ܡܺܐܡܪܳܐ ܕܶܫܬܺܝܢ ܘܚܰܕ

ܥܰܠ ܦܽܘܢܳܝܶܗ ܗܰܘ ܕܡܶܢ ܒܳܬܰܪ ܣܳܥܽܘܪܽܘܬܳܐ ܕܕܰܝܪ̈ܳܬܳܐ ܗܳܠܶܝܢ ܩܰܕܺܝ̈ܫܳܬܳܐ. ܐܶܬܶܐܡܰܪ ܕܶܝܢ܆ ܒܕܽܘܟܪܳܢܶܗ ܕܩܰܕܺܝܫܳܐ ܝܽܘܚܰܢܳܢ ܪܰܗܳܛܳܐ ܩܰܕܡܳܝܳܐ ܘܡܰܥܡܕܳܢܳܐ.

61: ܡܽܘܫܶܐ ܡܰܢ ܗܰܘ ܡܫܰܡܫܳܢܳܐ ܕܢܳܡܽܘܣܳܐ ܐܰ‌ܠܳܗܳܝܳܐ܆ ܘܰܕܒܰܢ̈ܒܺܝܶܐ ܟܽܠܶܗ ܗܳܢܳܐ ܐܺܝܬܰܘܗ̱ܝ ܗ̱ܘܳܐ܆ ܐܰܝܟܰܢܳܐ ܕܢܺܐܡܰܪ ܡܶܛܽܠܳܬܶܗ ܟܬܳܒܳܐ ܟܳܗܢܳܝܳܐ܆ ܕܠܳܐ ܩܳܡ ܬܽܘܒ ܢܒܺܝܳܐ ܒܺܐܝܣܪܳܐܶܝܠ ‌ܐܰܝܟ ܡܽܘܫܶܐ܆ ܠܗܰܘ ܕܝܰܕܥܶܗ ܡܳܪܝܳܐ ܦܰܪܨܽܘܦܳܐ ܠܽܘܩܒܰܠ ܦܰܪܨܽܘܦܳܐ܆ ܘܒܰܡܕܰܒܪ̈ܳܢܰܝ ܥܰܡܳܐ ܠܥܶܠ ܡܶܢ ܟܽܠܢܳܫ܆ ܒܗܳܝ ܕܠܰܘ ܝܰܪܺܝܬ̣ܬܳܐ ܒܝܽܘܒܳܠܳܐ ܕܡܶܢ ܐ̱ܚܪ̈ܳܢܶܐ ܐܺܝܬܶܝܗ̇ ܗ̱ܘܳܬ ܠܶܗ ܪܺܝܫܳܢܽܘܬܳܐ܆ ܘܳܐܦܠܳܐ ܡܶܢ ܦܣܳܩܳܐ ܘܰܓܒܺܝܬܳܐ ܕܗܳܢܽܘܢ ܕܰܗܘ̣ܳܐ ܠܗܽܘܢ ܪܺܝܫܳܐ܆ ܐܶܠܳܐ ܟܰܕ ܡܶܢ ܪܶܡܙܳܐ ܕܡܶܢ ܠܥܶܠ܆ ܐܰܝܟܰܢܳܐ ܕܟܰܕ ܥܳܪܶܩ ܗ̱ܘܳܐ ܢܶܬܬܰܝܬܶܐ ܠܘܳܬ ܗܳܕܶܐ܆ ܘܟܰܕ ܫܳܘܰܪ ܗ̱ܘܳܐ ܘܪܳܥܶܠ ܡܶܢ ܪܰܒܽܘܬܶܗ ܕܣܽܘܥܪܳܢܳܐ܆ ܡܶܫܬܰܘܕܥܳܢܺܝܬܳܐ ܓܶܝܪ ܕܢܰܦܫܳܗ̇ ܐܺܝܬܶܝܗ̇ ܡܝܰܬܪܽܘܬܳܐ܆ ܘܰܠܘܳܬ ܒܨܺܝܪܽܘܬܳܐ ܒܟܽܠܙܒܰܢ ܡܶܬܩܰܦܣܳܐ܆ ܟܰܕ ܫܒܰܩ ܒܰܙܒܰܢ ܠܥܰܡܳܐ ܗܰܘ ܕܰܡܕܰܒܰܪ ܗ̱ܘܳܐ܆ ܒܪ̈ܶܓܠܰܘܗ̱ܝ ܡܰܢ ܣܠܶܩ ܗ̱ܘܳܐ ܠܘܳܬ ܩܰܪܩܰܦܬܳܐ ܕܛܽܘܪܳܐ ܗܰܘ ܕܰܒܚܽܘܪܺܝܒ܆ ܒܬܰܪܥܺܝܬܶܗ ܕܶܝܢ܆ ܠܘܳܬܶܗ ܕܰܫܡܰܝܳܐ ܡܡܰܢܰܥ ܗ̱ܘܳܐ. ܡܰܠܽܘܢ ܕܶܝܢ܆ ܠܘܳܬ ܡܳܪܝܳܐ ܕܰܫܡܰܝܳܐ ܘܕܰܐܪܥܳܐ ܘܰܕܟܽܠܳܗ̇ ܒܪܺܝܬܳܐ ܠܳܐ ܡܶܬܚܰܙܝܳܢܺܝܬܳܐ ܘܡܶܬܚܰܙܝܳܢܺܝܬܳܐ. ܘܒܺܐܝ̈ܕܰܝܳܐ ܡܰܢ ܡܩܰܒܶܠ ܗ̱ܘܳܐ܆ ܠܰܟܬܺܝܒܬܳܐ ܕܢܳܡܽܘܣܳܐ. ܒܢܰܦܫܳܐ ܕܶܝܢ ܡܶܬܶܐܪܶܙ ܗ̱ܘܳܐ܆ ܠܥܽܘܡܩܳܐ ܘܰܠܪܽܘܚܳܐ ܕܰܟܬܺܝܒܬܳܐ. ܘܡܶܛܽܠ ܡܰܫܟܢܳܐ ܕܣܳܗܕܽܘܬܳܐ ܗܰܘ ܕܰܥܬܺܝܕ ܗ̱ܘܳܐ ܕܢܶܬܬܰܩܰܢ܆ ܕܩܳܕܶܡ ܗ̱ܘܳܐ ܡܛܰܦܶܤ ܠܥܺܕܬܳܐ ܕܰܡܫܺܝܚܳܐ ܫܳܡܰܥ ܗ̱ܘܳܐ܆ ܚܙܺܝ ܬܶܥܒܶܕ ܟܽܠ ܡܶܕܶܡ܆ ܐܰܝܟ ܛܽܘܦܣܳܐ ܗܰܘ ܕܶܐܬܚܰܘܺܝ ܠܳܟ ܒܛܽܘܪܳܐ^[1].

ܘܰܒܗܳܢܳܐ ܙܢܳܐ ܟܰܕ ܐܰܪܒܥܺܝܢ ܝܰܘ̈ܡܳܬܳܐ ܒܬܶܐܽܘܪܺܝܰܐ ܒܰܠܚܽܘܕܶܝܗ̇ ܐܶܬܬܰܪܣܺܝ܆ ܘܠܳܐ ܠܰܚܡܳܐ ܐܳܦܠܳܐ ܡܰܝ̈ܳܐ ܛܥܶܡ܆ ܢܚܶܬ ܟܰܕ ܛܥܺܝܢ ܗ̱ܘܳܐ ܗܳܠܶܝܢ ܠܽܘܚ̈ܶܐ܆ ܕܟܺܐܦܳܐ ܡܰܢ܆ ܕܰܟܬܺܝ̈ܒܳܢ ܕܶܝܢ ܠܰܐܠܳܗܳܐ. ܘܟܰܕ ܠܬܰܡܳܢ ܠܰܚܕܳܪ̈ܰܝ ܡܰܫܪܺܝܬܳܐ ܒܕܽܘܟ ܢܚܶܬ܆ ܩܥܳܬܳܐ ܡܶܕܶܡ ܫܡܰܥ ܕܳܐܬܝܳܐ ܗ̱ܘܳܬ ܠܶܐܕܢܰܘ̈ܗ̱ܝ. ܗܳܝ ܕܶܝܢ ܐܺܝܬܶܝܗ̇ ܗ̱ܘܳܬ܆ ܕܥܰܡܳܐ ܕܰܪܘܶܐ ܗ̱ܘܳܐ ܪܰܘܳܝܽܘܬܳܐ ܥܦܺܝܦܬܳܐ. ܘܰܕܠܰܘ ܒܨܽܘܕܳܪܳܐ ܕܚܰܡܪܳܐ ܒܰܠܚܽܘܕ܆ ܐܶܠܳܐ ܐܳܦ ܒܗܰܘ ܕܕܶܚܠܰܬ ܦܬܰܟܪ̈ܶܐ ܡܶܬܒܰܝܕܰܠ ܗ̱ܘܳܐ. ܚܰܠܶܦܘ ܓܶܝܪ ܬܶܫܒܽܘܚܬܳܐ ܕܺܝܠܗܽܘܢ܆ ܗܳܝ ܕܳܐܡܰܪ ܟܬܳܒܳܐ ܗܰܘ ܟܳܗܢܳܝܳܐ܆ ܘܫܰܢܺܝܘ ܠܕܶܚܠܬܳܐ ܘܣܶܓܕܬܳܐ ܕܰܐ‌ܠܗܐ܆ ܠܘܳܬ ܥܶܓܠܳܐ ܢܣܺܝܟܳܐ^[2]. ܟܰܕ ܕܶܝܢ ܝܶܫܽܘܥ ܗܰܘ ܕܢܽܘܢ ܩܰܪܺܝܒ ܗ̱ܘܳܐ ܐܰܟܚܕܳܐ ܥܰܡܶܗ ܘܶܐܡܰܪ ܡܶܢ ܠܳܐ ܝܺܕܰܥܬܳܐ܆ ܩܳܠܐ ܕܰܩܪܳܒܳܐ ܒܡܰܫܪܺܝܬܳܐ^[3]܆ ܟܰܕ ܩܰܕܶܡ ܗܽܘ ܝܰܕܥܶܗ ܠܚܰܫܳܐ ܘܶܐܬܢܟܶܬ ܒܬܰܪܥܺܝܬܶܗ ܐܳܡܰܪ ܗ̱ܘܳܐ: ܕܠܳܐ ܐܺܝܬܰܘܗ̱ܝ ܩܳܠܳܐ ܕܗܳܢܽܘܢ ܕܰܡܥܰܢܶܝܢ^[4] ܒܚܰܝܠܳܐ܆ ܘܳܐܦܠܳܐ ܩܳܠܳܐ ܕܗܳܢܽܘܢ ܕܰܡܥܰܢܶܝܢ ܥܰܠ ܙܳܟܽܘܬܳܐ ܕܰܩܪܳܒܳܐ. ܐܶܠܳܐ ܩܳܠܳܐ ܕܗܳܢܽܘܢ ܕܰܡܥܰܢܶܝܢ ܥܰܠ ܚܰܡܪܳܐ ܫܳܡܰܥ ܐ̱ܢܳܐ ܐܶܢܳܐ. ܘܰܠܗܳܠܶܝܢ ܡ̈ܶܠܶܐ ܡܶܟܺܝܠ܆ ܗܺܝ ܚܙܳܬܶܗ ܕܥܶܓܠܳܐ ܡܩܰܒܠܳܐ ܗ̱ܘܳܬ܆ ܘܰܡܫܰܪܪ̈ܳܢ ܗ̱ܘܰܝ̈ ܠܡܰܫܡܰܥܬܳܐ ܗܳܠܶܝܢ ܕܡܶܬܚܰܙ̈ܝܳܢ ܗ̱ܘܰܝ̈ ܪܦܳܣܳܐ. ܓܽܘܚܟܳܐ. ܫܳܢܝܽܘܬܳܐ ܫܺܐܕܳܢܳܝܬܳܐ܆ ܘܡܰܘܥ̈ܝܳܬܳܐ ܕܗܳܠܶܝܢ ܕܫܰܪܟܳܐ ܕܪܰܘܳܝܽܘܬܳܐ. ܘܟܰܕ ܗܳܠܶܝܢ ܚܙܳܐ܆ ܠܳܐ ܣܰܥܪܶܗ ܢܰܬܶܫ. ܠܳܐ ܟܽܘܬܺܝܢܶܗ ܣܰܕܶܩ. ܠܳܐ ܥܰܦܪܳܐ ܒܕܰܪ ܥܰܠ ܪܺܝܫܶܗ. ܕܝܰܬܺܝܪ ܓܶܝܪ ܪܰܒ ܡܶܢ ܐܶܒܠܳܐ ܐܺܝܬܰܘܗ̱ܝ ܗ̱ܘܳܐ ܚܰܫܳܐ. ܐܶܠܳܐ ܠܠܽܘܚ̈ܶܐ ܬܰܒܰܪ܆ ܗܳܠܶܝܢ ܕܕܰܣܝܳܡ ܢܳܡܽܘܣܳܐ ܗܰܘ ܒܰܪܳܝܳܐ ܘܛܰܝܳܦܳܐ ܘܕܰܥܕܰܡܳܐ ܠܰܟܬܺܝܒܬܳܐ ܩܳܐܶܡ ܐܶܡܗ̈ܳܬܳܐ ܐܺܝܬܰܝܗܶܝܢ ܗ̱ܘܰܝ̈ ܡܶܢ ܟܰܕܽܘ܆ ܕܗܰܘ ܕܶܝܢ ܪܽܘܚܳܢܳܝܳܐ ܘܰܕܝܰܬܺܝܪ ܥܰܡܺܝܩ ܒܰܛܢ̈ܳܬܳܐ. ܒܚܰܫ̈ܶܐ ܓܶܝܪ ܣܰܩܽܘܒ̈ܠܳܝܶܐ܆ ܡܶܣܬܰܕܩܺܝܢ ܐܰܝܟܰܢ ܕܗܽܘ ܣܽܘܟܴ̈ܠܶܐ ܗܳܢܽܘܢ ܚܠܺܝ̈ܡܶܐ ܘܫܰܪܺܝܪ̈ܶܐ ܘܰܐ‌ܠܳܗܳܝ̈ܶܐ܆ ܘܠܰܡܩܰܘܳܝܽܘ ܥܰܠ ܠܶܒܰܘ̈ܳܬܳܐ ܫܪ̈ܰܝܳܐ ܘܰܐܫܺܝ̈ܕܶܐ ܘܰܕܠܳܐ ܕܟܶܝܢ ܠܳܐ ܡܶܬܪܡܶܝܢ.

ܐܳܦ ܐܶܢܳܐ ܕܶܝܢ ܒܨܺܝܪܳܐ܆ ܠܘܳܬ ܛܽܘܪܳܐ ܕܦܺܝܠܳܣܽܘܦܺܝܰܐ ܣܶܠܩܶܬ܆ ܟܰܕ ܠܗܳܢܽܘܢ ܕܚܰܝ̈ܶܐ ܡܥܰܠܰܝ̈ܳܐ ܘܰܕܕܳܡܶܝܢ ܠܩܰܪܩܰܦܬܳܐ ܕܛܽܘܪܳܐ ܚܳܐܶܝܢ ܘܕܽܘܒܳܪܳܐ ܕܰܝܪܳܝܳܐ ܡܶܬܕܰܒܪܺܝܢ ܗܳܫܳܐ ܣܶܥܪܶܬ. ܘܰܚܙܺܝܬ ܠܰܘ ܠܰܐܠܳܗܳܐ ܕܰܒܢܽܘܪܳܐ ܢܳܚܶܬ܆ ܐܶܠܳܐ ܓܰܒܪ̈ܶܐ ܕܰܒܢܽܘܪܳܐ ܐܰ‌ܠܳܗܳܝܬܳܐ ܡܶܬܓܰܘܙܠܺܝܢ܆ ܕܰܪ̈ܓܺܝܓܳܬܳܐ ܗܳܢܶܝܢ ܡܝܰܬܪ̈ܳܬܳܐ ܘܰܡܥܰܠ̈ܝܳܬܳܐ܆ ܘܕܰܠܘܳܬ ܫܡܰܝܳܐ ܣܳܠܩܺܝܢ. ܕܠܰܘ ܢܳܡܽܘܣܳܐ ܒܠܽܘܚ̈ܶܐ ܟܺܐܦܳܝ̈ܳܬܳܐ ܡܩܰܒܠܺܝܢ܆ ܐܶܠܳܐ ܕܰܒܠܽܘܚ̈ܶܐ ܕܠܶܒܳܐ ܐܺܝܬ ܠܗܽܘܢ ܕܰܟܬܺܝܒܺܝܢ ܢܳܡܽܘܣ̈ܶܐ ܕܪܽܘܚܳܐ. ܘܕܰܒܗܳܠܶܝܢ ܠܰܘ ܒܰܠܚܽܘܕ ܡܶܬܗܰܓܶܝܢ ܐܺܝܡܳܡܳܐ ܟܺܝܬ ܘܠܶܠܝܳܐ ܘܰܒܝܰܕ ܦܽܘܡܳܐ ܡܰܝܬܶܝܢ ܠܗܽܘܢ܆ ܐܶܠܳܐ ܘܰܕܒܰܥܒܳܕܳܐ ܡܡܰܠܶܝܢ ܠܗܽܘܢ܆ ܘܕܺܐܝܬܰܝܗܽܘܢ ܢܳܡܽܘܣܳܐ ܠܗܳܢܽܘܢ ܕܚܳܙܶܝܢ ܠܗܽܘܢ܆ ܕܕܽܘܒܳܪܳܐ ܕܰܠܘܳܬ ܚܰܝ̈ܶܐ ܗܳܢܽܘܢ ܕܰܥܬܺܝܕܺܝܢ ܡܥܰܬܶܕ܆ ܘܰܠܗܳܠܶܝܢ ܙܰܒ̈ܢܳܝܳܬܳܐ ܫܳܐܶܛ܆ ܘܰܡܫܰܢܶܐ ܘܡܰܪܚܶܩ ܡܶܢ ܚܒܳܠܳܐ ܗܰܘ ܕܰܒܗܳܢܳܐ ܥܳܠܡܳܐ܆ ܘܰܠܟܽܠܢܳܫ ܐܰܝܟ ܕܰܠܡܺܐܡܰܪ ܡܰܙܥܶܩ ܘܳܐܡܰܪ: ܗܰܘ ܡܳܐ ܕܰܡܫܺܝܚܳܐ ܠܘܳܬ ܫܠܺܝ̈ܚܶܐ ܐܰܙܥܶܩ܆ ܕܩܽܘܡܘ ܢܺ݀ܐܙܰܠ ܡܶܢ ܗܳܪܟܳܐ^[5].

ܠܡܰܠܰܐܟ̈ܶܐ ܓܶܝܪ ܐܺܝܬܰܝܗܽܘܢ ܫܰܘ̈ܝ̣ܰܝ̣ ܒܡܰܥܡܪܳܐ܆ ܟܰܕ ܠܠܳܐ ܚܳܫܽܘܫܽܘܬܳܐ ܘܛܽܘܒܬܳܢܽܘܬܳܐ ܕܰܩܝܳܡܬܳܐ ܩܳܕܡܺܝܢ ܚܳܛܦܺܝܢ܆ ܘܩܳܕܡܺܝܢ ܡܶܬܒܰܣܡܺܝܢ ܒܗܳܠܶܝܢ ܕܡܶܣ̈ܬܰܟܝܳܢ. ܒܗܳܝ ܕܰܟܦܰܪܘ ܒܫܽܘܚܠܳܦܳܐ ܗܰܘ ܕܰܒܕܶܟܪܳܐ ܘܰܒܢܶܩܒܬܳܐ܆ ܘܰܒܗܳܝ ܕܰܦܪܰܘ ܘܰܣܓܰܘ܆ ܕܺܐܝܬܶܝܗ̇ ܡܶܠܬܳܐ ܡܰܘܠܕܳܢܺܝܬܳܐ ܕܥܳܒܽܘܕܽܘܬ ܒܢܰܝ̈ܳܐ. ܐܳܦ ܓܶܝܪ ܫܳܡܥܺܝܢܰܢ ܠܶܗ ܠܦܳܪܽܘܩܰܢ ܕܶܐܡܰܪ: ܕܒܰܩܝܳܡܬܳܐ ܠܳܐ ܢܳܣܒܺܝܢ ܢܶܫ̈ܶܐ܆ ܘܠܳܐ ܢܶܫ̈ܶܐ ܗܳܘ̈ܝܳܢ ܠܓܰܒܪ̈ܶܐ. ܐܶܠܳܐ ܐܺܝܬܰܝܗܽܘܢ܆ ܐܰܝܟ ܡܰܠܰܐܟ̈ܶܐ ܕܰܐ‌ܠܳܗܳܐ ܒܰܫܡܰܝܳܐ^[6].

ܘܠܰܘ ܒܗܳܕܶܐ ܒܰܠܚܽܘܕ ܐܝܬܝܗ̇ ܠܗܽܘܢ ܡܕܰܡܝܳܢܽܘܬܳܐ ܠܘܳܬ ܚܰܝ̈ܠܰܘܳܬܳܐ ܡܶܬܗܰܘ̈ܢܳܢܶܐ܆ ܐܶܠܳܐ ܐܳܦ ܒܗܳܢܶܝܢ ܕܰܒܓܽܘ̈ܕܶܐ ܕܬܶܫܒ̈ܚܳܬܳܐ ܕܰܕܠܳܐ ܫܰܠܘܳܐ ܡܝܰܩܪܺܝܢ ܠܡܳܪܗܽܘܢ܆ ܟܰܕ ܒܰܙܡܺܝܪ̈ܳܬܳܐ ܗܳܠܶܝܢ ܕܠܳܐ ܥܳܩܬܳܐ ܘܰܕܠܳܐ ܚܰܫܳܐ ܡܫܰܕܠܺܝܢ ܘܰܡܚܰܬܚܬܺܝܢ ܠܳܗ̇ ܠܢܰܦܫܳܐ܆ ܘܰܣܒܺܝܣܳܐܺܝܬ ܒܰܣܝܳܡ ܒܽܘܪܟܳܐ ܣܶܓܕܬܳܐ ܡܩܰܪܒܺܝܢ ܠܗܰܘ ܒܰܠܚܽܘܕܰܘܗ̱ܝ܆ ܠܗܰܘ ܕܠܶܗ ܟܳܦܳܐ ܟܽܠ ܒܽܘܪܟܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ ܘܕܰܠܬܰܚܬ ܡܶܢ ܐܰܪܥܳܐ^[7]܆ ܘܥܳܒܕܺܝܢ ܫܽܘܠܳܡܳܐ ܕܙܽܘܡܳܪܳܐ܆ ܕܶܡܥܬܳܐ ܗܳܝ ܕܒܰܨܠܽܘܬܳܐ܆ ܗܳܝ ܕܡܳܪܩܳܐ ܫܽܘܚܬܳܐ ܡܶܢ ܒܰܪܢܳܫܳܐ ܗܰܘ ܕܰܒ̣ܠܳܐ ܘܰܐܥܬܶܩ ܡܶܢ ܚܛܺܝܬܳܐ܆ ܘܬܽܘܒ ܝܰܬܺܝܪ ܕܰܟܝܳܐܺܝܬ ܥܰܠ ܙܽܘܡܳܪܳܐ ܡܶܢ ܕܪܺܝܫ ܦܳܢܶܝܢ. ܘܶܐܡܰܬܝ ܕܰܢܢܽܘܚܽܘܢ ܡܶܢ ܙܡܺܝܪ̈ܳܬܳܐ܆ ܟܰܕ ܒܩܶܪܝܳܢܳܐ ܕܰܟ̈ܬܳܒܶܐ ܐܰ‌ܠܳܗܳܝ̈ܶܐ܆ ܠܦܺܐܪ̈ܶܐ ܕܦܰܪܕܰܝܣܳܐ ܩܳܛܦܺܝܢ܆ ܘܰܠܗܰܒܳܒ̈ܶܐ ܡܟܰܢܫܺܝܢ. ܘܟܰܕ ܒܦܰܓܪܳܐ ܡܰܢ ܥܰܠ ‌ܐܰܪܥܳܐ ܐܺܝܬܰܝܗܽܘܢ. ܒܗܰܘܢܳܐ ܕܶܝܢ܆ ܒܰܫܡܰܝܳܐ ܡܕܰܝܪܺܝܢ. ܡܶܛܽܠ ܡܶܐܟܽܘܠܬܳܐ ܕܶܝܢ ܟܽܠܶܗ ܗܳܢܳܐ ܝܰܨܺܝܦܳܐ ܠܗܽܘܢ܆ ܟܡܳܐ ܕܢܶܕܥܽܘܢ ܕܥܰܡ ܦܰܓܪ̈ܶܐ ܐܰܣܺܝܪܺܝܢ. ܗܳܝ ܕܳܐܦ ܢܳܣܒܺܝܢ ܠܳܗ̇܆ ܠܘܳܬ ܫܶܡܫܳܐ ܕܥܳܪܶܒ ܣܽܘܢܩܳܢܳܐ ܕܟܰܪܣܳܐ܆ ܟܰܕ ܒܠܰܚܡܳܐ ܒܰܠܚܽܘܕ ܘܰܒܡܰܝ̈ܳܐ ܘܰܒܒܽܘ̈ܫܳܠܶܐ ܕܡܶܢ ܙܰܪ̈ܥܽܘܢܶܐ ܥܳܒܕܺܝܢ ܠܢܰܦܫܗܽܘܢ^[8] ܒܽܘܝܳܐܳܐ.

ܚܣܳܡܳܐ ܠܰܝܬܰܘܗ̱ܝ ܬܰܡܳܢ. ܡܶܬܝܰܨܦܳܐ ܓܶܝܪ ܡܣܰܪܩܽܘܬܳܐ ܠܟܽܠܗܽܘܢ ܫܰܘܝܳܐܺܝܬ. ܒܰܛܺܝܠܺܝܢ ܢܶܟ̈ܠܶܐ ܕܥܰܠ ܚ̈ܕܳܕܶܐ. ܥܫܽܘ̈ܩܝܶܐ܆ ܘܢܽܘܬܳܦ̈ܶܐ ܗܳܢܽܘܢ ܕܰܒܒܶܝܬ ܕܺܝ̈ܢܶܐ^[9]. ܪܶܚܡܰܬ ܟܶܣܦܳܐ ܓܶܝܪ܆ ܗܳܝ ܥܶܩܳܪܳܐ ܕܟܽܠܗܶܝܢ ܒܺܝ̈ܫܳܬܳܐ ܡܰܒܥܕܳܐ ܡܶܢ ܗܳܠܶܝܢ^[10]. ܒܰܡܝܰܬܪܽܘܬܳܐ ܕܶܝܢ ܐܺܝܬܰܝܗܽܘܢ ܐܳܦ ܣܰܓܺܝ ܪ̈ܳܚܡܰܝ ܥܽܘܬܪܳܐ܆ ܘܰܕܡܶܢ ܟܽܠ ܕܽܘܟ ܡܟܰܢܫܺܝܢ ܠܳܗ̇. ܕܰܠܚܶܡܬܳܐ ܡܫܰܝܢܺܝܢ. ܕܠܰܡܡܰܫܚܽܘܬܳܐ ܕܡܶܠܬܳܐ ܡܶܬܥܰܢܘܶܝܢ. ܕܰܠܓܽܘܚܟܳܐ ܫܰܪܝܳܐ ܒܶܐܣܳܪܳܐ ܕܰܟܡܺܝܪܽܘܬܳܐ ܐܳܚܕܺܝܢ. ܘܠܰܐܫܺܝܕܽܘܬܳܗ̇ ܕܢܰܦܫܳܐ܆ ܠܘܳܬ ܥܽܘܗܕܢܳܐ ܕܫܽܘܢܳܩܳܐ ܕܠܳܐ ܫܽܘܠܳܡ ܗܰܘ ܕܰܓܙܺܝܡ ܡܰܦܢܶܝܢ ܡܰܣܩܺܝܢ. ܘܰܐܝܟ ܕܒܰܡܠܰܚܡܽܘܬܳܐ ܕܗܰܕܳܡ̈ܶܐ ܘܒܰܚܕܳܐ ܫܰܠܡܽܘܬܳܐ܆ ܠܡܰܨ̈ܠܚܳܢܘܳܬܳܐ ܕܰܚ̈ܕܳܕܶܐ܆ ܒܰܝ̈ܬܳܝܳܬܳܐ ܕܺܝܠܗܽܘܢ ܚܳܫܒܺܝܢ ܠܗܶܝܢ. ܐܳܦ ܗܳܠܶܝܢ ܕܶܝܢ ܕܰܠܒܽܘܫܳܐ܆ ܫܰܘܝܳܐܺܝܬ ܐܺܝܬܰܝܗܶܝܢ ܠܗܶܝܢ. ܕܰܡܟܰܣ̈ܝܳܢ ܡܰܢ ܘܰܡܫܰܚ̈ܢܳܢ ܒܥܰܒܝܽܘܬܗܶܝܢ܆ ܪ̈ܳܕܝܳܢ ܕܶܝܢ ܘܰܡܡܰܟ̈ܟܳܢ ܒܩܰܫܝܽܘܬܗܶܝܢ ܠܚܺܐܦܳܐ ܘܰܩܪܳܒܳܐ ܕܒܶܣܪܳܐ. ܡܶܢ ܗܳܪܟܳܐ ܟܽܠ ܫܓܽܘܫܝܳܐ ܛܪܺܝܕ. ܘܫܶܠܝܳܐ ܘܒܗܺܝܠܽܘܬܳܐ ܗܳܝ ܕܥܰܠ ܟܽܠ ܡܶܕܶܡ ܐܰܚܺܝܕܳܐ. ܘܡܰܝܬܝܽܘܬ ܐ̱ܪ̈ܳܙܶܐ ܢܶܩܪܶܝܘܗ̱ܝ ܐ̱ܢܳܫ ܟܺܐܢܳܐܺܝܬ ܠܕܽܘܒܳܪܳܐ ܕܗܳܢܽܘܢ܆ ܐܰܘ ܕܽܘܒܳܪܳܐ ܕܚܰܝ̈ܶܐ. ܗܳܢܽܘܢ ܕܳܐܦ ܠܚܰܝ̈ܶܐ ܗܳܠܶܝܢ ܕܗܳܪܟܳܐ ܫܰܪܺܝܪܳܐܺܝܬ ܚܳܐܶܝܢ܆ ܐܳܦ ܠܗܳܠܶܝܢ ܕܰܥܬܺܝܕܺܝܢ܆ ܝܰܬܺܝܪ ܫܰܪܺܝܪܳܐܺܝܬ ܢܺܚܽܘܢ.

ܡܶܛܽܠܗܳܕܶܐ ܐܳܦ ܐܶܢܳܐ ܥܠܰܝ ܕܰܡܥܶܬ܆ ܕܡܶܢ ܕܽܘܝܳܪܳܐ ܛܽܘܒܬܳܢܳܐ ܕܰܐܝܟ ܗܳܟܰܢܳܐ ܓܠܺܝܙ ܐ̱ܢܳܐ܆ ܘܰܠܘܳܬ ܥܽܘܡܩܳܐ ܕܰܒܟܳܬܳܐ ܢܶܚܬܶܬ̣܆ ܠܘܳܬ ܗܽܘܠܶܐ ܕܥܳܠܡܳܐ ܗܳܝ ܕܰܠܬܰܚܬ ܣܺܝܡܳܐ܆ ܘܰܠܗܰܘܢܳܐ ܡܕܰܒܪܳܢܳܐ ܘܕܰܠܥܶܠ ܡܶܬܬܰܝܬܶܐ ܠܬܰܚܬ ܢܳܬܦܳܐ܆ ܘܰܒܕܶܡ̈ܥܶܐ ܘܰܒܬܶܢ̈ܚܳܬܳܐ ܕܝܰܨܺܝ̈ܦܘܳܬܳܐ ܣܪ̈ܺܝܩܳܬܳܐ ܡܦܰܟܪܳܐ. ܘܟܰܕ ܬܰܡܳܢ ܐܺܝܬܰܝ ܗ̱ܘܺܝܬ̣܆ ܠܡܶܠܬܳܐ ܗܳܝ ܕܦܶܛܪܽܘܤ ܠܘܳܬ ܢܰܦܫܳܐ ܕܺܝܠܝ ܐܶܡܪܶܬ. ܒܳܥܝܳܐ ܐܰܢ̱ܬܝ ܕܢܶܥܒܶܕ ܗܳܪܟܳܐ ܚܕܳܐ ܡܛܰܠܬܳܐ^[11]܆ ܘܰܚܙܺܝܬܳܗ̇ ܕܰܡܛܰܝܒܳܐܺܝܬ ܪܶܗܛܰܬ ܘܫܶܠ̣ܡܰܬ ܠܗܳܕܶܐ. ܐܶܠܳܐ ܬܽܘܒ ܟܰܕ ܒܥܽܘܗܕܳܢܳܐ ܫܶܩܠܶܬ ܠܪܶܚܡܬܳܐ ܕܺܝܠܟܽܘܢ܆ ܘܠܰܡܙܰܘܓܽܘܬܳܐ ܘܫܰܘܬܳܦܽܘܬܳܐ ܗܳܝ ܕܒܳܗ̇ ܡܫܺܝܚܳܐ ܥܰܡ ܗܰܕܶܐ ܥܺܕܬܳܐ ܫܰܘܬܦܰܢܝ܆ ܗܳܝ ܕܰܠܩܽܘܒܠܳܐ ܡܰܪܬܝܳܐ ܗ̱ܘܳܬ ܠܺܝ ܟܰܕ ܐܳܡܪܳܐ: ܫܰܢܳܐ ܡܶܢ ܗܳܕܐ ܬܰܪܥܺܝܬܳܐ ܐܳܘ ܐܰܢ̱ܬ. ܐܰܣܺܝܪ ܐܰܢ̱ܬ ܒܰܐܢ̱ܬܬܳܐ܆ ܠܳܐ ܬܶܒܥܶܐ ܫܪܳܝܳܐ^[12]. ܒܛܺܝܡܳܐ ܐܶܙܕܒܶܢܢ ܘܪܰܒܬܳܐ ܒܰܕܡܳܐ ܕܰܡܫܺܝܚܳܐ^[13]܆ ܘܠܳܐ ܐܺܝܬܰܝܢ ܡܳܪ̈ܰܝܳܐ ܕܢܰܦܫܰܢ. ܠܳܐ ܗܳܟܺܝܠ ܨܶܒܝܳܢܳܐ ܕܺܝܠܰܢ܆ ܐܶܠܳܐ ܗܰܘ ܕܡܳܪܝܳܐ ܢܶܗܘܶܐ.

ܘܟܰܕ ܗܳܟܰܢܳܐ ܐܰܗܦܟܶܬ ܥܰܝܢܝ ܡܶܢ ܪܺܝܫ ܛܽܘܪܳܐ ܗܰܘ܆ ܡܶܢ ܚܰܝ̈ܶܐ ܗܳܢܽܘܢ ܡܥܰܠܰܝ̈ܳܐ ܐܳܡܰܪ ܐ̱ܢܳܐ ܘܕܰܠܘܳܬ ܫܡܰܝܳܐ ܦܳܪܚܺܝܢ ܕܗܳܢܽܘܢ ܕܰܝܪ̈ܳܝܶܐ܆ ܠܳܐ ܓܶܝܪ ܐ̱ܢܳܫ ܟܰܕ ܠܗܳܢܽܘܢ ܕܰܓ̈ܳܠܰܝ ܐܶܣܟܺܡܳܐ ܡܰܝܬܶܐ ܠܺܝ ܠܰܡܨܰܥܬܳܐ ܢܨܰܚܶܐ ܠܕܽܘܒܳܪܳܐ ܗܰܘ ܐܰ‌ܠܳܗܳܝܳܐ܆ ܡܶܛܽܠ ܕܳܐܦܠܳܐ ܠܰܫ̈ܠܺܝܚܶܐ ܨܽܘܚܺܝܬܳܐ ܐܰܝܬܺܝ܆ ܝܺܗܽܘܕܳܐ ܕܰܢܦܰܠ ܡܶܢ ܓܽܘܕܳܐ ܗܳܝ ܕܰܬܪܶܥܣܰܪܬܳܐ܆ ܠܘܳܬ ܡܰܚܰܬܬܳܐ ܚܳܪܶܬ. ܘܟܰܕ ܠܝܽܘܩܢܳܗ̇ ܕܗܳܕܶܐ ܥܺܕܬܳܐ ܟܢܺܝܟܬܳܐ ܒܬܰܪܥܺܝܬܝ ܫܶܩܠܶܬ܆ ܟܰܕ ܠܦܺܝܠܳܣܽܘܦܺܝܰܐ ܗܳܝ ܛܥܺܝܬ܆ ܟܽܘܠܺܝ ܕܺܝܠܳܗ̇ ܗܘܺܝܬ܆ ܘܰܕܚܰܝܳܒܳܐ ܐܺܝܬܰܝ ܡܶܬܚܰܫܰܒ ܗ̱ܘܺܝܬ܆ ܕܗܳܝ ܕܳܐܦ ܡܶܢ ܕܡܳܐ ܕܺܝܠܝ ܐܶ݀ܬܓܠܶܙ ܚܠܳܦܶܝܗ̇ ܟܰܕ ܙܰܒܢܳܐ ܩܳܪܶܐ. ܐܰܟܙܢܳܐ ܓܶܝܪ ܕܰܐܢ̱ܬܬܳܐ ܐ̱ܢܳܫ ܟܰܕ ܒܥܽܘܬܪܳܐ ܘܒܰܡܫܰܪܬܚܽܘܬܳܐ ܥܰܒܺܝܛܳܐ^[14]܆ ܘܒܰܫܒܺܝܚܽܘܬܳܐ ܕܓܶܢܣܳܐ ܘܰܒܦܰܐܝܽܘܬܳܐ ܕܡܶܢ ܫܽܘܦܪܳܐ ܡܶܬܟܰܢܟܳܐ ܘܡܶܫܬܰܒܗܪܳܐ܆ ܘܗܳܠܶܝܢ ܟܰܕ ܐܺܝܬܶܝܗ̇ ܡܝܰܩܰܪܬܳܐ ܐܰܝܟ ܕܒܰܫܪܳܪܳܐ ܒܰܢܛܽܘܪܬܳܐ ܘܰܒܛܰܒܥܳܐ ܕܢܰܟܦܽܘܬܳܐ܆ ܬܶܬܡܟܰܪ ܠܘܳܬ ܙܽܘܘܳܓܳܐ ܠܡܶܣܟܺܢܳܐ ܘܰܠܒܳܝܫܳܐ܆ ܕܳܐܦܠܳܐ ܡܶܕܶܡ ܟܽܠ ܟܽܠܶܗ ܐܺܝܬ ܠܶܗ ܤܛܰܪ ܡܶܢ ܙܢܰܝ̈ܳܐ ܕܢܺܝܚܽܘܬܳܐ܆ ܗܳܟܰܢܳܐ ܐܳܦ ܗܺܝ ܥܶܒܕܰܬ܆ ܠܺܝ ܕܺܐܝܬܰܝ ܡܶܣܟܺܢܳܐ ܘܥܰܪܛܶܠܳܝܳܐ ܡܶܢ ܟܽܠܳܗ̇ ܡܝܰܬܪܽܘܬܳܐ܆ ܘܰܕܠܳܐ ܡܶܕܶܡ ܐ̱ܚܪܺܢܳܐ ܩܢܶܐ ܐ̱ܢܳܐ ܐܶܠܳܐ ܐܶܢ ܟܳܪܽܘܙܽܘܬܳܐ ܬܪܺܝܨܬܳܐ ܕܗܰܝܡܳܢܽܘܬܳܐ܆ ܐܰܩܦܰܬ ܗܺܝ ܠܳܗ̇܆ ܘܰܠܘܳܬ ܓܢܽܘܢܳܐ ܐ̱ܪܳܙܳܢܳܝܳܐ ܐܰܣܩܰܬ. ܘܰܠܗܳܕܶܐ ܒܠܚܽܘܕ܆ ܚܠܳܦ ܟܽܠܶܗ ܥܽܘܬܪܳܐ ܚܶܫܒܰܬ. ܡܶܛܽܠ ܗܳܕܶܐ ܘܟܰܕ ܩܰܪܺܝܒ ܐ̱ܢܳܐ ܡܰܚܒܳܐ ܠܺܝ܆ ܘܟܰܕ ܪܰܚܺܝܩ ܐ̱ܢܳܐ ܒܳܥܝܳܐ ܠܺܝ.

ܟܰܕ ܓܶܝܪ ܗܺܝ ܐܺܝܬܶܝܗ̇ ܗܳܝ ܕܩܰܕܡܳܝܬܳܐ ܐܶܬܩܰܝܡܰܬ ܕܟܽܠܗܶܝܢ ܥ̈ܺܕܳܬܳܐ ܩܰܕܺܝ̈ܫܳܬܳܐ ܕܰܒܟܽܠ ܕܽܘܟ ܕܰܐܪܥܳܐ܆ ܘܰܠܗܰܘ ܕܰܫܡܰܥ ܕܰܐܢ̱ܬ ܗ̱ܘ̣ ܟܺܐܦܳܐ܆ ܘܥܰܠ ܗܳܕܶܐ ܟܺܐܦܳܐ ܐܶ݀ܒܢܶܝܗ̇ ܠܥܺܕܬܝ ܘܬܰܪ̈ܥܶܐ ܕܰܫܝܽܘܠ ܠܳܐ ܢܶܚܣܢܽܘܢܳܗ̇^[15]܆ ܘܰܕܠܰܩ̈ܠܺܝܕܶܐ ܕܡܰܠܟܽܘܬܳܐ ܕܰܫܡܰܝܳܐ ܢܣܰܒ. ܩܰܕܡܳܝܬܳܐ ܪܳܥܝܳܐ ܘܓܰܒܪܳܐ ܘܒܰܢܳܝܳܐ ܢܶܣܒܰܬ̣܆ ܘܰܐܝܟ ܕܰܠܪܳܥܝܳܐ ܡܰܢ ܢܩܰܦܬ̣ܶܗ܆ ܐܰܝܟ ܕܥܰܡ ܓܰܒܪܳܐ ܕܶܝܢ ܥܶܡܪܰܬ ܥܰܡܶܗ ܢܰܟܦܳܐܺܝܬ܆ ܘܰܠܘܳܬ ܥܝܳܕܶܗ ܠܶܚܡܰܬ ܠܰܙܢܳܐ ܒܰܝܬܳܝܳܐ ܕܺܝܠܳܗ̇܆ ܘܰܐܝܟ ܕܒܰܢܳܝܳܐ ܠܫܶܬܶܐܣܬܳܐ ܗܳܝ ܕܶܐܬܪܰܡܝܰܬ ܡܶܢܶܗ ܒܣܺܝ̈ܡܳܬܳܐ ܕܺܝܠܳܗ̇ ܛܰܫܝܰܬ܆ ܘܰܠܟܽܘܢܳܝܳܐ ܕܰܟܪ̈ܺܝܣܛܝܳܢܶܐ ܩܕܳܡ ܨܶܒ̈ܘܳܬܳܐ ܐ̱ܚܪ̈ܳܢܝܳܬܳܐ ܐܰܝܟ ܡܶܕܶܡ ܡܥܰܠܝܳܐ܆ ܒܰܕܡܽܘܬ ܐܶܤܛܠܳܐ ܡܰܠܟܳܝܬܳܐ ܘܕܰܐܪܓܘܳܢܳܐ ܡܥܰܛܦܳܐ܆ ܛܰܢܳܢܳܐܺܝܬ ܐܺܝܬ ܠܳܗ̇ ܠܘܳܬ ܗܳܕܶܐ ܝܰܬܺܝܪܳܐܝܬ܆ ܘܟܰܕ ܡܶܙܕܰܝܦܳܐ ܡܶܠܬܳܐ ܕܰܫܪܳܪܳܐ ܠܳܐ ܡܶܬܪܰܡܝܳܐ. ܘܰܠܰܩܰܦܺܝ̈ܠܶܐ ܕܰܒܗܳܠܶܝܢ ܐܰ‌ܠܳܗܳܝ̈ܳܬܳܐ ܠܰܡܣܰܝܒܳܪܽܘ ܠܳܐ ܡܶܫܟܚܳܐ. ܘܰܠ̱ܐܢܳܫܺܝ̈ܢ ܕܰܠܒܰܪ ܡܶܢ ܘܳܠܺܝܬܳܐ ܐܶܬܢܰܩܰܦܘ ܠܳܗ̇܆ ܘܺܐܝܬ ܐܶܡܰܬܝ ܕܳܐܦ ܙܰܒܢܳܐ ܣܰܓܺܝܳܐܐ ܥܡܰܪܘ ܥܰܡܳܗ̇܆ ܘܠܳܐ ܐܶܬܬܘܺܝܘ ܘܰܗܦܰܟܘ ܡܶܢ ܕܢܰܪܫܥܽܘܢ܆ ܟܰܕ ܟܬܳܒܳܐ ܕܕܽܘܠܳܠܳܐ ܝܶܗܒܰܬ ܠܗܽܘܢ^[16]܆ ܡܰܪܺܝܪܳܐܺܝܬ ܛܶܪܕܰܬ ܐܶܢܽܘܢ. ܘܟܰܕ ܒܣܶܢܶܐܬܳܐ ܟܺܐܢܬܳܐ ܣܢܳܬ ܐܶܢܽܘܢ܆ ܡܶܢ ܫܰܘܝܽܘܬ ܡܰܥܡܪܳܐ ܕܥܰܡܗܽܘܢ ܥܶܪܩܰܬ. ܠܰܘ ܐܰܝܟ ܐܰܝ̇ܕܳܐ ܕܺܐܝܬܶܝܗ̇ ܒܺܝܫܰܬ ܒܚܶܪܝܳܢܳܐ ܘܪܳܚܡܰܬ ܒܥܶܠܕܒܳܒܽܘܬܳܐ ܘܢܳܛܪܰܬ ܐܰܟܬܳܐ܆ ܘܰܕܠܳܐ ܝܳܕܥܳܐ ܕܰܬܣܰܝܒܰܪ ܒܽܘܨܳܪ̈ܶܐ ܡܶܣܬܰܝܒܪ̈ܳܢܶܐ ܕܓܰܒܪ̈ܶܝܗ̇. ܐܳܦ ܗܳܕܶܐ ܓܶܝܪ ܕܺܝܠܳܝܬܳܐ ܗ̱ܝ ܕܢܶܫ̈ܶܐ ܚܰܝ̈ܠܬܳܢܝܳܬܳܐ ܘܰܟܢܺܝ̈ܟܳܬܳܐ܆ ܐܶܠܳܐ ܟܰܕ ܦܶܣܩܰܬ ܣܰܒܪܳܐ ܕܠܳܐ ܡܶܬܐܰܣܝܳܢܳܐܺܝܬ ܐܺܝܬ ܠܗܽܘܢ܆ ܘܰܡܢܰܣܶܝܢ ܕܳܐܦ ܠܗܰܝܡܳܢܽܘܬܳܐ ܕܺܝܠܳܗ̇ ܢܫܰܚܠܦܽܘܢ܆ ܘܒܰܕܡܽܘܬ ܟܽܘܪܗܳܢܳܐ ܡܚܰܒܠܳܢܳܐ ܢܶܬܠܽܘܢ ܠܳܗ̇ ܡܶܢ ܚܒܳܠܳܐ ܒܰܝܬܳܝܳܐ ܗܰܘ ܕܺܝܠܗܽܘܢ.

ܡܶܛܽܠ ܗܳܕܶܐ ܠܰܘ ܒܰܠܚܽܘܕ ܡܶܬܟܰܚܰܕ ܐ̱ܢܳܐ ܡܶܢܳܗ̇܆ ܐܶܠܳܐ ܐܳܦ ܕܳܚܶܠ ‌ܐ̱ܢܳܐ ܐܳܦ ܪܳܥܶܠ ‌ܐ̱ܢܳܐ. ܘܰܐܝܟܰܢܳܐ ܕܓܰܒܪܳܐ ܗܰܘ ܡܰܟܺܝܟܳܐ ܘܢܺܝܚܳܐ܆ ܘܰܕܡܶܕܶܡ ܐ̱ܚܪܺܢܳܐ ܠܳܐ ܩܢܶܐ܆ ܠܚܺܐܪܽܘܬܳܐ ܕܰܙܢܰܝ̈ܳܐ ܕܺܝܠܶܗ܆ ܝܰܬܺܝܪܳܐܺܝܬ ܡܚܰܘܶܐ ܠܳܗ̇ ܕܟܺܝܬܳܐ ܘܫܰܪܺܝܪܬܳܐ܆ ܠܥܰܬܺܝܪܬܳܐ ܗܳܝ ܒܰܪ̱ܬ ܙܰܘܓܶܗ܆ ܐܰܝܟܰܢܳܐ ܕܰܕܝܰܬܺܝܪ ܪܚܺܝܡ ܢܶܗܘܶܐ܆ ܗܳܟܰܢܳܐ ܐܳܦ ܐܶܢܳܐ܆ ܠܡܶܠܬܳܐ ܕܗܰܝܡܳܢܽܘܬܳܐ܆ ܬܪܺܝܨܬܳܐ ܘܰܕܡܶܢ ܟܽܠ ܕܽܘܟ ܓܪܺܝܕܳܐ ܘܰܡܪܺܝܩܳܐ ܡܰܫܠܶܡ ܐ̱ܢܳܐ ܠܳܗ̇. ܘܰܐܝܟ ܕܥܰܠ ܡܰܬܩܳܠܳܐ ܕܣܰܓܺܝ ܝܰܬܺܝܪ ܚܰܬܺܝܬ̣ ܘܡܰܣܰܐܬܳܐ ܫܰܘܝܰܬ ܪ̈ܶܟܢܶܐ ܕܰܚܺܝܠ ‌ܐ̱ܢܳܐ܆ ܕܕܰܠܡܳܐ ܒܕܽܘܟ ܠܰܚܕܳܐ ܡܶܢ ܟܰܦ̈ܶܐ܆ ܐܰܘ ܩܰܠܺܝܠܬܳܐ ܘܰܣܦܺܝܩܬܳܐ ܐܶ݀ܥܒܕܺܝܗ̇ ܒܦܰܢܛܰܣܺܝܰܐ ܕܠܳܐ ܩܢܽܘܡܳܐ ܘܚܶܠܡܳܢܳܝܬܳܐ ܕܰܣܦܺܝܩܽܘܬܶܗ^[17] ܕܶܐܘܛܶܘܟ̥ܶܐ܆ ܘܰܒܚܰܣܺܝܪܽܘܬ ܗܰܘܢܶܗ ܕܰܐܦܽܘܠܺܝܢܰܪܺܝܽܘܤ ܕܦܳܣܩܳܐ ܠܗܰܘܢܳܐ ܡܶܢ ܡܶܬܒܰܪܢܫܳܢܽܘܬܳܐ ܐܰ‌ܠܳܗܳܝܬܳܐ܆ ܘܡܶܢ ܦܽܘܪܩܳܢܐ ܕܺܝܠܰܢ܆ ܠܰܨܒܽܘܬܳܐ ܗܳܝ ܕܺܐܝܬܶܝܗ̇ ܐܰܟܚܕܳܐ ܕܝܰܬܺܝܪ ܛܳܒܳܐ ܘܰܕܝܰܬܺܝܪ ܡܥܰܠܝܳܐ܆ ܐܰܘ ܝܰܩܺܝܪܬܳܐ ܐܶܚܰܘܶܐ ܘܕܰܠܘܳܬ ܐܰܪܥܳܐ ܠܬܰܚܬ ܡܶܬܢܰܓܕܳܐ܆ ܒܰܦܣܳܩܳܐ ܘܰܬܪܰܝܳܢܽܘܬܳܐ ܕܰܟܝܳܢ̈ܶܐ ܕܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܡܰܠܠܳܢܺܝܬܳܐ.

ܐܶܠܳܐ ܚܰܕ ܡܰܟܪܶܙ ܐ̱ܢܳܐ ܠܶܗ ܠܳܗ̇ ܠܝܶܫܽܘܥ܆ ܠܗܰܘ ܕܶܐܬܡܳܠܝ ܘܝܰܘܡܳܢܳܐ ܗܽܘ ܟܰܕ ܗܽܘ ܘܰܠܥܳܠܡܺܝܢ^[18]. ܗܰܘ ܕܰܒܚܰܪܬܳܐ ܕܙܰܒܢ̈ܶܐ ܘܰܩܕܳܡ ܟܽܠ ܥܳܠ̈ܡܶܐ܆ ܘܰܕܒܺܐܝܕܰܘ̈ܗ̱ܝ ܟܽܠܡܶܕܶܡ ܗܘ̣ܳܐ^[19]. ܠܶܗ ܟܰܕ ܠܶܗ ܕܚܰܫ ܒܰܒܣܰܪ܆ ܘܕܰܒܗܳܝ ܕܺܐܝܬܰܘܗ̱ܝ ܐܰ‌ܠܳܗܳܐ ܡܥܰܠܰܝ ܗ̱ܘ ܘܠܳܐ ܡܶܬܓܰܫܦܳܢܰܐ ܗ̄ܘ ܠܚܰܫ̈ܶܐ. ܚܰܕ ܓܶܝܪ ܐܺܝܬܰܘܗ̱ܝ ܡܶܢ ܬܰܪܬܶܝܢ܆ ܡܶܢ ܐܰ‌ܠܳܗܽܘܬܳܐ ܟܺܝܬ ܘܐ̱ܢܳܫܽܘܬܳܐ܆ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܒܡܶܠܬܳܐ ܗܳܝ ܕܺܝܠܳܢܳܝܬܳܐ ܕܺܝܠܗܶܝܢ. ܗܽܘ ܟܰܕ ܗܽܘ ܐܰ‌ܠܳܗܳܐ ܘܒܰܪܢܳܫܳܐ ܫܰܪܺܝܪܳܐ܆ ܕܒܰܩܢܽܘܡܳܐ ܚܰܕ ܡܶܬܺܝܕܰܥ. ܚܰܕ ܓܶܝܪ ܐܺܝܬܰܘܗ̱ܝ ܦܰܪܨܽܘܦܳܐ ܕܺܝܠܶܗ܆ ܘܚܰܕ ܟܝܳܢܳܐ ܕܰܡܒܰܣܰܪ ܗܰܘ ܕܺܝܠܶܗ ܕܡܶܠܬܳܐ. ܘܠܳܐ ܟܰܕ ܠܗܳܢܶܝܢ ܕܡܶܢܗܶܝܢ ܐܺܝܬܶܝܗ̇ ܚܕܳܝܽܘܬܳܐ ܫܳܪܶܝܢ ܚ̱ܢܰܢ ܠܶܗ ܡܶܢ ܕܪܺܝܫ܆ ܬܪܶܝܢ ܟܝܳܢܺܝ̈ܢ ܐܳܡܪܺܝܢܰܢ: ܘܳܐܦܠܳܐ ܡܶܛܽܠ ܗܳܝ ܕܰܗܘ̣ܳܐ ܠܰܢ ܫܘܶܐ ܒܽܐܘܣܺܝܰܐ ܤܛܰܪ ܡܶܢ ܚܛܺܝܬܳܐ ܘܟܽܠ ܫܽܘܚܠܳܦܳܐ. ܐܳܡܪܺܝܢ ܚ̱ܢܰܢ ܕܰܫܕܳܐ ܡܶܢܶܗ ܗܳܝ ܕܢܶܗܘܶܐ ܐܺܝܬܰܘܗ̱ܝ ܫܘܶܐ ܒܽܐܘܣܺܝܰܐ ܠܘܳܬ ܐܰܒܳܐ ܘܰܐ‌ܠܳܗܳܐ. ܢܶܬܛܰܪ̈ܕܳܢ ܓܶܝܪ ܡܶܢ ܡܫܺܝܚܳܐ ܠܛܰܘܪܳܐ ܒܕܽܘܟ ܘܰܠܪܽܘܚܩܳܐ܆ ܦܽܘܠܳܓܳܐ܆ ܒܽܘܠܒܳܠܳܐ܆ ܣܒܺܝܪܽܘܬܳܐ܆ ܟܽܘܪ̈ܗܳܢܶܐ ܣܰܩܽܘܒ̈ܠܳܝܶܐ ܘܰܐܚ̈ܶܐ ܒܪܽܘܫܥܳܐ. ܘܒܳܗ̇ ܒܰܕܡܽܘܬܳܐ܆ ܟܽܠܗܶܝܢ ܐܰܝܠܶܝܢ ܕܚܳܒ̈ܠܳܢ ܘܝܳܠ̈ܕܳܢ ܚܽܘܣܪܳܢܳܐ ܕܦܽܘܪܩܳܢܳܐ ܕܺܝܠܰܢ.

ܡܶܛܽܠ ܗܳܠܶܝܢ ܗܳܕܶܐ ܢܰܨܺܝܚܬܳܐ ܘܰܫܒܺܝܚܬܳܐ ܐܶܡܳܐ ܕܥ̈ܺܕܳܬܳܐ܆ ܒܪܶܚܡܬܳܐ ܕܰܠܘܳܬܝ ܡܶܬܓܰܘܙܠܳܐ^[20]. ܘܟܰܕ ܥܰܪܛܶܠܳܝܶܐ ܐܺܝܬܰܝ܆ ܒܢܰܚ̈ܬܶܐ ܒܰܝ̈ܬܳܝܶܐ ܕܺܝܠܳܗ̇ ܡܥܰܛܦܳܐ ܠܺܝ܆ ܘܥܰܬܺܝܪܳܐ ܡܚܰܘܝܳܐ ܠܺܝ. ܘܡܶܬܥܰܣܩܳܐ ܠܘܳܬ ܚܙܽܘܩܝܳܐ ܕܺܝܠܝ܆ ܘܡܶܬܥܰܕܠܳܐ ܟܰܕ ܡܰܘܚܰܪ ܐ̱ܢܳܐ. ܐܶܢܳܐ ܕܶܝܢ ܐܳܦ ܟܰܕ ܪܰܚܺܝܩ ܐ̱ܢܳܐ ܠܳܐ ܛܥܺܝܬܳܗ̇. ܐܶܠܳܐ ܟܰܕ ܥܕܰܟܺܝܠ ܒܪܺܝܫ ܛܽܘܪܳܐ ܗܰܘ ܡܶܬܗܰܦܰܟ ܗ̱ܘܺܝܬ܆ ܘܥܰܡ ܗܳܢܽܘܢ ܕܚܰܝ̈ܶܐ ܗܳܢܽܘܢ ܡܥܰܠܰܝ̈ܳܐ ܕܕܰܝܪܳܝܽܘܬܳܐ ܡܶܬܥܰܢܘܶܝܢ܆ ܐܶܫܟܰܚܬܳܗ̇ ܕܥܰܠ ‌ܐܺܝ̈ܕܰܝܳܐ ܕܡܳܪܝܳܐ ܨܺܝܪܳܐ^[21]܆ ܐܰܝܟܰܢܳܐ ܕܳܐܦ ܡܶܛܽܠ ‌ܐܽܘܪܶܫܠܶܡ ܐܳܡܰܪ ܐܶܫܰܥܝܳܐ: ܘܰܕܥܽܘܗܕܳܢܳܐ ܣܰܓܺܝܳܐܐ ܕܺܝܠܳܗ̇ ܐܺܝܬ ܬܰܡܳܢ܆ ܐܳܦ ܒܰܨ̈ܠܰܘܳܬܳܐ ܐܳܦ ܒܬܰܟܫ̈ܦܳܬܳܐ. ܘܟܰܕ ܡܶܢ ܬܰܡܳܢ ܢܶܚܬܶܬ܆ ܠܘܳܬ ܝܺܕܺܝ̈ܥܳܬܳܐ ܡܶܢ ܒ̈ܢܳܬܳܗ̇ ܐܶܬܺܝܬ܆ ܥ̈ܺܕܳܬܳܐ ܗܳܠܶܝܢ ܕܰܬܚܽܘܬܶܝܗ̇ ܐܳܡܰܪ ܐ̱ܢܳܐ. ܘܰܠܫܰܦܺܝܪܽܘܬ ܛܽܘܗܡܳܐ ܐܶܡܗܳܝܬܳܐ ܕܺܝܠܗܶܝܢ ܐܰ݀ܥܗܕܶܬ ܐܶܢܶܝܢ܆ ܘܰܬܪܺܝܨܽܘܬܳܐ ܕܕܽܘܓ̈ܡܰܛܰܐ ܕܫܰܦܺܝܪܽܘܬ ܕܶܚܠܬܳܐ. ܘܟܰܕ ܐܶܬܰܝ̈ ܐܰܝܟ ܕܰܠܘܳܬ ܡܰܚܫܰܒܬܳܐ ܕܡܶܛܽܠ ܥܶܩܳܪܳܐ ܫܠܺܝܚܳܝܳܐ ܗܰܘ ܕܡܶܢܶܗ ܐܳܦ ܢܳܚ̈ܬܳܢ ܗ̱ܘܰܝ̈ ܒܝܽܘܒܳܠܳܐ܆ ܘܡܶܛܽܠ ܫܰܦܺܝܪܽܘܬ ܦܰܐܝܽܘܬܳܐ ܐܶܡܗܳܝܬܳܐ ܘܬܰܪܒܺܝܬܳܐ ܢܰܟܦܬܳܐ ܘܡܰܪܕܽܘܬܳܐ܆ ܟܽܠ ܟܡܳܐ ܕܺܐܝܬܰܘܗ̱ܝ ܙܺܐܦܳܢܳܐ ܘܢܽܘܟܪܳܝܳܐ ܫ̈ܕܰܝ ܡܶܢܗܶܝܢ܆ ܘܰܕܫܽܘܦܪܳܐ ܗܰܘ ܟܝܳܢܳܝܳܐ ܝܻ̈ܨܶܦܶܝܢ. ܘܟܰܕ ܠܰܡܦܺܝܣܳܢܽܘܬܳܐ ܐܰܪܛܺܝܩܳܝܬܳܐ܆ ܒܰܕܡܽܘܬ ܓܰܘ̈ܢܶܐ ܓܒܺܝ̈ܠܶܐ ܘܛܺܝ̈ܫܶܐ ܫ̣̈ܳܛܶܝܢ.

ܘܟܰܕ ܡܶܢ ܬܰܡܳܢ ܦܢܺܝܬ̣ ܘܒܽܐܘܪܚܳܐ ܪܕܺܝܬ̣܆ ܟܰܕ ܠܰܐܦܰܝ̈ ܐܰܬܪܳܐ ܕܰܩܕܳܡ ܬܰܪ̈ܥܶܐ ܕܰܡܕܺܝܢ̱ܬܳܐ ܗܘܺܝܬ܆ ܡܰܠܽܘܢ ܕܶܝܢ ܘܟܰܕ ܥܕܰܟܺܝܠ ܒܪܽܘܚܩܳܐ ܐܺܝܬܰܝ ܡܶܢ ܗܳܕܶܐ ܡܕܺܝܢ̱ܬܳܐ܆ ܩܳܠܐ ܐܰܪܥܰܢܝ. ܠܰܘ ܐܰܝܟ ܕܰܠܡܽܘܫܶܐ ܕܪܰܘܳܝܽܘܬܳܐ ܘܰܕܫܳܥܬܳܐ ܫܳܘܝܰܬ ܠܓܽܘܚܟܳܐ܆ ܘܰܕܪ̈ܶܦܣܶܐ ܠܳܐ ܟܢܺܝ̈ܟܶܐ ܕܰܠ̈ܫܺܐܕܶܐ ܡܶܫܬܰܡܠܶܝܢ܆ ܕܰܠܠܽܘܚ̈ܶܐ ܕܣܳܝܽܘܡܽܘܬ ܢܳܡܽܘܣܳܐ ܡܬܰܒܰܪ ܘܠܰܐܠܳܗܳܐ ܡܰܪܓܶܫ܆ ܐܶܠܳܐ ܩܳܠܳܐ ܕܰܪܘܳܙܳܐ ܘܰܕܬܰܘܕܺܝܬܳܐ ܗܳܝ ܕܳܐܡܰܪ ܕܰܘܺܝܕ^[22]: ܕܪܰܘܒܳܐ ܥܺܐܕܳܢܳܝܳܐ ܡܰܙܥܶܩ ܕܚܰܓܳܐ ܪܽܘܚܳܢܳܐ܆ ܘܕܰܠܠܽܘܚ̈ܶܐ ܕܠܶܒܳܐ ܦܳܬܰܚ܆ ܕܰܡܛܰܝܒܳܐܺܝܬ ܢܩܰܒܠܽܘܢ ܠܢܳܡܽܘܣ̈ܶܐ ܕܰܐ‌ܠܳܗܳܐ ܗܳܢܽܘܢ ܕܝܰܬܺܝܪ ܪܳܡܺܝܢ ܘܝܰܬܺܝܪ ܡܥܰܠܶܝܢ. ܒܪܰܡ ܐܶܢܳܐ ܢܳܡܽܘܣ̈ܶܐ ܡܶܬܕܰܪ̈ܟܳܢܶܐ ܟܳܬܶܒ ܐ̱ܢܳܐ ܒܟܽܘܢ ܗܰܢܺܝܳܐܺܝܬ܆ ܘܕܰܦܫܺܝܩܺܝܢ ܠܟܽܘܢ ܠܰܡܬܰܪܳܨܽܘ܆ ܘܰܕܠܳܐ ܡܶܕܶܡ ܝܰܩܺܝܪܳܐ ܐܺܝܬ ܒܗܽܘܢ.

ܗܳܢܽܘܢ ܕܰܒܕܽܘܒܳܪܳܐ ܗܰܘ ܕܕܰܝܪܳܝܽܘܬܳܐ ܦܳܠܚܺܝܢ܆ ܕܰܡܣܰܪܩܽܘܬܳܐ ܘܰܕܥܰܪܛܶܠܳܝܽܘܬܳܐ ܝܳܨܦܺܝܢ. ܚܢܰܢ ܒܳܬܰܪ ܗܳܝ ܕܠܳܐ ܢܶܥܠܽܘܒ ܢܶܪܗܰܛ. ܘܒܳܬܰܪ ܗܳܝ ܕܠܳܐ ܢܶܪܰܓ ܢܽܘܟܪ̈ܳܝܳܬܳܐ܆ ܘܒܳܬܰܪ ܗܳܝ ܕܰܠܗܳܢܽܘܢ ܕܰܣܢܺܝܩܺܝܢ ܢܫܰܘܬܶܦ ܡܶܢ ܗܳܠܶܝܢ ܕܺܐܝܬ ܠܰܢ ܐܰܝܟ ܕܡܶܫܟܚܳܐ. ܠܗܳܢܽܘܢ܆ ܗܳܝ ܕܰܢܙܰܡܪܽܘܢ ܒܝܰܕ ܚܦܺܝܛܽܘܬܳܐ ܒܠܶܠܝܳܐ ܘܒܺܐܝܡܳܡܳܐ ܡܶܬܝܰܨܦܳܐ. ܠܰܢ ܬܶܬܬܱܪܰܨ܆ ܗܳܝ ܕܢܶܬܪܰܚܰܩ ܡܶܢ ܙܡܺܝܪ̈ܳܬܳܐ ܫܟܺܝܪ̈ܳܬܳܐ ܘܰܒܠܶܫܳܢܳܐ ܘܒܡܰܫܡܰܥܬܳܐ܆ ܘܰܒܬܶܫܒ̈ܚܳܬܳܐ ܥ̈ܺܕܬܳܢܳܝܳܬܳܐ ܡܶܢ ܡܢܳܬܳܐ ܒܪܰܡܫܳܐ ܘܰܒܨܰܦܪܳܐ܆ ܐܰܘ ܦܽܘܡܳܐ ܢܶܦܬܰܚ܆ ܐܰܘ ܐܶܕܢܳܐ ܢܰܪܟܶܢ. ܗܳܢܽܘܢ ܫܶܬܩܳܐ ܡܫܰܡܠܝܳܐ ܡܶܬܥܰܢܘܶܝܢ ܘܶܐܣܳܪܳܐ ܕܠܶܫܳܢܳܐ܆ ܐܰܝܟܰܢܳܐ ܕܰܡܡܰܫ̈ܚܳܬܳܐ ܢܶܬܪܕܽܘܢ܆ ܠܡܶܫܡܰܥ ܟܺܝܬ ܘܠܰܡܡܰܠܳܠܽܘ. ܚܢܰܢ ܠܡܰܪܡܝܳܢܽܘܬܳܐ^[23] ܫܳܢܺܝܬܳܐ ܘܪܳܡܝܰܬ ܡܶܪܬܳܐ ܢܶܛܪܽܘܕ ܡܶܢܰܢ. ܗܳܢܽܘܢ ܒܚܽܘܒܳܐ ܐܰܣܺܝܪܺܝܢ. ܚܢܰܢ ܢܶܒܛܰܠ ܡܶܢ ܢܶܟܠܳܐ ܕܥܰܠ ܚ̈ܕܳܕܶܐ. ܗܳܢܽܘܢ ܡܕܰܡܥܺܝܢ܆ ܟܰܕ ܠܢܰܦܫܳܐ ܡܶܢ ܚ̈ܛܳܗܶܐ ܡܫܺܝܓܺܝܢ. ܚܢܰܢ ܠܪܶܗܛܳܐ ܗܰܘ ܕܰܠܘܳܬ ܬܶܐܱܛܪ̈ܶܐ ܢܶܣܟܽܘܪ ܠܰܢ. ܕܠܳܗ̇ ܓܶܝܪ ܟܰܕ ܠܳܗ̇ ܠܡܰܠܟܽܘܬܳܐ ܕܰܫܡܰܝܳܐ ܢܶܫܬܘܶܐ ܐܰܟܘܳܬܗܽܘܢ ܨܳܒܶܝܢ ܚ̱ܢܰܢ. ܘܙܳܕܶܩ ܕܰܒ̈ܢܳܬ ܓܶܢܣܳܐ܆ ܘܰܕܠܰܘ ܒܟܽܠ ܡܶܕܶܡ ܐܰܟܣ̈ܢܳܝܳܢ ܘܢܽܘܟܪ̈ܳܝܳܢ ܢܶܗܘ̈ܝܳܢ ܐܺܝܬܰܝܗܶܝܢ ܗܳܠܶܝܢ ܕܺܝܠܰܢ܆ ܠܘܳܬ ܐܰܡ̈ܢܶܐ ܕܗܳܢܽܘܢ. ܫܰܘܬܳܦܽܘܬܳܐ ܓܶܝܪ ܐܳܦܠܳܐ ܚܕܳܐ ܐܺܝܬ ܠܢܽܘܗܪܳܐ ܠܘܳܬ ܚܶܫܽܘܟܳܐ^[24]܆ ܫܳܡܥܺܝܢ ܚ̱ܢܰܢ ܠܰܟܬܳܒܳܐ ܐܰ‌ܠܳܗܳܝܳܐ ܕܳܐܡܰܪ.

ܟܰܕ ܠܗܳܠܶܝܢ ܢܳܡܽܘܣ̈ܶܐ ܡܰܝܬܶܐ ܐ̱ܢܳܐ ܠܟܽܘܢ ܐܶܬܺܝܬ̣. ܠܗܳܠܶܝܢ ܝܽܘܚܰܢܳܢ ܡܰܟܪܶܙ ܠܟܽܘܢ ܒܺܐܝ̈ܕܰܝ ܝܰܘܡܳܢܳܐ܆ ܩܳܠܐ ܗܰܘ ܕܩܳܥܶܐ ܒܚܽܘܪܒܳܐ^[25]܆ ܗܰܘ ܕܰܠܢܰܦ̈ܫܳܬܳܐ ܕܥܰܡܡ̈ܶܐ ܗܳܠܶܝܢ ܕܚܰܪ̈ܒܳܢ ܘܨܰܕܝ̈ܳܢ ܗ̱ܘܰܝ̈ ܡܶܢ ܟܽܠܳܗ̇ ܡܝܰܬܪܽܘܬܳܐ ܐܰܦܢܺܝ܆ ܘܠܰܬܝܳܒܽܘܬܳܐ ܫܦܺܝܥܳܐܺܝܬ ܦܬܰܚ ܠܗܶܝܢ܆ ܘܩܰܕܡܳܝܳܐ ܠܰܫܡܳܐ ܕܡܰܠܟܽܘܬܳܐ ܕܰܫܡܰܝܳܐ ܫܰܘܕܰܥ ܠܰܒܢܰܝ̈ܢܳܫܳܐ. ܗܽܘ ܓܶܝܪ ܒܝܰܕ ܬܰܟܫ̈ܦܳܬܶܗ ܠܡܰܘܗܰܒܬܳܐ ܗܳܕܶܐ ܕܪܰܒܳܐ ܡܶܢ ܟܽܠܗܶܝܢ ܫܰܟܶܢ ܠܰܢ܆ ܗܳܝ ܕܰܒܝܰܘܡܳܐ ܕܕܽܘܟܪܳܢܶܗ ܐܶܚܙܶܝܟܽܘܢ ܘܪܽܘܚܳܢܳܐܺܝܬ ܐܶ݀ܥܰܦܶܩܟܽܘܢ. ܪܚܺܝܡܳܐ ܗ̱ܝ ܠܶܗ ܓܶܝܪ ܕܳܐܦ ܒܫܰܦܺܝܪܽܘܬ ܣܳܥܽܘܪ̈ܘܳܬܳܐ ܢܶܩܕܽܘܡ ܢܶܪܗܰܛ܆ ܘܒܺܐܝ̈ܕܰܝܗܽܘܢ ܕܣܽܘܥܪ̈ܳܢܶܐ ܢܚܰܘܶܐ ܕܪܰܗܳܛܳܐ ܩܰܕܡܳܝܳܐ ܐܺܝܬܰܘܗ̱ܝ ܕܩܳܕܶܡ ܪܳܗܶܛ ܩܕܳܡ ܟܽܠ ܛܳܒܬܳܐ. ܢ݀ܶܬܟܰܫܰܦ ܠܶܗ ܗܳܟܺܝܠ܆ ܕܳܐܦ ܒܡܰܠܟܽܘܬܳܐ ܕܰܫܡܰܝܳܐ ܢܶܩܕܽܘܡ ܢܶܪܗܰܛ ܩܕܳܡܰܝܢ܆ ܠܗܳܝ ܕܰܒܗܳܝ ܕܩܰܕܶܡ ܐܰܟܪܶܙ ܩܰܕܶܡ ܥܰܬܕܳܗ̇. ܘܢܰܘܫܶܛ ܠܰܢ ܐܺܝܕܳܐ܆ ܘܰܢܣܰܝܰܥ ܠܰܢ ܠܘܳܬ ܡܰܪܕܺܝܬܳܐ ܗܳܝ ܐܰ‌ܠܺܝܨܬܳܐ܆ ܐܰܝܟ ܕܠܰܛܠܳܝ̈ܶܐ ܕܰܙܥܽܘܪ̈ܝܳܬܳܐ ܡܶܫܟܚܺܝܢ ܠܰܡܗܰܠܳܟܽܘ܆ ܡܶܛܽܠ ܠܳܐ ܡܫܰܡܠܝܽܘܬܳܐ ܕܰܡܝܰܬܪ̈ܳܬܳܐ܆ ܘܰܕܠܳܐ ܥܕܰܟܺܝܠ ܡܰܢܥܰܬ ܘܰܡܛܳܬ ܠܓܰܒܪܳܐ ܡܫܰܡܠܝܳܐ܆ ܠܰܡܫܽܘܚܬܐ ܕܩܰܘܡܬܳܐ ܕܡܽܘܠܳܝܶܗ ܕܰܡܫܺܝܚܳܐ^[26]. ܡܶܫܟܰܚ ܗܽܘ ܕܶܝܢ ܕܳܐܦ ܠܰܢ ܗܳܝ ܕܰܡܫܰܡܠܝܳܐ ܢܶܬܶܠ܆ ܗܰܘ ܕܶܐܡܰܪ: ܗܘ̣ܰܘ ܗܳܟܺܝܠ ‌ܐܰܢ̱ܬܽܘܢ ܡܫܰܡ̈ܠܰܝܳܐ܆ ܐܰܝܟܰܢܳܐ ܕܰܐܒܽܘܟܽܘܢ ܗܰܘ ܫܡܰܝܳܢܳܐ ܐܺܝܬܰܘܗ̱ܝ ܡܫܰܡܠܝܳܐ^[27]. ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ ܠܥܳܠܰܡ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܶܫܬܺܝܢ ܘܚܰܕ.

ܡܦܩܢܐ. 25: 40 [1]

ܡܦܩܢܐ. 25: 18 [2]

ܡܦܩܢܐ. 32: 17 [3]

ܕܙܳܡܪܺܝܢ[4]

ܡܬܝ. 26: 46 [5]

ܡܬܝ. 22: 30 [6]

ܦܝܠܝܦܣ̈ܝܐ. 2: 10 [7]

ܗܶܢܽܘܢ ܠܗܽܘܢ[8]

 ܒܕܝܩܐܤܛ̈ܝܐ[9]

ܐ. ܛܝܡܬܐܘܣ. 6: 10 [10]

ܡܬܝ. 17: 4 [11]

ܐ. ܩܘܪ̈ܝܢܬܝܐ. 7: 27 [12]

ܐ. ܩܘܪ̈ܝܢܬܝܐ. 6: 20 [13]

ܟܰܗܺܝܢܳܐ[14]

ܡܬܝ. 16: 18 [15]

ܡܬܝ. 5: 31 [16]

ܩܰܠܺܝܠܽܘܬܶܗ[17]

ܥܒܪ̈ܝܐ. 13: 8 [18]

ܝܘܚܢܢ. 1: 3 [19]

ܡܶܬܚܰܬܚܬܳܐ[20]

ܐܫܥܝܐ. 49: 16 [21]

ܡܙܡܘܪ̈ܐ. 42: 5 [22]

ܠܡܨܚܝܢܘܬܐ[23]

ܒ. ܩܘܪ̈ܝܢܬܝܐ. 6: 14 [24]

[25]ܡܬܝ. 3: 3  ܐܦ ܡܪܩܘܣ. 1: 3  ܐܦ ܠܘܩܐ. 3: 4 ܐܦ ܝܘܚܢܢ. 1: 23

ܐܦܣ̈ܝܐ. 4: 13 [26]

ܡܬܝ. 5: 48 [27]