ܡܺܐܡܪܳܐ ܕܶܫܬܺܝܢ ܘܶܫܬܳܐ

ܥܰܠ ܢܽܘܗܪ̈ܶܐ.

66: ܐܳܘ ܟܡܳܐ ܡܶܕܶܡ ܐܺܝܬܶܝܗ̇ ܗ̱ܘܳܬ ܛܪܽܘܢܽܘܬܳܐ ܕܰܠܩܽܘܒܠܰܢ ܘܠܽܘܩܒܰܠ ܚܛܺܝܬܳܐ ܕܺܝܠܰܢ܆ ܘܣܰܓܺܝܽܐܘܬܗܽܘܢ ܕܟܽܘܪ̈ܗܳܢܶܐ ܗܳܠܶܝܢ ܕܡܶܢ ܗܳܪܟܳܐ ܢܒܰܥܘ܆ ܡܶܢ ܕܽܘܡܳܪܳܐ ܓܶܝܪ ܘܬܶܡܗܳܐ ܡܫܰܪܶܐ ܐ̱ܢܳܐ܆ ܕܥܰܠ ܟܽܠܳܗ̇ ܗܳܕܶܐ ܘܕܰܐܝܟ ܗܳܕܶܐ ܐܳܣܝܽܘܬܳܐ ܣܢܺܝܩܳܐ ܗ̱ܘܳܬ܆ ܘܥܰܠ ‌ܐܰ‌ܠܳܗܳܐ ܘܰܕܡܰܐܣܶܐ ܘܰܕܗܽܘ ܩܢܽܘܡܶܗ ܥܳܒܶܕ܆ ܐܰܝܟܰܢܳܐ ܕܡܶܢ ܒܳܬܰܪ ܥܽܘܬܪܳܗ̇ ܕܳܐܣܝܽܘܬܳܐ܆ ܬܶܬܺܝܕܰܥ ܪܰܒܽܘܬܶܗ ܕܟܽܘܪܗܳܢܳܐ ܗܳܝ ܕܡܶܢ ܩܕܺܝܡ ܠܳܐ ܝܺܕܺܝܥܳܐ ܗ̱ܘܳܬ. ܠܳܐ ܓܶܝܪ ܐܺܝܙܓܰܕܳܐ ܘܠܳܐ ܡܰܠܰܐܟܳܐ܆ ܐܶܠܳܐ ܗܽܘ ܡܳܪܝܳܐ ܦܪܰܩ ܠܰܢ^[1]. ܡܶܬܕܰܡܰܪ ܥܰܡܰܢ ܐܶܫܰܥܝܳܐ ܘܡܰܙܥܶܩ. ܐܳܦ ܓܶܝܪ ܡܶܠܬܳܐ ܗܰܘ ܕܰܐ‌ܠܳܗܳܐ܆ ܟܰܕ ܝܺܠܺܝܕ ܗ̱ܘܳܐ ܒܰܟܝܳܢܳܐ ܡܶܢ ܠܥܶܠ܆ ܝܺܠܺܝܕܽܘܬܳܐ ܐܳܡܰܪ ܐ̱ܢܳܐ ܕܠܳܐ ܫܽܘܪܳܝ ܘܰܡܬܽܘܡܳܝܬܳܐ ܗܳܝ ܕܡܶܢ ܐܰܒܳܐ. ܗܽܘ ܕܶܝܢ ܟܰܕ ܗܽܘ ܟܰܕ ܨܒܳܐ ܪܶܚܡܰܬ ܐ̱ܢܳܫܳܐܺܝܬ ܘܰܡܕܰܒܪܳܢܳܐܺܝܬ ܕܢܶܬܺܝܠܶܕ ܐܳܦ ܡܶܢ ܠܬܰܚܬ܆ ܘܰܢܣܰܒ ܝܺܠܺܝܕܽܘܬܳܐ ܡܶܕܶܡ ܕܠܳܐ ܚܒ̣ܰܠ ܗܳܝ ܕܡܶܢ ܒܬܽܘܠܬܳܐ ܒܰܒܣܰܪ܆ ܘܰܒܗܳܕܶܐ ܒܰܙܢܳܐ ܡܶܕܶܡ ܫܰܪܺܝ ܕܰܢܣܽܘܟ̣ ܡܶܢ ܕܪܺܝܫ ܠܰܟܝܳܢܳܐ ܕܺܝܠܰܢ܆ ܘܥܰܡ ܛܺܝܢܳܐ ܠܢܽܘܪܳܐ ܕܰܐ‌ܠܳܗܽܘܬܳܐ ܒܰܝܬܳܝܬܳܐ ܕܺܝܠܶܗ܆ ܡܰܠܽܘܢ ܕܶܝܢ ܠܳܗ̇ ܠܰܐܠܳܗܽܘܬܶܗ ܬܡܺܝܗܳܐܺܝܬ ܠܰܚܕܳܐ ܐܰܝܬܺܝ܆ ܘܰܟܠܳܐ ܘܰܐܩܺܝܡܳܗ̇ ܠܗܳܝ ܕܰܒܥܳܩ̈ܳܬܳܐ ܬܺܐܠܕܺܝܢ ܒܢܰܝ̈ܳܐ^[2] ܕܥܰܠ ܚܰܘܳܐ ܐܶܬܓܰܙܪܰܬ ܡܳܢܳܐ ܥܳܒܶܕ܆ ܘܠܰܐܝܟܳܐ ܢܳܦܶܩ؟ ܠܰܢ ܗܳܢܽܘܢ ܕܒܰܟܝܳܢܳܐ ܐܺܝܬܰܝܢ ܝܺܠܺܝ̈ܕܶܐ ܕܡܶܢ ܠܬܰܚܬ܆ ܡܕܰܒܰܪ ܘܰܡܦܰܪܢܶܤ ܠܳܗ̇ ܒܛܰܝܒܽܘܬܳܐ ܠܺܝܠܺܝܕܽܘܬܳܐ ܗܳܝ ܕܡܶܢ ܠܥܶܠ ܘܰܫܡܰܝܳܢܺܝܬܳܐ. ܟܰܕ ܐܰܝܟ ܕܰܠܡܺܐܡܰܪ ܒܗܽܘܢ ܒܣܽܘܥܪ̈ܳܢܶܐ ܡܰܙܥܶܩ܆ ܕܡܶܛܽܠ ܗܳܕܶܐ ܐܶܢܳܐ ܐܶܬܝܰܠܕܶܬ ܡܶܢ ܠܬܰܚܬ܆ ܐܰܝܟܰܢܳܐ ܕܰܐܢ̱ܬܽܘܢ ܡܶܢ ܠܥܶܠ ܬܶܬܝܰܠܕܽܘܢ. ܡܶܛܽܠܗܳܕܶܐ ܐܳܦ ܠܡܰܘܠܳܕܳܐ ܐ̱ܪܳܙܳܢܳܝܳܐ ܗܰܘ ܕܺܝܠܟܽܘܢ܆ ܠܰܘ ܠܪܽܘܚܩܳܐ ܡܶܢ ܚܶܒܠܳܐ222 ܗܰܘ ܕܰܠܘܳܬܝ ܐܶܣܬܥܰܪ ܒܬܶܕܡܽܘܪܬܳܐ ܡܫܰܡܠܶܐ ܐ̱ܢܳܐ ܠܶܗ. ܝܺܠܺܝܕ ܐ̱ܢܳܐ ܓܶܝܪ ܐܶܢܳܐ ܒܰܒܣܰܪ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܐܶܡܳܐ ܒܬܽܘܠܬܳܐ. ܬܶܬܝܰܠܕܽܘܢ ܐܳܦ ܐܰܢ̱ܬܽܘܢ ܠܰܘ ܡܶܢ ܕܡ̈ܶܐ. ܐܳܦܠܐ ܡܶܢ ܨܶܒܝܳܢܳܐ ܕܒܶܣܪܳܐ܆ ܐܳܦܠܐ ܡܶܢ ܨܶܒܝܳܢܳܐ ܕܓܰܒܪܳܐ. ܐܶܠܳܐ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܝ̈ܳܐ^[3]. ܒܪܰܡ ܐܰܢ̱ܬܽܘܢ܆ ܕܛܰܝܒܽܘܬܳܐ ܕܺܝܠܝ ܬܶܗܘܽܘܢ ܫܰܘ̈ܬܳܦܶܐ. ܐܶܢܳܐ ܕܶܝܢ܆ ܕܰܟܝܳܢܳܐ ܕܺܝܠܟܽܘܢ ܗܘܺܝܬ ܫܰܘܬܳܦܳܐ܆ ܟܰܕ ܐܶܬܚܰܝܕܶܬ ܩܢܽܘܡܳܐܺܝܬ ܠܒܶܣܪܳܐ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ. ܘܰܒܗܳܕܶܐ ܡܫܰܡܠܝܳܐܺܝܬ ܗܘܺܝܬ ܒܰܪ ܐ̱ܢܳܫܳܐ ܤܛܰܪ ܡܶܢ ܫܽܘܚܠܳܦܳܐ܆ ܘܟܰܕ ܠܳܐ ܢܶܦܠܶܬ ܠܒܰܪ ܡܶܢ ܗܳܝ ܕܶܐ݀ܗܘܶܐ ܐܺܝܬܰܝ ܐܰ‌ܠܳܗܳܐ. ܒܪܰܡ ܘܟܰܕ ܗܳܟܰܢܳܐ ܐܺܝܬ ܠܺܝ ܒܰܟܝܳܢܳܐ܆ ܘܠܳܐ ܣܢܺܝܩܳܐ ܐܺܝܬܰܝ܆ ܐܳܦ ܒܗܳܕܶܐ ܝܺܠܺܝܕܽܘܬܳܐ ܐܶܢܳܐ ܩܰܕܡܳܝܳܐ ܐܶ݀ܫܪܶܐ ܠܟܽܘܢ܆ ܘܥܰܡ ܚܰܝܳܒ̈ܶܐ ܐ݀ܺܬܶܐ ܠܘܳܬ ܝܽܘܪܕܢܳܢ. ܘܰܒܡܰܥܡܽܘܕܺܝܬܳܐ ܕܰܬܝܳܒܽܘܬܳܐ ܗܳܝ ܕܝܽܘܚܰܢܳܢ܆ ܡܰܥܡܽܘܕܺܝܬܳܐ ܗܳܝ ܕܺܝܠܝ ܐܶ݀ܨܽܘܒ܆ ܗܳܝ ܕܒܰܐܒܳܐ ܘܒܺܝ ܒܪܳܐ ܘܰܒܪܽܘܚܳܐ ܩܰܕܺܝܫܳܐ ܥܬܺܝܕܳܐ ܕܬܶܫܬܰܡܠܶܐ.

ܡܶܛܽܠ ܗܳܠܶܝܢ ܘܕܰܐܝܟ ܗܳܠܶܝܢ܆ ܒܡܶܨܥܰܬ ܡܰܝ̈ܳܐ ܩܳܡ܆ ܗܰܘ ܕܰܡܛܰܠܶܠ ܒܡܰܝ̈ܳܐ ܡܶܕܝܳܪ̈ܰܘܗ̱ܝ^[4]. ܘܰܠܝܰܡܺܝܢܳܐ ܕܡܰܥܡܕܳܢܳܐ ܕܪܳܥܠܳܐ ܗ̱ܘܳܬ ܘܡܶܬܟܰܠܝܳܐ܆ ܥܠܰܘܗ̱ܝ ܢܳܓܶܕ ܠܳܗ̇܆ ܟܰܕ ܣܳܡ ܒܶܗ ܠܒܺܝܒܽܘܬܳܐ ܠܘܳܬ ܬܶܫܡܶܫܬܳܐ܆ ܒܗܳܝ ܕܶܐܡܰܪ ܫܒܽܘܩ ܗܳܫܳܐ^[5]: ܘܰܠܪܺܝܫܶܗ ܡܰܓܡܰܥ ܒܓܰܘ ܫܶܦ̈ܥܶܐ. ܒܨܺܝܪ ܩܰܠܺܝܠ ܕܶܝܢ ܐܳܦ ܐܶܢܳܐ܆ ܠܡܶܪܥܰܠ ܡܫܰܪܶܐ ܐ̱ܢܳܐ܆ ܟܰܕ ܠܠܳܐ ܡܶܣܬܰܝܟܳܢܽܘܬܳܗ̇ ܕܡܶܬܢܰܚܬܳܢܽܘܬܳܐ ܡܶܬܪܰܢܶܐ ܐ̱ܢܳܐ. ܘܥܳܡܶܕ ܒܡܰܝ̈ܳܐ ܘܰܠܬܰܚܬ ܗܳܘܶܐ܆ ܗܰܘ ܕܰܐܩܺܝܡ ܠܡܰܝ̈ܳܐ ܗܳܢܽܘܢ ܕܰܠܥܶܠ ܡܶܢ ܫܡܰܝܳܐ ܘܰܐܚܺܝܕ ܠܗܽܘܢ ܒܦܽܘܩܕܳܢܳܐ ܒܰܠܚܽܘܕ܆ ܠܗܳܢܽܘܢ ܡܶܬܬܰܝ̈ܬܝ̣ܰܝ̣ ܠܬܰܚܬ ܘܰܕܒܰܟܝܳܢܳܐ ܐܺܝܬܰܝܗܽܘܢ ܪ̈ܳܕܰܝܳܐ^[6]. ܐܶܠܳܐ ܐܰܝܟܰܢܳܐ ܕܰܐܩܺܝܡ ܐܶܢܽܘܢ ܠܗܳܢܽܘܢ ܗܳܝܕܶܝܢ ܥܳܒܽܘܕܳܐܺܝܬ܆ ܐܰܝܟ ܡܰܢ ܕܺܐܝܬܰܘܗ̱ܝ ܡܶܠܬܳܐ ܕܰܐܒܳܐ ܘܥܳܒܽܘܕܳܐ ܕܗܳܢܳܐ ܟܽܠ܆ ܗܳܟܰܢܳܐ ܐܳܦ ܗܳܫܳܐ ܐܳܣܝܳܐܺܝܬ ܘܰܡܕܰܒܪܳܢܳܐܺܝܬ ܒܝܽܘܪܕܢܳܢ܆ ܟܳܠܶܐ ܘܦܳܣܶܩ ܘܰܡܩܺܝܡ ܠܶܗ ܠܪܶܕܝܳܐ ܣܰܓܺܝ ܣܶܕܩ̈ܶܐ ܗܰܘ ܕܰܚܛܺܝܬܳܐ܆ ܘܠܰܪܓܶܠܬܳܐ ܗܳܝ ܕܡܶܢ ܬܰܡܳܢ ܡܰܫܦܥܳܐ ܗ̱ܘܳܬ ܥܠܰܝܢ܆ ܚܳܒܠܳܐ ܡܶܕܶܡ ܗܰܘ ܣܰܓܺܝܳܐܐ ܘܠܳܐ ܡܶܬܰܐܡܪܳܢܳܐ ܒܡܶܠܬܳܐ.

ܘܗܳܢܳܐ ܐܺܝܬܰܘܗ̱ܝ ܗ̱ܘܳܐ܆ ܗܰܘ ܟܺܝܬ ܕܰܢܒܺܝܳܐ ܕܰܘܺܝܕ ܓܰܠܝܳܐܺܝܬ ܩܰܕܶܡ ܗ̱ܘܳܐ ܡܰܟܪܶܙ ܟܰܕ ܐܳܡܰܪ: ܚܙܰܐܽܘܟ ܡܰܝ̈ܳܐ ܐܰ‌ܠܳܗܳܐ܆ ܚܙܰܐܽܘܟ ܡܰܝ̈ܳܐ ܘܰܕܚܶܠܘ^[7]. ܘܠܳܐ ܓܶܝܪ ܕܡܰܝ̈ܳܐ ܐܺܝܬܶܝܗ̇ ܕܺܝܠܳܝܬܳܐ ܕܢܶܚܙܽܘܢ܆ ܐܳܦ ܐܰ‌ܠܳܗܳܐ ܒܰܟܝܳܢܳܐ ܠܳܐ ܡܶܬܚܰܙܝܳܢܰܐ ܗ̱ܘ. ܐܶܠܳܐ ܐܶܡܰܬܝ ܕܰܗܘ̣ܳܐ ܡܶܬܚܰܙܝܳܢܳܐ ܟܰܕ ܐܶܬܒܰܣܰܪ ܡܶܛܽܠܳܬܰܢ܆ ܗܳܝܕܶܝܢ ܚܙܰܐܽܘܗ̱ܝ ܡܰܝ̈ܳܐ܆ ܒܢܰܝ̈ܢܳܫܳܐ ܗܳܢܽܘܢ ܕܒܰܪ̈ܓܺܝܓܳܬܳܐ ܪ̈ܰܛܺܝܒܳܬܳܐ ܡܶܬܦܰܪܦܥܺܝܢ ܪܰܦܝܳܐܺܝܬ ܘܰܕܚܶܠܘ. ܘܠܰܘ ܕܚܶܠܘ ܒܰܠܚܽܘܕ܆ ܐܶܠܳܐ ܐܳܦ ܡܶܢܗܽܘܢ ܕܥܽܘܡܩ̈ܶܐ ܐܰܝܟ ܕܡܶܢ ܬܗܽܘܡܳܐ ܡܶܕܶܡ ܐܶܬܕܰܠܰܚܘ ܘܶܐܙܕܰܥܙܰܥܘ܆ ܟܰܕ ܕܶܚܠܰܬ ܦܬܰܟܪ̈ܶܐ ܗܳܝ ܕܡܶܢ ܩܕܺܝܡ ܐܰܚܺܝܕܳܐ ܗ̱ܘܳܬ ܘܰܥܝ̈ܳܕܶܐ ܗܳܢܽܘܢ ܐܰܒܳܗܳܝ̈ܶܐ ܡܶܬܗܰܦܟܺܝܢ ܗ̱ܘܰܘ܆ ܘܰܫܪܺܝܚܽܘܬܳܐ ܡܶܬܗܰܦܟܳܐ ܗ̱ܘܳܬ ܠܢܰܟܦܽܘܬܳܐ. ܡܶܛܽܠ ܗܳܕܶܐ ܠܳܐ ܐܶܡܰܪ: ܚܙܰܐܘܽܟ ܡܰܝ̈ܳܐ ܚܕܳܢܳܐܺܝܬ^[8]܆ ܐܶܠܳܐ ܣܰܓܺܝܳܐܢܳܐܺܝܬ ܚܙܰܐܘܽܟ ܡܰܝ̈ܳܐ ܘܰܕܚܶܠܘ܆ ܡܶܛܽܠ ܡܦܰܬܟܽܘܬܳܐ ܕܚܰܫ̈ܶܐ ܘܰܐܝܟܰܢܳܐ ܕܶܐܡܪܶܬ ܣܰܓܺܝܽܐܘܬ ܣܶܕܩ̈ܶܐ. ܘܰܐܘܣܶܦ܆ ܐܶܬܕܰܠܰܚܘ ܬܗܽܘ̈ܡܶܐ ܣܽܘܓܳܐܐ ܕܪܰܘܒܳܐ ܕܡܰܝ̈ܳܐ. ܐܰܟܚܕܳܐ ܡܰܢ܆ ܟܰܕ ܡܚܰܘܶܐ ܗܦܽܘܟܝܳܐ ܕܡܶܢ ܥܽܘܡܩܳܐ ܕܰܥܝܳܕܳܐ ܥܰܬܺܝܩܳܐ. ܐܰܟܚܕܳܐ ܕܶܝܢ܆ ܐܳܦ ܕܥܰܡ ܪܰܘܒܳܐ ܡܶܕܶܡ ܘܰܫܓܽܘܫܝܳܐ ܗܘ̣ܳܬ ܗܳܕܶܐ܆ ܕܥܰܡܡ̈ܶܐ ܘܕܰܡܕܺܝ̈ܢܳܬܳܐ ܘܕܰܛܪ̈ܽܘܢܶܐ ܗܳܢܽܘܢ ܕܩܳܝܡܺܝܢ ܗ̱ܘܰܘ ܠܽܘܩܒܰܠ ܟܳܪܽܘܙܽܘܬܳܐ ܕܶܐܘܰܢܓܶܠܺܝܽܘܢ.

ܟܰܕ ܗܳܠܶܝܢ ܕܶܝܢ ܠܰܥܒܳܕܳܐ ܢܳܦ̈ܩܳܢ ܗ̱ܘܰܝ̈܆ ܘܒܶܗ ܒܢܶܣܝܳܢܳܐ ܡܶܬܚܰܙ̈ܝܳܢ ܗ̱ܘܰܝ̈܆ ܩ̈ܳܠܶܐ ܝܰܗ̱ܒ ܐܳܡܰܪ ܥܢܳܢ̈ܶܐ. ܐܳܦ ܓܶܐܪ̈ܶܐ ܕܺܝܠܳܟ ܦܳܪܚܺܝܢ. ܟܰܕ ܥܢܳܢ̈ܶܐ ܠܰܢܒܺܝ̈ܶܐ ܩܳܪܶܐ܆ ܕܰܐܡܛܰܪܘ ܠܰܢ ܡܶܛܪܳܐ ܗܰܘ ܫܡܰܝܳܢܳܐ܆ ܘܰܠܓܶܠ̈ܝܳܢܶܐ ܗܳܢܽܘܢ ܕܰܒܝܰܕ ܪܽܘܚܳܐ ܐܰ‌ܠܗܳܝܳܐ ܩܰܕܶܡܘ ܐܶܬܶܐܡܰܪܘ. ܗܳܕܶܐ ܓܶܝܪ ܒܕܽܘܟ̈ܝܳܬܳܐ ܣܰܓܺܝ̈ܳܐܬܳܐ ܐܺܝܬܶܝܗ̇ ܠܶܗ ܕܰܥܝܳܕܳܐ ܠܰܟܬܳܒܳܐ. ܐܰܝܟ ܐܶܡܰܬܝ ܕܳܐܡܰܪ: ܕܡܰܢܽܘ ܒܰܥ̈ܢܳܢܶܐ ܢܶܫܬܘܶܐ ܠܡܳܪܝܳܐ܆ ܐܰܘ ܡܰܢܽܘ ܢܶܬܕܰܡܶܐ ܠܡܳܪܝܳܐ ܒܰܒ̈ܢܰܝܳܐ ܕܰܐ‌ܠܳܗܳܐ܆ ܘܰܒܕܽܘܟܬܳܐ ܐ̱ܚܪܺܬܳܐ܆ ܘܠܰܥ̈ܢܳܢܶܐ ܐܶ݀ܦܩܽܘܕ ܕܠܳܐ ܢܰܡܛܪ̈ܳܢ ܥܠܰܘܗ̱ܝ ܡܶܛܪܳܐ܆ ܟܰܪܡܶܗ ܓܶܝܪ ܕܡܳܪܝܳܐ ܨܒܰܐܘܽܬ ܒܰܝܬܳܐ ܕܺܐܝܣܪܳܐܶܝܠ ‌ܐܺܝܬܰܘܗ̱ܝ^[9]. ܗܳܝ ܗܳܟܺܝܠ ܕܶܐܡܰܪ ܡܙܰܡܪܳܢܳܐ ܕܰܐܝܟ ܗܳܕܶܐ ܐܺܝܬܶܝܗ̇. ܕܟܰܕ ܡܰܝ̈ܳܐ ܚܙܰܐܘܽܗ̱ܝ ܠܰܐܠܳܗܳܐ ܗܰܘ ܕܶܐܬܒܰܣܰܪ ܘܶܐܬܒܰܪܢܰܫ ܘܰܕܚܶܠܘ܆ ܘܰܬܗܽܘ̈ܡܶܐ ܐܶܬܕܰܠܰܚܘ܆ ܩܳܠܳܐ ܝܰܗ̈ܒܶܝܢ ܥܢܳܢ̈ܶܐ. ܗܳܢܰܘ ܕܶܝܢ܆ ܢܒܺܝ̈ܶܐ ܗܳܢܽܘܢ ܕܡܶܣܬܰܒܪܺܝܢ ܗ̱ܘܰܘ ܡܶܢ ܩܕܺܝܡ ܠܳܐ ܓܠܰܝ̈ܳܐ܆ ܒܺܐܝ̈ܕܰܝܗܽܘܢ ܕܺܝܠܗܽܘܢ ܕܣܽܘܥܪ̈ܳܢܶܐ ܡܡܰܠܠܺܝܢ ܗ̱ܘܰܘ܆ ܟܰܕ ܩܰܕܺܝܡ̈ܘܳܬ ܡܶܠܰܝ̈ܗܽܘܢ ܡܶܬܡܰܠ̈ܝܳܢ ܗ̱ܘܰܝ̈܆ ܘܩ̈ܳܠܶܐ ܕܺܝܠܗܽܘܢ ܠܳܐ ܩܳܝܡܺܝܢ ܗ̱ܘܰܘ ܒܺܝܗܽܘܕ ܒܰܠܚܽܘܕ܆ ܐܶܠܳܐ ܒܰܕܡܽܘܬ ܓܶܐܪ̈ܶܐ ܦܳܪܚܺܝܢ ܗ̱ܘܰܘ܆ ܘܢܳܦܚܺܝܢ ܘܥܳܒܪܺܝܢ ܗ̱ܘܰܘ ܒܟܽܠܗܽܘܢ ܥܰܡܡ̈ܶܐ. ܩܳܕܡܺܝܢ ܗ̱ܘܰܘ ܓܶܝܪ ܐܳܡܪܺܝܢ ܡܶܛܽܠ ܥܰܡܰܢܽܘܐܶܝܠ܆ ܗܳܐ ܣܳܡܬܳܟ ܠܢܽܘܗܪܳܐ ܕܥܰܡܡ̈ܶܐ^[10]܆ ܕܬܶܗܘܶܐ ܠܦܽܘܪܩܳܢܳܐ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ. ܗܳܟܰܢܳܐ ܝܰܗܒܘ ܥܢܳܢ̈ܶܐ ܩܳܠܳܐ܆ ܘܓܶܐܪ̈ܶܐ ܦܪܰܚܘ.

ܘܰܠܗܳܠܶܝܢ ܢܩܶܦ ܩܳܠܳܐ ܕܪܰܥܡܳܐ܆ ܒܟܽܠܳܗ̇ ܓܺܝܓܠܳܐ. ܩܳܠܳܐ ܓܶܝܪ ܐܳܡܰܪ ܕܪܰܥܡܳܐ ܕܺܝܠܳܟ ܒܓܺܝܓܠܳܐ. ܩܳܠܳܐ ܕܶܝܢ ܕܪܰܥܡܳܐ܆ ܠܗܰܘ ܕܰܫܠܺܝ̈ܚܶܐ ܩܳܪܶܐ. ܗܳܢܽܘܢ ܕܐ̱ܢܳܫܺܝ̈ܢ ܡܶܢܗܽܘܢ܆ ܐܳܦ ܒܢܰܝ̈ܳܐ ܕܪܰܥܡܳܐ ܐܶܬܩܪܺܝܘ^[11]܆ ܟܰܕ ܫܰܡܶܫܘ ܠܟܳܪܽܘܙܽܘܬܳܐ ܪܰܒܬܳܐ ܘܪܰܒܰܬ ܩܳܠܳܐ ܘܰܫܡܰܝܳܢܺܝܬܳܐ܆ ܗܳܝ ܕܰܠܟܽܠܳܗ̇ ܗܳܝ ܕܰܬܚܶܝܬ ܫܡܰܝܳܐ^[12] ܐܰܪܥܡܰܬ܆ ܘܰܠܡܰܫ̈ܡܥܳܬܳܐ ܕܟܽܠܗܽܘܢ ܒܢܰܝ̈ܢܳܫܳܐ ܟܢܺܝܫܳܐܺܝܬ ܠܡܺܐܡܰܪ ܐܰܙܺܝܥܰܬ܆ ܘܣܶܟܪܰܬ ܠܕܽܘܓ̈ܡܰܛܰܐ ܕܰܓ̈ܳܠܶܐ ܘܠܰܫ̈ܟܳܚܳܬܳܐ ܐ̱ܢܳܫܳܝ̈ܳܬܳܐ. ܐܳܦ ܓܶܝܪ ܡܦܺܝܣܳܢܽܘܬܳܐ ܡܶܕܶܡ ܕܠܳܐ ܡܰܨܽܘܬܳܐ ܐܺܝܬ ܗܘ̣ܳܬ ܒܩܳܠܳܐ ܕܪܰܥܡܳܐ ܗܰܘ܆ ܕܢܳܓܕܳܐ ܗ̱ܘܳܬ ܗܰܢܺܝܳܐܺܝܬ ܠܗܳܢܽܘܢ ܕܫܳܡܥܺܝܢ ܗ̱ܘܰܘ. ܗܳܢܳܐ ܕܶܝܢ ܩܳܠܳܐ ܒܓܺܝܓܠܳܐ ܗܘ̣ܳܐ܆ ܘܠܰܘ ܒܰܚܕܳܐ ܦܢܺܝܬܳܐ ܘܒܰܚܕܳܐ ܓܽܘܢܝܳܐ. ܓܺܝܓܠܳܐ ܕܶܝܢ ܥܳܠܡܳܐ ܐܺܝܬܰܘܗ̱ܝ܆ ܡܶܛܽܠ ܗܳܝ ܕܰܒܗܶܝܢ ܟܰܕ ܒܗܶܝܢ ܡܶܬܟܪܶܟ܆ ܘܰܒܫܳܥ̈ܶܐ ܘܰܒܝܰܘ̈ܡܳܬܳܐ ܘܰܒܠܰܝ̈ܠܰܘܳܬܳܐ܆ ܘܰܒܝܰܪ̈ܚܶܐ ܘܰܒܡܰܘ̈ܠܳܕܶܐ ܘܰܒܡܰܘ̈ܬܳܢܶܐ܆ ܘܰܒܫܽܘܚ̈ܠܳܦܶܐ ܡܦܰܬܟ̈ܶܐ ܗܳܠܶܝܢ ܐ̱ܚܪ̈ܳܢܶܐ ܘܕܰܒܗܶܝܢ ܟܰܕ ܒܗܶܝܢ ܐܳܬܶܝܢ. ܐܰܝܟܰܢܳܐ ܕܢܶܣܬܒܰܪ ܕܡܰܣܶܐܒ ܘܬܽܘܒ ܡܶܬܛܰܠܶܐ܆ ܕܰܡܗܰܒܶܒ ܟܺܝܬ ܘܰܕܚܳܡܶܐ. ܘܡܶܢ ܗܳܠܶܝܢ ܕܰܫܠܶܡ ܒܗܶܝܢ܆ ܒܗܳܠܶܝܢ ܬܽܘܒ ܡܶܬܥܰܠܶܐ. ܡܶܛܽܠ ܗܳܕܶܐ ܐ̱ܢܳܫ ܐ̱ܚܪܺܢܳܐ ܠܰܘ ܓܺܝܓܠܳܐ ܦܫܺܝܛܳܐܺܝܬ܆ ܐܶܠܳܐ ܓܺܝܓܠܳܐ ܕܰܗܘܳܝܳܐ ܩܪܳܝܗ̱ܝ.

ܟܰܕ ܗܘ̣ܳܐ ܩܳܠܳܐ ܕܪܰܥܡܳܐ ܒܓܺܝܓܠܳܐ܆ ܐܰܢܗܰܪܘ ܐܳܡܰܪ ܒܰܪ̈ܩܶܐ ܕܺܝܠܳܟ ܠܡܶܬܥܰܡܪܳܢܺܝܬܳܐ. ܟܰܕ ܒܰܪ̈ܩܶܐ ܐܳܡܰܪ: ܠܢܰܨܺܝܚ̈ܘܳܬܳܐ ܕܦܽܘܩ̈ܕܳܢܶܐ ܕܦܳܪܽܘܩܰܢ ܕܡܰܒܪ̈ܩܳܢ ܒܰܡܝܰܬܪ̈ܳܬܳܐ. ܐܶܢ ܓܶܝܪ ܩܳܠܳܐ ܕܗܳܢܽܘܢ ܕܡܰܟܪܙܺܝܢ ܪܰܥܡܳܐ ܐܺܝܬܰܘܗ̱ܝ܆ ܡܶܢ ܟܽܠܦܪܽܘܤ ܐܳܦ ܗܰܘ ܡܳܐ ܕܡܶܫܬܰܡܠܶܐ ܡܶܢܶܗ ܘܢܳܩܶܦ܆ ܒܰܪ̈ܩܶܐ ܐܺܝܬܰܘܗ̱ܝ. ܟܰܕ ܕܶܝܢ ܒܰܪ̈ܩܶܐ ܐܰܢܗܰܪܘ ܡܶܢ ܩܳܠܳܐ ܕܪܰܥܡܳܐ܆ ܐܶܬܬܙܺܝܥܰܬ ܘܪܰܥܽܘܠܬܳܐ ܗܘ̣ܳܬ ܐܰܪܥܳܐ܆ ܬܰܪ̈ܥܝܳܬܳܐ ܗܳܠܶܝܢ ܙܰܒ̈ܢܳܝܳܬܳܐ ܘܕܰܠܘܳܬ ܐܰܪܥܳܐ ܐܰܣܺܝܪ̈ܳܢ. ܠܡܶܛܰܪ ܕܶܝܢ ܫܰܘܝܳܐ܆ ܕܰܐܝܟܰܢܳܐ ܠܳܐ ܐܶܡܰܪ ܕܢܰܢܗܪܽܘܢ ܒܰܪ̈ܩܶܐ ܘܰܬܙܽܘܥ ܐܰܪܥܳܐ܆ ܐܶܠܳܐ ܕܰܐܢܗܰܪܘ ܘܰܕܙܳܥܰܬ܆ ܡܶܛܽܠ ܫܰܪܺܝܪܽܘܬܳܗ̇ ܘܠܳܐ ܦܰܘܕܳܗ̇ ܕܰܢܒܺܝܽܘܬܳܐ܆ ܘܗܳܝ ܕܡܶܢ ܟܽܠ ܦܪܽܘܤ ܥܬܺܝܕܳܐ ܗ̱ܘܳܬ ܕܬܶܗܘܶܐ܆ ܐܰܝܟ ܗܰܘ ܕܡܶܢ ܟܰܕܽܘ ܢܶܦܩܰܬ ܠܳܗ̇܆ ܟܰܕ ܒܙܰܒܢܳܐ ܕܰܥܒܰܪ ܘܠܰܘ ܒܗܰܘ ܕܰܥܬܺܝܕ ܐܶܬܚܰܫܰܚ. ܠܗܳܕܶܐ ܓܶܝܪ ܒܣܰܓܺܝ̈ܳܐܬܳܐ ܐܺܝܬ ܠܡܶܫܟܳܚܽܘ.

ܘܡܶܟܺܝܠ܆ ܡܰܝܬܶܐ ܒܳܬܰܪܟܶܢ ܗܽܘ ܡܙܰܡܪܳܢܳܐ ܟܰܕ ܡܶܬܕܰܡܰܪ. ܒܝܰܡܳܐ ܐܽܘܪܚܳܟ ܘܰܫܒܺܝ̈ܠܰܝܟ ܒܡܰܝ̈ܳܐ ܣܰܓܺܝ̈ܶܐܐ. ܘܥܶܩ̈ܒܳܬܳܟ܆ ܠܳܐ ܢܶܬܝܰܕܥ̈ܳܢ. ܩܳܕܶܡ ܐ̱ܢܳܐ ܐܳܡܰܪ ܚܳܙܶܐ ܐ̱ܢܳܐ ܐܳܘ ܡܳܪܝܳܐ܆ ܘܬܳܡܰܗ ܐ̱ܢܳܐ ܒܽܐܘܪܚܳܐ ܕܣܳܝܽܘܡܽܘܬ ܢܳܡܽܘܣܳܐ ܕܺܝܠܳܟ ܐܶܘܰܢܓܶܠܳܝܬܳܐ܆ ܗܳܝ ܕܗܳܟܰܢܳܐ ܐܺܝܬܶܝܗ̇ ܚܰܬܺܝܬܬܳܐ܆ ܕܰܒܝܰܡܳܐ܆ ܗܳܢܰܘ ܕܶܝܢ ܒܪܰܛܺܝܒܽܘܬܳܐ ܘܰܒܗܰܢܺܝܽܐܘܬ ܚܰܫ̈ܶܐ ܕܥܳܠܡܳܐ ܗܳܢܳܐ ܡܗܰܠܟܳܐ ܘܡܶܫܬܰܘܫܛܳܐ ܘܪܳܒܝܳܐ܆ ܘܒܳܐܕܫ̈ܶܐ ܡܫܰܚ̈ܠܦܶܐ ܘܰܫܒܺܝ̈ܠܶܐ ܕܰܡܝܰܬܪ̈ܳܬܳܐ܆ ܒܫܽܘܟܳܢ̈ܶܐ ܟܺܝܬ ܪ̈ܽܘܚܳܢܳܝܶܐ܆ ܒܡܶܠܬܳܐ ܕܚܶܟܡܬܳܐ܆ ܒܡܶܠܬܳܐ ܕܺܝܕܰܥܬܳܐ܆ ܒܫܽܘܟܳܢ̈ܶܐ ܕܳܐܣܺܝ̈ܘܳܬܳܐ܆ ܒܡܰܥ̈ܒܕܳܢܘܳܬܳܐ ܕܚ̈ܰܝܠܶܐ܆ ܘܗܳܠܶܝܢ ܥܰܠ ܡܰܝ̈ܳܐ ܣܰܓܺܝ̈ܶܐܐ ܘܰܡܫܰܚ̈ܠܦܶܐ ܕܰܪ̈ܓܺܝܓܳܬܳܐ ܡܦ̈ܰܬܟܳܬܳܐ܆ ܐܳܦ ܚܰܪܺܝܦܳܐܺܝܬ ܘܩܰܠܺܝܠܳܐܺܝܬ܆ ܐܰܝܟܰܢܳܐ ܕܳܐܦܠܳܐ ܥܶܩ̈ܒܳܬܳܐ ܕܰܫܒܺܝ̈ܠܶܐ ܕܺܝܠܳܟ ܢܶܬܝ̈ܰܕܥܳܢ܆ ܡܶܛܽܠ ܗܳܝ ܕܒܰܕܡܽܘܬ ܡܶܕܶܡ ܩܰܠܺܝܠܳܐ ܘܦܳܪܽܘܚܳܐ ܪܶܗܛܰܬ ܡܶܠܬܳܐ ܦܳܪܽܘܩܳܝܬܳܐ ܒܡܶܬܥܰܡܪܳܢܺܝܬܳܐ.

ܠܗܳܢܳܐ ܕܶܝܢ ܪܰܘܡܳܐ܆ ܠܳܐ ܐܳܬܶܝܢ ܗ̱ܘܰܘ ܗܳܢܽܘܢ ܕܶܐܣܬܰܒܰܪܘ܆ ܐܶ‌ܠܽܘ ܠܳܐ ܩܰܕܶܡܘ ܐܶܬܗܰܕܺܝܘ ܐܰܝܟ ܕܰܒܝܽܘܠ̈ܦܳܢܶܐ ܡܶܕܶܡ ܡܥܰܠܰܝ̈ܳܐ^[13]܆ ܒܦܽܘܩ̈ܕܳܢܶܐ ܢܳܡܽܘ̈ܣܳܝܶܐ ܕܰܒܝܰܕ ܡܽܘܫܶܐ ܗܳܢܽܘܢ ܐܶܤܛܽܘܟ̈ܣܳܢܳܝܶܐ^[14] ܘܫܰܪ̈ܘܳܝܶܐ܆ ܘܩܰܕܶܡܘ ܐܶܬܝܰܠܰܦܘ ܘܶܐܬܶܐܪܶܙܘ ܒܟܳܗܢܽܘܬܳܐ ܗܳܝ ܛܽܘܦܣܳܢܳܝܬܳܐ ܕܰܐܝܟ ܢܳܡܽܘܣܳܐ. ܗܰܕܺܝܬ ܓܶܝܪ ܐܳܡܰܪ ܠܥܰܡܳܟ ܐܰܝܟ ܥܳܢܳܐ܆ ܒܺܐܝܕܳܐ ܕܡܽܘܫܶܐ ܘܕܰܐܗܪܽܘܢ. ܒܟܽܠ ܕܽܘܟ ܓܶܝܪ ܫܠܺܝ̈ܚܶܐ܆ ܟܰܕ ܠܡ̈ܶܠܶܐ ܢܳܡܽܘܣܳܝ̈ܬܳܐ ܘܰܢܒܺܝ̣ܳܝ̣̈ܳܬܳܐ ܡܦܰܬܚܺܝܢ ܗ̱ܘܰܘ ܘܡܰܢܗܪܺܝܢ܆ ܘܡܶܢ ܬܰܡܳܢ ܥܳܒܕܺܝܢ ܗ̱ܘܰܘ ܫܽܘܪܳܝܳܐ܆ ܡܫܰܪܪܺܝܢ ܗ̱ܘܰܘ ܠܶܗ ܠܶܐܘܰܢܓܶܠܺܝܽܘܢ܆ ܘܟܰܕ ܠܗܳܢܽܘܢ ܕܡܶܢ ܐܺܝܣܪܳܐܶܝܠ܆ ܘܰܠܥܰܡ̱ܡ̈ܶܐ ܗܳܢܽܘܢ ܕܫܰܪܟܳܐ܆ ܡܰܟܪܙܺܝܢ ܗ̱ܘܰܘ ܠܳܗ̇ ܠܡܶܠܬܳܐ.

ܢܶܫܟܰܚ ܕܶܝܢ ܐ̱ܢܳܫ܆ ܕܳܐܦ ܐܰܟܘܳܬܳܗ̇ ܕܰܟܬܺܝܒܬܳܐ ܘܰܐܝܟ ܗܰܘܢܳܐ ܦܫܺܝܩܳܐ܆ ܢܶܣܒܺܝܗ̇ ܠܗܳܝ ܕܰܚܙܰܐܘܽܟ ܡܰܝ̈ܳܐ ܐܰ‌ܠܳܗܳܐ ܘܰܕܚܶܠܘ. ܝܳܕܥܳܐ ܓܶܝܪ ܡܶܠܬܳܐ ܐܺܝܬ ܐܶܡܰܬܝ܆ ܐܳܦ ܕܬܶܥܒܶܕ ܦܰܪܨܽܘܦܳܐ܆ ܘܰܕܥܰܠ ܠܳܐ ܡܢܰܦ̈ܫܶܐ ܘܠܳܐ ܡܰܪ̈ܓܫܳܢܶܐ܆ ܬܣܺܝܡ ܡܰܪܓܫܳܢܽܘܬܳܐ ܘܬܰܪܥܺܝܬܳܐ. ܚܙܰܘ ܗܳܟܺܝܠ ܡܰܝ̈ܳܐ ܕܝܽܘܪܕܢܳܢ ܠܡܰܚܰܬܬܳܐ ܕܰܠܗܽܘܢ ܕܰܐ‌ܠܳܗܳܐ܆ ܘܰܕܚܶܠܘ ܘܰܪܥܶܠܘ. ܘܳܐܦ ܠܗܳܝ ܕܰܒܝܰܡܳܐ ܐܽܘܪܚܳܟ ܢܺܐܡܪܺܝܗ̇ ܐ̱ܢܳܫ܆ ܕܡܶܛܽܠ ܡܳܪܰܢ ܗܰܘ ܕܥܰܠ ܝܰܡܳܐ ܗܰܠܶܟ ܩܰܕܺܝܡܳܐ ܗ̱ܘܳܬ ܐܰܡܺܝܪܳܐ. ܒܪܰܡ ܡܰܫܠܡܳܢܽܘܬܳܐ ܚܰܬܺܝܬ̣ܬܳܐ ܕܟܽܠܗܶܝܢ ܗܳܠܶܝܢ ܡ̈ܶܠܶܐ ܘܰܕܣܽܘ̈ܟܳܠܶܐ ܕܰܥܠܰܝܗܶܝܢ܆ ܐܰܝܟ ܦܽܘܫܳܩܳܐ ܗܰܘ ܕܩܰܕܶܡ ܐܶܬܶܐܡܰܪ ܡܶܢ ܠܥܶܠ ܡܶܬܢܰܛܪܳܐ. ܕܗܳܠܶܝܢ ܟܽܠܗܶܝܢ ܛܳܒ̈ܳܬܳܐ ܗܘ̣ܳܬ ܠܰܢ ܡܙܰܡܢܳܢܺܝܬܳܐ ܡܰܚܰܬܬ̣ܶܗ ܕܰܠܝܽܘܪܕܢܳܢ܆ ܕܝܶܫܽܘܥ ܐܰ‌ܠܳܗܳܐ ܦܳܪܽܘܩܰܢ. ܡܶܢ ܬܰܡܳܢ ܕܚܶܠܘ ܡܰܝ̈ܳܐ܆ ܐܶܬܕܰܠܰܚܘ ܬܗܽܘ̈ܡܶܐ܆ ܝܰܗܒܘ ܩܳܠܳܐ ܥܢܳܢ̈ܶܐ܆ ܘܰܦܪܰܚܘ ܓܶܐܪ̈ܶܐ܆ ܘܶܐܬܳܐ ܫܶܡܥܶܗ ܕܩܳܠܳܐ ܕܰܥܒܰܪ ܒܓܺܝܓܠܳܐ܆ ܘܰܐܢܗܰܪܘ ܒܰܪ̈ܩܶܐ ܒܟܽܠܳܗ̇ ܡܶܬܥܰܡܪܳܢܺܝܬܳܐ܆ ܘܙܳܥܰܬ ܐܰܪܥܳܐ܆ ܘܝܰܡܳܐ ܐܶܬܥܒܰܪ^[15]܆ ܘܡܰܝ̈ܳܐ ܫܒܺܝ̈ܠܶܐ ܕܰܡܝܰܬܪ̈ܳܬܳܐ ܡܩܰܒܥܺܝܢ ܗ̱ܘܰܘ܆ ܘܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܘܟܽܘܗܳܢܳܐ ܐܰܗܪܽܘܢܳܝܳܐ܆ ܟܰܕ ܥܳܒܶܕ ܗ̱ܘܳܐ ܐܽܘܪܚܳܐ ܠܶܐܘܰܢܓܶܠܺܝܽܘܢ܆ ܒܝܰܕ ܡܰܠܦܳܢܽܘܬܳܐ ܡܫܰܡܠܰܝܬܳܐ ܕܰܫ̈ܠܺܝܚܶܐ ܘܦܽܘܠܚܳܢ ܟܳܗܢܽܘܬܳܐ܆ ܡܶܬܡܰܠܶܐ ܗ̱ܘܳܐ ܘܡܶܬܚܰܦܶܐ ܘܰܡܕܺܝܩ ܗ̱ܘܳܐ.

ܕܗܳܕܶܐ ܕܶܝܢ ܗܳܟܰܢܳܐ ܐܺܝܬ ܠܳܗ̇ ܣܳܗܶܕ ܐܳܦ ܛܽܘܦܣܳܐ ܗܰܘ ܕܰܗܘ̣ܳܐ ܡܶܢ ܩܕܺܝܡ. ܗܳܢܽܘܢ ܓܶܝܪ ܕܡܶܢ ܐܺܝܣܪܳܐܶܝܠ܆ ܗܳܢܽܘܢ ܕܥܰܡ ܝܶܫܘܥ ܗܰܘ ܒܪܶܗ ܕܢܽܘܢ^[16] ܥܒܰܪܘ ܝܽܘܪܕܢܳܢ ܒܪܶܓܠܳܐ܆ ܬܰܪܬܰܥܶܣܪ̈ܶܐ ܡܰܢ ܟܺܐܦ̈ܶܐ ܐܰܣܶܩܘ ܡܶܢܶܗ܆ ܘܰܛܥܶܢܘ ܐܶܢܶܝܢ ܥܰܠ ܟܰܬܦ̈ܳܬܗܽܘܢ܆ ܬܰܪܬܰܥܶܣܪ̈ܶܐ ܕܶܝܢ ܐ̱ܚܪ̈ܳܢܝܳܬܳܐ ܐܰܩܺܝܡܘ ܒܰܡܨܰܥܬܶܗ ܕܢܰܗܪܳܐ. ܟܰܕ ܗܳܕܶܐ ܡܰܘܕܥܳܐ ܡܶܠܬܳܐ ܓܰܠܝܳܐܺܝܬ܆ ܕܺܐܝܣܰܪ̈ܠܳܝܶܐ ܠܰܬܪܶܥܣܰܪ ܡܰܢ ܫ̈ܠܺܝܚܶܐ ܕܰܒܢܰܝ̈ܗܽܘܢ ܐܺܝܬܰܝܗܽܘܢ ܗ̱ܘܰܘ ܒܰܒܣܰܪ܆ ܠܝܽܘܪܕܢܳܢ ܫܰܟܶܢܘ ܐܶܢܽܘܢ܆ ܐܰܝܟܰܢܳܐ ܕܰܠܐ̱ܪܳܙܶܗ ܕܗܰܘ ܢܫܰܡܫܽܘܢ܆ ܟܰܕ ܐܳܙܺܠ̱ܝܢ ܘܡܰܥܡܕܺܝܢ ܠܟܽܠܗܽܘܢ ܥܰܡ̱ܡ̈ܶܐ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ܆ ܠܗܽܘܢ ܕܶܝܢ ܟܰܕ ܠܗܽܘܢ ܠܰܬܪܶܥܣܰܪ ܕܪܽܘܚܳܢܳܐܺܝܬ ܒܝܽܘܪܕܢܳܢ ܐܶܬܺܝܠܶܕܘ܆ ܘܰܐ̱ܚܪ̈ܳܢܶܐ ܚܠܳܦ ܐ̱ܚܪ̈ܳܢܶܐ ܗܘ̣ܰܘ܆ ܫܩܰܠܘ ܐܶܢܽܘܢ ܘܥܰܠ ܟܰܬܦ̈ܳܬܗܽܘܢ ܛܥܶܢܘ ܐܶܢܽܘܢ܆ ܟܰܕ ܐܶܬܪܟܶܢܘ ܠܡܰܠ̈ܦܳܢܘܳܬܳܐ ܕܺܝܠܗܽܘܢ. ܫܳܡܥܺܝܢ ܗ̱ܘܰܘ ܓܶܝܪ ܐܳܦ ܗܶܢܽܘܢ ܫܠܺܝ̈ܚܶܐ ܠܦܳܪܽܘܩܰܢ ܕܳܐܡܰܪ: ܕܝܽܘܚܰܢܳܢ ܡܰܢ ܐܰܥܡܶܕ ܒܡܰܝ̈ܳܐ܆ ܐܰܢ̱ܬܽܘܢ ܕܶܝܢ ܬܰܥܡܕܽܘܢ ܒܪܽܘܚܳܐ ܩܰܕܺܝܫܳܐ^[17].

ܥܡܳܕܳܐ ܕܶܝܢ ܗܰܘ ܕܰܒܪܽܘܚܳܐ ܩܰܕܺܝܫܳܐ ܡܶܫܬܰܡܠܶܐ܆ ܡܶܢ ܝܽܘܪܕܢܳܢ ܩܰܒܶܠ ܫܽܘܪܳܝܳܐ܆ ܟܰܕ ܬܰܡܳܢ ܢܚܶܬ ܪܽܘܚܳܐ ܕܣܳܝܽܘܡܽܘܬ ܒܢܰܝ̈ܳܐ. ܠܰܢ ܓܶܝܪ ܘܠܰܘ ܠܶܗ ܥܡܰܕ ܡܫܺܝܚܳܐ܆ ܟܰܕ ܡܕܰܟܶܐ ܘܰܡܩܰܕܶܫ ܠܗܽܘܢ ܠܡܰܝ̈ܳܐ܆ ܘܠܰܘ ܟܰܕ ܗܽܘ ܡܶܢܗܽܘܢ ܡܶܬܕܰܟܶܐ܆ ܐܰܝܟܰܢܳܐ ܓܶܝܪ ܗܰܘ ܕܶܐܬܺܝܠܶܕ ܠܰܢ ܡܶܢ ܐܰ‌ܠܳܗܳܐ ܚܶܟܡܬܳܐ܆ ܙܰܕܺܝܩܽܘܬܳܐ ܟܺܝܬ ܘܩܰܕܺܝܫܽܘܬܳܐ ܘܦܽܘܪܩܳܢܳܐ^[18]܆ ܘܠܰܢ ܡܶܢ ܠܒܰܪ ܒܰܕܡܽܘܬܳܐ ܕܝܰܘܢܳܐ ܡܩܰܒܶܠ ܗ̱ܘܳܐ ܠܳܗ̇ ܠܡܶܐܬܺܝܬܶܗ ܕܪܽܘܚܳܐ܆ ܠܗܰܘ ܟܺܝܬ ܕܒܰܟܝܳܢܳܐ ܐܺܝܬ ܗ̱ܘܳܐ ܠܶܗ ܒܶܗ ܐܰܝܟ ܫܘܶܐ ܒܽܐܘܣܺܝܰܐ. ܡܶܛܽܠܗܳܕܶܐ ܓܶܝܪ ܠܰܘ ܟܰܕ ܐܺܝܬܰܘܗ̱ܝ ܗ̱ܘܳܐ ܒܗܽܘܢ ܒܡܰܝ̈ܳܐ ܠܬܰܚܬ܆ ܢܰܓܕܳܗ̇ ܠܣܳܗܕܽܘܬܶܗ ܕܰܐܒܳܐ ܕܰܒܪܳܐ ܡܰܘܕܝܳܐ ܠܶܗ܆ ܘܰܠܡܶܐܬܺܝܬܶܗ ܕܪܽܘܚܳܐ܆ ܐܰܝܟܰܢܳܐ ܕܠܳܐ ܐ̱ܢܳܫ ܢܶܣܒܰܪ܆ ܕܡܶܢ ܡܰܥܡܽܘܕܺܝܬܳܐ ܐܰܝܟܰܢܳܐ ܕܰܚܢܰܢ ܥ̣ܬܰܪ ܣܳܝܽܘܡܽܘܬ ܒܢܰܝ̈ܳܐ. ܐܺܝܬ ܗ̱ܘܳܐ ܠܶܗ ܒܶܗ ܓܶܝܪ ܒܽܐܘܣܺܝܰܐ ܠܰܐܒܳܐ ܘܰܠܪܽܘܚܳܐ ܩܰܕܺܝܫܳܐ. ܘܟܰܕ ܢܚܶܬ ܠܡܰܝ̈ܳܐ ܠܰܢ ܘܠܰܘ ܠܶܗ܆ ܥܰܒ̣ܕܶܗ ܡܫܰܡܠܝܳܐ ܠܰܥܡܳܕܳܐ.

ܡܶܛܽܠ ܗܳܕܶܐ܆ ܡܶܢ ܒܳܬܰܪ ܡܰܣܰܩܬܳܐ ܕܡܶܢ ܡܰܝ̈ܳܐ ܗܘ̣ܳܬ܆ ܗܳܝ ܕܰܐܢ̱ܬ ܐܺܝܬܰܝܟ ܒܪܳܐ ܕܺܝܠܝ ܗܰܘ ܚܰܒܺܝܒܳܐ܆ ܘܗܳܝ ܕܪܽܘܚܳܐ ܕܢܳܚܶܬ ܗ̱ܘܳܐ ܐܰܝܟ ܝܰܘܢܳܐ ܘܳܐܬܶܐ ܗ̱ܘܳܐ ܥܠܰܘܗ̱ܝ^[19]. ܐܰܝܟܰܢܳܐ ܕܰܒܝܰܕ ܡܶܬܪ̈ܰܓܫܳܢܝܳܬܳܐ ܗܳܠܶܝܢ܆ ܘܕܰܒܫܶܡܥܳܐ ܘܒܰܚܙܳܬܳܐ ܡܶܬܝ̈ܰܕܥܳܢ܆ ܗܳܝ ܕܰܡܛܰܫܝܳܐ ܬܶܬܓܠܶܐ. ܘܶܐܢ ܕܶܝܢ ܠܳܐ ܐܶܢ ܠܰܘ ܗܽܘ ܡܶܠܬܳܐ ܗܰܘ ܕܶܐܬܒܰܣܰܪ ܐܺܝܬܰܘܗ̱ܝ ܗ̱ܘܳܐ ܗܰܘ ܕܰܒܝܽܘܪܕܢܳܢ ܥܡܰܕ ܚܠܳܦܰܝܢ ܘܰܡܕܰܒܪܳܢܳܐܺܝܬ܆ ܐܶܠܳܐ ܒܰܪܢܳܫܳܐ ܕܰܡܦ̣ܰܠܰܓ ܘܰܦܪܺܝܫ ܡܶܢ ܡܶܠܬܳܐ܆ ܐܰܝܟ ܡܶܠܬܳܐ ܕܗܳܢܽܘܢ ܕܗܳܠܶܝܢ ܕܢܶܣܛܽܘܪܺܝܽܘܤ ܡܶܬܪܰܥܶܝܢ܆ ܘܳܐܡܪܺܝܢ ܬܪܶܝܢ ܟܝܳܢ̈ܶܐ ܡܶܢ ܒܳܬܰܪ ܚܕܳܝܽܘܬܳܐ܆ ܥܰܠ ܡܰܝ̈ܳܐ ܝܰܬܺܝܪܳܐܺܝܬ ܐܰܝܟܰܢܳܐ ܕܰܥܠܰܝܢ܆ 222ܙܰܕܶܩ ܗ̱ܘܳܐ ܕܶܢܚܰܬ ܪܽܘܚܳܐ ܩܰܕܺܝܫܳܐ܆ ܘܶܐܬܩܰܪܝܰܬ ܥܠܰܘܗ̱ܝ ܒܰܪ̱ܬ ܩܳܠܳܐ ܗܳܝ ܕܰܐܝܟ ܕܡܶܢ ܦܰܪܨܽܘܦܳܐ ܕܰܐܒܳܐ ܐܶܬܬܰܝܬܝܰܬ. ܐܰܪܰܐ ܗܳܟܺܝܠ܆ ܣܦܺܝ̈ܩܶܐ ܐܺܝܬܰܝܗܽܘܢ ܗ̱ܘܰܘ ܡܰܝ̈ܳܐ ܐܰܝܟ ܡܶܠܰܬܗܽܘܢ܆ ܡܶܢ ܐܰܒܳܐ ܘܡܶܢ ܪܽܘܚܳܐ܆ ܡܶܛܽܠ ܕܡܶܢ ܒܳܬܰܪ ܡܰܣܰܩܬܳܐ ܐܺܝܬܰܘܗ̱ܝ ܗ̱ܘܳܐ ܩܳܠܳܐ. ܡܶܢ ܒܳܬܰܪ ܡܰܣܰܩܬܳܐ ܗܳܝ ܡܶܐܬܺܝܬܳܐ ܕܪܽܘܚܳܐ ܗܳܝ ܕܰܐܝܟ ܕܒܰܚܙܳܬܳܐ ܕܝܰܘܢܳܐ. ܐܶܠܳܐ ܫܰܦܺܝܪ ܝܺܕܺܝܥܳܐ܆ ܕܡܶܠܬܳܐ ܗܰܘ ܕܶܐܬܒܰܪܢܰܫ ܟܰܕ ܚܰܕ ܐܺܝܬܰܘܗ̱ܝ ܘܠܳܐ ܡܶܬܦܰܠܓܳܢܳܐ܆ ܟܕ ܠܫܶܦ̈ܥܶܐ ܕܝܽܘܪܕܢܳܢ ܥ̣ܰܠ܆ ܐܺܝܬ ܗ̱ܘܳܐ ܠܶܗ ܡܰܢ ܒܶܗ ܠܰܐܒܳܐ ܘܰܠܪܽܘܚܳܐ ܩܰܕܺܝܫܳܐ܆ ܒܗܳܝ ܕܗܺܝ ܟܰܕ ܗܺܝ ܕܽܐܘܣܺܝܰܐ܆ ܡܶܢ ܒܳܬܰܪ ܕܶܝܢ ܕܰܠܒܰܪ ܡܶܢ ܡܰܝ̈ܳܐ ܗܘ̣ܳܐ܆ ܡܶܛܽܠܳܬܰܢ ܢܳܣܶܒ ܗ̱ܘܳܐ ܠܶܗ ܠܪܽܘܚܳܐ. ܘܡܶܛܽܠܳܬܰܢ ܫܳܡܰܥ ܗ̱ܘܳܐ ܗܳܝ ܕܒܶܪܝ ܐܺܝܬܰܝܟ܆ ܐܰܝܟܰܢܳܐ ܕܰܚܢܰܢ ܒܶܗ ܢܶ݀ܬܩܪܶܐ ܒܢܰܝ̈ܳܐ܆ ܟܰܕ ܡܰܩܪ̈ܒܳܢܶܐ ܘܰܒܥܶܠ̈ܕܒܳܒܶܐ ܗܘ̣ܰܝܢܰܢ ܡܶܛܽܠ ܚܛܺܝܬܳܐ.

ܒܪܰܡ ܐܳܦ ܗܳܕܶܐ܆ ܦܰܐܝܽܘܬ ܐܰ‌ܠܳܗܳܐܺܝܬ ܐܰܟܚܕܳܐ ܘܰܡܕܰܒܪܳܢܳܐܺܝܬ. ܗܳܝ ܡܰܢ ܓܶܝܪ ܕܰܐܢ̱ܬ ܗ̱ܘ̣ ܒܪܳܐ ܕܺܝܠܝ܆ ܕܺܝܠܺܝܕܽܘܬܳܐ ܗܳܝ ܐܰ‌ܠܳܗܳܝܬܳܐ ܘܰܕܠܳܐ ܓܫܽܘܡ ܘܫܰܪܺܝܪܬܳܐ ܘܰܕܒܽܐܘܣܺܝܰܐ ܐܺܝܬܶܝܗ̇ ܡܚܰܘܝܳܢܺܝܬܳܐ. ܕܺܐܝܬܰܝܟ ܓܶܝܪ ܒܪܳܐ ܐܶܡܰܪ: ܘܠܰܘ ܕܰܗܘ̣ܰܝܬ. ܗܳܝ ܕܶܝܢ ܕܚܰܒܺܝܒܳܐ܆ ܕܪܶܚܡܰܬ ܐ̱ܢܳܫܽܘܬܳܐ ܗܳܝ ܕܰܠܘܳܬܰܢ ܐܺܝܬܶܝܗ̇ ܡܫܰܘܕܥܳܢܺܝܬܳܐ. ܒܶܗ ܓܶܝܪ ܐܰܝܟ ܕܰܒܪܺܝܫܺܝܬܳܐ ܬܪܰܝܳܢܺܝܬܳܐ ܕܓܶܢܣܰܢ܆ ܚܰܒܺܝ̈ܒܶܐ ܩܪܳܐ ܠܰܢ ܗܳܢܽܘܢ ܕܰܣܢܺܝܐܺܝܢ ܗ̱ܘܰܝܢ. ܡܶܛܽܠ ܕܳܐܦ ܐܰܝܟ ܡܶܠܬܶܗ ܕܦܰܘܠܽܘܤ܆ ܐܰ‌ܠܳܗܳܐ ܐܰܒܳܐ ܐܺܝܬܰܘܗ̱ܝ ܗ̱ܘܳܐ܆ ܕܒܰܡܫܺܝܚܳܐ ܠܥܳܠܡܳܐ ܗܳܢܳܐ ܡܪܰܥܶܐ ܗ̱ܘܳܐ^[20]. ܡܶܛܽܠ ܗܳܕܶܐ ܐܳܦ ܠܰܫܡܰܝܳܐ ܦܬܰܚ. ܐܰܝܟܰܢܳܐ ܕܢܺ݀ܐܠܰܦ ܕܰܫܡܰܝܳܢܺܝܬܳܐ ܐܺܝܬܶܝܗ̇ ܝܺܠܺܝܕܽܘܬܳܐ ܗܳܝ ܕܡܶܢ ܡܰܝ̈ܳܐ ܘܪܽܘܚܳܐ܆ ܗܳܝ ܕܒܳܗ̇ ܡܫܺܝܚܳܐ ܥܰܠ ܝܽܘܪܕܢܳܢ ܫܰܪܺܝ ܠܰܢ܆ ܘܰܠܬܰܪ̈ܥܶܐ ܕܰܫܡܰܝܳܐ ܦܳܬܚܳܐ܆ ܘܒܰܕܡܽܘܬ ܟܰܘܟ̈ܒܶܐ ܡܢܰܨܚܳܐ ܘܰܡܗܰܕܪܳܐ ܠܗܳܢܽܘܢ ܕܥܳܡܕܺܝܢ܆ ܘܰܡܚܰܠܠܳܐ ܘܡܳܪܩܳܐ ܡܶܢ ܛܺܝܢܳܐ ܘܩܳܪܝܳܐ ܠܘܳܬ ܗܳܠܶܝܢ ܕܰܠܥܶܠ. ܐܳܦ ܓܶܝܪ ܐܰܬܪܳܐ ܕܺܝܠܗܽܘܢ ܕܟܰܘܟ̈ܒܶܐ ܐܺܝܬܰܘܗ̱ܝ ܫܡܰܝܳܐ.

ܗܳܕܶܐ ܐܳܦ ܐܰܒܪܳܗܳܡ ܗܰܘ ܪܺܝܫ ܐܰܒܳܗ̈ܳܬܳܐ܆ ܟܰܕ ܩܰܕܶܡ ܐܶܬܶܐܪܶܙ ܠܗܳܝ ܕܠܳܐ ܡܶܬܡܰܠܠܳܐ܆ ܗܰܝܡܶܢ ܘܶܐܬܚܰܫܒܰܬ ܠܶܗ ܠܙܰܕܺܝܩܽܘܬܳܐ ܐܰܝܟ ܕܰܟܬܺܝܒ. ܙܰܒ̈ܢܺܝܢ ܓܶܝܪ ܣܰܓܺܝ̈ܳܐܢ ܠܶܗ ܟܰܕ ܠܶܗ ܠܡܽܘܠܟܳܢܳܐ ܩܰܒܶܠ܆ ܘܫܳܡܰܥ ܗ̱ܘܳܐ ܡܶܢ ܐܰ‌ܠܳܗܳܐ܆ ܒܰܙܒܰܢ ܡܰܢ ܕܢܶܬܒܰܪ̈ܟܳܢ ܒܳܟ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ܆ ܒܰܙܒܰܢ ܕܶܝܢ ܕܶܐ݀ܥܒܕܺܝܘܗ̱ܝ ܠܙܰܪܥܳܟ ܐܰܝܟ ܚܳܠܳܐ ܕܰܐܪܥܳܐ^[21]܆ ܒܰܙܒܰܢ ܕܶܝܢ܆ ܕܰܐܒܳܐ ܕܥܰܡܡ̈ܶܐ ܣܰܓܺܝ̈ܶܐܐ ܣܳܡܬܳܟ܆ ܘܰܐ݀ܣܓܶܝܟ ܣܰܓܺܝ ܛܳܒ. ܘܰܟܡܳܐ ܙܰܒ̈ܢܺܝܢ ܕܫܳܡܰܥ ܗ̱ܘܳܐ܆ ܟܽܠܗܶܝܢ^[22] ܙܰܒ̈ܢܳܬܳܐ ܡܗܰܝܡܶܢ ܗ̱ܘܳܐ܆ ܘܰܠܗܳܢܶܝܢ ܕܡܶܬܦܰܩ̈ܕܳܢ ܗ̱ܘܰܝ̈ ܠܶܗ ܡܶܫܬܡܰܥ ܗ̱ܘܳܐ܆ ܘܗܳܕܶܐ ܘܠܳܐ ܣܳܟ ܡܶܬܚܰܙܝܳܐ܆ ܕܰܐܡܪܳܗ̇ ܥܠܰܘܗ̱ܝ ܟܬܳܒܳܐ ܗܰܘ ܟܳܗܢܳܝܳܐ܆ ܗܳܝ ܕܗܰܝܡܶܢ ܐܰܒܪܳܗܳܡ ܠܰܐܠܳܗܳܐ ܘܶܐܬܚܰܫܒܰܬ ܠܶܗ ܠܙܰܕܺܝܩܽܘܬܳܐ^[23]. ܐܶܠܳܐ ܐܶܡܰܬܝ ܕܰܠܢܰܨܺܝܚܽܘܬܳܐ ܕܰܒ̈ܢܰܝܳܐ܆ ܗܳܢܽܘܢ ܕܡܶܢ ܗܰܝܡܳܢܽܘܬܳܐ ܕܒܰܡܫܺܝܚܳܐ ܥܬܺܝܕܺܝܢ ܗ̱ܘܰܘ ܕܢܶܗܘܽܘܢ ܠܶܗ ܚܰܘܺܝ ܠܶܗ ܐܰ‌ܠܳܗܳܐ܆ ܗܳܢܽܘܢ ܕܳܐܦ ܥܬܺܝܕܺܝܢ ܗ̱ܘܰܘ ܕܢܶܬܟܰܬܒܽܘܢ ܒܰܫܡܰܝܳܐ܆ ܘܰܐܦܩܶܗ ܠܒܰܪ ܘܶܐܡܰܪ ܠܶܗ: ܚܽܘܪ ܠܥܶܠ ܒܰܫܡܰܝܳܐ ܘܰܡ̣ܢܺܝ ܠܟܰܘܟ̈ܒܶܐ ܐܶܢ ܬܶܫܟܰܚ ܕܬܶܡܢ̣ܶܐ ܐܶܢܽܘܢ܆ ܘܶܐܡܰܪ: ܗܳܟܰܢܳܐ ܢܶܗܘܶܐ ܙܰܪܥܳܟ܆ ܗܳܝܕܶܝܢ ܐܰܝܬܺܝ ܒܳܬܪܳܗ̇܆ ܘܗܰܝܡܶܢ ܐܰܒܪܳܗܳܡ ܠܰܐܠܳܗܳܐ ܘܶܐܬܚܰܫܒܰܬ ܠܶܗ ܠܙܰܕܺܝܩܽܘܬܳܐ^[24]. ܐܳܦ ܓܶܝܪ ܗܺܝ ܗܳܝ ܕܰܐܦܩܶܗ ܠܒܰܪ ܡܶܣܬܰܒܪܳܐ ܠܺܝ܆ ܕܠܰܘ ܦܫܺܝܛܳܐܺܝܬ ܐܰܡܺܝܪܳܐ. ܐܶܠܳܐ ܕܟܰܕ ܠܒܰܪ ܡܶܢ ܣܽܘܥܪܳܢܳܐ ܗܳܠܶܝܢ ܕܩܰܪܺܝܒܺܝܢ ܘܡܶܬܪ̈ܰܓܫܳܢܶܐ ܐܺܝܬܰܝܗܽܘܢ ܥܰܒܕܶܗ܆ ܘܰܐܩܺܝܡܶܗ ܒܬܶܡܗܳܐ܆ ܘܰܐܝܬܝܳܗ̇ ܠܬܰܪܥܺܝܬܶܗ ܠܘܳܬ ܐ̱ܪܳܙܳܐ ܗܰܘ ܕܰܥܬܺܝܕ ܗ̱ܘܳܐ܆ ܗܳܟܰܢܳܐ ܡܚܰܘܶܐ ܗ̱ܘܳܐ ܠܶܗ ܠܰܒ̈ܢܰܝܳܐ ܗܳܢܽܘܢ ܕܰܒܝܰܕ ܗܰܝܡܳܢܽܘܬܳܐ ܕܒܰܥܡܳܕܳܐ܆ ܥܬܺܝܕܺܝܢ ܗ̱ܘܰܘ ܕܢܶܗܘܽܘܢ ܗܕܺܝܪ̈ܶܐ ܘܢܰܨܺܝ̈ܚܶܐ ܒܰܕܡܽܘܬ ܟܰܘܟ̈ܒܶܐ. ܘܡܶܛܽܠ ܟܺܝܬ ܕܗܰܝܡܳܢܽܘܬܳܐ ܐܺܝܬܶܝܗ̇ ܗ̱ܘܳܬ ܗܳܝ ܕܩܰܕܡܰܬ ܐܶܬܝܰܕܥܰܬ ܠܶܗ ܐ̱ܪܳܙܳܢܳܐܺܝܬ ܘܩܰܕܡܰܬ ܐܶܬܚܰܘܝܰܬ܆ ܗܳܝ ܐܰܝ̇ܕܳܐ ܕܳܐܦ ܥܬܺܝܕܳܐ ܗ̱ܘܳܬ ܠܰܡܙܰܕܳܩܽܘ ܠܗܳܢܽܘܢ ܕܗܰܝܡܶܢܘ܆ ܟܰܕ ܐܰ‌ܠܳܗܳܐ ܚܳܫܶܒ ܗ̱ܘܳܐ ܗܰܝܡܳܢܽܘܬܳܐ ܠܙܰܕܺܝܩܽܘܬܳܐ ܐܳܦ ܤܛܰܪ ܡܶܢ ܥ̈ܒܳܕܶܐ܆ ܘܰܡܫܰܟܶܢ ܫܽܘܒܩܳܢܳܐ ܕܗܳܠܶܝܢ ܕܩܰܕܺܝ̈ܡܳܢ 222ܚ̣̈ܛܝܢ܆ ܠܳܚܡܳܐܺܝܬ ܘܟܺܐܢܳܐܺܝܬ ܐܰܝܬܺܝ ܒܳܬܰܪܟܶܢ܆ ܗܳܝ ܕܗܰܝܡܶܢ ܐܰܒܪܳܗܳܡ ܠܰܐܠܳܗܳܐ ܘܶܐܬܚܰܫܒܰܬ ܠܶܗ ܠܙܰܕܺܝܩܽܘܬܳܐ. ܘܶܐܢܕܶܝܢ ܠܳܐ܆ ܐܶܢ ܠܰܘ ܠܘܳܬ ܗܳܝ ܕܰܥܬܺܝܕܳܐ ܚܳܝܪܳܐ ܗ̱ܘܳܬ ܗܳܝ ܕܶܐܬܰܐܡܪܰܬ܆ ܕܘܳܠܝܳܐ ܐܺܝܬܶܝܗ̇ ܗ̱ܘܳܬ ܕܗܳܕܶܐ ܗܳܝܕܶܝܢ ܝܰܬܺܝܪܳܐܺܝܬ ܬܶܣܬܗܶܕ ܗܘܳܬ ܠܰܐܒܪܳܗܳܡ܆ ܐܶܡܰܬܝ ܕܫܳܡܰܥ ܗ̱ܘܳܐ ܕܦܽܘܩ ܡܶܢ ܐܰܪܥܳܟ ܘܡܶܢ ܫܰܪܒܬܳܟ ܘܬܳܐ ܠܰܐܪܥܳܐ ܐܰܝ̇ܕܳܐ ܕܶܐ݀ܚܰܘܶܝܟ^[25]܆ ܘܢܳܦܶܩ ܗ̱ܘܳܐ܆ ܘܗܰܝܡܳܢܽܘܬܳܐ ܫܰܪܺܝܪܬܳܐ ܕܒܰܥ̈ܒܳܕܶܐ ܡܚܰܘܶܐ ܗ̱ܘܳܐ.

ܡܶܛܽܠܳܬܰܢ ܗܳܟܺܝܠ ‌ܐܳܦ ܦܬܳܚܳܐ ܕܰܫܡܰܝܳܐ ܗܘ̣ܳܐ܆ ܐܶܡܰܬܝ ܕܰܡܫܺܝܚܳܐ ܣܠܶܩ ܡܶܢ ܢܰܗܪܳܐ. ܡܶܛܽܠܳܬܰܢ ܐܳܦ ܠܢܶܣܝܳܢܳܐ ܕܳܐܟܶܠܩܰܪܨܳܐ ܩܰܒܶܠ ܟܰܕ ܡܚܰܘܶܐ܆ ܕܟܰܕ ܒܕܰܐܝܟ ܗܳܢܳܐ ܛܶܟܣܳܐ ܢܰܨܺܝܚܳܐ ܡܶܢ ܡܰܥܡܽܘܕܺܝܬܳܐ ܩܳܝܡܺܝܢܰܢ܆ ܘܰܒ̈ܢܰܝܳܐ ܕܰܐ‌ܠܳܗܳܐ ܗܳܘܶܝܢ ܚ̱ܢܰܢ܆ ܘܰܒ̈ܢܰܝ ܡܕܺܝܢ̱ܬܳܐ ܕܰܫܡܰܝܳܐ܆ ܢܶܗܘܶܐ ܐܺܝܬܰܘܗ̱ܝ ܠܰܢ ܐܳܟܶܠܩܰܪܨܳܐ ܕܚܳܣܶܡ ܒܰܢ ܡܶܛܽܠ ܢܰܨܺܝܚܽܘܬܳܐ܆ ܘܰܕܢܶܣܝܳܢܳܐ ܘܕܰܪܳܐ ܡܩܰܪܶܒ ܠܰܢ܆ ܐܰܝܟܰܢܳܐ ܕܳܐܦ ܒܳܐܕܳܡ ܚܣܰܡ ܡܶܛܽܠ ‌ܐܺܝܩܳܪܳܐ ܗܰܘ ܕܰܒܦܰܪܕܰܝܣܳܐ܆ ܘܰܒܝܰܕ ܢܶܣܝܳܢܳܐ ܘܡܰܛܥܝܳܢܽܘܬܳܐ ܐܰܦܩܶܗ ܡܶܢ ܬܰܡܳܢ.

ܠܰܢ ܗܳܟܺܝܠ ܩܰܕܶܡ ܐܶܬܟܰܬܫܳܗ̇ ܡܫܺܝܚܳܐ ܠܩܰܕܺܝܡܽܘܬ ܐܰܓܽܘܢܳܐ ܗܳܕܶܐ܆ ܟܰܕ ܩܰܕܶܡ ܡܰܪܦܶܐ ܘܰܡܫܰܗܶܐ ܠܶܗ ܠܚܰܝܠܶܗ. ܘܰܚܙܺܝ ܠܰܐ̱ܚܝܳܢܽܘܬܳܐ ܕܦܽܘܪ̈ܣܶܐ ܘܨܶܢ̈ܥܳܬܳܐ ܕܳܐܟܶܠܩܰܪܨܳܐ. ܐܰܝܟܰܢܳܐ ܓܶܝܪ ܕܥܰܠ ‌ܐܳܕܳܡ ܡܶܢ ܡܐܟܽܘܠܬܳܐ ܫܰܪܺܝ ܒܡܰܛܥܝܳܢܽܘܬܳܐ܆ ܗܳܟܰܢܳܐ ܐܳܦ ܥܰܠ ܡܫܺܝܚܳܐ܆ ܠܡܶܐܟܽܘܠܬܳܐ ܥܒܰܕ ܪܺܝܫܶܗ ܕܰܩܪܳܒܳܐ. ܟܰܕ ܐܳܡܰܪ: ܕܐܡܰܪ^[26] ܕܟܺܐܦ̈ܶܐ ܗܳܠܶܝܢ ܢܶܗܘ̈ܝܳܢ ܠܰܚ̈ܡܶܐ^[27]. ܘܬܰܡܳܢ ܡܰܢ ܟܰܕ ܗܳܝ ܕܠܳܐ ܐܺܝܬܶܝܗ̇ ܗ̱ܘܳܬ ܐܳܦܠܳܐ ܥܬܺܝܕܳܐ ܕܬܶܗܘܶܐ ܡܶܫܬܰܘܕܶܐ ܗ̱ܘܳܐ ܐܳܡܰܪ ܗ̱ܘܳܐ܆ ܕܟܰܕ ܠܒܰܪ ܡܶܢ ܦܽܘܩܕܳܢܳܐ ܬܶܐܟܠܽܘܢ ܡܶܢ ܐܺܝܠܳܢܳܐ܆ ܐܰܝܟ ܐܰ‌ܠܳܗ̈ܶܐ ܬܶܗܘܽܘܢ^[28]. ܗܳܪܟܳܐ ܕܶܝܢ܆ ܟܰܕ ܠܗܳܝ ܕܺܐܝܬܶܝܗ̇ ܡܕܰܡܶܐ ܐܳܡܰܪ ܗ̱ܘܳܐ: ܕܶܐܢ ܒܪܳܐ ܐܺܝܬܰܝܟ ܕܰܐ‌ܠܳܗܳܐ^[29]. ܐܰܟܚܕܳܐ ܡܰܢ܆ ܘܟܰܕ ܡܰܗܶܠ ܘܡܶܨܛܰܕܶܐ ܒܶܗ ܐܰܝܟ ܕܒܰܐܝܢܳܐ ܕܶܐܬܬܰܛܥܺܝ. ܐܰܟܚܕܳܐ ܕܶܝܢ܆ ܘܟܰܕ ܨܳܒܶܐ ܗ̱ܘܳܐ ܠܡܺܐܠܰܦ ܠܟܰܣܝܽܘܬܶܗ ܕܐ̱ܪܳܙܳܐ܆ ܗܳܝ ܟܺܝܬ ܕܛܰܥܝܳܐ ܗ̱ܘܳܬ ܠܶܗ. ܠܣܳܗܕܽܘܬܶܗ ܡܰܢ ܓܶܝܪ ܕܰܐܒܳܐ ܫܡܰܥ ܗ̱ܘܳܐ܆ ܕܰܒܪܳܐ ܐܰܟܪܶܙܬ̣ܶܗ. ܚܳܙܶܐ ܗ̱ܘܳܐ ܠܶܗ ܕܶܝܢ ܕܰܟܦܶܢ܆ ܘܡܶܬܦܰܫܟܳܢܳܐܺܝܬ ܐܺܝܬ ܗ̱ܘܳܐ ܠܶܗ. ܘܐܺܝܬܰܘܗ̱ܝ ܗ̱ܘܳܐ ܒܰܐܓܽܘܢܳܐ ܘܰܒܕܽܘܘܳܕܳܐ ܣܰܓܺܝܳܐܐ܆ ܟܰܕ ܠܗܳܝ ܕܟܰܣܝܳܐ ܡܶܬܪܰܓܪܰܓ ܗ̱ܘܳܐ ܕܢܶܕܰܥ. ܐܶܠܳܐ ܡܫܺܝܚܳܐ ܟܰܕ ܠܫܽܘܠܛܳܢܳܐ ܗܰܘ ܦܐܶܐ ܠܰܐܠܳܗܳܐ ܐܰܪܦܺܝ܆ ܐ̱ܢܳܫܳܐܺܝܬ ܘܢܺܝܚܳܐܺܝܬ ܘܡܰܟܺܝܟܳܐܺܝܬ ܙܳܢܶܩ ܘܕܳܚܶܩ ܠܶܗ ܒܝܰܕ ܡ̈ܶܠܶܐ ܕܠܳܚ̈ܡܳܢ܆ ܐܰܝܟܰܢܳܐ ܕܠܰܢ ܗܳܢܽܘܢ ܕܡܶܛܽܠܳܬܗܽܘܢ ܗܳܠܶܝܢ ܣܳܥܰܪ ܗ̱ܘܳܐ ܡܕܰܒܪܳܢܳܐܺܝܬ܆ ܢܚܰܘܶܐ ܡܰܠܦܳܢܽܘܬܳܐ ܘܛܽܘܦܣܳܐ ܕܙܳܟܽܘܬܳܐ ܐ̱ܢܳܫܳܝܬܳܐ. ܐܶ‌ܠܽܘ ܓܶܝܪ ܟܰܕ ܐܰܝܟ ܐܰ‌ܠܳܗܳܐ ܓܥܰܪ ܒܶܗ ܘܛܰܪܕܶܗ܆ ܗܺܝ ܡܕܰܡܝܳܢܽܘܬܳܐ ܠܪܽܘܚܩܳܐ ܡܶܢ ܚܰܝܠܳܐ ܕܺܝܠܰܢ ܐܺܝܬܶܝܗ̇ ܗ̱ܘܳܬ. ܡܶܛܽܠܗܳܕܶܐ ܓܶܝܪ ܐܳܦ ܒܝܰܕ ܗܳܠܶܝܢ ܕܕܳܡ̈ܝܳܢ܆ ܗܳܠܶܝܢ ܕܒܺܐܝ̈ܕܰܝܗܶܝܢ ܢܰܣܺܝ ܠܳܐܕܳܡ܆ ܫܳܒܶܩ ܗ̱ܘܳܐ ܕܢܶܬܩܰܪܰܒ ܠܶܗ ܢܶܣܝܳܢܳܐ܆ ܐܰܝܟܰܢܳܐ ܕܰܒܝܰܕ ܣܰܡ̈ܡܳܢܶܐ ܕܠܳܚܡܺܝܢ ܢܰܐܣܶܐ ܠܫܽܘܚܢܳܐ ܥܰܬܺܝܩܳܐ ܕܰܚܛܺܝܬܳܐ.

ܠܳܐ ܐ̱ܢܳܫ ܕܶܝܢ ܟܰܕ ܫܳܡܰܥ ܕܳܐܡܪܺܝܢ ܐܶܘܰܢܓ̈ܶܠܺܝܰܐ ܡܶܛܽܠ ܦܳܪܽܘܩܰܢ ܝܶܫܽܘܥ܆ ܗܳܝܕܶܝܢ ܕܳܒܰܪ ܠܶܗ ܐܳܟܶܠ ܩܰܪܨܳܐ ܠܰܡܕܺܝܢ̱ܬܳܐ ܩܰܕܺܝܫܬܳܐ܆ ܘܬܽܘܒ ܕܳܒܰܪ ܠܶܗ ܠܛܽܘܪܳܐ ܕܛܳܒ ܪܳܡ܆ ܢܶܣܒܰܪ ܠܶܗ ܕܒܰܕܡܽܘܬ ܒܥܺܝܪܳܐ ܡܶܬܕܒܰܪ ܗ̱ܘܳܐ ܡܶܢ ܗܰܘ. ܗܳܕܶܐ ܓܶܝܪ ܕܰܒܢܰܝ̈ܢܳܫܳܐ ܗܳܢܽܘܢ ܕܡܶܬܕܰܝܘܢܺܝܢ ܐܺܝܬܶܝܗ̇ ܕܺܝܠܳܝܬܳܐ܆ ܘܰܕܩܰܒܶܠܘ ܡܰܥܒܕܳܢܽܘܬܳܐ ܕܰܠܩܽܘܒܠܳܐ ܘܰܕܥܳܡܪܳܐ ܒܗܽܘܢ 222ܐܝܬܝܗ̇ ܠܗܽܘܢ܆ ܘܰܕܒܰܫܪܳܪܳܐ ܡܶܢ ܗܰܘ ܡܶܬܬܰܝܬܶܝܢ. ܐܶܢ ܓܶܝܪ ܚܢܰܢ ܕܰܒܫܰܠܺܝܛܽܘܬ ܒܝܳܬܳܐ ܡܕܰܒܪܺܝܢ ܚ̱ܢܰܢ ܠܰܢ܆ ܡܶܢ ܤܳܛܳܢܳܐ ܠܒܰܪ ܡܶܢ ܗܳܝ ܕܫܳܦܪܳܐ ܠܰܢ ܠܳܐ ܡܶܬܕܰܒܪܺܝܢ ܚ̱ܢܰܢ ܠܘܳܬ ܗܰܘ ܡܳܐ ܕܠܳܐ ܨܳܒܶܝܢ ܚ̱ܢܰܢ܆ ܐܰܝܟܰܢܳܐ ܥܬܺܝܕ ܗ̱ܘܳܐ ܡܫܺܝܚܳܐ ܕܗܳܕܶܐ ܢܶܚܰܫ. ܐܶܠܳܐ ܗܺܝ ܠܶܟܣܺܝܤ ܐܰܘܟܺܝܬ ܗܳܝ ܡܶܠܬܳܐ ܕܡܶܬܕܒܰܪ ܗ̱ܘܳܐ܆ ܐܰ‌ܠܳܗܳܐ ܡܚܰܘܝܳܐ ܠܶܗ܆ ܕܨܶܒܝܳܢܳܐܺܝܬ ܗܳܠܶܝܢ ܩܰܒܶܠ ܥܠܰܘܗ̱ܝ. ܚܢܰܢ ܡܰܢ ܓܶܝܪ ܟܰܕ ܡܶܢ ܕܽܘܟܬܳܐ ܠܕܽܘܟܬܳܐ ܐ̱ܚܪܺܬܳܐ ܡܶܬܬܙܺܝܥܺܝܢܰܢ ܘܰܡܫܰܢܶܝܢ ܚ̱ܢܰܢ܆ ܠܳܐ ܝܳܕܥܺܝܢܰܢ ܐܶܢ ܦܰܚܳܐ ܡܶܕܶܡ ܘܢܶܣܝܳܢܳܐ ܢܩܰܪܶܒ ܠܰܢ ܬܰܡܳܢ ܤܳܛܳܢܳܐ. ܡܫܺܝܚܳܐ ܕܶܝܢ܆ ܟܰܕ ܐܰܝܟ ܐܰ‌ܠܳܗܳܐ ܩܰܕܶܡ ܝܳܕܰܥ ܗ̱ܘܳܐ ܠܚܽܘܫܳܒ̈ܶܐ ܕܳܐܟܶܠܩܰܪܨܳܐ܆ ܘܰܠܢܶܣ̈ܝܳܢܶܐ ܗܳܢܽܘܢ ܕܰܥܬܺܝܕ ܗ̱ܘܳܐ ܕܰܢܩܰܪܶܒ ܠܶܗ܆ ܐܳܦ ܠܚܽܘܪܒܳܐ ܐܳܙܶܠ ܗ̱ܘܳܐ܆ ܐܳܦ ܠܘܳܬ ܡܕܺܝܢ̱ܬܳܐ ܩܰܕܺܝܫܬܳܐ ܡܫܰܢܶܐ ܗ̱ܘܳܐ܆ ܘܣܳܠܶܩ ܗ̱ܘܳܐ ܠܩܰܪܢܳܐ ܕܗܰܝܟܠܳܐ^[30]܆ ܟܰܕ ܡܶܢܗܶܝܢ ܕܕܽܘܟ̈ܝܳܬܳܐ ܡܓܰܪܶܓ ܗ̱ܘܳܐ ܠܶܗ ܕܢܶܣ̈ܝܳܢܶܐ ܕܠܳܚܡܺܝܢ ܢܩܰܪܶܒ܆ ܘܨܶܒܝܳܢܳܐܺܝܬ ܗܽܘ ܠܶܗ ܠܰܩܪ̈ܳܒܰܘܗ̱ܝ ܝܳܗܶܒ ܗ̱ܘܳܐ. ܐܰܝܟܰܢܳܐ ܕܟܰܕ ܠܟܽܠܳܗ̇ ܫܳܢܝܽܘܬܶܗ ܡܣܰܦܶܩ܆ ܘܰܒܚܰܝܠܳܐ ܡܶܫܬܟܰܚ ܡܚܺܝܠܳܐ܆ ܐܳܦ ܠܰܢ ܢܶܗܘܐ ܦܫܺܝܩ ܠܡܶܬܟܰܒܫܳܢܽܘܬܳܐ. ܘܰܐܟܙܢܳܐ ܕܐ̱ܢܳܫ ܛܰܪܩܳܐ܆ ܡܶܬܢܰܨܚܳܢܳܐ ܚܰܝܠܬܳܢܳܐ܆ ܕܚܰܝܠܳܐ ܠܳܐ ܡܶܙܕܰܟܝܳܢܳܐ ܐܺܝܬ ܠܶܗ ܒܰܕܡܽܘܬ ܫܶܡܫܽܘܢ ܗܰܘ܆ ܟܰܕ ܠܰܐܬܪܳܐ ܕܰܒܥܶܠ̈ܕܒܳܒܶܐ ܢܺܐܙܰܠ܆ ܗܽܘ ܠܶܗ ܢܶܬܶܠ ܘܢܰܫܠܶܡ ܠܗܳܢܽܘܢ ܕܰܠܩܽܘܒܠܶܗ܆ ܟܰܕ ܐܰܝܟ ܕܰܠܡܺܐܡܰܪ ܒܗܽܘܢ ܒܣܽܘܥܪ̈ܳܢܶܐ ܡܰܙܥܶܩ܆ ܕܒܰܪܽܘܢܳܢܝ^[31]܆ ܗܳܐ ܐܺܝܬܰܝ ܠܟܽܘܢ ܒܺܐܝ̈ܕܰܝܟܽܘܢ܆ ܐܰܝܟ ܕܨܳܒܶܝܢ ܐܢ̱ܬܽܘܢ ܐܶܬܚܰܫܰܚܘ ܒܺܝ܆ ܘܗܳܟܰܢܳܐ ܟܰܕ ܢܶܬܬܣܺܝܡܽܘܢ ܥܠܰܘܗ̱ܝ܆ ܒܥܽܘܫܢܳܐ ܘܰܒܚܰܝܠܳܐ ܢܶܗܦܽܘܟ ܘܢܶܙܟܶܐ ܐܶܢܽܘܢ܆ ܗܳܟܰܢܳܐ ܐܳܦ ܡܫܺܝܚܳܐ ܟܰܕ ܠܘܳܬ ܕܽܘܟ̈ܝܳܬܳܐ ܕܠܳܚ̈ܡܳܢ ܐܶܙܰܠ܆ ܐܰܫܠܶܡ ܗܽܘ ܠܶܗ ܠܰܩܪ̈ܳܒܰܘܗ̱ܝ ܕܳܐܟܶܠܩܰܪܨܳܐ. ܡܶܛܽܠܗܳܕܶܐ ܐܳܦ ܕܶܐܬܕܒܰܪ ܟܬܺܝܒܳܐ܆ ܘܗܳܟܰܢܳܐ ܡܶܢ ܡܫܰܪܬܚܽܘܬܳܐ ܣܰܓܺܝܐܬܳܐ ܙܟܳܝܗ̱ܝ . ܟܰܕ ܐܰܩܪܶܒ ܥܰܡܶܗ ܒܝܰܕ ܗܳܠܶܝܢ ܬܠܳܬܳܐ ܚܰܫ̈ܶܐ ܕܝܰܬܺܝܪ ܓܶܢܣ̈ܳܢܳܝ̣ܺܝ̣ܢ܆ ܗܳܢܽܘܢ ܕܳܐܦ ܕܗܳܠܶܝܢ ܕܫܰܪܟܳܐ ܐܺܝܬܰܝܗܽܘܢ ܐܳܚܽܘ̈ܕܶܐ. ܒܝܰܕ ܗܰܘ ܕܪܶܚܡܰܬ ܟܰܪܣܳܐ. ܒܝܰܕ ܗܰܘ ܕܫܽܘܒܚܳܐ ܣܪܺܝܩܳܐ. ܒܝܰܕ ܗܰܘ ܕܩܶܢܝܳܢܳܐ ܕܣܰܓܺܝ̈ܳܐܬܳܐ ܘܰܕܪܶܚܡܰܬ ܟܶܣܦܳܐ. ܠܗܳܝ ܕܳܐܦ ܛܽܘܪܳܐ ܕܣܰܓܺܝ ܪܳܡ ܐܰܝܟ ܕܠܺܝ ܡܶܣܬܰܒܪܳܐ ܩܪܳܗ̇܆ ܐܰܝܟ ܕܠܶܐܡܳܐ ܩܰܪܩܰܦܬܳܐ ܕܟܽܠܗܶܝܢ ܒܺܝ̈ܫܳܬܳܐ. ܠܗܳܢܳܐ ܕܶܝܢ ܢܶܣܝܳܢܳܐ܆ ܒܶܗ ܒܦܰܪܨܽܘܦܳܐ ܐܰܝܟ ܐ̱ܢܳܫ ܢܺܐܡܰܪ܆ ܘܰܒܗܶܝܢ ܒܡ̈ܶܠܶܐ ܩܰܪܶܒ ܠܶܗ ܐܳܟܶܠܩܰܪܨܳܐ ܠܰܡܫܺܝܚܳܐ܆ ܘܠܰܘ ܒܬܰܪܥܺܝܬܳܐ ܐܰܝܟܰܢܳܐ ܕܠܰܢ܆ ܟܰܕ ܚܽܘܫܳܒ̈ܶܐ ܚܰܫܳܢܳܝ̈ܶܐ ܪܳܡܶܐ ܒܰܢ. ܠܳܐ ܡܶܬܕܰܪܟܳܢܳܐ ܓܶܝܪ ܐܺܝܬܰܘܗ̱ܝ ܗ̱ܘܳܐ ܠܟܽܠ ܛܽܘܠܫܳܐ܆ ܘܰܚܛܺܝܬܳܐ ܠܳܐ ܥܒܰܕ ܐܰܝܟܰܢܳܐ ܕܰܟܬܺܝܒ܆ ܘܳܐܦܠܳܐ ܐܶܫܬܟܰܚ ܢܶܟܠܳܐ ܒܦܽܘܡܶܗ^[32]. ܠܘܳܬ ܗܰܘ ܕܡܶܢ ܒܳܬܰܪ ܢܶܣܝܳܢܳܐ ܩܪܶܒܘ ܡܰܠܰܐܟ̈ܶܐ܆ ܠܰܘ ܟܰܕ ܡܣܰܝܥܺܝܢ܆ ܐܶܠܳܐ ܟܰܕ ܐܰܝܟ ܕܰܠܡܳܪܳܐ ܘܰܐ‌ܠܳܗܳܐ ܡܫܰܡܫܺܝܢ^[33]. ܗܳܕܶܐ ܕܶܝܢ܆ ܕܰܐ‌ܠܳܗܳܐ ܒܰܠܚܽܘܕܰܘܗ̱ܝ ܐܺܝܬܶܝܗ̇ ܕܺܝܠܳܝܬܳܐ. ܒܰܪܶܟܘ ܓܶܝܪ ܐܳܡܰܪ ܠܡܳܪܝܳܐ ܟܽܠܗܽܘܢ ܚܰܝ̈ܠܰܘܳܬܶܗ܆ ܡܫܰܡ̈ܫܳܢܶܐ ܕܺܝܠܶܗ ܕܥܳܒܕܺܝܢ ܨܶܒܝܳܢܶܗ^[34]. ܠܗܰܘ ܕܳܐܦ ܚܢܰܢ ܢܒܰܪܶܟ܆ ܘܕܰܕܢܰܚ ܘܶܐܬܚܙܺܝ܆ ܘܰܒܝܰܕ ܗܳܠܶܝܢ ܕܶܐܬܢܰܣܺܝ܆ ܐܳܦ ܦܪܰܩ ܐܳܦ ܐܰ‌ܠ̣ܶܦ. ܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܫܬܝܢ ܘܫܬܐ.

[1]ܐܫܥܝܐ. 35: 4

[2]ܣܶܦܪܐ ܕܒܪܝܬܐ. 3: 16

[3]ܝܘܚܢܢ. 1: 13  ܐܦ ܝܘܚܢܢ. 3: 5

[4]ܡܙܡܘܪ̈ܐ. 104: 3

[5]ܡܬܝ. 3: 15

[6] ܕܳܝܽܘܒ̈ܶܐ

[7]ܡܙܡܘܪ̈ܐ. 77: 16

[8]ܠܘܳܬ ܡܶܠܬܳܐ ܘܗܰܘܢܳܐ ܕܡܰܠܦܳܢܳܐ ܐܰܝܟ ܕܰܒܠܶܫܳܢܳܐ ܝܰܘܢܳܝܳܐ: ܐܶܬܶܐܠܨ ܗܳܪܟܳܐ ܠܶܫܳܢܳܐ ܕܣܽܘܪ̈ܝ̣ܳܝ̣ܶܐ. ܠܐ ܓܶܝܪ ܐܺܝܬ ܒܶܗ ܕܢܺܐܡܰܪ ܐ̱ܢܳܫ ܡܰܝ̈ܳܐ ܚܕܳܢܳܐܝܬ: ܐܶܠܐ ܣܰܓܺܝܐܢܳܐܝܬ ܒܰܠܚܽܘܕ. ܘܡܰܠܦܳܢܳܐ ܟܰܕ ܒܳܥܶܐ ܕܰܢܚܰܘܶܐ ܕܡܶܛܽܠ ܣܰܓܺܝܐܘܽܬܐ ܘܫܽܘܚܠܳܦܳܐ ܕܚܰܫ̈ܶܐ ܐܰܡܺܝܪܳܐ ܡܶܠܬܳܐ: ܐܶܡܰܪ: ܕܠܐ ܐܶܡܰܪ ܢܒܺܝܳܐ ܚܙܰܐܘܽܟ ܡܰܝ̈ܳܐ. ܚܕܳܢܳܐܝܬ: ܐܶܠܐ ܚܙܰܐܘܽܟ ܡܰܝ̈ܳܐ ܣܰܓܺܝܳܢܳܐܝܬ.

[9]ܐܫܥܝܐ. 5: 6 ـ 7

[10]ܐܫܥܝܐ. 49: 8

[11]ܡܪܩܘܣ. 3: 17

[12]ܫܶܡܫܳܐ

ܡܥ̈ܠܢܝܐ[13]

[14]ܐܶܤܛܽܘܟ̈ܣܳܢܳܝܶܐ ܐܰܘ ܟܺܝܬ ܐܳܬܽܘ̈ܬܳܢܳܝܶܐ ܩܳܪܶܐ ܠܗܽܘܢ ܠܦܽܘܩ̈ܕܳܢܶܐ ـــ ܐܳܬܽܘ̈ܬܳܢܳܝܶܐ ܕܰܒܝܰܕ ܡܽܘܫܶܐ: ܡܶܛܽܠ ܕܒܰܕܡܽܘܬ ܐܳܬܘ̈ܳܬܳܐ ܫܰܪ̈ܘܳܝܳܬܳܐ ܠܰܛ̈ܠܳܝܶܐ ܗܘ̣ܰܘ ܠܰܢ: ܠܘܳܬ ܝܽܘܠܦܳܢܳܐ ܕܶܐܘܢܓܠܝܘܢ

[15]ܐܶܬܗܰܠܰܟ ܘܰܗܘܰܝ̈ ܒܶܗ ܐܽܘܪ̈ܚܳܬܳܐ

[16]ܝܫܘܥ ܒܪ ܢܘܢ. 4: 1 ـ 25

[17]ܦܪܟܣܝܣ. 1: 5

[18] ܐ. ܩܘܪ̈ܝܢܬܝܐ. 1: 30

[19]ܡܪܩܘܣ. 1: 10 ـ 11 ܐܦ ܠܘܩܐ. 3: 22

[20] ܒ. ܩܘܪ̈ܝܢܬܝܐ. 5: 19

[21]ܣܶܦܪܐ ܕܒܪܝܬܐ. 13: 16

[22]ܗܳܠܶܝܢ

[23]ܣܶܦܪܐ ܕܒܪܝܬܐ. 15: 6

[24] ܣܶܦܪܐ ܕܒܪܝܬܐ. 15: 5 ـ 6

[25]ܣܶܦܪܐ ܕܒܪܝܬܐ. 12: 1

ܐܶܡܰܪ[26]

[27]ܡܬܝ. 4: 3

[28]ܣܦܪܐ ܕܒܪܝܬܐ. 3: 5

[29]ܡܬܝ. 4: 5

[30]ܡܬܝ. 4: 5  ܐܦ 8

[31]ܠܒܽܘܟܽܘܢܳܢܝ

[32]ܐ. ܦܛܪܘܣ. 2: 22ܐܦ ܐܫܥܝܐ. 53: 9

[33]ܡܬܝ. 4: 11

[34]ܡܙܡܘܪ̈ܐ. 103: 21