ܡܺܐܡܪܳܐ ܕܫܰܒܥܺܝܢ ܘܚܰܕ

ܥܰܠ ܣܽܘܠܳܩܶܗ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ.

71: ܡܩܰܠܶܤ ܐ̱ܢܳܐ ܠܡܰܫ̈ܠܡܳܢܘܳܬܳܐ ܕܰܫ̈ܠܺܝܚܶܐ܆ ܗܳܢܶܝܢ ܕܗܳܢܽܘܢ ܕܰܠܗܳܕܶܐ ܥܺܕܬܳܐ ܪܥ̣ܰܘ܆ ܘܟܽܠܚܰܕ ܡܶܢܗܽܘܢ ܟܰܕ ܐܝܟ ܒܪܳܐ ܡܶܢ ܐܰܒܽܘܗ̱ܝ ܩܰܒܶܠܘ ܐܶܢܶܝܢ܆ ܘܰܠܗܳܠܶܝܢ ܦܰܬܺܝܘ ܒܫܽܘ̈ܘܫܳܛܶܐ ܕܒܺܐܝܕܳܐ ܒܺܐܝܕܳܐ܆ ܟܰܕ ܝܺܕܰܥܬܳܐ ܕܐ̱ܪܳܙܳܐ ܡܶܬܦܰܬܝܳܐ ܗ̱ܘܳܬ ܒܡܰܣ̈ܩܳܢܶܐ ܕܠܶܒܳܐ ܗܳܝ ܕܳܐܡܰܪ ܕܰܘܺܝܕ^[1]: ܘܰܒܪܶܚܡܰܬ ܥܰܡܠܳܐ ܢܛܰܪܘ ܐܶܢܶܝܢ܆ ܠܘܳܬܰܢ ܐܰܝܟ ܝܳܪܬܽܘܬܳܐ ܐܰܒܳܗܳܝܬܳܐ ܫܰܕܰܪܘ ܐܶܢܶܝܢ. ܕܡܶܢܗܶܝܢ ܚܕܳܐ ܐܺܝܬܶܝܗ̇ ܐܳܦ ܗܳܕܶܐ܆ ܗܳܝ ܕܝܰܘܡܳܢܳܐ ܬܶܣܰܩ ܥܺܕܬܳܐ ܠܗܳܕܶܐ ܩܰܪܩܰܦܬܳܐ ܕܛܽܘܪܳܐ܆ ܟܰܕ ܒܺܐܝܕܰܘ̈ܗ̱ܝ ܕܺܝܠܶܗ ܕܣܽܘܥܪܳܢܳܐ ܡܰܙܥܩܳܐ܆ ܕܠܰܢ ܣܠܶܩ ܝܶܫܽܘܥ ܠܰܫܡܰܝܳܐ ܘܠܳܐ ܗܘܐ ܠܶܗ.

ܐܰܟܙܢܳܐ ܓܶܝܪ ܕܠܰܢ ܥܡܰܕ܆ ܟܰܕ ܡܕܰܟܶܐ ܗ̱ܘܳܐ ܘܰܡܩܰܕܶܫ ܠܡܰܝ̈ܳܐ ܘܠܰܘ ܟܰܕ ܡܶܬܕܰܟܶܐ ܗ̱ܘܳܐ܆ ܐܰܝܟܰܢܳܐ ܓܶܝܪ ܗܰܘ ܕܢܽܘܗܪܳܐ ܕܡܶܢ ܢܽܘܗܪܳܐ ܐܺܝܬܰܘܗ̱ܝ ܘܠܳܐ ܝܳܕܰܥ ܚܛܺܝܬܳܐ܆ ܘܰܐܟܙܢܳܐ ܕܠܰܢ ܡܶܨܛܠܶܒ ܗ̱ܘܳܐ܆ ܘܰܐܝܟ ܗܳܝ ܕܰܟܬܺܝܒܳܐ ܡܶܫܬܰܡܠܶܐ ܗ̱ܘܳܐ ܒܚܰܫ̈ܶܐ܆ ܗܰܘ ܕܒܰܟܝܳܢܳܐ ܐܺܝܬܰܘܗ̱ܝ ܡܫܰܡܠܰܝ ܒܟܽܠ܆ ܟܰܕ ܠܰܢ ܗܳܢܽܘܢ ܠܳܐ ܡܫܰܡ̈ܠܰܝܳܐ ܗܽܘ ܒܶܗ ܒܝܰܕ ܦܽܘܪܩܳܢܳܐ ܡܰܠܝܳܐ ܘܳܐܣܝܽܘܬܳܐ ܡܫܰܡܠܰܝܬܳܐ ܥܳܒܶܕ ܗ̱ܘܳܐ ܡܫܰܡ̈ܠܰܝܳܐ^[2]܆ ܘܟܰܕ ܥܰܡ ܡܰܘܬܳܐ ܒܰܒܣܰܪ ܡܶܬܥܰܪܙܰܠ ܗ̱ܘܳܐ ܘܫܳܪܶܐ ܗ̱ܘܳܐ ܠܽܐܘܚܕܳܢܳܐ ܕܺܝܠܶܗ ܘܩܳܐܶܡ ܗ̱ܘܳܐ܆ ܗܳܟܰܢܳܐ ܟܰܕ ܠܳܐ ܦܰܓܪܳܢܳܐܺܝܬ ܠܰܫܡܰܝܳܐ ܘܠܰܐܪܥܳܐ ܡܳܠܶܐ ܗ̱ܘܳܐ ܘܰܠܟܽܠܗܶܝܢ ܡܶܬܚܰܙ̈ܝܳܢܝܳܬܳܐ ܘܠܳܐ ܡܶܬܚܰܙ̈ܝܳܢܝܳܬܳܐ܆ ܦܰܓܪܳܢܳܐܺܝܬ ܣܠܶܩ ܠܥܶܠ ܡܶܢ ܟܽܠܗܽܘܢ ܫܡܰܝܳܐ܆ ܟܰܕ ܠܰܢ ܡܰܝܬܶܐ ܗ̱ܘܳܐ ܒܶܗ܆ ܠܗܳܢܽܘܢ ܕܺܐܝܬܰܝܢ ܗ̱ܘܰܝܢ ܐܰܟܣ̈ܢܳܝܶܐ ܕܰܫܡܰܝܳܐ܆ ܡܰܠܽܘܢ ܕܶܝܢ ܕܳܐܦ ܥܠܶܝܗ̇ ܕܰܐܪܥܳܐ ܠܳܐ ܫܳܘܝܳܐܺܝܬ ܕܳܝܫܺܝܢ ܗ̱ܘܰܝܢ.

ܘܰܐܟܙܢܳܐ ܕܟܰܕ ܠܫܰܦܺܝܪܽܘܬ ܣܳܥܽܘܪܽܘܬܳܐ ܕܰܩܝܳܡܬܳܐ ܡܰܟܪܙܺܝܢ ܚ̱ܢܰܢ܆ ܘܰܡܚܰܘܶܝܢ ܚ̱ܢܰܢ ܕܒܺܐܝ̈ܕܶܝܗ̇ ܡܶܢ ܡܰܦܽܘܠܬܳܐ ܥܰܬܺܝܩܬܳܐ ܕܰܚܛܺܝܬܳܐ ܩܳܡܢܰܢ܆ ܥܕܰܡܳܐ ܠܝܰܘܡܳܐ ܕܦܰܢܛܺܝܩܽܘܤܛܺܝ ܗܳܢܰܘ ܕܶܝܢ ܕܚܰܡܫܺܝܢ܆ ܟܰܕ ܩܳܝܡܺܝܢܰܢ ܥܳܒܕܺܝܢܰܢ ܨܠܰܘܴ̈ܬܳܐ ܘܠܰܘ ܟܰܕ ܣܳܝܡܺܝܢ ܚ̱ܢܰܢ ܒܽܘܪܟܳܐ܆ ܒܶܗ ܟܰܕ ܒܶܗ ܒܰܙܢܳܐ܆ ܒܝܰܘܡܳܐ ܗܳܢܳܐ ܕܰܐܪܒܥܺܝܢ ܕܡܶܬܡܢܶܐ ܡܶܢ ܙܰܒܢܳܐ ܕܰܩܝܳܡܬܳܐ ܕܦܳܪܽܘܩܰܢ ܕܡܶܢ ܒܶܝܬ ܡܺܝ̈ܬܶܐ ܠܘܳܬ ܛܽܘܪܳܐ ܣܳܠܩܺܝܢܰܢ܆ ܟܰܕ ܡܰܘܕܥܺܝܢܰܢ ܕܰܚܢܰܢ ܐܶܬܪܰܡܪܰܡܢܰܢ܆ ܘܰܡܥܰܠܰܝ̈ܳܐ ܡܶܕܶܡ ܗܘܰܝܢܰܢ ܘܰܫܡܰܝܳܢ̈ܶܐ. ܟܰܕ ܪܺܝܫܺܝܬܳܐ ܕܓܶܢܣܳܐ ܕܺܝܠܰܢ ܣܶܠܩܰܬ ܠܘܳܬ ܬܪܽܘܢܽܘܤ ܕܰܠܥܶܠ ܡܶܢ ܫܡܰܝܳܐ ܘܡܰܠܟܳܝܳܐ܆ ܗܰܘ ܕܰܠܗܰܠ ܡܶܢ ܟܽܠ ܪܺܝܫܳܢܽܘܬܳܐ܆ ܫܽܘܠܛܳܢܳܐ ܟܺܝܬ ܘܚܰܝܠܳܐ^[3]. ܡܶܢ ܙܰܪܥܶܗ ܓܶܝܪ ܕܰܐܒܪܳܗܳܡ ܢܣܰܒ ܡܶܠܬܳܐ ܕܰܐ‌ܠܳܗܳܐ܆ ܟܰܕ ܗܘ̣ܳܐ ܡܶܢ ܐܰܢ̱ܬܬܳܐ܆ ܟܰܕ ܗܘ̣ܳܐ ܬܚܶܝܬ ܢܳܡܽܘܣܳܐ܆ ܘܒܳܗ̇ ܒܰܕܡܽܘܬܳܐ ܠܰܢ ܐܶܫܬܰܘܬܰܦ ܒܰܕܡܳܐ ܘܰܒܒܶܣܪܳܐ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܟܰܕ ܒܟܽܠܡܶܕܶܡ ܐܶܬܕܰܡܺܝ ܠܰܐܚܰܘ̈ܗ̱ܝ ܤܛܰܪ ܡܶܢ ܚܛܺܝܬܳܐ^[4].

ܐܶܠܐ܆ ܠܳܐ ܬܶܬܕܰܡܰܪ ܐܶܢܗܽܘ ܕܥܰܡܰܢܽܘܐܶܝܠ܆ ܪܺܝܫܺܝܬܳܐ ܕܓܶܢܣܳܐ ܕܺܝܠܰܢ܆ ܠܗܳܢܳܐ ܪܰܘܡܳܐ ܣܠܶܩ. ܠܰܘ ܓܶܝܪ ܚܛܽܘܦܝܳܐ ܚܰܫܒܳܗ̇ ܠܗܳܝ ܕܢܶܗܘܶܐ ܫܘܶܐ ܠܰܐܠܳܗܳܐ܆ ܗܳܢܰܘ ܕܶܝܢ܆ ܠܰܘ ܐܰܝܟ ܐ̱ܢܳܫ ܛܪܽܘܢܳܐ܆ ܠܡܰܠܟܽܘܬܳܐ ܕܠܳܐ ܒܡܶܕܶܡ ܣܳܟ ܙܳܕܩܳܐ ܠܗ ܥ̣ܰܠ ܕܒ̣ܰܪ ܒܰܩܛܺܝܪܳܐ܆ ܘܰܠܡܰܘܬܒܳܐ ܠܒܰܪ ܡܶܢ ܗܳܝ ܕܫܰܘܝܳܐ ܚܛܰܦ܆ ܟܰܕ ܚܫܰܒ ܟܺܝܬ ܘܰܐܣܒܰܪ ܗܽܘ ܠܶܗ ܕܰܫܘܶܐ ܠܰܐܠܳܗܳܐ. ܐܶܠܳܐ ܗܳܝ ܕܰܠܩܽܘܒܠܳܐ܆ ܕܟܰܕ ܒܰܕܡܽܘܬܳܐ ܕܰܐ‌ܠܳܗܳܐ ܐܺܝܬܰܘܗ̱ܝ܆ ܗܳܝ ܟܺܝܬ ܕܺܐܝܬܶܝܗ̇ ܒܽܐܘܣܺܝܰܐ ܕܰܐ‌ܠܳܗܳܐ܆ ܗܽܘ ܠܶܗ ܣܰܪܶܩ܆ ܟܰܕ ܕܡܽܘܬܳܐ ܕܥܰܒܕܳܐ ܢܣܰܒ܆ ܘܠܳܐ ܡܶܫܬܰܚܠܦܳܢܳܐܺܝܬ ܘܒܽܐܘܣܺܝܰܐ ܘܠܰܘ ܒܡܰܣܒܪܳܢܽܘܬܳܐ ܗܘ̣ܳܐ ܒܰܪܢܳܫܳܐ. ܘܟܰܕ ܒܰܕܡܽܘܬܳܐ ܕܰܒܢܰܝ̈ܢܳܫܳܐ ܡܶܬܕܰܒܰܪ ܗ̱ܘܳܐ^[5]. ܘܟܰܕ ܒܶܐܣܟܺܡܳܐ ܐܶܫܬܟܰܚ ܐܰܝܟ ܒܰܪܢܳܫܳܐ܆ ܐܰܝܟܰܢܳܐ ܕܳܐܡܰܪ ܟܬܳܒܳܐ ܟܳܗܢܳܝܳܐ. ܐܰܝܟ ܗܰܘ ܕܳܐܡܰܪ ܗ̱ܘܳܐ܆ ܕܟܰܕ ܐܳܦܠܐ ܒܡܶܕܶܡ ܫܳܛ ܐܰܘ ܐܰܣܠܺܝ ܠܰܡܫܽܘܚܬܳܐ ܥܰܒܕܳܢܳܝܬܳܐ܆ ܐܶܠܳܐ ܟܰܕ ܚܕܳܐ ܙܒܰܢ ܕܢܶܗܘܶܐ ܒܰܪܢܳܫܳܐ ܫܰܪܺܝܪܳܐܺܝܬ ܩܰܒܶܠ ܥܠܰܘܗ̱ܝ܆ ܐܰܝܟ ܒܰܪܢܳܫܳܐ ܥܰܡ ܒܢܰܝ̈ܢܳܫܳܐ ܐܶܬܗܰܦܰܟ. ܟܰܕ ܒܝܰܕ ܟܽܠܗܶܝܢ ܤܛܰܪ ܡܶܢ ܚܛܺܝܬܳܐ܆ ܕܳܡܝܽܘܬܳܐ ܕܰܠܘܳܬܰܢ ܚܰܘܺܝ܆ ܘܳܐܦ ܥܕܰܡܳܐ ܠܶܗ ܠܶܐܣܟܺܡܳܐ ܘܰܠܗܶܠܰܟܬܳܐ. ܘܠܳܐ ܐ̱ܢܳܫ ܕܺܐܝܬܰܘܗ̱ܝ ܐܳܬܳܐ ܡܶܕܶܡ ܘܬܶܕܡܽܘܪܬܳܐ ܐܶܬܚܙܺܝ܆ ܒܰܕܡܽܘܬ ܕܶܡ̈ܘܳܬܳܐ ܗܳܠܶܝܢ ܕܓܰܢ̱ܒܳܪ̈ܶܐ܆ ܐܺܝܬ ܗ̱ܘܳܐ ܠܶܗ ܓܶܝܪ ܐܰܝܟ ܐܰ‌ܠܳܗܳܐ ܡܥܰܠܝܽܘܬܳܐ ܗܳܝ ܕܒܰܟܝܳܢܳܐ܆ ܘܳܐܦܠܳܐ ܬܽܘܒ ܐܰܝܟ ܡܰܛܥ̈ܝܳܢܶܐ܆ ܠܡܰܬܡܳܗܽܘ ܠܗܳܢܽܘܢ ܕܚܳܙܶܝܢ ܗ̱ܘܰܘ ܝܰܨܺܝܦ ܗ̱ܘܳܐ. ܐܶܠܳܐ ܡܣܰܩܡܳܐܺܝܬ ܠܽܘܩܒܰܠ ܩܰܘܡܬܳܐ ܐ̱ܢܳܫܳܝܬܳܐ܆ ܠܰܐܠܳܗܽܘܬܳܐ ܕܺܝܠܶܗ ܓܳܠܶܐ ܗ̱ܘܳܐ ܘܰܡܚܰܘܶܐ܆ ܟܰܕ ܒܚܶܟܡܬܳܐ ܘܰܒܛܰܝܒܽܘܬܳܐ ܕܰܠܘܳܬܰܢ܆ ܠܰܡܕܰܒܪܳܢܽܘܬܳܐ ܣܳܥܰܪ ܗ̱ܘܳܐ. ܐܰܝܟܰܢܳܐ ܕܢܶܣܬܒܰܪ܆ ܕܗܽܘ ܗܰܘ ܡܫܰܡܠܝܳܐ ܪܳܒܶܐ ܗ̱ܘܳܐ ܡܶܛܽܠ ܩܰܘܡܬܳܐ܆ ܐܳܦ ܒܚܶܟܡܬܳܐ ܐܳܦ ܒܛܰܝܒܽܘܬܳܐ^[6]. ܐܶܠܳܐ ܟܺܝܬ ܐܳܦ ܟܦܶܢ ܐܳܦ ܨܗܳܐ܆ ܐܳܦ ܠܠܶܐܘܬܳܐ ܕܡܶܢ ܡܰܪܕܺܝܬܳܐ ܕܽܐܘܪܚܳܐ ܣܒܰܠ. ܐܳܦ ܠܗܳܠܶܝܢ ܐ̱ܚܪ̈ܳܢܝܳܬܳܐ ܨܶܒܝܳܢܳܐܺܝܬ ܡܶܬܪܡܶܐ ܗ̱ܘܳܐ܆ ܠܚܰܫ̈ܶܐ ܐܳܡܰܪ ܐ̱ܢܳܐ ܗܳܢܽܘܢ ܕܰܡܚܰܪܪܺܝܢ ܡܶܢ ܚܛܺܝܬܳܐ܆ ܟܰܕ ܡܶܫܬܰܡܥܳܢܳܐ ܗܘ̣ܳܐ ܠܰܐܒܳܐ.

ܡܳܢܳܐ ܕܶܝܢ ܐܺܝܬܶܝܗ̇ ܗܳܕܶܐ. ܕܰܚܛܺܝܬܳܐ ܕܳܐܕܳܡ ܐܺܝܬܶܝܗ̇ ܗ̱ܘܳܬ ܪܶܫܝܳܢܳܐ܆ ܠܳܐ ܡܶܫܬܰܡܥܳܢܽܘܬܳܐ܆ ܘܰܥܒܽܘܪܝܳܐ ܕܦܽܘܩܕܳܢܳܐ. ܠܗܳܕܶܐ ܡܫܺܝܚܳܐ ܗܰܘ ܐܳܕܳܡ ܬܪܰܝܳܢܳܐ܆ ܟܰܕ ܡܡܰܠܶܐ ܗ̱ܘܳܐ ܘܡܰܐܣܶܐ܆ ܦܽܘܩܕܳܢܳܐ ܐܳܡܰܪ ܗ̱ܘܳܐ ܕܰܢܣܰܒ ܡܶܢ ܐܰܒܳܐ܆ ܬܽܘܪܳܨܳܐ ܕܺܝܠܰܢ. ܠܗܰܘ ܕܟܰܕ ܠܰܥܒܳܕܳܐ ܡܰܝܬܶܐ ܗ̱ܘܳܐ ܠܶܗ܆ ܘܰܒܗܳܕܶܐ ܠܗܰܘ ܕܝܰܗܒܶܗ ܠܦܽܘܩܕܳܢܳܐ ܡܶܫܬܡܰܥ ܗ̱ܘܳܐ܆ ܛܽܘܦܣܳܐ ܕܚܰܝ̈ܶܐ ܡܥܰܠܰܝ̈ܳܐ ܝܳܗܶܒ ܗ̱ܘܳܐ ܠܰܢ. ܘܰܒܡܶܫܬܰܡܥܳܢܽܘܬܳܐ ܠܠܳܐ ܡܶܫܬܰܡܥܳܢܽܘܬܳܐ ܗܳܝ ܕܰܗܘܳܬ ܪܺܝܫܳܐ ܕܒܺܝ̈ܫܳܬܳܐ ܡܰܐܣܶܐ ܗ̱ܘܳܐ܆ ܗܳܝ ܕܡܶܢܳܗ̇ ܪܓܶܠܬܳܐ ܕܰܚܛܺܝܬܳܐ ܪܕܳܬ̣܆ ܘܡܰܘܬܳܐ ܒܟܽܠܶܗ ܓܶܢܣܳܐ ܐ̱ܢܳܫܳܝܳܐ ܥܒܰܪ ܘܰܐܡܠܶܟ. ܐܰܝܟܰܢܳܐ ܟܺܝܬ ܕܳܐ‌ܠܨܳܝܬܳܐ ܬܶܗܘܶܐ ܐܺܝܬܶܝܗ̇ ܡܶܟܺܝܠ܆ ܕܰܡܫܺܝܚܳܐ ܗܰܘ ܕܰܡܡܰܠܶܐ ܠܳܗ̇ ܠܡܶܫܬܰܡܥܳܢܽܘܬܳܐ܆ ܐܳܦ ܥܕܰܡܳܐ ܠܡܰܘܬܳܐ ܢܶܦܽܘܩ܆ ܗܰܘ ܕܰܒܝܰܕ ܠܳܐ ܡܶܫܬܰܡܥܳܢܽܘܬܳܐ ܗܰܘ ܚܳܒ܆ ܘܰܢܨܽܘܒ ܒܗܳܢܳܐ ܛܰܝܒܽܘܬܳܐ ܕܠܳܐ ܡܳܝܽܘܬܽܘܬܳܐ ܒܝܰܕ ܩܝܳܡܬܳܐ. ܗܳܕܶܐ ܐܺܝܬܶܝܗ̇ ܗ̱ܘܳܬ ܗܳܝ ܕܦܰܘܠܽܘܤ ܐܳܡܰܪ ܗ̱ܘܳܐ: ܕܡܰܟܶܟ ܗܽܘ ܠܶܗ ܟܰܕ ܗܘ̣ܳܐ ܡܶܫܬܰܡܥܳܢܳܐ ܥܕܰܡܳܐ ܠܡܰܘܬܳܐ܆ ܡܰܘܬܳܐ ܕܶܝܢ ܕܰܨܠܺܝܒܳܐ. ܡܶܛܽܠܗܳܕܶܐ ܐܳܦ ܐܰ‌ܠܳܗܳܐ ܐܰܣܓܺܝ ܪܰܡܪܡܶܗ܆ ܘܫܰܟܶܢ ܠܶܗ ܫܡܳܐ ܗܰܘ ܕܰܠܥܶܠ ܡܶܢ ܟܽܠ ܫܡܳܐ܆ ܐܰܝܟܰܢܳܐ ܕܒܰܫܡܶܗ ܕܝܶܫܽܘܥ ܟܽܠ ܒܽܘܪܟܳܐ ܬܟܽܘܦ܆ ܕܰܫܡܰܝܳܢ̈ܶܐ ܘܕܰܐܪ̈ܥܳܢܳܝܶܐ ܘܰܕܗܳܢܽܘܢ ܕܰܠܬܰܚܬ ܡܶܢ ܐܰܪܥܳܐ܆ ܘܟܽܠ ܠܶܫܳܢܳܐ ܢܰܘܕܶܐ ܕܡܳܪܝܰܐ ܗ̱ܘ ܝܶܫܽܘܥ ܡܫܺܝܚܳܐ܆ ܠܬܶܫܒܽܘܚܬܳܐ ܕܰܐ‌ܠܳܗܳܐ ܐܰܒܳܐ.^[7]

ܐܳܘ ܟܡܳܐ ܐܺܝܬܰܘܗ̱ܝ ܥܽܘܡܩܳܐ ܕܚܶܟܡܬܶܗ ܘܕܺܝܕܰܥܬܶܗ ܕܰܐ‌ܠܳܗܳܐ. ܐܳܘ ܟܡܳܐ ܐܺܝܬܰܘܗ̱ܝ ܥܽܘܬܪܳܐ ܕܰܡܕܰܒܪܳܢܽܘܬܳܐ ܗܳܝ ܕܡܶܛܽܠܳܬܰܢ܆ ܐܰܝܟܰܢܳܐ ܗܳܝ ܕܦܰܐܝܳܐ ܠܰܐܠܳܗܳܐ ܘܪܳܡܳܐ ܘܰܡܥܰܠܝܳܐ܆ ܐܺܝܬ ܒܗܶܝܢ ܒܗܳܠܶܝܢ ܐ̱ܢܳܫܳܝ̈ܳܬܳܐ ܘܡܰܟܺܝ̈ܟܳܬܳܐ. ܡܰܠܽܘܢ ܕܶܝܢ ܡܕܰܒܪ̈ܳܢܳܝܳܬܳܐ܆ ܐܰܝܟܰܢܳܐ ܕܟܰܕ ܡܣܰܝܶܟ ܐ̱ܢܳܐ ܐܺ݀ܡܰܪ ܠܰܟܢܺܝܫܽܘܬ ܬܰܪ̈ܬܰܝܗܶܝܢ. ܡܳܢܳܐ ܓܶܝܪ ܐܳܡܰܪ ܫܠܺܝܚܳܐ. ܡܶܛܽܠ ܗܳܕܶܐ ܐܳܦ ܐܰ‌ܠܳܗܳܐ ܐܰܣܓܺܝ ܪܰܡܪܡܶܗ܆ ܘܫܰܟܶܢ ܠܶܗ ܫܡܳܐ ܗܰܘ ܕܰܠܥܶܠ ܡܶܢ ܟܽܠ ܫܡܳܐ. ܡܶܛܽܠ ܗܳܕܶܐ ܐܰܝ̇ܕܳܐ. ܡܶܛܽܠ ܗܳܝ ܕܡܶܫܬܰܡܥܳܢܐ ܗܘ̣ܳܐ ܥܕܰܡܳܐ ܠܡܰܘܬܳܐ܆ ܡܰܘܬܳܐ ܕܶܝܢ ܕܰܨܠܺܝܒܳܐ.

ܘܗܰܘ ܕܡܰܘܬܳܐ ܕܰܒܝܰܕ ܨܠܺܝܒܳܐ ܣܒܰܠ ‌‌ܐܶܡܰܪ ܠܺܝ܆ ܠܘܳܬ ܪܰܘܡܳܐ ܐܰ‌ܠܳܗܳܝܳܐ ܐܶܬܥܰܠܺܝ܆ ܘܰܐܝܟܰܢܳܐ ܠܰܘ ܚܛܽܘܦܝܳܐ ܗ̱ܝ ܗܳܕܶܐ. ܐܺܝܛܰܐ ܛܰܥܳܝ ܐܰܢ̱ܬ ܠܗܶܝܢ ܠܗܳܠܶܝܢ ܕܡܶܢ ܩܕܺܝܡ ܐܶܬܐܶܡܰܪ̈ܝ̱܆ ܕܗܳܢܳܐ ܕܶܐܨܛܠܶܒ ܘܚܰܫ ܒܰܒܣܰܪ܆ ܟܰܕ ܒܰܕܡܽܘܬܳܐ ܕܰܐ‌ܠܳܗܳܐ ܐܺܝܬܰܘܗ̱ܝ܆ ܣܰܪܶܩ ܗܽܘ ܠܶܗ ܒܗܳܝ ܕܰܗܘ̣ܳܐ ܒܰܪܢܳܫܳܐ܆ ܗܳܕܐ ܗܝ ܓܶܝܪ ܗܳܝ ܕܰܢܣܰܒ ܕܡܽܘܬܳܐ ܕܥܰܒܕܳܐ. ܘܟܰܕ ܡܰܠ̣ܝܳܐ ܐܺܝܬܰܘܗ̱ܝ ܐܰܝܟ ܐܰ‌ܠܳܗܳܐ܆ ܥܰܡܰܢ ܣܢܺܝ̈ܩܶܐ ܐܰܟܚܕܳܐ ܐܶܬܡܢܺܝ. ܐܳܦ ܓܶܝܪ ܠܰܘ ܡܶܕܶܡ ܐ̱ܚܪܺܢܳܐ ܐܺܝܬܶܝܗ̇ ܗܳܝ ܕܶܐܣܬܰܪܰܩ܆ ܐܶܠܳܐ ܐܶܢ ܗܳܕܶܐ^[8].

ܡܶܛܽܠ ܗܳܕܶܐ܆ ܘܕܶܐܫܬܰܟܰܢ ܠܶܗ ܫܡܳܐ ܗܰܘ ܕܰܠܥܶܠ ܡܶܢ ܟܽܘܠ ܫܡܳܐ ܟܬܺܝܒ܆ ܗܰܘ ܕܒܰܟܝܳܢܳܐ ܐܺܝܬ ܗ̱ܘܳܐ ܠܶܗ܆ ܐܰܝܟ ܫܘܶܐ ܒܽܐܘܣܺܝܰܐ ܠܰܐܒܳܐ ܘܕܺܐܝܬܰܘܗ̱ܝ ܡܳܪܝܳܐ ܕܟܽܠ. ܕܶܐܫܬܰܟܰܢ ܠܶܗ ܕܶܝܢ ܐܰܡܺܝܪܳܐ܆ ܡܶܛܽܠܳܬܰܢ ܗܳܢܽܘܢ ܕܰܠܘܳܬܗܽܘܢ ܗ̱ܝ ܛܰܝܒܽܘܬܐ^[9] ܥܳܒܪܳܐ ܗ̱ܘܳܬ܆ ܕܗܳܢܽܘܢ ܕܳܐܦ ܪܺܝܫܺܝܬܳܐ ܒܰܒܣܰܪ ܗܘ̣ܳܐ ܗ̱ܘܳܐ. ܐܳܦ ܓܶܝܪ ܐܶ‌ܠܽܘ ܠܰܘ ܒܽܐܘܣܺܝܰܐ ܐܺܝܬܰܘܗ̱ܝ ܗ̱ܘܳܐ ܗܽܘ ܟܰܕ ܗܽܘ ܒܰܪܢܳܫܳܐ ܘܰܐ‌ܠܳܗܳܐ܆ ܐܶܠܳܐ ܒܰܬܪܶܝܢ ܟܝܳܢ̈ܶܐ ܐܺܝܬܰܘܗ̱ܝ ܗ̱ܘܳܐ ܡܫܺܝܚܳܐ܆ ܐܰܝܟܰܢܳܐ ܕܫܳܛܽܘܪܽܘܬܳܐ ܕܢܶܣܛܽܘܪ̈ܝܰܢܽܘ ܨܳܒܝܳܐ܆ ܠܳܐ ܡܶܬܡܰܨܝܳܢܺܝܬܳܐ ܐܺܝܬܶܝܗ̇ ܗ̱ܘܳܬ ܡܶܬܬܰܘܕܝܳܢܳܐܺܝܬ܆ ܕܰܠܒܰܪܢܳܫܳܐ ܕܕܺܝܠܳܢܳܐܺܝܬ ܡܶܢܶܗ ܘܠܶܗ ܡܩܰܝܰܡ ܡܦܰܠܓܳܐܺܝܬ^[10]܆ ܐܰܝܟ ܕܒܰܡܢܳܬܳܐ ܕܛܰܝܒܽܘܬܳܐ ܢܶܬܺܝܗܶܒ ܫܡܳܐ ܗܰܘ ܕܰܠܥܶܠ ܡܶܢ ܟܽܠ ܫܡܳܐ. ܡܶܫܟܰܚ ܗܽܘ ܡܰܢ ܓܶܝܪ ܡܶܫܟܰܚ ܗܽܘ ܐܰ‌ܠܳܗܳܐ܆ ܟܽܠܗܶܝܢ ܗܳܠܶܝܢ ܕܳܐܦ ܨܳܒܶܐ. ܨܳܒܶܐ ܕܶܝܢ܆ ܗܳܠܶܝܢ ܕܠܶܗ ܦܰܐܝ̈ܳܢ. ܦܐܶܐ ܠܶܗ ܕܶܝܢ ܡܶܢ ܗܳܠܶܝܢ ܕܠܳܐ ܛܶܟܣܳܐ ܘܠܳܐ ܡܶܕܶܡ. ܗܰܘ ܓܶܝܪ ܕܥܰܠ ܗܳܠܶܝܢ ܕܺܐܝܬܰܝܗܶܝܢ ܣܳܡ ܛܶܟܣܳܐ܆ ܐܰܝܟܰܢܳܐ ܗܽܘ ܡܶܛܽܠ ܢܰܦܫܶܗ ܡܶܕܶܡ ܕܠܳܐ ܛܟܣܐ ܢܶܨܒܶܐ ܗ̱ܘܳܐ. ܐܳܦ ܓܶܝܪ ܠܰܘ ܡܶܛܽܠ ܕܟܽܠ ܡܶܕܶܡ ܡܶܫܟܰܚ ܕܢܶܥܒܶܕ܆ ܡܶܛܽܠ ܗܳܕܶܐ ܐܳܡܪܺܝܢ ܚ̱ܢܰܢ ܠܶܗ܆ ܕܳܐܦ ܐ̱ܚܪܺܢܳܐ ܐܰ‌ܠܳܗܳܐ ܐܰܒܳܐ ܠܳܐ ܝܺܠܺܝܕܳܐ܆ ܐܰܟܘܳܬܶܗ ܡܶܫܟܰܚ ܠܡܶܥܒܰܕ܆ ܐܰܘ ܕܢܶܥܒܶܕ ܗܽܘ ܠܶܗ ܡܳܝܽܘܬܳܐ܆ ܐܰܘ ܕܠܳܐ ܐܺܝܬܰܘܗ̱ܝ ܕܠܳܐ ܪܺܝܫܳܐ܆ ܐܰܘ ܕܠܳܐ ܐܺܝܬܰܘܗ̱ܝ ܡܬܽܘܡܳܝܳܐ ܘܕܰܠܥܳܠܰܡ. ܐܰܟܙܢܳܐ ܓܶܝܪ ܕܺܐܝܬܰܘܗ̱ܝ ܚܰܝܠܬܳܢܳܐ. ܡܰܠܽܘܢ ܕܶܝܢ ܗܽܘ ܚܰܝܠܳܐ܆ ܗܳܟܰܢܳܐ ܐܳܦ ܗܽܘ ܛܟܣܐ ܐܺܝܬܰܘܗ̱ܝ ܘܰܡܠܰܚܡܽܘܬܳܐ ܕܟܽܠ. ܕܠܳܐ ܦܰܐܝܳܐ ܠܶܗ ܕܶܝܢ ܐܺܝܬܶܝܗ̇ ܗ̱ܘܳܬ܆ ܕܰܪܒܺܝܥܳܝܽܘܬܳܐ ܢܶܥܒܕܺܝܗ̇ ܠܰܬܠܺܝܬܳܝܽܘܬܳܐ܆ ܟܰܕ ܒܰܪܢܳܫܳܐ ܕܡܶܢܶܗ ܘܠܶܗ ܡܩܰܝܰܡ ܕܺܝܠܳܢܳܐܺܝܬ ܡܶܬܡܢܶܐ ܥܰܡܶܗ ܣܪܺܝܩܳܐܺܝܬ^[11] ܟܺܝܬ ܘܪܰܫܺܝܥܳܐܝܬ^[12]. ܘܠܰܘ ܡܰܠܽܘܢ ܟܰܕ ܚܰܕ ܐܺܝܬܰܘܗ̱ܝ ܡܶܠܬܳܐ ܐܳܦ ܟܰܕ ܡܒܰܣܰܪ. ܠܗܳܕܶܐ ܓܶܝܪ ܐܺܝܬ ܠܳܗ̇ ܐܳܦ ܗܳܝ ܕܦܰܐܝܳܐ ܐܰܟܚܕܳܐ܆ ܘܰܕܡܶܫܟܚܳܐ ܕܬܶܛܰܪ ܠܰܬܠܺܝܬܳܝܽܘܬܳܐ ܬܠܺܝܬܳܝܽܘܬܳܐ.

ܐܺܝܬ ܗ̱ܘܳܐ ܕܶܝܢ ܐܶܡܰܬܝ ܕܣܳܥܰܪ ܬܶܕܡܪ̈ܳܬܳܐ ܡܶܕܶܡ ܡܶܕܶܡ ܘܕܰܠܥܶܠ ܡܶܢ ܟܝܳܢܳܐ. ܐܶܠܳܐ ܒܪܰܡ܆ ܠܰܘ ܕܢܳܨ̈ܝܳܢ ܥܰܡ ܡ̈ܶܠܶܐ ܕܺܝܠܶܗ. ܐܰܝܟܰܢܳܐ ܗܳܟܺܝܠ ܗܰܘ ܕܳܐܡܰܪ ܕܡܶܢ ܡܰܕܢܳܚ̈ܰܝ ܫܶܡܫܳܐ ܥܕܰܡܳܐ ܠܡܰܥܪ̈ܳܒܰܘܗ̱ܝ ܫܡܳܐ ܕܺܝܠܝ ܡܫܰܒܰܚ^[13]܆ ܘܒܰܢܒܺܝܳܐ ܐ̱ܚܪܺܢܳܐ ܕܫܽܘܒܚܳܐ ܕܺܝܠܝ ܠܰܐ̱ܚܪܺܢܳܐ ܠܳܐ ܐܶ݀ܬܶܠ^[14]܆ ܫܡܳܐ ܗܰܘ ܕܰܠܥܶܠ ܡܶܢ ܟܽܠ ܫܡܳܐ ܝܰܗ̱ܒ ܠܒܰܪܢܳܫܳܐ ܐ̱ܢܳܫ ܐ̱ܚܪܺܢܳܐ ܠܒܰܪ ܡܶܢ ܐܰ‌ܠܳܗܳܐ ܡܶܠܬܳܐ܆ ܗܰܘ ܕܳܐܦ ܬܶܫܒܽܘܚܬܶܗ ܘܕܰܫܡܶܗ ܐܽܘܣܝܐܺܝܬ ܐܺܝܬܰܘܗ̱ܝ ܠܶܗ ܫܰܘܬܳܦܳܐ. ܐܰܟܙܢܳܐ ܓܶܝܪ ܕܟܰܕ ܣܰܪܶܩ ܗܽܘ ܠܶܗ܆ ܡܶܛܽܠ ܟܺܝܬ ܕܟܰܕ ܐܺܝܬܰܘܗ̱ܝ ܥܰܬܺܝܪܳܐ ܘܠܳܐ ܣܢܺܝܩܳܐ ܐܰܝܟ ܐܰ‌ܠܳܗܳܐ܆ ܗܳܝ ܕܢܶܗܘܶܐ ܒܰܪܢܳܫܳܐ ܐܶܬܡܰܣܟܰܢ ܡܶܛܽܠܳܬܰܢ܆ ܗܰܘ ܡܳܐ ܕܺܐܝܬ ܗ̱ܘܳܐ ܠܶܗ ܟܝܳܢܳܐܺܝܬ ܫܩܰܠ ܡܕܰܒܪܳܢܳܐܺܝܬ܆ ܗܳܟܰܢܳܐ ܐܳܦ ܕܶܐܣܬܰܠܰܩ ܐ̱ܢܳܫܳܐܺܝܬ ܐܰܡܺܝܪܳܐ. ܒܪܰܡ ܐܳܦ ܕܰܐ‌ܠܳܗܳܐܺܝܬ ܣܠܶܩ ܟܬܺܝܒܳܐ. ܦܰܘܠܽܘܤ ܓܶܝܪ ܗܰܘ ܕܡܶܛܽܠܳܬܶܗ ܟܬܰܒ ܕܐܶܣܬܰܠܰܩ ܒܫܽܘܒܚܳܐ^[15]܆ ܟܬܰܒ ܬܽܘܒ ܕܗܰܘ ܕܰܢܚܶܬ܆ ܗܽܘ ܐܺܝܬܰܘܗ̱ܝ ܐܳܦ ܗܰܘ ܕܰܣܠܶܩ ܠܥܶܠ ܡܶܢ ܟܽܠܗܽܘܢ ܫܡܰܝܳܐ܆ ܐܰܝܟܰܢܳܐ ܕܢܶܡ̣ܠܶܐ ܠܟܽܠ^[16].

ܡܰܢܽܘ ܓܶܝܪ ܕܟܰܕ ܗܳܠܶܝܢ ܫܳܡܰܥ܆ ܢܰܡܪܰܚ ܠܰܡܦܰܠܳܓܽܘ ܬܽܘܒ ܠܗܰܘ ܚܰܕ ܡܳܪܝܳܐ ܘܰܐ‌ܠܳܗܳܐ ܝܶܫܽܘܥ ܡܫܺܝܚܳܐ. ܐܶܢ ܓܶܝܪ ܗܰܘ ܕܰܢܚܶܬ ܠܳܐ ܦܰܓܪܳܢܳܐܺܝܬ܆ ܗܽܘ ܟܰܕ ܗܽܘ ܐܺܝܬܰܘܗ̱ܝ ܐܳܦ ܗܰܘ ܕܰܣܠܶܩ܆ ܘܗܳܕܶܐ ܟܰܕ ܒܶܣܪܳܐ ܗܰܘ ܕܡܶܢܰܢ ܡܒܰܣܰܪ܆ ܐܳܦ ܠܥܶܠ ܡܶܢ ܟܽܠܗܽܘܢ ܫܡܰܝܳܐ܆ ܠܘܳܬ ܐܺܝܩܳܪܳܐ ܗܰܘ ܡܥܰܠܝܳܐ ܘܕܰܦܐܶܐ ܠܰܐܠܳܗܳܐ܆ ܐܰܝܟܰܢܳܐ ܬܪܶܝܢ ܘܠܰܘ ܚܰܕ ܢܶܬܗܰܝܡܰܢ. ܡܶܛܽܠܗܳܕܶܐ ܗܳܟܺܝܠ ‌ܐܳܦ ܗܽܘ ܒܶܐܘܰܢ̈ܓܶܠܺܝܰܐ ܠܘܳܬ ܢܺܝܩܽܘܕܺܝܡܘܤ ܐܳܡܰܪ ܗ̱ܘܳܐ: ܕܠܳܐ ܐ̱ܢܳܫ ܣܠܶܩ ܠܰܫܡܰܝܳܐ܆ ܐܶܠܳܐ ܗܰܘ ܕܡܶܢ ܫܡܰܝܳܐ ܢܚܶܬ܆ ܒܪܶܗ ܕܐ̱ܢܳܫܳܐ܆ ܗܰܘ ܕܺܐܝܬܰܘܗ̱ܝ ܒܰܫܡܰܝܳܐ^[17]. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܗܰܘ ܕܡܶܢ ܒܳܬܰܪ ܡܶܬܒܰܣܪܳܢܽܘܬܳܐ ܕܡܶܢ ܝܳܠܕܰܬ ܐܰ‌ܠܳܗܳܐ ܡܰܪܝܰܡ ܠܳܐ ܡܶܫܬܰܚܠܦܳܢܳܐܺܝܬ ܒܪܶܗ ܕܐ̱ܢܳܫܳܐ ܗܘ̣ܳܐ܆ ܘܗܽܘ ܟܰܕ ܗܽܘ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ ܕܰܐ‌ܠܳܗܳܐ ܗܰܘ ܕܰܩܕܳܡ ܥܳܠ̈ܡܶܐ܆ ܗܰܘ ܕܳܐܦ ܩܕܳܡ ܡܶܬܒܰܣܪܳܢܽܘܬܳܐ ܘܳܐܦ ܡܶܢ ܒܳܬܰܪ ܡܶܬܒܰܪܢܫܳܢܽܘܬܳܐ ܘܰܕܒܰܫܡܰܝܳܐ ܐܺܝܬܰܘܗ̱ܝ܆ ܘܕܰܠܟܽܠ ܡܳܠܶܐ. ܠܰܘ ܓܶܝܪ ܐ̱ܚܪܳܢܝܳܐܺܝܬ ܐܳܡܰܪ ܗ̱ܘܳܐ ܕܰܒܪܶܗ ܕܐ̱ܢܳܫܳܐ ܢܚܶܬ ܡܶܢ ܫܡܰܝܳܐ܆ ܐܶܠܳܐ ܐܶܢ ܐܰܝܟ ܡܶܠܬܶܗ ܕܦܰܘܠܽܘܤ܆ ܕܝܶܫܽܘܥ ܡܫܺܝܚܳܐ ܗܰܘ ܕܶܐܬܡܳܠܝ ܘܝܰܘܡܳܢܳܐ܆ ܗܽܘ ܟܰܕ ܗܽܘ ܐܺܝܬܰܘܗ̱ܝ ܗ̱ܘܳܐ ܘܰܠܥܳܠܡܺܝܢ܆ ܘܢܶܗܘܶܐ ܐܺܝܬܰܘܗ̱ܝ^[18].

ܝܽܗ̱ܘ̈ܕܳܝܶܐ ܕܶܝܢ ܒܪܰܡ ܟܰܕ ܐܰܚ̈ܘܳܬܳܐ ܠܗܳܢܶܝܢ ܕܪܽܘܫܥܳܐ ܗܰܘ ܢܶܣܛܽܘܪܝܰܢܶܐ܆ ܡܶܬܟܰܬܫܺܝܢ ܘܰܡܣܰܡܶܝܢ ܠܘܳܬ ܠܳܐ ܡܶܬܦܰܠܓܳܢܽܘܬܳܗ̇ ܕܡܶܬܒܰܪܢܫܳܢܽܘܬܳܐ. ܟܰܕ ܝܶܫܽܘܥ ܡܰܙܥܶܩ ܗ̱ܘܳܐ: ܕܶܐܢܳܐ ܐܺܝܬܰܝ ܠܰܚܡܳܐ ܗܰܘ ܕܡܶܢ ܫܡܰܝܳܐ ܢܶܚܬܶܬ̣܆ ܩܳܥܶܝܢ ܗ̱ܘܰܘ ܠܩܽܘܒܠܶܗ ܡܓܰܕܦܳܢܳܐܺܝܬ ܘܳܐܡܪܺܝܢ ܗ̱ܘܰܘ: ܠܰܘ ܗܳܢܳܐ ܐܺܝܬܰܘܗ̱ܝ ܝܶܫܽܘܥ ܒܪܶܗ ܕܝܰܘܣܶܦ܆ ܕܗܰܘ ܕܰܚܢܰܢ ܝܳܕܥܺܝܢܰܢ ܠܰܐܒܽܘܗ̱ܝ ܘܠܶܐܡܶܗ܆ ܐܰܝܟܰܢܳܐ ܗܳܟܺܝܠ ‌ܐܳܡܰܪ ܗܳܢܳܐ܆ ܕܡܶܢ ܫܡܰܝܳܐ ܢܶܚܬܶܬ̣^[19]. ܡܫܺܝܚܳܐ ܕܶܝܢ ܟܰܕ ܝܰܬܺܝܪ ܡܶܢ ܝܽܗ̱ܘ̈ܕܳܝܶܐ ܘܡܶܢ ܢܶܣܛܽܘܪ̈ܝܰܢܽܘ ܝܳܕܰܥ ܗܽܘ ܠܶܗ܆ ܕܚܰܕ ܘܗܽܘ ܟܰܕ ܗܽܘ ܐܺܝܬܰܘܗ̱ܝ ܘܠܳܐ ܡܶܬܦܰܠܰܓ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ ܕܡܶܢ ܒܳܬܰܪ ܚܕܳܝܽܘܬܳܐ܆ ܐܳܦ ܠ̱ܐܢܳܫܺܝ̈ܢ ܕܶܝܢ ܚܳܙܶܐ ܗ̱ܘܳܐ ܡܶܢ ܗܳܢܽܘܢ ܕܕܰܒܺܝܩܺܝܢ ܗܘܰܘ ܠܶܗ܆ ܕܰܒܡܶܠܬܳܐ ܗܳܝ ܕܡܶܛܽܠ ܠܰܚܡܳܐ ܐܶܬܦܰܫܰܟܘ ܘܰܐܚܓܰܪܘ ܒܪܶܥܝܳܢܗܽܘܢ܆ ܟܰܕ ܝܰܨܺܝܦ ܗ̱ܘܳܐ ܕܺܝܠܳܗ̇ ܟܰܕ ܕܺܝܠܳܗ̇ ܕܬܰܪܥܺܝܬܳܐ ܐܳܡܰܪ ܗ̱ܘܳܐ܆ ܗܳܕܶܐ ܡܰܟܫܠܳܐ ܠܟܽܘܢ܆ ܐܶܢ ܗܳܟܺܝܠ ܬܶܚܙܽܘܢܳܝܗ̱ܝ ܠܰܒܪܶܗ ܕܐ̱ܢܳܫܳܐ ܕܣܳܠܶܩ ܠܰܐܝܟܳܐ ܕܺܐܝܬܰܘܗ̱ܝ ܗ̱ܘܳܐ ܡܶܢ ܩܕܺܝܡ^[20].

ܟܰܕ ܕܫܳܠ̈ܡܳܢ ܠܗܳܠܶܝܢ ܐܳܡܰܪ ܗ̱ܘܳܐ ܦܰܘܠܽܘܤ܆ ܛܳܒܳܐܺܝܬ ܐܰܡܪܶܗ ܕܠܰܘ ܚܛܽܘܦܝܳܐ ܚܰܫܒܳܗ̇ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܫܘܶܐ ܠܰܐܠܳܗܳܐ^[21]. ܠܬܰܡܳܢ ܓܶܝܪ ܣܠܶܩ ܡܓܰܫܡܳܐ܆ ܠܰܐܝܟܳܐ ܕܺܐܝܬܰܘܗ̱ܝ ܗ̱ܘܳܐ ܡܶܢ ܩܕܺܝܡ ܠܳܐ ܓܽܘܫܡܳܢܳܐܺܝܬ. ܡܰܠܽܘܢ ܕܶܝܢ܆ ܠܰܐܝܟܳܐ ܕܺܐܝܬܰܘܗ̱ܝ ܗ̱ܘܳܐ ܐܰ‌ܠܳܗܳܐܺܝܬ ܘܠܳܐ ܡܶܣܬܰܝܟܳܢܳܐܺܝܬ ܒܟܽܠ ܙܒܰܢ. ܐܶܢ ܗܳܟܺܝܠ ܡܳܠܶܐ ܗ̱ܘܳܐ ܠܟܽܠ܆ ܐܰܝܟܰܢܳܐ ܐܳܡܰܪ ܕܰܣܠܶܩ ܠܥܶܠ ܡܶܢ ܟܽܠܗܽܘܢ ܫܡܰܝܳܐ܆ ܐܰܝܟܰܢܳܐ ܕܢܶܡ̣ܠܶܐ ܠܟܽܠ. ܐܶܢܳܐ ܐܳܡܰܪ ܐ̱ܢܳܐ. ܟܰܕ ܐܶܬܒܰܣܰܪ܆ ܐܶܬܚܙܺܝ ܠܗܳܢܽܘܢ ܕܥܰܠ ‌ܐܰܪܥܳܐ. ܐܶܙܰܠ ܠܘܳܬ ܗܳܢܽܘܢ ܕܰܠܬܰܚܬ ܡܶܢ ܐܰܪܥܳܐ܆ ܟܰܕ ܢܚܶܬ ܠܰܫܝܽܘܠ. ܚܰܣܺܝܪܳܐ ܗ̱ܘܳܬ܆ ܕܳܐܦ ܠܘܳܬ ܫܡܰܝܳܢ̈ܶܐ ܢܺܐܙܰܠ ܗ̱ܘܳܐ ܟܰܕ ܡܒܰܣܰܪ܆ ܐܰܝܟܰܢܳܐ ܕܰܠܟܽܠ ܢܶܡܠܶܐ ܗ̱ܘܳܐ ܡܶܢ ܫܰܦܺܝܪܽܘܬ ܣܳܥܽܘܪܽܘܬܳܐ ܗܳܝ ܕܡܶܢ ܗܳܪܟܳܐ. ܟܰܕ ܠܗܳܢܽܘܢ ܡܰܢ ܫܳܪܶܐ ܗ̱ܘܳܐ ܡܶܢ ܠܰܘܛܬܳܐ ܕܰܚܛܺܝܬܳܐ܆ ܡܶܢ ܐܰܣܽܘܪ̈ܶܐ ܕܡܰܘܬܳܐ܆ ܠܗܳܢܽܘܢ ܕܶܝܢ܆ ܟܰܕ ܠܥܽܘܡ̈ܩܶܐ ܕܚܶܟܡܬܳܐ ܕܺܝܠܶܗ ܓܳܠܶܐ ܗ̱ܘܳܐ. ܕܳܐܦ ܓܶܝܪ ܚܰܝ̈ܠܰܘܳܬܳܐ ܗܳܠܶܝܢ ܕܒܰܫܡܰܝܳܐ܆ ܡܶܢ ܡܕܰܒܪܳܢܽܘܬܳܐ ܗܳܝ ܕܰܠܘܳܬܰܢ܆ ܝܰܬܺܝܪܳܐ ܐܶܫܬܰܘܕܥܽܘܗ̱ܝ ܠܥܽܘܬܪܳܐ ܡܛܰܫܝܳܐ ܕܚܶܟܡܬܳܐ ܐܰ‌ܠܳܗܳܝܬܳܐ܆ ܩܰܕܡܳܐܺܝܬ ܡܰܢ ܝܺܕܺܝܥܳܐ܆ ܡܶܢ ܗܳܠܶܝܢ ܕܡܶܬܕܰܡܪܺܝܢ ܗ̱ܘܰܘ ܥܰܠ ܝܰܠܕܶܗ ܕܥܰܡܰܢܽܘܐܶܝܠ ܟܰܕ ܐܳܡܪܺܝܢ ܗ̱ܘܰܘ: ܫܽܘܒܚܳܐ ܠܰܐܠܳܗܳܐ ܒܰܡܪ̈ܰܘܡܶܐ܆ ܥܰܠ ‌ܐܰܪܥܳܐ ܫܰܝܢܳܐ܆ ܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ^[22]. ܝܰܬܺܝܪ ܢܰܗܺܝܪܳܐܺܝܬ ܕܶܝܢ܆ ܒܝܰܕ ܗܳܠܶܝܢ ܕܟܳܬܶܒ ܗ̱ܘܳܐ ܦܰܘܠܽܘܤ ܠܶܐܦܶܣܳܝ̈ܶܐ ܗܳܟܰܢܳܐ܆ ܐܰܝܟܰܢܳܐ ܕܬܶܬܺܝܕܰܥ ܗܳܫܳܐ ܠܪ̈ܺܝܫܳܢܘܳܬܳܐ ܘܰܠܫܽܘܠ̈ܛܳܢܶܐ ܒܗܳܠܶܝܢ ܫܡܰܝܳܢ̈ܝܳܬܐ ܒܝܰܕ ܥܺܕܬܳܐ܆ ܚܶܟܡܬܳܐ ܕܰܐ‌ܠܳܗܳܐ ܗܳܝ ܣܰܓܺܝܰܐܬ̣ ܙܢܰܝ̈ܳܐ.^[23]

ܟܰܕ ܗܳܠܶܝܢ ܗܳܟܺܝܠ ܗܳܟܰܢܳܐ ܐܶܬܦܰܪܢܰܤ܆ ܟܶܦܰܬ̣ ܠܶܗ ܐܳܦ ܟܰܕ ܡܒܰܣܪ ܟܽܠ ܒܽܘܪܟܳܐ܆ ܕܰܫܡܰܝܳܢ̈ܶܐ ܘܕܰܐܪ̈ܥܳܢܳܝܶܐ. ܘܰܕܗܳܢܽܘܢ ܕܰܠܬܰܚܬ ܡܶܢ ܐܰܪܥܳܐ^[24]. ܗܳܢܰܘ ܕܶܝܢ܆ ܐܶܫܬܰܘܕܰܥܘ ܠܡܳܪܽܘܬܶܗ. ܐܰܝ̇ܕܳܐ ܓܶܝܪ ܒܽܘܪܟܳܐ ܢܶܣܒܰܪ ܐ̱ܢܳܫ ܕܠܳܐ ܓܽܘܫ̈ܡܳܢܶܐ. ܘܟܽܠ ܠܶܫܳܢܳܐ ܐܰܘܕܺܝ ܕܡܳܪܝܰܐ ܗ̄ܘ ܝܶܫܽܘܥ ܡܫܺܝܚܳܐ܆ ܠܬܶܫܒܽܘܚܬܳܐ ܕܰܐ‌ܠܳܗܳܐ ܐܰܒܳܐ^[25]. ܘܳܐܦܠܳܐ ܓܶܝܪ ܚܰܕ ܥܰܡܳܐ܆ ܘܳܐܦܠܳܐ ܠܶܫܳܢܳܐ ܡܶܟܺܝܠ ‌ܐܺܝܬ܆ ܗܰܘ ܕܠܰܝܬ ܠܶܗ ܡܶܢܶܗ ܐ̱ܢܳܫܺܝ̈ܢ ܡܶܢ ܟܠܦܪܽܘܤ ܕܰܐܘܕܺܝܘ ܗܰܝܡܳܢܽܘܬܳܐ ܗܳܝ ܕܒܰܡܫܺܝܚܳܐ܆ ܟܰܕ ܒܺܐܝܕܰܘ̈ܗ̱ܝ ܘܒܶܗ ܝܳܕܥܺܝܢ ܠܰܐܒܳܐ. ܗܰܘ ܓܶܝܪ ܕܰܚܙܳܐ ܠܰܒܪܳܐ܆ ܚܙܳܐ ܠܰܐܒܳܐ^[26]. ܘܫܽܘܒܚܳܐ ܕܰܒܪܳܐ܆ ܫܽܘܒܚܳܐ ܐܺܝܬܰܘܗ̱ܝ ܕܰܐܒܳܐ.

ܗܳܠܶܝܢ ܐܳܦ ܒܫܳܢܝܽܘܬܳܐ ܕܰܐܪܺܝܽܘܤ ܘܕܶܐܘܢܽܘܡܺܝܽܘܤ ܓܳܫ̈ܦܳܢ܆ ܗܳܢܽܘܢ ܕܰܒܪܺܝܬܳܐ ܐܳܡܪܺܝܢ ܕܺܐܝܬܰܘܗ̱ܝ ܒܪܶܗ ܕܰܐ‌ܠܳܗܳܐ܆ ܘܠܳܐ ܕܳܡܶܐ ܠܰܐܒܳܐ. ܗܳܝ ܓܶܝܪ ܕܰܫܡܳܐ ܗܰܘ ܕܰܠܥܶܠ ܡܶܢ ܟܽܠ ܫܡܳܐ܆ ܢܶܬܺܝܗܶܒ ܠܡܶܕܶܡ ܡܶܢ ܒܶܪ̈ܝܳܬܳܐ܆ ܠܳܐ ܐܺܝܬܶܝܗ̇ ܗ̱ܘܳܬ ܕܟܺܐܢܳܐ܆ ܐܰܘ ܠܡܶܕܶܡ ܡܶܢ ܗܳܢܽܘܢ ܕܠܳܐ ܕܳܡܶܝܢ ܒܽܐܘܣܺܝܰܐ ܠܰܐܠܳܗܳܐ ܘܰܐܒܳܐ. ܐܶ‌ܠܽܘ ܓܶܝܪ ܒܪܺܝܬܳܐ ܐܺܝܬܰܘܗ̱ܝ ܗ̱ܘܳܐ ܗܽܘ ܒܪܳܐ܆ ܘܚܰܕ ܡܶܢ ܟܽܠܗܶܝܢ ܐܺܝܬܰܘܗ̱ܝ ܗ̱ܘܳܐ܆ ܟܰܕ ܐܳܦ ܗܽܘ ܒܳܗ̇ ܒܗܳܝ ܕܰܒܪܶܐ ܥܰܡ ܗܳܠܶܝܢ ܒܶܪ̈ܝܳܬܳܐ ܐ̱ܚܪ̈ܳܢܝܳܬܳܐ ܡܶܬܡܢܶܐ ܗ̱ܘܳܐ܆ ܐܳܦܶܢ ܩܰܕܡܳܝܳܐ ܐܶܬܒܪܺܝ܆ ܗܳܕܶܐ ܓܶܝܪ ܐܳܡܪܺܝܢ ܗܳܢܽܘܢ ܕܰܠܪܽܘܫܥܳܐ ܡܨܰܒܬܺܝܢ܆ ܘܶܐܬܺܝܗܶܒ ܠܶܗ ܫܡܳܐ ܕܰܐܝܟ ܗܳܢܳܐ܆ ܦܳܐܶܫ ܗ̱ܘܳܐ ܠܶܗ ܡܶܢ ܗܳܝ ܕܢܶܗܘܶܐ ܐܺܝܬܰܘܗ̱ܝ ܗ̱ܘܳܐ ܠܥܶܠ ܡܶܢ ܟܽܠ ܫܡܳܐ. ܚܕܳܐ^[27] ܓܶܝܪ ܘܳܐܦ ܗܺܝ ܡܶܢ ܟܽܠܗܶܝܢ ܗܘ̣ܳܐ. ܐܶܢ ܟܺܝܬ ܚܰܕ ܡܶܢ ܟܽܠܗܶܝܢ ܘܠܰܘ ܗܰܘ ܕܒܰܟܝܳܢܳܐ ܐܺܝܬ ܠܶܗ ܐܰܝܟ ܐܰ‌ܠܳܗܳܐ܆ ܫܩܰܠ ‌ܐ̱ܢܳܫܳܐܺܝܬ ܘܰܡܕܰܒܪܳܢܳܐܺܝܬ. ܡܶܛܽܠ ܗܳܕܶܐ ܓܶܝܪ ܗܽܘ ܦܰܘܠܽܘܤ܆ ܠܳܐ ܐܶܡܰܪ ܕܫܰܟܶܢ ܠܶܗ ܗܳܝ ܕܢܶܬܩܪܶܐ ܐܰ‌ܠܳܗܳܐ܆ ܗܳܕܶܐ ܓܶܝܪ ܐܳܦ ܠܰܢ ܡܫܰܟܢܳܐ܆ ܒܗܳܝ ܕܳܐܡܰܪ: ܕܶܐܢܳܐ ܐܶܡܪܶܬ ܕܰܐ‌ܠܳܗ̈ܶܐ ܐܺܝܬܰܝܟܽܘܢ ܘܰܒ̈ܢܰܝܳܐ ܕܰܡܪܰܝܡܳܐ ܟܽܠܟܽܘܢ^[28]܆ ܐܶܠܳܐ ܐܰܝܟܰܢܳܐ ܕܰܠܪܽܘܚܩܳܐ ܢܥܰܠܶܐ ܠܬܰܪ̈ܥܝܳܬܳܐ ܕܗܳܢܽܘܢ ܕܫܳܡܥܺܝܢ ܡܶܢ ܕܳܡܝܽܘܬܳܐ ܡܰܟܺܝܟܬܳܐ ܘܕܰܐܟܘܳܬܰܢ܆ ܟܰܕ ܥܰܠ̣ܝܳܗ̇ ܠܡܶܠܬܳܐ ܘܰܐܪܺܝܡܳܗ̇ ܠܥܶܠ ‌ܐܰܟܚܕܳܐ ܥܰܡ ܫܪܳܪܳܐ ܕܣܽܘܥܪܳܢܳܐ܆ ܫܰܡܰܗ ܗܰܘ ܕܰܠܥܶܠ ܡܶܢ ܟܽܠ ܫܡܳܐ. ܟܰܕ ܝܳܗܶܒ ܒܗܳܕܶܐ ܠܡܶܣܬܰܟܳܠܽܘ܆ ܠܗܰܘ ܕܰܠܥܶܠ ܡܶܢ ܟܽܠܳܗ̇ ܒܪܺܝܬܳܐ܆ ܗܰܘ ܕܠܳܐ ܐ̱ܢܳܫ ܡܶܢ ܥܒܺܝ̈ܕܶܐ ܡܶܬܦܰܚܰܡ ܠܶܗ. ܡܶܛܽܠܗܳܕܶܐ ܐܳܦ ܗܳܢܽܘܢ ܩܰܕܡܳܝ̈ܶܐ ܘܥܰܬܺܝ̈ܩܶܐ ܘܝܰܬܺܝܪ ܐܰ‌ܠܳܗܳܝ̈ܶܐ ܕܡܶܢ ܥܶܒܪ̈ܳܝܶܐ܆ ܗܳܢܽܘܢ ܕܒܺܐܝ̈ܕܰܝܗܽܘܢ ܡ̈ܶܠܶܐ ܐܰ‌ܠܳܗܳܝ̈ܳܬܳܐ ܐܶܬܓ̈ܠܺܝܶܢ܆ ܘܩܰܕܺܝܡܽܘܬ ܡ̈ܶܠܶܐ ܠܳܐ ܕܰܓ̈ܳܠܳܬܳܐ ܕܗܳܠܶܝܢ ܕܰܥܬܺܝ̈ܕܳܢ܆ ܠܗܳܢܳܐ ܠܳܐ ܡܶܫܬܰܡܗܳܢܳܐ ܡܫܰܡܗܺܝܢ ܗ̱ܘܰܘ. ܟܰܕ ܠܳܗ̇ ܠܗܳܝ ܕܥܳܪܶܩ ܘܥܳܒܰܪ ܘܡܶܬܥܰܠܶܐ ܠܥܶܠ ܡܶܢ ܟܽܠ ܫܡܳܐ܆ ܫܡܳܐ ܣܳܡܽܘܗ̇. ܠܗܳܢܳܐ ܗܳܟܺܝܠ ‌ܐܳܦ ܦܰܘܠܽܘܤ܆ ܕܰܠܥܶܠ ܡܶܢ ܟܽܘܠ ܫܡܳܐ ܟܰܢ̣ܝܶܗ. ܐܶܠܳܐ ܬܽܘܒ ܐܳܦ ܗܳܝ ܕܝܰܬܺܝܪ ܢܶܬܪܰܡܪܰܡ܆ ܕܺܐܝܬܰܘܗ̱ܝ ܠܗܰܠ ܡܶܢ ܟܽܠܳܗ̇ ܒܪܺܝܬܳܐ ܐܰܝܟ ܐܰ‌ܠܳܗܳܐ ܕܒܰܟܝܳܢܳܐ܆ ܡܚܰܘܝܳܐ ܠܶܗ ܠܥܰܡܰܢܽܘܐܶܝܠ. ܣܰܒܘ ܠܺܝ ܓܶܝܪ ܠܗܳܢܽܘܢ ܬܠܳܬܐ ܛܠܳܝ̈ܶܐ ܕܰܡܫܰܒܚܺܝܢ ܗܘܰܘ ܠܡܳܪܝܳܐ ܒܰܡܨܰܥܬܳܐ ܕܫܰܠܗܶܒܺܝܬܳܐ ܘܰܕܓܰܘܙܰܠܬܳܐ ܗܳܝ ܕܝܰܬܺܝܪ ܡܶܢ ܟܽܠ ܕܚܺܝܠܳܐ ܗ̱ܘܳܬ܆ ܘܰܠܡܰܠܰܐܟ̈ܶܐ ܘܰܠܚܰܝ̈ܠܰܘܳܬܳܐ ܘܰܠܟܽܘܠܳܗ̇ ܒܪܺܝܬܳܐ ܡܶܬܗܰܘܢܳܢܺܝܬܳܐ ܘܡܶܬܪܰܓܫܳܢܺܝܬܳܐ܆ ܕܳܒܪܺܝܢ ܗܘܰܘ ܘܫܳܩܠܺܝܢ ܥܰܡܗܽܘܢ ܒܓܽܘܕܳܐ ܗܳܝ ܪܽܘܚܳܢܳܝܬܳܐ ܘܗܳܝ ܕܢܶܫܬܰܒܰܚ ܘܝܰܬܺܝܪ ܢܶܬܪܰܡܪܰܡ. ܠܡܳܪܝܳܐ ܕܟܽܠ ܒܰܠܚܽܘܕܰܘܗ̱ܝ ܡܰܩܦܺܝܢ ܗܘܰܘ.

ܡܰܢܽܘ ܗܳܟܺܝܠ ‌ܐܰܝܟ ܕܫܳܘܶܐ ܢܫܰܒܰܚ܆ ܠܰܫܦܺܝܥܽܘܬܳܐ ܘܪܰܒܽܘܬܳܐ ܕܪܶܚܡܰܬ ܐ̱ܢܳܫܽܘܬܶܗ ܕܰܡܫܺܝܚܳܐ ܘܰܕܡܶܬܢܰܚܬܳܢܽܘܬܶܗ ܕܠܳܐ ܣܳܟܳܐ. ܡܽܘܫܶܐ ܡܶܢ ܩܕܺܝܡ ܠܘܳܬ ܛܽܘܪܳܐ ܕܣܺܝܢܰܝ ܣܳܠܶܩ ܗ̱ܘܳܐ܆ ܘܰܐܪܒܥܺܝܢ ܝܰܘ̈ܡܳܬܳܐ ܕܠܳܐ ܬܽܘܪܣܳܝܳܐ ܗܳܘܶܐ ܗ̱ܘܳܐ܆ ܘܨܰܝܳܡܳܐ ܕܠܰܚܡܳܐ ܘܰܕܡܰܝ̈ܳܐ܆ ܐܰܝܟܰܢܳܐ ܕܰܕܡܽܘܬܳܐ ܒܰܠܚܽܘܕ ܢܶܚܙܶܐ ܕܬܶܫܒܽܘܚܬܶܗ ܕܰܐ‌ܠܳܗܳܐ. ܘܗܳܕܶܐ ܟܰܕ ܐܰܝܟ ܕܰܒܚܶܙܘܳܐ ܕܢܽܘܪܳܐ ܡܶܬܚܰܙܝܳܐ܆ ܕܰܚܒܺܝܟ ܒܥܰܪܦܶܠܳܐ ܘܰܒܬܶܢܳܢܳܐ. ܡܫܺܝܚܳܐ ܕܶܝܢ ܡܶܠܬܳܐ ܕܰܐ‌ܠܳܗܳܐ܆ ܢܽܘܗܪܰܐ ܗ̄ܘ ܫܰܪܺܝܪܳܐ ܘܠܳܐ ܡܚܰܠܛܳܐ܆ ܡܶܢ ܪܰܘܡܳܐ ܐܰܝܟ ܕܰܠܥܽܘܡܩܳܐ ܫܘܰܪ܆ ܘܰܚܠܰܕ ܘܰܓܡܰܥ ܠܘܳܬ ܥܽܘܡܩܳܗ̇ ܕܰܐܪܥܳܐ. ܡܰܠܽܘܢ ܕܶܝܢ ܒܰܐܬܪ̈ܰܘܳܬܳܐ ܬܰܚ̈ܬܳܝܶܐ ܕܰܐܪܥܳܐ܆ ܘܡܶܢ ܬܰܡܳܢ ܫ̣ܠܳܐ ܘܰܐܣܶܩ ܠܰܢ܆ ܕܒܰܚܛܺܝܬܳܐ ܘܰܒܡܰܘܬܳܐ ܡܛܰܒܥܺܝܢ ܗ̄ܘܰܝܢ. ܘܟܰܕ ܩܳܡ ܡܶܢ ܒܶܝܬ ܡܺܝ̈ܬܶܐ܆ ܝܰܘ̈ܡܳܬܳܐ ܐܰܪܒܥܺܝܢ ܥܰܡ ܬܰܠ̈ܡܺܝܕܶܐ ܟܰܕ ܐܳܟܶܠ ܗ̱ܘܳܐ ܘܫܳܬܶܐ ܐܺܝܬ ܐܶܡܰܬܝ ܡܶܬܗܰܦܰܟ ܗ̱ܘܳܐ. ܟܰܕ ܠܰܡܕܰܒܪܳܢܽܘܬܳܐ ܗܳܝ ܕܒܰܒܣܰܪ ܡܫܰܪܰܪ ܗ̱ܘܳܐ ܕܰܠܒܰܪ ܡܶܢ ܦܰܢܛܰܣܺܝܰܐ ܐܺܝܬܶܝܗ̇. ܘܗܳܟܰܢܳܐ ܠܰܫܡܰܝܳܐ ܣܳܠܶܩ ܗ̱ܘܳܐ. ܟܰܕ ܠܰܢ ܠܟܽܠܰܢ ܛܥܺܝܢ ܗ̱ܘܳܐ ܒܶܗ܆ ܡܶܛܽܠ ܕܰܡܒܰܣܰܪ ܗ̱ܘܳܐ ܗܳܝ ܕܺܝܠܰܢ.

ܠܡܳܢܳܐ ܗܳܟܺܝܠ ‌ܐܳܘ ܒܰܪܢܳܫܳܐ ܡܶܬܦܰܠܰܓ ܐܰܢ̱ܬ ܘܠܳܐ ܡܗܰܝܡܶܢ ܐܰܢ̱ܬ ܠܰܩܝܳܡܬܳܐ ܕܒܶܣܪܳܐ ܕܺܝܠܰܢ ܘܰܠܡܰܠܟܽܘܬܳܐ ܕܰܫܡܰܝܳܐ܆ ܟܰܕ ܐܺܝܬ ܠܳܟ ܡܶܫܟܳܢܳܐ ܕܗܳܠܶܝܢ܆ ܡܫܺܝܚܳܐ ܗܰܘ ܕܡܶܢ ܓܶܢܣܳܐ ܕܺܝܠܳܟ ܐܶܬܒܰܣܰܪ܆ ܘܩܳܡ ܡܶܢ ܡܺܝ̈ܬܶܐ ܘܰܣܠܶܩ ܘܰܥܒܰܪ ܐܶܢܽܘܢ ܠܰܫܡܰܝܳܐ. ܐܶܢ ܓܶܝܪ ܠܰܘ ܒܶܣܪܳܐ ܕܺܝܠܰܢ ܐܶܬܒܰܣܰܪ܆ ܐܰܝܟ ܣܪܺܝܩܽܘܬܶܗ ܕܶܐܘܛܶܘܟ̥ܶܐ܆ ܡܶܫܟܳܢܳܐ^[29] ܐܶܬܕܰܓܰܠ ܠܶܗ܆ ܘܗܳܠܶܝܢ ܕܣܰܒܪܳܐ ܕܰܥܬܺܝܕ ܡܰܠ̈ܝܳܬ ܦܰܘܕܳܐ ܘܰܕܦܽܘܫܳܟܳܐ ܐܺܝܬܰܝܗܶܝܢ܆ ܘܗܺܝ ܟܰܕ ܗܺܝ ܚܰܫ̣ܢܰܢ܆ ܠܗܳܢܽܘܢ ܕܡܶܢ ܡܰܘܙ̈ܦܳܢܶܐ ܕܶܐܬܬܰܛܥܺܝܘ܆ ܕܰܚܠܳܦ ܕܺܝܢܳܪ̈ܶܐ ܫܰܪܺܝܪ̈ܶܐ ܕܕܰܗܒܳܐ ܐܶܢ ܬܶܓܕܰܫ ܘܰܕܣܺܐܡܳܐ܆ ܡܶܫ̈ܟܳܢܶܐ ܕܡܶܣܬܰܒܪܺܝܢ ܕܕܰܗܒܳܐ ܘܺܐܝܬܰܝܗܽܘܢ ܕܰܢܚܳܫܳܐ ܡܶܢ ܠܬܰܚܬ ܘܛܺܝܫܺܝܢ ܕܰܗܒܳܐ ܡܶܢ ܠܒܰܪ ܫܩܰܠܘ.

ܐܶܠܳܐ ܟܰܕ ܠܫܽܘ̈ܥܝܳܬܳܐ ܘܰܠܡ̈ܰܬܠܶܐ ܕܰܐܝܟ ܗܳܠܶܝܢ ܚܕܰܘ ܐܳܡܪܺܝܢܰܢ܆ ܠܦܰܘܠܽܘܤ ܢܶܬܬܦܺܝܤ ܕܳܐܡܰܪ: ܕܡܶܛܽܠ ܕܰܒܝܰܕ ܒܪܢܳܫܳܐ ܡܰܘܬܳܐ܆ ܐܳܦ ܒܝܰܕ ܒܰܪܢܳܫܳܐ ܩܝܳܡܬܳܐ ܕܡܺܝ̈ܬܶܐ܆ ܘܰܐܟܙܢܳܐ ܕܒܳܐܕܳܡ ܟܽܠܗܽܘܢ ܡܳܝܬܺܝܢ܆ ܗܳܟܰܢܐ ܐܳܦ ܒܰܡܫܺܝܚܳܐ ܟܽܠܗܽܘܢ ܢܺܚܽܘܢ^[30].

ܒܗܳܢܳܐ ܗܳܟܺܝܠ ‌ܐܳܦ ܟܰܕ ܣܳܠܶܩ ܗ̱ܘܳܐ ܠܘܳܬ ܫܡܰܝܳܐ ܡܶܬܒܰܩܶܝܢ ܗ̱ܘܰܘ ܬܰܠ̈ܡܺܝܕܶܐ ܘܬܰܡܺܝܗܺܝܢ ܗ̱ܘܰܘ ܒܶܗ܆ ܟܰܕ ܒܰܚܙܳܬܳܐ ܘܚܰܘܪܳܐ ܕܰܒܗܰܘ ܠܢܰܦ̈ܫܳܬܳܐ ܒܰܝ̈ܬܳܝܳܬܳܐ ܕܺܝܠܗܽܘܢ ܬܠ̣ܰܘ. ܘܡܶܢ ܡܰܠܰܐܟ̈ܶܐ ܗܳܢܽܘܢ ܕܩܳܝܡܺܝܢ ܗ̱ܘܰܘ ܠܘܳܬܗܽܘܢ ܫܳܡܥܺܝܢ ܗ̱ܘܰܘ. ܓܰܒܪ̈ܶܐ ܓܠܺܝ̈ܠܳܝܶܐ܆ ܡܳܢܳܐ ܩܳܝܡܺܝܢ ܐܢ̱ܬܽܘܢ ܟܰܕ ܒܰܫܡܰܝܳܐ ܚܳܝܪܺܝܢ ܐܢ̱ܬܽܘܢ. ܗܳܢܳܐ ܝܶܫܽܘܥ ܕܶܐܣܬܰܠܰܩ ܡܶܢܟܽܘܢ ܠܰܫܡܰܝܳܐ܆ ܗܳܟܰܢܳܐ ܢܺܐܬܶܐ܆ ܒܗܰܘ ܙܢܳܐ ܕܰܚܙܰܝܬܽܘܢܳܝܗ̱ܝ ܕܳܐܙܶܠ ܠܰܫܡܰܝܳܐ^[31]. ܡܶܛܽܠ ܗܳܕܶܐ܆ ܠܳܐ ܫܠ̣ܰܘ ܘܠܳܐ ܦܳܫܘ ܕܰܠܘܳܬ ܗܰܘ ܚܳܝܪܺܝܢ ܗ̱ܘܰܘ܆ ܘܗܳܟܰܢܳܐ ܡܶܬܕܰܒܪܺܝܢ ܗܘܰܘ܆ ܘܗܳܟܰܢܳܐ ܠܘܳܬ ܚܙܳܬܳܐ ܗܳܝ ܕܰܥܬܺܝܕܳܐ ܡܶܬܛܰܝܒܺܝܢ ܗܘܰܘ.

ܗܳܠܶܝܢ ܕܶܝܢ ܠܰܘ ܠܘܳܬ ܗܳܢܽܘܢ ܡܶܬܐܰܡܪ̈ܳܢ ܗܘ̈ܰܝ ܒܰܠܚܽܘܕ܆ ܐܶܠܳܐ ܒܝܰܕ ܗܳܢܽܘܢ܆ ܐܳܦ ܠܘܳܬ ܟܽܠܗܽܘܢ ܗܳܢܽܘܢ ܕܰܡܗܰܝܡܢܺܝܢ. ܐܰܝܟܰܢܳܐ ܕܳܐܦ ܚܢܰܢ ܠܘܳܬ ܗܰܘ ܢܚܽܘܪ܆ ܘܢܶܬܚܰܫܰܒ ܠܺܐܝܩܳܪܳܐ ܗܰܘ ܕܶܐܬܝܰܩܰܪܢܰܢ. ܟܰܕ ܒܝܰܕ ܪܺܝܫܺܝܬܳܐ ܠܥܶܠ ܡܶܢ ܟܽܠ ܪܺܝܫܳܢܽܘܬܳܐ ܘܫܽܘܠܛܳܢܳܐ ܝܳܬܒܺܝܢ ܚ̱ܢܰܢ. ܐܰܢ̱ܬ ܕܶܝܢ ܒܺܐܝܩܳܪܳܐ ܗܳܢܳܐ ܠܳܐ ܡܰܪܓܫܳܢܳܐܺܝܬ ܐܺܝܬ ܠܳܟ܆ ܘܰܠܘܳܬ ܤܛܰܕܺܝܽܘܢ ܐܰܘܟܺܝܬ ܒܶܝܬ ܕܽܘܪܳܫܳܐ ܕܚܰܝ̈ܘܳܬ ܫܶܢܳܐ ܪܳܗܶܛ ܐܰܢ̱ܬ܆ ܘܠܰܒܢܰܝ̈ܢܳܫܳܐ ܫܰܘ̈ܝ̣ܰܝ̣ ܒܓܶܢܣܳܟ ܚܳܙܶܐ ܐܰܢ̱ܬ܆ ܕܥܰܡ ܗܳܠܶܝܢ ܡܶܬܟܰܬܫܺܝܢ ܘܡܶܬܥܰܪܙܠܺܝܢ܆ ܘܡܶܬܢܰܬܫܺܝܢ ܘܡܶܬܒܰܣܒܣܺܝܢ ܐܺܝܩܺܐ܆ ܗܳܢܽܘܢ ܕܕܺܝܠܶܗ ܟܰܕ ܕܺܝܠܶܗ ܕܛܺܝܢܳܐ ܟܺܝܬ ܘܕܰܓܒܺܝܠܬܳܐ܆ ܗܳܢܽܘܢ ܕܕܺܝܠܶܗ ܟܰܕ ܕܺܝܠܶܗ ܕܨܰܠܡܳܐ ܡܠܺܝܠܳܐ ܘܰܐ‌ܠܳܗܳܝܳܐ܆ ܗܳܢܽܘܢ ܕܕܺܝܠܳܗ̇ ܟܰܕ ܕܺܝܠܳܗ̇ ܕܣܳܝܽܘܡܽܘܬ ܒܢܰܝ̈ܳܐ ܘܰܓܒܺܝܠܽܘܬܳܐ ܕܡܶܢ ܕܪܺܝܫ܆ ܗܳܢܽܘܢ ܕܕܺܝܠܳܗ̇ ܕܰܚܕܳܐ ܪܺܝܫܺܝܬܳܐ ܗܳܝ ܕܣܶܠܩܰܬ ܠܥܶܠ ܡܶܢ ܫܡܰܝܳܐ܆ ܗܳܝ ܕܡܰܡܠܟܳܐ ܥܰܠ ܪ̈ܽܘܚܳܬܳܐ ܗܳܠܶܝܢ ܕܰܠܥܶܠ ܡܶܬܗܰܘ̈ܢܳܢܳܝܳܬܳܐ ܘܠܳܐ ܗܽܘ̈ܠܳܢܳܝܳܬܳܐ.

ܐܳܘ ܐܰܝܟܰܢܳܐ ܕܠܳܐ ܕܶܡܥܬܳܐ ܐܶ݀ܡܰܠܶܠ. ܐܰܝܟܰܢܳܐ ܐܶ݀ܚܰܘܶܐ ܠܳܟ ܠܪܰܒܽܘܬܳܗ̇ ܕܰܚܛܺܝܬܳܐ. ܟܰܕ ܡܶܢ ܗܳܝ ܕܠܳܐ ܐܺܝܬܰܝܢ ܗ̄ܘܰܝܢ ܠܗܳܝ ܕܢܶܗܘܶܐ ܐܺܝܬܰܝܢ ܐܶܬܬܰܝܬܺܝܢܰܢ܆ ܒܪܺܝܫܳܢܽܘܬܳܐ ܕܰܒܥܺܝܪܳܐ ܘܰܕܦܳܪ̈ܚܳܬܳܐ ܘܰܕܚܰܝ̈ܘܳܬܳܐ ܘܰܕܟܽܠܳܗ̇ ܐܰܪܥܳܐ ܐܶܬܝܰܩܰܪܢܰܢ. ܘܺܐܝܬܰܝܗܶܝܢ ܗ̈ܘܰܝ ܠܰܢ ܗܳܠܶܝܢ ܐܶܡ̈ܗܳܬܳܐ ܘܕܰܬܚܶܝܬ ܐܺܝܕܳܐ. ܘܒܳܗ̇ ܒܰܕܡܽܘܬܳܐ ܠܥܶܪܒܳܐ܆ ܐܰܪܝܳܐ ܘܕܺܐܒܳܐ ܡܥܰܝܰܕ ܠܺܐܝܕܳܐ ܐܺܝܬܰܘܗ̱ܝ ܗ̱ܘܳܐ ܠܒܰܪܢܳܫܳܐ ܘܰܡܫܰܝܢܳܐ. ܘܰܢܦܺܝ̈ܣܳܢܳܟ܆ ܟܰܕ ܒܰܕܡܽܘܬ ܪܰܡܟܳܐ ܕܚܰܝ̈ܘܳܬܳܐ ܕܪ̈ܳܥܝܳܢ܆ ܟܽܠܗܶܝܢ ܚܰܝ̈ܘܳܬ ܫܶܢܳܐ ܡܶܬܟܰܢ̈ܫܳܢ ܗ̱ܘܰܝ̈ ܠܘܳܬ ܐܳܕܳܡ܆ ܟܰܕ ܠܳܚܡܳܐܺܝܬ ܣܳܐܶܡ ܗ̱ܘܳܐ ܠܗܶܝܢ ܫܡܳܗ̈ܶܐ܆ ܘܰܠܟܽܠ ܚܰܕ ܐܳܕܫܳܐ ܒܰܫܡܶܗ ܡܦܰܪܶܫ ܗ̱ܘܳܐ.

ܐܶܠܳܐ ܟܰܕ ܡܶܢ ܪܺܝܫܳܢܽܘܬܳܐ ܗܳܕܶܐ ܡܶܛܽܠ ܚܛܺܝܬܳܐ ܢܦܰܠܢܰܢ܆ ܘܰܠܝܽܘܩܢܳܐ ܕܰܟܝܳܐ ܕܨܰܠܡܳܐ ܐܰ‌ܠܳܗܳܝܳܐ ܚܢܰܢ ܒܰܢ ܠܳܐ ܡܰܝܬܶܝܢ ܚ̱ܢܰܢ܆ ܕܳܚܠܺܝܢ ܚ̱ܢܰܢ ܡܶܟܺܝܠ ܡܶܢ ܩܰܫܝܽܘܬܗܶܝܢ ܕܚܰܝ̈ܘܳܬ ܫܶܢܳܐ. ܘܗܳܕܶܐ ܟܰܕ ܥܳܗ̈ܕܳܢ ܠܪܺܝܫܳܢܽܘܬܳܐ ܥܰܬܺܝܩܬܳܐ܆ ܘܠܳܐ ܐܳܬܝ̈ܳܢ ܥܠܰܝܢ܆ ܐܶܠܳܐ ܥܳܪ̈ܩܳܢ ܠܘܳܬ ܡܰܕܒܪ̈ܶܐ.

ܐܰܢ̱ܬ ܗܳܟܺܝܠ ܟܰܕ ܚܳܒܶܫ ܐܰܢ̱ܬ ܠܗܶܝܢ܆ ܡܓܰܪܶܓ ܐܰܢ̱ܬ ܘܰܡܗܰܪܗܰܪ ܠܒܰܥܪܺܝܪܳܝܽܘܬܳܐ ܕܺܝܠܗܶܝܢ܆ ܘܳܐ‌ܠܶܨ ܐܰܢ̱ܬ ܠܗܶܝܢ ܕܢܶܣ̈ܒܟܳܢ ܥܰܠ ܒܢܰܝ̈ܢܳܫܳܐ܆ ܡܦܰܪܣܶܐ ܐܰܢ̱ܬ ܘܓܳܠܶܐ ܠܰܚܛܺܝܬܳܐ ܕܓܶܢܣܳܐ ܕܺܝܠܰܢ܆ ܘܡܰܥܗܶܕ ܐܰܢ̱ܬ ܪܺܝܫܳܢܽܘܬܳܐ ܗܳܝ ܕܰܢܦܰܠܢܰܢ ܡܶܢܳܗ̇. ܟܰܕ ܙܳܕܶܩ ܗ̱ܘܳܐ܆ ܕܰܠܘܳܬ ܐܺܝܩܳܪܳܐ ܗܰܘ ܚܰܕܬܳܐ ܢܚܽܘܪ ܗܳܘܶܝܢ܆ ܗܰܘ ܕܰܚܠܳܦ ܪܺܝܫܳܢܽܘܬܳܐ ܗܳܝ ܕܥܰܠ ‌ܐܰܪܥܳܐ܆ ܠܘܳܬ ܡܰܠܟܽܘܬܳܐ ܗܳܝ ܕܰܫܡܰܝܳܐ ܫܰܢܺܝ ܐܰܥܒܰܪ ܠܰܢ. ܗܰܘ ܕܶܐ‌ܠܽܘ ܐܰܝܟ ܕܫܳܘܶܐ ܗ̱ܘܳܐ܆ ܘܙܳܕܶܩ ܗ̱ܘܳܐ ܠܶܗ ܡܶܬܕܰܒܪܺܝܢ ܗ̱ܘܰܝܢ܆ ܠܰܘ ܠܚܰܝ̈ܘܳܬ ܫܶܢܳܐ ܒܰܠܚܽܘܕ܆ ܐܶܠܳܐ ܐܳܦ ܠܫ̈ܺܐܕܶܐ ܐܺܝܬܰܝܢ ܗ̱ܘܰܝܢ ܕܚܺܝ̈ܠܶܐ܆ ܘܳܐܦ ܟܚܺܝ̈ܕܶܐ ܠܡܰܠܰܐܟ̈ܶܐ. ܘܡܰܘܕܰܥ ܗܳܕܶܐ܆ ܕܳܢܺܝܐܶܝܠ ܗܰܘ ܕܟܰܕ ܒܓܽܘܒܳܐ ܚܒܺܝܫ ܗ̱ܘܳܐ܆ ܒܗܶܬܘ ܡܶܢܶܗ ܐܰܪ̈ܝܰܘܳܬܳܐ. ܠܗܳܕܶܐ ܡܫܰܪܪܳܐ܆ ܐܳܦ ܬܰܩܠܰܐ ܗܳܝ ܕܒܰܒܬܽܘܠܽܘܬܳܐ ܘܰܒܗܰܝܡܳܢܽܘܬܳܐ ܐܺܝܬܶܝܗ̇ ܗ̱ܘܳܬ ܝܰܬܺܝܪ ܒܚܺܝܪܬܳܐ ܘܝܰܬܺܝܪ ܡܣܰܝܒܪܳܢܺܝܬܳܐ܆ ܘܳܐܦ ܟܶܢܫܳܐ ܠܳܐ ܡܶܬܡܰܢܝܳܢܳܐ ܕܣܳܗ̈ܕܶܐ܆ ܗܳܢܽܘܢ ܕܰܒܠܰܡܘ ܠܦܰܩܪܽܘܬܳܐ ܚܰܪܡܬܳܐ ܘܰܕܝܰܬܺܝܪ ܡܶܢ ܟܽܠ ܩܰܫܝܳܐ ܕܚܰܝ̈ܘܳܬ ܫܶܢܳܐ ܣܰܓܺܝ̈ܳܐܬܳܐ܆ ܒܝܰܕ ܗܳܢܶܝܢ ܕܠܰܡܫܺܝܚܳܐ ܪܺܝܫܺܝܬܳܐ ܕܓܶܢܣܳܐ ܕܺܝܠܰܢ ܡܶܬܚܰܫܒܺܝܢ ܗ̱ܘܰܘ܆ ܘܰܠܘܳܬ ܕܳܡܝܽܘܬܳܐ ܐܰ‌ܠܳܗܳܝܬܳܐ ܡܶܬܕܰܡܶܝܢ ܗ̱ܘܰܘ܆ ܒܰܕܡܽܘܬ ܗܰܘ ܕܳܐܡܰܪ ܗ̱ܘܳܐ܆ ܡܕܰܡ̈ܝܳܢܶܐ ܕܺܝܠܝ ܗ̣ܘܰܘ܆ ܐܰܝܟ ܡܳܐ ܕܳܐܦ ܐܶܢܳܐ ܕܰܡܫܺܝܚܳܐ^[32].

ܐܶܠܳܐ ܟܰܕ ܣܰܓܺܝ̈ܳܐܬܳܐ ܐܺܝܬ ܗ̱ܘܳܐ ܠܺܝ ܕܺܐ݀ܡܰܪ ܬܽܘܒ܆ ܘܰܕܠܽܐܘܠ̈ܝܳܬܳܐ ܫܳܘ̈ܝܳܢ܆ ܐܶ݀ܦܣܽܘܩ ܘܶܐ݀ܫܰܠܡܺܝܘܗ̱ܝ ܠܡܺܐܡܪܳܐ܆ ܒܰܟܚܺܝܕܽܘܬܳܐ ܕܚܰܓܳܐ ܗܳܢܳܐ ܢܰܨܺܝܚܳܐ ܘܰܣܓܺܝܕܳܐ܆ ܟܰܕ ܡܶܬܟܰܫܰܦ ܐ̱ܢܳܐ ܠܰܡܫܺܝܚܳܐ ܗܰܘ ܕܡܶܛܽܠܳܬܰܢ ܐܶܣܬܰܠܰܩ ܘܡܶܛܽܠܳܬܶܗ^[33] ܣܠܶܩ܆ ܕܰܢܥܰܠܶܐ ܠܬܰܪ̈ܥܝܳܬܳܐ ܕܺܝܠܰܢ ܠܰܫܡܰܝܳܐ ܕܰܠܬܰܚܬ ܡܶܬܓܰܪ̈ܓܪܳܢ܆ ܒܛܰܝܒܽܘܬܳܐ ܕܺܝܠܶܗ ܘܰܒܪܶܚܡܰܬ ܐ̱ܢܳܫܽܘܬܳܐ ܘܰܒܪ̈ܰܚܡܶܐ. ܠܗܰܘ ܕܳܐܦ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܕܫܰܒܥܺܝܢ ܘܚܰܕ.

[1]ܡܙܡܘܪܐ. 83: 6

[2]ܥܒܪ̈ܝܐ. 5: 8 ـ 9

[3]ܐܦܣ̈ܝܐ. 1: 21

[4]ܥܶܒܪ̈ܳܝܶܐ. 2: 14  ܐܦ ܥܒܪ̈ܝܐ. 2: 16 ـ 17

[5]ܦܝܠܝܦ̈ܣܝܐ. 2: 6 ـ 7

[6]ܠܘܩܐ. 2: 56

[7]ܦܝܠܝܦܣ̈ܝܐ. 2: 8 ـ 11

[8]ܦܝܠܝܦ̈ܣܝܐ. 2: 6 ـ 7

[9]ܗܽܘ ܫܽܘܟܳܢܳܐ

[10]ܘܰܡܦܰܠܓܳܐܝܬ

[11]ܝܰܬܺܝܪܳܐܝܬ

[12] ܘܰܪܒܺܝܥܐܝܬ

[13] ܡܙܡܘܪܐ. 113: 3

[14] ܐܶܫܰܥܝܳܐ. 42: 8.

[15]ܐ. ܛܝܡܬܐܘܣ. 3: 16

[16] ܐܦܣ̈ܝܐ. 4: 10

[17] ܝܘܚܢܢ. 3: 13

[18]ܥܒܪ̈ܝܐ. 13: 8

[19]ܝܘܚܢܢ. 6: 41 ـ 42

[20]ܝܘܚܢܢ. 6: 62

[21] ܦܝܠܦܣ̈ܝܐ. 2: 6

[22]ܠܘܩܐ. 2: 14

[23]ܐܦܣ̈ܝܐ. 3: 10

[24]ܦܝܠܝܦܣ̈ܝܐ. 2: 10

[25]ܦܝܠܝܦܣ̈ܝܐ. 2: 11

[26]ܝܘܚܢܢ. 14: 9

[27]ܙܳܕܶܩ ܠܡܶܕܰܥ ܕܗܳܕܶܐ ܕܶܐܡܰܪ ܡܰܠܦܳܢܳܐ ܗܳܪܟܳܐ: ܚܕܳܐ ܓܶܝܪ ܘܳܐܦ ܗܺܝ ܡܶܢ ܟܽܠܗܶܝܢ ܗܘ̣ܳܐ܆ ܘܠܐ ܕܶܟܪܳܢܳܐܝܬ ܐܺܝܬܶܝܗ̇ ܒܠܶܫܳܢܳܐ ܝܰܘܢܳܝܳܐ܆ ܘܠܐ ܢܶܩܒܳܢܳܐܝܬ. ܐܶܠܐ ܒܓܶܢܣܳܐ ܗܰܘ ܕܩܳܪܶܝܢ ܠܶܗ ܘܕܐܛܪܘܣ. ܗܰܘ ܕܒܶܗ ܩܳܪܶܝܢ ܝܰܘ̈ܢܳܝܶܐ܆ ܘܳܐܦ ܠܒܶܪ̈ܝܳܬܳܐ܆ ܘܳܐܦ ܠܰܫܡܳܗ̈ܶܐ. ܘܬܘܒ ܒܶܗ ܐܳܡܪܺܝܢ܆ ܘܳܐܦ ܠܗܳܝ ܕܰܡܥܳܕܺܝܢ ܚ̱ܢܰܢ ܠܡܺܐܡܰܪ ܒܠܶܫܳܢܳܐ ܣܽܘܪܝ̣ܳܝ̣ܳܐ܆ ܗܰܘ ܡܳܐ. ܗܳܢܰܘ ܕܶܝܢ܆ ܗܰܘ ܡܳܐ ܕܰܥܒܰܕ ܦܠܳܢ ܐܰܘ ܗܰܘ ܡܳܐ ܕܚܰܫ܆ ܐܰܘ ܗܰܘ ܡܳܐ ܕܰܗܘ̣ܳܐ. ܘܬܽܘܒ. ܐܳܦ ܠܗܳܝ ܕܳܐܡܪܺܝܢܰܢ ܚܰܕ ܡܶܕܶܡ. ܐܰܝܟܰܢܳܐ ܕܶܐܢ ܢܶܨܒܶܐ܆ ܠܗܳܝ ܚܕܳܐ ܘܰܠܗܳܝ ܕܗܺܝ ܕܣܳܡ ܡܰܠܦܳܢܳܐ ܒܓܶܢܣܳܐ ܗܰܘ܆ ܥܰܠ ܫܡܳܐ ܗܰܘ ܕܶܐܬܺܝܗܶܒ ܠܰܡܫܺܝܚܳܐ ܐܶܢ ܒܳܥܶܝܢ ܚ̱ܢܰܢ ܢܳܣܒܺܝܢܰܢ ܠܳܗ̇܆ ܘܶܐܢ ܨܳܒܶܝܢ ܚ̱ܢܰܢ܆ ܕܰܚܕܳܐ ܒܪܺܝܬܳܐ ܗ̣ܘܳܐ ܫܳܩܠܺܝܢܰܢ. ܘܶܐܢ ܬܽܘܒ ܨܳܒܶܝܢ ܚ̱ܢܰܢ܆ ܚܠܳܦ ܗܰܘ ܡܳܐ ܕܰܗܘ̣ܳܐ ܫܳܩܠܺܝܢܰܢ ܠܳܗ̇ ܠܗܳܝ ܚܕܳܐ ܘܰܠܗܳܝ ܗܺܝ. ܘܶܐܢ ܨܳܒܶܝܢ ܚ̱ܢܰܢ ܐܳܡܪܺܝܢܰܢ܆ ܚܰܕ ܓܶܝܪ ܡܶܕܶܡ ܗܘ̣ܳܐ܆ ܘܳܐܦ ܗܽܘ ܗܳܢܳܐ܆ ܡܶܢ ܟܽܠܗܶܝܢ ܗܘ. ܐܰܝܟܰܢܳܐ ܕܗܳܝ ܡܰܢ ܚܕܳܐ ܘܗܳܝ ܗܺܝ܆ ܠܰܘ ܥܰܠ ܡܫܺܝܚܳܐ ܬܶܬܢܣܶܒ܆ ܐܶܠܐ ܥܰܠ ܗܰܘ ܡܶܕܶܡ ܕܰܗܘ̣ܳܐ. ܗܳܝ ܕܶܝܢ ܕܰܗܘ̣ܳܐ܆ ܥܠܰܘܗܝ ܥܰܠ ܡܫܺܝܚܳܐ ܬܺܐܙܰܠ܀

[28]ܡܙܡܘܪ̈ܐ. 82: 6

[29]ܣܝܡܬܐ ܕܬܐܘܡܐ ܐܘܕܘ. ܦܐܬܐ 76. ܡܶܫܟܳܢܳܐ ܡܶܫ̈ܟܳܢܶܐ. ܪܰܗܒܽܘܢܳܐ. ܗܡܰܝܪܳܐ. ܓܽܘܥܠܳܢܳܐ. رهن

[30]ܐ. ܩܘܪ̈ܝܢܬܝܐ. 15: 21 ـ 22

[31]ܦܪܟܣܝܣ. 1: 11

[32]ܐ. ܩܘܪ̈ܝܢܬܝܐ. 4: 16  ܐܦ 11: 1

[33]ܡܶܛܽܠ ܢܰܦܫܶܗ