ܡܺܐܡܪܳܐ ܕܫܰܒܥܺܝܢ
ܕܺܐܝܬܰܘܗ̱ܝ ܡܪܬܝܳܢܳܐ ܕܰܬܠܳܬܳܐ. ܕܶܐܬܶܐܡܰܪ ܒܰܐܪܒܥܳܐ ܒܫܰܒܳܐ ܕܦܶܣܟܳܐ[1] ܩܰܕܺܝܫܳܐ ܐܰܘܟܺܝܬ ܚܰܫܳܐ ܐܰܝܟ ܥܝܳܕܳܐ.
70: ܠܳܐ ܐ̱ܢܳܫ ܟܰܕ ܡܶܬܚܰܫܰܒ܆ ܕܟܰܕ ܡܶܬܟܪܶܟ ܚܽܘܕܪܳܐ ܕܫܰܢ̱ܬܳܐ ܠܶܗ ܟܰܕ ܠܶܗ ܠܝܰܘܡܳܐ ܡܰܝܬܶܐ ܠܰܢ܆ ܥܰܡܳܗ̇ ܟܰܕ ܥܰܡܳܗ̇ ܕܗܽܘܦܽܘܬܶܣܺܝܤ ܟܰܕ ܗܽܘ ܟܰܕ ܗܽܘ ܙܰܒ̈ܢܺܝܢ ܣܰܓܺܝ̈ܳܐܢ ܐܺܝܬܰܘܗ̱ܝ ܐܳܦ ܗܰܘ ܕܡܰܠܶܦ܆ ܝܰܬܺܝܪܬܳܐ ܢܶܚܫܒܺܝܗ̇ ܠܡܰܫܡܥܳܢܽܘܬܳܐ ܗܳܕܶܐ ܕܩܰܪܺܝܒܳܐ܆ ܐܰܝܟ ܡܰܢ ܕܗܺܝ ܡܰܠܦܳܢܽܘܬܳܐ ܗܶܢܶܝܢ ܟܰܕ ܗܶܢܶܝܢ ܥܬܺܝܕܳܐ ܕܬܺܐܡܰܪ: ܘܰܒܗܳܠܶܝܢ ܕܗܳܐ ܡܶܢ ܟܰܕܽܘ ܝܺܕܺܝ̈ܥܳܢ ܣܪܺܝܩܳܐܺܝܬ ܥܠܰܝܗܶܝܢ ܟܰܕ ܥܠܰܝܗܶܝܢ ܕܡ̈ܶܠܶܐ ܬܶܬܟܪܶܟ. ܐܳܦ ܓܶܝܪ ܗܰܘ ܕܕܰܐܝܟ ܗܳܢܳܐ܆ ܕܛܳܥܶܐ ܠܶܗ ܡܶܣܬܒܰܪ ܠܺܝ ܐܳܕܫܳܐ ܗܳܢܳܐ ܕܡܶܠܬܳܐ܆ ܘܰܕܒܺܐܝܕܰܘ̈ܗ̱ܝ ܕܺܝܠܶܗ ܕܟܽܘܢܳܝܳܐ ܒܰܠܚܽܘܕܰܘܗ̱ܝ ܡܶܬܓܠܶܐ ܘܡܶܬܺܝܕܰܥ. ܡܰܪܬܝܳܢܽܘܬܳܐ ܓܶܝܪ ܐܰܘܟܺܝܬ ܡܰܙܥܩܳܢܽܘܬܳܐ ܘܰܡܙܰܡܢܽܘܬܳܐ ܡܶܫܬܰܡܗܳܐ܆ ܗܶܢܶܝܢ ܟܰܕ ܗܶܢܶܝܢ ܐܳܦ ܬܰܪܬܶܝܢ ܙܰܒ̈ܢܺܝܢ ܐܳܦ ܥܣܰܪ܆ ܠܳܐ ܕܶܝܢ ܡܰܡܶܐܢ ܐ̱ܢܳܐ ܕܳܐܦ ܙܰܒ̈ܢܳܬܳܐ ܣܰܓܺܝ̈ܐܬܳܐ ܐܺ݀ܡܰܪ: ܕܡܰܙܡܳܐ ܐܰܘ ܟܺܝܬ ܡܰܙܥܩܳܐ ܒܗܳܢܽܘܢ ܕܠܳܐ ܡܰܐܪܙܺܝܢ ܒܡܰܫܡܰܥܬܗܽܘܢ܆ ܟܒܰܪ ܕܶܝܢ ܐܳܦ ܒܗܳܢܽܘܢ ܕܡܰܐܪܙܺܝܢ܆ ܐܰܝܟܰܢܳܐ ܕܡܶܕܶܡ ܣܰܓܺܝܳܐܐ ܐܰܘ ܐܳܦ ܕܝܰܬܺܝܪ ܡܶܢ ܟܽܠ ܙܥܽܘܪ܆ ܡܶܢ ܗܳܠܶܝܢ ܕܡܶܬܐܰܡܪ̈ܳܢ ܢܶܠܒܟܽܘܢ.
ܐܰܟܙܢܳܐ ܓܶܝܪ ܕܰܐ̱ܚܪܺܬܳܐ ܗ̱ܝ ܗܳܝ ܕܢܶܒܣܰܡ ܘܰܐܚܪܺܬܐ ܗ̱ܝ ܕܝܰܬܺܝܪܳܐ ܢܶܒܣܰܡ܆ ܘܒܳܗ̇ ܒܰܕܡܽܘܬܳܐ ܐ̱ܚܪܺܬܳܐ ܗ̄ܝ ܗܳܝ ܕܢܶܙܡܰܪ ܘܰܐ̱ܚܪܺܬܐ ܗܳܝ ܕܝܰܬܺܝܪܳܐ ܢܶܙܡܰܪ܆ ܗܳܟܰܢܳܐ ܠܰܘ ܗܺܝ ܟܰܕ ܗܺܝ ܐܺܝܬܶܝܗ̇ ܗܳܝ ܕܢܶܙܱܡ ܐܰܘ ܟܺܝܬ ܢܰܙܥܶܩ܆ ܠܗܳܝ ܕܝܰܬܺܝܪܳܐ ܢܰܙܥܶܩ. ܗܳܝ ܡܰܢ ܓܶܝܪ܆ ܠܡܰܥܒܕܳܢܽܘܬܳܐ ܕܣܽܘܥܪܳܢܳܐ ܐܰܘ ܝܺܕܰܥܬܳܐ ܗܳܝ ܕܰܚܕܳܐ ܙܒܰܢ ܐܶܬܚܰܘܝܰܬ ܡܚܰܘܝܳܐ. ܗܳܝ ܕܶܝܢ܆ ܠܟܰܘܫܳܐ ܥܰܒܺܝܛܳܐ ܘܰܣܒܺܝܣܳܐ ܘܰܐܝܟܰܢܳܐ ܕܢܺܐܡܰܪ ܐ̱ܢܳܫ ܣܰܓܺܝܽܐܘܬ ܚܽܘܫܳܚܳܐ. ܡܳܕܶܝܢ ܠܳܐ ܬܡܺܝܗܳܐ܆ ܐܶܢܗܽܘ ܕܰܒܗܽܘܢ ܟܰܕ ܒܗܽܘܢ ܒܣܽܘ̈ܟܳܠܶܐ ܟܺܝܬ ܘܰܒܡ̈ܶܠܶܐ ܢܺܐܬܶܐ. ܡܶܛܽܠ ܕܳܐܦ ܐܶܡ̈ܗܳܬܳܐ ܘܰܡܪ̈ܰܒܝܳܢܝܳܬܳܐ܆ ܗܽܘ ܟܰܕ ܗܽܘ ܚܰܠܒܳܐ ܠܰܛ̈ܠܳܝܶܐ ܡܰܫ̈ܦܥܳܢ. ܘܡܶܢ ܒܳܬܰܪ ܗܳܢܳܐ܆ ܘܠܶܗ ܟܰܕ ܠܶܗ ܠܠܰܚܡܳܐ ܐܶܢ ܬܶܓܕܰܫ ܒܫܶܢܰܝܗܶܝܢ ܡܕܰܩ̈ܩܳܢ܆ ܟܰܕ ܒܡܶܐܟܽܘܠܬܳܐ ܗܳܝ ܕܝܰܬܺܝܪ ܚܠܺܝܡܳܐ ܒܺܐܝܕܳܐ ܒܺܐܝܕܳܐ ܡܥܰܝ̈ܕܳܢ ܠܗܽܘܢ. ܘܰܒܗܽܘܢ ܟܰܕ ܒܗܽܘܢ ܒܩܽܘܪ̈ܛܡܶܐ ܕܡ̈ܶܠܶܐ ܘܢܽܘܨܳܪ̈ܶܐ ܡܶܬܚܰܫ̈ܚܳܢ܆ ܟܰܕ ܡܠܰܓ̈ܠܓܳܢ ܐܰܟܚܕܳܐ ܥܰܡܗܽܘܢ ܘܰܡܕܰܡ̈ܝܳܢ ܒܠܳܐ ܡܫܰܡܠܝܽܘܬܳܗ̇ ܕܒܰܪ̱ܬ ܩܳܠܳܐ܆ ܘܡܶܠܽܘܢ̈ܝܳܬܳܐ ܕܰܡܦܰܣ̈ܩܳܢ ܪ̈ܳܬܡܳܢ ܐܰܟܚܕܳܐ ܘܰܡܡܰܠ̈ܠܳܢ ܥܰܡܗܽܘܢ܆ ܘܰܠܘܳܬ ܒܰܪ̱ܬ ܩܳܠܳܐ ܡܫܰܡܠܰܝܬܳܐ ܘܰܡܪܺܝܩܬܳܐ ܘܺܝܕܺܝܥܬܳܐ ܡܗܰܕܝ̈ܳܢ ܠܗܽܘܢ.
ܠܰܘ ܠܒܰܪ ܡܶܢ ܢܺܝܫܳܐ ܕܶܝܢ ܪܳܡܶܐ ܐ̱ܢܳܫ܆ ܟܰܕ ܐܳܡܰܪ ܕܳܐܕܫܳܐ ܗܳܢܳܐ ܕܡܰܠܦܳܢܽܘܬܳܐ ܗܳܕܶܐ ܕܣܺܝܡܳܐ ܩܕܳܡܰܝܢ܆ ܐܳܦ ܡܶܛܽܠ ܗܳܕܶܐ ܐܶܬܶܐܡܰܪ ܩܰܐܛܺܝܟܺܝܣܺܝܣ[2] ܐܰܘܟܺܝܬ ܡܰܪܬܝܳܢܽܘܬܳܐ܆ ܗܳܢܰܘ ܕܶܝܢ ܡܰܙܥܩܽܘܬ ܩܳܠܐ ܕܒܶܐܕܢ̈ܶܐ܆ ܡܶܛܽܠ ܗܳܝ ܕܰܐܝܟ ܗܰܘ ܕܡܶܢ ܫܡܰܝܳܐ ܘܡܶܢ ܪܰܘܡܳܐ܆ ܙܡܳܡܳܐ ܡܶܕܶܡ ܐܰܘ ܟܺܝܬ ܩܳܠܳܐ ܕܬܶܐܘܠܘܓܺܝܰܐ ܢܳܚܶܬ ܠܗܳܢܽܘܢ ܕܫܳܡܥܺܝܢ ܠܦܽܘܬ ܡܰܕܪܟܳܢܽܘܬܗܽܘܢ. ܡܶܢ ܠܥܶܠ ܓܶܝܪ ܠܗܳܢܽܘܢ ܕܰܠܬܰܚܬ ܒܕܽܘܟ ܐܺܝܬܰܝܗܽܘܢ ܘܥܰܠ ܐܰܪܥܳܐ ܐܳܬܶܝܢ܆ ܡܰܙܥܶܩ ܐܰܘ ܟܺܝܬ ܡܰܙܶܡ ܘܩܳܥܶܐ.
ܐܳܦ ܚܢܰܢ ܗܳܟܺܝܠ ܗܳܢܽܘܢ ܕܰܠܬܶܫܡܶܫܬܳܐ ܡܶܟܺܝܠ ܕܗܳܝ ܕܢܰܠܶܦ ܐܶܬܗܰܝܡܰܢܰܢ܆ ܟܰܕ ܒܰܙܡܳܡܳܐ ܐܰܘܟܺܝܬ ܒܩܳܠܳܐ ܕܡܶܢ ܬܰܡܳܢ ܡܶܬܢܰܩܫܺܝܢܰܢ ܒܠܶܒܰܢ܆ ܐܶܢܗܽܘ ܕܢܶܗܘܶܐ ܐܺܝܬܰܘܗ̱ܝ ܣܦܺܝܩܳܐ ܘܰܡܕܰܟܝܳܐ ܡܶܢ ܚܽܘܫܳܒ̈ܶܐ ܗܽܘ̈ܠܳܢܳܝܶܐ܆ ܒܰܕܡܽܘܬ ܩܳܠܐ ܗܰܘ ܕܰܒܡܰܕܒܪ̈ܶܐ ܘܰܒܕܽܘܟ̈ܝܳܬܳܐ ܚܰܪ̈ܒܳܬܳܐ[3]܆ ܥܰܡ ܙܡܳܡܳܐ ܐܰܘܟܺܝܬ ܩܳܠܐ ܡܰܙܡܺܝܢ ܚ̱ܢܰܢ܆ ܗܳܠܶܝܢ ܐ̱ܚܪ̈ܳܝܳܬܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܘܳܐܦܠܳܐ ܗܽܘ ܙܡܳܡܳܐ ܐܰܘܟܺܝܬ ܩܳܠܳܐ ܕܕܽܘܓ̈ܡܰܛܰܐ ܕܫܰܦܺܝܪܽܘܬ ܕܶܚܠܬܳܐ ܐܺܝܬܰܘܗ̱ܝ ܕܺܝܠܰܢ܆ ܐܶܠܳܐ ܐ̱ܚܪܳܝܬܶܗ ܕܰܙܡܳܡܳܐ. ܟܒܰܪ ܕܶܝܢ ܐܳܦ ܗܳܕܶܐ܆ ܠܗܰܘ ܕܩܳܥܶܐ ܙܳܕܶܩ ܕܢܶܚܫܒܺܝܗ̇ ܐܶܢ ܢܰܟܦܳܐܺܝܬ ܢܶܬܒܰܩܶܐ܆ ܡܶܛܽܠ ܕܳܐܦ ܗܳܠܶܝܢ ܕܝܳܥ̈ܝܳܢ ܕܺܝܠܗܽܘܢ ܕܙܰܪ̈ܥܶܐ ܐܺܝܬܰܝܗܶܝܢ.
ܐܰܝܟܰܢܳܐ ܗܳܟܺܝܠ ܐ̱ܢܳܫ ܠܡܶܠܬܳܐ ܗܳܝ ܕܡܶܢ ܫܡܰܝܳܐ ܐܺܝܬ ܠܳܗ̇ ܥܶܠ̈ܠܳܬܳܐ ܢܶܣܒܰܪ ܕܫܰܘܝܰܬ ܠܣܰܒܥܳܐ ܐܺܝܬܶܝܗ̇ ܘܝܰܬܺܝܪܬܳܐ܆ ܐܳܦ ܟܰܕ ܙܰܒ̈ܢܳܬܳܐ ܣܰܓܺܝ̈ܳܐܬܳܐ ܡܶܬܐܰܡܪܳܐ. ܘܠܳܐ ܐ̱ܢܳܫ܆ ܐܶܢ ܠܰܘ ܕܟܽܠ ܟܽܠܶܗ ܢܶܗܘܶܐ ܐܺܝܬܰܘܗ̱ܝ ܣܦܺܝܩܳܐ ܡܶܢ ܗܰܘܢܳܐ[4] ܘܡܶܢ ܚܽܘܫܳܒ̈ܶܐ. ܡܳܕܶܝܢ܆ ܐܳܦܠܳܐ ܡܶܢ ܢܰܗܺܝܪܽܘܬܶܗ ܕܫܶܡܫܳܐ ܗܳܘܝܳܐ ܣܰܒܥܽܘܬܳܐ ܒܗܳܢܽܘܢ ܕܚܳܙܶܝܢ܆ ܐܰܝܟ ܡܰܢ ܕܗܳܠܶܝܢ ܩܰܕܡܳܝ̈ܳܬܳܐ ܘܥܰܬܺܝ̈ܩܳܬܳܐ ܡܰܢܗܪܳܐ ܘܰܒܟܽܠܙܒܰܢ ܗܶܢܶܝܢ ܟܰܕ ܗܶܢܶܝܢ. ܕܡܶܬܛܰܠܶܐ ܓܶܝܪ ܡܶܣܬܒܰܪ ܟܽܠ ܝܽܘܡ܆ ܒܢܰܨܺܝܚܽܘܬܳܐ ܠܳܐ ܡܶܣܬܰܒܥܳܢܺܝܬܳܐ. ܕܡܶܠܬܳܐ ܕܶܝܢ ܐܰܠܳܗܳܝܬܳܐ ܘܰܕܫܶܡܫܳܐ܆ ܕܕܰܐܝܟ ܐܰܝ̇ܕܳܐ ܗ̱ܝ ܡܶܨܥܳܝܽܘܬܳܐ܆ ܨܳܒܶܐ ܐ̱ܢܳܐ ܡܰܢ ܕܺܐ݀ܡܰܪ܆ ܟܡܳܐ ܕܺܐܝܬܶܝܗ̇ ܕܢܽܘܗܪܳܐ ܗܰܘ ܡܶܬܗܰܘܢܳܢܳܐ ܠܘܳܬ ܗܳܢܳܐ ܡܶܬܪܰܓܫܳܢܳܐ܆ ܚܳܙܶܐ ܐ̱ܢܳܐ ܠܶܗ ܕܶܝܢ ܠܦܽܘܚܳܡܳܐ ܕܰܡܫܰܡܠܝܳܐܺܝܬ ܚܰܣܺܝܪ܆ ܠܰܘ ܟܽܠܶܗ ܗܳܢܳܐ܆ ܟܡܳܐ ܕܣܰܒܥܳܐ ܗܰܘ ܡܨܰܥܪܳܢܳܐ ܕܚܺܝܩ܆ ܐܰܘܟܺܝܬ ܛܪܺܝܕ ܘܡܰܣܠܰܝ܆ ܡܶܛܽܠ ܟܺܝܬ ܕܳܐܦ ܒܶܗ ܒܰܙܡܳܡܳܐ ܐܰܘ ܟܺܝܬ ܩܳܠܳܐ ܒܰܠܚܽܘܕܰܘܗ̱ܝ܆ ܥܽܘܩܣܳܐ ܠܳܐ ܡܶܬܠܰܒܟܳܢܳܐ ܕܪܶܓܬܳܐ ܪܳܡܝܳܐ ܒܰܢ. ܘܣܳܗܶܕ ܕܰܘܺܝܕ ܟܰܕ ܗܳܟܰܢܳܐ ܐܳܡܰܪ: ܐܰܟܙܢܳܐ ܕܡܶܬܝܰܐܰܒ ܐܰܝܠܳܐ ܠܘܳܬ ܡܥܺܝ̈ܢܶܐ ܕܡܰܝ̈ܳܐ. ܗܳܟܰܢܳܐ ܡܶܬܝܰܐܒܳܐ ܢܰܦܫܳܐ ܕܺܝܠܝ ܠܘܳܬܳܟ ܐܰܠܳܗܳܐ. ܨܗܳܬ ܢܰܦܫܝ ܠܘܳܬ ܐܰܠܳܗܐ ܚܰܝܳܐ܆ ܕܠܶܐܡܰܬܝ ܐܻ݀ܬܶܐ ܘܶܐ݀ܬܚܙܶܐ ܠܦܰܪܨܽܘܦܳܐ ܕܰܐܠܳܗܳܐ. ܗܘܰܝ̈ ܠܺܝ ܕܶܡ̈ܥܰܝ ܠܰܚܡܳܐ ܒܺܐܝܡܳܡܳܐ ܘܰܒܠܺܠܝܳܐ܆ ܟܰܕ ܡܶܬܶܐܡܰܪ ܗ̱ܘܳܐ ܠܺܝ ܒܟܽܠ ܝܽܘܡ ܕܰܐܝܟܰܘ ܐܰܠܳܗܳܟ. ܗܳܠܶܝܢ ܐܶܬܕܰܟܪܶܬ. ܘܶܐܫܕܶܬ ܢܰܦܫܝ ܥܠܰܝ܆ ܕܶܐ݀ܥܒܰܪ ܒܕܽܘܟܬܳܐ ܕܡܰܫܟܢܳܐ ܬܡܺܝܗܳܐ ܥܕܰܡܳܐ ܠܒܰܝܬܶܗ ܕܰܐܠܳܗܳܐ܆ ܒܩܳܠܳܐ ܕܰܪ̈ܘܳܙܶܐ ܘܰܕܬܰܘܕܺܝܬܳܐ ܕܪܰܘܒܳܐ[5] ܕܰܡܥܰܕܥܶܕ[6].
ܐܳܘ ܡܶܢ ܬܶܕܡܽܘܪܬܳܐ. ܪܳܐܶܓ ܗ̱ܘܺܝܬ ܐܺܡܰܪ ܠܰܐܠܳܗܳܐ. ܒܳܥܶܐ ܗܘܺܝܬ ܕܶܐ݀ܫܟܰܚ ܠܗܰܘ ܕܡܶܬܪܚܶܡ. ܨܗܶܐ ܗܘܺܝܬ ܫܰܘܝܳܐܺܝܬ ܠܰܐܝ̈ܠܶܐ. ܟܰܕ ܠܪܶܓܬܳܐ ܕܺܝܠܺܝ ܠܳܐ ܡܶܫܟܰܚ ܗ̱ܘܺܝܬ܆ ܡܶܐܟܽܘܠܬܳܐ ܥܳܒܶܕ ܗ̱ܘܺܝܬ ܠܕܶܡ̈ܥܶܐ. ܠܦܽܘܫܳܟܳܐ ܕܚܽܘܫܳܒ̈ܶܐ ܕܳܐܡܰܪ ܗ̱ܘܳܐ ܠܺܝ ܕܰܐܝܟܳܐ ܐܺܝܬܰܘܗ̱ܝ ܐܰܠܳܗܳܟ܆ ܫܳܠܶܡ ܗ̱ܘܺܝܬ ܘܠܳܐ ܣܳܟ. ܘܳܐܦܠܳܐ ܬܽܘܒ ܣܰܒܪܳܐ ܦܶܣܩܶܬ. ܠܟܽܠܶܗ ܕܶܝܢ ܚܰܝܠܳܐ ܕܢܰܦܫܳܐ ܕܺܝܠܝ܆ ܠܘܳܬܳܗ̇ ܕܪܶܓܬܳܐ ܣܰܦܶܩܬ̊ܶܗ. ܘܟܰܕ ܙܡܳܡܳܐ[7] ܡܶܕܶܡ ܠܡܰܚܣܶܢ ܗܳܝܕܶܝܢ ܩܰܒܠܶܬ܆ ܗܽܘ ܕܶܝܢ ܙܡܳܡܳܐ ܐܰܘܟܺܝܬ ܩܳܠܳܐ ܥܺܐܕܳܢܳܝܳܐ ܐܺܝܬܰܘܗ̱ܝ ܗ̱ܘܳܐ܆ ܕܐ̱ܢܳܫܺܝ̈ܢ ܕܪܳܘܙܺܝܢ ܗ̱ܘܰܘ ܘܰܡܫܰܒܚܺܝܢ܆ ܘܫܳܪܽܘܬܳܐ ܕܡܶܠܬܳܐ ܡܶܫܬܰܪܶܝܢ ܗ̱ܘܰܘ ܘܡܶܬܒܰܣܡܺܝܢ܆ ܘܰܒܗܰܘ ܐܰܝܟ ܕܒܰܡܗܰܕܝܳܢܳܐ ܡܶܬܚܰܫܰܚ ܗ̱ܘܺܝܬ܆ ܕܶܐ݀ܥܒܰܪ ܒܡܰܫܟܢܳܐ ܬܡܺܝܗܳܐ ܡܫܰܪܶܐ ܗ̱ܘܺܝܬ. ܗܳܢܰܘ ܕܶܝܢ ܕܶܐ݀ܪܕܶܐ ܘܶܐ݀ܥܒܰܪ ܠܬܶܐܽܘܪܺܝܰܐ ܟܝܳܢܳܝܬܳܐ ܗܳܝ ܕܡܶܬܚܰܙܝܳܐ ܒܥܳܠܡܳܐ ܗܳܢܳܐ ܕܡܶܬܚܙܶܐ܆ ܗܰܘ ܕܺܐܝܬܰܘܗ̱ܝ ܚܕܳܪ̈ܰܝܢ ܒܰܕܡܽܘܬ ܡܰܫܟܢܳܐ ܡܶܕܶܡ ܬܡܺܝܗܳܐ܆ ܘܗܳܟܰܢܳܐ ܐܶ݀ܡܛܶܐ ܠܘܳܬ ܒܰܝܬܳܐ ܕܰܐܠܳܗܳܐ܆ ܠܡܶܬܗܰܘ̈ܢܳܢܶܐ ܘܰܕܠܳܐ ܓܫܽܘܡ. ܒܗܳܠܶܝܢ ܓܶܝܪ ܝܰܬܺܝܪܳܐܺܝܬ ܒܰܕܡܽܘܬ ܒܰܝܬܳܐ ܥܳܡܰܪ ܐܰܠܳܗܳܐ܆ ܘܡܶܢ ܗܳܠܶܝܢ ܡܶܬܺܝܕܰܥ܆ ܟܰܕ ܠܳܐ ܡܶܬܕܰܪܟܳܢܳܐ ܐܺܝܬܰܘܗ̱ܝ ܒܰܟܝܳܢܳܐ ܘܠܳܐ ܡܶܬܩܰܪܒܳܢܳܐ. ܝܰܠܕܳܐ ܕܕܰܐܝܟ ܗܳܠܶܝܢ ܙܡܳܡ̈ܶܐ ܐܰܘܟܺܝܬ ܩ̈ܳܠܶܐ ܐܺܝܬܶܝܗ̇ ܠܰܢ ܗܳܕܶܐ ܡܰܙܡܢܽܘܬܳܐ ܐܰܘܟܺܝܬ ܡܰܪܬܝܳܢܽܘܬܳܐ܆ ܕܗܳܢܽܘܢ ܕܥܺܐܕܳܢܳܝ̈ܳܬܳܐ ܡܰܙܡܺܝܢ ܘܡܰܙܥܩܺܝܢ ܠܰܢ܆ ܘܰܕܪ̈ܰܚܺܝܩܳܢ ܡܶܢ ܟܽܠܳܗ̇ ܣܰܒܥܽܘܬܳܐ܆ ܘܕܰܡܚܰܬ̣ܚ̈ܬ̣ܳܢ ܘܰܡܓܰܪ̈ܓܳܢ ܠܰܢ ܠܘܳܬ ܗܳܢܽܘܢ ܕܡܶܢܗܽܘܢ ܐܺܝܬܰܝܗܽܘܢ ܗܶܢܽܘܢ ܙܡܳܡ̈ܶܐ ܘܰܡܢܰܒܪ̈ܫܳܢ ܠܪܶܓܬܳܐ ܕܺܝܠܰܢ.
ܐܰܝܬܳܐ ܗܳܟܺܝܠ ܡܶܛܽܠ ܟܺܝܬ ܕܥܺܐܕܳܐ ܗܝ ܗܳܝ ܕܢܶܬܕܟܰܪ ܠܰܐܠܳܗܳܐ. ܐܶܬܕܰܟܪܶܬ ܓܶܝܪ ܠܰܐܠܳܗܳܐ ܘܰܚܕܺܝܬ ܐܳܡܰܪ ܗܰܘ ܕܶܐܡܰܪ: ܢܰܘܕܶܐ ܕܰܡܗܰܝܡܢܺܝܢ ܚ̱ܢܰܢ ܒܚܰܕ ܐܰܠܳܗܳܐ ܐܰܒܳܐ ܐܰܚܺܝܕ ܟܽܠ. ܘܡܶܚܕܳܐ ܒܰܪܫܳܥܬܶܗ ܢܶܬܡܠܶܐ ܦܽܘܡܳܐ ܕܺܝܠܰܢ ܚܰܕܽܘܬܳܐ܆ ܘܠܶܫܳܢܳܐ ܕܺܝܠܰܢ ܪܘܳܙܳܐ[8]܆ ܐܰܝܟܰܢܳܐ ܕܰܟܬܺܝܒ.
ܘܰܐܝܟܰܢܳܐ ܟܒܰܪ ܬܺܐܡܰܪ ܠܰܡܗܰܝܡܳܢܽܘ ܒܚܰܕ ܐܰܠܳܗܳܐ ܦܳܩܶܕ ܐܰܢ̱ܬ ܠܺܝ܆ ܟܰܕ ܥܬܺܝܕ ܐܰܢ̱ܬ ܕܬܺܐܡܰܪ ܠܺܝ ܡܶܚܕܳܐ ܠܰܡܗܰܝܡܳܢܽܘ ܐܳܦ ܒܰܒܪܶܗ ܝܺܚܺܝܕܳܝܳܐ. ܐܺܝܛܰܐ ܠܳܐ ܫܳܡܰܥ ܐܰܢ̱ܬ ܕܟܰܕ ܐܶܡܪܶܬ ܒܚܰܕ ܐܰܠܳܗܳܐ܆ ܢܰܩܺܝܦܳܐܺܝܬ ܐܰܘܣܦܶܬ ܐܳܦ ܐܰܒܳܐ܆ ܘܰܕܥܰܡ ܫܡܳܐ ܗܰܘ ܕܰܐܒܳܐ ܥ̣ܰܠ ܐܰܟܚܕܳܐ ܐܳܦ ܫܽܘܘܕܳܥܳܐ ܕܰܒܪܳܐ܆ ܐܳܦ ܓܶܝܪ ܐܰܒܳܐ܆ ܕܰܒܪܳܐ ܡܶܢ ܟܽܠܦܪܽܘܤ ܐܺܝܬܰܘܗ̱ܝ ܐܰܒܳܐ܆ ܐܰܝܟܰܢܳܐ ܕܡܳܪܳܢܳܐܺܝܬ ܠܰܘ ܒܡܶܠܬܳܐ ܣܦܺܝܩܬܳܐ܆ ܐܶܠܳܐ ܒܣܽܘܥܪܳܢܳܐ ܢܶܗܘܶܐ ܐܺܝܬܰܘܗ̱ܝ ܐܰܒܳܐ. ܡܩܰܘܶܐ ܕܶܝܢ ܐܳܦ ܗܳܟܰܢܳܐ ܚܰܕ ܐܰܠܳܗܳܐ ܐܰܝܟ ܐܰܒܳܐ. ܐܳܦܠܳܐ ܓܶܝܪ ܐܺܝܬ ܐ̱ܚܪܺܢܳܐ ܐܰܒܳܐ ܥܰܡܶܗ. ܠܚܽܘܕܰܘܗ̱ܝ ܓܶܝܪ ܠܟܽܠܳܗ̇ ܗܳܝ ܕܢܶܗܘܶܐ ܐܺܝܬܰܘܗ̱ܝ ܐܰܒܳܐ ܐܺܝܬ ܠܶܗ܆ ܟܰܕ ܠܰܐ̱ܚܪܺܢܳܐ ܠܳܐ ܡܶܬܦܰܠܓܳܐ. ܡܶܛܽܠ ܟܺܝܬ ܕܠܰܘ ܡܶܢ ܡܶܕܶܡ ܐ̱ܚܪܺܝܢ ܐܺܝܬܰܘܗ̱ܝ܆ ܐܶܠܳܐ ܠܳܐ ܝܺܠܺܝܕܳܐܺܝܬ ܘܰܡܬܽܘܡܳܐܺܝܬ ܐܺܝܬܰܘܗ̱ܝ ܗ̱ܘܳܐ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܐܰܝܟ ܡܳܐ ܕܳܐܦ ܒܪܳܐ ܠܟܽܠܳܗ̇ ܗܳܝ ܕܢܶܗܘܶܐ ܐܺܝܬܰܘܗ̱ܝ ܒܪܳܐ ܐܺܝܬ ܠܶܗ܆ ܟܰܕ ܝܺܠܺܝܕܳܐܺܝܬ ܐܺܝܬܰܘܗ̱ܝ ܡܶܢ ܐܰܒܳܐ. ܒܪܰܡ ܐܳܦ ܗܽܘ ܕܠܳܐ ܙܰܒܢܳܐ ܘܰܡܬܽܘܡܳܐܺܝܬ.
ܘܰܐܝܟܰܢܳܐ ܡܶܫܟܚܳܐ ܠܡܶܣܬܰܟܳܠܽܘ ܒܪܳܐ܆ ܘܠܰܘ ܐ̱ܚܪܺܢܳܐ ܒܙܰܒܢܳܐ ܘܡܶܢ ܒܳܬܰܪ ܐܰܒܳܐ. ܐܰܝܟܰܢܳܐ܆ ܐܶܢ ܬܰܪܚܩܺܝܗ̇ ܠܬܰܪܥܺܝܬܳܟ ܡܶܢ ܡܰܘ̈ܠܳܕܶܐ ܦܰܓܪ̈ܳܢܳܝܶܐ܆ ܗܳܢܽܘܢ ܟܺܝܬ ܕܳܐܦ ܒܙܰܒܢܳܐ ܡܶܬܩܰܝܡܺܝܢ܆ ܘܡܶܢ ܪܶܕܝܳܐ ܐܺܝܬ ܠܗܽܘܢ ܡܰܥܒܰܪܬܳܐ ܕܰܠܘܳܬ ܗܳܝ ܕܢܶܗܘܽܘܢ ܐܺܝܬܰܝܗܽܘܢ. ܚܢܰܢ ܓܶܝܪ ܒܙܰܒܢܳܐ ܗܳܘܶܝܢܰܢ ܐܰܒܳܗ̈ܶܐ܆ ܘܪܶܕܝܳܐ ܩܰܕܺܝܡ ܠܝܰܠܕܳܐ ܕܰܒ̈ܢܰܝܳܐ ܕܺܝܠܰܢ. ܘܟܰܕ ܗܘ̣ܰܝܢܰܢ ܒܢܰܝ̈ܳܐ ܕܐ̱ܢܳܫܺܝ̈ܢ܆ ܐܳܦ ܐܰܒܳܗ̈ܶܐ ܕܐ̱ܢܳܫܺܝ̈ܢ ܐ̱ܚܪ̈ܳܢܶܐ ܐܺܝܬܰܝܢ. ܠܰܒܪܳܐ ܕܶܝܢ ܕܰܐܠܳܗܳܐ ܘܰܐܒܳܐ܆ ܐܶܡܰܬܝ ܕܫܳܡܰܥ ܐܰܢ̱ܬ ܒܰܟ̈ܬܳܒܶܐ ܟܳܗ̈ܢܳܝܶܐ܆ ܕܡܶܠܬܳܐ ܘܨܶܡܚܳܐ ܡܶܬܟܪܶܙ܆ ܡܰܪܕܽܘܬܳܐ ܢܶܗܘܽܘܢ ܠܳܟ ܗܶܢܽܘܢ ܫܡܳܗ̈ܶܐ܆ ܘܡܶܢܗܽܘܢ ܐܶܬܥܰܠܳܐ ܘܰܦܪܰܚ܆ ܠܘܳܬ ܡܰܘܠܳܕܳܐ ܗܰܘ ܕܠܳܐ ܚܰܫܳܐ ܘܰܕܠܳܐ ܓܫܽܘܡ ܘܰܡܬܽܘܡܳܝܳܐ. ܗܰܘܢܳܐ ܓܶܝܪ ܕܠܳܐ ܚܰܫܳܐ[9] ܝܳܠܶܕ ܠܳܗ̇ ܠܡܶܠܬܳܐ܆ ܘܠܳܐ ܗ̱ܘܳܐ ܐܰܝܟܰܢܳܐ ܕܦܰܓܪ̈ܶܐ ܡܟܰܢܶܝܢ܆ ܡܝܰܩܢܳܢܺܝܬܳܐ ܘܰܡܫܰܘܕܥܳܢܺܝܬܳܐ ܕܡܶܬܬܙܺܝܥܳܢܽܘܬܳܐ ܗܳܝ ܡܶܬܗܰܘܢܳܢܺܝܬܳܐ ܕܰܒܥܽܘܡܩܳܐ܆ ܘܰܕܠܶܗ ܠܗܰܘܢܳܐ ܟܽܠܶܗ ܗܰܘ ܠܳܐ ܡܶܬܚܰܙܝܳܢܳܐ ܘܰܕܠܳܐ ܝܺܕܺܝܥ܆ ܗܺܝ ܒܳܗ̇ ܡܨܰܠܡܳܐ. ܡܶܛܽܠܗܳܕܶܐ ܦܰܘܠܽܘܤ ܡܰܢ܆ ܨܰܠܡܳܐ ܕܰܐܠܳܗܳܐ ܠܳܐ ܡܶܬܚܰܙܝܳܢܳܐ ܟܰܢ̣ܝܶܗ ܠܰܒܪܳܐ[10]. ܐܶܫܰܥܝܳܐ[11] ܕܶܝܢ܆ ܡܰܠܰܐܟܳܐ ܕܬܰܪܥܺܝܬܳܐ ܪܰܒܬܳܐ܆ ܐܰܝܟ ܕܰܠܡܶܠܬܳܐ ܕܗܰܘܢܳܐ ܘܰܐܒܳܐ ܗܰܘ ܕܰܠܗܰܠ ܡܶܢ ܟܽܠ. ܟܰܕ ܕܶܝܢ ܠܶܗ ܟܰܕ ܠܶܗ ܨܶܡܚܳܐ ܕܬܶܫܒܽܘܚܬܳܐ ܡܶܫܟܰܚ ܐܰܢ̱ܬ ܠܶܗ ܕܰܡܫܡܗ܆[12] ܐܶܬܚܰܫܒ ܠܠܳܐ ܙܰܒܢܳܝܽܘܬܶܗ ܘܠܰܡܬܽܘܡܳܝܽܘܬܶܗ ܕܡܰܘܠܳܕܳܐ. ܐܰܟܙܢܳܐ ܓܶܝܪ ܕܰܠܨܶܡܚܳܐ ܘܰܠܡܰܢܗܪܳܢܽܘܬܳܐ ܫܶܡܫܳܢܳܝܬܳܐ܆ ܠܳܐ ܐ̱ܢܳܫ ܐܳܡܰܪ ܠܳܗ̇ ܡܶܬܦܰܪܫܳܢܺܝܬܳܐ ܡܶܢ ܫܶܡܫܳܐ ܗܰܘ ܕܡܰܨܡܰܚ ܐܰܘ ܡܰܢܗܰܪ܆ ܘܳܐܦܠܳܐ ܬܽܘܒ ܠܳܗ̇ ܠܓܺܝܓܠܳܐ ܗܳܝ ܐܳܚܽܘܕܬܳܐ ܕܺܝܠܗܽܘܢ ܕܙܰܠܺܝ̈ܩܶܐ܆ ܗܳܕܶܐ ܓܶܝܪ ܐܺܝܬܶܝܗ̇ ܫܶܡܫܳܐ ܕܡܶܬܦܰܪܫܳܐ ܒܰܡܢܳܬܳܐ ܡܶܕܶܡ ܕܫܳܥܬܳܐ ܡܶܢ ܡܰܢܗܪܳܢܽܘܬܳܐ ܒܰܝܬܳܝܬܳܐ ܕܺܝܠܳܗ̇܆ ܗܳܟܰܢܳܐ ܐܳܦ ܠܰܒܪܳܐ ܗܰܘ ܨܶܡܚܳܐ ܡܶܬܗܰܘܢܳܢܳܐ ܕܰܐܒܳܐ܆ ܟܽܠܳܗ̇ ܐܰܢܰܢܩܺܐ ܕܢܰܘܕܶܐ܆ ܕܰܫܘܶܐ ܒܰܡܬܽܘܡܳܝܽܘܬܳܐ ܐܺܝܬܰܘܗ̱ܝ ܠܗܰܘ ܕܰܐܨܡܚܶܗ ܘܠܳܐ ܡܶܬܡܰܠܠܳܢܳܐܺܝܬ ܐܰܕܢܚܶܗ. ܘܳܐܦ ܠܰܐܒܳܐ ܠܳܐ ܢܶܩܕܽܘܡ ܢܶܣܬܰܟܠܺܝܘܗ̱ܝ ܒܡܰܚܫܰܒܬܳܐ ܙܰܒܢܳܐܺܝܬ܆ ܩܕܳܡ ܝܰܠܕܶܗ ܗܰܘ ܕܰܫܘܶܐ ܠܶܗ ܒܰܡܬܽܘܡܳܝܽܘܬܳܐ.
ܐܰܪܰܐ ܗܳܟܺܝܠ ܟܰܕ ܗܳܠܶܝܢ ܫܳܡܰܥ ܐܰܢ̱ܬ܆ ܬܰܡܪܰܚ ܬܽܘܒ ܕܠܺܝܠܺܝܕܽܘܬܳܐ ܕܰܒܪܳܐ ܗܳܝ ܕܰܡܥܰܠܝܳܐ ܡܶܢ ܟܽܠ܆ ܬܦܰܚܶܡ ܡܶܕܶܡ ܡܶܢ ܝܺܠܺܝ̈ܕܘܳܬܳܐ ܗܳܠܶܝܢ ܕܥܰܠ ܐܰܪܥܳܐ ܡܶܬܓܰܪܪ̈ܳܢ ܘܰܠܘܳܬ ܗܽܘܠܶܐ ܡܶܬܥܰܪ̈ܓܠܳܢ܆ ܐܰܘ ܠܰܐܠܳܗܳܐ ܬܶܐܠܽܘܨ ܕܐ̱ܢܳܫܳܐܺܝܬ ܢܺܐܠܰܕ܆ ܐܰܝܟܰܢܳܐ ܕܰܠܗܳܠܶܝܢ ܕܺܝܠܰܢ ܢܶܬܦܰܚܰܡ܆ ܘܕܰܐܟܘܳܬܰܢ ܬܪܰܝܳܢܳܐ ܒܙܒܢܳܐ ܘܳܐܦ ܕܡܶܢ ܒܳܬܪܶܗ ܗܘ̣ܳܐ ܢܶܣܬܒܰܪ ܕܺܐܝܬ ܠܶܗ ܒܪܳܐ܆ ܘܠܳܐ ܬܦܰܪܶܫ ܢܳܩܦܳܐܺܝܬ܆ ܕܰܟܡܳܐ ܕܐܺܝܬܶܝܗ̇ ܡܶܨܥܳܝܽܘܬܳܐ ܘܪܰܚܺܝܩܽܘܬܳܐ ܒܰܝܢܳܬ ܡܰܘܠܳܕܳܐ ܐܰܠܳܗܳܝܳܐ ܘܐ̱ܢܳܫܳܝܳܐ܆ ܟܽܠܶܗ ܗܳܢܳܐ ܗܳܠܶܝܢ ܕܗܰܘ܆ ܪ̈ܰܚܺܝܩܳܢ ܟܽܘܠܳܢܳܐܺܝܬ ܡܶܢ ܗܳܠܶܝܢ ܕܰܒܗܶܝܢ ܐܺܝܬܰܝܢ܆ ܐܶܠܳܐ ܟܰܕ ܡܰܘ̈ܠܳܕܶܐ ܗܳܟܰܢܳܐ ܠܳܐ ܡܶܬܦܰܚܡܳܢܳܐܺܝܬ ܦܪܺܝܫܺܝܢ ܘܡܰܒܥܕܺܝܢ ܡܶܢ ܚ̈ܕܳܕܶܐ܆ ܒܗܳܠܶܝܢ ܕܡܶܬܚܰܙ̈ܝܳܢ ܥܠܰܝܗܽܘܢ܆ ܠܳܐ ܪܰܕܝܳܐܺܝܬ ܨܳܒܶܐ ܐܰܢ̱ܬ ܠܡܰܥܳܠܽܘ ܕܳܡܝܽܘܬܳܐ. ܗܰܘ ܠܳܐ ܓܽܘܫܡܳܢܳܐܺܝܬ ܠܳܐ ܚܰܫܳܢܳܐܺܝܬ ܘܰܕܠܳܐ ܪܶܕܝܳܐ ܝܺܠܶܕ. ܡܳܕܶܝܢ܆ ܠܳܐ ܬܡܺܝܗܳܐ ܐܶܢ ܐܳܦ ܡܬܽܘܡܳܐܺܝܬ܆ ܐܰܝܟܰܢܳܐ ܕܰܒܟܽܠܙܒܰܢ ܐܰܒܳܐ ܢܶܗܘܶܐ ܐܺܝܬܰܘܗ̱ܝ܆ ܕܰܒܪܳܐ ܗܰܘ ܕܰܒܟܽܠܙܒܰܢ ܐܺܝܬܰܘܗ̱ܝ. ܡܶܛܽܠ ܗܳܕܶܐ ܓܶܝܪ܆ ܐܳܦ ܝܺܚܺܝܕܳܝܳܐ ܡܟܰܢܰܝ. ܠܰܘ ܒܰܠܚܽܘܕ ܡܶܛܽܠ ܕܰܠܚܽܘܕܳܝܳܐ ܡܶܢ ܠܚܽܘܕܳܝܳܐ ܢܦܰܩ܆ ܐܶܠܳܐ ܕܳܐܦ ܒܰܠܚܽܘܕܳܝܽܘܬ ܙܢܳܐ܆ ܘܰܡܫܰܚܠܦܳܐܺܝܬ ܠܒܰܪ ܡܶܢ ܟܽܠ ܐܳܕܫܳܐ ܘܰܙܢܳܐ ܕܡܰܘܠܳܕܳܐ[13].
ܟܰܕ ܒܪܳܐ ܡܰܢ ܗܳܟܺܝܠ ܫܳܡܰܥ ܐܰܢ̱ܬ܆ ܡܶܢ ܫܡܳܐ ܩܛܽܘܦ ܗܳܝ ܕܰܫܘܶܐ ܒܽܐܘܣܺܝܰܐ. ܟܽܠ ܓܶܝܪ ܒܪܳܐ܆ ܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܘܰܟܝܳܢܳܐ ܐܺܝܬܰܘܗ̱ܝ ܫܰܘܝܳܐܺܝܬ ܠܰܐܒܳܐ. ܠܶܗ ܕܶܝܢ ܟܰܕ ܠܶܗ ܟܰܕ ܝܳܕܰܥ ܐܰܢ̱ܬ ܕܰܐܡܺܝܪ ܨܶܡܚܳܐ܆ ܐܶܬܚܰܫܒ ܠܫܰܘܝܽܘܬ ܡܬܽܘܡܳܝܽܘܬܶܗ ܕܰܠܘܳܬ ܗܰܘ ܕܰܐܨܡܚܶܗ ܘܰܐܕܢܚܶܗ. ܟܽܘܢܳܝܳܐ ܕܶܝܢ ܗܰܘ ܕܡܶܠܬܳܐ ܫܽܘܘܕܳܥܳܐ ܕܣܳܦܶܩ ܢܶܗܘܶܐ ܠܳܟ܆ ܕܠܳܐ ܚܳܫܽܘܫܽܘܬܳܗ̇ ܕܺܝܠܺܝܕܽܘܬܳܐ. ܠܳܐ ܚܰܫܳܢܳܐܺܝܬ ܓܶܝܪ܆ ܐܰܝܟ ܕܡܶܢ ܗܰܘܢܳܐ ܡܶܕܶܡ ܡܶܢ ܐܰܒܳܐ܆ ܡܶܠܬܳܐ ܝܺܠܺܝܕ.
ܘܰܦܫܺܝܛܳܐܺܝܬ ܠܡܺܐܡܰܪ܆ ܟܰܕ ܡܶܢ ܟܽܠ ܚܰܕ ܡܶܢ ܫܡܳܗ̈ܶܐ ܗܳܝ ܕܠܰܐܠܳܗܳܐ ܦܰܐܝܳܐ ܡܰܠܩܶܛ ܐܰܢ̱ܬ܆ ܟܽܠܗܶܝܢ ܐܰܝܠܶܝܢ ܕܰܠܘܳܬ ܕܳܡܝܽܘܬܳܐ ܡܰܚ̈ܬܳܢ ܕܡܶܣܟܺܢܽܘܬܳܐ ܕܺܝܠܰܢ܆ ܫܕܺܝ ܠܪܽܘܚܩܳܐ ܒܕܽܘܟ ܘܡܰܒܥܕܳܐܺܝܬ. ܟܽܠܶܗ ܗܳܢܳܐ ܓܶܝܪ ܦܳܐܶܫ ܚܰܕ ܫܽܘܘܕܳܥܳܐ܆ ܘܚܰܣܺܝܪ ܡܶܢ ܗܳܝ ܕܰܢܚܰܘܶܐ ܠܟܽܠܶܗ ܣܽܘܥܪܳܢܳܐ܆ ܐܰܝܟܰܢܳܐ ܕܳܐܦ ܡܶܢ ܟܽܠܗܽܘܢ ܟܺܝܬ܆ ܠܡܰܚܣܶܢ ܪ̈ܶܡܙܶܐ ܡܶܕܶܡ ܘܕܽܘܡ̈ܝܶܐ ܕܝܰܬܺܝܪ ܡܶܢ ܟܽܠ ܙܥܽܘܪܺܝܢ ܡܟܰܢܫܺܝܢܰܢ܆ ܐܰܝܟ ܗܰܘ ܕܟܺܐܦܳܐ ܠܟܺܐܦܳܐ ܐܰܟܚܕܳܐ ܢܳܩܫܺܝܢܰܢ܆ ܐܰܝܟܰܢܳܐ ܕܠܰܒܠܶܨܽܘܨܺܝܬܳܐ ܕܢܽܘܪܳܐ ܕܢܳܕܝܳܐ ܘܫܳܘܪܳܐ ܡܶܢܳܗ̇ ܢܶܚܙܶܐ.
ܒܪܰܡ ܕܶܝܢ ܟܡܳܐ ܟܡܳܐ ܫܡܳܐ ܗܰܘ ܕܡܶܠܬܳܐ ܡܶܣܬܒܰܪ ܐܰܝܟܰܢ ܕܗܽܘ܆ ܕܰܦܐܶܐ ܠܰܐܠܳܗܳܐ ܐܺܝܬܰܘܗ̱ܝ ܘܪܳܡܳܐ. ܐܶܠܳܐ ܐܶܢ ܠܰܘ ܣܰܟܽܘܠܬܳܢܳܐܺܝܬ ܬܶܕܥܺܝܘܗ̱ܝ ܕܕܰܐܠܳܗܳܐ ܐܺܝܬܰܘܗ̱ܝ ܡܶܠܬܳܐ܆ ܘܠܰܘ ܐܰܝܟ ܗܳܝ ܕܺܝܠܰܢ ܐܺܝܬܰܘܗ̱ܝ ܒܝܰܕ ܐܽܘܪ̈ܓܰܢܶܐ ܕܩܳܠܳܐ ܡܶܬܢܰܩܫܳܐ ܘܒܳܐܰܐܪ ܐܳܙܳܠ̱ܐ܆ ܗܳܝ ܕܡܶܛܽܠ ܟܺܝܬ ܕܥܰܡܶܗ ܕܡܰܦܩܳܗ̇ ܡܶܫܬܰܪܝܳܐ ܐܳܦ ܢܳܦܽܘܩܬܳܐ ܡܶܫܬܰܡܗܳܐ܆ ܐܳܦ ܠܗܳܢܳܐ ܡܶܢ ܟܽܠ ܦܪܽܘܤ ܬܶܚܫܒܺܝܘܗ̱ܝ ܕܰܕܠܳܐ ܩܽܘܝܳܡܳܐ ܐܺܝܬܰܘܗ̱ܝ. ܡܶܛܽܠܗܳܕܶܐ ܦܰܘܠܽܘܤ ܟܰܕ ܠܡܰܣܒܪܳܢܽܘܬܳܐ ܗܳܕܶܐ ܪܰܫܺܝܥܬܳܐ ܗܳܦܶܟ܆ ܨܰܠܡܳܐ ܕܰܩܢܽܘܡܶܗ ܕܰܐܒܳܐ ܫܰܡܗܶܗ[14]. ܡܶܠܬܳܐ ܕܶܝܢ ܢܳܦܽܘܩܬܳܐ ܕܰܬܝܰܩܶܢ ܠܰܩܢܽܘܡܳܐ ܠܳܐ ܡܟܰܢܶܐ. ܘܳܐܦܠܳܐ ܓܶܝܪ ܠܰܟܝܳܢܶܗ ܕܗܰܘܢܳܐ ܘܠܰܩܢܽܘܡܶܗ܆ ܝܳܕܥܺܝܢܰܢ ܡܶܢ ܡܰܦܩܗܶܝܢ ܕܡ̈ܶܠܶܐ܆ ܐܶܠܳܐ ܠܡܶܬܬܙܺܝܥܳܢܽܘܬܶܗ ܡܶܬܗܰܘܢܳܢܺܝܬܳܐ ܐܰܘ ܟܺܝܬ ܪܶܥܝܳܢܶܗ. ܡܶܠܬܳܐ ܕܶܝܢ ܕܰܐܠܳܗܳܐ܆ ܐܰܝܟ ܝܽܘܩܢܳܐ ܩܢܽܘܡܳܝܳܐ ܐܺܝܬܰܘܗ̱ܝ ܕܰܩܢܽܘܡܶܗ ܕܗܰܘ ܕܝܰܠ̣ܕܶܗ܆ ܒܗܳܝ ܕܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܐܺܝܬܰܘܗ̱ܝ ܫܰܘܝܳܐܺܝܬ ܠܰܐܒܳܐ. ܗܳܟܰܢܳܐ ܗܳܟܺܝܠ܆ ܐܳܦ ܒܪܳܐ ܡܫܰܡܰܗ ܐܳܦ ܐܰܠܳܗܳܐ. ܒܪܺܝܫܳܐ ܓܶܝܪ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ. ܘܡܶܠܬܳܐ ܐܺܝܬܰܘܗ̱ܝ ܗ̱ܘܳܐ ܠܘܳܬ ܐܰܠܳܗܳܐ܆ ܘܰܐܠܳܗܳܐ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ.[15]
ܒܳܗ̇ ܒܰܕܡܽܘܬܳܐ ܐܳܦ ܪܽܘܚܳܐ ܩܰܕܺܝܫܳܐ܆ ܒܪܺܝܫܳܐ ܐܺܝܬܰܘܗ̱ܝ ܗ̱ܘܳܐ܆ ܗܰܘ ܕܡܶܢ ܐܰܒܳܐ ܢܳܦܶܩ. ܐܰܝܟ ܙܢܳܐ ܓܶܝܪ ܕܥܰܡ ܡܶܠܬܳܐ ܗܳܝ ܕܺܝܠܰܢ ܪܽܘܚܳܐ ܐܰܟܚܕܳܐ ܢܳܦܩܳܐ܆ ܘܰܐܝܟ ܗܰܘ ܕܰܐܟܚܕܳܐ ܩܒܺܝܥܳܐ ܠܘܳܬܳܗ̇܆ ܗܳܟܰܢܳܐ ܠܳܐ ܪܰܚܺܝܩܳܐܺܝܬ ܘܠܳܐ ܡܶܬܦܰܪܫܳܢܳܐܺܝܬ܆ ܠܺܝܠܺܝܕܽܘܬܶܗ ܕܡܶܠܬܳܐ ܢܰܩܺܝܦܳܐ ܘܡܰܠܘܬܳܐ ܐܳܦ ܢܳܦܽܘܩܽܘܬܶܗ ܕܪܽܘܚܳܐ. ܡܳܕܶܝܢ ܕܠܳܐ ܙܰܒܢܰܐ ܗ̄ܘ ܘܰܡܬܽܘܡܳܝܳܐ܆ ܐܳܦ ܪܽܘܚܳܐ ܩܰܕܺܝܫܳܐ. ܐܶܢ ܓܶܝܪ ܒܪܳܐ ܠܰܘ ܒܙܰܒܢܳܐ ܝܺܠܺܝܕ܆ ܟܰܕ ܨܶܡܚܳܐ ܕܬܶܫܒܽܘܚܬܶܗ ܕܰܐܒܳܐ ܐܺܝܬܰܘܗ̱ܝ܆ ܐܰܢܰܢܩܺܐ ܕܳܐܦ ܪܽܘܚܳܐ ܗܰܘ ܕܠܳܐ ܦܰܪܺܝܩ ܐܰܘ ܪܰܚܺܝܩ ܡܶܢ ܒܪܳܐ ܘܡܶܠܬܳܐ܆ ܠܰܘ ܒܙܰܒܢܳܐ ܘܰܠܚܰܪܬܳܐ܆ ܐܶܠܳܐ ܡܬܽܘܡܳܐܺܝܬ ܢܰܦܺܝܩ ܡܶܢ ܐܰܠܳܗܳܐ ܘܰܐܒܳܐ. ܘܶܐܢ ܩܢܽܘܡܳܝܰܐ ܗ̄ܘ ܡܶܠܬܳܐ ܐܰܠܳܗܳܝܳܐ܆ ܘܠܰܘ ܐܰܝܟ ܗܳܕܶܐ ܕܺܝܠܰܢ ܐܺܝܬܰܘܗ̱ܝ܆ ܗܳܝ ܕܥܰܡ ܡܰܙܥܩܳܢܽܘܬܳܐ ܕܩܳܠܐ ܟܰܕ ܫܳܠܝܳܐ܆ ܡܶܚܕܳܐ ܐܰܟܚܕܳܐ ܡܶܬܚܰܒܠܳܐ܆ ܩܢܽܘܡܳܝܳܐ ܡܶܢ ܟܽܠ ܦܪܽܘܤ ܢܶܗܘܶܐ ܐܺܝܬܰܘܗ̱ܝ ܐܳܦ ܪܽܘܚܳܐ ܩܰܕܺܝܫܳܐ܆ ܘܠܰܘ ܒܰܕܡܽܘܬ ܡܰܦܽܘܚܺܝܬܳܐ ܐܰܘ ܠܶܗܬܳܐ ܕܡܶܬܐܰܫܕܳܐ.
ܐܶܠܳܐ ܕܡܶܢ ܐܰܒܳܐ ܐܳܡܰܪ ܢܳܦܶܩ ܐܶܡܰܪ: ܘܠܰܘ ܕܢܰܦܺܝܩ. ܘܕܰܚܺܝܠ ܐ̱ܢܳܐ܆ ܕܕܰܠܡܳܐ ܗܺܝ ܗܳܕܶܐ܆ ܕܛܰܠܝܳܐ ܡܚܰܘܝܳܐ ܠܳܗ̇ ܕܺܐܝܬܶܝܗ̇ ܠܢܳܦܽܘܩܽܘܬܶܗ ܕܪܽܘܚܳܐ. ܐܶܠܳܐ ܡܛܰܝܰܒܬܳܐ ܐܺܝܬܶܝܗ̇ ܠܡܺܐܡܰܪ: ܕܥܰܠ ܒܪܺܝܬܳܐ ܘܥܰܠ ܥܒܺܝܕܳܐ ܗܳܠܶܝܢ ܡܶܬܚܰܙ̈ܝܳܢ ܐܰܢ̱ܬ ܗܳܢܳܐ܆ ܗܳܠܶܝܢ ܕܰܒܗܳܝ ܕܺܐܝܬܰܘܗ̱ܝ ܗ̱ܘܳܐ ܘܺܐܝܬܰܘܗ̱ܝ ܘܢܶܗܘܶܐ ܐܺܝܬܰܘܗ̱ܝ ܡܶܬܦܰܠ̈ܓܳܢ. ܠܰܐܠܳܗܳܐ ܕܶܝܢ ܘܰܐܒܳܐ܆ ܟܽܠܗܶܝܢ ܕܩܳܝ̈ܡܳܢ ܐܺܝܬܰܝܗܶܝܢ. ܐܰܝܟܰܢܳܐ ܕܳܐܦ ܙܰܒܢܳܐ ܗܰܘ ܕܰܥܒܺܝܪ܆ ܕܩܳܐܶܡ ܢܶܣܬܒܰܪ. ܘܠܳܐ ܗܳܟܺܝܠ ܐܺܝܬܰܘܗ̱ܝ ܗ̱ܘܳܐ ܡܳܪܳܢܳܐܺܝܬ ܐܺܝܬܶܝܗ̇܆ ܘܠܳܐ ܢܶܗܘܶܐ ܐܺܝܬܰܘܗ̱ܝ. ܐܶܠܳܐ ܐܺܝܬܰܘܗ̱ܝ ܒܟܽܠ ܙܒܰܢ. ܝܰܬܺܝܪ ܡܳܪܳܢܳܝܳܐ ܗܳܟܺܝܠ ܐܰܝܟ ܕܥܰܠ ܐܰܠܳܗܳܐ܆ ܗܳܝ ܕܢܳܦܶܩ ܝܰܬܺܝܪ ܡܶܢ ܗܳܝ ܕܢܰܦܺܝܩ. ܐܰܟܘܳܬܳܗ̇ ܕܗܳܕܶܐ܆ ܐܳܦ ܡܶܢ ܦܰܪܨܽܘܦܳܐ ܕܚܶܟܡܬܶܗ ܕܰܐܠܳܗܳܐ ܗܳܝ ܕܺܐܝܬܶܝܗ̇ ܡܫܺܝܚܳܐ ܟܬܺܝܒܳܐ܆ ܗܳܝ ܕܡܶܢ ܩܕܳܡ ܟܽܠܗܽܘܢ ܬܶܠ̈ܠܶܐ ܝܳܠܶܕ ܠܺܝ܆ ܘܠܰܘ ܝܰܠܕܰܢܝ. ܢܶܬܕܰܡܰܪ ܕܶܝܢ ܐ̱ܢܳܫ ܛܳܒ܆ ܒܗܳܢܽܘܢ ܕܥܰܠ ܗܳܠܶܝܢ ܐܰܚܺܝܕܺܝܢ ܠܗܽܘܢ ܨܰܘܪ̈ܳܢܶܐ. ܐܶܢ ܓܶܝܪ ܡܶܢܳܗ̇ ܕܽܐܘܣܺܝܰܐ ܕܰܐܒܳܐ ܢܳܦܶܩ ܪܽܘܚܳܐ ܩܰܕܺܝܫܳܐ܆ ܐܰܝܟܰܢܳܐ ܢܳܩܦܳܐ ܕܡܶܕܶܡ ܡܶܢ ܗܳܢܶܝܢ ܕܺܐܝܬܰܝܗܶܝܢ ܒܶܗ ܒܰܟܝܳܢܳܐ܆ ܡܶܬܩܰܢܝܳܢܳܐ ܢܶܗܘܶܐ ܘܰܠܚܰܪܬܳܐ܆ ܘܠܰܘ ܕܰܡܬܽܘܡܳܐܺܝܬ ܡ̣ܟܳܢ ܒܶܗ.
ܐܶܠܳܐ ܬܶܬܚܪܶܐ ܘܬܺܐܡܰܪ ܠܩܽܘܒܠܰܢ ܠܘܳܬ ܗܳܠܶܝܢ܆ ܕܶܐܢ ܡܶܢ ܐܽܘܣܺܝܰܐ ܕܰܐܒܳܐ ܐܺܝܬܰܘܗ̱ܝ ܪܽܘܚܳܐ ܘܰܡܬܽܘܡܳܐܺܝܬ ܐܰܟܙܢܳܐ ܕܳܐܦ ܒܪܳܐ܆ ܠܡܳܢܳܐ ܠܳܐ ܐܳܦ ܠܶܗ ܩܳܪܶܝܢ ܚ̱ܢܰܢ ܒܪܳܐ. ܐܶܠܳܐ ܐܳܡܪܺܝܢ ܚ̱ܢܰܢ܆ ܡܶܛܽܠ ܕܠܰܘ ܕܡܶܬܺܝܠܶܕ܆ ܐܶܠܳܐ ܕܢܳܦܶܩ ܐܳܡܪܺܝܢ ܠܶܗ ܓܶܠ̈ܝܳܢܶܐ ܕܡ̈ܶܠܶܐ ܟܳܗ̈ܢܳܝܳܬܳܐ.
ܘܶܐܢ ܬܽܘܒ ܬܶܗܦܽܘܟ ܬܦܰܢܶܐ ܠܩܽܘܒܠܰܢ܆ ܡܳܢܳܐ ܗܳܟܺܝܠ ܡܫܰܚܠܦܳܐ ܝܺܠܺܝܕܽܘܬܳܐ ܡܶܢ ܢܳܦܽܘܩܽܘܬܳܐ. ܐܺ݀ܡܰܪ ܠܳܟ ܢܰܟܦܳܐܺܝܬ ܐܰܟܚܕܳܐ ܘܫܰܪܺܝܪܳܐܺܝܬ܆ ܐܶܠܽܘ ܝܳܕܰܥ ܗ̱ܘܰܝܬ ܐܳܘ ܡܝܰܬܪܳܐ܆ ܕܰܐܝܢܰܐ ܗ̄ܘ ܙܢܳܐ ܕܺܝܠܺܝܕܽܘܬܳܐ ܐܰܠܳܗܳܝܬܳܐ ܐܰܘ ܕܢܳܦܽܘܩܽܘܬܳܐ܆ ܐܳܡܰܪ ܗ̱ܘܺܝܬ ܠܳܟ܆ ܐܳܦ ܠܫܽܘܚܠܳܦܳܐ ܕܗܳܠܶܝܢ. ܐܶܠܳܐ ܡܰܫܶܦ ܐ̱ܢܳܐ ܠܰܬܠܺܝܬܳܝܽܘܬܳܐ ܗܳܝ ܕܗܳܟܰܢܳܐ ܐܺܝܬ ܠܳܗ̇ ܠܳܐ ܡܶܬܡܰܠܠܳܢܳܐܺܝܬ܆ ܗܳܝ ܕܗܺܝ ܠܳܗ̇ ܬܶܕܰܥ ܐܰܝܟ ܕܺܐܝܬܶܝܗ̇܆ ܘܰܡܫܰܒܰܚ ܐ̱ܢܳܐ ܘܳܐܚܶܕ ܐ̱ܢܳܐ ܠܘܳܬܝ ܠܗܰܘ ܡܳܐ ܕܰܢܚܶܬ ܠܘܳܬܰܢ܆ ܘܪܰܒܬܳܐ ܚܳܫܶܒ ܐ̱ܢܳܐ ܠܗܳܝ ܕܰܐܠܶܦ܆ ܕܰܐܒܳܐ ܠܰܘ ܡܶܢ ܡܶܕܶܡ ܐ̱ܚܪܺܝܢ ܐܺܝܬܰܘܗ̱ܝ܆ ܐܶܠܳܐ ܡܶܕܶܡ ܕܺܝܠܳܢܳܝܳܐ ܘܺܝܕܺܝܥܳܐ ܐܺܝܬ ܠܶܗ ܗܳܝ ܕܠܳܐ ܝܺܠܺܝܕܳܐܺܝܬ ܢܶܗܘܶܐ ܐܺܝܬܰܘܗ̱ܝ܆ ܘܕܰܒܪܳܐ ܝܺܠܺܝܕܳܐܺܝܬ ܡܶܢ ܐܰܒܳܐ. ܪܽܘܚܳܐ ܕܶܝܢ ܢܳܦܽܘܩܳܐܺܝܬ܆ ܟܰܕ ܫܽܘܘܕܳܥܳܐ ܠܳܐ ܡܶܬܬܙܺܝܥܳܢܳܐ ܘܠܳܐ ܚܠܺܝܛܳܐ ܐܺܝܬ ܠܶܗ ܕܕܺܝܠܳܢܳܝܽܘܬܳܐ܆ ܠܗܰܘ ܡܰܢ ܝܺܠܺܝܕܽܘܬܳܐ ܠܗܰܘ ܕܶܝܢ ܢܳܦܽܘܩܽܘܬܳܐ܆ ܐܰܝܟܰܢܳܐ ܕܠܳܐ ܒܠܺܝܠܬܳܐ ܘܰܓܪܺܝܕܬܳܐ ܘܰܡܪܺܝܩܬܳܐ ܡܶܢ ܕܺܝܠܳܝ̈ܳܬܳܐ ܗܳܠܶܝܢ ܕܥܰܠ ܟܽܠ ܚܰܕ ܡܶܢܗܽܘܢ ܡܶܬܚܰܙ̈ܝܳܢ܆ ܬܶܬܢܛܰܪ ܝܺܕܰܥܬܳܐ ܕܰܬܠܳܬܰܝ̈ܗܽܘܢ ܩܢܽܘ̈ܡܶܐ܆ ܕܗܳܢܽܘܢ ܕܽܐܘܣܺܝܰܐ ܗܳܢܰܘ ܕܶܝܢ ܐܰܠܳܗܽܘܬܳܐ ܚܕܳܐ ܗ̱ܝ܆ ܘܡܰܠܟܽܘܬܳܐ ܘܬܶܫܒܽܘܚܬܳܐ ܘܨܶܒܝܳܢܳܐ ܘܡܰܥܒܕܳܢܽܘܬܳܐ܆ ܘܟܽܠܗܶܝܢ ܗܳܠܶܝܢ ܐ̱ܚܪ̈ܳܢܝܳܬܳܐ܆ ܗܳܢܶܝܢ ܕܦܰܐܝ̈ܳܢ ܠܰܐܠܳܗܳܐ. ܐܰܠܳܗܳܐ ܓܶܝܪ ܐܰܒܳܐ. ܐܰܠܳܗܳܐ ܒܪܳܐ. ܐܰܠܳܗܳܐ ܪܽܘܚܳܐ ܩܰܕܺܝܫܳܐ. ܐܶܠܳܐ ܠܰܘ ܬܠܳܬܳܐ ܡܦܰܠܓܳܐܺܝܬ ܐܰܠܳܗ̈ܶܐ܆ ܒܗܳܝ ܕܰܒܪܳܐ ܘܪܽܘܚܳܐ܆ ܠܘܳܬ ܚܕܳܐ ܪܺܝܫܳܢܽܘܬܳܐ ܐܰܝܟ ܥܶܠܬܳܐ ܕܠܳܐ ܙܰܒܢܳܐ ܡܶܬܥܰܠܶܝܢ ܠܘܳܬ ܐܰܒܳܐ. ܐܳܦ ܓܶܝܪ ܡܶܢܶܗ ܐܺܝܬܶܝܗ̇ ܠܰܒܪܳܐ ܘܰܠܪܽܘܚܳܐ ܗܳܝ ܕܢܶܗܘܽܘܢ ܐܺܝܬܰܝܗܽܘܢ܆ ܐܳܦܶܢ ܠܰܘ ܡܶܢ ܒܳܬܪܶܗ. ܫܰܘ̈ܝ̣ܰܝ̣ ܒܰܡܬܽܘܡܳܝܽܘܬܳܐ ܓܶܝܪ ܐܺܝܬܰܝܗܽܘܢ. ܐܰܝܟܰܢܳܐ ܕܗܺܝ ܟܰܕ ܗܺܝ ܬܠܺܝܬܳܝܽܘܬܳܐ܆ ܐܳܦ ܬܠܺܝܬܳܐܺܝܬ ܬܶܣܬܰܟܰܠ ܒܕܺܝ̈ܠܳܝܘܳܬܳܐ܆ ܘܰܠܚܽܘܕܳܝܽܘܬܳܐ ܬܶܬܺܝܕܰܥ ܒܐܠܳܗܽܘܬܳܐ. ܘܠܳܐ ܡܶܬܦܰܣܩܳܢܳܐܺܝܬ ܬܶܬܦܰܪܰܫ܆ ܘܠܳܐ ܒܠܺܝܠܳܐܺܝܬ ܬܶܬܢܰܩܰܦ[16] .
ܘܡܶܢ ܡܶܣܟܺܢܽܘܬܳܐ ܝܽܗ̱ܘܕܳܝܬܳܐ ܘܰܕܣܶܒܶܝܠܺܝܽܘܤ ܬܶܥܪܽܘܩ܆ ܕܰܠܚܰܕ ܦܰܪܨܽܘܦܳܐ ܘܚܰܕ ܩܢܽܘܡܳܐ ܩܳܦܣܳܐ ܠܰܐܠܳܗܽܘܬܳܐ܆ ܘܰܒܗܰܘ ܚܰܕ ܘܰܒܗܳܝ ܕܗܺܝ ܟܰܕ ܗܺܝ ܕܽܐܘܣܺܝܰܐ܆ ܬܶܟܦܽܘܪ ܒܣܰܓܺܝܽܐܘܬ ܐܰܠܳܗܽܘܬܳܐ ܕܰܐܪܺܝܽܘܤ ܘܰܕܚܰܢ̈ܦܶܐ. ܟܕ ܚܕܳܢܳܐܺܝܬ ܐܳܦ ܣܳܓܝܳܐ ܗܳܝ ܕܳܐܦ ܬܡܺܝܗܳܐ܆ ܒܗܳܝ ܕܡܶܢ ܚܰܕ ܠܘܳܬ ܬܠܳܬܳܐ ܒܰܠܚܽܘܕ ܡܶܬܡܰܬܚܳܐ܆ ܘܬܽܘܒ ܠܘܳܬ ܚܰܕ ܡܶܬܥܰܠܝܳܐ. ܡܶܢ ܒܳܬܰܪ ܓܶܝܪ ܬܪܶܝܢ ܠܚܽܘܕܳܐܺܝܬ ܘܡܶܢ ܠܳܐ ܡܙܰܘ̈ܓܶܐ[17]܆ ܡܶܢܝܳܢܳܐ ܗܰܘ ܕܰܬܠܳܬܳܐ ܐܳܬܶܐ܆ ܐܰܝܟܰܢܳܐ ܟܺܝܬ ܕܳܐܦ ܒܗܳܕܶܐ܆ ܬܶܬܕܪܶܟ[18] ܠܳܐ ܡܫܰܘܬܦܽܘܬܳܐ ܘܠܳܐ ܡܶܬܦܰܚܡܳܢܽܘܬܳܐ ܕܰܐܠܳܗܳܐ ܕܰܠܘܳܬ ܒܪܺܝܬܳܐ. ܡܶܢ ܗܳܢܽܘܢ ܡܰܢ ܓܶܝܪ ܕܠܳܐ ܓܫܽܘܡ܆ ܒܰܠܚܽܘܕܳܝܽܘܬܳܐ ܘܒܰܬܠܺܝܬܳܝܽܘܬܳܐ܆ ܘܠܳܐ ܡܶܕܶܡ ܚܳܙܶܝܢܰܢ ܤܛܰܪ ܡܶܢܶܗ. ܕܓܽܘܫ̈ܡܶܐ ܕܶܝܢ܆ ܕܺܝܠܳܝܬܳܐ ܗ̱ܝ ܬܪܰܝܳܢܽܘܬܳܐ܆ ܗܳܢܽܘܢ ܟܺܝܬ ܕܡܶܢ ܗܽܘܠܶܐ ܘܳܐܕܫܳܐ ܡܩܰܝܡܺܝܢ. ܐܶܠܳܐ ܐܳܦܠܐ ܪܽܘܟܳܒܳܐ ܐܺܝܬ ܒܰܬܠܺܝܬܳܝܽܘܬܳܐ ܠܳܐ ܬܶܗܘܶܐ. ܐܳܦ ܓܶܝܪ ܡܶܕܶܡ ܦܫܺܝܛܳܐ ܐܺܝܬܶܝܗ̇ ܐܰܠܳܗܽܘܬܳܐ܆ ܘܠܳܐ ܡܪܰܟܒܳܐ ܒܽܐܘܣܺܝܰܐ.
ܐܶܠܳܐ ܟܒܰܪ ܢܫܰܐܶܠ ܐ̱ܢܳܫ ܡܶܢ ܗܳܢܽܘܢ ܕܗܳܫܳܐ ܚܰܕܬܳܐܺܝܬ ܥܳܐܠܺܝܢ ܠܕܶܚܠܰܬ ܐܰܠܳܗܳܐ܆ ܐܰܘ ܐܳܦ ܡܶܢ ܗܳܢܽܘܢ ܕܚܶܪܝܳܢܳܐܺܝܬ ܐܺܝܬ ܠܗܽܘܢ܆ ܕܟܰܕ ܨܳܒܶܐ ܗܳܟܺܝܠ ܐܰܠܳܗܳܐ ܩܢܶܐ ܒܪܳܐ ܘܪܽܘܚܳܐ ܩܰܕܺܝܫܳܐ܆ ܐܰܝܟܰܢܳܐ ܕܒܰܬܠܺܝܬܳܝܽܘܬܳܐ ܢܶܬܚܙܶܐ܆ ܐܰܘ ܟܰܕ ܠܳܐ ܨܳܒܶܐ.
ܡܳܐ ܠܳܐ ܪܰܕܝܳܐ ܣܰܓܺܝ ܘܠܳܐ ܝܰܠܺܝܦܳܐ ܐܺܝܬܰܘܗ̱ܝ ܫܽܘܐܴܠܳܐ ܗܳܢܳܐ܆ ܘܰܕܢܰܦܫܳܐ ܫܰܪܺܝܪܳܐܺܝܬ ܠܳܐ ܡܰܐܪܙܬܳܐ. ܥܰܠ ܗܳܠܶܝܢ ܓܶܝܪ ܡܶܬܩܰܢ̈ܝܳܢܝܳܬܳܐ ܘܰܕܡܶܢ ܠܒܰܪ ܡܶܬܢܰܣ̈ܒܳܢ܆ ܘܰܕܒܰܓܒܺܝܬܳܐ ܘܰܒܫܽܘܠܛܳܢܳܐ ܣܺܝ̈ܡܳܢ܆ ܐܺܝܬ ܠܳܗ̇ ܐܰܬܪܳܐ ܠܗܳܝ ܕܢܶܨܒܶܐ ܐܰܘ ܠܳܐ ܢܶܨܒܶܐ. ܟܰܕ ܓܶܝܪ ܨܳܒܶܝܢ ܚ̱ܢܰܢ ܗܳܢܳܐ ܡܶܕܶܡ ܩܳܢܶܝܢ ܚ̱ܢܰܢ ܘܢܳܣܒܺܝܢܰܢ܆ ܐܰܘ ܠܳܐ ܩܳܢܶܝܢ ܚ̱ܢܰܢ. ܗܳܠܶܝܢ ܕܶܝܢ ܕܡܶܢ ܫܽܘܪܳܝܳܐ ܟܝܳܢܳܐܺܝܬ ܘܒܽܐܘܣܺܝܰܐ ܡ̈ܟܳܢܳܢ ܒܰܢ܆ ܠܳܐ ܢܳܦ̈ܠܳܢ ܬܚܶܝܬ ܗܳܝ ܕܢܶܨܒܶܐ. ܗܺܝ ܓܶܝܪ ܟܰܕ ܗܺܝ ܐܺܝܬܶܝܗ̇܆ ܘܠܳܐ ܡܶܕܶܡ ܒܨܺܝܪ ܫܟܺܝܪܬܳܐ܆ ܗܳܝ ܕܰܬܫܰܐܶܠ܆ ܕܟܰܕ ܨܳܒܶܐ ܐܰܢ̱ܬ ܐܺܝܬܰܝܟ ܐܰܢ̱ܬ ܡܠܺܝܠܳܐ ܐܰܘ ܟܰܕ ܠܳܐ ܨܳܒܶܐ ܐܰܢ̱ܬ. ܗܳܠܶܝܢ ܓܶܝܪ ܕܰܟܝܳܢܳܐ ܐܺܝܬܰܝܗܶܝܢ. ܘܠܰܘ ܕܨܶܒܝܳܢܳܐ. ܐܰܟܙܢܳܐ ܕܠܳܐ ܐ̱ܢܳܫ ܐܺܝܬ ܕܰܡܫܰܐܶܠ܆ ܕܟܰܕ ܨܳܒܶܐ ܐܰܠܳܗܳܐ ܐܺܝܬܰܘܗ̱ܝ ܐܰܠܳܗܳܐ܆ ܐܰܘ ܟܰܕ ܠܳܐ ܨܳܒܶܐ. ܐܺܝܬܰܘܗ̱ܝ ܗ̱ܘܳܐ ܓܶܝܪ ܐܰܠܳܗܳܐ ܒܟܽܠܙܒܰܢ. ܗܳܟܰܢܳܐ ܟܺܝܬ ܐܳܦ ܐܰܒܳܐ܆ ܟܰܕ ܡܚܰܘܶܐ ܗ̱ܘܳܐ ܠܰܒܪܳܐ ܕܡܰܢܗܰܪ ܡܶܢܶܗ ܠܳܐ ܙܰܒܢܳܐܺܝܬ܆ ܐܰܝܟ ܨܶܡܚܳܐ ܒܰܝܬܳܝܳܐ܆ ܘܰܠܪܽܘܚܳܐ ܕܢܳܦܶܩ ܗ̱ܘܳܐ ܡܬܽܘܡܳܐܺܝܬ. ܠܳܐ ܡܶܬܦܰܪ̈ܫܳܢܶܐ ܓܶܝܪ ܐܺܝܬܰܝܗܽܘܢ ܗܳܠܶܝܢ ܡܶܢܶܗ܆ ܐܰܝܟܰܢܳܐ ܕܡܰܢܗܪܳܢܽܘܬܳܐ ܘܫܰܚܺܝܢܽܘܬܳܐ ܡܶܢ ܢܽܘܪܳܐ܆ ܐܳܦܶܢ ܥܳܪܶܩ ܡܶܢ ܟܽܠ ܕܳܡܝܽܘܬܳܐ ܕܬܰܚ̈ܘܝܳܬܳܐ. ܢܽܘܪܳܐ ܡܰܢ ܓܶܝܪ܆ ܘܠܳܐ ܡܶܕܶܡ ܐܺܝܬܶܝܗ̇ ܠܒܰܪ ܡܶܢ ܗܳܠܶܝܢ. ܐܳܡܰܪ ܐ̱ܢܳܐ ܟܺܝܬ ܡܰܢܗܪܳܢܽܘܬܳܐ ܘܫܰܚܺܝܢܽܘܬܳܐ. ܩܢܽܘܡܶܗ ܕܶܝܢ ܕܰܐܠܳܗܳܐ ܐܰܒܳܐ܆ ܠܰܘ ܠܰܒܪܳܐ ܘܰܠܪܽܘܚܳܐ ܗܳܦܶܟ ܡܶܫܬܪܶܐ ܠܳܐ ܬܶܗܘܶܐ܆ ܐܳܦܶܢ ܒܗܽܘܢ ܡܶܬܚܙܶܐ܆ ܡܶܛܽܠ ܗܳܝ ܕܚܰܕ ܘܫܰܘܝܽܘܬ ܐܺܝܩܳܪܳܐ ܕܰܐܠܳܗܽܘܬܳܐ.
ܐܶܠܳܐ ܢܺܐܡܰܪ ܐܳܦ ܠܘܳܬ ܗܳܠܶܝܢ ܗܰܘ ܕܫܳܡܰܥ܆ ܕܡܶܣܬܒܰܪ ܐܰܢ̱ܬ ܠܺܝ܆ ܕܠܰܘ ܠܒܰܪ ܡܶܢ ܗܳܝ ܕܘܳܠܝܳܐ ܠܡܶܠܬܳܐ ܕܡܶܛܽܠ ܐܰܠܳܗܽܘܬܳܐ ܡܡܰܠܶܠ ܐܰܢ̱ܬ. ܡܶܫܬܓܶܫ ܐ̱ܢܳܐ ܕܶܝܢ ܒܪܰܡ ܐܶܢܳܐ܆ ܟܰܕ ܠܰܟ̈ܬܳܒܶܐ ܐܰܠܳܗܳܝ̈ܶܐ ܩܳܪܶܐ ܐ̱ܢܳܐ܆ ܘܠܳܐ ܒܕܽܘܟ ܡܶܫܟܰܚ ܐ̱ܢܳܐ ܡܶܢ ܕܺܝܰܬܺܝܩܺܐ ܥܰܬܺܝܩܬܳܐ ܕܡܶܬܝܰܕܥܳܐ ܬܠܺܝܬܳܝܽܘܬܳܐ܆ ܐܶܠܳܐ ܚܰܕ ܦܰܪܨܽܘܦܳܐ ܘܚܰܕ ܐܰܠܳܗܳܐ܆ ܘܡܶܬܦܰܫܟܳܢܳܐ ܐܺܝܬܰܝ ܡܶܟܺܝܠ܆ ܠܡܰܘܕܳܝܽܘ ܚܰܕ ܠܗܰܘ ܕܰܒܢܳܡܽܘܣܳܐ ܘܒܰܢ̈ܒܺܝܶܐ ܘܒܶܐܘܰܢܓ̈ܶܠܺܝܰܐ ܡܰܠܶܠ.
ܐܶܠܳܐ ܝܰܬܺܝܪܳܐܺܝܬ[19] ܡܰܢ ܝܰܨܺܝܦܽܘܬܳܐ ܐܺܝܬ ܗ̱ܘܳܐ ܠܶܗ܆ ܟܕ ܒܝܰܕ ܡܽܘܫܶܐ ܡܡܰܠܶܠ ܗ̱ܘܳܐ ܐܰܠܳܗܳܐ ܕܟܽܠ[20]܆ ܕܠܺܐܝܣܪܳܐܶܝܠ ܗܰܘ ܕܥܰܡ ܕܶܚܠܰܬ ܫ̈ܺܐܕܶܐ ܡܶܨܪܳܝܬܳܐ ܐܶܬܪܰܒܺܝ܆ ܢܶܪܚܰܩ ܗ̱ܘܳܐ ܡܶܢ ܣܰܓܺܝܽܐܘܬ ܐܰܠܳܗܽܘܬܳܐ܆ ܘܰܢܥܰܬܕܺܝܘܗ̱ܝ ܕܰܢܚܽܘܪ ܠܘܳܬ ܚܰܕ ܐܰܠܳܗܳܐ܆ ܘܠܰܘ ܕܰܒܙܰܒܢܳܗ̇ ܐܺܝܬܶܝܗ̇ ܕܳܢܳܗ̇܆ ܠܗܳܝ ܕܰܠܗܳܢܽܘܢ ܕܫܰܒܪ̈ܳܢܳܝ̣ܺܝ̣ܢ ܘܠܳܐ ܡܶܫܟܚܺܝܢ ܠܡܶܥܪܳܐ. ܢܰܘܕܰܥ[21] ܢܰܗܺܝܪܳܐܺܝܬ ܬܰܘܕܺܝܬܳܐ܆ ܗܳܝ ܕܒܰܚܕܳܐ ܐܰܠܳܗܽܘܬܳܐ ܘܒܰܬܠܳܬܳܐ ܩܢܽܘ̈ܡܶܐ܆ ܐܰܝܟܰܢܳܐ ܕܠܳܐ ܬܽܘܒ ܠܘܳܬ ܗܳܝ ܕܰܐܠܳܗ̈ܶܐ ܣܰܓܺܝ̈ܶܐܐ ܢܶܣܒܪܽܘܢ ܕܳܐܡܰܪ ܢܶܨܛܠܽܘܢ. ܐܶܠܳܐ ܡܶܢ ܦܶܠܓܳܐ ܣܳܡܳܗ̇ ܩܕܳܡܰܝܗܽܘܢ ܠܡܰܠܦܳܢܽܘܬܳܐ. ܟܰܕ ܠܗܳܝ ܡܰܢ ܕܰܠܚܰܕ ܐܰܠܳܗܳܐ ܙܳܕܶܩ ܠܡܶܣܓܰܕ܆ ܐܰܝܟ ܐܰܝ̇ܕܳܐ ܕܺܐܝܬܶܝܗ̇ ܕܰܠܩܽܘܒܠܳܐ ܕܣܰܓܺܝܽܐܘܬ ܐܰܠܳܗ̈ܶܐ ܓܰܠܝܳܐܺܝܬ ܐܰܡܪܳܗ̇܆ ܠܫܽܘܘܕܳܥܳܐ ܕܶܝܢ ܗܰܘ ܓܰܠܝܳܐ ܘܢܰܗܺܝܪܳܐ ܕܰܬܠܳܬܐ ܩܢܽܘ̈ܡܶܐ܆ ܠܰܡܛܰܫܳܝܽܘ ܦܰܪܢܣܶܗ ܚܰܟܺܝܡܳܐܺܝܬ. ܡܶܛܽܠܗܳܕܶܐ ܟܰܕ ܥܒܺܝܕܽܘܬܳܐ ܕܗܳܢܳܐ ܥܳܠܡܳܐ ܡܰܫܠܶܡ ܗ̱ܘܳܐ܆ ܠܗܳܝ ܕܡܽܘܫܶܐ ܐܰܟܬܶܒ܆ ܠܰܒܪܺܝܬܳܐ ܘܥܳܒܽܘܕܽܘܬܳܐ ܕܡܰܠܰܐܟ̈ܶܐ ܒܫܶܬܩܳܐ ܫܰܒܩܳܗ̇܆ ܡܶܛܽܠ ܡܶܫܬܰܪܥܳܢܽܘܬܳܐ ܕܰܠܘܳܬ ܣܰܓܺܝܽܐܘܬ ܐܰܠܳܗ̈ܶܐ ܘܣܶܓܕܬܳܐ ܕܒܶܪ̈ܝܳܬܳܐ. ܘܰܠܗܳܕܶܐ ܒܗܽܘܫܳܥ ܢܒܺܝܳܐ ܐܳܡܰܪ ܗܳܟܰܢܳܐ: ܐܶܢܳܐ ܡܳܪܝܳܐ ܐܰܠܳܗܳܐ ܕܺܝܠܳܟ[22]܆ ܕܰܡܫܰܪܰܪ ܫܡܰܝܳܐ ܘܒܳܪܶܐ ܐܰܪܥܳܐ. ܗܰܘ ܕܺܐܝ̈ܕܰܝܳܐ ܕܺܝܠܝ ܒ̣ܪ̈ܰܝ ܠܟܽܠܳܗ̇ ܦܳܠܚܽܘܬܳܐ ܕܰܫܡܰܝܳܐ܆ ܘܠܳܐ ܚܰܘܺܝܬ ܐܶܢܽܘܢ ܠܳܟ ܕܬܺܐܙܰܠ ܒܳܬܰܪܗܽܘܢ. ܘܶܐܢܳܐ ܐܰܣܶܩܬ̊ܳܟ ܡܶܢ ܐܰܪܥܳܐ ܕܡܶܨܪܶܝܢ܆ ܘܰܐܠܳܗܳܐ ܤܛܰܪ ܡܶܢܝ ܠܳܐ ܬܶܕܰܥ. ܘܰܕܦܳܪܶܩ ܠܰܝܬ ܠܒܰܪ ܡܶܢܝ.
ܒܳܬܰܪܟܶܢ ܕܶܝܢ܆ ܐܳܦ ܡ̈ܶܠܶܐ ܡܶܕܶܡ ܡܶܕܶܡ ܡܶܬܬܰܝ̈ܬܝܳܢ ܒܟ̈ܬܳܒܶܐ ܕܡܽܘܫܶܐ ܕܠܰܝܬ ܠܡܺܐܡܰܪ ܠܽܘܩܒܰܠܗܶܝܢ܆ ܘܕܰܠܝܽܗ̱ܘ̈ܕܳܝܶܐ ܡܰܒ̈ܗܬܳܢ܆ ܘܒܰܙܒܰܢ ܡܰܢ ܡܨܰܠ̈ܦܳܢ ܡܚܰܘ̈ܝܳܢ ܠܰܒܪܳܐ ܘܡܶܠܬܳܐ܆ ܒܰܙܒܰܢ ܕܶܝܢ ܡܰܘ̈ܕܥܳܢ ܐܰܟܚܕܳܐ ܐܳܦ ܠܪܽܘܚܳܐ ܩܰܕܺܝܫܳܐ܆ ܘܫܽܘܘܕܳܥܳܐ ܣܰܓܺܝܳܐܢܝܳܐ ܪ̈ܳܡܙܳܢ ܕܰܬܠܳܬܐ ܩܢܽܘܡ̈ܶܐ܆ ܒܫܰܘܝܽܘܬ ܐܺܝܩܳܪܳܐ ܘܰܒܫܽܘܒܚܳܐ ܠܚܽܘܕܳܝܳܐ.
ܘܰܕܫܳܥܬܳܐ ܗܳܝ ܘܶܐܡܰܪ ܐܰܠܳܗܳܐ. ܢܶ݀ܥܒܶܕ ܒܰܪ ܐ̱ܢܳܫܳܐ ܒܨܰܠܡܳܐ ܕܺܝܠܰܢ. ܘܒܰܕܡܽܘܬܰܢ[23]. ܠܘܳܬ ܡܰܢܽܘ ܟܰܝ ܡܰܥ̈ܠܳܢ ܠܶܗ ܠܰܐܠܳܗܳܐ ܕܰܡܡܰܠܶܠ܆ ܡ̈ܠܶܐ ܢܦܺܝ̈ܚܳܬ ܡܶܢ ܐܰܠܳܗܳܐ. ܐܳܡܪܺܝܢ ܝܽܗ̱ܘ̈ܕܳܝܶܐ ܗܳܢܽܘܢ ܕܰܡܣܰܡܶܝܢ܆ ܕܰܠܘܳܬ ܡܰܠܰܐܟ̈ܶܐ. ܘܰܐܝܟܰܢܳܐ ܗܰܘ ܡܳܪܝܳܐ ܘܥܳܒܽܘܕܳܐ ܕܟܽܠ܆ ܕܢܶܫܬܰܘܬܦܽܘܢ ܠܶܗ ܒܥܳܒܽܘܕܽܘܬܳܐ ܘܰܕܢܶܓܫܦܽܘܢ[24] ܥܰܡܶܗ ܐܰܟܚܕܳܐ܆ ܘܝܰܬܺܝܪܳܐܺܝܬ ܒܚܰܝܽܘܬܳܐ ܡܠܺܝܠܬܳܐ ܒܰܪܢܳܫܳܐ܆ ܡܚܰܦܶܛ ܗ̱ܘܳܐ ܠܥܰܒ̈ܕܶܐ ܘܠܰܒܪ̈ܰܝܳܐ. ܗܳܝ ܓܶܝܪ ܕܢܶܒܪܶܐ܆ ܕܺܝܠܳܝܬܳܐ ܗ̄ܝ ܕܰܐܠܳܗܳܐ ܠܚܽܘܕܰܘܗ̱ܝ.
ܐܶܠܳܐ ܫܰܦܺܝܪ ܝܺܕܺܝܥܳܐ܆ ܕܰܠܘܳܬ ܗܰܘ ܕܡܶܫܬܰܘܬܰܦ ܠܶܗ ܒܽܐܘܣܺܝܰܐ ܘܰܒܡܰܠܟܽܘܬܳܐ ܘܰܒܫܽܘܒܚܳܐ ܒܪܶܗ ܘܡܶܠܬܶܗ܆ ܘܰܠܘܳܬ ܪܽܘܚܳܐ ܩܰܕܺܝܫܳܐ ܟܬܺܝܒ ܕܡܰܠܶܠ܆ ܠܗܳܢܽܘܢ ܕܠܳܐ ܢܽܘܟܪܳܝܳܐ ܠܗܽܘܢ ܗܳܝ ܕܢܶܒܪܽܘܢ. ܒܡܶܠܬܶܗ ܓܶܝܪ ܕܡܳܪܝܳܐ ܐܶܫܬܰܪܰܪܘ ܫܡܰܝܳܐ܆ ܘܰܒܪܽܘܚܳܐ ܕܦܽܘܡܶܗ ܟܽܠܶܗ ܚܰܝܠܗܽܘܢ.[25] ܘܰܐ̱ܚܪܳܢܝܳܐܺܝܬ ܟܺܝܬ܆ ܐܶܢ ܗܰܘ ܕܳܐܡܰܪ ܗ̱ܘܳܐ ܢܶܥܒܶܕ ܒܰܪܢܳܫܳܐ܆ ܠܰܘ ܕܰܚܕܳܐ ܘܗܺܝ ܟܰܕ ܗܺܝ ܐܽܘܣܺܝܰܐ ܠܗܳܢܽܘܢ ܐܺܝܬܰܘܗ̱ܝ ܗ̱ܘܳܐ܆ ܗܳܢܽܘܢ ܕܰܠܘܳܬܗܽܘܢ ܡܡܰܠܶܠ ܗ̱ܘܳܐ܆ ܐܰܝܟܰܢܳܐ ܡܶܫܟܚܳܐ ܗ̱ܘܳܬ܆ ܕܰܕܗܳܢܽܘܢ ܕܰܡܫܰܚܠܦܺܝܢ ܒܽܐܘܣܺܝܰܐ ܚܰܕ ܨܰܠܡܳܐ ܢܶܗܘܶܐ ܒܰܪܢܳܫܳܐ.
ܐܶܢ ܕܶܝܢ ܐܳܦ ܠܗܳܝ ܕܰܒܨܰܠܡܳܐ܆ ܠܰܘ ܐܰܝܟ ܐܶܣܟܺܡܳܐ ܕܦܰܓܪܳܐ ܢܳܣܒܺܝܢ ܚ̱ܢܰܢ ܠܳܗ̇܆ ܗܳܝ ܟܺܝܬ ܕܺܐܝܬܶܝܗ̇ ܫܰܪܺܝܪܬܳܐ܆ ܠܰܘ ܓܶܝܪ ܒܝܽܘܩܢܳܐ ܐ̱ܢܳܫܳܝܳܐ ܐܺܝܬܰܘܗ̱ܝ ܐܰܠܳܗܳܐ܆ ܘܳܐܦܠܳܐ ܒܶܐܣܟܺܡܳܐ ܗܰܘ ܕܠܳܐ ܐܶܣܟܺܝܡ ܘܰܕܠܳܐ ܓܫܽܘܡ܆ ܐܶܠܳܐ ܒܫܽܘܘܕܳܥܳܐ ܗܰܘ ܪܺܝܫܳܢܳܝܳܐ܆ ܐܰܝܟܰܢܳܐ ܕܢܶܗܘܶܐ ܪܺܝܫܳܐ ܘܢܰܡܠܶܟ ܥܰܠ ܐܰܪܥܳܐ. ܟܰܕ ܓܶܝܪ ܐܶܡܰܪ ܒܨܰܠܡܳܐ ܕܺܝܠܰܢ ܘܒܰܕܡܽܘܬܰܢ. ܐܰܝܬܺܝ ܒܳܬܪܳܗ̇ ܘܢܶܫܬܰܠܛܽܘܢ ܥܰܠ ܢܽܘ̈ܢܶܐ ܕܝܰܡܳܐ ܘܥܰܠ ܦܳܪ̈ܚܳܬܳܐ ܕܰܫܡܰܝܳܐ܆ ܘܥܰܠ ܒܥܺܝܪܳܐ ܘܥܰܠ ܟܽܠܳܗ̇ ܐܰܪܥܳܐ[26]܆ ܟܽܠܳܗ̇ ܐܰܢܰܢܩܺܐ ܕܬܰܦܢܟܳܐ ܗܰܘ ܕܰܒܨܰܠܡܶܗ ܥܬܺܝܕ ܗ̱ܘܳܐ ܒܰܪܢܳܫܳܐ ܕܢܶܗܘܶܐ܆ ܕܰܟܝܳܢܳܐ ܪܺܝܫܳܢܳܝܳܐ ܘܡܰܠܟܳܝܳܐ ܢܶܗܘܶܐ ܐܺܝܬܰܘܗ̱ܝ ܗ̱ܘܳܐ܆ ܗܰܘ ܟܺܝܬ ܕܺܐܝܬܰܘܗ̱ܝ ܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܘܠܰܘ ܕܰܟܝܳܢܳܐ ܗܰܘ ܡܰܠܰܐܟܳܝܳܐ ܐܰܘ ܕܰܐ̱ܚܪܺܢܳܐ ܡܶܕܡ ܥܒܺܝܕܳܐ ܘܕܰܬܚܶܝܬ ܡܳܪܽܘܬܳܐ.
ܐܶܠܳܐ ܬܺܐܡܰܪ܆ ܕܒܰܕܡܽܘܬ ܡܰܠ̈ܟܶܐ ܘܪ̈ܺܝܫܳܢܶܐ ܗܳܠܶܝܢ ܕܰܠܘܳܬܰܢ܆ ܗܳܢܽܘܢ ܕܳܐܡܪܺܝܢ ܕܙܰܦܠܳܢ ܣܳܝܡܺܝܢ ܚ̱ܢܰܢ ܢܳܡܽܘܣܳܐ ܐܰܘ ܦܳܩܕܺܝܢܰܢ. ܘܗܳܕܶܐ ܟܰܕ ܚܰܕ ܐܺܝܬܰܘܗ̱ܝ ܦܰܪܨܽܘܦܳܐ ܗܰܘ ܕܣܺܝܡ܆ ܐܳܦ ܐܰܠܳܗܳܐ ܐܶܡܰܪ ܢܶ݀ܥܒܶܕ ܒܰܪ ܐ̱ܢܳܫܳܐ ܒܨܰܠܡܳܐ ܕܺܝܠܰܢ. ܘܠܰܘ ܐܰܝܟܰܢܳܐ ܕܢܶܪܡܽܘܙ ܬܠܺܝܬܳܝܽܘܬܳܐ ܩܰܕܺܝܫܬܳܐ.
ܐܶܠܳܐ ܠܪܽܘܚܩܳܐ ܡܶܢ ܗܳܢܳܐ ܥܝܳܕܳܐ ܘܬܶܫܒܽܘܚܬܳܐ ܕܺܝܠܰܢ ܐܺܝܬܰܘܗ̱ܝ ܐܰܠܳܗܳܐ܆ ܘܳܐܦܠܳܐ ܡܬܽܘܡ ܡܶܬܚܙܶܐ ܕܰܡܚܰܘܶܐ ܗܽܘ ܠܶܗ ܥܳܒܽܘܕܳܐ ܟܰܕ ܗܳܟܰܢܳܐ ܡܡܰܠܶܠ. ܐܶܠܳܐ ܚܕܳܢܳܐܺܝܬ ܒܟܽܠܙܒܰܢ. ܘܠܰܘ ܣܰܓܺܝܐܢܳܐܺܝܬ. ܕܰܐܝܟ ܐܰܝܟܰܢ. ܐܶܢܳܐ ܩܰܕܡܳܝܳܐ ܘܶܐܢܳܐ ܒܳܬܰܪܟܶܢ܆ ܘܰܤܛܰܪ ܡܶܢܝ ܠܰܝܬ ܐܰܠܳܗܳܐ[27]. ܘܬܽܘܒ܆ ܐܶܢܳܐ ܗܰܘ ܕܬܰܩܢܶܬ ܢܽܘܗܪܳܐ܆ ܐܶܢܳܐ ܥܶܒܕܶܬ ܐܰܪܥܳܐ ܘܒܰܪܢܳܫܳܐ ܥܠܶܝܗ̇܆ ܐܶܢܳܐ ܒܺܐܝܕܳܐ ܕܺܝܠܝ ܫܰܪܪܶܬ ܫܡܰܝܳܐ[28]܆ ܘܠܳܐ ܐܶܡܰܪ ܥܒܰܕܢܰܢ܆ ܐܰܘ ܬܰܩܶܢ ܚ̱ܢܰܢ ܐܰܘ ܫܰܪܰܪܢܰܢ. ܐܶܠܽܘ ܓܶܝܪ ܠܕܰܐܝܟ ܗܳܢܳܐ ܫܽܘܒܚܳܐ ܘܺܐܝܩܳܪܳܐ ܪܳܚܶܡ ܗ̱ܘܳܐ ܐܰܠܳܗܳܐ܆ ܡܶܢ ܟܽܠ ܦܪܽܘܤ ܘܳܐܦ ܡܢܺܝ̈ܚܳܢܶܐ ܕܺܝܠܶܗ ܠܘܳܬܶܗ܆ ܣܰܓܝܳܐܢܳܐܺܝܬ ܡܡܰܠܠܺܝܢ ܗ̱ܘܰܘ. ܗܳܫܳܐ ܕܶܝܢ܆ ܕܰܠܩܽܘܒܠܳܐ ܡܶܬܚܙܶܝܢ܆ ܕܥܳܒܕܺܝܢ ܟܽܠܗܶܝܢ ܘܰܡܡܰܠܠܺܝܢ. ܐܰܢ̱ܬ ܐܰܥܫܶܢܬ ܒܚܰܝܠܳܐ ܕܺܝܠܳܟ ܠܝܰܡܳܐ[29]. ܘܡܶܢ ܫܽܘܪܳܝܳܐ ܐܰܢ̱ܬ ܡܳܪܝܳܐ ܠܰܐܪܥܳܐ ܫܰܬܶܐܣܬ܆ ܘܰܥ̈ܒܳܕܶܐ ܕܺܐܝ̈ܕܰܝܳܐ ܕܺܝܠܳܟ ܐܺܝܬܰܝܗܽܘܢ ܫܡܰܝ̈ܳܐ[30].
ܚܰܣܺܝܪܳܐ ܗܳܟܺܝܠ܆ ܕܗܳܝ ܕܢܶܥܒܶܕ ܒܰܪܢܳܫܳܐ ܒܨܰܠܡܳܐ ܕܺܝܠܰܢ܆ ܠܰܘ ܡܶܛܽܠ ܡܶܕܶܡ ܐ̱ܚܪܺܢܳܐ ܢܶܣܬܰܟܰܠ ܕܰܟܬܺܝܒܳܐ ܒܫܽܘܘܕܳܥܳܐ ܣܰܓܺܝܐܢܳܝܳܐ܆ ܐܶܠܳܐ ܡܶܛܽܠ ܗܳܝ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܬܶܬܺܝܕܰܥ ܥܳܒܽܘܕܬܳܐ ܐܰܝܟ ܚܰܕ ܐܰܠܳܗܳܐ܆ ܡܶܛܽܠ ܗܳܝ ܕܚܰܕ ܘܗܺܝ ܟܰܕ ܗܺܝ ܕܽܐܘܣܺܝܰܐ ܐܰܘ ܟܺܝܬ ܕܰܐܠܳܗܽܘܬܳܐ. ܡܶܛܽܠ ܗܳܕܶܐ ܒܗܳܠܶܝܢ ܕܒܰܬܰܪܟܶܢ ܬܽܘܒ܆ ܟܰܣܝܳܐܺܝܬ ܘܪܶܡܙܳܢܳܐܺܝܬ܆ ܐܳܦܶܢ ܠܰܘ ܡܫܰܡܠܝܳܐܺܝܬ ܐܶܡܰܪ ܫܽܘܘܕܳܥܳܐ ܕܰܬܠܺܝܬܳܝܽܘܬܳܐ܆ ܐܶܠܳܐ ܟܺܝܬ ܠܰܘ ܚܰܕ܆ ܐܶܠܳܐ ܦܰܪܨܽܘܦܳܐ ܬܪܰܝܳܢܳܐ ܡܰܨܠܶܦ ܡܚܰܘܶܐ ܕܗܰܘ ܕܒܳܪܶܐ. ܥܒܰܕ ܓܶܝܪ ܐܶܡܰܪ ܐܰܠܳܗܳܐ ܠܒܰܪܢܳܫܳܐ܆ ܒܨܰܠܡܳܐ ܕܰܐܠܳܗܳܐ ܥܰܒܕܶܗ. ܫܳܡܰܥ ܐܰܢ̱ܬ ܕܰܐܠܳܗܳܐ ܥܒܰܕ ܒܨܰܠܡܳܐ ܕܰܐܠܳܗܳܐ܆ ܟܰܕ ܛܳܒ ܟܺܝܬ ܙܳܕܶܩ ܗ̱ܘܳܐ ܕܢܺܐܡܰܪ܆ ܒܨܰܠܡܳܐ ܕܺܝܠܶܗ.
ܗܺܝ ܕܶܝܢ ܟܰܕ ܗܺܝ ܗܳܕܶܐ ܐܳܦ ܒܕܽܘܟܬܳܐ ܐ̱ܚܪܺܬܳܐ ܐܺܝܬ ܠܡܶܚܙܳܐ ܕܡܶܬܝܰܕܥܳܐ. ܐܶܬܚܙܺܝ ܓܶܝܪ ܐܳܡܰܪ ܐܰܠܳܗܳܐ ܠܰܐܒܪܳܗܳܡ. ܘܒܰܐܝܢܳܐ ܙܢܳܐ ܐܶܬܚܙܺܝ ܦܰܫܶܩ ܠܰܢ. ܟܰܕ ܠܰܡ ܐܰܪܺܝܡ ܥܰܝܢܰܘ̈ܗ̱ܝ ܚܙܳܐ܆ ܘܗܳܐ ܬܠܳܬܳܐ ܓܰܒܪ̈ܶܐ ܩܳܝܡܺܝܢ ܗܘܰܘ ܠܥܶܠ ܡܶܢܶܗ[31].
ܗܳܕܶܐ ܗܳܟܺܝܠ ܐܶܡܰܪ ܠܺܝ. ܐܰܠܳܗܳܐ ܗܰܘ ܕܶܐܬܚܙܺܝ܆ ܐܺܝܬܰܘܗ̱ܝ ܩܰܘܡܳܐ ܗܰܘ ܕܰܬܠܳܬܳܐ ܓܰܒܪ̈ܶܐ܆ ܐܺܝܢ ܐܳܡܰܪ. ܒܰܬܠܺܝܬܳܝܽܘܬܳܐ ܓܶܝܪ ܘܒܰܠܚܽܘܕܳܝܽܘܬܳܐ ܐܺܝܬܰܘܗ̱ܝ ܐܰܠܳܗܳܐ. ܗܰܘ ܓܶܝܪ ܕܰܬܠܳܬܳܐ ܓܰܒܪ̈ܶܐ ܚܙܳܐ ܘܰܣܓܶܕ ܥܰܠ ܐܰܪܥܳܐ܆ ܐܰܝܟ ܕܰܠܘܳܬ ܚܰܕ ܠܘܳܬ ܗܳܢܽܘܢ ܬܠܳܬܳܐ ܥܳܒܶܕ ܗ̱ܘܳܐ ܠܗܶܝܢ ܠܡ̈ܶܠܶܐ. ܟܰܕ ܐܶܡܰܪ: ܡܳܪܝܳܐ. ܐܶܢ ܐܰܪܰܐ ܐܶܫܟܚܶܬ ܛܰܝܒܽܘܬܳܐ ܩܕܳܡܰܝܟ܆ ܠܳܐ ܬܶܥܒ̣ܪܺܝܘܗ̱ܝ ܠܥܰܒܕܳܟ[32]. ܘܟܰܕ ܫܰܚܠܦܶܗ ܡܶܚܕܳܐ ܠܶܐܣܟܺܡܳܐ ܕܡܶܠܬܳܐ܆ ܬܽܘܒ ܐܰܝܟ ܕܰܠܘܳܬ ܬܠܳܬܳܐ ܡܡܰܠܶܠ ܗ̱ܘܳܐ. ܢܶܬܢܰܣܒܽܘܢ ܗܳܟܺܝܠ ܡܰܝ̈ܳܐ܆ ܘܰܢܫܺܝܓܽܘܢ ܪ̈ܶܓܠܶܐ ܕܺܝܠܟܽܘܢ܆ ܘܰܐܩܰܪܘ ܛܰܗܪܳܐ ܬܚܶܝܬ ܐܺܝܠܳܢܳܐ[33].
ܡܳܢܳܐ ܕܶܝܢ ܢܺܐܡܰܪ ܐ̱ܢܳܫ ܟܰܕ ܫܳܡܰܥ ܬܽܘܒ ܠܰܟ̈ܬܳܒܶܐ ܟܳܗ̈ܢܳܝܶܐ ܕܳܐܡܪܺܝܢ܆ ܘܡܳܪܝܳܐ ܐܰܡܛܰܪ ܥܰܠ ܣܕܽܘܡ ܘܥܰܠ ܥܳܡܽܘܪܐ ܟܶܒܪܺܝܬܳܐ ܘܢܽܘܪܳܐ ܡܶܢ ܠܘܳܬ ܡܳܪܝܳܐ ܡܶܢ ܫܡܰܝܳܐ[34]. ܐܰܝܢܳܐ ܡܳܪܝܳܐ܆ ܡܶܢ ܠܘܳܬ ܐܰܝܢܳܐ ܡܳܪܝܳܐ. ܠܳܐ ܓܶܝܪ ܬܺܐܡܰܪ ܕܚܰܕ ܡܳܪܝܳܐ܆ ܡܰܠܰܐܟܳܐ ܐܰܘ ܡܶܕܶܡ ܡܶܢ ܚܰܝ̈ܠܰܘܳܬܳܐ ܗܳܢܽܘܢ ܡܫܰܡ̈ܫܳܢܶܐ ܐܺܝܬܰܘܗ̱ܝ ܗ̱ܘܳܐ. ܗܽܘ ܓܶܝܪ ܫܡܳܐ ܡܳܪܝܳܐ܆ ܠܰܐܠܳܗܳܐ ܒܰܠܚܽܘܕܰܘܗ̱ܝ ܦܐܶܐ܆ ܐܰܝܟܰܢܳܐ ܕܰܟܬܺܝܒ܆ ܘܢܶܕܥܽܘܢ ܕܰܫܡܳܐ ܕܺܝܠܳܟ ܡܳܪܝܳܐ܆ ܐܰܢ̱ܬ ܒܰܠܚܽܘܕܰܝܟ ܡܪܰܝܡܳܐ ܥܰܠ ܟܽܠܳܗ̇ ܐܰܪܥܳܐ[35].
ܗܳܟܰܢܳܐ ܐܳܦ ܟܰܕ ܡܽܘܫܶܐ ܟܬܰܒ ܗܽܘ ܡܶܛܽܠܳܬܶܗ ܗܳܠܶܝܢ܆ ܘܡܰܠܶܠ ܡܳܪܝܳܐ ܠܘܳܬ ܡܽܘܫܶܐ ܐܰܦܺܝ̈ܢ ܒܰܐܦܺܝ̈ܢ܆ ܐܰܝܟ ܕܶܐܢ ܐ̱ܢܳܫ ܢܡܰܠܶܠ ܠܘܳܬ ܪܳܚܡܶܗ[36]܆ ܒܳܥܶܐ ܗ̱ܘܳܐ ܡܶܢ ܐܰܠܳܗܳܐ ܟܰܕ ܐܳܡܰܪ: ܚܰܘܳܐ ܠܺܝ ܫܽܘܒܚܳܟ[37]. ܐܶܠܳܐ ܐܶܢܗܽܘ ܕܰܐܦܺܝ̈ܢ ܒܰܐܦܺܝ̈ܢ ܒܰܕܡܽܘܬ ܪܳܚܡܳܐ ܡܡܰܠܶܠ ܗ̱ܘܳܐ ܠܶܗ ܠܰܐܠܳܗܳܐ܆ ܐܰܝܟܰܢܳܐ ܡܶܬܪܰܓܪܰܓ ܗ̱ܘܳܐ ܬܽܘܒ ܕܰܠܫܽܘܒܚܳܐ ܕܰܐܠܳܗܳܐ ܢܶܚܙܶܐ. ܐܰܘ ܝܺܕܺܝܥܳܐ ܕܰܠܨܶܡܚܳܐ ܕܬܶܫܒܽܘܚܬܶܗ ܒܳܥܶܐ ܗ̱ܘܳܐ ܕܢܶܬܚܰܘܶܐ ܠܶܗ܆ ܠܺܝܚܺܝܕܳܝܳܐ܆ ܠܡܶܠܬܳܐ܆ ܠܝܽܘܩܢܳܐ ܕܰܩܢܽܘܡܶܗ ܕܰܐܒܳܐ܆ ܠܗܰܘ ܕܰܒܝܰܘ̈ܡܳܬܳܐ ܐ̱ܚܪ̈ܳܝܶܐ ܒܰܒܣܰܪ ܥܬܺܝܕ ܗ̱ܘܳܐ ܕܢܶܬܚܙܶܐ.
ܡܶܛܽܠܗܳܕܶܐ ܐܳܦ ܫܳܡܰܥ ܗ̱ܘܳܐ܆ ܗܳܐ ܕܽܘܟܬܳܐ ܠܘܳܬܝ ܘܰܬܩܽܘܡ ܥܰܠ ܫܽܘܥܳܐ[38]. ܦܰܘܠܽܘܤ ܕܶܝܢ ܐܳܡܰܪ: ܕܗܰܘ ܫܽܘܥܳܐ ܡܫܺܝܚܳܐ ܐܺܝܬܰܘܗ̱ܝ ܗ̱ܘܳܐ[39]. ܗܳܝ ܕܶܝܢ ܕܳܐܡܰܪ܆ ܕܰܐܝܟ ܗܳܕܶܐ ܐܺܝܬܶܝܗ̇. ܕܕܰܚܙܳܬܳܐ ܕܫܽܘܒܚܳܐ ܕܺܝܠܝ ܗܳܝ ܕܪܳܐܶܓ ܐܰܢ̱ܬ ܕܬܶܫܟܰܚ܆ ܚܕܳܐ ܕܽܘܟܬܳܐ ܘܰܙܢܳܐ ܐܺܝܬ ܠܺܝ܆ ܡܶܬܒܰܣܪܳܢܽܘܬܶܗ ܕܡܶܠܬܳܐ. ܗܳܝ ܕܡܶܛܽܠܳܬܳܗ̇ ܟܺܐܦܳܐ ܢܶܫܬܰܡܰܗ ܟܰܕ ܐܳܡܰܪ: ܕܥܰܠ ܗܳܕܶܐ ܟܺܐܦܳܐ ܐܶ݀ܒܢܶܝܗ̇ ܠܥܺܕܬܝ[40]܆ ܘܡܶܬܚܰܙܝܳܢܳܐ ܢܶܗܘܶܐ ܒܰܡܕܰܒܪܳܢܽܘܬܳܐ ܗܳܝ ܕܒܰܒܣܰܪ ܟܰܕ ܒܰܟܝܳܢܶܗ ܠܳܐ ܡܶܬܚܰܙܝܳܢܳܐ ܐܺܝܬܰܘܗ̱ܝ܆ ܘܢܺܐܡܰܪ ܕܗܰܘ ܕܰܚܙܳܢܝ܆ ܚܙܳܐ ܠܰܐܒܳܐ[41]. ܐܰܝܟܰܢܳܐ ܟܺܝܬ ܕܗܳܢܽܘܢ ܕܢܶܚܙܽܘܢܳܝܗ̱ܝ ܢܺܐܡܪܽܘܢ܆ ܚܙܰܝܢܰܢ ܫܽܘܒܚܶܗ܆ ܫܽܘܒܚܳܐ ܐܰܝܟ ܕܺܝܚܺܝܕܳܝܳܐ ܕܡܶܢ ܐܰܒܳܐ܆ ܕܰܡܠܶܐ ܛܰܝܒܽܘܬܳܐ ܘܰܫܪܳܪܳܐ[42]. ܐܶܢ ܗܳܟܺܝܠ ܬܶܚܙܶܐ ܨܳܒܶܐ ܐܰܢ̱ܬ ܫܽܘܒܚܳܐ ܕܺܝܠܝ܆ ܒܗܳܢܳܐ ܙܢܳܐ ܐܶ݀ܩܕܽܘܡ ܐܶ݀ܚܰܘܶܐ ܠܳܟ. ܘܗܳܕܶܐ ܐܰܝܟ ܕܰܒܦܶܠܶܐܬܳܐ܆ ܘܰܐܝܟ ܕܡܶܫܟܚܳܐ ܕܟܰܕ ܡܶܢ ܪܽܘܚܩܳܐ ܩܳܕܶܡ ܐܰܢ̱ܬ ܚܳܙܶܐ ܐܰܢ̱ܬ܆ ܬܶܚܙܶܐ ܗܳܝ ܕܰܥܬܺܝܕܳܐ. ܟܰܕ ܣܽܘܓܐܗܶܝܢ ܡܶܬܟܰܣ̈ܝܳܢ܆ ܐܰܝܟܰܢܳܐ ܕܠܳܐ ܒܗܳܝ ܕܰܠܥܶܠ ܡܶܢܳܟ ܬܺܐܩܰܪ. ܘܬܶܬܡܚܶܠ ܐܳܦ ܠܘܳܬ ܗܳܝ ܕܡܶܬܬܰܕܪܟܳܐ ܗ̱ܘܳܬ ܠܳܟ. ܐܶ݀ܣܺܝܡܳܟ ܓܶܝܪ ܐܳܡܰܪ ܒܰܚܪܽܘܪܳܐ ܕܫܽܘܥܳܐ܆ ܘܶܐ݀ܟܰܣܶܐ ܐܺܝܕܳܐ ܕܺܝܠܝ ܥܠܰܝܟ܆ ܥܕܰܡܳܐ ܕܶܐ݀ܥܒܰܪ ܘܰܐܪܺܝܡ ܐܺܝܕܝ܆ ܘܗܳܝܕܶܝܢ ܬܶܚܙܶܐ ܠܗܳܠܶܝܢ ܕܒܶܣܬܰܪܝ܆ ܦܰܪܨܽܘܦܳܐ ܕܶܝܢ ܕܺܝܠܝ܆ ܠܳܐ ܢܶܬܚܙܶܐ ܠܳܟ.[43]
ܐܳܦ ܚܪܽܘܪܳܐ ܕܶܝܢ ܘܳܐܦ ܐܺܝܕܳܐ ܕܰܡܟܰܣܝܳܐ܆ ܡܳܢܳܐ ܐ̱ܚܪܺܢܳܐ܆ ܐܶܠܳܐ ܐܶܢ ܓܶܠܝܳܢܳܐ ܡܢܳܬܳܝܳܐ ܘܰܕܥܰܡ 222ܚܘܣܢܐ ܐܰܘܟܺܝܬ ܚܰܣܽܘܟܬܳܢܽܘܬܳܐ ܡܚܰܘܶܝܢ܆ ܕܰܐܝܟ ܗܳܢܳܐ ܓܶܝܪ ܐܺܝܬܰܘܗ̱ܝ ܗܰܘ ܡܳܐ ܕܰܒܝܰܕ ܚܪܽܘܪܳܐ ܐܰܘܟܺܝܬ ܢܶܩܒܳܐ ܢܳܦܶܠ ܬܚܶܝܬ ܥܰܝ̈ܢܶܐ܆ ܗܰܘ ܕܒܺܐܝܕܰܘ̈ܗ̱ܝ ܡܶܬܚܰܙ̈ܝܳܢ ܗܳܠܶܝܢ ܕܒܶܣܬܪܳܐ ܕܰܐܠܳܗܳܐ. ܗܳܠܶܝܢ ܕܶܝܢ ܐܺܝܬܰܝܗܶܝܢ ܗ̱ܘܰܝ̈܆ ܡܶܬܓܰܠܝܳܢܽܘܬܶܗ ܕܒܰܒܣܰܪ ܕܺܝܚܺܝܕܳܝܳܐ܆ ܗܳܝ ܕܰܒܙܰܒ̈ܢܶܐ ܕܡܶܢ ܒܶܣܬܪܳܐ ܐܰܘܟܺܝܬ ܒܳܬܰܪܟܶܢ ܦܽܘܐܺܝܛܳܐܺܝܬ ܠܡܺܐܡܰܪ ܘܕܰܥܬܺܝܕܺܝܢ.
ܘܰܕܗܳܠܶܝܢ ܗܳܟܰܢܳܐ ܐܺܝܬ ܠܗܶܝܢ܆ ܢܰܘ̈ܕܥܳܢ ܗܳܠܶܝܢ ܕܡܶܢ ܒܳܬܰܪܟܶܢ. ܢܚܶܬ ܓܶܝܪ ܐܳܡܰܪ ܡܳܪܝܳܐ ܒܰܥܢܳܢܳܐ ܘܩܳܡ ܠܘܳܬܶܗ ܬܰܡܳܢ܆ ܘܰܩܪܳܐ ܒܰܫܡܳܐ ܠܡܳܪܝܳܐ܆ ܘܰܥܒܰܪ ܡܳܪܝܳܐ ܩܕܳܡ ܐܰܦܰܘ̈ܗ̱ܝ[44]. ܚܳܙܶܐ ܐܰܢ̱ܬ ܕܡܳܪܝܳܐ ܩܪܳܐ ܠܡܳܪܝܳܐ ܐ̱ܚܪܺܢܳܐ܆ ܫܰܘܬܳܦܳܐ ܕܰܫܡܶܗ܆ ܡܶܛܽܠ ܟܺܝܬ ܕܳܐܦ ܕܽܐܘܣܺܝܰܐ ܘܰܕܫܽܘܒܚܳܐ܆ ܗܳܟܰܢܳܐ ܓܶܝܪ ܐܳܦ ܩܰܕܶܡ ܗ̱ܘܳܐ ܐܶܡܰܪ ܠܶܗ ܠܡܽܘܫܶܐ. ܘܶܐ݀ܩܪܶܐ ܒܰܫܡܳܐ ܠܡܳܪܝܳܐ ܩܕܳܡܰܝܟ. ܐܳܦ ܟܺܝܬ ܘܰܩܪܳܐ.
ܡܶܛܽܠ ܗܳܕܶܐ ܗܽܘ ܡܶܠܬܶܗ ܕܰܐܠܳܗܳܐ ܒܶܐܘܰܢ̈ܓܶܠܺܝܰܐ ܠܘܳܬ ܝܽܗ̱ܘ̈ܕܳܝܶܐ ܐܳܡܰܪ ܗ̱ܘܳܐ: ܐܶܠܽܘ ܡܗܰܝܡܢܺܝܢ ܗ̱ܘܰܝܬܽܘܢ ܠܡܽܘܫܶܐ܆ ܡܗܰܝܡܢܺܝܢ ܗ̱ܘܰܝܬܽܘܢ ܠܺܝ.[45] ܡܶܛܽܠܳܬܝ ܓܶܝܪ ܗܰܘ ܟܬܰܒ. ܗܰܘ ܕܳܐܦ ܒܬܶܢܝܳܢ ܢܳܡܽܘܣܳܐ܆ ܟܰܕ ܠܗܰܘ ܚܰܕ ܐܰܠܳܗܳܐ ܕܒܰܬܠܳܬܳܐ ܩܢܽܘ̈ܡܶܐ ܡܰܘܕܰܥ ܗ̱ܘܳܐ܆ ܟܰܕ ܠܟܽܠܶܗ ܣܽܘܥܪܳܢܳܐ ܒܰܙܥܽܘܪܽܘܬ ܡܶܠܬܳܐ ܡܶܕܶܡ ܓܠܺܝܬܳܐ ܚܒܰܫ ܐܶܡܰܪ: ܫܡܰܥ ܐܺܝܣܪܳܐܶܝܠ܆ ܡܳܪܝܳܐ ܐܰܠܳܗܳܐ ܕܺܝܠܰܢ ܡܳܪܝܳܐ ܚܰܕ ܐܺܝܬܰܘܗ̱ܝ[46].
ܗܳܠܶܝܢ ܕܶܝܢ ܢܶܦܩܶܬ ܒܡܶܠܬܳܐ܆ ܐܰܝܟܰܢܳܐ ܕܳܐܦ ܠܗܳܢܽܘܢ ܕܡܶܢ ܝܽܗ̱ܘ̈ܕܳܝܶܐ ܘܡܶܢ ܫܳܡܪ̈ܳܝܶܐ ܡܶܬܬܰܪܬܶܝܢ ܡܶܠܬܳܐ ܕܫܰܦܺܝܪܽܘܬ ܕܶܚܠܬܳܐ܆ ܢܶܗ̈ܘܝܳܢ ܐܺܝܬܰܝܗܶܝܢ ܠܳܚ̈ܡܳܬܳܐ ܗܳܠܶܝܢ ܕܡܶܬܐܰܡܪ̈ܳܢ܆ ܘܠܰܘ ܐܰܟܣ̈ܢܳܝܳܬܳܐ ܟܽܠ ܟܽܠܶܗ ܘܠܳܐ ܡܶܬܩܰܒ̈ܠܳܢܝܳܬܳܐ܆ ܐܳܦ ܓܶܝܪ ܠܟܽܠ ܚܰܕ ܡܶܢ ܬܰܪ̈ܥܝܳܬܳܐ ܒܰܝ̈ܬܳܝܳܬܳܐ ܕܺܝܠܳܗ̇ ܠܳܒܟܳܐ ܡܰܠܦܳܢܽܘܬܳܐ ܘܰܡܩܰܪܒܳܐ܆ ܡܶܛܽܠ ܕܰܟܢܽܘܫܝܳܐ ܣܰܓܝܳܐܐ ܕܣܳܗ̈ܕܘܳܬܳܐ ܕܡܶܢ ܢܒܺܝ̈ܶܐ ܟܺܝܬ ܘܡܶܢ ܟܬܳܒ̈ܶܐ ܕܫܰܪܟܳܐ ܕܕܺܝܰܬܺܝܩܺܐ ܥܰܬܺܝܩܬܳܐ܆ ܡܩܰܝܶܡ ܘܰܡܚܰܘܶܐ ܠܳܗ̇ ܠܡܶܠܬܳܐ ܕܡܶܛܽܠ ܬܠܺܝܬܳܝܽܘܬܳܐ ܩܰܕܺܝܫܬܳܐ. ܗܳܢܶܝܢ ܕܰܕܢܶܥܒܰܪ ܥܠܰܝܗܶܝܢ ܐܰܪܺܝܟܬܳܐ ܐܺܝܬܶܝܗ̇܆ ܘܠܰܘ ܕܙܰܒܢܳܐ ܗܳܢܳܐ ܕܩܰܪܺܝܒ.
ܘܡܳܢܳܐ ܬܡܺܝܗܳܐ ܐܶܢ ܒܙܰܒ̈ܢܶܐ ܕܡܽܘܫܶܐ܆ ܟܰܕ ܒܢܰܝ̈ ܐ̱ܢܳܫܳܐ ܐܰܝܟ ܕܶܐܡܪܶܬ ܠܳܐ ܡܫܰܡܠܝܳܐܺܝܬ ܣܺܝܡܺܝܢ ܗ̱ܘܰܘ܆ ܗܳܠܶܝܢ ܕܰܡܡܰܠܠܽܘܬ ܐܰܠܳܗܽܘܬܳܐ ܥܰܡ ܡܛܰܫܝܳܢܽܘܬܳܐ222 ܣܰܓܺܝܐܬܳܐ ܡܶܬܬܰܫ̈ܠܡܳܢ ܗ̱ܘܰܝ̈܆ ܐܶܡܰܬܝ ܕܳܐܦ ܒܕܺܝܰܬܺܝܩܺܐ ܚܕܰܬܳܐ ܥܰܡ ܡܕܰܒܪܳܢܽܘܬܳܐ ܚܰܟܺܝܡܬܳܐ ܣܰܓܺܝ ܘܒܺܐܝܕܳܐ ܒܺܐܝܕܳܐ ܡܶܠܬܳܐ ܕܰܐܝܟ ܗܳܕܶܐ ܪܕܳܬ̣܆ ܘܟܰܕ ܡܰܫܠܶܡ ܗ̱ܘܳܐ ܡܫܺܝܚܳܐ ܠܰܡܫܰܡܠܝܽܘܬܳܐ[47] ܕܦܽܘܩ̈ܕܳܢܶܐ ܐܶܘܰܢ̈ܓܶܠܳܝܶܐ ܐܳܡܰܪ ܗ̱ܘܳܐ: ܐܶܬܐܡܰܪ ܠܩܰܕܡܳܝ̈ܶܐ ܕܠܳܐ ܬܶܩܛܽܘܠ܆ ܐܶܢܳܐ ܕܶܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܟܽܠ ܡܰܢ ܕܪܳܓܶܙ ܥܰܠ ܐܰܚܽܘܗ̱ܝ ܐܺܝܩܺܝ ܡܚܰܝܒܳܐ ܢܶܗܘܶܐ ܐܺܝܬܰܘܗ̱ܝ ܠܕܺܝܢܳܐ܆[48] ܘܠܳܐ ܐܶܡܰܪ܆ ܕܶܐܡܰܪ ܐܰܠܳܗܳܐ ܠܩܰܕܡܳܝ̈ܶܐ܆ ܐܶܠܳܐ ܟܰܕ ܐܶܬܚܰܫܰܚ ܒܗܳܝ ܡܶܠܬܳܐ ܐܶܬܐܡܰܪ ܕܠܳܐ ܡܰܘܕܥܳܐ ܗ̱ܘܳܬ ܐܳܦܠܳܐ ܚܰܕ ܡܶܢ ܦܰܪ̈ܨܽܘܦܶܐ܆ ܘܗܳܟܰܢܳܐ ܐܰܝܬܺܝ ܒܳܬܪܳܗ̇ ܗܳܝ ܕܶܐܢܳܐ ܕܶܝܢ ܐܳܡܰܪ ܐ̱ܢܳܐ ܠܟܽܘܢ܆ ܐܳܦ ܐܺܝܩܳܪܳܐ ܘܫܽܘܠܛܳܢܳܐ ܦܐܶܐ ܠܰܐܠܳܗܳܐ ܕܦܰܪܨܽܘܦܳܐ ܒܰܝܬܳܝܳܐ ܕܺܝܠܶܗ ܐܰܥܶܠ܆ ܘܰܥܪܰܩ ܡܶܢ ܗܳܝ ܕܢܶܣܬܒܰܪ ܕܣܳܐܶܡ ܢܳܡܽܘܣܳܐ ܣܰܩܽܘܒܠܳܐܺܝܬ ܠܽܘܩܒܰܠ ܗܰܘ ܕܗܳܠܶܝܢ ܩܰܕܡܳܝ̈ܳܬܳܐ ܣܳܡ ܢܳܡܽܘܣܳܐ܆ ܫܒܽܘܩ ܕܳܐܦ ܠܗܳܠܶܝܢ ܗܽܘ ܐܺܝܬܰܘܗ̱ܝ ܗ̱ܘܳܐ ܗܰܘ ܕܣܳܡ܆ ܒܺܐܝܕܰܘ̈ܗ̱ܝ ܓܶܝܪ ܒܢܳܡܽܘܣܳܐ ܘܒܰܢ̈ܒܺܝܶܐ ܡܰܠܶܠ ܐܰܒܳܐ ܠܗܳܢܽܘܢ ܩܰܕܡܳܝ̈ܶܐ܆ ܐܶܠܳܐ ܡܶܢ ܒܳܬܰܪ ܡܽܘܠܳܝܳܐ ܕܰܡܕܰܒܪܳܢܽܘܬܳܐ܆ ܫܠܺܝ̈ܚܶܐ ܟܰܕ ܠܡܶܠܬܳܐ ܕܶܐܘܰܢܓܶܠܺܝܽܘܢ ܡܫܰܡܫܺܝܢ ܗ̱ܘܰܘ ܘܰܠܗܳܕܶܐ ܒܳܐܬܘ̈ܳܬܳܐ ܡܫܰܪܪܺܝܢ ܗ̱ܘܰܘ܆ ܥܰܡ ܦܰܪܶܗ̱ܣܺܝܰܐ ܡܶܟܺܝܠ ܡܰܟܪܙܺܝܢ ܗܘܰܘ ܐܳܦ ܠܫܽܘܠܛܳܢܶܗ ܕܪܽܘܚܳܐ ܘܰܠܫܰܘܝܽܘܬ ܐܺܝܩܳܪܶܗ ܕܰܠܘܳܬ ܐܰܒܳܐ ܘܰܒܪܳܐ܆ ܟܰܕ ܐܳܡܪܺܝܢ ܗܘܰܘ ܕܗܳܠܶܝܢ ܐܳܡܰܪ ܪܽܘܚܳܐ ܩܰܕܺܝܫܳܐ[49]܆ ܘܰܫܦܰܪ ܠܪܽܘܚܳܐ ܩܰܕܺܝܫܳܐ܆ ܘܶܐܡܰܪ ܪܽܘܚܳܐ ܩܰܕܺܝܫܳܐ܆ ܘܡܳܪܝܳܐ ܐܺܝܬܰܘܗ̱ܝ ܪܽܘܚܳܐ܆ ܘܰܠܘܳܬ ܝܽܗ̱ܘ̈ܕܳܝܶܐ ܤܛܶܦܰܢܽܘܤ܆ ܐܰܢ̱ܬܽܘܢ ܒܟܽܠ ܙܒܰܢ ܠܽܘܩܒܰܠ ܪܽܘܚܳܐ ܩܰܕܺܝܫܳܐ ܩܳܝܡܺܝܢ ܐܢ̱ܬܽܘܢ܆ ܐܳܦ ܦܛܪܘܤ ܠܘܳܬ ܚܰܢܰܢܝܳܐ܆ ܡܶܛܽܠ ܡܳܢܳܐ ܡܠ̣ܳܐ ܤܳܛܳܢܳܐ ܠܠܶܒܳܟ ܕܰܬܕܰܓܶܠ ܒܪܽܘܚܳܐ ܩܰܕܺܝܫܳܐ܆ ܠܳܐ ܕܰܓܶܠܬ ܒܰܒ̈ܢܰܝܢܳܫܳܐ ܐܶܠܳܐ ܒܰܐܠܳܗܳܐ[50].
ܒܝܰܕ ܟܽܠܗܶܝܢ ܗܳܟܺܝܠ ܐܶܬܚܰܘܝܰܬ܆ ܕܥܳܒܽܘܕܬܳܐ ܐܺܝܬܶܝܗ̇ ܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܘܕܺܝܠܳܗ̇ ܟܰܕ ܕܺܝܠܳܗ̇ ܕܰܚܕܳܐ ܐܽܘܣܺܝܰܐ ܘܬܶܫܒܽܘܚܬܳܐ ܘܡܰܠܟܽܘܬܳܐ ܘܚܰܝܠܳܐ ܘܰܡܬܽܘܡܳܝܽܘܬܳܐ. ܗܳܕܶܐ ܠܰܒܪܺܝܬܳܐ ܗܳܝ ܠܳܐ ܡܶܬܚܰܙܝܳܢܺܝܬܳܐ܆ ܠܚܰܝ̈ܠܰܘܳܬܳܐ ܐܳܡܰܪ ܐ̱ܢܳܐ ܗܳܠܶܝܢ ܕܰܠܥܶܠ ܘܡܶܬܗܰܘ̈ܢܳܢܶܐ܆ ܘܰܠܥܳܠܡܳܐ ܗܳܢܳܐ ܡܶܬܚܰܙܝܳܢܳܐ܆ ܡܶܢ ܗܳܝ ܕܠܳܐ ܐܺܝܬܰܝܗܽܘܢ ܠܗܳܝ ܕܢܶܗܘܽܘܢ ܐܺܝܬܰܝܗܽܘܢ ܐܰܥܒܪܰܬ. ܘܰܠܟܽܠܗܶܝܢ ܒܝܰܕ ܒܪܳܐ ܥܒܰܕ ܐܰܒܳܐ܆ ܟܰܕ ܥܳܒܶܕ ܐܰܟܚܕܳܐ ܥܰܡܶܗ ܐܳܦ ܪܽܘܚܳܐ ܩܰܕܺܝܫܳܐ. ܚܕܳܐ ܓܶܝܪ ܐܺܝܬܶܝܗ̇ ܡܰܥܒܕܳܢܽܘܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ.
ܡܳܢܳܐ ܗܳܟܺܝܠ ܐܳܡܰܪ. ܩܕܳܡ ܕܢܶܗܘܶܐ ܟܽܠ ܡܶܕܶܡ܆ ܢܺܐܡܰܪ ܕܒܰܛܺܝܠܳܐ ܘܰܕܠܳܐ ܣܳܥܽܘܪܽܘܬܳܐ ܐܺܝܬܰܘܗ̱ܝ ܗ̱ܘܳܐ ܐܰܠܳܗܳܐ܆ ܠܳܐ ܬܶܗܘܶܐ. ܡܠܽܘܐܳܐ ܓܶܝܪ ܐܺܝܬ ܗ̱ܘܳܐ ܠܶܗ ܐܰܝܟܰܢܳܐ ܕܐ̱ܢܳܫ ܢܺܐܡܰܪ܆ ܬܶܐܽܘܪܺܝܰܐ ܕܺܝܠܶܗ ܗܳܝ ܕܰܕܠܳܐ ܣܳܟܳܐ ܐܺܝܬܶܝܗ̇ ܘܰܕܠܶܗ ܒܰܠܚܽܘܕܰܘܗ̱ܝ ܡܶܬܝܰܕܥܳܐ ܗ̄ܘܳܬ܆ ܘܗܺܝ ܕܰܒܚܶܟܡܬܳܐ ܗܳܝ ܕܺܐܝܬܶܝܗ̇ ܗ̱ܘܳܬ ܒܶܗ ܐܽܘܣܝܳܐܺܝܬ ܢܶܬܒܰܣܰܡ ܐܰܘܟܺܝܬ ܢܶܚܕܶܐ܆ ܗܳܝ ܟܺܝܬ ܕܺܐܝܬܶܝܗ̇ ܒܪܳܐ ܝܺܚܺܝܕܳܝܳܐ ܘܡܶܠܬܳܐ܆ ܗܳܝ ܕܳܐܦ ܒܡ̈ܶܠܶܐ ܟܳܗ̈ܢܳܝܳܬܳܐ ܡܶܬܬܰܝܬܝܳܐ ܟܰܕ ܐܳܡܪܳܐ: ܡܶܢ ܩܕܳܡ ܟܽܠܗܽܘܢ ܬܶܠ̈ܠܶܐ ܝܳܠܶܕ ܠܺܝ[51]܆ ܘܶܐܢܳܐ ܐܺܝܬܰܝ ܗ̱ܘܺܝܬ ܗܳܝ ܕܰܠܘܳܬܳܗ̇ ܚܳܕܶܐ ܗ̱ܘܳܐ. ܘܶܐܢܕܶܝܢ ܠܳܐ܆ ܐܶܢ ܐܳܡܪܺܝܢ ܚ̱ܢܰܢ ܠܶܗ ܕܰܣܢܺܝܩ ܗ̱ܘܳܐ ܥܰܠ ܒܶܪ̈ܝܳܬܳܐ ܒܰܝ̈ܬܳܝܳܬܳܐ ܕܺܝܠܶܗ܆ ܐܰܝܟܰܢܳܐ ܕܰܒܗܶܝܢ ܢܚܰܘܶܐ ܗ̱ܘܳܐ ܡܰܥܒܕܳܢܽܘܬܳܐ ܒܰܝܬܳܝܬܳܐ ܕܺܝܠܶܗ܆ ܢܦܰܠ ܠܶܗ ܠܒܰܪ ܡܶܢ ܗܳܝ ܕܢܶܗܘܶܐ ܐܺܝܬܰܘܗ̱ܝ ܠܳܐ ܣܢܺܝܩܳܐ. ܗܽܘ ܓܶܝܪ ܠܳܐ ܣܢܺܝܩ ܥܰܠ ܡܶܕܶܡ. ܐܶܠܳܐ ܠܟܽܠܗܶܝܢ ܥܒܰܕ܆ ܐܶܡܰܬܝ ܕܰܕܘܳܠܝܳܐ ܕܳܢܳܗ̇ ܠܗܳܕܶܐ ܕܺܐܝܬܶܝܗ̇܆ ܒܡ̈ܠܶܐ ܗܳܠܶܝܢ ܕܗܽܘ ܝܳܕܰܥ܆ ܟܰܕ ܡܶܛܽܠ ܛܳܒܽܘܬܶܗ ܒܰܠܚܽܘܕܶܝܗ̇ ܗܳܝ ܕܥܳܒܪܳܐ ܠܟܽܠ ܨܳܒܶܐ܆ ܕܢܶܗܘܶܐ ܐܺܝܬ ܗܳܢܽܘܢ ܕܡܶܫܬܰܘܬܦܺܝܢ ܟܺܝܬ ܘܡܶܬܒܰܣܡܺܝܢ ܒܺܝܕܰܥܬܳܐ ܕܺܝܠܶܗ ܘܰܒܫܽܘܒܚܶܗ. ܘܶܐܢ ܕܶܝܢ ܠܳܐ ܐܰܝܟ ܡܶܠܬܳܐ ܣܟ̥ܰܠܬܳܐ ܘܰܕܠܳܐ ܗܰܘܢܳܐ ܕܗܳܢܽܘܢ܆ ܘܳܐܦ ܗܳܫܳܐ ܡܶܢ ܡܢܳܬܳܐ ܣܰܓܺܝܐܬܳܐ ܘܰܐܝܟ ܕܰܠܡܺܐܡܰܪ ܡܶܢܟܽܠ܆ ܒܰܛܺܝܠܳܐ ܐܺܝܬܰܘܗ̱ܝ ܘܰܕܠܳܐ ܣܳܥܽܘܪܽܘܬܳܐ. ܙܥܽܘܪ̈ܝܳܬܳܐ ܓܶܝܪ ܐܺܝܬܰܝܗܶܝܢ ܠܶܗ ܟܽܠܗܶܝܢ܆ ܠܦܽܘܬ ܚܰܝܠܶܗ ܘܡܰܥܒܕܳܢܽܘܬܶܗ ܕܠܳܐ ܣܳܟܳܐ. ܐܰܝܟ ܡܶܠܬܶܗ ܓܶܝܪ ܕܶܐܫܰܥܝܳܐ ܢܒܺܝܳܐ܆ ܟܽܠܗܽܘܢ ܥܰܡ̱ܡ̈ܶܐ܆ ܐܰܝܟ ܛܽܘܦܬܳܐ ܡܶܢ ܩܰܕܣܳܐ܆ ܘܰܐܝܟ ܢܶܙܠܳܐ ܕܡܰܣܰܐܬܳܐ ܐܶܬܚܫܶܒܘ ܠܶܗ[52]. ܘܟܽܠܗܽܘܢ ܠܠܳܐ ܡܶܕܶܡ ܐܺܝܬܰܝܗܽܘܢ܆ ܘܰܠܠܳܐ ܡܶܕܶܡ ܐܶܬܚܫܶܒܘ. ܐܰܝܟ ܡܶܠܬܶܗ ܕܶܝܢ ܕܚܰܟܺܝܡܳܐ ܦܰܘܠܽܘܤ܆ ܡܰܝܬܶܐ ܠܟܽܠܗܶܝܢ ܒܡܶܠܬܳܐ ܕܚܰܝܠܶܗ[53]. ܐܶܢ ܗܳܟܺܝܠ ܡܰܝܬܶܐ ܠܟܽܠܗܶܝܢ ܐܰܝܟ ܩܽܘܦܣܳܐ ܕܒܺܐܝܕܳܐ ܣܺܝܡ܆ ܘܟܽܠܗܶܝܢ ܠܦܽܘܬ ܡܥܰܠܝܽܘܬܳܐ ܕܚܰܝܠܶܗ ܟܰܕ ܡܶܬܦܰܚ̈ܡܳܢ܆ ܠܛܽܘܦܬܳܐ ܘܰܠܢܶܙܠܳܐ ܕܡܰܣܰܐܬܳܐ ܡܶܬܕܰܡ̈ܝܳܢ܆ ܠܘܳܬ ܡܥܰܠܝܽܘܬܳܐ ܕܡܰܥܒܕܳܢܽܘܬܶܗ ܗܳܝ ܕܥܳܒܪܳܐ ܠܟܽܠ ܘܫܳܦܥܳܐ ܒܰܕܡܽܘܬ ܝܰܡܳܐ ܠܳܐ ܡܶܬܬܟܺܝܠܳܢܳܐ܆ ܐܳܦ ܡܶܢ ܒܳܬܰܪ ܕܰܒ̣ܪܳܐ ܒܪܺܝܬܳܐ܆ ܕܠܳܐ ܣܳܥܽܘܪܽܘܬܳܐ ܩܰܘܺܝ܆ ܐܰܝܟ ܡܶܠܰܬܗܽܘܢ ܕܗܳܢܽܘܢ ܕܐ̱ܢܳܫܳܐܺܝܬ ܕܳܝܢܺܝܢ ܘܰܡܒܰܚܢܺܝܢ ܠܶܗ.
ܐܶܠܳܐ ܐܳܦ ܩܕܳܡ ܒܪܺܝܬܳܐ ܘܡܶܢ ܒܳܬܰܪ ܒܪܺܝܬܳܐ܆ ܗܽܘ ܐܺܝܬܰܘܗ̱ܝ ܕܣܳܦܶܩ ܗܽܘ ܠܶܗ. ܘܗܳܢܳܐ ܥܒܳܕܳܐ ܐܺܝܬ ܠܶܗ܆ ܬܶܐܽܘܪܺܝܰܐ ܕܺܝܠܶܗ. ܫܡܰܥ ܓܶܝܪ ܠܚܶܟܡܬܳܐ ܕܺܝܠܶܗ ܕܳܐܡܪܳܐ: ܐܶܢܳܐ ܐܺܝܬܰܝ ܗ̄ܘܺܝܬ ܗܳܝ ܕܰܠܘܳܬܳܗ̇ ܚܳܕܶܐ ܗ̱ܘܳܐ[54]. ܐܳܦ ܕܺܝܠܳܗ̇ ܕܶܝܢ ܕܚܶܟܡܬܳܐ ܥܒܳܕܳܐ ܐܺܝܬܰܘܗ̱ܝ ܗ̱ܘܳܐ܆ ܗܳܝ ܕܬܶܚܕܶܐ ܗ̱ܘܳܬ ܒܰܐܒܳܐ. ܐܳܡܪܳܐ ܓܶܝܪ܆ ܒܟܽܠ ܝܽܘܡ ܕܶܝܢ ܚܳܕܝܳܐ ܗ̱ܘܺܝܬ ܒܦܰܪܨܽܘܦܳܐ ܕܺܝܠܶܗ ܒܟܽܠ ܙܰܒܢܳܐ܆ ܐܰܝܟܰܢܳܐ ܕܳܐܦ ܒܶܐܘܰܢ̈ܓܶܠܺܝܰܐ ܐܳܡܰܪ: ܘܠܳܐ ܐ̱ܢܳܫ ܝܳܕܰܥ ܠܰܒܪܳܐ ܐܶܠܳܐ ܐܶܢ ܐܰܒܳܐ܆ ܘܳܐܦܠܳܐ ܠܰܐܒܳܐ ܐ̱ܢܳܫ ܝܳܕܰܥ ܐܶܠܳܐ ܐܶܢ ܒܪܳܐ[55]. ܗܳܝ ܓܶܝܪ ܕܰܒܟܽܠ ܝܽܘܡ ܘܰܒܟܽܠ ܙܰܒܢܳܐ܆ ܠܳܐ ܠܐ̱ܢܳܫ ܬܶܫܓܽܘܫ܆ ܐܰܝܟ ܡܰܢ ܕܪܶܡܙܳܐ ܙܰܒܢܳܝܳܐ ܐܺܝܬ ܠܳܗ̇. ܠܳܐ ܓܶܝܪ ܡܰܨܝܳܐ ܕܠܰܘ ܐ̱ܢܳܫܳܐܺܝܬ܆ ܘܰܠܪܽܘܚܩܳܐ ܡܶܢ ܡܥܰܠܝܽܘܬܳܐ ܐܰܠܳܗܳܝܬܳܐ ܢܡܰܠܶܠ܆ ܐܳܦܶܢ ܝܰܬܺܝܪܳܐܺܝܬ ܢܶܐܠܽܘܨ ܚܢܰܢ ܠܰܢ ܘܢܶܕܒܰܪ ܒܰܩܛܺܝܪܳܐ.
ܗܳܠܶܝܢ ܕܶܝܢ ܕܰܐܡܺܝܪ̈ܳܢ ܐܳܦ ܡܶܛܽܠ ܪܽܘܚܳܐ ܩܰܕܺܝܫܳܐ ܡܰܨܝܳܐ ܕܬܶܣܬܰܟܰܠ܆ ܗܳܕܶܐ ܚܶܟܡܬܳܐ ܘܚܰܝܠܳܐ ܕܰܐܠܳܗܳܐ ܝܺܚܺܝܕܳܝܬܳܐ ܘܰܩܢܽܘܡܳܝܬܳܐ܆ ܗܳܝ ܕܺܐܝܬܶܝܗ̇ ܡܫܺܝܚܳܐ. ܕܰܡܫܺܝܚܳܐ ܓܶܝܪ ܚܰܝܠܳܐ ܕܰܐܠܳܗܳܐ ܘܚܶܟܡܬܳܐ ܕܰܐܠܳܗܳܐ[56]܆ ܫܳܡܥܺܝܢܰܢ ܠܶܗ ܠܦܰܘܠܽܘܤ ܕܡܰܟܪܶܙ. ܗܳܝ ܕܟܰܕ ܐܶܡܪܰܬ ܡܰܛܽܠ ܐܰܠܳܗܳܐ ܘܰܐܒܳܐ܆ ܕܰܩܕܳܡ ܟܽܠܗܽܘܢ ܬܶܠ̈ܠܶܐ ܝܳܠܶܕ ܠܺܝ܆ ܐܳܡܪܳܐ ܗܺܝ ܡܶܛܽܠ ܢܰܦܫܳܗ̇܆ ܐܳܦ ܗܳܝ ܕܡܳܪܝܳܐ ܒ̣ܪܳܢܝ[57]. ܐܰܝܟܰܢܳܐ ܗܳܟܺܝܠ ܒ̣ܰܪܝܳܐ܆ ܐܶܢ ܝܺܠܺܝܕܳܐ. ܗܰܘ ܡܳܐ ܡܰܢ ܓܶܝܪ ܕܶܐܬܺܝܠܶܕ܆ ܡܶܢ ܟܝܳܢܳܐ ܐܺܝܬܰܘܗ̱ܝ. ܗܰܘ ܕܶܝܢ ܕܶܐܬܒܪܺܝ܆ ܡܶܢ ܥܳܒܽܘܕܽܘܬܳܐ. ܘܰܐܝܟܰܢܳܐ ܡܰܨܝܳܐ܆ ܕܗܺܝ ܟܰܕ ܗܺܝ ܝܰܠܕܳܐ ܘܰܥܒܳܕܳܐ ܬܶܗܘܶܐ ܐܺܝܬܶܝܗ̇܆ ܠܡ̈ܶܠܶܐ ܕܺܝܠܳܗ̇ ܢܶ݀ܫܡܰܥ܆ ܘܡܶܚܕܳܐ ܡܶܢ ܦܽܘܫܳܟܳܐ ܢܩܽܘܡ. ܟܰܕ ܡܰܢ ܓܶܝܪ ܗܳܝ ܕܰܩܕܳܡ ܟܽܠܗܽܘܢ ܬܶܠ̈ܠܶܐ ܝܳܠܶܕ ܠܺܝ ܐܶܡܪܰܬ. ܬܶܠ̈ܠܶܐ ܕܶܝܢ ܪܚܺܝܡܳܐ ܠܡܶܩܪܳܐ ܠܰܟܬܳܒܳܐ ܐܰܠܳܗܳܝܳܐ ܠܚܰܝ̈ܠܰܘܳܬܳܐ ܡܰܠܰܐܟܳܝ̈ܶܐ ܘܡܶܬܗܰܘ̈ܢܳܢܶܐ܆ ܐܰܝܟ ܗܳܝ ܕܰܐܡܺܝܪܳܐ܆ ܕܡܰܢܗܰܪ ܐܰܢ̱ܬ ܬܡܺܝܗܳܐܺܝܬ ܡܶܢ ܛܽܘܪ̈ܶܐ ܕܰܠܥܳܠܰܡ܆ ܘܠܳܐ ܚܕܳܐ ܥܶܠܬܳܐ ܣܳܡܰܬ. ܐܰܝ̇ܕܳܐ ܓܶܝܪ ܥܶܠܬܳܐ ܕܺܝܠܺܝܕܽܘܬܳܐ ܗܳܝ ܕܰܩܕܳܡ ܥܳܠ̈ܡܶܐ ܕܚܶܟܡܬܳܐ܆ ܗܳܝ ܐܰܝ̇ܕܳܐ ܕܰܡܬܽܘܡܳܐܺܝܬ ܡܶܢ ܐܰܒܳܐ ܐܰܨܡܚܰܬ ܟܺܝܬ ܘܰܐܢܗܪܰܬ܆ ܠܥܶܠ ܡܶܢ ܟܽܠ ܥܶܠܬܳܐ ܘܡܶܠܬܳܐ. ܥܶܠܬܳܐ ܓܶܝܪ ܕܩܰܫܺܝܫܳܐ ܡܶܢ ܐܰܠܳܗܳܐ܆ ܘܡܶܠܬܳܐ ܡܶܢ ܡܶܠܬܐ܆ ܠܰܝܬ ܠܡܶܫܟܳܚܽܘ.
ܥܰܠ ܗܳܝ ܕܶܝܢ ܕܡܳܪܝܳܐ ܒ̣ܪܳܢܝ܆ ܥܶܠܬܳܐ ܐܰܘܣܦܰܬ ܣܳܡܰܬ. ܐܶܡܪܰܬ ܓܶܝܪ ܕܰܒ̣ܪܳܢܝ ܪܺܝܫܳܐ ܕܽܐܘܪ̈ܚܳܬܳܐ ܕܺܝܠܶܗ[58]܆ ܠܰܥܒܳܕܰܘ̈ܗ̱ܝ. ܟܰܕ ܓܶܝܪ ܐܶܬܒܰܣܰܪ ܡܶܠܬܳܐ܆ ܚܶܟܡܬܳܐ ܗܳܝ ܝܺܚܺܝܕܳܝܬܳܐ ܘܚܰܝܠܳܐ ܕܰܐܒܳܐ܆ ܐܶܬܒܪܺܝ ܡܶܛܽܠܳܬܰܢ܆ ܒܗܳܝ ܕܰܗܘ̣ܳܐ ܒܰܪܢܳܫܳܐ. ܐܶܬܒܪܺܝ ܕܶܝܢ܆ ܠܪܺܝܫܳܐ ܕܽܐܘܪ̈ܚܳܬܳܐ ܕܺܝܠܶܗ܆ ܐܰܝܟܰܢܳܐ ܕܠܰܢ ܟܰܕ ܛܥܰܝܢܰܢ ܢܶܦܢܶܐ ܢܶ݀ܣܰܩ ܠܘܳܬ ܐܰܒܳܐ܆ ܘܰܠܘܳܬ ܐܽܘܪܚܳܐ ܬܪܺܝܨܬܳܐ ܕܰܡܝܰܬܪ̈ܳܬܳܐ܆ ܟܰܕ ܐܳܡܰܪ ܒܶܐܘܢ̈ܓܶܠܺܝܰܐ: ܐܶܢܳܐ ܐܺܝܬܰܝ ܐܽܘܪܚܳܐ܆ ܘܰܐܒܳܐ ܕܺܝܠܝ ܥܕܰܡܳܐ ܠܗܳܫܳܐ ܥܳܒܶܕ ܐܳܦ ܐܶܢܳܐ ܥܳܒܶܕ ܐ̱ܢܳܐ[59]. ܝܺܕܺܝܥܳܐ ܕܶܝܢ ܕܬܽܘܪܳܨܳܐ ܕܺܝܠܰܢ܆ ܘܡܶܢ ܒܳܬܰܪ ܫܽܘܠܳܡܳܐ ܕܰܡܕܰܒܪܳܢܽܘܬܳܐ ܗܳܝ ܕܡܶܛܽܠܳܬܳܗ̇ ܐܶܬܒܪܺܝ܆ ܟܰܕ ܡܰܙܥܶܩ܆ ܥܒܳܕܳܐ ܗܰܘ ܕܝܰܗܒܬ ܠܺܝ ܕܶܐ݀ܥܒܶܕ ܫܰܠܶܡܬ̊ܶܗ[60]. ܐܳܦ ܗܳܕܶܐ ܓܶܝܪ܆ ܣܳܟ̣ܪܳܐ ܥܰܡ ܗܳܠܶܝܢ ܐ̱ܚܪ̈ܳܢܝܳܬܳܐ ܠܦܽܘܡܳܐ ܡܰܪܳܚܳܐ ܕܰܐܪ̈ܝܰܐܢܘ܆ ܗܳܝ ܕܽܐܘܪ̈ܚܳܬܳܐ ܩܰܕܶܡ̈ܶܝܢ ܐܶܬܬܣܺܝ̈ܡܶܝܢ ܩܕܳܡ ܥ̈ܒܳܕܶܐ. ܐܽܘܪܚܳܐ ܓܶܝܪ ܐܺܝܬܶܝܗ̇܆ ܡܗܰܕܝܳܢܽܘܬܳܐ. ܘܡܰܘܕܥܳܢܽܘܬܳܐ ܕܺܝܕܰܥܬܳܐ ܟܺܝܬ ܘܕܰܡܝܰܬܪܽܘܬܳܐ܆ ܗܳܝ ܕܒܺܐܝ̈ܕܶܝܗ̇ ܠܘܳܬ ܛܳܒܬܳܐ ܥ̈ܒܳܕܶܐ ܗܳܢܰܘ ܕܶܝܢ ܚܢܰܢ܆ ܗܦܰܟܢܰܢ ܟܺܝܬ ܐܶܬܬܰܩܰܢ ܚ̱ܢܰܢ ܘܶܐܬܠܰܚܰܡܢܰܢ܆ ܐܰܝܟ ܗܳܝ ܕܶܐܫܟܰܚ ܟܽܠ ܐܽܘܪܚܳܐ ܕܺܝܕܰܥܬܳܐ ܘܝܰܗܒܳܗ̇ ܠܝܥܩܽܘܒ ܥܰܒܕܶܗ[61]܆ ܘܪܺܝܫܐ ܕܽܐܘܪܚܳܐ ܛܳܒܬܳܐ ܗܳܝ ܕܢܶ݀ܥܒܶܕ ܟܺܐܢ̈ܳܬܳܐ܆ ܘܽܐܘܪ̈ܚܳܬܳܟ ܡܳܪܝܳܐ ܐܰܘܕܰܥܰܝܢܝ ܘܰܫܒܺܝ̈ܠܰܝܟ ܐܰܠܶܦܰܝܢܝ[62].
ܐܶܢ ܕܶܝܢ ܠܘܳܬ ܗܳܠܶܝܢ ܢܺܐܡܪܽܘܢ ܗܳܢܽܘܢ ܕܺܝܪܶܬܘ ܠܫܳܢܝܽܘܬܶܗ ܕܰܐܪܺܝܽܘܤ܆ ܕܶܐܡܪܰܬ ܚܶܟܡܬܳܐ ܕܰܩܕܳܡ ܥܳܠ̈ܡܶܐ ܫܰܬܐܣܰܢܝ܆ ܘܰܐܝܟܰܢܐ ܐܺܝܬ ܠܳܗ̇ ܡܶܠܬܳܐ܆ ܕܗܳܠܶܝܢ ܢܶ݀ܣܬܰܟܰܠ ܡܶܛܽܠ ܡܶܬܒܰܪܢܫܳܢܽܘܬܳܐ ܗܳܝ ܕܰܒܝܰܘ̈ܡܳܬܳܐ ܐ̱ܚܪ̈ܳܝܶܐ ܗܘ̣ܳܬ܆ ܢܶܕܥܽܘܢ ܕܰܠܘܳܬ ܗܰܘܢܳܐ ܕܰܟ̈ܬܳܒܶܐ ܟܳܗ̈ܢܳܝܶܐ܆ ܠܳܐ ܝܰܠܺܝ̈ܦܶܐ ܐܺܝܬܰܝܗܽܘܢ. ܡܩܰܕܡܳܐ ܗ̱ܘܳܬ ܓܶܝܪ ܡܬܰܚܡܳܐ ܡܶܢ ܠܥܶܠ܆ ܘܩܰܕܺܝܡܳܐ ܗ̱ܘܳܬ ܪܰܡܝܳܐ ܒܡ̈ܶܠܶܐ ܕܩܰܕܺܝܡܽܘܬ ܝܺܕܰܥܬܳܐ܆ ܫܶܬܶܐܣܬܳܐ ܕܚܶܟܡܬܳܐ ܗܳܝ ܕܒܰܒܣܰܪ. ܫܶܬܶܐܣܬܳܐ ܓܶܝܪ ܐ̱ܚܪܺܬܳܐ ܐܳܡܰܪ: ܘܠܳܐ ܐ̱ܢܳܫ ܡܶܫܟܰܚ ܠܰܡܣܳܡ ܠܒܰܪ ܡܶܢ ܗܳܝ ܕܣܺܝܡܳܐ܆ ܗܳܝ ܕܺܐܝܬܶܝܗ̇ ܝܶܫܽܘܥ ܡܫܺܝܚܳܐ[63].
ܘܰܫܡܰܥ ܠܦܰܘܠܽܘܤ ܕܰܠܛܺܝܡܳܬܶܐܘܤ ܟܳܬܶܒ ܗ̱ܘܳܐ܆ ܒܨܶܒܝܳܢܳܐ ܕܺܝܠܶܗ ܘܰܒܛܰܝܒܽܘܬܶܗ ܗܳܝ ܕܶܐܬܝܰܗܒܰܬ ܠܰܢ܆ ܒܰܡܫܺܝܚܳܐ ܝܶܫܽܘܥ܆ ܩܕܳܡ ܙܰܒ̈ܢܶܐ ܕܥܳܠ̈ܡܶܐ[64].
ܘܶܐܢ ܒܰܡܫܺܝܚܳܐ ܝܶܫܽܘܥ ܐܶܬܝܰܗܒܰܬ܆ ܐܰܝܟܰܢܳܐ ܩܕܳܡ ܙܰܒܢܳܐ ܕܥܳܠ̈ܡܶܐ. ܐܶܠܳܐ ܫܰܦܺܝܪ ܝܺܕܺܝܥܳܐ܆ ܕܗܳܝ ܡܰܢ܆ ܕܗܳܝ ܕܩܰܕܡܰܬ ܐܶܬܬܰܚܡܰܬ ܘܰܕܩܰܕܺܝܡܽܘܬ ܝܺܕܰܥܬܳܐ. ܗܳܝ ܕܶܝܢ܆ ܕܡܰܦܩܳܢܗܽܘܢ ܕܰܥ̈ܒܳܕܶܐ. ܠܗܳܕܶܐ ܗܳܟܺܝܠ ܚܶܟܡܬܳܐ ܐܽܘܣܝ̣ܳܝ̣ܬܳܐ܆ ܠܺܝܚܺܝܕܳܝܳܐ ܡܶܠܬܳܐ܆ ܠܰܒܪܳܐ ܕܰܩܕܳܡ ܥܳܠ̈ܡܶܐ܆ ܠܢܽܘܗܪܳܐ ܕܡܶܢ ܢܽܘܗܪܳܐ܆ ܐܳܦ ܕܺܝܠܺܝܕ ܙܳܕܶܩ ܠܡܰܘܕܳܝܽܘ ܕܠܳܐ ܫܽܘܪܳܝ ܘܰܕܠܳܐ ܙܰܒܢܳܐ܆ ܘܠܳܐ ܚܳܫܽܘܫܳܐܺܝܬ ܘܠܳܐ ܓܽܘܫܡܳܢܳܐܺܝܬ ܡܶܢ ܐܰܒܳܐ܆ ܘܕܰܒ̣ܪܳܐ ܦܰܓܪܳܢܳܐܺܝܬ ܐܳܦ ܒܰܒܣܰܪ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܩܰܕܺܝܫܬܳܐ ܝܳܠܕܰܬ ܐܰܠܳܗܳܐ ܘܰܒܬܽܘܠܰܬ ܒܟܽܠܙܒܰܢ ܡܰܪܝܰܡ܆ ܟܰܕ ܠܳܐ ܫ̣ܕܳܐ ܡܶܢܶܗ ܐܰܘ ܙܢܰܩ ܡܶܛܽܠ ܗܳܝ ܕܶܐܬܒܪܺܝ܆ ܠܗܳܝ ܕܒܰܟܝܳܢܳܐ ܐܺܝܬܰܘܗ̱ܝ ܠܳܐ ܒܰܪܝܳܐ ܘܕܰܩܕܳܡ ܥܳܠ̈ܡܶܐ. ܐܶܢ ܓܶܝܪ ܢܰܦܫܳܐ ܕܺܝܠܰܢ ܒܝܰܕ ܪܽܘܟܳܒܳܐ ܕܰܠܘܳܬ ܦܰܓܪܳܐ ܠܳܐ ܫܳܕܝܳܐ ܡܶܢܳܗ̇ ܠܕܺܝܠܳܝܬܳܗ̇܆ ܕܰܐܝܟ ܐܰܝܟܰܢ܆ ܠܰܡܠܺܝܠܽܘܬܳܐ ܐܳܡܰܪ ܐ̱ܢܳܐ ܘܠܰܡܩܰܒܠܳܢܽܘܬܐ ܕܺܝܕܰܥܬܳܐ܆ ܐܶܠܳܐ ܒܰܟܢܺܝܫܽܘܬܳܐ ܗܳܝ ܕܒܰܟܝܳܢܳܐ ܚܕܳܐ ܚܰܝܽܘܬܳܐ ܒܰܪ ܐ̱ܢܳܫܳܐ ܡܫܰܡܠܝܳܐ ܡܶܢ ܬܪ̈ܰܝܗܽܘܢ ܘܚܰܕ ܩܢܽܘܡܳܐ܆ ܐܰܝܟܰܢܳܐ ܐܰܠܳܗܳܐ ܡܶܠܬܳܐ ܗܰܘ ܕܠܳܐ ܝܳܕܰܥ ܫܽܘܚܠܳܦܳܐ܆ ܐܶܠܳܐ ܕܰܒܟܽܠܙܒܰܢ ܐܺܝܬܰܘܗ̱ܝ܆ ܘܕܰܠܗܳܠܶܝܢ ܐ̱ܚܪ̈ܳܢܶܐ ܗܽܘ ܐܺܝܬܰܘܗ̱ܝ ܝܳܗܽܘܒܳܐ ܕܗܳܝ ܕܢܶܗܘܽܘܢ ܐܺܝܬܰܝܗܽܘܢ܆ ܥܬܺܝܕ ܗ̱ܘܳܐ ܕܢܶܦܶܠ ܡܶܢ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܟܰܕ ܡܶܬܚܰܝܰܕ ܗ̱ܘܳܐ ܩܢܽܘܡܳܐܺܝܬ ܠܦܰܓܪܳܐ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܐܰܘ ܗܳܝ ܕܰܒܗܶܦܟܳܐ܆ ܕܰܠܒܶܣܪܳܐ ܗܰܘ ܕܶܐܬܚܰܝܰܕ ܠܶܗ ܡܶܢ ܡܰܪܝܰܡ ܢܫܰܚܠܶܦ܆ ܘܰܢܥܰܠܺܝܘܗ̱ܝ ܠܽܐܘܣܺܝܰܐ ܕܰܐܠܳܗܽܘܬܳܐ.
ܠܳܐ ܒܠܺܝܠܳܐܺܝܬ ܗܳܟܺܝܠ ܡܶܢ ܬܪܶܝܢ ܟܝܳܢ̈ܶܐ܆ ܡܶܢ ܐܰܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܐܰܝܟ ܡܶܠܬܳܐ ܕܺܝܠܳܢܳܝܬܳܐ܆ ܚܰܕ ܡܰܘܕܶܝܢ ܚ̱ܢܰܢ ܠܶܗ ܠܥܰܡܰܢܽܘܐܶܝܠ܆ ܘܠܰܘ ܬܪܶܝܢ ܟܝܳܢ̈ܶܐ ܡܶܢ ܒܳܬܰܪ ܚܕܳܝܽܘܬܳܐ. ܠܶܗ ܟܰܕ ܠܶܗ ܫܘܶܐ ܒܽܐܘܣܺܝܰܐ ܠܰܐܒܳܐ ܒܗܳܝ ܕܰܐܠܳܗܳܐ ܐܺܝܬܰܘܗ̱ܝ܆ ܘܠܶܗ ܟܰܕ ܠܶܗ ܫܘܶܐ ܒܽܐܘܣܺܝܰܐ ܠܰܢ܆ ܒܗܳܝ ܕܰܤܛܰܪ ܡܶܢ ܫܽܘܚܠܳܦܳܐ ܗܘ̣ܳܐ ܒܰܪܢܳܫܳܐ.
ܗܳܝ ܕܶܝܢ ܕܡܶܢ ܒܳܬܰܪ ܚܕܳܝܽܘܬܳܐ܆ ܠܰܘ ܠܘܳܬ ܦܽܘܪܫܳܢܳܐ ܙܰܒܢܳܝܳܐ ܙܳܕܶܩ ܕܢܶܣܬܰܟܠܺܝܗ̇܆ ܐܰܝܟ ܗܰܘ ܕܰܩܕܳܡ ܚܕܳܝܽܘܬܳܐ ܬܪܶܝܢ ܟܝܳܢ̈ܶܐ ܐܺܝܬܰܝܗܽܘܢ ܗ̱ܘܰܘ܆ ܕܓܽܘܚܟܳܐ ܗ̱ܝ ܓܶܝܪ ܗܳܝ ܕܢܶܬܚܰܫܰܒ ܗܳܕܶܐ܆ ܐܳܦ ܓܶܝܪ ܠܳܐ ܩܰܕܶܡ ܐܶܬܩܰܝܰܡ ܥܽܘܠܳܐ ܒܰܒܬܽܘܠܬܳܐ ܩܕܳܡ ܡܰܓܢܳܢܽܘܬܶܗ ܕܡܶܠܬܳܐ܆ ܐܰܝܟܰܢܳܐ ܕܳܐܦ ܢܶܣܬܰܟܠܽܘܢ ܬܪܶܝܢ܆ ܟܰܕ ܒܰܡܒܰܝܬܝܳܢܽܘܬܳܐ ܡܶܕܶܡ ܪܰܚܡܳܢܳܝܬܳܐ ܡܶܬܚܰܝܰܕ ܗ̱ܘܳܐ ܡܶܟܺܝܠ ܗܰܘ ܕܶܐܬܒܛܶܢ. ܐܶܠܳܐ ܥܰܡܳܗ̇ ܕܗܳܝ ܕܡܶܠܬܳܐ ܐܰܓܶܢ ܒܰܒܬܽܘܠܬܳܐ܆ ܒܶܗ ܒܰܪܦܳܦܳܐ ܙܥܽܘܪܳܐ ܕܥܶܕܳܢܳܐ ܡܶܚܕܳܐ ܠܳܐ ܡܶܬܡܰܠܠܳܢܳܐܺܝܬ ܒܰܚܕܳܝܽܘܬܳܐ ܕܰܠܘܳܬܶܗ܆ ܦܰܓܪܳܐ ܡܶܬܩܰܝܰܡ ܗ̱ܘܳܐ܆ ܟܰܕ ܡܶܬܢܰܦܰܫ ܗ̱ܘܳܐ ܒܢܰܦܫܳܐ ܡܶܬܗܰܘܢܳܢܺܝܬܳܐ܆ ܘܫܽܘܪܳܝܳܐ ܕܗܳܝ ܕܢܶܗܘܶܐ ܐܺܝܬܰܘܗ̱ܝ ܢܳܣܶܒ ܗ̱ܘܳܐ. ܗܳܕܶܐ ܓܶܝܪ ܐܺܝܬܶܝܗ̇ ܚܕܳܝܽܘܬܳܐ ܗܳܝ ܕܒܰܩܢܽܘܡܳܐ܆ ܐܰܝܟ ܕܗܽܘ ܡܶܠܬܳܐ ܢܶܣܬܰܟܰܠ ܕܶܐܬܒܛܶܢ ܘܰܗܘ̣ܳܐ ܥܽܘܠܳܐ ܠܳܐ ܡܶܫܬܰܚܠܦܳܢܳܐܺܝܬ ܘܰܕܡܶܬܺܝܠܶܕ܆ ܡܶܛܽܠ ܗܳܝ ܕܰܡܚܰܝܰܕ ܗ̱ܘܳܐ ܠܦܰܓܪܳܐ ܕܰܡܟܳܢ ܗ̱ܘܳܐ ܕܢܶܬܒܛܶܢ ܘܰܕܢܶܬܺܝܠܶܕ.
ܚܰܘܳܐ ܠܺܝ ܗܳܟܺܝܠ ܪܦܳܦܳܐ ܙܥܽܘܪܳܐ ܕܙܰܒܢܳܐ܆ ܗܰܘ ܕܒܶܗ ܟܰܕ ܡܩܰܝܰܡ ܗ̱ܘܳܐ ܦܰܓܪܳܐ ܠܳܐ ܐܺܝܬܰܘܗ̱ܝ ܗ̱ܘܳܐ ܕܺܝܠܶܗ ܕܡܶܠܬܳܐ܆ ܐܰܘ ܟܺܝܬ ܟܝܳܢܳܐ ܐ̱ܢܳܫܳܝܳܐ ܗܰܘ ܕܚܰܝܶܕ ܠܶܗ܆ ܘܗܳܝܕܶܝܢ ܐܳܡܰܪ ܐ̱ܢܳܐ ܠܗܽܘܢ ܬܪܶܝܢ ܠܰܟ̈ܝܳܢܶܐ. ܐܶܢ ܕܶܝܢ ܠܳܐ ܡܶܬܦܰܠܓܳܢܳܐܺܝܬ ܐܶܬܩܰܝܰܡ܆ ܠܳܐ ܬܰܡܪܰܚ ܠܡܶܫܪܳܐ ܒܰܬܪܰܝܳܢܽܘܬܳܐ܆ ܠܰܚܕܳܝܽܘܬܳܐ ܠܳܐ ܡܶܬܦܰܣܩܳܢܺܝܬܳܐ ܕܒܰܩܢܽܘܡܳܐ.
ܗܳܝ ܗܳܟܺܝܠ ܕܠܳܐ ܙܳܕܶܩ ܕܢܺ݀ܐܡܰܪ ܬܪܶܝܢ ܟܝܳܢ̈ܶܐ ܡܶܢ ܒܳܬܰܪ ܚܕܳܝܽܘܬܳܐ܆ ܗܳܕܶܐ ܐܺܝܬܶܝܗ̇. ܡܶܛܽܠ ܟܺܝܬ ܕܗܺܝ ܚܕܳܝܽܘܬܳܐ܆ ܡܶܢ ܬܪܶܝܢ ܣܽܘܥܪ̈ܳܢܶܐ ܐܰܘ ܡܶܢ ܣܰܓܺܝ̈ܶܐܐ ܐܺܝܬܶܝܗ̇܆ ܚܰܕ ܓܶܝܪ ܘܰܦܫܺܝܛܳܐ܆ ܕܫܳܢܝܽܘܬܳܐ ܗ̱ܝ ܕܢܺ݀ܐܡܰܪ ܕܡܶܬܚܰܝܰܕ ܗܽܘ ܠܶܗ܆ ܡܶܢ ܒܳܬܰܪ ܕܡܰܘܕܶܐ ܐܰܢ̱ܬ ܚܕܳܝܽܘܬܳܐ܆ ܠܳܐ ܬܽܘܒ ܟܰܕ ܫܳܪܶܐ ܐܰܢ̱ܬ ܠܗܶܝܢ ܠܗܳܠܶܝܢ ܕܡܶܢܗܶܝܢ ܗܘ̣ܳܬ ܗܺܝ ܚܕܳܝܽܘܬܳܐ ܬܺܐܡܰܪ ܬܪܶܝܢ܆ ܘܬܶܫܪܶܐ ܠܗܰܘ ܚܰܕ ܕܠܳܐ ܡܶܬܦܰܠܓܳܢܳܐܺܝܬ ܡܶܢ ܬܪܶܝܢ ܐܶܬܩܰܝܰܡ.
ܐܳܦ ܗܳܝ ܕܶܝܢ ܙܳܕܶܩ ܕܬܶܬܢܰܗܰܪ܆ ܕܡܶܛܽܠ ܡܳܢܳܐ ܟܰܕ ܡܶܢ ܬܪܶܝܢ ܟܝܳܢ̈ܶܐ ܐܳܡܪܺܝܢܰܢ܆ ܡܰܘܣܦܺܝܢ ܚ̱ܢܰܢ ܕܰܡܫܰܡܠܝܳܐܺܝܬ ܐܺܝܬ ܠܗܽܘܢ ܐܰܝܟ ܡܶܠܬܳܐ ܕܺܝܠܳܢܳܝܬܳܐ ܗܳܝ ܕܰܥܠܰܝܗܽܘܢ. ܢܰܦܫܳܐ ܡܠܺܝܠܬܳܐ ܒܗܳܝ ܕܢܰܦܫܳܐ܆ ܡܶܕܶܡ ܡܫܰܡܠܝܳܐ ܐܺܝܬܶܝܗ̇܆ ܘܕܰܓܡܺܝܪܳܐܺܝܬ ܐܺܝܬ ܠܳܗ̇. ܠܰܘ ܓܶܝܪ ܠܡܽܘܠܳܝܳܐ ܕܗܳܝ ܕܬܶܗܘܶܐ ܐܺܝܬܶܝܗ̇ ܢܰܦܫܳܐ ܢܳܣܒܳܐ ܠܶܗ ܠܦܰܓܪܳܐ. ܡܶܛܽܠ ܕܳܐܦ ܟܰܕ ܡܶܬܦܰܪܫܳܐ ܡܶܢ ܗܳܢܳܐ܆ ܡܩܰܝܡܳܐ ܗ̱ܝ ܕܺܝܠܳܢܳܐܺܝܬ ܡܶܢܳܗ̇ ܘܠܳܗ̇. ܟܰܕ ܦܰܘܠܽܘܤ ܡܰܢ ܐܳܡܰܪ: ܕܺܐܝܬ ܪ̈ܽܘܚܶܐ ܕܙܰܕܝ̈ܩܶܐ ܕܶܐܫܬܰܡ̈ܠܺܝܶܢ.[65] ܦܶܛܪܽܘܤ ܕܶܝܢ ܡܶܛܽܠ ܚܰܛܳܝ̈ܶܐ ܟܳܬܶܒ: ܗܰܘ ܕܒܶܗ ܐܳܦ ܠܪ̈ܽܘܚܳܬܳܐ ܗܳܢܶܝܢ ܕܰܒܒܶܝܬ ܚܒܽܘܫܝܳܐ ܐܶܙܠܰ ܐܰܟܪܶܙ[66]. ܐܶܠܳܐ ܢܰܦܫܳܐ ܗܳܝ ܕܺܐܝܬܶܝܗ̇ ܡܫܰܡܠܰܝܬܳܐ܆ ܐܰܝܟ ܡܶܠܬܳܐ ܗܳܝ ܕܺܝܠܳܢܳܝܬܳܐ ܕܺܝܠܳܗ̇ ܘܕܰܥܠܶܝܗ̇ ܡܶܬܚܰܙܝܳܐ܆ ܟܰܕ ܡܪܰܟܒܳܐ ܥܰܡ ܦܰܓܪܳܐ܆ ܕܰܡܢܳܬܳܐ ܐܺܝܬܶܝܗ̇ ܕܒܰܪܢܳܫܳܐ ܡܶܬܗܰܝܡܢܳܐ. ܗܳܟܰܢܳܐ ܐܳܦ ܦܰܓܪܳܐ ܒܗܳܝ ܕܦܰܓܪܳܐ܆ ܡܶܕܶܡ ܡܫܰܡܠܝܳܐ ܐܺܝܬܰܘܗ̱ܝ܆ ܘܰܕܠܳܐ ܣܳܟ ܐܺܝܬ ܠܶܗ ܚܰܣܺܝܪܳܐܺܝܬ܆ ܐܰܝܟ ܬܚܽܘܡܳܐ ܗܰܘ ܕܦܰܓܪܳܐ ܘܡܶܠܬܳܐ ܕܺܝܠܳܢܳܝܬܳܐ ܕܺܝܠܶܗ. ܒܪܰܡ ܕܶܝܢ܆ ܡܢܳܬܰܐ ܗ̄ܘ ܕܟܽܠܳܗ̇ ܚܰܝܽܘܬܳܐ. ܒܗܳܢܳܐ ܙܢܳܐ܆ ܐܳܦ ܥܰܠ ܥܰܡܰܢܽܘܐܶܝܠ ܐܳܡܪܺܝܢܰܢ ܕܶܐܣܬܰܥܪܰܬ ܚܕܳܝܽܘܬܳܐ܆ ܡܶܢ ܐܰܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܐܰܝܟ ܡܶܠܬܳܐ ܕܺܝܠܳܢܳܝܬܳܐ ܗܳܝ ܕܺܝܠܗܶܝܢ. ܗܳܠܶܝܢ ܓܶܝܪ ܕܒܰܚܕܳܝܽܘܬܳܐ ܛܶܟܣܳܐ ܕܰܡܢܳܬܳܐ ܡܡܰܠ̈ܝܳܢ܆ ܠܘܳܬ ܫܽܘܡܠܳܝܳܐ ܕܚܰܕ ܩܢܽܘܡܳܐ܆ ܗܳܠܶܝܢ ܠܡܶܠܬܳܐ ܕܰܡܫܰܡܠܝܽܘܬܳܐ ܗܳܝ ܕܺܝܠܗܶܝܢ܆ ܠܳܐ ܚܰܣܺܝܪ̈ܳܢ܆ ܡܶܛܽܠ ܗܳܝ ܕܠܳܐ ܒܠܺܝܠܳܐܺܝܬ ܘܠܳܐ ܒܨܺܝܪܳܐܺܝܬ ܐܶܬܚܰܝ̈ܰܕܶܝܢ.
ܘܳܐܦ ܕܢܰܡܪܰܚ ܐܳܡܰܪ ܐܰܢ̱ܬ: ܕܰܠܡܶܠܬܳܐ ܕܰܐܠܳܗܳܐ ܗܰܘ ܡܫܰܡܠܰܝ ܒܟܽܠ܆ ܢܬܰܚܶܡ ܕܛܶܟܣܳܐ ܕܰܡܢܳܬܳܐ ܐܰܚܺܝܕ܆ ܐܺܝܢ ܐܳܡܰܪ ܐ̱ܢܳܐ. ܘܟܰܕ ܣܰܓܺܝ ܬܟܺܝܠ[67] ܐ̱ܢܳܐ. ܠܗܳܕܶܐ ܓܶܝܪ ܨܶܒܝܳܢܳܝܬܳܐ ܥܰܒܕܳܗ̇ ܡܶܛܽܠܳܬܳܟ܆ ܘܗܳܕܐ ܗ̱ܝ ܣܽܘܪܳܩܳܐ. ܘܗܰܘ ܕܰܩܕܳܡ ܟܽܠܗܽܘܢ ܬܶܠ̈ܠܶܐ ܐܶܬܺܝܠܶܕ܆ ܡܳܪܝܳܐ ܒ̣ܪܳܢܝ ܐܰܙܥܶܩ܆ ܠܰܘ ܟܰܕ ܫܠܰܚ ܐܰܝܟ ܕܰܠܡܶܕܶܡ ܡܶܢ ܠܒܽܘ̈ܫܶܐ܆ ܠܗܳܝ ܕܒܽܐܘܣܺܝܰܐ ܢܶܗܘܶܐ ܐܺܝܬܰܘܗ̱ܝ ܠܳܐ ܒܰܪܝܳܐ ܘܰܡܫܰܡܠܝܳܐ. ܒܳܗ̇ ܟܺܝܬ ܒܗܳܕܶܐ܆ ܐܳܦ ܥܰܒܕܳܐ ܘܰܡܫܰܡܫܳܢܳܐ ܗܽܘ ܠܶܗ ܩܪܳܐ. ܐܶܠܳܐ ܠܳܐ ܢܦܰܩ ܡܶܢ ܗܳܝ ܕܢܶܗܘܶܐ ܡܰܡܠܶܟ ܟܺܝܬ ܘܰܐܚܺܝܕ ܠܟܽܠ. ܘܚܰܫ ܒܰܒܣܰܪ܆ ܘܩܰܘܺܝ ܠܳܐ ܚܳܫܽܘܫܳܐ. ܘܟܰܕ ܠܶܗ ܟܰܕ ܠܶܗ ܐܳܡܪܺܝܢܰܢ ܫܘܶܐ ܒܽܐܘܣܺܝܰܐ ܠܰܐܒܳܐ ܘܰܫܘܶܐ ܒܽܐܘܣܺܝܰܐ ܠܰܢ܆ ܠܰܘ ܬܪܶܝܢ ܐܳܡܪܺܝܢ ܚ̱ܢܰܢ܆ ܐܰܝܟ ܡܶܠܰܬܗܽܘܢ ܕܗܳܢܽܘܢ ܕܠܳܐ ܪܰܕܝܳܐܺܝܬ ܐܰܣܒܰܪܘ. ܐܰܟܙܢܳܐ ܓܶܝܪ ܕܒܰܪܢܳܫܳܐ ܗܰܘ ܕܺܝܠܰܢ܆ ܟܰܕ ܡܶܢ ܬܪܶܝܢ ܐܺܝܬܰܘܗ̱ܝ܆ ܚܰܝܽܘܬܳܐ ܡܠܺܝܠܬܳܐ ܐܺܝܬܰܘܗ̱ܝ ܘܡܳܝܽܘܬ̣ܬܳܐ܆ ܕܰܒܚܰܕ ܩܢܽܘܡܳܐ ܘܰܟܝܳܢܳܐ ܐܺܝܬܶܝܗ̇܆ ܘܰܒܢܰܦܫܳܐ ܡܰܢ ܐܺܝܬܶܝܗ̇ ܡܠܺܝܠܬܳܐ܆ ܒܦܰܓܪܳܐ ܕܶܝܢ ܡܳܝܽܘܬ̣ܬܳܐ܆ ܘܠܰܘ ܡܶܛܽܠ ܗܳܕܶܐ ܠܰܬܪܶܝܢ ܡܦܰܠܓܳܐ܆ ܒܪܰܡ ܟܽܠܳܗ̇ ܡܶܬܩܰܪܝܳܐ ܡܠܺܝܠܬܳܐ ܘܟܽܠܳܗ̇ ܡܳܝܽܘܬ̣ܬܳܐ܆ ܗܳܟܰܢܳܐ ܐܳܦ ܡܫܺܝܚܳܐ܆ ܫܘܶܐ ܒܽܐܘܣܺܝܰܐ ܡܰܢ ܐܺܝܬܰܘܗ̱ܝ ܠܰܐܒܳܐ ܒܗܳܝ ܕܰܐܠܳܗܳܐ ܐܺܝܬܰܘܗ̱ܝ ܗ̱ܘܳܐ܆ ܫܘܶܐ ܒܽܐܘܣܺܝܰܐ ܕܶܝܢ ܐܳܦ ܠܰܢ ܗܽܘ ܟܰܕ ܗܽܘ ܒܗܳܝ ܕܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ܆ ܘܠܰܘ ܡܶܢ ܗܳܕܶܐ ܡܦܰܠܰܓ. ܘܗܳܕܶܐ ܝܰܬܺܝܪܳܐܺܝܬ ܐܺܝܬܶܝܗ̇ ܫܽܘܘܕܳܥܳܐ܆ ܕܰܚܕܳܝܽܘܬܳܐ ܪܺܝܫܳܝܬܳܐ ܘܰܕܗܳܝ ܕܥܰܡܰܢܽܘܐܶܝܠ ܚܰܕ ܩܢܽܘܡܳܐ ܐܺܝܬܰܘܗ̱ܝ܆ ܘܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܡܶܠܬܳܐ܆ ܗܳܝ ܕܡܶܣܬܰܢܩܺܝܢܰܢ ܐܳܠܨܳܐܺܝܬ ܥܰܠ ܦܪܽܘܣܕܺܝܽܘܪܺܝܣܡܽܘܤ ܐܰܘܟܺܝܬ ܬܽܘܚܳܡܳܐ ܘܳܐܡܪܺܝܢ ܚ̱ܢܰܢ܆ ܕܰܒܙܰܦܠܳܢ ܡܰܢ ܐܺܝܬܰܘܗ̱ܝ ܫܘܶܐ ܒܽܐܘܣܺܝܰܐ ܠܰܐܒܳܐ ܒܙܰܦܠܳܢ ܕܶܝܢ ܠܰܢ ܕܺܝܠܰܢ ܒܢܰܝ̈ܢܳܫܳܐ. ܥܰܠ ܓܶܝܪ ܗܳܢܽܘܢ ܕܒܰܬܪܰܝܳܢܽܘܬܳܐ ܡܦܰܠܓܺܝܢ ܘܰܦܪܺܝܫܺܝܢ܆ ܠܰܝܬ ܣܽܘܢܩܳܢܳܐ ܥܰܠ ܗܰܘ ܦܪܽܘܣܕܺܝܽܘܪܺܝܣܡܽܘܤ ܐܰܘܟܺܝܬ ܬܽܘܚܳܡܳܐ. ܡܶܛܽܠ ܗܳܕܶܐ ܐܳܦ ܒܪܶܗ ܕܐ̱ܢܳܫܳܐ ܗܘ̣ܳܐ܆ ܐܳܦ ܒܪܳܐ ܐܺܝܬܰܘܗ̱ܝ ܕܰܐܠܳܗܳܐ. ܘܗܽܘ ܠܶܗ ܗܳܕܶܐ ܟܺܝܬ ܐܳܦ ܗܳܝ ܡܫܰܡܰܗ ܗ̱ܘܳܐ܆ ܘܠܰܘ ܡܶܢ ܗܳܕܶܐ ܠܗܰܘ ܚܰܕ ܬܪܶܝܢ ܒܢܰܝ̈ܳܐ ܢܶܣܒܰܪ.
ܐܶܠܳܐ ܠܳܐ ܐܶܡܰܪ܆ ܐܳܡܰܪ ܟܬܳܒܳܐ ܗܰܘ ܟܳܗܢܳܝܳܐ܆ ܕܰܫܘܶܐ ܒܽܐܘܣܺܝܰܐ ܠܰܢ ܐܺܝܬܰܘܗ̱ܝ܆ ܘܕܳܚܶܠ ܐ̱ܢܳܐ ܐܺ݀ܡܰܪ ܡܶܠܬܳܐ ܕܠܳܐ ܟܬܺܝܒܳܐ. ܡܩܰܠܶܤ ܗ̱ܘܺܝܬ ܠܳܟ ܥܰܠ ܕܶܚܠܬܳܐ܆ ܐܶܠܽܘ ܠܰܘ ܕܥܶܠܬܳܐ ܪܰܫܺܝܥܬܳܐ܆ ܐܰܘ[68] ܕܠܳܐ ܝܰܠܺܝܦܽܘܬܳܐ ܐܺܝܬܶܝܗ̇ ܗ̱ܘܳܬ ܗܳܝ ܕܡܶܬܐܰܡܪܳܐ. ܡܳܢܳܐ ܓܶܝܪ ܐܶܡܰܪ ܠܺܝ܆ ܗܳܝ ܕܰܒܪܳܐ ܫܘܶܐ ܒܽܐܘܣܺܝܰܐ ܐܺܝܬܰܘܗ̱ܝ ܠܰܐܒܳܐ ܒܰܐܠܳܗܽܘܬܳܐ܆ ܣܺܝܡܳܐ ܒܕܽܘܟ ܒܰܟܬܳܒܳܐ ܐܰܠܳܗܳܝܳܐ܆ ܐܰܘ ܗܳܝ ܕܝܳܠܕܰܬ ܐܰܠܳܗܳܐ ܬܶܬܩܪܶܐ ܒܬܽܘܠܬܳܐ ܗܳܝ ܩܰܕܺܝܫܬܳܐ܆ ܐܰܘ ܗܳܝ ܕܶܐܬܒܰܣܰܪ ܡܶܠܬܳܐ܆ ܐܰܘ ܗܳܝ ܕܐܶܬܒܪܢܰܫ܆ ܗܳܠܶܝܢ ܓܶܝܪ ܒܳܗ̇ ܒܡܶܠܬܳܐ܆ ܘܠܳܐ ܒܕܽܘܟ ܡܶܢ ܡ̈ܶܠܶܐ ܕܰܟ̈ܬܳܒܶܐ ܢܦܺܝ̈ܚܰܝ ܡܶܢ ܐܰܠܳܗܳܐ ܐܺܝܬ ܠܡܶܫܟܳܚܽܘ ܕܣܺܝ̈ܡܳܢ. ܒܪܰܡ ܡܶܢ ܡ̈ܶܠܶܐ ܕܰܡ̈ܚܰܝܢܳܢ܆ ܘܡܶܢ ܫܡܳܗ̈ܶܐ ܘܣܽܘ̈ܟܳܠܶܐ ܕܠܳܐ ܚܶܪܝܳܢܳܐ܆ ܐܰܡܺܝܪ̈ܳܢ ܠܡܰܝ̈ܬܝ̣ܰܝ̣ ܐ̱ܪ̈ܳܙܶܐ ܕܥܺܕܬܳܐ ܫܠܺܝܚܳܝܬܳܐ.
ܟܰܕ ܓܶܝܪ ܫܡܰܥܘ ܠܰܐܠܳܗܳܐ ܘܰܐܒܳܐ ܕܰܒܝܰܕ ܡܽܘܫܶܐ ܐܳܡܰܪ: ܐܶܢܳܐ ܐܺܝܬܰܝ ܗܰܘ ܕܺܐܝܬܰܘܗ̱ܝ[69]. ܘܰܠܝܽܘܚܰܢܳܢ ܕܡܶܛܽܠ ܒܪܳܐ ܟܳܬܶܒ܆ ܒܪܺܝܫܳܐ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ[70]܆ ܘܗܰܘ ܕܺܐܝܬܰܘܗ̱ܝ܆ ܗܰܘ ܕܺܐܝܬܰܘܗ̱ܝ ܗ̱ܘܳܐ܆ ܗܰܘ ܕܳܐܬܶܐ܆ ܐܶܫܬܰܘܕܰܥܘ ܘܕܳܢܘ ܠܳܐ ܛܰܥܝܳܐܺܝܬ܆ ܕܰܕܗܳܢܽܘܢ ܕܰܚܕܳܐ ܘܗܺܝ ܟܰܕ ܗܺܝ ܐܺܝܬܶܝܗ̇ ܠܗܽܘܢ ܗܳܝ ܕܺܐܝܬܰܝܗܽܘܢ܆ ܕܗܳܠܶܝܢ ܡܶܢ ܐܰܢܰܢܩܺܐ ܐܳܦ ܐܽܘܣܺܝܰܐ ܐܳܦ ܝܳܬܳܐ ܚܕܳܐ ܗ̱ܝ܆ ܘܰܫܘܶܐ ܒܽܐܘܣܺܝܰܐ ܠܰܐܒܳܐ ܦܣܰܩܘ ܕܺܐܝܬܰܘܗ̱ܝ ܒܪܳܐ. ܘܟܰܕ ܩܪܰܘ ܕܡܶܠܬܳܐ ܒܶܣܪܳܐ ܗܘ̣ܳܐ[71]܆ ܕܶܐܬܒܰܣܰܪ ܐܰܡܪܽܘܗ̱ܝ. ܟܰܕ ܕܶܝܢ ܐܰܘܣܶܦܘ ܫܡܰܥܘ ܐܳܦ ܗܳܝ ܕܰܐܓܶܢ ܒܰܢ܆ ܘܒܰܪܢܳܫܳܐ ܝܶܫܽܘܥ ܡܫܺܝܚܳܐ܆ ܕܶܐܬܒܰܪܢܰܫ ܐܰܘܕܺܝܘ. ܘܟܰܕ ܒܓܶܠ̈ܝܳܢܶܐ ܐܰܠܳܗܳܝ̈ܶܐ ܕܰܢܒܺܝܽܘܬܳܐ ܕܶܐܫܰܥܝܳܐ ܐܰܕܺܝܩܘ ܕܡܰܙܥܩܺܝܢ܆ ܕܗܳܐ ܒܬܽܘܠܬܳܐ ܬܶܒܛܰܢ ܘܬܺܐܠܰܕ ܒܪܳܐ܆ ܘܬܶܩܪܽܘܢ ܫܡܶܗ ܥܰܡܰܢܽܘܐܶܝܠ[72]܆ ܘܰܕܛܰܠܝܳܐ ܐܶܬܺܝܠܶܕ ܠܰܢ ܘܰܒܪܳܐ ܐܶܬܺܝܗܶܒ ܠܰܢ܆ ܗܰܘ ܕܪܺܝܫܳܢܽܘܬܶܗ ܗ̱ܘܳܬ ܥܰܠ ܟܰܬܦܳܐ ܕܺܝܠܶܗ܆ ܘܰܕܡܶܬܩܪܶܐ ܫܡܶܗ ܡܰܠܰܐܟܳܐ ܕܬܰܪܥܺܝܬܳܐ ܪܰܒܬܳܐ܆ ܡܳܠܽܘܟܳܐ ܬܡܺܝܗܳܐ܆ ܐܰܠܳܗܳܐ ܚܰܝܠܬܳܢܳܐ[73]܆ ܠܗܳܝ ܕܺܝܠܶܕܬ̣ܶܗ ܠܛܰܠܝܳܐ܆ ܠܰܐܠܳܗܳܐ ܗܰܘ ܚܰܝܠܬܳܢܳܐ܆ ܝܳܠܕܰܬ ܐܰܠܳܗܳܐ ܐܰܟܪܙܽܘܗ̇.
ܗܳܟܰܢܳܐ ܘܟܰܕ ܝܺܠܶܦܘ ܕܡܶܢ ܙܰܪܥܶܗ ܕܰܐܒܪܳܗܳܡ ܢܣܰܒ܆ ܘܕܰܒܟܽܠܡܶܕܶܡ ܐܶܬܕܰܡܺܝ ܠܰܢ ܠܰܐܚܰܘ̈ܗ̱ܝ ܤܛܰܪ ܡܶܢ ܚܛܺܝܬܳܐ܆ ܘܒܳܗ̇ ܒܰܕܡܽܘܬܳܐ ܠܰܛ̈ܠܳܝܶܐ ܐܶܫܬܰܘܬܰܦ ܒܰܕܡܳܐ ܘܰܒܒܶܣܪܳܐ[74]܆ ܘܕܺܐܝܬܰܝܢ ܗܰܕܳܡ̈ܶܐ ܕܦܰܓܪܶܗ ܡܶܢ ܒܶܣܪܶܗ ܘܡܶܢ ܓܰܪ̈ܡܰܘܗ̱ܝ ܒܰܒܣܰܪ[75]܆ ܕܰܫܘܶܐ ܒܽܐܘܣܺܝܰܐ ܠܰܢ ܐܺܝܬܰܘܗ̱ܝ ܐܰܫܠܶܡܘ. ܐܰܘ ܗܳܟܺܝܠ ܟܦܽܘܪ ܐܳܦ ܒܗܳܠܶܝܢ ܫܡܳܗ̈ܶܐ ܐ̱ܚܪ̈ܳܢܶܐ܆ ܠܳܐ ܟܬܺܝ̈ܒܶܐ ܓܶܝܪ ܐܺܝܬܰܝܗܽܘܢ ܐܳܦ ܗܳܢܽܘܢ ܐܰܝܟ ܬܚܽܘ̈ܡܶܐ ܕܺܝܠܳܟ܆ ܐܰܝܟܰܢܳܐ ܕܢܶܗܘܶܐ ܠܳܟ ܪܽܘܫܥܳܐ ܡܫܰܡܠܝܳܐ܆ ܐܰܘ ܐܶܢ ܠܗܳܢܽܘܢ ܡܩܰܒܶܠ ܐܰܢ̱ܬ܆ ܐܳܦ ܠܗܳܢܳܐ ܩܰܒܶܠ. ܕܺܝܠܗܽܘܢ ܓܶܝܪ ܟܰܕ ܕܺܝܠܗܽܘܢ ܕܡܰܠ̈ܦܳܢܶܐ ܐܺܝܬܰܘܗ̱ܝ. ܡܰܠܽܘܢ ܕܶܝܢ܆ ܕܪܽܘܚܳܐ ܗܰܘ ܕܰܒܗܽܘܢ ܡܰܠܶܠ.
ܡܳܢܳܐ ܗܳܟܺܝܠ. ܒܪܺܝܬܳܐ ܐܳܡܰܪ ܦܳܩܶܕ ܐܰܢ̱ܬ ܠܺܝ ܕܶܐܫܰܒܰܚ ܕܣܶܠܩܰܬ ܠܘܳܬ ܬܪܽܘܢܽܘܤ ܥܶܠܳܝܳܐ ܘܡܰܠܟܳܝܳܐ܆ ܠܒܶܣܪܳܐ ܗܰܘ ܕܡܶܢܰܢ܆ ܐܶܢ ܡܰܢ ܦܪܺܝܫ ܗ̱ܘ ܡܶܢ ܐܰܠܳܗܳܐ ܠܳܐ ܒ̣ܰܪܝܳܐ ܘܡܶܠܬܳܐ܆ ܥܪܽܘܩ ܡܶܢ ܪܽܘܫܥܳܐ. ܦܽܘܠܚܳܢ ܒܰܪܢܳܫܰܐ ܗ̱ܘ ܓܶܝܪ ܣܽܘܥܪܳܢܳܐ ܓܰܠܝܳܐ. ܐܶܢ ܕܶܝܢ ܩܢܽܘܡܳܐܺܝܬ ܡܚܰܝܰܕ ܠܗܰܘ ܠܳܐ ܒ̣ܰܪܝܳܐ ܘܰܕܒܰܟܝܳܢܳܐ ܣܓܺܝܕܳܐ܆ ܣܓܽܘܕ ܠܶܗ܆ ܕܚܰܕ ܐܺܝܬܰܘܗ̱ܝ ܐܳܦ ܟܰܕ ܡܒܰܣܰܪ܆ ܘܥܰܡ ܐܰܒܳܐ ܘܪܽܘܚܳܐ ܡܶܣܬܓܶܕ܆ ܘܰܬܠܺܝܬܳܝܽܘܬܳܐ ܠܰܬܠܺܝܬܳܝܽܘܬܳܐ ܢܛܰܪ܆ ܘܥܰܡ ܦܰܘܠܽܘܤ ܐܶܬܕܰܡܰܪ ܒܪܰܒܽܘܬܳܗ̇ ܕܪܶܚܡܰܬ ܐ̱ܢܳܫܽܘܬܳܐ܆ ܕܰܐܩܺܝܡ ܠܰܢ ܥܰܡܶܗ ܐܰܟܚܕܳܐ ܘܰܐܘܬܶܒ ܠܰܢ ܥܰܡܶܗ ܒܗܳܠܶܝܢ ܕܰܠܥܶܠ ܡܶܢ ܫܡܰܝܳܐ ܒܰܡܫܺܝܚܳܐ ܝܶܫܽܘܥ[76]. ܠܰܢ ܐܶܡܰܪ ܕܩܳܡܢܰܢ ܥܰܡܶܗ ܐܰܟܚܕܳܐ ܘܺܝܬܶܒܢܰܢ ܥܰܡܶܗ܆ ܠܗܳܢܽܘܢ ܕܰܒܛܰܝܒܽܘܬܳܐ ܐܶܬܦܪܶܩܢܰܢ܆ ܐܰܝܟ ܡܰܢ ܕܒܰܟܝܳܢܐ ܕܺܝܠܰܢ ܐܶܫܬܰܘܬܰܦ ܡܫܺܝܚܳܐ. ܠܡܳܢܳܐ ܗܳܟܺܝܠ ܟܰܕ ܠܗܳܝ ܕܫܰܪܺܝܪܳܐ܆ ܘܰܠܗܳܝ ܕܡܶܬܟܰܪܙܳܐ ܘܡܶܣܬܰܗܕܳܐ ܡܶܢ ܟܬܳܒ̈ܶܐ ܟܳܗ̈ܢܳܝܶܐ ܡܰܪܦܶܐ ܐܰܢ̱ܬ܆ ܐܳܠܶܨ ܐܰܢ̱ܬ ܘܕܳܒܰܪ ܒܰܩܛܺܝܪܳܐ. ܕܗܶܓܓܳܐ ܕܰܓܳܠܳܐ ܬܰܣܶܩ ܠܰܫܡܰܝܳܐ܆ ܐܰܘ ܐܰܠܳܗܳܐ ܡܰܛܥܝܳܢܳܐ܆ ܒܗܳܝ ܕܡܶܣܬܒܰܪ ܕܦܽܘܪܩܳܢܳܐ ܕܺܝܠܰܢ ܕܰܓܳܠܳܐܺܝܬ ܥܳܒܶܕ.
ܠܗܳܠܶܝܢ ܟܰܕ ܡܶܢ ܐ̱ܢܳܫܺܝ̈ܢ ܠܳܐ ܡܰܐܪ̈ܙܶܐ ܐܶܬܦܰܫ̈ܰܟܶܝܢ܆ ܐܳܦ ܡܶܢ ܐ̱ܢܳܫܺܝ̈ܢ ܕܶܝܢ ܕܠܳܐ ܒܚܺܝܪܳܐܺܝܬ ܡܰܐܪܙܺܝܢ܆ ܫܰܦܺܝܪܳܐ ܕܶܝܢ ܠܡܺܐܡܰܪ ܕܗܶܢܽܘܢ ܠܗܽܘܢ ܐܰܪܶܙܘ܆ ܕܡܶܢ ܐܰܢܰܢܩܺܐ ܠܳܚ̈ܡܳܢ ܗ̱ܘܰܝ̈ ܠܡ̈ܶܠܶܐ ܕܡܰܪܬܝܳܢܽܘܬܳܐ܆ ܟܰܕ ܐܰܝܟ ܕܡܶܫܟܚܳܐ ܗ̱ܘܳܬ ܐܶܬܚܰܫܰܚܢܰܢ ܒܦܳܣܺܝ̈ܩܳܬܳܐ܆ ܣܳܡܢܰܢ ܩܕܳܡܰܝܟܽܘܢ. ܐܳܦ ܓܶܝܪ ܠܰܘ ܐܰܝܟܰܢܳܐ ܕܗܳܝ ܕܠܺܝ ܡܶܣܬܰܒܪܳܐ ܐܺ݀ܡܰܪ ܥܶܒܪܶܬ ܠܰܡܨܰܥܬܳܐ܆ ܐܶܠܳܐ ܐܰܝܟܰܢܳܐ ܕܗܳܝ ܕܰܠܗܳܢܽܘܢ ܕܫܳܡܥܺܝܢ ܚܳܫܚܳܐ ܘܡܰܘܬܪܳܐ ܐܶ݀ܡܰܠܶܐ.
ܟܰܕ ܠܘܳܬ ܕܰܐܝܟ ܗܳܕܶܐ ܗܳܟܺܝܠ ܬܰܘܕܺܝܬܳܐ ܐܰܢ̱ܬܽܘܢ ܐܶܬܩܪܺܝܬܽܘܢ܆ ܘܰܥܬܺܝܕܺܝܢ ܐܢ̱ܬܽܘܢ ܕܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ ܬܶܥܡܕܽܘܢ܆ ܡܶܢܶܗ ܕܰܥܡܳܕܳܐ ܐܶܣܬܰܟܠܘ ܠܐ̱ܪܳܙܳܐ ܪܰܒܳܐ ܕܫܰܦܺܝܪܽܘܬ ܕܶܚܠܬܳܐ. ܐܶܢ ܓܶܝܪ ܗܺܝ ܡܰܢ ܣܚܳܬܳܐ ܒܰܫܡܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܐܺܝܬܶܝܗ̇܆ ܗܳܢܽܘܢ ܕܶܝܢ ܕܥܳܡܕܺܝܢ ܐܰܝܟ ܡܶܠܬܶܗ ܕܦܰܘܠܽܘܤ ܒܡܰܘܬܳܐ ܕܰܡܫܺܝܚܳܐ ܥܳܡܕܺܝܢ[77]. ܡܳܢܳܐ ܐ̱ܚܪܺܢܳܐ ܡܶܢ ܗܳܪܟܳܐ ܡܶܬܚܰܘܶܐ܆ ܐܶܠܳܐ ܐܶܢ ܕܰܡܫܺܝܚܳܐ ܚܰܕ ܡܶܢ ܬܠܺܝܬܳܝܽܘܬܳܐ ܐܺܝܬܰܘܗ̱ܝ܆ ܡܶܠܬܳܐ ܗܰܘ ܕܶܐܬܒܰܪܢܰܫ ܘܰܛܥܶܡ ܡܰܘܬܳܐ ܒܰܒܣܰܪ܆ ܐܰܝܟܰܢܳܐ ܕܒܰܬܠܺܝܬܳܝܽܘܬܳܐ ܢܶܫܬܰܡܠܶܐ ܥܡܳܕܳܐ ܘܠܰܘ ܒܰܪܒܺܝܥܳܝܽܘܬܳܐ. ܕܰܐܝܟ ܗܳܢܳܐ ܓܶܝܪ ܙܳܕܶܩ ܗ̱ܘܳܐ ܕܢܶܗܘܶܐ ܐܺܝܬܰܘܗ̱ܝ ܗ̱ܘܳܐ܆ ܗܰܘ ܕܰܠܢܶܣܝܳܢܳܐ ܕܚܰܫܳܐ ܘܰܕܡܰܘܬܐ ܡܩܰܒܶܠ ܗ̱ܘܳܐ. ܗܽܘ ܟܰܕ ܗܽܘ ܚܳܫܽܘܫܳܐ ܐܰܟܚܕܳܐ ܘܠܳܐ ܚܳܫܽܘܫܳܐ. ܐܰܝܟܰܢܳܐ ܕܰܒܗܰܘ ܡܰܢ ܕܰܡܟܳܢ ܗ̱ܘܳܐ ܠܡܶܚܰܫ. ܝܺܕܺܝܥܳܐ ܕܶܝܢ ܕܰܒܒܶܣܪܳܐ܆ ܡܶܬܩܰܪܒܳܢܳܐ ܢܶܗܘܶܐ ܠܰܩܪܳܒܳܐ܆ ܘܢܶܬܥܰܪܙܰܠ ܥܰܡ ܒܥܶܠܕܰܪܳܐ. ܟܰܕ ܕܶܝܢ ܚܕܳܐ ܙܒܰܢ ܐܰܪܡܺܝ ܠܶܗ ܕܢܶܩܪܽܘܒ ܠܘܳܬܶܗ܆ ܢܶܙܢܩܺܝܘܗ̱ܝ[78] ܘܢܰܩܗܶܝܘܗ̱ܝ܆ ܘܰܢܡܺܝܬܺܝܘܗ̱ܝ ܒܠܳܐ ܚܳܫܽܘܫܽܘܬܳܗ̇ ܕܰܐܠܳܗܽܘܬܳܐ. ܡܶܢ ܗܳܪܟܳܐ ܚܒܳܠܳܐ ܡܰܢ ܗܰܘ ܕܰܒܩܰܒܪ̈ܶܐ܆ ܡܶܬܩܛܶܠ ܗ̱ܘܳܐ ܒܰܩܒܽܘܪܬܳܐ ܠܳܐ ܡܶܬܚܰܒܠܳܢܺܝܬܳܐ. ܒܡܰܚܰܬܬ̣ܳܐ ܕܶܝܢ ܗܳܝ ܕܠܰܫܝܽܘܠ܆ ܘܒܰܩܝܳܡܬܳܐ ܗܳܝ ܕܡܶܢ ܒܳܬܰܪ ܝܰܘܡܳܐ ܬܠܺܝܬܳܝܳܐ܆ ܛܪܽܘܢܽܘܬܶܗ ܕܡܰܘܬܳܐ ܡܫܰܡܠܝܳܐܺܝܬ ܡܶܫܬܰܪܝܳܐ ܗ̄ܘܳܬ܆ ܘܒܶܝܬ ܡܰܠܟܽܘܬܳܐ ܗܳܠܶܝܢ ܕܰܫܝܽܘܠ. ܬܰܪ̈ܥܶܐ ܓܶܝܪ ܕܰܫܝܽܘܠ ܐܰܝܟܰܢܳܐ ܕܰܟܬܺܝܒ ܟܰܕ ܚܙܰܐܽܘܗ̱ܝ ܪܥܶܠܘ. ܘܡܺܝ̈ܬܶܐ ܡܶܢ ܩܰܒܪ̈ܶܐ ܢܳܦܩܺܝܢ ܗ̱ܘܰܘ܆ ܘܰܒܬܰܪ̈ܥܶܐ ܕܰܡܕܺܝܢ̱ܬܳܐ ܩܰܕܺܝܫܬܳܐ ܥܳܐܠܺܝܢ ܗ̱ܘܰܘ[79]. ܟܰܕ ܠܣܰܒܪܳܐ ܗܰܘ ܕܡܶܣܬܰܟܶܐ ܠܰܢ ܒܝܰܕ ܗܳܠܶܝܢ ܕܡܶܬܚܰܙ̈ܝܳܢ ܗ̱ܘܰܝ̈ ܡܫܰܪܪܺܝܢ ܗ̱ܘܰܘ܆ ܕܳܐܦ ܠܰܢ ܡܶܢ ܒܳܬܰܪ ܩܝܳܡܬܳܐ ܕܡܶܢ ܩܰܒܪ̈ܶܐ܆ ܐܽܘܪܶܫܠܶܡ ܫܡܰܝܳܢܺܝܬܳܐ ܗܳܝ ܕܰܠܥܶܠ ܡܩܰܒܠܳܐ ܠܰܢ.
ܡܰܢܽܘ ܗܳܟܺܝܠ ܠܳܐ ܢܶܪܗܰܛ ܠܘܳܬ ܕܽܘܡܝܳܐ ܕܡܰܘܬܳܐ ܕܰܐܝܟ ܗܳܢܳܐ ܗܰܘ ܕܡܶܫܬܰܡܠܶܐ ܒܝܰܕ ܡܰܥܡܽܘܕܺܝܬܳܐ ܩܰܕܺܝܫܬܳܐ܆ ܐܰܝܟܰܢܳܐ ܕܢܶܗܘܶܐ ܫܰܘܬܳܦܳܐ ܕܠܳܐ ܡܳܝܽܘܬܽܘܬܳܐ. ܡܰܢܽܘ ܠܳܐ ܢܶܬܩܒܰܪ ܥܰܡܶܗ ܐܰܟܚܕܳܐ. ܡܰܢܽܘ ܠܰܘ ܗܽܘ ܠܶܗ ܠܟܽܠܶܗ ܢܶܥܒܶܕ ܠܒܺܝܫ ܓܰܘܢܳܐ ܕܡܺܝ̈ܬܶܐ ܐܰܝܟ ܕܰܠܠܳܐ ܡܶܬܚܰܒܠܳܢܽܘܬܳܐ܆ ܟܰܕ ܨܗܶܐ ܠܰܩܝܳܡܬܳܐ܆ ܘܰܠܗܳܝ ܕܰܐܟܚܕܳܐ ܢܶܫܬܰܒܰܚ ܥܰܡ ܡܫܺܝܚܳܐ. ܟܰܕ ܗܳܠܶܝܢ ܫܳܡܥܺܝܢ ܐܢ̱ܬܽܘܢ܆ ܝܳܕܰܥ ܐ̱ܢܳܐ ܕܰܒܠܰܥܬܽܘܢ ܒܢܰܦܫܟܽܘܢ ܘܰܠܘܳܬ ܗܰܘ ܕܡܶܬܪܚܶܡ ܐܶܬܢܰܒܪܰܫܬܽܘܢ. ܟܰܕ ܡܶܬܬܥܺܝܪܺܝܢ ܐܢ̱ܬܽܘܢ ܗܳܟܺܝܠ܆ ܠܪܶܓܬܳܐ ܕܺܝܠܟܽܘܢ ܒܠܶܫܳܢܳܐ ܦܰܪܶܣܘ. ܘܟܰܕ ܡܶܬܦܢܶܝܢ ܐܢ̱ܬܽܘܢ ܩܰܕܡܳܐܺܝܬ ܠܘܳܬ ܫܶܡܫܳܐ ܕܥܳܪܶܒ܆ ܟܦܽܘܪܘ ܒܥܰܒܕܽܘܬܳܐ ܕܒܺܝܫܳܐ. ܐܶܫܬܪܺܝܬܽܘܢ ܠܟܽܘܢ ܓܶܝܪ ܡܶܢ ܟܰܕܽܘ ܡܶܢ ܐܰܣܽܘܪ̈ܶܐ ܕܗܰܘ܆ ܡܶܛܽܠ ܕܳܐܦܠܳܐ ܕܕܰܢܣܰܝܒܰܪ ܡܶܫܟܰܚ ܠܚܰܝܠܳܐ ܕܡ̈ܶܠܶܐ ܗܳܠܶܝܢ ܕܰܥ̈ܬܺܝܕܳܢ ܕܢܶܬܐܰܡܪ̈ܳܢ. ܡ̈ܶܠܶܐ ܓܶܝܪ ܐܺܝܬܰܝܗܶܝܢ ܚܰܝ̈ܠܬܳܢܝܳܬܳܐ ܘܕܰܥܒܳܕܳܐ܆ ܘܰܕܒܰܕܡܽܘܬ ܢܶܓ̈ܕܶܐ ܛܳܪ̈ܕܳܢ ܠܫ̈ܺܐܕܶܐ܆ ܐܰܝܟ ܕܰܠܡܶܬܢܰܓ̈ܕܳܢܶܐ ܘܥܳܪ̈ܽܘܩܶܐ. ܘܡܶܢ ܒܳܬܰܪܟܶܢ ܬܽܘܒ ܟܰܕ ܠܘܳܬ ܫܶܡܫܳܐ ܕܕܳܢܰܚ ܡܶܬܦܢܶܝܢ ܐܢ̱ܬܽܘܢ܆ ܠܬܰܘܕܺܝܬܳܐ ܦܳܪܽܘܩܳܝܬܳܐ ܕܗܰܝܡܳܢܽܘܬܳܐ ܐܰܘܕܰܘ. ܒܠܶܒܳܐ ܓܶܝܪ ܡܶܬܗܰܝܡܰܢ ܠܙܰܕܝܩܽܘܬܳܐ܆ ܒܦܽܘܡܳܐ ܕܶܝܢ ܡܶܬܬܰܘܕܶܐ ܠܦܽܘܪܩܳܢܳܐ.[80]
ܠܫܽܘ̈ܘܕܳܥܶܐ ܡܰܢ ܗܳܟܺܝܠ܆ ܕܰܟܦܽܘܪܝܳܐ ܗܰܘ ܕܒܺܐܝܕܰܘ̈ܗ̱ܝ ܟܦܰܪܬܽܘܢ ܒܡܳܪܽܘܬܳܐ ܗܳܝ ܡܰܪܺܝܪܬܳܐ ܕܳܐܟܶܠܩܰܪܨܳܐ ܘܰܕܫ̈ܺܐܕܶܐ܆ ܗܳܝ ܕܒܳܗ̇ ܡܫܰܥܒܕܺܝܢ ܗ̱ܘܰܝܬܽܘܢ ܟܰܕ ܦܳܠܚܺܝܢ ܗ̱ܘܰܝܬܽܘܢ ܥܰܒܕܽܘܬܳܐ ܠܰܪ̈ܓܺܝܓܳܬܳܐ ܕܒܶܣܪܳܐ܆ ܘܰܠܛܽܘܦ̈ܣܶܐ ܕܰܩܝܳܡ̈ܶܐ ܗܳܢܽܘܢ ܕܰܐܩܺܝܡܬܽܘܢ܆ ܠܘܳܬ ܡܫܺܝܚܳܐ ܥܒܰܕܬܽܘܢ ܐܶܢܽܘܢ. ܙܳܕܶܩ ܕܶܝܢ܆ ܕܳܐܦ ܠܡܶܠܬܳܐ ܕܗܳܠܶܝܢ ܢܶܓܠܶܐ ܠܟܽܘܢ.
ܟܰܕ ܐܶܬܦܢܺܝܬܽܘܢ ܠܘܳܬ ܡܰܥܪܒܳܐ܆ ܠܺܐܝܕܳܐ ܕܝܰܡܺܝܢܳܐ ܦܫܰܛܬܽܘܢ܆ ܘܰܠܗܳܝ ܕܣܶܡܳܠܳܐ ܩܦܰܣܬܽܘܢ܆ ܘܗܳܟܰܢܳܐ ܒܡ̈ܶܠܶܐ ܕܕܰܠܩܽܘܒܠܳܐ ܠܘܳܬ ܐܳܟܶܠܩܰܪܨܳܐ ܐܶܬܚܰܫܰܚܬܽܘܢ. ܟܰܕ ܡܚܰܘܶܝܢ ܐܢ̱ܬܽܘܢ ܕܰܥܕܰܡܳܐ ܠܝܰܘܡܳܢܳܐ܆ ܐܺܝܕܳܐ ܗܝ ܥܳܒܽܘܕܬܳܐ ܕܣܳܥܽܘܪ̈ܘܳܬܳܐ ܗܳܠܶܝܢ ܕܒܰܟܝܳܢܳܐ ܘܝܰܡܺܝܢ̈ܳܝܳܬܳܐ܆ ܡܺܝܬ̣ܬܳܐ ܘܠܳܐ ܣܳܥܽܘܪܬܳܐ ܐܺܝܬܶܝܗ̇ ܗ̱ܘܳܬ ܠܟܽܘܢ. ܠܗܳܝ ܕܶܝܢ ܕܣܶܡܳܠܳܐ܆ ܗܳܢܰܘ ܕܶܝܢ ܬܰܪܥܝܬܳܐ ܒܺܝܫܬܳܐ ܗܳܝ ܕܰܠܣܳܥܽܘܪ̈ܘܳܬܳܐ ܒܺܝܫܽܘܬܳܐ ܗܳܠܶܝܢ ܕܰܠܒܰܪ ܡܶܢ ܟܝܳܢܳܐ ܣܳܥܪܳܐ ܗ̱ܘܳܬ܆ ܚܠܺܝܡܬܳܐ ܐܺܝܬ ܗ̱ܘܳܬ ܠܟܽܘܢ܆ ܘܰܕܡܶܬܬܪܺܝܡܳܐ ܗ̱ܘܳܬ ܛܪܽܘܢܳܐܺܝܬ ܠܽܘܩܒܰܠ ܢܳܡܽܘ̈ܣܶܐ ܕܟܺܐܢܽܘܬܳܐ. ܐܶܠܳܐ ܠܗܳܕܶܐ ܗܳܫܳܐ ܐܰܚܶܬܬܽܘܢ܆ ܘܰܠܝܰܡܺܝܢܳܐ ܠܥܶܠ ܐܰܪܺܝܡܬܽܘܢ܆ ܟܰܕ ܠܰܥ̈ܒܳܕܶܐ ܛܳܒ̈ܶܐ ܐܰܩܺܝܡܬܽܘܢ ܩܝܳܡܳܐ ܕܰܬܙܰܝܢܽܘܢܳܗ̇ ܠܗܳܕܶܐ܆ ܠܽܘܩܒܰܠ ܫܺܐܕܳܐ ܚܰܪܡܳܐ ܘܡܰܪܳܚܳܐ.
ܗܳܕܶܐ ܓܶܝܪ܆ ܐܳܦ ܒܛܽܘܦ̈ܣܶܐ ܗܳܢܽܘܢ ܢܳܡܽܘ̈ܣܳܝܶܐ ܘܛܶܠܳܢܳܝ̈ܶܐ ܡܶܬܝܰܕܥܳܐ ܗ̱ܘܳܬ. ܟܰܕ ܓܶܝܪ ܡܶܬܕܰܟܶܐ ܗ̱ܘܳܐ ܓܰܪܒܳܐ܆ ܢܳܡܽܘܣܳܐ ܐܺܝܬ ܗ̱ܘܳܐ ܕܢܶܬܡܫܰܚ ܛܰܪܦܳܐ ܕܶܐܕܢܶܗ ܕܝܰܡܺܝܢܳܐ܆ ܘܪܺܝܫ ܟܪܳܬܶܗ ܕܝܰܡܺܝܢܳܐ ܘܪܺܝܫ ܪܶܓܠܶܗ ܕܝܰܡܺܝܢܳܐ[81]܆ ܐܰܝܟܰܢܳܐ ܕܳܐܦ ܕܢܶܫܡܰܥ ܢܶܫܟܰܚ܆ ܕܰܣܟܺܝܪܬܳܐ ܒܒܺܝܫܽܘܬܳܐ ܐܺܝܬܶܝܗ̇ ܗ̱ܘܳܬ ܠܶܗ ܡܶܢ ܩܕܺܝܡ܆ ܐܶܕܢܳܐ ܗܳܝ ܕܺܐܝܬܶܝܗ̇ ܗ̱ܘܳܬ ܫܰܦܺܝܪܰܬ ܫܶܡܥܳܐ ܠܰܥ̈ܒܳܕܶܐ ܛܳܒ̈ܶܐ܆ ܘܰܕܢܶܗܘܶܐ ܐܺܝܬܰܘܗ̱ܝ ܥܳܒܽܘܕܳܐ ܕܰܥ̈ܒܳܕܶܐ ܗܳܢܽܘܢ ܕܒܰܟܝܳܢܳܐ ܘܝܰܡܺܝ̈ܢܳܝܶܐ. ܗܳܕܶܐ܆ ܐܳܦ ܟܰܕ ܡܶܫܬܰܡܠܶܐ ܗ̱ܘܳܐ ܘܰܠܘܳܬ ܩܰܕܺܝܫܽܘܬܳܐ ܡܶܬܦܪܶܫ ܗ̱ܘܳܐ ܪܺܝܫ ܟܳܗ̈ܢܶܐ ܡܶܬܢܰܛܪܳܐ ܗ̱ܘܳܬ. ܘܗܰܕܳܡ̈ܶܐ ܗܳܠܶܝܢ ܕܝܰܡܺܝܢܳܐ܆ ܒܰܕܡܳܐ ܗܰܘ ܕܕܽܘܟܳܝܳܐ ܡܶܬܡܰܫܚܺܝܢ ܗܘܰܘ.
ܠܘܳܬ ܗܳܕܶܐ ܬܰܪܥܺܝܬܳܐ ܚܳܝܪܳܐ܆ ܐܳܦ ܗܳܝ ܕܰܠܩܽܘܗܠܰܬ ܦܺܝܠܳܣܽܘܦܺܝܣܳܐ ܥܒܺܝܕܳܐ܆ ܗܳܝ ܕܒܺܐܝ̈ܕܶܝܗ̇ ܝܰܬܺܝܪܳܐܺܝܬ܆ ܐܳܦ ܗܳܠܺܝܢ ܕܠܺܝ ܐܰܡܺܝܪ̈ܳܢ ܡܶܬܢܰܗܪ̈ܳܢ. ܟܬܰܒ ܕܶܝܢ ܗܳܟܰܢܳܐ. ܠܶܒܳܐ ܕܚܰܟܺܝܡܳܐ ܠܝܰܡܺܝܢܶܗ. ܘܠܶܒܳܐ ܕܣܰܟܠܳܐ ܠܣܶܡܳܠܶܗ. ܐܳܦ ܟܺܝܬ ܒܽܐܘܪܚܳܐ ܐܶܡܰܬܝ ܕܳܐܙܶܠ ܣܰܟܠܳܐ܆ ܠܶܒܳܐ ܕܺܝܠܶܗ ܢܶܫܬܰܘܚܰܪ. ܘܗܳܠܶܝܢ ܕܢܶܬܚܰܫܰܒ ܟܽܠܗܶܝܢ܆ ܕܫܳܢܝܽܘܬܳܐ ܐܺܝܬܰܝܗܶܝܢ[82].
ܟܰܕ ܕܶܝܢ ܐܶܬܦܢܺܝܬܽܘܢ ܠܘܳܬ ܡܰܕܢܚܳܐ܆ ܟܰܕ ܬܰܪ̈ܬܰܝܗܶܝܢ ܐܺܝ̈ܕܰܝܟܽܘܢ ܠܪܰܘܡܳܐ ܐܰܪܺܝܡܬܽܘܢ܆ ܐܰܩܺܝܡܬܽܘܢ ܩܝܳܡܳܐ ܠܰܡܫܺܝܚܳܐ. ܟܰܕ ܡܰܘܕܥܺܝܢ ܐܢ̱ܬܽܘܢ܆ ܕܟܰܕ ܠܘܳܬ ܢܽܘܗܪܳܐ ܡܶܬܗܰܘܢܳܢܳܐ ܬܚܽܘܪܽܘܢ܆ ܕܡܶܫܬܰܘܕܥܳܢܽܘܬܳܐ ܕܰܐܠܳܗܳܐ܆ ܝܰܡܺܝ̈ܢܰܝ[83] ܒܬܰܪ̈ܬܰܝܗܶܝܢ ܬܶܗܘܽܘܢ܆ ܟܰܕ ܠܳܐ ܡܶܕܶܡ ܣܶܡܳܠܳܝܳܐ ܐܺܝܬ ܠܟܽܘܢ ܒܟܽܘܢ. ܐܶܠܳܐ ܟܽܠܟܽܘܢ܆ ܒܝܰܕ ܟܽܠܗܶܝܢ ܡܶܬܚܙܶܝܢ ܐܢ̱ܬܽܘܢ ܝܰܡܺܝ̈ܢܳܝܶܐ.
ܗܳܠܶܝܢ ܡܶܫܬܰܘܕܶܐ ܠܟܽܘܢ ܚܰܝܠܶܗ ܕܰܥܡܳܕܳܐ ܐܰܠܳܗܳܝܳܐ. ܠܗܳܕܶܐ ܛܰܝܒܽܘܬܳܐ ܛܰܪܘ܆ ܗܳܝ ܕܰܬܡܺܝܗܳܐܺܝܬ ܡܫܰܚܠܦܳܐ ܠܟܽܘܢ܆ ܘܰܒܢܰܝ̈ܳܐ ܕܢܽܘܗܪܳܐ ܥܳܒܕܳܐ ܠܟܽܘܢ. ܬܶܬܚܙܽܘܢ ܓܶܝܪ ܒܨܶܗܝܽܘܢ ܐܳܡܰܪ ܐܶܫܰܥܝܳܐ܆ ܐܰܝܟ ܢܰܗܪܳܐ ܫܒܺܝܚܳܐ ܕܡܶܬܬܰܝܬܶܐ ܒܰܐܪܥܳܐ ܨܗܺܝܬܳܐ. ܘܠܳܐ ܬܽܘܒ ܢܶܗܘܽܘܢ ܬܟܺܝܠܺܝܢ ܥܰܠ ܒܢܰܝ̈ܢܳܫܳܐ. ܐܶܠܳܐ ܐܶܕܢ̈ܶܐ ܢܶܬܠܽܘܢ ܠܡܶܫܡܰܥ܆ ܘܠܶܒܳܐ ܕܗܳܢܽܘܢ ܕܰܡܚܺܝܠܺܝܢ܆ ܢܨܽܘܬ ܠܡܶܣܬܰܟܳܠܽܘ. ܘܠܶܫܳܢ̈ܶܐ ܗܳܢܽܘܢ ܕܰܡܠܰܓܠܓܺܝܢ܆ ܩܰܠܺܝܠܳܐܺܝܬ ܢܺܐܠܦܽܘܢ ܠܰܡܡܰܠܳܠܽܘ ܫܰܝܢܳܐ. ܘܠܳܐ ܬܽܘܒ ܘܠܳܐ ܢܺܐܡܪܽܘܢ ܠܫܳܛܝܳܐ ܕܢܶܗܘܶܐ ܪܺܝܫܳܢܳܐ[84].
ܐܳܦ ܐܰܢ̱ܬܽܘܢ ܗܳܟܺܝܠ ܡܶܚܕܳܐ ܕܗܳܢܳܐ ܢܰܗܪܳܐ ܫܒܺܝܚܳܐ ܢܩܰܒܶܠܟܽܘܢ܆ ܐܰܝܟܳܐ ܓܶܝܪ ܐ̱ܢܳܫ ܚܙܳܐ ܐܰܘ ܫܡܰܥ ܢܰܗܪܳܐ ܫܒܺܝܚܳܐ܆ ܐܶܠܳܐ ܗܳܢܳܐ ܪܽܘܚܳܢܳܐ ܕܰܒܨܶܗܝܽܘܢ ܥܺܕܬܳܐ ܐܶܬܚܙܺܝ܆ ܘܥܰܠ ܟܽܠܳܗ̇ ܗܳܝ ܕܰܬܚܶܝܬ ܫܶܡܫܳܐ ܟܢܺܝܫܳܐܺܝܬ ܐܶܫܬܰܦܰܥ܆ ܗܰܘ ܕܰܒܫܽܘܒܚܳܐ ܐܰܠܳܗܳܝܳܐ ܘܰܒܫܽܘܟܳܢ̈ܶܐ ܫܡܰܝܳܢ̈ܶܐ ܣܒܺܝܤ܆ ܠܘܳܬ ܩܰܛܰܣܛܰܣܺܝܤ ܚܕܰܬܳܐ ܬܶܫܬܰܚܠܦܽܘܢ܆ ܘܬܶܬܠܽܘܢ ܐܶܕܢ̈ܶܐ ܕܺܝܠܟܽܘܢ ܐܰܝܟ ܢܒܺܝܽܘܬܳܐ ܠܡܶܫܡܰܥ. ܘܠܶܒܳܐ ܕܺܝܠܟܽܘܢ ܗܰܘ ܕܡܶܢ ܩܕܺܝܡ ܟܪܺܝܗ ܗ̱ܘܳܐ ܘܰܡܚܺܝܠ܆ ܟܰܕ ܢܶܬܚܠܶܡ ܒܪܽܘܚܳܐ܆ ܢܨܽܘܬ ܠܡܶܣܬܰܟܳܠܽܘ. ܘܠܶܫܳܢ̈ܶܐ ܕܺܝܠܟܽܘܢ ܗܳܢܽܘܢ ܕܰܒܠܳܐ ܝܰܠܺܝܦܽܘܬܳܐ ܕܺܝܕܰܥܬܳܐ ܕܰܐܠܳܗܳܐ ܠܰܥܓܺܝܢ ܗ̱ܘܰܘ܆ ܢܺܐܠܦܽܘܢ ܠܰܡܡܰܠܳܠܽܘ ܫܰܝܢܳܐ. ܫܰܝܢܳܐ ܕܶܝܢ ܕܺܝܠܰܢ ܡܫܺܝܚܳܐ ܐܺܝܬܰܘܗ̱ܝ[85]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ: ܠܳܐ ܬܽܘܒ ܢܺܐܡܪܽܘܢ ܠܶܗ ܠܫܳܛܝܳܐ ܕܢܶܗܘܶܐ ܪܺܝܫܳܢܳܐ. ܫܳܛܝܳܐ ܕܶܝܢ ܤܳܛܳܢܳܐ ܐܺܝܬܰܘܗ̱ܝ܆ ܗܰܘ ܕܩܰܕܡܳܝܳܐ ܐܶܬܟܪܰܗ ܚܰܣܺܝܪܽܘܬ ܪܶܥܝܳܢܳܐ ܘܰܓܠܺܝܙܽܘܬܳܐ ܕܡܶܢ ܐܰܠܳܗܳܐ܆ ܗܳܕܳܐ ܗ̱ܝ ܓܶܝܪ ܚܰܣܺܝܪܽܘܬ ܪܶܥܝܳܢܳܐ ܐܰܘܟܺܝܬ ܗܰܘܢܳܐ.
ܒܗܳܠܶܝܢ ܗܳܟܺܝܠ ܟܰܬܰܪܘ܆ ܘܠܳܐ ܐܰܢ̱ܬܽܘܢ ܡܶܢ ܨܶܒܝܳܢܟܽܘܢ ܠܘܳܬ ܒܺܝܫܽܘܬܳܐ ܬܺܐܙܽܠ̱ܘܢ. ܡܶܢ ܗܳܕܶܐ ܓܶܝܪ ܗܳܫܳܐ ܐܰܗܦܶܟܬܽܘܢ ܐܰܦܰܝ̈ܟܽܘܢ. ܒܶܐܣܟܺܡܳܐ ܒܳܚܽܘܪܳܐ ܒܩܳܠܳܐ. ܠܰܥ̈ܒܳܕܶܝܗ̇ ܕܗܳܕܶܐ. ܠܡܶܙܕܰܝܚܳܢܽܘܬܳܗ̇. ܠܛܳܥܝܽܘܬܳܗ̇. ܐܰܟܪܶܙܬܽܘܢ܆ ܘܰܐܣܠܺܝܬܽܘܢ. ܗܳܠܶܝܢ ܕܶܝܢ ܐܺܝܬܰܝܗܽܘܢ܆ ܐܰܒܽܘܒ̈ܶܐ ܘܨܶܨ̈ܠܶܐ ܘܰܙܡܺܝܪ̈ܳܬܳܐ ܕܙܰܢܳܝ̈ܳܬܳܐ܆ ܘܦܰܩܪܽܘܬܳܐ ܫܺܐܕܳܢܳܝܬܳܐ ܕܚܶܙܘܳܢ̈ܶܐ ܗܳܝ ܕܫܰܪܟܳܐ܆ ܗܳܝ ܕܒܺܐܝ̈ܕܶܝܗ̇ ܫܰܝܚܢܽܘܬܳܐ ܕܗܳܟܰܢܳܐ ܐܳܡܰܪ ܕܰܪ̈ܓܺܝܓܳܬܳܐ ܦܰܚ̈ܙܳܬܳܐ ܡܶܬܢܰܒܪܫܳܐ܆ ܘܚܽܘܠ̈ܛܳܢܶܐ ܕܰܠܒܰܪ ܡܶܢ ܢܳܡܽܘܣܳܐ܆ ܕܠܳܐ ܝܺܕܺܝܥܺܝܢ ܠܰܟܝܳܢܳܐ. ܠܗܳܠܶܝܢ ܠܳܐ ܡܶܬܟܰܒ̈ܫܳܢܶܐ. ܘܠܳܐ ܡܶܬܓܰܫ̈ܦܳܢܶܐ ܛܰܪܘ ܐܰܢ̱ܬܽܘܢ ܠܟܽܘܢ. ܐܰܝܟܰܢܳܐ ܕܟܰܕ ܠܰܡܫܺܝܚܳܐ ܒܝܰܕ ܡܰܥܡܽܘܕܺܝܬܳܐ ܠܳܒܫܺܝܢ ܐܢ̱ܬܽܘܢ܆ ܘܥܰܠ ܠܒܽܘܫܳܐ ܗܰܘ ܕܺܝܠܟܽܘܢ ܒܝܰܕ ܥ̈ܒܳܕܶܐ ܛܳܒ̈ܶܐ ܪܳܡܶܝܢ ܐܢ̱ܬܽܘܢ ܨܶܒ̈ܬܶܐ ܡܦܰܬܟ̈ܶܐ ܕܰܡܝܰܬܪܽܘܬܳܐ܆ ܘܢܰܨܺܝܚܳܐܺܝܬ ܡܶܬܥܰܛܦܺܝܢ ܐܢ̱ܬܽܘܢ܆ ܬܶܗܘܽܘܢ ܕܫܳܘܶܝܢ ܠܰܚܠܽܘܠܳܐ ܗܰܘ ܐܰܠܳܗܳܝܳܐ܆ ܘܰܠܫܳܪܽܘܬܳܐ ܗܳܝ ܡܶܬܗܰܘܢܳܢܺܝܬܳܐ܆ ܗܳܝ ܕܰܡܛܰܝܒܳܐ ܒܡܰܠܟܽܘܬܳܐ ܕܰܫܡܰܝܳܐ. ܠܗܳܝ ܕܬܶܗܘܶܐ ܕܟܽܠܰܢ ܢܶܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܫܰܒܥܺܝܢ.
[1]ܦܶܨܚܳܐ
[2]ܒܰܐܠܺܝܨܽܘܬܳܐ ܣܰܓܺܝܐܬܐ ܡܶܬܐܰܡܪܳܐ ܡܶܠܬܳܐ ܣܽܘܪܝܐܝܬ܆ ܗܳܝ ܕܡܶܛܽܠ ܫܡܳܐ ܗܳܢܳܐ ܕܡܰܪܬܝܳܢܽܘܬܳܐ܆ ܕܡܶܬܐܰܡܪܳܐ ܝܰܘܢܳܐܝܬ ܩܰܐܛܺܝܟܺܝܣܺܝܣ ܡܶܛܽܠ ܕܥܰܠ ܛܽܘܝܳܒܶܗ ܕܰܫܡܳܐ ܒܠܶܫܳܢܳܐ ܝܰܘܢܳܝܳܐ ܠ̣ܐܳܐ ܗ̱ܘܳܐ ܡܰܠܦܳܢܳܐ ܗܳܪܟܳܐ܆ ܘܠܰܘ ܣܰܓܺܝ ܐܳܠܨܳܐ ܗ̱ܘܳܬ ܥܰܠ ܡ̈ܶܠܶܐ ܗܳܠܶܝܢ ܕܡܶܛܽܘܠܳܬܶܗ ܐܰܡܺܝܪ̈ܳܢ ܠܶܗ܆ ܕܢܶܦ̈ܩܳܢ ܠܠܶܫܳܢܳܐ ܣܽܘܪܝ̣ܳܝ̣ܳܐ. ܡܶܛܽܠ ܕܟܰܕ ܣܰܓܺܝ̈ܐܬܳܐܐ ܐܳܡܪܺܝܢ ܚ̱ܢܰܢ܆ ܡܶܢ ܗܳܝ ܕܰܢܦܰܫܩܶܗ ܚܰܬܺܝܬܳܐܝܬ ܠܪܽܘܚܩܳܐ ܦܳܝܫܺܝܢܰܢ. ܡܰܙܥܩܳܢܽܘܬܳܐ ܓܶܝܪ ܐܳܡܪܺܝܢܰܢ. ܡܙܰܡܢܽܘܬܳܐ. ܡܪܺܝܒܳܢܽܘܬܳܐ. ܩܥܳܬܳܐ ܕܒܶܐܕܢ̈ܶܐ. ܡܶܛܽܠ ܕܰܫܡܳܐ ܗܰܘ ܐܺܝܟܘܣ ܕܡܶܢܶܗ ܡܪܰܟܰܒ ܗܳܢܳܐ܆ ܩܳܠܐ. ܘܪܰܘܒܳܐ. ܘܰܙܡܳܡܳܐ ܐܺܝܬܰܘܗ̱ܝ. ܗܳܪܟܳܐ ܕܶܝܢ ܟܰܕ ܚܳܪ ܡܰܠܦܳܢܳܐ ܒܪܽܘܟܳܒܶܗ܆ ܐܰܝܟ ܩܳܠܳܐ ܕܰܙܡܳܡܳܐ ܕܡܶܢ ܠܥܶܠ ܢܳܚܶܬ ܐܰܡܪܶܗ ܡܶܛܽܠ ܗܳܝ ܩܰܐܛܰܐ ܕܺܐܝܬ ܒܶܗ
[3]ܠܘܩܐ. 3: 4
[4]ܠܐ ܡܫܰܘܬܦܳܐ
[5]ܕܩܳܠܳܐ
[6]ܡܙܡܘܪ̈ܐ. 42: 2 ـ 5
[7]ܩܳܠܐ ܡܶܕܶܡ ܪܰܟܺܝܟܳܐ ܘܩܰܛܺܝܢܳܐ: ܘܕܰܠܡܰܚܣܶܢ ܡܶܬܬܨܺܝܬ ܒܶܐܕܢ̈ܶܐ ܥܰܡ ܫܶܠܝܳܐ ܣܰܓܺܝܐܐ: ܡܶܛܽܠ ܙܥܽܘܪܽܘܬܶܗ ܐܰܘ ܡܶܛܽܘܠ ܪܰܚܺܝܩܽܘܬܶܗ: ܐܺܝܬܰܘܗ̱ܝ ܗܳܢܳܐ ܙܡܳܡܳܐ: ܐܰܝܟ ܗܰܘ ܕܰܡܥܳܕ ܗ̱ܘܳܐ ܡܶܢ ܢܨܪܐ ܕܳܐܐܰܪ ܟܰܕ ܥܳܒܰܪ ܒܰܝܢܳܬ ܣܰܘ̈ܟܶܐ ܕܺܐܝ̈ܠܳܢܶܐ: ܐܰܘ ܒܰܝܢܳܬ ܓܽܘܫ̈ܡܶܐ ܡܶܕܶܡ. ܡܶܬܩܪܶܐ ܕܶܝܢ ܐܳܦ ܨܠܳܠܬܳܐ.
[8]ܡܙܡܘܪ̈ܐ. 125: 2
[10][10]ܩܘܠܣ̈ܝܐ. 1: 15
[14]ܥܒܪ̈ܝܐ. 1: 3
[16]ܬܶܬܬܰܠܘܰܬ
[17]ܠܐ ܡܙܰܘ̈ܓܶܐ ܐܺܝܬ ܥܝܳܕܳܐ ܠܐܪ̈ܝܬܡܛܝܩܘ ܐܰܘ ܟܺܝܬ ܠܡܶܢ̈ܝܳܢܶܐ ܠܡܶܩܪܳܐ: ܠܡܶܢ̈ܝܳܢܶܐ ܗܳܠܶܝܢ ܕܠܐ ܐܺܝܬܰܝܗܽܘܢ ܙܰܘ̈ܓܶܐ. ܘܩܰܕܡܳܝܳܐ ܕܗܳܠܶܝܢ ܐܺܝܬܰܘܗ̱ܝ: ܡܶܢܝܳܢܳܐ ܗܰܘ ܕܰܬܠܳܬܳܐ. ܘܡܶܚܕܳܐ ܗܰܘ ܕܚܰܡܫܳܐ: ܘܒܺܐܝܕܳܐ ܒܺܐܝܕܳܐ ܗܰܘ ܕ ܙ. ܘܗܰܘ ܕ ܛ
[18]ܬܶܬܺܝܕܰܥ
[19]ܩܕܡܐܝܬ
[20]ܐܫܥܝܐ. 45: 18
[21]ܢܶܓܠܶܐ
[22]ܗܘܫܥ. 13: 4
[23]ܣܶܦܪܐ ܕܒܪܝܬܐ. 1: 26
[25]ܡܙܡܘܪܐ. 33: 6
[26]ܣܶܦܪܐ ܕܒܪܝܬܐ. 1: 26
[27]ܐܫܥܝܐ. 44: 6 ܐܦ ܐܫܥܝܐ. 45: 6
[28]ܐܫܥܝܐ. 45: 12
[29]ܡܙܡܘܪ̈ܐ. 74: 12
[30]ܡܙܡܘܪ̈ܐ. 102: 25
[31]ܣܶܦܪܐ ܕܒܪܝܬܐ. 18: 2
[32]ܣܶܦܪܐ ܕܒܪܝܬܐ. 18: 3
[33]ܣܶܦܪܐ ܕܒܪܝܬܐ. 18: 4
[34]ܣܶܦܪܐ ܕܒܪܝܬܐ. 19: 24
[35]ܡܙܡܘܪ̈ܐ. 83: 18
[36]ܡܦܩܢܐ. 33: 11
[37]ܡܦܩܢܐ. 33: 18
[38]ܡܦܩܢܐ. 33: 21
[39]ܐ. ܩܘܪ̈ܝܢܬܝܐ. 10: 4
[40]ܡܬܝ. 16: 18
[41]ܝܘܚܢܢ. 14: 9
[42]ܝܘܚܢܢ. 1: 14
[43]ܡܦܩܢܐ. 33: 22 ـ 23
[44]ܡܦܩܢܐ 34: 5 ـ 6 33. 19
[45]ܝܘܚܢܢ. 5: 46
[46]ܬܶܢܝܢ ܢܡܘܣܐ. 6: 4
[47]ܠܡܰܫܠܡܳܢܽܘܬܳܐ
[48] ܡܬܝ. 5: 21
[49]ܦܪܟܣܝܣ. 21: 11
[50]ܦܪܟܣܝܣ. 5: 3
[51]ܡ̈ܬܠܐ. 8: 24
[52]ܐܫܥܝܐ. 40: 15
[53]ܥܒܪ̈ܝܐ. 1: 3
[54]ܡ̈ܬܠܐ. 8: 30
[55]ܡܬܝ. 11: 27
[56]ܐ. ܩܘܪ̈ܝܢܬܝܐ. 1: 24
[57]ܡ̈ܬܠܐ. 8: 22 ـ 24
[58]ܡ̈ܬܠܐ. 8: 22
[59]ܝܘܚܢܢ. 14: 6 ܐܦ ܝܘܚܢܢ. 5: 17
[60]ܝܘܚܢܢ. 17: 4
[61]ܒ. ܒܪܽܘܟ. 3: 37
[62]ܡܙܡܘܪ̈ܐ.25: 4
[63]ܐ. ܩܘܪ̈ܝܢܬܝܐ. 3: 11
[64]ܒ. ܛܝܡܬܐܘܣ. 1: 9
[65]ܥܶܒܪ̈ܳܝܶܐ. 12: 23
[66]ܐ. ܦܛܪܘܣ. 3: 19
[67]ܠܒܺܝܒ
[68]ܘܠܰܘ
[69]ܡܦܩܢܐ. 3: 14
[70]ܝܘܚܢܢ. 1: 1
[71]ܝܘܚܢܢ. 1: 14
[72]ܐܶܫܰܥܝܳܐ. 7: 14
[73]ܐܫܥܝܐ. 9: 6
[74]ܥܒܪ̈ܝܐ. 2: 14
[75]ܐܦܣ̈ܝܐ. 5: 30
[76]ܐܦܣ̈ܝܐ. 2: 4 ـ 6
[77]ܪ̈ܗܘܡܳܝܐ. 6: 3
[78] ܢܙܩܝܘܗܝ
[79]ܡܬܝ. 27: 53
[80]ܪ̈ܗܽܘܡܳܝܐ. 10: 10
[81]ܟܗ̈ܢܐ. 14: 17
[82]ܩܘܗܠܰܬ. 10: 2 ـ 3
[83]ܝܰܡܺܝܢܳܝ̣̈ܰܝ̣
[84]ܐܶܫܰܥܝܳܐ. 32: 2 ـ 5
[85]ܐܦܣ̈ܝܐ. 2: 14