ܡܺܐܡܪܳܐ ܕܰܐܪܒܥܺܝܢ ܘܫܰܒܥܳܐ
ܕܥܰܠ ܣܽܘܠܳܩܳܐ ܕܰܐܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܆ ܕܰܬܪܶܝܢ.
47: ܐܶܢܳܐ ܟܰܕ ܠܪܰܒܽܘܬ ܦܰܐܝܽܘܬܶܗ ܕܝܰܘܡܳܢܳܐ ܡܶܬܚܰܫܰܒ ܐ̱ܢܳܐ܆ ܠܳܐ ܐܺܝܬ ܠܺܝ ܕܰܐܝܟܳܐ ܐܶ݀ܩܽܘܡ ܐܶ݀ܫܠܶܐ ܡܶܢ ܕܽܘܡܳܪܳܐ. ܗܰܘ ܓܶܝܪ ܕܰܢܚܶܬ ܠܰܐܬܪ̈ܰܘܳܬܳܐ ܬܰܚ̈ܬܳܝܶܐ ܕܰܐܪܥܳܐ܆ ܠܥܶܠ ܡܶܢ ܟܽܠܗܽܘܢ ܫܡܰܝܳܐ ܣܠܶܩ[1]. ܡܳܢܳܐ ܗܳܟܺܝܠ ܐܳܦ ܐܶ݀ܣܥܽܘܪ. ܠܪܶܚܡܰܬ ܐ̱ܢܳܫܽܘܬܳܐ ܗܳܝ ܕܡܰܚܬܬܳܐ ܐܶ݀ܩܰܠܶܤ܆ ܐܰܘ ܠܪܰܘܡܳܐ ܐܰܠܳܗܳܝܳܐ ܗܰܘ ܕܡܰܣܰܩܬܳܐ ܐܶ݀ܫܰܒܰܚ. ܠܗܳܝ ܡܰܢ ܓܶܝܪ ܠܰܡܩܰܠܳܣܽܘ ܙܳܕܶܩ܆ ܠܗܳܝ ܕܶܝܢ ܠܰܡܫܰܒܳܚܽܘ܆ ܠܡܶܒܨܳܐ ܕܶܝܢ ܘܠܳܐ ܟܽܠ ܟܽܠܶܗ. ܠܳܐ ܡܶܬܕܰܪܟܳܢܳܐ. ܗܘ ܓܶܝܪ ܙܢܳܐ ܗܰܘ ܕܡܰܚܰܬܬ̣ܳܐ. ܐܰܝܟ ܡܳܐ ܕܳܐܦ ܠܳܐ ܡܶܬܥܰܩܒܳܢܰܐ ܗ̄ܘ ܕܽܘܡܳܪܳܐ ܗܰܘ ܕܡܰܣܰܩܬܳܐ.
ܠܰܐܝܟܳܐ ܓܶܝܪ ܢܚܶܬ܆ ܗܰܘ ܕܰܠܟܽܠ ܕܽܘܟ ܩܰܪܺܝܒ. ܐܰܘ ܠܰܐܝܟܳܐ ܬܽܘܒ ܣܠܶܩ܆ ܗܰܘ ܕܰܠܟܽܠ ܡܳܠܶܐ. ܐܶܢ ܡܰܢ ܠܳܐ ܦܰܓܪܳܢܳܐܺܝܬ܆ ܘܠܳܐ ܠܕܽܘܟ. ܠܰܐܝܟܳܐ ܓܶܝܪ ܢܺܐܙܰܠ ܘܰܢܫܰܢܶܐ܆ ܗܰܘ ܕܠܳܐ ܣܳܟܳܐ ܘܠܳܐ ܡܶܬܬܰܚܡܳܢܳܐ܆ ܘܕܳܐܦܠܳܐ ܒܰܚܕܳܐ ܕܽܘܟܬܳܐ ܡܶܣܬܰܝܰܟ܆ ܗܰܘ ܕܰܠܟܽܠ ܚܳܒܶܫ ܘܰܡܣܰܝܶܟ ܒܶܗ. ܐܶܢ ܕܶܝܢ ܦܰܓܪܳܢܳܐܺܝܬ ܐܶܬܳܐ܆ ܡܶܠܬܳܐ ܓܶܝܪ ܒܶܣܪܳܐ ܗܘ̣ܳܐ ܘܰܐܓܶܢ ܒܰܢ[2]. ܟܰܕ ܐܶܬܚܰܝܰܕ ܠܳܐ ܡܶܫܬܰܚܠܦܳܢܳܐܺܝܬ ܘܠܳܐ ܡܶܣܬܰܝܟܳܢܳܐܺܝܬ ܠܒܶܣܪܳܐ ܩܢܽܘܡܳܐܺܝܬ܆ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܘܩܰܘܺܝ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ ܐܳܦ ܟܰܕ ܗܘ̣ܳܐ ܒܰܪܢܳܫܳܐ܆ ܥ̣ܰܠ ܡܰܢ ܠܡܶܬܥܰܡܪܳܢܺܝܬܳܐ. ܐܰܝܟ ܒܽܘܟܪܳܐ ܒܰܐܚ̈ܶܐ ܣܰܓܺܝ̈ܶܐܐ[3]܆ ܣܠܶܩ ܕܶܝܢ ܟܰܕ ܗܽܘ ܗܳܟܘܳܬ ܐܺܝܬ ܠܶܗ܆ ܗܳܢܰܘ ܕܶܝܢ ܟܰܕ ܡܒܰܣܰܪ܆ ܠܥܶܠ ܡܶܢ ܟܽܠܗܽܘܢ ܫܡܰܝܳܐ܆ ܐܰܝܟ ܒܪܳܐ ܝܺܚܺܝܕܳܝܳܐ ܕܰܐܒܳܐ[4].
ܦܰܘܠܽܘܤ ܓܶܝܪ ܟܰܕ ܠܩܽܘ̈ܠܳܣܳܝܶܐ ܡܶܛܽܠ ܡܫܺܝܚܳܐ ܡܡܰܠܶܠ ܗ̱ܘܳܐ. ܟܬܰܒ܆ ܕܒܶܗ ܥܳܡܰܪ ܟܽܠܶܗ ܡܽܘܠܳܝܳܐ ܕܰܐܠܳܗܽܘܬܳܐ ܦܰܓܪܳܢܳܐܺܝܬ[5]. ܗܳܢܰܘ ܕܶܝܢ ܠܘ ܡܰܥܒܕܳܢܽܘܬܳܐ ܡܶܕܶܡ ܡܢܳܬܳܝܬܳܐ ܕܡܶܠܬܳܐ܆ ܐܰܝܟܰܢܳܐ ܕܳܐܦ ܒܰܢܒܺܝ̈ܶܐ܆ ܐܶܠܳܐ ܗܽܘ ܡܶܠܬܳܐ ܕܰܐܠܳܗܳܐ܆ ܗܰܘ ܡܰܠ̣ܝܳܐ ܘܚܰܝܳܐ ܘܰܩܢܽܘܡܳܝܳܐ. ܟܰܕ ܠܰܘ ܐܰܝܟ ܕܰܒܪܶܚܡܬܳܐ ܚܽܘܒܳܢܳܝܬܳܐ ܒܛܰܝܒܽܘܬܳܐ. ܘܒܰܡܫܰܘܬܦܳܢܽܘܬܳܐ ܥܡܰܪ܆ ܐܶܠܳܐ ܟܰܕ ܐܶܬܓܰܫܰܡ ܐܰܘ ܟܺܝܬ ܐܶܬܒܰܣܰܪ܆ ܐܽܘܣܝܳܐܺܝܬ ܟܺܝܬ ܘܒܰܚܕܳܝܽܘܬܳܐ ܟܝܳܢܳܝܬܳܐ܆ ܗܳܕܐ ܗܝ ܓܶܝܪ ܗܳܝ ܕܢܶܥܡܰܪ ܦܰܓܪܳܢܳܐܺܝܬ.
ܕܡܶܬܶܐܡܰܪ ܕܶܝܢ ܙܰܒ̈ܢܺܝܢ ܣܰܓܺܝ̈ܳܐܢ܆ ܐܳܦ ܥܰܠ ܗܳܢܽܘܢ ܕܰܩܢܽܘܡܳܐܺܝܬ ܡܚܰܝܕܺܝܢ܆ ܫܡܳܐ ܗܰܘ ܕܥܳܡܽܘܪܽܘܬܳܐ܆ ܣܳܗܶܕ ܦܰܘܠܽܘܤ܆ ܕܥܰܠ ܦܰܓܪܳܐ ܕܺܝܠܰܢ ܟܳܬܶܒ. ܐܶܢ ܒܰܝܬܳܐ ܐܰܪܥܳܢܳܝܳܐ ܕܺܝܠܰܢ ܕܦܰܓܪܳܐ ܢܶܫܬܪܶܐ[6]. ܐܳܦ ܚܰܕ ܡܶܢ ܗܳܢܽܘܢ ܪ̈ܳܚܡܰܘܗ̱ܝ ܕܺܐܝܽܘܒ. ܒܳܗ̇ ܒܰܕܡܽܘܬܳܐ܆ ܟܕ ܡܶܛܽܠ ܟܽܠܗܽܘܢ ܒܢܰܝ̈ܢܳܫܳܐ ܐܳܡܰܪ: ܫܒܽܘܩ ܕܶܝܢ ܠܗܳܢܽܘܢ ܕܥܳܡܪܺܝܢ ܒܒ̈ܳܬܶܐ ܕܛܺܝܢܳܐ[7]܆ ܗܰܘ ܕܡܶܢܶܗ ܐܳܦ ܚܢܰܢ ܐܺܝܬܰܝܢ܆ ܡܶܢܶܗ ܟܰܕ ܡܶܢܶܗ ܕܛܺܝܢܳܐ. ܘܠܳܐ ܐ̱ܢܳܫ ܢܶܫܬܓܶܫ ܟܰܕ ܗܳܟܰܢܳܐ ܡܶܬܚܰܫܰܒ܆ ܕܶܐܢ ܡܫܺܝܚܳܐ܆ ܡܶܠܬܳܐ ܕܰܐܠܳܗܳܐ ܗܰܘ ܕܶܐܬܒܰܣܰܪ ܐܺܝܬܰܘܗ̱ܝ܆ ܐܰܝܢܳܐ ܐ̱ܚܪܺܢܳܐ ܢܶܗܘܶܐ ܐܺܝܬܰܘܗ̱ܝ ܠܒܰܪ ܡܶܢܶܗ܆ ܡܽܘܠܳܝܳܐ ܕܰܐܠܳܗܽܘܬܳܐ ܗܰܘ ܕܒܶܗ ܥܡܰܪ[8].
ܥܝܳܕܰܐ ܗ̄ܘ ܓܶܝܪ ܠܰܟܬܳܒܳܐ ܐܰܠܳܗܳܝܳܐ܆ ܕܳܐܦ ܠܰܡܢܳܬܳܐ ܡܶܢ ܟܽܘܠܳܐ ܢܫܰܡܰܗ. ܐܺܝܬ ܐܶܡܰܬܝ܆ ܐܰܟܙܢܳܐ ܟܺܝܬ ܕܳܐܦ ܦܰܘܠܽܘܤ܆ ܠܢܰܦܫܳܐ ܡܰܢ ܒܰܪܢܳܫܳܐ ܗܰܘ ܕܰܠܓܰܘ ܟܰܢ̣ܝܳܗ̇. ܠܦܰܓܪܳܐ ܕܶܝܢ܆ ܒܰܪܢܳܫܳܐ ܗܰܘ ܕܰܠܒܰܪ. ܘܟܰܕ ܛܳܒ ܒܰܪܢܳܫܳܐ ܡܫܰܡܠܝܳܐܺܝܬ ܠܰܘ ܡܢܳܬܳܐ ܐܺܝܬܰܘܗ̱ܝ܆ ܐܶܠܳܐ ܩܢܽܘܡܳܐ ܚܰܕ ܗ̱ܘ ܕܡܶܢ ܬܪ̈ܰܝܗܽܘܢ. ܒܪܰܡ ܠܰܘ ܡܶܢ ܗܳܕܶܐ ܬܪܶܝܢ ܒܢܰܝ̈ܢܳܫܳܐ ܡܶܣܬܰܟܠܺܝܢܰܢ ܠܶܗ ܠܗܰܘ ܚܰܕ܆ ܡܶܛܽܠ ܟܺܝܬ ܕܒܰܪܢܳܫܳܐ ܗܰܘ ܕܰܠܓܰܘ ܘܒܰܪܢܳܫܳܐ ܗܰܘ ܕܰܠܒܰܪ ܐܶܬܶܐܡܰܪ.
ܕܰܐܝܟ ܗܳܢܳܐ ܕܶܝܢ. ܐܶܣܟܺܡܳܐ ܡܶܕܶܡ ܕܡܶܠܬܳܐ. ܐܺܝܬ ܠܡܶܚܙܳܐ܆ ܐܳܦ ܒܗܳܝ ܕܰܐܡܺܝܪܳܐ ܠܘܳܬ ܢܒܺܝܳܐ ܕܰܘܺܝܕ. ܕܰܒܠܺܠܝܳܐ ܥܰܡ ܠܶܒܳܐ ܕܺܝܠܝ ܗܳܕܶܤ ܗ̱ܘܺܝܬ[9]. ܡܰܢܽܘ ܓܶܝܪ ܐ̱ܚܪܺܢܳܐ ܐܺܝܬܰܘܗ̱ܝ܆ ܗܰܘ ܕܥܰܡ ܠܶܒܳܐ ܕܺܝܠܶܗ ܗܳܕܶܤ ܗ̱ܘܳܐ܆ ܐܶܠܳܐ ܐܶܢ ܟܺܝܬ ܠܶܗ ܠܠܶܒܶܗ ܢܺܐܡܰܪ܆ ܕܰܠܡܰܪ̈ܢܝܳܬܳܐ ܡܗܰܦܶܟ ܗ̱ܘܳܐ ܗܽܘ ܒܶܗ. ܠܰܘ ܓܶܝܪ ܡܶܛܽܠ ܕܰܐܝܟ ܗܰܘ ܕܶܐܣܟܺܡܳܐ ܬܪܰܝܳܢܳܝ ܦܰܪܨܽܘܦܳܐ܆ ܕܡܶܠܬܳܐ ܐܺܝܬܰܘܗ̱ܝ܆ ܡܶܛܽܠܗܳܕܶܐ ܕܰܬܪܶܝܢ ܠܶܒܺܝ̈ܢ ܐܺܝܬܰܘܗ̱ܝ ܗܰܘ ܚܰܕ ܢܶܣܒܰܪ.
ܗܳܟܰܢܳܐ ܐܳܦ ܝܥܩܘܒ ܟܰܕ ܟܳܬܶܒ ܐܶܓܰܪܬܳܐ ܗܳܝ ܩܰܬܽܘܠܺܝܩܺܝ܆ ܐܶܡܰܪ ܡܶܛܽܠ ܢܰܦܫܳܐ ܕܺܝܠܰܢ. ܡܶܬܝܰܐܒܐ ܪܽܘܚܳܐ ܗܳܝ ܕܰܐܥܡܰܪ ܒܰܢ. ܛܰܝܒܽܘܬܳܐ ܕܶܝܢ ܕܝܰܬܺܝܪ ܪܰܒܳܐ ܝܳܗܶܒ[10]. ܘܟܰܕ ܛܳܒ ܒܰܪܢܳܫܳܐ ܗܰܘ ܕܡܶܢ ܢܰܦܫܳܐ ܘܡܶܢ ܦܰܓܪܳܐ ܐܺܝܬܰܝܢ ܚܢܰܢ. ܐܰܝ̇ܕܳܐ ܗܳܟܺܝܠ ܢܰܦܫܳܐ ܐ̱ܚܪܺܬܳܐ ܐܰܘ ܟܺܝܬ ܪܽܘܚܳܐ ܐܰܥܡܰܪ ܒܰܢ. ܐܶܠܳܐ ܫܰܦܺܝܪ ܝܺܕܺܝܥܳܐ. ܕܒܰܢ ܐܶܡܰܪ: ܟܰܕ ܙܳܕܶܩ ܗ̱ܘܳܐ ܕܢܺܐܡܰܪ ܒܦܰܓܪܳܐ܆ ܟܰܕ ܚܠܳܦ ܫܽܘܘܕܳܥܳܐ ܡܢܳܬܳܝܳܐ܆ ܒܰܫܡܳܐ ܕܟܽܘܠܳܐ ܐܶܬܚܰܫܰܚ. ܗܳܝ ܕܶܝܢ ܕܳܐܡܰܪ: ܕܰܐܝܟ ܗܳܕܶܐ ܐܺܝܬܶܝܗ̇. ܡܶܬܝܰܐܒܳܐ ܡܰܢ ܘܡܶܬܪܰܓܪܓܳܐ ܪܽܘܚܳܐ ܗܳܝ ܕܒܰܢ܆ ܠܒܰܝܬܳܝܽܘܬܳܐ ܗܳܝ ܕܰܠܘܳܬ ܐܰܠܳܗܳܐ܆ ܟܰܕ ܡܶܢ ܪܶܚܡܬܳܐ ܕܥܳܠܡܳܐ ܡܰܗܦܟܳܐ ܐܰܦܶܝ̈ܗ̇. ܗܰܘ ܕܶܝܢ ܛܰܝܒܽܘܬܳܐ ܕܝܰܬܺܝܪ ܪܰܒܳܐ ܡܶܢ ܪܶܓܬܳܐ ܝܳܗܶܒ.
ܒܶܗ ܟܰܕ ܒܶܗ ܒܰܙܢܳܐ܆ ܐܳܦ ܙܟܰܪܝܳܐ ܢܒܺܝܳܐ ܐܳܡܰܪ: ܗܰܘ ܕܰܓܒܰܠ ܪܽܘܚܳܐ ܕܒܰܪܢܳܫܳܐ ܒܶܗ[11]. ܐܰܝ̇ܕܳܐ ܓܶܝܪ ܪܽܘܚܐ ܐ̱ܚܪܺܢܳܐ ܐܶܣܬܰܟܰܠ ܕܡܶܬܓܰܒܠܳܐ܆ ܤܛܰܪ ܡܶܢ ܒܰܪܢܳܫܳܐ. ܐܶܠܳܐ ܠܰܘ ܒܶܐܣܟܺܡܳܐ ܕܡܶܠܬܳܐ ܢܚܽܘܪ. ܐܶܠܳܐ ܟܰܕ ܒܰܟܝܳܢܳܐ ܕܣܽܘܥܪ̈ܳܢܶܐ ܚܳܝܪܺܝܢܰܢ. ܡܶܣܬܰܟܠܺܝܢܰܢ. ܕܚܰܕ ܐܺܝܬܰܘܗ̱ܝ ܗܰܘ ܕܣܺܝܡ ܘܠܰܘ ܬܪܶܝܢ. ܡܶܛܽܠ ܟܺܝܬ ܕܒܰܪܢܳܫܳܐ. ܡܶܢ ܬܰܪܬܶܝܢ. ܚܰܕ ܦܰܪܨܽܘܦܳܐ ܐܺܝܬܰܘܗ̱ܝ ܘܚܰܕ ܩܢܽܘܡܳܐ. ܦܐܬܐ
ܐܶܠܳܐ ܒܰܝܢܳܬ ܗܳܠܶܝܢ. ܟܰܕ ܐܳܡܰܪ ܐ̱ܢܳܐ ܪܰܒܽܘܬܳܗ̇ ܕܡܰܘܗܰܒܬܳܐ ܡܥܺܝܪܳܐ ܘܰܡܩܺܝܡܳܐ ܠܺܝ܆ ܘܰܒܥܽܘܬܪܳܐ ܗܰܘ ܕܪܶܚܡܰܬ ܐ̱ܢܳܫܽܘܬܳܐ ܕܰܠܘܳܬܰܢ ܬܰܡܺܝܗ ܐ̱ܢܳܐ܆ ܟܰܕ ܚܳܙܶܐ ܐ̱ܢܳܐ ܝܰܘܡܳܢܳܐ܆ ܠܗܰܘ ܕܡܶܢ ܙܰܪܥܶܗ ܕܰܐܒܪܳܗܳܡ ܢܣܰܒ[12]܆ ܠܗܰܘ ܕܡܶܢ ܥܶܩܳܪܶܗ ܕܺܐܝܫܰܝ ܘܰܕܕܰܘܺܝܕ܆ ܠܗܰܘ ܕܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܒܥܳܐ ܒܬܽܘܠܳܝܳܐ ܝܺܥܳܐ܆ ܠܗܰܘ ܕܰܒܒܰܛܢܳܐ܆ ܠܗܰܘ ܕܰܒܝܰܠܕܳܐ܆ ܠܗܰܘ ܕܰܒܒܶܝܬ ܠܚܶܡ܆ ܠܗܰܘ ܕܰܒܥܰܙܪܽܘܪ̈ܶܐ܆ ܠܗܰܘ ܕܒܽܐܘܪܝܳܐ܆ ܠܗܰܘ ܕܰܒܬܰܪܒܺܝܬܳܐ ܕܩܰܘܡܬܳܐ ܦܰܓܪܳܢܳܝܬܳܐ܆ ܘܗܳܝ ܟܺܝܬ ܐ̱ܚܪܳܝܬܳܐ ܘܰܕܣܰܓܺܝ ܪܰܒܳܐ܆ ܠܗܰܘ ܕܒܰܨܠܺܝܒܳܐ܆ ܠܗܰܘ ܕܰܒܩܰܒܪܳܐ܆ ܠܗܰܘ ܕܒܰܫܝܽܘܠ ܗܘ̣ܳܐ܆ ܕܰܥܒܰܪ ܐܶܢܽܘܢ ܠܰܫܡܰܝܳܐ܆ ܠܪ̈ܺܝܫܳܢܘܳܬܳܐ܆ ܠܫܽܘܠ̈ܛܳܢܶܐ܆ ܠܚܰܝ̈ܠܰܘܳܬܳܐ܆ ܠܟܽܘܪ̈ܣܰܘܳܬܳܐ܆ ܠܡܳܪ̈ܰܘܳܬܳܐ[13]܆ ܠܟܽܠܳܗ̇ ܒܪܺܝܬܳܐ ܡܶܬܗܰܘܢܳܢܺܝܬܳܐ ܥܒܰܪ ܘܰܪܗܶܛ܆ ܘܰܠܘܳܬ ܬܪܽܘܢܽܘܤ ܗܰܘ ܕܝܰܬܺܝܪ ܐܺܝܬܰܘܗ̱ܝ ܥܶܠܳܝܳܐ ܘܝܰܬܺܝܪ ܡܶܢ ܟܽܠ ܡܰܠܟܳܝܳܐ ܣܠܶܩ܆ ܘܝܳܬܶܒ ܐܰܟܚܕܳܐ ܥܰܡ ܐܰܒܳܐ.
ܐܳܦ ܓܶܝܪ ܐܶܡܰܪ ܡܳܪܝܳܐ ܠܡܳܪܝܳܐ ܕܬܶܒ ܠܳܟ ܡܶܢ ܝܰܡܺܝܢܝ[14]. ܫܳܡܰܥ ܐܰܢ̱ܬ ܠܶܗ ܠܰܐܠܳܗܳܝܳܐ ܕܰܘܺܝܕ܆ ܕܰܡܙܰܡܰܪ ܢܒܺܝܳܐܺܝܬ. ܡܳܢܳܐ ܗܳܟܺܝܠ ܒܗܳܠܶܝܢ ܢܺܐܡܰܪ: ܐܶܠܳܐ ܐܶܢ ܕܪܰܒܳܐ ܐܺܝܬܰܘܗ̱ܝ ܡܶܬܬܰܘܕܝܳܢܳܐܺܝܬ ܐ̱ܪܳܙܳܐ ܗܰܘ ܫܰܦܺܝܪܽܘܬ ܕܶܚܠܬܳܐ[15]. ܗܰܘ ܟܺܝܬ ܕܟܰܕ ܡܶܢܳܗ̇ ܕܟܳܪܽܘܙܽܘܬܳܐ܆ ܐܳܦܠܳܐ ܥܰܠ ܚܰܕ ܬܽܘܩܳܢܳܐ ܕܡ̈ܶܠܶܐ ܣܢܺܝܩ܆ ܠܒܶܙܝ̈ܶܐ222 ܡܰܢ ܗܳܢܽܘܢ ܕܰܒܗܶܪ̈ܣܺܝܤ ܠܒܰܪ ܣܳܐܶܡ܆ ܡܚܰܘܶܐ ܕܶܝܢ ܠܰܫܪܳܪܳܐ܆ ܓܰܠܝܳܐ ܘܢܰܗܺܝܪܳܐ܆ ܘܰܕܝܰܬܺܝܪ ܡܶܢ ܟܽܠ ܢܰܨܺܝܚ.
ܐܶܠܽܘ ܓܶܝܪ ܘܠܳܐ ܡܶܕܡ ܦܐܶܐ ܠܰܐܠܳܗܳܐ. ܐܺܝܬ ܗ̱ܘܳܐ ܕܡܶܬܬܰܝܬܶܐ ܒܡ̈ܶܠܶܐ ܗܳܠܶܝܢ ܕܰܡܕܰܒܪܳܢܽܘܬܳܐ ܗܰܘ ܕܰܐܠܳܗܳܐ ܡܚܰܘܶܐ ܗ̱ܘܳܐ ܠܶܗ ܠܥܰܡܰܢܽܘܐܶܝܠ܆ ܠܳܐ ܟܰܘܟܒܳܐ ܐܰܟܣܢܳܝܳܐ ܕܰܕܢܰܚ܆ ܘܰܐܝܟ ܗܰܘ ܕܡܰܢܗܰܪ ܗ̱ܘܳܐ ܠܗܰܠ̈ܟܳܬܳܐ ܕܰܡܓܽܘ̈ܫܶܐ܆ ܘܰܠܘܳܬ ܣܶܓܕܬܳܐ ܕܗܰܘ ܕܶܐܬܺܝܠܶܕ ܢܳܓܶܕ ܗ̱ܘܳܐ ܠܗܽܘܢ܆ ܠܳܐ ܩܽܘܪ̈ܒܳܢܶܐ ܗܳܠܶܝܢ ܕܡܶܢܗܽܘܢ܆ ܕܪܳܡܙܺܝܢ ܕܰܐܠܳܗܳܐ ܐܺܝܬܰܘܗ̱ܝ܆ ܘܡܰܠܟܳܐ ܗܰܘ ܕܰܒܗܳܠܶܝܢ ܡܶܬܝܰܩܰܪ ܗ̱ܘܳܐ. ܕܰܗܒܳܐ ܓܶܝܪ ܐܺܝܬܰܘܗ̱ܝ ܗ̱ܘܳܐ ܘܰܠܒܽܘܢܬܳܐ܆ ܣܺܝܡ ܗ̱ܘܳܐ ܕܶܝܢ ܥܰܡܗܽܘܢ ܐܳܦ ܡܽܘܪܳܐ܆ ܫܽܘܘܕܳܥܳܐ ܕܰܩܒܽܘܪܬܳܐ ܨܶܒܝܳܢܳܝܬܳܐ ܘܡܰܥܒܕܰܬ ܚܰܝ̈ܶܐ ܘܰܬܠܺܝܬܳܝܰܬ ܝܰܘ̈ܡܶܐ܆ ܠܳܐ ܐܳܣܝܽܘܬܳܐ ܕܚܰܫ̈ܶܐ ܕܟܽܠ ܓܢܶܤ܆ ܘܬܽܘܩܳܢܳܐ ܕܡܶܢ ܕܪܺܝܫ ܐܰܘܟܺܝܬ ܡܽܘܠܳܝܳܐ ܕܗܰܕܳܡ̈ܶܐ ܗܳܢܽܘܢ ܐܳܠ̈ܨܳܝܶܐ ܘܰܕܝܰܬܺܝܪ ܥܳܗܢܺܝܢ܆ ܕܥܰܡ ܫܽܘܠܛܳܢܳܐ ܗܰܘ ܕܰܦܐܶܐ ܠܥܳܒܽܘܕܳܐ܆ ܠܳܐ ܟܳܐܬܳܐ ܕܝܰܡܳܐ ܘܰܕܪ̈ܽܘܚܳܢܶܐ܆ ܘܡܰܪܕܺܝܬܳܐ ܬܡܺܝܗܬܳܐ ܕܥܰܠ ܪܰܛܺܝܒܬܳܐ܆ ܘܠܰܚ̈ܡܶܐ ܒܰܙܒܰܢ ܡܰܢ ܫܰܒܥܳܐ. ܒܰܙܒܰܢ ܕܶܝܢ ܚܰܡܫܳܐ. ܕܰܡܣܰܒܥܺܝܢ ܐܰܠ̈ܦܶܐ ܣܰܓܺܝ̈ܶܐܐ܆ ܘܡܶܢ ܩܨܳܝ̈ܶܐ ܗܳܢܽܘܢ ܕܺܝܬ̣ܰܪܘ ܡܥܺܝ̈ܢܶܐ ܥܰܬܺܝܪ̈ܳܬܳܐ ܡܰܫܦܥܺܝܢ܆ ܠܳܐ ܢܽܘܚܳܡܳܐ ܕܡܺܝ̈ܬܶܐ ܕܰܒܦܽܘܩܕܳܢܳܐ ܒܰܠܚܽܘܕ ܡܶܣܬܥܰܪ ܗ̱ܘܳܐ ܒܬܶܕܡܽܘܪܬܳܐ܆ ܠܳܐ ܫܶܡܫܳܐ ܕܒܰܨܠܺܝܒܳܐ ܒܰܡܨܰܥܬܶܗ ܕܝܰܘܡܳܐ ܥܳܪܶܒ ܗ̱ܘܳܐ܆ ܘܰܠܙܰܠܺܝܩܶܗ ܬܽܘܒ ܡܰܢܗܰܪ ܗ̱ܘܳܐ. ܘܬܽܘܒ ܥܳܡܶܕ ܗ̱ܘܳܐ ܐܰܝܟ ܬܚܽܘ̈ܡܶܐ ܘܢܳܡܽܘ̈ܣܶܐ ܗܳܢܽܘܢ ܕܡܶܢ ܫܽܘܪܳܝܳܐ ܐܶܬܩܒܰܥܘ ܘܶܐܬܬܣܺܝܡܘ ܠܶܗ ܘܰܠܪܰܡܫܳܐ ܡܰܫܶܦ ܗ̱ܘܳܐ܆ ܐܰܪܥܳܐ ܕܪܳܥܠܳܐ܆ ܫܽܘ̈ܥܶܐ ܕܡܶܨܛܰܪܶܝܢ܆ ܩܰܒܪܳܐ ܕܡܶܬܛܒܰܥ ܘܡܶܬܢܛܰܪ ܘܒܰܩܝܳܡܬܳܐ ܡܶܙܕܟܶܐ܆ ܘܡܰܒܰܥ ܚܰܝ̈ܶܐ ܚܠܳܦ ܚܒܳܠܳܐ܆ ܐܶܠܽܘ ܠܰܝܬ ܗ̱ܘܰܝ̈ ܗܳܠܶܝܢ. ܘܰܐ̱ܚܪ̈ܳܢܝܳܬܳܐ ܕܣܰܓܺܝ ܣܰܓܺܝ̈ܳܐܢ ܡܶܢ ܗܳܠܶܝܢ܆ ܡܰܘܬܒܳܐ ܗܰܘ ܕܡܶܢ ܝܰܡܺܝܢܳܐ ܕܰܐܒܳܐ܆ ܕܰܐܠܳܗܳܐ ܐܺܝܬܰܘܗ̱ܝ ܝܶܫܽܘܥ ܡܰܙܥܶܩ܆ ܘܣܳܟܰܪ ܠܦܽܘ̈ܡܶܐ ܬܪ̈ܺܝܥܶܐ ܘܡܰܪ̈ܳܚܶܐ ܕܗܳܢܽܘܢ ܕܰܡܙܰܝܦܺܝܢ ܠܳܗ̇ ܠܬܰܘܕܺܝܬܳܐ ܕܫܽܘܒܚܳܐ ܬܪܺܝܨܳܐ.
ܐܰܝܟܰܢܳܐ ܓܶܝܪ ܒܪܺܝܬܳܐ ܢܺܐܡܪܽܘܢܳܝܗ̱ܝ ܠܡܶܠܬܶܗ ܕܰܐܠܳܗܳܐ ܗܳܢܽܘܢ ܕܰܠܫܳܢܝܽܘܬܳܐ ܕܰܐܪܺܝܽܘܤ ܡܶܬܪܰܥܶܝܢ ܘܡܰܠܦܺܝܢ܆ ܐܶܡܰܬܝ ܕܢܶܬܒܰܩܽܘܢ ܒܶܗ ܕܒܰܬܪܽܘܢܽܘܤ ܗܰܘ ܕܰܠܥܶܠ ܡܶܢ ܟܽܠ ܡܥܰܠܰܝ ܝܳܬܶܒ܆ ܗܰܘ ܕܺܐܝܬܰܘܗ̱ܝ ܠܒܶܪ̈ܝܳܬܳܐ ܠܳܐ ܡܶܬܕܰܪܟܳܢܳܐ ܘܠܳܐ ܡܶܬܩܰܪܒܳܢܳܐ. ܡܳܪܝܳܐ ܓܶܝܪ ܐܶܡܰܪ ܠܡܳܪܝܳܐ ܕܺܝܠܝ܆ ܬܶܒ ܠܳܟ ܡܶܢ ܝܰܡܺܝܢܝ[16]. ܒܪܺܝܬܳܐ ܕܶܝܢ ܐܰܡܬܳܐ ܗ̱ܝ ܘܠܰܘ ܡܳܪܬܳܐ. ܐܰܝܟܰܢܳܐ ܟܺܝܬ ܕܶܐܠܽܘ ܠܳܐ ܕܡܳܪܝܳܐ ܐܺܝܬܰܘܗ̱ܝ ܗ̱ܘܳܐ ܒܰܟܝܳܢܳܐ܆ ܘܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܘܡܰܠܟܽܘܬܳܐ ܘܬܶܫܒܽܘܚܬܳܐ܆ ܕܗܳܝ ܕܺܐܝܬܰܘܗ̱ܝ ܐܳܦ ܐܰܒܳܐ. ܠܳܐ ܡܩܰܒܶܠ ܗ̱ܘܳܐ ܠܶܗ ܬܪܽܘܢܽܘܤ܆ ܐܰܝܟ ܕܠܰܐܝܢܳܐ ܕܺܐܝܬܰܘܗ̱ܝ ܟܽܠ ܟܽܠܶܗ ܐܰܟܣܢܳܝܳܐ ܘܢܽܘܟܪܳܝܳܐ.
ܒܺܐܝܕܰܘ̈ܗ̱ܝ ܕܶܝܢ ܕܺܝܠܗܶܝܢ ܟܰܕ ܕܺܝܠܗܶܝܢ ܕܗܳܠܶܝܢ ܬܪ̈ܺܝܥܳܝܳܬܳܐ܆ ܐܳܦ ܗܳܢܽܘܢ ܕܳܐܡܪܺܝܢ ܬܪܶܝܢ ܟܝܳܢ̈ܶܐ ܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܡܰܠܠܳܢܺܝܬܳܐ ܠܗܰܘ ܚܰܕ ܡܳܪܰܢ ܘܰܐܠܳܗܰܢ ܝܶܫܽܘܥ ܡܫܺܝܚܳܐ܆ ܡܶܬܟܰܣܣܺܝܢ. ܐܶܠܽܘ ܓܶܝܪ ܠܰܘ ܟܝܳܢܳܐ ܐܺܝܬܰܘܗ̱ܝ ܘܚܰܕ ܩܢܽܘܡܳܐ ܕܰܡܒܰܣܰܪ ܗܰܘ ܕܰܐܠܳܗܳܐ ܡܶܠܬܳܐ܆ ܟܽܠܳܗ̇ ܐܰܢܰܢܩܺܐ܆ ܕܢܰܘܣܶܦ ܢܶܒܕܶܐ ܡܶܟܺܝܠ ܥܰܠ ܬܠܺܝܬܳܝܽܘܬܳܐ ܦܰܪܨܽܘܦܳܐ ܪܒܺܝܥܳܝܳܐ. ܬܪܰܝܳܢܽܘܬܳܐ ܓܶܝܪ. ܠܟܽܠ ܚܰܕ ܡܶܢ ܟܝܳܢ̈ܶܐ܆ ܕܺܝܠܳܢܳܐܺܝܬ ܘܡܶܢܶܗ ܘܠܶܗ ܡܩܰܝܡܳܐ ܠܶܗ. ܟܰܕ ܕܶܝܢ ܦܪܺܝܫ ܟܝܳܢܳܐ ܗܰܘ ܐ̱ܢܳܫܳܝܳܐ. ܡܶܢ ܡܶܠܬܳܐ܆ ܡܶܢ ܟܽܠ ܦܪܽܘܤ܆ ܦܰܪܨܽܘܦܳܐ ܕܺܝܠܳܢܳܝܳܐ ܢܶܬܟܬܶܒ ܥܠܰܘܗ̱ܝ. ܘܬܽܘܒ ܬܪܽܘܢܽܘܤ ܗܰܘ ܡܰܠܟܳܝܳܐ܆ ܢܶܙܢܩܶܗ ܠܗܰܘ ܕܺܐܝܬܰܘܗ̱ܝ ܟܽܠ ܟܽܠܶܗ ܐܰܟܣܢܳܝܳܐ ܘܢܽܘܟܪܳܝܳܐ. ܘܠܰܘ ܐܰܝܟ ܕܰܠܢܽܘܟܪܳܝܳܐ ܒܰܠܚܽܘܕ܆ ܐܶܠܳܐ ܐܳܦ ܐܰܝܟ ܕܰܠܝܰܬܺܝܪܳܐ. ܐܰܝܟܰܢܳܐ ܓܶܝܪ ܠܰܘ ܝܰܬܺܝܪܰܐ ܗ̄ܘ܆ ܗܰܘ ܕܰܬܠܺܝܬܳܝܽܘܬܳܐ ܪܒܺܝܥܳܝܽܘܬܳܐ ܥܳܒܶܕ ܠܳܗ̇܆ ܘܒܰܪܢܳܫܳܐ ܕܶܐܬܥܒܶܕ ܐܰܠܳܗܳܐ ܡܰܥܶܠ ܡܰܥܡܰܪ ܒܰܫܡܰܝܳܐ܆ ܘܥܰܡ ܟܝܳܢܳܐ ܠܳܐ ܥܒܺܝܕܳܐ ܘܰܣܓܺܝܕܳܐ ܐܰܟܚܕܳܐ ܡܳܢܶܐ ܠܶܗ܆ ܘܰܐܠܳܗܳܐ ܚܰܕܬ̣ܳܐ ܡܶܢܫܶܠܝ ܒܳܪܶܐ ܘܰܡܪܰܟܶܒ܆ ܐܰܝܟ ܡܳܐ ܕܰܠܚܰܢ̈ܦܶܐ ܐܺܝܬ ܥܝܳܕܳܐ܆ ܕܰܠܗܳܢܽܘܢ ܕܒܳܥܶܝܢ ܡܶܢ ܒܢܰܝ̈ܢܳܫܳܐ ܢܶܓܒܠܽܘܢ ܘܢܶܥܒܕܽܘܢ ܐܶܢܽܘܢ ܐܰܠܳܗ̈ܶܐ܆ ܘܰܠܘܳܬ ܫܡܰܝܳܐ ܢܰܣܩܽܘܢ ܐܶܢܽܘܢ.
ܐܶܠܳܐ ܠܳܐ ܐܺܝܬܶܝܗ̇ ܕܰܐܝܟ ܗܳܕܶܐ ܡܢܳܬܶܗ ܕܝܰܥܩܘܒ ܐܳܡܰܪ ܐܶܪܰܡܝܳܐ. ܡܶܛܽܠ ܕܗܰܘ ܕܰܓܒܰܠ ܟܽܠ܆ ܗܽܘ ܐܺܝܬܰܘܗ̱ܝ ܝܳܪܬܽܘܬܶܗ. ܡܳܪܝܳܐ ܕܚܰܝ̈ܠܰܘܳܬܳܐ ܫܡܶܗ[17]. ܐܳܦ ܓܶܝܪ ܠܰܘ ܟܰܕ ܡܶܢ ܒܢܰܝ̈ܢܳܫܳܐ ܪܒ̣ܳܐ ܒܰܡܝܰܬܪܽܘܬܳܐ ܘܰܠܫܽܘܘܫܳܛܳܐ ܐܶܬܳܐ ܡܫܺܝܚܳܐ܆ ܐܶܬܩܪܺܝ ܐܰܠܳܗܳܐ܆ ܐܶܠܳܐ ܗܳܝ ܕܰܠܩܽܘܒܠܳܐ. ܕܟܰܕ ܐܺܝܬܰܘܗ̱ܝ ܐܰܠܳܗܳܐ ܒܰܟܝܳܢܳܐ. ܐܰܝܟ ܡܶܠܬܳܐ܆ ܣܰܪܶܩ ܗܽܘ ܠܶܗ܆ ܟܰܕ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ[18]. ܗܽܘ ܟܰܕ ܐܶܬܒܰܣܰܪ ܘܶܐܬܒܰܪܢܰܫ ܡܶܢ ܪܽܘܚܳܐ ܩܰܕܺܝܫܳܐ܆ ܘܡܶܢ ܩܰܕܺܝܫܬܳܐ ܘܝܳܠܕܰܬ ܐܰܠܳܗܳܐ ܒܬܽܘܠܬܳܐ܆ ܟܰܕ ܦܰܓܪܳܐ ܗܰܘ ܕܠܰܢ 222ܫܳܘܶܐ ܒܽܐܘܣܺܝܰܐ ܘܰܡܢܰܦܫܳܐ ܘܰܡܗܰܘܢܳܢܳܐ ܤܛܰܪ ܡܶܢ ܚܛܺܝܬܳܐ ܚܰܝܶܕ ܠܶܗ ܒܰܩܢܽܘܡܳܐ܆ ܐܰܝܟܰܢܳܐ ܕܡܶܢ ܟܽܠܳܗ̇ ܓܒܺܝܠܬܳܐ ܐ̱ܢܳܫܳܝܬܳܐ܆ ܢܕܰܟܶܝܗ̇ ܠܫܽܘܪܰܥܬܳܐ ܗܳܝ ܕܳܐܕܳܡ. ܟܰܕ ܚܰܕ ܐܺܝܬܰܘܗ̱ܝ ܡܶܢ ܬܰܪܬܶܝܢ܆ ܡܶܢ ܐܰܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ. ܚܰܕ ܦܰܪܨܽܘܦܳܐ. ܚܰܕ ܩܢܽܘܡܳܐ.
ܡܶܛܽܠ ܗܳܕܶܐ ܠܰܘ ܐ̱ܚܪܺܢܳܐ ܣܠܶܩ ܠܰܫܡܰܝܳܐ܆ ܐܶܠܳܐ ܐܶܢ ܗܰܘ ܕܡܶܢ ܬܰܡܳܢ ܢܚܶܬ. ܗܰܘ ܓܶܝܪ ܕܰܢܚܶܬ܆ ܗܽܘ ܐܺܝܬܰܘܗ̱ܝ ܐܳܦ ܗܰܘ ܕܰܣܠܶܩ ܠܥܶܠ ܡܶܢ ܟܽܠܗܽܘܢ ܫܡܰܝܳܐ[19]܆ ܠܦܰܘܠܽܘܤ ܫܳܡܥܺܝܢܰܢ ܕܡܰܙܥܶܩ. ܘܟܰܕ ܛܳܒ ܠܳܐ ܡܒܰܣܪܳܐ ܢܚܶܬ܆ ܡܒܰܣܪܳܐ ܕܶܝܢ ܣܠܶܩ܆ ܐܶܠܳܐ ܒܗܳܝ ܕܚܰܕ ܐܺܝܬܰܘܗ̱ܝ ܐܳܦ ܗܳܟܰܢܳܐ܆ ܗܽܘ ܘܠܰܘ ܐ̱ܚܪܺܢܳܐ ܣܠܶܩ. ܐܶܢܕܶܝܢ ܒܰܬܪܶܝܢ ܟܝܳܢ̈ܶܐ ܐܺܝܬܰܘܗ̱ܝ܆ ܐܰܝܟ ܫܽܘ̈ܥܝܳܬܳܐ ܗܳܠܶܝܢ ܕܦܽܘܠܚܳܢ ܒܰܪܢܳܫܳܐ. ܐ̱ܚܪܺܢܳܐ ܐܰܣܶܩ ܡܶܠܬܳܐ ܥܰܡܶܗ ܐܰܟܚܕܳܐ܆ ܘܗܰܘ ܕܠܳܐ ܕܰܢܚܶܬ ܢܶܫܬܟܰܚ ܕܰܣܠܶܩ. ܐܶܠܳܐ ܟܰܕ ܚܰܕ ܐܺܝܬܰܘܗ̱ܝ. ܐܳܦ ܟܽܘܪܣܝܳܐ ܗܰܘ ܕܰܠܥܳܠܰܡ ܩܰܒܠܶܗ ܡܥܰܝܕܳܐܺܝܬ܆ ܐܰܝܟ ܕܠܰܐܝܢܳܐ ܕܺܐܝܬܰܘܗ̱ܝ ܩܕܳܡ ܥܳܠ̈ܡܶܐ.
ܕܟܽܘܪܣܝܳܟ ܓܶܝܪ ܐܰܠܳܗܳܐ ܠܥܳܠܰܡ ܥܳܠܡܺܝܢ[20] ܫܳܡܰܥ ܗ̱ܘܳܐ. ܘܚܰܝ̈ܠܰܘܳܬܳܐ ܛܽܘܒ̈ܬܳܢܶܐ. ܘܪ̈ܽܘܚܶܐ ܗܳܠܶܝܢ ܡܶܬܗܰܘܢܳܢ̈ܝܳܬܳܐ ܘܠܳܐ ܗܽܘ̈ܠܳܢܳܝܳܬܳܐ܆ ܕܺܐܝܬܰܘܗ̱ܝ ܡܰܠܟܳܐ ܕܬܶܫܒܽܘܚܬܳܐ ܘܡܳܪܝܳܐ ܕܺܝܠܗܽܘܢ ܐܰܘܕܺܝܘ. ܘܠܰܘ ܦܫܺܝܛܳܐܺܝܬ. ܐܶܠܳܐ ܟܰܕ ܐܰܝܟ ܕܰܒܨܶܒܥܳܐ ܡܚܰܘܶܝܢ ܗ̱ܘܰܘ ܠܶܗ ܠܗܰܘ ܕܡܶܢ ܩܕܺܝܡ ܠܳܐ ܡܶܬܚܰܙܝܳܢܳܐ܆ ܡܶܛܽܠ ܕܰܡܒܰܣܰܪ ܗ̱ܘܳܐ. ܟܰܕ ܗܳܢܽܘܢ ܡܰܢ ܡܫܰܐܠܺܝܢ ܗ̱ܘܰܘ ܡܚܰܘܝܳܢܳܐܺܝܬ܆ ܕܡܰܢܽܘ ܐܺܝܬܰܘܗ̱ܝ ܗܳܢܳܐ ܡܰܠܟܳܐ ܕܬܶܫܒܽܘܚܬܳܐ[21]. ܗܳܢܽܘܢ ܕܶܝܢ ܡܦܰܢܶܝܢ ܗ̱ܘܰܘ ܦܶܬܓܳܡܳܐ ܝܰܬܺܝܪ ܓܰܠܝܳܐܺܝܬ܆ ܕܗܽܘ ܐܺܝܬܰܘܗ̱ܝ ܗܳܢܳܐ ܡܰܠܟܳܐ ܕܬܶܫܒܽܘܚܬܳܐ. ܐܰܝܟܰܢܳܐ ܕܚܰܕ ܘܗܽܘ ܟܰܕ ܗܽܘ ܢܰܣܒܰܪ ܕܺܐܝܬܰܘܗ̱ܝ܆ ܘܠܰܘ ܐ̱ܚܪܺܢܳܐ ܘܰܐ̱ܚܪܺܢܳܐ. ܗܳܟܰܢܳܐ ܐܰܩܺܝܡ ܠܰܢ ܥܰܡܶܗ. ܘܰܐܘܬܶܒ ܠܰܢ ܐܰܟܚܕܳܐ ܥܰܡܶܗ[22]܆ ܟܰܕ ܐܶܬܒܰܣܰܪ ܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ. ܐܶܢ ܓܶܝܪ ܕܽܐܘܣܺܝܰܐ ܐ̱ܚܪܺܬܳܐ ܐܺܝܬܰܘܗ̱ܝ ܗ̱ܘܳܐ. ܗܽܘ ܒܶܣܪܳܐ܆ ܐܰܘ ܦܰܢܛܰܣܺܝܰܐ ܡܶܕܶܡ ܐܺܝܬܶܝܗ̇ ܗ̱ܘܳܬ ܕܠܳܐ ܩܢܽܘܡ܆ ܠܰܐ̱ܚܪ̈ܳܢܶܐ ܡܰܠܽܘܢ ܡܳܕܶܝܢ܆ ܐܰܘ ܟܺܝܬ ܠܛܶܠܴ̈ܠܶܐ ܘܠܰܫܪ̈ܰܓܪܳܓܝܳܬܳܐ ܐܰܘܬܶܒ ܐܰܟܚܕܳܐ ܥܰܡܶܗ. ܘܠܰܘ ܠܰܢ. ܐܶܠܳܐ ܟܺܝܬ ܗܽܘ ܫܠܺܝܚܳܐ܆ ܕܰܚܢܰܢ ܩܳܡܢܰܢ ܘܺܝܬܶܒܢܰܢ ܥܰܡܶܗ ܐܰܟܚܕܳܐ ܐܳܡܰܪ: ܘܠܳܐ ܐܳܡܰܪ ܗ̱ܘܳܐ ܗܳܕܶܐ܆ ܐܶܠܽܘ ܠܳܐ ܕܦܰܓܪܳܐ ܗܰܘ ܕܺܝܠܰܢ ܚܰܝܶܕ ܠܶܗ ܘܠܰܘ ܐ̱ܚܪܺܢܳܐ.
ܐܳܘ ܠܪܶܚܡܰܬ ܐ̱ܢܳܫܽܘܬܳܐ ܠܳܐ ܡܶܬܡܰܠܠܳܢܺܝܬܳܐ. ܐܳܘ ܠܺܐܝܩܳܪܳܐ ܗܰܘ ܕܶܐܬܝܰܩܰܪܢܰܢ. ܡܶܢ ܫܽܘܪܳܝܳܐ ܓܶܝܪ܆ ܟܰܕ ܡܶܢ ܗܳܝ ܕܠܳܐ ܐܺܝܬܰܝܢ ܗ̱ܘܰܝܢ ܠܗܳܝ ܕܢܶܗܘܶܐ ܐܺܝܬܰܝܢ ܐܰܥܒܰܪ ܠܰܢ܆ ܒܛܺܝܢܳܐ ܗܰܘ ܕܺܝܠܰܢ. ܘܰܒܡܳܐܢܳܐ ܚܶܨܦܳܢܳܝܳܐ܆ ܠܢܰܦܫܳܐ ܡܠܺܝܠܬܳܐ. ܘܰܠܨܰܠܡܳܐ ܒܰܝܬܳܝܳܐ ܕܺܝܠܶܗ ܣܳܡ܆ ܘܫܰܡܠܺܝ ܠܒܰܪܢܳܫܳܐ. ܐܶܠܳܐ ܡܶܛܽܠ ܕܗܰܘ ܐܰܪܥܳܢܳܝܳܐ ܚܣܰܢ ܠܗܰܘ ܕܰܡܝܰܬܰܪ܆ ܘܰܒܚܰܝ̈ܶܐ ܗܳܢܽܘܢ ܕܒܶܣܪܳܐ ܐܶܬܥܰܡܰܛ ܫܽܘܦܪܳܐ ܗܰܘ ܕܨܰܠܡܳܐ. ܡܶܠܬܳܐ ܗܰܘ ܥܳܒܽܘܕܳܐ ܟܰܕ ܐܶܬܒܰܪܢܰܫ܆ ܒܶܗ ܒܛܺܝܢܳܐ ܘܰܒܨܰܠܡܳܐ ܠܟܽܠܢ ܡܰܦܶܩ ܠܘܳܬ ܫܡܰܝܳܐ܆ ܡܰܠܽܘܢ ܕܶܝܢ ܠܘܳܬ ܬܪܽܘܢܽܘܤ ܗܰܘ ܕܰܠܥܶܠ ܡܶܢ ܫܡܰܝܳܐ.
ܠܡܳܢܳܐ ܗܳܟܺܝܠ ܚܢܰܢ ܗܳܢܽܘܢ ܕܰܒܕܰܐܝܟ ܗܳܢܳܐ ܐܺܝܩܳܪܳܐ ܐܶܬܝܰܩܰܪܢܰܢ. ܡܶܬܦܰܠܓܺܝܢܰܢ ܬܽܘܒ ܥܰܠ ܡܰܠܟܽܘܬܳܐ ܕܰܫܡܰܝܳܐ ܗܳܝ ܕܰܡܠܺܝܟܳܐ ܠܰܢ܆ ܟܰܕ ܐܺܝܬ ܠܰܢ ܠܥܶܠ ܪܺܝܫܺܝܬܳܐ ܗܳܝ ܕܓܶܢܣܳܐ ܕܺܝܠܰܢ܆ ܘܒܺܐܝ̈ܕܶܝܗ̇ ܐܰܝܟ ܗܰܘ ܕܢܽܘܡܺܐ ܐܺܝܬ ܠܰܢ ܒܗܳܠܶܝܢ ܫܡܰܝܳܢ̈ܝܳܬܳܐ ܘܰܒܗܶܝܢ ܪܳܥܶܝܢ ܚ̱ܢܰܢ. ܟܰܕ ܛܳܒ܆ ܐܳܘ ܒܰܪܢܳܫܳܐ܆ ܟܰܕ ܩܪܺܝܬܳܐ ܙܳܒܶܢ ܐܰܢ̱ܬ܆ ܡܶܚܕܳܐ ܕܳܐܚܶܕ ܐܰܢ̱ܬ ܢܽܘܡܺܐ܆ ܠܳܐ ܣܳܟ ܡܶܬܦܰܫܰܟ ܐܰܢ̱ܬ ܐܰܘ ܐܺܝܬ ܠܳܟ ܦܽܘܠܳܓܳܐ܆ ܕܕܺܝܠܳܟ ܐܺܝܬܶܝܗ̇. ܐܶܠܳܐ ܡܶܟܺܝܠ܆ ܥܰܠ ܦܽܘܠܚܳܢܳܗ̇ ܕܗܳܝ ܥܳܡܶܠ ܐܰܢ̱ܬ. ܟܰܕ ܕܶܝܢ ܒܰܫܡܰܝܳܐ ܐܺܝܬ ܠܳܟ ܢܽܘܡܺܐ܆ ܠܳܐ ܗ̱ܘܳܐ ܒܗܳܠܶܝܢ ܫܡܰܝܳܢ̈ܝܬܐ ܦܳܠܰܚ ܐܰܢ̱ܬ܆ ܐܶܠܳܐ ܠܬܰܚܬ ܚܳܐܰܪ ܐܰܢ̱ܬ܆ ܟܰܕ ܒܰܕܡܽܘܬ ܬܰܘܠ̈ܥܶܐ ܠܘܳܬ ܐܰܪܥܳܐ ܡܶܬܟܪܶܟ ܐܰܢ̱ܬ܆ ܘܰܒܣܰܪܝܽܘܬ ܪܺܝܚܳܐ ܕܥܳܠܡܳܐ ܗܳܢܳܐ ܣܰܪܺܝܟ ܐܰܢ̱ܬ܆ ܘܰܒܡܰܪ̈ܢܝܳܬܳܐ ܗܳܠܶܝܢ ܕܰܡܠܶܐ ܙܰܒܢܳܐ ܚܪܺܝܙ[23] ܠܳܟ ܗܰܘܢܳܟ.
ܐܶܠܳܐ ܢܶ݀ܫܡܰܥ ܠܦܰܘܠܽܘܤ܆ ܡܳܢܳܐ ܐܺܝܬܶܝܗ̇ ܦܰܠܳܚܽܘܬܳܐ ܐܰܘܟܺܝܬ ܐܰܟܳܪܽܘܬܳܐ ܕܗܳܠܶܝܢ ܫܡܰܝ̈ܳܢܝܳܬܳܐ. ܘܒܳܗ̇ ܚܘܺܝܚܳܐܺܝܬ ܢܶܬܗܰܦܰܟ܆ ܐܰܝܟܰܢܳܐ ܕܰܠܛܳܒ̈ܳܬܳܐ ܗܳܠܶܝܢ ܕܰܠܥܳܠܰܡ ܢܶܫܬܘܶܐ. ܐܶܢ ܗܳܟܺܝܠ ܩܳܡܬܽܘܢ ܥܰܡ ܡܫܺܝܚܳܐ܆ ܗܳܠܶܝܢ ܕܰܠܥܶܠ ܒܥܰܘ܆ ܐܰܝܟܳܐ ܕܰܡܫܺܝܚܳܐ ܐܺܝܬܰܘܗ̱ܝ܆ ܟܰܕ ܝܳܬܶܒ ܡܶܢ ܝܰܡܺܝܢܳܐ ܕܰܐܠܳܗܳܐ. ܗܳܠܶܝܢ ܕܰܠܥܶܠ ܐܶܬܪܰܥܰܘ܆ ܠܰܘ ܗܳܠܶܝܢ ܕܥܰܠ ܐܰܪܥܳܐ. ܡܺܝܬܬܽܘܢ ܠܟܽܘܢ ܓܶܝܪ܆ ܘܚܰܝ̣ܰܝ̣̈ܟܽܘܢ ܟܣܶܝܢ ܥܰܡ ܡܫܺܝܚܳܐ ܒܰܐܠܳܗܳܐ. ܘܦܰܠܳܚܽܘܬܳܐ ܡܰܢ ܘܰܐܟܳܪܽܘܬܳܐ ܗܳܕܶܐ ܐܺܝܬܶܝܗ̇. ܡܳܢܰܐ ܗ̄ܘ ܕܶܝܢ ܦܽܘܪܥܳܢܳܐ ܕܗܳܕܶܐ. ܐܶܡܰܬܝ ܐܳܡܰܪ ܕܰܡܫܺܝܚܳܐ. ܚܰܝ̈ܶܐ ܕܺܝܠܰܢ ܢܶܬܓܠܶܐ܆ ܗܳܝܕܶܝܢ ܐܳܦ ܐܰܢ̱ܬܽܘܢ ܐܰܟܚܕܳܐ ܥܰܡܶܗ ܬܶܬܓܠܽܘܢ ܒܬܶܫܒܽܘܚܬܳܐ[24]. ܡܶܛܽܠ ܕܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܰܐܪܒܥܝܢ ܘܫܰܒܥܐ.