ܡܺܐܡܪܳܐ ܕܰܐܪܒܥܺܝܢ ܘܰܐܪܒܥܳܐ

ܥܰܠ ܕܽܘܟܪܳܢܳܐ ܗܰܘ ܕܡܶܫܬܰܡܠܶܐ ܠܘܳܬܰܢ ܕܟܺܐܢ̈ܶܐ ܗܳܢܽܘܢ ܕܡܶܢ ܥܳܠܰܡ܆ ܡܶܢ ܒܳܬܰܪ ܫܰܒܬܳܐ ܗܳܝ ܥܺܐܕܳܢܳܝܬܳܐ ܕܰܩܝܳܡܬܶܗ ܣܓܺܝܕܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ.

44: ܠܳܐ ܐܺܝܬ ܡܶܢ ܗܳܠܶܝܢ ܕܰܠܘܳܬ ܟܪ̈ܺܝܣܛܝܳܢܶܐ ܡܶܫ̈ܬܰܡܠܝܳܢ ܘܠܳܐ ܡܶܕܶܡ܆ ܗܰܘ ܕܠܰܘ ܠܗܰܠ ܡܶܢ ܟܽܠܶܗ ܕܽܘܡܳܪܳܐ ܐܺܝܬܰܘܗ̱ܝ܆ ܘܡܰܘܕܰܥ ܓܰܠܝܳܐܺܝܬ܆ ܕܐ̱ܪܳܙܳܐ ܕܺܝܠܰܢ ܘܟܽܠܶܗ ܝܽܘܠܦܳܢܰܢ܆ ܣܰܒܪܳܐ ܕܠܳܐ ܡܳܝܽܘܬܽܘܬܳܐ ܐܺܝܬܰܘܗ̱ܝ. ܘܗܳܕܶܐ ܝܰܬܺܝܪܳܐܺܝܬ ܠܡܺܐܡܰܪ. ܦܝܳܣܳܐ ܥܳܒܕܳܐ ܠܺܝ ܝܰܘܡܳܢܳܐ܆ ܗܽܘܦܽܘܬܶܣܺܝܤ ܐܰܘܟܺܝܬ ܥܶܠܬܳܐ ܕܰܟܢܽܘܫܝܳܐ ܕܺܝܠܰܢ ܕܰܠܗܳܪܟܳܐ.

ܡܶܢ ܒܳܬܰܪ ܓܶܝܪ ܥܺܐܕܳܐ ܕܚܰܫܳܐ ܦܳܪܽܘܩܳܝܳܐ ܘܕܰܩܝܳܡܬܳܐ܆ ܕܽܘܟܪܳܢܳܐ ܩܰܕܡܳܝܳܐ ܗܳܢܳܐ ܡܫܰܡܠܶܝܢ ܚ̱ܢܰܢ ܕܟܽܠܗܽܘܢ ܟܢܺܝܫܳܐܺܝܬ ܟܺܐܢ̈ܶܐ ܗܳܢܽܘܢ ܕܡܶܢ ܥܳܠܰܡ ܫܟܶܒܘ. ܟܰܕ ܐܰܝܟ ܕܰܒܫܺܝܦܽܘܪܳܐ ܪܰܒܳܐ ܘܪܳܡ ܩܳܠܳܐ܆ ܡܶܫܬܰܡܥܳܢܺܝܬܳܐ ܠܟܽܠܗܽܘܢ ܒܢܰܝ̈ܢܳܫܳܐ ܥܳܒܕܺܝܢ ܠܳܗ̇ ܠܗܳܕܶܐ܆ ܕܰܣܦܰܩ ܡܰܘܬܳܐ ܚܰܕ܆ ܗܰܘ ܕܡܳܪܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܆ ܠܡܶܫܪܳܐ ܠܫܽܘܪܰܥܬܳܐ ܘܣܰܟܠܽܘܬܳܐ ܕܟܽܠܗܽܘܢ ܒܢܰܝ̈ܢܳܫܳܐ. ܗܳܕܶܐ ܕܶܝܢ܆ ܠܳܐ ܡܬܽܘܡ^[1]܆ ܡܶܫܟܰܚ ܗ̱ܘܳܐ ܠܡܶܣܥܰܪ܆ ܟܰܕ ܠܰܘ ܐܰ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ܆ ܗܰܘ ܕܰܠܡܰܘܬܳܐ ܣܒܰܠ ܒܰܒܣܰܪ. ܕܰܐ‌ܠܳܗܳܐ ܓܶܝܪ ܒܰܠܚܽܘܕܰܘܗ̱ܝ ܐܺܝܬܶܝܗ̇ ܗ̱ܘܳܬ ܕܺܝܠܳܝܬܳܐ܆ ܗܳܝ ܕܰܚܠܳܦ ܟܽܠܗܽܘܢ ܒܢܰܝ̈ܢܳܫܳܐ ܢܡܽܘܬ.

ܐܶܠܳܐ ܟܒܰܪ ܢܺܐܡܰܪ ܐ̱ܢܳܫ܆ ܕܰܐܝܟܰܢܳܐ ܐܰ‌ܠܳܗܳܐ ܐܳܡܰܪ ܐܰܢ̱ܬ ܕܺܐܝܬܰܘܗ̱ܝ ܗܰܘ ܕܡܺܝܬ܆ ܟܰܕ ܦܰܘܠܽܘܤ ܓܰܠܝܳܐܺܝܬ ܐܶܡܰܪ ܒܗܳܠܶܝܢ ܕܰܟܬܰܒ ܠܘܳܬ ܛܺܝܡܳܬܶܐܘܤ܆ ܒܰܪܢܳܫܳܐ ܝܶܫܽܘܥ ܡܫܺܝܚܳܐ܆ ܗܰܘ ܕܝܰܗ̱ܒ ܗܽܘ ܠܶܗ ܬܰܚܠܽܘܦܳܐ ܕܦܽܘܪܩܳܢܳܐ ܚܠܳܦ ܟܽܠܢܳܫ^[2]. ܡܳܢܳܐ ܗܳܟܺܝܠ ܠܳܐ ܫܳܡܰܥ ܐܰܢ̱ܬ ܠܶܗ ܕܳܐܡܰܪ: ܕܡܳܪܝܳܐ ܕܬܶܫܒܽܘܚܬܳܐ ܐܶܨܛܠܶܒ^[3]܆ ܘܰܕܡܶܢ ܝܗܘ̈ܕܝܐ ܐܺܝܬܰܘܗ̱ܝ ܡܫܺܝܚܳܐ ܗܰܘ ܕܒܰܒܣܰܪ܆ ܗܰܘ ܕܺܐܝܬܰܘܗ̱ܝ ܐܰ‌ܠܳܗܳܐ ܕܥܰܠ ܟܽܠ ܡܒܰܪܟܳܐ ܕܰܠܥܳܠܰܡ ܐܰܡܺܝܢ^[4]܆ ܘܰܕܝܶܫܽܘܥ ܡܫܺܝܚܳܐ܆ ܐܶܬܡܳܠܝ̱܆ ܘܝܰܘܡܳܢܳܐ ܗܽܘ ܟܰܕ ܗܽܘ ܘܰܠܥܳܠܡܺܝܢ^[5]. ܚܰܕ ܓܶܝܪ ܐܺܝܬܰܘܗ̱ܝ ܗ̱ܘܳܐ ܡܶܢ ܬܰܪܬܶܝܢ܆ ܐܰ‌ܠܳܗܽܘܬܳܐ ܟܺܝܬ ܘܐ̱ܢܳܫܽܘܬܳܐ܆ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܐܰܝܟ ܡܶܠܬܳܐ ܗܝ ܕܺܝܠܗܶܝܢ܆ ܟܰܕ ܐܺܝܬܰܘܗ̱ܝ ܫܘܶܐ ܒܽܐܘܣܺܝܰܐ ܠܰܐܒܳܐ ܒܰܐܠܳܗܽܘܬܳܐ܆ ܘܰܫܘܶܐ ܒܽܐܘܣܺܝܰܐ ܠܰܢ ܠܰܒܢܰܝ̈ܢܳܫܳܐ ܗܽܘ ܟܰܕ ܗܽܘ ܒܐ̱ܢܳܫܽܘܬܳܐ.

ܐܳܦ ܓܶܝܪ ܘܰܠܒܰܪ ܐ̱ܢܳܫܳܐ ܗܰܘ ܕܺܝܠܰܢ܆ ܕܡܶܢ ܢܰܦܫܳܐ ܐܺܝܬܰܘܗ̱ܝ ܘܡܶܢ ܦܰܓܪܳܐ܆ ܘܺܐܝܬܰܘܗ̱ܝ ܒܚܰܕ ܩܢܽܘܡܳܐ܆ ܕܚܰܝܽܘܬܳܐ ܡܳܝܽܘܬܬܳܐ ܡܠܺܝܠܬܳܐ ܐܺܝܬܰܘܗ̱ܝ ܐܳܡܪܺܝܢܰܢ. ܐܶܠܳܐ ܒܦܰܓܪܳܐ ܡܰܢ. ܡܳܝܽܘܬܬܳܐ܆ ܡܠܺܝܠܬܳܐ ܕܶܝܢ ܒܢܰܦܫܳܐ. ܒܪܰܡ. ܟܽܠܳܗ̇ ܚܰܝܽܘܬܳܐ. ܡܫܰܡܗܳܐ ܡܳܝܽܘܬܬܳܐ܆ ܘܟܽܠܳܗ̇ 222ܩܪܝܳܐ ܡܠܺܝܠܬܳܐ. ܘܠܳܐ ܡܒܰܠ̈ܒܠܳܢ ܗܳܠܶܝܢ ܕܡܶܢܗܶܝܢ ܡܪܰܟܒܳܐ ܟܝܳܢܳܐܺܝܬ܆ ܘܳܐܦܠܳܐ ܬܽܘܒ ܠܰܬܪܶܝܢ ܡܦܰܠܓܳܐ.

ܗܳܟܰܢܳܐ ܐܳܦ ܥܰܡܰܢܽܘܐܶܝܠ܆ ܟܰܕ ܡܶܢ ܬܪܶܝܢ ܟܝܳܢ̈ܶܐ. ܚܰܕ ܐܺܝܬܰܘܗ̱ܝ܆ ܘܚܰܕ ܩܢܽܘܡܳܐ. ܘܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܡܶܠܬܳܐ܆ ܘܠܳܐ ܡܒܰܠܒܳܠܽܘ ܒܰܠܒܶܠ. ܠܗܳܠܶܝܢ ܕܡܶܢܗܶܝܢ ܗܘ̣ܳܬ ܚܕܳܝܽܘܬܳܐ ܠܳܐ ܡܶܬܡܰܠܠܳܢܺܝܬܳܐ܆ ܘܳܐܦܠܳܐ ܟܰܕ ܡܩܰܘܶܐ ܚܰܕ܆ ܝܳܗܶܒ ܡܰܥܠܳܢܳܐ ܠܰܬܪܰܝܳܢܽܘܬܳܐ܆ ܗܳܝ ܕܡܶܢܳܗ̇ ܗܳܘܶܐ ܦܽܘܠܳܓܳܐ. ܗܰܘ ܓܶܝܪ ܕܚܰܕ ܗ̱ܘ̣ ܡܳܪܳܢܳܐܺܝܬ܆ ܠܳܐ ܡܬܽܘܡ ܢܶܗܘܶܐ ܬܪܶܝܢ܆ ܟܰܕ ܕܶܝܢ ܢܫܰܢܶܐ ܠܗܳܝ ܕܢܶܗܘܶܐ ܬܪܶܝܢ܆ ܡܶܢ ܗܳܝ ܕܢܶܗܘܶܐ ܐܺܝܬܰܘܗ̱ܝ ܚܰܕ܆ ܦܳܫ ܠܶܗ ܡܶܢ ܟܽܠܦܪܘܤ.

ܟܰܕ ܗܳܟܺܝܠ ܚܰܕ ܐܺܝܬܰܘܗ̱ܝ ܝܶܫܽܘܥ ܡܫܺܝܚܳܐ܆ ܐܳܦܶܢ ܡܶܢ ܡܢܳܬܳܐ ܢܫܰܡܗܺܝܘܗ̱ܝ ܐ̱ܢܳܫ. ܘܒܰܪܢܳܫܳܐ ܢܺܐܡܪܺܝܘܗ̱ܝ܆ ܐܰ‌ܠܳܗܳܐ ܕܰܡܒܰܣܰܪ ܡܶܣܬܰܟܰܠ. ܐܳܦܶܢ ܐܰ‌ܠܳܗܳܐ ܬܽܘܒ ܢܶܩܪܶܝܘܗ̱ܝ܆ ܡܶܠܬܳܐ ܕܶܐܬܒܰܪܢܰܫ ܡܶܫܬܰܘܕܰܥ. ܡܶܛܽܠܗܳܕܶܐ ܓܶܝܪ. ܟܰܕ ܝܳܕܥܺܝܢܰܢ ܠܶܗ ܚܰܕ. ܘܠܳܐ ܡܶܬܦܰܠܓܳܢܳܐ܆ ܐܳ‌ܠܨܳܐܺܝܬ ܡܶܬܚܰܫܚܺܝܢ ܚ̱ܢܰܢ ܒܗܳܠܶܝܢ ܦܪܘܣܕܝܘܪ̈ܝܣܡܘ ܐܰܘ ܟܺܝܬ ܬܰܘܣ̈ܦܳܬܳܐ ܕܰܬܚܽܘ̈ܡܶܐ܆ ܟܰܕ ܐܳܡܪܺܝܢ ܚ̱ܢܰܢ ܠܶܗ ܫܘܶܐ ܒܽܐܘܣܺܝܰܐ ܠܰܐܒܳܐ ܒܰܐܠܳܗܽܘܬܳܐ܆ ܘܰܫܘܶܐ ܒܽܐܘܣܺܝܰܐ ܠܰܢ ܠܶܗ ܟܰܕ ܠܶܗ ܒܐ̱ܢܳܫܽܘܬܳܐ܆ ܘܠܶܗ ܟܰܕ ܠܶܗ ܚܳܫܽܘܫܳܐ ܒܰܒܣܰܪ܆ ܘܠܳܐ ܚܳܫܽܘܫܳܐ ܒܰܐܠܳܗܽܘܬܳܐ.

ܐܳܦ ܓܶܝܪ ܐܶ‌ܠܽܘ ܐܰܝܟ ܡܶܠܬܗܽܘܢ ܕܪ̈ܰܫܺܝܥܶܐ܆ ܬܪܶܝܢ ܟܝܳܢ̈ܶܐ ܐܺܝܬܰܝܗܽܘܢ ܗ̱ܘܰܘ ܡܶܢ ܒܳܬܰܪ ܚܕܳܝܽܘܬܳܐ܆ ܘܰܡܦܰܠܓܳܢܳܐܺܝܬ ܡܰܢ ܟܝܳܢܳܐ ܗܰܘ ܐ̱ܢܳܫܳܝܳܐ ܡܩܰܝܰܡ ܗ̱ܘܳܐ܆ ܐܳܦ ܟܝܳܢܳܐ ܕܶܝܢ ܬܽܘܒ ܗܰܘ ܐܰ‌ܠܳܗܳܝܳܐ ܦܪܺܝܫܳܐܺܝܬ܆ ܠܳܐ ܓܶܝܪ ܡܶܬܡܢܶܝܢ ܗ̱ܘܰܘ ܬܪܶܝܢ. ܐ̱ܚܪܺܢܳܐܝܬ܆ ܟܰܕ ܠܳܐ ܡܶܬܩܰܝܡܳܐ ܗ̱ܘܳܬ ܟܽܠ ܚܕܳܐ ܡܶܢ ܠܚܽܘ̈ܕܳܝܳܬܳܐ ܡܶܢܳܗ̇ ܘܠܳܗ̇ ܒܕܺܝܠܳܝܽܘܬ ܩܽܘܝܳܡܳܐ܆ ܕܓܽܘܚܟܳܐ ܐܺܝܬܶܝܗ̇ ܗ̱ܘܳܬ. ܘܰܕܡܰܠ̣ܝܳܐ ܗ̱ܘܳܬ ܡܶܢ ܒܓܳܠܳܐ ܘܰܨܒܳܪܳܐ ܝܰܬܺܝܪܳܐ܆ ܗܳܝ ܕܢܺܐܡܰܪ ܕܰܟܝܳܢܳܐ ܐ̱ܢܳܫܳܝܳܐ ܚܰܫ܆ ܐܰܘ ܕܰܫܘܶܐ ܒܽܐܘܣܺܝܰܐ ܠܰܢ ܐܺܝܬܰܘܗ̱ܝ ܒܐ̱ܢܳܫܽܘܬܳܐ܆ ܐܰܘ ܕܰܟܝܳܢܳܐ ܐܰ‌ܠܳܗܳܝܳܐ ܕܡܶܠܬܳܐ ܠܳܐ ܚܳܫܽܘܫܳܐ ܩܰܘܺܝ܆ ܘܕܰܫܘܶܐ ܒܽܐܘܣܺܝܰܐ ܠܰܐܒܳܐ ܐܺܝܬܰܘܗ̱ܝ ܒܰܐܠܳܗܽܘܬܳܐ ܠܗܳܠܶܝܢ ܓܶܝܪ. ܕܒܰܩܢܽܘܡܳܐ ܦܪ̈ܺܝܫܳܢ ܡܶܢ ܚ̈ܕܳܕܶܐ ܘܦܰܪ̈ܺܝܩܳܢ܆ ܕܚܶܟܡܬܳܐ ܝܰܬܺܝܪܬܳܐ ܐܺܝܬܶܝܗ̇ ܒܰܫܪܳܪܳܐ܆ ܕܰܐܝܟ ܕܰܠܗܳܠܶܝܢ ܕܰܡܚ̈ܰܝܕܳܢ ܢܦܰܪܶܫ ܒܡܶܠܬܳܐ.

ܘܰܚܙܺܝ ܠܺܝ ܠܰܙܗܺܝܪܽܘܬܳܐ ܕܰܟ̈ܬܳܒܶܐ ܢܦܺܝ̈ܚܰܝ ܡܶܢ ܐܰ‌ܠܳܗܳܐ܆ ܕܠܳܐ ܡܶܬܪܡܶܝܢ ܠܦܽܘܠܳܓܳܐ܆ ܐܶܠܳܐ ܒܟܽܠ ܕܽܘܟ ܡܚܰܘܶܝܢ܆ ܕܗܽܘ ܟܰܕ ܗܽܘ ܐܺܝܬܰܘܗ̱ܝ ܗ̱ܘܳܐ ܒܰܪܢܳܫܳܐ ܘܰܐ‌ܠܳܗܳܐ܆ ܟܰܕ ܚܰܕ ܦܰܪܨܽܘܦܳܐ ܐܺܝܬܰܘܗ̱ܝ ܘܚܰܕ ܩܢܽܘܡܳܐ. ܐܰܝܟܳܐ ܡܰܢ ܓܶܝܪ ܕܶܐܫܬܠܶܡ ܡܶܢ ܐܰܒܳܐ ܠܡܰܘܬܳܐ ܐܳܡܪܺܝܢ: ܐܰܘ ܕܶܐܨܛܠܶܒ ܡܶܢ ܐ̱ܚܪ̈ܳܢܶܐ܆ ܕܠܳܐ ܐ̱ܢܳܫ ܢܶܣܒܰܪ ܕܠܳܐ ܨܶܒܝܳܢܳܐܺܝܬ ܐܶܬܬܰܝܬܺܝ ܠܘܳܬ ܗܳܝ ܕܢܶܚܰܫ܆ ܒܰܫ̈ܡܳܗܶܐ ܪ̈ܳܡܶܐ ܘܕܰܦܐܶܝܢ ܠܰܐܠܳܗܳܐ ܡܶܬܚܰܫܚܺܝܢ. ܟܰܕ ܐܳܡܪܺܝܢ: ܗܰܘ ܟܺܝܬ ܕܥܰܠ ܒܪܳܐ ܕܺܝܠܳܢܳܝܳܐ ܕܺܝܠܶܗ ܠܳܐ ܚܳܤ܆ ܐܶܠܳܐ ܚܠܳܦ ܟܽܠܰܢ ܐܰܫܠܡܶܗ^[6]. ܘܶܐ‌ܠܽܘ ܓܶܝܪ ܝܺܕܰܥܘ܆ ܠܰܘ ܠܡܳܪܝܳܐ ܕܬܶܫܒܽܘܚܬܳܐ ܨܳܠܒܺܝܢ ܗ̱ܘܰܘ^[7].

ܛܳܒ ܓܶܝܪ ܝܺܕܺܝܥܳܐ܆ ܕܗܰܘ ܕܺܐܝܬܰܘܗ̱ܝ ܕܺܝܠܳܢܳܝܳܐ. ܘܰܒܪܳܐ ܚܰܒܺܝܒܳܐ ܘܫܰܪܺܝܪܳܐ ܕܰܐܒܳܐ܆ ܘܕܰܡܫܰܘܬܰܦ ܠܶܗ ܒܽܐܘܣܺܝܰܐ ܘܒܰܟܝܳܢܳܐ܆ ܘܺܐܝܬܰܘܗ̱ܝ ܡܳܪܝܳܐ ܕܬܶܫܒܽܘܚܬܳܐ܆ ܡܕܰܒܪܳܢܳܐܺܝܬ ܗܘ̣ܳܐ ܡܶܫܬܰܡܥܳܢܳܐ ܥܕܰܡܳܐ ܠܡܰܘܬܳܐ^[8]܆ ܘܠܰܘ ܟܰܕ ܐܶܬܕܒܰܪ ܒܰܩܛܺܝܪܳܐ ܡܶܢ ܐ̱ܢܳܫ܆ ܐܰܝܟܳܐ ܕܶܝܢ ܕܡܰܟܪܙܺܝܢ ܠܶܗ ܒܰܪܢܳܫܳܐ܆ ܠܳܐ ܬܽܘܒ ܕܶܐܫܬܠܶܡ ܡܶܢ ܐܰܒܳܐ ܐܳܡܪܺܝܢ܆ ܐܶܠܳܐ ܕܗܽܘ ܠܶܗ ܝܰܗܒ^[9]. ܐܰܝܟܰܢܳܐ ܘܒܰܐܝܢܳܐ ܙܢܳܐ. ܒܰܪܢܳܫܳܐ ܝܶܫܽܘܥ ܡܫܺܝܚܳܐ܆ ܗܰܘ ܕܝܰܗ̱ܒ ܗܽܘ ܠܶܗ ܬܰܚܠܽܘܦܳܐ ܕܦܽܘܪܩܳܢܳܐ ܚܠܳܦ ܟܽܠܢܳܫ^[10]. ܠܳܐ ܐܺܝܬܶܝܗ̇ ܗ̱ܘܳܬ ܕܶܝܢ ܕܒܰܪ ܐ̱ܢܳܫܳܐ ܕܠܳܐ ܐܺܝܬܰܘܗ̱ܝ ܗܽܘ ܟܰܕ ܗܽܘ ܐܳܦ ܐܰ‌ܠܳܗܳܐ. ܗܳܢܰܘ ܕܳܐܦ ܗܽܘ ܠܶܗ ܢܶܬܶܠ܆ ܘܕܰܣܦܰܩ ܕܰܠܟܽܠܢܳܫ ܢܶܦܪܽܘܩ.

ܘܰܠܗܳܕܶܐ ܝܰܬܺܝܪ ܓܰܠܝܳܐܺܝܬ܆ ܦܶܬܓܳܡܳܐ ܗܰܘ ܕܺܝܠܶܗ. ܕܰܫܠܺܝܚܳܐ ܕܩܰܕܶܡ ܐܶܬܬܣܺܝܡ܆ ܡܚܰܘܶܐ ܠܳܗ̇ ܝܰܬܺܝܪܳܐܺܝܬ. ܡܳܢܳܐ ܓܶܝܪ ܐܳܡܰܪ. ܗܰܘ ܚܰܕ ܘܡܶܨܥܳܝܳܐ ܕܰܐ‌ܠܳܗܳܐ ܘܕܰܒܢܰܝ̈ܢܳܫܳܐ ܒܰܪܢܳܫܳܐ ܝܶܫܽܘܥ ܡܫܺܝܚܳܐ܆ ܗܰܘ ܕܝܰܗ̱ܒ ܗܽܘ ܠܶܗ ܬܰܚܠܽܘܦܳܐ ܕܦܽܘܪܩܳܢܳܐ ܚܠܳܦ ܟܽܠܢܳܫ. ܐܰܝܟܰܢܳܐ ܟܺܝܬ ܕܡܳܕܶܝܢ ܠܰܘ ܦܫܺܝܛܳܐܺܝܬ ܒܰܪܢܳܫܳܐ ܐܺܝܬܰܘܗ̱ܝ ܗ̱ܘܳܐ܆ ܐܶܠܳܐ ܡܶܨܥܳܝܳܐ ܕܰܐ‌ܠܳܗܳܐ ܘܕܰܒܢܰܝ̈ܢܳܫܳܐ. ܕܡܶܨܥܳܝܳܐ ܕܶܝܢ. ܗܳܕܶܐ ܐܺܝܬܶܝܗ̇ ܕܺܝܠܳܝܬܳܐ܆ ܕܢܶܗܘܶܐ ܐܺܝܬ ܠܶܗ ܒܰܝܬܳܐܺܝܬ܆ ܠܘܳܬ ܟܽܠ ܚܰܕ ܡܶܢ ܗܳܢܽܘܢ ܕܪܰܚܺܝܩܺܝܢ ܡܶܢ ܚ̈ܕܳܕܶܐ. ܘܪܰܓܺܝܙܺܝܢ܆ ܘܰܠܘܳܬ ܬܰܪܥܽܘܬܳܐ ܡܶܬܬܰܝܬܶܝܢ. ܡܶܛܽܠܗܳܕܶܐ. ܗܽܘ ܟܰܕ ܗܽܘ ܟܰܕ ܒܰܟܝܳܢܳܐ ܐܺܝܬܰܘܗ̱ܝ ܐܰ‌ܠܳܗܳܐ܆ ܟܰܕ ܠܳܐ ܫܰܚܠܶܦ ܠܗܳܝ ܕܺܐܝܬܰܘܗ̱ܝ ܗ̱ܘܳܐ܆ ܐܳܦ ܒܰܟܝܳܢܳܐ ܗܘ̣ܳܐ ܒܰܪܢܳܫܳܐ܆ ܟܰܕ ܠܙܰܪܥܶܗ ܕܰܐܒܪܳܗܳܡ ܠܒܰܟ^[11]. ܗܳܝ ܕܶܝܢ ܕܰܠܒܰܟ ܐܰܘܟܺܝܬ ܩܡܰܛ܆ ܠܰܟܝܳܢܳܐ ܕܺܝܠܰܢ ܕܒܰܕܡܽܘܬ ܒܥܺܝܪܳܐ ܬܰܙ ܘܰܫܘܰܪ ܥܪܰܩ ܡܶܢ ܐܰ‌ܠܳܗܳܐ ܡܰܘܕܥܳܐ܆ ܘܰܒܝܰܕ ܡܶܬܬܰܚܬܝܳܢܽܘܬܳܐ ܕܺܝܠܶܗ ܕܰܠܘܳܬܶܗ ܐܶܬܕܪܶܟ ܘܶܐܬܬܰܝܬܺܝ ܘܶܐܬܩܰܪܰܒ ܠܶܗ.

ܕܰܥܝܳܕܳܐ ܗܝ ܓܶܝܪ ܐܺܝܬܶܝܗ̇ ܠܡܶܨ̈ܥܳܝܶܐ ܘܠܰܡܪ̈ܰܥܝܳܢܶܐ ܕܰܢܩܽܘܡـ[ܘܢ] ܒܝ[ܢܬ ܗܳܢـ]ܘܢ ܕܰܒܥܶܠ̈ܕܒܳܒܶܐ [ܐܺܝܬܰܝܗܽܘܢ܆] ܒܰܚܕܳܐ ܡܰܢ ܐܺܝܕܳܐ ܕܟܽܠܚܰܕ ܡܶܢܗܽܘܢ [ܢܐܚܕܘܢ]܆ ܘܰܢܟܰܢܫܽܘܢ ܐܶܢܽܘܢ ܠܘܳܬ ܐܰܚܽܘܬܳܐ ܐܰܘܟܺܝܬ ܢܰܩܺܝܦܽܘܬܳܐ. ܗܳܝ ܕܳܐܦ ܡܶܛܽܠܳܬܰܢ ܥܰܒܕܳܗ̇ ܡܫܺܝܚܳܐ ܫܰܝܢܳܐ^[12]. ܡܶܛܽܠ ܗܳܝ ܕܳܐܦ ܫܡܳܐ ܗܘܳܐ ܗܰܘ ܠܶܗ ܬܽܘܪܳܨܳܐ܆ ܘܟܰܕ ܕܰܠܩܽܘܒܠܳܐ ܘܰܡܥܰܠܝܳܐ ܐܺܝܬܰܝܢ ܗ̱ܘܰܝܢ ܕܰܠܩܽܘܒܠܳܐ ܕܣܰܟ̈ܠܘܳܬܳܐ܆ ܘ[ܪ̈ܽܘܫܥܶܐ ܪܰܥܺܝ ܠܰܐܒܳܐ ܫܡܰܝܳܢܳܐ܆] ܟܰܕ ܡܫܰܡܠܝܳܐܺܝܬ ܩܰܛܠܳܗ̇ ܠܰܒܥܶܠܕܒܳܒܽܘܬܳܐ ܒܰܨܠܺܝܒܳܐ ܕܰܚܠܳܦ ܟܽܠܗܽܘܢ ܒܢܰܝ̈ܢܳܫܳܐ^[13] [ܡܺܝܬ܆ ܘܰܚܠܳܦ] ܗܳܢܽܘܢ ܕܚܰܝ̣ܺܝ̣ܢ ܗܘ̣ܰܘ܆ ܘܰܚܠܳܦ ܗܳܢܽܘܢ ܕܫܰܢܺܝܘ ܗ̱ܘܰܘ ܡܶܢ ܚܰܝ̈ܶܐ ܕܗܳܪܟܳܐ.

ܘܠܳܐ ܬܶܬܚܙܶܐ ܠܳܟ ܐܰܟܣܢܳܝܬܳܐ ܗܳܝ ܕܡܶܬܰܐܡܪܳܐ܆ ܐܶܢ ܚܠܳܦ ܗܳܢܽܘܢ ܕܡܶܢ ܟܰܕܽܘ ܡܰܝ̣ܺܝ̣ܬܺܝܢ ܗ̱ܘܰܘ܆ ܫܳܡܰܥ ܐܰܢ̱ܬ ܕܡܺܝܬ ܡܫܺܝܚܳܐ܆ ܦܰܘܠܽܘܤ ܓܶܝܪ ܡܢܰܗܰܪ ܠܳܗ̇ ܠܥܶܠܬܳܐ ܓܰܠܝܳܐܺܝܬ. ܟܰܕ ܐܳܡܰܪ: ܐܶܠܳܐ ܐܰܡܠܶܟ ܡܰܘܬܳܐ ܐܳܦ ܥܰܠ ‌ܐܰܝܠܶܝܢ ܕܠܳܐ ܚܛܰܘ܆ ܒܰܕܡܽܘܬܳܐ ܕܰܥܒܳܪ ܦܽܘܩܕܳܢܶܗ ܕܳܐܕܳܡ^[14]. ܡܳܢܳܐ ܕܶܝܢ ܐܺܝܬܶܝܗ̇ ܗܳܕܶܐ؟ ܚܛܳܐ ܐܳܦ ܐܳܕܳܡ ܒܰܥܒܽܘܪܝܳܐ ܕܦܽܘܩܕܳܢܳܐ܆ ܐܰܘܒܶܕ ܠܛܰܝܒܽܘܬܳܐ ܕܠܳܐ ܡܳܝܽܘܬܽܘܬܳܐ. ܡܰܘܬܳܐ ܓܶܝܪ ܩܰܒܶܠ ܡܣܳܡ ܒܪܺܝܫܳܐ ܕܰܚܠܳܦ ܚܛܺܝܬܳܐ. ܫܡܰܥ ܓܶܝܪ ܕܥܰܦܪܳܐ ܐܺܝܬܰܝܟ܆ ܘܰܠܥܰܦܪܳܐ ܬܺܐܙܰܠ^[15]܆ ܡܶܟܺܝܠ‌ ܐܰܝܟ ܕܡܶܢ ܐܰܒܳܐ ܡܳܝܽܘܬܳܐ ܡܳܝ̈ܽܘܬܶܐ ܗܘ̣ܰܝܢ ܐܳܦ ܚܢܰܢ܆ ܟܰܕ ܢܦܰܠܢ ܬܚܶܝܬ ܦܰܟܶܗ ܕܡܰܘܬܳܐ. ܘܫܳܪ̈ܽܘܥܶܐ ܡܰܢ ܠܘܳܬ ܚܛܺܝܬܳܐ܆ ܐܰܟܣ̈ܢܳܝܶܐ ܕܶܝܢ ܡܶܢ ܒܰܝܬܳܝܽܘܬܳܐ ܕܰܠܘܳܬ ܐܰ‌ܠܳܗܳܐ. ܐܶܢ ܕܶܝܢ ܐܳܦ ܐ̱ܢܳܫ ܐܶܬܬܪܺܝܡ ܠܥܶܠ ܡܶܢ ܥܫܽܘܡܝܳܗ̇ ܕܰܚܛܺܝܬܳܐ ܘܦܰܟܳܗ̇܆ ܟܰܕ ܚ̣ܝܳܐ ܘܶܐܬܕܒܰܪ ܙܰܕܺܝܩܳܐܺܝܬ. ܐܰܝܟ ܚܢܽܘܟ ܘܢܽܘܚ ܘܰܐܒܪܳܗܳܡ ܘܗܳܢܽܘܢ ܕܰܠܗܳܠܶܝܢ ܕܳܡܶܝܢ ܒܰܡܝܰܬܪܽܘܬܳܐ܆ ܠܳܐ ܡܰܢ ܡܶܬܚܰܝܒܺܝܢ ܗ̱ܘܰܘ. ܡܶܢ ܗܳܢܽܘܢ ܕܰܠܗܽܘܢ ܡܶܣܬܰܥܪ̈ܳܢ ܗ̱ܘܰܝ̈܆ ܟܰܕ ܡܶܬܬܰܡܠܟܺܝܢ ܗ̱ܘܰܘ ܕܶܝܢ ܡܶܢ ܡܰܘܬܳܐ ܩܰܪܺܝܒܳܐ ܡܶܫܬܰܢܶܝܢ ܗ̱ܘܰܘ ܡܶܢ ܗܳܪܟܳܐ܆ ܡܶܛܽܠ ܚܽܘܝܳܒܳܐ ܗܰܘ ܕܡܶܢ ܥܒܳܪ ܦܽܘܩܕܳܢܳܐ ܕܳܐܕܳܡ ܢܳܚܶܬ ܗ̱ܘܳܐ.

ܚܙܺܝ ܓܶܝܪ ܐܰܝܟܰܢܳܐ ܙܗܺܝܪܳܐܺܝܬ ܐܶܡܰܪ ܦܰܘܠܽܘܤ. ܐܰܡܠܶܟ ܡܰܘܬܳܐ ܐܳܦ ܥܰܠ ‌ܐܰܝܠܶܝܢ ܕܠܳܐ ܚܛܰܘ. ܠܰܘ ܡܶܢ ܗܳܠܶܝܢ. ܕܰܠܗܽܘܢ ܣܥܺܝܪ̈ܳܢ ܗ̱ܘܰܝ̈܆ ܐܳܦ ܠܳܐ ܓܶܝܪ ܚܛܰܘ. ܐܶܠܐ܆ ܒܰܕܡܽܘܬܳܐ ܕܰܥܒܳܪ ܦܽܘܩܕܳܢܳܐ ܕܳܐܕܳܡ. ܘܰܐܝܟܳܐ ܗ̱ܝ ܟܺܐܢܽܘܬܳܐ ܟܒܰܪ ܬܺܐܡܰܪ܆ ܕܡܶܢ ܥܒܳܪ ܦܽܘܩܕܳܢܶܗ ܕܳܐܕܳܡ܆ ܬܚܶܝܬ ܢܶܫ̈ܒܰܘ̈ܗ̱ܝ ܕܡܰܘܬܳܐ ܢܶܗܘܽܘܢ ܟܽܠܗܽܘܢ ܒܢܰܝ̈ܢܳܫܳܐ܆ ܘܳܐܦ ܗܳܢܽܘܢ ܕܠܳܐ ܡܶܕܶܡ ܚܛܰܘ. ܐܶܠܳܐ ܡܶܛܽܠܗܳܕܶܐ. ܟܰܕ ܩܳܕܶܡ ܡܪܺܝܡ ܠܳܗ̇ ܠܰܗܦܳܟܬܳܐ ܗܰܘ ܫܠܺܝܚܳܐ ܐܶܡܰܪ: ܕܒܰܕܡܽܘܬܳܐ ܕܰܥܒܳܪ ܦܽܘܩܕܳܢܳܐ ܕܳܐܕܳܡ܆ ܗܰܘ ܕܺܐܝܬܰܘܗ̱ܝ ܛܽܘܦܣܳܐ ܕܗܰܘ ܕܰܥܬܺܝܕ. ܡܰܢܽܘ ܕܶܝܢ ܐܺܝܬܰܘܗ̱ܝ ܗܰܘ ܕܰܥܬܺܝܕ. ܐܳܕܳܡ ܗܰܘ ܬܪܰܝܳܢܳܐ. ܝܶܫܽܘܥ ܡܫܺܝܚܳܐ܆ ܕܗܰܘ ܕܰܗܘ̣ܳܐ ܛܽܘܦܣܳܐ ܕܺܝܠܶܗ ܗܰܘ ܩܰܕܡܳܝܳܐ. ܐܰܝܟܰܢܳܐ ܕܳܐܦ ܗܰܘ ܗܽܘ ܒܝܰܕ ܩܢܽܘܡܶܗ ܕܺܝܠܶܗ ܚܰܝܶܒ ܠܣܰܓܺܝ̈ܶܐܐ܆ ܗܳܟܰܢܳܐ ܗܳܢܳܐ ܠܣܰܓܺܝ̈ܶܐܐ ܢܙܰܕܶܩ ܗܽܘ ܒܝܰܕ ܩܢܽܘܡܳܐ ܕܢܰܦܫܶܗ. ܘܰܐܝܟ ܙܢܳܐ ܕܗܰܘ ܫܰܕܰܪ ܠܘܳܬ ܡܳܝܽܘܬܽܘܬܳܐ܆ ܗܳܟܰܢܳܐ ܗܳܢܳܐ ܢܫܰܕܰܪ ܛܰܝܒܽܘܬܳܐ ܕܠܳܐ ܡܳܝܽܘܬܽܘܬܳܐ܆ ܟܰܕ ܐܶܬܥܰܪܙܰܠ ܗܰܘ ܠܳܐ ܡܳܝܽܘܬܳܐ ܒܝܰܕ ܒܶܣܪܳܐ ܥܰܡ ܡܰܘܬܳܐ. ܘܰܫܪܳܐ ܩܝܳܡܬܶܗ ܠܡܰܠܟܽܘܬܳܐ ܕܺܝܠܶܗ ܗܳܝ ܕܰܐܡܠܶܟ ܥܠܰܝܢ.

 ܠܳܐ ܡܶܕܶܡ ܗܳܟܺܝܠ ‌ܐܶܣܬܰܓܰܦܢܰܢ ܒܝܰܕ ܥܒܳܪ ܦܽܘܩܕܳܢܳܐ ܕܳܐܕܳܡ ܗܰܘ ܩܰܕܡܳܝܳܐ܆ ܡܶܛܽܠ ܟܺܝܬ ܕܰܒܝܰܕ ܗܰܘ ܬܪܰܝܳܢܳܐ܆ ܣܰܓܺܝ ܪܰܘܪܒܳܐܺܝܬ ܐܶܬܥܰܕܰܪܢܰܢ. ܫܒܽܘܩ ܟܺܝܬ ܕܳܐܦ ܗܺܝ ܟܒܰܪ ܕܰܒܝܰܕ ܗܰܘ ܬܪܰܝܳܢܳܐ܆ ܣܰܓܺܝ ܪܰܘܪܒܳܐܺܝܬ ܐܶܬܥܰܕܰܪܢܰܢ. ܫܒܽܘܩ ܟܺܝܬ ܕܳܐܦ ܗܺܝ ܗܳܝ ܕܡܰܘܬܳܐ ܐܶܬܚܰܝܰܒ ܐܳܕܳܡ ܗܰܘ ܩܰܕܡܳܝܳܐ. ܕܥܽܘܕܪܳܢܳܐ ܪܰܒܳܐ ܘܪܺܝܫܳܝܳܐ ܐܺܝܬܶܝܗ̇. ܐܶ‌ܠܽܘ ܓܶܝܪ ܟܰܕ ܚܛܳܐ ܗ̱ܘܳܐ܆ ܠܳܐ ܡܳܝܽܘܬܳܐ ܩܰܘܺܝ ܗ̱ܘܳܐ܆ ܠܳܐ ܡܶܬܦܰܣ̈ܩܳܢ ܗ̱ܘܰܝ̈ ܗܳܠܶܝܢ ܕܰܚܛܺܝܬܳܐ܆ ܘܠܳܐ ܡܳܝܽܘܬܬܳܐ ܡܟܰܬܪܳܐ ܗ̱ܘܳܬ ܗܺܝ ܒܺܝܫܬܳܐ. ܗܳܫܳܐ ܕܶܝܢ ܟܰܕ ܫܡܰܥܢܰܢ ܒܶܗ܆ ܕܥܰܦܪܳܐ ܐܺܝܬܰܝܟ ܘܰܠܥܰܦܪܳܐ ܬܺܐܙܰܠ^[16]. ܠܳܐ ܐܶܬܪܚܰܩܢܰܢ ܘܶܐܫܬܒܰܩܢܰܢ ܡܶܢ ܐܰ‌ܠܳܗܳܐ ܗܰܘ ܟܺܐܢܳܐ. ܐܳܦܶܢ ܓܶܝܪ ܘܫܳܩܶܠ ܪܽܘܚܳܐ ܕܺܝܠܰܢ ܘܓܳܡܪܺܝܢ ܚ̱ܢܰܢ܆ ܘܰܠܥܰܦܪܳܐ ܕܺܝܠܰܢ ܗܳܦܟܺܝܢ ܚ̱ܢܰܢ^[17] ܐܰܝܟܰܢܳܐ ܕܰܢܒܺܝܳܐ ܗܰܘ ܕܰܡܙܰܡܰܪ ܐܳܡܰܪ: ܐܶܠܳܐ ܟܰܕ ܪܰܗܒܽܘܢܳܐ ܢܣܰܒܢܰܢ ܕܰܩܝܳܡܬܳܐ܆ ܘܛܰܝܒܽܘܬܳܐ ܕܣܳܝܽܘܡܽܘܬ ܒܢܰܝ̈ܳܐ܆ ܚ̈ܰܕܬ̣ܶܐ ܡܶܕܶܡ ܢ݀ܩܽܘܡ܆ ܘܟܰܕ ܠܰܚܛܺܝܬܳܐ ܗܳܝ ܥܰܬܺܝܩܬܳܐ ܫܳܠܚܺܝܢ ܚ̱ܢܰܢ. ܬܫܰܕܰܪ ܓܶܝܪ ܐܳܡܰܪ ܠܪܽܘܚܳܐ ܕܺܝܠܳܟ܆ ܘܢܶܬܒ̣ܪܽܘܢ܆ ܘܰܬܚܰܕܶܬ ܦܰܪܨܽܘܦܳܐ ܕܰܐܪܥܳܐ^[18].

ܡܶܛܽܠ ܗܳܕܶܐ ܗܳܟܺܝܠ ܡܶܢ ܒܳܬܰܪ ܥܺܐܕܳܐ ܕܰܩܝܳܡܬܳܐ܆ ܕܽܘܟܪܳܢܳܐ ܕܟܺܐܢ̈ܶܐ ܗܳܢܽܘܢ ܕܡܶܢ ܥܳܠܰܡ ܡܫܰܡܠܶܝܢ ܚ̱ܢܰܢ܆ ܡܶܛܽܠ ܟܺܝܬ ܕܰܐܡܠܶܟ ܡܰܘܬܳܐ܆ ܐܳܦ ܥܰܠ ‌ܐܰܝܠܶܝܢ ܕܠܳܐ ܚܛܰܘ܆ ܒܰܕܡܽܘܬܳܐ ܕܰܥܒܳܪ ܦܽܘܩܕܳܢܳܐ ܕܳܐܕܳܡ^[19]. ܘܡܶܛܽܠܳܬܗܽܘܢ ܕܗܳܠܶܝܢ܆ ܛܰܝܒܽܘܬܳܐ ܡܰܘܕܶܝܢ ܚ̱ܢܰܢ ܠܦܳܪܽܘܩܳܐ ܕܟܽܠܰܢ ܡܫܺܝܚܳܐ܆ ܕܰܢܚܶܬ ܠܰܐܬܪ̈ܰܘܳܬܳܐ ܬܰܚ̈ܬܳܝܶܐ ܕܰܐܪܥܳܐ܆ ܘܬܰܪ̈ܥܶܐ ܡܰܢ ܐܰܝܟܰܢܳܐ ܕܰܟܬܺܝܒ ܟܰܕ ܚܙܰܐܽܘܗ̱ܝ ܙܳܥܘ^[20]. ܠܡܽܘ̈ܟܠܶܐ ܕܶܝܢ ܕܦܰܪܙܠܳܐ ܘܰܠܬܰܪ̈ܥܶܐ ܕܡܰܘܬܳܐ ܗܳܠܶܝܢ ܕܰܢܚܳܫܳܐ ܬܰܒܰܪ^[21]܆ ܘܝܰܗ̱ܒ ܐܳܦ ܠܗܽܘܢ ܣܰܒܪܳܐ ܓܰܠܝܳܐ ܘܫܰܪܺܝܪܳܐ ܕܰܩܝܳܡܬܳܐ ܗܳܝ ܕܶܐܣܬܰܟܝܰܬ ܠܗܽܘܢ ܡܶܢ ܩܕܺܝܡ܆ ܟܰܕ ܕܫܳܥܬܳܐ ܡܢܺܝܚ ܠܗܽܘܢ ܒܰܐܬܪ̈ܰܘܳܬܳܐ ܡܶܕܶܡ ܢܰܗܺܝܪ̈ܶܐ܆ ܘܰܒܒܽܘܣܳܡܳܐ ܗܰܘ ܕܦܰܪܕܰܝܣܳܐ. ܡܶܛܽܠܳܬܳܗ̇ ܓܶܝܪ ܕܗܳܕܶܐ. ܒܶܐܘܰܢ̈ܓܶܠܝܰܐ. ܠܘܳܬ ܝܽܗ̱ܘ̈ܕܳܝܶܐ ܐܳܡܰܪ ܦܳܪܽܘܩܰܢ: ܐܰܒܪܳܗܳܡ ܐܰܒܽܘܟܽܘܢ ܕܳܨ ܘܶܐܬܪܰܓܪܰܓ ܕܢܶܚܙܶܐ ܠܝܰܘܡܳܐ ܗܰܘ ܕܺܝܠܝ܆ ܘܰܚܙܳܐ. ܘܰܚܕܺܝ^[22]. ܡܳܢܳܐ ܗܳܟܺܝܠ ‌ܐܺܝܬܰܝܗܽܘܢ܆ ܗܳܠܶܝܢ ܟܺܝܬ ܕܰܚܠܳܦ ܥܽܘܕܪ̈ܳܢܶܐ ܘܫܰܦܺܝܪܽܘܬ ܣܳܥܽܘܪ̈ܘܳܬܳܐ ܕܰܐܝܟ ܗܳܠܶܝܢ ܚܢܰܢ ܡܶܬܬܰܒܥܺܝܢܰܢ܆ ܡܶܢ ܫܠܺܝܚܳܐ ܕܡܰܠܶܦ ܢܺܐܠܰܦ. ܚܰܕ ܐܳܡܰܪ ܚܠܳܦ ܟܽܠܢܳܫ ܡܺܝܬ܆ ܐܰܝܟܰܢܳܐ ܕܗܳܢܽܘܢ ܕܚܰܝ̣ܺܝ̣ܢ܆ ܠܳܐ ܬܽܘܒ ܠܢܰܦܫܗܽܘܢ ܢܺܚܽܘܢ܆ ܐܶܠܐ. ܠܗܰܘ ܕܰܚܠܳܦܰܝܗܽܘܢ ܡܺܝܬ ܘܩܳܡ^[23].

ܐܰܪܰܐ ܗܳܟܺܝܠ܆ ܟܽܠ ܚܰܕ ܡܶܢܰܢ. ܠܳܐ ܗ̱ܘܳܐ ܠܢܰܦܫܶܗ ܚܰܝ ܒܰܠܚܽܘܕ. ܘܠܳܐ ܗ̱ܘܳܐ ܠܰܡܫܺܝܚܳܐ܆ ܐܶܡܰܬܝ ܕܗܰܘ ܡܰܢ ܒ̈ܳܬܶܐ ܢܰܨܺܝ̈ܚܶܐ ܒܳܢܶܐ܆ ܟܰܕ ܩܒܺܝܥ ܘܰܐܣܺܝܪ ܒܰܐܪܥܳܐ܆ ܘܠܳܐ ܡܣܰܟܶܐ ܕܡܳܐܶܬ ܡܬܽܘܡ. ܘܠܳܐ ܕܡܶܫܬܰܢܶܐ ܠܘܳܬ ܚܰܝ̈ܶܐ ܕܰܥܬܺܝܕܺܝܢ܆ ܗܰܘ ܕܶܝܢ ܐܰܟܳܪܽܘܬܳܐ ܦܳܠܰܚ. ܥܰܘܳܠܳܐܺܝܬ. ܐ̱ܚܪܺܢܳܐ ܕܶܝܢ ܬܶܓܽܘܪܬܳܐ ܥܳܠܽܘܒܳܐܺܝܬ܆ ܐ̱ܚܪܺܢܳܐ ܕܶܝܢ. ܝܰܙܦ̈ܳܬܳܐ ܠܝܰܙܦ̈ܳܬܳܐ ܐܰܟܚܕܳܐ ܡܰܩܶܦ܆ ܘܝܳܨܶܦ ܕܰܐܝܟܰܢܳܐ ܪܶܒܺܝܬܳܐ ܗܳܝ ܕܰܒܙܰܒܢܳܐ ܡܰܝ̣ܺܝ̣ܬܳܐ ܗ̱ܘܳܬ܆ ܡܶܢ ܫܛܳܪ̈ܶܐ ܚ̈ܰܕܬ̣ܶܐ ܬܶܬܥܺܝܪ ܘܬܶܬܢܰܚܰܡ܆ ܘܠܰܘ ܕܰܐܝܟܰܢܳܐ ܗܽܘ ܒܰܩܝܳܡܬܳܐ ܕܙܰܕܺܝ̈ܩܶܐ ܢܩܽܘܡ܆ ܘܥܳܒܰܪ ܒܪܶܗܛܳܐ ܠܡܶܣܟܺܢܳܐ. ܟܰܕ ܐܳܦܠܳܐ ܫܳܡܽܘܢܳܐ ܙܥܽܘܪܳܐ ܡܰܘܫܶܛ ܠܶܗ܆ ܐܳܦܠܳܐ ܡܶܬܚܰܫܰܒ ܕܠܰܡܫܺܝܚܳܐ ܕܰܟܦܶܢ ܥܳܒܰܪ.

ܡܳܢܳܐ ܕܶܝܢ ܐܺܡܰܪ ܡܶܛܽܠ ܢܶܫ̈ܶܐ ܗܳܢܶܝܢ ܕܒܰܦܣܳܩ ܣܰܒܪܳܐ ܐܳܙ̈ܳܠ̱ܢ ܘܡܰܪ̈ܩܕܳܢ ܥܰܠ ܡܺܝ̈ܬܶܐ ܕܺܝܠܗܶܝܢ. ܐܰܪܰܐ܆ ܠܰܘ ܠܘܳܬ ܡܰܪܫܽܘܬܳܐ ܕܠܳܐ ܗܰܝܡܳܢܽܘܬܳܐ ܝܰܬܺܝܪܳܐܺܝܬ ܡܰܝ̈ܬܝܳܢ ܠܗܽܘܢ ܥܠܰܝܢ܆ ܘܰܠܝܽܗ̱ܘ̈ܕܳܝܶܐ ܘܰܠܚܰܢ̈ܦܶܐ܆ ܢܺܐܡܪܽܘܢ ܓܶܝܪ ܟܺܐܢܳܐܺܝܬ܆ ܐܰܝܢܳܐ ܣܰܒܪܳܐ ܐܺܝܬ ܠܗܽܘܢ ܕܚܰܝ̈ܶܐ ܕܰܥܬܺܝܕܺܝܢ܆ ܠܗܳܢܽܘܢ ܕܗܳܟܰܢܳܐ ܠܳܐ ܡܶܬܒܰܝܳܐܢܳܐܺܝܬ ܐܳ‌ܠܶܝܢ ܟܺܝܬ ܘܡܶܬܰܐܠܶܝܢ. ܥܶܠܬܳܐ ܕܶܝܢ ܕܗܳܠܶܝܢ ܐܶܒ̈ܠܶܐ܆ ܡܶܛܽܠ ܕܟܰܕ ܠܳܐ ܡܶܕܶܡ ܐܺܝܬ ܠܰܢ ܙܘ̈ܳܕܶܐ ܕܰܩܝܳܡܬܳܐ ܡܶܢ ܥ̈ܒܳܕܶܐ ܛܳܒ̈ܶܐ ܡܶܬܬܰܘܒܠܺܝܢܰܢ. ܘܰܟܒܰܪ. ܐܶ‌ܠܽܘ ܒܬܰܪܥܺܝܬܳܐ ܗܳܕܶܐ ܒܳܟܶܝܢ ܗ̱ܘܰܝܢ܆ ܠܳܐ ܐܺܝܬܰܝܗܶܝܢ ܗ̱ܘܰܝܢ ܕܶܡ̈ܥܰܝܢ ܬܚܶܝܬ ܩܛܺܓܪܳܢܽܘܬܳܐ. ܗܳܫܳܐ ܕܶܝܢ. ܡܕܰܡܥܺܝܢ ܚ̱ܢܰܢ ܠܰܘ ܐܰܝܟ ܡܰܢ ܕܡܶܢ ܛܳܒ̈ܳܬܳܐ ܗܳܠܶܝܢ ܕܰܠܥܳܠܰܡ܆ ܥܬܺܝܕܺܝܢ ܕܢܶܦܕܽܘܢ ܗܳܢܽܘܢ ܕܰܥܢܰܕܘ܆ ܡܶܛܽܠ ܠܳܐ ܡܥܰܬܕܽܘܬܳܐ ܘܠܳܐ ܡܛܰܝܒܽܘܬܳܐ܆ ܐܶܠܳܐ ܐܰܝܟ ܡܰܢ ܕܡܶܢ ܗܳܠܶܝܢ ܚܰܝ̈ܶܐ ܒܺܝ̈ܫܶܐ ܘܰܬܥܺܝ̈ܫܶܐ ܐܰܓܗܺܝܘ.

ܒܰܕܓܽܘܢ ܡܶܬܚܢܶܩ ܐ̱ܢܳܐ. ܘܡܶܬܡܰܪܡܰܪ^[24] ܐ̱ܢܳܐ. ܘܡܶܨܛܪܶܐ ܐ̱ܢܳܐ܆ ܕܟܰܕ ܡܫܰܡܫܳܢܳܐ ܡܰܟܪܶܙ ܒܰܨܠܽܘܬܳܐ ܕܰܚܠܳܦ ܗܰܘ ܕܰܫܟܶܒ܆ ܘܰܡܫܰܡܰܗ ܠܗܰܘ ܕܰܥܢܰܕ ܘܡܶܬܟܰܫܰܦ ܚܠܳܦܰܘܗ̱ܝ ܐܰܝܟܰܢܳܐ ܕܢܶܫܬܘܶܐ ܠܰܢܝܳܚܬܳܐ܆ ܫܳܡܰܥ ܐ̱ܢܳܐ ܠܽܐܘܠܺܝܬܳܐ ܘܰܠܝܺܠܰܠܬܳܐ ܕܢܶܫ̈ܶܐ ܕܡܶܬܬܪܺܝܡܳܐ ܠܥܶܠ ܡܶܢ ܩܳܠܐ ܕܟܽܠܢܳܫ܆ ܐܰܝܟܰܢܳܐ ܕܠܳܐ ܡܶܟܺܝܠ ܢܶܫܬܡܰܥ ܩܳܠܶܗ ܕܗܰܘ ܕܡܰܟܪܶܙ ܘܡܶܬܟܰܫܰܦ܆ ܟܰܕ ܙܳܕܶܩ ܗ̱ܘܳܐ ܕܰܐܟܚܕܳܐ ܢܨܰܠ̈ܝܳܢ ܥܰܡܰܢ܆ ܘܢܶܬܐܰܠ̈ܨܳܢ ܘܢܶܟܰܐܒ ܠܗܶܝܢ ܡܶܛܽܠ ܡܰܪܕܺܝܬܶܗ ܕܚܺܝܠܬܳܐ ܕܗܰܘ ܕܰܚܙܰܩ ܘܡܶܬܕܰܒܪܳܢܽܘܬܶܗ܆ ܘܩܰܘܡܳܐ ܗܰܘ ܡܠܶܐ ܪܬ̣ܺܝܬ̣ܳܐ ܕܰܩܕܳܡ ܒܺܐܡܰܐ ܕܰܡܫܺܝܚܳܐ.

ܐܶܠܐ. ܘܠܳܐ ܚܕܳܐ ܡܶܠܬܳܐ ܐܺܝܬ ܠܰܢ ܡܶܛܽܠ ܗܳܠܶܝܢ ܕܰܥ̈ܬܺܝܕܳܢ. ܟܰܕ ܗܳܟܺܝܠ ܗܳܠܶܝܢ ܟܽܠܗܶܝܢ ܢܬܰܪܶܨ܆ ܘܰܠܥܽܘܗܕܳܢܳܐ ܗܰܘ ܕܡܶܛܽܠ ܙܰܕܺܝ̈ܩܶܐ. ܒܗܰܘܢܰܢ ܢܶܣܰܒ܆ ܢ݀ܨܰܠܶܐ ܕܢܶܫܬܘܶܐ ܠܦܶܣܳܐ ܘܝܽܘܪܬܳܢܳܐ ܗܰܘ ܕܥܰܡܗܽܘܢ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܆ ܕܥܰܡܶܗ. ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܩܰܕܺܝܫܳܐ܆ ܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܡ ܡܺܐܡܪܳܐ ܕܰܐܪܒܥܺܝܢ ܘܰܐܪܒܥܳܐ.

ܬܗܪܐ[1]

ܐ. ܛܝܡܬܐܘܣ. 2: 5 ـ 6 [2]

ܐ. ܩܘܪ̈ܝܢܬܝܐ. 2: 8 [3]

ܪ̈ܗܘܡܝܐ. 9: 5 [4]

ܥܒܪ̈ܝܐ. 13: 8 [5]

ܪ̈ܗܘܡܝܐ. 8: 32 [6]

ܐ. ܩܘܪ̈ܝܢܬܝܐ. 2: 8 [7]

ܦܝܠܝܦܣ̈ܝܐ. 2: 8 [8]

ܐܦܣ̈ܝܐ. 5: 2 [9]

ܐ. ܛܝܡܬܐܘܣ. 2: 5 ـ 6 [10]

ܥܒܪ̈ܝܐ. 2: 16 [11]

ܐܦܣ̈ܝܐ. 2: 14 [12]

ܐܦܣ̈ܝܐ. 2: 16 [13]

ܪ̈ܗܘܡܝܐ. 5: 14 [14]

ܣܦܪܐ ܕܒܪܝܬܐ. 3: 19 [15]

ܣܶܦܪܐ ܕܒܪܝܬܐ. 3: 19 [16]

ܡܙܡܘܪ̈ܐ. 104: 29 [17]

ܡܙܡܘܪ̈ܐ. 104: 30 [18]

ܪ̈ܗܘܡܝܐ. 5: 14 [19]

ܐܝܘܒ. 38: 17 [20]

ܡܙܡܘܪ̈ܐ. 107: 16 [21]

ܝܘܚܢܢ. 8: 56 [22]

ܒ. ܩܘܪ̈ܝܢܬܝܐ. 5: 14 ـ 15 [23]

ܘܫܳܢܶܐ[24]