ܣܘܢܛܐܩܛܝܩܘܤ ܐܰܘܟܺܝܬ ܕܫܐܠܬ ܫܠܳܡܳܐ. ܟܰܕ ܥܬܺܝܕ ܗ̱ܘܳܐ ܕܢܶܦܽܘܩ ܠܥ̈ܺܕܳܬܳܐ ܩܰܕܺܝ̈ܫܳܬܳܐ ܕܒܳܐܓܽܘܪ̈ܣܶܐ ܘܰܒܩܽܘܪ̈ܝܰܤ ܘܰܠܕܰܝܪ̈ܳܬܳܐ ܩܰܕܺܝ̈ܫܳܬܳܐ.
55: ܟܰܕ ܢܳܡܽܘܣܳܐ ܗܰܘ ܕܡܶܢ ܐܰܒܳܗ̈ܳܬܳܐ ܢܳܚܶܬ ܠܘܳܬܰܢ ܝܰܨܺܝܦܺܝܢܰܢ ܕܰܢܡܰܠܶܐ܆ ܠܘܳܬ ܥܻ̈ܕܳܬܳܐ ܩܰܕܺܝ̈ܫܳܬܳܐ ܗܳܠܶܝܢ ܕܒܳܐܓܽܘܪ̈ܣܶܐ ܘܰܒܩܽܘܪ̈ܝܰܤ ܘܕܰܝܪ̈ܳܬܳܐ ܟܳܗ̈ܢܳܝܳܬܳܐ ܕܗܳܢܽܘܢ ܕܡܶܬܥܰܢܘܶܝܢ ܕܽܘܒܳܪܳܐ ܝܺܚܺܝܕܳܝܳܐ ܥܬܺܝܕܺܝܢܰܢ ܠܰܡܚܳܪ ܠܡܶܦܰܩ܆ ܟܰܕ ܐܰܠܳܗܳܐ ܡܰܬܩܶܢ ܗܰܠ̈ܟܳܬܳܐ ܕܺܝܠܰܢ ܐܰܝܟ ܡܶܠܬܶܗ[1]܆ ܐܰܝܟܰܢܳܐ ܕܕܰܘܺܝܕ ܟܰܕ ܡܙܰܡܰܪ ܐܳܡܰܪ: ܨܳܒܶܐ ܓܶܝܪ ܗܽܘ ܢܳܡܽܘܣܳܐ ܕܗܰܘ ܕܰܒܟܽܠ ܙܰܒܢܳܐ ܐܰܝܢܳܐ ܕܗܽܘ ܐܰܚܺܝܕ ܠܶܗ ܠܡܰܘܬܒܳܐ ܗܳܢܳܐ ܫܠܺܝܚܳܝܳܐ܆ ܟܰܕ ܡܶܢ ܡܕܺܝܢ̱ܬܳܐ ܡܰܫܩܶܠ ܠܡܰܪܥܺܝܬܳܐ ܗܳܝ ܕܒܰܐܬܪܳܐ ܢܶܗܘܶܐ ܣܳܥܰܪ. ܘܠܺܝ ܡܶܣܬܰܒܪܳܐ ܕܫܰܦܺܝܪ ܐܺܝܬ ܠܶܗ ܠܢܳܡܽܘܣܳܐ ܗܳܢܳܐ܆ ܐܰܝܟܰܢܐ ܓܶܝܪ ܠܳܐ ܥܬܺܝܕ ܗ̱ܘܳܐ ܕܫܰܦܺܝܪ ܢܶܗܘܶܐ ܐܺܝܬ ܠܶܗ. ܟܰܕ ܥܰܬܺܝܩܳܐ ܐܺܝܬܰܘܗ̱ܝ ܐܰܟܚܕܳܐ ܘܰܡܝܰܩܪܳܐ܆ ܕܠܰܘ ܒܰܠܚܽܘܕ ܒܰܬܚܽܘ̈ܡܶܐ ܕܰܐܒܳܗ̈ܳܬܳܐ܆ ܐܶܠܳܐ ܐܳܦ ܒܡ̈ܶܠܶܐ ܕܰܟܬܳܒܳܐ ܢܦܺܝܚ ܡܶܢ ܐܰܠܳܗܳܐ ܡܚܰܣܰܢ. ܟܬܺܝܒ ܓܶܝܪ ܕܰܢܒܺܝܳܐ ܫܡܽܘܐܝܠ ܐܺܝܬ ܗ̱ܘܳܐ ܠܶܗ ܡܰܢ ܒܪܳܡܬܳܐ ܟܰܘܫܳܐ ܟܺܝܬ ܘܡܰܥܡܪܳܐ ܗܰܘ ܕܰܐܝܟ ܕܰܒܣܽܘܓܳܐܐ܆ ܘܰܡܢܺܝܚܳܢܽܘܬܳܐ ܕܡܰܕܒܚܳܐ ܘܬܶܫܡܶܫܬܳܐ ܟܳܗܢܳܝܬܳܐ܆ ܟܰܕ ܕܳܒܰܚ ܗ̱ܘܳܐ ܕܶܒܚ̈ܶܐ ܗܳܠܶܝܢ ܕܰܚܠܳܦ ܥܰܡܳܐ܆ ܡܶܬܟܪܶܟ ܗ̱ܘܳܐ ܕܶܝܢ ܘܰܒܕܽܘܟ̈ܝܳܬܳܐ ܗܳܠܶܝܢ ܢܰܨܺܝ̈ܚܳܬܳܐ ܘܰܡܩܰܕܫ̈ܳܬܳܐ ܗܳܘܶܐ ܗ̱ܘܳܐ܆ ܟܰܕ ܣܳܥܰܪ ܗ̱ܘܳܐ ܘܕܳܐܶܢ ܠܺܐܝܣܪܳܐܶܝܠ. ܐܺܝܬ ܠܶܗ ܕܶܝܢ ܠܰܟܬܳܒܳܐ ܟܳܗܢܳܝܳܐ ܗܳܟܰܢܳܐ: ܘܕܳܢ ܫܡܽܘܐܶܝܠ ܠܺܐܝܣܪܳܐܶܝܠ܆ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗ̱ܝ ܘܳܐܙܶܠ ܗ̱ܘܳܐ ܐܰܡܺܝܢܳܐܺܝܬ ܟܽܠ ܫܢܳܐ ܒܰܫܢܳܐ܆ ܘܡܶܬܟܪܶܟ ܗ̱ܘܳܐ ܒܒܶܝܬ ܐܺܝܠ ܘܰܒܓܰܠܓܳܠܳܐ ܘܰܒܡܰܨܦܝܳܐ܆ ܘܕܳܐܶܢ ܗ̱ܘܳܐ ܠܺܐܝܣܪܳܐܶܝܠ ܒܟܽܠܗܶܝܢ ܗܳܠܶܝܢ ܕܽܘܟ̈ܝܳܬܳܐ ܡܩܰܕܫ̈ܳܬܳܐ. ܦܽܘܢܳܝܶܗ ܕܶܝܢ ܐܺܝܬܰܘܗ̱ܝ ܗ̱ܘܳܐ ܠܪܳܡܬܳܐ܆ ܘܬܰܡܳܢ ܐܺܝܬܰܘܗ̱ܝ ܗ̱ܘܳܐ ܒܰܝܬܶܗ ܘܕܳܐܶܢ ܗ̱ܘܳܐ ܬܰܡܳܢ ܠܺܐܝܣܪܳܐܶܝܠ܆ ܘܰܒ̣ܢܳܐ ܬܰܡܳܢ ܡܰܕܒܚܳܐ ܠܡܳܪܝܳܐ[2].
ܐܳܕܫܳܐ ܕܶܝܢ ܕܰܐܝܟ ܗܳܢܳܐ ܣܳܥܽܘܪܽܘܬܳܐ ܐܰܘܟܺܝܬ ܕܡܶܬܟܰܪܟܳܢܽܘܬܳܐ܆ ܗܳܝ ܕܰܠܗܳܢܽܘܢ ܕܶܐܬܗܰܝܡܰܢܘ ܠܰܡܩܳܡ ܒܪܺܝܫ ܥܰܡܳܐ ܦܰܐܝܳܐ܆ ܐܳܦܠܳܐ ܠܰܫ̈ܠܺܝܚܶܐ ܛܳܥܶܐ ܗ̱ܘܳܐ. ܟܬܺܝܒ ܓܶܝܪ ܒܰܟܬܳܒܳܐ ܗܰܘ ܕܰܦܪܰܟܣܺܝܤ ܗܳܟܰܢܳܐ. ܡܶܢ ܒܳܬܰܪ ܕܶܝܢ ܝܰܘ̈ܡܳܬܳܐ ܝܺܕܺܝ̈ܥܶܐ ܐܶܡܰܪ ܦܰܘܠܽܘܤ ܠܘܳܬ ܒܰܪܢܰܒܰܐ܆ ܢܶܦܢܶܐ ܗܳܟܺܝܠ ܘܢܶܣܥܽܘܪ ܠܰܐܚ̈ܶܐ ܒܟܽܠ ܡܕܺܝܢ̈ܳܬܳܐ ܒܗܳܠܶܝܢ ܕܣܰܒܰܪܢܰܢ ܒܗܶܝܢ ܡܶܠܬܳܐ ܕܡܳܪܝܳܐ ܕܰܐܝܟܰܢܳܐ ܐܺܝܬ ܠܗܽܘܢ[3]. ܕܗܰܘ ܡܰܢ ܗܳܟܺܝܠ ܚܙܽܘܩܝܳܐ ܢܳܡܽܘܣܳܝܳܐ ܐܺܝܬܰܘܗ̱ܝ ܘܳܐܠܨܳܝܳܐ܆ ܘܠܰܘ ܝܰܬܺܝܪܳܐ ܘܒܰܛܺܝܠܳܐ ܗܳܐ ܐܶܬܚܰܘܝܰܬ ܡܶܢ ܟܰܕܽܘ܆ ܐܰܢ̱ܬܽܘܢ ܕܶܝܢ ܐܰܝܟܰܢܳܐ ܣܳܒܪܺܝܢ ܐܢ̱ܬܽܘܢ ܠܺܝ ܕܣܺܝܡ ܐ̱ܢܳܐ܆ ܟܰܕ ܡܶܢ ܚܠܺܝܛܽܘܬܳܐ ܕܺܝܠܟܽܘܢ ܪܳܚܡܰܬ ܐܰܠܳܗܳܐ ܩܰܠܺܝܠ ܙܰܒܢܳܐ ܡܶܬܦܪܶܫ ܐ̱ܢܳܐ܆ ܐܰܘ ܕܒܰܐܝܠܶܝܢ ܡ̈ܶܠܶܐ ܡܶܬܚܰܫܰܚ ܐ̱ܢܳܐ ܠܘܳܬܟܽܘܢ. ܐܶܢ ܩܰܠܺܝܠ ܡܶܕܶܡ ܝܰܬܺܝܪ ܐܰܓܰܪ ܟܰܕ ܪܰܚܺܝܩ ܐ̱ܢܳܐ܆ ܘܡܶܢ ܚܙܳܬܳܐ ܕܺܝܠܟܽܘܢ ܟܳܗܢܳܝܬܳܐ ܡܶܬܓܠܶܙ ܐ̱ܢܳܐ. ܐܰܪܰܐ ܠܰܘ ܒܗܳܠܶܝܢ ܐܰܝܠܶܝܢ ܕܰܠܘܳܬ ܬܰܣܠܽܘܢܺܝ̈ܩܳܝܶܐ ܟܳܬܶܒ ܗ̱ܘܳܐ ܦܰܘܠܽܘܤ ܟܰܕ ܗܳܟܰܢܳܐ ܐܳܡܰܪ ܗ̱ܘܳܐ: ܚܢܰܢ ܕܶܝܢ ܐܰܚ̈ܰܝܢ ܟܰܕ ܗܘܰܝܢܰܢ ܝܰܬܡ̈ܶܐ ܡܶܢܟܽܘܢ܆ ܒܰܡܠܶܐ ܥܶܕܳܢܳܐ ܕܙܰܒܢܳܐ. ܒܦܰܪܨܽܘܦܳܐ ܘܠܰܘ ܒܠܶܒܳܐ܆ ܘܝܰܬܺܝܪܳܐܺܝܬ ܐܶܬܚܰܦܰܛܢܰܢ ܕܢܶ݀ܚܙܶܐ ܐܰܦܰܝ̈ܟܽܘܢ ܒܪܶܓܬܳܐ ܣܰܓܺܝܐܬܳܐ[4]. ܡܰܢܽܘ ܐܰܝܟ ܕܫܳܘܶܐ ܢܶܬܕܰܡܰܪ ܒܚܰܝܠܗܶܝܢ ܕܡ̈ܶܠܶܐ ܗܳܠܶܝܢ܆ ܒܡܶܨܥܰܬ ܓܶܝܪ ܗܳܝ ܕܳܐܡܰܪ ܬܡܺܝܗ ܐ̱ܢܳܐ ܟܰܕ ܚܳܙܶܐ ܐ̱ܢܳܐ ܕܰܡܙܺܝܓ ܒܗܶܝܢ ܚܽܘܒܳܐ ܗܰܘ ܕܰܡܫܺܝܚܳܐ܆ ܠܗܰܘ ܕܰܐܕܠܶܩ ܗܰܘ ܕܶܐܡܰܪ: ܕܢܽܘܪܳܐ ܐܶܬܺܝܬ̣ ܕܰܐܪܡܶܐ ܥܰܠ ܐܰܪܥܳܐ܆ ܘܨܳܒܶܐ ܗ̱ܘܺܝܬ ܐܶܠܽܘ ܗܳܐ ܡܶܢ ܟܰܕܽܘ ܕܰܠܺܝܩܳܐ ܗ̱ܘܳܬ[5]. ܗܰܘ ܕܡܶܛܽܠܳܬܶܗ ܐܳܦ ܟܰܠܬܳܐ ܗܳܝ ܕܰܒܬܶܫܒ̈ܚܳܬ ܬܶܫܒ̈ܚܳܬܳܐ ܟܰܕ ܠܥܺܕܬܳܐ ܡܩܰܕܡܳܐ ܗ̱ܘܳܬ ܡܛܰܦܣܳܐ ܐܳܡܪܳܐ ܕܡܰܝ̈ܳܐ ܣܰܓܺܝ̈ܶܐܐ ܠܳܐ ܢܶܬܡܨܽܘܢ ܠܰܡܕܰܥܳܟܽܘ ܠܚܽܘܒܳܐ. ܘܢܰܗܪ̈ܰܘܳܬܳܐ ܠܳܐ ܢܶܓܪܦܽܘܢܳܝܗ̱ܝ [6].
ܩܰܕܡܳܐܺܝܬ ܡܰܢ ܓܶܝܪ. ܠܡܰܪܦܝܳܢܽܘܬܳܐ ܗܳܝ ܕܝܰܬܺܝܪ ܐܺܝܬܶܝܗ̇ ܙܥܽܘܪܬܳܐ܆ ܠܳܐ ܓܶܝܪ ܐܳܡܰܪ ܐ̱ܢܳܐ ܚܙܽܘܩܝܳܐ܆ ܝܰܬܡܽܘܬܳܐ ܕܒܰܡܠܶܐ ܥܶܕܳܢܳܐ ܕܙܰܒܢܳܐ ܓܶܕܫܰܬ ܩܪܳܗ̇. ܠܳܐ ܓܶܝܪ ܐܶܡܰܪ ܕܟܰܕ ܐܶܬܦܪܶܫܢܰܢ ܐܰܘ ܟܰܕ ܐܶܬܪܰܚܰܩܢܰܢ ܡܶܢܟܽܘܢ ܐܶܠܳܐ ܟܰܕ ܗܘܰܝܢܰܢ ܝܰܬܡ̈ܶܐ ܡܶܢܟܽܘܢ. ܐܰܝܟܰܢܳܐ ܕܰܢܚܰܘܶܐ܆ ܕܰܐܝܟ ܥܰܠ ܒܢܰܝ̈ܳܐ ܘܰܐܒܳܐ ܐܺܝܬܶܝܗ̇. ܗܘܳܬ ܪܶܚܡܬܳܐ܆ ܕܚܰܝܠܳܐ ܕܰܟܝܳܢܳܐ ܐܺܝܬ ܠܳܗ̇. ܡܰܠܽܘܢ ܕܶܝܢ ܕܰܒܣܰܓܺܝ ܝܰܬܺܝܪܳܐ ܐܺܝܬܶܝܗ̇ ܩܛܺܝܪܳܝܬܳܐ ܝܰܬܺܝܪ ܡܶܢ ܗܳܝ܆ ܐܳܦ ܓܶܝܪ ܘܗܳܪܟܳܐ ܠܛܶܟܣܳܐ ܗܳܦܶܟ܆ ܟܰܕ ܓܶܝܪ ܦܰܪܨܽܘܦܳܐ ܕܰܐܒܳܐ ܐܰܚܺܝܕ ܗ̱ܘܳܐ ܦܰܘܠܽܘܤ. ܝܰܬܡܳܐ ܩܪܳܐ ܗܽܘ ܠܶܗ ܟܰܕ ܨܳܒܶܐ ܕܢܰܘܕܰܥ ܕܰܠܬܰܪ̈ܬܰܝܗܶܝܢ ܪ̈ܶܚܡܳܬܳܐ ܐܰܟܚܕܳܐ ܐܺܝܬ ܗ̱ܘܳܐ ܠܶܗ ܒܶܗ܆ ܘܰܠܗܳܝ ܕܰܐܒܳܗ̈ܶܐ ܘܰܠܗܳܝ ܕܰܒܢܰܝ̈ܳܐ. ܘܡܰܚܶܒ ܡܰܢ ܐܰܝܟ ܐܰܒܳܐ܆ ܟܳܐܶܒ ܗ̱ܘܳܐ ܠܶܗ ܕܶܝܢ ܚܽܘܒܳܢܳܐܺܝܬ܆ ܐܰܝܟ ܒܪܳܐ ܕܰܠܝܰܬܡܽܘܬܳܐ ܠܳܐ ܡܨܶܐ ܠܰܡܣܰܝܒܳܪܽܘ. ܐܰܒܳܐ ܡܰܢ ܓܶܝܪ ܐܳܦ ܢܣܰܝܒܰܪ ܟܒܰܪ ܦܪܽܘܫܝܳܐ ܕܰܒܢܰܝ̈ܳܐ. ܒܪܳܐ ܕܶܝܢ ܠܳܐ ܦܺܝܠܳܣܽܘܦܐܺܝܬ ܘܠܳܐ ܡܶܫܟܚܳܢܳܐܺܝܬ ܐܺܝܬ ܠܶܗ ܒܗܳܕܶܐ܆ ܘܒܰܪܫܳܥܬܶܗ ܠܘܳܬ ܕܶܡ̈ܥܶܐ ܘܽܐܘܠ̈ܝܳܬܳܐ ܢܳܦܶܩ. ܘܠܰܘ ܟܰܕ ܐܶܬܝܰܬܰܡܢܰܢ ܐܶܡܰܪ ܒܰܠܚܽܘܕ܆ ܐܶܠܳܐ ܟܰܕ ܣܰܓܺܝ ܐܶܬܝܰܬܰܡܢܰܢ ܡܶܢܟܽܘܢ. ܟܰܕ ܐܶܬܢܬܰܦ ܘܶܐܬܢܬܶܫ ܡܶܢܗܽܘܢ ܘܰܐܝܟ ܕܒܰܐܢܰܢܩܺܐ ܐܶܬܢܓܰܕ ܩܛܺܝܪܳܐܻܝܬ܆ ܡܚܰܘܶܐ ܗ̱ܘܳܐ ܒܝܰܕ ܬܰܘܣܶܦܬܳܐ ܘܰܡܬܺܝܚܽܘܬܳܐ ܕܠܶܟܣܺܝܤ ܗܳܝ ܕܶܐܡܰܪ ܕܣܰܓܺܝ ܐܶܬܝܰܬܰܡܢܰܢ ܡܶܢܟܽܘܢ.
ܕܬܰܪܬܶܝܢ ܕܶܝܢ ܕܰܐܘܣܶܦ ܕܰܒܦܰܪܨܽܘܦܳܐ ܐܶܬܦܪܶܫ܆ ܒܰܠܚܽܘܕ ܘܠܰܘ ܒܠܒܳܐ ܟܰܕ ܡܫܰܘܕܰܥ ܕܳܐܦ ܟܰܕ ܒܬܰܪܥܺܝܬܶܗ ܡܰܟܪܶܟ ܗ̱ܘܳܐ ܠܗܽܘܢ܆ ܘܰܒܗܳܕܶܐ ܡܶܬܒܰܝܰܐ ܗ̱ܘܳܐ܆ ܥܰܠ ܓܠܺܝܙܽܘܬܳܐ ܕܡܶܢ ܚܙܳܬܗܽܘܢ ܦܰܓܪܳܢܳܝܬܳܐ ܝܳܩܶܕ ܗ̱ܘܳܐ ܘܡܶܫܬܰܠܗܰܒ܆ ܡܶܛܽܠ ܗܳܕܶܐ ܟܺܝܬ ܐܳܦ ܐܳܡܰܪ ܗ̱ܘܳܐ܆ ܕܝܰܬܺܝܪܳܐܺܝܬ ܐܶܬܚܰܦܰܛܢܰܢ ܕܢܶܚܙܶܐ ܦܰܪܨܽܘܦܳܐ ܕܺܝܠܟܽܘܢ܆ ܒܪܶܓܬܳܐ ܣܰܓܺܝܐܬܳܐ܆ ܒܰܐܝ̇ܕܳܐ ܡܶܢ ܗܳܠܶܝܢ ܐܶ݀ܚܪܽܘܙ ܠܗܰܘܢܳܐ. ܒܗܳܝ ܕܝܰܬܺܝܪܳܐܺܝܬ ܒܗܳܝ ܕܶܐܬܚܰܦܰܛܢܰܢ܆ ܒܗܳܝ ܕܰܒܪܶܓܬܳܐ ܣܰܓܺܝܐܬܳܐ. ܟܽܠܗܶܝܢ ܓܶܝܪ ܕܡܶܫܬܰܠܗܰܒ ܗ̱ܘܳܐ ܡܚܰܘ̈ܝܳܢ ܠܶܗ ܠܺܝ ܠܰܪܚܽܘܡܳܐ. ܘܰܐܝܟ ܗܰܘ ܕܰܨܗܶܐ ܘܰܪܗܺܝܛ ܘܡܶܬܝܰܐܰܒ. ܕܠܳܐ ܡܫܽܘܚܬܳܐ ܘܠܳܐ ܡܶܬܬܰܚܕܳܢܐܺܝܬ ܠܡܶܚܙܳܐ ܠܗܰܘ ܕܡܶܬܪܚܶܡ܆ ܗܳܠܶܝܢ ܡܰܢ ܗܳܟܺܝܠ܆ ܦܰܘܠܽܘܤ ܗܰܘ ܕܠܰܡܫܺܝܚܳܐ ܐܺܝܬ ܗ̱ܘܳܐ ܠܶܗ ܒܶܗ ܘܰܐܝܟ ܕܡܶܢ ܡܥܺܝܢܳܐ ܕܚܽܘܒܳܐ ܐܰܠܳܗܳܝܳܐ܆ ܡܰܫܦܰܥ ܗ̱ܘܳܐ ܪ̈ܶܕܝܶܐ ܕܡ̈ܶܠܶܐ܆ ܘܣܽܘ̈ܟܳܠܶܐ ܐܰܠܳܗܳܝ̈ܶܐ ܘܢܽܘܪ̈ܳܢܳܝܶܐ. ܟܰܕ ܕܶܝܢ ܚܳܙܶܐ ܐ̱ܢܳܐ ܐܳܦ ܐܶܢܳܐ ܒܨܺܝܪܳܐ ܠܨܰܠܡܳܐ ܕܰܡܝܰܬܪܽܘܬܶܗ ܪܰܒܬܳܐ ܕܗܰܘ܆ ܘܠܰܡܫܰܪܬܚܽܘܬܳܐ ܕܫܽܘܦܪܳܐ ܕܺܝܠܟܽܘܢ ܪܽܘܚܳܢܳܝܳܐ. ܒܰܠܺܝܥ ܐ̱ܢܳܐ ܒܢܰܦܫܝ ܥܠܰܝܟܽܘܢ܆ ܘܗܳܕܶܐ ܟܰܕ ܐܺܝܬܰܝ ܪܳܚܽܘܡܳܐ ܣܰܢܝܳܐ ܘܠܳܐ ܚܳܫܚܳܐ܆ ܘܰܩܛܺܝܪܳܐܺܝܬ ܘܠܳܐ ܨܶܒܝܳܢܳܐܺܝܬ ܡܶܢܟܽܘܢ ܡܶܬܢܰܓܰܕ ܐ̱ܢܳܐ. ܒܪܰܡ ܡܶܛܽܠ ܕܒܰܕܡܰܝ̈ܳܐ ܙܒܺܝܢܺܝܢ ܚ̱ܢܰܢ[7]܆ ܘܒܰܕܝܰܬܺܝܪ ܪܰܘܪܒܺܝܢ ܣܰܓܺܝ ܒܰܕܡܳܐ ܕܰܡܫܺܝܚܳܐ܆ ܙܳܕܶܩ ܡܶܢܟܽܠ ܦܪܽܘܤ ܕܢܶܩܰܦ ܠܦܽܘܩ̈ܕܳܢܰܘܗ̱ܝ ܕܡܳܪܐ܆ ܘܰܢ݀ܡܰܠܶܐ ܐܽܘܪܚܳܐ ܗܳܕܶܐ ܕܣܺܝܡܳܐ ܩܕܳܡܰܝܢ.
ܠܟܽܘܢ ܕܶܝܢ ܨܳܒܶܐ ܐ̱ܢܳܐ ܕܡܰܥܗܕܳܢܽܘܬܳܐ ܙܥܽܘܪܬܳܐ ܐܰܥܗܶܕ ܟܰܕ ܒܡ̈ܶܠܶܐ ܬܽܘܒ ܕܦܰܘܠܽܘܤ ܡܶܬܚܰܫܰܚ ܐ̱ܢܳܐ܆ ܗܳܠܶܝܢ ܕܰܠܘܳܬ ܦܺܝܠܺܝܦܺܝܣ̈ܳܝܶܐ ܟܬܰܒ ܗܳܟܰܢܳܐ܆ ܡܳܕܶܝܢ ܐܳܘ ܚܰܒܺܝ̈ܒܶܐ ܕܺܝܠܝ: ܐܰܝܟܰܢܳܐ ܕܰܒܟܽܠܙܒܰܢ ܐܶܫܬܡܰܥܬܽܘܢ܆ ܠܰܘ ܐܰܝܟ ܕܰܒܩܰܪܺܝܒܽܘܬܳܐ ܕܺܝܠܝ ܒܰܠܚܽܘܕ܆ ܐܶܠܳܐ ܐܳܦ ܗܳܫܳܐ ܣܰܓܺܝ ܝܰܬܺܝܪܳܐܺܝܬ ܒܪܰܚܺܝܩܽܘܬܳܐ ܕܺܝܠܝ܆ ܥܰܡ ܕܶܚܠܬܳܐ ܘܰܪܬܺܝܬܳܐ ܗܘ̣ܰܝܬܽܘܢ ܦܳܠܚܺܝܢ ܦܽܘܪܩܳܢܳܐ ܕܺܝܠܟܽܘܢ[8]. ܐܶܬܥܗܰܕܘ ܠܺܝ ܠܬܶܫܡܶܫܬܳܐ ܗܳܝ ܕܡܰܙܡܽܘܪ̈ܶܐ܆ ܠܩܰܘܡܳܐ ܠܶܠܝ̣ܳܝ̣ܳܐ܆ ܠܰܨ̈ܠܰܘܳܬܳܐ ܪ̈ܰܡܫܳܝܳܬܳܐ܆ ܠܪܽܘܓܙܳܐ ܗܳܢܳܐ ܕܣܺܝܡ ܥܠܰܝܢ܆ ܠܒܳܥ̈ܘܳܬܳܐ ܗܳܠܶܝܢ ܕܡܶܛܽܠ ܗܳܢܳܐ ܡܶܫ̈ܬܰܡܠܝܳܢ܆ ܗܳܠܶܝܢ ܕܰܒܟܽܠܶܗ ܗܳܢܳܐ ܝܰܪܚܳܐ܆ ܬܰܪܬܶܝܢ ܙܰܒ̈ܢܺܝܢ ܒܫܰܒܬܳܐ܆ ܐܶܬܚܙܺܝ ܠܰܢ ܕܢܶܫܬܰܡ̈ܠܝܳܢ. ܙܳܕܶܩ ܗ̱ܘܳܐ ܡܰܢ ܓܶܝܪ ܕܰܥܕܰܡܳܐ ܠܗܳܢܳܐ ܟܽܠܶܗ ܢܶܣܒܠܺܝܘܗ̱ܝ ܠܗܳܢܳܐ ܥܰܡܠܳܐ܆ ܥܕܰܡܐ ܕܢܺܐܠܰܦ ܕܰܡܚܰܪܪܺܝܢ ܡܶܢ ܐܰܢܰܢܩܺܐ ܗܳܕܶܐ ܕܚܺܝܠܬܳܐ܆ ܐܰܚܰܝ̈ܢ ܗܳܢܽܘܢ ܕܰܥܡܺܝܠܺܝܢ ܒܶܗ ܒܚܰܫܳܐ. ܕܶܚܠܶܬ ܕܶܝܢ܆ ܕܰܠܡܳܐ ܡܰܚܢܽܘܩܺܝܬܳܐ ܘܡܰܘܒܠܳܐ ܐܰܪܡܶܐ ܥܠܰܝܟܽܘܢ ܘܢܶܬܬܣܺܝܡ ܥܠܰܝܟܽܘܢ ܝܽܘܩܪܳܐ. ܟܰܕ ܠܳܐ ܡܫܰܡܠܶܝܢ ܐܢ̱ܬܽܘܢ ܠܶܗ ܠܦܽܘܩܕܳܢܳܐ܆ ܗܳܠܶܝܢ ܗܳܟܺܝܠ ܕܨܶܒܝܳܢܳܐ ܕܺܝܠܟܽܘܢ ܚܰܘܰܘ. ܟܰܕ ܠܬܶܐܰܛܪ̈ܶܐ ܘܰܠܦܽܘܪ̈ܓܳܝܶܐ ܠܳܐ ܡܰܘܬܪ̈ܳܢܶܐ ܚܕܰܘ ܐܳܡܪܺܝܢ ܐܢ̱ܬܽܘܢ.
ܐܰܡܺܝܢܳܐܺܝܬ ܘܰܣܒܺܝܣܳܐܺܝܬ ܠܘܳܬ ܥܺܕܬܳܐ ܙܶܠܘ. ܘܬܰܡܳܢ ܟܰܕ ܐܺܝ̈ܕܰܝܟܽܘܢ ܦܳܫܛܺܝܢ ܐܢ̱ܬܽܘܢ. ܠܰܐܠܳܗܳܐ ܐܶܬܟܰܫܦܘ܆ ܕܰܠܘܳܬ ܟܽܠ ܥܒܳܕܳܐ ܛܳܒܳܐ ܢܗܰܕܶܝܟܽܘܢ ܘܰܢܣܰܝܰܥܟܽܘܢ ܠܳܐ ܬܶܕܡܟܽܘܢ. ܕܕܰܠܡܳܐ ܟܰܕ ܒܠܳܐ ܢܛܽܘܪܬܳܐ ܬܗܘܽܘܢ ܐܺܝܬܰܝܟܽܘܢ܆ ܒܰܕܡܽܘܬ ܐ̱ܢܳܫܺܝ̈ܢ ܒܰܪܒܪ̈ܳܝܶܐ. ܢܶܪܗܛܽܘܢ ܥܠܰܝܟܽܘܢ ܫ̈ܺܐܕܶܐ. ܠܳܐ ܟܰܕ ܠܳܐ ܡܚܰܣܢܺܝܢ ܐܢ̱ܬܽܘܢ܆ ܐܶܠܳܐ ܟܰܕ ܣܦܺܝܩܺܝܢ ܐܢ̱ܬܽܘܢ ܡܶܢ ܥܽܘܕܪܳܢܳܐ ܕܰܐܠܳܗܳܐ ܢܶܚܙܽܘܢܳܟܽܘܢ. ܚܰܪܺܝܦܳܐܺܝܬ ܚܳܝܪܺܝܢ. ܢܳܛܽܘܪܳܐܺܝܬ. ܥܺܝܪܳܐܺܝܬ. ܩܳܛܽܘܠܴܐܺܝܬ. ܠܳܐ ܓܶܝܪ ܢܶܕܡܟܽܘܢ܆ ܐܶܢ ܠܳܐ ܢܶܥܒܕܽܘܢ ܒܺܝܫܬܳܐ. ܡܰܪܡܶܐ222 ܫܶܢܬܳܐ ܡܶܢܗܽܘܢ. ܘܠܳܐ ܕܳܡܟܺܝܢ ܐܳܡܰܪ ܟܬܳܒܳܐ ܗܰܘ ܟܳܗܢܳܝܳܐ[9]܆ ܡܶܢ ܟܽܠ ܕܽܘܟ ܗܳܟܺܝܠ ܚܰܣܶܢܘ ܐܰܢ̱ܬܽܘܢ ܠܟܽܘܢ. ܡܗܰܝܡܢܳܐܺܝܬ ܘܰܒܕܰܟܝܽܘܬܳܐ ܕܒܶܣܪܳܐ܆ ܟܰܕ ܠܚܳܬܡܳܐ ܕܰܨܠܺܝܒܳܐ ܪܳܫܡܺܝܢ ܐܢ̱ܬܽܘܢ ܥܰܠ ܒܶܝܬ ܥܰܝ̈ܢܰܝܟܽܘܢ܆ ܘܰܠܚܰܝܠܳܐ ܕܐ̱ܪ̈ܳܙܶܐ ܩܰܕܺܝ̈ܫܶܐ ܒܰܕܡܽܘܬ ܫܶܪܝܳܢܳܐ ܪܽܘܚܳܢܳܝܳܐ ܠܳܒܫܺܝܢ ܐܢ̱ܬܽܘܢ. ܘܰܒܪ̈ܰܚܡܶܐ ܫܦܺܝ̈ܥܶܐ ܕܥܰܠ ܣܢܺܝ̈ܩܶܐ ܠܪ̈ܰܚܡܶܐ ܕܡܶܢ ܠܥܶܠ ܢܳܓܕܺܝܢ ܐܢ̱ܬܽܘܢ. ܐܳܦ ܚܢܰܢ ܕܶܝܢ ܘܟܰܕ ܪܰܚܺܝܩܺܝܢ ܚ̱ܢܰܢ ܢܣܰܝܰܥܟܽܘܢ܆ ܟܰܕ ܠܓܰܒܪ̈ܶܐ ܗܳܢܽܘܢ ܕܰܦܪܺܝܫܺܝܢ ܡܶܢ ܥܳܠܡܳܐ܆ ܘܩܰܪܺܝܒܺܝܢ ܠܰܐܠܳܗܳܐ ܡܦܺܝܣܺܝܢ ܚ̱ܢܰܢ܆ ܕܰܨ̈ܠܰܘܳܬܳܐ ܕܰܚܠܳܦܰܝܟܽܘܢ ܢܶܡܬܚܽܘܢ ܕܰܟ̈ܝܳܬܳܐ܆ ܘܰܕܡܶܛܽܠ ܠܳܐ ܗܽܘܠܳܢܳܝܽܘܬܳܐ ܘܠܳܐ ܡܶܬܢܰܬܦܳܢܽܘܬܳܐ ܐܺܝܬܰܝܗܶܝܢ ܩܰܠܺܝ̈ܠܳܬܳܐ܆ ܘܕܰܠܘܳܬ ܫܡܰܝܳܐ ܛܳܝ̈ܣܳܢ. ܘܰܡܗܰܝܡܢܺܝܢ ܚ̱ܢܰܢ܆ ܕܗܰܘ ܚܰܕ ܐܰܠܳܗܳܐ ܕܒܰܬܠܺܝܬܳܝܽܘܬܳܐ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܐܰܝܟ ܫܽܘܪܳܐ ܬܠܺܝܬܳܝܳܐ ܘܠܳܐ ܡܶܬܬܰܪܥܳܢܳܐ ܠܰܡܕܺܝܢ̱ܬܳܐ ܢܶܗܘܶܐ܆ ܕܚܺܝܠܳܐ ܠܳܐ ܡܶܬܩܰܪܒܳܢܳܐ ܠܳܐܟܶܠܩܰܪܨܳܐ ܘܰܠ̈ܫܺܐܕܶܐ. ܬܶܫܒܽܘܚܬܳܐ ܗܳܟܺܝܠ ܥܰܠ ܟܽܠܗܶܝܢ ܢܰܣܶܩ܆ ܠܦܳܪܽܘܩܳܐ ܕܢܰܦ̈ܫܳܬܳܐ ܕܺܝܠܰܢ ܠܗܰܘ ܕܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܺܪܳܐ ܕܚܰܡܫܺܝܢ ܘܚܰܡܫܳܐ.