ܡܐܡܪܳܐ ܕܚܰܡܫܺܝܢ ܘܰܬܡܳܢܝܳܐ

ܥܰܠ ܗܳܝ ܕܶܐܬܳܐ ܠܩܽܘܪܽܘܤ ܡܕܺܝܢ̱ܬܳܐ܆ ܘܥܰܠ ܡܕܰܒܪܳܢܽܘܬܳܐ ܕܡܶܐܬܺܝܬܳܐ ܕܒܰܒܣܰܪ ܕܰܡܫܺܝܚܳܐ ܐܰ‌ܠܳܗܰܢ.

58: ܥܝܳܕܳܐ ܥܰܬܺܝܩܳܐ ܨܳܒܶܐ ܕܗܳܢܽܘܢ ܕܨܳܝܒܺܝܢ ܠܥ̈ܺܕܳܬܳܐ܆ ܘܡܶܫܟܚܺܝܢ ܠܡܺܐܡܰܪ ܡܶܕܶܡ ܡܰܘܬܪܳܢܳܐ܆ ܢܶܥܒܪܽܘܢ ܠܰܡܨܰܥܬܳܐ ܘܢܶܬܠܽܘܢ ܠܗܳܢܽܘܢ ܕܫܳܡܥܺܝܢ܆ ܡܶܢ ܚܶܟܡܬܳܐ ܘܺܝܕܰܥܬܳܐ ܗܳܝ ܕܰܫܟܺܝܚܳܐ ܒܗܽܘܢ܆ ܐܶܢܗܽܘ^[1] ܐܰܪܰܐ ܕܺܐܝܬܶܝܗ̇.

ܥܰܠ ܗܳܝ ܘܳܐܦ ܠܗܳܢܽܘܢ ܕܰܥܕܰܟܺܝܠ ܒܛܶܠܳܢܺܝܬܳܐ ܕܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܡܶܬܕܰܒܪܺܝܢ ܗ̱ܘܰܘ܆ ܐܺܝܬܶܝܗ̇ ܗ̱ܘܳܬ ܗܳܕܶܐ ܚܦܺܝܛܽܘܬܳܐ. ܟܬܺܝܒ ܓܶܝܪ ܕܟܰܕ ܦܰܘܠܽܘܤ ܘܒܰܪܢܰܒܰܐ ܡܰܟܪܙܺܝܢ ܗ̱ܘܰܘ ܐܶܘܰܢܓܶܠܺܝܽܘܢ܆ ܘܒܰܐܢܛܝܽܘܟܺܝܰܐ ܗܳܝ ܕܦܺܝܣܺܝܕܝܰܐ ܥܰܠ̣ܘ ܠܰܟܢܽܘܫܬܳܐ ܕܝܽܗ̱ܘ̈ܕܳܝܶܐ܆ ܫܰܕܰܪܘ ܠܘܳܬܗܽܘܢ ܗܳܢܽܘܢ ܪ̈ܺܝܫܰܝ ܟܢܽܘܫܬܳܐ ܐ̱ܢܳܫܺܝ̈ܢ ܟܰܕ ܐܳܡܪܺܝܢ: ܓܰܒܪ̈ܶܐ ܐܰܚ̈ܰܝܢ܆ ܐܶܢ ܐܺܝܬ ܒܟܽܘܢ ܡܶܠܬܳܐ ܕܒܽܘܝܳܐܳܐ ܠܘܳܬ ܥܰܡܳܐ ܐܶܡܰܪܘ^[2].

ܘܳܐܦ ܗܽܘ ܕܶܝܢ ܦܰܘܠܽܘܤ ܡܶܬܚܙܶܐ܆ ܕܠܳܐ ܡܬܽܘܡ ܥܒܰܕ ܡܶܐܬܺܝܬܶܗ ܕܰܠܘܳܬ ܐ̱ܢܳܫܺܝ̈ܢ ܕܠܳܐ ܡܶܠܬܳܐ܆ ܐܰܘ ܕܰܣܦܺܝܩܳܐ ܡܶܢ ܡܰܠܦܳܢܽܘܬܳܐ. ܐܶܠܳܐ ܕܰܠܘܳܬ ܟܽܠܢܳܫ ܒܳܗ̇ ܒܰܕܡܽܘܬܳܐ܆ ܒܡܶܠܬܳܐ ܡܰܠܽܘܢ ܐܳܬܶܐ ܗ̱ܘܳܐ܆ ܐܰܘ ܒܡܶܐܬܺܝܬܳܐ ܕܦܰܓܪܳܐ. ܘܠܳܗ̇ ܠܗܳܕܶܐ ܡܚܰܘܶܐ ܝܰܬܺܝܪ ܢܰܗܺܝܪܳܐܺܝܬ ܗܽܘ ܟܬܳܒܳܐ ܐܰ‌ܠܳܗܳܝܳܐ܆ ܟܰܕ ܐܳܡܰܪ ܡܶܛܽܠܳܬܶܗ: ܕܟܰܕ ܐܶܬܳܐ ܠܡܰܩܶܕܽܘܢܝܰܐ܆ ܟܰܕ ܐܶܬܟܪܶܟ ܟܺܝܬ ܒܰܐܬܪ̈ܰܘܳܬܳܐ ܗܳܠܶܝܢ ܘܒܰܝܰܐ ܐܶܢܽܘܢ ܒܡܶܠܬܳܐ ܣܰܓܺܝܐܬܳܐ܆ ܐܶܬܳܐ ܠܐܠܕܐ^[3]. ܗܳܢܳܐ ܟܽܠܶܗ ܐܺܝܬܰܘܗ̱ܝ ܗ̱ܘܳܐ ܠܶܗ ܣܽܘܥܪܳܢܳܐ ܒܝܰܨܺܝܦܽܘܬܳܐ ܘܒܰܫܩܳܠܛܰܥܢܳܐ܆ ܐܰܝܟܰܢܳܐ ܕܳܐܦ ܒܺܐܝܕܳܐ ܒܺܐܝܕܳܐ ܢܶܥܒܰܪ ܒܗܽܘܢ ܒܰܐܬܪ̈ܰܘܳܬܳܐ. ܘܕܰܠܗܳܢܽܘܢ^[4] ܕܟܽܠܚܰܕ ܠܰܘ ܡܫܳܟܳܐܺܝܬ܆ ܘܳܐܦܠܳܐ ܐܰܝܟ ܕܰܒܡܰܥܒܰܪܬܳܐ ܢܒܰܝܰܐ ܘܢܰܠܶܦ܆ ܐܶܠܳܐ ܒܡܶܠܬܳܐ ܣܰܓܺܝܐܬܳܐ.

ܟܰܕ ܗܳܟܺܝܠ ܠܗܳܢܳܐ ܢܳܡܽܘܣܳܐ ܨܳܒܶܐ ܐ̱ܢܳܐ ܐܳܦ ܐܶܢܳܐ ܕܶܐ݀ܡܰܠܶܐ܆ ܘܡܶܕܶܡ ܡܶܢ ܗܳܠܶܝܢ ܕܳܐ‌ܠ̈ܨܳܢ ܘܡܰܘܬܪ̈ܳܢ ܐܶ݀ܡܰܠܶܠ܆ ܘܚܳܙܶܐ ܐ̱ܢܳܐ ܠܗܰܘ ܕܰܒܪܺܝܫ ܥܺܕܬܳܐ ܗܳܕܶܐ ܟܳܗܢܳܝܬܳܐ ܝܳܬܶܒ܆ ܕܥܰܡ ܟܽܠܳܗ̇ ܝܺܕܰܥܬܳܐ ܡܠܺܝܠܬܳܐ ܘܪܳܥܝ̣ܳܝ̣ܬܳܐ܆ ܡܕܰܒܰܪ ܡܰܢ ܠܡܰܪܥܺܝܬܳܐ ܠܘܳܬ ܪܶܥܝܳܐ ܛܳܒܳܐ ܕܡܶܢ ܟܽܠ ܡܰܘܥܺܝܬܳܐ ܡܰܥܒܕܰܬ ܚܒܳܠܳܐ ܕܟܶܐ܆ ܡܪܰܒܶܐ ܕܶܝܢ ܥܰܠ ܡܰܝ̈ܳܐ ܕܰܢܝܳܚܳܐ ܕܠܳܐ ܡܶܕܶܡ ܫܥܺܝܢܳܝܳܐ ܐܺܝܬ ܒܗܽܘܢ܆ ܐܶܠܳܐ ܐܺܝܬܰܝܗܽܘܢ ܡܶܫ̈ܬܰܬܝܳܢܶܐ ܘܠܳܐ ܕܠܺܝ̈ܚܶܐ ܘܰܫܦܰܝ̈ܳܐ ܘܢܰܗܺܝܪ̈ܶܐ܆ ܚܳܙܶܐ ܐ̱ܢܳܐ ܕܶܝܢ ܠܡܰܪܥܺܝܬܳܐ ܕܰܠܩܳܠܶܗ ܕܪܳܥܝܳܐ ܡܶܫܬܰܘܕܥܳܐ ܘܰܚܘܺܝܚܳܐܺܝܬ ܢܳܩܦܳܐ ܠܶܗ܆ ܘܠܳܐ ܬܳܙܳܐ ܘܥܳܪܩܳܐ ܡܶܢܶܗ ܐܰܝܟ ܕܡܶܢ ܡܰܡܠܠܳܐ ܢܽܘܟܪܳܝܳܐ܆ ܝܰܬܺܝܪܳܐܺܝܬ ܠܘܳܬ ܗܳܝ ܕܳܐܡܰܪ ܡܶܬܬܰܝܬܶܐ ܐ̱ܢܳܐ. ܠܡܺܐܡܰܪ ܕܶܝܢ ܡܶܕܶܡ ܚܰܕܬܳܐ܆ ܘܠܳܐ ܚܰܕ.

ܠܰܘ ܓܶܝܪ ܐ̱ܚܪܺܢܳܐ ܝܶܫܽܘܥ ܢܰܟܪܶܙ ܠܟܽܘܢ܆ ܗܰܘ ܕܪܳܥܝܳܐ ܗܳܢܳܐ ܠܳܐ ܐܰܟܪܶܙ܆ ܘܳܐܦܠܳܐ ܬܽܘܒ ܣܒܰܪܬܳܐ ܐ̱ܚܪܺܬܳܐ܆ ܗܳܝ ܕܠܳܐ ܩܰܒܶܠܬܽܘܢ. ܘܡܶܛܽܠ ܟܺܝܬ ܕܰܐܝܟ ܐܰܪܕܺܝܟܠܳܐ ܚܰܟܺܝܡܳܐ܆ ܫܰܦܺܝܪ ܣܳܡܳܗ̇ ܠܫܶܬܶܐܣܬܳܐ܆ ܠܳܐ ܡܶܫܟܚܺܝܢ ܚ̱ܢܰܢ ܕܫܶܬܶܐܣܬܳܐ ܐ̱ܚܪܺܬܳܐ ܢ݀ܣܺܝܡ ܠܒܰܪ ܡܶܢ ܗܳܝ ܕܣܺܝܡܳܐ܆ ܗܳܝ ܕܺܐܝܬܶܝܗ̇ ܡܫܺܝܚܳܐ^[5]. ܐܶܠܳܐ ܥܠܶܝܗ̇ ܠܳܚܡܳܐܺܝܬ ܢܶܒܢܶܐ܆ ܟܰܕ ܕܰܗܒܳܐ ܘܣܺܐܡܳܐ ܘܟܺܐܦ̈ܶܐ ܡܝܰܩܪ̈ܳܬܳܐ ܚܳܪܙܺܝܢܰܢ܆ ܝܽܘܠ̈ܦܳܢܶܐ ܕܟܰܝ̈ܳܐ ܘܠܳܐ ܡܚܰܠ̈ܛܶܐ ܕܰܫܪܳܪܳܐ. ܟܰܕ ܠܩܰܝ̈ܣܶܐ ܕܶܝܢ ܘܠܰܥܡܺܝܪܳܐ ܘܠܰܩ̈ܢܰܝܳܐ ܙܳܢܩܺܝܢ ܚ̱ܢܰܢ܆ ܫܟܳܚ̈ܳܬܳܐ ܕܰܓܳܠ̈ܳܬܳܐ ܘܡܰܣ̈ܠܝܳܬܳܐ ܘܰܓܒܽܘܠ̈ܝܶܐ ܕܗܶܪ̈ܣܝܤ. ܗܳܝ ܓܶܝܪ ܕܢܶܕܰܥ ܫܰܦܺܝܪ ܕܡܳܢܳܐ ܐܺܝܬܶܝܗ̇ ܗܺܝ ܫܶܬܶܐܣܬܳܐ܆ ܡܰܠܦܳܐ ܕܠܳܐ ܡܶܕܶܡ ܐܰܟܣܢܳܝܳܐ ܐܰܘ ܢܽܘܟܪܳܝܳܐ ܢܶܒܢܶܐ ܥܠܶܝܗ̇.

ܡܳܢܳܐ ܗܳܟܺܝܠ ‌ܐܺܝܬܶܝܗ̇ ܗܺܝ ܫܶܬܶܐܣܬܳܐ܆ ܢܺ݀ܐܡܰܪ. ܒܠܶܒܳܐ ܓܶܝܪ ܡܗܰܝܡܢܺܝܢ ܚ̱ܢܰܢ ܠܙܰܕܺܝܩܽܘܬܳܐ܆ ܒܦܽܘܡܳܐ ܕܶܝܢ ܡܰܘܕܶܝܢ ܚ̱ܢܰܢ ܠܦܽܘܪܩܳܢܳܐ^[6].

ܡܫܺܝܚܳܐ ܗܰܘ ܚܶܟܡܬܳܐ ܘܚܰܝܠܳܐ ܕܰܐ‌ܠܳܗܳܐ^[7]܆ ܗܰܘ ܕܠܳܐ ܚܰܫܳܢܳܐܺܝܬ ܡܰܢ ܘܠܳܐ ܦܰܓܪܳܢܳܐܺܝܬ ܐܰܝܟ ܡܶܠܬܳܐ ܡܶܢ ܐܰܒܳܐ ܐܶܬܺܝܠܶܕ܆ ܕܠܳܐ ܫܽܘܪܳܝܳܐ ܕܶܝܢ ܗܳܢܰܘ ܕܶܝܢ ܠܳܐ ܙܰܒܢܳܐܺܝܬ ܘܰܩܕܳܡ ܟܽܠ ܥܳܠܡܳܐ ܘܰܡܬܽܘܡܳܐܺܝܬ܆ ܐܰܝܟ ܐܰܝܢܳܐ ܕܺܐܝܬܰܘܗ̱ܝ ܨܶܡܚܳܐ ܕܬܶܫܒܽܘܚܬܳܐ ܕܺܝܠܶܗ ܘܨܰܠܡܳܐ ܕܰܩܢܽܘܡܶܗ^[8]܆ ܘܰܐܝܟ ܐܰܝܢܳܐ ܕܺܐܝܬܰܘܗ̱ܝ ܒܪܳܐ ܫܘܶܐ ܒܽܐܘܣܺܝܰܐ ܠܗܰܘ ܕܝܰܠ̣ܕܶܗ܆ ܘܰܐܝܟ ܝܺܚܺܝܕܳܝܳܐ ܘܰܠܚܽܘܕܳܝܳܐ ܕܡܶܢ ܠܚܽܘܕܳܝܳܐ ܕܟܽܠܗܶܝܢ ܐܺܝܬ ܠܶܗ ܐܽܘܣܝܳܐܺܝܬ ܘܰܕܠܳܐ ܒܽܘܨܳܪܳܐ ܗܳܠܶܝܢ ܕܰܐܒܳܐ܆ ܘܗܽܘ^[9] ܒܶܗ ܡܩܰܘܶܐ ܠܶܗ ܐܰܝܟ ܝܽܘܩܢܳܐ ܠܳܐ ܡܫܰܚܠܦܳܐ܆ ܒܝܰܘ̈ܡܳܬܳܐ ܕܶܝܢ ܐ̱ܚܪ̈ܳܝܶܐ ܡܶܢ ܫܡܰܝܳܐ ܢܚܶܬ ܐܰܝܟ ܕܺܐܝܬܰܘܗ̱ܝ ܠܳܐ ܦܰܓܪܳܢܳܐ܆ ܘܥ̣ܰܠ ܠܡܰܪܒܥܳܐ ܒܬܽܘܠܳܝܳܐ܆ ܘܶܐܬܒܰܣܰܪ ܤܛܰܪ ܡܶܢ ܚܛܺܝܬܳܐ ܘܰܤܛܰܪ ܡܶܢ ܙܰܪܥܳܐ ܕܒܰܪܢܳܫܳܐ ܘܪܶܓܬܳܐ܆ ܡܶܢ ܪܽܘܚܳܐ ܩܰܕܺܝܫܐ ܘܡܶܢܳܗ̇ ܕܰܒܬܽܘܠܬܳܐ܆ ܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ܆ ܕܰܡܢܰܦܰܫ ܒܢܰܦܫܳܐ ܡܶܬܗܰܘܢܳܢܺܝܬܳܐ܆ ܘܠܳܐ ܫܰܚܠܶܦ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܐܰ‌ܠܳܗܳܐ܆ ܘܰܡܫܰܡܠܝܳܐܺܝܬ ܘܫܰܪܺܝܪܳܐܺܝܬ ܗܘ̣ܳܐ ܒܰܪܢܳܫܳܐ܆ ܟܰܕ ܠܳܐ ܫܰܚܠܶܦ ܗܽܘ ܠܶܗ ܠܢܰܦܫܳܐ ܐܰܘ ܠܒܶܣܪܳܐ܆ ܘܳܐܦܠܳܐ ܬܽܘܒ ܡܰܙܶܓ ܠܢܰܦܫܳܐ ܐܰܘ ܠܒܶܣܪܳܐ ܒܽܐܘܣܺܝܰܐ ܕܰܐ‌ܠܳܗܽܘܬܳܐ܆ ܕܠܳܐ ܦܽܘܪܣܳܐ ܗ̱ܝ ܓܶܝܪ܆ ܐܰܘ ܕܰܟܝܳܢܳܐ ܠܳܐ ܒ̣ܰܪܝܐ ܘܠܳܐ ܡܶܫܬܰܚܠܦܳܢܳܐ ܠܰܒܪܺܝܬܳܐ ܢܶܫܬܰܚܠܰܦ܆ ܐܰܘ ܕܰܠܘܳܬ ܐܽܘܣܺܝܰܐ ܠܳܐ ܥܒܺܝܕܬܳܐ ܢܶܫܬܰܚܠܰܦ ܢܶܥܒܰܪ ܡܶܕܡ ܡܶܢ ܗܘ̈ܰܝܳܐ܆ ܐܶܠܳܐ ܟܰܕ ܩܰܘܺܝ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܘܟܰܕ ܦܰܓܪܳܐ ܚܰܝܶܕ ܗܽܘ ܠܶܗ ܩܢܽܘܡܳܐܺܝܬ ܕܢܰܦܫܳܐ ܐܺܝܬ ܠܶܗ ܡܠܺܝܠܬܳܐ܆ ܐܰܝܟܰܢܳܐ ܕܡܶܢ ܬܪܶܝܢ ܟܝܳܢ̈ܶܐ܆ ܡܶܢ ܐܰ‌ܠܳܗܽܘܬܳܐ ܠܳܐ ܒܪܺܝܬܳܐ ܘܡܶܢ ܐ̱ܢܳܫܽܘܬܳܐ ܒܪܺܝܬܳܐ܆ ܚܰܕ ܡܫܺܝܚܳܐ ܢܶܬܚܰܘܶܐ ܠܰܢ܆ ܚܰܕ ܡܳܪܝܳܐ܆ ܚܰܕ ܦܰܪܨܽܘܦܳܐ܆ ܚܰܕ ܩܢܽܘܡܳܐ܆ ܚܰܕ ܟܝܳܢܳܐ ܕܰܡܒܰܣܰܪ ܕܡܶܠܬܳܐ.

ܘܰܐܝܟܰܢܳܐ ܚܰܕ ܐܺܝܬܰܘܗ̱ܝ ܝܰܬܺܝܪ ܡܶܬܚܰܪܝܳܢܳܐܺܝܬ ܟܒܰܪ ܬܺܐܡܰܪ܆ ܘܶܐܬܒܰܣܰܪ ܡܶܠܬܳܐ ܘܠܰܘ ܫܽܘܚܠܳܦܳܐ ܕܰܠܘܳܬ ܒܶܣܪܳܐ ܚܰܫ܆ ܐܰܘ ܐܰܝܢܳܐ ܣܳܟ ܐܺܝܬܰܘܗ̱ܝ ܙܢܳܐ ܕܰܚܕܳܝܽܘܬܳܐ ܕܰܐ‌ܠܳܗܳܐ ܡܶܠܬܳܐ ܠܘܳܬ ܦܰܓܪܳܐ. ܐܶܢܳܐ ܕܶܝܢ ܘܳܐܦ ܠܘܳܬ ܚܶܪܝ̣ܳܝ̣ܽܘܬܳܐ ܕܺܝܠܳܟ ܐܶ݀ܦܰܢܶܐ ܦܶܬܓܳܡܳܐ܆ ܘܶܐ݀ܫܪܶܐ ܠܗܳܝ ܕܡܶܬܦܰܫܟܳܐ܆ ܘܠܰܙܢܳܐ ܠܳܐ ܐܶ݀ܒܨܶܐ܆ ܘܰܒܫܶܬܩܳܐ ܐܶ݀ܝܰܩܰܪ ܠܗܳܝ ܕܠܳܐ ܡܶܬܡܰܠܠܳܐ܆ ܐܳܦ ܐܺܝܩܳܪܳܐ ܕܙܳܕܶܩ ܐ݀ܶܛܰܪ ܠܶܗ ܠܐ̱ܪܳܙܳܐ܆ ܟܰܕ ܢܳܡܽܘܣ̈ܶܐ ܕܰܟ̈ܬܳܒܶܐ ܢܦܺܝ̈ܚܰܝ ܡܶܢ ܐܰ‌ܠܳܗܳܐ ܩܳܪܶܐ ܐ̱ܢܳܐ ܠܳܟ.

ܫܡܰܥܳܝܗ̱ܝ ܓܶܝܪ ܠܦܰܘܠܽܘܤ ܗܰܘ ܕܰܡܫܺܝܚܳܐ ܐܺܝܬ ܠܶܗ ܒܶܗ ܕܰܡܡܰܠܶܠ^[10]܆ ܕܰܡܚܰܘܶܐ ܠܗܳܝ ܕܠܳܐ ܡܶܬܕܰܪܟܳܐ ܐܰܝܟ ܕܡܰܨܝܳܐ ܕܬܶܬܕܪܶܟ ܠܒܰܪܢܳܫܳܐ ܘܳܐܡܰܪ: ܕܡܶܛܽܠ ܗܳܟܺܝܠ ܕܰܛܠܳܝ̈ܶܐ^[11] ܐܶܫܬܰܘܬܰܦܘ ܠܰܕܡܳܐ ܘܰܠܒܶܣܪܳܐ܆ ܘܳܐܦ ܗܽܘ ܒܳܗ̇ ܒܰܕܡܽܘܬܳܐ ܐܶܫܬܰܘܬܰܦ ܒܗܶܝܢ ܟܰܕ ܒܗܶܝܢ^[12]. ܐܰܟܙܢܳܐ ܗܳܟܺܝܠ ܕܢܰܦܫܳܐ ܕܛܰܠܝܳܐ ܘܰܕܒܰܪܢܳܫܳܐ ܗܰܘ ܕܰܐܟܘܳܬܰܢ ܐܶܫܬܰܘܬܦܰܬ ܒܰܕܡܳܐ ܘܰܒܒܶܣܪܳܐ܆ ܘܟܰܕ ܒܽܐܘܣܺܝܰܐ ܡܚܰܝܕܳܐ ܒܡܶܠܬܳܐ ܗܳܝ ܕܰܫܘܺܝܚܽܘܬܳܐ ܕܰܐܟܚܕܳܐ܆ ܚܕܳܐ ܚܰܝܽܘܬܳܐ ܫܰܡܠܝܰܬ̣ܶܗ ܠܒܰܪܢܳܫܳܐ܆ ܟܰܕ ܠܳܐ ܗܺܝ ܐܶܫܬܰܚܠܦܰܬ̣ ܠܦܰܓܪܳܐ܆ ܐܳܦܠܳܐ ܬܽܘܒ ܗܽܘ ܦܰܓܪܳܐ ܠܢܰܦܫܳܐ܆ ܐܶܠܳܐ ܟܽܠܚܰܕ ܡܶܢܗܽܘܢ ܟܰܬܰܪ ܕܠܳܐ ܒܽܘܠܒܳܠܳܐ ܗܰܘ ܡܳܐ ܕܺܐܝܬܰܘܗ̱ܝ܆ ܠܰܘ ܕܺܝܠܳܢܳܐܺܝܬ ܘܡܶܢܶܗ ܘܠܶܗ܆ ܐܰܝܟ ܕܳܐܦ ܢܶܬܡܢܶܐ ܬܪܶܝܢ ܘܢܶܫܬܰܪ̈ܝܳܢ ܗܳܠܶܝܢ ܕܶܐܬܚܰܝ̈ܰܕܶܝܢ܆ ܐܶܠܳܐ ܟܰܕ ܒܪܶܗܛܳܐ ܕܰܐܟܚܕܳܐ ܗܰܘ ܕܡܶܢ ܬܰܪܬܶܝܢ܆ ܚܰܕ ܦܰܪܨܽܘܦܳܐ ܟܺܝܬ ܘܚܰܕ ܩܢܽܘܡܳܐ ܘܚܰܕ ܟܝܳܢܳܐ ܡܶܬܚܙܶܐ ܘܰܡܩܰܝܰܡ܆ ܒܳܗ̇ ܒܰܕܡܽܘܬܳܐ ܐܳܦ ܗܽܘ ܡܶܠܬܳܐ ܕܰܐ‌ܠܳܗܳܐ܆ ܟܰܕ ܕܠܳܐ ܙܰܪܥܳܐ ܘܰܕܠܳܐ ܚܛܳܗ ܐܶܫܬܰܘܬܰܦ ܠܰܕܡܳܐ ܘܰܠܒܶܣܪܳܐ ܕܰܡܢܰܦܰܫ ܟܺܝܬ ܒܢܰܦܫܳܐ ܡܠܺܝܠܬܳܐ܆ ܘܶܐܬܚܰܝܰܕ ܠܗܳܠܶܝܢ ܒܽܐܘܣܺܝܰܐ ܘܒܰܟܝܳܢܳܐ ܠܳܐ ܡܶܫܬܰܚܠܦܳܢܳܐܺܝܬ ܘܠܳܐ ܒܠܺܝܠܴܐܺܝܬ܆ ܚܰܕ ܡܶܢ ܬܰܪܬܶܝܢ܆ ܐܰ‌ܠܳܗܽܘܬܳܐ ܟܺܝܬ ܘܐ̱ܢܳܫܽܘܬܳܐ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܘܠܳܐ ܚܰܣܺܝܪܳܐܺܝܬ܆ ܥܰܡܰܢܽܘܐܶܝܠ ‌ܐܶܬܺܝܠܶܕ ܘܶܐܫܬܰܡܰܗ܆ ܘܚܰܘܺܝ ܠܗܳܝ ܕܺܝܠܶܕܬ̣ܶܗ ܝܳܠܕܰܬ ܐܰ‌ܠܳܗܳܐ܆ ܕܰܠܦܰܓܪܳܐ ܡܰܢ ܒܡܰܓܢܳܢܽܘܬܳܐ ܕܪܽܘܚܳܐ ܗܺܝ ܡܶܢܳܗ̇ ܐܰܫܘܚܰܬ܆ ܗܰܘ ܕܰܡܟܳܢ ܕܢܶܬܒܛܶܢ ܘܢܶܬܺܝܠܶܕ܆ ܡܶܛܽܠ ܕܶܝܢ ܚܕܳܝܽܘܬܳܐ ܠܳܐ ܡܶܬܡܰܠܠܳܢܺܝܬܳܐ ܠܡܶܠܬܳܐ ܗܰܘ ܕܶܐܬܒܰܣܰܪ ܒܶܛܢܰܬ ܘܝܶܠܕܰܬ܆ ܘܦܰܐܝܽܘܬ ܐܰ‌ܠܳܗܳܐܺܝܬ ܘܒܰܬܡܺܝܗܽܘܬܶܗ ܕܝܰܠܕܳܐ ܟܺܐܢܳܐܺܝܬ ܐܶܫܬܰܡܗܰܬ ܝܳܠܕܰܬ ܐܰ‌ܠܳܗܳܐ܆ ܘܡܶܢ ܬܶܕܡܽܘܪܬܳܐ ܘܠܰܘ ܡܶܢ ܛܰܝܒܽܘܬܳܐ ܘܫܽܘܟܳܢܳܐ ܐ̱ܢܳܫܳܝܳܐ ܐܶܬܟܬܶܒ ܥܠܶܝܗ̇ ܟܽܘܢܳܝܳܐ ܗܳܢܳܐ܆ ܗܰܘ ܕܡܰܟܪܶܙ ܠܐ̱ܪܳܙܳܐ ܪܰܒܳܐ ܗܰܘ ܕܡܶܛܽܠܳܬܰܢ܆ ܘܰܠܡܶܬܢܰܚܬܳܢܽܘܬܳܐ ܪܳܚܡܰܬ ܐ̱ܢܳܫܳܐ ܕܰܐ‌ܠܳܗܳܐ ܘܡܶܠܬܳܐ܆ ܗܳܝ ܕܳܐܦ ܒܶܗ ܒܡܽܘܟܳܟܳܐ ܠܳܐ ܥܳܪܩܳܐ ܡܶܢ ܡܥܰܠܝܽܘܬܳܐ ܗܳܝ ܕܪܳܡܳܐ ܠܥܶܠ ܡܶܢ ܟܽܠܢܳܫ ܘܰܕܠܰܐܠܳܗܳܐ ܦܰܐܝܳܐ. ܐܶܢ ܡܰܢ ܓܶܝܪ ܓܰܘܳܢܳܝܳܐ^[13] ܐܺܝܬܰܘܗ̱ܝ ܗܽܘ ܝܰܠܕܳܐ܆ ܩܪܺܝܗ̇ ܠܰܒܬܽܘܠܬܳܐ ܐܳܦ ܝܳܠܕܰܬ ܒܰܪܢܳܫܳܐ܆ ܐܳܘ ܝܰܬܺܝܪܳܐ ܒܰܒܓܳܠܳܐ ܘܰܒܪܽܘܫܥܳܐ. ܐܶܢ ܕܶܝܢ ܬܡܺܝܗܳܐ ܐܺܝܬܰܘܗ̱ܝ ܘܰܠܥܶܠ ܡܶܢ ܡܶܠܬܳܐ܆ ܫܒܽܘܩܶܝܗ̇ ܕܡܶܢ ܗܳܝ ܕܰܬܡܺܝܗܳܐ ܘܰܡܝܰܬܪܳܐ ܬܶܫܬܰܡܰܗ. ܩܰܕܺܝܡܳܐ ܓܶܝܪ ܝܺܕܺܝܥܳܐ܆ ܕܰܐ‌ܠܳܗܳܐ ܠܰܘ ܠܳܐ ܡܒܰܣܪܳܐ ܝܶܠܕܰܬ܆ ܐܶܠܳܐ ܕܰܡܒܰܣܰܪ ܘܰܡܒܰܪܢܰܫ.

ܐܶܠܳܐ ܐܰܝܟ ܙܢܳܐ ܕܥܰܠ ܩܽܘܝܳܡܳܐ ܕܺܝܠܰܢ܆ ܡܦܳܣܺܝܢ ܚ̱ܢܰܢ ܡܰܢ ܕܒܰܟܝܳܢܳܐ ܡܚܰܝܕܳܐ ܢܰܦܫܳܐ ܠܘܳܬ ܦܰܓܪܳܐ܆ ܗܳܝ ܕܶܝܢ ܕܰܐܝܟܰܢܳܐ ܘܒܰܐܝܢܳܐ ܙܢܳܐ ܠܡܺܐܡܰܪ ܠܳܐ ܡܶܫܟܚܺܝܢܰܢ܆ ܥܳܒܪܳܐ ܓܶܝܪ ܠܡܰܕܪܟܳܢܽܘܬܳܐ ܕܺܝܠܰܢ܆ ܗܳܟܰܢܳܐ ܐܳܦ ܥܰܠ ܥܰܡܰܢܽܘܐܶܝܠ. ܝܳܕܥܺܝܢܰܢ ܕܒܳܗ̇ ܒܰܕܡܽܘܬܳܐ ܠܰܢ܆ ܐܳܦ ܒܰܟܝܳܢܳܐ ܐܰܟܚܕܳܐ ܕܶܝܢ ܐܳܦ ܠܥܶܠ ܡܶܢ ܟܝܳܢܳܐ܆ ܐܶܫܬܰܘܬܰܦ ܡܶܠܬܳܐ ܠܰܕܡܳܐ ܘܰܠܒܶܣܪܳܐ܆ ܗܳܝܕܶܝܢ ܕܰܐܝܟܰܢܳܐ ܠܡܺܐܡܰܪ܆ ܥܳܒܪܳܐ ܠܟܽܠ ܡܶܠܬܳܐ ܘܡܰܚܫܰܒܬܳܐ. ܒܬܰܚܘܺܝܬܳܐ ܓܶܝܪ ܗܳܝ ܕܺܝܠܰܢ ܒܰܠܚܽܘܕ ܕܺܐܝܬܶܝܗ̇ ܠܳܐ ܡܶܬܡܰܠܠܳܢܺܝܬܳܐ܆ ܚܰܘܝܶܗ ܦܰܘܠܽܘܤ ܠܐ̱ܪܳܙܳܐ ܗܰܘ ܕܺܐܝܬܰܘܗ̱ܝ ܝܰܬܺܝܪ ܠܳܐ ܡܶܬܡܰܠܠܳܢܳܐ܆ ܘܕܳܐܦ ܠܳܐ ܠܰܚܕܳܐ ܬܰܪܥܺܝܬܳܐ ܡܶܬܕܪܶܟ. ܐܶܢ ܓܶܝܪ ܥܰܠ ܚܕܳܝܽܘܬܳܐ ܬܥܰܩܶܒ ܗܳܝ ܕܰܐܝܟܰܢܳܐ܆ ܚܰܣܺܝܪܳܐ ܠܳܟ ܗܺܝ ܟܰܕ ܗܺܝ ܠܡܺܐܡܰܪ܆ ܐܳܦ ܥܰܠ ܡܰܚܰܬܬܳܐ ܗܳܝ ܕܡܶܢ ܫܡܰܝܳܐ.

ܐܰܝܟܰܢܳܐ ܓܶܝܪ ܡܶܢ ܠܥܶܠ ܢܚܶܬ ܠܘܳܬܰܢ܆ ܗܰܘ ܕܰܠܟܽܠ ܡܳܠܶܐ܆ ܐܰܘ ܐܰܝܟܰܢܳܐ ܬܽܘܒ ܠܳܐ ܡܶܣܬܰܝܟܳܢܳܐܺܝܬ ܒܡܰܪܒܥܳܐ ܕܰܒܬܽܘܠܬܳܐ ܥ̣ܰܠ ‌ܐܶܬܥܪܺܝ ܗܰܘ ܠܳܐ ܡܶܬܥܰܪܝܳܢܳܐ. ܘܰܐܝܟܰܢܳܐ ܟܽܠܶܗ ܐܺܝܬܰܘܗ̱ܝ ܗ̱ܘܳܐ ܒܟܽܠ ܡܰܠܽܘܢ ܕܶܝܢ ܐܳܦ ܠܥܶܠ ܡܶܢ ܟܽܠ܆ ܘܟܽܠܶܗ ܐܺܝܬܰܘܗ̱ܝ ܗ̱ܘܳܐ ܒܳܗ̇܆ ܝܺܕܺܝܥܳܐ ܕܶܝܢ ܕܰܠܥܶܠ ܡܶܢ ܟܽܠ ܡܶܠܬܳܐ ܘܗܰܘܢܳܐ܆ ܘܰܐܝܟ ܕܗܽܘ ܠܚܽܘܕܰܘܗ̱ܝ ܝܳܕܰܥ. ܠܡܶܫܟܳܚܽܘ ܓܶܝܪ ܙܢܳܐ ܕܗܳܠܶܝܢ ܕܺܐܝܬܰܝܗܶܝܢ ܬܡܺܝ̈ܗܳܬܳܐ ܠܳܐ ܡܶܫܟܚܳܐ܆ ܠܰܐܠܳܗܳܐ ܕܶܝܢ ܙܳܕܶܩ ܠܡܰܫܳܦܽܘ ܙܢܳܐ ܕܗܳܠܶܝܢ܆ ܗܰܘ ܕܟܽܠܗܶܝܢ ܡܨܶܐ ܚܰܝܠܳܐ. ܕܰܢܚܶܬ ܓܶܝܪ܆ ܟܬܳܒܳܐ ܟܳܗܢܳܝܳܐ ܐܶܡܰܪ. ܒܝܰܕ ܕܰܘܺܝܕ ܡܰܢ܆ ܐܰܪܟܶܢ ܫܡܰܝܳܐ ܡܳܪܝܳܐ ܘܚܽܘܬ^[14]. ܗܳܝ ܕܶܝܢ ܕܰܐܪܟܶܢ ܠܰܫܡܰܝܳܐ. ܗܳܕܶܐ ܐܺܝܬܶܝܗ̇. ܠܳܐ ܬܟܰܬܰܪ ܐܳܡܰܪ܆ ܟܰܕ ܠܚܰܝ̈ܠܰܘܳܬܳܐ ܗܳܠܶܝܢ ܕܰܒܪܰܘܡܳܐ ܘܒܰܫܡܰܝܳܐ ܡܶܬܺܝܕܰܥ ܐܰܢ̱ܬ ܒܰܠܚܽܘܕ. ܐܶܠܳܐ ܐܰܝܟ ܗܰܘ ܕܡܰܪܟܶܢ ܐܰܢ̱ܬ ܘܨܳܠܶܐ ܐܰܢ̱ܬ ܠܗܽܘܢ܆ ܘܰܐ‌ܠ̣ܘܶܬ ܐܶܢܽܘܢ ܒܺܝܕܰܥܬܳܐ ܠܰܫܡܰܝܳܐ ܠܘܳܬ ܐܰܪܥܐ܆ ܒܝܰܕ ܣܽܘܪܳܩܳܐ ܟܺܝܬ ܕܺܝܠܳܟ ܘܡܰܚܰܬܬܳܟ. ܫܡܰܝܳܐ ܓܶܝܪ ܐܺܝܬ ܥܝܳܕܳܐ ܠܰܟ̈ܬܳܒܶܐ ܟܳܗ̈ܢܳܝܶܐ ܠܡܶܩܪܳܐ ܙܰܒ̈ܢܺܝܢ ܣܰܓܺܝ̈ܳܐܢ ܠܚܰܝ̈ܠܰܘܳܬܳܐ ܗܳܢܽܘܢ ܕܒܰܫܡܰܝܳܐ܆ ܐܰܝܟܰܢܳܐ ܕܳܐܦ ܥܰܙܪܳܐ ܐܳܡܰܪ: ܪܰܒ ܗ̱ܘ ܫܪܳܪܳܐ܆ ܘܳܐܦ ܫܡܰܝܳܐ ܡܒܰܪܶܟ ܠܶܗ.

ܒܝܰܕ ܕܶܝܢ ܦܰܘܠܽܘܤ ܬܽܘܒ ܐܺܝܬ ܠܡܶܫܡܰܥ ܬܰܪ̈ܬܰܝܗܶܝܢ. ܐܳܦ ܕܰܢܚܶܬ܆ ܐܳܦ ܕܒܶܣܪܳܐ ܗܰܘ ܕܡܶܢܰܢ ܐܶܬܒܰܣܰܪ. ܟܰܕ ܓܶܝܪ ܠܓܰܠܰܛܳܝ̈ܶܐ ܫܳܠܰܚ ܗ̱ܘܳܐ ܟܳܬܶܒ܆ ܕܶܐܡܰܬܝ ܕܶܝܢ ܕܶܐܬܳܐ ܡܽܘܠܳܝܗܽܘܢ ܕܙܰܒ̈ܢܶܐ܆ ܫܰܕܰܪ ܐܰ‌ܠܳܗܳܐ ܠܰܒܪܶܗ܆ ܕܢܶܗܘܶܐ ܡܶܢ ܐܰܢ̱ܬܬܳܐ. ܕܢܶܗܘܶܐ ܬܚܶܝܬ ܢܳܡܽܘܣܳܐ^[15]. ܝܽܘܚܰܢܳܢ ܕܶܝܢ ܗܰܘ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ܆ ܗܰܘ ܒܰܪ ܪܰܥܡܳܐ^[16]܆ ܡܚܰܘܶܐ ܠܠܳܐ ܡܶܬܦܰܠܓܳܢܽܘܬܳܗ̇ ܐܰܟܚܕܳܐ ܘܰܠܠܳܐ ܡܶܫܬܰܚܠܦܳܢܽܘܬܳܗ̇ ܕܡܶܬܒܰܣܪܳܢܽܘܬܳܐ ܟܰܕ ܐܳܡܰܪ: ܡܶܠܬܳܐ ܒܶܣܪܳܐ ܗ̣ܘܳܐ܆ ܘܰܫܪܳܐ ܒܰܢ^[17]. ܦܰܘܠܽܘܤ ܕܶܝܢ ܐܳܦ ܟܰܕ ܒܬܰܚܘܺܝܬܳܐ ܐܶܬܚܰܫܰܚ ܐܰܝܟ ܕܡܶܫܟܚܳܐ ܠܒܰܪܢܳܫܳܐ ܨܳܪܶܗ ܠܣܽܘܥܪܳܢܳܐ. ܟܰܕ ܡܰܘܕܰܥ: ܕܒܽܐܘܣܺܝܰܐ ܐܶܬܚܰܝܰܕ ܡܶܠܬܳܐ ܠܒܶܣܪܳܐ. ܗܳܢܰܘ ܕܶܝܢ ܩܢܽܘܡܳܐܺܝܬ. ܗܺܝ ܓܶܝܪ ܟܰܕ ܗܺܝ ܐܺܝܬܶܝܗ̇. ܡܶܛܽܠ ܟܺܝܬ ܕܰܕܝܳܬܳܐ ܘܕܰܚܕܳܝܽܘܬܳܐ ܕܒܰܟܝܳܢܳܐ ܐܺܝܬܰܝܗܶܝܢ ܡܫܰܘܕܥܳܢ̈ܝܳܬܳܐ ܬܰܪ̈ܬܰܝܗܶܝܢ. ܣܳܡܢܰܢ ܓܶܝܪ ܒܗܳܠܶܝܢ ܕܡܶܢ ܩܕܳܡ ܩܰܠܺܝܠ ‌ܐܶܬܶܐܡܰܪ̈ܝ̱܆ ܗܳܝ ܕܰܠܘܳܬ ܥܶܒܪ̈ܳܝܶܐ ܐܶܫܬܰܠܚܰܬ ܡܶܢܶܗ. ܡܶܛܽܠ ܗܳܟܺܝܠ ܕܰܒ̈ܢܰܝܳܐ ܐܶܫܬܰܘܬܰܦܘ ܒܰܕܡܳܐ ܘܰܒܒܶܣܪܳܐ܆ ܐܳܦ ܗܽܘ ܒܳܗ̇ ܒܰܕܡܽܘܬܳܐ ܐܶܫܬܰܘܬܰܦ ܒܗܶܝܢ ܟܰܕ ܒܗܶܝܢ^[18].

ܠܰܘ ܓܶܝܪ ܥܽܘܠܳܐ ܩܰܕܶܡ ܐܶܬܩܰܝܰܡ ܒܟܰܪܣܳܐ ܕܰܒܬܽܘܠܬܳܐ܆ ܘܡܶܚܕܳܐ ܡܶܠܬܳܐ ܕܰܐ‌ܠܳܗܳܐ ܒܰܝܬܝܶܗ ܠܶܗ ܠܗܳܢܳܐ ܒܢܰܩܺܝܦܽܘܬܳܐ ܚܽܘܒܳܢܳܝܬܳܐ ܘܰܒܡܰܚܒܳܢܽܘܬܳܐ ܪܳܚܡܳܢܳܝܬܳܐ܆ ܘܰܒܬܰܪܥܺܝܬܳܐ ܗܳܝ ܕܡܶܢ ܨܶܒܝܳܢܳܐ ܐܶܫܬܰܟܢܰܬ. ܐܶܢ ܓܶܝܪ ܗܳܕܶܐ ܐܺܝܬܶܝܗ̇܆ ܠܰܘ ܗܽܘ ܡܶܠܬܳܐ ܡܒܰܣܰܪ܆ ܐܳܦܠܳܐ ܒܰܪܢܳܫܳܐ ܗܘ̣ܳܐ ܠܳܐ ܡܶܫܬܰܚܠܦܳܢܳܐܺܝܬ. ܐܶܠܳܐ ܦܰܪܨܽܘܦܳܐ ܕܒܰܪܢܳܫܳܐ ܒܰܝܬܺܝ ܠܶܗ܆ ܘܢܳܩܦܳܐܺܝܬ ܡܶܢ ܒܳܬܰܪ ܚܕܳܝܽܘܬܳܐ ܕܕܰܐܝܟ ܗܳܕܶܐ܆ ܬܪܶܝܢ ܟܝܳܢ̈ܶܐ ܡܶܬܡܢܶܝܢ ܘܰܩܢܽܘܡ̈ܶܐ܆ ܘܦܰܪ̈ܨܽܘܦܶܐ ܬܪܶܝܢ܆ ܕܰܒܫܰܘܝܽܘܬ ܫܡܳܐ ܕܰܒܪܽܘܬܳܐ ܘܰܒܫܰܘܝܽܘܬ ܐܺܝܩܳܪܳܐ ܐܰܣܺܝܪܺܝܢ ܐܰܟܚܕܳܐ܆ ܘܰܕܚܰܕ ܐܺܝܬܰܝܗܽܘܢ ܡܶܣܬܰܒܪܺܝܢ ܒܢܰܩܺܝܦܽܘܬܳܐ ܪܳܚܡܳܢܳܝܬܳܐ ܗܳܝ ܕܰܒܛܰܝܒܽܘܬܳܐ ܘܰܒܫܽܘܟܳܢܳܐ܆ ܐܰܝܟܰܢܳܐ ܕܳܐܡܪܺܝܢ ܗܳܢܽܘܢ ܕܰܠܒܶܕ̥ܝ̈ܶܐ ܢܕܺܝ̈ܕܶܐ ܘܰܣܪ̈ܰܝܳܐ ܕܕܝܘܕܘܪܘܤ ܘܰܕܬܶܐܽܘܕܽܘܪܽܘܤ ܘܰܕܢܶܣܛܽܘܪܺܝܽܘܤ ܘܰܕܬܶܐܽܘܕܽܘܪܺܝܛܽܘܤ ܡܓܰܣܶܝܢ.

ܐܶܢ ܕܶܝܢ ܐܰܝܟ ܕܰܠܦܰܘܠܽܘܤ ܘܠܰܫܪܳܪܳܐ ܫܳܦܪܳܐ܆ ܒܳܗ̇ ܒܰܕܡܽܘܬܳܐ ܠܰܛܠܳܝ̈ܶܐ ܐܶܫܬܰܘܬܰܦ ܡܶܠܬܳܐ ܠܰܕܡܳܐ ܘܰܠܒܶܣܪܳܐ܆ ܒܳܗ̇ ܒܰܚܕܳܝܽܘܬܳܐ ܗܳܝ ܕܰܠܘܳܬ ܡܶܠܬܳܐ܆ ܩܢܳܐ ܩܽܘܝܳܡܳܐ ܒܶܣܪܳܐ ܗܰܘ ܕܡܶܢ ܒܬܽܘܠܬܳܐ ܕܰܡܠܺܝܠܳܐܺܝܬ ܡܢܰܦܰܫ ܗ̱ܘܳܐ. ܐܰܝܟܰܢܳܐ ܕܳܐܦ ܗܽܘ ܢܶܣܬܰܟܰܠ ܗ̱ܘܳܐ ܕܶܐܬܒܰܣܰܪ ܘܶܐܬܒܰܪܢܰܫ܆ ܘܠܳܐ ܡܶܬܦܰܠܓܳܢܳܐܺܝܬ ܚܰܕ ܐܶܬܩܰܝܰܡ܆ ܒܗܳܝ ܕܰܗܘ̣ܳܐ ܒܰܪܢܳܫܳܐ܆ ܐܳܦܶܢ ܒܗܳܝ ܕܡܶܠܬܳܐ ܐܺܝܬܰܘܗ̱ܝ ܗ̱ܘܳܐ ܘܰܐ‌ܠܳܗܳܐ܆ ܗܽܘ ܟܰܕ ܗܽܘ ܡܩܰܝܰܡ ܗ̱ܘܳܐ ܘܺܐܝܬܰܘܗ̱ܝ ܗ̱ܘܳܐ܆ ܗܰܘ ܕܺܐܝܬܰܘܗ̱ܝ ܩܕܳܡ ܟܽܠ ܥܳܠܡܳܐ ܘܙܰܒܢܳܐ܆ ܐܰܝܟ ܕܗܽܘ ܢܶܗܘܶܐ ܐܺܝܬܰܘܗ̱ܝ ܗܰܘ ܕܶܐܬܓܒܶܠ܆ ܘܥܽܘܠܳܐ ܒܰܒܣܰܪ ܗܘ̣ܳܐ܆ ܘܶܐܬܒܛܶܢ ܘܶܐܬܺܝܠܶܕ܆ ܘܡܶܢ ܒܳܬܰܪ ܚܕܳܝܽܘܬܳܐ ܗܳܝ ܕܗܳܟܰܢܳܐ ܫܰܪܺܝܪܬܳܐ ܘܠܳܐ ܡܶܬܡܰܠܠܳܢܺܝܬܳܐ ܠܳܐ ܣܳܟ ܡܶܬܦܰܠܰܓ܆ ܐܶܠܳܐ ܡܶܢ ܐܰ‌ܠܳܗܽܘܬܳܐ ܘܡܶܢ ܐ̱ܢܳܫܽܘܬܳܐ ܐܰܝܟ ܕܶܐܡܰܪܢܰܢ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܐܰܝܟ ܡܶܠܬܳܐ ܗܳܝ ܕܺܝܠܗܶܝܢ܆ ܚܰܕ ܦܰܪܨܽܘܦܳܐ ܐܺܝܬܰܘܗ̱ܝ ܘܚܰܕ ܩܢܽܘܡܳܐ ܘܚܰܕ ܟܝܳܢܳܐ܆ ܝܺܕܺܝܥܳܐ ܕܶܝܢ ܕܰܐܝܟ ܡܰܢ ܕܡܶܠܬܳܐ ܐܶܬܒܰܣܰܪ.

ܐܶ݀ܣܺܝܡ ܠܳܟ ܕܶܝܢ ܬܽܘܒ܆ ܐܳܦ ܢܳܡܽܘܣܳܐ ܕܰܓܪܺܝܓܽܘܪܺܝܽܘܤ ܗܰܘ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ. ܐܰܝܟܰܢܳܐ ܕܬܺܐܠܰܦ܆ ܕܳܐܦ ܡܰܝ̈ܬܝ̣ܰܝ̣ ܐ̱ܪ̈ܳܙܶܐ ܘܡܰܠ̈ܦܳܢܶܐ ܕܥܺܕܬܳܐ܆ ܟܰܕ ܒܳܬܰܪ ܥܶܩ̈ܒܳܬܳܐ ܕܰܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ ܪܳܕܶܝܢ܆ ܚܕܳܝܽܘܬܳܐ ܗܳܝ ܕܒܽܐܘܣܺܝܰܐ ܘܒܰܩܢܽܘܡܳܐ ܥܰܠ ܥܰܡܰܢܽܘܐܶܝܠ ܡܫܰܒܚܺܝܢ ܗ̱ܘܰܘ. ܒܶܐܓܰܪܬܳܐ ܓܶܝܪ ܗܳܝ ܕܰܠܘܳܬ ܩܠܝܕܘܢܝܘܤ ܟܬܰܒ ܗܳܟܰܢܳܐ. ܐܶܢ ܐ̱ܢܳܫ ܐܰܝܟ ܕܒܰܢܒܺܝܳܐ ܐܳܡܰܪ ܕܰܒܛܰܝܒܽܘܬܳܐ ܐܰܥܒ̣ܶܕ܆ ܐܶܠܳܐ ܠܰܘ ܕܒܽܐܘܣܺܝܰܐ ܐܶܬܢܰܩܰܦ ܘܰܐܟܚܕܳܐ ܐܶܬܓܒܶܠ܆ ܢܶܗܘܶܐ ܐܺܝܬܰܘܗ̱ܝ ܣܦܺܝܩܳܐ ܡܶܢ ܡܰܥܒܕܳܢܽܘܬܳܐ ܡܝܰܬܰܪܬܳܐ. ܡܰܠܽܘܢ ܕܶܝܢ܆ ܡܰܠܝܳܐ ܡܶܢ ܗܳܝ ܕܰܠܩܽܘܒܠܳܐ. ܘܬܽܘܒ. ܐܶܢ ܐ̱ܢܳܫ ܐܳܡܰܪ ܕܶܐܬܓܒܶܠ ܒܰܪܢܳܫܳܐ܆ ܒܳܬܰܪܟܶܢ ܥ̣ܰܠ ܝܺܠ̣ܶܕ ܐܰ‌ܠܳܗܳܐ܆ ܡܚܰܝܒܳܐ ܐܺܝܬܰܘܗ̱ܝ. ܠܰܘ ܓܶܝܪ ܝܺܠܺܝܕܽܘܬܳܐ ܕܰܐ‌ܠܳܗܳܐ ܐܺܝܬܶܝܗ̇ ܗܳܕܶܐ܆ ܐܶܠܳܐ ܥܪܽܘܩܝܳܐ ܕܡܶܢ ܝܺܠܺܝܕܽܘܬܳܐ. ܘܬܽܘܒ. ܐܶܢ ܐ̱ܢܳܫ ܠܰܘ ܝܳܠܕܰܬ ܐܰ‌ܠܳܗܳܐ ܠܡܰܪܝܰܡ ܡܰܘܕܶܐ܆ ܤܛܰܪ ܡܶܢ ܐܰ‌ܠܳܗܽܘܬܳܐ ܐܺܝܬܰܘܗ̱ܝ.

ܡܶܢ ܗܳܠܶܝܢ ܗܳܟܺܝܠ ܟܽܠܗܶܝܢ ܝܺܕܺܝܥܬܳܐ ܐܺܝܬܶܝܗ̇܆ ܕܬܶܐܽܘܕܽܘܪܺܝܛܽܘܤ ܘܢܶܣܛܽܘܪܺܝܽܘܤ܆ ܘܰܟܢܽܘܫܝܳܐ ܗܰܘ ܢܳܨܶܐ ܥܰܡ ܐܰ‌ܠܳܗܳܐ ܕܗܳܢܽܘܢ ܕܰܒܟܰܠܩܺܝܕܽܘܢܺܐ ܐܶܬܟܰܢܰܫܘ܆ ܘܡܰܠ̈ܦܳܢܶܐ ܕܗܳܠܶܝܢ ܕܝܘܕܘܪܘܤ ܘܬܶܐܽܘܕܽܘܪܽܘܤ܆ ܟܰܕ ܬܪܶܝܢ ܟܝܳܢ̈ܶܐ ܡܰܘܕܶܝܢ ܗ̱ܘܰܘ ܠܚܰܕ ܡܫܺܝܚܳܐ ܡܶܢ ܒܳܬܰܪ ܚܕܳܝܽܘܬܳܐ܆ ܠܰܘ ܚܕܳܝܽܘܬܳܐ ܗܳܝ ܫܰܪܺܝܪܬܳܐ ܘܰܕܒܰܩܢܽܘܡܳܐ ܡܫܰܒܚܺܝܢ ܗ̱ܘܰܘ܆ ܐܶܠܳܐ ܗܳܝ ܚܽܘܒܳܢܳܝܬܳܐ܆ ܗܳܝ ܕܡܶܢ ܢܰܩܺܝܦܽܘܬܳܐ ܪܳܚܡܳܢܳܝܬܳܐ ܘܛܰܝܒܽܘܬܳܐ܆ ܒܗܳܝ ܕܰܡܫܰܘܬܰܦ ܡܳܪܳܐ ܠܥܰܒܕܶܗ܆ ܐܰܝܟܰܢܳܐ ܕܳܐܦ ܒܰܢ̈ܒܺܝܶܐ ܗܘ̣ܳܬ. ܗܳܝ ܟܺܝܬ ܕܠܳܐ ܝܺܠܺܝܕܽܘܬܳܐ ܕܰܐ‌ܠܳܗܳܐ ܕܶܐܬܒܰܣܰܪ ܡܰܥܠܳܐ܆ ܐܶܠܳܐ ܥܪܽܘܩܝܳܐ ܡܰܠܽܘܢ ܘܰܟܦܽܘܪܝܳܐ ܕܺܝܠܺܝܕܽܘܬܳܐ܆ ܘܳܐܦܠܳܐ ܕܝܳܠܕܰܬ ܐܰ‌ܠܳܗܳܐ ܬܶܗܘܶܐ ܐܺܝܬܶܝܗ̇ ܒܬܽܘܠܬܳܐ ܒܰܫܪܳܪܳܐ ܫܳܒܩܳܐ܆ ܐܳܦܶܢ ܒܰܪ̱ܬ ܩܳܠܳܐ ܒܰܠܚܽܘܕ ܡܚܰܘܝܳܐ ܐܶܣܟܺܡܳܐ ܕܰܓܳܠܳܐܺܝܬ ܕܰܡܫܰܟܢܳܐ ܠܳܗ̇܆ ܘܚܰܣܺܝܪ ܗܰܘܢܳܐ ܡܰܢ ܠܢܶܣܛܽܘܪܺܝܽܘܤ ܩܳܪܝܳܐ܆ ܡܶܛܽܠ ܡܰܛܥܝܳܢܽܘܬܳܐ ܡܰܢ ܘܫܽܘܦܰܪܕܺܝܩܽܘܬܳܐ ܕܣܰܓܺܝ̈ܶܐܐ܆ ܐܰܝܟ ܡܰܢ ܕܰܚܕܳܐ ܙܒܰܢ ܐܶܬܚܰܝܰܒ ܗ̱ܘܳܐ ܠܶܗ. ܒܰܫܪܳܪܳܐ ܕܶܝܢ܆ ܐܰܝܟ ܕܠܰܐܝܢܳܐ ܕܦܰܪܣܺܝ ܠܕܽܘܓܡ̈ܰܛܰܐ ܗܳܠܶܝܢ ܕܫܳܘܶܝܢ ܠܚܶܫܽܘܟܳܐ܆ ܘܰܗܘ̣ܳܐ ܡܙܰܡܢܳܢܳܐ ܕܚܶܪܡܳܐ ܠܰܐܒܳܗܰܝ̈ܗܽܘܢ.

ܗܳܠܶܝܢ ܓܶܝܪ ܚܰܘܝܰܬ ܐܶܣܟܺܡܳܐ ܕܳܐܡܪܳܐ ܨܢܺܝܥܳܐܺܝܬ ܣܽܘܢܶܗܕܽܘܤ ܗܳܝ ܕܰܒܟܰܠܩܺܝܕܽܘܢܺܐ. ܘܟܰܕ ܡܶܫܬܰܥܝܳܐ ܡܰܠܽܘܢ ܒܫܰܪܒܳܐ ܘܰܓܒܽܘܠܝܳܐ ܕܰܡܨܰܕܝܳܢܽܘܬܳܐ܆ ܟܰܕ ܒܰܬܪܶܝܢ ܟܝܳܢ̈ܶܐ ܬܰܚܡܰܬ ܠܰܡܫܺܝܚܳܐ܆ ܚܰܕ ܐܶܡܪܰܬ ܕܺܐܝܬܰܘܗ̱ܝ ܩܢܽܘܡܶܗ. ܟܰܕ ܩܢܽܘܡܳܐ ܚܠܳܦ ܦܰܪܨܽܘܦܳܐ ܐܶܣܬܰܟܠܰܬ܆ ܐܰܝܟܰܢܳܐ ܕܬܶܐܽܘܕܽܘܪܺܝܛܽܘܤ ܟܰܕ ܠܝܽܘܚܰܢܳܢ ܗܰܘ ܕܡܶܢ ܐܶܓ̈ܶܤ ܟܳܬܶܒ ܗ̱ܘܳܐ ܦܰܫܩܶܗ ܠܢܶܟܠܳܐ. ܐܰܘ ܓܶܝܪ ܟܰܕ ܚܰܕ ܩܢܽܘܡܳܐ ܐܺܝܬܰܘܗ̱ܝ ܒܰܫܪܳܪܳܐ܆ ܢܶܗܘܶܐ ܐܳܦ ܚܰܕ ܟܝܳܢܳܐ ܕܰܡܒܰܣܰܪ ܕܰܐ‌ܠܳܗܳܐ ܡܶܠܬܳܐ܆ ܐܰܘ ܟܰܕ ܬܪܶܝܢ ܟܝܳܢ̈ܶܐ ܐܺܝܬܰܝܗܽܘܢ܆ ܢܶܗܘܽܘܢ ܒܕܽܘܟ ܡܶܢ ܟܽܠ ܦܪܽܘܤ ܐܳܦ ܬܪܶܝܢ ܩܢܽܘܡ̈ܶܐ ܘܦܰܪ̈ܨܽܘܦܶܐ܆ ܘܰܪܒܺܝܥܳܝܽܘܬܳܐ ܬܶܫܬܟܰܚ ܬܠܺܝܬܳܝܽܘܬܳܐ. ܐܶܠܳܐ ܬܪܶܝܢ ܡܰܢ ܟܝܳܢ̈ܶܐ ܐܳܡܪܺܝܢ ܗܳܢܽܘܢ ܪ̈ܰܫܺܝܥܶܐ ܐܳܡܪܺܝܢ ܚ̱ܢܰܢ܆ ܚܰܕ ܕܶܝܢ ܦܰܪܨܽܘܦܳܐ܆ ܟܰܕ ܒܟܽܘܢܳܝܳܐ ܗܰܘ ܕܰܡܫܺܝܚܳܐ ܘܕܰܒܪܳܐ ܘܰܕܡܳܪܝܳܐ ܘܰܒܫܽܘܠܛܳܢܳܐ ܠܗܳܠܶܝܢ ܬܪܶܝܢ ܡܰܩܦܺܝܢ ܚ̱ܢܰܢ܆ ܐܰܝܟ 222ܕܐܢ ܐ̱ܢܳܫ ܐܳܦ ܠܰܬܪܶܝܢ ܓܰܒܪ̈ܶܐ ܕܰܒܚܰܕ ܐܺܝܩܳܪܳܐ ܡܶܢ ܠܘܳܬ ܡܰܠܟܳܐ ܡܝܰܩܪܺܝܢ܆ ܚܰܕ ܢܶܣܒܰܪ ܕܺܐܝܬܰܝܗܽܘܢ܆ ܡܶܛܽܠ ܫܰܘܝܽܘܬܳܐ ܘܗܺܝܟܰܕܗܺܝܽܘܬܳܐ ܕܺܐܝܩܳܪܳܐ ܐܰܘ ܕܫܽܘܠܛܳܢܳܐ. ܘܡܶܢ ܐܰܝܟܳܐ ܗܳܢܳܐ ܙܢܳܐ ܕܰܚܕܳܝܽܘܬܳܐ ܓܒܺܝܠܬܳܐ ܘܰܕܠܳܐ ܝܰܠܺܝܦܽܘܬܳܐ ܐܶܫܬܟܰܚ܆ ܡܰܠܽܘܢ ܕܶܝܢ ܕܗܳܝ ܕܝܰܬܺܝܪ ܫܰܪܺܝܪܳܐ ܢܺܐܡܰܪ܆ ܕܦܽܘܠܳܓܳܐ ܡܠܰܬܟ̣ܳܐ ܘܡܰܛܥܝܳܢܳܐ܆ ܘܰܕܡܶܬܚܪܶܐ ܕܗܰܘ ܡܳܐ ܕܠܳܐ ܐܺܝܬܰܘܗ̱ܝ ܢܰܣܒܰܪ^[19]. ܢܕܰܓܶܠ ܕܶܝܢ ܠܗܰܘ ܡܳܐ ܕܺܐܝܬܰܘܗ̱ܝ ܫܰܪܺܝܪܳܐܺܝܬ.

ܡܶܢ ܟ̈ܬܳܒܶܐ ܓܶܝܪ ܐܰ‌ܠܳܗܳܝ̈ܶܐ܆ ܠܰܝܬ ܠܶܗ ܠܐ̱ܢܳܫ ܠܡܺܐܡܰܪ܆ ܗܳܢܽܘܢ ܟܺܝܬ ܕܳܐܡܪܺܝܢ ܠܶܗ ܠܡܶܠܬܳܐ ܕܶܐܫܬܰܘܬܰܦ ܠܰܢ ܒܳܗ̇ ܒܰܕܡܽܘܬܳܐ ܒܰܕܡܳܐ ܘܰܒܒܶܣܪܳܐ܆ ܘܰܕܗܽܘ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܶܣܪܳܐ ܗܳܢܰܘ ܕܶܝܢ ܒܰܪܢܳܫܳܐ ܟܰܕ ܩܰܘܺܝ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܘܠܰܘ ܗܳܝ ܕܰܠܩܽܘܒܠܳܐ܆ ܕܡܶܢ ܫܽܘܠܛܳܢܳܐ ܗܰܘ ܕܺܝܠܶܗ ܝܰܗ̱ܒ ܠܐ̱ܢܳܫ ܡܶܢ ܒܢܰܝ̈ܢܳܫܳܐ. ܠܰܘ ܓܶܝܪ ܗܽܘ ܡܶܟܺܝܠ ܢܶܫܬܟܰܚ ܕܶܐܣܬܰܪܰܩ ܨܶܒܝܳܢܳܐܺܝܬ ܐܶܬܡܰܟܰܟ܆ ܒܗܳܝ ܕܰܗܘ̣ܳܐ ܠܳܐ ܡܶܫܬܰܚܠܦܳܢܳܐܺܝܬ ܒܰܪܢܳܫܳܐ܆ ܘܰܒܗܳܕܶܐ ܢܣܰܒ ܕܡܽܘܬܳܐ ܕܥܰܒܕܳܐ܆ ܐܶܠܳܐ ܐ̱ܢܳܫ ܐ̱ܚܪܺܢܳܐ ܡܶܢ ܗܳܢܽܘܢ ܕܡܶܢ ܐܰܪܥܳܐ܆ ܕܰܠܫܽܘܠܛܳܢܳܐ ܐܰ‌ܠܳܗܳܝܳܐ ܐܶܬܚܛܶܦ.

ܐܶܢܕܶܝܢ ܟܰܕ ܐܶܫܬܰܘܬܰܦ ܒܰܕܡܳܐ ܘܰܒܒܶܣܪܳܐ܆ ܒܳܗ̇ ܒܰܕܡܽܘܬܳܐ ܠܰܢ ܐܶܫܬܰܘܬܰܦ ܒܗܶܝܢ ܟܰܕ ܒܗܶܝܢ܆ ܐܶܣܬܰܪܰܩ ܡܰܢ ܗܽܘ ܟܰܕ ܐܺܝܬܰܘܗ̱ܝ ܥܰܬܺܝܪܳܐ ܒܰܟܝܳܢܳܐ܆ ܘܟܰܕ ܐܶܬܳܐ ܬܚܶܝܬ ܡܽܘܫ̈ܚܳܬܳܐ ܕܡܶܣܟܺܢܽܘܬܳܐ. ܛܪܺܝܕܳܐ ܕܶܝܢ ܠܪܽܘܚܩܳܐ܆ ܐܳܦ ܡܰܣܒܪܳܢܽܘܬܳܐ ܕܰܓܳܠܬܳܐ ܕܦܰܢܛܰܣܺܝܰܐ. ܘܠܳܐ ܓܶܝܪ ܟܰܕ ܐܺܝܬ ܠܶܗ ܦܰܓܪܳܐ ܡܶܕܶܡ ܫܡܰܝܳܢܳܐ ܐܰܝܟ ܡܡܰܠܠܽܘܬ ܡ̈ܰܬܠܶܐ ܕܘܐ‌ܠܢܛܝܢܘܤ܆ ܐܶܬܳܐ ܠܘܳܬܰܢ ܗܽܘ ܡܶܠܬܳܐ܆ ܡܶܛܽܠ ܟܺܝܬ ܕܳܐܦܠܳܐ ܐܳܕܳܡ ܗܰܘ ܕܰܚܛܳܐ ܘܰܠܡܰܘܬܳܐ ܐܶܫܬܠܶܡ ܕܰܐܝܟ ܗܳܢܳܐ ܐܺܝܬܰܘܗ̱ܝ ܗ̱ܘܳܐ܆ ܗܰܘ ܕܡܶܛܽܠܳܬܶܗ ܐܳܦ ܕܢܶܬܒܰܪܢܰܫ ܩܰܒܶܠ܆ ܘܳܐܦܠܳܐ ܬܽܘܒ ܐܶܣܬܒܰܪ ܕܰܐܝܟ ܕܰܒܚܶܠ̈ܡܶܐ ܘܗܶܓܓ̈ܶܐ ܡܶܬܚܙܶܐ ܗ̱ܘܐ ܒܰܪܢܳܫܳܐ܆ ܐܰܝܟ ܪܰܫܺܝܥܽܘܬܗܽܘܢ ܕܶܐܘܛܶܘܟ̥ܶܐ ܘܰܕܡܰܢܺܝ̈ܢܳܝܶܐ. ܠܳܐ ܓܶܝܪ ܣܳܦܩܳܐ ܗ̱ܘܳܬ ܣܒܺܝܪܽܘܬܳܐ ܕܰܬܩܺܝܡܺܝܘܗ̱ܝ ܠܒܰܪ ܐ̱ܢܳܫܳܐ ܗܰܘ ܕܢܰܦܺܝܠ ܗ̱ܘܳܐ ܘܰܪܡܶܐ ܬܚܶܝܬ ܚܛܺܝܬܳܐ܆ ܘܰܕܬܶܥܒܶܕ ܦܽܘܪܩܳܢܳܐ ܫܰܪܺܝܪܳܐ. ܘܶܐ‌ܠܽܘ ܕܢܶܫܬܪܰܓܪܰܓ ܘܰܕܢܶܬܗܰܓܰܓ ܕܡܶܬܚܙܶܐ ܒܰܠܚܽܘܕ܆ ܐܺܝܬ ܗ̱ܘܳܐ ܠܶܗ ܫܩܳܠ ܛܰܥܢܳܐ܆ ܙܳܕܶܩ ܗ̱ܘܳܐ ܠܶܗ܆ ܕܳܐܦܠܳܐ ܠܰܒܬܽܘܠܬܳܐ ܢܶܣܰܒ ܗ̱ܘܳܐ ܠܡܽܘܠܳܝܳܐ ܕܰܡܕܰܒܪܳܢܽܘܬܳܐ܆ ܘܳܐܦܠܳܐ ܕܙܰܒܢܳܐ ܗܰܘ ܕܬܶܫܥܳܐ ܝܰܪ̈ܚܺܝܢ ܢܶܬܒܛܶܢ ܗ̱ܘܳܐ. ܘܠܳܐ ܕܰܒܥܰܙܪܽܘܪ̈ܶܐ ܢܶܬܟܰܪܰܟ ܗ̱ܘܳܐ܆ ܘܳܐܦܠܳܐ ܕܰܒܝܰܕ ܩܰܘܡܬܳܐ ܦܰܓܪܳܢܳܝܬܳܐ ܟܺܝܬ ܘܬܰܪܒܺܝܬܳܐ ܢܺܐܬܶܐ ܗ̱ܘܳܐ.

ܐܶܠܳܐ ܕܠܳܐ ܚܶܪܝܳܢܳܐ ܗ̱ܝ. ܕܟܰܕ ܨܒܳܐ ܗ̱ܘܳܐ ܕܡܶܢ ܙܰܪܥܶܗ ܕܰܐܒܪܳܗܳܡ ܢܶܣܰܒ ܐܰܝܟ ܕܰܟܬܺܝܒ܆ ܘܕܰܒܟܽܠ ܡܶܕܶܡ ܤܛܰܪ ܡܶܢ ܚܛܺܝܬܳܐ ܢܶܬܕܰܡܶܐ ܠܰܢ ܠܰܐܚܰܘ̈ܗܝ^[20]. ܘܕܰܒܝܰܕ ܟܽܠܗܶܝܢ ܗܳܠܶܝܢ ܕܺܝܠܰܢ ܢܺܐܬܶܐ܆ ܐܰܝܟܰܢܳܐ ܕܡܶܢ ܟܽܠ ܕܽܘܟ ܢܶܥܛܶܐ ܠܚܰܝܠܳܐ ܕܰܚܛܺܝܬܳܐ܆ ܡܶܢ ܒܬܽܘܠܬܳܐ ܗܳܝ ܕܡܶܢ ܐܳܕܳܡ ܘܡܶܢ ܐܰܒܪܳܗܳܡ ܘܡܶܢ ܕܰܘܺܝܕ ܢܳܚܬܳܐ ܐܶܬܒܰܣܰܪ܆ ܘܰܠܢܳܡܽܘܣ̈ܶܐ ܕܰܟܝܳܢܳܐ ܕܺܝܠܰܢ ܨܶܒܝܳܢܳܐܺܝܬ ܐܶܫܬܰܥܒܰܕ܆ ܐܳܦܶܢ ܕܠܳܐ ܙܰܪܥܳܐ ܘܰܠܗܰܠ ܡܶܢ ܡܶܠܬܳܐ܆ ܐܰܝܟܰܢܳܐ ܕܠܰܢ ܥܰܒ̈ܕܶܐ ܕܰܚܛܺܝܬܳܐ ܢܫܰܟܶܢ ܚܺܐܪܽܘܬܳܐ. ܡܶܛܽܠ ܗܳܕܶܐ ܐܶܬܒܰܣܰܪ܆ ܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ. ܘܠܰܘ ܕܠܳܐ ܢܰܦܫܳܐ. ܐܶܠܳܐ ܐܳܦ ܕܰܡܢܰܦܰܫ. ܘܰܒܢܰܦܫܳܐ ܡܶܬܗܰܘܢܳܢܺܝܬܳܐ. ܐܳܦ ܓܶܝܪ ܢܽܘܟܪܳܝܬܳܐ ܐܺܝܬܶܝܗ̇ ܗ̱ܘܳܬ ܕܡܶܠܬܳܐ܆ ܕܰܒܢܰܦܫܳܐ ܡܠܺܝܠܬܳܐ ܘܕܰܒܨܰܠܡܳܐ ܕܺܝܠܶܗ ܐܶܬܒܰܪܝܰܬ ܢܰܗܡܶܐ ܗ̱ܘܳܐ܆ ܘܶܢܫܒܩܺܝܗ̇ ܠܳܐ ܡܶܬܰܐܣܝܳܢܺܝܬܳܐ܆ ܠܗܳܝ ܕܳܐܦ ܚܠܳܦ ܥܶܪ̈ܒܰܘܗ̱ܝ ܣܳܡܳܗ̇ ܪܳܥܝܳܐ ܗܰܘ ܛܳܒܳܐ. ܠܳܐ ܓܶܝܪ ܢܶܙܕܪܶܒ^[21] ܡܶܛܽܠ ܦܽܘܪܩܳܢܳܐ ܕܺܝܠܝ ܗܰܘ ܣܪܺܝܩ ܬܰܪܥܺܝܬܳܐ ܐܰܦܽܘܠܺܝܢܰܪܺܝܽܘܤ܆ ܘܢܶܦܣܩܺܝܘܗ̱ܝ ܠܗܰܘܢܳܐ ܕܺܝܠܰܢ ܡܶܢ ܡܶܬܒܰܪܢܫܳܢܽܘܬܳܐ ܐܰ‌ܠܳܗܳܝܬܳܐ܆ ܡܶܛܽܠ ܕܰܦܣܺܝܩ ܗܽܘ ܒܬܰܪܥܺܝܬܶܗ܆ ܘܡܰܣܒܰܪ ܕܠܳܐ ܡܶܫܟܰܚ ܐܰ‌ܠܳܗܳܐ ܕܢܶܬܚܰܝܰܕ ܠܳܐ ܡܶܬܦܰܠܓܳܢܳܐܺܝܬ ܠܒܶܣܪܳܐ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ. ܒܰܝܬܳܝܰܐ ܗ̄ܘ ܓܶܝܪ ܗܰܘ ܡܶܬܗܰܘܢܳܢܳܐ ܠܡܶܠܬܳܐ܆ ܘܝܰܬܺܝܪ ܡܶܢ ܒܶܣܪܳܐ ܛܳܒ ܠܳܚܡܳܐܺܝܬ ܡܶܫܟܰܚ ܕܢܶܬܚܰܝܰܕ܆ ܘܕܳܐܦܠܳܐ ܚܰܕ ܥܘܒܝܐ ܥܳܒܶܕ ܡܶܢ ܬܰܘܣܶܦܬܳܐ܆ ܐܰܝܟܰܢܳܐ ܕܺܐܝܬ ܠܡܶܚܙܳܐ ܥܰܠ ܓܽܘܫ̈ܡܶܐ܆ ܗܳܠܶܝܢ ܕܰܒܪܰܒܽܘܬܳܐ ܘܰܒܫܽܘܚܠܳܦܳܐ ܕܗܳܝ ܕܰܐܝܟܰܢܳܐ ܡܶܬܬܕܺܝܢܺܝܢ.

ܠܥܶܠܬܳܐ ܕܶܝܢ ܗܳܝ ܕܰܒܗܶܝܢ ܟܰܕ ܒܗܶܝܢ ܐܶܫܬܰܘܬܰܦ ܠܰܢ ܡܶܠܬܳܐ^[22]܆ ܦܰܘܠܽܘܤ ܡܢܰܗܰܪ ܠܳܗ̇ ܟܰܕ ܐܳܡܰܪ: ܐܰܝܟܰܢܳܐ ܕܰܒܝܰܕ ܡܰܘܬܳܐ܆ ܢܒܰܛܶܠ ܠܗܰܘ ܕܺܐܝܬ ܠܶܗ ܐܽܘܚܕܳܢܳܐ ܕܡܰܘܬܳܐ܆ ܗܳܢܰܘ ܕܶܝܢ ܠܣܳܛܳܢܳܐ܆ ܘܢܰܓܗܶܐ ܠܗܳܠܶܝܢ܆ ܠܟܽܠܗܽܘܢ ܗܳܢܽܘܢ ܕܰܒܕܶܚܠܬܳܐ ܕܡܰܘܬܳܐ܆ ܒܝܰܕ ܟܽܠܗܽܘܢ ܚܰܝ̣ܰܝ̣̈ܗܽܘܢ ܐܺܝܬܰܝܗܽܘܢ ܗ̱ܘܰܘ ܡܚܰܝ̈ܒܶܐ ܠܥܰܒܕܽܘܬܳܐ. ܐܰܝܟܰܢܳܐ ܡܳܕܶܝܢ ܕܶܐܢܗܽܘ ܕܡܶܕܶܡ ܠܳܐ ܢܣܰܒ ܡܶܠܬܳܐ܆ ܡܶܢ ܗܳܠܶܝܢ ܕܰܒܗܶܝܢ ܐܶܬܚܰܝܰܠ ܡܰܘܬܳܐ ܘܶܐܚܰܕ܆ ܗܳܢܳܐ ܬܚܶܝܬ ܥܰܒܕܽܘܬܳܐ ܕܡܰܘܬܳܐ ܩܰܘܺܝ. ܡܳܕܶܝܢ ܗܰܘܢܳܐ܆ ܐܶܢ ܠܳܐ ܐܶܬܢܣܶܒ ܐܰܝܟ ܡܶܠܬܶܗ ܕܰܐܦܽܘܠܺܝܢܰܪܺܝܽܘܤ܆ ܠܚܺܐܪܽܘܬܳܐ ܠܳܐ ܐܶܫܬܘܺܝ. ܐܶܠܳܐ ܟܽܠܗܶܝܢ ܐܶܬܢܣܶܒ܆ ܘܰܒܝܰܕ ܟܽܠܗܶܝܢ ܐܶܫܬܪܺܝ ܐܽܘܚܕܳܢܳܐ ܕܡܰܘܬܳܐ܆ ܘܳܐܦ ܤܳܛܳܢܳܐ ܗܰܘ ܕܺܐܝܬ ܗ̱ܘܳܐ ܠܶܗ ܗܳܢܳܐ܆ ܟܰܕ ܐܶܬܥܰܪܙܰܠ^[23] ܡܰܢ ܥܰܡ ܒܰܪܢܳܫܳܐ ܕܰܡܟܳܢ ܗ̱ܘܳܐ ܕܢܶܚܰܫ܆ ܐܶܫܟܚܶܗ ܕܶܝܢ ܠܶܗ ܟܰܕ ܠܶܗ ܐܰ‌ܠܳܗܳܐ ܠܳܐ ܚܳܫܽܘܫܳܐ܆ ܘܰܕܒܰܒܣܰܪ ܡܰܢ ܒܰܠܚܽܘܕ ܛܰܥܡܶܗ ܠܡܰܘܬܳܐ܆ ܒܠܳܐ ܚܳܫܽܘܫܽܘܬܳܐ ܕܶܝܢ ܐܰܩܗܺܝ ܠܥܽܘܩܣܶܗ ܡܰܪܺܝܪܳܐ ܘܚܰܪܺܝܦܳܐ ܕܰܠܩܽܘܒܠܰܢ܆ ܘܒܰܩܒܽܘܪܬܶܗ ܡܰܥܒܕܰܬ ܚܰܝ̈ܶܐ ܕܰܥܟܶܗ ܠܰܚܒܳܠܳܐ܆ ܘܰܒܡܰܚܰܬܬ̣ܶܗ ܕܠܰܫܝܽܘܠ ܫܪܳܐ ܠܰܐܣܽܘܪ̈ܶܐ ܠܳܐ ܡܶܬܥܰܪ̈ܩܳܢܶܐ ܕܗܳܢܽܘܢ ܕܰܚܒܺܝܫܺܝܢ ܗ̱ܘܰܘ ܬܰܡܳܢ܆ ܘܒܰܩܝܳܡܬܳܐ ܕܡܶܢ ܡܺܝ̈ܬܶܐ ܙܰܡܶܢ ܠܰܢ ܩܝܳܡܬܳܐ.

ܗܳܕܶܐ^[24] ܐܺܝܬܶܝܗ̇ ܫܶܬܶܐܣܬܳܐ ܗܳܝ ܕܝܽܘܠ̈ܦܳܢܶܐ ܕܺܝܠܳܟ܆ ܐܳܘ ܪܳܥܝܳܐ ܕܗܳܕܶܐ ܡܰܪܥܺܝܬܳܐ ܡܠܺܝܠܬܳܐ. ܠܥܶܪ̈ܒܶܐ ܕܺܝܠܳܟ ܠܪܶܥܝܳܐ ܕܺܝܠܳܟ ܩܰܪܶܒܬ ܘܬܰܪܣܺܝܬ̊ ܘܠܰܘ ܠܢܽܘܟܪܳܝܳܐ. ܠܗܳܠܶܝܢ ܕܰܬܩܺܝܡ ܐܶܢܽܘܢ ܩܕܳܡܰܘ̈ܗ̱ܝ ܒܝܰܘܡܳܐ ܗܰܘ ܪܰܒܳܐ ܘܰܕܢܺܝܚܳܐ ܕܕܺܝܢܳܐ܆ ܘܰܬܩܰܒܶܠ ‌ܐܰܓܪܳܐ ܕܪܰܒܽܘܬ ܒܰܝܬܽܘܬܳܟ܆ ܗܳܝ ܕܒܺܐܝ̈ܕܶܝܗ̇ ܛܪܰܕܬ ܠܕܺܐܒ̈ܶܐ܆ ܘܚܰܘܺܝܬ ܐܶܢܽܘܢ ܠܗܳܢܽܘܢ ܕܡܶܬܪܰܥܶܝܢ ܕܣܳܟܪܺܝܢ ܡܰܫܡܰܥܬܗܽܘܢ ܠܘܳܬ ܒܰܪ̱ܬ ܩܳܠܳܐ ܕܰܐܓܺܝܪ̈ܶܐ܆ ܘܬܶܫܡܰܥ ܡܶܠܬܳܐ ܗܳܝ ܕܦܳܣܩܳܐ ܕܩܽܘܒܳܠ ܛܰܝܒܽܘܬܳܐ ܕܗܰܘ ܕܕܳܐܶܢ܆ ܗܳܝ ܫܳܘܝܰܬ ܠܰܨܠܽܘܬܳܐ ܘܕܰܪܚܺܝܡܳܐ ܠܗܳܢܽܘܢ ܕܰܡܣܰܟܶܝܢ܆ ܐܳܘ ܥܰܒܕܳܐ ܛܳܒܳܐ ܘܰܡܗܰܝܡܢܳܐ܆ ܥܰܠ ܙܥܽܘܪ̈ܝܳܬܳܐ ܐܺܝܬܰܝܟ ܗ̱ܘܰܝܬ ܡܗܰܝܡܢܳܐ܆ ܥܰܠ ܣܰܓܺܝ̈ܳܐܬܳܐ ܐܰ݀ܩܺܝܡܳܟ܆ ܥܽܘܠ ܠܚܰܕܽܘܬܶܗ ܕܡܳܪܳܟ^[25]. ܗܰܘ ܕܠܶܗ ܝܳܐܝܳܐ ܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܚܰܡܫܺܝܢ ܘܬܡܢܝܐ.

ܡܽܘܢ ܕܗܽܘ[1]

ܦܪܟܣܝܣ. 13: 15 [2]

[3]ܦܪܟܣܝܣ.20: 1 ـ 2  ܐܦ ܟܬܝܒ ܗܳܟܰܢ ܒܦܪܟܣܝܣ. ܚܠܳܦ ܡܶܠܰܬ ܐܰ‌ܠܕܳܐ. ܠܗܶܠܰܣ ܐܰܬܪܳܐ.

[4]ܠܗܳܢܽܘܢ ܕܟܽܠ ܚܰܕ ܥܝܳܕܳܐ ܐܺܝܬ ܠܝܰܘ̈ܢܳܝܶܐ ܠܡܺܐܡܰܪ: ܚܠܳܦ ܗܳܝ ܕܰܠܟܽܠܢܳܫ ܡܶܢܶܗ ܘܠܶܗ ܕܺܝܠܳܢܳܐܝܬ

ܐ. ܩܘܪ̈ܝܢܬܝܐ. 3: 10 ـ 12 [5]

ܪ̈ܗܘܡܝܐ. 10: 10 [6]

ܐ. ܩܘܪ̈ܝܢܬܝܐ. 1: 24 [7]

ܥܒܪ̈ܝܐ. 1: 3 [8]

ܘܒܰܩܢܽܘܡܶܗ. ܗܽܘ ܒܰܩܢܽܘܡܶܗ[9]

ܒ. ܩܘܪ̈ܝܢܬܝܐ. 13: 3 [10]

ܕܰܒ̈ܢܰܝܳܐ ܕܥܘ̈ܠܐ. ܕܰܒ̈ܢܰܝܳܐ. ܥܽܘ̈ܠܶܐ.[11]

ܥܒܪ̈ܝܐ. 2: 14 [12]

ܐܰܝܟ ܗܳܢܳܐ ܕܓܘܐ[13]

ܡܙܡܘܪ̈ܐ. 143: 5 [14]

ܓܠܛܝ̈ܐ. 4: 4 [15]

[16]ܡܪܩܘܣ. 3: 17 ܝܽܘܚܰܢܳܢ ܕܶܝܢ ܗܰܘ ܒܪܳܐ ܕܗܰܘ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ ܪܰܥܡܳܐ

ܝܘܚܢܢ. 1: 14 [17]

ܥܒܪ̈ܝܐ. 2: 14 [18]

ܢܫܰܒܰܚ[19]

ܥܒܪ̈ܝܐ. 2: 16 ـ 17 [20]

ܢܬܐܠܨ[21]

ܥܒܪ̈ܝܐ. 2: 14 ـ 15 [22]

ܢܚܶܬ ܕܰܐܪܳܐ[23]

[24]ܠܘܳܬ ܣܰܪܓܺܝܣ ܐܶܦܝܣܩܘܦܐ ܐܳܡܰܪ.ܠܡܶܕܰܥ ܙܳܕܶܩ: ܕܰܒܡܶܢܗܽܘܢ ܕܰܨܚܳܚ̈ܶܐ܆ ܐܘ ܐܝܬ. ܗܳܢܰܘ ܕܶܝܢ ܫܰܦܺܝܪ ܒܡܶܢܗܽܘܢ ܕܶܝܢ ܐܘ ܗܳܢܰܘ ـ ܫܰܦܺܝܪ ܕܶܝܢ ܒܰܪ̱ܬ ܩܳܠܳܐ ܩܪܘܝܬܐ.

ܡܬܝ. 25: 21 ـ 24 [25]