ܡܺܐܡܪܳܐ ܕܰܐܪܒܥܺܝܢ ܘܰܬܠܳܬܳܐ

ܥܰܠ ܦܶܬܓܳܡܳܐ ܗܰܘ ܕܝܽܘܚܰܢܳܢ. ܘܡܶܢ ܡܰܠܝܽܘܬܳܐ ܕܺܝܠܶܗ ܚܢܰܢ ܟܽܠܰܢ ܢܣܰܒܢ܆ ܘܛܰܝܒܽܘܬܳܐ ܚܠܳܦ ܛܰܝܒܽܘܬܳܐ^[1]܆ ܘܥܰܠ ܥܡܺܝ̈ܕܰܝ ܚܰܕܬܳܐܺܝܬ.

43: ܫܳܡܥܺܝܢܰܢ. ܕܶܐܘܰܢܓܶܠܝܣܛܐ ܐܰ‌ܠܳܗܳܝܳܐ ܝܽܘܚܰܢܳܢ܆ ܟܰܕ ܠܪܰܒܽܘܬܳܐ ܕܪܶܚܡܰܬ ܐ̱ܢܳܫܽܘܬܳܐ ܠܳܐ ܡܶܬܡܰܠܠܳܢܺܝܬܳܐ ܕܺܝܚܺܝܕܳܝܳܐ ܒܪܳܐ ܕܰܐ‌ܠܳܗܳܐ ܘܡܶܠܬܳܐ܆ ܒܪܰܒܽܘܬ ܩܳܠܳܐ ܨܳܒܶܐ ܗ̱ܘܳܐ ܠܰܡܚܰܘܳܝܽܘ܆ ܗܳܝ ܕܰܒܝܰܕ ܡܶܬܒܰܪܢܫܳܢܽܘܬܳܐ ܚܰܘܺܝ܆ ܡܶܬܕܰܡܪܳܢܳܐܺܝܬ ܐܰܙܥܶܩ: ܡܶܠܬܳܐ ܒܶܣܪܳܐ ܗܘ̣ܳܐ ܘܰܐܓܶܢ ܒܰܢ^[2]. ܟܰܕ ܐܰܝܟ ܕܰܠܡܺܐܡܰܪ ܐܳܡܰܪ ܗ̱ܘܳܐ܆ ܐܘ ܠܥܽܘܬܪܳܐ ܦܐܶܐ ܠܰܐܠܳܗܳܐ ܘܕܰܡܫܽܘܚܬܳܐ ܠܰܝܬ ܠܶܗ܆ ܕܛܳܒܽܘܬܳܐ ܗܳܝ ܕܰܠܘܳܬܰܢ ܗܰܘ ܪܳܡܳܐ ܘܕܰܠܗܰܠ ܡܶܢ ܟܽܠ ܟܝܳܢܳܐ܆ ܗܰܘ ܕܒܺܐܝܕܰܘ̈ܗ̱ܝ ܟܽܠܗܶܝܢ ܐܶܬܒܪ̈ܺܝܶܢ ܗܳܠܶܝܢ ܡܶܬܚܰܙܝܳܢ̈ܝܳܬܳܐ ܘܠܳܐ ܡܶܬܚܰܙܝܳܢ̈ܝܳܬܳܐ܆ ܗܰܘ ܕܠܰܟܪ̈ܽܘܒܶܐ ܘܠܰܣܪ̈ܳܦܶܐ ܕܚܺܝܠܳܐ ܘܠܳܐ ܡܶܬܚܰܙܝܳܢܳܐ܆ ܘܰܠܟܽܠܗܽܘܢ ܚܰܝ̈ܠܰܘܳܬܳܐ ܕܰܠܥܶܠ ܡܶܢ ܥܳܠܡܳܐ܆ ܡܶܢ ܪܰܘܡܳܐ ܗܰܘ ܠܳܐ ܡܶܬܩܰܪܒܳܢܳܐ ܘܰܕܗܳܟܰܢܳܐ ܝܰܬܺܝܪ ܪܳܡ܆ ܐܰܘ ܐܰܝܟܰܢܳܐ ܕܢܺܐܡܰܪ ܐ̱ܢܳܫ. ܐܳܦ ܩܰܪܩܰܦܬܳܐ܆ ܠܘܳܬ ܕܰܐܝܟ ܐܰܝ̇ܕܳܐ ܡܫܽܘܚܬܳܐ ܕܡܰܟܺܝܟܽܘܬܳܐ ܢܚܶܬ܆ ܒܶܣܪܳܐ ܗܘܳܐ ܘܰܐܓܶܢ ܒܰܢ.

ܡܶܢ ܩܕܺܝܡ ܡܰܢ ܓܶܝܪ ܒܢܰܦ̈ܫܳܬܳܐ ܕܙܰܕܺܝ̈ܩܶܐ ܡܕܰܝܰܪ ܗ̱ܘܳܐ܆ ܘܒܰܙܒܰܢ ܙܒܰܢ ܥܰܠ ܢܒܺܝ̈ܶܐ. ܡܰܓܶܢ ܗ̱ܘܳܐ. ܟܰܕ ܡܰܪܬܶܐ ܗ̱ܘܳܐ ܠܗܳܢܽܘܢ ܕܰܐܪܚܶܩܘ ܡܶܢ ܛܳܒܬܳܐ܆ ܘܰܡܩܰܕܶܡ ܗ̱ܘܳܐ ܐܳܡܰܪ ܗܳܠܶܝܢ ܕܰܥ̈ܬܺܝܕܳܢ. ܐܳܦ ܗܳܫܳܐ ܕܶܝܢ ܐܶ‌ܠܽܘ ܢܰܦܫܳܐ ܒܰܠܚܽܘܕ ܚܰܝܶܕ ܠܶܗ܆ ܗܳܝ ܕܰܒܨܰܠܡܳܐ ܕܺܝܠܶܗ ܐܶܬܒܰܪܝܰܬ܆ ܠܳܐ ܐܺܝܬܰܘܗ̱ܝ ܗ̱ܘܳܐ ܗܳܟܰܢܳܐ ܬܡܺܝܗܳܐ܆ ܙܢܳܐ ܗܰܘ ܕܡܶܬܢܰܚܬܳܢܽܘܬܳܐ. ܒܰܝܬܳܝܰܐ ܗ̄ܘ ܓܶܝܪ ܕܰܐ‌ܠܳܗܽܘܬܳܐ. ܐܰܝܟܰܢܳܐ ܕܗܽܘ܆ ܘܠܰܘ ܒܟܽܠܡܶܕܶܡ ܐܺܝܬܰܘܗ̱ܝ ܠܪܽܘܚܩܳܐ܆ ܟܝܳܢܳܐ ܗܰܘ ܡܶܬܗܰܘܢܳܢܳܐ ܘܰܕܠܳܐ ܓܫܽܘܡ. ܗܳܝ ܕܶܝܢ ܕܳܐܦ ܠܘܳܬ ܥܰܒܝܽܘܬܳܐ ܕܒܶܣܪܳܐ ܢܶܬܢܰܚܰܬ܆ ܘܠܺܝ ܠܟܽܠܺܝ ܢܶܣܰܒ ܒܰܚܕܳܝܽܘܬܳܐ ܗܳܝ ܕܒܰܩܢܽܘܡܳܐ܆ ܘܰܤܛܰܪ ܡܶܢ ܚܛܺܝܬܳܐ ܘܰܤܛܪ ܡܶܢ ܟܽܠܶܗ ܫܽܘܚܠܳܦܳܐ ܢܶܗܘܶܐ ܒܰܪܢܳܫܳܐ. ܟܕ ܠܳܐ ܫܰܚܠܶܦ ܗܳܝ ܕܺܐܝܬܰܘܗ̱ܝ ܗ̱ܘܳܐ܆ ܐܰܝܟܰܢܳܐ ܠܰܘ ܠܗܰܠ ܡܶܢ ܟܽܠ ܬܶܡܗܳܐ ܐܺܝܬܶܝܗ̇. ܟܰܕ ܓܶܝܪ ܡܶܬܬܰܚܕܳܐ ܬܰܪܥܺܝܬܶܗ ܕܗܰܘ ܕܡܶܬܒܰܩܶܐ܆ ܘܡܶܬܚܰܒܫܳܐ ܒܡܶܨܥܰܬ ܪܰܘܡܳܐ ܟܺܝܬ. ܗܰܘ ܕܥܳܒܰܪ ܠܟܽܠ܆ ܘܒܰܝܢܳܬ ܣܽܘܪܳܩܳܐ. ܗܰܘ ܕܣܰܓܺܝ ܫܺܝܛ ܘܰܡܬܰܚܬܰܝ. ܕܡܶܢ ܓܰܒܳܐ ܗܰܘ ܕܰܠܩܽܘܒܠܳܐ܆ ܟܳܠܝܳܐ ܡܰܢ ܘܳܐܚܕܳܐ. ܠܟܽܠ ܡܶܠܬܳܐ ܘܚܽܘܫܳܒܳܐ܆ ܡܫܰܒܚܳܐ ܕܶܝܢ ܒܰܠܚܽܘܕ܆ ܠܗܰܘ ܕܳܐܦ ܒܝܰܕ ܡܰܟܺܝܟܽܘܬܳܐ ܡܶܬܺܝܕܰܥ ܕܺܐܝܬܰܘܗ̱ܝ ܝܰܬܺܝܪ ܪܳܡܳܐ.

ܘܰܐܝܟܰܢܳܐ ܝܺܕܰܥܬ ܐܳܘ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ܆ ܦܰܫܶܩ ܠܰܢ܆ ܕܡܶܠܬܳܐ ܒܶܣܪܳܐ ܗܘ̣ܳܐ ܘܰܐܓܶܢ ܒܰܢ^[3]. ܐ̱ܪܳܙܳܐ ܓܶܝܪ ܪܰܒܳܐ ܐܰܝܟ ܕܒܰܫܪܳܪܳܐ ܡܣܰܒܰܪ ܐܰܢ̱ܬ ܠܰܢ. ܗܘ̣ܳܐ ܠܺܝ ܐܺܡܰܪ ܡܚܰܘܝܳܢܽܘܬܳܐ. ܗܽܘ ܢܶܣܝܳܢܳܐ. ܚܙܰܝܢܰܢ ܓܶܝܪ. ܐܶܢܳܐ ܟܺܝܬ ܘܗܳܢܽܘܢ ܕܥܰܡܝ ܠܫܽܘܒܚܶܗ. ܫܽܘܒܚܳܐ ܐܰܝܟ ܕܺܝܚܺܝܕܳܝܳܐ ܕܡܶܢ ܐܰܒܳܐ܆ ܕܰܡܠܶܐ ܛܰܝܒܽܘܬܳܐ ܘܰܫܪܳܪܳܐ. ܐܰܝܟ ܗܰܘ ܕܳܐܡܰܪ ܗ̱ܘܳܐ: ܕܠܰܘ ܟܰܕ ܠܽܐܘܣܺܝܰܐ ܕܺܝܠܶܗ ܕܡܶܠܬܳܐ ܚܙܺܝܬ̣܆ ܗܳܝ ܕܰܠܟܽܠ ‌ܐܺܝܬܶܝܗ̇ ܠܳܐ ܝܺܕܰܥܬܳܐ܆ ܘܠܳܐ ܡܟܳܢܳܐ ܕܬܶܬܚܙܶܐ ܘܳܐܦܠܳܐ ܬܽܘܒ ܕܬܶܬܕܪܶܟ܆ ܐܶܡܪܶܬ ܗܰܘ ܡܳܐ ܕܶܐܡܪܶܬ܆ ܐܶܠܳܐ ܟܰܕ ܡܶܢ ܗܳܠܶܝܢ ܦܰܐܝܰܬ ܠܰܐܠܳܗܳܐ ܕܥܳܒܶܕ ܗ̱ܘܳܐ ܘܰܡܡܰܠܶܠ ܗ̱ܘܳܐ܆ ܠܫܽܘܒܚܳܐ ܕܺܝܠܶܗ ܓܰܠܝܳܐܺܝܬ ܘܰܒܗܶܝܢ ܒܥܰܝ̈ܢܶܐ ܚܳܙܶܐ ܗܘܰܝܬ. ܫܽܘܒܚܳܐ ܕܶܝܢ܆ ܠܰܘ ܕܒܰܡܫܰܘܬܦܽܘܬܳܐ ܐܶܫܬܰܟܰܢ ܐܰܝܟ ܕܰܠܚܰܕ ܡܶܢ ܙܰܕܺܝ̈ܩܶܐ ܕܡܶܢ ܩܕܺܝܡ. ܘܰܐܟܙܢܳܐ ܕܰܠܡܽܘܫܶܐ ܕܰܡܩܰܒܶܠ ܗ̱ܘܳܐ ܢܳܡܽܘܣܳܐ܆ ܘܡܶܬܢܰܨܰܚ ܗ̱ܘܳܐ ܘܡܶܫܬܰܒܰܚ ܦܰܪܨܽܘܦܶܗ܆ ܐܰܝܟ ܗܳܝ ܕܰܐܡܺܝܪܳܐ ܡܶܢ ܐܰ‌ܠܳܗܳܐ ܕܰܠܗܳܢܽܘܢ ܕܰܡܫܰܒܚܺܝܢ ܠܺܝ ܐܶ݀ܫܰܒܰܚ܆ ܐܶܠܳܐ ܫܽܘܒܚܳܐ܆ ܐܰܝܟ ܕܺܝܚܺܝܕܳܝܳܐ ܕܡܶܢ ܐܰܒܳܐ܆ ܕܰܡܠܶܐ ܛܰܝܒܽܘܬܳܐ ܘܰܫܪܳܪܳܐ. ܗܳܢܰܘ ܕܶܝܢ. ܐܰܝܟ ܐܰܝܢܳܐ ܕܰܦܐܶܐ ܗ̱ܘܳܐ ܕܢܶܗܘܶܐ ܐܺܝܬ ܠܶܗ ܠܰܒܪܳܐ ܝܺܚܺܝܕܳܝܳܐ܆ ܕܰܟܝܳܢܳܐܺܝܬ ܘܽܐܘܣܝܳܐܺܝܬ ܐܺܝܬܰܘܗ̱ܝ ܒܶܗ.

ܡܶܛܽܠܗܳܕܶܐ ܓܶܝܪ. ܠܳܐ ܐܶܡܰܪ ܫܽܘܒܚܳܐ ܐܰܝܟ ܕܰܒܪܳܐ܆ ܐܰܝܟܰܢܳܐ ܕܠܳܐ ܐ̱ܢܳܫ ܢܶܣܒܰܪ܆ ܕܰܐܝܟ ܕܰܒܫܽܘܟܳܢܳܐ ܐܶܬܶܐܡܰܪ ܗܽܘ ܫܽܘܡܳܗܳܐ. ܩܪܶܝܢ ܓܶܝܪ ܐܳܦ ܐ̱ܚܪ̈ܳܢܶܐ ܒܢܰܝ̈ܳܐ܆ ܒܗܳܢܳܐ ܙܢܳܐ. ܐܰܝܟ ܕܰܒܗܳܝ ܕܶܐܢܳܐ ܐܶܡܪܶܬ ܕܰܐ‌ܠܳܗ̈ܶܐ ܐܺܝܬܰܝܟܽܘܢ^[4]܆ ܘܰܒܢܰܝ̈ܳܐ ܕܰܡܪܰܝܡܳܐ ܟܽܠܟܽܘܢ ܐܶܠܳܐ ܐܰܝܟ ܕܺܝܚܺܝܕܳܝܳܐ. ܗܳܕܶܐ ܓܶܝܪ܆ ܠܺܝܠܺܝܕܽܘܬܳܐ ܚܰܬܺܝܬܬܳܐ ܘܫܰܪܺܝܪܬܳܐ ܡܚܰܘܶܐ܆ ܘܰܠܗܺܝܟܰܕܗܺܝܽܘܬܳܐ ܕܽܐܘܣܺܝܰܐ܆ ܘܰܕܡܶܢ ܐܰܒܳܐ.

ܡܚܰܘܶܐ ܗ̱ܘܳܐ ܓܶܝܪ. ܕܡܶܢ ܐܰܒܳܐ ܐܰܬܺܝ ܗ̱ܘܳܐ܆ ܘܠܳܐ ܗܘܳܐ ܐܰܝܟ ܥܰܒܕܳܐ ܡܶܢ ܐܰ‌ܠܳܗܳܐ܆ ܒܝܰܕ ܗܳܠܶܝܢ ܕܣܳܥܰܪ ܗ̱ܘܳܐ ܘܡܶܫܬܰܒܰܚ. ܐܳܦ ܓܶܝܪ ܟܰܕ ܠܢܰܨܺܝܚܽܘܬܳܐ ܕܢܽܘܗܪܳܐ ܫܶܡܫܳܢܳܝܳܐ ܡܩܰܒܶܠ ‌ܐ̱ܢܳܫ ܒܥܰܝܢܰܘ̈ܗ̱ܝ܆ ܝܳܕܰܥ܆ ܕܡܶܢ ܙܰܠܺܝܩܳܐ ܐܰܨܡܰܚ ܙܰܗܪܳܐ ܗܰܘ ܚܰܬܺܝܬܳܐ ܘܫܰܪܺܝܪܳܐ. ܡܰܠ̣ܝܳܐ ܓܶܝܪ ܐܺܝܬܰܘܗ̱ܝ ܗ̱ܘܳܐ 222ܗܘ ܫܽܘܒܚܳܐ܆ ܘܡܶܢ ܫܪܳܪܳܐ ܘܡܶܢ ܛܰܝܒܽܘܬܳܐ܆ ܘܳܐܦܠܳܐ ܒܡܶܕܶܡ ܣܳܟ ܐܺܝܬܰܘܗ̱ܝ ܗ̱ܘܳܐ ܚܰܣܺܝܪܳܐ. ܗܳܝ ܕܶܝܢ ܕܡܰܠ̣ܝܳܐ. ܘܠܳܐ ܚܰܣܺܝܪܳܐ܆ ܕܺܝܠܳܝܬܳܐ ܕܰܐ‌ܠܳܗܳܐ ܠܚܽܘܕܰܘܗ̱ܝ ܐܺܝܬܶܝܗ̇.

ܘܰܕܗܳܕܶܐ. ܗܳܟܰܢܳܐ ܐܺܝܬ ܠܳܗ̇܆ ܐܳܡܰܪ: ܕܳܐܦ ܗܽܘ ܝܽܘܚܰܢܳܢ ܡܰܥܡܕܳܢܳܐ ܣܳܗܶܕ ܟܰܕ ܩܳܥܶܐ ܗ̱ܘܳܐ ܘܳܐܡܰܪ: ܗܳܢܳܐ ܐܺܝܬܰܘܗ̱ܝ ܗܰܘ ܕܶܐܡܪܶܬ܆ ܗܰܘ ܕܒܳܬܰܪܝ ܐܳܬܶܐ ܗܘ̣ܳܐ ܠܶܗ ܩܕܳܡܰܝ܆ ܡܶܛܽܠ ܕܡܶܢ ܩܕܳܡܰܝ ܐܺܝܬܰܘܗ̱ܝ ܗ̱ܘܳܐ^[5]. ܘܛܳܒܳܐܺܝܬ ܘܣܰܓܺܝ ܠܳܚܡܳܐܺܝܬ ܠܗܳܝ ܕܩܰܕܺܝܡܳܐ ܗ̱ܘܳܬ ܣܺܝܡܳܐ܆ ܘܰܐܝܟ ܐܺܝܙܓܰܕܳܐ ܕܡܶܠܬܳܐ ܕܩܳܕܶܡ ܪܳܗܶܛ ܣܗܶܕ. ܐܶ‌ܠܽܘ ܓܶܝܪ ܐܶܡܰܪ ܒܰܠܚܽܘܕ ܕܰܩܕܳܡܰܝ ܗܘ̣ܳܐ܆ ܡܶܫܟܰܚ ܗ̱ܘܳܐ ܐ̱ܢܳܫ ܠܡܺܐܡܰܪ܆ ܕܰܐܝܟ ܒܰܪܢܳܫܳܐ ܠܒܰܪ ܐ̱ܢܳܫܳܐ ܥܰܒܪܶܗ ܡܶܢ ܟܽܠ ܦܪܽܘܤ܆ ܒܰܡܝܰܬܪܽܘܬܳܐ ܟܺܝܬ ܘܒܰܡܚܰܘܝܳܢܽܘܬܳܐ ܕܳܐܬܘ̈ܳܬܳܐ. ܗܳܫܳܐ ܕܶܝܢ ܓܠܳܗ̇ ܘܢܰܗܪܳܗ̇ ܠܥܶܠܬܳܐ܆ ܗܳܝ ܕܡܶܛܽܠܳܬܳܗ̇ ܗܰܘ ܩܕܳܡܰܘܗ̱ܝ ܗܘ̣ܳܐ܆ ܟܰܕ ܐܶܡܰܪ: ܡܶܛܽܠ ܕܡܶܢ ܩܕܳܡܰܝ ܐܺܝܬܰܘܗ̱ܝ ܗ̱ܘܳܐ. ܘܟܰܕ ܛܳܒ ܒܰܗܘܳܝܳܐ ܗܰܘ ܕܰܒܒܶܣܪܳܐ܆ ܬܪܰܝܳܢܳܐ ܕܝܽܘܚܰܢܳܢ ܐܺܝܬܰܘܗ̱ܝ ܗ̱ܘܳܐ ܝܶܫܽܘܥ ܒܙܰܒܢܳܐ.

ܐܰܝܟܰܢܳܐ ܗܳܟܺܝܠ ܩܰܕܡܳܝܳܐ ܐܺܝܬܰܘܗ̱ܝ ܗ̱ܘܳܐ. ܐܰܘ ܝܺܕܺܝܥܳܐ ܗ̱ܝ܆ ܕܰܒܗܳܝ ܕܺܐܝܬܰܘܗ̱ܝ ܗ̱ܘܳܐ ܐܰ‌ܠܳܗܳܐ. ܘܡܶܟܺܝܠ ܗܽܘ ܐܶܘܰܢܓܠܺܝܣܛܳܐ܆ ܟܰܕ ܝܰܬܺܝܪ ܢܰܗܺܝܪܳܐܺܝܬ ܘܓܰܠܝܳܐܺܝܬ ܡܚܰܬܶܡ ܠܳܗ̇ ܠܣܳܗܕܽܘܬܳܐ. ܡܰܘܣܶܦ: ܘܡܶܢ ܡܰܠܝܽܘܬܳܐ ܕܺܝܠܶܗ܆ ܚܢܰܢ ܟܽܠܰܢ ܢܣܰܒܢܰܢ^[6]. ܠܳܐ ܬܶܬܕܰܡܰܪ ܐܳܡܰܪ: ܐܶܢܗܽܘ ܕܝܽܘܚܰܢܳܢ ܗܰܘ ܕܝܰܬܺܝܪ ܪܰܒ ܒܺܝ̈ܠܺܝܕܰܝ ܢܶܫ̈ܶܐ^[7]܆ ܒܗܳܠܶܝܢ ܪ̈ܺܝܫܳܝܳܬܳܐ ܘܩܰܕܡܳܝ̈ܳܬܳܐ ܐܰܫܶܦ ܠܝܶܫܽܘܥ. ܐܰܫܶܦ ܓܶܝܪ ܐܰܝܟ ܕܠܰܐܠܳܗܳܐ. ܐܳܦ ܓܶܝܪ ܠܰܘ ܗܰܘ ܒܰܠܚܽܘܕ܆ ܐܶܠܳܐ ܡܶܢ ܡܰܠܝܽܘܬܳܐ ܕܺܝܠܶܗ܆ ܐܳܦ ܚܢܰܢ ܟܽܠܰܢ ܢܣܰܒܢܰܢ. ܫܶܡܫܳܐ ܓܶܝܪ ܕܙܰܕܺܝܩܽܘܬܳܐ ܐܺܝܬܰܘܗ̱ܝ ܗ̱ܘܳܐ܆ ܡܫܰܡܠܰܝ ܒܟܽܠ ܘܡܰܠ̣ܝܳܐ܆ ܘܕܰܐܦ̈ܶܐ ܣܰܓܺܝ̈ܳܐܬܳܐ ܡܰܢܗܰܪ ܗ̱ܘܳܐ܆ ܘܰܕܡܶܢ ܟܽܠܢܳܫ ܡܶܬܢܣܶܒ ܗ̱ܘܳܐ ܐܰܝܟܰܢܳܐ ܕܟܽܠܚܰܕ ܡܨܶܐ ܗ̱ܘܳܐ܆ ܘܰܠܢܽܘܗܪܳܐ ܒܰܝܬܳܝܳܐ ܕܺܝܠܶܗ ܕܠܳܐ ܒܽܘܨܳܪܳܐ ܐܺܝܬ ܗ̱ܘܳܐ ܠܶܗ ܒܶܗ. ܘܠܰܘ ܐܰܝܟܰܢ ܕܗܽܘ ܘܰܐܝܟ ܕܳܐܬܝܳܐ܆ ܡܶܢ ܡܰܠܝܽܘܬܳܐ ܕܺܝܠܶܗ ܚܢܰܢ ܟܽܠܰܢ ܢܣܰܒܢܰܢ: ܐܶܠܳܐ ܛܰܝܒܽܘܬܳܐ ܚܠܳܦ ܛܰܝܒܽܘܬܳܐ. ܚܠܳܦ ܗܳܝ ܢܳܡܽܘܣܳܝܬܳܐ܆ ܗܳܝ ܐܶܘܰܢܓܶܠܳܝܬܳܐ.

ܐܶ‌ܠܽܘ ܠܳܐ ܓܶܝܪ ܕܰܒܝܰܕ ܣܳܝܽܘܡܽܘܬ ܢܳܡܽܘܣܳܐ ܕܡܽܘܫܶܐ ܩܰܕܶܡܢܰܢ ܐܶܬܪܕܺܝܢܰܢ ܒܰܕܡܽܘܬ ܛܠܳܝ̈ܶܐ ܫܰܒܪ̈ܶܐ܆ ܒܦܽܘܩ̈ܕܳܢܶܐ ܗܳܢܽܘܢ ܕܺܐܝܬܰܝܗܽܘܢ ܗ̱ܘܰܘ. ܒܰܕܡܽܘܬ ܟܬܺܝ̈ܒܳܬܳܐ ܫܰܪ̈ܘܳܝܳܬܳܐ ܕܳܐ‌ܠܰܦ ܒܶܝܬ܆ ܠܳܐ ܡܶܫܟܚܺܝܢ ܗ̱ܘܰܝܢ ܕܰܠܪܰܒܽܘܬܳܗ̇ ܕܛܰܝܒܽܘܬܳܐ ܗܳܕܶܐ ܝܰܬܺܝܪ ܡܫܰܡܠܰܝܬܳܐ ܢ݀ܩܰܒܶܠ.

ܡܶܣܬܰܒܪܳܐ ܠܺܝ ܕܶܝܢ܆ ܕܳܐܦ ܬܰܪܥܺܝܬܳܐ ܐ̱ܚܪܺܬܳܐ ܡܚܰܘܶܐ ܦܶܬܓܳܡܳܐ ܗܳܢܳܐ. ܟܰܕ ܓܶܝܪ ܡܶܢ ܫܽܘܪܳܝܳܐ. ܡܶܢ ܗܳܝ ܕܠܳܐ ܐܺܝܬܰܘܗ̱ܝ. ܐܰܝܬܝܶܗ ܥܳܒܽܘܕܳܐ ܠܳܐܕܳܡ ܠܗܳܝ ܕܢܶܗܘܶܐ ܐܺܝܬܰܘܗ̱ܝ܆ ܘܓܰܒܠܶܗ ܡܶܢ ܐܰܪܥܳܐ. ܢܦܰܚ ܒܰܐܦܰܘ̈ܗ̱ܝ ܢܫܰܡܬܳܐ ܕܚܰܝ̈ܶܐ^[8]܆ ܗܳܝ ܕܒܺܐܝ̈ܕܶܝܗ̇ ܥܰܬܰܪ ܠܗܳܝ ܕܰܒܨܰܠܡܳܐ ܕܰܐ‌ܠܳܗܳܐ ܢܶܗܘܶܐ ܐܺܝܬܰܘܗ̱ܝ. ܐܰܟܚܕܳܐ ܕܶܝܢ܆ ܘܟܰܕ ܐܺܝܬܰܘܗ̱ܝ ܡܰܠ̣ܝܳܐ ܡܶܢ ܡܰܥܒܕܳܢܽܘܬܳܐ ܐܰ‌ܠܳܗܳܝܬܳܐ. ܕܡܶܢ ܗܳܪܟܳܐ܆ ܐܳܦ ܠܟܽܠ ܚܕܳܐ ܡܶܢ ܚܰܝ̈ܘܳܬܳܐ ܘܦܳܪ̈ܚܳܬܳܐ ܣܳܡ ܫܡܳܗ̈ܶܐ܆ ܘܟܰܕ ܬܶܡܗܳܐ ܐܶܬܬܰܝܬܺܝ ܥܠܰܘܗ̱ܝ܆ ܘܫܶܢܬܳܐ. ܟܰܕ ܐܶ‌ܠܥܶܗ ܐܶܬܬܪܺܝܡܰܬ ܡܶܢܶܗ܆ ܗܳܝ ܕܡܶܢܳܗ̇ ܥܒܰܕ ܐܰ‌ܠܳܗܳܐ ܠܚܰܘܳܐ܆ ܡܶܢ ܒܳܬܰܪ ܫܶܢܬܶܗ. ܡܶܫܬܰܘܕܰܥ ܗ̱ܘܳܐ ܟܰܕ ܐܳܡܰܪ܆ ܗܳܢܳܐ: ܗܳܫܳܐ܆ ܓܰܪܡܳܐ ܡܶܢ ܓܰܪ̈ܡܰܝ. ܘܒܶܣܪܳܐ ܡܶܢ ܒܶܣܪܝ. ܘܡܶܚܕܳܐ ܒܰܪܫܳܥܬܶܗ ܠܗܳܝ ܕܰܥܬܺܝܕܳܐ܆ ܒܰܕܡܽܘܬ ܢܒܺܝܳܐ ܩܰܕܶܡ ܗ̱ܘܳܐ ܐܶܡܰܪ: ܡܶܛܽܠܗܳܕܶܐ ܢܶܫܒܽܘܩ ܓܰܒܪܳܐ ܠܰܐܒܽܘܗ̱ܝ ܘܠܶܐܡܶܗ܆ ܘܢܶܩܰܦ ܠܰܐܢ̱ܬܬܶܗ܆ ܘܢܶܗܘܽܘܢ ܬܪ̈ܰܝܗܽܘܢ ܠܒܶܣܪܳܐ ܚܰܕ^[9].

ܕܗܳܠܶܝܢ ܕܶܝܢ ܡ̈ܶܠܶܐ ܠܰܘ ܕܳܐܕܳܡ ܐܺܝܬܰܝܗܶܝܢ ܗ̱ܘܰܝ̈܆ ܐܶܠܳܐ ܕܡܰܥܒܕܳܢܽܘܬܳܐ ܐܰ‌ܠܳܗܳܝܬܳܐ ܐܰܝܟ ܕܶܐܡܪܶܬ܆ ܣܗܶܕ. ܗܽܘ ܡܳܪܰܢ ܒܶܐܘܰܢ̈ܓܶܠܝܰܐ. ܟܰܕ ܐܶܡܰܪ: ܠܳܐ ܩܪܰܝܬܽܘܢ ܕܗܰܘ ܕܰܥܒܰܕ ܡܶܢ ܫܽܘܪܳܝܳܐ܆ ܕܶܟܪܳܐ ܘܢܶܩܒܬܳܐ ܥܒܰܕ ܐܶܢܽܘܢ܆ ܘܶܐܡܰܪ ܡܶܛܽܠܗܳܕܶܐ: ܢܶܫܒܽܘܩ ܓܰܒܪܳܐ ܠܰܐܒܽܘܗ̱ܝ ܘܠܶܐܡܶܗ ܘܢܶܩܰܦ ܠܘܳܬ ܐܰܢ̱ܬܬܶܗ^[10]. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܰܘ ܐܳܕܳܡ ܐܺܝܬܰܘܗ̱ܝ ܗ̱ܘܳܐ ܗܰܘ ܕܗܳܠܶܝܢ ܐܶܡܰܪ܆ ܐܶܠܳܐ ܐܰ‌ܠܳܗܳܐ ܗܰܘ ܕܰܒܗܰܘ ܡܡܰܠܶܠ ܗ̱ܘܳܐ. ܠܳܐ ܚܶܪܝܳܢܳܐ ܗܳܟܺܝܠ ‌ܐܺܝܬܶܝܗ̇ ܡܳܕܶܝܢ܆ ܕܛܰܝܒܽܘܬܳܐ ܕܪܽܘܚܳܐ ܩܰܕܺܝܫܳܐ ܐܺܝܬ ܗ̱ܘܳܐ ܥܠܰܘܗ̱ܝ܆ ܘܰܢܦܰܠ ܡܶܢ ܗܳܕܶܐ ܒܰܥܒܳܪ ܦܽܘܩܕܳܢܳܐ܆ ܡܶܛܽܠ ܗܳܕܶܐ. ܐܳܦ ܦܳܪܽܘܩܰܢ. ܟܰܕ ܠܘܳܬ ܬܰܪܥܺܝܬܳܐ ܗܳܝ ܩܰܕܡܳܝܬܳܐ ܡܥܰܠܶܐ ܗ̱ܘܳܐ ܘܡܰܣܶܩ ܠܗܽܘܢ ܠܬܰܠ̈ܡܺܝܕܶܐ܆ ܘܰܡܚܰܘܶܐ ܗ̱ܘܳܐ ܕܗܽܘ ܐܺܝܬܰܘܗ̱ܝ ܗ̱ܘܳܐ ܐܰ‌ܠܳܗܳܐ ܗܰܘ ܕܗܳܝܕܶܝܢ ܢܦܰܚ ܢܫܡܬܐ ܕܚܰܝ̈ܶܐ ܒܰܐܦܰܝ̈ ܐܳܕܳܡ܆ ܘܗܳܫܳܐ ܢܦܰܚ ܒܗܽܘܢ ܟܰܕ ܐܳܡܰܪ ܠܗܽܘܢ: ܣܰܒܘ ܪܽܘܚܳܐ ܩܰܕܺܝܫܳܐ^[11] ܠܗܳܢܳܐ ܗܳܟܺܝܠ. ܐܳܡܰܪ ܐܶܘܰܢܓܶܠܺܝܣܛܳܐ: ܡܶܢ ܡܰܠܝܽܘܬܳܐ ܕܺܝܠܶܗ ܚܢܰܢ ܟܽܠܢ ܢܣܰܒܢܰܢ. ܘܛܰܝܒܽܘܬܳܐ ܕܪܽܘܚܳܐ܆ ܚܠܳܦ ܛܰܝܒܽܘܬܳܐ ܗܳܝ ܕܰܢܦܰܠܢܰܢ ܡܶܢܳܗ̇^[12].

ܗܰܘ ܓܶܝܪ ܕܰܠܗܳܝ ܝܰܗ̱ܒ ܐܰܝܟ ܡܰܠܝܳܐ܆ ܐܳܦ ܠܗܳܕܶܐ ܫܰܟܶܢ ܝܰܬܺܝܪ ܥܰܬܺܝܪܳܐܺܝܬ ܘܝܰܬܺܝܪ ܫܦܺܝܥܳܐܺܝܬ܆ ܡܶܢ ܡܰܠܝܽܘܬܳܐ ܗܳܝ ܕܺܝܠܶܗ܆ ܘܰܐܝܟܰܢܳܐ ܕܠܳܐ ܐ̱ܢܳܫ ܢܺܐܡܰܪ܆ ܡܳܢܳܐ ܗܳܟܺܝܠ܆ ܒܝܰܕ ܡܽܘܫܶܐ ܠܳܐ ܐܶܬܝܰܗܒܰܬ ܛܰܝܒܽܘܬܳܐ܆ ܩܰܕܶܡ ܐܰܪܺܝܡܳܗ̇ ܠܰܗܦܳܟܬܳܐ ܕܰܐܝܟ ܗܳܕܶܐ. ܟܰܕ ܐܶܡܰܪ: ܕܢܳܡܽܘܣܳܐ ܒܝܰܕ ܡܽܘܫܶܐ ܐܶܬܺܝܗܶܒ. ܛܰܝܒܽܘܬܳܐ ܕܶܝܢ ܘܰܫܪܳܪܳܐ܆ ܒܝܰܕ ܝܶܫܽܘܥ ܡܫܺܝܚܳܐ ܗܘ̣ܳܐ^[13]. ܠܢܳܡܽܘܣܳܐ ܓܶܝܪ܆ ܠܥܽܘܕܪܳܢܳܐ ܝܰܗܒܶܗ ܐܰ‌ܠܳܗܳܐ^[14]܆ ܐܰܝܟܰܢܳܐ ܕܶܐܫܰܥܝܳܐ ܢܒܺܝܳܐ ܐܳܡܰܪ. ܟܰܕ ܓܶܝܪ ܡܶܬܡܪܰܕ ܗ̱ܘܳܐ ܒܰܢ܆ ܘܡܶܬܥܫܶܡ ܗ̱ܘܳܐ ܒܚܰܫ̈ܶܐ. ܢܳܡܽܘܣܳܐ ܗܰܘ ܟܝܳܢܳܝܳܐ܆ ܥܰܕܰܪ ܢܳܡܽܘܣܳܐ ܗܰܘ ܟܬܺܝܒܳܐ ܒܝܰܕ ܡܰܥܗܕܳܢܽܘܬܳܐ ܟܰܕ ܐܶܡܰܪ: ܠܳܐ ܬܶܩܛܽܘܠ. ܠܳܐ ܬܓܽܘܪ.. ܘܟܽܠܗܶܝܢ ܗܳܠܶܝܢ ܕܰܠܗܳܠܶܝܢ ܕܳܡ̈ܝܳܢ܆ ܘܡܶܬܪܰܚܩܳܢܽܘܬܳܐ ܕܡܶܢ ܚ̈ܛܳܗܶܐ ܡܰܠ̈ܦܳܢ.

ܒܪܰܡ܆ ܝܰܬܺܝܪܳܐܺܝܬ ܐܰܝܬܺܝ ܠܰܬܚܶܝܬ ܠܰܘܛܬܳܐ܆ ܟܰܕ ܠܳܐ ܐܶܬܡܨܺܝܢܰܢ ܕܰܢܫܡܠܶܝܘܗ̱ܝ ܠܦܽܘܩܕܳܢܳܐ. ܘܶܐܫܬܟܰܚ. ܗܽܘ ܗܳܢܳܐ ܦܽܘܩܕܳܢܳܐ܆ ܗܰܘ ܕܰܠܚܰܝ̈ܶܐ. ܠܡܰܘܬܳܐ܆ ܐܰܝܟܰܢܳܐ ܕܳܐܡܰܪ ܦܰܘܠܽܘܤ. ܐܶܡܰܪ ܓܶܝܪ: ܕܠܺܝܛ ܗ̱ܘ̣ ܟܽܠ ܒܰܪܢܳܫܳܐ܆ ܗܰܘ ܐܰܝܢܳܐ ܕܠܳܐ ܢܟܰܬܰܪ ܒܟܽܠܗܶܝܢ ܡ̈ܶܠܶܐ ܕܢܳܡܽܘܣܳܐ ܗܳܢܳܐ܆ ܕܢܶܥܒܶܕ ܐܶܢܶܝܢ^[15]. ܘܠܳܐ ܓܶܝܪ ܫܽܘܒܩܳܢܳܐ ܕܰܚ̈ܛܳܗܶܐ܆ ܘܳܐܦܠܳܐ ܡܰܘܗܰܒܬܳܐ ܕܪܽܘܚܳܐ܆ ܗܳܝ ܕܡܶܢܳܗ̇ ܡܶܛܽܠ ܥܒܳܪ ܦܽܘܩܕܳܢܳܐ ܕܳܐܕܳܡ ܫܪܰܥܢܰܢ. ܝܰܗ̱ܒ ܢܳܡܽܘܣܳܐ.

ܗܳܠܶܝܢ ܓܶܝܪ. ܐܺܝܬܰܝܗܶܝܢ ܕܺܝܠܳܢܳܝ̈ܳܬܳܐ. ܕܛܰܝܒܽܘܬܳܐ ܘܕܰܫܪܳܪܳܐ ܗܳܠܶܝܢ ܕܰܗܘ̣ܰܘ ܒܝܰܕ ܝܶܫܽܘܥ ܡܫܺܝܚܳܐ܆ ܗܳܠܶܝܢ ܕܡܶܢܗܽܘܢ ܗܘ̣ܳܬ ܣܳܝܽܘܡܽܘܬ ܒܢܰܝ̈ܳܐ ܡܶܢ ܒܳܬܰܪ ܫܽܘܘܙܳܒܳܐ ܕܡܶܢ ܚ̈ܛܳܗܶܐ܆ ܘܢܰܗܪ̈ܰܘܳܬܳܐ ܗܳܢܽܘܢ ܕܡܶܢ ܟܰܪܣܳܐ ܕܗܳܢܽܘܢ ܕܗܰܝܡܶܢܘ ܒܶܗ ܪܕܰܘ^[16]. ܗܳܢܳܐ ܐܳܦ ܒܰܢܒܺܝ̈ܶܐ ܢܫܰܒ ܘܡܰܠܶܠ܆ ܡܶܛܽܠ ܟܺܝܬ ܕܡܶܛܽܠܳܬܶܗ ܡܶܬܢܰܒܶܝܢ ܗ̱ܘܰܘ. ܠܗܳܠܶܝܢ ܕܶܝܢ. ܢܳܡܽܘܣܳܐ ܗܰܘ ܕܶܐܬܺܝܗܶܒ ܒܝܰܕ ܡܽܘܫܶܐ܆ ܐܰܝܟ ܕܰܒܛܽܘܦܣܳܐ ܘܰܒܪܽܘܫܡܳܐ ܒܰܠܚܽܘܕ ܩܳܕܶܡ ܗ̱ܘܳܐ ܪܳܫܶܡ. ܒܰܥܒܳܕܳܐ ܕܶܝܢ. ܫܰܡܠܺܝ ܐܶܢܶܝܢ܆ ܡܫܺܝܚܳܐ ܗܰܘ ܕܺܐܝܬܰܘܗ̱ܝ ܫܪܳܪܳܐ. ܒܝܰܕ ܕܶܝܢ ܗܳܠܶܝܢ ܕܶܐܬܶܐܡܰܪ̈ܝ̱܆ ܐܳܦ ܠܗܳܢܽܘܢ ܕܥܰܠ ܡܽܘܫܶܐ ܪܰܘܪ̈ܒܳܬܳܐ ܡܶܬܪܰܥܶܝܢ. ܥܰܠܺܝ ܘܰܐܣܶܩ ܗܽܘ ܐܶܘܰܢܓܶܠܺܝܣܛܳܐ܆ ܠܫܽܘܒܚܳܐ ܗܰܘ ܕܙܳܕܶܩ ܗ̱ܘܳܐ ܕܡܶܛܽܠ ܡܫܺܝܚܳܐ. ܟܰܕ ܡܚܰܘܶܐ. ܕܗܰܘ. ܡܫܰܡܫܳܢܳܐ ܕܗܳܢܳܐ ܐܺܝܬܰܘܗ̱ܝ ܗ̱ܘܳܐ܆ ܕܩܳܕܶܡ ܗ̱ܘܳܐ ܡܛܰܦܶܤ ܠܶܗ ܠܰܫܪܳܪܳܐ.

ܟܰܕ ܗܳܟܺܝܠ ܒܗܳܕܶܐ ܘܰܒܕܰܐܝܟ ܗܳܕܶܐ. ܛܰܝܒܽܘܬܳܐ ܐܶܬܒܰܣܰܡܬܽܘܢ܆ ܗܳܢܽܘܢ ܕܗܳܫܳܐ ܐܶܫܬܘܺܝܬܽܘܢ ܠܰܥܡܳܕܳܐ ܩܰܕܺܝܫܳܐ܆ ܒܟܽܠ ܢܛܽܘܪܬܳܐ ܠܗܳܕܶܐ ܛܰܪܘ܆ ܠܘܳܬܟܽܘܢ ܓܶܝܪ ܐܰ݀ܗܦܰܟܶܝܗ̇ ܠܡܶܠܬܳܐ܆ ܡܶܛܽܠ ܟܺܝܬ ܕܰܚܢܰܢ ܒܨܳܐܝ̈ܘܳܬܳܐ ܣܰܓܺܝ̈ܳܐܬܳܐ ܛܰܘܶܫܢܳܝܗ̱ܝ ܠܢܰܚܬܳܐ ܢܰܨܺܝܚܳܐ ܗܰܘ ܕܣܳܝܽܘܡܽܘܬ ܒܢܰܝ̈ܳܐ. ܡܶܛܽܠܗܳܕܶܐ܆ ܐܳܦ ܥܰܠ ܬܝܳܒܽܘܬܳܐ ܣܰܓܺܝܐܬܳܐ. ܘܰܚܦܺܝܛܽܘܬܳܐ ܣܢܺܝܩܺܝܢܰܢ܆ ܟܰܕ ܪܓܶܠܬܳܐ ܕܕܶܡ̈ܥܶܐ ܣܳܦܩܳܐ ܠܡܰܛܳܦܽܘ ܘܰܠܡܶܓܪܰܦ ܠܩܽܘܦܝܳܐ ܗܰܘ ܕܣܰܟ̈ܠܘܳܬܰܢ. ܠܗܳܠܶܝܢ ܕܙܳܕܶܩ ܕܬܶܩܰܦ܆ ܐܳܦ ܥܳܢܘܳܝܽܘܬܳܐ ܗܳܝ ܐ̱ܚܪܺܬܳܐ ܕܰܡܝܰܬܪ̈ܳܬܳܐ ܗܳܢܶܝܢ ܕܫܰܪܟܳܐ܆ ܐܰܝܟܰܢܳܐ ܕܰܡܫܰܡܠܝܳܐܺܝܬ ܢܶܥܛܶܐ ܐܶܢܽܘܢ ܠܛܽܘܠܫ̈ܶܐ. ܠܟܽܘܢ ܕܶܝܢ܆ ܘܠܳܐ ܡܶܕܶܡ ܕܰܐܝܟ ܗܳܟܰܢܳܐ ܐܺܝܬ ܠܟܽܘܢ ܡܰܟܶܐܒܳܢܳܐ ܐܰܘ ܥܡܺܝܠܳܐ. ܐܶܠܳܐ ܒܰܠܚܽܘܕ ܗܳܝ ܕܬܶܗܘܽܘܢ ܚܳܕܶܝܢ ܐܢ̱ܬܽܘܢ. ܒܛܳܒ̈ܳܬܳܐ ܗܳܠܶܝܢ ܕܶܐܬܺܝܗܶܒ̈ܝ̱܆ ܘܰܕܬܶܗܘܽܘܢ ܡܰܙܥܩܺܝܢ ܐܢ̱ܬܽܘܢ ܒ̈ܢܳܬ ܩ̈ܳܠܶܐ ܗܳܠܶܝܢ ܕܰܒܝܰܕ ܐܶܫܰܥܝܳܐ ܢܒܺܝܳܐ ܩܰܕܶܡ ܐܶܬܶܐܡܰܪ̈ܝ̱܆ ܬܶܪܘܰܙ ܢܰܦܫܝ ܒܡܳܪܝܳܐ܆ ܐܰ‌ܠܒ̣ܫܰܢܝ ܓܶܝܪ ܢܰܚܬܳܐ ܕܦܽܘܪܩܳܢܳܐ ܘܟܽܘܬܺܝܢܳܐ ܕܚܰܕܽܘܬܳܐ. ܐܰܝܟ ܕܰܠܚܰܬܢܳܐ ܣܺܝܡ ܠܺܝ ܟܠܺܝܠܳܐ܆ ܘܰܐܝܟ ܕܰܠܟܰܠܬܳܐ ܨܰܒܬܰܢܝ ܒܨܶܒܬܳܐ^[17].

ܐܶܢ ܓܶܝܪ ܒܡܰܪܓܫܳܢܽܘܬܳܐ ܬܶܬܕܰܒܪܽܘܢ ܕܢܰܨܺܝܚܽܘܬܳܐ ܗܳܝ ܕܶܐܬܝܰܗܒܰܬ ܠܟܽܘܢ܆ ܘܰܠܗܳܠܶܝܢ. ܐܳܦ ܒܬܰܪܥܺܝܬܳܐ. ܐܳܦ ܒܦܽܘܡܳܐ ܬܗܰܦܟܽܘܢ ܐܶܢܶܝܢ܆ ܘܰܠܡܰܚ̈ܫܒܳܬܳܐ ܕܳܐܟܶܠܩܰܪܨܳܐ ܠܳܐ ܬܩܰܒܠܽܘܢ܆ ܟܰܕ ܡܶܢ ܟܽܠ ܕܽܘܟ. ܐܰܢ̱ܬܽܘܢ ܠܟܽܘܢ ܩܳܦܣܺܝܢ ܐܢ̱ܬܽܘܢ܆ ܘܕܳܚܠܺܝܢ ܐܢ̱ܬܽܘܢ. ܕܕܰܠܡܳܐ ܡܶܕܶܡ ܒܕܽܘܟ ܡܶܢ ܐܰܝܠܶܝܢ 222ܕܡ̈ܨܬܢ^[18] ܢܶܓܫܽܘܦ ܒܶܐܤܛܠܳܐ ܗܳܝ ܕܗܳܟܰܢܳܐ ܫܒܺܝܚܳܐ ܘܰܗܕܺܝܪܳܐܺܝܬ ܡܰܙܗܪܳܐ܆ ܩܰܠܺܝܠܳܐܺܝܬ ܢܶܦܩܰܚ ܒܟܽܘܢ ܙܰܪܥܳܐ ܗܰܘ ܐܰ‌ܠܳܗܳܝܳܐ. ܘܢܶܬܠܰܚ̈ܡܳܢ ܠܟܽܘܢ ܥܰܡ ܗܳܠܶܝܢ ܕܶܐܬܶܐܡܰܪ̈ܝ̱ ܡܶܢ ܠܥܶܠ܆ ܐܳܦ ܗܳܠܶܝܢ ܡ̈ܶܠܶܐ ܕܫܰܪܟܳܐ ܕܺܝܠܶܗ ܕܰܢܒܺܝܳܐ܆ ܘܰܐܝܟ ܐܰܪܥܳܐ ܕܰܡܪܰܒܝܳܐ ܗܰܒܳܒܳܐ ܕܺܝܠܳܗ̇܆ ܘܰܐܝܟ ܓܰܢܬܳܐ ܕܡܰܘܥܝܳܐ ܙܰܪ̈ܥܶܐ ܕܺܝܠܳܗ̇܆ ܗܳܟܰܢܳܐ ܢܰܕܢܰܚ ܡܳܪܝܳܐ ܙܰܕܺܝܩܽܘܬܳܐ ܘܰܪܘܳܙܳܐ ܩܕܳܡ ܟܽܠܗܽܘܢ ܥܰܡܡ̈ܶܐ^[19].

ܡܶܬܚܙܶܝܢ ܐܢ̱ܬܽܘܢ ܓܶܝܪ ܫܰܪܺܝܪܳܐܺܝܬ ܐܰܝܟ ܢܰܗܺܝܪ̈ܶܐ ܒܥܳܠܡܳܐ܆ ܕܡܶܠܬܳܐ ܕܚܰܝ̈ܶܐ ܐܰܚܺܝܕܺܝܢ܆ ܐܰܝܟܰܢܳܐ ܕܳܐܡܰܪ ܫܠܺܝܚܳܐ. ܗܳܢܰܘ ܕܶܝܢ. ܗܽܘ ܐܶܣܟܺܡܳܐ ܕܺܝܠܟܽܘܢ ܗܰܘ ܕܡܶܬܚܙܶܐ^[20]܆ ܚܰܝܠܳܐ ܕܡܶܠܬܳܐ ܐܰܚܺܝܕ܆ ܘܡܰܙܥܶܩ ܠܘܳܬ ܟܽܠܗܽܘܢ ܗܳܢܽܘܢ ܕܚܳܙܶܝܢ ܠܳܗ̇ ܠܚܶܘܳܪܽܘܬܳܐ ܕܺܝܠܶܗ ܕܰܠܒܽܘܫܳܐ܆ ܕܰܒ̈ܢܰܝܳܐ ܕܢܽܘܗܪܳܐ ܐܺܝܬܰܝܟܽܘܢ܆ ܘܰܒ̈ܢܰܝܳܐ ܕܺܐܝܡܳܡܳܐ. ܘܠܳܐ ܡܶܟܺܝܠ^[21] ܕܠܶܠܝܳܐ ܐܳܦܠܳܐ ܕܚܶܫܽܘܟܳܐ^[22]. ܣܳܥܽܘܪ̈ܘܳܬܳܐ ܗܳܟܺܝܠ ‌ܐܺܝܡܳܡ̈ܳܝܳܬܳܐ ܘܢܰܨܺܝ̈ܚܳܬܳܐ ܥܰܬܶܕܘ܆ ܟܰܕ ܠܘܳܬ ܙܰܠܓܳܐ ܕܚܰܝ̈ܶܐ ܗܳܢܽܘܢ ܕܰܥܬܺܝܕܺܝܢ ܚܳܝܪܺܝܢ ܐܢ̱ܬܽܘܢ܆ ܘܰܠܘܳܬ ܗܳܢܽܘܢ ܡܶܬܛܰܝܒܺܝܢ ܐܢ̱ܬܽܘܢ܆ ܘܟܰܕ ܥܺܝܪܺܝܢ ܐܢ̱ܬܽܘܢ ܘܫܳܗܪܺܝܢ ܐܢ̱ܬܽܘܢ܆ ܘܠܳܐ ܗ̱ܘܳܐ ܒܡܰܪ̈ܢܝܳܬܳܐ ܥܳܠ̈ܡܳܢܳܝܳܬܳܐ ܘܕܰܡܠܶܐ ܙܰܒܢܳܐ ܕܳܡܟܺܝܢ ܐܢ̱ܬܽܘܢ܆ ܘܰܒܣܰܒܪ̈ܶܐ ܕܠܳܐ ܩܰܘܡܳܐ ܘܰܒܦܰܢܛܰܣܺܝ̈ܐܤ ܥܳܠ̈ܡܳܢܳܝܳܬܳܐ ܡܶܬܚܠܰܡܠܡܺܝܢ ܐܢ̱ܬܽܘܢ܆ ܠܰܘ ܣܰܓܺܝ ܙܰܒܢܳܐ ܢܟܰܬܰܪ ܒܗܳܠܶܝܢ ܚܰܝ̈ܶܐ ܕܩܰܪܺܝܒܺܝܢ. ܒܳܬܰܪ ܩܰܠܺܝܠ ‌ܐܳܙܺܠ̱ܝܢ ܚ̱ܢܰܢ.

ܠܐ ܬܶܥܒܕܽܘܢ ܐܰܢ̱ܬܽܘܢ ܠܟܽܘܢ ܥܰܪ̈ܛܶܠܳܝܶܐ܆ ܡܶܢ ܬܰܟܣܺܝܬܳܐ ܗܳܝ ܢܰܩܕܬܳܐ ܘܰܕܝܰܬܺܝܪ ܡܶܢܟܽܠ ܕܰܟܝܳܐ. ܠܳܐ ܬܶܫܕܽܘܢ ܡܶܢ ܦܰܪܨܽܘܦܳܐ ܕܺܝܠܟܽܘܢ ܠܣܽܘܡܳܩܽܘܬܳܐ ܗܳܝ ܕܡܶܢ ܢܽܘܪܳܐ ܕܪܽܘܚܳܐ܆ ܗܳܝ ܕܰܥܠܰܝܟܽܘܢ ܗܰܒܒ̣ܰܬ. ܡܶܢ ܗܳܕܶܐ. ܫ̈ܺܐܕܶܐ ܢܶܕܚܠܽܘܢ܆ ܘܳܐܟܶܠܩܰܪܨܳܐ ܗܰܘ ܪܺܝܫܳܢܳܐ ܕܗܳܠܶܝܢ܆ ܟܰܕ ܠܽܘܩܒܰܠ ܢܰܦ̈ܫܳܬܳܐ ܗܳܠܶܝܢ ܕܡܶܢ ܦܰܓܪ̈ܶܐ ܡܰܓܗ̈ܝܳܢ ܩܳܝܡܺܝܢ܆ ܘܡܰܪܕܺܝܬܳܐ ܗܳܝ ܪܳܕܶܝܢ܆ ܗܳܝ ܕܠܳܐ ܐܺܝܬ ܠܡܶܫܬܐܳܠܽܘ ܡܶܢܳܗ̇. ܘܟܰܕ ܒܗܳܠܶܝܢ ܡܰܢ ܠܳܐ ܡܛܰܘ̈ܫܳܬܳܐ ܡܶܙܕܟܶܝܢ܆ ܫܳܘܪܺܝܢ ܕܶܝܢ ܥܰܠ ܗܳܠܶܝܢ ܒܺܝ̈ܫܳܬܳܐ܆ ܘܰܠܘܳܬ ܚܶܫܽܘܟܳܐ ܗܰܘ ܕܰܡܛܳܐ ܠܗܽܘܢ ܡܰܘܒܠܺܝܢ ܠܗܶܝܢ.

ܐܰܟܚܕܳܐ ܓܶܝܪ܆ ܐܳܦ ܬܒܰܥܬܳܐ ܗܳܝ ܕܰܠܥܳܠܰܡ ܢܶܣܒܠܽܘܢ܆ ܡܶܢ ܒܰܪ̱ܬ ܩܳܠܳܐ ܗܳܝ ܕܚܺܝܠܬܳܐ ܕܕܰܝܳܢܳܐ: ܙܶܠܘ ܡܶܢܝ ܠܺܝ̈ܛܶܐ ܠܢܽܘܪܳܐ ܗܳܝ ܕܰܠܥܳܠܰܡ܆ ܗܳܝ ܕܰܡܛܰܝܒܳܐ ܠܳܐܟܶܠܩܰܪܨܳܐ ܘܰܠܡܰܠܰܐܟܰܘ̈ܗܝ^[23]. ܐܳܦ ܓܶܝܪ ܐܳܦ ܡܶܛܽܠܳܬܳܗ̇ ܕܗܳܕܶܐ܆ ܥܡܳܕܳܐ^[24] ܡܶܬܩܰܪܝܳܐ ܗܺܝ ܣܚܳܬܳܐ ܗܳܝ ܕܡܰܘܠܳܕܳܐ ܕܡܶܢܕܪܺܝܫ^[25]܆ ܡܶܛܽܠ ܗܳܝ ܕܰܐܝܟ ܗܰܘ ܕܰܨܒܺܝܥܺܝܢ ܐܺܝܬܰܝܗܽܘܢ ܗܳܠܶܝܢ ܕܰܣܚܰܘ ܒܪܽܘܚܳܐ ܘܰܒܡܰܝ̈ܳܐ܆ ܐܰܟܙܢܳܐ ܕܥܰܡܪܳܐ ܗܰܘ ܕܰܒܝܰܕ ܨܽܘܒܳܥܳܐ ܗܳܘܶܐ ܣܽܘܡܳܩܳܐ ܐܰܘ ܐܰܪܓܘܳܢܳܝܳܐ. ܨܽܘܒܥܳܐ ܓܶܝܪ ܐܺܝܬܰܘܗ̱ܝ ܡܳܪܳܢܳܐܺܝܬ܆ ܗܰܘ ܡܳܐ ܕܡܶܨܛܒܰܥ ܘܰܡܩܰܘܶܐ ܒܨܽܘܒܥܶܗ ܘܠܳܐ ܡܶܬܬܫܺܝܓ. ܟܰܕ ܐܶܨܛܰܒܰܥܬܽܘܢ ܗܳܟܺܝܠ ܨܽܘܒܳܥܳܐ ܗܰܘ ܐܰ‌ܠܳܗܳܝܳܐ܆ ܠܳܐ ܬܫܺܝܓܽܘܢܳܗ̇ ܡܶܢܟܽܘܢ ܠܣܽܘܡܳܩܽܘܬܳܐ ܗܳܝ ܪܽܘܚܳܢܳܝܬܳܐ ܘܢܽܘܪܳܢܳܝܬܳܐ ܐܰܝܟ ܕܶܐܡܪܶܬ܆ ܘܰܬܛܝܦܘܢܗ̇222 ܒܰܪ̈ܓܺܝܓܳܬܳܐ ܪ̈ܰܛܺܝܒܳܬܳܐ܆ ܐܳܦܠܳܐ ܬܶܫܠܚܽܘܢܳܗ̇ ܠܟܽܘܬܺܝܢܳܐ ܗܳܝ ܕܫܽܘܘܙܳܒܳܐ ܕܡܶܢ ܚ̈ܛܳܗܶܐ܆ ܗܳܝ ܕܕܳܡܝܳܐ ܠܬܰܠܓܳܐ܆ ܘܥܰܡ ܦܰܪܶܗ̱ܣܺܝܰܐ ܥܰܠ ܣܡܳܟܳܐ ܡܰܠܟܳܝܳܐ ܬܶܣܬܰܡܟܽܘܢ܆ ܟܰܕ ܠܰܚܫܳܡܺܝܬܳܐ ܗܳܝ ܡܶܬܗܰܘܢܳܢܺܝܬܳܐ ܐܳܟܠܺܝܢ ܐܢ̱ܬܽܘܢ܆ ܘܠܳܐ ܫܳܡܥܺܝܢ ܐܢ̱ܬܽܘܢ ܒܰܪ̱ܬ ܩܳܠܳܐ ܗܳܝ ܟܡܺܝܪܬܳܐ: ܚܰܒܪܝ܆ ܐܰܝܟܰܢܳܐ ܥ̣ܰܠܬ ܠܗܳܪܟܳܐ܆ ܟܰܕ ܠܰܝܬ ܠܳܟ ܠܒܽܘܫܳܐ ܕܡܶܫܬܽܘܬܳܐ^[26].

ܕܢܽܘܪ̈ܳܢܶܐ ܓܶܝܪ ܐܺܝܬܰܝܟܽܘܢ ܒܰܚܙܳܬܳܐ܆ ܘܢܰܨܺܝܚ̈ܶܐ ܒܙܰܠܺܝ̈ܩܶܐ ܕܪܽܘܚܳܐ܆ ܡܰܘ̈ܕܥܳܢ ܐܳܦ ܬܰܚ̈ܦܝܳܬܳܐ ܕܡܶܢ ܟܶܬܳܢܳܐ ܗܳܠܶܝܢ ܕܥܰܠ ܪ̈ܺܝܫܶܐ ܕܺܝܠܟܽܘܢ. ܕܰܥܕܰܡܳܐ ܠܥܰܝ̈ܢܰܝܟܽܘܢ ܢܳܚ̈ܬܳܢ. ܐܳܦ ܓܶܝܪ ܐܰܝܟܰܢܳܐ ܕܡܽܘܫܶܐ ܡܶܢ ܗܳܝ ܕܰܒܩܽܘܪܒܳܐ ܕܰܐ‌ܠܳܗܳܐ ܗܘ̣ܳܐ܆ ܟܰܕ ܢܰܗܺܝܪܳܐ ܘܢܰܨܺܝܚܳܐ ܗܘ̣ܳܐ ܦܰܪܨܽܘܦܶܗ܆ ܠܰܘ ܡܶܣܬܰܝܒܪܳܢܳܐ ܐܺܝܬܰܘܗ̱ܝ ܗ̱ܘܳܐ ܠܰܒ̈ܢܰܝ ܫܰܪܒܬܶܗ ܟܰܕ ܡܶܬܚܙܶܐ ܗ̱ܘܳܐ. ܡܶܛܽܠ ܗܳܕܶܐ ܐܳܦ ܐܳ‌ܠܨܳܐܺܝܬ ܡܶܬܚܰܦܶܐ ܗ̱ܘܳܐ܆ ܒܶܗ ܟܰܕ ܒܶܗ ܒܰܙܢܳܐ ܐܳܦ ܐܰܢ̱ܬܽܘܢ܆ ܡܰܠܽܘܢ ܕܶܝܢ ܒܪܰܚܺܝܩܽܘܬܳܐ ܣܰܓܺܝܐܬܳܐ ܝܰܬܺܝܪ ܪܰܘܪܒܳܐܺܝܬ܆ ܟܰܕ ܐܶܬܬܰܒܪܰܩܬܽܘܢ ܒܪܺܝܫܳܐ ܘܰܒܦܰܪܨܽܘܦܳܐ ܕܺܝܠܟܽܘܢ ܘܰܒܟܽܠܗܽܘܢ ܗܰܕܳܡܰܝ̈ܟܽܘܢ ܒܡܶܐܬܺܝܬܳܐ ܕܪܽܘܚܳܐ܆ ܠܢܰܨܺܝܚܽܘܬܳܐ ܗܳܝ ܕܣܰܓܺܝ ܢܰܗܺܝܪܳܐ ܡܟܰܣܶܝܢ ܐܢ̱ܬܽܘܢ ܒܬܰܚܦܺܝܬܳܐ. ܟܰܕ ܡܰܠܦܺܝܢ ܐܢ̱ܬܽܘܢ ܒܝܰܕ ܐܶܣܟܺܡܳܐ ܗܳܢܳܐ ܠܥܰܝ̈ܢܶܐ ܕܺܝܠܰܢ܆ ܕܠܳܐ ܢܰܩ̈ܬ̣ܳܢ ܒܰܚܙܳܬܳܐ ܡܥܰܩܒܳܢܳܐܺܝܬ.

ܐܶܠܳܐ ܐܰܝܟ ܗܰܘ ܕܳܐܦ ܗܰܝܟ̈ܠܶܐ ܕܰܐ‌ܠܳܗܳܐ ܗܘ̣ܰܝܬܽܘܢ^[27]܆ ܒܰܕܡܽܘܬ ܒܶܝܬ ܬܰܪ̈ܥܶܐ ܡܝܰܩܪ̈ܶܐ܆ ܠܪ̈ܺܝܫܶܐ ܘܰܠܦܰܪ̈ܨܽܘܦܶܐ ܕܺܝܠܟܽܘܢ ܡܟܰܣܶܝܢ ܚ̱ܢܰܢ܆ ܘܟܰܕ ܥܰܡ ܐܺܝܩܳܪܳܐ ܡܶܕܶܡ ܣܰܓܺܝܳܐܐ ܩܳܪܒܺܝܢ ܚ̱ܢܰܢ܆ ܡܫܰܡܠܶܝܢ ܚ̱ܢܰܢ ܠܟܽܘܢ. ܟܰܕ ܬܟܺܝܠܺܝܢܰܢ ܥܰܠ ܗܰܝܡܳܢܽܘܬܳܐ ܒܰܠܚܽܘܕܶܝܗ̇܆ ܗܳܝ ܕܡܰܡܪܚܳܐ ܙܰܒ̈ܢܺܝܢ ܣܰܓܺܝ̈ܳܐܢ ܐܳܦ ܥܰܠ ܗܳܠܶܝܢ ܠܳܐ ܡܶܬܬܰܡܪ̈ܚܳܢܝܳܬܳܐ܆ ܠܗܳܝ ܟܺܝܬ ܕܳܐܦ ܐܰ‌ܠܳܗܳܐ ܝܳܗܶܒ ܗܽܘ ܠܶܗ ܘܡܶܬܢܰܚܰܬ ܥܰܡܳܗ̇.

ܘܰܕܠܰܘ ܒܰܪ̱ܬ ܩܳܠܳܐ ܣܦܺܝܩܬܳܐ ܗܝ. ܘܰܕܪܽܘܘܪܳܒܳܐ ܗܝ ܡܶܠܬܳܐ܆ ܕܝܰܬܺܝܪ ܪܰܘܪ̈ܒܳܢ ܡܶܢ ܗܳܠܶܝܢ ܕܶܐܬܶܐܡܰܪ̈ܝ̱܆ ܬܶܫܟܰܚ ܕܰܗܘ̈ܰܝ ܒܫܽܘܪܳܝܳܐ ܕܟܳܪܽܘܙܽܘܬܳܐ. ܐܶܡܰܬܝ ܕܡܰܥܡܕܺܝܢ ܗ̱ܘܰܘ ܫܠܺܝ̈ܚܶܐ܆ ܘܰܐܝܟ ܗܰܘ ܕܫܶܬܶܐܣ̈ܶܐ ܕܝܽܘܠܦܳܢܳܐ ܕܰܟܪ̈ܺܝܣܛܝܳܢܶܐ ܡܰܪܡܶܝܢ ܗ̱ܘܰܘ. ܗܳܝܕܶܝܢ ܐܳܦ ܓܶܝܪ ܙܰܒܢܳܐ ܐܺܝܬ ܗ̱ܘܳܐ ܠܳܗ̇ ܠܡܶܬܚܰܘܝܳܢܽܘܬܳܐ ܕܳܐܬܘ̈ܳܬܳܐ ܘܰܕܬܶܕܡܪ̈ܳܬܳܐ܆ ܟܰܕ ܠܳܐ ܗܰܝܡܳܢܽܘܬܳܐ ܐܰܚܺܝܕܳܐ ܗ̱ܘܳܬ܆ ܡܶܛܽܠ ܟܺܝܬ ܕܟܰܕ ܠܩܽܘܪ̈ܝܢܬܳܝܶܐ ܟܳܬܶܒ ܗ̱ܘܳܐ. ܐܳܡܰܪ ܫܠܺܝܚܳܐ ܕܰܠܘܳܬ ܠܳܐ ܡܗܰܝܡ̈ܢܶܐ܆ ܚܳܫ̈ܚܳܝܳܬܳܐ ܘܳܐ‌ܠ̈ܨܳܝܳܬܳܐ ܐܺܝܬܰܝܗܶܝܢ ܬܶܕܡܪ̈ܳܬܳܐ^[28].

ܟܰܕ ܗܳܟܺܝܠ ܦܶܛܪܽܘܤ ܠܗܳܢܽܘܢ ܕܒܶܝܬ ܩܽܘܪܢܺܝܠܺܝܽܘܤ ܗܰܘ ܩܶܢܛܪܽܘܢܳܐ ܡܰܥܡܶܕ ܗ̱ܘܳܐ܆ ܗܳܢܽܘܢ ܕܰܠܗܳܕܶܐ ܩܪܶܝܢ ܗ̱ܘܰܘ܆ ܩܕܳܡ ܕܰܠܡܰܝ̈ܳܐ ܣܳܟ ܢܶܬܩܰܪܒܽܘܢ ܗ̱ܘܰܘ܆ ܒܠܶܫܳܢ̈ܶܐ ܡܡܰܠܠܺܝܢ ܗ̱ܘܰܘ. ܟܰܕ ܕܶܝܢ ܦܰܘܠܽܘܤ ܠܰܐ̱ܚܪ̈ܳܢܶܐ ܒܶܐܦܶܣܽܘܤ^[29]܆ ܕܰܠܡܰܥܡܽܘܕܺܝܬܶܗ ܒܰܠܚܽܘܕ ܕܝܽܘܚܰܢܳܢ ܝܳܕܥܺܝܢ ܗ̱ܘܰܘ܆ ܠܘܳܬ ܪܽܘܚܳܐ ܗܰܘ ܡܰܥܒܶܕ ܡܫܰܡܠܝܽܘܬܳܐ ܘܰܠܘܳܬ ܡܰܝ̈ܳܐ ܕܝܶܫܽܘܥ ܦܳܪܽܘܩܳܐ ܐܰ‌ܠܳܗܳܐ ܡܗܰܕܶܐ ܗ̱ܘܳܐ ܘܰܡܩܰܪܶܒ܆ ܥܰܡ ܗܰܘ ܕܠܶܫܳܢ̈ܶܐ܆ ܐܳܦ ܫܽܘܟܳܢܳܐ ܗܰܘ ܕܰܢܒܺܝܽܘܬܳܐ ܐܰܟܚܕܳܐ ܡ̣ܙܰܘܶܓ ܗ̱ܘܳܐ. ܡܡܰܠܠܺܝܢ ܗ̱ܘܰܘ ܓܶܝܪ ܒܠܶܫܳܢ̈ܶܐ. ܗܳܢܽܘܢ ܕܰܥܡܰܕܘ܆ ܐܳܦ ܡܶܬܢܰܒܶܝܢ ܗ̱ܘܰܘ. ܘܡܳܢܳܐ ܡܶܬܒܰܥܝܳܐ ܠܡܶܚܫܰܒ ܠܣܰܓܺܝ̈ܐܘܳܬܳܐ ܕܠܳܐ ܣܳܟܳܐ ܕܳܐܬܘ̈ܳܬܳܐ܆ ܗܳܢܶܝܢ ܕܶܐܫܬܘܺܝܘ ܠܗܶܝܢ ܗܳܢܽܘܢ ܕܗܰܝܡܶܢܘ ܒܰܡܫܺܝܚܳܐ܆ ܘܰܠܗܰܝܡܳܢܽܘܬܳܐ ܥܕܰܡܳܐ ܠܣܰܘ̈ܦܶܐ ܕܡܶܬܥܰܡܪܳܢܺܝܬܳܐ ܡܬܰܚ̈ܶܝܢ. ܘܰܠܟܽܠ ‌ܐ̱ܢܳܫ ܢܳܓܕܺܝܢ ܠܘܳܬܗܶܝܢ ܘܰܢܣܰܒ̈ܶܝܢ.

ܠܘܳܬܟܽܘܢ ܗܳܟܺܝܠ ܒܦܳܣܺܝ̈ܩܳܬܳܐ ܠܡܺܐܡܰܪ ܐܺܝܬܶܝܗ̇ ܠܰܢ ܟܽܠܳܗ̇ ܡܶܠܬܳܐ܆ ܗܳܢܽܘܢ ܕܡܶܢܫܶܠܝ ܥܬܰܪܬܽܘܢ ܟܽܠܶܗ ܗܳܢܳܐ ܥܽܘܬܪܳܐ ܕܛܰܝܒܽܘܬܳܐ܆ ܐܰܝܟܰܢܳܐ ܕܥܰܡ ܝܰܨܺܝܦܽܘܬܳܐ ܡܶܕܶܡ ܥܺܝܪܬܳܐ ܬܚܽܘܨܽܘܢ ܥܠܰܘܗ̱ܝ ܐܺܝܕܳܐ ܘܬܶܙܕܰܗܪܽܘܢ ܒܶܗ܆ ܘܠܳܐ ܠܦܳܠ̈ܫܰܝ ܐܶܣ̈ܶܐ܆ ܘܠܳܐ ܠܓܰܢܳܒ̈ܶܐ ܬܶܫܒܩܽܘܢ ܐܰܝܢܳܐ ܕܗܽܘ ܡܰܥܠܳܢܳܐ܆ ܠܦܳܠ̈ܫܰܝ ܐܶܣ̈ܶܐ ܕܶܝܢ ܡܕܰܡܶܐ ܐ̱ܢܳܐ܆ ܠܡܰܟܝܳܢܽܘܬܳܐ ܗܳܝ ܕܚܽܘ̈ܫܳܒܶܐ ܗܳܢܽܘܢ ܕܺܐܝܬ ܠܗܽܘܢ ܫܰܦܺܝܪܽܘܬ ܦܰܪܨܽܘܦܳܐ ܘܰܐܝܟ ܗܰܘ ܕܺܐܝܬܰܝܗܽܘܢ ܙܶܕܩ̈ܶܐ ܡܶܣܬܰܒܪܺܝܢ܆ ܐܶܡܰܬܝ ܕܐ̱ܢܳܫ ܡܶܢܟܽܘܢ ܟܰܕ ܢܶܬܚܰܫܰܒ ܢܺܐܡܰܪ ܦܠܳܢ ܡܗܰܝܡܢܳܐ ܐܺܝܬܰܘܗ̱ܝ ܘܰܟܪܺܝܣܛܝܳܢܳܐ ܐܰܝܟ ܕܳܐܦ ܐܶܢܳܐ܆ ܠܘܳܬ ܒܶܝܬ ܪܶܗܛܳܐ ܕܪ̈ܰܟܫܳܐ ܘܰܠܘܳܬ ܬܶܐܛܰܪ̈ܶܐ ܥܰܡ ܬܟܺܝܠܽܘܬܳܐ ܐܳܙܶܠ ܠܒܶܝܬ ܩܦܺܝܠܳܐ ܥܳܐܶܠ܆ ܥܰܡ ܩܽܘܦ̈ܣܶܐ ܡܶܬܥܢܶܐ܆ ܒܡܰܫ̈ܬܝܶܐ ܡܶܬܶܐܡܶܢ܆ ܒܨ̈ܶܨܠܶܐ ܘܒܰܐܒܽܘ̈ܒܶܐ ܡܶܬܦܰܪܓܶܐ܆ ܘܒܰܙܡܺܝܪ̈ܳܬܳܐ ܕܙܳܢܝܽܘܬܳܐ ܡܶܬܬܰܫܥܶܐ܆ ܥܰܡ ܛܠܳܝ̈ܶܐ ܐܺܝܬܰܘܗ̱ܝ ܒܫܽܘܩܳܐ܆ ܘܡܶܬܒܰܣܰܡ ܒܦܽܘܪ̈ܓܳܝܶܐ ܕܛܰܠܝܽܘܬܳܐ. ܘܠܳܐ ܗ̱ܘܳܐ ܗܽܘ ܒܰܠܚܽܘܕܰܘܗ̱ܝ܆ ܐܶܠܳܐ ܐܳܦ ܣܰܓܝ̈ܶܐܐ ܐ̱ܚܪ̈ܳܢܶܐ܆ ܕܺܝܠܶܗ ܟܰܕ ܕܺܝܠܶܗ ܕܨܶܒܝܳܢܳܐ ܐܺܝܬܰܝܗܽܘܢ.

ܡܳܢܳܐ ܗܳܟܺܝܠ. ܐܶܢܳܐ ܠܚܽܘܕܰܝ ܐܺܝܬܰܝ ܐܶܡܰܪ ܠܺܝ: ܐܶ݀ܚܰܘܶܐ ܚܰܬܺܝܬܽܘܬܳܐ ܐܶܘܰܢܓܶܠܳܝܬܳܐ܆ ܘܰܠܡܳܢܳܐ ܠܰܘ ܠܘܳܬ ܡܰܕܒܪ̈ܶܐ ܡܳܕܶܝܢ ܐܳܙܶܠ ‌ܐ̱ܢܳܐ܆ ܘܰܒܗܳܢܽܘܢ ܕܕܽܘܒܳܪܳܐ ܕܰܝܪܳܝܳܐ ܡܶܬܥܰܢܘܶܝܢ ܡܶܬܕܰܡܶܐ ܐ̱ܢܳܐ. ܫܘܰܪ ܥܪܽܘܩ ܐܳܚܝ. ܡܶܢ ܡܰܚܫܰܒܬܳܐ ܕܰܐܝܟ ܗܳܕܶܐ܆ ܫܕܺܝ ܡܶܢܳܟ ܠܪܽܘܚܩܳܐ܆ ܠܡܰܚ̈ܫܒܳܬܳܐ ܗܳܠܶܝܢ ܕܳܐܟܶܠܩܰܪܨܳܐ. ܗܳܠܶܝܢ ܐܺܝܬܰܝܗܶܝܢ ܦܽܘܠܚܳܢܶܗ ܕܗܰܘ܆ ܘܥܽܘܬܳܕܶܗ ܘܡܶܙܕܰܝܚܳܢܽܘܬܶܗ. ܒܗܳܠܶܝܢ ܟܦܰܪܬ ܠܳܟ. ܠܳܐ ܬܶܗܦܽܘܟ ܠܰܐܝܟܳܐ ܕܰܢܦܰܩܬ ܡܶܢ ܬܰܡܳܢ. ܒܪܳܐ ܕܢܽܘܗܪܳܐ ܗܘ̣ܰܝܬ^[30]܆ ܚܽܘܪ ܐܰܢ̱ܬ ܒܳܟ܆ ܘܕܰܥ ܡܰܢܽܘ ܐܺܝܬܰܝܟ. ܘܰܐܟܣܺܝܽܘܡܳܐ ܕܺܝܠܳܟ ܐܰܘ ܟܺܝܬ ܐܺܝܩܳܪܳܟ܆ ܢܶܣܦܰܩ ܠܳܟ ܠܘܳܬ ܡܰܠܦܳܢܽܘܬܳܐ. ܠܳܐ ܬܶܚܣܰܡ ܒܒܺܝ̈ܫܶܐ܆ ܐܳܦܶܢ ܬܶܛܰܢ ܒܗܳܢܽܘܢ ܕܥܳܒܕܺܝܢ ܠܳܐ ܢܳܡܽܘܣܳܝܽܘܬܳܐ^[31]܆ ܫܡܰܥܳܝܗ̱ܝ ܠܕܰܘܺܝܕ ܕܳܐܡܰܪ: ܐܰܝܟܰܢܳܐ ܓܶܝܪ ܠܳܐ ܫܟܺܝܪܳܐ܆ ܕܗܳܢܽܘܢ ܡܰܢ ܕܰܒܬܶܐܓܽܘܪܬܳܐ ܡܶܬܗܰܦܟܺܝܢ ܘܰܥܬܺܝܕܺܝܢ ܕܝܰܡ̱̈ܡܶܐ ܐܰܪ̈ܺܝܟܶܐ ܢܶܥܒܪܽܘܢ܆ ܒܣܰܒܪܳܐ ܡܰܢ ܕܝܽܘܬܪܳܢܳܐ ܥܰܠ ܩܺܝܢܕܽܘܢܽܘܤ ܢܰܡܪܚܽܘܢ܆ ܘܠܳܐ ܢܶܬܚܰܫܒܽܘܢ ܕܣܰܓܺܝ̈ܶܐܐ ܐܺܝܬܰܝܗܽܘܢ ܗܳܢܽܘܢ ܕܦܰܕܘ ܘܶܐܬܢܰܘܰܓܘ.

ܠܘܳܬ ܕܶܝܢ ܕܰܠܺܝ̈ܠܶܐ ܘܕܰܐܨܠܰܚܘ ܘܟܰܬܰܪܘ ܢܚܽܘܪܽܘܢ܆ ܘܣܳܟ ܡܶܢ ܚܘܺܝܚܽܘܬܳܐ ܕܺܝܠܗܽܘܢ ܠܳܐ ܢܶܬܥܰܟܪܽܘܢ.

ܗܳܢܽܘܢ ܕܶܝܢ ܕܰܠܘܳܬ ܕܶܚܠܰܬ ܐܰ‌ܠܳܗܳܐ ܡܶܬܩܰܪܒܺܝܢ܆ ܢܰܝܬܽܘܢ ܠܰܡܨܰܥܬܳܐ ܬܰܚܘܺܝܬܳܐ ܒܺܝܫܬܳܐ ܕܗܳܢܽܘܢ ܕܡܰܒܐܫܺܝܢ܆ ܘܡܶܛܽܠܗܳܕܶܐ ܠܘܳܬ ܥܰܡ̈ܠܶܐ ܕܰܡܝܰܬܪܽܘܬܳܐ ܢܰܐܡܢܽܘܢ܆ ܘܟܰܕ ܛܳܒ. ܬܰܓܳܪܳܐ ܡܰܢ ܥܰܠ ܩܺܝܢ̈ܕܽܘܢܽܘ. ܐܳܙܶܠ ܒܚܺܐܦܳܐ܆ ܟܰܕ ܥܽܘܬܪܳܐ ܕܠܳܐ ܐܺܝܬܰܘܗ̱ܝ ܡܶܬܗܰܓܰܓ. ܐܰܢ̱ܬ ܕܶܝܢ ܗܳܐ ܡܶܢ ܟܰܕܽܘ ܩܢܶܐ ܐܰܢ̱ܬ ܠܶܗ ܠܩܶܢܝܳܢܳܐ. ܘܰܠܣܽܘܓܶܐܗ ܕܥܽܘܬܪܳܐ ܐܰܚܺܝܕ ܐܰܢ̱ܬ ܠܘܳܬܳܟ. ܠܫܽܘܘܙܳܒܳܐ ܕܡܶܢ ܚ̈ܛܳܗܰܝܟ. ܠܛܰܝܒܽܘܬܳܐ ܕܣܳܝܽܘܡܽܘܬ ܒܢܰܝ̈ܳܐ. ܠܰܥܡܽܘܪܝܳܐ ܕܒܳܟ ܕܰܐ‌ܠܳܗܳܐ. ܠܗܰܘ ܕܳܐܦ ܕܰܬܪܰܒܶܝܘܗ̱ܝ ܒܟܽܠ ܝܽܘܡ ܡܶܫܟܰܚ ܐܰܢ̱ܬ܆ ܟܰܕ ܝܳܨܶܦ ܐܰܢ̱ܬ ܕܰܥ̈ܒܳܕܶܐ ܛܳܒ̈ܶܐ. ܐܳܦ ܓܶܝܪ ܐܳܦ ܟܰܕ ܒܽܐܘܡܳܢܽܘܬܳܟ ܡܚܰܩܶܠ ‌ܐܰܢ̱ܬ܆ ܘܒܳܬܰܪ ܨܶܒ̈ܘܳܬܳܐ ܗܳܠܶܝܢ ܕܫܰܪܟܳܐ ܕܥܳܠܡܳܐ ܪܰܗܺܝܛ ܐܰܢ̱ܬ܆ ܠܘܳܬ ܦܽܘܪܢܳܣܳܐ ܕܚܰܝ̈ܶܐ ܕܰܒܟܽܠ ܝܽܘܡ. ܘܠܳܐ ܡܶܕܶܡ ܚܽܘܣܪܳܢܳܐ ܬܶܣܒܽܘܠ܆ ܐܶܢܗܽܘ ܕܰܠܬܶܐܰܛܪ̈ܶܐ ܠܳܐ ܬܶܗܘܶܐ ܐܳܙܶܠ. ܐܶܢ ܠܶܐܕܢ̈ܶܐ ܕܺܝܠܳܟ ܘܰܠܥܰܝ̈ܢܶܐ ܠܳܐ ܬܫܰܓܶܫ ܘܬܰܛܥܶܐ ܒܚܶܙܘ̈ܳܢܶܐ ܕܳܐܟܶܠܩܰܪܨܳܐ ܘܰܒܫܶܡ̈ܥܶܐ. ܐܶܢ ܠܘܳܬ ܥܺܕܬܳܐ ܬܺܐܬܶܐ ܒܰܨ̈ܠܰܘܳܬܳܐ ܨܰܦܪ̈ܳܝܳܬܳܐ ܘܪ̈ܰܡܫܳܝܳܬܳܐ܆ ܘܰܒܬܶܫܒ̈ܚܳܬܳܐ ܐܰ‌ܠܳܗܳܝ̈ܳܬܳܐ ܕܡܰܙܡܽܘܪ̈ܶܐ ܬܒܰܣܶܡ ܠܢܰܦܫܳܟ܆ ܘܠܰܐܠܳܗܳܐ ܬܝܰܩܰܪ.

ܐܶܠܳܐ ܟܰܕ ܗܳܠܶܝܢ ܐܳܡܰܪ ܐ̱ܢܳܐ܆ ܡܶܬܢܰܟܰܬ ܐ̱ܢܳܐ ܣܰܓܺܝ܆ ܘܟܳܐܶܒ ܠܺܝ ܒܢܰܦܫܝ. ܚܳܙܶܐ ܐ̱ܢܳܐ ܓܶܝܪ. ܠܗܳܢܽܘܢ ܕܶܐܬܬܰܪܬܺܝܘ ܡܶܠܬܳܐ ܕܫܰܦܺܝܪܽܘܬ ܕܶܚܠܬܳܐ ܝܰܨܺܝܦܳܐܺܝܬ܆ ܘܥܰܡ ܟܽܠܳܗ̇ ܢܰܟܦܽܘܬܳܐ ܟܺܝܬ ܘܰܫܩܳܠ ܛܰܥܢܳܐ܆ ܘܶܐܫܬܘܺܝܘ ܠܰܥܡܳܕܳܐ ܩܰܕܺܝܫܳܐ܆ ܕܡܶܣܬܰܓܦܺܝܢ ܡܶܢ ܡܕܰܡܝܳܢܽܘܬܳܐ ܕܺܝܠܰܢ. ܘܰܐܝܟܰܢܳܐ ܕܟܰܕ ܠܟܽܠܗܶܝܢ ܗܳܠܶܝܢ ܐ̱ܚܪ̈ܳܢܝܳܬܳܐ ܫܳܒܶܩ ܐ̱ܢܳܐ܆ ܗܳܝ ܕܫܺܝܛܳܐ ܘܰܙܥܽܘܪܝܳܐ. ܘܰܠܣܰܓܺܝ̈ܶܐܐ ܐܺܝܬܶܝܗ̇ ܒܣܺܝܬܳܐ ܐܰܝܬܶܐ ܠܰܡܨܰܥܬܳܐ܆ ܗܳܫܳܐ. ܟܕ ܫܳܡܥܺܝܢ ܠܟܳܗ̈ܢܶܐ ܕܩܳܝܡܺܝܢ ܘܰܡܨܰܠܶܝܢ܆ ܗܳܢܽܘܢ ܡܰܢ. ܠܬܰܚܬ ܚܳܝܪܺܝܢ ܘܰܓܗܺܝܢܺܝܢ܆ ܘܰܐܟܚܕܳܐ ܥܰܡܗܽܘܢ ܡܨܰܠܶܝܢ. ܘܥܰܡ ܬܰܪܥܺܝܬܳܐ ܚܦܺܝܛܬܳܐ ܟܺܝܬ. ܘܰܪܟܺܝܢܬܳܐ. ܘܒܰܪ̱ܬ ܩܳܠܳܐ܆ ܥܳܢܶܝܢ ܐܰܡܺܝܢ. ܐܢ̱ܬܽܘܢ ܕܶܝܢ ܦܫܺܝܛܺܝܢ ܐܢ̱ܬܽܘܢ ܘܡܶܬܥܰܢܦܺܝܢ ܐܢ̱ܬܽܘܢ ܒܦܽܘܪܓܳܝܳܐ܆ ܘܙܰܒ̈ܢܺܝܢ ܣܰܓܺܝ̈ܳܐܢ. ܡܶܛܽܠ ܫܰܪ̈ܒܶܐ ܥܳܠ̈ܡܳܢܳܝܶܐ ܦܥܺܝܪ ܚܶܟܟ̣ܽܘܢ.

ܗܽܘ ܕܶܝܢ ܐܰܡܺܝܢ܆ ܝܰܬܺܝܪ ܐܳ‌ܠܨܳܝܳܐ ܛܳܒ ܡܶܢ ܟܽܠ. ܐܺܝܬܰܘܗ̱ܝ ܣܰܓܺܝ܆ ܘܰܡܡܰܠܝܳܢܳܐ ܐܰܟܚܕܳܐ ܕܰܨܠܽܘܬܳܐ. ܟܰܕ ܓܶܝܪ ܡܶܢ ܠܶܫܳܢܳܐ ܥܶܒܪܳܝܳܐ ܠܝܰܘܢܳܝܳܐ ܡܶܬܦܰܫܰܩ܆ ܗܳܝ ܕܢܶܗܘܶܐ ܡܰܘܕܰܥ. ܟܰܕ ܓܶܝܪ ܟܳܗܢܳܐ. ܬܰܟܫ̈ܦܳܬܳܐ ܕܰܚܠܳܦܰܝܟܽܘܢ ܡܰܣܶܩ܆ ܠܟܽܘܢ ܙܳܕܶܩ ܗ̱ܘܳܐ ܕܬܶܥܢܽܘܢ. ܢܶܗܘܶܐ܆ ܘܠܳܐ ܡܰܪܓܫܺܝܢ ܐܢ̱ܬܽܘܢ ܕܰܒܨܶܒܝܳܢܟܽܘܢ ܣܳܒܠܺܝܢ ܐܢ̱ܬܽܘܢ ܗܳܢܳܐ ܟܽܠܶܗ ܚܽܘܣܪܳܢܳܐ. ܘܟܰܕ ܠܗܳܕܶܐ ܝܳܕܰܥ ܗ̱ܘܳܐ ܦܰܘܠܽܘܤ܆ ܠܳܐ ܡܩܰܠܶܤ ܠܗܽܘܢ ܠܗܳܢܽܘܢ ܕܠܰܘ ܓܰܠܝܳܐܺܝܬ ܡܨܰܠܶܝܢ ܐܰܘ ܡܒܰܪܟܺܝܢ܆ ܐܰܝܟܰܢܳܐ ܟܺܝܬ ܕܗܳܢܽܘܢ ܕܰܒܥܰܡܳܐ ܐܺܝܬܰܝܗܽܘܢ܆ ܠܳܐ ܢܶܬܡܨܽܘܢ ܕܢܶܥܢܽܘܢ ܐܰܡܺܝܢ܆ ܟܰܕ ܗܳܟܰܢܳܐ ܐܳܡܰܪ. ܘܶܐܢ ܕܶܝܢ ܠܳܐ܆ ܠܳܐ ܬܒܰܪܶܟ ܒܪܽܘܚ܆ ܗܰܘ ܕܰܡܡܰܠܶܐ ܕܽܘܟܬܳܐ ܕܗܶܕܝܽܘܛܳܐ܆ ܐܰܝܟܰܢܳܐ ܢܺܐܡܰܪ ܐܰܡܺܝܢ܆ ܥܰܠ ܬܰܘܕܺܝܬܳܟ ܕܺܝܠܳܟ. ܡܶܛܽܠ ܟܺܝܬ. ܕܡܳܢܳܐ ܐܳܡܰܪ ܐܰܢ̱ܬ. ܠܳܐ ܝܳܕܰܥ^[32].

ܡܳܢܳܐ ܕܶܝܢ ܐܳܡܰܪ ܠܘܳܬ ܗܳܢܽܘܢ ܕܰܠܒܰܝܬܳܐ ܗܰܘ ܕܰܐܪ̈ܝܰܢܽܘ ܪܳܗܛܺܝܢ ܐܰܝܟ ܗܰܘ ܕܰܠܥܺܕܬܳܐ ܐܳܙܺܠ̱ܝܢ܆ ܘܣܳܒܪܺܝܢ ܕܠܳܐ ܡܰܪܓܙܺܝܢ ܠܰܐܠܳܗܳܐ. ܐܰܝܕܳܐ ܓܶܝܪ ܫܰܘܬܳܦܽܘܬܳܐ ܠܢܽܘܗܪܳܐ ܠܘܳܬ ܚܶܫܽܘܟܳܐ^[33] ܐܶܡ̣ܰܪ ܠܺܝ. ܐܰܢ̱ܬ ܠܡܶܠܬܳܐ ܘܰܒܪܳܐ ܕܰܐ‌ܠܳܗܳܐ܆ ܐܰܝܟ ܕܰܠܠܳܐ ܒ̣ܰܪܝܳܐ ܘܰܫܘܶܐ ܒܰܡܬܽܘܡܳܝܽܘܬܳܐ ܠܰܐܒܳܐ ܣܳܓܶܕ ܐܰܢ̱ܬ. ܗܳܢܽܘܢ ܕܶܝܢ ܟܰܕ ܒܪܺܝܬܳܐ ܐܳܡܪܺܝܢ ܠܶܗ ܕܺܐܝܬܰܘܗ̱ܝ ܘܰܥܒܳܕܳܐ܆ ܒܪܽܘܫܥܳܐ ܕܚܰܢ̈ܦܶܐ ܡܶܬܦܰܠܦܠܺܝܢ܆ ܟܰܕ ܦܳܠܚܺܝܢ ܠܰܒܪܺܝܬܳܐ ܠܒܰܪ ܡܶܢ ܒܳܪܽܘܝܳܐ.

ܐܳܦ ܗܳܝ ܕܶܝܢ ܫܳܡܰܥ ܐ̱ܢܳܐ ܥܠܰܝܗܽܘܢ ܕܥܳܒܕܺܝܢ܆ ܕܚܰܢܦܳܝܬܳܐ ܗܝ ܟܺܝܬ. ܘܰܕܠܳܐ ܐܰ‌ܠܳܗ܆ ܕܗܽܘܦܶܘܡܢܺܝ̈ܡܰܛܶܐ ܐܰܘܟܺܝܬ ܥܽܘܗ̈ܕܳܢܶܐ ܕܶܐܣܬܥܰܪܘ̱ ܠܰܡ ܐܳܡܪܺܝܢ ܩܕܳܡ ܦܺܝܠܰܛܽܘܤ܆ ܩܳܪܶܝܢ ܒܝܰܘ̈ܡܳܬܳܐ ܕܚܰܫܳܐ ܦܳܪܽܘܩܳܝܳܐ. ܠܗܳܠܶܝܢ ܕܶܝܢ ܡܰܟܣܺܝܡܝܰܢܽܘܤ ܛܪܽܘܢܳܐ. ܗܰܘ ܕܰܠܟܽܠܢܳܫ ܙܟܳܐ ܒܪܽܘܫܥܳܐ܆ ܐܰܝܟܰܢܳܐ ܕܰܒܬܰܫܥ̈ܝܳܬܳܐ ܥܺܕܬܳܢܳܝ̈ܳܬܳܐ ܟܬܺܝܒ܆ ܟܰܕ ܓܒܽܘ̈ܠܝܶܐ. ܐܺܝܬܰܝܗܽܘܢ ܘܕܰܓ̈ܳܠܶܐ܆ ܡܥܰܬܶܕ ܗ̱ܘܳܐ܆ ܕܳܐܦ ܠܰܛܠܳܝ̈ܶܐ ܗܳܢܽܘܢ ܕܰܠܘܳܬ ܡܰܠ̈ܦܳܢܶܐ ܐܳܬܶܝܢ ܗ̱ܘܰܘ. ܚܠܳܦ ܝܽܘܠܦܳܢܳܐ ܡܶܕܶܡ ܐ̱ܚܪܺܢܳܐ ܢܶܫܬܰܠܡܽܘܢ ܗ̱ܘܰܘ. ܒܗܳܢܳܐ. ܐܳܦ ܐܰܪ̈ܝܢܘ ܛܳܢܺܝܢ܆ ܟܰܕ ܠܰܡܙܰܥܳܪܽܘ ܗܽܘ ܗܳܟܘܳܬ ܝܰܨܺܝܦܺܝܢ ܗ̱ܘܰܘ ܠܰܐܠܳܗܽܘܬܶܗ ܕܺܝܚܺܝܕܳܝܳܐ܆ ܘܠܰܡܬܰܚܬܳܝܽܘ ܠܫܰܘܝܽܘܬ ܐܺܝܩܳܪܶܗ ܕܰܠܘܳܬ ܐܰܒܳܐ ܘܰܠܗܳܝ ܕܗܳܝ ܟܰܕ ܗܳܝ ܕܽܐܘܣܺܝܰܐ.

ܐܰܢ̱ܬܽܘܢ ܕܶܝܢ ܒܪܰܡ. ܚܰܕܳܝ̣ܺܝ̣ܢ ܐܢ̱ܬܽܘܢ ܟܰܕ ܠܗܶܝܢ ܠܗܳܠܶܝܢ ܡܰܣ̈ܠܝܳܬܳܐ ܫܳܡܥܺܝܢ ܐܢ̱ܬܽܘܢ܆ ܘܠܰܘ ܛܰܡܽܐܘܬܳܐ ܕܳܝܢܺܝܢ ܐܢ̱ܬܽܘܢ ܠܳܗ̇ ܕܺܐܝܬܶܝܗ̇܆ ܠܗܳܝ ܕܳܐܦܶܢ ܠܰܩܕܳܡ ܒܶܝܬ ܬܰܪ̈ܥܶܐ ܕܒܰܝܬܽܘܢܳܐ ܗܰܘ ܬܶܓܫܦܽܘܢ ܒܰܠܚܽܘܕ܆ ܟܰܕ ܩܳܢܽܘ̈ܢܶܐ ܟܳܗ̈ܢܳܝܶܐ ܕܥܺܕܬܳܐ ܒܰܡܣܳܡ ܒܪܺܝܫܳܐ ܝܰܩܺܝܪܳܐ ܘܩܰܫܝܳܐ ܡܫܰܢܩܺܝܢ܆ ܠܗܰܘ ܕܰܠܒܰܝܬܳܐ ܕܗܶܪ̈ܶܛܺܝܩܽܘ ܥܳܐܶܠ܆ ܘܥܰܡ ܗܳܠܶܝܢ ܡܰܡܪܰܚ ܐܰܟܚܕܳܐ ܠܰܡܨܰܠܳܝܽܘ. ܥܰܡܳܗ̇ ܕܶܝܢ ܟܰܕ ܥܰܡܳܗ̇ ܕܬܰܪܥܺܝܬܳܐ ܠܳܐ ܡܒܰܚܢܳܢܺܝܬܳܐ܆ ܐܳܦ ܗܳܝ ܡܶܢ ܐ̱ܢܳܫܺܝ̈ܢ ܡܶܣܬܰܥܪܳܐ܆ ܕܺܐܝܬ ܠܳܗ̇ ܪܽܘܫܥܳܐ ܕܝܰܬܺܝܪ ܡܶܢ ܟܽܠ ܪܰܒ.

ܡܶܢ ܓܶܝܪ ܦܰܛܺܝܪ̈ܶܐ ܕܝܽܗ̱ܘ̈ܕܳܝܶܐ ܕܡܶܫܬܰܕܪܺܝܢ ܠܗܽܘܢ ܐܳܟܠܺܝܢ. ܐܰܪܰܐ ܗܳܟܺܝܠ܆ ܙܥܽܘܪܰܐ ܗ̄ܘ ܦܽܘܪܫܳܢܳܐ ܕܺܐܝܬ ܒܶܝܬ ܝܽܗ̱ܘ̈ܕܳܝܶܐ ܘܠܰܢ܆ ܨܠܰܒܘ ܗܳܢܽܘܢ ܠܰܡܫܺܝܚܳܐ܆ ܐܰܝܟ ܕܠܰܡܓܰܕܦܳܢܳܐ ܘܥܳܒܰܪ ܥܰܠ ܢܳܡܽܘܣܳܐ. ܐܰܢ̱ܬ ܕܶܝܢ ܣܳܓܶܕ ܐܰܢ̱ܬ ܠܶܗ܆ ܐܰܝܟ ܕܰܠܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ. ܘܰܐ‌ܠܳܗܳܐ ܡܰܢ. ܡܶܛܽܠ ܡܰܪܳܚܽܘܬܳܐ ܕܺܝܠܗܽܘܢ ܕܰܥܠܰܘܗ̱ܝ܆ ܟܰܕ ܐܰ݀ܗܦܶܟ ܐܰܦܰܘ̈ܗ̱ܝ ܡܶܢܗܽܘܢ܆ ܒܝܰܕ ܢܒܺܝܳܐ ܩܰܕܶܡ ܡܰܟܪܶܙ ܟܰܕ ܐܳܡܰܪ: ܐܰ݀ܗܦܶܟ ܥܰܕܥ̈ܺܐܕܰܝܟܽܘܢ ܠܶܐܒܠܳܐ^[34]. ܐܰܢ̱ܬ ܕܶܝܢ܆ ܠܠܰܚܡܳܐ ܐܶܒܠܳܢܳܝܳܐ ܕܺܝܠܗܽܘܢ ܐܳܟܶܠ ‌ܐܰܢ̱ܬ܆ ܗܰܘ ܕܰܠܠܰܚܡܳܐ ܫܡܰܝܳܢܳܐ ܐܶܫܬܘܺܝܬ̊ ܠܡܶܐܟܰܠ܆ ܘܠܰܡܣܰܡܳܩܽܘ ܠܣܶܦ̈ܘܳܬܳܐ ܕܺܝܠܳܟ ܒܰܕܡܳܐ ܕܠܳܐ ܡܳܝܽܘܬܽܘܬܳܐ܆ ܗܰܘ ܕܙܰܒ̣ܢܳܟ ܡܶܢ ܚܛܺܝܬܳܐ^[35]܆ ܗܰܘ ܕܡܳܠܶܐ ܠܠܶܫܳܢܳܐ ܕܺܝܠܳܟ ܪܘܳܙܳܐ܆ ܕܳܐܦ ܗܳܕܶܐ ܓܶܝܪ. ܕܰܥܒܳܪ ܢܳܡܽܘܣܳܐ ܕܝܰܬܺܝܪ ܪܰܒ ܐܺܝܬܶܝܗ̇܆ ܡܶܢ ܩܳܢܽܘ̈ܢܶܐ ܩܰܕܺܝ̈ܫܶܐ. ܒܰܡܣܳܡ ܒܪܺܝܫܳܐ ܡܚܰܝܒܳܐ. ܠܡܳܢܳܐ ܗܳܟܺܝܠ ܢܳܓܕܺܝܢ ܚ̱ܢܰܢ ܥܠܰܝܢ ܣܪܺܝܩܳܐܺܝܬ ܠܰܘܛܬܳܐ ܘܚܶܪܡܳܐ. ܡܶܛܽܠ ܗܳܠܶܝܢ. ܘܰܐܝܠܶܝܢ ܕܗܳܠܶܝܢ ܕܳܡ̈ܝܳܢ܆ ܕܰܚܺܝܠ ‌ܐ̱ܢܳܐ. ܘܪܳܥܶܠ ‌ܐ̱ܢܳܐ܆ ܕܕܰܠܡܳܐ ܠܗܳܢܽܘܢ ܕܗܳܫܳܐ ܐܶܬܟܬܶܒܘ ܒܡܰܪܥܺܝܬܶܗ ܕܰܡܫܺܝܚܳܐ ܢܣܰܓܶܦ. ܐܶܠܳܐ ܐܳܦ ܚܢܰܢ. ܢܶ݀ܪܢܶܐ܆ ܕܠܳܐ ܚܛܺܝܬܳܐ ܥܦܺܝܦܬܳܐ ܢܶܚܛܶܐ܆ ܗܳܝ ܟܺܝܬ ܕܰܚܢܰܢ ܒܰܢ ܡܰܥܘܠܺܝܢ ܚ̱ܢܰܢ ܘܰܡܣܰܓܦܺܝܢ ܚ̱ܢܰܢ܆ ܘܗܳܝ ܕܠܰܐ̱ܚܪ̈ܳܢܶܐ ܡܣܰܓܦܺܝܢ ܚ̱ܢܰܢ ܡܶܢ ܡܕܰܡܝܳܢܽܘܬܳܐ.

ܐܳܦ ܗܶܢܽܘܢ ܕܶܝܢ. ܗܳܢܽܘܢ ܕܚܰܕܬܳܐܺܝܬ ܥܡܰܕܘ܆ ܕܰܠܡܳܐ ܠܡܰܗܡܝܳܢܽܘܬܰܢ ܕܺܝܠܰܢ܆ ܢܶܣܒܽܘܢܳܗ̇ ܙܘ̈ܳܕܶܐ ܘܥܶܠܬܳܐ ܕܰܚ̈ܛܳܗܶܐ. ܐܶܠܳܐ ܢܳܡܽܘܣܐ ܫܠܺܝܚܳܝܳܐ ܢܡܰܠܽܘܢ܆ ܟܰܕ ܣܳܢܶܝܢ ܡܰܢ ܠܒܺܝܫܬܳܐ܆ ܡܶܬܢܰܩܦܺܝܢ ܕܶܝܢ ܠܛܳܒܬܳܐ^[36]. ܒܗܳܕܶܐ ܓܶܝܪ. ܟܽܠܰܢ ܢܶܬܡܨܶܐ ܠܡܶܫܬܘܳܝܽܘ ܠܡܰܠܟܽܘܬܳܐ ܕܰܫܡܰܝܳܐ. ܠܗܳܝ ܕܬܶܗܘܶܐ. ܕܢܶܫܬܘܶܐ ܟܽܠܰܢ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ ܥܰܡ ܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ. ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܐ ܕܰܐܪܒܥܺܝܢ ܘܰܬܠܬܐ.

ܝܘܚܢܢ. 1: 16 [1]

ܝܘܚܢܢ. 1: 14 [2]

ܝܘܚܢܢ. 1: 14 [3]

ܐܫܥܝܐ. 41: 23 [4]

ܝܘܚܢܢ. 1: 27  [5]

ܝܘܚܢܢ. 1: 16 [6]

ܡܬܝ. 11: 11 [7]

ܣܶܦܪܐ ܕܒܪܝܬܐ. 2: 7 [8]

ܣܶܦܪܐ ܕܒܪܝܬܐ. 2: 23 ـ 24 [9]

ܡܬܝ. 19: 4 ـ 6 [10]

ܝܘܚܢܢ. 20: 22 [11]

ܝܘܚܢܢ. 1: 16 [12]

ܝܘܚܢܢ. 1: 17 [13]

ܐܫܥܝܐ. 8: 20 [14]

ܓܠܛܝ̈ܐ. 3: 10  ܐܦ ܬܶܢܝܳܢ ܢܳܡܽܘܣܐ. 27: 26 [15]

ܝܘܚܢܢ. 7: 38 [16]

ܐܫܥܝܐ. 61: 10 [17]

ܕܰܡ̈ܨܰܐܳܢ؟ ܡܶܢ ܨܳܐܬܳܐ.[18]

ܐܫܥܝܐ. 61: 11 [19]

ܦܝܠܝܦܣ̈ܝܐ. 2: 15 [20]

ܬܘܒ[21]

ܐ. ܬܣܠܘܢܝܩ̈ܝܐ. 5: 5 [22]

ܡܬܝ. 25: 41  ܐܦ [23]

[24] ܨܒܥܐ. ܒܠܶܫܳܢܳܐ ܝܰܘܢܳܝܳܐ. ܡܚܰܝܢܳܐ ܒܰܪ̱ܬ ܩܳܠܐ ܗܳܝ ܕܰܥܡܳܕܳܐ܆ ܠܗܰܘ ܕܨܽܘܒܥܐ.

ܛܝܛܘܣ. 3: 5 [25]

ܡܬܝ. 22: 12 [26]

ܒ. ܩܘܪ̈ܝܢܬܝܐ. 6: 16  ܐܦ ܐ. ܩܘܪ̈ܝܢܬܝܐ. 3: 16 [27]

ܐ. ܩܘܪ̈ܝܢܬܝܐ. 14: 22 [28]

ܦܪܟܣܝܣ. 10: 44  ܐܦ 19: 6 [29]

ܐܦܣ̈ܝܐ. 5: 8 [30]

ܡܙܡܘܪ̈ܐ. 37: 1 [31]

ܐ. ܩܘܪ̈ܝܢܬܝܐ. 14: 16 [32]

ܒ. ܩܘܪ̈ܝܢܬܝܐ. 6: 14 [33]

ܛܘܒܝܛ. 2: 6  ܐܦ ܥܡܘܣ. 8: 10 [34]

ܛܝܛܘܣ. 2: 14  ܐܦ ܡܙܡܘܪ̈ܐ.125: 2 [35]

ܪ̈ܗܘܡܝܐ. 12: 9 [36]