ܡܺܐܡܪܳܐ ܕܚܰܡܫܺܝܢ ܘܰܐܪܒܥܳܐ

ܠܘܳܬ ܗܳܢܽܘܢ ܕܡܶܢ ܒܳܬܰܪ ܒܳܥܽܘܬܳܐ ܠܒܶܝܬ ܚ̈ܙܘܳܢ̈ܶܐ ܐܶܙܰܠܘ. ܘܰܕܗܳܝ ܕܰܠܕܰܐܝܟ ܗܳܠܶܝܢ ܢܶܚܙܶܐ ܠܒܰܪ ܡܶܢ ܢܳܡܽܘܣܳܐ ܐܺܝܬܶܝܗ̇܆ ܘܙܳܕܶܩ ܠܡܶܩܕܰܡ ܒܰܥ̈ܒܳܕܶܐ ܕܰܬܝܳܒܽܘܬܳܐ܆ ܠܰܐܢܰܢܩܺܐ ܕܪܽܘܓܙܳܐ ܗܰܘ ܕܣܺܝܡ ܘܕܰܣܒܺܝܣܳܐܺܝܬ ܢܶܗܘܶܐ ܡܶܫܬܰܘܬܦܺܝܢܰܢ ܒܐ̱ܪ̈ܳܙܶܐ ܩܰܕܺܝ̈ܫܶܐ ܘܰܣܓܺܝ̈ܕܶܐ.

54: ܬܽܘܒ ܠܰܡܨܰܥܬܳܐ ܥܶܒܪܶܬ܆ ܟܰܕ ܣܦܺܝܩܽܘܬܳܐ ܡܰܢ ܘܠܳܐ ܚܕܳܐ ܐܺܝܬ ܠܺܝ܆ ܠܡܺܐܡܰܪ ܐܰܘ ܠܡܰܠܳܦܽܘ ܡܶܕܶܡ ܕܚܳܫܰܚ܆ ܟܰܕ ܡܶܢ ܥܢܳܢܳܐ ܕܡܰܪ̈ܢܝܳܬܳܐ ܗܽܘܠܳܢܳܝ̈ܳܬܳܐ ܡܶܬܚܰܫܰܚ ܐ̱ܢܳܐ܆ ܗܳܠܶܝܢ ܕܰܒܗܶܝܢ ܥܺܕܬܳܐ ܗܳܕܶܐ ܩܰܕܺܝܫܬܳܐ ܘܠܳܐ ܗܽܘܠܳܢܳܝܬܳܐ ܠܒܰܪ ܡܶܢ ܗܳܝ ܕܫܳܘܝܳܐ ܡܶܬܦܰܟܪܳܐ܆ ܟܰܕ ܐ̱ܢܳܫܺܝ̈ܢ ܒܺܐܝܕܳܐ ܒܺܐܝܕܳܐ ܒܝܽܘܩܪ̈ܶܐ ܐܰܟܣ̈ܢܳܝܶܐ ܘܠܳܐ ܟܳܗ̈ܢܳܝܶܐ ܡܰܛܥܢܺܝܢ ܠܳܗ̇. ܐܰܝܟܰܢܳܐ ܕܠܳܐ ܢܶܚܣܪܽܘܢ ܠܗܽܘܢ ܠܕܶܚ̈ܠܶܐ ܗܳܢܽܘܢ ܕܡܶܢ ܠܓܰܘ܆ ܫܓܽܘ̈ܫܝܶܐ ܕܡܶܢ ܠܒܰܪ܆ ܟܰܕ ܡܶܬܥܨܶܐ ܐ̱ܢܳܐ ܕܶܝܢ ܒܪܰܡ ܡܶܬܕܒܰܪ ܐ̱ܢܳܐ ܒܰܩܛܺܝܪܳܐ܆ ܡܶܛܽܠ ‌ܐܰܢܰܢܩܺܐ ܗܳܕܶܐ ܕܩܳܝܡܳܐ ܘܰܐܝܟ ܗܰܘ ܕܡܶܢ ܢܽܘܪܳܐ ܡܶܫܬܰܠܗܰܒ ܐ̱ܢܳܐ܆ ܠܘܳܬ ܗܳܕܶܐ ܡܶܬܕܚܶܐ ܐ̱ܢܳܐ܆ ܘܠܰܘ ܡܶܢ ܨܶܒܝܳܢܝ ܘܡܳܢܳܐ ܬܡܺܝܗܳܐ ܐܶܢ ܐܶܢܳܐ ܗܰܘ ܕܫܽܘܚ̈ܢܶܐ ܣܰܓܺܝ̈ܶܐܐ ܘܰܕܠܳܐ ܡܶܢܝܳܢ ܡܰܒܥܳܐ ܢܰܦܫܝ܆ ܚܶܫܶܬ ܗܳܕܶܐ ܘܠܳܐ ܡܶܫܟܰܚ ܐ̱ܢܳܐ ܠܡܶܫܬܰܩ܆ ܐܶܡܰܬܝ ܕܳܐܦ ܐܶܪܰܡܝܳܐ^[1]܆ ܗܰܘ ܕܡܶܢ ܟܰܪܣܳܐ ܕܶܐܡܶܗ ܐܺܝܬܰܘܗ̱ܝ ܗ̱ܘܳܐ ܕܰܡܩܰܕܰܫ܆ ܟܰܕ ܚܳܙܶܐ ܗ̱ܘܳܐ ܠܥܰܡܳܐ ܕܺܝܠܶܗ ܕܓܳܚܶܟ ܗ̱ܘܳܐ ܡܰܠܽܘܢ ܥܰܠ ܗܳܠܶܝܢ ܕܳܐܡܰܪ ܗ̱ܘܳܐ ܠܗܽܘܢ ܘܠܰܘ ܕܟܳܐܶܒ ܗ̱ܘܳܐ ܠܶܗ܆ ܘܰܕܡܶܨܛܰܕܶܐ ܗ̱ܘܳܐ ܘܠܰܘ ܕܡܶܬܟܡܰܪ ܐܰܘ ܕܡܶܬܶܐܒܶܠ܆ ܘܕܳܐܦܠܳܐ ܬܽܘܒ ܪܳܥܶܠ ܗ̱ܘܳܐ ܡܶܢ ܪܽܘܓܙܳܐ ܗܰܘ ܕܡܶܬܓܙܶܡ ܗ̱ܘܳܐ܆ ܟܰܕ ܕܳܢ ܠܡܶܫܬܰܩ܆ ܘܬܽܘܒ ܡܶܫܬܰܠܗܰܒ ܗ̱ܘܳܐ ܘܝܳܩܶܕ ܒܠܶܒܶܗ܆ ܘܠܰܡܡܰܠܳܠܽܘ ܡܶܬܶܐܠܶܨ ܗ̱ܘܳܐ܆ ܘܡܶܛܽܠ ܗܳܕܶܐ ܐܳܦ ܐܳܡܰܪ ܗ̱ܘܳܐ. ܠܡܰܥܘܠܳܢܽܘܬܳܐ ܘܰܠܕܳܘܝܽܘܬܳܐ ܐܶ݀ܩܪܶܐ܆ ܡܶܛܽܠ ܕܰܗܘܳܬ ܠܺܝ ܡܶܠܬܶܗ ܕܡܳܪܝܳܐ ܠܚܶܣܕܳܐ ܘܰܠܨܰܕܘܳܐ ܟܽܠܶܗ ܝܰܘܡܳܐ. ܘܶܐܡܪܶܬ ܕܠܳܐ ܐܶܫܰܡܰܗ ܫܡܶܗ ܕܡܳܪܝܳܐ. ܘܠܳܐ ܐܶ݀ܡܰܠܶܠ ܥܰܠ ܫܡܶܗ. ܘܰܗܘ̣ܳܐ ܒܠܶܒܳܐ ܕܺܝܠܝ ܐܰܝܟ ܢܽܘܪܳܐ ܕܝܳܩܕܳܐ. ܕܡܶܫܬܰܠܗܒܳܐ ܘܡܶܙܕܰܪܒܳܐ ܒܓܰܪ̈ܡܰܝ. ܘܠܳܐ ܡܶܫܟܰܚ ܐ̱ܢܳܐ ܠܰܡܣܰܝܒܳܪܽܘ.

ܣܳܦܶܩ ܡܰܢ ܗܳܟܺܝܠ ‌ܐܰܝܟ ܕܶܐܡܪܶܬ. ܕܢܶܗܘܶܐ ܐܶܣܳܪܳܐ ܕܠܶܫܳܢܳܐ ܕܺܝܠܝ ܡܚܺܝܠܳܐ ܘܒܰܠܚܽܘܕ܆ ܗܽܘ ܡܰܚܫܽܘܠܳܐ ܗܰܘ ܕܣܽܘܥܪ̈ܳܢܶܐ ܥܳܠ̈ܡܳܢܳܝܶܐ܆ ܐܳܦ ܫܓܽܘܫܝܳܐ ܗܰܘ ܕܡܶܢ ܠܒܰܪ ܕܗܳܢܽܘܢ ܕܠܽܘܩܒܰܠ ܡܶܠܬܳܐ ܬܪܺܝܨܬܳܐ ܡܰܩܪܒܺܝܢ. ܐܶܢܕܶܝܢ ܐܰܝܟ ܐܶܪܰܡܝܳܐ ܐܶ݀ܚܫܽܘܒ. ܕܳܐܦ ܠܺܝ ܗܘ̣ܳܬ ܡܶܠܬܶܗ ܕܡܳܪܝܳܐ ܠܚܶܣܕܳܐ ܘܰܠܨܰܕܘܳܐ. ܡܶܢ ܟܽܠ ܦܪܽܘܤ ܐܳܡܰܪ ܐܳܦ ܐܶܢܳܐ ܐܰܝܟ ܗܰܘ ܐܶܡܪܶܬ ܕܠܳܐ ܐܶܫܰܡܰܗ ܫܡܶܗ ܕܡܳܪܝܳܐ. ܘܠܳܐ ܐܶ݀ܡܰܠܶܠ ܥܰܠ ܫܡܳܐ ܕܺܝܠܶܗ. ܘܶܐ݀ܨܰܠܶܐ ܕܬܰܪܥܳܐ ܕܰܢܛܽܘܪܬܳܐ ܢܶܬܬܣܺܝܡ ܠܣܶܦ̈ܘܳܬܳܐ ܕܺܝܠܝ. ܘܶܐ݀ܬܥܰܢܘܶܐ ܫܶܬܩܳܐ ܡܫܰܡܠܝܳܐ. ܐܰܘ ܓܶܝܪ ܠܰܘ ܓܽܘܚܟܳܐ܆ ܘܨܰܕܘܳܐ ܓܰܠܝܳܐ ܕܡ̈ܶܠܶܐ ܕܡܳܪܝܳܐ ܐܺܝܬܶܝܗ̇܆ ܗܳܝ ܕܶܐܢܳܐ ܡܰܢ ܩܕܳܡ ܩܰܠܺܝܠ ܒܳܥ̈ܘܳܬܳܐ ܟܽܘܠ̈ܳܝܳܬ ܟܶܢܫܳܐ ܒܥܺܕܬܳܐ ܐܰ݀ܟܪܶܙ. ܘܕܶܡ̈ܥܶܐ ܘܡܰܘܕܝܳܢܽܘܬܳܐ ܕܗܳܠܶܝܢ ܕܶܐܬܚ̈ܛܺܝ̣ܝ̣ܢ222 ܘܨܰܘܡܳܐ. ܘܰܦܫܺܝܛܳܐܺܝܬ ܠܡܺܐܡܰܪ܆ ܬܽܘܪܳܨܳܐ ܕܡܶܢ ܬܝܳܒܽܘܬܳܐ. ܡܶܛܽܠ ܡܚܽܘܬܳܐ ܗܳܝ ܡܶܢ ܟܰܕܽܘ ܩܳܝܡܳܐ ܘܰܐܝܟ ܕܰܠܡܺܐܡܰܪ ܒܩܽܘܪܒܳܐ ܠܥܶܠ ܡܶܢ ܪܺܝܫܰܢ ܬܰܠ̣ܝܳܐ܆ ܘܺܐܝܬܶܝܗ̇ ܕܚܺܝܠܬܳܐ ܐܳܦ ܠܡܶܫܬܡܳܥܽܘ.

ܐܰܢ̱ܬܽܘܢ ܕܶܝܢ ܡܰܠܽܘܢ ܕܶܝܢ ܣܰܓܺܝ̈ܶܐܐ ܡܶܢܟܽܘܢ. ܠܳܐ ܓܶܝܪ ܐܺܝܬ ܠܺܝ ܕܰܠܟܽܠܟܽܘܢ ܐܶ݀ܩܰܛܪܶܓ. ܠܘܳܬ ܚܙܳܬܳܐ ܕܒܶܝܬ ܪܶܗܛܳܐ ܕܪ̈ܰܟܫܳܐ ܬܺܐܙܽܠ̱ܘܢ. ܘܰܠܘܳܬ ܗܰܝܟܠܳܐ ܗܰܘ ܕܓܽܘܚܟܳܐ. ܟܒܰܪ ܕܶܝܢ ܝܰܬܺܝܪ ܒܰܝܬܳܝܳܐ ܕܓܰܘܙܰܠܬܳܐ ܕܙܳܢܝܽܘܬܳܐ ܢܫܰܡܗܺܝܘܗ̱ܝ. ܘܬܶܐܰܛܪܽܘܢ ܕܟܽܠܳܗ̇ ܫܪܺܝܚܽܘܬܳܐ. ܐܶܠܳܐ ܬܺܐܡܰܪ: ܕܳܐܦ ܡܶܢ ܒܳܥ̈ܘܳܬܳܐ ܘܡܶܢ ܟܢܽܘܫ̈ܝܶܐ ܗܳܢܽܘܢ ܕܰܒܥܺܕܬܳܐ ܠܳܐ ܦܳܫ̣ܬ. ܘܳܐܦ ܠܚܶܙܘܳܢ̈ܶܐ ܗܳܢܽܘܢ ܒܳܗ̇ ܒܰܕܡܽܘܬܳܐ ܐܶܫܬܰܘܬܰܦܬ. ܐܺܝܛܰܐ ܠܳܐ ܫܳܡܰܥ ܐܰܢ̱ܬ ܠܦܰܘܠܽܘܤ ܕܰܠܩܽܘܪ̈ܝܢܬܝܐ ܟܳܬܶܒ. ܕܠܳܐ ܡܶܫܟܚܺܝܢ ܐܢ̱ܬܽܘܢ ܕܟܳܣܶܗ ܕܡܳܪܰܢ ܬܶܫܬܽܘܢ. ܘܟܳܣܳܐ ܕܫ̈ܺܐܕܶܐ܆ ܠܳܐ ܡܶܫܟܚܺܝܢ ܐܢ̱ܬܽܘܢ ܕܰܠܦܳܬܽܘܪܶܗ ܕܡܳܪܰܢ ܬܶܫܬܰܘܬܦܽܘܢ ܘܰܠܦܳܬܽܘܪܳܐ ܕܫ̈ܺܐܕܶܐ^[2]. ܘܠܳܐ ܐ̱ܢܳܫ ܚܰܟܺܝܡܳܐ ܕܰܡܝܰܬܪܳܐܺܝܬ ܐܳܡܰܪ. ܚܰܕ ܕܒܳܢܶܐ ܘܚܰܕ ܕܣܳܬܰܪ. ܡܳܢܳܐ ܝܰܬܺܝܪ ܐܰܘܬܰܪ. ܐܶܠܳܐ ܐܶܢ ܥܰܡܠܳܐ܆ ܕܥܳܡܶܕ ܘܣܳܚܶܐ ܡܶܢ ܡܺܝܬܳܐ ܘܬܽܘܒ ܓܳܫܶܦ ܒܶܗ܆ ܡܳܢܳܐ ܐܰܘܬܰܪ ܒܰܣܚܳܬܶܗ. ܗܳܟܰܢܳܐ ܒܰܪܢܳܫܳܐ ܕܨܳܐܶܡ ܥܰܠ ܚ̈ܛܳܗܰܘܗ̱ܝ. ܘܬܽܘܒ ܐܳܙܶܠ ܘܗܶܢܽܘܢ ܟܰܕ ܗܶܢܽܘܢ ܥܳܒܶܕ^[3]. ܕܗܳܢܽܘܢ ܓܶܝܪ ܕܗܳܠܶܝܢ ܕܰܠܒܰܪ ܡܶܢ ܢܳܡܽܘܣܳܐ ܣܳܥܪܺܝܢ ܘܡܶܢ ܪܰܫܺܝܥܽܘܬܳܐ ܡܶܬܡܠܶܝܢ܆ ܒܦܳܬܽܘܪܳܐ ܘܰܒܟܳܣܳܐ ܡܶܣܬܰܒܪܺܝܢ ܕܡܶܫܬܰܘܬܦܺܝܢ. ܘܕܳܐܟܠܺܝܢ ܘܫܳܬܶܝܢ ܠܗܳܠܶܝܢ ܕܨܳܒܶܝܢ ܒܗܶܝܢ ܘܣܳܥܪܺܝܢ. ܣܳܗܶܕ ܐܳܦ ܟܬܳܒܳܐ ܟܳܗܢܳܝܳܐ ܕܡܶܛܽܠ ܗܳܠܶܝܢ ܕܕܰܐܝܟ ܗܳܟܰܢ ܗܳܟܰܢܳܐ ܐܳܡܰܪ: ܗܳܠܶܝܢ ܓܶܝܪ ܐܳܟܠܺܝܢ ܡܶܐܟ̈ܠܳܬܳܐ ܕܪܽܘܫܥܳܐ܆ ܒܚܰܡܪܳܐ ܕܶܝܢ ܒܗܰܘ ܕܰܠܒܰܪ ܡܶܢ ܢܳܡܽܘܣܳܐ ܪܳܘܶܝܢ^[4].

ܘܰܐܝܕܳܐ ܥܰܘܳܠܽܘܬܳܐ ܗܳܝ ܢܺܐܡܰܪ ܐ̱ܢܳܫ܆ ܗܳܝ ܕܠܰܐܓܽܘܢܳܐ ܕܪ̈ܰܟܫܳܐ ܢܶܚܙܶܐ. ܣܰܓܺܝܐܬܳܐ ܘܠܰܘ ܐܰܝܕܳܐ ܕܗܺܝ. ܥܰܡ ܦܰܪܶܗ̱ܣܺܝܰܐ ܐܰܘ ܗܳܢܳܐ ܐܶ݀ܦܰܢܶܐ ܠܳܟ ܦܶܬܓܳܡܳܐ. ܩܰܕܡܳܐܺܝܬ ܡܰܢ ܓܶܝܪ܆ ܕܟܽܠ ܚܰܕ ܡܶܢ ܚܶܙܘܳܢ̈ܶܐ܆ ܠܚܰܕ ܡܶܢ ܐܰ‌ܠܳܗ̈ܶܐ ܗܳܢܽܘܢ ܕܰܓܳܠܰܝ̈ ܫܡܳܐ ܡܶܢ ܟܽܠ ܦܪܽܘܤ ܦܪܺܝܫ ܘܣܺܝܡ ܐܰܝܟ ܕܠܺܐܝܩܳܪܶܗ܆ ܠܦܽܘܣܺܝܕܽܘܢ ܡܰܢ ܗܰܘ ܕܪ̈ܰܟܫܳܐ. ܠܰܐܪܺܝܤ ܕܶܝܢ ܗܰܘ ܕܗܳܢܽܘܢ ܕܰܠܚܽܘܕܳܐܺܝܬ ܡܶܬܟܰܬܫܺܝܢ. ܠܰܐܪܛܺܝܡܺܝܤ ܕܶܝܢ 222ܗܰܘ ܕܡܶܬܟܰܬܫܰܝ̈ ܥܰܡ ܚܰܝ̈ܘܳܬܳܐ. ܠܕܺܝܘܢܽܘܣܽܘܤ ܕܶܝܢ ܡܰܫܟܢܳܐ ܗܰܘ ܕܬܶܐܰܛܪܽܘܢ. ܘܰܐܝܟܰܢܳܐ ܢܶܫܦܪ̈ܳܢ ܠܰܐܠܳܗܳܐ܆ ܗܳܠܶܝܢ ܕܰܠܫ̈ܺܐܕܶܐ ܡܰܦ̈ܨܚܳܢ ܟܺܝܬ ܘܰܡܢܺܝ̈ܚܳܢ. ܐܰܝܟܰܢܳܐ ܕܶܝܢ ܠܘܳܬ ܗܳܢܶܝܢ ܢܶܪܗܰܛ ܬܽܘܒ܆ ܠܘܳܬ ܗܳܢܶܝܢ ܕܢܳܡܽܘܣܳܐܺܝܬ ܟܦܰܪܢܰܢ ܒܗܶܝܢ܆ ܐܶܡܰܬܝ ܕܰܠܘܳܬ ܥܰܒܕܽܘܬܳܐ ܗܳܝ ܕܰܡܫܺܝܚܳܐ ܡܶܬܟܰܬܒܺܝܢ ܗ̱ܘܰܝܢ܆ ܘܰܩܝܳܡ̈ܶܐ ܕܫܰܠܡܽܘܬܳܐ ܠܘܳܬܶܗ ܣܳܝܡܺܝܢ ܗ̱ܘܰܝܢ܆ ܘܰܥܬܺܝܕܺܝܢ ܗ̱ܘܰܝܢ ܠܡܶܫܬܘܳܝܽܘ ܠܰܥܡܳܕܳܐ ܗܰܘ ܐܰ‌‌ܠܳܗܳܝܳܐ ܘܦܳܪܽܘܩܳܝܳܐ. ܗܳܠܶܝܢ ܓܶܝܪ ܐܺܝܬܰܝܗܶܝܢ. ܡܶܙܕܰܝܚܳܢܽܘܬܶܗ ܕܳܐܟܶܠܩܰܪܨܳܐ ܘܦܽܘܠܚܳܢܳܐ ܕܥܺܐܕܰܘ̈ܗ̱ܝ܆ ܗܳܠܶܝܢ ܕܰܟܦܰܪܢܰܢ ܒܗܶܝܢ. ܕܬܰܪܬܶܝܢ ܕܶܝܢ ܕܳܐܦܶܢ ܗܳܫܳܐ ܢܺܐܡܰܪ ܐ̱ܢܳܫ܆ ܕܠܰܘ ܠܘܳܬ ܐܺܝܩܳܪܳܐ ܕܫ̈ܺܐܕܶܐ ܚܳܝܪ̈ܳܢ ܗܳܠܶܝܢ ܕܡܶܫܬܰܡ̈ܠܝܳܢ܆ ܐܶܠܳܐ ܠܘܳܬ ܗܰܢܺܝܽܐܘܬܳܐ ܕܺܝܠܰܢ. ܐܶܠܳܐ ܡܰܪܓܙܳܐ ܠܶܗ ܠܗܰܘ ܕܰܥܒܰܕ܆ ܗܳܝ ܕܰܠܒܰܪ ܡܶܢ ܗܰܘ ܡܳܐ ܕܰܦܩܺܝܕ ܠܶܗ܆ ܢܶܬܚܰܫܰܚ ܒܗܶܝܢ ܒܚܰܝ̈ܘܳܬܳܐ ܗܳܠܶܝܢ ܠܳܐ ܡܠܺܝ̈ܠܳܬܳܐ. ܐܳܦ ܓܶܝܪ ܟܽܠ ܚܕܳܐ ܡܶܢܗܶܝܢ܆ ܠܗܳܝ ܕܣܽܘܢܩܳܢܳܐ ܡܶܕܶܡ ܕܚܰܝ̈ܶܐ ܕܥܳܠܡܳܐ ܬܡܰܠܶܐ ܥܒܺܝܕܳܐ܆ ܘܠܰܘ ܠܦܽܘܪܓܳܝܳܐ ܝܰܬܺܝܪܳܐ ܘܰܕܠܳܐ ܚܰܫܚܽܘ. ܣܽܘܣܝܳܐ ܓܶܝܪ ܡܶܛܽܠ ܗܳܕܶܐ ܝܺܗܺܝܒ ܠܰܒܢܰܝ̈ܢܳܫܳܐ܆ ܐܰܝܟܰܢܳܐ ܕܟܰܕ ܪܳܟܒܺܝܢ ܠܳܗ̇ ܠܚܰܝܽܘܬܳܐ ܩܰܠܺܝܠܳܐܺܝܬ ܢܫܰܡܠܽܘܢ ܡܰܪ̈ܕܝܳܬܳܐ ܕܽܐܘܪܚܳܐ܆ ܘܰܕܠܽܘܩܒܰܠ ܡܰܩܪ̈ܒܳܢܶܐ ܟܰܕ ܐܳܬܶܝܢ ܥܠܰܝܗܽܘܢ ܢܶܦܩܽܘܢ܆ ܟܰܕ ܡܥܰܕܪܳܢܳܐ ܘܰܡܣܰܝܥܳܢܳܐ ܐܺܝܬܰܘܗ̱ܝ ܠܗܽܘܢ܆ ܒܰܩܪܳܒܳܐ ܗܰܘ ܕܠܽܘܩܒܰܠ ܒܥܶܠ̈ܕܒܳܒܶܐ. ܗܳܝ ܟܺܝܬ ܕܳܐܦ ܗܰܘ ܕܰܒܝܰܕ ܥܰܠܥܳܠܳܐ ܘܰܥܢܳܢ̈ܶܐ ܡܡܰܠܶܠ ܗ̱ܘܳܐ ܠܺܐܝܽܘܒ ܐܳܡܰܪ^[5]: ܐܰܘ ܐܰܢ̱ܬ ܣܳܡܬ ܚܰܝܠܳܐ ܠܣܽܘܣܝܳܐ܆ ܘܰܐ‌ܠܒ̣ܶܫܬ ܠܰܩܕܠܳܐ ܕܺܝܠܶܗ ܕܶܚܠܬܳܐ ܟܰܕ ܦܳܓܰܥ ܒܓܶܐܪܳܐ ܡܰܓܚܶܟ܆ ܘܠܳܐ ܢܰܗܦܶܟ ܐܰܦܰܘ̈ܗ̱ܝ ܡܶܢ ܦܰܪܙܠܳܐ܆ ܟܰܕ ܩܰܪܢܳܐ ܕܶܝܢ ܡܫܰܘܕܥܳܐ ܐܳܡܰܪ܆ ܐܶܗܶܐ ܐܶܗܶܐ܆ ܡܶܢ ܪܽܘܚܩܳܐ ܕܶܝܢ ܡܪܺܝܚ ܒܰܩܪܳܒܳܐ^[6]܆ ܟܬܺܝܒ ܕܶܝܢ ܐܳܦ ܒܡ̈ܰܬܠܶܐ ܒܳܗ̇ ܒܰܕܡܽܘܬܳܐ܆ ܣܽܘܣܝܳܐ ܡܶܬܛܰܝܰܒ ܠܝܰܘܡܳܐ ܕܰܩܪܳܒܳܐ. ܡܶܢ ܠܘܳܬ ܡܳܪܝܳܐ ܕܶܝܢ ܐܺܝܬܰܘܗ̱ܝ ܥܽܘܕܪܳܢܳܐ^[7].

ܡܶܛܽܠ ܗܳܠܶܝܢ ܚܳܫܚܳܐܺܝܬ ܐܶܬܬܰܝܬܝܰܬ̣ ܗܺܝ ܚܰܝܽܘܬܳܐ ܠܥܽܘܡܪܳܐ ܕܰܒܢܰܝ̈ܢܳܫܳܐ܆ ܠܰܘ ܐܰܝܟܰܢܳܐ ܕܬܶܦܣܩܺܝܗ̇ ܟܰܕ ܒܫܰܒܥܳܐ ܚܽܘܕܪ̈ܺܝܢ ܡܰܟܪܶܟ ܐܰܢ̱ܬ ܠܳܗ̇܆ ܘܡܰܪ̈ܟܒܳܬܳܐ ܠܽܘܩܒܰܠ ܡܰܪ̈ܟܒܳܬܳܐ ܬܰܦܶܩ܆ ܘܰܒܚܺܐܦܳܐ ܕܓܺܝ̈ܓܠܶܐ ܬܦܰܣܶܩ ܪ̈ܶܓܠܰܝܗܽܘܢ܆ ܘܟܰܕ ܒܡܰܦܰܠܬܳܐ ܕܳܘܺܝܬܳܐ ܘܡܶܬܚܰܢܳܢܺܝܬܳܐ ܚܳܕܶܐ ܐܰܢ̱ܬ ܬܩܽܘܫ ܟܰܦܳܐ܆ ܠܰܘ ܓܶܝܪ ܗܳܟܰܢܳܐ ܪܳܕܶܐ ܘܡܰܠܶܦ ܠܳܟ ܟܬܳܒܳܐ ܐܰ‌ܠܳܗܳܝܳܐ܆ ܐܶܠܳܐ ܒܕܰܠܩܽܘܒܠܳܐ. ܕܟܰܕ ܒܗܳܢܳܐ ܙܢܳܐ ܣܺܝܡ ܐܰܢ̱ܬ܆ ܚܰܪܡܽܘܬܳܐ ܘܥܰܘܳܠܽܘܬܳܐ ܡܰܟܬܶܒ ܥܠܰܝܟ܆ ܟܰܕ ܗܳܟܰܢܳܐ ܐܳܡܰܪ: ܚܳܐܶܤ ܙܰܕܺܝܩܳܐ ܥܰܠ ܢܰܦ̈ܫܳܬܳܐ ܕܰܒܥܺܝܪܶܗ܆ ܪ̈ܰܚܡܰܝܗܽܘܢ^[8] ܕܶܝܢ ܕܪ̈ܰܫܺܝܥܶܐ ܕܠܳܐ ܪ̈ܰܚܡܶܐ ܐܺܝܬܰܝܗܽܘܢ^[9]. ܗܳܝ ܓܶܝܪ ܕܰܐܡܺܝܪܳܐ ܠܚܰܟܺܝܡܳܐ ܦܰܘܠܽܘܤ: ܕܰܠܡܳܐ ܥܰܠ ܬܰܘܪ̈ܶܐ ܒܛܺܝܠ ܠܶܗ ܠܰܐܠܳܗܳܐ^[10]܆ ܠܘܳܬ ܣܽܘܟܳܠܳܐ ܐ̱ܚܪܺܢܳܐ ܚܳܝܪܳܐ܆ ܟܰܕ ܓܶܝܪ ܡܡܰܠܶܠ ܗ̱ܘܳܐ ܠܩܽܘܪ̈ܝܢܬܳܝܶܐ܆ ܡܶܛܽܠ ܗܳܝ ܕܙܳܕܶܩ ܠܗܽܘܢ ܠܗܳܢܽܘܢ ܕܠܶܐܘܰܢܓܶܠܺܝܽܘܢ ܡܰܟܪܙܺܝܢ܆ ܕܡܶܢ ܐܶܘܰܢܓܶܠܺܝܽܘܢ ܢܺܚܽܘܢ ܐܳܡܰܪ ܗ̱ܘܳܐ^[11]܆ ܕܡܰܢܽܘ ܕܡܰܦܠܰܚ ܡܬܽܘܡ ܒܢܰܦ̈ܩܳܬܳܐ ܕܡܶܢ ܕܺܝܠܶܗ. ܡܰܢܽܘ ܢܳܨܶܒ ܟܰܪܡܳܐ. ܘܡܶܢ ܦܺܐܪ̈ܰܘܗ̱ܝ ܠܳܐ ܐܳܟܶܠ. ܡܰܢܽܘ ܪܳܥܶܐ ܡܰܪܥܺܝܬܳܐ܆ ܘܡܶܢ ܚܰܠܒܳܐ ܕܡܰܪܥܺܝܬܳܐ ܠܳܐ ܐܳܟܶܠ^[12]. ܕܰܠܡܳܐ ܐܰܝܟ ܒܰܪܢܳܫܳܐ ܗܳܠܶܝܢ ܡܡܰܠܶܠ ‌ܐ̱ܢܳܐ܆ ܐܰܘ ܐܳܦ ܢܳܡܽܘܣܳܐ ܠܰܘ ܗܳܠܶܝܢ ܐܳܡܰܪ. ܒܢܳܡܽܘܣܳܐ ܓܶܝܪ ܗܰܘ ܕܡܽܘܫܶܐ ܟܬܺܝܒ܆ ܠܳܐ ܬܶܒܠܽܘܡ ܬܰܘܪܳܐ ܕܡܰܕܪܶܟ܆ ܕܰܠܡܳܐ ܥܰܠ ܬܰܘܪ̈ܶܐ ܒܛܺܝܠ ܠܶܗ ܠܰܐܠܳܗܳܐ^[13]. ܗܳܕܶܐ ܗܳܟܺܝܠ ‌ܐܺܝܬܶܝܗ̇ ܗܳܝ ܕܶܐܡܰܪ ܦܽܘܩܕܳܢܳܐ ܗܰܘ ܢܳܡܽܘܣܳܝܳܐ܆ ܗܰܘ ܕܦܳܩܶܕ ܠܳܐ ܬܶܒܠܽܘܡ ܬܰܘܪܳܐ ܕܡܰܕܪܶܟ. ܣܳܡ ܢܳܡܽܘܣܳܐ ܐܰ‌ܠܳܗܳܐ. ܠܰܘ ܕܥܰܠ ܫܰܦܺܝܪܽܘܬ ܢܳܡܽܘܣܳܐ ܕܡܶܛܽܠ ܬܰܘܪ̈ܶܐ ܒܛܺܝܠ ܗ̱ܘܳܐ ܠܶܗ. ܡܳܢܳܐ ܓܶܝܪ ܡܶܢ ܗܳܠܶܝܢ ܕܰܫܟܺܝܪ̈ܳܢ ܐܺܝܬܶܝܗ̇ ܗ̱ܘܳܬ ܗܳܕܶܐ. ܕܢܶܬܒܰܠܡܽܘܢ ܘܢܶܬܬܰܟܣܽܘܢ ܒܶܐܕܪܳܐ܆ ܠܘܳܬ ܗܳܝ ܕܢܶܥܒܕܽܘܢ ܦܽܘܠܚܳܢܗܽܘܢ ܝܰܨܺܝܦܳܐܺܝܬ. ܘܠܰܘ ܠܘܳܬ ܟܰܪܣܳܐ ܢܚܽܘܪܽܘܢ ܠܒܰܪ ܡܶܢ ܙܰܒܢܳܐ ܕܙܳܕܶܩ܆ ܐܶܠܳܐ ܠܰܢ ܡܶܢ ܦܽܘܩܕܳܢܳܐ ܡܰܠܶܦ. ܕܙܰܕܺܝܩܳܐ ܐܺܝܬܶܝܗ̇ ܕܗܳܢܽܘܢ ܕܦܳܠܚܺܝܢ܆ ܡܶܢ ܗܳܠܶܝܢ ܕܰܒܗܶܝܢ ܠܳܐܶܝܢ. ܐܳܦ ܢܶܬܬܰܪܣܽܘܢ. ܡܶܛܽܠܳܬܳܗ̇ ܟܺܝܬ ܕܗܳܕܶܐ ܐܳܦ ܡܰܝܬܶܐ ܒܳܬܪܳܗ̇ ܟܰܕ ܐܳܡܰܪ: ܐܰܘ ܡܶܛܽܠܳܬܰܢ ܡܶܢ ܟܽܠܦܪܽܘܤ ܐܳܡܰܪ. ܡܶܛܽܠܳܬܰܢ ܓܶܝܪ ܐܶܬܟܰܬܒܰܬ. ܡܶܛܽܠ ܕܥܰܠ ܣܰܒܪܳܐ ܘܳܠܶܐ ܠܶܗ ܠܗܰܘ ܕܟܳܪܶܒ ܠܡܶܟܪܰܒ. ܘܗܰܘ ܕܡܰܕܪܶܟ܆ ܥܰܠ ܣܰܒܪܳܐ ܕܗܳܝ ܕܢܶܫܬܰܘܬܰܦ ܘܢܶܐܟܽܘܠ.

ܡܶܛܽܠ ܟܺܝܬ ܕܥܰܠ ܟܽܠ ܡܶܕܶܡ ܒܛܺܝܠ ܠܶܗ ܐܰ‌ܠܳܗܳܐ܆ ܘܰܕܟܽܠܗܶܝܢ ܝܳܨܶܦ. ܘܥܰܠ ܟܽܠܗܶܝܢ ܡܪܰܚܶܡ ܐܰܝܟ ܐܰ‌ܠܳܗܳܐ܆ ܝܺܕܺܝܥܳܐ ܗܝ ܘܛܳܒ ܓܰܠܝܳܐ. ܦܳܬܰܚ ܐܰܢ̱ܬ ܓܶܝܪ ܐܺܝܕܳܟ܆ ܘܡܳܠܶܐ ܐܰܢ̱ܬ ܠܟܽܠ ܚܰܝܽܘܬܳܐ ܡܶܢ ܫܰܦܺܝܪܽܘܬ ܨܶܒܝܳܢܳܐ^[14]܆ ܐܳܡܰܪ ܠܘܳܬܶܗ ܢܒܺܝܳܐ ܗܰܘ ܕܰܡܙܰܡܰܪ܆ ܐܶܠܳܐ ܬܽܘܒ ܐܳܦ ܐ̱ܢܳܫ ܚܰܟܺܝܡܳܐ ܐܳܡܰܪ: ܕܳܐܦ ܗܳܝ ܕܥܰܠ ܟܽܠ ܫܰܠܺܝܛ ܐܰܢ̱ܬ ܕܥܰܠ ܟܽܠ ܬܚܽܘܤ ܥܳܒܕܳܐ ܠܳܟ. ܟܳܬܶܒ ܕܶܝܢ ܐܳܦ ܐ̱ܚܪܺܢܳܐ܆ ܕܪ̈ܰܚܡܶܐ ܕܒܰܪܢܳܫܳܐ ܥܰܠ ܩܰܪܺܝܒܶܗ. ܪ̈ܰܚܡܶܐ ܕܶܝܢ ܕܡܳܪܝܳܐ ܥܰܠ ܟܽܠ ܒܣܰܪ. ܐܳܦ ܓܶܝܪ ܠܰܘ ܡܶܛܽܠ ܟܺܝܬ ܕܡܶܕܶܡ ܡܶܕܶܡ ܡܶܢܗܶܝܢ ܕܰܒܥܺܝܪ̈ܳܐ ܝܺܗܝ̈ܒܳܢ ܠܰܒܢܰܝ̈ ܐ̱ܢܳܫܳܐ ܠܢܶܟܣܬܳܐ ܘܰܠܡܶܐܟܽܘܠܬܳܐ. ܡܶܛܽܠ ܗܳܕܶܐ ܐܳܦ ܟܰܕ ܚܰܝ̈ܳܢ܆ ܠܳܐ ܡܪܰܚܡܳܢܳܐܺܝܬ ܙܳܕܶܩ ܠܰܢ ܠܡܶܬܚܰܫܳܚܽܘ ܒܗܳܠܶܝܢ܆ ܘܳܐܦܠܳܐ ܚܰܕ ܚܰܘܣܳܢܳܐ ܢܶܗܘܶܐ ܐܺܝܬ ܠܰܢ ܥܠܰܝܗܶܝܢ. ܘܬܶܐܓܽܘܪܬܳܐ ܒܰܛܺܝܠܬܳܐ ܘܡܰܚܣܪܳܢܺܝܬܳܐ ܕܫܶܥܝܳܐ ܘܕܰܦܨܺܝܚܽܘܬܳܐ ܫܺܐܕܳܢܳܝܬܳܐ܆ ܢܶܥܒܕܺܝܘܗ̱ܝ ܠܫܶܦܠܳܐ ܘܥܰܡܠܳܐ ܘܰܠܡܰܘܬܳܐ ܕܪ̈ܰܟܫܳܐ܆ ܘܗܳܠܶܝܢ ܡܰܢܽܘ ܘܰܐܝܠܶܝܢ. ܚܢܰܢ ܗܳܢܽܘܢ ܕܰܡܕܰܡܝܳܢܽܘܬܳܐ ܕܰܐ‌ܠܳܗܳܐ ܡܶܬܬܰܒܥܺܝܢ ܚ̱ܢܰܢ܆ ܗܘ̣ܰܘ ܓܶܝܪ ܡܪ̈ܰܚܡܳܢܶܐ ܐܳܡܰܪ ܐܰܝܟܰܢܳܐ ܕܰܐܒܽܘܟܽܘܢ ܡܪܰܚܡܳܢܰܐ ܗ̄ܘ^[15].

ܕܫܺܐܕܳܢܳܝܬܳܐ ܕܶܝܢ ܐܺܝܬܶܝܗ̇ ܚܙܳܬܳܐ ܗܳܝ ܕܪ̈ܰܟܫܳܐ ܣܳܗܕܺܝܢ ܗܶܢܽܘܢ ܠܽܘ̈ܬܳܟܶܐ ܘܦܽܘܪ̈ܣܶܐ ܨܢܺܝ̈ܥܶܐ ܗܳܢܽܘܢ ܕܬܰܡܳܢ܆ ܘܰܡܡܰܪܝܳܢܽܘܬܳܐ ܗܳܝ ܕܕܳܡܝܳܐ ܠܰܕܚܰܪ̈ܳܫܶܐ. ܘܩ̈ܶܛܠܶܐ ܗܳܠܶܝܢ ܚܰܪ̈ܡܶܐ ܘܰܩܫܰܝ̈ܳܐ ܘܰܕܠܳܐ ܢܳܡܽܘܤ ܕܡܰܛܥ̈ܝܳܢܶܐ. ܗܳܠܶܝܢ ܕܡܶܬܬܰܡܪܚܺܝܢ ܠܽܘܩܒܰܠ ܩܰܘܡܬܳܐ ܗܳܝ ܙܥܽܘܪܬܳܐ ܘܫܰܒܪܳܝܬܳܐ. ܘܰܕܡܶܫܟ̈ܚܳܢ ܣܰܓܺܝ ܕܢܰܪ̈ܓܙܳܢܳܝܗ̱ܝ ܠܰܐܠܳܗܳܐ. ܘܰܕܫܳܘ̈ܝܳܢ ܠܪܰܒܽܘܬ ܦܶܩ̈ܥܶܐ ܘܒܰܪ̈ܩܶܐ ܡܰܘܩ̈ܕܳܢܶܐ. ܐܶ‌ܠܽܘ ܕܶܝܢ ܘܳܐܦ ܕܰܡܚܰܪܪܳܐ ܡܶܢ ܗܳܠܶܝܢ ܐܺܝܬܶܝܗ̇ ܗ̱ܘܳܬ ܗܺܝ ܦܨܺܝܚܽܘܬܳܐ. ܡܶܢ ܦܺܐܪ̈ܶܝܗ̇ ܒܳܩܶܝܢ ܗ̱ܘܰܝܢ ܠܳܗ̇. ܕܡܶܢ ܦܺܐܪ̈ܰܘܗ̱ܝ ܓܶܝܪ ܡܶܬܺܝܕܰܥ ܐܺܝܠܳܢܳܐ^[16]܆ ܕܰܡܫܺܝܚܳܐ ܐܰ‌ܠܳܗܳܐ ܘܦܳܪܽܘܩܳܐ ܗܰܘ ܕܠܳܐ ܕܰܓܳܠܳܐ ܐܺܝܬܰܘܗ̱ܝ ܦܳܣܩܳܐ܆ ܐܰܝܠܶܝܢ ܗܳܟܺܝܠ ‌ܐܺܝܬܰܝܗܽܘܢ ܦܺܐܪ̈ܶܐ ܕܬܰܟܬܘ̈ܫܶܐ ܗܳܠܶܝܢ ܕܪ̈ܰܟܫܳܐ܆ ܚܶܪ̈ܝܳܢܶܐ ܘܓܽܘ̈ܕܳܦܶܐ ܘܬܰܟ̈ܬܽܘܫܶܐ ܘܒܽܘܠܒܳܠܳܐ ܕܥܰܡܳܐ ܘܰܩܥܳܬܳܐ ܘܰܪ̈ܓܽܘܡܝܶܐ ܕܟܺܐܦ̈ܶܐ ܘܰܩܪ̈ܳܒܶܐ ܕܰܒ̈ܢܰܝ ܫܰܪܒܬܳܐ ܘܩ̈ܶܛܠܶܐ ܘܝܰܩ̈ܕܳܢܶܐ. ܒܚܰܕ ܡܶܢ ܗܳܠܶܝܢ ܚ̈ܛܳܗܶܐ ܐܰܝܟ ܕܰܒܣܽܘܓܳܐܐ܆ ܘܳܐܦ ܗܽܘ ܗܰܘ ܕܺܐܝܬܰܘܗ̱ܝ ܝܰܬܺܝܪ ܢܰܟܦܳܐ ܡܶܢܗܽܘܢ ܕܚܰܙܳܝ̈ܶܐ ܟܡܳܐ ܙܰܒ̈ܢܺܝܢ ܢܳܦܶܠ. ܐܰܘ ܓܶܝܪ ܩܥܳܐ ܐܰܘ ܐܶܬܚܪܺܝ. ܐܰܘ ܓܰܕܶܦ܆ ܐܰܘ ܠܘܳܬ ܪܽܘܓܙܳܐ ܐܶܬܓܰܘܙܰܠ ܘܨܰܥܪܳܐ܆ ܘܡܳܢܰܐ ܗ̄ܘ ܡܣܳܡ ܒܪܺܝܫܳܐ ܕܥܰܠ ‌ܐܰܦ̈ܰܝ ܗܳܠܶܝܢ. ܡܰܗܦܟܽܘܬ ܐܰܦ̈ܶܐ ܡܶܬܢܰܟܪܝܳܢܽܘܬܳܐ ܕܡܶܢ ܐܰ‌ܠܳܗܳܐ. ܕܗܳܝ ܕܡܳܢܳܐ ܢܶܗܘܶܐ ܕܝܰܬܺܝܪ ܩܫܶܐ ܡܶܢܳܗ̇.

ܘܰܕܫܳܥܬܳܐ: ܫܡܰܥ ܡܶܛܽܠ ܩܥܳܬܳܐ܆ ܗܳܝ ܕܡܶܣܬܰܒܪܳܐ ܕܺܐܝܬܶܝܗ̇ ܕܝܰܬܺܝܪ ܩܰܠܺܝܠܳܐ ܡܶܢ ܗܳܠܶܝܢ ܐ̱ܚܪ̈ܳܢܝܳܬܳܐ. ܐܶܡܰܪ ܕܶܝܢ ܡܳܪܝܳܐ܆ ܩܥܳܬܳܐ ܕܰܣܕܽܘܡ ܘܰܕܥܰܡܽܘܪܰܐ ܣܶܓܝܰܬ ܠܘܳܬܝ ܘܰܚ̈ܛܳܗܶܐ ܕܺܝܠܗܽܘܢ ܪܰܘܪܒܺܝܢ ܣܰܓܺܝ^[17]܆ ܗܳܕܶܐ ܒܰܠܚܽܘܕ ܣܳܦܩܳܐ ܠܰܡܚܰܘܳܝܽܘ. ܕܕܰܐܝܟ ܐܰܝܢܳܐ ܡܶܕܶܡ ܐܺܝܬܶܝܗ̇ ܩܥܳܬܳܐ. ܩܰܕܡܳܐܺܝܬ ܕܕܰܣܕܽܘܡ ܘܰܕܥܰܡܽܘܪܰܐ ܐܺܝܬܶܝܗ̇ ܩܽܘܛܪܳܓܳܐ. ܘܳܐܦ ܒܝܰܕ ܐܶܫܰܥܝܳܐ ܕܶܝܢ ܗܰܘ ܢܒܺܝܳܐ ܐܳܡܰܪ ܐܰ‌ܠܳܗܳܐ. ܟܰܪܡܶܗ ܓܶܝܪ ܕܡܳܪܝܳܐ ܨܒܰܐܘܽܬ. ܒܰܝܬܳܐ ܕܺܐܝܣܪܳܐܶܝܠ ‌ܐܺܝܬܰܘܗ̱ܝ܆ ܘܓܰܒܪ̈ܶܐ ܕܺܝܗܽܘܕܳܐ. ܟܰܪܡܳܐ ܢܨܺܝܒ ܚܰܕܬܳܐܺܝܬ ܚܰܒܺܝܒܳܐ܆ ܣܰܟܺܝܬ ܕܢܶܥܒܶܕ ܕܺܝܢܳܐ܆ ܥܒܰܕ ܕܶܝܢ ܠܳܐ ܢܳܡܽܘܣܳܝܽܘܬܳܐ. ܘܠܰܘ ܙܰܕܺܝܩܽܘܬܳܐ܆ ܐܶܠܳܐ ܩܥܳܬܳܐ^[18]. ܡܳܢܳܐ ܕܶܝܢ. ܩܥܳܬܳܐ ܡܶܢ ܬܚܶܝܬ ܩܛܺܝܓܪܳܢܽܘܬܳܐ ܐܺܝܬܶܝܗ̇.

ܚܶܪܝܳܢܳܐ ܕܶܝܢ܆ ܡܶܢ ܗܳܠܶܝܢ ܕܡܶܬܩܰܠ̈ܣܳܢ ܐܺܝܬܰܘܗ̱ܝ܆ ܘܠܳܐ ܥܰܠ ܟܽܠܶܗ܆ ܚܙܺܝ ܓܶܝܪ ܐܰܝܟܰܢܳܐ ܒܝܰܕ ܚܰܙܩܺܝܐܶܝܠ ܒܥܶܕܠܳܝ̈ܶܐ ܪܰܘܪ̈ܒܶܐ ܣܳܐܶܡ ܠܶܗ ܐܰ‌ܠܳܗܳܐ ܟܰܕ ܐܳܡܰܪ: ܒܰܝܬܳܐ ܕܶܝܢ ܕܺܐܝܣܪܳܐܶܝܠ ܠܳܐ ܢܶܨܒܽܘܢ ܠܡܰܫܡܥܳܟ܆ ܡܶܛܽܠ ܕܠܳܐ ܨܳܒܶܝܢ ܠܡܶܫܡܥܰܢܝ܆ ܡܶܛܽܠ ܕܟܽܠܶܗ ܒܰܝܬܳܐ ܕܺܐܝܣܪܳܐܶܝܠ ܚܶܪ̈ܝ̣ܳܝ̣ܶܐ ܐܺܝܬܰܝܗܽܘܢ ܘܩܰܫ̈ܝ̣ܰܝ̣ ܠܶܒܳܐ^[19]. ܡܶܬܒܰܩܶܐ ܐܰܢ̱ܬ܆ ܕܰܐܝܟܰܢܳܐ ܚܶܪܝܳܢܳܐ ܥܰܡ ܠܳܐ ܡܶܫܬܰܡܥܳܢܽܘܬܳܐ ܘܥܰܡ ܩܰܫܝܽܘܬ ܠܶܒܳܐ ܡܛܰܟܰܤ. ܦܰܘܠܽܘܤ ܕܶܝܢ ܠܗܳܠܶܝܢ ܟܽܠܗܶܝܢ ܟܢܺܝܫܳܐܺܝܬ ܣܳܐܶܡ ܐܰܝܟ ܐܰܝܠܶܝܢ ܕܰܡܥܺܝ̈ܩܳܢ ܘܡܰܪ̈ܓܙܳܢ ܠܪܽܘܚܳܐ ܩܰܕܺܝܫܳܐ. ܟܬܰܒ ܓܶܝܪ ܗܳܟܰܢܳܐ: ܘܠܳܐ ܬܥܺܝܩܽܘܢ ܠܪܽܘܚܳܐ ܩܰܕܺܝܫܳܐ ܕܰܐ‌ܠܳܗܳܐ܆ ܗܰܘ ܕܒܶܗ ܐܶܬܚܬܶܡܬܽܘܢ ܠܝܰܘܡܳܐ ܕܦܽܘܪܩܳܢܳܐ܆ ܟܽܠܳܗ̇ ܡܰܪܺܝܪܽܘܬܳܐ ܘܚܶܡܬܳܐ ܘܪܽܘܓܙܳܐ܆ ܘܰܩܥܳܬܳܐ ܘܓܽܘܕܳܦܳܐ ܢܶܬܬܪܺܝܡܽܘܢ ܡܶܢܟܽܘܢ܆ ܥܰܡ ܟܽܠܳܗ̇ ܒܺܝܫܽܘܬܳܐ^[20].

ܠܡܳܢܳܐ ܗܳܟܺܝܠ ܠܘܳܬ ܚܙܳܬܳܐ ܕܪ̈ܰܟܫܳܐ ܐܳܙܺܠ̱ܝܢ ܚ̱ܢܰܢ܆ ܐܰܝܟܰܢܐ ܕܟܽܠܗܶܝܢ ܗܳܠܶܝܢ ܒܺܝ̈ܫܳܬܳܐ ܒܰܕܡܽܘܬ ܪܶܕܝܳܐ ܒܺܝܫܳܐ ܓܳܝ̈ܚܳܢ ܐܰܝܟ ܝܰܡܬܳܐ܆ ܘܠܰܘ ܟܰܕ ܒܫܶܠܝܳܐ ܡܰܠܽܘܢ ܡܩܰܘܶܝܢ ܚ̱ܢܰܢ ܡܦܺܝܣܺܝܢ ܚ̱ܢܰܢ ܠܰܐܠܳܗܳܐ. ܕܢܶܫܒܽܘܩ ܠܰܢ ܥܰܠ ܗܳܠܶܝܢ ܕܟܰܕ ܒܣܽܘܥܪ̈ܳܢܶܐ ܕܥܳܠܡܳܐ ܡܶܬܗܰܦܟܺܝܢ ܚ̱ܢܰܢ܆ ܐܰܘ ܠܘܳܬ ܩܥܳܬܳܐ܆ ܐܰܘ ܠܘܳܬ ܡܶܠܬܳܐ ܕܓܽܘܕܳܦܳܐ܆ ܐܰܘ ܠܘܳܬ ܚܶܡܬܳܐ ܕܠܳܐ ܒܨܶܒܝܳܢܰܢ ܫܪܰܥܢܰܢ. ܐܶܠܳܐ ܐܶܢ ܫܳܦܪܳܐ ܠܟܽܘܢ܆ ܐܳܦ ܒܗܽܘܢ ܒܬܶܐܰܛܪ̈ܶܐ. ܐܰܘܟܺܝܬ ܒܶܝܬ ܚܶܙܘܳܢ̈ܶܐ ܢܶܬܒܰܩܶܐ܆ ܘܢܶܚܙܶܐ ܐܶܢ ܠܰܘ ܡܰܚܣܪ̈ܳܢܶܐ ܐܺܝܬܰܝܗܽܘܢ ܘܡܰܘܒ̈ܕܳܢܶܐ܆ ܘܠܰܘ ܐܰܝܟ ܕܐ̱ܢܳܫܺܝ̈ܢ ܡܣܰܒܪܺܝܢ ܟܺܝܬ ܘܳܐܡܪܺܝܢ: ܕܡܰܦ̈ܨܚܳܢܶܐ ܡܶܕܡ ܐܺܝܬܰܝܗܽܘܢ ܘܰܡܚܰܕܝܳܢ̈ܶܐ. ܘܥܳܒܰܪ ܐ̱ܢܳܐ ܠܳܗ̇ ܠܽܐܘܪܟܺܝܣܛܘܬܐ ܐܰܘܟܺܝܬ ܠܪܰܩܕܽܘܬܳܐ ܗܳܝ ܣܰܓܺܝܐܬܳܐ ܘܰܫܦܺܝܥܬܳܐ܆ ܟܰܕ ܗܰܕܳܡ̈ܶܐ ܗܳܢܽܘܢ ܕܶܟܪ̈ܳܢܳܝܶܐ ܡܶܬܢܰܩܒܬܺܝܢ ܘܰܙܡܺܝܪ̈ܳܬܳܐ ܗܳܢܶܝܢ܆ ܐܶܪ̈ܽܘܣܳܝܳܬܳܐ ܐܰܘ ܟܺܝܬ ܪ̈ܶܚܡܬܳܢܝܳܬܳܐ܆ ܪ̈ܳܕܝܳܢ ܘܡܰܠ̈ܦܳܢ ܪܰܦܝܽܘܬܳܐ܆ ܘܫܳܪ̈ܝܳܢ ܠܳܗ̇ ܠܚܺܝܨܽܘܬܳܗ̇ ܕܢܰܦܫܳܐ܆ ܘܰܠܦܰܩܪܽܘܬܳܐ ܕܟܽܠܳܗ̇ ܪܶܓܬܳܐ ܫܟܺܝܪܬܳܐ ܚܳܪ̈ܙܳܢ ܘܪ̈ܳܡܝܳܢ ܒܳܗ̇. ܘܛܳܡܪ̈ܳܢ ܘܩܳܒܪ̈ܳܢ ܠܳܗ̇ ܒܝܽܘܩܪܳܐ ܘܰܒܨܽܘܕܳܪܳܐ ܕܗܰܢܺܝ̈ܐܘܳܬܳܐ. ܡܳܢܳܐ ܢܺܐܡܰܪ ܥܰܠ ܗܳܢܽܘܢ ܕܚܳܙܶܝܢ ܠܡܺܝ̈ܡܳܣܶܐ ܗܳܢܽܘܢ ܕܗܳܠܶܝܢ ܡܰܓܚ̈ܟܳܢܝܳܬܳܐ܆ ܐܰܪܰܐ ܠܰܘ ܠܰܫܚܳܩܳܐ ܘܰܠܪܽܘܓܙܳܐ ܡܙܺܝܥܺܝܢ ܚ̱ܢܰܢ ܠܶܗ ܠܰܐܠܳܗܳܐ ܐܶܡܰܬܝ ܕܓܳܚܟܺܝܢ ܚ̱ܢܰܢ܆ ܟܰܕ ܚܳܙܶܝܢܰܢ ܠܦܰܪܨܽܘܦܶܗ ܕܒܰܪܢܳܫܳܐ ܕܡܶܫܬܰܩܰܦ܆ ܠܗܰܘ ܕܰܓܒܰܠ ܡܰܢ ܐܰ‌ܠܳܗܳܐ܆ ܢܳܦܰܚ ܕܶܝܢ ܒܦܰܪܨܽܘܦܳܐ ܕܺܝܠܶܗ ܢܫܰܡܬܳܐ ܕܚܰܝ̈ܶܐ. ܐܰܝܟܰܢܳܐ ܕܢܶܗܘܶܐ ܐܺܝܬܰܘܗ̱ܝ ܟܚܺܝܕܳܐ ܐܳܦ ܠܡܰܠܰܐܟ̈ܶܐ܆ ܠܗܰܘ ܟܺܝܬ ܕܳܐܦ ܝܰܩܪܶܗ ܬܽܘܒ ܡܶܠܬܶܗ ܕܰܐ‌ܠܳܗܳܐ ܗܰܘ ܕܶܐܬܒܰܪܢܰܫ ܡܶܛܽܠܳܬܰܢ܆ ܟܰܕ ܩܳܡ ܡܶܢ ܡܺܝ̈ܬܶܐ ܘܰܢܦܰܚ ܒܰܫ̈ܠܺܝܚܶܐ ܘܶܐܡܰܪ: ܣܰܒܘ ܪܽܘܚܳܐ ܩܰܕܺܝܫܳܐ^[21]. ܠܦܰܪܨܽܘܦܳܐ ܗܳܟܺܝܠ ܗܰܘ ܕܗܳܟܰܢܳܐ ܐܶܬܝܰܩܰܪ܆ ܡܰܠܽܘܢ ܕܶܝܢ ܕܰܥܦܺܝܦܳܐܺܝܬ ܐܶܫܬܰܒܰܚ܆ ܠܳܐ ܚܳܫܶܒ ܐܰܢ̱ܬ ܕܕܰܪܬܺܝܬܳܐ ܐܺܝܬܶܝܗ̇ ܘܰܕܪܶܥܠܳܐ܆ ܐܳܦ ܠܗܽܘܢ ܠܚܰܝ̈ܠܰܘܳܬܳܐ ܕܰܠܥܶܠ ܕܰܡܨܰܥܪܳܐܺܝܬ ܡܶܬܡܚܶܐ ܘܡܶܬܓܚܶܟ. ܐܺܝܛܐ ܐܶܡܰܪ ܠܺܝ. ܥܰܠ ܗܳܠܶܝܢ ܓܳܚܶܟ ܐܰܢ̱ܬ܆ ܥܰܠ ܗܳܢܶܝܢ ܕܬܶܒܟܶܐ ܙܳܕܶܩ ܗ̱ܘܳܐ ܠܳܟ ܘܕܰܬܪܰܩܶܕ.

ܐܰܝܟܳܐ ܐܶ݀ܣܺܝܡ ܠܥܰܪܣܳܐ ܗܳܝ ܕܟܺܝܬܳܐ܆ ܘܰܠܙܽܘܘܳܓܳܐ ܗܰܘ ܡܝܰܩܪܳܐ ܕܡܶܬܒܰܙܰܚ ܒܫܳܥܬܳܐ. ܘܰܠܫܰܘܬܳܦܽܘܬܳܐ ܢܰܟܦܬܳܐ ܕܓܰܝܳܪܳܐܺܝܬ ܡܶܬܦܰܝܥܳܐ ܒܒܶܙܚ̈ܶܐ܆ ܘܰܠܗܰܕܳܡ̈ܶܐ ܕܦܰܓܪܳܐ ܕܡܶܬܦܰܪܣܶܝܢ. ܗܳܢܽܘܢ ܕܒܺܐܝ̈ܕܰܝܗܽܘܢ ܐܺܝܬܶܝܗ̇ ܥܳܒܽܘܕܽܘܬ ܒܢܰܝ̈ܳܐ܆ ܗܳܢܽܘܢ ܕܒܺܐܝ̈ܕܰܝܗܽܘܢ ܢܛܽܘܪܬܳܐ ܕܝܽܘܒܳܠܶܗ ܕܓܶܢܣܳܐ ܕܺܝܠܰܢ. ܘܰܠܚܳܢܽܘܬܳܐ ܠܳܐ ܡܶܬܡܰܠܠܳܢܺܝܬܳܐ ܕܰܟܝܳܢܳܐ ܕܺܝܠܰܢ ܕܰܒܒܶܗܬܬܳܐ ܘܰܫܟܺܝܪܳܐܺܝܬ ܡܶܬܒܰܙܚܳܐ܆ ܡܰܠܽܘܢ ܕܶܝܢ ܠܐ̱ܪܳܙܳܐ ܗܰܘ ܕܰܡܠܶܐ ܟܽܠܳܗ̇ ܟܚܺܝܕܽܘܬܳܐ ܘܢܰܟܦܽܘܬܳܐ.

ܒܗܰܬ ܐܳܘ ܒܰܪܢܳܫܳܐ܆ ܐܳܦܶܢ ܘܠܳܐ ܡܶܢ ܡܶܕܶܡ ܐ̱ܚܪܺܝܢ܆ ܡܶܢ ܓܒܺܝܠܬܳܐ ܕܺܝܠܳܟ܆ ܗܳܝ ܕܶܐܬܓܰܒܠܰܬ ܡܶܢ ܐܰ‌ܠܳܗܳܐ. ܒܗܰܬ ܡܶܢ ܓܒܺܝܠܽܘܬܳܐ ܕܡܶܢ ܕܪܺܝܫ ܗܳܝ ܐܰ‌ܠܳܗܳܝܬܳܐ܆ ܗܳܝ ܕܡܶܛܽܠܳܬܳܗ̇ ܕܡܶܠܬܶܗ ܕܰܐ‌ܠܳܗܳܐ ܒܰܗܘܳܝܳܐ ܕܒܰܒܣܰܪ ܕܡܶܢ ܒܬܽܘܠܬܳܐ ܐܶܫܬܰܘܬܰܦ ܠܳܟ. ܠܡܳܢܳܐ ܐܰܢ̱ܬ ܥܠܰܝܟ ܓܳܚܶܟ ܐܰܢ̱ܬ. ܐܰܟܙܢܳܐ ܕܗܳܢܽܘܢ ܕܰܫܢܺܝܐܝܺܢ܆ ܕܠܳܐ ܡܰܪܓܫܳܢܳܐܺܝܬ ܠܒܶܣܪ̈ܶܐ ܒܰܝ̈ܬܳܝܶܐ ܕܺܝܠܗܽܘܢ ܡܢܰܬܫܺܝܢ ܐܰܘ ܐܳܟܠܺܝܢ. ܐܰܝܟܰܢܳܐ ܕܶܝܢ ܟܰܕ ܓܰܘܪܳܐ ܡܰܢ ܐܶܣܬܥܰܪ ܠܩܽܘܒܠܳܟ^[22] ܡܨܰܥܪܳܢܳܐܺܝܬ܆ ܒܳܟܶܐ ܐܰܢ̱ܬ ܘܡܶܬܬܰܢܰܚ ܐܰܢ̱ܬ܆ ܘܚܰܝ̣ܰܝ̣̈ܟ ܠܳܐ ܚܰܝ̈ܶܐ ܣܳܒܰܪ ܐܰܢ̱ܬ ܕܺܐܝܬܰܝܗܽܘܢ. ܘܟܳܐܶܒ ܠܳܟ ܐܳܦ ܟܰܕ ܫܶܡܫܳܐ ܚܳܙܶܐ ܐܰܢ̱ܬ܆ ܘܟܽܠ ܡܶܕܶܡ ܠܥܶܠ ܘܰܠܬܰܚܬ ܣܳܒܰܪ ܐܰܢ̱ܬ ܕܗܳܘܶܐ܆ ܘܰܟܬܳܒܐ ܡܚܰܝܒܳܢܳܐ ܕܺܝܡܽܘܣܝܽܘܢ ܟܳܬܶܒ ܐܰܢ̱ܬ ܥܰܠ ܗܰܘ ܓܰܝܳܪܳܐ܆ ܘܰܠܡܰܘܬܳܐ ܡܣܳܡ ܒܪܺܝܫܳܐ ܙܥܽܘܪܳܐ ܡܬܰܚܶܡ ܐܰܢ̱ܬ ܠܶܗ ܕܺܐܝܬܰܘܗ̱ܝ܆ ܟܰܕ ܟܡܳܐ ܙܰܒ̈ܢܺܝܢ ܕܰܐܘܒܕܺܝܘܗ̱ܝ܆ ܠܗܰܘ ܕܰܚܛܳܐ ܨܳܒܶܐ ܐܰܢ̱ܬ.

ܟܰܕ ܕܶܝܢ ܠܝܽܘܩ̈ܢܶܐ ܕܒܺܝ̈ܫܳܬܳܐ ܕܕܰܐܝܟ ܗܳܠܶܝܢ ܚܳܙܶܐ ܐܰܢ̱ܬ ܒܡܰܫܟܢܳܐ ܗܰܘ ܫܟܺܝܪܳܐ ܕܫܶܥܝܳܐ܆ ܡܶܬܩܰܬܩܰܬ ܐܰܢ̱ܬ ܘܡܶܬܶܐܫܶܕ ܐܰܢ̱ܬ ܒܓܽܘܚܟܳܐ܆ ܘܰܦܨܺܝܚܽܘܬܳܐ ܘܦܽܘܪܓܳܝܳܐ ܩܳܪܶܐ ܐܰܢ̱ܬ ܠܳܗ̇ ܠܰܨܒܽܘܬܳܐ ܗܳܝ ܕܶܐܒܠܳܐ. ܒܰܐܝܠܶܝܢ ܥܰܝ̈ܢܶܐ ܟܰܕ ܠܒܰܝܬܳܟ ܬܺܐܬܶܐ ܬܶܚܙܶܐ ܠܰܐܢ̱ܬܬܳܟ. ܐܰܝܟܰܢܳܐ ܬܶܬܒܥܶܝܗ̇ ܠܡܶܬܢܰܟܳܦܽܘ܆ ܐܰܢ̱ܬ ܗܰܘ ܕܺܐܝܬܰܝܟ ܚܰܙܳܝܳܐ ܦܰܚܙܳܐ ܕܚܶܙܘܳܢ̈ܶܐ ܗܳܢܽܘܢ ܫܟܺܝܪ̈ܶܐ ܘܠܳܐ ܟܢܺܝ̈ܟܶܐ ܘܙܰܢܳܝ̈ܶܐ܆ ܗܰܘ ܕܟܶܢܫܳܐ ܕܪܶܒܽܘ ܪ̈ܓܺܝܓܳܬܳܐ ܟܰܢܶܫܬ܆ ܘܰܠܕܶܡ̈ܘܳܬܳܐ ܕܒܺܝ̈ܫܳܬܳܐ ܒܬܰܪܥܺܝܬܳܟ ܡܬܰܪܣܶܐ ܐܰܢ̱ܬ܆ ܒܰܕܡܽܘܬ ܢܽܘܪܳܐ ܕܰܒܥܳܒ̈ܶܐ ܟܡܺܝܢܳܐ ܘܡܰܘܩܕܳܐ.

ܘܡܳܢܳܐ ܐܶܥܒܶܕ ܐܳܡܰܪ܆ ܕܗܳܐ ܡܰܫܟܢܳܐ ܗܰܘ ܕܒܶܝܬ ܐܶܫܬܥܶܢܝܳܐ ܦܬܺܝܚ܆ ܘܩܳܪܶܐ ܠܺܝ ܠܰܚܙܳܬܳܐ. ܐܶ‌ܠܽܘ ܓܶܝܪ ܐܰܚܺܝܕ ܗ̱ܘܳܐ܆ ܐܰܝܟܳܐ ܐܺܝܬ ܗ̱ܘܳܐ ܣܽܘܢܩܳܢܳܐ ܥܰܠ ܗܳܠܶܝܢ ܡ̈ܶܠܶܐ. ܐܳܘ ܡܝܰܬܪܳܐ. ܐܰܝܟܰܢܳܐ ܕܶܝܢ ܚܳܙܶܐ ܗ̱ܘܰܝܬ ܠܗܳܠܶܝܢ ܕܠܳܐ ܡܶܫ̈ܬܡܠܝܳܢ ܗ̱ܘܰܝ̈. ܕܰܐܢܰܢܩܺܐ ܐܺܝܬܶܝܗ̇ ܗ̱ܘܳܬ ܛܰܝܒܽܘܬܳܐ ܗܳܝܕܶܝܢ. ܘܠܰܘ ܕܨܶܒܝܳܢܳܐ ܕܺܝܠܳܟ. ܡܶܛܽܠ ܕܶܝܢ ܕܰܦܬܺܝܚ ܡܚܰܡܣܢܳܢܳܐܺܝܬ ܘܦܝܠܳܣܽܘܦܳܐܺܝܬ ܥܒܰܪܳܝܗ̱ܝ ܒܪܶܗܛܳܐ. ܫܒܽܘܩ ܐܶܢܽܘܢ ܕܠܳܐ ܣܳܥܽܘܪܽܘܬܳܐ ܠܗܳܢܽܘܢ ܕܬܰܡܳܢ ܡܥܰܬܕܺܝܢ. ܠܟܽܠܗܶܝܢ ܚܰܘܳܐ ܐܶܢܶܝܢ ܒܰܛܺܝ̈ܠܳܬܳܐ ܘܰܕܠܳܐ ܝܽܘܬܪܳܢ. ܐܳܦ ܓܶܝܪ ܠܳܐ ܣܳܦܩܳܐ ܠܘܳܬ ܡܰܦܰܩ ܒܪܽܘܚܳܐ ܠܗܳܢܽܘܢ ܕܡܶܬܬܨܺܝܕܺܝܢ܆ ܘܗܳܝ ܕܰܡܥܰܬܕܺܝܢ ܘܡܰܬܩܢܺܝܢ ܒܶܝܬ ܚ̈ܶܙܘܳܢܶܐ܆ ܘܰܡܫܰܓܫܺܝܢ ܘܡܰܛܥܶܝܢ ܠܗܳܢܽܘܢ ܕܝܰܥܢܳܐܺܝܬ ܣܺܝܡܺܝܢ ܠܘܳܬܗܽܘܢ܆ ܡܶܛܽܠ ܕܳܐܦ ܗܰܘ ܕܺܐܝܬܰܘܗ̱ܝ ܡܚܰܠܶܨ ܠܒܽܘ̈ܫܶܐ ܢܺܐܡܰܪ ܥܰܠ ܕܚܳܙܶܐ ܗ̱ܘܳܐ ܠܒܽܘܫ̈ܶܐ ܘܕܰܗܒܳܐ ܐܶܫܬܓܶܫ ܒܬܰܪܥܺܝܬܶܗ ܘܶܐܬܬܰܛܥܺܝ. ܘܗܰܘ ܕܙܳܢܝܳܐܺܝܬ ܘܠܳܐ ܢܛܺܝܪܳܐܺܝܬ ܚܳܐܰܪ܆ ܒܫܽܘܦܪܳܐ ܕܢܶܫ̈ܶܐ ܢܶܐܚܽܘܕ ܥܶܠܬܳܐ. ܘܰܒܗܳܕܶܐ ܟܶܐܡܰܬ ܝܰܬܺܝܪܳܐܺܝܬ ܢܶܬܚܙܶܐ ܕܠܳܐ ܡܚܰܝܰܒ.

ܐܶܠܳܐ ܠܳܐ ܐܺܝܬܶܝܗ̇ ܠܳܐ ܝܺܕܺܝܥܬܳܐ. ܕܗܰܘ ܕܡܶܢ ܗܳܠܶܝܢ ܕܰܒܫܽܘܠܛܳܢܶܗ ܣܺܝ̈ܡܳܢ ܡܚܰܡܣܢܳܢܳܐܺܝܬ ܡܶܬܪܰܚܰܩ܆ ܗܳܢܳܐ ܐܰܝܟ ܣܳܥܽܘܪܳܐ ܕܰܡܝܰܬܪ̈ܳܬܳܐ ܠܰܟ̈ܠܺܝܠܶܐ ܘܰܠܦܽܘܪ̈ܥܳܢܶܐ ܕܙܳܟ̈ܘܳܬܳܐ ܥܬܺܝܕ ܕܢܶܫܬܘܶܐ܆ ܥܪܽܘܩ ܗܳܟܺܝܠ ܒܟܽܠܶܗ ܚܰܝܠܳܟ ܡܶܢ ܚ̈ܶܙܘܳܢܶܐ ܗܳܠܶܝܢ. ܡܶܢ ܡܰܚܢܽܘܩܺܝܬܳܐ ܕܢܰܦ̈ܫܳܬܳܐ܆ ܡܶܢ ܓܽܘܡܳܨܳܐ ܕܳܐܟܶܠ ܩܰܪܨܳܐ܆ ܡܶܢ ܡܰܛܥܝܳܢܽܘܬܳܐ ܡܨܰܒܰܬ̣ܬܳܐ܆ ܡܶܢ ܡܰܛܥܝܳܢܽܘܬܳܐ ܫܰܦܺܝܪܰܬ ܦܰܪܨܽܘܦܳܐ܆ ܡܶܢ ܣܽܘܓܦܳܢܳܐ ܕܠܳܐ ܡܰܪܓܫܳܢܽܘܬܳܐ܆ ܡܶܢ ܐܰܒܕܳܢܳܐ ܕܺܐܝܬ ܠܶܗ ܦܰܪܶܗ̱ܣܺܝܰܐ ܘܰܓܠܶܐ ܘܺܝܕܺܝܥ. ܘܶܐܢ ܐ̱ܢܳܫ ܠܘܳܬ ܗܳܕܶܐ ܢܳܓܶܕ ܠܳܟ. ܠܘܳܬ ܥܺܕܬܳܐ ܐܰܗܦܶܟ ܓܶܕܳܝܗ̱ܝ ܐܰܢ̱ܬ܆ ܟܰܕ ܡܶܠܬܳܐ ܗܳܝ ܟܬܳܒܳܝܬܳܐ ܐܳܡܰܪ ܐܰܢ̱ܬ ܠܶܗ܆ ܐܰܗܦܶܟ ܪܶܓܠܳܐ ܕܺܝܠܳܟ ܡܶܢ ܐܽܘܪܚܳܐ ܒܺܝܫܬܳܐ^[23]܆ ܠܽܐܘܪ̈ܚܳܬܳܐ ܓܶܝܪ ܗܳܠܶܝܢ ܕܡܶܢ ܝܰܡܺܝܢܳܐ ܝܳܕܰܥ ܐܰ‌ܠܳܗܳܐ܆ ܡܥܰܩ̈ܡܳܬܳܐ ܕܶܝܢ ܐܺܝܬܰܝܗܶܝܢ ܗܳܠܶܝܢ ܕܡܶܢ ܣܶܡܳܠܳܐ܆ ܚܰܘܳܐ ܠܶܗ ܒܡܶܠܬܳܐ ܝܰܬܺܝܪ ܦܰܬܝܳܐܺܝܬ ܫܽܘܚܠܳܦܳܐ ܕܬܰܪ̈ܬܰܝܗܶܝܢ ܗܳܠܶܝܢ ܐܽܘܪ̈ܚܳܬܳܐ. ܚܰܘܳܐ ܫܽܘܠܳܡܳܐ ܕܟܽܠ ܚܕܳܐ ܡܶܢܗܶܝܢ. ܡܰܝܶܩ ܘܰܥܕܽܘܠ ܩܕܳܡܰܘܗܝ܆ ܠܥܳܒܽܘܪܽܘܬܶܗ ܘܰܠܠܳܐ ܩܰܘܡܶܗ ܕܦܽܘܪܓܳܝܳܐ ܗܳܢܳܐ ܕܰܡܠܶܐ ܙܰܒܢܳܐ. ܕܰܚܶܠܳܝܗ̱ܝ . ܪܫܽܘܡ ܠܶܗ ܠܒܶܝܬ ܕܺܝܢܳܐ ܗܰܘ ܕܰܥܬܺܝܕ ܕܰܡܫܺܝܚܳܐ. ܐܰܘܒܶܠܳܝܗ̱ܝ ܒܣܰܒܪ̈ܶܐ܆ ܠܘܳܬ ܚܰܝ̈ܶܐ ܗܳܢܽܘܢ ܛܽܘܒ̈ܬܳܢܶܐ ܘܰܕܠܳܐ ܫܽܘܠܳܡ ܕܰܡܛܰܝܒܺܝܢ ܠܙܰܕܺܝ̈ܩܶܐ. ܡܶܢ ܟܽܠ ܕܽܘܟ ܚܒܽܘܫܳܝܗ̱ܝ . ܠܳܐ ܬܶܚܣܰܪ ܦܽܘܪܩܳܢܳܐ ܕܺܝܠܶܗ. ܠܳܐ ܬܰܘܒܶܕ ܠܨܰܝܕܳܐ. ܐܶܢ ܕܶܝܢ ܕܝܰܬܺܝܪ ܚܶܪܝܳܐܺܝܬ ܩܳܐܶܡ ܒܬܰܟܬܽܘܫܳܐ ܬܶܚܙܶܝܘܗ̱ܝ܆ ܘܰܕܢܶܙܟܶܐ ܒܒܺܝܫܬܳܐ ܐܺܝܬ ܠܶܗ ܝܰܨܺܝܦܽܘܬܳܐ܆ ܘܕܰܐܘ ܟܰܕ ܡܶܬܦܰܪܰܤ ܐܰܘ ܩܛܺܝܪܳܐܺܝܬ ܒܳܥܶܐ ܠܡܶܓܪܦܳܟ ܠܘܳܬ ܗܳܝ ܕܠܶܗ ܫܳܦܪܳܐ. ܗܳܝܕܶܝܢ ܐܶܬܚܰܫܰܚ ܒܚܶܡܬܳܐ ܟܺܐܢܬܳܐ. ܠܪܳܚܡܽܘܬܳܐ ܒܺܝܫܬܳܐ ܐܰܘܟܺܝܬ ܠܚܰܒܪܽܘܬܳܐ ܣܕܽܘܩ. ܫܘܰܪ ܘܰܥܪܽܘܩ ܡܶܢ ܒܺܝܫܳܐ܆ ܐܶܬܕܰܟܪ ܠܰܣܝܳܡ ܢܳܡܽܘܣܳܐ ܕܪܽܘܚܳܐ܆ ܕܰܡܦܰܪܓܶܠ ܘܦܳܩܶܕ ܠܳܟ ܠܡܶܪܓܰܙ ܘܠܰܘ ܠܡܶܚܛܳܐ. ܗܳܟܰܢܳܐ ܪܓܶܙ ܦܺܝܢܚܶܤ. ܘܟܰܕ ܠܗܳܢܽܘܢ ܕܙܳܢܝܳܐܺܝܬ ܡܥܰܪܙܠܺܝܢ ܗ̱ܘܰܘ ܩܒܰܥ ܘܰܬܪܰܙ ܒܪܽܘܡܚܶܗ^[24]܆ ܠܡܰܘܬܳܐ ܬܕܰܘܶܓ ܐܶܢܽܘܢ ܗܳܟܰܢܳܐ ܡܶܬܚܰܡܰܬ ܗ̱ܘܳܐ ܡܽܘܫܶܐ. ܗܰܘ ܕܝܰܬܺܝܪ ܡܶܢ ܟܽܠܗܽܘܢ ܒܢܰܝ̈ܢܳܫܳܐ ܐܺܝܬܰܘܗ̱ܝ ܗ̱ܘܳܐ ܢܺܝܚܳܐ ܘܡܰܟܺܝܟܳܐ ܠܽܘܩܒܰܠ ܗܳܢܽܘܢ ܕܥܳܒܪܺܝܢ ܗ̱ܘܰܘ ܢܳܡܽܘܣ̈ܶܐ ܕܰܐ‌ܠܳܗܳܐ ܟܰܕ ܠܨܽܘܚ̈ܝܳܬܳܐ ܒܰܝ̈ܬܳܝܳܬܳܐ ܗܳܠܶܝܢ ܕܺܝܠܶܗ ܢܺܝܚܳܐܺܝܬ ܡܣܰܝܒܰܪ ܗ̱ܘܳܐ ܘܡܰܟܺܝܟܳܐܺܝܬ܆ ܟܰܕ ܓܶܝܪ ܗܳܢܽܘܢ ܕܒܶܝܬ ܕܳܬܳܢ ܘܰܐܒܺܝܪܰܡ ܘܰܟܢܽܘܫܬܳܐ ܗܳܝ ܕܒܶܝܬ ܩܽܘܪܰܚ^[25] ܚܰܣܳܡܳܐܺܝܬ ܘܰܡܨܰܥܪܳܢܳܐܺܝܬ ܐܶܬܬܙܺܝܥܘ ܠܩܽܘܒܠܶܗ܆ ܗܰܘ ܣܳܐܶܡ ܢܳܡܽܘܣܳܐ܆ ܘܰܡܕܰܒܪܳܢܳܐ ܕܥܰܡܳܐ ܟܰܕ ܥܰܠ ‌ܐܰܦܰܘ̈ܗ̱ܝ ܢܦܰܠ ܥܰܠ ‌ܐܰܪܥܳܐ ܩܕܳܡܰܝܗܽܘܢ ܡܦܺܝܤ ܗ̱ܘܳܐ ܘܡܶܬܟܰܫܰܦ ܠܗܽܘܢ ܠܰܡܨܰܥܪ̈ܳܢܶܐ܆ ܕܠܳܐ ܒܪܽܘܓܙܳܐ ܗܰܘ ܕܡܶܢ ܠܥܶܠ ܢܶܦܠܽܘܢ܆ ܗܰܘ ܐܰܝܢܳܐ ܕܟܰܕ ܠܳܐ ܡܶܬܬܦܺܝ̈ܣܳܢܶܐ ܩܰܘܺܝܘ ܘܰܚܬܺܝܪ̈ܶܐ܆ ܠܚܰܪܬܳܐ ܫܰܕܰܪ ܐܶܢܽܘܢ ܠܰܫܝܽܘܠ.

ܙܳܕܶܩ ܓܶܝܪ ܕܰܒܨܰܥܪ̈ܶܐ ܡܰܢ ܘܡܰܥܘ̈ܠܳܢܘܳܬܳܐ ܗܳܠܶܝܢ ܕܰܠܩܽܘܒܠܰܢ܆ ܘܡܰܟܺܝܟܳܐܺܝܬ ܘܦܺܝܠܳܣܽܘܦܳܐܺܝܬ ܢܶܗܘܶܐ ܣܺܝܡܺܝܢ ܚ̱ܢܰܢ ܘܰܡܣܰܝܒܪܺܝܢ ܚ̱ܢܰܢ. ܒܗܳܠܶܝܢ ܕܶܝܢ ܕܠܽܘܩܒܰܠ ‌ܐܰ‌ܠܳܗܳܐ ܡ̈ܳܬܚܳܢ܆ ܘܠܽܘܩܒܰܠ ܫܽܘܒܚܶܗ ܡܶܬܗܰܓ̈ܝܳܢ. ܥܰܡ ܚܶܡܬܳܐ ܝܰܬܺܝܪ ܩܰܫܝܳܐܺܝܬ ܙܳܕܶܩ ܕܢܶܬܬܥܺܝܪ. ܡܶܛܽܠ ܗܳܕܐ ܓܶܝܪ ܐܳܦ ܐ̱ܢܳܫ ܡܶܢ ܢܒܺܝ̈ܶܐ ܐܶܡܰܪ: ܕܢܺܝܚܳܐ ܢܶܗܘܶܐ ܩܪܰܒܬܳܢܳܐ. ܡܰܟܺܝܟܽܘܬܳܐ ܓܶܝܪ ܘܢܺܝܚܽܘܬܳܐ ܕܠܳܐ ܦܳܪܽܘܫܽܘܬܳܐ. ܘܰܕܠܰܘ ܒܡܶܠܬܳܐ ܡܶܬܕܰܒܪܳܐ܆ ܕܥܶܪ̈ܒܶܐ ܐܺܝܬܶܝܗ̇ ܕܺܝܠܳܝܬܳܐ ܘܠܰܘ ܕܰܒܢܰܝ̈ܢܳܫܳܐ ܡܠܺܝ̈ܠܶܐ. ܡܶܛܽܠܗܳܕܶܐ ܓܶܝܪ ܐܺܝܬܶܝܗ̇ ܚܶܡܬܳܢܽܘܬܳܐ ܒܢܰܦܫܳܐ ܕܺܝܠܰܢ ܐܰܝܟܰܢܳܐ ܕܰܠܘܳܬ ܓܰܢ̱ܒܳܪܽܘܬܳܐ ܬܦܺܝܤ ܘܰܬܚܰܦܶܛ ܠܰܢ. ܘܡܶܬܚܰܫܚܺܝܢ ܚ̱ܢܰܢ ܒܳܗ̇ ܒܗܳܕܶܐ ܠܽܘܩܒܰܠ ܪܰܦܝܽܘܬܳܐ ܕܰܪ̈ܓܺܝܓܳܬܳܐ܆ ܘܡܶܬܟܰܬܫܺܝܢ ܚ̱ܢܰܢ ܒܳܗ̇ ܚܠܳܦ ܢܳܡܽܘܣ̈ܶܐ ܕܰܐ‌ܠܳܗܳܐ܆ ܘܳܐܦ ܚܠܳܦܰܘܗ̱ܝ ܕܺܝܠܶܗ ܕܰܫܪܳܪܳܐ.

ܐܶܠܳܐ ܓܶܝܪ ܠܳܐ ܝܳܕܰܥ ܐ̱ܢܳܐ܆ ܐܰܝܟܰܢܳܐ ܡܶܢ ܒܳܬܰܪ ܡܰܪܬܝܳܢܽܘܬܳܐ ܗܳܝ ܕܡܶܢ ܩܕܺܝܡ ܒܥܺܕܬܳܐ ܥܶܒܕܶܬ ܠܘܳܬܟܽܘܢ. ܟܰܕ ܣܰܟܺܝܬ̣ ܕܶܐ݀ܚܙܶܝܟܽܘܢ ܥܳܒܽܘ̈ܕܶܐ ܕܰܥ̈ܒܳܕܶܐ ܛܳܒ̈ܶܐ܆ ܘܬܽܘܒ ܡܶܛܽܠ ܥܪ̈ܽܘܩܝܳܐ ܕܡܶܢ ܒܺܝ̈ܫܳܬܳܐ ܡܡܰܠܶܠ ‌ܐ̱ܢܳܐ ܥܡܰܟܽܘܢ. ܐܰܤܛܳܐ ܓܶܝܪ ܐܳܡܰܪ ܡܶܢ ܒܺܝܫܬܳܐ ܘܰܥܒܶܕ ܛܳܒܬܳܐ܆ ܥܰܠ ܓܶܝܪ ܦܽܘܠܚܳܢܳܐ ܣܰܓܺܝܳܐܐ ܕܣܳܥܽܘܪ̈ܘܳܬܳܐ ܛܳܒ̈ܳܬܳܐ ܣܢܺܝܩܺܝܢ ܚ̱ܢܰܢ܆ ܐܰܝܟܰܢܳܐ ܕܡܶܢ ܪܽܘܓܙܳܐ ܗܳܢܳܐ ܕܰܬܠܶܐ ܠܥܶܠ ܡܶܢܰܢ ܢܶ݀ܥܪܽܘܩ܆ ܗܰܘ ܕܗܳܐ ܒܽܐܘܪܚܳܐ ܡܶܟܺܝܠ ‌ܐܳܦ ܠܘܳܬ ܡܕܺܝܢ̈ܳܬܳܐ ܐ̱ܚܪ̈ܳܢܝܳܬܳܐ ܗܰܠܶܟ ܘܳܐܬܶܐ܆ ܘܳܐܦܠܳܐ ܡܶܢ ܡܕܺܝܢ̱ܬܳܐ ܗܳܝ ܕܰܐ‌ܠܟܣܰܢܕܪܽܘܤ ܡܰܪܚܶܩ ܠܶܗ܆ ܐܶܠܳܐ ܥܕܰܟܺܝܠ ܠܗܳܢܽܘܢ ܕܰܚܠܺܝܡܺܝܢ ܪܳܥܶܐ ܘܪܳܒܶܐ ܘܳܐܬܶܐ܆ ܐܰܝܟܰܢܳܐ ܕܥܳܡܽܘܪ̈ܶܝܗ̇ ܕܗܳܝ ܠܰܘ ܒܰܠܚܽܘܕ ܬܶܐܰܛܪ̈ܶܐ ܢܶܐܚܕܽܘܢ܆ ܐܶܠܳܐ ܡܶܢ ܟܰܕܽܘ ܐܳܦ ܒܶܝܬ ܩܰܦܺܝ̈ܠܶܐ. ܘܒܶܝܬ ܡܙܰܒ̈ܢܰܝ ܚܰܡܪܳܐ ܘܳܐܦ ܠܚܳܢ̈ܘܳܬܳܐ ܕܒܶܣܪܳܐ ܘܰܕܒܽܘ̈ܫܳܠܶܐ ܘܰܕܡܶܐܟ̈ܠܳܬܳܐ ܕܟܽܠ ܓܢܶܤ ܗܳܠܶܝܢ ܕܰܠܘܳܬ ܗܰܢܺܝܽܐܘܬܳܐ ܚܳܝܪ̈ܳܢ܆ ܘܒܰܠܚܽܘܕ ܒܡܶܐܟ̈ܠܳܬܳܐ ܕܡܶܢ ܠܰܚܡܳܐ ܘܡܶܢ ܗܳܠܶܝܢ ܙܰܪ̈ܥܽܘܢܶܐ ܐ̱ܚܪ̈ܳܢܶܐ ܢܶܬܬܰܪܣܽܘܢ ܘܢܶܬܐܰܒܠܽܘܢ܆ ܘܡܶܕܶܡ ܐ̱ܚܪܺܝܢ ܠܳܐ ܢܶܥܒܕܽܘܢ܆ ܐܶܠܳܐ ܐܶܢ ܕܰܢܦܺܝܣܽܘܢ ܠܰܐܠܳܗܳܐ ܒܟܽܠ ܝܽܘܡ ܒܬܰܟ̈ܫܦܳܬܳܐ ܘܰܒܒܳܥ̈ܘܳܬܳܐ.

ܢܰ݀ܕܪܟܺܝܗ̇ ܗܳܟܺܝܠ ܠܰܐܢܰܢܩܺܐ ܗܳܕܶܐ. ܘܨܶܒܝܳܢܳܐܺܝܬ ܗܳܠܶܝܢ ܕܰܬܝܳܒܽܘܬܳܐ ܢܚܰܘܶܐ ܘܢܺܐܬܰܪ ܥܰܡ ܗܳܝ ܕܢܶܥܪܽܘܩ ܡܶܢ ܪܽܘܓܙܳܐ܆ ܐܳܦ ܐܰܓܪܐ ܕܥܰܠ ܗܳܠܶܝܢ. ܠܰܘ ܓܶܝܪ ܕܠܳܐ ܐܰܓܪܳܐ ܗܝ ܗܳܝ ܕܡܶܢ ܨܶܒܝܳܢܶܗ ܕܐ̱ܢܳܫ ܢܶܬܚܰܫܰܒ܆ ܕܶܐ‌ܠܽܘ ܐܶܬܰܝ̈ ܥܠܰܝܢ ܗܳܠܶܝܢ ܒܺܝ̈ܫܳܬܳܐ܆ ܡܳܢܳܐ ܠܳܐ ܓܳܒܶܝܢ ܗ̱ܘܰܝܢ ܕܢܶܥܒܶܕ܆ ܠܘܳܬ ܓܗܳܝܬܳܐ ܕܡܶܢ ܗܳܠܶܝܢ܆ ܘܰܩܕܳܡ ܕܢܺܐܬܝ̈ܳܢ ܥܠܰܝܢ ܒܪܶܚܡܰܬ ܥܰܡܠܳܐ ܘܦܺܝܠܳܣܽܘܦܳܐܺܝܬ ܢܺܚܶܐ܆ ܐܶܢ ܓܶܝܪ ܠܰܘ ܒܡܰܪܕܽܘܬܳܐ ܗܳܕܶܐ ܘܰܒܕܶܚܠܬܳܐ ܢܶܫܬܰܚܠܰܦ܆ ܚܰܣܺܝܪܳܐ ܡܶܟܺܝܠ ܕܰܣܦܺܝ̈ܩܶܐ ܘܢܽܘܟܪ̈ܳܝܶܐ ܢܶܗܘܶܐ ܐܺܝܬܰܝܢ ܕܰܐ‌ܠܳܗܳܐ. ܘܰܕܠܰܚܒܳܠܳܐ ܡܫܰܡܠܝܳܐ ܢܶܫܬܠܶܡ ܘܕܰܒܓܽܘܡܳܨܳܐ ܥܰܡܺܝܩܳܐ ܢ݀ܶܦܶܠ.

ܘܰܠܗܳܕܶܐ ܓܰܠܝܳܐܺܝܬ ܕܒܶܐܪܰܡܝܳܐ ܣܺܝܡܳܐ ܐܺܝܬ ܠܡܶܫܟܳܚܽܘ ܗܳܟܰܢܳܐ ܒܟܺܐܒܳܐ ܘܒܰܡܚܽܘܬܳܐ ܐܶܬܪܕܰܝ ܐܽܘܪܶܫܠܶܡ܆ ܕܰܠܡܳܐ ܬܶܪܚܰܩ ܢܰܦܫܳܐ ܕܺܝܠܝ ܡܶܢܶܟܝ. ܕܠܳܐ ܐܶܥܒܕܶܟܝ ܐܰܪܥܳܐ ܠܳܐ ܡܶܬܬܕܺܝܫܳܢܺܝܬܳܐ^[26]܆ ܗܳܝ ܟܺܝܬ ܕܠܳܐ ܬܶܬܥܡܰܪ܆ ܡܶܛܽܠ ܗܳܕܐ ܟܰܕ ܪܰܬܺܝܬ ܐ̱ܢܳܐ ܘܪܰܥܺܝܠ ‌ܐ̱ܢܳܐ ܩܳܡܶܬ ܥܰܠ ܡ̈ܶܠܶܐ ܗܳܠܶܝܢ ܘܰܠܦܶܬܓܳܡܳܐ ܗܰܘ ܕܰܫܠܺܝܚܳܐ ܦܰܘܠܽܘܤ܆ ܒܪܰܒܽܘܬ ܩܳܠܳܐ ܡܰܙܥܶܩ ܐ̱ܢܳܐ܆ ܕܥܰܕ ܐܺܝܬ ܠܰܢ ܙܰܒܢܳܐ ܢܶ݀ܦܠܽܘܚ ܛܳܒܬܳܐ^[27]. ܥܰܠ ܓܶܝܪ ܩܰܕܺܝܡܽܘܬ ܢܛܽܘܪܬܳܐ ܣܰܓܺܝܐܬܳܐ ܐܺܝܬ ܠܰܢ ܣܽܘܢܩܳܢܳܐ ܣܰܓܺܝ܆ ܠܚܺܐܦܳܐ ܘܡܶܐܬܺܝܬܳܐ ܕܫ̈ܺܐܕܶܐ ܕܰܥܠܰܝܢ ܡܣܰܟܶܝܢ ܚ̱ܢܰܢ. ܒܫܽܘܪܳܐ ܕܰܡܥܰܕܪܳܢܽܘܬܳܐ ܐܰ‌‌ܠܳܗܳܝܬܳܐ ܚܢܰܢ ܠܰܢ ܢܚܰܣܶܢ. ܡܳܢܳܐ ܕܶܝܢ ܐܺܝܬܰܘܗ̱ܝ ܗܳܢܳܐ. ܕܶܚܠܬܳܐ ܕܰܐ‌ܠܳܗܳܐ. ܢܶܫܪܶܐ ܓܶܝܪ ܡܰܠܰܐܟܶܗ ܕܡܳܪܝܳܐ ܚܕܳܪ̈ܰܝ ܗܳܢܽܘܢ ܕܕܳܚܠܺܝܢ ܠܶܗ ܘܰܢܦܰܨܶܐ ܐܶܢܽܘܢ^[28]. ܐܶܬܒܰܩܳܐ܆ ܕܛܶܟܣܳܐ ܘܚܰܝܠܳܐ ܕܡܰܫܪܺܝܬܳܐ ܕܟܽܠܶܗ ܚܰܝܠܳܐ ܘܰܟܢܽܘܫܝܳܐ ܕܦܳܠ̈ܚܶܐ܆ ܐܰܚܺܝܕܳܐ ܢܛܽܘܪܬܳܐ ܕܚܰܕ ܡܰܠܰܐܟܳܐ ܗܳܝ ܕܰܚܕܺܝܪܳܐ ܠܳܟ܆ ܐܳܦ ܓܶܝܪ ܠܟܽܠܚܰܕ ܡܶܢ ܗܳܢܽܘܢ ܕܕܳܚܠܺܝܢ ܠܡܳܪܝܳܐ܆ ܡܰܠܰܐܟܳܐ ܢܰܩܺܝܦ ܠܘܽ ܢܛܽܘܪܬܳܐ܆ ܡܶܛܽܠ ܗܳܕܶܐ ܟܰܕ ܠܰܒܢܰܝ̈ܢܳܫܳܐ ܢܰܟ̈ܦܶܐ ܡܡܰܠܠܺܝܢ ܚ̱ܢܰܢ܆ ܡܰܠܰܐܟܳܐ ܕܺܝܠܳܟ ܐܳܡܪܺܝܢ ܚ̱ܢܰܢ܆ ܘܳܐܦ ܒܰܦܪܰܟܣܝܤ ܕܺܝܢ ܕܰܫ̈ܠܺܝܚܶܐ^[29]܆ ܟܰܕ ܦܶܛܪܽܘܤ ܐܶܬܠܒܶܟ ܘܶܐܬܚܒܶܫ ܡܶܢ ܗܶܪܽܘܕܺܝܤ ܘܰܠܒܰܪ ܡܶܢ ܡܰܣܒܪܳܢܽܘܬܳܐ ܕܟܽܠ‌ ܐ̱ܢܳܫ ܥܰܠ ܬܰܪܥܳܐ ܕܒܰܝܬܳܐ ܡܶܕܶܡ ܩܳܡ ܘܰܢܩܰܫ ܕܟܰܕ ܡܶܬܦܰܠܓܺܝܢ ܗ̱ܘܰܘ ܘܠܳܐ ܡܗܰܝܡܢܺܝܢ ܗ̱ܘܰܘ ܗܳܢܽܘܢ ܕܰܠܓܰܘ܆ ܠܘܳܬ ܛܠܺܝܬܳܐ ܗܳܝ ܕܰܐܘܕܥܰܬ̣ ܐܶܢܽܘܢ ܐܳܡܪܺܝܢ ܗ̱ܘܰܘ. ܡܰܠܰܐܟܳܐ ܕܺܝܠܶܗ ܐܺܝܬܰܘܗ̱ܝ. ܘܡܳܢܳܐ ܬܡܺܝܗܳܐ ܗܳܕܶܐ. ܐܶܡܰܬܝ ܐܳܦ ܠܟܽܠ ܚܰܕ ܡܶܢ ܛܠܳܝ̈ܶܐ ܙܥܽܘܪ̈ܶܐ ܢܛܽܘܪܬܳܐ ܡܶܕܶܡ ܡܰܠܰܐܟܳܝܬܳܐ ܡܬܰܚܡܳܐ ܘܰܦܪܺܝܫܳܐ. ܐܳܡܰܪ ܓܶܝܪ ܡܳܪܰܢ ܒܶܐܘܰܢܓ̈ܶܠܝܰܐ܆ ܚܙܰܘ: ܠܳܐ ܬܶܒܣܽܘܢ ܥܰܠ ܚܰܕ ܡܶܢ ܗܳܠܶܝܢ ܙܥܽܘܪ̈ܶܐ. ܐܳܡܰܪ ܐ̱ܢܳܐ ܠܟܽܘܢ ܓܶܝܪ܆ ܕܡܰܠܰܐܟ̈ܶܐ ܕܺܝܠܗܽܘܢ ܒܰܫܡܰܝܳܐ ܒܟܽܠܙܒܰܢ ܚܳܙܶܝܢ ܦܰܪܨܽܘܦܶܗ ܕܳܐܒܝ ܗܰܘ ܕܒܰܫܡܰܝܳܐ^[30]. ܠܰܘ ܐܰܝܟ ܡܰܢ ܕܚܳܙܶܐ ܐ̱ܢܳܫ ܦܰܪܨܽܘܦܳܐ ܕܰܐ‌ܠܳܗܳܐ. ܐܰܝܟܰܢܳܐ ܓܶܝܪ ܦܰܪܨܽܘܦܳܐ ܢܶܗܘܶܐ ܐܺܝܬ ܠܶܗ ܠܗܰܘ ܕܰܕܠܳܐ ܐܶܣܟܺܡܳܐ ܐܺܝܬܰܘܗ̱ܝ ܘܰܕܠܳܐ ܦܰܓܪܳܐ. ܐܰܘ ܐܰܝܟܰܢܳܐ ܡܶܬܚܙܶܐ ܗܰܘ ܠܳܐ ܡܶܬܚܰܙܝܳܢܳܐ ܐܶܠܳܐ ܥܝܳܕܰܐ ܗ̄ܘ ܠܰܟܬܳܒܳܐ ܐܰ‌ܠܳܗܳܝܳܐ ܦܰܪܨܽܘܦܳܐ ܠܡܶܩܪܳܐ ܠܣܳܥܽܘܪܽܘܬܳܐ ܕܰܐ‌ܠܳܗܳܐ ܗܳܝ ܕܰܠܘܳܬܰܢ. ܐܰܝܟ ܗܳܝ ܕܰܐܡܺܝܪܳܐ ܠܰܡܙܰܡܪܳܢܳܐ. ܠܳܐ ܬܰܗܦܶܟ ܦܰܪܨܽܘܦܳܟ ܡܶܢܝ^[31]. ܘܰܐܢܗܰܪ ܦܰܪܨܽܘܦܳܐ ܕܺܝܠܳܟ ܥܰܠ ܥܰܒܕܳܟ^[32]. ܚܳܙܶܝܢ ܗܳܟܺܝܠ ܡܰܠܰܐܟ̈ܶܐ ܗܳܢܰܘ ܕܶܝܢ ܡܶܬܒܰܩܶܝܢ ܕܕܰܐܝܟ ܐܰܝܕܳܐ ܗ̱ܝ ܣܳܥܽܘܪܽܘܬܳܐ ܘܰܒܛܺܝܠܽܘܬܳܐ ܕܺܝܠܶܗ ܗܳܝ ܕܥܰܠ ܫܰܒܪ̈ܶܐ ܘܢܳܛܪܺܝܢ ܠܗܽܘܢ ܥܰܡ ܢܛܽܘܪܬܳܐ ܝܳܨܽܘܦܬܳܐ ܘܥܺܝܪܬܳܐ.

ܐܰܪܰܐ ܡܰܪ̈ܓܫܳܢ ܐܢ̱ܬܶܝܢ ܢܶܫ̈ܶܐ. ܕܰܟܡܰܐ ܗ̱ܘ ܚܽܘܣܪܳܢܳܐ ܗܰܘ ܕܡܰܚܣܪ̈ܳܢ ܐܢ̱ܬܶܝܢ ܠܗܽܘܢ ܠܰܛܠܳܝ̈ܶܐ ܗܳܢܽܘܢ ܙܥܽܘܪ̈ܶܐ܆ ܐܶܡܰܬܝ ܕܰܡܫܰܕܪ̈ܳܢ ܐܢ̱ܬܶܝܢ ܠܗܽܘܢ ܠܘܳܬ ܬܶܐܰܛܪ̈ܶܐ܆ ܡܫ̈ܰܠܚܳܢ ܐܢ̱ܬܶܝܢ ܠܗܽܘܢ ܓܶܝܪ ܠܗܳܢܽܘܢ ܕܰܪܚܺܝܡܺܝܢ ܠܟܶܝܢ ܡܶܢ ܡܥܰܕܪܳܢܽܘܬܳܐ ܘܰܢܛܽܘܪܬܳܐ ܡܰܠܰܐܟܳܝܬܳܐ ܘܰܡܛܰܝ̈ܒܶܐ ܥܳܒ̈ܕܳܢ ܐܢ̱ܬܶܝܢ ܠܗܽܘܢ ܠܒܺܝܫܳܐ ܠܘܳܬ ܚܽܘܣܪܳܢܳܐ. ܠܗܳܕܶܐ ܗܳܟܺܝܠ ܥܒܳܕܳܐ ܕܰܒܥܶܠ̈ܕܒܳܒܳܬܳܐ ܢܬܰܚܶܡ ܐ̱ܢܳܫ ܕܺܐܝܬܶܝܗ̇ ܐܳܘ ܕܶܐܡܗ̈ܳܬܳܐ. ܟܽܠܰܢ ܗܳܟܺܝܠ ܠܘܳܬ ܥܺܕܬܳܐ ܢܶܪܗܰܛ ܛܠܳܝ̈ܶܐ ܐܰܟܚܕܳܐ ܥܰܡ ܣܳܒ̈ܶܐ ܓܰܒܪ̈ܶܐ ܥܰܡ ܢܶܫ̈ܶܐ܆ ܟܽܠ ܓܶܢܣܳܐ ܘܩܰܘܡܬܳܐ܆ ܘܗܳܟܰܢܳܐ ܠܰܢܛܽܘܪܬܳܐ ܕܡܰܠܰܐܟ̈ܶܐ ܠܳܐ ܡܶܙܕܰܥܙܥܳܢܺܝܬܳܐ ܠܰܚܕܳܪ̈ܰܝܢ ܕܺܝܠܰܢ ܢܶܥܒܕܺܝܗ̇. ܝܰܬܺܝܪܳܐܺܝܬ ܟܰܕ ܒܐ̱ܪ̈ܳܙܶܐ ܩܰܕܺܝ̈ܫܶܐ ܡܶܫܬܰܘܬܦܺܝܢܰܢ ܘܟܰܕ ܒܚܰܝܠܳܐ ܕܗܳܠܶܝܢ ܡܶܬܡܰܫܚܺܝܢ ܚ̱ܢܰܢ ܘܡܶܬܚܰܝܠܺܝܢ. ܗܳܝܕܶܝܢ ܓܶܝܪ ܠܰܘ ܡܶܛܽܠ ܢܽܘܛܳܪܳܐ ܕܺܝܠܰܢ ܒܰܠܚܽܘܕ ܡܟܰܬܪܺܝܢ ܡܰܠܰܐܟ̈ܶܐ ܠܘܳܬܰܢ܆ ܐܶܠܳܐ ܐܳܦ ܡܶܛܽܠ ‌ܐܺܝܩܳܪܳܐ ܕܡܳܪܗܽܘܢ܆ ܟܰܕ ܐܰܝܟ ܗܰܘ ܕܰܠܘܳܬ ܒ̈ܳܬܶܐ ܡܰܠܰܐܟܳܝ̈ܶܐ ܕܺܐܝܬ ܒܗܽܘܢ ܡܰܠܟܳܐ ܕܥܳܡܰܪ܆ ܟܳܢܫܺܝܢ ܘܡܶܬܐܰܡܢܺܝܢ ܠܘܳܬ ܢܰܦ̈ܫܳܬܳܐ ܟܺܝܬ ܕܺܝܠܰܢ ܘܰܠܘܳܬ ܦܰܓܪ̈ܰܝܢ. ܘܠܳܐ ܐ̱ܢܳܫ ܢܺܐܡܰܪ ܠܺܝ ܕܕܳܚܶܠ ‌ܐ̱ܢܳܐ ܘܡܶܢ ܫܰܘܬܳܦܽܘܬܳܐ ܕܐ̱ܪ̈ܳܙܶܐ ܡܶܢ ܗܳܕܶܐ ܡܶܬܪܰܚܰܩ ܐ̱ܢܳܐ܆ ܟܳܠܶܐ ܠܺܝ ܓܶܝܪ ܦܰܘܠܽܘܤ ܟܰܕ ܐܳܡܰܪ: ܗܰܘ ܓܶܝܪ ܕܟܰܕ ܠܳܐ ܫܳܘܶܐ ܐܳܟܶܠ ܘܫܳܬܶܐ܆ ܚܽܘܝܳܒܳܐ ܠܢܰܦܫܶܗ ܐܳܟܶܠ ܘܫܳܬܶܐ^[33]. ܡܶܛܽܠ ܗܳܕܶܐ ܚܕܳܐ ܙܒܰܢ܆ ܐܰܘ ܬܰܪܬܶܝܢ ܒܫܰܢ̱ܬܳܐ ܡܶܬܩܰܪܰܒ ܐ̱ܢܳܐ ܠܦܳܬܽܘܪܳܐ ܗܰܘ ܕܚܺܝܠܳܐ ܥܰܡ ܙܗܺܝܪܽܘܬܳܐ. ܘܰܠܗܳܕܶܐ ܐܶܡܰܪ ܠܺܝ ܟܳܠܺܝܬܳܐ ܡܰܣܒܰܪ ܐܰܢ̱ܬ܆ ܠܗܳܝ ܕܶܐܡܰܪ ܠܳܟ ܫܠܺܝܚܳܐ ܕܰܬܕܰܟܶܐ ܢܰܦܫܳܟ ܒܟܽܠܝܽܘܡ܆ ܘܬܶܬܒܰܣܰܡ ܒܬܽܘܪܣܳܝܳܐ ܗܰܘ ܠܳܐ ܡܳܝܽܘܬܳܐ ܕܠܳܐ ܠܳܐ ܫܳܘܝܳܐܺܝܬ ܬܶܐܟܽܘܠ ܘܬܶܫܬܶܐ܆ ܘܳܐܦܠܳܐ ܓܶܝܪ ܐܶ‌ܠܽܘ ܐ̱ܢܳܫ ܟܰܕ ܠܘܳܬ ܡܰܠܟܳܐ ܥܬܺܝܕ ܗܘܰܝܬ ܕܬܶܥܽܘܠ ܥܰܗܕܳܟ ܕܠܳܚܡܳܐܺܝܬ. ܘܥܰܡ ܬܰܟܣܺܝܬܳܐ ܟܢܺܝܟܬܳܐ ܘܰܗܠܰܟܬܳܐ ܬܶܥܒܶܕ ܡܰܥܰܠܬܳܟ. ܐܳܡܪܺܝܢ ܗ̱ܘܰܝܢ ܕܡܶܢ ܒܶܝܬ ܡܰܠ̈ܟܶܐ ܟܠ̣ܳܟ ܗܳܢܳܐ܆ ܐܶܠܳܐ ܕܝܰܬܺܝܪܳܐܺܝܬ ܚܰܦܛܳܟ ܐܰܝܟܰܢܳܐ ܕܳܐܦ ܬܶܥܽܘܠ ܘܟܰܕ ܐܰܝܟ ܕܰܦܐܶܐ ܥܳܐܶܠ ‌ܐܰܢ̱ܬ ܬܶܬܒܰܣܰܡ ܒܺܐܝܩܳܪܳܐ. ܘܳܐܦܠܳܐ ܓܶܝܪ ܟܰܕ ܚܕܳܐ ܙܒܰܢ ܒܫܰܢ̱ܬܳܐ ܩܳܪܶܒ ܐܰܢ̱ܬ ܩܳܕܶܡ ܐܰܢ̱ܬ ܡܕܰܟܶܐ ܐܰܢ̱ܬ܆ ܐܰܢ̱ܬ ܠܳܟ ܒܝܰܕ ܟܽܠܳܗ̇ ܫܰܢ̱ܬܳܐ ܫܳܘܝܳܐܺܝܬ ܠܝܰܘܡܳܐ ܗܰܘ܆ ܐܰܝܢܳܐ ܕܒܶܗ ܨܳܒܶܐ ܐܰܢ̱ܬ ܠܡܶܫܬܰܘܬܳܦܽܘ܆ ܘܶܐܢ ܕܶܝܢ ܠܳܐ. ܐܺܝܬ ܗ̱ܘܳܐ ܠܶܗ ܡܶܠܬܳܐ ܠܚܽܘܟܳܡܳܟ ܒܕܰܠܩܽܘܒܠܳܐ ܕܶܝܢ ܐܺܝܬܰܘܗ̱ܝ ܟܽܠܶܗ܆ ܕܟܰܕ ܨܳܐܬܳܐ ܕܝܰܪ̈ܚܶܐ ܣܰܓܺܝ̈ܶܐܐ ܘܩܽܘܦܝܳܐ ܣܰܓܺܝܳܐܐ ܕܰܚ̈ܛܳܗܶܐ ܟܰܢܶܫܬ. ܝܰܬܺܝܪ ܠܳܐ ܫܳܘܝܳܐܺܝܬ ܡܰܠܽܘܢ ܡܶܬܩܰܪܰܒ ܐܰܢ̱ܬ. ܗܰܘ ܓܶܝܪ ܕܰܐܡܺܝܢܳܐܺܝܬ ܩܳܪܶܒ. ܝܳܕܰܥ ܕܰܥܬܺܝܕ ܡܶܚܕܳܐ ܕܰܠܘܳܬ ܡܰܠܟܳܐ ܢܶܬܩܰܪܰܒ. ܘܢܶܫܰܐܠ ܫܠܳܡܳܐ ܕܗܳܢܳܐ ܘܰܠܓܰܘ ܢܶܣܒܺܝܘܗ̱ܝ. ܘܰܐܝܟ ܚܰܝܠܶܗ ܘܰܐܝܟ ܕܡܰܨܝܳܐ ܡܶܢ ܚ̈ܛܳܗܶܐ ܣܰܓܺܝ̈ܶܐܐ ܡܶܬܪܰܚܰܩ܆ ܐܰܢ̱ܬ ܕܶܝܢ ܟܕ ܚܕܳܐ ܙܒܰܢ ܦܣ̣ܰܩܬ ܘܶܐܫܬܐܶܠܬ ܡܶܢ ܗܳܕܶܐ. ܘܰܠܘܳܬ ܬܽܘܗܳܝܳܐ ܢܰܓܺܝܪܳܐ ܚܳܐܰܪ ܐܰܢ̱ܬ ܘܥܰܡ ܡܫܰܠܛܽܘܬܳܐ ܘܠܳܐ ܩܰܢܺܝܛܽܘܬܳܐ ܣܳܥܰܪ ܐܰܢ̱ܬ ܟܽܠܗܶܝܢ ܗܳܠܶܝܢ ܕܨܳܒܶܐ ܐܰܢ̱ܬ ܥܕܰܡܳܐ ܕܢܺܐܬܶܐ ܗܰܘ ܝܰܘܡܳܐ. ܗܰܘ ܐܰܝܢܳܐ ܕܒܶܗ ܐܳܦܠܳܐ ܚܕܳܐ ܡܰܥܰܠܬܳܐ ܢܶܗܘܶܐ ܐܺܝܬ ܠܶܗ ܠܡܰܠܟܳܐ܆ ܐܶܠܳܐ ܕܰܣܟܺܝܪ ܢܶܫܟܚܺܝܘܗ̱ܝ ܠܒܶܝܬ ܡܰܥܡܪܳܐ ܕܺܝܠܳܟ.

ܙܳܕܶܩ ܗܳܟܺܝܠ ‌ܐܳܦ ܠܡܶܬܕܰܟܳܝܽܘ ܐܰܝܟ ܕܡܶܫܟܚܳܐ. ܐܳܦ ܕܰܐܡܺܝܢܳܐܺܝܬ ܢܶܬܩܰܪܰܒ ܠܕܰܟܝܳܐ. ܐܳܦ ܫܶܡܫܳܐ ܓܶܝܪ܆ ܠܥܰܝ̈ܢܶܐ ܚܠܺܝ̈ܡܳܬܳܐ ܐܺܝܬܰܘܗ̱ܝ ܡܶܬܚܰܙܝܳܢܳܐ ܐܶܠܳܐ ܠܰܘ ܡܶܛܽܠܗܳܕܶܐ ܙܳܕܶܩ ܠܗܶܝܢ ܠܗܳܠܶܝܢ ܕܰܡܚܺܝ̈ܠܳܢ ܒܰܚܙܳܝܳܐ܆ ܕܢܶܒܣ̈ܝܳܢ ܥܰܠ ‌ܐܳܣܝܽܘܬܳܐ. ܐܰܝܟܰܢܳܐ ܕܰܡܫܰܡܠܝܳܐܺܝܬ ܢܶܚܣܪ̈ܳܢ ܠܢܰܨܺܝܚܽܘܬܶܗ ܕܙܰܠܺܝܩܳܐ܆ ܐܰܘ ܠܳܐ ܝܳܕܰܥ ܐܰܢ̱ܬ܆ ܕܕܶܒܚܬܳܐ ܗܳܕܶܐ ܡܠܺܝܠܬܳܐ ܘܰܕܠܳܐ ܕܡܳܐ܆ ܘܳܐܦ ܒܬܶܫܡܶܫܬܳܐ ܗܳܝ ܢܳܡܽܘܣܳܝܬܳܐ ܕܰܒܝܕ ܕܡܳܐ ܩܰܕܺܝܡܳܐ ܗ̱ܘܳܬ ܡܶܫܬܰܡܠܝܳܐ܆ ܟܰܕ ܒܟܽܠ ܚܰܕ ܝܰܘܡܳܐ ܒܨܰܦܪܳܐ ܘܰܒܪܰܡܫܳܐ ܬܽܘܒ܆ ܚܠܳܦ ܚܽܘܣܳܝܳܐ ܡܶܬܩܰܪܒܳܐ ܗ̱ܘܳܬ܆ ܐܰܝܟܰܢܳܐ ܕܬܶܗܘܶܐ ܝܺܕܺܝܥܬܳܐ܆ ܕܰܚܕܳܐ ܕܶܒܚܬܳܐ ܡܶܕܶܡ ܘܗܺܝ ܟܰܕ ܗܺܝ ܐܺܝܬܶܝܗ̇ ܕܰܐܝܟ ܢܳܡܽܘܣܳܐ ܡܰܢ ܐܰܝܟ ܕܰܒܨܰܦܪܳܐ ܘܫܽܘܪܳܝܳܐ ܕܺܝܕܰܥܬܳܐ ܕܰܐ‌ܠܳܗܳܐ ܡܶܬܩܰܪܒܳܐ ܗ̱ܘܳܬ܆ ܐܰܝܟ ܐܶܘܰܢܓܶܠܺܝܽܘܢ ܕܶܝܢ܆ ܒܚܰܪܬܳܐ ܕܝܰܘ̈ܡܳܬܳܐ ܕܥܳܠܡܳܐ ܘܰܒܪܰܡܫܳܐ܆ ܘܡܶܬܗܰܘܢܳܢܳܐܺܝܬ ܘܝܰܬܺܝܪ ܡܫܰܡܠܝܳܐܺܝܬ ܡܶܬܕܰܒܚܳܐ ܗ̱ܘܳܬ܆ ܗܳܝ ܟܺܝܬ ܕܳܐܦ ܕܶܒܚܬܳܐ ܕܰܐܡܺܝܢܽܘܬܳܐ ܡܶܬܟܰܢܝܳܐ ܗ̱ܘܳܬ܆ ܡܶܛܽܠ ܗܳܝ ܕܰܐܡܺܝܢܳܐܺܝܬ ܘܰܕܠܳܐ ܦܣܳܩ ܡܶܬܩܰܪܒܳܐ ܗ̱ܘܳܬ. ܐܶܢ ܗܳܟܺܝܠ ܒܳܟ ܗܰܘ ܕܰܚܕܳܐ ܙܒܰܢ ܒܫܰܢ̱ܬܳܐ ܒܰܠܚܽܘܕ ܡܶܬܩܰܪܰܒ ܐܰܢ̱ܬ ܢܕܰܡܶܐ ܟܽܠܢܳܫ ܠܳܐ ܡܶܬܕܰܒܚܳܢܳܐ ܡܩܰܘܶܐ ܗܽܘ ܕܶܒܚܳܐ܆ ܡܶܬܦܰܣܩܳܐ ܠܳܗ̇ ܡܶܟܺܝܠ ܗܺܝ ܐܰܡܺܝܢܽܘܬܳܐ ܕܕܶܒܚܬܳܐ܆ ܒܰܛܺܝܠ ܚܽܘܣܳܝܳܐ. ܡܰܕܒܚܳܐ ܕܠܳܐ ܣܳܥܽܘܪܽܘܬܰܐ ܗ̄ܘ. ܡܰܢܽܘ ܗܰܘ ܕܫܳܩܶܠ ܠܳܗ̇ ܠܰܚܛܺܝܬܶܗ ܕܥܳܠܡܳܐ܆ ܕܰܒܟܽܠܙܒܰܢ ܣܢܺܝܩܳܐ ܥܰܠ ܕܽܘܟܳܝܳܐ. ܚܳܙܶܐ ܐܰܢ̱ܬ ܕܒܰܟܡܳܐ ܠܳܐ ܡܠܺܝܠܽܘܬܳܐ ܢܳܦܠܺܝܢ ܚ̱ܢܰܢ܆ ܐܶܢ ܠܰܬܚܽܘ̈ܡܶܐ ܒܰܝ̈ܬܳܝܶܐ ܕܺܝܠܰܢ ܡܶܬܬܦܺܝܣܺܝܢܚ̱ܢܰܢ ܘܠܰܘ ܠܢܳܡܽܘܣ̈ܶܐ܀

ܟܰܕ ܗܳܟܺܝܠ ܒܝܰܕ ܟܽܠ ‌ܐܽܘܪܚܳܐ ܕܰܥ̈ܒܳܕܶܐ ܛܳܒ̈ܶܐ ܝܳܨܦܺܝܢܰܢ ܢܶ݀ܫܬܰܘܬܰܦ  ܒܕܶܒܚܬܳܐ ܗܳܝ ܡܰܥܒܕܰܬ ܚܰܝ̈ܶܐ܆ ܠܳܐ ܓܶܝܪ ܐܺܝܬܶܝܗ̇܆ ܠܳܐ  ܐܺܝܬܶܝܗ̇܆ ܕܰܡܗܰܝܡܢܳܐ ܢܶܗܘܶܐ ܠܳܐ ܡܶܫܬܰܘܬܦܳܢܳܐ ܕܗܳܕܶܐ܆ ܐܶܢܗܽܘ ܕܨܳܒܶܐ ܕܢܺܚܶܐ ܚܰܝ̈ܶܐ ܗܳܢܽܘܢ ܫܰܪܺܝܪ̈ܶܐ܆ ܐܰܝܟܰܢܳܐ ܕܳܐܦܠܳܐ ܤܛܰܪ ܡܶܢ ܗܳܝ ܕܰܢܣܽܘܩ ܐܳܐܰܪ܆ ܐܳܦ ܒܗܳܕܶܐ ܓܶܝܪ ܐܰܝܠܶܝܢ ܕܒܰܡܫܺܝܚܳܐ ܗܰܝܡܶܢܰܢ ܒܶܗ ܚܝ̣ܰܝ̣ܢ ܚ̱ܢܰܢ ܘܡܶܬܬܙܺܝܥܺܝܢ ܚ̱ܢܰܢ ܘܺܐܝܬܰܝܢ^[34] ܕܠܶܗ ܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܫܠܶܡ ܡܺܐܡܪܳܐ ܕܚܰܡܫܺܝܢ ܘܰܐܪܒܥܐ‌܀

ܐܪܡܝܐ. 20: 8 ـ 9 [1]

ܐ. ܩܘܪ̈ܝܢܬܝܐ. 10: 21 [2]

ܝܫܘܥ ܒܪ ܐܣܝܪܐ. 34: 27 ـ 31 [3]

ܡ̈ܬܠܐ. 4: 17 [4]

ܐܝܘܒ. 38: 1 [5]

ܐܝܘܒ. 39: 19 ـ 25 [6]

ܡ̈ܬܠܐ. 21: 31 [7]

ܠܶܒܰܘ̈ܳܬܗܽܘܢ[8]

ܡ̈ܬܠܐ. 12: 10 [9]

ܐ. ܩܘܪ̈ܝܢܬܝܐ. 9: 9 [10]

ܐ. ܩܘܪ̈ܝܢܬܝܐ. 9: 14 [11]

ܐ. ܩܘܪ̈ܝܢܬܝܐ. 9: 7 ـ 9 [12]

ܐ. ܩܘܪ̈ܝܢܬܝܐ. 9: 10 [13]

ܡܙܡܘܪ̈ܐ. 144: 16 [14]

ܠܘܩܐ. 6: 36 [15]

ܡܬܝ. 12: 33 [16]

ܣܶܦܪܐ ܕܒܪܝܬܐ. 18: 20 [17]

ܐܫܥܝܐ. 5: 7 [18]

ܚܙܩܝܐܝܠ. 3: 7 [19]

ܐܦܣ̈ܝܐ. 4: 30 ـ 31 [20]

ܝܘܚܢܢ. 20: 22 [21]

ܥܠܰܝܟ[22]

ܡ̈ܬܠܐ. 4: 27 [23]

ܣܶܦܪܐ ܕܡܢܝܢܐ. 25: 7 [24]

ܣܶܦܪܐ ܕܡܢܝܢܐ. 16: 24 [25]

ܐܪܡܝܐ. 6: 8 [26]

ܓܠܛܝ̈ܐ. 6: 10 [27]

ܡܙܡܘܪ̈ܐ. 34: 7 [28]

ܦܪܟܣܝܣ. 12: 1 ـ [29]

ܡܬܝ. 18: 10 [30]

ܡܙܡܘܪ̈ܐ. 26: 9 [31]

ܡܙܡܘܪ̈ܐ. 31: 16[32]

ܐ. ܩܘܪ̈ܝܢܬܝܐ. 11: 29 [33]

ܪ̈ܗܘܡܝܐ. 6: 8  ܐܦ 14: 8 [34]