ܡܺܐܡܪܳܐ ܕܫܬܝܢ ܘܰܬܠܳܬܳܐ
ܥܠ ܒܶܝܬ ܝܰܠܕܳܐ ܐܰܘܟܺܝܬ ܒܶܝܬ ܕܶܢܚܳܐ
63: ܟܰܕ ܗܳܐ ܬܰܪܬܶܝܢ ܙܰܒ̈ܢܺܝܢ ܡܶܢ ܟܰܕܽܘ ܠܥܺܐܕܳܐ ܗܳܢܳܐ ܥܰܕܥܕܶܬ̣ ܥܰܡܟܽܘܢ܆ ܠܰܘ ܐ̱ܢܳܫ ܕܠܳܐ ܡܶܠܬܳܐ ܐܶܬܚܙܺܝܬ̣. ܘܳܐܦܠܳܐ ܕܰܠܗܳܢܽܘܢ ܕܰܩܪܶܝܢ ܠܳܐ ܡܶܫܟܰܚ ܕܰܢܬܰܪܣܶܐ ܪܽܘܚܳܢܳܐܺܝܬ. ܐܶܠܳܐ ܘܰܕܣܰܓܺܝ ܡܫܰܪܬܰܚ ܘܰܫܦܺܝܥ ܒܕܰܐܝܟ ܗܳܠܶܝܢ܆ ܒܗܳܝ ܕܰܐܢ̱ܬܽܘܢ ܝܳܕܥܺܝܢ ܐܢ̱ܬܽܘܢ ܗ̱ܘ ܡܶܢ ܨܶܒܝܳܢܳܐ ܪܳܚܶܡ ܐܰܠܳܗܳܐ܆ ܕܥܰܬܺܝܪܳܐܺܝܬ ܬܶܬܬܰܪܣܽܘܢ ܒܗܳܠܶܝܢ ܡܡܰܫ̈ܚܳܬܳܐ܆ ܘܥܰܠ̈ܠܳܬܳܐ ܙܥܽܘܪ̈ܝܳܬܳܐ ܬܩܰܒܠܽܘܢ ܕܣܽܘ̈ܟܳܠܶܐ܆ ܘܰܠܗܳܠܶܝܢ ܬܦܰܬܽܘܢ ܐܶܢܶܝܢ ܐܰܢ̱ܬܽܘܢ ܒܟܽܘܢ܆ ܘܰܠܪܰܘܡܳܐ ܦܐܶܐ ܠܰܐܠܳܗܳܐ ܬܰܣܩܽܘܢ ܐܶܢܶܝܢ. ܐܰܟܙܢܳܐ ܓܶܝܪ ܕܰܐܪܥܳܐ ܡܰܦܪܝܳܢܺܝܬܳܐ ܘܰܕܒܺܐܝ̈ܕܰܝܳܐ ܕܰܐܟܳܪ̈ܶܐ ܫܰܦܺܝܪ ܐܶܬܦܰܠܚܰܬ ܟܰܕ ܡܩܰܒܠܳܐ ܙܰܪܥܳܐ܆ ܫܶܒܠܳܐ ܫܰܡܺܝܢܬܳܐ ܘܪܳܡܬܳܐ ܝܳܗܒܳܐ܆ ܗܳܝ ܕܶܝܢ ܕܠܳܐ ܐܺܝܬ ܠܳܗ̇ ܫܰܦܺܝܪܽܘܬ ܟܝܳܢܳܐ ܠܘܳܬ ܝܺܠܺܝܕܽܘܬܳܐ ܕܦܺܐܪ̈ܶܐ ܘܠܳܐ ܝܺܨܺܝܦܬܳܐ܆ ܟܒܰܪ ܘܟܰܕ ܡܶܢ ܡܰܘܥܺܝܬܳܐ ܕܰܒܪܺܝܬܳܐ ܡܶܣܬܰܪܚܳܐ[1]܆ ܐܳܦ ܠܙܰܪܥܳܐ ܗܰܘ ܒܚܺܝܪܳܐ ܡܚܰܒܠܳܐ܆ ܒܶܗ ܟܰܕ ܒܶܗ ܒܰܙܢܳܐ ܐܳܦ ܬܰܪܥܺܝܬܳܐ܆ ܗܳܝ ܡܰܢ ܕܛܳܒܳܐܺܝܬ ܐܶܬܬܰܝܬܝܰܬ̣ ܘܰܬܪܺܝܨܳܐܺܝܬ ܠܰܡܗܰܝܡܳܢܽܘ ܝܰܠܺܝܦܳܐ܆ ܐܳܦ ܟܰܕ ܝܽܘܠ̈ܦܳܢܶܐ ܙܥܽܘܪ̈ܶܐ ܡܩܰܒܠܳܐ܆ ܒܪܰܡ ܠܰܘ ܕܰܠܒܰܪ ܡܶܢ ܡܶܠܬܳܐ ܕܫܰܦܺܝܪܽܘܬ ܕܶܚܠܬܳܐ ܢܳܦܠܺܝܢ܆ ܡܫܰܡܢܳܐ ܠܗܽܘܢ ܠܗܳܠܶܝܢ܆ ܘܰܕܢܶܗܘܽܘܢ ܥܒܺܝܛܺܝܢ ܥܳܒܕܳܐ ܠܗܽܘܢ ܒܦܺܐܪ̈ܶܐ ܕܕܽܘܓܡ̈ܰܛܰܐ ܫܰܪܺܝܪ̈ܶܐ܆ ܕܡܰܦܩܺܝܢ ܠܰܚܡܳܐ ܕܡܶܫܟܰܚ ܠܡܶܣܡܰܟ ܠܶܒܶܗ ܕܒܰܪܢܳܫܳܐ. ܗܳܝ ܕܶܝܢ ܛܳܠܽܘܡܬܳܐ ܘܕܰܒ̈ܡܶܠܶܐ ܕܪܽܘܫܥܳܐ ܐܶܬܪܰܒܝܰܬ܆ ܘܕܰܒܚܽܘܫܳܒ̈ܶܐ ܠܳܐ ܣܰܟܽܘܠ̈ܬܳܢܶܐ ܘܣܰܟ̈ܠܶܐ ܡܚܰܓܪܳܐ܆ ܣܳܦܩܳܐ ܗ̱ܝ܆ ܕܳܐܦ ܠܝܽܘܠܦܳܢܳܐ ܗܰܘ ܝܰܡܺܝܢܳܝܳܐ ܬܶܥܒܶܕ ܕܠܳܐ ܦܺܐܪ̈ܶܐ܆ ܟܰܕ ܐܶܙܕܟܺܝ ܘܰܐܡܚܶܠ ܒܰܪܡܳܝܳܐ ܕܙܰܪܥܳܐ ܗܰܘ ܕܙܺܝ̈ܙܳܢܶܐ ܕܰܠܥܶܠ ܡܶܢܶܗ. ܘܕܰܐܢ̱ܬܽܘܢ ܡܰܢ ܥܰܡܳܗ̇ ܟܰܕ ܥܰܡܳܗ̇ ܕܰܚܘܺܝܚܽܘܬܳܐ ܐܰܬܺܝܐܺܝܢ ܐܢ̱ܬܽܘܢ܆ ܟܰܕ ܦܽܘܡܳܐ ܕܬܰܪܥܺܝܬܟܽܘܢ ܦܰܬܺܝܬܽܘܢ܆ ܘܰܠܗܳܠܶܝܢ ܙܥܽܘܪ̈ܝܳܬܳܐ ܪܰܘܪܒܳܐܺܝܬ ܩܰܒܶܠܬܽܘܢ܆ ܣܰܓܺܝ ܬܟܺܝܠ ܐ̱ܢܳܐ. ܘܕܳܝܠܳܐ ܒܺܝ ܡܶܟܺܝܠ ܕܶܚܠܬܳܐ ܡܶܛܽܠ ܗܳܕܶܐ ܐܳܦܠܳܐ ܚܕܳܐ.
ܒܪܰܡ ܕܶܝܢ ܐܶܢܳܐ ܟܰܕ ܠܘܳܬ ܥܺܐܕܳܐ ܗܳܢܳܐ ܬܠܺܝܬܳܝܳܐ ܕܩܰܪܺܝܒ ܒܨܶܒܝܳܢܳܐ ܕܰܐܠܳܗܳܐ ܐܶܬܬܰܝܬܺܝܬ[2]܆ ܫܳܪܽܘܬܳܐ ܬܠܺܝܬܳܝܬܳܐ ܠܰܡܥܰܬܳܕܽܘ[3]܆ ܠܳܐ ܡܫܰܪܬܰܚ[4] ܐ̱ܢܳܐ. ܟܰܕ ܓܶܝܪ ܗܺܝ ܟܰܕ ܗܺܝ ܗܽܘܦܶܘܬܶܣܺܝܤ ܐܺܝܬܶܝܗ̇܆ ܐܶܢ ܗܽܘ ܡܰܢ ܕܰܒܗܽܘܢ ܟܰܕ ܒܗܽܘܢ ܒܣܽܘ̈ܟܳܠܶܐ ܘܰܒ̈ܡܶܠܶܐ ܐܶܬܚܰܫܰܚ܆ ܫܳܝܛܺܝܢ ܐܢ̱ܬܽܘܢ ܠܳܗ̇ ܠܫܳܪܽܘܬܳܐ܆ ܒܰܕܡܽܘܬ ܗܳܢܽܘܢ ܕܰܒܒܽܘ̈ܫܳܠܶܐ ܕܶܐܬܡܳܠܝ ܡܶܬܬܰܪܣܶܝܢ. ܐܶܢܕܶܝܢ ܠܘܳܬ ܣܽܘ̈ܟܳܠܶܐ ܚ̈ܰܕܬܶܐ ܐܶ݀ܚܽܘܪ܆ ܕܳܚܶܠ ܐ̱ܢܳܐ܆ ܕܕܰܠܡܳܐ ܟܰܕ ܒܥܽܘܡܩܳܐ ܕܬܶܐܽܘܪ̈ܺܝܰܐܤ ܥܳܡܶܕ ܐ̱ܢܳܐ܆ ܠܳܐ ܐܶ݀ܫܟܰܚ ܠܡܶܬܕܰܠܳܝܽܘ. ܟܰܕ ܚܕܳܐ ܡܶܢ ܬܰܪܬܶܝܢ ܓܳܕܫܳܐ. ܐܰܘ ܟܰܕ ܬܰܪܥܺܝܬܳܐ ܠܳܐ ܣܳܦܩܳܐ ܕܥܰܡ ܗܰܘ ܡܳܐ ܕܡܶܣܬܰܟܰܠ ܬܶܡܬܽܘܚ܆ ܐܰܘ ܟܰܕ ܡܶܠܬܳܐ ܠܳܐ ܡܶܫܟܚܳܐ ܕܬܰܘܕܰܥ ܠܗܳܝ ܕܶܐܣܬܰܟܠܰܬ. ܒܪܰܡ ܡܶܛܽܠ ܕܥܰܬܺܝܪܰܐ ܗ̱ܘ ܗܰܘ ܕܺܐܝܬܰܘܗ̱ܝ ܥܶܠܬܳܐ ܕܗܳܢܳܐ ܚܰܓܳܐ ܕܩܰܪܺܝܒ܆ ܠܳܐ ܙܳܕܶܩ ܠܡܰܡܳܐܢܽܘ. ܐܶܠܳܐ ܙܳܕܶܩ ܠܡܶܫܐܰܠ܆ ܐܰܝܟܰܢܳܐ ܕܢܶܬܶܠ ܠܰܢ ܠܰܡܚܺܝ̈ܠܶܐ ܗܰܘܢܳܐ ܘܡܶܠܬܳܐ ܚܰܪܺܝܦܬܳܐ[5]܆ ܡܶܛܽܠ ܕܳܐܦ ܗܽܘ ܝܰܗ̱ܒ ܡܶܠܬܳܐ ܠܗܳܢܽܘܢ ܕܰܡܣܰܒܪܺܝܢ ܒܚܰܝܠܳܐ ܪܰܒܳܐ܆ ܠܐ̱ܪܳܙܳܐ ܪܰܒܳܐ ܕܫܰܦܺܝܪܽܘܬ ܕܶܚܠܬܳܐ. ܘܟܰܕ ܠܗܳܕܶܐ ܡܶܫܬܘܶܐ ܐ̱ܢܳܐ܆ ܐܶ݀ܡܚܶܐ ܠܗܽܘܦܶܘܬܶܣܺܝܣ[6] ܗܳܕܶܐ ܕܩܰܪܺܝܒܳܐ܆ ܐܰܟܙܢܳܐ ܕܒܕܺܝܩܶܠܰܐ ܠܰܐܪܥܳܐ ܕܰܗܒܳܢܳܝܬܳܐ. ܘܟܰܕ ܡܢܳܬܳܐ ܡܶܕܶܡ ܙܥܽܘܪܬܳܐ ܓܳܪܶܕ ܐ̱ܢܳܐ܆ ܘܰܠܗܳܕܶܐ ܚܳܫܶܠ ܐ̱ܢܳܐ ܘܰܡܫܰܒܶܛ ܐ̱ܢܳܐ ܘܢܳܓܶܕ ܐ̱ܢܳܐ ܠܳܗ̇ ܠܰܪܘܺܝܚܽܘܬܳܐ܆ ܡܳܐܢܳܐ ܕܕܰܗܒܳܐ ܘܰܕܣܰܓܺܝ ܪܰܒ ܐܶ݀ܥܒܶܕ.
ܡܳܢܳܐ ܓܶܝܪ ܐܺܝܬ ܕܠܳܐ ܡܶܠܬܳܐ܆ ܡܶܢ ܗܳܢܶܝܢ ܕܒܺܝܠܺܝܕܽܘܬܶܗ ܕܰܡܫܺܝܚܳܐ ܐܶܬܕܰܒܰܪ. ܡܳܢܳܐ ܕܶܝܢ ܕܠܰܘ ܡܛܰܝܦܳܢܰܐ ܗ̱ܘ ܕܰܡܥܺܝ̈ܢܶܐ ܫܦܺܝ̈ܥܳܬܳܐ ܕܡ̈ܶܠܶܐ܆ ܘܕܰܡܚܰܘܶܐ ܠܟܽܠܗܶܝܢ ܐܰܝܟ ܢܽܘܛܰܦܬܳܐ ܚܕܳܐ܆ ܒܝܰܕ ܕܰܠܟܽܠ ܡܶܠܬܳܐ ܙܳܟܶܐ. ܐܶܢ ܓܶܝܪ ܐܶ݀ܫܰܡܰܪ ܠܠܶܫܳܢܳܐ܆ ܠܪܰܘܡܳܐ ܕܰܐܝܠܶܝܢ ܕܡܶܬܚܰܙ̈ܝܳܢ ܠܘܳܬ ܐܽܘܣܺܝܰܐ ܗܳܝ ܕܰܠܗܰܠ ܡܶܢ ܟܽܠ ܕܰܐܠܳܗܳܐ ܘܡܶܠܬܳܐ ܘܦܳܪܽܘܚܳܐ ܐܶ݀ܗܘܶܐ܆ ܘܰܒܝܰܕ ܪܰܒܽܘܬ ܡܰܡܠܠܳܐ ܕܡ̈ܶܠܶܐ ܐܶ݀ܦܪܰܚ ܐܰܟܚܕܳܐ ܥܰܡ ܣܽܘ̈ܟܳܠܶܐ܆ ܕܡܶܢ ܐܰܪܥܳܐ ܡܶܬܬܪܺܝܡ ܐ̱ܢܳܐ ܒܰܠܚܽܘܕ ܐܶ݀ܣ̣ܬܒܰܪ܆ ܒܰܕܡܽܘܬ ܦܰܪܽܘܓܳܐ ܡܶܕܶܡ ܕܗܳܫܳܐ ܚܰܕܬܳܐܺܝܬ ܡܶܢ ܩܶܢܳܐ ܦܰܪܺܝܚ܆ ܘܕܰܒܗܳܠܶܝܢ ܕܰܠܘܳܬ ܐܰܪܥܳܐ ܡܰܠܽܘܢ ܘܠܰܘ ܠܥܶܠ ܒܳܐܰܐܪ ܡܶܫܟܰܚ ܠܡܶܦܪܰܚ ܘܰܠܬܰܚܬ ܡܶܬܬܰܝܬܶܐ. ܟܽܠ ܟܡܳܐ ܓܶܝܪ ܕܡܶܬܩܰܪܰܒ ܐ̱ܢܳܫ ܠܪܳܡܳܐ܆ ܗܳܢܳܐ ܟܽܠܶܗ ܡܶܢ ܪܰܘܡܳܐ ܢܦܽܘܫ. ܒܥܽܘܡܩܳܐ ܕܶܝܢ ܬܽܘܒ ܕܡܰܚܬܬܳܐ ܕܺܝܠܶܗ ܘܰܕܡܶܬܒܰܣܪܳܢܽܘܬܶܗ ܗܳܝ ܕܝܰܬܺܝܪ ܐܺܝܬܶܝܗ̇ ܪܳܚܡܰܬ ܐ̱ܢܳܫܳܐ܆ ܐܶܢ ܟܺܝܬ ܐܰ݀ܩܶܬ ܠܥܰܝܢܳܐ ܕܬܰܪܥܺܝܬܝ܆ ܘܶܐ݀ܬܚܪܶܐ ܕܶܐ݀ܚܽܘܬ ܥܰܡܳܗ̇ ܐܰܟܚܕܳܐ ܒܡܶܠܬܐ ܠܘܳܬ ܥܽܘܡܩܳܐ ܕܠܳܐ ܡܫܽܘܚܬܳܐ܆ ܐ݀ܶܬܡܚܶܠ ܘܶܐ݀ܫܦܰܠ ܘܶܐ݀ܨܽܘܪ܆ ܒܰܕܡܽܘܬ ܗܳܢܽܘܢ ܕܰܒܝܰܡܳܐ ܛܳܝܦܺܝܢ܆ ܐܰܘ ܥܰܠ ܓܕܳܢܦܳܐ ܡܶܕܶܡ ܕܰܫܩܺܝܦܳܐ ܕܝܰܬܺܝܪ ܪܳܡ ܩܳܝܡܺܝܢ. ܗܳܢܽܘܢ ܕܡܶܚܕܳܐ ܕܠܰܐܦܰܝ̈ ܠܬܰܚܬ ܚܳܝܪܺܝܢ܆ ܟܰܕ ܚܶܫܽܘܟܳܐ ܘܨܰܘܪܳܢܳܐ ܡܶܬܡܠܶܝܢ܆ ܡܰܗܦܟܺܝܢ ܥܰܝ̈ܢܰܝܗܽܘܢ܆ ܠܳܐ ܓܶܝܪ ܣܳܦܶܩ ܚܰܝܠܳܐ ܚܰܙܳܝܳܐ ܕܥܰܝ̈ܢܶܐ܆ ܠܘܳܬ ܠܳܐ ܡܶܬܕܰܪܟܳܢܽܘܬܶܗ ܕܥܽܘܡܩܳܐ. ܗܳܟܰܢܳܐ ܟܺܝܬ ܐܳܦ ܩܰܢܳܝܽܘܬܳܐ ܗܳܝ ܚܰܙܳܝܬܳܐ ܕܢܰܦܫܳܐ܆ ܐܳܦܶܢ ܝܰܬܺܝܪܳܐܺܝܬ ܬܶܗܘܶܐ ܐܺܝܬܶܝܗ̇ ܕܰܒܡܰܚ̈ܫܒܳܬܳܐ ܡܒܰܚ̈ܢܳܢܝܳܬܳܐ ܣܰܓܺܝ ܡܥܰܩܒܳܢܳܐܺܝܬ ܘܰܡܕܰܪܫܳܐܺܝܬ ܐܺܝܬ ܠܳܗ̇܆ ܢܳܫܳܐ ܐܰܝܟܰܢ ܕܗܽܘ ܘܚܳܝܓܳܐ܆ ܘܥܳܪܩܳܐ ܟܰܕ ܠܘܳܬ ܠܳܐ ܡܶܣܬܰܝܟܳܢܽܘܬܳܐ ܘܠܳܐ ܡܶܬܩܰܪܒܳܢܽܘܬܳܐ ܕܡܰܚܰܬܬܳܐ ܕܰܐܠܳܗܳܐ ܡܶܠܬܳܐ ܚܳܝܪܳܐ. ܘܰܠܚܰܪܬܳܐ ܡܶܢ ܒܳܬܰܪ ܫܶܦ̈ܥܶܐ ܣܰܓܺܝ̈ܶܐܐ ܕܣܽܘ̈ܟܳܠܶܐ ܘܰܕܡ̈ܶܠܶܐ܆ ܗܳܝ ܕܰܠܩܽܘܗܠܰܬ ܦܺܝܠܳܣܽܘܦܝܬܝܢܐ ܥܒܺܝܕܳܐ ܡܶܢ ܟܽܠ ܦܪܽܘܤ ܒܙܰܒܢܳܗ̇ ܬܺܐܡܰܪ܆ ܟܽܠܗܶܝܢ ܗܳܠܶܝܢ ܢܰܣܺܝܬ̣ ܒܚܶܟܡܬܳܐ. ܐܶܡܪܶܬ ܐܶ݀ܬܚܰܟܰܡ. ܘܗܺܝ ܐܶܬܪܰܚܩܰܬ ܡܶܢܝ ܠܪܽܘܚܩܳܐ܆ ܝܰܬܺܝܪ ܡܶܢ ܡܳܐ ܕܺܐܝܬܶܝܗ̇ ܗ̱ܘܳܬ. ܘܰܠܥܽܘܡܩܳܐ ܥܰܡܺܝܩܳܐ ܡܰܢܽܘ ܢܶܫܟܚܺܝܘܗ̱ܝ[7].
ܐܰܝܢܳܐ ܓܶܝܪ ܗܰܘܢܳܐ ܕܟܰܕ ܠܬܰܪ̈ܬܰܝܗܶܝܢ ܐܰܟܚܕܳܐ ܡܟܰܢܶܫ܆ ܠܪܰܘܡܳܐ ܟܺܝܬ ܘܰܠܥܽܘܡܩܳܐ ܠܚܰܕ܆ ܘܫܳܡܰܥ ܠܶܗ ܠܰܟܬܳܒܳܐ ܐܰܠܳܗܳܝܳܐ ܕܳܐܡܰܪ: ܕܗܰܘ ܕܰܠܥܶܠ ܡܶܢ ܟܽܠ ܪܺܝܫܳܢܽܘܬܳܐ ܘܫܽܘܠܛܳܢܳܐ ܘܚܰܝܠܳܐ ܘܡܳܪܽܘܬܳܐ ܘܟܽܠ ܫܡܳܐ ܕܡܶܫܬܰܡܰܗ܆ ܠܰܘ ܒܰܠܚܽܘܕ ܒܥܳܠܡܳܐ ܗܳܢܳܐ ܐܶܠܳܐ ܐܳܦ ܒܗܰܘ ܕܰܥܬܺܝܕ[8]. ܗܰܘ ܕܺܐܝܬܰܘܗ̱ܝ ܩܕܳܡ ܟܽܠܗܶܝܢ ܘܰܕܒܶܗ ܟܽܠܗܶܝܢ ܐܶܬܩܰܝܰܡ̈ܝ̱܆ ܢܚܶܬ ܠܰܐܬܪ̈ܰܘܳܬܳܐ ܬܰܚ̈ܬܳܝܶܐ ܕܰܐܪܥܳܐ܆ ܟܰܕ ܤܛܰܪ ܡܶܢ ܚܛܺܝܬܳܐ ܐܶܬܚܰܝܰܕ ܠܒܶܣܪܳܐ ܕܺܝܠܰܢ ܘܰܠܢܰܦܫܳܐ ܡܶܬܗܰܘܢܳܢܺܝܬܳܐ ܩܢܽܘܡܳܐܺܝܬ܆ ܠܳܐ ܙܳܐܰܥ ܘܰܒܬܶܡܗܳܐ ܗܳܘܶܐ܆ ܘܰܒܫܶܬܩܳܐ ܡܫܰܒܰܚ ܠܰܡܥܰܕܪܳܢܳܐ܆ ܗܰܘ ܕܰܠܗܳܢܳܐ ܟܽܠܶܗ ܣܽܘܪܳܩܳܐ ܨܶܒܝܳܢܳܝܳܐ ܢܚܶܬ܆ ܠܗܰܘ ܠܳܐ ܣܢܺܝܩܳܐ ܘܡܰܠ̣ܝܳܐ ܘܥܰܬܺܝܪܳܐ܆ ܘܰܕܡܶܛܽܠ ܦܽܘܪܩܳܢܳܐ ܕܺܝܠܰܢ ܗܳܝ ܕܢܶܬܒܰܣܰܪ ܐܶܬܡܰܣܟܰܢ܆ ܘܰܥܕܰܡܳܐ ܠܰܨܠܺܝܒܳܐ ܕܚܰܫ̈ܶܐ ܕܰܚܠܳܦܰܝܢ ܒܰܒܣܰܪ ܩܰܒܶܠ ܥܠܰܘܗ̱ܝ. ܐܳܘ ܡܶܢ ܬܶܕܡܽܘܪܬܳܐ. ܗܰܘ ܕܒܰܠܚܽܘܕܰܘܗ̱ܝ ܐܺܝܬ ܠܶܗ ܠܳܐ ܡܳܝܽܘܬܽܘܬܳܐ܆ ܢܽܘܗܪܳܐ ܗ̱ܘ ܠܳܐ ܡܶܬܩܰܪܒܳܢܳܐ[9]܆ ܗܰܘ ܫܶܡܫܳܐ ܕܙܰܕܺܝܩܽܘܬܳܐ܆ ܡܶܛܽܠܳܬܰܢ ܗܳܢܽܘܢ ܕܠܰܓܒܺܝܠܬܳܐ ܩܰܕܡܳܝܬܳܐ ܘܰܐܠܳܗܳܝܬܳܐ ܡܶܢ ܚܛܺܝܬܳܐ ܨܰܥܰܪܢܰܢ܆ ܗܳܢܽܘܢ ܕܰܢܦܰܠܢܰܢ ܡܶܢ ܐܰܬܪܰܢ ܩܰܕܡܳܝܳܐ܆ ܡܶܢ ܦܰܪܕܰܝܣܳܐ ܗܰܘ ܕܰܢܨܺܝܒ ܠܡܰܕܢܚܳܐ ܐܳܡܰܪ ܐ̱ܢܳܐ܆ ܘܰܠܘܳܬ ܡܰܥܪܒܳܐ ܐܶܫܬܕܺܝܢܰܢ ܠܰܐܟܣܽܘܪܝܳܐ܆ ܘܰܠܒܰܪ ܡܶܢ ܟܽܠܳܗ̇ ܡܰܢܗܪܳܢܽܘܬܳܐ ܐܰܠܳܗܳܝܬܳܐ ܗܘ̣ܰܝܢܰܢ܆ ܡܶܢ ܡܰܥܪܒܳܐ ܕܳܢܰܚ܆ ܟܰܕ ܐܶܫܬܰܘܬܰܦ ܬܡܺܝܗܳܐܺܝܬ ܠܰܗܘܳܝܳܐ ܕܺܝܠܰܢ܆ ܘܡܶܢ ܙܰܪܥܶܗ ܕܰܐܒܪܳܗܳܡ ܢܣܰܒ܆ ܘܰܫܘܰܚ ܒܰܒܣܰܪ ܡܶܢ ܥܶܩܳܪܳܐ ܕܺܐܝܫܰܝ ܘܰܕܕܰܘܺܝܕ܆ ܘܗܳܟܰܢܳܐ ܕܢܰܚ ܠܗܳܢܽܘܢ ܕܰܒܚܶܫܽܘܟܳܐ ܕܠܳܐ ܝܺܕܰܥܬܳܐ ܘܰܒܛܶܠܳܠܳܐ ܕܡܰܘܬܳܐ ܝܳܬܒܺܝܢ ܗ̱ܘܰܘ.
ܟܰܕ ܠܗܳܢܳܐ ܕܶܢܚܳܐ ܬܡܺܝܗܳܐ ܘܰܕܝܰܬܺܝܪ ܦܐܶܐ ܠܰܐܠܳܗܳܐ܆ ܩܳܕܶܡ ܗ̱ܘܳܐ ܡܰܘܕܰܥ ܐܶܪܰܡܝܳܐ ܢܒܺܝܳܐ ܐܳܡܰܪ ܗ̱ܘܳܐ: ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ܆ ܘܰܐ݀ܩܺܝܡ ܠܕܰܘܺܝܕ ܕܶܢܚܳܐ ܙܰܕܺܝܩܳܐ܆ ܘܢܰܡܠܶܟ ܡܰܠܟܳܐ ܙܰܕܺܝܩܳܐ܆ ܘܢܶܣܬܰܟܰܠ ܘܢܶܥܒܶܕ ܕܺܝܢܳܐ ܘܙܰܕܺܝܩܽܘܬܳܐ ܥܰܠ ܐܰܪܥܳܐ. ܒܝܰܘ̈ܡܳܬܳܐ ܕܺܝܠܶܗ ܢܶܬܦܪܶܩ ܝܺܗܽܘܕܳܐ. ܘܺܐܝܣܪܳܐܶܝܠ ܢܶܫܪܶܐ ܟܰܕ ܬܟܺܝܠ. ܘܗܳܢܰܐ ܗ̱ܘ ܫܡܳܐ ܕܺܝܠܶܗ ܗܰܘ ܕܢܶܩܪܶܝܘܗ̱ܝ ܡܳܪܝܳܐ܆ ܝܽܘܨܕܩ[10]. ܗܽܘ ܒܰܢ̈ܒܺܝܶܐ. ܕܗܳܕܶܐ ܕܶܝܢ ܢܒܺܝܽܘܬܳܐ܆ ܕܠܳܐ ܚܶܪܝܳܢ ܠܘܳܬ ܡܫܺܝܚܳܐ ܚܳܝܪܳܐ܆ ܟܽܠܢܳܫ ܢܺܐܡܰܪ ܡܶܢ ܗܳܢܽܘܢ ܕܳܐܦܶܢ ܡܢܳܬܳܐܺܝܬ ܣܥܺܝܪ ܠܗܽܘܢ ܟܬܳܒܳܐ ܟܳܗܢܳܝܳܐ. ܘܠܳܐ ܐ̱ܢܳܫ ܓܶܝܪ ܡܶܢ ܕܰܘܺܝܕ ܐܰܡܠܶܟ ܡܰܠܟܳܐ ܙܰܕܺܝܩܳܐ܆ ܟܰܕ ܟܽܠܗܽܘܢ ܗܳܢܽܘܢ ܕܡܶܢܶܗ ܫܪܰܥܘ ܤܛܰܪ ܡܶܢ ܚܶܙܰܩܝܳܐ ܘܝܽܘܫܺܝܳܐ܆ ܗܳܢܽܘܢ ܕܡܶܢ ܒܳܬܰܪܗܽܘܢ ܐܶܬܢܰܒܝ ܐܶܪܰܡܝܳܐ ܗܳܠܶܝܢ. ܩܕܳܡ ܓܶܝܪ ܦܶܬܓܳܡ̈ܶܐ ܙܥܽܘܪ̈ܶܐ ܕܗܳܠܶܝܢ ܕܶܐܬܬܣܺܝܡܘ ܥܰܠ ܝܽܘܟ̥ܰܢܝܳܐ ܗܰܘ ܕܡܶܢ ܒܳܬܰܪ ܡܰܘܬܶܗ ܕܝܽܘܫܺܝܳܐ ܐܰܡܠܶܟ ܐܳܡܰܪ ܗ̱ܘܳܐ: ܐܶܬܬܫܺܝܛ ܝܽܘܟܰܢܝܳܐ܆ ܐܰܝܟ ܡܳܐܢܳܐ ܗܰܘ ܕܠܰܝܬ ܥܠܰܘܗ̱ܝ ܣܽܘܢܩܳܢܳܐ[11]. ܗܳܠܶܝܢ ܕܶܝܢ ܕܰܢܒܺܝܽܘܬܳܐ܆ ܫܰܦܺܝܪ ܝܺܕܺܝܥܳܐ܆ ܕܰܠܙܰܒܢܳܐ ܗܰܘ ܕܡܶܢ ܒܳܬܰܪܟܶܢ ܘܕܰܥܬܺܝܕ ܢܳܚ̈ܬܳܢ. ܒܪܰܡ ܘܳܐܦܠܳܐ ܠܰܐ̱ܚܪܺܢܳܐ ܡܶܢ ܗܳܢܽܘܢ ܕܰܐܡܠܶܟܘ܆ ܕܶܢܚܳܐ ܙܰܕܺܝܩܳܐ ܢܶܩܪܶܐ ܐ̱ܢܳܫ ܟܺܐܢܳܐܺܝܬ܆ ܐܶܠܳܐ ܐܶܢ ܠܰܡܫܺܝܚܳܐ܆ ܠܗܰܘ ܫܶܡܫܳܐ ܕܙܰܕܺܝܩܽܘܬܳܐ܆ ܗܰܘ ܕܰܠܙܰܠܺܝ̈ܩܶܐ ܕܺܝܕܰܥܬܳܐ ܕܰܐܠܳܗܳܐ ܐܰܨܡܰܚ ܠܰܢ. ܗܰܘ ܕܳܐܦ ܥܒܰܕ ܕܺܝܢܳܐ ܘܙܰܕܺܝܩܽܘܬܳܐ ܥܰܠ ܐܰܪܥܳܐ܆ ܟܰܕ ܢܳܡܽܘܣ̈ܶܐ ܕܺܝܠܶܗ ܗܳܢܽܘܢ ܕܛܳܒ ܡܶܢ ܟܽܠ ܙܰܕܺܝܩܺܝܢ ܦܪܰܤ ܥܰܠ ܟܽܠܳܗ̇ ܐܰܪܥܳܐ. ܗܰܘ ܕܰܒܝܰܘ̈ܡܳܬܶܗ܆ ܐܰܟܚܕܳܐ ܐܳܦ ܝܺܗܽܘܕܳܐ ܐܶܬܦܪܶܩ܆ ܐܳܦ ܐܺܝܣܪܳܐܶܝܠ ܫ̣ܪܳܐ ܟܰܕ ܬܟܺܝܠ. ܟܰܕ ܓܶܝܪ ܐܶܣܬܕܩ ܗ̱ܘܳܐ ܥܰܡܳܐ ܠܰܬܪܶܝܢ ܦܣܳܩ̈ܶܐ ܡܶܢ ܙܰܒ̈ܢܰܘܗ̱ܝ ܕܫܳܠܽܘܡܽܘܢ܆ ܠܺܐܝܣܪܳܐܶܝܠ ܟܺܝܬ ܘܠܺܝܗܽܘܕܳܐ܆ ܡܦܰܠܓܳܐܺܝܬ ܥܕܰܡܳܐ ܠܫܽܘܠܳܡܳܐ ܡܶܬܬܰܡܠܟܺܝܢ ܗ̱ܘܰܘ. ܠܟܳܪܽܘܙܽܘܬܶܗ ܕܶܝܢ ܕܰܡܫܺܝܚܳܐ ܘܰܠܡܰܠܟܽܘܬܶܗ܆ ܟܽܠܗܽܘܢ ܐܰܝܟ ܕܰܒܣܽܘܓܳܐܐ ܗܳܢܽܘܢ ܕܰܦܠܺܝܓܺܝܢ ܗ̱ܘܰܘ ܐܶܬܪܟܶܢܘ ܘܶܐܫܬܰܥܒܰܕܘ ܫܰܘܝܳܐܺܝܬ܆ ܘܰܠܚܰܕ ܢܺܝܪܳܐ ܩܰܒܶܠܘ. ܡܶܛܽܠ ܕܶܝܢ ܕܺܝܗܽܘܕܳܐ ܡܰܢ܆ ܗܰܘ ܕܡܰܘܕܶܐ ܡܶܬܦܰܫܰܩ. ܐܺܝܣܪܳܐܶܝܠ ܕܶܝܢ ܗܰܘܢܳܐ ܚܳܙܶܐ ܠܰܐܠܳܗܳܐ܆ ܢܶܩܪܶܐ ܐ̱ܢܳܫ ܝܺܗܽܘܕܳܐ ܕܶܐܬܦܪܶܩ܆ ܠܗܳܢܽܘܢ ܕܗܳܫܳܐ ܐܶܬܩܰܪܰܒܘ ܠܶܐܘܰܢܓܶܠܺܝܽܘܢ܆ ܘܰܐܚܺܝܕܺܝܢ ܕܽܘܟܬܳܐ ܕܗܳܢܽܘܢ ܕܡܰܘܕܶܝܢ. ܐܺܝܣܪܳܐܶܝܠ ܕܶܝܢ ܕܫܳܪܶܐ ܬܟܺܝܠܳܐܺܝܬ܆ ܠܗܳܢܽܘܢ ܕܡܶܢ ܟܰܕܽܘ ܗܰܝܡܶܢܘ ܘܰܥܒܰܪܘ ܒܬܶܐܽܘܪܺܝܰܐ܆ ܘܰܒܗܳܕܶܐ ܡܶܣܬܰܟܠܺܝܢ ܐܰܘ ܟܺܝܬ ܚܳܙܶܝܢ ܠܰܐܠܳܗܳܐ܆ ܘܰܡܫܰܪܪܺܝܢ ܒܺܝܕܰܥܬܳܐ ܘܰܬܟܺܝܠܺܝܢ܆ ܘܰܐܝܟ ܗܰܘ ܕܫܳܪܶܝܢ ܘܡܶܬܬܢܺܝܚܺܝܢ ܒܗܳܠܶܝܢ ܕܺܝܕܰܥܘ. ܬܪ̈ܰܝܗܽܘܢ ܕܶܝܢ ܗܳܠܶܝܢ ܬܶܓ̈ܡܶܐ܆ ܚܰܕ ܦܰܓܪܳܐ ܕܥܺܕܬܳܐ ܡܩܰܝܡܺܝܢ܆ ܘܰܬܚܶܝܬ ܚܰܕ ܪܺܝܫܳܐ ܡܫܺܝܚܳܐ ܐܺܝܬܰܝܗܽܘܢ. ܗܰܘ ܕܳܐܦ ܟܺܐܢܳܐܺܝܬ ܐܳܡܰܪ ܐܶܪܰܡܝܳܐ ܕܡܶܬܩܪܶܐ ܝܽܘܨܳܕܳܩ܆ ܗܰܘ ܟܺܝܬ ܕܰܡܫܰܘܕܰܥ ܙܰܕܺܝܩܽܘܬܳܐ ܕܰܐܠܳܗܳܐ ܟܰܕ ܠܠܶܫܳܢܳܐ ܝܰܘܢܳܝܳܐ ܡܶܬܦܰܫܰܩ. ܙܰܕܺܝܩܽܘܬܳܐ ܕܶܝܢ ܕܰܐܠܳܗܳܐ ܘܰܐܒܳܐ܆ ܐܰܝܟ ܡܳܐ ܕܚܶܟܡܬܳܐ ܘܚܰܝܠܳܐ܆ ܡܫܺܝܚܳܐ ܐܺܝܬܰܘܗ̱ܝ. ܫܡܰܥܳܝܗ̱ܝ ܓܶܝܪ ܠܦܰܘܠܽܘܤ ܕܡܶܛܽܠܳܬܶܗ ܟܳܬܶܒ ܠܩܽܘܪ̈ܝܢܬܳܝܐ܆ ܗܰܘ ܕܰܗܘ̣ܳܐ ܠܰܢ ܚܶܟܡܬܳܐ ܡܶܢ ܐܰܠܳܗܳܐ܆ ܙܰܕܺܝܩܽܘܬܳܐ ܟܺܝܬ ܘܩܰܕܺܝܫܽܘܬܳܐ ܘܦܽܘܪܩܳܢܳܐ[12]. ܟܰܕ ܗܳܠܶܝܢ ܕܶܝܢ ܐܶܪܰܡܝܳܐ ܢܳܦܶܩ ܗ̱ܘܳܐ ܢܒܺܝܳܐܺܝܬ ܡܶܛܽܠ ܝܶܫܽܘܥ ܘܳܐܡܰܪ ܗ̱ܘܳܐ ܕܢܶܬܩܪܶܐ ܝܽܘܨܳܕܳܩ܆ ܗܳܢܰܘ ܕܶܝܢ ܙܰܕܺܝܩܽܘܬܳܐ ܕܰܐܠܳܗܳܐ܆ ܘܝܰܬܺܝܪ ܓܰܠܝܳܐܺܝܬ ܘܢܰܗܺܝܪܳܐܺܝܬ ܐܰܝܟ ܗܰܘ ܕܒܰܝܢܳܬܗܶܝܢ ܕܺܝܠܗܶܝܢ ܕܡ̈ܶܠܶܐ܆ ܠܶܗ ܠܗܰܘ ܕܡܶܬܢܰܒܶܐ ܗ̱ܘܳܐ ܐܰܝܟ ܕܰܠܡܺܐܡܰܪ ܘܳܐܦ ܒܗܶܝܢ ܒܥܰܝ̈ܢܶܐ ܐܶܫܬܰܘܕܰܥ܆ ܘܰܒܕܶܢܚܶܗ ܗܰܘ ܕܗܳܝܕܶܝܢ ܥܬܺܝܕ ܗ̱ܘܳܐ܆ ܘܗܳܫܳܐ ܡܶܢܰܢ ܡܶܬܚܙܶܐ ܐܶܬܢܰܗܰܪ܆ ܡܶܢ ܚܰܕܽܘܬܳܐ ܐܰܙܥܶܩ܆ ܗܽܘ ܒܰܢ̈ܒܺܝܶܐ. ܟܰܕ ܐܰܝܟ ܗܰܘ ܕܰܒܨܶܒܥܳܐ ܡܚܰܘܶܐ ܗ̱ܘܳܐ ܘܳܐܡܰܪ: ܗܽܘ ܗܳܢܳܐ ܐܺܝܬܰܘܗ̱ܝ ܗܰܘ ܕܒܰܢ̈ܒܺܝܶܐ ܗܘ̣ܳܐ܆ ܘܰܕܢܶܬܢܰܒܽܘܢ ܗܳܠܶܝܢ ܕܡܶܛܽܠܳܬܶܗ ܢܦܰܚ ܒܗܽܘܢ ܘܰܐܥܒܶܕ ܡܫܰܚܠܦܳܐܺܝܬ.
ܡܶܛܽܠ ܗܳܢܳܐ ܕܶܢܚܳܐ ܕܡܶܠܬܳܐ ܗܰܘ ܕܶܐܬܒܰܪܢܰܫ ܡܶܛܽܠܳܬܰܢ܆ ܐܳܦ ܙܟܰܪܝܳܐ ܢܒܺܝܳܐ ܝܰܬܺܝܪ ܐܰܠܳܗܳܐܺܝܬ ܐܳܡܰܪ: ܗܳܐ ܓܰܒܪܳܐ ܕܶܢܚܳܐ ܫܡܳܐ ܠܶܗ[13]. ܘܡܶܢ ܠܬܰܚܬ ܡܶܢܶܗ ܢܶܕܢܰܚ. ܒܳܒܺܝ ܟܡܳܐ ܐܺܝܬܶܝܗ̇ ܚܰܬܺܝܬܽܘܬܳܗ̇ ܕܰܢܒܺܝܽܘܬܳܐ. ܡܰܢܽܘ ܕܠܳܐ ܢܫܰܒܰܚ ܠܗܰܘ ܕܰܩܕܳܡ ܟܽܠܗܶܝܢ ܗܳܠܶܝܢ ܫܢܰܝ̈ܳܐ ܒܝܰܕ ܥܰܒ̈ܕܶܐ ܒܰܝ̈ܬܳܝܶܐ ܕܺܝܠܶܗ ܓܪܺܝܕܳܐܺܝܬ ܡܰܠܶܠ ܐܶܢܶܝܢ ܠܗܳܠܶܝܢ܆ ܘܰܒܝܰܘ̈ܡܳܬܳܐ ܐ̱ܚܪ̈ܳܝܶܐ ܒܰܥܒܳܕܳܐ ܡܰܠ̣ܺܝ ܐܶܢܶܝܢ ܠܗܳܠܶܝܢ ܕܩܰܕܶܡ ܐܶܬܶܐܡܰܪ̈ܝ̱. ܐܳܦ ܓܶܝܪ ܕܶܢܚܳܐ ܐܳܡܰܪ ܢܒܺܝܳܐ ܫܡܳܐ ܠܶܗ. ܢܽܘܗܪܐ ܓܶܝܪ ܐܺܝܬܰܘܗ̱ܝ ܡܶܢ ܢܽܘܗܪܳܐ ܐܰܒܳܐ܆ ܗܰܘ ܕܡܰܢܗܰܪ ܠܟܽܠ ܒܰܪܢܳܫܳܐ ܕܳܐܬܶܐ ܠܥܳܠܡܳܐ[14]. ܡܶܛܽܠܗܳܕܶܐ ܗܰܘ ܡܳܐ ܕܺܐܝܬܰܘܗ̱ܝ ܐܳܦ ܐܶܬܩܪܺܝ. ܘܕܺܝܠܳܝܬܶܗ ܡܰܢ ܕܢܽܘܗܪܳܐ ܘܰܕܫܶܡܫܳܐ ܐܺܝܬܶܝܗ̇܆ ܗܳܝ ܕܡܶܢ ܠܥܶܠ ܢܶܢܗܰܪ ܘܙܰܠܺܝ̈ܩܰܘܗ̱ܝ ܢܰܪܡܶܐ ܒܗܳܠܶܝܢ ܕܰܥܬܺܝܕܺܝܢ ܠܡܶܬܢܰܗܳܪܽܘ܆ ܘܰܠܡܶܫܬܰܘܬܳܦܽܘ ܒܢܰܨܺܝܚܽܘܬܳܐ ܗܳܝ ܕܡܶܢ ܬܰܡܳܢ. ܡܶܛܽܠ ܕܶܝܢ ܕܫܶܡܫܳܐ ܗܰܘ ܕܙܰܕܺܝܩܽܘܬܳܐ܆ ܢܽܘܗܪܳܐ ܗܰܘ ܠܳܐ ܡܶܬܩܰܪܒܳܢܳܐ ܓܰܒܪܳܐ ܗܘ̣ܳܐ[15]. ܟܰܕ ܩܰܒܶܠ ܥܠܰܘܗ̱ܝ ܕܢܶܬܒܰܣܰܪ ܘܰܕܢܶܬܒܰܪܢܰܫ ܡܶܛܽܠܳܬܰܢ܆ ܡܶܢ ܠܬܰܚܬ ܕܢܰܚ. ܟܰܕ ܓܶܝܪ ܢܣܰܒ ܕܡܽܘܬܳܐ ܕܥܰܒܕܳܐ܆ ܘܡܰܟܶܟ ܗܽܘ ܠܶܗ ܨܶܒܝܳܢܳܐܺܝܬ܆ ܡܶܢ ܡܬܰܚܬܳܝܽܘܬܳܐ ܗܳܝ ܕܗܳܟܰܢܳܐ ܐܺܝܬܶܝܗ̇ ܝܰܬܺܝܪ ܡܡܰܟܰܟ̣ܬܳܐ ܕܢܰܚ܆ ܘܒܺܐܝܕܳܐ ܒܺܐܝܕܳܐ ܚܰܘܺܝ ܗܽܘ ܠܶܗ܆ ܘܰܠܚܰܪܬܳܐ ܐܰܢܗܰܪ ܐܰܝܟ ܐ̱ܢܳܫ ܢܺܐܡܰܪ ܒܟܽܠܳܗ̇ ܐܰܠܳܗܽܘܬܳܐ. ܡܶܛܽܠܗܳܕܶܐ ܙܟܰܪܝܳܐ ܟܰܕ ܩܰܕܶܡ ܡܰܟܪܶܙ ܗ̱ܘܳܐ ܠܳܗ̇ ܠܗܳܕܶܐ ܬܶܕܡܽܘܪܬܳܐ ܐܶܡܰܪ: ܗܳܐ ܓܰܒܪܳܐ ܕܶܢܚܳܐ ܫܡܳܐ ܠܶܗ܆ ܘܡܶܢ ܠܬܰܚܬ ܡܶܢܶܗ ܢܶܕܢܰܚ.
ܠܗܳܢܳܐ ܕܶܝܢ ܕܶܢܚܳܐ ܕܡܶܢ ܠܬܰܚܬ܆ ܐܳܦ ܕܰܘܺܝܕ ܟܰܕ ܠܳܗ̇ ܠܗܳܕܶܐ ܬܰܪܥܺܝܬܳܐ ܐ̱ܚܪܳܢܝܳܐܺܝܬ ܦܰܫܶܩ܆ ܕܡܶܢ ܡܰܥܪܒܳܐ ܕܢܰܚ ܐܳܡܰܪ: ܘܥܰܡ ܝܽܘܚܰܢܳܢ ܡܰܥܡܕܳܢܳܐ ܠܘܳܬ ܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܕܢܶܫܬܘܽܘܢ ܠܕܶܢܚܶܗ ܡܰܙܥܶܩ ܐܳܦ ܗܽܘ܆ ܛܰܝܶܒܘ ܐܽܘܪܚܶܗ ܕܡܳܪܝܳܐ܆ ܬܪ̈ܺܝܨܶܐ ܥܒܶܕܘ ܠܰܫ̈ܒܺܝܠܶܐ ܕܺܝܠܶܗ[16]. ܥܒܶܕܘ ܓܶܝܪ ܐܽܘܪܚܳܐ ܐܶܡܰܪ ܠܗܰܘ ܕܰܪܟܺܝܒ ܥܰܠ ܡܰܥܪܒܳܐ܆ ܡܳܪܝܳܐ ܫܡܳܐ ܠܶܗ[17]. ܐܳܦ ܓܶܝܪ ܐܳܦܶܢ ܥܰܠ ܡܶܣܟܺܢܽܘܬܳܐ ܕܺܝܠܰܢ ܪܟܶܒ܆ ܘܰܠܫܽܘܒܚܳܐ ܒܰܝܬܳܝܳܐ ܕܺܝܠܶܗ ܡܕܰܒܪܳܢܳܐܺܝܬ ܚܰܦܺܝ܆ ܐܰܝܟ ܗܰܘ ܕܡܶܢ ܡܰܥܪܒܳܐ ܕܳܢܰܚ܆ ܐܶܠܳܐ ܒܪܰܡ ܡܳܪܝܳܐ ܫܡܳܐ ܠܶܗ. ܐܳܦ ܓܶܝܪ ܘܟܰܕ ܒܰܪܢܳܫܳܐ ܗܘ̣ܳܐ܆ ܠܳܐ ܫܕܳܗ̇ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܡܳܪܝܳܐ ܘܰܐܠܳܗܳܐ. ܡܶܛܽܠ ܕܳܐܦܶܢ ܢܶܬܶܠ ܕܕܳܢܰܚ ܫܶܡܫܳܐ ܡܶܢ ܡܰܥܪܒܳܐ܆ ܗܽܘ ܡܰܢ ܠܳܐ ܗܳܘܶܐ ܒܰܗܽܘܪܳܐ. ܗܳܝ ܕܰܠܩܽܘܒܠܳܐ ܕܶܝܢ܆ ܕܰܠܡܰܥܪܒܳܐ ܡܚܰܘܶܐ ܕܺܐܝܬܶܝܗ̇ ܡܰܕܢܚܳܐ. ܒܶܗ ܟܰܕ ܒܶܗ ܒܰܙܢܳܐ ܐܳܦ ܡܶܠܬܳܐ ܕܰܐܠܳܗܳܐ܆ ܟܰܕ ܡܰܥܪܒܳܐ ܐܺܝܬܰܘܗ̱ܝ ܗ̱ܘܳܐ ܕܽܘܒܳܪܳܐ ܕܺܝܠܰܢ܆ ܟܰܕ ܐܰܘܟܶܡ ܒܰܚܛܺܝܬܳܐ܆ ܘܺܐܝܬܰܘܗ̱ܝ ܗ̱ܘܳܐ ܕܰܓܠܺܝܙ ܡܶܢ ܣܳܥܽܘܪܽܘܬܳܐ ܐܰܠܳܗܳܝܬܳܐ܆ ܡܰܕܢܚܳܐ ܥܰܒܕܶܗ܆ ܟܰܕ ܒܰܪܶܟ ܠܡܰܥܒܰܪܬܳܐ ܕܺܝܠܰܢ ܕܰܠܗܳܝ ܕܢܶܗܘܶܐ ܐܺܝܬܰܝܢ ܒܝܰܕ ܡܶܬܒܰܣܪܳܢܽܘܬܳܐ ܕܺܝܠܶܗ܆ ܗܳܝ ܕܡܶܢܳܗ̇ ܥܒ̈ܳܕܶܐ ܕܢܽܘܗܪܳܐ ܘܟܽܠ ܡܳܐ ܕܺܐܝܬܰܘܗ̱ܝ ܛܳܒܳܐ ܒܶܝܬ ܒܢܰܝ̈ܢܳܫܳܐ ܐܶܬܕܰܒܰܪ܆ ܙܰܕܺܝܩܽܘܬܳܐ ܘܢܰܟܦܽܘܬܳܐ܆ ܘܚܽܘܕܪܳܐ ܗܰܘ ܕܫܰܪܟܳܐ ܕܰܡܝܰܬܪ̈ܳܬܳܐ.
ܘܰܐܟܙܢܳܐ ܕܡܰܠܟܳܐ ܕܨܳܒܶܐ ܕܢܶܚܙܽܘܩ ܠܰܡܕܺܝܢ̱ܬܳܐ ܙܥܽܘܪܬܳܐ ܘܠܳܐ ܝܺܕܺܝܥܬܳܐ܆ ܘܕܳܐܦܠܳܐ ܣܳܟ ܣܳܦܩܳܐ ܠܰܡܣܰܝܒܳܪܽܘ ܠܡܶܐܬܺܝܬܶܗ܆ ܐܳܦܶܢ ܙܰܒ̈ܢܺܝܢ ܣܰܓܺܝ̈ܳܐܢ ܗܽܘ ܠܶܗ ܢܶܩܦܽܘܤ܆ ܘܢܶܦܣܽܘܩ ܠܣܽܘܓܳܐܗ̇ ܕܰܢܦܺܝܚܽܘܬܳܐ ܕܦܰܢܛܰܣܺܝܰܐ ܘܰܕܫܽܘܒܚܳܐ ܗܰܘ ܕܒܰܚܕܳܪ̈ܰܘܗ̱ܝ ܐܰܝܟܰܢܳܐ ܕܢܶܗܘܶܐ ܡܶܣܬܰܝܒܪܳܢܳܐ ܠܰܡܕܺܝܢ̱ܬܳܐ܆ ܠܳܐ ܡܶܫܟܰܚ ܕܠܰܘ ܡܰܠܟܳܐܺܝܬ ܢܶܥܽܘܠ܆ ܘܳܐܦܠܳܐ ܕܰܒܝܰܕ ܟܽܠܗܶܝܢ ܢܶܟܦܽܘܪ ܒܗܳܝ ܕܺܐܝܬܰܘܗ̱ܝ܆ ܗܳܟܰܢܳܐ ܐܳܦ ܒܪܳܐ ܘܡܶܠܬܶܗ ܕܰܐܒܳܐ܆ ܗܰܘ ܠܳܐ ܡܶܬܕܰܪܟܳܢܳܐ ܘܠܳܐ ܡܶܣܬܰܝܟܳܢܳܐ܆ ܟܰܕ ܨܒܳܐ ܕܐ̱ܢܳܫܳܐܺܝܬ ܢܺܐܬܶܐ ܠܗܳܢܳܐ ܥܳܠܡܳܐ܆ ܗܰܘ ܕܺܐܝܬܰܘܗ̱ܝ ܠܘܳܬܶܗ ܢܽܘܛܰܦܬܳܐ ܡܶܢ ܩܰܕܣܳܐ[18] ܐܰܝܟܰܢܳܐ ܕܶܐܡܰܪ ܐ̱ܢܳܫ ܡܶܢ ܢܒܺܝ̈ܶܐ: ܟܰܕ ܐܰܠܳܗܳܐܺܝܬ ܡܳܠܶܐ ܠܶܗ ܠܗܳܢܳܐ܆ ܘܰܟܡܳܐ ܕܡܶܫܟܚܳܐ ܗ̱ܘܳܬ ܕܢܶܬܡܰܟܰܟ ܡܶܢ ܫܽܘܒܚܳܐ ܒܰܝܬܳܝܳܐ ܗܰܘ ܕܺܝܠܶܗ ܘܰܠܘܳܬ ܡܰܟܺܝܟܽܘܬܳܐ ܢܺܐܬܶܐ܆ ܗܳܕܐ ܗ̱ܝ ܓܶܝܪ ܗܳܝ ܕܢܶܣܬܰܪܰܩ ܘܰܒܗܳܕܶܐ ܢܶܗܘܶܐ ܡܶܬܩܰܪܒܳܢܳܐ܆ ܡܶܢ ܒܳܬܰܪ ܗܳܠܶܝܢ ܟܽܠܗܶܝܢ܆ ܒܪܰܡ ܠܳܐ ܡܶܬܦܰܚܡܳܢܳܐܺܝܬ ܘܒܰܙܢܳܐ ܡܶܕܶܡ ܝܺܕܺܝܥܳܐ ܘܰܦܪܺܝܫܳܐ ܝܰܬܺܝܪ ܡܶܢ ܟܽܠܗܽܘܢ ܗܳܢܽܘܢ ܐ̱ܚܪ̈ܳܢܶܐ܆ ܒܝܰܕ ܬܰܪܥܳܐ ܡܶܕܶܡ ܐܰܠܳܗܳܝܳܐ ܘܰܕܝܰܬܺܝܪ ܡܰܠܟܳܝ ܗܳܢܰܘ ܕܶܝܢ ܒܬܽܘܠܽܘܬܳܐ ܠܥܳܠܡܳܐ ܕܺܝܠܰܢ ܥ̣ܰܠ܆ ܟܕ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܝܳܠܕܰܬ ܐܰܠܳܗܳܐ ܒܬܽܘܠܬܳܐ ܒܰܒܣܰܪ ܐܶܬܺܝܠܶܕ.
ܠܗܳܢܳܐ ܝܰܠܕܳܐ ܐܰܟܣܢܳܝܳܐ ܘܰܕܠܳܐ ܙܰܪܥܳܐ܆ ܕܕܳܢܰܚ ܡܶܢ ܫܰܒܛܳܐ ܕܺܝܗܽܘܕܳܐ ܗܰܘ ܕܡܶܢܶܗ ܢܳܚܬܳܐ ܗ̱ܘܳܬ ܡܰܪܝܰܡ ܒܝܽܘܒܳܠܳܐ܆ ܐܳܦ ܝܰܥܩܘܒ ܪܺܝܫ ܐܰܒܳܗ̈ܳܬܳܐ ܩܰܕܶܡ ܗ̱ܘܳܐ ܐܳܡܰܪ: ܟܰܕ ܒܡ̈ܶܠܶܐ ܙܥܽܘܪ̈ܝܳܬܳܐ ܠܟܽܠܶܗ ܥܽܘܬܪܳܐ ܕܐ̱ܪܳܙܳܐ ܚܒܰܫ. ܐܶܡܰܪ ܓܶܝܪ܆ ܓܽܘܪܝܳܐ ܕܰܐܪܝܳܐ ܝܺܗܽܘܕܳܐ܆ ܡܶܢ ܡܰܘܥܺܝܬܳܐ ܒܶܪܝ ܣܠ̣ܶܩܬ[19]. ܟܰܕ ܓܽܘܪܝܳܐ ܡܰܢ ܕܰܐܪܝܳܐ ܟܰܢ̣ܝܶܗ ܠܰܡܫܺܝܚܳܐ܆ ܡܶܛܽܠ ܡܰܠܟܳܝܽܘܬܳܐ ܘܠܳܐ ܡܶܬܩܰܪܒܳܢܽܘܬܳܐ. ܝܺܗܽܘܕܳܐ ܕܶܝܢ܆ ܡܶܛܽܠ ܕܡܶܢ ܫܰܒܛܳܐ ܕܺܝܗܽܘܕܳܐ ܢܳܓܶܕ ܗ̱ܘܳܐ ܫܰܘܝܽܘܬ ܓܶܢܣܳܐ ܒܰܒܣܰܪ܆ ܘܡܶܛܽܠ ܗܳܝ ܕܰܚܠܳܦܰܝܢ ܗܳܢܽܘܢ ܕܳܐܦܠܳܐ ܚܕܳܐ ܦܰܪܶܗ̱ܣܺܝܰܐ ܐܺܝܬ ܠܰܢ ܠܘܳܬ ܐܰܠܳܗܳܐ ܐܰܘܕܺܝ ܘܶܐܡܰܪ: ܡܰܘܕܶܐ ܐ̱ܢܳܐ ܠܳܟ ܐܰܒܳܐ ܡܳܪܳܐ ܕܰܫܡܰܝܳܐ ܘܕܰܐܪܥܳܐ܆ ܕܛܰܫ̣ܺܝܬ ܗܳܠܶܝܢ ܡܶܢ ܚܰܟܺܝ̈ܡܶܐ ܘܣܰܟܽܘ̈ܠܬܳܢܶܐ܆ ܘܰܓܠ̣ܰܝܬ ܐܶܢܶܝܢ ܠܫܰܒܪ̈ܶܐ܆ ܐܺܝܢ ܐܰܒܳܐ܆ ܕܗܳܟܰܢܳܐ ܗܘ̣ܳܐ ܨܶܒܝܳܢܳܐ ܩܕܳܡܰܝܟ[20]. ܝܺܗܽܘܕܳܐ ܕܶܝܢ܆ ܐܶܡܰܪܢܰܢ ܠܰܢ ܡܶܢ ܟܰܕܽܘ܆ ܕܗܰܘ ܕܡܰܘܕܶܐ ܡܶܬܦܰܫܰܩ. ܗܰܘ ܕܰܠܘܳܬܶܗ܆ ܐܳܡܰܪ ܐ̱ܢܳܐ ܕܶܝܢ ܠܗܰܘ ܕܰܚܠܳܦܰܝܢ ܐܰܘܕܺܝ܆ ܟܰܕ ܒܥܰܝ̈ܢܶܐ ܪ̈ܰܚܺܝܩܳܬܳܐ ܘܰܕܩܳܕܡ̈ܳܢ ܚ̈ܳܙܝܳܢ ܠܗܳܠܶܝܢ[21] ܕܰܥܬܺܝ̈ܕܳܢ ܚܳܐܰܪ ܗ̱ܘܳܐ ܝܰܥܩܘܒ ܐܶܡܰܪ: ܡܶܢ ܡܰܘܥܺܝܬܳܐ ܒܶܪܝ ܣܠ̣ܶܩܬ. ܟܰܕ ܡܰܘܥܺܝܬܳܐ ܕܺܝܠܶܗ܆ ܠܰܒܬܽܘܠܬܳܐ ܩܰܕܺܝܫܬܳܐ ܩܳܪܶܐ܆ ܗܳܝ ܕܡܶܢܳܗ̇ ܐܰܝܟ ܕܡܶܢ ܫܒܶܫܬܳܐ܆ ܡܫܺܝܚܳܐ ܣܓܽܘܠܳܐ ܗܰܘ ܕܠܳܐ ܙܰܪܥܳܐ ܣܠܶܩ ܘܰܐܘܥܺܝ.
ܐܰܝܟܳܐ ܗܳܟܺܝܠ ܐܺܝܬܰܝܗܽܘܢ ܟܕ ܗܳܠܶܝܢ ܫܳܡܥܺܝܢ܆ ܗܳܢܽܘܢ ܒܰܥ̈ܠܰܝ ܫܡܳܐ ܕܫܳܢܝܽܘܬܶܗ ܕܶܐܘܛܶܘܟ̥ܶܐ. ܐܰܪܐ ܘܳܐܦܠܳܐ ܠܪܺܝܫ ܐܰܒܳܗ̈ܳܬܳܐ ܢܶܬܬܦܺܝܣܽܘܢ ܕܳܐܡܰܪ܆ ܕܡܶܢ ܡܰܘܥܺܝܬܳܐ ܒܶܪܝ ܣܠ̣ܶܩܬ܆ ܘܟܰܕ ܓܳܚܟܺܝܢ ܥܰܠ ܫܳܛܽܘܪܽܘܬܳܐ ܕܦܰܢܛܰܣܺܝܰܐ܆ ܕܡܶܢ ܐܽܘܣܺܝܰܐ ܕܺܝܠܰܢ ܐܺܝܬܰܘܗ̱ܝ ܢܰܘܕܽܘܢ܆ ܦܰܓܪܶܗ ܩܰܕܺܝܫ ܒܟܽܠ ܕܰܡܫܺܝܚܳܐ܆ ܒܰܪ̱ܬ ܓܶܢܣܳܐ ܓܶܝܪ ܕܺܝܠܰܢ ܐܺܝܬܶܝܗ̇ ܡܰܪܝܰܡ܆ ܐܳܦ ܝܰܥܩܽܘܒ ܐܰܒܳܐ ܩܰܕܡܳܝܳܐ ܕܺܝܠܳܗ̇܆ ܡܶܛܽܠ ܕܳܐܦ ܡܶܢܶܗ ܟܰܕ ܡܶܢܶܗ ܕܛܺܝܢܳܐ ܡܰܬܩܢܺܝܢ ܚ̱ܢܰܢ[22]܆ ܐܰܝܟܰܢܳܐ ܕܳܐܡܰܪ ܟܬܳܒܳܐ ܕܺܐܝܽܘܒ. ܘܗܰܘ ܕܬܰܩܶܢ ܘܰܓܒܰܠ܆ ܠܰܘ ܠܰܐܚܪܺܬܳܐ܆ ܐܶܠܳܐ ܠܳܗ̇ ܠܰܓܒܺܝܠܬܳܐ ܗܳܝ ܕܢܶܦܠܰܬ ܘܩܰܒܠܰܬ ܠܰܚܒܳܠܳܐ ܕܰܚܛܺܝܬܳܐ ܐܶܬܳܐ ܕܰܢܬܰܪܶܨ ܘܢܶܓܒܽܘܠ ܡܶܢ ܕܪܺܝܫ܆ ܒܝܰܕ ܡܶܬܒܰܣܪܳܢܽܘܬܳܐ ܐܰܠܳܗܳܝܬܳܐ܆ ܟܰܕ ܐܰܝܟ ܚܡܺܝܪܳܐ ܐܰܪܡܺܝ ܗܽܘ ܠܶܗ ܒܰܓܒܺܝܠܬܳܐ ܟܽܠܳܗ̇ ܕܓܶܢܣܳܐ ܐ̱ܢܳܫܳܝܳܐ܆ ܘܰܗܘ̣ܳܐ ܐܳܕܳܡ ܬܪܰܝܳܢܳܐ܆ ܘܰܫܪܺܝ ܠܰܢ ܒܰܩܝܳܡܬܳܐ܆ ܘܫܰܢܺܝ ܐܰܥܒܰܪ ܠܰܢ ܡܶܢ ܕܽܘܒܳܪܳܐ ܐܰܪܥܳܢܳܝܳܐ ܘܥܰܦܪܳܢܳܐ܆ ܠܘܳܬ ܕܽܘܝܳܪܳܐ ܠܳܐ ܡܶܬܚܰܒܠܳܢܳܐ ܘܰܫܡܰܝܳܢܳܐ. ܐܰܝܟܰܢܳܐ ܗܳܟܺܝܠ ܠܳܐ ܡܰܪܓܫܺܝܢ ܐܢ̱ܬܽܘܢ ܕܡܶܢ ܛܳܒ̈ܳܬܳܐ ܕܰܐܝܟ ܗܳܠܶܝܢ ܡܰܚܣܪܺܝܢ ܐܢ̱ܬܽܘܢ ܠܰܢ܆ ܘܰܐܟܣ̈ܢܳܝܶܐ ܥܳܒܕܺܝܢ ܐܢ̱ܬܽܘܢ ܠܰܢ ܕܡܶܬܒܰܪܢܫܳܢܽܘܬܳܐ ܗܳܝ ܡܥܰܕܪܳܢܺܝܬܳܐ ܘܰܕܡܶܛܽܠ ܗܳܢܽܘܢ ܕܰܢܦܰܠܘ ܐܶܬܦܰܪܢܣܰܬ܆ ܘܣܳܒܪܺܝܢ ܐܢ̱ܬܽܘܢ ܕܨܳܐܬܳܐ ܡܶܕܶܡ ܐܰܘ ܛܽܘܠܫܳܐ ܛܳܐܶܫ ܒܶܣܪܳܐ ܗܰܘ ܕܡܶܢܰܢ ܒܰܐܠܳܗܳܐ ܡܶܠܬܳܐ܆ ܟܰܕ ܠܳܐ ܡܶܣܬܰܟܠܺܝܢ ܐܢ̱ܬܽܘܢ ܕܰܚܕܳܐ ܐܺܝܬܶܝܗ̇ ܗܳܝ ܕܰܡܟܳܢܳܐ ܕܰܬܛܰܡܰܐ ܘܰܬܨܰܐܶܐ܆ ܗܳܢܰܘ ܕܶܝܢ ܚܒܳܠܳܐ ܕܰܚܛܺܝܬܳܐ. ܐܰܝܟܳܐ ܕܶܝܢ ܐܺܝܬ ܥܶܩܒܬܳܐ ܕܰܚܛܺܝܬܳܐ܆ ܐܰܝܟܳܐ ܕܰܐܠܳܗܳܐ ܡܶܠܬܳܐ ܐܺܝܬ ܕܠܳܐ ܡܶܫܬܰܚܠܦܳܢܳܐܺܝܬ ܡܶܬܒܰܣܰܪ. ܘܰܒܬܽܘܠܽܘܬܳܐ ܕܶܐܡܳܐ ܐܳܦ ܡܶܢ ܒܳܬܰܪ ܝܰܠܕܳܐ܆ ܘܡܰܓܢܳܢܽܘܬܳܐ ܕܪܽܘܚܳܐ ܩܰܕܺܝܫܳܐ܆ ܘܪܰܚܺܝܩܽܘܬܳܐ ܕܙܰܪܥܳܐ ܕܓܰܒܪܳܐ܆ ܘܟܽܠܶܗ ܛܽܘܠܳܩܳܐ ܘܠܳܐ ܫܟܺܝܚܽܘܬܳܐ ܘܰܓܠܺܝܙܽܘܬܳܐ ܕܪܶܓܬܳܐ. ܠܡܳܢܳܐ ܟܰܕ ܠܗܳܠܶܝܢ ܟܽܠܗܶܝܢ ܥܳܒܪܺܝܢ ܐܢ̱ܬܽܘܢ܆ ܗܳܢܶܝܢ ܕܗܳܟܰܢܳܐ ܐܺܝܬܰܝܗܶܝܢ ܕܰܟ̈ܝܳܬܳܐ ܘܪܰܘܪ̈ܒܳܬܳܐ ܘܰܕܡܰܠ̣̈ܝܳܢ ܒܰܣܺܝܡܽܘܬ ܪܺܝܚܳܐ ܡܶܕܶܡ ܐܰܠܳܗܳܝܬܳܐ܆ ܒܰܕܡܽܘܬ ܚܙܺܝܪ̈ܶܐ ܡܰܗܦܟܺܝܢ ܐܢ̱ܬܽܘܢ ܡܰܢ ܐܰܦܰܝ̈ܟܽܘܢ ܡܶܢ ܗܳܢܶܝܢ ܕܰܡܒܰܣ̈ܡܳܢ ܘܰܡ̈ܟܳܢܳܢ ܕܢܰܗ̈ܢܝܳܢ ܠܣܰܘܩܳܐ܆ ܠܘܳܬ ܕܶܝܢ ܣܝܳܢܳܐ ܣܰܪܝܳܐ ܕܚܽܘܫܳܒܰܝ̈ܟܽܘܢ ܢܳܚܬܺܝܢ ܐܢ̱ܬܽܘܢ܆ ܠܳܐ ܓܶܝܪ ܐܳܡܰܪ ܐ̱ܢܳܐ ܕܰܟܝܳܢܳܐ ܕܺܝܠܰܢ. ܐܶܢ ܓܶܝܪ ܛܰܡܳܐܐ ܐܺܝܬܰܘܗ̱ܝ ܒܶܣܪܳܐ ܕܺܝܠܰܢ܆ ܡܳܕܶܝܢ ܘܳܐܦܠܳܐ ܡܶܢ ܫܽܘܪܳܝܳܐ ܙܳܕܶܩ ܗ̱ܘܳܐ ܕܢܶܓܒܠܺܝܘܗ̱ܝ ܠܗܳܢܳܐ܆ ܗܰܘ ܕܰܠܟܽܠܗܶܝܢ ܥܒܰܕ ܫܰܦܺܝܪ̈ܳܬܳܐ ܘܛܳܒ̈ܳܬܳܐ ܘܰܕܣܰܓܺܝ ܫܰܦܺܝܪ̈ܳܢ. ܐܶܢ ܕܶܝܢ ܕܟܺܝܬܳܐ ܐܺܝܬܶܝܗ̇ ܗܺܝ ܓܒܺܝܠܬܳܐ܆ ܘܡܶܕܶܡ ܚܽܘܣܪܳܢܳܐ ܐܰܘ ܛܰܡܽܐܘܬܳܐ ܠܳܐ ܐܰܝܬܝܰܬ ܠܗܰܘ ܕܓܰܒ̣ܠܳܗ̇܆ ܐܰܝܟܰܢܳܐ ܠܰܘ ܕܝܰܬܺܝܪ ܕܰܟܝܳܐ ܐܺܝܬܶܝܗ̇ ܓܒܺܝܠܽܘܬܳܐ ܕܡܶܢ ܕܪܺܝܫ܆ ܘܳܐܦܠܳܐ ܐܺܝܬ ܠܡܺܐܡܰܪ ܕܒܰܟܡܳܐ ܡܶܨܥܳܝܽܘܬܳܐ ܘܪܽܘܚܩܳܐ ܐܺܝܬܶܝܗ̇ ܗܳܕܶܐ ܦܰܐܝܰܬ ܠܰܐܠܳܗܳܐ ܝܰܬܺܝܪ ܡܶܢ ܗܳܝ ܩܰܕܡܳܝܬܳܐ܆ ܗܳܝ ܕܒܺܐܝ̈ܕܶܝܗ̇ ܗܘ̣ ܗܰܘ ܕܰܓܒܰܠ ܨܒܳܐ ܕܢܶܬܓܒܶܠ ܒܰܒܣܰܪ. ܐܶܠܳܐ ܚܙܰܘ܆ ܕܕܰܠܡܳܐ ܐܳܦ ܒܗܳܕܶܐ܆ ܠܘܳܬ ܫܽܘܥ̈ܝܳܬܳܐ ܢܕܺܝ̈ܕܳܬܳܐ ܕܡܰܢܺܝ̈ܢܳܝܶܐ ܬܶܦܩܽܘܢ܆ ܘܟܰܕ ܠܦܰܓܪܳܐ ܕܺܝܠܰܢ ܐܰܝܟ ܡܨܰܐܳܐ ܘܛܰܡܳܐܐ ܠܒܰܪ ܡܶܢ ܐ̱ܪܳܙܳܐ ܣܳܝܡܺܝܢ ܐܢ̱ܬܽܘܢ܆ ܒܰܕܡܽܘܬ ܗܳܢܽܘܢ܆ ܐܳܦ ܥܳܒܽܘܕܳܐ ܐ̱ܚܪܺܢܳܐ ܬܩܺܝܡܽܘܢ ܠܶܗ. ܐܳܦ ܓܶܝܪ ܘܰܠܦܰܢܛܰܣܺܝܰܐ ܡܶܢ ܬܰܡܳܢ ܚܰܠܶܨܬܽܘܢܳܗ̇. ܡܰܠܽܘܢ ܕܶܝܢ ܡܶܢ ܗܳܝ ܐܶܬܚܰܠܰܨܬܽܘܢ ܘܶܐܬܓܢܰܒܬܽܘܢ܆ ܟܰܕ ܣܰܓܺܝ ܡܶܬܚ̈ܰܢܳܢܶܐ ܐܺܝܬܰܝܟܽܘܢ ܒܬܰܪ̈ܬܰܝܗܶܝܢ܆ ܘܟܰܕ ܓܳܢܒܺܝܢ ܐܢ̱ܬܽܘܢ ܘܟܰܕ ܡܶܬܓܰܢܒܺܝܢ ܐܢ̱ܬܽܘܢ. ܡܗܰܝܡܢܺܝܢ ܚ̱ܢܰܢ ܕܶܝܢ ܕܗܰܘ ܕܶܐܡܰܪ ܡܶܛܽܠ ܥܶܪ̈ܒܶܐ ܕܺܝܠܶܗ: ܕܓܰܢܳܒܳܐ ܠܳܐ ܐܳܬܶܐ܆ ܐܶܠܳܐ ܕܢܶܓܢܽܘܒ ܘܢܶܩܛܽܘܠ ܘܢܰܘܒܶܕ܆ ܐܶܢܳܐ ܐܶܬܺܝܬ ܐܰܝܟܰܢܳܐ ܕܚܰܝ̈ܶܐ ܢܶܗܘܽܘܢ ܠܗܽܘܢ ܘܝܰܬܺܝܪܳܐ ܢܶܗܘܶܐ ܠܗܽܘܢ[23]܆ ܐܳܦ ܠܟܽܘܢ ܢܶܫܟܰܚ ܘܢܰܦܢܶܝܟܽܘܢ ܕܶܐܬܓܢܶܒܬܽܘܢ ܘܶܐܒܰܕܬܽܘܢ܆ ܘܢܰܚܶܝܟܽܘܢ ܕܶܐܬܢܟܶܣܬܽܘܢ ܡܶܢ ܟܰܕܽܘ ܒܠܳܐ ܗܰܝܡܳܢܽܘܬܳܐ.
ܐܳܦ ܦܰܘܠܽܘܤ ܕܶܝܢ܆ ܙܰܒܢܰܐ ܗ̄ܘ ܓܶܝܪ ܕܢܰܦܢܶܐ ܢܰܣܩܺܝܗ̇ ܠܡܶܠܬܳܐ ܡܶܢ ܕܪܺܝܫ ܡܶܢ ܐܰܝܟܳܐ ܕܢܶܦܩܰܬ܆ ܕܢܳܩ̈ܦܳܢ ܠܗܳܠܶܝܢ ܕܝܰܥܩܽܘܒ ܕܶܐܡܰܪ ܕܡܶܢ ܡܰܘܥܺܝܬܳܐ ܒܶܪܝ ܣܠ̣ܶܩܬ. ܠܓܰܠ̈ܰܛܳܝܶܐ ܟܬܰܒ ܟܰܕ ܐܳܡܰܪ: ܕܶܐܡܰܬܝ ܕܶܝܢ ܕܶܐܬܳܐ ܡܽܘܠܳܝܶܗ ܕܙܰܒܢܳܐ܆ ܫܰܕܰܪ ܐܰܠܳܗܳܐ ܠܰܒܪܶܗ ܕܢܶܗܘܶܐ ܡܶܢ ܐܰܢ̱ܬܬܳܐ܆ ܕܢܶܗܘܶܐ ܬܚܶܝܬ ܢܳܡܽܘܣܳܐ[24]. ܗܳܝ ܕܶܝܢ ܕܡܶܢ ܐܰܢ̱ܬܬܳܐ܆ ܕܡܶܢܳܗ̇ ܕܽܐܘܣܺܝܰܐ ܕܰܒܬܽܘܠܬܳܐ ܐܶܬܺܝܠܶܕ ܒܰܒܣܰܪ ܥܰܡܰܢܽܘܐܶܝܠ ܡܚܰܘܝܳܐ. ܠܳܐ ܓܶܝܪ ܐܶܡܰܪ ܒܝܰܕ ܐܰܢ̱ܬܬܳܐ܆ ܐܰܝܟܰܢܳܐ ܕܢܶܬܶܠ ܐܰܬܪܳܐ ܠܗܳܢܽܘܢ ܕܒܺܝܫܳܐܺܝܬ ܡܶܬܪܰܥܶܝܢ܆ ܕܡܰܥܒܰܪܬܳܐ ܢܺܐܡܪܽܘܢܳܝܗ̱ܝ ܠܝܰܠܕܶܗ ܡܰܬܠܳܢܳܐܺܝܬ܆ ܘܕܰܐܝܟ ܕܰܒܣܺܝܠܽܘܢܳܐ ܪܗܶܛ܆ ܐܰܘ ܕܰܐܝܟ ܒܰܪܩܳܐ ܥܒܰܪ. ܡܶܛܽܠܗܳܕܶܐ܆ ܐܳܦ ܒܰܛܢܳܐ ܡܫܰܡܠܝܳܐ ܡܶܬܢܣܶܒ ܠܘܳܬ ܡܶܬܚܰܘܝܳܢܽܘܬܳܐ ܕܡܶܬܒܰܣܪܳܢܽܘܬܳܐ ܫܰܪܺܝܪܬܳܐ ܘܰܕܠܳܐ ܦܰܢܛܰܣܺܝܰܐ. ܐܶܬܡܰܠ̣ܺܝܘ ܓܶܝܪ ܐܳܡܰܪ ܝܰܘ̈ܡܳܬܳܗ̇ ܕܬܺܐܠܰܕ[25].
ܐܶܢܳܐ ܕܶܝܢ ܟܰܕ ܝܰܬܺܝܪ ܥܰܡܺܝܩܳܐܺܝܬ ܚܳܐܰܪ ܐ̱ܢܳܐ ܒܰܟ̈ܬܺܝܒܳܬܳܐ ܟܳܗ̈ܢܳܝܳܬܳܐ܆ ܕܐ̱ܪܳܙܳܐ ܐ̱ܚܪܺܢܳܐ ܕܝܰܬܺܝܪ ܪܰܒ ܡܶܫܟܰܚ ܐ̱ܢܳܐ ܕܰܡܕܺܝܩ ܡܶܢܗܶܝܢ. ܡܶܛܽܠ ܓܶܝܪ ܕܳܐܕܳܡ ܡܰܢ ܡܶܢ ܚܶܘܝܳܐ ܠܳܐ ܐܶܬܬܰܛܥܺܝ. ܐܰܢ̱ܬܬܳܐ ܕܶܝܢ ܟܰܕ ܐܶܬܬܰܛܥܝܰܬ܆ ܩܰܕܡܳܝܬܳܐ ܗܘ̣ܳܬ ܒܰܥܒܳܪ ܦܽܘܩܕܳܢܳܐ܆ ܟܰܕ ܠܗܳܢܳܐ ܥܒܳܪ ܦܽܘܩܕܳܢܳܐ ܨܒܳܐ ܕܢܰܐܣܶܐ ܐܰܠܳܗܳܐ ܡܶܠܬܳܐ܆ ܥܰܠ̣ܝܳܗ̇ ܠܰܐܢ̱ܬܬܳܐ ܠܘܳܬ ܐܺܝܩܳܪܳܐ ܕܝܰܬܺܝܪ ܪܰܒ. ܐܰܠܳܗܳܐ ܓܶܝܪ ܐܶܡܰܬܝ ܕܡܰܐܣܶܐ ܐܰܘ ܡܬܰܪܶܨ܆ ܠܰܘ ܠܗܳܝ ܪܺܝܫܳܝܬܳܐ ܒܰܠܚܽܘܕ ܡܰܦܢܶܐ ܡܰܝܬܶܐ ܠܶܗ ܠܗܰܘ ܕܰܟܪܺܝܗ܆ ܐܶܠܳܐ ܐܳܦ ܥܽܘܬܪܳܐ ܗܰܘ ܕܠܰܝܬ ܗ̱ܘܳܐ ܠܶܗ ܡܰܘܣܶܦ ܠܶܗ. ܗܳܝ ܟܺܝܬ ܕܳܐܦ ܠܘܳܬܰܢ ܕܺܝܠܰܢ ܥܒܰܕ. ܟܰܕ ܠܰܘ ܒܰܠܚܽܘܕ ܡܶܢ ܚܽܘܝܳܒܳܐ ܕܡܰܘܬܳܐ ܘܡܶܢ ܚܒܳܠܳܐ ܐܰܓܗܺܝ ܠܰܢ ܒܝܰܕ ܩܝܳܡܬܶܗ܆ ܐܶܠܳܐ ܘܟܰܕ ܚܠܳܦ ܦܰܪܕܰܝܣܳܐ ܠܘܳܬ ܡܰܠܟܽܘܬܳܐ ܕܰܫܡܰܝܳܐ ܐܰܝܬܺܝ ܠܰܢ܆ ܘܰܒ̈ܢܰܝܳܐ ܚܠܳܦ ܥܰܒ̈ܕܶܐ ܥܒܰܕ ܠܰܢ܆ ܘܝܳܪ̈ܬܶܐ ܕܰܐܠܳܗܳܐ.
ܡܳܢܳܐ ܗܳܟܺܝܠ ܐܺܝܬܰܘܗ̱ܝ ܗܰܘ ܕܝܰܬܺܝܪ ܪܰܒ܆ ܗܰܘ ܕܠܶܗ ܐܰܫܘܝܳܗ̇ ܠܰܐܢ̱ܬܬܳܐ. ܐܳܡܰܪ ܐ̱ܢܳܐ ܓܰܠܝܳܐܺܝܬ. ܦܰܘܠܽܘܤ ܟܰܕ ܪܺܝܫܳܢܽܘܬܳܐ ܘܛܶܟܣܳܐ ܩܰܕܡܳܝܳܐ ܝܳܗܶܒ ܠܓܰܒܪܳܐ܆ ܘܰܠܗܳܠܶܝܢ ܬܪ̈ܰܝܳܢܳܝܳܬܳܐ ܦܰܠܶܓ ܠܰܐܢ̱ܬܬܳܐ܆ ܘܡܶܛܽܠܗܳܕܶܐ ܐܳܡܰܪ ܕܙܳܕܶܩ ܠܳܗ̇ ܕܬܶܬܟܰܚܰܕ ܘܬܶܫܬܰܥܒܰܕ܆ ܐܶܡܰܪ: ܕܠܳܐ ܓܶܝܪ ܐܺܝܬܰܘܗ̱ܝ ܓܰܒܪܳܐ ܡܶܢ ܐܰܢ̱ܬܬܳܐ܆ ܐܶܠܳܐ ܐܰܢ̱ܬܬܳܐ ܡܶܢ ܓܰܒܪܳܐ[26]. ܐܶܬܒܰܪܝܰܬ ܓܶܝܪ ܡܶܢ ܐܶܠܥܶܗ ܕܳܐܕܳܡ. ܐܶܡܰܬܝ ܕܶܝܢ ܕܢܶܩܦܳܐ ܕܙܽܘܘܳܓܳܐ ܘܰܙܢܳܐ ܗܰܘ ܕܚܽܘܠܛܳܢܳܐ ܐܶܫܬܰܠܰܛ ܥܰܠ ܗܘܳܝܳܐ ܕܺܝܠܰܢ܆ ܗܘ̣ܳܐ ܐܳܦ ܓܰܒܪܳܐ ܒܝܰܕ ܐܰܢ̱ܬܬܳܐ܆ ܕܡܶܢ ܗܳܪܟܳܐ ܟܰܕ ܐܰܝܟ ܗܰܘ ܕܰܠܘܳܬ ܪܳܚܡܽܘܬܳܐ ܘܰܐܘܝܽܘܬܳܐ ܡܟܰܢܶܫ ܠܗܽܘܢ ܗܽܘ ܫܠܺܝܚܳܐ. ܠܘܳܬ ܗܳܝ ܕܠܳܐ ܢܶܐܚܕܽܘܢ ܓܰܒܪ̈ܶܐ ܫܽܘܠܛܳܢܳܐ ܩܰܫܝܳܐܺܝܬ ܥܰܠ ܢܶܫ̈ܶܐ܆ ܐܰܝܬܺܝ ܒܳܬܰܪܟܶܢ. ܒܪܰܡ ܘܠܳܐ ܐܰܢ̱ܬܬܳܐ ܤܛܰܪ ܡܶܢ ܓܰܒܪܳܐ܆ ܘܳܐܦܠܳܐ ܓܰܒܪܳܐ ܤܛܰܪ ܡܶܢ ܐܰܢ̱ܬܬܳܐ ܒܡܳܪܝܳܐ. ܐܰܟܙܢܳܐ ܓܶܝܪ ܕܰܐܢ̱ܬܬܳܐ ܡܶܢ ܓܰܒܪܳܐ܆ ܗܳܟܰܢܳܐ ܐܳܦ ܓܰܒܪܳܐ ܒܝܰܕ ܐܰܢ̱ܬܬܳܐ[27]. ܐܶܠܳܐ ܚܢܰܢ ܡܰܢ܆ ܟܺܐܢܳܐܺܝܬ ܡܶܬܰܐܡܪܺܝܢ ܚ̱ܢܰܢ ܕܰܗܘ̣ܰܝܢܰܢ ܒܝܰܕ ܐܰܢ̱ܬܬܳܐ ܘܠܰܘ ܡܶܢ ܐܰܢ̱ܬܬܳܐ. ܪܡܳܝܶܗ ܓܶܝܪ ܕܙܰܪܥܳܐ ܕܓܰܒܪܳܐ ܩܰܕܺܝܡ܆ ܘܡܶܢܶܗ ܡܰܠܽܘܢ ܐܺܝܬܰܝܢ. ܡܫܺܝܚܳܐ ܕܶܝܢ ܕܰܕܠܳܐ ܙܰܪܥܳܐ ܐܶܬܒܛܶܢ܆ ܠܰܘ ܒܝܰܕ ܐܰܢ̱ܬܬܳܐ܆ ܐܶܠܳܐ ܡܶܢ ܐܰܢ̱ܬܬܳܐ ܡܳܪܳܢܳܐܺܝܬ ܗܘ̣ܳܐ܆ ܘܰܠܛܶܟܣܳܐ ܕܝܰܬܺܝܪ ܐܺܝܬ ܠܶܗ ܪܺܝܫܳܢܽܘܬܳܐ ܐܰܣܩܳܗ̇. ܒܰܓܒܺܝܠܽܘܬܳܐ ܡܰܢ ܓܶܝܪ ܗܳܝ ܩܰܕܡܳܝܬܳܐ܆ ܡܶܢ ܐܳܕܳܡ ܐܺܝܬܶܝܗ̇ ܐܰܢ̱ܬܬܳܐ. ܒܰܓܒܺܝܠܽܘܬܳܐ ܕܶܝܢ ܕܡܶܢ ܕܪܺܝܫ܆ ܡܫܺܝܚܳܐ ܗܰܘ ܐܳܕܳܡ ܬܪܰܝܳܢܳܐ ܡܶܢܳܗ̇. ܗܳܢܳܐ ܟܽܠܶܗ ܕܶܝܢ ܡܝܰܬܪܳܐ ܗܳܕܶܐ ܡܶܢ ܗܳܝ܆ ܟܡܳܐ ܕܝܰܬܺܝܪ ܐܰܠܳܗܳܝܳܐ ܓܒܺܝܠܽܘܬܳܐ ܕܡܶܢ ܕܪܺܝܫ ܝܰܬܺܝܪ ܡܶܢ ܓܒܺܝܠܽܘܬܳܐ.
ܟܰܕ ܗܳܟܺܝܠ ܠܕܰܐܝܟ ܗܳܢܳܐ ܐܺܝܩܳܪܳܐ ܐܶܫܬܘܺܝܬܶܝ̈ܢ ܐܳܘ ܢܶܫ̈ܶܐ܆ ܘܰܠܗܶܝܢ ܠܗܳܠܶܝܢ ܕܺܐܝܬܰܝܗܶܝܢ ܩܰܕܡܳܝ̈ܳܬܳܐ ܘܪ̈ܺܝܫܳܝܳܬܳܐ܆ ܒܝܰܕ ܝܳܠܕܰܬ ܐܰܠܳܗܳܐ ܒܬܽܘܠܬܳܐ܆ ܡܶܠ̈ܟܶܐ ܕܝܰܬܺܝܪ ܛܳܒܺܝܢ ܘܕܰܠܘܳܬ ܚܰܝ̈ܶܐ ܗܳܢܽܘܢ ܕܰܥܬܺܝܕܺܝܢ ܡܰܘܒܠܺܝܢ ܡܠܽܘܟ̈ܶܝܢ ܠܓܰܒܪ̈ܰܝܟܶܝܢ. ܘܶܐܢܗܽܘ ܡܶܢ ܕܬܶܫܟ̈ܚܳܢ ܐܶܢܽܘܢ܆ ܕܩܰܕܡܳܝ̈ܶܐ ܥܳܒܕܺܝܢ ܠܗܳܠܶܝܢ ܕܙܳܕܩ̈ܳܢ܆ ܘܰܠܟܶܝܢ ܗܶܢܶܝܢ ܟܰܕ ܗܶܢܶܝܢ ܡܰܪܬܶܝܢ܆ ܐܰܝܟ ܕܰܠܡܰܠ̈ܦܳܢܶܐ ܘܕܰܐܚܺܝܕܺܝܢ ܛܶܟܣܳܐ ܕܪܺܝܫܳܐ܆ ܐܰܪ̈ܟܶܢܶܝܢ ܐܶܕܢ̈ܟܶܝܢ. ܐܶܢܕܶܝܢ ܗܳܝ ܕܰܠܩܽܘܒܠܳܐ܆ ܕܒܰܪ̈ܓܺܝܓܳܬܳܐ ܐܰܣܺܝܪܺܝܢ ܐܰܘ ܒܡܰܪ̈ܢܝܳܬܳܐ ܥܳܠ̈ܡܳܢܳܝܳܬܳܐ܆ ܘܰܕܡܶܬܚܰܢܩܺܝܢ ܡܶܛܽܠ ܟܽܘܢܳܫܳܐ ܕܕܰܗܒܳܐ܆ ܘܕܰܠܠܰܝ̈ܠܰܘܳܬܳܐ[28] ܕܠܳܐ ܫܶܢܬܳܐ ܢܳܦܩܺܝܢ ܠܗܽܘܢ܆ ܘܡܶܬܪܢܶܝܢ ܕܰܠܡܰܢܽܘ ܡܰܢ ܡܶܢ ܗܳܢܽܘܢ ܕܚܰܝܳܒܺܝܢ ܒܒܶܝܬ ܐܰܣܺܝܪ̈ܶܐ ܢܶܚܒܫܽܘܢ܆ ܠܡܰܢܽܘ ܕܶܝܢ ܟܰܕ ܦܟܺܝܪ ܢܶܓܕܽܘܢ ܢܰܝܬܽܘܢ ܠܒܶܝܬ ܕܺܝܢܳܐ܆ ܥܰܠ ܒܰܝܬܳܐ ܕܶܝܢ ܕܡܰܢܽܘ ܢܶܦܠܽܘܢ ܐܰܝܟ ܐܰܝܢܳܐ ܕܰܡܫܰܥܒܰܕ ܬܚܶܝܬ ܚܰܘܒܬܳܐ܆ ܘܰܙܟܶܐ ܘܰܡܛܰܠܰܩ ܒܣܰܓܺܝܽܐܘܬܗܶܝܢ ܕܪ̈ܶܒܝܳܬܳܐ. ܠܡܰܢܽܘ ܕܶܝܢ ܐܳܦ ܡܶܢܶܗ ܕܰܠܒܽܘܫܳܐ ܗܰܘ ܐܳܠܨܳܝܳܐ ܢܶܫܠܚܽܘܢ܆ ܠܳܐ ܬܶܫܗܪ̈ܳܢ ܥܰܡܗܽܘܢ ܫܰܗܪܳܐ ܕܗܳܟܰܢܳܐ ܐܺܝܬܰܘܗ̱ܝ ܡܠܶܐ ܕܽܘܘܳܢܳܐ ܘܚܶܪܡܳܐ܆ ܐܳܦܠܳܐ ܒܡ̈ܶܠܶܐ ܗܳܠܶܝܢ ܕܡܶܢ ܠܘܳܬܟܶܝܢ ܐܰܟܙܢܳܐ ܕܰܒܪܽܘܚܳܐ܆ ܠܫܰܠܗܶܒܺܝܬܳܐ ܕܪܶܚܡܰܬ ܟܶܣܦܳܐ ܬܢܰܒܪ̈ܫܳܢ. ܒܚܽܘܫܳܒܳܐ ܕܶܝܢ ܡܶܕܶܡ ܪܳܚܶܡ ܐܰܠܳܗܳܐ܆ ܘܰܒܬܰܪܥܺܝܬܳܐ ܓܰܒܪܳܢܳܝܬܐ ܡ̈ܶܠܶܐ ܚܰܟܺܝ̈ܡܳܬܳܐ 222ܢܨܽܘ̈ܠܶܝܢ ܠܗܽܘܢ܆ ܘܰܠܪܶܓܬܳܐ ܕܝܰܬܺܝܪܽܘܬܳܐ[29] ܕܺܝܚ̈ܺܝܕܶܐ ܒܗܽܘܢ ܕܰܥ̈ܶܟܶܝܢ. ܘܰܠܘܳܬ ܒܰܪ ܙܰܘܓܳܗ̇ ܟܽܠ ܚܕܳܐ ܡܶܢܟܶܝܢ ܬܺܐܡܰܪ: ܝܰܗ̱ܒ ܠܰܢ ܐܰܠܳܗܳܐ ܒܽܘܪܟܬܳܐ ܕܣܳܦܩܳܐ ܠܰܢ܆ ܒܰܡܫܰܝܢܽܘܬܳܐ ܘܰܒܒܰܣܺܝܡܽܘܬܳܐ ܗܳܝ ܕܡܶܢ ܠܥܶܠ ܡܶܬܒܰܣܡܺܝܢ ܚ̱ܢܰܢ. ܡܶܢ ܟܽܠ ܕܽܘܟ ܪ̈ܳܕܝܳܢ ܠܰܢ ܛܳܒ̈ܳܬܳܐ. ܡܶܢ ܥܰܡ̈ܠܶܐ ܕܺܝܠܳܟ ܒܳܣܡܺܝܢ ܚ̱ܢܰܢ܆ ܗܳܢܽܘܢ ܕܒܰܪܶܟ ܐܶܢܽܘܢ ܒܬܰܘ̈ܣܦܳܬܳܐ ܗܳܠܶܝܢ ܕܡܶܢܶܗ܆ ܗܰܘ ܝܳܗܽܘܒܳܐ ܕܛܳܒ̈ܳܬܳܐ. ܘܶܐܡܰܬܝ ܕܬܶܚܙܶܝ̈ܢܳܝܗ̱ܝ ܕܰܒܗܳܠܶܝܢ ܕܰܐܝܟ ܗܳܟܰܢ ܐܶܬܪܰܟܰܟ ܘܶܐܬܦܨܰܚ܆ ܘܩܰܠܺܝܠ ܐܰܫ̣ܶܦ ܘܶܐܬܪܰܦܺܝ ܡܶܢ ܗܳܝ ܚܺܝܨܽܘܬܳܐ ܕܥܰܣܩܽܘܬܳܐ ܡܰܪܺܝܪܬܳܐ܆ ܡܶܚܕܳܐ ܩܰܠܺܝܠܳܐܺܝܬ ܐܰܝܬܺܝ ܒܳܬܰܪܟܶܢ܆ ܢܶܬܚܰܫܰܒ ܗܳܟܺܝܠ ܐܳܘ ܪܚܽܘܡܝ܆ ܐܳܦ ܡܶܕܶܡ ܪܳܚܶܡ ܐ̱ܢܳܫܳܐ ܡܶܛܽܠ ܗܳܢܽܘܢ ܕܡܶܣܟܺܢܺܝܢ. ܬܰܒ̈ܥܳܬܳܐ ܕܚܰܘ̈ܒܳܬܳܐ ܠܰܘ ܗܳܟܰܢܳܐ ܢܶܥܒܶܕ ܐܶܢܶܝܢ ܚ̈ܰܬܺܝܬܳܬܳܐ. ܢܶܣܰܒ ܡܢܳܬܳܐ. ܠܦܽܘܪܥܳܢܳܐ ܕܶܝܢ ܗܰܘ ܕܫܰܪܟܳܐ܆ ܐܰܘ ܢܰܓܰܪ ܩܰܠܺܝܠ܆ ܐܰܘ ܐܶܢ ܥܰܡܺܝܩܳܐܺܝܬ ܡܶܣܟܺܢܺܝܢ ܢܶܫܒܽܘܩ. ܚܢܰܢ ܚܳܕܶܝܢ ܚ̱ܢܰܢ. ܗܳܢܽܘܢ ܡܕܰܡܥܺܝܢ. ܚܢܰܢ ܣܳܒܥܺܝܢ ܚ̱ܢܰܢ܆ ܘܡܶܢ ܝܰܬܺܝܪ̈ܳܬܳܐ ܡܶܬܒܰܣܡܺܝܢ ܚ̱ܢܰܢ. ܠܰܚܡܳܐ ܒܰܠܚܽܘܕ ܐܳܟܠܺܝܢ ܗܳܢܽܘܢ܆ ܘܠܶܗ ܟܒܰܪ ܕܰܡܡܰܫܰܚ܆ ܐܰܘ ܕܳܐܦ ܡܶܢܳܗ̇ ܕܰܡܫܽܘܚܬܳܐ ܕܺܝܠܶܗ ܕܣܽܘܢܩܳܢܳܐ ܚܰܣܺܝܪ. ܡܰܥܠܳܐ ܐ̱ܢܳܐ ܐܳܦ ܐܶܢܳܐ ܡܶܕܶܡ ܐܰܟܚܕܳܐ ܥܰܡ ܫܦܺܝܥܽܘܬ ܛܳܒܽܘܬܳܐ ܕܺܝܠܳܟ܆ ܘܠܳܐ ܫܳܚܩܳܐ ܐ̱ܢܳܐ ܠܳܟ ܒܡܰܪ̈ܢܝܳܬܳܐ ܕܫܰܢ̱ܬܳܐ ܗܳܕܶܐ. ܫܳܒܩܳܐ ܐ̱ܢܳܐ ܠܳܟ ܗܰܘ ܠܒܽܘܫܳܐ ܕܰܥܬܺܝܕ ܗ̱ܘܰܝܬ ܕܬܶܥܒܶܕ ܠܺܝ ܘܗܳܠܶܝܢ ܚܶܫ̈ܠܳܬܳܐ ܕܕܰܗܒܳܐ܆ ܘܰܢܦܰܩܬ̣ܳܐ ܗܳܝ ܕܥܰܠ ܨܶܒܬܳܐ ܗܰܘ ܐ̱ܚܪܺܢܳܐ. ܠܳܐ ܡܶܕܶܡ ܬܶܙܒ̣ܶܢ ܠܺܝ ܟܽܠ ܟܽܠܶܗ. ܢܰܚ̈ܬܶܐ ܗܳܢܽܘܢ[30] ܕܣܺܝܡܺܝܢ ܠܓܰܘ ܒܰܠܚܽܘܕܰܝܗܽܘܢ ܣܳܦܩܺܝܢ ܠܺܝ. ܡܪܰܚܡܳܢܽܘܬܳܐ ܗܳܝ ܕܥܰܠ ܣܢܺܝ̈ܩܶܐ ܡܨܰܒܬܳܐ ܠܺܝ ܝܰܬܺܝܪ ܟܢܺܝܟܳܐܺܝܬ܆ ܛܳܒ ܡܶܢ ܟܽܠܗܽܘܢ ܢܰܚ̈ܬܶܐ ܝܰܩܺܝܪ̈ܰܝ ܕܡܰܝ̈ܳܐ. ܡܶܢ ܠܓܰܘ ܬܶܗܘܶܐ ܠܺܝ ܦܰܐܝܽܘܬܳܐ܆ ܗܳܝ ܕܠܳܐ ܣܳܐܒܳܐ ܘܰܕܠܰܐܠܳܗܳܐ ܪܚܺܝܡܳܐ܆ ܠܰܘ ܗܳܝ ܕܡܶܢ ܠܒܰܪ܆ ܗܳܝ ܕܚܳܡܝܳܐ[31] ܘܢܳܦܠܳܐ ܐܰܝܟ ܗܰܒܳܒܳܐ. ܟܺܝܣܳܐ ܛܳܒܳܐ ܘܠܳܐ ܡܶܬܚܰܠܨܳܢܳܐ܆ ܡܶܢ ܗܳܪܟܳܐ ܐܶ݀ܣܺܝܡ ܠܰܒ̈ܢܰܝ. ܟܰܕ ܗܳܠܶܝܢ ܦܺܝܠܳܣܽܘܦܺܝܣܳܐ ܥܳܒܕܳܐ ܐܰܢ̱ܬܝ܆ ܟܰܕ ܫܳܡܰܥ ܓܰܒܪܶܟܝ܆ ܐܳܦܶܢ ܢܶܗܘܶܐ ܕܺܐܝܬܰܘܗ̱ܝ ܒܰܕܡܽܘܬ ܚܰܝܘܰܬ ܫܶܢܳܐ܆ ܡܶܢ ܟܽܠܦܪܽܘܤ ܢܫܰܚܠܶܦ ܬܰܪܥܺܝܬܶܗ܆ ܘܪܳܚܶܡ ܐ̱ܢܳܫܳܐ ܢܶܗܘܶܐ ܠܚܰܝܳܒ̈ܶܐ. ܘܠܳܐ ܐ̱ܢܳܫ ܓܶܝܪ ܗܳܟܰܢܳܐ ܣܳܦܶܩ ܕܰܠܓܰܒܪ̈ܶܐ ܢܦܺܝܤ܆ ܐܰܝܟ ܢܶܫ̈ܶܐ ܟܢܺܝ̈ܟܳܬܳܐ ܘܢܰܟ̈ܦܳܬܳܐ܆ ܐܳܦܠܳܐ ܐܶܢ ܢܶܗܘܶܐ ܐܺܝܬ ܠܶܗ ܟܽܠܳܗ̇ ܡܠܺܝܠܽܘܬܳܐ ܘܰܨܢܺܝܥܽܘܬܳܐ ܕܪܝܛܘܪ̈ܐܤ. ܟܰܕ ܡܶܫܟ̈ܚܳܢ ܐܢ̱ܬܶܝܢ ܗܳܟܺܝܠ ܕܬܶܥܒ̈ܕܳܢ ܛܳܒܬܳܐ ܐܶܢ ܠܳܐ ܬܶܥ̈ܒܕܳܢ܆ ܠܰܟܬܳܒܳܐ ܫܡܰܥ̈ܶܝܢ ܕܳܐܡܰܪ: ܕܰܚܛܺܝܬܳܐ ܬܶܬܚܫܶܒ ܠܟܶܝܢ. ܕܝܳܕܰܥ ܓܶܝܪ ܐܳܡܰܪ ܛܳܒܬܳܐ ܠܡܶܥܒܰܕ ܘܠܳܐ ܥܳܒܶܕ܆ ܚܛܳܗܳܐ ܐܺܝܬ ܠܶܗ[32].
ܐܳܦ ܐܶܡܰܬܝ ܕܶܝܢ ܕܰܠܘܳܬ ܗܰܢܺܝܽܐܘܬ̣ ܚܰܫܳܐ[33] ܬܶܚ̈ܙܝܳܢ ܐܶܢܽܘܢ ܠܓܰܒܪ̈ܶܐ ܕܰܡܚܰܦܛܺܝܢ ܠܟܶܝܢ܆ ܕܰܠܘܳܬ ܐܽܘܪ̈ܚܳܬܳܐ ܣܒܺܝ̈ܣܳܬܳܐ ܗܳܠܶܝܢ ܕܰܠܕܦ̈ܢܐ222܆ ܘܰܠܘܳܬ ܟܳܘܫܳܐ[34] ܪܰܛܺܝܒܳܐ ܘܕܰܢܦܰܩܬܳܐ ܕܬܰܡܳܢ܆ ܐܰܝܟܰܢܳܐ ܕܗܳܟܰܢܳܐ ܟܢܺܝܟܳܐܺܝܬ ܢܺܐܡܪܺܝܗ̇܆ ܟܰܕ ܥܰܠ ܝܳܠܕܰܬ ܐܰܠܳܗܳܐ ܡܩܺܝ̈ܡܳܢ ܐܢ̱ܬܶܝܢ ܗܰܘܢܟܶܝܢ܆ ܐܰܝܟ ܕܥܰܠ ܦܶܢܩܺܝܬܳܐ ܕܝܽܘܠ̈ܦܳܢܶܐ ܟܳܗ̈ܢܳܝܶܐ܆ ܘܡܶܢܳܗ̇ ܕܬܰܪܥܺܝܬܳܐ ܕܟܺܝܬܳܐ ܡܰܥܡܪ̈ܳܢ ܐܢ̱ܬܶܝܢ ܒܟܶܝܢ܆ ܪ̈ܕܳܝܶܢ ܐܶܢܽܘܢ ܠܘܳܬ ܛܳܒܬܳܐ ܘܰܐܠܶܦܶܝ̈ܢ ܐܶܢܽܘܢ ܟܰܕ ܐܳܡܪ̈ܳܢ ܐܢ̱ܬܶܝܢ܆ ܒܰܟܢܺܝܟܽܘܬܳܐ ܘܢܰܟܦܽܘܬܳܐ ܝܰܬܺܝܪܳܐܺܝܬ ܐܳܘ ܓܰܒܪܝ ܢܝܰܩܰܪ ܚܰܝ̈ܶܐ ܕܺܝܠܰܢ. ܒܟܳܘ̈ܫܶܐ ܘܕܽܘܝܳܪ̈ܶܐ ܢܰܟ̈ܦܶܐ ܕܰܒܒܰܝܬܰܢ܆ ܢܶܥܒܕܺܝܘܗ̱ܝ ܠܙܽܘܘܳܓܳܐ ܐ̱ܪܳܙܳܐ. ܘܰܠܥܰܪܣܳܐ ܕܟܺܝܬܳܐ. ܢܶܗܘ̈ܝܳܢ ܠܰܢ ܗܳܠܶܝܢ ܕܚܽܘܠܛܳܢܳܐ܆ ܠܰܘ ܡܥܰܩܒܳܢܽܘܬܳܐ ܡܶܕܶܡ ܘܝܰܨܺܝܦܽܘܬܳܐ ܕܰܪ̈ܓܺܝܓܳܬܳܐ܆ ܐܶܠܳܐ ܚܰܢܽܘܬܳܐ ܐ̱ܪܳܙܳܢܳܝܬܳܐ ܘܠܳܐ ܡܶܬܡܰܠܠܳܢܺܝܬܳܐ ܘܰܕܡܶܢ ܐܰܠܳܗܳܐ ܐܶܬܝܰܗܒܰܬ ܕܡܰܘܠܕܽܘܬ ܒܢܰܝ̈ܳܐ. ܒܗܳܠܶܝܢ ܡ̈ܶܠܶܐ܆ ܬܶܦ̈ܓܕܳܢ ܡܰܢ ܠܚܺܐܦ̈ܶܐ ܫܟܺܝܪ̈ܶܐ ܕܓܰܒܪ̈ܰܝܟܶܝܢ܆ ܕܢܳܩܫܺܝܢ ܕܶܝܢ ܟܰܦܳܐ ܡܰܠܰܐܟ̈ܶܐ ܘܚܳܕܶܝܢ ܢܶܗܘܽܘܢ ܐܺܝܬܰܝܗܽܘܢ ܠܟܶܝܢ܆ ܘܗܺܝ ܒܬܽܘܠܬܳܐ ܛܽܘܒܬܳܢܺܝܬܳܐ܆ ܘܟܽܠܳܗ̇ ܓܽܘܕܳܐ ܕܩܰܕܺܝ̈ܫܶܐ܆ ܕܰܡܟܰܠܶܠ ܠܟܶܝܢ ܕܶܝܢ ܡܫܺܝܚܳܐ ܠܳܐ ܡܶܬܚܰܙܝܳܢܳܐܺܝܬ܆ ܗܰܘ ܣܳܐܶܡ ܐܰܓܽܘܢܳܐ ܕܰܡܝܰܬܪܽܘܬܳܐ܆ ܗܰܘ ܕܡܶܢ ܐܰܢ̱ܬܬܳܐ ܗܘ̣ܳܐ ܘܠܰܘ ܒܝܰܕ ܐܰܢ̱ܬܬܳܐ܆ ܘܡܶܢ ܗܳܝ ܠܰܡܫܰܪܪܽܘܬܳܐ ܗܳܕܶܐ ܘܰܚܠܺܝܡܽܘܬܳܐ ܢܨܰܒ ܒܟܶܝܢ.
ܐܳܦ ܡܶܛܽܠ ܬܰܪܒܺܝܬܳܐ ܕܶܝܢ ܕܰܒ̈ܢܰܝܳܐ ܕܺܝܠܟܶܝܢ܆ ܠܳܐ ܬܰܫ̈ܦܳܢ ܠܗܽܘܢ ܠܓܰܒܪ̈ܶܐ. ܐܶܠܳܐ ܐܶܡܰܬܝ ܕܰܠܘܳܬ ܚ̈ܶܙܘܳܢܶܐ ܡܰܘܒܠܺܝܢ ܠܗܽܘܢ܆ ܘܰܠܘܳܬ ܣܽܘܓܦܳܢܳܐ ܐ̱ܚܪܺܢܳܐ ܐܰܘ ܚܒܳܠܐ ܕܢܰܦܫܳܐ܆ ܠܘܳܬ ܥܺܕܬܳܐ ܐܶܬܬܠ̈ܶܝܢ ܒܗܽܘܢ ܐܰܢ̱ܬܶܝܢ. ܠܽܘܩܒܰܠ ܦܽܘܪܓܳܝܳܐ ܗܰܘ ܡܰܘܒܕܳܢܳܐ܆ ܠܥܺܐܕܳܐ ܗܰܘ ܝܰܬܺܝܪ ܢܰܨܺܝܚܳܐ ܕܡܶܢ ܩܰܕܺܝ̈ܫܶܐ ܐܰܩܺܝ̈ܡܶܝܢ. ܘܗܳܟܰܢܳܐ ܫܓ̈ܰܫܶܝܢ ܐܶܢܽܘܢ ܘܓܰܪ̈ܶܓܶܝܢ܆ ܟܰܕ ܐܰܟܚܕܳܐ ܐܳܦ ܫܰܪܺܝܪܳܐܺܝܬ ܐܳܡܪ̈ܳܢ ܐܰܢ̱ܬܶܝܢ܆ ܕܠܳܐ ܡܶܫܟܰܚ ܕܰܢܥܰܕܥܶܕ ܫܰܦܺܝܪ ܠܰܐܠܳܗܳܐ܆ ܗܰܘ ܕܰܠܘܳܬ ܚ̈ܶܙܘܳܢܶܐ ܐܳܙܶܠ܆ ܐܰܘ ܠܘܳܬ ܣܽܘܥܪܳܢܳܐ ܡܶܕܶܡ ܐ̱ܚܪܺܢܳܐ ܕܕܳܡܶܐ ܕܰܠܒܰܪ ܡܶܢ ܢܳܡܽܘܣܳܐ. ܘܟܰܕ ܗܳܟܰܢܳܐ ܡܶܟܺܝܠ ܒܗܳܠܶܝܢ ܥܝ̈ܳܕܶܐ ܘܰܙܢܰܝ̈ܳܐ ܡܶܬܪܰܒܶܝܢ ܘܥܰܡܗܽܘܢ ܪܳܒܶܝܢ ܘܠܰܡܫܽܘܚܬܳܐ ܕܩܰܘܡܬܳܐ ܐܳܬܶܝܢ܆ ܠܰܘ ܕܙܰܒܢܳܐ ܒܰܠܚܽܘܕ܆ ܐܶܠܳܐ ܐܳܦ ܕܰܡܝܰܬܪܽܘܬܳܐ܆ ܐܰܝܟ ܐܰܝܠܶܝܢ ܕܡܶܢ ܟܰܕܽܘ ܐܶܬܒܰܝܬܺܝܘ ܠܗܽܘܢ ܚܕܳܐ ܙܒܰܢ ܠܗܰܘ ܕܶܐܡܪ: ܫܒܽܘܩܘ ܛܠܳܝ̈ܶܐ ܘܠܳܐ ܬܶܟܠܽܘܢ ܐܶܢܽܘܢ ܕܢܺܐܬܽܘܢ ܠܘܳܬܝ܆ ܕܰܐܝܠܶܝܢ ܓܶܝܪ ܕܕܰܐܝܟ ܗܳܠܶܝܢ ܐܶܢܽܘܢ ܐܺܝܬܶܝܗ̇ ܡܰܠܟܽܘܬܳܐ ܕܰܫܡܰܝܳܐ[35]. ܗܳܘܶܝܢ ܠܟܶܝܢ ܚܽܘܛܪܳܐ ܕܣܰܝܒܽܘܬܳܐ܆ ܘܒܽܘܝܳܐܳܐ ܕܟܽܠ ܥܳܩܳܐ. ܢܶܬܪܕܽܘܢ ܓܶܝܪ ܥܰܡ ܗܳܠܶܝܢ ܐ̱ܚܪ̈ܳܢܝܳܬܳܐ܆ ܐܳܦ ܗܳܝ ܕܝܰܩܰܪ ܠܰܐܒܽܘܟ ܘܠܶܐܡܳܟ܆ ܐܰܝܟܰܢܳܐ ܕܫܰܦܺܝܪ ܢܶܗܘܶܐ ܠܳܟ܆ ܘܬܶܗܘܶܐ ܢܰܓܺܝܪ ܙܰܒܢܳܐ ܥܰܠ ܐܰܪܥܳܐ[36].
ܚܳܙܶܝܢ ܐܢ̱ܬܽܘܢ ܕܠܰܘ ܣܪܺܝܩܳܐܺܝܬ ܐܳܡܰܪ ܗ̱ܘܺܝܬ ܟܰܕ ܡܫܰܪܶܐ ܗ̱ܘܺܝܬ ܒܡܺܐܡܪܳܐ܆ ܕܶܐܢ ܢܶܣܰܒ ܦܪܶܕܬܳܐ ܙܥܽܘܪܬܳܐ ܕܣܽܘܟܳܠܳܐ ܡܶܢ ܥܽܘܬܪܳܐ ܕܚܶܟܡܬܳܐ ܐܰܟܙܢܳܐ ܕܡܶܢ ܡܛܐܠܘܢ222܆ ܘܰܠܗܳܕܶܐ ܢܶܪܬܰܚ܆ ܢܶܫܬܰܡܠܶܐ ܡܶܢܳܗ̇ ܡܳܐܢܳܐ ܪܰܒܳܐ܆ ܗܳܐ ܓܶܝܪ ܟܰܕ ܠܘܳܬ ܗܳܢܳܐ ܟܽܠܶܗ ܦܰܬܝܳܐ ܢܦܰܩܢܰܢ܆ ܢܽܘܛܦܬܳܐ222 ܕܡ̈ܶܠܶܐ ܐܰܘ ܕܣܽܘ̈ܟܳܠܶܐ ܕܺܝܠܶܗ ܠܳܐ ܐܶܫܟܰܚܢܰܢ܆ ܐܰܝܟܰܢܳܐ ܕܰܒܕܽܘܟ ܐܳܡܰܪ ܐܺܝܽܘܒ.
ܨܳܒܶܝܢ ܐܢ̱ܬܽܘܢ ܗܳܟܺܝܠ ܕܠܶܗ ܠܡܳܐܢܳܐ ܝܰܬܺܝܪ ܣܰܓܺܝ ܡܥܰܠܝܳܐ ܢܶܥܒܕܺܝܘܗ̱ܝ܆ ܘܰܒܗܳܢܳܐ ܒܰܕܡܽܘܬ ܟܺܐܦ̈ܶܐ ܡܝܰܩܪ̈ܳܬܳܐ܆ ܣܽܘ̈ܟܳܠܶܐ ܡܶܕܶܡ ܡܦܰܬܟ̈ܶܐ ܘܥܰܡܺܝ̈ܩܶܐ ܢܶܚܪܽܘܙ܆ ܐܶܠܳܐ ܢܶܫܒܽܘܩ ܠܰܢ ܡܶܢ ܟܽܠ ܦܪܽܘܤ ܝܰܘܡܳܐ. ܘܙܳܕܶܩ ܕܥܰܡ ܙܰܒܢܳܐ ܢܡܰܫܚܺܝܗ̇ ܠܪܰܒܽܘܬܶܗ ܕܡܺܐܡܪܳܐ܆ ܡܶܛܽܠ ܕܳܐܦ ܕܢܶܕܰܥ ܙܰܒܢܳܐ ܠܟܽܠ ܡܶܕܶܡ ܡܶܬܦܰܩܕܺܝܢܰܢ. ܒܪܰܡ ܐܰܝܟܰܢܳܐ ܕܠܳܐ ܢܰܗܡܶܐ ܘܢܶܫܒܩܺܝܘܗ̱ܝ ܠܡܳܐܢܳܐ ܕܟܽܠ ܟܽܠܶܗ ܠܳܐ ܡܨܰܒܬܳܐ܆ ܢܗܰܕܪܺܝܘܗ̱ܝ ܠܗܳܢܳܐ ܒܰܫܪܳܝܳܐ ܕܰܚܕܳܐ ܒܥܳܬܳܐ.
ܟܰܕ ܓܶܝܪ ܝܳܠܕܰܬ ܐܰܠܳܗܳܐ ܒܬܽܘܠܬܳܐ ܢܳܚܬܳܐ ܒܝܽܘܒܳܠܳܐ ܡܶܢ ܫܰܒܛܳܐ ܕܺܝܗܽܘܕܳܐ ܘܡܶܢ ܕܰܘܺܝܕ܆ ܐܰܝܟܰܢܳܐ ܐܳܡܰܪ ܗ̱ܘܳܐ ܠܳܗ̇ ܓܰܒܪܺܐܶܝܠ܆ ܘܗܳܐ ܐܶܠܺܝܫܒܰܥ ܐ̱ܚܝܳܢܬܶܟܝ ܒܰܛܢܳܐ[37]. ܐܳܦ ܓܶܝܪ ܕܰܙܟܰܪܝܳܐ ܟܳܗܢܳܐ ܐܺܝܬܶܝܗ̇ ܗ̱ܘܳܬ ܗܳܕܶܐ ܐܰܢ̱ܬܬܳܐ܆ ܟܰܕ ܡܶܢ ܫܰܒܛܳܐ ܕܠܶܘܳܝ̈ܶܐ ܡܶܢ ܟܽܠܦܪܽܘܤ ܐܺܝܬܶܝܗ̇ ܗ̱ܘܳܬ. ܠܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܢܳܡܽܘܣܳܝܬܳܐ ܕܗܰܘ ܕܡܶܢ ܫܰܒܛܳܐ ܐ̱ܚܪܺܢܳܐ ܐܺܝܬܰܘܗ̱ܝ ܗ̱ܘܳܐ܆ ܡܶܢ ܫܰܒܛܳܐ ܐ̱ܚܪܺܢܳܐ ܢܰܝܬܶܐ ܠܶܗ ܐܰܢ̱ܬܬܳܐ. ܐܳܡܰܪ ܓܶܝܪ ܒܡܶܢ̈ܝܳܢܶܐ ܡܳܪܝܳܐ ܒܝܰܕ ܡܽܘܫܶܐ܆ ܟܽܠܚܰܕ ܒܝܳܪܬܽܘܬܳܐ ܕܫܰܒܛܳܐ ܕܰܐܒܽܘܗ̱ܝ܆ ܢܶܬܢܰܩܦܽܘܢ ܒܙܽܘܘܳܓܳܐ ܒ̈ܢܰܝ ܐܺܝܣܪܳܐܶܝܠ. ܘܟܽܠ ܒܰܪܬܳܐ ܕܰܡܚܰܝܢܳܐ ܒܝܳܪܬܽܘܬܳܐ ܡܶܢ ܟܽܠܗܽܘܢ ܫܰܒ̈ܛܶܐ ܕܰܒ̈ܢܰܝܳܐ ܕܺܐܝܣܪܳܐܶܝܠ܆ ܠܚܰܕ ܡܶܢ ܗܳܢܽܘܢ ܕܡܶܢ ܫܰܪܒܬܳܐ ܕܰܐܒܽܘܗܶܝܢ ܢܶܗܘ̈ܝܳܢ ܢܶܫ̈ܶܐ[38]. ܡܶܛܽܠܗܳܕܶܐ ܟܺܝܬ܆ ܘܟܰܕ ܝܰܘܣܶܦ ܐܶܬܚܫܶܒ ܒܫܰܪ̈ܒܳܬܳܐ ܐܰܝܟ ܕܺܐܝܬ ܥܝܳܕܳܐ ܠܰܟܬܳܒܳܐ ܐܰܠܳܗܳܝܳܐ܆ ܕܡܰܟܬܒܽܘܬ ܫܰܪ̈ܒܳܬܳܐ ܡܶܢ ܓܰܒܪ̈ܶܐ ܥܳܒܶܕ ܘܠܰܘ ܡܶܢ ܢܶܫ̈ܶܐ܆ ܕܶܐܬܚܰܫܒܰܬ ܒܫܰܪ̈ܒܳܬܳܐ ܡܰܪܝܰܡ ܡܶܣܬܰܒܪܳܐ܆ ܟܰܕ ܡܶܢܶܗ ܕܺܝܠܶܗ ܕܫܰܒܛܳܐ ܕܰܡܟܺܝܪܳܗ̇ ܐܺܝܬܶܝܗ̇ ܐܰܝܟ ܢܳܡܽܘܣܳܐ.
ܐܰܝܟܰܢܳܐ ܗܳܟܺܝܠ ܐ̱ܚܝܳܢܬܳܗ̇ ܕܶܐܠܺܝܫܒܰܥ ܐܺܝܬܶܝܗ̇ ܗܺܝ ܒܬܽܘܠܬܳܐ ܩܰܕܺܝܫܬܳܐ. ܐ̱ܢܳܫܺܝ̈ܢ ܡܰܢ ܗܳܟܺܝܠ ܡܶܢ ܠܳܐ ܝܰܠܺܝܦܽܘܬܳܐ ܐܶܡܰܪܘ: ܕܡܶܛܽܠ ܕܺܐܝܣܰܪ̈ܠܳܝܳܬܳܐ ܐܺܝܬܰܝܗܶܝܢ ܗ̱ܘܰܝ̈ ܬܰܪ̈ܬܰܝܗܶܝܢ ܘܡܶܢ ܚܰܕ ܥܰܡܳܐ ܡܶܬܬܰܝ̈ܬܝܳܢ ܗ̱ܘܰܝ̈܆ ܡܶܛܽܠ ܗܳܕܶܐ ܒ̈ܢܳܬ ܓܶܢܣܳܐ ܩܪܳܐ ܐܶܢܶܝܢ ܓܰܒܪܺܐܶܝܠ. ܗܳܕܶܐ ܕܶܝܢ ܗܳܝܕܶܝܢ ܐܺܝܬ ܠܳܗ̇ ܡܶܠܬܳܐ܆ ܕܰܠܗܰܘ ܕܡܶܢܶܗ ܟܰܕ ܡܶܢܶܗ ܕܥܰܡܳܐ ܒܰܪ ܓܶܢܣܳܐ ܢܶܩܪܶܐ ܐ̱ܢܳܫ܆ ܐܶܡܰܬܝ ܕܟܰܕ ܡܶܛܽܠ ܐ̱ܢܳܫ ܐ̱ܚܪܺܢܳܐ ܕܡܶܢ ܥܰܡܳܐ ܡܶܕܶܡ ܐ̱ܚܪܺܢܳܐ ܐܺܝܬܰܘܗ̱ܝ ܡܡܰܠܶܠ܆ ܠܘܳܬ ܦܽܘܪܳܫܳܐ ܕܗܳܢܳܐ܆ ܠܗܰܘ ܕܡܶܢܶܗ ܟܰܕ ܡܶܢܶܗ ܕܓܶܢܣܳܐ ܐܺܝܬܰܘܗ̱ܝ܆ ܢܟܰܢܶܐ ܒܰܪ ܓܶܢܣܳܐ܆ ܐܰܝܟܰܢܳܐ ܕܦܰܘܠܽܘܤ ܒܶܐܓܰܪܬܳܐ ܗܳܝ ܕܰܠܘܳܬ ܪ̈ܘܡܳܝܶܐ܆ ܟܰܕ ܡܶܛܽܠ ܗܳܢܽܘܢ ܕܡܶܢ ܥܰܡܡ̈ܶܐ ܕܫܰܪܟܳܐ ܘܳܐܦ ܡܶܢ ܝܽܗ̱ܘ̈ܕܳܝܶܐ ܗܰܝܡܶܢܘ ܥܬܺܝܕ ܗ̱ܘܳܐ ܕܰܢܡܰܠܶܠ܆ ܠܝܽܗ̱ܘ̈ܕܳܝܶܐ ܒ̈ܢܰܝ ܓܶܢܣܶܗ ܟܰܢܺܝ ܐܶܢܽܘܢ ܟܰܕ ܐܳܡܰܪ: ܚܠܳܦ ܐܰܚ̈ܰܝ ܗܳܢܽܘܢ ܕܺܐܝܬܰܝܗܽܘܢ ܒ̈ܢܰܝ ܓܶܢܣܳܐ ܕܺܝܠܝ ܒܰܒܣܰܪ܆ ܗܳܢܽܘܢ ܕܺܐܝܬܰܝܗܽܘܢ ܐܺܝܣܰܪ̈ܠܳܝܶܐ[39]. ܕܰܐܝܟ ܗܳܢܳܐ ܕܶܝܢ ܡܶܕܶܡ܆ ܘܠܳܐ ܒܕܽܘܟ ܡܶܛܽܠ ܐܶܠܺܝܫܒܰܥ ܘܡܶܛܽܠ ܡܰܪܝܰܡ ܢܶܫܟܰܚ܆ ܘܳܐܦܠܳܐ ܟܰܕ ܢܶܫ̈ܶܐ ܣܰܓܺܝ̈ܳܐܬܳܐ ܐܺܝܬ ܗ̱ܘܰܝ̈ ܡܶܢܶܗ ܟܰܕ ܡܶܢܶܗ ܕܥܰܡܳܐ܆ ܐܳܡܰܪ ܗ̱ܘܳܐ ܡܰܠܰܐܟܳܐ ܠܘܳܬ ܒܬܽܘܠܬܳܐ ܐܰܝܟ ܫܽܘܘܕܳܥܳܐ ܝܺܕܺܝܥܳܐ܆ ܗܳܝ ܕܗܳܐ ܐܶܠܺܝܫܒܰܥ ܐ̱ܚܝܳܢܬܶܟܝ. ܐܶܠܳܐ ܟܰܕ ܡܫܰܡܫܳܢܳܐ ܐܺܝܬܰܘܗ̱ܝ ܗ̱ܘܳܐ ܕܓܶܠ̈ܝܳܢܶܐ ܐܰܠܳܗܳܝ̈ܶܐ ܘܰܕܦܽܘܩ̈ܕܳܢܶܐ ܪ̈ܽܘܚܳܢܳܝܶܐ܆ ܠܰܘ ܦܫܺܝܛܳܐܺܝܬ[40] ܐܰܡܪܳܗ̇ ܠܗܳܕܶܐ. ܡܶܛܽܠ ܕܳܐܦ ܠܘܳܬ ܝܰܘܣܶܦ ܡܰܠܰܐܟܳܐ ܗܰܘ ܕܶܐܬܓܠܺܝ ܥܠܰܘܗ̱ܝ ܒܚܶܠܡܳܐ ܐܳܡܰܪ ܗ̱ܘܳܐ܆ ܝܰܘܣܶܦ ܒܪܶܗ ܕܕܰܘܺܝܕ[41]܆ ܐܰܝܟܰܢܳܐ ܕܰܠܘܳܬ ܡܽܘܠܟܳܢܳܐ ܢܰܣܩܺܝܗ̇ ܠܬܰܪܥܺܝܬܶܗ܆ ܗܰܘ ܕܒܺܐܝܕܰܘ̈ܗ̱ܝ ܡܠ̣ܰܟ ܐܰܠܳܗܳܐ܆ ܕܡܶܢ ܕܰܘܺܝܕ ܢܶܗܘܶܐ ܡܫܺܝܚܳܐ. ܗܳܟܰܢܳܐ ܗܳܟܺܝܠ ܐܳܦ ܗܳܪܟܳܐ܆ ܗܳܝ ܕܗܳܐ ܐܶܠܺܝܫܒܰܥ ܐ̱ܚܝܳܢܬܶܟܝ܆ ܡܰܠܝܰܬ ܡܶܢ ܐ̱ܪܳܙܳܐ ܦܐܶܐ ܠܰܐܠܳܗܳܐ ܐܺܝܬܶܝܗ̇. ܗܳܝ ܟܺܝܬ ܕܶܐܢܳܐ ܡܗܰܝܡܶܢ ܐ̱ܢܳܐ܆ ܕܳܐܦܠܳܐ ܠܳܗ̇ ܠܰܒܬܽܘܠܬܳܐ ܛܥܳܬ ܗ̱ܘܳܬ܆ ܟܰܕ ܒܪܽܘܚܳܐ ܩܰܕܺܝܫܳܐ ܡܫܰܘܬܦܳܐ ܗ̱ܘܳܬ. ܡܶܛܽܠܗܳܕܶܐ ܐܳܦ ܚܘܺܝܚܳܐܺܝܬ ܡܶܫܬܰܡܥܳܐ ܗ̱ܘܳܬ܆ ܘܡܶܚܕܳܐ ܒܰܪ ܫܳܥܬܶܗ ܠܘܳܬ ܐܶܠܺܝܫܒܰܥ ܡܶܣܬܰܪܗܒܳܐ ܗ̱ܘܳܬ.
ܡܶܛܽܠ ܓܶܝܪ ܕܰܡܫܺܝܚܳܐ ܐܳܦ ܡܰܠܟܳܐ ܐܺܝܬܰܘܗ̱ܝ ܗ̱ܘܳܐ ܕܗܳܢܽܘܢ ܕܡܰܡܠܟܺܝܢ[42]܆ ܒܗܳܝ ܟܺܝܬ ܕܰܐܠܳܗܳܐ ܘܡܳܪܝܳܐ ܕܟܽܠ ܐܺܝܬܰܘܗ̱ܝ. ܗܽܘ ܕܶܝܢ ܟܰܕ ܗܽܘ ܐܳܦ ܪܺܝܫ ܟܳܗ̈ܢܶܐ ܐܶܫܬܰܡܰܗ ܟܰܕ ܗܘ̣ܳܐ ܒܰܪܢܳܫܳܐ܆ ܟܰܕ ܗܽܘ ܠܶܗ ܩܰܪܶܒ ܕܶܒܚܬܳܐ ܘܩܽܘܪܒܳܢܳܐ܆ ܕܽܘܟܳܝܳܐ ܕܰܚܛܺܝܬܳܐ ܕܥܳܠܡܳܐ܆ ܘܟܰܕ ܠܬܰܘܕܺܝܬܳܐ ܕܺܝܠܰܢ ܕܒܶܗ ܡܟܰܗܶܢ ܗܽܘ ܠܶܗ ܟܺܝܬ ܘܳܐܦ ܠܰܐܒܳܐ܆ ܐܶܬܒܰܩܰܘ ܓܶܝܪ ܐܳܡܰܪ ܦܰܘܠܽܘܤ ܒܰܫܠܺܝܚܳܐ ܘܪܺܝܫ ܟܳܗ̈ܢܶܐ ܕܬܰܘܕܺܝܬܰܢ ܝܶܫܽܘܥ[43]܆ ܩܰܕܡܰܬ ܐܶܬܦܰܪܢܣܰܬ ܗܳܕܶܐ ܡܶܢ ܠܥܶܠ܆ ܕܢܶܬܚܰܠܰܛ ܗܽܘ ܓܶܢܣܳܐ܆ ܕܫܰܒܛܳܐ ܡܰܠܟܳܝܳܐ ܕܺܝܗܽܘܕܳܐ܆ ܘܰܕܫܰܒܛܳܐ ܟܳܗܢܳܝܳܐ ܕܠܶܘܺܝ. ܐܰܝܟܰܢܳܐ ܕܰܡܫܺܝܚܳܐ ܗܰܘ ܡܰܠܟܳܐ ܘܪܺܝܫ ܟܳܗ̈ܢܶܐ܆ ܡܶܢ ܬܪ̈ܰܝܗܽܘܢ ܢܶܚܽܘܬ ܒܝܽܘܒܳܠܳܐ ܒܰܒܣܰܪ. ܟܬܺܝܒ ܓܶܝܪ ܒܡܰܦܩܳܢܳܐ܆ ܕܰܩܕܳܡ ܕܢܶܬܬܣܺܝܡ ܦܽܘܩܕܳܢܳܐ ܗܰܘ ܕܟܳܠܶܐ ܗ̱ܘܳܐ ܠܡܶܣܰܒ ܐܰܢ̱ܬܬܳܐ ܡܶܢ ܫܰܒܛܳܐ ܐ̱ܚܪܺܢܳܐ܆ ܕܰܐܗܪܽܘܢ ܗܰܘ ܪܺܝܫ ܟܳܗ̈ܢܶܐ ܩܰܕܡܳܝܳܐ ܕܰܐܝܟ ܢܳܡܽܘܣܳܐ܆ ܢܶܣܰܒ ܡܶܢ ܫܰܒܛܳܐ ܕܺܝܗܽܘܕܳܐ ܐܰܢ̱ܬܬܳܐ܆ ܠܶܐܠܺܝܫܒܰܥ ܒܰܪ̱ܬ ܥܰܡܺܝܢܳܕܳܒ[44]. ܥܰܡܺܝܢܳܕܳܒ ܕܶܝܢ܆ ܡܶܢ ܝܺܗܽܘܕܳܐ ܢܳܚܶܬ ܗ̱ܘܳܐ ܒܝܽܘܒܳܠܳܐ. ܘܰܐܝܟܰܢܳܐ ܕܠܳܐ ܐ̱ܢܳܫ܆ ܥܰܡܺܝܢܳܕܳܒ ܐ̱ܚܪܺܢܳܐ ܢܶܣܒܰܪ܆ ܟܰܕ ܟܳܠܶܐ ܠܳܗ̇ ܠܛܽܘܥܝ̣ܰܝ̣܆ ܘܝܰܬܺܝܪ ܓܰܠܝܳܐܺܝܬ ܡܚܰܘܶܐ ܠܳܗ̇ ܠܗܳܕܶܐ ܟܬܳܒܳܐ ܟܳܗܢܳܝܳܐ܆ ܐܶܡܰܪ ܒܰܪܬܳܐ ܕܥܰܡܺܝܢܳܕܳܒ܆ ܚܳܬܳܐ ܕܶܝܢ ܕܢܰܚܫܽܘܢ. ܘܰܚܙܺܝ ܠܺܝ ܠܰܡܕܰܒܪܳܢܽܘܬܳܐ ܚܰܟܺܝܡܰܬ ܒܟܽܠ ܕܪܽܘܚܳܐ܆ ܗܰܘ ܕܕܰܒܰܪ ܘܦܰܪܢܶܤ ܕܳܐܦ ܗܳܕܶܐ ܐܰܢ̱ܬܬܶܗ ܕܰܙܟܰܪܝܳܐ ܗܳܝ ܐܶܡܶܗ ܕܡܰܥܡܕܳܢܳܐ܆ ܗܳܝ ܒܰܪ̱ܬ ܓܶܢܣܳܐ ܕܝܳܠܕܰܬ ܐܰܠܗܳܐ ܡܰܪܝܰܡ܆ ܐܶܠܺܝܫܒܰܥ ܬܶܬܟܰܢܶܐ܆ ܟܰܕ ܠܘܳܬ ܗܳܝ ܐܶܠܺܝܫܒܰܥ ܡܰܣܩܳܐ ܠܰܢ܆ ܗܳܝ ܕܰܐܗܪܽܘܢ ܢܣܰܒ ܗ̱ܘܳܐ܆ ܘܗܳܝ ܕܒܺܐܝ̈ܕܶܝܗ̇ ܗܘ̣ܳܬ ܢܰܩܺܝܦܽܘܬܳܐ ܕܰܬܪ̈ܰܝܗܽܘܢ ܫܰܒ̈ܛܶܐ܆ ܘܰܒܝܕ ܫܡܳܗ̇ ܓܰܠܝܳܐܺܝܬ ܡܰܙܥܩܳܐ܆ ܕܡܰܢ ܗ̱ܝ ܐܶܠܺܝܫܒܰܥ ܐܺܝܬܶܝܗ̇ ܠܺܝ ܐ̱ܚܝܳܢܽܘܬܳܐ ܗܳܝ ܕܰܠܘܳܬ ܒܬܽܘܠܬܳܐ.
ܘܠܳܐ ܐ̱ܢܳܫ ܢܺܐܡܰܪ ܠܺܝ܆ ܕܫܶܒܝܳܐ ܗܰܘ ܕܒܳܒ̈ܠܳܝܶܐ ܒܰܠܒܠܶܗ ܠܥܰܡܳܐ ܕܝܽܗ̱ܘ̈ܕܳܝܶܐ܆ ܐܰܝܟܰܢܳܐ ܕܳܐܦܠܳܐ ܚܰܕ ܡܶܟܺܝܠ ܦܽܘܪܳܫܳܐ ܢܶܗܘܶܐ ܐܺܝܬ ܕܓܶܢ̈ܣܶܐ ܐܰܘ ܕܫܰܒ̈ܛܶܐ. ܡܰܘܕܰܥ ܓܶܝܪ ܥܰܙܪܳܐ܆ ܕܟܽܠܗܽܘܢ ܗܳܢܽܘܢ ܕܦܳܢܶܝܢ ܗ̱ܘܰܘ ܡܶܢ ܒܳܒܶܝܠ܆ ܥܰܡܠܳܐ ܣܰܓܺܝܳܐܐ ܣܳܒܠܺܝܢ ܗ̱ܘܰܘ܆ ܕܰܐܝܟ ܕܡܰܨܝܳܐ ܢܟܰܢܫܽܘܢ ܠܰܒ̈ܢܰܝܳܐ ܕܰܐܗܪܽܘܢ ܘܰܠܠܶܘܳܝ̈ܶܐ ܗܳܢܽܘܢ ܕܫܰܪܟܳܐ. ܒܛܺܝܠ ܗ̱ܘܳܐ ܠܗܽܘܢ ܓܶܝܪ ܥܰܠ ܥܝ̈ܳܕܶܐ ܐܰܒܳܗ̈ܳܝܶܐ ܕܺܝܠܗܽܘܢ. ܡܫܰܘܕܰܥ ܓܶܝܪ ܘܪܳܫܶܡ ܗܰܘ ܕܰܐܟܬܶܒ܆ ܠܰܘ ܒܰܠܚܽܘܕ ܠܫܰܒܛܳܐ ܕܗܳܢܽܘܢ ܕܰܦܢܰܘ܆ ܐܶܠܳܐ ܐܳܦ ܠܰܡܕܺܝܢ̱ܬܳܐ ܐܳܦ ܠܩܽܘܪ̈ܝܰܐܤ.
ܐܳܦ ܠܽܘܩܳܐ ܕܶܝܢ ܟܰܕ ܠܚܰܬܺܝܬܽܘܬܳܐ ܕܗܳܠܶܝܢ ܕܶܐܬܶܐܡܰܪ̈ܝ̱ ܡܚܰܘܶܐ ܠܰܢ܆ ܐܶܡܰܪ ܡܶܛܽܠ ܙܟܰܪܝܳܐ ܟܰܕ ܐܳܡܰܪ: ܘܰܐܢ̱ܬܬܶܗ ܡܶܢ ܒ̈ܢܳܬܳܐ ܕܰܐܗܪܽܘܢ. ܘܰܫܡܳܐ ܕܺܝܠܳܗ̇ ܐܶܠܺܝܫܒܰܥ[45].
ܐܳܦ ܡܫܺܝܚܳܐ ܕܶܝܢ ܗܰܘ ܕܶܐܡܰܪ ܗܽܘ ܡܶܛܽܠ ܢܰܦܫܶܗ܆ ܕܰܦܐܶܐ ܠܰܢ ܕܰܢܡܰܠܶܐ ܟܽܠܳܗ̇ ܟܺܐܢܽܘܬܳܐ[46]܆ ܘܠܳܐ ܡܶܕܶܡ ܡܶܢ ܗܳܠܶܝܢ ܕܰܠܘܳܬ ܚܰܬܺܝܬܽܘܬܳܐ ܚܳܝܪ̈ܳܢ ܡܶܛܽܠܳܬܶܗ܆ ܫܒܰܩ ܕܢܶܦܶܠ. ܐܶܠܳܐ ܟܰܕ ܠܟܽܠܗܶܝܢ ܢܛܰܪ܆ ܐܰܩܺܝܡ ܐܶܢܶܝܢ܆ ܘܫܰܠܶܡ ܐܶܢܶܝܢ. ܡܫܺܝܚܳܐ ܓܶܝܪ ܫܽܘܪܳܝܰܐ ܗ̄ܘ ܘܫܽܘܠܳܡܳܐ ܕܢܳܡܽܘܣܳܐ ܘܕܰܢܒܺܝ̈ܶܐ܆ ܘܰܐܠܳܗܳܐ ܕܕܺܝܰܬܺܝܩܺܐ ܥܰܬܺܝܩܬܳܐ ܘܰܚܕܰܬܳܐ. ܗܰܘ ܕܳܐܦ ܒܝܰܕ ܒܶܣܪܳܐ ܕܢܰܚ ܠܰܢ ܒܝܰܘ̈ܡܳܬܳܐ ܐ̱ܚܪ̈ܳܝܶܐ. ܠܶܗ ܬܶܫܒܽܘܚܬܳܐ ܘܽܐܘܚܕܳܢܳܐ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ܆ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܫܬܝܢ ܘܰܬܠܳܬܳܐ.
[10]ܐܪܡܝܐ. 23: 5 ـ 6 ܘܒܰܢܒܺܝܽܘܬܳܐ ܕܶܐܪܡܝܐ ܟܬܝܒ ܗܳܟܰܢ. ܚܠܳܦ ܝܘܨܕܩ. ܙܕܩ̣ܢ.
[16]ܡܬܝ. 3: 3 ܐܦ ܡܪܩܘܣ. 1: 3 ܐܦ ܠܘܩܐ. 3: 4 ܐܦ ܝܘܚܢܢ. 1: 23