ܡܺܐܡܪܳܐ ܕܚܰܡܫܺܝܢ ܘܰܬܪܶܝܢ
ܥܰܠ ܡܰܩ̈ܒܳܝܶܐ
52: ܩܽܘܠܳܣܗܽܘܢ ܕܰܛܠܳܝ̈ܶܐ ܡܰܩ̈ܒܳܝܶܐ ܡܶܛܽܠ ܢܰܨܺܝܚܽܘܬܳܐ ܕܬܰܟ̈ܬܽܘܫܰܝܗܽܘܢ ܡܶܣܬܒܰܪ ܡܰܢ ܕܰܡ̈ܠܽܘܐܶܐ ܡܫܰܪ̈ܬܚܶܐ ܕܣܽܘ̈ܟܳܠܶܐ ܝܳܗܶܒ ܠܗܳܢܽܘܢ ܕܳܐܡܪܺܝܢ. ܒܗܳܝ ܕܶܝܢ ܕܙܳܟܶܐ ܠܟܽܠ ܫܟܳܚܬܳܐ ܡܠܺܝܠܬܳܐ܆ ܨܪ̈ܺܝܟܶܐ ܘܡܶܣ̈ܟܺܢܶܐ ܘܕܰܒܡܶܨܥܳܝܽܘܬܳܐ ܣܰܓܺܝܐܬܳܐ ܦܰܝ̣ܺܝ̣ܫܺܝܢ ܡܶܢ ܫܪܳܪܳܐ܆ ܡܚܰܘܶܐ ܠܗܽܘܢ ܠܗܳܢܽܘܢ ܕܰܡܩܰܠܣܺܝܢ.
ܡܶܛܽܠ ܕܳܐܦ ܨܰܝܳܪܳܐ܆ ܐܶܢܗܽܘ ܕܰܚܙܳܬܳܐ ܡܶܕܶܡ ܐܰܟܣܢܳܝܬܳܐ ܢܶܚܙܶܐ ܘܕܰܠܒܰܪ ܡܶܢ ܗܳܢܶܝܢ ܕܰܡܥܰܝ̈ܕܳܢ܆ ܕܫܽܘܦܪܳܐ ܕܠܳܐ ܣܳܟܳܐ ܡܶܢ ܟܝܳܢܳܐ ܐܺܝܬ ܠܳܗ̇܆ ܘܢܺܐܨܰܦ ܕܰܠܗܳܕܶܐ ܒܓܰܘ̈ܢܶܐ ܢܕܰܡܶܐ܆ ܨܰܠܡܳܐ ܡܰܢ ܫܰܦܺܝܪܳܐ ܡܶܢ ܟܽܠܦܪܽܘܤ ܘܦܰܐܝܳܐ ܢܨܽܘܪ܆ ܕܰܠܘܳܬ ܬܰܦܢܟܳܐ ܕܗܳܟܰܢܳܐ ܐܺܝܬܰܘܗ̱ܝ ܛܥܺܝܢ ܫܽܘܦܪܳܐ ܘܰܪܚܺܝܡܳܐ ܐܶܬܕܰܡܺܝ. ܢܶܙܕܟܶܐ ܕܶܝܢ ܒܗܳܝ ܕܠܳܐ ܡܶܬܡܰܨܶܐ܆ ܕܰܒܝܰܕ ܐܽܘܡܳܢܽܘܬܳܐ ܠܘܳܬ ܚܰܬܺܝܬܽܘܬܳܐ ܢܶܬܡܰܛܶܐ ܕܫܽܘܦܪܳܐ ܗܰܘ ܟܝܳܢܳܝܳܐ.
ܗܳܟܰܢܳܐ ܗܳܟܺܝܠ ܐܳܦ ܚܢܰܢ ܟܰܕ ܐܰܝܟ ܗܰܘ ܕܰܒܣܰܡܡ̈ܳܢܶܐ ܕܡ̈ܶܠܶܐ ܨܳܒܶܝܢ ܚ̱ܢܰܢ ܕܰܢܨܽܘܪ܆ ܠܫܰܦܺܝܪܽܘܬ ܦܰܐܝܽܘܬܳܐ ܪܽܘܚܳܢܳܝܬܳܐ܆ ܘܠܰܡܥܰܙܝܳܢܽܘܬܳܐ ܥܠܰܝܡܳܝܬܳܐ ܘܰܙܪܺܝܙܬܳܐ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ ܕܫܰܒܥܳܐ ܛܠܳܝ̈ܶܐ ܕܫܰܦܺܝܪ̈ܳܢ ܡܰܢ ܐܳܡܪܺܝܢ ܚ̱ܢܰܢ ܘܰܕܣܰܓܺܝ ܫܰܦܺܝܪ̈ܳܢ܆ ܕܰܐܝܟ ܗܳܟܰܢܳܐ ܓܶܝܪ ܐܺܝܬܶܝܗ̇ ܗܺܝ ܨܒܽܘܬܳܐ܆ ܕܣܰܓܺܝ ܕܶܝܢ ܒܕܽܘܟ ܠܪܽܘܚܩܳܐ ܦܰܪ̈ܺܝܩܳܢ ܡܶܢ ܪܰܒܽܘܬܗܽܘܢ ܕܣܽܘܥܪ̈ܳܢܶܐ܆ ܘܡܰܒ̈ܥܕܳܢ ܘܚܰܣܺܝܪ̈ܳܢ ܐܳܦ ܡܶܢܶܗ ܕܰܟܝܳܢܳܐ.
ܗܳܝ ܓܶܝܪ ܕܢܶܫܡܰܥ ܒܰܠܚܽܘܕ܆ ܕܫܰܒܥܳܐ ܛܠܳܝ̈ܶܐ ܕܗܳܫܳܐ ܡܶܢ ܩܰܘܡܬܳܐ ܫܰܒܪܳܝܬܳܐ ܢܦܰܩܘ܆ ܒܶܗ ܒܬܰܪܥܳܐ ܕܛܰܠܝܽܘܬܳܐ܆ ܕܰܐܝܟ ܕܰܒܕܰܪ̈ܓܶܐ ܕܣܶܒܠܬܳܐ ܩܰܠܺܝܠ ܒܙܰܒܢܳܐ ܩܰܕܺܝܡܺܝܢ ܠܰܚ̈ܕܳܕܶܐ܆ ܛܠܳܝ̈ܶܐ ܕܶܝܢ ܒܪܰܡ ܟܽܠܗܽܘܢ܆ ܚܰܕ ܘܗܽܘ ܟܰܕ ܗܽܘ ܡܰܘܬܳܐ ܚܠܳܦ ܫܰܦܺܝܪܽܘܬ ܕܶܚܠܬܳܐ ܣܰܝܒܰܪܘ܆ ܟܰܕ ܒܳܐܕܫ̈ܶܐ ܡܫܰܚ̈ܠܦܶܐ ܕܫܶܢ̈ܕܶܐ ܚܰܡܣܶܢܘ܆ ܘܩܰܕܡܳܝܗܽܘܢ ܐܶܠܺܝܥܳܙܳܪ ܣܳܒܳܐ ܘܟܳܗܢܳܐ܆ ܘܡܰܠܦܳܢܳܐ ܕܚܰܫ̈ܶܐ ܕܰܚܠܳܦ ܡܝܰܬܪܽܘܬܳܐ ܡܰܠܽܘܢ ܐܰܘ ܕܢܳܡܽܘܣܳܐ܆ ܘܒܳܬܰܪܗܽܘܢ ܐܶܡܗܽܘܢ ܕܡܰܣܰܐܒ ܗ̱ܘܳܐ ܠܳܗ̇ ܒܙܰܒܢܳܐ܆ ܕܰܒܗܳܝ ܕܓܰܢ̱ܒܳܪܳܐܺܝܬ ܡܣܰܝܒܪܳܐ ܗ̱ܘܳܬ ܠܢܶܓ̈ܕܶܐ ܕܰܒ̈ܢܶܝܗ̇܆ ܐܳܦ ܒܳܗ̇ ܒܗܳܝ ܕܺܐܝܬܶܝܗ̇ ܐܶܡܗܽܘܢ ܟܶܦܪܰܬ.
ܠܰܐܝ̇ܕܳܐ ܡܰܫܡܰܥܬܳܐ ܠܳܐ ܡܰܬܡܗܳܐ܆ ܠܰܐܝ̇ܕܳܐ ܕܶܝܢ ܢܰܦܫܐ ܠܳܐ ܡܰܬܗܪܳܐ. ܥܰܠ ܬܰܪܒܺܝܬܳܐ ܕܶܝܢ ܕܰܐܝܠܶܝܢ ܡ̈ܶܠܶܐ ܣܢܺܝܩܺܝܢ ܗܶܢܽܘܢ ܣܽܘܥܪ̈ܳܢܶܐ܆ ܕܡܰܨܝܳܐ ܕܰܬܥܰܠܶܐ ܐܶܢܽܘܢ ܠܪܰܘܡܳܐ. ܠܩܽܘ̈ܠܳܣܶܐ ܡܰܢ ܗܳܟܺܝܠ܆ ܗܳܠܶܝܢ ܕܡܶܢ ܗܽܘܓܳܝܳܐ ܘܡܶܢ ܐܽܘܡܳܢܽܘܬܳܐ ܗ̱ܝ ܕܰܡܚܰܓܝܳܢܳܐܺܝܬ ܡܶܫܬܰܘܕܝܳܐ ܠܡܶܟܬܰܒ܆ ܠܬܰܚܬ ܒܕܽܘܟ ܣܳܝܡܺܝܢ ܠܗܽܘܢ܆ ܦܳܪܚܺܝܢ ܕܶܝܢ ܠܘܳܬܶܗ ܕܰܫܡܰܝܳܐ܆ ܘܰܒܓܶܦ̈ܶܐ ܒܰܝ̈ܬܳܝܶܐ ܕܺܝܠܗܽܘܢ ܡܶܬܪܰܡܪܡܺܝܢ܆ ܘܠܰܘ ܒܽܐܘܡܳܢܳܝ̈ܶܐ ܘܢܽܘܟܪ̈ܳܝܶܐ. ܘܰܠܘܳܬܶܗ ܕܰܐܠܳܗܳܐ ܣܳܝܽܘܡܶܗ ܕܰܐܓܽܘܢܳܐ ܕܫܰܦܺܝܪܽܘܬ ܕܶܚܠܬܳܐ܆ ܥܰܡ ܢܒܺܝܳܐ ܡܰܙܥܩܺܝܢ܆ ܡܶܢ ܠܘܳܬܳܟ ܐܺܝܬܰܘܗ̱ܝ ܩܽܘܠܳܣܰܢ ܒܥܺܕܬܳܐ ܪܰܒܬܳܐ .
ܡܶܛܽܠ ܕܶܝܢ ܕܰܠܥܺܕܬܳܐ ܐܶܬܥܰܗܕܰܬ܆ ܣܽܘܟܳܠܳܐ ܡܶܕܶܡ ܕܝܰܬܺܝܪ ܐܰܠܳܗܳܝ ܘܕܰܟܣܶܐ܆ ܥܶܦܝܰܬ ܡܶܢ ܐܰܬܠܺܝܛܽܘܬܳܐ ܕܣܳܗ̈ܕܶܐ ܗܳܠܶܝܢ ܚܰܝ̈ܠܬܳܢܶܐ. ܡܶܣܬܰܒܪܳܐ ܠܺܝ ܓܶܝܪ܆ ܕܛܽܘܦܣܳܐ ܐܰܚܺܝܕܺܝܢ. ܣܳܒܳܐ ܡܰܢ ܐܶܠܺܝܥܳܙܳܪ܆ ܕܢܳܡܽܘܣܳܐ ܗܰܘ ܕܰܐܥܬܶܩ ܘܣܶܐܒ ܒܰܟܬܳܒܳܐ܆ ܛܠܳܝ̈ܶܐ ܕܶܝܢ ܗܳܢܽܘܢ ܕܶܐܬܬܰܠܡܰܕܘ ܠܶܗ ܠܣܳܒܳܐ ܘܶܐܡܗܽܘܢ ܕܗܳܠܶܝܢ܆ ܝܽܘܩܢܳܐ ܕܥܺܕܬܳܐ ܗܳܝ ܕܡܶܢ ܥܰܡܡ̈ܶܐ ܡܡ̣ܰܠܶܝܢ ܗ̱ܘܰܘ܆ ܗܳܝ ܕܡܶܢ ܩܕܺܝܡ ܡܰܢ ܕܠܳܐ ܝܰܠܕܳܐ ܐܺܝܬܶܝܗ̇ ܗ̱ܘܳܬ܆ ܒܳܬܰܪܟܶܢ ܕܶܝܢ ܣܰܓܺܝܰܐܬ̣ ܒܢܰܝ̈ܳܐ܆ ܗܳܝ ܕܳܐܦ ܩܰܕܡܰܬ ܐܶܬܪܰܕܝܰܬ̣ ܘܝܶܠܦܰܬ ܡܶܢ ܢܳܡܽܘܣܳܐ܆ ܝܽܘܠ̈ܦܳܢܶܐ ܗܳܢܽܘܢ ܫܰܪ̈ܘܳܝܶܐ ܘܰܕܒܰܕܡܽܘܬ ܐܳܬܘ̈ܳܬܳܐ ܩܰܕܡܳܝ̈ܳܬܳܐ ܕܫܰܦܺܝܪܽܘܬ ܕܶܚܠܬܳܐ܆ ܗܳܝ ܕܡܶܛܽܠܳܬܳܗ̇ ܚܰܢܰܐ ܢܒܺܝܬܳܐ ܐܳܡܪܳܐ: ܕܰܥܩܰܪܬܳܐ ܝܶܠܕܰܬ ܫܰܒܥܳܐ ܆ ܟܰܕ ܟܢܽܘܫܬܳܐ ܗܳܝ ܕܡܶܢ ܩܕܺܝܡ ܐܺܝܬܶܝܗ̇ ܗ̱ܘܳܬ ܣܰܓܺܝܐܬܳܐ ܒܰܒ̈ܢܰܝܳܐ ܐܶܬܡܰܚܠܰܬ̣.
ܐܶܠܳܐ ܐܰܝܟܰܢܳܐ ܐܰܝܬܶܝܘܗ̱ܝ ܠܟܽܘܢ ܠܰܩܕܳܡ ܥܰܝ̈ܢܶܐ܆ ܠܶܣܛܰܐܕܺܝܽܘܢ ܗܰܘ ܕܰܡܝܰܬܪܽܘܬܳܐ܆ ܠܗܰܘ ܕܳܐܦ ܙܰܒܢܳܐ ܗܰܘ ܕܡܶܬܚܪܶܐ ܕܰܢܚܰܒܶܠ ܠܩܰܕܡܳܝ̈ܳܬܳܐ ܠܳܐ ܐܰܥܡܛܶܗ܆ ܐܶܠܳܐ ܟܰܕ ܡܶܢ ܟܽܠܢܳܫ ܡܶܙܕܰܡܰܪ܆ ܒܡܰܫܡ̈ܥܳܬܳܐ ܚ̈ܰܕܬ̣ܳܬ̣ܳܐ ܘܕܰܐܝܟ ܗܰܘ ܕܠܳܐ ܛܥܺܝܡ ܠܗܶܝܢ ܡܶܕܶܡ ܢܳܩܶܫ܆ ܘܰܕܡܶܬܪܰܓܪ̈ܓܳܢ ܠܫܳܪܽܘܬܳܐ܆ ܥܰܬܺܝܩܬܳܐ ܡܰܢ ܒܚܽܘܕܪܳܐ ܕܰܫܢܰܝ̈ܳܐ܆ ܚܕܰܬܳܐ ܕܶܝܢ ܒܚܰܒܺܝܒܽܘܬܳܐ ܘܰܒܠܳܐ ܣܰܒܥܽܘܬܳܐ.
ܩܰܕܺܝܡ ܗ̱ܘܳܐ ܡܰܢ ܝܰܬܺܝܒ ܐܰܢܛܺܝܰܟܽܘܤ ܗܰܘ ܛܪܽܘܢܳܐ ܘܩܰܫܝܳܐ ܒܰܙܢܳܐ ܥܰܠ ܕܽܘܟܬܳܐ ܡܶܕܶܡ ܪܳܡܬܳܐ܆ ܕܰܐܝܟ ܗܳܢܳܐ ܓܶܝܪ ܡܶܕܶܡ ܐܺܝܬܶܝܗ̇ ܪܳܡܽܘܬܳܐ ܘܚܰܣܺܝܪܽܘܬ ܗܰܘܢܳܐ܆ ܕܥܳܒܕܳܐ ܠܗܳܢܽܘܢ ܕܰܟܪܺܝܗܺܝܢ ܒܳܗ̇܆ ܕܰܩܫܺܝܬܳܐ ܢܶܚܫܒܽܘܢܳܗ̇ ܠܗܳܝ ܕܰܥܠܶܝܗ̇ ܟܰܕ ܥܠܶܝܗ̇ ܕܰܐܪܥܳܐ ܢܶܗܘܽܘܢ ܩܳܝܡܺܝܢ ܥܰܡ ܗܳܢܽܘܢ ܕܫܰܪܟܳܐ܆ ܐܰܝܟܰܢܳܐ ܕܢܺܐܨܦܽܘܢ ܕܥܰܠ ܐܳܐܰܪ ܢܶܣܒܟܽܘܢ ܘܢܶܕܪܟܽܘܢ ܘܰܥܠܰܘܗ̱ܝ ܕܪܺܝܫ ܛܶܦܪ̈ܰܝܗܽܘܢ ܢܗܰܠܟܽܘܢ܆ ܘܰܢܪܺܝܡܽܘܢ ܓܒܺܝܢܳܐ ܘܝܰܬܺܝܪ ܢܶܬܬܪܺܝܡܽܘܢ ܒܰܕܡܽܘܬ ܐܰܪ̈ܙܶܐ ܕܠܶܒܢܳܢ ܆ ܗܳܝ ܕܳܐܡܰܪ ܟܬܳܒܳܐ ܐܰܠܳܗܳܝܳܐ܆ ܟܰܕ ܡܒܰܙܰܚ ܠܰܓܠܺܝܙܽܘܬ ܦܺܐܪ̈ܶܐ ܕܺܝܠܗܽܘܢ ܘܰܠܪܳܡܽܘܬܗܽܘܢ.
ܩܳܝܡܳܐ ܗ̱ܘܳܬ ܕܶܝܢ ܚܕܳܪ̈ܰܘܗ̱ܝ ܟܰܕ ܡܚܰܙܩܳܐ ܒܙܰܝ̈ܢܶܐ܆ ܟܽܠܳܗ̇ ܣܰܓܺܝܽܐܘܬܳܐ ܕܟܶܢܫܳܐ ܕܦܳܠ̈ܚܶܐ ܘܕܰܫܩܺܝ̈ܠܰܝ ܢܰܝ̈ܙܟܶܐ܆ ܕܣܳܦܩܳܐ ܗܘ̣ܬ ܕܬܶܥܒܶܕ ܕܶܚܠܬܳܐ ܒܗܳܢܽܘܢ ܕܚܳܙܶܝܢ܆ ܩܰܕܺܝܡܺܝܢ ܗ̱ܘܰܘ ܕܶܝܢ ܣܺܝܡܺܝܢ ܐܽܘܪ̈ܓܰܢܶܐ ܡܫܰܚ̈ܠܦܶܐ ܘܰܕܟܽܠ ܓܢܶܤ ܕܫܶܢ̈ܕܶܐ܆ ܕܰܡܚܰܘܶܝܢ ܗ̱ܘܰܘ ܙܢܰܝ̈ܰܐ ܡܫܰܚ̈ܠܦܶܐ ܕܰܡܣܳܡ ܒܪ̈ܺܝܫܶܐ. ܝܺܕܺܝ̈ܥܶܐ ܕܶܝܢ ܡܶܢܗܽܘܢ ܘܠܳܐ ܡܥܰܝ̈ܕܶܐ܆ ܘܰܕܗܳܝܕܶܝܢ ܒܰܠܚܽܘܕ ܠܢܶܣܝܳܢܳܐ ܐܶܬܺܝܕܰܥܘ܆ ܟܽܠܗܽܘܢ ܕܶܝܢ ܒܳܗ̇ ܒܰܕܡܽܘܬܳܐ܆ ܕܡܰܘܬܳܐ ܡܰܪܺܝܪܳܐ ܘܰܩܛܺܝܪܳܝܳܐ ܓܳܙܡܺܝܢ ܗ̱ܘܰܘ܆ ܘܕܰܒܢܶܓ̈ܕܶܐ ܕܝܰܬܺܝܪ ܩܰܛܺܝܢܺܝܢ ܐܶܢ ܡܰܨܝܳܐ ܠܡܺܐܡܰܪ܆ ܡܢܰܬܫܺܝܢ ܗ̱ܘܰܘ ܐܰܟܚܕܳܐ ܥܰܡ ܒܶܣܪܳܐ ܐܳܦ ܠܢܰܦܫܳܐ܆ ܘܰܒܩܰܠܺܝܠ ܩܰܠܺܝܠ ܣܳܕܩܺܝܢ ܗ̱ܘܰܘ ܠܳܗ̇ ܡܶܢ ܐܶܣܳܪܳܐ ܗܰܘ ܕܰܫܘܺܝܚܽܘܬܳܐ ܕܰܐܟܚܕܳܐ.
ܥܳܒܰܪ ܗ̱ܘܳܐ ܕܶܝܢ ܠܰܡܨܰܥܬܳܐ ܒܛܶܟܣܳܐ ܩܰܕܡܳܝܳܐ ܐܶܠܺܝܥܳܙܳܪ ܗܰܘ ܟܳܗܢܳܐ܆ ܕܣܳܒܳܐ ܡܰܢ ܐܺܝܬܰܘܗ̱ܝ ܗ̱ܘܳܐ ܒܣܰܥܪܳܐ ܕܪܺܝܫܶܗ܆ ܥܠܰܝܡܳܝ ܗ̱ܘܐ ܕܶܝܢ ܒܬܰܪܥܺܝܬܶܗ܆ ܘܡܶܬܬܒܰܥ ܗ̱ܘܳܐ ܕܢܶܐܟܽܘܠ ܡܶܢ ܕܶܒ̈ܚܶܐ ܚܰܢ̈ܦܳܝܶܐ ܘܡܶܢ ܒܶܣܪܳܐ ܕܰܚܙܺܝܪܳܐ܆ ܘܢܶܟܦܽܘܪ ܒܗܳܕܶܐ ܒܕܶܚܠܬܳܐ ܗܳܝ ܕܟܺܝܬܳܐ ܕܢܳܡܽܘܣܳܐ. ܣܳܒܰܪ ܗ̱ܘܳܐ ܠܶܗ ܓܶܝܪ ܛܪܽܘܢܳܐ ܕܶܐܢ ܠܗܳܢܳܐ ܢܶܙܟܶܐ܆ ܠܢܳܡܽܘܣܳܐ ܙܟܳܐ ܐܳܦ ܠܳܗ̇ ܠܟܳܗܢܽܘܬܳܐ. ܘܰܠܡܶܙܕܰܟܝܳܢܽܘܬܶܗ ܕܣܳܒܳܐ܆ ܫܪܳܝܳܐ ܕܗܳܠܶܝܢ ܡܰܣܒܰܪ ܗ̱ܘܳܐ. ܠܘܳܬ ܗܳܠܶܝܢ ܓܶܝܪ ܐܺܝܬܰܘܗ̱ܝ ܗ̱ܘܳܐ ܠܶܗ ܩܪܳܒܳܐ ܘܠܰܘ ܠܘܳܬܗܽܘܢ. ܫܰܪܺܝܪܳܐܺܝܬ ܗܳܟܺܝܠ܆ ܐܳܦ ܕܰܕܠܳܐ ܚܶܪܝܳܢܳܐ ܢܳܩܦܺܝܢ ܗ̱ܘܘ ܠܡܰܠܦܳܢܳܐ ܛܠܳܝ̈ܶܐ ܘܬܰܠ̈ܡܺܝܕܶܐ ܡܰܣܒܰܪ ܗ̱ܘܳܐ ܐܶܠܳܐ ܐܶܬܕܰܓܰܠ ܡܶܢ ܣܰܒܪܶܗ ܘܡܶܢ ܡܰܣܒܪܳܢܽܘܬܶܗ.
ܟܰܕ ܓܶܝܪ ܗܽܘ ܐܶܠܺܝܥܳܙܳܪ ܒܦܰܓܪܳܐ ܣܳܒܳܝܳܐ ܘܰܡܚܺܝܠܳܐ܆ ܐܶܬܥܰܠܰܡ ܠܽܘܩܒܰܠ ܒܺܝ̈ܫܳܬܳܐ ܘܩܰܫ̈ܝܳܬܳܐ܆ ܚܰܝܶܠ ܐܶܢܽܘܢ ܠܰܛܠܳܝ̈ܶܐ ܘܳܐܦ ܟܰܕ ܬܰܙܺܝܙܺܝܢ ܗ̱ܘܰܘ ܘܫܰܡܺܝܢܺܝܢ ܒܦܰܓܪܗܽܘܢ ܪܽܘܚܳܢܳܐ ܚܰܘܝܶܗ ܠܢܳܡܽܘܣܳܐ܆ ܐܳܦ ܠܟܳܗܢܽܘܬܳܐ ܡܥܰܠܰܝܬܳܐ ܘܪܳܡܬܳܐ. ܟܕ ܚܰܘܺܝ ܕܣܰܒܪܳܐ ܡܛܰܫܝܳܐ ܐܺܝܬ ܒܗܽܘܢ܆ ܗܰܘ ܕܡܶܛܽܠܳܬܶܗ ܐܳܦ ܙܳܕܶܩ ܗ̱ܘܳܐ܆ ܠܡܶܚܰܫ܆ ܘܰܕܠܰܘ ܥܕܰܡܳܐ ܠܶܐܣܟܺܡܳܐ ܐܰܘ ܠܰܟܬܺܝܒܬܳܐ ܩܳܝܡܺܝܢ ܗܳܠܶܝܢ.
ܣܰܓܺܝܳܐܐ ܓܶܝܪ ܐܺܝܬܰܘܗ̱ܝ ܗ̱ܘܳܐ ܗܽܘ ܐܰܢܛܺܝܰܟܽܘܤ. ܟܰܕ ܡܓܰܚܶܟ ܗ̱ܘܳܐ ܥܰܠ ܐܶܠܺܝܥܳܙܳܪ܆ ܐܰܝܟ ܕܥܰܠ ܐܰܝܢܳܐ ܕܺܐܝܩܺܐ ܚܳܐܶܫ ܗ̱ܘܳܐ܆ ܘܥܰܠ ܡܶܐܟܽܘܠܬܳܐ ܗܳܝ ܕܣܰܓܺܝ ܗܰܢܺܝܳܐܐ ܕܒܶܣܪܳܐ ܕܰܚܙܺܝܪܐ ܡܰܒܣܶܐ ܗ̱ܘܳܐ܆ ܟܰܕ ܫܽܘܟܳܢܳܐ ܕܰܟܝܳܢܳܐ ܩܳܪܶܐ ܗ̱ܘܳܐ ܠܗܳܕܶܐ ܘܰܕܫܳܢܝܽܘܬܳܐ ܕܳܐܶܢ ܗ̱ܘܳܐ ܠܳܗ̇܆ ܠܗܳܝ ܕܒܰܚܕܳܐ ܡܶܐܟܽܘܠܬܳܐ ܢܚܰܠܶܦ ܢܶܓܒܶܐ ܡܰܘܬܳܐ. ܐܳܦ ܓܶܝܪ ܡܡܰܙܶܓ ܗ̱ܘܳܐ ܠܗܽܘܢ ܠܰܓܙܳܡܰܘ̈ܗ̱ܝ ܟܰܕ ܐܰܟܚܕܳܐ ܒܳܗ̇ ܟܰܕ ܒܳܗ̇ ܡܓܰܚܶܟ ܗ̱ܘܳܐ ܒܶܗ ܒܓܰܒܪܳܐ ܐܳܦ ܡܕܰܚܶܠ ܗ̱ܘܳܐ܆ ܐܺܝܬ ܕܶܝܢ ܐܰܝܟܳܐ܆ ܕܳܐܦ ܟܰܕ ܕܰܡܪܰܚܶܡ ܘܚܳܐܶܤ ܥܠܰܘܗ̱ܝ ܐܳܡܰܪ ܗ̱ܘܳܐ: ܡܶܬܟܦܶܦ ܘܡܶܬܪܟܶܢ ܠܘܳܬ ܡܚܺܝܠܽܘܬܳܗ̇ ܕܣܰܝܒܽܘܬܳܐ ܐܰܟܚܕܳܐ ܘܝܰܩܺܝܪܽܘܬܳܗ̇.
ܠܗܶܝܢ ܕܶܝܢ ܟܕ ܠܗܶܝܢ ܠܰܫ̈ܟܳܚܳܬܳܐ ܐܰܚܺܝܕܺܝܢ ܗ̱ܘܰܘ܆ ܘܳܐܦ ܡܫܰܡ̈ܫܳܢܶܐ ܗܳܢܽܘܢ ܫܩܺܝ̈ܠܰܝ ܢܰܝ̈ܙܟܶܐ ܕܰܚܕܳܪ̈ܰܘܗ̱ܝ܆ ܟܰܕ ܐܰܟܚܕܳܐ ܡܶܙܕܰܝܢܺܝܢ ܗ̱ܘܰܘ ܘܰܡܣܰܝܥܺܝܢ ܗ̱ܘܰܘ ܐܳܦ ܒܗܳܕܶܐ ܠܡܰܠܟܳܐ܆ ܘܟܰܕ ܒܟܽܠ ܦܽܘܪܣܳܐ ܐܰܝܟ ܕܰܠܡܰܓܕܠܳܐ ܕܰܡܝܰܬܪܽܘܬܳܐ ܚܳܕܪܺܝܢ ܗ̱ܘܰܘ ܠܶܗ ܠܣܳܒܳܐ ܣܕܺܝܪܳܐܺܝܬ. ܐܶܠܳܐ ܐܺܝܬܰܘܗ̱ܝ ܗ̱ܘܳܐ ܠܗܽܘܢ ܠܳܐ ܡܶܬܕܰܪܟܳܢܳܐ܆ ܘܠܳܐ ܡܶܣܬܰܝܥܳܢܳܐ ܟܽܠ ܟܽܠܶܗ ܘܠܳܐ ܡܶܬܟܰܒܫܳܢܳܐ܆ ܐܳܡܰܪ ܗ̱ܘܳܐ ܓܶܝܪ ܕܢܳܡܽܘܣܳܐ ܕܺܝܠܰܢ ܐܳܘ ܐܰܢܛܺܝܽܘܟܳܝܳܐ܆ ܫܰܪܺܝܪܳܐܺܝܬ ܐܺܝܬܰܘܗ̱ܝ ܢܳܡܽܘܣܳܐ. ܫܟܳܚܬܳܐ ܓܶܝܪ ܘܡܰܘܗܰܒܬܳܐ ܐܺܝܬܰܘܗ̱ܝ ܕܰܐܠܳܗܳܐ. ܝܽܘܠܦܳܢܳܐ ܕܶܝܢ ܐܳܦܠܳܐ ܕܚܰܕ ܡܶܢ ܒܢܰܝ̈ܢܳܫܳܐ܆ ܐܰܘ ܠܳܐ ܫܳܡܰܥ ܐܰܢ̱ܬ ܡܶܛܽܠ ܡܽܘܫܶܐ܆ ܘܡܶܛܽܠ ܨܰܘܡܶܗ ܗܰܘ ܕܰܐܪܒܥܺܝܢ ܝܰܘ̈ܡܳܬܳܐ܆ ܘܢܰܩܕܽܘܬܳܐ ܘܕܽܘܟܳܝܳܐ ܕܡܶܢ ܗܳܢܳܐ܆ ܘܡܶܛܽܠ ܪܺܝܫܶܗ ܕܛܽܘܪܳܐ ܕܣܺܝܢܰܝ ܘܡܶܛܽܠ ܥܢܳܢܳܐ܆ ܘܡܶܛܽܠ ܗܰܘ ܕܡܶܢ ܬܰܡܳܢ ܝܳܗܶܒ ܗ̱ܘܳܐ ܠܶܗ ܓܶܠ̈ܝܳܢܶܐ܆ ܘܡܶܛܽܠ ܠܽܘ̈ܚܶܐ ܗܳܠܶܝܢ ܕܰܓܠܺܝ̈ܦܳܢ ܗ̱ܘܰܝ̈ ܒܨܶܒܥܳܐ ܕܰܐܠܳܗܳܐ ܗܳܠܶܝܢ ܕܰܥܦܺܝܦܳܐܺܝܬ ܟܬܺܝ̈ܒܳܢ ܗ̱ܘܰܝ̈܆ ܡܶܢ ܠܓܰܘ ܟܺܝܬ ܐܳܦ ܡܶܢ ܠܒܰܪ܆ ܘܰܠܗܳܢܽܘܢ ܡܰܢ ܕܝܰܬܺܝܪ ܥܒܶܝܢ ܡܩܰܕܡ̈ܳܢ ܗ̱ܘܰܝ̈ ܡܚܰܘ̈ܝܳܢ ܠܰܐܦ̈ܶܐ ܒܰܪ̈ܳܝܳܬܳܐ ܕܰܟܬܺܝܒܬܳܐ܆ ܠܗܳܢܽܘܢ ܕܶܝܢ ܕܩܰܛܺܝܢܺܝܢ ܗ̱ܘܰܘ ܠܘܳܬ ܬܶܐܽܘܪܺܝܰܐ܆ ܪ̈ܳܡܙܳܢ ܗ̱ܘܰܝ̈ ܠܥܽܘܡ̈ܩܶܐ ܐ̱ܪ̈ܳܙܳܢܳܝܶܐ ܕܪܽܘܚܳܐ. ܡܶܢ ܬܰܡܳܢ ܐܺܝܬ ܠܰܢ ܡܰܣܠܝܳܢܽܘܬܳܐ ܕܡܶܐܟܽܘܠܬܳܐ ܕܒܶܣܪܳܐ ܕܰܚܙܺܝܪܳܐ ܕܪܳܕܝܳܐ ܘܡܰܠܦܳܐ ܠܰܢ ܕܢܶܟܠܶܐ ܠܰܪ̈ܓܺܝܓܳܬܳܐ ܠܰܥ̈ܒܳܬܳܐ܆ ܘܰܕܠܳܐ ܢܶܪܕܽܘܦ ܒܳܬܰܪ ܗܳܠܶܝܢ ܕܗܰܢܺܝ̈ܳܐܢ܆ ܘܰܒܗܳܕܶܐ ܢܬܰܪܶܨ ܠܰܡܚܰܡܣܢܳܢܽܘܬܳܐ. ܐܶܬܟܰܚܕ ܗܳܟܺܝܠ ܐܳܘ ܡܶܢܶܗ ܕܣܳܐܶܡ ܢܳܡܽܘܣܳܐ܆ ܕܰܐܠܳܗܳܐ ܐܺܝܬܰܘܗ̱ܝ܆ ܐܰܘ ܡܶܢܶܗ ܕܚܽܘܫܳܒܳܐ ܕܢܳܡܽܘܣܳܐ. ܠܚܰܝ̈ܘܳܬܳܐ ܡܰܢ ܓܶܝܪ ܠܳܐ ܡܠܺܝ̈ܠܳܬܳܐ܆ ܡܰܦܶܤ ܠܗܶܝܢ ܐܰܝܟ ܕܶܐܡܰܪܬ ܒܰܡܫܰܪܬܚܽܘܬܳܐ ܕܫܽܘܟܳܢܶܗ ܕܰܟܝܳܢܳܐ ܢܶܬܚܰܫ̈ܚܳܢ܆ ܘܰܕܢܶܗܘܶܐ ܐܺܝܬ ܠܗܶܝܢ ܪܶܓܬܳܐ ܕܗܰܢܺܝ̈ܐܘܳܬܳܐ ܠܳܐ ܡܦܰܓ̈ܕܳܬܳܐ. ܠܒܰܪܢܳܫܳܐ ܕܶܝܢ ܡܠܺܝܠܳܐ܆ ܠܰܘ ܟܽܠܗܶܝܢ ܗܳܠܶܝܢ ܕܰܡܟܳܢ܆ ܗܳܠܶܝܢ ܐܳܦ ܠܡܶܣܥܰܪ ܐܰܘܟܺܝܬ ܠܡܶܐܟܰܠ܆ ܐܶܬܬܣܺܝܡ ܠܶܗ ܢܳܡܽܘܣܳܐ܆ ܡܶܢ ܗܳܠܶܝܢ ܡܰܢ ܓܶܝܪ ܟܳܠܶܐ. ܗܳܠܶܝܢ ܕܶܝܢ ܡܰܦ̈ܣܳܢ ܠܶܗ܆ ܡܶܛܽܠܳܬܳܗ̇ ܟܺܝܬ ܕܗܳܕܶܐ܆ ܐܳܦ ܚܰܝ̈ܽܘܬܳܢܶܐ ܩܳܪܶܝܢ ܚ̱ܢܰܢ ܠܗܽܘܢ ܠܒܰܪܒܪ̈ܳܝܶܐ܆ ܠܟܽܠܗܽܘܢ ܗܳܢܽܘܢ ܕܰܠܟܽܠܗܶܝܢ ܬܚܶܝܬ ܫܢܐ 222ܡܰܝܬܶܝܢ܆ ܟܰܕ ܠܰܟܝܳܢܳܐ ܘܠܰܘ ܠܢܳܡܽܘܣܳܐ ܡܶܬܬܦܺܝܣܺܝܢ. ܗܳܠܶܝܢ ܡܰܢ ܗܳܟܺܝܠ ܕܬܰܪܥܺܝܬܳܐ ܢܳܡܽܘܣܳܝܬܳܐ ܕܰܐܝܟ ܗܳܠܶܝܢ ܐܺܝܬܰܝܗܶܝܢ܆ ܐܰܝܟܰܢܳܐ ܕܡܶܢ ܣܽܘ̈ܟܳܠܶܐ ܗܳܢܽܘܢ ܕܺܐܝܬܰܝܗܽܘܢ ܡܥܰܠܰܝ̈ܳܐ ܘܝܰܬܺܝܪ ܠܳܐ ܡܶܬܡܰܠ̈ܠܳܢܶܐ ܐܰܪܚܶܩ.
ܐܳܦ ܓܶܝܪ ܠܘܳܬ ܚܰܢܦܽܘܬܳܐ ܐܺܝܬܶܝܗ̇ ܠܺܝ ܡܶܠܬܳܐ܆ ܘܰܠܘܳܬ ܡܰܫܡܰܥܬܳܐ ܕܠܳܐ ܡܫܰܘܬܦܳܐ ܒܐ̱ܪ̈ܳܙܶܐ. ܡܳܢܳܐ ܕܶܝܢ ܐܳܡܰܪ: ܡܶܛܽܠ ܐܶܣܟܺܡܳܐ ܐܰܘ ܐܺܝܩܳܪܳܐ ܕܪܺܝܫܽܘܬ ܟܳܗܢܽܘܬܳܐ. ܢܳܟܶܦ ܐ̱ܢܳܐ ܡܶܢ ܟܽܘܬܺܝܢܳܐ ܗܳܝ ܕܰܥܕܰܡܳܐ ܠܪ̈ܶܓܠܶܐ ܢܳܚܬܳܐ ܕܰܒܓܰܘ̈ܢܶܐ ܡܦܰܬܟ̈ܶܐ ܘܰܡܫܰܚ̈ܠܦܶܐ ܙܩܺܝܪܳܐ܆ ܘܰܡܫܰܘܕܥܳܐ ܕܙܳܕܶܩ ܠܶܗ ܠܪܺܝܫ ܟܳܗ̈ܢܶܐ܆ ܕܰܠܟܽܠܶܗ ܟܢܽܘܫܝܳܐ ܡܦܰܬܟܳܐ ܕܰܡܝܰܬܪ̈ܳܬܳܐ ܢܶܗܘܶܐ ܠܒܺܝܫ. ܒܳܗܶܬ ܐ̱ܢܳܐ ܡܶܢ ܦܪܺܝܣܳܐ ܗܰܘ ܕܕܺܝ̈ܢܶܐ ܘܡܶܢ ܡܫܰܘܕܥܳܢܽܘܬܳܐ ܘܰܫܪܳܪܳܐ܆ ܗܳܠܶܝܢ ܟܺܝܬ ܕܥܰܠ ܚܰܕܝܳܐ ܛܥܺܝܢܺܝܢ ܠܗܶܝܢ ܗܳܢܽܘܢ ܕܠܰܡܟܰܗܳܢܽܘ ܡܛܳܬ̣ ܐܶܢܽܘܢ ܟܰܕ ܠܰܩܕܽܘܫ ܩܽܘ̈ܕܫܺܝܢ ܥܳܐܠܺܝܢ܆ ܐܰܝܟܰܢܳܐ ܕܢܶܗܘܽܘܢ ܐܺܝܬ ܠܗܽܘܢ ܠܰܡܠܺܝܠܽܘܬܳܗ̇ ܕܢܰܦܫܳܐ܆ ܕܰܒܡܶܠܬܳܐ ܡܰܠܽܘܢ ܐܰܘ ܒܚܶܡܬܳܐ ܘܒܰܪ̈ܓܺܝܓܳܬܳܐ ܗܳܠܶܝܢ ܣܰܩܽܘܒ̈ܠܳܝܳܬܳܐ ܡܶܬܕܰܒܪܳܐ܆ ܐܰܝܟ ܕܢܶܫܟܚܽܘܢ ܕܰܢܕܽܘܢܽܘܢ ܗܳܠܶܝܢ ܕܙܳܕܩ̈ܳܢ܆ ܘܰܐܝܟ ܙܢܳܐ ܕܰܒܡܰܚܙܺܝܬܳܐ ܢܩܰܿܒܠܽܘܢ ܠܓܶܠ̈ܝܳܢܶܐ ܗܳܠܶܝܢ ܕܡܶܢ ܠܥܶܠ ܘܫܽܘܘ̈ܕܳܥܶܐ܆ ܘܰܠܗܳܠܶܝܢ ܚܰܬܺܝܬ̣ܳܐܺܝܬ ܘܫܰܪܺܝܪܳܐܺܝܬ ܢܰܦܩܽܘܢ ܠܘܳܬ ܗܳܢܽܘܢ ܕܡܶܬܐܰܪܙܺܝܢ. ܡܶܬܚܰܡܰܨ ܐ̱ܢܳܐ ܡܶܢ ܩܝܕܐܪܝܤ ܐܰܘܟܺܝܬ ܩܽܘܒܥܳܐ ܕܰܡܟܰܠܶܠ ܠܶܗ ܠܪܺܝܫܶܗ ܕܟܳܗܢܳܐ܆ ܐܰܝܟ ܕܰܐܝܢܳܐ ܕܠܽܘܩܒܰܠ ܚܰܫ̈ܶܐ ܡܶܬܓܰܒܰܪ. ܪܳܐܶܬ ܐ̱ܢܳܐ ܡܶܢ ܛܰܣܳܐ ܕܕܰܗܒܳܐ ܗܰܘ ܕܥܰܠ ܒܶܝܬ ܥܰܝ̈ܢܶܐ܆ ܗܰܘ ܕܰܡܩܰܕܶܫ ܒܗܳܝ ܕܡܰܝܬܶܐ ܒܶܗ ܠܰܫܡܳܐ ܗܰܘ ܠܳܐ ܡܫܰܘܬܦܳܐ ܕܰܐܠܳܗܳܐ܆ ܘܗܳܢܳܐ ܟܰܕ ܒܰܚܬܳܡܳܐ ܡܶܕܶܡ ܕܠܳܐ ܡܶܬܡܰܠ̈ܠܳܢܝܳܬܳܐ ܓܠܺܝܦ܆ ܐܰܝܟܰܢܳܐ ܕܢܰܢܗܰܪ ܠܦܰܪܨܽܘܦܶܗ ܕܟܳܗܢܳܐ܆ ܘܰܢܗܰܕܶܐ ܘܢܰܠܦܺܝܘܗ̱ܝ ܕܠܰܐܠܳܗܳܐ ܒܰܠܚܽܘܕܰܘܗ̱ܝ ܢܶܚܙܶܐ. ܟܰܕ ܗܳܠܶܝܢ ܘܰܕܣܰܓܺܝ̈ܳܐܢ ܡܶܢ ܗܳܠܶܝܢ ܡܶܬܚܰܫܰܒ ܐ̱ܢܳܐ܆ ܐܰܝܟܰܢܳܐ ܐܶܫܰܠܶܡ ܠܢܳܡܽܘܣܳܐ ܐܰܒܳܗܳܝܳܐ. ܐܰܝܟܰܢܳܐ ܕܶܝܢ ܡܶܢ ܚܕܳܐ ܡܶܐܟܽܘܠܬܳܐ ܠܳܐ ܡܠܺܝܠܬܳܐ ܐܶ݀ܙܕܟܶܐ. ܐܰܝܟܰܢܳܐ ܐܶ݀ܣܰܝܶܒ ܠܦܽܘܡܳܐ ܕܺܝܠܝ܆ ܗܰܘ ܕܰܥܕܰܡܳܐ ܠܗܳܕܶܐ ܣܰܝܒܽܘܬܳܐ ܐܶܬܕܰܟܺܝ. ܐܺܝܬ ܠܳܟ ܒܗܳܠܶܝܢ ܐܳܘ ܐܰܢܛܺܝܘܟܶܐ ܒܽܘܩܝܳܗ̇ ܕܢܰܦܫܝ. ܣܰܒ ܢܶܣܝܳܢܳܐ ܡܶܟܺܝܠ ܕܳܐܦ ܕܦܰܓܪܳܐ ܕܺܝܠܝ.
ܗܰܘ ܕܶܝܢ ܟܰܕ ܒܡ̈ܶܠܶܐ ܗܳܠܶܝܢ܆ ܕܣܰܓܺܝ ܐܺܝܬܰܝܗܶܝܢ ܗ̱ܘܰܝ̈ ܕܦܺܝܠܳܣܽܘܦܺܝܰܐ ܐܰܝܟ ܕܰܒܥܽܘܩ̈ܣܶܐ ܐܶܬܡܚܺܝ܆ ܒܫܶܢ̈ܕܶܐ ܦܳܩܶܕ ܗ̱ܘܳܐ ܕܢܶܬܢܰܓܰܕ܆ ܘܡܶܚܕܳܐ ܒܰܪ ܫܳܥܬܶܗ ܡܫܰܡ̈ܫܳܢܶܐ ܐܰܚܺܝ̈ܕܰܝ ܢܰܝ̈ܙܟܶܐ ܗܳܢܽܘܢ ܡܰܪܺܝܪ̈ܶܐ܆ ܒܰܙܘܳܪ̈ܶܐ ܡܳܚܶܝܢ ܗ̱ܘܰܘ. ܒܒܽܘ̈ܥܛܳܬܳܐ ܡܳܬܚܺܝܢ ܗ̱ܘܰܘ. ܒܡܰܚ̈ܘܳܬܳܐ ܕܢܶܓ̈ܕܶܐ ܣܳܪܩܺܝܢ ܗ̱ܘܰܘ ܠܶܗ. ܠܕܰܦ̈ܢܳܬܶܗ ܡܳܚܶܝܢ ܗ̱ܘܰܘ. ܠܒܶܣܪܳܐ ܕܺܝܠܶܗ ܡܒܰܣܒܣܺܝܢ ܗ̱ܘܰܘ܆ ܟܰܕ ܫܦܺܝܥܳܐܺܝܬ ܕܡܶܗ ܪܳܕܶܐ ܗ̱ܘܳܐ.
ܗܽܘ ܕܶܝܢ ܣܳܒܳܐ ܟܰܕ ܒܰܫܡܰܝܳܐ ܩܳܒܰܥ ܥܰܝܢܰܘ̈ܗ̱ܝ ܘܰܠܪܶܗܛܳܐ ܕܰܠܘܳܬ ܗܳܠܶܝܢ ܕܰܠܥܶܠ ܥܰܡ ܡܣܰܪܗܒܽܘܬܳܐ ܡܶܕܶܡ ܪܳܗܶܛ ܗ̱ܘܳܐ܆ ܒܠܶܗܬܳܐ ܘܰܒܕܽܘܥܬܳܐ ܡܶܬܶܐܠܶܨ ܗ̱ܘܳܐ܆ ܘܰܠܚܰܪܬܳܐ ܟܰܕ ܐܳܦܠܳܐ ܥܕܰܡܐ ܠܰܚܕܳܐ ܡܶܠܬܳܐ ܡܚܺܝܠܬܳܐ ܐܰܘ ܪܦܺܝܬܳܐ ܐܶܙܕܟܺܝ܆ ܠܓܰܘܙܰܠܬܳܐ ܕܢܽܘܪܳܐ ܡܶܫܬܠܶܡ ܗ̱ܘܳܐ. ܘܟܰܕ ܬܰܡܳܢ ܫܰܪܟܳܢܳܐ ܕܦܰܓܪܶܗ ܐܶܬܦܰܫܰܪ܆ ܡܶܢ ܒܳܬܰܪ ܨܠܽܘܬܳܐ ܕܰܚܠܳܦ ܥܰܡܳܐ܆ ܘܡ̈ܶܠܶܐ ܡܰܦ̈ܩܳܢܝܳܬܳܐ ܕܰܠܘܳܬ ܐܰܠܳܗܳܐ܆ ܠܘܳܬ ܡܛܰܠ̈ܠܶܐ ܛܽܘܒ̈ܬܳܢܳܝܳܬܳܐ ܕܡܰܠܰܐܟ̈ܶܐ ܘܕܰܐܒܳܗ̈ܳܬܳܐ ܩܰܕܺܝ̈ܫܶܐ ܦܪܰܚ.
ܛܠܳܝ̈ܶܐ ܕܶܝܢ ܗܳܠܶܝܢ܆ ܟܰܕ ܒܰܕܡܽܘܬ ܝܽܘܠ̈ܦܳܢܶܐ ܟܳܗ̈ܢܳܝܶܐ ܩܰܒܶܠܘ ܐܶܢܽܘܢ ܠܬܰܟ̈ܬܽܘܫܶܐ ܗܳܢܽܘܢ ܕܡܰܠܦܳܢܳܐ܆ ܘܰܒܗܳܕܶܐ ܣܰܓܺܝ ܐܰܟܺܝܦܳܐܺܝܬ ܘܝܰܨܺܝܦܳܐܺܝܬ ܐܶܬܗܰܓܺܝܘ܆ ܘܝܰܬܺܝܪ ܡܶܢ ܡܰܪ̈ܕܘܳܬܳܐ ܢܳܡܽܘ̈ܣܳܝܳܬܳܐ܆ ܠܰܡܚܰܡܣܢܳܢܽܘܬܶܗ ܕܣܳܒܳܐ ܕܰܒܗܳܝ ܕܢܶܚܰܫ ܝܺܠܶܦܘ ܘܦܰܪܓܶܠܘ ܝܰܨܺܝܦܳܐܺܝܬ܆ ܘܰܢܛܰܪܘ ܒܥܽܘܗܕܳܢܳܐ ܥܰܡ ܚܰܬܺܝܬ̣ܽܘܬ̣ܳܐ ܡܶܕܶܡ ܫܰܦܺܝܪܰܬ ܟܝܳܢܳܐ ܘܚܰܪܺܝܦܬܳܐ܆ ܟܰܕ ܠܳܐ ܡܶܕܶܡ ܟܽܠ ܟܽܠܶܗ ܫܪܰܥܘ ܐܰܘ ܛܥܰܘ܆ ܠܗܳܝ ܕܶܐܬܝܰܠܦܰܬ ܠܰܘ ܒܝܰܕ ܠܶܫܳܢܳܐ ܡܰܠܽܘܢ ܝܰܠܦܽܘܗ̇ ܘܰܐܫܠܡܽܘܗ̇܆ ܐܶܠܳܐ ܒܝܰܕ ܓܰܢ̱ܒܳܪܽܘܬܳܐ ܕܕܳܡܝܳܐ ܕܰܒܫܶܢ̈ܕܶܐ.
ܟܽܠ ܚܰܕ ܓܶܝܪ ܡܶܢܗܽܘܢ ܕܰܛܠܳܝ̈ܶܐ܆ ܐܰܝܟ ܛܶܟܣܳܐ ܕܩܰܘܡܬܶܗ ܠܰܡܨܰܥܬܳܐ ܡܶܬܬܰܝܬܶܐ ܗ̱ܘܳܐ. ܟܰܕ ܣܳܒܰܪ ܗ̱ܘܳܐ ܠܶܗ ܛܪܽܘܢܳܐ ܕܰܒܝܰܕ ܡܣܳܡ ܒܪܺܝܫܳܐ ܕܥܰܠ ܗܰܘ ܩܰܕܡܳܝܳܐ ܡܫܰܚܠܶܦ ܗ̱ܘܳܐ ܠܗܽܘܢ ܠܗܳܢܽܘܢ ܐ̱ܚܪ̈ܳܢܶܐ ܠܘܳܬ ܕܰܚܽܘܠܬܳܢܽܘܬܳܐ. ܡܰܢܽܘ ܓܶܝܪ ܠܳܐ ܢܺܐܒܰܫ ܗ̱ܘܳܐ ܒܕܶܚܠܬܳܐ܆ ܟܰܕ ܠܒܶܣܪ̈ܶܐ ܕܰܐܚܰܘ̈ܗ̱ܝ ܚܳܙܶܐ ܗ̱ܘܳܐ ܕܡܰܪܺܝܪܳܐܺܝܬ ܡܶܣܬܰܪܩܺܝܢ ܗ̱ܘܰܘ ܘܡܶܬܒܰܣܒܣܺܝܢ. ܗܳܕܶܐ ܕܶܝܢ ܠܰܘ ܗܳܟܰܢܳܐ ܢܳܦܩܳܐ ܗ̱ܘܳܬ܆ ܐܶܠܳܐ ܠܰܫܟܳܚܬܳܐ ܗܳܝ ܕܡܰܕܚܠܳܢܽܘܬܳܐ ܡܶܬܚܰܘܝܳܢܽܘܬܳܐ ܕܓܰܢ̱ܒܳܪܽܘܬܳܐ ܕܝܰܬܺܝܪ ܪܰܒܳܐ ܥܰܒܕܽܘܗ̇܆ ܡܙܰܝ̈ܢܶܐ ܗܳܢܽܘܢ ܚܰܝ̈ܠܬܳܢܶܐ ܘܰܙܪ̈ܺܝܙܶܐ ܕܫܰܦܺܝܪܽܘܬ ܕܶܚܠܬܳܐ. ܗܰܘ ܡܰܢ ܓܶܝܪ ܩܰܕܡܳܝܳܐ ܕܰܐܚ̈ܶܐ ܡܶܬܪܰܥܶܐ ܗ̱ܘܳܐ܆ ܕܰܬܚܶܝܬ ܚܰܘܒܬܳܐ ܐܺܝܬܰܘܗ̱ܝ ܕܰܡܕܰܡܝܳܢܽܘܬܳܐ ܕܡܰܠܦܳܢܶܗ. ܗܰܘ ܕܶܝܢ ܕܰܬܪܶܝܢ܆ ܥܰܡ ܡܝܰܬܪܽܘܬܳܐ ܗܳܝ ܕܡܰܠܦܳܢܶܗ܆ ܐܳܦ ܕܗܳܝ ܕܰܐܚܽܘܗ̱ܝ ܚܳܫܶܒ ܗ̱ܘܳܐ ܕܺܐܝܬܰܘܗ̱ܝ ܚܰܝܳܒܳܐ. ܠܗܰܘ ܕܶܝܢ ܕܰܬܠܳܬܐ܆ ܐܰܓܽܘܢܳܐ ܐܺܝܬ ܗ̱ܘܳܐ ܠܶܗ܆ ܕܳܐܦ ܠܗܳܢܽܘܢ ܕܩܰܕܶܡܘ ܐܶܬܟܰܬܰܫܘ ܢܶܥܒܰܪ܆ ܘܰܕܢܶܗܘܶܐ ܬܰܚܘܺܝܬܳܐ ܕܓܰܢ̱ܒܳܪܽܘܬܳܐ ܠܗܳܢܽܘܢ ܕܫܰܪܟܳܐ. ܟܽܠܗܽܘܢ ܕܝܢ ܠܰܚ̈ܕܳܕܶܐ ܡܶܫܬܰܘܬܦܺܝܢ ܗ̱ܘܰܘ ܒܕܰܪ̈ܶܐ ܘܰܒܬܰܟ̈ܬܽܘܫܶܐ܆ ܘܟܽܠ ܚܰܕ ܡܶܢܗܽܘܢ ܠܰܘ ܒܣܳܗܕܽܘܬܳܐ ܒܰܝܬܳܝܬܳܐ ܕܺܝܠܶܗ ܒܰܠܚܽܘܕ ܡܶܬܟܰܬܰܫ ܗ̱ܘܳܐ܆ ܐܶܠܳܐ ܐܳܦ ܒܗܳܝ ܕܗܰܘ ܐ̱ܚܪܺܢܳܐ. ܗܰܘ ܡܰܢ ܓܶܝܪ ܕܩܰܕܶܡ ܐܶܙܰܠ܆ ܩܳܝܶܡܬܳܐ ܡܶܕܶܡ ܡܢܰܦܰܫܬܳܐ ܐܺܝܬܰܘܗ̱ܝ ܗ̱ܘܳܐ ܠܗܰܘ ܕܳܐܬܶܐ ܒܳܬܪܶܗ܆ ܘܰܣܝܳܡܳܐ ܡܶܕܶܡ ܚܰܕܬܳܐ ܕܰܠܒܺܝܒܽܘܬܳܐ ܕܡܶܢܫܶܠܝ ܟܬܺܝܒ ܘܣܺܝܡ ܩܕܳܡܰܘܗܝ܆ ܘܰܕܣܳܦܶܩ ܕܢܶܓܕܺܝܘܗ̱ܝ ܠܘܳܬ ܛܢܳܢܳܐ ܫܰܘܝܳܐ. ܗܳܢܽܘܢ ܕܶܝܢ ܕܒܳܬܰܪܟܶܢ ܟܰܕ ܠܘܳܬ ܤܛܰܐܕܝܘܢ ܥܒܰܪܘ܆ ܡܣܰܝܒܪܺܝܢ ܗ̱ܘܰܘ ܠܰܐܬܠܺܝܣܽܘܬܳܐ ܕܰܐܚܰܝ̈ܗܽܘܢ ܝܰܬܺܝܪ ܡܶܢܗܽܘܢ ܕܺܝܠܗܽܘܢ ܕܗܳܢܽܘܢ ܕܚܳܫܺܝܢ ܗ̱ܘܰܘ܆ ܡܶܬܥܰܬܕܺܝܢ ܗ̱ܘܰܘ ܕܶܝܢ ܠܘܳܬ ܗܳܝ ܕܰܥܬܺܝܕܳܐ܆ ܟܰܕ ܕܰܚܺܝܠܺܝܢ ܗ̱ܘܰܘ܆ ܠܰܘ ܡܶܢ ܗܳܝ ܕܰܒܥܶܩ̈ܒܳܬܳܐ ܕܗܳܢܽܘܢ ܢܺܐܬܽܘܢ܆ ܐܶܠܳܐ ܡܶܢ ܗܳܝ ܕܠܰܘ ܒܶܗ ܒܦܰܓܪܗܽܘܢ ܢܚܰܘܽܘܢ ܐܰܚܽܘܬܳܐ ܘܫܰܘܝܽܘܬ ܬܰܪܥܺܝܬܳܐ ܕܰܡܚܰܡܣܢܳܢܽܘܬܳܐ ܒܫܶܢ̈ܕܶܐ ܡܫܰܚ̈ܠܦܶܐ ܕܽܐܘܪ̈ܓܰܢܶܐ ܡܫܰܢ̈ܩܳܢܶܐ.
ܐ̱ܢܳܫ ܡܰܢ ܓܶܝܪ ܡܶܢܗܽܘܢ ܥܰܠ ܓܺܝܓܠܳܐ ܡܶܬܡܬܰܚ ܗ̱ܘܳܐ. ܘܡܶܫܬܪܶܐ ܗ̱ܘܳܐ ܡܰܢ ܡܶܢ ܐܰܣܳܪܳܐ ܕܫܳܪ̈ܝܳܬܶܗ܆ ܟܰܕ ܩܳܛܶܐ ܗ̱ܘܳܐ ܕܶܝܢ ܐܰܟܚܕܳܐ ܥܰܡ ܡܶܬܟܰܪܟܳܢܽܘܬܶܗ ܕܚܽܘܕܪܳܐ܆ ܟܰܕ ܓܽܘܡܪ̈ܶܐ ܕܢܽܘܪܳܐ ܣܺܝ̈ܡܳܢ ܗ̱ܘܰܝ̈ ܡܶܢ ܠܬܰܚܬ܆ ܒܳܗ̇ ܟܰܕ ܒܳܗ̇ ܐܰܟܚܕܳܐ ܐܳܦ ܝܳܩܶܕ ܗ̱ܘܳܐ. ܐ̱ܚܪܺܢܳܐ ܕܶܝܢ ܒܛܶܦܪ̈ܶܐ ܕܦܰܪܙܠܳܐ܆ ܒܰܕܡܽܘܬ ܫܠܳܚܳܐ ܕܥܶܪܒܳܐ܆ ܡܶܫܬܠܰܚ ܗ̱ܘܳܐ ܡܶܢ ܡܶܫܟܶܗ. ܐ̱ܚܪܺܢܳܐ ܟܰܕ ܕܢܶܬܦܣܶܩ ܠܶܫܳܢܶܗ ܐܶܬܦܩܶܕ܆ ܨܶܒܝܳܢܳܐܺܝܬ ܠܗܳܢܳܐ ܐܰܦܶܩ ܐܰܘܫܛܶܗ ܠܰܦܣܳܩܳܐ܆ ܟܰܕ ܡܚܰܘܶܐ ܗ̱ܘܳܐ ܕܶܐܠܽܘ ܡܶܕܶܡ ܡܶܢ ܗܳܠܶܝܢ ܕܰܒܥܽܘܡܩܳܐ ܡܛܰܫ̈ܝܳܢ ܗ̱ܘܰܝ̈܆ ܡܶܬܬܒܰܥ ܗ̱ܘܳܐ ܕܰܠܫܶܢ̈ܕܶܐ ܢܶܬܶܠ܆ ܐܳܦ ܠܗܳܢܳܐ ܐܶܢ ܡܰܨܝܳܐ ܗ̱ܘܳܬ܆ ܒܨܶܒܝܳܢܶܗ ܡܰܣܪܰܚ ܗ̱ܘܳܐ. ܐܳܦ ܓܶܝܪ ܟܽܠܚܰܕ ܡܶܢܗܽܘܢ ܝܰܨܺܝܦ ܗ̱ܘܳܐ ܫܦܺܝܥܳܐܺܝܬ ܕܰܠܘܳܬ ܙܢܰܝ̈ܳܐ ܚ̈ܰܕܬ̣ܶܐ ܕܰܡܣܳܡ ܒܪ̈ܺܝܫܶܐ܆ ܚܘܺܝܚܽܘܬܳܐ ܕܝܰܬܺܝܪ ܚܰܕܬ̣ܳܐ ܢܚܰܘܶܐ܆ ܘܒܰܚܕܳܐ ܒܟܽܠܗܽܘܢ ܗܰܕܳܡܰܘ̈ܗ̱ܝ ܢܶܬܒܚܰܪ܆ ܘܰܕܕܽܘܪ̈ܳܫܶܐ ܣܰܓܺܝ̈ܶܐܐ ܕܰܚܠܺܝܡܽܘܬܳܐ ܢܶܣܒܽܘܠ܆ ܩܕܳܡ ܕܢܰܦܫܶܗ ܬܶܬܦܪܶܫ ܡܶܢ ܦܰܓܪܶܗ. ܕܳܝܢܺܝܢ ܗ̱ܘܰܘ ܓܶܝܪ܆ ܕܰܕܚܰܝ̈ܘܳܬܳܐ ܐܰܝܟ ܕܰܒܣܽܘܓܳܐܐ ܐܺܝܬܶܝܗ̇ ܕܺܝܠܳܝܬܳܐ܆ ܗܳܝ ܕܰܒܚܰܕ ܩܶܛܠܳܐ ܢܶܬܪ̈ܰܡܝܳܢ. ܠܗܳܢܽܘܢ ܕܶܝܢ ܕܡܶܬܢܰܨܚܺܝܢ ܒܰܙܪܺܝܙܽܘܬܳܐ ܝܰܬܺܝܪܳܐܺܝܬ ܐܺܝܬܶܝܗ̇ ܕܦܰܐܝܳܐ܆ ܕܳܐܬܘ̈ܳܬܳܐ ܣܰܓܺܝ̈ܳܐܬܳܐ ܕܓܰܢ̱ܒܳܪܽܘܬܳܐ ܢܰܝܬܽܘܢ ܥܰܠ ܦܰܓܪܗܽܘܢ܆ ܘܕܰܠܘܳܬ ܣܰܝ̈ܦܶܐ ܕܡܰܩܪ̈ܒܳܢܶܐ ܐܰܟܚܕܳܐ ܢܺܐܙܽܠ̱ܘܢ܆ ܘܥܰܠ ܒܥܶܠܕܒܳܒܳܐ ܘܥܰܠ ܒܰܝܬܳܝܳܐ ܐܰܟܚܕܳܐ ܢܶܗܘܶܐ ܡܰܪܙܶܦ ܕܶܡܗܽܘܢ.
ܕܰܐܝܟ ܗܳܕܶܐ ܐܺܝܬܶܝܗ̇ ܗ̱ܘܳܬ ܡܥܰܙܝܳܢܽܘܬܳܐ ܕܰܛܠܳܝ̈ܶܐ܆ ܗܳܢܽܘܢ ܚܰܝ̈ܠܬܳܢܶܐ ܘܰܙܪ̈ܺܝܙܶܐ܆ ܐܰܝܟܰܢܳܐ ܕܠܳܐ ܟܰܕ ܗܳܝ ܕܟܽܠ ܚܰܕ ܐܳܡܰܪ ܐ̱ܢܳܐ: ܐܶ݀ܫܬܰܘܚܰܪ ܒܬܽܘܢܳܝܳܐ܆ ܕܰܐܝܟ ܗܳܕܶܐ ܐܺܝܬܶܝܗ̇ ܗ̱ܘܳܬ ܡܶܬܥܰܬܕܳܢܽܘܬܳܐ ܗܳܝ ܕܝܰܬܺܝܪ ܡܛܰܝܰܒܬܳܐ ܕܰܠܘܳܬ ܬܰܟ̈ܬܽܘܫܶܐ܆ ܕܣܳܗ̈ܕܶܐ ܗܳܢܽܘܢ ܠܳܐ ܡܶܙܕܰܟ̈ܝܳܢܶܐ. ܐܰܟܙܢܳܐ ܓܶܝܪ ܕܗܳܢܽܘܢ ܕܒܰܟܠܺܝܠܳܐ ܕܕܰܗܒܳܐ ܟܺܐܦ̈ܶܐ ܗܳܠܶܝܢ ܝܰܩܺܝܪ̈ܳܬ ܕܡܰܝ̈ܳܐ ܘܰܡܥܰܠ̈ܝܳܬܳܐ ܩܳܒܥܺܝܢ܆ ܠܰܘ ܚܰܕ ܓܰܘܢܳܐ ܒܳܥܶܝܢ܆ ܐܶܠܳܐ ܡܫܰܚ̈ܠܦܶܐ ܘܰܡܦܰܬܟ̈ܶܐ܆ ܠܰܡܫܰܪܬܚܽܘܬܳܐ ܕܚܰܕ ܫܽܘܦܪܳܐ܆ ܒܶܗ ܟܰܕ ܒܶܗ ܒܰܙܢܳܐ ܗܳܠܶܝܢ܆ ܥܰܠ ܫܟܳܚ̈ܳܬܳܐ ܐܰܟܣ̈ܢܳܝܳܬܳܐ ܘܰܡܫܰܚ̈ܠܦܳܬܳܐ ܕܫܶܢ̈ܕܶܐ ܫܳܘܪܺܝܢ ܗ̱ܘܰܘ ܘܡܶܬܦܰܨܚܺܝܢ ܗ̱ܘܰܘ܆ ܟܰܕ ܠܰܟܠܺܝܠܳܐ ܕܣܳܗܕܽܘܬܳܐ ܒܰܐܓܽܘ̈ܢܶܐ ܣܰܓܺܝ̈ܰܐܝ ܐܳܕܫ̈ܶܐ܆ ܐܰܝܟ ܕܰܒܟܺܐܦ̈ܶܐ ܡܝܰܩܪ̈ܳܬܳܐ ܡܨܰܒܬܺܝܢ ܗ̱ܘܰܘ ܡܦܰܬܟܳܐܺܝܬ.
ܟܰܕ ܫܬܳܐ ܡܰܢ ܗܳܟܺܝܠ ܐܰܚ̈ܶܐ܆ ܪܶܗܛܳܐ ܫܰܡܠܺܝܘ܆ ܘܰܠܘܳܬ ܟܠܺܝܠܳܐ ܕܰܩܪܳܝܬܳܐ ܕܰܠܥܶܠ ܪܗܶܛܘ ܘܡܰܢܰܥܘ ܆ ܗܰܘ ܐ̱ܚܪܳܝܳܐ ܘܰܫܒܺܝܥܳܝܳܐ ܐܶܫܬܚܰܪ ܗ̱ܘܳܐ. ܟܰܕ ܒܶܫܬܳܐ ܬܰܟ̈ܬܽܘܫܶܐ ܠܛܺܝܫ ܗ̱ܘܳܐ܆ ܘܰܗܘ̣ܳܐ ܝܰܬܺܝܪܳܐܺܝܬ ܚܰܪܺܝܦܳܐ ܠܘܳܬ ܟܽܠ ܐܰܓܽܘܢܳܐ ܘܬܰܟܬܽܘܫܳܐ ܕܫܰܦܺܝܪܽܘܬ ܕܶܚܠܬܳܐ܆ ܗܰܘ ܕܟܰܕ ܕܚܶܠ ܡܶܢܶܗ ܗܽܘ ܛܪܽܘܢܳܐ܆ ܡܢܰܣܶܐ ܗ̱ܘܳܐ ܕܰܒܫܽܘ̈ܓܳܫܶܐ ܘܰܒܫܽܘܘ̈ܕܳܝܶܐ ܢܪܰܦܶܝܘܗ̱ܝ܆ ܘܟܰܕ ܚܳܙܶܐ ܕܳܐܦ ܠܗܳܠܶܝܢ ܫܳܐܶܛ܆ ܕܶܐܡܶܗ ܬܩܽܘܡ ܠܘܳܬܶܗ ܦܳܩܶܕ ܗ̱ܘܳܐ܆ ܐܰܝܟܰܢܳܐ ܕܰܢܚܽܘܤ ܥܠܶܝܗ̇ ܐܰܝܟ ܕܥܰܠ ܐܰܝ̇ܕܳܐ ܕܣܶܐܒܰܬ̣ ܘܺܐܝܬܶܝܗ̇ ܕܠܳܐ ܒܢܰܝ̈ܳܐ܆ ܐܳܦ ܓܶܝܪ ܚܳܫܶܒ ܗ̱ܘܳܐ܆ ܕܣܳܦܩܳܐ ܗ̱ܘܳܬ ܐܳܦ ܟܰܕ ܡܶܬܚܰܙܝܳܐ܆ ܫܒܽܘܩ ܟܺܝܬ ܐܳܦ ܟܰܕ ܡܡܰܠܠܳܐ܆ ܕܰܬܪܰܦܶܝܘܗ̱ܝ ܘܰܠܘܳܬ ܟܝܳܢܳܐ ܬܟܽܘܦ ܘܬܰܪܟܢܶܗ ܠܰܐܬܠܺܝܛܳܐ. ܛܰܥܝܳܐ ܗ̱ܘܳܬ ܠܶܗ ܕܶܝܢ ܠܗܰܘ ܣܦܺܝܩ ܗܰܘܢܳܐ܆ ܕܗܺܝ ܐܺܝܬܶܝܗ̇ ܗ̱ܘܳܬ܆ ܕܳܐܦ ܠܗܳܢܽܘܢ ܐ̱ܚܪ̈ܳܢܶܐ ܠܘܳܬ ܐܰܓܽܘ̈ܢܶܐ ܡܶܫܚܰܬ ܘܰܠܘܳܬ ܫܡܰܝܳܐ ܫܰܕܪܰܬ ܐܶܢܽܘܢ܆ ܐܳܦ ܓܶܝܪ ܟܰܕ ܡܶܢ ܩܽܘܪܒܳܐ ܐܺܝܬܶܝܗ̇ ܗ̱ܘܳܬ܆ ܒܕܰܡܽܘܬ ܪܺܝܫ ܚܰܝܠܳܐ ܛܰܪܩܳܐ ܘܚܰܝܠܬܳܢܳܐ ܕܦܳܠ̈ܚܶܐ ܩܪ̈ܰܒܬܳܢܶܐ ܕܫܰܦܺܝܪܽܘܬ ܕܶܚܠܬܳܐ ܡܰܥܗܕܳܐ ܗ̱ܘܳܬ ܠܗܽܘܢ܆ ܟܰܕ ܠܟܳܐ ܘܰܠܗܰܠ ܡܶܬܟܰܪܟܳܐ ܗ̱ܘܳܬ ܘܰܡܕܺܝܩܳܐ ܘܪܰܥܺܝܠܳܐ ܗ̱ܘܳܬ. ܕܕܰܠܡܳܐ ܐ̱ܢܳܫ ܢܶܫܦܰܠ ܠܶܗ ܘܢܶܚܓܰܪ ܡܶܢ ܒܢܶܝ̈ܗ̇. ܘܟܰܕ ܐܰܟܚܕܳܐ ܥܰܡ ܟܽܠܚܰܕ ܡܶܢܗܽܘܢ ܐܰܬܠܺܝܣܳܐ ܥܳܒܕܳܐ ܗ̱ܘܳܬ܆ ܘܰܐܟܚܕܳܐ ܡܩܺܝܡܳܐ ܗ̱ܘܳܬ ܥܰܡܶܗ ܩܝܳܡܳܐ ܒܫ̈ܶܢܕܶܐ܆ ܘܰܕܝܳܩܕܳܐ ܡܰܣܒܪܳܐ ܗ̱ܘܳܬ܆ ܘܰܕܡܶܬܦܰܣܩܳܐ ܒܰܕܡܽܘܬ ܐܺܝܠܳܢܐ܆ ܟܰܕ ܣܰܘ̈ܟܶܐ ܗܳܠܶܝܢ ܒ̈ܢܳܬ ܡܰܘܥܺܝܬܳܗ̇ ܡܶܬܦܰܣ̈ܩܳܢ. ܘܕܰܒܦܳܣܺܝ̈ܩܳܬܳܐ ܐܳܡܰܪ ܟܰܕ ܗܳܠܶܝܢ ܕܦܰܘܠܽܘܤ ܡܰܙܥܩܳܐ ܗ̱ܘܳܬ: ܒ̈ܢܰܝ ܗܳܠܶܝܢ ܕܬܽܘܒ ܚܳܒܠܳܐ ܐ̱ܢܳܐ܆ ܥܕܰܡܳܐ ܕܢܶܬܬܨܺܝܪ ܒܟܽܘܢ ܡܫܺܝܚܳܐ .
ܗܳܠܶܝܢ ܡܰܢ ܗܳܟܺܝܠ ܟܰܣܝܳܐܺܝܬ܆ ܘܠܳܐ ܡܶܬܚܰܙܝܳܢܳܐܺܝܬ܆ ܐܳܦ ܡܶܬܪܰܥܝܳܐ ܗ̱ܘܳܬ܆ ܐܳܦ ܡܰܪܬܝܳܐ ܗ̱ܘܳܬ ܘܳܐܦ ܣܳܥܪܳܐ ܗ̱ܘܳܬ. ܠܘܳܬ ܕܶܝܢ ܗܰܘ ܙܥܽܘܪܳܐ ܕܰܒ̈ܢܶܝܗ̇ ܟܰܕ ܓܰܠܝܳܐܺܝܬ ܩܳܡܰܬ̣ ܐܰܝܟ ܦܽܘܩܕܳܢܶܗ ܕܰܛܪܽܘܢܳܐ܆ ܘܰܒܡܰܡܠܠܳܐ ܥܶܒܪܳܝܳܐ ܡܶܠܬܽܘܢܺܝܬܳܐ ܚܕܳܐ܆ ܠܰܘ ܒܶܐܕܢܰܘ̈ܗ̱ܝ ܒܰܠܚܽܘܕ ܕܰܒܪܳܗ̇ ܐܰܪܡܝܰܬ̣ ܐܶܠܳܐ ܒܬܰܪܥܺܝܬܶܗ܆ ܘܠܰܘ ܐܰܝܟܰܢܳܐ ܕܬܶܬܛܰܫܶܐ ܡܶܢ ܡܫܰܡ̈ܫܳܢܶܐ ܒܩܳܠܳܐ ܗܰܘ ܐܰܒܳܗܳܝܳܐ ܡܰܠܠܰܬ̣܆ ܐܶܠܳܐ ܐܰܝܟܰܢܳܐ ܕܠܰܐܒܳܗ̈ܶܐ ܩܰܕܡܳܝ̈ܶܐ ܘܰܠܢܶܨ̈ܚܳܢܶܐ ܗܳܢܽܘܢ ܥܰܬܺܝܩ̈ܶܐ ܬܰܥܗܕܺܝܘܗ̱ܝ ܠܰܐܓܽܘܢܺܝܣܛܳܐ ܘܰܠܘܳܬ ܛܢܳܢܳܐ ܫܰܘܝܳܐ ܬܰܬܦܶܝܘܗ̱ܝ܆ ܐܰܕܠܶܩܬ̣ܶܗ ܘܰܐܪܬ̣ܰܚܬ̣ܶܗ ܝܰܬܺܝܪܳܐܺܝܬ ܠܠܶܒܶܗ ܕܛܰܠܝܳܐ. ܘܟܰܕ ܐܰܝܟ ܗܰܘ ܕܬܰܗܺܝܪܳܐ ܗ̱ܘܳܐ܆ ܠܡܰܘܬܳܐ ܗܰܘ ܡܰܪܺܝܪܳܐ܆ ܐܰܝܟ ܕܰܠܚܰܠܝܳܐ ܡܶܣܬܰܪܗܰܒ ܗ̱ܘܳܐ ܠܡܶܒܠܰܥ܆ ܘܕܰܫܪܰܐܘܽܢܳܢܝ ܡܶܢ ܐܰܣܽܘܪ̈ܶܐ ܠܘܳܬ ܗܳܢܽܘܢ ܕܩܳܝܡܺܝܢ ܗ̱ܘܰܘ ܠܘܳܬܶܗ ܡܰܙܥܶܩ ܗ̱ܘܳܐ. ܘܟܰܕ ܐܶܫܬܪܺܝ ܡܛܰܝܒܳܐܺܝܬ ܡܶܢ ܗܳܢܽܘܢ ܕܶܐܬܬܰܛܥܺܝܘ܆ ܐܰܝܟ ܗܰܘ ܕܡܶܢ ܬܰܪܥܺܝܬܳܐ ܓܰܢ̱ܒܳܪܬܳܐ ܐܶܫܬܰܚܠܰܦ܆ ܠܚܰܕ ܡܶܢ ܛܶܓ̣̈ܢܶܐ ܗܳܢܽܘܢ ܕܩܰܕܺܝܡܺܝܢ ܗ̱ܘܰܘ ܣܺܝܡܺܝܢ ܘܡܶܢ ܢܽܘܪܳܐ ܡܶܫܬܰܠܗܒܺܝܢ ܫܘܰܪ ܢܚܶܬ܆ ܘܩܰܠܺܝܠܳܐܺܝܬ ܐܰܘ ܐܰܝܟ ܕܰܨܒܳܐ ܗ̱ܘܳܐ ܐܶܫܬܘܺܝ ܠܪܶܓܬܶܗ܆ ܘܶܐܬܬܰܘܣܰܦ ܥܰܠ ܓܽܘܕܳܐ ܫܡܰܝܳܢܺܝܬܳܐ ܕܰܐܚܰܘ̈ܗ̱ܝ.
ܘܒܳܬܰܪ ܗܳܢܳܐ ܬܽܘܒ܆ ܐܶܡܶܗ ܚܳܠܨܳܐ ܗ̱ܘܳܬ܆ ܘܟܰܕ ܒܒܺܝ̈ܫܳܬܳܐ ܕܕܳܡ̈ܝܳܢ ܐܶܬܢܰܣܝܰܬ̣܆ ܘܰܒܫܰܒܥܳܐ ܐܰܓܽܘ̈ܢܶܐ ܕܰܒ̈ܢܶܝܗ̇ ܐܶܬܟܰܠܠܰܬ̣܆ ܟܠܺܝܠܐ ܗܳܝ ܠܳܗ̇ ܣܳܡܰܬ̣ ܠܰܒ̈ܢܶܝܗ̇ ܟܰܕ ܚܰܘܝܰܬ̣ ܒܺܐܝ̈ܕܰܝܗܽܘܢ ܕܺܝܠܗܽܘܢ ܕܣܽܘܥܪ̈ܳܢܶܐ܆ ܕܡܶܢ ܐܰܝܢܳܐ ܥܶܩܳܪܳܐ ܢܒܰܥ̈ܝ̱ ܘܶܐܬܪ̈ܰܒܺܝ̱ ܗܳܠܶܝܢ ܡܰܘ̈ܥܝܳܬܳܐ ܚܰܝ̈ܠܬܳܢܝܳܬܳܐ. ܠܰܘ ܗܳܟܰܢܳܐ ܡܢܳܪܬܳܐ ܗܳܝ ܕܰܒܫܰܒܥܳܐ ܫܪ̈ܳܓܺܝܢ ܡܶܬܗܰܕܪܳܐ ܗ̱ܘܳܬ܆ ܡܰܢܗܪܳܐ ܗ̱ܘܳܬ ܠܶܗ ܠܡܰܫܟܢܳܐ ܕܣܳܗܕܽܘܬܳܐ܆ ܐܰܝܟ ܡܳܐ ܕܗܳܕܶܐ ܒܫܰܒܥܳܐ ܢܰܗܺܝܪ̈ܶܐ ܡܠܺܝ̈ܠܶܐ ܕܰܒ̈ܢܶܝܗ̇܆ ܡܰܒܪܩܳܐ ܠܥܺܕܬܳܐ ܕܰܡܫܺܝܚܳܐ.
ܠܗܳܠܶܝܢ ܫܡܰܥܶܝ̈ܢ ܐܳܘ ܐܶܡ̈ܗܳܬܳܐ܆ ܘܗܳܟܰܢܳܐ ܠܰܒ̈ܢܰܝܟܶܝܢ ܪ̈ܰܒܶܝ̣ܶܢ܆ ܘܰܫܒܽܘ̈ܩܶܝܢ ܐܶܢܽܘܢ ܕܢܺܐܙܽܠ̱ܘܢ ܠܥܺܕܬܳܐ܆ ܘܚܰܦ̈ܶܛܶܝܢ ܐܶܢܽܘܢ ܠܘܳܬ ܡܰܠܦܳܢܽܘܬܳܐ ܕܝܽܘܠ̈ܦܳܢܐ ܟܳܗ̈ܢܳܝܶܐ܆ ܘܠܳܐ ܬܶܚܢ̈ܩܳܢ ܐܶܢܽܘܢ ܒܡܰܪ̈ܢܝܳܬܳܐ ܗܳܠܶܝܢ ܥܳܠܡܳܢܳܝ̈ܳܬܳܐ܆ ܗܳܠܶܝܢ ܓܶܝܪ ܕܡܶܬܚܰܙܝ̈ܳܢ ܕܰܡܠܶܐ ܙܰܒܢܳܐ ܐܺܝܬܰܝܗܶܝܢ܆ ܗܳܠܶܝܢ ܕܶܝܢ ܕܠܳܐ ܡܶܬܚܰܙܝ̈ܳܢ ܕܰܠܥܳܠܰܡ ܆ ܡܰܙܥܶܩ ܡܫܺܝܚܳܐ܆ ܗܰܘ ܕܰܒܦܰܘܠܽܘܤ ܡܡܰܠܶܠ. ܐܳܘ ܠܶܐܡܳܐ ܟܳܗܢܳܝܬܳܐ܆ ܐܳܘ ܠܢܰܦܫܳܐ ܕܶܟܪܳܢܳܝܬܳܐ ܕܰܒܦܰܓܪܳܐ ܢܶܫܳܝܳܐ܆ ܐܳܘ ܠܫܰܠܡܽܘܬܳܐ ܕܰܛܠܳܝ̈ܶܐ܆ ܕܰܚܕܳܐ ܬܰܪܒܺܝܬܳܐ܆ ܚܕܳܐ ܡܝܰܬܪܽܘܬܳܐ܆ ܚܕܳܐ ܡܚܰܡܣܢܳܢܽܘܬܳܐ ܚܰܘܺܝܘ ܠܰܢ܆ ܚܠܳܦ ܚܰܕ ܣܰܒܪܳܐ܆ ܚܰܕ ܡܰܘܬܳܐ ܘܰܫܘܶܐ ܒܺܐܝܩܳܪܳܐ. ܡܳܢܳܐ ܠܘܳܬ ܗܳܠܶܝܢ ܢܺܐܡܪܽܘܢ ܠܰܢ ܗܳܢܽܘܢ ܕܚܶܠܩܳܐ ܡܥܰܪܙܠܺܝܢ܆ ܡܶܢ ܡܶܬܬܙܺܝܥܳܢܽܘܬܳܐ ܛܳܥܺܝܬܳܐ ܕܟܰܘܟ̈ܒܶܐ. ܠܰܘ ܓܶܝܪ ܒܳܗ̇ ܟܰܕ ܒܳܗ̇ ܒܫܳܥܬܳܐ ܒܕܽܘܟ܆ ܐܰܟܙܢܳܐ ܕܰܒܩܰܘܡܶܗ ܕܩܶܢܛܪܽܘܢ ܗܳܢܰܘ ܕܶܝܢ ܡܽܘܫܚܰܬ ܚܕܳܐ ܢܽܘܩܰܙܬܳܐ܆ ܝܶܠܕܰܬ ܐܶܢܽܘܢ ܐܶܡܗܽܘܢ. ܘܳܐܦܠܳܐ ܐܰܝܟ ܒܶܕ̣ܝ̣ܰܝ̣̈ܗܽܘܢ ܕܡܰܢܺܝ̈ܢܳܝܶܐ܆ ܡܢܳܬܳܐ ܣܰܓܺܝܐܬܳܐ ܕܰܚܕܳܐ ܪܺܝܫܳܢܽܘܬܳܐ ܐܺܝܬ ܗ̱ܘܳܐ ܒܗܽܘܢ ܠܟܽܠܗܽܘܢ܆ ܐܶܠܳܐ ܚܽܘܫܳܒܳܐ ܗܰܘ ܐܰܚܺܝܕ ܗ̱ܘ̣ ܠܶܗ ܘܫܰܦܺܝܪ ܕܶܚܠܬܳܐ܆ ܟܰܕ ܚܰܕ ܐܺܝܬܰܘܗ̱ܝ ܗ̱ܘܳܐ ܒܗܽܘܢ܆ ܚܰܕ ܘܗܽܘ ܟܰܕ ܗܽܘ ܟܠܺܝܠܳܐ ܕܣܳܗܕܽܘܬܳܐ ܙܰܡܶܢ ܠܗܽܘܢ.
ܗܳܠܶܝܢ ܟܰܕ ܡܶܢ ܡܰܪܕܽܘܬܳܐ ܗܳܝ ܢܳܡܽܘܣܳܝܬܳܐ ܫܩܰܠܘ ܚܺܐܦܳܐ܆ ܩܕܳܡ ܣܳܗ̈ܕܶܐ ܗܳܢܽܘܢ ܕܶܐܘܰܢܓܶܠܺܝܽܘܢ ܩܰܕܶܡܘ ܪܗܶܛܘ܆ ܐܰܟܙܢܳܐ ܕܝܽܘܚܰܢܳܢ ܩܕܳܡ ܡܫܺܝܚܳܐ. ܐܳܦ ܓܶܝܪ ܗܳܢܽܘܢ ܬܠܳܬܳܐ ܛܠܳܝ̈ܶܐ܆ ܐܳܦ ܕܳܢܺܝܐܝܠ ܓܰܒܪܳܐ ܗܰܘ ܕܰܪ̈ܓܺܝܓܳܬܳܐ ܡܝܰܬܪ̈ܳܬܳܐ܆ ܡܶܢ ܐܰܬܽܘܢܳܐ ܕܢܽܘܪܳܐ ܗܰܘ ܕܰܒܒܳܒܶܠ܆ ܘܡܶܢ ܓܽܘܒܳܐ ܕܰܐܪ̈ܝܰܘܳܬܳܐ ܐܶܬܦܰܨܺܝܘ܆ ܟܰܕ ܠܒܰܪܒܪ̈ܳܝܶܐ ܐܶܬܚܙܺܝܘ ܟܚܺܝ̈ܕܶܐ ܒܝܰܕ ܐܳܬܘ̈ܳܬܳܐ܆ ܐܰܝܟܰܢܳܐ ܕܢܶܦܢܽܘܢ ܘܢܶܣܩܽܘܢ ܗܳܢܽܘܢ ܕܡܶܢ ܐܺܝܣܪܳܐܶܝܠ܆ ܠܘܳܬ ܐܽܘܪܶܫܠܶܡ ܗܳܝ ܕܥܰܠ ܐܰܪܥܳܐ ܣܺܝܡܳܐ. ܛܠܳܝ̈ܶܐ ܕܶܝܢ ܡܰܩ̈ܒܳܝܶܐ܆ ܟܰܕ ܡܶܐܬܺܝܬܶܗ ܕܰܡܫܺܝܚܳܐ ܘܰܩܝܳܡܬܳܐ܆ ܘܽܐܘܪܶܫܠܶܡ ܗܳܝ ܡܶܬܗܰܘܢܳܢܺܝܬܳܐ܆ ܕܗܳܝ ܕܽܐܘܡܳܢܳܗ̇ ܘܥܳܒܽܘܕܳܗ̇ ܐܰܠܳܗܰܐ ܗ̄ܘ ܆ ܘܟܳܪܽܘܙܽܘܬܳܐ ܕܡܰܠܟܽܘܬܳܐ ܕܰܫܡܰܝܳܐ܆ ܗܳܐ ܡܶܢ ܟܰܕܽܘ ܥܰܠ ܬܰܪܥܳܐ ܐܺܝܬܶܝܗ̇ ܗ̱ܘܳܬ܆ ܡܶܢ ܤܛܰܐܕܺܝܽܘܢ ܕܰܐܓܽܘ̈ܢܶܐ ܐܰܫܩܶܠܘ ܥܒܰܪܘ ܠܘܳܬ ܫܡܰܝܳܐ܆ ܟܰܕ ܣܰܒܪܳܐ ܕܚܰܝ̈ܶܐ ܕܰܥܬܺܝܕܺܝܢ ܩܳܕܡܺܝܢ ܪܳܕܶܝܢ ܘܡܰܠܦܺܝܢ ܠܰܢ܆ ܘܰܠܘܳܬ ܗܳܠܶܝܢ ܡܥܰܬܕܺܝܢ ܠܰܢ. ܘܶܐܢܕܶܝܢ ܠܳܐ܆ ܐܶܠܽܘܠܳܐ ܕܗܳܕܶܐ ܗܳܟܰܢܳܐ ܩܰܕܡܰܬ ܐܶܬܕܰܒܪܰܬ ܘܶܐܬܦܰܪܢܣܰܬ܆ ܡܳܢܳܐ ܠܳܐ ܐܳܡܪܺܝܢ ܗ̱ܘܰܘ ܝܽܗ̱ܘ̈ܕܳܝܶܐ ܗܳܢܽܘܢ ܣܡܰܝ̈ܳܐ܆ ܟܰܕ ܠ̱ܐܢܳܫܺܝ̈ܢ ܡܶܢ ܗܳܢܽܘܢ ܕܰܚܠܳܦ ܡܫܺܝܚܳܐ ܐܰܣܗܶܕܘ ܚܳܙܶܝܢ ܗ̱ܘܰܘ ܕܰܒܫܶܢ̈ܕܶܐ ܡܳܝܬܺܝܢ ܗ̱ܘܰܘ܆ ܘܰܠܘܳܬ ܣܰܒܪܳܐ ܢܰܨܺܝܚܳܐ ܕܰܩܝܳܡܬܳܐ ܠܳܐ ܐܺܝܬ ܠܗܽܘܢ ܥܰܝ̈ܢܶܐ ܠܰܡ̣ܚܳܪ܆ ܗܰܘ ܕܰܒܙܰܠܺܝ̈ܩܰܘܗ̱ܝ ܚܢܰܢ ܐܶܬܢܰܗܪܢܰܢ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܗܰܘ ܕܰܠܗܳܕܶܐ ܩܪܳܐ ܠܰܢ. ܕܠܶܗ ܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܐ ܕܚܰܡܫܺܝܢ ܘܰܬܪܶܝܢ.