ܡܺܐܡܪܳܐ ܕܰܐܪܒܥܺܝܢ ܘܶܫܬܳܐ

ܕܡܶܛܽܠ ܡܳܢܳܐ ܒܝܰܘܡܳܐ ܡܶܨܥܳܝܳܐ ܕܦܰܢܛܺܝܩܽܘܤܛܺܐ܆ ܟܢܽܘܫܝܳܐ ܡܫܰܡܠܶܝܢ ܚ̱ܢܰܢ܆ ܘܥܰܠ ܩܶܪܝܳܢܳܐ ܗܰܘ ܕܠܳܚܶܡ ܕܶܐܘܰܢܓܶܠܺܝܽܘܢ ܕܝܽܘܚܰܢܳܢ ܕܳܐܡܰܪ: ܕܟܰܕ ܗܳܐ ܡܶܢ ܟܰܕܽܘ ܗܘ̣ܳܬ ܡܨܰܥܬܳܐ ܕܥܺܐܕܳܐ ܕܦܰܢܛܺܝܩܽܘܤܛܺܐ܆ ܣܠܶܩ ܝܶܫܽܘܥ ܠܗܰܝܟܠܳܐ ܘܡܰܠܶܦ ܗ̱ܘܳܐ^[1]. ܘܥܰܠ ܗܳܠܶܝܢ ܕܫܰܪܟܳܐ.

46: ܠܳܐ ܐ̱ܢܳܫ ܐܰܝܟ ܕܰܠܝܰܬܺܝܪ̈ܶܐ ܢܕܽܘܢ ܠܰܢ܆ ܡܶܛܽܠ ܗܳܝ ܕܠܰܡܨܰܥܬܳܐ ܕܦܰܢܛܺܝܩܽܘܤܛܺܐ ܡܥܰܕܥܕܺܝܢܰܢ܆ ܡܥܰܕܥܕܺܝܢܰܢ ܓܶܝܪ܆ ܠܰܘ ܡܥܰܩܒܳܢܳܐܺܝܬ. ܘܰܐܝܟ ܣܰܪ̈ܺܝܟܰܝ ܒܟܽܠܡܶܕܶܡ ܕܠܳܐ ܒܽܘܚܳܢܳܐ܆ ܐܶܠܳܐ ܪܶܚܡܰܬ ܐܰ‌ܠܳܗܳܐܺܝܬ. ܟܰܕ ܡܚܰܘܶܝܢ ܚ̱ܢܰܢ܆ ܕܟܰܕ ܠܛܰܝܒܽܘܬܳܐ ܕܰܩܝܳܡܬܳܐ ܩܰܒܶܠܢܰܢ ܥܰܡ ܗܰܝܡܳܢܽܘܬܳܐ܆ ܘܒܰܕܡܽܘܬ ܡܶܐܟܽܘܠܬܳܐ ܡܶܕܶܡ ܕܣܰܓܺܝ ܗܰܢܺܝܳܐܐ ܛܥܰܡܢܳܗ̇܆ ܘܕܰܩܶܩܢܳܗ̇ ܒܫܶܢ̈ܰܝܢ. ܘܰܠܝܰܫܛܰܢ ܫܰܕܰܪܢܳܗ̇܆ ܘܰܒܡܰܪܓܫܳܢܽܘܬܳܗ̇ ܕܗܰܢܺܝܽܐܘܬܳܐ ܝܰܬܺܝܪܳܐܺܝܬ ܗܘ̣ܰܝܢܰܢ. ܬܽܘܒ ܐܰܝܟ ܗܰܘ ܕܠܳܗ̇ ܟܰܕ ܠܳܗ̇ ܠܰܛܥܳܡܬܳܐ ܡܶܢ ܕܪܺܝܫ ܡܶܬܝܰܐܒܺܝܢ ܚ̱ܢܰܢ܆ ܟܰܕ ܒܕܺܝܢܳܐ ܪܳܓܺܝܢ ܚ̱ܢܰܢ ܘܡܰܚܒܺܝܢ ܚ̱ܢܰܢ܆ ܠܗܰܘ ܡܳܐ ܕܰܒܫܽܘܪ̈ܳܝܶܐ ܝܰܩܰܪܢܰܢ ܒܝܰܕ ܗܰܝܡܳܢܽܘܬܳܐ.

ܗܳܟܰܢܳܐ ܓܶܝܪ ܐܳܦ ܟܰܕ ܠܘܳܬ ܫܽܘܠܳܡܳܐ ^[2] ܐܳܬܶܝܢ ܚ̱ܢܰܢ܆ ܣܰܒܥܳܐ ܠܳܐ ܫܳܩܠܺܝܢ ܚ̱ܢܰܢ. ܕܗܰܘ ܡܳܐ ܕܫܰܪܺܝܪܳܐܺܝܬ ܐܺܝܬܰܘܗ̱ܝ ܫܰܦܺܝܪܳܐ ܘܛܳܒܳܐ. ܡܶܛܽܠ ܕܳܐܦ ܗܳܕܶܐ ܐܰܝܟ ܕܒܰܫܪܳܪܳܐ܆ ܐܺܝܬܶܝܗ̇ ܪܚܺܝܡܬܳܐ ܠ̱ܐܢܳܫܺܝ̈ܢ܆ ܕܰܠܗܰܘ ܡܳܐ ܕܪܳܓܺܝܢ܆ ܐܳܦ ܟܰܕ ܢܶܫܬܘܽܘܢ ܠܶܗ܆ ܗܳܢܽܘܢ ܕܪܳܚܡܺܝܢ܆ ܘܠܳܐ ܡܶܕܶܡ ܒܨܺܝܪ ܪܳܚܡܺܝܢ ܠܶܗ܆ ܘܰܠܘܳܬ ܪܶܓܬܶܗ ܡܶܢ ܕܪܺܝܫ ܡܶܫܬܰܠܗܒܺܝܢ.

ܕܗܺܝ ܕܶܝܢ ܡܨܰܥܬܳܐ܆ ܒܶܗ ܟܰܕ ܒܶܗ ܒܰܙܢܳܐ ܡܝܰܩܰܪܬܳܐ ܐܺܝܬܶܝܗ̇܆ ܐܰܝܟ ܕܳܐܦ ܪܺܝܫܳܐ ܘܫܽܘܠܳܡܳܐ܆ ܐܳܦ ܗܽܘ ܢܳܡܽܘܣܳܐ ܫܰܘܕܰܥ. ܟܰܕ ܦܳܩܶܕ ܓܶܝܪ ܘܡܰܠܶܦ ܕܰܬܠܳܬ ܙܰܒ̈ܢܺܝܢ ܒܫܰܢ̱ܬܳܐ ܙܳܕܶܩ ܠܰܡܥܰܕܥܳܕܽܘ^[3]܆ ܐܳܡܰܪ ܥܺܐܕܳܐ ܕܫܳܒܽܘ̈ܥܶܐ ܬܶܥܒܶܕ ܠܺܝ ܒܫܽܘܪܳܝܳܐ ܕܰܚܨܳܕܳܐ ܕܚ̈ܶܛܶܐ܆ ܘܥܺܐܕܳܐ ܕܟܽܘܢܳܫܳܐ ܒܰܡܨܰܥܬܳܐ ܕܫܰܢ̱ܬܳܐ܆ ܗܳܕܶܐ ܕܶܝܢ ܠܰܘ ܡܶܛܽܠ ܡܶܕܶܡ ܐ̱ܚܪܺܝܢ ܦܰܩܕܳܗ̇܆ ܐܶܠܳܐ ܐܶܢ ܡܶܛܽܠ ܕܒܰܣܒܺܝܣܽܘܬܗܶܝܢ ܕܙܰܒ̈ܢܳܬܳܐ܆ ܐܳܦܠܳܐ ܡܫܰܠܳܡܽܘ ܢܫܰܠܶܡ ܡܬܽܘܡ ܘܢܶܒ̣ܛܰܠ. ܡܶܢ ܕܰܡܥܰܕܥܕܺܝܢܰܢ ܘܡܶܬܥܰܗܕܺܝܢܰܢ ܚܢܰܢ ܠܰܐܠܳܗܳܐ܆ ܐܶܢܗܽܘ ܟܺܝܬ ܕܥܽܘܗܕܳܢܳܐ ܕܰܐ‌ܠܳܗܳܐ ܥܺܐܕܳܐ ܐܺܝܬܰܘܗ̱ܝ܆ ܐܰܝܟ ܗܳܝ ܕܶܐܬܕܰܟܪܶܬ ܠܰܐܠܳܗܳܐ ܘܰܚܕܺܝܬ̣܆ ܕܡܶܢ ܕܰܘܺܝܕ ܡܶܙܕܰܡܪܳܐ.

ܐܶܠܳܐ ܢ݀ܶܚܙܶܐ܆ ܕܡܶܛܽܠ ܡܳܢܳܐ ܝܶܫܽܘܥ ܟܰܕ ܗܘ̣ܳܬ ܡܨܰܥܬܳܐ ܕܥܺܐܕܳܐ܆ ܠܘܳܬ ܝܽܗ̱ܘ̈ܕܳܝܶܐ ܡܰܠܶܠ. ܡܳܢܳܐ ܕܶܝܢ ܝܰܨܺܝܦ ܗ̱ܘܳܐ ܠܰܡܬܰܪܳܨܽܘ܆ ܡܶܢ ܗܳܠܶܝܢ ܕܰܡܡܰܠܶܠ ܗ̱ܘܳܐ. ܠܰܣܝܳܓܳܐ ܗܰܘ ܕܒܰܡܨܰܥܬܳܐ ܐܰܝܟܰܢܳܐ ܕܦܰܘܠܽܘܤ ܐܳܡܰܪ ܝܰܨܺܝܦ ܗ̱ܘܳܐ ܕܢܶܫܪܶܐ^[4]܆ ܟܰܕ ܡܒܰܛܶܠ ܒܕܽܘܓ̈ܡܰܛܰܐ ܠܢܳܡܽܘܣܳܐ ܕܦܽܘܩ̈ܕܳܢܶܐ. ܣܝܳܓܳܐ ܓܶܝܪ ܐܺܝܬܰܘܗ̱ܝ ܗ̱ܘܳܐ ܢܳܡܽܘܣܳܐ܆ ܕܰܠܘܳܬ ܢܛܽܘܪܬܳܐ ܘܙܽܘܗܳܪܳܐ ܐܶܬܺܝܗܶܒ܆ ܘܰܐܝܟ ܗܰܘ ܕܣܳܐܶܓ ܗ̱ܘܳܐ ܘܣܳܟܰܪ ܘܟܳܠܶܐ ܒܣܳܝܽܘܡܽܘܬ ܢܳܡܽܘܣܳܐ ܠܒܰܪܢܳܫܳܐ.

ܡܶܨܥܳܝܽܘܬ ܐܶܣܬܳܐ ܕܶܝܢ. ܡܶܛܽܠ ܗܳܝ ܕܠܺܐܝܣܪܳܐܶܝܠ ܘܰܠܥܰܡܡ̈ܶܐ ܟܳܠܶܐ ܗ̱ܘܳܐ ܘܦܳܪܶܫ. ܕܫܰܘ̈ܝ̣ܰܝ̣ ܓܶܢܣܳܐ ܡܰܢ ܐܺܝܬܰܝܗܽܘܢ ܘܡܶܢ ܚܰܕ ܛܺܝܢܳܐ ܐܶܬܓܒܶܠܘ. ܘܠܶܗ ܟܰܕ ܠܶܗ ܠܨܰܠܡܳܐ ܕܰܐ‌ܠܳܗܳܐ ܥܰܬܺܝܪܺܝܢ܆ ܘܒܰܕܡܽܘܬ ܐܰܚ̈ܶܐ ܥܳܡܪܺܝܢ ܒܒܰܝܬܳܐ ܚܰܕ ܒܗܳܢܳܐ ܥܳܠܡܳܐ. ܒܰܣܝܳܓܳܐ ܕܶܝܢ ܡܶܨܥܳܝܳܐ ܡܶܬܦܰܣܩܺܝܢ܆ ܒܢܳܡܽܘܣܳܐ. ܐܰܪܰܐ ܗܳܟܺܝܠ܆ ܠܰܘ ܕܢܳܩܦܳܐ ܘܰܕܠܳܚܡܳܐ ܐܺܝܬܶܝܗ̇܆ ܕܒܰܡܨܰܥܬܶܗ ܕܥܺܐܕܳܐ ܢܶܗܘܶܐ ܐܺܝܬܰܘܗ̱ܝ ܫܪܳܝܳܗ̇ ܕܡܶܨܥܳܝܽܘܬ ܐܶܣܬܳܐ.

ܐܳܦ ܟܺܝܬ ܗܽܘ ܒܶܐܘܰܢܓ̈ܶܠܝܰܐ ܐܳܡܰܪ: ܠܳܐ ܐܶܬܺܝܬ̣ ܕܶܐ݀ܫܪܶܐ ܢܳܡܽܘܣܳܐ ܐܶܠܳܐ ܕܶܐ݀ܡܰܠܶܐ^[5]. ܐܶܠܳܐ ܚܙܺܝ ܡܳܢܳܐ ܐܺܝܬܰܘܗ̱ܝ ܗܽܘ ܫܪܳܝܳܐ܆ ܘܠܳܐ ܬܫܰܓܫܳܟ ܗܳܝ ܕܶܐܬܰܐܡܪܰܬ܆ ܕܢܳܡܽܘܣܳܐ ܕܦܽܘܩ̈ܕܳܢܶܐ ܡܶܬܒܰܛܰܠ ܒܕܽܘܓ̈ܡܰܛܰܐ. ܥܦܺܝܦܳܐ ܐܺܝܬܰܘܗ̱ܝ ܗ̱ܘܳܐ ܢܳܡܽܘܣܳܐ. ܚܕܳܐ ܡܰܢ ܕܛܰܝܳܦܽܘܬܳܐ ܘܕܰܐܦ̈ܶܐ ܕܡܶܢ ܠܒܰܪ܆ ܟܰܕ ܠܦܽܘܩܕܳܢܳܐ ܕܰܟܬܳܒܳܐ ܡܚܰܘܶܐ. ܐ̱ܚܪܺܬܳܐ ܕܶܝܢ. ܟܰܕ ܒܥܽܘܡܩܳܐ ܡܛܰܫܶܐ ܠܕܽܘܓܡܰܐ ܕܪܽܘܚܳܐ. ܟܰܕ ܗܳܟܰܢܳܐ ܐܶܬܓܠܺܝ ܘܶܐܬܚܰܘܺܝ ܪܽܘܚܳܐ ܗܰܘ ܕܢܳܡܽܘܣܳܐ܆ ܒܝܰܕ ܡܰܫܠܡܳܢܽܘܬܳܐ ܐܶܘܰܢܓܶܠܳܝܬܳܐ ܕܦܳܪܽܘܩܰܢ܆ ܚܰܦܝܶܗ ܠܦܽܘܩܕܳܢܳܐ ܕܰܟܬܳܒܳܐ. ܟܰܕ ܓܶܝܪ ܣܝܳܡ ܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ܆ ܠܳܐ ܬܶܩܛܽܘܠ ‌ܐܳܡܰܪ ܗ̱ܘܳܐ^[6]. ܡܫܺܝܚܳܐ ܗܰܘ ܗܰܘܢܳܐ ܕܢܳܡܽܘܣܳܐ. ܘܝܳܗܽܘܒܳܐ ܕܪܽܘܚܳܐ ܗܰܘ ܕܒܶܗ܆ ܗܳܝ: ܕܠܳܐ ܬܶܪܓܰܙ ܥܰܠ ‌‌ܐܰܚܽܘܟ ܐܺܝܩܺܐ ܦܩ̣ܰܕ^[7]. ܟܰܕ ܒܗܳܕܶܐ ܝܰܬܺܝܪܳܐܺܝܬ ܡܡܰܠܶܐ ܗ̱ܘܳܐ ܠܨܶܒܝܳܢܶܗ ܕܢܳܡܽܘܣܳܐ. ܟܰܕ ܓܶܝܪ ܠܪܽܘܓܙܳܐ ܗܰܘ ܕܡܶܢܶܗ ܝܳܥܶܐ ܩܶܛܠܳܐ. ܩܰܕܶܡ ܐܰܪܺܝܡ܆ ܐܳܦ ܠܗܳܝ ܕܰܠܗܰܘ ܡܶܬܝܰܨܦܳܐ ܗ̱ܘܳܬ ܣܥܰܪ܆ ܐܳܦ ܠܗܳܝ ܕܠܳܐ ܬܶܩܛܽܘܠ ܚܰܘܺܝ ܝܰܬܺܝܪܬܳܐ܆ ܟܰܕ ܥܰܒܕܳܗ̇ ܥܰܡܽܘܛܬܳܐ ܘܰܡܚܰܦܰܝܬܳܐ ܒܝܰܕ ܦܽܘܩܕܳܢܳܐ ܕܝܰܬܺܝܪ ܪܰܒ. ܠܳܐ ܡܬܽܘܡ^[8] ܓܶܝܪ ܢܺܐܬܶܐ ܠܘܳܬ ܩܶܛܠܳܐ܆ ܗܰܘ ܕܳܐܦܠܳܐ ܠܡܶܪܓܰܙ ܐܶܫܬܒܶܩ. ܗܳܟܰܢܳܐ ܐܳܦ ܟܰܕ ܠܚܰܘܪܳܐ ܡܰܪܳܚܳܐ ܘܰܫܪܺܝܚܳܐ ܗܰܘ ܕܰܠܘܳܬ ܪܶܓܬܳܐ ܐܳܙܶܠ ܘܡܶܬܢܓܶܕ ܚܰܝܶܒ܆ ܠܗܳܝ ܕܠܳܐ ܬܓܽܘܪ. ܐܳܦ ܡܰܠܺܝ܆ ܐܳܦ ܚܰܒܶܠ.

ܟܰܕ ܓܶܝܪ ܪܽܘܚܳܢܳܝܳܐ ܐܺܝܬܰܘܗ̱ܝ ܗ̱ܘܳܐ ܗܽܘ ܢܳܡܽܘܣܳܐ^[9]܆ ܡܰܠ̣ܝܶܗ ܡܰܢ ܡܳܪܰܢ ܒܚܰܕܬܽܘܬܳܐ ܕܪܽܘܚܳܐ. ܫܪܳܝܗ̱ܝ ܕܶܝܢ ܒܥܰܬܺܝܩܽܘܬܳܐ ܕܰܟܬܳܒܳܐ^[10]. ܕܗܰܘ ܕܶܝܢ ܕܡܰܥܬܰܩ ܘܡܰܣܰܐܒ܆ ܒܩܽܘܪܒܳܐ ܐܺܝܬܰܘܗ̱ܝ ܕܰܚܒܳܠܳܐ܆ ܐܳܦ ܠܦܰܘܠܽܘܤ ܐܳܦ ܠܰܫܪܳܪܳܐ ܫܳܦܪܳܐ. ܣܰܓܺܝ ܕܶܝܢ ܛܳܒܳܐܺܝܬ ܐܶܡܰܪ: ܕܰܒܩܽܘܪܒܳܐ ܕܰܚܒܳܠܳܐ ܗܘ̣ܳܐ܆ ܘܠܰܘ ܕܰܡܫܰܡܠܝܳܐܺܝܬ ܐܶܬܚܰܒܰܠ. ܒܗܳܝ ܓܶܝܪ ܕܡܶܬܡܰܠܶܐ ܗܰܘܢܶܗ܆ ܡܶܣܬܒܰܪ ܕܰܡܩܰܘܶܐ ܢܳܡܽܘܣܳܐ. ܕܶܐܬܚܰܒܰܠ ܕܶܝܢ ܡܶܣܬܒܰܪ܆ ܒܗܳܝ ܕܝܰܬܺܝܪܳܐ ܐܶܬܚܰܘܺܝ ܦܽܘܩܕܳܢܳܐ ܕܰܟܬܳܒܳܐ.

ܐܰܟܙܢܳܐ ܕܶܐܢ ܐ̱ܢܳܫ܆ ܐܳܦ ܠܚܽܘܕܪܳܐ ܗܰܘ ܕܶܐܬܪܫܶܡ ܥܰܠ ܕܰܦܳܐ ܡܶܢ ܡܪܰܫܡܳܢܽܘܬܳܐ ܗܳܝ ܩܰܕܡܳܝܬܳܐ ܕܕܳܡܶܐ ܠܛܶܠܳܠܳܐ܆ ܢܺܐܡܰܪ ܕܰܡܚܰܒܰܠ܆ ܒܝܰܕ ܡܶܬܪܰܡܝܳܢܽܘܬܳܐ ܕܓܰܘ̈ܢܶܐ ܗܳܢܽܘܢ ܕܶܐܬܪܡܺܝܘ ܥܠܰܘܗ̱ܝ. ܡܚܰܒܰܠ ܡܰܢ ܓܶܝܪ܆ ܒܗܳܝ ܕܠܰܘ ܒܝܰܕ ܐܶܣܟܺܡܳܐ ܗܰܘ ܩܰܕܡܳܝܳܐ ܛܶܠܳܢܳܝܳܐ ܡܶܬܚܰܘܶܐ. ܡܩܰܘܶܐ ܕܶܝܢ ܒܪܰܡ܆ ܒܗܳܝ ܕܝܰܬܺܝܪ ܢܰܨܺܝܚܳܐ ܡܶܬܚܙܶܐ܆ ܒܝܰܕ ܫܰܦܺܝܪܽܘܬ ܓܰܘ̈ܢܶܐ ܗܳܝ ܕܚܰܦܝܰܬ̣ܶܗ. ܗܳܕܶܐ ܗܳܟܺܝܠ ‌ܐܳܦ ܒܗܳܠܶܝܢ ܕܗܳܫܳܐ ܐܶܬܩܪ̈ܰܚܶܝܢ ܓܠܳܐ ܘܚܰܘܺܝ ܡܫܺܝܚܳܐ. ܟܰܕ ܓܶܝܪ ܝܽܗ̱ܘ̈ܕܳܝܶܐ ܥܳܕܠܺܝܢ ܗ̱ܘܰܘ ܠܶܗ܆ ܐܰܝܟ ܐܰܝܢܳܐ ܕܰܠܢܳܡܽܘܣܳܐ ܫܳܪܶܐ ܗ̱ܘܳܐ܆ ܕܰܠܗܰܘ ܕܰܡܫܰܪܰܝ ܗ̱ܘܳܐ ܒܫܳܪ̈ܝܳܬܳܐ ܘܗܰܕܳܡ̈ܶܐ ܕܦܰܓܪܶܗ ܘܰܪܡܶܐ ܗ̱ܘܳܐ ܒܥܰܪܣܳܐ܆ ܠܡܶܣܰܒ ܥܰܪܣܶܗ ܒܫܰܒܬܳܐ ܘܰܢܗܰܠܶܟ ܦܳܩܶܕ ܗ̱ܘܳܐ^[11]. ܟܰܕ ܣܠܶܩ ܠܗܰܝܟܠܳܐ܆ ܡܰܠܶܦ ܗ̱ܘܳܐ^[12]܆ ܗܳܠܶܝܢ ܟܺܝܬ ܕܰܕܝܶܫܽܘܥ ܒܰܠܚܽܘܕܰܘܗ̱ܝ ܐܺܝܬܶܝܗ̇ ܗ̱ܘܳܬ ܠܡܰܠܳܦܽܘ܆ ܕܰܐ‌ܠܳܗܳܐ ܗܰܘ ܕܶܐܬܒܰܣܰܪ. ܘܠܰܡܩܰܛܪ̈ܓܳܢܶܐ ܡܰܬܡܰܗ ܗ̱ܘܳܐ. ܐܰܝܟܰܢܳܐ ܕܟܰܕ ܡܶܬܕܰܡܪܺܝܢ ܢܺܐܡܪܽܘܢ: ܕܰܐܝܟܰܢܳܐ ܗܳܢܳܐ ܟܬܺܝ̈ܒܳܬܳܐ ܝܳܕܰܥ܆ ܟܰܕ ܠܳܐ ܝܺܠܶܦ. ܡܳܕܶܝܢ ܠܳܐ ܙܳܕܶܩ ܗ̱ܘܳܐ ܣܳܟ ܕܢܶܬܩܰܛܪܰܓ. ܡܶܢ ܟܽܠ ܦܪܽܘܤ ܓܶܝܪ܆ ܕܰܡܝܰܬܰܪ ܡܶܢ ܢܳܡܽܘܣܳܐ ܐܺܝܬܰܘܗ̱ܝ ܗ̱ܘܳܐ܆ ܗܰܘ ܕܥܰܠ ܡܰܪܕܽܘܬܳܐ ܗܳܝ ܕܡܶܢܶܗ ܠܳܐ ܐܶܣܬܢܶܩ܆ ܠܘܳܬ ܗܳܝ ܕܠܰܐ̱ܚܪ̈ܳܢܶܐ ܢܰܠܶܦ.

ܡܶܛܽܠܗܳܕܶܐ ܓܶܝܪ ܟܰܕ ܐܶܬܒܰܪܢܰܫ܆ ܘܰܒܝܰܕ ܟܽܠܗܶܝܢ ܗܳܠܶܝܢ ܕܰܠܡܽܘܫ̈ܚܳܬܳܐ ܐ̱ܢܳܫܳܝ̈ܳܬܳܐ ܠܳܚ̈ܡܳܢ ܐܶܬܳܐ܆ ܘܰܠܗܳܠܶܝܢ ܕܺܝܠܰܢ ܤܛܰܪ ܡܶܢ ܚܛܺܝܬܳܐ ܒܰܝܬܺܝ ܠܶܗ܆ ܐܰܝܟܰܢܳܐ ܕܳܐܦ ܠܒܰܛܢܳܐ ܢܶܬܪܡܶܐ ܘܰܠܝܰܠܕܳܐ܆ ܘܳܐܦ ܠܗܽܘܢ ܠܥܰܙܪܽܘܪ̈ܶܐ܆ ܘܰܠܩܰܘܡܬܳܐ ܫܰܒܪܳܝܬܳܐ ܘܰܠܬܽܘܪܣܳܝܳܐ ܘܰܠܬܰܪܒܺܝܬܳܐ. ܠܡܰܠܦܳܢܽܘܬܳܐ ܕܰܟܬܺܝܒ̈ܳܬܳܐ ܠܳܐ ܩܰܒܶܠ ܥܠܰܘܗ̱ܝ. ܟܰܕ ܨܳܒܶܐ ܗ̱ܘܳܐ ܕܰܢܚܰܘܶܐ܆ ܕܠܳܐ ܡܶܕܶܡ ܐܺܝܬ ܗ̱ܘܳܐ ܠܶܗ ܡܶܢ ܡܫܰܘܬܦܽܘܬܳܐ ܕܡܶܢ ܐ̱ܚܪܺܢܳܐ ܐܰܘ ܟܺܝܬ ܢܣܺܝܒܽܘܬܳܐ܆ ܐܰܘ ܡܶܢ ܡܰܘܗܰܒܬܳܐ ܕܡܶܢ ܐܰ‌ܠܳܗܳܐ ܐܰܝܟ ܒܰܪܢܳܫܳܐ܆ ܐܰܘ ܝܽܘܠܦܳܢܳܐ܆ ܐܰܘ ܡܚܰܘܝܳܢܽܘܬܳܐ ܕܳܐܬܘ̈ܳܬܳܐ. ܐܶܠܳܐ ܗܽܘ ܐܺܝܬܰܘܗ̱ܝ ܗ̱ܘܳܐ ܚܶܟܡܬܳܐ ܗܳܝ ܐܽܘܣܝ̣ܳܝ̣ܬܳܐ ܕܰܐܒܳܐ ܘܚܰܝܠܳܐ^[13]܆ ܟܰܕ ܟܽܠܗܶܝܢ ܗܽܘ ܡܶܢ ܢܰܦܫܶܗ ܐܰܝܟ ܐܰ‌ܠܳܗܳܐ ܕܒܰܟܝܳܢܳܐ܆ ܐܳܦ ܡܰܥܒܶܕ ܐܳܦ ܡܡܰܠܶܠ. ܐܰܟܚܕܳܐ ܕܶܝܢ ܐܳܦ ܟܰܕ ܡܚܰܘܶܐ܆ ܕܰܠܛܰܝܒܽܘܬܳܐ ܗܳܝ ܕܺܐܝܬ ܗ̱ܘܳܐ ܠܶܗ ܠܳܐܕܳܡ ܡܶܢ ܫܽܘܪܳܝܳܐ ܩܕܳܡ ܡܰܛܥܝܳܢܽܘܬܳܐ ܕܚܶܘܝܳܐ܆ ܐܶܬܳܐ ܕܢܰܦܢܶܐ ܠܓܶܢܣܳܐ ܕܺܝܠܰܢ܆ ܟܰܕ ܠܳܐ ܣܢܺܝܩ ܥܰܠ ܥܽܘܕܪܳܢܳܐ ܕܡܶܢ ܢܳܡܽܘܣܳܐ ܗܰܘ ܟܬܺܝܒܳܐ.

ܡܶܛܽܠܳܬܳܗ̇ ܓܶܝܪ ܕܗܳܕܶܐ ܥܶܠܬܳܐ܆ ܐܳܦ ܬܰܠ̈ܡܺܝܕܶܐ ܕܠܳܐ ܝܳܕܥܺܝܢ ܟܬܺܝ̈ܒܳܬܳܐ ܓܳܒܶܐ ܗ̱ܘܳܐ. ܡܶܛܽܠܗܳܕܶܐ ܕܶܝܢ. ܐܳܡܰܪ ܗ̱ܘܳܐ: ܕܡܰܠܦܳܢܽܘܬܳܐ ܕܺܝܠܝ ܠܳܐ ܐܺܝܬܶܝܗ̇ ܕܺܝܠܝ. ܐܶܠܳܐ ܕܗܰܘ ܕܫܰܕܪܰܢܝ^[14]. ܩܰܕܡܳܐܺܝܬ ܡܰܢ܆ ܟܰܕ ܥܳܪܶܩ ܡܶܢ ܡܰܪܫܽܘܬܳܐ ܕܣܰܩܽܘܒܠܳܝܽܘܬ ܐܰ‌ܠܳܗܳܐ ܗܳܝ ܕܡܶܣܬܰܒܪܳܐ. ܕܬܰܪܬܶܝܢ ܕܶܝܢ܆ ܟܰܕ ܛܽܘܦܣܳܐ ܝܳܗܶܒ ܠܰܢ ܕܰܡܡܰܫܚܽܘܬܳܐ ܘܰܕܡܰܟܺܝܟܽܘܬܳܐ. ܕܰܬܠܳܬ ܕܶܝܢ. ܘܰܕܝܰܬܺܝܪ ܫܰܪܺܝܪܳܐ܆ ܟܰܕ ܠܬܰܪܥܺܝܬܳܐ ܡܰܨܝܰܬ ܙܥܽܘܪ̈ܝܳܬܳܐ ܕܝܽܗ̱ܘ̈ܕܳܝܶܐ ܡܰܟܶܤ. ܡܶܛܽܠ ܓܶܝܪ ܐܳܡܰܪ ܕܰܐܝܟ ܕܒܰܪܢܳܫܳܐ. ܕܕܺܝܠܝ ܐܺܝܬܶܝܗ̇ ܡܰܠܦܳܢܽܘܬܳܐ ܚܳܫܒܺܝܢ ܐܢ̱ܬܽܘܢ܆ ܡܶܛܽܠ ܗܳܕܶܐ ܡܶܬܕܰܡܪܺܝܢ ܐܢ̱ܬܽܘܢ܆ ܕܰܐܝܟܰܢܳܐ ܝܳܕܰܥ ܐ̱ܢܳܐ ܟܬܺܝ̈ܒܳܬܳܐ ܟܰܕ ܠܳܐ ܝܶܠܦܶܬ^[15].

ܐܶ‌ܠܽܘ ܕܶܝܢ ܐܺܝܬܰܝܟܽܘܢ ܗ̱ܘܰܝܬܽܘܢ ܕܟܰܝ̈ܳܐ ܒܣܳܥܽܘܪ̈ܘܳܬܟܽܘܢ܆ ܕܥܳܒܕܺܝܢ ܨܶܒܝܳܢܳܐ ܕܰܐ‌ܠܳܗܳܐ܆ ܘܳܐܦ ܙܥܽܘܪ̈ܝܳܬܳܐ ܡܶܫܟܚܺܝܢ ܗ̱ܘܰܝܬܽܘܢ ܠܡܶܚܙܳܐ܆ ܝܳܕܥܺܝܢ ܗ̱ܘܰܝܬܽܘܢ܆ ܕܟܰܕ ܡܶܠܬܳܐ ܐܺܝܬܰܝ ܘܰܒܪܳܐ ܫܰܪܺܝܪܳܐ ܕܰܐܒܳܐ܆ ܘܠܳܐ ܣܢܺܝܩ ܐ̱ܢܳܐ ܥܰܠ ܝܽܘܠܦܳܢܳܐ. ܡܰܠܶܦ ܐ̱ܢܳܐ܆ ܘܠܳܐ ܡܶܬܕܰܡܪܺܝܢ ܗ̱ܘܰܝܬܽܘܢ܆ ܕܰܐܝܟܰܢܳܐ ܝܳܕܰܥ ܐ̱ܢܳܐ ܟܬܺܝ̈ܒܳܬܳܐ ܟܰܕ ܠܳܐ ܝܶܠܦܶܬ܆ ܐܳܦܠܳܐ ܕܺܝܠܝ ܚܳܫܒܺܝܢ ܗ̱ܘܰܝܬܽܘܢ ܠܳܗ̇ ܠܡܰܠܦܳܢܽܘܬܳܐ ܐܰܝܟ ܕܰܕܒܰܪܢܳܫܳܐ܆ ܐܶܠܳܐ ܕܰܐܒܳܐ. ܟܽܠܗܶܝܢ ܓܶܝܪ ܗܳܠܶܝܢ ܕܺܐܝܬܰܝܗܶܝܢ ܕܰܒܪܳܐ. ܕܰܐܒܳܐ ܐܺܝܬܰܝܗܶܝܢ܆ ܐܰܟܙܢܳܐ ܕܳܐܦ ܟܽܠܗܶܝܢ ܗܳܠܶܝܢ ܕܺܐܝܬܰܝܗܶܝܢ ܕܰܐܒܳܐ. ܕܰܒܪܳܐ ܐܺܝܬܰܝܗܶܝܢ^[16]܆ ܡܶܛܽܠ ܗܳܝ ܕܗܺܝ ܟܰܕ ܗܺܝ ܕܽܐܘܣܺܝܰܐ ܐܰܘܟܺܝܬ ܕܰܐ‌ܠܳܗܽܘܬܳܐ.

ܐܶ‌ܠܽܘ ܕܶܝܢ ܕܺܝܠܝ ܐܺܝܬܶܝܗ̇ ܗ̱ܘܳܬ ܡܰܠܦܳܢܽܘܬܳܐ܆ ܒܗܰܘ ܙܢܳܐ ܕܰܐܢ̱ܬܘܢ ܐܰܣܒܰܪܬܽܘܢ܆ ܡܶܢ ܟܽܠ ܦܪܽܘܤ. ܐܳܦ ܐܰܝܟ ܒܰܪܢܳܫܳܐ ܚܳܐܶܫ ܗ̱ܘܺܝܬ ܡܶܕܶܡ ܘܫܽܘܒܚܳܐ ܒܰܝܬܳܝܳܐ ܕܺܝܠܝ ܡܰܣܒܰܪ ܗ̱ܘܺܝܬ ܠܶܗ ܠܣܽܘܥܪܳܢܳܐ. ܡܶܛܽܠ ܕܶܝܢ ܕܟܰܕ ܐܰ‌ܠܳܗܳܐ ܐܺܝܬܰܝ ܒܰܟܝܳܢܳܐ܆ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܺܝܬ ܒܰܪܢܳܫܳܐ܆ ܘܰܒܨܶܒܝܳܢܝ ܢܶܚܬܶܬ ܠܟܽܠܳܗ̇ ܗܳܕܶܐ ܡܰܟܺܝܟܽܘܬܳܐ܆ ܠܳܐ ܐܺܝܬܰܝ ܕܰܣܢܺܝܩ ܥܰܠ ܫܽܘܒܚܳܐ܆ ܡܶܛܽܠ ܗܳܕܶܐ ܠܳܐ ܒܳܥܶܐ ܐ̱ܢܳܐ ܠܶܗ܆ ܐܶܠܳܐ ܥܰܠ ܗܰܘ ܕܫܰܕܪܰܢܝ ܡܰܣܶܩ ܐ̱ܢܳܐ ܠܶܗ^[17]. ܘܟܰܕ ܠܰܡܕܰܒܪܳܢܽܘܬܳܐ ܡܡܰܠܶܐ ܐ̱ܢܳܐ܆ ܘܳܐܦ ܟܰܕ ܒܫܽܘܒܚܳܐ ܥܰܡܶܗ ܡܶܫܬܰܘܬܰܦ ܐ̱ܢܳܐ.

ܐܶܢܳܐ ܓܶܝܪ ܐܰܝܟ ܒܪܳܐ. ܒܗܰܘ ܡܫܰܒܰܚ ܐ̱ܢܳܐ܆ ܩܰܕܺܝܡܳܐ ܗܳܟܺܝܠ ܝܺܕܺܝܥܳܐ. ܕܟܰܕ ܗܳܟܰܢܳܐ ܐܺܝܬ ܠܺܝ܆ ܠܥܶܠ ܡܶܢ ܢܳܡܽܘܣܳܐ ܗܰܘ ܕܶܐܬܺܝܗܶܒ ܠܟܽܘܢ ܡܶܢܝ ܐܶܬܥܰܠܺܝܬ̣. ܐܰܝܟܰܢܳܐ ܗܳܟܺܝܠ ܡܰܪܫܶܝܢ ܐܢ̱ܬܽܘܢ ܥܠܰܝ ܥܒܽܘܪܝܳܐ ܕܗܳܢܳܐ܆ ܟܰܕ ܠܥܶܠ ܘܰܠܬܰܚܬ ܠܡܽܘܫܶܐ ܡܪܰܘܪܒܺܝܢ ܐܢ̱ܬܽܘܢ܆ ܐܰܝܟܰܢܳܐ ܕܶܝܢ ܡܦܺܝܣܺܝܢ ܐܢ̱ܬܽܘܢ ܕܥܳܒܕܺܝܢ ܐܢ̱ܬܽܘܢ ܣܢܺܐܓܪܽܘܬܳܐ ܚܠܳܦ ܢܳܡܽܘܣܳܐ܆ ܟܰܕ ܠܳܐ ܡܡܰܠܶܝܢ ܐܢ̱ܬܽܘܢ ܦܽܘܩ̈ܕܳܢܶܐ ܕܗܰܘ. ܒܪܰܡ ܐܶ݀ܚܰܘܶܐ ܠܟܽܘܢ ܓܰܠܝܳܐܺܝܬ܆ ܕܰܒܝܰܕ ܥܒܽܘܪܝܳܐ ܗܰܘ ܕܡܶܣܬܒܰܪ ܠܟܽܘܢ܆ ܐܶܢܳܐ ܢܳܡܽܘܣܳܐ ܡܰܠܺܝܬ̣.

ܐܶܢ ܓܶܝܪ ܡܶܢ ܟܽܠ ܦܪܽܘܤ܆ ܗܳܝ ܕܢܶܥܒܶܕ ܡܶܕܶܡ ܒܝܰܘܡܳܐ ܕܫܰܒܬܳܐ܆ ܫܪܳܝܶܗ ܕܢܳܡܽܘܣܳܐ ܡܬܰܚܡܺܝܢ ܐܢ̱ܬܽܘܢ ܕܺܐܝܬܶܝܗ̇܆ ܐܰܝܟܰܢܳܐ ܟܰܕ ܐܰ‌ܠܳܗܳܐ ܠܰܐܒܳܗ̈ܳܬܳܐ ܗܳܢܽܘܢ ܕܒܶܝܬ ܐܰܒܪܳܗܳܡ ܦܳܩܶܕ ܗ̱ܘܳܐ܆ ܕܝܰܘܡܳܐ ܬܡܺܝܢܳܝܳܐ ܟܽܠ ܕܶܟܪܳܐ ܙܳܕܶܩ ܠܡܶܬܓܙܳܪܽܘ^[18]܆ ܟܰܕ ܝܰܘܡܳܐ ܬܡܺܝܢܳܝܳܐ ܒܫܰܒܬܳܐ ܢܶܣܬܰܩܒܰܠ ܢܶܡܛܶܐ܆ ܡܶܬܓܙܰܪ ܒܰܪܢܳܫܳܐ܆ ܟܰܕ ܟܺܝܬ ܙܳܕܶܩ ܗ̱ܘܳܐ ܕܰܬܒܰܛܠܽܘܢ ܘܠܳܐ ܬܶܓܙܪܽܘܢ܆ ܐܶܢ ܟܺܝܬ ܒܟܽܠ ܒܶܛܠܳܢܳܐ ܡܝܰܩܪܳܐ ܫܰܒܬܳܐ. ܐܶܠܳܐ ܫܰܦܺܝܪ ܝܺܕܺܝܥܳܐ܆ ܕܰܠܦܽܘܠܚܳܢܳܐ ܗܰܘ ܪܽܘܚܳܢܳܝܳܐ܆ ܘܕܰܠܘܳܬ ܦܽܘܪܩܳܢܳܐ ܕܢܰܦܫܳܐ ܚܳܐܰܪ܆ ܠܳܐ ܟܳܠܝܳܐ ܫܰܒܬܳܐ܆ ܐܶܠܳܐ ܠܗܰܘ ܕܰܠܘܳܬ ܦܰܓܪܳܐ܆ ܗܳܢܰܘ ܕܶܝܢ ܠܗܰܢܺܝܽܐܘܬ ܚܰܫ̈ܶܐ ܗܳܝ ܒܶܣܪܳܢܳܝܬܳܐ ܘܕܰܒܗܽܘܠܶܐ ܥܳܠܡܳܢܳܝܬܳܐ ܡܶܬܐܰܡܢܳܐ܆ ܘܰܐܟܙܢܳܐ ܕܽܐܘܡܳܢܽܘܬܳܐ ܡܶܕܶܡ ܦܳܠܚܰܬ ܒܺܐܝ̈ܕܰܝܳܐ. ܠܗܳܝ ܕܢܳܡܽܘܣܳܐ. ܥܒܳܕܳܐ ܕܦܽܘܠܚܳܢܳܐ. ܩܪܳܗ̇ ܟܰܕ ܐܳܡܰܪ: ܟܽܠ ܥܒܳܕܳܐ ܕܦܽܘܠܚܳܢܳܐ ܠܳܐ ܬܶܥܒܕܽܘܢ.

ܘܟܰܕ ܠܗܳܕܶܐ ܡܢܰܗܰܪ ܒܕܽܘܟܬܳܐ ܐ̱ܚܪܺܬܳܐ ܐܳܡܰܪ: ܟܽܠ ܥܒܳܕܳܐ ܠܳܐ ܬܶܥܒܕܽܘܢ^[19]. ܒܪܰܡ ܟܽܠܗܶܝܢ ܐܰܝܠܶܝܢ ܕܢܶܬܥܰܒ̈ܕܳܢ ܠܟܽܠ ܢܰܦܫܳܐ܆ ܗܳܠܶܝܢ ܒܰܠܚܽܘܕ ܢܶܬܥܰܒ̈ܕܳܢ ܠܟܽܘܢ. ܡܶܛܽܠܗܳܕܶܐ ܐܳܦ ܠܥܶܪܒܳܐ ܕܢܰܦܺܝܠ ܒܚܰܒܳܪܳܐ ܐܰܘ ܠܬܰܘܪܳܐ܆ ܫܰܠܺܝܛ ܗ̱ܘܳܐ ܒܫܰܒܬܳܐ ܠܰܡܩܳܡܽܘ. ܘܣܳܥܽܘܪܽܘܬܳܐ ܪܽܘܚܳܢܳܝܬܳܐ ܐܺܝܬܶܝܗ̇ ܗ̱ܘܳܬ܆ ܒܗܳܢܳܐ ܙܢܳܐ ܐܳܦ ܓܙܽܘܪܬܳܐ ܟܰܕ ܠܘܳܬ ܝܽܘܬܪܳܢܳܐ ܕܢܰܦܫܳܐ ܚܳܝܪܳܐ ܗ̱ܘܳܬ. ܡܶܬܥܰܒܕܳܐ ܒܫܰܒܬܳܐ ܘܛܳܒ ܟܺܐܢܳܐܺܝܬ. ܗܰܘ ܓܶܝܪ ܕܡܶܬܓܙܰܪ ܠܒܰܪܢܳܫܳܐ ܗܰܘ ܕܡܶܢ ܗܰܢܺܝܽܐܘܬܳܐ ܘܡܶܢ ܫܶܢܬܳܐ ܐܰܘܟܺܝܬ ܡܰܫܟ̣ܒܳܐ ܗܰܘ ܕܡܶܬܚܰܒܰܠ܆ ܫܳܕܶܐ ܡܶܢܶܗ ܒܰܫܕܳܝܳܗ̇ ܕܥܽܘܪܠܽܘܬܳܐ܆ ܗܰܘ ܕܛܽܘܦܣܳܐ ܐܺܝܬ ܠܶܗ ܕܰܥܡܳܕܳܐ ܩܰܕܺܝܫܳܐ. ܗܰܘ ܕܒܶܗ. ܟܰܕ ܠܒܰܪܢܳܫܳܐ ܗܰܘ ܥܰܬܺܝܩܳܐ ܫܳܠܚܺܝܢ ܚ̱ܢܰܢ܆ ܠܗܰܘ ܪܽܘܚܳܢܳܝܳܐ ܘܚܰܕܬܳܐ ܠܳܒܫܺܝܢܰܢ܆ ܟܰܕ ܠܰܡܫܺܝܚܳܐ ܠܳܒܫܺܝܢ ܚ̱ܢܰܢ^[20].

ܗܳܕܶܐ ܓܶܝܪ ܐܳܦ ܦܰܘܠܽܘܤ. ܟܰܕ ܠܩܽܘ̈ܠܳܣܳܝܶܐ ܟܳܬܶܒ ܗ̱ܘܳܐ ܐܳܡܰܪ: ܗܰܘ ܕܒܶܗ ܐܶܬܓܙܰܪܬܽܘܢ܆ ܒܰܓܙܽܘܪܬܳܐ ܠܳܐ ܥܒܺܝܕܰܬ ܒܺܐܝ̈ܕܰܝܳܐ܆ ܒܰܫܠܳܚܳܐ ܕܦܰܓܪܳܐ ܕܰܚ̈ܛܳܗܶܐ ܕܒܶܣܪܳܐ܆ ܒܰܓܙܽܘܪܬܳܐ ܕܰܡܫܺܝܚܳܐ܆ ܟܰܕ ܐܶܬܩܒܰܪܬܽܘܢ ܥܰܡܶܗ ܐܰܟܚܕܳܐ ܒܡܰܥܡܽܘܕܺܝܬܳܐ^[21]܆ ܘܰܚܙܺܝ ܕܰܐܝܟܰܢܳܐ ܚܰܟܺܝܡܳܐܺܝܬ ܠܘܳܬ ܝܽܗ̱ܘ̈ܕܳܝܶܐ ܐܶܡܰܪ ܡܳܪܰܢ: ܐܶܢ ܓܙܽܘܪܬܳܐ ܫܳܩܶܠ ܒܰܪܢܳܫܳܐ ܒܫܰܒܬܳܐ܆ ܡܶܛܽܠ ܕܠܳܐ ܢܶܫܬܪܶܐ ܢܳܡܽܘܣܳܐ ܕܡܽܘܫܶܐ܆ ܥܠܰܝ ܡܟܰܒܕܺܝܢ^[22] ܐܢ̱ܬܽܘܢ܆ ܥܰܠ ܕܟܽܠܶܗ ܒܰܪܢܳܫܳܐ ܥܶܒܕܶܬ ܚܠܺܝܡܳܐ ܒܫܰܒܬܳܐ^[23]܆ ܘܟܰܕ ܛܳܒ܆ ܓܙܽܘܪܬܳܐ ܝܰܬܺܝܪܳܐܺܝܬ ܡܶܣܬܰܒܪܳܐ ܗ̱ܘܳܬ ܕܫܳܪܝܳܐ ܠܢܳܡܽܘܣܳܐ܆ ܕܰܠܒܶܛܠܳܢܳܐ ܗܰܘ ܫܰܒܬܳܢܳܝܳܐ ܦܳܣܩܳܐ ܗ̱ܘܳܬ ܘܰܡܒܰܛܠܳܐ. ܐܶܠܳܐ ܗܰܘ ܡܳܐ ܐܳܡܰܪ ܕܰܠܟܽܘܢ ܟܰܕ ܒܶܣܪܳܢܳܐܺܝܬ ܕܳܝܢܺܝܢ ܐܢ̱ܬܽܘܢ܆ ܫܪܳܝܳܐ ܕܢܳܡܽܘܣܳܐ ܡܶܣܬܒܰܪ ܕܺܐܝܬܰܘܗ̱ܝ܆ ܩܽܘܝܳܡܳܐ ܝܰܬܺܝܪܳܐܺܝܬ ܐܺܝܬܰܘܗ̱ܝ܆ ܟܰܕ ܪܽܘܚܳܢܳܐܺܝܬ ܡܶܫܬܰܡܠܶܐ.

ܐܳܦ ܣܽܘܟܳܠܳܐ ܕܶܝܢ ܡܶܕܶܡ ܐ̱ܚܪܺܢܳܐ ܕܝܰܬܺܝܪ ܥܰܡܺܝܩ ܡܕܺܝܩ ܡܶܢ ܗܳܪܟܳܐ. ܡܶܢ ܓܶܝܪ ܓܙܽܘܪܬܳܐ ܗܳܝ ܕܩܳܕܡܳܐ ܗ̱ܘܳܬ ܡܛܰܦܣܳܐ ܠܡܰܥܡܽܘܕܺܝܬܳܐ܆ ܕܰܒܝܰܘܡܳܐ ܬܡܺܝܢܳܝܳܐ ܡܶܫܬܰܡܠܝܳܐ ܗ̱ܘܳܬ܆ ܗܰܘ ܟܺܝܬ ܕܺܐܝܬܰܘܗ̱ܝ ܚܰܕ ܒܫܰܒܳܐ܆ ܛܳܒܳܐܺܝܬ ܡܶܙܕܰܟܝܳܐ ܫܰܒܬܳܐ܆ ܘܡܶܢ ܒܶܛܠܳܢܳܐ ܕܺܝܠܳܗ̇ ܡܰܫܦܳܐ܆ ܐܰܝܟܰܢܳܐ ܓܶܝܪ ܠܳܐ ܥܬܺܝܕ ܗ̱ܘܳܐ ܛܶܠܳܠܳܐ ܕܢܰܫܶܦ ܠܰܫܪܳܪܳܐ܆ ܡܶܛܽܠ ܟܺܝܬ ܕܳܐܦ ܡܽܘܠܳܝܶܗ ܐܳܦ ܢܰܘܚܶܗ ܕܢܳܡܽܘܣܳܐ܆ ܐܺܝܬܰܘܗ̱ܝ ܐܶܘܰܢܓܶܠܺܝܽܘܢ.

ܟܰܕ ܗܳܠܶܝܢ ܘܕܰܐܝܟ ܗܳܠܶܝܢ ܡ̈ܶܠܶܐ ܘܣܽܘ̈ܟܳܠܶܐ ܐܰ‌ܠܳܗܳܝ̈ܶܐ ܐܳܡܰܪ ܗ̱ܘܳܐ ܦܳܪܽܘܩܰܢ܆ ܟܰܕ ܠܡܶܩܛܰܠ ܨܳܒܶܝܢ ܗ̱ܘܰܘ ܝܽܗ̱ܘ̈ܕܳܝܶܐ܆ ܘܚܶܡܬܳܐ ܒܰܥܪܺܝܪܳܝܬܳܐ ܢܳܫܡܺܝܢ ܗ̱ܘܰܘ܆ ܕܢܶܐܚܕܽܘܢܳܝܗ̱ܝ ܒܳܥܶܝܢ ܗ̱ܘܰܘ܆ ܐܶܠܳܐ ܠܳܐ ܐ̱ܢܳܫ ܐܳܡܰܪ ܐܰܪܡܺܝ ܥܠܰܘܗ̱ܝ ܐܺܝܕܳܐ܆ ܡܶܛܽܠ ܕܠܳܐ ܥܕܰܟܺܝܠ ‌ܐܰܬܝܳܐ ܗ̱ܘܳܬ ܫܳܥܬܶܗ^[24]܆ ܗܳܕܶܐ ܕܶܝܢ ܐܰܡܺܝܪܳܐ܆ ܠܰܘ ܐܰܝܟܰܢܳܐ ܕܒܰܕܡܽܘܬ ܒܶܕܝ̈ܶܐ ܘܰܫܛܽܘܪ̈ܘܳܬܳܐ ܕܚܰܟܺܝܡܰܘ̈ܗ̱ܝ ܕܥܳܠܡܳܐ ܗܳܢܳܐ܆ ܦܶܣܳܐ ܘܚܽܘܪܩܳܢܳܐ ܐܰܢܰܢܩܳܝܳܐ ܕܫܳܥܬܳܐ ܡܶܕܶܡ ܢܶܬܚܰܫܰܒ܆ ܠܗܰܘ ܕܚܶܠܩܳܐ ܩܳܪܶܝܢ ܠܶܗ܆ ܕܰܠܘܳܬ ܗܳܝ ܕܢܶܚܰܫ ܩܛܺܝܪܳܐܺܝܬ ܡܰܝܬܶܐ ܗ̱ܘܳܐ ܠܶܗ܆ ܐܶܠܳܐ ܐܰܝܟܰܢܳܐ ܕܗܳܝ ܕܰܠܩܽܘܒܠܳܐ ܢܺܐܠܰܦ. ܕܳܐܦ ܟܰܕ ܙܰܒ̈ܢܺܝܢ ܣܰܓܺܝ̈ܳܐܢ ܨܒܰܘ ܝܽܗ̱ܘ̈ܕܳܝܶܐ ܕܢܶܠܒܟܽܘܢܳܝܗ̱ܝ ܕܠܳܐ ܒܨܶܒܝܳܢܶܗ܆ ܠܳܐ ܠܰܒܟܽܘܗ̱ܝ܆ ܐܶܠܳܐ ܐܶܡܰܬܝ ܕܗܽܘ ܨܒܳܐ܆ ܘܰܒܫܳܥܬܳܐ ܗܳܝ ܕܗܽܘ ܙܳܕܶܩ܆ ܘܶܐܡܰܬܝ ܕܰܠܗܳܝ ܕܢܶܚܰܫ܆ ܕܺܐܝܬ ܠܳܗ̇ ܫܰܦܺܝܪܽܘܬ ܙܰܒܢܳܐ ܚܰܫܒܳܗ̇܆ ܠܟܽܠܗܶܝܢ ܓܶܝܪ ܕܡܶܢ ܫܽܘܪܳܝܳܐ ܣܳܡ ܘܦܰܪܢܶܤ ܐܶܢܶܝܢ ܒܙܰܒܢܗܶܝܢ ܘܠܳܚܡܳܐܺܝܬ. ܕܰܐܝܟ ܐܰܝܟܰܢ ܙܳܕܶܩ ܗ̱ܘܳܐ ܕܢܶܬܺܝܗܶܒ ܢܳܡܽܘܣܳܐ܆ ܐܶܠܳܐ ܒܙܰܒܢܳܐ ܕܠܳܚܶܡ ܗ̱ܘܳܐ. ܢܒܺܝ̈ܶܐ ܒܳܗ̇ ܒܰܕܡܽܘܬܳܐ ܐܶܘܰܢܓܶܠܺܝܽܘܢ.

ܫܡܳܐ ܗܳܟܺܝܠ ܗܰܘ ܕܫܳܥܬܳܐ܆ ܠܚܰܬܺܝܬܳܢܽܘܬܳܐ ܕܰܒܛܺܝܠܽܘܬܳܐ ܘܰܕܚܶܟܡܬܳܐ ܕܦܳܪܽܘܩܰܢ ܡܚܰܘܶܐ܆ ܕܳܐܦܠܳܐ ܡܢܳܬܳܐ ܡܶܕܶܡ ܠܳܐ ܡܶܬܦܰܣܩܳܢܺܝܬܳܐ ܕܥܶܕܳܢܳܐ܆ ܘܳܐܦܠܳܐ ܒܰܪܦܳܦܳܐ ܙܥܽܘܪܳܐ ܕܙܰܒܢܳܐ܆ ܡܶܢ ܗܳܝ ܕܰܒܙܰܒܢܶܗ ܢܶܗܘܶܐ ܡܶܕܶܡ ܫܳܪܰܥ ܣܳܟ ܐܰܘ ܦܳܐܶܕ܆ ܐܶܠܳܐ ܟܽܠܗܶܝܢ ܒܛܶܟܣܳܐ ܘܠܳܚܡܳܐܺܝܬ ܡܕܰܒܰܪ܆ ܘܶܐܢ ܕܶܝܢ ܠܳܐ ܐܰܝܟܰܢܳܐ ܠܰܘ ܕܠܳܐ ܡܶܠܬܳܐ ܗܳܝ ܘܫܰܢܳܝܬܳܐ܆ ܗܳܝ ܕܢܺܐܡܰܪ ܕܰܬܚܶܝܬ ܐܰܢܰܢܩܺܐ ܕܫܳܥܬܳܐ ܡܫܰܥܒܰܕ ܗܰܘ ܥܳܒܽܘܕܳܐ ܕܥܳܠ̈ܡܶܐ ܘܰܕܙܰܒ̈ܢܶܐ܆ ܐܶܡܰܬܝ ܕܳܐܦܠܳܐ ܥܠܰܝܢ ܙܳܕܶܩ ܕܰܢܫܰܒܚܺܝܗ̇^[25] ܠܗܳܕܶܐ.

ܒܰܕܓܽܘܢ ܐܳܦ ܟܰܕ ܐܶܡܶܗ ܡܦܺܝܣܳܐ ܗ̱ܘܳܬ ܠܶܗ ܒܩܳܛܢܶܐ ܗܳܝ ܕܰܓܠܺܝܠܳܐ܆ ܟܰܕ ܚܣܰܪ ܚܰܡܪܳܐ ܠܗܳܢܽܘܢ ܕܫܳܬܶܝܢ ܗ̱ܘܰܘ ܒܡܶܫܬܽܘܬܳܐ܆ ܕܳܐܬ̣ܳܐ ܦܰܐܝܰܬ ܠܰܐܠܳܗܳܐ ܢܚܰܘܶܐ܆ ܩܥܳܐ: ܡܳܐ ܠܺܝ ܘܠܶܟܝ ܐܰܢ̱ܬܬܳܐ܆ ܠܳܐ ܥܕܰܟܺܝܠ ‌ܐܶܬ̣ܳܬ̣ ܫܳܥܬܳܐ ܕܺܝܠܝ^[26]. ܘܒܰܪ ܫܳܥܬܶܗ ܡܰܝ̈ܳܐ ܠܚܰܡܪܳܐ ܫܰܚܠܶܦ ܘܗܳܐ ܐܶ‌ܠܽܘ ܐܰܝܟ ܐܰܝܢܳܐ ܕܰܡܫܰܥܒܰܕ ܠܰܐܢܰܢܩܺܐ ܕܫܳܥ̈ܶܐ ܩܛܺܝܪܳܐܺܝܬ ܗܳܕܶܐ ܐܶܡܰܪ: ܗܳܝ ܕܶܝܢ ܕܫܳܥܬܳܐ ܠܳܐ ܩܰܪܺܝܒܳܐ ܗ̱ܘܳܬ܆ ܠܳܐ ܡܶܫܟܰܚ ܗ̱ܘܳܐ ܡܶܚܕܳܐ ܒܰܪ ܫܳܥܬܶܗ ܐܳܬ̣ܳܐ ܠܡܶܣܥܰܪ܆ ܐܶܠܳܐ ܠܬܶܕܡܽܘܪܬܳܐ ܡܰܢ܆ ܐܰܝܟ ܐܰܝܢܳܐ ܕܺܐܝܬ ܠܶܗ ܫܽܘܠܛܳܢܳܐ ܘܺܐܝܬܰܘܗ̱ܝ ܐܰ‌ܠܳܗܳܐ ܫܰܡܠܺܝ܆ ܠܶܐܡܶܗ ܕܶܝܢ ܕܡܶܕܶܡ ܐ̱ܢܳܫܳܝܳܐ ܚܶܫܰܬ̣܆ ܘܡܶܬܚܙܰܘܙܝܳܢܳܐܺܝܬ ܠܘܳܬ ܗܳܕܶܐ ܡܚܰܦܛܳܐ ܗ̱ܘܳܬ ܠܶܗ܆ ܒܝܰܕ ܗܳܠܶܝܢ ܕܶܐܡܰܪ ܠܳܗ̇ ܪܕܳܐ ܘܰܐ‌ܠ̣ܦܳܗ̇܆ ܕܗܽܘ ܠܰܘ ܠܡܶܬܚܙܰܘܙܝܳܢܽܘܬܳܐ܆ ܐܶܠܳܐ ܒܫܳܥܰܬܗܶܝܢ ܘܰܒܥܶܕܳܢܗܶܝܢ ܥܬܺܝܕ ܠܡܶܥܒܰܕ ܬܶܕܡܪ̈ܳܬܳܐ ܕܰܐܝܟ ܗܳܠܶܝܢ܆ ܟܕ ܠܠܳܐ ܗܰܝܡܳܢܽܘܬܗܽܘܢ ܕܝܽܗ̱ܘ̈ܕܳܝܶܐ ܡܰܒܗܶܬ̣܆ ܘܰܠܘܳܬ ܝܺܕܰܥܬܳܐ ܕܺܝܠܶܗ ܡܫܰܒܶܠ ܗ̱ܘܳܐ ܘܰܡܗܰܕܶܐ ܠܗܽܘܢ.

ܒܪܰܡ ܕܶܝܢ ܐܽܘܡܘܤ ܥܒܰܕ ܠܗܳܝ ܕܐܫܬܰܐܠܰܬ܆ ܟܰܕ ܠܶܐܡܶܗ ܡܝܰܩܰܪ܆ ܘܟܰܕ ܠܡܶܫܬܽܘܬܳܐ ܝܰܬܺܝܪ ܡܫܰܡܠܝܳܐܺܝܬ ܡܒܰܪܶܟ܆ ܘܟܰܕ ܡܰܠܶܦ ܐܰܟܚܕܳܐ ܕܠܶܐܡ̈ܗܳܬܳܐ ܢܶܥܢܶܐ ܘܢܶܫܬܡܰܥ܆ ܘܰܡܝܰܩܪܳܐ ܢܶܚܫܒܺܝܘܗ̱ܝ ܠܙܽܘܘܳܓܳܐ܆ ܘܰܕܟܺܝܬܳܐ ܠܥܰܪܣܳܐ܆ ܢܶܫܡܥܽܘܢ ܗܳܢܽܘܢ ܕܠܶܐܡ̈ܗܳܬܳܐ ܕܺܝܠܗܽܘܢ ܡܫܺܝܛܺܝܢ܆ ܕܰܡܫܺܝܚܳܐ ܟܰܕ ܐܰ‌ܠܳܗܳܐ ܐܺܝܬܰܘܗ̱ܝ܆ ܡܶܢ ܐܶܡܶܗ ܡܶܬܟܰܚܰܕ܆ ܐܳܦ ܟܰܕ ܠܒܰܪ ܡܶܢ ܙܰܒܢܳܐ ܫܳܐܠܳܐ ܗ̱ܘܳܬ܆ ܘܥܳܢܶܐ ܘܡܶܫܬܡܰܥ ܠܗܳܕܶܐ ܘܡܶܬܬܦܺܝܤ. ܟܰܕ ܠܰܢ ܣܳܐܶܡ ܢܳܡܽܘ̈ܣܶܐ܆ ܕܢܶ݀ܬܟܰܚܰܕ ܡܶܢ ܟܝܳܢܳܐ.

ܐܶܠܳܐ ܐܰܝܟܰܢܳܐ ܕܰܠܘܳܬ ܗܳܝ ܕܩܰܕܺܝܡܳܐ ܣܺܝܡܳܐ ܢܰܗܦܟܺܝܗ̇ ܠܡܶܠܬܳܐ ܡܶܬܕܰܡܰܪ ܐ̱ܢܳܐ ܒܣܰܡܝܽܘܬܗܽܘܢ ܕܝܽܗ̱ܘ̈ܕܳܝܶܐ ܕܰܐܝܟܰܢܳܐ ܟܰܕ ܠܡܶܠܰܘܗ̱ܝ ܕܦܳܪܽܘܩܰܢ ܗܳܠܶܝܢ ܐܰ‌ܠܳܗܳܝ̈ܳܬܳܐ܆ ܘܕܰܠܥܶܠ ܡܶܢ ܒܰܪܢܳܫܳܐ ܕܳܝܢܺܝܢ ܗ̱ܘܰܘ܆ ܘܡܶܢܗܶܝܢ ܘܠܳܐ ܗ̱ܘܳܐ ܠܗܽܘܢ ܠܡܶܫܬܰܘܕܳܥܽܘ܆ ܕܗܽܘ ܐܺܝܬܰܘܗ̱ܝ ܡܫܺܝܚܳܐ ܗܰܘ ܕܡܶܢ ܢܳܡܽܘܣܳܐ ܘܡܶܢ ܢܒܺܝ̈ܶܐ ܩܰܕܶܡ ܘܶܐܬܟܪܶܙ܆ ܡܶܬܦܰܫܟܺܝܢ ܗ̱ܘܰܘ܆ ܒܰܙܒܰܢ ܡܰܢ ܟܰܕ ܐܳܡܪܺܝܢ: ܠܗܳܢܳܐ ܝܳܕܥܺܝܢܰܢ ܡܶܢ ܐܰܝܟܳܐ ܐܺܝܬܰܘܗ̱ܝ܆ ܡܫܺܝܚܳܐ ܕܶܝܢ ܐܶܡܰܬܝ ܕܳܐܬܶܐ ܠܳܐ ܐ̱ܢܳܫ ܝܳܕܰܥ ܡܶܢ ܐܰܝܟܳܐ ܐܺܝܬܰܘܗ̱ܝ^[27]܆ ܒܰܙܒܰܢ ܕܶܝܢ ܬܽܘܒ ܟܰܕ ܡܶܬܚܰܫܒܺܝܢ ܘܳܐܡܪܺܝܢ܆ ܠܳܐ ܗ̱ܘܳܐ ܟܬܳܒܳܐ ܐܶܡܰܪ: ܕܡܶܢ ܙܰܪܥܶܗ ܕܕܰܘܺܝܕ ܘܡܶܢ ܒܶܝܬܠܚܶܡ ܩܪܺܝܬܳܐ ܐܰܝܟܳܐ ܕܺܐܝܬܰܘܗ̱ܝ ܗ̱ܘܳܐ ܕܰܘܺܝܕ ܐܳܬܶܐ ܡܫܺܝܚܳܐ.

ܫܰܦܺܝܪܳܐ ܕܶܝܢ ܕܰܠܘܳܬ ܚܰܕ ܡܶܢ ܗܳܠܶܝܢ ܕܡܶܬܦܰܫܟܺܝܢ܆ ܐܶܘܰܢܓܶܠܴܐܺܝܬ ܢܶܡܬܽܘܚ ܘܢܺܐܡܰܪ܆ ܝܽܗ̱ܘܕܳܝܳܐ ܣܰܡܝܳܐ܆ ܚܠܽܘܛ ܬܪ̈ܰܝܗܽܘܢ ܦܽܘܫܳܟ̈ܶܐ ܕܺܝܠܳܟ܆ ܘܒܰܝܢܳܬ ܬܪ̈ܰܝܗܽܘܢ܆ ܢܰܗܺܝܪܳܐܺܝܬ ܬܶܚܙܶܐ ܠܰܡܫܺܝܚܳܐ. ܘܟܰܕ ܓܳܐܶܫ ܐܰܢ̱ܬ ܠܶܗ ܘܟܰܕ ܒܺܐܝ̈ܕܰܝܳܐ ܐܳܚܶܕ ܐܰܢ̱ܬ܆ ܘܟܰܕ ܠܳܐ ܝܳܕܰܥ ܐܰܢ̱ܬ. ܐܰܝܟ ܓܶܝܪ ܦܽܘܫܳܟܳܐ ܕܺܝܠܳܟ ܗܰܘ ܕܳܐܡܰܪ: ܕܠܳܐ ܐ̱ܢܳܫ ܝܳܕܰܥ ܡܶܢ ܐܰܝܟܳܐ ܐܳܬܶܐ ܡܫܺܝܚܳܐ܆ ܡܶܢ ܠܥܶܠ ‌ܐܺܝܬܰܘܗ̱ܝ܆ ܘܡܶܢ ܐܰܒܳܐ ܐܺܝܬ ܠܶܗ ܝܺܠܺܝܕܽܘܬܳܐ ܠܳܐ ܡܶܬܕܰܪܟܳܢܺܝܬܳܐ܆ ܘܰܕܠܰܒ̈ܢܰܝ ܐ̱ܢܳܫܳܐ ܠܳܐ ܝܺܕܺܝܥܳܐ. ܒܰܒܣܰܪ ܕܶܝܢ ܡܶܢ ܕܰܘܺܝܕ܆ ܘܡܶܢ ܒܶܝܬܠܚܶܡ ܐܰܟܚܕܳܐ ܐܳܡܰܪ: ܘܰܐܢ̱ܬܝ ܒܶܝܬܠܚܶܡ ܒܰܝܬܳܐ ܕܳܐܦܰܪܬܳܐ܆ ܙܥܽܘܪܬܳܐ ܐܺܝܬܰܝܟܝ̱ ܕܬܶܗܘܶܝܢ ܒܰܐܠ̈ܦܶܐ ܕܺܝܗܽܘܕܳܐ܆ ܡܶܢܶܟܝ ܢܶܦܽܘܩ ܠܺܝ ܗܰܘ ܕܢܶܗܘܶܐ ܪܺܝܫܳܢܳܐ ܒܺܐܝܣܪܳܐܶܝܠ܆ ܘܡܰܦ̈ܩܳܢܶܐ ܕܺܝܠܶܗ ܡܶܢ ܪܺܝܫܺܝܬܳܐ܆ ܡܶܢ ܝܰܘ̈ܡܳܬܳܐ ܕܥܳܠܰܡ^[28].

ܐܳܦ ܐܶܫܰܥܝܳܐ ܢܒܺܝܳܐ ܟܰܕ ܡܶܢ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܐܳܡܰܪ ܕܫܳܘܰܚ܆ ܬܽܘܒ ܐܳܡܰܪ. ܕܕܳܪܶܗ ܡܰܢܽܘ ܢܶܫܬܰܥܶܐ^[29]܆ ܐܺܝܬܰܘܗ̱ܝ ܗ̱ܘܳܐ ܓܶܝܪ ܗܽܘ ܟܰܕ ܗܽܘ܆ ܐܳܦ ܕܠܳܐ ܚܫܺܝܒ ܒܫܰܪ̈ܒܳܬܳܐ ܐܰܝܟ ܐܰ‌ܠܳܗܳܐ܆ ܘܳܐܦ ܕܡܶܬܟܬܶܒ ܥܠܰܘܗ̱ܝ ܓܶܢܣܳܐ ܒܰܒܣܰܪ܆ ܐܶܠܳܐ ܝܽܗ̱ܘ̈ܕܳܝܶܐ ܟܰܕ ܠܰܐܠܳܗܐ ܐܰܪܓܶܙܘ܆ ܡܶܢ ܟܬܳܒܳܐ ܗܰܘ ܕܡܶܢܶܗ ܘܠܳܐ ܗ̱ܘܳܐ ܠܗܽܘܢ ܠܡܶܕܰܥ܆ ܠܳܐ ܝܺܕܰܥܬܳܐ ܡܶܬܡܠܶܝܢ ܗ̱ܘܰܘ ܘܚܶܫܽܘܟܳܐ܆ ܟܰܕ ܠܰܢܒ̈ܺܝܰܘܳܬܳܐ ܡܰܢ܆ ܡܢܳܬܳܐ ܩܳܪܶܝܢ ܗ̱ܘܰܘ. ܐܰܝܟܰܢܳܐ ܕܳܐܦ ܠܗܶܪ̈ܛܺܝܩܽܘ ܐܺܝܬ ܥܝܳܕܳܐ܆ ܕܝܽܗ̱ܘܕܳܐܺܝܬ ܢܶܦܤܩܽܘܢ ܠܡ̈ܶܠܶܐ ܢܦܺܝ̈ܚܳܬ ܡܶܢ ܐܰ‌ܠܳܗܳܐ܆ ܘܰܠܣܺܝܪܳܐ ܕܕܽܘܓ̈ܡܰܛܰܐ ܥܰܘܠܳܐ ܢܶܓܕܠܽܘܢ܆ ܕܠܰܬܪ̈ܰܝܗܽܘܢ ܕܰܘܺܝܕ ܢܒܺܝܳܐܺܝܬ ܠܳܛ ܟܰܕ ܐܳܡܰܪ: ܢܶܗܘܶܐ ܦܳܬܽܘܪܳܐ ܕܺܝܠܗܽܘܢ ܩܕܳܡܰܝܗܽܘܢ ܠܦܰܚܳܐ܆ ܘܰܠܦܽܘܪܥܳܢܳܐ ܘܰܠܟܶܫܠܳܐ. ܢܶܚ̈ܫܟܳܢ ܥܰܝ̈ܢܰܝܗܽܘܢ ܕܠܳܐ ܢܶܚܙܽܘܢ^[30]܆ ܕܦܳܬܽܘܪܳܐ ܕܶܝܢ ܐܺܝܬܰܝܗܶܝܢ ܡ̈ܶܠܶܐ ܕܰܐ‌ܠܳܗܳܐ ܘܫܳܪܽܘܬܳܐ ܡܶܕܶܡ ܡܠܺܝܠܬܳܐ܆ ܟܬܳܒܳܐ ܐܰ‌ܠܳܗܳܝܳܐ ܐܰܘܕܰܥ ܟܰܕ ܐܳܡܰܪ: ܐܶܬܳܐ ܕܶܝܢ ܡܽܘܫܶܐ ܘܰܩܪܳܐ ܠܩܰܫܺܝ̈ܫܶܐ ܕܥܰܡܳܐ. ܘܣܳܡ ܩܕܳܡܰܝܗܽܘܢ ܠܟܽܠܗܶܝܢ ܡ̈ܶܠܶܐ ܗܳܠܶܝܢ܆ ܐܰܝܠܶܝܢ ܕܰܦܩ̣ܰܕ ܐܰ‌ܠܳܗܳܐ^[31].

ܗܳܟܰܢܳܐ ܐܳܦ ܡܰܬܰܝ ܐܳܡܰܪ: ܟܰܕ ܠܡܰܠ̈ܦܳܢܘܳܬܶܗ ܕܦܳܪܽܘܩܰܢ ܡܬܰܢܶܐ ܗ̱ܘܳܐ܆ ܕܰܐ̱ܚܪܺܢܳܐ ܡܰܬܠܳܐ ܣܳܡ ܩܕܳܡܰܝܗܽܘܢ^[32]. ܡܶܠܬܳܐ ܕܶܝܢ ܗܳܝ ܕܣܳܡ ܩܕܳܡܰܝܗܽܘܢ܆ ܕܽܘܡܝܳܐ ܘܣܶܒܗܳܐ ܕܦܳܬܽܘܪܳܐ ܐܺܝܬ ܠܳܗ̇܆ ܘܰܕܬܽܘܪܣܳܝܳܐ ܗܰܘ ܕܰܡܟܳܢ ܠܰܡܬܰܪܣܳܝܽܘ ܠܢܰܦܫܳܐ. ܠܗܰܘ ܕܰܢ݀ܨܰܠܶܐ ܚܢܰܢ܆ ܕܕܰܟܝܳܐܺܝܬ ܘܰܡܫܰܡܠܝܳܐܺܝܬ ܢ݀ܶܫܬܰܘܬܰܦ ܠܶܗ܆ ܘܰܕܢܶ݀ܩܛܽܘܦ ܦܺܐܪ̈ܶܐ ܕܡܶܢܶܗ܆ ܘܰܒܢܽܘܗܪܳܐ ܕܡܶܢܶܗ ܢܶܬܢܰܗܰܪ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܆ ܕܥܰܡܶܗ ܠܰܐܒܳܐ ܘܰܠܪܽܘܚܳܐ ܩܰܕܺܝܫܳܐ܆ ܦܰܐܝܳܐ ܬܶܫܒܽܘܚܬܳܐ܆ ܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܰܐܪܒܥܺܝܢ ܘܫܬܐ.

ܝܘܚܢܢ. 7: 14 [1]

 ܫܽܘܠܳܡܳܐ ܩܳܪܶܐ ܠܩܰܢܳܝܽܘܬܶܗ ܕܡܶܕܶܡ.[2]

[3]ܣܶܦܪܐ ܕܡܦܩܢܐ. 23: 14 ܐܦ ܬܢܝܢ ܢܡܘܣܐ. 16: 10 ـ 16

ܐܦܣ̈ܝܐ. 2: 14 [4]

ܡܬܝ. 5: 17 [5]

[6]ܣܦܪܐ ܕܡܦܩܢܐ. 20: 13 ܐܦ ܬܢܝܢ ܢܡܘܣܐ. 5: 17 ܐܦ ܡܬܝ. 5: 21

ܡܬܝ. 5: 22 [7]

ܒܠܐ ܡܶܬܬܙܺܝܥܳܢܽܘܬܳܐ[8]

ܪ̈ܗܘܡܝܐ. 7: 14 [9]

ܪ̈ܗܘܡܝܐ. 7: 6 [10]

ܡܪܩܘܣ. 2: 9 [11]

ܝܘܚܢܢ. 7: 14 [12]

ܐ. ܩܘܪ̈ܝܢܬܝܐ. 1: 24 [13]

ܝܘܚܢܢ. 7: 16 [14]

ܝܘܚܢܢ. 7: 15 [15]

ܝܘܚܢܢ. 17: 10 [16]

ܝܘܚܢܢ. 7: 18 [17]

ܣܶܦܪܐ ܕܒܪܝܬܐ. 17: 12 [18]

ܡܦܩܢܐ. 20: 10  ܐܦ ܬܢܝܢ ܢܡܘܣܐ. 5: 14 [19]

[20]ܐܦܣ̈ܝܐ. 4: 24  ܐܦ ܓܠܛܝ̈ܐ. 3: 27  ܐܦ ܩܘܠܣ̈ܝܐ. 3: 10

ܩܘܠܣ̈ܝܐ. 2: 11 ـ 12 [21]

ܚܰܡܺܝܬ̣ܝܢ[22]

ܝܘܚܢܢ. 17: 23 [23]

ܝܘܚܢܢ. 7: 30 [24]

ܢܰܘܕܝܗ̇[25]

ܝܘܚܢܢ. 2: 4 [26]

ܝܘܚܢܢ. 7: 27 [27]

ܡܝܟܐ. 5: 1 [28]

ܐܫܥܝܐ. 53: 8 [29]

ܡܙܡܘܪ̈ܐ. 69: 22 ـ 23 [30]

ܣܦܪܐ ܕܡܦܩܢܐ. 19: 7 [31]

ܡܬܝ. 13: 13 [32]