ܕܩܰܕܺܝܫܳܐ ܣܶܐܘܺܝܪܽܘܤ ܦܰܛܶܪܝܰܪܟܝܤ ܡܺܐܡܪܳܐ ܥܰܠ ܒܶܝܬ ܝܰܠܕܳܐ ܐܰܘܟܺܝܬ ܒܶܝܬ ܕܶܢܚܳܐ. ܐܶܬܶܐܡܰܪ ܕܶܝܢ ܒܳܬܰܪ ܗܳܠܶܝܢ ܒܕܽܘܟܪܳܢܶܗ ܕܡܳܪܝ ܤܛܶܦܰܢܽܘܤ ܡܶܛܽܠܗܳܕܶܐ ܐܳܦ ܥܠܰܘܗ̱ܝ ܕܣܳܗܕܳܐ ܗܽܘ ܫܽܘܠܳܡܶܗ ܕܡܺܐܡܪܳܐ ܡܛܰܟܰܣ[1].
1: ܟܰܕ ܢܰܨܺܝܚܳܐ ܚܳܙܶܐ ܐ̱ܢܳܐ ܠܰܟܢܽܘܫܝܳܐ ܕܺܝܠܟܽܘܢ ܚܳܕܶܐ ܐ̱ܢܳܐ ܡܰܢ ܘܪܳܘܶܙ ܐ̱ܢܳܐ ܒܢܰܦܫܝ. ܠܳܐ ܕܶܝܢ ܝܳܕܰܥ ܐ̱ܢܳܐ܆ ܒܪܰܡ ܐܶܢ ܐ̱ܢܳܫ ܡܶܢܟܽܘܢ. ܗܰܒܘ ܠܺܝ ܓܶܝܪ ܕܥܰܡ ܫܽܘܒܩܳܢܳܐ ܐܺ݀ܡܰܪ. ܬܰܪܥܺܝܬܳܐ ܕܫܳܘܝܳܐ ܢܶܣܰܒ. ܠܚܰܓܳܐ ܗܳܢܳܐ ܕܩܰܪܺܝܒ. ܐܰܝܕܳܐ ܗ̱ܝ ܓܶܝܪ ܬܰܪܥܺܝܬܳܐ ܕܗܳܟܰܢܳܐ ܪܘܺܝܚܳܐ. ܘܡܶܢ ܥܰܡܛܳܢܳܐ ܕܚܰܫ̈ܶܐ ܕܰܟܝܳܐ. ܘܰܕܟܰܕ ܒܝܰܕ ܬܶܐܽܘܪܺܝܰܐ ܡܡܰܫܚܳܐܺܝܬ ܟܺܝܬ ܠܡܶܬܩܰܪܳܒܽܘ ܡܶܫܟܚܳܐ ܠܘܳܬ݂ ܗܳܠܶܝܢ ܠܳܐ ܡܶܬܕܰܪ̈ܟܳܢܝܳܬܳܐ. ܬܶܨܒܶܐ ܡܰܢ ܫܰܘܝܳܐܺܝܬ. ܬܶܬܡܨܶܐ ܕܶܝܢ ܟܰܕ ܬܶܨܒܶܐ ܕܬܶܬܢܰܗܰܪ ܒܰܠܚܽܘܕ ܒܬܶܕܡܽܘܪܬܳܐ ܕܝܰܘܡܳܐ ܗܳܢܳܐ ܕܩܳܐܶܡ. ܘܰܕܚܰܕ ܙܰܠܺܝܩܳܐ ܬܩܰܒܶܠ ܕܺܝܠܺܝܕܽܘܬܳܐ ܕܒܰܒܣܰܪ ܕܰܡܫܺܝܚܳܐ.
2: ܠܘܳܬ ܓܶܝܪ ܟܽܠܳܗ̇ ܡܕܰܒܪܳܢܽܘܬܳܐ. ܘܳܐܦܠܳܐ ܠܡܰܠܰܐܟ̈ܶܐ ܐܺܝܬܶܝܗ̇ ܡܶܬܡܰܨܝܳܢܺܝܬܳܐ ܠܰܡܚܳܪ. ܫܒܽܘܩ ܠܰܢ ܕܺܝܠܰܢ. ܠܗܳܢܽܘܢ ܕܥܰܡ ܛܺܝܢܳܐ ܐܰܣܺܝܪܺܝܢܰܢ. ܕܗܰܘ ܓܶܝܪ ܕܠܳܐ ܙܰܒܢܳܐ ܘܰܕܠܳܐ ܫܽܘܪܳܝܳܐ ܘܠܳܐ ܒܰܪܝܳܐ ܡܥܰܕܥܕܺܝܢܰܢ ܥܺܐܕܳܐ ܕܒܶܝܬ ܝܰܠܕܳܐ ܗܳܝ ܕܳܐܦ ܬܡܺܝܗܳܐ. ܕܗܽܘ ܟܰܕ ܗܽܘ ܐܳܦ ܡܶܬܚܰܙܝܳܢܽܘܬ݂ ܐܰܠܳܗܳܐ ܡܶܫܬܰܡܰܗ. ܐܰܝܟܰܢܳܐ ܕܰܐܡܬܰܚ ܕܢܶܒܥܶܐ ܠܥܶܠܬܳܐ ܗܳܝ ܕܡܶܛܽܠܳܬܳܗ̇ ܗܘ̣ܳܐ ܗܰܘ ܕܠܳܐ ܗܘܳܝܳܐ܆ ܟܰܕ ܓܶܝܪ ܡܶܠܬܳܐ ܐܺܝܬܰܘܗ̱ܝ ܗ̱ܘܳܐ ܗܘ̣ܳܐ ܒܶܣܪܳܐ܆ ܟܰܕ ܘܠܳܐ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܡܶܠܬܳܐ ܫܰܚܠܶܦ܆ ܘܳܐܦ ܠܗܳܝ ܕܢܶܗܘܶܐ ܒܰܪܢܳܫܳܐ ܐܰܘܣܶܦ ܢܣܰܒ.
3: ܢܺܐܠܰܦ ܡܶܢ ܗܳܠܶܝܢ ܬܪܶܝܢ ܫܡܳܗ̈ܶܐ. ܕܡܶܛܽܠ ܗܳܕܶܐ ܠܺܝܠܺܝܕܽܘܬܳܐ ܕܒܰܒܣܰܪ ܐܶܬܪܡܺܝ. ܐܰܝܟܰܢܳܐ ܕܰܐܠܳܗܳܐ ܠܰܒܢܰܝ̈ܢܳܫܳܐ ܢܶܬܚܙܶܐ. ܐܰܝܟܰܢܳܐ ܕܰܒܕܽܘܟ ܩܳܕܶܡ ܗ̱ܘܳܐ ܡܰܟܪܶܙ ܢܒܺܝܳܐ ܐܰܠܳܗܳܝܳܐ ܕܰܘܺܝܕ ܟܰܕ ܐܳܡܰܪ: ܐܰܠܳܗܳܐ ܓܰܠܝܳܐܺܝܬ ܢܺܐܬܶܐ. ܐܰܠܳܗܳܐ ܕܺܝܠܰܢ ܘܠܳܐ ܢܶܫܬܽܘܩ[2]. ܗܳܝ ܕܶܝܢ ܕܰܐܠܳܗܳܐ ܓܰܠܝܳܐܺܝܬ ܢܺܐܬܶܐ. ܡܚܰܘܝܳܐ ܢܰܗܺܝܪܳܐܺܝܬ. ܕܗܰܘ ܕܠܳܐ ܡܟܳܢ ܠܡܶܬܚܙܳܝܽܘ. ܠܰܐܠܳܗܳܐ ܓܶܝܪ ܘܠܳܐ ܐ̱ܢܳܫ ܡܬܽܘܡ ܚܙܳܐ[3] ܐܰܝܟ ܒܰܪ̱ܬ ܩܳܠܳܐ ܕܝܽܘܚܰܢܳܢ. ܠܥܰܝ̈ܢܶܐ ܦܰܓܪ̈ܳܢܳܝܳܬܳܐ ܢܶܗܘܶܐ ܡܶܬܚܰܙܝܳܢܳܐ. ܗܳܝ ܕܶܝܢ ܕܠܳܐ ܢܶܫܬܽܘܩ. ܗܳܕܶܐ ܡܰܘܕܥܳܐ. ܕܰܟܝܳܢܳܐ ܡܰܢ ܐ̱ܢܳܫܳܝܳܐ ܘܓܶܢܣܳܐ ܕܺܝܠܰܢ. ܒܺܝܫܳܐܺܝܬ ܣܳܥܰܪ ܗ̱ܘܳܐ. ܘܰܠܘܳܬ݂ ܩܰܪ̈ܩܦܳܬܳܐ ܪ̈ܳܡܳܬܳܐ ܕܒܺܝܫܽܘܬܳܐ ܢܦܰܩ ܢܦܰܠ. ܘܳܐܦܠܳܐ ܚܰܕ ܐܳܕܫܳܐ ܐܺܝܬ ܗ̱ܘܳܐ ܕܣܳܥܽܘܪܽܘܬܳܐ ܫܟܺܝܪܬܳܐ. ܗܰܘ ܕܠܳܐ ܐܰܪܟܶܢ ܠܶܗ ܨܰܘܪܶܗ. ܐܰܝܟ ܕܳܐܦ ܩܕܳܡ ܓܠܺܝ̈ܦܶܐ ܢܶܬܓܗܶܢ܆ ܘܰܠܟܺܐܦܳܐ ܘܰܠܩܰܝ̈ܣܶܐ ܢܶܣܓܽܘܕ. ܘܰܐܠܳܗ̈ܶܐ ܢܫܰܡܰܗ ܠܗܳܢܶܝܢ ܕܰܕܠܳܐ ܢܦܶܫ ܘܠܳܐ ܡܰܪ̈ܓܫܳܢܝܳܬܳܐ.
4: ܐܰܠܳܗܳܐ ܕܶܝܢ ܡܶܠܬܳܐ܆ ܟܰܕ ܕܫܳܘܶܝܢ ܐܺܝܬܰܝܢ ܗ̱ܘܰܝܢ ܠܗܳܝ ܕܢܶܬܒܣܶܐ[4] ܘܢܶܫܬܰܬܰܩ܆ ܘܕܳܐܦܠܳܐ ܟܽܠ ܟܽܠܶܗ ܡܶܢ ܒܛܺܝܠܽܘܬܳܐ ܕܺܝܠܶܗ ܢܶܣܬܥܰܪ܆ ܡܶܛܽܠ ܠܳܐ ܡܶܬܬܟܺܝܠܳܢܽܘܬܳܐ ܗܳܝ ܕܒܺܝ̈ܫܳܬܰܢ܆ ܟܰܕ ܐܶܙܕܟܺܝ ܡܶܢ ܒܰܣܺܝܡܽܘܬܳܐ ܗܳܝ ܕܰܡܟܳܢܳܐ ܒܶܗ. ܠܳܐ ܐܰܗܡܺܝ ܡܶܢܰܢ ܘܠܳܐ ܫܬܶܩ. ܐܶܠܳܐ ܐܶܬܳܐ ܓܰܠܝܳܐܺܝܬ. ܘܬܰܪܶܨ ܠܰܟܝܳܢܳܐ ܗܰܘ ܕܶܐܬܟܪܰܗ.
5: ܐܶܬܳܐ ܕܶܝܢ ܘܰܢܚܶܬ ܠܘܳܬܰܢ. ܠܰܘ ܟܰܕ ܡܶܢ ܕܽܘܟܬܳܐ ܠܕܽܘܟܬܳܐ ܫܰܢܺܝ܆ ܐܰܝܟܰܢܳܐ ܓܶܝܪ ܗܰܘ ܕܰܒܟܽܠܕܽܘܟ ܩܰܪܺܝܒ ܘܰܠܟܽܠ ܡܳܠܶܐ܆ ܘܕܳܐܦܠܳܐ ܡܶܢ ܡܶܕܶܡ ܡܶܬܚܒܶܫ܆ ܡܰܠܽܘܢ ܕܶܝܢ ܕܗܽܘ ܚܳܒܶܫ ܠܟܽܠ[5]. ܐܶܠܳܐ ܟܰܕ ܐܺܝܬܰܘܗ̱ܝ ܟܽܠܶܗ ܒܰܐܠܳܗܳܐ ܘܰܐܒܳܐ. ܘܟܽܠܶܗ ܐܺܝܬܰܘܗ̱ܝ ܗܽܘ ܟܰܕ ܗܽܘ ܒܟܰܪܣܳܐ ܕܰܒܬܽܘܠܬܳܐ. ܘܳܐܦ ܕܢܶܬܥܪܶܐ ܐܶܨܛܒܺܝ. ܘܩܰܘܺܝ ܠܳܐ ܡܶܬܥܰܪܝܳܢܳܐ ܒܰܟܝܳܢܶܗ.
6: ܗܳܝ ܕܶܝܢ ܕܰܐܝܟܰܢܳܐ. ܡܶܠܬܳܐ ܠܰܡܦܰܫܳܩܽܘ ܠܳܐ ܡܶܫܟܚܳܐ. ܠܬܶܕܡܽܘܪܬܳܐ ܡܰܢ ܓܶܝܪ ܐܰܫܠܶܡܘ. ܗܳܢܽܘܢ ܕܰܐܟܪܶܙܘ ܠܶܐܘܰܢܓܶܠܺܝܽܘܢ܆ ܠܰܙܢܳܐ ܕܶܝܢ ܠܰܡܚܰܘܳܝܽܘ ܠܳܐ ܐܶܬܗܰܝܡܰܢܘ. ܗܰܘ ܓܶܝܪ ܕܶܐܡܰܪ ܕܒܰܪܢܳܫܳܐ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ܆ ܘܡܶܠܬܳܐ ܐܺܝܬܰܘܗ̱ܝ ܗ̱ܘܳܐ ܠܘܳܬ ܐܰܠܳܗܳܐ܆ ܘܰܐܠܳܗܳܐ ܐܺܝܬܰܘܗ̱ܝ ܗ̱ܘܳܐ ܗܽܘ ܡܶܠܬܳܐ. ܐܶܡܰܪ. ܐܳܦ ܗܳܝ ܕܡܶܠܬܳܐ ܒܶܣܪܳܐ ܗ̣ܘܳܐ ܘܰܫܪܳܐ ܒܰܢ[6]. ܘܟܰܕ ܥܕܰܡܳܐ ܠܗܳܕܶܐ ܡܶܠܬܳܐ ܚܰܬܡܳܗ̇ ܠܟܳܪܽܘܙܽܘܬܳܐ܆ ܘܠܰܙܢܳܐ ܠܰܝܬ ܗ̱ܘܳܐ ܠܶܗ ܦܽܘܪܣܳܐ ܠܡܺܐܡܰܪ. ܚܠܳܦ ܙܢܳܐ ܗܰܝܡܳܢܽܘܬܳܐ ܠܰܡܨܰܥܬܳܐ ܐܰܝܬܺܝ. ܗܰܝܡܳܢܽܘܬܳܐ ܕܶܝܢ. ܠܰܘ ܕܠܳܐ ܡܶܠܬܳܐ ܘܳܐܦܠܳܐ ܗܳܝ ܕܰܥܕܰܡܳܐ ܠܡ̈ܶܠܶܐ ܩܳܝܡܳܐ. ܐܶܠܳܐ ܕܒܰܥ̈ܒܳܕܶܐ ܘܰܕܡܶܢ ܢܰܨܺܝܚ̈ܘܳܬܳܐ ܕܣܳܥܽܘܪ̈ܘܳܬܳܐ ܡܶܫܬܰܪܪܳܐ. ܡܳܢܳܐ ܓܶܝܪ ܐܳܡܰܪ. ܚܙܰܝܢ ܫܽܘܒܚܶܗ܆ ܫܽܘܒܚܳܐ ܐܰܝܟ ܕܺܝܚܺܝܕܳܝܳܐ ܕܡܶܢ ܐܰܒܳܐ. ܕܰܡܠܶܐ ܛܰܝܒܽܘܬܳܐ ܘܰܫܪܳܪܳܐ. ܐܰܝܟ ܗܰܘ ܕܳܐܡܰܪ ܗ̱ܘܳܐ. ܕܰܕܗܳܝ ܕܡܶܠܬܳܐ ܒܶܣܪܳܐ ܗܘ̣ܳܐ ܠܳܐ ܡܶܫܬܰܚܠܦܳܢܳܐܺܝܬ[7]܆ ܐܳܬܳܐ ܘܬܰܚܘܺܝܬܳܐ ܓܠܺܝܬܳܐ ܘܰܕܣܰܓܺܝ ܢܰܗܺܝܪܳܐܺܝܬ ܐܺܝܬ ܠܰܢ. ܒܗܳܝ ܕܰܒܗܶܝܢ ܒܥܰܝ̈ܢܶܐ ܢܶܚܙܶܐ ܫܽܘܒܚܶܗ܆ ܘܢܶܚܙܶܝܘܗ̱ܝ ܕܦܰܐܝܽܘܬ݂ ܐܰܠܳܗܳܐܺܝܬ ܡܰܥܒܶܕ ܬܶܕܡܪ̈ܳܬܳܐ. ܘܰܠܟܽܘܪ̈ܗܳܢܶܐ ܕܰܟܝܳܢܳܐ ܕܺܝܠܰܢ ܡܬܰܪܶܨ.
7: ܟܰܕ ܓܶܝܪ ܒܝܰܡܳܐ ܘܰܒܪ̈ܽܘܚܶܐ ܟܳܐܶܐ ܗ̱ܘܳܐ[8]܆ ܘܠܰܣܛܽܘ̈ܟܝܶܐ[9] ܡܫܰܚܠܶܦ ܡܠܰܚܶܡ ܗ̱ܘܳܐ ܒܨܶܒܝܳܢܳܐ ܒܰܠܚܽܘܕ. ܘܰܠܣܰܡܝܳܐ ܕܡܶܢ ܝܺܠܺܝܕܽܘܬܶܗ ܒܳܒ̈ܳܬܳܐ ܕܥܰܝ̈ܢܶܐ ܝܳܗܶܒ ܗ̱ܘܳܐ[10]. ܗܳܠܶܝܢ ܕܠܳܐ ܫܩܰܠ ܡܶܢ ܟܝܳܢܳܐ. ܡܚܰܘܶܐ ܗ̱ܘܳܐ ܗܽܘ ܠܶܗ ܕܥܳܒܽܘܕܳܐ ܐܺܝܬܰܘܗ̱ܝ ܕܗܳܢܳܐ ܟܽܠ܆ ܘܡܳܪܳܐ ܕܰܟܝܳܢܳܐ ܘܰܐܠܳܗܳܐ ܒܰܫܪܳܪܳܐ܆ ܘܰܕܡܶܛܽܠ ܪܶܚܡܰܬ݂ ܐ̱ܢܳܫܽܘܬܳܐ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ. ܘܠܰܘ ܗܳܝ ܕܰܠܩܽܘܒܠܳܐ. ܕܟܰܕ ܒܰܪܢܳܫܳܐ ܐܺܝܬܰܘܗ̱ܝ. ܘܡܶܛܽܠ ܬܰܪܒܺܝܬܳܐ ܕܰܡܝܰܬܪܽܘܬܳܐ. ܐܰܝܟ ܫܳܛܽܘܪ̈ܘܳܬܳܐ ܕܢܶܣܛܽܘܪܺܝܽܘܤ ܠܺܐܝܩܳܪܳܐ ܕܰܐܠܳܗܽܘܬܳܐ ܫܘܰܪ ܐܶܬܥܰܠܺܝ. ܐܰܟܙܢܳܐ ܕܰܐܠܳܗ̈ܶܐ ܗܳܢܽܘܢ ܕܡ̈ܰܬܠܶܐ ܕܚܰܢ̈ܦܶܐ ܓܳܒܠܺܝܢ.
8: ܡܰܙܥܶܩ ܓܶܝܪ ܐܶܘܰܢܓܶܠܺܝܣܛܳܐ. ܕܰܚܙܰܝܢ ܫܽܘܒܚܶܗ. ܫܽܘܒܚܳܐ ܐܰܝܟ ܕܺܝܚܺܝܕܳܝܳܐ ܕܡܶܢ ܐܰܒܳܐ. ܕܰܡܠܶܐ ܛܰܝܒܽܘܬܳܐ ܘܰܫܪܳܪܳܐ5. ܝܺܚܺܝܕܳܝܳܐ ܕܶܝܢ. ܒܽܐܘܣܺܝܰܐ ܘܒܰܟܝܳܢܳܐ ܗܰܘ ܕܰܐܒܳܐ ܐܺܝܬ ܠܶܗ ܫܽܘܒܚܳܐ ܗܽܘ ܒܶܗ. ܘܠܳܐ ܗܘ̣ܳܐ ܐܰܝܟ ܚܰܕ ܡܶܢ ܒܢܰܝ̈ܢܳܫܳܐ ܙܰܕܺܝ̈ܩܶܐ ܡܫܰܘܬܦܳܐܺܝܬ ܘܰܐܝܟ ܕܒܰܡܢܳܬܳܐ ܕܛܰܝܒܽܘܬܳܐ ܘܰܕܡܰܘܗܰܒܬܳܐ܆ ܥܬܰܪ ܣܽܘܥܪܳܢܳܐ ܡܶܬܩܰܢܝܳܢܳܐ. ܘܕܰܦܐܶܐ ܠܰܐܠܳܗܳܐ ܐܺܝܬܰܘܗ̱ܝ ܗ̱ܘܳܐ ܗܽܘ ܫܽܘܒܚܳܐ. ܡܰܠܝܳܐ ܐܺܝܬܰܘܗ̱ܝ ܗ̱ܘܳܐ ܡܶܢ ܛܰܝܒܽܘܬܳܐ ܘܰܫܪܳܪܳܐ. ܕܰܐܠܳܗܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܫܰܪܺܝܪܳܐܺܝܬ. ܗܳܝ ܕܗܳܠܶܝܢ ܕܰܐܝܟ ܗܳܟܰܢ ܢܫܰܟܶܢ. ܘܰܕܠܳܐ ܡܶܬܶܥܗܶܕ ܒܺܝ̈ܫܳܬܳܐ ܢܶܗܘܶܐ ܠܘܳܬܰܢ. ܘܢܶܦܪܽܘܩ ܠܰܢ ܠܗܳܢܽܘܢ ܕܰܚܛܰܘ. ܘܺܐܝܬܰܝܢ ܗ̱ܘܰܝܢ ܛܳܠܡܰܝ̈ ܛܰܝܒܽܘܬܳܐ.
9: ܒܛܰܝܒܽܘܬܳܐ ܓܶܝܪ ܐܺܝܬܰܝܢ ܦܪ̈ܺܝܩܶܐ ܒܝܰܕ ܗܰܝܡܳܢܽܘܬܳܐ. ܘܗܳܕܶܐ ܠܰܘ ܡܶܢܰܢ. ܡܰܘܗܰܒܬܳܐ ܗ̱ܝ ܕܰܐܠܳܗܳܐ. ܠܰܘ ܡܶܢ ܥܒܳܕ̈ܶܐ܆ ܐܰܝܟܰܢܳܐ ܕܠܳܐ ܐ̱ܢܳܫ ܢܶܫܬܰܒܗܰܪ[11]. ܐܰܝܟܰܢܳܐ ܕܦܰܘܠܽܘܤ ܐܳܡܰܪ: ܐܰܝܟܰܢܳܐ ܓܶܝܪ ܠܰܘ ܡܰܘܗܰܒܬܳܐ ܗܳܝ ܪܰܒܬܳܐ ܘܰܕܥܳܒܪܳܐ ܠܟܽܠܳܗ̇ ܫܦܺܝܥܽܘܬܳܐ ܕܫܽܘܟܳܢܳܐ. ܕܝܰܗ̱ܒ ܠܰܢ ܗܳܝ ܕܢܶܗܘܶܐ ܐܺܝܬܰܝܢ. ܘܡܶܢ ܗܳܝ ܕܠܳܐ ܐܺܝܬܰܝܢ ܗ̱ܘܰܝܢ ܐܰܥܒܰܪ ܠܰܢ. ܟܰܕ ܨܰܠܡܳܐ ܐܰܠܳܗܳܝܳܐ ܡܙܰܓ ܒܛܺܝܢܳܐ. ܠܢܰܦܫܳܐ ܡܶܬܗܰܘܢܳܢܺܝܬܳܐ ܐܳܡܰܪ ܐ̱ܢܳܐ. ܒܳܬܰܪܟܶܢ ܡܶܛܽܠ ܒܺܝܫܽܘܬܳܐ ܠܰܚܒܳܠܳܐ ܐܶܬܢܰܚܰܬܢܰܢ. ܘܰܒܡܰܘܬܳܐ ܐܶܬܚܰܝܰܒܢܰܢ. ܡܳܢܳܐ ܗܳܟܺܝܠ ܗ̱ܘ܆ ܠܡܶܙܕܰܟܝܳܢܽܘܬܳܐ ܕܺܝܠܰܢ. ܥܶܠܬܳܐ ܕܣܳܥܽܘܪܽܘܬ݂ ܫܰܦܺܝܪ̈ܳܬܳܐ ܕܝܰܬܺܝܪ ܪܰܒܳܐ ܥܒܳܕܶܗ܆ ܐܳܦ ܓܶܝܪ ܠܰܘ ܠܘܳܬ݂ ܗܳܝ ܕܢܶܗܘܶܐ ܐܺܝܬܰܝܢ ܦܢܳܐ ܡܶܢܕܪܺܝܫ ܐܰܣܶܩ ܠܰܢ ܒܰܠܚܽܘܕ܆ ܐܶܠܳܐ ܡܶܢ ܡܫܰܪܬܚܽܘܬܳܐ ܝܰܬܺܝܪܬܳܐ. ܐܳܦ ܗܳܝ ܕܫܰܦܺܝܪ ܢܶܗܘܶܐ ܐܺܝܬܰܝܢ ܐܰܘܣܶܦ ܝܰܗ̱ܒ.
10: ܟܰܕ ܓܶܝܪ ܨܰܠܡܳܐ ܡܶܢ ܣܝܳܢܳܐ ܘܰܫܥܺܝܢܳܐ ܐܶܬܛܡܰܪ܆ ܟܰܕ ܠܰܓܒܺܝܠܬܳܐ ܕܺܝܠܰܢ ܚܰܝܶܕ ܠܰܐܠܳܗܽܘܬܳܐ ܒܰܝܬܳܝܬܳܐ. ܡܥܰܕܰܪ ܠܨܰܠܡܳܐ. ܘܥܰܡܶܗ ܠܒܶܣܪܳܐ ܡܰܣܶܩ ܠܰܫܡܰܝܳܐ. ܐܰܝܟܰܢܳܐ ܕܗܳܝ ܕܰܡܝܰܬܪܳܐ ܡܶܢ ܗܳܠܶܝܢ ܕܒܰܢ ܬܶܣܒܺܝܘܗ̱ܝ ܠܽܐܘܚܕܳܢܳܐ. ܘܗܳܝ ܕܡܶܛܽܠܳܬܳܗ̇ ܐܳܦ ܡܶܢ ܫܽܘܪܳܝܳܐ ܐܶܬܐܰܣܪܰܬ݂ ܐܰܟܚܕܳܐ. ܘܫܰܡܠܺܝ ܠܚܰܝܽܘܬܳܐ ܪܰܒܬܳܐ ܘܰܡܠܺܝܠܬܳܐ ܠܒܰܪܢܳܫܳܐ. ܘܗܰܘ ܕܰܓܒܰܠ ܒܫܽܘܪܳܝܳܐ ܚܰܟܺܝܡܳܐܺܝܬ. ܗܽܘ ܡܶܢܕܪܺܝܫ. ܓܳܒܶܠ ܝܰܬܺܝܪ ܚܰܟܺܝܡܳܐܺܝܬ. ܩܰܕܡܳܐܺܝܬ ܡܰܢ ܓܶܝܪ ܡܶܢ ܐܰܪܥܳܐ ܓܒܰܠ ܠܳܐܕܳܡ܆ ܘܰܢܦܰܚ ܒܶܗ ܪܽܘܚܳܐ ܕܚܰܝ̈ܶܐ[12]. ܟܰܕ ܢܰܦܫܶܗ ܡܠܺܝܠܳܐܺܝܬ܆ ܘܥܰܒܕܶܗ ܡܩܰܒܠܳܢܳܐ ܕܰܡܝܰܬܪܽܘܬܳܐ ܘܰܕܟܽܠܳܗ̇ ܚܶܟܡܬܳܐ. ܗܳܕܶܐ ܓܶܝܪ ܐܺܝܬܶܝܗ̇. ܗܳܝ ܕܰܒܨܰܠܡܳܐ ܕܰܐܠܳܗܳܐ ܢܶܗܘܶܐ. ܡܶܛܽܠ ܕܶܝܢ ܕܡܶܢ ܒܳܬܰܪ ܡܰܦܽܘܠܬܳܐ ܕܡܶܢ ܦܰܪܕܰܝܣܳܐ܆ ܘܰܕܕܽܘܒܳܪܳܐ ܗܰܘ ܠܳܐ ܡܳܝܽܘܬܳܐ. ܚܟܰܡ ܐܳܕܳܡ ܠܰܐܢ̱ܬܬܶܗ܆ ܘܥܶܠܰܬ݂ ܫܰܘܬܳܦܽܘܬܳܐ ܗܳܕܶܐ ܘܚܽܘܠܛܳܢܳܐ ܕܪܶܕܝܳܐ܆ ܗܰܘ ܕܠܰܒܥܺܝܪܳܐ ܝܰܬܺܝܪܳܐܺܝܬ ܦܐܶܐ ܘܠܰܘ ܠܰܒܢܰܝ̈ܢܳܫܳܐ ܡܠܺܝ̈ܠܶܐ܆ ܘܠܰܚܒܳܠܳܐ ܘܰܠܡܰܘܬܳܐ ܡܫܰܕܰܪ܆ ܠܝܽܘܒܳܠܳܐ ܕܶܝܢ ܒܪܰܡ ܕܓܶܢܣܳܐ ܢܳܛܰܪ.
11: ܡܶܛܽܠ ܗܰܘ ܕܗܳܟܰܢܳܐ ܚܰܟܺܝܡܳܐܺܝܬ ܘܪܶܚܡܰܬ݂ ܐ̱ܢܳܫܳܐܺܝܬ ܪܕܳܐ܆ ܡܳܢܳܐ ܥܒܰܕ ܥܰܡܰܢܽܘܐܶܝܠ. ܠܳܗ̇ ܟܰܕ ܠܳܗ̇ ܟܰܢܶܫ ܠܬܰܪ̈ܬܰܝܗܶܝܢ. ܠܰܓܒܺܝܠܬܳܐ ܐܳܡܰܪ ܐ̱ܢܳܐ ܗܳܝ ܕܰܒܛܰܝܒܽܘܬܳܐ ܕܠܳܐ ܡܳܝܽܘܬܽܘܬܳܐ ܡܝܰܩܪܳܐ ܗ̱ܘܳܬ. ܘܰܠܗܳܝ ܕܥܰܡ ܚܒܳܠܳܐ ܡܙܰܘܓܳܐ. ܠܺܝܠܺܝܕܽܘܬܳܐ ܗܳܝ ܕܡܶܢ ܚܽܘܠܛܳܢܳܐ ܗܘܳܬ݂. ܘܗܽܘ ܗܰܘ ܕܡܶܢ ܩܕܺܝܡ ܡܶܢ ܐܰܪܥܳܐ ܓܰܒܠܶܗ ܠܒܰܪܢܳܫܳܐ. ܡܶܢ ܒܬܽܘܠܬܳܐ ܥܽܘܠܳܐ ܡܶܬܓܒܶܠ. ܟܰܕ ܐܶܬܒܰܣܰܪ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢܳܗ̇. ܒܶܣܪܳܐ ܗܰܘ ܫܘܶܐ ܒܽܐܘܣܺܝܰܐ ܕܺܝܠܰܢ ܕܰܡܢܰܦܰܫ ܒܢܰܦܫܳܐ ܡܶܬܗܰܘܢܳܢܺܝܬܳܐ. ܘܠܰܘ ܡܶܢ ܡܰܕܡܟܳܐ ܘܪܶܓܬܳܐ ܘܡܰܪܡܝܳܢܽܘܬܳܐ ܕܙܰܪܥܳܐ ܐ̱ܢܳܫܳܝܳܐ[13].
12: ܘܕܺܝܠܳܝܬܳܐ ܡܰܢ ܕܰܓܒܺܝܠܬܰܢ ܩܰܕܡܳܝܬܳܐ ܐܺܝܬܶܝܗ̇ ܡܶܬܒܰܣܪܳܢܽܘܬܳܐ ܕܠܳܐ ܙܰܪܥܳܐ. ܕܺܝܠܳܝܬܳܐ ܕܶܝܢ ܕܰܙܢܳܐ ܗܰܘ ܬܪܰܝܳܢܳܐ ܕܰܗܘܳܝܳܐ ܕܺܝܠܰܢ. ܗܳܝ ܕܣܳܟ ܢܶܗܘܶܐ ܡܶܢ ܐܰܢ̱ܬܬܳܐ. ܗܳܟܰܢܳܐ ܐܳܦ ܒܰܛܢܳܐ ܕܰܒܙܰܒܢܳܐ. ܐܶܬܡܰܠܺܝܘ ܓܶܝܪ ܝܰܘ̈ܡܳܬܳܗ̇ ܕܬܺܐܠܰܕ[14]. ܐܳܡܰܪ ܡܶܛܽܠ ܝܳܠܕܰܬ ܐܰܠܳܗܳܐ ܟܬܳܒܳܐ ܗܰܘ ܟܳܗܢܳܝܳܐ. ܕܙܽܘܘܳܓܳܐ ܡܰܢ ܐܺܝܬܶܝܗ̇ ܗ̱ܘܳܬ ܕܺܝܠܳܝܬܳܐ ܗܺܝ ܗܳܕܶܐ. ܕܠܳܐ ܢܶܣܝܳܢܳܐ ܕܶܝܢ ܕܙܽܘܘܳܓܳܐ ܫܰܪܝܰܬ݂. ܘܫܰܠܡܰܬ݂ ܒܰܒܬܽܘܠܽܘܬܳܐ. ܡܶܢ ܒܳܬܰܪ ܓܶܝܪ ܝܰܠܕܳܐ. ܠܳܐ ܡܶܫܬܰܪܝܳܢܳܐ ܩܰܘܺܝ ܛܰܒܥܳܐ ܕܰܒܬܽܘܠܽܘܬܳܐ. ܒܟܽܠܗܶܝܢ ܓܶܝܪ ܐܰܝܠܶܝܢ ܕܠܰܚܒܳܠܳܐ ܡܰܝ̈ܬܝܳܢ ܠܰܢ܆ ܙܰܪ̈ܥܶܐ ܕܠܳܐ ܡܳܝܽܘܬܽܘܬܳܐ ܚܳܠܶܛ. ܡܶܛܽܠ ܟܺܝܬ ܕܳܐܦ ܠܘܳܬ ܗܳܕܶܐ ܚܳܝܪܳܐ ܗ̱ܘܳܬ ܠܶܗ ܟܽܠܳܗ̇ ܡܶܠܬܳܐ ܕܰܡܕܰܒܪܳܢܽܘܬܳܐ. ܕܠܰܚܒܳܠܳܐ ܡܰܢ ܢܶܚܒܽܘܫ[15] ܘܢܶܟܠܶܐ ܘܰܠܒܶܣܬܪܳܐ ܢܰܗܦܟܺܝܘܗ̱ܝ. ܢܫܰܪܶܐ ܕܶܝܢ ܒܠܳܐ ܡܳܝܽܘܬܽܘܬܳܐ.
13: ܙܰܒܢܰܐ ܗ̱ܘ ܠܺܝ ܕܶܝܢ ܕܗܳܠܶܝܢ ܕܕܰܘܺܝܕ ܐܺܡܰܪ ܘܰܐ݀ܙܥܶܩ. ܕܡܰܢܽܘ ܢܡܰܠܶܠ ܚܰܝܠ̈ܬܳܢܘܳܬܳܐ ܕܡܳܪܝܳܐ. ܡܶܫܬܰܡܥܳܢ̈ܝܳܬܳܐ ܢܶܥܒܶܕ ܠܟܽܠܗܶܝܢ ܬܶܫܒ̈ܚܳܬܶܗ[16]. ܠܝܰܠܕܳܐ ܓܶܝܪ ܗܳܢܳܐ ܦܐܶܐ ܠܰܐܠܳܗܳܐ ܘܕܰܠܗܰܠ ܡܶܢ ܟܽܠ ܬܶܕܡܽܘܪܬܳܐ܆ ܗܰܘ ܕܡܶܢ ܒܳܬܰܪ ܡܰܦܩܳܢܳܐ ܘܰܐܝܟ ܕܐ̱ܢܳܫ ܢܺܐܡܰܪ ܡܶܢ ܒܳܬܰܪ ܗ̱ܝ ܚܙܳܬܳܐ ܘܓܶܫܬܳܐ܆ ܠܳܐ ܠܡܶܠܬܳܐ ܐܺܝܬܰܘܗ̱ܝ ܡܶܬܰܐܡܪܳܢܳܐ܆ ܘܳܐܦܠܳܐ ܠܬܰܪܥܺܝܬܳܐ ܡܶܬܕܰܪܟܳܢܳܐ.
14: ܐܶܫܰܥܝܳܐ ܗܰܘ ܫܺܝܦܽܘܪܳܐ ܪܰܒ ܩܳܠܳܐ ܕܰܢܒܺܝ̈ܶܐ ܩܰܕܶܡ ܐܰܟܪܶܙ. ܐܰܝܟ ܕܰܠܡܺܐܡܰܪ ܐܳܦ ܟܰܕ ܡܶܢ ܠܥܶܠ ܒܳܠܶܡ ܠܦܽܘܡܳܐ ܕܗܳܢܽܘܢ ܕܡܶܬܚܪܶܝܢ ܘܩܳܝܡܺܝܢ ܣܰܩܽܘܒܠܳܐܺܝܬ ܠܽܘܩܒܰܠ ܪܰܒܽܘܬܳܗ̇ ܕܬܶܕܡܽܘܪܬܳܐ. ܟܰܕ ܗܳܟܰܢܳܐ ܐܳܡܰܪ. ܩܳܠܳܐ ܕܰܩܥܳܬܳܐ ܡܶܢ ܡܕܺܝܢ̱ܬܳܐ. ܩܳܠܳܐ ܡܶܢ ܗܰܝܟܠܳܐ. ܩܳܠܶܗ ܕܡܳܪܝܳܐ ܕܦܳܪܰܥ ܦܽܘܪܥܳܢܳܐ ܠܗܳܢܽܘܢ ܕܩܳܝܡܺܝܢ ܠܩܽܘܒܠܶܗ. ܩܕܳܡ ܗܳܝ ܕܚܳܒܠܳܐ ܬܺܐܠܰܕ. ܘܰܩܕܳܡ ܕܢܺܐܬܶܐ ܟܺܐܒܳܐ ܕܚܶܒ̈ܠܶܐ. ܦܶܠܛܰܬ ܘܝܶܠܕܰܬ ܕܶܟܪܳܐ[17]. ܡܶܫܬܰܡܥܳܢܺܝܬܳܐ ܬܶܗܘܶܐ ܐܳܡܰܪ ܗܳܝ ܕܰܥܬܺܝܕ ܐ̱ܢܳܐ ܠܡܶܬܢܰܒܳܝܽܘ. ܘܰܕܕܳܡܝܳܐ ܐܺܝܬܶܝܗ̇ ܠܰܩܥܳܬܳܐ ܕܰܡܕܺܝܢ̱ܬܳܐ. ܕܝܰܬܺܝܪ ܡܳܙܓܳܐ ܒܩܳܠܳܗ̇ ܠܡܰܫܡܰܥܬܳܐ ܕܗܳܢܽܘܢ ܕܫܳܡܥܺܝܢ. ܐܶܠܳܐ ܐܳܦܶܢ ܡܶܫܬܰܡܥܳܢܺܝܬܳܐ ܗ̱ܝ. ܐܶܠܳܐ ܒܪܰܡ ܠܳܐ ܡܶܬܡܰܠܠܳܢܺܝܬܳܐ ܗ̱ܝ. ܩܳܠܳܐ ܓܶܝܪ ܐܺܝܬܰܘܗ̱ܝ ܡܶܢ ܗܰܝܟܠܳܐ. ܗܳܠܶܝܢ ܕܶܝܢ ܕܡܶܢ ܗܰܝܟܠܳܐ ܘܡܶܢ ܕܽܘܟܬܳܐ ܓܰܘܳܝܬܳܐ ܕܗܳܢܳܐ܆ ܘܡܶܢ ܩܕܽܘܫ ܩܽܘܕ̈ܫܶܐ ܡܶܬܬܰܝ̈ܬܝܳܢ ܐܰܘ ܡܶܬܓܰܠ̈ܝܳܢ. ܐܰܝܟܰܢܳܐ ܕܳܐܡܰܪ ܟܬܳܒܳܐ ܐܰܠܳܗܳܝܳܐ ܐ̱ܪ̈ܳܙܳܢܳܝܳܬܳܐ ܡܶܕܶܡ ܐܺܝܬܰܝܗܶܝܢ܆ ܘܕܰܠܬܰܪ̈ܥܝܳܬܳܐ ܕܰܒܢܰܝ̈ܢܳܫܳܐ ܠܳܐ ܡܶܬܩܰܪ̈ܒܳܢܝܳܬܳܐ ܐܰܘ ܥܰܣ̈ܩܳܬ݂ ܠܡܶܬܩܰܪܒܳܢܽܘܬܳܐ. ܘܠܳܐ ܡܶܬܕܰܪ̈ܟܳܢܝܳܬܳܐ ܠܦܽܘ̈ܫܳܩܶܐ. ܐܶܠܳܐ ܗܽܘ ܩܳܠܳܐ ܘܗܺܝ ܟܳܪܽܘܙܽܘܬܳܐ ܗܳܝ ܛܒܺܝܒܬܳܐ ܘܠܳܐ ܡܶܬܡܰܠܠܳܢܺܝܬܳܐ. ܡܰܟܣܳܢܳܐܺܝܬ ܬܩܽܘܡ ܠܽܘܩܒܰܠ ܗܳܢܽܘܢ ܕܣܺܝܡܺܝܢ ܣܰܩܽܘܒܠܳܐܺܝܬ ܘܠܳܐ ܡܶܬܬܦܺܝܣܳܢܳܐܺܝܬ ܐܺܝܬ ܠܗܽܘܢ. ܘܬܶܦܪܽܘܥ ܐܶܢܽܘܢ.
15: ܡܳܢܳܐ ܕܶܝܢ ܐܺܝܬܰܘܗ̱ܝ ܗܰܘ ܕܰܐܝܟ ܗܳܢܳܐ ܩܳܠܳܐ ܘܟܳܪܽܘܙܽܘܬܳܐ. ܩܕܳܡ ܗܳܝ ܕܚܳܒܠܳܐ ܬܺܐܠܰܕ܆ ܘܰܩܕܳܡ ܕܢܺܐܬܶܐ ܟܺܐܒܳܐ ܕܚܶܒ̈ܠܶܐ. ܦܶܠܛܰܬ݂ ܘܝܶܠܕܰܬ݂ ܕܶܟܪܳܐ[18]. ܚܳܙܶܐ ܐ̱ܢܳܐ ܐܳܡܰܪ ܠܟܰܪܣܳܐ ܕܥܰܠ ܬܰܪ̈ܥܶܐ ܕܚܶܒ̈ܠܶܐ ܐܺܝܬܶܝܗ̇܆ ܘܕܰܡܣܪܰܗܒܳܐ ܠܘܳܬ ܝܰܠܕܳܐ. ܘܳܐܬܶܐ ܐ̱ܢܳܐ ܡܶܟܺܝܠ ܕܶܐܡܳܐ ܐܶ݀ܩܪܶܐ ܠܗܳܝ ܕܒܰܛܢܳܐ. ܘܠܳܐ ܝܳܕܰܥ ܐ̱ܢܳܐ ܐܰܝܟܰܢܳܐ ܟܰܕ ܩܰܕܡܰܬ݂ ܠܟܺܐܒ̈ܶܐ ܕܚܶܒ̈ܠܶܐ. ܥܶܪܩܰܬ݂ ܡܶܢ ܬܚܽܘ̈ܡܶܐ ܕܰܟܝܳܢܳܐ ܘܝܶܠܕܰܬ݂ ܕܶܟܪܳܐ. ܘܰܐܣܽܘܪܳܐ ܗܰܘ ܕܰܒܬܽܘܠܽܘܬܳܐ ܐܳܦ ܡܶܢ ܒܳܬܰܪ ܝܰܠܕܳܐ. ܠܳܐ ܡܶܣܬܰܕܩܳܢܳܐ ܟܰܬܰܪ.
16: ܡܶܛܽܠܗܳܕܶܐ ܗܽܘ ܢܒܺܝܳܐ ܟܰܕ ܬܡܰܗ ܒܬܰܪܥܺܝܬܶܗ ܥܰܠ ܬܶܕܡܽܘܪܬܳܐ. ܡܰܝܬܶܐ ܒܳܬܰܪܟܶܢ ܐܳܦ ܗܳܠܶܝܢ ܟܰܕ ܡܰܙܥܶܩ. ܡܰܢܽܘ ܫܡܰܥ ܕܰܐܝܟ ܗܳܕܶܐ. ܘܡܰܢܽܘ ܚܙܳܐ ܗܳܟܰܢܳܐ. ܢܶܒܥܶܐ ܕܶܝܢ ܐ̱ܢܳܫ ܘܛܳܒ ܟܺܐܢܳܐܺܝܬ. ܕܰܐܝܟܰܢܳܐ ܒܗܳܝ ܕܝܶܠܕܰܬ ܕܶܟܪܳܐ. ܐܰܝܟ ܕܰܒܡܶܕܶܡ ܬܡܺܝܗܳܐ ܗܽܘ ܢܒܺܝܳܐ ܐܶܬܕܰܡܰܪ. ܠܰܘ ܓܶܝܪ ܠܳܐ ܡܥܰܝܰܕܬܳܐ ܗ̱ܝ ܗܳܕܶܐ. ܘܳܐܦܠܳܐ ܐܰܟܣܢܳܝܬܳܐ ܕܰܟܝܳܢܳܐ. ܣܰܓܺܝ̈ܳܐܬܳܐ ܓܶܝܪ ܐܳܦ ܢܶܫ̈ܶܐ ܐ̱ܚܪ̈ܳܢܝܳܬܳܐ ܝܺܠܶܕ̈ܝ ܕܶܟܪ̈ܶܐ. ܐܳܦ ܗܳܫܳܐ ܬܽܘܒ. ܕܝܳܠ̈ܕܳܢ ܐܺܝܬ ܠܡܶܚܙܳܐ.
17: ܐܶܠܳܐ ܠܡܶܕܰܥ ܙܳܕܶܩ. ܕܳܐܦܠܳܐ ܗܳܕܶܐ ܐܺܝܬܶܝܗ̇ ܕܠܳܐ ܬܶܕܡܽܘܪܬܳܐ ܘܳܐܦܠܳܐ ܕܰܦܫܺܝܛܳܐܺܝܬ ܐܰܡܺܝܪܳܐ. ܐܶܠܳܐ ܘܰܕܣܓܺܝ ܒܙܰܒܢܳܗ̇. ܡܶܢ ܒܳܬܰܪ ܓܶܝܪ ܕܶܐܬܢܰܩܰܒܬܝ (ܕܶܐܬܢܰܩܰܒܬܳܢ)222 ܘܶܐܬܪܰܦܺܝ ܟܝܳܢܳܐ ܕܺܝܠܰܢ܆ ܘܒܰܕܡܽܘܬܳܐ ܕܰܥܒܳܪ ܦܽܘܩܕܳܢܳܐ ܕܳܐܕܳܡ ܥܰܠ ܟܽܠܗܽܘܢ ܒܢܰܝ̈ܢܳܫܳܐ ܐܰܡܠܶܟ ܡܰܘܬܳܐ. ܠܳܐ ܐ̱ܢܳܫ ܕܶܟܪܳܐ ܡܶܬܺܝܠܶܕ ܗ̱ܘܳܐ. ܕܰܠܘܳܬ ܚܛܺܝܬܳܐ ܥܠܰܝܡܳܐܺܝܬ ܡܨܶܐ ܗ̱ܘܳܐ ܠܰܡܩܳܡ. ܐܰܝܟܰܢܳܐ ܕܡܶܢ ܥܶܩܳܪܳܗ̇ ܢܪܺܝܡܺܝܗ̇܆ ܘܰܒܗܳܢܳܐ ܙܢܳܐ. ܡܳܪܳܢܳܐܺܝܬ ܟܽܠ ܕܡܶܬܺܝܠܶܕ ܗ̱ܘܳܐ. ܢܶܩܒܬܳܐ ܘܪܰܦܝܳܐ ܐܺܝܬܰܘܗ̱ܝ ܗ̱ܘܳܐ. ܒܰܠܚܽܘܕܰܘܗ̱ܝ ܕܶܝܢ ܥܰܡܰܢܽܘܐܶܝܠ ܡܶܢ ܗܰܘ ܙܰܒܢܳܐ ܒܰܫܪܳܪܳܐ ܕܶܟܪܳܐ ܐܶܬܺܝܠܶܕ. ܟܰܕ ܠܰܛܪܽܘܢܽܘܬܶܗ ܕܳܐܟܶܠܩܰܪܨܳܐ ܣܚܰܦ. ܘܰܠܡܰܘܬܳܐ ܓܶܝܪ. ܘܠܰܟܝܳܢܳܐ ܕܺܝܠܰܢ ܗܰܘ ܕܰܡܫܰܪܰܝ ܗ̱ܘܳܐ ܘܰܡܚܺܝܠ ܥܰܠܺܝ[19] ܠܘܳܬ ܕܶܟܪܳܢܳܝܽܘܬܳܐ. ܐܰܝܟܰܢܳܐ ܕܒܰܐܓܽܘ̈ܢܶܐ ܕܰܚܠܳܦ ܫܰܦܺܝܪܽܘܬ݂ ܕܶܚܠܬܳܐ. ܢܶܬܠܰܒܒܽܘܢ ܒܢܰܝ̈ܢܳܫܳܐ ܘܢܰܡܪܚܽܘܢ ܠܽܘܩܒܰܠ ܗܰܘ ܕܡܶܢ ܩܕܺܝܡ ܥܫ̣ܰܡ. ܠܘܳܬ ܗܳܠܶܝܢ. ܐܳܦ ܝܽܘܕܳܝܳܐ ܢܶܒܗܰܬ݂. ܐܳܦ ܚܰܢܦܳܐ ܢܶܬܚܰܦܶܐ. ܟܰܕ ܚܳܙܶܐ ܠܝܰܠܕܳܐ ܒܬܽܘܠܳܝܳܐ ܕܡܶܢ ܢܒܺܝ̈ܶܐ ܡܶܬܟܪܶܙ. ܘܡܶܢ ܡܰܦܩܳܢܳܐ ܕܥܰܒ̈ܕܶܐ ܡܶܣܬܗܶܕ.
18: ܐܶܠܳܐ ܡܳܢܳܐ ܐܶ݀ܚܰܫ. ܟܰܕ ܚܳܙܶܐ ܐ̱ܢܳܐ ܠܡܺܐܡܪܳܐ ܕܰܠܘܳܬ݂ ܠܳܐ ܡܡܰܫܚܽܘܬܳܐ ܢܳܦܶܩ ܠܰܢ. ܘܗܳܕܶܐ ܟܰܕ ܠܘܳܬ ܚܰܕ ܙܰܠܺܝܩܳܐ ܕܡܶܐܬܺܝܬܶܗ ܕܒܰܒܣܰܪ ܕܰܡܫܺܝܚܳܐ ܐܶܬܶܐܡܰܢ ܒܰܠܚܽܘܕ ܐܰܝܟܰܢܳܐ ܕܶܐܡܪܶܬ݂. ܫܳܒܶܩ ܐ̱ܢܳܐ ܕܶܝܢ ܠܒܶܝܬܠܚܶܡ. ܠܡܰܟܬܒܳܢܽܘܬܳܐ. ܠܥܰܙܪܽܘܪ̈ܶܐ. ܠܽܐܘܪܝܳܐ. ܠܪܶܗܛܳܐ ܕܟܰܘܟܒܳܐ. ܠܩܽܘܪ̈ܒܳܢܶܐ ܘܰܠܣܶܓܕܬܳܐ ܕܰܡܓܽܘ̈ܫܶܐ. ܠܰܥܪܽܘܩܝܳܐ ܕܰܠܘܳܬ݂ ܡܶܨܪܶܝܢ. ܠܦܽܘܢܳܝܳܐ ܬܽܘܒ ܕܡܶܢ ܡܶܨܪܶܝܢ. ܠܬܰܪܥܺܝܬܳܐ ܡܣܰܝܒܰܬ݂ ܒܩ̈ܶܛܠܶܐ ܕܺܐܝܪܽܘܕܺܝܤ ܕܥܰܠ ܫܰܒܪ̈ܶܐ ܡܶܙܕܰܝܢܳܐ ܗ̱ܘܳܬ݂. ܐܰܝܟܰܢܳܐ ܕܡܶܛܽܠ ܪܽܘܓܙܳܐ ܕܠܳܐ ܡܠܺܝܠܽܘܬܳܐ. ܐܳܦܠܳܐ ܬܶܪܓܰܫ ܗ̱ܘܳܬ ܕܰܠܡܰܢܽܘ ܨܳܒܝܳܐ ܗ̱ܘܳܬ ܠܡܶܩܛܰܠ. ܐܳܦ ܓܶܝܪ ܟܽܠܚܕܐ ܡܶܢ ܗܳܠܶܝܢ ܕܶܐܬܡ̈ܢܺܝܶܢ. ܠܘܳܬܳܗ̇ ܩܳܪܝܳܐ. ܘܥܶܠܠ̈ܳܬܳܐ ܕܬܰܪ̈ܥܝܳܬܳܐ ܐܰܠܳܗܳܝ̈ܳܬܳܐ ܝܳܗܒܳܐ. ܘܟܰܕ ܟܽܠܗܶܝܢ ܪܳܐܶܓ ܐ̱ܢܳܐ ܠܡܺܐܡܰܪ܆ ܡܶܛܽܠ ܚܽܘܒܳܐ ܕܰܠܘܳܬ݂ܗܶܝܢ. ܡܶܛܽܠ ܠܳܐ ܡܡܰܫܚܽܘܬܳܐ ܠܟܽܠܗܶܝܢ ܫܳܒܶܩ ܐ̱ܢܳܐ. ܟܰܕ ܝܳܗܶܒ ܐ̱ܢܳܐ ܐܳܦ ܒܗܳܕܶܐ ܠܡܶܙܟܳܐ. ܠܗܰܘ ܕܰܠܥܳܠܡܳܐ ܙܟܳܐ[20].
19: ܐܳܦ ܐܰܢ̱ܬܽܘܢ ܕܶܝܢ܆ ܟܰܕ ܒܗܳܠܶܝܢ ܡ̈ܶܠܶܐ ܒܰܣܶܡܬܽܘܢ ܢܰܦ̈ܫܳܬܟܽܘܢ܆ ܘܬܺܐܙܽܠ̱ܘܢ ܠܒܳܬܰܝ̈ܟܽܘܢ ܘܰܬܣܺܝܡܽܘܢ ܦܳܬܽܘܪܳܐ. ܒܗܶܝܢ ܟܰܕ ܒܗܶܝܢ ܐܶܬܒܰܣ̱ܡܘ. ܘܗܳܟܰܢܳܐ ܟܰܕ ܒܗܰܢܺܝܽܐܘܬܳܐ ܕܬܰܪܥܺܝܬܳܐ ܠܗܰܢܺܝܽܐܘܬܳܐ ܗܳܝ ܕܟܰܪܣܳܐ ܬܚܰܦܽܘܢ. ܡܠܺܝܠܳܐ ܐܰܝܟ ܕܒܰܫܪܳܪܳܐ ܠܟܽܠܶܗ ܝܰܘܡܳܐ ܗܳܢܳܐ ܕܥܺܐܕܳܐ. ܠܰܐܠܳܗܳܐ ܡܶܠܬܳܐ ܗܰܘ ܕܶܐܬܒܰܣܰܪ ܡܶܛܽܠܳܬܰܢ ܦܪܽܘܫܘ ܘܟܰܗܶܢܘ.
20: ܬܶܗܘܶܐ ܕܶܝܢ ܠܡܺܐܡܰܪ ܕܳܐܦ ܟܽܠܗܽܘܢ ܚܰܝ݂ܰܝ݂̈ܟܽܘܢ. ܐܰܝܟܰܢܳܐ ܕܳܐܦ ܤܛܶܦܰܢܽܘܤ ܗܰܘ ܩܰܕܡܳܝܳܐ ܕܣܳܗܕ̈ܶܐ ܥܒܰܕ. ܟܰܕ ܢܰܩܺܝ ܠܶܗ ܠܰܕܡܳܐ ܒܰܝܬܳܝܳܐ. ܘܠܰܟܠܺܝܠܳܐ ܕܣܳܗܕܽܘܬܳܐ ܐܶܫܬܘܺܝ. ܐܳܦ ܗܳܕܶܐ ܓܶܝܪ ܕܚܶܟܡܬܳܐ ܕܰܐܠܳܗܳܐ ܗܳܝ ܕܝܰܬܺܝܪ ܡܶܢ ܟܽܠ ܥܰܡܺܝܩܳܐ ܐܺܝܬܶܝܗ̇. ܗܳܝ ܕܡܰܟܪܙܳܐ ܒܝܰܕ ܗܳܠܶܝܢ ܕܡܶܢܳܗ̇ ܡܶܬܕܰܒܪ̈ܳܢ ܠܗܳܠܶܝܢ ܕܠܳܐ ܡܶܬܚܰܙ̈ܝܳܢ ܘܰܡܛܰܫ̈ܝܳܢ. ܕܶܐܤܛܶܦܰܢܽܘܤ. ܗܳܢܰܘ ܕܶܝܢ ܕܡܰܝܬܶܐ ܫܡܳܐ ܕܰܟܠܺܝܠܳܐ. ܢܶܗܘܶܐ ܪܺܝܫ ܬܶܓܡܳܐ ܘܩܰܕܡܳܝܳܐ ܕܰܐܓܽܘ̈ܢܶܐ ܗܳܠܶܝܢ ܟܳܗ̈ܢܳܝܶܐ. ܕܰܡܫܰܘܕܰܥ ܐܳܦ ܒܝܰܕ ܫܡܶܗ ܐܳܦ ܒܝܰܕ ܬܰܚܘܺܝܬܳܐ ܕܒܰܩܢܽܘܡܶܗ܆ ܕܗܳܢܽܘܢ ܕܰܠܘܳܬܶܗ ܟܰܕ ܠܘܳܬܶܗ ܕܰܤܛܰܕܺܝܽܘܢ ܥܬܺܝܕܺܝܢ ܠܡܶܚܠܰܨ. ܠܰܟܠܺܝܠܳܐ ܗܰܘ ܕܰܒܡܰܠܟܽܘܬܳܐ ܕܰܫܡܰܝܳܐ ܢܶܣܒܽܘܢ. ܟܰܕ ܩܰܕܶܡ ܡܰܨܡܰܚ ܩܕܳܡܰܝܗܽܘܢ ܕܬܰܟܬܽܘ̈ܫܶܐ.
21: ܫܳܒܶܩ ܐ̱ܢܳܐ ܠܡܺܐܡܰܪ. ܕܰܠܗܳܝ ܕܰܠܩܽܘܪܒܳܐ ܕܰܡܕܰܡܝܳܢܽܘܬܳܐ ܕܗܰܘ ܠܡܶܐܬܳܐ. ܘܠܳܐ ܐ̱ܢܳܫ ܡܶܢ ܣܳܗ̈ܕܶܐ ܐܶܬܡܨܺܝ ܚܰܝܠܳܐ. ܩܰܕܡܳܐܺܝܬ ܡܰܢ ܓܶܝܪ. ܒܗܳܝ ܕܗܽܘ ܩܰܕܡܳܝܳܐ ܩܰܒܶܠ ܥܠܰܘܗ̱ܝ ܕܢܶܚܰܫ ܚܠܳܦ ܡܫܺܝܚܳܐ. ܠܳܐ ܡܶܬܦܰܚܡܳܢܳܐ ܐܺܝܬܰܘܗ̱ܝ ܒܰܡܝܰܬܪܽܘܬܳܐ. ܕܬܰܪܬܶܝܢ ܕܶܝܢ. ܒܗܳܝ ܕܰܒܝܰܕ ܬܽܘܪܓܳܡܶܗ ܗܰܘ ܛܽܘܒܬܳܢܳܐ ܘܰܐܠܳܗܳܝܳܐ ܠܝܽܘܕܳܝ̈ܶܐ ܪܕܳܐ[21]. ܕܠܳܐ ܢܶܬܩܰܒܥܽܘܢ ܘܢܶܣܡܽܘܢ ܠܘܳܬ݂ ܟܬܳܒܳܐ. ܪܽܘܚܳܢܳܐܺܝܬ ܕܶܝܢ ܠܢܳܡܽܘܣܳܐ ܘܠܰܢܒܺܝ̈ܶܐ ܢܶܣܬܰܟܠܽܘܢ. ܘܰܢܚܰܘܶܐ ܢܰܗܺܝܪܳܐܺܝܬ ܕܠܰܘ ܠܐ̱ܢܳܫ ܒܰܪܢܳܫܳܐ ܡܶܢ ܣܰܓܺܝ̈ܶܐܐ ܐܰܝܟܰܢܳܐ ܕܡܰܣܒܪܺܝܢ ܗ̱ܘܰܘ ܨܠܰܒܘ. ܐܶܠܳܐ ܠܡܶܠܬܳܐ ܗܰܘ ܕܶܐܬܒܰܣܰܪ ܘܶܐܬܒܰܪܢܰܫ ܡܶܛܽܠܳܬܰܢ. ܐܰܠܳܗܳܐ ܕܢܳܡܽܘܣܳܐ ܘܕܰܢܒܺܝ̈ܶܐ.
22: ܡܶܢ ܗܳܪܟܳܐ ܟܰܕ ܒܬܰܪܥܺܝܬܶܗ ܐܶܬܚܛܶܦ ܡܶܢ ܬܶܐܽܘܪܺܝܰܐ܆ ܘܒܰܫܡܰܝܳܐ ܩܒܰܥ ܠܥܰܝ̈ܢܶܐ ܕܺܝܠܶܗ܆ ܘܠܰܐܪܥܳܐ ܫܒܰܩ. ܘܳܐܦ ܟܰܕ ܥܕܰܟܺܝܠ ܥܰܠ ܐܰܪܥܳܐ ܩܳܐܶܡ ܗ̱ܘܳܐ. ܠܗܰܘ ܕܡܶܢܶܗ ܡܶܣܬܗܶܕ ܗ̱ܘܳܐ ܚܙܳܐ[22]. ܘܟܰܕ ܐܶܬܢܰܩܰܦ ܠܶܗ܆ ܘܟܽܠܶܗ ܠܘܳܬ݂ ܗܰܘ ܕܶܐܬܡܰܙܰܓ. ܟܦܰܪ ܒܗܳܝ ܕܒܰܪܢܳܫܳܐ ܢܶܗܘܶܐ ܐܺܝܬܰܘܗ̱ܝ. ܟܰܕ ܒܰܥ̈ܢܳܢܶܐ ܕܟܺܐܦ̈ܶܐ ܡܶܬܪܓܶܡ ܗ̱ܘܳܐ. ܘܰܒ̈ܢܳܬ ܩ̈ܳܠܶܐ ܕܠܰܐܠܳܗܳܐ ܦܰܐܝ̈ܳܢ ܐܳܡܰܪ ܗ̱ܘܳܐ. ܠܗܳܢܽܘܢ ܓܶܝܪ ܕܰܡܨܰܥܰܪ ܗ̱ܘܳܐ܆ ܘܩܰܫ̈ܝ݂ܰܝ̣ ܩܕܠܳܐ ܘܠܳܐ ܓܙܺܝܪ̈ܶܐ ܒܠܶܒܳܐ ܘܒܶܐܕܢ̈ܶܐ ܩܳܪܶܐ ܗ̱ܘܳܐ. ܚܠܳܦ ܗܳܠܶܝܢ ܡܨܰܠܶܐ ܗ̱ܘܳܐ ܟܰܕ ܐܳܡܰܪ: ܡܳܪܝܳܐ ܠܳܐ ܬܩܺܝܡ ܠܗܽܘܢ ܚܛܺܝܬܳܐ ܗܳܕܶܐ[23]. ܟܰܕ ܐܶܬܕܰܡܺܝ ܠܗܰܘ ܕܰܚܠܳܦ ܗܳܢܽܘܢ ܕܨܳܠܒܺܝܢ ܗ̱ܘܰܘ ܠܶܗ ܒܶܗ ܒܥܽܘܙܳܐ ܕܚܰܫܳܐ ܐܰܙܥܶܩ. ܐܰܒܳܐ ܫܒܽܘܩ ܠܗܽܘܢ[24]. ܡܳܢܳܐ ܓܶܝܪ ܥܬܺܝܕ ܗ̱ܘܳܐ ܗܰܘ ܕܰܠܝܶܫܽܘܥ ܚܳܙܶܐ ܗ̱ܘܳܐ. ܐܶܠܳܐ ܐܶܢ ܕܰܠܡ̈ܶܠܶܐ ܕܝܶܫܽܘܥ ܢܡܰܠܶܠ. ܘܰܐܝܟܰܢܳܐ ܕܨܰܝܳܪ̈ܶܐ ܕܕܶܡ̈ܘܳܬܳܐ ܒܓܰܘ̈ܢܶܐ ܨܳܝܪܺܝܢ܆ ܘܰܠܘܳܬ݂ ܨܰܠܡܳܐ ܡܶܕܶܡ ܩܰܕܡܳܝ ܛܽܘܦܣܳܐ ܚܳܝܪܺܝܢ܆ ܠܰܘ ܠܡܶܕܶܡ ܐ̱ܚܪܺܝܢ܆ ܐܶܠܳܐ ܠܝܽܘܩܢܳܐ ܗܰܘ ܕܡܶܢ ܬܰܡܳܢ ܒܕܰܦ̈ܶܐ ܗܳܠܶܝܢ ܕܡܶܢܗܽܘܢ ܡܶܬܬܨܺܝܪܺܝܢ ܝܳܨܦܺܝܢ ܠܰܡܕܰܡܳܝܽܘ. ܗܳܟܰܢܳܐ ܐܳܦ ܤܛܶܦܰܢܽܘܤ ܡܶܢ ܪܺܝܫ ܬܰܦܢܟܳܐ ܝܶܫܽܘܥ. ܠܨܰܠܡܳܐ ܒܰܝܬܳܝܳܐ ܨܳܪ ܝܰܬܺܝܪ ܡܥܰܠܝܳܐܺܝܬ ܐܰܝܟ ܕܡܶܫܟܚܳܐ ܗ̱ܘܳܬ݂.
23: ܡܶܛܽܠܗܳܕܶܐ ܟܰܕ ܦܳܪܰܥ ܠܶܗ ܡܶܛܽܠ ܡܕܰܡܝܳܢܽܘܬܳܐ ܗܳܕܶܐ ܚܰܬܺܝܬ̣ܬܳܐ ܘܰܕܝܰܬܺܝܪ ܩܰܪܺܝܒܳܐ. ܒܩܽܘܪܒܳܐ ܕܺܝܠܶܗ ܥܒܰܕ ܕܢܶܗܘܶܐ ܐܺܝܬܰܘܗ̱ܝ ܥܽܘܗܕܳܢܳܐ ܕܝܰܘܡܳܐ ܘܚܰܓܳܐ ܕܒܶܝܬ ܝܰܠܕܳܐ. ܗܰܘ ܕܳܐܦ ܠܰܢ ܕܡܶܛܽܠ ܚܛܳܗܰܝ̈ܢ ܣܰܓܺܝ̈ܶܐܐ ܒܪܽܘܚܩܳܐ ܐܺܝܬܰܝܢ܆ ܚܛܳܗ̈ܶܐ ܓܶܝܪ ܕܺܝܠܰܢ ܦܳܪܫܺܝܢ ܒܰܝܢܰܝܢ ܘܠܶܗ[25] ܐܰܝܟ ܕܶܐܡܰܪ ܢܒܺܝܳܐ. ܕܰܒܩܽܘܪܒܳܐ ܢܶܗܘܶܐ ܢܰܫܘܶܐ ܠܰܢ ܟܰܕ ܒܰܬܝܳܒܽܘܬܳܐ ܡܶܬܕܰܟܶܝܢܰܢ. ܡܶܛܽܠ ܕܟܽܠܗܶܝܢ ܡܨܶܐ[26]. ܠܳܐ ܡܶܬܡܰܨܝܳܢܳܐ ܕܶܝܢ ܠܶܗ ܘܠܳܐ ܡܶܕܶܡ. ܠܗܰܘ ܕܰܦܐܶܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ. ܐܰܡܺܝܢ܀
ܫܠܶܡ ܕܩܰܕܺܝܫܳܐ ܣܶܐܘܺܝܪܶܐ ܦܰܐܛܪܝܐܪܟܝܤ.
[1]ܡܺܐܡܪܳܐ ܕܫܰܒܥܳـ[ـܐ. ܥܰܠ ܒܶܝܬ] ܝܰܠܕܳܐ ܐܰܘܟܺܝܬ ܒܶܝܬ [ܕܶܢܚܳܐ ܕܩܰܕܺ«ܝܫܳܐ» ܡܳܪܝ ܣܶܐܘܺܪܶܐ ܦܰܛܪ«ܝܪܟܝܣ» [ܐܶܬܶܐܡܰܪ ܕܶܝܢ] ܒܕܽܘܟܪܳܢܶܗ ܕܩܰܕ«ܝܫܳܐ» ܤܛـ[ـܐܦܢܘܣ] ܘܡܶܛܽܠ ܠܗ ܗܳܕܶܐ ܐܦ ܥܠܰܘ[ܗܝ ܕܣܗܕܐ] ܗܽܘ ܫܽܘܠܳܡܳܐ ܕܺܝܠܶܗ [ܕܡܺܐܡܪܳܐ] ܡܛܰܟܰܣ.