ܡܺܐܡܪܳܐ ܕܶܫܬܺܝܢ ܘܚܰܡܫܳܐ

ܥܰܠ ܩܰܕܺܝ̈ܫܶܐ ܒܰܣܶܝܠܺܝܽܘܤ ܘܰܓܪܺܝܓܽܘܪܺܝܽܘܤ. ܡܰܘܣ̈ܦܳܢ ܕܶܝܢ ܐܰܡܺܝܪ̈ܳܢ ܡ̈ܶܠܶܐ ܡܶܕܶܡ ܩܰܠܺܝܠ ܠܰܐܦ̈ܰܝ ܫܽܘܠܳܡܶܗ܆ ܐܳܦ ܥܰܠ ܠܒܺܝܫ ܠܰܐܠܳܗܳܐ ܐܺܝܓܢܰܐܛܺܝܽܘܤ.

65: ܠܳܐ ܐ̱ܢܳܫ ܟܰܕ ܒܢܳܡܽܘܣܳܐ ܕܩܽܘ̈ܠܳܣܶܐ ܚܳܐܰܪ ܒܗܰܘܢܶܗ܆ ܢܶܣܒܰܪ ܥܠܰܝ ܕܰܒܗܳܕܶܐ ܬܰܪܥܺܝܬܳܐ ܥܶܒܪܶܬ ܠܰܡܨܰܥܬܳܐ܆ ܐܰܝܟ ܐܰܝ̇ܕܳܐ ܕܺܐܝܬ ܠܗܽܘܢ ܠܗܳܢܽܘܢ ܕܡܺܐܡܪ̈ܶܐ ܚܰܓܳܢܳܝ̈ܶܐ ܐܳܡܪܺܝܢ܆ ܘܒܽܐܘܡܳܢܽܘܬܳܐ ܠܩܽܘ̈ܠܳܣܶܐ ܙܳܩܪܺܝܢ. ܗܳܢܽܘܢ ܕܚܰܕ ܥܒܳܕܳܐ ܐܺܝܬ ܠܗܽܘܢ ܘܝܰܨܺܝܦܽܘܬܳܐ܆ ܗܳܝ ܕܰܒܪܰܒܽܘܬܗܽܘܢ ܕܣܽܘ̈ܟܳܠܶܐ ܘܰܒܫܽܘܦܪܗܽܘܢ ܕܰܫܡܳܗ̈ܶܐ܆ ܢܥܰܠܽܘܢ ܘܢܰܘܪܒܽܘܢ ܐܶܢܽܘܢ ܠܣܽܘܥܪ̈ܳܢܶܐ܆ ܘܥܰܠ ܗܳܠܶܝܢ ܐܰܝܟ ܕܥܰܠ ܦܰܓܪ̈ܶܐ ܥܰܪ̈ܛܶܠܳܝܶܐ܆ ܟܽܘܬܺܝܢܳܐ ܡܥܰܠܰܝܬܳܐ ܗܳܝ ܕܫܰܦܺܝܪܽܘܬ ܠܶܫܳܢܳܐ ܢܥܰܛܦܽܘܢ܆ ܘܫܰܦܺܝܪ̈ܶܐ ܢܚܰܘܽܘܢ ܐܶܢܽܘܢ ܒܰܚܙܳܬܳܐ ܕܡܶܢ ܠܒܰܪ܆ ܠܗܳܠܶܝܢ ܕܠܰܘ ܗܳܟܰܢܳܐ ܐܺܝܬ ܠܗܽܘܢ ܒܰܟܝܳܢܳܐ܆ ܘܰܐܘ ܟܽܠ ܟܽܠܶܗ ܐܰܘ ܒܨܺܝܪ ܣܰܓܺܝ ܡܶܢ ܚܙܳܬܳܐ ܗܳܝ ܕܛܺܝܫܳܐ ܥܠܰܝܗܽܘܢ ܚܰܣܺܝܪܺܝܢ. ܒܪܽܘܚܩܳܐ ܓܶܝܪ ܡܶܢ ܢܰܦܫܳܐ ܕܺܝܠܝ ܐܺܝܬܶܝܗ̇ ܗܳܕܶܐ. ܐܶܡܰܬܝ ܕܳܐܦܶܢ ܗܳܟܰܢܳܐ ܒܺܝܫܳܐܺܝܬ ܣܺܝܡ ܗ̱ܘܺܝܬ ܐܶܢܳܐ܆ ܒܰܣܶܝܠܺܝܽܘܤ ܘܓܪܺܝܓܽܘܪܺܝܽܘܤ܆ ܟܰܕ ܩܳܝܡ̈ܳܬܳܐ ܕܰܡܝܰܬܪ̈ܳܬܳܐ ܐܺܝܬ ܠܗܽܘܢ ܒܬܰܪ̈ܥܝܳܬܳܐ ܕܟܽܠܢܳܫ ܟܬܺܝ̈ܒܳܬܳܐ ܘܠܳܐ ܡܳܝ̈ܘܬܳܬܳܐ܆ ܘܕܽܘܒܳܪܳܐ ܡܶܕܶܡ ܠܳܐ ܚܳܫܽܘܫܳܐ ܘܕܰܡܫܰܠܰܚ ܡܶܢ ܟܽܠܶܗ ܡܰܣܰܒ ܒܰܐܦ̈ܶܐ ܚܝ̣ܰܘ܆ ܒܰܕܡܽܘܬ ܕܽܘܝܳܪܳܐ ܛܽܘܒܬܳܢܳܐ ܗܰܘ ܕܰܒܦܰܪܕܰܝܣܳܐ܆ ܥܰܠ ܟܽܘܬܺܝܢ̈ܝܳܬܳܐ ܡܶܫ̈ܟܳܢܳܝܳܬܳܐ ܕܺܝܠܝ܆ ܠܳܐ ܣܢܺܝܩܺܝܢ ܗ̱ܘܰܘ. ܥܰܠ ܗܳܠܶܝܢ ܓܶܝܪ ܣܢܺܝܩܺܝܢ܆ ܗܳܢܽܘܢ ܕܚܰܝ̈ܶܐ ܕܰܠܒܰܪ ܘܢܽܘܟܪ̈ܳܝܶܐ ܕܦܰܪܕܰܝܣܳܐ ܚ̣ܝܰܘ.

ܗܳܝ ܕܶܝܢ ܝܰܬܺܝܪܳܐܺܝܬ ܡܶܬܝܰܨܦܳܐ ܠܺܝ܆ ܗܳܝ ܕܰܒܟܽܠ ܫܰܢ̱ܬܳܐ ܟܰܕ ܡܳܛܶܐ ܝܰܘܡܳܐ ܗܳܢܳܐ ܡܝܰܩܪܳܐ܆ ܗܰܘ ܕܒܶܗ ܪܰܒܳܐ ܒܰܣܶܝܠܺܝܽܘܤ ܐܰܫܩܶܠ ܠܘܳܬ ܡܛܰܠ̈ܠܶܐ ܫܡܰܝܳܢ̈ܝܳܬܳܐ܆ ܐܶ݀ܣܺܝܡ ܒܰܡܨܰܥܬܳܐ ܩܕܳܡ ܟܽܠܢܳܫ ܘܶܐ݀ܙܰܝܰܚ ܠܕܽܘܟܬܳܐ ܕܗܳܢܽܘܢ. ܒܰܕܡܽܘܬ ܟܽܘܠܳܝܽܘܬ ܙܰܝܢܳܐ ܫܒܺܝܚܬܳܐ ܕܐ̱ܢܳܫܳܐ ܛܰܪ̈ܩܶܐ ܕܶܐܬܢܰܨܰܚܘ܆ ܐܰܘ ܐܰܝܟ ܕܰܠܠܽܘܚ̈ܶܐ ܢܳܡܽܘܣܳܝ̈ܳܬܳܐ܆ ܐܰܘ ܐܰܝܟ ܛܽܘܦܣܳܐ ܕܰܨܠܺܝܒܳܐ܆ ܐܰܝܟܰܢܳܐ ܕܰܠܘܳܬ ܬܰܪܥܺܝܬܳܐ ܓܰܢ̱ܒܳܪܬܳܐ ܘܢܳܡܽܘܣܳܝܬܳܐ ܘܠܳܐ ܗܽܘܠܳܢܳܝܬܳܐ ܢܶܬܥܰܠܶܐ. ܐܰܘ ܓܶܝܪ ܠܰܘ ܟܽܘܠܳܝܽܘܬ^[1] ܙܰܝܢܳܐ ܗܰܘ ܕܽܘܒܳܪܳܐ ܕܗܳܢܽܘܢ ܕܰܐܝܟ ܦܰܘܠܽܘܤ: ܐܰܩܺܝܡܘ ܗܰܕܳܡܰܝ̈ܗܽܘܢ ܙܰܝܢܳܐ ܕܙܰܕܺܝܩܽܘܬܳܐ ܠܰܐܠܳܗܳܐ^[2]. ܐܰܘ ܠܰܘ ܢܳܡܽܘܣܳܐ ܐܺܝܬܰܝܗܽܘܢ܆ ܗܳܢܽܘܢ ܕܠܰܥܒܳܕܶܗ ܕܢܳܡܽܘܣܳܐ ܐܰܝܟ ܡܶܠܬܶܗ ܕܺܝܠܶܗ ܬܽܘܒ ܕܰܫܠܺܝܚܳܐ܆ ܚܰܘܝܽܘܗ̱ܝ ܟܬܺܝܒܳܐ ܒܠܶܒ̈ܰܘܳܬܗܽܘܢ. ܐܰܘ ܠܰܘ ܛܽܘܦܣܳܐ ܕܰܨܠܺܝܒܳܐ ܙܳܕܶܩ ܕܢܶܣܒܰܪ ܐܶܢܽܘܢ܆ ܠܗܳܢܽܘܢ ܕܰܫܩܰܠܘ ܨܠܺܝܒܳܐ ܗܳܢܰܘ ܕܶܝܢ ܠܡܺܝܬܽܘܬܶܗ ܕܥܳܠܡܳܐ ܗܳܢܳܐ ܘܰܢܩܶܦܘ ܒܳܬܪ ܡܫܺܝܚܳܐ܆ ܘܰܫܠܺܝܚܳܐܺܝܬ ܐܳܦ ܗܳܕܶܐ ܐܰܙܥܶܩܘ܆ ܕܠܰܢ ܥܳܠܡܳܐ ܨܠܺܝܒ܆ ܠܥܳܠܡܳܐ ܕܶܝܢ ܒܳܗ̇ ܒܰܕܡܽܘܬܳܐ ܚܢܰܢ^[3]܆ ܘܚܰܝ̣ܺܝ̣ܢ ܚ̱ܢܰܢ ܡܰܢ ܚܢܰܢ ܠܳܐ ܬܽܘܒ܆ ܚܰܝ ܕܶܝܢ ܒܰܢ ܡܫܺܝܚܳܐ. ܗܰܘ ܡܳܐ ܕܶܝܢ ܕܗܳܫܳܐ ܚܰܝ̣ܺܝ̣ܢ ܚ̱ܢܰܢ ܒܰܒܣܰܪ܆ ܒܗܰܝܡܳܢܽܘܬܳܐ ܚܰܝ̣ܺܝ̣ܢܰܢ ܗܳܝ ܕܰܒܪܶܗ ܕܰܐ‌ܠܳܗܳܐ^[4].

ܡܳܢܳܐ ܗܳܟܺܝܠ ‌ܐ̱ܚܪܺܢܳܐ܆ ܗܳܢܽܘܢ ܡܰܓ̈ܕܠܳܐ ܪܰܘܪ̈ܒܶܐ ܘܠܳܐ ܡܶܬܬܰܪ̈ܥܳܢܶܐ ܘܡܶܬܟܰܬܫܳܢ̈ܶܐ ܩܰܕܡܳܝ̈ܶܐ ܕܥܺܕܬܳܐ ܒܰܣܶܝܠܺܝܽܘܤ ܘܰܓܪܺܝܓܽܘܪܺܝܽܘܤ܆ ܚܳܐܝܶܢ ܗ̱ܘܰܘ ܘܣܳܝܩܺܝܢ܆ ܐܶܠܳܐ ܐܶܢ ܗܰܝܡܳܢܽܘܬܳܐ. ܗܳܝ ܓܶܝܪ ܕܗܰܝܡܳܢܽܘܬܳܐ ܢܺܚܶܐ ܐ̱ܢܳܫ܆ ܡܶܢ ܗܳܝ ܕܰܒܗܰܝܡܳܢܽܘܬܳܐ ܢܺܚܶܐ܆ ܕܝܰܬܺܝܪ ܪܰܒܳܐ ܡܶܬܚܰܙܝܳܐ ܠܺܝ. ܗܰܘ ܓܶܝܪ ܕܰܒܗܰܝܡܳܢܽܘܬܳܐ ܚܰܝ܆ ܡܶܢ ܗܰܝܡܳܢܽܘܬܳܐ ܥܕܰܟܺܝܠ ܡܶܬܠܒܶܟ ܘܡܶܫܬܰܪܰܪ. ܗܰܘ ܕܶܝܢ ܕܗܺܝ ܗܰܝܡܳܢܽܘܬܳܐ ܣܳܐܶܩ ܘܚܰܝ܆ ܟܰܕ ܩܒܺܝܥܳܐܺܝܬ ܩܳܐܶܡ ܥܰܠ ܫܽܘܥܳܐ܆ ܡܰܠܽܘܢ ܕܶܝܢ ܐܳܦ ܠܰܐܦ̈ܰܝ ܠܥܶܠ ܡܶܬܬܰܝܬܶܐ܆ ܠܰܐ̱ܚܪ̈ܳܢܶܐ ܡܶܢ ܗܳܠܶܝܢ ܕܗܽܘ ܣܳܐܶܩ ܘܰܡܡܰܠܶܠ ܥܳܒܶܕ ܕܢܺܚܽܘܢ܆ ܘܰܡܗܰܝܡ̈ܢܶܐ ܥܳܒܶܕ ܠܗܽܘܢ. ܡܶܛܽܠܗܳܕܶܐ ܗܽܘ ܦܰܘܠܽܘܤ ܗܳܫܳܐ ܡܰܢ ܐܳܡܰܪ ܗ̱ܘܳܐ: ܕܰܒܗܰܝܡܳܢܽܘܬܳܐ ܚܰܝ. ܗܳܫܳܐ ܕܶܝܢ ܟܰܕ ܠܘܳܬ ܗܳܝ ܕܝܰܬܺܝܪ ܪܰܒܳܐ ܣܳܠܶܩ܆ ܐܰܝܟ ܡܰܢ ܕܗܺܝ ܗܰܝܡܳܢܽܘܬܳܐ ܚܰܝ܆ ܕܰܡܫܺܝܚܳܐ ܡܡܰܠܶܠ ܒܶܗ ܐܳܡܰܪ ܗ̱ܘܳܐ.

ܗܳܟܰܢܳܐ ܐܺܝܬܰܝܗܽܘܢ ܗ̱ܘܰܘ ܗܳܠܶܝܢ ܡܰܠ̈ܦܳܢܶܐ ܚܰܝ̈ܠܬܳܢܶܐ ܕܰܫܪܳܪܳܐ܆ ܕܰܒܡܰܠ̈ܦܳܢܘܳܬܳܐ ܕܺܝܠܗܽܘܢ ܐܰܝܟ ܕܰܒܓܶܐܪ̈ܶܐ ܩܰܛܶܠܘ ܠܣܰܓܺܝ̈ܶܐܐ ܕܰܒܪܽܘܫܥܳܐ ܦܰܩܺܝܪܺܝܢ ܗ̱ܘܰܘ ܘܪܳܬܚܺܝܢ. ܘܗܳܟܰܢܳܐ ܥܒܰܕܘ ܐܶܢܽܘܢ ܕܢܺܚܽܘܢ ܚܰܝ̈ܶܐ ܫܰܪܺܝܪ̈ܶܐ ܕܗܰܝܡܳܢܽܘܬܳܐ ܬܪܺܝܨܬܳܐ܆ ܘܟܰܕ ܐܶܬܕܰܡܺܝܘ ܠܰܐܠܳܗܳܐ ܕܳܐܡܰܪ: ܐܶܢܳܐ ܐܶ݀ܩܛܽܘܠ ܘܰܠܡܶܚܳܐ ܐܶ݀ܥܒܶܕ܆ ܐܶ݀ܡܚܶܐ ܘܶܐܢܳܐ ܐܰ݀ܣܶܐ. ܕܰܐܝܟ ܗܳܟܰܢܰܐ ܗ̱ܘ ܓܶܝܪ ܗܰܘ ܛܳܒܳܐ ܐܰ‌ܠܳܗܳܐ. ܕܩܳܛܶܠ ‌ܐܰܝܟܰܢܳܐ ܕܢܰܚܶܐ܆ ܘܡܰܚܶܐ ܐܰܝܟܰܢܳܐ ܕܢܰܐܣܶܐ. ܗܳܢܽܘܢ ܓܶܝܪ ܕܒܳܠܥܺܝܢ ܘܡܳܝܬܺܝܢ ܡܰܘܬܳܐ ܗܰܘ ܕܰܠܥܳܠܰܡ܆ ܗܶܢܽܘܢ ܠܗܽܘܢ ܗܳܘܶܝܢ ܥܶܠܬܳܐ ܕܗܳܟܰܢܳܐ ܢܡܽܘܬܽܘܢ ܐܰܘ ܕܢܶܒܠܥܽܘܢ. ܗܳܢܽܘܢ ܕܰܠܘܳܬܗܽܘܢ ܡܰܙܥܶܩ ܟܕ ܐܳܡܰܪ: ܠܡܳܢܳܐ ܡܳܝܬܺܝܢ ܐܢܬܘܢ ܒܰܝܬܳܐ ܕܺܐܝܣܪܳܐܶܝܠ܆ ܡܶܛܽܠ ܕܠܳܐ ܨܳܒܶܐ ܐ̱ܢܳܐ ܒܡܰܘܬܶܗ ܕܗܰܘ ܕܡܳܐܶܬ ܐܳܡܰܪ ܐܰܕܽܘܢܰܝ ܡܳܪܝܳܐ܆ ܐܰܝܟ ܕܢܶܗܦܽܘܟ ܡܶܢ ܐܽܘܪܚܶܗ ܬܺܚܶܐ ܢܰܦܫܶܗ^[5]. ܗܳܕܶܐ ܗܳܢܽܘܢ ܡܰܠ̈ܦܳܢܶܐ ܕܡ̈ܶܠܶܐ ܕܪܽܘܚܳܐ܆ ܐܳܦ ܗܳܫܳܐ ܡܰܥܒܕܺܝܢ܆ ܒܝܰܕ ܥܰܡ̈ܠܶܐ ܗܳܢܽܘܢ ܕܰܫܒܰܩܘ ܒܡܰܟ̈ܬܒܳܢܘܳܬܗܽܘܢ. ܟܽܠ ܡܰܢ ܓܶܝܪ ܕܩܳܪܶܐ ܒܗܽܘܢ܆ ܡܳܐܶܬ ܡܶܢ ܠܒܰܪܢܳܫܐ ܥܰܬܺܝܩܳܐ܆ ܗܰܘ ܕܚܰܝ ܒܬܰܪܥܺܝܬܳܐ ܕܒܶܣܪܳܐ. ܚܳܝܶܐ ܕܶܝܢ ܠܗܰܘ ܚܰܕܬ̥ܳܐ܆ ܠܗܰܘ ܕܶܐܬܒ̣ܪܺܝ ܒܰܐܠܳܗܳܐ܆ ܒܙܰܕܺܝܩܽܘܬܳܐ ܘܰܒܚܰܣܝܽܘܬܳܐ ܕܰܫܪܳܪܳܐ^[6]܆ ܘܡܶܬܚܰܕܰܬ ܒܡܶܫܬܰܘܕܥܳܢܽܘܬܳܐ ܒܨܰܠܡܳܐ ܕܗܰܘ ܕܰܒ̣ܪܳܝܗ̱ܝ .

ܐܳܦ ܗܽܘ ܕܶܝܢ ܐܶܢܳܐ܆ ܐܶܡܰܬܝ ܕܶܐܢܳܐ ܠܺܝ ܐܰ݀ܛܥܶܐ܆ ܘܟܰܕ ܠܘܳܬ ܒܺܝܫܽܘܬܶܗ ܕܙܰܒܢܳܐ ܕܗܳܫܳܐ ܚܳܐܰܪ ܐ̱ܢܳܐ܆ ܐܶ݀ܣܒܰܪ ܕܐ̱ܢܳܫ ܐܺܝܬܰܝ܆ ܟܰܕ ܒܰܫܪܳܪܳܐ ܘܠܳܐ ܡܶܕܶܡ ܐܺܝܬܰܝ܆ ܟܰܕ ܒܗܳܢܽܘܢ ܐܰܝܟ ܕܰܒܡܰܚܙܺܝܬܳܐ ܡܰܩܶܬ ܐ̱ܢܳܐ ܥܰܝܢܳܐ ܕܬܰܪܥܺܝܬܝ܆ ܡܶܫܟܰܚ ܐ̱ܢܳܐ ܠܳܗ̇ ܠܰܫܟܺܝܪܽܘܬܝ ܕܰܟܡܳܐ ܗ̱ܝ܆ ܘܰܠܣܰܢܝܽܘܬܳܐ ܕܢܰܦܫܝ ܕܕܰܐܝܟ ܐܰܝ̇ܕܳܐ ܗ̱ܝ܆ ܘܡܶܬܚܰܦܶܐ ܐ̱ܢܳܐ ܘܡܶܬܚܰܡܰܨ ܐ̱ܢܳܐ܆ ܘܰܠܘܳܬ ܬܽܘܪܳܨܳܐ ܕܗܳܢܶܝܢ ܕܡܶܬܚܰܛܝ̈ܳܢ ܡܶܢܝ ܡܶܬܬܥܺܝܪ ܐ̱ܢܳܐ. ܐܳܦ ܓܶܝܪ ܐܺܝܬ ܠܡܶܚܙܳܐ ܠܰܓܪܺܝܓܽܘܪܺܝܽܘܤ ܬܶܐܽܘܠܽܘܓܽܘܤ ܕܰܒܚܰܕ ܡܶܢ ܡܺܐܡܪ̈ܶܐ ܕܺܝܠܶܗ ܟܬܰܒ܆ ܕܰܠܗܶܕܝܽܘܛܳܐ ܡܰܢ ܘܰܠܗܰܘ ܕܰܒܥܰܡܳܐ ܐܺܝܬܰܘܗ̱ܝ܆ ܪܰܒܬܳܐ ܐܺܝܬܶܝܗ̇ ܗܳܝ ܕܠܳܐ ܢܶܗܘܶܐ ܐܺܝܬܰܘܗ̱ܝ ܒܺܝܫܳܐ. ܠܪܺܝܫ ܟܳܗ̈ܢܶܐ ܕܶܝܢ ܘܕܰܒܪܺܝܫ ܥܰܡܳܐ ܩܳܐܶܡ܆ ܗܳܝ ܕܰܠܩܽܘܒܠܳܐ ܒܺܝܫܬܳܐ ܪܰܒܬܳܐ܆ ܗܳܝ ܕܠܳܐ ܢܶܗܘܶܐ ܡܝܰܬܰܪ ܣܰܓܺܝ ܡܶܢ ܐ̱ܚܪ̈ܳܢܶܐ ܒܰܡܝܰܬܪ̈ܳܬܳܐ܆ ܐܰܝܟܰܢܳܐ ܕܢܶܫܟܰܚ ܕܰܠܘܳܬ ܡܕܰܡܝܳܢܽܘܬܶܗ ܢܰܓܶܕ ܐܶܢܽܘܢ ܠܗܳܢܽܘܢ ܕܰܬܚܶܝܬ ܐܺܝܕܶܗ. ܠܰܝܬ ܓܶܝܪ ܝܽܘܬܪܳܢܳܐ ܒܡܶܠܬܳܐ ܕܡܰܠܦܳܢܽܘܬܳܐ ܕܠܳܐܐܰܪ ܡܳܚܝܳܐ^[7]. ܗܳܝ ܕܳܐܡܰܪ ܫܠܺܝܚܳܐ܆ ܐܶܡܰܬܝ ܕܰܥܒܳܕܰܘ̈ܗ̱ܝ ܕܗܰܘ ܕܡܰܠܶܦ܆ ܠܰܘ ܐܰܟܚܕܳܐ ܥܰܡܳܗ̇ ܕܡܶܠܬܳܐ ܡܡܰܠܠܺܝܢ. ܡܶܛܽܠܗܳܕܶܐ ܗܳܢܽܘܢ ܒܰܫܪܳܪܳܐ ܐܺܝܬܰܝܗܽܘܢ ܗ̱ܘܰܘ ܪ̈ܺܝܫܰܝ ܟܳܗ̈ܢܶܐ܆ ܡܶܛܽܠ ܕܟܽܠܗܶܝܢ ܐܰܝܠܶܝܢ ܕܙܳܕܶܩ ܗ̱ܘܳܐ ܕܢܶܗܘ̈ܝܳܢ ܫܟܺܝ̈ܚܳܢ ܠܪ̈ܳܥܰܘܳܬܳܐ ܕܥܶܪ̈ܒܶܐ ܡ̈ܠܺܝܠܶܐ܆ ܐܰܟܚܕܳܐ ܪ̈ܗ̣ܰܛܶܝܢ ܒܗܽܘܢ. ܙܢܳܐ. ܡܶܠܬܳܐ. ܕܽܘܒܳܪܳܐ. ܪܰܕܝܽܘܬܳܐ ܕܚܶܒܫܰܬ ܡܰܪ̈ܕܘܳܬܳܐ ܡܫܰܚ̈ܠܦܳܬܳܐ ܕܟܽܠ ܓܢܶܤ܆ ܐܳܦ ܐ̱ܢܳܫܳܝ̈ܳܬܳܐ ܐܳܦ ܐܰ‌ܠܳܗܳܝ̈ܳܬܳܐ܆ ܘܰܒܟܽܠܗܶܝܢ ܠܘܳܬ ܬܶܫܡܶܫܬܳܐ ܕܟܳܪܽܘܙܽܘܬܳܐ ܐܶܘܰܢܓܶܠܳܝܬܳܐ ܐܶܬܚܰܫܚܰܬ.

ܠܺܝ ܕܶܝܢ ܡܶܣܬܰܒܪܳܐ܆ ܕܳܐܦ ܗܶܢܽܘܢ ܫܡܳܗܰܝ̈ܗܽܘܢ ܕܓܰܒܪ̈ܶܐ܆ ܕܺܝܠܗܽܘܢ ܕܣܽܘܥܪ̈ܳܢܶܐ܆ ܘܕܺܝܠܶܗ ܕܰܫܪܳܪܳܐ ܐܺܝܬܰܝܗܽܘܢ ܡܫܰܘܕܥܳܢ̈ܶܐ. ܘܕܡܶܢ ܐܰ‌ܠܳܗܳܐ ܩܰܕܶܡܘ ܐܶܬܩܪܺܝܘ܆ ܐܳܦܶܢ ܒܢܰܝ̈ܢܳܫܳܐ ܡܶܢ ܒܳܬܰܪ ܣܽܘܥܪ̈ܳܢܶܐ ܣܺܝܡܺܝܢ ܠܗܽܘܢ ܠܰܫܡܳܗ̈ܶܐ܆ ܐܰܝܟܰܢܳܐ ܕܡܽܘܫܶܐ ܩܪܳܝܗ̱ܝ ܠܰܒܪܶܗ ܓܝܪܫܡ ܟܰܕ ܐܳܡܰܪ: ܕܬܰܘܬܳܒܳܐ ܐܺܝܬܰܝ ܒܰܐܪܥܳܐ ܢܽܘܟܪܳܝܬܳܐ^[8]܆ ܐܳܦ ܗܺܝ ܕܶܝܢ ܒܰܪܬܶܗ ܕܦܶܪܥܽܘܢ ܠܶܗ ܕܺܝܠܶܗ ܡܽܘܫܶܐ ܫܰܡܗܰܬ ܟܰܕ ܐܳܡܪܳܐ: ܕܡܶܢ ܡܰܝ̈ܳܐ ܫܠܺܝܬܶܗ^[9].

ܗܳܟܰܢܳܐ ܐܳܦ ܒܰܣܶܝܠܺܝܽܘܤ ܐܶܫܬܰܡܰܗ܆ ܡܶܛܽܠ ܗܳܝ ܕܰܠܗܳܢܽܘܢ ܕܡܶܬܪܥܶܝܢ ܡܶܢܶܗ ܠܡܰܠܟܽܘܬܳܐ ܕܰܫܡܰܝܳܐ ܡܰܘܒܶܠ܆ ܘܡܶܛܽܠ ܗܳܝ ܕܡܶܠܬܳܐ ܕܡܰܠܦܳܢܽܘܬܳܐ ܕܺܝܠܶܗ ܒܰܡܨܰܥܬܳܐ ܕܽܐܘܪܚܳܐ ܡܰܠܟܳܝܬܳܐ ܐܳܬܝܳܐ܆ ܟܰܕ ܡܰܟܣܳܐ ܠܗܶܪ̈ܶܣܺܝܤ ܬܪ̈ܰܝܳܢܳܬ ܫܩܺܝ̈ܦܶܐ^[10]܆ ܗܳܠܶܝܢ ܕܡܶܟܳܐ ܘܡܶܟܳܐ ܣܺܝ̈ܡܳܢ.

ܓܪܺܝܓܽܘܪܺܝܽܘܤ ܕܶܝܢ܆ ܐܰܝܟ ܡܰܢ ܕܰܠܘܳܬ ܥܺܝܪܽܘܬܳܐ ܐܰ‌ܠܳܗܳܝܬܳܐ ܡܥܺܝܪ ܠܗܳܢܽܘܢ ܕܫܶܢܬܳܐ ܥܳܠܡܳܢܳܝܬܳܐ ܕܳܡܟܺܝܢ܆ ܘܒܺܐܝܕܰܘ̈ܗ̱ܝ ܕܺܝܠܶܗ ܕܰܫܡܳܐ ܠܘܳܬ ܡܗܰܝܡ̈ܢܶܐ ܥܰܡ ܦܰܘܠܽܘܤ ܡܰܙܥܶܩ. ܐܰܢ̱ܬܽܘܢ ܓܶܝܪ ܟܽܠܟܽܘܢ ܐܺܝܬܰܝܟܽܘܢ ܒܢܰܝ̈ܳܐ ܕܢܽܘܗܪܳܐ ܘܰܒܢܰܝ̈ܳܐ ܕܺܐܝܡܳܡܳܐ܆ ܘܠܳܐ ܐܺܝܬܰܝܢ ܒ̈ܢܰܝ ܠܶܠܝܳܐ ܘܳܐܦܠܳܐ ܒ̈ܢܰܝ ܚܶܫܽܘܟܳܐ܆ ܐܰܪܰܐ ܗܳܟܺܝܠ ܠܳܐ ܢܶ݀ܕܡܰܟ ܐܰܝܟ ܕܳܐܦ ܗܳܢܽܘܢ ܕܫܰܪܟܳܐ܆ ܐܶܠܳܐ ܢܶ݀ܬܬܥܺܝܪ ܘܢܶ݀ܫܗܰܪ^[11].

ܟܰܕ ܡܶܬܒܰܩܶܐ ܐ̱ܢܳܐ ܕܶܝܢ ܒܶܗ ܒܓܰܒܪܳܐ ܝܰܬܺܝܪ ܒܪܶܚܡܰܬ ܥܰܡܠܳܐ܆ ܕܰܒܗܳܝ ܝܰܬܺܝܪ ܡܳܪܳܢܳܐܺܝܬ ܐܶܬܩܪܺܝ ܓܪܺܝܓܽܘܪܺܝܽܘܤ ܗܳܢܰܘ ܕܶܝܢ ܥܺܝܪܳܐ ܐܳܡܰܪ ܐ̱ܢܳܐ܆ ܡܶܛܽܠ ܕܟܰܕ ܥܺܝܪܳܐܺܝܬ ܒܬܶܐܽܘܪܺܝܰܐ ܐܳܦ ܠܘܳܬ ܫܡܰܝܳܐ ܪܳܕܶܐ ܗ̱ܘܳܐ܆ ܘܒܰܕܡܽܘܬ ܚܰܝ̈ܠܰܘܳܬܳܐ ܥܶܠܳܝ̈ܶܐ ܒܥܰܝܢܳܐ ܥܺܝܪܬܳܐ ܘܰܕܠܳܐ ܢܳܝܡܳܐ ܠܘܳܬ ܢܽܘܗܪܳܐ ܕܰܬܠܺܝܬܳܝܽܘܬܳܐ ܚܳܪ܆ ܘܰܒܩܰܠܺܝܠܽܘܬܳܐ ܘܰܒܡܶܬܥܰܠܝܳܢܽܘܬܳܐ ܕܬܰܪܥܺܝܬܳܐ ܐܰܝܟ ܕܰܒܓܶܦܳܐ ܠܳܐ ܦܪܰܚ ܝܰܬܺܝܪܳܐ܆ ܐܳܦܠܳܐ ܐܶܬܚܪܺܝ ܠܘܳܬ ܠܳܐ ܡܶܬܕܰܪܟܳܢܽܘܬܳܐ܆ ܐܶܠܳܐ ܚܰܦܺܝ ܠܥܰܝܢܳܐ ܡܥܰܩܒܳܢܺܝܬܳܐ ܘܚܶܪܝ̣ܳܝ̣ܬܳܐ܆ ܘܡܰܫܰܚ ܒܰܡܫܽܘܚܬܳܐ ܒܰܝܬܳܝܬܳܐ ܕܺܝܠܶܗ ܠܡܶܬܢܰܗܪܳܢܽܘܬܳܐ܆ ܘܠܳܐ ܡܰܪܺܝ ܐܰܘ ܐܶܬܚܪܺܝ ܠܘܳܬ ܥܰܬܺܝܪܽܘܬܳܗ̇ ܕܛܰܝܒܽܘܬܳܐ. ܡܶܢ ܬܰܡܳܢ ܪܥܶܡ ܠܰܢ ܬܶܐܽܘܠܽܘܓ̥ܺܝܰܐ ܕܠܳܐ ܛܽܘܥܝ̣ܰܝ̣ ܘܚܰܬܺܝܬܬܳܐ܆ ܟܕ ܐܶܬܬܥܺܝܪ ܥܺܝܪܽܘܬܳܐ ܐܰ‌ܠܳܗܳܝܬܳܐ ܒܰܕܡܽܘܬ ܪ̈ܽܘܚܶܐ ܗܳܠܶܝܢ ܡܶܬܗܰܘ̈ܢܳܢܝܳܬܳܐ ܘܠܳܐ ܗܽܘ̈ܠܳܢܳܝܳܬܳܐ܆ ܡܶܛܽܠ ܕܳܐܦ ܠܗܳܢܶܝܢ ܡܶܢܶܗ ܕܣܽܘܥܪܳܢܳܐ ܐܺܝܬ ܠܗܶܝܢ ܗܽܘ ܗܳܢܳܐ ܫܡܳܐ ܕܥܺܝܪܽܘܬܳܐ. ܟܬܺܝܒ ܓܶܝܪ ܠܘܳܬ ܕܳܢܺܝܐܶܝܠ: ܘܗܳܐ ܥܺܝܪ^[12] ܘܩܰܕܺܝܫܳܐ ܡܶܢ ܫܡܰܝܳܐ ܢܚܶܬ^[13]. ܥܺܝܪ ܕܶܝܢ܆ ܘܠܳܐ ܡܶܕܡ ܐ̱ܚܪܺܢܳܐ ܡܶܬܦܰܫܰܩ܆ ܐܶܠܳܐ ܐܶܢ ܥܺܝܪܳܐ ܘܫܰܗܳܪܳܐ.

ܒܶܗ ܟܰܕ ܒܶܗ ܒܰܙܢܳܐ ܐܳܦ ܠܒܺܝܫ ܠܰܐܠܳܗܳܐ ܐܺܝܓܢܰܐܛܺܝܽܘܤ܆ ܗܰܘ ܕܗܳܫܳܐ ܗܳܕܶܐ ܫܳܪܽܘܬܳܐ  ܪܽܘܚܳܢܳܝܬܳܐ ܣܳܡ ܩܕܳܡܰܝܢ܆ ܒܒܰܝܬܳܐ ܕܺܝܠܶܗ ܕܒܶܝܬ ܨܠܽܘܬܳܐ܆ ܘܒܰܡܝܰܬܪ̈ܳܬܳܐ ܡܶܬܩܰܠ̈ܣܳܢܝܳܬܳܐ ܕܬܰܠܡܺܝܕܰܘ̈ܗ̱ܝ ܚܳܕܶܐ܆ ܡܶܢܗܽܘܢ ܕܣܽܘܥܪ̈ܳܢܶܐ ܠܳܚܡܳܐܺܝܬ܆ ܡܶܢ ܗܳܝ ܕܗܳܠܶܝܢ ܕܰܥ̈ܬܺܝܕܳܢ ܩܰܕܶܡ ܝܳܕܰܥ܆ ܐܶܫܬܰܡܰܗ ܐܺܝܓܢܰܐܛܺܝܽܘܤ. ܗܰܘ ܓܶܝܪ ܕܒܠܶܫܳܢܳܐ ܕܪ̈ܽܘܡܳܝܶܐ ܐܳܦܶܢ ܡܡܰܫܚܳܐܺܝܬ ܡܦܳܤ܆ ܝܳܕܥ ܗܘ ܕܢܽܘܪܳܢܳܐ ܕܡܶܬܓܰܘܙܰܠ ‌ܐܰܝܟܰܢܳܐ ܕܗܳܟܰܢܳܐ ܢܺܐܡܰܪ܆ ܡܶܫܬܰܘܕܰܥ ܡܶܢ ܗܳܪܟܳܐ. ܐܝܓܢܡ^[14] ܓܶܝܪ ܡܟܰܢܶܝܢ ܪ̈ܽܘܡܳܝܶܐ ܠܢܽܘܪܳܐ ܕܩܰܕܺܝܚܳܐ ܘܡܶܬܓܰܘܙܠܳܐ. ܡܰܢܽܘ ܕܶܝܢ ܕܗܳܟܰܢܳܐ ܐܺܝܬ ܗ̱ܘܳܐ ܠܶܗ ܒܶܗ ܓܰܘܙܰܠܬܳܐ ܐܰܘ ܟܺܝܬ ܠܰܡܦܺܝܕܳܐ ܕܪܶܚܡܬܳܐ ܐܰ‌ܠܳܗܳܝܬܳܐ܆ ܘܰܒܪܶܓܬܳܐ ܕܗܳܝ ܕܰܚܠܳܦ ܡܫܺܝܚܳܐ ܢܶܚܰܫ ܡܶܫܬܰܠܗܰܒ ܗ̱ܘܳܐ܆ ܗܰܘ ܕܳܐܦ ܟܰܕ ܠܪ̈ܽܘܡܳܝܶܐ ܟܳܬܶܒ ܗ̱ܘܳܐ ܐܳܡܰܪ ܗ̱ܘܳܐ: ܕܢܽܘܪܳܐ ܘܚܰܝ̈ܘܳܬܳܐ ܘܪ̈ܶܒܽܘ ܐܳܕܫ̈ܶܐ ܕܫܶܢ̈ܕܶܐ ܢܺܐܬܽܘܢ ܥܠܰܝ܆ ܒܰܠܚܽܘܕ ܠܝܶܫܽܘܥ ܡܫܺܝܚܳܐ ܐܶ݀ܫܬܘܶܐ܆ ܘܗܳܕܶܐ ܟܰܕ ܐܺܝܬ ܗ̱ܘܳܐ ܠܶܗ ܡܶܢ ܠܓܰܘ ܠܗܰܘ ܕܡܶܬܪܚܶܡ ܗ̱ܘܳܐ܆ ܗܳܝ ܕܳܐܦ ܬܡܺܝܗܳܐ܆ ܡܶܛܽܠܗܳܕܶܐ ܐܳܦ ܡܰܙܥܶܩ ܗ̱ܘܳܐ܆ ܡܶܢ ܠܓܰܘ ܐܳܡܰܪ ܠܺܝ܆ ܕܬܳܐ ܠܳܟ ܠܘܳܬ ܐܳܒܝ.

ܠܰܘ ܕܶܝܢ ܒܰܠܚܽܘܕ ܒܡܳܪܳܢܳܝܽܘܬܳܐ ܕܰܫܡܳܐ܆ ܗܳܝ ܕܡܶܢ ܐܰ‌ܠܳܗܳܐ ܩܰܕܡܰܬ ܐܶܬܠܰܚܡܰܬ ܠܒܰܣܶܝܠܺܝܽܘܤ ܘܠܰܓܪܺܝܓܽܘܪܺܝܽܘܤ܆ ܗܘ̣ܳܬ ܡܕܰܡܝܳܢܽܘܬܳܐ ܠܘܳܬ ܐܺܝܓܢܰܐܛܺܝܽܘܤ܆ ܐܶܠܳܐ ܐܳܦ ܒܩܰܘܡܳܐ ܙܪܺܝܙܳܐ ܕܰܚܠܳܦ ܫܪܳܪܳܐ. ܒܦܰܪܗ̱ܣܺܝܰܐ. ܒܰܐܓܽܘ̈ܢܶܐ. ܒܚܰܫ̈ܶܐ. ܒܫܰܠܡܽܘܬܳܐ ܕܟܳܪܽܘܙܽܘܬܳܐ. ܐܰ‌ܠܳܗܳܐ ܓܶܝܪ ܝܳܕܥܺܝܢ ܗ̱ܘܰܘ ܘܡܰܠܦܺܝܢ ܗ̱ܘܰܘ܆ ܠܡܶܠܬܳܐ ܕܰܐ‌ܠܳܗܳܐ ܗܰܘ ܕܠܳܐ ܡܶܫܬܰܚܠܦܳܢܳܐܺܝܬ ܐܶܬܒܰܣܰܪ܆ ܘܶܐܨܛܠܶܒ ܚܠܳܦܰܝܢ ܘܚܰܫ ܒܰܒܣܰܪ܆ ܟܰܕ ܙܥܽܘܪ̈ܝܳܬܳܐ ܝܺܨܶܦܘ ܕܰܣܢܺܐܓܪܽܘܬܳܐ ܣܺܝܡܽܘܢܺܝܢܳܝܬܳܐ ܘܢܶܣܛܽܘܪܺܝܢܳܝܬܳܐ ܗܳܝ ܕܰܡܣܰܡܝܳܐ܆ ܘܡܶܬܬܰܩܠܳܐ ܠܳܐ ܐܰ‌ܠܳܗܳܐܺܝܬ ܒܚܰܫܽܘܬ ܐܰ‌ܠܳܗܽܘܬܳܐ. ܡܦܳܣܺܝܢ ܗ̱ܘܰܘ ܓܶܝܪ ܕܚܰܫܳܐ܆ ܠܳܐ ܓܳܫܶܦ ܒܗܰܘ ܠܳܐ ܚܳܫܽܘܫܳܐ܆ ܐܳܦܶܢ ܡܕܰܒܪܳܢܳܐܺܝܬ ܐܰܝܟ ܡܒܰܣܪܳܐ ܘܰܡܒܰܪܢܫܳܐ ܢܶܗܘܶܐ ܒܚܰܫ̈ܶܐ܆ ܟܰܕ ܡܰܩܗܶܐ ܠܥܽܘܩܣܳܐ ܕܡܰܘܬܳܐ ܕܰܠܩܽܘܒܠܰܢ ܘܕܰܚܛܺܝܬܳܐ. ܘܺܐܝܓܢܰܐܛܺܝܽܘܤ ܡܰܢ ܐܳܡܰܪ ܗ̱ܘܳܐ: ܐܰܦܶܣܘ ܠܺܝ ܕܰܡܕܰܡܝܳܢܳܐ ܐܶ݀ܗܘܶܐ ܕܚܰܫܳܐ ܕܰܐ‌ܠܳܗܝ. ܓܪܺܝܓܽܘܪܺܝܽܘܤ ܕܶܝܢ܆ ܐܶܢ ܐ̱ܢܳܫ ܠܳܐ ܣܳܓܶܕ ܠܗܰܘ ܕܰܨܠܺܝܒ܆ ܚܶܪܡܳܐ ܢܶܗܘܶܐ. ܘܢܶܬܬܣܺܝܡ ܥܰܡ ܩܳܛ̈ܠܰܝ ܐܰ‌ܠܳܗܳܐ. ܒܰܣܶܝܠܺܝܽܘܤ ܕܶܝܢ ܬܽܘܒ. ܠܰܘ ܓܶܝܪ ܗܳܢܳܐ ܟܽܠܶܗ ܫܡܰܝܳܐ ܘܰܐܪܥܳܐ ܘܪ̈ܶܒܘܳܬܳܐ ܕܝܰܡ̱̈ܡܶܐ܆ ܘܗܳܠܶܝܢ ܕܰܒܡܰܝ̈ܳܐ ܡܕܰܝܪ̈ܳܢ܆ ܘܗܳܠܶܝܢ ܝܰܒܫܳܢ̈ܳܝܳܬܳܐ ܕܚܰܝ̈ܘܳܬܳܐ ܘܢܶܨ̈ܒܳܬܳܐ܆ ܘܟܰܘܟ̈ܒܶܐ ܘܳܐܰܐܪ ܘܫܳܥ̈ܶܐ܆ ܘܨܶܒܬܳܐ ܡܦܰܬܟܳܐ ܕܗܳܢܳܐ ܟܽܠ܆ ܡܚܰܘ̈ܝܳܢ ܠܰܡܥܰܠܝܽܘܬܶܗ ܕܚܰܝܠܳܐ܆ ܐܰܝܟ ܡܳܐ ܕܗܳܝ ܕܢܶܫܟܰܚ ܐܰ‌ܠܳܗܳܐ ܗܰܘ ܠܳܐ ܡܶܬܥܰܪܝܳܢܳܐ܆ ܕܠܳܐ ܚܳܫܽܘܫܳܐܺܝܬ ܒܝܰܕ ܒܶܣܪܳܐ ܢܶܬܥܰܪܙܰܠ ܥܰܡ ܡܰܘܬܳܐ܆ ܐܰܝܟܰܢܳܐ ܕܠܰܢ ܒܝܰܕ ܚܰܫܶܗ ܢܫܰܟܶܢ ܠܳܐ ܚܳܫܽܘܫܽܘܬܳܐ. ܗܰܘ ܕܶܝܢ ܕܠܰܢ ܒܚܰܫܳܐ ܗܰܘ ܕܺܝܠܶܗ ܠܳܐ ܚܳܫܽܘܫܽܘܬܳܐ ܫܰܟܶܢ܆ ܐܰܝܟܰܢܳܐ ܗܽܘ ܟܰܕ ܡܛܳܐ܆ ܚܰܣܪܳܗ̇ ܠܠܳܐ ܚܳܫܽܘܫܽܘܬܳܐ ܘܰܠܠܳܐ ܡܶܬܚܰܒܠܳܢܽܘܬܳܐ ܘܰܠܠܳܐ ܡܳܝܽܘܬܽܘܬܳܐ܆ ܢܦܰܫܩܽܘܢ ܗܳܢܽܘܢ ܕܰܒܝܰܬܺܝܪ̈ܳܬܳܐ ܐܺܝܬܰܝܗܽܘܢ ܪ̈ܳܚܡܰܝ ܐܰ‌ܠܳܗܳܐ܆ ܘܰܣܢܺܐܓܪ̈ܶܐ ܣܪ̈ܺܝܩܶܐ ܕܠܳܐ ܚܳܫܽܘܫܽܘܬܳܐ ܕܰܐ‌ܠܳܗܳܐ ܡܶܠܬܳܐ܆ ܘܕܰܒܝܰܕ ܗܳܢܶܝܢ ܕܥܳܒܕܺܝܢ ܒܗܶܝܢ ܣܢܺܐܓܪܽܘܬܳܐ ܡܨܰܥܪܺܝܢ.

ܡܶܛܽܠ ܗܳܠܶܝܢ ܡܰܠ̈ܦܳܢܘܳܬܳܐ ܢܦܺܝ̈ܚܳܬ ܡܶܢ ܐܰ‌ܠܳܗܳܐ܆ ܘܢܳܡܽܘܣ̈ܶܐ ܟܳܗ̈ܢܳܝܶܐ ܘܰܫܠܺܝ̈ܚܳܝܶܐ ܗܳܢܽܘܢ ܕܰܠܟܽܠ ܠܶܫܳܢܳܐ ܥܰܘܠܳܐ ܒܳܠܡܺܝܢ ܠܕܽܘܟܪܳܢܳܐ ܕܰܚܣܰܝ̈ܳܐ ܗܳܢܽܘܢ ܡܚܰܓܶܝܢ ܚ̱ܢܰܢ܆ ܟܰܕ ܚܰܕܽܘܬܳܐ ܪܽܘܚܳܢܳܝܬܳܐ ܡܙܰܡܢܺܝܢܰܢ ܠܟܽܘܢ. ܕܟܰܕ ܓܶܝܪ ܟܬܳܒܳܐ ܕܡ̈ܰܬܠܶܐ ܐܳܡܰܪ: ܗܳܢܽܘܢ ܕܰܒܬܰܟܫ̈ܦܳܬܗܽܘܢ ܢܶܬܶܠ ܡܫܺܝܚܳܐ ܐܰ‌ܠܳܗܳܐ ܘܡܶܠܬܳܐ܆ ܗܰܘ ܕܰܒ̣ܪܳܐ ܘܰܗܦܰܟ ܡܶܢ ܕܪܺܝܫ ܒ̣ܪܳܐ ܠܚܰܝܽܘܬܳܐ ܡܠܺܝܠܬܳܐ ܒܰܪܢܳܫܳܐ܆ ܕܟܰܕ ܕܠܳܐ ܥܳܩܬܳܐ ܘܰܐܝܟܰܢܳܐ ܕܠܶܗ ܪܚܺܝܡ ܢܳܦܩܺܝܢܰܢ ܠܗܽܘܢ ܠܚܰܝ̈ܶܐ ܗܳܠܶܝܢ ܕܗܳܪܟܳܐ܆ ܢܶܚܕܶܐ. ܘܢܶܬܒܰܣܰܡ ܥܰܡ ܩܰܕܺܝ̈ܫܶܐ ܐܳܦ ܒܡܰܠܟܽܘܬܳܐ ܕܰܫܡܰܝܳܐ܆ ܠܫܽܘܒܚܳܐ ܕܺܝܠܶܗ ܟܺܝܬ ܘܕܰܐܒܳܐ ܘܰܕܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܫܬܝܢ ܘܚܰܡܫܳܐ.

[1]ܟܽܘܠܳܢܳܝܽܘܬ

[2]ܪ̈ܗܘܡܝܐ. 6: 13

[3]ܓܠܛܝ̈ܐ. 6: 14

[4]ܓܠܛܝ̈ܐ. 2: 20

[5]ܚܙܩܝܐܝܠ. 18: 21

[6]ܐܦܣ̈ܝܐ. 4: 22 ـ 24

[7]ܐ. ܩܘܪ̈ܝܢܬܝܐ. 9: 26

[8]  ܡܦܩܢܐ. 2: 22

[9]ܡܦܩܢܐ. 2: 10

[10]ܣܰܩܽܘܒ̈ܠܳܝܳܬ ܫܩܺܝ̈ܦܶܐ

[11]ܐ. ܬܣܠܘܢܝܩ̈ܝܐ. 5: 5 ـ 6

[12]ܙܳܕܶܩ ܠܡܶܕܰܥ ܕܒܰܟ̈ܬܳܒܶܐ ܕܝܰܘ̈ܢܳܝܶܐ ܗܳܢܽܘܢ ܕܕܳܢܝܐܝܠ: ܠܰܘ ܒܠܶܫܳܢܳܐ ܝܰܘܢܳܝܳܐ ܟܬܺܝܒ ܗܰܘ ܫܡܳܐ ܕܥܺܝܪܳܐ: ܐܶܠܐ ܥܶܒܪܳܐܝܬ ܣܺܝܡ: ܥܺܝܪ. ܡܶܛܠ ܗܳܕܶܐ ܐܶܬܐܠܨ ܡܰܠܦܳܢܳܐ ܕܢܺܐܡܰܪ: ܕܥܺܝܪ. ܗܳܢܰܘ ܕܶܝܢ ܥܺܝܪܳܐ: ܘܠܐ ܡܶܕܶܡ ܐ̱ܚܪܺܢܳܐ ܡܶܬܦܰܫܰܩ ܐܶܠܐ ܐܶܢ ܥܺܝܪܳܐ.

[13]ܕܢܝܐܝܠ. 4: 20

[14]ܙܳܕܶܩ ܠܡܶܕܰܥ ܐܳܦ ܗܳܪܟܳܐ: ܕܠܰܘ ܠܢܽܘܪܳܐ ܦܫܺܝܛܳܐܝܬ ܩܳܪܶܝܢ ܪ̈ܽܘܡܳܝܶܐ ܐܝܓܢܡ: ܐܠܐ ܠܢܽܘܪ̈ܳܬܳܐ ܗܳܠܶܝܢ ܕܡܶܬܩܰܕܚ̈ܳܢ ܒܕܽܘܟ̈ܝܳܬܳܐ ܗܳܠܶܝܢ ܕܪ̈ܳܡܳܢ ܘܰܡܫܰܘ̈ܕܥܳܢ ܣܝܡܝܘܢ ܡܶܕܶܡ ܕܰܥܕܰܟܺܝܠ ܠܐ ܩܰܪܺܝܒ: ܕܰܐܝܟ ܐܰܝܟܰܢ. ܐܰܝܟ ܗܳܠܶܝܢ ܕܩܳܕܚܺܝܢ ܥܰܠ ܬܶܠ̈ܠܐ ܘܥܰܠ ܪ̈ܰܘܡܶܐ ܘܡܶܬܓܰܘ̈ܙܠܳܢ ܘܰܡܚ̈ܰܘܝܳܢ ܡܶܐܬܺܝܬܳܐ ܕܰܒܥܶܠ̈ܕܒܳܒܶܐ: ܠܦܽܘܬ ܬܰܢܘܰܝ ܘܫܽܘܘܕܳܥܳܐ ܕܩܰܕܺܝܡ ܣܺܝܡ. ܗܰܘ ܕܩܳܪܶܝܢ ܠܶܗ ܝܰܘ̈ܢܳܝܶܐ ܦܽܘܪܣܘܣ. ܡܶܛܽܠ ܗܳܕܶܐ ܐܶܡܰܪ ܡܰܠܦܳܢܳܐ: ܕܡܶܢ ܗܳܝ ܕܗܳܠܶܝܢ ܕܰܥܬܺܝ̈ܕܳܢ ܩ݀ܕܡ ܝܳܕܰܥ.