ܡܺܐܡܪܳܐ ܕܚܰܡܫܺܝܢ ܘܰܬܠܳܬܳܐ

ܥܰܠ ܡܰܪܕܽܘܬܳܐ ܐܰܘܟܺܝܬ ܡܚܽܘܬܳܐ ܗܳܝ ܕܶܐܫܬܰܡܥܰܬ ܕܶܐܬܬܰܝܬܝܰܬ̣ ܡܶܢ ܐܰ‌ܠܳܗܳܐ ܥܰܠ ‌ܐܰ‌ܠܶܟܣܰܢܕܪ̈ܳܝܶܐ.

53: ܠܳܐ ܐ̱ܢܳܫ ܢܶܣܒܰܪ ܕܰܕܠܳܐ ܩܺܝܢܕܽܘܢܽܘܤ ܐܺܝܬܶܝܗ̇ ܠܟܳܗ̈ܢܶܐ܆ ܐܰܘ ܠܗܳܢܽܘܢ ܕܩܳܝܽܘܡܽܘܬܳܐ ܕܰܒܪܺܝܫ ܥܰܡܳܐ ܐܶܬܗܰܝܡܰܢܘ܆ ܗܳܝ ܕܢܶܫܬܩܽܘܢ܆ ܐܳܦܠܳܐ ܢܶܚܫܽܘܒ ܕܛܰܝܒܽܘܬܳܐ ܡܶܕܶܡ ܡܫܰܟܢܺܝܢ ܗܳܠܶܝܢ ܠܗܳܢܽܘܢ ܕܫܳܡܥܺܝܢ܆ ܐܶܡܰܬܝ ܕܟܰܕ ܢܶܥܒܪܽܘܢ ܠܰܡܨܰܥܬܳܐ܆ ܢܺܐܡܪܽܘܢ ܡܶܕܶܡ ܘܢܰܠܦܽܘܢ. ܚܰܘܒܬܳܐ ܓܶܝܪ ܡܡܰܠܶܝܢ ܟܰܕ ܗܳܕܶܐ ܥܳܒܕܺܝܢ܆ ܗܳܝ ܕܟܰܕ ܠܳܐ ܡܶܬܡܰܠܝܳܐ܆ ܫܽܘܢܳܩܳܐ ܪܰܒܳܐ ܡܰܝܬܝܳܐ ܥܰܠ ܗܳܢܽܘܢ ܕܠܳܐ ܡܡܰܠܶܝܢ ܠܳܗ̇܆ ܥܰܡܽܘܤ ܡܰܢ ܓܶܝܪ ܗܰܘ ܢܒܺܝܳܐ ܐܳܡܰܪ: ܟܳܗ̈ܢܶܐ ܫܡܰܥܘ܆ ܘܰܐܣܗܶܕܘ ܠܒܰܝܬܶܗ ܕܝܰܥܩܽܘܒ܆ ܐܳܡܰܪ ܡܳܪܝܳܐ ܐܰ‌ܠܳܗܳܐ ܐܰܚܺܝܕ ܟܽܠ^[1]. ܐܶܫܰܥܝܳܐ ܕܶܝܢ ܒܳܗ̇ ܒܰܕܡܽܘܬܳܐ ܦܳܩܶܕ ܠܰܢ܆ ܒܰܝܰܐܽܘܗ̱ܝ ܒܰܝܰܐܽܘܗ̱ܝ ܠܥܰܡܝ ܐܳܡܰܪ ܐܰ‌ܠܳܗܳܐ. ܟܳܗ̈ܢܶܐ ܡܰܠܶܠܘ ܒܠܶܒܳܗ̇ ܕܽܐܘܪܶܫܠܶܡ^[2]. ܐܰܝܟܰܢܳܐ ܟܺܝܬ ܕܡܳܕܶܝܢ ܙܳܕܶܩ ܠܶܗ ܠܟܳܗܢܳܐ܆ ܕܰܒܩܰܕܡܳܐ ܡܰܢ ܒܝܰܕ ܕܽܘܟܳܝܳܐ܆ ܡܰܫܡܰܥܬܳܐ ܕܝܰܬܺܝܪ ܚܰܪܺܝܦܳܐ ܢܶܗܘܶܐ ܐܺܝܬ ܠܶܗ܆ ܐܰܝܟ ܕܢܶܬܡܨܶܐ ܕܩܰܠܺܝܠܳܐܺܝܬ ܢܶܪܓܰܫ ܒܚܶܙܘܳܢ̈ܶܐ ܗܳܢܽܘܢ ܕܡܶܢ ܐܰ‌ܠܳܗܳܐ ܡܶܬܬܰܝܬܶܝܢ܆ ܐܰܘ ܓܙܳܡ̈ܶܐ ܐܰܘ ܦܽܘܩ̈ܕܳܢܶܐ. ܕܬܰܪܬܶܝܢ ܕܶܝܢ ܕܠܰܘ ܩܰܢܺܝܛܳܐܺܝܬ܆ ܐܶܠܳܐ ܥܰܡ ܦܰܪܶܗ̱ܣܺܝܰܐ ܡܶܕܶܡ ܢܳܡܽܘܣܳܝܬܳܐ ܘܚܰܟܺܝܡܬܳܐ܆ ܢܰܣܗܶܕ ܠܥܰܡܳܐ ܘܰܢܡܰܠܶܠ. ܠܰܘ ܦܫܺܝܛܳܐܺܝܬ ܐܶܠܳܐ ܒܠܶܒܳܗ̇ ܕܽܐܘܪܫܠܶܡ܆ ܐܰܝܟܰܢܳܐ ܕܰܒܗܳܢܽܘܢ ܕܫܳܡܥܺܝܢ ܬܶܓܫܽܘܦ ܡܶܠܬܳܐ܆ ܘܠܰܘ ܒܰܠܚܽܘܕ ܠܡܰܫܡܰܥܬܳܐ ܬܰܦܨܰܚ܆ ܐܶܠܳܐ ܐܳܦ ܠܓܰܘ ܬܶܥܒܰܪ ܘܬܶܥܽܘܠ܆ ܘܰܠܘܳܬ ܢܰܦܫܳܐ ܬܫܰܕܰܪ ܠܝܽܘܬܪܳܢܳܐ ܗܰܘ ܕܡܶܢ ܣܽܘ̈ܟܳܠܶܐ.

ܡܶܛܽܠ ܡܶܠܬܳܐ ܗܳܝ ܕܕܰܐܝܟ ܗܳܕܶܐ܆ ܠܩܽܘܪ̈ܝܢܬܳܝܶܐ ܟܳܬܶܒ ܗ̱ܘܳܐ ܦܰܘܠܽܘܤ܆ ܐܶܠܳܐ ܒܥܺܕܬܳܐ ܨܳܒܶܐ ܐ̱ܢܳܐ܆ ܕܚܰܡܶܫ ܡ̈ܶܠܶܐ ܒܗܰܘܢܝ ܐܶ݀ܡܰܠܶܠ܆ ܐܰܝܟܰܢܳܐ ܕܳܐܦ ܠܰܐ̱ܚܪ̈ܳܢܶܐ ܐܰ݀ܪܬܶܐ܆ ܐܰܘ ܪܶܒܽܘ ܡܶܠܻ̈ܝܢ ܒܠܶܫܳܢܳܐ^[3].

ܗܳܠܶܝܢ ܕܶܝܢ ܕܰܠܘܳܬ ܚܰܙܩܺܝܐܶܝܠ ܢܒܺܝܳܐ ܡܶܢ ܐܰ‌ܠܳܗܳܐ ܡܶܬܰܐܡܪ̈ܳܢ܆ ܕܶܚܠܬܳܐ ܪܰܒܬܳܐ ܡܰܝ̈ܬܝܳܢ ܥܰܠ ܗܳܢܽܘܢ ܕܰܒܪܺܝܫ ܥܰܡܳܐ ܩܳܝܡܺܝܢ܆ ܘܥܰܠ ܗܳܢܽܘܢ ܕܠܳܐ ܡܰܪܓܫܳܢܳܐܺܝܬ ܣܺܝܡܺܝܢ܆ ܘܪܶܥܠܳܐ ܥܳܒ̈ܕܳܢ܆ ܘܰܡܚܰܘ̈ܝܳܢ ܢܰܗܺܝܪܳܐܺܝܬ ܕܕܰܐܝܟ ܐܰܝܢܳܐ ܩܺܝܢܕܽܘܢܽܘܤ ܐܺܝܬ ܠܶܗ ܠܫܶܬܩܳܐ. ܘܝܰܬܺܝܪܳܐܺܝܬ ܡܰܢ ܕܰܠܗܰܘ ܕܪܺܝܫܳܢܽܘܬܳܐ ܗܳܝ ܟܳܗܢܳܝܬܳܐ ܡܗܰܝܡܰܢ. ܕܳܘܩܳܐ ܡܫܰܡܰܗ ܠܶܗ. ܐܰܘ ܡܶܛܽܠ ܗܳܝ ܕܣܳܥܰܪ ܘܚܳܐܰܪ ܒܶܗ ܒܥܰܡܳܐ ܘܚܰܨܺܝܦܳܐܺܝܬ ܒܳܩܰܪ ܠܶܗ܆ ܘܟܽܠܳܗ̇ ܥܰܝܢܳܐ ܐܺܝܬܰܘܗ̱ܝ ܡܶܬܒܰܩܝܳܢܺܝܬܳܐ ܘܰܡܒܰܚܢܳܢܺܝܬܳܐ܆ ܟܰܕ ܩܳܐܶܡ ܒܙܰܒܢܳܐ ܘܰܕܠܳܐ ܒܙܰܒܢܳܐ ܐܰܝܟ ܢܳܡܽܘܣܳܐ ܫܠܺܝܚܳܝܳܐ^[4] ܥܰܠ ܗܳܢܽܘܢ ܕܡܶܬܪܰܥܶܝܢ ܘܺܐܝܬܰܝܗܽܘܢ ܬܚܶܝܬ ܪܺܝܫܳܢܽܘܬܳܐ܆ ܐܰܘ ܡܶܛܽܠ ܕܒܰܕܡܽܘܬ ܛܽܘܦܣܳܐ ܣܺܝܡ ܩܕܳܡܰܝܢ ܘܰܐܝܟ ܩܰܕܺܝܡܽܘܬ ܪܽܘܫܡܳܐ ܡܶܕܶܡ ܕܰܬܪܺܝܨܽܘܬܳܐ ܕܰܒܚܰܝ̈ܶܐ. ܐܳܦ ܓܶܝܪ ܐܳܦ ܣܝܡܝܘܢ ܐܰܘܟܺܝܬ ܐܳܬ̣ܳܐ܆ ܗܳܝ ܟܺܝܬ ܕܰܠܘܳܬܳܗ̇ ܡܫܰܕܪܺܝܢ ܩܶܫ̈ܬܶܐ ܓܶܐܪܳܐ܆ ܕܳܘܩܳܐ ܡܶܫܬܰܡܗܳܐ. ܐܰܝܟܰܢܳܐ ܕܰܐܟܙܢܳܐ ܕܗܳܢܽܘܢ ܟܰܕ ܩܶܫܬܳܐ ܡܳܬܚܺܝܢ܆ ܟܽܠܶܗ ܚܰܘܪܳܐ ܕܺܝܠܗܽܘܢ ܠܘܳܬ ܢܺܝܫܳܐ ܗܰܘ ܐܰܘܟܺܝܬ ܕܳܘܩܳܐ ܩܳܒܥܺܝܢ ܠܶܗ܆ ܟܰܕ ܡܕܰܡܝܳܢܳܐܺܝܬ ܘܛܳܒ ܚܳܢܝܳܐܺܝܬ ܠܘܳܬܶܗ ܨܳܒܶܝܢ ܠܰܡܫܰܕܳܪܽܘ ܓܶܐܪܳܐ܆ ܒܶܗ ܟܰܕ ܒܶܗ ܒܰܙܢܳܐ ܐܳܦ ܥܰܡܳܐ܆ ܠܘܳܬ ܟܳܗܢܳܐ ܢܶܗܘܽܘܢ ܚܳܝܪܺܝܢ ܐܰܝܟ ܕܰܠܘܳܬ ܕܳܘܩܳܐ ܐܰܘ ܟܺܝܬ ܢܺܝܫܳܐ܆ ܘܰܠܘܳܬ ܕܽܘܒܳܪܳܐ ܕܗܰܘ ܘܡܶܠܬܳܐ܆ ܟܽܠܳܗ̇ ܣܳܥܽܘܪܽܘܬܳܐ ܕܺܝܠܗܽܘܢ ܢܶܗܘܽܘܢ ܡܬܰܪܨܺܝܢ. ܗܳܟܰܢܳܐ ܓܶܝܪ ܐܳܦ ܦܰܘܠܽܘܤ܆ ܟܰܕ ܠܳܐ ܡܰܣܛܝܳܢܺܝܬܳܐ ܘܠܳܐ ܛܰܥܳܝܬܳܐ ܐܺܝܬ ܗ̱ܘܳܐ ܠܶܗ ܥܰܝܢܳܐ ܕܬܰܪܥܺܝܬܶܗ܆ ܘܰܕܒܰܠܚܽܘܕ ܠܘܳܬ ܗܳܠܶܝܢ ܫܡܰܝܳܢ̈ܝܳܬܳܐ ܚܳܝܪܳܐ ܗ̱ܘܳܬ ܐܳܡܰܪ ܗ̱ܘܳܐ: ܟܰܕ ܠܗܳܠܶܝܢ ܡܰܢ ܕܰܕܒܶܣܬܰܪܝ ܛܳܥܶܐ ܐ̱ܢܳܐ܆ ܒܗܳܠܶܝܢ ܕܶܝܢ ܕܠܰܩܕܳܡܰܝ ܡܶܬܡܬܰܚ ܐ̱ܢܳܐ. ܘܚܳܐܰܪ ܐ̱ܢܳܐ ܠܘܳܬ ܕܳܘܩܳܐ ܐܰܘܟܺܝܬ ܢܺܝܫܳܐ܆ ܪܳܗܶܛ ܐ̱ܢܳܐ ܠܘܳܬ ܟܠܺܝܠܳܐ ܕܰܩܪܳܝܬܳܐ ܕܰܠܥܶܠ ܕܰܐ‌ܠܳܗܳܐ^[5].

ܩܳܪܶܐ ܕܶܝܢ ܡܰܠܽܘܢ ܕܳܘܩܳܐ ܠܟܳܗܢܳܐ܆ ܐܳܦ ܐܰܝܟ ܬܰܪܥܺܝܬܳܐ ܗܳܝ܆ ܡܶܛܽܠ ܟܺܝܬ ܕܰܥܝܳܕܳܐ ܐܺܝܬ ܠܰܡܫܰܡܳܗܽܘ ܕܳܘܩܳܐ܆ ܠܗܰܘ ܕܥܰܠ ܫܽܘܪܳܐ ܐܰܘ ܥܰܠ ܕܽܘܟܬܳܐ ܡܶܕܶܡ ܐ̱ܚܪܺܬܳܐ ܪܳܡܬܳܐ ܩܳܐܶܡ܆ ܘܚܰܪܺܝܦܳܐܺܝܬ ܚܳܐܰܪ ܘܕܳܐܶܩ ܡܶܢ ܪܽܘܚܩܳܐ܆ ܘܩܳܕܶܡ ܡܰܘܕܰܥ ܠܚܺܐܦܳܐ ܘܡܶܐܬܺܝܬܳܐ ܕܰܒܥܶܠ̈ܕܒܳܒܶܐ܆ ܐܰܘ ܠܡܶܕܶܡ ܐ̱ܚܪܺܢܳܐ ܡܶܢ ܗܳܠܶܝܢ ܕܠܳܐ ܝܺܕܺܝ̈ܥܳܢ܆ ܥܬܺܝ̈ܕܳܢ ܕܶܝܢ ܕܢܺܐܬܝ̈ܳܢ ܒܳܬܰܪ ܩܰܠܺܝܠ. ܘܰܠܗܳܕܶܐ ܐܺܝܬ ܠܡܶܫܟܳܚܽܘ ܒܰܟܬܳܒܳܐ ܕܡܰܠ̈ܟܘܳܬܳܐ܆ ܕܓܰܠܝܳܐܺܝܬ ܡܶܬܬܰܢܝܳܐ ܗܳܟܰܢܳܐ܆ ܘܰܣܠܶܩ ܛܰܠܝܳܐ ܕܳܘܩܳܐ. ܘܰܐܪܺܝܡ ܥܰܝ̈ܢܶܐ ܕܺܝܠܶܗ ܘܰܚܙܳܐ܆ ܘܗܳܐ ܥܰܡܳܐ ܣܰܓܝܳܐܐ ܕܳܐܬܶܐ ܒܽܐܘܪܚܳܐ ܗܳܝ ܕܣܽܘܪܰܐܺܝܡ ܡܶܢ ܓܰܒܳܐ ܕܛܽܘܪܳܐ^[6]. ܘܶܐܬܳܐ ܕܳܘܩܳܐ ܘܰܐܘܕܰܥ ܠܡܰܠܟܳܐ ܘܶܐܡܰܪ܆ ܡܶܚܙܳܐ ܚܙܺܝܬ ܓܰܒܪ̈ܶܐ ܡܶܢ ܐܽܘܪܚܳܐ ܕܣܽܘܪܰܐܺܝܡ ܡܶܢ ܓܰܒܳܐ ܕܛܽܘܪܳܐ. ܘܳܐܦ ܒܕܽܘܟܬܳܐ ܐ̱ܚܪܺܬܳܐ ܬܽܘܒ܆ ܘܶܐܙܰܠ ܕܳܘܩܳܐ ܥܰܠ ‌ܐܶܓܳܪܳܐ ܕܬܰܪ̈ܥܶܐ ܥܰܠ ܫܽܘܪܳܐ܆ ܘܰܐܪܺܝܡ ܥܰܝܢܰܘ̈ܗ̱ܝ ܘܰܚܙܳܐ. ܘܗܳܐ ܓܰܒܪܳܐ ܕܪܳܗܶܛ ܠܚܽܘܕܰܘܗ̱ܝ ܠܩܽܘܒܠܶܗ. ܘܰܩܥܳܐ ܕܳܘܩܳܐ ܘܰܐܘܕܰܥ ܠܡܰܠܟܳܐ. ܘܳܐܦ ܒܕܽܘܟܬܳܐ ܕܶܝܢ ܐ̱ܚܪܺܬܳܐ ܬܽܘܒ܆ ܘܕܳܘܩܳܐ ܩܳܐܶܡ ܗ̱ܘܳܐ ܥܰܠ ܡܰܓܕܠܳܐ ܒܺܐܝܙܰܪܥܶܝܠ܆ ܘܰܚܙܳܐ ܠܚܷܠܳܐ ܕܥܰܡܳܐ ܕܺܝܗܽܘ^[7] ܟܰܕ ܐܶܬܳܐ ܘܳܐܡܰܪ ܥܰܡܳܐ ܚܳܙܶܐ ܐ̱ܢܳܐ^[8].

ܗܳܟܰܢܳܐ ܕܶܝܢ ܙܳܕܶܩ ܐܳܦ ܠܰܡܕܰܒܪܳܢܶܗ ܕܥܰܡܳܐ܆ ܕܟܰܕ ܐܰܝܟ ܕܥܰܠ ܕܽܘܟܬܳܐ ܡܶܕܶܡ ܪܳܡܬܳܐ ܩܳܐܶܡ ܥܰܠ ܡܰܓܕܠܳܐ ܕܰܡܝܰܬܪ̈ܳܬܳܐ܆ ܘܰܡܥܰܠܰܝ ܒܣܳܥܽܘܪܽܘܬܳܐ ܘܰܒܬܶܐܽܘܪܺܝܰܐ܆ ܡܶܛܽܠ ܗܳܕܶܐ ܓܶܝܪ܆ ܐܳܦ ܝܳܬܶܒ ܥܰܠ ܡܰܘܬܒܳܐ ܗܳܢܳܐ ܕܡܶܬܚܙܶܐ ܠܥܶܠ ܡܶܢ ܗܳܢܽܘܢ ܐ̱ܚܪ̈ܳܢܶܐ܆ ܠܡܶܩܢܳܐ ܥܰܝܢܳܐ ܕܬܰܪܥܺܝܬܳܐ܆ ܕܕܰܟܝܳܐ ܘܚܰܪܺܝܦܳܐ ܘܰܕܡܶܢ ܠܥܶܠ ܡܶܬܢܰܗܪܳܐ܆ ܘܰܕܩܳܕܡܳܐ ܚܳܙܝܳܐ ܡܶܢ ܪܽܘܚܩܳܐ ܠܰܓ̈ܙܳܡܶܐ ܕܳܐܬܶܝܢ܆ ܐܰܘ ܠܚܺܐܦ̈ܶܐ ܕܫ̈ܺܐܕܶܐ ܐܰܝܟ ܕܡܰܩܪ̈ܒܳܢܶܐ܆ ܐܰܘ ܠܰܟ̈ܡܺܐܢܶܐ ܕܰܡܛܰܫܶܝܢ܆ ܐܰܘ ܠܦܰܚ̈ܶܐ ܕܒܺܝܫܳܐ ܕܰܛܡܺܝܪܺܝܢ܆ ܘܰܕܢܶܩܕܽܘܡ ܢܰܘܕܰܥ ܘܢܶܩܕܽܘܡ ܢܥܰܬܶܕ܆ ܘܕܰܢܗܰܕܶܐ ܘܢܶܡܠܽܘܟ ܗܳܠܶܝܢ ܕܒܺܐܝ̈ܕܰܝܗܶܝܢ ܐܺܝܬ ܠܡܶܗܘܳܐ܆ ܠܒܰܪ ܡܶܢ ܒܺܝ̈ܫܳܬܳܐ ܗܳܠܶܝܢ ܕܰܥܬܺܝ̈ܕܳܢ ܠܡܶܐܬܳܐ ܥܠܰܝܗܽܘܢ܆ ܡܶܛܽܠ ܗܳܕܶܐ ܓܶܝܪ ܝܰܬܺܝܪܳܐܺܝܬ܆ ܕܳܘܩܳܐ ܐܰܝܟ ܕܶܐܡܪܶܬ ܡܫܰܡܰܗ ܠܶܗ ܟܬܳܒܳܐ ܗܰܘ ܟܳܗܢܳܝܳܐ.

ܒܳܬܰܪܟܶܢ ܕܶܝܢ ܠܶܗ ܟܰܕ ܠܶܗ ܒܳܥܶܐ ܕܟܰܕ ܩܳܕܶܡ ܚܳܙܶܐ܆ ܐܦ ܢܣܰܗܶܕ ܠܥܰܡܳܐ ܦܰܪܶܗܣܝܳܐܺܝܬ ܘܓܰܠܝܳܐܺܝܬ܆ ܘܝܰܬܺܝܪ ܢܰܗܺܝܪܳܐܺܝܬ ܛܳܒ ܡܶܢ ܫܺܝܦܽܘܪܳܐ ܫܰܦܺܝܪ ܢܶܥܡܬܳܐ ܘܪܰܒ ܩܳܠܳܐ܆ ܐܰܝܟ ܕܳܐܦ ܒܡܰܫܡܰܥܬܳܐ ܗܳܝ ܝܰܩܺܝܪܬܳܐ ܘܕܰܡܣܰܟܪܳܐ ܒܒܺܝܫܽܘܬܳܐ ܗܳܝ ܥܳܠܡܳܢܳܝܬܳܐ ܢܶܓܫܽܘܦ. ܫܰܦܺܝܪܳܐ ܕܶܝܢ ܕܳܐܦ ܠܳܗ̇ ܠܡܶܠܬܶܗ ܕܚܰܙܩܺܝܐܶܝܠ ܢܶܫܡܰܥ܆ ܘܢܶܕܰܥ ܕܰܟܡܳܐ ܕܶܚܠܬܳܐ܆ ܘܕܰܐܝܟ ܐܰܝܢܳܐ ܡܣܳܡ ܒܪܺܝܫܳܐ ܣܺܝܡ ܘܰܢܛܺܝܪ ܠܟܳܗ̈ܢܶܐ܆ ܗܳܢܽܘܢ ܕܰܠܕܰܐܝܟ ܗܳܠܶܝܢ ܠܳܐ ܡܰܙܥܩܺܝܢ. ܐܺܝܬ ܠܳܗ̇ ܕܶܝܢ ܗܳܟܰܢܳܐ. ܘܰܗܘܳܬ ܡܶܠܬܶܗ ܕܡܳܪܝܳܐ ܠܘܳܬܝ ܕܳܐܡܪܳܐ: ܒܰܪܢܳܫܳܐ ܡܰܠܶܠ ܠܰܒ̈ܢܰܝ ܥܰܡܳܟ. ܘܬܺܐܡܰܪ ܠܘܳܬܗܽܘܢ܆ ܐܰܪܥܳܐ ܗܳܝ ܕܰܐ݀ܝܬܶܐ ܥܠܶܝܗ̇ ܚܰܪܒܳܐ܆ ܢܶܣܰܒ ܥܰܡܳܐ ܕܰܐܪܥܳܐ ܓܰܒܪܐ ܚܰܕ ܡܶܢܗܽܘܢ܆ ܘܢܶܬܠܽܘܢܳܝܗ̱ܝ ܠܗܽܘܢ ܠܕܳܘܩܳܐ. ܘܶܐܢ ܢܶܚܙܶܐ ܕܳܘܩܳܐ ܠܚܰܪܒܳܐ ܕܳܐܬܝܳܐ ܥܰܠ ‌ܐܰܪܥܳܐ܆ ܘܢܶܩܥܶܐ ܒܩܰܪܢܳܐ ܘܰܢܫܰܘܕܰܥ ܠܥܰܡܳܐ. ܘܢܰܫܡܰܥ ܗܰܘ ܕܰܫܡܰܥ ܠܩܳܠܐ ܕܩܰܪܢܳܐ ܘܠܳܐ ܢܶܙܕܗܰܪ܆ ܘܬܺܐܬܶܐ ܥܠܰܘܗ̱ܝ ܚܰܪܒܳܐ ܘܬܰܕܪܟܺܝܘܗ̱ܝ܆ ܕܡܶܗ ܥܰܠ ܪܺܝܫܶܗ ܢܶܗܘܶܐ. ܡܶܛܽܠ ܕܟܰܕ ܩܳܠܳܐ ܕܩܰܪܢܳܐ ܫܡܰܥ܆ ܠܳܐ ܐܶܙܕܗܰܪ. ܕܡܶܗ ܥܠܰܘܗ̱ܝ ܢܶܗܘܶܐ. ܘܗܳܢܳܐ ܡܶܛܽܠ ܕܶܐܙܕܗܰܪ ܢܰܦܫܶܗ ܦܰܨܺܝ. ܘܕܳܘܩܳܐ ܐܶܢ ܢܶܚܙܶܐ ܠܚܰܪܒܳܐ ܕܳܐܬܝܳܐ܆ ܘܠܳܐ ܢܶܩܥܶܐ ܒܩܰܪܢܳܐ ܘܠܳܐ ܢܫܰܘܕܰܥ ܠܥܰܡܳܐ܆ ܘܥܰܡܳܐ ܠܳܐ ܢܶܙܕܗܰܪ܆ ܘܟܰܕ ܬܺܐܬܶܐ ܚܰܪܒܳܐ ܬܶܣܰܒ ܡܶܢܗܽܘܢ ܢܰܦܫܳܐ܆ ܗܳܝ ܡܰܢ ܡܶܛܽܠ ܠܳܐ ܢܳܡܽܘܣܳܝܽܘܬܳܐ ܕܺܝܠܳܗ̇ ܐܶܬܢܰܣܒܰܬ. ܠܰܕܡܳܐ ܕܶܝܢ ܕܺܝܠܳܗ̇܆ ܡܶܢ ܐܺܝܕܳܐ ܕܕܳܘܩܳܐ ܐܶ݀ܬܒܰܥ^[9].

ܟܰܕ ܗܳܠܶܝܢ ܗܳܟܺܝܠ ܗܳܟܰܢܳܐ ܓܙܺܝ̈ܡܳܢ܆ ܐܶܢ ܟܰܕ ܫܳܬܶܩ ܕܳܘܩܳܐ ܘܠܳܐ ܩܳܕܶܡ ܡܰܘܕܰܥ ܐܳܦܠܳܐ ܡܰܠܶܦ܆ ܟܰܕ ܚܕܳܐ ܢܰܦܫܐ ܒܰܠܚܽܘܕ ܐܳܒܕܳܐ܆ ܚܰܝܳܒܳܐ ܐܺܝܬܰܘܗ̱ܝ ܕܰܕܡܳܐ ܕܗܳܝ܆ ܡܳܢܳܐ ܢܶܥܒܶܕ ܚܢܰܢ. ܡܰܠܽܘܢ ܕܶܝܢ ܡܳܢܳܐ ܠܳܐ ܢܶܚܰܫ ܕܰܩܫܶܐ܆ ܕܕܰܢܩܽܘܡ ܡܰܢ ܒܪܺܝܫ ܥܰܡܳܐ ܐܶܬܛܰܟܰܣܢܰܢ܆ ܠܰܘ ܕܶܝܢ ܒܰܠܚܽܘܕ ܠܗܳܝ ܕܰܥܬܺܝܕܳܐ ܠܳܐ ܩܳܕܡܺܝܢܰܢ ܡܰܘܕܥܺܝܢ ܚ̱ܢܰܢ܆ ܐܶܠܳܐ ܐܳܦ ܥܰܠ ܚܰܫ̈ܶܐ ܗܳܢܽܘܢ ܕܰܩܕܳܡ ܪ̈ܶܓܠܶܐ ܣܺܝܡܺܝܢ ܘܰܩܕܳܡ ܥܰܝ̈ܢܶܐ ܐܺܝܬܰܝܗܽܘܢ ܘܡܶܬܚܙܶܝܢ܆ ܐܺܝܬ ܠܰܢ ܠܶܫܳܢܳܐ ܠܳܐ ܡܶܬܬܙܺܝܥܳܢܳܐ܆ ܘܚܰܫ̈ܶܐ ܐܰܝܠܶܝܢ܆ ܐܰܟܣ̈ܢܳܝܶܐ ܡܶܕܶܡ ܘܠܳܐ ܡܥܰܝ̈ܕܶܐ܆ ܘܗܳܠܶܝܢ ܕܳܐܦܠܳܐ ܒܙܰܒܢܳܐ ܗܰܘ ܕܩܰܕܶܡ ܥܒܰܪ ܗܘ̣ܰܘ܆ ܐܳܦܠܳܐ ܬܽܘܢܳܝܳܐ ܡܶܕܶܡ ܕܬܰܫܥܺܝܬܳܐ ܥܰܬܺܝܩܬܳܐ ܫܰܕܰܪ ܠܘܳܬܰܢ. ܝܺܕܰܥܢܰܢ ܓܶܝܪ ܘܳܐܦ ܒܙܰܒ̈ܢܶܐ ܗܳܢܽܘܢ ܕܰܩܕܳܡ ܩܰܠܺܝܠ܆ ܘܳܐܦ ܒܗܳܢܽܘܢ ܕܡܶܢ ܩܕܺܝܡ ܥܒܰܪܘ܆ ܐܳܦ ܡܕܺܝܢ̈ܳܬܳܐ ܐܳܦ ܐܰܬܪ̈ܰܘܳܬܳܐ܆ ܐܳܦ ܟܶܢ̈ܫܶܐ ܘܥܰܡ̱ܡ̈ܶܐ܆ ܕܶܐܬܬܒܰܥܘ ܕܺܝ̈ܢܶܐ ܕܗܳܠܶܝܢ ܕܰܚܛܰܘ܆ ܐܰܘ ܒܟܽܘܪ̈ܗܳܢܶܐ ܐܰܘ ܒܡܶܛܪ̈ܶܐ ܕܠܳܐ ܡܫܽܘܚܬܳܐ܆ ܐܰܘ ܒܰܡܚܽܘܬܳܐ ܕܒܰܪܕܳܐ܆ ܐܰܘ ܒܽܐܘܟܠܳܢܳܐ ܕܩܰܡܨܳܐ܆ ܘܰܒܚܰܣܺܝܪܽܘܬ ܬܽܘܪܣܳܝܳܐ ܕܡܶܢ ܗܳܪܟܳܐ܆ ܘܠܳܐ ܫܟܺܝܚܽܘܬܳܐ ܕܺܝܠܶܗ ܕܬܽܘܪܣܳܝܳܐ ܐܳ‌ܠܨܳܝܳܐ ܩܰܫܝܳܐܺܝܬ ܐܶܬܥܰܨܰܪܘ܆ ܐܰܘ ܕܰܒܟܽܘܪܗܳܢܳܐ ܡܚܰܒܠܳܢܳܐ ܢܦܰܠܘ܆ ܘܰܒܚܽܘܒܳܠܳܐ ܣܓܺܝܘ ܒܢܰܝ̈ܢܳܫܳܐ ܕܡܰܘܬܳܐ. ܐܰܘ ܕܰܠܫܶܒܝܳܐ ܕܰܒܥܶܠ̈ܕܒܳܒܶܐ ܐܶܫܬܠܶܡܘ. ܐܰܘ ܕܰܒܢܽܘܦ̈ܚܶܐ ܘܰܒܫܽܘܚ̈ܢܶܐ ܠܳܐ ܡܶܬܰܐܣ̈ܝܳܢܶܐ ܐܶܬܡܰܚܺܝܘ.

ܕܫ̈ܺܐܕܶܐ ܕܶܝܢ ܒܰܥܪܺܝܪ̈ܳܝܶܐ܆ ܐܶܫܬܒܶܩܘ ܕܢܶܙܕܰܝܢܽܘܢ ܗܳܟܰܢܳܐ ܟܢܺܝܫܳܐܺܝܬ ܥܰܠ ܟܽܠܶܗ ܥܰܡܳܐ ܕܰܡܕܺܝܢ̱ܬܳܐ ܐܰܘ ܕܕܽܘܟܬܳܐ ܡܶܕܶܡ܆ ܥܕܰܡܳܐ ܠܛܶܒܳܐ ܗܳܢܳܐ ܙܺܝܥܳܐ ܠܳܐ ܫܡܰܥܢܰܢ܆ ܐܶܠܳܐ ܐܳܦ ܟܰܕ ܥܰܠ ܠܰܘ̈ܛܳܬܳܐ ܗܳܠܶܝܢ ܕܡܽܘܫܶܐ ܥܶܒܪܶܬ܆ ܗܳܠܶܝܢ ܕܠܳܛ ܠܰܐܝܠܶܝܢ ܕܥܳܒܪܺܝܢ ܥܰܠ ܦܽܘܩ̈ܕܳܢܶܐ ܕܢܳܡܽܘܣܳܐ܆ ܘܰܙܢܰܝ̈ܳܐ ܡܫܰܚ̈ܠܦܶܐ ܕܟܽܘܪ̈ܗܳܢܶܐ ܩܪܺܝܬ. ܘܠܳܐ ܡܶܕܶܡ ܕܰܐܝܟ ܗܳܟܰܢ ܐܶܫܟܚܶܬ. ܐܶܠܳܐ ܐܶܢ ܕܰܠܡܳܐ ܗܳܝ ܢܺܐܡܰܪ ܐ̱ܢܳܫ܆ ܗܳܝ ܕܰܐܡܺܝܪܳܐ ܠܶܗ ܗܳܟܰܢܳܐ܆ ܢܶܡܚܶܝܟ ܡܳܪܝܳܐ ܒܫܳܢܝܽܘܬܳܐ ܘܰܒܓܳܗܪܽܘܬܳܐ ܘܰܒܫܽܘܓܢܳܝܳܐ ܕܬܰܪܥܺܝܬܳܐ^[10]. ܗܳܕܶܐ ܕܶܝܢ ܡܢܳܬܳܐ ܐܺܝܬܶܝܗ̇܆ ܘܠܰܘ ܝܽܘܩܢܳܐ ܟܽܠܳܗ̇ ܕܰܡܚܽܘܬܳܐ ܗܳܕܶܐ ܕܗܳܫܳܐ ܐܶܬܬܰܝܬܝܰܬ̣. ܐܺܝܬ ܗ̱ܘ̣ ܡܰܢ ܓܶܝܪ ܒܶܗ ܒܚܰܫܳܐ ܫܳܢܝܽܘܬܳܐ ܐܳܦ ܫܽܘܓܢܳܝܳܐ ܕܬܰܪܥܺܝܬܳܐ. ܡܰܘܣ̈ܦܳܢ ܕܶܝܢ ܣܺܝ̈ܡܳܢ ܥܰܡ ܗܳܠܶܝܢ ܐܳܦ ܗܳܢܶܝܢ܆ ܐܰܝܠܶܝܢ ܕܠܳܐ ܒܡܶܠܬܳܐ ܡܶܬܡ̈ܠܠܳܢ ܘܳܐܦܠܳܐ ܠܡܰܫܡܰܥܬܳܐ ܡܶܬܗܰܝ̈ܡܢܳܢ. ܗܳܝ ܡܰܢ ܓܶܝܪ ܕܢܶܫܢܽܘܢ ܒܢܰܝ̈ܢܳܫܳܐ ܘܢܶܬܒܰܥܩܽܘܢ ܘܰܢܢܰܬܫܽܘܢ ܘܰܢܦܰܣܩܽܘܢ ܠܒܶܣܪ̈ܶܐ ܕܺܝܠܗܽܘܢ ܘܠܳܐ ܢܶܪܓܫܽܘܢ܆ ܘܢܶܗܘܽܘܢ ܦܰܩܺܝܪܺܝܢ܆ ܥܰܠ ܡܰܥܒܕܳܢܽܘܬܳܐ ܕܫ̈ܺܐܕܶܐ ܗܳܢܽܘܢ ܕܳܐ‌ܠܨܺܝܢ ܠܗܽܘܢ ܙܳܕܶܩ ܕܢܶܟܬܒܺܝܗ̇. ܗܳܝ ܕܶܝܢ ܕܢܶܣܒܪܽܘܢ ܕܡܺܐܩܰܕ ܝܳܩܕܺܝܢ܆ ܘܓܽܘܡܪ̈ܶܐ ܕܢܽܘܪܳܐ ܕܰܡܕܰܥ̈ܟܳܢ ܢܬܺܝܒܽܘܢ܆ ܗܳܢܰܘ ܕܶܝܢ ܩܽܘܪ̈ܒܽܘܢܝܶܐ^[11]܆ ܠܒܰܪ ܡܶܢ ܦܰܩܪܽܘܬܳܐ ܗܳܝ ܫܺܐܕܳܢܳܝܬܳܐ ܐܺܝܬܶܝܗ̇. ܘܰܠܒܰܪ ܡܶܢ ܢܰܩܺܝܦܽܘܬܳܐ ܟܝܳܢܳܝܬܳܐ. ܘܕܰܬܚܶܝܬ ܡܶܠܬܳܐ ܡܶܕܶܡ ܢܣܺܝܡܺܝܘܗ̱ܝ܆ ܠܚܰܫܳܐ ܗܰܘ ܕܰܠܗܰܠ ܡܶܢܟܽܠ ܡܶܠܬܳܐ܆ ܠܳܐ ܡܶܫܟܚܳܐ. ܠܗܳܕܶܐ ܙܳܕܶܩ ܕܰܢܠܰܚܶܡ ܡܶܢ ܠܰܘ̈ܛܳܬܳܐ ܗܳܠܶܝܢ ܕܡܽܘܫܶܐ܆ ܠܩܰܕܺܝܡܽܘܬ ܡܶܠܬܳܐ ܗܳܝ ܕܳܐܡܪܳܐ: ܢܶܥܒܶܕ ܐܶܢܶܝܢ ܡܳܪܝܳܐ ܬܡܺܝ̈ܗܳܬܳܐ ܠܡܰܚ̈ܘܳܬܳܐ ܕܺܝܠܳܟ ܘܰܠܡܰܚ̈ܘܳܬܳܐ ܕܙܰܪܥܳܐ ܕܺܝܠܳܟ܆ ܡܰܚ̈ܘܳܬܳܐ ܪܰܘܪ̈ܒܳܬܳܐ ܘܰܬܡܺܝ̈ܗܳܬܳܐ܆ ܘܟܽܘܪ̈ܗܳܢܶܐ ܒܺܝ̈ܫܶܐ ܘܰܡܗܰܝܡ̈ܢܶܐ^[12]. ܕܰܬܡܺܝ̈ܗܳܬܳܐ ܕܶܝܢ ܗܳܕܐ ܗ̱ܝ ܕܺܝܠܳܝܬܳܐ܆ ܗܳܝ ܕܰܠܒܰܪ ܡܶܢ ܡܰܣܒܪܳܢܽܘܬܳܐ ܘܬܰܪܥܺܝܬܳܐ ܕܟܽܠܢܳܫ ܘܓܰܘܳܢܳܝܬܳܐ ܢܶܓ̈ܕܫܳܢ܆ ܘܢܶܥܪ̈ܩܳܢ ܡܶܢ ܡܰܕܪܟܳܢܽܘܬܳܐ ܕܚܽܘܫܳܒ̈ܶܐ܆ ܘܢܶܬܬܰܡ̈ܗܳܢ ܡܰܢ ܡܶܛܽܠ ܕܰܓܕܰܫ̈ܶܝܢ܆ ܟܰܕ ܕܶܝܢ ܚܕܳܐ ܙܒܰܢ ܓܕܰܫܶܝ̈ܢ ܠܗܶܝܢ܆ ܢܶܬܗܰܝܡ̈ܢܳܢ. ܠܳܐ ܕܶܝܢ ܡܶܬܗܰܝܡ̈ܢܳܢ ܗ̱ܘܰܝ̈ ܩܕܳܡ ܕܢܶܗܘ̈ܝܳܢ܆ ܡܶܛܽܠ ܗܳܕܶܐ ܓܶܝܪ ܠܡܰܚ̈ܘܳܬܳܐ ܕܰܐܝܟ ܗܳܠܶܝܢ ܬܡܺܝ̈ܗܳܬܳܐ ܘܰܡܗܰܝܡ̈ܢܳܬܳܐ ܩܪܳܐ ܐܶܢܶܝܢ. ܡܰܝܬܶܐ ܕܶܝܢ ܒܳܬܰܪ ܗܳܠܶܝܢ ܓܙܳܡ̈ܶܐ ܕܗܳܟܰܢܳܐ ܕܚܺܝܠܺܝܢ܆ ܐܳܦ ܗܳܝ ܕܰܒܣܰܓܺܝܽܐܘܬܳܐ ܐܺܝܬܶܝܗ̇ ܝܰܬܺܝܪ ܕܚܺܝܠܬܳܐ܆ ܘܟܽܠ ܟܽܘܪܗܳܢܳܐ ܐܳܡܰܪ ܘܟܽܠ ܡܚܽܘܬܳܐ ܐܰܝ̇ܕܳܐ ܕܠܳܐ ܟܬܺܝܒܳܐ ܒܰܟܬܳܒܳܐ ܕܢܳܡܽܘܣܳܐ ܗܳܢܳܐ܆ ܢܰܝܬܶܐ ܡܳܪܝܳܐ ܥܠܰܝܟ ܥܕܰܡܳܐ ܕܢܶܥܛܶܝܟ^[13].

ܗܳܝ ܡܰܢ ܗܳܟܺܝܠ ܕܩܰܕܺܝܡܳܐ ܗ̱ܘܳܬ ܐܰܡܺܝܪܳܐ ܓܰܘܳܢܳܐܺܝܬ ܘܓܶܢܣܳܢܳܐܺܝܬ ܕܰܥܬܺܝܕܺܝܢ ܗ̱ܘܰܘ ܕܢܶܗܘܽܘܢ ܐܳܕܫ̈ܶܐ ܕܡܰܚ̈ܘܳܬܳܐ ܬܡܺܝ̈ܗܳܬܳܐ܆ ܡܶܢ ܗܳܠܶܝܢ ܕܰܐܡܺܝܪ̈ܳܢ ܠܰܢ ܝܺܕܺܝܥܳܐ ܘܡܶܬܬܰܘܕܝܳܐ. ܡܶܛܽܠ ܡܳܢܳܐ ܕܶܝܢ ܗܳܫܳܐ ܒܗܽܘܢ ܒܣܽܘܥܪ̈ܳܢܶܐ܆ ܐܶܬܚ̈ܙܺܝܶܢ ܗܳܠܶܝܢ ܕܰܒܢܶܣܝܳܢܳܐ ܡܶܢ ܩܕܺܝܡ ܠܳܐ ܐܶܬܺܝܕܰܥܶܝ̈ܢ܆ ܟܡܳܐ ܕܺܐܝܬܶܝܗ̇ ܕܶܐܕܰܥ ܐܶܢܳܐ܆ ܘܠܳܐ ܡܶܛܽܠ ܡܶܕܶܡ ܐ̱ܚܪܺܝܢ܆ ܐܶܠܳܐ ܐܶܢ ܡܶܛܽܠ ܗܳܕܶܐ ܒܰܠܚܽܘܕ ܕܰܥܬܺܝܕܳܐ ܕܬܶܬܶܐܡܰܪ. ܗܳܢܽܘܢ ܕܝܰܬܺܝܪ ܥܰܬܺܝܩܺܝܢ܆ ܘܗܳܢܽܘܢ ܕܡܶܢ ܒܳܬܰܪ ܗܳܠܶܝܢ ܐܰܝܟ ܢܳܡܽܘܣܳܐ ܗܰܘ ܕܡܽܘܫܶܐ ܡܶܬܕܰܒܪܺܝܢ ܗ̱ܘܰܘ܆ ܟܰܕ ܫܰܒܪ̈ܶܐ ܡܶܕܶܡ ܐ̱ܢܳܫܺܝ̈ܢ ܐܺܝܬܰܝܗܽܘܢ ܗ̱ܘܰܘ ܘܥܰܒ̈ܕܳܢܳܝܶܐ܆ ܘܠܳܐ ܡܫܰܡܠܝܳܐܺܝܬ ܣܺܝܡܺܝܢ ܗ̱ܘܰܘ܆ ܒܕܶܚܠܬܳܐ ܕܬܰܫܢܺܝܩܳܐ ܗܰܘ ܕܰܥܬܺܝܕ ܘܰܕܠܳܐ ܫܽܘܠܳܡ܆ ܠܡܶܟܠܳܐ ܗܶܢܽܘܢ ܠܗܽܘܢ ܡܶܢ ܚ̈ܛܳܗܶܐ܆ ܠܳܐ ܡܶܫܟܚܺܝܢ ܗ̱ܘܰܘ. ܡܶܛܽܠ ܗܳܕܶܐ ܢܳܡܽܘܣܳܐ ܡܰܠܽܘܢ ܕܶܝܢ ܗܰܘ ܕܝܰܗܒܶܗ ܠܢܳܡܽܘܣܳܐ܆ ܓܺܗܰܢܳܐ ܘܢܽܘܪܳܐ ܕܰܠܥܳܠܰܡ ܠܳܐ ܓܙܰܡ ܠܗܽܘܢ. ܐܶܠܳܐ ܟܰܕ ܚܳܛܶܝܢ ܗ̱ܘܰܘ܆ ܡܶܚܕܳܐ ܘܰܒܥܶܩܒܳܐ ܕܰܚܛܺܝܬܗܽܘܢ ܡܫܰܢܶܩ ܗ̱ܘܳܐ ܠܗܽܘܢ. ܕܫܰܒܪ̈ܶܐ ܓܶܝܪ ܘܰܕܥܰܒ̈ܕܶܐ ܐܺܝܬܶܝܗ̇܆ ܗܳܝ ܕܥܰܠ ܡܣܳܡ ܒܪ̈ܺܝܫܶܐ ܡܶܢ ܗܳܠܶܝܢ ܕܰܒܪܽܘܚܩܳܐ ܦܰܪܺܝܩܺܝܢ ܢܶܓܚܟܽܘܢ܆ ܡܶܢ ܡܰܚ̈ܘܳܬܳܐ ܕܶܝܢ ܗܳܠܶܝܢ ܕܬܰܠ̣̈ܝܳܢ ܠܥܶܠ ܡܶܢ ܪܺܝܫܗܽܘܢ ܢܶܪܥܠܽܘܢ ܘܢܶܬܟܰܘܢܽܘܢ. ܕܰܒ̈ܢܰܝܳܐ ܕܶܝܢ ܕܺܝܠܳܝܬܳܐ ܐܺܝܬܶܝܗ̇܆ ܗܳܝ ܕܳܐܦ ܒܰܓܙܳܡܳܐ ܒܰܠܚܽܘܕܰܘܗ̱ܝ ܕܰܐܒܳܐ ܢܶܬܩܰܦܣܽܘܢ ܘܢܶܕܚܠܽܘܢ. ܡܶܛܽܠ ܗܳܕܶܐ ܠܬܰܠ̈ܡܺܝܕܶܐ ܕܶܐܘܰܢܓܶܠܺܝܽܘܢ܆ ܐܰܝܟ ܕܠܰܡܫܰܡ̈ܠܰܝܳܐ ܘܰܐܝܟ ܕܠܰܒ̈ܢܰܝܳܐ܆ ܒܝܰܕ ܓܙܳܡܳܐ ܒܰܠܚܽܘܕ ܐܺܝܬܶܝܗ̇ ܡܟܰܘܢܳܢܽܘܬܳܐ. ܕܡܶܢ ܗܳܪܟܳܐ ܐܳܦ ܦܰܘܠܽܘܤ ܟܰܕ ܠܪ̈ܽܘܡܳܝܶܐ ܟܳܬܶܒ ܐܳܡܰܪ ܗ̱ܘܳܐ܆ ܠܳܐ ܓܶܝܪ ܢܣܰܒܬܽܘܢ ܪܽܘܚܳܐ ܕܥܰܒܕܽܘܬܳܐ ܬܽܘܒ ܠܕܶܚܠܬܳܐ. ܐܶܠܳܐ ܢܣܰܒܬܽܘܢ ܪܽܘܚܳܐ ܕܣܳܝܽܘܡܽܘܬ ܒܢܰܝ̈ܳܐ^[14]. ܕܰܠܗܳܢܽܘܢ ܕܶܝܢ ܕܡܶܢ ܩܕܺܝܡ ܟܰܕ ܡܰܣܟܠܺܝܢ ܗ̱ܘܰܘ܆ ܡܶܚܕܳܐ ܐܳܪ̈ܥܳܢ ܗ̱ܘܰܝ̈ ܗܳܠܶܝܢ ܕܰܡܣܳܡ ܒܪܺܝܫܳܐ܆ ܒܝܰܕ ܟܽܠܶܗ ܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ ܐܺܝܬ ܠܡܶܫܟܳܚܽܘ ܕܡܶܬܬܰܢܝܳܐ ܒܬܰܫܥܺܝܬܳܐ. ܐܶܡܰܬܝ ܓܶܝܪ ܕܠܰܡܢܺܝܚܳܢܽܘܬܶܗ ܕܰܐ‌ܠܳܗܳܐ ܛܳܥܶܝܢ ܗ̱ܘܰܘ. ܘܰܠܦܽܘܠܚܳܢܳܐ ܕܬܶܫܡܶܫܬܳܐ ܗܳܝ ܢܳܡܽܘܣܳܝܬܳܐ܆ ܘܰܠܘܳܬ ܕܶܚܠܬܳܐ ܗܳܝ ܕܫ̈ܺܐܕܶܐ ܡܰܣܛܶܝܢ ܗ̱ܘܰܘ܆ ܒܰܪܫܳܥܬܶܗ ܠܰܐܚܪ̈ܳܢܝ̣ܰܝ̣ ܫܰܪܒܬܳܐ ܗܳܠܶܝܢ ܕܡܶܢ ܩܽܘܪܒܳܐ ܫܒܳܒܺܝܢ ܗܘܰܘ ܠܗܽܘܢ ܦܳܠܚܺܝܢ ܗ̱ܘܰܘ ܥܰܒܕܽܘܬܳܐ. ܐܰܘ ܠܐ̱ܢܳܫ ܡܶܢ ܒܰܪܒܪ̈ܳܝܶܐ ܗܳܢܽܘܢ ܕܰܠܒܰܪ ܡܶܢ ܬܚܽܘܡ̈ܶܐ܆ ܐܰܘ ܒܡܰܚ̈ܘܳܬܳܐ ܐ̱ܚܪ̈ܳܢܝܳܬܳܐ ܡܶܬܟܰܘܢܺܝܢ ܗ̱ܘܰܘ܆ ܗܳܝ ܟܺܝܬ ܕܳܐܦ ܦܰܘܠܽܘܤ ܐܰܘܕܥܳܗ̇܆ ܟܰܕ ܠ̱ܐܢܳܫܺܝ̈ܢ ܥܰܬܺܝ̈ܩܶܐ ܒܗܳܢܳܐ ܙܢܳܐ ܐܶܬܥܗܰܕ܆ ܒܗܳܠܶܝܢ ܕܰܠܘܳܬ ܩܽܘܪ̈ܝܢܬܝܐ ܟܬܰܒ ܗ̱ܘܳܐ. ܠܳܐ ܢܙܱܢܶܐ ܐܰܝܟܰܢܳܐ ܕܐ̱ܢܳܫܺܝ̈ܢ ܡܶܢܗܽܘܢ ܙܰܢܺܝܘ܆ ܘܰܢܦܰܠܘ ܡܶܢܗܽܘܢ ܒܚܰܕ ܝܰܘܡܳܐ ܥܶܣܪܺܝܢ ܘܰܬܠܳܬܳܐ ܐܰ‌ܠ̈ܦܺܝܢ. ܐܳܦܠܳܐ ܢܢܰܣܶܐ ܠܰܡܫܺܝܚܳܐ܆ ܐܰܝܟܰܢܳܐ ܕܐ̱ܢܳܫܺܝ̈ܢ ܢܰܣܺܝܘ܆ ܘܡܶܢ ܚ̈ܘܰܘܳܬܳܐ ܐܳܒܕܺܝܢ ܗ̱ܘܰܘ܆ ܐܳܦܠܳܐ ܢܪܰܛܶܢ ܐܰܝܟܰܢܳܐ ܕܐ̱ܢܳܫܺܝ̈ܢ ܡܶܢܗܽܘܢ ܪܛܶܢܘ܆ ܘܶܐܒܰܕܘ ܡܶܢ ܡܚܰܒܠܳܢܳܐ^[15]܆ ܗܳܟܰܢܳܐ ܡܶܛܽܠ ܥܶܠ̈ܠܳܬܳܐ ܗܳܠܶܝܢ ܕܶܐܬܶܐܡܰܪ̈ܝ܆ ܘܠܳܐ ܡܶܕܶܡ ܐܺܝܬ ܗ̱ܘܳܐ ܒܰܡܨܰܥܬܳܐ ܕܰܚ̈ܛܳܗܶܐ܆ ܘܕܰܡܣܳܡ ܒܪܺܝܫܳܐ ܗܰܘ ܕܡܶܛܽܠ ܚ̈ܛܳܗܶܐ.

ܡܶܛܽܠ ܟܺܝܬ ܕܳܐܦ ܢܒܺܝ̈ܶܐ ܒܩܰܠܺܝܠ ܩܰܠܺܝܠ ܟܰܕ ܡܶܫܬܰܘܫܰܛ ܗ̱ܘܳܐ ܙܰܒܢܳܐ܆ ܗܳܠܶܝܢ ܕܡܶܛܽܠ ܫܽܘܢܳܩܳܐ ܗܰܘ ܕܰܥܬܺܝܕ ܘܰܕܠܳܐ ܫܽܘܠܳܡ ܒܡ̈ܶܠܶܐ ܒܰܝ̈ܬܳܝܳܬܳܐ. ܗܳܠܶܝܢ ܕܺܝܠܗܽܘܢ ܡܚܰܘܶܝܢ ܗ̱ܘܰܘ. ܣܳܗܕܳܐ ܐܺܝܬܰܘܗ̱ܝ ܐܶܫܰܥܝܳܐ ܕܳܐܡܰܪ: ܡܰܢܽܘ ܢܰܘܕܰܥܟܽܘܢ ܕܢܽܘܪܳܐ ܝܳܩܕܳܐ^[16]܆ ܡܰܢܽܘ ܢܰܘܕܰܥܟܽܘܢ ܐܰܬܪܳܐ ܗܰܘ ܕܰܠܥܳܠܰܡ. ܘܬܽܘܒ܆ ܬܰܘܠܥܳܐ ܓܶܝܪ ܕܺܝܠܗܽܘܢ ܠܳܐ ܬܡܽܘܬ܆ ܘܢܽܘܪܳܐ ܕܺܝܠܗܽܘܢ ܠܳܐ ܬܶܕܥܰܟ. ܟܡܳܐ ܡܰܢ ܗܳܟܺܝܠ ܕܰܚܢܰܢ ܗܳܢܽܘܢ ܕܠܶܐܘܰܢܓܶܠܺܝܽܘܢ ܗܰܝܡܶܢܢ܆ ܗܳܠܶܝܢ ܕܫܰܘ̈ܝܳܢ ܗ̱ܘܰܝ̈ ܗܳܠܶܝܢ ܠܣܳܝܽܘܡܽܘܬ ܒܢܰܝ̈ܳܐ ܣܳܥܪܺܝܢ ܗ̱ܘܰܝܢ܆ ܘܒܰܓܙܳܡܳܐ ܕܓܺܗܰܢܳܐ. ܗܳܢܰܘ ܕܶܝܢ܆ ܕܢܽܘܪܳܐ ܗܳܝ ܕܠܳܐ ܕܳܥܟܳܐ܆ ܓܺܗܰܢܳܐ ܓܶܝܪ ܡܶܛܽܠ ܗܳܕܶܐ ܡܶܬܩܰܪܝܳܐ ܫܰܠܗܶܒܺܝܬܳܐ ܗܳܝ ܐܰܝܟ ܡܳܐ ܕܠܺܝ ܡܶܬܚܰܙܝܳܐ܆ ܡܶܛܽܠ ܗܳܝ ܕܰܐܝܟ ܗܰܘ ܕܝܳܠܽܘܕܳܐܺܝܬ ܐܺܝܬ ܠܳܗ̇ ܘܠܳܐ ܡܶܬܒܰܨܪܳܢܳܐܝܬ܆ ܘܰܒܟܽܠ ܙܒܰܢ ܡܶܬܥܰܠܡܳܐ ܘܡܶܬܢܰܒܪܫܳܐ܆ ܘܠܳܐ ܣܢܺܝܩܳܐ ܥܰܠ ܡܶܕܶܡ ܠܘܳܬ ܬܰܪܒܺܝܬܳܐ ܕܫܳܓܪܳܐ܆ ܐܰܝܟ ܢܽܘܪܳܐ ܗܳܕܶܐ ܗܽܘܠܳܢܳܝܬܳܐ ܘܡܶܬܚܰܙܝܳܢܺܝܬܳܐ܆ ܠܚܺܐܦ̈ܶܐ ܕܰܚܛܺܝܬܳܐ ܗܳܠܶܝܢ ܪܰܘܪ̈ܒܶܐ ܘܰܫܟܺܝܪ̈ܶܐ ܡܦܰܓܕܺܝܢ ܗ̱ܘܰܝܢ ܘܠܳܐ ܡܶܕܶܡ ܕܰܐܝܟ ܗܳܟܰܢܳܐ܆ ܡܶܚܕܳܐ ܒܰܪܫܳܥܬܶܗ ܐܳܪܰܥ ܗ̱ܘܳܐ ܠܰܢ܆ ܐܺܝܬ ܐܶܡܰܬܝ ܕܳܐܦ ܟܰܕ ܚܳܛܶܝܢ ܗ̱ܘܰܝܢ܆ ܐܰܝܟ ܐܰܝܢܳܐ ܕܰܠܗܳܢܽܘܢ ܥܰܬܺܝ̈ܩܶܐ܆ ܐܰܝܟ ܛܰܘܦܳܢܳܐ ܗܰܘ ܕܰܒܝܰܘ̈ܡܰܝ ܢܽܘܚ. ܐܰܝܟ ܒܰܪ̈ܩܶܐ ܡܰܘܩ̈ܕܳܢܶܐ ܘܦܶܩ̈ܥܶܐ ܗܳܢܽܘܢ ܕܶܐܬܬܰܝܬܺܝܘ ܥܰܠ ܣܕܽܘܡ. ܐܰܝܟ ܚ̈ܘܰܘܳܬܳܐ ܗܳܢܽܘܢ ܕܰܒܝܰܘ̈ܡܰܝ ܡܽܘܫܶܐ܆ ܕܢܽܘܟ̈ܬܳܬ̣ܳܐ ܕܡܰܘܬܳܐ ܢܳܟܬܺܝܢ ܗ̱ܘܰܘ.

ܐܶܡܰܬܝ ܕܶܝܢ ܡܶܟܺܝܠ܆ ܕܰܒܝܰܕ ܗܳܝ ܕܗܳܠܶܝܢ ܕܣܰܓܺܝ ܩܰܫ̈ܝܳܢ ܒܟܽܠܝܽܘܡ ܚܳܛܶܝܢ ܗ̱ܘܰܝܢ܆ ܘܰܒܝܰܕ ܗܳܝ ܕܙܳܟܶܝܢ ܗ̱ܘܰܝܢ ܠܗܳܢܽܘܢ ܥܰܬܺܝ̈ܩܶܐ ܒܥܰܘ̈ܠܶܐ ܗܳܠܶܝܢ ܕܰܠܒܰܪ ܡܶܢ ܢܳܡܽܘܣܳܐ܆ ܥܰܠ ܓܙܳܡܳܐ ܕܗܳܠܶܝܢ ܕܰܥ̈ܬܺܝܕܳܢ ܓܚܶܟܢܰܢ܆ ܘܰܐܝܟ ܠܳܐ ܐܺܝܬܰܘܗ̱ܝ ܚܫܰܒܢܳܝܗ̱ܝ ܆ ܘܫܳܛܽܘܪܽܘܬܳܐ ܐܰܣܒܰܪܢܰܢ ܕܺܐܝܬܰܘܗ̱ܝ ܐܳܦ ܗܽܘ ܫܡܳܗ̇ ܕܓܺܗܰܢܳܐ܆ ܘܠܶܗ ܠܣܽܘܥܪܳܢܳܐ܆ ܐܰܝܟ ܐܰܝܢܳܐ ܕܠܰܝܬ ܠܶܗ ܦܝܳܣܳܐ ܠܨܰܕܘܳܐ ܐܰܝܬܺܝܢܳܝܗ̱ܝ ܆ ܟܰܕ ܐܳܡܪܺܝܢ ܗ̱ܘܰܝܢ ܟܽܠܚܰܕ ܡܶܢܰܢ܆ ܐܶܢܳܐ ܒܥܳܠܡܳܐ ܗܳܢܳܐ ܕܩܰܪܺܝܒ ܘܕܰܡܠܶܐ ܙܰܒܢܳܐ ܐܶܬܒܰܣܰܡ܆ ܘܰܒܝܰܕ ܟܽܠ ܗܰܢܺܝܽܐܘܬܳܐ ܘܥܰܘܳܠܽܘܬܳܐ ܐܺܬܶܐ܆ ܘܰܠܥܳܠܰܡ ܐܺ݀ܩܰܕ ܒܢܽܘܪܳܐ܆ ܒܗܳܠܶܝܢ ܡܰܢ ܡܚܰܕܝܳܢ̈ܝܳܬܳܐ ܕܡܶܬܚ̈ܰܙܝܳܢ ܙܳܕܶܩ ܠܺܝ ܠܡܶܐܚܰܕ. ܠܫܽܘܥ̈ܝܳܬܳܐ ܕܶܝܢ ܕܗܳܠܶܝܢ ܕܰܥ̈ܬܺܝܕܳܢ ܘܠܳܐ ܡܶܬܚ̈ܰܙܝܳܢ ܠܳܐ ܐܬܚܠܰܡܠܰܡ: ܗܳܝܕܶܝܢ ܗܳܟܺܝܠ ܗܳܝܕܶܝܢ܆ ܡܚܰܘܶܐ ܠܰܢ ܫܽܘܪ̈ܳܝܶܐ ܕܫܰܠܗܶܒܺܝܬܳܐ ܗܳܝ ܕܠܳܐ ܡܶܬܗܰܝܡܢܳܐ ܠܰܢ ܘܰܕܠܳܐ ܕܳܥܟܳܐ܆ ܓܽܘܡܪ̈ܶܐ ܕܢܽܘܪܳܐ ܡܰܦܶܩ ܬܡܺܝܗܳܐܺܝܬ ܡܶܢ ܦܰܓܪ̈ܶܐ ܐ̱ܢܳܫܳܝ̈ܶܐ܆ ܕܕܰܝ̈ܘܳܢܶܐ ܗܳܢܽܘܢ ܕܗܳܟܰܢܳܐ ܡܶܫܬܰܢܩܺܝܢ ܗ̱ܘܰܘ. ܐܰܝܟܰܢܳܐ ܕܢܰܘܕܰܥ ܓܰܠܝܳܐܺܝܬ܆ ܕܰܕܢܽܘܪܐ ܗܳܝ ܕܰܠܚܰܪܬܳܐ܆ ܐܺܝܬܶܝܗ̇ ܐ̱ܚܝܳܢܬܳܐ ܘܒܰܪ̱ܬ ܓܶܢܣܳܐ܆ ܗܳܕܶܐ ܢܽܘܪܳܐ ܕܫܰܢܩܰܬ ܠܗܳܠܶܝܢ܆ ܗܳܕܶܐ ܕܰܠܗܳܢܽܘܢ ܕܠܳܐ ܝܳܕܥܺܝܢ ܒܳܗ̇ ܒܰܕܡܘܬܳܐ ܠܳܐ ܡܶܬܗܰܝܡܢܳܐ. ܙܶܠܘ ܠܟܽܘܢ ܓܶܝܪ ܡܶܢܝ ܐܳܡܰܪ ܐܳܘ ܠܺܝ̈ܛܶܐ ܠܢܽܘܪܳܐ ܗܳܝ ܕܰܠܥܳܠܰܡ܆ ܗܳܝ ܕܰܡܛܰܝܒܳܐ ܠܳܐܟܶܠܩܰܪܨܳܐ ܘܰܠܡܰܠܰܐܟܰܘ̈ܗܝ^[17].

ܐܳܦ ܠܗܳܕܶܐ ܕܶܝܢ ܣܰܓܺܝ ܪܶܚܡܰܬ ܐ̱ܢܳܫܳܐܺܝܬ ܥܰܒܕܳܗ̇. ܡܶܛܽܠ ܓܶܝܪ ܕܗܳܐ ܡܶܢ ܟܰܕܽܘ ܥܰܠ ܬܰܪ̈ܥܶܐ ܐܺܝܬܶܝܗ̇ ܡܶܐܬܺܝܬܳܐ ܕܝܰܘܡܳܐ ܗܰܘ ܐ̱ܚܪܳܝܳܐ܆ ܒܝܰܕ ܡܰܪ̈ܕܘܳܬܳܐ ܕܝܰܬܺܝܪ ܢܰܗܺܝܪ̈ܳܢ ܘܓܰܠ̈ܝܳܢ܆ ܘܰܒܝܰܕ ܗܳܠܶܝܢ ܕܝܰܬܺܝܪ ܡܰܟ̈ܶܐܒܳܢ܆ ܡܰܥܗܶܕ ܠܰܢ ܗܳܠܶܝܢ ܕܰܥ̈ܬܺܝܕܳܢ܆ ܘܠܰܘ ܒܝܰܕ ܡ̈ܶܠܶܐ܆ ܐܶܠܳܐ ܒܝܰܕ ܣܽܘܥܪ̈ܳܢܶܐ܆ ܐܰܝܟܰܢܳܐ ܕܠܳܐ ܒܒܺܝ̈ܫܳܬܳܐ ܗܳܠܶܝܢ ܕܠܳܐ ܡܶܬܥܰܪ̈ܩܳܢܝܳܬܳܐ ܘܰܕܠܳܐ ܫܽܘܠܳܡ ܢܶܦܶܠ. ܟܽܠܗܶܝܢ ܓܶܝܪ ܥܳܒܶܕ ܘܡܶܬܬܰܓܰܪ܆ ܘܳܐܦ ܠܰܡܫܰܢܳܩܽܘ ܡܶܬܶܐܠܶܨ܆ ܟܰܕ ܝܰܨܺܝܦ ܕܢܶܚܛܽܘܦ ܠܰܢ ܡܶܢ ܒܺܝ̈ܫܳܬܳܐ ܗܳܠܶܝܢ ܕܠܰܝܬ ܠܡܶܫܬܐܳܠܽܘ ܡܶܢܗܶܝܢ܆ ܘܰܕܫܽܘܠܳܡܳܐ ܠܰܝܬ ܠܗܶܝܢ. ܡܶܛܽܠ ܕܳܐܦ ܡܶܢ ܫܽܘܪܳܝܳܐ ܡܶܛܽܠ ܗܳܕܶܐ ܓܙܰܡ܆ ܐܰܝܟܰܢܳܐ ܕܢܶܕܚܰܠ ܡܰܠܽܘܢ܆ ܐܰܘ ܕܢܶܬܶܠ ܢܶܣܝܳܢܳܐ ܕܰܓܙܳܡܳܐ. ܘܳܐܦ ܗܺܝ ܕܶܝܢ ܗܳܝ ܕܶܐܫܬܰܡܥܰܬ܆ ܕܗܳܢܽܘܢ ܕܰܒܚܰܫܳܐ ܗܳܢܳܐ ܐܰܟܣܢܳܝܳܐ ܐܰܚܺܝܕܺܝܢ܆ ܦܳܥܶܝܢ ܡܰܢ ܐܰܝܟ ܥܶܪ̈ܒܶܐ ܘܥ̈ܶܙܶܐ܆ ܢܳܒܚܺܝܢ ܕܶܝܢ ܐܰܝܟ ܟܰܠ̈ܒܶܐ܆ ܘܰܒ̈ܢܳܬ ܩ̈ܳܠܶܐ ܐ̱ܚܪ̈ܳܢܝܳܬܳܐ ܒܥܺܝܪ̈ܳܝܳܬܳܐ ܡܰܝܬܶܝܢ ܒܝܰܕ ܦܽܘܡܗܽܘܢ. ܘܰܠܬܶܒܢܳܐ ܘܠܰܥܡܺܝܪܳܐ ܪܳܓܺܝܢ܆ ܘܰܠܬܽܘܪ̈ܣܳܝܶܐ ܕܰܠ̈ܚܰܝܘܳܬܳܐ ܐ̱ܚܪ̈ܳܢܝܳܬܳܐ ܠܳܚܡܺܝܢ. ܡܰܟܣܳܢܽܘܬܳܐ ܚܰܬܺܝܬ̣ܬܳܐ ܐܺܝܬܶܝܗ̇ ܕܠܳܐ ܡܠܺܝܠܽܘܬܳܐ ܕܺܝܠܰܢ܆ ܡܶܛܽܠ ܓܶܝܪ ܕܰܐܝܟܰܢܳܐ ܕܰܟܬܺܝܒ܆ ܒܰܪܢܳܫܳܐ ܟܰܕ ܒܺܐܝܩܳܪܳܐ ܐܺܝܬܰܘܗ̱ܝ ܠܳܐ ܐܶܣܬܰܟܰܠ܆ ܐܶܠܳܐ ܐܶܬܦܰܚܰܡ ܠܰܒܥܺܝܪܳܐ ܕܠܳܐ ܗܰܘܢܳܐ ܘܶܐܬܕܰܡܺܝ ܠܳܗ̇܆ ܘܰܕܩܰܢܳܝܽܘܬܳܐ ܐܰܘܟܺܝܬ ܐܰܝܢܳܝܽܘܬܳܐ ܒܥܺܝܪܳܝܬܳܐ ܗܳܝ ܕܰܒܬܰܪܥܺܝܬܳܐ ܕܺܝܠܰܢ ܐܳܦܠܳܐ ܚܕܳܐ ܡܰܪܓܫܳܢܽܘܬܳܐ ܐܺܝܬ ܠܰܢ܆ ܒܰܒ̈ܢܳܬ ܩ̈ܳܠܶܐ ܠܳܐ ܡܠܺܝ̈ܠܳܬܳܐ ܡܰܟܶܤ ܠܰܢ. ܟܰܕ ܐܰܝܟ ܕܰܠܡܺܐܡܰܪ ܡܶܠܬܳܐ ܗܳܝ ܕܰܟܬܳܒܳܐ ܡܰܙܥܶܩ܆ ܕܢܰܟܣܳܟ ܦܽܘܡܳܐ ܕܺܝܠܳܟ ܘܠܰܘ ܐܶܢܳܐ^[18].

ܠܳܐ ܗܳܟܺܝܠ ‌ܐܰܝܟ ܡܰܢ ܕܰܠܒܰܪ ܡܶܢܶܗ ܕܚܰܫܳܐ ܗܳܢܳܐ ܩܳܝܡܺܝܢܰܢ ܚܢܰܢ܆ ܢܶܬܬܣܺܝܡ ܣܰܓܺܝ ܒܺܝܫܳܐܺܝܬ܆ ܟܰܕ ܝܰܬܺܝܪ ܡܶܢ ܗܳܢܽܘܢ ܟܪܺܝܗܺܝܢ ܚ̱ܢܰܢ ܠܳܐ ܡܠܺܝܠܽܘܬܳܐ. ܗܰܘ ܡܰܢ ܓܶܝܪ ܕܒܰܪ̱ܬ ܩܳܠܳܐ ܕܚܰܝܽܘܬܳܐ ܠܳܐ ܡܠܺܝܠܬܳܐ ܡܫܰܡܰܪ܆ ܡܣܰܓܶܦ ܡܰܢ ܘܠܳܐ ܠܐܢܳܫ. ܐܶܠܳܐ ܗܳܝ ܕܰܠܩܽܘܒܠܳܐ ܐܳܦ ܡܰܘܬܰܪ܆ ܟܰܕ ܠܚܰܘܣܳܢܳܐ ܘܰܠܡܶܬܰܐܒܠܳܢܽܘܬܳܐ ܡܰܝܬܶܐ ܠܗܽܘܢ ܠܗܳܢܽܘܢ ܕܫܳܡܥܺܝܢ. ܐܰܢ̱ܬ ܕܶܝܢ ܗܰܘ ܕܢܰܦܫܳܐ ܚܰܝܘܰܬ ܫܶܢܳܝܬܳܐ^[19] ܡܶܕܶܡ ܐܺܝܬ ܠܳܟ ܘܠܳܐ ܡܠܺܝܠܬܳܐ܆ ܘܰܕܚܰܫ̈ܶܐ ܕܰܒܥܺܝܪ̈ܳܐ ܣܰܓܺܝ̈ܳܐܬܳܐ ܒܢܰܦܫܳܟ ܐܰܟܚܕܳܐ ܠܒܺܝܫ ܐܰܢ̱ܬ܆ ܘܣܰܓܺܝ ܕܶܡ̈ܘܳܬܳܐ ܡܶܕܶܡ ܐܺܝܬܰܝܟ ܐܰܝܟ ܚ̈ܙܴܬܶܐ ܕܗܳܠܶܝܢ ܕܡܶܬܩܰܪ̈ܝܳܢ ܐܳܬܘ̈ܳܬܳܐ܆ ܘܰܠܚܽܘܣܪܳܢܳܐ ܘܠܰܡܥܰܘܠܳܢܽܘܬܳܐ ܕܩܰܪ̈ܺܝܒܰܝܟ܆ ܡܶܣܬܢܶܐ ܐܰܢ̱ܬ ܒܰܠܚܽܘܕ܆ ܘܠܳܐ ܣܳܟ ܡܶܬܚܰܢܰܢ ܐܰܢ̱ܬ. ܘܛܳܒ ܟܺܐܢܳܐܺܝܬ. ܡܶܬܚ̣ܰܢܢܳܐ ܡܰܢ ܓܶܝܪ ܗܳܝ ܠܳܐ ܨܶܒܝܳܢܳܝܬܳܐ. ܡܶܣܬܰܢܝܳܐ ܕܶܝܢ ܗܳܝ ܕܡܶܢ ܨܶܒܝܳܢܶܗ ܕܐ̱ܢܳܫ. ܘܗܳܝ ܡܰܢ ܡܶܬܚܰܘܝܳܢܽܘܬܳܐ ܕܰܡܣܳܡ ܒܪܺܝܫܳܐ. ܗܳܝ ܕܶܝܢ ܕܒܺܝܫܽܘܬܳܐ. ܡܳܢܳܐ ܓܶܝܪ ܦܪܺܝܫ ܐܰܢ̱ܬ ܡܶܢ ܐܰܪܝܳܐ ܐܡܪ ܠܺܝ؟ ܐܶܡܰܬܝ ܕܰܐܝܟ ܕܳܐܡܰܪ ܢܒܺܝܳܐ ܕܰܘܺܝܕ: ܟܳܡܶܢ ܐܰܢ̱ܬ ܒܡܛܫ̈ܝܬܐ^[20] ܐܰܝܟ ܐܰܪܝܳܐ ܒܰܛܝܳܪܶܗ܆ ܟܳܡܶܢ ܐܰܢ̱ܬ ܠܡܶܚܛܰܦ ܠܶܡܣܟܺܢܳܐ܆ ܠܡܶܚܛܰܦ ܠܡܶܣܟܺܢܳܐ ܟܰܕ ܢܳܓܶܕ ܐܰܢ̱ܬ ܠܶܗ.^[21] ܡܳܢܳܐ ܕܶܝܢ ܐ̱ܢܳܫ ܢܺܐܡܪܳܟ ܡܳܪܳܢܳܐܺܝܬ܆ ܐܶܡܰܬܝ ܕܚܳܛܽܘܦܳܐ ܡܰܢ ܐܺܝܬܰܝܟ ܐܰܝܟ ܐܰܪܝܳܐ܆ ܚܰܪܡܳܐ ܕܶܝܢ ܐܰܝܟ ܕܺܐܒܳܐ܆ ܐܰܟܬܳܢܳܐ ܕܶܝܢ ܐܰܝܟ ܓܰܡܠܳܐ܆ ܐܳܟܽܘܠܳܐ ܕܶܝܢ ܐܰܝܟ ܕܶܒܳܐ܆ ܦܩܺܝܪ ܥܰܠ ܢܶܩ̈ܒܳܬܳܐ ܕܶܝܢ ܐܰܝܟ ܣܽܘܣܝܳܐ܆ ܪ̈ܰܟܫܳܐ ܓܶܝܪ ܦܩܺܝܪ̈ܰܝ ܥܰܠ ܢܶܩ̈ܒܳܬܳܐ ܗܘܰܘ ܐܳܡܰܪ ܡܶܛܽܠ ‌ܐ̱ܢܳܫܺܝ̈ܢ ܐܶܪܰܡܝܳܐ^[22]: ܕܕܳܩܰܪ ܐܰܢ̱ܬ ܕܶܝܢ ܐܰܝܟ ܬܰܘܪܳܐ܆ ܕܒܽܘܥ̈ܛܳܬܳܐ ܡܳܬܰܚ ܐܰܢ̱ܬ ܐܰܝܟ ܚܡܳܪܳܐ܆ ܕܫܳܘܰܪ ܐܰܢ̱ܬ ܕܶܝܢ ܫܳܢܝܳܐܺܝܬ ܐܰܝܟ ܬܰܝܫܳܐ܆ ܢܟܺܝܠܳܐ ܕܶܝܢ ܐܺܝܬܰܝܟ ܘܰܡܨܰܕܝܳܢܳܐ ܐܰܝܟ ܬܰܥܠܳܐ. ܟܰܕ ܗܳܠܶܝܢ ܟܽܠܗܶܝܢ ܡܶܬܟܰܪܗܳܐ ܚܕܳܐ ܢܰܦܫܳܐ܆ ܡܶܫܟܚܳܐ ܬܽܘܒ ܠܡܶܬܩܪܳܝܽܘ ܢܰܦܫܳܐ. ܡܰܠܽܘܢ ܕܶܝܢ܆ ܠܰܘ ܫܺܐܕܳܐ ܡܶܕܶܡ ܐܺܝܬܶܝܗ̇ ܩܰܫܝܳܐ ܘܚܰܪܡܳܐ. ܡܳܢܳܐ ܕܶܝܢ ܠܰܘ ܛܽܘܒܬܳܢܺܝܬܳܐ ܐܺܝܬܶܝܗ̇ ܗ̱ܘܳܬ ܕܗܰܘ ܕܗܳܟܰܢܳܐ ܐܺܝܬ ܠܶܗ ܕܰܥܡܺܝܪܳܐ ܢܶܗܘܶܐ ܐܳܟܶܠ ܘܬܶܒܢܳܐ ܘܠܰܘ ܕܰܒܢܰܝ̈ܢܳܫܳܐ ܒ̈ܢܰܝ ܓܶܢܣܶܗ ܢܶܥܒܶܕ ܠܶܗ ܡܶܐܟܽܘܠܬܳܐ܆ ܐܰܝܟ ܡܳܐ ܕܳܐܦ ܐܶܡܰܪ ܐ̱ܢܳܫ ܡܶܢ ܢܒܺܝ̈ܶܐ܆ ܟܰܕ ܡܚܰܣܶܕ ܠ̱ܐܢܳܫܺܝ̈ܢ ܕܩܳܛܽܘܠܳܐܺܝܬ ܣܺܝܡܺܝܢ ܗ̱ܘܰܘ܆ ܗܶܢܽܘܢ ܐܳܡܪܺܝܢ ܟܽܘܣܘ ܒܢܰܝ̈ܢܳܫܳܐ. ܬܰܘܪ̈ܶܐ ܓܶܝܪ ܐܰܘܦܺܝܘ ܠܗܽܘܢ.

ܢܶܬܢܰܟܰܦ ܡܰܢ ܗܳܟܺܝܠ܆ ܘܢܶܬܟܰܘܰܢ ܐܳܘ ܪ̈ܳܚܡܶܐ ܘܰܐܚ̈ܶܐ ܘܰܠܘܳܬ ܢܰܦܫܰܢ ܐܳܦܶܢ ܡܫܰܘܚܪܳܐܺܝܬ ܢܚܽܘܪ. ܘܡܶܢ ܚܰܫܳܐ ܓܰܠܝܳܐ ܘܺܝܕܺܝܥܳܐ ܕܰܐ̱ܚܪ̈ܳܢܶܐ܆ ܡܰܠܽܘܢ ܕܶܝܢ ܡܶܢ ܣܳܥܽܘܪܽܘܬܳܐ ܘܡܰܪܕܽܘܬܳܐ ܐܰ‌ܠܳܗܳܝܬܳܐ܆ ܟܽܘܪ̈ܗܳܢܶܐ ܟܣܰܝ̈ܳܐ ܕܺܝܠܰܢ ܕܢܰܦܫܰܢ ܢ݀ܥܰܩܶܒ܆ ܘܰܚܢܰܢ ܥܰܠ ܢܰܦܫܰܢ ܢܶ݀ܒܟܶܐ܆ ܕܟܰܕ ܗܳܠܶܝܢ ܕܝܰܬܺܝܪ ܩܰܫ̈ܝܳܢ ܚܳܛܶܝܢ ܚ̱ܢܰܢ܆ ܠܬܰܫܢܺܝ̈ܩܶܐ ܗܳܠܶܝܢ ܕܰܥܬܺܝܕܺܝܢ ܘܰܕܠܳܐ ܫܽܘܠܳܡ ܥܰܠ ܚ̈ܛܳܗܶܐ ܗܳܢܽܘܢ ܪܰܘܪ̈ܒܶܐ ܡܶܬܢܰܛܪܺܝܢ ܚ̱ܢܰܢ. ܗܳܝ ܓܶܝܪ ܕܰܒܥܳܠܡܳܐ ܗܳܢܳܐ ܕܩܰܪܺܝܒ܆ ܘܰܕܫܽܘܠܳܡܳܐ ܐܺܝܬ ܠܶܗ ܢܶܬܪܕܶܐ܆ ܝܽܘܬܪܳܢܰܐ ܗ̄ܘ ܪܰܒܳܐ ܠܗܳܢܽܘܢ ܕܰܚ̣ܛܰܘ. ܐܰܘ ܓܶܝܪ ܡܫܰܡܠܝܳܐܺܝܬ܆ ܐܰܘ ܡܢܳܬܳܐܺܝܬ ܡܶܫܬܪܶܝܢ ܡܶܢ ܚ̈ܛܳܗܰܝܗܽܘܢ ܐܰܝܟ ܡܽܘܫ̈ܚܳܬܳܐ ܟܺܐܢ̈ܳܬܳܐ ܕܰܐ‌ܠܳܗܳܐ܆ ܗܰܘ ܕܥܰܡ ܕܺܝܢܳܐ ܐܰܟܚܕܳܐ܆ ܘܪܶܚܡܰܬ ܐ̱ܢܳܫܽܘܬܳܐ ܠܟܽܠ ܚܰܕ ܗܳܝ ܕܰܐܝܟ ܕܫܳܘܝܳܐ ܬܳܩܶܠ. ܘܰܫܡܰܥܳܝܗ̱ܝ܆ ܟܰܕ ܒܝܰܕ ܐܶܫܰܥܝܳܐ ܢܒܺܝܳܐ ܡܶܛܽܠ ‌ܐܽܘܪܶܫܠܶܡ ܐܳܡܰܪ: ܒܰܝܰܐܽܘܗ̇ ܡܶܛܽܠ ܕܶܐܬܡܰܠܺܝ ܡܽܘܟܳܟܳܗ̇܆ ܐܶܫܬܰܪܝܰܬ ܚܛܺܝܬܳܗ̇܆ ܡܶܛܽܠ ܕܩܰܒܠܰܬ ܡܶܢ ܐܺܝܕܳܐ ܕܡܳܪܝܳܐ ܥܦܺܝ̈ܦܶܐ ܠܰܚ̈ܛܳܗܶܐ ܕܺܝܠܳܗ̇^[23]. ܡܶܛܽܠ ܗܳܕܶܐ ܐܳܦ ܒܽܘܝܳܐܳܐ ܡܰܘܣܶܦ ܠܳܗ̇܆ ܥܰܡ ܫܪܳܝܳܐ ܘܫܽܘܒܩܳܢܳܐ ܕܰܚܛܺܝܬܳܐ܆ ܡܶܛܽܠ ܕܰܥܦܺܝ̈ܦܶܐ ܩܰܒܠܰܬ ܠܕܺܝ̈ܢܶܐ ܕܥܰܠ ‌ܐܰܦ̈ܰܝ ܚ̈ܛܳܗܶܝܗ̇܆ ܟܰܕ ܒܳܒ̈ܠܳܝܶܐ ܝܰܬܺܝܪ ܡܶܢ ܗܳܝ ܕܙܳܕܩܳܐ ܐܶܫܬܰܢܰܕܘ ܒܳܗ̇ ܕܳܘܝܳܐܺܝܬ. ܘܳܐܦ ܗܽܘ ܕܶܝܢ ܡܳܪܰܢ ܝܶܫܽܘܥ ܒܶܐܘܰܢܓܶܠܺܝܽܘܢ܆ ܡܰܥܶܠ ܠܶܗ ܠܰܐܒܪܳܗܳܡ܆ ܕܰܡܦܰܢܶܐ ܦܶܬܓܡܳܐ ܒܰܫܝܽܘܠ ܠܗܰܘ ܥܰܬܺܝܪܳܐ ܕܡܶܫܬܰܠܗܰܒ ܗ̱ܘܳܐ܆ ܘܰܕܢܶܬܦܰܝܰܓ ܠܶܫܳܢܶܗ ܒܛܽܘܦܬܳܐ ܒܰܠܚܽܘܕ ܡܶܬܟܰܫܰܦ ܗ̱ܘܳܐ܆ ܐܶܬܕܰܟܪ ܕܩܰܒ̣ܶܠܬ ܐܰܢ̱ܬ ܛܳܒ̈ܳܬܳܟ ܒܚܰܝ̣ܰܝ̣̈ܟ܆ ܘܠܳܥܳܙܳܪ ܒܳܗ̇ ܒܰܕܡܽܘܬܳܐ ܒܺܝ̈ܫܳܬܳܐ܆ ܗܳܫܳܐ ܕܶܝܢ ܗܳܪܟܳܐ ܡܶܬܒܰܝܰܐ܆ ܐܰܢ̱ܬ ܕܶܝܢ ܡܶܬܕܘܶܐ ܐܰܢ̱ܬ^[24].

ܐܶܠܳܐ ܕܶܝܢ ܐܳܦܠܳܐ ܗܳܝ ܢܶܣܒܰܪ ܐ̱ܢܳܫ܆ ܕܗܳܢܽܘܢ ܕܰܒܠܰܥܘ ܒܶܗ ܒܚܰܫܳܐ܆ ܐܰܝܟ ܡܰܢ ܕܝܰܬܺܝܪ ܡܶܢܰܢ ܚܛܰܘ ܐܶܬܪܕܺܝܘ. ܐܳܦ ܓܶܝܪ ܒܣܳܥܽܘܪ̈ܘܳܬܳܐ ܗܳܠܶܝܢ ܕܰܐܝܟ ܗܳܟܰܢ܆ ܡܶܢ ܗܳܢܽܘܢ ܕܰܒܡܶܫܬܰܘܕܥܳܢܽܘܬܳܐ ܩܰܪܺܝܒܺܝܢ ܠܶܗ ܝܰܬܺܝܪ ܡܶܢ ܗܳܠܶܝܢ ܐ̱ܚܪ̈ܳܢܶܐ ܡܫܰܪܶܐ ܠܽܘܩܕܰܡ܆ ܘܺܐܝܬ ܠܡܶܫܡܥܶܗ ܠܰܐܠܳܗܳܐ ܕܳܐܡܰܪ ܒܚܰܙܩܺܝܐܶܝܠ ܠܘܳܬ ܡܰܠܰܐܟ̈ܶܐ ܗܳܢܽܘܢ ܡܫܰܢ̈ܩܳܢܶܐ܆ ܟܰܕ ܥܬܺܝܕܺܝܢ ܗ̱ܘܰܘ ܕܰܢܚܰܒܠܽܘܢܳܗ̇ ܠܽܐܘܪܫܠܶܡ܆ ܗܰܠܶܟܘ ܒܰܡܕܺܝܢ̱ܬܳܐ ܘܰܚܪܽܘܒܘ ܘܠܳܐ ܬܚܽܘܣܽܘܢ܆ ܘܡܶܢ ܒܶܝܬ ܡܰܩܕܫܳܐ ܕܺܝܠܝ ܫܰܪܰܘ^[25]. ܐܳܦ ܟܰܕ ܒܢܰܘ̈ܗ̱ܝ ܕܰܐܗܪܽܘܢ ܢܽܘܪܳܐ ܢܽܘܟܪܳܝܬܳܐ ܩܰܪܶܒܘ܆ ܘܡܶܛܽܠ ܗܳܕܶܐ ܝܺܩܶܕܘ ܐܶܡܰܪ ܒܗܳܢܽܘܢ ܕܩܰܪܺܝܒܺܝܢ ܠܺܝ ܐܶܬܩܰܕܰܫ܆ ܘܰܩܕܳܡ ܟܽܠܳܗ̇ ܟܢܽܘܫܬܳܐ ܐܶܫܬܰܒܰܚ^[26]. ܕܫܳܠ̈ܡܳܢ ܠܗܳܠܶܝܢ ܐܳܦ ܦܶܛܪܽܘܤ ܗܰܘ ܩܳܝܽܘܡܳܐ ܩܰܕܡܳܝܳܐ ܕܰܫ̈ܠܺܝܚܶܐ ܟܬܰܒ: ܕܙܰܒܢܰܐ ܗ̱ܘ ܠܰܡܫܰܪܳܝܽܘ ܕܺܝܢܳܐ ܡܶܢ ܒܰܝܬܶܗ ܕܰܐ‌ܠܳܗܳܐ^[27]. ܐܳܦ ܕܰܘܺܝܕ ܕܶܝܢ ܡܙܰܡܰܪ ܕܪܰܒܳܐ ܐܺܝܬܰܘܗ̱ܝ ܐܰ‌ܠܳܗܳܐ ܘܰܕܚܺܝܠܳܐ ܥܰܠ ܟܽܠܗܽܘܢ ܗܳܢܽܘܢ ܕܒܰܚܕܳܪ̈ܰܘܗ̱ܝ^[28].

ܟܰܕ ܗܳܠܶܝܢ ܗܳܟܺܝܠ ܝܳܕܥܺܝܢܰܢ܆ ܒܝܰܕ ܬܝܳܒܽܘܬܳܐ ܢܩܰܕܡܺܝܘܗ̱ܝ ܠܪܽܘܓܙܳܐ܆ ܘܟܰܕ ܒܽܐܘܪܚܳܐ ܡܶܫܬܰܘܫܰܛ ܘܳܐܬܶܐ ܢܶܟܠܶܝܘܗ̱ܝ܆ ܘܠܳܐ ܢܰܛܥܶܐ ܚܢܰܢ ܠܰܢ ܐܰܝܟ ܕܙܰܕܺܝ̈ܩܶܐ ܟܶܐܡܰܬ ܐܺܝܬܰܝܢ ܚܢܰܢ܆ ܘܠܳܐ ܫܳܘܶܝܢ ܚ̱ܢܰܢ ܕܗܶܢܶܝܢ ܟܰܕ ܗܶܢܶܝܢ ܢܶܚܰܫ܆ ܥܰܡ ܗܳܢܽܘܢ ܕܗܳܐ ܡܶܢ ܟܰܕܽܘ ܚܰܫܘ. ܟܰܕ ܓܶܝܪ ܪܳܚܶܡ ܐ̱ܢܳܫܳܐ ܐܺܝܬܰܘܗ̱ܝ ܐܰ‌ܠܳܗܳܐ ܘܚܰܟܺܝܡܳܐ܆ ܘܰܡܣܰܟܶܐ ܠܫܽܘܚܠܳܦܳܐ ܕܟܽܠܰܢ ܕܰܠܘܳܬ ܗܳܝ ܕܰܡܝܰܬܪܳܐ܆ ܠܰܘ ܥܰܠ ܟܽܠܢ ܐܰܟܚܕܳܐ ܡܰܝܬܶܐ ܠܶܗ ܠܚܽܘܛܪܳܐ ܗܰܘ ܕܰܡܚܳܐ. ܡܦܰܬܟܳܐܺܝܬ ܕܶܝܢ ܘܰܡܫܰܚܠܦܳܐܺܝܬ ܡܶܬܩܰܪܰܒ ܠܗܳܢܽܘܢ ܕܚܳܛܶܝܢ܆ ܘܰܠܗܳܢܽܘܢ ܡܰܢ ܡܳܚܶܐ ܘܡܰܘܬܰܪ^[29] ܟܰܕ ܠܬܰܫܢܺܝܩܳܐ ܗܰܘ ܕܰܥܬܺܝܕ ܠܗܽܘܢ ܘܰܕܠܳܐ ܫܽܘܠܳܡ܆ ܐܰܘ ܫܳܪܶܐ ܟܽܠ ܟܽܠܶܗ ܐܰܘ ܥܳܒܶܕ ܠܶܗ ܝܰܬܺܝܪ ܩܰܠܺܝܠܳܐ܆ ܠܗܳܢܽܘܢ ܕܶܝܢ ܡܶܢ ܡܚܽܘܬܳܐ ܕܰܐ̱ܚܪ̈ܳܢܶܐ ܡܟܰܘܶܢ ܘܰܡܢܰܟܶܦ ܘܰܡܫܰܚܠܶܦ܆ ܐܰܘ ܟܰܕ ܐܳܦܠܳܐ ܡܶܢ ܬܰܚܘܺܝܬܳܐ ܕܚܶܠܘ܆ ܐܳܦܠܳܐ ܥܰܠ ܒܺܝܫܽܘܬܗܽܘܢ ܐܶܬܬܘܺܝܘ܆ ܡܰܫܠܶܡ ܠܗܽܘܢ ܠܬܰܫܢܺܝ̈ܩܶܐ ܐ̱ܚܪ̈ܳܝܶܐ ܕܰܒܟܺܐܢܽܘܬܳܐ܆ ܐܰܘ ܗܳܫܳܐ ܐܰܘ ܒܥܳܠܡܳܐ ܗܰܘ ܕܰܥܬܺܝܕ܆ ܠܳܐ ܗܳܟܺܝܠ ܒܗܳܠܶܝܢ ܩܰܕܡܳܝ̈ܳܬܳܐ ܒܰܠܚܽܘܕ ܢܚܽܘܪ܆ ܘܟܰܕ ܠܗܳܝ ܕܰܥܬܺܝܕܳܐ ܠܳܐ ܡܶܬܚܰܫܒܺܝܢ ܚ̱ܢܰܢ܆ ܠܘܳܬ ܚܽܘܫܳܒ̈ܶܐ ܣܰܟ̈ܠܶܐ ܢܶܦܰܠ܆ ܘܢܺܐܡܰܪ ܐܰܝܟܰܢܳܐ ܕܰܒܕܽܘܟ ܟܬܰܒ ܐ̱ܢܳܫ ܡܶܢ ܢܒܺܝ̈ܶܐ܆ ܣܪܺܝܩܰܐ ܗ̄ܘ ܗܰܘ ܕܦܳܠܰܚ ܥܰܒܕܽܘܬܳܐ ܠܰܐܠܳܗܳܐ܆ ܡܳܢܳܐ ܝܽܘܬܪܳܢܳܐ ܕܰܢܛܰܪܢܰܢ ܢܛܽܘܪ̈ܳܬܳܐ ܕܺܝܠܶܗ^[30]. ܗܳܝܕܶܝܢ ܓܶܝܪ ܗܳܝܕܶܝܢ ܢܶܚܙܶܐ ܓܰܠܝܳܐܺܝܬ܆ ܒܰܝܢܳܬ ܙܰܕܺܝܩܳܐ ܘܒܰܝܢܳܬ ܥܰܘܳܠܳܐ܆ ܘܒܰܝܢܳܬ ܗܰܘ ܕܦܳܠܰܚ ܠܰܐܠܳܗܳܐ ܘܒܰܝܢܳܬ ܗܰܘ ܕܠܳܐ ܦܳܠܰܚ ܠܶܗ. ܡܶܛܽܠ ܕܗܳܐ ܝܰܘܡܳܐ ܐܳܬܶܐ ܕܝܳܩܶܕ ܐܰܝܟ ܬܰܢܽܘܪܳܐ ܘܰܢܓܰܘܙܶܠ ‌ܐܶܢܽܘܢ ܘܢܶܗܘܽܘܢ ܟܽܠܗܽܘܢ ܐ̱ܚܪ̈ܳܢܝ̣ܰܝ̣ ܓܶܢܣܳܐ ܘܟܽܠܗܽܘܢ ܕܥܳܒܕܺܝܢ ܥܰܘܠܳܐ ܩܰܢܝܳܐ܆ ܘܢܰܘܩܶܕ ܐܶܢܽܘܢ ܝܰܘܡܳܐ ܗܰܘ ܕܳܐܬܶܐ܆ ܐܳܡܰܪ ܡܳܪܝܳܐ ܐܰܚܺܝܕ ܟܽܠ܆ ܘܠܳܐ ܢܶܫܬܒܶܩ ܥܶܩܳܪܳܐ ܕܺܝܠܗܽܘܢ ܐܳܦܠܳܐ ܫܰܒܽܘܩܳܐ܆ ܘܢܶܕܢܰܚ ܠܟܽܘܢ܆ ܠܗܳܢܽܘܢ ܕܕܳܚܠܺܝܢ ܠܰܫܡܳܐ ܕܺܝܠܝ ܫܶܡܫܳܐ ܕܙܰܕܺܝܩܽܘܬܳܐ ܘܳܐܣܝܽܘܬܳܐ ܒܟܶܢ̈ܦܰܘܗ̱ܝ.

ܗܳܠܶܝܢ ܕܶܝܢ ܗܳܫܳܐ ܐܶܬܶܐܡܰܪ̈ܝ̱ ܡܶܢܝ ܝܰܬܺܝܪ ܒܪܶܚܡܰܬ ܥܰܡܠܳܐ܆ ܐܰܝܟܰܢܳܐ ܕܢܺܐܠܰܦ ܕܰܠܘܳܬ ܗܳܠܶܝܢ ܕܥܳܠܡܳܐ ܕܰܥܬܺܝܕ ܢܚܽܘܪ܆ ܘܠܰܘ ܡܶܢ ܗܳܠܶܝܢ ܕܩܰܪ̈ܺܝܒܳܢ ܒܰܠܚܽܘܕ ܢܕܽܘܢܺܝܗ̇ ܠܟܺܐܢܽܘܬܶܗ ܕܰܐ‌ܠܳܗܳܐ܆ ܘܰܠܦܽܘܪܥܳܢܽܘܬܶܗ ܗܳܝ ܕܰܡܦܰܠܓܳܐ ܘܝܳܗܒܳܐ ܘܰܐܝܟ ܕܫܳܘܝܳܐ ܠܟܽܠ ܚܰܕ ܡܶܢ ܗܳܢܽܘܢ ܕܚܳܛܶܝܢ ܒܛܶܟܣܳܐ ܫܰܘܝܳܐ. ܙܰܒܢܰܐ ܗ̄ܘ ܕܶܝܢ ܗܳܫܳܐ ܡܶܢ ܟܰܕܽܘ܆ ܕܰܢܚܽܘܪ ܘܢܺܐܨܰܦ ܕܰܐܝܟܰܢܳܐ ܟܰܕ ܡܪܰܥܶܝܢ ܚ̱ܢܰܢ ܠܶܗ ܠܰܐܠܳܗܳܐ ܥܰܠ ܗܳܠܶܝܢ ܕܰܚܛܰܝܢ܆ ܚܰܫܳܐ ܗܰܘ ܕܶܐܬܳܐ ܥܰܠ ‌ܐ̱ܚܪ̈ܳܢܶܐ܆ ܠܳܐ ܢܶܬܩܰܪܰܒ ܠܰܩܕܳܡܰܘܗ̱ܝ ܒܽܐܘܪܚܳܐ܆ ܘܰܢܪܰܥܶܐ ܐܳܦ ܠܰܐ̱ܚܪ̈ܳܢܶܐ܆ ܘܢܺܐܬܶܐ ܐܳܦ ܥܠܰܝܢ. ܐܺܝܬ ܗ̱ܘ ܓܶܝܪ ܐܺܝܬ ܗ̱ܘ ܣܰܡ̱ܡ̈ܳܢܶܐ܆ ܗܳܢܽܘܢ ܕܒܺܐܝ̈ܕܰܝܗܽܘܢ ܡܰܨܝܳܐ ܠܡܶܟܠܳܐ ܘܰܠܡܶܦܣܰܩ ܠܪܽܘܓܙܳܐ ܗܰܘ ܕܡܶܬܬܰܝܬܶܐ ܡܶܢ ܐܰ‌ܠܳܗܳܐ. ܘܰܕܫܳܥܬܳܐ ܨܠܽܘܬܳܐ ܘܗܳܝ ܕܰܒܝܰܕ ܒܳܥ̈ܘܳܬܳܐ ܢܶܬܟܰܫܰܦ ܘܰܢܫܰܒܚܺܝܘܗ̱ܝ ܠܰܐܠܳܗܳܐ܆ ܥܰܡ ܟܳܗ̈ܢܶܐ ܐܰܟܚܕܳܐ ܕܣܳܝܡܺܝܢ ܒܶܣ̈ܡܶܐ ܢܳܡܽܘܣܳܐܺܝܬ ܡܰܣܩܺܝܢ ܕܶܒܚܬܳܐ. ܦܰܘܠܽܘܤ ܡܰܢ ܓܶܝܪ ܟܰܕ ܠܥܶܒܪ̈ܳܝܶܐ ܟܳܬܶܒ ܐܳܡܰܪ: ܕܙܳܕܶܩ ܠܡܰܣܳܩܽܘ ܕܶܒܚܬܳܐ ܕܬܶܫܒܽܘܚܬܳܐ ܒܟܽܠܙܒܰܢ ܠܰܐܠܳܗܳܐ: ܗܳܢܰܘ ܕܶܝܢ ܦܺܐܪ̈ܶܐ ܕܣܶܦ̈ܘܳܬܳܐ ܕܡܰܘ̈ܕܝܳܢ ܠܰܫܡܶܗ^[31]. ܡܽܘܫܶܐ ܕܶܝܢ ܟܰܕ ܡܰܠܶܠܘ ܒܶܗ܆ ܘܠܰܚܶܫܘ ܡܓܰܕܦܳܢܳܐܺܝܬ ܒܢܰܝ̈ܳܐ ܕܺܐܝܣܪܳܐܶܝܠ܆ ܘܢܳܦܠܺܝܢ ܗ̱ܘܰܘ ܡܶܢܫܶܠܝ ܟܢܺܝܫܳܐܺܝܬ ܘܡܳܝܬܺܝܢ ܗ̱ܘܰܘ܆ ܐܶܡܰܪ ܠܘܳܬ ܐܰܗܪܽܘܢ܆ ܣܰܒ ܦܺܝܪܡܳܐ ܘܣܺܝܡ ܥܠܰܘܗ̱ܝ ܢܽܘܪܳܐ ܡܶܢ ܡܰܕܒܚܳܐ ܘܰܐܪܡܳܐ ܥܠܶܝܗ̇ ܒܶܣ̈ܡܶܐ ܘܰܐܘܒܶܠ ܩܰܠܺܝܠܳܐܺܝܬ ܠܡܰܫܪܺܝܬܳܐ܆ ܘܚܰܣܳܐ ܥܠܰܝܗܽܘܢ ܢܰܦܺܝܩ ܓܶܝܪ ܪܽܘܓܙܳܐ ܡܶܢ ܡܳܪܝܳܐ܆ ܘܰܡܫܰܪܰܝ ܠܶܗ ܠܰܡܚܰܒܳܠܽܘ ܒܥܰܡܳܐ. ܘܰܢܣܰܒ ܐܰܗܪܽܘܢ ܐܰܝܟܰܢܳܐ ܕܡܰܠܶܠ ܠܶܗ ܡܽܘܫܶܐ. ܘܰܪܗܶܛ ܠܰܟܢܽܘܫܬܳܐ. ܡܶܢ ܟܰܕܽܘ ܡܫܰܪܰܝ ܗ̱ܘܳܐ ܠܶܗ ܠܡܰܘܬܳܢܳܐ ܒܥܰܡܳܐ. ܘܰܐܪܡܺܝ ܒܶܣ̈ܡܶܐ ܘܚܰܣܺܝ ܥܰܠ ܥܰܡܳܐ. ܘܩܳܡ ܒܰܝܢܳܬ ܗܳܢܽܘܢ ܕܡܰܝ̣ܺܝ̣ܬܺܝܢ ܗ̱ܘܰܘ ܘܗܳܢܽܘܢ ܕܚܰܝ̣ܺܝ̣̈ܢ ܗ̱ܘܰܘ܆ ܘܶܐܬܟܠܺܝ ܡܰܘܬܳܢܳܐ^[32]. 706

ܚܳܙܶܝܢ ܐܢ̱ܬܽܘܢ ܕܰܠܪܽܘܓܙܳܐ ܗܰܘ 222ܕܫܰܪܺܝ ܗ̱ܘܳܐ܆ ܟܠܳܐ ܟܳܗܢܳܐ ܟܰܕ ܥ̣ܰܠ ܩܳܡ ܒܰܡܨܰܥܬܳܐ ܥܰܡ ܒܶܣ̈ܡܶܐ܆ ܘܕܰܠܡܶܣܬܰܪܗܳܒܽܘ ܙܳܕܶܩ܆ ܘܕܰܒܟܽܠ ܙܒܰܢ ܙܳܕܶܩ ܠܰܡܩܰܪܳܒܽܘ ܨܠܽܘܬܳܐ ܐܰܝܟ ܦܺܐܪ̈ܶܐ ܕܣܶܦ̈ܘܳܬܳܐ. ܩܰܕܺܝܡܳܐ ܕܶܝܢ ܝܺܕܺܝܥܳܐ ܕܳܐܦ ܒܶܣ̈ܡܶܐ ܛܽܘܦܣܳܐ ܐܺܝܬܰܝܗܽܘܢ ܕܰܨܠܽܘܬܳܐ ܕܟܺܝܬܳܐ ܘܒܰܣܺܝܡܽܘܬ ܪܺܝܚܳܐ. ܬܶܬܩܰܢ ܓܶܝܪ ܐܳܡܰܪ ܨܠܽܘܬܳܐ ܕܺܝܠܝ܆ ܐܰܝܟ ܒܶܣ̈ܡܶܐ ܩܕܳܡܰܝܟ܆ ܘܰܒܗܳܕܶܐ ܗܳܟܺܝܠ ܗܳܫܳܐ ܢܶܬܚܰܫܰܚ ܚܘܺܝܚܳܐܺܝܬ ܘܰܐܡܺܝܢܳܐܺܝܬ܆ ܘܠܳܐ ܟܰܕ ܚܕܳܐ ܙܒܰܢ ܐܰܘ ܬܰܪܬܶܝܢ ܒܒܳܥܽܘܬܳܐ ܐܰܪܰܥܢܰܢ ܢܶܣܒܰܥ܆ ܘܢܶܫܕܶܝܘܗ̱ܝ ܠܣܽܘܥܪܳܢܳܐ ܡܶܢܰܢ ܐܰܝܟ ܕܰܠܝܰܬܺܝܪܳܐ܆ ܐܶܠܳܐ ܥܰܡ ܕܶܡ̈ܥܶܐ܆ ܥܰܡ ܗܳܝ ܕܳܐܦ ܠܒܽܘܪܟܳܐ ܟܳܦܺܝܢ ܚ̱ܢܰܢ ܥܰܠ ‌ܐܰܪܥܳܐ ܢܶܒܥܶܐ. ܘܢܶܬܟܰܫܰܦ ܢܦܺܝܤ. ܒܳܗܶܬ ܐ̱ܢܳܐ ܓܶܝܪ ܘܡܶܬܚܰܦܶܐ^[33] ܐ̱ܢܳܐ ܕܟܰܕ ܚܢܰܢ ܟܳܗ̈ܢܶܐ ܥܰܠ ‌ܐܰܪܥܳܐ ܪܡܶܝܢ ܚ̱ܢܰܢ ܘܰܡܨܰܠܶܝܢ ܚ̱ܢܰܢ ܠܟܽܘܢ ܗܳܢܽܘܢ ܕܰܒܥܰܡܳܐ ܐܺܝܬܰܝܟܽܘܢ ܕܩܳܝܡܺܝܢ ܐܢ̱ܬܽܘܢ ܘܰܦܥܺܝܪ ܚܶܟܟܽܘܢ ܚܳܙܶܐ ܐ̱ܢܳܐ. ܫܰܘܝܳܐܺܝܬ ܓܶܝܪ ܡܫܰܡܫܳܢܳܐ܆ ܠܟܽܠ ‌ܐ̱ܢܳܫ ܩܳܥܶܐ ܕܰܢܣܺܝܡ ܒܽܘܪܟܳܐ܆ ܗܳܝ ܕܰܠܩܽܘܒܠܳܐ ܓܶܝܪ܆ ܕܶܐܢ ܟܺܝܬ ܐܳܦ ܗܳܕܶܐ ܐܺܝܬ ܠܡܺܐܡܰܪ܆ ܕܠܰܘ ܠܟܽܠ ‌ܐ̱ܢܳܫ ܡܰܙܥܶܩ܆ ܠܟܽܘܢ ܡܰܢ ܕܬܶܬܓܰܗܢܽܘܢ ܙܳܕܶܩ ܗ̱ܘܳܐ܆ ܟܳܗ̈ܢܶܐ ܕܶܝܢ ܢܩܽܘܡܽܘܢ ܗ̱ܘܰܘ܆ ܘܰܚܠܳܦܰܝܟܽܘܢ ܢܶܡܬܚܽܘܢ ܗ̱ܘܰܘ ܐܺܝ̈ܕܰܝܗܽܘܢ ܠܘܳܬ ܫܡܰܝܳܐ. ܐܶܠܳܐ ܫܰܘܝܳܐܺܝܬ ܟܽܠܰܢ ܢ݀ܨܰܠܶܐ. ܢܶܒܪܽܘܟ ܫܰܘܝܳܐܺܝܬ. ܒܪܶܚܡܰܬ ܥܰܡܠܐ ܢܩܽܘܫ܆ ܐܰܝܟܰܢܳܐ ܕܰܠܟܽܠܶܗ ܬܰܪܥܳܐ ܕܫܽܘܒܩܳܢܳܐ ܢܶܦܬܰܚ.

ܐܺܝܬ ܐܳܦ ܐ̱ܚܪܺܢܳܐ ܣܰܡܳܐ ܕܡܰܐܣܶܐ ܘܬܳܟܶܤ ܠܪܽܘܓܙܳܐ܆ ܗܰܘ ܕܙܳܕܶܩ ܠܰܡܙܰܘܓܽܘܬܶܗ ܐܰܟܚܕܳܐ ܥܰܡ ܨܠܽܘܬܳܐ. ܠܰܡܪܰܚܡܳܢܽܘܬܳܐ ܕܥܰܠ ܣܢܺܝܩ̈ܶܐ ܐܳܡܰܪ ܐ̱ܢܳܐ. ܘܰܠܗܳܝ ܕܰܢ݀ܫܰܘܬܶܦ ܡܶܢ ܗܳܠܶܝܢ ܕܺܐܝܬ ܠܰܢ ܠܡܶܣ̈ܟܺܢܶܐ. ܠܗܳܕܶܐ ܓܶܝܪ ܐܳܦ ܦܰܘܠܽܘܤ ܐܰ‌ܠ̣ܘܶܬ ܟܰܕ ܐܰܘܣܶܦ ܐܳܦ ܗܳܠܶܝܢ ܥܰܠ ܦܶܬܓܳܡ̈ܶܐ ܗܳܠܶܝܢ ܕܣܺܝܡܺܝܢ ܡܶܢ ܠܥܶܠ. ܠܙܶܕܩܬܳܐ ܕܶܝܢ ܘܠܰܡܫܰܘܬܦܳܢܽܘܬܳܐ ܠܳܐ ܬܶܛܥܽܘܢ܆ ܕܰܐܝܟ ܗܳܠܶܝܢ ܓܶܝܪ ܕܶܒ̈ܚܶܐ ܫܳܦܪܺܝܢ ܠܰܐܠܳܗܳܐ^[34]. ܠܗܳܕܶܐ ܐܳܦ ܕܳܢܺܝܐܶܝܠ ܗܰܘ ܢܒܺܝܳܐ ܡܳܠܶܟ ܗ̱ܘܳܐ ܠܢܰܒܽܘܟܕܢܳܨܰܪ܆ ܟܰܕ ܩܰܕܶܡ ܝܰܕܥܶܗ ܡܶܢ ܦܫܳܪܳܐ ܗܰܘ ܚܰܟܺܝܡܳܐ ܕܚܶܠ̈ܡܶܐ܆ ܕܰܥܬܺܝܕ ܗ̱ܘܳܐ ܕܢܶܫܬܰܚܠܰܦ ܠܕܽܘܒܳܪܳܐ ܡܶܕܶܡ ܕܚܰܝܘܰܬ ܫܶܢܳܐ܆ ܘܰܠܗܽܘܦܳܟܳܐ ܒܥܺܝܪܳܝܳܐ ܢܶܬܚܰܠܰܦ^[35]܆ ܐܰܝܟܰܢܳܐ ܕܗܳܫܳܐ ܫܳܡܥܺܝܢܰܢ ܡܶܛܽܠ ܗܳܢܽܘܢ ܕܒܰܠܺܝܥܺܝܢ ܒܚܰܫܳܐ ܗܳܢܳܐ܆ ܘܳܐܡܰܪ ܗ̱ܘܳܐ ܡܶܛܽܠ ܗܳܕܶܐ ܡܰܠܟܳܐ܆ ܡܶܠܟܳܐ ܕܺܝܠܝ ܢܶܫܦܰܪ ܥܠܰܝܟ܆ ܘܰܚ̈ܛܳܗܰܝܟ ܒܰܡܪ̈ܰܚܡܳܢܘܳܬܳܐ ܦܪܽܘܩ ܘܥܰܘ̈ܠܰܝܟ ܒܚܰܘ̈ܣܳܢܶܐ ܕܥܰܠ ܡܶܣ̈ܟܺܢܶܐ܆ ܟܒܰܪ ܬܶܗܘܶܐ ܡܰܓܪܰܬ ܪܽܘܚܳܐ ܥܰܠ ܫܳܪ̈ܥܳܬܳܟ. ܠܗܳܠܶܝܢ ܙܳܕܶܩ ܠܡܰܠܘܳܬܽܘ܆ ܣܰܡܳܐ ܗܰܘ ܪܰܒܳܐ܆ ܘܝܰܬܺܝܪ ܚܰܝܠܬܳܢܳܐ܆ ܘܕܺܐܝܬܰܘܗ̱ܝ ܡܥܰܕܪܳܢܳܐ ܠܘܳܬ ܟܽܠ ܟܽܘܪܗܳܢܳܐ ܘܰܡܚܽܘܬܳܐ.

ܗܳܝ ܐܳܡܰܪ ܐ̱ܢܳܐ ܕܢܶܫܬܰܘܬܰܦ ܕܠܳܐ ܫܰܠܘܳܐ ܒܕܶܒܚܬܳܐ ܕܠܳܐ ܕܡܳܐ܆ ܕܦܰܓܪܳܐ ܘܰܕܡܳܐ ܕܰܡܫܺܝܚܳܐ܆ ܗܰܘ ܕܰܡܪܺܝܡ ܠܰܚܛܺܝܬܶܗ ܕܥܳܠܡܳܐ ܒܰܠܚܽܘܕ܆ ܐܶܢܗܽܘ ܕܰܚܢܰܢ ܠܳܐ ܢܰܗܦܟܺܝܗ̇ ܠܛܰܝܒܽܘܬܳܐ. ܗܳܢܳܐ ܓܶܝܪ ܕܡܳܐ ܒܰܙܒܰܢ܆ ܐܳܦ ܟܰܕ ܒܛܽܘܦܣܳܐ ܘܛܶܠܳܢܺܝܬܳܐ ܩܳܕܶܡ ܗ̱ܘܳܐ ܡܶܬܚܰܘܶܐ ܗ̱ܘܳܐ܆ ܟܰܕ ܐܶܡܪܳܐ ܡܶܬܕܒܰܚ ܗ̱ܘܳܐ ܐܰܝܟ ܦܰܣܟܐ ܗܰܘ ܕܰܦܩܺܝܕ ܗ̱ܘܳܐ ܡܶܢ ܡܽܘܫܶܐ܆ ܘܥܰܠ ‌ܐܶܣܟ̈ܦܳܬܳܐ ܐܰܘܟܺܝܬ ܩܝ̈ܳܡܶܐ ܕܟܽܠܚܰܕ ܡܶܢ ܬܰܪ̈ܥܶܐ ܡܶܬܡܫܰܚ ܗ̱ܘܳܐ܆ ܐܶܡܰܬܝ ܕܒܽܘܟܪ̈ܶܐ ܕܡܶܨܪ̈ܳܝܶܐ ܡܶܬܡܚܶܝܢ ܗ̱ܘܰܘ܆ ܠܰܡܚܰܒܠܳܢܳܐ ܛܳܪܶܕ ܗ̱ܘܳܐ ܡܶܢ ܫܰܒܪ̈ܶܐ ܕܺܐܝܣܪܳܐܶܝܠ܆ ܘܰܒܟܽܠ ܒܰܝܬܳܐ ܕܰܡܫܺܝܚ ܗ̱ܘܳܐ܆ ܠܳܐ ܓܳܫܶܦ ܗ̱ܘܳܐ. ܐܳܦ ܚܢܰܢ ܗܳܟܺܝܠ܆ ܢܶ݀ܡܫܽܘܚ ܒܰܕܡܳܐ ܐܰ‌ܠܳܗܳܝܳܐ ܠܬܰܪ̈ܥܶܐ ܡܶܬܗܰܘ̈ܢܳܢܶܐ ܕܒܰܝܬܳܐ ܕܺܝܠܰܢ܆ ܗܳܢܰܘ ܕܶܝܢ ܠܦܽܘ̈ܡܰܝܢ. ܘܗܳܟܰܢܳܐ ܡܶܢ ܡܚܰܒܠܳܢܳܐ ܢܶ݀ܥܪܽܘܩ܆ ܘܟܰܕ ܦܰܓܪܳܐ ܕܰܐ‌ܠܳܗܳܐ ܘܡܶܠܬܳܐ ܗܰܘ ܕܶܐܬܒܰܣܰܪ ܐܳܟܠܺܝܢܰܢ܆ ܘܡܶܢ ܩܽܘܕܫܳܐ ܠܗܳܠܶܝܢ ܕܰܠܓܰܘ ܡܳܠܶܝܢ ܚ̱ܢܰܢ܆ ܠܟܽܠ ܚܰܫܳܐ ܠܳܐ ܡܠܺܝܠܳܐ ܘܚܰܝܽܘܬܳܢܳܝܳܐ ܢܶ݀ܙܢܽܘܩ ܘܢ݀ܶܫܕܶܐ ܡܶܢܰܢ. ܘܢܶܗܘܶܐ ܠܫ̈ܺܐܕܶܐ ܗܳܢܽܘܢ ܡܰܩܪ̈ܒܳܢܶܐ܆ ܠܰܘ ܒܰܠܚܽܘܕ ܠܳܐ ܡܶܬܟܰܒ̈ܫܳܢܶܐ܆ ܐܶܠܳܐ ܐܳܦ ܕܚܺܝ̈ܠܶܐ. ܝܰܬܺܝܪܳܐܺܝܬ ܐܶܢ ܐܳܦ ܨܰܘܡܳܐ ܢܰ݀ܘܣܶܦ܆ ܙܰܝܢܳܐ ܗܰܘ ܕܣܰܓܺܝ ܚܳܫܰܚ ܘܰܡܝܰܬܰܪ ܠܽܘܩܒܰܠ ܪ̈ܽܘܚܶܐ ܒܺܝ̈ܫܳܬܳܐ܆ ܘܢܶ݀ܬܦܰܨܶܐ ܡܶܢ ܪܽܘܓܙܳܐ ܟܺܝܬ ܗܳܢܳܐ ܕܩܰܪܺܝܒ܆ ܘܡܶܢ ܗܰܘ ܐ̱ܚܪܳܝܳܐ ܘܕܰܥܬܺܝܕ. ܘܢܶ݀ܫܬܘܶܐ ܠܡܰܠܟܽܘܬܐ ܕܰܫܡܰܝܳܐ܆ ܒܰܡܫܺܝܚܳܐ ܝܶܫܽܘܥ ܡܳܪܰܢ. ܕܥܰܡܶܗ ܠܰܐܒܳܐ ܘܰܠܪܽܘܚܳܐ ܩܰܕܺܝܫܳܐ ܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܳܐ ܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܚܰܡܫܺܝܢ ܘܰܬܠܳܬܳܐ.

ܥܡܘܣ. 3: 13 [1]

ܐܫܥܝܐ. 40: 1 ـ 2 [2]

ܐ. ܩܘܪ̈ܝܢܬܝܐ. 14: 19 [3]

ܒ. ܛܝܡܬܐܘܣ. 4: 2 [4]

ܦܝܠܝܦܣ̈ܝܐ. 3: 13 ـ 14 [5]

[6]ܒ. ܫܡܘܐܝܠ. 13: 34

ܕܝܗܘܕ؟[7]

ܒ. ܡܠ̈ܟܐ. 9: 17 [8]

ܚܙܩܝܐܝܠ. 33: 1 ـ 7 [9]

ܬܢܝܢ ܢܡܘܣܐ. 28: 28 [10]

ܦܰܚܡܳܐ[11]

ܬܢܝܢ ܢܡܘܣܐ. 28: 59 [12]

ܬܢܝܢ ܢܡܘܣܐ. 28: 61 [13]

ܪ̈ܗܘܡܝܐ. 8: 15 [14]

[15]ܐ. ܩܘܪ̈ܝܢܬܝܐ. 10: 8 ـ 11 ܐܦ ܣܦܪܐ ܕܡܢܝܢܐ. 25: 9

ܢܽܘܗܳܪܳܐ. ܒܐܓܪܬܐ ܕ ܐ. ܩܘܪ̈ܝܢܬܝܐ ܟܳܬܶܒ ܗ̱ܘܳܐ ܥܶܣܪܺܝܢ ܘܰܬܠܳܬܳܐ ܐܰ‌ܠ̈ܦܺܝܢ. ܘܒܣܶܦܪܳܐ ܕܡܶܢܝܳܢܳܐ. ܥܶܣܪܺܝܢ ܘܰܐܪܒܥܐ ܐܰ‌ܠ̈ܦܺܝܢ.

ܐܫܥܝܐ. 33: 14 [16]

ܡܬܝ. 25: 41 [17]

ܠܘܩܐ. 19: 22 [18]

ܚܝܘܬܢܝܬܐ[19]

 ܒܡܛܫ̈ܘܝܬܐ[20]

ܡܙܡܘܪ̈ܐ. 10: 9 [21]

ܐܪܡܝܐ. 5: 8 [22]

ܐܫܥܝܐ. 40: 1 [23]

ܠܘܩܐ. 16: 25 [24]

ܚܙܩܝܐܝܠ. 9: 5 ـ 6 [25]

ܣܶܦܪܐ ܕܟܗ̈ܢܐ. 10: 3 [26]

ܐ. ܦܛܪܘܣ. 4: 17 [27]

ܡܙܡܘܪ̈ܐ. 89: 8 [28]

ܡܰܘܪܶܬ؟[29]

ܡܰܠܰܐܟܺܝ. 3: 14 [30]

ܥܒܪ̈ܝܐ. 13: 15 [31]

ܣܶܦܪܐ ܕܡܢܝܢܐ. 16: 46 ـ 48 [32]

ܡܬܚܡܨ[33]

ܥܒܪ̈ܝܐ. 13: 16 [34]

ܕܢܝܐܝܠ. 4: 24 [35]