ܡܺܐܡܪܳܐ ܕܶܫܬܺܝܢ ܘܫܰܒܥܳܐ

ܥܰܠ ܩܰܕܺܝܫܬܳܐ ܝܳܠܕܰܬ ܐܰ‌ܠܳܗܳܐ ܘܰܒܬܽܘܠܰܬ ܒܟܽܠܙܒܰܢ ܡܰܪܝܰܡ.

67: ـ ܟܰܕ ܨܳܒܶܐ ܐ̱ܢܳܐ ܕܰܠܘܳܬ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܐܶ݀ܚܽܘܪ܆ ܘܰܠܣܽܘ̈ܟܳܠܶܐ ܕܡܶܛܽܠܳܬܳܗ̇ ܒܪܺܝܫ ܗܰܠ̈ܟܳܬܝ ܒܰܠܚܽܘܕ ܐܶ݀ܓܫܽܘܦ. ܣܳܒܰܪ ܐ̱ܢܳܐ ܕܩܳܠܳܐ ܐܰܝܟ ܕܡܶܢ ܐܰ‌ܠܳܗܳܐ ܐܳܬܶܐ ܠܺܝ ܕܳܐܡܰܪ: ܘܰܕܗܳܢܳܐ ܣܰܓܺܝ ܡܰܙܥܶܩ ܒܶܐܕܢ̈ܰܝ܆ ܠܳܐ ܬܶܬܩܰܪܰܒ ܠܗܳܪܟܳܐ. ܫܪܺܝ ܠܰܣܐܽܘܢܳܐ ܡܶܢ ܪ̈ܶܓܠܰܝܟ. ܕܽܘܟܬܳܐ ܓܶܝܪ ܗܳܝ ܕܒܳܗ̇ ܩܳܐܶܡ ܐܰܢ̱ܬ܆ ܐܰܪܥܳܐ ܩܰܕܺܝܫܬܳܐ ܐܺܝܬܶܝܗ̇^[1]. ܙܳܕܶܩ ܓܶܝܪ ܐܰܝܟ ܕܒܰܫܪܳܪܳܐ܆ ܕܡܶܢ ܟܽܠ ܦܰܢܛܰܣܺܝܰܐ ܡܺܝܬܬܳܐ ܘܒܶܣܪܳܢܳܝܬܳܐ ܐܰܝܟ ܕܡܶܢ ܣܐܽܘ̈ܢܶܐ ܡܶܕܶܡ܆ ܢܶܫܪܶܝܘܗ̱ܝ ܠܗܰܘܢܳܐ ܗܰܘ ܕܥܰܠ ܡܶܕܶܡ ܡܶܢ ܬܶܐܽܘܪܺܝܰܐܤ ܐܰ‌ܠܳܗܳܝ̈ܳܬܳܐ ܡܢܰܣܶܐ ܠܡܶܣܰܩ. ܡܳܢܳܐ^[2] ܕܶܝܢ ܬܶܐܽܘܪܺܝܰܐ ܬܶܗܘܶܐ ܕܝܰܬܺܝܪ ܐܰ‌ܠܳܗܳܝܳܐ ܡܶܢ ܕܝܳܠܕܰܬ ܐܰ‌ܠܳܗܳܐ܆ ܡܳܢܳܐ ܕܶܝܢ ܕܝܰܬܺܝܪ ܪܳܡ ܡܶܢ ܗܳܕܶܐ. ܠܗܳܝ ܕܡܶܬܩܰܪܰܒ ܠܳܗ̇ ܡܰܢ ܐ̱ܢܳܫ ܐܰܝܟ ܕܠܰܐܪܥܳܐ ܩܰܕܺܝܫܬܳܐ܆ ܦܳܓܰܥ ܕܶܝܢ ܒܰܫܡܰܝܳܐ. ܐܳܦ ܓܶܝܪ ܡܶܢ ܐܰܪܥܳܐ ܐܺܝܬܶܝܗ̇ ܗ̱ܘܳܬ܆ ܘܒܰܪܢܳܫܳܐ ܐܺܝܬܶܝܗ̇ ܗ̱ܘܳܬ ܒܰܟܝܳܢܳܐ ܘܫܰܘܝܰܬ ܒܽܐܘܣܺܝܰܐ ܠܰܢ܆ ܐܳܦܶܢ ܡܶܢ ܟܽܠܶܗ ܛܽܘܠܫܳܐ ܐܺܝܬܶܝܗ̇ ܗ̱ܘܳܬ ܕܟܺܝܬܳܐ ܘܠܳܐ ܡܣܰܝܰܒܬܳܐ܆ ܐܰܝܟ ܕܡܶܢ ܫܡܰܝܳܐ ܕܶܝܢ ܡܰܢ ܡܥ̈ܰܝܳܐ ܒܰܝ̈ܬܳܝܶܐ ܕܺܝܠܳܗ̇ ܠܰܐܠܳܗܳܐ ܕܶܐܬܒܰܣܰܪ ܐܰܦܪܝܰܬ܆ ܒܗܳܝ ܕܒܶܛܢܰܬ ܦܰܐܝܽܘܬ ܐܰ‌ܠܳܗܳܐܺܝܬ ܘܝܶܠܕܰܬ܆ ܠܰܘ ܟܰܕ ܗܺܝ ܗܳܝ ܕܢܶܗܘܶܐ ܐܺܝܬܰܘܗ̱ܝ ܐܰ‌ܠܳܗܳܐ ܫܰܟܢܰܬ ܠܗܰܘ ܕܶܐܬܺܝܠܶܕ. ܗܳܕܶܐ ܓܶܝܪ ܐܺܝܬܰܘܗ̱ܝ ܗ̱ܘܳܐ ܕܠܳܐ ܫܽܘܪܳܝ ܘܰܠܗܰܠ ܡܶܢ ܟܽܠܗܽܘܢ ܥܳܠ̈ܡܶܐ܆ ܐܶܠܳܐ ܟܰܕ ܠܗܳܝ ܕܢܶܗܘܶܐ ܗ̱ܘܳܐ ܗܽܘ ܟܰܕ ܗܽܘ ܠܳܐ ܡܶܫܬܰܚܠܦܳܢܳܐܺܝܬ ܒܰܪܢܳܫܳܐ ܝܶܗܒܰܬ܆ ܡܶܢܳܗ̇ ܘܡܶܢ ܡܶܐܬܺܝܬܳܐ ܠܳܐ ܡܶܬܡܰܠܠܳܢܺܝܬܳܐ ܘܐ̱ܪܳܙܳܢܳܝܬܳܐ ܕܪܽܘܚܳܐ ܩܰܕܺܝܫܳܐ. ܗܳܝ ܕܶܝܢ ܕܰܐܝܟܰܢܳܐ ܐܶܢ ܨܳܒܶܐ ܐܰܢ̱ܬ ܠܡܺܐܠܰܦ܆ ܒܳܠܶܡ ܠܶܗ ܠܥܽܘܩܳܒܳܟ ܛܰܒܥܳܐ ܕܰܒܬܽܘܠܽܘܬܳܐ܆ ܕܳܐܦܠܳܐ ܒܶܗ ܒܝܰܠܕܳܐ ܐܰܫܶܦ. ܗܰܘ ܕܶܝܢ ܕܰܛܒܺܝܥ܆ ܠܳܐ ܡܶܬܓܰܫܫܳܢܳܐ ܡܶܢ ܟܽܠܦܪܽܘܤ ܘܟܰܣܝܳܐ ܐܺܝܬܰܘܗ̱ܝ ܘܠܳܐ ܡܶܬܡܰܠܠܳܢܳܐ. ܐܰܝܟܰܢܳܐ ܟܺܝܬ ܕܢܺܐܡܰܪ ܐ̱ܢܳܫ ܟܰܕ ܬܳܡܰܗ ܒܳܗ̇ ܒܬܶܕܡܽܘܪܬܳܐ ܒܰܕܡܽܘܬ ܝܰܥܩܽܘܒ܆ ܕܡܳܐ ܕܚܺܝܠܳܐ ܕܽܘܟܬܳܐ ܗܳܕܶܐ^[3]܆ ܘܰܕܗܳܢܰܘ ܬܰܪܥܳܐ ܕܰܫܡܰܝܳܐ.

ܢܚܶܬ ܡܰܢ ܓܶܝܪ܆ ܐܳܦ ܡܶܢ ܩܕܺܝܡ ܐܰ‌ܠܳܗܳܐ ܕܥܰܠ ܟܽܠ܆ ܟܰܕ ܒܰܙܒܰܢ ܣܳܐܶܡ ܗ̱ܘܳܐ ܢܳܡܽܘܣܳܐ ܥܰܠ ܛܽܘܪܳܐ ܕܣܺܝܢܰܝ. ܘܺܐܝܬܶܝܗ̇ ܗ̱ܘܳܬ ܚܙܳܬܳܐ ܕܫܽܘܒܚܶܗ ܕܡܳܪܝܳܐ܆ ܐܰܝܟܰܢܳܐ ܕܳܐܡܰܪ ܟܬܳܒܳܐ ܟܳܗܢܳܝܳܐ܆ ܐܰܝܟ ܢܽܘܪܳܐ ܕܡܶܬܓܰܘܙܠܳܐ܆ ܥܰܠ ܩܰܪܩܰܦܬܳܐ ܗܳܝ ܕܛܽܘܪܳܐ ܩܕܳܡ ܒ̈ܢܰܝ ܐܺܝܣܪܳܐܶܝܠ^[4]. ܚܙܳܬܳܐ ܕܶܝܢ ܒܪܰܡ ܐܺܝܬܶܝܗ̇ ܗ̱ܘܳܬ܆ ܘܠܰܘ ܕܽܐܘܣܺܝܰܐ ܐܰܘ ܕܰܩܢܽܘܡܳܐ܆ ܐܶܠܳܐ ܕܫܽܘܒܚܶܗ ܕܡܳܪܝܳܐ. ܢܰܩܺܝܦ ܗ̱ܘܳܐ ܕܶܝܢ ܠܰܚܙܳܬܳܐ ܕܰܐܝܟ ܗܳܕܶܐ܆ ܬܶܢܳܢܳܐ ܘܰܥܢܳܢܳܐ ܡܰܠܝܰܬ ܥܰܡܛܳܢܳܐ܆ ܘܩܳܠܳܐ ܥܰܙܺܝܙܳܐ ܕܫܺܝܦܽܘܪܳܐ. ܘܒܰܪ̈ܩܶܐ ܕܪܳܗܛܺܝܢ ܘܟܽܠܗܶܝܢ ܕܥܳܒ̈ܕܳܢ ܗ̱ܘܰܝ̈ ܕܶܚܠܬܳܐ܆ ܘܰܠܪܽܘܚܩܳܐ ܡܶܢ ܛܽܘܪܳܐ ܠܗܳܢܽܘܢ ܕܩܳܝܡܺܝܢ ܗ̱ܘܰܘ ܚܕܳܪ̈ܰܘܗ̱ܝ ܕܳܚ̈ܩܳܢ ܗ̱ܘܰܝ̈ ܘܡܰܘܒ̈ܠܳܢ܆ ܘܗܳܕܶܐ ܟܰܕ ܫܰܦܺܝܪ ܡܢܰܩܕܺܝܢ ܗ̱ܘܰܘ ܘܰܡܕܰܟܶܝܢ. ܠܗܳܢܽܘܢ ܓܶܝܪ ܕܺܐܝܬܰܝܗܽܘܢ ܗ̱ܘܰܘ ܚܰܝܘܰܬ ܫܶܢܳܝ̈ܶܐ ܡܶܕܶܡ ܒܩܰܢܳܝܽܘܬܳܐ ܕܢܰܦܫܗܽܘܢ܆ ܫܕܳܝܳܐ ܕܟܺܐܦ̈ܶܐ ܘܰܕܓܶܐܪ̈ܶܐ ܡܶܬܓܰܙܡܺܝܢ ܗ̱ܘܰܘ ܠܗܽܘܢ. ܐܳܦܶܢ ܓܶܝܪ ܚܰܝܘܰܬ ܫܶܢܳܐ ܐܳܡܰܪ ܬܶܓܫܽܘܦ ܒܛܽܘܪܳܐ ܬܶܬܪܓܶܡ^[5]܆ ܐܰܘ ܒܓܶܐܪܳܐ ܬܶܬܟܫܶܛ. ܗܳܠܶܝܢ ܕܶܝܢ ܡܶܬܦܰܪ̈ܢܣܳܢ ܗ̱ܘܰܝ̈܆ ܡܶܛܽܠ ܕܶܚܠܬܳܐ. ܐܰܝܟ ܕܠܰܡܫܰܥ̈ܒܕܶܐ ܓܶܝܪ ܥܕܰܟܺܝܠ ܘܥܰܒ̈ܕܶܐ ܕܕܶܚܠܰܬ ܫ̈ܺܐܕܶܐ ܗܳܝ ܡܶܨܪܳܝܬܳܐ ܘܕܰܚ̈ܫܶܐ ܗܳܢܽܘܢ ܫܟܺܝܪ̈ܶܐ ܡܶܬܩܰܪܰܒ ܗ̱ܘܳܐ ܠܘܳܬܗܽܘܢ܆ ܘܡܶܢ ܟܽܠ ܕܽܘܟ ܣܽܘܪܳܕܳܐ ܡܩܺܝܡ ܗ̱ܘܳܐ ܥܠܰܝܗܽܘܢ܆ ܟܰܕ ܐܰܝܟ ܡܙܺܝ̈ܥܰܝ ܡܶܢ ܩ̈ܳܠܶܐ ܘܰܐܝܟ ܗܰܘ ܕܪܳܥܠܺܝܢ ܨܳܒܶܐ ܗ̱ܘܳܐ ܕܢܶܥܒܶܕ ܐܶܢܽܘܢ܆ ܘܗܳܟܰܢܳܐ ܠܘܳܬ ܣܳܝܽܘܡܽܘܬ ܢܳܡܽܘܣܳܐ ܢܶܗܘܽܘܢ ܫܰܦܺܝܪ ܡܶܬܬܦܺܝ̈ܣܳܢܶܐ. ܠܘܳܬ ܗܳܠܶܝܢ ܕܳܐܦ ܦܰܘܠܽܘܤ ܟܰܕ ܚܳܐܰܪ ܗ̱ܘܳܐ ܠܘܳܬܗܶܝܢ܆ ܠܗܳܢܽܘܢ ܕܗܰܝܡܶܢܘ ܒܶܐܘܰܢܓܶܠܺܝܽܘܢ ܐܳܡܰܪ ܗ̱ܘܳܐ܆ ܠܳܐ ܓܶܝܪ ܢܣܰܒܬܽܘܢ ܪܽܘܚܳܐ ܕܥܰܒܕܽܘܬܳܐ ܬܽܘܒ ܠܕܶܚܠܬܳܐ. ܐܶܠܳܐ ܢܣܰܒܬܽܘܢ ܪܽܘܚܳܐ ܕܣܳܝܽܘܡܽܘܬ ܒܢܰܝ̈ܳܐ^[6]. ܨܳܒܶܐ ܗ̱ܘܳܐ ܡܰܢ ܓܶܝܪ ܕܰܒܕܶܚܠܬܳܐ ܢܩܰܕܶܡ ܢܬܰܪܐܶܐ^[7] ܐܶܢܽܘܢ ܘܰܢܩܰܕܶܡ ܢܶܪܕܶܐ ܒܝܰܕ ܢܳܡܽܘܣܳܐ܆ ܘܗܳܟܰܢܳܐ ܟܰܕ ܠܥܶܠ ܡܶܢ ܛܶܟܣܳܐ ܕܥܰܒ̈ܕܶܐ ܡܶܬܥܰܠܶܝܢ ܣܳܠܩܺܝܢ܆ ܐܰܝܟ ܕܰܠܘܳܬ ܒܢܰܝ̈ܳܐ ܢܶܬܩܰܪܰܒ܆ ܝܰܬܺܝܪ ܡܫܰܡܠܝܳܐܺܝܬ ܘܝܰܬܺܝܪ ܚܰܒܺܝܒܳܐܺܝܬ.

ܟܰܕ ܕܶܝܢ ܠܳܐ ܡܶܕܶܡ ܒܪܰܡ ܡܶܢ ܩܰܕܺܝܡܽܘܬ ܡܰܪܕܽܘܬܳܐ ܝܺܬܰܪܘ܆ ܐܶܠܳܐ ܐܰܟܙܢܳܐ ܕܒܰܪܓܶܠܬܳܐ܆ ܒܚܺܐܦܳܐ ܘܡܶܠܐܳܐ222 ܕܰܚ̈ܛܳܗܶܐ ܠܥܽܘܕܪܳܢܳܐ ܗܰܘ ܕܡܶܢ ܗܳܪܟܳܐ ܐܰܛܺܝܦܘ܆ ܐܳܦ ܗܳܟܰܢܳܐ ܡܶܛܽܠ ܫܦܺܝܥܽܘܬܳܐ ܕܛܳܒܽܘܬܶܗ܆ ܝܰܬܺܝܪ ܥܰܬܺܝܪܬܳܐ ܘܰܡܫܰܪܬܰܚܬܳܐ ܝܳܗܶܒ ܠܳܗ̇ ܠܗܽܘܢ ܠܛܰܝܒܽܘܬܳܐ܆ ܘܰܠܪܽܘܚܳܐ ܕܣܳܝܽܘܡܽܘܬ ܒܢܰܝ̈ܳܐ. ܐܰܝܟܰܢܳܐ ܕܰܠܗܳܢܽܘܢ ܕܠܳܐ ܢܰܓܶܕ ܐܶܢܽܘܢ ܒܕܶܚܠܬܳܐ܆ ܒܚܽܘܒܳܐ ܢܫܰܥܒܶܕ ܐܶܢܽܘܢ. ܘܟܰܕ ܥܰܒ̈ܕܶܐ ܡܰܣ̈ܠܰܝܳܐ ܐܶܬܚܙܺܝܘ܆ ܒܢܰܝ̈ܳܐ ܒܚܺܝܪ̈ܶܐ ܢܶܥܒܶܕ ܐܶܢܽܘܢ. ܗܳܕܶܐ ܐܰܪܰܐ ܐܺܝܬܶܝܗ̇ ܗ̱ܘܳܬ܆ ܗܳܝ ܕܚܰܟܺܝܡܳܐܺܝܬ ܡܶܢ ܫܠܺܝܚܳܐ ܐܶܬܰܐܡܪܰܬ܆ ܗܳܝ ܕܰܐܝܟܳܐ ܕܶܝܢ ܕܣܶܓܝܰܬ̣ ܚܛܺܝܬܳܐ܆ ܝܰܬܺܝܪ ܐܶܬܝܰܬܪܰܬ ܛܰܝܒܽܘܬܳܐ^[8]. ܐܶܠܳܐ ܬܰܡܳܢ ܡܰܢ܆ ܐܰܝܟܳܐ ܕܪܽܘܚܳܐ ܕܥܰܒܕܽܘܬܳܐ܆ ܛܽܘܪܳܐ ܕܡܶܬܬܰܢܰܢ ܐܺܝܬ ܗ̱ܘܳܐ܆ ܟܰܕ ܕܡܽܘܬܳܐ^[9] ܒܰܠܚܽܘܕ ܐܰܝܟ ܢܽܘܪܳܐ ܕܡܶܬܓܰܘܙܠܳܐ ܕܫܽܘܒܚܶܗ ܕܡܳܪܝܳܐ ܩܰܒܶܠ ܗ̱ܘܳܐ܆ ܘܡܽܘܫܶܐ ܡܢܺܝܚܳܢܳܐ ܕܰܡܫܰܡܶܫ ܗ̱ܘܳܐ. ܗܳܪܟܳܐ ܕܶܝܢ܆ ܐܰܝܟܳܐ ܕܛܰܝܒܽܘܬܳܐ ܕܣܳܝܽܘܡܽܘܬ ܒܢܰܝ̈ܳܐ܆ ܛܽܘܪܳܐ ܡܠܺܝܠܳܐ ܒܬܽܘܠܬܳܐ܆ ܕܰܒܕܰܟܝܽܘܬܳܐ ܘܰܒܡܶܐܬܺܝܬܳܐ ܕܪܽܘܚܳܐ ܩܰܕܺܝܫܳܐ ܡܶܬܬܰܨܡܰܚ ܘܢܳܗܰܪ܆ ܘܠܰܘ ܚܙܳܬܳܐ ܕܫܽܘܒܚܶܗ ܕܡܳܪܝܳܐ܆ ܐܶܠܳܐ ܗܽܘ ܐܰ‌ܠܳܗܳܐ܆ ܗܰܘ ܒܪܳܐ܆ ܗܰܘ ܡܶܠܬܳܐ܆ ܗܰܘ ܨܰܠܡܳܐ܆ ܗܰܘ ܝܽܘܩܢܳܐ ܕܰܩܢܽܘܡܳܐ ܐܰܒܳܗܳܝܳܐ. ܠܰܘ ܕܕܳܪܶܟ ܦܫܺܝܛܳܐܺܝܬ ܥܰܠ ܩܰܪܩܰܦܬܳܐ ܕܛܽܘܪܳܐ܆ ܐܶܠܳܐ ܕܠܳܐ ܡܶܫܬܰܚܠܦܳܢܳܐܺܝܬ ܡܶܢܳܗ̇ ܡܶܬܒܰܣܰܪ ܘܡܶܬܺܝܠܶܕ. ܡܶܠܬܳܐ ܓܶܝܪ ܒܶܣܪܳܐ ܗܘ̣ܳܐ܆ ܘܰܐܓܶܢ ܒܰܢ^[10]. ܟܰܕ ܗܽܘ ܩܢܽܘܡܶܗ ܡܰܥܒܶܕ ܘܰܡܫܰܡܶܫ ܛܰܝܒܽܘܬܶܗ ܕܰܠܘܳܬܰܢ܆ ܘܠܰܘ ܟܰܕ ܒܰܐ̱ܚܪܺܢܳܐ ܡܫܰܡܫܳܢܳܐ ܡܶܬܚܰܫܰܚ. ܠܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܕܥܰܒܕܳܐ܆ ܕܰܠܛܰܝܒܽܘܬܳܐ ܕܣܳܝܽܘܡܽܘܬ ܒܢܰܝ̈ܳܐ ܢܫܰܡܶܫ. ܡܶܛܽܠ ܗܳܕܶܐ ܒܪܰܒܽܘܬܶܗ ܕܥܽܘܕܪܳܢܳܐ ܐܰ‌ܠܳܗܳܝܳܐ ܡܶܫܬܰܒܗܰܪ܆ ܘܰܕܠܳܐ ܐܶܬܺܝܬ ܕܶܐܫܬܰܡܰܫ܆ ܐܶܠܳܐ ܕܶܐ݀ܫܰܡܶܫ ܡܰܙܥܶܩ^[11]. ܘܩܰܕܡܳܐܺܝܬ ܗܽܘ ܗܘܳܐ ܒܪܶܗ ܕܐ̱ܢܳܫܳܐ܆ ܟܰܕ ܒܽܐܘܣܺܝܰܐ ܒܪܳܐ ܐܺܝܬܰܘܗ̱ܝ ܕܰܐ‌ܠܳܗܳܐ ܠܳܐ ܡܶܬܚܰܙܝܳܢܳܐ܆ ܘܗܳܟܰܢܳܐ ܠܰܢ ܗܳܢܽܘܢ ܕܡܶܢ ܐܰܪܥܳܐ ܐܺܝܬܰܝܢ܆ ܒܢܰܝ̈ܳܐ ܒܛܰܝܒܽܘܬܳܐ ܕܰܐܒܳܐ ܫܡܰܝܳܢܳܐ ܡܚܰܘܶܐ. ܘܰܢܣܰܒ ܗܳܝ ܕܰܒܨܺܝܪܳܐ܆ ܐܰܝܟܰܢܳܐ ܕܢܶܬܶܠ ܗܳܝ ܕܰܡܝܰܬܪܳܐ܆ ܘܟܰܕ ܠܳܗ̇ ܠܗܳܝ ܕܰܒܨܺܝܪܳܐ܆ ܫܰܚܠܶܦ ܬܰܩܢܳܗ̇ ܠܘܳܬ ܗܳܝ ܕܰܡܝܰܬܪܳܐ. ܡܶܢ ܓܶܝܪ ܐܶܡܳܐ ܠܳܐ ܡܢܰܣܝܰܬ ܒܙܽܘܘܳܓܳܐ.

ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܟܺܐܦܳܐ ܗܰܘ ܕܰܚܙܳܐ ܕܳܢܺܝܐܶܝܠ ܢܒܺܝܳܐ ܕܰܕܠܳܐ ܐܺܝ̈ܕܰܝܳܐ ܡܶܢ ܛܽܘܪܳܐ ܡܶܬܦܣܶܩ^[12]܆ ܗܳܢܰܘ ܕܶܝܢ ܕܰܕܠܳܐ ܙܰܪܥܳܐ ܘܰܡܣܰܝܥܳܢܽܘܬܳܐ^[13] ܕܓܰܒܪܳܐ ܡܶܢ ܒܬܽܘܠܬܳܐ ܡܶܬܒܰܣܰܪ. ܒܡܳܢܳܐ ܗܳܟܺܝܠ ܝܰܬܺܝܪܳܐܺܝܬ ܐܶܬܕܰܡܰܪ؟ ܒܛܽܘܪܳܐ ܗܰܘ ܕܰܠܬܰܚܬ ܣܺܝܡ ܒܰܐܦ̈ܶܐ^[14] ܒܰܪ̈ܳܝܳܬܳܐ܆ ܘܡܶܛܽܠ ܒܬܽܘܠܽܘܬܳܐ ܘܡܶܛܽܠ ‌ܐ̱ܪܳܙܳܐ ܐܰ‌ܠܳܗܳܝܳܐ ܗܰܘ ܕܶܐܫܬܰܡܠܺܝ ܒܶܗ܆ ܐܺܝܬܰܘܗ̱ܝ ܪܳܡܳܐ ܘܰܡܥܰܠܝܳܐ܆ ܐܰܘ ܒܟܺܐܦܳܐ܆ ܗܰܘ ܕܺܐܝܬܰܘܗ̱ܝ ܡܰܢ ܪܺܝܫ ܛܽܘܪܳܐ ܘܪܺܝܫܳܐ ܘܩܰܪܩܰܦܬܳܐ ܕܟܽܠ ܪܺܝܫܳܢܽܘܬܳܐ܆ ܫܽܘܠܛܳܢܳܐ ܟܺܝܬ ܘܚܰܝܠܳܐ^[15]܆ ܦܣܳܩܳܐ ܕܶܝܢ ܕܛܽܘܪܳܐ ܗܳܢܳܐ ܒܰܒܣܰܪ ܐܶܨܛܒܺܝ ܕܢܶܗܘܶܐ܆ ܐܰܝܟܰܢܳܐ ܕܰܐܝܟ ܫܶܬܶܐܣܬܳܐ ܢܶܬܬܣܺܝܡ ܬܚܶܝܬ ܟܽܠܶܗ ܡܽܘܠܳܝܳܐ ܕܥܺܕܬܳܐ. ܫܶܬܶܐܣܬܳܐ ܓܶܝܪ ܐܳܡܰܪ ܐ̱ܚܪܺܬܳܐ܆ ܠܳܐ ܐ̱ܢܳܫ ܡܶܫܟܰܚ ܠܰܡܣܳܡ ܠܒܰܪ ܡܶܢ ܗܳܕܶܐ ܕܣܺܝܡܳܐ܆ ܗܳܝ ܕܺܐܝܬܶܝܗ̇ ܝܶܫܽܘܥ ܡܫܺܝܚܳܐ^[16]. ܠܰܘ ܕܶܝܢ ܡܶܛܽܠ ܕܪܳܚܡܰܬ ܐ̱ܢܳܫܳܐ ܘܰܡܫܰܝܰܢܬܳܐ ܐܺܝܬܶܝܗ̇ ܡܰܚܰܬܬܶܗ ܕܡܶܠܬܳܐ܆ ܘܡܶܬܓܰܙܪܳܢܽܘܬܳܗ̇ ܕܟܺܐܦܳܐ܆ ܘܛܽܘܪܳܐ ܠܳܐ ܐܺܝܬܰܘܗ̱ܝ ܕܰܡܕܰܚܶܠ܆ ܐܶܠܳܐ ܦܫܺܝܩ ܠܡܶܬܩܰܪܒܳܢܽܘܬܳܐ. ܡܶܛܽܠܗܳܕܶܐ ܙܳܕܶܩ ܕܠܳܐ ܢܶܬܕܰܟܶܐ܆ ܘܗܳܟܰܢܳܐ ܥܰܠ ܡܶܬܩܰܪܒܳܢܽܘܬܳܐ ܢܶܬܬܟܶܠ. ܡܰܢܽܘ ܓܶܝܪ ܕܟܰܕ ܡܶܫܟܰܚ ܠܶܗ ܠܛܽܘܪܳܐ܆ ܠܰܘ ܡܩܰܒܶܠ ‌ܐܰ‌ܠܳܗܳܐ ܐܰܝܟ ܕܰܠܗܰܘ ܕܣܺܝܢܰܝ ܐܶܠܳܐ ܝܳܠܶܕ ܐܰ‌ܠܳܗܳܐ܆ ܠܳܐ ܬܳܡܰܗ ܡܶܢ ܗܳܪܟܳܐ܆ ܟܰܕ ܚܳܙܶܐ ܠܰܐܠܳܗܳܐ ܗܰܘ ܕܰܢܚܶܬ ܥܠܰܘܗ̱ܝ ܕܡܶܬܺܝܠܶܕ ܒܰܪ ܐ̱ܢܳܫܳܐ ܡܶܢܶܗ ܠܳܐ ܡܶܫܬܰܚܠܦܳܢܳܐܺܝܬ.

ܡܶܛܽܠܗܳܕܶܐ ܐܶܢܳܐ ܟܰܕ ܠܘܳܬ ܫܦܽܘ̈ܠܰܘܗ̱ܝ ܕܛܽܘܪܳܐ ܗܳܢܳܐ ܪܶܗܛܶܬ܆ ܠܘܳܬ ܬܰܪ̈ܥܝܳܬܳܐ ܐܳܡܰܪ ܐ̱ܢܳܐ ܗܳܢܶܝܢ ܕܡܶܢ ܠܒܰܪ ܘܛܰܝ̈ܳܦܳܬܳܐ܆ ܕܳܚܶܠ ‌ܐ̱ܢܳܐ ܕܰܠܓܰܘ ܐܰ݀ܕܺܝܩ ܐܰܝܟ ܕܰܒܒܶܝܬ ܩܕܽܘܫ ܩܽܘ̈ܕܫܶܐ܆ ܟܰܕ ܫܳܡܰܥ ܐ̱ܢܳܐ ܠܰܟܬܳܒܳܐ ܢܳܡܽܘܣܳܝܳܐ ܕܡܶܛܽܠ ܪܺܝܫ ܟܳܗ̈ܢܶܐ ܗܰܘ ܕܥܳܐܶܠ ܗ̱ܘܳܐ ܠܬܰܡܳܢ ܐܳܡܰܪ: ܘܢܶܣܰܒ ܦܺܝܪܡܳܐ ܕܰܡܠܶܐ ܓܽܘܡܪ̈ܶܐ ܕܢܽܘܪܳܐ ܡܶܢ ܡܰܕܒܚܳܐ ܗܰܘ ܕܰܩܕܳܡ ܡܳܪܝܳܐ܆ ܘܢܶܡܠܶܐ ܐܺܝܕܰܘ̈ܗ̱ܝ ܒܶܣ̈ܡܶܐ ܕܪܽܘܟܳܒܳܐ ܕܩܺܝܩܳܐ܆ ܘܢܶܥܽܘܠ ܠܓܰܘ ܡܶܢ ܐܰܦ̈ܰܝ ܬܰܪܥܳܐ܆ ܘܰܢܣܺܝܡ ܠܒܶܣ̈ܡܶܐ ܥܰܠ ܢܽܘܪܳܐ ܩܕܳܡ ܡܳܪܝܳܐ܆ ܘܰܢܚܰܦܶܐ ܥܶܛܪܳܐ ܗܰܘ ܕܒܶܣ̈ܡܶܐ ܠܚܽܘܣܳܝܳܐ ܗܰܘ ܕܥܰܠ ܣܳܗ̈ܕܘܳܬܳܐ܆ ܘܠܳܐ ܢܡܽܘܬ^[17].

ܙܳܕܶܩ ܓܶܝܪ ܕܢܶܬܢܰܝܰܪ ܐܰܘ ܟܺܝܬ ܢܶܬܒܚܰܪ ܒܢܰܦܫܶܗ܆ ܗܰܘ ܕܰܠܘܳܬ ܗܳܠܶܝܢ ܕܰܠܓܰܘ ܥܳܐܶܠ܆ ܒܓܽܘܡܪ̈ܶܐ ܕܢܽܘܪܳܐ ܗܳܠܶܝܢ ܕܡܶܢ ܡܰܕܒܚܳܐ ܘܰܐ‌ܠܳܗܳܝ̈ܳܬܳܐ. ܒܳܬܰܪܟܶܢ ܕܢܶܗܘܶܐ ܐܺܝܬ ܠܶܗ ܐܺܝ̈ܕܰܝܳܐ ܕܡܰܠ̣̈ܝܴܢ ܒܶܣ̈ܡܶܐ ܩܰܛܺܝ̈ܢܳܬܳܐ ܕܡܶܬܪ̈ܰܟܒܳܢ. ܝܺܕܺܝܥܳܐ ܕܶܝܢ ܕܕܰܟܝܽܘܬܳܐ ܕܣܳܥܽܘܪ̈ܘܳܬܳܐ ܕܰܡܪ̈ܰܟܒܳܢ ܒܚܽܘܕܪܳܐ ܕܰܡܝܰܬܪ̈ܳܬܳܐ܆ ܘܡܰܘܠܕܳܐ ܨܠܽܘܬܳܐ ܝܰܠܕܳܐ ܕܬܰܪܥܺܝܬܳܐ ܩܰܛܺܝܢܬܳܐ. ܐܰܝܟܰܢܳܐ ܕܟܰܕ ܗܳܘܝܳܐ ܗܳܕܶܐ ܡܚܰܠܰܛܬܳܐ ܥܰܡ ܢܽܘܪܳܐ܆ ܬܗܰܕܶܐ ܡܰܢ ܠܘܳܬ ܓܶܠ̈ܝܳܢܶܐ ܡܡܰܫ̈ܚܶܐ ܘܰܕܡܶܫܟܚܺܝܢ ܕܢܶܬܥܪܽܘܢ܆ ܠܗܳܠܶܝܢ ܕܶܝܢ ܕܰܠܥܶܠ ܡܶܢ ܚܰܝܠܳܐ ܗܰܘ ܕܒܰܢ܆ ܒܰܕܡܽܘܬ ܥܶܛܪܳܐ ܡܶܕܶܡ ܬܚܰܦܶܐ ܐܶܢܶܝܢ܆ ܒܚܽܘܣܳܝܳܐ ܕܥܰܠ ܢܰܦ̈ܫܳܬܳܐ ܕܺܝܠܰܢ܆ ܘܠܳܐ ܬܰܘܩܰܪ ܒܗܳܝ ܕܥܳܒܪܳܐ ܠܚܰܝܠܰܢ. ܡܶܛܽܠܗܳܕܶܐ ܐܶܢܳܐ ܟܰܕ ܠܳܐ ܡܛܰܝܒܳܐܺܝܬ ܐܺܝܬ ܠܺܝ ܘܠܳܐ ܕܰܟܝܳܐܺܝܬ܆ ܘܳܐܦܠܳܐ ܒܢܽܘܪܳܐ ܕܰܐܝܟ ܗܳܕܶܐ ܘܳܐܦܠܳܐ ܒܒܶܣ̈ܡܶܐ ܡܙܰܗܰܪ^[18] ܐ̱ܢܳܐ ܘܡܰܬܩܶܢ ܐ̱ܢܳܐ܆ ܠܒܰܪ ܐܶ݀ܩܽܘܡ ܘܠܳܐ ܐܶ݀ܥܰܩܶܒ ܩܰܛܺܝܢܳܐܺܝܬ ܠܗܳܠܶܝܢ ܕܰܠܓܰܘ܆ ܟܰܕ ܐܳܦܠܳܐ ܕܰܐܕܺܝܩ ܣܳܟ ܡܶܫܟܰܚ ܐ̱ܢܳܐ܆ ܘܠܰܡܫܺܝܚܳܐ ܐܶ݀ܣܓܽܘܕ ܚܽܘܣܳܝܳܐ ܗܰܘ ܕܒܳܗ̇ ܐܶܬܒܛܶܢ܆ ܘܰܢܣܰܒ ܠܰܚܛܺܝܬܶܗ ܕܥܳܠܡܳܐ.

ܟܰܕ ܗܳܠܶܝܢ ܒܪܰܡ ܡܶܬܚܰܫܰܒ ܐ̱ܢܳܐ܆ ܚܳܙܶܐ ܐ̱ܢܳܐ ܠܶܗ ܬܽܘܒ ܠܶܗ ܠܥܽܘܗܕܳܢܳܗ̇ ܕܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ܆ ܕܡܰܢܗܰܪ ܠܶܗ ܠܠܶܒܳܐ ܕܺܝܠܝ. ܘܰܕܒܰܕܡܽܘܬ ܢܽܘܪܳܐ ܡܫܰܠܗܶܒ ܠܶܗ܆ ܘܰܕܟܽܠܳܗ̇ ܒܰܣܺܝܡܽܘܬ ܪܺܝܚܳܐ ܒܰܕܡܽܘܬ ܒܶܣ̈ܡܶܐ ܡܳܠܶܐ ܠܶܗ. ܘܡܶܟܺܝܠ ‌ܐܰܝܟ ܗܰܘ ܕܰܛܥܺܝܬ ܐܶܢܳܐ ܠܺܝ ܘܰܒܬܶܡܗܳܐ ܗܘܺܝܬ܆ ܐܶܬܕܰܒܪܶܬ ܒܪܶܓܬܳܐ ܘܶܐܬܚܰܛܦܶܬ ܘܶܐܬܬܰܚܕܶܬ. ܘܟܽܠܺܝ ܠܓܰܘ ܐܺܝܬܰܝ܆ ܘܡܶܬܬܰܒܪܰܩ ܐ̱ܢܳܐ ܒܫܽܘܦܪ̈ܶܐ ܘܰܒ̈ܚܶܙܘܶܐ ܛܽܘܦܣܳܢܳܝ̈ܶܐ ܗܳܢܽܘܢ ܕܣܺܝܡܺܝܢ ܒܓܰܘ ܒܶܝܬ ܩܕܽܘܫ ܩܽܘ̈ܕܫܶܐ. ܘܡܶܬܒܰܩܶܐ ܐ̱ܢܳܐ ܒܶܗ ܒܥܰܡܰܢܽܘܐܶܝܠ܆ ܕܒܰܙ̈ܢܰܝܳܐ ܣܰܓܺܝ̈ܶܐܐ ܡܶܫܬܰܘܕܰܥ ܘܡܶܬܚܰܘܶܐ.

ܩܰܕܡܳܐܺܝܬ ܒܩܺܒܽܘܬܳܐ ܕܡܶܢ ܕܰܗܒܳܐ ܕܰܟܝܳܐ ܘܡܶܢ ܩܰܝ̈ܣܶܐ ܠܳܐ ܡܰܒܠ̈ܛܶܐ ܡܰܬܩܢܳܐ. ܟܰܕ ܗܽܘ ܕܰܗܒܳܐ ܡܶܢ ܟܽܠܕܽܘܟ ܡܶܢ ܠܓܰܘ ܟܺܝܬ ܘܡܶܢ ܠܒܰܪ ܩܪܺܝܡ ܥܰܠ ܕܰܦ̈ܶܐ^[19]܆ ܘܳܐܦ ܠܳܐ ܚܕܳܐ ܕܽܘܟܬܳܐ ܟܽܠ ܟܽܠܶܗ ܫܳܒܶܩ܆ ܥܰܪܛܶܠܳܝܬܳܐ ܘܰܕܓܰܠܝܳܐ ܡܶܢ ܫܒܺܝܚܽܘܬܳܐ ܒܰܝܬܳܝܬܳܐ ܕܺܝܠܶܗ. ܐܰܘ ܠܰܘ ܕܰܐܝܟ ܗܳܟܰܢܰܐ ܗ̱ܘ ܡܫܺܝܚܳܐ܆ ܟܰܕ ܚܰܕ ܐܺܝܬܰܘܗ̱ܝ ܡܶܢ ܬܰܪܬܶܝܢ܆ ܡܶܢ ܐܰ‌ܠܳܗܽܘܬܳܐ ܐܰܝܟ ܕܡܶܢ ܕܰܗܒܳܐ ܕܛܳܒ ܡܰܢܗܰܪ ܘܡܰܙܠܶܓ܆ ܘܡܶܢ ܐ̱ܢܳܫܽܘܬܳܐ ܠܳܐ ܡܚܰܠܰܛܬܳܐ ܕܰܚܒܳܠܳܐ ܐܰܝܟ ܕܡܶܢ ܩܰܝ̈ܣܶܐ ܠܳܐ 222ܡܰܒܠ̈ܛܶܐ܆ ܡܶܛܽܠ ܒܰܛܢܳܐ ܕܰܟܝܳܐ ܘܰܕܠܳܐ ܙܰܪܥܳܐ ܕܰܐ‌ܠܳܗܳܐ ܡܶܠܬܳܐ ܕܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܒܬܽܘܠܬܳܐ ܡܰܪܝܰܡ܆ ܕܠܰܘ ܠܒܶܣܪܳܐ ܒܰܠܚܽܘܕ ܕܠܳܐ ܢܰܦܫܳܐ ܚܰܝܶܕ ܗܽܘ ܠܶܗ܆ ܐܶܠܳܐ ܠܕܰܡܢܰܦܰܫ ܒܢܰܦܫܳܐ ܡܶܬܗܰܘܢܳܢܺܝܬܳܐ. ܗܳܕܶܐ ܓܶܝܪ ܐܺܝܬܶܝܗ̇ ܗܳܝ ܕܕܰܗܒܳܐ ܩܪܺܝܡ ܗ̱ܘܳܐ ܥܰܠ ܩܰܝ̈ܣܶܐ ܡܶܢ ܠܓܰܘ ܟܺܝܬ ܘܡܶܢ ܠܒܰܪ.

ܘܰܚܙܺܝ ܠܺܝ܆ ܐܳܦ ܒܗܳܝ ܠܚܰܬܺܝܬܽܘܬܶܗ ܕܛܽܘܦܣܳܐ. ܐܰܟܙܢܳܐ ܓܶܝܪ ܕܩܰܝܣܳܐ ܗܰܘ ܠܳܐ 222ܡܒܰܠܛܳܐ܆ ܩܰܝܣܳܐ ܡܰܢ ܐܺܝܬܰܘܗ̱ܝ ܒܰܟܝܳܢܳܐ܆ ܘܰܠܗܳܢܽܘܢ ܩܰܝ̈ܣܶܐ ܐ̱ܚܪ̈ܳܢܶܐ ܕܫܰܪܟܳܐ ܕܰܒܒܶܠܛܺܝܬܳܐ ܒܳܩܺܝܢ ܘܡܶܬܛܰܠܩܺܝܢ ܫܘܶܐ ܒܓܶܢܣܳܐ ܘܰܫܘܶܐ ܒܽܐܘܣܺܝܰܐ ܐܺܝܬܰܘܗ̱ܝ܆ ܒܰܠܚܽܘܕ ܕܶܝܢ ܗܳܝ ܕܠܳܐ ܡܰܒܠܰܛ ܐܺܝܬ ܠܶܗ ܕܺܝܠܳܝܬܳܐ ܘܺܝܕܺܝܥܬܳܐ܆ ܗܳܟܰܢܳܐ ܐܳܦ ܒܶܣܪܶܗ ܕܰܡܫܺܝܚܳܐ ܗܰܘ ܕܰܡܠܺܝܠܳܐܺܝܬ ܐܶܬܢܰܦܰܫ܆ ܫܘܶܐ ܒܓܶܢܣܳܐ ܡܰܢ ܠܰܢ ܘܕܺܝܠܶܗ ܟܰܕ ܕܺܝܠܶܗ ܕܰܟܝܳܢܳܐ ܐܺܝܬܰܘܗ̱ܝ ܗ̱ܘܳܐ ܘܰܫܘܶܐ ܒܽܐܘܣܺܝܰܐ܆ ܥܰܬܺܝܪ ܗ̱ܘܳܐ ܕܶܝܢ ܗܳܝ ܕܗܽܘ ܒܰܠܚܽܘܕܰܘܗ̱ܝ ܢܶܗܘܶܐ ܐܺܝܬܰܘܗ̱ܝ ܒܰܪ ܚܺܐܪ̈ܶܐ ܘܠܳܐ ܡܶܬܓܰܫܦܳܢܳܐ ܡܶܢ ܚܒܳܠܳܐ ܗܰܘ ܕܡܶܢ ܚܛܺܝܬܳܐ܆ ܒܗܳܝ ܕܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܒܬܽܘܠܬܳܐ ܐܶܬܒܛܶܢ ܘܶܐܬܚܰܝܰܕ ܠܡܶܠܬܳܐ܆ ܗܰܘ ܕܰܚܛܺܝܬܳܐ ܠܳܐ ܥܒܰܕ܆ ܐܳܦܠܳܐ ܐܶܫܬܟܰܚ ܢܶܟܠܳܐ ܒܦܽܘܡܶܗ^[20]. ܒܪܰܡ ܐܰܝܟܰܢܳܐ ܕܩܰܝ̈ܣܶܐ ܗܳܢܽܘܢ ܕܩܺܒܽܘܬܳܐ ܡܶܢ ܒܶܠܛܺܝܬܳܐ ܡܰܢ ܡܝܰܬܪܺܝܢ ܗ̱ܘܰܘ ܘܰܡܚܰܪܪܺܝܢ܆ ܕܢܶܬܦܰܣܩܽܘܢ ܕܶܝܢ ܡܟܳܢܺܝܢ ܗ̱ܘܰܘ ܘܰܕܢܺܐܩܕܽܘܢ܆ ܒܶܗ ܟܰܕ ܒܶܗ ܒܰܙܢܳܐ ܐܳܦ ܦܰܓܪܶܗ ܗܰܘ ܕܟܶܐ ܒܟܽܠ ܕܰܡܫܺܝܚܳܐ܆ ܕܰܚܛܺܝܬܳܐ ܡܰܢ ܘܕܰܚܒܳܠܳܐ ܗܰܘ ܕܡܶܢ ܗܳܕܶܐ ܠܳܐ ܡܫܰܘܬܦܳܐ ܐܺܝܬܰܘܗ̱ܝ ܗ̱ܘܳܐ܆ ܡܩܰܒܠܳܢܳܐ ܕܶܝܢ ܒܪܰܡ ܕܢܶܓ̈ܕܶܐ ܘܰܕܡܰܚ̈ܘܳܬܳܐ ܘܕܰܦܣܳܩܳܐ ܘܰܕܡܰܘܬܳܐ܆ ܘܰܕܚܰܫ̈ܶܐ ܗܳܢܽܘܢ ܕܕܳܡܶܝܢ ܠܗܳܠܶܝܢ. ܐܶ‌ܠܽܘ ܓܶܝܪ ܠܰܘ ܗܳܟܰܢܳܐ ܐܺܝܬ ܗ̱ܘܳܐ ܠܶܗ܆ ܠܳܐ ܣܳܒܶܠ ܗ̱ܘܳܐ ܢܶܣܝܳܢܳܐ ܕܡܰܘܬܳܐ܆ ܗܰܘ ܕܒܶܗ ܫܪܳܐ ܠܗܰܘ ܕܽܐܘܚܕܳܢܳܐ ܕܡܰܘܬܳܐ ܐܺܝܬ ܗ̱ܘܳܐ ܠܶܗ^[21]܆ ܘܟܰܕ ܥܕܰܡܳܐ ܠܰܩܒܽܘܪܬܳܐ ܘܰܠܡܰܚܰܬܬܳܐ ܕܠܰܫܝܽܘܠ ‌ܐܶܬܳܐ܆ ܘܟܰܕ ܠܳܐ ܝܺܕܰܥ^[22] ܐܳܦܠܳܐ ܠܰܚܒܳܠܳܐ ܗܰܘ ܕܡܶܢ ܗܳܪܟܳܐ܆ ܒܝܰܕ ܩܝܳܡܬܳܐ ܐܰ‌ܠܳܗܳܝܬܳܐ ܕܡܶܢ ܒܶܝܬ ܡܺܝ̈ܬܶܐ. ܠܳܐ ܓܶܝܪ ܐܶܫܬܰܒܩܰܬ ܢܰܦܫܶܗ ܒܰܫܝܽܘܠ܆ ܐܳܦܠܳܐ ܒܶܣܪܶܗ ܚܙܳܐ ܚܒܳܠܳܐ^[23]܆ ܐܰܝܟ ܕܰܟܬܺܝܒ. ܐܰܝܟܰܢܳܐ ܟܺܝܬ ܕܰܒܝܰܕ ܟܽܠܗܶܝܢ܆ ܠܳܐ ܡܶܬܚܰܒܠܳܢܳܐ ܐܶܬܚܰܘܺܝ ܦܰܓܪܶܗ ܕܰܡܫܺܝܚܳܐ. ܕܠܰܚܒܳܠܳܐ ܡܰܢ ܗܰܘ ܕܡܶܢ ܚܛܺܝܬܳܐ܆ ܕܟܽܠ ܟܽܠܶܗ ܠܳܐ ܡܶܬܟܰܒܫܳܢܳܐ. ܕܗܰܘ ܕܶܝܢ ܕܡܶܢ ܡܰܘܬܳܐ ܘܡܶܢ ܩܒܽܘܪܬܳܐ܆ ܡܩܰܒܠܳܢܳܐ ܡܰܢ܆ ܕܒܶܗ ܕܶܝܢ ܫܪܳܝܗ̱ܝ ܘܠܳܐ ܐܶܬܠܒܶܟ ܡܶܢܶܗ܆ ܡܶܛܽܠ ܚܕܳܝܽܘܬܳܐ ܗܳܝ ܕܰܠܘܳܬ ܡܶܠܬܳܐ܆ ܕܗܰܘ ܕܒܰܟܝܳܢܳܐ ܐܺܝܬܰܘܗ̱ܝ܆ ܠܳܐ ܡܶܬܚܰܒܠܳܢܳܐ ܘܠܳܐ ܚܳܫܽܘܫܳܐ ܘܠܳܐ ܡܳܝܽܘܬܳܐ.

ܒܗܳܝ ܕܶܝܢ܆ ܥܪܽܘܩ ܡܶܢ ܦܽܘܚܳܡܳܐ ܗܰܘ ܕܡܶܢ ܩܺܒܽܘܬܳܐ ܘܡܶܢ ܕܽܘܡܝܳܐ ܗܰܘ ܕܰܠܘܳܬܳܗ̇. ܠܰܘ ܓܶܝܪ ܐܰܟܙܢܳܐ ܕܕܰܗܒܳܐ ܕܟܰܕ ܐܶܬܦܠܰܚ ܕܰܒܺܝܩ ܗ̱ܘܳܐ ܒܗܽܘܢ ܒܩܰܝ̈ܣܶܐ܆ ܐܳܦ ܡܶܠܬܳܐ ܕܰܐ‌ܠܳܗܳܐ ܗܳܟܰܢܳܐ ܡܚܰܝܰܕ ܗ̱ܘܳܐ ܠܒܶܣܪܳܐ. ܐܳܦ ܓܶܝܪ ܡܚܺܝܠܳܐ ܗ̱ܝ܆ ܘܠܳܐ ܡܶܫܟܚܳܐ ܟܡܳܐ ܟܡܳܐ ܛܶܠܳܢܺܝܬܳܐ ܕܰܒܛܽܘܦܣܳܐ܆ ܕܰܒܝܰܕ ܟܽܠܗܶܝܢ ܬܝܰܩܢܺܝܘܗ̱ܝ ܠܰܫܪܳܪܳܐ. ܘܡܶܢ ܚܰܬܺܝܬܽܘܬܳܐ ܦܳܝܫܳܐ܆ ܟܰܕ ܩܳܕܡܳܐ ܡܚܰܘܝܳܐ ܒܰܠܚܽܘܕ ܫܽܘܘ̈ܕܳܥܶܐ ܡܶܕܶܡ ܕܕܽܘܡܝܳܐ.

ܕܰܚܕܳܝܽܘܬܳܐ ܓܶܝܪ ܗܳܝ ܐܰ‌ܠܳܗܳܝܬܳܐ ܕܥܰܠ ܥܰܡܰܢܽܘܐܶܝܠ܆ ܝܽܘܩܢܳܐ ܐ̱ܚܪܺܢܳܐ ܝܳܗܶܒ ܠܰܢ ܦܰܘܠܽܘܤ ܟܰܕ ܐܳܡܰܪ: ܡܶܛܽܠ ܗܳܟܺܝܠ ܕܰܛܠܳܝ̈ܶܐ ܐܶܫܬܰܘܬܰܦܘ ܒܰܕܡܳܐ ܘܰܒܒܶܣܪܳܐ܆ ܐܳܦ ܗܽܘ ܒܳܗ̇ ܒܰܕܡܽܘܬܳܐ ܐܶܫܬܰܘܬܰܦ ܒܗܽܘܢ ܟܰܕ ܒܗܽܘܢ^[24]. ܐܰܝܟܰܢܳܐ ܟܺܝܬ ܕܡܳܕܶܝܢ ܡܶܠܬܳܐ ܕܰܐ‌ܠܳܗܳܐ܆ ܒܶܗ ܟܰܕ ܒܶܗ ܒܰܙܢܳܐ ܠܰܢ܆ ܐܶܫܬܰܘܬܰܦ ܒܰܕܡܳܐ ܘܰܒܒܶܣܪܳܐ. ܝܺܕܺܝܥܳܐ ܕܶܝܢ ܕܒܰܟܢܺܝܫܽܘܬܳܐ ܗܳܝ ܕܒܰܟܝܳܢܳܐ ܘܒܰܩܢܽܘܡܳܐ܆ ܐܰܝܟ ܕܺܐܝܬ ܠܡܶܚܙܳܐ܆ ܕܰܡܚܰܝܕܳܐ ܠܦܰܓܪܳܐ ܢܰܦܫܳܐ ܕܺܝܠܰܢ ܕܠܳܐ ܒܽܘܠܒܳܠܳܐ.

ܐܶܠܳܐ ܬܽܘܒ ܕܰܒܬܶܐܽܘܪܺܝܰܐܤ ܕܩܺܒܽܘܬܳܐ ܐܶ݀ܬܥܢܶܐ܆ ܩܶܣܛܳܐ ܕܕܰܗܒܳܐ ܗܳܝ ܕܺܐܝܬ ܗ̱ܘܳܐ ܒܳܗ̇ ܡܰܢ̱ܢܳܐ ܩܳܪܝܳܐ ܠܺܝ ܘܰܠܘܳܬܳܗ̇ ܢܳܓܕܳܐ ܠܺܝ܆ ܟܕ ܙܰܠܺܝ̈ܩܶܐ ܡܶܕܶܡ ܡܶܬܗܰܘ̈ܢܳܢܶܐ ܡܫܰܕܪܳܐ܆ ܘܝܽܘܩܢܳܐ ܐ̱ܚܪܺܢܳܐ ܕܥܰܡܰܢܽܘܐܶܝܠ ܡܨܰܠܦܳܐ ܡܚܰܘܝܳܐ ܠܺܝ. ܐܰܟܙܢܳܐ ܓܶܝܪ ܕܨܰܝܳܪܳܐ܆ ܨܳܝܪܳܐ ܬܶܫܡܶܫܬܳܐ ܗܳܝ ܢܳܡܽܘܣܳܝܬܳܐ ܒܝܰܕ ܟܽܠܚܰܕ ܛܽܘܦܣܳܐ ܒܺܐܝܕܳܐ ܒܺܐܝܕܳܐ ܐܰܝܟ ܕܥܰܠ ܕܰܦܳܐ܆ ܠܟܽܠܳܗ̇ ܡܕܰܒܪܳܢܽܘܬܳܐ ܕܡܶܐܬܺܝܬܳܐ ܕܒܰܒܣܰܪ ܕܰܡܫܺܝܚܳܐ܆ ܟܰܕ ܬܶܐܽܘܪܺܝܰܐ ܐ̱ܚܪܺܬܳܐ ܡܶܢ ܐ̱ܚܪܺܢܳܐ ܡܶܬܟܰܢܫܳܐ܆ ܘܠܳܐ ܣܳܦܶܩ ܚܰܕ ܕܰܢܚܰܘܶܐ ܠܟܽܠ ܡܶܕܶܡ.

ܟܰܕ ܓܶܝܪ ܡܶܢ ܫܡܰܝܳܐ ܐܰܝܟ ܡܶܛܪܳܐ ܢܚܶܬ ܗ̱ܘܳܐ ܡܰܢ̱ܢܳܐ܆ ܘܰܒܩܶܣܛܳܐ ܗܳܝ ܕܡܶܢ ܠܬܰܚܬ ܐܶܬܚܰܫܠܰܬ ܡܶܬܚܒܶܫ ܗ̱ܘܳܐ܆ ܡܰܘܕܰܥ ܗ̱ܘܳܐ ܠܡܶܠܬܶܗ ܕܰܐ‌ܠܳܗܳܐ ܗܰܘ ܕܡܶܢ ܫܡܰܝܳܐ ܢܳܚܶܬ ܗ̱ܘܳܐ܆ ܘܠܰܘ ܡܶܢ ܠܥܶܠ ܛܥܺܝܢ^[25] ܗ̱ܘܳܐ ܒܶܣܪܳܐ܆ ܐܶܠܳܐ ܡܶܢ ܠܬܰܚܬ ܘܡܶܢܰܢ ܠܳܐ ܡܶܫܬܰܚܠܦܳܢܳܐܺܝܬ ܡܶܬܒܰܣܰܪ. ܘܥܰܠ ܩܺܒܽܘܬܳܐ ܡܰܢ܆ ܩܰܝ̈ܣܶܐ ܡܰܢ ܛܽܘܦܣܳܐ ܕܦܰܓܪܳܐ ܡܡܰܠܶܝܢ ܗ̱ܘܰܘ. ܕܰܗܒܳܐ ܕܶܝܢ ܕܰܐ‌ܠܳܗܽܘܬܳܐ. ܗܳܪܟܳܐ ܕܶܝܢ܆ ܗܳܝ ܕܰܠܩܽܘܒܠܳܐ. ܩܶܣܛܳܐ ܡܰܢ ܗܳܝ ܕܕܰܗܒܳܐ܆ ܬܰܚܘܺܝܬܳܐ ܕܦܰܓܪܳܐ ܡܚܰܘܝܳܐ. ܡܰܢܢܳܐ ܕܶܝܢ ܠܗܳܝ ܕܰܐ‌ܠܳܗܳܐ ܡܶܠܬܳܐ. ܟܰܕ ܗܳܕܶܐ ܡܰܘܕܥܳܐ ܗ̱ܘܳܬ ܘܪܳܡܙܳܐ ܗܺܝ ܦܶܠܶܐܬܳܐ܆ ܕܰܡܫܺܝܚܳܐ ܡܶܢ ܒܳܬܰܪ ܕܩܰܪܶܒ ܗܽܘ ܠܶܗ ܚܠܳܦܰܝܢ ܠܪܺܝܚܳܐ ܒܰܣܺܝܡܳܐ ܕܶܒܚܬܳܐ ܘܩܽܘܪܒܳܢܳܐ ܠܰܐܠܳܗܳܐ^[26]܆ ܘܩܳܡ ܡܶܢ ܒܶܝܬ ܡܺܝ̈ܬܶܐ܆ ܘܰܒܗܳܕܶܐ ܐܶܫܬܰܡܰܗ ܡܶܟܺܝܠ ܠܰܚܡܳܐ ܫܡܰܝܳܢܳܐ܆ ܠܚܰܝ̈ܶܐ ܕܺܝܠܰܢ ܘܠܰܢܣܺܝܒܽܘܬܳܐ܆ ܠܳܐ ܬܽܘܒ ܐܺܝܬ ܗ̱ܘܳܐ ܠܶܗ ܦܰܓܪܳܐ ܕܰܡܫܰܥܒܰܕ ܠܟܽܘܪ̈ܗܳܢܶܐ ܐ̱ܢܳܫܳܝ̈ܶܐ܆ ܐܰܘ ܡܩܰܒܠܳܢܳܐ ܕܗܳܠܶܝܢ ܕܕܰܐܝܟ ܗܳܟܰܢ܆ ܕܟܰܦܢܳܐ ܐܳܡܰܪ ܐ̱ܢܳܐ ܘܰܕܠܶܐܘܬܳܐ ܘܰܕܨܶܗܝܳܐ ܘܰܕܢܶܓ̈ܕܶܐ. ܡܡܰܠܝܳܐ ܗ̱ܘܳܬ ܓܶܝܪ ܡܕܰܒܪܳܢܽܘܬܳܐ܆ ܗܳܝ ܕܡܶܛܽܠܳܬܳܗ̇ ܗܳܠܶܝܢ ܨܶܒܝܳܢܳܐܺܝܬ ܣܰܝܒܰܪ. ܐܶܠܳܐ ܟܽܠܶܗ ܐܰܝܟ ܐܰܝܢܳܐ ܕܰܕܕܰܗܒܳܐ ܗܰܘ ܩܰܕܺܝܫܳܐ ܡܰܥܒܶܕ ܚܰܝ̈ܶܐ܆ ܠܳܐ ܡܶܬܥܰܛܝܳܢܳܐ ܠܳܐ ܚܳܫܽܘܫܳܐ ܐܰܝܟ ܦܰܓܪܳܐ ܕܰܐ‌ܠܳܗܳܐ ܘܰܕܚܰܝ̈ܶܐ ܕܒܰܟܝܳܢܳܐ܆ ܘܕܰܒܫܽܘܒܚܳܐ ܗܰܘ ܕܰܦܐܶܐ ܠܰܐܠܳܗܳܐ ܡܗܰܕܰܪ. ܘܠܰܘ ܟܰܕ ܫܰܢܺܝ ܘܶܐܫܬܰܚܠܰܦ ܠܰܟܝܳܢܳܐ ܕܰܐ‌ܠܳܗܽܘܬܳܐ܆ ܐܶܠܳܐ ܟܰܕ ܩܰܘܺܝ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܗܰܘ ܕܒܶܗ ܐܳܦ ܢܶܬܚܙܶܐ ܐܰܝܟ ܕܰܟܬܺܝܒ ܡܶܢ ܗܳܢܽܘܢ ܕܕܰܩܪܽܘܗ̱ܝ^[27]܆ ܟܰܕ ܡܶܢ ܫܡܰܝܳܐ ܬܽܘܒ ܐܳܬܶܐ. ܘܗܳܕܶܐ ܐܺܝܬܶܝܗ̇ ܗ̱ܘܳܬ ܗܳܝ ܕܳܐܡܰܪ ܗ̱ܘܳܐ ܦܰܘܠܽܘܤ: ܐܶܢ ܕܶܝܢ ܘܺܝܕܰܥܢ ܒܰܒܣܰܪ ܠܰܡܫܺܝܚܳܐ܆ ܐܶܠܳܐ ܗܳܫܳܐ ܠܳܐ ܬܽܘܒ ܝܳܕܥܺܝܢ ܚ̱ܢܰܢ^[28].

ܐܶܠܳܐ ܟܰܕ ܒܩܺܒܽܘܬܳܐ ܡܰܟܪܶܟ ܐ̱ܢܳܐ ܠܥܰܝܢܳܐ ܕܺܝܠܝ܆ ܚܳܙܶܐ ܐ̱ܢܳܐ ܠܠܽܘܚ̈ܶܐ ܗܳܠܶܝܢ ܢܳܡܽܘܣܳܝ̈ܳܬܳܐ ܕܣܺܝ̈ܡܳܢ ܒܳܗ̇܆ ܘܰܠܚܽܘܛܪܳܐ ܕܰܐܗܪܽܘܢ ܗܰܘ ܕܡܶܢ ܒܳܬܰܪ ܕܝܰܒܺܝܫ ܗ̱ܘܳܐ ܬܡܺܝܗܳܐܺܝܬ ܐܰܦܪܰܥ ܘܦܺܐܪ̈ܶܐ ܕܓܰܘ̈ܙܶܐ ܐܰܘܥܺܝ^[29]. ܟܰܕ ܗܳܕܶܐ ܡܰܘܕܥܳܐ ܡܶܠܬܳܐ܆ ܕܰܡܫܺܝܚܳܐ ܐܰܟܙܢܳܐ ܕܩܺܒܽܘܬܳܐ܆ ܟܰܕ ܗܽܘ ܒܶܗ ܚܳܒܶܫ ܠܢܳܡܽܘܣܳܐ ܘܰܠܟܳܗܢܽܘܬܳܐ ܗܳܝ ܕܠܶܘܳܝ̈ܶܐ܆ ܚܰܦܺܝ ܐܶܢܽܘܢ. ܘܟܰܕ ܐܶܬܡܚܶܠܘ ܗܳܠܶܝܢ ܡܶܢ ܟܰܕܽܘ ܘܺܝܒܶܫܘ܆ ܕܢܰܝܬܽܘܢ ܦܺܐܪ̈ܶܐ ܒܝܰܕ ܦܶܩܚܳܐ^[30] ܕܕܽܘܒܳܪܳܐ ܐܶܘܰܢܓܶܠܳܝܳܐ ܥܒܰܕ ܐܶܢܽܘܢ. ܡܶܛܽܠܳܬܳܗ̇ ܟܺܝܬ ܕܗܳܕܶܐ ܐܳܦ ܐܳܡܰܪ ܗ̱ܘܳܐ: ܕܠܳܐ ܬܰܣܒܪܽܘܢ ܕܶܐܬܺܝܬ ܕܶܐ݀ܫܪܶܐ ܠܢܳܡܽܘܣܳܐ ܐܰܘ ܠܰܢܒܺܝ̈ܶܐ. ܠܳܐ ܐܶܬܺܝܬ ܕܶܐ݀ܫܪܶܐ ܐܶܠܳܐ ܕܶܐ݀ܡܰܠܶܐ^[31]. ܡܳܢܳܐ ܕܶܝܢ ܐܺܝܬܰܝܗܽܘܢ ܗ̱ܘܰܘ ܦܺܐܪ̈ܶܐ. ܓܰܘ̈ܙܶܐ. ܘܛܳܒ ܟܺܐܢܳܐܺܝܬ. ܕܚܽܘܛܪܳܐ ܓܶܝܪ ܢܳܡܽܘܣܳܝܳܐ ܘܪܳܕܽܘܝܳܐ܆ ܐܺܝܬܰܘܗ̱ܝ ܦܺܐܪܳܐ ܓܰܘܙܳܐ. ܩܠܳܦܬܳܐ ܕܶܝܢ ܕܓܰܘܙܳܐ ܗܳܝ ܕܡܶܢ ܠܒܰܪ ܐܺܝܬ ܠܶܗ ܒܰܐܦܰܘ̈ܗ̱ܝ܆ ܡܨܰܪܦܳܢܺܝܬܳܐ ܟܡܳܐ ܟܡܳܐ ܐܺܝܬܶܝܗ̇ ܘܚܰܪܺܝܦܬܳܐ. ܗܳܝ ܕܶܝܢ ܕܒܳܬܰܪ ܗܳܕܶܐ܆ ܚܠܺܝܡܬܳܐ ܘܰܩܫܺܝܬܳܐ. ܬܰܪ̈ܬܰܝܗܶܝܢ ܕܶܝܢ ܗܳܠܶܝܢ ܚܳܒ̈ܫܳܢ ܠܶܗ ܠܗܰܘ ܪܰܟܺܝܟܳܐ ܘܕܺܐܝܬܰܘܗ̱ܝ ܥܳܗܢܳܐ ܠܡܶܐܟܽܘܠܬܳܐ ܘܰܠܒܽܘܣܳܡܳܐ. ܟܽܠ ܓܶܝܪ ܡܰܪܕܽܘܬܳܐ ܐܰܝܟ ܡܶܠܬܶܗ ܕܦܰܘܠܽܘܤ ܒܙܰܒܢܳܐ ܡܰܢ ܕܗܳܫܳܐ܆ ܠܳܐ ܡܶܣܬܰܒܪܳܐ ܕܺܐܝܬܶܝܗ̇ ܕܚܰܕܽܘܬܳܐ. ܐܶܠܳܐ ܕܥܳܩܬܳܐ. ܠܚܰܪܬܳܐ ܕܶܝܢ܆ ܦܺܐܪܳܐ ܡܫܰܝܢܳܐ ܕܙܰܕܺܝܩܽܘܬܳܐ ܝܳܗܒܳܐ ܠܗܳܢܽܘܢ ܕܒܺܐܝ̈ܕܶܝܗ̇ ܐܶܬܕܰܪܰܫܘ^[32]. ܟܰܕ ܚܰܪܺܝܦܬܳܐ ܡܰܢ ܡܶܕܶܡ ܐܺܝܬܶܝܗ̇ ܘܰܟܡܺܝܪܬܳܐ ܡܶܛܽܠ ܥܰܡ̈ܠܶܐ܆ ܠܗܰܘ ܡܳܐ ܕܶܝܢ ܕܰܒܪܶܚܡܰܬ ܥܰܡܠܳܐ ܐܶܬܩܢܺܝ ܚܠܺܝܡܳܐܺܝܬ ܡܶܢ ܟܽܠܕܽܘܟ ܢܳܛܪܳܐ܆ ܘܗܳܟܰܢܳܐ ܥܰܡ ܡܫܰܠܛܽܘܬܳܐ ܡܶܢ ܗܰܘ ܡܳܐ ܕܶܐܬܩܢܺܝ ܡܶܬܡܰܠܝܳܐ ܘܡܶܬܒܰܣܡܳܐ.

ܘܳܐܦ ܗܽܘ ܕܶܝܢ ܚܽܘܛܪܳܐ ܗܰܘ ܕܰܐܦܪܰܥ ܡܶܢܶܗ ܘܠܶܗ܆ ܡܶܛܽܠ ܥܰܬܺܝܪܽܘܬܳܐ ܘܰܫܦܺܝܥܽܘܬܳܐ ܕܣܽܘ̈ܟܳܠܶܐ ܪ̈ܽܘܚܳܢܳܝܶܐ܆ ܐ̱ܚܪܳܢܝܳܐܺܝܬ ܩܰܕܶܡ ܡܫܰܘܕܰܥ ܠܰܢ ܠܰܡܫܺܝܚܳܐ܆ ܠܗܰܘ ܕܡܶܢ ܐܺܝܫܰܝ ܘܡܶܢ ܕܰܘܺܝܕ ܐܰܘܥܺܝ ܒܰܒܣܰܪ܆ ܗܰܘ ܕܒܶܗ ܓܶܢܣܳܐ ܕܺܝܠܰܢ ܗܰܘ ܕܰܚܡ̣ܳܐ ܡܶܢ ܚܛܺܝܬܳܐ܆ ܗܰܒܶܒ ܘܰܐܦܪܰܥ ܘܶܐܬܳܐ ܠܩܰܘܡܬܳܐ. ܗܰܘ ܕܡܶܛܽܠܳܬܶܗ ܟܰܕ ܡܶܬܢܰܒܶܐ ܐܶܫܰܥܝܳܐ ܐܳܡܰܪ ܗ̱ܘܳܐ: ܢܶܦܽܘܩ ܚܽܘܛܪܳܐ ܡܶܢ ܥܶܩܳܪܳܐ ܕܺܐܝܫܰܝ܆ ܘܦܶܪܥܳܐ^[33] ܡܶܢ ܥܶܩܳܪܳܐ ܢܶܣܰܩ^[34].

ܐܳܦ ܚܽܘܣܳܝܳܐ ܡܰܢ ܬܽܘܒ ܗܰܘ ܕܰܠܥܶܠ ܡܶܢ ܩܺܒܽܘܬܳܐ ܣܺܝܡ ܗ̱ܘܳܐ܆ ܗܰܘ ܕܰܥܠܰܘܗ̱ܝ ܡܶܢ ܗܳܢܽܘܢ ܕܰܒܢܳܡܽܘܣܳܐ ܡܟܰܗܢܺܝܢ ܗ̱ܘܰܘ ܘܠܳܐ ܐ̱ܢܳܫ ܟܰܗܶܢ܆ ܘܳܐܦܠܳܐ ܕܡܳܐ ܣܳܟ ܐܶܫܰܕ ܥܠܰܘܗ̱ܝ܆ ܗܰܘ ܕܰܒܓܶܦ̈ܶܐ ܕܰܟܪ̈ܽܘܒܶܐ ܡܶܬܚܰܦܶܐ ܗ̱ܘܳܐ ܡܶܢ ܬܪ̈ܰܝܗܽܘܢ ܓܰܒ̈ܶܐ܆ ܠܰܡܫܺܝܚܳܐ ܡܫܰܘܕܰܥ ܓܰܠܝܳܐܺܝܬ܆ ܗܰܘ ܕܩܰܕܶܡ ܣܳܡܶܗ ܐܰ‌ܠܳܗܳܐ ܚܽܘܣܳܝܳܐ ܒܝܰܕ ܗܰܝܡܳܢܽܘܬܳܐ ܒܰܕܡܳܐ ܕܺܝܠܶܗ^[35] ܐܰܝܟܰܢܳܐ ܕܦܰܘܠܽܘܤ ܐܳܡܰܪ. ܕܰܠܥܶܠ ܡܶܢ ܩܺܒܽܘܬܳܐ ܡܰܢ ܣܺܝܡ ܗ̱ܘܳܐ܆ ܘܡܶܢ ܗܳܪܟܳܐ ܡܫܰܘܕܰܥ ܗ̱ܘܳܐ܆ ܕܟܽܠܳܗ̇ ܡܶܠܬܳܐ ܕܡܶܐܬܺܝܬܳܐ ܕܒܰܒܣܰܪ ܐܰܘܟܺܝܬ ܕܰܡܕܰܒܪܳܢܽܘܬܳܐ܆ ܠܘܳܬ ܗܳܕܶܐ ܡܶܬܥܰܠܝܳܐ ܗ̱ܘܳܬ ܘܰܐܟܚܕܳܐ ܡܶܬܡܰܠܝܳܐ ܗ̱ܘܳܬ܆ ܠܘܳܬ ܗܳܝ ܕܢܶܗܘܶܐ ܐܰܝܟ ܕܰܟܬܺܝܒ ܚܽܘܣܳܝܳܐ ܡܶܛܽܠ ܚ̈ܛܳܗܰܝܢ܆ ܠܟܳܗ̈ܢܶܐ ܕܶܝܢ ܠܳܐ ܡܶܬܓܰܫܫܳܢܳܐ܆ ܡܶܛܽܠ ܟܺܝܬ ܕܳܐܦܠܳܐ ܕܐ̱ܢܳܫ ܡܶܢ ܒܢܰܝ̈ܢܳܫܳܐ ܐܺܝܬܶܝܗ̇ ܗ̱ܘܳܬ܆ ܐܶܠܳܐ ܕܺܝܠܶܗ܆ ܗܳܝ ܕܰܢܩܰܪܶܒ ܗܽܘ ܠܶܗ܆ ܗܳܝ ܕܳܐܦ ܥܒܰܕ܆ ܟܰܕ ܚܕܳܐ ܙܒܰܢ ܐܶܬܩܰܪܰܒ܆ ܡܶܛܽܠ ܗܳܝ 222ܕܢ݀ܣܩ^[36] ܚ̈ܛܳܗܶܐ ܕܣܰܓܺܝ̈ܶܐܐ^[37]. ܚܢܰܢ ܓܶܝܪ ܗܳܫܳܐ ܟܰܕ ܡܟܰܗܢܺܝܢ ܚ̱ܢܰܢ܆ ܠܰܘ ܒܩܰܕܺܝܡܽܘܬ ܛܽܘܦܣܳܐ ܕܳܒܚܺܝܢ ܚ̱ܢܰܢ ܠܶܗ܆ ܐܶܠܳܐ ܥܽܘܗܕܳܢܳܐ ܕܕܶܒܚܬܳܐ ܗܳܝ ܕܡܶܢܶܗ ܐܶܬܩܰܪܒܰܬ܆ ܒܝܰܕ ܗܳܠܶܝܢ ܕܐ̱ܪܳܙܳܢܳܐܺܝܬ ܡܶܣܬܰܥܪ̈ܳܢ ܡܫܰܡܠܶܝܢ ܚ̱ܢܰܢ. ܗܳܝ ܕܶܝܢ ܕܡܶܢ ܟܪ̈ܽܘܒܶܐ ܢܶܗܘܶܐ ܡܶܬܛܰܠܰܠ܆ ܘܳܐܦ ܟܰܕ ܗܘ̣ܳܐ ܚܽܘܣܳܝܳܐ ܡܕܰܒܪܳܢܳܐܺܝܬ܆ ܐܰܝܟܰܢܳܐ ܠܰܘ ܢܰܗܺܝܪܳܐܺܝܬ ܡܚܰܘܝܳܐ܆ ܕܰܐ‌ܠܳܗܳܐ ܐܺܝܬܰܘܗ̱ܝ ܐܳܦ ܟܰܕ ܚܰܫ ܒܰܒܣܰܪ ܚܠܳܦܰܝܢ܆ ܕܚܺܝܠܳܐ ܘܠܳܐ ܡܶܬܩܰܪܒܳܢܳܐ ܠܚܰܝ̈ܠܰܘܳܬܳܐ ܕܰܠܥܶܠ ‌ܐܰܝܟ ܕܳܐܦ ܩܕܳܡ ܚܰܫܳܐ܆ ܘܝܰܬܺܝܪܳܐܺܝܬ ܡܝܰܩܪܳܐ ܘܰܣܓܺܝܕܳܐ܆ ܡܶܛܽܠ ܡܶܬܓܰܠܝܳܢܽܘܬܳܐ ܕܚܶܟܡܬܳܐ ܗܳܝ ܣܰܓܺܝܰܐܬ̣ ܡܦܰܬܟܽܘܬܳܐ^[38] ܕܰܐܝܟ ܦܰܘܠܽܘܤ ܢܺܐܡܰܪ: ܗܳܝ ܕܥܰܠ ܦܽܘܪܩܳܢܳܐ ܕܺܝܠܰܢ.

ܐܶܠܳܐ ܟܰܕ ܗܳܠܶܝܢ ܐܳܡܰܪ ܐ̱ܢܳܐ܆ ܚܳܙܶܐ ܐ̱ܢܳܐ ܠܶܗ ܠܥܶܛܪܳܐ ܗܰܘ ܕܒܶܣ̈ܡܶܐ ܕܡܶܬܬܪܺܝܡ ܘܡܶܬܥܰܠܶܐ ܠܥܶܠ܆ ܘܰܡܚܰܦܶܐ ܠܳܗ̇ ܠܢܰܗܺܝܪܽܘܬܳܐ ܕܢܽܘܪܳܐ. ܘܰܡܥܰܡܶܛ ܠܗܶܝܢ ܠܥܰܝ̈ܢܰܝ܆ ܘܟܳܠܶܐ ܠܺܝ ܕܠܰܩܕܳܡܰܝ ܐܶܪܕܶܐ. ܘܡܳܠܶܟ ܠܺܝ ܕܠܳܐ ܡܶܣܬܰܓܦܳܢܳܐܺܝܬ ܐܶ݀ܫܰܦ ܐܶ݀ܚܽܘܬ܆ ܘܰܨܡܺܝܬܳܐܺܝܬ ܘܫܰܠܝܳܐܺܝܬ܆ ܟܰܕ ܫܳܩܶܠ ‌ܐ̱ܢܳܐ ܚܕܳܐ ܘܣܳܐܶܡ ܐ̱ܢܳܐ ܚܕܳܐ ܠܒܶܣܬܰܪܝ ܐܰ݀ܙܺܝܥ ܐܶܢܶܝܢ ܠܪ̈ܶܓܠܶܐ܆ ܘܶܐ݀ܗܘܶܐ ܠܒܰܪ ܥܰܡ ܙܗܺܝܪܽܘܬܳܐ. ܒܪܰܡ ܐܳܦ ܨܶܒܬܳܗ̇ ܗܰܘ ܕܡܶܢ ܠܒܰܪ ܕܝܳܠܕܰܬ ܐܰ‌ܠܳܗܳܐ ܣܰܓܺܝܰܐܐ ܗ̱ܘ. ܘܰܐܝܟ ܕܰܠܡܺܐܡܰܪ: ܥܰܡ ܥܽܘܬܪܳܐ ܗܰܘ ܕܡܶܢ ܠܓܰܘ ܡܡܰܪܶܐ. ܗܺܝ ܓܶܝܪ ܐܺܝܬܶܝܗ̇ ܚܡܺܝܪܳܐ ܕܰܓܒܺܝܠܬܳܐ ܕܺܝܠܰܢ ܗܳܝ ܕܡܶܢ ܕܪܺܝܫ܆ ܥܶܩܳܪܳܐ ܕܰܓܦܶܬܳܐ ܗܳܝ ܫܰܪܺܝܪܬܳܐ܆ ܕܗܳܝ ܕܰܚܢܰܢ ܗܘ̣ܰܝܢܰܢ ܫܒܶܫ̈ܬܶܐ܆ ܒܝܰܕ ܫܰܘܝܽܘܬ ܡܰܘܥܺܝܬܳܐ ܗܳܝ ܕܰܒܡܰܥܡܽܘܕܺܝܬܳܐ. ܗܳܢܰܘ ܬܚܽܘܡܳܐ ܕܬܰܪ̈ܥܘܳܬܳܐ ܕܰܐ‌ܠܳܗܳܐ ܠܘܳܬ ܒܢܰܝ̈ܢܳܫܳܐ܆ ܗܳܠܶܝܢ ܕܡܶܛܽܠܳܬܗܶܝܢ ܡܙܰܡܪܺܝܢ ܗ̱ܘܰܘ ܡܰܠܰܐܟ̈ܶܐ܆ ܗܳܝ ܕܫܽܘܒܚܳܐ ܒܰܡܪ̈ܰܘܡܶܐ ܠܰܐܠܳܗܳܐ܆ ܘܥܰܠ ‌ܐܰܪܥܳܐ ܫܰܝܢܳܐ܆ ܒܰܒܢܰܝ̈ܢܳܫܳܐ ܫܰܦܺܝܪܽܘܬ ܡܶܨܛܰܒܝܳܢܽܘܬܳܐ^[39]. ܡܶܛܽܠ ܗܳܠܶܝܢ܆ ܕܽܘܟܪܳܢܳܗ̇ ܕܰܒܬܽܘܠܬܳܐ ܠܢܰܦ̈ܫܳܬܳܐ ܕܺܝܠܰܢ ܡܥܺܝܪ܆ ܟܰܕ ܡܶܬܚܰܫ̈ܒܳܢ ܕܡܶܢ ܐܰܝ̇ܕܳܐ ܒܥܶܠܕܒܳܒܽܘܬܳܐ ܕܠܳܐ ܬܰܪܥܽܘܬܳܐ ܘܡܶܢ ܩܳܛܰܣܛܰܣܺܝܤ ܐܰܘ ܟܺܝܬ ܕܽܘܒܳܪܳܐ ܡܩܰܪܒܳܢܳܐ ܐܰܝܟ ܕܰܠܡܺܐܡܰܪ܆ ܠܕܰܐܝܟ ܐܰܝܢܳܐ ܫܰܝܢܳܐ ܘܰܐܘܝܽܘܬܳܐ ܕܰܐ‌ܠܳܗܳܐ ܘܢܰܩܺܝܦܽܘܬܳܐ ܐܶܬܩܪܺܝܢܰܢ ܒܝܰܕ ܡܶܨܥܳܝܽܘܬܳܗ̇.

ܐܰܝܟܰܢܳܐ ܗܳܟܺܝܠ ܠܰܘ ܪܰܒܬܳܐ ܢܶܬܪ̈ܰܥܝܳܢ ܒܬܽܘ̈ܠܳܬܳܐ܆ ܕܰܠܘܳܬ ܐܺܝܩܳܪܳܐ ܕܝܳܠܕܰܬ ܐܰ‌ܠܳܗܳܐ ܡܰܪܝܰܡ ܘܰܠܘܳܬ ܟܠܺܝܠܳܐ ܘܦܽܘܪܥܳܢܳܐ ܕܡܶܢ ܬܰܡܳܢ ܪ̈ܳܗܛܳܢ. ܐܰܝܟܰܢܳܐ ܗܳܠܶܝܢ ܕܰܬܚܶܝܬ ܢܺܝܪܳܐ ܠܰܘ ܢܰܟܦܳܐܺܝܬ ܘܰܟܢܺܝܟܳܐܺܝܬ 222ܢܦܰܩܢܳܝܗ̱ܝ ܠܙܽܘܘܳܓܳܐ ܘܰܠܫܰܘܬܳܦܽܘܬܳܐ܆ ܟܰܕ ܡܶܬܢܰܟ̈ܬܳܢ ܕܠܰܘ ܒܬܽܘܠܽܘܬܳܐ ܡܶܬܥܰܢ̈ܘܝܳܢ܆ ܘܟܰܕ ܦܺܝܠܳܣܽܘܦܺܝܣܳܐ ܥܳܒ̈ܕܳܢ ܗܳܝ ܕܟܽܠ ܚܰܕ ܒܗܰܘ ܡܳܐ ܕܶܐܬܩܪܺܝ ܒܶܗ ܒܗܳܢܳܐ ܢܟܰܬܰܪ^[40]܆ ܡܶܛܽܠ ܢܳܡܽܘܣܳܐ ܕܪܽܘܚܳܐ. ܐܰܝܟܰܢܳܐ ܠܰܘ ܟܽܠܰܢ ܢܶܬܕܰܒܰܪ ܘܢܺܚܶܐ ܐܰܝܟ ܕܰܠܫܽܘܒܚܳܐ ܕܰܐ‌ܠܳܗܳܐ ܗܰܘ ܕܶܐܬܒܰܣܰܪ܆ ܘܰܠܕܰܐܝܟ ܗܳܕܶܐ ܘܰܠܟܽܠܳܗ̇ ܗܳܕܶܐ ܪܶܚܡܰܬ ܐ̱ܢܳܫܽܘܬܳܐ ܐܰܫܘܺܝ ܠܰܢ.

ܒܰܕܓܽܘܢ ܟܺܝܬ ܐܳܦ ܐܰܢ̱ܬܽܘܢ ܟܰܕ ܫܡܰܥܬܽܘܢ ܕܰܠܝܳܠܕܰܬ ܐܰ‌ܠܳܗܳܐ ܩܕܽܘܫ ܩܽܘ̈ܕܫܺܝܢ ܩܪܺܝܬܳܗ̇܆ ܗܳܠܶܝܢ ܕܶܝܢ ܐܺܝܬܰܝܗܽܘܢ ܡܰܫܟܢܳܐ ܗܰܘ ܕܡܶܢ ܒܳܬܰܪ^[41] ܦܪܳܣܳܐ ܬܪܰܝܳܢܳܐ܆ ܪܬܰܚܬܽܘܢ ܒܠܶܒܟܽܘܢ܆ ܘܣܰܓܺܝ ܒܙܰܒܢܳܗ̇ ܒܥܰܝܬܽܘܢ܆ ܕܡܰܫܟܢܳܗ̇ ܩܰܕܡܳܝܳܐ܆ ܒܰܝܬܳܐ ܕܺܝܠܳܗ̇ ܕܒܶܝܬ ܨܠܽܘܬܳܐ ܐܳܡܰܪ ܐ̱ܢܳܐ܆ ܢܶܬܦܰܬܶܐ ܒܬܰܘܣܶܦܬܳܐ ܕܶܐܤ̈ܛܘܶܐ. ܡܳܢܳܐ ܗܳܟܺܝܠ ‌ܐܺܝܬܰܘܗ̱ܝ ܗܰܘ ܕܚܰܣܺܝܪ܆ ܐܶܠܳܐ ܐܶܢ ܕܢܶܨܒܶܐ ܡܰܢ ܚܢܰܢ ܘܢܶܪܡܶܐ ܐܺܝܕܳܐ ܘܰܢܫܰܪܶܐ܆ ܕܬܶܬܕܰܡܽܘܢ ܕܶܝܢ ܐܰܢ̱ܬܽܘܢ ܒܨܶܒܝܳܢܳܐ ܛܳܒܳܐ ܘܰܫܦܺܝܥ ܡܰܘܗܰܒܬܳܐ ܠܰܒ̈ܢܰܝ ܐܺܝܣܪܳܐܶܝܠ. ܗܳܢܽܘܢ ܕܟܰܕ ܡܰܫܟܢܳܐ ܗܰܘ ܕܣܳܗܕܽܘܬܳܐ ܡܶܬܬܰܩܰܢ ܗ̱ܘܳܐ܆ ܚܘܺܝܚܳܐܺܝܬ ܟܽܠܗܽܘܢ ܐܰܥܶܠܘ ܠܟܽܠܳܗ̇ ܗܽܘܠܶܐ ܘܰܠܡܰܘܗܰܒܬܳܐ ܕܩܶܢ̈ܝܳܢܶܐ܆ ܟܰܕ ܐܰ‌ܠܳܗܳܐ ܐܳܦܠܳܐ ܕܣܰܥܪܳܐ ܕܥ̈ܶܙܶܐ ܢܶܣܰܒ ܐܰܣܠܺܝ܆ ܐܰܝܟ ܕܠܰܥܒܳܕܳܐ ܕܗܳܠܶܝܢ ܝܳܪ̈ܺܝܥܳܬܳܐ ܕܣܰܥܪܳܐ. ܗܽܘ ܓܶܝܪ ܐܺܝܬܰܘܗ̱ܝ ܗ̱ܘܳܐ ܗܰܘ ܕܳܐܦ ܠܰܬܪܶܝܢ ܫܳܡܽܘ̈ܢܶܐ ܕܰܐܪܡܰܠܬܳܐ ܩܰܒܶܠ܆ ܘܡܶܢ ܩܕܳܡ ܟܽܠܳܗ̇ ܡܰܘܗܰܒܬܳܐ ܥܰܬܺܝܪܬܳܐ ܐܰܝܬܺܝ ܐܶܢܽܘܢ ܠܰܡܨܰܥܬܳܐ܆ ܡܶܛܽܠ ܟܺܝܬ ܕܟܽܠܗܽܘܢ ܚܰܝ̣ܶܝ̣̈ܗ̇ ܕܗܳܝ ܕܝܶܗܒܰܬ ܒܗܽܘܢ ܡܶܬܗܰܦܟܺܝܢ ܗ̱ܘܰܘ. ܠܳܐ ܐ̱ܢܳܫ ܗܳܟܺܝܠ ܡܶܣܟܺܢܳܐ ܟܰܕ ܒܳܗܶܬ ܒܡܶܣܟܺܢܽܘܬܶܗ܆ ܢܢܰܟܪܶܐ ܗܽܘ ܠܶܗ ܡܶܢ ܒܽܘܪܟܬܳܐ. ܐܶܠܳܐ ܢܰܥܶܠ ܗܰܘ ܡܳܐ ܕܡܳܛܝܳܐ ܒܺܐܝܕܰܘ̈ܗ̱ܝ܆ ܒܰܠܚܽܘܕ ܐܶܢ ܠܳܐ ܡܶܣܟܺܝܢ ܘܺܐܝܬܰܘܗ̱ܝ ܡܶܣܟܺܢܳܐ ܒܠܶܒܳܐ. ܝܳܕܰܥ ܗ̱ܘ ܓܶܝܪ ܗܰܘ ܕܰܠܗܳܢܳܐ ܡܩܰܒܶܠ܆ ܕܡܶܢ ܐܰܝܟܳܐ ܡܶܬܩܰܪܰܒ. ܗܰܘ ܕܟܰܕ ܐܳܦ ܒܪܶܬܚܳܐ ܕܪܽܘܚܳܐ ܕܗܳܢܳܐ ܟܶܢܫܳܐ ܟܳܗܢܳܝܳܐ ܚܳܕܶܐ܆ ܘܒܺܐܝܩܳܪܳܐ ܕܰܒܬܽܘܠܬܳܐ ܩܰܕܺܝܫܬܳܐ܆ ܡܶܣܬܒܰܪ ܠܺܝ ܕܡܰܙܥܶܩ ܠܘܳܬܳܗ̇ ܐܰܝܟܰܢܳܐ ܕܳܐܦ ܠܘܳܬ ܥܺܕܬܳܐ܆ ܒ̈ܢܳܬ ܩ̈ܳܠܶܐ ܗܳܠܶܝܢ ܕܶܐܫܰܥܝܳܐ܆ ܦܰܬܳܝ ܠܡܰܫܟܢܶܟܝ. ܘܰܠܝܳܪ̈ܺܝܥܳܬܳܐ ܕܕܳܪ̈ܳܬܳܐ ܕܺܝܠܶܟܝ ܩܒܽܘܥܝ̱. ܠܳܐ ܬܚܽܘܣܺܝܢ. ܐܰܘܪܶܟܝ̱ ܛܽܘܢ̈ܒܰܝܟܝ. ܘܰܠܣܶܟ̈ܶܐ ܕܺܝܠܶܟܝ ܫܰܪܰܪܝ. ܬܽܘܒ ܠܝܰܡܺܝܢܳܐ ܘܰܠܣܶܡܳܠܳܐ ܦܫܽܘܛܝ^[42]. ܥܰܠ ܗܳܠܶܝܢ ܕܳܐܦ ܚܢܰܢ ܟܰܕ ܛܰܝܒܽܘܬܳܐ ܡܰܘܕܶܝܢ ܚ̱ܢܰܢ ܠܶܗ܆ ܟܰܕ ܒܒܽܘܪ̈ܟܳܬܳܐ ܕܪܽܘܚܳܐ ܡܟܰܠܠܺܝܢ ܚ̱ܢܰܢ ܠܟܽܘܢ ܐܳܡܪܺܝܢܰܢ: ܕܡܳܪܝܳܐ ܐܰ‌ܠܳܗܳܐ ܕܰܐܒܳܗ̈ܳܬܐ ܕܺܝܠܰܢ ܢܰܘܣܶܦ ܥܠܰܝܟܽܘܢ ܐܰܝܟ ܕܺܐܝܬܰܝܟܽܘܢ ܒܰܐܠܦܳܐ ܥܶܐܦ̈ܶܐ. ܘܰܢܒܰܪܶܟܟܽܘܢ ܐܰܝܟܰܢܳܐ ܕܡܰܠܶܠ ܠܟܽܘܢ^[43]. ܠܗܰܘ ܕܳܐܦ ܬܶܫܒܽܘܚܬܳܐ ܘܺܐܝܩܳܪܳܐ ܡܰܣܩܺܝܢ ܚ̱ܢܰܢ܆ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܫܬܝܢ ܘܫܰܒܥܳܐ.

[1]ܡܦܩܢܐ. 3: 5

[2]ܐܰܝ̇ܕܳܐ

[3]ܣܶܦܪܐ ܕܒܪܝܬܐ. 28: 17

[4]ܡܦܩܢܐ. 24: 17

[5]ܡܦܩܢܐ. 19: 13

[6]ܪ̈ܗܘܡܝܐ. 8: 15

[7]ܡܶܢ ܬܳܐܪܽܘܬܐ

[8]ܪ̈ܗܘܡܝܐ. 5: 20

[9]ܚܙܳܬܳܐ

[10]ܝܘܚܢܢ. 1: 14

[11]ܡܬܝ. 20: 28 ܐܦ ܡܪܩܘܣ. 10: 45

[12]ܕܢܝܐܝܠ. 2: 34

[13]ܘܡܰܥܒܕܳܢܽܘܬܳܐ

[14]ܒܰܚܙܳܬܳܐ ܕܡܶܢ ܠܒܰܪ

[15]ܐܦܣ̈ܝܐ. 1: 21

[16]ܐ. ܩܘܪ̈ܝܢܬܝܐ. 3: 11

[17]ܟܗ̈ܢܐ. 16: 12 ـ 13

[18]ܡܶܢ ܙܽܘܗܳܪܳܐ

[19]ܡܦܩܢܐ. 25: 11 ܐܦ ܡܦܩܢܐ. 37: 1 ـ 2

[20]ܐ. ܦܛܪܘܣ. 2: 22  ܐܦ ܐܫܥܝܐ. 53: 9

[21]ܥܒܪ̈ܝܐ. 2: 14

[22]ܣܒܰܠ

[23]ܦܪܟܣܝܣ. 2: 31

[24]ܥܒܪ̈ܝܐ. 2: 14

[25]ܠܒܺܝܫ

[26]ܐܦܣ̈ܝܐ. 5: 2

[27]ܙܟܪܝܐ. 12: 10

[28]ܒ. ܩܘܪ̈ܝܢܬܝܐ. 5: 16

[29] ܣܶܦܪܐ ܕܡܶܢܝܢܐ. 17: 8

[30]ܡܰܘܥܺܝܬܳܐ

[31]ܡܬܝ. 5: 17

[32] ܥܒܪ̈ܝܐ. 12: 11

[33]ܘܢܽܘܪܒܳܐ

[34]ܐܫܥܝܐ. 11: 1

[35]ܪ̈ܗܘܡܝܐ. 3: 25

[36]ܕܢ̣ܣܩ ܣܝܡܐ: ܡܶܛܽܠ ܕܰܚ̈ܛܳܗܶܐ ܡܶܬܩܪܶܝܢ ܗ̱ܘܰܘ ܕܶܒܚ̈ܶܐ ܕܥܰܡܳܐ ܗܳܢܽܘܢ ܕܡܰܣܩܺܝܢ ܗ̱ܘܰܘ ܟܳܗ̈ܢܶܐ.

[37]ܥܒܪ̈ܝܐ. 9: 28

[38]ܐܦܣ̈ܝܐ. 3: 10

[39]ܠܘܩܐ. 2: 14

[40]ܐ. ܩܘܪ̈ܝܢܬܝܐ. 7: 20  ܐܦ 24

[41]ܕܰܠܓܰܘ ܡܶܢ ܐܰܦ̈ܰܝ ܬܰܪܥܳܐ. ܬܰܪ̈ܥܶܐ.

[42]ܐܫܥܝܐ. 54: 2 ـ 3

[43]ܬܶܢܝܢ ܢܳܡܘܣܐ. 1: 11