ܡܺܐܡܪܳܐ ܕܶܫܬܺܝܢ ܘܰܬܪܶܝܢ

ܥܰܠ ܙܓܽܘܓ̈ܝܳܬܳܐ ܗܳܠܶܝܢ ܕܶܐܫܬܰܕܰܪ̈ܝ̱ ܡܶܢ ܦܰܠܰܤܛܺܝܢܺܝ܆ ܘܓܽܘܡܪ̈ܶܐ ܗܳܠܶܝܢ ܕܡܶܢ ܗܳܢܽܘܢ ܕܡܶܬܕܰܝܘܢܺܝܢ ܗ̱ܘܰܘ ܐܶܬ̇ܬܻ̇ܝܒ̈ܝ̱ ܘܶܐܬܚ̈ܰܘܺܝ ܠܥܺܕܬܳܐ ܩܰܕܺܝܫܬܳܐ ܕܰܐ‌ܠܳܗܳܐ ܗܳܝ ܕܒܰܐܢܛܺܝܘܟܺܝܰܐ.

62: ܟܰܕ ܐܽܘܪܶܫܠܶܡ ܒܰܙܒܰܢ ܥܬܺܝܕܳܐ ܗ̱ܘܳܬ ܕܡܶܢ ܒܳܒ̈ܠܳܝܶܐ ܬܶܬܬܰܩܪܰܒ܆ ܘܠܰܟܒܽܘܫܝܳܐ ܘܰܠܚܽܘܪܒܳܐ ܡܫܰܡܠܝܳܐ ܬܶܫܬܠܶܡ܆ ܘܡܶܬܓܙܶܡ ܗ̱ܘܳܐ ܠܳܗ̇ ܡܰܢ ܡܶܢ ܢܒܺܝ̈ܶܐ܆ ܠܳܐ ܕܶܝܢ ܡܶܫܬܰܚܠܦܳܐ ܗ̱ܘܳܬ ܐܳܦܠܳܐ ܡܶܬܟܰܡܪܳܐ ܗ̱ܘܳܬ ܥܰܠ ܓܙܳܡ̈ܶܐ܆ ܐܶܠܳܐ ܕܠܳܐ ܟܺܐܒܳܐ ܣܺܝܡܳܐ ܗ̱ܘܳܬ܆ ܘܡܶܢ ܗܳܝ ܕܬܶܚܛܶܐ ܠܳܐ ܡܶܬܪܰܚܩܳܐ ܗ̱ܘܳܬ܆ ܐܶܠܳܐ ܒܗܶܝܢ ܟܰܕ ܒܗܶܝܢ ܐܰܚܺܝܕܳܐ ܗ̱ܘܳܬ܆ ܘܰܒܡ̈ܶܠܶܐ ܫܟܺܝܪ̈ܳܬܳܐ ܘܰܒܣܳܥܽܘܪ̈ܘܳܬܳܐ܆ ܐܶܪܰܡܝܳܐ ܗܰܘ ܕܒܶܐܒܠܳܐ ܐܰ‌ܠܳܗܳܝܳܐ ܡܛܰܪܰܦ ܗ̱ܘܳܐ ܒܠܶܒܶܗ܆ ܘܕܰܠܘܳܬ ܒ̈ܢܰܝ ܓܶܢܣܶܗ ܐܶܢ ܟܺܝܬ ܐ̱ܢܳܫ ܐ̱ܚܪܺܝܢ ܐܺܝܬܰܘܗ̱ܝ ܗ̱ܘܳܐ ܕܝܰܬܺܝܪ ܚܰܝܽܘܣܬܳܢ ܘܓܳܝܠܺܝܢ ܪ̈ܰܚܡܰܘܗ̱ܝ܆ ܟܰܕ ܚܳܙܶܐ ܗ̱ܘܳܐ ܕܩܶܪܒܰܬ ܘܡܰܢܥܰܬ ܡܶܢ ܟܰܕܽܘ ܒܺܝܫܬܳܐ ܗܳܝ ܕܡܶܣܬܰܟܝܳܐ ܗ̱ܘܳܬ܆ ܘܳܐܦܠܳܐ ܠܐ̱ܢܳܫ ܟܽܠ ܟܽܠܶܗ ܡܶܫܟܰܚ ܗ̱ܘܳܐ ܣܳܟ ܕܡܶܬܬܰܢܰܚ܆ ܟܰܕ ܡܕܰܡܰܥ ܗ̱ܘܳܐ ܘܳܐܡܰܪ ܗ̱ܘܳܐ: ܡܰܢܽܘ ܢܚܽܘܤ ܥܠܰܝܟܝ ܐܽܘܪܶܫܠܶܡ܆ ܐܰܘ ܡܰܢܽܘ ܢܶܬܟܡܰܪ ܥܠܰܝܟܝ^[1]. ܠܕܰܐܝܟ ܗܳܕܶܐ ܓܶܝܪ ܬܶܢܰܚܬܳܐ ܘܕܶܡܥܬܳܐ ܒܳܥܶܐ ܗ̱ܘܳܐ܆ ܕܣܳܦܩܳܐ ܗ̱ܘܳܬ ܕܬܶܟܠܶܐ ܠܪܽܘܓܙܳܐ ܕܰܐ‌ܠܳܗܳܐ. ܠܰܘ ܕܰܡܪܰܛܒܳܐ ܒܰܠܚܽܘܕ ܠܥܰܝܢܳܐ܆ ܐܰܘ ܒܕܽܘܟ ܐܳܦ ܥܰܠ ܦܰܟܳܐ ܫܳܚܠܳܐ܆ ܐܶܠܳܐ ܕܡܶܢ ܥܽܘܡܩܳܐ ܘܰܐܝܟ ܗܰܘ ܕܡܶܢܳܗ̇ ܕܢܰܦܫܳܐ ܢܳܦܩܳܐ܆ ܘܥܳܒܕܳܐ ܫܽܘܚܠܳܦܳܐ ܕܕܽܘܒܳܪܳܐ ܕܚܰܝ̈ܶܐ ܗܰܘ ܕܡܰܒܣܰܝ^[2] ܗ̱ܘܳܐ.

ܡܩܰܠܰܣܬܳܐ ܗ̱ܝ ܓܶܝܪ ܕܶܡܥܬܳܐ ܡܰܝܬܝܰܬ ܦܺܐܪ̈ܶܐ܆ ܘܰܕܠܰܐܠܳܗܳܐ ܡܶܫܟܚܳܐ ܕܬܰܪܟܶܢ. ܐܰܝܟܰܢܳܐ ܟܺܝܬ ܕܗܳܝ ܕܠܳܐ ܣܳܥܽܘܪܳܝܬܳܐ ܐܺܝܬܶܝܗ̇܆ ܘܰܕܡܶܢ ܥܒ̈ܳܕܶܐ ܣܰܩܽܘܒ̈ܠܳܝܶܐ ܡܶܬܩܰܛܪܓܳܐ܆ ܘܕܳܐܦܠܳܐ ܚܰܕ ܚܰܝܠܳܐ ܩܰܢ̣ܝܳܐ܆ ܐܳܦ ܡܰܪܓܳܙܽܘ ܟܒܰܪ ܡܰܪܓܙܳܐ܆ ܕܒܶܐܣܟܺܡܳܐ ܕܰܡܨܰܕܝܳܢܽܘܬܳܐ ܡܶܬܰܐܫܕܳܐ. ܐܰܘ ܓܶܝܪ ܠܰܘ ܡܨܰܕܝܳܢܽܘܬܐ ܐܺܝܬܶܝܗ̇܆ ܗܳܝ ܕܩܰܠܺܝܠ ܢܕܰܡܰܥ ܥܰܠ ܚܛܺܝܬܳܐ. ܢܶܬܥܰܪܓܰܠ ܕܶܝܢ ܬܽܘܒ ܒܣܽܘܥܪ̈ܳܢܶܐ ܕܗܳܕܶܐ. ܡܶܛܽܠ ܗܳܕܶܐ ܐܶܫܰܥܝܳܐ ܗܰܘ ܢܒܺܝܳܐ܆ ܠܰܘ ܠܕܰܐܝܟ ܗܳܕܶܐ ܕܶܡܥܬܳܐ ܒܰܠܚܽܘܕ ܡܰܣܠܶܐ܆ ܐܶܠܳܐ ܐܳܦ ܠܘܳܬ ܗܳܝ ܕܝܰܬܺܝܪ ܪܰܒܳܐ ܐܳܡܰܪ: ܘܳܐܦܠܳܐ ܐܶܢ ܬܟܽܘܦ ܨܰܘܪܳܟ ܐܰܝܟ ܟܪܽܘܠܳܐ܆ ܘܣܰܩܳܐ ܘܩܶܛܡܳܐ ܬܫܰܘܶܐ ܬܚܽܘܬܰܝܟ. ܘܳܐܦܠܳܐ ܟܰܕ ܬܶܩܪܽܘܢ ܨܰܘܡܳܐ ܘܝܰܘܡܳܐ ܡܩܰܒܠܳܐ ܠܡܳܪܝܳܐ^[3]. ܐܳܦ ܡܺܝܟܳܐ ܕܶܝܢ܆ ܐܰܟܘܳܬܳܗ̇ ܕܺܝܠܳܗ̇ ܕܬܰܪܥܺܝܬܳܐ ܐܳܡܰܪ. ܒܥܺܕܬܳܐ ܕܡܳܪܝܳܐ ܠܳܐ ܬܕܰܡܥܽܘܢ ܒܕܶܡ̈ܥܶܐ܆ ܘܠܳܐ ܢܕܰܡܥܽܘܢ ܥܰܠ ܗܳܠܶܝܢ^[4]. ܐܳܦ ܝܽܘܐܶܝܠ ܕܶܝܢ܆ ܒܳܗ̇ ܒܰܕܡܽܘܬܳܐ ܡܰܙܥܶܩ. ܘܗܳܫܳܐ ܐܳܡܰܪ ܡܳܪܝܳܐ ܐܰ‌ܠܳܗܳܐ ܕܺܝܠܟܽܘܢ܆ ܐܶܬܦܢܰܘ ܠܘܳܬܝ ܡܶܢ ܟܽܠܶܗ ܠܶܒܟܽܘܢ܆ ܒܨܰܘܡܳܐ ܘܰܒܒܶܟܝܳܐ ܘܰܒܡܰܪܩܽܘܕܬܳܐ܆ ܘܣܰܕܶܩܘ ܠܶܒܰܘ̈ܳܬܟܽܘܢ ܘܠܰܘ ܢܰܚ̈ܬܰܝܟܽܘܢ^[5]. ܥܰܠ ܠܶܒܳܐ ܓܶܝܪ ܫܚܺܝܩܳܐ ܘܰܬܒܺܝܪܳܐ ܐܺܝܬ ܣܽܘܢܩܳܢܳܐ܆ ܘܕܰܒܕܶܚܠܬܳܐ ܦܳܠܰܚ ܥܰܒܕܽܘܬܳܐ ܠܡܳܪܝܳܐ܆ ܐܰܘ ܒܪܶܚܡܬܳܐ ܡܶܢ ܒܳܬܰܪ ܕܶܚܠܬܳܐ܆ ܘܰܕܡܶܛܽܠܳܬܳܗ̇ ܕܺܝܠܳܗ̇ ܕܛܳܒܬܳܐ ܦܳܠܰܚ ܠܳܗ̇ ܠܛܳܒܬܳܐ܆ ܘܕܰܒܝܰܕ ܟܽܠ ܦܽܘܩܕܳܢܳܐ ܪܳܕܶܐ^[6]܆ ܡܶܛܽܠ ܕܰܠܪܽܘܓܙܳܐ ܗܰܘ ܕܡܶܢ ܠܥܶܠ ܢܪܰܝܰܚ܆ ܘܰܡܚܰܣܝܳܢܳܐ ܢܶܥܒܕܺܝܘܗ̱ܝ ܠܰܐܠܳܗܳܐ.

ܡܶܛܽܠ ܗܳܕܶܐ ܟܰܕ ܡܶܢ ܩܕܺܝܡ ܚܰܫܳܐ ܗܰܘ ܐܰܟܣܢܳܝܳܐ ܘܠܳܐ ܡܥܰܝܕܳܐ ܫܶܡܥܶܬ ܕܰܨܦܰܚ ܥܰܠ ܡܕܺܝܢ̱ܬܳܐ ܗܳܝ ܪܰܒܬܳܐ ܕܰܐ‌ܠܶܟܣܰܢܕܪ̈ܳܝܶܐ ܥܶܒܪܶܬ ܠܰܡܨܰܥܬܳܐ܆ ܘܟܰܕ ܩܳܡܶܬ ܥܰܠ ܗܳܕܶܐ ܒܺܐܡܰܐ ܟܳܗܢܳܝܬܳܐ܆ ܨܳܪܶܬ ܒܡܶܠܬܳܐ ܠܳܐܕܫܳܗ̇ ܕܰܡܚܽܘܬܳܐ. ܩܕܳܡ ܥܰܝ̈ܢܶܐ ܐܰܝܬܺܝܬ ܐܶܢܶܝܢ ܠܒܺܝ̈ܫܳܬܳܐ. ܠܰܓ̈ܙܳܡܶܐ ܕܚܺܝ̈ܠܶܐ ܗܳܢܽܘܢ ܕܺܐܝܬ ܒܰܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ܆ ܠܽܘܩܒܰܠ ܗܳܢܽܘܢ ܕܥܳܒܪܺܝܢ ܥܰܠ ܢܳܡܽܘܣ̈ܶܐ ܐܰ‌ܠܳܗܳܝ̈ܶܐ ܩܪܺܝܬ ܩܕܳܡ ܥܺܕܬܳܐ. ܐܰܪܬܺܝܬ̣. ܚܰܘܺܝܬ̣ ܗܳܝ ܕܙܳܕܶܩ ܗ̱ܘܳܐ ܕܢܶܣܥܽܘܪ. ܘܰܠܘܳܬ ܡܶܫܬܰܡܥܳܢܽܘܬܳܐ ܐܶܬܬܘܰܗܬܽܘܢ. ܠܚܰܝܽܘܣܬܳܢܽܘܬܳܐ ܕܺܝܠܝ ܕܰܥܠܰܝܟܽܘܢ ܩܰܒܶܠܬܽܘܢ. ܠܡ̈ܶܠܶܐ ܒܩܽܘܠܳܣ̈ܶܐ ܦܪܰܥܬܽܘܢ. ܐܶܬܬܰܢܰܚܬܽܘܢ. ܐܶܬܩܦ̣ܶܣܬܽܘܢ. ܐܶܬܟܰܢܰܫܬܽܘܢ ܒܒܳܥ̈ܘܳܬܳܐ ܟܽܘ̈ܠܳܝܳܬ ܟܶܢܫܳܐ ܩܕܳܡ ܬܰܪ̈ܥܶܐ ܕܰܡܕܺܝܢ̱ܬܳܐ. ܒܬܶܫܒ̈ܚܳܬܳܐ ܘܒܰܙܡܺܝܪ̈ܳܬܳܐ ܒܥܺܕܬܳܐ ܠܰܐܠܳܗܳܐ ܐܶܬܟܰܫܰܦܬܽܘܢ. ܡܶܢ ܦܽܘܪ̈ܓܳܝܶܐ ܕܚܶܙܘܳܢ̈ܶܐ ܐܰܝܟ ܕܡܶܢ ܐܰܒܕܳܢܳܐ ܕܢܰܦܫܳܐ ܐܰܗܦܶܟܬܽܘܢ ܐܰܦܰܝ̈ܟܽܘܢ܆ ܘܡܶܢ ܟܽܠܳܗ̇ ܐܰܫܺܝܕܽܘܬܳܐ ܘܦܽܘܪܦܳܥܳܐ ܕܪܶܓܬܳܐ. ܠܘܳܬ ܣܳܥܽܘܪ̈ܘܳܬܳܐ ܕܰܚܦܺܝܛܽܘܬܳܐ܆ ܡܬܰܚܬܽܘܢ ܘܛܰܝܶܒܬܽܘܢ ܐܰܢ̱ܬܽܘܢ ܠܟܽܘܢ܆ ܢܰܟܦܽܘܬܳܐ ܘܢܺܝܚܽܘܬܳܐ܆ ܘܰܠܘܳܬ ܫܰܪܟܳܐ ܕܰܟܢܺܝܟܽܘܬܳܐ ܕܚܰܝ̈ܶܐ.

ܗܳܫܳܐ ܕܶܝܢ ܗܳܢܳܐ ܟܽܠܶܗ ܚܳܙܶܐ ܐ̱ܢܳܐ ܠܟܽܘܢ ܕܰܛܥܰܝܬܽܘܢ ܐܶܢܶܝܢ ܠܟܽܠܗܶܝܢ ܗܳܠܶܝܢ܆ ܐܰܝܟܰܢܳܐ ܕܳܐܦܠܳܐ ܐܶܢ ܡܶܕܶܡ ܕܚܺܝܠܳܐ ܘܙܺܝܥܳܐ ܫܡܰܥܬܽܘܢ ܬܶܕܥܽܘܢ. ܡܳܢܳܐ ܗܳܟܺܝܠ ܙܳܕܶܩ ܗ̱ܘܳܐ ܠܺܝ ܕܶܐ݀ܣܥܽܘܪ܆ ܕܫܳܡܰܥ ܐ̱ܢܳܐ ܕܚܰܫܳܐ ܗܰܘ ܕܰܩܕܳܡ ܢܶܣܝܳܢܶܗ ܠܳܐ ܡܶܬܗܰܝܡܢܳܢܰܐ ܗ̄ܘ܆ ܘܕܰܠܒܰܪ ܡܶܢ ܡܶܠܬܳܐ ܒܽܐܘܪܚܳܐ ܪܳܕܶܐ ܘܳܐܬܶܐ܆ ܘܪܳܥܶܐ ܡܶܢ ܟܰܕܽܘ ܘܠܰܡܕܺܝܢ̱ܬܳܐ ܘܠܰܐܬܪ̈ܰܘܳܬܳܐ ܐ̱ܚܪ̈ܳܢܶܐ ܘܡܶܣܬܰܟܶܐ ܕܠܰܘ ܡܶܢ ܒܳܬܰܪ ܣܰܓܺܝ ܐܳܬܶܐ ܐܳܦ ܥܠܰܝܢ܆ ܘܠܳܐ ܡܶܫܬܡܰܥ ܡܶܟܺܝܠ܆ ܐܶܠܳܐ ܡܶܬܚܙܶܐ. ܐܰܪܰܐ ܠܰܘ ܕܬܽܘܒ ܠܥܽܘܗܕܳܢܳܐ ܕܰܬܝܳܒܽܘܬܳܐ ܐܰ݀ܝܬܶܝܟܽܘܢ܆ ܘܕܰܒܗܶܝܢ ܟܰܕ ܒܗܶܝܢ ܒܡ̈ܶܠܶܐ ܐܺ݀ܬܶܐ܆ ܐܶܠܳܐ ܕܶܚܠܬܳܐ ܐܺܝܬܶܝܗ̇ ܗ̱ܘܳܬ ܠܰܘ ܙܥܽܘܪܬܳܐ܆ ܕܕܰܠܡܳܐ ܟܰܕ ܐܳܡܪܺܝܢܰܢ ܗܶܢܶܝܢ ܟܰܕ ܗܶܢܶܝܢ܆ ܠܰܘ ܒܰܠܚܽܘܕ ܕܶܚܠܬܳܐ ܠܳܐ ܢܶܥܒܶܕ ܒܟܽܘܢ܆ ܐܶܠܳܐ ܐܳܦ ܠܡܶܬܓܚܳܟܽܘ ܡܶܢ ܐ̱ܢܳܫܺܝ̈ܢ ܐܰܝܟ ܝܰܬܺܝܪ̈ܶܐ ܘܒܳܓ̈ܽܘܠܳܐ ܢܶܣܬܒܰܪ. ܡܶܛܽܠ ܗܳܕܶܐ܆ ܠܶܐܓܪ̈ܳܬܳܐ ܕܶܐܬܟܬܶܒ̈ܝ̱ ܡܶܢ ܦܰܠܶܣܛܺܝܢܺܝ ܩܪܺܝܬ̣ ܠܟܽܘܢ܆ ܕܺܐܝܬܰܝܗܶܝܢ ܕܓܰܒܪ̈ܶܐ ܩܰܕܺܝ̈ܫܶܐ ܘܣܰܓܺܝ ܪ̈ܳܚܡܰܝ ܐܰ‌ܠܳܗܳܐ܆ ܘܰܕܗܳܝ ܕܢܺܐܡܪܽܘܢ ܫܪܳܪܳܐ ܣܳܝܩܺܝܢ ܐܰܝܟ ܕܠܳܐܐܰܪ܆ ܘܺܐܝܬܰܝܗܽܘܢ ܕܫܳܘܶܝܢ ܕܢܶܬܗܰܝܡܢܽܘܢ. ܣܳܡܶܬ ܩܕܳܡܰܝܟܽܘܢ ܠܓܽܘܡܪ̈ܶܐ ܗܳܠܶܝܢ ܡܕܰܥܟ̈ܳܬܳܐ ܠܡܶܬܚܰܘܝܳܢܽܘܬܳܐ܆ ܠܗܳܠܶܝܢ ܕܥܰܡ ܐܶܓܪ̈ܳܬܳܐ ܫܰܕܰܪܘ ܐܶܢܶܝܢ܆ ܘܟܰܕ ܡܶܢ ܗܳܢܽܘܢ ܕܡܶܬܕܰܝܘܢܺܝܢ ܗ̱ܘܰܘ ܐܶܬܬܺܝܒ̈ܝ̱ ܒܗܶܝܢ ܒܥܰܝ̈ܢܶܐ ܚܙܰܘ܆ ܘܒܺܐܝ̈ܕܰܝ̈ܳܐ ܒܰܝܬܳܝ̈ܳܬܳܐ ܕܺܝܠܗܽܘܢ ܩܰܒܶܠܘ ܐܶܢܶܝܢ܆ ܠܰܡܢܰܘ̈ܬܳܐ ܗܳܠܶܝܢ ܚܰܪ̈ܺܝܦܳܬܳܐ ܕܰܙܓܽܘܓܺܝܬܳܐ ܕܶܐܬܬܰܒܪܰܬ ܗܳܠܶܝܢ ܕܰܐܟܚܕܳܐ ܥܰܡ ܓܽܘܡܪ̈ܶܐ ܐܶܬܬܺܝܒ̈ܝ. ܫܡܰܥܬܽܘܢ ܕܶܝܢ ܕܗܳܢܽܘܢ ܕܰܟܬܰܒܘ܆ ܐܳܦ ܗܳܕܶܐ ܐܰܘܣܶܦܘ. ܕܰܫܡܰܥܘ ܕܚܰܕܚ̈ܕܳܢܶܐ ܡܶܢ ܗܳܢܽܘܢ ܕܡܶܬܕܰܝܘܢܺܝܢ ܗ̱ܘܰܘ܆ ܨܶܨ̈ܶܐ ܡܶܢ ܥܽܘܡܩܳܐ ܕܗܳܢܶܝܢ ܕܓܰܘܗܽܘܢ ܡܰܣܩܺܝܢ ܗ̱ܘܰܘ܆ ܘܪܳܩܺܝܢ ܗ̱ܘܰܘ ܡܶܢ ܦܽܘܡܗܽܘܢ.

ܗܳܠܶܝܢ ܗܳܟܺܝܠ ܕܠܳܐ ܟܺܐܒܳܐ ܘܰܕܠܳܐ ܕܶܡ̈ܥܶܐ ܢܶܥܒ̣ܰܪ ܐܶܢܶܝܢ܆ ܗܳܠܶܝܢ ܠܳܐ ܣܳܦ̈ܩܳܢ ܕܳܐܦ ܠܢܰܦܫܳܐ ܕܟܺܐܦܳܐ ܢܰܪ̈ܟܟܳܢ܆ ܘܢܰܪ̈ܚܩܳܢ ܡܶܢ ܟܽܠ ܪܶܓܬܳܐ ܘܦܽܘܪܓܳܝܳܐ ܕܠܳܐ ܗܰܘܢܳܐ܆ ܘܰܢܦܺܝ̈ܣܳܢ ܕܢܶܬܥܣܶܩ ܐܳܦ ܠܘܳܬܳܗ̇ ܕܗܳܝ ܕܢܺܚܶܐ ܘܰܕܥܰܠ ܣܰܩܳܐ ܢܶܬܶܒ܆ ܘܩܰܫܝܳܐܺܝܬ ܢܶܬܬܥܺܝܩ ܘܢܶܬܶܐܒܶܠ ܘܥܰܡ ܢܒܺܝܳܐ ܗܰܘ ܕܰܡܙܰܡܰܪ ܢܺܐܡܰܪ: ܕܩܶܛܡܳܐ ܐܰܝܟ ܠܰܚܡܳܐ ܠܶܥܣܶܬ܆ ܘܰܠܫܶܩܝܳܐ ܕܺܝܠܝ ܥܰܡ ܒܶܟܝܳܐ ܡܳܙܶܓ ܗ̱ܘܺܝܬ^[7]܆ ܗܳܠܶܝܢ ܠܰܘ ܫܽܘܪ̈ܳܝܶܐ ܕܫܽܘܢܳܩܳܐ ܗܰܘ ܕܰܥܬܺܝܕ ܘܰܕܠܳܐ ܫܽܘܠܳܡ ܐܺܝܬܰܝܗܶܝܢ܆ ܡܰܢܽܘ ܬܽܘܒ^[8] ܢܶܬܦܰܠܰܓ ܘܠܳܐ ܢܗܰܝܡܶܢ ܡܶܛܽܠ ܫܰܠܗܶܒܺܝܬܳܐ ܗܳܝ ܕܠܳܐ ܕܳܥܟܳܐ ܕܰܓܙܺܝܡܳܐ܆ ܟܰܕ ܚܳܙܶܐ ܠܰܒܢܰܝ̈ܢܳܫܳܐ ܕܥܰܠ ‌ܐܰܪܥܳܐ ܡܶܬܥܰܪܓܠܺܝܢ ܠܟܳܐ ܘܰܠܗܰܠ܆ ܘܡܶܬܢܰܬܦܺܝܢ ܘܡܶܬܒܰܥܩܺܝܢ܆ ܘܡܰܙܥܩܺܝܢ ܕܝܳܩܕܺܝܢ ܡܶܢ ܝܰܩܕܳܢܳܐ ܡܶܕܶܡ ܟܰܣܝܳܐ ܘܰܕܠܳܐ ܡܶܬܚܙܶܐ܆ ܘܕܰܒܡܶܬ̇ܬܻ̇ܝܒܳܢܽܘܬܳܐ ܘܡܰܣܩܳܐ ܕܓܽܘܡܪ̈ܶܐ ܕܰܡܕܰܥ̈ܟܳܢ ܡܶܬܗܰܝܡܰܢ. ܐܶܡܰܬܝ ܕܬܶܬܶܠ ܠܺܝ ܡܶܠܬܳܐ ܕܗܳܕܶܐ. ܫܰܐܠ ܗܳܝܕܶܝܢ܆ ܐܳܦ ܕܰܐܝܟܰܢܳܐ ܡܶܢ ܒܳܬܰܪ ܩܝܳܡܬܳܐ ܕܦܰܓܪ̈ܶܐ ܝܳܩܶܕ ܐ̱ܢܳܫ ܕܠܳܐ ܫܽܘܠܳܡ ܘܠܳܐ ܡܰܘܦܶܐ ܟܰܕ ܝܳܩܶܕ. ܢܶܗܘ̈ܝܳܢ ܠܳܟ ܬܰܚܘܺܝܬܳܐ ܕܗܳܠܶܝܢ ܕܰܥ̈ܬܺܝܕܳܢ ܐܳܘ ܒܰܪܢܳܫܳܐ܆ ܗܳܠܶܝܢ ܕܡܶܬܚܰܙܝ̈ܳܢ.

ܐܳܦ ܓܶܝܪ ܙܳܕܶܩ ܗ̱ܘܳܐ ܕܰܠܡ̈ܶܠܶܐ ܠܳܐ ܕܰܓ̈ܳܠܳܬܳܐ ܕܶܐܘܰܢܓܶܠܺܝܽܘܢ܆ ܐܰܝܟ ܕܰܠܣܽܘܥܪ̈ܳܢܶܐ ܢܗܰܝܡܶܢ ܐܶܢܶܝܢ܆ ܝܰܬܺܝܪܳܐܺܝܬ ܟܰܕ ܗܽܘ ܦܳܪܽܘܩܰܢ ܡܰܙܥܶܩ: ܕܰܫܡܰܝܳܐ ܘܰܐܪܥܳܐ ܢܶܥܒܪܽܘܢ܆ ܡ̈ܶܠܶܐ ܕܶܝܢ ܕܺܝܠܝ ܠܳܐ ܢܶܥܒܪ̈ܳܢ^[9]. ܒܪܰܡ ܠܘܳܬ ܟܽܠܗܶܝܢ ܡܶܬܦܰܠܓܺܝܢ ܚ̱ܢܰܢ ܘܠܳܐ ܡܗܰܝܡܢܺܝܢ ܚ̱ܢܰܢ. ܟܰܕ ܒܡܶܠܬܳܐ ܒܰܠܚܽܘܕ ܐܳܡܪܺܝܢܰܢ ܕܰܡܗܰܝܡܢܺܝܢ ܚ̱ܢܰܢ܆ ܘܠܳܐ ܡܶܕܶܡ ܕܶܝܢ ܟܽܠ ܟܽܠܶܗ ܕܫܰܪܺܝܪ ܚܳܫܒܺܝܢ ܚ̱ܢܰܢ. ܒܰܕܓܽܘܢ ܐܳܦ ܟܰܕ ܡ̈ܶܠܶܐ ܗܳܢܶܝܢ ܫܳܡܥܺܝܢ ܚ̱ܢܰܢ܆ ܕܳܐܦ ܗܶܢܶܝܢ ܡܶܢ ܡܳܪܰܢ ܐܰܡܺܝܪ̈ܳܢ ܘܪ̈ܳܫܡܳܢ ܐܳܕܫܳܐ ܐ̱ܚܪܺܢܳܐ ܕܫܶܢ̈ܕܶܐ ܕܰܡܛܰܝܰܒ ܠܗܳܢܽܘܢ ܕܰܚܛܰܘ܆ ܗܳܢܶܝܢ ܕܳܐܡܰܪ ܒܗܶܝܢ. ܐܶܢܕܶܝܢ ܢܺܐܡܰܪ ܥܰܒܕܳܐ ܗܰܘ ܒܺܝܫܳܐ ܒܠܶܒܶܗ܆ ܕܡܳܪܝ ܡܰܘܚܰܪ ܠܡܶܐܬܳܐ܆ ܘܰܢܫܰܪܶܐ ܠܡܶܡܚܳܐ ܠܰܟ̈ܢܰܘܳܬܶܗ܆ ܘܰܠܡܶܐܟܰܠ ܟܺܝܬ ܘܰܠܡܶܫܬܳܐ ܥܰܡ ܗܳܢܽܘܢ ܕܰܪܘܶܝܢ܆ ܢܺܐܬܶܐ ܡܳܪܶܗ ܕܥܰܒܕܳܐ ܗܰܘ ܒܝܰܘܡܳܐ ܗܰܘ ܕܠܳܐ ܡܣܰܟܶܐ ܘܰܒܫܳܥܬܳܐ ܗܳܝ ܕܠܳܐ ܝܳܕܰܥ ܘܢܶܦܠܓܺܝܘܗ̱ܝ^[10]. ܡܶܬܦܰܠܓܺܝܢ ܚ̱ܢܰܢ ܘܠܳܐ ܡܗܰܝܡܢܺܝܢ ܚ̱ܢܰܢ. ܘܟܰܕ ܡܶܨܛܰܕܶܝܢ ܚ̱ܢܰܢ܆ ܐܰܘ ܐܳܡܪܺܝܢܰܢ: ܐܰܘ ܡܶܬܚܰܫܒܺܝܢ ܚ̱ܢܰܢ. ܬܽܘܒ ܗܳܟܺܝܠ ܡܶܢ ܒܳܬܰܪ ܩܝܳܡܬܳܐ ܢܡܽܘܬ ܐ̱ܢܳܫ܆ ܟܰܕ ܡܶܬܦܰܠܰܓ܆ ܘܡܳܢܰܘ ܐܳܕܫܳܐ ܕܡܶܬܦܰܠܓܳܢܽܘܬܳܐ ܗܳܝ. ܣܽܘܥܪܳܢܳܐ ܕܠܳܐ ܦܝܳܣܳܐ ܡܶܬܚܙܶܐ. ܘܰܐ̱ܚܪܳܢܝܳܐܺܝܬ ܠܳܐ ܡܶܫܟܚܳܢܳܐ ܐܺܝܬܰܘܗ̱ܝ. ܐܶܠܳܐ ܡܛܰܝܒܳܐ ܗܳܝ ܕܰܠܘܳܬ ܗܰܘ ܕܗܳܟܰܢܳܐ ܣܺܝܡ ܢܺܐܡܰܪ܆ ܕܚܽܘܪ ܐܳܘ ܚܰܟܺܝܡܳܐ ܕܥܳܠܡܳܐ ܗܳܢܳܐ ܠܘܳܬ ܕܳܒܽܘ̈ܨܶܐ ܕܰܙܓܽܘܓܺܝܬܳܐ ܗܳܠܶܝܢ ܕܡܶܬܬܺܝܒܺܝܢ ܗ̱ܘܰܘ ܒܝܰܕ ܗܰܕܳܡܳܐ ܪܰܟܺܝܟܳܐ ܝܰܫܛܳܐ܆ ܘܟܺܐܒܳܐ ܡܰܢ ܕܰܡܚܽܘܬܳܐ ܥܳܒܕܺܝܢ܆ ܕܠܳܐ ܛܳܪܝܳܐ ܕܶܝܢ ܘܰܡܚܽܘܬܳܐ ܥܳܒܪܺܝܢ܆ ܒܗܳܝ ܕܳܐܦܠܳܐ ܚܰܕ ܦܣܳܩܳܐ ܐܰܘ ܦܽܘܠܳܓܳܐ ܥܳܒܕܺܝܢ ܒܦܰܓܪܳܐ. ܬܶܗܘܶܐ ܠܳܟ ܢܰܗܺܝܪܽܘܬܳܗ̇ ܘܩܰܛܺܝܢܽܘܬܳܗ̇^[11] ܕܰܙܓܽܘܓܺܝܬܳܐ܆ ܕܡܽܘܬܳܐ ܕܣܰܟܺܝܢܳܐ ܡܶܕܡ ܪܽܘܚܳܢܳܝܬܳܐ ܘܡܶܬܗܰܘܢܳܢܺܝܬܳܐ܆ ܕܠܰܘ ܦܰܓܪܳܐ ܩܳܛܥܳܐ ܘܦܳܠܓܳܐ܆ ܐܶܠܳܐ ܕܡܰܫ̣ܠܚܳܐ ܐܰܝܟ ܕܡܶܢ ܓܶܠܕܳܐ ܡܶܢ ܣܳܝܽܘܡܽܘܬ ܒܢܰܝ̈ܳܐ ܕܪܽܘܚܳܐ܆ ܗܳܝ ܕܶܐܫܬܘܺܝܘ ܠܳܗ̇ ܡܶܢܩܕܺܝܡ ܒܝܰܕ ܡܰܥܡܽܘܕܺܝܬܳܐ܆ ܗܳܢܽܘܢ ܕܺܐܝܬܰܝܗܽܘܢ ܡܚܰܝ̈ܒܶܐ ܬܚܶܝܬ ܡܣܳܡ ܒܪܺܝܫܳܐ ܗܳܢܳܐ. ܡܰܟܣܳܢܽܘܬܳܐ ܕܠܳܐ ܗܰܝܡܳܢܽܘܬܳܐ ܕܺܝܠܰܢ ܐܰܚ̈ܰܝ܆ ܐܺܝܬܰܝܗܶܝܢ ܗܳܠܶܝܢ ܕܡܶܬܚܰܙܝ̈ܳܢ. ܡܶܛܽܠ ܗܳܕܶܐ ܐܳܦ ܗܳܝ ܕܨܶܨ̈ܶܐ ܘܰܙܓܽܘܓ̈ܝܳܬܳܐ ܢܶܬܬܺܝܒܽܘܢ ܘܢܶܣܩܽܘܢ ܒܝܰܫܛܳܐ܆ ܕܰܦܝܳܣܳܐ ܐܺܝܬܶܝܗ̇܆ ܘܠܰܘ ܠܒܰܪ ܡܶܢ ܡܶܠܬܳܐ ܡܶܣܬܰܒܪܳܐ. ܬܰܚܘܺܝܬܳܐ ܓܶܝܪ ܐܺܝܬܶܝܗ̇ ܗܳܕܶܐ܆ ܕܗܳܝ ܕܰܚܢܰܢ ܫܳܛܢܳܗ̇ ܠܕܶܚܠܬܳܐ ܕܰܐ‌ܠܳܗܳܐ܆ ܘܰܠܡ̈ܶܠܶܐ ܕܡܰܪܕܽܘܬܳܐ ܐܰ‌ܠܳܗܳܝܬܳܐ ܘܰܠܡܶܬܬܰܘܝܳܢܽܘܬܳܐ. ܘܣܳܗܶܕ ܕܰܘܺܝܕ ܡܰܢ ܟܰܕ ܐܳܡܰܪ: ܣܰܟܶܟ ܐܰܘ ܟܺܝܬ ܩܦܽܘܕ ܠܒܶܣܪܳܐ ܕܺܝܠܝ ܡܶܢ ܕܶܚܠܬܳܟ܆ ܡܶܢ ܕܺܝ̈ܢܶܐ ܓܶܝܪ ܕܺܝܠܳܟ ܐܶܢܳܐ ܕܶܚܠܶܬ^[12]܆ ܩܽܘܗܠܰܬ ܕܶܝܢ ܕܳܐܡܰܪ: ܡ̈ܶܠܶܐ ܕܚܰܟܺܝ̈ܡܶܐ ܐܰܝܟ ܙܳܩ̈ܽܘܬܶܐ ܕܬܰܘܪ̈ܶܐ^[13]܆ ܘܰܐܝܟ ܨܶܨ̈ܶܐ ܕܰܢܨܺܝܒܺܝܢ. ܣܰܓܺܝ ܕܶܝܢ ܛܳܒܳܐܺܝܬ ܙܽܩ̈ܽܘܬܶܐ ܕܬܰܘܪ̈ܶܐ ܫܰܡܰܗ܆ ܡܶܛܽܠ ܟܺܝܬ ܕܠܰܢ ܒܰܕܡܽܘܬ ܬܰܘܪ̈ܶܐ ܦܳܠ̈ܚܰܝ ܐܰܪܥܳܐ ܡܥܺܝܪ ܠܦܽܘܠܚܳܢܳܐ. ܕܬܶܬܕܰܡܰܪ^[14] ܟܺܝܬ ܫܳܘܝܳܐ܆ ܐܳܦ ܗܳܝ ܕܰܐܝܟ ܨܶܨ̈ܶܐ ܕܰܢܨܺܝܒܺܝܢ. ܐܳܦ ܓܶܝܪ ܕܶܚܠܬܳܐ ܕܰܐ‌ܠܳܗܳܐ܆ ܘܳܐܦ ܡ̈ܶܠܶܐ ܡܰܠ̈ܦܳܢܝܳܬܳܐ ܕܰܡܝܰܬܪܽܘܬܳܐ ܘܳܐܦ ܝܽܘܠ̈ܦܳܢܶܐ܆ ܩܛܺܝܪܳܐܺܝܬ ܡܰܢ ܡܶܬܩܰܒܥܺܝܢ ܒܰܢ܆ ܡܶܛܽܠ ܗܳܝ ܕܶܐܬܬܚܶܕܢܰܢ ܒܒܺܝܫܽܘܬܳܐ܆ ܘܝܰܨܺܝܦܳܐܺܝܬ ܡܶܢ ܛܰܠܝܽܘܬܳܐ ܕܺܝܠܰܢ ܣܺܝܡܺܝܢ ܚ̱ܢܰܢ ܠܘܳܬ ܒܺܝ̈ܫܳܬܳܐ܆ ܡܶܚܕܳܐ ܕܶܝܢ ܕܣܳܟ ܡܶܬܩܰܒܥܺܝܢ܆ ܡܶܛܽܠ ܕܰܐ̱ܚܝܳܢܳܐܺܝܬ ܐܺܝܬ ܠܶܗ ܠܰܟܝܳܢܳܐ ܕܺܝܠܰܢ ܠܘܳܬ ܛܳܒܬܳܐ܆ ܒܰܕܡܽܘܬ ܐܰܪܥܳܐ ܗܳܝ ܕܺܐܝܬܶܝܗ̇ ܝܰܬܺܝܪ ܡܰܘܠܕܳܢܺܝܬܳܐ܆ ܒܰܩܒܳܥܗܽܘܢ ܕܨܶܨ̈ܶܐ ܐܰܝܟ ܕܰܒܥܶܩܳܪ̈ܶܐ ܕܢܶܨܒܬܳܐ ܡܶܬܟܰܪܟܺܝܢ ܘܡܶܬܥܰܪܙܠܺܝܢ܆ ܘܡܰܗܦܟܺܝܢ ܡܫܰܚܠܦܺܝܢ ܠܶܗ ܠܰܩܛܺܝܪܳܐ܆ ܠܒܰܝܬܳܝܽܘܬܳܐ ܟܝܳܢܳܝܬܳܐ. ܐܶܠܳܐ ܚܢܰܢ ܠܨܶܨ̈ܶܐ ܕܰܐܝܟ ܗܳܠܶܝܢ ܐܰܝܟ ܕܶܐܡܪܶܬ܆ ܟܰܕ ܒܒܺܝܫܽܘܬܳܐ ܠܫܰܦܺܝܪܽܘܬ ܛܽܘܗܡܳܐ ܕܰܟܝܳܢܳܐ ܫܰܚܠܶܦܢܰܢ܆ ܥܰܡ ܩܛܺܝܪܳܐ ܬܽܘܒ ܘܟܺܐܒܳܐ ܐܰܬܺܝܒܢܰܢ ܐܶܢܽܘܢ.

ܡܶܛܽܠܗܳܕܶܐ ܓܶܝܪ܆ ܐܳܦ ܛܠܳܝ̈ܶܐ ܕܺܐܝܬܰܝܗܽܘܢ ܫܰܒܪ̈ܶܐ ܒܩܰܘܡܬܳܐ ܚܰܫܽܘܗ̇ ܠܗܳܕܶܐ. ܐܰܝܟܰܢܳܐ ܕܢܺܐܠܰܦ ܕܰܐܝܟ ܕܡܶܢ ܨܶܐܕܰܝܢ܆ ܚܰܒܶܠܢܳܝܗ̱ܝ ܠܰܟܝܳܢܳܐ. ܘܡܶܟܺܝܠ ܠܳܐ ܡܩܰܒܠܳܢܳܐܺܝܬ ܐܺܝܬ ܠܶܗ ܠܘܳܬ ܡܝܰܬܪܽܘܬܳܐ. ܘܡܶܫܬܰܘܕܥܳܐ^[15] ܓܰܠܝܳܐܺܝܬ܆ ܒܡܰܦܰܩܗܶܝܢ^[16] ܕܓܽܘܡܪ̈ܶܐ܆ ܕܰܒ̈ܢܰܝܳܐ ܕܓܺܗܰܢܳܐ ܘܰܕܢܽܘܪܳܐ ܗܳܘܶܝܢ ܗܳܢܽܘܢ ܕܡܶܬܝܰܠܕܺܝܢ܆ ܟܰܕ ܘܠܳܐ ܚܕܳܐ ܡܰܪܕܽܘܬܳܐ ܕܡܶܛܽܠ ܡܰܠܟܽܘܬܳܐ ܕܰܐ‌ܠܳܗܳܐ ܡܶܢܰܢ ܡܶܬܝܰܠܦܺܝܢ. ܡܰܢܽܘ ܓܶܝܪ ܡܬܽܘܡ ܡܶܛܽܠ ܩܝܳܡܬܳܐ ܐܰܘ ܡܶܛܽܠ ܡܰܠܟܽܘܬܳܐ ܕܰܫܡܰܝܳܐ܆ ܐܰܘ ܡܶܛܽܠ ܚܰܝ̈ܶܐ ܕܰܥܬܺܝܕܺܝܢ ܘܰܕܠܳܐ ܫܽܘܠܳܡ܆ ܠܰܒܪܳܐ ܕܺܝܠܶܗ ܡܡܰܠܶܠ. ܠܰܘ ܟܽܠܶܗ ܥܰܡܠܳܐ ܒܗܳܕܶܐ ܡܶܬܢܰܦܰܩ ܠܰܢ܆ ܠܡܰܠܳܦܽܘ ܐܶܢܽܘܢ ܠܰܛܠܳܝ̈ܶܐ ܟܬܺܝ̈ܒܳܬܳܐ܆ ܘܗܳܟܰܢܳܐ ܟܰܕ ܢܶܗܘܽܘܢ ܒܩܰܘܡܬܳܐ܆ ܢܚܰܘܶܐ ܠܗܽܘܢ ܠܡܰܪܺܝܪܽܘܬܳܐ^[17] ܗܳܝ ܕܰܒܬܰܚ̈ܠܽܘܦܶܐ ܕܡܰܣܒܳܐ ܘܡܰܬܠܳܐ܆ ܠܥܶܠܳܠ̈ܬܳܐ ܕܥܳܠܽܘܒܽܘܬܳܐ܆ ܠܬܰܪ̈ܒܝܳܬܳܐ ܘܫܽܘܘ̈ܫܳܛܶܐ ܕܦܽܘܪ̈ܣܶܐ ܥܰܘܠܳܐ ܘܰܕܪ̈ܶܒܝܳܬܳܐ܆ ܠܰܚܣܳܡܳܐ ܗܰܘ ܕܰܠܘܳܬ ܩܰܪ̈ܺܝܒܶܐ܆ ܠܣܶܢܰܐܬ ܒܢܰܝ̈ܢܳܫܳܐ܆ ܠܬܽܘ̈ܩܳܢܶܐ ܡܥܰܠܰܝ̈ܳܐ ܕܒܶܢ̈ܝܳܢܶܐ ܢܰܨܺܝ̈ܚܶܐ܆ ܠܰܘ ܒܺܐܝ̈ܕܰܝܗܽܘܢ ܕܺܝܠܗܽܘܢ ܕܣܽܘܥܪ̈ܳܢܶܐ ܡܳܠܟܺܝܢܰܢ ܠܗܽܘܢ܆ ܕܠܳܐ ܢܗܰܝܡܢܽܘܢܳܝܗ̱ܝ ܠܰܫܠܺܝܚܳܐ ܕܳܐܡܰܪ: ܠܳܐ ܓܶܝܪ ܐܺܝܬ ܠܰܢ ܗܳܪܟܳܐ ܡܕܺܝܢ̱ܬܳܐ ܕܰܡܩܰܘܝܳܐ܆ ܐܶܠܳܐ ܠܗܳܝ ܕܰܥܬܺܝܕܳܐ ܒܳܥܶܝܢ ܚ̱ܢܰܢ^[18]. ܕܰܠܡܳܐ ܢܳܡܽܘܣܳܐ ܪܽܘܚܳܢܳܝܳܐ ܩܪܰܝܢܰܢ ܠܗܽܘܢ܆ ܕܰܠܡܳܐ ܦܽܘܪܓܳܠܳܐ ܡܶܕܶܡ ܙܥܽܘܪܳܐ ܟܬܳܒܳܝܳܐ ܪܕܰܝܢ ܐܶܢܽܘܢ܆ ܕܰܠܡܳܐ ܚܰܘܺܝܢܰܢ ܠܗܽܘܢ܆ ܕܰܐܝܟܰܢܳܐ ܒܝܰܕ ܝܰܨܺܝܦܽܘܬܳܐ ܕܥܰܠ ܡܶܣ̈ܟܺܢܶܐ ܘܩܽܘܒܳܠܳܐ ܕܰܐܟܣ̈ܢܳܝܶܐ܆ ܘܩܳܝܘܡܽܘܬ ܒܰܐܦ̈ܶܐ ܕܗܳܢܽܘܢ ܕܡܶܬܩܰܦܚܺܝܢ. ܘܰܒܝܰܕ ܗܳܠܶܝܢ ܥܒ̈ܳܕܶܐ ܛܳܒ̈ܶܐ ܕܫܰܪܟܳܐ܆ ܒܳܢܶܝܢ ܚ̱ܢܰܢ ܠܰܢ ܡܛܰܠ̈ܠܶܐ ܗܳܠܶܝܢ ܕܰܠܥܳܠܰܡ܆ ܫܳܬܶܩ ܐ̱ܢܳܐ ܪܰܦܝܽܘܬܳܐ ܘܰܡܥܰܫܩܽܘܬܳܐ ܗܳܝ ܕܒܳܗ̇ ܠܰܛܠܳܝ̈ܶܐ ܡܪܰܒܶܝܢ ܚ̱ܢܰܢ܆ ܗܳܝ ܕܡܶܢܳܗ̇ ܐܺܝܬܰܝܗܽܘܢ ܦܫܺܝ̈ܩܶܐ ܠܘܳܬ ܪ̈ܓܺܝܓܳܬܳܐ ܘܰܠܘܳܬ ܟܽܠ ܨܰܚܢܽܘܬܳܐ^[19]. ܡܶܛܽܠ ܗܳܠܶܝܢ ܟܽܠܗܶܝܢ ܕܗܳܫܳܐ ܪ̈ܒ̣ܰܝ ܘܶܐܬܥܰܫ̈ܰܢܶܝܢ܆ ܥܰܡ ܫܦܺܝܥܽܘܬܳܐ ܣܰܓܺܝܐܬܳܐ ܐܳܦ ܩܰܘܡܬܳܐ ܫܰܒܪܳܝܬܳܐ܆ ܒܚܰܫܳܐ ܬܡܺܝܗܳܐ ܡܶܬܩܰܦܚܳܐ. ܟܰܕ ܪܳܕܝܳܐ ܡܰܢ ܠܠܳܐ ܡܰܪܓܫܳܢܽܘܬܳܐ ܕܺܝܠܰܢ ܕܠܳܐ ܟܳܐܶܒ ܠܰܢ܆ ܠܳܐ ܡܶܕܶܡ ܕܶܝܢ ܟܽܠ ܟܽܠܶܗ ܗܺܝ ܡܶܣܬܰܓܦܳܐ܆ ܐܰܝܟܰܢܳܐ ܕܳܐܦܠܳܐ ܠܰܛܠܳܝ̈ܶܐ ܗܳܢܽܘܢ ܕܰܒܒܶܝܬܠܚܶܡ ܡܶܢ ܗܶܪܽܘܕܺܝܤ ܐܶܬܩܰܛܰܠܘ܆ ܚܽܘܣܪܳܢܳܐ ܐܰܝܬܺܝ ܠܗܽܘܢ ܩܶܛܠܳܐ܆ ܕܫܰܢܺܝ ܐܰܥܒܰܪ ܐܶܢܽܘܢ ܩܰܠܺܝܠܳܐܺܝܬ ܡܶܢ ܚܰܝ̈ܶܐ ܗܳܠܶܝܢ ܬܥܺܝ̈ܫܶܐ ܘܙܰܒ̈ܢܳܝܶܐ܆ ܠܘܳܬ ܡܰܠܟܽܘܬܳܐ ܕܰܫܡܰܝܳܐ. ܚܠܳܦ ܓܶܝܪ ܟܽܠܗܶܝܢ ܥܰܣ̈ܩܳܬܳܐ ܘܰܡܥܺܝܩܳܢ̈ܝܳܬܳܐ ܗܳܠܶܝܢ ܕܡܶܬܬܰܝ̈ܬܝܳܢ ܗܳܪܟܳܐ܆ ܐܶܢܗܽܘ ܕܠܰܘ ܡܶܛܽܠ ܬܒܰܥܬܳܐ ܕܰܚ̈ܛܳܗܶܐ ܢܶܬܬܰܝ̈ܬܝܳܢ܆ ܦܽܘܪ̈ܥܳܢܶܐ ܢܶܗܘܽܘܢ ܠܗܽܘܢ ܠܗܳܢܽܘܢ ܕܶܐܬܢܰܣܺܝܘ ܒܗܳܠܶܝܢ ܕܰܐܝܟ ܗܳܟܰܢ܆ ܒܚܰܝ̈ܶܐ ܗܳܢܽܘܢ ܕܰܥܬܺܝܕܺܝܢ. ܐܳܦ ܓܶܝܪ ܬܰܡܳܢ܆ ܗܳܝ ܕܰܐܝܟ ܕܫܳܘܶܐ ܠܟܽܠܚܰܕ ܡܶܬܢܰܛܪܳܐ.

ܡܳܢܳܐ ܗܳܟܺܝܠ ܚܢܰܢ܆ ܗܳܢܽܘܢ ܕܗܳܠܶܝܢ ܫܳܡܥܺܝܢ ܚ̱ܢܰܢ܆ ܘܗܳܠܶܝܢ ܒܺܝ̈ܫܳܬܳܐ ܚܳܙܶܝܢ ܚ̱ܢܰܢ܆ ܗܳܠܶܝܢ ܕܰܠܥܶܠ ܡܶܢ ܪܺܝܫܰܢ ܡܶܟܺܝܠ ܬܰܠ̣̈ܝܳܢ. ܬܽܘܒ^[20] ܕܰܚܛܺܝܬܳܐ ܢܺܐܨܰܦ܆ ܠܘܳܬܗܶܝܢ ܟܰܕ ܠܘܳܬܗܶܝܢ ܕܽܐܘܪ̈ܚܳܬܳܐ ܕܰܐܒܕܳܢܳܐ ܢܶܪܕܶܐ܆ ܘܳܐܦܠܳܐ ܕܰܛܠܳܝ̈ܶܐ ܙܥܽܘܪ̈ܶܐ ܢܶܗܘܶܐ ܡܕܰܡܝܳܢ̈ܶܐ܆ ܐܳܦ ܓܶܝܪ ܠܗܳܢܽܘܢ ܟܰܕ ܡܶܢ ܨܶܒ̈ܘܳܬܳܐ ܡܣܰܓ̈ܦܳܢܝܳܬܳܐ ܡܰܪܚܩܺܝܢ ܠܗܽܘܢ ܐܰܒܳܗܰܝ̈ܗܽܘܢ܆ ܒܡܶܠܬܳܐ ܡܰܪܬܶܝܢ ܠܗܽܘܢ ܗܳܠܶܝܢ ܕܘܳܠ̈ܝܳܢ. ܘܳܐܡܪܺܝܢ: ܚܙܰܘ ܠܳܐ ܠܘܳܬ ܒܺܐܪܳܐ ܬܺܐܙܽܠ̱ܘܢ܆ ܕܕܰܠܡܳܐ ܒܥܽܘܡܩܳܐ ܬܶܦܠܽܘܢ. ܐܳܦܠܳܐ ܬܶܣܩܽܘܢ ܠܥܶܠܺܝܬܳܐ ܐܰܘ ܠܶܐܓܳܪܳܐ ܘܰܬܕܺܝܩܽܘܢ܆ ܕܕܰܠܡܳܐ ܒܳܬܰܪ ܪܺܝܫܟܽܘܢ^[21] ܬܶܚܬܽܘܢ ܘܰܬܡܽܘܬܽܘܢ. ܘܶܐܡܰܬܝ ܕܢܶܚܙܽܘܢ ܐܶܢܽܘܢ ܕܠܳܐ ܡܶܬܬܦܺܝܣܺܝܢ܆ ܘܕܰܠܘܳܬܗܶܝܢ ܟܰܕ ܠܘܳܬܗܶܝܢ ܪܳܗܛܺܝܢ܆ ܘܰܕܡܰܒܣܶܝܢ ܥܰܠ ܦܽܘܪܩܳܢܳܐ ܕܺܝܠܗܽܘܢ܆ ܘܠܳܐ ܡܶܬܬܰܟܣܺܝܢ ܒܡܰܪ̈ܬܝܳܢܘܳܬܳܐ܆ ܗܳܝܕܶܝܢ ܡܶܟܺܝܠ ܡܩܺܝܡܺܝܢ ܥܰܠ ܕܽܘܟ̈ܝܳܬܳܐ ܗܳܢܶܝܢ ܦܰܪ̈ܨܽܘܦܽܘܢܶܐ ܡܶܕܶܡ ܕܚܺܝ̈ܠܶܐ ܘܕܶܡ̈ܘܳܬܳܐ ܕܚܰܝ̈ܘܳܬ ܫܶܢܳܐ܆ ܕܣܳܦ̈ܩܳܢ ܕܰܢܣܰܪ̈ܕܳܢ ܐܶܢܽܘܢ ܘܰܢܙܻܝ̈ܥܳܢ. ܘܟܰܕ ܡܰܘܒܠܺܝܢ ܠܗܽܘܢ ܘܰܡܚܰܘܶܝܢ ܠܗܽܘܢ܆ ܥܰܡ ܓܙܳܡܳܐ ܡܶܕܶܡ ܡܰܕܚܠܺܝܢ ܠܗܽܘܢ ܘܳܐܡܪܺܝܢ: ܠܳܐ ܬܽܘܒ ܬܕܽܘܫܽܘܢ ܒܕܽܘܟ̈ܝܳܬܳܐ ܗܳܠܶܝܢ. ܘܶܐܢ ܕܶܝܢ ܠܳܐ܆ ܡܶܢ ܗܳܠܶܝܢ ܕܡܶܬܚܰܙܝ̈ܳܢ ܠܟܽܘܢ ܬܶܬܐܰܟܠܽܘܢ. ܘܗܳܢܽܘܢ ܕܶܝܢ ܟܰܕ ܕܰܚܺܝܠܺܝܢ ܘܪܳܥܠܺܝܢ܆ ܒܕܶܚܠܬܳܐ ܠܬܰܪܥܺܝܬܗܽܘܢ ܬܳܟܣܺܝܢ܆ ܘܙܳܢܩܺܝܢ ܡܶܢܗܽܘܢ ܠܰܥܝܳܕܳܐ ܡܣܰܓܦܳܢܳܐ.

ܐܳܦ ܚܢܰܢ ܗܳܟܺܝܠ ܝܰܘܡܳܢܳܐ܆ ܗܰܒܘ ܠܺܝ ܓܶܝܪ ܕܥܰܡ ܫܽܘܒܩܳܢܳܐ ܐܺ݀ܡܰܪ: ܥܰܠ ܕܡܶܛܽܠ ܦܽܘܪܩܳܢܳܐ ܐܺܝܬܶܝܗ̇ ܡܶܠܬܳܐ܆ ܐܰܝܟ ܕܰܠܘܳܬ ܛܠܳܝ̈ܶܐ ܠܘܳܬܟܽܘܢ ܐܶܬܩܰܪܰܒܢܰܢ. ܡܶܢܩܕܺܝܡ ܓܶܝܪ܆ ܟܰܕ ܐܰܝܟ ܕܰܠܓܰܒܪ̈ܶܐ ܡܰܠܶܠܢܰܢ ܠܟܽܘܢ܆ ܒܡܶܠܬܳܐ ܚܰܘܺܝܢܰܢ ܐܶܢܶܝܢ ܠܟܽܘܢ ܠܒܺܝ̈ܫܳܬܳܐ. ܗܳܫܳܐ ܕܶܝܢ ܟܰܕ ܛܰܥܝܳܐܺܝܬ ܚܳܙܶܝܢ ܚ̱ܢܰܢ ܠܟܽܘܢ܆ ܕܬܽܘܒ ܠܘܳܬ ܚܶܙܘܳܢ̈ܶܐ ܐܳܙܺܠ̱ܝܢ ܐܢ̱ܬܽܘܢ܆ ܘܰܠܘܳܬ ܐܰܫܺܝܕܽܘܬܳܐ ܘܪܰܦܝܽܘܬܳܐ ܕܬܰܡܳܢ ܘܰܐܒܕܳܢܳܐ ܘܰܚܒܳܠܳܐ ܕܢܰܦܫܳܐ܆ ܐܰܝܟ ܕܠܰܛܠܳܝ̈ܶܐ ܚܰܘܺܝܢܰܢ ܠܟܽܘܢ. ܠܰܘ ܕܶܡ̈ܘܳܬܳܐ ܡܰܛܥ̈ܝܳܢܝܳܬܳܐ ܘܕܰܥܒܺܝ̈ܕܳܢ ܒܽܐܘܡܳܢܽܘܬܳܐ܆ ܘܡܶܬܚܰܟ̈ܡܳܢ ܕܶܚܠܬܳܐ ܗܳܝ ܕܠܳܐ ܐܺܝܬܶܝܗ̇܆ ܐܶܠܳܐ ܗܶܢܶܝܢ ܡܰܘ̈ܥܝܳܬܶܗ ܕܪܽܘܓܙܳܐ܆ ܐܰܝܟܰܢܳܐ ܕܒܰܚܙܳܬܳܐ ܢܕܰܚܶܠ ‌ܐܶܢܽܘܢ܆ ܠܗܳܢܽܘܢ ܕܡܶܠܬܳܐ ܠܳܐ ܟܠ̣ܳܬ^[22] ܐܶܢܽܘܢ.

ܗܳܟܰܢܳܐ ܐܳܦ ܐܰ‌ܠܳܗܳܐ ܠܗܳܢܽܘܢ ܕܡܶܢ ܐܺܝܣܪܳܐܶܝܠ ܕܫܰܒܪܳܐܺܝܬ ܘܝܰܬܺܝܪ ܠܳܐ ܡܫܰܡܠܝܳܐܺܝܬ ܣܺܝܡܺܝܢ ܗ̱ܘܰܘ ܒܝܰܕ ܢܒܺܝ̈ܶܐ ܡܶܬܩܰܪܰܒ ܗ̱ܘܳܐ. ܟܰܕ ܓܶܝܪ ܙܰܒ̈ܢܳܬܳܐ ܣܰܓܺܝ̈ܳܐܬܳܐ ܓܳܙܶܡ ܗ̱ܘܳܐ ܠܗܽܘܢ ܚܽܘܪܒܳܗ̇ ܕܽܐܘܪܫܠܶܡ܆ ܠܳܐ ܫܳܡܥܺܝܢ ܗ̱ܘܰܘ. ܘܡܶܟܺܝܠ܆ ܒܚ̈ܶܙܘܶܐ ܕܚܺܝ̈ܠܶܐ ܕܺܝܠܗܽܘܢ ܕܣܽܘܥܪ̈ܳܢܶܐ ܕܩܳܕܡܺܝܢ ܡܛܰܦܣܺܝܢ ܠܶܗ ܠܰܓܙܳܡܳܐ܆ ܐܰܝܟ ܕܰܠܒܳܒܽܘܣ̈ܶܐ ܡܕܰܚܶܠ ܗ̱ܘܳܐ ܠܗܽܘܢ. ܘܰܠܘܳܬ ܐܶܪܰܡܝܳܐ ܐܳܡܰܪ ܗ̱ܘܳܐ: ܙܶܠ ܘܰܙܒܰܢ ܒܰܓܒܽܘܓܳܐ ܓܒܺܝܠܳܐ ܕܚܶܨܦܳܐ܆ ܘܬܰܝܬܶܐ ܡܶܢ ܩܰܫܺܝ̈ܫܶܐ ܕܥܰܡܳܐ ܘܡܶܢ ܩܰܫܺܝ̈ܫܶܐ ܕܟܳܗ̈ܢܶܐ܆ ܘܬܶܦܽܘܩ ܠܒܶܝܬ ܩܒܽܘܪ̈ܶܐ ܕܰܒ̈ܢܰܝܳܐ ܕܺܝܠܗܽܘܢ ܗܳܢܽܘܢ ܕܡܺܝܬܘ܆ ܘܬܶܬܒܪܺܝܘܗ̱ܝ ܠܒܰܓܒܽܘܓܳܐ ܠܥܺܢܰܝ̈ܗܽܘܢ ܕܓܰܒܪ̈ܶܐ ܗܳܢܽܘܢ ܕܢܳܦܩܺܝܢ ܥܰܡܳܟ. ܘܬܺܐܡܰܪ ܠܗܽܘܢ܆ ܗܳܠܶܝܢ ܐܳܡܰܪ ܡܳܪܝܳܐ ܕܚܰܝ̈ܠܰܘܳܬܳܐ. ܗܳܟܰܢܳܐ ܐܶ݀ܬܒܽܘܪ ܠܥܰܡܳܐ ܗܳܢܳܐ ܘܠܰܡܕܺܝܢ̱ܬܳܐ ܗܳܕܶܐ܆ ܐܰܝܟܰܢܳܐ ܕܡܶܬܬܒܰܪ ܡܳܐܢܳܐ ܕܚܶܨܦܳܐ܆ ܗܰܘ ܕܠܳܐ ܡܶܫܟܰܚ ܬܽܘܒ ܠܡܶܬܰܐܣܳܝܽܘ. ܗܳܟܰܢܳܐ ܐܶ݀ܥܒܶܕ ܠܕܽܘܟܬܳܐ ܗܳܕܶܐ ܐܳܡܰܪ ܡܳܪܝܳܐ܆ ܘܰܠܗܳܢܽܘܢ ܕܥܳܡܪܺܝܢ ܒܳܗ̇. ܕܶܐܬܠܺܝܗ̇ ܠܰܡܕܺܝܢ̱ܬܳܐ ܗܳܕܶܐ܆ ܐܰܝܟ ܐܰܪܥܳܐ ܕܚܰܪܒܳܐ^[23].

ܐܳܦ ܠܚܰܙܩܺܝܐܶܝܠ ܕܶܝܢ ܦܳܩܶܕ ܗ̱ܘܳܐ܆ ܕܰܒܝܰܕ ܛܽܘܦܣ̈ܶܐ ܕܕܳܡܶܝܢ܆ ܘܒܺܐܝ̈ܕܶܝܗ̇ ܕܺܝܠܳܗ̇ ܕܰܡܚܰܘܝܳܢܽܘܬܳܐ ܕܣܽܘܥܪ̈ܳܢܶܐ ܢܰܟܶܤ ܠܰܒܥܺܝܪܳܝܽܘܬܶܗ ܘܰܠܠܳܐ ܡܠܺܝܠܽܘܬܶܗ ܕܥܰܡܳܐ܆ ܘܠܰܥܝܳܕܳܐ ܗܰܘ ܡܚܰܠܛܳܐ ܘܰܠܕܽܘܒܳܪܳܐ܆ ܘܰܠܫܶܒܝܳܐ ܗܰܘ ܕܡܶܛܽܠ ܗܳܕܶܐ ܡܶܣܬܰܟܶܐ ܠܗܽܘܢ܆ ܘܰܠܟܰܦܢܳܐ ܗܰܘ ܕܒܶܗ ܘܰܠܬܽܘܪܣܳܝܳܐ ܗܰܘ ܕܡܶܐܟ̈ܠܳܬܳܐ ܛܰܡ̈ܳܐܬܳܐ ܘܕܰܠܒܰܪ ܡܶܢ ܢܳܡܽܘܣܳܐ. ܣܰܒ ܠܳܟ ܓܶܝܪ ܐܶܡܰܪ ܠܶܗ: ܚ̈ܶܛܶܐ ܘܰܣܥܳܪ̈ܶܐ ܘܓܽܘ̈ܡܶܐ ܘܰܛܠܰܦ̈ܚܶܐ ܘܦܰܪܓܳܐ ܘܟܽܘ̈ܢܳܬܶܐ܆ ܘܬܰܪܡܶܐ ܐܶܢܽܘܢ ܒܡܳܐܢܐ ܚܰܕ ܕܦܰܚܳܪܳܐ܆ ܘܬܶܥܒܶܕ ܐܶܢܽܘܢ ܠܳܟ ܠܰܚܡܳܐ. ܘܡܶܐܟܽܘܠܬܳܐ ܕܺܝܠܳܟ ܗܳܝ ܕܬܶܐܟܽܘܠ ܒܡܰܬܩܳܠܳܐ ܥܶܣܪܺܝܢ ܣܝ̈ܩܠܘ^[24] ܒܝܰܘܡܳܐ. ܡܶܢ ܥܶܕܳܢܳܐ ܥܕܰܡܳܐ ܠܥܶܕܳܢܳܐ ܬܶܐܟܽܘܠ ‌ܐܶܢܽܘܢ. ܘܡܰܝ̈ܳܐ ܒܟܰܝܠܳܐ ܬܶܫܬܶܐ܆ ܚܕܳܐ ܡܶܢ ܫܶܬ ܡ̈ܢܰܘܳܬܶܗ ܕܺܐܝܢ. ܡܶܢ ܥܶܕܳܢܳܐ ܥܕܰܡܳܐ ܠܥܶܕܳܢܳܐ ܬܶܫܬܶܐ. ܘܛܰܪܡܽܘܣܳܐ ܕܰܣܥܳܪ̈ܶܐ ܬܶܐܟܽܘܠ ‌ܐܶܢܽܘܢ. ܒܰܟܒܰܝ̈ܳܐ ܕܙܶܒܠܳܐ ܐ̱ܢܳܫܳܝܳܐ ܬܶܛܡܽܘܪ ܐܶܢܽܘܢ ܠܥܺܢܰܝ̈ܗܽܘܢ^[25]܆ ܘܬܺܐܡܰܪ: ܗܳܠܶܝܢ ܐܳܡܰܪ ܡܳܪܝܳܐ ܐܰ‌ܠܳܗܳܐ ܕܺܐܝܣܪܳܐܶܝܠ. ܗܳܟܰܢܳܐ ܢܶܐܟܠܽܘܢ ܒܢܰܝ̈ܳܐ ܕܺܐܝܣܪܳܐܶܝܠ ܠܰܚܡܳܐ ܕܺܝܠܗܽܘܢ ܛܰܡܳܐܐ ܒܥܰܡܡ̈ܶܐ܆ ܐܰܝܟܰܢܳܐ ܕܶܐ݀ܒܰܕܰܪ ܐܶܢܽܘܢ ܬܰܡܳܢ.

ܐܶܠܳܐ ܐܳܦܠܳܐ ܐܶܫܰܥܝܳܐ ܗܰܘ ܢܒܺܝܳܐ܆ ܘܟܰܕ ܛܳܒ ܝܰܬܺܝܪ ܓܰܠܝܳܐܺܝܬ ܘܝܰܬܺܝܪ ܢܰܗܺܝܪܳܐܺܝܬ^[26] ܡܶܬܢܰܒܶܐ ܗ̱ܘܳܐ ܝܰܬܺܝܪ ܡܶܢ ܗܳܢܽܘܢ ܐ̱ܚܪ̈ܳܢܶܐ܆ ܐܺܝܬܰܘܗ̱ܝ ܗ̱ܘܳܐ ܠܳܐ ܡܫܰܘܬܦܳܐ ܕܳܐܕܫܳܐ ܗܳܢܳܐ ܕܡܰܪܬܝܳܢܽܘܬܳܐ. ܡܶܬܦܩܶܕ ܗ̱ܘܳܐ ܓܶܝܪ ܕܥܰܪܛܶܠܳܝܳܐ ܢܗܰܠܶܟ ܘܰܕܠܳܐ ܣܐܽܘܢܳܐ܆ ܐܰܝܟܰܢܳܐ ܕܰܠܥܰܪܛܶܠܳܝܽܘܬܳܐ ܘܰܠܫܶܒܝܳܐ ܡܰܪܺܝܪܳܐ ܕܐ̱ܢܳܫܺܝ̈ܢ ܢܚܰܘܶܐ.

ܗܳܠܶܝܢ ܕܶܝܢ܆ ܘܠܳܐ ܡܶܛܽܠ ܡܶܕܶܡ ܐ̱ܚܪܺܢܳܐ ܡܶܣܬܰܥܪ̈ܳܢ ܗ̱ܘܰܝ̈܆ ܐܶܠܳܐ ܡܶܛܽܠ ܗܳܝ ܕܗܳܢܽܘܢ ܕܫܳܡܥܺܝܢ ܗ̱ܘܰܘ ܕܺܐܝܬܰܝܗܽܘܢ ܗ̱ܘܰܘ ܥܒܰܝ̈ܳܐ ܒܬܰܪܥܺܝܬܳܐ ܘܫܰܒܪ̈ܳܢܳܝܶܐ ܘܕܰܒܡܶܠܬܳܐ ܠܳܐ ܡܶܬܬܰܪܬܶܝܢ܆ ܒܰܚܙܳܬܗܽܘܢ ܕܣܽܘܥܪ̈ܳܢܶܐ ܢܶܬܚܰܡܨܽܘܢ܆ ܘܰܒܕܶܚܠܬܳܐ ܘܒܽܐܘܠܨܳܢܳܐ ܢܶܙܕܰܪܒܽܘܢ.

ܢܶܕܚܰܠ ܗܳܟܺܝܠ ‌ܐܳܦ ܚܢܰܢ܆ ܕܠܰܘ ܛܽܘܦܣ̈ܶܐ ܕܒܺܝ̈ܫܳܬܳܐ ܗܳܢܶܝܢ ܕܰܥ̈ܬܺܝܕܳܢ ܕܢܶܗܘ̈ܝܳܢ ܚܙܰܝܢܰܢ܆ ܐܶܠܳܐ ܠܗܽܘܢ ܠܫܽܘܘ̈ܕܳܥܶܐ ܕܪܽܘܓܙܳܐ. ܠܳܐ ܠܘܳܬ ܩܰܪܺܝܒܶܗ ܟܽܠ ܚܰܕ ܢܚܽܘܪ ܘܢܶܣܒܰܪ ܠܶܗ܆ ܕܰܒܝܰܕ ܐ̱ܚܪ̈ܳܢܶܐ ܕܰܡܢܺܝܚܺܝܢ ܠܰܐܠܳܗܳܐ ܡܶܬܦܪܶܩ ܗܽܘ. ܟܽܠܢܳܫ ܢܶܚܫܽܘܒ܆ ܕܡܶܛܽܠܳܬܶܗ ܥܬܺܝܕ ܠܡܶܐܬܳܐ ܪܽܘܓܙܳܐ܆ ܐܶܢܗܽܘ ܕܠܳܐ ܢܶܬܗܦܰܟ ܢܶܫܬܰܚܠܰܦ ܠܘܳܬ ܗܳܝ ܕܰܡܝܰܬܪܳܐ. ܐܶܢ ܓܶܝܪ ܠܰܘ ܚܢܰܢ ܒܰܢ ܢܚܽܘܪ܆ ܐܶܠܳܐ ܒܰܐܚܪ̈ܳܢܶܐ ܢܶܗܘܽܘܢ ܠܰܢ ܣܶܒܪ̈ܶܐ܆ ܢܩܰܘܶܐ ܟܽܠܰܢ ܒܰܛܺܝ̈ܠܶܐ܆ ܘܰܕܠܳܐ ܡܶܕܶܡ ܐܺܝܬ ܠܰܢ ܙܘ̈ܳܕܶܐ ܕܦܽܘܪܩܳܢܳܐ. ܘܬܶܬܠܰܚܰܡ ܠܰܢ ܟܺܐܢܳܐܺܝܬ܆ ܗܳܝ ܕܰܒܝܰܕ ܐܶܪܰܡܝܳܐ ܐܶܬܰܐܡܪܰܬ: ܪܗܰܛܘ ܐܶܬܟܰܪܟ̥ܘ ܒܽܐܘܪ̈ܚܳܬܳܐ ܕܽܐܘܪܫܠܶܡ܆ ܘܰܚܙܰܘ ܘܕܰܥܘ܆ ܘܰܒܥܰܘ ܒܦܳܠ̈ܛܘܳܬܳܗ̇܆ ܐܶܢ ܬܶܫܟܚܽܘܢ ܒܳܗ̇ ܓܰܒܪܳܐ܆ ܐܶܢ ܢܶܫܬܟܰܚ ܐ̱ܢܳܫ ܕܥܳܒܶܕ ܕܺܝܢܳܐ ܘܒܳܥܶܐ ܗܰܝܡܳܢܽܘܬܳܐ܆ ܘܰܡܚܰܣܝܳܢܳܐ ܐܶ݀ܗܘܶܐ ܠܳܗ̇^[27].

ܚܙܰܘ ܪܘܺܝܚܽܘܬܳܗ̇ ܕܪܶܚܡܰܬ ܐ̱ܢܳܫܽܘܬܳܐ. ܠܚܰܕ ܒܰܠܚܽܘܕܰܘܗ̱ܝ ܨܳܒܶܐ ܕܰܢܫܰܟܢܺܝܘܗ̱ܝ ܠܦܽܘܪܩܳܢܳܐ ܗܰܘ ܓܰܘܳܢܳܝܳܐ ܘܠܳܐ ܡܶܫܟܰܚ. ܐܳܦ ܓܶܝܪ ܐܺܝܬ ܐܶܡܰܬܝ܆ ܕܳܐܦ ܡܝܰܬܪܽܘܬܳܐ ܘܙܰܕܺܝܩܽܘܬܳܐ ܡܫܰܡܠܰܝܬܳܐ ܕܚܰܕ ܓܰܒܪܳܐ܆ ܝܳܗܒܳܐ ܫܦܺܝܥܳܐܺܝܬ ܦܽܘܪܩܳܢܳܐ ܕܟܽܠܳܗ̇ ܡܕܺܝܢ̱ܬܳܐ. ܐܶܠܳܐ ܠܡܰܚܣܶܢ ܐܺܝܬ ܠܡܶܫܟܳܚܽܘ ܛܳܒܬܳܐ ܗܳܝ ܕܪܺܝܫܳܝܳܐ܆ ܓܰܒܪܳܐ ܕܡܶܫܟܰܚ ܕܢܶܟܠܶܐ ܪܽܘܓܙܳܐ܆ ܘܰܕܢܶܫܬܡܰܥ ܡܶܢ ܐܰ‌ܠܳܗܳܐ. ܥܒܳܕܳܐ ܗ̱ܝ ܓܶܝܪ ܠܡܶܫܟܳܚܽܘ ܓܰܒܪܳܐ ܡܗܰܝܡܢܳܐ^[28]܆ ܗܳܝ ܕܳܐܡܰܪ ܟܬܳܒܳܐ ܐܰ‌ܠܳܗܳܝܳܐ. ܐܳܦ ܓܶܝܪ ܗܰܝܡܳܢܽܘܬܳܐ ܕܡܶܬܚܰܘܝܳܐ ܡܰܘܕܰܥ ܙܰܕܺܝܩܳܐ. ܗܳܢܰܘ ܕܶܝܢ ܕܰܒܝܰܕ ܥ̈ܒܳܕܶܐ ܡܶܬܓܰܠܝܳܐ܆ ܘܠܰܘ ܕܰܒܠܶܫܳܢܳܐ ܘܰܒܣܶܦ̈ܘܳܬܳܐ ܡܶܬܪܰܘܪܒܳܐ.

ܡܶܛܽܠ ܗܳܟܺܝܠ ܕܟܽܠܰܢ ܐܺܝܬܰܝܢ ܡܶܣ̈ܟܺܢܶܐ ܘܰܕܚܰܣܺܝܪܺܝܢ ܡܶܢ ܡܝܰܬܪܽܘܬܳܐ܆ ܐܰܟܙܢܳܐ ܕܰܒܓܶܒ̈ܝܳܬܳܐ ܕܟܽܘ̈ܢܳܫܶܐ܆ ܟܽܠܚܰܕ ܐܰܝܟ ܚܰܝܠܶܗ ܢܶܦܠܰܚ ܛܳܒܬܳܐ܆ ܘܢܰܥܶܠ ܠܥܽܘܕܪܳܢܳܐ ܕܓܰܘܳܐ. ܕܣܳܦܩܳܐ ܓܶܝܪ ܬܶܗܘܶܐ܆ ܗܳܝ ܕܡܶܢ ܟܽܠܰܢ ܡܶܬܟܰܢܫܳܐ܆ ܕܰܡܚܰܣܝܳܢܳܐ ܬܶܥܒܕܺܝܘܗ̱ܝ ܠܰܐܠܳܗܳܐ ܢ݀ܨܰܠܶܐ. ܢ݀ܕܰܡܰܥ. ܢ݀ܚܰܡܣܶܢ. ܢ݀ܨܽܘܡ܆ ܟܰܕ ܡܶܢ ܟܽܠܳܗ̇ ܒܺܝܫܽܘܬܳܐ ܨܰܝܳܡ̈ܶܐ ܡܩܰܘܶܝܢ ܚ̱ܢܰܢ. ܢܶ݀ܦܣܽܘܩ ܪܶܗܛܳܐ. ܠܰܘ ܗܰܘ ܕܰܠܘܳܬ ܚ̈ܶܙܘܳܢܶܐ ܒܰܠܚܽܘܕ܆ ܐܶܠܳܐ ܐܳܦ ܗܰܘ ܕܰܠܘܳܬ ܒܶܝܬ ܕܺܝ̈ܢܶܐ. ܢܶ݀ܗܘܶܐ ܪ̈ܳܚܡܰܝ ܐ̱ܢܳܫܳܐ ܠܰܡܚܰܝ̈ܒܶܐ. ܐܳܦ ܚܢܰܢ ܓܶܝܪ ܡܣܳܡ ܒܪܺܝܫܳܐ ܢܶܣܒܽܘܠ. ܢܶ݀ܫܒܽܘܩ ܩܰܠܺܝܠ܆ ܒܕܰܣܢܺܝܩܺܝܢ ܚ̱ܢܰܢ ܥܰܠ ܫܽܘܒܩܳܢܳܐ ܣܰܓܺܝܳܐܐ. ܡܶܢ ܢܰܚ̈ܬܶܐ ܗܳܢܽܘܢ ܝܰܬܺܝܪ̈ܶܐ܆ ܢܶ݀ܬܶܠ ܠܗܳܢܽܘܢ ܕܡܶܣܟܺܢܺܝܢ. ܡܝܰܬܪܳܐ ܗ̱ܝ ܓܶܝܪ ܕܟܰܕ ܢܶܟܦܰܢ ܚܢܰܢ ܨܶܒܝܳܢܳܐܺܝܬ ܘܥܰܡ ܡܝܰܬܪܽܘܬܳܐ ܢܶܫܠܰܚ܆ ܐܰܘ ܟܰܕ ܬܺܐܬܶܐ ܗܳܝ ܕܠܳܐ ܬܶܗܘܶܐ ܡܰܥܒܕܳܢܽܘܬܗܽܘܢ ܕܫ̈ܺܐܕܶܐ܆ ܟܰܕ ܫܢܺܝ̣ܺܝ̣ܢ ܚ̱ܢܰܢ ܘܰܡܦܰܪܣܶܝܢ ܚ̱ܢܰܢ. ܚܕܳܐ ܥܶܙܰܩܬܳܐ ܕܕܰܗܒܳܐ ܐܰܘ ܥܶܩܳܐ ܬܪܺܝܡ ܐܰܢ̱ܬܬܳܐ܆ ܘܰܢܣܰܦܶܩ ܠܰܩ̈ܛܺܝܠܶܐ ܕܟܰܦܢܳܐ܆ ܩܕܳܡ ܕܰܒܫܺܫ̈ܠܳܬܳܐ ܬܶܬܶܐܣܰܪ ܘܰܒܟܶܒ̈ܠܶܐ. ܢܙܰܒܶܢ ܠܰܢ ܒܛܺܝܡܳܐ ܙܥܽܘܪܬܳܐ ܩܕܳܡ ܚܰܫܳܐ ܗܳܝ ܕܠܳܐ ܢܶܚܰܫ. ܗܳܝ ܟܺܝܬ ܕܗܳܢܽܘܢ ܕܚܰܫܘ܆ ܒܣܰܓܺܝ ܙܳܒܢܺܝܢ ܗ̱ܘܰܘ ܠܳܗ̇ ܩܕܳܡ ܕܢܶܣܒܠܽܘܢܳܝܗ̱ܝ ܠܢܶܣܝܳܢܳܐ.

ܥܰܕܰܪܘ ܠܥܺܕܬܳܐ ܕܰܥܡܺܝܠܳܐ ܘܰܒܚܰܘ̈ܒܳܬܳܐ ܛܥܺܝܢܳܐ ܝܽܘܩܪܳܐ ܘܰܡܛܰܒܥܳܐ܆ ܘܠܳܐ ܡܶܫܟܚܳܐ ܕܰܬܬܰܪܣܶܐ ܠܟܽܠܗܽܘܢ ܗܳܢܽܘܢ ܕܟܰܦܢܺܝܢ ܘܬܰܠܒܶܫ ܠܥܰܪ̈ܛܶܠܳܝܶܐ.

ܐܶܠܳܐ ܠܳܐ ܒܳܗܬܺܝܢ ܐ̱ܢܳܫܺܝ̈ܢ ܕܪ̈ܶܒܝܳܬܳܐ ܝܰܩܺܝܪ̈ܳܬܳܐ ܒܺܐܝ̈ܕܶܝܗ̇ ܬܳܒܥܺܝܢ ܠܶܗ ܠܰܡܫܺܝܚܳܐ܆ ܘܟܶܣܦܳܐ  ܝܳܗܒܺܝܢ ܠܶܗ ܒܪܶܒܺܝܬܳܐ܆ ܠܗܰܘ ܕܶܐܡܰܪ ܕܕܺܝܠܝ ܗ̱ܘ̣ ܣܺܐܡܳܐ ܘܕܺܝܠܝ ܗ̱ܘ̣ ܕܰܗܒܳܐ^[29]܆ ܘܝܰܗ̱ܒ ܥܽܘܬܪܳܐ܆ ܘܗܳܠܶܝܢ ܟܰܕ ܝܰܘ̈ܡܳܬܳܐ ܙܥܽܘܪ̈ܶܐ ܚܙܰܩܢܰܢ܆ ܕܚܳܙܶܝܢ ܠܗܽܘܢ ܠܡܶܣ̈ܟܺܢܶܐ ܕܠܰܝܬ ܠܗܽܘܢ ܕܡܶܢ ܐܰܝܟܳܐ ܢܺܚܽܘܢ܆ ܘܰܕܥܰܠ ܚܙܽܘܩܝܰܢ ܐܰܝܟ ܢܰܓܺܝܪܳܐ ܩܳܥܶܝܢ ܗ̱ܘܰܘ ܘܰܡܒܰܓܢܺܝܢ܆ ܐܶ‌ܠܽܘܠܳܐ ܕܰܢܣܰܒܘ ܗܳܠܶܝܢ ܥܶܣܪܳܐ ܫܳܡܽܘ̈ܢܶܐ ܕܰܐܝܟ ܥܝܳܕܳܐ. ܐܶܠܳܐ ܓܶܝܪ ܠܳܐ ܝܳܕܰܥ ܐ̱ܢܳܐ ܐܰܝܟܰܢܳܐ ܗܳܠܶܝܢ ܡ̈ܶܠܶܐ ܫܪ̈ܰܥܶܝܢ ܡܶܢ ܠܶܫܳܢܳܐ ܕܺܝܠܝ. ܕܰܚܺܝܠ ‌ܐ̱ܢܳܐ ܓܶܝܪ܆ ܕܕܰܠܡܳܐ ܢܶܫܬܰܚܩܽܘܢ ܥܠܰܝܢ ܡܰܘܙ̈ܦܳܢܶܐ܆ ܘܟܰܕ ܐܳܚܕܺܝܢ ܐܺܝ̈ܕܰܝܗܽܘܢ܆ ܐܳܦܠܳܐ ܠܡܰܘܙܳܦܽܘ ܢܶܨܛܒܽܘܢ. ܢܶܫܒܩܽܘܢ ܕܶܝܢ ܡܶܢ ܟܽܠܦܪܽܘܤ܆ ܡܶܛܽܠ ܕܟܰܕ ܝܰܨܺܝܦܺܝܢܰܢ ܕܦܽܘܪܩܳܢܗܽܘܢ ܗܳܠܶܝܢ ܐܶܡܰܪܢܰܢ܆ ܐܰܝܟܰܢܳܐ ܕܢܶܬܦܰܨܽܘܢ ܥܰܡܰܢ ܡܶܢ ܪܽܘܓܙܳܐ ܗܳܢܳܐ ܕܣܺܝܡ ܥܠܰܝܢ. ܘܟܰܕ ܡܶܬܪܰܚܡܺܝܢ ܥܰܠ ܡܶܣ̈ܟܺܢܶܐ ܐܰܝܟ ܕܰܟܬܺܝܒ: ܢܰܘܙܦܽܘܢܳܝܗ̱ܝ ܠܰܐܠܳܗܳܐ^[30]܆ ܗܰܘ ܕܡܶܢ ܠܘܳܬܶܗ ܢܳܣܒܺܝܢ ܦܽܘܪ̈ܥܳܢܶܐ ܥܰܬܺܝܪ̈ܶܐ ܘܪܰܘܪ̈ܒܶܐ܆ ܘܳܐܦ ܒܚܰܝ̈ܶܐ ܗܳܠܶܝܢ܆ ܘܳܐܦ ܒܡܰܠܟܽܘܬܳܐ ܗܳܝ ܕܰܫܡܰܝܳܐ. ܠܗܳܝ ܕܬܶܗܘܶܐ ܕܟܽܠܰܢ ܢܶܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܘܰܠܪܽܘܚܳܐ ܩܰܕܺܝܫܳܐ܆ ܦܐܶܐ ܟܽܠ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܫܬܝܢ ܘܰܬܪܝܢ.

ܐܪܡܝܐ. 15: 5 [1]

ܕܰܒܣܶܐ[2]

ܐܫܥܝܐ. 58: 5 [3]

ܡܝܟܐ. 1: 10 [4]

ܝܘܐܝܠ. 2: 12 ـ 13 [5]

ܡܗܰܠܶܟ. ܡܗܦܟ.[6]

ܡܙܡܘܪ̈ܐ. 102: 9 [7]

ܥܕܰܟܺܝܠ[8]

[9]ܡܬܝ. 24: 35  ܐܦ ܠܘܩܐ. 21: 33  ܐܦ ܡܪܩܘܣ. 13: 31

ܡܬܝ. 24: 48 ـ 51 [10]

ܘܪܰܩܺܝܩܽܘܬܳܗ̇. ܪܰܩܺܝܩܽܘܬܳܗ̇.[11]

ܡܙܡܘܪ̈ܐ. 118: 120 [12]

ܩܘܗܠܬ. 12: 12 [13]

ܕܬܬܡܗ[14]

ܡܶܬܚܰܘܝܳܐ[15]

 ܒܡܶܬܬܰܣܪܚܳܢܽܘܬܗܶܝܢ[16]

 ܠܡܰܪܕܽܘܬܳܐ[17]

ܥܒܪ̈ܝܐ. 13: 14 [18]

ܨܘܚܢܘܬܐ[19]

ܥܕܰܟܺܝܠ[20]

ܟܰܕ ܦܳܪܚܺܝܢ ܐܢܬܽܘܢ[21]

ܟܦ̣ܬ[22]

ܐܪܡܝܐ. 19: 1 ـ 2  ܐܦ 19: 10 ـ 12 [23]

ܡܰܬܩ̈ܳܠܶܐ[24]

ܚܙܩܝܐܝܠ. 4: 9 ـ 12 [25]

ܣܽܘܥܪܳܢܳܐܝܬ[26]

ܐܪܡܝܐ. 5: 1 [27]

ܡ̈ܬܠܐ. 20: 6 [28]

ܚܓܝ. 2: 9 [29]

ܡ̈ܬܠܐ. 19: 17 [30]