ܡܺܐܡܪܳܐ ܕܶܫܬܺܝܢ ܘܰܐܪܒܥܳܐ

ܟܰܕ ܫܰܐܶܠܘ ܐܰܚ̈ܶܐ ܡܗܰܝܡ̈ܢܶܐ܆ ܕܡܺܐܡܪܳܐ ܗܰܘ ܕܶܐܬܶܐܡܰܪ ܒܩܽܘܪܽܘܤ ܠܽܘܩܒܰܠ ܓܽܘ̈ܕܳܦܰܘܗ̱ܝ ܕܬܶܐܽܘܕܽܘܪܺܝܛܽܘܤ ܢܶܬܶܐܡܰܪ ܠܗܽܘܢ. ܟܰܕ ܫܽܘܪܳܝܶܗ ܐܶܬܠܚܶܡ ܠܕܽܘܟܪܳܢܳܐ ܗܰܘ ܕܡܶܫܬܰܡܠܶܐ ܗ̱ܘܳܐ ܕܰܛܠܳܝ̈ܶܐ ܗܳܢܽܘܢ ܕܶܐܬܩܰܛܰܠܘ ܡܶܢ ܗܶܪܽܘܕܺܝܤ܆ ܐܶܬܬܰܠܘܰܬ ܗܽܘ ܗܳܢܳܐ ܡܺܐܡܪܳܐ ܘܳܐܦ ܟܰܕ ܐ̱ܚܪ̈ܳܢܝܳܬܳܐ ܡܶܕܶܡ ܡܶܕܶܡ ܐܶܬܬܰܘܣܰܦ̈ܝ̱. ܐܶܬܶܐܡܰܪ ܕܶܝܢ ܒܥܺܕܬܳܐ ܗܳܝ ܕܡܶܬܩܰܪܝܳܐ ܗ̱ܘܳܬ ܩܐܛܐܩܐܢܝܢ ܗܳܢܰܘ ܕܶܝܢ ܕܒܰܚܕܰܬܳܐ܆ ܐܰܝܟܳܐ ܕܚܳܠܕܺܝܢ ܗ̱ܘܰܘ ܬܰܥ̈ܠܶܐ ܗܳܢܽܘܢ ܕܗܶܪ̈ܶܣܺܝܤ ܗܳܝ ܢܶܣܛܽܘܪܝܳܢܳܝܬܳܐ.

64: ܨܳܒܶܐ ܗ̱ܘܺܝܬ ܫܰܦܺܝܪ ܕܰܥܘ܆ ܕܳܐܦ ܝܰܘܡܳܢܳܐ ܐܰܝܟ ܡܳܐ ܕܡܶܢ ܩܕܺܝܡ ܡܶܢ ܟܰܕܽܘ܆ ܩܳܠܐ ܕܺܝܠܝ ܐܶ݀ܫܰܕܰܪ ܥܰܠ ܛܠܳܝ̈ܶܐ ܗܳܢܽܘܢ ܫܰܒܪ̈ܶܐ ܕܰܚܠܳܦ ܡܫܺܝܚܳܐ ܡܶܢ ܗܶܪܽܘܕܺܝܤ ܐܶܬܩܰܛܰܠܘ܆ ܗܳܢܽܘܢ ܕܰܒܝܰܕ ܢܶܟܣܬܳܐ ܕܗܳܟܰܢܳܐ ܡܫܰܒܚܳܐ ܠܓܰܒܪܳܐ ܡܫܰܡܠܝܳܐ ܡܶܢܫܶܠܝ ܫܘܰܪܘ ܡܛܰܘ܆ ܠܰܡܫܽܘܚܬܳܐ ܕܩܰܘܡܬܳܐ ܪܽܘܚܳܢܳܝܬܳܐ^[1]܆ ܟܰܕ ܣܗܶܕܘ ܕܰܐ‌ܠܳܗܳܐ ܚܰܝܠܬܳܢܳܐ ܐܺܝܬܰܘܗ̱ܝ ܗ̱ܘܳܐ ܛܰܠܝܳܐ ܗܰܘ ܕܰܒܒܶܝܬ ܠܚܶܡ܆ ܗܰܘ ܕܶܐܬܺܝܠܶܕ ܠܰܢ ܠܰܘ ܓܶܝܪ ܠܶܗ܆ ܐܰܝܟܰܢܳܐ ܕܳܐܦ ܐܶܫܰܥܝܳܐ ܢܒܺܝܳܐ ܡܰܙܥܶܩ: ܕܛܰܠܝܳܐ ܐܶܬܺܝܠܶܕ ܠܰܢ^[2]܆ ܗܽܘ ܓܶܝܪ ܟܰܕ ܗܽܘ ܐܳܦ ܒܪܳܐ ܐܺܝܬܰܘܗ̱ܝ ܗ̱ܘܳܐ ܕܡܶܢ ܐܰܒܳܐ܆ ܡܶܠܬܳܐ ܝܺܚܺܝܕܳܝܳܐ ܗܰܘ ܕܳܐܦ ܐܶܬܺܝܗܶܒ ܠܰܢ܆ ܡܶܛܽܠ ܕܳܐܦ ܚܠܳܦܰܝܢ ܐܰܫܠܶܡ ܗܽܘ ܠܶܗ ܠܪܺܝܚܳܐ ܒܰܣܺܝܡܳܐ܆ ܕܶܒܚܬܳܐ ܘܩܽܘܪܒܳܢܳܐ ܠܰܐܠܳܗܳܐ ܘܰܐܒܳܐ^[3].

ܠܫܰܒܪ̈ܶܐ ܗܳܟܺܝܠ ܕܰܩܕܳܡ ܕܶܒܚܬܳܐ ܕܰܐܝܟ ܗܳܕܶܐ ܩܰܕܶܡܘ ܐܶܬܩܰܛܰܠܘ܆ ܡܰܢܽܘ ܕܠܳܐ ܢܶܬܶܠ ܛܽܘܒܳܐ܆ ܕܡܰܘܬܳܐ ܡܠܶܐ ܐܰܓܪܳܐ ܐܶܫܟܰܚܘ ܠܗܽܘܢ܆ ܘܕܰܐܓܪܳܐ ܪܰܒܳܐ ܕܡܰܠܟܽܘܬܳܐ ܕܰܫܡܰܝܳܐ. ܗܳܝ ܟܺܝܬ ܕܳܐܦ ܐܶܪܰܡܝܳܐ ܗܰܘ ܢܒܺܝܳܐ܆ ܓܰܠܝܳܐܺܝܬ ܩܰܕܶܡ ܐܰܡܪܳܗ̇. ܡܶܢ ܒܳܬܰܪ ܓܶܝܪ ܕܶܐܡܰܪ ܕܪܳܚܶܝܠ ܟܰܕ ܠܰܒ̈ܢܰܝܳܐ ܕܺܝܠܳܗ̇ ܐܳ‌ܠ̣ܝܳܐ ܗ̱ܘܳܬ܆ ܠܳܐ ܨܳܒܝܳܐ ܗ̱ܘܳܬ ܠܡܶܬܒܰܝܳܐܽܘ ܡܶܛܽܠ ܕܠܳܐ ܐܺܝܬܰܝܗܽܘܢ^[4]܆ ܟܰܕ ܪܳܚܝܠ ܠܒܶܝܬ ܠܚܶܡ ܩܳܪܶܐ ܗ̱ܘܳܐ܆ ܡܶܛܽܠ ܕܬܰܡܳܢ ܩܒܺܝܪܳܐ ܗ̱ܘܳܬ ܪܳܚܶܝܠ ‌ܐܰܢܬܬܳܐ ܕܝܰܥܩܘܒ܆ ܗܰܘ ܕܳܐܦ ܐܶܡܰܪ ܒܕܽܘܟ ܡܶܛܽܠܳܬܳܗ̇܆ ܘܰܩܒܰܪܬܳܗ̇ ܬܰܡܳܢ ܒܽܐܘܪܚܳܐ ܕܺܐܝܦܽܘܕܪܽܘܡܽܘܢ ܗܳܢܰܘ ܕܶܝܢ ܕܒܶܝܬ ܪܶܗܛܳܐ ܕܪ̈ܰܟܫܳܐ^[5]. ܗܳܕܶܐ ܐܺܝܬܶܝܗ̇ ܒܶܝܬ ܠܚܶܡ܆ ܐܰܝܬܺܝ ܒܳܬܰܪܟܶܢ܆ ܗܳܠܶܝܢ ܐܳܡܰܪ ܡܳܪܝܳܐ. ܢܶܫܠܶܐ ܩܳܠܶܟܝ ܡܶܢ ܒܶܟܝܳܐ܆ ܘܥܰܝ̈ܢܰܝܟܝ ܡܶܢ ܕܶܡ̈ܥܶܐ܆ ܡܶܛܽܠ ܕܺܐܝܬ ܗ̱ܘܳܐ ܐܰܓܪܳܐ ܠܰܒ̈ܢܰܝܟܝ ܐܳܡܰܪ ܡܳܪܝܳܐ^[6]. ܛܳܒܳܐܺܝܬ ܓܶܝܪ ܡܦܰܫܩܳܢܳܐ ܐ̱ܚܪܺܢܳܐ ܠܰܘ ܠܰܥ̈ܒܳܕܶܐ ܕܺܝܠܶܟܝ ܐܶܠܳܐ ܠܰܒ̈ܢܰܝܳܐ ܕܺܝܠܶܟܝ ܦܰܫܶܩ. ܫܒܽܘܩ ܕܶܝܢ ܕܳܐܦ ܥܒܳܕܳܐ ܕܶܐܡܳܐ ܢܶܚܫܒܺܝܗ̇ ܐ̱ܢܳܫ ܕܺܐܝܬܶܝܗ̇܆ ܠܗܳܝ ܕܠܰܒ̈ܢܰܝܳܐ ܒܰܝ̈ܬܳܝܶܐ ܕܺܝܠܳܗ̇ ܬܰܘܫܶܛ ܐܶܢܽܘܢ ܠܢܶܟܣܬܳܐ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ. ܐܰܝܢܳܐ ܗܳܟܺܝܠ ‌ܐܺܝܬܰܘܗ̱ܝ ܐܰܓܪܳܐ ܕܰܒ̈ܢܰܝܳܐ ܕܺܝܠܳܗ̇. ܬܽܘܒ. ܗܽܘ ܢܒܺܝܳܐ ܐܳܡܰܪ: ܢܶܦܢܽܘܢ ܡܶܢ ܐܰܪܥܳܐ ܕܰܒܥܶܠ̈ܕܒܳܒܶܐ. ܘܢܶܗܘܶܐ ܣܰܒܪܳܐ ܠܚܰܪܬܶܟܝ ܐܳܡܰܪ ܡܳܪܝܳܐ܆ ܘܢܶܗܦܟܽܘܢ ܒܢܰܝ̈ܟܝ ܠܰܬܚܽܘ̈ܡܰܝܗܽܘܢ^[7]. ܟܰܕ ܓܶܝܪ ܫܒܰܩܘ ܫܰܒܪ̈ܶܐ ܠܰܐܪܥܳܐ ܕܰܒܥܶܠ̈ܕܒܳܒܰܝܗܽܘܢ܆ ܕܦܳܠ̈ܚܶܐ ܕܗܶܪܽܘܕܺܝܤ ܗܳܢܽܘܢ ܩܳܛ̈ܠܰܝ ܛܠܳܝ̈ܶܐ܆ ܗܦܰܟܘ ܠܰܬܚܽܘ̈ܡܰܝܗܽܘܢ. ܬܚܽܘܡ̈ܶܐ ܕܶܝܢ ܐܳܦ ܕܺܝܠܗܽܘܢ ܐܳܦ ܕܟܽܠܰܢ܆ ܦܰܪܕܰܝܣܳܐ ܐܺܝܬܰܘܗ̱ܝ܆ ܗܰܘ ܐܰܬܪܳܐ ܘܒܶܝܬ ܐܰܒܳܗ̈ܶܐ ܕܒܰܪ ܐ̱ܢܳܫܳܐ ܩܰܕܡܳܝܳܐ. ܐܰܝܟܰܢܳܐ ܟܺܝܬ ܕܡܳܕܝܢ ܟܡܳܐ ܕܺܐܝܬܰܝܢ ܒܬܰܘܬܳܒܽܘܬܳܐ ܗܳܕܶܐ܆ ܠܒܰܪ ܡܶܢ ܬܚܽܘܡ̈ܶܐ ܕܺܝܠܰܢ ܥܳܡܪܺܝܢ ܚ̱ܢܰܢ܆ ܐܰܝܟ ܛܪ̈ܺܝܕܶܐ ܘܕܰܫܕܶܝܢ ܠܰܐܟܣܽܘܪܝܳܐ. ܘܗܳܢܳܐ ܣܰܒܪܳܐ ܐܺܝܬ ܠܰܢ ܡܶܢ ܒܳܬܰܪ ܚܰܪܬܰܢ܆ ܦܽܘܢܳܝܳܐ ܛܽܘܒܬܳܢܳܐ ܕܰܠܘܳܬ ܗܳܠܶܝܢ܆ ܗܰܘ ܕܩܰܠܺܝܠܳܐܺܝܬ ܐܶܫܬܘܺܝܘ ܠܶܗ ܛܠܳܝ̈ܶܐ ܗܳܠܶܝܢ.

ܠܐ ܐ̱ܢܳܫ ܗܳܟܺܝܠ ܢܚܽܘܤ ܥܠܰܝܗܽܘܢ ܐܰܝܟ ܐܰܝܠܶܝܢ ܕܡܶܬܚ̈ܰܢܳܢܝܳܬܳܐ ܚ̣ܰܫܘ. ܡܰܠܽܘܢ ܕܶܝܢ ܛܽܘܒ̈ܬܳܢܶܐ ܢܶܚܫܽܘܒ ܐܶܢܽܘܢ܆ ܕܰܗܘ̣ܰܘ ܩܰܕܡܳܝ̣̈ܰܝ̣ ܩܰܘܡܳܐ ܕܓܽܘܕܳܐ ܕܣܳܗ̈ܕܶܐ ܗܳܢܽܘܢ ܕܚܰܫܘ ܚܠܳܦ ܡܫܺܝܚܳܐ.

ܠܗܳܢܽܘܢ ܕܳܐܦ ܟܽܠܶܗ ܡܺܐܡܪܳܐ ܨܳܒܶܐ ܗ̱ܘܺܝܬ ܐܰܝܟ ܕܶܐܡܪܶܬ ܕܶܐ݀ܩܰܪܶܒ ܠܗܽܘܢ܆ ܘܠܳܐ ܝܳܕܰܥ ܐ̱ܢܳܐ ܐܰܝܟܰܢܳܐ ܠܘܳܬ ܫܒܺܝܠܳܐ ܐ̱ܚܪܺܢܳܐ ܢܳܓܕܺܝܢ ܐܢ̱ܬܽܘܢ ܠܺܝ܆ ܘܪܳܓܺܝܢ ܐܢ̱ܬܽܘܢ ܕܬܶܫܡܥܽܘܢ ܗܳܠܶܝܢ ܕܰܒܩܽܘܪܽܘܤ ܐܶܬܶܐܡܰܪ̈ܝ̱. ܗܳܢܳܐ ܓܶܝܪ ܫܡܳܐ ܐܺܝܬ ܠܰܡܕܺܝܢ̱ܬܳܐ ܗܳܝ܆ ܠܽܘܩܒܰܠ ܗܳܢܽܘܢ ܕܰܡܦܰܠܓܺܝܢ ܠܶܗ ܠܗܰܘ ܚܰܕ ܡܳܪܰܢ ܘܰܐ‌ܠܳܗܰܢ ܝܶܫܽܘܥ ܡܫܺܝܚܳܐ܆ ܒܰܥܦܺܝܦܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ. ܗܳܝ ܟܺܝܬ ܕܡܶܣܬܰܒܪܳܐ ܗ̱ܘܳܬ ܠܺܝ ܣܰܓܺܝ ܡܥܰܩܒܳܢܺܝܬܳܐ ܘܒܰܛܺܝܠܬܳܐ܆ ܐܶ‌ܠܽܘܠܳܐ ܕܰܠܝܽܘܩܢܳܐ ܕܡܽܘܫܶܐ ܚܰܕܬܶܬ ܒܥܽܘܗܕܳܢܳܐ܆ ܘܰܠܘܳܬ ܗܰܘ ܚܳܪܶܬ. ܟܰܕ ܓܶܝܪ ܗܰܘ ܠܢܳܡܽܘܣܳܐ ܗܰܘ ܕܶܐܬܺܝܗܶܒ ܡܶܢ ܐܰ‌ܠܳܗܳܐ ܠܰܒ̈ܢܰܝ ܐܺܝܣܪܳܐܶܝܠ ܒܚܽܘܪܺܝܒ܆ ܩܪܳܐ ܩܕܳܡܰܝܗܽܘܢ ܬܽܘܒ ܡܶܢ ܒܳܬܰܪ ܙܰܒܢܳܐ ܕܰܐܪܒܥܺܝܢ ܫ̈ܢܺܝܢ ܗܰܘ ܕܰܒܡܰܕܒܪܳܐ ܛܰܠܩܽܘܗ̱ܝ܆ ܟܰܕ ܟܽܠܗܽܘܢ ܗܳܢܽܘܢ ܕܰܢܦܰܩܘ ܡܶܢ ܡܶܨܪܶܝܢ ܐܰܝܟ ܕܰܠܡܺܐܡܰܪ ܡܰܝ̣ܺܝ̣ܬܺܝܢ ܗ̱ܘܰܘ ܡܶܢ ܟܰܕܽܘ܆ ܠܶܗ ܟܰܕ ܠܶܗ ܠܢܳܡܽܘܣܳܐ ܒܦܳܣܺܝ̈ܩܳܬܳܐ ܬܳܢܶܐ ܗ̱ܘܳܐ ܠܰܒ̈ܢܰܝܗܽܘܢ ܕܗܳܢܽܘܢ ܟܰܕ ܗܽܘ^[8] ܒܕܽܘܟ ܬܰܡܳܢ ܠܰܐܦ̈ܰܝ ܡܰܥܪܒܳܝܳܗ̇ ܕܡܽܘܐܳܒ ܒܰܐܪܥܳܐ ܗܳܝ ܕܩܰܪܺܝܒܳܐ ܠܪ̈ܶܕܝܰܘܗ̱ܝ ܕܝܽܘܪܕܢܳܢ܆ ܥܰܡ ܬܰܫܥܺܝܬܳܐ ܟܺܝܬ ܡܶܕܶܡ ܩܰܛܺܝܢܬܳܐ ܘܡܰܠܦܳܢܺܝܬܳܐ ܘܰܓܪܺܝܕܽܘܬܳܐ ܚܰܬܺܝܬܬܳܐ. ܕܡܶܢ ܗܳܪܟܳܐ ܐܳܦ ܬܶܢܝܳܢ ܢܳܡܽܘܣܳܐ ܩܪܳܝܗ̱ܝ ܠܰܟܬܳܒܳܐ. ܡܳܕܶܝܢ ܠܰܘ ܠܪܽܘܚܩܳܐ ܡܶܢ ܝܽܘܩܢܳܐ ܗܳܢܳܐ ܢܳܦܠܳܐ܆ ܗܳܝ ܕܳܐܦ ܚܢܰܢ ܟܰܕ ܫܒܰܩܢܰܢ ܠܰܡܕܺܝܢ̱ܬܳܐ ܗܳܝ܆ ܐܰܝ̇ܕܳܐ ܕܒܳܗ̇ ܐܺܝܬ ܗ̱ܘܰܘ ܐ̱ܢܳܫܺܝ̈ܢ ܕܛܳܢܺܝܢ222 ܗ̱ܘܰܘ ܒܕܶܚܠܰܬ ܫ̈ܺܐܕܶܐ ܗܳܝ ܥܰܬܺܝܩܬܳܐ ܕܡܶܨܪ̈ܳܝܶܐ ܒܕܽܘܓ̈ܡܰܛܰܐ܆ ܠܰܘ ܓܶܝܪ ܒܫܰܦܺܝܪܽܘܬ ܕܶܚܠܬܳܐ ܚܰܬܺܝܬܬܳܐ ܗܳܝ ܕܗܳܫܳܐ܆ ܠܶܗ ܟܰܕ ܠܶܗ ܠܡܺܐܡܪܳܐ ܡܶܢ ܕܪܺܝܫ ܢܶܗܦܽܘܟ ܢܶܣܰܒ܆ ܘܗܳܕܶܐ ܟܰܕ ܒܕܽܘܓ̈ܡܰܛܰܐ ܬܪ̈ܺܝܨܶܐ ܕܺܝܠܟܽܘܢ ܐܰܝܟ ܕܰܒܫܶܦ̈ܥܰܘܗ̱ܝ ܕܝܽܘܪܕܢܳܢ ܡܶܬܦܰܪܦܥܺܝܢ ܚ̱ܢܰܢ܆ ܘܠܰܘ ܟܰܕ ܩܰܪܺܝܒܺܝܢ ܚ̱ܢܰܢ ܒܰܠܚܽܘܕ. ܟܒܰܪ ܓܶܝܪ ܐܳܦ ܗܳܪܟܳܐ ܐܺܝܬ ܐ̱ܢܳܫ ܕܺܐܝܬܰܘܗ̱ܝ ܡܶܨܪܳܝܳܐ ܐܰܝܟ ܗܰܘ ܩܰܕܡܳܝܳܐ ܒܪܽܘܫܥܳܐ. ܡܗܰܝܡܢܺܝܢ ܚ̱ܢܰܢ ܕܶܝܢ ܕܰܐܝܟܰܢܳܐ ܕܗܳܢܽܘܢ ܫܰܢܺܝܘ ܡܶܢ ܛܳܥܝܽܘܬܳܐ ܕܰܐܒܳܗܰܝ̈ܗܽܘܢ܆ ܐܳܦ ܗܳܠܶܝܢ ܢܶܬܬܘܽܘܢ ܘܢܶܫܒܩܽܘܢ ܠܬܰܪܥܺܝܬܗܽܘܢ ܒܺܝܫܬܳܐ.

ܐܺܝܬ ܒܶܗ ܕܶܝܢ ܒܡܺܐܡܪܳܐ ܗܰܘ܆ ܗܰܘ ܐܰܝܢܳܐ ܕܶܐܬܶܐܡܰܪ ܡܶܢܰܢ ܒܰܡܕܺܝܢ̱ܬܳܐ ܗܳܝ ܕܰܩܕܳܡ ܩܰܠܺܝܠ ‌ܐܶܫܬܰܡܗܰܬ܆ ܡܶܢ ܒܳܬܰܪ ܡܰܡܠܠܳܐ ܗܰܘ ܩܰܕܡܳܝܳܐ܆ ܟܰܕ ܡܩܰܒܶܠ ܛܰܝܒܽܘܬܳܐ ܒܫܽܘܪ̈ܳܝܶܐ ܕܺܝܠܶܗ܆ ܕܗܰܘ ܕܩܳܐܶܡ ܗ̱ܘܳܐ ܒܪܺܝܫ ܥܺܕܬܳܐ ܕܬܰܡܳܢ܆ ܕܠܳܐ ܡܒܰܨܪܳܐܺܝܬ ܘܠܳܐ ܩܦܺܝܠܳܐܺܝܬ^[9] ܠܡܶܠܬܳܐ ܕܰܐ‌ܠܳܗܳܐ ܣܳܡ ܩܕܳܡܰܝܗܽܘܢ܆ ܗܳܟܰܢܳܐ.

ܡܶܛܽܠ ܕܰܠܫܶܬܶܐܣܬܳܐ ܡܶܢ ܗܳܢܳܐ ܡܰܠܦܳܢܳܐ ……………………………………………….ܠܘܳܬ ܐܰܓܽܘ̈ܢܶܐ ܪܰܘܪ̈ܒܶܐ ܕܣܳܗܕܽܘܬܳܐ ܙܰܪܶܙ^[10] ܐܶܢܽܘܢ.

ܗܳܟܰܢܳܐ ܟܺܝܬ ܐܳܦ ܒܚܰܕܚ̈ܕܳܢܶܐ ܡܶܢ ܨܚܳܚ̈ܶܐ ܕܶܐܘܰܢܓܶܠܺܝܽܘܢ ܟܬܺܝܒ: ܕܫܶܠ̈ܬܶܐ ܡܶܕܶܡ ܕܰܕܡܳܐ ܡܶܢ ܦܰܓܪܳܐ ܕܺܝܠܶܗ ܬܡܺܝܗܳܐܺܝܬ܆ ܒܰܕܡܽܘܬ ܛܽܘ̈ܦܶܐ ܕܕܽܘܥܬܳܐ ܪ̈ܳܕܝܳܢ ܗ̱ܘܰܝ̈^[11]܆ ܐܰܝܟܰܢܳܐ ܕܡܶܢ ܟܝܳܢܳܐ ܕܺܝܠܰܢ ܢܰܘܒܶܫ܆ ܘܰܐܝܟ ܗܰܘ ܕܡܰܦܶܩ ܘܛܳܪܶܕ ܠܳܗ̇ ܠܰܡܥܺܝܢܳܐ ܕܕܶܚܠܬܳܐ. ܘܶܐܢܕܶܝܢ ܠܳܐ܆ ܐܶ‌ܠܽܘ ܠܰܘ ܗܳܕܶܐ ܐܺܝܬܶܝܗ̇ ܗ̱ܘܳܬ ܕܰܐܝܟ ܕܰܒܐ̱ܪܳܙܳܐ ܡܶܣܬܰܥܪܳܐ܆ ܘܶܐܦܠܳܐ ܐܶ‌ܠܽܘ ܐ̱ܢܳܫ ܫܰܦܠܳܐ ܐܺܝܬܰܘܗ̱ܝ ܗ̱ܘܳܐ ܘܰܕܝܰܬܺܝܪ ܡܶܢ ܟܽܠ‌ ܐ̱ܢܳܫ ܕܰܚܽܘܠܬܳܢ܆ ܡܶܢ ܡܫܰܦܠܳܢܽܘܬܳܐ ܘܰܡܚܺܝܠܽܘܬܳܐ ܒܰܠܚܽܘܕܶܝܗ̇ ܠܒܰܪ ܡܶܢ ܟܝܳܢܳܐ܆ ܒܢܽܘ̈ܛܦܳܬܳܐ ܕܰܕܡܳܐ܆ ܐܰܟܙܢܳܐ ܕܰܒܬܰܠܺܝܠܽܘܬܳܐ ܕܕܽܘܥܬܳܐ ܥܬܺܝܕ ܗ̱ܘܳܐ ܕܢܶܬܪܰܛܰܒ.

ܕܰܐܝܟ ܗܳܕܶܐ ܐܺܝܬܶܝܗ̇܆ ܘܳܐܦ ܗܺܝ ܗܳܝ ܕܰܐܡܺܝܪܳܐ܆ ܗܳܝ ܕܳܐܦ ܗܺܝ ܠܣܰܓܺܝ̈ܶܐܐ ܐܶܬܗܰܝܡܢܰܬ^[12]܆ ܕܕܰܓܳܠܳܐܺܝܬ ܒܚܰܕܚ̈ܕܳܢܶܐ ܡܶܢ ܐܶܘܰܢܓ̈ܶܠܺܝܰܐ ܡܰܘܣܦܳܐ ܟܬܺܝܒܳܐ: ܕܡܰܠܰܐܟܳܐ ܐܺܝܬ ܗ̱ܘܳܐ ܕܩܳܐܶܡ ܠܘܳܬ ܨܠܺܝܒܳܐ ܘܰܡܚܰܝܶܠ ܗ̱ܘܳܐ ܠܶܗ. ܘܳܐܦ ܗܳܕܶܐ ܓܶܝܪ܆ ܡܶܛܽܠ ܡܕܰܒܪܳܢܽܘܬܳܐ ܕܡܶܛܽܠܳܬܰܢ ܡܶܣܬܰܥܪܳܐ ܗ̱ܘܳܬ. ܒܰܐܓܽܘ̈ܢܶܐ ܓܶܝܪ ܗܳܢܽܘܢ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ܆ ܐܰܝܟܰܢܳܐ ܕܳܐܦ ܒܗܳܠܶܝܢ ܐ̱ܚܪ̈ܳܢܝܳܬܳܐ ܗܽܘ ܫܰܪܺܝ ܠܰܢ܆ ܟܰܕ ܐܰܣܗܶܕ ܩܕܳܡ ܦܘܢܛܝܘܤ ܦܝܠܐܛܘܤ ܡܰܘܕܝܳܢܽܘܬܳܐ ܫܰܦܺܝܪܬܳܐ^[13] ܐܰܝܟܰܢܳܐ ܕܳܐܡܰܪ ܫܠܺܝܚܳܐ: ܘܟܰܕ ܡܚܰܘܶܐ ܡܶܢ ܬܰܚܘܺܝܬܳܐ ܗܳܝ ܕܒܶܗ܆ ܕܗܳܢܽܘܢ ܕܰܥܬܺܝܕܺܝܢ ܕܢܶܬܟܰܬܫܽܘܢ ܬܰܟ̈ܬܽܘܫܶܐ ܟܳܗ̈ܢܳܝܶܐ ܘܩܰܕܺܝ̈ܫܶܐ܆ ܡܰܠܰܐܟ̈ܶܐ ܢܶܗܘܽܘܢ ܠܗܽܘܢ ܕܰܡܥܰܕܪܺܝܢ ܠܗܽܘܢ. ܐܶܢ ܓܶܝܪ ܗܽܘ ܐܺܝܬܰܘܗ̱ܝ ܗ̱ܘܳܐ܆ ܚܶܟܡܬܳܐ ܗܳܝ ܣܳܦܩܰܬ ܠܟܽܠ ܘܚܰܝܠܳܐ ܕܰܐܒܳܐ܆ ܐܰܝܟܰܢܳܐ ܣܢܺܝܩ ܗ̱ܘܳܐ ܥܰܠ ܡܰܠܰܐܟܳܐ ܚܰܕ ܕܰܡܚܰܝܶܠ ܗ̱ܘܳܐ ܠܶܗ܆ ܗܰܘ ܕܰܠܟܽܠܗܽܘܢ ܐܺܝܬ ܠܶܗ ܕܰܡܫܰܡܫܺܝܢ ܠܶܗ ܐܰܝܟ ܡܳܪܳܐ ܘܥܳܒܽܘܕܳܐ܆ ܐܳܦ ܐܶܡܰܬܝ ܕܥܰܡ ܒܢܰܝ̈ܢܳܫܳܐ ܐ̱ܢܳܫܳܐܺܝܬ ܡܶܬܗܰܦܰܟ ܗ̱ܘܳܐ. ܗܳܐ ܓܶܝܪ ܐܳܡܰܪ ܡܰܬܰܝ: ܡܰܠܰܐܟ̈ܶܐ ܩܪܶܒܘ ܘܰܡܫܰܡܫܺܝܢ ܗ̱ܘܰܘ ܠܶܗ^[14]. ܘܳܐܦ ܗܽܘ ܕܶܝܢ ܟܰܕ ܡܕܰܒܪܳܢܳܐܺܝܬ ܐܰܟܚܕܳܐ ܘܡܶܬܢܰܚܬܳܢܳܐܺܝܬ ܡܡܰܠܶܠ ‌ܐܳܡܰܪ ܗ̱ܘܳܐ: ܐܰܘ ܣܳܒܰܪ ܐܰܢ̱ܬ ܕܠܳܐ ܡܶܫܟܰܚ ܐ̱ܢܳܐ ܗܳܫܳܐ ܕܰܐ݀ܦܺܝܤ ܠܳܐܒܝ܆ ܘܰܢܩܺܝܡ ܠܘܳܬܝ ܣܰܓܺܝ̈ܶܐܐ܆ ܝܰܬܺܝܪ ܡܶܢ ܬܰܪܬܰܥܶܣܪ̈ܶܐ ܠܶܓ̈ܝܽܘܢܺܝܢ ܕܡܰܠܰܐܟ̈ܶܐ. ܐܰܝܟܰܢܳܐ ܗܳܟܺܝܠ ܢܶܬܡܰܠܽܘܢ ܟܬܳܒ̈ܶܐ܆ ܕܗܳܟܰܢܳܐ ܙܳܕܶܩ ܕܢܶܗܘܶܐ^[15]. ܘܳܐܦ ܠܗܽܘܢ ܕܶܝܢ ܠܗܳܢܽܘܢ ܕܗܳܠܶܝܢ ܕܢܶܣܛܽܘܪܺܝܽܘܤ ܪܘܶܝܢ܆ ܗܰܢܺܝܳܐܺܝܬ ܐܺܝܬ ܗ̱ܘܳܐ ܠܺܝ ܕܶܐ݀ܫܰܐܶܠ. ܕܶܐܢܗܽܘ ܕܰܠܡܶܠܬܳܐ ܕܰܐ‌ܠܳܗܳܐ܆ ܐܺܝܬ ܗ̱ܘܳܐ ܠܶܗ ܠܰܡܫܺܝܚܳܐ ܐܰܝܟ ܡܶܠܰܬܗܽܘܢ ܕܥܳܡܰܪ ܒܶܗ܆ ܐܰܝܟܰܢܳܐ ܥܰܠ ܥܽܘܕܪܳܢܳܐ ܕܚܰܕ ܡܰܠܰܐܟܳܐ ܣܢܺܝܩ ܗ̱ܘܳܐ. ܐܰܪܰܐ ܒܗܰܘ ܙܰܒܢܳܐ܆ ܣܦܺܝܩܳܐ ܐܺܝܬܰܘܗ̱ܝ ܗ̱ܘܳܐ ܡܶܢ ܥܡܽܘܪܝܳܐ܆ ܐܰܘ ܗܰܘ ܕܥܳܡܰܪ ܗ̱ܘܳܐ ܒܶܗ܆ ܠܳܐ ܣܳܦܶܩ ܗ̱ܘܳܐ ܠܶܗ ܠܘܳܬ ܣܽܘܝܳܥܳܐ. ܚܕܳܐ ܡܶܢ ܬܰܪ̈ܬܰܝܗܶܝܢ ܓܶܝܪ܆ ܟܽܠܳܗ̇ ܐܰܢܰܢܩܺܐ ܕܬܺܐܡܪܽܘܢ. ܐܶܬܬܥܺܝܪܘ ܗܳܟܺܝܠ ‌ܐܳܘ ܗܳܠܶܝܢ ܘܕܰܥܘ ܡܶܟܺܝܠ܆ ܕܳܐܦ ܐܰܢ̱ܬܽܘܢ ܒܟܽܘܢ ܢܳܦܠܺܝܢ ܐܢ̱ܬܽܘܢ܆ ܘܒܰܪ ܐ̱ܢܳܫܳܐ ܫܚܺܝܡܳܐ ܒܪܺܝܫܳܐ ܓܰܠܝܳܐ ܡܓܰܕܦܳܢܳܐܺܝܬ ܘܝܽܗ̱ܘܕܳܐܺܝܬ ܫܳܛܪܺܝܢ ܐܢ̱ܬܽܘܢ܆ ܠܗܰܘ ܕܶܐܨܛܠܶܒ ܚܠܳܦܰܝܢ. ܐܳܦ ܓܶܝܪ ܗܰܘ ܡܣܰܝܒܳܐ ܬܶܐܽܘܕܽܘܪܺܝܛܽܘܤ܆ ܠܳܐ ܡܶܬܚܰܡܰܨ܆ ܕܰܒܣܰܩܽܘܒ̈ܠܳܝܘܳܬ ܡ̈ܶܠܶܐ ܗܳܠܶܝܢ ܕܠܽܘܩܒܰܠ ܩܦ̈ܠܐܐ ܗܳܢܽܘܢ ܕܚܰܟܺܝܡܳܐ ܩܽܘܪܝܠܘܤ܆ ܣܢܺܝܩ ܥܰܠ ܥܽܘܕܪܳܢܳܐ ܡܰܠܰܐܟܳܝܳܐ ܢܺܐܡܪܺܝܘܗ̱ܝ܆ ܘܒܰܕܡܽܘܬ ܗܰܘ ܕܰܡܓܰܚܶܟ ܘܣܳܒܶܟ ܥܰܠ ܚܰܒܪܶܗ ܢܫܰܐܶܠ܆ ܡܰܢܽܘ ܗܰܘ ܕܥܰܠ ܣܽܘܝܳܥܳܐ ܡܰܠܰܐܟܳܝܳܐ ܐܶܣܬܢܶܩ. ܗܳܕܶܐ ܐܳܦ ܥܰܠ ‌ܐܶܣ̈ܶܐ ܨܳܪܽܘܗ̇ ܒܝܰܕ ܐܽܘܡܳܢܽܘܬܳܐ ܕܨܰܝܳܪ̈ܶܐ܆ ܟܰܕ ܝܽܘܩ̈ܢܶܐ ܥܒܰܕܘ ܡܕܰܡܝܳܢܳܐܺܝܬ܆ ܗܳܢܽܘܢ ܕܗܶܢܶܝܢ ܟܰܕ ܗܶܢܶܝܢ ܐܰܟܘܳܬܶܗ ܦܩܰܪܘ܆ ܘܣܳܒܪܺܝܢ ܕܰܡܒܰܙܚܺܝܢ ܠܰܡܚܺܝܠܽܘܬܶܗ ܕܰܡܫܺܝܚܳܐ܆ ܠܗܳܝ ܕܰܚܢܰܢ ܡܕܰܒܪܳܢܽܘܬܳܐ ܚܰܟܺܝܡܬܳܐ ܘܰܐ‌ܠܳܗܳܝܬܳܐ ܚܰܘܺܝܢܳܗ̇. ܗܰܘ ܓܶܝܪ ܕܶܐܬܳܐ ܕܢܶܣܰܒ ܡܚܺܝ̈ܠܘܳܬܳܐ ܘܟܽܘܪ̈ܗܳܢܶܐ ܕܺܝܠܰܢ^[16]܆ ܗܳܝ ܕܳܐܡܰܪ ܟܬܳܒܳܐ ܟܳܗܢܳܝܳܐ܆ ܐܰܝܟܰܢܳܐ ܥܬܺܝܕ ܗ̱ܘܳܐ ܕܢܺܐܨܰܦ ܕܠܳܐ ܢܶܣܬܒܰܪ ܡܚܺܝܠܳܐ܆ ܘܚܶܣܕܳܐ ܢܕܽܘܢ ܕܺܐܝܬܰܘܗ̱ܝ܆ ܡܽܘܟܳܟܳܐ ܗܰܘ ܕܡܶܛܽܠܳܬܰܢ ܩܰܒܶܠ ܥܠܰܘܗ̱ܝ.

ܒܰܕܓܽܘܢ ܐܳܦ ܥܰܠ ܨܠܺܝܒܳܐ ܗܳܝ …………………………………………….. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܫܬܝܢ ܘܰܐܪܒܥܳܐ.

ܐܦܣ̈ܝܐ. 4: 13 [1]

ܐܫܥܝܐ. 9: 6 [2]

ܐܦܣ̈ܝܐ. 5: 2 [3]

ܐܪܡܝܐ. 31: 15 [4]

ܣܶܦܪܐ ܕܒܪܝܬܐ. 35: 19 [5]

ܐܪܡܝܐ. 31: 16 [6]

ܐܪܡܝܐ. 31: 17 [7]

ܗܘ̣ܳܐ[8]

[9]ܡܙܰܝܦܳܐܝܬ

[10] ܙܰܝܶܢ ܐܶܢܽܘܢ

[11]ܡܬܝ. 22: 44

[12]ܐܶܣܬܰܒܪܰܬ

[13]ܐ. ܛܝܡܬܐܘܣ. 6: 13

[14]ܡܬܝ. 4: 11

[15]ܡܬܝ. 26: 53: ـ 54

[16]ܡܬܝ. 8: 17