ܡܺܐܡܪܳܐ ܕܚܰܡܫܺܝܢ ܘܬܶܫܥܳܐ

ܐܶܬܶܐܡܰܪ ܐܳܦ ܗܳܢܳܐ ܒܩܽܘܪܽܘܤ. ܥܰܠ ܡܕܰܒܪܳܢܽܘܬܳܐ ܕܡܶܐܬܺܝܬܶܗ ܕܒܰܒܣܰܪ܆ ܕܰܡܫܺܝܚܳܐ ܐܰ‌ܠܳܗܳܐ ܕܺܝܠܰܢ܆ ܠܽܘܩܒܰܠ ܓܽܘ̈ܕܳܦܰܘܗ̱ܝ ܕܬܶܐܽܘܕܽܘܪܺܝܛܽܘܤ.

59: ܡܶܛܽܠ ܕܰܠܫܶܬܶܐܣܬܳܐ ܡܶܢ ܗܳܢܳܐ ܡܰܠܦܳܢܳܐ ܘܪܺܝܫ ܢܰܓܳܪ̈ܶܐ ܚܰܟܺܝܡܳܐ ܕܗܳܕܶܐ ܥܺܕܬܳܐ ܟܳܗܢܳܝܬܳܐ ܕܫܰܦܺܝܪ ܐܶܬܬܣܺܝܡܰܬ̣ ܚܙܰܝܢܰܢ܆ ܗܳܝ ܕܺܐܝܬܶܝܗ̇ ܝܶܫܽܘܥ ܡܫܺܝܚܳܐ^[1]܆ ܘܰܠܗܳܕܶܐ ܕܰܒܥܽܘܡܩܳܐ ܐܶܬܪܰܡܝܰܬ ܘܶܐܫܬܰܪܪܰܬ܆ ܟܰܕ ܒܕܺܝܩܶܠܰܐ ܡܰܠܦܳܢܺܝܬܳܐ ܕܕܽܘܓ̈ܡܰܛܰܐ ܕܫܰܦܺܝܪܽܘܬ ܕܶܚܠܬܳܐ܆ ܫܰܦܺܝܪ ܐܽܘܡܳܢܳܐܺܝܬ ܘܒܰܙܢܳܐ ܕܠܳܚܶܡ ܐܶܬܚܦܰܪ ܠܶܒܳܐ ܕܺܝܠܟܽܘܢ܆ ܘܰܕܠܳܐ ܡܶܢ ܗܰܓܳܓܽܘܬܳܐ ܡܰܢܺܝܢܳܝܬܳܐ ܘܰܕܠܳܐ ܐܰ‌ܠܳܗ ܕܶܐܘܛܶܘܟ̥ܶܐ ܡܶܙܕܰܥܙܥܳܐ܆ ܐܳܦ ܠܳܐ ܡܶܢ ܚܰܣܺܝܪܽܘܬ ܗܰܘܢܳܐ ܛܰܡܰܐܬܳܐ ܕܰܐܦܽܘܠܺܝܢܰܪܺܝܽܘܤ ܡܶܬܦܰܣܩܳܐ܆ ܐܳܦܠܳܐ ܠܰܬܪܶܝܢ ܘܰܕܟܽܠ ܚܰܕ ܡܶܢܶܗ ܘܠܶܗ ܡܶܢ ܫܳܢܝܽܘܬܳܐ ܝܺܗܽܘܕܳܝܬܳܐ ܕܢܶܣܛܽܘܪܺܝܽܘܤ ܡܶܬܦܰܣܩܳܐ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ ܕܡܶܢ ܒܳܬܰܪ ܚܕܳܝܽܘܬܳܐ܆ ܐܶܠܳܐ ܕܡܶܢ ܬܰܪܬܶܝܢ ܡܶܢ ܐܰ‌ܠܳܗܽܘܬܳܐ ܟܺܝܬ ܘܐ̱ܢܳܫܽܘܬܳܐ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܐܰܝܟ ܡܶܠܬܳܐ ܗܳܝ ܕܺܝܠܳܢܳܝܬܳܐ ܕܺܝܠܗܶܝܢ܆ ܠܳܐ ܒܠܺܝܠܳܐܺܝܬ ܘܠܳܐ ܡܶܬܦܰܠܓܳܢܳܐܺܝܬ܆ ܚܰܕ ܒܪܳܐ ܚܰܕ ܡܳܪܝܳܐ ܡܶܬܬܰܘܕܶܐ܆ ܐܰܝܟ ܚܰܕ ܦܰܪܨܽܘܦܳܐ ܘܚܰܕ ܩܢܽܘܡܳܐ܆ ܘܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܡܶܠܬܳܐ܆ ܐܰܝܬܶܐ ܕܳܐܦ ܚܢܰܢ ܥܰܠ ܫܶܬܶܐܣܬܳܐ ܗܳܝ ܕܛܳܒܳܐܺܝܬ ܐܶܬܩܰܒܥܰܬ ܙܗܺܝܪܳܐܺܝܬ ܬܽܘܒ ܢܶܒܢܶܐ. ܟܺܐܦܳܐ ܓܶܝܪ ܐܺܝܬܶܝܗ̇ ܪܺܝܫ ܓܽܘܢܝܳܐ. ܓܒܺܝܬܳܐ ܟܺܝܬ ܘܰܡܝܰܩܰܪܬܳܐ^[2].

ܪܺܝܫ ܓܽܘܢܝܳܐ ܡܰܢ܆ ܡܶܛܽܠ ܕܰܠܗܳܠܶܝܢ ܕܪ̈ܰܚܺܝܩܳܢ ܗ̱ܘܰܝ̈ ܐܰ‌ܠܘܶܬ. ܗܳܕܶܐ ܡܰܢ܆ ܟܰܕ ܥܒܰܕ ܫܰܝܢܳܐ ܘܪܰܥܺܝ ܒܦܰܓܪܳܐ ܕܒܶܣܪܳܐ ܕܺܝܠܶܗ ܘܰܒܝܰܕ ܕܡܳܐ ܕܰܨܠܺܝܒܶܗ ܐܰܝܟܰܢܳܐ ܕܦܰܘܠܽܘܤ ܐܳܡܰܪ: ܠܗܳܠܶܝܢ ܕܥܰܠ ‌ܐܰܪܥܳܐ ܠܘܳܬ ܗܳܠܶܝܢ ܕܒܰܫܡܰܝܳܐ^[3]܆ ܐܺܝܬܰܝܢ ܗ̱ܘܰܝܢ ܓܶܝܪ ܛܪ̈ܺܝܕܶܐ ܐܰܝܟ ܕܒܰܩܪܳܒܳܐ ܘܰܣܢ̈ܺܝܐܶܐ ܠܰܐܠܳܗܳܐ ܡܶܛܽܠ ܚܛܺܝܬܳܐ܆ ܗܳܕܶܐ ܕܶܝܢ ܐܳܦ ܟܰܕ ܒܰܚܕܳܐ ܩܪܳܝܬܳܐ ܕܶܐܘܰܢܓܶܠܺܝܽܘܢ ܩܪܳܐ ܠܗܳܢܽܘܢ ܕܡܶܢ ܐܺܝܣܪܳܐܶܝܠ܆ ܘܰܠܗܳܢܽܘܢ ܕܡܶܢ ܥܰܡܡ̈ܶܐ ܗܳܢܽܘܢ ܕܠܳܐ ܐܰ‌ܠܳܗ ܘܕܰܒܕܶܚܠܰܬ ܫ̈ܺܐܕܶܐ ܐܰܣܺܝܪܺܝܢ ܗ̱ܘܰܘ܆ ܘܰܒܗܳܕܶܐ ܥܒܰܕ ܠܰܬܪ̈ܰܝܗܽܘܢ ܓܰܒ̈ܶܐ ܚܰܕ܆ ܘܰܫܪܳܐ ܠܡܶܨܥܳܝܽܘܬ ܐܶܣܬܳܐ ܕܰܣܝܳܓܳܐ^[4]. ܗܽܘ ܓܶܝܪ ܟܰܕ ܗܽܘ܆ ܐܳܦ ܡܶܨܥܳܝܳܐ ܕܰܒܢܰܝ̈ܢܳܫܳܐ ܘܕܰܐ‌ܠܳܗܳܐ ܐܰܡܺܝܪ^[5]. ܘܰܐܟܙܢܳܐ ܕܕܺܝܠܳܝܬܳܐ ܐܺܝܬܶܝܗ̇ ܕܟܺܐܦܳܐ ܪܺܝܫ ܓܽܘܢܝܳܐ܆ ܗܳܝ ܕܥܰܡ ܬܰܪ̈ܬܰܝܗܶܝܢ ܐܶܣ̈ܶܐ ܬܶܗܘܶܐ ܐܰܣܺܝܪܳܐ ܐܰܟܚܕܳܐ܆ ܘܕܰܠܚܰܕ ܡܶܕܶܡ ܐܰܟܚܕܳܐ ܬܠܰܚܶܡ ܐܶܢܶܝܢ܆ ܘܒܳܗ̇ ܒܰܕܡܽܘܬܳܐ ܕܺܝܠܳܝܬܳܐ ܐܺܝܬܶܝܗ̇ ܕܡܶܨܥܳܝܳܐ܆ ܗܳܝ ܕܰܠܘܳܬ ܟܽܠܚܰܕ ܡܶܢ ܗܳܢܽܘܢ ܕܪܰܚܺܝܩܺܝܢ ܘܰܒܥܶܠܕ̈ܒܳܒܺܝܢ ܒܰܝܬܳܐܺܝܬ ܢܶܗܘܶܐ ܐܺܝܬ ܠܶܗ܆ ܗܳܟܰܢܳܐ ܐܳܦ ܗܽܘ ܟܰܕ ܒܰܟܝܳܢܳܐ ܐܺܝܬܰܘܗ̱ܝ ܒܪܳܐ ܘܰܫܘܶܐ ܒܽܐܘܣܺܝܰܐ ܠܗܰܘ ܕܝܰܠܕܶܗ܆ ܗܘ̣ܳܐ ܒܪܶܚܡܰܬ ܐ̱ܢܳܫܽܘܬܶܗ ܠܳܐ ܡܶܫܬܰܚܠܦܳܢܳܐܺܝܬ ܐܳܦ ܠܰܢ ܫܘܶܐ ܒܽܐܘܣܺܝܰܐ܆ ܐܰܝܟܰܢܳܐ ܕܠܰܢ ܗܳܢܽܘܢ ܕܰܦܠܺܝܓܺܝܢ ܗ̱ܘܰܝܢ ܘܪܰܚܺܝܩܺܝܢ܆ ܘܰܪܡܶܝܢ ܗ̱ܘܰܝܢ ܡܺܝ̈ܬܶܐ ܡܶܢ ܚܛܺܝܬܳܐ܆ ܢܩܺܝܡ ܐܰܟܚܕܳܐ ܗܽܘ ܒܶܗ ܘܢܰܘܬܶܒ ܐܰܟܚܕܳܐ ܥܰܡ ܐܰܒܳܐ ܫܡܰܝܳܢܳܐ. ܐܰܝܟܰܢܳܐ ܗܳܟܺܝܠ ܗܰܘ ܕܰܠܗܳܠܶܝܢ ܕܪ̈ܰܚܺܝܩܳܢ ܗ̱ܘܰܝ̈ ܐܰ‌ܠܘܶܬ ܘܠܰܚܕܳܐ ܐܰܝܬܺܝ܆ ܗܽܘ ܡܶܢ ܒܳܬܰܪ ܚܕܳܝܽܘܬܳܐ ܠܰܬܪܶܝܢ ܢܶܬܦܰܠܰܓ. ܗܰܘ ܡܳܐ ܓܶܝܪ ܕܡܶܢ ܬܪܶܝܢ ܡܶܕܶܡ ܒܚܰܕ ܩܢܽܘܡܳܐ ܡܶܬܚܙܶܐ܆ ܘܠܳܐ ܡܒܰܠܒܳܠܽܘ ܡܒܰܠܒܶܠ ܠܗܳܠܶܝܢ ܕܡܶܢܗܶܝܢ ܠܚܰܕ ܐܶܬܟܰܢܰܫ܆ ܘܳܐܦܠܳܐ ܬܪܶܝܢ ܗܳܘܶܐ ܡܶܟܺܝܠ܆ ܐܰܝܟܰܢܳܐ ܕܠܳܐ ܢܶܫܪܶܝܗ̇ ܠܰܚܕܳܝܽܘܬܳܐ. ܬܪܰܝܳܢܽܘܬܳܐ ܓܶܝܪ܆ ܫܪܳܝܳܐ ܐܺܝܬܶܝܗ̇ ܕܰܚܕܳܝܽܘܬܳܐ.

ܟܺܐܦܳܐ ܕܶܝܢ ܓܒܺܝܬܳܐ ܘܰܡܝܰܩܰܪܬܳܐ ܗܽܘ ܟܰܕ ܗܽܘ ܐܰܡܺܝܪ܆ ܡܶܛܽܠ ܟܺܝܬ ܕܰܒܗܳܝ ܕܰܐ‌ܠܳܗܳܐ܆ ܝܺܚܺܝܕܳܝܳܐ ܐܺܝܬܰܘܗ̱ܝ ܡܶܢ ܐܰܒܳܐ܆ ܘܕܰܠܒܰܪ ܡܶܢ ܟܽܠܶܗ ܟܝܳܢܳܐ ܒܰܪܝܳܐ ܐܺܝܬܰܘܗ̱ܝ܆ ܘܰܕܠܳܐ ܡܶܬܚܫܶܒ ܐܰܟܚܕܳܐ ܘܡܶܬܡܢܶܐ ܥܰܡ ܥܒܺܝ̈ܕܶܐ܆ ܘܡܳܪܳܐ ܐܺܝܬܰܘܗ̱ܝ ܕܟܽܠܶܗ ܐܺܝܩܳܪܳܐ ܘܬܶܫܒܽܘܚܬܳܐ.

ܗܳܟܰܢܳܐ ܐܳܦ ܟܰܠܬܳܐ ܗܳܝ ܕܰܒܬܶܫܒܚܰܬ ܬܶܫܒ̈ܚܳܬܳܐ. ܟܰܕ ܠܥܺܕܬܳܐ ܩܳܕܡܳܐ ܗ̱ܘܳܬ ܡܛܰܦܣܳܐ ܐܳܡܪܳܐ ܡܶܛܽܠܳܬܶܗ܆ ܒܰܪ ܐܳܚܝ^[6] ܚܶܘܳܪܳܐ ܘܣܽܘܡܳܩܳܐ ܕܰܓܒܶܐ ܒܺܝ̈ܠܺܝܕܶܐ ܡܶܢ ܪ̈ܶܒܘܳܬܳܐ^[7]. ܒܰܪ ܐܰܚܳܐ^[8] ܡܰܢ܆ ܡܶܛܽܠ ܟܺܝܬ ܕܒܶܗ ܟܰܕ ܒܶܗ ܒܰܟܝܳܢܳܐ ܐܶܫܬܰܘܬܰܦ ܠܰܢ ܟܰܕ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ܆ ܘܶܐܫܬܰܡܰܗ ܒܽܘܟܪܳܐ ܒܰܐܚ̈ܶܐ ܣܰܓܺܝ̈ܶܐܐ^[9]. ܐܳܦ ܓܶܝܪ ܐܺܝܬܰܝܢ ܗܰܕܳܡ̈ܶܐ ܕܦܰܓܪܳܐ ܕܺܝܠܶܗ܆ ܡܶܢ ܒܶܣܪܳܐ ܕܺܝܠܶܗ ܘܡܶܢ ܓܰܪ̈ܡܶܐ ܕܺܝܠܶܗ.^[10] ܐܰܝܟܰܢܳܐ ܕܰܫܠܺܝܚܳܐ ܟܬܰܒ ܠܶܐܦܶܣܳܝ̈ܶܐ. ܚܶܘܳܪܳܐ ܕܶܝܢ ܗܽܘ ܟܰܕ ܗܽܘ܆ ܡܶܛܽܠ ܙܰܗܪܳܐ ܘܢܽܘܗܪܳܐ ܠܳܐ ܡܶܬܩܰܪܒܳܢܳܐ ܕܰܐ‌ܠܳܗܽܘܬܳܐ܆ ܗܰܘ ܕܺܐܝܬܰܘܗ̱ܝ܆ ܗܰܘ ܫܰܪܺܝܪܳܐ܆ ܗܰܘ ܕܡܰܢܗܰܪ ܠܟܽܠ ܒܰܪܢܳܫܳܐ ܕܳܐܬܶܐ ܠܥܳܠܡܳܐ^[11]܆ ܐܰܝܟܰܢܳܐ ܕܝܽܘܚܰܢܳܢ ܗܰܘ ܬܶܐܽܘܠܽܘܓܽܘܤ ܐܳܡܰܪ: ܣܽܘܡܳܩܳܐ ܕܶܝܢ ܬܽܘܒ ܗܽܘ ܟܰܕ ܗܽܘ ܘܠܰܘ ܐ̱ܚܪܺܢܳܐ ܡܶܛܽܠ ܣܽܘܡܳܩܽܘܬܳܐ ܕܰܕܡܳܐ܆ ܗܰܘ ܟܺܝܬ ܕܨܶܒܝܳܢܳܐܺܝܬ ܐܶܫܰܕ܆ ܟܰܕ ܨܠܺܝܒܳܐ ܣܒܰܠ ܚܠܳܦܰܝܢ ܒܰܒܣܰܪ. ܓܰܒܝܳܐ ܕܶܝܢ ܒܺܝ̈ܠܺܝܕܶܐ ܡܶܢ ܪ̈ܶܒܘܳܬܳܐ܆ ܗܳܢܰܘ ܕܶܝܢ ܕܠܰܘ ܥܰܡ ܪ̈ܶܒܘܳܬܳܐ ܕܡܰܠܰܐܟ̈ܶܐ ܐܰܟܚܕܳܐ ܡܶܬܡܢܶܐ܆ ܐܶܠܳܐ ܓܰܒܝܳܐ ܘܕܰܠܪܽܘܚܩܳܐ ܡܶܢ ܗܳܠܶܝܢ ܐܺܝܬܰܘܗ̱ܝ܆ ܡܶܛܽܠ ܕܺܝܠܳܢܳܝܽܘܬܳܐ ܘܚܰܬܺܝܬܽܘܬܳܐ ܫܰܪܺܝܪܬܳܐ ܕܺܝܠܺܝܕܽܘܬܳܐ ܕܡܶܢ ܩܕܳܡ ܥܳܠ̈ܡܶܐ ܕܡܶܢ ܐܰܒܳܐ. ܡܶܛܽܠܳܬܳܗ̇ ܓܶܝܪ ܕܗܳܕܶܐ܆ ܐܳܦ ܒܰܫܡܳܐ ܦܰܓܪܳܢܳܝܳܐ ܕܝܰܠܕܳܐ ܐܶܬܚܰܫܰܚ ܟܬܳܒܳܐ ܟܳܗܢܳܝܳܐ. ܘܰܓܒܶܐ ܒܺܝ̈ܠܺܝܕܶܐ ܟܰܢܝܶܗ܆ ܐܰܝܟܰܢܳܐ ܕܡܶܢ ܐܽܘܣܺܝܰܐ ܕܰܐܒܳܐ ܢܚܰܘܶܝܘܗ̱ܝ ܟܰܕ ܝܺܠܺܝܕ.

ܕܰܐܝܟ ܗܳܕܐ ܐܺܝܬܶܝܗ̇܆ ܐܳܦ ܗܳܝ ܕܰܐܝܟ ܕܡܶܢ ܦܰܪܨܽܘܦܳܐ ܕܰܐ‌ܠܳܗܳܐ ܘܰܐܒܳܐ ܒܝܰܕ ܢܒܺܝܳܐ ܗܰܘ ܕܰܡܙܰܡܰܪ ܐܰܡܺܝܪܳܐ ܠܘܳܬ ܒܪܳܐ: ܡܶܢ ܟܰܪܣܳܐ ܩܕܳܡ ܟܰܘܟܰܒ ܢܽܘܓܗܳܐ ܝܺܠܶܕܬܳܟ^[12]. ܐܳܦ ܓܶܝܪ ܟܰܪܣܳܐ܆ ܢܽܘܟܪܳܝܬܳܐ ܐܺܝܬܶܝܗ̇ ܕܽܐܘܣܺܝܰܐ ܗܳܝ ܠܳܐ ܦܰܓܪܳܢܳܝܬܳܐ ܘܕܰܠܗܰܠ ܡܶܢ ܟܽܠ. ܒܪܰܡ ܡܚܰܘܝܳܢܺܝܬܳܐ ܐܺܝܬܶܝܗ̇ ܘܰܡܫܰܘܕܥܳܢܺܝܬܳܐ ܕܺܝܠܺܝܕܽܘܬܳܐ ܗܳܝ ܚܰܬܺܝܬ̣ܬܳܐ ܘܕܰܐܝܟ ܗܰܘ ܕܒܰܟܝܳܢܐ ܗ̱ܝ. ܒܡܶܣܟܺܢܽܘܬܳܐ ܓܶܝܪ ܕܡ̈ܶܠܶܐ ܗܳܠܶܝܢ ܕܰܠܘܳܬܰܢ ܡܶܬܚܰܫܰܚ ܟܬܳܒܳܐ ܐܰ‌ܠܳܗܳܝܳܐ܆ ܟܰܕ ܠܡܳܟܽܘܬܳܐ ܘܰܐܪܥܳܢܳܝܽܘܬܳܐ ܕܬܰܪܥܺܝܬܳܐ ܕܺܝܠܰܢ ܐܰܝܟ ܕܡܰܨܝܳܐ ܨܳܒܶܐ ܕܰܢܥܰܠܶܐ ܘܢܶܣܰܩ ܠܘܳܬ ܪܰܘܡܳܐ ܕܣܽܘܟܴ̈ܠܶܐ ܐܰ‌ܠܳܗܳܝ̈ܶܐ܆ ܘܟܰܕ ܡܶܬܢܰܚܰܬ ܐܰܟܚܕܳܐ ܡܶܛܽܠ ܗܳܕܶܐ ܥܰܡ ܥܝܳܕܳܐ ܕܡܰܫܡܰܥܬܳܐ ܕܺܝܠܰܢ܆ ܐܰܝܟܰܢܳܐ ܕܰܠܝܽܘܩ̈ܢܶܐ ܕܰܫܪܳܪܳܐ ܢܨܽܘܪ ܒܰܢ܆ ܘܰܢܫܰܚܠܶܦ ܢܰܥܒܪܺܝܘܗ̱ܝ ܠܗܰܘܢܰܢ ܠܘܳܬ ܐܰܝܢܳܝܽܘܬܳܐ ܕܗܳܝ ܕܡܶܬܝܰܨܦܳܐ ܠܶܗ܆ ܒܝܰܕ ܪܶܡܙܗܶܝܢ ܕܡ̈ܶܠܶܐ܆ ܡܶܛܽܠ ܕܠܳܐ ܡܶܫܟܚܳܐ ܕܰܐ̱ܚܪܳܢܝܳܐܺܝܬ ܒܡ̈ܶܠܶܐ ܡܶܕܶܡ ܐ̱ܚܪ̈ܳܢܝܳܬܳܐ ܐܰܘ ܒܰܫܡܳܗ̈ܶܐ ܕܛܳܒ ܡܝܰܬܪܺܝܢ܆ ܠܗܽܘܢ ܠܣܽܘܥܪ̈ܳܢܶܐ ܫܚܺܝ̈ܡܶܐ ܢܚܰܘܶܐ ܡܶܢܗܽܘܢ ܘܰܠܗܽܘܢ.

ܚܰܕ ܗܳܟܺܝܠ ‌ܐܺܝܬܰܘܗ̱ܝ ܟܺܐܦܳܐ܆ ܗܰܘ ܪܺܝܫ ܓܽܘܢܝܳܐ܆ ܗܰܘ ܓܰܒܝܳܐ܆ ܗܰܘ ܡܝܰܩܪܳܐ܆ ܗܰܘ ܚܶܘܳܪܳܐ ܘܣܽܘܡܳܩܳܐ ܐܰܝܟ ܡܶܠܬܳܗ̇ ܕܟܰܠܬܳܐ ܗܳܝ ܕܰܒܬܶܫܒܚܰܬ ܬܶܫܒ̈ܚܳܬܳܐ: ܡܶܠܬܳܐ ܓܶܝܪ ܒܶܣܪܳܐ ܗܘ̣ܳܐ ܘܰܐܓܶܢ ܒܰܢ^[13]. ܐܰܝܟܰܢܳܐ ܕܰܐܡܺܝܪ ܠܶܗ ܠܝܽܘܚܰܢܳܢ ܗܰܘ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ ܘܶܐܘܰܢܓܶܠܺܝܣܛܳܐ܆ ܘܳܐܦܶܢ ܠܳܐ ܫܳܦܪܳܐ ܠܬܶܐܽܘܕܽܘܪܺܝܛܽܘܤ ܕܰܐܡܪܰܚ ܕܠܽܘܩܒܰܠ ܟܬܳܒܳܐ ܟܳܗܢܳܝܳܐ ܕܶܐܘܰܢܓ̈ܶܠܺܝܰܐ ܢܰܙܥܶܩ ܘܢܺܐܡܰܪ: ܐܶܢ ܗܳܟܺܝܠ ܠܳܐ ܗܘ̣ܳܐ ܒܶܣܪܳܐ ܐܰ‌ܠܳܗܳܐ ܡܶܠܬܳܐ܆ ܘܰܣܪܺܝܩܳܐܺܝܬ ܢܶܐܚܽܘܕ ܥܶܠܬܳܐ ܒܫܽܘܚܠܳܦܳܐ. ܐܰܝܟܰܢܳܐ ܓܶܝܪ ܥܬܺܝܕ ܗ̱ܘܳܐ ܡܶܠܬܳܐ ܗܰܘ ܕܰܒܪܺܝܫܳܐ ܐܺܝܬܰܘܗ̱ܝ ܗ̱ܘܳܐ܆ ܘܰܠܘܳܬ ܐܰ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ܆ ܘܰܐ‌ܠܳܗܳܐ ܐܺܝܬܘܗ̱ܝ ܗ̱ܘܳܐ^[14]܆ ܕܢܶܫܒܽܘܩ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܘܰܠܘܳܬ ܗܳܝ ܕܢܶܗܘܶܐ ܢܶܫܬܰܚܠܰܦ ܗ̱ܘܳܐ. ܩܰܕܶܡ ܗ̱ܘܳܐ ܓܶܝܪ ܙܰܗܰܪ ܠܰܢ ܟܳܪܽܘܙܳܐ ܗܰܘ ܕܰܫܪܳܪܳܐ܆ ܟܰܕ ܩܰܕܶܡ ܗ̱ܘܳܐ ܐܶܡܰܪ ܙܰܒ̈ܢܺܝܢ ܣܰܓܺܝ̈ܳܐܢ ܗܳܝ ܕܺܐܝܬܰܘܗ̱ܝ ܗ̱ܘܳܐ: ܘܰܐܝܟ ܕܰܠܡܺܐܡܰܪ ܐܰܝܟ ܗܰܘ ܕܳܐܡܰܪ ܗ̱ܘܳܐ: ܕܡܶܛܽܠ ܗܰܘ ܕܺܐܝܬܰܘܗ̱ܝ ܡܡܰܠܶܠ ‌ܐ̱ܢܳܐ ܠܳܟ܆ ܘܠܳܐ ܬܶܦܶܠ ܠܘܳܬ ܗܰܘܢܳܐ ܡܰܣܠܝܳܐ܆ ܘܫܽܘܚܠܳܦܳܐ ܥܰܠ ܗܰܘ ܠܳܐ ܡܶܫܬܰܚܠܦܳܢܳܐ ܬܶܬܪܢܶܐ. ܐܶܡܰܬܝ ܕܫܳܡܰܥ ܐܰܢ̱ܬ܆ ܕܗܰܘ ܕܺܐܝܬܰܘܗ̱ܝ ܗܘ̣ܳܐ ܒܶܣܪܳܐ ܡܶܛܽܠܳܬܰܢ܆ ܟܰܕ ܠܳܐ ܫܰܚܠܶܦ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܘܰܐܘܣܶܦ ܢܣܰܒ ܗܰܘ ܡܳܐ ܕܠܳܐ ܐܺܝܬܰܘܗ̱ܝ ܗ̱ܘܳܐ܆ ܘܰܗܘ̣ܳܐ ܒܰܫܪܳܪܳܐ ܒܰܪܢܳܫܳܐ. ܡܶܛܽܠ ܗܳܟܺܝܠ ܕܗܽܘ ܟܰܕ ܗܽܘ ܐܺܝܬܰܘܗ̱ܝ ܗ̱ܘܳܐ܆ ܡܫܰܡܠܝܳܐ ܐܰ‌ܠܳܗܳܐ ܟܺܝܬ ܘܒܰܪܢܳܫܳܐ܆ ܬܽܘܒ ܝܽܘܚܰܢܳܢ ܐܳܡܰܪ: ܗܰܘ ܕܺܐܝܬܰܘܗ̱ܝ ܗ̱ܘܳܐ ܡܶܢ ܪܺܝܫܺܝܬܳܐ. ܗܰܘ ܕܰܫܡܰܥܢܰܢ. ܗܰܘ ܕܰܚܙܰܝܢܰܢ ܒܥܰܝ̈ܢܰܝܢ. ܗܰܘ ܕܰܚܙܰܝܢܰܢ ܘܺܐܝ̈ܕܰܝܳܐ ܕܺܝܠܰܢ ܓܰܫܶܝ̈ܢ܆ ܡܶܛܽܠ ܡܶܠܬܳܐ ܕܚܰܝ̈ܶܐ. ܐܳܦ ܟܺܝܬ ܗܽܘ ܬܳܘܒ ܐܶܡܰܪ: ܕܠܰܐܠܳܗܳܐ ܠܳܐ ܐ̱ܢܳܫ ܡܬܽܘܡ ܚܙܳܐ^[15]. ܐܰܝܟܰܢܳܐ ܗܳܟܺܝܠ ܠܡܶܠܬܳܐ ܕܚܰܝ̈ܶܐ ܘܰܕܚܰܝ܆ ܕܰܚܙܳܝܗ̱ܝ ܘܓܰܫܶܗ ܡܫܰܪܰܪ. ܐܰܘ ܝܺܕܺܝܥܳܐ ܗܝ܆ ܕܰܒܗܳܝ ܕܶܐܬܒܰܣܰܪ ܘܶܐܬܒܰܪܢܰܫ ܡܶܬܚܰܙܝܳܢܳܐ ܘܡܶܬܓܰܫܫܳܢܳܐ ܕܢܶܗܘܶܐ ܐܶܨܛܒܺܝ܆ ܠܰܘ ܟܰܕ ܒܗܳܝ ܕܺܐܝܬܰܘܗ̱ܝ ܗ̱ܘܳܐ ܐܶܬܚܙܺܝ ܘܶܐܬܓܫܶܫ܆ ܐܶܠܳܐ ܒܗܳܝ ܕܰܗܘ̣ܳܐ. ܟܰܕ ܓܶܝܪ ܚܰܕ ܐܺܝܬܰܘܗ̱ܝ ܘܠܳܐ ܡܶܬܦܰܠܓܳܢܳܐ܆ ܗܽܘ ܟܰܕ ܗܽܘ ܐܺܝܬܰܘܗ̱ܝ ܗ̱ܘܳܐ ܐܳܦ ܡܶܬܚܰܙܝܳܢܳܐ܆ ܐܳܦ ܠܳܐ ܡܶܬܚܰܙܝܳܢܳܐ. ܘܕܰܬܚܶܝܬ ܓܶܫܬܳܐ ܠܳܐ ܢܳܦܶܠ܆ ܐܳܦ ܕܡܶܬܓܫܶܫ. ܗܽܘ ܟܰܕ ܗܽܘ ܐܳܦ ܕܰܐ‌ܠܳܗܳܐܺܝܬ ܘܐ̱ܢܳܫܳܐܺܝܬ ܡܡܰܠܶܠ ‌ܐܳܦ ܕܦܰܐܝܽܘܬ ܐܰ‌ܠܳܗܳܐܺܝܬ ܡܰܥܒܶܕ ܬܶܕܡܪ̈ܳܬܳܐ܆ ܐܳܦ ܕܰܡܕܰܒܪܳܢܳܐܺܝܬ ܡܩܰܒܶܠ ܚܰܫ̈ܶܐ. ܘܠܳܐ ܓܶܝܪ ܡܶܛܽܠ ܡܶܕܶܡ ܐ̱ܚܪܺܢܳܐ ܗܘ̣ܳܐ ܒܰܪܢܳܫܳܐ܆ ܐܶܠܳܐ ܡܶܛܽܠ ܕܚܰܫܳܐ ܕܰܚܠܳܦܰܝܢ^[16] ܢܶܣܒܽܘܠ܆ ܘܕܰܒ̈ܢܳܬ ܩܴ̈ܠܶܐ ܐܰܝܠܶܝܢ ܕܠܰܢ ܦܰܐܝ̈ܳܢ ܗ̱ܘܰܝ̈ ܢܡܰܠܶܠ ܚܠܳܦ ܓܶܢܣܳܐ ܕܺܝܠܰܢ. ܟܰܕ ܓܶܝܪ ܕܠܳܐ ܒܶܣܪܳܐ ܐܺܝܬܰܘܗ̱ܝ ܗ̱ܘܳܐ܆ ܘܠܳܐ ܕܢܶܚܰܫ ܘܳܐܦܠܳܐ ܕܰܢܡܰܠܶܠ ܗܳܟܰܢܳܐ ܡܰܟܺܝܟܳܐܺܝܬ ܘܐ̱ܢܳܫܳܐܺܝܬ ܡܶܫܟܚܳܐ ܗ̱ܘܳܬ. ܟܰܕ ܕܶܝܢ ܐܶܬܒܰܣܰܪ ܦܰܓܪܳܐ ܕܰܡܢܰܦܰܫ ܡܶܬܗܰܘܢܳܢܳܐܺܝܬ ܘܕܰܡܟܳܢ ܕܢܶܚܰܫ܆ ܟܺܐܢܳܐܺܝܬ ܐܳܦ ܐ̱ܢܳܫܳܐܺܝܬ ܡܡܰܠܶܠ. ܘܰܒܗܰܘ ܡܩܰܒܠܳܢܳܐ ܕܚܰܫܳܐ ܚܰܫ܆ ܟܰܕ ܩܰܘܺܝ ܗܽܘ ܐܰܝܟ ܐܰ‌ܠܳܗܳܐ ܘܡܶܠܬܳܐ܆ ܠܳܐ ܡܩܰܒܠܳܢܳܐ ܕܚܰܫܳܐ ܘܳܐܦ ܠܳܐ ܚܳܫܽܘܫܳܐ. ܠܰܘ ܓܶܝܪ ܡܶܛܽܠ ܚܰܫܽܘܬ ܐܰ‌ܠܳܗܽܘܬܳܐ ܗܳܝ ܕܠܳܐ ܪܰܕܝܳܐܺܝܬ ܡܶܬܛܰܒܒܳܐ ܥܠܰܝܢ ܡܶܢ ܐ̱ܢܳܫܺܝ̈ܢ܆ ܦܳܪܫܺܝܢ ܚ̱ܢܰܢ ܠܶܗ ܡܶܢ ܒܶܣܪܳܐ. ܗܳܕܶܐ ܓܶܝܪ ܕܗܳܢܽܘܢ ܕܩܰܢܺܝܛܺܝܢ ܘܙܰܝ̣ܺܝ̣ܥܺܝܢ ܐܺܝܬܶܝܗ̇܆ ܘܰܕܗܳܢܽܘܢ ܕܬܰܡܳܢ ܕܳܚܠܺܝܢ ܕܶܚܠܬܳܐ ܐܰܝܟܳܐ ܕܠܰܝܬ ܕܶܚܠܬܳܐ܆ ܘܢܳܦܠܺܝܢ ܒܗܳܢܶܝܢ ܕܠܰܐ̱ܚܪ̈ܳܢܶܐ ܪܳܫܶܝܢ܆ ܘܪܳܥܠܺܝܢ ܐܰܝܟ ܕܡܶܛܽܠ ‌ܐܰ‌ܠܳܗܳܐ ܚܳܫܽܘܫܳܐ܆ ܘܰܠܪܽܘܚܩܳܐ ܕܳܚܩܺܝܢ ܠܶܗ ܡܶܢ ܚܰܫܳܐ܆ ܒܗܳܝ ܕܦܳܪܫܺܝܢ ܠܶܗ ܡܶܢ ܒܶܣܪܳܐ ܗܰܘ ܕܶܐܬܚܰܝܰܕ ܠܶܗ. ܡܦܳܣܺܝܢ ܚ̱ܢܰܢ ܗܘ ܓܶܝܪ܆ ܕܳܐܦ ܟܰܕ ܐܶܬܒܰܣܰܪ ܘܥܰܡ ܡܰܘܬܳܐ ܒܝܰܕ ܒܶܣܪܳܐ ܐܶܬܥܰܪܙܰܠ܆ ܐܳܦܠܳܐ ܓܶܝܪ ܡܰܨܝܳܐ ܗ̱ܘܳܬ ܐ̱ܚܪܳܢܝܳܐܺܝܬ܆ ܘܠܳܐ ܡܶܕܶܡ ܚܰܫ ܡܶܢ ܟܽܠܗܶܝܢ ܗܳܠܶܝܢ ܕܠܳܐ ܡܟܳܢ ܗ̱ܘܳܐ. ܚܰܫܳܐ ܕܶܝܢ ܕܚܰܫ̈ܶܐ ܗܘ̣ܳܐ ܗܽܘ܆ ܘܡܰܘܬܐ ܕܡܰܘܬܳܐ܆ ܟܰܕ ܠܗܰܠ ܡܶܢ ܒܶܣܪܳܐ ܕܢܶܦܽܘܩ ܠܳܐ ܐܶܫܟܰܚ܆ ܐܳܦܠܳܐ ܬܽܘܒ ܕܢܶܩܪܽܘܒ ܣܳܟ ܠܗܰܘ ܠܳܐ ܚܳܫܽܘܫܳܐ܆ ܐܶܠܳܐ ܕܳܐܦ ܒܰܩܝܳܡܬܳܐ ܗܘ̣ܳܐ ܗܽܘ ܡܺܝܬܳܐ܆ ܘܳܐܦܠܳܐ ܠܗܰܘ ܠܒܰܟ܆ ܠܗܰܘ ܕܕܰܐܚܺܝܕ ܠܶܗ ܡܰܣܒܰܪ ܗ̱ܘܳܐ. ܐܰܝܟܰܢܐ ܟܺܝܬ ܕܡܳܕܶܝܢ ܡܫܺܝܚܳܐ܆ ܠܳܐ ܕܳܚܶܠ ܗ̱ܘܳܐ ܡܶܢ ܡܰܘܬܳܐ܆ ܗܰܘ ܕܗܳܟܰܢܳܐ ܒܽܐܘܚܕܳܢܳܐ ܙܟܳܝܗ̱ܝ .

ܠܰܘ ܓܶܝܪ ܕܕܶܚܠܬܳܐ܆ ܐܶܠܳܐ ܕܰܡܕܰܒܪܳܢܽܘܬܳܐ ܘܕܳܐܣܝܽܘܬܳܐ ܗܳܝ ܕܡܶܛܽܠܳܬܰܢ܆ ܐܺܝܬܶܝܗ̇ ܗ̱ܘܳܬ ܗܳܝ ܕܳܐܡܰܪ: ܐܰܒܳܐ ܐܶܢ ܡܰܨܝܳܐ܆ ܢܶܥܒܰܪ ܡܶܢܝ ܟܳܣܳܐ ܗܳܢܳܐ^[17]. ܗܰܘ ܓܶܝܪ ܕܪܶܓܬܳܢܳܐܺܝܬ ܡܶܛܽܠ ܦܽܘܪܩܳܢܳܐ ܕܺܝܠܰܢ ܠܘܳܬ ܚܰܫܳܐ ܐܳܬܶܐ ܗ̱ܘܳܐ ܘܳܐܡܰܪ: ܕܰܒܪܶܓܬܳܐ ܪܶܓܶܬ ܕܶܐ݀ܟܽܘܠ ܦܣܟܐ ܗܳܢܳܐ ܐܰܘ ܟܺܝܬ ܚܰܫܳܐ܆ ܘܰܟܐܳܐ ܒܶܗ ܒܦܶܛܪܽܘܤ ܕܰܠܘܳܬ ܩܰܕܺܝܡܽܘܬ ܡܶܠܬܳܐ ܕܰܨܠܺܝܒܳܐ ܐܶܡܰܪ ܕܚܳܤ ܠܳܟ ܡܳܪܝ ܠܳܐ ܬܶܗܘܶܐ ܠܳܟ ܗܳܕܶܐ܆ ܘܶܐܡܰܪ ܠܶܗ ܙܶܠ ܠܳܟ ܠܒܶܣܬܰܪܝ ܤܳܛܳܢܳܐ ܟܶܫܠܳܐ ܕܺܝܠܝ ܐܺܝܬܰܝܟ^[18]܆ ܕܠܳܐ ܡܶܬܪܰܥܶܐ ܐܰܢ̱ܬ ܗܳܠܶܝܢ ܕܰܐ‌ܠܳܗܳܐ܆ ܐܶܠܳܐ ܗܳܠܶܝܢ ܕܰܒܢܰܝ̈ܢܳܫܳܐ܆ ܐܰܝܟܰܢܐ ܥܬܺܝܕ ܗ̱ܘܳܐ ܕܢܶܥܪܽܘܩ ܡܶܢ ܗܳܝ ܟܰܕ ܡܛܳܐ ܘܩܳܡ ܙܰܒܢܳܐ܆ ܗܳܝ ܕܰܠܘܳܬܳܗ̇ ܟܰܕ ܚܦܺܝܛ ܡܣܰܪܗܶܒ ܗ̱ܘܳܐ. ܐܶܠܳܐ ܗܳܝ ܟܺܝܬ ܕܶܐܡܪܶܬ܆ ܕܰܡܕܰܒܪܳܢܽܘܬܳܐ ܐܰܟܚܕܳܐ ܘܕܳܐܣܝܽܘܬܳܐ ܐܺܝܬܰܝܗܶܝܢ ܗ̱ܘܰܝ̈ ܡ̈ܶܠܶܐ. ܠܳܐܟܶܠܩܰܪܨܳܐ ܓܶܝܪ ܗܰܘ ܕܰܐܛܥܺܝ ܠܳܐܕܳܡ ܘܰܠܚܰܘܳܐ܆ ܘܰܦܝܳܣܳܐ ܥܒܰܕ ܐܶܢܽܘܢ ܕܡܶܢ ܩܰܝܣܳܐ ܗܰܘ ܕܰܟܠܶܐ ܗ̱ܘܳܐ ܢܶܐܟܠܽܘܢ܆ ܒܗܳܝ ܕܶܐܡܰܪ ܠܗܽܘܢ ܕܟܰܕ ܬܶܐܟܠܽܘܢ ܬܶܗܘܽܘܢ ܐܰܝܟ ܐܰ‌ܠܳܗ̈ܶܐ܆ ܙܳܕܶܩ ܗ̱ܘܳܐ ܠܶܗ ܕܰܒܗܶܝܢ ܟܕ ܒܗܶܝܢ ܒܰܡܨܺܝ̈ܕܳܬܳܐ ܢܶܬܬܨܺܝܕ܆ ܘܢܶܬܬܰܛܥܶܐ ܒܡܶܫܬܰܐܠܳܢܽܘܬܳܐ ܕܡܶܢ ܟܳܣܳܐ܆ ܘܢܶܪܗܰܛ ܐܰܝܟ ܕܥܰܠ ܒܰܪܢܳܫܳܐ ܕܕܰܚܺܝܠ ܡܶܢ ܡܰܘܬܳܐ܆ ܘܢܶܫܟܚܺܝܘܗ̱ܝ ܠܶܗ ܟܰܕ ܠܶܗ ܐܰ‌ܠܳܗܳܐ ܠܳܐ ܚܳܫܽܘܫܳܐ܆ ܘܗܳܟܰܢܳܐ ܢܶܙܕܟܶܐ ܒܳܐܕܳܡ ܗܰܘ ܕܰܓܢܰܒ ܗܘ ܥܰܠ ܣܰܒܪܳܐ ܕܰܐ‌ܠܳܗܽܘܬܳܐ. ܐܰܟܚܕܳܐ^[19] ܕܶܝܢ܆ ܐܳܦ ܠܦܽܘܡܳܐ ܡܰܪܳܚܳܐ ܕܝܽܗ̱ܘ̈ܕܳܝܶܐ ܣܟܰܪ܆ ܕܰܥܬܺܝܕܺܝܢ ܗ̱ܘܰܘ ܠܡܺܐܡܰܪ܆ ܕܠܳܐ ܚܛܰܝܢܰܢ ܕܰܨܠܰܒܢܳܝܗ̱ܝ܆ ܠܗܰܘ ܕܗܽܘ ܒܨܶܒܝܳܢܶܗ ܪܗܶܛ ܥܰܠ ܚܰܫܳܐ. ܕܰܬܠܬ ܕܶܝܢ܆ ܕܳܐܦ ܠܰܢ ܒܝܰܕ ܗܳܠܶܝܢ ܡ̈ܶܠܶܐ ܪܳܕܶܐ ܗ̱ܘܳܐ܆ ܕܠܳܐ ܢܶܪܗܰܛ ܟܰܕ ܠܳܐ ܩܪܶܝܢ ܚ̱ܢܰܢ ܥܰܠ ‌ܐܰܓܽܘ̈ܢܶܐ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ܆ ܐܳܦܠܳܐ ܡܰܪܳܚܳܐܺܝܬ ܚܢܰܢ ܡܶܢ ܢܰܦܫܰܢ ܢܺܐܙܰܠ ܘܰܚܢܰܢ ܥܠܰܝܢ ܢܶܬܬܟܶܠ. ܟܕ ܕܶܝܢ ܙܰܒܢܳܐ ܩܳܪܶܐ܆ ܠܘܳܬ ܐܰ‌ܠܳܗܳܐ ܢܪܺܝܡ ܚܝܳܪܰܢ ܘܢܺܐܡܰܪ. ܢܶܥܒܰܪ ܡܶܢܝ ܟܳܣܳܐ ܗܳܢܳܐ. ܘܰܒܪܰܡ ܠܰܘ ܐܰܝܟ ܕܶܐܢܳܐ ܨܳܒܶܐ ܐ̱ܢܳܐ܆ ܐܶܠܳܐ ܐܰܝܟ ܕܰܐܢ̱ܬ^[20]. ܕܰܠܘܳܬ ܓܶܝܪ ܡܰܠܦܳܢܽܘܬܳܐ ܕܺܝܠܰܢ ܐܰܡܺܝܪܳܐ ܗܳܕܶܐ ܝܺܕܺܝܥܳܐ܆ ܒܗܳܝ ܕܠܰܘ ܐ̱ܚܪܺܢܳܐ ܘܰܐ̱ܚܪܺܢܳܐ ܐܺܝܬܰܘܗ̱ܝ ܨܶܒܝܳܢܳܐ ܕܰܒܪܳܐ ܘܕܰܐܒܳܐ܆ ܐܶܠܳܐ ܚܰܕ ܘܗܽܘ ܟܰܕ ܗܽܘ. ܐܰܟܚܕܳܐ ܕܶܝܢ ܐܳܦ ܒܝܰܕ ܗܳܠܶܝܢ ܕܳܐܡܰܪ ܗ̱ܘܳܐ ܡܚܰܘܶܐ ܗ̱ܘܳܐ܆ ܕܒܶܗ ܟܰܕ ܒܶܗ ܒܰܟܝܳܢܳܐ ܐܶܫܬܰܘܬܰܦ ܠܰܢ܆ ܗܰܘ ܕܪܳܥܶܠ ܡܶܢ ܡܰܘܬܳܐ ܘܰܕܨܶܒܝܳܢܳܐܺܝܬ ܠܚܰܫܳܐ ܕܕܶܚܠܬܳܐ ܘܰܕܥܳܩܬܳܐ ܘܕܰܟܡܺܝܪܽܘܬܳܐ ܩܰܒܶܠ. ܘܳܐܡܰܪ ܗ̱ܘܳܐ: ܕܥܰܝ̣ܺܝ̣ܩܳܐ ܠܳܗ̇ ܠܢܰܦܫܝ ܥܕܰܡܳܐ ܠܡܰܘܬܳܐ. ܐܰܝܟܰܢܳܐ ܕܗܳܠܶܝܢ܆ ܡܶܢ ܫܶܪ̈ܫܰܝܗܶܝܢ ܢܶܬܥܰܩܪ̈ܳܢ ܡܶܢ ܓܶܢܣܐ ܕܺܝܠܰܢ܆ ܟܰܕ ܡܰܩܪ̈ܒܳܢ ܥܰܡ ܡܫܺܝܚܳܐ ܗܰܘ ܚܰܝܠܶܗ ܕܰܐܒܳܐ ܠܳܐ ܡܶܬܚܰܙܝܳܢܳܐ. ܐܰܟܙܢܳܐ ܓܶܝܪ ܕܟܰܕ ܒܰܒܣܰܪ ܠܡܰܘܬܳܐ ܣܒܰܠ ܨܶܒܝܳܢܳܐܺܝܬ܆ ܒܶܗ ܢܨܰܒ ܠܠܳܐ ܡܳܝܽܘܬܽܘܬܳܐ܆ ܗܳܟܰܢܳܐ ܐܳܦ ܟܰܕ ܒܨܶܒܝܳܢܶܗ ܩܰܒܠܶܗ ܠܚܰܫܳܐ ܕܕܶܚܠܬܳܐ܆ ܒܳܗ̇ ܙܪܰܥ ܠܰܠܒܺܝܒܽܘܬܳܐ ܘܰܠܓܰܢ̱ܒܳܪܽܘܬܳܐ܆ ܗܳܝ ܕܡܶܢܳܗ̇ ܠܗܳܢܽܘܢ ܕܗܰܝܡܶܢܘ ܒܶܗ܆ ܠܘܳܬ ܐܰܓܽܘ̈ܢܶܐ ܪܰܘܪ̈ܒܶܐ ܕܣܳܗܕܽܘܬܳܐ ܙܰܪܶܙ ܐܶܢܽܘܢ.

ܒܰܕܓܽܘܢ ܐܳܦ ܥܰܠ ܨܠܺܝܒܳܐ ܗܳܝ ܕܰܐ‌ܠܳܗܝ ܐܰ‌ܠܳܗܝ ܠܡܳܢܳܐ ܫܒܰܩܬܳܢܝ^[21]܆ ܚܠܳܦܰܝܢ ܐܰܙܥܩܳܗ̇܆ ܟܰܕ ܠܰܣܢܺܐܓܪܽܘܬܳܐ ܕܰܚܠܳܦ ܟܽܠܶܗ ܓܶܢܣܳܐ ܩܰܒܶܠ ܥܠܰܘܗ̱ܝ. ܚܢܰܢ ܓܶܝܪ ܐܺܝܬܰܝܢ ܗ̱ܘܰܝܢ ܗܳܢܽܘܢ ܕܰܫܒܺܝܩܺܝܢ ܗ̱ܘܰܝܢ ܡܶܛܽܠ ܠܳܐ ܡܶܫܬܰܡܥܳܢܽܘܬܳܐ ܕܳܐܕܳܡ ܗܰܘ ܐܰܒܽܘܢ ܩܰܕܡܳܝܳܐ. ܕܠܰܘ ܓܶܝܪ ܗܽܘ ܫܒܺܝܩ ܗ̱ܘܳܐ܆ ܠܬܰܠܡܺܝܕܰܘ̈ܗ̱ܝ ܡܩܰܕܶܡ ܗ̱ܘܳܐ ܐܳܡܰܪ ܟܰܕ ܠܘܳܬ ܚܰܫܳܐ ܦܳܪܽܘܩܳܝܳܐ ܐܳܬܶܐ ܗ̱ܘܳܐ܆ ܕܗܳܐ ܐܳܬܝܳܐ ܫܳܥܬܳܐ ܐܳܦ ܗܳܫܳܐ ܐܺܝܬܶܝܗ̇܆ ܕܬܶܬܒܰܕܪܽܘܢ ܟܽܠ ܚܰܕ ܠܰܐܬܪܶܗ܆ ܘܠܺܝ ܒܰܠܚܽܘܕܰܝ ܬܶܫܒܩܽܘܢܳܢܝ. ܘܠܳܐ ܐܺܝܬܰܝ ܠܚܽܘܕܰܝ. ܡܶܛܽܠ ܕܳܐܒܝ ܥܰܡܝ ܐܺܝܬܰܘܗ̱ܝ^[22]. ܡܳܕܶܝܢ܆ ܠܰܘ ܗܽܘ ܐܺܝܬܰܘܗ̱ܝ ܗ̱ܘܳܐ ܕܰܫܒܺܝܩ ܗ̱ܘܳܐ܆ ܐܶܠܳܐ ܚܠܳܦܰܝܢ ܗܳܢܽܘܢ ܕܰܫܒܺܝܩܺܝܢ ܗ̱ܘܰܝܢ ܩܥܳܐ܆ ܗܳܢܽܘܢ ܕܡܶܛܽܠܳܬܗܽܘܢ ܐܳܦ ܐܳܡܰܪ ܗ̱ܘܳܐ ܒܕܰܘܺܝܕ ܢܒܺܝܳܐ ܟܰܕ ܗܶܢܶܝܢ ܗܳܠܶܝܢ ܒ̈ܢܳܬ ܩ̈ܳܠܶܐ ܩܰܕܶܡ ܐܶܡܰܪ: ܐܰ‌ܠܳܗܳܐ ܐܰ‌ܠܳܗܳܐ ܕܺܝܠܝ ܨܽܘܬ̣ܰܝܢܝ܆ ܠܡܢܳܐ ܫܒܰܩܬܳܢܝ܆ ܠܪܽܘܚܩܳܐ ܡܶܢ ܦܽܘܪܩܳܢܳܐ ܕܺܝܠܝ^[23] ܡ̈ܶܠܶܐ ܕܫܳܪ̈ܥܳܬܳܐ ܕܺܝܠܝ^[24]. ܠܰܘ ܓܶܝܪ ܚܠܳܦ ܫܳܪ̈ܥܳܬܳܐ ܒܰܝ̈ܬܳܝܳܬܳܐ ܕܺܝܠܶܗ ܡܶܬܟܰܫܰܦ ܗ̱ܘܳܐ܆ ܗܰܘ ܕܠܳܐ ܥܒܰܕ ܚܛܺܝܬܳܐ܆ ܘܳܐܦܠܳܐ ܐܶܫܬܟܰܚ ܢܶܟܠܳܐ ܒܦܽܘܡܶܗ^[25]. ܠܗܳܕܶܐ ܓܥܳܬܳܐ܆ ܩܥܳܬܳܐ ܚܰܝܠܬܳܢܺܝܬܳܐ ܩܪܳܗ̇ ܫܠܺܝܚܳܐ. ܗܳܝ ܕܥܰܡܳܗ̇ ܟܰܕ ܡܶܬܟܰܫܰܦ ܗ̱ܘܳܐ ܕܰܡܰܥ܆ ܟܰܕ ܠܰܢ ܐܰܫ̣ܶܐܠ^[26] ‌ܐܶܢܶܝܢ ܠܕܶܡ̈ܥܶܐ܆ ܐܰܝܟ ܡܳܐ ܕܳܐܦ ܠܒܰܪ̱ܬ ܩܳܠܳܐ^[27]. ܚܰܝܠܬܳܢܺܝܬܳܐ ܓܶܝܪ ܐܰܝܟ ܕܒܰܫܪܳܪܳܐ ܐܺܝܬܶܝܗ̇ ܗ̱ܘܳܬ ܩܥܳܬܳܐ܆ ܗܳܝ ܕܰܒܝܰܕ ܟܽܠܶܗ ܗܳܢܳܐ ܙܰܒܢܳܐ ܐܶܫܟܚܰܬ܆ ܕܬܰܪܟܶܢ ܠܘܳܬܰܢ ܠܡܰܫܡܰܥܬܶܗ ܕܰܐܒܳܐ܆ ܠܗܳܝ ܕܰܐܗܦܟܳܗ̇ ܥܒܳܪ ܦܽܘܩܕܳܢܳܐ ܗܰܘ ܕܳܐܕܳܡ. ܐܰܝܟܰܢܳܐ ܓܶܝܪ ܥܬܺܝܕ ܗ̱ܘܳܐ ܕܥܰܠ ܩܥܳܬܳܐ ܚܰܝܠܬܳܢܺܝܬܳܐ ܢܶܣܬܢܶܩ ܟܰܕ ܚܠܳܦ ܢܰܦܫܶܗ ܡܶܬܟܰܫܰܦ ܗ̱ܘܳܐ ܗܽܘ ܒܪܳܐ܆ ܟܰܕ ܡܳܟܣܳܐ ܘܙܳܢܺܝܬܳܐ ܡܶܬܬܰܢܚܺܝܢ ܘܰܡܕܰܡܥܺܝܢ ܒܫܶܠܝܳܐ ܘܡܶܫܬܰܡܥܺܝܢ. ܕܒܰܡܕܰܒܪܳܢܽܘܬܳܐ ܓܶܝܪ ܡܨܰܠܶܐ ܗ̱ܘܳܐ܆ ܘܠܰܘ ܟܰܕ ܗܽܘ ܥܰܠ ܗܕܶܐ ܣܢܺܝܩ ܗ̱ܘܳܐ܆ ܐܰܘܕܰܥ. ܟܰܕ ܨܰܠܺܝ ܥܰܠ ܠܳܥܳܙܳܪ ܘܶܐܡܰܪ: ܐܰܒܳܐ ܡܰܘܕܶܐ ܐ̱ܢܳܐ ܠܳܟ ܕܰܫܡܰܥܬܳܢܝ܆ ܐܶܢܳܐ ܕܶܝܢ ܝܳܕܰܥ ܗ̱ܘܺܝܬ ܕܰܒܟܽܠܙܒܰܢ ܫܳܡܰܥ ܐܰܢ̱ܬ ܠܺܝ܆ ܐܶܠܳܐ ܡܶܛܽܠ ܗܳܢܳܐ ܕܩܳܐܶܡ ܟܶܢܫܳܐ ܚܕܳܪ̈ܰܝ ܐܶܡܪܶܬ܆ ܕܰܢܗܰܝܡܢܽܘܢ ܕܰܐܢ̱ܬ ܫܰܕܰܪܬܳܢܝ^[28].

ܐܰܟܙܢܳܐ ܗܳܟܺܝܠ ܕܰܠܫܳܪ̈ܥܳܬܳܐ ܕܺܝܠܰܢ ܒܰܝܬܺܝ ܠܶܗ ܟܰܕ ܠܳܐ ܝܳܕܰܥ ܗ̱ܘܳܐ ܚܛܺܝܬܳܐ܆ ܗܳܟܰܢܳܐ ܐܳܦ ܠܦܽܘܪܩܳܢܳܐ ܕܺܝܠܰܢ ܦܽܘܪܩܳܢܳܐ ܕܺܝܠܶܗ ܩܳܪܶܐ ܗ̱ܘܳܐ܆ ܘܳܐܡܰܪ ܗ̱ܘܳܐ ܟܰܕ ܗܽܘ ܐܺܝܬܰܘܗ̱ܝ ܦܳܪܽܘܩܳܐ܆ ܠܪܽܘܚܩܳܐ ܡܶܢ ܦܽܘܪܩܳܢܳܐ ܕܺܝܠܝ܆ ܡ̈ܶܠܶܐ ܕܫܳܪ̈ܥܳܬܳܐ ܕܺܝܠܝ. ܡܶܛܽܠ ܗܳܕܶܐ ܠܘܳܬ ܗܰܘ ܕܡܶܫܟܰܚ ܗ̱ܘܳܐ ܕܢܶܦܪܩܺܝܘܗ̱ܝ ܡܶܢ ܡܰܘܬܳܐ ܓܳܥܶܐ ܗ̱ܘܳܐ܆ ܐܳܦ ܡܶܫܬܡܰܥ ܗ̱ܘܳܐ ܡܶܢ ܕܶܚܠܬܳܐ. ܘܟܰܕ ܛܳܒ ܐܶܢ ܕܗܽܘ ܢܶܬܦܪܶܩ ܡܶܢ ܡܰܘܬܳܐ ܡܦܺܝܤ ܗ̱ܘܳܐ܆ ܝܰܬܺܝܪܳܐܺܝܬ ܠܳܐ ܐܶܫܬܡܰܥ. ܐܳܦ ܓܶܝܪ ܡܺܝܬ ܠܶܗ. ܐܶܠܳܐ ܐܶܢܗܽܘ ܕܡܶܬܬܥܺܝܪܺܝܢܰܢ ܘܡܶܣܬܰܟܠܺܝܢ ܚ̱ܢܰܢ܆ ܐܶܫܬܡܰܥ ܠܶܗ܆ ܟܰܕ ܕܰܚܢܰܢ ܒܶܗ ܢܶܬܦܪܶܩ ܘܢܶܬܦܰܨܶܐ ܡܶܢ ܠܰܘܛܬܳܐ ܕܡܰܘܬܳܐ ܗܳܝ ܕܥܰܠ ‌ܐܳܕܳܡ ܡܶܬܟܰܫܰܦ ܗ̱ܘܳܐ܆ ܠܗܳܝ ܟܺܝܬ ܕܰܒܡܰܘܬܳܐ ܒܰܝܬܳܝܳܐ ܕܺܝܠܶܗ ܫܪܳܗ̇. ܘܰܐܟܙܢܳܐ ܕܠܰܢ ܐܰܘܙܦܳܗ̇^[29] ܠܰܨܠܽܘܬܳܐ ܘܰܠܕܶܡܥܬܳܐ܆ ܗܳܟܰܢܐ ܐܳܦ ܠܕܶܚܠܬܳܐ܆ ܘܰܠܗܳܝ ܕܢܺܐܠܰܦ ܡܶܫܬܰܡܥܳܢܽܘܬܳܐ ܡܶܢ ܗܳܠܶܝܢ ܕܚܰܫ. ܠܰܘ ܓܶܝܪ ܗܽܘ ܣܢܺܝܩ ܗ̱ܘܳܐ ܥܰܠ ܝܽܘܠܦܳܢܳܐ܆ ܗܰܘ ܕܰܠܟܽܠܗܶܝܢ ܝܳܕܰܥ. ܐܶܠܳܐ ܟܰܕ ܪܺܝܫܺܝܬܳܐ ܕܓܶܢܣܳܐ ܕܺܝܠܰܢ ܨܒܳܐ ܕܢܶܗܘܶܐ܆ ܠܚܰܣܺܝܪ̈ܳܬܳܐ ܐܰܘ ܟܺܝܬ ܒܽܘܨܳܪ̈ܶܐ ܕܳܐܕܳܡ ܡܰܠܺܝ. ܡܶܛܽܠܗܳܕܶܐ܆ ܐܳܦ ܕܶܐܫܬܰܡܠܺܝ ܡܶܬܶܐܡܰܪ܆ ܗܰܘ ܕܺܐܝܬܰܘܗ̱ܝ ܡܫܰܡܠܰܝ ܒܟܽܠ ܒܰܟܝܳܢܶܗ܆ ܟܰܕ ܒܗܳܝ ܕܰܗܘ̣ܳܐ ܒܰܪܢܳܫܳܐ܆ ܠܠܳܐ ܡܫܰܡܠܝܽܘܬܳܐ ܕܺܝܠܰܢ ܒܰܝܬܺܝ ܠܶܗ܆ ܘܝܰܗ̱ܒ ܠܰܢ ܛܽܘܦܣܳܐ ܡܰܠܦܳܢܳܝܳܐ ܕܰܡܫܰܡܠܝܽܘܬܳܐ܆ ܘܰܗܘ̣ܳܐ ܠܟܽܠܗܽܘܢ ܗܳܢܽܘܢ ܕܡܶܫܬܰܡܥܺܝܢ ܠܶܗ܆ ܥܶܠܬܳܐ ܕܦܽܘܪܩܳܢܳܐ ܕܰܠܥܳܠܰܡ^[30].

ܐܰܝܟܰܢܳܐ ܗܳܟܺܝܠ ܟܰܕ ܒܳܗܶܬ ܬܶܐܽܘܕܽܘܪܺܝܛܽܘܤ ܒܗܳܠܶܝܢ ܕܗܳܟܰܢܳܐ ܐܺܝܬܰܝܗܶܝܢ ܦܰܐܝ̈ܳܬ ܠܰܐܠܳܗܳܐ ܐܰܟܚܕܳܐ ܘܰܡܕܰܒܪ̈ܳܢܳܝܳܬܳܐ܆ ܡܢܰܟܪܳܐ ܠܶܗ ܡܶܢܗܶܝܢ ܠܰܐܠܳܗܳܐ ܡܶܠܬܳܐ܆ ܠܗܰܘ ܕܡܶܛܽܠܳܬܗܶܝܢ ܕܗܳܠܶܝܢ ܨܶܒܝܳܢܳܐܺܝܬ ܣܰܪܶܩ ܗܽܘ ܠܶܗ ܘܶܐܬܡܰܣܟܰܢ. ܐܶܢ ܓܶܝܪ ܡܶܢ ܗܳܠܶܝܢ ܢܰܪܚܩܺܝܘܗ̱ܝ ܐܰܝܟ ܕܡܶܢ ܫܺܝ̈ܛܳܬܳܐ ܘܰܙܥܽܘܪ̈ܝܳܬܳܐ܆ ܡܶܢ ܐܰܝܟܳܐ ܢܺܐܠܰܦ ܕܶܐܬܡܰܣܟܰܢ. ܐܶܠܳܐ ܟܰܕ ܠܳܐ ܡܶܣܬܰܟܰܠ ܠܚܶܟܡܬܳܗ̇ ܕܡܶܬܒܰܪܢܫܳܢܽܘܬܳܐ ܐܰ‌ܠܳܗܳܝܬܳܐ܆ ܘܠܰܟܝܳܢܳܐ ܐ̱ܢܳܫܳܝܳܐ ܕܺܝܠܳܢܳܐܺܝܬ ܘܡܶܢܶܗ ܘܠܶܗ ܝܳܗܶܒ ܠܗܶܝܢ ܠܗܳܠܶܝܢ܆ ܠܰܬܪܶܝܢ ܡܦܰܠܶܓ ܠܶܗ ܠܚܰܕ ܡܫܺܝܚܳܐ ܘܰܡܫܰܐܶܠ܆ ܕܡܰܢܽܘ ܗܰܘ ܕܰܒܥܰܡ̈ܠܶܐ ܕܰܡܝܰܬܪܽܘܬܳܐ ܐܶܫܬܰܡܠܺܝ܆ ܘܠܰܘ ܒܰܟܝܳܢܳܐ ܐܺܝܬܰܘܗ̱ܝ ܗ̱ܘܳܐ ܡܫܰܡܠܝܳܐ. ܡܰܢܽܘ ܗܰܘ ܕܰܒܢܶܣܝܳܢܳܐ ܝܰܠܦܳܗ̇ ܠܡܶܫܬܰܡܥܳܢܽܘܬܳܐ܆ ܘܰܠܗܳܕܶܐ ܠܳܐ ܝܳܕܰܥ ܗ̱ܘܳܐ ܠܳܗ̇ ܩܕܳܡ ܢܶܣܝܳܢܳܐ. ܡܰܢܽܘ ܗܰܘ ܕܥܰܡ ܕܶܚܠܬܳܐ^[31] ܚ̣ܝܳܐ܆ ܘܥܰܡ ܕܶܡ̈ܥܶܐ ܬܰܟܫ̈ܦܳܬܳܐ ܩܰܪܶܒ܆ ܘܰܠܡܶܦܪܰܩ ܗܽܘ ܠܶܗ ܠܳܐ ܡܨܶܐ ܗ̱ܘܳܐ܆ ܐܶܠܳܐ ܡܦܺܝܤ ܗ̱ܘܳܐ ܠܗܰܘ ܕܡܶܫܟܰܚ ܗ̱ܘܳܐ ܠܡܶܦܪܰܩ܆ ܐܶܢ ܚܰܕ ܐܳܡܰܪ ܐܰܢ̱ܬ ܘܡܶܬܪܰܥܶܐ ܐܰܢ̱ܬ ܠܰܡܫܺܝܚܳܐ܆ ܐܰܝܟܰܢܳܐ ܡܫܰܐܶܠ ‌ܐܰܢ̱ܬ ܐܰܝܟ ܕܥܰܠ ܬܪܶܝܢ ܦܰܪ̈ܨܽܘܦܶܐ ܗܳܝ ܕܡܰܢܽܘ܆ ܐܰܝܟܰܢܳܐ ܕܰܠܒܰܪܢܳܫܐ ܕܺܝܠܳܢܳܐܺܝܬ ܗܳܠܶܝܢ ܬܰܩܶܦ܆ ܘܠܰܘ ܠܰܐܠܳܗܳܐ ܡܶܠܬܳܐ ܕܰܡܒܰܣܰܪ ܘܰܡܒܰܪܢܰܫ܆ ܠܗܰܘ ܕܰܚܢܰܢ ܟܰܕ ܚܰܕ ܝܳܕܥܺܝܢܰܢ ܠܶܗ܆ ܘܡܶܫܬܰܘܕܥܺܝܢܰܢ ܠܫܽܘܚܠܳܦܳܐ܆ ܘܕܰܒ̈ܢܳܬ ܩ̈ܳܠܶܐ ܘܰܕܣܽܘܥܪ̈ܳܢܶܐ^[32]܆ ܘܰܠܗܳܠܶܝܢ ܡܰܢ ܡܰܘܕܶܝܢ ܚ̱ܢܰܢ ܦܰܐܝ̈ܳܬ ܠܰܐܠܳܗܳܐ܆ ܠܗܳܠܶܝܢ ܕܶܝܢ ܐ̱ܢܳܫܳܝ̈ܳܬܳܐ܆ ܠܶܗ ܝܳܗܒܺܝܢܰܢ ܠܗܶܝܢ ܠܟܽܠܗܶܝܢ܆ ܟܰܕ ܠܳܐ ܛܰܥܝܳܐ ܠܰܢ ܕܗܽܘ ܟܰܕ ܗܽܘ ܐܺܝܬܰܘܗ̱ܝ ܐܰ‌ܠܳܗܳܐ ܟܺܝܬ ܘܒܰܪܢܳܫܳܐ܆ ܘܠܳܐ ܡܦܰܪܫܺܝܢ ܚ̱ܢܰܢ ܠܗܶܝܢ ܘܰܡܦܰܠܓܺܝܢܰܢ ܠܰܬܪܶܝܢ ܟܝܳܢ̈ܶܐ. ܠܗܳܕܶܐ ܓܶܝܪ ܐܳܦ ܦܰܘܠܽܘܤ ܐܰܘܕܰܥ ܟܰܕ ܐܶܡܰܪ܆ ܗܰܘ ܕܰܒܝܰܘ̈ܡܳܬܳܐ ܕܒܶܣܪܶܗ܆ ܒܳܥ̈ܘܳܬܳܐ ܘܬܰܟܫ̈ܦܳܬܳܐ ܩܰܪܶܒ^[33]܆ ܟܰܕ ܩܕܳܡ ܡܶܬܒܰܪܢܫܳܢܽܘܬܳܐ ܕܠܳܐ ܒܶܣܪܳܐ ܝܳܕܰܥ ܠܶܗ. ܠܗܰܘ ܕܰܠܗܳܠܶܝܢ ܫܺܝ̈ܛܳܬܳܐ ܘܐ̱ܢܳܫܳܝ̈ܳܬܳܐ ܩܰܒܶܠ ܥܠܰܘܗ̱ܝ܆ ܘܰܐܘܣܶܦ ܗܳܝ ܕܟܰܕ ܛܳܒ ܒܪܳܐ ܐܺܝܬܰܘܗ̱ܝ܆ ܘܶܐܬܕܰܡܰܪ ܒܟܽܠܶܗ ܗܳܢܳܐ ܡܽܘܟܳܟܳܐ ܕܡܶܛܽܠܳܬܰܢ܆ ܐܰܝܟ ܕܕܰܒܪܳܐ ܕܰܐ‌ܠܳܗܳܐ ܕܒܰܟܝܳܢܳܐ. ܠܗܰܘ ܕܳܐܦ ܚܢܰܢ ܬܶܫܒܽܘܚܬܳܐ ܡܰܣܩܺܝܢܰܢ܆ ܥܰܡ ܐܰܒܳܐ ܘܰܒܪܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܚܰܡܫܺܝܢ ܘܬܶܫܥܳܐ.

ܐ. ܩܘܪ̈ܝܢܬܝܐ. 3: 11 [1]

ܐܫܥܝܐ. 28: 16 [2]

ܩܘܠܣ̈ܝܐ. 1: 20 [3]

ܐܦܣ̈ܝܐ. 2: 14 [4]

ܐ. ܛܝܡܬܐܘܣ. 2: 5 [5]

ܒܰܪ ܚܳܬܝ [6]

ܬܫܒ̈ܚܳܬ ܬܫܒ̈ܚܳܬܳܐ. 5: 11 [7]

ܒܰܪ ܚܳܬܳܐ ܒܝܰܘܢܳܝܐ ܫܘܶܐ ܠܡܺܐܡܰܪ ܒܰܪ ܐܰܚܐ ܘܒܰܪ ܚܳܬܳܐ.[8]

ܪ̈ܗܘܡܝܐ. 8: 29 [9]

ܐܦܣ̈ܝܐ. 5: 30 [10]

ܝܘܚܢܢ. 1: 9 [11]

ܡܙܡܘܪ̈ܐ. 110: 3 [12]

ܝܘܚܢܢ. 1: 14 [13]

ܝܘܚܢܢ. 1: 1 [14]

ܝܘܚܢܢ. 1: 18 [15]

ܚܠܳܦܰܝܢ[16]

ܡܬܝ. 26: 39 [17]

ܡܬܝ. 16: 22 ـ 23 [18]

ܒܳܗ̇ ܕܶܝܢ ܒܗܳܕܶܐ[19]

ܡܬܝ. 26: 39[20]

ܡܬܝ. 27: 46  ܐܦ ܡܪܩܘܣ. 15: 34 [21]

ܝܘܚܢܢ. 16: 32 [22]

ܕܺܝܠܝ. ܡܶܛܽܠ[23]

ܡܙܡܘܪ̈ܐ. 17: 1 [24]

ܐ. ܦܛܪܘܣ. 2: 22  ܐܦ ܐܫܥܝܐ. 53: 9 [25]

 ܐܰܘܙܶܦ[26]

ܥܒܪ̈ܝܐ. 5: 7 [27]

ܝܘܚܢܢ. 11: 41 ـ 42 [28]

ܐܫ̣ܐܠ[29]

ܥܒܪ̈ܝܐ. 5: 7 ـ 9 [30]

ܩܰܢܺܝܛܽܘܬ ܢܟܦܘܬܐ [31]

ܘܰܠܒܰܪ̱ܬ ܩܳܠܐ ܘܰܠܫܽܘܚܠܳܦܳܐ ܕܣܽܘܥܪ̈ܳܢܶܐ[32]

ܥܒܪ̈ܝܐ. 5: 7 ـ 8 [33]