ܡܺܐܡܪܳܐ ܕܶܫܬܺܝܢ

ܐܶܬܶܐܡܰܪ܆ ܟܰܕ ܡܗܰܝܡ̈ܢܶܐ ܗܳܢܽܘܢ ܕܰܒܩܽܘܪܽܘܤ ܩܥܰܘ܆ ܕܰܢܟܰܬܰܪ ܠܘܳܬܗܽܘܢ܆ ܠܘܳܬ ܗܳܝ ܕܳܐܦ ܡܰܠܦܳܢܽܘܬܳܐ ܐ̱ܚܪܺܬܳܐ ܢܶܫܡܥܽܘܢ.

60: ܣܳܦܩܳܐܺܝܬ ܡܰܢ ܐܰܝܟ ܕܣܳܒܰܪ ܐ̱ܢܳܐ܆ ܐܰܝܟ ܡܫܽܘܚܬܳܐ ܕܚܰܝܠܳܐ ܕܺܝܠܰܢ ܡܚܺܝܠܳܐ܆ ܘܰܐܝܟ ܐܰܝܠܶܝܢ ܕܰܒܣܳܥܽܘܪܽܘܬܳܐ ܒܰܠܚܽܘܕ ܠܘܳܬ ܡܕܺܝܢ̱ܬܳܐ ܕܺܝܠܟܽܘܢ ܐܶܬܰܝܢܰܢ܆ ܠܡܶܠܬܳܐ ܕܡܶܛܽܠ ܕܽܘܓ̈ܡܰܛܰܐ ܕܰܫܪܳܪܳܐ ܩܕܳܡܰܝܟܽܘܢ ܣܳܡܢܰܢ. ܡܶܛܽܠ ܕܶܝܢ ܕܟܰܕ ܚܰܡܺܝܡܳܐܺܝܬ ܘܡܶܢ ܬܰܪܥܺܝܬܳܐ ܪܳܚܡܰܬ ܐܰ‌ܠܳܗܳܐ ܡܶܬܬܙܺܝܥܺܝܢ ܐܢ̱ܬܽܘܢ܆ ܕܙܳܕܩܳܐ ܐܰܣܒܰܪܬܽܘܢ ܕܬܶܐܚܕܽܘܢ ܠܰܢ ܟܰܕ ܠܘܳܬ ܦܽܘܢܳܝܳܐ ܫܩܺܝܠܺܝܢ ܗ̱ܘܰܝܢ ܚܺܐܦܳܐ܆ ܟܰܕ ܒܰܦܓܽܘܕܬܳܐ ܕܚܽܘܒܳܐ ܠܘܳܬܟܽܘܢ ܢܓܰܕܬܽܘܢܳܢܝ܆ ܐܰܝܟܰܢܳܐ ܕܳܐܦ ܠܬܽܘܪܓܳܡܳܐ ܗܳܢܳܐ ܕܰܬܠܳܬܳܐ ܬܶܫܡܥܽܘܢ܆ ܠܘܳܬ ܥܽܘܗܕܳܢܳܐ ܕܬܰܫܥܺܝܬܳܐ ܥܰܬܺܝܩܬܳܐ ܐܶܬܰܝܢܰܢ.

ܐܶ‌ܠܺܝܳܐ ܓܶܝܪ ܗܰܘ ܬܰܫܒܳܝܳܐ܆ ܗܰܘ ܕܒܰܛܢܳܢܳܐ ܐܰ‌ܠܳܗܳܝܳܐ ܡܶܫܬܰܠܗܰܒ ܗ̱ܘܳܐ ܘܳܐܡܰܪ: ܡܶܛܰܢ ܛܶܢܶܬ̣ ܠܡܳܪܝܳܐ^[1]܆ ܘܠܳܐ ܡܶܫܟܰܚ ܗ̱ܘܳܐ ܠܰܡܣܰܝܒܳܪܽܘ ܠܫܽܘܢܳܝܳܐ ܕܣܶܓܕܬܳܐ ܕܰܐ‌ܠܳܗܳܐ܆ ܗܳܝ ܕܫܰܢܺܝܘ ܘܰܐܥܒܪܽܘܗ̇ ܢܒܺܝ̈ܶܐ ܗܳܢܽܘܢ ܕܒܶܗܬܬܳܐ ܐܰܝܟܰܢܳܐ ܕܳܐܡܰܪ ܟܬܳܒܳܐ ܟܳܗܢܳܝܳܐ܆ ܠܘܳܬ ܒܰܥܠܳܐ ܘܰܠܘܳܬ ܐܰ‌ܠܳܗ̈ܶܐ ܕܰܓ̈ܳܠܶܐ ܘܡܰܣ̈ܠܰܝܳܐ܆ ܡܰܙܥܶܩ ܗ̱ܘܳܐ ܟܰܕ ܐܳܡܰܪ ܠܘܳܬܗܽܘܢ ܘܰܠܘܳܬ ܥܰܡܳܐ ܐܰܟܚܕܳܐ ܗܰܘ ܕܶܐܬܬܰܛܥܺܝ ܡܶܢܗܽܘܢ܆ ܥܕܰܡܳܐ ܠܶܐܡܰܬܝ ܬܶܚܓܪܽܘܢ ܥܰܠ ܬܪ̈ܰܝܗܽܘܢ ܩܦܳܣ̈ܰܝܟܽܘܢ. ܐܶܢ ܐܺܝܬܰܘܗ̱ܝ ܡܳܪܝܳܐ ܐܰ‌ܠܳܗܳܐ܆ ܬܰܘ ܘܙܶܠܘ ܒܳܬܪܶܗ. ܐܶܢ ܕܶܝܢ ܒܰܥܠܰܐ ܗ̄ܘ܆ ܙܶܠܘ ܒܳܬܪܶܗ^[2]. ܟܰܕ ܨܳܒܶܐ ܗ̱ܘܳܐ ܕܶܝܢ ܕܰܡܫܰܡܠܝܳܐܺܝܬ ܢܰܟܶܤ ܐܶܢܽܘܢ ܥܰܠ ܛܳܥܝܽܘܬܗܽܘܢ܆ ܘܟܰܕ ܠܳܐ ܡܶܬܐܰܣܝܳܢܳܐܺܝܬ ܐܺܝܬ ܠܗܽܘܢ܆ ܠܰܐܒܕܳܢܳܐ ܢܰܫܠܶܡ ܐܶܢܽܘܢ ܒܰܦܣܳܩܳܐ ܕܡܶܢ ܠܥܶܠ܆ ܡܰܣܪܚܳܢܽܘܬܳܐ ܕܰܐܝܟ ܗܳܕܶܐ ܩܕܳܡ ܥܰܡܳܐ ܡܬܰܚ ܘܶܐܡܰܪ ܠܗܽܘܢ ܠܪ̈ܰܫܺܝܥܶܐ. ܢܶܬܠܽܘܢ ܐܳܡܰܪ ܬܪܶܝܢ ܬܰܘܪ̈ܶܐ܆ ܘܢܶܓܒܽܘܢ ܠܗܽܘܢ ܚܰܕ. ܘܰܢܦܰܫܚܽܘܢܳܝܗ̱ܝ ܗܰܕܳܡܳܐ ܗܰܕܳܡܳܐ ܘܰܢܣܺܝܡܽܘܢ ܥܰܠ ܩܰܝ̈ܣܶܐ. ܘܢܽܘܪܳܐ ܠܳܐ ܢܣܺܝܡܽܘܢ. ܘܶܐܢܳܐ ܐܶ݀ܥܒܶܕ ܬܰܘܪܳܐ ܗܰܘ ܐ̱ܚܪܺܢܳܐ܆ ܘܢܽܘܪܳܐ ܠܳܐ ܐܶ݀ܣܺܝܡ. ܘܰܩܥܰܘ ܒܰܫ̈ܡܳܗܶܐ ܕܰܐ‌ܠܳܗ̈ܶܐ ܕܺܝܠܟܽܘܢ. ܘܶܐܢܳܐ ܐܶ݀ܩܪܶܐ ܒܰܫܡܳܐ ܕܡܳܪܝܳܐ ܐܰ‌ܠܳܗܳܐ ܕܺܝܠܝ. ܘܢܶܗܘܶܐ ܐܰ‌ܠܳܗܳܐ ܗܰܘ ܕܶܐܢ ܢܶܥܢܶܐ ܝܰܘܡܳܢܳܐ ܒܢܽܘܪܳܐ܆ ܗܳܢܳܐ ܐܺܝܬܰܘܗ̱ܝ ܐܰ‌ܠܳܗܳܐ.

ܟܰܕ ܕܶܝܢ ܦܰܢܺܝ ܥܰܡܳܐ ܦܶܬܓܳܡܳܐ ܘܶܐܡܰܪ: ܛܳܒܳܐ ܡܶܠܬܳܐ ܗܳܝ ܕܡܰܠ̣ܶܠܬ܆ ܘܶܐܬܦܣܶܤ ܠܗܽܘܢ ܠܰܢܒܺܝ̈ܶܐ ܕܰܓ̈ܳܠܶܐ ܕܰܒܛܶܟܣܳܐ ܩܰܕܡܳܝܳܐ ܢܩܰܪܒܽܘܢ ܝܰܩܕܳܐ ܫܰܠܡܳܐ܆ ܐܳܦ ܓܶܝܪ ܙܳܕܶܩ ܗ̱ܘܳܐ ܕܩܰܕܡܳܐܺܝܬ ܬܶܬܟܣܶܤ ܡܚܺܝܠܽܘܬܳܐ ܕܕܰܓܳܠܽܘܬܳܐ܆ ܘܗܳܟܰܢܳܐ ܒܳܬܰܪܟܶܢ ܢܚܰܘܶܐ ܫܪܳܪܳܐ ܠܚܰܝܠܳܐ ܕܺܝܠܶܗ ܠܳܐ ܡܶܙܕܰܟܝܳܢܳܐ܆ ܡܰܙܥܩܺܝܢ ܗ̱ܘܰܘ ܗܳܢܽܘܢ ܕܳܘ̈ܰܝܳܐ ܥܕܰܡܳܐ ܠܦܶܠܓܶܗ ܕܝܰܘܡܳܐ܆ ܥܢܺܝ ܠܰܢ ܐܳܘ ܒܰܥܠܳܐ ܥܢܺܝ ܠܰܢ܆ ܘܠܳܐ ܦܳܪܰܥ ܗ̱ܘܳܐ ܡܶܢ ܠܘܳܬܶܗ ܩܳܠܐ ܡܶܕܶܡ܆ ܘܠܳܐ ܫܶܡܥܳܐ. ܡܶܟܺܝܠ ܟܰܕ ܦܢܳܝܳܐ ܡܫܰܘܚܪܳܐ ܐܺܝܬܰܘܗ̱ܝ ܗ̱ܘܳܐ܆ ܘܢܽܘܪܳܐ ܐܺܝܬ ܗ̱ܘܳܐ ܘܠܳܐ ܣܳܟ܆ ܘܠܳܐ ܝܰܩܕܳܐ ܣܺܝܡ ܗ̱ܘܳܐ ܝܰܩܕܳܐ ܫܰܠܡܳܐ܆ ܘܟܰܕ ܡܓܰܚܶܟ ܗ̱ܘܳܐ ܐܶ‌ܠܺܝܳܐ ܒܰܣܦܺܝܩܽܘܬ ܗܰܘܢܗܽܘܢ ܪܰܫܺܝܥܬܳܐ^[3]܆ ܝܰܬܺܝܪ ܙܪܺܝܙܳܐܺܝܬ ܐܶܡܰܪ ܩܥܰܘ܆ ܕܕܰܠܡܳܐ ܬܥܺܝܪܽܘܢܳܝܗ̱ܝ ܠܒܰܥܠܳܐ ܕܕܰܡܺܝܟ.

ܘܟܰܕ ܒܗܽܘܢ ܒܣܽܘܥܪ̈ܳܢܶܐ ܐܶܬܝܰܕܥܰܬ ܡܚܺܝܠܽܘܬܳܐ ܘܕܰܓܳܠܽܘܬܳܐ ܕܛܽܘܥܝ̣ܰܝ̣܆ ܗܰܘ ܒܰܪܢܳܫܳܐ ܕܰܐ‌ܠܳܗܳܐ ܡܶܢ ܒܳܬܰܪ ܗܳܢܽܘܢ܆ ܒܢ̣ܳܐ ܡܰܢ ܡܰܕܒܚܳܐ ܡܶܢ ܬܰܪ̈ܬܰܥܶܣܪܶܐ ܟܺܐܦ̈ܶܐ܆ ܚܦܰܪ ܕܶܝܢ ܠܕܽܘܟܬܳܐ ܗܳܝ ܕܰܚܕܳܪ̈ܰܘܗ̱ܝ. ܘܗܳܟܰܢܳܐ ܟܰܕ ܦܰܫܚܶܗ ܠܬܰܘܪܳܐ ܗܰܕܳܡ ܗܰܕܳܡ܆ ܘܣܳܡܶܗ ܥܰܠ ܡܰܕܒܚܳܐ ܥܰܡ ܩܰܝ̈ܣܶܐ܆ ܦܰܩܶܕ ܗ̱ܘܳܐ ܠܗܳܢܽܘܢ ܕܩܳܝܡܺܝܢ ܗ̱ܘܰܘ ܠܘܳܬܶܗ ܘܳܐܡܰܪ ܗ̱ܘܳܐ: ܣܰܒܘ ܠܺܝ ܬܰܪܬܶܝܢ ܩܽܘ̈ܠܺܝܢ ܕܡܰܝ̈ܳܐ܆ ܘܢܶܐܫܕܽܘܢ ܥܰܠ ܡܰܕܒܚܳܐ. ܥܰܠ ܝܰܩܕܳܐ ܫܰܠܡܳܐ ܘܥܰܠ ܨܠܺܝ̈ܚܶܐ. ܘܶܐܡܰܪܘ: ܬܢܰܘ ܘܰܬܢܰܘ. ܘܶܐܡܰܪ: ܬܰܠܶܬܘ ܘܬܰܠܶܬܘ. ܘܰܠܕܽܘܟܬܳܐ ܗܳܝ ܕܶܐܬܚܰܦܪܰܬ ܚܕܳܪ̈ܰܝ ܡܰܕܒܚܳܐ ܡܠ̣ܰܘ ܡܰܝ̈ܳܐ܆ ܘܥܰܒܕܽܘܗ̇ ܐܰܝܟ ܝܰܡܳܐ. ܘܰܩܥܳܐ ܢܒܺܝܳܐ ܒܩܳܠܐ ܪܳܡܳܐ ܠܘܳܬ ܡܳܪܝܳܐ ܐܰ‌ܠܳܗܳܐ ܕܰܐܒܪܳܗܳܡ ܘܕܺܐܝܣܚܳܩ ܘܕܺܐܝܣܪܳܐܶܝܠ܆ ܟܰܕ ܩܳܪܶܐ ܘܡܰܥܗܶܕ ܠܰܐܒܳܗܰܘ̈ܗ̱ܝ ܕܥܰܡܳܐ ܘܰܡܢܺܝ̈ܚܳܢܶܐ ܕܺܝܠܶܗ܆ ܗܳܢܽܘܢ ܕܙܳܕܶܩ ܗ̱ܘܳܐ ܠܗܽܘܢ ܕܰܢܪܰܚܡܽܘܢ ܥܰܠ ܒܢܰܝ̈ܗܽܘܢ ܕܛܰܥܝ̣ܺܝ̣ܢ ܗ̱ܘܰܘ. ܘܗܳܠܶܝܢ ܡܰܢ ܣܳܠ̈ܩܳܢ ܗ̱ܘܰܝ̈ ܒܪܰܒܽܘܬ ܩܳܠܳܐ ܡܶܢ ܬܰܪܥܺܝܬܶܗ ܘܦܽܘܡܶܗ ܕܰܢܒܺܝܳܐ. ܡܶܢ ܫܡܰܝܳܐ ܕܶܝܢ܆ ܢܽܘܪܳܐ ܚܠܳܦܰܝܗܶܝܢ ܕܡ̈ܶܠܶܐ ܡܶܫܬܰܕܪܳܐ ܗ̱ܘܳܬ. ܘܟܰܕ ܐܶܬܳܬ ܘܫܶܟܢܰܬ ܥܰܠ ܡܰܕܒܚܳܐ܆ ܠܟܽܠܗܶܝܢ ܐܰܟܚܕܳܐ ܛܰܠܩܰܬ. ܠܝܰܩܕܳܐ ܫܰܠܡܳܐ. ܠܩܰܝ̈ܣܶܐ. ܠܟܺܐܦ̈ܶܐ܆ ܘܰܠܡܰܝ̈ܳܐ ܗܳܢܽܘܢ ܕܛܳܝܦܺܝܢ ܗ̱ܘܰܘ ܒܰܚ̈ܕܳܕܶܐ܆ ܘܰܐܝܟ ܗܰܘ ܕܳܐܦ ܠܶܗ ܠܥܰܦܪܳܐ ܠܶܟܚܰܬ̣. ܘܟܰܕ ܢܦܰܠ ܥܰܡܳܐ ܥܰܠ ‌ܐܰܦܰܘ̈ܗ̱ܝ ܩܥܰܘ܆ ܫܰܪܺܝܪܳܐܺܝܬ ܡܳܪܝܳܐ ܐܰ‌ܠܳܗܳܐ܆ ܗܽܘ ܐܺܝܬܰܘܗ̱ܝ ܐܰ‌ܠܳܗܳܐ. ܘܟܰܕ ܩܳܡܘ ܩܰܛܶܠܘ ܐܶܢܽܘܢ ܠܰܢܒܺܝ̈ܶܐ ܕܰܓ̈ܳܠܶܐ.

ܡܶܛܽܠ ܗܳܟܺܝܠ ܕܳܐܦ ܚܢܰܢ ܠܗܳܢܽܘܢ ܕܰܡܚܰܘܶܝܢ ܐܶܣܟܺܡܳܐ܆ ܕܚܰܕ ܡܰܢ ܡܫܺܝܚܳܐ ܡܰܘܕܶܝܢ ܠܰܬܪܶܝܢ ܕܶܝܢ ܡܦܰܠܓܺܝܢ ܠܶܗ܆ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ ܕܡܶܢ ܒܳܬܰܪ ܚܕܳܝܽܘܬܳܐ܆ ܥܰܡ ܦܰܪܶܗ̱ܣܺܝܰܐ ܐܶܡܰܪܢܰܢ܆ ܥܕܰܡܳܐ ܠܶܐܡܰܬܝ ܬܶܚܓܪܽܘܢ ܥܰܠ ܬܪ̈ܰܝܗܽܘܢ ܩܦܳܣ̈ܰܝܟܽܘܢ܆ ܐܶܢ ܡܰܢ ܚܰܕ ܗ̱ܘ̣ ܡܫܺܝܚܳܐ܆ ܚܰܕ ܐܰܘܕܰܘ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܡܶܠܬܳܐ. ܐܶܢܕܶܝܢ ܡܶܢ ܒܳܬܰܪ ܚܕܳܝܽܘܬܳܐ ܬܪܶܝܢ ܟܝܳܢ̈ܶܐ ܡܰܟܪܙܺܝܢ ܐܢ̱ܬܽܘܢ܆ ܠܳܐ ܬܚܰܘܽܘܢ ܐܶܣܟܺܡܳܐ ܕܚܰܕ ܐܳܡܪܺܝܢ ܐܢ̱ܬܽܘܢ ܒܠܶܫܳܢܳܐ܆ ܠܗܰܘ ܕܰܒܚܰܝܠܳܐ ܦܣܰܩܬܽܘܢܳܝܗ̱ܝ ܠܰܬܪܶܝܢ܆ ܗܶܢܽܘܢ ܕܶܝܢ ܒܰܕܡܽܘܬ ܢܒܺܝ̈ܶܐ ܗܳܢܽܘܢ ܕܒܰܥܠܳܐ ܠܥܽܘܕܪܳܢܳܐ ܗܰܘ ܕܡܶܢ ܝܺܕܰܥܬܳܐ ܕܰܓܳܠܰܬ ܫܡܳܐ ܩܳܪܶܝܢ ܗ̱ܘܰܘ܆ ܒܰܙܒܰܢ ܡܰܢ ܟܰܕ ܠܡܶܫܬܰܐܠܳܢܽܘܬܳܐ ܗܳܝ ܕܡܶܢ ܟܳܣܳܐ ܡܰܝܬܶܝܢ܆ ܒܰܙܒܰܢ ܕܶܝܢ ܗܳܝ ܕܰܐ‌ܠܳܗܝ ܐܰ‌ܠܳܗܝ ܠܡܳܢܳܐ ܫܒܰܩܬܳܢܝ^[4]܆ ܘܰܠܒܳܥܽܘܬܳܐ ܗܳܝ ܕܥܰܡ ܩܥܳܬܳܐ ܚܰܝܠܬܳܢܺܝܬܳܐ ܘܕܶܡ̈ܥܶܐ ܚܠܳܦܰܝܢ ܐܶܬܩܰܪܒܰܬ^[5]܆ ܘܰܠܗܳܠܶܝܢ ܐ̱ܚܪ̈ܳܢܝܳܬܳܐ ܕܰܡܕܰܒܪܳܢܳܐܺܝܬ ܐܶܣܬܥܰܪ ܘܶܐܬܶܐܡܰܪ܆ ܘܠܳܐ ܦܪܰܥ ܘܰܥܢܳܐ ܐܶܢܽܘܢ ܐܰܟܡܳܐ ܕܳܐܦܠܳܐ ܠܗܳܢܽܘܢ ܩܳܠܐ ܡܶܕܶܡ ܫܰܪܺܝܪܳܐ ܐܳܦܠܳܐ ܫܶܡܥܳܐ܆ ܚܢܰܢ ܕܶܝܢ ܟܰܕ ܡܰܕܒܚܳܐ ܕܺܝܕܰܥܬܳܐ ܫܰܪܺܝܪܬܳܐ ܐܰܩܺܝܡܢܰܢ ܥܰܠ ܬܰܪܬܰܥܶܣܪ̈ܶܐ ܟܺܐܦܺܝ̈ܢ ܕܡܰܠܦܳܢܽܘܬܳܐ ܠܳܐ ܡܶܙܕܰܥܙܥܳܢܺܝܬܳܐ ܕܰܬܪܶܥܣܰܪ ܫܠܺܝ̈ܚܶܐ܆ ܘܰܠܝܰܩܕܳܐ ܫܰܠܡܳܐ ܡܶܬܗܰܘܢܳܢܳܐ ܒܩܰܛܺܝܢܽܘܬܳܐ ܕܕܽܘܓ̈ܡܰܛܰܐ ܦܰܫܰܚܢܰܢ ܘܦܰܠܶܓܢܰܢ ܗܰܕܳܡܳܐ ܗܰܕܳܡܳܐ܆ ܬܢܰܝܢܰܢ ܒܰܠܚܽܘܕ ܟܰܕ ܒܗܳܠܶܝܢ ܬܪܶܝܢ ܝܰܘ̈ܡܺܝܢ ܡܰܠܶܠܢܰܢ ܠܟܽܘܢ܆ ܐܰܢ̱ܬܽܘܢ ܟܰܕ ܡܕܰܡܝܳܢܽܘܬܳܐ ܡܫܰܡܠܰܝܬܳܐ ܕܶܐ‌ܠܺܝܳܐ ܬܳܒܥܺܝܢ ܐܢ̱ܬܽܘܢ܆ ܐܳܦ ܕܰܢܬܰܠܶܬ ܥܰܬܶܕܬܽܘܢ ܠܰܢ. ܘܗܳܐ ܚܘܺܝܚܳܐܺܝܬ ܡܬܰܠܬܺܝܢܰܢ܆ ܟܰܕ ܙܒܰܢ̱ܬܳܐ ܗܳܕܶܐ ܕܰܬܠܳܬ ܡܡܰܠܠܺܝܢܰܢ ܠܟܽܘܢ. ܐܰܝܟܰܢܳܐ ܕܰܡܫܺܝܚܳܐ ܗܰܘ ܕܺܐܝܬܰܘܗ̱ܝ ܢܽܘܪܳܐ ܫܡܰܝܳܢܺܝܬܳܐ ܘܠܳܐ ܗܽܘܠܳܢܳܝܬܳܐ ܘܠܳܐ ܥܒܺܝܕܬܳܐ܆ ܐܳܦ ܓܶܝܪ ܐܰ‌ܠܳܗܰܢ ܢܽܘܪܰܐ ܗ̄ܘ ܡܛܰܠܩܳܢܺܝܬܳܐ ܐܰܝܟ ܕܰܟܬܺܝܒ^[6]܆ ܢܰܒܪܶܩ ܘܢܶܢܗܰܪ ܒܠܶܒܰܘ̈ܳܬܟܽܘܢ܆ ܘܰܢܛܰܠܶܩ ܠܟܽܠ ܡܳܐ ܕܺܐܝܬܰܘܗ̱ܝ ܐܰܪܥܳܢܳܝܳܐ ܘܰܐܫܺܝܕܳܐ ܘܬܰܘܚܕܳܝܳܐ^[7]. ܘܰܠܟܽܠܶܗ ܝܰܩܕܳܐ ܫܰܠܡܳܐ ܕܺܝܠܰܢ܆ ܠܪܺܝܚܳܐ ܒܰܣܺܝܡܳܐ ܢܩܰܒܠܺܝܘܗ̱ܝ܆ ܟܰܕ ܡܶܐܟܽܘܠܬܳܐ ܕܺܝܠܶܗ ܥܳܒܶܕ ܠܶܗ ܠܗܳܢܳܐ. ܗܽܘ ܓܶܝܪ ܐܶܡܰܪ ܕܡܶܐܟܽܘܠܬܳܐ ܕܺܝܠܝ ܐܺܝܬܶܝܗ̇܆ ܕܶܐ݀ܥܒܶܕ ܨܶܒܝܳܢܶܗ ܕܳܐܒܝ^[8]. ܨܶܒܝܳܢܶܗ ܕܶܝܢ ܕܰܐܒܳܐ ܐܺܝܬܰܘܗ̱ܝ܆ ܦܽܘܪܩܳܢܳܐ ܕܺܝܠܰܢ܆ ܗܰܘ ܕܶܐܬܦܪܶܩܢܰܢ ܒܝܰܕ ܡܶܐܬܺܝܬܳܐ ܕܒܰܒܣܰܪ ܕܰܡܫܺܝܚܳܐ. ܐܰܝܟܰܢܳܐ ܓܶܝܪ ܠܰܘ ܢܽܘܪܰܐ ܗ̄ܘ ܡܫܺܝܚܳܐ܆ ܗܰܘ ܕܟܰܕ ܥܕܰܟܺܝܠ ܒܡܽܘܫ̈ܚܳܬܳܐ ܕܡܽܘܟܳܟܳܐ ܨܶܒܝܳܢܳܝܳܐ ܡܶܬܗܰܦܰܟ ܗ̱ܘܳܐ܆ ܘܰܡܕܰܒܪܳܢܽܘܬܳܐ ܕܰܚܠܳܦܰܝܢ ܡܡܰܠܶܐ ܗ̱ܘܳܐ܆ ܐܶܬܚܰܠܦܰܬ ܕܡܽܘܬܶܗ ܥܰܠ ܛܽܘܪܳܐ܆ ܘܳܐܦܠܳܐ ܗܳܝܕܶܝܢ ܟܰܕ ܦܰܢܛܰܣܺܝܰܐ ܥܒܰܕ܆ ܘܳܐܦܠܳܐ ܟܰܕ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ ܫܰܚܠܶܦ܆ ܢܶܬܛܪܶܕ ܓܶܝܪ ܡܶܢ ܟܽܠ ܕܽܘܟ ܫܽܘܚܠܳܦܳܐ ܘܰܣܒܺܝܪܽܘܬܳܐ܆ ܐܶܠܳܐ ܟܰܕ ܒܦܰܪܨܽܘܦܶܗ ܐܰܢܗܰܪ ܐܰܝܟ ܫܶܡܫܳܐ ܒܙܰܗܪܺܝܪ̈ܶܐ ܐܰ‌ܠܳܗܳܝ̈ܶܐ܆ ܘܰܠܢܰܚ̈ܬܶܐ ܗܳܠܶܝܢ ܕܰܠܒܺܝܫ ܗ̱ܘܳܐ ܐܰܚܘܰܪ ܒܢܽܘܗܪܳܐ. ܗܽܘ ܓܶܝܪ ܐܺܝܬܰܘܗ̱ܝ ܗ̱ܘܳܐ ܫܶܡܫܳܐ ܗܰܘ ܕܙܰܕܺܝܩܽܘܬܳܐ܆ ܘܗܰܘ ܕܡܶܬܥܰܛܰܦ ܢܽܘܗܪܳܐ ܐܰܝܟ ܢܰܚܬܳܐ܆ ܘܰܕܡܳܬܰܚ ܠܰܫܡܰܝܳܐ ܐܰܝܟ ܝܳܪܺܝܥܬܳܐ^[9] ܐܰܝܟܰܢܳܐ ܕܰܡܙܰܡܰܪ ܕܰܘܺܝܕ: ܗܰܘ ܕܳܐܦ ܟܰܕ ܐܶܨܛܠܶܒ܆ ܫܶܡܫܳܐ ܩܦܰܤ ܠܙܰܠܺܝ̈ܩܶܐ ܕܺܝܠܶܗ.

ܐܶܠܳܐ ܟܰܕ ܡܰܙܥܰܪ ܠܳܗ̇ ܠܪܰܒܽܘܬܳܐ ܗܳܝ ܦܰܐܺܝܬ ܠܰܐܠܳܗܳܐ ܕܬܶܕܡܽܘܪܬܳܐ܆ ܬܶܐܽܘܕܽܘܪܽܘܤ ܗܰܘ ܪܰܫܺܝܥܳܐ܆ ܗܰܘ ܕܰܗܘ̣ܳܐ ܪܺܝܫ ܡܰܘܬܒܳܐ ܕܡܽܘܡܦܣܘܐܤܛܝܐ܆ ܗܰܘ ܡܰܠܦܳܢܳܐ ܕܢܶܣܛܽܘܪܺܝܽܘܤ ܘܰܕܬܶܐܽܘܕܽܘܪܺܝܛܽܘܤ܆ ܕܠܳܐ ܡܶܕܶܡ ܪܰܒܳܐ ܐܺܝܬܶܝܗ̇ ܗܳܕܶܐ ܐܳܡܰܪ: ܐܳܦ ܓܶܝܪ ܘܟܰܕ ܡܶܨܪ̈ܳܝܶܐ ܡܶܬܪܕܶܝܢ ܗ̱ܘܰܘ ܒܝܰܕ ܡܽܘܫܶܐ܆ ܠܰܘ ܬܠܳܬ ܫܳܥ̈ܶܐ. ܐܶܠܳܐ ܬܠܳܬܳܐ ܝܰܘܡܺܝ̈ܢ ܗܘ̣ܳܐ ܚܶܫܽܘܟܳܐ܆ ܐܰܪܰܐ ܠܳܐ ܡܶܬܚܰܡܰܨ ܐܰܢ̱ܬ܆ ܐܳܡܰܪ ܐ̱ܢܳܐ ܠܘܳܬܶܗ ܘܛܳܒ ܟܺܐܢܳܐܺܝܬ܆ ܕܠܳܐ ܡܶܣܬܰܟܰܠ ‌ܐܰܢ̱ܬ ܗܳܠܶܝܢ ܕܳܐܡܰܪ ܐܰܢ̱ܬ ܐܳܘ ܣܪܺܝܩܳܐ. ܠܗܰܠ ܓܶܝܪ܆ ܒܡܶܨܪܶܝܢ ܒܰܠܚܽܘܕ ܗܘ̣ܳܐ. ܗܳܪܟܳܐ ܕܶܝܢ܆ ܥܰܠ ܟܽܠܳܗ̇ ܐܰܪܥܳܐ. ܡܳܪܳܐ ܓܶܝܪ ܕܰܐܪܥܳܐ ܐܺܝܬܰܘܗ̱ܝ ܗ̱ܘܳܐ܆ ܘܰܕܟܽܠܳܗ̇ ܒܪܺܝܬܳܐ܆ ܗܰܘ ܕܰܠܡܰܘܬܳܐ ܦܳܪܽܘܩܳܝܳܐ ܕܰܒܝܰܕ ܨܠܺܝܒܳܐ ܣܒܰܠ ܒܰܒܣܰܪ. ܘܡܳܢܳܐ ܬܡܺܝܗܳܐ܆ ܐܰܝܟܳܐ ܕܳܐܦ ܐܰܝܟ ܕܰܒܛܽܘܦܣܳܐ ܒܝܰܕ ܝܶܫܽܘܥ ܒܰܪܢܽܘܢ܆ ܡܰܬܚܶܗ ܠܫܶܡܫܳܐ ܠܛܰܘܪܳܐ ܕܚܰܕ ܝܰܘܡܳܐ. ܐܳܦ ܓܶܝܪ ܠܰܘ ܐ̱ܚܪܳܢܝܳܐܺܝܬ ܗܰܘ ܠܢܰܗܺܝܪ̈ܶܐ ܕܒܰܫܡܰܝܳܐ ܦܳܩܶܕ ܗ̱ܘܳܐ ܘܳܐܡܰܪ: ܢܩܽܘܡ ܫܶܡܫܳܐ ܒܓܶܒܥܽܘܢ ܘܣܰܗܪܳܐ ܒܢܰܚܠܳܐ ܕܺܐܝܠܽܘܢ^[10]. ܐܶ‌ܠܽܘܠܳܐ ܕܰܡܩܰܕܶܡ ܗ̱ܘܳܐ ܡܛܰܦܶܤ ܠܝܶܫܽܘܥ ܗܰܘ ܫܰܪܺܝܪܳܐ ܘܰܫܡܰܝܳܢܳܐ. ܕܩܳܕܶܡ ܗ̱ܘܳܐ ܓܶܝܪ ܡܛܰܦܶܤ܆ ܗܳܝ ܐܺܝܬܶܝܗ̇ ܣܳܗܕܽܘܬܳܐ ܓܠܺܝܬܳܐ. ܟܰܕ ܥܬܺܝܕ ܗ̱ܘܳܐ ܡܽܘܫܶܐ ܕܰܢܫܰܕܪܺܝܘܗ̱ܝ ܡܶܢ ܡܰܕܒܪܳܐ܆ ܥܰܡ ܐܳܦ ܓܰܒܪ̈ܶܐ ܐ̱ܚܪ̈ܳܢܶܐ ܕܡܶܢ ܟܽܠ ܚܰܕ ܫܰܒܛܳܐ ܕܺܐܝܣܪܳܐܶܝܠ܆ ܥܰܠ ܗܳܝ ܕܢܶܓܫܽܘܢܳܗ̇ ܠܰܐܪܥܳܐ ܕܡܽܘܠܟܳܢܳܐ܆ ܟܰܕ ܐܽܘܫܳܥ ܡܶܬܶܐܡܰܪ ܗ̱ܘܳܐ܆ ܝܶܫܽܘܥ ܗܦܰܟ ܫܰܡܗܶܗ. ܟܰܕ ܠܰܐ̱ܚܪܺܢܳܐ ܘܠܳܐ ܠܚܰܕ ܟܽܠ ܟܽܠܶܗ ܫܰܚܠܶܦ ܫܡܳܐ. ܗܰܘ ܕܳܐܦ ܠܚܰܪܬܳܐ ܟܰܕ ܪܺܝܫܳܢܳܐ ܕܥܰܡܳܐ ܗܘ̣ܳܐ ܒܰܦܣܳܩܳܐ ܕܰܐ‌ܠܳܗܳܐ ܡܶܢ ܒܳܬܰܪ ܡܰܘܬܶܗ ܕܡܽܘܫܶܐ܆ ܝܰܗ̱ܒ ܠܗܽܘܢ ܝܽܘܪܬܳܢܳܐ ܒܦܶܣܳܐ ܠܰܐܪܥܳܐ ܕܡܽܘܠܟܳܢܳܐ. ܠܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܕܰܫܡܳܐ ܐ̱ܚܪܺܢܳܐ ܡܶܕܶܡ ܐܰܝܢܳܐ ܕܗܽܘ܆ ܠܰܐܪܥܳܐ ܗܳܝ ܠܡܰܥܳܠܽܘ܆ ܗܳܝ ܐܰܝܕܳܐ ܕܛܽܘܦܣܳܐ ܐܰܚܺܝܕܳܐ ܗ̱ܘܳܬ ܕܡܰܠܟܽܘܬܳܐ ܕܰܫܡܰܝܳܐ܆ ܐܶܠܳܐ ܐܶܢ ܕܝܶܫܽܘܥ. ܘܣܳܗܶܕ ܦܶܛܪܽܘܤ ܕܒܰܫܡܳܐ ܕܝܶܫܽܘܥ ܠܗܰܘ ܚܓܺܝܪܳܐ ܐܰܚܠܶܡ^[11]܆ ܘܰܠܘܳܬ ܝܽܗ̱ܘ̈ܕܳܝܶܐ ܡܬܰܪܓܶܡ ܗ̱ܘܳܐ ܘܳܐܡܰܪ: ܐܳܦܠܳܐ ܓܶܝܪ ܐܺܝܬ ܫܡܳܐ ܐ̱ܚܪܺܢܳܐ ܬܚܶܝܬ ܫܡܰܝܳܐ ܕܺܝܗܺܝܒ ܒܶܝܬ ܒܢܰܝ̈ܢܳܫܳܐ܆ ܗܰܘ ܕܒܶܗ ܙܳܕܶܩ ܠܰܢ ܕܢܶܬܦܪܶܩ܆ ܘܳܐܦ ܗܽܘ ܕܶܝܢ ܝܶܫܽܘܥ ܕܡܰܙܥܶܩ ܒܶܐܘܰܢܓ̈ܶܠܺܝܰܐ: ܕܶܐܢ ܠܳܐ ܢܶܬܺܝܠܶܕ ܐ̱ܢܳܫ ܡܶܢ ܡܰܝ̈ܳܐ ܘܪܽܘܚܳܐ܆ ܠܳܐ ܡܶܫܟܰܚ ܠܡܶܥܰܠ ܠܡܰܠܟܽܘܬܳܐ ܕܰܐ‌ܠܳܗܳܐ^[12]܆ ܘܶܐܢܳܐ ܐܺܝܬܰܝ ܬܰܪܥܳܐ܆ ܒܺܐܝ̈ܕܰܝ ܐܶܢ ܐ̱ܢܳܫ ܢܶܥܽܘܠ ܢܶܬܦܪܶܩ܆ ܘܢܶܥܽܘܠ ܘܢܶܦܽܘܩ ܘܪܶܥܝܳܐ ܢܶܫܟܰܚ^[13].

ܠܚܶܫܽܘܟܳܐ ܕܶܝܢ ܗܳܢܳܐ ܕܥܰܠ ܨܠܺܝܒܳܐ܆ ܘܳܐܦ ܗܳܢܽܘܢ ܕܰܐܟܬܶܒܘ ܠܬܰܫ̈ܥܝܳܬܳܐ ܚܰܢ̈ܦܳܝܳܬܳܐ ܪܰܫܡܽܘܗܝ܆ ܕܰܠܒܰܪ ܡܶܢ ܟܽܠܳܗ̇ ܢܰܩܺܝܦܽܘܬܳܐ ܘܰܥܝܳܕܳܐ ܕܰܐܩܠܶܦܣܺܝܤ ܫܶܡܫܳܢܳܝܬܳܐ ܗܘ̣ܳܐ܆ ܘܣܳܗܶܕ ܥܰܡ ܐܰܪܥܳܐ ܗܳܝ ܕܪܶܥܠܰܬ܆ ܕܰܒܪܺܝܬܳܐ ܒܬܶܕܡܽܘܪܬܳܐ ܥܰܡ ܒܳܪܽܘܝܳܐ ܐܰܟܚܕܳܐ ܚܳܫܳܐ ܗ̱ܘܳܬ.

ܠܗܳܕܶܐ ܐܳܦ ܢܒܺܝܳܐ ܥܰܡܽܘܤ܆ ܥܰܡ ܢܛܽܘܪܬܳܐ ܚܰܬܺܝܬܬܳܐ ܕܫܳܥ̈ܶܐ ܩܰܕܶܡ ܐܰܡܪܳܗ̇܆ ܕܡܶܢ ܫܳܥܬܳܐ ܕܫܶܬ ܥܕܰܡܳܐ ܠܗܳܝ ܕܰܬܫܰܥ ܗܳܘܝܳܐ܆ ܗܳܟܰܢܳܐ^[14]. ܘܢܶܗܘܶܐ ܒܝܰܘܡܳܐ ܗܰܘ ܐܳܡܰܪ ܡܳܪܝܳܐ: ܢܶܥܪܰܒ ܫܶܡܫܳܐ ܒܛܰܗܪܳܐ܆ ܘܢܶܚܫܰܟ ܢܽܘܗܪܳܐ ܥܰܠ ‌ܐܰܪܥܳܐ ܒܺܐܝܡܳܡܳܐ^[15].

ܐܰܪܰܐ ܠܳܐ ܐܶܬܢܰܗܰܪܬܽܘܢ ܒܬܰܪܥܺܝܬܟܽܘܢ܆ ܕܚܳܙܶܝܢ ܐܢ̱ܬܽܘܢ ܠܶܗ ܠܥܰܡܰܢܽܘܐܶܝܠ ܪܳܡܳܐ ܒܗܳܠܶܝܢ ܡܰܟܺܝ̈ܟܳܬܳܐ܆ ܕܰܒܚܰܫ̈ܶܐ ܒܳܐܬܘ̈ܳܬܳܐ ܐܰ‌ܠܳܗܳܝ̈ܳܬܳܐ ܡܰܢܗܰܪ܆ ܠܳܐ ܟܰܕ ܢܳܦܠܺܝܢ ܐܢ̱ܬܽܘܢ ܥܰܠ ‌ܐܰܦܰܝ̈ܟܽܘܢ ܣܳܓܕܺܝܢ ܐܢ̱ܬܽܘܢ ܟܰܕ ܐܳܡܪܺܝܢ ܐܢ̱ܬܽܘܢ: ܫܰܪܺܝܪܳܐܺܝܬ ܡܳܪܝܳܐ ܐܰ‌ܠܳܗܳܐ ܗܰܘ ܕܶܐܨܛܠܶܒ ܡܶܛܽܠܳܬܰܢ܆ ܗܽܘ ܐܺܝܬܰܘܗ̱ܝ ܐܰ‌ܠܳܗܳܐ܆ ܘܡܶܢ ܗܳܢܽܘܢ ܕܰܡܦܰܠܓܺܝܢ ܠܶܗ ܘܳܐܡܪܺܝܢ ܠܶܗ ܡܶܢ ܒܳܬܰܪ ܚܕܳܝܽܘܬܳܐ ܕܒܰܬܪܶܝܢ ܟܝܳܢ̈ܶܐ ܡܶܬܺܝܕܰܥ܆ ܐܰܝܟ ܕܡܶܢ ܢܒܺܝ̈ܶܐ ܗܳܢܽܘܢ ܕܰܓ̈ܳܠܶܐ ܡܰܗܦܟܺܝܢ ܐܢ̱ܬܽܘܢ ܐܰܦܰܝ̈ܟܽܘܢ ܘܢܳܕܳܐ ܠܟܽܘܢ ܡܶܢܗܽܘܢ܆ ܕܰܠܕܶܚܠܰܬ ܐܰ‌ܠܳܗܳܐ ܒܒܺܝܫܽܘܬ ܨܢܺܝܥܽܘܬܳܐ ܡܙܰܝܦܺܝܢ ܘܰܡܫܰܚܠܦܺܝܢ܆ ܐܺܝܢ. ܗܳܕܶܐ ܓܶܝܪ ܟܰܕ ܩܥܰܝܬܽܘܢ ܫܰܘܕܰܥܬܽܘܢ܆ ܘܟܰܕ ܒܚܶܪܡܳܐ ܚܰܝܶܒܬܽܘܢ ܠܗܳܢܽܘܢ ܕܗܳܟܰܢܳܐ ܡܶܬܪܰܥܶܝܢ.

ܟܰܕ ܠܗܳܕܶܐ ܗܰܝܡܳܢܽܘܬܟܽܘܢ ܫܰܪܺܝܪܬܳܐ ܘܰܬܪܺܝܨܬܳܐ ܦܳܪܰܥ ܐܰ‌ܠܳܗܳܐ܆ ܐܳܦ ܠܣܳܒܳܐ ܗܳܢܳܐ ܟܳܗܢܳܝܳܐ ܐܰܝܬܺܝ ܗܳܫܐ ܐܰܩܺܝܡ ܥܠܰܝܢ܆ ܠܪܳܥܝܳܐ ܒܚܺܝܪܳܐ ܕܡܺܝܛܪܽܘܦܽܘܠܺܝܤ^[16] ܗܳܝ ܕܺܝܠܟܽܘܢ܆ ܕܰܒܡܽܘܠܳܝܳܐ ܕܒܽܘܪܟܬܶܗ ܕܰܡܫܺܝܚܳܐ ܐܶܬܳܐ܆ ܘܡܶܫܟܰܚ ܗ̱ܘܳܐ ܕܒܰܕܡܽܘܬ ܝܰܥܩܽܘܒ ܗܰܘ ܕܣܶܐܒ ܘܰܡܠܶܐ ܗ̱ܘܳܐ ܡܶܢ ܝܰܘ̈ܡܳܬܳܐ ܐܰ‌ܠܳܗܳܝ̈ܶܐ ܗܳܢܽܘܢ ܕܒܰܡܝܰܬܪ̈ܳܬܳܐ܆ ܕܠܰܒܢܰܝ̈ܳܐ ܒܰܝ̈ܬܳܝܶܐ ܕܺܝܠܶܗ ܒܽܘܪ̈ܟܳܬܳܐ ܫܰܪܺܝܪ̈ܳܬܳܐ ܘܡܰܥܒ̈ܕܳܢܝܳܬܳܐ ܢܫܰܟܶܢ. ܗܰܘ ܕܶܐ‌ܠܽܘܠܳܐ ܕܙܰܒܢܳܐ ܘܟܽܘܪܗܳܢܳܐ ܫܰܦܠܶܗ܆ ܟܒܰܪ ܟܰܕ ܠܡ̈ܶܠܶܐ ܕܺܝܠܰܢ ܫܳܡܰܥ ܗ̱ܘܳܐ ܩܳܐܶܡ ܗ̱ܘܳܐ܆ ܘܰܡܫܰܡܰܪ ܗ̱ܘܳܐ ܫܶܦ̈ܥܶܐ ܕܠܶܫܳܢܳܐ ܒܰܝܬܳܝܳܐ ܕܺܝܠܶܗ܆ ܥܰܠ ܫܟܳܚ̈ܳܬܳܐ ܕܡ̈ܶܠܶܐ ܕܶܐܪ̈ܶܛܺܝܩܽܘ. ܡܰܛܶܢ ܓܶܝܪ ܥܕܰܟܺܝܠ ܛܳܐܶܢ ܗܽܘ ܠܡܳܪܝܳܐ. ܘܰܒܗܳܕܶܐ ܒܰܠܚܽܘܕ ܠܳܐ ܣܶܐܒ܆ ܐܶܠܳܐ ܐܳܦ ܡܶܬܛܰܠܶܐ ܙܪܺܝܙܳܐܺܝܬ ܘܡܶܬܥܰܠܰܡ ܒܪܽܘܚܳܐ.

ܗܳܠܶܝܢ ܐܳܦ ܝܰܘܡܳܢܳܐ ܣܳܡܢܰܢ ܩܕܳܡܰܝܟܽܘܢ܆ ܡܶܛܽܠ ܚܽܘܒܳܐ ܕܺܝܠܟܽܘܢ܆ ܘܟܰܕ ܡܶܛܽܠ ‌ܐܺܝܩܳܪܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܬܰܠܶܬܢܰܢ. ܐܶܠܳܐ ܠܢܽܘܪܳܐ ܕܕܽܘܓ̈ܡܰܛܰܐ ܕܰܬܪܺܝܨܽܘܬ ܫܽܘܒܚܳܐ ܠܳܐ ܬܕܰܥܟܽܘܢ ܠܺܝ܆ ܐܰܝܟܰܢܳܐ ܕܰܒܠܰܡܦܺܝ̈ܕܶܐ ܢܰܗܺܝܪ̈ܶܐ ܠܘܳܬ ܡܰܠܟܽܘܬܳܐ ܕܰܫܡܰܝܳܐ ܬܺܐܬܽܘܢ. ܠܗܳܝ ܕܬܶܗܘܶܐ ܕܢܶܫܬܘܶܐ ܟܽܠܰܢ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܠܗܰܘ ܕܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܡ ܡܺܐܡܪܳܐ ܕܶܫܬܺܝܢ‌܀

ܐ. ܡܠܟ̈ܐ. 19: 10 [1]

ܐ. ܡܠܟ̈ܐ. 18: 21 [2]

ܪܰܫܺܝܥܳܐ؟[3]

ܡܬܝ. 27: 46  ܐܦ ܡܪܩܘܣ. 15: 34 [4]

ܥܒܪ̈ܝܐ. 5: 7 [5]

ܥܒܪ̈ܝܐ. 12: 29 [6]

ܚܒܽܘܟܝܳܐ ܗܳܢܰܘ ܕܶܝܢ ܡܶܢ ܚܒ̈ܘܟܐ[7]

ܝܘܚܢܢ. 4: 34 [8]

ܡܙܡܘܪ̈ܐ. 104: 2 [9]

ܝܫܘܥ ܒܪ ܢܘܢ. 10: 12 [10]

ܦܪܟܣܝܣ. 4: 10 [11]

ܝܘܚܢܢ. 3: 5 [12]

ܝܘܚܢܢ. 10: 9 [13]

ܡܬܝ. 27: 45 [14]

ܥܡܘܣ. 8: 9 [15]

[16]ܠܦܺܝܠܘܟܣܝܢܘܣ ܡܺܝܛܪܘܦܘܠܝܛܝܣ ܕܡܰܒܽܘܓ ܐܳܡܰܪ.