ܡܺܐܡܪܳܐ ܕܰܐܪܒܥܺܝܢ ܘܰܬܪܶܝܢ

ܕܡܰܪܬܝܳܢܽܘܬܳܐ ܕܰܬܪܶܝܢ. ܐܶܬܶܐܡܰܪ ܕܶܝܢ܆ ܒܰܐܪܒܥܳܐ ܒܫܰܒܳܐ ܕܫܰܒܬܳܐ ܪܰܒܬܳܐ.

42: ܟܰܕ ܠܟܶܢܫܳܐ ܗܳܢܳܐ ܪܽܘܚܳܢܳܝܳܐ ܚܳܙܶܐ ܐ̱ܢܳܐ܆ ܘܠܰܙܢܳܐ ܕܫܳܡܽܘ̈ܥܶܐ ܕܠܰܘ ܠܚܽܘܕܳܝ ܐܳܕܫܰܐ ܗ̱ܘ܆ ܐܶܠܳܐ ܡܫܰܚܠܦܳܐ. ܡܶܬܚܰܫܰܒ ܐ̱ܢܳܐ܆ ܡܶܬܦܰܠܰܓ ܐ̱ܢܳܐ ܒܢܰܦܫܝ. ܐܶܢܗܽܘ ܡܰܢ ܓܶܝܪ ܕܰܠܘܳܬ ܡܰܫܡܰܥܬܳܐ ܠܳܐ ܡܫܰܘܬܦܰܬ ܒܐ̱ܪ̈ܳܙܶܐ ܐܶ݀ܚܽܘܪ܆ ܠܰܬܕܳܐ ܒܺܐܝܕܳܐ ܕܺܝܠܝ ܢܳܓܶܕ ܐ̱ܢܳܐ܆ ܘܡܰܘܫܶܛ ܐ̱ܢܳܐ ܠܗܳܢܽܘܢ ܕܰܥܬܺܝܕܺܝܢ ܕܢܶܬܪܰܒܽܘܢ^[1]. ܗܳܢܰܘ ܕܶܝܢ ܡܰܠܦܳܢܽܘܬܳܐ ܗܳܝ ܕܡ̈ܶܠܶܐ ܦܫܺܝ̈ܛܳܬܳܐ ܒܰܕܡܽܘܬ ܚܰܠܒܳܐ ܡܰܫܦܥܳܐ. ܐܶܢ ܕܶܝܢ ܠܘܳܬ ܗܳܢܽܘܢ ܕܡܶܢ ܟܰܕܽܘ ܡܰܐܪܙܺܝܢ ܐܶ݀ܚܽܘܪ܆ ܗܳܢܽܘܢ ܕܝܰܘܡܳܢܳܐ. ܐܶܕܢ̈ܶܐ ܡܙܰܠ̈ܗܙܳܬܳܐ ܘܰܕܡܶܢ ܫܰܢ̱ܬܳܐ ܠܫܰܢ̱ܬܳܐ ܐܰܝܬܺܝܘ ܠܰܢ܆ ܐܳܬܶܐ ܐ̱ܢܳܐ ܕܳܐܦ ܡܶܢ ܗܳܠܶܝܢ ܕܝܰܬܺܝܪ ܚ̈ܠܺܝܡܳܢ ܐܺ݀ܡܰܪ: ܡܶܢ ܗܳܠܶܝܢ ܕܰܐܚܺܝ̈ܕܳܢ^[2] ܚܰܝܠܳܐ ܕܠܰܚܡܳܐ ܘܰܕܬܽܘܪܣܳܝܳܐ ܚܠܺܝܡܳܐ܆ ܗܰܘ ܟܺܝܬ ܕܠܳܚܶܡ ܠܗܳܢܽܘܢ ܕܰܒܩܰܘܡܬܳܐ ܗܳܝ ܪܽܘܚܳܢܳܝܬܳܐ ܪܳܒܶܝܢ ܘܡܶܬܥܰܠܡܺܝܢ.

ܠܡܰܚܣܶܢ ܓܶܝܪ ܟܰܕ ܡܶܕܶܡ ܕܰܐܝܟ ܗܳܟܰܢܳܐ ܢܶܬܶܐܡܰܪ܆ ܢܶܫܟܰܚ ܕܰܦܝܳܣܳܐ ܢܶܥܒܶܕ ܐܶܢܽܘܢ ܠܗܳܢܽܘܢ ܕܗܳܟܰܢܳܐ ܣܺܝܡܺܝܢ^[3]܆ ܕܺܐܝܬܶܝܗ̇ ܕܫܳܘܝܳܐ ܠܡܶܕܶܡ. ܡܶܐܬܺܝܬܰܢ ܕܰܐܟܚܕܳܐ ܘܟܽܘܢܳܫܰܢ ܕܰܠܗܳܪܟܳܐ. ܐܰܝܟܰܢܳܐ ܟܺܝܬ ܕܰܙܥܽܘܪܬܳܐ ܐܰܝܬܶܐ ܠܡܺܐܡܰܪ. ܘܰܒܨܺܝܪܬܳܐ ܢܶܚܫܒܽܘܢܳܗ̇ ܠܗܳܕܶܐ܆ ܘܰܦܫܺܝܩܳܐܺܝܬ ܢܶܒܣܽܘܢ ܘܰܢܫܺܝܛܽܘܢ܆ ܘܗܶܢܽܘܢ ܠܗܽܘܢ ܢܩܰܠܣܽܘܢ܆ ܥܰܠ ܡܰܒܣܝܳܢܽܘܬܳܐ ܘܰܡܒܰܣܪܳܢܽܘܬܳܐ ܕܥܰܠ ܗܳܝ ܕܰܢܩܽܘܡ ܐ̱ܢܳܫ ܘܰܢܨܽܘܬ ܘܢܶܫܡܰܥ ܠܗܳܠܶܝܢ ܐܰ‌ܠܳܗܳܝ̈ܳܬܳܐ. ܘܰܠܗܳܝ ܕܰܠܘܳܬܰܢ ܢܺܐܬܽܘܢ܆ ܡܶܐܬܺܝܬܳܐ ܡܶܕܶܡ ܕܰܒܨܰܕܘܳܐ ܘܕܰܠ̈ܥܰܝܢܶܐ ܒܰܠܚܽܘܕ ܐܺܝܬܶܝܗ̇ ܢܶܣܒܪܽܘܢ.

ܐܶܢ ܕܶܝܢ ܠܘܳܬ ܪܰܘܡܳܐ ܟܺܝܬ ܕܐ̱ܪܳܙܳܐ ܐܰ݀ܘܣܶܦ ܐܶܥܰܠܺܝܘܗ̱ܝ ܩܰܠܺܝܠ ܠܗܰܘܢܳܐ܆ ܗܳܕܶܐ ܓܶܝܪ ܐܺܝܬܶܝܗ̇ ܗܳܝ ܕܩܰܕܺܝܡܳܐ ܣܺܝܡܳܐ ܝܰܘܡܳܢܳܐ ܠܡܰܠܦܳܢܽܘܬܳܐ. ܘܰܠܡܰܡܠܠܳܐ ܕܒܽܘܚܳܢܳܐ܆ ܠܫܽܘܚܠܳܦܗܽܘܢ ܡܳܕܶܝܢ ܕܫܳܡܽܘ̈ܥܶܐ ܠܳܐ ܡܦܰܪܶܫ ܐ̱ܢܳܐ܆ ܬܰܗܺܝܪܳܐ ܡܶܟܺܝܠ ‌ܐܺܝܬܰܝ܆ ܘܰܐܝܟ ܗܰܘ ܕܰܠܒܰܪ ܡܶܢ ܦܰܓܪܳܐ ܗܳܘܶܐ ܐ̱ܢܳܐ܆ ܘܰܠܘܳܬ ܗܳܠܶܝܢ ܕܰܠܥܶܠ ܛܳܐܶܤ ܐ̱ܢܳܐ. ܘܗܳܕܶܐ ܟܰܕ ܠܬܰܚܬ ܒܕܽܘܟ ܒܰܬܥܺܝܫܽܘܬܳܐ ܕܚܰܝ̈ܶܐ ܒܺܝ̈ܫܶܐ ܣܺܝܡ ܐ̱ܢܳܐ܆ ܘܥܰܠ ܕܽܘܟܳܝܳܐ ܣܰܓܺܝܳܐܐ ܥܕܰܟܺܝܠ ܣܢܺܝܩ ܐ̱ܢܳܐ.

ܢܳܬܶܦ ܠܺܝ ܓܶܝܪ ܠܘܳܬܶܗ܆ ܢܽܘܗܪܳܐ ܗܰܘ ܕܰܡܡܰܠܠܽܘܬ ܐܰ‌ܠܳܗܽܘܬܳܐ܆ ܘܫܽܘܦܪܳܐ ܠܳܐ ܡܶܬܕܰܪܟܳܢܳܐ ܕܡܶܢ ܬܰܡܳܢ܆ ܘܡܰܪܘܶܐ ܠܺܝ ܪܰܘܳܝܽܘܬܳܐ ܛܽܘܒܬܳܢܺܝܬܳܐ ܘܢܰܟܦܬܳܐ. ܐܰܝܟܰܢܳܐ ܟܺܝܬ ܕܗܳܠܶܝܢ ܕܡܶܬܰܐܡܪ̈ܳܢ܆ ܠܰܘ ܕܕܺܝܢܳܐ ܕܺܝܠܝ ܢܶܗܘ̈ܝܳܢ ܐܺܝܬܰܝܗܶܝܢ ܬܽܘܒ܆ ܐܶܠܳܐ ܕܡܰܫܒܳܐ ܗܰܘ ܕܡܶܢ ܠܥܶܠ. ܡܶܛܽܠ ܟܺܝܬ ܕܪܽܘܚܳܐ ܐܰܝܟܳܐ ܕܨܳܒܶܐ ܢܳܫܶܒ^[4]܆ ܐܰܝܟܰܢܳܐ ܕܳܐܡܰܪ ܟܬܳܒܳܐ ܗܰܘ ܟܳܗܢܳܝܳܐ.

ܡܳܢܳܐ ܗܳܟܺܝܠ ܙܳܕܶܩ ܠܡܶܣܥܰܪ. ܕܶܐ݀ܩܒܥܺܝܗ̇ ܠܥܰܝܢܳܐ ܒܬܶܐܘܳܪܺܝܳܐ ܕܰܠܥܶܠ܆ ܘܰܕܟܽܠ ܟܽܠܶܗ ܐܶ݀ܫܬܽܘܩ ܡܶܢ ܗܳܠܶܝܢ ܕܰܠܬܰܚܬ܆ ܐܶܠܳܐ ܕܳܚܶܠ ‌ܐ̱ܢܳܐ܆ ܕܕܰܠܡܳܐ ܗܰܘ ܕܡܶܬܬܰܪܬܶܐ ܢܶܥܪܽܘܩ ܠܶܗ ܡܶܢ ܢܰܨܺܝܚܽܘܬܳܗ̇ ܕܡܶܠܬܳܐ܆ ܟܕ ܠܳܐ ܡܣܰܝܒܰܪ ܠܡܶܚܙܳܐ ܠܙܰܗܪܺܝܪ̈ܶܐ ܕܡܶܢ ܗܳܕܶܐ܆ ܘܶܐ݀ܣܬܢܶܩ ܠܺܝ ܐܶܢܳܐ ܥܰܠ ܬܰܚܦܺܝܬܳܐ܆ ܗܳܢܰܘ ܕܶܝܢ ܥܰܠ ܡܶܠܬܳܐ ܕܡܶܫܟܚܳܐ ܠܰܡܟܰܣܳܝܽܘ ܠܪܰܒܽܘܬܗܽܘܢ ܕܣܽܘ̈ܟܳܠܶܐ܆ ܐܰܝܟܰܢܳܐ ܕܡܽܘܫܶܐ ܟܰܕ ܢܚܶܬ ܡܶܢ ܛܽܘܪܳܐ܆ ܘܰܫܒܺܝܚ^[5] ܗ̱ܘܳܐ ܒܦܰܪܨܽܘܦܶܗ ܡܶܢ ܥܶܢܝܳܢܳܐ ܗܰܘ ܕܰܠܘܳܬ ܐܰ‌ܠܳܗܳܐ܆ ܘܠܳܐ ܡܶܬܚܰܙܝܳܢܳܐ^[6] ܐܺܝܬܰܘܗ̱ܝ ܗ̱ܘܳܐ ܠܰܒ̈ܢܰܝ ܐܝܣܪܳܐܶܝܠ܆ ܘܶܐܣܬܢܶܩ ܥܰܠ ܗܳܕܶܐ^[7].

ܡܳܢܳܐ ܕܶܝܢ ܐܰܪܰܐ. 222ܕܢܶܬܬܰܦܢܽܘܗ̱ܝ ܒܰܩܛܺܝܪܳܐ ܠܗܰܘܢܳܐ ܡܶܢ ܪܰܘܡܳܐ ܙܳܕܶܩ܆ ܐܶܠܳܐ ܬܽܘܒ. ܐܶܢ ܗܳܕܶܐ ܢܶܥܒܶܕ܆ ܢܶܗܘܶܐ ܐܺܝܬܰܝܢ. ܕܡܶܢ ܐܰܪܥܳܐ ܩܳܥܶܝܢ ܚ̱ܢܰܢ. ܘܰܕܒܳܐܐܰܪ ܡܡܰܠܠܺܝܢܰܢ^[8]. ܐܰܝܟܰܢܳܐ ܕܠܶܐܫܰܥܝܳܐ ܘܠܰܫܠܺܝܚܳܐ ܡܶܛܽܠ ‌ܐ̱ܢܳܫܺܝ̈ܢ ܐܰܡܺܝܪܳܐ. ܡܳܕܶܝܢ ܐܳܦܠܐ ܒܗܳܝ. ܐܳܦܠܳܐ ܒܗܳܕܶܐ ܢܺܐܙܰܠ܆ ܛܶܟܣܳܐ ܕܶܝܢ ܡܶܕܶܡ ܡܶܨܥܳܝܳܐ ܢܶܪܕܶܐ܆ ܟܰܕ ܒܰܙܒܰܢ ܡܰܢ ܒܟܰܣܝܽܘܬܗܽܘܢ ܕܣܽܘ̈ܟܳܠܶܐ ܓܳܫܦܺܝܢ ܚ̱ܢܰܢ܆ ܒܰܙܒܰܢ ܕܶܝܢ. ܟܰܕ ܡܶܢܶܗ ܕܥܽܘܡܩܳܐ ܟܳܦܢܺܝܢ ܚ̱ܢܰܢ ܘܰܡܫܰܢܶܝܢ ܚ̱ܢܰܢ܆ ܒܪܶܓܠܳܐ ܩܰܠܺܝܠܬܳܐ܆ ܘܰܐܝܟ ܗܰܘ ܕܰܒܚܰܪܬܳܗ̇ ܕܶܐ‌ܠܦܳܐ ܡܶܬܢܰܩܫܺܝܢ ܚ̱ܢܰܢ܆ ܘܰܠܘܳܬ ܐܶܕܢܳܐ ܩܒܺܝܥܰܬ ܚܰܕܬܳܐܺܝܬ ܡܶܬܠܰܚܡܺܝܢܰܢ.

ܐܳܦ ܓܶܝܪ ܗܳܝ ܕܰܒܫܰܦܺܝܪܽܘܬ ܐܽܘܡܳܢܽܘܬܳܐ ܘܚܰܟܺܝܡܳܐܺܝܬ ܢܫܰܚܠܶܦ ܠܒܰܪ̱ܬ ܩܳܠܳܐ܆ ܡܶܢ ܡܰܪܕܽܘܬܳܐ ܫܠܺܝܚܳܝܬܳܐ ܢܳܚܬܳܐ ܠܰܢ. ܗܳܝ ܕܒܳܗ̇ ܦܰܘܠܽܘܤ ܟܰܕ ܠܓܰܠܰܛܳܝ̈ܶܐ ܟܳܬܶܒ ܗ̱ܘܳܐ ܐܳܡܰܪ: ܨܳܒܶܐ ܗ̱ܘܺܝܬ ܕܶܝܢ ܕܶܐ݀ܗܘܶܐ ܩܰܪܺܝܒ ܐܶܢܳܐ ܠܘܳܬܟܽܘܢ ܗܳܫܳܐ܆ ܘܶܐ݀ܫܰܚܠܶܦ ܠܒܰܪ̱ܬ ܩܳܠܳܐ ܕܺܝܠܝ^[9]. ܐܳܦ ܚܰܙܩܝܐܝܠ ܕܶܝܢ ܗܰܘ ܢܒܺܝܳܐ. ܡܰܠܽܘܢ ܕܶܝܢ ܗܰܘ ܕܒܺܐܝܕܰܘ̈ܗ̱ܝ ܡܡܰܠܶܠ ܗ̱ܘܳܐ܆ ܝܰܬܺܝܪ ܐ̱ܪܳܙܳܢܳܐܺܝܬ ܠܳܗ̇ ܠܗܳܕܶܐ ܡܚܰܘܶܐ^[10] ܗ̱ܘܳܐ. ܟܰܕ ܦܳܩܶܕ ܗ̱ܘܳܐ ܠܗܳܢܽܘܢ ܕܰܡܟܰܗܢܺܝܢ܆ ܕܰܠܓܰܘ ܡܶܢ ܒܶܝܬ ܩܽܘܕܫܳܐ. ܢܶܫܠܚܽܘܢܳܗ̇ ܠܶܐܤܛܠܳܐ ܗܳܝ ܟܳܗܢܳܝܬܳܐ܆ ܢܶܠܒܫܽܘܢ ܕܶܝܢ ܠܒܽܘܫܳܐ ܐ̱ܚܪܺܢܳܐ ܠܥܶܠ ܡܶܢ ܠܒܽܘܫܗܽܘܢ ܟܰܕ ܢܳܦܩܺܝܢ ܠܘܳܬ ܥܰܡܳܐ. ܐܳܡܰܪ ܕܶܝܢ ܗܳܟܰܢܳܐ. ܘܢܶܠܒܫܽܘܢ ܡܳܐܢ̈ܶܐ ܐ̱ܚܪ̈ܳܢܶܐ ܐܶܡܰܬܝ ܕܓܳܫܦܺܝܢ ܒܥܰܡܳܐ^[11]. ܘܬܽܘܒ. ܘܶܐܡܰܬܝ ܕܢܳܦܩܺܝܢ ܠܕܳܪܬܳܐ ܗܳܝ ܒܰܪܳܝܬܳܐ ܠܘܳܬ ܥܰܡܳܐ܆ ܢܶܫܠܚܽܘܢ ܐܶܤ̈ܛܠܶܐ ܕܺܝܠܗܽܘܢ ܗܳܠܶܝܢ ܕܰܡܫܰܡܫܺܝܢ ܒܗܶܝܢ܆ ܘܰܢܣܺܝܡܽܘܢ ܐܶܢܶܝܢ ܒܶܐܟܣܳܪ̈ܶܐ^[12] ܗܳܠܶܝܢ ܕܒܶܝܬ ܩܽܘܕܫܳܐ܆ ܘܢܶܠܒܫܽܘܢ ܐܤ̈ܛܠܶܐ ܐ̱ܚܪ̈ܳܢܝܳܬܳܐ܆ ܘܠܳܐ ܢܩܰܕܫܽܘܢܳܝܗ̱ܝ ܠܥܰܡܳܐ ܒܶܐܤ̈ܛܠܶܐ ܕܺܝܠܗܽܘܢ^[13].

ܗܳܠܶܝܢ ܕܶܝܢ ܐܺܡܰܪ: ܠܰܘ ܟܰܕ ܚܳܣܶܡ ܒܶܗ ܒܥܰܡܳܐ ܡܶܛܽܠ ܩܽܘܕܳܫܳܐ܆ ܐܰܝ̇ܕܳܐ ܓܶܝܪ ܡܶܠܬܳܐ ܕܰܚܣܳܡܳܐ ܬܶܗܘܶܐ ܠܘܳܬ ܐܰ‌ܠܳܗܳܐ܆ ܗܰܘ ܕܡܶܛܽܠ ܛܳܒܽܘܬܶܗ ܣܰܓܺܝܐܬܳܐ ܘܰܫܦܺܝܥܬܳܐ܆ ܐܳܦ ܗܳܝ ܕܢܶܗܘܶܐ ܐܺܝܬܰܝܢ. ܐܳܦ ܗܳܝ ܕܫܰܦܺܝܪ ܢܶܗܘܶܐ ܐܺܝܬܰܝܢ ܫܰܟܶܢ ܠܰܢ܆ ܐܶܠܐ. ܐܰܝܟܰܢܳܐ ܕܠܳܐ ܢܰܘܩܰܪ܆ ܒܗܳܝ ܕܰܠܗܰܠ ܡܶܢ ܟܰܝܠܳܐ ܡܰܫܦܰܥ ܠܳܗ̇ ܠܛܳܒܽܘܬܳܐ. ܡܶܛܽܠ ܟܺܝܬ܆ ܕܳܐܦܠܳܐ ܠܙܰܠܺܝܩܳܐ ܟܽܠܶܗ ܕܫܶܡܫܳܐ ܡܶܫܟܚܺܝܢ ܚ̱ܢܰܢ ܠܰܡܩܰܒܳܠܽܘ ܒܥܰܝ̈ܢܰܝܢ. ܘܶܐܢܗܽܘ ܟܺܝܬ ܕܰܠܩܽܘܒܠܶܗ ܬܪܺܝܨܳܐܺܝܬ ܢܩܺܝܡ ܒܳܒ̈ܳܬܰܢ܆ ܘܰܠܟܽܠܶܗ ܢܶܨܒܶܐ ܕܢܶܚܙܶܐ܆ ܘܳܐܦ ܗ̱ܘ̣ ܗܰܘ ܡܳܐ ܕܡܶܫܟܚܺܝܢ ܚ̱ܢܰܢ ܠܡܶܚܙܳܐ ܚܳܣܪܺܝܢ ܚ̱ܢܰܢ. ܘܰܕܗܳܕܶܐ ܒܚܰܘܣܳܢܳܐ ܕܥܰܠ ܢܰܦ̈ܫܳܬܳܐ ܕܺܝܠܰܢ ܥܳܒܶܕ ܠܳܗ̇܆ ܡܛܰܝܰܒܬܳܐ ܐܺܝܬܶܝܗ̇ ܠܡܶܫܡܰܥ܆ ܡܶܢܗܽܘܢ ܕܰܟ̈ܬܳܒܶܐ ܟܳܗ̈ܢܳܝܶܐ ܕܳܐܡܪܺܝܢ. ܘܶܐܡܰܪ ܐܰ‌ܠܳܗܳܐ ܠܘܳܬ ܡܽܘܫܶܐ. ܟܰܕ ܐܳܡܰܪ: ܟܰܕ ܬܚܽܘܬ. ܣܰܗܶܕܳܝܗ̱ܝ ܠܥܰܡܳܐ܆ ܕܕܰܠܡܳܐ ܢܶܬܩܰܪܒܽܘܢ ܠܘܳܬ ܐܰ‌ܠܳܗܳܐ ܠܡܶܬܒܰܩܳܝܽܘ܆ ܘܢܶܦܶܠ ܡܶܢܗܽܘܢ ܣܽܘܓܳܐܐ. ܘܟܳܗ̈ܢܶܐ ܗܳܢܽܘܢ ܕܩܳܪܒܺܝܢ ܠܡܳܪܝܳܐ ܐܰ‌ܠܳܗܳܐ܆ ܢܶܬܩܰܕܫܽܘܢ܆ ܕܕܰܠܡܳܐ ܢܡܺܝܬ ܡܳܪܝܳܐ ܡܶܢܗܽܘܢ^[14].

ܗܳܟܰܢܳܐ ܒܡܰܘܕܥܳܢܽܘܬܳܐ ܕܗܳܠܶܝܢ ܐܰ‌ܠܳܗܳܝ̈ܳܬܳܐ. ܠܰܘ ܠܘܳܬ ܟܽܠܢܳܫ ܒܗܶܝܢ ܟܰܕ ܒܗܶܝܢ ܒܡ̈ܶܠܶܐ ܐܰܘ ܒܣܽܘ̈ܟܳܠܶܐ ܙܳܕܶܩ ܠܡܶܬܚܰܫܳܚܽܘ܆ ܘܳܐܦܠܳܐ ܐܺܝܬܶܝܗ̇ ܙܗܺܝܪܬܳܐ ܠܟܽܠܗܽܘܢ ܗܳܢܽܘܢ ܕܫܳܡܥܺܝܢ܆ ܕܰܥܠܶܝܗ̇ ܟܕ ܥܠܶܝܗ̇ ܕܬܶܐܽܘܪܺܝܰܐ ܢܶܣܩܽܘܢ^[15]. ܐܶܠܳܐ ܕܢܶܕܥܽܘܢ ܬܚܽܘܡܳܐ ܡܰܘܬܪܳܢܳܐ ܕܠܳܐ ܝܺܕܰܥܬܳܐ. ܘܰܕܡܰܕܪܟܳܢܽܘܬܳܐ܆ ܐܰܝܟܰܢܳܐ ܕܶܐܢ ܢܶܗܘܶܐ ܐܺܝܬ ܠܶܗ ܠܟܽܠ ܚܰܕ܆ ܡܶܢ ܡܽܘܫ̈ܚܳܬܳܐ ܕܛܽܘܝܳܒܳܐ ܘܰܕܕܽܘܟܳܝܳܐ. ܡܶܛܽܠ ܗܳܕܶܐ. ܦܰܘܠܽܘܤ ܟܰܕ ܠ̱ܐܢܳܫܺܝ̈ܢ ܟܳܬܶܒ ܗ̱ܘܳܐ. ܐܳܡܰܪ ܗ̱ܘܳܐ. ܐܶܢ ܐ̱ܢܳܫ ܣܳܒܰܪ ܕܰܢܒܺܝܳܐ ܐܺܝܬܰܘܗ̱ܝ ܐܰܘ ܪܽܘܚܳܢܳܝܳܐ܆ ܢܶܫܬܰܘܕܰܥ ܠܗܳܢܶܝܢ ܕܟܳܬܶܒ ܐ̱ܢܳܐ ܠܟܽܘܢ܆ ܕܦܽܘܩ̈ܕܳܢܶܐ ܕܡܳܪܝܳܐ ܐܺܝܬܰܝܗܽܘܢ. ܐܶܢ ܕܶܝܢ ܐ̱ܢܳܫ ܠܳܐ ܝܳܕܰܥ. ܠܳܐ ܢܶܕܰܥ^[16].

ܟܰܕ ܗܳܠܶܝܢ ܗܳܟܺܝܠ. ܗܳܟܰܢܳܐ ܐܶܬܦܰܪ̈ܰܫܶܝܢ܆ ܠܡܶܬܩܰܪܳܒܽܘ ܡܶܬܬܟܶܠ ‌ܐ̱ܢܳܐ ܠܬܶܫܡܶܫܬܳܐ ܕܡܶܠܬܳܐ ܕܗܰܝܡܳܢܽܘܬܳܐ. ܟܰܕ ܗܳܝ ܕܶܐܬܬܟܶܠ ‌ܐܺܝܬ ܠܺܝ. ܡܶܢ ܗܰܘ ܕܝܰܗ̱ܒ ܠܰܢ. ܠܰܘ ܪܽܘܚܳܐ ܕܕܶܚܠܬܳܐ܆ ܐܶܠܳܐ ܪܽܘܚܳܐ ܕܚܰܝܠܳܐ ܘܰܕܚܽܘܒܳܐ ܘܰܕܡܶܬܢܰܟܦܳܢܽܘܬܳܐ^[17]܆ ܐܰܝܟܰܢܳܐ ܕܳܐܡܰܪ ܫܠܺܝܚܳܐ.

ܕܰܢ݀ܗܰܝܡܶܢ ܐܰܫܠܶܡܘ ܠܰܢ. ܗܳܢܽܘܢ ܕܗܶܢܽܘܢ ܩܢܽܘܡܗܽܘܢ ܗܘ̣ܰܘ ܚܰܙܳܝ̈ܶܐ ܘܰܡܫܰܡ̈ܫܳܢܶܐ ܕܡܶܠܬܳܐ^[18]܆ ܘܗܳܢܽܘܢ ܕܰܒܥܶܩ̈ܒܳܬܗܽܘܢ ܕܗܳܢܽܘܢ ܪܰܥܰܘ ܠܥܺܕܬܳܐ ܩܰܬܽܘܠܺܝܩܺܝ ܘܰܫܠܺܝܚܳܝܬܳܐ܆ ܒܰܐܒܳܐ. ܘܒܰܒܪܳܐ. ܘܰܒܪܽܘܚܳܐ ܩܰܕܺܝܫܳܐ܆ ܐ̱ܪܳܙܳܐ ܚܰܕܬܳܐ ܘܥܰܬܺܝܩܳܐ. ܚܰܕܬܳܐ ܡܰܢ܆ ܕܰܒܟܽܠ ܚܰܕ ܝܰܘܡܳܐ ܡܶܣܬܰܟܰܠ ܟܺܝܬ ܘܡܶܬܺܝܕܰܥ܆ ܘܕܰܒܟܽܠ ܙܒܰܢ ܡܶܬܚܰܕܰܬ ܒܰܢ܆ ܒܡܰܕܪ̈ܟܳܢܘܳܬܳܐ ܡܢ̈ܬܝܳܬܳܐ^[19]. ܐܰܝܟܰܢܳܐ ܕܢܶܐܚܽܘܕ ܡܰܢ ܗܰܘ ܡܳܐ ܕܰܐܕܪܶܟܢܰܢ܆ ܒܗܳܝ ܕܶܝܢ ܕܰܕܠܳܐ ܣܽܘܦ ܐܺܝܬܰܘܗ̱ܝ܆ ܣܰܓܺܝ ܝܰܬܺܝܪܳܐܺܝܬ ܢܶܗܘܶܐ ܪܰܚܺܝܩܺܝܢ ܚ̱ܢܰܢ ܬܽܘܒ܆ ܐܰܘ ܟܡܳܐ ܕܰܐܕܪܶܟܢܰܢ ܡܰܣܒܪܺܝܢ ܚ̱ܢܰܢ. ܥܰܬܺܝܩܳܐ ܕܶܝܢ. ܒܗܳܝ ܕܰܩܕܳܡ ܟܽܠ ܥܳܠܡܳܐ ܘܙܰܒܢܳܐ ܐܺܝܬܰܘܗ̱ܝ. ܒܳܗ̇ ܗܳܟܺܝܠ ܒܗܳܕܶܐ. ܐܳܦ ܦܰܘܠܽܘܤ܆ ܕܰܒܓܶܠܝܳܢܳܐ ܕܐ̱ܪܳܙܳܐ ܗܰܘ ܕܰܟܣܶܐ ܗ̱ܘܳܐ ܒܙܰܒ̈ܢܶܐ ܗܳܢܽܘܢ ܕܡܶܢ ܥܳܠܰܡ^[20]܆ ܐܳܡܰܪ ܗ̱ܘܳܐ ܕܡܰܟܪܶܙ܆ ܐܰܝܟ ܡܰܢ ܕܺܐܝܬܰܘܗ̱ܝ ܗ̱ܘܳܐ ܡܰܢ ܡܶܢ ܫܽܘܪܳܝܳܐ܆ ܫܰܬܺܝܩ ܗ̱ܘܳܐ ܕܶܝܢ܆ ܘܰܒܝܰܕ ܗܳܠܶܝܢ ܕܰܠܚܰܪܬܳܐ ܐܶܬܓܠܺܝ܆ ܐܶܬܺܝܕܰܥ ܕܟܰܕ ܐܺܝܬܰܘܗ̱ܝ ܗ̱ܘܳܐ ܡܶܢ ܩܕܺܝܡ܆ ܫܰܬܺܝܩ ܗ̱ܘܳܐ ܘܰܡܟܰܣܰܝ.

ܐܶܡܰܬܝ ܕܶܝܢ ܕܳܐܡܰܪ ܐ̱ܢܳܐ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܐܶܣܬܰܟܰܠ ܠܺܝ ܠܗܳܝ ܚܕܳܐ ܐܽܘܣܺܝܰܐ ܟܺܝܬ ܘܰܐ‌ܠܳܗܽܘܬܳܐ ܕܒܰܬܠܳܬܳܐ ܩܢܽܘ̈ܡܶܐ. ܐܰܒܳܐ ܡܰܢ ܓܶܝܪ܆ ܠܰܘ ܡܶܢ ܡܶܕܶܡ ܐ̱ܚܪܺܝܢ܆ ܐܶܠܐ. ܠܳܐ ܝܺܠܺܝܕܳܐܺܝܬ ܐܺܝܬܰܘܗ̱ܝ ܒܗܳܝ ܕܺܐܝܬܰܘܗ̱ܝ. ܒܪܳܐ ܕܶܝܢ ܟܰܕ ܝܺܠܺܝܕܳܐܺܝܬ ܐܰܨܡܰܚ ܡܶܢ ܐܰܒܳܐ܆ ܐܺܝܬܰܘܗ̱ܝ ܒܟܽܠܙܒܰܢ ܐܳܦ ܗܽܘ. ܠܰܘ ܟܰܕ ܒܙܰܒܢܳܐ ܘܰܠܚܰܪܬܳܐ ܐܶܬܺܝܠܶܕ܆ ܐܶܠܳܐ ܟܰܕ ܒܟܽܠ ܙܒܰܢ ܐܰܟܚܕܳܐ ܐܺܝܬܰܘܗ̱ܝ ܥܰܡ ܐܰܒܳܐ. ܐܶ‌ܠܽܘ ܓܶܝܪ ܐܺܝܬ ܗ̱ܘܳܐ ܙܰܒܢܳܐ܆ ܐܰܘ ܪܦܳܦܳܐ ܡܶܕܶܡ ܙܥܽܘܪܳܐ ܕܟܽܠܶܗ ܥܳܠܡܳܐ. ܐܰܝܟܰܢܳܐ ܕܗܳܟܰܢܳܐ ܐܺܡܰܪ܆ ܗܰܘ ܕܠܳܐ ܐܺܝܬܰܘܗ̱ܝ ܗ̱ܘܳܐ ܒܶܗ ܒܪܳܐ܆ ܒܗܰܘ ܡܶܢ ܟܽܠܦܪܽܘܤ܆ ܘܳܐܦܠܳܐ ܐܰܒܳܐ ܡܳܪܳܢܳܐܺܝܬ ܐܺܝܬܰܘܗ̱ܝ ܗ̱ܘܳܐ ܐܰܒܳܐ܆ ܟܰܕ ܓܠܺܝܙ ܗ̱ܘܳܐ ܡܶܢ ܒܪܳܐ.

ܐܶܢ ܕܶܝܢ ܒܪܳܐ. ܡܶܠܬܳܐ ܐܺܝܬܰܘܗ̱ܝ ܕܰܐܒܳܐ܆ ܐܳܦ ܚܶܟܡܬܳܐ ܐܳܦ ܚܰܝܠܳܐ܆ ܕܰܒܪܺܝܫܳܐ ܓܶܝܪ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ^[21]. ܠܝܽܘܚܰܢܳܢ ܫܳܡܥܺܝܢ ܚ̱ܢܰܢ ܕܡܰܙܥܶܩ܆ ܘܕܰܡܫܺܝܚܳܐ ܚܰܝܠܳܐ ܕܰܐ‌ܠܳܗܳܐ. ܘܚܶܟܡܬܳܐ ܕܰܐ‌ܠܳܗܳܐ^[22]. ܠܦܰܘܠܽܘܤ ܕܡܰܟܪܶܙ܆ ܐܰܝܟܰܢܳܐ ܠܳܐ ܐܺܝܬܶܝܗ̇ ܕܪܽܘܫܥܳܐ܆ ܕܢܶܬܚܰܫܰܒ ܒܰܓܒܽܘ̈ܠܝܶܐ ܐ̱ܢܳܫܳܝ̈ܶܐ ܕܬܰܪܥܺܝܬܳܐ܆ ܐܰܝܟ ܗܰܘ ܕܺܐܝܬ ܗ̱ܘܳܐ ܛܰܘܪܳܐ ܡܶܕܶܡ ܙܰܒܢܳܝܳܐ܆ ܗܰܘ ܕܒܶܗ ܕܰܣܦܺܝܩ ܡܶܢ ܡܶܠܬܳܐ ܘܚܶܟܡܬܳܐ ܘܚܰܝܠܳܐ܆ ܐܺܝܬܰܘܗ̱ܝ ܗ̱ܘܳܐ ܐܰܒܳܐ. ܡܳܕܶܝܢ. ܐܰܒܳܐ ܐܺܝܬܰܘܗ̱ܝ ܒܟܽܠ ܙܒܰܢ܆ ܕܰܒܪܳܐ ܕܰܒܟܽܠܙܒܰܢ ܐܺܝܬܰܘܗ̱ܝ܆ ܘܓܽܘܕܳܦܳܐ ܐܺܝܬܶܝܗ̇. ܗܳܝ ܕܰܐܝܟ ܫܳܢܝܽܘܬܳܐ ܕܰܐܪܺܝܽܘܤ ܢܺܐܡܰܪ܆ ܕܺܐܝܬ ܗ̱ܘܳܐ ܙܒܰܢ܆ ܐܶܡܰܬܝ ܕܠܳܐ ܐܺܝܬܰܘܗ̱ܝ ܗ̱ܘܳܐ ܒܪܳܐ.

ܐܶܢ ܓܶܝܪ ܐܰܝܟ ܡܶܠܬܶܗ ܕܦܰܘܠܽܘܤ܆ ܨܶܡܚܳܐ ܘܝܽܘܩܢܳܐ ܐܺܝܬܰܘܗ̱ܝ܆ ܕܬܶܫܒܽܘܚܬܳܐ ܐܰܒܳܗܳܝܬܳܐ ܘܕܰܩܢܽܘܡܳܐ ܐܰܒܳܗܳܝܳܐ܆ ܘܒܺܐܝܕܰܘ̈ܗ̱ܝ ܠܟܽܠܗܽܘܢ ܥܳܠ̈ܡܶܐ ܥܒܰܕ ܐܰܒܳܐ^[23]܆ ܐܰܝܟܳܐ ܢܶܫܟܚܺܝܘܗ̱ܝ ܠܗܰܘ ܙܒܰܢ^[24] ܕܗܳܢܽܘܢ ܪ̈ܰܫܺܝܥܶܐ܆ ܗܰܘ ܕܒܶܗ ܐܳܡܪܺܝܢ ܕܠܳܐ ܐܺܝܬܰܘܗ̱ܝ ܗ̱ܘܳܐ ܒܪܳܐ܆ ܐܶܢܗܽܘ ܕܥܳܒܽܘܕܳܐ ܕܥܳܠ̈ܡܶܐ ܐܺܝܬܰܘܗ̱ܝ ܒܪܳܐ܆ ܗܳܢܽܘܢ ܕܰܒܗܽܘܢ ܚܒܺܝܫ ܗܰܘ ܐܶܡܰܬܝ܆ ܟܰܕ ܐܺܝܬ ܠܶܗ ܡܫܰܘܕܥܳܢܽܘܬܳܐ ܙܰܒܢܳܝܬܳܐ. ܚܰܣܺܝܪܳܐ ܗܳܟܺܝܠ. ܐܰܘ ܐܰܢ̱ܬܽܘܢ ܐܰܝܟ ܡܶܠܰܬܟܽܘܢ܆ ܕܶܐܢܗܽܘ ܕܒܰܙܒܰܢ ܗܘ̣ܳܐ ܒܪܳܐ܆ ܘܠܰܘ ܒܟܽܠ ܙܒܰܢ ܐܺܝܬܰܘܗ̱ܝ ܗ̱ܘܳܐ܆ ܕܠܰܘ ܡܺܐܠܰܕ ܝܺܠܺܝܕ܆ ܐܶܠܳܐ ܡܶܥܒܰܕ ܥܒܺܝܕ ܡܶܢ ܐܰܒܳܐ. ܗܳܝ ܓܶܝܪ ܕܒܰܐܒܳܐ ܢܺܐܠܕܽܘܢ܆ ܕܺܝܠܳܝܬܳܐ ܐܺܝܬܶܝܗ̇ ܕܦܰܓܪ̈ܶܐ܆ ܗܳܢܽܘܢ ܕܡܶܢ ܡܰܘ̈ܠܳܕܶܐ ܕܕܳܝܒܺܝܢ ܢܳܚܬܺܝܢ܆ ܗܳܢܽܘܢ ܕܗܳܘܶܝܢ ܟܺܝܬ ܐܳܦ ܡܳܝܬܺܝܢ. ܕܰܟܝܳܢܳܐ ܕܶܝܢ ܗܰܘ ܕܠܳܐ ܓܫܽܘܡ. ܘܕܰܠܗܰܠ ܡܶܢ ܟܽܠ܆ ܢܽܘܟܪܳܝܬܳܐ ܐܺܝܬܶܝܗ̇ ܗܳܕܶܐ.

ܟܰܕ ܓܶܝܪ ܗܰܘܢܳܐ ܐܽܘܣܝ̣ܳܝ̣ܳܐ. ܐܺܝܬܰܘܗ̱ܝ ܐܰܒܳܐ ܡܬܽܘܡܳܐܺܝܬ. ܘܠܳܐ ܚܰܫܳܢܳܐܺܝܬ ܡܶܢܳܗ̇ ܕܬܽܘܪܣܳܝܳܐ ܗܳܝ ܕܺܝܠܶܗ ܝܺܠܶܕ ܠܡܶܠܬܳܐ. ܘܰܠܗܳܢܳܐ. ܚܰܝܳܐ ܘܰܩܢܽܘܡܳܝܳܐ܆ ܘܠܰܘ ܕܒܳܐܰܐܪ ܡܶܬܶܐܫܶܕ܆ ܒܰܕܡܽܘܬ ܡܶܠܬܳܐ ܗܳܝ ܕܺܝܠܰܢ. ܡܶܛܽܠ ܗܳܕܶܐ ܓܶܝܪ܆ ܐܳܦ ܝܽܘܩܢܳܐ ܕܰܩܢܽܘܡܶܗ ܕܰܐܒܳܐ ܡܫܰܡܰܗ^[25]. ܐܰܟܙܢܳܐ ܓܶܝܪ ܕܡܶܠܬܳܐ ܗܳܝ ܕܺܝܠܰܢ܆ ܟܰܕ ܡܶܢ ܗܰܘܢܳܐ ܗܰܘ ܕܒܰܢ ܢܳܦܩܳܐ܆ ܡܝܰܩܢܳܐ ܠܚܽܘܫܳܒܳܐ ܗܰܘ ܕܰܒܠܶܒܳܐ܆ ܗܳܟܰܢܳܐ ܟܺܝܬ ܐܳܦ ܡܶܠܬܳܐ ܗܰܘ ܕܰܐ‌ܠܳܗܳܐ܆ ܒܰܕܡܽܘܬ ܝܽܘܩܢܳܐ ܘܛܰܒܥܳܐ ܠܳܐ ܡܫܰܚܠܦܳܐ ܐܺܝܬܰܘܗ̱ܝ܆ ܟܰܕ ܡܚܰܘܶܐ ܗܽܘ ܒܶܗ^[26] ܠܰܐܒܳܐ.

ܡܶܛܽܠ ܗܳܕܶܐ ܓܶܝܪ. ܐܳܦ ܒܶܐܘܰܢܓ̈ܶܠܺܝܰܐ܆ ܟܺܐܢܳܐܺܝܬ ܡܰܙܥܶܩ ܗ̱ܘܳܐ܆ ܗܳܝ ܕܶܐܢܳܐ ܒܰܐܒܳܐ. ܘܰܐܒܳܐ ܒܺܝ^[27]܆ ܘܗܰܘ ܕܰܚܙܳܢܝ ܚܙܳܐ ܠܰܐܒܳܐ. ܗܳܝ ܓܶܝܪ ܕܰܚܙܳܢܝ܆ ܕܰܢܣܰܟܠܰܢܝ ܐܺܝܬܶܝܗ̇. ܠܺܝܕܰܥܬܳܐ ܓܶܝܪ. ܕܗܳܠܶܝܢ ܐܰ‌ܠܳܗܳܝ̈ܳܬܳܐ ܘܰܕܠܳܐ ܓܫܽܘܡ܆ ܒܥܰܝ̈ܢܶܐ ܗܳܠܶܝܢ ܕܬܰܪܥܺܝܬܳܐ ܡܶܬܩܰܪܒܺܝܢܰܢ. ܡܶܛܽܠ ܕܠܰܚܙܳܬܳܐ ܟܺܝܬ ܦܰܓܪܳܢܳܝܬܳܐ܆ ܘܳܐܦ ܐܰܒܳܐ. ܘܳܐܦ ܒܪܳܐ܆ ܒܳܗ̇ ܒܰܕܡܽܘܬܳܐ. ܠܳܐ ܡܶܬܚܰܙܝܳܢܳܐ ܐܺܝܬܰܘܗ̱ܝ܆ ܐܰܝܟ ܗܳܝ: ܕܠܰܐܠܳܗܳܐ ܘܠܳܐ ܐ̱ܢܳܫ ܚܙܳܐ ܡܬܽܘܡ. ܟܰܕ ܗܳܝ. ܝܺܕܰܥܬܳܐ ܐܺܝܬܶܝܗ̇܆ ܕܡܶܠܬܳܐ. ܐܶܬܚܙܺܝ ܠܚܰܪܬܳܐ܆ ܡܶܛܽܠ ܟܺܝܬ ܕܶܐܬܒܰܣܰܪ܆ ܐܶܠܳܐ ܠܰܘ ܒܗܳܝ ܕܡܶܠܬܳܐ ܐܺܝܬܰܘܗ̱ܝ ܗ̱ܘܳܐ. ܐܶܠܳܐ ܒܗܳܝ ܕܡܶܛܽܠܳܬܰܢ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ.

ܗܰܘ ܓܶܝܪ ܕܶܐܡܰܪ; ܕܠܰܐܠܳܗܳܐ܆ ܘܠܳܐ ܐ̱ܢܳܫ ܡܬܽܘܡ ܚܙܳܐ^[28]. ܗܽܘ ܐܶܡܰܪ: ܗܰܘ ܕܺܐܝܬܰܘܗ̱ܝ ܗ̱ܘܳܐ ܡܶܢ ܪܺܝܫܺܝܬܳܐ܆ ܗܰܘ ܕܰܫܡܰܥܢܰܢ܆ ܗܰܘ ܕܰܚܙܰܝܢܰܢ ܒܥܰܝ̈ܢܰܝܢ܆ ܗܰܘ ܕܰܚܙܰܝܢܰܢ ܘܒܺܐܝ̈ܕܰܝܳܐ ܕܺܝܠܰܢ ܓܰܫܶܢܳܝ̈ܗ̱ܝ܆ ܡܶܛܽܠ ܡܶܠܬܳܐ ܕܚܰܝ̈ܶܐ^[29]. ܐܰܝܟܰܢܳܐ ܟܺܝܬ ܕܡܳܕܶܝܢ. ܗܽܘ ܡܶܠܬܳܐ܆ ܗܽܘ ܟܰܕ ܗܽܘ ܐܺܝܬܰܘܗ̱ܝ ܐܳܦ ܡܶܬܚܰܙܝܳܢܳܐ ܐܳܦ ܠܳܐ ܡܶܬܚܰܙܝܳܢܳܐ ܟܰܕ ܒܗܳܝ ܡܰܢ ܕܺܐܝܬܰܘܗ̱ܝ ܡܶܣܬܰܟܰܠ܆ ܒܗܳܝ ܕܶܝܢ ܕܰܗܘ̣ܳܐ܆ ܡܶܬܚܙܶܐ.

ܐܶܢܕܶܝܢ ܡܶܢ ܪܺܝܫܺܝܬܳܐ ܐܺܝܬܰܘܗ̱ܝ ܗ̱ܘܳܐ܆ ܘܰܐ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ܆ ܘܰܠܘܳܬ ܐܰ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ^[30]. ܝܺܕܺܝܥܳܐ ܕܡܺܐܠܰܕ ܝܺܠܺܝܕ ܡܳܕܶܝܢ܆ ܘܠܰܘ ܡܶܒܪܳܐ ܒܪܶܐ. ܐܰܘ ܥܒܺܝܕ܆ ܐܰܝܟ ܫܳܛܽܘܪ̈ܘܳܬܳܐ ܗܳܠܶܝܢ ܕܰܐܪܺܝܽܘܤ. ܗܰܘ ܓܶܝܪ ܕܡܶܢ ܪܺܝܫܺܝܬܳܐ ܐܺܝܬܰܘܗ̱ܝ ܗ̱ܘܳܐ܆ ܐܰܝܟܰܢܳܐ ܟܺܝܬ ܢܶܬܥܒܶܕ ܒܰܙܒܰܢ. ܕܗܳܝ ܓܶܝܪ ܕܺܐܝܬܰܘܗ̱ܝ ܘܰܕܗܳܝ ܕܢܶܬܥܒܶܕ܆ ܣܰܓܝܳܐܐ ܐܺܝܬܰܘܗ̱ܝ ܫܽܘܚܠܳܦܳܐ. ܗܰܘ ܡܳܐ ܓܶܝܪ ܕܶܐܬܥܒܶܕ܆ ܫܽܘܪܳܝܳܐ ܙܰܒܢܳܐ ܡܶܬܟܬܶܒ ܥܠܰܘܗ̱ܝ. ܒܛܰܘܪܳܐ ܓܶܝܪ ܡܶܕܶܡ܆ ܐܰܘ ܕܥܳܠܡܳܐ ܐܰܘ ܕܙܰܒܢܳܐ ܡܶܢ ܟܽܠ ܦܪܽܘܤ ܥܒܺܝܕ܆ ܗܰܘ ܕܒܶܗ ܡܶܢ ܩܕܳܡ ܕܢܶܬܥܒܶܕ܆ ܡܶܣܬܰܝܰܟ. ܗܰܘ ܕܶܝܢ ܕܺܐܝܬܰܘܗ̱ܝ܆ ܡܶܢ ܟܽܠܳܗ̇ ܦܰܢܛܰܣܺܝܰܐ ܕܡܶܣܬܰܝܟܳܢܽܘܬܳܐ ܕܕܰܐܝܟ ܗܳܕܶܐ ܥܳܪܶܩ.

ܐܰܟܙܢܳܐ ܓܶܝܪ ܕܗܳܝ ܕܺܐܝܬܰܘܗ̱ܝ ܗ̱ܘܳܐ܆ ܥܰܠ ‌ܐܰܒܳܐ. ܕܠܳܐ ܣܳܟܳܐ ܐܺܝܬܶܝܗ̇ ܘܠܳܐ ܡܶܬܬܰܚܡܳܢܺܝܬܳܐ܆ ܬܶܬܡܨܶܐ ܓܶܝܪ. ܘܠܳܐ ܟܽܠ ܟܽܠܶܗ ܠܡܶܫܟܳܚܽܘ܆ ܐܶܡܰܬܝ ܕܠܳܐ ܐܺܝܬܰܘܗ̱ܝ ܗ̱ܘܳܐ܆ ܗܳܟܰܢܳܐ ܐܳܦ ܥܰܠ ܒܪܳܐ܆ ܟܰܕ ܗܳܝ ܕܺܐܝܬܰܘܗ̱ܝ ܗ̱ܘܳܐ ܫܰܘܝܳܐܺܝܬ ܣܺܝܡܳܐ ܥܠܰܘܗ̱ܝ܆ ܠܳܐ ܡܬܽܘܡ ܬܶܫܟܰܚ ܬܶܦܪܰܚ ܘܬܶܥܒܪܺܝܗ̇܆ ܒܙܰܘ̈ܥܶܐ ܚܰܪ̈ܺܝܦܶܐ ܘܩܰܠܺܝ̈ܠܶܐ ܕܬܰܪܥܺܝܬܳܐ. ܐܰ‌ܠܳܗܳܐ ܓܶܝܪ ܐܺܝܬܰܘܗ̱ܝ ܗ̱ܘܳܐ܆ ܘܰܠܘܳܬ ܐܰ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ.

ܡܶܢ ܗܳܪܟܳܐ܆ ܐܳܦ ܕܽܘܓܡܰܐ ܗܰܘ ܒܺܝܫܳܐ ܘܰܕܠܳܐ ܐܰ‌ܠܳܗ ܕܣܰܐܒܝܠܝܘܤ ܗܰܘ ܠܺܝܒܳܝܳܐ ܡܶܫܬܪܶܐ܆ ܕܕܰܐܒܳܐ ܘܕܰܒܪܳܐ ܚܰܕ ܩܢܽܘܡܳܐ ܐܳܡܰܪ ܗ̱ܘܳܐ܆ ܘܠܰܬܪ̈ܰܝܗܽܘܢ ܚܳܒܶܟ ܗ̱ܘܳܐ ܐܰܟܚܕܳܐ ܘܒܳܐܶܠ ܗ̱ܘܳܐ܆ ܐܰܝܟܰܢܳܐ ܟܺܝܬ ܕܗܽܘ ܟܰܕ ܗܽܘ ܐܰܒܳܐ ܘܰܒܪܳܐ܆ ܐܳܦ ܪܽܘܚܳܐ ܬܽܘܒ ܩܰܕܺܝܫܳܐ ܢܶܫܬܰܡܰܗ܆ ܘܒܰܩܪ̈ܳܝܳܬܳܐ ܣܪ̈ܺܝܩܳܬܳܐ ܬܶܨܛܰܒܰܬ^[31]܆ ܡܰܠܽܘܢ ܬܠܺܝܬܳܝܽܘܬܳܐ ܘܠܰܘ ܬܶܫܬܰܒܰܚ. ܐܶܢ ܓܶܝܪ ܐܰ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ ܒܪܳܐ܆ ܘܰܠܘܳܬ ܐܰ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ܆ ܐܰܝܟ ܐ̱ܚܪܺܢܳܐ ܠܘܳܬ ܐ̱ܚܪܺܢܳܐ ܐܺܝܬܰܘܗ̱ܝ ܗ̱ܘܳܐ. ܐܰܝܟܰܢܐ ܟܺܝܬ ܕܡܳܕܶܝܢ܆ ܢܶܗܘܽܘܢ ܡܰܢ ܦܪܺܝܫܺܝܢ ܒܰܠܚܽܘܕ ܒܰܩܢܽܘܡܳܐ. ܒܗܳܝ܆ ܕܗܰܘ ܡܰܢ ܐܰܒܳܐ ܐܺܝܬܰܘܗ̱ܝ. ܗܰܘ ܕܶܝܢ ܒܪܳܐ܆ ܢܶܗܘܽܘܢ ܕܶܝܢ ܢܰܩܺܝܦܺܝܢ ܒܰܐܠܳܗܽܘܬܳܐ܆ ܘܰܒܗܳܝ ܕܗܺܝ ܟܰܕ ܗܺܝ ܕܽܐܘܣܺܝܰܐ. ܐܰܟܙܢܳܐ ܓܶܝܪ ܕܰܐ‌ܠܳܗܳܐ ܐܺܝܬܰܘܗ̱ܝ ܐܰܒܳܐ܆ ܗܳܟܰܢܳܐ ܐܰ‌ܠܳܗܳܐ ܐܺܝܬܰܘܗ̱ܝ ܒܪܳܐ. ܘܰܐܟܙܢܳܐ. ܕܺܐܝܬܰܘܗ̱ܝ ܗ̱ܘܳܐ ܐܰܒܳܐ܆ ܗܳܟܰܢܳܐ ܐܺܝܬܰܘܗ̱ܝ ܗ̱ܘܳܐ ܒܪܳܐ. ܠܗܳܢܽܘܢ ܕܶܝܢ ܕܓܰܘܳܢܳܝܬܳܐ ܗܝ ܐܰ‌ܠܳܗܽܘܬܳܐ܆ ܘܫܰܘܝܳܐ ܗܳܝ ܕܺܐܝܬܰܘܗ̱ܝ܆ ܕܗܳܠܶܝܢ. ܘܳܐܦ ܐܽܘܣܺܝܰܐ ܚܕܳܐ ܐܺܝܬܶܝܗ̇. ܡܶܢ ܗܳܝ ܓܶܝܪ ܕܺܐܝܬܰܘܗ̱ܝ܆ ܐܰܬܺܝ ܗܽܘ ܫܡܳܐ ܕܽܐܘܣܺܝܰܐ ܘܡܶܬܶܐܡܰܪ.

ܡܶܛܽܠܗܳܕܶܐ. ܐܳܦ ܠܪܽܘܚܳܐ ܩܰܕܺܝܫܳܐ܆ ܕܰܫܘܶܐ ܒܽܐܘܣܺܝܰܐ ܐܺܝܬܰܘܗ̱ܝ ܐܳܡܪܺܝܢܢ ܠܰܐܒܳܐ ܘܠܰܒܪܳܐ. ܠܳܐ ܓܶܝܪ ܒܪܶܐ܆ ܘܳܐܦܠܳܐ ܬܽܘܒ ܥܰܡ ܥܒ̈ܳܕܶܐ ܐܰܟܚܕܳܐ ܡܢܶܐ. ܪܽܘܚܳܐ ܓܶܝܪ ܐܺܝܬܰܘܗ̱ܝ ܕܰܫܪܳܪܳܐ܆ ܗܰܘ ܕܡܶܢ ܐܰܒܳܐ ܢܳܦܶܩ^[32]. ܐܰܝܟܰܢܳܐ ܕܶܝܢ ܥܬܺܝܕ ܗ̱ܘܳܐ܆ ܕܡܶܕܶܡ ܐܰܟܣܢܳܝܳܐ ܘܠܰܘ ܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܕܰܐܒܳܐ ܢܶܦܽܘܩ. ܘܰܚܙܺܝ ܠܺܝ ܠܚܰܝܠܳܗ̇ ܕܠܶܟܣܺܝܤ. ܗܳܝ ܓܶܝܪ ܕܢܳܦܶܩ܆ ܐܰܝܟ ܕܰܠܡܺܐܡܰܪ ܡܰܘܕܥܳܐ܆ ܠܡܰܦܰܩܬܶܗ ܬܡܺܝܗܬܳܐ ܕܪܽܘܚܳܐ܆ ܕܒܰܕܡܽܘܬ ܚܺܐܦܳܐ ܕܢܰܗܪܳܐ ܕܣܰܓܺܝ ܪܰܒ܆ ܕܡܶܢ ܡܥܺܝܢܳܐ ܡܶܕܶܡ ܥܰܬܺܝܪܬܳܐ ܘܰܐܡܺܝܢܰܬ ܪܶܕܝܳܐ ܢܳܦܶܩ ܘܪܳܕܶܐ. ܕܢܰܗܪܳܐ ܕܶܝܢ܆ ܕܺܝܠܳܗ̇ ܟܕ ܕܺܝܠܳܗ̇ ܕܽܐܘܣܺܝܰܐ ܐܺܝܬܰܘܗ̱ܝ ܫܰܘܝܳܐܺܝܬ ܠܰܡܥܺܝܢܳܐ܆ ܐܰܝܟܰܢܳܐ ܠܰܘ ܟܺܐܢܳܐܺܝܬ ܢܺܐܡܰܪ ܐ̱ܢܳܫ. ܐܶܠܳܐ ܡܳܢܳܐ ܐܶ݀ܚܰܫ܆222 ܕܰܠܣܽܘ̈ܟܳܠܶܐ ܕܡܶܛܽܠ ‌ܐܰ‌ܠܳܗܳܐ܆ ܘܰܠܗܳܠܶܝܢ܆ ܟܰܕ ܣܰܓܺܝ ܥܰܡܽܘܛܳܐܺܝܬ ܐܶܬܰܘ ܠܘܳܬܰܢ܆ ܘܗܳܢܳܐ ܟܽܠܶܗ ܒܰܠܚܽܘܕ ܟܡܳܐ ܕܢܶܬܦܰܢܛܰܤ ܗܰܘܢܳܐ ܕܺܝܠܰܢ܆ ܒܝܽܘܩ̈ܢܶܐ ܫܺܝ̈ܛܶܐ ܘܰܡܚܺܝ̈ܠܶܐ܆ ܘܰܒܡܶܣܟܺܢܽܘܬܳܐ ܕܰܫܡܳܗ̈ܶܐ ܕܰܠܘܳܬܰܢ܆ ܡܢܰܣܶܐ ܐ̱ܢܳܐ ܕܶܐ݀ܡܰܠܶܠ.

ܕܰܚܺܝܠ ‌ܐ̱ܢܳܐ ܓܶܝܪ܆ ܕܕܰܠܡܳܐ ܐ̱ܢܳܫ ܒܕܽܘܟ ܡܶܢ ܗܳܢܽܘܢ ܕܨܳܝܬܺܝܢ܆ ܟܰܕ ܡܥܺܝܢܳܐ ܫܳܡܰܥ ܘܢܰܗܪܳܐ܆ ܪܶܕܝܳܐ ܡܶܕܶܡ ܢܶܣܒܰܪ܆ ܡܶܛܽܠ ‌ܐܽܘܣܺܝܰܐ ܗܳܝ ܕܩܳܝܡܳܐ ܘܕܰܒܟܽܠܙܒܰܢ ܗܽܘ ܗܳܟܘܳܬ ܐܺܝܬ ܠܳܗ̇ ܘܰܩܒܺܝܥܳܐܺܝܬ܆ ܗܳܝ ܕܺܐܝܬܶܝܗ̇܆ ܕܺܐܝܬܶܝܗ̇ ܘܰܕܠܳܐ ܡܶܬܬܙܺܝܥܳܐ ܐܰܘ ܡܫܰܢܝܳܐ ܡܶܢ ܩܰܘܡܳܐ ܘܰܩܒܺܝܥܽܘܬܳܐ ܕܺܝܠܳܗ̇. ܡܥܺܝܢܳܐ ܓܶܝܪ. ܘܢܰܗܪܳܐ܆ ܐܳܦܶܢ ܗܺܝ ܟܰܕ ܗܺܝ ܐܺܝܬܰܘܗ̱ܝ ܒܽܐܘܣܺܝܰܐ܆ ܐܶܠܳܐ ܟܺܝܬ ܐܳܦ ܒܚܰܝܠܳܐ. ܚܰܕ ܡܶܕܶܡ ܐܺܝܬܰܘܗ̱ܝ܆ ܟܰܕ ܒܗܳܝ ܒܰܠܚܽܘܕ ܕܰܡܗܰܠܶܟ ܘܪܳܕܶܐ܆ ܠܘܳܬ ܗܳܝ ܕܰܐ̱ܚܪܺܢܳܐ ܘܰܐ̱ܚܪܺܢܳܐ ܢܶܣܬܒܰܪ ܕܺܐܝܬܰܘܗ̱ܝ ܡܶܣܬܰܟܰܡ. ܗܳܝ ܟܺܝܬ ܕܠܳܐ ܐ̱ܢܳܫ ܡܶܢ ܗܳܢܽܘܢ ܕܺܐܝܬ ܠܗܽܘܢ ܗܰܘܢܳܐ܆ ܡܶܬܚܰܫܰܒ ܠܳܗ̇ ܕܺܐܝܬܶܝܗ̇܆ ܥܰܠ ‌ܐܽܘܣܺܝܰܐ ܗܳܝ ܐܰ‌ܠܳܗܳܝܬܳܐ.

ܐܳܦ ܓܶܝܪ ܘܠܳܐ ܣܳܟ ܥܳܒܰܪ ܡܶܬܶܐܫܶܕ ܩܢܽܘܡܳܐ ܗܰܘ ܕܰܐܒܳܐ܆ ܠܘܳܬ ܗܰܘ ܕܪܽܘܚܳܐ. ܐܶܠܳܐ ܒܰܟܝܳܢܳܐ ܡܰܢ܆ ܠܳܐ ܒܨܺܝܪܳܐܺܝܬ ܕܶܝܢ܆ ܢܳܦܶܩ ܡܶܢܶܗ ܪܽܘܚܳܐ ܩܰܕܺܝܫܳܐ. ܟܰܕ ܡܶܫܬܰܘܬܰܦ ܡܰܢ. ܒܳܗ̇ ܟܰܕ ܒܳܗ̇ ܒܽܐܘܣܺܝܰܐ܆ ܐܺܝܬܰܘܗ̱ܝ ܕܶܝܢ ܒܰܩܢܽܘܡܳܐ ܕܺܝܠܳܢܳܝܳܐ ܕܺܝܠܶܗ. ܐܰ‌ܠܳܗܳܐ ܓܶܝܪ ܐܺܝܬܰܘܗ̱ܝ. ܐܳܦ ܗܽܘ ܪܽܘܚܳܐ ܩܰܕܺܝܫܳܐ. ܘܗܳܕܶܐ ܒܕܽܘܟ̈ܝܳܬܳܐ ܣܰܓܺܝ̈ܳܐܬܳܐ ܕܰܟ̈ܬܳܒܶܐ ܐܰ‌ܠܳܗܳܝ̈ܶܐ ܐܰܡܺܝܪ^[33]: ܘܩܰܪܺܝܒܬܳܐ ܐܺܝܬܶܝܗ̇ ܕܣܳܗܕܽܘܬܳܐ ܓܠܺܝܬܳܐ ܢܶܣܰܒ܆ ܐܰܝܟ ܕܡܶܢܗܽܘܢ ܕܡܰܥ̈ܠܳܢܶܐ ܕܰܩܕܳܡ ܬܰܪ̈ܥܶܐ ܕܺܝܠܗܶܝܢ ܕܰܟ̈ܬܺܝܒܳܬܳܐ ܟܳܗ̈ܢܳܝܳܬܳܐ܆ ܐܰܝܟܰܢܳܐ ܕܠܳܐ ܡܶܠܬܳܐ ܐܰܪܺܝܟܬܳܐ ܢܶܡܬܽܘܚ.

ܒܰܒܪܺܝܬܳܐ ܓܶܝܪ ܟܬܰܒ ܡܽܘܫܶܐ܆ ܗܳܢܰܐ ܗ̄ܘ ܓܶܝܪ ܗܰܘ ܩܰܕܡܳܝܳܐ ܕܰܣܝܳܡ̈ܶܐ ܕܺܝܠܶܗ܆ ܕܟܰܕ ܥܬܺܝܕ ܗ̱ܘܳܐ ܝܰܘܣܶܦ ܠܡܶܦܫܰܪ ܠܚܶܠܡܳܐ ܗܰܘ ܕܦܶܪܥܽܘܢ ܐܶܡܰܪ: ܕܒܶܠܥܳܕ ܡܶܢ ܐܰ‌ܠܳܗܳܐ. ܠܳܐ ܡܶܬܦܰܢܶܐ ܦܶܬܓܳܡܳܐ ܕܦܽܘܪܩܳܢܳܐ ܠܦܶܪܥܽܘܢ^[34]܆ ܟܰܕ ܠܰܐܠܳܗܳܐ ܥܳܒܶܕ ܗ̱ܘܳܐ ܪܺܝܫܳܐ ܘܰܡܕܰܒܪܳܢܳܐ ܕܦܽܘܫܳܩܳܐ܆ ܗܰܘ ܕܝܳܕܰܥ ܓܰܠܝܳܐܺܝܬ ܠܗܳܠܶܝܢ ܕܟܰܣ̈ܝܳܢ. ܘܡܶܛܽܠ ܟܺܝܬ ܕܰܫܕܳܝܗ̱ܝ ܠܪܶܡܙܳܐ ܕܟܰܣܝܽܘܬܶܗ ܕܚܶܠܡܳܐ܆ ܠܘܳܬ ܒ̈ܢܰܝ ܒܰܝܬܳܐ ܕܺܝܠܶܗ ܐܶܡܰܪ ܗ̱ܘܳܐ ܦܶܪܥܽܘܢ܆ ܟܰܕ ܐܶܬܕܰܡܰܪ ܗ̱ܘܳܐ ܒܡܰܥܒܕܳܢܽܘܬܳܐ ܐܰ‌ܠܳܗܳܝܬܳܐ ܗܳܝ ܕܰܒܙܰܕܺܝܩܳܐ܆ ܕܕܰܠܡܳܐ ܢܶܫܟܰܚ ܓܰܒܪܳܐ ܕܰܐܝܟ ܗܳܢܳܐ܆ ܗܰܘ ܕܺܐܝܬ ܠܶܗ ܒܶܗ ܪܽܘܚܳܐ ܕܰܐ‌ܠܳܗܳܐ^[35].

ܚܳܙܶܐ ܐܰܢ̱ܬ܆ ܐܰܝܟܰܢܳܐ ܓܠܺܝܬܳܐ ܐܺܝܬܶܝܗ̇ ܗܳܝ ܣܳܗܕܽܘܬܳܐ܆ ܠܗܰܘ ܓܶܝܪ ܕܶܐܡܰܪ ܝܰܘܣܶܦ܆ ܐܰ‌ܠܳܗܳܐ ܕܰܥܬܺܝܕ ܕܰܢܦܰܢܶܐ ܦܶܬܓܳܡܳܐ ܕܦܽܘܪܩܳܢܳܐ ܠܦܶܪܥܽܘܢ܆ ܠܗܳܢܳܐ. ܗܰܘ ܕܶܐܫܬܘܺܝ ܠܦܽܘܢܳܝ ܦܶܬܓܳܡܳܐ܆ ܪܽܘܚܳܐ ܕܰܐ‌ܠܳܗܳܐ ܟܰܢ̣ܝܶܗ. ܐܰܪܰܐ ܗܳܟܺܝܠ. ܡܳܕܶܝܢ܆ ܐܰ‌ܠܳܗܳܐ ܐܺܝܬܰܘܗ̱ܝ ܪܽܘܚܳܐ ܩܰܕܺܝܫܳܐ. ܐܶܠܳܐ ܐܳܦ ܥܳܒܽܘܕܳܐ. ܫܰܘܝܳܐܺܝܬ ܠܰܐܒܳܐ ܘܠܰܒܪܳܐ܆ ܘܝܳܗܽܘܒܳܐ ܕܚܶܟܡܬܳܐ ܘܰܕܣܽܘܟܳܠܳܐ.

ܟܬܺܝܒ ܓܶܝܪ ܐܶ‌ܠܝܗܘ. ܒܬܰܫܥܺܝܬܳܐ ܗܳܝ ܕܥܰܠ ‌ܐܺܝܘܒ. ܕܳܐܡܰܪ: ܪܽܘܚܳܐ ܕܰܐ‌ܠܳܗܳܐ ܗܳܝ ܕܰܥܒܰܕܬܰܢܝ. ܢܶܫܡܬܳܐ ܕܰܐܚܺܝܕ ܟܽܠ ܗܳܝ ܕܡܰܠܦܳܐ ܠܺܝ^[36]. ܠܳܐ ܐ̱ܢܳܫ ܗܳܟܺܝܠ܆ ܡܶܛܽܠ ܗܳܝ ܕܰܒܓܶܢܣܳܐ ܗܰܘ ܕܡܶܬܩܪܶܐ ܘܕܐܛܐܪܘܤ ܕܠܳܐ ܕܶܟܪܳܢܳܝܳܐ ܘܠܳܐ ܢܶܩܒܬܳܢܳܝܳܐ ܐܶܫܬܰܡܰܗ ܗܽܘ ܪܽܘܚܳܐ܆ ܢܙܰܥܪܺܝܗ̇ ܠܰܐܠܳܗܽܘܬܶܗ ܕܗܳܢܳܐ. ܐܳܦ ܓܶܝܪ ܐܳܦ ܠܶܗ ܠܰܐܒܳܐ. ܡܰܠܽܘܢ ܕܶܝܢ ܠܳܗ̇ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܕܪܽܘܚܳܐ ܐܶܫܬܰܡܗܰܬ ܡܶܫܟܚܺܝܢܰܢ ܠܳܗ̇. ܐܰܡܺܝܪ ܓܶܝܪ ܒܶܐܘܰܢܓ̈ܠܝܰܐ. ܗܳܟܰܢܳܐ. ܪܽܘܚܐ^[37] ܗ̄ܘ ܐܰ‌ܠܳܗܳܐ ܘܰܐܝܠܶܝܢ ܕܣܳܓܕܺܝܢ ܠܶܗ܆ ܒܪܽܘܚܳܐ. ܘܒܰܫܪܳܪܳܐ ܘܠܳܐ ܕܢܶܣܓܕܽܘܢ^[38].

ܐܺܝܬ ܠܳܟ ܗܳܟܺܝܠ܆ ܬܠܺܝܬܳܝܽܘܬܳܐ܆ ܫܡܳܐ ܗܰܘ ܣܓܺܝܕܳܐ ܘܰܡܝܰܩܪܳܐ܆ ܟܳܪܽܘܙܽܘܬܳܐ ܗܳܝ ܕܫܰܦܺܝܪܽܘܬ ܕܶܚܠܬܳܐ܆ ܫܽܘܘܕܳܥܳܐ ܗܰܘ ܕܗܰܝܡܳܢܽܘܬܳܐ. ܐܰ‌ܠܳܗܽܘܬܳܐ ܚܕܳܐ ܒܰܬܠܳܬܳܐ ܩܢܽܘ̈ܡܶܐ. ܐܰܝܟܰܢܳܐ ܟܺܝܬ ܕܗܳܝ ܕܚܰܕ ܘܗܺܝ ܟܰܕ ܗܺܝ ܕܽܐܘܣܺܝܰܐ܆ ܒܰܐܠܳܗܽܘܬܳܐ ܐܺܝܬܶܝܗ̇. ܐܳܦ ܓܶܝܪ ܠܰܘ ܐ̱ܚܪܺܢܳܐܺܝܬ ܐܺܝܬܰܘܗ̱ܝ ܒܪܳܐ ܐܰ‌ܠܳܗܳܐ܆ ܐܶܠܳܐ ܐܶܢ ܐܰܝܟܰܢܳܐ ܕܳܐܦ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܡܝܰܩ̈ܢܳܢܝܳܬܳܐ ܕܶܝܢ ܕܰܬܠܳܬܰܝ̈ܗܽܘܢ ܩܢܽܘ̈ܡܶܐ܆ ܕܰܐܒܳܐ ܡܰܢ ܐܺܝܬܶܝܗ̇܆ ܠܳܐ ܝܺܠܺܝܕܽܘܬܳܐ. ܘܗܳܝ ܕܠܳܐ ܐܺܝܬܰܘܗ̱ܝ ܡܶܢ ܡܶܕܶܡ ܐ̱ܚܪܺܝܢ. ܕܰܒܪܳܐ ܕܶܝܢ܆ ܝܺܠܺܝܕܽܘܬܳܐ ܗܳܝ ܕܡܶܢ ܐܰܒܳܐ. ܘܪܽܘܚܳܐ ܕܶܝܢ܆ ܢܳܦܽܘܩܽܘܬܳܐ. ܐܶܠܳܐ ܠܳܐ ܙܳܕܶܩ ܠܰܡܥܰܩܳܒܽܘܬܳܗ̇ ܠܺܝܠܺܝܕܽܘܬܳܐ܆ ܐܰܝܟܰܢܳܐ ܕܠܳܐ ܙܳܕܶܩ ܠܡܶܒܨܳܐ ܘܠܰܡܥܰܩܳܒܽܘ܆ ܕܡܳܢܳܐ ܐܺܝܬܶܝܗ̇ ܢܳܦܽܘܩܽܘܬܳܐ.

ܪܰܒܬܳܐ ܗܝ ܠܰܢ ܓܶܝܪ܆ ܗܳܝ ܒܰܠܚܽܘܕ ܕܢܺܐܠܰܦ܆ ܕܺܝܠܺܝܕ ܡܰܢ ܒܪܳܐ܆ ܢܰܦܺܝܩ ܕܶܝܢ ܪܽܘܚܳܐ ܩܰܕܺܝܫܳܐ܆ ܐܰܝܟܰܢܳܐ ܕܠܳܐ ܒܠܺܝܠܳܐ ܘܢܰܗܺܝܪܳܐ ܢܶܗܘܶܐ ܐܺܝܬ ܠܰܢ ܫܽܘܘܕܳܥܳܐ ܕܰܩܢܽܘ̈ܡܶܐ܆ ܟܰܕ ܠܰܬܠܺܝܬܳܝܽܘܬܳܐ ܗܳܝ ܕܕܺܝܠܳܝ̈ܳܬܳܐ ܠܳܐ ܒܳܠܶܝܢ ܚ̱ܢܢ܆ ܒܗܰܘ ܚܰܕ 222ܘܓܰܘܳܢܳܝܳܐ ܕܰܐ‌ܠܳܗܽܘܬܳܐ. ܗܳܝ ܕܶܝܢ ܕܰܐܝܟܰܢܳܐ܆ ܠܠܳܐ ܝܺܠܺܝܕܳܐ. ܘܰܠܗܰܘ ܕܶܐܬܺܝܠܶܕ ܘܰܠܗܰܘ ܕܰܢܦܰܩ܆ ܢܶܫܒܽܘܩ ܠܡܶܕܰܥ. ܐܶ‌ܠܽܘ ܓܶܝܪ ܐܺܝܬܰܘܗ̱ܝ ܗ̱ܘܳܐ ܠܰܢ ܡܶܬܕܰܪܟܳܢܳܐ. ܗܽܘ ܙܢܳܐ ܕܺܝܠܺܝܕܽܘܬܳܐ ܐܰܘ ܕܢܳܦܽܘܩܽܘܬܳܐ܆ ܠܳܐ ܐܺܝܬܰܘܗ̱ܝ ܗ̱ܘܳܐ ܦܐܶܐ ܠܰܐܠܳܗܳܐ܆ ܠܗܳܢܽܘܢ ܟܺܝܬ ܕܛܰܥ̈ܝܳܢ ܠܗܽܘܢ^[39] ܣܰܓܺܝ̈ܳܐܬܳܐ܆ ܐܳܦ ܕܺܝܠܶܗ ܕܰܗܘܳܝܳܐ ܗܰܘ ܕܺܝܠܰܢ܆ ܕܕܰܐܝܟ ܐܰܝܟܰܢܳܐ ܐܺܝܬ ܠܗܶܝܢ.

ܫܡܰܥ ܠܰܡܡܰܠܠܽܘܬ ܐܰ‌ܠܳܗܽܘܬܳܐ ܗܳܝ ܕܝܽܘܚܰܢܳܢ܆ ܕܰܐܝ̇ܕܳܐ ܗܝ ܡܚܰܘܝܳܢܽܘܬܳܐ. ܟܰܕ ܓܶܝܪ ܐܶܬܢܰܗܰܪ ܠܡܺܐܡܰܪ: ܒܪܺܝܫܳܐ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ܆ ܘܡܶܠܬܳܐ܆ ܐܺܝܬܰܘܗ̱ܝ ܗ̱ܘܳܐ ܠܘܳܬ ܐܰ‌ܠܳܗܳܐ܆ ܘܰܐ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ. ܗܽܘ ܡܶܠܬܳܐ^[40]. ܘܚܰܘܺܝ ܐܰܟܚܕܳܐ ܐܳܦ ܠܗܳܝ ܕܰܕܠܳܐ ܫܽܘܪܳܝ ܘܰܕܠܳܐ ܚܰܫܳܐ ܕܺܝܠܺܝܕܽܘܬܶܗ ܕܡܶܠܬܳܐ܆ ܘܰܠܫܰܘܝܽܘܬ ܐܺܝܩܳܪܳܐ ܕܽܐܘܣܺܝܰܐ ܗܳܝ ܕܰܠܘܳܬ ܐܰܒܳܐ܆ ܘܳܐܦ ܠܗܳܝ ܕܺܐܝܬܶܝܗ̇ ܕܺܝܠܳܝܬܳܐ ܕܰܩܢܽܘܡܳܐ ܕܺܝܠܶܗ܆ ܕܠܳܐ ܐ̱ܢܳܫ ܟܺܝܬ ܡܰܣܒܰܪ ܠܶܗ ܕܰܠܟܽܠ ܡܶܕܶܡ ܐܰܕܪܶܟ܆ ܢܫܰܐܠܶܗ ܝܰܬܺܝܪ ܡܥܰܩܒܳܢܳܐܺܝܬ ܘܢܺܐܡܰܪ: ܘܰܐܝܟܰܢܳܐ ܒܪܺܝܫܳܐ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ܆ ܘܗܰܘ ܡܶܠܬܳܐ ܐܺܝܬܰܘܗ̱ܝ ܗ̱ܘܳܐ ܐܰ‌ܠܳܗܳܐ܆ ܘܰܐ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ ܗܘ ܡܶܠܬܳܐ. ܐܰܝܬܺܝ ܒܳܬܰܪܟܶܢ ܡܶܚܕܳܐ܆ ܠܰܐܠܳܗܳܐ. ܠܳܐ ܐ̱ܢܳܫ ܚܙܳܐ ܡܬܽܘܡ^[41]. ܐܶܢ ܗܳܟܺܝܠ ܠܳܐ ܚܙܰܝܬ. ܐܳܦܠܳܐ ܐܶܣܬܰܟܰܠܬ܆ ܡܰܗܦܶܟ ܗ̱ܘܳܐ ܐ̱ܢܳܫ ܠܩܽܘܒܠܶܗ. ܘܣܰܓܺܝ ܟܺܐܢܳܐܺܝܬ܆ ܡܶܢ ܐܰܝܟܳܐ ܗܳܠܶܝܢ ܐܶܬܰܝܬ ܠܡܺܐܡܰܪ: ܝܺܚܺܝܕܳܝܳܐ ܒܪܳܐ ܐܳܡܰܪ ܗܰܘ ܕܺܐܝܬܰܘܗ̱ܝ ܒܥܽܘܒܶܗ ܕܰܐܒܳܐ܆ ܗܽܘ ܐܶܫܬܰܥܺܝ. ܐܰܝܟ ܕܰܠܡܺܐܡܰܪ. ܟܰܕ ܐܳܡܰܪ: ܕܰܒܪܺܝܫܳܐ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ܆ ܘܗܽܘ ܡܶܠܬܳܐ ܐܶܫܬܰܥܺܝ ܟܺܝܬ ܘܰܓܠܳܐ.

ܗܳܝ ܕܶܝܢ ܕܰܐܝܟܰܢܳܐ ܐܺܝܬܰܘܗ̱ܝ ܗ̱ܘܳܐ܆ ܠܘܳܬܰܢ ܠܳܐ ܢܶܚܬܰܬ ܠܘܳܬܶܗ ܕܗܰܘ ܕܶܐܡܰܪ ܕܰܒܪܺܝܫܳܐ ܐܺܝܬܰܘܗ̱ܝ ܗ̱ܘܳܐ. ܡܰܗܦܶܟ ܐ̱ܢܳܐ ܡܫܰܕܰܪ ܐ̱ܢܳܐ ܠܳܟ. ܗܽܘ ܐܳܡܰܪ ܠܳܟ܆ ܕܗܳܝ ܕܶܐܬܓܰܠܝܰܬ ܐܶܡܪܶܬ ܐܶܢܳܐ. ܗܳܝ ܕܶܝܢ ܕܚܰܣܺܝܪܳܐ܆ ܝܳܕܰܥ ܠܳܗ̇܆ ܗܰܘ ܕܰܒܥܽܘ̈ܒܶܐ ܐܺܝܬܰܘܗ̱ܝ ܕܰܐܒܳܐ. ܗܳܝ ܕܶܝܢ ܕܰܒܥܽܘ̈ܒܶܐ ܬܽܘܒ܆ ܡܶܢ ܡܶܣܟܺܢܽܘܬܳܐ ܕܰܫܡܳܗ̈ܶܐ ܘܰܕܣܽܘ̈ܟܳܠܶܐ ܗܳܢܽܘܢ ܕܰܠܘܳܬܰܢ ܐܰܡܺܝܪܳܐ܆ ܟܕ ܫܽܘܘܕܳܥܳܐ ܦܰܓܪܳܢܳܝܳܐ ܐܺܝܬ ܠܳܗ̇. ܐܰܝܢܳܐ ܓܶܝܪ ܥܽܘܒܳܐ ܐܺܝܬ ܕܠܳܐ ܐܺܝܬ ܠܶܗ ܡܶܣܬܰܝܟܳܢܽܘܬܳܐ. ܡܫܰܘܕܰܥ ܕܶܝܢ ܒܪܰܡ. ܠܒܰܝܬܳܝܽܘܬܳܐ ܘܚܰܒܺܝܒܽܘܬܳܐ^[42] ܕܰܒܪܳܐ ܕܰܠܘܳܬ ܐܰܒܳܐ܆ ܘܰܕܗܽܘ ܒܰܠܚܽܘܕܰܘܗ̱ܝ ܝܳܕܰܥ ܠܳܗ̇ ܠܽܐܘܣܺܝܰܐ ܕܺܝܠܶܗ ܟܣܺܝܬܳܐ ܘܠܳܐ ܡܶܬܡܰܠܠܳܢܺܝܬܳܐ܆ ܘܰܕܟܽܠܗܽܘܢ ܥܒܺܝ̈ܕܶܐ ܛܰܥܝܳܐ܆ ܐܰܝܟܰܢܳܐ ܕܰܒܕܽܘܟ ܐܳܦ ܗܽܘ ܐܳܡܰܪ ܒܶܐܘܢܓ̈ܠܝܰܐ܆ ܕܠܳܐ ܐ̱ܢܳܫ ܡܶܫܬܰܘܕܰܥ ܠܰܒܪܳܐ ܐܶܠܳܐ ܐܶܢ ܐܰܒܳܐ܆ ܘܳܐܦܠܳܐ ܠܰܐܒܳܐ ܐ̱ܢܳܫ ܡܶܫܬܰܘܕܰܥ ܐܶܠܳܐ ܐܶܢ ܒܪܳܐ^[43].

ܕܰܐܝܟ ܗܳܕܶܐ ܡܶܣܬܰܒܪܳܐ ܠܺܝ ܕܺܐܝܬܶܝܗ̇܆ ܐܳܦ ܗܳܝ ܕܰܐܡܺܝܪܳܐ ܡܶܛܽܠ ܪܽܘܚܳܐ܆ ܕܒܳܨܶܐ ܐܳܦ ܥܽܘܡܩ̈ܶܐ ܕܰܐ‌ܠܳܗܳܐ^[44]. ܥܝܳܕܳܐ ܓܶܝܪ ܐܺܝܬ ܠܘܳܬܰܢ ܕܬܶܬܶܐܡܰܪ ܡܶܛܽܠ ܗܰܘ ܕܝܳܕܰܥ ܠܐ̱ܪ̈ܳܙܶܐ ܕܪܳܚܡܶܗ܆ ܕܰܒܥܽܘܒܳܐ ܕܺܝܠܶܗ ܐܺܝܬܰܘܗ̱ܝ. ܝܳܕܰܥ ܠܬܰܘ̈ܳܢܶܐ ܟܣܰܝ̈ܳܐ܆ ܘܳܐܦ ܠܥܽܘܡܩܳܐ ܕܬܰܪܥܺܝܬܳܐ ܕܺܝܠܶܗ. ܗܳܝ ܕܶܝܢ ܕܒܳܨܶܐ܆ ܠܺܝܕܰܥܬܳܐ ܪܺܝܫܳܝܬܳܐ ܡܚܰܘܝܳܐ܆ ܘܰܕܠܳܐ ܡܶܕܶܡ ܥܳܒܰܪ ܠܺܝܕܰܥܬܶܗ ܕܪܽܘܚܳܐ܆ ܐܰܝܟ ܠܳܐ ܡܶܬܒܰܨܝܳܢܳܐ ܟܺܝܬ ܘܠܳܐ ܡܶܬܕܰܪܟܳܢܳܐ. ܘܳܐܦ ܗܳܝ ܗܳܕܶܐ ܕܶܝܢ ܠܶܟܣܝܤ܆ ܠܳܐ ܥܳܪܩܳܐ ܡܶܢ ܙܥܽܘܪܽܘܬ ܦܰܐܝܽܘܬܳܐ ܗܳܕܶܐ ܕܺܝܠܰܢ. ܗܳܝ ܓܶܝܪ ܕܢܶܒܨܶܐ܆ ܕܗܳܢܽܘܢ ܕܠܳܐ ܝܳܕܥܺܝܢ ܐܺܝܬܶܝܗ̇. ܐܶܠܳܐ ܙܳܕܶܩ. ܠܡܶܫܕܳܐ ܐܶܢܽܘܢ ܠܟܽܠܗܽܘܢ ܫܽܘܘ̈ܕܳܥܰܝܗܽܘܢ ܕܡ̈ܶܠܶܐ܆ ܗܳܢܽܘܢ ܕܡܰܒܥܕܺܝܢ ܘܠܳܐ ܠܳܚܡܺܝܢ ܠܽܐܘܣܺܝܰܐ ܗܳܝ ܕܰܠܗܰܠ ܡܶܢ ܟܽܠ܆ ܡܶܛܽܠ ܟܺܝܬ ܕܠܳܐ ܫܟܺܝܚܺܝܢ ܠܰܢ ܫܡܳܗ̈ܶܐ ܡܝܰܬܪ̈ܶܐ܆ ܟܰܕ ܠܗܳܠܶܝܢ ܐܰ‌ܠܳܗܳܝ̈ܳܬܳܐ ܡܰܘܕܥܺܝܢ ܚ̱ܢܰܢ܆ ܘܢܰܠܚܶܡ ܒܰܠܚܽܘܕ ܬܰܪ̈ܥܝܳܬܳܐ܆ ܗܳܠܶܝܢ ܐܰܝܠܶܝܢ ܕܰܠܗܰܘ ܡܶܕܶܡ ܕܣܺܝܡ܆ ܟܡܳܐ ܟܡܳܐ ܩܰܪ̈ܺܝܒܳܢ.

ܐܰܚܽܘܕ ܗܳܟܺܝܠ ܬܠܺܝܬܳܝܽܘܬܳܐ. ܐܰܝܟ ܕܶܐܡܪܶܬ܆ ܚܕܳܐ ܐܰ‌ܠܳܗܽܘܬܳܐ ܘܽܐܘܣܺܝܰܐ ܒܰܬܠܳܬܳܐ ܩܢܽܘܡ̈ܶܐ ܠܳܐ ܒܠܺܝ̈ܠܶܐ. ܚܕܳܐ ܪܺܝܫܳܢܽܘܬܳܐ ܘܠܰܘ ܬܠܳܬ. ܡܶܢ ܐܰܒܳܐ ܓܶܝܪ܆ ܐܳܦܶܢ ܠܰܘ ܡܶܢ ܒܳܬܰܪ ܐܰܒܳܐ܆ ܐܺܝܬܰܝܗܽܘܢ ܒܪܳܐ ܘܪܽܘܚܳܐ ܩܰܕܺܝܫܳܐ܆ ܟܰܕ ܠܳܐ ܙܰܒܢܳܐܺܝܬ ܘܠܳܐ ܡܰܪܚܩܳܢܳܐܺܝܬ܆ ܗܰܘ ܡܰܢ ܐܶܬܺܝܠܶܕ ܗܰܘ ܕܶܝܢ ܢܦܰܩ܆ ܠܥܶܠ ܡܶܢ ܟܽܠ ܥܶܠܬܳܐ ܘܡܶܠܬܳܐ. ܬܠܺܝܬܳܝܽܘܬܳܐ ܕܶܝܢ. ܐܶܡܰܬܝ ܕܳܐܡܰܪ ܐ̱ܢܳܐ: ܠܰܐܒܳܐ ܐܶܣܬܰܟܠ܆ ܘܠܰܒܪܐ ܗܰܘ ܕܠܳܐ ܡܶܫܬܰܚܠܦܳܢܳܐܺܝܬ ܘܠܳܐ ܡܶܫܬܰܓܢܝܳܢܳܐܺܝܬ ܡܶܛܽܠܳܬܰܢ ܒܚܰܪܬܳܐ ܕܝܰܘ̈ܡܳܬܳܐ ܐܶܬܒܰܣܰܪ܆ ܘܰܠܪܽܘܚܳܐ ܩܰܕܺܝܫܳܐ. ܠܳܐ ܓܶܝܪ ܦܣܰܩܬܳܗ̇ ܠܡܰܠܽܘܬܽܘܬܳܗ̇ ܘܰܠܠܳܐ ܡܶܬܦܰܠܓܳܢܽܘܬܳܗ̇ ܕܰܬܠܺܝܬܳܝܽܘܬܳܐ܆ ܡܶܬܒܰܪܢܫܳܢܽܘܬܶܗ ܕܺܝܚܺܝܕܳܝܳܐ. ܚܰܕ ܓܶܝܪ ܐܺܝܬܰܘܗ̱ܝ ܗܽܘ ܡܶܠܬܳܐ. ܐܳܦ ܟܰܕ ܐܶܬܒܰܣܰܪ܆ ܘܠܰܘ ܠܰܬܪܶܝܢ ܡܦܰܠܰܓ. ܐܶܠܳܐ ܩܕܳܡ ܥܳܠ̈ܡܶܐ ܡܰܢ. ܚܰܕ ܐܺܝܬܰܘܗ̱ܝ ܗ̱ܘܳܐ ܘܰܦܫܺܝܛܳܐ ܘܠܳܐ ܦܰܓܪܳܢܳܐ܆ ܐܰܝܟܰܢܳܐ ܕܳܐܦ ܐܰܒܳܐ ܘܪܽܘܚܳܐ ܩܰܕܺܝܫܳܐ.

ܒܚܰܪܬܳܐ ܕܶܝܢ ܕܙܰܒܢܳܐ܆ ܟܶܕ ܡܶܛܽܠ ܦܽܘܪܩܳܢܳܐ ܕܺܝܠܰܢ ܐܶܬܒܰܪܢܰܫ܆ ܠܰܘ ܦܫܺܝܛܳܐ. ܐܰܘ ܠܳܐ ܦܰܓܪܳܢܳܐ܆ ܐܶܠܳܐ ܚܰܕ ܡܶܢ ܬܰܪܬܶܝܢ܆ ܐܰ‌ܠܳܗܽܘܬܳܐ ܟܺܝܬ ܘܐ̱ܢܳܫܽܘܬܳܐ܆ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܐܰܝܟ ܡܶܠܬܳܐ ܕܺܝܠܳܢܳܝܬܳܐ ܕܺܝܠܗܶܝܢ܆ ܘܠܰܘ ܟܰܕ ܒܗܳܝ ܕܺܐܝܬܰܘܗ̱ܝ ܐܰ‌ܠܳܗܳܐ܆ ܫܰܚܠܦܳܗ̇ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܦܫܺܝܛܳܐ܆ ܐܶܠܳܐ ܒܗܳܝ ܕܟܰܕ ܩܰܘܺܝ ܩܒܺܝܥܳܐܺܝܬ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܠܰܚܕܳܝܽܘܬܳܐ ܕܰܠܘܳܬ ܒܶܣܪܳܐ ܩܰܒܶܠ ܥܠܰܘܗ̱ܝ܆ ܘܡܶܛܽܠܳܬܰܢ ܗܘ̣ܳܐ ܒܰܪܢܳܫܳܐ.

ܐܰܟܙܢܳܐ ܕܢܰܦܫܳܐ ܕܺܝܠܰܢ ܡܠܺܝܠܬܳܐ܆ ܒܝܰܕ ܫܘܺܝܚܽܘܬܳܐ ܕܰܐܟܚܕܳܐ܆ ܚܕܳܝܽܘܬܳܐ ܪܺܝܫܳܝܬܳܐ ܡܚܰܝܕܳܐ ܠܦܰܓܪܳܐ܆ ܟܰܕ ܠܡܶܬܗܰܘܢܳܢܽܘܬܳܐ ܕܺܝܠܳܗ̇ ܘܰܠܠܳܐ ܦܰܓܪܳܢܽܘܬܳܗ̇ ܗܳܝ ܕܒܰܟܝܳܢܳܐ. ܠܳܐ ܫܕܳܬ ܡܶܢܳܗ̇܆ ܒܫܰܘܝܽܘܬ ܪܶܗܛܳܐ ܕܶܝܢ ܕܰܐܟܚܕܳܐ ܕܡܶܢ ܬܰܪܬܶܝܢ܆ ܚܰܕ ܩܢܽܘܡܳܐ ܘܰܟܝܳܢܳܐ܆ ܘܚܰܝܽܘܬܳܐ ܚܕܳܐ܆ ܡܫܰܡܠܝܳܐ ܠܶܗ ܠܒܰܪܢܳܫܳܐ܆ ܗܳܟܰܢܳܐ ܗܽܘ ܒܪܳܐ ܕܰܐ‌ܠܳܗܳܐ܆ ܟܰܕ ܠܳܐ ܡܶܫܬܰܚܠܦܳܢܳܐܺܝܬ ܐܶܬܚܰܝܰܕ ܠܒܶܣܪܳܐ ܩܢܽܘܡܳܐܺܝܬ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܥܰܡܰܢܽܘܐܶܝܠ ‌ܐܶܫܬܰܡܰܗ܆ ܗܳܝ ܕܰܗܘ̣ܳܐ ܐܳܦ ܟܰܕ ܡܶܬܶܐܡܰܪ ܥܰܡܰܢ ܐܰ‌ܠܳܗܳܐ܆ ܟܰܕ ܐܺܝܬܰܘܗ̱ܝ ܚܰܕ ܦܰܪܨܽܘܦܳܐ܆ ܚܰܕ ܩܢܽܘܡܳܐ܆ ܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܡܶܠܬܳܐ. ܘܠܳܐ ܟܰܕ ܫܰܚܠܶܦ܆ ܐܳܦܠܳܐ ܬܽܘܒ ܟܰܕ ܒܰܠܒܶܠ ܠܗܳܠܶܝܢ ܕܡܶܢܗܶܝܢ ܗܘ̣ܳܬ ܚܕܳܝܽܘܬܳܐ ܗܳܝ ܠܳܐ ܡܶܬܦܰܫܩܳܢܺܝܬܳܐ܆ ܗܳܠܶܝܢ ܟܺܝܬ ܕܢܳܩ̈ܦܳܢ ܡܰܢ ܡܶܢ ܚܽܘܠܛܢܳܐ ܠܓܽܘܫ̈ܡܶܐ ܗܳܢܽܘܢ ܪ̈ܰܛܺܝܒܶܐ ܘܰܐܫܺܝ̈ܕܶܐ܆ ܐܺܝܬܰܝܗܶܝܢ ܕܶܝܢ ܢܽܘܟܪ̈ܳܝܳܬܳܐ ܕܰܟܝܳܢܳܐ ܗܰܘ ܕܠܳܐ ܓܫܽܘܡ. ܐܳܦܠܳܐ ܬܽܘܒ ܟܰܕ ܒܰܬܪܰܝܳܢܽܘܬܳܐ ܡܶܬܦܣܶܩ ܡܶܢ ܒܳܬܰܪ ܚܕܳܝܽܘܬܳܐ. ܫܰܪܝܳܐ ܗܝ ܓܶܝܪ ܕܰܚܕܳܝܽܘܬܳܐ ܗܳܝ ܬܪܰܝܳܢܽܘܬܳܐ.

ܐܰܝܢܳܐ ܓܶܝܪ ܦܽܘܪܣܳܐ ܢܶܫܟܰܚ ܕܡܶܢ ܕܪܺܝܫ ܢܶܫܪܶܐ ܠܗܰܘ ܕܰܩܢܽܘܡܳܐܺܝܬ ܒܰܚܕܳܝܽܘܬܳܐ ܠܳܐ ܡܶܬܦܰܠܓܳܢܺܝܬܳܐ ܐܺܝܬܰܘܗ̱ܝ܆ ܠܗܳܠܶܝܢ ܕܡܶܢܗܶܝܢ ܐܺܝܬܰܘܗ̱ܝ܆ ܐܰܘ ܡܰܢܽܘ ܗܰܘ ܕܡܶܕܶܡ ܕܰܚܠܺܝܡ ܡܶܬܪܰܥܶܐ ܢܺܐܡܰܪ܆ ܕܡܶܠܬܳܐ ܗܰܘ ܠܳܐ ܒ̣ܰܪܝܳܐ ܕܰܐ‌ܠܳܗܳܐ ܫܽܘܚܠܳܦܳܐ ܕܰܠܦܰܓܪܳܐ ܚܰܫ܆ ܐܰܘ ܬܽܘܒ ܗܳܝ ܐ̱ܚܪܺܬܳܐ܆ ܕܦܰܓܪܳܐ ܗܰܘ ܕܡܶܢ ܒܬܽܘܠܬܳܐ ܩܰܕܺܝܫܬܳܐ ܘܕܰܫܘܶܐ ܠܰܢ ܒܽܐܘܣܺܝܰܐ܆ ܫܰܢܺܝ ܡܶܢ ܟܝܳܢܳܐ ܕܺܝܠܶܗ܆ ܘܰܠܘܳܬ ܐܽܘܣܺܝܰܐ ܐܰ‌ܠܳܗܳܝܬܳܐ ܥܒܰܪ܆ ܗܳܝ ܕܰܠܟܽܠܗܽܘܢ ܥܒܺܝ̈ܕܶܐ ܐܺܝܬܶܝܗ̇ ܠܳܐ ܡܶܬܩܰܪܒܳܢܺܝܬܳܐ ܘܠܳܐ ܡܶܬܕܰܪܟܳܢܺܝܬܳܐ.

ܐܳܦܠܳܐ ܓܶܝܪ ܐܰܝܟ ܙܢܳܐ ܕܚܽܘܛܪܳܐ ܗܰܘ ܕܡܽܘܫܶܐ ܠܚܶܘܝܳܐ܆ ܘܪܶܕܝܳܐ ܗܰܘ ܕܢܺܝܠܽܘܤ ܠܰܕܡܳܐ܆ ܘܢܽܘܗܪܳܐ ܗܰܘ ܕܰܒܡܶܨܪܶܝܢ ܠܚܶܫܽܘܟܳܐ܆ ܒܶܗ ܟܰܕ ܒܶܗ ܒܰܙܢܳܐ ܐܳܦ ܡܶܠܬܳܐ ܗܰܘ ܕܰܐ‌ܠܳܗܳܐ܆ ܠܰܟܝܳܢܳܐ ܕܒܰܪܢܳܫܳܐ ܐܶܫܬܰܚܠܰܦ. ܗܳܠܶܝܢ ܓܶܝܪ ܟܰܕ ܒܶܪ̈ܝܳܬܳܐ ܐܺܝܬܰܝܗܽܘܢ ܗ̱ܘܰܘ ܘܓܽܘܫ̈ܡܳܢܶܐ܆ ܟܰܕ ܟܝܳܢܳܐ ܡܶܫܬܰܚܠܦܳܢܳܐ ܡܛܳܐ ܠܗܽܘܢ܆ ܘܒܰܟ̈ܡܳܝܘܳܬܳܐ ܐܳܦ ܒܰܐܝ̈ܢܳܝܘܳܬܳܐ ܚܒܺܝܫܺܝܢ܆ ܡܶܫܬܰܚܠܦܺܝܢ. ܘܙܰܒ̈ܢܺܝܢ ܣܰܓܺܝ̈ܐܢ ܐܳܦ ܐܰܟܚܕܳܐ ܘܒܳܗ̇ ܟܰܕ ܒܳܗ̇܆ ܘܰܠܗܳܢܽܘܢ ܡܰܢ ܐܺܝܢ܆ ܠܗܳܢܽܘܢ ܕܶܝܢ ܠܳܐ܆ ܐܰܟܙܢܳܐ ܕܰܠܡܶܨܪ̈ܳܝܶܐ ܘܠܰܒ̈ܢܰܝ ܐܺܝܣܪܳܐܶܝܠ܆ ܟܰܕ ܐܰ‌ܠܳܗܳܐ ܨܳܒܶܐ. ܗܳܟܰܢܳܐ ܓܶܝܪ ܐܳܦ ܗܰܘ ܡܰܢܢܐ ܠܘܳܬ ܟܽܠ ‌ܐܰܝܢܳܝܽܘܬܳܐ ܕܰܛܥܴ̈ܡܳܬܳܐ ܗܳܦܶܟ ܗ̱ܘܳܐ ܡܶܬܠܰܚܰܡ ܗ̱ܘܳܐ܆ ܟܰܕ ܠܖܶܓܬܳܐ ܕܟܽܠ ܚܰܕ ܡܡܰܠܶܐ ܗ̱ܘܳܐ^[45].

ܟܝܳܢܳܐ ܕܶܝܢ ܐܰ‌ܠܳܗܳܝܳܐ܆ ܘܕܰܒܗܳܝ ܕܺܐܝܬܰܘܗ̱ܝ܆ ܡܫܰܪܪܳܐ ܘܰܩܒܺܝܥܳܐ. ܘܠܳܐ ܡܶܣܬܰܝܟܳܢܳܐ. ܘܠܳܐ ܡܶܬܬܰܚܡܳܢܳܐ ܐܺܝܬܰܘܗ̱ܝ܆ ܠܳܐ ܡܶܫܬܰܚܠܦܳܢܳܐܺܝܬ ܐܺܝܬ ܠܶܗ. ܠܘܳܬܶܗ ܓܶܝܪ ܠܳܐ ܐܺܝܬ ܫܽܘܚܠܳܦܳܐ܆ ܐܰܘ ܛܶܠܳܢܺܝܬܳܐ ܕܫܽܘܓܢܳܝܳܐ^[46]܆ ܡܰܙܥܶܩ ܟܬܳܒܳܐ ܗܰܘ ܟܳܗܢܳܝܳܐ. ܡܶܛܽܠ ܡܰܢ ܓܶܝܪ ܗܰܘ ܚܽܘܛܪܳܐ. ܟܬܺܝܒ: ܕܰܫܕܳܝܗ̱ܝ ܡܽܘܫܶܐ ܥܰܠ ‌ܐܰܪܥܳܐ. ܘܰܗܘ̣ܳܐ ܚܶܘܝܳܐ^[47]. ܘܒܳܗ̇ ܒܰܕܡܽܘܬܳܐ ܡܶܛܠ ܡܰܝ̈ܳܐ܆ ܕܫܰܚܠܶܦ ܠܟܽܠܗܽܘܢ ܡܰܝ̈ܳܐ ܗܳܠܶܝܢ ܕܰܒܢܰܗܪܳܐ ܠܰܕܡܳܐ^[48]. ܡܶܛܠ ܕܶܝܢ ܐܰ‌ܠܳܗܳܐ ܕܟܽܠ܆ ܠܳܐ ܡܬܽܘܡ ܬܶܫܟܰܚ ܕܣܺܝܡܳܐ ܒܰܟܬܳܒܳܐ ܐܰ‌ܠܳܗܳܝܳܐ܆ ܗܳܝ ܕܶܐܫܬܰܚܠܰܦ. ܐܳܦܶܢ ܓܶܝܪ ܒܗܽܘܫܳܥ ܢܒܺܝܳܐ ܐܳܡܰܪ: ܐܶܢܳܐ ܚ̈ܶܙܘܳܢܶܐ ܐܰܣܓܺܝܬ̣܆ ܘܒܺܐܝ̈ܕܰܝܳܐ ܕܰܢܒܺܝ̈ܶܐ ܐܶܬܕܰܡܺܝܬ̣^[49]܆ ܐܶܠܳܐ ܗܺܝ ܡܶܬܕܰܡܝܳܢܽܘܬܳܐ܆ ܠܳܐ ܐܺܝܬܶܝܗ̇ ܗ̱ܘܳܬ ܫܽܘܚܠܳܦܳܐ ܕܽܐܘܣܺܝܰܐ. ܐܶܠܳܐ ܐܰܝܟ ܕܰܒܪ̈ܶܡܙܶܐ܆ ܩܰܕܺܝܡܽܘܬ ܡܛܰܦܣܳܢܽܘܬܳܐ ܕܰܫܪܳܪܳܐ ܗܰܘ ܕܰܥܬܺܝܕ ܗ̱ܘܳܐ ܐܺܝܬܶܝܗ̇ ܗ̱ܘܳܬ.

ܡܶܢ ܗܳܪܟܳܐ. ܐܳܦ ܚܰܙܩܺܝܐܶܝܠ ‌ܐܳܡܰܪ: ܗܳܢܳܐ ܚܶܙܘܳܐ ܕܰܕܡܽܘܬܳܐ ܕܫܽܘܒܚܶܗ ܕܡܳܪܝܳܐ^[50]܆ ܕܫܽܘܒܚܳܐ ܗܳܟܺܝܠ ܕܡܳܪܝܳܐ܆ ܘܠܰܘ ܕܽܐܘܣܺܝܰܐ ܐܺܝܬܶܝܗ̇ ܗ̱ܘܳܬ ܗܺܝ ܡܶܬܕܰܡܝܳܢܽܘܬܳܐ܆ ܐܰܘ ܐܳܦ ܫܽܘܚܠܳܦܳܐ. ܡܳܕܶܝܢ܆ ܐ̱ܚܪܺܢܳܐ ܡܶܕܶܡ ܐܺܝܬܰܘܗ̱ܝ ܛܽܘܦܣܳܐ ܕܰܢܒܺܝܽܘܬܳܐ܆ ܘܰܐ̱ܚܪܺܢܳܐ ܡܶܕܶܡ܆ ܡܚܰܘܝܳܢܽܘܬܳܐ ܕܰܡܕܰܒܪܳܢܽܘܬܳܐ ܫܰܪܺܝܪܬܳܐ. ܐܰܝܟ ܐܳܡܰܪ. ܐܶܠܳܐ ܐܳܦ ܡܶܛܽܠ ܡܶܐܬܺܝܬܳܐ ܕܒܰܒܣܰܪ ܕܡܶܠܬܳܐ. ܟܬܺܝܒܳܐ܆ ܗܳܝ ܕܒܰܕܡܽܘܬܳܐ ܕܰܒܢܰܝ̈ܢܳܫܳܐ ܗܘ̣ܳܐ܆ ܘܒܶܐܣܟܺܡܳܐ ܐܶܫܬܟܰܚ ܐܰܝܟ ܒܰܪܢܳܫܳܐ^[51]. ܐܶܠܳܐ ܩܰܕܶܡ ܐܰܪܺܝܡܳܗ̇ ܠܛܳܥܝܽܘܬܳܐ ܕܰܣܒܺܝܪܽܘܬܳܐ ܕܺܝܠܳܟ ܐܰܘܟܺܝܬ ܫܽܘܓܢܳܝܳܐ܆ ܟܰܕ ܐܶܡܰܪ: ܕܰܕܡܽܘܬܳܐ ܕܥܰܒܕܳܐ ܢܣܰܒ܆ ܘܗܳܟܰܢܳܐ ܐܰܝܬܺܝ ܒܳܬܰܪܟܶܢ܆ ܗܳܝ ܕܒܰܕܡܽܘܬܳܐ ܕܰܒܢܰܝ̈ܢܳܫܳܐ ܗܘ̣ܳܐ. ܗܰܘ ܓܶܝܪ ܕܰܢܣܰܒ ܠܽܐܘܣܺܝܰܐ ܕܺܝܠܰܢ܆ ܗܳܕܶܐ ܓܶܝܪ ܐܺܝܬܶܝܗ̇ ܕܡܽܘܬܳܐ ܕܥܰܒܕܳܐ܆ ܘܚܰܝܕܳܗ̇ ܠܶܗ ܩܢܽܘܡܳܐܺܝܬ܆ ܐܳ‌ܠܨܳܐܺܝܬ ܐܳܦ ܠܶܐܣܟܺܡܳܐ ܐܳܦ ܠܡܶܬܕܰܡܝܳܢܽܘܬܳܐ ܕܰܠܘܳܬܰܢ ܚܰܘܺܝ܆ ܠܰܘ ܟܰܕ ܐܶܣܬܒܰܪ܆ ܐܶܠܳܐ ܟܰܕ ܠܳܐ ܡܶܫܬܰܚܠܦܳܢܳܐܺܝܬ ܗܳܕܶܐ ܗܘ̣ܳܐ.

ܗܰܘ ܓܶܝܪ ܕܰܒܝܰܕ ܫܽܘܓܢܳܝܳܐ. ܐܰܘ ܒܝܰܕ ܚܙܳܬܳܐ ܕܠܳܐ ܐܺܝܬܶܝܗ̇܆ ܨܳܒܶܐ ܗ̱ܘܳܐ ܒܰܠܚܽܘܕ ܕܰܢܚܰܘܶܐ ܦܰܢܛܰܣܺܝܐ܆ ܠܳܐ ܡܶܣܬܢܶܩ ܗ̱ܘܳܐ ܥܰܠ ܗܳܝ ܕܢܶܣܰܒ ܡܶܕܶܡ. ܐܶܢܕܶܝܢ ܟܰܕ ܕܳܒܰܪ ܐܰܢ̱ܬ ܒܰܩܛܺܝܪܳܐ. ܘܥܳܫܶܡ ܐܰܢ̱ܬ ܬܺܐܡܰܪ܆ ܕܰܕܡܽܘܬܳܐ ܕܥܰܒܕܳܐ ܐܺܝܬܶܝܗ̇܆ ܗܳܝ ܡܕܰܡܝܳܢܽܘܬܳܐ ܐܰܝܟ ܠܰܕܡܺܐܡܰܪ ܘܡܶܬܕܰܡܝܳܢܽܘܬܳܐ܆ ܩܰܕܡܳܐܺܝܬ ܡܰܢ ܩܳܝܡܳܐ ܠܩܽܘܒܠܳܟ. ܗܳܝ ܕܰܢܣܰܒ. ܢܳܣܶܒ ܓܶܝܪ ܐ̱ܢܳܫ ܣܽܘܥܪܳܢܳܐ ܡܶܕܶܡ. ܡܶܢ ܟܽܠ ܦܪܽܘܤ. ܘܠܰܘ ܫܪܰܓܪܳܓܺܝܬܳܐ. ܠܰܘ ܓܶܝܪ ܐܰܝܟ ܓܒܽܘ̈ܠܝܶܐ ܗܳܢܽܘܢ ܕܰܒܪܽܘܟܳܒ^[52] ܡ̈ܰܬܠܶܐ܆ ܦܰܪܨܽܘܦܳܐ ܡܶܕܶܡ ܕܰܓܳܠܳܐ ܕܐ̱ܢܳܫܽܘܬܳܐ ܕܰܡܺܝ ܣܳܡ ܗܽܘ ܥܠܰܘܗ̱ܝ ܡܶܠܬܳܐ. ܒܳܬܰܪܟܶܢ ܕܶܝܢ܆ ܐܳܦ ܡܶܢ ܬܰܡܳܢ ܢܶܣܒܰܟ ܠܳܐ ܡܶܬܟܰܬܫܳܢܳܐ ܠܘܳܬ ܫܰܠܡܽܘܬܳܐ.

ܡܳܢܳܐ ܓܶܝܪ ܐܳܡܰܪ ܗܽܘ ܫܠܺܝܚܳܐ؟ ܗܰܘ ܕܟܰܕ ܒܰܕܡܽܘܬܳܐ ܕܰܐ‌ܠܳܗܳܐ ܐܺܝܬܰܘܗ̱ܝ܆ ܠܰܘ ܚܛܽܘܦܝܳܐ ܚܰܫܒܳܗ̇ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܫܘܶܐ ܠܰܐܠܳܗܳܐ. ܐܶܠܳܐ ܢܰܦܫܶܗ ܣܰܪܶܩ܆ ܟܰܕ ܕܡܽܘܬܳܐ ܕܥܰܒܕܳܐ ܢܣܰܒ^[53]. ܐܰܟܙܢܳܐ ܗܳܟܺܝܠ ܕܟܰܕ ܒܰܕܡܽܘܬܳܐ ܕܰܐ‌ܠܳܗܳܐ ܐܺܝܬܰܘܗ̱ܝ܆ ܒܽܐܘܣܺܝܰܐ ܕܰܐ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ܆ ܘܠܰܘ ܒܦܰܢܛܰܣܺܝܰܐ ܒܰܠܚܽܘܕ. ܘܰܐܝܟ ܕܰܒܝܽܘܩܢܳܐ ܣܪܺܝܩܳܐ ܘܠܳܐ ܩܢܽܘܡܳܝܳܐ܆ ܗܳܟܰܢܳܐ ܟܺܝܬ ܐܳܦ ܐܽܘܣܺܝܰܐ ܐܶܠܳܐ ܠܰܘ ܛܶܠܳܢܺܝܬܳܐ ܕܥܰܒܕܳܐ ܢܣܰܒ܆ ܟܰܕ ܠܒܶܣܪܳܐ ܐܶܬܚܰܝܰܕ ܩܢܽܘܡܳܐܺܝܬ܆ ܕܢܰܦܫܳܐ ܐܺܝܬ ܠܶܗ ܡܠܺܝܠܬܳܐ. ܥܰܠ ܬܰܪ̈ܬܰܝܗܶܝܢ ܓܶܝܪ܆ ܒܳܗ̇ ܒܰܕܡܽܘܬܳܐ ܢܳܩܦܳܐܺܝܬ܆ ܣܳܡ ܦܰܘܠܽܘܤ ܫܡܳܐ ܗܰܘ ܕܰܕܡܽܘܬܳܐ.

ܘܶܐܢ ܬܺܐܡܰܪ܆ ܡܳܢܳܐ ܗܳܟܺܝܠ؟ ܥܰܠ ܛܽܘܪܳܐ ܠܳܐ ܐܶܫܬܰܚܠܦܰܬ ܕܡܽܘܬܶܗ܆ ܟܰܕ ܩܰܪܺܝܒ ܗ̱ܘܳܐ ܝܽܘܚܰܢܳܢ ܘܝܰܥܩܽܘܒ ܘܦܶܛܪܽܘܤ܆ ܐܶܢܳܐ ܐܰ݀ܩܺܝܡܳܟ ܡܶܢ ܦܽܘܫܳܟܳܐ܆ ܟܰܕ ܡ̈ܶܠܶܐ ܒܰܠܚܽܘܕ ܕܶܐܘܰܢܓܶܠܺܝܽܘܢ ܐܶ݀ܩܪܶܐ ܩܕܳܡܰܝܟ܆ ܘܶܐ݀ܚܰܘܶܐ ܠܳܟ ܡܳܢܰܐ ܗ̄ܘ ܙܢܳܐ ܗܰܘ ܕܫܽܘܚܠܳܦ ܕܡܽܘܬܳܐ. ܘܰܢܗܰܪ ܐܳܡܰܪ ܦܰܪܨܽܘܦܶܗ ܐܰܝܟ ܫܶܡܫܳܐ. ܢܰܚ̈ܬܶܐ ܕܶܝܢ ܕܺܝܠܶܗ ܗܘ̣ܰܘ ܚܶܘܳܪ̈ܶܐ ܐܰܝܟ ܢܽܘܗܪܳܐ^[54]. ܐܰܪܐ ܗܳܟܺܝܠ܆ ܗܳܝ ܕܢܶܢܗܰܪ ܠܦܰܪܨܽܘܦܳܐ ܕܺܝܠܶܗ ܡܶܢ ܫܽܘܒܚܳܐ ܦܐܶܐ ܠܰܐܠܳܗܳܐ ܒܰܕܡܽܘܬ ܫܶܡܫܳܐ܆ ܘܡܳܐܢܰܘ̈ܗ̱ܝ ܢܰܒܪܩܽܘܢ ܢܰܨܺܝܚܽܘܬܳܐ ܕܢܽܘܗܪܳܐ܆ ܚܽܘܠܳܦܳܐ ܡܶܕܶܡ ܕܽܐܘܣܺܝܰܐ ܡܰܘܕܥܳܐ܆ ܐܰܘ ܕܰܕܦܳܫ ܡܶܢ ܗܳܝ ܕܢܶܗܘܶܐ ܐܺܝܬܰܘܗ̱ܝ ܒܰܪܢܳܫܳܐ ܡܚܰܘܝܳܐ܆ ܗܳܝ ܟܺܝܬ ܕܠܳܐ ܡܶܫܬܰܚܠܦܳܢܳܐܺܝܬ ܠܡܶܗܘܳܐ ܨܒ̣ܳܐ܆ ܥܰܡ ܗܳܝ ܕܩܰܘܺܝ ܐܰ‌ܠܳܗܳܐ܆ ܐܰܘ ܗܳܕܶܐ ܐܺܝܬܶܝܗ̇ ܗ̱ܘܳܬ ܝܰܬܺܝܪܳܐܺܝܬ܆ ܗܳܝ ܟܺܝܬ ܕܺܐܝܬܶܝܗ̇ ܫܰܪܺܝܪܬܳܐ ܕܗܽܘ ܟܰܕ ܗܽܘ ܐܺܝܬܰܘܗ̱ܝ ܗ̱ܘܳܐ܆ ܕܰܒܠܶܨܽܘܨܺܝܬܳܐ ܙܥܽܘܪܬܳܐ ܕܰܡܥܰܠܝܽܘܬܳܐ ܒܰܝܬܳܝܬܳܐ ܕܺܝܠܶܗ ܠܘܳܬ ܡܶܬܓܰܠܝܳܢܽܘܬܳܐ ܐܰܕܠܶܩ܆ ܥܰܡ ܗܳܝ ܕܰܠܬܰܪܥܺܝܬܳܐ ܕܬܰܠ̈ܡܺܝܕܶܐ ܨܳܒܶܐ ܗ̱ܘܳܐ ܕܰܢܩܰܝܶܡ ܡܫܰܪܰܪܬܳܐ ܟܡܳܐ ܕܡܰܨܝܳܐ ܗ̱ܘܳܬ. ܟܰܕ ܓܶܝܪ ܡܶܛܽܠ ܨܠܺܝܒܳܐ ܦܳܪܽܘܩܳܝܳܐ. ܩܰܕܶܡ ܗ̱ܘܳܐ ܫܡܰܥ ܦܶܛܪܽܘܤ܆ ܘܐ̱ܢܳܫܳܐܺܝܬ ܡܶܬܪܰܥܶܐ ܗ̱ܘܳܐ܆ ܐܳܡܰܪ ܗ̱ܘܳܐ: ܚܳܤ ܠܳܟ ܡܳܪܝ ܠܳܐ ܬܶܗܘܶܐ ܠܳܟ ܗܳܕܶܐ^[55].

ܐܶܢ ܓܶܝܪ ܒܰܣܒܺܝܪܽܘܬܳܐ. ܘܠܰܘ ܒܰܫܪܳܪܳܐ܆ ܗܽܘ ܡܶܠܬܳܐ ܕܰܐ‌ܠܳܗܳܐ ܗܘ̣ܳܐ ܒܰܪܢܳܫܳܐ ܤܛܰܪ ܡܶܢ ܟܽܠܶܗ ܫܽܘܚܠܳܦܳܐ܆ ܐܳܦܠܳܐ ܠܒܶܣܪܳܐ ܕܺܝܠܰܢ ܢܣܰܒ܆ ܝܰܬܺܝܪܰܐ ܗ̄ܘ ܣܽܘܢܩܳܢܳܐ ܕܡܰܪܝܰܡ. ܡܶܠܬܰܐ ܗ̄ܘ ܙܰܒܢܳܐ ܗܰܘ ܕܒܰܛܢܳܐ܆ ܘܕܶܐܬܡܰܠܺܝܘ ܝܰܘ̈ܡܳܬܳܐ ܕܺܝܠܳܗ̇ ܕܬܺܐܠܰܕ ܐܰܝܟܰܢܳܐ ܕܰܟܬܺܝܒ^[56]. ܗܶܓܓܳܐ ܐܳܦ ܚܶܠܡܳܐ ܐܰܝܟ ܕܕܳܡܝܳܐ ܐܺܝܬܰܘܗ̱ܝ܆ ܐܳܦ ܗܽܘ ܡܰܘܠܳܕܳܐ. ܗܶܢܽܘܢ ܥܰܙܪܽܘܪ̈ܶܐ ܘܳܐܦ ܗܺܝ ܬܰܪܒܺܝܬܳܐ ܕܩܰܘܡܬܳܐ. ܗܳܝ ܕܢܶܟܦܰܢ. ܗܳܝ ܕܢܶܕܡܰܟ. ܗܳܝ ܕܢܶܠܐ̣ܶܐ ܡܶܢ ܥܰܡܠܳܐ ܕܽܐܘܪܚܳܐ. ܢܶܓ̈ܕܶܐ. ܨܠܺܝܒܳܐ܆ ܘܳܐܦ ܗܳܝ ܟܺܝܬ ܐ̱ܚܪܳܝܬܳܐ ܘܰܕܝܰܬܺܝܪ ܪܰܒܳܐ ܠܰܡܚܰܘܝܳܢܽܘܬܳܐ ܕܰܫܪܳܪܳܐ܆ ܗܳܝ ܕܡܶܢ ܒܳܬܰܪ ܩܝܳܡܬܳܐ ܠܬܰܠ̈ܡܺܝܕܶܐ ܕܡܶܬܦܰܫܟܺܝܢ ܗ̱ܘܰܘ ܢܰܙܥܶܩ ܗ̱ܘܳܐ ܝܶܫܽܘܥ܆ ܓܽܘܫܽܘܢܳܢܝ ܘܰܚܙܰܘ܆ ܕܰܠܪܽܘܚܳܐ ܒܶܣܪܳܐ ܘܓܰܪ̈ܡܶܐ ܠܰܝܬ ܠܳܗ̇܆ ܐܰܝܟܰܢܳܐ ܕܚܳܙܶܝܢ ܐܢ̱ܬܽܘܢ ܕܺܐܝܬ ܠܺܝ^[57]. ܘܠܳܐ ܐܶܡܰܪ ܕܒܶܣܪܳܐ ܘܰܒܓܰܪ̈ܡܶܐ ܡܶܬܚܙܶܐ ܐ̱ܢܳܐ܆ ܐܶܠܳܐ ܕܒܶܣܪܳܐ ܘܓܰܪ̈ܡܶܐ ܐܺܝܬ ܠܺܝ. ܟܰܕ ܡܚܰܘܶܐ ܢܰܗܺܝܪܳܐܺܝܬ܆ ܕܗܰܘ ܡܶܕܶܡ ܕܺܐܝܬ ܗ̱ܘܳܐ ܠܶܗ܆ ܡܶܢ ܐܽܘܣܺܝܰܐ ܕܺܝܠܰܢ ܢܰܣܒܶܗ܆ ܒܰܚܕܳܝܽܘܬܳܐ ܫܰܪܺܝܪܬܳܐ ܟܺܝܬ ܘܠܳܐ ܡܶܬܦܰܣܩܳܢܺܝܬܳܐ.

ܗܳܠܶܝܢ ܕܶܝܢ. ܠܰܘ ܡܶܛܽܠ ܡܶܬܚܰܘܝܳܢܽܘܬܳܐ^[58] ܬܰܚܶܬ ܐܶܢܶܝܢ܆ ܐܶܠܳܐ ܐܰܝܟ ܐܳ‌ܠ̈ܨܳܝܳܬܳܐ ܘܚܳܫ̈ܚܳܬܳܐ܆ ܠܗܳܢܽܘܢ ܕܫܰܪܘܳܐܺܝܬ ܥܳܐܠܺܝܢ ܠܘܳܬ ܝܽܘܠܦܳܢܳܐ ܕܗܰܝܡܳܢܽܘܬܳܐ܆ ܘܟܰܕ ܚܦܺܝܛ ܐ̱ܢܳܐ ܕܶܐ݀ܩܕܽܘܡ ܐܶ݀ܥܩܪܺܝܗ̇ ܠܟܽܠܳܗ̇ ܡܰܘܥܺܝܬܳܐ ܕܙܺܝ̈ܙܳܢܶܐ ܘܰܕܝܽܘܠ̈ܦܳܢܶܐ ܗܳܢܽܘܢ ܕܰܓ̈ܳܠܶܐ܆ ܐܰܝܟܰܢܳܐ ܕܠܳܐ ܬܣܰܓܶܦ ܠܙܰܪܥܳܐ ܗܰܘ ܫܰܦܺܝܪ ܛܽܘܗܡܳܐ. ܐܳܦ ܓܶܝܪ ܠܰܘ^[59] ܣܪܺܝܩܳܐܺܝܬ ܘܰܕܠܳܐ ܥܶܠܬܳܐ ܐܶܬܒܰܪܢܰܫ ܡܶܠܬܳܐ ܗܰܘ ܝܺܚܺܝܕܳܝܳܐ ܘܰܒܪܳܐ ܕܰܐ‌ܠܳܗܳܐ ܘܰܐܒܳܐ܆ ܐܶܠܳܐ ܠܘܳܬ ܥܽܘܕܪܳܢܳܐ ܕܺܝܠܰܢ. ܚܙܳܐ ܠܰܢ ܓܶܝܪ ܕܒܺܝܫܳܐܺܝܬ ܥܰܡ ܢܰܦܫܰܢ ܐܶܬܕܒܰܪܢܰܢ. ܘܕܰܠܗܰܘܢܳܐ ܗܰܘ ܐܰܚܺܝܕ ܗܽܘ ܠܶܗ. ܘܕܰܒܨܰܠܡܳܐ ܕܰܐ‌ܠܳܗܳܐ ܗܘ̣ܳܐ܆ ܟܕܰܢܢܰܢ ܘܫܰܥܒܶܕܢܳܝܗ̱ܝ ܬܚܶܝܬ ܚܰܫ̈ܶܐ ܕܒܶܣܪܳܐ. ܘܰܠܗܰܘ ܕܰܕܢܶܗܘܶܐ ܪܺܝܫܳܐ ܡܛܳܬ ܠܶܗ܆ ܘܰܕܒܰܕܡܽܘܬ ܡܰܠܟܳܐ ܘܠܳܐ ܗ̱ܘܳܐ ܠܶܗ ܕܢܶܗܘܶܐ ܦܳܩܶܕ ܠܪ̈ܶܓܫܶܐ ܗܳܠܶܝܢ ܕܦܰܓܪܳܐ܆ ܗܳܢܶܝܢ ܕܙܳܕܶܩ ܕܢܶܣܬܰܥܪ̈ܳܢ܆ ܕܒܰܪ̈ܓܺܝܓܳܬܳܐ ܡܶܬܥܫܶܡ ܛܪܽܘܢܳܐܺܝܬ ܘܠܰܟܦܳܬܳܐ. ܗܳܝ ܕܒܶܣܪܳܐ. ܕܰܠܬܰܚܬ ܢܶܬܥܰܬ̣܆ ܘܠܰܡܠܺܝܠܽܘܬܳܐ ܕܢܰܦܫܳܐ ܠܗܳܝ ܕܰܠܩܽܘܒܠܳܐ ܐܰܟܪܟܰܬ ܐܰܝܬܝܰܬ܆ ܘܰܐܝܟ ܗܰܘ ܕܰܐܗܦܶܟܬܳܗ̇ ܐܰܝܟܰܢ ܕܗܰܘ ܘܰܥܩܳܬܳܗ̇^[60]܆ ܘܥܰܡ ܠܳܐ ܡܠܺܝܠܽܘܬܳܐ ܐܰܟܚܕܳܐ ܢܶܬܦܰܬ̣ ܐܰܚܬܬܳܗ̇.

ܘܟܰܕ ܚܙܳܐ. ܪܳܚܶܡ܆ ܘܟܰܕ ܡܶܨܥܳܝܳܐ ܐܰܪܡܺܝ ܢܰܦܫܶܗ܆ ܠܟܽܠܶܗ ܚܰܝܶܕ ܗܽܘ ܠܶܗ ܠܟܽܠܳܗ̇ ܓܒܺܝܠܬܳܐ ܕܺܝܠܰܢ܆ ܐܰܝܟܰܢܳܐ ܕܰܠܗܰܘ ܕܰܡܝܰܬܰܪ ܢܶܬܶܠ ‌ܐܽܘܚܕܳܢܳܐ ܗܰܘ ܕܰܒܗܳܢܶܝܢ ܕܰܡܝܰܬܪ̈ܳܢ. ܐܶܬܒܰܣܰܪ ܓܶܝܪ ܡܶܢ ܪܽܘܚܳܐ ܩܰܕܺܝܫܳܐ܆ ܘܡܶܢ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ܆ ܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ܆ ܕܰܡܢܰܦܰܫ ܒܢܰܦܫܳܐ ܡܶܬܗܰܘܢܳܢܺܝܬܳܐ. ܟܰܕ ܪܽܘܚܳܐ ܡܰܢ. ܥܳܒܽܘܕܳܐܺܝܬ ܡܰܥܒܶܕ ܗ̱ܘܳܐ ܠܶܗ ܠܝܰܠܕܳܐ. ܡܰܪܝܰܡ ܕܶܝܢ܆ ܡܰܥ̣ܠܳܐ ܗ̱ܘܳܬ ܐܰܟܚܕܳܐ ܠܳܐ ܚܰܣܺܝܪܳܐܺܝܬ ܤܛܰܪ ܡܶܢ ܚܛܺܝܬܳܐ ܘܪܶܓܬܳܐ܆ ܟܽܠܗܶܝܢ ܐܰܝܠܶܝܢ ܕܰܡ̈ܟܳܢܳܢ ܢܶܫ̈ܶܐ ܕܰܐܟܚܕܳܐ ܢܶܥ̈ܠܳܢ ܠܝܰܠܕܳܐ ܡܶܢ ܐܽܘܣܺܝܰܐ ܗܳܝ ܕܺܝܠܗܶܝܢ. ܒܪܰܡ ܕܰܟܝܳܐܺܝܬ܆ ܘܟܰܕ ܐܶܬܢܛܰܪ ܠܳܐ ܡܶܣܬܰܕܩܳܢܳܐ ܐܶܣܳܪܳܐ ܗܰܘ ܕܰܒܬܽܘܠܽܘܬܳܐ.

ܗܳܕܶܐ ܓܶܝܪ ܐܺܝܬܶܝܗ̇ ܗܳܝ ܦܰܐܝܰܬ ܠܰܐܠܳܗܳܐ ܘܰܬܡܺܝܗܬܳܐ ܕܺܝܠܶܗ ܕܝܰܠܕܳܐ܆ ܘܕܰܡܚܰܘܝܳܐ ܕܰܐ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ ܗܰܘ ܕܶܐܬܺܝܠܶܕ܆ ܡܚܰܝܰܕ ܗ̱ܘܳܐ ܓܶܝܪ ܩܢܽܘܡܳܐܺܝܬ܆ ܠܦܰܓܪܳܐ ܕܰܡܟܳܢ ܗ̱ܘܳܐ ܘܰܐܝܟܰܢܳܐ ܟܽܠܶܗ ܡܶܠܬܳܐ ܐܺܝܬܰܘܗ̱ܝ ܗ̱ܘܳܐ ܒܦܰܓܪܳܐ ܢܺܐܡܰܪ ܐ̱ܢܳܫ܆ ܟܰܕ ܐܺܝܬܰܘܗ̱ܝ ܡܰܠܝܳܐ^[61] ܘܠܳܐ ܡܶܣܬܰܝܟܳܢܳܐ. ܐܰܝܟܰܢܳܐ ܓܶܝܪ. ܐܶܡܰܪ ܠܺܝ: ܡܳܠܶܐ ܠܟܽܠ܆ ܘܺܐܝܬܰܘܗ̱ܝ ܠܥܶܠ ܡܶܢܶܗ ܕܗܳܢܳܐ ܟܽܠ܆ ܘܟܽܠܶܗ ܐܺܝܬܘܗ̱ܝ ܒܟܽܠ܆ ܘܟܽܠܶܗ ܠܥܶܠ ܡܶܢ ܟܽܠ. ܠܳܐ ܓܶܝܪ ܐܳܡܰܪ ܐܰܢ̱ܬ ܕܰܡܢܳܬܳܐ ܡܰܢ ܡܶܢܶܗ ܚܒܺܝܫܳܐ ܒܟܽܠ܆ ܗܰܘ ܕܶܝܢ ܕܫܰܪܟܳܐ ܕܶܝܢ ܕܺܝܠܶܗ܆ ܥܳܒܰܪ ܠܥܶܠ ܡܶܢ ܟܽܠ ܘܡܶܫܬܰܦܰܥ ܠܥܶܠ ܡܶܢ ܟܽܠ. ܗܳܕܶܐ ܓܶܝܪ ܕܺܝܠܳܝܬܐ ܗ̱ܝ ܕܡܶܬܡܰܫ̈ܚܳܢܶܐ ܘܡܶܣ̈ܬܰܝܟܳܢܶܐ. ܕܰܟܝܳܢܳܐ ܕܶܝܢ ܗܰܘ ܕܰܕܠܳܐ ܣܽܘܦ. ܘܠܳܐ ܡܶܬܕܰܪܟܳܢܳܐ܆ ܐܰܟܣܢܳܝܬܳܐ ܐܺܝܬܶܝܗ̇ ܟܽܠ ܟܽܠܶܗ. ܘܢܽܘܟܪܳܝܬܳܐ. ܐܶܢ ܗܳܟܺܝܠ ܥܰܠ ܗܳܝ ܠܰܝܬ ܠܳܟ ܡܶܠܬܳܐ ܠܡܺܐܡܰܪ܆ ܐܶܠܳܐ ܡܗܰܝܡܶܢ ܐܰܢ̱ܬ. ܕܟܽܠܶܗ ܐܺܝܬܰܘܗ̱ܝ ܐܳܦ ܒܟܽܠ. ܐܳܦ ܠܥܶܠ ܡܶܢ ܟܽܠ܆ ܗܳܟܰܢܳܐ ܗܰܝܡܶܢ܆ ܕܠܳܐ ܡܶܣܬܰܝܟܳܢܳܐܺܝܬ ܟܽܠܶܗ ܩܢܽܘܡܳܐܺܝܬ ܡܚܰܝܰܕ ܠܦܰܓܪܳܐ܆ ܘܕܰܠܟܽܠ ܡܳܠܶܐ.

ܕܰܐܝܟ ܗܳܢܰܐ ܗ̄ܘ ܓܶܝܪ ܐܳܕܫܳܐ ܕܰܬܡܺܝ̈ܗܳܬܳܐ܆ ܟܰܕ ܐܺܝܬ ܠܶܗ ܣܢܺܐܓܪܳܐ ܨܶܒܝܳܢܶܗ ܕܰܐ‌ܠܳܗܳܐ ܘܚܰܝܠܶܗ܆ ܕܗܰܘ ܕܛܶܟܣܳܐ ܣܳܡ ܠܶܗ ܠܰܟܝܳܢܳܐ܆ ܘܠܳܐ ܡܶܬܕܰܒܰܪ ܗܽܘ ܡܶܢ ܟܝܳܢܳܐ. ܙܥܽܘܪ ܗ̱ܘ̣ ܠܶܗ ܓܶܝܪ ܠܰܐܠܳܗܳܐ ܡܶܠܬܳܐ܆ ܠܰܘ ܦܰܓܪܳܐ ܒܰܠܚܽܘܕ܆ ܐܶܠܳܐ ܗܽܘ ܗܳܟܘܳܬ܆ ܐܳܦ ܗܽܘ ܗܳܢܳܐ ܟܽܠ܆ ܗܰܘ ܟܺܝܬ ܕܕܽܘܟܬܳܐ ܐܰܚܺܝܕ ܠܘܳܬܶܗ܆ ܘܳܐܦܠܳܐ ܕܢܽܘܩܰܙܬܳܐ ܠܘܳܬ ܚܽܘܕܪܳܐ. ܒܺܐܝܕܳܐ ܓܶܝܪ ܕܺܝܠܶܗ ܐܺܝܬܰܝܗܽܘܢ ܥܶܒܪ̈ܶܝܗ̇ ܕܰܐܪܥܳܐ^[62]. ܐܰܝܟܰܢܳܐ ܕܰܟܬܺܝܒ.

ܒܪܰܡ ܟܰܕ ܐܶܬܒܰܪܢܰܫ܆ ܒܣܽܘܓܐܗܽܘܢ ܕܢܳܡܽܘܣܰܘ̈ܗ̱ܝ ܕܰܟܝܳܢܳܐ ܐܶܫܬܰܥܒܰܕ ܨܶܒܝܳܢܳܐܺܝܬ܆ ܗܰܘ ܕܰܠܥܶܠ ܡܶܢ ܟܝܳܢܳܐ܆ ܘܒܽܐܘܣܺܝܰܐ ܒܰܪ ܚܺܐܪ̈ܶܐ. ܘܰܒܝܰܕ ܟܽܠܗܶܝܢ ܗܳܠܶܝܢ ܕܺܝܠܰܢ ܐܶܬܳܐ ܕܠܳܐ ܚܛܳܗ܆ ܐܰܝܟܰܢܳܐ ܕܠܰܚܛܺܝܬܳܐ ܢܚܰܒܶܠ܆ ܘܰܠܠܰܘܛܬܳܐ ܗܳܝ ܕܥܰܠ ܓܶܢܣܳܐ ܐ̱ܢܳܫܳܝܳܐ. ܗܳܕܶܐ ܕܶܝܢ ܐܺܝܬܶܝܗ̇ ܗ̱ܘܳܬ܆ ܗܳܝ ܕܥܰܦܪܳܐ ܐܺܝܬܰܝܟ ܘܰܠܥܰܦܪܳܐ ܬܺܐܙܰܠ^[63]. ܡܶܛܽܠ ܗܳܕܶܐ. ܐܳܦ ܒܡܰܥܰܠܬܳܐ ܕܰܠܗܳܢܳܐ ܥܳܠܡܳܐ ܐܶܫܬܰܘܬܰܦ ܠܰܢ܆ ܐܳܦ ܠܺܝܠܺܝܕܽܘܬܳܐ ܒܶܣܪܳܢܳܝܬܳܐ ܐܶܬܪܡܺܝ. ܘܰܒܗܳܕܶܐ. ܥܶܩܳܪܳܐ ܕܠܳܐ ܡܳܝܽܘܬܽܘܬܳܐ ܐܰܪܡܺܝ܆ ܒܡܰܓܢܳܢܽܘܬܳܐ ܕܪܽܘܚܳܐ ܩܰܕܺܝܫܳܐ܆ ܕܥܰܠ ܡܶܬܒܰܣܪܳܢܽܘܬܳܐ ܗܳܝ ܕܺܝܠܶܗ. ܘܥܰܠ ܒܰܛܢܶܗ܆ ܘܥܰܠ ܒܬܽܘܠܽܘܬܳܗ̇ ܕܶܐܡܳܐ ܗܳܝ ܕܝܶܠܕܰܬ܆ ܘܗܳܟܰܢܳܐ ܥܰܠ ‌‌ܐܰܪܥܳܐ ܐܶܬܚܙܺܝ܆ ܘܥܰܡ ܒܢܰܝ̈ܢܳܫܳܐ ܐܶܬܗܰܦܰܟ^[64]܆ ܟܰܕ ܪܳܫܶܡ ܠܰܢ ܐܽܘܪܚܳܐ ܕܚܰܝ̈ܶܐ ܡܝܰܬܪ̈ܶܐ ܘܰܕܕܽܘܒܳܪܳܐ ܛܳܒܳܐ܆ ܤܛܰܪ ܡܶܢ ܟܽܠܳܗ̇ ܦܰܢܛܰܣܺܝܰܐ.

ܢܺܝܫܳܐ ܓܶܝܪ ܐܺܝܬ ܗ̱ܘܳܐ ܠܶܗ܆ ܕܰܠܚܰܫ̈ܶܐ ܫܰܪܺܝܪ̈ܶܐ܆ ܒܝܰܕ ܐܳܣܝܽܘܬܳܐ ܫܰܪܺܝܪܬܳܐ ܢܰܐܣܶܐ. ܡܶܛܽܠܗܳܕܶܐ. ܗܳܠܶܝܢ ܕܺܝܠܝ ܟܽܠܗܶܝܢ. ܤܛܰܪ ܡܶܢ ܚܛܺܝܬܳܐ ܢܣܰܒ܆ ܐܰܝܟܰܢܳܐ ܕܒܰܐܝܠܶܝܢ ܕܶܐܬܬܰܥܒܰܕ ܗܳܢܶܝܢ ܕܰܚܒܳܠܳܐ܆ ܒܗܳܠܶܝܢ ܢܚܰܘܶܐ ܗܳܢܶܝܢ ܕܠܳܐ ܡܶܬܚܰܒܠܳܢܽܘܬܳܐ. ܐܳܦ ܓܶܝܪ ܠܳܐ ܥܒܰܕ ܚܛܺܝܬܳܐ܆ ܘܳܐܦܠܳܐ ܐܶܫܬܟܰܚ ܢܶܟܠܳܐ ܒܦܽܘܡܶܗ^[65]. ܡܶܛܽܠܗܳܕܶܐ. ܐܳܦ ܠܘܳܬ ܢܶܣܝܳܢܳܐ ܕܡܰܘܬܳܐ ܐܶܬܳܐ܆ ܐܰܝܟܰܢܳܐ ܕܢܶܫܪܶܐ ܠܡܰܘܬܳܐ ܗܰܘ ܕܶܐܬܥܰܫܰܢ ܥܠܰܝܢ܆ ܟܰܕ ܐܺܝܬܰܘܗ̱ܝ ܠܳܐ ܡܳܝܽܘܬܳܐ ܒܰܟܝܳܢܳܐ. ܘܗܳܕܶܐ ܩܰܪܺܝܒܳܐ܆ ܕܡܶܢ ܡܶܠܰܘ̈ܗ̱ܝ ܕܦܰܘܠܽܘܤ ܢܺܐܠܦܶܝܗ̇. ܕܳܐܡܰܪ ܗܳܟܰܢܳܐ: ܡܶܛܽܠ ܗܳܟܺܝܠ ܕܰܒܢܰܝ̈ܳܐ ܐܶܫܬܰܘܬܰܦܘ ܒܒܶܣܪܳܐ ܘܰܕܡܳܐ܆ ܐܳܦ ܗܽܘ ܒܳܗ̇ ܒܰܕܡܽܘܬܳܐ ܐܶܫܬܰܘܬܰܦ ܒܗܽܘܢ ܟܰܕ ܒܗܽܘܢ܆ ܐܰܝܟܰܢܳܐ ܕܰܒܝܰܕ ܡܰܘܬܳܐ ܢܒܰܛܶܠ ܠܗܰܘ ܕܺܐܝܬ ܠܶܗ ܐܽܘܚܕܳܢܳܐ ܕܡܰܘܬܳܐ܆ ܗܳܢܰܘ ܕܶܝܢ ܠܳܐܟܶܠܩܰܪܨܳܐ܆ ܘܰܢܚܰܪܰܪ ܠܗܳܠܶܝܢ. ܠܟܽܠܗܽܘܢ ܗܳܢܽܘܢ ܕܰܒܕܶܚܠܬܳܐ ܕܡܰܘܬܳܐ ܒܝܰܕ ܟܽܠܗܽܘܢ ܚܰܝ̣ܰܝ̣̈ܗܽܘܢ ܡܚܰܝ̈ܒܶܐ ܐܺܝܬܰܝܗܽܘܢ ܗ̱ܘܰܘ ܕܥܰܒܕܽܘܬܳܐ^[66]. ܡܶܛܽܠ ܗܳܕܶܐ ܐܳܡܰܪ: ܒܳܗ̇ ܒܰܕܡܽܘܬܳܐ ܠܰܢ ܐܶܫܬܰܘܬܰܦ ܒܰܕܡܳܐ ܘܰܒܒܶܣܪܳܐ܆ ܘܶܐܫܬܰܘܬܰܦ ܒܗܶܝܢ ܟܰܕ ܒܗܶܝܢ. ܐܰܝܟܰܢܳܐ ܕܟܰܕ ܠܳܐ ܣܳܥܽܘܪܳܐ ܢܶܥܒܕܺܝܘܗ̱ܝ ܠܡܰܘܬܳܐ܆ ܢܰܓܗܶܐ ܠܰܢ ܡܶܢ ܥܰܒܕܽܘܬܳܐ ܕܳܐܟܶܠܩܰܪܨܳܐ܆ ܠܰܢ ܗܳܢܽܘܢ ܕܥܰܒ̈ܕܶܐ ܐܰܚܺܝܕ ܗ̱ܘܳܐ ܠܰܢ ܐܰܝܟ ܡܚܰܝ̈ܒܶܐ ܠܰܚܛܺܝܬܳܐ܆ ܘܰܐܫܠܶܡ ܠܰܢ ܠܽܐܘܚܕܳܢܳܐ ܕܡܰܘܬܳܐ.

ܠܳܐ ܗܳܟܺܝܠ ܣܳܒܶܠ ܗ̱ܘܳܐ ܡܰܘܬܳܐ܆ ܐܶ‌ܠܽܘ ܠܳܐ ܕܒܶܗ ܟܰܕ ܒܶܗ ܒܰܟܝܳܢܳܐ ܐܶܫܬܰܘܬܰܦ ܠܰܢ. ܐܶ‌ܠܽܘ ܠܳܐ ܓܶܝܪ ܐܶܬܒܰܣܰܪ ܘܶܐܬܒܰܪܢܰܫ܆ ܕܢܶܚܰܫ ܠܳܐ ܡܶܫܟܚܳܐ ܗ̱ܘܳܬ܆ ܟܰܕ ܐܰ‌ܠܳܗܳܐ ܐܺܝܬܰܘܗ̱ܝ ܠܳܐ ܦܰܓܪܳܢܳܐ܆ ܘܠܳܐ ܡܶܬܩܰܪܒܳܢܳܐ ܠܚܰܫ̈ܶܐ. ܒܗܳܝ ܗܳܟܺܝܠ ܕܶܐܬܒܰܣܰܪ܆ ܒܗܳܕܶܐ ܐܳܦ ܚܰܫ. ܒܗܳܝ ܓܶܝܪ ܕܺܐܝܬܰܘܗ̱ܝ ܗ̱ܘܳܐ ܠܳܐ ܚܳܫܽܘܫܳܐ܆ ܘܳܐܦ ܟܰܕ ܚܰܫ܆ ܠܳܐ ܚܳܫܽܘܫܳܐ ܩܰܘܺܝ. ܒܒܶܣܪܳܐ ܓܶܝܪ. ܝܺܕܺܝܥܳܐ ܗܝ ܕܚܰܫ܆ ܘܠܰܘ ܒܰܐܠܳܗܽܘܬܳܐ܆ ܘܝܰܬܺܝܪܳܐܺܝܬ ܐܰܘܕܰܥ ܒܗܳܝ ܕܚܰܫ܆ ܕܺܐܝܬܰܘܗ̱ܝ ܠܳܐ ܚܳܫܽܘܫܳܐ.

ܠܳܐ ܙܳܕܶܩ ܗܳܟܺܝܠ ܕܰܢܦܰܠܓܺܝܘܗ̱ܝ ܡܶܛܽܠ ܗܳܕܶܐ܆ ܠܰܬܪܰܝܳܢܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ܆ ܐܰܝܟܰܢܳܐ ܕܰܣܢܺܐܓܪ̈ܶܐ ܣܪ̈ܺܝܩܶܐ ܢܶܬܚܙܶܐ ܕܠܳܐ ܚܳܫܽܘܫܽܘܬܳܐ ܕܰܐ‌ܠܳܗܳܐ. ܟܰܕ ܬܟܺܝܠܺܝܢ ܚ̱ܢܰܢ ܕܶܝܢ. ܐܳܡܪܺܝܢܰܢ ܠܶܗ ܚܰܕ ܘܕܰܡܒܰܣܰܪ܆ ܘܟܰܕ ܢܳܩܦܺܝܢܰܢ ܠܡܰܠܦܳܢܽܘܬܳܐ ܕܰܟ̈ܬܳܒܶܐ ܟܳܗ̈ܢܳܝܶܐ܆ ܕܡܰܟܪܙܺܝܢ ܠܶܗ ܕܚܰܫ ܒܰܒܣܰܪ܆ ܘܟܰܕ ܓܰܠܝܳܐܺܝܬ ܝܳܕܥܺܝܢܰܢ܆ ܕܚܰܫܳܐ ܠܳܐ ܥܳܒܰܪ ܠܗܰܠ ܡܶܢ ܦܰܓܪܳܐ ܗܰܘ ܚܳܫܽܘܫܳܐ. ܓܳܫܶܦ ܓܶܝܪ ܘܠܳܐ ܣܳܟ ܒܠܳܐ ܚܳܫܽܘܫܽܘܬܳܗ̇ ܕܰܐ‌ܠܳܗܽܘܬܳܐ. ܐܶܠܳܐ ܐܰܝܟ ܕܶܐܡܰܬܝ^[67] ܕܚܰܒܠܳܐ ܡܶܬܦܣܶܩ܆ ܗܳܕܶܐ ܟܺܝܬ ܗܳܝ ܕܡܰܬܠܳܐ܆ ܡܶܙܕܢܶܩ ܡܶܢܳܗ̇ ܠܪܽܘܚܩܳܐ.

ܠܐ ܗܳܟܺܝܠ ܬܦܰܠܓܺܝܘܗ̱ܝ ܡܶܢ ܗܰܘ ܕܰܡܟܳܢ ܠܡܶܚܰܫ܆ ܐܰܝܟܰܢܳܐ ܕܰܠܒܰܪܢܳܫܳܐ ܡܶܢܶܗ ܘܠܶܗ ܘܠܰܘ ܠܰܐܠܳܗܳܐ ܢܶܚܫܒܺܝܘܗ̱ܝ ܠܬܽܘܪܳܨܳܐ ܗܰܘ ܕܡܶܢ ܚܰܫܳܐ. ܐܰܩܺܝܡ ܗܰܘܢܳܟ^[68]܆ ܕܡܶܛܽܠ ‌ܐܰ‌ܠܳܗܳܐ ܗܰܘ ܕܒܰܫܪܳܪܳܐ ܐܺܝܬܰܘܗ̱ܝ ܠܳܐ ܚܳܫܽܘܫܳܐ. ܐܺܝܬܶܝܗ̇ ܠܳܟ ܡܶܠܬܳܐ. ܘܠܳܐ ܬܶܕܚܰܠ܆ ܟܰܕ ܛܐܟܐ ܐܰܢ̱ܬ ܟܪܺܝܗ ܐܰܢ̱ܬ ܠܳܗ̇ ܠܚܰܫܽܘܬ ܐܰ‌ܠܳܗܽܘܬܳܐ ܗܳܝ ܕܡܰܛܶܒ ܐܰܢ̱ܬ ܥܠܰܝܢ܆ ܐܰܝܟ^[69] ܗܰܘ ܕܚܳܐܶܫ ܡܶܕܶܡ ܡܶܢ ܗܳܠܶܝܢ ܕܰܠܒܰܪ ܡܶܢ ܟܝܳܢܳܐ ܗܰܘ ܠܳܐ ܡܩܰܒܠܳܢܳܐ ܕܚܰܫܳܐ܆ ܟܰܕ ܥܰܡ ܡܰܘܬܳܐ ܒܝܰܕ ܒܶܣܪܳܐ ܡܶܬܥܰܪܙܰܠ.

ܐܰܟܙܢܳܐ ܓܶܝܪ ܕܦܰܪܙܠܳܐ ܟܰܕ ܒܢܽܘܪܳܐ ܐܶܬܬܰܪܬ̣ܰܚ܆ ܘܰܠܫܰܠܗܶܒܺܝܬܳܐ ܩܰܒܶܠ ܒܥܽܘܡܩܳܐ܆ ܐܰܝܟܰܢܳܐ ܟܺܝܬ ܕܢܶܣܬܒܰܪ. ܕܗܽܘ^[70] ܣܽܘܥܪܳܢܳܐ ܢܽܘܪܳܐ ܐܺܝܬܰܘܗ̱ܝ܆ ܒܳܠܰܥ ܡܰܢ ܗܽܘ ܡܶܢ ܗܳܢܽܘܢ ܕܡܳܚܶܝܢ ܠܶܗ ܟܰܕ ܥܰܠ ܣܰܕܳܢܳܐ ܡܶܫܬܰܒܰܛ܆ ܚܳܐܶܫ ܕܶܝܢ ܟܝܳܢܳܗ̇ ܕܢܽܘܪܳܐ ܘܠܳܐ ܡܶܕܶܡ܆ ܘܗܳܕܶܐ ܟܰܕ ܠܳܐ ܡܶܬܦܰܠܓܳܢܳܐܺܝܬ ܡܚܰܝܰܕ ܠܗܰܘ ܕܡܶܬܡܚܶܐ ܘܡܶܫܬܰܥܒܰܕ ܠܢܳܩ̈ܫܶܐ ܬܰܩܺܝ̈ܦܶܐ ܕܰܒܝܰܕ ܐܰܪ̈ܙܦܳܬܳܐ܆ ܗܳܟܰܢܳܐ ܟܺܝܬ ܬܶܣܬܰܟܰܠ ‌ܐܳܦ ܥܰܠ ܚܰܫܳܐ ܦܳܪܽܘܩܳܝܳܐ܆ ܟܰܕ ܪܶܡܙܳܐ^[71] ܡܶܕܶܡ ܙܥܽܘܪܳܐ ܘܕܽܘܡܝܳܐ ܩܰܠܺܝܠ ܢܳܣܶܒ ܐܰܢ̱ܬ ܡܶܢ ܬܰܚܘܺܝܬܳܐ܆ ܡܶܙܕܟܶܐ ܓܶܝܪ ܡܶܢ ܟܽܠܦܪܽܘܤ ܡܶܢ ܫܪܳܪܳܐ ܗܽܘ ܦܽܘܚܳܡܳܐ ܘܰܣܝܳܡܳܐ ܕܰܠܩܽܘܒܠܶܗ ܕܨܰܠܡܳܐ܆ ܒܗܳܝ ܕܡܶܠܬܳܐ ܡܰܢ ܗܰܘ ܕܰܐ‌ܠܳܗܳܐ ܡܚܰܝܰܕ ܗ̱ܘܳܐ ܠܶܗ ܠܦܰܓܪܳܐ ܕܰܡܩܰܒܶܠ ܗ̱ܘܳܐ ܠܢܶܓ̈ܕܶܐ ܗܳܠܶܝܢ ܕܡܶܢ ܚܰܫܳܐ܆ ܕܺܝܠܳܢܳܝܳܐ ܕܶܝܢ ܒܪܰܡ ܕܺܝܠܶܗ ܡܶܬܗܰܝܡܰܢ ܗ̱ܘܳܐ ܕܺܐܝܬܰܘܗ̱ܝ ܗܽܘ ܚܰܫܳܐ܆ ܟܰܕ ܠܳܐ ܐܰܪܚܶܩ ܡܶܢ ܠܳܐ ܚܳܫܽܘܫܽܘܬܳܐ ܗܳܝ ܕܒܰܟܝܳܢܳܐ܆ ܡܶܛܽܠ ܕܕܺܝܠܳܢܳܝܳܐ ܕܺܝܠܶܗ ܘܠܰܘ ܕܐ̱ܢܳܫ ܐ̱ܚܪܺܝܢ ܐܺܝܬܰܘܗ̱ܝ ܗ̱ܘܳܐ ܗܽܘ ܦܰܓܪܳܐ܆ ܗܰܘ ܕܩܰܒܠܶܗ ܠܚܰܫܳܐ.

ܡܶܛܽܠܗܳܕܶܐ ܗܳܟܺܝܠ܆ ܐܳܦ ܕܛܰܥܡܶܗ ܠܡܰܘܬܳܐ ܒܰܠܚܽܘܕ ܡܶܬܐܰܡܪܳܐ܆ ܟܰܕ ܫܪܳܝܗ̱ܝ ܒܝܰܕ ܩܝܳܡܬܳܐ ܬܠܺܝܬܳܝܰܬ ܝܰܘ̈ܡܶܐ ܘܰܐ‌ܠܳܗܳܝܬܳܐ. ܘܰܒܝܰܕ ܡܰܢ ܩܒܽܘܪܬܳܐ ܕܦܰܓܪܳܐ܆ ܟܰܕ ܡܶܢ ܥܶܩܳܪܶܗ ܬܰܠܫܶܗ ܘܰܐܪܺܝܡܶܗ ܠܰܚܒܳܠܳܐ ܗܰܘ ܕܰܒܩܰܒܪܳܐ܆ ܗܳܝ ܕܳܐܦ ܡܶܛܽܠ ܡܶܬܚܰܘܝܳܢܽܘܬܳܗ̇܆ ܦܰܓܪ̈ܶܐ ܣܰܓܺܝ̈ܶܐܐ ܕܰܫܟܺܝܒܺܝܢ ܗ̱ܘܰܘ ܐܶܬܬܥܺܝܪܘ̱ ܘܩܳܡܘ̱ ܗܳܝܕܶܝܢ܆ ܘܰܠܘܳܬ ܡܕܺܝܢ̱ܬܳܐ ܗܳܝ ܩܰܕܺܝܫܬܳܐ ܫܘܰܪܘ ܥܰܠ̣ܘ^[72]. ܒܝܰܕ ܢܰܦܫܳܐ ܕܶܝܢ܆ ܟܽܠܶܗ ܓܶܝܪ ܐܺܝܬܰܘܗ̱ܝ ܗ̱ܘܳܐ ܕܰܡܚܰܝܰܕ ܗ̱ܘܳܐ ܠܳܗ̇܆ ܘܳܐܦ ܟܽܠܶܗ ܒܦܰܓܪܳܐ܆ ܐܰܝܟ ܡܰܠܝܳܐ ܘܠܳܐ ܡܶܬܦܰܠܓܳܢܳܐ. ܟܰܕ ܠܰܫܝܽܘܠ ܢܚܶܬ܆ ܘܥܰܠ ܢܰܦ̈ܫܳܬܳܐ ܗܳܠܶܝܢ ܕܬܰܡܳܢ ܚܒܺܝ̈ܫܳܢ ܗ̱ܘܰܝ̈ ܪܰܚܶܡ. ܘܶܐܡܰܪ ܐܰܝܟ ܒܰܪ̱ܬ ܩܳܠܶܗ ܕܰܢܒܺܝܳܐ܆ ܠܗܳܢܽܘܢ ܕܒܰܐܣܽܘܪ̈ܶܐ ܕܦܽܘܩܘ܆ ܘܰܠܗܳܢܽܘܢ ܕܰܒܚܶܫܽܘܟܳܐ ܕܶܐܬܓܠܰܘ^[73].

ܗܳܢܳܐ ܟܰܕ ܩܳܡ ܣܠܶܩ ܠܰܫܡܰܝܳܐ. ܗܰܘ ܕܰܢܚܶܬ ܠܳܐ ܦܰܓܪܳܢܳܐ܆ ܣܠܶܩ ܦܰܓܪܳܢܳܐ. ܟܰܕ ܚܰܕ ܐܺܝܬܰܘܗ̱ܝ ܡܶܢ ܬܠܺܝܬܳܝܽܘܬܳܐ܆ ܘܠܳܐ ܐܰܘܣܶܦ ܥܠܶܝܗ̇ ܡܶܢܝܳܢܳܐ ܪܒܺܝܥܳܝܳܐ܆ ܐܰܘ ܕܦܰܪܨܽܘܦܳܐ ܐܰܘ ܕܰܟܝܳܢܳܐ ܐܰܘ ܕܰܩܢܽܘܡܳܐ. ܗܳܟܰܢܳܐ ܝܺܬܶܒ ܡܶܢ ܝܰܡܺܝܢܳܐ ܕܰܐܒܳܐ܆ ܐܰܝܟܰܢܳܐ ܕܡܶܢ ܫܡܳܗ̈ܶܐ ܟܺܝܬ ܘܣܽܘ̈ܟܳܠܶܐ ܗܳܢܽܘܢ ܕܰܠܘܳܬܰܢ ܬܺܐܠܰܦ ܫܰܘܝܽܘܬ ܐܺܝܩܳܪܳܐ ܕܺܝܠܶܗ܆ ܘܡܰܠܟܳܝܽܘܬܶܗ ܗܳܝ ܕܡܶܢ ܡܰܘܬܒܳܐ. ܘܶܐܢ ܕܶܝܢ ܠܳܐ܆ ܐܰܝ̇ܕܳܐ ܬܶܗܘܶܐ ܐܺܝܬܶܝܗ̇ ܝܰܡܺܝܢܳܐ ܐܰܘ ܣܶܡܳܠܳܐ܆ ܕܰܐܒܳܐ ܗܰܘ ܠܳܐ ܦܰܓܪܳܢܳܐ ܘܰܕܠܳܐ ܐܶܣܟܺܡܳܐ ܘܠܳܐ ܡܶܣܬܰܝܟܳܢܳܐ. ܗܳܟܰܢܳܐ ܢܺܐܬܶܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬܶܐ܆ ܐܰܝܟܰܢܳܐ ܕܳܐܦ ܡܶܢ ܗܳܢܽܘܢ ܕܕܰܩܪܽܘܗ̱ܝ ܢܶܬܚܙܶܐ^[74]܆ ܐܰܝܟܰܢܳܐ ܕܰܢܒܺܝܽܘܬܳܐ ܐܳܡܪܳܐ. ܗܳܟܰܢܳܐ ܐܰܪܚܶܩ ܠܰܢ ܡܶܢ ܥܰܒܕܽܘܬܳܐ ܕܗܳܢܽܘܢ ܕܠܳܐ ܐܺܝܬܰܝܗܽܘܢ ܐܰ‌ܠܳܗ̈ܶܐ^[75]܆ ܘܩܰܪܶܒ ܠܰܢ ܠܺܝܕܰܥܬܳܐ ܕܗܰܘ ܕܺܐܝܬܰܘܗ̱ܝ ܐܰ‌ܠܳܗܳܐ ܘܰܐܒܳܐ ܫܡܰܝܳܢܳܐ.

ܟܰܕ ܩܳܝܡܺܝܢ ܐܢ̱ܬܽܘܢ ܗܳܟܺܝܠ ‌ܐܰܢ̱ܬܽܘܢ ܗܳܢܽܘܢ ܕܗܳܫܳܐ ܡܶܬܬܰܪܬܶܝܢ ܐܢ̱ܬܽܘܢ ܡܶܠܬܳܐ ܕܫܰܦܺܝܪܽܘܬ ܕܶܚܠܬܳܐ܆ ܥܰܡ ܠܒܺܝܒܽܘܬܳܐ ܫܕܰܘ ܡܶܢܟܽܘܢ ܟܶܒ̈ܠܶܐ ܗܳܢܽܘܢ ܝܰܩܺܝܪ̈ܶܐ. ܐܶܡܰܪܘ ܠܰܒ̈ܢܳܬ ܩ̈ܳܠܶܐ ܗܳܠܶܝܢ ܟܳܗ̈ܢܳܝܳܬܳܐ ܕܕܰܘܺܝܕ܆ ܢܦܰܣܶܩ ܠܰܐܣܽܘܪ̈ܶܐ ܕܺܝܠܗܽܘܢ܆ ܘܢܶܫܕܶܐ ܡܶܢܗܽܘܢ ܠܢܺܝܪܳܐ ܕܺܝܠܗܽܘܢ^[76]. ܚܽܘܪܘ. ܘܶܐܬܦܢܰܘ ܠܘܳܬ ܡܰܥܪ̈ܳܒܶܐ ܕܫܶܡܫܳܐ܆ ܘܗܳܟܰܢܳܐ ܟܦܽܘܪܘ ܒܣܳܛܳܢܳܐ܆ ܘܰܒܣܺܝܥܬܳܐ ܗܳܝ ܕܝܰܬܺܝܪ ܡܶܢ ܟܽܠ ܒܺܝܫܳܐ ܕܫ̈ܺܐܕܶܐ܆ 222ܘܒܰܨܚ̈ܳܬܶܐ ܕܗܳܢܽܘܢ. ܟܰܕ ܡܰܘܕܥܺܝܢ ܐܢ̱ܬܽܘܢ ܒܝܰܕ ܗܳܢܳܐ ܐܶܣܟܺܡܳܐ܆ ܕܒܰܪܢܳܫܳܐ ܗܰܘ ܥܰܬܺܝܩܳܐ܆ ܥܪܰܒ ܠܶܗ ܥܰܡ ܣܳܥܽܘܪ̈ܘܳܬܳܐ ܕܺܝܠܶܗ܆ ܘܶܐܙܰܠ ܠܶܗ ܠܘܳܬ ܪܰܡܫܳܐ. ܟܰܕ ܕܶܝܢ ܗܳܕܶܐ ܬܶܥܒܕܽܘܢ܆ ܠܘܳܬ ܡܰܕܢܚܳܐ ܐܶܬܦܢܰܘ܆ ܘܣܺܝܡܘ ܩܝܳܡ̈ܶܐ ܗܳܠܶܝܢ ܕܰܠܘܳܬ ܡܫܺܝܚܳܐ܆ ܡܶܛܽܠ ܟܺܝܬ ܕܰܥܝܳܕܳܐ ܐܺܝܬ ܠܗܳܢܽܘܢ ܕܶܐܬܚܰܪܰܪܘ̱ ܡܶܢ ܛܪܽܘܢܽܘܬܳܐ ܐܰܘܟܺܝܬ ܫܶܒܝܳܐ ܡܶܕܶܡ܆ ܕܰܠܡܰܠܟܳܐ ܗܰܘ ܕܰܙܟܳܐ ܘܡܶܢ ܥܰܒܕܽܘܬܳܐ ܡܪܺܝܕܬܳܐ ܚܰܪܰܪ ܐܶܢܽܘܢ܆ ܒܝܰܕ ܩܝܳܡ̈ܶܐ ܢܶܬܢܰܩܦܽܘܢ܆ ܘܰܠܡܰܣܳܩܽܘ ܠܶܗ ܡܰܕܰܐܬܳܐ.

ܡܳܢܳܐ ܕܶܝܢ ܐܺܝܬܶܝܗ̇ ܡܰܕܰܐܬܳܐ ܗܳܝ ܕܬܳܒܰܥ ܡܫܺܝܚܳܐ ܠܗܳܢܽܘܢ ܕܰܡܗܰܝܡܢܺܝܢ ܒܶܗ܆ ܘܥܳܡܕܺܝܢ ܒܰܫܡܳܐ ܕܺܝܠܶܗ ܘܕܰܐܒܳܐ ܘܰܕܪܽܘܚܳܐ ܩܰܕܺܝܫܳܐ. ܗܳܝ ܕܰܠܘܳܬ ܡܰܕܢܚܳܐ ܢܶܗܘܽܘܢ ܚܳܝܪܺܝܢ ܒܟܽܠܙܒܰܢ܆ ܘܰܠܘܳܬ ܝܰܘܡܳܐ ܗܰܘ ܕܠܳܐ ܪܰܡܫܳܐ ܗܰܘ ܕܰܩܝܳܡܬܳܐ܆ ܘܕܰܠܘܳܬ ܗܰܘ ܢܶܗܘܽܘܢ ܡܥܰܬܕܺܝܢ ܘܰܡܛܰܝܒܺܝܢ. ܘܟܰܕ ܚܕܳܐ ܙܒܰܢ ܫܳܕܶܝܢ ܡܶܢܗܽܘܢ ܥ̈ܒܳܕܶܐ ܕܚܶܫܽܘܟܳܐ܆ ܢܶܠܒܫܽܘܢ ܙܰܝܢܳܐ ܕܢܽܘܗܪܳܐ܆ ܘܰܐܝܟ ܕܒܺܐܝܡܳܡܳܐ ܒܫܰܦܺܝܪܽܘܬ ܐܶܣܟܺܡܳܐ ܢܗܰܠܟܽܘܢ. ܠܳܐ ܒܰܙܡܳܪ̈ܶܐ ܘܰܒܪ̈ܰܘܳܝܘܳܬܳܐ. ܘܠܳܐ ܒܡܰܫܟ̈ܒܶܐ ܘܰܒܦܰܚ̈ܙܘܳܬܳܐ. ܠܳܐ ܒܚܶܪܝܳܢܳܐ ܘܒܰܛܢܳܢܳܐ^[77]. ܗܳܠܶܝܢ ܓܶܝܪ ܐܺܝܬܰܝܗܶܝܢ ܡܶܙܕܰܝܚܳܢܽܘܬܶܗ ܕܳܐܟܶܠܩܰܪܨܳܐ ܘܰܥܒܳܕܰܘ̈ܗ̱ܝ܆ ܘܟܽܠܗܶܝܢ ܗܳܢܶܝܢ ܕܢܳܩ̈ܦܳܢ ܠܗܳܠܶܝܢ܆ ܗܳܢܶܝܢ ܟܺܝܬ ܕܦܰܘܠܽܘܤ ܟܢܺܝܫܳܐܺܝܬ ܒܝܰܕ ܗܳܠܶܝܢ ܕܒܳܬܰܪܟܶܢ ܐܰܝܬܺܝ܆ ܚܒܰܫ ܐܶܢܶܝܢ ܟܰܕ ܐܶܡܰܪ: ܘܰܒܛܺܝܠܽܘܬܳܐ ܕܥܰܠ ܒܶܣܪܳܐ ܠܳܐ ܬܶܥܒܕܽܘܢ ܐܰܝܟ ܕܰܠܪܶܓܬܳܐ^[78].

ܟܰܕ ܗܳܕܶܐ ܗܳܟܺܝܠ ܚܘܺܝܚܳܐܺܝܬ ܬܶܣܥܪܽܘܢ܆ ܗܳܝ ܢܶ݀ܒܥܶܐ܆ ܕܡܶܛܽܠ ܡܳܢܳܐ ܠܰܡܫܺܝܚܳܐ ܒܰܠܚܽܘܕ ܫܳܠܡܺܝܢ ܐܢ̱ܬܽܘܢ ܒܝܰܕ ܫܽܘܘܕܳܝܳܐ܆ ܘܠܳܐ ܗ̱ܘܳܐ ܟܺܝܬ ܥܰܡܶܗ ܐܳܦ ܠܰܐܒܐ ܘܳܐܦ ܠܪܽܘܚܳܐ ܩܰܕܺܝܫܳܐ. ܩܰܕܺܝܡܳܐ ܝܺܕܺܝܥܳܐ ܗܺܝ ܥܶܠܬܳܐ܆ ܘܠܳܐ ܣܳܟ ܐܺܝܬ ܒܳܗ̇ ܚܶܪܝܳܢܳܐ܆ ܠܗܳܢܽܘܢ ܕܺܐܝܬܰܝܗܽܘܢ ܝܳܕܽܘ̈ܥܶܐ ܕܡ̈ܶܠܶܐ ܟܳܗ̈ܢܳܝܳܬܳܐ ܕܪܽܘܚܳܐ. ܗܽܘ ܓܶܝܪ ܒܶܐܘܰܢܓܶܠ̈ܝܰܐ܆ ܬܰܪܥܳܐ ܘܽܐܘܪܚܳܐ ܗܽܘ ܠܶܗ ܫܰܡܰܗ^[79]܆ ܟܰܕ ܡܶܬܩܰܪܒܳܢܳܐ ܗܘ̣ܳܐ ܠܰܢ ܒܝܰܕ ܡܶܬܒܰܣܪܳܢܽܘܬܳܐ܆ ܗܰܘ ܕܒܰܟܝܳܢܶܗ ܐܺܝܬܰܘܗ̱ܝ ܠܳܐ ܡܶܬܩܰܪܒܳܢܳܐ܆ ܘܒܰܕܡܽܘܬ ܐܽܘܪܚܳܐ ܗܽܘ ܠܶܗ ܦܪܰܤ ܒܝܰܕ ܡܶܬܢܰܚܬܳܢܽܘܬܳܐ ܕܠܳܐ ܡܫܽܘܚܬܳܐ܆ ܠܪ̈ܶܓܠܶܐ ܕܬܰܪܥܺܝܬܳܐ ܕܺܝܠܰܢ ܗܳܠܶܝܢ ܕܰܡܚܰܓܪ̈ܳܢ ܗ̱ܘܰܝ̈܆ ܘܡܶܬܒܰܝ̈ܕܠܳܢ ܗ̱ܘܰܝ̈ ܡܶܢ ܛܳܥܝܽܘܬܳܐ ܗܳܝ ܕܰܦܬܰܟܪ̈ܶܐ ܘܩܳܨ̈ܥܳܢ ܗ̱ܘܰܝ̈. ܘܠܳܐ ܡܶܫܟ̈ܚܳܢ ܗ̱ܘܰܝ̈ ܣܳܟ ܕܢܶܦܣ̈ܥܳܢ܆ ܠܘܳܬ ܩܰܪܩܰܦܬܳܐ ܗܳܝ ܪܳܡܬܳܐ ܘܰܡܥܰܠܰܝܬܳܐ ܘܰܩܫܺܝܬܳܐ ܕܺܝܕܰܥܬܳܐ ܕܚܰܕ ܐܰ‌ܠܳܗܳܐ.

ܐܰܝܟ ܐܰܝܠܶܝܢ ܗܳܟܺܝܠ ܕܰܒܝܽܘܠ̈ܦܳܢܶܐ ܫܰܪ̈ܘܳܝܶܐ ܡܰܥ̈ܠܳܢܳܝܶܐ ܐܺܝܬܰܝܟܽܘܢ܆ ܘܰܠܒܰܪ ܡܶܢ ܕܳܪ̈ܳܬܳܐ ܟܳܗ̈ܢܳܝܳܬܳܐ ܩܳܝܡܺܝܢ ܐܢ̱ܬܽܘܢ܆ ܠܘܳܬ ܐܽܘܪܚܳܐ ܘܬܰܪܥܳܐ ܪܗܰܛܘ. ܐܰܝܟܰܢܳܐ ܕܶܐܡܰܬܝ ܕܬܶܩ̣ܫܽܘܢ ܒܝܰܕ ܗܳܠܶܝܢ ܕܟܰܕ ܫܳܠܡܺܝܢ ܐܢ̱ܬܽܘܢ ܠܶܗ. ܐܳܡܪܺܝܢ ܐܢ̱ܬܽܘܢ܆ ܓܰܠܝܳܐܺܝܬ. ܘܰܡܛܰܝܒܳܐܺܝܬ ܢܶܦܬܰܚ܆ ܘܢܰܪܘܰܚ^[80] ܠܟܽܘܢ ܡܰܥܰܠܬܳܐ܆ ܗܰܘ ܕܶܐܡܰܪ ܩܽܘܫܘ ܘܢܶܬܦܬܰܚ ܠܟܽܘܢ^[81].

ܐ̱ܚܪܳܢܝܳܐܺܝܬ ܕܶܝܢ ܟܺܝܬ܆ ܕܳܐܦ ܗܰܘ ܕܥܰܡ ܡܫܺܝܚܳܐ ܡܶܬܛܰܟܰܤ ܘܫܳܠܶܡ܆ ܥܰܡ ܬܠܺܝܬܳܝܽܘܬܳܐ ܡܶܬܛܰܟܰܤ. ܝܰܬܺܝܪܳܐܺܝܬ^[82] ܡܰܢ܆ ܐܳܦ ܡܶܛܽܠ ܗܳܝ ܕܗܺܝ ܟܰܕ ܗܺܝ ܕܽܐܘܣܺܝܰܐ܆ ܬܠܳܬܰܝ̈ܗܽܘܢ ܩܢܽܘ̈ܡܶܐ. ܒܳܬܰܪܟܶܢ ܕܶܝܢ܆ ܕܰܫܡܳܐ ܗܳܢܳܐ ܡܫܺܝܚܳܐ܆ ܡܳܪܳܢܳܐܺܝܬ ܡܰܢ. ܕܰܒܪܳܐ ܐܺܝܬܰܘܗ̱ܝ܆ ܗܰܘ ܕܶܐܬܡܫܰܚ ܘܒܰܠܚܽܘܕܰܘܗ̱ܝ ܐܺܝܬܰܘܗ̱ܝ ܘܡܶܫܬܰܡܰܗ ܡܫܺܝܚܳܐ܆ ܘܠܳܐ ܓܶܝܪ ܐܰܒܐ ܡܫܺܝܚܳܐ܆ ܘܳܐܦܠܳܐ ܪܽܘܚܳܐ ܩܰܕܺܝܫܳܐ܆ ܡܥܰܠܶܐ ܕܶܝܢ ܒܪܰܡ ܘܡܰܣܶܩ ܠܰܢ܆ ܠܘܳܬ ܬܰܪܥܺܝܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ. ܡܰܘܕܰܥ ܓܶܝܪ ܠܰܐܒܳܐ ܗܰܘ ܕܰܡܫܰܚ܆ ܘܠܰܒܪܳܐ ܗܰܘ ܕܶܐܬܡܫܰܚ܆ ܘܰܠܪܽܘܚܳܐ ܗܰܘ ܕܰܚܠܳܦ ܡܫܺܝܚܽܘܬܳܐ ܡܶܣܬܰܟܰܠ. ܐܳܡܰܪ ܓܶܝܪ ܦܰܘܠܽܘܤ ܟܰܕ ܠܥܶܒܪ̈ܳܝܶܐ ܟܳܬܶܒ܆ ܗܳܝ ܕܡܶܢ ܕܰܘܺܝܕ ܐܶܬܰܐܡܪܰܬ ܒܰܢܒܺܝܽܘܬܳܐ ܥܰܠ ܒܪܳܐ܆ ܘܰܡܚܰܘܝܳܐ ܠܰܐܒܳܐ ܗܰܘ ܕܡܳܫܰܚ. ܘܠܰܒܪܐ ܗܰܘ ܕܡܶܬܡܫܰܚ܆ ܡܶܛܽܠ ܗܳܕܶܐ ܡܰܫ̣ܚܳܟ ܐܰ‌ܠܳܗܳܐ ܐܰ‌ܠܳܗܳܟ܆ ܡܶܫܚܳܐ ܕܰܪܘܳܙܳܐ ܝܰܬܺܝܪ ܡܶܢ ܡܫܰܘ̈ܬܦܰܝܟ^[83]. ܠܽܘܩܳܐ ܕܶܝܢ ܟܬܰܒ܆ ܕܟܰܕ ܩܳܡ ܝܶܫܽܘܥ ܒܰܟܢܽܘܫܬܳܐ ܕܝܽܗ̱ܘ̈ܕܳܝܶܐ܆ ܘܰܢܣܰܒ ܟܬܳܒܳܐ ܕܶܐܫܰܥܝܳܐ ܢܒܺܝܳܐ܆ ܩܪܳܐ ܠܩܰܕܺܝܡܽܘܬ ܡܶܠܬܳܐ ܗܳܝ ܕܰܥܠܰܘܗ̱ܝ ܕܰܡܫܰܘܕܥܳܐ ܗ̱ܘܳܬ. ܕܰܚܠܳܦ ܡܶܫܚܳܐ. ܒܪܽܘܚܳܐ ܡܫܺܝܚ ܗ̱ܘܳܐ. ܐܺܝܬ ܠܳܗ̇ ܕܶܝܢ ܠܡܶܠܬܳܐ. ܗܳܟܰܢܳܐ܆ ܟܰܕ ܐܰܝܟ ܕܡܶܢ ܦܰܪܨܽܘܦܳܐ ܕܰܡܫܺܝܚܳܐ ܡܶܬܐܰܡܪܳܐ. ܪܽܘܚܳܐ ܕܡܳܪܝܳܐ ܥܠܰܝ܆ ܡܶܛܽܠ ܗܳܝ ܕܡܰܫܚܰܢܝ^[84].

ܚܙܰܘ ܕܶܝܢ ܐܶܡܰܬܝ ܕܬܶܥܠܽܘܢ ܠܒܶܝܬ ܩܽܘܕܫܳܐ܆ ܘܬܶܚܙܽܘܢ ܠܰܡܥܺܝܢܳܐ ܗܳܝ ܡܰܠܝܰܬ ܪܬܺܝܬܳܐ ܘܰܕܚܺܝܠܬܳܐ ܕܝܽܘܪܕܢܳܢ. ܝܽܘܪܕܢܳܢ ܓܶܝܪ ܐܺܝܬܰܝܗܽܘܢ ܟܽܠ ܡܰܝ̈ܳܐ ܐܰܝܠܶܝܢ ܕܒܰܫܡܳܐ ܕܝܶܫܽܘܥ ܡܶܫܬܰܡܠܶܝܢ܆ ܗܰܘ ܕܗܽܘ ܩܰܕܡܳܝܳܐ ܒܝܽܘܪܕܢܳܢ ܐܰܪܡܺܝ ܠܰܢ ܫܽܘܪܳܝܳܐ ܕܰܥܡܳܕܳܐ ܐܰ‌ܠܳܗܳܝܳܐ܆ ܗܳܕܶܐ ܓܶܝܪ ܐܳܦ ܡܨܰܠܶܝܢ ܚ̱ܢܰܢ܆ ܕܬܶܬܺܝܗܶܒ ܠܗܽܘܢ ܠܡܰܝ̈ܳܐ ܛܰܝܒܽܘܬܳܐ ܕܝܽܘܪܕܢܳܢ܆ ܕܰܠܡܳܐ ܐ̱ܢܳܫ ܡܶܢܟܽܘܢ ܟܰܕ ܒܥܰܝ̈ܢܶܐ ܕܒܶܣܪܳܐ ܕܳܐܶܢ܆ ܫܚܺܝ̈ܡܶܐ ܢܶܚܫܽܘܒ ܐܶܢܽܘܢ ܠܡܰܝ̈ܳܐ. ܐܶܠܳܐ ܒܥܰܝ̈ܢܶܐ ܕܗܰܝܡܳܢܽܘܬܳܐ܆ ܕܰܡܠܶܐ ܡܶܢ ܢܽܘܪܳܐ ܐܰ‌ܠܳܗܳܝܬܳܐ ܘܰܡܕܰܟܝܳܢܺܝܬܳܐ܆ ܢܶܚܙܶܝܘܗ̱ܝ ܠܢܰܗܪܳܐ ܫܡܰܝܳܢܳܐ܆ ܘܰܕܡܶܢ ܠܥܶܠ ܪܳܕܶܐ. ܩܰܪܺܝܒ ܗ̱ܘ̣ ܓܶܝܪ܆ ܗܰܘ ܕܰܒܪܽܘܚܳܐ ܩܰܕܺܝܫܳܐ ܡܰܥܡܶܕ ܠܟܽܘܢ ܘܰܒܢܽܘܪܳܐ^[85]. ܟܶܢ̈ܫܶܐ ܕܦܳܠ̈ܚܶܐ ܠܳܐ ܦܰܓܪ̈ܳܢܶܐ ܟܪܺܝܟܺܝܢ ܠܳܗ̇ ܠܰܡܥܺܝܢܳܐ. ܪ̈ܶܒܘܳܬܳܐ ܕܡܰܠܰܐܟ̈ܶܐ. ܐܰ‌ܠ̈ܦܶܐ ܕܪ̈ܺܝܫܳܢܰܝ ܡܰܠܰܐܟ̈ܶܐ܆ ܘܚܰܝ̈ܠܰܘܳܬܳܐ ܐ̱ܚܪ̈ܳܢܶܐ܆ ܕܬܶܓ̈ܡܶܐ ܘܰܕܛܶܟܣ̈ܶܐ ܗܳܢܽܘܢ ܕܝܰܬܺܝܪ ܡܥܰܠܶܝܢ.

ܠܐ ܠܬܰܚܬ ܬܬܰܚܬܽܘܢܳܝܗ̱ܝ ܠܗܰܘܢܟܽܘܢ. ܗܳܠܶܝܢ ܕܰܠܥܶܠ ‌ܐܶܬܗܰܓܰܘ. ܘܟܰܕ ܗܳܟܰܢܳܐ ܬܶܗܘܽܘܢ ܐܺܝܬ ܠܟܽܘܢ ܒܬܰܪܥܺܝܬܳܐ ܘܰܒܗܰܝܡܳܢܽܘܬܳܐ ܡܫܺܝܚܳܐ ܗܰܘ ܫܶܡܫܳܐ ܕܙܰܕܺܝܩܽܘܬܳܐ ܢܶܒܪܰܩ ܒܟܽܘܢ. ܪܶܕܝܳܐ ܓܶܝܪ ܕܝܽܘܪܕܢܳܢ܆ ܡܰܝ̈ܳܐ ܕܚܰܝܠܳܐ ܘܕܳܐܣܝܽܘܬܳܐ ܐܺܝܬܰܝܗܽܘܢ. ܕܗܳܢܳܐ ܟܽܠܶܗ ܡܫܰܚܠܦܺܝܢ ܡܶܢ ܡܰܝ̈ܳܐ ܐ̱ܚܪ̈ܳܢܶܐ܆ ܟܡܳܐ ܕܡܰܝ̈ܳܐ ܡܰܚ̈ܝܳܢܶܐ ܘܰܚ̈ܠܰܝܳܐ ܘܡܶܫ̈ܬܰܬܝܳܢܶܐ܆ ܡܶܢ ܡܳܠܰܚܬܳܐ ܡܰܥܒܕܰܬ ܚܒܳܠܳܐ.

ܘܰܠܗܳܕܶܐ ܐܺܝܬ ܠܰܡܚܰܘܳܝܽܘ܆ ܕܡܢ ܟ̈ܬܳܒܶܐ ܟܳܗ̈ܢܳܝܶܐ ܡܶܢ ܩܕܺܝܡ ܩܰܕܡܰܬ ܐܶܬܟܰܪܙܰܬ. ܒܗܳܝ ܓܶܝܪ ܕܰܐܪܒܰܥ ܕܡܰܠ̈ܟܘܳܬܳܐ. ܟܬܺܝܒ܆ ܕܐ̱ܢܳܫ ܛܶܟܣܳܐ. ܐܰܘܟܺܝܬ ܪܺܝܫ ܚܰܝܠܳܐ ܕܡܰܠܟܳܐ ܕܣܽܘܪܺܝܰܐ ܕܰܫܡܶܗ ܢܰܥܡܳܢ܆ ܠܘܳܬ ܐܶ‌ܠܺܝܫܰܥ ܢܒܺܝܳܐ ܐܶܬܳܐ ܗ̱ܘܳܐ. ܕܰܒܓܰܪܒܳܐ ܡܰܢ ܡܟܰܬܰܡ ܗ̱ܘܳܐ ܦܰܓܪܶܗ. ܡܶܬܟܰܫܰܦ ܗ̱ܘܳܐ ܕܶܝܢ ܡܶܛܽܠ ܕܽܘܟܳܝܳܐ ܕܡܶܢܶܗ ܕܚܰܫܳܐ. ܗܰܘ ܕܟܰܕ ܐܶܬܦܩܰܕ ܡܶܢܶܗ ܕܙܰܕܺܝܩܳܐ ܟܰܕ ܐܶܡܰܪ ܠܶܗ܆ ܕܙܶܠ ܣܚܺܝ ܒܝܽܘܪܕܢܳܢ ܫܒܰܥ ܙܰܒ̈ܢܺܝܢ܆ ܘܢܶܦܢܶܐ ܒܶܣܪܳܟ ܥܠܰܝܟ ܘܬܶܬܕܰܟܶܐ܆ ܐܰܫܺܝܛܶܗ ܠܰܙܢܳܐ ܕܳܐܣܝܽܘܬܳܐ. ܘܟܰܕ ܐܶܬܡܠܺܝ ܚܶܡܬܳܐ ܫܰܢܺܝ. ܟܰܕ ܐܶܡܰܪ: ܗܳܐ ܐܶܢܳܐ ܐܳܡܰܪ ܗ̱ܘܺܝܬ܆ ܕܢܶܦܽܘܩ ܠܘܳܬܝ܆ ܘܢܶܩܪܶܐ ܥܠܰܝ ܒܰܫܡܳܐ ܕܡܳܪܝܳܐ ܐܰ‌ܠܳܗܶܗ܆ ܘܰܢܣܺܝܡ ܐܺܝܕܳܐ ܕܺܝܠܶܗ ܥܰܠ ܓܰܪܒܳܐ܆ ܘܰܢܟܰܦܪܶܗ ܡܶܢ ܒܶܣܪܳܐ ܕܺܝܠܝ. ܠܳܐ ܛܳܒܺܝܢ ܐܰܒܰܪܢܰܐ ܘܦܰܐܪܦܰܕ ܢܰܗܪ̈ܰܘܳܬܳܐ ܕܕܰܡܰܣܩܽܘܤ܆ ܝܰܬܺܝܪ ܡܶܢ ܟܽܠܗܽܘܢ ܡܰܝ̈ܳܐ ܕܺܐܝܣܪܳܐܶܝܠ܆ ܠܳܐ ܟܰܕ ܐ݀ܺܙܱܠ܆ ܐܶ݀ܣܚܶܐ ܒܗܽܘܢ ܘܶܐ݀ܬܕܰܟܶܐ܆ ܘܰܗܦܰܟ ܘܶܐܙܰܠ ܒܚܶܡܬܳܐ. ܘܰܩܪܶܒܘ ܥܰܒ̈ܕܶܐ ܕܺܝܠܶܗ. ܘܶܐܡܰܪܘ ܠܘܳܬܶܗ. ܐܰܒܳܐ: ܐܶ‌ܠܽܘ ܡܶܠܬܳܐ ܪܰܒܬܳܐ ܡܰܠܶܠ ܠܘܳܬܳܟ ܢܒܺܝܳܐ܆ ܠܳܐ ܥܳܒܶܕ ܗ̱ܘܰܝܬ܆ ܐܰܝܟ ܡܳܐ ܕܶܐܡܰܪ ܠܘܳܬܳܟ܆ ܣܚܺܝ ܘܶܐܬܕܰܟܳܐ. ܘܰܢܚܶܬ ܢܰܥܡܳܢ܆ ܘܰܥܡܰܕ ܒܝܽܘܪܕܢܳܢ ܫܒܰܥ ܙܰܒ̈ܢܺܝܢ. ܐܰܝܟ ܡܶܠܬܶܗ ܕܓܰܒܪܳܐ ܕܰܐ‌ܠܳܗܳܐ܆ ܘܰܦܢܳܐ ܒܶܣܪܳܐ ܕܷܺܝܠܶܗ ܥܠܰܘܗ̱ܝ ܐܰܝܟ ܕܛܰܠܝܳܐ ܙܥܽܘܪܳܐ ܘܶܐܬܕܰܟܺܝ^[86].

ܚܳܙܶܝܢ ܐܢ̱ܬܽܘܢ ܕܕܰܐܝܟ ܐܰܝܢܰܐ ܗ̄ܘ ܚܰܝܠܳܐ ܕܫܶܦ̈ܥܶܐ ܕܝܽܘܪܕܢܳܢ܆ ܘܰܕܗܳܢܽܘܢ ܕܡܰܣܒܪܺܝܢ ܥܠܰܝܗܽܘܢ ܕܰܫܘܶܝܢ ܐܶܢܽܘܢ ܠܡܰܝ̈ܳܐ ܗܳܢܽܘܢ ܕܫܰܪܟܳܐ܆ ܡܶܢ ܚܽܘܫܳܒܳܐ ܟܺܐܢܳܐ ܫܳܪܥܺܝܢ܆ ܘܛܳܥܶܝܢ ܡܶܢ ܫܪܳܪܳܐ܆ ܠܡܳܢܳܐ ܕܶܝܢ ܠܳܐ ܡܶܬܒܰܩܶܝܢ ܐܢ̱ܬܽܘܢ܆ ܕܰܐܝܟܰܢܳܐ ܗ̱ܘ ܬܽܘܢܳܝܳܗ̇ ܕܬܰܫܥܺܝܬܳܐ܆ ܛܽܘܦܣܳܐ ܐܺܝܬܰܘܗ̱ܝ ܗ̱ܘܳܐ ܕܐ̱ܪܳܙܳܐ ܗܰܘ ܕܰܥܬܺܝܕ ܗ̱ܘܳܐ܆ ܘܕܰܥܡܳܕܳܐ ܗܳܢܳܐ ܐܰ‌ܠܳܗܳܝܳܐ. ܩܰܕܡܳܝܰܬ ܡܰܢ ܓܶܝܪ܆ ܕܰܒܝܽܘܪܕܢܳܢ ܘܠܰܘ ܒܡܰܝ̈ܳܐ ܡܶܕܶܡ ܐ̱ܚܪ̈ܳܢܶܐ܆ ܦܳܩܶܕ ܗ̱ܘܳܐ ܢܒܺܝܳܐ ܠܡܶܣܚܳܐ. ܟܰܕ ܡܰܘܕܰܥ܆ ܕܗܳܠܶܝܢ ܡܰܝ̈ܳܐ ܒܰܠܚܽܘܕ ܐܺܝܬܰܝܗܽܘܢ ܕܽܘܟܳܝܳܐ܆ ܕܠܰܡܫܳܓܽܘ ܟܽܘܬܡܳܐ ܡܶܫܟܚܺܝܢ. ܡܰܢܽܘ ܕܶܝܢ ܗܳܟܰܢܐ ܐܺܝܬܰܘܗ̱ܝ ܠܳܐ ܝܰܠܺܝܦܳܐ ܕܰܟ̈ܬܳܒܶܐ ܟܳܗ̈ܢܳܝܶܐ܆ ܐܰܝܟܰܢܳܐ ܕܠܳܐ ܢܶܕܰܥ܆ ܕܠܰܘ ܡܶܛܽܠ ܡܶܕܶܡ ܐ̱ܚܪܺܝܢ ܐܺܝܬܰܘܗ̱ܝ ܩܰܕܺܝܫܳܐ ܗܽܘ ܝܽܘܪܕܢܳܢ܆ ܐܶܠܳܐ ܡܶܛܽܠ ܝܶܫܽܘܥ܆ ܫܡܳܐ ܗܰܘ ܣܰܓܺܝ ܡܝܰܩܪܳܐ ܘܦܳܪܽܘܩܳܝܳܐ. ܝܶܫܽܘܥ܆ ܗܰܘ ܕܳܐܦ ܥܳܡܶܕ ܒܶܗ ܒܝܰܘ̈ܡܳܬܳܐ ܐ̱ܚܪ̈ܳܝܶܐ܆ ܘܡܶܢ ܩܕܺܝܡ ܒܰܙܒܰܢ ܒܝܰܕ ܝܶܫܽܘܥ ܒܰܪ ܢܽܘܢ ܩܳܕܶܡ ܗ̱ܘܳܐ ܡܶܬܛܰܦܰܤ܆ ܘܰܒܡܰܥܒܰܪܬܳܐ ܕܩܺܒܽܘܬܳܐ ܠܪܶܕܝܶܗ ܥܰܟܰܪ ܘܰܐܗܦܶܟ ܠܒܶܣܬܪܳܐ܆ ܘܰܐܥܒܰܪ ܠܐܝܣܪܳܐܶܝܠ ‌ܐܰܝܟ ܕܰܒܝܰܕ ܐܰܪܥܳܐ ܝܰܒܺܝܫܬܳܐ^[87].

ܕܬܰܪܬܶܝܢ ܕܶܝܢ. ܠܡܶܬܒܰܩܳܝܽܘ ܙܳܕܶܩ܆ ܕܰܐܝܟܰܢܳܐ ܟܰܕ ܐܶ‌ܠܺܝܫܳܥ ܐܶܡܰܪ ܕܙܶܠ ܣܚܺܝ ܒܝܽܘܪܕܢܳܢ ܫܒܰܥ ܙܰܒ̈ܢܺܝܢ^[88]܆ ܠܳܐ ܟܰܬܰܪ ܟܬܳܒܳܐ ܗܰܘ ܕܰܐܝܟ ܕܒܰܫܪܳܪܳܐ ܢܦܺܝܚ ܡܶܢ ܐܰ‌ܠܳܗܳܐ ܒܠܶܟܣܺܝܤ ܗܳܝ ܕܰܣܚܳܬܳܐ܆ ܐܶܠܳܐ ܐܶܡܰܪ: ܘܰܢܚܶܬ ܢܰܥܡܳܢ ܘܰܥܡܰܕ ܒܝܽܘܪܕܢܳܢ ܫܒܰܥ ܙܰܒ̈ܢܺܝܢ ܟܰܕ ܡܰܙܥܶܩ ܓܰܠܝܳܐܺܝܬ܆ ܕܰܣܚܳܬܳܐ ܕܰܒܝܽܘܪܕܢܳܢ ܒܰܠܚܽܘܕܶܝܗ̇ ܐܺܝܬܶܝܗ̇ ܐܳܦ ܥܡܳܕܳܐ܆ ܘܳܐܦ ܕܢܰܥܡܳܢ ܕܶܝܢ ܩܰܕܡܳܝܳܐ ܗܰܘ ܕܡܶܢ ܥܰܡ̱ܡ̈ܶܐ ܗܰܘ ܣܽܘܪܝ̣ܳܝ̣ܳܐ܆ ܒܝܽܘܪܕܢܳܢ ܥܳܡܶܕ܆ ܘܡܶܢ ܓܰܪܒܳܐ ܡܶܬܕܰܟܶܐ܆ ܕܛܽܘܦܣܐ ܐܰܚܺܝܕ ܕܥܺܕܬܳܐ ܗܳܝ ܥܰܡܡܳܝܬܳܐ܆ ܗܳܝ ܕܡܶܢ ܩܕܺܝܡ ܡܓܰܪܒܳܐ ܗ̱ܘܳܬ ܘܛܰܡܳܐܐ ܗ̱ܘܳܬ܆ ܘܩܰܕܡܰܬ ܒܰܩܪܳܝܬܳܐ ܕܰܒܝܰܕ ܥܡܳܕܳܐ ܐܳܦ ܐܰܨܠܚܰܬ ܝܰܬܺܝܪ ܡܶܢ ܐܺܝܣܪܳܐܶܝܠ.

ܗܳܝ ܕܶܝܢ ܕܰܫܒܰܥ ܙܰܒ̈ܢܺܝܢ ܢܶܥܡܰܕ܆ ܠܡܰܚܰܬܬܳܐ ܡܫܰܡܠܰܝܬܳܐ ܕܪܽܘܚܳܐ ܩܰܕܺܝܫܳܐ ܩܳܕܡܳܐ ܗ̱ܘܳܬ ܡܫܰܘܕܥܳܐ܆ ܕܰܦܪܰܚ ܗ̱ܘܳܐ ܘܰܢܚܶܬ ܥܰܠ ܝܽܘܪܕܢܳܢ ܒܰܚܙܳܬܳܐ ܕܝܰܘܢܳܐ. ܒܝܰܕ ܫܰܒܥܳܐ ܓܶܝܪ ܫܽܘܘ̈ܕܳܥܶܐ܆ ܡܶܢܝܳܢܳܐ ܓܶܝܪ ܕܫܰܒܥܳܐ ܡܫܰܡܠܝܰܐ ܗ̄ܘ܆ ܠܰܡܫܰܡܠܝܽܘܬܳܐ ܕܪܽܘܚܳܐ ܚܰܘܺܝ ܐܶܫܰܥܝܳܐ ܢܒܺܝܳܐ ܟܰܕ ܐܳܡܰܪ: ܪܽܘܚܳܐ ܕܚܶܟܡܬܳܐ. ܘܰܕܣܽܘܟܳܠܳܐ܆ ܪܽܘܚܳܐ ܕܡܰܚܫܰܒܬܳܐ. ܘܰܕܓܰܢ̱ܒܳܪܽܘܬܳܐ^[89]܆ ܪܽܘܚܳܐ ܕܺܝܕܰܥܬܳܐ ܘܰܕܫܰܦܺܝܪܽܘܬ ܕܶܚܠܬܳܐ܆ ܪܽܘܚܳܐ ܕܕܶܚܠܬܳܐ ܕܰܐ‌ܠܗܳܐ^[90].

ܐܳܦ ܒܗܳܝ ܕܶܝܢ ܙܳܕܶܩ ܕܢܰ݀ܩܶܬ̣ ܗܰܘܢܰܢ ܐܰܝܟܰܢܳܐ ܕܢܺܐܠܰܦ܆ ܕܳܐܦ ܒܶܗ ܒܛܽܘܦܣܳܐ ܕܺܝܠܳܗ̇ ܕܬܰܫܥܺܝܬܳܐ ܕܰܟܬܳܒܳܐ܆ ܠܳܐ ܡܶܕܶܡ ܡܰܗܡܰܝ ܡܶܢ ܚܰܬܺܝܬܽܘܬܳܐ. ܐܶܠܳܐ ܐܺܝܬ ܠܡܶܚܙܳܐ ܠܰܫܪܳܪܳܐ ܓܰܠܝܳܐ ܘܢܰܗܺܝܪܳܐ܆ ܐܳܦ ܒܶܗ. ܠܳܐ ܓܶܝܪ ܐܶܡܰܪ ܒܰܠܚܽܘܕ ܡܶܛܽܠ ܢܰܥܡܳܢ܆ ܕܰܥܡܰܕ܆ ܐܶܠܳܐ ܐܰܘܣܶܦ܆ ܐܰܝܟ ܡܶܠܬܳܐ ܕܓܰܒܪܳܐ ܕܰܐ‌ܠܳܗܳܐ. ܒܡܶܠܬܳܐ ܓܶܝܪ ܕܗܰܘ ܕܰܡܫܰܡܶܫ ܠܰܥܡܳܕܳܐ ܘܰܡܟܰܗܶܢ ܘܰܡܨܰܠܶܐ܆ ܪܽܘܚܳܐ ܡܰܓܶܢ. ܡܰܝ̈ܳܐ ܡܰܘܠܕܺܝܢ. ܗܳܝ ܕܳܐܦ ܦܰܘܠܽܘܤ ܟܰܕ ܠܶܐܦܶܣܳܝ̈ܶܐ ܟܳܬܶܒ ܗ̱ܘܳܐ ܐܳܡܰܪ ܡܶܛܽܠ ܡܫܺܝܚܳܐ܆ ܘܕܰܟܺܝ ܒܰܣܚܳܬܳܐ ܕܡܰܝ̈ܳܐ ܒܡܶܠܬܳܐ^[91].

ܒܪܰܡ ܐܳܦܠܳܐ ܗܳܕܶܐ܆ ܗܳܝ ܕܰܥܬܺܝܕ ܐ̱ܢܳܐ ܠܡܺܐܡܰܪ܆ ܫܳܘܝܳܐ ܕܬܶܬܒܣܶܐ܆ ܐܰܘ ܠܳܐ ܬܡܺܝܗܬܳܐ ܐܺܝܬܶܝܗ̇܆ ܐܰܘ ܕܠܰܘ ܣܰܓܺܝ ܦܰܐܝܰܬ ܠܰܐܠܳܗܳܐ. ܐܳܦ ܓܶܝܪ ܙܳܕܶܩ ܗ̱ܘܳܐ ܕܢܺܐܡܰܪ܆ ܐܶܢܗܽܘ ܕܠܰܘ ܐ̱ܪܳܙܳܐ ܐܺܝܬܰܘܗ̱ܝ ܗ̱ܘܳܐ ܗܰܘ ܕܡܶܬܬܰܘܕܰܥ ܗ̱ܘܳܐ. ܕܟܰܕ ܣܚܳܐ ܗܰܘ ܣܽܘܪܝ̣ܳܝ̣ܳܐ ܗܘ̣ܳܐ ܚܠܺܝܡܳܐ^[92]. ܐܶܠܳܐ ܡܳܢܳܐ ܐܳܡܰܪ. ܘܰܦܢܳܐ ܒܶܣܪܶܗ ܥܠܰܘܗ̱ܝ ܐܰܝܟ ܕܛܰܠܝܳܐ ܙܥܽܘܪܳܐ. ܗܳܕܶܐ ܕܶܝܢ ܐܺܝܬܶܝܗ̇܆ ܗܳܝ ܕܗܽܘ ܥܡܳܕܳܐ ܐܰ‌ܠܳܗܳܝܳܐ ܘܫܰܪܺܝܪܳܐ ܡܶܫܬܰܘܕܶܐ. ܕܠܰܘ ܒܰܠܚܽܘܕ ܕܽܘܟܳܝܳܐ ܕܰܚ̈ܛܳܗܶܐ ܕܒܰܕܡܽܘܬ ܟܽܘ̈ܬܡܳܬܳܐ ܕܓܰܪܒܳܐ ܐܺܝܬܰܝܗܽܘܢ ܡܫܰܟܶܢ܆ ܐܶܠܳܐ ܐܳܦ ܛܰܠܝܽܘܬܳܐ ܘܰܥܠܰܝܡܽܘܬܳܐ ܪܽܘܚܳܢܳܝܬܳܐ܆ ܠܘܳܬ ܗܳܝ ܕܢܶܬܓܰܒܰܪ ܠܽܘܩܒܰܠ ܪ̈ܽܘܚܶܐ ܗܳܠܶܝܢ ܕܒܺܝܫܽܘܬܳܐ.

ܡܶܛܽܠ ܗܳܕܶܐ ܓܶܝܪ ܐܳܦ ܣܚܳܬܳܐ ܕܡܰܘܠܳܕܳܐ ܕܡܶܢ ܕܪܺܝܫ^[93] ܡܫܰܡܰܗ܆ ܟܰܕ ܛܠܳܝ̈ܶܐ ܚ̈ܰܕܬܶܐ ܘܺܝܠܺܝ̈ܕܰܝ ܗܳܫܳܐ ܚܠܳܦ ܣܳܒ̈ܶܐ ܥܳܒܶܕ ܠܰܢ. ܗܳܟܰܢܳܐ ܟܺܝܬ ܐܳܦ ܗܽܘ ܫܠܺܝܚܳܐ ܐܳܡܰܪ: ܕܥܺܕܬܳܐ ܗܳܝ ܕܶܐܬܢܰܨܚܰܬ ܡܶܢ ܡܰܥܡܽܘܕܺܝܬܳܐ. ܠܳܐ ܐܺܝܬ ܒܳܗ̇ ܟܽܘܬܡܳܐ ܐܰܘ ܩܶܡܛܳܐ^[94]. ܟܰܕ ܒܝܰܕ ܡܰܢ ܟܽܘܬܡܳܐ ܡܰܘܕܰܥ܆ ܫܕܳܝܳܐ ܕܰܚܛܺܝܬܳܐ. ܒܝܰܕ ܩܶܡܛܳܐ ܕܶܝܢ܆ ܠܓܽܘܪܳܕܳܐ ܘܚܽܘܪܳܪܳܐ ܕܡܶܢ ܣܰܝܒܽܘܬܳܐ܆ ܘܰܠܩܰܘܡܬܳܐ ܕܛܰܠܝܽܘܬܳܐ. ܫܽܘܘܕܳܥܳܐ ܓܶܝܪ ܕܣܰܝܒܽܘܬܳܐ ܐܺܝܬܰܘܗ̱ܝ ܩܶܡܛܳܐ. ܟܰܕ ܫܳܠܚܺܝܢ ܚ̱ܢܰܢ ܕܶܝܢ ܠܒܰܪܢܳܫܳܐ ܗܰܘ ܥܰܬܺܝܩܳܐ܆ ܠܳܒܫܺܝܢܰܢ ܗܰܘ ܚܰܕܬܳܐ^[95]܆ ܐܰܝܟܰܢܳܐ ܕܳܐܡܰܪ ܟܬܳܒܳܐ ܗܰܘ ܟܳܗܢܳܝܳܐ.

ܥܡܳܕܳܐ ܕܶܝܢ. ܡܟܰܢܝܳܐ ܣܚܳܬܳܐ ܗܳܕܶܐ ܐ̱ܪܳܙܳܢܳܝܬܳܐ܆ ܡܶܛܽܠ ܕܥܰܡ ܡܫܺܝܚܳܐ ܐܰܟܚܕܳܐ ܡܶܬܩܰܒܪܺܝܢ ܚ̱ܢܰܢ܆ ܟܰܕ ܡܶܫܬܰܘܬܦܺܝܢܰܢ ܠܶܗ ܒܡܰܘܬܳܐ ܬܠܺܝܬܳܝ ܝܰܘ̈ܡܶܐ܆ ܒܝܰܕ ܓܡܳܥܬܳܐ ܬܠܺܝܬܳܝܬܳܐ ܕܰܒܡܰܝ̈ܳܐ. ܗܽܘ ܓܶܝܪ ܗܳܟܰܢܳܐ ܠܡܰܘܬܳܐ ܒܰܝܬܳܝܳܐ ܗܰܘ ܕܺܝܠܶܗ ܟܰܢܺܝ܆ ܟܰܕ ܐܶܡܰܪ ܠܘܳܬ ܐ̱ܢܳܫܺܝ̈ܢ ܡܶܢ ܬܰܠܡܺܝܕܰܘ̈ܗ̱ܝ. ܡܶܫܟܚܺܝܢ ܐܢ̱ܬܽܘܢ ܠܡܶܫܬܳܐ ܟܳܣܳܐ ܗܰܘ ܕܶܐܢܳܐ ܥܬܺܝܕ ܐ̱ܢܳܐ ܠܡܶܫܬܳܐ܆ ܐܰܘ ܡܰܥܡܽܘܕܺܝܬܳܐ ܗܳܝ ܕܶܐܢܳܐ ܥܳܡܶܕ ܐ̱ܢܳܐ ܬܶܥܡܕܽܘܢ^[96]܆ ܘܛܳܒ ܟܺܐܢܳܐܺܝܬ. ܟܳܣܳܐ ܡܰܢ܆ ܡܶܛܽܠ ܗܳܝ ܕܢܶܣܝܳܢܳܐ ܕܡܰܘܬܳܐ܆ ܠܰܘ ܕܰܥܨܳܬܳܐ ܘܕܰܩܛܺܝܪܳܐ ܐܺܝܬܰܘܗ̱ܝ ܗ̱ܘܳܐ ܠܶܗ܆ ܐܶܠܳܐ ܗܰܢܺܝܐܳܐ ܘܰܕܨܶܒܝܳܢܳܐ ܕܺܝܠܶܗ. ܡܰܥܡܽܘܕܺܝܬܳܐ ܕܶܝܢ܆ ܡܶܛܽܠ ܗܳܝ ܕܠܳܐ ܩܰܘܺܝ ܒܰܫܝܽܘܠ܆ ܐܶܠܳܐ ܡܶܚܕܳܐ ܩܳܡ܆ ܐܰܝܟ ܗܳܢܽܘܢ ܕܰܒܥܽܘܡܩܳܐ ܕܡܰܝ̈ܳܐ ܥܳܡܕܺܝܢ܆ ܘܡܶܚܕܳܐ ܒܰܪܫܳܥܬܶܗ ܓܳܕܶܝܢ ܘܛܳܝܦܺܝܢ܆ ܤܛܰܪ ܡܶܢ ܥܰܡܠܳܐ ܡܶܕܶܡ. ܟܰܕ ܡܶܬܩܰܒܪܺܝܢܰܢ ܕܶܝܢ ܐܰܟܚܕܳܐ ܥܰܡܶܗ ܒܰܓܡܳܥܬܳܐ ܬܠܺܝܬܳܝܬܳܐ܆ ܘܡܶܫܬܰܓܢܶܝܢ ܚ̱ܢܰܢ ܒܰܓܢܽܘܢܳܐ ܒܰܕܡܽܘܬܳܐ ܕܡܰܘܬܶܗ ܡܰܥܒܶܕ ܚܰܝ̈ܶܐ܆ ܡܶܫܬܰܘܬܦܺܝܢܰܢ ܠܶܗ ܐܳܦ ܒܰܩܝܳܡܬܳܐ. ܐܶܢ ܓܶܝܪ ܫܰܘ̈ܝ̣ܰܝ̣ ܒܢܶܨܒܬܳܐ ܗܘ̣ܰܝܢ ܠܶܗ ܒܰܕܡܽܘܬܳܐ ܕܡܰܘܬܶܗ ܐܳܡܰܪ ܦܰܘܠܽܘܤ܆ ܐܶܠܳܐ ܐܳܦ ܕܰܩܝܳܡܬܶܗ ܢܶܗܘܶܐ^[97].

ܪܳܗܛܳܐ ܕܶܝܢ ܐܰܟܚܕܳܐ܆ ܘܫܰܘܝܰܬ ܒܡܶܢܝܳܢܳܐ ܐܺܝܬܶܝܗ̇ ܠܡܺܝܬܽܘܬܳܐ ܬܠܺܝܬܳܝܰܬ ܝܰܘ̈ܡܶܐ܆ ܐܳܦ ܗܳܝ ܩܪܳܝܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܗܳܝ ܕܒܳܗ̇ ܡܶܫܬܰܡܠܶܐ ܗܽܘ ܥܡܳܕܳܐ. ܒܰܫܡܳܐ ܓܶܝܪ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ ܥܳܡܕܺܝܢ ܚ̱ܢܰܢ܆ ܕܰܚܕܳܐ ܐܰ‌ܠܳܗܽܘܬܳܐ ܕܒܰܬܠܺܝܬܳܝܽܘܬܳܐ. ܕܠܶܗ ܫܽܘܒܚܳܐ ܠܥܳܠܡܺܝܢ ܐܰܡܺܝܢ‌܀

ܫܠܡ ܡܺܐܡܪܐ ܕܐܪܒܥܝܢ ܘܬܪܝܢ.

ܕܢܶܬܬܰܪܣܽܘܢ[1]

ܕܺܐܝܬ ܠܗܶܝܢ[2]

ܕܺܐܝܬܰܝܗܽܘܢ[3]

ܝܘܚܢܢ. 3: 8 [4]

ܘܡܰܙܗܰܪ[5]

ܠܐ ܡܶܬܬܚܺܝܪܳܢܐ[6]

ܡܦܩܢܐ. 34: 33 ـ 35 [7]

ܐ. ܩܘܪ̈ܝܢܬܝܐ. 14: 9 [8]

ܓܠܛܝ̈ܐ. 4: 20 [9]

ܪܳܡܶܙ[10]

ܚܙܩܝܐܝܠ. 42: 14 [11]

[12]ܒܶܐܟܣܳܪ̈ܶܐ.  ܒܰܐܪܥܳܐ.  Plattform

ܚܙܩܝܐܝܠ. 44: 19 [13]

ܡܦܩܢܐ. 19: 21 ـ 22 [14]

ܢܕܪܟܘܢ[15]

ܐ. ܩܘܪ̈ܝܢܬܝܐ. 14: 37 ـ 38 [16]

ܒ. ܛܝܡܬܐܘܣ. 1: 7 [17]

ܠܘܩܐ. 1: 2 [18]

ܕܒܺܐܝܕܳܐ ܒܺܐܝܕܳܐ[19]

ܐܦܣ̈ܝܐ. 3: 9   ܐܦ ܪ̈ܗܘܡܝܐ. 16: 25 [20]

ܝܘܚܢܢ. 1: 1 [21]

ܐ. ܩܘܪ̈ܝܢܬܝܐ. 1: 24 [22]

ܥܒܪ̈ܝܐ. 1: 2 ـ 3 [23]

ܐܶܡܰܬܝ[24]

 ܡܟܢܝ  ܐܦ ܥܒܪ̈ܝܐ. 1: 3 [25]

 ܒܰܩܢܽܘܡܶܗ[26]

ܝܘܚܢܢ. 10: 38 [27]

ܝܘܚܢܢ. 1: 18 [28]

ܐ. ܝܘܚܢܢ. 1: 1 [29]

ܝܘܚܢܢ. 1: 1 [30]

ܬܬܛܒܒ[31]

ܝܘܚܢܢ. 15: 26 [32]

ܩܳܪܶܐ[33]

ܣܶܦܪܐ ܕܒܪܝܬܐ. 41: 16 [34]

ܣܶܦܪܐ ܕܒܪܝܬܐ. 41: 38 [35]

ܐܝܘܒ. 33: 4 [36]

[37]ܬܰܚܘܺܝܬܳܐ ܗܳܝ ܕܣܳܡ ܡܰܠܦܳܢܳܐ ܡܶܢ ܐܶܘܰܢܓܶܠܝܘܢ܆ ܒܰܫܡܳܐ ܗܰܘ ܕܪܽܘܚܳܐ ܕܠܐ ܕܶܟܪܳܢܳܝܳܐ ܘܠܐ ܢܶܩܒܬܳܢܳܝܳܐ ܐܺܝܬܰܘܗ̱ܝ܆ ܡܫܰܡܗܳܐ ܠܶܗ ܠܰܐܒܳܐ܆ ܡܰܐܠܽܘܢ ܕܶܝܢ ܐܳܦ ܠܟܽܠܳܗ̇ ܬܠܺܝܬܳܝܽܘܬܳܐ. ܐܶܢ ܗܳܟܺܝܠ ‌ܐܳܡܰܪ. ܠܰܘ ܡܶܛܽܠ ܗܳܕܶܐ ܙܳܥܪܳܐ ܐܰ‌ܠܳܗܽܘܬܳܐ ܕܰܬܠܺܝܬܳܝܽܘܬܳܐ: ܡܶܛܽܠ ܟܺܝܬ ܕܳܐܦ ܗܺܝ ܐܶܬܩܰܪܝܰܬ ܒܰܫܡܳܐ ܗܰܘ ܕܺܐܝܬܰܘܗ̱ܝ ܘܕܐܛܐܪܘܣ܆ ܐܳܦܠܐ ܡܳܕܶܝܢ ܐܰ‌ܠܳܗܽܘܬܳܐ ܕܪܽܘܚܐ ܬܶܙܥܰܪ ܒܥܰܝ̈ܢܰܝܟ܆ ܡܶܛܽܠ ܕܗܳܟܰܢܳܐ ܡܶܬܒܪܶܐ.

ܝܘܚܢܢ. 4: 24 [38]

ܠܰܢ[39]

ܝܘܚܢܢ. 1: 1 [40]

ܝܘܚܢܢ. 1: 18 [41]

ܘܫܰܪܺܝܪܽܘܬܳܐ[42]

ܡܬܝ. 11: 27 [43]

ܐ. ܩܘܪ̈ܝܢܬܝܐ. 2: 10 [44]

ܣܶܦܪܐ ܕܚܟܡܬܐ. 16: 20 [45]

ܝܥܩܘܒ. 1: 17 [46]

ܡܦܩܢܐ. 4: 3 [47]

ܡܦܩܢܐ. 7: 20 [48]

ܗܽܘܫܳܥ. 12: 11 [49]

ܚܙܩܝܐܝܠ. 2: 1 [50]

ܦܝܠܝܦܣ̈ܝܐ. 2: 7 [51]

ܕܰܒܦܽܘܐܝ̈ܛܘܳܬܳܐ[52]

ܦܝܠܝܦܣ̈ܝܐ. 2: 6 ـ 7 [53]

ܡܬܝ. 17: 2 [54]

ܡܬܝ. 16: 22 [55]

ܠܘܩܐ. 2: 6 [56]

ܠܘܩܐ. 24: 39 [57]

ܡܶܬܚܙܘܙܝܢܘܬܐ[58]

 ܐܰܝܟܰܢ ܕܗܽܘ[59]

[60]ܣܝܡܬܐ ܕܬܐܘܡܐ ܐܘܕܘ ܦܐܬܐ 253 ܥܩ̣ܳܐ. ܢܶܥܩܶܐ. ܥܩܳܝܳܐ. ܡܫܰܢܝܳܢܺܝܬܳܐ. ܗܳܢܰܘ ܕܶܝܢ. ܐܰܗܦܶܟ ܡܶܕܶܡ ܠܒܶܣܬܪܶܗ. ܐܰܪܡܝܶܗ ܠܰܐܪܥܳܐ ܥܰܠ ܚܰܨܶܗ. ܐܰܟܡܳܐ ܕܟܰܕ ܕܳܡܶܟ ܥܰܠ ܚܰܨܶܗ. ܗܳܟܰܢ ܥܳܩܺܝܢܰܢ ܨܶܒ̈ܥܳܬܳܐ ܟܰܕ ܠܘܳܬ ܚܰܨܳܐ ܕܱܺܐܝܕܳܐ ܦܳܬܠܺܝܢܰܢ ܠܗܶܝܢ.

ܕܡܳܠܶܐ ܠܟܽܠ[61]

ܡܙܡܘܪ̈ܐ. 95: 4 [62]

ܣܶܦܪܐ ܕܒܪܝܬܐ. 3: 19 [63]

ܐܓܪܬܐ ܕܬܪܬܝܢ ܕܒܰܪܽܘܟ. 3: 38 [64]

ܐ. ܦܛܪܘܣ. 2: 22 ܐܦ ܐܫܥܝܐ. 53: 9 [65]

ܥܒܪ̈ܝܐ. 2: 14 ـ 15 [66]

[67]ܡܶܛܽܠ ܗܳܢܳܐ ܐܳܡܰܪ ܡܰܠܦܳܢܳܐ ܕܰܢܦܰܠ ܡܰܘܬܳܐ ܘܶܐܙܕܢܩ ܠܒܶܣܬܪܶܗ: ܡܶܢ ܗܳܝ ܕܢܶܓܫܘܦ ܒܠܳܐ ܚܳܫܽܘܫܽܘܬܳܗ̇ ܕܰܐ‌ܠܳܗܽܘܬܳܐ܆ ܐܰܝܟܰܢܳܐ ܕܢܳܦܶܠ ܗܰܘ ܕܟܰܕ ܢܳܓܶܕ ܘܡܶܬܬܠܐ ܒܚܰܒܠܳܐ܆ ܘܟܰܕ ܡܶܬܦܣܶܩ ܡܶܣܬܚܦ ܠܒܶܣܬܪܶܗ.

 ܣܺܝܡ ܒܳܠܳܟ[68]

ܕܕܰܠܡܳܐ ܢܶܚܰܫ[69]

 ܕܗܝ ܢܽܘܪܳܐ ܩܢܽܘܡܳܗ̇ ܗܳܢܰܘ ܕܶܝܢ܆ ܗܽܘ ܗܰܘ ܡܳܐ ܕܺܐܝܬܰܘܗ̱ܝ[70]

ܙܰܗܪܳܐ[71]

ܡܬܝ. 27: 52 ـ 53 [72]

ܐܫܥܝܐ. 49: 9 [73]

ܝܘܚܢܢ. 19: 37   ܐܦ ܙܟܪܝܐ. 12: 10 [74]

ܐܰ‌ܠܳܗܳܐ[75]

ܡܙܡܘܪ̈ܐ. 2: 3 [76]

ܪ̈ܗܘܡܝܐ. 13: 12 ـ 13 [77]

ܪ̈ܗܘܡܝܐ. 13: 14 [78]

ܝܘܚܢܢ. 14: 6 [79]

ܘܢܦܪܘܣ[80]

ܡܬܝ. 7: 7 [81]

ܩܕܡܬ[82]

ܡܙܡܘܪ̈ܐ. 45: 8   ܐܦ ܥܒܪ̈ܝܐ. 1: 9 [83]

ܠܘܩܐ. 4: 18 [84]

ܡܬܝ. 3: 11   ܐܦ ܠܘܩܐ. 3: 16 [85]

ܒ. ܕܡܠܟ̈ܐ. 5: 11 ـ 14 [86]

ܝܫܘܥ ܒܪ ܢܘܢ. 3: 14 [87]

ܒ. ܕܡܠܟ̈ܐ. 5: 14 [88]

ܘܰܕܚܰܝܠܳܐ[89]

ܐܫܥܝܐ. 11: 2 [90]

ܐܦܣ̈ܝܐ. 5: 26 [91]

ܒ. ܕܡܠܟ̈ܐ. 5: 14 [92]

ܛܝܛܘܣ. 3: 5 [93]

ܐܦܣ̈ܝܐ. 5: 27 [94]

ܩܘܠܣ̈ܝܐ. 3: 9 ـ 10 [95]

ܡܬܝ. 20: 22   ܐܦ ܡܪܩܘܣ. 10: 39 [96]

ܪ̈ܗܘܡܝܐ. 6: 5 [97]