ܡܺܐܡܪܳܐ ܕܶܫܬܺܝܢ ܘܰܬܡܳܢܝܳܐ
ܥܰܠ ܗܳܝ ܕܙܳܕܶܩ ܕܰܢܨܽܘܡ. ܐܶܬܶܐܡܰܪ ܕܶܝܢ ܒܪܺܝܫܶܗ ܕܨܰܘܡܳܐ ܩܰܕܺܝܫܳܐ ܕܰܐܪܒܥܺܝܢ.
68: ܐܶܡܰܬܝ ܐ̱ܢܳܫ ܠܘܳܬ ܗܳܝ ܕܘܳܠܝܳܐ ܢܶܬܚܰܫܰܚ ܒܡ̈ܶܠܶܐ܆ ܟܰܕ ܒܨܰܘܡܳܐ ܠܳܐ ܢܶܬܚܰܫܰܚ. ܐܰܝܟܰܢܳܐ ܕܶܝܢ ܢܺܐܠܰܦ ܕܨܰܘܡܳܐ ܒܽܘܣܳܡܳܐ ܪܽܘܚܳܢܳܝܳܐ ܐܺܝܬܰܘܗ̱ܝ܆ ܟܰܕ ܦܳܬܽܘܪܳܐ ܡܠܺܝܠܳܐ ܠܳܐ ܣܳܝܡܺܝܢܰܢ ܩܕܳܡܰܝܟܽܘܢ. ܐܰܝܟܰܢܳܐ ܕܶܝܢ ܠܰܘ ܐܰܝܟ ܗܳܢܽܘܢ ܕܰܠܘܳܬ ܟܰܪܣܗܽܘܢ ܦܢܶܝܢ܆ ܢܶܣܬܒܰܪ ܕܰܐܒܺܝܠܺܝܢ ܚ̱ܢܰܢ ܥܰܠ ܨܰܘܡܳܐ܆ ܐܶܢ ܠܰܘ ܒܡ̈ܶܠܶܐ ܢܚܰܘܶܝܗ̇ ܠܰܦܨܺܝܚܽܘܬܳܐ܆ ܟܰܕ ܒܗܳܠܶܝܢ ܡܬܰܪܣܶܝܢ ܚ̱ܢܰܢ ܠܟܽܘܢ ܘܡܶܬܬܰܪܣܶܝܢ ܚ̱ܢܰܢ܆ ܐܰܝܟ ܡܶܠܬܶܗ ܕܡܳܪܰܢ ܕܶܐܡܰܪ ܒܶܐܘܰܢܓ̈ܶܠܺܝܰܐ: ܕܡܶܐܟܽܘܠܬܳܐ ܕܺܝܠܝ ܐܺܝܬܶܝܗ̇ ܕܶܐ݀ܥܒܶܕ ܨܶܒܝܳܢܶܗ ܕܗܰܘ ܕܫܰܕܪܰܢܝ ܘܶܐ݀ܫܰܡܠܶܐ ܥܒܳܕܶܗ[1].
ܗܳܠܶܝܢ ܕܶܝܢ ܐܳܡܰܪ ܗ̱ܘܳܐ: ܟܰܕ ܡܶܠܬܳܐ ܐܰܪܺܝܟܬܳܐ ܕܡܰܠܦܳܢܽܘܬܳܐ ܡܬܰܚ ܗ̱ܘܳܐ ܠܘܳܬ ܗܳܝ ܫܳܡܪܳܝܬܳܐ܆ ܘܰܠܘܳܬ ܗܳܝ ܕܢܶܐܟܽܘܠ ܠܰܚܡܳܐ ܡܚܰܦܛܺܝܢ ܗ̱ܘܰܘ ܠܶܗ ܬܰܠܡܺܝܕܰܘ̈ܗ̱ܝ. ܡܶܠܬܳܐ ܓܶܝܪ܆ ܬܽܘܪܣܳܝܳܐ ܫܰܪܺܝܪܳܐ ܕܢܰܦܫܳܐ ܐܺܝܬܶܝܗ̇. ܡܶܛܽܠܗܳܕܶܐ ܟܰܕ ܩܰܠܺܝܠ ܡܚܰܠܶܦ ܐ̱ܢܳܐ ܠܳܗ̇ ܠܡܶܠܬܶܗ ܕܡܰܙܡܽܘܪܳܐ܆ ܐܳܡܰܪ ܐ̱ܢܳܐ ܟܰܕ ܕܳܐܶܨ ܐ̱ܢܳܐ ܐܰܟܚܕܳܐ ܘܚܳܕܶܐ ܐ̱ܢܳܐ܆ ܠܰܘ ܕܢܶܪ̈ܘܙܳܢ ܣܶܦ̈ܘܳܬܝ ܐܶܡܰܬܝ ܕܶܐ݀ܙܡܰܪ ܠܳܟ܆ ܐܶܠܳܐ ܕܢܶܪ̈ܘܙܳܢ ܣܶܦ̈ܘܳܬܝ ܐܶܡܰܬܝ ܕܶܐ݀ܨܽܘܡ ܠܳܟ[2] ܐܳܦ ܓܶܝܪ ܡܶܢ ܗܳܝ ܕܰܢܨܽܘܡ܆ ܐܳܦ ܗܳܝ ܕܢܶܙܡܰܪ܆ ܐܳܦ ܗܳܝ ܕܢܰܠܶܦ ܣܰܟܽܘܠܬܳܢܳܐܺܝܬ ܗܳܘܝܳܐ. ܘܠܶܗ ܟܰܕ ܠܶܗ ܠܨܰܘܡܳܐ ܬܶܫܟܰܚ܆ ܐܳܦ ܕܰܠܦܽܘܡܶܗ ܕܗܰܘ ܕܡܰܠܶܦ܆ ܘܰܠܡܰܫܡܰܥܬܳܐ ܕܫܳܡܽܘ̈ܥܶܐ ܡܕܰܟܶܐ܆ ܘܰܠܬܰܪ̈ܥܝܳܬܳܐ ܡܰܩܶܦ܆ ܠܘܳܬ ܗܳܝ ܕܗܳܠܶܝܢ ܕܰܠܥܶܠ ܢܶܬܪ̈ܰܥܝܳܢ܆ ܘܰܠܘܳܬ ܗܳܝ ܕܟܽܠ ܡܳܐ ܕܺܐܝܬܰܘܗ̱ܝ ܒܶܣܪܳܢܳܐ ܘܰܐܪܥܳܢܳܝܳܐ ܢܶܫ̈ܕܝܳܢ ܡܶܢܗܶܝܢ.
ܒܪܰܡ ܐܺܝܬ ܐ̱ܢܳܫܺܝ̈ܢ ܕܗܳܟܰܢܳܐ ܒܶܣܪܳܢܺܝܢ ܒܗܰܘܢܗܽܘܢ܆ ܘܰܕܗܽܘ ܒܶܣܪܳܐ ܐܺܝܬܰܝܗܽܘܢ܆ ܘܕܰܠܬܰܘܬܳܪ̈ܶܐ ܕܠܶܒܗܽܘܢ ܡܓܰܣܶܝܢ[3] ܐܰܝܟܰܢܳܐ ܕܳܐܡܰܪ ܟܬܳܒܳܐ ܟܳܗܢܳܝܳܐ܆ ܘܳܐܡܪܺܝܢ ܒܪܶܚܡܰܬ ܟܰܪܣܳܐ ܐܰܟܚܕܳܐ ܘܠܳܐ ܝܰܠܺܝܦܳܐܺܝܬ܆ ܕܡܳܢܳܐ ܡܰܘܬܰܪ ܐ̱ܢܳܐ ܠܶܗ ܠܰܐܠܳܗܳܐ ܐܶܢ ܨܳܐܶܡ ܐ̱ܢܳܐ. ܠܡܳܢܳܐ ܕܶܝܢ ܘܟܰܕ ܠܳܐ ܐܺܝܬܰܝ ܗ̱ܘܺܝܬ ܐܰܝܬܝܰܢܝ ܠܗܳܝ ܕܶܐ݀ܗܘܶܐ ܐܺܝܬܰܝ܆ ܘܬܽܘܪ̈ܣܳܝܶܐ ܕܟܽܠܓܢܶܤ ܬܰܩܶܢ܆ ܐܶܢ ܥܬܺܝܕ ܗ̱ܘܺܝܬ ܕܨܰܝܳܡܳܐ ܐܶ݀ܗܘܶܐ. ܐܰܪܰܐ[4] ܕܶܝܢ ܠܥܳܒܽܘܕܳܐ ܗܰܘ ܕܗܳܟܰܢܳܐ ܐܺܝܬܰܘܗ̱ܝ ܛܳܒܳܐ܆ ܗܳܕܶܐ ܡܚܰܕܝܳܐ ܠܶܗ܆ ܗܳܝ ܕܰܐ݀ܩܪܶܒ ܥܰܡ ܚܰܝ̈ܶܐ ܕܺܝܠܝ܆ ܘܰܠܦܰܓܪܳܐ ܕܺܝܠܝ ܐܶ݀ܫܺܝܚ ܘܶܐ݀ܛܰܠܩܺܝܘܗ̱ܝ ܒܨܰܘܡܳܐ ܘܰܒܟܰܦܢܳܐ܆ ܘܰܩܛܺܝܪܳܐܺܝܬ ܐܶ݀ܣܬܰܕܰܩ ܡܶܢ ܐܶܣܳܪܳܐ ܕܢܰܦܫܝ.
ܐܶܢܳܐ ܕܶܝܢ ܡܶܬܕܰܡܰܪ ܐ̱ܢܳܐ ܥܰܠ ܗܳܢܽܘܢ ܕܗܳܠܶܝܢ ܐܳܡܪܺܝܢ. ܘܗܳܢܳܐ ܟܽܠܶܗ ܪܰܚܺܝܩ ܐ̱ܢܳܐ ܡܶܢ ܗܳܝ ܕܶܐ݀ܫܰܠܶܡ ܠܗܳܠܶܝܢ ܡܶܠܽܘܣ̈ܝܳܬܳܐ ܬܥܺܝ̈ܫܳܬܳܐ ܘܓܽܘܚ̈ܟܳܢܳܝܳܬܳܐ܆ ܕܳܐܦ ܠܘܳܬ ܪܰܘܡܳܐ ܡܶܬܬܪܺܝܡ ܐ̱ܢܳܐ. ܘܰܐܝܟ ܕܰܠܐ̱ܢܳܫ ܡܰܠܟܳܐ ܕܡܶܢ ܫܡܰܝܳܐ ܐܶܬܳܐ܆ ܥܰܡ ܟܽܠܳܗ̇ ܣܶܓܕܬܳܐ ܘܺܐܝܩܳܪܳܐ ܡܥܰܦܶܩ ܐ̱ܢܳܐ ܠܶܗ ܠܨܰܘܡܳܐ ܘܰܡܫܰܠܶܡ[5] ܐ̱ܢܳܐ ܠܶܗ܆ ܘܰܠܘܳܬ ܥܽܘܗܕܳܢܳܐ ܥܰܬܺܝܩܳܐ ܡܶܬܥܰܠܶܐ ܐ̱ܢܳܐ. ܘܒܺܐܝܕܰܘ̈ܗ̱ܝ ܝܳܠܶܦ ܐ̱ܢܳܐ ܐܰܝܟ ܕܡܰܨܝܳܐ܆ ܕܰܐܝ̇ܕܳܐ ܗ̱ܝ ܡܶܠܬܳܐ ܕܥܳܒܽܘܕܽܘܬܳܐ ܕܡܶܛܽܠܳܬܝ܆ ܘܕܰܐܝܟ ܐܰܝ̇ܕܳܐ ܡܶܕܶܡ ܐܺܝܬܶܝܗ̇ ܗ̱ܘܳܬ ܒܺܐܝܩܳܪܳܐ ܢܰܦܫܶܗ ܕܒܰܪܢܳܫܳܐ. ܩܰܠܺܝܠ ܕܶܝܢ ܡܶܢ ܠܥܶܠ ܙܳܕܶܩ ܠܰܡܫܰܪܳܝܽܘ.
ܐܰܠܳܗܳܐ ܗܰܘ ܛܽܘܒܬܳܢܳܐ ܘܰܕܒܰܠܚܽܘܕܰܘܗ̱ܝ ܚܰܝܠܬܳܢܳܐ[6] ܕܰܐܝܟ ܦܰܘܠܽܘܤ ܢܺܐܡܰܪ: ܗܰܘ ܕܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ ܡܶܬܚܙܶܐ܆ ܒܰܬܠܳܬܳܐ ܩܢܽܘ̈ܡܶܐ ܠܳܐ ܒ̈ܠܺܝܠܶܐ ܘܰܒܗܳܝ ܕܗܺܝ ܟܰܕ ܗܺܝ ܕܰܚܕܳܐ ܐܽܘܣܺܝܰܐ܆ ܟܰܕ ܒܰܠܚܽܘܕܰܘܗ̱ܝ ܐܺܝܬܰܘܗ̱ܝ ܕܠܳܐ ܪܺܝܫܳܐ[7] ܘܰܡܬܽܘܡܳܝܳܐ ܘܕܳܐܦܠܳܐ ܥܰܠ ܡܶܕܶܡ ܣܢܺܝܩ܆ ܐܰܝܟ ܐܰܝܢܳܐ ܕܺܐܝܬܰܘܗ̱ܝ ܡܫܰܡܠܰܝ ܒܟܽܠ ܒܰܟܝܳܢܳܐ܆ ܡܶܛܽܠ ܫܦܺܝܥܽܘܬܳܐ ܗܳܝ ܪܺܝܫܳܝܬܳܐ ܘܰܡܥܰܠܰܝܬܳܐ ܕܛܳܒܽܘܬܶܗ܆ ܠܥܳܠܡܳܐ ܗܰܘ ܕܰܠܥܶܠ ܘܡܶܬܗܰܘܢܳܢܳܐ ܒ̣ܪܳܐ܆ ܐܶܡܰܬܝ ܕܶܐܬܚܰܙܝܰܬ ܠܶܗ ܕܫܰܦܺܝܪ ܐܺܝܬ ܠܶܗ܆ ܐܳܡܰܪ ܐ̱ܢܳܐ ܕܶܝܢ ܠܡܰܠܰܐܟ̈ܶܐ ܘܰܠܪ̈ܽܘܚܶܐ ܗܳܠܶܝܢ ܡܫܰܡ̈ܫܳܢܝܳܬܳܐ ܘܠܳܐ ܗܽܘ̈ܠܳܢܳܝܳܬܳܐ܆ ܟܰܕ ܨܳܒܶܐ ܕܢܶܗܘܽܘܢ ܐܺܝܬܰܝܗܽܘܢ܆ ܗܳܢܽܘܢ ܕܡܶܫܬܰܘܬܦܺܝܢ ܒܬܶܫܒܽܘܚܬܳܐ ܟܺܝܬ ܘܰܒܢܰܨܺܝܚܽܘܬܳܐ ܗܳܝ ܕܰܐܝܟ ܗܰܘ ܕܫܳܦܥܳܐ ܘܢܳܒܥܳܐ ܡܶܢܶܗ ܡܶܛܽܠ ܥܽܘܬܪܳܐ ܫܦܺܝܥܳܐ܆ ܠܗܳܢܽܘܢ ܕܳܐܦ ܗܺܝ ܗܳܕܶܐ ܚܰܝ̈ܶܐ ܐܺܝܬܶܝܗ̇ ܠܗܽܘܢ܆ ܗܳܝ ܕܢܶܬܡܠܽܘܢ ܘܢܶܬܒܰܣܡܽܘܢ ܡܶܢ ܢܽܘܗܪܳܐ ܗܰܘ ܕܡܶܢ ܬܰܡܳܢ ܐܰܝܟ ܕܡܶܢ ܡܥܺܝܢܳܐ ܪܳܕܶܐ܆ ܘܰܢܫܰܒܚܽܘܢ ܠܰܡܥܰܕܪܳܢܳܐ ܕܠܳܐ ܫܰܠܘܳܐ ܘܰܕܠܳܐ ܣܰܒܥܽܘ܆ ܒܬܶܫܒ̈ܚܳܬܳܐ ܡܶܕܶܡ ܐܰܠܳܗܳܝ̈ܳܬܳܐ ܘܰܒ̈ܩܳܠܶܐ ܥܺܐܕܳܢܳܝ̈ܶܐ܆ ܐܰܝܟܰܢܳܐ ܕܰܢܒܺܝܳܐ ܗܰܘ ܕܰܡܙܰܡܰܪ ܐܳܡܰܪ: ܥܺܐܕܳܐ ܓܶܝܪ ܐܺܝܬܶܝܗ̇ ܐܰܝܟ ܕܒܰܫܪܳܪܳܐ ܘܫܳܪܽܘܬܳܐ ܐܰܡܺܝܢܬܳܐ܆ ܗܳܝ ܕܰܢܫܰܒܰܚ ܕܠܳܐ ܫܰܠܘܳܐ ܠܰܐܠܳܗܳܐ[8].
ܟܰܕ ܨܳܒܶܐ ܕܶܝܢ ܐܰܝܟܰܢܳܐ ܕܦܰܘܠܽܘܤ ܟܬܰܒ: ܕܒܺܐܝܕܳܐ ܒܺܐܝܕܳܐ ܠܣܰܓܺܝܐܘܽܬ ܡܦܰܬܟܽܘܬܳܐ ܕܚܶܟܡܬܳܐ ܕܺܝܠܶܗ ܢܚܰܘܶܐ[9]܆ ܘܝܰܬܺܝܪܳܐܺܝܬ ܢܚܰܕܶܐ ܘܢܶܓܠܶܐ ܠܚܰܝ̈ܠܰܘܳܬܳܐ ܥܶܠܳܝ̈ܶܐ܆ ܕܠܰܘ ܒܰܠܚܽܘܕ ܟܝܳܢ̈ܶܐ ܡܶܬܗܰܘ̈ܢܳܢܶܐ ܘܰܕܠܳܐ ܓܫܽܘܡ ܘܕܰܒܗܳܕܶܐ ܡܶܣܬܰܒܪܺܝܢ ܕܩܰܪܺܝܒܺܝܢ ܠܶܗ ܡܶܫܟܰܚ ܕܢܶܒܪܶܐ܆ ܐܶܠܳܐ ܘܕܰܡܫܰܡܠܝܳܐܺܝܬ ܐܰܟܣܢܳܝ̣ܺܝ̣ܢ ܘܪܰܚܺܝܩܺܝܢ ܘܡܰܒܥܕܺܝܢ ܡܶܢ ܩܰܪܺܝܒܽܘܬܳܐ ܕܰܠܘܳܬܶܗ܆ ܘܕܳܐܦܠܳܐ ܚܕܳܐ ܡܣܰܒܗܽܘܬܳܐ ܐܺܝܬ ܠܗܽܘܢ ܐܰܘܟܺܝܬ ܫܰܘܬܳܦܽܘܬܳܐ܆ ܡܶܢ ܐܰܝܠܶܝܢ ܕܠܳܐ ܐܺܝܬܰܝܗܶܝܢ܆ ܐܰܝܬܝܶܗ ܠܥܳܠܡܳܐ ܗܳܢܳܐ ܗܽܘܠܳܢܳܝܳܐ ܘܡܶܬܚܰܙܝܳܢܳܐ. ܟܰܕ ܠܰܫܡܰܝܳܐ ܡܰܢ ܒܟܰܘܟ̈ܒܶܐ ܥܰܒܕܶܗ ܡܦܰܬܟܳܐ. ܘܠܰܐܪܥܳܐ ܟܰܕ ܒܫܽܘܦܪ̈ܶܐ ܗܳܠܶܝܢ ܕܡܶܬܚܙܶܝܢ ܥܠܶܝܗ̇ ܨܰܒ̣ܬܳܗ̇܆ ܘܫܰܡܠܺܝ ܐܰܟܚܕܳܐ ܠܟܽܠܗܶܝܢ ܐܰܝܠܶܝܢ ܕܰܒܗܳܠܶܝܢ ܚܒܺܝ̈ܫܳܢ܆ ܘܶܐܣܰܪ ܠܝܰܡܳܐ ܒܥܽܘ̈ܒܶܝܗ̇ ܕܰܐܪܥܳܐ܆ ܘܟܰܢܶܫ ܠܡܰܝ̈ܳܐ ܠܰܟܢܽܘܫܝܳܐ ܚܕ ܐܰܝܟܰܢܳܐ ܕܰܟܬܺܝܒ[10]. ܘܰܒܝܰܡܳܐ ܬܽܘܒ ܐܰܚܕܪܳܗ̇ ܠܰܐܪܥܳܐ ܘܥܰܒܕܳܗ̇ ܕܢܶܗܘܽܘܢ ܫܳܪܥܺܝܢ ܥܠܶܝܗ̇ ܡܰܝ̈ܳܐ ܘܪܳܕܶܝܢ ܚܕܳܪ̈ܶܝܗ̇. ܗܽܘ ܓܶܝܪ ܐܳܡܰܪ ܥܰܠ ܝܰܡ̱̈ܡܶܐ ܫܰܬܐܣܳܗ̇܆ ܘܥܰܠ ܢܰܗܪ̈ܰܘܳܬܳܐ ܐܰܬܩܢܳܗ̇[11]. ܘܟܰܕ ܕܢܶܬܡܰܙܓܽܘܢ ܐܶܤܛܽܘܟ̈ܣܶܐ ܒܰܚ̈ܕܳܕܶܐ ܚܰܟܺܝܡܳܐܺܝܬ ܥܰܬܶܕ ܘܬܰܩܶܢ ܐܶܢܽܘܢ܆ ܐܰܪܥܳܐ ܘܢܽܘܪܳܐ ܘܡܰܝ̈ܳܐ ܘܳܐܐܰܪ܆ ܚܰܕ ܫܽܘܦܪܳܐ ܡܶܢ ܡܠܰܚܡܽܘܬܳܐ ܕܟܽܠܗܶܝܢ ܘܚܽܘܠܛܳܢܳܐ ܠܳܐ ܚܠܺܝܛܳܐ ܕܗܳܟܰܢܳܐ ܐܳܡܰܪ ܚܰܬܶܬ̣܆ ܐܰܝܟܰܢܳܐ ܕܳܐܦ ܫܽܘܒܚܳܐ ܕܺܝܠܳܢܳܝܳܐ ܕܥܰܠ ܟܽܠ ܚܕܳܐ ܡܶܢ ܒܶܪ̈ܝܳܬܳܐ܆ ܘܓܰܘܳܢܳܝܳܐ ܡܶܢ ܪܽܘܟܳܒܳܐ ܘܡܽܘܠܳܝܳܐ ܕܰܐܟܚܕܳܐ ܕܟܽܠ ܢܶܩܛܽܘܦ܆ ܟܰܕ ܡܰܠ̣ܝܳܐ ܐܺܝܬܰܘܗ̱ܝ ܗܽܘ ܘܥܰܠ ܗܳܝ ܕܢܶܫܬܰܒܰܚ ܠܳܐ ܣܢܺܝܩ܆ ܐܶܠܳܐ ܟܰܕ ܡܶܬܬܰܓܰܪ ܡܶܢ ܗܳܪܟܳܐ ܕܢܶܪܒܶܐ ܒܗܳܢܽܘܢ ܕܰܡܫܰܒܚܺܝܢ ܠܥܽܘܬܪܳܐ ܕܺܝܕܰܥܬܳܐ ܘܰܕܬܶܐܽܘܪܺܝܰܐ. ܕܰܠܡܰܠܰܐܟ̈ܶܐ ܓܶܝܪ ܬܰܘܣܶܦܬܳܐ ܕܫܽܘܒܚܳܐ ܘܰܕܩܽܘܠܳܣܳܐ ܕܡܶܛܽܠ ܐܰܠܳܗܳܐ܆ ܥܒܰܕ ܫܡܰܝܳܐ ܟܰܕ ܐܶܬܒܪܺܝ܆ ܐܰܪܥܳܐ ܟܺܝܬ ܘܗܺܝ ܒܪܺܝܬܳܐ ܕܫܰܪܟܳܐ ܕܢܳܦܠܳܐ ܬܚܶܝܬ ܪܓܫܬܐ ܡܶܬܚܰܙܝܳܢܺܝܬܳܐ܆ ܣܗܶܕ. ܗܽܘ ܟܰܕ ܡܶܢ ܡܢܳܬܳܐ ܚܰܘܺܝ ܠܟܽܠ ܘܶܐܡܰܪ ܠܘܳܬ ܐܺܝܘܒ܆ ܕܶܐܡܰܬܝ ܕܰܗܘ̣ܰܘ ܟܰܘܟ̈ܒܶܐ ܫܰܒܚܽܘܢܝ ܒܩܳܠܳܐ ܪܰܒܳܐ ܟܽܠܗܽܘܢ ܡܰܠܰܐܟ̈ܶܐ ܕܺܝܠܝ ܘܩܰܠܶܣܘ[12]܆ ܣܶܟܪܶܬ ܕܶܝܢ ܠܝܰܡܳܐ ܒܬܰܪ̈ܥܶܐ ܐܶܡܰܬܝ ܕܡܶܬܓܰܠܰܠ ܗ̱ܘܳܐ ܘܡܶܬܬܪܺܝܡ܆ ܘܡܶܢ ܟܰܪܣܳܐ ܕܶܐܡܳܐ ܕܺܝܠܶܗ ܢܳܦܶܩ ܗ̱ܘܳܐ.
ܘܟܰܕ ܗܳܠܶܝܢ ܗܳܟܰܢܳܐ ܪ̈ܰܚܺܝܩܳܢ ܗ̱ܘܰܝ̈ ܘܰܦܪ̈ܺܝܫܳܢ܆ ܒܪܺܝܬܳܐ ܗܳܝ ܡܶܬܗܰܘܢܳܢܺܝܬܳܐ ܐܳܡܰܪ ܐ̱ܢܳܐ ܘܗܳܝ ܡܶܬܪܰܓܫܳܢܺܝܬܳܐ܆ ܘܳܐܦ ܠܳܐ ܚܰܕ ܚܽܘܠܛܳܢܳܐ ܐܺܝܬ ܗ̱ܘܳܐ ܠܗܶܝܢ ܠܘܳܬ ܚ̈ܕܳܕܶܐ ܐܰܘ ܫܰܘܬܳܦܽܘܬܳܐ܆ ܒܳܪܶܐ ܘܰܐܟܣܢܳܐܺܝܬ ܡܰܝܬܶܐ܆ ܘܰܡܩܺܝܡ ܒܰܝܢܳܬ ܬܰܪ̈ܬܰܝܗܶܝܢ ܠܒܰܪܢܳܫܳܐ. ܟܰܕ ܡܶܢ ܛܺܝܢܳܐ ܡܰܢ ܓܒܰܠ ܦܰܓܪܳܐ[13]܆ ܐܰܝܟܰܢܳܐ ܕܗܽܘ ܬܽܘܒ ܠܘܳܬ ܐܺܝܘܒ ܗܳܟܰܢܳܐ ܐܳܡܰܪ: ܐܰܘ ܐܰܢ̱ܬ ܟܰܕ ܢܣܰܒܬ ܛܺܝܢܳܐ ܡܶܢ ܐܰܪܥܳܐ ܓܒܰܠܬ ܚܰܝܽܘܬܳܐ ܘܡܰܠܳܠܬܳܐ ܣܳܡܬܳܗ̇ ܥܰܠ ܐܰܪܥܳܐ܆ ܣܳܡ ܒܶܗ ܕܶܝܢ ܢܰܦܫܳܐ ܡܶܬܗܰܘܢܳܢܺܝܬܳܐ ܘܰܡܠܺܝܠܬܳܐ ܘܰܕܠܳܐ ܓܫܽܘܡ. ܐܰܝܟܰܢܳܐ ܕܰܒܒܶܣܪܳܐ ܡܰܢ܆ ܠܘܳܬ ܒܪܺܝܬܳܐ ܡܶܬܚܰܙܝܳܢܺܝܬܳܐ ܢܶܗܘܶܐ ܐܺܝܬ ܠܶܗ ܒܰܝܬܳܐܺܝܬ. ܒܢܰܦܫܳܐ ܕܶܝܢ܆ ܠܘܳܬ ܗܳܝ ܠܳܐ ܗܽܘܠܳܢܳܝܬܳܐ ܘܠܳܐ ܡܶܬܚܰܙܝܳܢܺܝܬܳܐ. ܘܟܰܕ ܠܗܳܝ ܡܰܢ ܚܳܙܶܐ ܒܥܰܝ̈ܢܶܐ ܦܰܓܪ̈ܳܢܳܝܳܬܳܐ܆ ܠܗܳܝ ܕܶܝܢ ܡܶܣܬܰܟܰܠ ܒܥܰܝ̈ܢܶܐ ܕܬܰܪܥܺܝܬܳܐ܆ ܢܶܬܒܰܩܶܐ ܒܚܶܟܡܬܶܗ ܕܥܳܒܽܘܕܳܐ ܗܳܝ ܕܰܒܟܽܠ ܚܕܳܐ ܡܶܢܗܶܝܢ ܣܺܝܡܳܐ܆ ܘܢܶܚܕܶܐ ܘܢܶܬܒܰܣܰܡ܆ ܟܰܕ ܡܕܰܝܰܪ ܐܰܝܟ ܡܰܠܰܐܟܳܐ ܐ̱ܚܪܺܢܳܐ ܥܰܠ ܐܰܪܥܳܐ܆ ܡܶܬܚܰܙܝܳܢܳܐ ܘܠܳܐ ܡܶܬܚܰܙܝܳܢܳܐ܆ ܘܰܕܝܰܬܺܝܪ ܡܶܢ ܡܰܠܰܐܟ̈ܶܐ ܡܚܰܘܶܐ ܗܽܘ ܒܶܗ ܠܠܳܐ ܡܶܬܒܰܨܝܳܢܽܘܬܳܐ ܕܣܰܟܽܘܠܬܳܢܽܘܬܶܗ ܕܗܰܘ ܚܰܟܺܝܡܳܐ ܒܰܠܚܽܘܕܰܘܗ̱ܝ ܐܰܠܳܗܳܐ܆ ܟܰܕ ܪܽܘܚܳܐ ܘܒܶܣܪܳܐ ܐܺܝܬܰܘܗ̱ܝ ܗܽܘ ܟܰܕ ܗܽܘ ܘܰܕܡܶܬܚܙܶܐ ܘܰܕܡܶܣܬܰܟܰܠ܆ ܘܰܕܠܳܐ ܡܶܕܶܡ ܡܶܬܢܰܬܰܦ ܒܗܰܘܢܶܗ ܡܶܢ ܥܽܘܪܙܳܠܳܐ ܕܰܠܘܳܬ ܦܰܓܪܳܐ܆ ܐܳܦܠܳܐ ܒܡܶܬܬܙܺܝܥܳܢ̈ܘܳܬܳܐ ܡܠܺܝ̈ܠܳܬܳܐ ܕܢܰܦܫܳܐ ܡܶܢ ܗܳܪܟܳܐ ܡܶܬܦܣܶܩ[14] ܐܰܘ ܡܶܬܢܰܬܰܥ ܠܬܰܚܬ. ܐܺܝܬܰܘܗ̱ܝ ܗ̱ܘܳܐ ܠܶܗ ܓܶܝܪ ܩܰܠܺܝܠܳܐ ܘܫܰܦܺܝܪ ܡܶܬܬܦܺܝܣܳܢܳܐ܆ ܘܰܕܝܰܬܺܝܪܳܐܺܝܬ ܠܘܳܬ ܗܳܠܶܝܢ ܕܰܠܥܶܠ ܡܶܬܬܰܝܬܶܐ܆ ܘܰܐܝܟ ܕܰܠܪܺܝܫܳܢܳܐ܆ ܠܨܶܒܝܳܢܳܐ ܫܰܠܺܝܛ ܒܝܳܬܳܐ ܕܗܰܘܢܳܐ ܢܳܩܶܦ ܘܡܶܬܕܒܰܪ. ܡܶܛܽܠܗܳܕܶܐ ܓܶܝܪ ܫܰܡܠܝܰܬ ܢܰܩܺܝܦܽܘܬܳܐ ܗܳܝ ܕܡܶܢ ܬܰܪ̈ܬܰܝܗܶܝܢ ܚܕܳܐ ܚܰܝܽܘܬܳܐ܆ ܠܰܘ ܐܰܝܟܰܢܳܐ ܕܗܳܝ ܕܰܒܨܺܝܪܳܐ܆ ܐܶܠܳܐ ܐܰܝܟܰܢܳܐ ܕܗܳܝ ܕܰܡܝܰܬܪܳܐ ܢܶܗܘܶܐ ܠܒܺܝܟܳܐ ܐܽܘܚܕܳܢܳܐ.
ܗܳܝ ܓܶܝܪ ܕܰܐܡܺܝܪܳܐ ܠܐ̱ܢܳܫ ܚܰܟܺܝܡܳܐ܆ ܕܦܰܓܪܐ ܡܶܬܚܰܒܠܳܢܳܐ ܡܰܘܩܰܪ ܠܢܰܦܫܳܐ[15]܆ ܘܰܡܢܰܬܰܥ ܡܰܫܟܢܳܐ ܐܰܪܥܳܢܳܝܳܐ ܠܗܰܘܢܳܐ ܣܰܓܺܝ ܡܰܪ̈ܢܝܳܬܳܐ܆ ܡܶܢ ܒܳܬܰܪ ܥܒܳܪ ܦܽܘܩܕܳܢܳܐ ܗܘ̣ܳܬ܆ ܗܰܘ ܕܡܶܛܽܠܳܬܶܗ ܡܰܦܽܘܠܬܳܐ ܕܡܶܢ ܦܰܪܕܰܝܣܳܐ ܐܶܬܚܰܝܰܒ܆ ܘܝܰܨܺܝ̈ܦܘܳܬܳܐ ܘܰܬܥܳܫܳܐ ܘܥܰܡ̈ܠܶܐ ܘܰܚܒܳܠܳܐ ܗܰܘ ܕܡܶܢ ܡܰܘܬܳܐ. ܫܳܡܰܥ ܗ̱ܘܳܐ ܓܶܝܪ܆ ܕܟܽܘܒ̈ܶܐ ܘܩܽܘܪ̈ܛܒܶܐ ܬܰܘܥܶܐ ܠܳܟ ܐܰܪܥܳܐ܆ ܘܰܒܕܽܘܥܬܳܐ ܕܰܐܦܰܝ̈ܟ ܬܶܐܟܽܘܠ ܠܰܚܡܳܟ. ܘܰܐܪܥܳܐ ܐܺܝܬܰܝܟ ܘܠܰܐܪܥܳܐ ܬܺܐܙܰܠ[16]. ܩܕܳܡ ܕܶܝܢ ܕܢܶܥܒܰܪ ܥܰܠ ܦܽܘܩܕܳܢܳܐ ܕܰܐܠܳܗܳܐ ܗܰܘ ܕܒܳܩܶܐ ܗ̱ܘܳܐ ܠܫܰܠܺܝܛܽܘܬ ܒܝܳܬܶܗ܆ ܒܛܰܝܒܽܘܬܳܐ ܕܠܳܐ ܡܳܝܽܘܬܽܘܬܳܐ ܡܝܰܩܰܪ ܗ̱ܘܳܐ. ܗܰܘ ܓܶܝܪ ܕܶܐܡܰܪ: ܕܦܰܓܪܳܐ ܡܶܬܚܰܒܠܳܢܳܐ ܡܰܘܩܰܪ ܠܢܰܦܫܳܐ܆ ܐܶܡܰܪ ܡܶܢ ܩܕܳܡ ܩܰܠܺܝܠ܆ ܕܰܐܠܳܗܳܐ ܡܰܘܬܳܐ ܠܳܐ ܥܒܰܕ܆ ܘܳܐܦ ܠܳܐ ܚܳܕܶܐ ܥܰܠ ܐܰܒܕܳܢܳܐ ܕܗܳܢܽܘܢ ܕܚܰܝ̣ܺܝ̣ܢ. ܘܳܐܦܠܳܐ ܗܳܠܶܝܢ ܕܶܝܢ ܕܝܰܨܺܝ̈ܦܘܳܬܳܐ܆ ܥܰܡ ܚܛܺܝܬܳܐ ܘܪܰܫܺܝܥܽܘܬܳܐ ܐܶܬܺܝܰܗ̈ܶܒܶܝܢ. ܒܰܟܬܳܒܳܐ ܓܶܝܪ ܗܰܘ ܦܺܝܠܳܣܽܘܦܳܐ ܕܺܐܝܘܒ ܟܬܺܝܒ܆ ܕܟܽܠܗܽܘܢ ܚܰܝ̣ܰܝ̣̈ܗܽܘܢ ܕܪ̈ܰܫܺܝܥܶܐ ܒܡܰܪܢܺܝܬܳܐ ܐܺܝܬܰܝܗܽܘܢ[17].
ܡܶܛܽܠܗܳܕܶܐ ܗܳܟܺܝܠ ܗܳܢܽܘܢ ܕܰܒܛܺܝܠ ܠܗܽܘܢ ܥܰܠ ܦܽܘܪܩܳܢܳܐ ܕܺܝܠܗܽܘܢ ܡܶܛܽܠ ܟܺܝܬ ܕܙܳܕܶܩ ܡܶܢ ܟܽܠ ܦܪܽܘܤ ܕܢܺܐܨܰܦ܆ ܘܰܒܗܳܕܶܐ ܐܶܬܚܰܝܰܒܢܰܢ ܡܶܛܽܠ ܚܛܺܝܬܳܐ ܕܰܐܒܽܘܢ ܩܰܕܡܳܝܳܐ܆ ܡܰܥܒܪܺܝܢ ܠܗܽܘܢ ܠܥܰܡ̈ܠܶܐ ܠܘܳܬ ܩܰܢܳܝܽܘܬܳܐ ܕܰܡܝܰܬܪ̈ܳܬܳܐ܆ ܘܰܠܝܰܨܺܝ̈ܦܘܳܬܳܐ ܡܰܥܢܶܝܢ ܠܗܶܝܢ ܒܗܳܠܶܝܢ ܛܳܒ̈ܳܬܳܐ ܘܰܫܡܰܝܳܢ̈ܝܳܬܳܐ ܘܰܒܣܰܒܪܳܐ ܗܰܘ ܕܰܥܬܺܝܕ܆ ܐܰܝܟ ܗܳܝ ܕܰܐܡܺܝܪܳܐ ܒܡ̈ܰܬܠܶܐ܆ ܬܰܦܶܠ ܡܰܪܢܺܝܬܳܐ ܠܓܰܒܪܳܐ ܚܰܟܺܝܡܳܐ܆ ܣܰܟ̈ܠܶܐ ܕܶܝܢ ܢܶܬܚܰܫܒܽܘܢ ܒܺܝ̈ܫܳܬܳܐ[18].
ܡܰܢܽܘ ܕܶܝܢ ܐܺܝܬܰܘܗ̱ܝ ܚܰܟܺܝܡܳܐ܆ ܐܶܠܳܐ ܗܰܘ ܕܰܚܠܺܝܡ ܒܗܰܘܢܶܗ܆ ܘܗܳܠܶܝܢ ܕܺܐܝܬܰܝܗܶܝܢ ܒ̈ܢܳܬ ܓܶܢܣܳܐ ܠܗܰܘܢܳܐ ܘܰܐܠܳܗܳܝ̈ܳܬܳܐ ܡܶܬܚܰܫܰܒ܆ ܘܕܰܐܝܟܰܢܳܐ ܠܳܐ ܢܶܦܶܕ ܡܶܢ ܚܰܝ̈ܶܐ ܗܳܢܽܘܢ ܕܰܥܬܺܝܕܺܝܢ܆ ܗܳܢܽܘܢ ܕܰܦܐܶܝܢ ܠܢܰܦܫܳܐ ܡܠܺܝܠܬܳܐ. ܗܳܟܰܢܳܐ ܗܳܟܺܝܠ ܗܳܠܶܝܢ ܛܰܪ̈ܩܳܬܳܐ ܘܪ̈ܺܝܫܳܝܳܬܳܐ ܕܥܳܒܽܘܕܽܘܬܳܐ ܐܺܝܬ ܗ̱ܘܳܐ ܠܶܗ ܠܒܰܪܢܳܫܳܐ ܗܰܘ ܩܰܕܡܳܝܳܐ. ܟܰܕ ܠܦܰܓܪܳܐ ܠܰܘ ܐܰܝܟ ܝܽܘܩܪܳܐ ܘܣܽܘܛܡܳܐ ܕܰܐܒܳܪܳܐ ܢܰܣܒܶܗ ܠܰܡܣܳܡ ܒܪܺܝܫܳܐ܆ ܐܰܝܟܰܢܳܐ ܕܫܽܘ̈ܥܝܳܬܳܐ ܕܚܰܢ̈ܦܶܐ ܓܳܒ̈ܠܳܢ܆ ܐܶܠܳܐ ܟܰܕ ܡܚܰܘܶܐ ܠܥܳܒܽܘܕܳܐ ܚܰܟܺܝܡܳܐ ܒܰܐܟܣܢܳܝܽܘܬܳܐ ܕܰܟܝܳܢܶܗ܆ ܗܰܘ ܕܡܶܛܽܠܗܳܕܶܐ ܐܳܦ ܪܳܚܶܡ ܐ̱ܢܳܫܳܐ ܡܶܬܶܐܡܰܪ܆ ܠܳܐ ܗ̱ܘܳܐ ܐܰܝܟ ܡܰܢ ܕܰܠܗܳܠܶܝܢ ܒܶܪ̈ܝܳܬܳܐ ܐ̱ܚܪ̈ܳܢܝܳܬܳܐ ܣܳܢܶܐ܆ ܠܟܽܠܗܶܝܢ ܓܶܝܪ ܐܰܚܺܝܕ ܚܰܝܽܘܣܬܳܢܳܐܺܝܬ[19] ܐܰܝܟ ܐܰܒܳܐ܆ ܐܶܠܳܐ ܡܶܛܽܠ ܕܝܰܬܺܝܪܳܐܺܝܬ ܛܳܒ ܡܶܢ ܟܽܠܗܶܝܢ܆ ܒܰܪܢܳܫܳܐ ܡܰܟܪܶܙ ܠܳܗ̇ ܠܽܐܘܡܳܢܽܘܬܶܗ ܘܠܰܡܦܰܬܟܽܘܬܳܐ ܕܥܳܒܽܘܕܽܘܬܶܗ܆ ܕܥܰܦܪܳܐ ܘܗܰܘܢܳܐ ܠܳܐ ܒܠܺܝܠܳܐܺܝܬ ܒܰܫܘܺܝܚܽܘܬܳܐ ܕܰܐܟܚܕܳܐ ܡܶܬܚܙܶܐ. ܡܶܛܽܠ ܗܳܕܶܐ ܐܳܦ ܕܰܘܺܝܕ ܠܰܫܡܰܝ̈ܳܐ ܡܰܢ ܐܳܡܰܪ: ܕܟܰܕ ܡܶܬܚܙܶܝܢ ܐܰܝܟ ܕܰܠܡܺܐܡܰܪ܆ ܡܰܙܥܩܺܝܢ ܘܡܶܫܬܰܥܶܝܢ ܫܽܘܒܚܳܐ ܕܰܐܠܳܗܳܐ.[20] ܥܰܠ ܕܶܝܢ ܬܽܘܩܳܢܶܗ ܕܒܰܪܢܳܫܳܐ܆ 222ܕܙܳܟܶܐ ܡܶܢ ܬܶܐܽܘܪܺܝܰܐ ܡܰܘܕܶܐ. ܟܰܕ ܐܳܡܰܪ: ܐܰܢ̱ܬ ܓܒܰܠܬܳܢܝ ܘܣܳܡܬ ܥܠܰܝ ܐܺܝܕܳܟ[21]. ܐܶܬܬܰܡܗܰܬ ܝܺܕܰܥܬܳܟ ܡܶܢܝ. ܐܶܬܥܰܫܢܰܬ ܘܠܳܐ ܡܶܫܟܰܚ ܐ̱ܢܳܐ ܠܘܳܬܳܗ̇.
ܕܡܶܢ ܗܳܪܟܳܐ ܐܳܦ ܡܰܥܡܪܳܐ ܘܕܽܘܝܳܪܳܐ ܕܠܳܚܶܡ ܗ̱ܘܳܐ ܠܚܰܝ̈ܶܐ ܗܳܢܽܘܢ ܕܠܳܐ ܡܰܘܬܳܐ ܘܰܕܠܳܐ ܥܳܩܳܐ ܩܢܳܝܗ̱ܝ ܗ̱ܘܳܐ ܠܦܰܪܕܰܝܣܳܐ܆ ܕܥܰܒܺܝܛ ܗ̱ܘܳܐ ܒܢܶܨܒ̈ܳܬܳܐ ܕܡܰܝܬܶܝܢ ܦܺܐܪ̈ܶܐ ܕܰܡܟܳܢܺܝܢ ܠܰܡܬܰܪܣܳܝܽܘ ܠܗܳܢܽܘܢ ܕܚܰܝ̈ܶܐ ܕܰܐܝܟ ܗܳܠܶܝܢ ܚܳܐܶܝܢ܆ ܘܰܠܘܳܬ ܢܰܦܫܳܐ ܡܰܠܽܘܢ ܡܫܰܕܪܺܝܢ ܠܶܗ ܠܝܽܘܬܪܳܢܳܐ ܘܰܠܗܰܢܺܝܽܐܘܬܳܐ܆ ܐܰܝܟܰܢܳܐ ܕܳܐܡܪܳܐ ܐܳܦ ܡܶܠܬܳܐ ܟܳܗܢܳܝܬܳܐ܆ ܕܙܰܕܺܝܩܳܐ ܟܰܕ ܐܳܟܶܠ ܢܣܰܒܰܥ ܢܰܦܫܶܗ[22]. ܝܺܕܺܝܥܳܐ ܕܶܝܢ ܕܥܰܡ ܢܰܦܫܳܐ ܐܳܦ ܦܰܓܪܳܐ ܐܰܟܚܕܳܐ ܡܶܬܬܰܪܣܶܐ ܗ̱ܘܳܐ܆ ܘܡܰܪܓܶܫ ܗ̱ܘܳܐ ܥܰܡܳܗ̇ ܒܒܽܘܣܳܡܳܐ ܒܫܰܘܬܳܦܽܘܬܳܐ܆ ܘܒܶܐܣܳܪܳܐ ܕܰܐܟܚܕܳܐ ܕܰܟܝܳܢܳܐ. ܐܰܟܙܢܳܐ ܓܶܝܪ ܕܟܰܕ ܐܳܕܳܡ ܡܶܢ ܒܳܬܰܪ ܕܰܥܒܰܪ ܦܽܘܩܕܳܢܳܐ ܟܽܘܬܺܝ̈ܢܝܳܬܳܐ ܕܡܶܫܟܳܐ ܠܒܶܫ܆ ܗܳܢܰܘ ܕܶܝܢ ܡܺܝܬܽܘܬܳܐ ܗܳܝ ܕܡܶܢ ܚܽܘܝܳܒܳܐ ܕܡܰܘܬܳܐ܆ ܘܥܰܒܝܽܘܬܳܐ ܘܝܰܩܺܝܪܽܘܬܳܐ ܗܳܝ ܕܡܶܢ ܗܳܪܟܳܐ܆ ܡܶܫܟܳܐ ܓܶܝܪ ܫܽܘܘܕܳܥܰܐ ܗ̄ܘ ܕܡܺܝܬܽܘܬܳܐ܆ ܥܰܒ̈ܝܳܬܳܐ ܡܶܟܺܝܠ ܐܺܝܬܰܝܗܶܝܢ ܡܶܐܟ̈ܠܳܬܳܐ܆ ܘܕܰܠܦܰܓܪܳܐ ܡܰܢ ܡܬܰܪ̈ܣܝܳܢ ܘܰܠܢܰܦܫܳܐ ܕܶܝܢ ܡܰܗ̈ܢܝܳܢ܆ ܘܒܰܙܢܳܐ ܡܶܕܶܡ ܡܶܙܕܰܗܪ̈ܳܢ ܒܳܗ̇ ܡܶܛܽܠ ܫܘܺܝܚܽܘܬܐ ܕܰܐܟܚܕܳܐ܆ ܗܳܟܰܢܐ ܩܕܳܡ ܥܒܳܪ ܦܽܘܩܕܳܢܳܐ ܟܰܕ ܥܰܡ ܢܰܦܫܳܐ ܐܰܟܚܕܳܐ ܡܶܬܥܰܠܶܐ ܗ̱ܘܳܐ ܦܰܓܪܳܐ ܘܡܶܬܬܪܺܝܡ ܗ̱ܘܳܐ ܠܥܶܠ ܡܶܛܽܠ ܩܰܠܺܝܠܽܘܬܳܐ ܘܠܳܐ ܝܰܩܺܝܪܽܘܬܳܐ܆ ܐܳܦ ܡܶܬܬܰܪܣܶܐ ܗ̱ܘܳܐ ܐܰܟܚܕܳܐ ܒܬܰܪ̈ܣܝܳܬܳܐ ܕܠܳܚ̈ܡܳܢ ܗ̱ܘܰܝ̈. ܘܰܐܟܙܢܳܐ ܕܗܳܫܳܐ ܟܰܕ ܦܰܓܪܳܐ ܢܳܬܰܥ ܠܳܗ̇ ܠܢܰܦܫܳܐ ܠܬܰܚܬ܆ ܝܰܥܢܳܐܺܝܬ ܘܪܰܝܽܘܓܬܳܢܳܐܺܝܬ ܠܘܳܬ ܡܶܐܟ̈ܠܳܬܳܐ ܗܳܠܶܝܢ ܗܽܘ̈ܠܳܢܳܝܳܬܳܐ ܘܕܰܠܒܶܣܪܳܐ ܡܫܰܡ̈ܢܳܢ ܣܺܝܡܺܝܢܰܢ. ܗܳܟܰܢܳܐ ܗܳܝܕܶܝܢ ܟܰܕ ܢܰܦܫܳܐ ܐܰܝܟ ܟܝܳܢܳܐ ܕܺܝܠܳܗ̇ ܐܺܝܬ ܗ̱ܘܳܐ ܠܳܗ̇ ܪܶܟܢܳܐ ܘܡܶܨܛܰܠܝܳܢܽܘܬܳܐ ܗܳܝ ܕܰܠܘܳܬ ܗܳܠܶܝܢ ܕܰܡܝܰܬܪ̈ܳܢ܆ ܝܰܥܢܳܐܺܝܬ ܡܶܬܪܰܓܪܰܓ ܗ̱ܘܳܐ ܒܰܪܢܳܫܳܐ܆ ܠܗܳܠܶܝܢ ܡܶܐܟ̈ܠܳܬܳܐ ܕܦܰܪܕܰܝܣܳܐ܆ ܗܳܢܶܝܢ ܕܺܐܝܬܰܝܗܶܝܢ ܗ̱ܘܰܝ̈ ܝܰܬܺܝܪ ܠܳܐ ܗܽܘ̈ܠܳܢܳܝܳܬܳܐ. ܕܡܶܢ ܗܳܪܟܳܐ ܘܟܰܕ ܒܦܽܘܩܕܳܢܳܐ ܗܰܘ ܕܰܐܠܳܗܳܐ ܠܳܐ ܬܰܟܣܶܗ ܠܚܺܐܦܳܐ ܗܰܘ ܕܪܶܓܬܳܐ܆ ܐܶܬܳܐ ܠܘܳܬ ܦܺܐܪܳܐ ܕܩܰܝܣܳܐ ܗܰܘ ܕܰܟܠܶܐ ܗ̱ܘܳܐ܆ ܗܰܘ ܕܰܕܫܳܥܬܳܐ ܠܳܐ ܐܺܝܬܰܘܗ̱ܝ ܗ̱ܘܳܐ ܕܣܳܦܶܩ ܕܢܶܐܟܽܘܠ ܡܶܢܶܗ. ܘܕܰܕܬܰܪܥܺܝܬܳܐ ܐܺܝܬܶܝܗ̇ ܗ̱ܘܳܬ ܗܳܝ ܦܰܩܪܽܘܬܳܐ ܕܪܶܓܬܳܐ܆ ܘܠܰܘ ܕܒܶܣܪܳܐ܆ ܡܰܘܕܰܥ ܗܽܘ ܫܶܕܠܳܗ̇ ܕܡܰܛܥܝܳܢܽܘܬܳܐ. ܬܶܗܘܽܘܢ ܓܶܝܪ ܐܰܝܟ ܐܰܠܳܗ̈ܶܐ[23] ܐܳܡܰܪ ܗܰܘ ܕܰܐܛܥܺܝ ܐܶܢ ܬܶܐܟܠܽܘܢ. ܗܳܝ ܕܶܝܢ ܕܢܶܪܰܓ ܕܢܶܗܘܶܐ ܐܰܠܳܗܳܐ܆ ܐܳܦܶܢ ܕܣܰܟܠܽܘܬܳܐ ܐܺܝܬܶܝܗ̇܆ ܪܶܓܬܳܐ ܠܳܐ ܗܽܘܠܳܢܳܝܬܳܐ ܕܢܰܦܫܳܐ ܐܺܝܬܶܝܗ̇ ܘܠܰܘ ܕܦܰܓܪܳܐ.
ܐܶܢ ܕܶܝܢ ܢܺܐܡܰܪ ܐ̱ܢܳܫ܆ ܕܰܠܡܳܢܳܐ ܗܳܟܺܝܠ ܟܰܕ ܩܰܕܶܡ ܥܒܰܕ ܐܰܠܳܗܳܐ ܠܰܐܪܥܳܐ܆ ܥܳܒܶܕ ܗ̱ܘܳܐ ܠܳܗ̇ ܕܬܰܘܪܶܩ ܒܥܶܣܒܳܐ ܗܰܘ ܡܶܬܬܰܪܣܝܳܢܳܐ[24] ܕܚ̈ܶܛܶܐ ܘܰܕܗܳܠܶܝܢ ܙܰܪ̈ܥܽܘܢܶܐ ܕܫܰܪܟܳܐ܆ ܐܶܢ ܠܰܘ ܒܗܳܠܶܝܢ ܥܬܺܝܕ ܗ̱ܘܳܐ ܒܰܪܢܳܫܳܐ ܠܡܶܬܬܰܪܣܳܝܽܘ. ܡܦܰܢܶܐ ܐ̱ܢܳܐ ܠܶܗ܆ ܡܶܛܽܠ ܕܳܐܦ ܐܳܣܝܳܐ܆ ܩܕܳܡ ܟܽܘܪܗܳܢܳܐ ܡܰܬܩܶܢ ܠܗܽܘܢ ܠܣܰܡ̈ܡܳܢܶܐ. ܐܰܢ̱ܬ ܕܶܝܢ܆ ܐܰܝܟܰܢܳܐ ܠܳܐ ܢܳܦܶܠ ܐܰܢ̱ܬ ܡܶܢ ܗܳܝ ܕܦܰܐܝܳܐ܆ ܕܳܐܦܠܳܐ ܐܰܝܟ ܡܳܐ ܕܠܳܐܣܝܳܐ ܝܳܗܶܒ ܐܰܢ̱ܬ ܠܰܐܠܳܗܳܐ ܕܢܶܩܕܽܘܡ ܢܶܥܒܶܕ ܒܛܺܝܠܽܘܬܳܐ܆ ܠܗܰܘ ܕܰܠܟܽܠܗܶܝܢ ܗܳܠܶܝܢ ܕܰܥ̈ܬܺܝܕܳܢ ܓܰܠܝܳܐܺܝܬ ܝܳܕܰܥ. ܡܶܛܽܠܗܳܕܶܐ ܐܳܦ ܟܰܕ ܐܶܬܟܪܰܗܢܰܢ ܘܰܠܘܳܬ ܩܰܛܰܤܛܰܣܺܝܤ ܒܶܣܪܳܢܳܝܬܳܐ ܢܚܶܬܢܰܢ ܐܶܬܟܕܶܢܢ܆ ܬܽܘܪ̈ܣܳܝܶܐ ܕܠܳܚܡܺܝܢ ܩܰܕܶܡ ܛܰܝܶܒ ܠܰܢ. ܐܶܠܳܐ ܐܰܟܙܢܳܐ ܕܳܐܣܝܳܐ ܡܬܰܪܣܶܐ ܠܗܰܘ ܕܰܟܪܺܝܗ܆ ܘܟܰܕ ܠܥܶܠ̈ܠܳܬܳܐ ܗܳܠܶܝܢ ܡܰܥ̈ܒܕܳܬ ܟܽܘܪ̈ܗܳܢܶܐ ܦܳܣܶܩ܆ ܘܟܰܕ ܠܘܳܬ ܚܽܘܠܡܳܢܳܐ ܗܰܘ ܟܝܳܢܳܝܳܐ ܡܰܦܢܶܐ ܡܰܣܶܩ܆ ܗܳܟܰܢܳܐ ܐܳܦ ܐܰܠܳܗܳܐ ܡܬܰܪܣܶܐ ܡܰܢ ܦܰܓܪܳܢܳܐܺܝܬ ܐܰܝܟ ܕܠܰܐܝܠܶܝܢ ܕܰܟܪܺܝܗܺܝܢ܆ ܡܰܦܢܶܐ ܕܶܝܢ ܡܰܣܶܩ ܠܘܳܬ ܩܰܛܰܤܛܰܣܺܝܤ ܗܳܝ ܩܰܕܡܳܝܬܳܐ ܘܰܕܝܰܬܺܝܪ ܚܠܺܝܡܳܐ܆ ܗܳܝ ܕܕܽܘܝܳܪܳܐ ܗܰܘ ܕܰܒܦܰܪܕܰܝܣܳܐ܆ ܟܰܕ ܦܳܩܶܕ ܨܰܘܡܳܐ ܕܡܶܢ ܗܳܠܶܝܢ ܡܶܐܟ̈ܠܳܬܳܐ ܗܽܘ̈ܠܳܢܳܝܳܬܳܐ܆ ܘܡܰܥܗܶܕ ܠܳܗ̇ ܠܢܰܦܫܳܐ ܕܺܝܠܰܢ ܐܺܝܩܳܪܳܐ ܗܰܘ ܩܰܕܡܳܝܳܐ܆ ܒܝܰܕ ܢܳܡܽܘܣܳܐ ܘܰܢܒܺܝ̈ܶܐ܆ ܘܦܽܘ̈ܩܳܕܶܐ ܐܶܘܰܢܓ̈ܶܠܳܝܶܐ ܘܰܫ̈ܠܺܝܚܳܝܶܐ.
ܘܡܽܘܫܶܐ ܡܰܢ ܠܰܥܣܰܪܬܳܐ ܕܝܰܪܚܳܐ ܫܒܺܝܥܳܝܳܐ[25]܆ ܠܝܰܘܡܳܐ ܗܰܘ ܕܚܽܘܣܳܝܳܐ܆ ܩܰܪܝܳܐ ܩܰܕܺܝܫܳܐ ܘܨܰܘܡܳܐ ܬܰܚܶܡ ܕܢܶܗܘܶܐ ܐܺܝܬܰܘܗ̱ܝ. ܗܳܢܰܘ ܕܶܝܢ ܕܡܶܢ ܐܰܠܳܗܳܐ ܐܶܬܩܪܺܝ ܘܠܰܘ ܡܶܢ ܒܢܰܝ̈ܢܳܫܳܐ ܐܶܫܬܟܰܚ܆ ܐܰܟܙܢܳܐ ܕܳܐܦ ܦܰܘܠܽܘܤ ܩܰܪܝܳܐ ܘܰܫܠܺܝܚܳܐ ܗܽܘ ܠܶܗ ܫܰܡܰܗ܆ ܟܰܕ ܠܰܘ ܡܶܢ ܒ̈ܢܰܝ ܐ̱ܢܳܫܳܐ ܘܳܐܦܠܳܐ ܒܝܰܕ ܒܰܪܢܳܫܳܐ܆ ܐܶܠܳܐ ܒܝܰܕ ܝܶܫܽܘܥ ܦܳܪܽܘܩܳܐ ܐܰܠܳܗܳܐ ܐܶܬܩܪܺܝ ܡܶܢ ܫܡܰܝܳܐ܆ ܠܘܳܬܶܗ ܕܰܥܒܳܕܳܐ ܕܰܫܠܺܝܚܽܘܬܳܐ[26]܆ ܘܠܰܘ ܒܰܕܡܽܘܬ ܗܳܢܽܘܢ ܐ̱ܚܪ̈ܳܢܶܐ ܠܽܘܩܕܰܡ ܬܰܠܡܺܝܕܳܐ܆ ܘܗܳܟܰܢܳܐ ܐܶܫܬܰܡܰܗ ܫܠܺܝܚܳܐ. ܐܶܠܳܐ ܟܰܕ ܥܕܰܟܺܝܠ ܝܰܬܺܝܪ ܡܳܟܳܐܺܝܬ ܣܺܝܡܺܝܢ ܗ̱ܘܰܘ ܘܰܒܒܶܣܪܳܐ ܣܰܪܺܝܟܺܝܢ ܗ̱ܘܰܘ܆ ܐܳܡܰܪ ܗ̱ܘܳܐ ܠܗܽܘܢ ܣܳܐܶܡ ܢܳܡܽܘܣܳܐ܆ ܘܗܳܕܶܐ ܟܰܕ ܩܰܪܝܳܐ ܩܰܕܺܝܫܳܐ ܫܰܡܗܶܗ ܠܨܰܘܡܳܐ ܐܰܝܟ ܪܳܡܳܐ܆ ܐܳܦ ܬܡܰܟܟܽܘܢ ܢܰܦ̈ܫܳܬܟܽܘܢ[27].
ܐܶܫܰܥܝܳܐ ܕܶܝܢ ܟܰܕ ܡܶܢ ܗܳܕܶܐ ܡܰܟܺܝܟܽܘܬܳܐ ܡܰܣܶܩ ܠܗܽܘܢ܆ ܘܥܰܡ ܪܰܘܡܶܗ ܕܨܰܘܡܳܐ ܡܪܺܝܡ ܘܰܡܥܰܠܶܐ ܠܶܗ ܠܪܶܥܝܳܢܗܽܘܢ܆ ܘܰܠܘܳܬ ܦܨܺܝܚܽܘܬܳܐ ܕܪܽܘܚܳܐ ܡܚܰܦܶܛ ܠܗܽܘܢ܆ ܘܠܰܟܡܺܝܪܽܘܬܳܐ ܘܠܶܐܒܠܳܐ ܕܳܚܶܩ ܗ̱ܘܳܐ ܡܶܢܗܽܘܢ ܡܰܙܥܶܩ ܗ̱ܘܳܐ܆ ܠܰܘ ܗܳܢܳܐ ܨܰܘܡܳܐ ܓܒܺܝܬ̣ ܘܝܰܘܡܳܐ܆ ܕܰܢܡܰܟܶܟ ܒܰܪܢܳܫܳܐ ܢܰܦܫܶܗ[28].
ܡܶܛܽܠܗܳܕܶܐ ܐܳܦ ܡܳܪܰܢ ܟܰܕ ܠܰܗܕܺܝܪܽܘܬܶܗ ܘܰܦܨܺܝܚܽܘܬܶܗ ܕܨܰܘܡܳܐ ܓܳܠܶܐ ܗ̱ܘܳܐ܆ ܒܩܳܠܳܐ ܢܰܨܺܝܚܳܐ ܡܦܰܩܶܕ ܗ̱ܘܳܐ܆ ܕܰܐܢ̱ܬ ܕܶܝܢ ܟܰܕ ܨܳܐܶܡ ܐܰܢ̱ܬ ܡܫܽܘܚ ܪܺܝܫܳܟ܆ ܘܦܰܪܨܽܘܦܳܟ ܐܰܫܺܝܓ[29]. ܟܰܕ ܠܢܰܨܺܝܚܽܘܬܳܐ ܘܕܰܟܝܽܘܬܳܐ ܕܢܰܦܫܳܐ ܡܚܰܘܶܐ ܗ̱ܘܳܐ܆ ܒܝܰܕ ܗܰܕܳܡ̈ܶܐ ܕܦܰܓܪܳܐ ܗܳܠܶܝܢ ܕܝܰܬܺܝܪ ܪ̈ܺܝܫܳܢܺܝܢ. ܠܘܳܬ ܓܶܝܪ ܪܺܝܫܳܐ ܘܦܰܪܨܽܘܦܳܐ ܣܽܘܓܐܗܽܘܢ ܕܪ̈ܶܓܫܶܐ ܩܒܺܝܥܺܝܢ܆ ܫܶܡܥܳܐ܆ ܛܥܳܡܬܳܐ܆ ܚܙܳܬܳܐ܆ ܡܪܺܝܚܳܢܽܘܬܳܐ܆ ܗܳܠܶܝܢ ܕܒܺܐܝ̈ܕܰܝܗܽܘܢ ܐܰܝܟ ܕܒܰܡܢܺܝ̈ܚܳܢܶܐ ܡܰܥܒܶܕ ܗܰܘܢܳܐ܆ ܟܰܕ ܠܘܳܬ ܗܳܠܶܝܢ ܕܙܳܕܶܩ ܕܢܶܣܬܰܥܪ̈ܳܢ ܡܫܰܡܫܺܝܢ ܠܶܗ܆ ܘܰܐܘ ܒܺܝܫܽܘܬܳܐ ܦܳܠܚܺܝܢ ܥܰܡܶܗ ܐܰܟܚܕܳܐ ܐܰܘ ܡܝܰܬܪܽܘܬܳܐ. ܠܗܳܠܶܝܢ ܗܳܟܺܝܠ ܗܽܘ ܡܳܪܰܢ܆ ܠܰܡܫܳܓܽܘ ܡܰܢ ܘܠܰܡܕܰܟܳܝܽܘ ܦܳܩܶܕ܆ ܒܡܶܬܪܰܚܩܳܢܽܘܬܳܐ ܕܡܶܢ ܒܺܝ̈ܫܳܬܳܐ. ܠܡܶܡܫܰܚ ܕܶܝܢ ܘܠܰܡܗܰܕܳܪܽܘ ܘܰܠܡܰܦܨܳܚܽܘ܆ ܒܣܳܥܽܘܪܽܘܬܳܐ ܕܛܳܒ̈ܳܬܳܐ܆ ܗܳܠܶܝܢ ܕܡܰܢܗܪܳܐ ܥܠܰܝܗܶܝܢ ܛܰܝܒܽܘܬܳܐ ܕܪܽܘܚܳܐ. ܠܰܘ ܡܶܛܽܠ ܡܶܕܶܡ ܐ̱ܚܪܺܝܢ ܗܳܟܺܝܠ ܠܗܳܢܽܘܢ ܕܨܳܝܡܺܝܢ ܡܰܚܶܒ܆ ܐܶܠܳܐ ܡܶܛܽܠ ܕܰܠܥܳܒܽܘܕܽܘܬܶܗ ܒܝܰܕ ܗܳܕܶܐ ܡܫܰܒܚܺܝܢ܆ ܕܡܶܢ ܒܳܬܰܪ ܕܒܰܚܒܳܠܳܐ ܘܰܒܡܰܘܬܳܐ ܘܰܒܥܰܒܝܽܘܬܳܐ ܠܬܰܚܬ ܐܶܬܢܰܬܰܥ ܦܰܓܪܳܐ܆ ܐܰܝܟ ܗܰܘ ܕܰܒܦܰܪܕܰܝܣܳܐ ܡܕܰܝܪܺܝܢ܆ ܘܰܠܢܰܦܫܳܐ ܡܬܰܪܣܶܝܢ ܒܬܽܘܪ̈ܣܳܝܶܐ ܡ̈ܠܺܝܠܶܐ ܘܠܳܐ ܗܽܘ̈ܠܳܢܳܝܶܐ܆ ܘܰܐܝܟ ܕܥܰܠ ܡܰܣܰܐܬܳܐ ܘܪܶܟܢܳܐ ܕܟܰܦ̈ܶܐ[30] ܢܳܬܓܺܝܢ[31] ܠܥܶܠ܆ ܘܰܠܦܰܓܪܳܐ ܢܳܓܕܺܝܢ ܠܥܶܠ܆ ܒܥܳܠܽܘܒܽܘܬܳܐ ܕܗܳܝ ܕܰܡܝܰܬܪܳܐ.
[32]ܕܡܶܢ ܗܳܪܟܳܐ ܦܰܘܠܽܘܤ ܒܰܛܪܳܘܐܰܤ ܟܰܕ ܬܰܠ̈ܡܺܝܕܶܐ ܟܢܺܝܫܺܝܢ ܗ̱ܘܰܘ ܠܘܳܬܶܗ ܕܢܶܩܨܽܘܢ ܠܰܚܡܳܐ ܘܰܢܩܰܒܠܽܘܢ ܣܰܝܒܳܪܬܳܐ܆ ܟܰܕ ܫܰܪܺܝ ܕܰܢܡܰܠܶܠ ܠܗܽܘܢ܆ ܛܥܳܗ̇ ܠܡܶܐܟܽܘܠܬܳܐ ܡܶܬܪܰܓܫܳܢܺܝܬܳܐ. ܟܰܕ ܡܶܬܬܰܪܣܶܐ ܗ̱ܘܳܐ ܕܶܝܢ ܒܢܰܦܫܶܗ ܒܬܰܪ̈ܥܝܳܬܳܐ ܐܰܠܳܗܳܝ̈ܳܬܳܐ܆ ܥܕܰܡܳܐ ܠܦܶܠܓܶܗ ܕܠܶܠܝܳܐ ܡܰܬܚܳܗ̇ ܠܡܶܠܬܳܐ܆ ܘܒܰܪ ܫܳܥܬܶܗ ܐܺܝܬ ܗ̱ܘܳܐ ܠܡܶܚܙܳܐ ܠܦܺܐܪܳܗ̇ ܕܦܺܝܠܳܣܽܘܦܺܝܰܐ ܕܕܰܐܝܟ ܗܳܕܶܐ. ܢܦܰܠ ܗ̱ܘܳܐ ܓܶܝܪ ܥܠܰܝܡܳܐ ܐ̱ܢܳܫ ܕܥܰܠ ܟܰܘܬܳܐ ܝܳܬܶܒ ܗ̱ܘܳܐ ܕܰܫܡܶܗ ܐܶܘܛܽܘܟܽܘܤ܆ ܟܰܕ ܕܰܬܠܳܬܳܐ ܬܰܛܠܺܝ̈ܠܶܐ ܐܺܝܬܰܘܗ̱ܝ ܗ̱ܘܳܐ ܒܰܝܬܳܐ܆ ܘܡܺܝܬܳܐ ܣܺܝܡ ܗ̱ܘܳܐ. ܘܦܰܘܠܽܘܤ ܡܩܺܝܡ ܗ̱ܘܳܐ ܠܶܗ ܠܗܰܘ ܕܰܪܡܶܐ ܗ̱ܘܳܐ܆ ܟܰܕ ܥܰܠ ܦܰܓܪܶܗ ܒܰܠܚܽܘܕ ܢܦܰܠ ܗ̱ܘܳܐ. ܘܟܰܕ ܡܫܰܗܶܐ[33] ܠܳܗ̇ ܘܰܡܕܰܥܶܟ ܠܪܰܒܽܘܬܳܗ̇ ܕܬܶܕܡܽܘܪܬܳܐ ܒܬܰܪܥܺܝܬܳܐ ܡܰܟܺܝܟܬܳܐ܆ ܐܳܦ ܠܘܳܬ ܗܳܢܽܘܢ ܕܩܳܝܡܺܝܢ ܗ̱ܘܰܘ ܚܕܳܪ̈ܰܘܗ̱ܝ ܡܰܙܥܶܩ ܗ̱ܘܳܐ܆ ܕܠܳܐ ܬܶܬܪܰܗܒܽܘܢ ܢܰܦܫܶܗ ܓܶܝܪ ܒܶܗ ܐܺܝܬܶܝܗ̇܆ ܘܡܶܢ ܒܳܬܰܪ ܗܳܕܶܐ ܣܠܶܩ ܠܒܰܝܬܳܐ ܘܰܩܨܳܐ ܠܰܚܡܳܐ܆ ܡܶܢ ܡܰܡܠܠܳܐ ܕܗܳܠܶܝܢ ܕܰܡܝܰܬܪ̈ܳܢ ܠܳܐ ܫ̣ܠܳܐ[34]. ܐܶܠܳܐ ܐܶܫܟܚܶܗ ܕܶܢܚܶܗ ܕܝܰܘܡܳܐ ܟܰܕ ܡܡܰܠܶܠ܆ ܘܕܰܛܥܳܝܗ̱ܝ ܠܙܰܒܢܳܗ̇ ܕܫܶܢܬܳܐ܆ ܘܡܶܚܕܳܐ ܠܘܳܬ ܐܰܬܪܳܐ ܐ̱ܚܪܺܢܳܐ ܐܰܫܩܶܠ܆ ܘܰܒܣܳܡܳܐ ܚܳܫܶܒ ܗ̱ܘܳܐ ܠܥܰܡ̈ܠܶܐ ܗܳܢܽܘܢ ܕܰܚܠܳܦ ܐܶܘܰܢܓܶܠܺܝܽܘܢ. ܒܰܕܓܽܘܢ ܐܳܦ ܟܰܕ ܠܗܳܕܶܐ ܡܰܘܕܰܥ ܓܰܠܝܳܐܺܝܬ ܐܳܡܰܪ ܗ̱ܘܳܐ: ܚܽܘܒܶܗ ܓܶܝܪ ܕܰܐܠܳܗܳܐ ܠܒܺܝܟ ܠܰܢ[35]. ܩܽܘܝܳܡܳܐ ܓܶܝܪ ܘܚܰܝ̈ܶܐ ܕܗܳܢܽܘܢ ܕܡܰܚܒܺܝܢ ܠܰܐܠܳܗܳܐ܆ ܗܺܝ ܗܳܝ ܒܰܠܚܽܘܕ ܕܢܰܚܒܽܘܢ ܐܺܝܬܶܝܗ̇.
ܗܳܟܰܢܳܐ ܡܽܘܫܶܐ ܠܘܳܬ ܨܰܘܡܳܐ ܗܰܘ ܢܰܩܺܝܦܳܐ ܕܰܐܪܒܥܺܝܢ ܝܰܘ̈ܡܺܝܢ ܣܦܰܩ܆ ܟܰܕ ܠܢܳܡܽܘܣܳܐ ܥܰܠ ܛܽܘܪܳܐ ܡܶܬܶܐܪܶܙ ܗ̱ܘܳܐ܆ ܘܰܒܬܶܐܽܘܪܺܝܰܐ ܐܰܠܳܗܳܝܬܳܐ ܡܶܬܬܰܪܣܶܐ ܗ̱ܘܳܐ. ܗܳܟܰܢܐ ܐܳܦ ܐܶܠܺܝܳܐ ܠܗܽܘܢ ܟܰܕ ܠܗܽܘܢ ܠܝܰܘ̈ܡܳܬܳܐ ܐܰܪܒܥܺܝܢ ܕܠܳܐ ܡܶܐܟܽܘܠܬܳܐ ܫܰܡܠܺܝ. ܟܕ ܥܬܺܝܕ ܗ̱ܘܳܐ ܕܢܶܬܥܢܶܐ ܥܰܡ ܐܰܠܳܗܳܐ ܐܰܝܟ ܕܡܰܨܝܳܐ ܠܒܰܪܢܳܫܳܐ܆ ܒܰܡܥܰܪܬܳܐ ܗܳܝ ܕܰܒܚܽܘܪܺܝܒ. ܡܶܛܽܠܗܳܕܶܐ ܗܰܘ ܡܰܢ ܐܶܫܬܶܐܠ ܡܶܢ ܥܰܡܳܐ ܟܰܕ ܐܰܣܟܶܠ܆ ܘܡܶܢ ܪܽܘܓܙܳܐ ܕܰܐܠܳܗܳܐ ܦܰܠܛܶܗ܆ ܗܰܘ ܕܶܝܢ ܠܰܘ ܠܡܶܛܪܳܐ ܒܰܠܚܽܘܕ܆ ܐܶܠܳܐ ܐܳܦ ܠܗܶܝܢ ܠܛܽܘ̈ܦܶܐ ܕܛܰܠܳܐ ܟ̣ܠܳܐ܆ ܬܠܳܬ ܫܢܺܝ̈ܢ ܘܶܫܬܳܐ ܝܰܪ̈ܚܺܝܢ܆ ܟܰܕ ܒܟܰܘܪܳܢܳܐ ܡܫܰܢܶܩ ܗ̱ܘܳܐ ܠܶܗ ܠܺܐܝܣܪܳܐܶܝܠ ܕܡܰܪܫܰܥ ܗ̱ܘܳܐ. ܘܬܽܘܒ ܡܰܫܩܶܐ ܗ̱ܘܳܐ ܠܰܐܪܥܳܐ ܒܫܶܦܥܳܐ ܥܰܬܺܝܪܳܐ ܕܡܶܛܪ̈ܶܐ. ܟܰܕ ܠܬܰܪ̈ܬܰܝܗܶܝܢ܆ ܒܝܰܕ ܨܠܽܘܬܳܐ ܡܬܰܪܶܨ ܗ̱ܘܳܐ. ܗܳܝ ܟܺܝܬ ܕܺܐܝܬܶܝܗ̇ ܗ̱ܘܳܬ ܦܺܐܪܳܐ ܕܨܰܘܡܳܐ. ܩܳܪܶܝܢ ܗ̱ܘܰܘ ܓܶܝܪ ܠܡܳܪܝܳܐ܆ ܘܗܽܘ ܫܳܡܰܥ ܗ̱ܘܳܐ ܠܗܽܘܢ. ܚܳܙܶܐ ܗ̱ܘܳܐ ܠܗܽܘܢ ܓܶܝܪ ܕܰܡܥܰܠܶܝܢ ܘܡܰܣܩܺܝܢ ܠܳܗ̇ ܠܢܰܦܫܗܽܘܢ ܠܘܳܬ ܐܺܝܩܳܪܳܐ ܗܰܘ ܩܰܕܡܳܝܳܐ܆ ܘܒܺܐܝ̈ܕܶܝܗ̇ ܡܬܰܪܣܶܝܢ ܠܶܗ ܠܦܰܓܪܳܐ܆ ܘܰܐܝܟ ܕܰܠܥܰܒ̈ܕܶܐ ܫܰܪܺܝܪ̈ܶܐ ܦܳܪܰܥ ܗ̱ܘܳܐ ܠܗܽܘܢ.
ܐܳܦ ܫܠܺܝ̈ܚܶܐ ܕܶܝܢ ܐܳܦ ܗܳܠܶܝܢ ܕܰܠܗܳܢܽܘܢ ܐܶܬܢܰܩܰܦܘ܆ ܠܟܽܠܗܽܘܢ ܚܰܝ̣ܰܝ̣̈ܗܽܘܢ ܨܰܘܡܳܐ ܥܳܒܕܺܝܢ ܗ̱ܘܰܘ ܠܗܽܘܢ. ܘܟܽܠܗܶܝܢ ܣܳܥܪܺܝܢ ܗ̱ܘܰܘ܆ ܟܰܕ ܨܰܘܡܳܐ ܘܰܨܠܽܘܬܳܐ ܩܳܕܡܺܝܢ ܗ̱ܘܰܘ. ܘܣܳܗܶܕ ܟܬܳܒܳܐ ܕܰܦܪܰܟܣܺܝܤ ܟܰܕ ܗܳܟܰܢܳܐ ܐܳܡܰܪ: ܟܰܕ ܕܶܝܢ ܗܶܢܽܘܢ ܡܫܰܡܫܺܝܢ ܗ̱ܘܰܘ ܠܡܳܪܝܳܐ ܘܨܳܝܡܺܝܢ܆ ܐܶܡܰܪ ܪܽܘܚܳܐ ܩܰܕܺܝܫܳܐ. ܦܪܽܘܫܘ ܠܺܝ ܠܒܰܪܢܰܒܰܐ ܘܰܠܫܳܐܘܳܠ ܠܰܥܒܳܕܳܐ ܗܰܘ ܕܰܩܪܺܝܬ ܐܶܢܽܘܢ ܠܶܗ. ܗܳܝܕܶܝܢ ܟܰܕ ܨܳܡܘ ܘܨܰܠܺܝܘ ܘܣܳܡܘ ܥܠܰܝܗܽܘܢ ܐܺܝ̈ܕܰܝܳܐ ܫܰܕܰܪܘ ܐܶܢܽܘܢ[36]. ܘܰܒܕܽܘܟܬܳܐ ܐ̱ܚܪܺܬܳܐ ܬܽܘܒ ܡܶܛܽܠܳܬܶܗ ܕܦܰܘܠܽܘܤ ܘܰܕܒܰܪܢܰܒܰܐ ܐܳܡܰܪ: ܟܰܕ ܥܒܰܕܘ ܠܗܽܘܢ ܕܶܝܢ ܩܰܫܺܝ̈ܫܶܐ ܒܟܽܠ ܥܺܕܬܳܐ܆ ܟܰܕ ܨܰܠܺܝܘ ܥܰܡ ܨܰܘܡܳܐ܆ ܐܰܓܥܶܠܘ ܐܶܢܽܘܢ ܠܡܳܪܝܳܐ ܗܰܘ ܕܗܰܝܡܶܢܘ ܒܶܗ[37]. ܡܶܛܽܠܗܳܕܶܐ ܐܺܝܬܰܝܗܽܘܢ ܗ̱ܘܰܘ ܥܳܒܽܘ̈ܕܶܐ ܕܪܶܒܽܘ ܬܶܕܡܪ̈ܳܬܳܐ܆ ܘܳܐܣ̈ܘܳܬܳܐ ܕܟܽܘܪ̈ܗܳܢܶܐ ܕܟܽܠ ܓܢܶܤ.
ܐܶܠܳܐ ܐܳܡܰܪ ܐܰܢ̱ܬ ܟܰܕ ܗܳܠܶܝܢ ܫܳܡܰܥ ܐܰܢ̱ܬ܆ ܕܗܳܢܽܘܢ ܟܰܕ ܕܰܐܝܟ ܗܳܠܶܝܢ ܐܺܝܬܰܝܗܽܘܢ ܗ̱ܘܰܘ ܒܪܰܒܽܘܬܳܐ ܕܰܡܝܰܬܪܽܘܬܳܐ ܘܰܫ̈ܠܺܝܚܶܐ܆ ܛܳܒ ܟܺܐܢܳܐܺܝܬ ܨܳܝܡܺܝܢ ܗ̱ܘܰܘ. ܐܶܢܳܐ ܕܶܝܢ ܐ̱ܢܳܫ ܚܰܛܳܝܳܐ ܐܺܝܬܰܝ ܘܰܒܨܺܝܪܳܐ. ܐܺܝܛܰܐ ܠܰܫ̈ܠܺܝܚܶܐ ܡܰܢ ܚܳܫܚܳܐ ܐܺܝܬܰܘܗ̱ܝ ܗ̱ܘܳܐ ܨܰܘܡܳܐ ܘܳܐܠܨܳܝܳܐ܆ ܠܳܟ ܕܶܝܢ ܕܺܐܝܬܰܝܟ ܚܰܛܳܝܳܐ ܝܰܬܺܝܪܰܐ ܗ̱ܘ܆ ܐܺܝܢ ܐܳܡܰܪ. ܗܳܢܽܘܢ ܓܶܝܪ ܨܳܝܡܺܝܢ ܗ̱ܘܰܘ܆ ܐܰܝܟܰܢܳܐ ܕܬܶܕܡܪ̈ܳܬܳܐ ܘܳܐܬܘ̈ܳܬܳܐ ܢܶܣܥܪܽܘܢ. ܠܺܝ ܕܶܝܢ ܚܰܒܺܝܒܳܐ ܕܶܐ݀ܠܥܰܤ ܘܶܐ݀ܫܬܶܐ܆ ܘܟܰܕ ܠܰܝܬ ܠܺܝ ܣܽܘܥܪܳܢܳܐ ܡܶܕܶܡ ܐܶ݀ܥܒܪܺܝܘܗ̱ܝ ܠܥܳܠܡܳܐ. ܐܶܠܳܐ ܩܰܕܡܳܐܺܝܬ ܡܰܢ܆ ܕܢܰܦܫܳܐ ܚܙܺܝܪܳܝܬܳܐ ܘܬܰܘܪܳܝܬܳܐ ܐܺܝܬܶܝܗ̇ ܕܺܝܠܳܝܬܳܐ܆ ܗܳܝ ܕܠܳܐ ܣܳܟ ܬܶܪܚܰܡ ܡܝܰܬܪܽܘܬܳܐ ܘܒܰܝܬܳܝܽܘܬܳܐ ܕܰܠܘܳܬ ܐܰܠܳܗܳܐ܆ ܐܶܠܳܐ ܕܰܠܘܳܬ ܟܰܪܣܳܗ̇ ܬܶܗܘܶܐ ܚܳܝܪܳܐ. ܒܳܬܰܪܟܶܢ ܕܶܝܢ܆ ܠܘܳܬ ܬܳܪܐܽܘܬܳܐ ܕܦܰܓܪܳܐ ܨܳܝܡܺܝܢ ܗ̱ܘܰܘ ܫ̈ܠܺܝܚܶܐ܆ ܘܠܰܘ ܟܰܕ ܠܘܳܬ ܡܶܬܚܰܘܝܳܢܽܘܬܳܐ ܕܳܐܬܘ̈ܳܬܳܐ ܦܥܺܝܪ ܗ̱ܘܳܐ ܚܶܟܗܽܘܢ. ܠܳܐ ܓܶܝܪ ܐܺܝܬܰܝܗܽܘܢ ܗ̱ܘܰܘ ܥܰܒ̈ܕܶܐ ܕܫܽܘܒܚܳܐ ܣܪܺܝܩܳܐ. ܘܣܰܗܶܕ ܦܰܘܠܽܘܤ ܕܰܠܩܽܘܪ̈ܝܢܬܳܝܶܐ ܟܳܬܶܒ ܗ̱ܘܳܐ: ܐܶܠܳܐ ܡܥܰܨܰܪ ܐ̱ܢܳܐ ܠܦܰܓܪܝ ܘܰܡܩܰܦܰܚ ܐ̱ܢܳܐ܆ ܕܕܰܠܡܳܐ ܐܶܢܳܐ ܕܠܰܐ̱ܚܪ̈ܳܢܶܐ ܐܰܟܪܙܶܬ܆ ܐܶܢܳܐ ܩܢܽܘܡܝ ܡܰܣܠܝܳܐ ܐܶ݀ܗܘܶܐ.[38] ܐܰܝܟܰܢܳܐ ܟܺܝܬ ܕܡܳܕܶܝܢ ܗܽܘ ܡܰܢ ܢܺܝܫܶܗ ܕܨܰܘܡܳܐ܆ ܩܽܘܦܳܚܶܗ ܕܒܶܣܪܳܐ ܐܺܝܬܰܘܗ̱ܝ. ܐܳܬܘ̈ܳܬܳܐ ܕܶܝܢ ܐܺܝܬܰܝܗܶܝܢ ܗ̱ܘܰܝ̈܆ ܕܰܡܫܺܝܚܳܐ ܗܰܘ ܕܡܰܥܒܶܕ ܗ̱ܘܳܐ܆ ܘܰܡܝܰܩܰܪ ܗ̱ܘܳܐ ܐܰܟܚܕܳܐ ܠܰܡܝܰܬܪܽܘܬܳܐ ܕܗܳܠܶܝܢ܆ ܘܡܰܘܬܰܪ ܗ̱ܘܳܐ ܠܰܐ̱ܚܪ̈ܳܢܶܐ܆ ܗܳܢܽܘܢ ܕܡܶܛܽܠܳܬܗܽܘܢ ܗܘ̣ܳܬ ܗܺܝ ܡܶܬܚܰܘܝܳܢܽܘܬܳܐ ܕܳܐܬܘ̈ܳܬܳܐ܆ ܐܰܝܟܰܢܳܐ ܕܰܢܗܰܝܡܢܽܘܢ ܠܶܐܘܰܢܓܶܠܺܝܽܘܢ.
ܐܶܠܳܐ ܬܽܘܒ ܬܺܐܡܰܪ܆ ܕܗܳܢܽܘܢ ܦܫܺܝܩܳܐܺܝܬ ܡܣܰܝܒܪܺܝܢ ܗ̱ܘܰܘ ܠܶܗ ܠܨܰܘܡܳܐ. ܐܶܢܳܐ ܕܶܝܢ ܐܶܢ ܐܶ݀ܨܽܘܡ܆ ܕܡܶܬܦܰܣܰܩ ܒܶܣܪܝ ܡܰܣܒܰܪ ܐ̱ܢܳܐ ܘܡܶܨܛܰܪܝܳܐ ܢܰܦܫܝ܆ ܘܰܒܨܺܝܪ ܩܰܠܺܝܠ ܕܠܳܐ ܢܫܰܡܬܳܐ ܗܳܘܶܐ ܐ̱ܢܳܐ. ܠܡܳܢܳܐ ܕܬܶܥܪܽܘܩ ܒܝܰܕ ܥܶܠ̈ܠܳܬܳܐ ܥܰܒܕܳܢܳܐܺܝܬ ܡܶܢ ܨܰܘܡܳܐ ܡܶܬܚܪܶܐ ܐܰܢ̱ܬ܆ ܐܰܝܟ ܕܡܶܢ ܡܳܪܳܐ ܩܰܫܝܳܐ܆ ܘܗܳܕܶܐ ܟܰܕ ܗܳܠܶܝܢ ܕܦܽܘܪܩܳܢܳܐ ܦܳܩܶܕ. ܐܰܪܰܐ[39] ܓܶܝܪ܆ ܕܒܰܩܛܺܝܪܳܐ ܙܥܽܘܪܳܐ ܕܳܒܰܪ ܗ̱ܘܳܐ ܠܶܗ ܠܒܶܣܪܶܗ ܡܶܣܬܒܰܪ ܠܳܟ܆ ܗܰܘ ܕܳܐܡܰܪ ܕܰܡܥܰܨܰܪ ܐ̱ܢܳܐ ܠܦܰܓܪܳܐ ܕܺܝܠܝ܆ ܗܳܝ ܓܶܝܪ ܕܰܢܥܰܨܰܪ܆ ܕܢܶܐܠܽܘܨ ܐܺܝܬܶܝܗ̇. ܕܰܩܛܺܝܪ̈ܳܢܶܐ ܓܶܝܪ ܐܺܝܬܶܝܗ̇ ܡܰܠܟܽܘܬܳܐ ܕܰܫܡܰܝܳܐ[40]. ܐܶܠܳܐ ܗܰܘ ܕܗܳܟܰܢܳܐ ܕܳܒܰܪ ܒܰܩܛܺܝܪܳܐ܆ ܒܰܙܢܳܐ ܡܶܕܶܡ ܟܝܳܢܳܐ ܥܰܒܕܶܗ ܠܶܗ ܠܰܩܛܺܝܪܳܐ܆ ܡܶܛܽܠ ܕܳܐܦܠܳܐ ܠܳܐ ܡܶܬܡܰܨܝܳܢ̈ܝܳܬܳܐ ܦܩܰܕ ܠܰܢ ܐܰܠܳܗܳܐ܆ ܘܶܐܫܬܰܘܫܰܛ ܠܘܳܬ ܗܳܝ ܕܢܺܐܡܰܪ: ܗܰܘ ܡܳܐ ܕܗܳܫܳܐ ܚܰܝ ܐ̱ܢܳܐ ܒܒܶܣܪܳܐ܆ ܒܗܰܝܡܳܢܽܘܬܰܐ ܗ̱ܘ̣ ܚܰܝ ܐ̱ܢܳܐ ܕܰܒܪܶܗ ܕܰܐܠܳܗܳܐ܆ ܗܰܘ ܕܰܐܚܒܰܢܝ ܘܰܐܫܠܶܡ ܗܽܘ ܠܶܗ ܚܠܳܦܰܝ[41]. ܕܢܶܕܒܰܪ ܗܳܟܺܝܠ ܒܰܩܛܺܝܪܳܐ ܩܰܠܺܝܠ ܙܳܕܶܩ ܠܪܶܓܬܶܗ ܕܒܶܣܪܳܐ܆ ܘܥܳܐܶܠ ܡܶܟܺܝܠ ܚܠܳܦ ܗܳܕܶܐ ܒܽܘܝܳܐܶܗ ܕܰܐܠܳܗܳܐ܆ ܘܚܰܕܽܘܬܳܐ ܗܳܝ ܕܡܶܢ ܬܰܡܳܢ ܕܰܡܡܰܠܝܳܐ ܗܳܝ ܕܦܺܝܠܳܣܽܘܦܺܝܬܺܝܢܳܐ ܗܘ̣ܳܬ ܡܶܢ ܡܙܰܡܪܳܢܳܐ܆ ܗܳܝ ܕܒܽܘ̈ܝܳܐܝܰܟ ܚܰܕܝܽܘܗ̇ ܠܢܰܦܫܝ[42]. ܐܰܝܟܰܢܳܐ ܕܳܐܦ ܠܘܳܬ ܦܰܓܪܳܐ ܡܶܟܺܝܠ ܢܶܥܒܰܪ ܗܽܘ̣ ܒܽܘܣܳܡܳܐ ܗܰܘ ܕܡܶܢ ܗܳܪܟܳܐ܆ ܘܫܰܦܺܝܪ ܩܰܢܳܝܽܘܬܳܐ ܘܰܚܠܺܝܡܳܐ ܢܶܥܒܕܺܝܘܗ̱ܝ܆ ܐܰܝܟ ܗܳܝ ܕܰܟܬܺܝܒܳܐ܆ ܕܟܰܕ ܠܶܒܳܐ ܚܳܕܶܐ܆ ܡܗܰܒܶܒ ܦܰܪܨܽܘܦܳܐ[43]. ܐܶܢ ܕܶܝܢ ܐܳܦ ܬܶܬܕܰܟܶܐ ܥܰܝܢܳܐ ܕܬܰܪܥܺܝܬܳܐ܆ ܘܰܒܬܶܐܽܘܪܺܝܰܐ ܕܡܶܢ ܠܥܶܠ ܬܶܬܒܰܣܰܡ܆ ܘܰܒܓܶܠ̈ܝܳܢܶܐ ܗܳܢܽܘܢ ܕܝܰܬܺܝܪ ܐܰܠܳܗܺܝܢ܆ ܗܺܝ ܐܰܫܺܝܕܽܘܬܳܗ̇ ܘܰܦܨܺܝܚܽܘܬܳܗ̇ ܕܗܰܢܺܝܐܘܽܬܐ܆ ܐܳܦ ܒܓܰܪ̈ܡܶܐ ܒܰܕܡܽܘܬ ܡܶܫܚܳܐ ܥܳܒܪܳܐ ܘܚܳܠܕܳܐ. ܟܰܕ ܡܫܰܪܰܪ ܠܳܗ̇ ܐܳܦ ܠܗܳܕܶܐ ܟܬܳܒܳܐ ܟܳܗܢܳܝܳܐ ܘܳܐܡܰܪ ܗܳܟܰܢܳܐ: ܟܰܕ ܚܳܙܝܳܐ ܥܰܝܢܳܐ ܛܳܒ̈ܳܬܳܐ ܡܚܰܕܝܳܐ ܠܠܶܒܳܐ. ܛܶܒܳܐ ܕܶܝܢ ܛܳܒܳܐ ܡܫܰܡܶܢ ܓܰܪ̈ܡܶܐ[44].
ܕܰܐܝܟ ܗܳܢܳܐ ܡܶܕܶܡ ܐܰܟܬܶܒ ܟܰܕ ܡܶܫܬܰܥܶܐ ܠܕܽܘܒܳܪܶܗ ܕܰܐܢܛܽܘܢܺܝܽܘܤ ܗܰܘ ܐܰܢܕܪܺܝܢܛܳܐ ܕܥܳܢܘܳܝܽܘܬܳܐ܆ ܐܰܬܰܐܢܰܣܺܝܽܘܤ ܗܰܘ ܕܒܶܐܦܺܝܣܩܽܘ̈ܦܶܐ ܢܰܗܺܝܪܳܐ ܫܡܰܝܳܢܳܐ. ܟܰܕ ܓܶܝܪ ܫܰܢܺܝ ܗ̱ܘܳܐ ܗܽܘ ܐܰܢܛܽܘܢܺܝܽܘܤ܆ ܠܕܽܘܟܬܳܐ ܡܶܕܶܡ ܡܶܢ ܐܰܬܪ̈ܰܘܳܬܳܐ ܗܳܢܽܘܢ ܠܳܐ ܡܶܬܬܕܺܝ̈ܫܳܢܶܐ ܘܠܳܐ ܡܶܬܥܰܡܪ̈ܳܢܶܐ ܠܡܰܕܒܪܳܐ ܗܰܘ ܓܰܘܳܝܳܐ܆ ܘܬܰܡܳܢ ܙܰܒܢܳܐ ܣܰܓܺܝܳܐܐ ܕܰܝܰܪ܆ ܒܚܰܝ̈ܶܐ ܕܝܰܬܺܝܪ ܩܫܶܝܢ ܘܝܰܬܺܝܪ ܡܶܢ ܟܽܠ ܥܰܣܩܺܝܢ܆ ܟܰܕ ܐ̱ܢܳܫܺܝ̈ܢ ܐܰܠ̣ܙܽܘܗ̱ܝ ܟܰܕ ܒܰܩܛܺܝܪܳܐ ܦܰܬܚܽܘܗ̱ܝ ܠܬܰܪܥܶܗ܆ ܐܶܡܰܪ ܕܰܢܦܰܩ ܠܘܳܬܗܽܘܢ ܐܰܢܛܽܘܢܺܝܽܘܤ܆ ܐܰܝܟ ܗܰܘ ܕܡܶܢ ܐܰܬܪܳܐ ܡܶܕܶܡ ܩܰܕܺܝܫܳܐ ܘܠܳܐ ܡܶܬܩܰܪܒܳܢܳܐ ܡܰܐܪܶܙ ܗ̱ܘܳܐ܆ ܘܺܐܝܬܰܘܗ̱ܝ ܗ̱ܘܳܐ ܠܒܺܝܫ ܠܰܐܠܳܗܳܐ܆ ܘܗܳܝܕܶܝܢ ܗܽܘ ܩܰܕܡܳܐܺܝܬ ܐܶܬܚܙܺܝ ܗ̱ܘܳܐ ܡܶܢ ܡܰܫܪܺܝܬܶܗ ܠܗܳܢܽܘܢ ܕܶܐܬܰܘ ܗ̱ܘܰܘ ܠܘܳܬܶܗ. ܗܳܢܽܘܢ ܡܰܢ ܗܳܟܺܝܠ܆ ܡܶܬܕܰܡܪܺܝܢ ܗ̱ܘܰܘ ܟܰܕ ܚܳܙܶܝܢ ܗ̱ܘܰܘ ܠܶܗ ܠܦܰܓܪܶܗ ܟܺܝܬ ܕܗܺܝ ܟܕ ܗܺܝ ܩܰܢܳܝܽܘܬܳܐ ܐܺܝܬ ܗ̱ܘܳܬ ܠܶܗ܆ ܘܳܐܦܠܳܐ ܕܫܰܡܺܝܢ ܐܰܝܟ ܠܳܐ ܡܩܰܦܚܳܐ܆ ܐܳܦܠܳܐ ܕܰܒܨܺܝܪ ܐܰܝܟ ܕܡܶܢ ܨܰܘ̈ܡܶܐ ܘܡܶܢ ܩܪ̈ܳܒܶܐ ܕܫ̈ܺܐܕܶܐ܆ ܕܕܰܐܝܟ ܗܳܢܳܐ ܕܶܝܢ ܐܺܝܬܰܘܗ̱ܝ ܗ̱ܘܳܐ ܐܰܝܟ ܐܰܝܢܳܐ ܕܰܩܕܳܡ ܫܽܘܢܳܝܶܗ ܝܳܕܥܺܝܢ ܗ̱ܘܰܘ ܠܶܗ܆ ܕܢܰܦܫܶܗ ܕܶܝܢ ܬܽܘܒ ܙܢܳܐ ܕܰܟܝܳܐ. ܐܳܦܠܳܐ ܓܶܝܪ ܐܰܝܟ ܕܡܶܢ ܥܳܩܬܳܐ ܩܦܺܝܣܬܳܐ ܐܺܝܬܶܝܗ̇ ܗ̱ܘܳܬ܆ ܘܳܐܦܠܳܐ ܕܡܶܢ[45] ܗܰܢܺܝܽܐܘܬܳܐ ܐܰܫܺܝܕܳܐ ܗ̱ܘܳܬ܆ ܘܳܐܦܠܳܐ ܕܡܶܢ ܓܽܘܚܟܳܐ ܐܰܘ ܩܽܘܛܳܦܳܐ ܡܶܙܕܰܪܒܳܐ ܗ̱ܘܳܬ. ܘܳܐܦܠܳܐ ܓܶܝܪ ܟܰܕ ܚܙܳܐ ܠܟܶܢܫܳܐ ܐܶܬܕܠܰܚ܆ ܘܳܐܦܠܳܐ ܟܰܕ ܡܶܢ ܟܽܠܗܽܘܢ ܗܳܢܽܘܢ ܕܰܐܝܟ ܗܳܟܰܢ ܡܶܫܬܠܶܡ ܗ̱ܘܳܐ ܐܶܬܦܨܰܚ. ܐܶܠܳܐ ܟܽܠܶܗ ܐܺܝܬܰܘܗ̱ܝ ܗ̱ܘܳܐ ܫܰܘܝܳܐ܆ ܐܰܝܟ ܐܰܝܢܳܐ ܕܡܶܢ ܡܶܠܬܳܐ ܡܶܬܕܒܰܪ ܗ̱ܘܳܐ܆ ܘܰܒܗܳܝ ܕܒܰܟܝܳܢܳܐ ܩܳܐܶܡ. ܐܰܝܟܰܢܳܐ ܟܺܝܬ ܕܡܳܕܶܝܢ ܗܳܕܶܐ ܐܺܝܬܶܝܗ̇ ܗܳܝ ܕܒܰܟܝܳܢܳܐ ܢܩܽܘܡ܆ ܗܳܝ ܕܰܒܝܰܕ ܨܰܘ̈ܡܶܐ ܘܰܒܝܰܕ ܥܰܡ̈ܠܶܐ ܕܥܳܢܘܳܝܽܘܬܳܐ ܢܶܬܶܠ ܠܳܗ̇ ܠܢܰܦܫܳܐ ܐܽܘܚܕܳܢܳܐ܆ ܘܰܒܝܰܕ ܒܽܘܣܳܡ̈ܶܐ ܠܳܐ ܗܽܘ̈ܠܳܢܳܝܶܐ ܘܰܕܠܶܗ ܦܐܶܝܢ܆ ܢܬܰܪܣܶܝܘܗ̱ܝ ܠܦܰܓܪܳܐ.
ܚܢܰܢ ܗܳܟܺܝܠ܆ ܥܕܰܡܳܐ ܠܶܐܡܰܬܝ ܒܗܳܠܶܝܢ ܕܰܠܒܰܪ ܡܶܢ ܟܝܳܢܳܐ ܢ݀ܟܰܬܰܪ܆ ܘܢܶܣܒܰܪ ܟܰܕ ܫܰܢܺܝ̣ܺܝ̣ܢ ܚ̱ܢܰܢ܆ ܕܡܶܢ ܚܰܝ̈ܶܐ ܗܳܠܶܝܢ ܣܪ̈ܺܝܩܶܐ ܡܶܣܬܰܕܩܺܝܢܰܢ܆ ܟܰܕ ܠܗܳܠܶܝܢ ܩܰܠܺܝܠ ܝܰܘ̈ܡܳܬܳܐ ܨܳܝܡܺܝܢ ܚ̱ܢܰܢ. ܬܶܗܘܶܐ ܕܶܝܢ ܕܡܶܛܽܠ ܡܝܰܬܪܽܘܬܳܐ ܘܠܳܐ ܚܕܳܐ ܡܶܠܬܳܐ ܐܺܝܬ ܠܰܢ. ܕܰܠܡܳܐ ܠܰܒܪܶܗ ܕܰܐܠܳܗܳܐ܆ ܠܡܶܠܬܳܐ ܗܰܘ ܕܰܩܕܳܡ ܥܳܠ̈ܡܶܐ܆ ܠܗܰܘ ܕܟܽܠܶܗ ܗܳܢܳܐ ܡܶܛܽܠܳܬܰܢ ܡܰܟܶܟ ܗܽܘ̣ ܠܶܗ܆ ܐܰܝܟܰܢܳܐ ܕܳܐܦ ܡܶܢ ܫܡܰܝܳܐ ܢܶܚܽܘܬ ܘܠܳܐ ܡܶܫܬܰܚܠܦܳܢܳܐܺܝܬ ܢܶܬܒܰܣܰܪ ܘܢܶܬܒܰܪܢܰܫ܆ ܘܕܶܒܚܬܳܐ ܢܶܬܩܰܪܰܒ ܒܝܰܕ ܨܠܺܝܒܳܐ ܕܽܘܟܳܝܳܐ ܕܥܳܠܡܳܐ ܘܢܶܚܰܫ ܒܰܒܣܰܪ܆ ܡܶܛܽܠ ܥܽܘܗܕܳܢܳܐ ܕܚܰܫܶܗ ܘܕܰܩܝܳܡܬܶܗ ܠܳܐ ܢܝܰܩܪܺܝܘܗ̱ܝ܆ ܘܰܚܠܳܦ ܚܰܫܳܐ ܦܳܪܽܘܩܳܝܳܐ܆ ܗܳܝ ܕܡܶܢ ܨܰܘܡܳܐ ܢܶܬܩܰܦܰܚ ܠܳܐ ܢܶܦܪܥܺܝܘܗ̱ܝ܆ ܐܶܠܳܐ ܐܳܦ ܠܗܳܕܶܐ ܥܳܒܰܪ ܐ̱ܢܳܐ ܠܳܗ̇. ܕܰܠܡܳܐ ܠܚܺܐܦܳܐ ܗܰܘ ܕܫ̈ܺܐܕܶܐ ܠܳܐ ܚܳܙܶܝܢܰܢ܆ ܕܥܰܠ ܬܰܪ̈ܥܶܐ ܩܳܐܶܡ܆ ܠܳܐ ܗ̱ܘܳܐ ܗܳܠܶܝܢ ܡܩܰܕܶܡ ܗ̱ܘܺܝܬ ܐܳܡܰܪ ܗ̱ܘܺܝܬ ܠܟܽܘܢ܆ ܘܐ̱ܢܳܫܺܝ̈ܢ ܟܰܕ ܡܶܨܛܰܕܶܝܢ ܐܳܡܪܺܝܢ ܗ̱ܘܰܘ܆ ܥܕܰܡܳܐ ܠܶܐܡܰܬܝ ܒܳܥ̈ܘܳܬܳܐ ܟܽܘ̈ܠܳܝܳܬ ܟܶܢܫܳܐ ܘܬܶܫܡ̈ܫܳܬܳܐ ܕܙܽܘܡܳܪ̈ܶܐ ܘܰܨ̈ܠܰܘܳܬܳܐ܆ ܢܩܽܘܡ ܗܳܟܺܝܠ ܒܳܗ̇ ܟܰܕ ܒܳܗ̇ ܒܡܰܒܣܝܳܢܽܘܬܳܐ܆ ܘܟܰܕ ܡܰܩܪ̈ܒܳܢܶܐ ܡܰܢ ܣܺܝܡܺܝܢ ܥܠܰܝܢ܆ ܐܳܦ ܫܽܘܪ̈ܶܐ ܐܳܦ ܬܰܪ̈ܥܶܐ ܡܙܰܗܪܺܝܢ ܚ̱ܢܰܢ܆ ܟܰܕ ܡܶܬܬܰܓܪܺܝܢ ܚ̱ܢܰܢ ܗܳܝ ܕܠܳܐ ܢܶ݀ܬܟܒܶܫ. ܟܰܕ ܕܶܝܢ ܪ̈ܽܘܚܶܐ ܚܰܪ̈ܡܳܬܳܐ ܘܣܳܢ̈ܝܳܬ ܒܢܰܝ̈ܢܳܫܳܐ ܘܰܕܝܰܬܺܝܪ ܡܶܢ ܟܽܠ ܒܺܝ̈ܫܳܢ ܡܶܛܽܠ ܚ̈ܛܳܗܰܝܢ ܐܶܫܬܒܶܩ̈ܝ̱ ܘܶܐܫܬܰܡܰܪ̈ܝ̱ ܥܠܰܝܢ܆ ܠܳܐ ܗ̱ܘܳܐ ܒܫܽܘܪܳܐ ܪܽܘܚܳܢܳܐ܆ ܒܨܰܘܡܳܐ ܘܒܰܨܠܽܘܬܳܐ ܢ݀ܣܰܬܰܪ ܚܢܰܢ ܠܰܢ ܘܢܶܚܣܰܢ܆ ܗܳܢܳܐ ܓܶܝܪ ܓܶܢܣܳܐ ܐܳܡܰܪ܆ ܘܠܳܐ ܒܡܶܕܶܡ ܡܶܫܟܚܳܐ ܕܢܶܦܽܘܩ܆ ܐܶܠܳܐ ܐܶܢ ܒܰܨܠܽܘܬܳܐ ܘܰܒܨܰܘܡܳܐ[46].
ܠܳܐ ܗܳܟܺܝܠ ܢܶܦܣܽܘܩ ܣܰܒܪܳܐ. ܐܶܠܳܐ ܚܰܬܺܝܬܳܐܺܝܬ[47] ܢܶܫܬܰܚܠܰܦ܆ ܠܰܘ ܟܰܕ ܠܒܶܣܬܪܰܢ ܬܽܘܒ ܪܳܗܛܺܝܢ ܚ̱ܢܰܢ. ܚܕܳܐ ܓܶܝܪ ܫܳܥܬܳܐ ܕܰܬܝܳܒܽܘܬܳܐ ܫܰܪܺܝܪܬܳܐ܆ ܣܳܦܩܳܐ ܕܰܠܚܶܡܬܳܐ ܗܳܝ ܕܝܰܬܺܝܪ ܡܶܢ ܟܽܠ ܩܰܫܝܳܐ ܬܰܗܦܶܟ. ܐܺܝܬ ܠܰܢ ܗܳܠܶܝܢ ܝܰܘ̈ܡܳܬܳܐ ܩܰܕܺܝ̈ܫܶܐ ܣܓ̈ܺܝܕܶܐ ܐܰܝܟ ܕܰܠܥܽܘܕܪܳܢܳܐ ܢܶܚܛܦܺܝܘܗ̱ܝ ܠܙܰܒܢܳܐ. ܘܗܰܘ ܕܰܠܗܳܠܶܝܢ ܒܚܰܫܳܐ ܒܰܝܬܳܝܳܐ ܕܺܝܠܶܗ ܘܒܰܩܝܳܡܬܳܐ ܝܰܩܰܪ܆ ܢܶܥܢܶܐ ܘܢܶܦܪܽܘܩ ܠܰܢ. ܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܫܬܝܢ ܘܰܬܡܢܝܐ.
[1]ܝܘܚܢܢ. 4: 34
[2]ܡܙܡܘܪ̈ܐ. 71: 22 ـ 23
[3]ܡܬܝ. 12: 34 ܐܦ ܠܘܩܐ. 6: 45
[4]ܟܰܝ
[5]ܫܳܐܶܠ ܐ̱ܢܳܐ ܫܠܳܡܶܗ
[6]ܐ. ܛܝܡܬܐܘܣ. 6: 15
[7]ܕܠܐ ܫܽܘܪܳܝܳܐ
[8]ܡܙܡܘܪ̈ܐ. 95: 1 ـ 2
[9]ܐܦܣ̈ܝܐ. 3: 10
[10]ܣܶܦܪܐ ܕܒܪܝܬܐ. 1: 9
[11]ܡܙܡܘܪ̈ܐ. 24: 2
[12]ܐܝܘܒ. 38: 7 ـ 8
[13]ܐܝܘܒ. 38: 14
[14]ܡܶܬܥܟܪ
[15]ܚܟܡܬܐ. 9: 15
[16]ܣܶܦܪܐ ܕܒܪܝܬܐ. 3: 18 ـ 19
[17]ܐܝܘܒ. 15: 20
[18]ܡ̈ܬܠܐ. 17: 12
[19]ܝܰܨܽܘܦܬܳܢܳܐܝܬ
[20]ܡܙܡܘܪ̈ܐ. 19: 2
[21]ܡܙܡܘܪ̈ܐ. 138: 5 ـ 6
[22]ܡ̈ܬܠܐ. 13: 24
[23]ܣܶܦܪܐ ܕܒܪܝܬܐ. 3: 5
[24]ܡܬܰܪܣܝܳܢܳܐ
[25]ܟܗ̈ܢܐ. 16: 29 ـ 31
[26]ܪ̈ܗܘܡܝܐ. 1: 1 ܐܦ ܓܠܛܝ̈ܐ. 1: 1
[27]ܟܗ̈ܢܐ. 16: 31
[28]ܐܫܥܝܐ. 58: 5
[29]ܡܬܝ. 6: 17
[30]ܠܝܽܘܩܪ̈ܶܐ
[31]ܢܳܬܦܺܝܢ
[32]ܦܪܟܣܝܣ. 20: 6 ـ 12
[33]ܡܩܰܦܰܚ
[34]ܢܳܚ
[35]ܒ. ܩܘܪ̈ܝܢܬܝܐ. 5: 14
[36]ܦܪܟܣܝܣ. 13: 2ـ 3
[37]ܦܪܟܣܝܣ. 14: 22
[38]ܐ. ܩܘܪ̈ܝܢܬܝܐ. 9: 27
[39]ܟܰܝ
[40]ܡܬܝ. 11: 12
[41]ܓܠܛܝ̈ܐ. 2: 20
[42]ܡܙܡܘܪ̈ܐ. 94: 19
[43]ܡ̈ܬܠܐ. 15: 13
[44]ܡ̈ܬܠܐ. 15: 30
[46]ܡܪܩܘܣ. 9: 29
[47]ܡܫܰܡܠܝܐܝܬ