ܡܺܐܡܪܳܐ ܕܚܰܡܫܺܝܢ ܘܫܬܐ
ܥܰܠ ܡܶܐܬܺܝܬܶܗ ܕܰܠܩܶܢܫܪܶܝܢ܆ ܘܥܰܠ ܐܽܘܪܳܥܗܽܘܢ ܕܥܳܡܽܘܪ̈ܶܐ ܡܗܰܝܡ̈ܢܶܐ ܕܰܡܕܺܝܢ̱ܬܳܐ ܐܶܬܶܐܡܰܪ ܕܶܝܢ ܗܘ ܫܽܘܪܳܝܶܗ ܒܰܠܚܽܘܕ܆ ܟܰܕ ܡܶܛܽܠ ܫܶܐܠܬܐ ܡܶܕܶܡ ܕܣܽܘܥܪܳܢܳܐ ܡܕܺܝܢܳܝܳܐ ܘܰܓܥܳܬܳܐ ܐܶܬܦܣܶܩ ܗܽܘ ܡܺܐܡܪܳܐ ܘܡܶܚܕܳܐ ܠܚܰܪܬܳܐ ܐܶܬܶܐܡܰܪ.
56: ܐܶܡܰܬܝ ܕܡܽܘܫܶܐ ܗܰܘ ܪܰܒܳܐ ܣܠܶܩ ܠܛܽܘܪܳܐ ܕܣܺܝܢܰܝ ܘܰܠܓܰܘ ܡܶܢ ܥܢܳܢܳܐ ܥ̣ܰܠ ܘܰܐܪܒܥܺܝܢ ܝܰܘ̈ܡܳܬܳܐ ܕܠܳܐ ܡܶܐܟܽܘܠܬܳܐ ܫܰܡܠܺܝ܆ ܘܥܰܡ ܣܳܐܶܡ ܢܳܡܽܘܣܳܐ ܗܘ̣ܳܐ. ܐܶܬܶܐܪܶܙܘ̱ ܐ̱ܪ̈ܳܙܶܐ ܗܳܠܶܝܢ ܕܢܳܡܽܘܣܳܐ. ܗܳܝܕܶܝܢ ܢܚܶܬ ܟܰܕ ܡܰܝܬܶܐ ܒܺܐܝܕܰܘ̈ܗ̱ܝ ܠܠܽܘܚ̈ܶܐ ܗܳܠܶܝܢ ܛܽܘܒ̈ܬܳܢܳܝܳܬܳܐ ܕܰܒܨܶܒܥܳܐ ܕܰܐܠܳܗܳܐ ܟܬܺܝ̈ܒܳܢ ܗ̱ܘܰܝ̈[1]. ܨܶܒܥܳܐ ܕܶܝܢ ܕܰܐܠܳܗܳܐ ܗܰܘ ܠܳܐ ܦܰܓܪܳܢܳܐ ܐܺܝܬܶܝܗ̇ ܪܽܘܚܳܐ ܩܰܕܺܝܫܳܐ. ܟܽܠ ܡܳܐ ܓܶܝܪ ܕܟܳܬܶܒ ܐܰܠܳܗܳܐ܆ ܒܪܽܘܚܳܐ ܡܶܬܟܬܶܒ܆ ܡܶܛܽܠܗܳܕܶܐ ܐܳܦ ܟܽܠ ܟܬܳܒܳܐ ܐܰܠܳܗܳܝܳܐ ܢܦܺܝܚ ܡܶܢ ܐܰܠܳܗܳܐ ܐܰܡܺܝܪ. ܘܟܰܕ ܦܪ̈ܺܝܫܶܐ ܕܶܝܢ ܐܳܡܪܺܝܢ ܗ̱ܘܰܘ ܥܰܠ ܦܳܪܽܘܩܰܢ ܡܫܺܝܚܳܐ ܕܒܰܒܥܶܠܙܒܽܘܒ ܡܰܦܶܩ ܗ̱ܘܳܐ ܕܰܝ̈ܘܶܐ. ܡܰܬܰܝ ܕܶܝܢ ܐܳܡܰܪ. ܕܦܰܢܺܝ ܦܶܬܓܳܡܳܐ ܘܶܐܡܰܪ ܠܘܳܬܗܽܘܢ܆ ܐܶܢ ܕܶܝܢ ܐܶܢܳܐ ܒܪܽܘܚܳܐ ܕܰܐܠܳܗܳܐ ܡܰܦܶܩ ܐ̱ܢܳܐ ܕܰܝ̈ܘܶܐ܆ ܐܰܪܰܐ ܡܳܕܶܝܢ ܩܶܪܒܰܬ ܠܳܗ̇ ܥܠܰܝܟܽܘܢ ܡܰܠܟܽܘܬܳܐ ܕܰܐܠܳܗܳܐ[2]܆ ܠܽܘܩܳܐ ܕܶܝܢ ܟܰܕ ܗܺܝ ܗܳܕܶܐ ܟܳܬܶܒ ܗ̱ܘܳܐ ܐܶܡܰܪ ܕܰܠܘܳܬܗܽܘܢ ܕܰܡܓܰܕܦܳܢ̈ܶܐ. ܐܶܡܰܪ ܡܳܪܰܢ: ܕܶܐܢ ܕܶܝܢ ܕܶܐܢܳܐ ܒܨܶܒܥܳܐ ܕܰܐܠܳܗܳܐ ܡܰܦܶܩ ܐ̱ܢܳܐ ܕܰܝ̈ܘܶܐ. ܐܰܪܰܐ ܡܳܕܶܝܢ ܩܶܪܒܰܬ ܠܳܗ̇ ܥܠܰܝܟܽܘܢ ܡܰܠܟܽܘܬܶܗ ܕܰܐܠܳܗܳܐ[3]܆ ܐܳܦ ܠܳܚܽܘ̈ܫܶܐ ܕܶܝܢ ܘܚܰܪ̈ܳܫܶܐ ܗܳܢܽܘܢ ܕܦܶܪܥܽܘܢ ܐܰܝܟܰܢܐ ܕܰܟܬܺܝܒ܆ ܟܰܕ ܠܥܳܒܽܘܕܽܘܬ ܬܶܕܡܪ̈ܳܬܳܐ ܗܳܠܶܝܢ ܕܰܒܝܰܕ ܡܽܘܫܶܐ ܡܶܫ̈ܬܰܡܠܝܳܢ ܗ̱ܘܰܝ̈ ܐܰܫܶܦܘ ܘܶܐܙܕܟܺܝܘ܆ ܘܰܒܚܰܝܠܳܐ ܠܳܐ ܡܶܬܩܰܪܒܳܢܳܐ ܕܪܽܘܚܳܐ ܬܗܰܪܘ ܗ̱ܘܰܘ܆ ܗܰܘ ܕܡܰܥܒܶܕ ܗ̱ܘܳܐ ܠܗܶܝܢ ܠܬܶܕܡܪ̈ܳܬܳܐ܆ ܕܨܶܒܥܳܐ ܕܰܐܠܳܗܳܐ ܐܺܝܬܶܝܗ̇ ܗܳܕܶܐ ܐܰܙܥܶܩܘ[4]. ܠܗܳܝ ܟܺܝܬ ܕܡܽܘܫܶܐ ܡܰܢ ܐܰܝܟ ܥܰܒܕܳܐ ܘܰܡܢܺܝܚܳܢܳܐ܆ ܒܛܰܝܒܽܘܬܳܐ ܐܺܝܬ ܗ̱ܘܳܐ ܠܶܗ ܕܡܰܥܒܕܳܐ ܒܺܐܝܕܰܘ̈ܗ̱ܝ ܠܗܳܠܶܝܢ ܐܳܬܘ̈ܳܬܳܐ. ܡܫܺܝܚܳܐ ܕܶܝܢ ܐܰܝܟ ܒܪܳܐ܆ ܟܰܕ ܕܺܝܠܳܢܳܝܳܐ ܕܺܝܠܶܗ ܐܺܝܬܰܘܗ̱ܝ ܠܶܗ܆ ܘܰܕܒܰܟܝܳܢܳܐ ܐܺܝܬܰܘܗ̱ܝ ܒܶܗ ܘܰܫܘܶܐ ܒܽܐܘܣܺܝܰܐ܆ ܡܶܛܽܠܗܳܕܶܐ ܐܳܦ ܒܬܰܠ̈ܡܺܝܕܶܐ ܢܦܰܚ ܗ̱ܘܳܐ ܠܶܗ ܟܰܕ ܐܳܡܰܪ ܣܰܒܘ ܪܽܘܚܳܐ ܩܰܕܺܝܫܳܐ[5]. ܗܽܘ ܓܶܝܪ ܐܺܝܬܰܘܗ̱ܝ ܗܰܘ ܕܳܐܦ ܒܫܽܘܪܳܝܳܐ ܥܰܦܪܳܐ ܡܶܢ ܐܰܪܥܳܐ ܓܰܒܠܶܗ ܠܒܰܪ ܐ̱ܢܳܫܳܐ. ܘܰܢܦܰܚ ܒܦܰܪܨܽܘܦܳܐ ܕܺܝܠܶܗ ܢܫܰܡܬܳܐ ܕܚܰܝ̈ܶܐ ܡܶܛܽܠ ܕܳܐܦ ܠܟܽܠܗܶܝܢ ܗܳܠܶܝܢ ܕܰܗܘ̈ܰܝ܆ ܒܝܰܕ ܡܶܠܬܳܐ ܘܰܒܪܳܐ ܥܒܰܕ ܐܶܢܶܝܢ ܐܰܒܳܐ܆ ܘܰܒܝܰܕ ܪܽܘܚܳܐ ܗܰܘ ܕܳܐܦ ܡܶܬܬܰܝܬܶܐ ܗ̱ܘܳܐ ܘܰܡܪܰܚܶܦ ܠܥܶܠ ܡܶܢ ܡܰܝ̈ܳܐ܆ ܟܰܕ ܡܰܚܶܐ ܗ̱ܘܳܐ܆ ܘܩܽܘܝܳܡܳܐ ܗܽܘ ܒܶܗ ܝܳܗܶܒ ܗ̱ܘܳܐ ܠܟܽܠ. ܐܳܦ ܚܢܰܢ ܓܶܝܪ ܒܶܗ ܚܰܝ̣ܺܝ̣ܢ ܚ̱ܢܰܢ ܘܡܶܬܬܙܺܝܥܺܝܢ ܚ̱ܢܰܢ ܐܳܦ ܐܺܝܬܰܝܢ. ܐܺܝܬܰܘܗ̱ܝ ܓܶܝܪ ܐܳܚܽܘܕܳܐ ܕܩܽܘܝܳܡܳܐ ܕܗܳܠܶܝܢ ܕܺܐܝܬܰܝܗܶܝܢ.
ܟܰܕ ܗܳܟܺܝܠ ܠܽܘܚ̈ܶܐ ܕܰܒܗܳܢܳܐ ܪܽܘܚܳܐ ܟܬܺܝ̈ܒܳܢ ܗ̱ܘܰܝ̈ ܛܥܺܝܢ ܗ̱ܘܳܐ ܡܽܘܫܶܐ܆ ܡܶܛܽܠ ܟܺܝܬ ܕܰܚܙܳܝܗ̱ܝ ܠܥܰܡܳܐ ܕܰܫܢ̣ܳܐ ܘܨܰܥܰܪ ܘܰܚܛܳܐ܆ ܘܚܰܠܶܦܘ ܥܒܰܕܘ ܠܗܽܘܢ ܚܠܳܦ ܬܶܫܒܽܘܚܬܳܐ ܕܰܐܠܳܗܳܐ܆ ܕܽܘܡܝܳܐ ܕܬܰܘܪܳܐ ܕܳܐܟܶܠ ܥܶܣܒܳܐ. ܫܰܦܺܝܪ ܓܶܝܪ ܒܝܰܕ ܗܳܠܶܝܢ ܒܰܙܰܚ ܟܬܳܒܳܐ ܠܛܳܥܝܽܘܬܳܐ ܕܺܝܠܗܽܘܢ܆ ܟܰܕ ܫܕܳܐ ܐܶܢܶܝܢ ܠܠܽܘܚ̈ܶܐ ܗܳܠܶܝܢ ܟܬܺܝ̈ܒܳܬ ܡܶܢ ܐܰܠܳܗܳܐ ܬܰܒܰܪ ܐܶܢܽܘܢ. ܠܗܳܢܽܘܢ ܓܶܝܪ ܕܥܺܝܪܺܝܢ ܣܳܐܶܡ ܢܳܡܽܘܣܳܐ ܐܰܠܳܗܳܐ ܠܰܘ ܠܗܳܢܽܘܢ ܕܰܪܘܶܝܢ܆ ܒܪܰܡ ܕܶܝܢ ܟܰܕ ܐܶܬܬܘܺܝܘ ܥܰܠ ܗܳܠܶܝܢ ܕܰܚܛܰܘ. ܬܽܘܒ ܒܠܽܘܚ̈ܶܐ ܐ̱ܚܪ̈ܳܢܝܳܬܳܐ܆ ܠܶܗ ܟܰܕ ܠܶܗ ܠܢܳܡܽܘܣܳܐ ܟܳܬܶܒ ܗ̱ܘܳܐ. ܐܶܠܳܐ ܩܰܕܡܳܐܺܝܬ ܡܰܢ ܫܳܡܰܥ ܗ̱ܘܳܐ ܡܽܘܫܶܐ. ܣܰܩ ܠܘܳܬܝ ܠܛܽܘܪܳܐ܆ ܘܶܐ݀ܬܶܠ ܠܳܟ ܠܽܘܚ̈ܶܐ ܗܳܠܶܝܢ ܕܟܺܐܦܳܐ܆ ܢܳܡܽܘܣܳܐ ܘܦܽܘܩ̈ܕܳܢܶܐ ܗܳܠܶܝܢ ܕܟܶܬܒܶܬ܆ ܕܰܬܣܺܝܡ ܠܗܽܘܢ ܢܳܡܽܘܣܳܐ.
ܡܶܢ ܒܳܬܰܪ ܕܶܝܢ ܚܛܺܝܬܳܐ܆ ܠܰܘ ܗܳܟܰܢܳܐ. ܐܶܠܳܐ ܦܣܽܘܠ ܠܳܟ ܬܰܪܬܶܝܢ ܠܽܘܚ̈ܶܐ ܕܟܺܐܦܳܐ܆ ܒܰܕܡܽܘܬ ܗܳܠܶܝܢ ܩܰܕܡܳܝ̈ܳܬܳܐ. ܘܣܰܩ ܠܘܳܬܝ ܠܛܽܘܪܳܐ ܘܶܐ݀ܟܬܽܘܒ ܥܰܠ ܠܽܘܚ̈ܶܐ܆ ܡ̈ܶܠܶܐ ܗܳܠܶܝܢ ܕܺܐܝܬ ܗ̱ܘܳܐ ܥܰܠ ܠܽܘܚ̈ܶܐ ܩܰܕܡܳܝ̈ܳܬܳܐ ܗܳܠܶܝܢ ܕܰܬܒܰܪܬ[6]. ܟܰܕ ܗܳܕܶܐ ܡܰܘܕܥܳܐ ܗ̱ܘܳܬ ܡܶܠܬܳܐ ܒܝܰܕ ܛܽܘܦܣܳܐ܆ ܕܟܰܕ ܒܫܽܘܪܳܝܳܐ ܓܰܒܠܶܗ ܐܰܠܳܗܳܐ ܠܒܰܪܢܳܫܳܐ܆ ܘܡܶܢ ܒܳܬܰܪܟܶܢ ܒܝܰܕ ܣܚܳܬܳܐ ܕܝܰܠܕܳܐ ܕܡܶܢ ܕܪܺܝܫ ܬܽܘܒ ܕܪܺܝܫ ܗܦܰܟ ܓܰܒܠܶܗ. ܥܰܠ ܠܽܘܚ̈ܶܐ ܕܠܶܒܶܗ ܕܺܐܝܬܰܝܗܶܝܢ ܗ̱ܘܰܝ̈ ܕܰܟ̈ܝܳܬܳܐ. ܗܳܠܶܝܢ ܕܰܒܪܳܐ ܟܺܝܬ ܘܰܗܦܰܟ ܚܰܕܶܬ ܐܶܢܶܝܢ ܡܶܢ ܕܪܺܝܫ ܠܢܳܡܽܘܣ̈ܶܐ ܒܰܝ̈ܬܳܝܶܐ ܕܺܝܠܶܗ ܟܬܰܒ. ܡܶܢ ܩܕܺܝܡ ܡܰܢ ܠܗܰܘ ܕܰܟܝܳܢܳܐ܆ ܠܚܰܪܬܳܐ ܕܶܝܢ ܠܗܰܘ ܐܶܘܰܢܓܶܠܳܝܳܐ ܘܰܕܪܽܘܚܳܐ. ܠܗܳܠܶܝܢ ܟܺܝܬ ܠܽܘܚ̈ܶܐ ܕܠܶܒܳܐ܆ ܐܶܢ ܐ̱ܢܳܫ ܒܝܰܕ ܚܛܺܝܬܳܐ ܢܬܰܒܰܪ. ܠܰܘ ܐ̱ܚܪܳܢܝܳܐܺܝܬ ܡܶܫܬܘܶܐ ܠܶܗ ܟܰܕ ܠܶܗ ܠܰܟܬܳܒܳܐ ܕܰܒܨܶܒܥܳܐ ܕܰܐܠܳܗܳܐ ܡܶܬܟܬܶܒ܆ ܐܶܠܳܐ ܐܶܢ ܟܰܕ ܗܽܘ ܩܢܽܘܡܶܗ ܠܗܳܠܶܝܢ ܢܶܦܣܽܘܠ ܗܽܘ ܠܶܗ ܒܝܰܕ ܬܝܳܒܽܘܬܳܐ. ܟܰܕ ܓܳܪܶܕ ܡܶܢܶܗ ܠܣܰܢܝܽܘܬܳܐ ܕܰܚܛܺܝܬܳܐ ܒܣܳܥܽܘܪ̈ܘܳܬܳܐ ܕܰܟ̈ܝܳܬܳܐ.
ܐܶܢ ܗܳܟܺܝܠ ܗܰܘ ܡܰܠܟܳܐ ܕܟܽܠ ܘܡܳܪܳܐ. ܠܳܐ ܐܶܫܬܶܐܠ ܐܰܘ ܐܰܣܠܺܝ܆ ܐܶܠܳܐ ܐܰܫܘܺܝ ܕܰܠܢܳܡܽܘܣܳܐ ܕܺܝܠܶܗ ܢܶܬܶܠ ܙܒܰܢ̱ܬܳܐ ܕܬܰܪܬܶܝܢ ܡܶܢ ܕܪܺܝܫ ܠܥܰܡܳܐ ܕܰܐܪܓܙܶܗ. ܐܰܝܢܳܐ ܡܰܦܰܩ ܒܪܽܘܚܳܐ ܢܶܗܘܶܐ ܠܰܢ܆ ܠܰܢ ܗܳܢܽܘܢ ܕܥܰܦܪܳܐ ܘܩܶܛܡܳܐ ܐܺܝܬܰܝܢ ܐܰܝܟ ܕܰܟܬܺܝܒ[7]܆ ܟܰܕ ܠܟܽܘܢ ܥܶܪ̈ܒܶܐ ܚܰܒܺܝ̈ܒܶܐ ܕܰܡܫܺܝܚܳܐ ܘܕܰܛܢܳܢܳܐ ܐܰܠܳܗܳܝܳܐ ܣܳܝܩܺܝܢ ܐܢ̱ܬܽܘܢ. ܠܳܐ ܢܺܐܡܰܪ ܠܶܗ ܟܰܕ ܠܶܗ ܠܡܺܐܡܪܳܐ܆ ܠܗܰܘ ܕܰܦܣܰܩ ܗ̱ܘܳܐ ܫܓܽܘܫܝܳܐ ܕܐ̱ܢܳܫܺܝ̈ܢ. ܠܰܡܫܰܪܳܝܽܘ ܗܳܟܺܝܠ ܙܳܕܶܩ ܬܽܘܒ ܠܺܝ ܡܰܢ ܒܗܳܠܶܝܢ ܕܡܶܢ ܟܰܕܽܘ ܐܶܬܶܐܡܰܪ̈ܝ̱. ܠܟܽܘܢ ܕܶܝܢ. ܒܶܗ ܟܰܕ ܒܶܗ ܒܫܶܡܥܳܐ. ܠܗܰܘ ܕܠܰܘ ܒܠܽܘܚ̈ܶܐ ܠܳܐ ܦܣܺܝ̈ܠܳܬܳܐ܆ ܐܶܠܳܐ ܒܠܽܘܚ̈ܶܐ ܗܳܠܶܝܢ ܕܰܡܕܰܟ̈ܝܳܢ ܕܠܶܒܳܐ ܕܺܝܠܟܽܘܢ ܫܰܦܺܝܪ ܝܳܕܰܥ ܐ̱ܢܳܐ ܕܣܳܐܶܡ ܐ̱ܢܳܐ.
ܣܰܓܺܝ̈ܳܐܬܳܐ ܐܺܝܬܰܝܗܶܝܢ ܗܳܠܶܝܢ ܕܰܡܙܺܝ̈ܥܳܢ ܠܺܝ ܕܠܳܐ ܐܶܥܒܪܺܝܗ̇ ܒܫܶܬܩܳܐ ܠܰܡܕܺܝܢ̱ܬܳܐ ܕܺܝܠܟܽܘܢ. ܐܶܠܳܐ ܐܶܬܶܠ ܩܳܠܳܐ ܒܚܰܓܳܐ ܗܳܢܳܐ ܡܗܰܝܡܢܳܐ ܘܪܳܚܶܡ ܐܰܠܳܗܳܐ܆ ܗܰܘ ܟܺܝܬ ܕܺܐܝܬܰܘܗ̱ܝ ܥܺܕܬܳܐ ܕܰܐܠܳܗܳܐ ܚܰܝܳܐ܆ ܘܶܐ݀ܚܰܘܶܐ ܒܰܠܚܽܘܕ ܫܰܦܺܝܪܽܘܬ ܨܶܒܝܳܢܳܐ ܕܬܰܪܥܺܝܬܳܐ ܕܢܰܦܫܝ܆ ܘܳܐܦܶܢ ܠܰܘ ܡܶܕܶܡ ܚܰܝܠܬܳܢܳܐ ܐܺܝܬ ܠܺܝ ܕܺܐ݀ܡܰܪ܆ ܐܰܘ ܕܰܐ̱ܚܪܳܢܝܳܐܺܝܬ ܡܰܘܬܪܳܢܳܐ. ܚܕܳܐ ܕܶܝܢ ܝܰܬܺܝܪܳܐܺܝܬ ܛܳܒ ܡܶܢ ܟܽܠܗܶܝܢ ܡܚܰܦܛܳܐ ܠܺܝ ܘܰܡܫܰܠܗܒܳܐ ܘܰܡܥܺܝܪܳܐ. ܘܡܶܬܚܰܪܝܳܐ ܡܰܢ ܬܰܪܥܺܝܬܳܐ ܕܳܐܦ ܤܛܰܪ ܡܶܢ ܠܶܫܳܢܳܐ ܐܽܘܪܓܰܢܽܘܢ ܬܶܩܕܽܘܡ ܘܬܶܪܗܰܛ܆ ܐܶܠܽܘ ܡܰܨܝܳܐ ܗ̱ܘܳܬ. ܠܶܫܳܢܳܐ ܕܶܝܢ ܩܕܳܡ ܬܰܪܥܺܝܬܳܐ܆ ܕܰܐܝܟ ܐܰܝ̇ܕܳܐ ܕܶܝܢ ܐܺܝܬܶܝܗ̇ ܗܳܕܶܐ܆ ܗܳܝ ܕܥܺܕܬܳܐ ܗܳܕܶܐ܆ ܠܰܘ ܒܰܠܚܽܘܕ ܠܳܐ ܙܺܐܦܳܢܳܐܺܝܬ ܗܰܝܡܳܢܽܘܬܳܐ ܬܪܺܝܨܬܳܐ ܡܰܘܕܝܳܐ܆ ܐܶܠܳܐ ܐܳܦ ܡܩܰܒܠܳܐ ܩܺܝܢܕܽܘܢܽܘܤ ܕܬܶܚܰܫ ܚܠܳܦܶܝܗ̇ ܐܶܢ ܢܶܩܪܶܐ ܙܰܒܢܳܐ܆ ܘܒܰܕܡܽܘܬ ܒܰܪܬܳܐ ܫܰܪܺܝܪܬܳܐ ܡܫܰܘܙܒܳܐ ܝܽܘܩܢܳܐ ܐܶܡܗܳܝܳܐ܆ ܕܥܺܕܬܳܐ ܫܠܺܝܚܳܝܬܳܐ ܗܳܝ ܕܒܰܢ̣ܝܳܐ ܒܰܡܕܺܝܢ̱ܬܳܐ ܗܳܝ ܕܰܐܢܛܺܝܽܘܟܽܘܤ. ܐܰܝܟܰܢܳܐ ܗܳܟܺܝܠ ܠܰܘ ܒܟܽܠܶܗ ܦܽܘܡܳܐ ܐܶܫܰܐܶܠ ܫܠܳܡܳܗ̇܆ ܘܰܐܒܳܗܳܐܺܝܬ ܐܶܥܰܦܩܺܝܗ̇. ܐܳܦ ܓܶܝܪ ܐܳܦ ܠܰܐܒܳܗ̈ܶܐ ܪܚܺܝܡܬܳܐ ܐܺܝܬܶܝܗ̇. ܕܰܠܗܳܢܽܘܢ ܡܶܢ ܒܢܰܝ̈ܗܽܘܢ ܒܝܰܬܺܝܪܽܘܬܳܐ ܢܫܰܠܡܽܘܢ ܘܰܢܚܰܒܒܽܘܢ܆ ܠܗܳܢܽܘܢ ܕܝܰܬܺܝܪܳܐܺܝܬ ܡܫܰܘܙܒܺܝܢ ܕܳܡܝܽܘܬܳܐ ܕܗܳܢܽܘܢ ܕܺܝܠܶܕܘ ܐܶܢܽܘܢ. ܘܰܐܝܟ ܕܰܒܨܽܘܪܬܳܐ ܘܫܽܘܦܪܳܐ ܕܓܰܘ̈ܢܶܐ ܕܰܡܺܝܘ ܘܰܩܢ̣ܰܘ ܕܺܝܠܳܝ̈ܳܬܳܐ ܕܰܐܒܳܗܰܝ̈ܗܽܘܢ. ܡܳܢܳܐ ܗܳܟܺܝܠ ܐܺܝܬܶܝܗ̇ ܕܺܝܠܳܝܬܳܐ ܕܥܺܕܬܳܐ ܫܠܺܝܚܳܝܬܳܐ ܗܳܝ ܕܒܰܡܕܺܝܢ̱ܬܳܐ ܕܰܐܢܛܺܝܽܘܟܽܘܤ. ܗܳܝ ܕܰܠܘܳܬ ܥܰܡܰܢܽܘܐܶܝܠ ܥܰܡ ܦܰܛܪܽܘܤ ܬܰܙܥܶܩ܆ ܐܰܢ̱ܬ ܐܺܝܬܰܝܟ ܡܫܺܝܚܳܐ ܒܪܶܗ ܕܰܐܠܳܗܳܐ ܚܰܝܳܐ[8]܆ ܘܚܰܕ ܘܠܶܗ ܟܰܕ ܠܶܗ ܬܰܘܕܶܐ ܠܰܡܫܺܝܚܳܐ ܘܰܒܪܳܐ ܕܰܐܠܳܗܳܐ ܚܰܝܳܐ܆ ܠܶܗ ܟܰܕ ܠܶܗ ܐܰܠܳܗܳܐ. ܘܠܶܗ ܟܰܕ ܠܶܗ ܒܰܪܢܳܫܳܐ ܫܰܪܺܝܪܳܐ܆ ܘܠܰܘ ܐ̱ܚܪܺܢܳܐ ܘܰܐ̱ܚܪܺܢܳܐ ܐܰܝܟ ܗܳܢܽܘܢ ܕܰܒܟܰܠܩܺܝܕܽܘܢܺܝܰܐ ܪܰܫܺܝܥܳܐܺܝܬ ܦܰܠܓܽܘܗ̱ܝ ܠܰܬܪܰܝܳܢܽܘܬܳܐ ܕܰܟܝܳܢ̈ܶܐ܆ ܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܡܰܠܠܳܢܺܝܬܳܐ. ܠܳܐ ܓܶܝܪ ܐܶܡܰܪ܆ ܐܰܢ̱ܬ ܐܺܝܬܰܝܟ ܡܫܺܝܚܳܐ܆ ܗܰܘ ܕܒܳܟ ܐܺܝܬܰܘܗ̱ܝ ܒܪܶܗ ܕܰܐܠܳܗܳܐ ܗܰܘ ܚܰܝܳܐ܆ ܐܰܝܟܰܢܳܐ ܕܰܐ̱ܚܪܺܢܳܐ ܒܰܐ̱ܚܪܺܢܳܐ ܢܶܣܬܰܟܰܠ܆ ܐܰܝܟܰܢܳܐ ܕܗܳܢܽܘܢ ܕܦܳܣܩܺܝܢ ܠܶܗ ܨܳܒܶܝܢ. ܐܶܠܳܐ ܐܰܘܕܺܝ ܕܰܡܫܺܝܚܳܐ ܐܺܝܬܰܝܟ ܘܰܒܪܶܗ ܕܰܐܠܳܗܳܐ ܚܰܝܳܐ܆ ܟܰܕ ܒܗܳܝ ܕܺܐܝܬܰܝܟ܆ ܥܰܠ ܓܰܘܳܢܳܝܳܐ ܘܰܕܒܳܗ̇ ܒܰܕܡܽܘܬܳܐ ܐܶܬܚܰܫܰܚ. ܗܰܘ ܡܰܢ ܓܶܝܪ ܫܡܳܐ ܡܫܺܝܚܳܐ ܠܣܽܘܪܳܩܳܐ ܗܰܘ ܕܡܶܛܽܠܳܬܰܢ ܐܺܝܬܰܘܗ̱ܝ ܕܰܦܐܶܐ ܐܳܦ ܐ̱ܢܳܫܳܝܰܐ ܗ̄ܘ. ܗܳܝܕܶܝܢ ܓܶܝܪ ܐܶܬܩܪܺܝ ܡܫܺܝܚܳܐ. ܐܶܡܰܬܝ ܕܳܐܦ ܤܛܰܪ ܡܶܢ ܫܽܘܚܠܳܦܳܐ ܗܘ̣ܳܐ ܒܰܪܢܳܫܳܐ܆ ܟܰܕ ܠܳܐ ܐܰܪܚܶܩ ܡܶܢܶܗ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܐܰܠܳܗܳܐ܆ ܘܟܰܕ ܠܳܐ ܣܢܺܝܩܳܐ ܐܺܝܬܰܘܗ̱ܝ.
ܠܰܢ ܡܶܬܡܫܰܚ ܗ̱ܘܳܐ ܒܡܶܫܚܳܐ ܗܰܘ ܕܰܪܘܳܙܳܐ. ܐܰܝܟ ܪܺܝܫܺܝܬܳܐ ܕܓܶܢܣܳܐ ܘܳܐܕܳܡ ܬܪܰܝܳܢܳܐ܆ ܘܟܰܕ ܡܫܰܕܰܪ ܠܘܳܬܰܢ ܠܣܳܝܽܘܡܽܘܬ ܒܢܰܝ̈ܳܐ ܘܰܠܛܰܝܒܽܘܬܳܐ ܗܳܝ ܕܰܒܝܰܕ ܪܽܘܚܳܐ܆ ܘܗܳܠܶܝܢ ܕܰܒܝܰܕ ܐܶܫܰܥܝܳܐ ܢܒܺܝܳܐ ܩܰܕܶܡ ܘܶܐܬܬܰܙܥܰܩ ܐܳܡܰܪ: ܒܙܰܒܢܗܶܝܢ ܪܽܘܚܶܗ ܕܡܳܪܝܳܐ ܥܠܰܝ[9]܆ ܡܶܛܽܠ ܗܳܝ ܕܡܰܫܚܰܢܝ ܟܰܕ ܡܫܰܘܕܰܥ ܓܰܠܝܳܐܺܝܬ ܒܝܰܕ ܡ̈ܶܠܶܐ ܗܳܠܶܝܢ ܕܰܠܡܽܘܟܳܟܳܐ ܘܡܶܬܢܰܚܬܳܢܽܘܬܳܐ ܗܳܝ ܕܣܽܘܪܳܩܳܐ܆ ܘܠܶܗ ܟܺܝܬ ܠܰܫܡܳܐ ܘܣܽܘܥܪܳܢܳܐ ܡܫܺܝܚܳܐ. ܡܶܛܽܠܳܬܰܢ ܩܰܒܠܶܗ ܥܠܰܘܗ̱ܝ. ܪܽܘܚܳܐ ܓܶܝܪ ܐܳܡܰܪ ܗܽܘ ܟܺܝܬ ܕܰܟܝܳܢܳܐܺܝܬ ܐܺܝܬܰܘܗ̱ܝ ܒܺܝ܆ ܡܶܛܽܠ ܗܳܝ ܕܗܺܝ ܟܰܕ ܗܺܝ ܕܽܐܘܣܺܝܰܐ ܘܕܰܐܠܳܗܽܘܬܳܐ. ܗܳܢܳܐ ܥܠܰܝ ܐܶܬܳܐ܆ ܘܰܐܝܟ ܗܰܘ ܕܡܶܢ ܠܒܰܪ ܒܫܶܦ̈ܥܰܘܗ̱ܝ ܕܝܽܘܪܕܢܳܢ ܒܰܕܡܽܘܬ ܝܰܘܢܳܐ ܐܶܬܳܐ ܫܪܳܐ. ܠܰܘ ܐܰܝܟ ܡܰܢ ܕܠܳܐ ܐܺܝܬܰܘܗ̱ܝ ܗ̱ܘܳܐ ܒܺܝ܆ ܐܶܠܳܐ ܡܶܛܽܠ ܗܳܝ ܕܡܰܫܚܰܢܝ. ܡܶܛܽܠ ܡܳܢܳܐ ܕܶܝܢ ܕܡܶܬܡܫܰܚ܆ ܨܒܳܐ ܘܩܰܒܶܠ ܥܠܰܘܗ̱ܝ܆ ܐܶܠܳܐ ܐܶܢ ܡܶܛܽܠܳܬܰܢ ܗܶܢܽܘܢ ܕܰܣܦܺܝ̈ܩܶܐ ܗܳܘܶܝܢܰܢ ܡܶܢ ܪܽܘܚܳܐ܆ ܡܶܛܽܠ ܓܙܳܪ ܕܺܝܢܳܐ ܕܰܐܠܳܗܳܐ ܗܰܘ ܥܰܬܺܝܩܳܐ ܕܶܐܡܰܪ. ܕܠܳܐ ܬܶܥܡܰܪ ܪܽܘܚܝ ܒܰܒܢܰܝ̈ܢܳܫܳܐ ܗܳܠܶܝܢ. ܡܶܛܽܠ ܕܒܶܣܪܳܐ ܐܺܝܬܰܝܗܽܘܢ[10].
ܟܽܘܢܳܝܳܐ ܕܶܝܢ ܟܺܝܬ ܗܰܘ ܕܰܒܪܳܐ ܕܰܐܠܳܗܳܐ ܚܰܝܳܐ ܦܐܶܐ ܠܰܐܠܳܗܳܐ ܐܺܝܬܰܘܗ̱ܝ܆ ܘܕܰܠܡܶܠܬܳܐ ܦܐܶܐ ܗܰܘ ܕܶܐܬܺܝܠܶܕ ܩܕܳܡ ܥܳܠ̈ܡܶܐ ܐܰܠܳܗܳܐܺܝܬ ܡܶܢ ܐܰܒܳܐ. ܐܶܠܽܘ ܡܰܢ ܓܶܝܪ ܐܶܡܰܪ. ܐܰܢ̱ܬ ܐܺܝܬܰܝܟ ܒܪܳܐ ܕܰܐܠܳܗܳܐ. ܓܰܘܳܢܳܝܳܐ ܟܒܰܪ ܡܶܣܬܒܰܪ ܗ̱ܘܳܐ ܗܽܘ ܫܡܳܐ. ܘܠܰܘ ܕܺܝܠܳܢܳܝܳܐ ܕܺܝܠܶܗ ܘܰܕܝܰܬܺܝܪ ܠܳܚܶܡ ܠܶܗ. ܐܰܡܺܝܪܳܐ ܗܝ ܓܶܝܪ ܐܳܦ ܥܰܠ ܐܺܝܣܪܳܐܶܝܠ ܐܰܝܟ ܕܡܶܢ ܦܰܪܨܽܘܦܳܐ ܕܰܐܠܳܗܳܐ܆ ܒܶܪܝ ܒܽܘܟܪܝ ܐܺܝܣܪܳܐܶܝܠ[11]܆ ܐܶܠܳܐ ܐܰܘܣܶܦ ܕܗܰܘ ܚܰܝܳܐ ܐܰܝܟܰܢܳܐ ܕܰܢܚܰܘܶܐ ܗܳܝ ܕܕܺܝܠܳܢܳܝܳܐ ܘܰܦܪܺܝܫܳܐ ܘܠܳܐ ܡܫܰܘܬܦܳܐ܆ ܟܰܕ ܓܶܝܪ ܐܶܬܒܰܩܺܝ ܒܶܗ ܝܰܬܺܝܪ ܢܰܗܺܝܪܳܐܺܝܬ ܦܛܪܘܤ܆ ܘܶܐܬܢܰܗܰܪ ܒܥܰܝ̈ܢܶܐ ܕܬܰܪܥܺܝܬܶܗ ܒܫܽܘܦܪܳܐ ܕܰܐܠܳܗܽܘܬܳܐ ܗܽܘ ܝܰܬܺܝܪ ܢܰܨܺܝܚܳܐ. ܘܩܰܒܶܠ ܓܶܠܝܳܢܳܐ ܠܰܘ ܡܶܢ ܒܶܣܪܳܐ ܘܰܕܡܳܐ. ܐܶܠܳܐ ܗܰܘ ܕܡܶܢ ܠܥܶܠ. ܐܰܫܟܚܶܗ ܚܰܝ̈ܶܐ ܡܶܢ ܚܰܝ̈ܶܐ ܐܰܒܳܐ. ܘܡܶܢ ܢܽܘܗܪܳܐ ܫܰܪܺܝܪܳܐ ܢܽܘܗܪܳܐ ܫܰܪܺܝܪܳܐ. ܘܒܰܕ ܬܗܺܝܪܳܐ ܗܘ̣ܳܐ. ܘܡܰܠܝܳܐ ܡܶܢ ܪܽܘܚܳܐ ܐܰܙܥܶܩ܆ ܐܰܢ̱ܬ ܐܺܝܬܰܝܟ ܡܫܺܝܚܳܐ ܗܰܘ ܒܪܶܗ ܕܰܐܠܳܗܳܐ ܗܰܘ ܚܰܝܳܐ[12]. ܗܰܘ ܕܡܶܛܽܠܳܬܝ ܡܰܟܺܝܟܳܐ ܘܪܳܡܳܐ ܡܶܛܽܠ ܡܥܰܠܝܽܘܬܳܐ ܕܰܟܝܳܢܳܐ ܗܰܘ ܕܰܠܥܶܠ. ܗܰܘ ܕܚܰܕ ܡܶܢ ܬܰܪܬܶܝܢ ܠܳܐ ܒܠܺܝܠܳܐܺܝܬ܆ ܡܶܢ ܐܰܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ ܒܚܰܕ ܦܰܪܨܽܘܦܳܐ ܘܰܩܢܽܘܡܳܐ ܚܰܕ܆ ܐܳܦ ܐܺܝܬܰܘܗ̱ܝ ܐܳܦ ܡܶܬܺܝܕܰܥ. ܚܰܕ ܓܶܝܪ ܐܺܝܬܰܘܗ̱ܝ ܡܶܬܬܰܘܕܝܳܢܳܐܺܝܬ ܟܝܳܢܳܐ ܕܡܶܠܬܳܐ. ܘܕܰܡܒܰܣܰܪ ܒܒܶܣܪܳܐ ܕܰܫܘܶܐ ܠܰܢ ܒܽܐܘܣܺܝܰܐ܆ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ.
ܠܗܳܕܶܐ ܗܳܟܺܝܠ ܦܰܐܝܽܘܬܳܐ ܕܬܰܘܕܺܝܬܳܐ ܬܪܺܝܨܬܳܐ. ܕܰܒܦܰܪܨܽܘܦܳܐ ܕܶܐܡܳܐ ܕܥ̈ܺܕܳܬܳܐ ܗܳܠܶܝܢ ܕܰܒܡܰܕܢܚܳܐ ܫܟܺܝܚܳܐ ܟܝܳܢܳܐܺܝܬ܆ ܐܳܦ ܕܰܒܚܶܙܘܳܐ ܕܗܳܕܶܐ ܥܺܕܬܳܐ ܐܰܝܟ ܕܰܕܒܰܪܬܳܐ ܫܰܪܺܝܪܬܳܐ ܡܰܒܪܩܳܐ ܚܳܙܶܐ ܐ̱ܢܳܐ܆ ܘܟܰܕ ܡܶܬܒܰܩܶܐ ܐ̱ܢܳܐ ܚܰܬܺܝܬܳܐܺܝܬ܆ ܡܶܫܟܰܚ ܐ̱ܢܳܐ ܠܳܗ̇ ܠܗܳܕܶܐ ܕܰܫܠܺܝܚܳܐܺܝܬ ܐܳܡܰܪ. ܕܠܰܝܬ ܒܳܗ̇ ܟܽܘܬܡܳܐ ܐܰܘ ܩܶܡܛܳܐ. ܐܰܘ ܡܶܕܶܡ ܡܶܢ ܗܳܠܶܝܢ ܕܕܰܐܝܟ ܗܳܟܰܢ. ܐܶܠܳܐ ܕܺܐܝܬܶܝܗ̇ ܩܰܕܺܝܫܬܳܐ ܘܰܕܠܳܐ ܡܽܘܡ[13]. ܘܠܳܐ ܕܰܠܫܽܘܦܪܳܐ ܡܶܬܛܰܟܢܳܐ ܠܳܗ̇ ܡܶܢ ܛܝ̈ܳܫܶܐ ܗܳܠܶܝܢ ܕܡܶܬܛܺܝܫܺܝܢ ܒܰܐܦ̈ܶܐ ܒܰܕܡܽܘܬ ܙܳܢ̈ܝܳܬܳܐ܆ ܗܳܢܰܘ ܕܶܝܢ ܡܶܢ ܗܰܓܳܓܽܘܬܳܐ ܕܠܳܐ ܩܰܘܡܳܐ ܘܰܕܠܳܐ ܐܰܠܳܗ ܘܚܶܠܡܳܢܳܝܬܳܐ ܕܽܐܘܛܶܘܟ̥ܶܐ. ܘܠܳܐ ܬܽܘܒ ܕܰܡܙܰܝܦܳܐ ܠܳܗ̇ ܠܫܰܦܺܝܪܽܘܬ ܦܰܐܝܽܘܬܳܐ ܐܶܡܗܳܝܬܳܐ ܕܺܝܠܳܗ̇ ܒܚܶܫܟܳܐ ܕܦܽܘܠܚܳܢ ܒܰܪܢܳܫܐ ܢܰܣܛܘܪܝܢܐ܆ ܡܰܠܽܘܢ ܕܶܝܢ ܕܣܰܢܝܽܘܬܳܐ ܘܰܡܫܰܟܪܽܘܬܳܐ ܝܺܗܽܘܕܳܝܬܳܐ܆ ܐܳܡܰܪ ܐ̱ܢܳܐ ܕܶܝܢ ܒܰܥܦܺܝܦܽܘܬܳܐ ܕܰܟܝܳܢ̈ܶܐ܆ ܡܶܛܽܠ ܗܳܕܶܐ ܚܳܕܝܳܐܺܝܬ ܐܰܝܟ ܕܰܠܘܳܬ ܐܰܒܳܐ ܪܶܗܛܰܬ ܠܘܳܬܝ܆ ܘܟܰܕ ܠܒܰܪ ܡܶܢ ܬܰܪ̈ܥܶܐ ܕܰܡܕܺܝܢ̱ܬܳܐ ܓܳܚ̣ܰܬ̣ ܐܶܪܰܥܬ̣ܰܢܝ܆ ܟܰܕ ܬܟܺܝܠܳܐ ܕܠܳܐ ܡܶܕܶܡ ܚܰܠܦܶܬ̣ ܡܶܢ ܫܰܦܺܝܪܽܘܬ ܛܽܘܗܡܳܐ. ܡܶܛܽܠܗܳܕܶܐ ܟܰܕ ܡܝܰܬܪܽܘܬܳܐ ܗܳܝ ܕܰܒܝܰܕ ܣܳܥܽܘܪ̈ܘܳܬܳܐ ܕܠܳܚܡܳܐ ܠܗܰܝܡܳܢܽܘܬܳܐ ܡܚܰܘܝܳܐ܆ ܟܰܕ ܠܳܐ ܐܺܝܬܰܝ ܢܒܺܝܳܐ ܐܶܠܳܐ ܚܰܛܳܝܳܐ ܘܰܒܨܺܝܪܳܐ. ܐܰܝܟ ܕܠܰܢܒܺܝܳܐ ܩܰܒܶܠܬ̣ܰܢܝ܆ ܟܰܕ ܡܣܰܟܝܳܐ ܠܡܶܣܰܒ ܐܰܓܪܳܐ ܕܰܢܒܺܝܳܐ ܡܶܛܽܠ ܗܰܘ ܕܠܳܐ ܕܰܓܳܠܳܐܺܝܬ ܐܶܫܬܰܘܕܺܝ ܘܶܐܡܰܪ: ܕܗܰܘ ܕܰܡܩܰܒܶܠ ܢܒܺܝܳܐ ܒܰܫܡܳܐ ܕܰܢܒܺܝܳܐ. ܐܰܓܪܳܐ ܕܰܢܒܺܝܳܐ ܢܳܣܶܒ[14]. ܘܰܐܝܟܰܢܳܐ ܕܗܳܢܽܘܢ ܕܡܶܢ ܩܕܺܝܡ ܠܘܳܬ ܫܡܽܘܐܶܝܠ ܡܰܙܥܩܺܝܢ ܗ̱ܘܰܘ ܟܰܕ ܡܶܬܩܰܒܰܠ ܗ̱ܘܳܐ ܡܶܢܗܽܘܢ. ܐܳܦ ܗܺܝ ܐܰܙܥܩܰܬ܆ ܫܰܝܢܳܐ ܐܺܝܬܶܝܗ̇ ܡܰܥܰܠܬܳܟ ܐܳܘ ܚܰܙܳܝܳܐ܆ ܡܶܛܽܠ ܗܳܕܶܐ ܟܺܝܬ ܐܳܦ ܚܢܰܢ ܟܰܕ ܒܡ̈ܶܠܶܐ ܐܶܘܰܢܓ̈ܶܠܳܝܳܬܳܐ ܦܳܪܥܺܝܢܰܢ ܠܳܗ̇. ܐܰܝܟ ܦܽܘܩܕܳܢܶܗ ܕܦܳܪܽܘܩܰܢ ܐܳܡܪܺܝܢܰܢ: ܫܠܳܡܳܐ ܠܒܰܝܬܳܐ ܗܳܢܳܐ. ܘܡܶܛܽܠ ܟܺܝܬ ܕܰܕܫܳܘܶܐ ܐܺܝܬܰܘܗ̱ܝ ܒܰܝܬܳܐ܆ ܢܺܐܬܶܐ ܝܰܬܺܝܪܳܐܺܝܬ ܫܠܳܡܳܐ ܕܺܝܠܰܢ ܥܠܰܘܗ̱ܝ. ܘܰܩܒܺܝܥܳܐ ܢܟܰܬܰܪ ܕܠܳܐ ܢܶܗܦܽܘܟ. ܐܶܬܚܰܘܝܰܬ ܓܶܝܪ ܫܰܪܺܝܪܳܐܺܝܬ ܡܶܛܽܠ ܟܺܝܬ ܕܟܰܕ ܠܺܝ ܕܠܳܐ ܡܶܕܶܡ ܐܺܝܬܰܝ܆ ܒܰܕܡܽܘܬ ܡܰܠܰܐܟܳܐ ܕܰܐܠܳܗܳܐ ܩܰܒܠܰܬ. ܡܰܠܽܘܢ ܕܶܝܢ ܐܰܝܟ ܕܠܶܗ ܠܰܡܫܺܝܚܳܐ ܟܰܕ ܥܰܠ ܥܺܝܠܳܐ ܝܳܬܶܒ ܗ̱ܘܳܐ܆ ܘܠܳܐ ܫܳܛܰܬ̣ ܐܳܦܠܳܐ ܢܶܕܰܬ̣ ܐܰܝܟܰܢܳܐ ܕܦܰܘܠܽܘܤ ܟܰܕ ܠܓܰܠ̈ܰܛܳܝܶܐ ܟܳܬܶܒ ܗ̱ܘܳܐ ܐܳܡܰܪ[15].
ܠܶܗ ܠܰܡܫܺܝܚܳܐ ܐܳܦ ܟܰܕ ܥܰܠ ܬܰܪ̈ܥܶܐ ܩܳܐܶܡ ܡܬܰܪܣܝܳܐ ܟܰܕ ܐܺܝܬܰܘܗ̱ܝ ܒܡܶܣܟܺܢܽܘܬܳܐ܆ ܘܡܰܥܠܳܐ ܠܰܬܚܶܝܬ ܬܰܛܠܺܝܠܳܐ ܟܰܕ ܐܺܝܬܰܘܗ̱ܝ ܐܰܟܣܢܳܝܳܐ܆ ܘܟܰܕ ܥܰܪܛܶܠܳܝ ܡܰܠܒܫܳܐ܆ ܘܟܰܕ ܒܟܽܘܪܗܳܢܳܐ ܘܰܒܒܶܝܬ ܐܰܣܺܝܪ̈ܶܐ ܡܶܬܶܐܠܰܨ ܣܳܥܪܳܐ. ܡܶܛܽܠܗܳܕܶܐ ܘܬܽܘܒ ܐܳܡܪܺܝܢ ܚ̱ܢܰܢ. ܢܺܐܬܶܐ ܫܠܳܡܳܐ ܕܺܝܠܰܢ ܥܠܶܝܗ̇. ܒܛܰܝܒܽܘܬܳܐ ܕܗܰܘ ܕܶܐܡܰܪ܆ ܫܠܳܡܳܐ ܕܺܝܠܝ ܝܳܗܶܒ ܐ̱ܢܳܐ ܠܟܽܘܢ. ܫܠܳܡܳܐ ܕܺܝܠܝ ܫܳܒܶܩ ܐ̱ܢܳܐ ܠܟܽܘܢ[16]. ܗܰܘ ܕܟܰܕ ܠܗܳܢܳܐ ܐܰܝܟ ܕܰܠܫܽܘܪܳܐ ܚܰܣܺܝܢܳܐ ܢܶܟܪܟܺܝܘܗ̱ܝ ܠܳܗ̇܆ ܕܠܳܐ ܣܽܘܓܦܳܢܳܐ ܢܶܛܪܺܝܗ̇܆ ܟܰܕ ܡܦܰܨܶܐ ܠܳܗ̇ ܡܶܢ ܟܽܠܶܗ ܚܣܳܡܳܐ ܕܳܐܟܶܠ ܩܰܪܨܳܐ܆ ܘܰܢܚܰܘܶܝܗ̇ ܕܡܶܬܩܰܪܝܳܐ ܟܠܩܝܤ ܐܰܘ ܢܚܳܫܳܝܬܳܐ ܒܗܽܘܢ ܒܣܽܘܥܪ̈ܳܢܶܐ܆ ܘܰܕܠܳܐ ܡܕܰܓܠܳܐ ܠܶܗ ܠܟܽܘܢܳܝܳܐ܆ ܒܗܳܝ ܕܬܶܨܡܰܚ ܡܰܢ ܘܰܬܙܰܗܰܪ܆ ܘܰܡܫܰܪܰܪܬܳܐ ܘܰܚܠܺܝܡܬܳܐ ܬܶܗܘܶܐ ܐܺܝܬܶܝܗ̇ ܒܕܰܟܝܽܘܬܳܐ ܕܗܰܝܡܳܢܽܘܬܳܐ ܬܪܺܝܨܬܳܐ܆ ܬܶܟܦܽܘܪ ܕܶܝܢ ܘܬܰܣܠܶܐ ܠܟܽܠ ܫܽܘܚܬܳܐ ܕܒܺܝܫܽܘܬܳܐ ܗܶܪܶܛܺܝܩܝܬܐ. ܟܰܕ ܐܳܡܰܪ ܠܘܳܬܳܗ̇. ܗܳܠܶܝܢ ܕܒܰܙܒܰܢ ܠܘܳܬ ܐܶܪܰܡܝܳܐ ܢܒܺܝܳܐ ܐܶܡܰܪ. ܗܳܐ ܣܳܡܬܳܟ ܒܝܰܘܡܳܐ ܕܝܰܘܡܳܢܳܐ. ܐܰܝܟ ܡܕܺܝܢ̱ܬܳܐ ܡܚܰܣܰܢܬܳܐ ܘܰܐܝܟ ܫܽܘܪܐ ܚܰܣܺܝܢܳܐ ܕܰܢܚܳܫܳܐ[17]܆ ܘܢܺܐܡܰܪ ܟܽܠܶܗ ܥܰܡܳܐ ܐܰܡܺܝܢ ܐܰܡܺܝܢ. ܘܠܺܝ ܡܰܢ ܚܠܳܦ ܗܳܠܶܝܢ ܢܶܗܦܽܘܟ ܢܶܬܶܠ ܥܰܡܳܐ ܗܳܢܳܐ ܠܰܙܘ̈ܳܕܶܐ. ܨܠ̈ܰܘܳܬܳܐ ܕܺܝܠܶܗ ܟܳܗ̈ܢܳܝܳܬܳܐ܆ ܢܰܣܶܩ ܕܶܝܢ ܫܽܘܒܚܳܐ ܠܝܳܗܽܘܒܳܐ ܕܟܽܠܗܶܝܢ ܛܳܒ̈ܳܬܳܐ ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ ܘܽܐܘܚܕܳܢܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܚܰܡܫܺܝܢ ܘܫܬܐ.