ܡܺܐܡܪܳܐ ܕܰܐܪܒܥܺܝܢ ܘܚܰܡܫܳܐ

ܥܰܠ ܗܳܝ ܕܰܟܬܺܝܒܳܐ. ܠܰܫܠܺܝܚܳܐ ܠܘܳܬ ܛܺܝܡܳܬܶܐܘܤ܆ ܕܰܪܶܫ ܕܶܝܢ ܐܰܢ̱ܬ ܠܳܟ ܠܘܳܬ ܫܰܦܺܝܪܽܘܬ ܕܶܚܠܬܳܐ. ܕܽܘܪܳܫܐ ܓܶܝܪ ܦܰܓܪܳܢܳܝܳܐ ܒܩܰܠܺܝܠ‌ ܐܺܝܬܰܘܗ̱ܝ ܡܰܘܬܪܳܢܳܐ. ܫܰܦܺܝܪܽܘܬ ܕܶܚܠܬܳܐ ܕܶܝܢ. ܠܘܳܬ ܟܽܠ ܡܶܕܶܡ ܐܺܝܬܶܝܗ̇ ܡܰܘܬܪܳܢܺܝܬܳܐ܆ ܕܫܽܘܘܕܳܝܳܐ ܐܺܝܬ ܠܳܗ̇ ܕܚܰܝ̈ܶܐ܆ ܕܗܳܢܽܘܢ ܕܗܳܫܳܐ ܘܰܕܗܳܢܽܘܢ ܕܰܥܬܺܝܕܺܝܢ^[1]. ܘܥܰܠ ܗܳܝ ܕܶܐܬܰܐܡܪܰܬ ܡܶܢ ܦܳܪܽܘܩܰܢ ܠܘܳܬ ܡܰܪܝܰܡ܆ ܠܳܐ ܬܶܓܫܦܺܝܢ ܒܺܝ܆ ܠܳܐ ܓܶܝܪ ܥܕܰܟܺܝܠ ܣܶܠܩܶܬ ܠܘܳܬ ܐܳܒܝ^[2]. ܘܥܰܠ ܙܳܟܽܘܬܳܐ ܗܳܝ ܕܶܐܣܬܰܒܪܰܬ ܠܰܢ܆ ܕܡܰܠܟܳܐ ܫܰܦܺܝܪ ܕܶܚܠܬܳܐ.

45: ܟܰܕ ܪܶܚܡܰܬ ܝܽܘܠܦܳܢܳܐ. ܐܺܝܬ ܠܗܽܘܢ ܠ̱ܐܢܳܫܺܝ̈ܢ܆ ܕܦܽܘܫܳܩ̈ܶܐ ܕܡ̈ܶܠܶܐ ܐܰ‌ܠܳܗܳܝ̈ܳܬܳܐ܆ ܘܫܽܘ̈ܐܴܠܶܐ ܥܰܣ̈ܩܶܐ ܐܰܝܟ ܕܰܠܢܽܘܗܳܪܗܶܝܢ ܡܩܰܪܒܺܝܢ ܠܺܝ ܒܟܽܠܙܒܰܢ܆ ܒܝܰܘ̈ܡܳܬܳܐ ܡܝܰܩܪ̈ܶܐ. ܗܳܢܽܘܢ ܕܚܰܫܳܐ ܦܳܪܽܘܩܳܝܳܐ ܕܰܡܫܺܝܚܳܐ. ܘܕܰܩܝܳܡܬܳܐ܆ ܟܰܕ ܬܰܪ̈ܬܶܝܢ ܡ̈ܶܠܶܐ ܓܰܒܺܝܘ ܡܶܢ ܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ܆ ܕܢܶܫܬܘܽܘܢ ܠܦܽܘܫܳܩܳܐ ܕܺܝܠܗܶܝܢ ܡܦܺܝܣܺܝܢ ܗܘܰܘ. ܕܡܶܢܗܶܝܢ ܗܳܝ ܡܰܢ ܚܕܳܐ܆ ܡܶܢ ܨܰܘܡܳܐ ܐܺܝܬ ܗ̱ܘܳܐ ܠܳܗ̇ ܥܶܠܬܳܐ. ܐܳܡܪܺܝܢ ܗ̱ܘܰܘ ܓܶܝܪ܆ ܕܕܰܠܡܳܐ ܠܳܐ ܙܳܕܶܩ ܠܡܶܣܒܰܠ ܥܰܡܠܳܐ ܕܡܶܢ ܨܰܘܡܳܐ܆ ܒܰܠܚܽܘܕ ܕܶܝܢ ܕܠܰܣܢܺܝ̈ܩܶܐ ܢ̇ܫܰܘܬܶܦ ܡܶܢ ܗܳܠܶܝܢ ܕܺܐܝܬ ܠܰܢ܆ ܘܕܰܢ݀ܡܰܠܶܠ ܫܪܳܪܳܐ ܒܣܶܦ̈ܘܳܬܰܢ܆ ܘܢܶ݀ܟܠܶܐ ܐܺܝ̈ܕܰܝܳܐ ܡܶܢ ܥܰܘܠܳܐ܆ ܘܡܶܢ ܥܳܠܽܘܒܽܘܬܳܐ ܢܶܬܪܰܚܰܩ܆ ܘܰܐܝܟ ܗܳܠܶܝܢ ܣܳܥܽܘܪ̈ܘܳܬܳܐ ܕܫܰܦܺܝܪܽܘܬ ܕܶܚܠܬܳܐ ܢܶܣܥܽܘܪ. ܟܰܕ ܦܰܘܠܽܘܤ ܟܳܬܶܒ ܠܘܳܬ ܛܺܝܡܳܬܶܐܘܤ. ܕܽܘܪܳܫܳܐ ܓܶܝܪ ܦܰܓܪܳܢܳܝܳܐ ܒܩܰܠܺܝܠ ‌ܐܺܝܬܰܘܗ̱ܝ ܡܰܘܬܪܳܢܳܐ܆ ܫܰܦܺܝܪܽܘܬ ܕܶܚܠܬܳܐ ܕܶܝܢ ܠܘܳܬ ܟܽܠ ܡܶܕܶܡ ܐܺܝܬܶܝܗ̇ ܡܰܘܬܪܳܢܺܝܬܳܐ^[3].

ܗܳܝ ܕܶܝܢ ܦܪܘܛܐܣܝܤ ܐ̱ܚܪܺܬܳܐ܆ ܡܶܢ ܥܺܐܕܳܐ ܘܡܶܢܳܗ̇ ܕܰܩܝܳܡܬܳܐ ܐܺܝܬ ܗ̱ܘܳܐ ܠܳܗ̇ ܚܺܐܦܳܐ. ܐܳܦ ܓܶܝܪ ܡܦܺܝܣܺܝܢ ܗ̱ܘܰܘ ܠܡܺܐܠܰܦ܆ ܕܡܳܢܰܐ ܗ̱ܘ ܗܰܘܢܳܐ ܕܗܳܠܶܝܢ ܡ̈ܶܠܶܐ܆ ܗܳܢܶܝܢ ܕܡܰܠܶܠ ܦܳܪܽܘܩܳܐ ܕܟܽܠ ܡܶܢ ܒܳܬܰܪ ܩܝܳܡܬܶܗ ܕܡܶܢ ܡܺܝ̈ܬܶܐ ܠܘܳܬ ܡܰܪܝܰܡ܆ ܠܳܐ ܬܶܓܫܦܺܝܢ ܒܺܝ܆ ܠܳܐ ܓܶܝܪ ܥܕܰܟܺܝܠ ܣܶܠܩܶܬ ܠܘܳܬ ܐܳܒܝ^[4]. ܐܳܦ ܟܺܝܬ ܟܰܕ ܐܶܫܬܰܘܕܺܝܬ̣ ܠܗܽܘܢ܆ ܕܰܒܥܺܕܬܳܐ ܐ݀ܰܦܩܺܝܗ̇ ܠܡܶܠܬܳܐ ܕܡܶܛܽܠ ܗܳܕܶܐ܆ ܐܰܝܟܰܢܳܐ ܕܠܰܘ ܒܰܠܚܽܘܕ ܦܽܘܫܳܩܳܐ ܢܺܐܬܪܽܘܢ܆ ܐܶܠܳܐ ܥܰܡ ܗܳܢܳܐ. ܐܳܦ ܐܰܓܪܳܐ ܕܡܶܢ ܐܰ‌ܠܳܗܳܐ ܢܶܗܘܶܐ ܐܺܝܬ ܠܗܽܘܢ܆ ܕܰܗܘ̣ܰܘ ܡܙܰܡܢܳܢ̈ܶܐ ܕܫܶܡܥܳܐ ܡܰܘܬܪܳܢܳܐ ܕܓܰܘܳܐ܆ ܟܰܕ ܣܽܘܥܪ̈ܳܢܶܐ ܡܶܕܶܡ ܡܶܕܶܡ ܡܥܺܝ̈ܩܳܢܶܐ ܓܕܰܫܘ ܠܺܝ܆ ܘܩܽܘܛܳܦܳܐ ܘܥܰܪܦܶܠܳܐ ܡܶܕܶܡ ܡܠܰܐܽܘܗ̱ܝ ܠܚܽܘܫܳܒܳܐ܆ ܐܶܬܥܰܟܪܶܬ ܡܶܢ ܬܰܪܥܺܝܬܳܐ ܛܳܒܬܳܐ܆ ܘܫܶܬܩܳܐ ܐܶܚܕܶܬ. ܘܰܐܝܟܰܢܳܐ ܕܳܐܡܰܪ ܢܒܺܝܳܐ ܕܰܘܺܝܕ: ܚܶܪܫܶܬ. ܘܶܐܬܡܰܟܟܶܬ ܘܰܫܠܺܝܬ̣ ܡܶܢ ܛܳܒ̈ܳܬܳܐ. ܘܟܺܐܒܳܐ ܕܺܝܠܝ ܐܶܬܚܰܕܰܬ^[5]. ܘܳܐܦ ܗܳܫܳܐ ܕܶܝܢ ܒܪܰܡ܆ ܟܰܕ ܥܕܰܟܺܝܠ ܗܺܝ ܥܳܩܬܳܐ ܡܶܬܢܰܒܪܫܳܐ ܒܺܝ܆ ܘܰܥܕܰܟܺܝܠ ܒܰܥܢܳܢܳܐ ܕܰܟܡܺܝܪܽܘܬܳܐ ܡܶܬܚܰܫܰܟ ܐ̱ܢܳܐ܆ ܟܰܕ ܒܡܳܠܽܘܟܳܐ ܐܶܬܚܰܫܚܶܬ ܒܰܣܝܳܡ ܢܳܡܽܘܣܳܐ ܕܪܽܘܚܳܐ ܩܰܕܺܝܫܳܐ ܕܳܐܡܰܪ: ܟܰܕ ܟܽܠܳܗ̇ ܡܰܪܢܺܝܬܳܐ ܕܺܝܠܟܽܘܢ ܫܳܕܶܝܢ ܐܢ̱ܬܽܘܢ ܥܠܰܘܗ̱ܝ܆ ܡܶܛܽܠ ܕܠܶܗ ܒܛܺܝܠ ܥܠܰܝܟܽܘܢ^[6]܆ ܝܰܘܡܳܢܳܐ ܐ݀ܶܦܪܽܘܥ ܠܚܰܘܒܬܳܐ ܗܳܝ ܕܰܠܥܶܠ ܡܶܢ ܝܰܘܡܳܗ̇.

ܠܡܶܠܬܳܐ ܕܰܫܠܺܝܚܳܐ ܗܳܝ ܕܳܐܡܰܪ: ܕܰܪܶܫ ܕܶܝܢ ܢܰܦܫܳܟ ܠܘܳܬ ܫܰܦܺܝܪܽܘܬ ܕܶܚܠܬܳܐ܆ ܕܽܘܪܳܫܳܐ ܓܶܝܪ ܦܰܓܪܳܢܳܝܳܐ. ܒܩܰܠܺܝܠ ‌ܐܺܝܬܰܘܗ̱ܝ ܡܰܘܬܪܳܢܳܐ܆ ܫܰܦܺܝܪܽܘܬ ܕܶܚܠܬܳܐ ܕܶܝܢ. ܠܘܳܬ ܟܽܠ ܡܶܕܶܡ ܐܺܝܬܶܝܗ̇ ܡܰܘܬܪܳܢܺܝܬܳܐ܆ ܕܫܽܘܘܕܳܝܳܐ ܐܺܝܬ ܠܳܗ̇ ܕܚܰܝ̈ܶܐ܆ ܕܗܳܢܽܘܢ ܕܗܳܫܳܐ. ܘܰܕܗܳܢܽܘܢ ܕܰܥܬܺܝܕܺܝܢ^[7]܆ ܗܳܟܰܢܳܐ ܫܰܩܠܽܘܗ̇ ܐ̱ܢܳܫܺܝ̈ܢ ܕܕܽܘܪܳܫܳܐ ܡܶܕܶܡ ܛܳܒܳܐ ܐܺܝܬܰܘܗ̱ܝ܆ ܘܡܰܘܬܪܳܢܳܐ. ܐܶܠܳܐ ܗܰܘ ܡܰܢ ܕܗܳܢܽܘܢ ܕܰܒܦܰܓܪܳܐ ܡܶܬܢܰܦܩܺܝܢ ܘܢܳܦܠܺܝܢ܆ ܐܳܡܰܪ ܐ̱ܢܳܐ ܕܶܝܢ܆ ܕܗܳܢܽܘܢ ܕܰܒܕܰܪܳܐ ܡܶܬܕܰܪܫܺܝܢ܆ ܕܰܠܘܳܬ ܫܰܦܺܝܪܽܘܬ ܚܽܘܠܡܳܢܳܐ ܡܰܝܬܶܐ ܠܗܽܘܢ ܠܗܳܢܽܘܢ ܕܢܳܦܠܺܝܢ܆ ܒܩܰܠܺܝܠ ‌ܐܺܝܬܰܘܗ̱ܝ ܡܰܘܬܪܳܢܳܐ. ܥܕܰܡܳܐ ܓܶܝܪ ܠܦܰܓܪܳܐ ܩܳܐܶܡ ܘܰܠܘܳܬܶܗ ܡܶܫܬܰܡܠܶܐ.

ܫܰܦܺܝܪܽܘܬ ܕܶܚܠܬܳܐ ܕܶܝܢ܆ ܕܺܐܝܬܶܝܗ̇ ܕܽܘܪܳܫܳܐ ܕܢܰܦܫܳܐ ܘܕܽܘܟܳܝܳܐ ܗܰܘ ܕܰܒܝܰܕ ܡܝܰܬܪ̈ܳܬܳܐ܆ ܠܘܳܬ ܟܽܠ ܡܶܕܶܡ ܐܺܝܬܶܝܗ̇ ܡܰܘܬܪܳܢܺܝܬܳܐ܆ ܕܺܐܝܬ ܠܳܗ̇ ܫܽܘܘܕܳܝܳܐ ܕܚܰܝ̈ܶܐ܆ ܕܗܳܢܽܘܢ ܕܗܳܫܳܐ ܘܰܕܗܳܢܽܘܢ ܕܰܥܬܺܝܕܺܝܢ. ܗܳܢܽܘܢ ܓܶܝܪ܆ ܕܰܒܝܰܕ ܥܰܡ̈ܠܶܐ ܕܰܡܝܰܬܪܽܘܬܳܐ. ܗܶܢܽܘܢ ܠܗܽܘܢ ܢܰܦܶܩܘ܆ ܠܳܐ ܗ̱ܘܳܐ ܒܚܰܝ̈ܶܐ ܗܳܠܶܝܢ ܒܰܠܚܽܘܕ ܐܺܝܬܰܝܗܽܘܢ ܕܰܡܣܰܒܪܺܝܢ ܒܰܡܫܺܝܚܳܐ܆ ܐܶܠܳܐ ܠܘܳܬ ܗܳܢܽܘܢ ܕܰܥܬܺܝܕܺܝܢ ܚܳܝܪܺܝܢ܆ ܐܰܝܟܳܐ ܕܠܳܐ ܡܶܬܡܰܠ̈ܠܳܢܶܐ ܘܰܕܠܳܐ ܫܽܘܠܳܡ ܐܺܝܬܰܝܗܽܘܢ ܦܽܘܪ̈ܥܳܢܶܐ ܕܰܐܓܽܘ̈ܢܶܐ. ܗܳܠܶܝܢ ܕܥܰܝܢܳܐ ܠܳܐ ܚܙܳܬ̣܆ ܘܶܐܕܢܳܐ ܠܳܐ ܫܶܡܥܰܬ̣܆ ܘܥܰܠ ܠܶܒܳܐ ܕܒܰܪ ܐ̱ܢܳܫܳܐ ܠܳܐ ܣܠܶܩܘ^[8].

ܐ̱ܚܪ̈ܳܢܶܐ ܕܶܝܢ ܕܰܐܝܟ ܗܳܢܳܐ ܦܽܘܫܳܩܳܐ ܒܕܽܘܟܬܳܐ ܗܳܕܶܐ ܐܰܫܠܶܡܘ. ܐܳܡܪܺܝܢ ܓܶܝܪ܆ ܕܕܽܘܪܳܫܳܐ ܗܳܢܳܐ ܦܰܓܪܳܢܳܝܳܐ܆ ܡܶܢ ܦܶܬܓܳܡ̈ܶܐ ܗܳܢܽܘܢ ܕܩܰܕܺܝܡܺܝܢ ܠܶܗ ܡܶܬܢܰܗܰܪ. ܟܰܕ ܓܶܝܪ ܐܶܡܰܪ ܗܽܘ ܫܠܺܝܚܳܐ: ܕܡܶܢ ܫܽܘܥ̈ܝܳܬܳܐ ܕܶܝܢ ܡܣܰܝ̈ܒܳܬܳܐ ܘܣܳܒ̈ܳܬܳܢܳܝܳܬܳܐ ܐܶܫܬܰܐ̱ܠ܆ ܗܳܟܰܢܳܐ ܐܰܝܬܺܝ ܒܳܬܰܪܟܶܢ. ܘܕܰܪܶܫ ܕܶܝܢ ܢܰܦܫܳܟ ܠܘܳܬ ܫܰܦܺܝܪܽܘܬ ܕܶܚܠܬܳܐ. ܕܽܘܪܳܫܳܐ ܓܶܝܪ ܦܰܓܪܳܢܳܝܳܐ ܒܩܰܠܺܝܠ ܡܶܕܶܡ ܐܺܝܬܰܘܗ̱ܝ ܡܰܘܬܪܳܢܳܐ^[9]. ܫܽܘܥ̈ܝܳܬܳܐ ܕܶܝܢ ܡܣܰܝ̈ܒܳܬܳܐ ܘܣܳܒ̈ܳܬܳܢܳܝܳܬܳܐ ܐܳܡܪܺܝܢ: ܠܰܢܛܽܘܪ̈ܳܬܳܐ ܢܳܡܽܘ̈ܣܳܝܳܬܳܐ ܩܳܪܶܐ܆ ܗܳܠܶܝܢ ܕܝܽܗ̱ܘ̈ܕܳܝܶܐ ܥܳܒܕܺܝܢ ܗ̱ܘܰܘ ܡܣܰܝ̈ܒܳܬܳܐ܆ ܘܝܰܬܺܝܪܳܐܺܝܬ ܡܰܢ ܟܰܕ ܡܙܰܝܦܺܝܢ ܗ̱ܘܰܘ ܠܗܶܝܢ܆ ܒܳܬܰܪܟܶܢ ܕܶܝܢ ܕܟܰܕ ܣܶܐܒ̈ܝ̱ ܘܰܗܘ̈ܰܝ ܒܩܰܪܺܝܒܽܘܬܳܐ ܕܰܚܒܳܠܳܐ܆ ܡܰܫܠܡܺܝܢ ܗ̱ܘܰܘ ܠܗܶܝܢ ܒܙܰܒܢܳܐ ܕܠܳܐ ܙܳܕܶܩ. ܗܳܝ ܓܶܝܪ ܕܰܒܙܰܒܢܳܐ ܕܙܳܕܶܩ ܐܺܝܬܶܝܗ̇ ܚܳܫܚܳܝܬܳܐ܆ ܟܰܕ ܒܙܰܒܢܳܐ ܕܠܳܐ ܙܳܕܶܩ ܡܶܬܩܰܪܒܳܐ܆ ܠܳܐ ܚܳܫܚܳܝܬܳܐ ܐܺܝܬܶܝܗ̇܆ ܐܰܟܙܢܳܐ ܕܶܐܢ ܐ̱ܢܳܫ ܠܗܰܘ ܕܰܠܩܰܘܡܬܳܐ ܕܓܰܒܪܳܐ ܐܶܬܳܐ܆ ܠܘܳܬ ܬܕܳܐ ܕܰܡܪܰܒܝܳܢܺܝܬܳܐ ܢܩܰܪܶܒ܆ ܐܰܝܟ ܕܰܠܡܶܬܬܰܪܣܳܝܽܘ ܒܚܰܠܒܳܐ.

ܠܗܶܝܢ ܗܳܟܺܝܠ ܠܗܳܠܶܝܢ ܢܛܽܘܪ̈ܳܬܳܐ ܢܳܡܽܘܣ̈ܳܝܳܬܳܐ܆ ܠܗܳܠܶܝܢ ܟܺܝܬ. ܕܫܽܘ̈ܥܝܳܬܳܐ ܡܣܰܝ̈ܒܳܬܳܐ ܘܣܳܒ̈ܬܳܢܳܝܳܬܳܐ ܩܪܳܐ ܐܶܢܶܝܢ ܦܰܘܠܽܘܤ܆ ܡܶܛܽܠ ܝܽܗ̱ܘ̈ܕܳܝܶܐ ܗܳܢܽܘܢ ܕܰܕܠܳܐ ܒܙܰܒܢܗܶܝܢ ܘܰܡܣܰܝܒܳܐܺܝܬ ܡܶܬܚܰܫܚܺܝܢ ܗ̱ܘܰܘ ܒܗܶܝܢ܆ ܠܗܶܝܢ ܟܰܕ ܠܗܶܝܢ܆ ܐܳܦ ܕܽܘܪܳܫܳܐ ܦܰܓܪܳܢܳܝܳܐ ܟܰܢܺܝ ܐܶܢܶܝܢ. ܦܰܓܪ̈ܳܢܳܝܳܬܳܐ ܓܶܝܪ ܐܺܝܬܰܝܗܶܝܢ ܗ̱ܘܰܝ̈ ܢܛܽܘܪ̈ܳܬܳܐ ܕܢܳܡܽܘܣܳܐ܆ ܐܳܦܶܢ ܬܶܐܘܳܪ̈ܺܝܐܤ܆ ܪ̈ܽܘܚܳܢܳܝܳܬܳܐ ܘܕܰܠܚܰܪܬܳܐ ܢܦܰܩ̈ܶܝܢ ܠܰܥܒܳܕܳܐ܆ ܪ̈ܳܫܡܳܢ ܗ̱ܘܰܝ̈. ܐܰܝܟ ܓܶܝܪ ܗܳܝ ܕܓܰܠܝܳܐܺܝܬ ܡܶܬܚܰܙܝܳܐ ܠܘܳܬ ܕܽܘܟܳܝܳܐ ܕܦܰܓܪܳܐ ܥܢܶܝܢ ܗ̱ܘܰܘ܆ ܘܰܠܘܳܬ ܢܽܘܩ̈ܳܕܶܐ ܕܒܶܣܪܳܐ܆ ܗܳܢܽܘܢ ܕܳܐܦ ܒܩܰܠܺܝܠ ‌ܐܺܝܬ ܗ̱ܘܳܐ ܒܗܽܘܢ ܝܽܘܬܪܳܢܳܐ܆ ܟܡܳܐ ܕܗܳܠܶܝܢ ܕܛܶܠܳܢܺܝܬܳܐ ܐܰܚܺܝ̈ܕܳܢ ܗ̱ܘܰܝ̈܆ ܘܢܳܡܽܘܣܳܐ ܗܰܘ ܕܡܽܘܫܶܐ ܦܘܠܝܛܘܬܝܢܐ ܗܳܘܶܐ ܗ̱ܘܳܐ.

ܟܰܕ ܡܶܢ ܗܳܢܳܐ ܗܳܟܺܝܠ ܕܽܘܪܳܫܳܐ ܦܰܓܪܳܢܳܝܳܐ. ܘܕܽܘܒܳܪܳܐ ܢܳܡܽܘܣܳܝܳܐ܆ ܡܰܪܚܶܩ ܗ̱ܘܳܐ ܠܶܗ ܫܠܺܝܚܳܐ ܠܛܺܝܡܳܬܶܐܽܘܤ܆ ܐܰܝܟ ܡܰܢ ܕܡܶܢ ܝܽܗ̱ܘ̈ܕܳܝܶܐ ܢܳܓܶܕ ܗ̱ܘܳܐ ܠܓܶܢܣܳܐ ܗܰܘ ܕܡܶܢ ܥܰܡܳܐ. ܠܘܳܬ ܚܰܝ̈ܶܐ ܐܳܘܰܢܓ̈ܶܠܳܝܶܐ ܡܰܥܒܰܪ ܣܳܐܶܡ ܠܶܗ. ܟܰܕ ܐܳܡܰܪ: ܫܰܦܺܝܪܽܘܬ ܕܶܚܠܬܳܐ ܕܶܝܢ܆ ܠܘܳܬ ܟܽܠ ܡܶܕܶܡ ܡܰܘܬܪܳܢܺܝܬܳܐ ܐܺܝܬܶܝܗ̇܆ ܕܺܐܝܬ ܠܳܗ̇ ܫܽܘܘܕܳܝܳܐ ܕܚܰܝ̈ܶܐ܆ ܕܗܳܢܽܘܢ ܕܗܳܫܳܐ܆ ܘܰܕܗܳܢܽܘܢ ܕܰܥܬܺܝܕܺܝܢ. ܡܶܢ ܠܗܰܠ ܡܰܢ ܓܶܝܪ ܕܰܡܠܶܐ ܙܰܒܢܳܐ ܐܺܝܬܰܘܗ̱ܝ ܦܽܘܪܥܳܢܳܐ܆ ܐܰܪܥܳܐ ܕܡܽܘܠܟܳܢܳܐ ܘܡܶܬܥܰܫܢܳܢܽܘܬܳܐ ܕܥܰܠ ܒܥܶܠ̈ܕܒܳܒܶܐ. ܡܫܰܪܬܚܽܘܬܳܐ ܕܦܺܐܪ̈ܶܐ܆ ܘܟܰܗܺܝܢܽܘܬܳܐ ܘܦܽܘܪܦܳܥܳܐ ܕܰܠܘܳܬ ܗܳܠܶܝܢ ܕܩܰܪ̈ܺܝܒܳܢ. ܡܶܢ ܗܳܪܟܳܐ ܕܶܝܢ܆ ܣܳܝܽܘܡܽܘܬ ܒܢܰܝ̈ܳܐ. ܡܰܘܗܰܒܬܳܐ ܥܰܬܺܝܪܬܳܐ ܕܪܽܘܚܳܐ. ܘܥܰܡ ܚܰܝ̈ܶܐ ܗܳܠܶܝܢ ܕܩܰܪܺܝܒܺܝܢ܆ ܐܳܦ ܗܳܠܶܝܢ ܕܰܥܬܺܝܕܺܝܢ܆ ܕܫܽܘܠܳܡܳܐ ܠܰܝܬ ܠܗܽܘܢ.

ܘܰܚܙܺܝ ܠܺܝ ܠܣܰܟܽܘܠܬܳܢܽܘܬܳܐ ܕܬܰܪܥܺܝܬܳܐ ܫܠܺܝܚܳܝܬܳܐ. ܠܳܐ ܓܶܝܪ ܐܶܡܰܪ: ܕܕܽܘܪܳܫܳܐ ܦܰܓܪܳܢܳܝܳܐ܆ ܡܰܘܬܪܳܢܳܐ ܐܺܝܬܰܘܗ̱ܝ. ܐܶܠܳܐ ܐܶܡܰܪ: ܕܰܒܩܰܠܺܝܠ ‌ܐܺܝܬܰܘܗ̱ܝ ܡܰܘܬܪܳܢܳܐ. ܢܶܬܶܠ ܓܶܝܪ ܐܳܡܰܪ: ܕܳܐܦ ܗܳܫܳܐ ܐܰܚܺܝܕ܆ ܘܰܥܕܰܟܺܝܠ ܦܘܠܝܛܘܬܝܢܐ ܗܳܘܶܐ ܘܕܺܝܠܶܗ ܐܺܝܬܰܘܗ̱ܝ ܕܽܘܒܳܪܳܐ. ܐܶܠܳܐ ܐܳܦܶܢ ܗܳܕܶܐ ܢܶܬܶܠ܆ ܒܩܰܠܺܝܠ ܡܶܕܶܡ ܡܰܘܬܰܪ. ܕܰܡܠܶܐ ܙܰܒܢܳܐ ܓܶܝܪ ܐܺܝܬ ܠܶܗ ܦܽܘܪ̈ܥܳܢܶܐ. ܫܰܦܺܝܪܽܘܬ ܕܶܚܠܬܳܐ ܕܶܝܢ܆ ܗܳܢܰܘ ܕܶܝܢ ܕܽܘܒܳܪܳܐ ܗܰܘ ܐܶܘܰܢܓܶܠܳܝܳܐ܆ ܡܽܘܠܟܳܢܳܐ ܕܚܰܝ̈ܶܐ ܗܳܢܽܘܢ ܕܰܥܬܺܝܕܺܝܢ ܐܺܝܬ ܠܶܗ. ܡܶܬܬܰܘܕܝܳܢܳܐܺܝܬ ܓܶܝܪ ܐܺܝܬܰܘܗ̱ܝ ܪܰܒܳܐ܆ ܐ̱ܪܳܙܳܐ ܗܰܘ ܕܫܰܦܺܝܪܽܘܬ ܕܶܚܠܬܳܐ܆ ܗܰܘ ܕܰܒܝܰܕ ܐܶܘܰܢܓܶܠܺܝܽܘܢ ܐܶܬܟܪܶܙ.

ܐ̱ܚܪ̈ܳܢܶܐ ܕܶܝܢ ܟܰܕ ܠܕܽܘܪܳܫܳܐ ܦܰܓܪܳܢܳܝܳܐ ܐܳܡܪܺܝܢ ܕܺܐܝܬܰܘܗ̱ܝ܆ ܥܰܡ̈ܠܶܐ ܕܥܳܢܘܳܝܽܘܬܳܐ. ܨܰܘܡܳܐ. ܠܳܐ ܣܚܳܬܳܐ. ܡܰܫܟܒܳܐ ܕܥܰܠ ‌ܐܰܪܥܳܐ܆ ܘܗܳܠܶܝܢ ܐ̱ܚܪ̈ܳܢܝܳܬܳܐ ܕܒܺܐܝ̈ܕܰܝܗܶܝܢ ܦܰܓܪܳܐ ܡܶܬܟܒܶܫ. ܫܰܦܺܝܪܽܘܬ ܕܶܚܠܬܳܐ ܕܶܝܢ܆ ܕܰܟܝܽܘܬܳܐ ܗܳܝ ܕܰܒܚܽܘܫܳܒ̈ܶܐ. ܠܩܰܘ̈ܡܶܐ ܡܰܢ ܓܶܝܪ. ܘܚܺܐܦ̈ܶܐ ܪ̈ܳܚܡܰܝ ܪ̈ܓܺܝܓܳܬܳܐ ܕܦܰܓܪܳܐ܆ ܝܳܕܥܳܐ ܪܰܚܺܝܩܽܘܬܳܐ ܗܳܝ ܕܡܶܢ ܡܶܐܟ̈ܠܳܬܳܐ ܠܰܡܦܰܓܳܕܽܘ܆ ܠܳܐ ܕܶܝܢ ܬܽܘܒ܆ ܐܳܦ ܡܶܢ ܚܽܘܫܳܒ̈ܶܐ ܗܳܢܽܘܢ ܙܰܢܳܝ̈ܶܐ ܐܰܪܚܩܰܬ܆ ܐܰܘ ܠܡܶܐܚܰܕ ܚܶܡܬܳܐ ܦܝܳܣܳܐ ܥܶܒܕܰܬ܆ ܐܰܘ ܠܥܽܘܩܣܳܐ ܕܰܚܣܳܡܳܐ ܐܰܩܗܝܰܬ܆ ܐܰܘ ܠܫܳܢܝܽܘܬܳܐ ܕܪܶܚܡܰܬ ܟܶܣܦܳܐ ܟܠܳܬ܆ ܐܰܘ ܠܰܡܫܰܩܠܽܘܬܳܐ ܫܰܢܩܰܬ܆ ܐܰܘ ܠܚܽܘܒܳܐ ܗܰܘ ܕܰܠܘܳܬ ܩܰܪܺܝܒܳܐ ܪܕܳܬ ܘܰܐ‌ܠܦܰܬ܆ ܐܰܝܟܰܢܳܐ ܟܺܝܬ ܕܡܳܕܝܢ ܕܽܘܪܳܫܳܐ ܦܰܓܪܳܢܳܝܳܐ܆ ܠܒܶܣܪܳܐ ܒܰܠܚܽܘܕ ܡܰܟܶܟ܆ ܘܰܠܘܳܬ ܡܶܕܶܡ ܙܥܽܘܪܳܐ܆ ܗܳܢܰܘ ܕܶܝܢ ܠܘܳܬ ܗܳܕܶܐ ܒܰܠܚܽܘܕ.

ܐܰܘܬܰܪ ܫܰܦܺܝܪܽܘܬ ܕܶܚܠܬܳܐ ܕܶܝܢ܆ ܗܳܝ ܟܺܝܬ ܕܺܐܝܬܶܝܗ̇ ܢܛܽܘܪܬܳܐ ܕܚܽܘܫܳܒ̈ܶܐ܆ ܠܢܰܦܫܳܐ ܡܕܰܟܝܳܐ. ܘܟܰܕ ܠܒܰܪܢܳܫܳܐ ܗܰܘ ܥܰܬܺܝܩܳܐ ܡܰܫܠܚܳܐ܆ ܠܘܳܬ ܬܶܐܽܘܪܺܝܰܐ ܟܝܳܢܳܝܬܳܐ ܡܰܝܬܝܳܐ܆ ܘܓܳܠܝܳܐ ܐܰܝܟ ܡܳܐ ܕܡܶܬܕܪܶܟ ܠܰܒܢܰܝ̈ܢܳܫܳܐ܆ ܕܰܐܝܠܶܝܢ ܐܺܝܬܰܝܗܶܝܢ ܡ̈ܶܠܶܐ ܕܒܳܪܽܘܝܽܘܬܳܐ܆ ܘܰܠܡܶܓܫܰܦ ܒܬܶܐܘܳܠܳܓܺܝܰܐ ܥܳܒܕܳܐ܆ ܗܳܝ ܕܡܶܣܬܰܟܝܳܐ ܕܺܐܝܬܶܝܗ̇ ܛܽܘܒܬܳܢܽܘܬܳܐ ܗܳܝ ܐ̱ܚܪܳܢܳܝܬܳܐ.

ܡܶܛܽܠ ܗܳܟܺܝܠ ܕܫܰܦܺܝܪܽܘܬ ܕܶܚܠܬܳܐ ܠܗܳܢܽܘܢ ܕܡܶܬܕܰܒܪܺܝܢ ܒܳܗ̇܆ ܐܰܝܟ ܗܳܠܶܝܢ ܦܽܘܪ̈ܥܳܢܶܐ ܝܳܗܒܳܐ܆ ܘܳܐܦ ܒܚܰܝ̈ܶܐ ܗܳܠܶܝܢ ܕܗܳܪܟܳܐ ܩܰܪܺܝܒܺܝܢ܆ ܡܰܛܥܡܳܐ ܠܰܒ̈ܢܰܝ ܬܰܪܒܺܝܬܳܗ̇ ܡܶܢ ܚܰܝ̈ܶܐ ܗܳܠܶܝܢ ܕܰܥܬܺܝܕܺܝܢ܆ ܟܰܕ ܒܰܕܡܽܘܬ ܪܰܗܒܽܘܢܳܐ ܕܚܰܝ̈ܶܐ ܡܫܰܟܢܳܐ ܠܗܽܘܢ ܬܶܐܽܘܪܺܝܰܐ ܗܳܝ ܕܗܳܪܟܳܐ܆ ܕܗܳܠܶܝܢ ܕܬܰܡܳܢ ܡܶܣܬܰܒܪ̈ܳܢ܆ ܡܶܛܽܠܗܳܕܶܐ ܗܽܘ ܫܠܺܝܚܳܐ܆ ܕܺܐܝܬ ܠܳܗ̇ ܫܽܘܘܕܳܝܳܐ ܐܰܘ ܟܺܝܬ ܡܽܘܠܟܳܢܳܐ ܕܚܰܝ̈ܶܐ ܐܰܡܪܳܗ̇܆ ܕܗܳܢܽܘܢ ܕܗܳܫܳܐ܆ ܘܰܕܗܳܢܽܘܢ ܕܰܥܬܺܝܕܺܝܢ. ܠܗܳܠܶܝܢ ܓܶܝܪ ܚܰܝ̈ܶܐ ܕܩܰܪܺܝܒܺܝܢ܆ ܠܳܐ ܐ̱ܢܳܫ ܡܳܪܳܢܳܐܺܝܬ ܐܳܡܰܪ ܚܰܝ̈ܶܐ. ܐܶܠܳܐ ܡܰܘܬܳܐ܆ ܠܗܳܢܽܘܢ ܕܰܒܗܽܘܢ ܒܰܪܢܳܫܳܐ ܡܗܰܒܶܒ ܟܺܝܬ ܘܢܳܬܰܪ^[10]܆ ܘܠܰܚܒܳܠܳܐ ܡܶܫܬܰܕܰܪ.

ܗܰܘ ܕܶܝܢ ܕܰܒܝܰܕ ܫܰܦܺܝܪܽܘܬ ܕܶܚܠܬܳܐ ܡܶܬܕܰܒܰܪ܆ ܘܰܠܫܽܘܘ̈ܕܳܥܶܐ ܘܣܽܘ̈ܟܳܠܶܐ ܕܚܰܝ̈ܶܐ ܗܳܢܽܘܢ ܕܰܥܬܺܝܕܺܝܢ ܩܳܛܶܦ܆ ܚܰܝ̈ܶܐ ܥܳܒܶܕ ܠܗܽܘܢ ܠܶܗ܆ ܐܳܦ ܠܚܰܝ̈ܶܐ ܗܳܢܽܘܢ ܕܥܳܠܡܳܐ ܗܳܢܳܐ ܕܩܰܪܺܝܒ܆ ܒܗܳܝ ܕܳܐܦ ܗܳܪܟܳܐ ܗܘ̣ܳܐ ܒܰܡܫܰܘܬܦܽܘܬܳܐ ܕܚܰܝ̈ܶܐ ܗܳܢܽܘܢ ܫܰܪܺܝܪ̈ܶܐ. ܫܰܦܺܝܪܽܘܬ ܕܶܚܠܬܳܐ ܓܶܝܪ܆ ܡܰܘܠܟܳܢܳܐ ܕܚܰܝ̈ܶܐ ܐܺܝܬ ܠܳܗ̇. ܕܗܳܢܽܘܢ ܕܗܳܫܳܐ ܘܰܕܗܳܢܽܘܢ ܕܰܥܬܺܝܕܺܝܢ. ܗܳܠܶܝܢ ܕܶܝܢ ܐܳܡܪܺܝܢ ܚ̱ܢܰܢ܆ ܠܰܘ ܐܰܝܟܰܢܐ ܕܐ̱ܢܳܫ ܟܰܕ ܡܰܒܣܶܐ ܒܥܰܡ̈ܠܶܐ ܕܥܳܢܘܳܝܽܘܬܳܐ܆ ܒܰܕܡܽܘܬ ܐܰܕܳܠܦܺܝܽܘܤ ܗܰܘ ܫܟܺܝܪ ܫܡܳܐ ܟܰܕ ܐܶܬܟܪܰܗ ܗܶܪܣܺܝܤ ܗܳܝ ܕܰܡܨܰܠ̈ܝܳܢܶܐ܆ ܠܦܰܓܪܳܐ ܡܰܢ ܢܫܰܡܶܢ܆ ܕܰܟܝܽܘܬܳܐ ܕܶܝܢ ܕܬܰܪܥܺܝܬܳܐ ܢܶܫܬܰܘܕܶܐ܆ ܘܟܰܕ ܡܶܢ ܨܰܘܡܳܐ ܘܡܶܢ ܡܚܰܡܣܢܳܢܽܘܬܳܐ ܗܳܝ ܕܫܰܪܟܳܐ ܡܰܡܶܐܢ ܘܡܶܬܩܰܛܰܥ܆ ܐܰܝܟ ܡܰܢ ܕܩܰܠܺܝܠ ܡܶܕܶܡ ܟܶܐܡܰܬ ܐܰܘܬܪܰܬ܆ ܢܶܬܪܰܘܪܰܒ ܡܫܰܩܠܳܐܺܝܬ܆ ܕܫܰܦܺܝܪ ܕܶܚܠܬܳܐ ܐܺܝܬܰܘܗ̱ܝ.

ܗܰܘ ܓܶܝܪ ܕܰܠܥܰܡ̈ܠܶܐ ܕܦܰܓܪܳܐ ܫܕܳܐ ܡܶܢܶܗ܆ ܘܒܰܒܣܳܡܳܐ ܡܶܬܦܰܪܦܰܥ܆ ܘܳܐܡܰܪ ܕܰܒܬܰܪܥܺܝܬܶܗ ܕܰܟܝܳܐ ܐܺܝܬܰܘܗ̱ܝ܆ ܘܰܒܚܽܘܫܳܒ̈ܶܐ ܗܳܢܽܘܢ ܕܙܳܢܝܽܘܬܳܐ. ܐܰܘ ܕܗܳܢܽܘܢ ܚܰܫ̈ܶܐ ܐ̱ܚܪ̈ܳܢܶܐ ܠܳܐ ܡܶܬܛܰܘܰܫ ܕܕܳܡܶܐ ܐܺܝܬܰܘܗ̱ܝ܆ ܠܗܰܘ ܕܡܶܢ ܢܽܘܪܳܐ ܡܰܢ ܝܳܩܶܕ. ܘܡܶܬܢܰܒܪܰܫ܆ ܐܳܡܰܪ ܕܶܝܢ ܕܰܒܝܰܩܕܳܢܳܐ ܐܰܘ ܒܬܶܢܳܢܳܐ ܠܳܐ ܡܰܪܓܶܫ. ܒܗܳܝ. ܕܳܐܦ ܡܰܬܠܳܐ ܕܚܶܟܡܬܳܐ ܐܶܬܕܰܡܰܪ ܒܳܗ̇. ܟܰܕ ܗܳܟܰܢܳܐ ܐܳܡܰܪ: ܢܶܩܛܽܘܪ ܐ̱ܢܳܫ ܢܽܘܪܳܐ ܒܥܽܘܒܶܗ܆ ܠܢܰܚ̈ܬܶܐ ܕܶܝܢ ܕܺܝܠܶܗ ܠܳܐ ܢܰܘܩܶܕ. ܐܰܘ ܢܗܰܠܶܟ ܐ̱ܢܳܫ ܥܰܠ ܓܽܘܡܪ̈ܶܐ ܕܢܽܘܪܳܐ܆ ܠܪ̈ܶܓܠܶܐ ܕܶܝܢ ܕܺܝܠܶܗ܆ ܠܳܐ ܢܰܘܩܶܕ^[11].

ܠܐ ܗܳܟܺܝܠ ܙܳܕܶܩ ܠܡܰܒܣܳܝܽܘ ܥܰܠ ܡܰܪ̈ܕܘܳܬܳܐ ܗܳܠܶܝܢ ܕܥܳܢܘܳܝܽܘܬܳܐ܆ ܐܳܦܠܐ ܙܳܕܶܩ ܠܡܰܗܡܳܝܽܘ ܒܕܽܘܪܳܫܳܐ ܦܰܓܪܳܢܳܝܳܐ܆ ܗܰܘ ܟܺܝܬ ܕܺܐܝܬܰܘܗ̱ܝ ܦܺܝܠܳܣܽܘܦܺܝܰܐ ܗܳܝ ܣܳܥܽܘܪܳܝܬܳܐ. ܐܶܠܳܐ ܕܢܶܐܚܕܺܝܗ̇ ܙܳܕܶܩ. ܒܟܽܠܶܗ ܚܰܝܠܰܢ܆ ܐܰܝܟܰܢܳܐ ܕܒܺܐܝ̈ܕܶܝܗ̇ ܢܶܬܬܰܝܬܶܐ ܠܘܳܬ ܫܰܦܺܝܪܽܘܬ ܕܶܚܠܬܳܐ܆ ܗܳܝ ܟܺܝܬ ܕܺܐܝܬܶܝܗ̇ ܕܰܟܝܽܘܬܳܐ ܗܳܝ ܕܰܒܬܰܪܥܺܝܬܳܐ܆ ܗܳܝ ܕܦܺܐܪܳܐ ܕܺܝܠܳܗ̇ ܐܺܝܬܶܝܗ̇܆ ܬܶܐܽܘܪܺܝܰܐ ܗܳܝ ܟܝܳܢܳܝܬܳܐ ܘܗܝ ܕܬܶܐܽܘܠܳܘܓܺܝܰܐ. ܣܳܥܽܘܪܽܘܬܳܐ ܓܶܝܪ܆ ܕܽܘܪܟܬܳܐ^[12] ܗ̱ܝ ܕܬܶܐܽܘܪܺܝܰܐ. ܐܰܝܟܰܢܳܐ ܕܶܐܡܰܪ ܓܪܺܝܓܽܘܪܺܝܽܘܤ ܗܰܘ ܡܡܰܠܶܠ ܐܰ‌ܠܳܗܳܝ̈ܳܬܳܐ.

ܐܶܢ ܗܳܟܺܝܠ ܒܣܳܥܽܘܪܽܘܬܳܐ ܢܶܒܣܶܐ܆ ܣܦܺܝ̈ܩܶܐ ܢܶܗܘܐ ܡܶܢ ܟܽܠܳܗ̇ ܦܺܝܠܳܣܽܘܦܶܝܰܐ. ܐܳܦ ܓܶܝܪ ܗܳܢܽܘܢ ܕܰܠܫܶܬܶܐܣܬܶܗ ܕܒܰܝܬܳܐ ܙܰܥܙܰܥܘ܆ ܠܟܽܠܶܗ ܒܰܝܬܳܐ ܙܰܡܶܢܘ ܡܰܦܽܘܠܬܳܐ. ܐܳܦܶܢ ܓܶܝܪ ܠܘܳܬ ܗܳܝ ܕܡܶܢ ܟܽܠ ܪܺܝܫܳܝܳܐ ܘܰܡܥܰܠܝܳܐ ܕܰܡܝܰܬܪܽܘܬܳܐ. ܢܶܡܛܶܐ ܐ̱ܢܳܫ܆ ܣܢܺܝܩ ܗ̱ܘ̣ ܥܰܠ ܗܳܝ ܕܰܒܝܰܕ ܥܳܢܘܳܝܽܘܬܳܐ܆ ܢܦܰܓܶܕ ܠܚܺܐܦ̈ܶܐ ܕܦܰܓܪܳܐ ܗܳܢܽܘܢ ܪ̈ܳܚܡܰܝ ܪ̈ܓܺܝܓܳܬܳܐ ܘܠܳܐ ܡܶܬܠܰܒ̈ܟܳܢܶܐ. ܗܳܝ ܟܺܝܬ ܕܰܒܩܰܠܺܝܠ ‌ܐܺܝܬܶܝܗ̇ ܡܰܘܬܪܳܢܺܝܬܳܐ. ܐܶܡܰܬܝ ܕܠܳܐ ܟܕܺܝܢܳܐ ܥܰܡܳܗ̇ ܐܰܟܚܕܳܐ ܫܰܦܺܝܪܽܘܬ ܕܶܚܠܬܳܐ܆ ܗܳܢܰܘ ܕܶܝܢ ܢܛܽܘܪܬܳܐ ܟܺܝܬ ܕܚܽܘܫܳܒ̈ܶܐ ܘܕܰܟܝܽܘܬܳܐ.

ܕܽܘܪܳܫܳܐ ܡܰܢ ܓܶܝܪ ܦܰܓܪܳܢܳܝܳܐ܆ ܐܺܝܬ ܗܘ ܕܡܰܪܡܶܠ ܡܶܢ ܫܰܦܺܝܪܽܘܬ ܕܶܚܠܬܳܐ܆ ܘܩܰܠܺܝܠ ܡܰܘܬܰܪ. ܫܰܦܺܝܪܽܘܬ ܕܶܚܠܬܳܐ ܕܶܝܢ ܗܳܝ ܕܰܠܘܳܬ ܟܽܠ ܡܶܕܶܡ ܡܰܘܬܪܳܐ܆ ܕܰܤܛܰܪ ܡܶܢ ܕܽܘܪܳܫܳܐ ܦܰܓܪܳܢܳܝܳܐ ܬܶܗܘܶܐ ܒܐ̱ܢܳܫ ܘܬܶܬܩܒܰܥ܆ ܕܠܳܐ ܦܽܘܪܣܳܐ ܗ̱ܝ. ܐܶܢ ܓܶܝܪ ܠܰܘ ܒܟܽܠ ܝܽܘܡ ܢܡܺܝܬ ܐܶܢܽܘܢ ܠܗܰܕܳܡ̈ܶܐ ܗܳܢܽܘܢ ܕܥܰܠ ‌ܐܰܪܥܳܐ܆ ܠܳܐ ܝܳܕܰܥ ܐ̱ܢܳܐ ܐܶܢ ܢܺܚܶܐ ܒܰܢ ܡܬܽܘܡ ܡܫܺܝܚܳܐ. ܐܳ‌ܠܨܳܐ ܗܳܟܺܝܠ ܥܰܠ ܕܽܘܪܳܫܳܐ ܦܰܓܪܳܢܳܝܳܐ܆ ܐܳܦ ܥܰܠ ܫܰܦܺܝܪܽܘܬ ܕܶܚܠܬܳܐ܆ ܐܰܝܟܰܢܳܐ ܕܰܐܝܟ ܕܡܰܨܝܳܐ ܕܬܶܬܕܪܶܟ ܠܰܒܢܰܝ̈ܢܳܫܳܐ܆ ܠܘܳܬ ܗܳܝ ܕܰܡܫܰܡܠܝܳܐ ܢܶܬܡܰܛܶܐ.

ܕܰܐܝܟ ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܦܰܘܠܽܘܤ܆ ܕܰܒܬܰܪ̈ܬܰܝܗܶܝܢ ܡܶܬܚܰܫܰܚ ܗ̱ܘܳܐ ܐܰܟܚܕܳܐ܆ ܘܒܰܙܒܰܢ ܡܰܢ ܟܰܕ ܐܳܡܰܪ ܗ̱ܘܳܐ: ܡܥܰܨܰܪ ܐ̱ܢܳܐ ܠܦܰܓܪܳܐ ܕܺܝܠܝ ܘܰܡܫܰܥܒܶܕ ܐ̱ܢܳܐ܆ ܕܕܰܠܡܳܐ ܟܰܕ ܠܰܐ̱ܚܪ̈ܳܢܶܐ ܐܰܟܪܙܶܬ܆ ܐܶܢܳܐ ܡܰܣܠܝܳܐ ܐܶ݀ܗܘܶܐ^[13]. ܒܰܙܒܰܢ ܕܶܝܢ܆ ܟܰܕ ܚܽܘܫܳܒ̈ܶܐ ܣܳܚܦܺܝܢ ܚ̱ܢܰܢ܆ ܘܟܽܠ ܪܰܘܡܳܐ ܕܡܶܬܬܪܺܝܡ ܠܽܘܩܒܰܠ ܝܺܕܰܥܬܳܐ ܕܰܐ‌ܠܳܗܳܐ܆ ܘܫܳܒܶܝܢܰܢ ܠܟܽܠ ܬܰܪܥܺܝܬܳܐ ܠܡܶܫܬܰܡܥܳܢܽܘܬܶܗ ܕܰܡܫܺܝܚܳܐ^[14]. ܘܬܽܘܒ܆ ܒܫܰܗܪܳܐ ܙܰܒ̈ܢܺܝܢ ܣܰܓܺܝ̈ܳܐܢ܆ ܒܟܰܦܢܳܐ ܘܰܒܨܶܗܝܳܐ܆ ܒܨܰܘܡܳܐ ܙܰܒ̈ܢܺܝܢ ܣܰܓܺܝ̈ܳܐܢ܆ ܒܩܽܘܪܫܳܐ ܘܰܒܥܰܪܛܶܠܳܝܽܘܬܳܐ^[15]. ܘܬܽܘܒ ܡܶܛܽܠ ‌ܐ̱ܢܳܫܺܝ̈ܢ ܐܳܡܰܪ: ܗܳܢܽܘܢ ܟܺܝܬ ܕܠܰܥܒܳܕܶܗ ܕܢܳܡܽܘܣܳܐ. ܡܚܰܘܶܝܢ܆ ܕܰܟܬܺܝܒ ܒܠܶܒܰܘ̈ܳܬܳܐ ܕܺܝܠܗܽܘܢ. ܟܰܕ ܣܳܗܕܳܐ ܐܰܟܚܕܳܐ ܬܺܐܪܬܳܐ ܕܺܝܠܗܽܘܢ^[16]܆ ܘܒܰܡܨܰܥܬܳܐ ܚܽܘܫܳܒ̈ܶܐ ܡܩܰܛܪܓܺܝܢ ܠܰܚ̈ܕܳܕܶܐ܆ ܐܰܘ ܐܳܦ ܢܳܦܩܺܝܢ ܪܽܘܚܳܐ ܒܝܰܘܡܳܐ ܗܰܘ܆ ܐܶܡܰܬܝ ܕܕܳܐܶܢ ܐܰ‌ܠܳܗܳܐ ܟܰܣ̈ܝܳܬܳܐ ܕܰܒܢܰܝ̈ܢܳܫܳܐ܆ ܐܰܝܟ ܐܶܘܰܢܓܶܠܺܝܽܘܢ ܕܺܝܠܝ ܒܝܰܕ ܝܶܫܽܘܥ ܡܫܺܝܚܳܐ^[17]. ܐܳܦ ܡܶܛܽܠܳܬܶܗ ܕܶܝܢ ܕܦܰܘܠܽܘܤ܆ ܘܡܶܛܽܠ ܒܰܪܢܰܒܳܐ܆ ܟܬܳܒܳܐ ܗܰܘ ܕܰܦܪܰܟܣܺܝܤ ܡܶܫܬܰܥܶܐ܆ ܕܟܰܕ ܨܰܠܺܝܘ ܥܰܡ ܨܰܘ̈ܡܶܐ ܐܰܓܥܶܠܘ ܠ̱ܐܢܳܫܺܝ̈ܢ ܠܡܳܪܝܳܐ^[18]. ܗܰܘ ܕܗܰܝܡܶܢܘ ܗ̱ܘܰܘ ܒܶܗ.

ܗܳܠܶܝܢ ܬܠܳܬܳܐ ܦܽܘܫܳܩ̈ܶܐ܆ ܥܰܠ ܦܶܬܓܳܡܳܐ ܗܳܢܳܐ ܫܠܺܝܚܳܝܳܐ ܕܩܰܕܺܝܡ ܣܺܝܡ܆ ܓܒܶܝܢ ܚ̱ܢܰܢ܆ ܘܳܐܦܠܳܐ ܠܚܰܕ ܡܶܢܗܽܘܢ ܡܰܣܠܶܝܢ ܚ̱ܢܰܢ. ܐܳܦܠܳܐ ܓܶܝܪ ܣܰܩܽܘܒܠܳܝ̣ܺܝ̣ܢ ܠܰܚ̈ܕܳܕܶܐ܆ ܘܟܽܠܗܽܘܢ ܠܘܳܬ ܢܺܝܫܳܐ ܬܪܺܝܨܳܐ܆ ܘܫܰܦܺܝܪ ܕܶܚܠܬܳܐ ܚܳܝܪܺܝܢ. ܥܰܬܺܝܪܬܳܐ ܓܶܝܪ ܘܣܰܓܺܝܳܐܐ ܐܳܕܫ̈ܶܐ ܐܺܝܬܶܝܗ̇ ܬܰܪܥܺܝܬܳܐ ܕܡ̈ܶܠܶܐ ܕܪܽܘܚܳܐ.

ܙܰܒܢܰܐ ܗ̱ܘ ܕܶܝܢ ܡܶܟܺܝܠ܆ ܕܳܐܦ ܠܘܳܬ ܗܳܝ ܐ̱ܚܪܺܬܳܐ ܢܺܐܬܶܐ܆ ܘܡܶܠܬܳܐ ܙܥܽܘܪܬܐ ܢܶܬܶܠ܆ ܗܳܝ ܟܺܝܬ ܕܡܳܪܰܢ ܘܰܐ‌ܠܳܗܰܢ ܝܶܫܽܘܥ ܡܫܺܝܚܳܐ ܠܘܳܬ ܡܰܪܝܰܡ ܐܶܡܰܪ ܡܶܢ ܒܳܬܰܪ ܩܝܳܡܬܶܗ ܕܡܶܢ ܡܺܝ̈ܬܶܐ܆ ܠܳܐ ܬܶܓܫܦܺܝܢ ܒܺܝ܆ ܠܳܐ ܓܶܝܪ ܥܕܰܟܺܝܠ ܣܶܠܩܶܬ ܠܘܳܬ ܐܳܒܝ^[19].

ܐ̱ܢܳܫܺܝ̈ܢ ܓܶܝܪ ܐܳܡܪܺܝܢ: ܕܡܶܛܽܠ ܕܩܶܪܒܰܬ ܠܘܳܬܶܗ ܐܰܢ̱ܬܬܳܐ ܗܳܝ܆ ܘܓܶܫܦܰܬ ܠܘܳܬܶܗ ܥܰܡܳܗ̇ ܟܰܕ ܥܰܡܳܗ̇ ܕܬܰܪܥܺܝܬܳܐ܆ ܥܰܡ ܗܳܝ ܕܳܐܦ ܡܶܢ ܩܕܺܝܡ܆ ܟܰܕ ܘܠܳܐ ܡܶܕܶܡ ܡܝܰܬܪܳܐ ܐܶܬܪܰܥܝܰܬ ܡܶܛܽܠܳܬܶܗ܆ ܘܳܐܦܠܳܐ ܐܶܬܚܰܫܒܰܬ ܠܣܽܘܥܪܳܢܳܐ ܗܰܘ ܦܐܶܐ ܠܰܐܠܳܗܳܐ ܘܰܫܒܺܝܚܳܐ ܘܪܳܡܳܐ ܕܰܩܝܳܡܬܳܐ܆ ܐܶܠܳܐ ܐܰܣܒܪܰܬ ܬܽܘܒ ܥܠܰܘܗ̱ܝ ܕܰܐܝܟ ܕܰܒܛܶܟܣܳܐ ܗܰܘ ܩܰܕܡܳܝܳܐ܆ ܝܰܬܺܝܪ ܡܡܰܟܟ̣ܳܐܺܝܬ ܘܝܰܬܺܝܪ ܐ̱ܢܳܫܳܐܺܝܬ ܡܶܬܗܰܦܰܟ ܐܰܟܚܕܳܐ ܥܰܡ ܬܰܠܡܺܝܕܰܘ̈ܗ̱ܝ܆ ܟܰܕ ܗܳܕܶܐ ܗܳܝܕܶܝܢ. ܗܺܝ ܡܕܰܒܪܳܢܽܘܬܳܐ ܬܳܒܥܳܐ ܗ̱ܘܳܬ܆ ܡܶܛܽܠܗܳܕܶܐ ܟܰܕ ܡܥܰܠܶܐ ܘܡܰܣܶܩ ܠܳܗ̇ ܦܳܪܽܘܩܰܢ ܠܬܰܪܥܺܝܬܳܗ̇ ܠܘܳܬ ܫܡܰܝܳܐ܆ ܗܳܝ ܕܰܠܬܰܚܬ ܥܰܠ ‌ܐܰܪܥܳܐ ܣܺܝܡܳܐ ܗ̱ܘܳܬ. ܐܳܡܰܪ ܠܳܐ ܬܶܓܫܦܺܝܢ ܒܺܝ. ܠܳܐ ܓܶܝܪ ܥܕܰܟܺܝܠ ܣܶܠܩܶܬ ܠܘܳܬ ܐܳܒܝ. ܐܰܝܟ ܗܰܘ ܕܳܐܡܰܪ ܗ̱ܘܳܐ: ܠܳܐ ܬܶܓܫܦܺܝܢ ܝܰܬܺܝܪ ܡܥܰܩܒܳܢܳܐܺܝܬ܆ ܐܰܝܟ ܡܰܢ ܕܬܶܐܚܕܺܝܢܳܢܝ222. ܠܘܳܬ ܓܶܝܪ ܐܰܒܳܐ ܕܺܝܠܝ ܡܣܰܪܗܶܒ ܐ̱ܢܳܐ. ܟܒܰܪ ܓܶܝܪ ܐܳܦ ܕܒܳܥܝܳܐ ܗ̱ܘܳܬ ܕܬܶܐܚܽܘܕ ܚܰܝܠܬܳܢܳܐܺܝܬ ܘܰܒܟܽܠܶܗ ܚܰܝܠܳܗ̇ ܬܶܠܒܽܘܟ ܐܶܢܶܝܢ ܠܪ̈ܶܓܠܶܐ ܗܳܠܶܝܢ ܐܰ‌ܠܳܗܳܝ̈ܳܬܳܐ ܝܰܕܥܳܗ̇܆ ܡܶܢ ܚܰܕܽܘܬܳܐ ܘܡܶܢ ܡܶܬܬܙܺܝܥܳܢܽܘܬܳܐ ܪܳܚܡܰܬ ܐܰ‌ܠܳܗܳܐ. ܐܳܡܰܪ ܓܶܝܪ ܐܳܦ ܡܰܬܰܝ. ܡܶܛܽܠܳܬܳܗ̇ ܟܺܝܬ܆ ܘܡܶܛܽܠ ܡܰܪܝܰܡ ܗܳܝ ܐ̱ܚܪܺܬܳܐ܆ ܕܰܠܒܱ̈ܟܶܝܢ ܪ̈ܶܓܠܰܘܗ̱ܝ ܘܰܣܓ̈ܶܕܶܝܢ ܠܶܗ^[20].

ܐ̱ܚܪ̈ܳܢܶܐ ܕܶܝܢ ܐܳܡܪܺܝܢ܆ ܕܰܠܘܳܬ ܬܰܪܥܺܝܬܳܐ ܕܝܰܬܺܝܪ ܪܳܡܳܐ ܘܰܡܥܰܠܝܳܐ܆ ܡܰܣܩܳܐ ܠܰܢ ܒܰܪ̱ܬ ܩܳܠܳܐ ܗܳܝ ܕܡܳܪܰܢ. ܟܰܕ ܓܶܝܪ ܡܰܪܝܰܡ ܩܶܪܒܰܬ ܠܘܳܬܶܗ. ܝܰܬܺܝܪ ܚܰܡܺܝܡܳܐܺܝܬ܆ ܘܠܰܡܫܰܐܳܠܽܘ ܡܶܕܶܡ ܐܰ‌ܠܳܗܳܝܳܐ ܨܳܒܝܳܐ ܗ̱ܘܳܬ܆ ܘܰܕܬܶܬܓܠܶܐ ܠܳܗ̇ ܡܶܠܬܳܐ ܕܰܩܝܳܡܬܳܐ܆ ܘܰܕܬܶܓܫܽܘܦ ܒܥܽܘܡܩܳܐ ܕܰܡܕܰܒܪܳܢܽܘܬܳܐ ܗܳܝ ܕܡܶܛܽܠܳܬܰܢ. ܡܶܬܝܰܐܒܳܐ ܗ̱ܘܳܬ܆ ܐܶܡܰܪ ܠܘܳܬܳܗ̇ ܝܶܫܽܘܥ. ܗܰܘ ܕܝܳܕܰܥ ܟܰܣ̈ܝܳܬܳܐ ܕܠܶܒܰܘ̈ܳܬܳܐ. ܠܳܐ ܬܶܓܫܦܺܝܢ ܒܺܝ. ܠܳܐ ܓܶܝܪ ܥܕܰܟܺܝܠ ܣܶܠܩܶܬ̣ ܠܘܳܬ ܐܳܒܝ.

ܡܶܛܽܠ ܓܶܝܪ ܕܶܐܫܬܰܘܕܺܝ ܗ̱ܘܳܐ ܠܬܰܠ̈ܡܺܝܕܶܐ܆ ܕܡܶܢ ܒܳܬܰܪ ܡܰܣܰܩܬܳܐ ܕܠܰܫܡܰܝܳܐ ܒܝܰܕ ܡܶܐܬܺܝܬܳܐ ܕܪܽܘܚܳܐ ܩܰܕܺܝܫܳܐ܆ ܬܶܗܘܶܐ ܡܫܰܡܠܰܝܬܳܐ ܗܺܝ ܡܰܠܦܳܢܽܘܬܶܗ ܘܡܶܬܓܰܠܝܳܢܽܘܬܶܗ ܕܐ̱ܪܳܙܳܐ܆ ܟܰܕ ܐܳܡܰܪ: ܕܗܳܠܶܝܢ ܡܰܠܠܶܬ ܠܟܽܘܢ. ܟܰܕ ܠܘܳܬܟܽܘܢ ܐܺܝܬܰܝ^[21] ܗ̱ܘܺܝܬ܆ ܦܰܪܰܩܠܺܝܛܐ ܕܶܝܢ ܗܰܘ ܪܽܘܚܳܐ ܩܰܕܺܝܫܳܐ܆ ܗܰܘ ܕܰܢܫܰܕܰܪ ܐܰܒܳܐ ܕܺܝܠܝ ܒܰܫܡܰܝܳܐ222܆ ܗܽܘ ܢܰܠܶܦܟܽܘܢ ܟܽܠܗܶܝܢ܆ ܘܢܰܥܶܗܕܟܽܘܢ ܟܽܠܗܶܝܢ ܗܳܠܶܝܢ ܕܶܐܡܪܶܬ ܠܟܽܘܢ^[22]܆ ܘܬܽܘܒ܆ ܬܽܘܒ ܣܰܓܺܝ̈ܳܐܬܳܐ ܐܺܝܬ ܠܺܝ ܠܡܺܐܡܰܪ ܠܟܽܘܢ܆ ܐܶܠܳܐ ܠܳܐ ܡܶܫܟܚܺܝܢ ܐܢ̱ܬܽܘܢ ܠܡܶܛܥܰܢ ܗܳܫܳܐ܆ ܐܶܡܰܬܝ ܕܶܝܢ ܕܗܰܘ ܢܺܐܬܶܐ܆ ܪܽܘܚܳܐ ܗܰܘ ܕܰܫܪܳܪܳܐ܆ ܗܽܘ ܢܕܰܒܰܪܟܽܘܢ ܒܟܽܠܶܗ ܫܪܳܪܳܐ^[23].

ܡܶܛܽܠܗܳܕܶܐ ܐܶܡܰܪ: ܠܳܐ ܬܶܓܫܦܺܝܢ ܒܺܝ. ܗܳܢܰܘ ܕܶܝܢ ܠܳܐ ܬܥܰܩܒܺܝܢ ܘܬܶܒܨܶܝܢ ܠܡܶܠܬܳܐ ܕܡܶܛܽܠ ܗܳܠܶܝܢ ܕܨܳܒܝܳܐ ܐܰܢ̱ܬܝ ܠܰܡܫܰܐܳܠܽܘ܆ ܐܳܦܠܳܐ ܬܶܓܫܦܺܝܢ^[24] ܒܺܝ. ܠܳܐ ܥܕܰܟܺܝܠ ‌ܐܶܬܳܐ ܙܰܒܢܗܶܝܢ ܕܗܳܠܶܝܢ. ܬܽܘܒ ܓܶܝܪ ܐܳܦܠܳܐ ܠܘܳܬ ܐܰܒܳܐ ܥܕܰܟܺܝܠ ܣܶܠܩܶܬ̣. ܐܶ݀ܣܰܩ ܕܶܝܢ܆ ܘܗܳܝܕܶܝܢ ܟܰܕ ܢܺܐܬܶܐ ܪܽܘܚܳܐ ܢܰܠܶܦܟܽܘܢ܆ ܐܰܝܟܰܢܳܐ ܕܳܐܦ ܡܶܫܬܰܘܕܰܝ ܠܺܝ. ܡܶܕܶܡ ܓܶܝܪ ܕܰܐܝܟ ܗܳܟܰܢ܆ ܨܳܒܝܳܐ ܗ̱ܘܳܬ ܡܰܪܝܰܡ ܕܰܬܫܰܐܠܺܝܘܗ̱ܝ ܠܡܳܪܰܢ ܘܰܕܬܺܐܠܰܦ.

ܝܺܕܺܝܥܳܐ ܢܰܗܺܝܪܳܐܺܝܬ܆ ܡܶܢ ܗܳܠܶܝܢ ܕܟܰܕ ܩܶܪܒܰܬ̣ ܠܘܳܬܶܗ܆ ܠܰܘ ܡܳܪܰܢ ܩܪܳܬܶܗ܆ ܐܶܠܳܐ ܪܰܒܽܘܢܺܝ܆ ܗܳܢܰܘ ܕܶܝܢ ܡܰܠܦܳܢܳܐ^[25]܆ ܡܰܠܦܳܢܳܐ ܐܳܡܪܳܐ ܩܪܺܝܬܳܟ. ܡܶܛܽܠ ܕܰܠܡܶܬܝܰܠܳܦܽܘ ܡܣܰܪܗܒܳܐ ܐ̱ܢܳܐ. ܐܶܠܳܐ ܗܰܘ ܕܰܡܕܰܒܰܪ ܠܡܶܠܰܘ̈ܗ̱ܝ ܒܕܺܝܢܳܐ܆ ܠܡܰܠܦܳܢܽܘܬܳܐ ܐܰܝܟ ܡܰܢ ܕܠܰܘ ܒܙܰܒܢܳܗ̇ ܗ̱ܘܳܬ. ܡܬܰܗܶܐ ܠܳܗ̇. ܘܠܳܐ ܐ̱ܢܳܫ ܢܺܐܡܰܪ܆ ܕܰܕܠܳܐ ܦܝܳܣܳܐ ܗ̱ܝ ܗܳܕܶܐ܆ ܗܳܝ ܕܰܐܢ̱ܬܬܳܐ ܗܳܟܰܢܳܐ ܬܶܗܘܶܐ ܐܺܝܬ ܠܳܗ̇ ܪܶܚܡܰܬ ܝܽܘܠܦܳܢܳܐ. ܝܰܬܺܝܪܳܐܺܝܬ ܓܶܝܪ ܠܢܶܫ̈ܶܐ ܫܟܺܝܚܳܐ ܡܥܰܩܒܳܢܽܘܬܳܐ܆ ܐܳܦ ܒܛܳܒ̈ܳܬܳܐ. ܒܪܰܡ.

ܐܳܦ ܗܽܘ ܡܳܪܰܢ ܐܰܘܕܰܥ܆ ܕܪ̈ܳܚܡܳܬ ܝܽܘܠܦܳܢܳܐ ܐܺܝܬܰܝܗܶܝܢ ܗ̱ܘܰܝ̈ ܗܳܢܶܝܢ ܕܶܐܬܬܰܠ̈ܡܰܕܶܝܢ ܠܶܗ܆ ܒܝܰܕ ܗܳܠܶܝܢ ܕܰܐܣܗܶܕ ܪܶܚܡܰܬ ܝܽܘܠܦܳܢܳܐ ܥܰܠ ܡܰܪܝܰܡ ܚܳܬܳܗ̇ ܕܡܳܪܬܳܐ܆ ܟܰܕ ܚܙܳܗ̇ ܕܟܰܕ ܠܳܐ ܣܰܒܥܳܐܺܝܬ ܐܺܝܬ ܠܳܗ̇ ܡܶܢ ܡܰܠܦܳܢܽܘܬܶܗ ܢܰܩܺܝܦܳܐ ܠܶܗ. ܟܰܕ ܐܶܡܰܪ: ܕܡܰܪܝܰܡ ܕܶܝܢ ܡܢܳܬܳܐ ܛܳܒܬܳܐ ܓܒܳܬ̣ ܠܳܗ̇. ܗܳܝ ܟܺܝܬ ܕܠܳܐ ܬܶܬܢܣܶܒ ܡܶܢܳܗ̇^[26]. ܐܶܠܳܐ ܐܳܦܠܳܐ ܗܳܝ ܐ̱ܚܪܺܬܳܐ ܢܰܗܦܶܟ ܐ̱ܢܳܫ ܢܰܝܬܶܐ ܣܰܩܽܘܒܠܳܐܺܝܬ܆ ܕܠܳܐ ܩܰܪܺܝܒܳܐ ܗ̱ܘܳܬ ܡܰܪܝܰܡ܆ ܐܶܡܰܬܝ ܕܡܳܪܰܢ ܠܰܫ̈ܠܺܝܚܶܐ ܡܶܐܬܺܝܬܳܐ ܕܦܰܪܩܠܺܝܛܳܐ ܐܶܫܬܰܘܕܺܝ ܘܝܽܘܠܦܳܢܳܐ ܡܫܰܡܠܝܳܐ܆ ܘܠܳܐ ܐܳܡܰܪ ܗ̱ܘܳܐ ܠܘܳܬܳܗ̇܆ ܗܳܠܶܝܢ ܟܰܕ ܠܳܐ ܝܳܕܥܳܐ ܗ̱ܘܳܬ ܠܗܶܝܢ. ܝܳܕܰܥ ܓܶܝܪ. ܗܰܘ ܡܰܢ ܕܕܰܐܝܟ ܗܳܢܳܐ܆ ܕܠܰܘ ܠܦܽܘܬ ܠܳܐ ܝܺܕܰܥܬܳܐ ܕܗܳܢܽܘܢ ܕܫܳܡܥܺܝܢ ܗ̱ܘܰܘ܆ ܐܶܠܳܐ ܠܦܽܘܬ ܝܺܕܰܥܬܳܐ ܒܰܝܬܳܝܬܳܐ ܕܺܝܠܳܗ̇܆ ܐܺܝܬ ܗ̱ܘܳܐ ܠܶܗ ܥܝܳܕܳܐ ܠܡܳܪܰܢ܆ ܠܰܡܡܰܠܳܠܽܘ ܟܺܝܬ ܘܠܰܡܦܰܢܳܝܽܘ ܦܶܬܓܳܡܳܐ.

ܒܰܕܓܽܘܢ ܐܳܦ ܠܘܳܬ ܢܺܝܩܽܘܕܺܝܡܽܘܤ܆ ܕܠܳܐ ܝܳܕܰܥ ܗ̱ܘܳܐ. ܐܳܡܰܪ ܗ̱ܘܳܐ܆ ܕܰܐܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܳܟ܆ ܕܶܐܢܗܽܘ ܕܠܳܐ ܢܶܬܺܝܠܶܕ ܐ̱ܢܳܫ ܡܶܢ ܕܪܺܝܫ܆ ܠܳܐ ܡܶܫܟܰܚ ܠܡܶܥܰܠ ܠܡܰܠܟܽܘܬܳܐ ܕܰܐ‌ܠܳܗܳܐ^[27]. ܐܳܦ ܠܘܳܬ ܗܳܝ ܫܳܡܪܳܝܬܳܐ ܕܒܳܗ̇ ܒܰܕܡܽܘܬܳܐ܆ ܠܳܐ ܝܳܕܥܳܐ ܗ̱ܘܳܬ. ܐܳܡܰܪ ܗ̱ܘܳܐ: ܕܗܰܘ ܕܶܝܢ ܕܢܶܫܬܶܐ ܡܶܢ ܡܰܝ̈ܳܐ ܗܳܠܶܝܢ ܕܶܐܢܳܐ ܐܶ݀ܬܶܠ ܠܶܗ. ܠܳܐ ܢܶܨܗܶܐ ܠܥܳܠܰܡ^[28]. ܡܳܢܳܐ ܕܶܝܢ ܐܳܡܰܪ ܐ̱ܢܳܐ ܫܳܡܪܳܝܬܳܐ ܐܶܡܰܬܝ ܕܳܐܦ ܠܗܽܘܢ ܠܬܰܠ̈ܡܺܝܕܶܐ܆ ܟܰܕ ܠܳܐ ܝܳܕܥܺܝܢ ܗ̱ܘܰܘ ܗܳܠܶܝܢ ܕܡܶܛܽܠܳܬܗܶܝܢ ܫܳܡܥܺܝܢ ܗ̱ܘܰܘ ܐܰܝܟ ܕܰܒܣܽܘܓܳܐܐ ܡܡܰܠܶܠ ܗ̱ܘܳܐ ܠܗܽܘܢ܆ ܐܰܝܟ ܐܰܝܟܳܐ ܕܳܐܡܰܪ ܗ̱ܘܳܐ܆ ܕܠܺܝ ܡܶܐܟܽܘܠܬܳܐ ܐܺܝܬ ܠܺܝ ܠܡܶܐܟܰܠ܆ ܗܳܝ ܕܰܐܢ̱ܬܽܘܢ ܠܳܐ ܝܳܕܥܺܝܢ ܐܢ̱ܬܽܘܢ ܠܳܗ̇^[29]̇܆ ܘܰܒܕܽܘܟܬܳܐ ܕܶܝܢ ܐ̱ܚܪܺܬܳܐ ܬܽܘܒ܆ ܝܽܘܚܰܢܳܢ ܐܶܘܰܢܓܶܠܺܝܣܛܳܐ ܡܫܰܘܕܰܥ. ܕܳܐܡܪܺܝܢ ܗ̱ܘܰܘ ܬܰܠ̈ܡܺܝܕܶܐ܆ ܕܠܳܐ ܝܳܕܥܺܝܢ ܚ̱ܢܰܢ ܡܳܢܳܐ ܡܡܰܠܶܠ^[30]. ܐܳܦ ܒܬܰܫܥܺܝܬܳܐ ܕܶܝܢ ܗܳܝ ܕܥܰܠ ܗܰܘ ܥܺܝܠܳܐ. ܘܥܰܠ ܣܰܘ̈ܟܶܐ ܐܳܡܰܪ: ܕܗܳܠܶܝܢ ܠܳܐ ܐܶܣܬܰܟܰܠܘ ܗ̱ܘܰܘ ܬܰܠܡܺܝܕܰܘ̈ܗ̱ܝ ܕܡܶܢ ܩܕܺܝܡ. ܐܶܠܳܐ ܐܶܡܰܬܝ ܕܶܐܫܬܰܒܰܚ ܝܶܫܽܘܥ. ܗܳܝܕܶܝܢ ܐܶܬܕܟܰܪܘ܆ ܕܗܳܠܶܝܢ ܟܬܺܝ̈ܒܳܢ ܗ̱ܘܰܝ̈ ܡܶܛܽܠܳܬܶܗ^[31].

ܗܳܟܰܢܳܐ. ܐܳܦ ܗܳܪܟܳܐ܆ ܠܡܰܪܝܰܡ ܕܪܳܓܳܐ ܗ̱ܘܳܬ ܠܡܺܐܠܰܦ܆ ܗܳܠܶܝܢ ܟܺܝܬ ܕܳܐܦ ܠܰܡܫܰܐܳܠܽܘ ܨܳܒܝܳܐ ܗ̱ܘܳܬ܆ ܘܳܐܦ ܟܰܕ ܠܳܐ ܝܳܕܥܳܐ ܗ̱ܘܳܬ܆ ܐܶܡܰܪ ܠܳܗ̇ ܗܰܘ ܕܝܳܕܰܥ ܠܟܽܠܗܶܝܢ ܩܕܳܡ ܗܘܳܝܗܶܝܢ܆ ܠܳܐ ܬܶܓܫܦܺܝܢ ܒܺܝ. ܠܳܐ ܓܶܝܪ ܥܕܰܟܺܝܠ ܣܶܠܩܶܬ ܠܘܳܬ ܐܳܒܝ^[32]. ܟܒܰܪ ܓܶܝܪ. ܐܶ‌ܠܽܘ ܡܦܳܣܳܐ ܗ̱ܘܳܬ ܡܰܪܝܰܡ܆ ܐܰܝܟܰܢܳܐ ܕܰܫܠܺܝ̈ܚܶܐ ܕܫܽܘܘܕܳܝܳܐ ܗܰܘ ܕܡܶܛܽܠ ܪܽܘܚܳܐ܆ ܘܒܰܬܘܳܗܝܳܐ ܗܰܘ ܕܝܽܘܠܦܳܢܳܐ. ܗܰܘ ܕܝܰܬܺܝܪ ܡܫܰܡܠܰܝ܆ ܠܳܐ ܡܢܰܣܝܳܐ ܗ̱ܘܳܬ ܠܡܺܐܠܰܦ܆ ܗܳܠܶܝܢ ܕܠܳܐ ܡܰܦܶܤ ܗ̱ܘܳܐ ܙܰܒܢܳܐ. ܗܳܫܐ ܕܶܝܢ܆ ܗܺܝ ܡܰܢ. ܡܢܰܣܝܳܐ ܗ̱ܘܳܬ ܠܡܺܐܠܰܦ܆ ܐܰܝܟ ܐܰܝ̇ܕܳܐ ܕܠܳܐ ܝܳܕܥܳܐ ܗ̱ܘܳܬ. ܡܳܪܰܢ ܕܶܝܢ܆ ܐܰܝܟ ܐܰܝܢܳܐ ܕܝܳܕܰܥ ܗ̱ܘܳܐ ܡܦܰܢܶܐ ܗ̱ܘܳܐ ܦܶܬܓܳܡܳܐ. ܠܰܘ ܓܶܝܪ ܡܶܛܽܠ ܠܳܐ ܝܺܕܰܥܬܳܗ̇ ܕܗܳܝ܆ ܐܳܦ ܗܽܘ ܠܡܶܠܰܘ̈ܗ̱ܝ ܕܺܝܠܶܗ ܛܰܥܺܝ ܗ̱ܘܳܐ.

ܟܰܕ ܠܗܳܢܳܐ ܗܳܟܺܝܠ ܦܽܘܫܳܩܳܐ ܬܪܰܝܳܢܳܐ܆ ܕܰܠܘܳܬ ܡܥܰܠܝܽܘܬܳܐ ܚܳܐܰܪ. ܡܩܰܒܠܺܝܢܰܢ܆ ܠܳܐ ܡܫܺܝܛܺܝܢ ܚ̱ܢܰܢ ܠܗܰܘ ܩܰܕܡܳܝܳܐ. ܐܳܦ ܓܶܝܪ ܐܳܡܪܺܝܢܰܢ: ܘܰܕܡܶܬܪܰܓܫܳܢܳܐܺܝܬ ܓܶܫܦܰܬ ܡܰܪܝܰܡ ܒܝܶܫܽܘܥ܆ ܐܳܦ ܕܰܐܟܚܕܳܐ ܒܝܰܕ ܫܽܘܐܴܠܳܐ ܘܰܒܝܰܕ ܗܳܝ ܕܰܩܪܳܬܶܗ ܡܰܠܦܳܢܳܐ܆ ܐܳܦ ܡܶܬܗܰܘܢܳܢܳܐܺܝܬ ܓܫܰܦܬ̣ܶܗ. ܘܬܰܪ̈ܬܰܝܗܶܝܢ ܠܳܐ ܕܰܓܳܠܳܐܺܝܬ ܡܗܰܝܡܢܺܝܢܰܢ ܕܰܗܘ̈ܰܝ. ܘܗܳܠܶܝܢ ܡܰܢ܆ ܟܡܳܐ ܕܙܳܕܶܩ ܗ̱ܘܳܐ ܐܰܝܟ ܕܰܠܦܽܘܫܳܩܳܐ ܕܦܶܬܓܳܡ̈ܶܐ ܗܳܠܶܝܢ ܕܶܐܬܬܰܣܪܰܚܘ܆ ܢܶܬܰܐܡܪ̈ܳܢ.

ܡܶܣܬܒܰܪ ܠܺܝ ܕܶܝܢ. ܗܽܘ ܦܶܬܓܳܡܳܐ ܗܰܘ ܫܠܺܝܚܳܝܳܐ܆ ܕܠܳܚܡܳܐܺܝܬ ܐܺܝܬ ܠܶܗ܆ ܐܳܦ ܠܘܳܬ ܙܳܟܽܘܬܳܐ ܕܡܰܠܟܳܐ ܕܺܝܠܰܢ ܪܳܚܶܡ ܠܰܡܫܺܝܚܳܐ܆ ܕܠܽܘܩܒܰܠ ܗܳܢܽܘܢ ܡܳܪ̈ܽܘܕܶܐ܆ ܗܳܝ ܕܗܳܫܳܐ ܐܶܣܬܰܒܪܰܬ ܠܰܢ. ܕܕܽܘܪܳܫܳܐ ܦܰܓܪܳܢܳܝܳܐ܆ ܒܩܰܠܺܝܠ ‌ܐܺܝܬܰܘܗ̱ܝ ܡܰܘܬܪܳܢܳܐ. ܫܰܦܺܝܪܽܘܬ ܕܶܚܠܬܳܐ ܕܶܝܢ܆ ܠܘܳܬ ܟܽܠܡܶܕܶܡ ܐܺܝܬܶܝܗ̇ ܡܰܘܬܪܳܢܺܝܬܳܐ ܕܫܽܘܘܕܳܝܳܐ ܕܚܰܝ̈ܶܐ ܐܺܝܬ ܠܳܗ̇܆ ܕܗܳܢܽܘܢ ܕܗܳܫܳܐ. ܘܰܕܗܳܢܽܘܢ ܕܰܥܬܺܝܕܺܝܢ^[33].. ܠܰܘ ܓܶܝܪ ܗܳܢܳܐ ܟܽܠܶܗ ܐܺܝܬ ܠܶܗ ܠܡܶܬܬܟܳܠܽܘ ܥܰܠ ܕܽܘܪܳܫܳܐ ܦܰܓܪܳܢܳܝܳܐ ܘܰܩܪܳܒܳܝܳܐ܆ ܘܥܰܠ ܥܽܘܬܳܕܳܐ ܕܙܰܝ̈ܢܶܐ܆ ܗܰܘ ܟܺܝܬ ܕܩܰܠܺܝܠ ܡܰܘܬܰܪ܆ ܟܡܳܐ ܕܥܰܠ ܫܰܦܺܝܪܽܘܬ ܕܶܚܠܬܳܐ ܘܥܰܠ ܫܽܘܒܚܳܐ ܬܪܺܝܨܳܐ ܕܗܰܝܡܳܢܽܘܬܳܐ܆ ܕܡܶܢ ܟܽܠܕܽܘܟ ܡܫܰܪܰܪ ܘܰܩܢܶܐ ܙܗܺܝܪܽܘܬܳܐ܆ ܘܳܐܦܠܳܐ ܚܕܳܐ ܡܶܫܬܰܚܠܦܳܢܽܘܬܳܐ ܡܰܫܶܦ܆ ܐܶܠܳܐ ܚܰܕ ܝܳܕܰܥ ܠܶܗ ܠܡܶܠܬܶܗ ܕܰܐ‌ܠܳܗܳܐ܆ ܗܰܘ ܕܒܰܫܪܳܪܳܐ ܘܰܤܛܰܪ ܡܶܢ ܟܽܠ ܫܽܘܚܠܳܦܳܐ ܐܶܬܒܰܣܰܪ ܘܶܐܬܒܰܪܢܰܫ ܘܨܶܒܝܳܢܳܐܺܝܬ ܚܰܫ ܒܰܒܣܰܪ܆ ܘܰܒܫܰܘܝܽܘܬ ܢܬܳܥܳܐ ܥܳܪܶܩ܆ ܡܶܢ ܦܣܳܩܳܐ ܟܺܝܬ ܝܺܗܽܘܕܳܝܳܐ ܕܰܬܪܰܝܳܢܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ ܐܰ‌ܠܳܗܳܝܬܳܐ ܘܠܳܐ ܡܶܬܡܰܠܠܳܢܺܝܬܳܐ. ܘܡܶܢ ܛܳܥܝܽܘܬܳܐ ܚܶܠܡܳܢܳܝܬܳܐ ܕܗܰܓܳܓܽܘܬܶܗ ܕܶܐܘܛܶܘܟ̥ܶܐ܆ ܘܡܶܢ ܚܰܣܺܝܪܽܘܬ ܗܰܘܢܳܐ ܫܢܳܝܬܳܐ ܕܰܐܦܽܘܠܺܝܢܰܪܺܝܽܘܤ. ܗܳܠܶܝܢ ܓܶܝܪ. ܒܶܕܝ̈ܶܐ ܘܰܨܳܒܪ̈ܶܐ ܡܰܬܠܳܢܳܝ̈ܶܐ ܐܺܝܬܰܝܗܘܢ܆ ܕܰܐܘ ܒܰܪܢܳܫܳܐ ܠܒܺܝܫ ܠܰܐܠܳܗܳܐ ܓܳܒܠܺܝܢ ܠܶܗ ܠܦܳܪܽܘܩܳܐ ܕܺܝܠܰܢ܆ ܐܳܘ ܗܰܓܳܓܳܐ. ܐܳܘ ܕܠܳܐ ܗܰܘܢܳܐ. ܐܰܝܟ ܗܳܝ ܕܰܠܗܽܘܢ ܡܶܣܬܰܒܪܳܐ܆ ܘܠܰܘ ܐܰܝܟ ܟܬܳܒܐ ܐܰ‌ܠܳܗܳܝܳܐ܆ ܐܰ‌ܠܳܗܳܐ ܡܫܰܡܠܝܳܐ ܕܰܡܫܰܡܠܝܳܐܺܝܬ ܡܒܰܪܢܰܫ܆ ܐܰܝܟܰܢܳܐ ܕܳܐܣܝܽܘܬܳܐ ܡܫܰܡܠܰܝܬܳܐ ܘܰܕܠܳܐ ܒܡܶܕܶܡ ܚܰܣܺܝܪܳܐ ܢܫܰܟܶܢ ܠܰܢ܆ ܠܗܳܢܽܘܢ ܕܰܟܺܪܝܗܶܝܢ ܗ̱ܘܰܝܢ. ܘܰܡܚܰܒܠܺܝܢ ܡܶܢ ܚܛܺܝܬܳܐ܆ ܗܳܢܽܘܢ ܕܡܶܛܽܠܳܬܗܽܘܢ ܐܶܬܪܡܺܝ ܕܢܶܬܒܰܣܰܪ܆ ܘܳܐܦ ܕܢܶܚܰܫ ܩܰܒܶܠ ܥܠܰܘܗ̱ܝ.

ܡܶܛܽܠܗܳܕܶܐ ܐܰܝܟ ܕܒܰܫܪܳܪܳܐ. ܘܠܰܘ ܐܰܝܟ ܕܒܶܐܣܟܺܡܳܐ ܕܰܓܳܠܳܐ. ܘܕܰܠܥܰܝ̈ܢܶܐ ܗܳܘܶܐ ܡܨܰܕܝܳܢܳܐܺܝܬ܆ ܡܶܛܽܠ ‌ܐܶܣܟܺܡܳܐ ܗܰܘ ܡܰܠܟܳܝܳܐ܆ ܐܰܝܟ ܫܰܦܺܝܪ ܕܶܚܠܬܳܐ. ܟܰܕ ܠܥܶܠ ܚܳܐܰܪ܆ ܥܰܡ ܢܒܺܝܳܐ ܕܰܘܺܝܕ ܡܙܰܡܰܪ. ܠܰܘ ܓܶܝܪ ܥܰܠ ܩܶܫܬܳܐ ܕܺܝܠܝ ܐܶ݀ܬܬܟܶܠ܆ ܘܣܰܝܦܳܐ ܕܺܝܠܝ ܠܳܐ ܢܶܦ̣ܪܩܰܢܝ. ܐܶܠܳܐ ܝܰܡܺܝܢܳܐ ܕܺܝܠܳܟ ܘܰܕܪܳܥܳܟ܆ ܘܡܰܢܗܪܳܢܽܘܬܳܐ ܕܦܰܪܨܽܘܦܳܟ. ܒܳܟ ܢܕܰܩܰܪ ܠܰܒ̈ܥܶܠܕܒܳܒܰܝܢ܆ ܘܒܰܫܡܳܟ ܢܫܽܘܛ ܠܗܳܢܽܘܢ ܕܩܳܝܡܺܝܢ ܥܠܰܝܢ^[34]. ܘܠܰܘ ܒܡ̈ܶܠܶܐ ܒܰܠܚܽܘܕ܆ ܐܶܠܳܐ ܐܳܦ ܒܗܽܘܢ ܒܣܽܘܥܪ̈ܳܢܶܐ ܡܕܰܡܶܐ ܒܶܗ ܒܕܰܘܺܝܕ.

ܐܰܟܙܢܳܐ ܓܶܝܪ ܕܗܰܘ. ܟܰܕ ܨܳܕܶܗ ܠܫܳܐܘܳܠ܆ ܠܚܰܝܽܘܣܬܳܢܽܘܬܳܐ ܕܥܰܠ ܫܰܘܝܽܘܬ ܓܶܢܣܶܗ܆ ܥܒܰܕ ܡܶܢ ܡܶܕܶܡ ܒܥܶܠܕܒܳܒܽܘܬܳܐ܆ ܒܶܗ ܒܰܙܢܳܐ ܐܳܦ ܗܳܢܳܐ܆ ܟܰܕ ܠܡܳܪܽܘܕܳܐ ܘܥܰܘܳܠܳܐ ܡܶܢ ܩܕܺܝܡ ܐܶܚܰܕ ܒܺܐܝܕܰܘ̈ܗ̱ܝ ܫܰܘܙܒܶܗ ܘܰܐܚ̣ܝܶܗ܆ ܐܳܦܶܢ ܗܰܘ ܙܘ̈ܳܕܶܐ ܕܚܰܣܺܝܪܽܘܬ ܪܶܥܝܳܢܳܐ ܕܝܰܬܺܝܪ ܪܰܒܳܐ ܥܰܒܕܳܗ̇ ܠܪܶܚܡܰܬ ܐ̱ܢܳܫܽܘܬܳܐ. ܐܶܠܳܐ ܗܰܘ ܡܰܢ܆ ܐܶܬܬܨܺܝܪ ܘܰܥܪܰܩ ܘܶܐܒܰܕ. ܗܰܘ ܕܶܝܢ ܡܶܛܽܠ ܫܰܦܺܝܪܽܘܬ ܕܶܚܠܬܳܐ ܘܰܡܫܰܝܢܽܘܬܳܐ ܘܪܶܚܡܰܬ ܐ̱ܢܳܫܽܘܬܳܐ܆ ܥܰܡ ܡܰܠܟܽܘܬܳܐ ܕܗܳܪܟܳܐ ܐܳܦ ܠܗܳܝ ܕܰܫܡܰܝܳܐ ܢܶܫܬܘܶܐ. ܫܰܦܺܝܪܽܘܬ ܕܶܚܠܬܳܐ ܓܶܝܪ܆ ܠܘܳܬ ܟܽܠ ܡܶܕܶܡ ܐܺܝܬܶܝܗ̇ ܡܰܘܬܪܳܢܺܝܬܳܐ. ܕܫܽܘܘܕܳܝܳܐ ܕܚܰܝ̈ܶܐ ܐܺܝܬ ܠܳܗ̇܆ ܕܗܳܢܽܘܢ ܕܗܳܫܳܐ. ܘܰܕܗܳܢܽܘܢ ܕܰܥܬܺܝܕܺܝܢ. ܠܗܳܢܽܘܢ ܕܬܶܗܘܶܐ. ܕܟܽܠܰܢ ܢܶܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܩܰܕܺܝܫܳܐ܆ ܠܥܳܠܰܡ ܥܳܠܡܺܝܢ‌܀

 ܫܠܶܡ ܕܰܐܪܒܥܺܝܢ ܘܚܰܡܫܳܐ.

ܐ. ܛܝܡܬܐܘܣ. 4: 7 ـ 8 [1]

ܝܘܚܢܢ. 20: 17 [2]

ܐ. ܛܝܡܬܐܘܣ. 4: 8 [3]

ܝܘܚܢܢ. 20: 17 [4]

ܡܙܡܘܪ̈ܐ. 39: 2 ـ 3 [5]

ܐ. ܦܛܪܘܣ. 5: 7 [6]

ܐ. ܛܝܡܬܐܘܣ. 4: 7 ـ 8  [7]

ܐ. ܩܘܪ̈ܝܢܬܝܐ. 2: 9 [8]

ܐ. ܛܝܡܬܐܘܣ. 4: 7 ـ 8 [9]

ܘܚܳܡܶܐ[10]

ܡ̈ܬܠܐ. 6: 27 ـ 28 [11]

ܟܽܘܒܫܳܐ. ܪܟܘܒܐ.[12]

ܐ. ܩܘܪ̈ܝܢܬܝܐ. 9: 27 [13]

ܒ. ܩܘܪ̈ܝܢܬܝܐ. 10: 5  [14]

ܒ. ܩܘܪ̈ܝܢܬܝܐ. 11: 27 [15]

ܪ̈ܗܘܡܝܐ. 2: 15 [16]

ܪ̈ܗܘܡܝܐ. 2: 16 [17]

ܦܪܟܣܝܣ. 13: 3 [18]

ܝܘܚܢܢ. 20: 17 [19]

ܡܬܝ. 28: 9 [20]

ܡܩܰܘܶܐ[21]

  ܝܘܚܢܢ. 14: 26 [22]

ܝܘܚܢܢ. 16: 12 ـ 13 [23]

ܬܶܬܩܰܪܒܺܝܢ ܠܺܝ[24]

ܝܘܚܢܢ. 20: 16 [25]

ܠܘܩܐ. 10: 42 [26]

ܝܘܚܢܢ. 3: 5 [27]

ܝܘܚܢܢ. 4: 14 [28]

  ܝܘܚܢܢ. 4: 32 [29]

ܝܘܚܢܢ. 16: 18 [30]

ܝܘܚܢܢ. 12: 16 [31]

ܝܘܚܢܢ. 20: 17 [32]

ܐ. ܛܝܡܬܐܘܣ. 4: 8 [33]

ܡܙܡܘܪ̈ܐ. 44: 7 [34]