ܥܰܠ ܗܳܝ ܕܰܐܡܺܝܪܳܐ ܠܰܫܠܺܝܚܳܐ ܒܶܐܓܰܪܬܳܐ ܗܳܝ ܕܰܠܘܳܬ ܪ̈ܽܗܘܡܳܝܶܐ܆ ܡܶܛܽܠܗܳܕܶܐ ܐܰܝܟܰܢܳܐ ܕܰܒܝܰܕ ܚܰܕ ܒܰܪܢܳܫܳܐ ܥܶܠܰܬ̣ ܚܛܺܝܬܳܐ ܠܥܳܠܡܳܐ܆ ܘܰܒܝܰܕ ܚܛܺܝܬܳܐ ܡܰܘܬܳܐ܆ ܗܳܟܰܢܳܐ ܒܟܽܠܗܽܘܢ ܒܢܰܝ̈ܢܳܫܳܐ ܥܒܰܪ ܡܰܘܬܳܐ܆ ܒܗܳܝ ܕܟܽܠܗܽܘܢ ܚܛܰܘ܆ ܥܕܰܡܳܐ ܓܶܝܪ ܠܢܳܡܽܘܣܳܐ ܚܛܺܝܬܳܐ ܐܺܝܬܶܝܗ̇ ܗ̱ܘܳܬ ܒܥܳܠܡܳܐ܆ ܚܛܺܝܬܳܐ ܕܶܝܢ ܠܳܐ ܚܫܺܝܒܳܐ ܗ̱ܘܳܬ ܟܰܕ ܠܰܝܬ ܗ̱ܘܳܐ ܢܳܡܽܘܣܳܐ܆ ܐܶܠܳܐ ܐܰܡܠܶܟ ܡܰܘܬܳܐ ܡܶܢ ܐܳܕܳܡ ܥܕܰܡܳܐ ܠܡܽܘܫܶܐ ܐܳܦ ܥܰܠ ܐܰܝܠܶܝܢ ܕܠܳܐ ܚܛܰܘ܆ ܒܰܕܡܽܘܬܳܐ ܕܰܥܒܳܪ ܦܽܘܩܕܳܢܳܐ ܕܳܐܕܳܡ܆ ܗܰܘ ܕܺܐܝܬܰܘܗ̱ܝ ܛܽܘܦܣܳܐ ܕܗܰܘ ܕܰܥܬܺܝܕ[1]. ܘܥܰܠ ܗܳܝ ܕܰܐܡܺܝܪܳܐ ܒܶܐܓܰܪܬܳܐ ܕܰܠܘܳܬ ܩܽܘܪ̈ܝܢܬܳܝܶܐ܆ ܐܶܡܰܬܝ ܕܶܝܢ ܕܢܶܫ̈ܬܰܥܒܕܳܢ ܠܶܗ ܟܽܠܗܶܝܢ܆ ܗܳܝܕܶܝܢ ܐܳܦ ܗܽܘ ܒܪܳܐ ܢܶܫܬܰܥܒܰܕ ܠܗܰܘ ܕܫܰܥܒܶܕ ܠܶܗ ܟܽܠܗܶܝܢ܆ ܐܰܝܟܰܢܳܐ ܕܢܶܗܘܶܐ ܐܰܠܳܗܳܐ ܟܽܠܗܶܝܢ ܒܟܽܠܗܶܝܢ[2].
49: ܟܰܕ ܡܶܢ ܩܕܺܝܡ ܕܽܘܟܪܳܢܳܐ ܕܟܺܐܢ̈ܶܐ ܗܳܢܽܘܢ ܕܡܶܢ ܥܳܠܰܡ ܥܳܒܕܺܝܢ ܗ̱ܘܰܝܢ܆ ܐܰܝܟ ܥܝܳܕܳܐ ܗܰܘ ܥܰܬܺܝܩܳܐ ܘܕܰܠܘܳܬܰܢ ܡܛܳܐ܆ ܘܰܐܝܟ ܡܰܫܠܡܳܢܽܘܬܳܐ ܗܳܝ ܕܢܳܚܬܳܐ ܡܶܢ ܐܰܒܳܗ̈ܳܬܳܐ ܩܰܕܺܝ̈ܫܶܐ ܘܡܶܢ ܗܳܢܽܘܢ ܕܢܳܡܽܘܣܳܐܺܝܬ ܩܳܡܘ ܒܪܺܝܫ ܥܺܕܬܳܐ܆ ܕܙܳܕܩܳܐ ܐܰܣܒܰܪܢܰܢ ܕܰܥܠܰܘܗ̱ܝ ܕܫܰܪܒܳܐ ܗܳܢܳܐ܆ ܐܳܦ ܠܟܽܘܢ ܐܺܡܰܪ ܡܺܐܡܪܳܐ: ܐܳܦ ܠܰܡܫܺܝܚܳܐ ܐܶ݀ܫܰܒܰܚ܆ ܕܰܠܗܳܕܶܐ ܡܺܝܬ ܘܰܚ̣ܝܳܐ܆ ܐܰܝܟܰܢܳܐ ܕܳܐܦ ܕܡܺܝ̈ܬܶܐ ܐܳܦ ܕܗܳܢܽܘܢ ܕܚܰܝ̣ܺܝ̣ܢ ܢܶܗܘܶܐ ܡܳܪܝܳܐ[3]. ܠܰܘ ܓܶܝܪ ܚܠܳܦ ܗܳܢܽܘܢ ܕܚܰܝ̣ܺܝ̣ܢ ܒܰܠܚܽܘܕ܆ ܐܶܠܳܐ ܟܺܝܬ. ܐܳܦ ܚܠܳܦ ܡܺܝ̈ܬܶܐ ܣܒܰܠ ܘܩܰܒܶܠ ܥܠܰܘܗ̱ܝ܆ ܠܰܨܠܺܝܒܳܐ ܦܳܪܽܘܩܳܝܳܐ ܨܶܒܝܳܢܳܐܺܝܬ. ܕܚܰܝ̣ܺܝ̣ܢ ܡܰܢ ܟܺܝܬ ܐܳܡܪܺܝܢ ܚ̱ܢܰܢ: ܠܙܰܕܺܝ̈ܩܶܐ ܗܳܢܽܘܢ ܕܰܒܙܰܕܺܝܩܽܘܬܳܐ ܚܳܐܝܶܢ. ܡܺܝ̈ܬܶܐ ܕܶܝܢ ܬܽܘܒ܆ ܠܗܳܢܽܘܢ ܕܒܰܚܛܺܝܬܳܐ ܡܰܝ̣ܺܝ̣ܬ̣ܺܝܢ. ܐܶܢ ܕܶܝܢ ܐܳܦ ܕܚܰܝ̣ܺܝ̣ܢ ܢܺܐܡܰܪ ܐ̱ܢܳܫ܆ ܠܗܳܢܽܘܢ ܕܚܰܝ̈ܶܐ ܗܳܠܶܝܢ ܕܰܒܒܶܣܪܳܐ ܥܕܰܟܺܝܠ ܘܗܳܠܶܝܢ ܕܰܡܠܶܐ ܙܰܒܢܳܐ ܚܳܐܝܶܢ. ܡܺܝ̈ܬܶܐ ܕܶܝܢ܆ ܠܗܳܢܽܘܢ ܕܗܳܝܕܶܝܢ ܒܡܺܝ̈ܬܶܐ ܚܫܺܝܒܺܝܢ ܗ̱ܘܰܘ܆ ܘܰܠܥܳܠܡܳܐ ܫܒܰܩܘ ܗ̱ܘܰܘ. ܘܡܶܢ ܟܰܕܽܘ ܥܰܢܺܝܕܺܝܢ ܗ̱ܘܰܘ܆ ܐܳܦܠܳܐ ܗܳܟܰܢܳܐ ܠܒܰܪ ܡܶܢ ܫܪܳܪܳܐ ܢܺܐܬܶܐ. ܐܳܦ ܓܶܝܪ ܚܠܳܦ ܙܰܕܺܝ̈ܩܶܐ. ܐܳܦ ܚܠܳܦ ܚܰܛܳܝ̈ܶܐ܆ ܘܰܚܠܳܦ ܗܳܢܽܘܢ ܕܰܢܦܰܩܘ ܡܶܢ ܚܰܝ̈ܶܐ܆ ܘܰܚܠܳܦ ܗܳܢܽܘܢ ܕܰܥܕܰܟܺܝܠ ܚܰܝ̣ܺܝ̣ܢ܆ ܠܰܕܡܳܐ ܕܺܝܠܶܗ ܐܶܫܰܕ. ܐܰܝܟܰܢܳܐ ܕܰܐܟܙܢܳܐ ܕܒܳܐܕܳܡ ܟܽܠܗܽܘܢ ܡܺܝܬܘ܆ ܗܳܟܰܢܳܐ ܒܰܡܫܺܝܚܳܐ ܟܽܠܗܽܘܢ ܢܺܚܽܘܢ[4]. ܡܰܙܥܶܩ ܓܶܝܪ ܦܰܘܠܽܘܤ: ܕܰܒܝܰܕ ܚܰܕ ܒܰܪܢܳܫܳܐ ܥܶܠܰܬ ܚܛܺܝܬܳܐ ܠܥܳܠܡܳܐ܆ ܘܰܒܝܰܕ ܚܛܺܝܬܳܐ ܡܰܘܬܳܐ. ܘܗܳܟܰܢܳܐ ܒܟܽܠܗܽܘܢ ܒܢܰܝ̈ܢܳܫܳܐ ܥܒܰܪ ܡܰܘܬܳܐ. ܒܗܳܝ ܕܟܽܠܗܽܘܢ ܚܛܰܘ[5].
ܟܰܕ ܓܶܝܪ ܐܳܕܳܡ ܐܶܬܓܒܶܠ ܡܶܢ ܛܺܝܢܳܐ܆ ܐܶܬܢܰܦܰܫ ܕܶܝܢ ܒܢܰܦܫܳܐ ܡܠܺܝܠܬܳܐ. ܘܕܰܒܨܰܠܡܳܐ ܕܰܐܠܳܗܳܐ ܐܶܬܒܰܪܝܰܬ[6]܆ ܒܗܳܝ ܕܶܐܬܝܰܩܪܰܬ ܒܫܰܠܺܝܛܽܘܬ ܒܝܳܬ̣ܳܐ܆ ܘܰܒܗܳܝ ܕܶܐܬܡܠܶܟ ܥܰܠ ܗܳܠܶܝܢ ܕܥܰܠ ܐܰܪܥܳܐ܆ ܘܰܒܗܳܝ ܕܬܶܗܘܶܐ ܐܺܝܬܶܝܗ̇ ܡܩܰܒܠܳܢܺܝܬܳܐ ܕܙܰܕܺܝܩܽܘܬܳܐ ܘܰܕܟܽܠܳܗ̇ ܡܝܰܬܪܽܘܬܳܐ܆ ܘܡܶܫܟܚܳܐ ܠܡܶܫܬܰܘܬܳܦܽܘ ܒܗܳܠܶܝܢ ܐ̱ܚܪ̈ܳܢܝܳܬܳܐ ܕܕܰܐܝܟ ܗܳܠܶܝܢ܆ ܟܽܠܗܶܝܢ ܐܰܝܠܶܝܢ ܕܒܽܐܘܣܺܝܰܐ ܡܶܬܚܰܙ̈ܝܳܢ ܒܰܐܠܳܗܳܐ ܘܒܰܟܝܳܢܳܐ ܗܰܘ ܕܰܠܗܰܠ ܡܶܢ ܟܽܠ܆ ܘܚܳܝܶܐ ܗ̱ܘܳܐ ܚܰܝ̈ܶܐ ܗܳܢܽܘܢ ܛܽܘܒ̈ܬܳܢܶܐ ܕܦܰܪܕܰܝܣܳܐ܆ ܘܰܡܟܰܠܰܠ ܗ̱ܘܳܐ ܒܛܰܝܒܽܘܬܳܐ ܗܳܝ ܕܠܳܐ ܡܳܝܽܘܬܽܘܬܳܐ܆ ܘܒܳܬܰܪ ܗܳܕܶܐ ܥܒܰܪ ܥܰܠ ܦܽܘܩܕܳܢܳܐ ܗܰܘ ܕܰܠܒܽܘܩܝܳܐ ܕܫܰܠܺܝܛܽܘܬ ܒܝܳܬ̣ܳܐ ܢܰܣܒܶܗ ܗ̱ܘܳܐ܆ ܘܰܠܢܳܛܽܘܪܬܳܐ ܕܛܳܒ̈ܳܬܳܐ ܗܳܠܶܝܢ ܕܶܐܬܺܝ̈ܗܶܒܶܝܢ ܠܶܗ܆ ܘܰܠܥܶܠܬܳܐ ܕܗܳܢܶܝܢ ܕܰܥ̈ܬܺܝܕܳܢ ܗ̱ܘܰܝ̈ ܕܢܶܬܬܰܘܣ̈ܦܳܢ ܠܶܗ܆ ܘܶܐܬܚܰܝܰܒ ܓܶܝܪ ܕܺܝܢܳܐ ܕܡܰܘܬܳܐ. ܡܶܛܽܠ ܚܛܺܝܬܳܐ ܕܠܳܐ ܡܶܫܬܰܡܥܳܢܽܘܬܳܐ ܘܕܰܥܒܽܘܪܝܳܐ ܕܦܽܘܩܕܳܢܳܐ܆ ܘܰܫܡܰܥ ܕܥܰܦܪܳܐ ܐܺܝܬܰܝܟ ܘܰܠܥܰܦܪܳܐ ܬܺܐܙܰܠ[7]܆ ܡܶܟܺܝܠ ܐܳܦ ܚܢܰܢ. ܐܰܝܟ ܕܡܶܢ ܐܰܒܳܐ ܡܳܝܽܘܬܳܐ܆ ܒܢܰܝ̈ܳܐ ܡܳܝ̈ܽܘܬܶܐ ܗܘ̣ܰܝܢܰܢ ܐܰܝܟ ܢܰܩܺܝܦܽܘܬܳܐ. ܘܠܰܘ ܗܳܕܶܐ ܒܰܠܚܽܘܕ܆ ܐܶܠܳܐ ܐܳܦ ܕܺܐܝܬܰܝܗܽܘܢ ܡܫܰܪ̈ܰܝܳܐ ܠܘܳܬ ܙܰܕܺܝܩܽܘܬܳܐ ܘܰܠܘܳܬ ܦܽܘܠܚܳܢܳܐ ܕܟܽܠܳܗ̇ ܡܝܰܬܪܽܘܬܳܐ܆ ܟܰܕ ܐܰܝܟ ܗܰܘ ܕܗܽܘ ܟܝܳܢܳܐ ܕܺܝܠܰܢ ܐܶܬܟܪܰܗ ܪܶܚܡܰܬ ܗܰܢܺܝܽܐܘܬܳܐ܆ ܘܫܳܪܽܘܥܳܐܺܝܬ ܣܺܝܡ ܗ̱ܘܳܐ܆ ܘܰܦܫܺܝܩܳܐܺܝܬ ܠܰܚܛܺܝܬܳܐ ܡܶܫܬܰܪܓܰܠ ܗ̱ܘܳܐ܆ ܐܰܝܟܰܢܳܐ ܕܳܐܦ ܐܰܠܳܗܳܐ ܢܺܐܡܰܪ: ܕܣܺܝܡܳܐ ܗ̱ܝ ܬܰܪܥܺܝܬܶܗ ܕܒܰܪܢܳܫܳܐ ܝܰܨܺܝܦܳܐܺܝܬ ܥܰܠ ܒܺܝ̈ܫܳܬܳܐ ܡܶܢ ܛܰܠܝܽܘܬܶܗ[8].
ܗܳܕܶܐ ܗܳܟܺܝܠ ܐܺܝܬܶܝܗ̇܆ ܗܳܝ ܟܺܝܬ ܕܶܐܡܰܪ ܦܰܘܠܽܘܤ: ܕܰܒܝܰܕ ܚܰܕ ܒܰܪܢܳܫܳܐ ܥܶܠܰܬ ܚܛܺܝܬܳܐ ܠܥܳܠܡܳܐ܆ ܘܰܒܝܰܕ ܚܛܺܝܬܳܐ ܡܰܘܬܳܐ܆ ܘܗܳܟܰܢܳܐ ܒܟܽܠܗܽܘܢ ܒܢܰܝ̈ܢܳܫܳܐ ܥܒܰܪ ܡܰܘܬܳܐ܆ ܒܗܳܝ ܕܟܽܠܗܽܘܢ ܚܛܰܘ[9]. ܟܰܕ ܐܰܝܟ ܕܰܠܡܺܐܡܰܪ ܐܳܡܰܪ: ܕܙܰܪܥܳܐ ܡܰܢ ܠܡܰܘܬܳܐ܆ ܚܛܺܝܬܳܐ ܕܳܐܕܳܡ ܗܘ̣ܳܬ. ܗܽܘ ܕܶܝܢ ܡܰܘܬܳܐ܆ ܟܰܕ ܒܟܽܠܗܽܘܢ ܒܢܰܝ̈ܳܐ ܕܺܝܠܶܗ ܥܒܰܪ ܒܰܕܡܽܘܬ ܫܶܒ̈ܠܶܐ܆ ܦܺܐܪܳܐ[10] ܡܫܰܪܬܚܳܐ ܐܰܝܬܺܝ܆ ܘܰܚܛܺܝܬܳܐ ܣܰܓܺܝܐܬܳܐ ܐܰܫܘܰܚ܆ ܒܗܳܝ ܕܟܽܠܗܽܘܢ ܒܢܰܝ̈ܢܳܫܳܐ ܐܰܝܟ ܕܰܠܡܺܐܡܰܪ܆ ܒܢܶܫ̈ܒܶܐ ܕܰܚ̈ܛܳܗܶܐ ܡܶܬܥܰܪܙܠܺܝܢ ܗ̱ܘܰܘ.
ܡܢܳܐ ܗܳܟܺܝܠ. ܣܦܺܝܩܳܐ ܡܶܢ ܡܥܰܕܪܳܢܽܘܬܳܐ܆ ܐܶܡܰܪ ܠܺܝ؟ ܫܰܒܩܶܗ ܐܰܠܳܗܳܐ ܠܰܟܝܳܢܳܐ ܕܺܝܠܰܢ܆ ܨܳܒܶܐ ܐ̱ܢܳܐ ܓܶܝܪ. ܕܝܰܨܺܝܦܳܐܺܝܬ ܐܶ݀ܒܰܚܢܺܝܗ̇ ܠܗܳܝ ܕܥܳܒܽܘܪܳܐܺܝܬ ܘܡܰܪܗܛܳܐܺܝܬ ܐܰܡܺܝܪܳܐ ܗ̱ܘܳܬ ܠܰܢ ܡܶܢ ܩܕܺܝܡ܆ ܘܰܡܫܰܡܠܝܳܐܺܝܬ ܐܶ݀ܒܨܶܝܗ̇ ܘܶܐ݀ܥܰܩܒܺܝܗ̇ ܠܬܰܪܥܺܝܬܳܐ ܫܠܺܝܚܳܝܬܳܐ܆ ܗܳܝ ܕܰܒܗܳܠܶܝܢ ܕܶܐܬܶܐܡܰܪ̈ܝ̱ ܣܦܺܝܩܳܐ ܡܰܢ. ܡܶܢ ܡܥܰܕܪܳܢܽܘܬܳܐ. ܘܠܳܐ ܟܽܠ ܟܽܠܶܗ. ܐܺܝܬ ܗ̱ܘܳܐ ܠܶܗ ܓܶܝܪ ܢܳܡܽܘܣܳܐ ܗܰܘ ܟܝܳܢܳܝܳܐ ܠܥܽܘܕܪܳܢܳܐ܆ ܘܰܠܡܰܠܦܳܢܽܘܬܳܐ ܕܰܐܝܠܶܝܢ ܕܙܳܕܶܩ ܗ̱ܘܳܐ ܕܢܶܣܬܰܥܪ̈ܳܢ. ܟܝܳܢܳܐܺܝܬ ܓܶܝܪ ܣܳܡ ܒܰܢ ܐܰܠܳܗܳܐ܆ ܝܺܕܰܥܬܳܐ ܡܶܕܶܡ ܘܦܳܪܽܘܫܽܘܬܳܐ ܕܗܳܝ ܕܛܳܒܳܐ ܟܺܝܬ ܘܰܕܗܳܝ ܕܒܺܝܫܳܐ܆ ܘܡܰܥܗܕܳܢܽܘܬܳܐ ܗܳܝ ܕܡܶܢ ܬܺܐܪܬܳܐ.
ܡܶܛܽܠ ܗܳܕܶܐ ܓܶܝܪ. ܩܳܐܺܝܢ ܡܰܢ܆ ܟܰܕ ܒܰܬܪ̈ܰܝܳܢܝܳܬܳܐ ܘܰܒܨܺܝܪ̈ܳܬܳܐ ܕܡܶܢ ܥܰܠ̈ܠܳܬܶܗ ܝܰܩܰܪ ܒܕܶܒܚܬܳܐ ܠܰܐܠܳܗܳܐ܆ ܘܶܐܣܬܠܺܝ ܘܶܐܬܬܫܺܝܛ ܡܶܢ ܗܳܒܶܝܠ܆ ܘܠܳܐ ܣܰܝܒܰܪ ܠܩܰܕܺܝܡܽܘܬ ܐܺܝܩܳܪܳܐ܆ ܘܰܚܣܳܡܳܐ ܐܶܬܟܪܰܗ܆ ܘܰܒܢܶܟܣܬܳܐ ܕܰܐܚܽܘܗ̱ܝ ܛܰܢܶܦ ܠܝܰܡܺܝܢܶܗ܆ ܟܺܐܢܳܐܺܝܬ ܡܶܬܚܰܝܰܒ ܗ̱ܘܳܐ ܒܰܡܣܳܡ ܒܪܺܝܫܳܐ. ܚܢܽܘܟ ܕܶܝܢ ܟܰܕ ܙܰܕܺܝܩܽܘܬܳܐ ܬܳܪܶܨ܆ ܡܶܫܬܰܢܶܐ ܗ̱ܘܳܐ. ܐܳܦ ܗܳܢܽܘܢ ܕܡܶܢ ܩܕܳܡܰܘܗ̱ܝ ܡܰܢ ܐܺܝܬܰܝܗܽܘܢ ܗ̱ܘܰܘ܆ ܒܳܗ̇ ܕܶܝܢ ܒܰܕܡܽܘܬܳܐ ܐܰܟܘܳܬܶܗ ܚܳܐܝܶܢ ܗ̱ܘܰܘ܆ ܠܰܐܠܳܗܳܐ ܫܳܦܪܺܝܢ ܗ̱ܘܰܘ. ܘܒܰܝ̈ܬܳܝܶܐ ܕܰܐܠܳܗܳܐ ܐܺܝܬܰܝܗܽܘܢ ܗ̱ܘܰܘ. ܘܟܰܕ ܛܳܒ ܘܳܐܦܠܳܐ ܚܰܕ ܢܳܡܽܘܣܳܐ ܟܬܺܝܒܳܐ ܐܺܝܬ ܗ̱ܘܳܐ ܠܗܽܘܢ܆ ܕܰܡܗܰܕܶܐ ܗ̱ܘܳܐ ܠܗܽܘܢ ܠܘܳܬ ܗܳܝ ܕܛܳܒܳܐ܆ ܗܰܘ ܕܙܳܕܶܩ ܗ̱ܘܳܐ ܠܗܽܘܢ ܕܢܶܛܪܽܘܢܳܝܗ̱ܝ . ܐܶܠܳܐ ܫܩܺܝܠܺܝܢ ܗ̱ܘܰܘ ܗܶܢܽܘܢ ܒܗܽܘܢ܆ ܢܳܡܽܘܣܳܐ ܗܰܘ ܟܝܳܢܳܝܳܐ ܕܣܳܦܶܩ ܗ̱ܘܳܐ ܠܗܽܘܢ ܠܰܡܬܰܪܨܳܢܽܘܬܳܐ.
ܡܶܛܽܠ ܕܶܝܢ ܕܳܐܦܠܳܐ ܛܰܘܦܳܢܳܐ ܒܰܛܠܳܗ̇ ܠܒܺܝܫܽܘܬܳܐ܆ ܘܳܐܦܠܳܐ ܦܽܘܠܳܓܳܐ ܗܰܘ ܕܠܶܫܳܢ̈ܶܐ܆ ܘܳܐܦܠܳܐ ܦܶܩ̈ܥܶܐ ܡܰܘܩ̈ܕܳܢܶܐ ܗܳܢܽܘܢ ܕܶܐܬܬܰܝܬܺܝܘ ܥܰܠ ܣܕܽܘܡ܆ ܘܳܐܦܠܳܐ ܬܽܘܒ ܡܶܢ ܗܳܝ ܕܰܠܩܽܘܒܠܳܐ܆ ܪ̈ܺܝܫܰܝ ܐܰܒܳܗ̈ܳܬܳܐ ܕܒܰܙܒܰܢ ܙܒܰܢ ܩܳܝܡܺܝܢ ܗ̱ܘܰܘ܆ ܘܡܶܫܟܚܺܝܢ ܗ̱ܘܰܘ ܕܒܰܕܡܽܘܬ ܩܝ̈ܳܡܳܬܳܐ ܡܶܕܶܡ ܚܰܝ̈ܳܬܳܐ ܕܰܡܝܰܬܪܽܘܬܳܐ ܠܗܳܢܽܘܢ ܕܒܰܚܛܺܝܬܳܐ ܣܰܪܺܝܟܺܝܢ ܗ̱ܘܰܘ ܢܶܓܕܽܘܢ ܒܬܰܚܘܺܝܬܳܐ. ܡܶܟܺܝܠ ܢܳܡܽܘܣܳܐ ܗܰܘ ܟܝܳܢܳܝܳܐ܆ ܛܒܰܥ ܗ̱ܘܳܐ ܠܶܗ ܒܚܰܫ̈ܶܐ܆ ܘܳܐܦܠܳܐ ܠܚܰܕ ܐ̱ܢܳܫ ܠܳܒܶܟ ܗ̱ܘܳܐ܆ ܕܡܶܢ ܬܺܐܪܬܶܗ ܢܶܬܬܱܪܰܨ. ܒܗܳܝ ܕܶܝܢ ܕܰܩܢܳܬ ܗ̱ܘܳܬ ܠܳܗ̇ ܬܰܪܥܺܝܬܳܐ ܕܟܽܠܢܳܫ. ܐܰܝܢܳܝܽܘܬܳܐ ܗܳܝ ܕܒܺܝܫܽܘܬܳܐ܆ ܡܶܢ ܗܳܝ ܕܣܰܓܺܝ ܚܳܛܶܝܢ ܗ̱ܘܰܘ܆ ܘܳܐܦܠܳܐ ܕܚܳܛܶܝܢ ܗ̱ܘܰܘ ܡܰܣܒܪܺܝܢ ܗ̱ܘܰܘ.
ܐܰܝܟܰܢܳܐ ܟܺܝܬ ܕܡܶܟܺܝܠ܆ ܥܰܠ ܢܳܡܽܘܣܳܐ ܐ̱ܚܪܺܢܳܐ ܢܶܗܘܶܐ ܣܽܘܢܩܳܢܳܐ܆ ܗܰܘ ܕܰܒܝܰܕ ܟܬܺܝ̈ܒܳܬܳܐ ܡܰܥܗܶܕ. ܗܳܝ ܓܶܝܪ ܕܶܐܬܥܰܪܡܰܬ ܚܛܺܝܬܳܐ ܘܶܐܬܬܪܺܝܡܰܬ ܒܰܕܡܽܘܬ ܩܰܪܩܰܦܬܳܐ ܕܛܽܘܪܳܐ܆ ܘܚܰܦܝܰܬ̣ܶܗ ܠܢܳܡܽܘܣܳܐ ܗܰܘ ܟܝܳܢܳܝܳܐ܆ ܡܰܦܰܩ ܒܪܽܘܚܳܐ ܥܳܒܕܳܐ ܗ̱ܘܳܬ ܠܗܽܘܢ ܠܗܳܢܽܘܢ ܕܚܳܛܶܝܢ. ܡܶܫܟܚܺܝܢ ܗ̱ܘܰܘ ܓܶܝܪ ܠܡܺܐܡܰܪ: ܕܟܰܕ ܒܒܺܝܫܽܘܬܳܐ ܐܶܬܛܰܒܰܥܢܰܢ܆ ܘܙܳܕܶܩ ܗ̱ܘܳܐ ܕܬܶܬܩܰܪܰܒ ܠܰܢ ܡܰܥܗܕܳܢܽܘܬܳܐ܆ ܠܳܐ ܐܶܬܩܰܪܒܰܬ ܠܰܢ. ܘܗܳܕܐ ܗ̱ܝ ܗܳܝ ܕܶܐܬܰܐܡܪܰܬ ܡܶܢ ܫܠܺܝܚܳܐ: ܥܕܰܡܳܐ ܓܶܝܪ ܠܢܳܡܽܘܣܳܐ ܚܛܺܝܬܳܐ ܐܺܝܬܶܝܗ̇ ܗ̱ܘܳܬ ܒܥܳܠܡܳܐ܆ ܚܛܺܝܬܳܐ ܕܶܝܢ ܠܳܐ ܡܶܬܚܰܫܒܳܐ ܗ̱ܘܳܬ܆ ܟܰܕ ܠܰܝܬ ܗ̱ܘܳܐ ܢܳܡܽܘܣܳܐ[11]. ܐܺܝܬܶܝܗ̇ ܗ̱ܘܳܬ ܡܰܢ ܐܳܡܰܪ ܚܛܺܝܬܳܐ ܒܥܳܠܡܳܐ. ܥܬܺܝܕܳܐ ܗ̱ܘܳܬ ܕܶܝܢ. ܟܰܕ ܠܰܝܬ ܗ̱ܘܳܐ ܢܳܡܽܘܣܳܐ ܗܰܘ ܕܡܰܟܶܤ܆ ܕܠܳܐ ܢܶܗܘܶܐ ܡܶܬܚܰܫܒܳܐ ܠܗܽܘܢ ܠܗܳܢܽܘܢ ܕܚܳܛܶܝܢ.
ܟܰܕ ܕܶܝܢ ܚܠܰܕ ܥ̣ܰܠ ܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ܆ ܘܰܠܡܰܪܓܫܳܢܽܘܬܳܐ ܕܰܚܛܺܝܬܳܐ ܐܰܝܬܺܝ ܐܶܢܽܘܢ܆ ܠܗܳܢܽܘܢ ܕܠܳܐ ܡܰܪܓܫܳܢܳܐܺܝܬ ܐܺܝܬ ܗ̱ܘܳܐ ܠܗܽܘܢ܆ ܕܬܶܗܘܶܐ ܚܫܺܝܒܳܐ ܥܒܳܕܳܗ̇ ܠܗܳܕܶܐ. ܠܗܳܕܶܐ ܓܶܝܪ ܢܶܚܙܶܐ ܐ̱ܢܶܫ܆ ܐܳܦ ܥܰܠ ܗܳܢܽܘܢ ܕܰܟܪܺܝܗܶܝܢ. ܐܶܢ ܟܰܕ ܥܽܘܕܪܳܢܳܐ ܩܰܕܡܳܝܳܐ ܐܶܬܩܰܪܰܒ܆ ܕܰܐܝܟ ܐܰܝܟܰܢ܆ ܕܽܘܒܳܪܳܐ ܕܰܢܛܺܝܪ ܘܰܡܛܰܟܰܤ܆ ܬܶܬܪܰܒܶܐ ܡܰܢ܆ ܗܽܘܠܶܐ ܗܳܝ ܡܰܥܒܪܰܬ ܟܽܘܪܗܳܢܳܐ. ܡܶܛܽܠ ܠܳܐ ܡܛܰܟܣܽܘܬܶܗ ܕܗܰܘ ܕܰܟܪܺܝܗ܆ ܢܶܬܡܚܶܠ ܕܶܝܢ ܚܰܝܠܳܐ ܕܗܰܘ ܥܽܘܕܪܳܢܳܐ. ܠܳܐ ܕܶܝܢ ܢܶܬܩܰܪܰܒ ܠܶܗ ܙܢܳܐ ܐ̱ܚܪܺܢܳܐ ܝܺܕܺܝܥܳܐ ܘܝܰܬܺܝܪ ܡܰܥܒܕܳܢܳܐ܆ ܕܡܰܐܣܝܳܢܽܘܬܳܐ ܕܬܰܪܬܶܝܢ: ܟܰܕ ܡܰܪܦܶܝܢ ܚ̱ܢܰܢ ܕܢܶܬܥܰܕܰܠ ܒܗܰܘ ܕܰܟܪܺܝܗ܆ ܒܳܐܣܝܳܐ ܡܶܬܥܰܕܠܺܝܢܰܢ. ܟܰܕ ܒܗܶܝܢ ܒܡ̈ܶܠܶܐ. ܐܳܡܪܺܝܢ ܚ̱ܢܰܢ܆ ܕܡܶܢ ܠܘܬ ܐܳܣܝܳܐ ܗܘ̣ܳܬ. ܘܗܳܕܶܐ ܟܰܕ ܗܽܘ ܟܪܺܝܗܳܐ ܝܰܗ̱ܒ ܥܶܠ̈ܠܳܬܳܐ ܕܗܳܝ ܕܝܰܬܺܝܪ ܩܰܫܝܳܐܺܝܬ ܢܶܬܟܪܰܗ. ܐܶܢܕܶܝܢ ܗܽܘ ܐܳܣܝܳܐ. ܠܳܐ ܡܒܰܨܪܳܐܺܝܬ. ܘܰܒܙܰܒܢܶܗ ܕܟܽܠ ܡܶܕܶܡ܆ ܠܰܙܢܰܝ̈ܳܐ ܕܺܝܠܳܗ̇ ܕܳܐܣܝܽܘܬܳܐ ܢܶܥܒܶܕ܆ ܗܳܠܶܝܢ ܕܰܩܛܺܝܓܪܳܢܽܘܬܳܐ܆ ܥܰܠ ܗܰܘ ܕܰܟܪܺܝܗ ܟܺܐܢܳܐܺܝܬ ܡܶܬܗܰܦ̈ܟܳܢ.
ܐܶܬܺܝܗܶܒ ܗܳܟܺܝܠ ܗܳܝܕܶܝܢ ܢܳܡܽܘܣܳܐ ܗܰܘ ܕܰܒܝܰܕ ܟܬܺܝ̈ܒܳܬܳܐ܆ ܐܰܝܟܰܢܳܐ ܕܠܳܐ ܠܳܐ ܡܶܬܬܰܟܣܳܢܺܝܬܳܐ ܬܶܗܘܶܐ ܐܺܝܬܶܝܗ̇ ܗܳܝ ܕܢܶܚܛܶܐ܆ ܒܰܫܦܺܝܥܽܘܬܳܗ̇ ܘܣܰܓܺܝܽܐܘܬܳܗ̇ ܕܰܚܛܺܝܬܳܐ܆ ܬܶܬܚܫܶܒ ܕܶܝܢ ܠܗܳܢܽܘܢ ܕܡܶܢ ܒܳܬܰܪ ܣܝܳܡ ܢܳܡܽܘܣܳܐ ܘܡܰܥܗܕܳܢܽܘܬܳܐ ܕܡܶܢ ܗܳܢܳܐ ܚܳܛܶܝܢ.
ܐܶܠܳܐ ܡܶܛܽܠ ܕܠܳܐ ܐ̱ܢܳܫ ܟܰܕ ܡܰܗܦܶܟ ܢܺܐܡܰܪ ܬܽܘܒ: ܒܰܛܠܳܗ̇[12] ܗܽܘ ܗܳܟܺܝܠ ܢܳܡܽܘܣܳܐ ܠܰܚܛܺܝܬܳܐ ܡܫܰܡܠܝܳܐܺܝܬ܆ ܡܩܰܕܶܡ ܠܳܗ̇ ܠܰܗܦܳܟܬܳܐ ܗܽܘ ܫܠܺܝܚܳܐ܆ ܘܳܐܡܰܪ: ܢܳܡܽܘܣܳܐ ܡܰܢ ܠܥܽܘܕܪܳܢܳܐ ܐܶܬܺܝܗܶܒ. ܠܢܳܡܽܘܣܳܐ ܓܶܝܪ. ܠܥܽܘܕܪܳܢܳܐ ܝܰܗܒܶܗ ܐܰܠܳܗܳܐ. ܐܰܝܟܰܢܳܐ ܕܶܐܫܰܥܝܳܐ ܢܒܺܝܳܐ ܐܳܡܰܪ: ܠܰܟܝܳܢܳܐ ܕܶܝܢ ܕܺܝܠܰܢ. ܕܰܡܓܺܝܕ ܗ̱ܘܳܐ ܘܰܦܣܺܝܩ ܚܰܝܠܶܗ܆ ܘܡܶܢ ܥܒܳܪ ܦܽܘܩܕܳܢܳܐ ܕܳܐܕܳܡ ܐܶܬܡܚܶܠ ܠܳܐ ܚܰܝܶܠ. ܠܳܐ ܐܰܦܢܺܝ ܐܰܝܬܝܶܗ ܠܚܽܘܠܡܳܢܳܐ ܗܰܘ ܕܙܳܕܶܩ ܗ̱ܘܳܐ܆ ܠܳܐ ܐܰܓܗܝܶܗ ܡܶܢ ܚܒܳܠܳܐ. ܐܶܡܰܪ ܓܶܝܪ: ܕܠܳܐ ܬܶܩܛܽܘܠ. ܠܳܐ ܬܓܽܘܪ[13]. ܘܰܒܝܰܕ ܗܳܠܶܝܢ ܕܙܳܕܶܩ ܠܡܶܥܪܰܩ ܡܶܢ ܚܛܺܝܬܳܐ ܐܰܠ̣ܶܦ. ܐܰܘܣܶܦ ܕܶܝܢ܆ ܗܳܝ: ܕܬܶܪܚܰܡ ܠܡܳܪܝܳܐ ܐܰܠܳܗܳܟ܆ ܘܬܶܪܚܰܡ ܠܩܰܪܺܝܒܳܟ ܐܰܝܟ ܢܰܦܫܳܟ[14]܆ ܘܰܒܗܳܕܶܐ ܠܽܐܘܪܚܳܐ ܕܰܡܝܰܬܪܽܘܬܳܐ ܚܰܘܺܝ. ܚܰܝܠܳܐ ܕܶܝܢ ܠܗܳܝ ܕܰܢܬܰܪܶܨ ܗܳܠܶܝܢ. ܠܳܐ ܣܳܡ ܒܶܗ܆ ܘܳܐܦܠܳܐ ܠܰܟܝܳܢܳܐ ܐ̱ܢܳܫܳܝܳܐ ܕܡܶܬܟܰܦܰܦ ܗ̱ܘܳܐ ܡܶܢ ܚܛܺܝܬܳܐ ܬܪܰܨ. ܐܰܟܙܢܳܐ ܕܶܐܢ ܐ̱ܢܳܫ ܠܗܰܘ ܕܣܶܐܒ ܘܰܟܦܺܝܦ ܠܘܳܬ ܐܰܪܥܳܐ܆ ܫܰܒܽܘܩܬܳܐ ܡܰܢ ܢܶܬܶܠ ܠܶܗ ܗܳܝ ܕܰܡܣܰܡܟܳܐ ܘܛܳܥܢܳܐ ܠܶܗ܆ ܚܰܝܠܳܐ ܕܶܝܢ ܐܳܦܠܳܐ ܚܰܕ ܢܫܰܟܶܢ ܠܶܗ ܠܘܳܬ ܗܳܝ ܕܰܢܗܰܠܶܟ܆ ܐܳܦܠܳܐ ܒܚܺܝܨܽܘܬܳܐ ܡܶܕܶܡ ܢܚܰܝܶܠ ܠܪ̈ܶܓܠܰܘܗ̱ܝ܆ ܗܳܢܽܘܢ ܕܡܶܢ ܣܰܝܒܽܘܬܳܐ ܡܶܬܒܰܝ̈ܕܠܳܢ ܘܩܳܨ̈ܥܳܢ[15].
ܐܰܡܠܶܟ ܓܶܝܪ ܡܰܘܬܳܐ ܐܳܡܰܪ ܡܶܢ ܐܳܕܳܡ ܥܕܰܡܳܐ ܠܡܽܘܫܶܐ. ܐܳܦ ܥܰܠ ܐܰܝܠܶܝܢ ܕܠܳܐ ܚܛܰܘ܆ ܒܰܕܡܽܘܬܳܐ ܕܰܥܒܳܪ ܦܽܘܩܕܳܢܶܗ ܕܳܐܕܳܡ܆ ܗܰܘ ܕܺܐܝܬܰܘܗ̱ܝ ܛܽܘܦܣܳܐ ܕܗܰܘ ܕܰܥܬܺܝܕ. ܠܡܰܘܬܳܐ ܓܶܝܪ ܗܰܘ ܕܡܶܢ ܐܳܕܳܡ ܥ̣ܰܠ ܥܰܠ ܟܝܳܢܳܐ ܕܺܝܠܰܢ܆ ܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܠܳܐ ܟ̣ܠܳܐ. ܡܽܘܫܶܐ ܓܶܝܪ ܗܳܪܟܳܐ܆ ܠܰܣܝܳܡ ܢܳܡܽܘܣܳܐ. ܘܰܠܕܽܘܒܳܪܳܐ ܗܰܘ ܕܒܺܐܝܕܰܘ̈ܗ̱ܝ ܐܶܬܺܝܗܶܒ ܩܳܪܶܐ܆ ܐܰܝܟ ܗܳܝ ܕܰܐܡܺܝܪܳܐ ܒܶܐܘܰܢܓ̈ܶܠܝܰܐ ܡܶܛܽܘܠ ܗܳܢܽܘܢ ܕܰܒܢܳܡܽܘܣܳܐ ܚܳܐܝܶܢ ܗ̱ܘܰܘ ܒܗܰܘ ܙܰܒܢܳܐ܆ ܕܺܐܝܬ ܠܗܽܘܢ ܡܽܘܫܶܐ ܘܰܢܒܺܝ̈ܶܐ[16]܆ ܘܗܳܕܶܐ ܟܰܕ ܡܽܘܫܶܐ ܡܶܢ ܙܰܒܢܳܐ ܣܰܓܺܝܳܐܐ ܫܒܰܩ ܗ̱ܘܳܐ ܠܥܳܠܡܳܐ ܗܳܢܳܐ܆ ܘܰܚܙܰܩ ܠܘܳܬ ܐܰܠܳܗܳܐ. ܥܒܰܪ ܗܳܟܺܝܠ ܡܰܘܬܳܐ. ܘܰܡܛܳܐ ܒܡܰܪܕܺܝܬܶܗ܆ ܥܕܰܡܳܐ ܐܳܦ ܠܶܗ ܠܫܽܘܠܳܡܳܐ ܕܕܽܘܒܳܪܳܐ ܗܰܘ ܕܰܒܡܽܘܫܶܐ ܘܚܰܝ̈ܶܐ ܗܳܢܽܘܢ ܕܰܒܢܳܡܽܘܣܳܐ܆ ܗܳܢܽܘܢ ܕܰܡܫܺܝܚܳܐ ܘܶܐܘܰܢܓܶܠܺܝܽܘܢ ܫܪܳܐ ܘܰܐܥܒܰܪ ܐܶܢܽܘܢ. ܥܒܰܪ ܕܶܝܢ. ܟܰܕ ܡܰܡܠܶܟ܆ ܐܳܦ ܥܰܠ ܐܰܝܠܶܝܢ ܕܠܳܐ ܚܛܰܘ. ܘܰܐܝܟܰܢܳܐ ܥܰܠ ܗܳܢܽܘܢ ܕܠܳܐ ܚܳܛܶܝܢ ܗ̱ܘܰܘ. ܐܳܦܠܳܐ ܥ̈ܒܳܕܶܐ ܕܡܰܘܬܳܐ ܣܳܥܪܺܝܢ ܗ̱ܘܰܘ܆ ܐܰܡܠܶܟ ܡܰܘܬܳܐ. ܡܦܰܢܶܐ ܦܶܬܓܳܡܳܐ ܘܳܐܡܰܪ: ܕܠܰܘ ܡܶܢ ܗܳܢܶܝܢ ܕܰܠܗܽܘܢ ܡܰܣ̈ܟܠܳܢ܆ ܐܳܦܠܳܐ ܓܶܝܪ ܚܛܰܘ܆ ܐܶܠܳܐ ܒܰܕܡܽܘܬܳܐ ܕܰܥܒܳܪ ܦܽܘܩܕܳܢܶܗ ܕܳܐܕܳܡ[17]. ܒܕܽܘܡܝܳܐ ܐܳܡܰܪ ܕܰܥܒܳܪ[18] ܦܽܘܩܕܳܢܳܐ܆ ܕܰܐܒܳܐ ܩܰܕܡܳܝܳܐ ܐܳܕܳܡ܆ ܐܰܝܟ ܒܢܰܝ̈ܳܐ ܐܳܦ ܒܶܐܫܛܳܪܳܐ ܕܰܚܛܺܝܬܳܐ ܗܰܘ ܕܡܶܢ ܬܰܡܳܢ ܢܳܚܶܬ ܗ̱ܘܳܐ ܡܶܬܠܰܒܟܺܝܢ ܗ̱ܘܰܘ.
ܘܰܐܝܟܰܢܳܐ ܕܠܳܐ ܐ̱ܢܳܫ ܢܺܐܡܰܪ: ܘܰܐܝܟܰܢܳܐ ܐܺܝܬܶܝܗ̇ ܗܳܕܶܐ ܟܺܐܢܬܳܐ܆ ܕܡܶܛܽܠ ܫܽܘܪܰܥܬܳܐ ܕܰܐܒܳܐ܆ ܗܳܢܽܘܢ ܕܡܶܢܶܗ ܗܘ̣ܰܘ ܢܶܗܘܽܘܢ ܚܰܝܳܒ̈ܶܐ ܟܰܕ ܠܳܐ ܚܳܛܶܝܢ܆ ܟܰܕ ܩܳܕܶܡ ܡܪܺܝܡ ܠܳܗ̇ ܠܰܗܦܳܟܬܳܐ܆ ܐܰܠܘܶܬ ܠܗܳܝ ܩܰܕܡܳܝܬܳܐ. ܗܳܝ ܕܬܰܪܬܶܝܢ ܟܰܕ ܐܶܡܰܪ: ܒܰܕܡܽܘܬܳܐ ܕܰܥܒܳܪ ܦܽܘܩܕܳܢܳܐ ܕܳܐܕܳܡ܆ ܗܰܘ ܕܺܐܝܬܰܘܗ̱ܝ ܛܽܘܦܣܳܐ ܕܗܰܘ ܕܰܥܬܺܝܕ. ܟܠܺܝ ܐܳܡܰܪ ܠܠܶܫܳܢܳܟ ܐܳܘ ܡܩܰܛܪܓܳܢܳܐ. ܐܳܦܶܢ ܓܶܝܪ ܕܽܘܡܝܳܐ ܗܰܘ ܕܳܐܕܳܡ ܩܰܕܡܳܝܳܐ܆ ܡܶܣܬܒܰܪ ܕܣܳܓܶܦ ܠܗܳܢܽܘܢ ܕܠܳܐ ܚܛܰܘ܆ ܒܗܳܝ ܕܰܒܟܽܠܗܽܘܢ ܒܢܰܝ̈ܢܳܫܳܐ ܥܒܰܪܘ ܡܣܳܡ ܒܪ̈ܺܝܫܶܐ ܗܳܠܶܝܢ ܕܰܚܒܳܠܳܐ ܘܕܰܥܒܳܪ ܦܽܘܩܕܳܢܳܐ܆ ܐܶܠܳܐ ܟܺܝܬ܆ ܕܽܘܡܝܳܐ ܕܪܶܚܡܰܬ ܐ̱ܢܳܫܽܘܬܳܐ ܕܣܰܓܺܝ ܪܰܒܳܐ ܝܺܠܺܝܕ ܠܰܢ܆ ܟܰܕ ܛܽܘܦܣܳܐ ܗܘ̣ܳܐ ܕܳܐܕܳܡ ܗܰܘ ܕܰܬܪܶܝܢ ܘܕܰܥܬܺܝܕ܆ ܗܰܘ ܕܺܐܝܬܰܘܗ̱ܝ ܡܫܺܝܚܳܐ. ܐܶܬܬܦܺܝܤ ܗܰܘ ܘܶܐܫܬܡܰܥ ܠܚܰܘܳܐ. ܘܟܰܕ ܛܥܶܡ ܡܶܢ ܦܺܐܪܳܐ ܕܺܐܝܠܳܢܳܐ܆ ܕܢܶܥܒܶܕ ܒܢܰܝ̈ܳܐ ܒܥܳܩ̈ܳܬܳܐ ܡܶܬܚܰܝܰܒ ܗ̱ܘܳܐ܆ ܘܰܠܡܰܘܬܳܐ ܡܶܫܬܰܕܰܪ ܗ̱ܘܳܐ. ܗܳܕܶܐ ܓܶܝܪ ܡܰܙܥܩܳܐ ܗܳܝ ܕܰܒܥܳܩ̈ܳܬܳܐ ܬܺܐܠܕܺܝܢ ܒܢܰܝ̈ܳܐ܆ ܘܗܳܝ ܕܥܰܦܪܳܐ ܐܺܝܬܰܝܟ ܘܰܠܥܰܦܪܳܐ ܬܺܐܙܰܠ[19]. ܝܺܥ̣ܳܐ ܗܳܢܳܐ ܡܶܢ ܐܰܢ̱ܬܬܳܐ ܒܬܽܘܠܬܳܐ܆ ܟܰܕ ܐܶܬܒܰܣܰܪ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢܳܗ̇܆ ܘܒܰܪܶܟ ܠܡܰܥܒܰܪܬܳܐ ܕܺܝܠܰܢ ܕܰܠܗܳܝ ܕܢܶܗܘܶܐ ܐܺܝܬܰܝܢ.
ܘܟܰܕ ܒܥܶܩܳܪܳܐ ܕܰܟܝܳܢܳܐ ܕܺܝܠܰܢ ܐܰܝܟ ܐ̱ܢܳܫ ܢܺܐܡܰܪ. ܠܠܳܐ ܡܶܬܚܰܒܠܳܢܽܘܬܳܐ ܐܰܛܥܶܡ܆ ܒܗܳܠܶܝܢ ܕܰܠܩܽܘܒܠܳܐ. ܠܗܳܠܶܝܢ ܕܰܠܩܽܘܒܠܳܐ ܐܰܣܺܝ. ܘܰܕܟܽܠܗܶܝܢ ܛܳܒ̈ܳܬܳܐ. ܗܘ̣ܳܐ ܠܰܢ ܪܺܝܫܺܝܬܳܐ܆ ܟܰܕ ܫܰܚܠܶܦ ܐܰܗܦܶܟ ܐܶܢܶܝܢ ܠܰܡܥܺܝܩܳܢ̈ܝܳܬܳܐ ܠܘܳܬ ܒܰܣܺܝ̈ܡܳܬܳܐ. ܟܰܕ ܐܰܢ̱ܬܬܳܐ ܡܰܢ ܣܳܡ ܠܽܘܩܒܰܠ ܐܰܢ̱ܬܬܳܐ܆ ܠܰܒܬܽܘܠܬܳܐ ܗܳܝ ܕܶܐܬܩܰܕܫܰܬ܆ ܠܽܘܩܒܰܠ ܗܳܝ ܕܶܐܬܬܰܛܥܝܰܬ ܡܶܢ ܚܶܘܝܳܐ. ܠܝܳܠܕܰܬ ܐܰܠܳܗܳܐ܆ ܠܽܘܩܒܰܠ ܟܰܪܣܳܐ ܗܳܝ ܕܚܶܒܠܰܬ ܠܩܳܐܺܝܢ. ܠܽܘܩܒܰܠ ܗܳܝ ܕܰܒܥܳܩ̈ܳܬܳܐ ܝܳܠܕܳܐ ܘܰܒܠܰܘܛܬܳܐ ܘܒܰܚܒܳܠܳܐ܆ ܗܳܝ ܕܰܒܚܰܕܽܘܬܳܐ ܘܰܒܒܽܘܪܟܬܳܐ ܘܰܒܠܳܐ ܡܶܬܚܰܒܠܳܢܽܘܬܳܐ ܝܶܠܕܰܬ. ܫܳܡܥܳܐ ܗ̱ܘܳܬ ܓܶܝܪ܆ ܡܒܰܪܰܟܬܳܐ ܐܰܢ̱ܬܝ ܒܢܶܫ̈ܶܐ܆ ܘܰܡܒܰܪܰܟ ܗ̱ܘ̣ ܦܺܐܪܳܐ ܕܟܰܪܣܶܟܝ[20]. ܘܡܶܢ ܡܰܠܰܐܟܳܐ ܪ̈ܳܥܰܘܳܬܳܐ ܡܶܣܬܰܒܪܺܝܢ ܗ̱ܘܰܘ. ܚܰܕܽܘܬܳܐ ܪܰܒܬܳܐ ܗܳܝ ܕܬܶܗܘܶܐ ܠܟܽܠܶܗ ܥܳܠܡܳܐ. ܡܶܛܽܠ ܕܶܐܬܺܝܠܶܕ ܠܟܽܘܢ ܝܰܘܡܳܢܳܐ ܦܳܪܽܘܩܳܐ܆ ܗܰܘ ܕܺܐܝܬܰܘܗ̱ܝ ܡܫܺܝܚܳܐ ܡܳܪܝܳܐ ܒܰܡܕܺܝܢ̱ܬܶܗ ܕܕܰܘܺܝܕ[21]. ܩܰܝܣܳܐ ܕܶܝܢ ܐܰܩܺܝܡ ܠܽܘܩܒܰܠ ܩܰܝܣܳܐ. ܠܽܘܩܒܰܠ ܗܰܘ ܕܠܳܐ ܡܶܫܬܰܡܥܳܢܽܘܬܳܐ܆ ܗܰܘ ܕܡܶܫܬܰܡܥܳܢܽܘܬܳܐ. ܐܶܫܬܡܰܥ ܓܶܝܪ ܠܰܐܒܳܐ. ܚܠܳܦܰܝܢ ܕܺܝܠܰܢ ܠܳܐ ܡܶܬܬܦܺܝ̈ܣܳܢܶܐ. ܥܕܰܡܳܐ ܠܡܰܘܬܳܐ. ܡܰܘܬܳܐ ܕܶܝܢ ܕܰܨܠܺܝܒܳܐ[22]. ܐܺܝ̈ܕܰܝܳܐ ܕܶܝܢ ܣܕܰܪ܆ ܠܽܘܩܒܰܠ ܐܺܝܕܳܐ. ܗܳܠܶܝܢ ܕܶܐܣܬܰܟܰܟ̈ܶܝܢ ܒܨܶܨ̈ܶܐ܆ ܠܽܘܩܒܰܠ ܗܳܝ ܕܠܳܐ ܙܗܺܝܪܳܐܺܝܬ ܓܶܫܦܰܬ ܒܦܺܐܪܳܐ ܗܰܘ ܕܰܟܠܶܐ ܗ̱ܘܳܐ. ܐܰܝܟܰܢܳܐ ܕܰܚܢܰܢ ܠܺܐܝ̈ܕܰܝܳܐ ܕܺܝܠܰܢ ܐܰܘ ܟܺܝܬ ܠܣܳܥܽܘܪ̈ܘܳܬܳܐ܆ ܒܰܨܠܺܝܒܳܐ ܢܶܩܒܽܘܥ ܐܶܢܶܝܢ܆ ܟܰܕ ܡܶܢ ܥ̈ܒܳܕܶܐ ܕܥܳܠܡܳܐ ܠܗܳܠܶܝܢ ܡܡܺܝܬܺܝܢ ܚ̱ܢܰܢ. ܠܽܘܩܒܰܠ ܛܥܳܡܬܳܐ ܕܶܝܢ. ܛܥܳܡܬܳܐ ܬܩܰܠ ܦܰܚܶܡ. ܠܽܘܩܒܰܠ ܗܳܝ ܠܰܥܒܬܳܐ ܘܠܳܐ ܡܦܰܓܰܕܬܳܐ܆ ܗܳܝ ܡܚܰܡܣܢܳܢܺܝܬܳܐ ܘܪܳܕܽܘܝܬܳܐ ܕܺܝܠܰܢ ܘܡܰܐܣܝܳܢܺܝܬܳܐ܆ ܗܳܝ ܕܰܚܠܶܐ ܐܳܡܰܪ ܐ̱ܢܳܐ ܘܕܰܡܪܳܪܬܳܐ. ܘܗܳܝ ܟܺܝܬ ܕܺܐܝܬܶܝܗ̇ ܟܽܠܶܗ ܩܶܦܰܠܶܐܘܳܢ܆ ܟܰܕ ܠܽܘܩܒܰܠ ܗܳܝ ܕܥܰܦܪܐ ܐܺܝܬܰܝܟ ܘܰܠܥܰܦܪܳܐ ܬܺܐܙܰܠ܆ ܘܬܶܗܦܽܘܟ ܠܰܐܪܥܳܐ ܗܳܝ ܕܡܶܢܳܗ̇ ܐܶܬܢܣܶܒܬ[23]܆ ܠܰܩܝܳܡܬܳܐ ܐܰܩܺܝܡ܆ ܘܰܠܚܰܝ̈ܶܐ ܕܡܶܢ ܡܰܘܬܳܐ܆ ܘܰܠܢܽܘܚܳܡܳܐ ܕܡܶܢ ܡܺܝܬܽܘܬܳܐ܆ ܙܰܪܥܳܐ ܕܡܰܘܠܳܕܳܐ ܕܺܝܠܰܢ ܕܡܶܢ ܕܪܺܝܫ ܘܕܰܩܝܳܡܬܳܐ.
ܗܳܟܰܢܳܐ ܟܺܝܬ. ܐܳܦ ܠܰܫܝܽܘܠ ܐܶܙܰܠ. ܟܰܕ ܠܰܐܬܪ̈ܰܘܳܬܳܐ ܬܰܚ̈ܬܳܝܶܐ ܕܰܐܪܥܳܐ ܢܚܶܬ. ܠܰܘ ܒܰܐܠܳܗܽܘܬܳܐ ܥܰܪܛܶܠܳܝܬܳܐ܆ ܐܰܝܟܰܢܳܐ ܓܶܝܪ ܒܗܳܝ ܕܰܠܟܽܠ ܡܳܠܝܳܐ܆ ܘܰܠܡܶܬܚܙܳܝܽܘ ܠܳܐ ܡܶܫܟܚܳܐ܆ ܘܳܐܦܠܳܐ ܟܰܕ ܠܰܚܙܳܬܳܐ ܕܢܰܦܫܳܐ ܐܶܫܬܰܚܠܰܦ܆ ܠܡܶܛܪܰܕ ܓܶܝܪ ܙܳܕܶܩ ܗ̱ܘܳܐ ܠܦܰܢܛܰܣܺܝܰܐ܆ ܐܳܦ ܡܶܢ ܬܰܚ̈ܬܳܝܳܬ̣ܳܗ̇ ܕܰܐܪܥܳܐ ܐܰܝܟ ܡܰܚܣܪܳܢܺܝܬܳܐ܆ ܐܶܠܳܐ ܟܰܕ ܠܳܐ ܡܶܬܡܰܠܠܳܢܳܐܺܝܬ ܡܚܰܝܰܕ ܗ̱ܘܳܐ ܠܢܰܦܫܳܐ܆ ܗܳܝ ܕܣܳܡ ܚܠܳܦ ܥܶܪ̈ܒܰܘܗ̱ܝ ܪܳܥܝܳܐ ܗܰܘ ܛܳܒܳܐ[24]܆ ܘܗܳܟܰܢܳܐ ܐܶܬܚܙܺܝ ܠܢܰܦ̈ܫܳܬܳܐ ܗܳܠܶܝܢ ܕܬܰܡܳܢ ܚܒܺܝ̈ܫܳܢ ܗ̱ܘܰܝ̈܆ ܐܰܝܟܰܢܳܐ ܕܢܶܫܪܶܐ ܡܰܢ ܠܗܳܠܶܝܢ܆ ܗܳܢܽܘܢ ܕܟܰܕ ܠܳܐ ܚܛܰܘ ܐܰܡܠܶܟ ܥܠܰܝܗܽܘܢ ܡܰܘܬܳܐ ܒܰܕܡܽܘܬܳܐ ܕܰܥܒܳܪ ܦܽܘܩܕܳܢܶܗ ܕܳܐܕܳܡ[25]. ܘܡܶܛܽܠܗܳܕܶܐ ܐܳܦܶܢ ܠܳܐ ܡܶܫܬܰܢܩܺܝܢ ܗ̱ܘܰܘ܆ ܐܶܠܳܐ ܚܒܺܝܫܺܝܢ ܗ̱ܘܰܘ ܘܰܟܠܶܝܢ ܡܶܢ ܐܽܘܪܚܳܐ ܗܳܝ ܕܰܠܘܳܬ ܦܰܪܕܰܝܣܳܐ܆ ܘܡܶܢ ܢܝܳܚܬܳܐ ܗܳܝ ܕܒܰܐܬܪ̈ܰܘܳܬܳܐ ܢܰܗܺܝܪ̈ܶܐ܆ ܗܳܢܽܘܢ ܕܰܒܗܽܘܢ ܐܳܦ ܡܕܰܝܪܺܝܢ܆ ܟܰܕ ܒܪ̈ܽܘܚܳܬܗܽܘܢ ܡܶܢ ܒܳܬܰܪ ܩܝܳܡܬܳܐ ܥ̣ܰܠܘ ܐܰܟܚܕܳܐ ܥܰܡ ܡܫܺܝܚܳܐ܆ ܥܕܰܡܳܐ ܕܬܺܐܬܶܐ ܩܝܳܡܬܳܐ ܗܳܝ ܕܟܽܠ ܘܛܽܘܒܬܳܢܽܘܬܳܐ ܗܳܝ ܐ̱ܚܪܳܝܬܳܐ ܕܡܰܠܟܽܘܬܳܐ ܕܰܫܡܰܝܳܐ܆ ܢܺܐܡܰܪ ܕܶܝܢ ܐܳܦ ܠܗܳܢܽܘܢ ܕܒܰܐܣܽܘܪ̈ܶܐ ܕܦܽܘܩܘ܆ ܘܰܠܗܳܢܽܘܢ ܕܰܒܚܶܫܽܘܟܳܐ ܐܶܬܓܠܰܘ[26]. ܐܳܦ ܓܶܝܪ ܐܳܦ ܠܗܳܕܶܐ ܩܳܪ̈ܝܳܢ ܗ̱ܘܰܝ̈ ܠܶܗ ܠܗܰܘ ܟܺܐܢܳܐ ܘܪܳܚܶܡ ܐ̱ܢܳܫܳܐ܆ ܡ̈ܶܠܶܐ ܗܳܠܶܝܢ ܕܟܺܐܢܽܘܬܳܐ܆ ܘܰܬܪܺܝܨܽܘܬܳܐ ܗܳܝ ܕܠܳܐ ܡܰܣܰܒ ܒܰܐܦ̈ܶܐ ܕܕܺܝ̈ܢܶܐ.
ܗܳܟܰܢܳܐ ܐܳܦ ܦܶܛܪܽܘܤ ܫܠܺܝܚܳܐ ܐܳܡܰܪ: ܕܳܐܦ ܠܪ̈ܽܘܚܳܬܳܐ ܗܳܢܶܝܢ ܕܰܕܒܶܝܬ ܐܰܣܺܝܪ̈ܶܐ ܟܰܕ ܐܶܙܰܠ ܐܰܟܪܶܙ ܕܠܳܐ ܐܶܬܬܦܺܝܣ̈ܝ̱ ܗ̱ܘܰܝ̈ ܒܰܙܒܰܢ[27]܆ ܟܰܕ ܠܰܗܦܳܟܬܳܐ ܗܳܝ ܫܳܪܶܐ܆ ܗܳܝ ܕܐ̱ܢܳܫܺܝ̈ܢ ܟܰܕ ܡܰܗܦܟܺܝܢ ܐܳܡܪܺܝܢ: ܕܶܐܢ ܡܰܘܬܪܳܢܺܝܬܺܐ ܗ̱ܝ ܡܶܬܒܰܪܢܳܫܳܢܽܘܬܳܐ܆ ܠܡܳܢܳܐ ܠܰܘ ܩܕܳܡ ܙܰܒ̈ܢܶܐ ܣܰܓܺܝ̈ܶܐܐ ܐܶܬܒܰܪܢܰܫ. ܗܳܐ ܓܶܝܪ ܐܳܦ ܠܪ̈ܽܘܚܳܬܳܐ ܗܳܢܶܝܢ ܕܒܶܝܬ ܐܰܣܺܝܪ̈ܶܐ. ܟܰܕ ܐܶܙܰܠ ܐܰܟܪܶܙ܆ ܐܰܝܟܰܢܳܐ ܕܢܶܫܪܶܐ ܠܗܳܠܶܝܢ܆ ܠܟܽܠܗܽܘܢ ܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܠܰܡܗܰܝܡܳܢܽܘ ܒܶܗ܆ ܐܶܠܽܘ ܒܗܰܘ ܙܰܒܢܳܐ܆ ܐܶܬܳܐ ܠܘܳܬ ܗܳܠܶܝܢ ܕܥܰܠ ܐܰܪܥܳܐ ܟܰܕ ܐܶܬܒܰܣܰܪ. ܗܳܠܶܝܢ ܓܶܝܪ܆ ܐܳܦ ܟܰܕ ܒܬܰܚ̈ܬܳܝܳܬܳܗ̇ ܕܰܐܪܥܳܐ ܕܢܰܚ ܘܶܐܬܚܙܺܝ. ܐܶܫܬܰܘܕܥܽܘܗ̱ܝ ܡܶܢ ܟܽܠܦܪܽܘܤ܆ ܘܶܐܬܒܰܣܰܡܘ ܒܕܶܢܚܶܗ.
ܘܠܳܐ ܐ̱ܢܳܫ ܢܺܐܡܰܪ܆ ܕܰܐܡܺܝܪ ܒܕܽܘܟ ܒܰܟܬܳܒܳܐ ܐܰܠܳܗܳܝܳܐ ܠܘܳܬ ܐܰܠܳܗܳܐ ܕܟܽܠ܆ ܕܠܰܝܬ ܒܡܰܘܬܳܐ ܗܰܘ ܕܡܶܬܕܟܰܪ ܠܳܟ܆ ܒܰܫܝܽܘܠ ܕܶܝܢ ܡܰܢܽܘ ܢܰܘܕܶܐ ܠܳܟ[28]. ܟܬܺܝܒ ܓܶܝܪ. ܕܳܐܦ ܡܺܝ̈ܬܶܐ ܚܰܝ̈ܶܐ. ܠܳܐ ܢܶܚܙܽܘܢ[29]. ܐܶܠܳܐ ܗܽܘ ܟܰܕ ܗܽܘ ܢܒܺܝܳܐ ܐܳܡܰܪ: ܢܶܬܢܰܚܡܽܘܢ ܡܺܝ̈ܬܶܐ ܘܰܢܩܽܘܡܽܘܢ ܗܳܢܽܘܢ ܕܰܒܩܰܒܪ̈ܶܐ[30]. ܗܳܠܶܝܢ ܡܰܢ ܓܶܝܪ ܟܽܘܠܳܢܳܐܺܝܬ ܘܓܰܘܳܢܳܝ̈ܳܬܳܐ ܐܺܝܬܰܝܗܶܝܢ܆ ܥܰܠ ܟܽܠܶܗ ܟܝܳܢܳܐ. ܗܳܠܶܝܢ ܕܶܝܢ ܕܺܝܠ̈ܠܳܬܳܐ222. ܘܰܠܥܶܠ ܡܶܢ ܟܝܳܢܳܐ. ܘܰܕܡܰܘܗܰܒܬܶܗ ܘܚܰܝܠܬܳܢܽܘܬܶܗ ܕܰܐܠܳܗܳܐ ܒܰܠܚܽܘܕܶܝܗ̇. ܣܰܓܺܝ̈ܳܐܬܳܐ ܓܶܝܪ ܡܶܢ ܗܳܠܶܝܢ ܕܰܡܕܰܒܪܳܢܽܘܬܳܐ ܘܡܶܬܒܰܪܢܫܳܢܽܘܬܳܐ ܗܳܝ ܕܡܶܛܽܠܳܬܰܢ܆ ܬܡܺܝ̈ܗܳܬܳܐ ܐܺܝܬܰܝܗܶܝܢ܆ ܘܢܰܦܺܝ̈ܩܳܢ ܠܒܰܪ ܡܶܢ ܬܚܽܘ̈ܡܶܐ ܕܰܟܝܳܢܳܐ.
ܙܰܒܢܰܐ ܗ̱ܘ ܕܶܝܢ ܕܳܐܦ ܠܗܳܝ ܐ̱ܚܪܺܬܳܐ ܢܶܫܘܶܐ ܠܰܫܪܳܝܳܐ ܕܠܳܚܶܡ܆ ܕܥܰܣܩܬܳܐ ܡܶܣܬܰܒܪܳܐ ܘܡܶܢ ܣܰܓܺܝ̈ܶܐܐ ܡܶܬܬܰܣܪܚܳܐ ܘܡܶܫܬܰܐܠܳܐ܆ ܗܳܝ ܕܡܶܢ ܫܠܺܝܚܳܐ ܠܘܳܬ ܩܽܘܪ̈ܺܝܢܬܳܝܶܐ ܟܬܺܝܒܳܐ ܡܶܛܽܠ ܡܫܺܝܚܳܐ: ܐܶܡܰܬܝ ܕܶܝܢ ܕܢܶܫ̈ܬܰܥܒܕܳܢ ܠܶܗ ܟܽܠܗܶܝܢ܆ ܗܳܝܕܶܝܢ ܐܳܦ ܗܽܘ ܒܪܳܐ ܢܶܫܬܰܥܒܰܕ ܠܗܰܘ ܕܫܰܥܒܶܕ ܠܶܗ ܟܽܠܗܶܝܢ܆ ܐܰܝܟܰܢܳܐ ܕܢܶܗܘܶܐ ܐܺܝܬܰܘܗ̱ܝ ܐܰܠܳܗܳܐ ܟܽܠܗܶܝܢ ܒܟܽܠܗܶܝܢ[31]. ܠܡܶܕܰܥ ܗܳܟܺܝܠ ܙܳܕܶܩ܆ ܕܰܐܠܳܗܳܐ ܐܰܝܟ ܡܶܠܬܳܐ ܕܒܳܪܽܘܝܽܘܬܳܐ ܘܰܕܫܽܘܠܛܳܢܳܐ ܘܰܕܚܰܝܠܳܐ ܠܳܐ ܡܶܬܡܰܠܠܳܢܳܐ܆ ܘܟܰܕ ܨܳܒܶܝܢ ܚ̱ܢܰܢ ܘܟܰܕ ܠܳܐ ܨܳܒܶܝܢ ܚ̱ܢܰܢ܆ ܐܰܠܳܗܳܐ ܕܟܽܠܰܢ ܐܺܝܬܰܘܗ̱ܝ. ܘܡܳܪܳܐ ܘܡܰܠܟܳܐ. ܐܰܝܟ ܬܰܪܥܺܝܬܳܐ ܕܶܝܢ ܗܳܝ ܕܰܡܝܰܬܪܽܘܬܳܐ܆ ܠܰܘ ܕܟܽܠܗܽܘܢ ܒܢܰܝ̈ܢܳܫܳܐ ܐܺܝܬܰܘܗ̱ܝ ܡܰܠܟܳܐ ܘܰܐܠܳܗܳܐ. ܐܶܠܳܐ ܕܗܳܢܽܘܢ ܕܨܳܒܶܝܢ ܒܰܠܚܽܘܕ܆ ܘܰܕܗܳܢܽܘܢ ܕܒܰܡܝܰܬܪܽܘܬܳܐ ܚܳܐܝܶܢ܆ ܘܰܕܗܳܢܽܘܢ ܕܠܳܐ ܐܰܡܠܟܰܬ ܥܠܰܝܗܽܘܢ ܚܛܺܝܬܳܐ ܒܦܰܓܪܗܽܘܢ ܡܳܝܽܘܬܳܐ[32]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ: ܒܗܳܕܶܐ ܓܶܝܪ ܡܶܠܬܳܐ܆ ܐܰܠܳܗܳܐ ܕܰܐܒܪܳܗܳܡ ܘܕܺܐܝܣܚܳܩ ܘܰܕܝܰܥܩܽܘܒ ܡܫܰܡܰܗ. ܘܰܢܒܺܝܳܐ ܗܰܘ ܕܰܡܙܰܡܰܪ ܡܫܰܒܰܚ܆ ܡܰܠܟܳܐ ܕܺܝܠܝ. ܘܰܐܠܳܗܳܐ ܕܺܝܠܝ[33]. ܐܰܝܟܰܢܳܐ ܟܺܝܬ ܕܗܰܘ ܕܡܶܢ ܚܛܺܝܬܳܐ. ܘܡܶܢ ܚܰܫ̈ܶܐ ܗܳܠܶܝܢ ܫܟܺܝܪ̈ܶܐ ܡܶܬܬܰܡܠܰܟ܆ ܠܳܐ ܡܫܰܥܒܰܕ ܠܰܐܠܳܗܳܐ. ܟܰܕ ܕܶܝܢ ܠܗܳܢܶܝܢ ܕܰܠܩܽܘܒܠܳܐ ܐܺܝܬܰܘܗ̱ܝ ܡܫܰܥܒܕܳܐ܆ ܕܰܡܪܺܝܡ ܐܺܝ̈ܕܰܝܳܐ ܠܽܘܩܒܰܠ ܡܰܠܟܽܘܬܳܐ ܗܳܝ ܢܳܡܽܘܣܳܝܬܳܐ ܡܶܣܬܒܰܪ.
ܡܫܺܝܚܐ ܗܳܟܺܝܠ. ܟܰܕ ܡܰܟܶܟ̣ ܗܽܘ ܠܶܗ. ܡܶܛܽܠ ܦܽܘܪܩܳܢܳܐ ܕܺܝܠܰܢ܆ ܟܽܠܗܶܝܢ ܗܳܠܶܝܢ ܕܺܝܠܰܢ ܒܰܝܬܺܝ ܠܶܗ. ܘܟܰܕ ܚܢܰܢ ܬܚܶܝܬ ܠܰܘܛܬܳܐ ܗܘ̣ܰܝܢܰܢ܆ ܠܠܰܘܛܬܳܐ ܥܠܰܘܗ̱ܝ ܢܰܓܕܳܗ̇܆ ܐܰܝܟܰܢܳܐ ܕܢܶܫܪܶܝܗ̇ ܠܗܳܕܶܐ܆ ܘܳܐܦ ܠܰܘܛܬܳܐ ܡܶܛܽܠ ܗܳܕܶܐ ܐܶܬܩܪܺܝ ܘܰܗܘ̣ܳܐ. ܐܳܡܰܪ ܓܶܝܪ ܦܰܘܠܽܘܤ܆ ܕܰܡܫܺܝܚܳܐ ܙܒܰܢ ܠܰܢ ܡܶܢ ܠܰܘܛܬܳܐ ܕܢܳܡܽܘܣܳܐ܆ ܟܰܕ ܗܘܳܐ ܚܠܳܦܰܝܢ ܠܰܘܛܬܳܐ. ܟܬܺܝܒ ܓܶܝܪ. ܕܠܺܝܛ ܗ̱ܘ̣ ܟܽܠ ܡܰܢ ܕܡܶܬܬܠܶܐ ܥܰܠ ܩܰܝܣܳܐ܆ ܐܰܝܟܰܢܳܐ ܕܰܒܥܰܡܡ̈ܶܐ ܒܽܘܪܟܬܳܐ ܗܳܝ ܕܰܐܒܪܳܗܳܡ ܬܶܗܘܶܐ ܒܰܡܫܺܝܚܳܐ ܝܶܫܽܘܥ[34]. ܒܗܳܕܶܐ ܡܶܠܬܳܐ܆ ܐܳܦ ܕܰܚܛܺܝܬܳܐ ܐܶܫܬܰܡܰܗ ܐܳܡܪܺܝܢ ܚ̱ܢܰܢ. ܠܗܰܘ ܓܶܝܪ ܐܳܡܰܪ ܕܠܳܐ ܝܺܕܰܥ ܚܛܺܝܬܳܐ܆ ܚܛܺܝܬܳܐ ܥܰܒܕܶܗ ܚܠܳܦܰܝܢ܆ ܐܰܝܟܰܢܳܐ ܕܰܚܢܰܢ ܢܶܗܘܶܐ ܒܶܗ ܙܰܕܺܝܩܽܘܬܳܐ ܕܰܐܠܳܗܳܐ[35].
ܐܰܟܙܢܳܐ ܗܳܟܺܝܠ ܕܰܚܠܳܦܰܝܢ ܠܰܘܛܬܳܐ ܘܰܚܛܺܝܬܳܐ ܐܶܫܬܰܡܰܗ. ܒܶܗ ܟܰܕ ܒܶܗ ܒܰܙܢܳܐ܆ ܟܰܕ ܚܢܰܢ ܠܰܘ ܐܰܝܟ ܦܽܘܩ̈ܕܳܢܶܐ ܚܳܐܝܶܢ ܚ̱ܢܰܢ܆ ܐܶܠܳܐ ܫܳܓܫܺܝܢ ܚ̱ܢܰܢ ܒܚܰܫ̈ܶܐ܆ ܟܰܕ ܠܡܳܪܽܘܕܽܘܬܳܐ ܘܰܠܠܳܐ ܫܽܘܥܒܳܕܳܐ ܗܰܘ ܕܺܝܠܰܢ ܡܒܰܝܬܶܐ ܠܶܗ܆ ܗܽܘ ܐܰܡܺܝܪ ܠܳܐ ܡܫܰܥܒܕܳܐ. ܐܰܝܟܰܢܳܐ ܕܶܐܡܰܬܝ ܕܰܒܝܰܕ ܐܶܘܰܢܓܶܠܺܝܽܘܢ܆ ܟܰܕ ܪܳܕܶܐ ܘܡܰܠܶܦ ܠܰܢ܆ ܘܰܠܘܳܬ ܡܶܫܬܰܘܕܥܳܢܽܘܬܳܐ ܡܰܝܬܶܐ ܠܰܢ܆ ܢܰܪܚܶܩ ܡܰܢ ܡܶܢܰܢ. ܠܰܚܛܺܝܬܳܐ ܗܳܝ ܡܳܪܽܘܕܬܳܐ܆ ܢܫܰܥܒܶܕ ܠܰܢ ܕܶܝܢ ܠܛܰܝܒܽܘܬܳܐ. ܐܳܦ ܟܰܕ ܒܙܰܕܺܝܩܽܘܬܳܐ ܡܶܬܬܰܡܠܟܺܝܢܰܢ܆ ܘܰܢܩܰܪܒܰܢ ܠܰܐܠܳܗܳܐ܆ ܗܳܝܕܶܝܢ. ܗܽܘ ܢܶܣܬܒܰܪ ܕܰܡܫܰܥܒܰܕ ܡܶܟܺܝܠ܆ ܟܰܕ ܚܠܳܦ ܠܳܐ ܫܽܘܥܒܳܕܳܐ ܘܠܳܐ ܡܶܬܬܦܺܝܣܳܢܽܘܬܳܐ܆ ܠܫܽܘܥܒܳܕܳܐ ܗܰܘ ܕܺܝܠܰܢ ܡܒܰܝܬܶܐ ܠܶܗ܆ ܘܳܐܦ ܗܽܘ ܡܶܣܬܰܟܰܠ ܘܡܶܬܶܐܡܰܪ ܕܰܡܫܰܥܒܰܕ܆ ܐܰܝܟܰܢܳܐ ܕܢܶܗܘܶܐ ܐܺܝܬܰܘܗ̱ܝ ܐܰܠܳܗܳܐ ܟܽܠܗܶܝܢ ܒܟܽܠܗܶܝܢ[36]. ܗܳܝܕܶܝܢ ܓܶܝܪ. ܠܰܘ ܒܗܳܝ ܒܰܠܚܽܘܕ ܕܒܳܪܽܘܝܳܐ ܐܺܝܬܰܘܗ̱ܝ܆ ܐܶܠܳܐ ܐܳܦ ܒܡܶܫܬܰܘܕܥܳܢܽܘܬܳܐ ܐܳܦ ܒܟܽܠܗܶܝܢ܆ ܢܶܗܘܶܐ ܐܰܠܳܗܳܐ ܕܗܳܢܽܘܢ ܕܶܐܫܬܰܥܒܰܕܘ. ܕܗܳܢܽܘܢ ܡܰܢ. ܟܰܕ ܡܶܛܽܠ ܡܝܰܬܪܽܘܬܳܐ ܐܶܫܬܰܘܕܥܽܘܗ̱ܝ ܡܶܢ ܟܰܕܽܘ ܘܶܐܫܬܰܥܒܰܕܘ ܠܶܗ܆ ܕܗܳܢܽܘܢ ܕܶܝܢ ܟܰܕ ܠܚܰܪܬܳܐ ܒܝܰܕ ܫܽܘܢܳܩܳܐ ܗܰܘ ܕܠܳܐ ܫܽܘܠܳܡ ܡܶܫܬܰܘܕܥܺܝܢ ܠܶܗ܆ ܕܡܰܘܩܶܕ ܡܶܟܺܝܠ ܘܠܰܘ ܕܡܰܢܗܰܪ.
ܠܳܐ ܐ̱ܢܳܫ ܕܶܝܢ ܟܰܕ ܫܳܡܰܥ ܡܶܛܽܠ ܒܪܳܐ܆ ܗܳܝ ܕܰܠܗܰܘ ܕܫܰܥܒܶܕ ܠܶܗ ܟܽܠܗܶܝܢ܆ ܢܰܣܒܰܪ ܕܚܰܣܺܝܪܳܐܺܝܬ ܡܶܢ ܚܰܝܠܳܐ ܐܺܝܬ ܠܶܗ ܘܰܣܢܺܝܩܳܐܺܝܬ܆ ܐܰܝܟܰܢܳܐ ܕܢܶܣܬܢܶܩ ܥܰܠ ܐܰܒܳܐ ܕܰܡܫܰܥܒܶܕ ܠܶܗ ܟܽܠܗܶܝܢ ܘܡܰܪܟܶܢ. ܫܰܘܝܳܐ ܗ̱ܝ ܓܶܝܪ ܬܠܺܝܬܳܝܽܘܬܳܐ ܩܰܕܷܺܝܫܬܳܐ ܒܟܽܠܗܶܝܢ. ܘܕܰܚܕܳܐ ܐܽܘܣܺܝܰܐ ܘܡܰܥܒܕܳܢܽܘܬܳܐ ܟܺܝܬ ܘܚܰܝܠܳܐ ܐܺܝܬܶܝܗ̇܆ ܐܳܦܶܢ ܐ̱ܚܪܺܢܳܐܺܝܬ ܗ̱ܘ̣ ܐܶܣܟܺܡܳܐ ܕܡܶܠܬܳܐ ܡܶܬܪܰܟܰܒ. ܐܶܢ ܓܶܝܪ ܐܳܦ ܐܰܒܳܐ ܢܶܬܶܐܡܰܪ ܕܡܰܥܒܶܕ ܡܶܕܶܡ܆ ܡܶܢ ܟܽܠ ܦܪܽܘܤ. ܒܝܰܕ ܒܪܳܐ ܘܰܒܪܽܘܚܳܐ. ܘܕܺܝܠܳܢܳܐܺܝܬ ܕܶܝܢ܆ ܡܶܛܽܠ ܒܪܳܐ ܠܦܺܝܠܺܝ̈ܦܺܝܣܳܝܶܐ ܟܬܰܒ ܦܰܘܠܽܘܤ: ܐܰܝܟ ܡܰܥܒܕܳܢܽܘܬܳܐ ܕܗܳܝ ܕܢܶܬܡܨܶܐ ܘܰܢܫܰܥܒܶܕ ܗܽܘ ܠܶܗ ܠܟܽܠܗܶܝܢ[37].
ܢܙܽܘܥ ܗܳܟܺܝܠ ܚܰܒܺܝ̈ܒܰܝ܆ ܕܫܳܡܥܺܝܢܰܢ ܕܡܶܬܶܐܡܰܪ ܡܫܺܝܚܳܐ ܠܳܐ ܡܫܰܥܒܕܳܐ܆ ܡܶܛܽܠ ܠܳܐ ܡܶܬܬܦܺܝܣܳܢܽܘܬܳܐ ܕܺܝܠܰܢ܆ ܘܡܶܛܽܠ ܩܰܘܡܳܐ ܣܰܩܽܘܒܠܳܝܳܐ ܘܡܰܩܪܒܳܢܽܘܬܳܐ ܕܚܰܫ̈ܶܐ. ܘܢܶܫܬܰܥܒܰܕ ܠܪܽܘܚܳܐ܆ ܘܢܰܣܠܶܐ ܠܚܰܝ̈ܶܐ ܗܳܢܽܘܢ ܚܰܫܳܢܳܝ̈ܶܐ. ܘܰܢܛܰܝܶܒ ܚܢܰܢ ܠܰܢ܆ ܐܰܝܟܰܢܳܐ ܕܳܐܦ ܒܰܢ ܢܶܗܘܶܐ ܟܽܠܗܶܝܢ ܐܰܠܳܗܳܐ[38]. ܕܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ܀
ܕܰܐܪܒܥܺܝܢ ܘܬܶܫܥܳܐ.