ܥܰܠ ܦܰܢܛܺܝܩܽܘܤܛܺܐ. ܐܶܬܶܐܡܰܪ ܕܶܝܢ ܒܫܰܒܬܳܐ ܗܳܝ ܕܒܳܬܰܪܟܶܢ. ܒܰܥܪܽܘܒܬܳܐ܆ ܟܰܕ ܩܰܕܺܝܡ ܗ̱ܘܳܐ ܨܰܘܡܳܐ ܡܰܟܪܶܙ ܐܰܝܟ ܥܝܳܕܳܐ.
48: ܐܶܫܰܥܝܳܐ ܗܰܘ ܕܝܰܬܺܝܪ ܐܺܝܬܰܘܗ̱ܝ ܡܪܺܝܩ ܒܰܪ̱ܬ ܩܳܠܳܐ ܡܶܢ ܟܽܠܗܽܘܢ ܢܒܺܝ̈ܶܐ. ܘܝܰܬܺܝܪ ܪܳܡܳܐ܆ ܘܕܶܐܘܰܢܓܶܠܳܐܺܝܬ ܡܰܠܽܘܢ ܐܰܘ ܢܒܺܝܳܐܺܝܬ ܩܰܕܶܡ ܐܰܟܪܶܙ. ܠܐ̱ܪܳܙܳܐ ܗܰܘ ܕܶܐܘܰܢܓܶܠܺܝܽܘܢ܆ ܚܙܳܝܗ̱ܝ ܠܥܰܡܰܢܽܘܐܶܝܠ ܕܝܳܬܶܒ ܥܰܠ ܟܽܘܪܣܝܳܐ ܪܳܡܳܐ ܘܰܡܫܰܩܠܳܐ[1]. ܘܕܰܐܝܟ ܡܳܪܝܳܐ ܡܰܢ ܨܒܰܐܘܽܬ. ܡܶܢ ܣܪ̈ܳܦܶܐ ܡܶܫܬܰܒܰܚ܆ ܕܰܐܝܟ ܓܡܽܘܪܬܳܐ ܕܶܝܢ ܗܽܘ ܟܰܕ ܗܽܘ ܥܰܠ ܡܰܕܒܚܳܐ ܣܺܝܡ. ܘܛܳܒ ܟܺܐܢܳܐܺܝܬ. ܓܡܽܘܪܬܳܐ ܩܰܕܡܳܐ ܗ̱ܘܳܬ ܡܛܰܦܣܳܐ܆ ܠܡܶܠܬܳܐ ܗܰܘ ܕܡܶܛܽܠܳܬܰܢ ܠܳܐ ܡܶܫܬܰܚܠܦܳܢܳܐܺܝܬ ܐܶܬܒܰܣܰܪ ܘܶܐܬܒܰܪܢܰܫ. ܗܳܕܶܐ ܓܶܝܪ ܐܺܝܬܰܘܗ̱ܝ ܥܰܡܰܢܽܘܐܶܝܠ.
ܐܰܟܙܢܳܐ ܓܶܝܪ ܕܩܰܝܣܳܐ ܕܟܰܕ ܥܰܡ ܢܽܘܪܳܐ ܢܶܬܥܰܪܙܰܠ ܘܢܺܐܩܰܕ ܐܰܟܺܝܦܳܐܺܝܬ܆ ܘܰܒܥܽܘܡܩܳܐ ܢܩܰܒܠܺܝܗ̇ ܠܫܰܠܗܶܒܺܝܬܳܐ܆ ܕܺܐܝܬܰܘܗ̱ܝ ܟܽܠܶܗ ܢܽܘܪܳܐ ܡܶܣܬܒܰܪ܆ ܘܗܳܕܶܐ. ܟܰܕ ܠܳܐ ܢܦܰܩ ܡܶܢ ܗܳܝ ܕܢܶܗܘܶܐ ܐܺܝܬܰܘܗ̱ܝ ܩܰܝܣܳܐ܆ ܘܳܐܦܠܳܐ ܫܕܳܐ ܡܶܢܶܗ ܠܰܟܝܳܢܶܗ ܒܰܝܬܳܝܳܐ܆ ܐܶܠܳܐ ܠܳܐ ܡܶܬܦܰܪܫܳܢܳܐܺܝܬ. ܕܚܰܕ ܐܺܝܬܰܘܗ̱ܝ ܡܶܬܗܰܝܡܰܢ܆ ܐܳܦ ܓܡܽܘܪܬܳܐ ܡܶܫܬܰܡܰܗ ܣܽܘܥܪܳܢܳܐ. ܘܰܫܡܳܐ ܠܳܐ ܡܶܬܦܰܠܓܳܢܳܐ܆ ܘܳܐܦ ܗܳܠܶܝܢ ܕܺܝ̈ܠܳܢܳܝܳܬܳܐ ܕܢܽܘܪܳܐ. ܡܰܥܒܶܕ ܘܡܰܢܗܰܪ ܘܡܰܘܩܶܕ܆ ܒܶܗ ܟܰܕ ܒܶܗ ܒܰܙܢܳܐ܆ ܟܰܕ ܐܶܬܚܰܝܰܕ ܡܶܠܬܶܗ ܕܰܐܠܳܗܳܐ ܠܒܶܣܪܳܐ ܗܰܘ ܕܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ܆ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܐܶܬܚܰܝܰܕ ܕܶܝܢ ܠܰܘ ܦܫܺܝܛܳܐܺܝܬ܆ ܐܶܠܳܐ ܒܰܚܕܳܝܽܘܬܳܐ ܗܳܝ ܕܒܰܩܢܽܘܡܳܐ܆ ܐܰܝܟܰܢܳܐ ܕܗܽܘ ܢܶܣܬܰܟܰܠ ܒܰܫܪܳܪܳܐ ܕܶܐܬܒܰܣܰܪ ܟܺܝܬ ܘܶܐܬܒܰܪܢܰܫ܆ ܢܰܛܪܶܗ ܡܰܢ ܠܒܶܣܪܳܐ ܟܰܕ ܗܺܝ ܗܳܕܶܐ ܐܺܝܬܰܘܗ̱ܝ ܗܰܘ ܡܳܐ ܕܺܐܝܬܰܘܗ̱ܝ܆ ܘܠܳܐ ܫܰܚܠܦܶܗ ܠܗܳܢܳܐ ܠܰܟܝܳܢܳܐ ܗܰܘ ܕܺܝܠܶܗ܆ ܐܳܦܠܳܐ ܬܽܘܒ ܗܽܘ ܠܰܟܝܳܢܳܐ ܕܗܰܘ ܐܶܬܚܰܠܰܦ. ܟܰܕ ܡܚܰܝܰܕ ܕܶܝܢ ܚܕܳܐ ܙܒܰܢ. ܠܳܐ ܡܶܬܦܰܠܓܳܢܳܐܺܝܬ܆ ܕܚܰܕ ܐܺܝܬܰܘܗ̱ܝ ܚܫܺܝܒ ܠܘܳܬܶܗ ܕܒܶܣܪܳܐ܆ ܘܟܽܠܳܗ̇ ܗܳܝ ܕܺܝܠܳܢܳܝܬܳܐ ܕܠܶܗ ܥܒܰܕ ܣܳܡ ܒܶܗ. ܐܰܝܟܰܢܳܐ ܟܺܝܬ ܕܳܐܦ ܢܰܐܣܶܐ. ܐܳܦ ܢܶܒ̣ܪܶܐ. ܐܳܦ ܢܰܚܶܐ܆ ܡܶܛܽܠ ܟܺܝܬ ܕܰܕܡܶܠܬܳܐ ܒܳܪܽܘܝܳܐ ܘܡܰܥܒܶܕ ܚܰܝ̈ܶܐ܆ ܗܘ̣ܳܐ ܕܺܝܠܳܢܳܝܳܐ ܗܽܘ ܦܰܓܪܳܐ܆ ܘܺܐܝܬܰܘܗ̱ܝ ܓܡܽܘܪܬܳܐ ܐܰܠܳܗܳܝܬܳܐ ܘܡܶܬܗܰܘܢܳܢܺܝܬܳܐ.
ܡܶܛܽܠܗܳܕܶܐ ܟܰܕ ܪܰܩ ܡܰܢ܆ ܒܣܰܡܝܳܐ ܗܰܘ ܕܡܶܢ ܡܰܘܠܳܕܳܐ ܣܳܡ ܥܳܒܽܘܕܳܐܺܝܬ ܒܳܒ̈ܳܬܳܐ܆ ܟܰܕ ܒܒܰܪ̱ܬ ܩܳܠܳܐ ܕܶܝܢ ܕܡܶܢ ܠܶܫܳܢܳܐ ܡܰܙܥܶܩ ܠܳܥܳܙܳܪ ܬܳܐ ܠܒܰܪ[2]܆ ܐܰܩܺܝܡ ܠܡܺܝܬܳܐ ܪܒܺܝܥܳܝ ܝܰܘ̈ܡܳܬܳܐ܆ ܘܰܕܒܰܐܣܽܘܪ̈ܶܐ ܕܰܩܒܽܘܪܬܳܐ ܐܰܣܺܝܪ ܘܰܣܪܶܐ. ܘܥܰܠ ܝܰܡܳܐ. ܐܰܝܟ ܕܥܰܠ ܐܰܪܥܳܐ ܡܗܰܠܶܟ ܗ̱ܘܳܐ. ܘܰܐ̱ܚܪ̈ܳܢܝܳܬܳܐ ܕܰܐܝܟ ܗܳܠܶܝܢ ܡܰܥܒܶܕ ܗ̱ܘܳܐ ܦܰܓܪܳܢܳܐܺܝܬ܆ ܗܳܠܶܝܢ ܟܺܝܬ ܕܕܽܐܘܣܺܝܰܐ ܐܰܠܳܗܳܝܬܳܐ ܒܰܠܚܽܘܕܶܝܗ̇ ܐܺܝܬܶܝܗ̇ ܗ̱ܘܳܬ ܠܡܰܥܒܳܕܽܘ ܐܶܢܶܝܢ.
ܠܗܳܕܶܐ ܓܡܽܘܪܬܳܐ ܐܳܡܰܪ ܢܒܺܝܳܐ: ܕܫܰܩܠܳܗ̇ ܚܰܕ ܡܶܢ ܣܪ̈ܳܦܶܐ ܡܶܢ ܡܰܕܒܚܳܐ. ܘܩܰܪܒܳܗ̇ ܠܶܗ܆ ܘܰܓܫܰܦ ܒܦܽܘܡܶܗ ܘܶܐܡܰܪ: ܗܳܐ ܓܶܫܦܰܬ ܗܳܕܶܐ ܒܣܶܦ̈ܘܳܬܳܟ. ܘܰܡܪܺܝܡܳܐ ܠܠܳܐ ܢܳܡܽܘ̈ܣܳܝܘܳܬܳܟ܆ ܘܠܰܚ̈ܛܳܗܰܝܟ ܡܕܰܟܝܳܐ[3]. ܡܕܰܟܝܳܐ ܓܶܝܪ ܐܰܝܟ ܕܒܰܫܪܳܪܳܐ ܠܣܶܦ̈ܘܳܬܳܐ ܕܗܳܢܽܘܢ ܕܰܒܠܶܒܳܐ ܡܰܢ ܡܗܰܝܡܢܺܝܢ ܒܶܗ ܠܙܰܕܺܝܩܽܘܬܳܐ܆ ܒܦܽܘܡܳܐ ܕܶܝܢ ܡܰܘܕܶܝܢ ܒܶܗ ܠܦܽܘܪܩܳܢܳܐ[4]܆ ܘܡܰܣܡܩܺܝܢ ܠܶܗ ܠܠܶܫܳܢܗܽܘܢ ܒܰܕܡܳܐ܆ ܗܳܕܐ ܗܝ ܓܶܝܪ ܡܕܰܟܝܳܢܽܘܬܳܗ̇ ܘܢܽܘܪܳܢܳܝܽܘܬܳܗ̇ ܕܗܳܕܶܐ ܓܡܽܘܪܬܳܐ. ܐܶܠܳܐ ܢܒܺܝܳܐ ܡܰܢ ܗܳܟܰܢܳܐ. ܝܽܗ̱ܘ̈ܕܳܝܶܐ ܕܶܝܢ ܗܳܢܽܘܢ ܕܡܶܢ ܟܽܠܶܗ ܣܽܘܟܳܠܳܐ ܣܦܺܝܩܺܝܢ܆ ܘܺܐܝܬܰܝܗܽܘܢ ܣܰܓܺܝ ܛܳܠܽܘ̈ܡܶܐ܆ ܘܰܡܣܰܡܶܝܢ ܒܬܰܚܦܺܝܬܳܐ ܗܳܝ ܕܥܰܠ ܠܶܒܗܽܘܢ܆ ܟܰܕ ܓܰܠܝܳܐܺܝܬ ܚܳܙܶܝܢ ܠܳܗ̇ ܠܰܓܡܽܘܪܬܳܐ. ܕܒܳܐܬܘ̈ܳܬܳܐ ܐܰܠܳܗܳܝ̈ܳܬܳܐ ܡܰܒܪܩܳܐ܆ ܘܰܒܡܰܠ̈ܦܳܢܘܳܬܳܐ ܡܰܢܗܪܳܐ܆ ܘܰܒܡܰܘܩܕܳܢܽܘܬܳܐ ܡܛܰܠܩܳܐ ܠܗܽܘܠܶܐ ܕܰܚܛܺܝܬܳܐ܆ ܐܰܝܟ ܗܳܝ ܕܰܟܬܺܝܒܳܐ. ܕܰܐܠܳܗܳܐ ܕܺܝܠܰܢ ܢܽܘܪܰܐ ܗ̄ܘ ܕܰܡܛܰܠܩܳܐ[5]܆ ܘܳܐܡܪܳܐ ܕܰܫܒܺܝܩܺܝܢ ܠܳܟ ܚ̈ܛܳܗܰܝܟ܆ ܘܰܕܫܽܘܠܛܳܢܳܐ ܐܺܝܬ ܠܶܗ ܠܰܒܪܶܗ ܕܐ̱ܢܳܫܳܐ ܥܰܠ ܐܰܪܥܳܐ ܠܡܶܫܒܰܩ ܚ̈ܛܳܗܶܐ܆[6] ܠܳܐ ܡܗܰܝܡܢܺܝܢ ܗ̱ܘܰܘ ܕܗܽܘ ܐܰܠܳܗܳܐ܆ ܗܽܘ ܗܰܘ ܕܰܡܡܰܠܶܠ ܗܳܐ ܩܰܪܺܝܒ ܠܗܽܘܢ܆ ܘܥܰܠ ܐܰܪܥܳܐ ܓܰܠܝܳܐܺܝܬ ܡܶܬܚܙܶܐ܆ ܘܥܰܡ ܒܢܰܝ̈ܢܳܫܳܐ ܡܶܬܗܰܦܰܟ[7]. ܐܶܠܳܐ ܟܰܕ ܡܶܬܬܰܩܠܺܝܢ ܗ̱ܘܰܘ ܒܗܰܘ ܡܳܐ ܕܡܶܬܚܙܶܐ܆ ܘܒܰܪܢܳܫܳܐ ܒܰܠܚܽܘܕ ܣܳܒܪܺܝܢ ܗ̱ܘܰܘ ܕܺܐܝܬܰܘܗ̱ܝ܆ ܠܳܐ ܕܶܝܢ ܬܽܘܒ ܗܽܘ ܟܰܕ ܗܽܘ ܐܳܦ ܐܰܠܳܗܳܐ܆ ܠܟܺܐܦܳܐ ܗܳܝ ܪܺܝܫ ܓܽܘܢܝܳܐ܆ ܠܗܳܝ ܓܒܺܝܬܳܐ܆ ܠܗܳܝ ܡܝܰܩܰܪܬܳܐ܆ ܠܫܽܘܥܳܐ ܕܟܶܫܠܳܐ ܐܰܝܟ ܕܰܟܬܺܝܒ. ܘܰܠܟܺܐܦܳܐ ܕܬܽܘܩܰܠܬܳܐ ܐܰܩܺܝܡܽܘܗ̇ ܗܶܢܽܘܢ ܠܗܽܘܢ[8]. ܟܰܕ ܠܘܳܬ ܡܽܘܫܶܐ ܦܥܺܝܪ ܠܗܽܘܢ ܚܶܟܗܽܘܢ܆ ܘܰܠܘܳܬ ܩܰܪܩܰܦܬܳܐ ܗܳܝ ܕܛܽܘܪܳܐ ܕܣܺܝܢܰܝ܆ ܘܟܰܕ ܥܰܡ ܬܰܪܥܺܝܬܳܐ ܡܶܕܶܡ ܡܫܰܩܰܠܬܳܐ ܘܡܰܪܳܚܬܳܐ ܡܶܬܪܰܘܪܒܺܝܢ܆ ܘܰܒܦܽܘܡܳܐ ܦܰܬܝܳܐ ܐܳܡܪܺܝܢ: ܕܠܰܢ ܥܰܠ ܛܽܘܪܳܐ ܒܢܽܘܪܳܐ ܡܰܠܶܠ ܐܰܠܳܗܳܐ[9]. ܠܗܳܢܳܐ ܕܶܝܢ܆ ܠܳܐ ܝܳܕܥܺܝܢܰܢ ܡܶܢ ܐܰܝܟܳܐ ܐܺܝܬܰܘܗ̱ܝ[10].
ܡܶܛܽܠ ܗܳܕܶܐ ܪܽܘܚܳܐ ܩܰܕܺܝܫܳܐ ܟܰܕ ܒܳܠܶܡ ܠܦܽܘܡܳܐ ܕܺܝܠܗܽܘܢ ܗܰܘ ܠܳܐ ܓܙܺܝܪܳܐ܆ ܘܰܠܥܰܒܝܽܘܬܳܐ ܕܬܰܪܥܺܝܬܗܽܘܢ܆ ܒܠܶܫܳܢ̈ܶܐ ܢܽܘܪ̈ܳܢܶܐ ܡܰܓܶܢ ܥܰܠ ܫ̈ܠܺܝܚܶܐ. ܟܰܕ ܡܰܘܕܰܥ. ܕܰܕܗܳܝ ܐܺܝܬܰܘܗ̱ܝ ܗ̱ܘܳܐ ܗܰܘ ܕܥܰܠ ܛܽܘܪܳܐ ܡܰܠܶܠ ܥܰܡ ܡܽܘܫܶܐ܆ ܐܳܦ ܗܰܘ ܕܰܐܝܟ ܓܡܽܘܪܬܳܐ ܘܠܰܘ ܗܺܝ ܢܽܘܪܳܐ ܒܰܡܕܰܒܪܳܢܽܘܬܳܐ ܕܢܰܚ ܘܶܐܬܚܙܺܝ܆ ܘܒܳܗ̇ ܒܰܕܡܽܘܬܳܐ ܠܰܢ ܤܛܰܪ ܡܶܢ ܚܛܺܝܬܳܐ ܐܶܫܬܰܘܬܰܦ ܒܰܕܡܳܐ ܘܰܒܒܶܣܪܳܐ܆ ܘܠܳܐ ܫܕܳܐ ܡܶܢܶܗ ܗܳܝ ܕܺܐܝܬܰܘܗ̱ܝ ܐܰܠܳܗܳܐ܆ ܐܳܦ ܟܰܕ ܗܘ̣ܐ ܒܰܪܢܳܫܳܐ[11]. ܐܰܝܟܰܢܳܐ ܕܡܶܬܩܰܪܒܳܢܳܐ ܢܶܗܘܶܐ܆ ܐܳܦ ܢܶܬܚܙܶܐ ܟܺܝܬ ܠܟܽܠܗܽܘܢ ܒܢܰܝ̈ܢܳܫܳܐ. ܟܰܕ ܡܕܰܟܶܝܢ ܚ̱ܢܰܢ ܢܰܦܫܰܢ܆ ܢܶܬܡܨܶܐ ܕܢܶܠܒܟܺܝܘܗ̱ܝ ܒܟܰܠܒܬܳܐ ܕܺܝܕܰܥܬܳܐ܆ ܐܰܝܟܰܢܳܐ ܕܰܚܙܳܐ ܢܒܺܝܳܐ ܕܰܥܒܰܕ ܚܰܕ ܡܶܢ ܣܪ̈ܳܦܶܐ.
ܕܡܶܛܽܠܗܳܕܶܐ ܓܶܝܪ ܐܶܬܚܙܺܝ ܡܰܟܺܝܟܳܐ܆ ܐܰܝܟܰܢܳܐ ܕܠܳܟ ܢܶܗܘܶܐ ܡܶܬܩܰܪܒܳܢܳܐ܆ ܗܽܘ ܣܗܶܕ ܠܳܟ܆ ܟܰܕ ܐܶܫܬܰܚܠܦܰܬ ܕܡܽܘܬܶܗ ܥܰܠ ܛܽܘܪܳܐ[12]܆ ܘܰܐܢܗܰܪ ܠܙܰܠܺܝܩܳܐ ܕܰܐܠܳܗܽܘܬܳܐ ܒܰܝܬܳܝܬܳܐ ܕܺܝܠܶܗ܆ ܘܒܰܪ ܫܳܥܬܶܗ ܚܡܰܠ ܘܩܰܦܣܶܗ. ܠܗܰܘ ܕܟܰܕ ܠܳܐ ܐܶܫܟܰܚܘ ܠܰܡܣܰܝܒܳܪܽܘܬܶܗ ܬܰܠ̈ܡܺܝܕܶܐ ܗܳܢܽܘܢ ܕܰܣܠܶܩܘ ܥܰܡܶܗ܆ ܠܘܳܬ ܐܰܪܥܳܐ ܐܶܬܪܟܶܢܘ ܘܰܢܦܰܠܘ. ܘܟܰܕ ܥܰܝ̈ܢܰܝܗܽܘܢ ܥܰܡܶܨܘ܆ ܒܰܐܪܥܳܐ ܠܦܰܪܨܽܘܦܳܐ ܕܺܝܠܗܽܘܢ ܩܒܰܥܘ܆ ܥܕܰܡܳܐ ܕܰܩܪܶܒ ܬܽܘܒ ܗܰܘ ܪܳܚܶܡ ܐ̱ܢܳܫܳܐ ܠܘܳܬ ܗܳܢܽܘܢ ܕܠܳܐ ܐܶܬܡܨܺܝܘ ܠܡܶܬܩܰܪܳܒܽܘ ܠܶܗ܆ ܘܰܡܫܰܝܢܳܐܺܝܬ ܐܶܡܰܪ ܟܰܕ ܡܩܺܝܡ ܠܗܽܘܢ: ܩܽܘܡܘ ܘܠܳܐ ܬܶܕܚܠܽܘܢ.
ܐܶܢܕܶܝܢ ܗܽܘ ܙܢܳܐ ܕܣܽܘܪܳܩܳܐ ܘܡܰܟܺܝܟܽܘܬܳܗ̇ ܕܰܡܕܰܒܪܳܢܽܘܬܳܐ. ܟܶܫܠܳܐ ܡܶܣܬܒܰܪ ܠܳܟ. ܐܳܘ ܝܽܗ̱ܘܕܳܝܳܐ܆ ܘܰܒܝܰܕ ܐܰܝܠܶܝܢ ܕܙܳܕܶܩ ܗ̱ܘܳܐ ܠܳܟ ܕܬܶܬܩܰܪܰܒ ܠܺܝܕܰܥܬܳܐ ܕܰܐܠܳܗܳܐ܆ ܒܝܰܕ ܗܳܠܶܝܢ ܫܳܘܰܪ ܐܰܢ̱ܬ ܘܥܳܪܶܩ ܐܰܢ̱ܬ܆ ܘܥܶܠܬܳܐ ܥܳܒܶܕ ܐܰܢ̱ܬ ܠܳܗ̇ ܠܪܶܚܡܰܬ ܐ̱ܢܳܫܽܘܬܳܐ܆ ܠܘܳܬ ܗܳܝ ܕܬܰܙܥܪܺܝܘܗ̱ܝ ܠܘܳܬ ܪܰܒܳܐ܆ ܘܰܠܗܰܘ ܕܰܕܪܰܒܽܘܬܳܐ ܕܺܝܠܶܗ ܠܰܝܬ ܣܳܟܳܐ[13]܆ ܐܰܝܟܰܢܳܐ ܕܳܐܡܰܪ ܢܒܺܝܳܐ: ܚܽܘܪ ܒܡܶܐܬܺܝܬܶܗ ܐܰܠܳܗܳܝܬܳܐ ܘܪܳܡܰܬ ܡܶܢ ܟܽܠ ܕܪܽܘܚܳܐ܆ ܘܶܐܬܥܰܗܰܕ ܠܛܽܘܪܳܐ ܕܣܺܝܢܰܝ܆ ܨܳܒܶܐ ܐ̱ܢܳܐ ܓܶܝܪ ܗܳܕܶܐ. ܐܳܦ ܐܶܢܳܐ܆ ܘܦܰܚܶܡ ܥܰܡ ܢܽܘܪܳܐ ܗܳܝ ܦܷ̇ܕܰܓܽܘܓܳܝܬܳܐ ܐܰܘܟܺܝܬ ܡܗܰܕܝܰܬ ܛܠܳܝ̈ܶܐ ܘܫܰܪܘܳܝܬܳܐ ܕܒܰܕܡܽܘܬ ܟܬܺܝ̈ܒܳܬܳܐ ܠܢܽܘܪܳܐ ܗܳܕܶܐ ܕܰܡܫܰܡܠܝܽܘܬܳܐ܆ ܘܰܕܡܰܠܝܳܐ ܬܶܐܽܘܪܺܝܰܐ ܪܽܘܚܳܢܳܝܬܳܐ ܘܰܡܥܰܠܰܝܬܳܐ.
ܐܳܘ ܓܶܝܪ ܠܰܘ ܐܰܝܟ ܕܠܰܡܫܰܥ̈ܒܕܶܐ ܐܶܬܩܰܪܰܒ ܠܘܳܬܟܽܘܢ ܒܗܰܘ ܙܰܒܢܳܐ܆ ܘܰܐܝܟ ܕܰܠܥܰܒ̈ܕܶܐ ܕܰܪ̈ܓܺܝܓܳܬܳܐ ܕܰܣܢܺܝܩܺܝܢ ܥܰܠ ܕܶܚܠܬܳܐ ܘܥܰܠ ܡܚܽܘܬܳܐ܆ ܘܕܰܠܡܰܚܣܶܢ ܐܶܬܡܨܺܝܘ ܬܠܳܬܳܐ ܝܰܘ̈ܡܺܝܢ ܒܰܠܚܽܘܕܰܝܗܽܘܢ ܠܡܶܬܕܰܟܳܝܽܘ܆ ܘܕܳܐܦܠܳܐ ܕܢܶܓܫܦܽܘܢ ܠܘܳܬ ܛܽܘܪܳܐ ܡܶܬܦܰܩܕܺܝܢ[14]܆ ܐܶܠܳܐ ܠܪܽܘܚܩܳܐ ܒܕܽܘܟ ܡܶܬܛܰܪܕܺܝܢ܆ ܡܶܛܽܠ ܕܽܘܒܳܪܳܐ ܚܰܝܽܘܬܳܢܳܐ ܘܠܳܐ ܡܠܺܝܠܳܐ. ܐܳܦܶܢ ܓܶܝܪ ܚܰܝܘܰܬ ܫܶܢܳܐ ܐܳܡܰܪ ܬܶܬܩܰܪܰܒ ܠܛܽܘܪܳܐ ܬܶܬܪܓܶܡ. ܐܶܢ ܟܺܝܬ ܒܥܺܝܪܳܐ ܠܳܐ ܬܺܚܶܐ.
ܡܶܛܽܠܗܳܕܶܐ ܟܺܝܬ܆ ܠܘܳܬ ܕܽܘܚܳܠܳܐ ܘܣܽܘܪܳܕܳܐ ܗܳܘ̈ܝܳܢ ܗ̱ܘܰܝ̈ ܟܽܠܗܶܝܢ. ܚܶܫܽܘܟܳܐ ܥܰܡܛܳܢܳܐ ܥܰܪܦܶܠܳܐ܆ ܘܰܙܥܳܩܬܳܐ ܕܫܺܝܦܽܘܪ̈ܶܐ ܕܰܡܙܺܝܥܳܐ ܗ̱ܘܳܬ ܠܡܰܫܡܰܥܬܳܐ. ܘܬܺܚܶܐ. ܘܝܰܚܒܽܘܪܳܐ ܕܣܳܠܶܩ ܐܰܝܟ ܕܡܶܢ ܓܰܘܙܰܠܬܳܐ ܕܝܳܩܕܳܐ܆ ܘܩ̈ܳܠܶܐ ܡܶܕܶܡ ܠܳܐ ܝܺܕܺܝ̈ܥܶܐ܆ ܘܒܰܪ̈ܩܶܐ ܕܪܳܗܛܺܝܢ ܘܰܥܢܳܢܳܐ[15]. ܘܗܳܕܶܐ. ܥܰܡܛܳܢܺܝܬܳܐ ܕܰܠܛܽܘܪܳܐ ܡܚܰܦܝܳܐ ܗ̱ܘܳܬ. ܘܟܽܠܗܶܝܢ ܦܫܺܝܛܳܐܺܝܬ ܐܺܝܬܰܝܗܶܝܢ ܗ̱ܘܰܝ̈܆ ܕܡܰܠ̈ܝܳܢ ܪܗܺܝܒܽܘܬܳܐ ܘܕܶܚܠܬܳܐ. ܐܰܝܟܰܢܳܐ ܟܺܝܬ ܕܳܐܦ ܡܽܘܫܶܐ ܢܺܐܡܰܪ: ܕܰܒܕܶܚܠܬܳܐ ܐܺܝܬܰܝ ܘܰܒܪܶܥܠܳܐ[16]. ܕܚܺܝܠܳܐ ܓܶܝܪ ܐܺܝܬܰܘܗ̱ܝ ܗ̱ܘܳܐ ܗܰܘ ܡܳܐ ܕܡܶܬܗܰܓܰܓ ܗ̱ܘܳܐ܆ ܐܰܝܟܰܢܳܐ ܕܳܐܡܰܪ ܫܠܺܝܚܳܐ. ܣܰܓܺܝ ܕܶܝܢ ܛܳܒܳܐܺܝܬ ܐܶܡܰܪ ܕܡܶܬܗܰܓܰܓ ܗ̱ܘܳܐ܆ ܘܠܰܘ ܕܡܶܣܬܰܟܰܠ ܗ̱ܘܳܐ ܐܰܘ ܕܡܶܬܺܝܕܰܥ. ܦܰܢܛܰܣܺܝܰܐ ܓܶܝܪ ܡܶܕܶܡ ܐܰܘܟܺܝܬ ܗܰܓܳܓܽܘܬܳܐ. ܘܕܽܘܡܝܳܐ. ܘܛܶܠܳܢܺܝܬܳܐ܆ ܘܩܰܕܺܝܡܽܘܬ ܡܛܰܦܣܳܢܽܘܬܳܐ ܐܰܝܟ ܕܰܒܝܽܘܩܢܳܐ܆ ܕܗܳܠܶܝܢ ܕܰܥܬܺܝ̈ܕܳܢ ܘܰܕܗܳܠܶܝܢ ܕܒܰܡܫܺܝܚܳܐ ܥܬܺܝ̈ܕܳܢ ܗ̱ܘܰܝ̈ ܕܢܶܬܓܰܠ̈ܝܳܢ܆ ܐܺܝܬܰܝܗܶܝܢ ܗ̱ܘܰܝ̈ ܗܳܢܶܝܢ ܕܥܰܡܽܘܛܳܐܺܝܬ ܒܢܳܡܽܘܣܳܐ ܗܳܝܕܶܝܢ ܡܶܬܚܰܘ̈ܝܳܢ ܗ̱ܘܰܝ̈.
ܬܳܐ ܗܳܟܺܝܠ ܒܰܚܶܢ ܠܺܝ ܘܦܰܚܶܡ ܠܽܘܩܒܰܠ ܗܳܠܶܝܢ܆ ܠܡܰܓܢܳܢܽܘܬܳܐ ܗܳܝ ܕܪܽܘܚܳܐ ܩܰܕܺܝܫܳܐ. ܠܳܐ ܐܶܣܬܢܶܩܘ ܫ̈ܠܺܝܚܶܐ ܥܰܠ ܡܰܣܰܩܬܳܐ ܕܰܠܛܽܘܪܳܐ. ܐܳܦ ܓܶܝܪ ܐܺܝܬܰܝܗܽܘܢ ܗ̱ܘܰܘ܆ ܕܣܰܠܺܝܩܺܝܢ ܥܰܠ ܩܰܪܩܰܦܬܳܐ ܗܳܝ ܕܰܡܝܰܬܪܽܘܬܳܐ܆ ܟܰܕ ܥܰܡ ܐܰܠܳܗܳܐ ܘܡܶܠܬܳܐ ܗܘ̣ܰܘ ܐܰܟܚܕܳܐ܆ ܘܰܡ̈ܠܰܝܳܐ ܐܺܝܬܰܝܗܽܘܢ ܗ̱ܘܰܘ ܡܶܢ ܡܰܪܕܽܘܬܳܐ ܗܳܝ ܐܰܠܳܗܳܝܬܳܐ. ܟܕ ܠܰܘ ܬܠܳܬܳܐ ܝܰܘ̈ܡܺܝܢ ܒܰܠܚܽܘܕ ܐܶܬܕܰܟܺܝܘ܆ ܐܶܠܳܐ ܠܟܽܠܳܗ̇ ܨܳܐܽܘܬܶܗ ܕܥܳܠܡܳܐ ܫܕܰܘ ܡܶܢܗܽܘܢ܆ ܘܶܐܡܰܪܘ ܠܡܰܠܦܳܢܳܐ ܕܺܝܠܗܽܘܢ: ܗܳܐ ܚܢܰܢ ܫܒܰܩܢܰܢ ܟܽܠ ܡܶܕܶܡ ܘܰܢܩܶܦܢܳܟ[17].
ܡܶܛܽܠܗܳܕܶܐ܆ ܟܰܕ ܝܳܬܒܺܝܢ ܗ̱ܘܰܘ ܒܒܰܝܬܳܐ܆ ܘܰܒܥܶܠܺܝܬܳܐ ܡܶܢ ܟܽܠ ܦܪܽܘܤ ܐܰܝܟܳܐ ܕܥܳܡܕܺܝܢ ܗ̱ܘܰܘ܆ ܐܰܝܟܰܢܳܐ ܕܳܐܡܰܪ ܟܬܳܒܳܐ ܗܰܘ ܕܰܦܪܰܟܣܺܝܤ܆ ܐܶܬܳܐ ܥܠܰܝܗܽܘܢ ܦܰܪܩܠܺܝܛܳܐ. ܐܰܝܟܰܢܳܐ ܕܢܰܠܶܦ ܢܰܗܺܝܪܳܐܺܝܬ܆ ܕܰܐܝܟ ܕܰܠܘܳܬ ܪ̈ܳܚܡܶܐ ܪܳܚܡܳܐܺܝܬ ܘܐ̱ܪܳܙܳܢܳܐܺܝܬ ܐܶܬܳܐ܆ ܘܠܳܐ ܗ̱ܘܳܐ ܐܰܝܟ ܕܰܠܘܳܬ ܥܰܒ̈ܕܶܐ ܕܚܺܝܠܳܐܺܝܬ ܘܡܳܪܳܢܳܐܺܝܬ. ܠܪ̈ܳܚܡܶܐ ܓܶܝܪ ܒܥܶܠܺܝܬܳܐ. ܘܰܒܬܰܘܳܢܳܐ܆ ܘܕܺܝܠܳܢܳܐܺܝܬ ܒܶܝܬ ܠܶܗ ܘܰܠܗܽܘܢ ܡܡܰܠܶܠ ܐ̱ܢܳܫ ܚܽܘܒܳܢܳܐܺܝܬ܆ ܘܰܡܫܰܘܬܶܦ ܠܗܽܘܢ ܒܠܳܐ ܡܶܬܡܰܠ̈ܠܳܢܝܳܬܳܐ ܘܰܒܐ̱ܪ̈ܳܙܶܐ.
ܡܶܛܽܠܳܬܳܗ̇ ܕܗܳܕܶܐ ܗܽܘ ܡܳܪܰܢ ܐܳܡܰܪ ܗ̱ܘܳܐ ܠܘܳܬܗܽܘܢ: ܐܰܢ̱ܬܽܘܢ ܪ̈ܳܚܡܰܝ ܐܺܝܬܰܝܟܽܘܢ. ܠܳܐ ܡܶܟܺܝܠ ܐܳܡܰܪ ܐ̱ܢܳܐ ܠܟܽܘܢ ܥܰܒ̈ܕܶܐ. ܡܶܛܽܠ ܕܥܰܒܕܳܐ ܠܳܐ ܝܳܕܰܥ ܡܳܢܳܐ ܥܳܒܶܕ ܡܳܪܶܗ. ܠܟܽܘܢ ܕܶܝܢ ܐܶܡܪܶܬܟܽܘܢ ܪ̈ܳܚܡܶܐ܆ ܡܶܛܽܠ ܕܟܽܠܗܶܝܢ ܗܳܠܶܝܢ ܕܫܶܡܥܶܬ ܡܶܢ ܐܰܒܳܐ ܕܺܝܠܝ܆ ܐܰܘܕܥܶܬ ܐܶܢܶܝܢ ܠܟܽܘܢ[18]. ܐܳܦ ܦܰܘܠܽܘܤ ܕܶܝܢ ܟܰܕ ܠܪ̈ܽܘܡܳܝܶܐ ܫܳܠܰܚ ܗ̱ܘܳܐ ܐܶܓܰܪܬܳܐ ܟܳܬܶܒ ܗ̱ܘܳܐ: ܠܳܐ ܓܶܝܪ ܢܣܰܒܬܽܘܢ ܪܽܘܚܳܐ ܕܥܰܒܕܽܘܬܳܐ ܬܽܘܒ ܠܕܶܚܠܬܳܐ. ܐܶܠܳܐ ܢܣܰܒܬܽܘܢ ܪܽܘܚܳܐ ܕܣܳܝܽܘܡܽܘܬ ܒܢܰܝ̈ܳܐ܆ ܗܳܝ ܕܒܳܗ̇ ܩܳܥܶܝܢ ܚ̱ܢܰܢ ܐܰܒܳܐ ܐܰܒܽܘܢ[19].
ܗܘ̣ܳܐ ܕܶܝܢ ܐܳܡܰܪ ܡܶܢܫܶܠܝ. ܩܳܠܐ ܡܶܢ ܫܡܰܝܳܐ܆ ܐܰܝܟ ܡܳܐ ܕܶܐܡܰܬܝ ܕܡܶܬܬܰܝܬܶܐ ܡܰܫܒܳܐ ܩܛܺܝܪܳܝܳܐ ܕܪܽܘܚܳܐ܆ ܘܰܡܠܳܐ ܠܟܽܠܶܗ ܒܰܝܬܳܐ ܐܰܝܟܳܐ ܕܝܳܬܒܺܝܢ ܗ̱ܘܰܘ. ܘܶܐܬܚܙܺܝܘ ܠܗܽܘܢ ܠܶܫܳܢ̈ܶܐ ܕܡܶܬܦܰܠܓܺܝܢ ܐܰܝܟ ܕܢܽܘܪܳܐ[20]. ܘܡܶܢ ܫܡܰܝܳܐ ܡܰܢ܆ ܐܰܝܟܰܢܳܐ ܕܰܢܚܰܘܶܐ ܓܰܠܝܳܐܺܝܬ܆ ܕܡܶܢ ܫܡܰܝܳܐ ܐܰܠܳܗܳܐܺܝܬ ܗܘ̣ܳܬ ܗܺܝ ܡܰܚܰܬܬ̣ܶܗ ܕܪܽܘܚܳܐ. ܕܰܐܝܟ ܗܰܘ ܕܶܝܢ. ܕܡܰܫܒܳܐ ܩܛܺܝܪܳܝܳܐ ܕܪܽܘܚܳܐ ܡܶܬܬܰܝܬܶܐ ܗ̱ܘܳܐ܆ ܡܶܛܽܠ ܕܰܠܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܠܰܡܩܰܒܳܠܽܘ ܠܛܰܝܒܽܘܬܳܐ ܗܳܝ ܕܣܳܝܽܘܡܽܘܬ ܒܢܰܝ̈ܳܐ܆ ܩܛܺܝܪ̈ܳܝܶܐ ܥܬܺܝܕ ܗ̱ܘܳܐ ܕܢܶܥܒܶܕ ܐܶܢܽܘܢ ܕܡܰܠܟܽܘܬܳܐ ܕܰܫܡܰܝܳܐ. ܡܳܠܶܐ ܗ̱ܘܳܐ ܕܶܝܢ ܠܟܽܠܶܗ ܒܰܝܬܳܐ܆ ܐܰܝܟܰܢܳܐ ܕܬܶܬܚܰܘܶܐ ܡܰܘܗܰܒܬܳܐ܆ ܕܠܰܘ ܡܢܳܬܳܐܺܝܬ ܠ̱ܐܢܳܫܺܝ̈ܢ ܐܶܬܝܰܗܒܰܬ܆ ܐܶܠܳܐ ܠܟܽܠܶܗ ܡܽܘܠܳܝܳܐ ܕܥܺܕܬܳܐ.
ܠܶܫܳܢ̈ܶܐ ܕܶܝܢ ܐܺܝܬܰܝܗܽܘܢ ܗ̱ܘܰܘ ܕܶܐܬܚܙܺܝܘ ܕܢܽܘܪܳܐ܆ ܕܡܰܘܕܥܺܝܢ ܗ̱ܘܰܘ ܕܟܽܠܶܗ ܗܳܢܳܐ ܐܺܝܬܶܝܗ̇ ܡܶܨܥܳܝܽܘܬܳܐ ܘܪܰܚܺܝܩܽܘܬܳܐ ܕܣܳܝܽܘܡܽܘܬ ܢܳܡܽܘܣܳܐ ܗܳܝ ܥܰܬܺܝܩܬܳܐ. ܘܰܕܗܳܝ ܚܕܰܬܳܐ܆ ܟܡܳܐ ܕܺܐܝܬܶܝܗ̇ ܒܰܝܢܳܬ ܡܶܠܬܳܐ ܡܦܰܪܰܫܬܳܐ ܕܰܒܝܰܕ ܠܶܫܳܢܳܐ ܢܳܦܩܳܐ ܒܩܳܠܳܐ܆ ܘܒܰܝܢܳܬ ܩܳܠܳܐ ܠܳܐ ܝܺܕܺܝܥܳܐ ܕܫܺܝܦܽܘܪ̈ܶܐ. ܘܬܰܡܳܢ ܡܰܢ ܐܰܝܟ ܕܰܒܚܶܙܘܳܐ ܕܒܰܪܩܳܐ܆ ܢܽܘܪܳܐ ܡܶܚܕܳܐ ܥܰܡܳܗ̇ ܕܗܳܝ ܕܡܶܬܚܰܙܝܳܐ ܗ̱ܘܳܬ ܪܳܗܛܳܐ ܗ̱ܘܳܬ ܥܳܒܪܳܐ. ܗܳܪܟܳܐ ܕܶܝܢ܆ ܠܶܫܳܢ̈ܶܐ ܕܢܽܘܪܳܐ ܥܰܠ ܫܠܺܝ̈ܚܶܐ ܝܺܬܶܒܘ܆ ܘܒܰܪ ܫܳܥܬܶܗ ܡܰܠ̈ܝ̣ܰܝ̣ ܡܶܢ ܪܽܘܚܳܐ ܐܺܝܬܰܝܗܽܘܢ ܗ̱ܘܰܘ܆ ܕܰܡܛܺܝܦܺܝܢ ܗ̱ܘܰܘ. ܘܡܰܫܦܥܺܝܢ ܪ̈ܳܕܰܝܳܐ ܐܰܠܳܗܳܝ̈ܶܐ. ܘܰܠܫܰܠܗܶܒܺܝܬܳܗ̇ ܕܛܰܝܒܽܘܬܳܐ. ܕܝܰܬܺܝܒܳܐ ܥܠܰܝܗܽܘܢ ܐܺܝܬ ܗ̱ܘܳܐ ܠܗܽܘܢ ܘܠܰܘ ܕܥܳܒܪܳܐ. ܘܕܰܠܠܶܫܳܢ̈ܶܐ ܕܺܝܠܗܽܘܢ. ܠܘܳܬ ܟܽܠ ܐܳܕܫܳܐ ܕܡܰܡܠܠܳܐ ܨܶܒܥܰܬ ܐܶܢܽܘܢ. ܠܰܘ ܟܰܕ ܒܚܶܫܽܘܟܳܐ ܘܰܒܥܰܡܛܳܢܳܐ ܡܶܬܚܰܦܝܳܐ܆ ܐܶܠܳܐ ܟܰܕ ܒܫܳܥܬܳܐ ܬܠܺܝܬܳܝܬܳܐ ܕܺܐܝܡܳܡܳܐ ܡܰܢܗܪܳܐ. ܘܗܳܕܶܐ ܐܰܝܟ ܕܠܰܡܚܰܘܝܳܢܽܘܬܳܐ ܕܗܳܝ ܕܰܒܝܰܕ ܡܶܐܬܺܝܬܶܗ ܕܪܽܘܚܳܐ ܩܰܕܺܝܫܳܐ ܐܶܬܓܠܺܝ ܢܰܗܺܝܪܳܐܺܝܬ ܘܰܐܝܟ ܕܒܺܐܝܡܳܡܳܐ܆ ܐ̱ܪܳܙܳܐ ܕܰܬܠܺܝܬܳܝܽܘܬܳܐ.
ܡܶܢ ܗܳܪܟܳܐ ܠܰܘ ܠܺܐܝܣܪܳܐܶܝܠ ܒܰܠܚܽܘܕ ܥܰܡܳܐ ܚܰܕ. ܪܳܕܶܝܢ ܗ̱ܘܰܘ ܘܡܰܠܦܺܝܢ܆ ܐܶܠܳܐ ܟܰܕ ܒܰܕܡܽܘܬ ܦܳܪ̈ܽܘܚܶܐ ܒܝܰܕ ܐܳܐܰܪ ܡܶܬܬܰܝܬܶܝܢ ܗ̱ܘܰܘ܆ ܥܰܠ ܟܽܠܳܗ̇ ܡܶܬܥܰܡܪܳܢܺܝܬܳܐ ܪܗܶܛܘ. ܘܰܠܟܽܠܶܗ ܓܶܢܣܳܐ ܕܰܒܢܰܝ̈ܢܳܫܳܐ ܐܰܝܟ ܕܰܠܡܺܐܡܰܪ ܐܰܠܶܦܘ܆ ܘܡܶܢܫܶܠܝ ܫܰܚܠܶܦܘ ܐܶܢܽܘܢ. ܘܗܳܠܶܝܢ ܡܰܢܽܘ[21] ܗܶܢܽܘܢ. ܠܳܐ ܝܰܠܺܝ̈ܦܶܐ܆ ܘܕܰܠܘܳܬ ܝܰܡܬܳܐ ܘܨܰܝܳܕܽܘܬܳܐ ܥܢܶܝܢ ܗ̱ܘܰܘ ܘܰܐܡܺܝܢܺܝܢ. ܘܗܳܢܳܐ ܟܽܠܶܗ ܐܺܝܬܰܝܗܽܘܢ ܗ̱ܘܰܘ ܝܳܕܽܘ̈ܥܶܐ ܘܰܡܗܺܝܪ̈ܶܐ܆ ܒܦܳܣܺܝ̈ܩܳܬܳܐ ܠܡܺܐܡܰܪ: ܟܡܳܐ ܟܺܝܬ ܕܢܽܘ̈ܢܶܐ ܗܳܢܽܘܢ ܕܨܳܝܕܺܝܢ ܗ̱ܘܰܘ܆ ܐܺܝܬܰܝܗܽܘܢ ܗ̱ܘܰܘ ܕܠܳܐ ܩܳܠܳܐ. ܐܳܦ ܓܶܝܪ ܠܰܘ ܗܶܢܽܘܢ ܐܺܝܬܰܝܗܽܘܢ ܗ̱ܘܰܘ ܕܰܡܡܰܠܠܺܝܢ܆ ܐܶܠܳܐ ܪܽܘܚܳܐ ܩܰܕܺܝܫܳܐ ܗܰܘ ܕܚܳܪ[22] ܘܫܰܚܠܶܦ ܠܠܶܫܳܢܰܝ̈ܗܽܘܢ܆ ܐܰܝܟܰܢܳܐ ܟܺܝܬ ܕܰܠܟܽܠܗܽܘܢ ܥܰܡ̱ܡ̈ܶܐ ܢܡܰܠܠܽܘܢ܆ ܐܰܝܟ ܒܰܪ̱ܬ ܩܳܠܳܐ ܐܰܒܳܗܳܝܬܳܐ ܘܡܰܡܠܠܳܐ ܕܺܝܠܗܽܘܢ܆ ܘܰܦܝܳܣܳܐ ܢܶܥܒܕܽܘܢ ܠܟܽܠ ܐ̱ܢܳܫ܆ ܕܚܰܕ ܐܰܠܳܗܳܐ ܢܶܕܥܽܘܢ ܟܺܝܬ ܢܰܘܕܽܘܢ܆ ܗܰܘ ܕܒܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܣܓܺܝܕܬܳܐ ܘܰܡܝܰܩܰܪܬܳܐ܆ ܘܰܠܢܳܡܽܘܣܳܐ ܕܶܐܘܰܢܓܶܠܺܝܽܘܢ ܢܩܰܒܠܽܘܢ܆ ܘܕܰܬܚܶܝܬ ܢܺܝܪܳܐ ܕܡܶܢܶܗ ܢܶܬܟܰܕ̣ܢܽܘܢ܆ ܐܰܝܟܰܢܳܐ ܕܳܐܦ ܒܶܐܘܰܢܓ̈ܶܠܝܰܐ ܐܳܡܰܪ ܦܳܪܽܘܩܰܢ: ܫܩܽܘܠܘ̱ ܠܢܺܝܪܳܐ ܕܺܝܠܝ ܥܠܰܝܟܽܘܢ܆ ܘܺܝܠܰܦܘ ܡܶܢܝ ܕܢܺܝܚܳܐ ܐܺܝܬܰܝ ܘܡܰܟܺܝܟܳܐ ܒܠܶܒܳܐ܆ ܘܬܶܫܟܚܽܘܢ ܢܝܳܚܳܐ ܠܢܰܦ̈ܫܳܬܟܽܘܢ. ܢܺܝܪܳܐ ܓܶܝܪ ܕܺܝܠܝ ܒܰܣܺܝܡܳܐ ܐܺܝܬܰܘܗ̱ܝ. ܘܡܰܘܒܠܳܐ ܕܺܝܠܝ ܩܰܠܺܝܠܬܳܐ ܐܺܝܬܶܝܗ̇[23].
ܗܳܕܶܐ ܐܰܪܰܐ ܐܺܝܬܶܝܗ̇ ܗ̱ܘܳܬ ܗܳܝ ܬܶܕܡܽܘܪܬܳܐ܆ ܗܳܝ ܟܺܝܬ ܕܰܨܦܰܢܝܳܐ ܗܰܘ ܢܒܺܝܳܐ ܡܶܢ ܙܰܒܢܳܐ ܐܰܪܺܝܟܳܐ ܩܰܕܶܡ ܗ̱ܘܳܐ ܚܳܙܶܐ܆ ܘܰܐܝܟ ܕܡܶܢ ܦܰܪܨܽܘܦܳܐ ܕܪܽܘܚܳܐ ܗܰܘ ܕܒܶܗ ܡܡܰܠܶܠ ܗ̱ܘܳܐ ܩܰܕܶܡ ܗ̱ܘܳܐ ܐܳܡܰܪ: ܗܳܝ ܕܶܐ݀ܫܰܚܠܶܦ ܥܰܠ ܥܰܡ̱ܡ̈ܶܐ ܠܶܫܳܢܳܐ ܠܫܰܪ̈ܒܳܬܳܐ ܕܺܝܠܗܽܘܢ܆ ܕܢܶܩܪܽܘܢ ܟܽܠܗܽܘܢ ܫܡܶܗ ܕܡܳܪܝܳܐ܆ ܕܢܶܦܠܚܽܘܢ ܠܶܗ ܥܰܒܕܽܘܬܳܐ ܬܚܶܝܬ ܢܺܝܪܳܐ ܚܰܕ܆ ܡܶܢ ܥܶܒܪ̈ܶܐ ܕܢܰܗܪ̈ܰܘܳܬܳܐ ܕܟܽܘܫ܆ ܢܰܝܬܽܘܢ ܠܺܝ ܕܶܒ̈ܚܶܐ[24]. ܟܽܠܗܽܘܢ ܓܶܝܪ ܗܳܢܽܘܢ ܕܡܶܢ ܥܶܒܪ̈ܶܝܗ̇ ܕܰܐܪܥܳܐ܆ ܘܕܰܒܢܰܗܪ̈ܰܘܳܬܳܐ ܕܰܚܛܺܝܬܳܐ ܘܕܰܪ̈ܓܺܝܓܳܬܳܐ ܪ̈ܰܛܺܝܒܳܬܳܐ ܐܶܨܛܒܰܥܘ ܘܰܐܘܟܶܡܘ ܒܗܰܘܢܗܽܘܢ܆ ܘܰܐܝܟ ܗܰܘ ܕܰܗܘ̣ܰܘ ܟܽܘ̈ܫܳܝܶܐ܆ ܪܗܶܛܘ ܠܘܳܬ ܫܠܺܝ̈ܚܶܐ. ܘܰܠܘܳܬ ܡܰܠܦܳܢܽܘܬܳܐ ܗܳܝ ܕܪܽܘܚܳܐ. ܘܟܰܕ ܐܶܬܢܰܗܰܪܘ̱ ܒܥܰܝܢܳܐ ܕܬܰܪܥܺܝܬܗܽܘܢ܆ ܘܶܐܬܡܪܶܩܘ̱ ܘܶܐܬܚܰܠܰܠܘ ܒܡܰܝ̈ܳܐ܆ ܘܶܐܬܕܰܟܺܝܘ ܒܢܽܘܪܳܐ܆ ܒܝܰܕ ܣܚܳܬܳܐ ܗܳܝ ܕܡܰܘܠܳܕܳܐ ܕܡܶܢ ܕܪܺܝܫ܆ ܕܶܒܚ̈ܶܐ ܕܬܶܫܒܽܘܚܬܳܐ ܐܰܝܬܺܝܘ. ܗܳܢܰܘ ܕܶܝܢ܆ ܦܺܐܪ̈ܶܐ ܕܣܶܦ̈ܘܳܬܳܐ ܕܡܰܘ̈ܕܝܳܢ ܠܰܫܡܶܗ[25]܆ ܐܰܝܟܰܢܳܐ ܕܰܒܕܽܘܟ ܐܳܡܰܪ ܦܰܘܠܽܘܤ.
ܐܶܠܳܐ ܠܗܳܕܶܐ ܡܶܬܗܰܦܟܳܢܽܘܬܳܐ ܕܠܶܫܳܢ̈ܶܐ ܗܳܝ ܕܗܳܟܰܢܳܐ ܢܰܗܺܝܪܳܐܺܝܬ ܐܶܬܰܐܡܪܰܬ ܡܶܢ ܢܒܺܝܽܘܬܳܐ܆ ܐܰܠܳܗܳܝܬܳܐ ܡܶܕܶܡ ܘܰܬܡܺܝܗܬܳܐ܆ ܝܽܗ̱ܘ̈ܕܳܝܶܐ ܗܳܢܽܘܢ ܕܥܰܡ ܢܒܺܝ̈ܶܐ ܐܶܬܪܰܒܺܝܘ܆ ܟܰܕ ܚܳܙܶܝܢ ܗ̱ܘܰܘ ܠܳܗ̇ ܒܗܶܝܢ ܒܥܰܝ̈ܢܶܐ܆ ܘܰܡܩܰܒܠܺܝܢ ܗ̱ܘܰܘ ܠܳܗ̇ ܒܶܐܕܢ̈ܶܐ ܗܳܢܶܝܢ ܠܳܐ ܡܶܬܬܦܺܝܣܳܢ̈ܝܳܬܳܐ ܘܰܕܠܳܐ ܫܳܡ̈ܥܳܢ܆ ܪܰܘܳܝܽܘܬܳܐ ܩܳܪܶܝܢ ܗ̱ܘܰܘ ܠܳܗ̇. ܘܡܶܛܽܠ ܫܠܺܝ̈ܚܶܐ ܐܳܡܪܺܝܢ ܗ̱ܘܰܘ܆ ܕܡܶܢ ܡܶܐܪܺܝܬܳܐ ܡܠܶܝܢ[26]. ܟܰܕ ܒܬܰܪܥܺܝܬܳܐ ܡܰܢ ܡܓܰܕܦܳܢܺܝܬܳܐ. ܘܰܒܦܽܘܡܳܐ ܡܨܰܚܝܳܢܳܐ ܗܳܕܶܐ ܐܳܡܪܺܝܢ ܗ̱ܘܰܘ܆ ܛܰܥܝܳܐ ܗ̱ܘܳܬ ܠܗܽܘܢ ܕܶܝܢ܆ ܕܰܫܪܳܪܳܐ ܐܳܡܪܺܝܢ ܗ̱ܘܰܘ ܒܝܰܕ ܗܳܠܶܝܢ ܕܰܡܓܰܕܦܺܝܢ ܗ̱ܘܰܘ. ܡܶܐܪܺܝܬܳܐ ܓܶܝܪ ܚܰܡܪܳܐ ܚܰܕܬ̣ܳܐ ܐܺܝܬܶܝܗ̇܆ ܗܰܘ ܕܺܐܝܬܰܘܗ̱ܝ ܗ̱ܘܳܐ ܡܰܠܦܳܢܽܘܬܳܐ ܗܳܝ ܚܕܰܬܳܐ ܕܪܽܘܚܳܐ܆ ܕܗܳܝ ܕܰܫܠܺܝ̈ܚܶܐ ܗܘ̣ܰܘ ܡܩܰܒ̈ܠܳܢܶܝܗ̇܆ ܟܰܕ ܒܝܰܕ ܡܰܪܕܽܘܬܳܐ ܗܳܝ ܕܦܳܪܽܘܩܰܢ ܐܶܬܚܰܪܰܪܘ ܡܶܢ ܒܺܝܫܽܘܬܳܐ ܗܳܝ ܥܰܬܺܝܩܬܳܐ ܘܰܗܘ̣ܰܘ ܚܰܕ̈ܬ̣ܶܐ܆ ܕܡܶܛܽܠܳܬܗܽܘܢ ܟܰܕ ܠܳܐ ܡܫܰܡܠܝܳܐܺܝܬ ܡܶܢ ܫܽܘܪܳܝܳܐ ܐܺܝܬܰܝܗܽܘܢ ܗ̱ܘܰܘ܆ ܠܘܳܬ ܬܰܠܡܺܝܕܰܘ̈ܗ̱ܝ ܕܝܽܘܚܰܢܳܢ ܕܰܡܫܰܐܠܺܝܢ ܗ̱ܘܰܘ. ܕܥܰܠ ܡܳܢܳܐ ܠܳܐ ܨܳܝܡܺܝܢ. ܐܳܡܰܪ ܗ̱ܘܳܐ. ܕܠܳܐ ܐ̱ܢܳܫ ܪܳܡܶܐ ܚܰܡܪܳܐ ܚܰܕܬ̣ܳܐ ܒܙܶܩ̈ܶܐ ܒܰܠ̈ܝܳܬܳܐ. ܘܶܐܢܕܶܝܢ ܠܐ܆ ܢܶܨܪܶܐ ܐܶܢܶܝܢ ܚܰܡܪܳܐ ܗܰܘ ܚܰܕܬ̣ܳܐ ܠܙܶܩ̈ܶܐ ܘܗܽܘ ܢܶܬܶܐܫܶܕ܆ ܘܙܶܩ̈ܶܐ ܢܺܐܒ̈ܕܳܢ. ܐܶܠܳܐ ܚܰܡܪܳܐ ܚܰܕܬ̣ܳܐ ܒܙܶܩ̈ܶܐ ܚ̈ܰܕܬ̣ܳܬ̣ܳܐ ܙܳܕܶܩ ܠܡܰܪܡܳܝܽܘ܆ ܘܰܬܪ̈ܰܝܗܽܘܢ ܡܶܬܢܰܛܪܺܝܢ ܐܰܟܚܕܳܐ[27]. ܒܕܽܘܟ̈ܝܳܬܳܐ ܓܶܝܪ ܣܰܓܺܝ̈ܳܐܬܳܐ ܕܰܟܬܳܒܳܐ ܐܰܠܳܗܳܝܳܐ܆ ܡܶܠܬܳܐ ܗܳܝ ܕܡܰܠܦܳܢܽܘܬܳܐ ܩܰܪܝܳܐ ܚܰܡܪܳܐ܆ ܐܰܝܟ ܗܳܝ ܕܰܒܡܰܙܡܽܘܪ̈ܶܐ ܐܰܡܺܝܪܳܐ: ܐܰܫܩܺܝܬ̊ ܠܰܢ ܚܰܡܪܳܐ ܕܡܶܬܬܰܘܝܳܢܽܘܬܳܐ[28]܆ ܘܰܐܝܟ ܕܰܒܝܰܕ ܐܶܫܰܥܝܳܐ ܠܘܳܬ ܐܽܘܪܶܫܠܶܡ ܐܶܬܰܐܡܪܰܬ: ܡܶܛܽܠ ܗܳܢܽܘܢ ܕܡܰܠܦܺܝܢ ܗ̱ܘܰܘ ܡܰܣ̈ܠܝܳܬܳܐ܆ ܘܚܳܠܛܺܝܢ ܗ̱ܘܰܘ ܒܦܽܘܩ̈ܕܳܢܶܐ ܐܰܠܳܗܳܝ̈ܶܐ܆ ܠܗܳܠܶܝܢ ܐ̱ܢܳܫܳܝ̈ܳܬܳܐ ܘܕܰܠܘܳܬ ܐܰܫܺܝܕܽܘܬܳܐ ܥܳܠܡܳܢܳܝܬܳܐ ܡܰܝ̈ܬܝܳܢ. ܟܶܣܦܳܐ ܕܺܝܠܟܽܘܢ ܡܰܣܠܝܳܐ ܐܺܝܬܰܘܗ̱ܝ. ܩܰܦܺܝ̈ܠܶܐ ܕܺܝܠܶܟܝ ܚܳܠܛܺܝܢ ܚܰܡܪܳܐ ܒܡܰܝ̈ܳܐ[29].
ܟܰܕ ܡܶܢ ܗܳܢܳܐ ܗܳܟܺܝܠ ܫܶܩܝܳܐ ܚܰܕܬ̣ܳܐ ܘܰܫܡܰܝܳܢܳܐ܆ ܗܘܰܘ ܡܠܰܝ̈ܳܐ ܟܳܪ̈ܽܘܙܶܐ ܗܳܢܽܘܢ ܕܛܰܝܒܽܘܬܳܐ ܗܳܝ ܚܕܰܬܳܐ܆ ܘܠܰܐܓܳܢܳܐ ܕܡܰܠܦܳܢܽܘܬܳܐ ܡܶܢ ܗܳܢܳܐ ܐܰܩܺܝܡܘ̱܆ ܠܡܶܬܥܰܡܪܳܢܺܝܬܳܐ ܟܽܠܳܗ̇. ܕܪܰܘܝܳܐ ܗ̱ܘܳܬ ܘܰܡܨܰܕܪܳܐ܆ ܘܡܶܬܒܰܝܕܠܳܐ ܗ̱ܘܳܬ ܡܶܢ ܪܰܘܳܝܽܘܬܳܐ ܕܫ̈ܺܐܕܶܐ܆ ܠܘܳܬ ܥܺܝܪܽܘܬܳܐ ܫܰܚܠܶܦܘ̱ ܐܰܝܬܝܽܘܗ̇ ܕܺܝܕܰܥܬܳܐ܆ ܕܚܰܕ ܐܰܠܳܗܳܐ ܘܒܰܠܚܽܘܕܰܘܗ̱ܝ. ܘܰܒܢܽܘܪܳܐ ܕܕܽܘܓ̈ܡܰܛܰܐ ܕܫܰܦܺܝܪܽܘܬ ܕܶܚܠܬܳܐ܆ ܠܪܶܕܝܳܐ ܗܰܘ ܕܰܪ̈ܓܺܝܓܳܬܳܐ ܫܟܺܝܪ̈ܳܬܳܐ ܕܰܐܛܺܝܦܶܗ ܗ̱ܘܳܐ ܡܶܟܺܝܠ ܠܥܳܠܡܳܐ ܐܰܘܒܶܫܘ܆ ܟܰܕ ܓܰܢ̱ܒܳܪܽܘܬܳܐ. ܢܰܟܦܽܘܬܳܐ܆ ܟܽܠܳܗ̇ ܡܚܰܡܤܢܳܢܽܘܬܳܐ ܘܦܺܝܠܳܣܽܘܦܺܝܰܐ ܪܕܰܘ ܘܰܐܠܶܦܘ. ܘܰܒܗܳܕܶܐ ܐܰܘܩܶܕܘ ܫܦܺܝܥܳܐܺܝܬ ܐܰܟܚܕܳܐ܆ ܠܟܽܠܗܶܝܢ ܨܶܢ̈ܥܳܬܳܐ ܘܕܶܚ̈ܠܳܬܳܐ ܥܰܬܺܝ̈ܩܳܬܳܐ. ܡܕܰܡܶܐ ܐ̱ܢܳܐ ܠܳܗ̇ ܗܳܟܺܝܠ ܠܢܽܘܪܳܐ ܗܳܕܶܐ ܡܶܬܗܰܘܢܳܢܺܝܬܳܐ܆ ܗܳܝ ܡܛܰܠܩܳܢܺܝܬܳܐ ܕܪܽܘܫܥܳܐ܆ ܠܢܽܘܪܳܐ ܗܳܝ ܕܡܶܬܬܰܢܝܳܐ ܒܬܰܫܥܺܝܬܳܐ܆ ܗܳܝ ܕܢܶܚܬܰܬ̣ ܥܰܠ ܕܶܒܚܬܳܐ ܕܶܐܠܺܝܳܐ ܢܒܺܝܳܐ܆ ܗܳܝ ܕܠܰܢܒܺܝ̈ܶܐ ܕܰܓ̈ܳܠܶܐ ܐܰܟܣܰܬ̣܆ ܗܳܝ ܕܰܟܬܺܝܒ ܡܶܛܽܠܳܬܳܗ̇܆ ܘܢܶܦܠܰܬ ܢܽܘܪܳܐ ܡܶܢ ܠܘܳܬ ܡܳܪܝܳܐ ܡܶܢ ܫܡܰܝܳܐ܆ ܘܶܐܟܠܰܬ ܠܝܰܩܕܳܐ ܗܰܘ ܫܰܠܡܳܐ ܘܠܰܨܠܺܝ̈ܚܶܐ ܘܰܠܡܰܝ̈ܳܐ ܗܳܠܶܝܢ ܕܰܥܠܰܝܗܽܘܢ܆ ܘܰܠܡܰܝ̈ܳܐ ܗܳܠܶܝܢ ܕܰܒܝܰܡܳܐ[30]܆ ܘܳܐܦ ܠܟܺܐܦܳܐ ܘܳܐܦ ܠܥܰܦܪܳܐ ܠܶܟܚܰܬ̣ ܢܽܘܪܳܐ ܘܰܢܦܰܠ ܟܽܠܶܗ ܥܰܡܳܐ ܥܰܠ ܐܰܦܰܝ̈ܗܽܘܢ ܘܶܐܡܰܪܘ: ܫܰܪܺܝܪܳܐܺܝܬ ܡܳܪܝܳܐ ܐܰܠܳܗܳܐ܆ ܗܽܘ ܐܺܝܬܰܘܗ̱ܝ ܐܰܠܳܗܳܐ[31].
ܗܳܟܰܢܳܐ ܟܺܝܬ ܐܳܦ ܡܶܠܬܳܐ ܗܳܝ ܢܽܘܪܳܢܳܝܬܳܐ ܕܪܽܘܚܳܐ܆ ܟܰܕ ܡܶܢ ܫܡܰܝܳܐ ܢܶܚܬܰܬ̣ ܥܰܠ ܐܰܪܥܳܐ܆ ܗܳܝ ܕܡܶܛܽܠܳܬ̣ܗ̇ ܐܳܦ ܡܳܪܰܢ ܐܳܡܰܪ ܗ̱ܘܳܐ: ܕܢܽܘܪܳܐ ܐܶܬܺܝܬ̣ ܕܰܐܪܡܶܐ ܥܰܠ ܐܰܪܥܳܐ܆ ܘܡܳܢܳܐ ܨܳܒܶܐ ܐ̱ܢܳܐ܆ ܐܶܠܽܘ ܡܶܢ ܟܰܕܽܘ ܕܰܠܺܝܩܳܐ ܗ̱ܘܳܬ[32]܆ ܠܶܟܚܰܬ̣ ܘܰܐܝܟ ܗܰܘ ܕܕܰܪܥܳܬ ܐܶܢܶܝܢ ܠܡܰܪ̈ܢܝܳܬܳܐ ܗܳܠܶܝܢ ܐܰܪ̈ܥܳܢܳܝܳܬܳܐ. ܠܡܰܝ̈ܳܐ ܗܳܢܽܘܢ ܕܳܐܣܽܘܛܽܘܬܳܐ. ܠܝܰܡܳܐ ܕܠܳܐ ܩܰܘܡܳܐ ܘܰܕܡܶܬܓܰܠܰܠ ܫܓܺܝܫܳܐܺܝܬ ܕܥܳܠܡܳܐ ܗܳܢܳܐ܆ ܘܰܠܢܰܦ̈ܫܳܬܳܐ ܗܳܠܶܝܢ ܚܰܒܽܘܒ̈ܝܳܬܳܐ ܘܗܽܘ̈ܠܳܢܳܝܳܬܳܐ܆ ܘܰܠܗܳܠܶܝܢ ܕܒܰܕܡܽܘܬ ܟܺܐܦ̈ܶܐ ܩܰܫܝܳܐܺܝܬ ܘܣܰܩܽܘܒܠܳܐܺܝܬ ܣܺܝ̈ܡܳܢ ܗ̱ܘܰܝ̈ ܠܘܳܬ ܫܰܦܺܝܪܽܘܬ ܕܶܚܠܬܳܐ. ܐܰܝܟܰܢܳܐ ܟܺܝܬ ܕܟܽܠܗܽܘܢ ܟܢܺܝܫܳܐܺܝܬ ܐܰܟܚܕܳܐ܆ ܢܶܬܪܰܟܢܽܘܢ ܠܟܳܪܽܘܙܽܘܬܳܐ ܗܳܝ ܕܰܫ̈ܠܺܝܚܶܐ܆ ܘܢܶܦܠܽܘܢ ܥܰܠ ܦܰܪܨܽܘܦܳܐ ܕܺܝܠܗܽܘܢ ܘܰܐܝܟ ܡܶܠܬܳܐ ܗܳܝ ܕܦܰܘܠܽܘܤ ܢܺܐܡܪܽܘܢ: ܕܫܰܪܺܝܪܳܐܺܝܬ ܐܰܠܳܗܳܐ ܐܺܝܬ ܒܟܽܘܢ. ܘܫܰܪܺܝܪܳܐܺܝܬ. ܡܳܪܝܳܐ ܐܰܠܳܗܳܐ ܗܽܘ ܐܺܝܬܰܘܗ̱ܝ ܐܰܠܳܗܳܐ[33].
ܠܐ ܐ̱ܢܳܫ ܕܶܝܢ ܢܶܣܒܰܪ܆ ܡܶܛܽܠ ܗܳܝ ܕܰܐܠܳܗܳܐ ܒܢܽܘܪܳܐ ܢܚܶܬ ܠܘܳܬ ܛܽܘܪܳܐ ܗܰܘ ܕܣܺܝܢܰܝ. ܘܰܒܠܶܫܳܢ̈ܶܐ ܢܽܘܪ̈ܳܢܶܐ ܐܶܬܚܙܺܝ ܪܽܘܚܳܐ ܩܰܕܺܝܫܳܐ܆ ܕܢܽܘܪܳܐ ܐܺܝܬܶܝܗ̇ ܐܽܘܣܺܝܰܐ ܗܳܝ ܐܰܠܳܗܳܝܬܳܐ. ܐܶܢ ܓܶܝܪ ܠܳܐ ܡܶܬܚܰܙܝܳܢܳܐ ܐܺܝܬܰܘܗ̱ܝ ܐܰܠܳܗܳܐ܆ ܐܰܝܟ ܗܳܝ: ܕܠܰܐܠܳܗܳܐ ܠܳܐ ܐ̱ܢܳܫ ܡܬܽܘܡ ܚܙܳܐ[34]܆ ܢܽܘܪܳܐ ܕܶܝܢ ܗܳܝ܆ ܡܶܬܚܰܙܝܳܢܺܝܬܐ ܐܺܝܬܶܝܗ̇ ܗ̱ܘܳܬ ܠܥܰܝ̈ܢܶܐ ܕܺܝܠܰܢ܆ ܫܰܦܺܝܪ ܝܺܕܺܝܥܳܐ ܕܠܰܘ ܒܽܐܘܣܺܝܰܐ ܐܶܬܚܙܺܝ܆ ܘܐܳܦ ܠܳܐ ܗ̱ܘܳܐ ܠܗܰܘ ܡܶܕܶܡ ܕܺܐܝܬܰܘܗ̱ܝ ܚܰܘܺܝ. ܐܶܠܳܐ ܒܚܶܙܘܳܐ ܕܢܽܘܪܳܐ. ܡܢܳܬܳܐ ܡܶܕܶܡ ܡܶܢ ܡܰܥ̈ܒܕܳܢܘܳܬܶܗ ܒܰܝ̈ܬܳܝܳܬܳܐ ܫܰܘܕܰܥ. ܠܡܰܢܗܪܳܢܽܘܬܳܐ. ܠܰܡܛܰܠܩܳܢܽܘܬܳܐ ܕܰܚܛܺܝܬܳܐ ܐܰܘܟܺܝܬ ܡܕܰܟܝܳܢܽܘܬܳܐ. ܘܡܶܛܽܠܗܳܕܶܐ ܐܳܦ ܡܽܘܫܶܐ ܐܳܡܰܪ ܗ̱ܘܳܐ ܠܘܳܬ ܒܢ̈ܰܝ ܐܺܝܣܪܳܐܶܝܠ܆ ܘܡܰܠܶܠ ܡܳܪܝܳܐ ܠܘܳܬܟܽܘܢ ܡܶܢ ܡܶܨܥܰܬ ܢܽܘܪܳܐ[35]. ܡܳܕܶܝܢ ܐ̱ܚܪܺܢܳܐ ܐܺܝܬܰܘܗ̱ܝ ܗ̱ܘܳܐ ܡܳܪܝܳܐ܆ ܗܰܘ ܕܡܶܢ ܡܶܨܥܰܬ ܢܽܘܪܳܐ ܡܡܰܠܶܠ ܗ̱ܘܳܐ܆ ܘܠܰܘ ܗܺܝ ܢܽܘܪܳܐ ܐܺܝܬܰܘܗ̱ܝ ܗ̱ܘܳܐ ܡܳܪܝܳܐ. ܘܶܐܢܕܶܝܢ ܠܳܐ ܐܳܡܰܪ ܗ̱ܘܳܐ: ܕܡܰܠܠܰܬ ܢܽܘܪܳܐ ܠܘܳܬܟܽܘܢ. ܘܳܐܦ ܟܰܕ ܠܶܐܠܺܝܳܐ ܕܶܝܢ ܡܡܰܠܶܠ ܗ̱ܘܳܐ ܒܰܡܥܰܪܬܳܐ ܕܛܽܘܪܳܐ ܕܚܽܘܪܺܝܒ܆ ܘܒܳܐܕܫ̈ܶܐ ܣܰܓܺܝ̈ܰܐܝ ܙܢܰܝ̈ܳܐ ܥܬܺܝܕ ܗ̱ܘܳܐ ܕܢܶܥܒܶܕ ܒܶܗ ܡܰܪܓܫܳܢܽܘܬܳܐ ܕܓܶܠܝܳܢܳܐ ܒܰܝܬܳܝܳܐ ܕܺܝܠܶܗ܆ ܒܡܰܫܒܳܐ ܘܰܒܪܽܘܚܳܐ ܪܰܒܬܳܐ܆ ܘܰܒܥܰܠܥܳܠܳܐ[36]. ܘܒܢܽܘܪܳܐ܆ ܒܟܽܠ ܗܳܝ ܩܰܕܶܡ ܗ̱ܘܳܐ ܐܶܡܰܪ: ܕܠܳܐ ܙܳܕܶܩ ܠܡܰܣܒܳܪܽܘ܆ ܕܗܳܠܶܝܢ ܐܺܝܬܰܘܗ̱ܝ ܡܳܪܝܳܐ.
ܬܶܦܽܘܩ ܓܶܝܪ ܐܳܡܰܪ ܠܰܡܚܳܪ: ܘܰܬܩܽܘܡ ܩܕܳܡ ܡܳܪܝܳܐ ܒܛܽܘܪܳܐ. ܘܗܳܐ ܡܳܪܝܳܐ ܢܶܥܒܰܪ. ܘܪܽܘܚܳܐ ܪܰܒܬܳܐ ܥܰܫܺܝܢܬܳܐ ܩܕܳܡ ܡܳܪܝܳܐ ܕܫܳܪܝܳܐ ܛܽܘܪ̈ܶܐ. ܘܰܡܬܰܒܪܳܐ ܫܽܘ̈ܥܶܐ. ܠܳܐ ܗ̱ܘܳܐ ܒܪܽܘܚܳܐ ܡܳܪܝܳܐ. ܘܡܶܢ ܒܳܬܰܪ ܪܽܘܚܳܐ܆ ܥܰܠܥܳܠܳܐ[37]. ܠܳܐ ܗ̱ܘܳܐ ܒܥܰܠܥܳܠܳܐ ܡܳܪܝܳܐ. ܘܡܶܢ ܒܳܬܰܪ ܥܰܠܥܳܠܳܐ܆ ܢܽܘܪܳܐ. ܘܡܶܢ ܒܳܬܰܪ ܢܽܘܪܳܐ܆ ܩܳܠܳܐ ܕܟܰܚܬܳܐ ܩܰܛܺܝܢܬܳܐ. ܘܡܶܢ ܒܳܬܰܪ ܗܳܠܶܝܢ ܐܳܡܰܪ: ܘܗܳܐ ܩܳܠܐ ܠܘܳܬܶܗ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܩܳܠܳܐ ܒܰܠܚܽܘܕ ܫܡܰܥ. ܕܢܺܝܚܳܐܺܝܬ ܡܶܬܬܰܝܬܶܐ. ܐܰܝܟ ܟܰܚܬܳܐ ܩܰܛܺܝܢܬܳܐ܆ ܠܡܳܪܝܳܐ ܕܶܝܢ ܐܰܘܟܺܝܬ ܠܽܐܘܣܺܝܰܐ ܐܰܠܳܗܳܝܬܳܐ܆ ܒܳܐܕܫ̈ܶܐ ܗܳܠܶܝܢ ܕܶܐܬܚܙܺܝܘ܆ ܒܗܳܢܽܘܢ ܕܺܐܝܬ ܗ̱ܘܳܐ ܒܗܽܘܢ ܐܳܦ ܢܽܘܪܳܐ܆ ܠܳܐ ܚܙܳܐ.
ܡܫܰܚܠܦܳܐܺܝܬ ܓܶܝܪ ܐܶܬܚܙܺܝ ܠܩܰܕܺܝ̈ܫܶܐ܆ ܘܠܰܘ ܒܚܰܕ ܙܢܳܐ ܠܘܳܬ ܟܽܠܗܽܘܢ. ܡܶܛܽܠ ܕܳܐܦ ܐܰܝܟ ܒܰܪܢܳܫܳܐ[38] ܕܢܳܚܶܬ ܕܰܪܳܐ ܐܶܬܚܙܺܝ ܠܝܰܥܩܘܒ[39]܆ ܐܳܦ ܠܕܳܢܺܝܐܶܝܠ ܕܶܝܢ ܒܳܗ̇ ܒܰܕܡܽܘܬܳܐ. ܒܚܶܙܘܳܐ ܕܓܰܒܪܳܐ ܣܳܒܳܐ܆ ܘܰܕܒܰܪܢܳܫܳܐ ܕܢܳܚܶܬ ܡܶܢ ܫܡܰܝܳܐ[40]. ܗܳܝ ܟܺܝܬ ܕܳܐܦ ܒܝܰܕ ܗܽܘܫܳܥ ܢܒܺܝܳܐ. ܐܳܡܰܪ ܠܳܗ̇: ܕܶܐܢܳܐ ܚܶܙܘܳܢ̈ܶܐ ܐܰܣܓܺܝܬ̣܆ ܘܒܺܐܝ̈ܕܰܝܳܐ ܕܰܢܒܺܝ̈ܶܐ ܐܶܬܕܰܡܺܝܬ[41]. ܡܶܛܽܠܗܳܕܶܐ ܟܺܝܬ ܐܳܦ ܪܽܘܚܳܐ ܩܰܕܺܝܫܳܐ܆ ܐܶܬܚܙܺܝ ܡܰܢ ܥܰܠ ܫܶܦ̈ܥܶܐ ܕܝܽܘܪܕܢܳܢ ܐܰܝܟ ܝܰܘܢܳܐ[42]܆ ܟܰܕ ܠܘܳܬ ܝܰܘܢܳܐ ܗܳܝ ܩܰܕܡܳܝܬܳܐ ܡܰܣܶܩ ܠܰܢ܆ ܗܳܝ ܕܣܰܒܪܰܬ ܠܢܰܘܚܶܗ ܕܛܰܘܦܳܢܳܐ ܗܰܘ ܕܰܒܝܰܘ̈ܡܰܝ ܢܽܘܚ[43]܆ ܘܰܐܝܟܰܢܳܐ ܕܰܢܫܰܘܕܰܥ ܒܝܰܕ ܗܳܕܶܐ ܓܰܠܝܳܐܺܝܬ܆ ܕܚܰܕ ܐܺܝܬܰܘܗ̱ܝ ܐܰܠܳܗܳܐ ܕܕܺܝܰܬܺܝܩܺܐ ܥܰܬܺܝܩܬܳܐ ܘܕܰܚܕܰܬܳܐ܆ ܕܡܶܬܪܰܥܶܐ. ܠܓܶܢܣܳܐ ܕܰܒ̈ܢܰܝ ܐ̱ܢܳܫܳܐ. ܘܗܳܝܕܶܝܢ ܡܰܢ: ܟܰܕ ܡܢܺܝܚ ܗ̱ܘܳܐ ܘܡܰܥܒܰܪ ܠܡܰܝ̈ܳܐ ܕܰܚܒܳܠܳܐ. ܗܳܫܳܐ ܕܶܝܢ܆ ܟܰܕ ܡܕܰܟܶܐ ܒܡܰܝ̈ܳܐ ܚܰܝ̈ܶܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ.
ܐܶܬܚܙܺܝ ܕܶܝܢ ܠܰܫ̈ܠܺܝܚܶܐ ܒܠܶܫܳܢ̈ܶܐ ܢܽܘܪ̈ܳܢܶܐ܆ ܘܰܒܠܶܫܳܢܳܐ ܕܟܽܠ ܥܰܡܳܐ. ܡܫܰܟܶܢ ܗ̱ܘܳܐ ܠܗܽܘܢ ܠܰܡܡܰܠܳܠܽܘ܆ ܟܰܕ ܡܢܺܝܚ ܘܰܡܒܰܛܶܠ ܠܰܡܣܳܡ ܒܪܺܝܫܳܐ ܗܰܘ ܥܰܬܺܝܩܳܐ ܕܦܽܘܠܳܓܳܐ ܕܠܶܫܳܢ̈ܶܐ ܘܰܕܒܰܪ̱ܬ ܩܳܠܳܐ ܡܦܰܠܰܓܬܳܐ܆ ܠܗܳܝ ܕܶܐܣܰܪܬܳܗ̇ ܐܰܟܚܕܳܐ ܘܰܟܢܰܫܬܳܗ̇. ܬܰܘܕܺܝܬܳܐ ܚܕܳܐ ܘܗܰܝܡܳܢܽܘܬܳܐ ܗܳܝ ܕܒܰܡܫܺܝܚܳܐ܆ ܐܶܠܳܐ ܠܰܘ ܡܶܛܽܠ ܗܳܕܶܐ܆ ܪܽܘܚܳܐ ܩܰܕܺܝܫܳܐ ܢܽܘܪܳܐ ܐܺܝܬܰܘܗ̱ܝ ܗ̱ܘܳܐ ܒܽܐܘܣܺܝܰܐ܆ ܡܶܛܽܠ ܟܺܝܬ ܕܗܳܟܰܢܳܐ ܐܶܬܚܙܺܝ܆ ܐܰܝܟܰܢܳܐ ܕܳܐܦܠܳܐ ܝܰܘܢܳܐ. ܐܳܦ ܓܶܝܪ ܐ̱ܚܪܺܢܳܐ ܡܶܕܶܡ ܐܺܝܬܰܘܗ̱ܝ ܗܰܘ ܕܰܐܝܟ ܕܰܒܛܽܘܦܣܳܐ ܡܶܬܚܙܶܐ. ܘܰܐ̱ܚܪܺܢܳܐ ܡܶܕܶܡ ܗ̱ܘ̣ ܫܪܳܪܳܗ̇ ܕܽܐܘܣܺܝܰܐ. ܡܶܛܽܠ ܗܳܕܶܐ ܥܰܠ ܥܰܡܰܢܽܘܐܶܝܠ܆ ܠܰܘ ܕܶܐܬܚܙܺܝ ܒܰܠܚܽܘܕ ܥܰܠ ܐܰܪܥܳܐ ܟܬܺܝܒ܆ ܐܶܠܐ. ܕܡܶܠܬܳܐ ܒܶܣܪܳܐ ܗܘ̣ܳܐ[44]܆ ܘܰܕܫܰܕܰܪ ܐܰܠܳܗܳܐ ܠܰܒܪܶܗ܆ ܕܢܶܗܘܶܐ ܡܶܢ ܐܰܢ̱ܬܬܳܐ܆ ܕܢܶܗܘܶܐ ܬܚܶܝܬ ܢܳܡܽܘܣܳܐ[45]. ܒܽܐܘܣܺܝܰܐ ܓܶܝܪ ܘܒܰܫܪܳܪܳܐ ܗܘ̣ܳܐ ܒܰܪܢܳܫܳܐ܆ ܟܰܕ ܚܰܝܶܕ ܠܶܗ ܒܰܩܢܽܘܡܳܐ ܘܰܤܛܰܪ ܡܶܢ ܚܛܺܝܬܳܐ܆ ܠܦܰܓܪܳܐ ܗܰܘ ܕܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ܆ ܘܰܡܢܰܦܫܳܐ ܘܰܡܗܰܘܢܳܢܳܐ ܘܕܰܫܘܶܐ ܠܰܢ ܒܽܐܘܣܺܝܰܐ ܢܶܗܘܶܐ ܐܺܝܬܰܘܗ̱ܝ ܐܰܠܳܗܳܐ ܘܰܫܘܶܐ ܒܽܐܘܣܺܝܰܐ ܠܰܐܒܳܐ.
ܗܳܠܶܝܢ ܐܺܝܬܰܝܗܶܝܢ܆ ܐܰܝܠܶܝܢ ܕܟܰܕ ܒܝܰܘܡܳܐ ܗܰܘ ܡܝܰܩܪܳܐ ܕܦܰܢܛܺܩܽܘܤܛܺܐ ܠܡܺܐܡܰܪ ܥܬܺܝܕ ܗ̱ܘܺܝܬ܆ ܐܶܬܟܠܺܝܬ̣ ܡܶܢ ܨܶܒܝܳܢܝ܆ ܡܶܛܽܠ ܟܺܝܬ ܕܟܰܕ ܣܰܓܺܝ̈ܶܐܐ ܣܰܓܺܝ ܠܥܶܠ ܡܶܢ ܥܝܳܕܳܐ ܐܶܫܬܘܺܝܘ ܠܰܥܡܳܕܳܐ ܩܰܕܺܝܫܳܐ܆ ܟܰܕ ܡܕܰܝܠܺܝܢ ܚ̱ܢܰܢ ܠܬܶܫܡܶܫܬܳܗ̇ ܕܛܰܝܒܽܘܬܳܐ ܟܳܫܢܰܢ ܘܰܐܘܚܰܪܢܰܢ܆ ܘܕܶܚܠܬܳܐ ܐܺܝܬܶܝܗ̇ ܗ̱ܘܳܬ ܠܰܘ ܩܰܠܺܝܠ܆ ܕܕܰܠܡܳܐ ܒܕܽܘܟ ܐ̱ܢܳܫܺܝ̈ܢ ܡܶܢ ܗܳܢܽܘܢ ܪ̈ܳܚܡܰܝ ܥܻ̈ܐܕܶܐ܆ ܘܕܰܡܬܰܚܡܺܝܢ ܠܶܗ ܠܥܺܐܕܳܐ ܒܦܳܬܽܘܪܳܐ ܩܰܠܺܝܠܳܐ ܘܠܳܐ ܡܫܰܘܚܪܳܐ ܘܰܡܫܰܪܬܚܳܐ ܡܰܥܘܠܳܢܽܘܬܳܐ ܢܶܟܬܒܽܘܢ ܥܠܰܝܢ. ܟܕ ܢܰܓܪܽܘܢ ܘܢܶܫܬܰܘܚܪܽܘܢ ܒܫܶܡܥܳܐ܆ ܘܰܠܥܺܐܕܳܐ܆ ܕܠܳܐ ܥܺܐܕܳܐ ܐܺܝܬܰܘܗ̱ܝ ܢܶܚܫܒܽܘܢ. ܐܶܬܪܕܺܝܢܰܢ ܕܶܝܢ܆ ܕܠܰܘ ܗܳܝ ܕܺܝܠܰܢ ܢܕܽܘܩ. ܐܶܠܳܐ ܗܳܝ ܕܰܐ̱ܚܪ̈ܳܢܶܐ[46]܆ ܘܰܕܥܰܡ ܒܰܝܬܳܐ ܕܺܝܠܳܢܳܝܳܐ ܕܺܝܠܰܢ ܢܶܗܘܶܐ ܡܶܬܟܰܪܟܺܝܢ ܚ̱ܢܰܢ ܘܡܶܬܢܰܬܦܺܝܢ ܚ̱ܢܰܢ. ܗܳܝ ܡܰܢ ܓܶܝܪ ܐܺܝܬܶܝܗ̇ ܕܰܣܝܳܡ ܢܳܡܽܘܣܳܐ ܫܠܺܝܚܳܝܳܐ܆ ܗܳܝ ܕܶܝܢ ܦܽܘܪܓܳܠܳܐ ܘܦܽܘܩܕܳܢܳܐ ܕܡܰܬܠܳܐ.
ܒܪܰܡ ܙܳܕܶܩ ܗ̱ܘܳܐ܆ ܕܠܰܘ ܗܳܟܰܢܳܐ ܪܰܦܝܳܐܺܝܬ[47] ܢܶܗܘܶܐ ܣܺܝܡܺܝܢ ܚ̱ܢܰܢ܆ ܘܰܠܘܳܬ ܗܰܢܺܝܽܐܘܬܳܐ ܕܟܰܪܣܳܐ ܢܚܽܘܪ ܒܰܠܚܽܘܕ܆ ܢܶܒܣܶܐ ܕܶܝܢ ܒܢܰܦܫܳܐ. ܗܳܝ ܓܶܝܪ ܕܰܠܩܽܘܒܠܳܐ ܙܳܕܶܩ ܗ̱ܘܳܐ. ܕܰܠܘܳܬ ܬܽܘܪܣܳܝܳܐ ܡܰܢ ܗܰܘ ܡܠܺܝܠܳܐ ܘܪܽܘܚܳܢܳܝܳܐ܆ ܗܰܘ ܟܺܝܬ ܕܺܐܝܬܰܘܗ̱ܝ ܫܶܡܥܳܐ ܕܡ̈ܶܠܶܐ ܗܳܠܶܝܢ ܐܰܠܳܗܳܝ̈ܳܬܳܐ܆ ܐܽܘܟܠܳܐ ܘܫܶܩܝܳܐ ܗܰܘ ܫܰܪܺܝܪܳܐ ܘܡܳܪܳܢܳܝܳܐ ܕܒܰܪܢܳܫܳܐ܆ ܝܰܥܢܳܐܺܝܬ ܢܶܗܘܶܐ ܣܺܝܡܺܝܢ ܚ̱ܢܰܢ. ܘܪܶܓܬܳܢܳܐܺܝܬ܆ ܒܛܶܟܣܳܐ ܕܶܝܢ ܬܪܰܝܳܢܳܐ ܢܶܗܘܶܐ ܣܺܝܡܺܝܢ ܚ̱ܢܰܢ ܠܗܳܠܶܝܢ ܕܦܰܓܪܳܐ. ܡܰܨܝܳܐ ܗ̱ܝ ܓܶܝܪ ܕܳܐܦ ܬܰܪ̈ܬܰܝܗܶܝܢ ܢܶܣܥܽܘܪ. ܐܶܠܳܐ ܟܽܠܚܕܳܐ ܡܶܢܗܶܝܢ. ܒܙܰܒܢܳܐ ܗܰܘ ܕܙܳܕܶܩ ܘܟܰܕ ܗܳܠܶܝܢ ܩܰܕܡܳܝ̈ܳܬܳܐ ܐܰܝܟ ܩܰܕܡܳܝ̈ܳܬܳܐ ܢܶܬܝܰܩܪ̈ܳܢ ܘܠܳܐ ܡܶܬܬܫܺܝ̈ܛܳܢ ܡܶܢ ܗܳܠܶܝܢ ܬܪ̈ܰܝܳܢܝܳܬܳܐ܆ ܐܰܘ ܐܳܦ ܟܽܠ ܟܽܠܶܗ ܡܶܬܒܰܣܡܺܝܢ ܒܡܰܗܡܝܳܢܽܘܬܳܐ.
ܘܳܐܦܠܳܐ ܓܶܝܪ ܐܶܢܳܐ. ܗܽܘ ܗܰܘ ܕܗܳܠܶܝܢ ܐܳܡܰܪ ܐ̱ܢܳܐ: ܐ̱ܢܳܫ ܕܠܳܐ ܦܳܬܽܘܪܳܐ ܐܺܝܬܰܝ ܘܰܕܠܳܐ ܒܰܝܬܳܐ. ܐܶܠܳܐ ܒܥ̈ܺܐܕܶܐ܆ ܐܳܦ ܕܝܰܬܺܝܪ ܡܫܰܪܬܰܚ ܡܶܢ ܗܰܘ ܕܥܺܐܕܳܐ ܡܰܬܩܶܢ ܐ̱ܢܳܐ ܦܳܬܽܘܪܳܐ܆ ܟܰܕ ܥܰܡ ܐ̱ܚܪ̈ܳܢܶܐ ܐܺܝܬ ܐܶܡܰܬܝ ܡܶܫܬܰܪܶܐ ܐ̱ܢܳܐ. ܐܶܠܳܐ. ܠܰܘ ܡܶܛܽܠܗܳܕܶܐ ܒܗܳܠܶܝܢ ܕܰܡܝܰܬܪ̈ܳܢ ܡܰܒܣܶܐ ܐ̱ܢܳܐ܆ ܘܰܠܘܳܬ ܒܽܘ̈ܫܳܠܶܐ ܚܳܐܰܪ ܐ̱ܢܳܐ ܘܰܠܘܳܬ ܬܽܘܪܣܳܝܳܐ ܗܰܘ ܕܕܳܐܶܒ ܘܳܐܒܶܕ܆ ܟܰܕ ܡܰܪܚܶܩ ܐ̱ܢܳܐ ܡܶܢ ܡܰܠܦܳܢܽܘܬܳܐ. ܣܳܦܶܩ ܗ̱ܘ ܓܶܝܪ ܝܰܘܡܳܐ܆ ܕܳܐܦ ܠܟܰܪܣܳܐ ܢܡܰܫܰܚ ܘܢܶܬܶܠ ܛܰܘܪܳܐ ܕܫܳܥ̈ܶܐ ܣܰܓܺܝ̈ܳܐܬܳܐ ܘܰܕܣܳܦ̈ܩܳܢ. ܠܡܳܢܳܐ ܗܳܟܺܝܠ ܪܗܺܝܒܺܝܢ ܚ̱ܢܰܢ ܘܡܶܬܥܰܣܩܺܝܢ ܚ̱ܢܰܢ܆ ܘܡܶܬܥܨܶܝܢ ܚ̱ܢܰܢ ܘܡܶܣܬܰܪܗܒܺܝܢܰܢ܆ ܟܰܕ ܒܰܡܚܽܘܬܳܐ ܕܝܰܥܢܽܘܬܳܐ ܟܰܪܣܳܐ ܒܳܠܥܺܝܢ ܚ̱ܢܰܢ܆ ܘܰܐܝܟ ܕܰܠܘܳܬ ܪܶܗܛܳܐ ܡܶܬܕܚܶܝܢ ܚ̱ܢܰܢ.
ܐܶܠܳܐ ܟܒܰܪ ܐܰܢ̱ܬܽܘܢ ܟܰܕ ܗܳܠܶܝܢ ܫܳܡܥܺܝܢ ܐܢ̱ܬܽܘܢ܆ ܡܶܫܬܰܚܩܺܝܢ ܐܢ̱ܬܽܘܢ ܟܰܕ ܐܳܡܪܺܝܢ ܐܢ̱ܬܽܘܢ܆ ܕܰܚܢܰܢ ܕܟܰܪܣܰܢ ܘܠܳܐ ܚܕܳܐ ܡܶܠܬܳܐ ܥܳܒܕܺܝܢ ܚ̱ܢܰܢ܆ ܘܳܐܦܠܳܐ ܬܽܘܒ ܕܰܡܫܰܪܬܚܽܘܬܳܐ ܕܡܶܐܟ̈ܠܳܬܳܐ܆ ܥܰܡ ܦܰܘܠܽܘܤ ܕܶܝܢ ܐܳܡܪܺܝܢܰܢ: ܕܰܐܠܳܗܳܐ ܐܳܦ ܠܗܳܕܶܐ ܐܳܦ ܠܗܳܠܶܝܢ ܢܒܰܛܶܠ[48]. ܠܰܘ ܟܰܕ ܠܗܰܕܳܡܳܐ ܗܳܢܳܐ ܕܦܰܓܪܳܐ ܠܳܝܛܺܝܢ ܚ̱ܢܰܢ܆ ܥܒܺܝܕ ܓܶܝܪ ܡܶܢ ܗܰܘ. ܕܰܠܟܽܠܗܶܝܢ ܥܒܰܕ ܫܰܦܺܝܪ̈ܳܬܳܐ ܘܰܕܣܰܓܺܝ ܫܰܦܺܝܪ̈ܳܢ܆ ܐܶܠܳܐ ܠܗܳܢܽܘܢ ܕܰܐܠܳܗܳܐ ܐܺܝܬ ܠܗܽܘܢ ܟܰܪܣܗܽܘܢ[49]܆ ܘܰܠܡܰܠܝܽܘܬܳܗ̇ ܕܗܳܕܶܐ܆ ܟܰܗܺܝܢܽܘܬܳܐ ܘܛܳܒܽܘܬ ܝܰܘ̈ܡܳܬܳܐ ܣܳܒܪܺܝܢ ܕܺܐܝܬܶܝܗ̇. ܠܡ̈ܶܠܶܐ ܕܶܝܢ ܪ̈ܽܘܚܳܢܳܝܳܬܳܐ ܠܳܐ ܣܰܒܥܳܐܺܝܬ ܫܳܡܥܺܝܢ ܚ̱ܢܰܢ. ܘܰܠܗܳܕܶܐ ܒܣܳܡܳܐ ܪܺܝܫܳܝܳܐ. ܘܫܳܪܽܘܬܳܐ ܕܚܰܕܽܘܬܳܐ ܚܳܫܒܺܝܢ ܚ̱ܢܰܢ ܠܳܗ̇. ܠܳܐ ܣܳܟ ܗܳܟܺܝܠ ܬܶܩ̣ܢܰܛ܆ ܕܳܐܦ ܐܶܡܰܬܝ ܕܨܳܒܶܐ ܐܰܢ̱ܬ ܘܰܣܒܺܝܣܳܐܺܝܬ. ܬܡܰܠܶܠ ܠܰܢ܆ ܐܳܦܠܳܐ ܒܚܰܕ ܥܶܕܳܢܳܐ ܬܰܗܡܶܐ ܘܬܶܫܒܽܘܩ ܠܰܢ ܕܠܳܐ ܬܽܘܪܣܳܝܳܐ܆ ܘܰܕܢܶܗܘܶܐ ܟܰܦܢܺܝܢ ܚ̱ܢܰܢ ܒܪܶܓܬܳܐ ܗܳܝ ܕܢܰܦܫܳܐ.
ܐܶܠܳܐ ܕܶܝܢ ܟܰܕ ܗܳܠܶܝܢ ܡ̈ܶܠܶܐ ܐܳܡܪܺܝܢ ܐܢ̱ܬܽܘܢ܆ ܐܳܦ ܪܰܘܳܝ ܐ̱ܢܳܐ܆ ܐܳܦ ܚܳܕܶܐ ܐ̱ܢܳܐ. ܡܫܰܡܠܝܳܐܺܝܬ ܕܶܝܢ ܒܪܰܡ܆ ܠܰܝܬ ܠܺܝ ܠܡܶܬܬܟܳܠܽܘ. ܚܰܒܺܝܒܳܐ ܓܶܝܪ܆ ܐܶܢ ܐܳܦ ܗܳܫܳܐ ܟܰܕ ܒܨܰܘܡܳܐ ܗܳܠܶܝܢ ܐܳܡܰܪ ܐ̱ܢܳܐ: ܠܳܐ ܐܶ݀ܣܬܒܰܪ ܝܰܩܺܝܪܳܐ܆ ܐܶܠܳܐ ܠܒܰܪ ܡܶܢ ܩܛܺܝܓܪܳܢܽܘܬܳܐ ܐܶ݀ܗܘܶܐ܆ ܠܣܰܓܺܝ̈ܶܐܐ ܓܶܝܪ ܫܳܡܰܥ ܐ̱ܢܳܐ܆ ܕܰܒܡܰܣܰܐܬܳܐ ܬܳܩܠܺܝܢ ܠܳܗ̇ ܠܫܳܥܬܳܐ ܕܰܬܫܰܥ ܕܝܰܘܡܳܐ ܗܳܢܳܐ܆ ܘܰܐܝܟ ܕܰܒܟܰܦܬܳܐ ܐܳܦ ܠܶܗ ܠܢܶܙܠܳܐ ܡܥܰܩܒܺܝܢ. ܘܗܳܢܽܘܢ ܡܰܢ ܐܰܡܪܺܝܢ܆ ܕܰܡܫܰܘܚܪܳܐܺܝܬ ܐܶܬܟܰܢܰܫܢ. ܗܳܢܽܘܢ ܕܶܝܢ܆ ܕܰܒܥܶܕܳܢܰܢ. ܘܰܡܡܰܫܚܳܐܺܝܬ ܘܠܳܚܡܳܐܺܝܬ. ܐ̱ܚܪ̈ܳܢܶܐ ܕܶܝܢ ܡܶܬܚܪܶܝܢ ܘܰܡܫܰܪܪܺܝܢ ܥܰܡ ܟܰܦܢܳܐ. ܝܰܬܺܝܪ ܚܰܪܺܝܦܳܐܺܝܬ܆ ܕܫܳܥܬܳܐ ܕܰܬܫܰܥ܆ ܫܽܘܠܳܡܳܐ ܘܰܫܪܳܝܳܐ ܕܰܟܢܽܘܫܝܳܐ܆ ܙܳܕܶܩ ܗ̱ܘܳܐ ܕܬܶܗܘܶܐ ܐܺܝܬܶܝܗ̇ ܗ̱ܘܳܬ. ܐܶܢܳܐ ܕܶܝܢ. ܠܘܳܬ ܗܳܢܽܘܢ ܕܰܐܝܟ ܗܳܟܰܢ. ܐܳܡܰܪ ܐ̱ܢܳܐ ܝܰܬܺܝܪ ܟܺܐܢܳܐܺܝܬ܆ ܕܠܰܐܠܳܗܳܐ ܙܳܕܶܩ ܠܡܶܬܛܦܳܣܽܘ ܝܰܬܺܝܪܳܐܺܝܬ. ܐܰܘ ܠܰܒܢܰܝ̈ܢܳܫܳܐ[50].
ܐܰܩܺܝܡܘ̱ ܓܶܝܪ ܗܰܘܢܟܽܘܢ ܐܶܢ ܫܳܦܪܳܐ ܠܟܽܘܢ ܐܳܘ ܐܰܢ̱ܬܽܘܢ܆ ܥܰܠ ܗܳܠܶܝܢ ܕܗܳܫܳܐ ܐܶܬܩܪ̈ܺܝ̣ܶܝ̣ܢ ܠܟܽܘܢ. ܫܡܰܥܬܽܘܢ ܓܶܝܪ ܐܶܢܗܽܘ ܕܠܰܘ ܒܨܶܒܝܳܢܟܽܘܢ ܛܥܰܝܬܽܘܢ܆ ܕܦܶܛܪܽܘܤ ܘܝܽܘܚܰܢܳܢ ܣܳܠܩܺܝܢ ܗ̱ܘܰܘ ܠܗܰܝܟܠܳܐ܆ ܒܫܳܥܬܳܐ ܕܰܨܠܽܘܬܳܐ ܗܳܝ ܕܰܬܫܰܥ[51]܆ ܥܰܡ ܦܶܛܪܽܘܤ ܗܳܟܺܝܠ ܘܝܽܘܚܰܢܳܢ ܙܳܕܶܩ ܠܡܶܣܰܩ ܐܰܟܚܕܳܐ ܒܫܳܥܬܳܐ ܕܰܬܫܰܥ܆ ܘܠܰܘ ܕܥܰܡ ܗܳܢܽܘܢ ܕܟܰܦܢܺܝܢ ܠܳܐ ܡܠܺܝܠܳܐܺܝܬ ܢܶܚܽܘܬ ܐܰܟܚܕܳܐ ܡܶܢ ܗܰܝܟܠܳܐ. ܢܶܬܶܠ ܠܟܽܘܢ ܕܶܝܢ ܡܳܪܝܳܐ܆ ܐܳܦ ܐܰܓܪܳܐ ܗܰܘ ܕܡܶܛܽܠ ܨܰܘܡܳܐ܆ ܘܳܐܦ ܗܰܘ ܕܡܶܛܽܠ ܫܶܡܥܳܐ ܪܳܚܶܡ ܥܰܡܠܳܐ. ܘܢܰܠܶܦܟܽܘܢ ܕܥܰܡ ܦܰܘܠܽܘܤ ܢܺܐܡܰܪ ܟܽܠ ܚܰܕ ܡܶܢܟܽܘܢ܆ ܕܰܒܟܽܠ ܘܰܒܟܽܠܗܶܝܢ ܡܕܰܪܰܫ ܐ̱ܢܳܐ. ܘܰܠܡܶܣܒܰܥ ܘܰܠܡܶܟܦܰܢ. ܘܰܕܢܶܗܘܶܐ ܝܰܬܺܝܪ ܠܺܝ܆ ܘܰܕܢܶܗܘܶܐ ܚܰܣܺܝܪ ܠܺܝ. ܟܽܠܗܶܝܢ ܡܨܶܐ ܐ̱ܢܳܐ ܚܰܝܠܳܐ ܒܰܡܫܺܝܚܳܐ ܕܰܡܚܰܝܶܠ ܠܺܝ[52].
ܒܪܰܡ. ܐܰܝܟܰܢܳܐ ܕܰܡܫܰܡܠܝܳܐܺܝܬ. ܟܰܕ ܣܳܠܩܺܝܢ ܐܢ̱ܬܽܘܢ ܠܗܰܝܟܠܳܐ܆ ܒܦܶܛܪܽܘܤ ܘܰܒܝܽܘܚܰܢܳܢ ܬܕܰܡܽܘܢ܆ ܫܰܘܬܶܦܘ ܠܰܣܢܺܝ̈ܩܶܐ ܒܪ̈ܰܚܡܶܐ ܘܰܒܪܶܚܡܰܬ ܐ̱ܢܳܫܽܘܬܳܐ܆ ܐܰܝܟܰܢܳܐ ܕܗܳܢܽܘܢ ܪܰܚܶܡܘ ܥܰܠ ܡܶܣܟܺܢܳܐ ܗܰܘ ܘܰܚܓܺܝܪܳܐ܆ ܘܗܳܕܶܐ ܟܰܕ ܣܺܐܡܳܐ ܘܕܰܗܒܳܐ ܠܰܝܬ ܗ̱ܘܳܐ ܠܗܽܘܢ܆ ܐܶܠܳܐ ܟܰܕ ܚܽܘܠܡܳܢܳܐ ܗܰܘ ܠܳܐ ܡܶܙܕܰܒܢܳܢܳܐ ܫܰܟܶܢܘ ܠܶܗ. ܗܳܕܶܐ ܕܶܝܢ ܡܚܰܦܶܛ ܐ̱ܢܳܐ ܠܟܽܘܢ ܕܬܶܥܒܕܽܘܢ܆ ܠܘܳܬ ܗܳܢܽܘܢ ܕܚܳܕܪܺܝܢ܆ ܐܶܢ ܐܳܦ ܗܶܢܽܘܢ ܢܕܰܡܽܘܢ ܒܗܰܘ ܚܓܺܝܪܳܐ܆ ܘܰܠܘܳܬ ܬܰܪܥܳܐ ܕܗܰܝܟܠܳܐ ܢܩܽܘܡܽܘܢ ܐܰܘ ܢܶܬܒܽܘܢ܆ ܘܠܰܘ ܠܓܰܘ ܢܶܥܠܽܘܢ ܘܠܰܨ̈ܠܰܘܳܬܳܐ ܕܺܝܠܟܽܘܢ ܢܶܦܣܩܽܘܢ. ܘܰܐ̱ܚܪ̈ܳܢܝܳܬܳܐ ܒܺܝ̈ܫܳܬܳܐ ܢܶܣܥܪܽܘܢ܆ ܗܳܠܶܝܢ ܕܳܐܦ ܠܡܺܐܡܰܪ ܐܶܢܶܝܢ ܒܳܗܶܬ ܐ̱ܢܳܐ. ܡܶܫܟܚܳܐ ܗ̱ܝ ܓܶܝܪ. ܕܟܽܠܗܶܝܢ ܒܢܳܡܽܘ̈ܣܶܐ ܫܠܺܝܚܳܝ̈ܶܐ܆ ܘܰܒܫܰܦܺܝܪܽܘܬ ܐܶܣܟܺܡܳܐ. ܘܰܒܛܶܟܣܳܐ ܢܶܗ̈ܘܝܳܢ[53]܆ ܠܬܶܫܒܽܘܚܬܳܐ ܕܰܡܫܺܝܚܳܐ ܐܰܠܳܗܳܐ ܕܥܰܠ ܟܽܠ[54]. ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ. ܘܰܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܰܐܪܒܥܺܝܢ ܘܰܬܡܳܢܝܳܐ.