ܥܰܠ ܣܳܗܕܳܐ ܩܰܕܺܝܫܳܐ ܕܘܡܛܝܘܤ.
51: ܡܶܬܚܰܫܰܒ ܐ̱ܢܳܐ܆ ܕܟܺܐܢܳܐܺܝܬ ܢܶܟܬܽܘܒ ܥܠܰܝܢ ܛܳܠܽܘܡܽܘܬܳܐ܆ ܫܰܦܺܝܪ ܙܳܟܽܘܬܳܐ ܣܳܗܕܳܐ ܕܰܡܫܺܝܚܳܐ ܕܘܡܛܝܘܤ܆ ܐܶܢ ܐܳܦ ܒܫܶܬܩܳܐ ܢܶܥܒܪܺܝܘܗ̱ܝ܆ ܟܰܕ ܠܳܐ ܣܳܟ ܐܰܙܺܝܥܢܰܢ ܥܠܰܘܗ̱ܝ ܠܶܫܳܢܳܐ ܡܩܰܠܣܳܢܳܐ. ܣܳܦܩܳܐ ܗ̱ܘܳܬ ܡܰܢ ܓܶܝܪ܆ ܐܳܦ ܗܺܝ ܗܳܝ ܒܰܠܚܽܘܕ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ ܚܰܫ܆ ܘܰܐܓܽܘܢܳܐ ܫܰܦܺܝܪܳܐ ܕܬܰܟܬܽܘ̈ܫܶܐ ܟܳܗ̈ܢܳܝܶܐ ܐܶܬܟܰܬܰܫ܆ ܘܰܟܠܺܝܠܳܐ ܕܥܰܠ ܗܳܠܶܝܢ ܩܛܰܪ܆ ܕܥܶܠ̈ܠܳܬܳܐ ܕܣܳܦ̈ܩܳܢ ܬܶܬܶܠ ܕܡ̈ܶܠܶܐ܆ ܘܬܰܒܰܥ ܡܥܺܝ̈ܢܶܐ ܥܰܬܺܝܪ̈ܳܬܳܐ ܕܩܽܘ̈ܠܳܣܶܐ܆ ܘܠܰܢ ܬܚܰܘܶܐ ܛܳܠܽܘܡ̈ܶܐ ܕܫܰܬܺܝܩܺܝܢ ܚ̱ܢܰܢ. ܗܳܝ ܕܶܝܢ ܕܰܒܟܽܠ ܝܰܘܡܳܐ. ܠܟܽܘܪ̈ܗܳܢܶܐ ܡܫܰܚ̈ܠܦܶܐ ܛܳܪܶܕ ܡܶܢ ܗܳܢܽܘܢ ܕܰܥܡܺܝܠܺܝܢ܆ ܘܡܰܐܣܶܐ ܠܗܳܢܽܘܢ ܕܰܟܪܺܝܗܳܐܺܝܬ ܐܺܝܬ ܠܗܽܘܢ ܕܠܳܐ ܐܰܓܪܳܐ. ܘܒܰܡܨܰܥܬܳܗ̇ ܕܰܡܕܺܝܢ̱ܬܳܐ܆ ܐܰܝܟܰܢܳܐ ܡܩܺܝܡܳܐ ܠܒܰܪ ܡܶܢ ܥܶܕܠܳܝܳܐ ܠܗܳܢܽܘܢ ܕܫܳܬܩܺܝܢ܆ ܡܰܠܽܘܢ ܕܶܝܢ ܕܠܳܐ ܟܽܠ ܦܽܘܡܳܐ ܦܳܬܚܺܝܢ ܠܩܽܘܠܳܣܳܐ.
ܐܰܢ̱ܬܬܳܐ ܡܰܢ ܓܶܝܪ ܗܳܝ ܕܰܒܡܰܪܕܺܝܬܳܐ ܕܰܕܡܳܐ ܡܶܬܩܰܦܚܳܐ ܗ̱ܘܳܬ܆ ܟܰܕ ܟܽܠܶܗ ܥܽܘܬܪܳܗ̇ ܒܰܕܪܰܬ ܘܝܶܗܒܰܬ ܠܳܐܣܰܘ̈ܳܬܳܐ܆ ܠܡܰܚܣܶܢ ܡܫܰܘܚܪܳܐܺܝܬ ܐܳܣܝܽܘܬܳܐ ܕܠܳܐ ܢܦܰܩܬ̣ܳܐ ܕܠܳܬ̣܆ ܟܰܕ ܒܺܐܝܕܳܗ̇ ܡܰܢ ܓܶܫܦܰܬ ܒܩܰܪܢܳܐ ܕܡܰܪܛܽܘܛܳܐ܆ ܒܬܰܪܥܺܝܬܳܗ̇ ܕܶܝܢ ܠܘܳܬ ܥܽܘܡܩ̈ܶܐ ܕܗܰܝܡܳܢܽܘܬܳܐ ܢܶܚܬܰܬ̣܆ ܘܶܐܚܰܕܬܶܗ ܠܰܐܠܳܗܳܐ ܡܶܠܬܳܐ ܘܳܐܣܝܳܐ. ܡܶܛܽܠܗܳܕܶܐ ܓܶܝܪ. ܟܰܕ ܟܶܢܫܳܐ ܣܰܓܺܝܳܐܐ ܚܳܒܶܨ ܗ̱ܘܳܐ ܘܙܳܪܶܒ ܗ̱ܘܳܐ ܠܶܗ܆ ܐܰܝܟ ܡܰܢ ܕܗܺܝ ܒܰܠܚܽܘܕܶܝܗ̇ ܡܶܬܗܰܘܢܳܢܳܐܺܝܬ ܓܶܫܦܰܬ ܒܶܗ܆ ܘܰܐܟܣܢܳܐܺܝܬ ܡܶܢ ܗܳܠܶܝܢ ܐ̱ܚܪ̈ܳܢܶܐ܆ ܡܫܰܐܶܠ ܗ̱ܘܳܐ. ܡܰܢܽܘ ܩܪܶܒ ܠܺܝ[1]. ܠܰܘ ܐܰܝܟ ܠܳܐ ܝܳܕܰܥ ܗ̱ܘܳܐ. ܠܗܳܝ ܕܓܶܫܦܰܬ ܒܶܗ܆ ܐܶܠܳܐ ܟܰܕ ܨܳܒܶܐ ܗ̱ܘܳܐ ܕܰܒܝܰܕ ܫܽܘܐܴܠܳܐ ܢܦܰܪܣܶܐ ܘܢܶܓܠܶܐ ܠܟܽܠܢܳܫ ܠܓܶܫܬܳܐ ܗܳܝ ܕܠܶܗ ܒܰܠܚܽܘܕܰܘܗ̱ܝ ܐܶܬܝܰܕܥܰܬ. ܒܰܕܓܽܘܢ ܐܳܦ ܟܰܕ ܡܶܬܦܰܫܟܺܝܢ ܗ̱ܘܰܘ ܬܰܠ̈ܡܺܝܕܶܐ܆ ܣܰܓܺܝ̈ܶܐܐ ܓܶܝܪ ܐܺܝܬܰܝܗܽܘܢ ܗ̱ܘܰܘ ܗܳܢܽܘܢ ܕܰܡܙܰܥܦܺܝܢ ܗ̱ܘܰܘ. ܡܳܪܳܢܳܐܺܝܬ ܠܡܺܐܡܰܪ. ܐܰܘ ܕܓܳܫܦܺܝܢ܆ ܡܰܙܥܶܩ ܗ̱ܘܳܐ. ܐ̱ܢܳܫ ܓܫܰܦ ܒܺܝ. ܐܶܢܳܐ ܓܶܝܪ ܝܶܕܥܶܬ܆ ܠܚܰܝܠܳܐ ܕܰܢܦܰܩ ܡܶܢܝ ܟܰܕ ܚܰܝܠܳܐ ܕܰܢܦܰܩ ܐܳܡܰܪ ܗ̱ܘܳܐ: ܠܡܰܥܒܕܳܢܽܘܬܳܐ ܗܳܝ ܕܳܐܣܝܽܘܬܳܐ܆ ܗܳܝ ܕܢܶܓܕܰܬ ܗܳܝ ܒܗܰܝܡܳܢܽܘܬܳܐ܆ ܐܰܝܟ ܕܡܶܢ ܒܺܐܪܳܐ ܕܡܰܪܕܝܳܐ ܐܳܣܺܝ̈ܘܳܬܳܐ ܕܠ̣ܳܬ̣.
ܠܘܳܬ ܕܘܡܛܝܘܤ ܕܶܝܢ ܟܽܠܗܽܘܢ ܟܪ̈ܺܝܗܶܐ ܪܳܗܛܺܝܢ. ܠܰܘ ܟܰܕ ܡܶܢ ܐܳܣܰܘ̈ܳܬܳܐ ܐܶܬܥܰܕܰܪܘ ܠܽܘܩܕܰܡ܆ ܐܳܦܠܳܐ ܟܰܕ ܒܰܐܓܪ̈ܶܐ ܪܰܘܪ̈ܒܶܐ ܐܶܫܬܚܶܩܘ܆ ܘܰܠܡܶܣܟܺܢܽܘܬܳܐ ܐܶܬ̣ܰܘ܆ ܐܶܠܳܐ ܟܰܕ ܠܗܳܢܽܘܢ ܡܶܢ ܪܽܘܚܩܳܐ ܐܶܡܰܪܘ ܠܗܽܘܢ ܚܕܰܘ܆ ܠܗܳܢܽܘܢ ܕܰܡܙܰܒܳܢܽܘ ܡܙܰܒܢܺܝܢ ܗ̱ܘܰܘ ܠܳܗ̇ ܠܡܰܐܣܝܳܢܽܘܬܳܐ܆ ܘܰܠܘܳܬ ܛܰܝܒܽܘܬܳܐ ܕܺܝܠܶܗ ܠܳܐ ܡܶܙܕܰܒܢܳܢܺܝܬܳܐ ܘܡܰܐܣܝܳܢܺܝܬܳܐ ܡܶܬܓܰܘܣܺܝܢ ܗ̱ܘܰܘ܆ ܡܶܚܕܳܐ ܕܟܽܘܪܗܳܢܳܐ ܓܳܕܶܫ ܗ̱ܘܳܐ ܠܗܽܘܢ܆ ܟܰܕ ܓܰܠܝܳܐܺܝܬ ܘܰܒܗܽܘܢ ܒܣܽܘܥܪ̈ܳܢܶܐ ܡܰܟܪܶܙ ܗ̱ܘܳܐ ܗܳܠܶܝܢ ܕܰܢܒܺܝܳܐ܆ ܟܽܠܗܽܘܢ ܗܳܢܽܘܢ ܕܠܰܝܬ ܠܗܽܘܢ ܟܶܣܦܳܐ ܬܰܘ ܙܒܶܢܘ[2]. ܘܰܐܝܟܰܢܳܐ ܐ̱ܢܳܫ ܢܶܙܒܶܢ ܟܰܕ ܠܰܝܬ ܠܶܗ ܟܶܣܦܳܐ. ܟܰܕ ܗܰܝܡܳܢܽܘܬܳܐ ܚܠܳܦ ܛܺܝܡܳܐ ܝܺܕܺܝܥܳܐ 222ܕܡ̣ܪܡܐ. ܪܶܚܡܰܬ ܝܽܘܬܪܳܢܳܐܺܝܬ ܓܶܝܪ ܐܺܝܬ ܠܶܗ ܠܣܳܗܕܳܐ܆ ܠܘܳܬ ܛܺܝܡܳܐ ܕܰܐܝܟ ܗܳܕܶܐ܆ ܘܗܰܝܡܳܢܽܘܬܳܐ ܬܳܒܰܥ. ܚܦܺܝܛܽܘܬܳܐ ܓܶܝܪ ܐܺܝܬ ܠܶܗ. ܕܠܰܘ ܦܰܓܪܳܐ ܕܰܟܪܺܝܗ ܢܰܐܣܶܐ ܒܰܠܚܽܘܕ܆ ܐܶܠܳܐ ܩܕܳܡ ܦܰܓܪܳܐ. ܠܢܰܦܫܳܐ. ܡܶܛܽܠ ܟܺܝܬ ܕܗܰܝܡܳܢܽܘܬܳܐ܆ ܠܢܰܦܫܳܐ ܗܳܝ ܕܰܡܗܰܝܡܢܳܐ ܡܕܰܟܝܳܐ ܠܽܘܩܕܰܡ ܘܰܚܠܺܝܡܬܳܐ ܥܳܒܕܳܐ ܠܳܗ̇܆ ܘܗܳܟܰܢܳܐ ܠܦܰܓܪܳܐ ܡܙܰܡܢܳܐ ܦܽܘܪܩܳܢܳܐ. ܐܰܝܟܰܢܳܐ ܕܠܰܘ ܕܗܰܘ ܕܣܳܥܰܪ ܬܶܕܡܽܘܪܬܳܐ. ܬܶܣܬܰܒܰܪ ܕܺܐܝܬܶܝܗ̇ ܗܳܕܶܐ܆ ܐܶܠܳܐ ܕܗܰܘ ܕܰܡܗܰܝܡܶܢ. ܡܶܛܽܠ ܗܳܕܶܐ ܓܶܝܪ ܐܳܦ ܡܳܪܰܢ ܠܟܽܠ ܚܰܕ ܡܶܢ ܗܳܢܽܘܢ ܕܗܳܟܰܢܳܐ ܡܗܰܝܡܢܺܝܢ ܗ̱ܘܰܘ ܡܦܰܢܶܐ ܗ̱ܘܳܐ ܟܰܕ ܐܳܡܰܪ: ܗܰܝܡܳܢܽܘܬܳܟ ܦܪܰܩܬܳܟ[3].
ܥܰܡ ܗܳܕܶܐ ܗܰܝܡܳܢܽܘܬܳܐ ܐܶܬܰܝܢ ܠܗܰܝܟܠܳܐ ܗܳܢܳܐ ܟܳܗܢܳܝܳܐ ܟܽܠܗܽܘܢ ܒܳܗ̇ ܒܰܕܡܽܘܬܳܐ܆ ܠܰܘ ܒܰܠܚܽܘܕ ܗܳܢܽܘܢ ܕܰܒܟܽܘܪ̈ܗܳܢܶܐ ܝܰܩܺܝܪ̈ܶܐ ܡܶܬܰܐܠܨܺܝܢ ܐܶܠܳܐ ܐܳܦ ܗܳܢܽܘܢ ܕܰܒܩ̈ܰܠܺܝܠܶܐ ܡܶܕܶܡ. ܘܠܰܘ ܟܰܕ ܟܰܣܝܳܐܺܝܬ ܓܳܫܦܺܝܢ ܒܓܽܘܪܢܳܐ ܕܗܰܕܳܡ̈ܶܐ ܩܰܕܺܝ̈ܫܶܐ܆ ܘܰܒܡܶܫܚܳܐ ܕܡܶܢ ܗܳܕܶܐ ܡܶܬܡܰܫܚܺܝܢ܆ ܐܶܠܳܐ ܟܰܕ ܥܰܡ ܦܰܪܶܗ̱ܣܺܝܰܐ܆ ܘܰܫܠܺܝܚܳܐܺܝܬ ܠܡܺܐܡܰܪ: ܟܰܕ ܒܦܰܪܨܽܘܦܳܐ ܓܰܠܝܳܐ ܠܬܶܫܒܽܘܚܬܶܗ ܕܡܳܪܝܳܐ ܐܰܝܟ ܕܰܒܡܰܚܙܺܝܬܳܐ ܚܳܙܶܝܢ[4]܆ ܘܣܺܝܡܺܝܢ ܩܕܳܡ ܟܽܠ ܐ̱ܢܳܫ ܐܰܟܙܢܳܐ ܕܰܒܒܶܝܬ ܐܳܣ̈ܰܘܳܬܳܐ. ܠܗܳܢܽܘܢ ܡܰܢ ܓܶܝܪ ܒ̈ܳܬܶܐ ܕܒܶܝܬ ܨܠܽܘܬܳܐ ܕܗܳܢܽܘܢ ܣܳܗ̈ܕܶܐ ܐ̱ܚܪ̈ܳܢܶܐ ܡܨܰܒ̈ܬܳܢ܆ 222ܦܠ̈ܩܝܐ ܕܫܺܝܫܳܐ ܬܛܠ̈ܝܬܐ ܘܰܠܩܽܘܢ̈ܝܳܬܳܐ܆ ܘܩܽܘܦ̈ܣܶܐ ܡܦܰܬܟ̈ܶܐ ܕܥܰܠ ܐܰܪܥܳܐ ܡܗܰܒܒܺܝܢ ܘܡܰܙܗܪܺܝܢ. ܠܒܰܝܬܳܐ ܕܶܝܢ ܗܳܢܳܐ ܡܝܰܩܪܳܐ ܘܰܣܓܺܝܕܳܐ ܕܕܽܘܡܛܝܘܤ. ܡܨܰܒܬܺܝܢ܆ ܝܽܘܩ̈ܢܶܐ ܡܠܺܝ̈ܠܶܐ ܕܗܳܢܽܘܢ ܕܰܟܪܺܝܗܺܝܢ ܕܣܺܝܡܺܝܢ ܒܰܡܨܰܥܬܳܐ ܩܕܳܡ ܟܽܠܢܳܫ܆ ܘܰܐܟܙܢܳܐ ܕܰܒܟܽܘܪܳܐ ܡܶܕܶܡ ܡܶܬܗܰܘܢܳܢܳܐ ܒܚܽܘܠܡܳܢܳܐ ܡܶܬܢܰܝܪܺܝܢ ܟܺܝܬ ܘܡܶܬܡܰܪܩܺܝܢ ܘܡܶܬܬܰܪܨܺܝܢ܆ ܘܡܶܫܬܰܕܪܺܝܢ ܠܘܳܬ ܫܽܘܩܳܐ ܝܰܬܺܝܪ ܢܰܨܺܝ̈ܚܶܐ. ܗܳܢܽܘܢ ܕܳܐܦ ܡܰܓܣܺܝܢ222 ܗ̱ܘܰܘ܆ ܡܰܥܗܕܺܝܢ ܗ̱ܘܰܘ ܠܶܗ ܠܝܶܫܽܘܥ ܐܰܠܳܗܶܗ ܕܣܳܗܕܳܐ܆ ܠܗܰܘ ܟܶܢܫܳܐ܆ ܗܰܘ ܕܡܶܛܽܠ ܗܳܕܶܐ ܟܬܺܝܒ ܒܶܐܘܰܢܓ̈ܶܠܝܰܐ܆ ܕܟܰܕ ܚܙܳܐ ܐܶܢܽܘܢ ܠܟܶܢ̈ܫܶܐ ܐܶܬܪܰܚܰܡ ܘܚܳܤ ܥܠܰܝܗܽܘܢ ܕܺܐܝܬܰܝܗܽܘܢ ܗ̱ܘܰܘ ܕܰܫܚܝܩܺܝܢ ܘܰܫܕܶܝܢ܆ ܐܰܝܟ ܥܶܪ̈ܒܶܐ ܕܠܰܝܬ ܠܗܽܘܢ ܪܳܥܝܳܐ[5].
ܡܶܛܽܠܗܳܕܶܐ܆ ܘܟܰܕ ܠܚܽܘܠܡܳܢܳܐ ܩܰܠܺܝܠܳܐ ܡܶܫܬܘܶܐ ܟܽܠ ܚܰܕ ܐܳܙܶܠ. ܘܺܐܝܬ ܠܡܶܚܙܳܐ܆ ܟܽܠ ܓܶܢܣܳܐ ܘܟܽܠ ܩܰܘܡܬܳܐ܆ ܕܥܰܠ ܐܰܪܥܳܐ ܚܠܺܝܛܳܐܺܝܬ ܫܛܺܝܚܺܝܢ. ܘܟܰܕ ܬܶܢܰܚܬܳܐ ܐܺܝܬ ܐܶܡܰܬܝ. ܕܣܳܒܳܐ ܗܰܘ ܕܰܟܪܺܝܗ ܗ̱ܘܳܐ. ܟܰܕ ܐܶܬܚܠܶܡ 222ܬܫ̣ܠܐ܆ ܝܳܗܶܒ ܩܳܠܳܐ ܠܩܽܘܒܠܶܗ ܒܽܘܓܳܢܳܐ ܕܛܰܠܝܽܘܬܳܐ܆ ܐܰܘ ܐܽܘܠܺܝܬܶܗ ܡܶܬܚܰܢܳܢܺܝܬܳܐ ܕܫܰܒܪܳܐ. ܘܰܐܢ̱ܬܬܳܐ. ܙܰܒ̈ܢܺܝܢ ܣܰܓܺܝ̈ܳܐܢ ܐܶܡܗܽܘܢ ܟܰܕ ܥܰܠ ܗܳܠܶܝܢ ܒܳܟܝܳܐ܆ ܘܰܠܟܽܘܬܺܝܢܳܗ̇ ܣܳܕܩܳܐ. ܘܰܠܚܰܕܝܳܗ̇ ܡܳܚܝܳܐ܆ ܘܰܡܚܰܪܛܳܐ ܦܰܟܶܝ̈ܗ̇. ܘܡܶܬܓܰܗܢܳܐ ܥܰܠ ܗܰܘ ܕܰܟܪܺܝܗ. ܘܰܕܬܰܥܒܪܺܝܘܗ̱ܝ ܠܟܽܘܪܗܳܢܳܐ ܥܠܶܝܗ̇. ܨܳܒܝܳܐ ܡܰܢ܆ ܠܳܐ ܡܶܫܟܚܳܐ ܕܶܝܢ. ܘܰܠܚܰܪܬܳܐ ܚܳܠܛܳܐ ܨܠܽܘܬܳܐ ܒܕܶܡ̈ܥܶܝܗ̇܆ ܘܰܡܦܺܝܣܳܐ ܠܶܗ ܠܣܳܗܕܳܐ ܕܰܢܣܰܝܥܺܝܗ̇ ܒܬܰܟܫܶܦܬܳܐ. ܘܡܶܚܕܳܐ ܒܰܪ ܫܳܥܬܶܗ ܗܽܘ ܐܺܝܙܓܰܕܳܐ܆ ܠܘܳܬ ܗܳܝ ܡܰܢ ܟܰܕ ܩܳܪܝܳܐ܆ ܠܘܳܬ ܗܳܢܽܘܢ ܕܶܝܢ ܐ̱ܚܪ̈ܳܢܶܐ. ܐܳܦ ܟܰܕ ܫܰܬܺܝܩܺܝܢ܆ ܗܽܘ ܡܶܢ ܢܰܦܫܶܗ ܐܳܬܶܐ. ܘܰܠܟܽܠܗܽܘܢ ܚܰܕܽܘܬܳܐ. ܘܰܫܪܳܝܳܐ ܕܡܶܢ ܒܺܝ̈ܫܳܬܳܐ ܡܩܰܒܶܠ. ܘܰܠܗܳܢܽܘܢ ܕܥܳܐܠܺܝܢ ܡܫܰܦܶܝܢ ܕܽܘܟܬܳܐ ܗܳܢܽܘܢ ܕܡܶܬܚܰܠܡܺܝܢ ܘܢܳܦܩܺܝܢ܆ ܟܰܕ ܚܽܘܠܡܳܢܳܐ ܕܺܝܠܗܽܘܢ ܝܳܗܒܺܝܢ ܡܶܫܟܳܢܳܐ ܫܰܪܺܝܪܳܐ ܠܗܳܢܽܘܢ܆ ܕܗܳܝ ܕܳܐܦ ܗܶܢܽܘܢ ܡܶܫܬܘܶܝܢ ܠܗܳܠܶܝܢ ܕܡܶܣ̈ܬܰܟܝܳܢ.
ܠܟܽܠܗܽܘܢ ܡܰܢ ܗܳܟܺܝܠ ܟܽܘܪ̈ܗܳܢܶܐ܆ ܡܫܰܟܶܢ ܚܽܘܠ̈ܡܳܢܶܐ ܦܫܺܝ̈ܩܶܐ ܘܥܰܬܺܝܪ̈ܶܐ܆ ܥܰܒܕܳܐ ܫܰܪܺܝܪܳܐ ܕܰܐܠܳܗܳܐ ܕܽܘܡܛܝܘܤ. ܘܰܠܫܶܠܚ̈ܶܐ ܕܫ̈ܺܐܕܶܐ ܒܺܝ̈ܫܶܐ܆ ܐܰܝܟ ܕܰܠܕܶܒܳܒ̈ܶܐ ܛܳܪܶܕ. ܝܰܬܺܝܪܳܐܺܝܬ ܕܶܝܢ܆ ܣܽܘ̈ܕܳܩܶܐ ܗܳܠܶܝܢ ܕܥܳܒܪܺܝܢ ܡܶܢ ܥܰܛܡܳܐ ܥܕܰܡܳܐ ܠܩܽܘܪܨܠܳܐ܆ ܐܰܘ ܗܰܦܟ̈ܶܐ܆ ܐܰܘ ܟܺܐܒ̈ܶܐ ܕܓܰܪ̈ܡܶܐ ܕܶܐܙܕܰܥܙܰܥܘ ܐܰܘ ܐܶܬܪܰܥܪܰܥܘ܆ ܐܰܘ ܕܰܓ̈ܝܳܕܶܐ ܕܰܢܫ̣ܰܘ܆ ܐܰܘ ܕܘܰܪ̈ܺܝܕܶܐ ܕܶܐܬܩܦܶܣܘ܆ ܚܠܺܝ̈ܡܶܐ. ܘܰܡܫܰܡ̈ܠܰܝܳܐ ܩܰܠܺܝܠܳܐܺܝܬ ܝܰܬܺܝܪ ܡܶܢ ܡܶܠܬܳܐ ܗܳܦܶܟ ܡܩܺܝܡ.
ܠܺܝ ܡܶܣܬܰܒܪܳܐ܆ ܕܦܽܘܪܥܳܢܳܐ ܕܥܰܡܠܶܗ ܝܰܗܒܳܗ̇ ܐܰܠܳܗܳܐ ܠܗܳܕܶܐ܆ ܝܺܕܺܝܥܳܐܺܝܬ ܘܰܐܝܟ ܕܰܒܝܰܬܺܝܪܳܐ܆ ܠܢܰܟܦܽܘܬܶܗ ܘܰܠܥܳܢܘܳܝܽܘܬܶܗ ܗܳܝ ܕܰܠܘܳܬ ܪ̈ܓܺܝܓܳܬܳܐ ܕܺܝܠܶܗ ܕܣܳܗܕܳܐ. ܫܳܡܰܥ ܐ̱ܢܳܐ ܓܶܝܪ ܥܠܰܘܗ̱ܝ ܕܟܰܕ ܐܺܝܬܰܘܗ̱ܝ ܗ̱ܘܳܐ ܒܒܶܣܪܳܐ܆ ܟܰܕ ܕܽܘܒܳܪܳܐ ܦܺܝܠܘܣܘܦܳܝܳܐ ܘܡܰܕܒܪܳܝܳܐ ܡܶܬܥܰܢܘܶܐ ܗ̱ܘܳܐ܆ ܡܕܰܪܶܫ ܗ̱ܘܳܐ܆ ܘܰܡܢܰܦܶܩ ܗܽܘ ܠܶܗ ܒܝܰܕ ܥܰܡ̈ܠܶܐ ܣܳܥܽܘܪ̈ܳܝܶܐ܆ ܘܒܰܡܥܰܪܬܳܐ ܥܳܡܰܪ ܗ̱ܘܳܐ܆ ܘܒܳܬܰܪ ܚܰܝ̈ܶܐ ܠܳܐ ܚܠܺܝ̈ܛܶܐ ܪܳܕܶܦ ܗ̱ܘܳܐ. ܕܰܐܝܠܶܝܢ ܕܶܝܢ ܕܕܰܐܝܟ ܗܳܠܶܝܢ ܐܺܝܬܰܝܗܽܘܢ܆ ܗܰܕܳܡ̈ܶܐ ܗܳܢܽܘܢ ܡܰܥ̈ܒܕܰܝ ܝܰܠܕܳܐ ܕܰܠܘܳܬ ܥܰܛܡ̈ܳܬܳܐ܆ ܟܰܕ ܒܢܰܟܦܽܘܬܳܐ ܘܒܰܡܚܰܡܣܢܳܢܽܘܬܳܐ ܗܘ̣ܰܘ ܡܺܝ̈ܬܶܐ܆ ܝܰܒܺܝ̈ܫܶܐ ܡܶܕܶܡ ܐܰܝܟܰܢ ܕܗܽܘ ܐܺܝܬܰܝܗܽܘܢ܆ ܕܠܳܐ ܦܺܐܪ̈ܶܐ ܟܺܝܬ. ܘܰܕܠܳܐ ܝܰܠܕܳܐ܆ ܕܠܰܐܠܳܗܳܐ ܐܶܬܟܰܗܰܢܘ. ܘܰܐܝܟ ܕܰܠܡܺܐܡܰܪ. ܒܰܕܡܽܘܬ ܦܰܘܠܽܘܤ ܡܰܙܥܩܺܝܢ܆ ܕܛܳܒ ܗ̱ܘ̣ ܠܶܗ ܠܓܰܒܪܳܐ ܕܗܳܟܰܢܳܐ ܢܶܗܘܶܐ ܐܺܝܬܰܘܗ̱ܝ[6]. ܐܰܝܟܰܢܳܐ ܕܗܳܝ ܕܰܠܩܽܘܒܠܳܐ ܕܗܳܢܽܘܢ ܕܰܡܫܰܪ̈ܝܳܢ ܐܺܝ̈ܕܰܝܗܽܘܢ܆ ܗܳܢܰܘ ܕܶܝܢ ܕܗܳܢܽܘܢ ܕܠܳܐ ܦܳܠܚܺܝܢ ܥܰܡ̈ܠܶܐ ܗܳܢܽܘܢ ܕܰܡܝܰܬܪܽܘܬܳܐ܆ ܡܶܬܛܰܢ̈ܦܳܢ ܥܰܛܡ̈ܳܬܗܽܘܢ ܒܗܰܢܺܝ̈ܐܘܳܬܐ ܪ̈ܰܛܺܝܒܳܬܳܐ. ܗܳܟܰܢܳܐ ܓܶܝܪ ܒܕܽܘܟ ܐܳܦ ܚܰܙܩܺܝܐܶܝܠ ܗܰܘ ܢܒܺܝܳܐ ܐܳܡܰܪ: ܟܰܕ ܓܰܠ̈ܝܳܬܳܐ ܡܩܺܝܡ ܠܗܶܝܢ ܠܥܶܠ̈ܠܬܐ ܕܚܽܘܪܒܳܐ ܗܰܘ ܕܰܥܬܺܝܕ ܗ̱ܘܳܐ ܕܢܶܬܬܰܝܬܶܐ ܥܰܠ ܐܽܘܪܶܫܠܶܡ[7]. ܘܰܠܟܽܠܗܽܘܢ ܐܶ݀ܩܛܽܘܠ. ܟܽܠܗܶܝܢ ܐܺܝ̈ܕܰܝܳܐ ܢܶܬܪ̈ܰܦܝܳܢ. ܘܟܽܠܗܶܝܢ ܥܰܛܡ̈ܳܬܳܐ ܢܶܬܛܰܢ̈ܦܳܢ ܒܪܰܛܺܝܒܽܘܬܳܐ. ܟܒܰܪ ܕܶܝܢ ܡܰܠܽܘܢ ܕܶܝܢ ܕܗܳܝ ܕܝܰܬܺܝܪ ܫܰܪܺܝܪܳܐ ܢܺܐܡܰܪ܆ ܕܠܰܘ ܒܰܠܚܽܘܕ ܡܶܛܽܠ ܦܽܘܠܚܳܢܳܐ ܢܰܟܦܳܐ ܘܣܳܥܽܘܪܳܝܳܐ ܕܰܡܝܰܬܪܽܘܬܳܐ܆ ܐܺܝܩܳܪܳܐ ܘܫܽܘܟܳܢܳܐ ܫܰܩܠܳܗ̇ ܣܳܗܕܳܐ ܕܽܘܡܛܝܘܤ܆ ܠܗܳܝ ܕܢܶܥܒܶܕ ܐܳܣܝܽܘܬܳܐ ܕܟܽܘܪ̈ܗܳܢܶܐ ܗܳܠܶܝܢ ܕܰܠܘܳܬ ܥܰܛܡ̈ܳܬܳܐ܆ ܐܶܠܳܐ ܐܳܦ ܡܶܛܽܠܳܬܳܗ̇ ܕܺܝܠܳܗ̇ ܕܰܡܡܰܠܠܽܘܬ ܐܰܠܳܗܽܘܬܳܐ ܕܝܶܫܽܘܥ.
ܡܗܰܝܡܶܢ ܗ̱ܘܳܐ ܓܶܝܪ ܕܰܡܫܺܝܚܳܐ. ܡܶܢ ܥܰܛܡ̈ܳܬܳܐ ܕܰܐܒܪܳܗܳܡ ܘܕܺܐܝܣܚܳܩ ܘܰܕܝܰܥܩܽܘܒ܆ ܘܡܶܢ ܫܰܪܒܬܳܐ ܕܺܝܗܽܘܕܳܐ ܐܶܬܺܝܠܶܕ ܒܰܒܣܰܪ܆ ܟܰܕ ܡܶܢ ܟܝܳܢܳܐ ܕܺܝܠܰܢ ܢܣܰܒ܆ ܘܰܕܗܽܘ ܟܰܕ ܗܽܘ ܐܺܝܬܰܘܗ̱ܝ ܐܰܠܳܗܳܐ ܕܥܰܠ ܟܽܠ. ܠܗܳܕܶܐ ܐܳܦ ܐܰܒܪܳܗܳܡ. ܟܰܕ ܡܶܢ ܪܽܘܚܳܐ ܗܰܘ ܕܓܳܠܶܐ ܠܳܐ ܝܺܕܺܝ̈ܥܳܬܳܐ ܘܕܰܥ̈ܬܺܝܕܳܢ ܩܰܕܶܡ ܐܶܬܶܐܪܶܙ܆ ܟܰܕ ܠܥܰܒܕܳܐ ܕܺܝܠܶܗ ܒܰܪ ܒܰܝܬܳܐ ܬܳܒܰܥ ܗ̱ܘܳܐ ܕܢܶܬܶܠ ܫܽܘܘ̈ܕܳܝܶܐ ܕܡܰܘ̈ܡܳܬܳܐ ܐܳܡܰܪ ܗ̱ܘܳܐ: ܣܺܝܡ ܐܺܝܕܳܐ ܕܺܝܠܳܟ ܬܚܶܝܬ ܥܰܛܡܳܐ ܕܺܝܠܝ܆ ܘܰܐ݀ܘܡܶܝܟ ܒܡܳܪܝܳܐ ܐܰܠܳܗܳܐ ܕܰܫܡܰܝܳܐ ܘܕܰܐܪܥܳܐ[8]. ܟܰܕ ܡܳܪܝܳܐ ܐܰܠܳܗܳܐ ܕܰܫܡܰܝܳܐ ܘܕܰܐܪܥܳܐ. ܡܗܰܝܡܶܢ ܗ̱ܘܳܐ ܕܺܐܝܬܰܘܗ̱ܝ܆ ܡܶܠܬܳܐ ܗܰܘ ܕܰܥܬܺܝܕ ܗ̱ܘܳܐ ܕܢܶܬܒܰܣܰܪ ܡܶܢ ܙܰܪܥܳܐ ܕܺܝܠܶܗ. ܠܗܳܕܶܐ ܐܳܦ ܝܰܥܩܽܘܒ ܡܩܰܕܶܡ ܗ̱ܘܳܐ ܘܳܐܡܰܪ: ܟܰܕ ܗܳܠܶܝܢ ܐ̱ܚܪ̈ܳܝܳܬܳܐ ܣܳܐܶܩ ܗ̱ܘܳܐ܆ ܘܠܰܒ̈ܢܰܝܳܐ ܕܺܝܠܶܗ ܒܽܘܪ̈ܟܳܬܳܐ ܗܳܠܶܝܢ ܡܰܦ̈ܩܳܢܝܳܬܳܐ ܐܳܡܰܪ ܗ̱ܘܳܐ: ܗܳܠܶܝܢ ܕܒܰܛܢ̈ܳܢ ܗ̱ܘܰܝ̈ ܐ̱ܪܳܙܳܢܳܐܺܝܬ ܢܒܺܝܽܘܬܳܐ ܕܗܰܘ ܕܰܥܬܺܝܕ. ܠܳܐ ܢܶܓܡܰܪ ܪܺܝܫܳܢܳܐ ܡܶܢ ܝܺܗܽܘܕܳܐ܆ ܘܰܡܕܰܒܪܳܢܳܐ ܕܡܶܢ ܥܰܛܡ̈ܳܬܳܐ ܕܺܝܠܶܗ܆ ܥܕܰܡܳܐ ܕܢܺܐܬܶܐ ܗܰܘ ܕܠܶܗ ܢܛܺܝܪܳܐ܆ ܘܗܽܘ ܐܺܝܬܰܘܗ̱ܝ ܣܽܘܟܳܝܳܐ ܕܥܰܡܡ̈ܶܐ[9].
ܡܫܺܝܚܳܐ ܕܶܝܢ ܐܺܝܬܰܘܗ̱ܝ܆ ܗܰܘ ܕܰܒܒܶܣܪܳܐ ܡܰܢ ܡܶܢ ܐܰܒܳܗ̈ܳܬܳܐ ܘܡܶܢ ܓܙܽܘܪܬܳܐ ܡܶܬܝܰܒܰܠ ܘܢܳܚܶܬ܆ ܘܕܰܢܫܰܡܶܫ ܪܶܚܡܰܬ ܐ̱ܢܳܫܳܐܺܝܬ ܠܰܡܕܰܒܪܳܢܽܘܬܳܐ ܕܰܐܝܟ ܗܳܕܶܐ ܩܳܒܶܠ ܥܠܰܘܗ̱ܝ. ܐܺܝܬܰܘܗ̱ܝ ܕܶܝܢ ܗܽܘ܆ ܣܽܘܟܳܝܳܐ ܘܣܰܒܪܳܐ ܕܥܰܡܡ̈ܶܐ. ܡܶܛܽܠ ܗܳܕܶܐ ܦܰܘܠܽܘܤ. ܟܰܕ ܠܪ̈ܽܘܡܳܝܶܐ ܟܳܬܶܒ. ܐܳܡܰܪ ܗ̱ܘܳܐ: ܐܳܡܰܪ ܐ̱ܢܳܐ ܕܶܝܢ. ܕܰܡܫܺܝܚܳܐ ܝܶܫܽܘܥ ܡܫܰܡܫܳܢܳܐ ܗܘ̣ܳܐ ܕܰܓܙܽܘܪܬܳܐ܆ ܚܠܳܦ ܫܪܳܪܶܗ ܕܰܐܠܳܗܳܐ܆ ܠܰܡܫܰܪܳܪܽܘ ܠܡܽܘܠ̈ܟܳܢܶܐ ܕܰܐܒܳܗ̈ܳܬܳܐ܆ ܥܰܡܡ̈ܶܐ ܕܶܝܢ ܚܠܳܦ ܪ̈ܰܚܡܶܐ܆ ܢܫܰܒܚܽܘܢ ܠܰܐܠܳܗܳܐ[10]. ܘܬܽܘܒ. ܗܳܢܽܘܢ ܕܕܺܝܠܗܽܘܢ ܐܺܝܬܰܝܗܽܘܢ ܐܰܒܳܗ̈ܳܬܳܐ܆ ܘܡܶܢܗܽܘܢ ܐܺܝܬܰܘܗ̱ܝ ܡܫܺܝܚܳܐ ܗܰܘ ܕܒܰܒܣܰܪ܆ ܗܰܘ ܕܺܐܝܬܰܘܗ̱ܝ ܐܰܠܳܗܳܐ ܕܥܰܠ ܟܽܠ ܡܒܰܪܟܳܐ ܕܰܠܥܳܠܡܺܝܢ ܐܰܡܺܝܢ[11].
ܗܳܠܶܝܢ ܡܰܠܶܦ ܠܰܢ ܟܰܕ ܒܝܰܕ ܐܳܣܺܝ̈ܘܳܬܳܐ ܬܶܐܘܠܘܓܝܣܐ ܥܳܒܶܕ ܣܳܗܕܳܐ ܕܘܡܛܝܘܤ܆ ܕܡܶܢ ܐܰܬܪ̈ܰܘܳܬܳܐ ܗܳܠܶܝܢ ܕܰܚܕܳܪ̈ܰܝ ܩܘܪܘܤ ܡܕܺܝܢ̱ܬܳܐ ܐܺܝܬܰܘܗ̱ܝ܆ ܘܦܽܘܪܩܳܢܳܐܺܝܬ ܐܶܬܳܐ ܥܡܰܪ ܠܘܳܬܰܢ܆ ܘܰܡܦܰܪܣܶܐ ܘܰܡܒܰܙܰܚ ܒܝܰܕ ܗܳܠܶܝܢ ܕܶܐܡܰܪܢܰܢ܆ ܕܺܝܠܶܗ ܓܶܝܪ ܕܣܳܗܕܳܐ ܐܺܝܬܰܝܗܶܝܢ ܗ̱ܘܰܝ̈ ܗܳܠܶܝܢ ܡ̈ܶܠܶܐ ܘܠܰܘ ܕܺܝܠܰܢ܆ ܠܪܰܫܺܝܥܳܐ ܬܶܐܽܘܕܽܘܪܺܝܛܽܘܤ ܗܰܘ ܕܰܠܒܰܪ ܡܶܢ ܢܳܡܽܘܣܳܐ ܝܺܬܶܒ ܒܪܺܝܫ ܗܳܝ ܡܕܺܝܢ̱ܬܳܐ܆ ܘܗܺܝ ܟܰܕ ܗܺܝ ܚܰܣܺܝܪܽܘܬ ܪܶܥܝܳܢܳܐ ܒܰܕܡܽܘܬ ܢܶܣܛܽܘܪܺܝܽܘܤ ܐܶܬܟܪܰܗ܆ ܘܰܬܪܶܝܢ ܟܝܳܢ̈ܶܐ ܡܶܢ ܒܳܬܰܪ ܚܕܳܝܽܘܬܳܐ ܠܗܰܘ ܚܰܕ ܡܫܺܝܚܳܐ ܐܰܠ̣ܶܦ. ܘܰܠܦܽܘܠܚܳܢ ܒܰܪܢܳܫܳܐ ܐܰܚܬܶܗ ܠܐ̱ܪܳܙܳܐ ܗܰܘ ܕܰܐܝܟ ܕܒܰܫܪܳܪܳܐ ܪܰܒܳܐ ܘܰܐܠܳܗܳܝܳܐ܆ ܗܰܘ ܕܳܐܦ ܠܪ̈ܺܝܫܰܝ ܐܰܒܳܗ̈ܳܬܳܐ ܐܰܒܪܳܗܳܡ ܘܺܐܝܣܚܳܩ ܘܝܰܥܩܽܘܒ ܐܰܠܳܗܳܝܳܐ ܡܶܬܚܙܶܐ ܗ̱ܘܳܐ ܘܡܶܬܗܰܝܡܰܢ ܘܗܳܕܶܐ ܟܰܕ ܒܛܽܘܦ̈ܣܶܐ ܘܰܒܪ̈ܶܡܙܶܐ ܩܳܕܶܡ ܗ̱ܘܳܐ ܡܶܬܬܰܘܕܰܥ.
ܟܰܕ ܗܳܟܺܝܠ ܒܕܰܐܝܟ ܗܳܕܶܐ ܐܳܣܝܽܘܬܳܐ ܘܡܰܠܦܳܢܽܘܬܳܐ ܕܣܳܗܕܳܐ ܡܶܬܒܰܣܡܺܝܢܰܢ܆ ܐܶܡܰܬܝ ܕܰܒܥܰܛܡܳܐ ܢܶܬܰܐܣܶܐ. ܐܰܘ ܒܗܰܕܳܡܳܐ ܐ̱ܚܪܺܢܳܐ ܕܦܰܓܪܳܐ܆ ܠܳܐ ܒܛܰܣ̈ܶܐ ܕܣܺܐܡܳܐ ܐܰܘ ܕܕܰܗܒܳܐ ܢܝܰܩܪܺܝܘܗ̱ܝ ܒܰܠܚܽܘܕ܆ ܕܺܐܝܬ ܠܗܽܘܢ ܕܰܓܠܺܝܦܳܐ ܒܗܽܘܢ ܗܺܝ ܐܳܣܝܽܘܬܳܐ܆ ܘܗܽܘ ܗܰܕܳܡܳܐ ܗܰܘ ܕܰܗܘ̣ܳܐ ܚܠܺܝܡܳܐ. ܐܶܠܳܐ ܠܗܰܕܳܡ̈ܶܐ ܕܺܝܠܰܢ. ܒܕܰܟܝܽܘܬܳܐ ܢܗܰܕܰܪ܆ ܘܝܰܬܺܝܪ ܢܰܨܺܝ̈ܚܶܐ ܛܳܒ ܡܶܢ ܕܰܗܒܳܐ ܘܛܳܒ ܡܶܢ ܣܺܐܡܳܐ ܢܩܺܝܡ ܐܶܢܽܘܢ. ܐܰܘ ܟܰܕ ܒܙܽܘܘܳܓܳܐ ܡܝܰܩܪܳܐ ܘܰܒܥܰܪܣܳܐ ܕܟܺܝܬܳܐ ܡܦܰܓܕܺܝܢܰܢ ܠܶܗ ܠܚܺܐܦܳܐ ܕܗܳܠܶܝܢ[12]. ܗܰܘ ܢܳܡܽܘܣܳܝ ܢܰܦܫܶܗ܆ ܐܰܘ ܟܰܕ ܒܰܒܬܽܘܠܬܳܐ ܡܡܺܝܬܺܝܢ ܚ̱ܢܰܢ ܠܗܽܘܢ ܘܰܡܩܰܕܫܺܝܢ ܚ̱ܢܰܢ ܠܺܐܝܩܳܪܶܗ ܕܗܰܘ ܕܣܰܪܶܩ ܗܽܘ ܠܶܗ[13]܆ ܘܡܶܢ ܥܰܛܡ̈ܳܬܶܗ ܕܰܐܒܪܳܗܳܡ ܡܶܛܽܠܳܬܰܢ ܡܶܬܝܰܒܰܠ.
ܠܰܘ ܗܳܟܰܢܳܐ ܓܶܝܪ ܝܳܕܥܳܐ ܠܰܡܨܰܒܳܬܽܘ ܥܶܙܰܩܬܳܐ ܕܕܰܗܒܳܐ ܐܰܘ ܥܶܩܳܐ܆ ܐܰܝܟ ܡܳܐ ܕܫܰܘܬܳܦܽܘܬܳܐ ܢܰܟܦܬܳܐ ܟܰܕ ܡܶܬܢܰܛܪܳܐ܆ ܘܰܒܬܽܘܠܽܘܬܳܐ ܕܰܒܝܰܕ ܥܳܢܘܳܝܽܘܬܳܐ ܘܰܢܙܺܝܪܽܘܬܳܐ ܡܡܰܟܟ̣ܳܐ ܠܡܰܩܪܒܳܢܽܘܬܳܐ ܘܰܠܚܺܐܦܳܐ ܕܒܶܣܪܳܐ܆ ܘܰܡܪܰܚܡܳܢܽܘܬܳܐ ܕܥܰܠ ܡܶܣ̈ܟܺܢܶܐ ܟܰܕ ܒܗܳܠܶܝܢ ܡܶܬܚܰܠܛܳܐ܆ ܘܡܰܫܩܝܳܐ ܘܢܳܛܪܳܐ ܠܶܗ ܠܠܰܡܦܺܝܕܳܐ ܕܰܡܝܰܬܪ̈ܳܬܳܐ ܕܠܳܐ ܢܶܕܥܰܟ܆ ܘܰܡܩܺܝܡܳܐ ܠܶܗ ܠܰܐܠܳܗܳܐ ܡܚܰܣܝܳܢܳܐ. ܡܥܰܕܰܪ ܓܶܝܪ ܝܰܬܺܝܪ ܡܛܰܝܒܳܐܺܝܬ ܗܰܘ ܪܳܚܶܡ ܐ̱ܢܳܫܳܐ܆ ܠܗܳܢܽܘܢ ܕܰܡܥܰܕܪܺܝܢ ܠܗܳܢܽܘܢ ܕܒܰܣܢܺܝܩܽܘܬܳܐ ܐܺܝܬܰܝܗܽܘܢ܆ ܘܠܳܐ ܡܰܗܡܶܝܢ ܡܶܢ ܫܰܘܝܽܘܬ ܓܶܢܣܳܐ ܕܺܝܠܗܽܘܢ. ܗܳܠܶܝܢ ܡܢܺܝ̈ܚܳܢ ܠܣܳܗ̈ܕܶܐ. ܗܳܠܶܝܢ ܠܰܡܫܺܝܚܳܐ ܐܰܠܳܗܗܽܘܢ ܕܣܳܗ̈ܕܶܐ. ܒܳܬܰܪ ܗܳܠܶܝܢ. ܚܦܺܝܛܳܐܺܝܬ܆ ܘܥܰܡ ܟܽܠܳܗ̇ ܝܰܨܺܝܦܽܘܬܳܐ ܢܶܪܕܽܘܦ. ܘܠܰܨ̈ܠܰܘܳܬܗܽܘܢ ܕܩܰܕܺܝ̈ܫܶܐ ܗܳܠܶܝܢ ܕܰܚܠܳܦܰܝܢ ܡܳܬܚܺܝܢ܆ ܝܰܬܺܝܪ ܚܰܝ̈ܠܬܳܢܝܳܬܳܐ ܢܶܥܒܶܕ܆ ܗܶܢܶܝܢ ܓܶܝܪ ܗܳܠܶܝܢ܆ ܠܟܽܠ ܟܽܘܪܗܳܢܳܐ ܘܽܐܘܠܨܳܢܳܐ ܛܥܺܝܢ ܡܰܘܬܳܐ ܛܳܪ̈ܕܳܢ ܡܶܢ ܡܕܺܝܢ̱ܬܳܐ ܗܳܕܶܐ܆ ܐܰܝܟܰܢܳܐ ܟܺܝܬ ܕܗܳܠܶܝܢ ܕܡܶܢܰܢ ܡܶܣܬܰܥܪ̈ܳܢ ܗ̱ܘܰܝ̈܆ ܡܰܝ̈ܬܝܳܢ ܗ̱ܘܰܝ̈ ܪܽܘܓܙܳܐ ܣܰܓܺܝܳܐܐ. ܟܽܠܰܢ ܓܶܝܪ ܒܟܽܠ ܝܽܘܡ. ܠܒܺܝܫܽܘܬܳܐ ܡܪܰܒܶܝܢ ܚ̱ܢܰܢ܆ ܟܰܕ ܥܰܠ ܥܽܘܬܪܳܐ ܕܒܰܣܺܝܡܽܘܬܶܗ ܕܰܐܠܳܗܳܐ ܘܥܰܠ ܡܰܓܪܰܬ ܪܽܘܚܶܗ ܡܰܒܣܶܝܢ ܚ̱ܢܰܢ.
ܢܶܣܬܰܪܗܰܒ ܗܳܟܺܝܠ ܠܡܶܫܬܰܚܠܳܦܽܘ܆ ܘܠܰܡܚܰܘܳܝܽܘ ܦܺܐܪ̈ܶܐ ܕܰܬܝܳܒܽܘܬܳܐ܆ ܥܰܕ ܠܳܐ ܡܰܘܦܝܳܐ܆ ܐܶܠܳܐ ܒܰܡܫܰܪܬܚܽܘܬܳܐ ܣܺܝܡܳܐ܆ ܛܰܝܒܽܘܬܳܐ ܗܳܝ ܕܠܳܐ ܟܰܝܠܳܐ ܕܢܰܓܺܝܪܽܘܬ ܪܽܘܚܳܐ܆ ܥܰܕ ܡܰܨ̈ܝܳܢ ܚܰܝܠܳܐ ܨ̈ܠܰܘܳܬܳܐ ܗܳܠܶܝܢ ܕܣܳܗ̈ܕܶܐ. ܬܶܗܘܶܐ ܕܶܝܢ. ܕܳܐܦܠܳܐ ܛܰܝܒܽܘܬܳܐ ܬܶܬܡܫܰܚ ܠܰܢ܆ ܐܶܠܳܐ ܕܠܳܐ ܫܽܘܠܳܡ ܬܟܰܬܰܪ ܠܰܢ܆ ܐܳܦܠܳܐ ܕܒܰܚ̈ܛܳܗܶܐ ܕܺܝܠܰܢ ܚܰܝܠܬܳܢܽܘܬܗܶܝܢ ܕܬܰܟܫ̈ܦܳܬܳܐ ܬܶܬܡܚܶܠ ܘܬܶܙܕܟܶܐ ܒܛܰܝܒܽܘܬܳܐ. ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐܠܳܗܳܐ ܪܰܒܳܐ ܘܦܳܪܽܘܩܢ ܝܶܫܽܘܥ ܡܫܺܝܚܳܐ. ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ. ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ܆ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܚܰܡܫܺܝܢ ܘܚܰܕ.