ܡܺܐܡܪܳܐ ܕܶܫܬܺܝܢ ܘܬܶܫܥܳܐ
ܥܰܠ ܩܰܕܺܝܡܽܘܬ ܥܽܘܬܳܕܳܐ ܕܡܰܥܰܠܬܳܐ ܕܰܠܒܶܝܬ ܡܰܥܡܽܘܕܺܝܬܳܐ܆ ܕܡܶܢ ܒܳܬܰܪ ܥܺܐܕܳܐ ܩܰܕܺܝܫܳܐ ܕܰܩܝܳܡܬܳܐ ܐܰܝܟ ܥܝܳܕܳܐ. ܐܶܬܶܐܡܰܪ ܕܶܝܢ܆ ܒܪܰܡܫܳܐ ܗܰܘ ܕܡܰܥ̈ܠܰܝ ܨܰܘܡܳܐ ܟܰܕ ܐܶܬܬܚܶܕ ܗܽܘ ܒܰܝܬܳܐ ܩܰܕܺܝܫܳܐ ܕܒܶܝܬ ܡܰܥܡܽܘܕܺܝܬܳܐ.
69: ܬܽܘܒ ܒܗܳܠܶܝܢ ܝܰܘ̈ܡܳܬܳܐ ܣܰܓܺܝ̈ܰܐܝ ܐܺܝܩܳܪܳܐ ܕܨܰܘܡܳܐ܆ ܕܢܰܥܗܶܕܟܽܘܢ ܨܳܒܶܝܢ ܚ̱ܢܰܢ ܠܰܙܢܳܗ̇ ܕܡܰܥܰܠܬܳܐ ܗܳܕܶܐ ܟܳܗܢܳܝܬܳܐ ܕܰܠܗܳܪܟܳܐ. ܐܰܟܙܢܳܐ ܓܶܝܪ ܕܰܚܕܳܐ ܙܒܰܢ ܒܫܰܢ̱ܬܳܐ܆ ܟܰܕ ܠܰܟܪܽܘܟܝܶܗ ܕܝܰܘܡܳܐ ܗܰܘ ܡܥܰܩܒܺܝܢ ܚ̱ܢܰܢ ܐܰܝܟ ܕܡܰܨܝܳܐ܆ ܗܰܘ ܕܒܶܗ ܡܫܺܝܚܳܐ ܠܰܨܠܺܝܒܳܐ ܦܳܪܽܘܩܳܝܳܐ ܣܒܰܠ ܒܰܒܣܰܪ ܨܶܒܝܳܢܳܐܺܝܬ܆ ܘܟܰܕ ܐܶܬܩܒܰܪ ܩܳܡ܆ ܟܰܕ ܫܪܳܐ ܡܰܢ ܒܰܩܒܽܘܪܬܶܗ ܡܰܥܒܕܰܬ ܚܰܝ̈ܶܐ ܠܰܚܒܳܠܳܐ ܗܰܘ ܕܰܒܩܰܒܪ̈ܶܐ. ܥܩܰܪ ܕܶܝܢ ܒܡܰܚܰܬܬܶܗ ܗܳܝ ܕܠܰܐܬܪ̈ܰܘܳܬܳܐ ܬܰܚ̈ܬܳܝܶܐ ܕܰܐܪܥܳܐ܆ ܠܒܶܝܬ ܡܰܠܟܽܘܬܳܐ ܕܰܫܝܽܘܠ ܗܰܘ ܕܚܺܝܠܳܐ ܘܩܰܫܝܳܐ ܘܠܳܐ ܡܶܬܥܰܩܪܳܢܳܐ[1]. ܒܗܳܠܶܝܢ ܐܰܪܒܥܺܝܢ ܝܰܘ̈ܡܳܬܳܐ ܕܰܩܕܳܡ ܗܳܢܳܐ܆ ܩܳܕܡܺܝܢ ܚ̱ܢܰܢ ܡܶܬܕܰܟܶܝܢ ܚ̱ܢܰܢ܆ ܠܰܘ ܡܶܢ ܡܶܐܟ̈ܠܳܬܳܐ ܒܰܠܚܽܘܕ ܗܳܠܶܝܢ ܕܚܳܝܪ̈ܳܢ ܠܘܳܬ ܒܣܳܡܳܐ ܘܰܠܦܰܩܪܽܘܬܳܐ ܕܰܪ̈ܓܺܝܓܳܬܳܐ ܡܫܰܠ̈ܗܒܳܢ܆ ܐܶܠܳܐ ܘܟܰܕ ܡܶܢ ܟܽܠܳܗ̇ ܒܺܝܫܽܘܬܳܐ ܨܰܝܳܡ̈ܶܐ ܘܠܳܐ ܡܬܰܪ̈ܣܝܶܐ ܡܩܰܘܶܝܢ ܚ̱ܢܰܢ ܐܰܝܟܰܢܳܐ ܕܢܶܫܬܰܘܬܰܦ ܒܕܶܒܚܬܳܐ ܕܟܺܝܬܳܐ ܘܰܕܠܳܐ ܕܡܳܐ ܕܥܶܪܒܳܐ ܗܰܘ ܡܶܬܕܰܒܚܳܢܳܐ܆ ܕܗܰܘ ܡܠܺܝܠܳܐ܆ ܕܗܰܘ ܐܶܡܪܳܐ ܘܰܐܠܳܗܳܐ܆ ܘܰܢܥܰܕܥܶܕ ܠܰܘ ܒܰܚܡܺܝܪܳܐ ܥܰܬܺܝܩܳܐ ܐܳܦܠܳܐ ܒܰܚܡܺܝܪܳܐ ܕܒܺܝܫܽܘܬܳܐ ܘܰܕܡܰܪܺܝܪܽܘܬܳܐ܆ ܐܶܠܳܐ ܒܦܰܛܺܝܪ̈ܶܐ ܕܕܰܟܝܽܘܬܳܐ ܘܕܰܫܪܳܪܳܐ[2]܆ ܟܰܕ ܠܳܐ ܡܶܕܶܡ ܛܥܺܝܢܺܝܢ ܚ̱ܢܰܢ ܡܶܢ ܒܰܪܢܳܫܳܐ ܗܰܘ ܥܰܬܺܝܩܳܐ ܡܰܣܝܳܐ ܐܰܘ ܚܰܡܺܝܥܳܐ܆ ܠܗܳܝ ܕܶܝܢ ܕܶܐܢ ܐ̱ܢܳܫ ܒܰܡܫܺܝܚܰܐ ܗ̄ܘ ܒܪܺܝܬܰܐ ܗ̄ܘ ܚܕܰܬܳܐ܆ ܘܰܠܗܳܝ ܕܥܰܬܺܝ̈ܩܳܬܳܐ ܥܒܰܪ̈ܝ ܠܗܶܝܢ[3] ܘܰܗܘ̈ܰܝ ܟܽܠܗܶܝܢ ܚ̈ܰܕܬܳܬܳܐ ܒܗܽܘܢ ܒܰܥ̈ܒܳܕܶܐ ܡܫܰܘܕܥܺܝܢ ܚ̱ܢܰܢ܆ ܐܰܝܟܰܢܳܐ ܕܗܳܟܰܢܳܐ ܡܶܟܺܝܠ܆ ܟܰܕ ܒܟܽܠܚܰܕ ܚܰܕܒܫܰܒܳܐ ܡܫܰܡܠܶܝܢ ܚ̱ܢܰܢ ܥܽܘܗܕܳܢܳܐ ܕܺܝܠܳܗ̇ ܕܰܩܝܳܡܬܳܐ܆ ܘܰܡܝܰܩܪܺܝܢ ܚ̱ܢܰܢ ܠܶܗ ܠܝܰܘܡܳܐ ܗܰܘ ܒܥܶܠ ܫܡܶܗ[4] ܕܡܳܪܰܢ ܘܦܳܪܽܘܩܰܢ܆ ܙܰܒ̈ܢܳܬܳܐ ܣܰܓܺܝ̈ܳܐܬܳܐ܆ ܒܟܽܠܙܒܰܢ ܕܶܝܢ ܚܰܕܬܳܐܺܝܬ܆ ܒܳܗ̇ ܟܰܕ ܒܳܗ̇ ܒܕܶܒܚܬܳܐ ܢܶܬܒܰܣܰܡ܆ ܒܶܗ ܟܰܕ ܒܶܗ ܒܰܙܢܳܐ܆ ܒܗܽܘܢ ܟܰܕ ܒܗܽܘܢ ܒܝܰܘ̈ܡܳܬܳܐ ܕܰܡܚܰܡܣܢܳܢܽܘܬܳܐ ܘܕܽܘܟܳܝܳܐ܆ ܩܳܕܡܺܝܢܰܢ ܡܕܰܟܶܝܢ ܚ̱ܢܰܢ ܚܢܰܢ ܠܰܢ ܩܕܳܡ ܗܰܘ ܝܰܘܡܳܐ܆ ܗܰܘ ܕܒܶܗ ܡܫܺܝܚܳܐ ܟܰܕ ܒܠܽܘܟܳܝܬܳܐ ܕܶܐܤܛܪܰܛܝܽܘܛܳܐ ܐܶܬܕܩܰܪ ܒܕܰܦܢܶܗ܆ ܕܡܳܐ ܘܡܰܝ̈ܳܐ ܕܚܰܝ̈ܐ ܐܰܒܰܥ ܠܰܢ܆ ܘܠܰܡܥܺܝܢܳܐ ܕܫܽܘܒܩܳܢܳܐ ܫܰܡܰܪ[5] ܕܰܐܡܺܝܢܳܐܺܝܬ ܪܳܕܝܳܐ܆ ܘܗܳܕܶܐ ܐܶܡܰܬܝ܆ ܡܶܢ ܒܳܬܰܪ ܡܰܦܩܳܢܳܐ ܕܢܰܦܫܳܐ ܘܡܰܘܬܳܐ. ܡܰܢܽܘ ܚܙܳܐ ܚܰܝ̈ܶܐ ܘܫܽܘܒܩܳܢܳܐ ܕܡܶܢ ܡܰܘܬܳܐ ܪܳܕܶܝܢ. ܡܳܕܶܝܢ ܠܰܘ ܐܰܟܣܢܳܝܬܳܐ ܗ̱ܝ܆ ܐܶܢܗܽܘ ܕܗܳܢܽܘܢ ܕܰܒܡܰܘܬܶܗ ܕܰܡܫܺܝܚܳܐ ܥܳܡܕܺܝܢ܆ ܚܰܝ̈ܶܐ ܡܶܬܥܰܛܦܺܝܢ.
ܢ݀ܝܰܩܰܪ ܗܳܟܺܝܠ ܠܰܡܥܺܝܢܳܐ ܗܳܕܶܐ ܐܰܠܳܗܳܝܬܳܐ܆ ܗܳܝ ܕܡܶܢ ܫܡܰܝܳܐ ܪܳܕܝܳܐ܆ ܡܰܠܽܘܢ ܕܶܝܢ ܡܶܢ ܥܳܒܽܘܕܗܽܘܢ ܕܰܫܡܰܝܳܐ܆ ܘܰܠܢܶܨܒ̈ܳܬܳܐ ܗܳܠܶܝܢ ܕܡܶܢܳܗ̇ ܡܶܬܝܰܠ̈ܕܳܢ ܘܫ̈ܳܬܝܳܢ ܠܰܫܡܰܝܳܐ ܡܫܰܕܪܳܐ. ܢ݀ܝܰܩܰܪ ܕܶܝܢ܆ ܟܰܕ ܠܥܶܩܒܬܳܐ ܡܰܢ ܕܦܰܓܪܳܐ ܩܰܠܺܝܠ ܡܰܪܚܩܺܝܢܰܢ ܡܶܢܳܗ̇ ܡܶܛܽܠ ܕܽܘܟܳܝܳܐ ܐܰܝܟ ܕܩܰܕܺܝܡ ܐܰܡܺܝܪ: ܒܥܰܝ̈ܢܶܐ ܕܶܝܢ ܕܬܰܪܥܺܝܬܳܐ ܐܰܡܺܝܢܳܐܺܝܬ ܚܳܝܪܺܝܢ ܚ̱ܢܰܢ ܒܳܗ̇܆ ܐܰܝܟܰܢܳܐ ܕܰܠܝܰܘܡܳܐ ܕܰܩܝܳܡܬܳܐ ܒܪ̈ܶܓܠܶܐ ܕܰܟ̈ܝܳܬܳܐ ܡܶܟܺܝܠ ܐܰܟܚܕܳܐ ܥܰܡ ܡܫܺܝܚܳܐ ܢܶ݀ܥܽܘܠ܆ ܘܰܒܟܽܠ ܚܰܕ ܚܰܕܒܫܰܒܳܐ ܥܰܡܳܗ̇ ܕܬܰܪܥܺܝܬܳܐ ܫܘܺܝܬܳܐ܆ ܠܳܗ̇ ܟܰܕ ܠܳܗ̇ ܠܽܐܘܪܚܳܐ ܢܶܪܕܶܐ ܘܰܢܗܰܠܶܟ܆ ܕܪܺܝܫܬܳܐ ܘܠܳܐ ܕܪܺܝܫܬܳܐ ܘܰܕܡܶܬܚܰܕܬ̣ܳܐ. ܟܽܠܗܶܝܢ ܓܶܝܪ ܐܰܝܠܶܝܢ ܕܰܠܘܳܬ ܚܰܝ̈ܶܐ ܕܰܥܬܺܝܕܺܝܢ ܡܰܝܬ̈ܝܳܢ܆ ܕܠܳܐ ܣܳܐܒ̈ܳܢ ܐܺܝܬܰܝܗܶܝܢ ܘܰܕܠܳܐ ܡܥ̈ܰܬܩܳܢ. ܠܗܰܘ ܕܶܝܢ ܝܰܘܡܳܐ܆ ܗܰܘ ܕܒܶܗ ܐܶܬܦܰܬܚܰܬ ܕܰܦܢܳܐ ܗܳܝ ܚܰܝܬܳܐ ܘܰܛܥܺܝܢܰܬ ܢܽܘܗܪܳܐ܆ ܘܰܠܗܰܘ ܕܰܩܝܳܡܬܳܐ܆ ܚܰܕ ܙܳܕܶܩ ܕܢܶܚܫܽܘܒ ܐܶܢܽܘܢ ܐܳܦܶܢ ܡܫܰܚܠܦܺܝܢ. ܡܰܝ̈ܳܐ ܓܶܝܪ ܘܰܕܡܳܐ܆ ܫܽܘܘ̈ܕܳܥܶܐ ܐܺܝܬܰܝܗܽܘܢ ܗ̱ܘܰܘ ܕܰܩܝܳܡܬܳܐ. ܕܢܰܗܺܝܪܳܐܺܝܬ ܡܰܘܕܥܺܝܢ܆ ܕܗܰܘ ܕܚܰܫ ܘܰܥܬܺܝܕ ܗ̱ܘܳܐ ܕܢܶܬܩܒܰܪ܆ ܕܢܶܬܚܫܶܒ ܡܰܢ ܐܰܟܚܕܳܐ ܥܬܺܝܕ ܐܰܝܟܰܢܳܐ ܕܳܐܡܰܪ ܕܰܘܺܝܕ: ܥܰܡ ܗܳܢܽܘܢ ܒܰܠܚܽܘܕ ܕܢܳܚܬܺܝܢ ܠܰܫܝܽܘܠ[6]܆ ܐܶܠܳܐ ܠܰܘ ܥܰܡ ܗܳܢܽܘܢ ܕܰܡܩܰܘܶܝܢ܆ ܢܶܬܚܙܶܐ ܕܶܝܢ ܒܡܺܝ̈ܬܶܐ ܒܰܪܚܺܐܪ̈ܶܐ܆ ܘܰܐܝܟ ܐܰܠܳܗܳܐ ܚܰܝܳܐ ܢܩܽܘܡ.
ܢ݀ܩܰܕܶܡ ܗܳܟܺܝܠ ܢ݀ܥܰܬܶܕ ܚܢܰܢ ܠܰܢ܆ ܐܰܝܟܰܢܳܐ ܕܠܳܐ ܠܪܽܘܚܩܳܐ ܡܶܢ ܐܽܘܪܚܳܐ ܕܡܰܝ̈ܳܐ ܚܰܝ̈ܶܐ ܢ݀ܶܦܰܠ܆ ܐܳܦܠܳܐ ܕܟܽܠ ܟܽܠܶܗ ܢܶܬܚܙܶܐ ܕܠܳܐ ܫܳܘܶܝܢ ܚ̱ܢܰܢ܆ ܟܰܕ ܒܕܽܘܪ̈ܟܳܬܳܐ ܛܰܡ̈ܳܐܬܳܐ ܡܨܰܥܪܺܝܢܰܢ ܠܳܗ̇. ܕܰܐܝ̇ܕܳܐ ܕܶܝܢ ܐܺܝܬܶܝܗ̇ ܗܺܝ ܐܽܘܪܚܳܐ܆ ܗܳܝ ܕܰܠܘܳܬ ܡܥܺܝܢܳܐ ܗܳܕܶܐ ܡܰܝܬܝܳܐ. ܐܶܫܰܥܝܳܐ ܟܰܕ ܢܒܺܝܳܐܺܝܬ ܩܰܕܶܡ ܐܶܬܛܰܦܰܤ ܒܬܰܪܥܺܝܬܶܗ ܘܶܐܬܶܐܪܶܙ ܐܰܟܪܶܙ܆ ܟܰܕ ܗܳܟܰܢܳܐ ܐܳܡܰܪ: ܐܶܬܬܪܰܥܘ ܒܡܰܕܒܪܳܐ ܡܰܝ̈ܳܐ܆ ܘܰܪܓܶܠܬ̣ܳܐ ܒܰܐܪܥܳܐ ܨܗܺܝܬܳܐ. ܘܬܶܗܘܶܐ ܗܳܝ ܕܠܳܐ ܡܺܝ̈ܢ ܠܥܳܒ̈ܶܐ. ܘܒܰܐܪܥܳܐ ܗܳܝ ܨܗܺܝܬܳܐ܆ ܡܥܺܝܢܳܐ ܕܡܰܝ̈ܳܐ ܬܶܗܘܶܐ. ܬܰܡܳܢ ܢܶܗܘܶܐ ܒܽܘܣܳܡܳܐ ܕܦܳܪ̈ܚܳܬܳܐ. ܕܰܝܪ̈ܶܐ ܕܣܺܝܪ̈ܺܝܢܶܤ ܘܰܩܢܰܝ̈ܳܐ ܘܥܳܒ̈ܶܐ. ܘܬܶܗܘܶܐ ܬܰܡܳܢ ܐܽܘܪܚܳܐ ܕܟܺܝܬܳܐ܆ ܘܽܐܘܪܚܳܐ ܩܰܕܺܝܫܬܳܐ ܬܶܬܩܪܶܐ. ܠܳܐ ܢܶܥܒܰܪ ܬܰܡܳܢ ܛܰܡܳܐܐ܆ ܘܠܳܐ ܬܶܗܘܶܐ ܬܽܘܒ ܬܰܡܳܢ ܐܽܘܪܚܳܐ ܛܰܡܰܐܬܳܐ. ܗܳܢܽܘܢ ܕܶܝܢ ܕܰܡܒܰܕܪܺܝܢ ܢܶܪܕܽܘܢ ܒܳܗ̇ ܘܠܳܐ ܢܶܛܥܽܘܢ. ܘܠܳܐ ܢܶܗܘܶܐ ܬܰܡܳܢ ܐܰܪܝܳܐ. ܘܳܐܦܠܳܐ ܡܶܢ ܚܰܝ̈ܘܳܬ ܫܶܢܳܐ ܗܳܢܶܝܢ ܒܺܝ̈ܫܳܬܳܐ܆ ܠܳܐ ܢܶܣ̈ܩܳܢ ܥܠܶܝܗ̇܆ ܐܳܦܠܳܐ ܢܶܫ̈ܬܰܟܚܳܢ ܬܰܡܳܢ. ܐܶܠܳܐ ܢܗܰܠܟܽܘܢ ܒܳܗ̇ ܦܪ̈ܺܝܩܶܐ ܘܕܰܡܟܰܢܫܺܝܢ ܡܶܢ ܡܳܪܝܳܐ[7].
ܡܳܢ ܕܶܝܢ ܐܺܝܬܶܝܗ̇ ܐܰܪܥܳܐ ܗܳܝ ܕܩܰܕܡܳܐܺܝܬ ܡܳܢ ܐܺܝܬܶܝܗ̇ ܗ̱ܘܳܬ ܚܰܪܒܬܳܐ ܘܰܕܠܳܐ ܡܰܝ̈ܳܐ. ܠܚܰܪܬܳܐ ܕܶܝܢ ܒܰܡܥܺܝܢܳܐ ܕܡܰܝ̈ܳܐ ܚܰܝ̈ܶܐ ܐܶܬܕܰܗܢܰܬ܆ ܐܶܠܳܐ ܐܶܢ ܥܺܕܬܳܐ ܗܳܝ ܕܡܶܢ ܩܕܺܝܡ ܐܺܝܬܶܝܗ̇ ܗ̱ܘܳܬ ܕܠܳܐ ܕܳܪܶܟ ܗ̱ܘܳܐ ܒܳܗ̇ ܐܰܠܳܗܳܐ܆ ܘܰܕܚܰܪܒܳܐ ܗ̱ܘܳܬ ܡܶܢ ܝܺܕܰܥܬܶܗ ܕܗܰܘ܆ ܘܰܒܨܶܗܝܳܐ ܗܰܘ ܕܡܶܢ ܕܶܚܠܰܬ ܫ̈ܺܐܕܶܐ ܝܰܒܺܝܫܳܐ ܗ̱ܘܳܬ܆ ܘܳܐܦܠܳܐ ܒܫܶܩܝܳܐ ܗܰܘ ܢܳܡܽܘܣܳܝܳܐ ܘܳܐܦܠܳܐ ܒܗܰܘ ܢܒܺܝ̣ܳܝ̣ܳܐ ܫܳܬܝܳܐ ܗ̱ܘܳܬ. ܗܳܫܳܐ ܕܶܝܢ ܒܰܡܥܺܝܢܳܐ ܕܰܣܚܳܬܳܐ ܕܺܝܠܺܝܕܽܘܬܳܐ ܕܡܶܢ ܕܪܺܝܫ ܡܰܫ̣ܦܥܳܐ ܐܰܝܟ ܝܰܡܳܐ܆ ܘܰܒܓܰܘܳܗ̇ ܩܰܒܠܰܬ ܒܰܕܡܽܘܬ ܝܰܡܳܐ ܪܰܒܳܐ ܠܟܽܠܗܽܘܢ ܪ̈ܨܺܝܢܶܐ ܡܢ̈ܳܬܳܝܶܐ ܕܺܐܝܣܪܳܐܶܝܠ܆ ܠܩܰܕܺܝܡܽܘܬ ܡ̈ܶܠܶܐ ܐܳܡܰܪ ܐ̱ܢܳܐ ܗܳܠܶܝܢ ܕܡܽܘܫܶܐ ܘܗܳܠܶܝܢ ܕܰܢܒܺܝ̈ܶܐ ܕܡܶܛܽܠ ܡܫܺܝܚܳܐ.
ܠܗܳܠܶܝܢ ܕܳܐܦ ܠܡܶܠܬܳܐ ܗܳܝ ܕܕܰܘܺܝܕ ܒܙܰܒܢܳܗ̇ ܙܳܕܶܩ ܕܰܢܠܰܚܶܡ ܠܘܳܬܗܶܝܢ܆ ܕܗܳܟܰܢܳܐ ܐܺܝܬ ܠܳܗ̇. ܒ̈ܥܺܕܳܬܳܐ ܒܰܪܶܟܘ ܠܰܐܠܳܗܳܐ܆ ܡܳܪܝܳܐ ܡܶܢ ܡܥܺܝ̈ܢܶܐ ܕܺܐܝܣܪܳܐܶܝܠ[8]. ܗܳܝ ܕܒܳܗ̇܆ ܪܶܗܛܳܐ ܕܰܐܟܚܕܳܐ ܗܘ̣ܳܐ ܕܦܳܪ̈ܚܳܬܳܐ܆ ܗܳܢܶܝܢ ܕܦ̣ܰܪ̈ܶܝܢ ܘܰܦܪ̈ܰܚܶܝܢ ܡܶܢ ܣܽܘܥܪ̈ܳܢܶܐ ܐܰܪ̈ܥܳܢܳܝܶܐ ܠܰܫܡܰܝܳܐ ܒܝܰܕ ܕܽܘܒܳܪܳܐ ܐܶܘܰܢܓܶܠܳܝܳܐ܆ ܘܡܶܢ ܩܕܺܝܡ ܡܳܢ ܐܺܝܬܰܝܗܶܝܢ ܗ̱ܘܰܝ̈ ܕܠܳܐ ܩܳܠܳܐ. ܠܚܰܪܬܳܐ ܕܶܝܢ ܒܰܕܡܽܘܬ ܣܺܝܪ̈ܺܝܢܶܤ ܠܡ̈ܶܠܶܐ ܐܰܠܳܗܳܝ̈ܳܬܳܐ ܙܳܡܪ̈ܳܢ܆ ܐܰܝܟ ܐܰܝܠܶܝܢ ܕܶܐܬܚܙܺܝܘ ܡܰܠ̈ܦܳܢܶܐ ܗܳܢܽܘܢ ܒܚܺܝܪ̈ܶܐ ܕܗܳܕܶܐ. ܣܺܝܪ̈ܺܝܢܶܤ ܓܶܝܪ܆ ܓܶܢܣܳܐ ܡܶܕܶܡ ܕܦܳܪ̈ܚܳܬܳܐ ܐܺܝܬܰܘܗ̱ܝ܆ ܗܰܢܺܝ ܩܳܠܳܐ ܘܰܕܝܰܬܺܝܪ ܡܰܠܳܠ܆ ܕܰܒܡܰܕܒܪ̈ܶܐ ܐܰܝܟ ܡܶܠܬܳܐ ܪܳܚܶܡ ܕܰܢܕܰܝܰܪ. ܕܰܐܝܟ ܗܳܠܶܝܢ ܕܶܝܢ ܐܺܝܬܰܝܗܽܘܢ ܐܳܦ ܩܰܕܺܝ̈ܫܶܐ܆ ܕܰܒܚܽܘܪܒܳܐ ܘܒܰܓܠܺܝܙܽܘܬܳܐ ܕܣܽܘܥܪ̈ܳܢܶܐ ܗܳܠܶܝܢ ܕܰܒܥܳܠܡܳܐ ܡܶܬܗܰܦܟܺܝܢ ܘܗܽܘ̈ܠܳܢܳܝܶܐ ܡܶܬܗܰܢܶܝܢ. ܡܶܛܽܠܗܳܕܶܐ ܒܥܳܒ̈ܶܐ ܐܰܦܩܚܰܬ܆ ܟܰܕ ܡܶܬܟܰܠܠܴܳܐ ܒܕܺܝ̈ܠܳܝܳܬܳܐ ܕܦܰܪܕܰܝܣܳܐ܆ ܝܺܕܺܝܥܳܐ ܕܶܝܢ ܕܰܒܦܶܩ̈ܚܶܐ ܕܕܽܘܒܳܪ̈ܶܐ ܡܫܰܚ̈ܠܦܶܐ܆ ܕܡܰܝܬܶܝܢ ܦܺܐܪ̈ܶܐ ܐܰܘ ܒܰܡܳܐܐ ܟܰܝ̈ܠܺܝܢ ܐܰܘ ܒܶܫܬܺܝܢ ܐܰܘ ܒܰܬܠܳܬܺܝܢ. ܐܰܘܥܝܰܬ ܕܶܝܢ܆ ܐܳܦ ܩܢܰܝ̈ܳܐ ܕܡܶܫܟܚܺܝܢ ܕܢܶܬܢܰܦܚܽܘܢ ܘܢܶܙܡܪܽܘܢ ܬܶܫܒ̈ܚܳܬܳܐ ܘܓܶܠ̈ܝܳܢܶܐ ܐܰܠܳܗܳܝ̈ܶܐ ܕܪܽܘܚܳܐ܆ ܘܕܰܢܫܰܕܠܽܘܢ ܘܰܢܫܰܝܢܽܘܢ ܒܰܙܡܳܪܗܽܘܢ ܠܗܳܢܽܘܢ ܕܒܰܥܪܺܝܪܺܝܢ ܒܰܙܢܰܝ̈ܗܽܘܢ.
ܚܳܙܶܝܢ ܐܢ̱ܬܽܘܢ ܕܕܰܐܝܟ ܐܰܝܠܶܝܢ ܦܶܪ̈ܥܶܐ ܗܘ̣ܳܬ ܠܰܢ ܐܶܡܳܐ ܡܥܺܝܢܳܐ ܗܳܝ ܕܚܰܝ̈ܶܐ܆ ܕܠܰܐܪܥܳܐ ܗܳܝ ܚܰܪܒܬܳܐ ܐܰܫܩܝܰܬ܆ ܐܽܘܪܚܳܐ ܗܳܝ ܕܰܠܘܳܬ ܗܳܕܶܐ܆ ܩܰܕܺܝܫܬܳܐ ܘܰܕܟܺܝܬܳܐ ܘܰܕܠܰܐܪ̈ܝܰܘܳܬܳܐ ܘܰܠܗܳܢܽܘܢ ܕܺܐܝܬܰܝܗܽܘܢ ܐܰܝܟ ܚܰܝ̈ܘܳܬ ܫܶܢܳܐ ܘܠܳܐ ܕܟܰܝ̈ܳܐ܆ ܠܳܐ ܡܶܬܗܰܠܟܳܢܺܝܬܳܐ. ܕܰܐܝܟ ܗܳܠܶܝܢ ܓܶܝܪ ܐܺܝܬܰܝܗܽܘܢ܆ ܗܳܢܽܘܢ ܕܰܒܡܰܥܡܽܘܕܺܝܬܳܐ ܩܰܕܺܝܫܬܳܐ ܐܶܬܕܰܟܺܝܘ ܘܶܐܬܢܰܨܰܚܘ[9]܆ ܗܳܢܽܘܢ ܕܡܶܢ ܩܕܺܝܡ ܡܰܢ ܒܥܰܡ̱ܡ̈ܶܐ ܡܒܰܕܪܺܝܢ ܗ̱ܘܰܘ܆ ܟܰܕ ܒܢܳܡܽܘ̈ܣܶܐ ܘܒܰܥ̈ܝܳܕܶܐ ܡܫܰܚ̈ܠܦܶܐ ܡܶܬܪܰܒܶܝܢ ܗ̱ܘܰܘ. ܗܳܫܳܐ ܕܶܝܢ ܐܶܬܟܰܢܰܫܘ ܒܝܰܕ ܛܰܝܒܽܘܬܳܐ܆ ܘܰܒܚܰܕ ܦܰܓܪܳܐ ܕܰܡܫܺܝܚܳܐ ܐܺܝܬܰܝܗܽܘܢ.
ܐܳܦ ܚܢܰܢ ܗܳܟܺܝܠ ܠܟܽܠ ܗܰܘ ܡܳܐ ܕܺܐܝܬܰܘܗ̱ܝ ܚܰܫܳܐ ܡܶܕܶܡ ܚܰܝܰܘܬ ܫܶܢܳܝܳܐ܆ ܢܶ݀ܫܕܶܐ ܡܶܢ ܬܰܪܥܺܝܬܰܢ. ܠܰܪ̈ܓܺܝܓܳܬܳܐ ܒܥܺܝܪ̈ܳܝܳܬܳܐ ܘܰܫܪ̈ܺܝܚܳܬܳܐ ܕܚܰܫ̈ܶܐ ܕܰܬܚܶܝܬ ܟܰܪܣܳܐ. ܠܰܚܛܽܘܦܝܳܐ ܘܥܳܠܽܘܒܽܘܬܳܐ ܕܠܽܘܩܒܰܠ ܩܰܪ̈ܺܝܒܰܝܢ. ܠܚܶܡܬܳܐ. ܠܰܐܟܬܳܐ. ܠܡܰܪܺܝܪܽܘܬܳܐ. ܠܰܙܢܳܐ ܢܟܺܝܠܳܐ. ܠܰܡܨܰܚܝܳܢܽܘܬܳܐ ܐܰܘ ܕܒܶܐܕܢ̈ܶܐ ܥܳܐܠܳܐ܆ ܐܰܘ ܕܰܒܝܰܕ ܠܶܫܳܢܳܐ ܢܳܦܩܳܐ. ܕܰܕܟܺܝܬܳܐ ܓܶܝܪ ܘܩܰܕܺܝܫܬܳܐ ܐܺܝܬܶܝܗ̇ ܐܽܘܪܚܳܐ ܫܡܰܥܬܽܘܢ. ܘܶܐܢ ܐܰܝܟ ܕܫܳܘܶܐ ܘܰܡܛܰܝܒܳܐܺܝܬ ܬܗܰܠܟܽܘܢ ܒܳܗ̇. ܬܽܘܒ ܐܶܫܰܥܝܳܐ ܥܰܡ ܒ̈ܢܳܬ ܩ̈ܳܠܶܐ ܟܳܗ̈ܢܳܝܳܬܳܐ ܢܶܐܪܽܘܥܟܽܘܢ. ܘܰܢܩܰܠܶܣܟܽܘܢ ܡܰܢ ܥܰܠ ܛܽܘܝܳܒܟܽܘܢ܆ ܢܚܰܦܶܛܟܽܘܢ ܕܶܝܢ ܥܰܡ ܩܽܘܠܳܣܳܐ ܠܘܳܬ ܡܰܥܰܠܬܳܐ. ܘܢܺܐܡܰܪ: ܬܪܺܝܨܬܳܐ ܗ̱ܘܳܬ ܐܽܘܪܚܳܐ ܕܫܰܦܺܝܪ̈ܰܝ ܕܶܚܠܬܳܐ ܘܰܡܛܰܝܰܒܬܳܐ. ܦܬܰܚܘ ܬܰܪ̈ܥܶܐ܆ ܢܶܥܽܘܠ ܥܰܡܳܐ ܕܢܳܛܰܪ ܙܰܕܺܝܩܽܘܬܳܐ ܘܰܕܢܳܛܰܪ ܫܪܳܪܳܐ܆ ܘܕܰܐܚܺܝܕ ܫܪܳܪܳܐ ܘܰܕܢܳܛܰܪ ܫܰܝܢܳܐ. ܡܶܛܽܠ ܕܰܥܠܰܝܟ ܣܰܒܰܪܘ ܣܰܒܪܳܐ ܡܳܪܝܳܐ ܥܕܰܡܳܐ ܠܥܳܠܰܡ. ܢܶܬܶܠ ܠܟܽܘܢ ܕܶܝܢ ܗܽܘ ܡܳܪܝܳܐ ܕܟܰܕ ܗܳܟܰܢܳܐ ܡܥܰܬܕܺܝܢ ܐܢ̱ܬܽܘܢ ܘܰܡܛܰܝܒܺܝܢ܆ ܐܳܦ ܠܡܰܥܰܠܬܳܐ ܕܰܠܗܳܪܟܳܐ ܬܽܘܒ ܥܰܡ ܫܰܝܢܳܐ ܬܶܫܬܘܽܘܢ܆ ܐܳܦ ܠܗܳܝ ܕܰܠܡܰܠܟܽܘܬܳܐ ܕܰܫܡܰܝܳܐ܆ ܠܬܶܫܒܽܘܚܬܳܐ ܕܺܝܠܶܗ. ܡܶܛܽܠ ܕܠܶܗ ܦܰܐܝܳܐ ܬܶܫܒܽܘܚܬܳܐ܆ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܫܬܝܢ ܘܬܶܫܥܐ.
[2]ܐ. ܩܘܪ̈ܝܢܬܝܐ. 5: 8
[3]ܒ. ܩܘܪ̈ܝܢܬܝܐ. 5: 17
[4]ܝܰܘ̈ܢܳܝܶܐ ܠܝܰܘܡܳܐ ܕܚܰܕܒܫܰܒܳܐ܆ ܡܳܪܳܢܳܝܳܐ ܡܟܰܢܶܝܢ ܠܶܗ.
[5]ܐܰܣܶܩ
[6]ܡܙܡܘܪ̈ܐ. 114: 17
[7]ܐܫܥܝܐ. 35: 6 ـ 10
[8]ܡܙܡܘܪ̈ܐ. 68: 26
[9]ܐܶܬܢܰܗܰܪܘ