ܡܺܐܡܪܳܐ ܕܚܰܡܫܺܝܢ.

ܥܰܠ ܩܰܕܺܝܫܳܐ ܠܶܐܘܰܢܛܺܝܽܘܤ ܣܳܗܕܳܐ

50: ܠܡܶܫܬܰܩ ܨܳܒܶܐ ܗ̱ܘܺܝܬ ܫܰܦܺܝܪ ܕܰܥܘ܆ ܟܰܕ ܚܕܳܐ ܙܒܰܢ ܩܰܠܶܣܬܶܗ ܠܰܙܪܺܝܙܳܐ ܠܶܐܘܰܢܛܺܝܽܘܤ. ܚܳܙܶܐ ܐ̱ܢܳܐ ܕܶܝܢ ܠܰܕܡܳܐ ܕܺܝܠܶܗ ܕܰܡܡܰܠܶܠ ܒܺܝ܆ ܒܰܕܡܽܘܬ ܕܡܳܐ ܗܰܘ ܕܗܳܒܶܝܠ^[1]܆ ܕܗܰܘ ܕܰܫܡܰܥ ܐܰ‌ܠܳܗܳܐ ܩܳܠܶܗ܆ ܘܰܠܠܶܫܳܢܳܐ ܐܶ݀ܚܽܘܕ ܠܳܐ ܡܨܶܐ ܐ̱ܢܳܐ. ܘܛܳܒ ܟܺܐܢܳܐܺܝܬ. ܕܡܳܐ ܓܶܝܪ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ ܐܶܬܶܐܫܶܕ܆ ܝܰܬܺܝܪ ܡܶܢ ܟܽܠ ܡܠܺܝܠܽܘܬܳܐ ܐܺܝܬܰܘܗ̱ܝ ܡܡܰܠܠܳܢܳܐ. ܐܰܝܟܰܢܳܐ ܓܶܝܪ ܠܳܐ ܢܰܙܥܶܩ ܡܶܕܶܡ ܪܰܒܳܐ ܘܰܛܒܺܝܒܳܐ ܘܡܶܫܬܰܡܥܳܢܳܐ܆ ܕܡܳܐ ܕܚܰܝܽܘܬܳܐ ܡܠܺܝܠܬܳܐ܆ ܕܰܡܠܺܝܠܳܐܺܝܬ ܘܨܶܒܝܳܢܳܐܺܝܬ ܠܰܐܠܳܗܳܐ ܘܡܶܠܬܳܐ ܡܶܬܢܰܩܶܐ.

ܐܰܝܠܶܝܢ ܗܳܟܺܝܠ ‌ܐܺܝܬܰܝܗܶܝܢ܆ ܗܳܠܶܝܢ ܕܫܳܡܥܺܝܢܰܢ ܠܶܗ ܕܡܰܙܥܶܩ. ܕܙܳܕܶܩ ܕܢܰܗܡܶܐ ܡܶܢ ܒܶܣܪܳܐ. ܐܰܝܟ ܐܰܝܢܳܐ ܕܥܳܒܰܪ ܘܚܳܡܶܐ܆ ܢܶܬܬܰܘܣܰܦ ܕܶܝܢ ܥܰܠ ܕܽܘܟܳܝܳܐ ܕܢܰܦܫܳܐ܆ ܘܕܰܢ݀ܣܰܟܶܐ ܠܚܰܝ̈ܶܐ ܡܶܬܗܰܘ̈ܢܳܢܶܐ ܘܠܳܐ ܗܽܘ̈ܠܳܢܳܝܶܐ ܗܳܠܶܝܢ ܕܒܰܩܝܳܡܬܳܐ. ܐܶܢ ܓܶܝܪ ܒܚܰܝ̈ܶܐ ܗܳܠܶܝܢ ܡܣܰܒܪܺܝܢܰܢ ܒܰܡܫܺܝܚܳܐ ܒܰܠܚܽܘܕ܆ ܝܰܬܺܝܪ ܕܳܘܰܝ̈ܳܐ ܐܺܝܬܰܝܢ ܛܳܒ ܡܶܢ ܟܽܠܗܽܘܢ ܒܢܰܝ̈ܢܳܫܳܐ^[2]. ܣܳܦܶܩ ܗ̱ܘܳܐ ܡܰܢ ܓܶܝܪ ܡܫܺܝܚܳܐ ܕܡܺܝܬ ܘܩܳܡ܆ ܕܰܠܘܳܬ ܣܰܒܪܳܐ ܗܰܘ ܢܫܰܪܰܪ ܐܶܢܽܘܢ܆ ܠܗܳܢܽܘܢ ܕܗܰܝܡܶܢܘ ܒܶܗ ܘܶܐܬܩܒܰܪܘ ܥܰܡܶܗ ܐܰܟܚܕܳܐ ܒܡܰܥܡܽܘܕܺܝܬܳܐ ܘܩܳܡܘ ܐܰܟܚܕܳܐ ܥܰܡܶܗ^[3]. ܣܺܝܡܳܐ ܕܶܝܢ ܥܰܡ ܗܳܕܶܐ܆ ܐܳܦ ܡܰܠܦܳܢܽܘܬܳܐ ܕܰܟ̈ܬܳܒܶܐ. ܠܗܳܝ ܕܠܳܐ ܣܳܟ ܙܳܕܶܩ ܗ̱ܘܳܐ ܕܢܰܣܠܶܐ ܘܠܳܐ ܢܗܰܝܡܢܺܝܗ̇܆ ܟܰܕ ܢܦܺܝܚܰܬ ܡܶܢ ܐܰ‌ܠܳܗܳܐ ܐܺܝܬܶܝܗ̇. ܗܳܠܶܝܢ ܓܶܝܪ ܕܡܶܢ ܐܰ‌ܠܳܗܳܐ ܡܶܬܬܰܝ̈ܬܝܳܢ܆ ܠܥܶܠ ܡܶܢ ܟܽܠܶܗ ܚܶܪܝܳܢܳܐ ܘܦܽܘܫܳܟܳܐ ܐܺܝܬܰܝܗܶܝܢ. ܗܳܝ ܕܶܝܢ ܕܳܐܦ ܬܰܟ̈ܬܽܘܫܰܝܗܽܘܢ ܕܣܳܗ̈ܕܶܐ܆ ܠܰܒ̈ܢܳܬ ܩ̈ܳܠܶܐ ܗܳܠܶܝܢ ܟܳܗ̈ܢܳܝܳܬܳܐ ܢܚܰܬܡܽܘܢ܆ ܐܰܝܟܰܢܳܐ ܠܰܘ ܢܰܗܺܝܪܳܐܺܝܬ ܡܚܰܘܝܳܐ܆ ܠܰܡܫܰܪܳܪܽܘܬܶܗ ܘܠܰܩܒܺܝܥܽܘܬܶܗ ܕܣܽܘܟܳܝܳܐ.

ܡܰܠܟܽܘܬܳܐ ܓܶܝܪ ܠܳܐ ܡܶܙܕܰܟܝܳܢܺܝܬܳܐ ܩܰܒܶܠܢܰܢ^[4]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ: ܠܳܐ ܐ̱ܢܳܫ ܗܳܟܺܝܠ ܗܳܢܳܐ ܟܽܠܶܗ ܢܶܗܘܶܐ ܚܰܣܺܝܪ ܗܰܘܢܳܐ ܘܠܳܐ ܡܫܰܘܬܦܳܐ ܕܟܽܠܶܗ ܣܽܘܟܳܠܳܐ܆ ܐܰܝܟܰܢܳܐ ܕܰܒܗܳܠܶܝܢ ܚܰܝ̈ܶܐ ܕܳܘ̈ܰܝܳܐ ܘܡܬܚ̈ܢܢܐ222܆ ܢܶܚܒܫܶܗ ܠܣܰܒܪܳܐ ܗܰܘ ܠܳܐ ܡܳܝܽܘܬܳܐ. ܘܰܕܗܳܟܰܢܳܐ ܐܺܝܬܰܘܗ̱ܝ ܪܽܘܚܳܢܳܐ܆ ܕܗܰܘ ܕܥܳܒܪܺܝܢ ܥܰܠ ܠܳܐ ܡܶܙܕܰܥܙܥܳܢܽܘܬܶܗ܆ ܚܰܫ̈ܶܐ ܐܰܬܠܺܝ̈ܛܶܐ ܗܳܠܶܝܢ ܕܰܚܠܳܦܰܘܗ̱ܝ. ܗܳܢܽܘܢ ܕܰܕܢܶܚܫܽܘܢ ܠܳܐ ܡܩܰܒܠܺܝܢ ܗ̱ܘܰܘ. ܐܰܘ ܟܰܕ ܡܩܰܒܠܺܝܢ ܗ̱ܘܰܘ܆ ܠܳܐ ܣܳܦܩܺܝܢ ܗ̱ܘܰܘ ܠܘܳܬ ܣܰܓܺܝܽܐܘܬܗܽܘܢ ܕܫܶܢ̈ܕܶܐ ܗܳܠܶܝܢ ܕܣܰܝܒܰܪܘ܆ ܐܶ‌ܠܽܘ ܠܳܐ ܕܰܡܫܺܝܚܳܐ ܗܰܘ ܐܰ‌ܠܳܗܶܗ ܕܣܰܒܪܳܐ ܒܗܽܘܢ ܡܶܬܟܰܬܰܫ ܗ̱ܘܳܐ.

ܗܳܠܶܝܢ ܘܕܰܐܝܟ ܗܳܠܶܝܢ ܡܡܰܠܶܠ ܠܰܢ ܕܡܶܗ ܘܚܰܝܠܬܳܢܳܐ ܘܰܙܪܺܝܙܳܐ ܕܣܳܗܕܳܐ ܠܶܐܘܰܢܛܺܝܽܘܤ. ܗܰܘ ܕܟܰܕ ܢܣܰܡܶܩ ܒܶܗ ܠܓܶܦܳܐ ܕܬܰܪܥܺܝܬܰܢ܆ ܠܰܫܡܰܝܳܐ ܢܶܦܪܰܚ܆ ܟܰܕ ܗܳܘܶܝܢ ܚ̱ܢܰܢ ܩܰܠܺܝ̈ܠܶܐ ܡܶܕܶܡ ܘܰܙܪ̈ܺܝܙܶܐ܆ ܒܝܰܕ ܦܽܘܠܚܳܢܳܐ ܕܰܡܝܰܬܪ̈ܳܬܳܐ܆ ܟܰܕ ܚܶܟܡܬܳܐ܆ ܙܰܕܺܝܩܽܘܬܳܐ܆ ܓܰܢ̱ܒܳܪܽܘܬܳܐ܆ ܢܰܟܦܽܘܬܳܐ ܣܳܥܪܺܝܢܰܢ. ܟܰܕ ܒܟܽܠܗܽܘܢ ܥܰܡ̈ܠܶܐ ܕܥܳܢܘܳܝܽܘܬܳܐ ܡܶܬܩܰܠܣܳܢܺܝܬܳܐ܆ ܠܰܐܓܽܘ̈ܢܶܐ ܕܣܳܗ̈ܕܶܐ. ܠܰܩܕܳܡ ܥܰܝ̈ܢܰܝܢ ܡܰܝܬܶܝܢ ܚ̱ܢܰܢ܆ ܘܳܐܦ ܚܢܰܢ ܠܰܢ ܗܳܠܶܝܢ ܠܳܚܫܺܝܢ ܚ̱ܢܰܢ܆ ܬܰܕܥܶܟ ܫܰܠܗܶܒܺܝܬܳܐ ܗܳܝ ܕܪܶܓܬܳܐ ܙܰܢܳܝܬܳܐ. ܟܰܕ ܡܶܢ ܒܶܣܪ̈ܰܝܗܽܘܢ ܕܫܰܦܺܝܪ̈ܰܝ ܕܶܚܠܬܳܐ ܡܶܬܟܰܚܕܳܐ܆ ܕܫܳܝܚܺܝܢ ܗ̱ܘܰܘ ܒܢܽܘܪܳܐ܆ ܬܶܬܪܕܶܐ ܢܰܦܫܳܐ ܚܠܺܝܡܽܘܬܳܐ ܘܚܺܝܨܽܘܬܳܐ܆ ܘܠܳܐ ܬܶܬܓܢܶܒ ܒܚܽܘ̈ܟܳܡܶܐ ܡܰܛܥ̈ܝܳܢܶܐ ܕܳܐܟܶܠܩܰܪܨܳܐ. ܡܶܢ ܡܥܰܙܝܳܢܽܘܬܗܽܘܢ ܕܰܙܪ̈ܺܝܙܶܐ ܗܳܝ ܕܠܽܘܩܒܰܠ ܛܪ̈ܽܘܢܶܐ܆ ܗܳܝ ܕܠܳܐ ܫܟܳܚܬܳܐ ܗ̱ܝ ܫܽܘܓܳܫܳܐ. ܐܳܦܠܐ ܗܳܝ ܕܓܰܪܡܳܐ܆ ܬܰܗܦܟܬܳܗ̇ ܐܰܘ ܫܰܚܠܶܦܬܶܗ.

ܬܶܬܦܰܓܰܕ ܠܳܐ ܣܰܒܥܽܘܬܳܐ ܕܪܶܚܡܰܬ ܟܶܣܦܳܐ ܘܰܕܥܳܠܽܘܒܽܘܬܳܐ܆ ܒܗܳܝ ܕܣܳܗ̈ܕܶܐ ܠܰܘ ܒܰܠܚܽܘܕ ܗܳܠܶܝܢ ܕܺܐܝܬ ܗ̱ܘܳܐ ܠܗܽܘܢ܆ ܐܶܠܳܐ ܐܳܦ ܗܽܘ ܒܶܣܪܗܽܘܢ ܐܰܦܶܩܘ ܠܦܽܘܩܕܳܢܳܐ ܗܰܘ ܕܳܐܡܰܪ ܗ̱ܘܳܐ ܠܗܽܘܢ: ܐܶܢ ܐ̱ܢܳܫ ܨܳܒܶܐ ܕܢܺܐܬܶܐ ܒܳܬܰܪܝ܆ ܢܶܟܦܽܘܪ ܒܢܰܦܫܶܗ ܘܢܶܫܩܽܘܠ ܨܠܺܝܒܶܗ ܘܢܶܩܰܦ ܠܺܝ^[5]. ܙܳܕܶܩ ܠܰܢ ܓܶܝܪ. ܕܠܳܐ ܢܶ݀ܥܠܽܘܒ ܠܩܰܪ̈ܺܝܒܰܝܢ܆ ܢ݀ܺܐܨܰܦ ܕܶܝܢ ܐܰܝܟ ܡܶܠܬܶܗ ܕܦܰܘܠܽܘܤ ܕܠܳܐ ܢܶܬܥܠܶܒ ܡܶܢ ܤܳܛܳܢܳܐ^[6]܆ ܐܳܦ ܓܶܝܪ ܟܡܳܐ ܟܺܝܬ ܕܰܠܩܰܪ̈ܺܝܒܰܝܢ ܢ݀ܣܰܓܶܦ ܗܳܢܳܐ ܟܽܠܶܗ ܡܶܢ ܫܺܐܕܳܐ ܒܺܝܫܳܐ ܡܶܣܬܰܓܦܺܝܢܰܢ. ܐܰܝܟܰܢܳܐ ܟܺܝܬ ܕܗܳܝ ܕܠܰܐ̱ܚܪ̈ܳܢܶܐ ܡܣܰܓܦܺܝܢܰܢ ܛܰܥܝܳܐ ܠܰܢ ܕܰܚܢܰܢ ܠܰܢ ܫܰܪܺܝܪܳܐܺܝܬ ܡܣܰܓܦܺܝܢܰܢ.

ܒܗܳܠܶܝܢ ܠܳܐ ܐܶܙܕܟܺܝ ܠܶܐܘܰܢܛܺܝܽܘܤ ܗܰܘ ܐܰܓܽܘܢܺܝܣܛܳܐ ܕܫܰܦܺܝܪܽܘܬ ܕܶܚܠܬܳܐ. ܘܳܐܦܠܳܐ ܠܽܘܩܒܰܠ ܒܢܰܝ̈ܢܳܫܳܐ ܫܰܘ̈ܝ̣ܰܝ̣ ܒܓܶܢܣܐ ܐܶܙܕܟܺܝ ܗܳܢܽܘܢ ܕܰܥܠܰܝܗܽܘܢ܆ ܐܰܘ ܟܰܕ ܥܰܠ ܗܰܘ ܕܚܰܝܠܬܳܢ ܡܶܢܶܗ ܢܳܦܶܠ ‌ܐ̱ܢܳܫ܆ ܠܳܐ ܡܶܫܟܰܚ ܕܰܠܗܳܢܳܐ ܢܒܽܘܙ ܘܰܢܫܰܥܒܶܕ܆ ܐܰܘ ܟܰܕ ܟܒܰܫ ܘܰܙܟܳܝܗ̱ܝ ܟܰܕ ܥܰܘܴܠܳܐܺܝܬ ܐܶܬܳܐ ܥܠܰܘܗ̱ܝ ܘܰܫܒܳܝܗ̱ܝ ܆ ܐܰܪܓܶܙ ܠܰܐܠܳܗܳܐ ܘܠܳܐ ܡܶܫܬܰܘܙܰܒ. ܗܳܝ ܟܺܝܬ ܕܳܐܦ ܐܶܫܰܥܝܳܐ ܢܒܺܝܳܐ ܐܳܡܰܪ ܠܳܗ̇: ܟܰܕ ܡܫܰܐܠܝܳܐܺܝܬ ܡܰܦܶܩ ܠܳܗ̇ ܠܡܶܠܬܳܐ܆ ܕܰܠܡܳܐ ܢܳܣܶܒ ܐ̱ܢܳܫ ܒܶܙܬܳܐ ܡܶܢ ܓܰܢ̱ܒܳܪܳܐ܆ ܘܶܐܢ ܢܶܫܒܶܐ ܐ̱ܢܳܫ ܥܰܘܴܠܳܐܺܝܬ܆ ܢܶܫܬܰܘܙܰܒ^[7].

ܐܶܠܳܐ ܟܰܕ ܥܰܡ ܡܰܠܟܳܐ ܫܡܰܝܳܢܳܐ ܐܰܦܠܰܚ܆ ܘܰܠܘܳܬ ܓܰܢ̱ܒܳܪܳܐ ܡܶܬܗܰܘܢܳܢܳܐ ܐܶܣܬܕܰܪ܆ ܠܘܳܬ ܤܳܛܳܢܳܐ ܗܰܘ ܕܶܐܬܥܰܫܰܢ ܠܩܽܘܒܠܰܢ܆ ܒܰܙܶܗ ܠܗܳܢܳܐ. ܘܫܰܠܚܶܗ ܡܶܢ ܚܰܝܠܶܗ܆ ܘܶܐܫܬܰܘܙܰܒ. ܘܶܐܬܦܪܰܩ ܦܽܘܪܩܳܢܳܐ ܕܰܠܥܳܠܰܡ܆ ܟܰܕ ܟܠܺܝ̈ܠܶܐ ܕܣܳܗܕܽܘܬܳܐ ܫܩܰܠ܆ ܘܡܳܐܢ̈ܶܐ ܣܰܓܺܝ̈ܶܐܐ ܕܺܝܠܶܗ ܚܛܰܦ܆ ܘܰܠܡܶܫܬܰܘܕܥܳܢܽܘܬܳܐ ܕܰܫܪܳܪܳܐ ܩܰܪܶܒ ܐܶܢܽܘܢ. ܕܰܐܬܠܺܝ̈ܣܘܳܬܳܐ ܗܳܠܶܝܢ ܟܳܗ̈ܢܳܝܳܬܳܐ܆ ܐܶܫܰܥܝܳܐ ܬܽܘܒ ܡܙܰܡܰܪ ܙܡܺܝܪܬܳܐ ܗܳܝ ܛܥܺܝܢܰܬ ܙܳܟܽܘܬܳܐ ܟܰܕ ܐܳܡܰܪ: ܗܳܟܰܢܳܐ ܐܳܡܰܪ ܡܳܪܝܳܐ. ܐܶܢ ܐ̱ܢܳܫ ܢܶܫܒܶܐ ܠܓܰܢ̱ܒܳܪܳܐ܆ ܢܶܣܰܒ ܒܶܙܬܳܐ. ܟܰܕ ܕܶܝܢ ܡܶܢ ܗܰܘ ܕܚܰܝܠܬܳܢ ܢܳܣܶܒ܆ ܢܶܬܦܪܶܩ^[8].

ܕܰܠܡܳܐ ܡܶܕܶܡ ܕܰܐܝܟ ܗܳܟܰܢܳܐ܆ ܕܡܳܐ ܗܰܘ ܕܚܰܝ̈ܘܳܬܳܐ ܘܰܕܕܶܒ̈ܚܳܬܳܐ ܗܳܠܶܝܢ ܚܰܢ̈ܦܳܝܳܬܳܐ܆ ܡܫܰܟܶܢ ܗ̱ܘܳܐ ܠܗܳܢܽܘܢ ܕܦܳܠܚܺܝܢ ܗ̱ܘܰܘ ܘܰܡܫܰܡܫܺܝܢ ܗ̱ܘܰܘ܆ ܐܰܝܟ ܐܰܝܠܶܝܢ ܕܠܰܡܗܰܝܡ̈ܢܶܐ ܪܳܕܶܝܢ ܘܡܰܠܦܺܝܢ ܣܳܗ̈ܕܶܐ܆ ܢܰܟ̈ܦܳܬܳܐ ܗܳܠܶܝܢ ܡܠܺܝ̈ܠܳܬܳܐ܆ ܝܰܩ̈ܕܶܐ ܫܰܠ̈ܡܶܐ. ܗܳܠܶܝܢ ܕܚܰܝ̣ܺܝ̣ܢ ܐܳܦ ܡܶܢ ܒܳܬܰܪ ܝܰܩܕܳܢܳܐ ܕܢܽܘܪܳܐ܆ 222ܩܳܝܡܬܳܐ ܗܳܝ ܕܰܡܝܰܬܪܽܘܬܳܐ܆ ܬܰܚܘܺܝܬܳܐ ܗ̱ܝ ܕܓܰܢ̱ܒܳܪܽܘܬܳܐ܆ ܘܠܳܐ ܟܽܠ ܟܽܠܶܗ. ܕܡܳܐ ܓܶܝܪ ܗܰܘ ܕܚܰܝ̈ܘܳܬܳܐ ܠܳܐ ܡܠܺܝ̈ܠܳܬܳܐ܆ ܕܠܰܦܬܰܟܪ̈ܶܐ ܚܰܪ̈ܫܶܐ ܘܰܕܠܳܐ ܢܰܦܫܳܐ ܘܠܳܐ ܡܰܪ̈ܓܫܳܢܶܐ ܡܶܬܶܐܫܶܕ ܗ̱ܘܳܐ܆ ܕܚܰܫ̈ܶܐ ܕܠܳܐ ܡܠܺܝܠܽܘܬܳܐ ܐܺܝܬܰܘܗ̱ܝ ܗ̱ܘܳܐ. ܡܰܥܒܕܳܢܳܐ. ܘܠܰܘ ܕܽܘܟܳܝܳܐ. ܒܰܕܓܽܘܢ ܐܳܦ ܒܝܰܕ ܐܶܣܟܺܡ̈ܶܐ ܫܟܺܝܪ̈ܶܐ ܘܚܽܘܠ̈ܛܳܢܶܐ܆ ܘܡ̈ܶܠܶܐ ܘܰܫܡܳܗ̈ܶܐ ܠܳܐ ܟܢܺܝ̈ܟܶܐ ܘܦܰܚ̈ܙܶܐ ܘܰܙܡܺܝܪ̈ܳܬܳܐ܆ ܕܰܐܘ ܫܳܢܝܽܘܬܳܐ ܐܰܘ ܪܰܦܝܽܘܬܳܐ ܡܰܥܒܕܺܝܢ ܗ̱ܘܰܘ܆ ܐܰܘ ܡܰܪܚܩܳܢܽܘܬܳܐ ܕܡܶܢ ܚܽܘܫܳܒ̈ܶܐ ܡܶܢ ܬܪ̈ܰܝܗܽܘܢ ܓܰܒ̈ܶܐ܆ ܡܫܰܡܠܶܝܢ ܗ̱ܘܰܘ ܠܗܽܘܢ ܐ̱ܪ̈ܳܙܶܐ.

ܡܰܢܽܘ ܕܠܳܐ ܢܶܬܗܰܪ ܒܬܰܡܺܝܗܽܘܬܳܐ ܕܫܽܘܚܠܳܦܳܐ ܐܰ‌ܠܳܗܳܝܳܐ. ܒܕܰܦܢܰܐ ܕܠܶܐܘܰܢܛܺܝܽܘܤ ܡܡܰܠܶܠ ܘܝܳܗܶܒ ܓܶܠ̈ܝܳܢܶܐ܆ ܗܰܘ ܡܰܠܦܳܢܳܐ ܕܢܰܟܦܽܘܬܳܐ܆ ܠܰܘ ܐܰܦܽܘܠܽܘܢ ܗܰܘ ܪܳܚܽܘܡܳܐ ܥܣܺܝܩ ܪܶܚܡܬܳܐ ܕܕܰܦܢܰܐ܆ ܘܕܰܠܒܽܘܝܳܐܗ̇ ܕܦܰܩܪܽܘܬܳܐ ܗܳܝ ܕܰܣܒܰܠ܆ ܟܰܕ ܪܳܕܶܦ ܒܳܬܰܪ ܗܳܝ ܕܪܳܚܶܡ ܗ̱ܘܳܐ܆ ܟܰܕ ܠܳܐ ܐܶܬܳܐ ܠܫܽܘܡܠܳܝܳܐ ܣܽܘܥܪܳܢܶܗ܆ ܒܣܰܘ̈ܟܶܐ ܕܺܝܠܳܗ̇ ܡܶܬܟܰܠܰܠ. ܐܶܠܳܐ ܐܰܝܟ ܕܕܳܡܝܳܐ܆ ܠܳܐ ܣܦܰܩܘ ܛܰܢ̈ܦܶܐ ܠܰܡܕܰܥܳܟܽܘ ܠܓܰܘܙܰܠܬܳܗ̇ ܕܪܶܓܬܳܐ. ܟܰܕ ܓܶܝܪ ܒܰܠܺܝܥ ܒܰܠܺܝܥ ܒܚܰܫܳܐ ܥܰܠ ܩܰܪܩܰܦܬܶܗ܆ ܠܣܰܓܺܝ̈ܶܐܐ ܐܰܫܪܰܥ ܘܰܐܛܥܺܝ ܡܶܢ ܘܳܠܺܝܬܳܐ܆ ܟܰܕ ܙܠܺܝ̈ܡܳܬܳܐ ܩܳܨܶܡ܆ ܘܰܛܥܺܝܢ ܣܪܺܝܩܳܐܺܝܬ 222ܩܢܬܪܐ^[9]. ܠܗܰܘ ܕܰܐܟܶܣܬ̣ܶܗ. ܘܚܰܘܝܰܬܶܗ ܠܳܐ ܡܽܘܣܺܝܩܳܪܳܐ܆ ܗܳܢܰܘ ܕܶܝܢ ܠܳܐ ܐܽܘܡܳܢܳܐ ܕܰܙܡܳܪܳܐ܆ ܛܠܺܝܬܳܐ ܗܳܝ ܕܡܶܬܪܰܚܡܳܐ ܗ̱ܘܳܬ܆ ܕܠܳܐ ܐܶܬܬܰܥܠܰܬ ܘܶܐܬܢܰܓܕܰܬ ܒܰܢܩ̈ܳܫܶܐ.

ܢܶܒܗܬܽܘܢ ܒܢܰܝ̈ܳܐ ܕܦܽܘܐܝ̈ܛܶܐ 222ܕܰܠܩܢܬܪܐ ܘܠܰܛܪܺܝܦܽܘܕܳܐ ܡܒܰܓܒܓܺܝܢ ܠܰܢ܆ ܘܰܠܚܰܢ̈ܦܶܐ ܕܳܘ̈ܰܝܳܐ ܘܫܳܢ̈ܝܶܐ ܒܡ̈ܰܬܠܶܐ ܡܰܦܗܶܝܢ ܘܡܰܛܥܶܝܢ܆ ܘܥܰܡ ܩܳܨܽܘܡܽܘܬܶܗ ܕܰܐܦܽܘܠܽܘܢ ܢܶܫܬܩܽܘܢ. ܫܰܬܺܝܩ ܓܶܝܪ ܫܶܬܩܳܐ ܓܡܺܝܪܳܐ. ܘܰܕܟܽܠ ܟܽܠܶܗ܆ ܘܕܰܚܺܝܠ ܘܡܶܢ ܟܽܠ ܕܽܘܟܬܳܐ ܥܰܪܺܝܩ. ܘܳܐܦ ܗܽܘ܆ ܘܳܐܦ ܣܺܝܥܬܳܐ ܗܳܝ ܕܫܶܠ̈ܚܶܐ ܕܫ̈ܺܐܕܶܐ܆ ܡܶܢ ܣܳܗ̈ܕܶܐ ܗܳܢܽܘܢ ܕܡܶܢ ܥܰܡܡ̈ܶܐ܆ ܗܳܢܽܘܢ ܕܡܶܢ ܩܕܺܝܡ ܕܳܚܠܺܝܢ ܗ̱ܘܰܘ ܠܗܽܘܢ ܘܕܶܒ̈ܚܶܐ ܡܩܰܪܒܺܝܢ ܗ̱ܘܰܘ ܠܗܽܘܢ.

ܘܡܶܚܕܳܐ ܕܡܰܪܓܫܺܝܢ ܒܚܰܕ ܡܶܢ ܩܰܕܺܝ̈ܫܶܐ ܕܩܰܪܺܝܒ. ܘܺܐܝܬܰܘܗ̱ܝ ܒܕܽܘܟܬܳܐ ܡܶܕܶܡ܆ ܡܶܚܕܳܐ ܒܰܪܫܳܥܬܶܗ ܐܰܝܟ ܕܡܶܢ ܫܰܠܗܶܒܺܝܬܳܐ ܕܢܽܘܪܳܐ܆ ܟܕ ܠܳܐ ܡܣܰܝܒܪܺܝܢ ܥܳܪܩܺܝܢ ܘܳܐܙܺܠ̱ܝܢ ܟܰܕ ܩܳܥܶܝܢ ܟܰܕ ܐܳ‌ܠܶܝܢ ܘܡܶܬܰܐܒܠܺܝܢ. ܟܰܕ ܡܰܘܕܶܝܢ ܡܶܙܕܰܟܝܳܢܽܘܬܳܐ ܟܰܕ ܡܫܰܡܗܳܐܺܝܬ ܡܶܬܥܰܗܕܺܝܢ ܠܗܽܘܢ ܠܣܳܗ̈ܕܶܐ܆ ܘܰܡܦܺܝܣܺܝܢ ܠܗܽܘܢ ܕܠܳܐ ܢܶܬܪܰܕܦܽܘܢ܆ ܐܰܝܟܰܢܳܐ ܕܳܐܦ ܠܡܳܪܐ ܕܺܝܠܗܽܘܢ ܟܰܕ ܪܰܬܺܝܬܺܝܢ ܐܳܡܪܺܝܢ ܗ̱ܘܰܘ: ܡܳܐ ܠܰܢ ܘܠܳܟ ܝܶܫܽܘܥ ܒܪܶܗ ܕܰܐ‌ܠܳܗܳܐ܆ ܐܶܬܰܝܬ ܠܗܳܪܟܳܐ ܩܕܳܡ ܙܰܒܢܳܐ ܠܡܰܘܒܳܕܽܘ ܠܰܢ^[10].

ܙܡܰܪ ܠܳܗ̇ ܐܳܦ ܠܗܳܕܶܐ ܬܶܫܒܽܘܚܬܳܐ ܕܙܳܟܽܘܬܳܐ. ܢܒܺܝܳܐ ܐܶܫܰܥܝܳܐ܆ ܘܡܰܙܥܶܩ ܠܳܗ̇ ܠܘܳܬ ܣܳܗ̈ܕܶܐ܆ ܟܰܕ ܐܳܡܰܪ: ܗܳܐ ܗܳܟܺܝܠ ܒܕܶܚܠܬܳܐ ܕܺܝܠܟܽܘܢ ܗܶܢܽܘܢ ܢܶܕܚܠܽܘܢ. ܗܳܢܽܘܢ ܕܕܳܚܠܺܝܢ ܗܘܰܝܬܽܘܢ ܡܶܢܗܽܘܢ܆ ܢܶܕܚܠܽܘܢ ܡܶܢܟܽܘܢ. ܐܺܝ̈ܙܓܰܕܶܐ ܓܶܝܪ ܢܶܫܬܰܕܪܽܘܢ ܡܶܢܗܽܘܢ܆ ܕܰܡܦܺܝܣܺܝܢ ܡܶܛܽܠ ܫܰܝܢܳܐ. ܟܰܕ ܡܰܪܺܝܪܳܐܺܝܬ ܒܳܟܶܝܢ. ܢܶܚܪ̈ܒܳܢ ܓܶܝܪ ܐܽܘܪ̈ܚܳܬܳܐ ܕܗܳܠܶܝܢ. ܚܰܪܺܝܒ ܓܶܝܪ ܘܰܨܕܺܝ ܗܰܝܟܠܳܐ ܗܰܘ ܕܰܒܕܠܦܘ. ܗܰܘ ܕܒܽܘܠܽܘܡܦܺܝܰܐ. ܗܰܘ ܕܒܢܐܡܐܐ. ܗܰܘ ܕܒܰܐܦܺܝܕܰܐܘܪܽܘܤ. ܗܰܘ ܕܒܰܐܝܣܬܡܘܤ. ܘܒܰܟܢܽܘܫܝܳܐ ܓܰܘܳܢܳܝܳܐ ܒܳܟܶܝܢ ܩܳܨܽܘ̈ܡܶܐ ܘܰܐ‌ܠܳܗ̈ܶܐ ܨܒܳܪ̈ܶܐ. ܟܰܕ ܠܳܐ ܐ̱ܢܳܫ ܟܽܠ ܟܽܠܶܗ ܐܳܙܶܠ ܠܘܳܬܗܽܘܢ.

ܠܠܐܘܢܛܝܘܤ ܕܶܝܢ ܚܳܙܶܝܢ ܐܢ̱ܬܽܘܢ܆ ܕܟܽܠ ‌ܐܽܘܪܚܳܐ ܡܫܰܕܪܳܐ ܟܶܢܫܳܐ ܫܰܦܺܝܪ ܕܶܚܠܬܳܐ ܟܺܝܬ ܘܰܕܠܳܐ ܣܳܟܳܐ܆ ܕܒܰܕܡܽܘܬ ܢܰܗܪܳܐ ܡܶܢ ܟܽܠ ܕܽܘܟ ܓܳܐܰܚ. ܗܳܕܶܐ ܒܰܛܪܺܝܦܽܘܠܺܝܤ. ܒܝܰܡܳܐ ܣܳܥܰܪ ܬܶܕܡܽܘܪܬܳܐ ܟܰܕ ܡܶܢ ܝܰܘܡܳܐ ܗܳܢܳܐ ܡܝܰܩܪܳܐ ܘܰܣܓܺܝܕܳܐ ܡܶܬܟܰܚ̈ܕܳܢ ܪ̈ܽܘܚܶܐ ܗܳܢܶܝܢ ܣܰܩܽܘܒ̈ܠܳܝܳܬܳܐ܆ ܘܰܐܟܚܕܳܐ ܢܳܫ̈ܒܳܢ ܘܠܰܚ̈ܕܳܕܶܐ ܡܣܰܝ̈ܥܳܢ ܕܗܳܟܰܢܳܐ ܐܳܡܰܪ: ܘܰܐܝܟ ܗܰܘ ܕܰܐܝܟ ܨܶܒܝܳܢܗܽܘܢ ܐܳܦ ܗܶܢܶܝܢ ܕܰܡܚ̈ܰܕܝܳܢ ܠܗܽܘܢ ܢܳܦ̈ܚܳܢ ܠܗܳܢܽܘܢ ܕܛܳܝܦܺܝܢ. ܐܰܝܟܰܢܳܐ ܟܺܝܬ ܕܢܶܬܚ̈ܰܙܝܳܢ ܐܶ‌ܠܦ̈ܶܐ ܒܰܙܢܳܐ ܡܶܕܶܡ܆ ܕܪܶܦܣܳܐ ܥܳܒ̈ܕܳܢ ܘܡܰܟܪ̈ܟܳܢ܆ ܘܦܳܓ̈ܥܳܢ ܒܰܚ̈ܕܳܕܶܐ ܠܟܳܐ ܘܰܠܗܰܠ ܘܰܡܚܰܢ̈ܦܳܢ܆ ܘܥܰܡ ܚܰܕܽܘܬܳܐ ܣܰܓܺܝܐܬܳܐ ܡܰܦܪܓܺܝܢ ܠܗܳܢܽܘܢ ܕܛܳܝܦܺܝܢ܆ ܐܰܝܟ ܕܫܽܘܠܳܡܳܐ ܕܗܰܢܝܽܐܘܬܳܐ ܢܶܗܘܶܐ ܐܺܝܬܰܘܗ̱ܝ ܣܳܟܶܗ ܕܛܰܘܦܳܐ.

ܡܰܙܥܶܩ ܓܶܝܪ ܒܺܐܝܕܰܘ̈ܗ̱ܝ ܕܣܳܗܕܳܐ܆ ܐܰ‌ܠܳܗܳܐ ܗܰܘ ܕܰܒܝܰܕ ܐܶܫܰܥܝܳܐ ܢܒܺܝܳܐ ܡܰܠܶܠ: ܠܳܐ ܓܶܝܪ ܐܶܪܚܰܩ ܡܶܢ ܡ̈ܶܠܶܐ ܕܪܽܘܚܳܐ܆ ܟܰܕ ܠܰܐܬܠܺܝܛܳܐ ܕܪܽܘܚܳܐ ܡܝܰܩܰܪ ܐ̱ܢܳܐ: ܐܳܡܰܪ ܠܓܰܪܒܝܳܐ ܐܰܝܬܳܐ. ܘܰܠܬܰܝܡܢܳܐ ܠܳܐ ܬܶܟ̣ܠܶܝܢ. ܐܰܝܬܳܐ ܠܰܒ̈ܢܰܝܳܐ ܕܺܝܠܝ ܡܶܢ ܐܰܪܥܳܐ ܕܡܶܢ ܪܽܘܚܩܳܐ. ܘܠܰܒ̈ܢܳܬܳܐ ܕܺܝܠܝ ܡܶܢ ܣܰܘ̈ܦܶܝܗ̇ ܕܰܐܪܥܳܐ^[11]. ܠܟܽܠܗܽܘܢ ܗܳܢܽܘܢ ܕܰܩܪܶܝܢ ܒܫܶܡܝ.

ܟܰܕ ܕܰܐܝܟ ܗܳܢܳܐ ܗܳܟܺܝܠ ‌ܐܺܝܙܓܰܕܳܐ ܚܰܝܠܬܳܢܳܐ ܐܺܝܬ ܠܰܢ. 222ܢ̇ܦܝܣܘܗ̱ܝ ܕܳܐܦ ܒܪ̈ܽܘܚܶܐ ܗܳܠܶܝܢ ܕܒܺܝܫܽܘܬܳܐ ܢܶܟܐܶܐ܆ ܕܡܶܕܶܡ ܒܰܥܪܺܝܪܳܝܳܐ ܘܣܳܢܶܐ ܒܢܰܝ̈ܢܳܫܳܐ ܢܦܰܚ̈ܶܝܢ܆ ܘܠܰܡܕܺܝܢ̱ܬܳܐ ܕܺܝܠܰܢ ܫܓܰܫ̈ܶܝܢ. ܐܰܝܟܰܢܳܐ ܕܪܽܘܚܳܐ ܡܫܰܝܰܢܬܳܐ ܘܢܺܝܚܬܳܐ܆ ܘܥܳܗܢܳܝܬܳܐ ܘܨܰܚܘܳܢܺܝܬܳܐ ܚܠܳܦܰܝܗܶܝܢ ܢܶܫܰܒ ܠܰܢ ܡܫܺܝܚܳܐ ܗܰܘ ܫܰܝܢܳܐ ܕܺܝܠܰܢ܆ ܟܰܕ ܗܳܘܶܐ ܡܚܰܣܝܳܢܳܐ ܠܰܚ̈ܛܳܗܶܐ ܕܺܝܠܰܢ܆ ܘܰܢܫܰܟܶܢ ܟܽܠܳܗ̇ ܫܰܦܺܝܪܽܘܬ ܩܽܘܝܳܡܳܐ ܘܫܰܦܺܝܪܽܘܬ ܚܰܝ̈ܶܐ ܕܗܳܢܳܐ ܥܽܘܡܪܳܐ. ܘܢܰܫܘܶܐ ܠܰܢ ܠܚܰܝ̈ܶܐ ܗܳܠܶܝܢ ܕܰܥܬܺܝܕܺܝܢ. ܕܰܠܗܽܘܢ ܬܶܗܘܶܐ ܕܢܶܫܬܘܶܐ ܟܽܠܰܢ. ܒܪܶܚܡܰܬ ܐ̱ܢܳܫܽܘܬܶܗ ܕܺܝܠܶܗ ܘܛܰܝܒܽܘܬܳܐ. ܗܰܘ ܕܠܶܗ ܬܶܫܒܽܘܚܬܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܠܥܳܠܰܡ ܥܳܠܡܺܝܢ ܐܰܡܺܝܢ.

ܫܶܠܡܰܬ ܦܶܢܩܺܝܬܳܐ ܩܰܕܡܳܝܬܳܐ ܕܐܦܝܬܪܘܢܝܘܢ.

ܣܶܦܪܳܐ ܕܒܪܝܬܐ. 4: 10 [1]

ܐ. ܩܘܪ̈ܝܢܬܝܐ. 15: 19 [2]

ܩܘܠܣ̈ܝܐ. 2: 12 [3]

ܥܒܪ̈ܝܐ. 12: 28 [4]

ܡܬܝ. 16: 24  ܐܦ ܡܪܩܘܣ. 8: 34 [5]

ܒ. ܩܘܪ̈ܝܢܬܝܐ. 2: 11 [6]

ܐܫܥܝܐ. 49: 24 [7]

ܡܬܝ. 12: 29 [8]

ܩܝܬܪܐ؟[9]

[10]ܠܘܩܐ. 8: 28  ܐܦ 4: 34 ܐܦ ܡܪܩܘܣ. 5: 7

ܐܫܥܝܐ. 43: 6 ـ 7 [11]