ܡܺܐܡܪܳܐ ܕܚܰܡܫܺܝܢ ܘܫܰܒܥܳܐ
ܥܰܠ ܗܳܝ ܕܶܐܬܠܒܶܟ ܡܶܢ ܡܗܰܝܡ̈ܢܶܐ ܗܳܢܽܘܢ ܕܰܒܩܶܢܫܪܝܢ ܒܕܽܘܟܪܳܢܳܐ ܕܣܳܗܕܳܐ ܩܰܕܺܝܫܳܐ ܣܪܓܺܝܤ ܘܰܥܠܰܘܗ̱ܝ ܕܺܝܠܶܗ ܕܣܳܗܕܳܐ ܘܥܰܠ ܒܰܟܽܘܤ ܗܰܘ ܕܰܐܟܚܕܳܐ ܥܰܡܶܗ ܐܶܬܢܰܨܰܚ ܒܰܐܬܠܺܝܛܽܘܬܳܐ.
57: ܗܳܢܽܘܢ ܕܚܽܘܒܳܢܳܐܺܝܬ ܘܪܳܚܡܳܐܺܝܬ ܡܩܰܒܠܺܝܢ ܠܰܐܟܣ̈ܢܳܝܶܐ܆ ܟܰܕ ܠܟܽܠ ܡܶܕܶܡ ܕܝܰܬܺܝܪ ܫܰܦܺܝܪ ܘܛܳܒ ܬܽܘܪܣܳܝܳܐ ܘܡܶܐܟܽܘܠܬܳܐ ܡܟܰܢܫܺܝܢ܆ ܥܶܠܬܳܐ ܕܫܳܪܽܘܬܳܐ ܘܕܰܒܣܳܡܳܐ ܥܳܒܕܺܝܢ ܠܶܗ ܠܩܽܘܒܳܠܳܐ ܕܗܳܢܽܘܢ ܕܶܐܬܰܘ ܠܘܳܬܗܽܘܢ. ܐܰܝܟ ܐܰܝܢܳܐ ܕܺܐܝܬܰܘܗ̱ܝ ܗ̱ܘܳܐ ܐܰܒܪܳܗܳܡ܆ ܟܰܕ ܠܰܬܠܳܬܳܐ ܡܰܠܰܐܟ̈ܶܐ ܩܰܒܶܠ܆ ܡܰܠܽܘܢ ܕܶܝܢ ܠܶܗ ܠܰܐܠܳܗܳܐ ܟܰܕ ܒܛܶܟܣܳܐ ܕܡܰܠܰܐܟ̈ܶܐ ܘܒܰܚܙܳܬܳܐ ܕܓܰܒܪ̈ܶܐ ܐܶܬܚܙܺܝ܆ ܘܰܐܝܟ ܕܰܒܛܶܠܳܢܺܝܬܳܐ ܘܰܒܛܽܘܦܣܳܐ ܡܰܘܕܰܥ ܗ̱ܘܳܐ ܠܰܚܕܳܐ ܐܽܘܣܺܝܰܐ ܟܺܝܬ ܘܰܐܠܳܗܽܘܬܳܐ ܕܒܰܬܠܳܬܳܐ ܩܢܽܘܡ̈ܶܐ. ܘܰܠܗܳܕܶܐ ܡܚܰܘܶܐ ܟܬܳܒܳܐ ܟܳܗܢܳܝܳܐ܆ ܟܰܕ ܐܶܡܰܪ ܡܰܢ ܕܶܐܬܚܙܺܝ ܠܶܗ ܐܰܠܳܗܳܐ ܠܘܳܬ ܒܰܠܽܘܛܳܐ ܗܰܘ ܕܡܰܡܪܶܐ. ܐܰܝܬܺܝ ܕܶܝܢ ܒܳܬܰܪܟܶܢ܆ ܕܟܰܕ ܐܰܪܺܝܡ ܥܰܝܢܰܘ̈ܗ̱ܝ ܚܙܳܐ܆ ܗܳܐ ܬܠܳܬܳܐ ܓܰܒܪ̈ܺܝܢ ܩܳܝܡܺܝܢ ܠܥܶܠ ܡܶܢܶܗ. ܘܕܰܪܗܶܛ ܡܰܢ ܐܰܝܟ ܕܰܠܘܳܬ ܬܠܳܬܳܐ܆ ܕܰܐܝܟ ܕܰܠܚܰܕ ܕܶܝܢ ܠܰܬܠܳܬܰܝ̈ܗܽܘܢ ܡܡܰܠܶܠ ܗ̱ܘܳܐ܆ ܟܰܕ ܓܶܝܪ ܚܙܳܐ ܐܶܢܽܘܢ ܐܳܡܰܪ: ܪܗܶܛ ܠܘܳܬܗܽܘܢ ܠܽܐܘܪܰܥܗܽܘܢ܆ ܡܶܢ ܬܰܪܥܳܐ ܕܡܰܫܟܢܳܐ ܕܺܝܠܶܗ܆ ܘܰܣܓܶܕ ܥܰܠ ܐܰܪܥܳܐ ܘܶܐܡܰܪ ܡܳܪܝܳܐ: ܐܶܢ ܐܰܪܰܐ ܐܶܫܟܚܶܬ ܛܰܝܒܽܘܬܳܐ ܩܕܳܡܰܝܟ. ܠܳܐ ܬܶܥܒܪܺܝܘܗ̱ܝ ܠܥܰܒܕܳܟ[1]. ܘܡܶܚܕܳܐ ܟܰܕ ܫܰܚܠܦܶܗ ܠܶܐܣܟܺܡܳܐ ܕܡܶܠܬܳܐ. ܬܽܘܒ ܐܰܝܟ ܕܰܠܘܳܬ ܬܠܳܬܳܐ ܡܳܬܰܚ ܗ̱ܘܳܐ ܠܳܗ̇ ܠܡܶܠܬܳܐ ܟܰܕ ܐܳܡܰܪ: ܢܶܫܬܰܩܠܽܘܢ ܗܳܟܺܝܠ ܡܰܝ̈ܳܐ ܘܰܢܫܺܝܓܽܘܢ ܠܪ̈ܶܓܠܶܐ ܕܺܝܠܟܽܘܢ. ܟܰܕ ܕܶܝܢ ܢܳܚܶܬ ܗ̱ܘܳܐ܆ ܐܰܝܟ ܕܰܠܘܳܬ ܐܰܠܳܗܳܐ ܘܡܳܪܝܳܐ ܕܟܽܠ ܥܳܒܶܕ ܗ̱ܘܳܐ ܠܗܶܝܢ ܓܰܠܝܳܐܺܝܬ ܠܡ̈ܶܠܶܐ܆ ܘܰܐܝܟ ܕܡܶܢ ܐܰܠܳܗܳܐ ܠܦܽܘܢܳܝ ܦܶܬܓܳܡ̈ܶܐ ܡܩܰܒܶܠ ܗ̱ܘܳܐ. ܐܶܠܳܐ ܗܳܝ ܟܺܝܬ ܕܫܶܩܠܶܬ ܠܺܝ ܚܺܐܦܳܐ ܡܶܠܬܳܐ ܠܡܺܐܡܰܪ: ܟܰܕ ܪܳܗܶܛ ܗܰܘ ܪܳܚܶܡ ܐܰܟܣ̈ܢܳܝܶܐ. ܠܣܰܪܳܐ ܡܰܢ ܕܬܶܥܒܶܕ ܠܰܚܡܳܐ ܦܳܩܶܕ ܗ̱ܘܳܐ. ܗܽܘ ܕܶܝܢ ܩܢܽܘܡܶܗ. ܐܰܝܟ ܕܺܐܝܬ ܗ̱ܘܳܐ ܒܶܗ ܠܘܳܬ ܒܰܩܪܳܐ ܐܶܣܬܰܪܗܰܒ܆ ܘܠܰܘ ܠܰܐ̱ܚܪܺܢܳܐ ܦܳܩܶܕ܆ ܘܗܳܕܶܐ ܟܺܝܬ ܐܺܝܬ ܗ̱ܘܳܐ ܠܶܗ ܬܠܳܬܡܳܐܐ ܘܰܬܡܳܢܬܰܥܣܰܪ ܥܰܒ̈ܕܶܐ ܝܺܠܺܝ̈ܕܰܝ ܒܰܝܬܳܐ[2]܆ ܘܰܐ̱ܚܪ̈ܳܢܶܐ ܙܒܺܝ̈ܢܰܝ ܟܶܣܦܳܐ܆ ܘܟܰܕ ܓܒܳܐ ܥܶܓܠܳܐ ܪܰܟܺܝܟܳܐ ܘܛܳܒܳܐ ܐܰܝܬܺܝ܆ ܘܟܰܕ ܝܰܗܒܶܗ ܠܛܰܠܝܳܐ܆ ܕܢܰܬܩܢܺܝܘܗ̱ܝ ܠܗܳܢܳܐ ܠܘܳܬ ܫܳܪܽܘܬܳܐ. ܩܰܠܺܝܠܳܐܺܝܬ ܦܳܩܶܕ ܗ̱ܘܳܐ ܠܶܗ.
ܕܰܐܝܟ ܗܳܢܳܐ ܗܳܟܺܝܠ ܡܶܕܶܡ ܐܳܦ ܐܰܢ̱ܬܽܘܢ ܥܒܰܕܬܽܘܢ܆ ܟܰܕ ܠܡܶܐܬܺܝܬܳܐ ܕܺܝܠܝ ܫܺܝܛܬܳܐ ܫܩܰܠܬܽܘܢ܆ ܘܟܰܕ ܡܶܢ ܟܽܠܕܽܘܟ ܟܽܠ ܛܥܽܘܡܳܐ ܪܽܘܚܳܢܳܝܳܐ ܟܰܢܶܫܬܽܘܢ܆ ܕܡܶܫܟܰܚ ܠܰܡܬܰܪܣܳܝܽܘ ܠܢܰܦܫܳܐ ܡܶܬܗܰܘܢܳܢܳܐܺܝܬ܆ ܘܰܐܬܩܶܢܬܽܘܢ ܦܳܬܽܘܪܳܐ ܡܫܰܪܬܚܳܐ܆ ܒܬܶܫܡ̈ܫܳܬܳܐ ܕܡܰܙܡܽܘܪ̈ܶܐ܆ ܒܰܨ̈ܠܰܘܳܬܳܐ܆ ܒܰܐܡܺܝܢܽܘܬܳܐ ܩܒܺܝܥܬܳܐ ܕܰܠܘܳܬ ܥܺܕܬܳܐ܆ ܒܫܰܘܬܳܦܽܘܬܳܐ ܕܫܳܪܽܘܬܳܐ ܐ̱ܪܳܙܳܢܳܝܬܳܐ. ܘܰܠܚܰܪܬܳܐ ܟܰܕ ܠܒܰܟܬܽܘܢ ܠܰܢ ܘܰܐ̱ܚܪܳܢܝܳܐܺܝܬ ܠܳܐ ܫܒܰܩܬܽܘܢ ܠܰܢ܆ ܠܡܶܦܢܳܐ ܠܡܰܥܡܪܰܢ܆ ܐܶܠܳܐ ܐܶܢ ܐܳܦ ܠܗܳܕܶܐ ܫܳܪܽܘܬܳܐ ܕܚܰܕܽܘܬܳܐ ܢܶ݀ܫܬܰܪܶܐ ܘܢܶܒܣܰܡ ܥܰܡܟܽܘܢ ܘܰܢܥܰܕܥܶܕ ܐܰܟܚܕܳܐ ܥܰܡܟܽܘܢ ܠܕܽܘܟܪܳܢܗܶܝܢ ܕܰܐܬܠܺܝ̈ܣܘܳܬܳܐ ܕܣܰܪܓܺܝܤ ܣܳܗܕܳܐ. ܐܰܝܟܰܢܳܐ ܗܳܟܺܝܠ ܐܶ݀ܗܘܶܐ ܣܺܝܡ ܐ̱ܢܳܐ ܒܰܩܪܳܝܬܳܐ ܕܫܳܪܽܘܬܳܐ ܕܗܳܟܰܢܳܐ ܐܺܝܬܶܝܗ̇ ܢܰܨܺܝܚܬܳܐ ܘܰܕܥܺܐܕܳܐ ܕܗܳܢܳܐ ܟܽܠܶܗ ܫܒܺܝܚ. ܐܰܪܰܐ ܟܰܕ ܫܰܬܺܝܩ ܐ̱ܢܳܐ ܘܳܐܦܠܳܐ ܡܶܕܶܡ ܡܰܥܶܠ ܐ̱ܢܳܐ ܠܗܳܢܽܘܢ ܕܰܩܪܰܐܘܽܢܝ܆ ܡܶܢ ܗܳܠܶܝܢ ܕܰܗܕܺܝܪܬܳܐ ܘܢܰܨܺܝܚܬܳܐ ܡܫܰܡ̈ܠܝܳܢ ܠܳܗ̇ ܠܚܰܕܽܘܬܳܐ. ܘܰܐܝܟܰܢܳܐ ܠܰܘ ܐܰܝܟ ܗܳܢܽܘܢ ܝܰܥ̈ܢܶܐ ܕܡܶܢ ܙܡܺܝ̈ܢܶܐ ܐܶ݀ܗܘܶܐ ܐܺܝܬܰܝ܆ ܡܰܠܽܘܢ ܕܶܝܢ ܐܰܝܟ ܗܳܢܽܘܢ ܠܳܐ ܒ̈ܢܰܝ ܚܺܐܪ̈ܶܐ ܢܰܩܺܝ̈ܦܰܝ ܠܦܳܬܽܘܪ̈ܶܐ܆ ܗܳܢܽܘܢ ܕܰܠܟܰܪܣܳܐ ܒܰܠܚܽܘܕ ܡܶܬܚܪܶܝܢ ܠܡܶܡܠܳܐ ܘܝܰܬܺܝܪ ܡܶܢ ܣܰܒܥܳܐ. ܠܳܐ ܕܶܝܢ ܣܳܟ ܬܳܠ̣ܶܝܢ ܚܰܘܪܗܽܘܢ ܠܘܳܬ ܫܡܰܝܳܐ܆ ܘܰܡܫܰܒܚܺܝܢ ܠܗܰܘ ܕܝܰܗ̱ܒ ܠܩܽܘܝܳܡܳܐ ܕܚܰܝ̈ܶܐ ܕܺܝܠܰܢ ܬܽܘܪ̈ܣܳܝܶܐ ܗܳܢܽܘܢ ܕܥܳܗܢܺܝܢ ܘܠܳܚܡܺܝܢ ܒܟܽܠܶܗ ܗܳܢܳܐ ܫܽܘܚܠܳܦܳܐ ܘܰܡܦܰܬܟܽܘܬܳܐ. ܟܒܰܪ ܕܶܝܢ ܐܳܦܠܳܐ ܟܰܕ ܨܳܒܶܐ ܐ̱ܢܳܐ ܠܡܶܫܬܰܩ܆ ܡܰܦܣܳܐ ܠܺܝ ܗܺܝ ܢܰܨܺܝܚܽܘܬܗܽܘܢ ܕܬܰܟܬܽܘܫܰܘ̈ܗ̱ܝ ܕܣܳܗܕܳܐ.
ܠܗܰܘ ܕܰܕܡܶܢ ܕܪܺܝܫ ܡܚܰܕܶܬ ܠܶܗ ܒܥܽܘܗܕܳܢܳܐ ܠܙܰܒܢܳܐ ܕܣܳܗܕܽܘܬܳܐ ܡܣܰܒܰܪ ܐ̱ܢܳܐ ܕܚܳܙܶܐ ܐ̱ܢܳܐ ܠܶܗ. ܟܰܕ ܩܳܐܶܡ ܩܕܳܡ ܡܰܐܟܣܺܝܡܝܰܢܽܘܤ ܛܪܽܘܢܳܐ܆ ܥܰܡ ܒܰܟܽܘܤ ܒܰܪ ܦܳܠܚܽܘܬܶܗ ܘܰܫܘܶܐ ܒܬܰܟܬܽܘܫܳܐ. ܛܪܽܘܢܰܐ ܗ̱ܘ ܓܶܝܪ ܟܽܠ ܡܰܠܟܳܐ ܕܠܽܘܩܒܰܠ ܫܰܦܺܝܪܽܘܬ ܕܶܚܠܬܳܐ ܣܳܐܶܡ ܢܳܡܽܘܣܳܐ܆ ܐܳܦܶܢ ܢܶܗܘܶܐ ܢܳܡܽܘܣܳܐܺܝܬ ܐܶܬܬܰܣܪܰܚ. ܥܰܡ ܒܰܟܽܘܤ ܕܶܝܢ ܐܶܡܪܶܬ܆ ܡܶܛܽܠ ܟܺܝܬ ܕܠܳܐ ܙܳܕܶܩ ܕܰܒܡܶܠܬܳܐ ܢܦܰܠܶܓ ܐܶܢܽܘܢ ܡܶܢ ܚ̈ܕܳܕܶܐ܆ ܠܗܳܢܽܘܢ ܕܰܟܠܺܝܠܳܐ ܕܣܳܗܕܽܘܬܳܐ ܐܰܠ̣ܘܶܬ ܐܶܢܽܘܢ ܐܰܟܚܕܳܐ. ܫ̈ܘܰܝܳܐ ܓܶܝܪ ܐܺܝܬܰܝܗܽܘܢ ܗ̱ܘܰܘ ܒܩܰܘܡܬܳܐ. ܒܚܶܙܘܳܐ ܒܪܰܒܽܘܬܳܐ. ܥܠܰܝܡܳܝ̈ܶܐ ܒܦܰܓܪܳܐ܆ ܝܰܬܺܝܪ ܥܠܰܝ̈ܡܳܝܶܐ ܒܬܰܪܥܺܝܬܳܐ. ܕܡܰܦܠܚܺܝܢ ܗ̱ܘܰܘ ܡܰܢ܆ ܘܕܰܒܬܶܓ̈ܡܶܐ ܡܙܰܝ̈ܢܶܐ ܕܒܰܚܕܳܪ̈ܰܝ ܡܰܠܟܳܐ ܡܶܬܚܰܫܒܺܝܢ ܗ̱ܘܰܘ. ܩܰܝܽܘܡ̈ܶܐ ܕܶܝܢ ܩܰܕܡܳܝ̈ܶܐ ܐܺܝܬܰܝܗܽܘܢ ܗ̱ܘܰܘ܆ ܘܰܕܛܶܟܣܳܐ ܗܰܘ ܕܰܒܪܺܝܫܳܢܽܘܬܳܐ ܐܰܚܺܝܕܺܝܢ ܗ̱ܘܰܘ. ܐܰܝܟܰܢܳܐ ܕܣܰܪܓܺܝܤ ܡܰܢ ܩܰܕܡܳܝܳܐ. ܬܪܰܝܳܢܳܐ ܕܶܝܢ ܒܰܟܽܘܤ ܢܶܬܡܢܽܘܢ. ܐܳܦ ܟܺܝܬ ܟܰܕ ܒܚܰܕ ܪܶܥܝܳܢܳܐ ܕܫܰܦܺܝܪܽܘܬ ܕܶܚܠܬܳܐ ܡܠܰܚܡܺܝܢ ܗ̱ܘܰܘ܆ ܘܰܟܪ̈ܺܝܣܛܝܳܢܶܐ ܡܶܬܩܪܶܝܢ ܘܺܐܝܬܰܝܗܽܘܢ ܗ̱ܘܰܘ܆ ܚܰܕ ܘܗܽܘ ܟܰܕ ܗܽܘ ܐܰܓܽܘܢܳܐ ܚܠܳܦ ܫܪܳܪܳܐ ܐܶܬܟܰܬܰܫܘ.
ܐ̱ܢܳܫܺܝ̈ܢ ܓܶܝܪ ܟܰܕ ܟܬܰܒܘ ܥܠܰܝܗܽܘܢ ܠܘܳܬ ܡܰܠܟܳܐ܆ ܘܰܠܗܳܝ ܕܠܳܐ ܡܕܰܒܚܺܝܢ ܗ̱ܘܰܘ ܘܰܡܢܰܩܶܝܢ ܠܫ̈ܺܐܕܶܐ܆ ܐܰܝܟ ܡܶܕܶܡ ܡܶܢ ܡܰܪ̈ܫܘܳܬܳܐ ܫܟܺܝܪ̈ܳܬܳܐ ܡܩܰܛܪܓܺܝܢ ܗ̱ܘܰܘ ܘܰܡܚܰܝܒܺܝܢ. ܓܰܘܙܠܽܘܗ̇ ܠܚܶܡܬܶܗ ܕܗܰܘ ܕܰܐܚܺܝܕ ܗ̱ܘܳܐ. ܟܰܕ ܐܳܡܪܺܝܢ ܗ̱ܘܰܘ ܥܠܰܝܗܽܘܢ ܕܡܶܢ ܪܳܚܡܽܘܬܶܗ ܕܗܰܘ܆ ܐܶܬܰܘ ܠܗܳܕܶܐ ܟܽܠܳܗ̇ ܦܰܪܰܗ̱ܣܺܝܰܐ. ܘܟܰܕ ܡܶܢ ܫܽܘܪܳܝܳܐ ܠܳܐ ܗܰܝܡܶܢ܆ ܒܳܬܰܪܟܶܢ ܕܶܝܢ ܠܘܳܬ ܗܰܝܟܠܳܐ ܕܙܽܘܤ ܐܰܠܳܗܳܐ ܛܰܢܦܳܐ ܘܕܰܓܳܠ ܫܡܳܐ ܐܰܝܬܺܝ ܐܶܢܽܘܢ܆ ܘܡܶܢ ܕܶܒ̈ܚܶܐ ܡܣܰܝ̈ܒܶܐ ܥܰܡ ܡܫܰܡ̈ܫܳܢܶܐ ܕܺܝܠܶܗ ܐܶܟܰܠ܆ ܘܢܰܣܺܝ ܕܰܢܚܰܦܶܛ ܠܘܳܬ ܡܶܐܟܽܘܠܬܳܐ ܗܳܝ ܡܣܰܝܰܒܬܳܐ ܐܳܦ ܠܚܰܝ̈ܠܬܳܢܶܐ ܗܳܢܽܘܢ܆ ܫܳܡܰܥ ܗ̱ܘܳܐ ܕܠܳܐ ܙܳܕܶܩ ܠܰܡܕܰܒܳܚܽܘ ܠܰܓ̈ܠܺܝܦܶܐ ܕܠܳܐ ܢܰܦܫܳܐ܆ ܘܰܠܨܰܠ̈ܡܶܐ ܕܫ̈ܺܐܕܶܐ ܒܺܝ̈ܫܶܐ܆ ܗܳܢܽܘܢ ܕܦܽܘܡܳܐ ܐܺܝܬ ܠܗܽܘܢ ܘܠܳܐ ܡܡܰܠܠܺܝܢ܆ ܘܒܶܐܕܢܰܝ̈ܗܽܘܢ ܠܳܐ ܫܳܡܥܺܝܢ ܘܗܳܢܶܝܢ ܐ̱ܚܪ̈ܳܢܝܳܬܳܐ[3]. ܗܳܠܶܝܢ ܕܰܒܗܶܝܢ ܢܒܺܝܳܐ ܗܰܘ ܕܰܡܙܰܡܰܪ ܠܠܳܐ ܡܰܪܓܫܳܢܽܘܬܗܽܘܢ ܘܠܳܐ ܡܶܬܬܙܺܝܥܳܢܽܘܬܗܽܘܢ ܒܰܙܰܚ. ܗܳܠܶܝܢ ܕܡܶܢܗܶܝܢ ܟܰܕ ܝܰܬܺܝܪܳܐܺܝܬ ܪܬܰܚ ܘܛܰܪܛܰܥ ܒܙܰܘܥܳܐ ܪܰܓܽܘܙܬܳܢܳܐ ܘܫܰܒܗܪܳܢܳܐ ܕܢܰܦܫܶܗ܆ ܦܩܰܕ ܕܢܶܬܦܰܣ̈ܩܳܢ ܡܰܢ ܙܽܘܢ̈ܰܤ ܕܺܝܠܗܽܘܢ܆ ܕܢܶܬܬܪܺܝܡ ܕܶܝܢ ܡܶܢ ܨܰܘܪܳܐ ܕܺܝܠܗܽܘܢ ܨܶܒܬܳܐ ܗܰܘ ܕܕܰܗܒܳܐ܆ ܗܰܘ ܕܰܥܝܳܕܳܐ ܐܺܝܬ ܠܗܽܘܢ ܠܡܶܬܠܳܐ ܠܰܡܙܰܝ̈ܢܶܐ ܗܳܢܽܘܢ ܕܰܠܘܳܬ ܡܰܠ̈ܟܶܐ ܩܰܪܺܝܒܺܝܢ. ܘܟܰܕ ܟܽܘܬܺܝ̈ܢܝܳܬܳܐ ܟܺܝܬ ܕܢܶܫ̈ܶܐ ܠܳܒܫܺܝܢ. ܢܶܬܬܰܝܬܽܘܢ ܒܡܶܨܥܰܬ ܫܽܘܩܳܐ. ܐܶܠܳܐ ܠܦܽܘܬ ܗܳܠܶܝܢ ܡܶܬܚܰܟܡܺܝܢ ܗ̱ܘܰܘ ܠܩܽܘܒܠܶܗ. ܟܰܕ ܒܗܽܘܢ ܒܣܽܘܥܪ̈ܳܢܶܐ ܐܳܡܪܺܝܢ ܗ̱ܘܰܘ ܣܳܗ̈ܕܶܐ ܗܳܢܽܘܢ ܕܡܶܢ ܟܽܠ ܕܽܘܟ ܠܳܐ ܡܶܙܕܰܟ̈ܝܳܢܶܐ ܘܰܕܫܰܦܺܝܪܳܐܺܝܬ ܝܰܠܺܝܦܺܝܢ ܗ̱ܘܰܘ ܥܰܡ ܥܩܺܝܡܳܐ ܠܰܡܦܰܬܳܠܽܘ[4]. ܗܳܝ ܕܳܐܡܰܪ ܕܰܘܺܝܕ ܘܰܕܠܰܫ̈ܟܳܚܳܬܳܐ ܕܳܐܟܶܠܩܰܪܨܳܐ ܘܕܽܐܘܪ̈ܓܰܢܶܐ ܕܺܝܠܶܗ ܢܰܗܦܟܽܘܢ ܠܘܳܬ ܗܳܝ ܕܰܡܝܰܬܪܳܐ܆ ܡܳܢܳܐ ܣܳܒܰܪ ܐܰܢ̱ܬ ܐܳܘ ܡܶܬܟܰܬܰܫ ܥܰܡ ܐܰܠܳܗܳܐ܆ ܕܒܶܐܣܟܺܡܳܐ ܢܶܩܒܬܳܢܳܝܳܐ ܡܰܪܦܶܐ ܐܰܢ̱ܬ ܠܢܰܦ̈ܫܳܬܳܐ ܕܺܝܠܰܢ ܗܳܠܶܝܢ ܚܰܝ̈ܠܬܳܢܝܳܬܳܐ. ܠܒܽܘܫܳܐ ܕܰܐܢ̱ܬܬܳܐ ܩܛܺܝܪܳܐܺܝܬ ܠܦܰܓܪ̈ܶܐ ܐܰܠ̣ܒܶܫܬ. ܐܶܠܳܐ ܠܰܘ ܠܬܰܪܥܺܝܬܳܐ ܕܺܝܠܰܢ ܚܠܺܝܡܬܳܐ ܘܰܡܫܰܪܰܪܬܳܐ ܐܰܠ̣ܒܶܫܬ ܪܰܦܝܽܘܬܳܐ܆ ܢܚܰܘܶܐ ܠܳܟ ܒܗܽܘܢ ܒܰܥ̈ܒܳܕܶܐ܆ ܕܡܰܫܰܪ ܥܠܰܝܢ ܦܽܘܪܓܳܠܳܐ ܘܦܽܘܩܕܳܢܳܐ ܕܰܐܠܳܗܳܐ ܗܰܘ ܕܰܒܝܰܕ ܡܽܘܫܶܐ ܕܳܐܡܰܪ: ܕܠܳܐ ܢܶܠܒܰܫ ܓܰܒܪܳܐ ܠܒܽܘܫܳܐ ܢܶܫܳܝܳܐ[5]. ܐܶܢ ܓܶܝܪ ܠܣܰܓܺܝ̈ܳܐܬܳܐ ܡܶܢ ܢܶܫ̈ܶܐ ܠܳܐ ܗܘܳܬ ܥܽܘܟܳܪܳܐ ܢܶܩܒܳܝܽܘܬܶܗ ܕܰܟܝܳܢܳܐ܆ ܐܶܠܳܐ ܒܗܰܘܢܳܐ ܕܶܟܪܳܢܳܝܳܐ ܠܘܳܬ ܐܰܓܽܘ̈ܢܶܐ ܕܫܰܦܺܝܪܽܘܬ ܕܶܚܠܬܳܐ ܢܦܰܩ̈ܶܝܢ܆ ܘܒܰܟ̈ܠܺܝܠܶܐ ܕܙܳܟܽܘܬܳܐ ܕܠܽܘܩܒܰܠ ܐܳܟܶܠܩܰܪܨܳܐ ܐܶܬܟܰܠܰܠ̈ܶܝܢ܆ ܐܰܝܟܰܢܳܐ ܠܰܢ ܟܽܘܬܺܝܢܳܐ ܗܳܕܶܐ ܡܫܰܚܠܦܳܐ ܐܳܘ ܫܳܘܶܐ ܠܓܽܘܚܟܳܐ. ܐܰܘ ܠܳܐ ܚܳܙܶܐ ܐܰܢ̱ܬ ܕܳܐܦ ܡܶܢ ܦܰܓܪܳܐ ܕܺܝܠܰܢ ܕܰܥܠܰܝܡܳܐܺܝܬ ܡܶܬܬܰܝܬܶܐ ܫܳܪܥܳܐ ܘܠܳܐ ܨܳܒܝܳܐ ܕܰܬܫܰܟܶܢ܆ ܘܗܽܘ ܟܳܦܰܪ ܒܳܗ̇ ܡܰܠܝܳܐܺܝܬ ܐܰܝܟ ܐܰܝܕܳܐ ܕܠܳܐ ܒܰܝܬܳܝܳܐ ܠܶܗ. ܒܪܰܡ ܗܳܢܳܐ ܟܽܠܶܗ ܪܰܚܺܝܩܺܝܢ ܚ̱ܢܰܢ ܕܢܶܣܬܰܓܰܦ ܡܶܢ ܗܳܪܟܳܐ ܕܳܐܦ ܠܘܳܬ ܬܰܪܥܺܝܬܳܐ ܡܝܰܬܰܪܬܳܐ ܡܶܬܥܰܠܶܝܢ ܚ̱ܢܰܢ. ܘܡܶܚܕܳܐ ܒܰܪ ܫܳܥܬܶܗ ܝܰܬܺܝܪܳܐܺܝܬ ܢܶ݀ܬܕܰܡܶܐ ܠܡܳܪܳܐ ܕܺܝܠܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܐܰܟܙܢܳܐ ܓܶܝܪ ܕܗܰܘ܆ ܟܰܕ ܡܶܢ ܝܽܗ̱ܘ̈ܕܳܝܶܐ ܕܠܳܐ ܐܰܠܳܗ ܕܰܡܓܰܚܟܺܝܢ ܗ̱ܘܰܘ ܒܶܗ ܒܟܽܘ̈ܒܶܐ ܐܶܬܟܰܠܰܠ܆ ܐܰܝܟ ܕܰܒܛܽܘܦܣܳܐ ܩܳܕܶܡ ܗ̱ܘܳܐ ܡܰܘܕܰܥ ܠܐ̱ܪܳܙܳܐ ܥܰܡܺܝܩܳܐ ܘܰܡܛܰܫܝܳܐ܆ ܕܗܰܘ ܕܒܺܐܝܕܰܘ̈ܗ̱ܝ ܠܰܚܛܺܝܬܳܐ ܕܥܳܠܡܳܐ ܒܰܕܡܽܘܬ ܐܶܡܪܳܐ ܫܩܰܠ ܥܰܠ ܪܺܝܫܶܗ܆ ܘܰܡܫܰܡܠܝܳܐܺܝܬ ܕܰܥܟܳܗ̇ ܠܗܳܝ ܕܟܽܘܒ̈ܶܐ ܘܕܰܪܕܪ̈ܶܐ ܐܰܘܥܝܰܬ ܠܰܢ܆ ܗܳܟܰܢܳܐ ܐܳܦ ܚܢܰܢ ܒܝܰܕ ܓܰܢ̱ܒܳܪܽܘܬܳܐ ܡܚܰܡܣܢܳܢܺܝܬܳܐ ܗܳܝ ܕܰܒܕܰܪܳܐ ܕܣܳܗܕܽܘܬܳܐ܆ ܠܪܰܦܝܽܘܬܳܐ ܘܰܠܕܶܚܠܬܳܐ ܒܗܳܠܶܝܢ ܟܽܘܬܺܝ̈ܢܝܳܬܳܐ ܢܶܫܳܝ̈ܳܬܳܐ ܢܶܩܗܶܐ ܘܰܢܒܰܙܰܚ. ܡܰܥܒܶܕ ܓܶܝܪ ܡܫܺܝܚܳܐ ܗܰܘ ܚܰܝܠܶܗ ܕܰܐܠܳܗܳܐ ܘܰܐܒܳܐ ܥܕܰܟܺܝܠ ܐܳܦ ܗܳܫܳܐ܆ ܐܳܦ ܒܥܰܒ̈ܕܶܐ ܒܰܝ̈ܬܳܝܶܐ ܕܺܝܠܶܗ ܗܳܠܶܝܢ ܕܕܳܡ̈ܝܳܢ.
ܟܰܕ ܗܳܠܶܝܢ ܘܕܰܐܝܟ ܗܳܠܶܝܢ ܡܶܬܪܰܥܶܝܢ ܗ̱ܘܰܘ ܘܳܐܡܪܺܝܢ ܗ̱ܘܰܘ ܗܶܢܽܘܢ ܐܰܬܠܺܝ̈ܛܶܐ܆ ܘܰܒܝܰܕ ܡܨܰܥܬܳܗ̇ ܕܰܡܕܺܝܢ̱ܬܳܐ ܐܶܬܬܰܝܬܺܝܘ܆ ܟܰܕ ܩܪܳܐ ܐܶܢܽܘܢ ܡܶܚܕܳܐ ܬܽܘܒ ܠܘܳܬܶܗ ܗܽܘ ܛܪܽܘܢܳܐ܆ ܫܰܪܺܝ ܕܰܐܝܟ ܕܠܰܐܝܠܶܝܢ ܕܶܐܬܬܰܛܥܺܝܘ ܢܰܦܢܶܐ ܐܶܢܽܘܢ ܡܶܢ ܛܳܥܝܽܘܬܳܐ. ܘܰܕܢܶܓܚܰܟ ܘܰܢܡܰܝܶܩ ܒܐ̱ܪܳܙܳܐ ܪܰܒܳܐ ܕܫܰܦܺܝܪܽܘܬ ܕܶܚܠܬܳܐ ܘܢܺܐܡܰܪ: ܕܰܠܡܳܢܳܐ ܡܶܬܒܥܶܐ ܠܟܽܘܢ ܐܳܘ ܣܪ̈ܺܝܩܶܐ ܠܡܶܣܓܰܕ ܠܗܰܘ ܒܰܪ ܢܰܓܳܪܳܐ܆ ܠܗܰܘ ܕܡܶܢ ܒܬܽܘܠܬܳܐ ܕܶܐܬܚܰܒܠܰܬ ܓܰܝܳܪܳܐܺܝܬ ܡܶܢ ܩܕܳܡ ܡܶܫܬܽܘܬܳܐ ܢܳܡܽܘܣܳܝܬܳܐ ܐܶܬܺܝܠܶܕ܆ ܠܗܰܘ ܕܳܐܦ ܐܰܝܟ ܥܳܒܰܪ ܥܰܠ ܢܳܡܽܘܣܳܐ ܘܕܰܫܓܽܘܫ̈ܝܶܐ ܥܳܒܶܕ ܗ̱ܘܳܐ ܒܥܰܡܳܐ ܕܺܝܠܗܽܘܢ܆ ܚܰܝܒܽܘܗ̱ܝ ܝܽܗ̱ܘ̈ܕܳܝܶܐ ܠܰܙܩܺܝܦܳܐ.
ܘܰܠܘܳܬ ܗܳܠܶܝܢ ܬܽܘܒ ܗܶܢܽܘܢ ܩܰܕܺܝ̈ܫܶܐ܆ ܟܰܕ ܠܠܶܫܳܢܳܐ ܕܺܝܠܗܽܘܢ ܡܡܰܠܶܠ ܐܰܠܳܗܳܝ̈ܳܬܳܐ ܒܰܨ̈ܠܰܘܳܬܳܐ ܠܛܰܫܘ ܐܶܡܰܪܘ: ܠܰܘ ܒܰܕܡܽܘܬ ܐܰܠܳܗܰܝ̈ܟܽܘܢ ܕܺܝܠܟܽܘܢ ܗܳܢܽܘܢ ܡܶܬܓܰܚ̈ܟܳܢܶܐ܆ ܕܰܒܢܰܝ̈ܢܳܫܳܐ ܐܺܝܬܰܝܗܽܘܢ ܗ̱ܘܰܘ ܕܳܘ̈ܰܝܳܐ ܘܦܰܚ̈ܙܶܐ܆ ܕܡܶܢ ܚܽܘܠ̈ܛܳܢܶܐ ܠܳܐ ܢܳܡܽܘܣܳܝ̈ܶܐ ܘܡܶܢ ܓܰܘܪܳܐ ܗܘܰܘ܆ ܐܶܬܺܝܠܶܕ ܡܫܺܝܚܳܐ. ܐܶܠܳܐ ܒܗܳܝ ܡܰܢ ܕܺܐܝܬܰܘܗ̱ܝ ܐܰܠܳܗܳܐ܆ ܕܢܰܓܳܪܳܐ ܐܺܝܬܰܘܗ̱ܝ ܒܪܐ ܐܰܝܟ ܕܒܰܫܪܳܪܳܐ܆ ܕܰܐܠܳܗܳܐ ܘܰܐܒܳܐ ܗܰܘ ܕܰܒܝܰܕ ܡܶܠܬܶܗ ܘܚܶܟܡܬܶܗ ܘܕܺܐܝܬܰܘܗ̱ܝ ܚܰܝ̈ܶܐ ܩܢܽܘܡܳܝ̈ܶܐ܆ ܘܕܰܩܕܳܡ ܥܳܠ̈ܡܶܐ ܠܳܐ ܦܰܓܪܳܢܳܐܺܝܬ ܘܠܳܐ ܚܰܫܳܢܳܐܺܝܬ ܡܶܢܶܗ ܐܶܬܺܝܠܶܕ܆ ܠܰܫܡܰܝܳܐ ܘܠܰܐܪܥܳܐ ܢܰܓܰܪ ܠܰܢ܆ ܘܰܠܟܽܠܳܗ̇ ܒܪܺܝܬܳܐ ܗܳܝ ܕܰܠܥܶܠ ܡܶܢ ܫܡܰܝܳܐ ܡܰܠܰܐܟܳܝܬܳܐ܆ ܟܰܕ ܠܳܐ ܐܺܝܬܶܝܗ̇ ܗ̱ܘܳܬ ܠܗܳܝ ܕܬܶܗܘܶܐ ܐܺܝܬܶܝܗ̇ ܐܰܝܬܺܝ. ܒܗܳܝ ܕܶܝܢ ܕܺܐܝܬܰܘܗ̱ܝ ܒܰܪܢܳܫܳܐ ܠܳܐ ܡܶܫܬܰܚܠܦܳܢܳܐܺܝܬ ܘܨܶܒܝܳܢܳܐܺܝܬ ܕܢܶܗܘܶܐ ܡܶܛܽܠܳܬܰܢ ܗܳܢܽܘܢ ܕܰܐܒܺܝܕܺܝܢ ܗ̱ܘܰܘ ܨܒܳܐ. ܡܶܢ ܪܽܘܚܳܐ ܩܰܕܺܝܫܳܐ ܬܽܘܒ ܠܳܐ ܚܰܫܳܢܳܐܺܝܬ ܘܰܤܛܰܪ ܡܶܢ ܚܛܺܝܬܳܐ܆ ܘܡܶܢ ܐܶܡܳܐ ܒܬܽܘܠܬܳܐ ܝܺܠܺܝܕ܆ ܘܟܰܕ ܠܡܰܘܬܳܐ ܕܰܒܝܰܕ ܨܠܺܝܒܳܐ ܒܨܶܒܝܳܢܶܗ ܣܒܰܠ ܒܰܒܣܰܪ܆ ܐܰܘܕܰܥ ܕܠܰܘ ܡܶܛܽܠܳܬܶܗ܆ ܐܶܠܳܐ ܡܶܛܽܠܳܬܰܢ ܕܺܝܠܰܢ ܣܰܒܠܶܗ ܠܗܳܢܳܐ܆ ܟܰܕ ܬܠܺܝܬܳܝ ܝܰܘ̈ܡܶܐ ܩܳܡ ܡܶܢ ܡܺܝ̈ܬܶܐ܆ ܘܰܫܪܳܐ ܠܰܐܣܽܘܪ̈ܶܐ ܗܳܢܽܘܢ ܕܒܰܫܝܽܘܠ ܘܰܠܗܳܕܶܐ ܫܰܪܪܳܗ̇ ܒܝܰܕ ܗܳܝ ܕܦܰܓܪ̈ܶܐ ܣܰܓܺܝ̈ܶܐܐ ܕܩܰܕܺܝ̈ܫܶܐ ܕܰܫܟܺܝܒܺܝܢ ܗ̱ܘܰܘ ܩܳܡܘ܆ ܘܠܰܡܕܺܝܢ̱ܬܳܐ ܩܰܕܺܝܫܬܳܐ ܪܗܶܛܘ ܥܰܠ̣ܘ.
ܠܘܳܬ ܗܳܠܶܝܢ ܕܶܝܢ܆ ܐܰܝܟ ܚܰܪܫܳܐ ܘܰܕܠܳܐ ܩܳܠܳܐ ܟܰܬܰܪ ܗܰܘ ܛܪܽܘܢܳܐ܆ ܘܰܒܬܶܐܽܘܠܽܘܓܝܰܐ ܗܳܝ ܒܰܙܢܳܐ ܡܶܕܶܡ ܐܶܨܛܰܕܰܪ[6] ܘܺܝܒܶܫ܆ ܘܠܰܝܬ ܗ̱ܘܳܐ ܠܶܗ ܗܰܘ ܡܳܐ ܕܢܶܥܒܶܕ܆ ܐܶܠܳܐ ܐܶܙܕܟܺܝ ܡܶܢ ܡܝܰܬܪܽܘܬܗܽܘܢ܆ ܠܘܳܬ ܐܰܬܪܳܐ ܗܰܘ ܕܰܒܡܶܨܥܰܬ ܢܰܗܪܺܝܢ ܕܢܶܬܬܰܘܒܠܽܘܢ ܗܳܠܶܝܢ ܦܳܩܶܕ ܗ̱ܘܳܐ܆ ܗܰܘ ܕܳܐܘܦܪܰܐܛܝܣܝܐ[7] ܩܳܪܶܝܢ ܠܶܗ ܒ̈ܢܰܝ ܐܰܬܪܳܐ ܗܰܘ. ܘܰܕܢܶܫܬܰܠܡܽܘܢ ܠܰܐܢܛܽܝܰܟܽܘܤ ܗܰܘ ܕܺܐܝܬܰܘܗ̱ܝ ܗ̱ܘܳܐ ܗܶܓܡܽܘܢܳܐ ܕܛܶܟ̈ܣܶܐ ܕܬܰܡܳܢ ܗܳܢܳܘܢ ܕܰܒܦܳܠܚܽܘܬܳܐ܆ ܗܰܘ ܕܗܳܢܽܘܢ ܙܰܡܢܽܘܗ̇ ܗ̱ܘܰܘ ܠܶܗ ܠܪܺܝܫܳܢܽܘܬܳܐ܆ ܐܳܦ ܠܗܳܕܶܐ ܓܶܝܪ ܣܳܒܰܪ ܗ̱ܘܳܐ ܗܽܘ ܡܰܠܟܳܐ ܥܰܘܳܠܳܐ ܕܰܠܨܰܥܪܗܽܘܢ ܘܰܠܫܺܝܛܽܘܬܗܽܘܢ ܦܰܩܕܳܗ̇܆ ܘܟܰܕ ܟܺܝܬ ܗܳܝ ܕܣܳܦܩܳܐ ܗ̱ܘܳܬ ܘܙܳܕܩܳܐ ܠܦܽܘܩܕܳܢܳܐ ܥܳܒܶܕ ܗ̱ܘܳܐ ܗܽܘ ܐܰܢܛܺܝܰܟܽܘܤ ܬܳܒܰܥ ܗ̱ܘܳܐ ܠܗܽܘܢ ܘܰܡܒܰܚܶܢ ܗ̱ܘܳܐ ܣܽܘܥܪܳܢܗܽܘܢ ܒܫܽܘ̈ܐܴܠܶܐ ܘܰܒܢܶܓ̈ܕܶܐ. ܟܰܕ ܕܶܝܢ ܚܙܳܐ ܕܠܳܐ ܡܶܨܛܰܠܝܳܢܳܐܺܝܬ ܐܺܝܬ ܠܗܽܘܢ ܠܰܐܠܳܗܳܝܳܐ ܡܰܢ ܣܰܪܓܺܝܤ. ܕܢܶܫܬܠܶܡ ܕܫܳܥܬܳܐ ܠܒܶܝܬ ܚܒܽܘܫܝܳܐ ܦܳܩܶܕ ܗ̱ܘܳܐ. ܠܛܽܘܒܬܳܢܳܐ ܕܶܝܢ ܒܰܟܽܘܤ ܕܒܰܓ̈ܝܳܕܶܐ ܕܬܰܘܪ̈ܶܐ ܢܶܬܢܰܓܰܕ ܥܰܠ ܟܰܪܣܶܗ ܦܩܰܕ܆ ܡܶܢ ܒܳܬܰܪ ܡܰܚ̈ܘܳܬܳܐ ܗܳܠܶܝܢ ܕܥܰܠ ܚܰܨܶܗ܆ ܒܗܳܠܶܝܢ ܕܟܰܕ ܣܰܓܺܝ̈ܳܐܬܳܐ ܐܺܝܬܰܝܗܶܝܢ ܗ̱ܘܰܝ̈܆ ܘܰܐܝܟ ܕܰܠܡܺܐܡܰܪ ܠܳܐ ܡܶܬܡܰܢ̈ܝܳܢܝܳܬܳܐ ܟܰܕ ܚܰܡܣܶܢ܆ ܘܠܳܐ ܐܰܫܦܶܠ ܒܬܰܪܥܺܝܬܶܗ܆ ܐܳܦܠܳܐ ܡܶܠܬܳܐ ܪܦܺܝܬܳܐ ܘܠܳܐ ܓܰܒܪܳܢܳܝܬܳܐ ܡܶܢ ܠܶܫܳܢܶܗ ܐܰܦܶܩ܆ ܒܗܶܝܢ ܐܰܓܥܠܳܗ̇ ܠܢܰܦܫܶܗ ܗܳܝ ܡܟܰܠܰܠܬܳܐ܆ ܠܰܡܫܺܝܚܳܐ ܗܽܘ ܣܳܝܽܘܡܶܗ ܕܰܐܓܽܘܢܳܐ. ܟܰܕ ܦܰܓܪܶܗ ܒܚܽܘܪܒܳܐ ܫܳܕܶܐ ܗ̱ܘܳܐ. ܘܰܬܡܺܝܗܳܐܺܝܬ ܡܶܢ ܚܰܝ̈ܘܳܬ ܫܶܢܳܐ ܡܶܬܢܛܰܪ ܗ̱ܘܳܐ ܕܠܳܐ ܣܽܘܓܦܳܢ܆ ܥܕܰܡܐ ܕܐ̱ܢܳܫܺܝ̈ܢ ܡܶܢ ܗܳܢܽܘܢ ܕܰܒܕܰܐܝܟ ܗܳܠܶܝܢ ܐܺܝܬ ܠܗܽܘܢ ܥܝܳܕܳܐ ܠܡܶܥܡܰܠ ܪܶܚܡܰܬ ܐܰܠܳܗܳܐܺܝܬ ܘܡܶܢ ܐܰܚ̈ܶܐ ܢܰܟ̈ܦܶܐ. ܟܰܪܟܽܘܗ̱ܝ ܠܗܳܢܳܐ ܘܥܰܦܝܽܘܗ̱ܝ ܘܠܰܩܒܽܘܪܬܳܐ ܐܰܫܠܡܽܘܗ̱ܝ.
ܣܰܪܓܺܝܤ ܕܶܝܢ ܡܶܟܺܝܠ܆ ܡܶܬܬܰܝܬܶܐ ܗ̱ܘܳܐ ܠܘܳܬ ܬܰܟ̈ܬܽܘܫܶܐ ܕܝܰܬܺܝܪ ܡܥܰܠܶܝܢ܆ ܟܰܕ ܒܰܟܽܘܤ ܒܠܶܠܝܳܐ ܐܶܬܚܙܺܝ ܠܶܗ܆ ܘܰܠܘܳܬ ܡܛܰܠ̈ܠܶܐ ܛܽܘܒ̈ܬܳܢܳܝܳܬܳܐ ܩܳܪܶܐ ܗ̱ܘܳܐ ܠܶܗ܆ ܘܰܠܒܺܝܒܽܘܬܳܐ ܕܠܳܐ ܡܶܬܡܰܠܠܳܐ ܘܚܰܕܽܘܬܳܐ ܥܒܰܕ ܗ̱ܘܳܐ ܒܶܗ܆ ܕܰܝܳܢܳܐ ܓܶܝܪ ܗܰܘ ܩܰܫܝܳܐ܆ ܘܣܰܓܺܝ ܚܰܪܡܳܐ܆ ܙܢܳܐ ܡܰܪܺܝܪܳܐ ܕܬܰܫܢܺܝܩܳܐ ܘܰܕܠܳܐ ܦܫܺܝܩ ܕܢܶܣܬܰܝܒܰܪ ܐܶܬܦܰܪܰܤ ܠܶܗ܆ ܟܰܕ ܓܶܝܪ ܡܣܳܢ̈ܶܐ ܕܰܒܣܶܟ̈ܶܐ ܚܰܪ̈ܺܝܦܳܬܳܐ ܡܣܰܟܟܺܝܢ ܬܰܩܶܢ܆ ܕܰܒܗܳܠܶܝܢ ܢܶܬܪ̈ܰܡܝܳܢ ܪ̈ܶܓܠܰܘܗ̱ܝ ܦܳܩܶܕ ܗ̱ܘܳܐ܆ ܘܰܕܢܶܪܗܰܛ ܩܕܳܡ ܡܰܪܟܰܒܬܳܐ ܕܺܝܠܶܗ܆ ܟܰܕ ܡܶܢ ܚܶܣܢܳܐ ܚܰܕ ܠܘܳܬ ܚܰܕ ܚܶܣܢܳܐ ܐ̱ܚܪܺܢܳܐ ܕܰܫܒܳܒܳܝ ܗ̱ܘܳܐ ܠܶܗ ܛܳܪܶܕ ܗ̱ܘܳܐ ܕܪܰܚܺܝܩ ܗ̱ܘܳܐ ܡܺܝ̈ܠܶܐ ܬܶܫܥܳܐ܆ ܘܰܠܗܳܕܶܐ ܚܘܺܝܚܳܐܺܝܬ ܣܳܥܰܪ ܗ̱ܘܳܐ ܐܰܝܟ ܡܰܪ̈ܬܝܳܢܘܳܬܶܗ ܕܰܫܠܺܝܚܳܐ ܟܰܕ ܐܶܡܰܪ: ܕܶܐ݀ܣܰܐܢ ܘܶܐܚܙܽܘܩ ܠܪ̈ܶܓܠܰܝ ܒܛܽܘܝܳܒܶܗ ܕܶܐܘܰܢܓܶܠܺܝܽܘܢ ܕܰܫܠܳܡܳܐ[8]. ܪܰܒܳܐ ܗ̄ܝ ܠܺܝ ܗܳܕܶܐ܆ ܕܶܐܕܰܡܶܐ ܒܪ̈ܶܓܠܰܘܗ̱ܝ ܕܰܡܫܺܝܚܳܐ ܦܳܪܽܘܩܰܢ ܗܳܠܶܝܢ ܕܶܐܣܬܰܟܰܟ̈ܶܝܢ ܡܶܛܽܠܳܬܝ. ܥܕܰܟܺܝܠ ܡܶܬܬܰܢܰܚ ܐ̱ܢܳܐ ܡܶܛܽܠ ܚܰܣܺܝܪܽܘܬܳܐ ܕܰܡܕܰܡܝܳܢܽܘܬܳܐ ܕܨܶܨ̈ܶܐ. ܥܰܠ ܕܠܰܘ ܐܳܦ ܒܺܐܝ̈ܕܰܝ ܐܰܝܟ ܗܰܘ ܡܣܰܟܰܟ ܐ̱ܢܳܐ. ܟܰܕ ܒܗܳܠܶܝܢ ܡ̈ܶܠܶܐ ܕܫܰܦܺܝܪܽܘܬ ܕܶܚܠܬܳܐ ܫܰܪܰܪ ܗܽܘ ܠܶܗ. ܘܰܐܝܟ ܕܥܰܠ ܚܽܘܛܪܳܐ ܡܗܰܝܡܢܳܐܺܝܬ ܘܰܡܫܰܪܪܳܐܺܝܬ ܐܶܣܬܡܶܟ܆ ܠܽܐܘܪܚܳܐ ܕܗܳܟܰܢܳܐ ܐܺܝܬܶܝܗ̇ ܥܡܺܝܠܬܳܐ ܪܕܳܐ ܘܫܰܡܠܺܝ ܗܽܘ ܣܳܗܕܳܐ܆ ܘܰܒܠܶܠܝܳܐ ܦܰܣ̈ܶܐ ܕܪ̈ܶܓܠܰܘܗ̱ܝ ܗܳܠܶܝܢ ܕܗܳܟܰܢܳܐ ܐܶܬܡܚܺܝ̈ܶܢ ܒܕܽܘܒ̈ܨܶܐ ܗܳܠܶܝܢ ܣܒܺܝ̈ܣܶܐ ܘܡܰܟܶܐܒܳܢ̈ܶܐ܆ ܘܰܕܝܰܬܺܝܪ ܩܰܛܺܝܢܺܝܢ ܗ̱ܘܰܘ ܘܚܰܪܺܝܦܺܝܢ ܕܨܶܨ̈ܶܐ܆ ܡܶܢ ܛܰܝܒܽܘܬܳܐ ܐܰܠܳܗܳܝܬܳܐ ܡܶܬܚܰܠ̈ܡܳܢ ܗ̱ܘܰܝ̈.
ܐܶܠܳܐ ܗܺܓܡܽܘܢܳܐ ܗܰܘ ܕܠܳܐ ܪ̈ܰܚܡܶܐ ܘܝܰܬܺܝܪ ܠܳܐ ܚܰܝܽܘܣܬܳܢܳܐ. ܝܰܬܺܝܪ ܡܶܢ ܟܽܠ ܚܰܝܘܰܬ ܫܶܢܳܐ܆ ܟܰܕ ܙܳܕܶܩ ܗ̱ܘܳܐ ܠܶܗ ܕܢܶܫܬܰܚܠܰܦ ܒܬܶܕܡܽܘܪܬܳܐ ܥܰܠ ܫܳܢܝܽܘܬܶܗ ܐܰܘܣܶܦ. ܘܕܰܒܗܽܘܢ ܟܰܕ ܒܗܽܘܢ ܒܰܡܣܳܢ̈ܶܐ ܒܶܗ ܟܰܕ ܒܶܗ ܒܰܙܢܳܐ܆ ܗܺܝ ܟܰܕ ܗܺܝ ܡܫܽܘܚܬܳܐ ܫܘܺܝܬܳܐ ܕܽܐܘܪܚܳܐ ܦܳܩܶܕ ܗ̱ܘܳܐ ܕܢܶܪܗܰܛ ܚܳܙܽܘܩܳܐ ܗܰܘ ܛܳܒܳܐ ܘܰܚܘܺܝܚܳܐ. ܘܗܽܘ ܡܰܢ ܐܳܡܰܪ ܗܽܘ ܕܶܝܢ ܟܰܕ ܘܠܳܐ ܒܡܶܕܶܡ ܐܶܬܬܰܗܺܝ ܥܢܳܐ ܘܰܫܡܰܥ ܟܰܕ ܐܳܡܰܪ: ܐܶܪܗܰܛ ܐܳܦ ܗܳܫܳܐ ܬܽܘܒ܆ ܐܰܝܟܰܢܳܐ ܕܰܩܕܳܡ ܒܺܐܡܰܐ ܕܰܡܫܺܝܚܳܐ܆ ܠܰܘ ܥܰܘܳܠܽܘܬܳܐ ܐܰܝܟ ܡܶܠܬܶܗ ܕܰܡܙܰܡܪܳܢܳܐ. ܐܶܠܳܐ ܙܰܕܺܝܩܽܘܬܳܐ ܕܥܶܩܒܳܐ ܕܺܝܠܝ ܬܟܰܪܟܰܢܝ[9]. ܡܡܰܐܶܢ ܗ̱ܘܺܝܬ ܓܶܝܪ ܐܶܠܽܘ ܟܺܝܬ ܥܰܠ ܐܰܪܥܳܐ ܣܳܒܰܪ ܗ̱ܘܺܝܬ ܕܰܡܗܰܠܶܟ ܗ̱ܘܺܝܬ܆ ܘܠܰܘ ܒܽܐܘܪܚܳܐ ܗܳܝ ܕܰܠܘܳܬ ܫܡܰܝܳܐ ܡܰܘܒܠܳܐ.
ܘܟܰܕ ܗܳܟܰܢܳܐ ܫܰܠܶܡ ܪܶܗܛܶܗ ܐܰܝܟ ܦܰܘܠܽܘܤ ܘܗܰܝܡܳܢܽܘܬܶܗ ܢܛܰܪ܆ ܡܶܬܦܣܶܩ ܪܺܝܫܶܗ. ܘܗܳܢܳܐ ܫܽܘܠܳܡܳܐ ܕܰܐܓܽܘ̈ܢܶܐ ܗܘ̣ܳܐ ܠܶܗ܆ ܟܰܕ ܠܰܪܨܳܦܳܐ ܕܽܘܟܬܳܐ ܗܳܝ ܕܗܳܟܰܢܳܐ ܡܶܬܩܰܪܝܳܐ ܒܠܶܫܳܢܶܗ ܕܰܐܬܪܳܐ܆ ܠܕܰܚܺܝܚܳܐ ܡܝܰܩܪܳܐ ܕܦܰܓܪܶܗ ܐܰܓܥܶܠ. ܗܰܘ ܣܳܥܽܘܪܳܐ ܕܪܶܒܽܘ ܬܶܕܡܪ̈ܳܬܳܐ ܘܳܐܣ̈ܺܝܘܳܬܳܐ܆ ܟܰܕ ܠܟܽܠܳܗ̇ ܐܽܘܪܚܳܐ ܗܳܝ ܕܰܠܬܰܡܳܢ ܡܰܝܬܝܳܐ܆ ܒܰܕܡܳܐ ܗܰܘ ܕܰܪܕܳܐ ܡܶܢ ܥܶܩܒܰܘ̈ܗ̱ܝ ܩܰܕܫܳܗ̇܆ ܘܣܰܡܺܝ ܒܗܶܝܢ ܒܛܽܘ̈ܦܶܐ ܠܥܰܝܢܳܐ ܗܳܝ ܠܳܐ ܡܶܬܟܰܚܕܳܢܺܝܬܳܐ ܕܬܰܢܺܝܢܳܐ ܗܰܘ ܕܢܳܛܰܪ ܠܥܶܩܒܳܐ ܕܺܝܠܰܢ[10]܆ ܘܕܺܝܠܶܗ ܡܶܬܢܛܰܪ ܪܺܝܫܶܗ. ܚܢܰܢ ܡܰܢ ܓܶܝܪ܆ ܟܰܕ ܚܽܘܫܳܒ̈ܶܐ ܚܰܫܳܢܳܝ̈ܶܐ ܡܶܙܕܰܪܥܺܝܢ ܒܠܶܒܰܘ̈ܳܬܳܐ ܕܺܝܠܰܢ ܡܶܢܶܗ܆ ܠܫܽܘܪ̈ܳܝܶܐ ܒܰܕܡܽܘܬ ܪܺܝܫܳܐ ܙܳܕܶܩ ܠܰܢ ܠܡܶܛܰܪ. ܗܽܘ ܕܶܝܢ܆ ܠܥܶܩ̈ܒܳܬܳܐ ܐܰܘܟܺܝܬ ܗܰܠ̈ܟܳܬܳܐ ܕܡܰܚ̈ܫܒܳܬܳܐ ܕܺܝܠܰܢ ܕܠܳܐ ܝܺܕܺܝ̈ܥܳܬܳܐ ܐܺܝܬܰܝܗܶܝܢ ܠܶܗ ܢܳܛܰܪ܆ ܒܝܰܕ ܡ̈ܶܠܶܐ ܗܳܠܶܝܢ ܕܡܶܢ ܠܒܰܪ ܐܰܘ ܣܳܥܽܘܪ̈ܘܳܬܳܐ. ܐܰܝܟܰܢܳܐ ܕܗܳܟܰܢܳܐ ܒܝܰܕ ܪܶܚܡܰܬ ܗܰܢܺܝܽܐܘܬܳܐ ܠܘܳܬ ܓܽܘܡܳܨܳܐ ܕܰܚܛܺܝܬܳܐ ܢܶܕܚܶܐ ܠܰܢ ܘܢܰܘܒܶܕ ܡܰܪܺܝܪܳܐܺܝܬ. ܡܶܛܽܠ ܗܳܕܶܐ ܟܽܠܗܽܘܢ ܒܰܪܒܪ̈ܳܝܶܐ ܗܳܢܽܘܢ ܕܬܰܡܳܢ܆ ܟܰܕ ܡܶܢ ܥܰܒܕܽܘܬܳܐ ܕܗܰܘ ܥܳܪܩܺܝܢ ܡܫܰܠܛܳܐܺܝܬ ܘܰܕܠܳܐ ܕܶܚܠܬܳܐ܆ ܘܟܰܕ ܠܳܐ ܡܶܕܶܡ ܡܶܣܬܰܓܦܺܝܢ ܡܶܢ ܢܛܽܘܪܬܳܐ ܕܥܶܩܒܳܐ܆ ܠܘܳܬ ܒܰܝܬܳܐ ܕܒܶܝܬ ܨܠܽܘܬܳܐ ܕܺܝܠܶܗ ܗܰܘ ܣܓܺܝܕܳܐ ܘܰܡܝܰܩܪܳܐ ܐܳܙܺܠ̱ܝܢ. ܟܰܕ ܡܩܰܒܠܺܝܢ ܥܠܰܝܗܽܘܢ ܠܢܺܝܪܳܐ ܕܺܝܕܰܥܬܳܐ ܕܰܐܠܗܳܐ ܗܳܝ ܕܒܰܡܫܺܝܚܳܐ.
ܚܳܙܶܝܢ ܐܢ̱ܬܽܘܢ ܕܕܰܐܝܟ ܐܰܝܠܶܝܢ ܐܺܝܬܰܝܗܶܝܢ ܡܶܐܟ̈ܠܳܬܳܗ̇ ܕܫܳܪܽܘܬܳܐ܆ ܗܳܝ ܕܒܳܗ̇ ܠܒܰܟܬܽܘܢ ܠܰܢ܆ ܟܰܕ ܒܚܽܘܒܳܐ ܥܰܬܺܝܪܺܝܢ ܐܢ̱ܬܽܘܢ܆ ܡܳܕܶܝܢ ܡܫܰܡܠܰܝܬܳܐ ܠܗܳܕܶܐ ܚܰܘܰܘ܆ ܘܫܰܟܶܢܘ ܠܺܝ ܨ̈ܠܰܘܳܬܳܐ ܕܺܝܠܟܽܘܢ܆ ܟܰܕ ܫܳܐܠܺܝܢ ܐܢ̱ܬܽܘܢ ܡܶܢ ܡܫܺܝܚܳܐ ܐܰܠܳܗܳܐ ܗܰܘ ܕܥܰܠ ܟܽܠ܆ ܕܦܽܘܢܳܝܳܐ ܛܳܒܳܐ ܘܰܕܠܶܗ ܪܚܺܝܡ ܢܫܰܟܶܢ ܠܺܝ܆ ܗܰܘ ܕܰܠܘܳܬ ܡܕܺܝܢ̱ܬܳܐ ܗܳܝ ܕܰܐܢܛܺܝܰܟܽܘܤ. ܠܗܰܘ ܕܦܰܐܝܳܐ ܬܶܫܒܽܘܚܬܳܐ ܘܽܐܘܚܕܳܢܳܐ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܚܰܡܫܺܝܢ ܘܫܰܒܥܳܐ.