ܡܺܐܡܪܳܐ ܕܰܐܪܒܥܺܝܢ ܘܚܰܕ

ܥܰܠ ‌ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ܆ ܘܰܬܪܶܝܢ܆ ܐܶܬܶܐܡܰܪ ܕܶܝܢ܆ ܟܰܕ ܡܺܐܡܪܳܐ ܗܰܘ ܕܶܐܬܶܐܡܰܪ܆ ܒܫܰܢ̱ܬܳܐ ܗܳܝ ܕܥܶܒܪܰܬ ܐܶܬܩܪܺܝ ܐܳܦ ܗܳܫܳܐ ܠܥܰܡܳܐ܆ ܗܳܕܶܐ ܓܶܝܪ ܫܰܐܶܠܘ܆ ܐܶܡܰܬܝ ܕܡܶܬܶܐܡܰܪ ܗ̱ܘܳܐ.

41:܆ ܥܰܡܽܘܤ ܗܰܘ ܬܡܺܝܗܳܐ ܘܪܰܒܳܐ ܒܰܢ̈ܒܺܝܶܐ܆ ܟܰܕ ܠܘܳܬ ܡܽܘܟܳܟܳܐ ܘܰܡܬܰܚܬܳܝܽܘܬܳܐ ܡܶܬܩܦܶܤ ܗ̱ܘܳܐ܆ ܘܰܡܡܰܫܰܚ ܗ̱ܘܳܐ ܠܰܙܥܽܘܪܽܘܬܳܐ ܕܺܝܠܶܗ ܠܽܘܩܒܰܠ ܩܪܳܝܬܳܐ ܪܰܒܬܳܐ ܘܰܡܥܰܠܰܝܬܳܐ ܕܰܐ‌ܠܳܗܳܐ܆ ܘܥܳܪܶܩ ܗ̱ܘܳܐ ܡܶܢ ܐܺܝܩܳܪܳܐ ܘܫܽܘܠܛܳܢܳܐ ܕܰܢܒܺܝܽܘܬܳܐ. ܗܳܢܳܐ ܟܽܠܶܗ܆ ܐܰܝܟܰܢܳܐ ܟܺܝܬ ܕܳܐܦ ܢܺܐܡܰܪ ܗ̱ܘܳܐ ܠܚܰܪܬܳܐ ܕܠܳܐ ܐܺܝܬܰܝ ܗ̱ܘܺܝܬ ܢܒܺܝܳܐ ܐܶܢܳܐ܆ ܘܳܐܦܠܳܐ ܒܪܳܐ ܕܰܢܒܺܝܳܐ ܐܺܝܬܰܝ ܐܶܢܳܐ܆ ܘܰܕܠܳܐ ܒܨܶܒܝܳܢܶܗ ܠܘܳܬ ܬܶܫܡܶܫܬܳܐ ܕܰܐܝܟ ܗܳܕܶܐ ܡܶܬܬܰܝܬܶܐ ܗ̱ܘܳܐ܆ ܘܣܳܒܰܪ ܗ̱ܘܳܐ. ܐܰܝܟ ܗܰܘ ܕܶܐ‌ܠܽܘ ܠܩܳܠ ܫܺܝܦܽܘܪܳܐ ܫܳܡܰܥ ܗ̱ܘܳܐ܆ ܟܰܕ ܡܰܕܚܶܠ ܗ̱ܘܳܐ ܘܰܡܙܺܝܥ ܠܶܗ ܡܰܫܒܳܐ ܕܡܶܢ ܠܥܶܠ ܕܪܽܘܚܳܐ܆ ܐܰܘ ܠܰܐܪܝܳܐ ܕܓܳܣܰܪ ܗ̱ܘܳܐ ܡܰܠܟܳܐܺܝܬ ܐܰܟܚܕܳܐ ܘܰܕܚܺܝܠܳܐܺܝܬ܆ ܘܰܪܬܺܝܬܳܐ ܡܰܥܒܶܕ ܗ̱ܘܳܐ ܒܗܳܢܽܘܢ ܕܫܳܡܥܺܝܢ. ܐܳܡܰܪ ܗ̱ܘܳܐ: ܐܶܢ ܬܶܩܥܶܐ ܩܰܪܢܳܐ ܒܰܡܕܺܝܢ̱ܬܳܐ ܘܥܰܡܳܐ ܠܳܐ ܢܙܽܘܥ. ܐܰܪܝܳܐ ܢܶܓܣܽܘܪ. ܘܡܰܢܽܘ ܠܳܐ ܢܶܕܚܰܠ. ܡܳܪܝܳܐ ܐܰ‌ܠܳܗܳܐ ܡܰܠܶܠ܆ ܘܡܰܢܽܘ ܠܳܐ ܢܶܬܢܰܒܶܐ^[1].

ܘܳܐܦ ܐܶܢܳܐ ܗܳܟܺܝܠ. ܕܗܳܫܳܐ ܠܡܶܫܬܰܩ ܨܳܒܶܐ ܗ̱ܘܺܝܬ܆ ܟܰܕ ܡܶܕܶܡ ܕܕܳܡܶܐ ܠܰܕܗܰܘ ܢܒܺܝܳܐ ܚܶܫܶܬ. ܐܳܡܰܪ: ܟܰܕ ܐܰܪܒܥܺܝܢ ܣܳܗ̈ܕܶܐ. ܡܢܰܨܚܺܝܢ ܘܰܡܗܰܕܪܺܝܢ ܠܶܗ ܠܚܰܓܳܐ ܗܳܢܳܐ ܕܩܰܪܺܝܒ܆ ܡܰܢܽܘ ܢܶܫܬܽܘܩ. ܡܰܢܽܘ ܕܶܝܢ ܕܠܳܐ ܢܕܰܝܶܨ^[2] ܪܽܘܚܳܢܳܐܺܝܬ܆ ܟܰܕ ܒܢܶܨܚܳܢ̈ܶܐ ܘܰܓܢ̱ܒܳܪ̈ܘܳܬܳܐ ܕܗܳܢܽܘܢ ܡܶܬܬܰܒܪܰܩ.

ܐܳܦ ܓܶܝܪ ܐܰܟܙܢܳܐ ܕܟܰܕ ܕܽܘܒܳܪܳܐ ܘܚܰܝ̈ܶܐ ܗܳܢܽܘܢ ܕܒܰܒܣܰܪ ܚܳܐܶܝܢ ܗ̱ܘܰܘ ܘܡܶܬܕܰܒܪܺܝܢ ܗܶܢܽܘܢ ܦܳܠ̈ܚܶܐ܆ ܘܰܒܟܽܘܠܳܝܽܘܬ ܙܰܝܢܳܐ ܡܶܨܛܰܒܬܺܝܢ ܗ̱ܘܰܘ܆ ܩܳܕܡܺܝܢ ܗ̱ܘܰܘ ܫܳܘܪܺܝܢ ܩܕܳܡ ܣܶܕܪܳܐ ܕܰܩܪܳܒܳܐ܆ ܠܒܺܝܒܽܘܬܳܐ ܥܳܒܕܺܝܢ ܗ̱ܘܰܘ ܒܰܒ̈ܢܰܝ ܦܳܠܚܽܘܬܗܽܘܢ ܗܳܢܽܘܢ ܕܳܚܽܘ̈ܠܶܐ܆ ܟܰܕ ܚܶܙܘܳܐ ܡܶܕܶܡ ܚܰܝܠܬܳܢܳܐ ܘܓܰܢ̱ܒܳܪܳܐ ܐܺܝܬܰܝܗܽܘܢ ܗ̱ܘܰܘ ܬܰܚܘܺܝܬܳܐ. ܒܶܗ ܟܰܕ ܒܶܗ ܒܰܙܢܳܐ ܐܳܦ ܗܳܫܳܐ܆ ܟܰܕ ܐܰܝܟ ܕܥܰܠ ܕܰܦܳܐ ܡܶܬܚܙܶܝܢ ܕܰܐܓܽܘܢܳܐ ܫܰܦܺܝܪܳܐ ܕܣܳܗܕܽܘܬܳܐ ܡܶܬܟܰܬܫܺܝܢ܆ ܐܳܦ ܠܰܡ̈ܚܺܝܠܶܐ ܦܝܳܣܐ ܥܳܒܕܺܝܢ ܕܰܐܟܚܕܳܐ ܢܶܬܟܰܬܫܽܘܢ ܒܙܰܒ̈ܢܶܐ ܕܕܳܡܶܝܢ ܠܕܺܝܠܗܽܘܢ܆ ܐܳܦ ܠܠܳܐ ܡܠܺܝ̈ܠܶܐ ܐܰܟܙܢܳܐ ܕܶܐܢܳܐ ܡܩܺܝܡܺܝܢ ܠܘܳܬ ܩܽܘܠܳܣܳܐ ܕܺܝܠܗܽܘܢ. ܘܡܶܣܬܰܒܪܺܝܢ ܠܺܝ ܕܳܐܡܪܺܝܢ: ܕܠܳܐ ܬܶܣܒܰܪ ܠܳܟ ܐܳܘ ܡܝܰܬܪܳܐ܆ ܕܟܽܠܳܗ̇ ܚܰܘܒܬܳܐ ܕܩܽܘ̈ܠܳܣܶܐ ܕܺܝܠܰܢ ܦܪܺܝܥ^[3] ܠܳܟ܆ ܡܶܛܽܠ ܟܺܝܬ ܕܡܺܐܡܪܳܐ ܚܰܕ ܥܡܺܝܠ ܠܳܟ ܥܠܰܝܢ. ܠܳܐ ܥܕܰܟܺܝܠ ܥܒܺܝܕ ܠܳܟ ܐܰܪܒܥܺܝܢ ܩܽܘ̈ܠܳܣܶܐ. ܠܰܘ ܓܶܝܪ ܡܶܛܽܠ ܕܓܰܘܳܢܳܐܺܝܬ ܐܶܬܟܰܬܰܫܢܰܢ ܠܰܐܓܽܘܢܳܐ ܟܳܗܢܳܝܳܐ ܕܣܳܗܕܽܘܬܳܐ ܬܕܽܘܢ ܕܰܚܕܳܐ ܐܺܝܬܶܝܗ̇ ܣܳܗܕܽܘܬܳܐ܆ ܘܠܰܘ ܣܰܓܺܝ̈ܳܐܬܳܐ. ܗܽܘ ܤܛܰܐܕܺܝܽܘܢ ܕܺܝܠܶܗ ܕܬܰܟܬܽܘܫܳܐ ܐܺܝܬܰܘܗ̱ܝ ܗ̱ܘܳܐ ܒܰܠܚܽܘܕ ܓܰܘܳܢܳܝܳܐ ܘܗܳܝ ܕܡܶܛܽܠ ܡܫܺܝܚܳܐ ܢܶܓܒܶܐ ܠܡܶܚܰܫ.

ܟܽܠܚܰܕ ܡܶܢܰܢ ܕܶܝܢ܆ ܡܶܬܚܰܘܝܳܢܽܘܬܳܐ ܕܺܝܠܳܢܳܝܬܳܐ ܥܒܰܕ ܕܰܡܚܰܡܣܢܳܢܽܘܬܶܗ܆ ܘܠܰܘ ܐܰܟܚܕܳܐ ܐܶܫܬܰܘܬܰܦܢܰܢ ܠܰܚ̈ܕܳܕܶܐ ܒܗܳܠܶܝܢ ܕܡܰܟ̈ܶܐܒܳܢ ܗ̱ܘܰܝ̈. ܘܳܐܦܠܳܐ ܡܶܛܽܠ ܗܳܕܶܐ ܒܨܺܝܪܳܐܺܝܬ ܚܰܫܢܰܢ ܡܶܛܽܠ ܟܺܝܬ ܕܟܰܕ ܐܰܟܚܕܳܐ ܟܕܺܝܢܺܝܢ ܚ̱ܢܰܢ ܐܶܫܬܘܺܝܢܰܢ ܠܡܶܚܰܫ. ܕܡ̈ܶܠܶܐ ܗܳܟܺܝܠ ܣܰܓܺܝ̈ܳܐܬܳܐ ܘܰܕܣܽܘ̈ܟܳܠܶܐ܆ ܐܺܝܬܰܝܢ ܣܳܦ̈ܩܶܐ ܠܡܶܬܰܠ ܠܳܟ ܥܶܠܠ̈ܬܐ.

ܘܰܐܟܙܢܳܐ ܕܢܰܗܪܳܐ ܗܰܘ ܕܢܳܦܶܩ ܡܶܢ ܥܕܶܢ ܘܡܰܫܩܶܐ ܠܦܰܪܕܰܝܣܳܐ܆ ܟܰܕ ܠܰܐܪܒܥܳܐ ܡܶܬܦܰܠܰܓ^[4]܆ ܠܗܳܠܶܝܢ ܐܰܪܒܥܳܐ ܢܰܗܪ̈ܰܘܴܬܳܐ ܪܰܘܪ̈ܒܶܐ ܡܫܰܡܠܶܐ܆ ܗܳܟܰܢܳܐ ܚܢܰܢ܆ ܐܰܝܟ ܕܡܶܢ ܡܥܺܝܢܳܐ ܡܶܕܶܡ ܕܫܶܦ̈ܥܶܐ ܐܰܡܺܝ̈ܢܶܐ ܡܰܪܕܝܳܐ܆ ܡܶܢ ܨܰܘܡܳܐ ܕܰܐܪܒܥܺܝܢ ܝܰܘ̈ܡܺܝܢ ܗܰܘ ܕܡܰܫܩܶܐ ܕܠܳܐ ܚܣܳܡ^[5] ܠܦܰܪܕܰܝܣܳܐ ܡܶܬܗܰܘܢܳܢܳܐ ܕܰܐ‌ܠܳܗܳܐ܆ ܠܥܺܕܬܳܐ ܐܳܡܪܺܝܢ: ܐܰܪܒܥܺܝܢ ܢܰܗܪ̈ܰܘܳܬܳܐ ܪܳܕܶܝܢ ܚ̱ܢܰܢ. ܐܳܦ ܓܶܝܪ ܟܰܕ ܡܶܢܗܽܘܢ ܕܝܰܘ̈ܡܳܬܳܐ ܗܳܢܽܘܢ ܩܰܕܺܝ̈ܫܶܐ ܐܶܬܪܕܺܝܢܰܢ܆ ܘܡܶܢ ܟܽܠ ܪܶܓܬܳܐ ܨܳܡܢܰܢ܆ ܘܰܐܡܺܝܬܢܰܢ ܠܗܰܕܳܡ̈ܶܐ ܗܳܠܶܝܢ ܕܥܰܠ ‌ܐܰܪܥܳܐ܆ ܒܗܽܘܢ ܐܳܦ ܒܰܟ̈ܠܺܝܠܶܐ ܕܣܳܗܕܽܘܬܳܐ ܐܶܨܛܰܒܰܬܢܰܢ. ܡܶܢ ܗܳܪܟܳܐ. ܟܰܕ ܒܪ̈ܳܕܰܝܳܐ ܕܝܰܬܺܝܪ ܫܦܺܝܥܺܝܢ ܐܶܬܬܪܺܝܡܢܰܢ܆ ܒܓܰܘ ܬܰܪܥܺܝܬܳܟ ܪܳܡܶܝܢܰܢ. ܒܰܠܚܽܘܕ܆ ܫܡܰܥܳܝܗ̱ܝ ܠܗܰܘ ܕܰܒܝܰܕ ܗܰܘ ܕܡܰܪܡܰܪ ܡܶܫܬܰܘܕܶܐ ܘܳܐܡܰܪ: ܦܰܬ̣ܳܐ ܦܽܘܡܳܟ ܘܶܐ݀ܡܠܶܝܘܗ̱ܝ^[6].

ܟܰܕ ܗܳܠܶܝܢ ܗܳܟܺܝܠ ܘܕܰܐܝܟ ܗܳܠܶܝܢ ܡܶܢܗܽܘܢ ܕܣܳܗ̈ܕܶܐ ܩܰܕܺܝ̈ܫܶܐ ܡܶܬܰܐܡܪ̈ܳܢ ܗ̱ܘܰܝ̈܆ ܘܳܐܦ ܡܶܣ̈ܬܰܟܠܳܢ ܠܳܚܡܳܐܺܝܬ܆ ܐܰܝܟܰܢܳܐ ܠܳܐ ܐܶ݀ܕܠܳܐ ܡܰܝ̈ܳܐ ܥܰܡ ܚܰܕܽܘܬܳܐ ܡܶܢ ܡܰܒܽܘ̈ܥܶܐ ܕܦܽܘܪܩܳܢܳܐ^[7]܆ ܐܰܝܟܰܢܳܐ ܟܺܝܬ ܕܳܐܦ ܐܶܫܰܥܝܳܐ ܢܒܺܝܳܐ ܐܳܡܰܪ: ܘܳܐܡܰܪ ܒܝܰܘܡܳܐ ܗܳܢܳܐ܆ ܫܰܒܰܚܘ ܠܡܳܪܝܳܐ܆ ܐܰܙܥܶܩܘ ܫܡܰܝܳܐ ܕܺܝܠܶܗ܆ ܐܰܘܕܰܥܘ ܒܥܰܡܡ̈ܶܐ ܫܒܺܝ̈ܚܳܬܳܐ ܕܺܝܠܶܗ^[8]. ܥܰܗܺܝܕܺܝܢ ܐܢ̱ܬܽܘܢ ܗܘ܆ ܕܰܒܝܰܕ ܡܚܰܡܣܢܳܢܽܘܬܳܐ ܕܣܳܗ̈ܕܶܐ ܗܳܢܽܘܢ ܕܰܒܦܰܓܪܳܐ ܘܰܠܥܶܠ ܡܶܢ ܦܰܓܪܳܐ܆ ܐܶܬܪܰܡܪܰܡ ܫܡܶܗ. ܫܰܒܰܚܘ ܠܰܫܡܶܗ ܕܡܳܪܝܳܐ܆ ܡܶܛܽܠ ܕܪ̈ܳܡܳܬܳܐ ܥܒܰܕ܆ ܐܶܫܬܰܥܰܘ ܗܳܠܶܝܢ ܒܟܽܠܳܗ̇ ܐܰܪܥܳܐ.

ܐܶܠܳܐ ܟܰܕ ܥܕܰܟܺܝܠ ܡܡܰܠܶܠ ‌ܐ̱ܢܳܐ܆ ܘܩܰܠܺܝܠ ܡܶܕܶܡ ܫܰܪܺܝܬ ܠܡܶܕܠܳܐ ܡܶܢ ܫܶܩ̈ܝܶܐ ܕܕܰܐܝܟ ܗܳܠܶܝܢ܆ ܘܚܳܙܶܐ ܐ̱ܢܳܐ ܕܓܳܐܰܚ ܐܰܝܟ ܡܶܠܐܳܐ ܩܽܘܠܳܣܳܐ ܕܢܶܨܚܳܢ̈ܶܐ ܗܳܢܽܘܢ ܪ̈ܽܘܚܳܢܳܝܶܐ܆ ܐܳܬܝܳܐ ܠܺܝ ܠܡܺܐܡܰܪ܆ ܗܳܝ ܟܺܝܬ ܕܐ̱ܢܳܫ ܚܰܟܺܝܡܳܐ ܐܶܡܰܪ: ܐܶܡܪܶܬ܆ ܕܰܐ݀ܫܩܶܐ ܠܓܰܢܬܳܐ ܕܺܝܠܝ܆ ܘܰܐ݀ܪܘܶܐ ܠܡܰܫ̈ܟܒܳܬܳܐ ܕܺܝܠܝ܆ ܘܗܳܐ ܗܘ̣ܳܐ ܠܺܝ ܬܰܦܳܐ. ܠܢܰܗܪܳܐ܆ ܘܢܰܗܪܳܐ ܕܺܝܠܝ ܗܘ̣ܳܐ ܠܝܰܡܳܐ.

ܐܰܪܰܐ ܗܳܟܺܝܠ܆ ܐ݀ܶܣܦܰܩ ܐܶܢܳܐ ܒܰܠܚܽܘܕܰܝ܆ ܠܘܳܬ ܕܰܐܝܟ ܗܳܕܶܐ ܠܳܐ ܡܶܬܬܟܺܝܠܳܢܽܘܬܳܐ ܕܪܶܕܝܳܐ܆ ܬܰܘ ܗܳܟܺܝܠ ܣܰܝܥܽܘܢܝ ܒܩܽܘ̈ܠܳܣܶܐ. ܘܟܰܕ ܐܰܟܙܢܳܐ ܕܗܰܒܳܒ̈ܶܐ܆ ܠܢܶܨܚܳܢ̈ܶܐ ܡܫܰܚ̈ܠܦܶܐ ܘܣܰܓܺܝ̈ܰܐܝ ܙܢܰܝ̈ܳܐ ܕܣܳܗ̈ܕܶܐ ܡܟܰܢܫܺܝܢ ܚ̱ܢܰܢ܆ ܡܶܢ ܟܽܠܗܽܘܢ ܚܰܕ ܟܠܺܝܠܳܐ ܡܦܰܬܟܳܐ ܢܶ݀ܓܕܽܘܠ.

ܐܰܝܟܰܢܳܐ ܓܶܝܪ ܟܰܕ ܐܰܪܒܥܺܝܢ ܐܺܝܬܰܝܗܽܘܢ ܗ̱ܘܰܘ܆ ܠܰܐܣܽܘܪ̈ܶܐ ܣܰܓܺܝ̈ܰܐܝ ܐܳܕܫ̈ܶܐ ܕܗܽܘܠܶܐ ܗܳܝ ܕܢܳܬܦܳܐ ܗ̱ܘܳܬ ܠܗܽܘܢ ܠܬܰܚܬ ܠܳܐ ܐܶܬܪܡܺܝܘ܆ ܠܳܐ ܒܥܰܘ ܠܰܐܬܪܳܐ ܐܰܒܳܗܳܝܳܐ ܗܰܘ ܕܥܰܠ ‌ܐܰܪܥܳܐ ܣܺܝܡ܆ ܐܰܪܥܳܐ ܗܳܝ ܕܡܶܣܬܰܒܪܳܐ ܚܠܺܝܬܳܐ ܠܰܒܢܰܝ̈ܢܳܫܳܐ. ܠܳܐ ܠܘܳܬ ܐܰܒܳܗ̈ܶܐ ܐܶܬܪܟܶܢܘ܆ ܣܽܘܥܪܳܢܳܐ ܘܰܫܡܳܐ. ܗܰܘ ܕܰܐܝܟ ܕܰܒܣܽܘܓܳܐܐ ܝܰܬܺܝܪ ܚܠܶܐ܆ ܐܳܦ ܝܰܬܺܝܪ ܡܶܢܶܗ ܕܰܐܬܪܳܐ ܐܰܒܳܗܳܝܳܐ. ܠܳܐ ܡܶܢ ܚܽܘܠܛܳܢܳܐ ܕܙܽܘܘܳܓܳܐ ܐܶܙܕܟܺܝܘ܆ ܗܳܝ ܟܺܝܬ ܕܡܶܢ ܗܳܠܶܝܢ ܕܶܐܫܬܰܡܰܗ܆ ܒܪܰܚܺܝܩܽܘܬܳܐ ܣܰܓܺܝܐܬܳܐ ܛܳܒ ܐܺܝܬܶܝܗ̇ ܝܰܬܺܝܪ ܩܛܺܝܪܳܝܬܳܐ ܠܘܳܬ ܪܶܚܡܬܳܐ. ܘܠܳܐ ܐ̱ܢܳܫ ܡܶܢܗܽܘܢ ܥܰܠ ܒܢܰܝ̈ܳܐ ܪܰܚܶܡ ܘܳܐܦܠܳܐ ܬܽܘܒ ܥܰܠ ܛܰܠܝܽܘܬܳܐ ܕܺܝܠܶܗ ܩܢܳܐ ܚܰܘܣܳܢܳܐ. ܠܰܐܚ̈ܶܐ ܕܶܝܢ ܐܰܘ ܠܗܳܠܶܝܢ ܝܽܘܩܪ̈ܶܐ ܕܫܰܪܟܳܐ ܕܰܐ̱ܚܝܳܢܽܘܬܳܐ ܗܳܝ ܕܡܶܢ ܒܶܣܪܳܐ ܐܳܬܝܳܐ܆ ܠܛܰܪ̈ܦܶܐ ܡܕܰܡܶܝܢ ܗ̱ܘܰܘ ܠܗܽܘܢ܆ ܕܥܰܡܳܗ̇ ܕܗܳܝ ܕܫܳܘܚܺܝܢ ܐܳܦ ܢܳܦܠܺܝܢ.

ܠܕܶܚܠܬܳܐ ܕܶܝܢ܆ ܐܳܦܠܳܐ ܡܰܥܒܰܪܬܳܐ ܗܘܳܬ ܠܳܗ̇ ܥܰܠ ܢܰܦܫܗܽܘܢ ܠܳܐ ܡܶܬܟܰܒܫܳܢܺܝܬܳܐ ܕܗܳܢܽܘܢ ܐܺܝܬܰܘܗ̱ܝ ܗ̱ܘܳܐ ܓܶܝܪ. ܪܺܝܫ ܛܶܟܣܳܐ ܕܺܝܠܗܽܘܢ܆ ܡܫܺܝܚܳܐ ܗܰܘ ܕܰܠܘܳܬ ܐܰܒܽܘܗ̱ܝ ܡܶܛܽܠ ܗܳܢܽܘܢ ܕܰܡܗܰܝܡܢܺܝܢ ܒܶܗ ܐܶܡܰܪ: ܐܰܝܟܰܢܳܐ ܕܰܐܢ̱ܬ ܐܰܒܳܐ ܐܺܝܬܰܝܟ ܒܺܝ ܘܶܐܢܳܐ ܒܳܟ܆ ܐܳܦ ܗܶܢܽܘܢ ܒܰܢ ܚܰܕ ܢܶܗܘܽܘܢ.^[9] ܡܶܢ ܗܳܪܟܳܐ. ܚܕܳܐ ܚܺܝܨܽܘܬܳܐ ܕܰܚܘܺܝܚܽܘܬ ܬܰܪܥܺܝܬܳܐ ܐܺܝܬ ܗ̱ܘܳܐ ܠܗܽܘܢ ܒܰܪ̱ܬ ܩܳܠܳܐ ܚܕܳܐ܆ ܚܰܘܪܳܐ. ܗܠܰܟܬܳܐ. ܩܰܘܡܳܐ ܠܳܐ ܡܶܬܬܙܺܝܥܳܢܳܐ ܕܰܩܕܳܡ ܒܺܐܡܰܐ ܕܒܶܝܬ ܕܺܝܢܳܐ. ܘܗܳܢܳܐ ܥܦܺܝܦܳܐ. ܕܢܰܦܫܳܐ ܟܺܝܬ ܘܰܕܦܰܓܪܳܐ. ܦܰܪܶܗܣܺܝܰܐ. ܠܒܺܝܒܽܘܬܳܐ. ܠܳܐ ܡܶܬܪܰܟܢܳܢܽܘܬܳܐ. ܘܠܳܐ ܡܰܫܦܳܢܽܘܬܳܐ ܕܰܠܘܳܬ ܫܽܘ̈ܓܳܫܶܐ. ܠܳܐ ܡܶܬܬܰܘܗܳܢܽܘܬܳܐ ܕܰܠܘܳܬ ܓܙܳܡ̈ܶܐ. ܡܛܰܝܒܽܘܬܳܐ ܕܰܠܘܳܬ ܫܶܢ̈ܕܶܐ. ܗܳܝ ܕܰܢܩܰܕܡܽܘܢ ܢܶܡܛܽܘܢ ܐܶܢܶܝܢ ܠܰܫ̈ܟܳܚܳܬܳܐ ܕܫܶܢ̈ܕܶܐ. ܘܥܰܠ ܟܽܠܗܶܝܢ ܢܶܓܚܟܽܘܢ܆ ܒܗܳܝ ܕܢܶܗܘܶܐ ܐܺܝܬ ܠܗܽܘܢ ܡܛܰܝܒܳܐܺܝܬ ܕܰܠܢܶܣܝܳܢܳܐ ܕܟܽܠܗܶܝܢ ܢܣܰܝܒܪܽܘܢ. ܘܳܐܦܶܢ ܬܶܗܘܶܐ ܠܟܽܠ ܚܰܕ ܡܶܢܗܽܘܢ ܕܥܰܠ ܦܰܓܪܳܐ ܬܪܰܝܳܢܳܐ ܢܶܣܬܢܶܩ. ܠܙܽܘܢܳܐ^[10] ܕܶܝܢ. ܘܠܺܐܝܩܳܪ̈ܶܐ ܗܳܢܽܘܢ ܕܦܳܠܚܽܘܬܳܐ. ܡܶܢ ܒܳܬܰܪ ܡܰܪܦܝܳܢܽܘܬܳܐ ܕܺܝܠܗܽܘܢ܆ ܘܠܰܡܝܰܩܪ̈ܳܢܘܳܬܳܐ ܕܗܳܢܽܘܢ ܕܥܰܠ ‌ܐܰܪܥܳܐ ܡܰܡܠܟܺܝܢ܆ ܫܺܝܛܽܘܬܳܐ ܘܚܶܠܡܳܐ ܕܗܳܢܽܘܢ ܕܡܶܢ ܪܰܘܳܝܽܘܬܳܐ ܡܶܨܛܰܕܪܺܝܢ܆ ܣܳܒܪܺܝܢ ܗ̱ܘܰܘ ܕܺܐܝܬܰܝܗܽܘܢ.

ܟܽܠܶܗ ܓܶܝܪ ܗܰܘܢܳܐ ܕܺܝܠܗܽܘܢ ܕܰܐܬܠܺܝ̈ܛܶܐ ܗܳܢܽܘܢ ܕܫܰܦܺܝܪܽܘܬ ܕܶܚܠܬܳܐ܆ ܡܩܰܕܶܡ ܗ̱ܘܳܐ ܡܰܕܪܶܟ ܘܰܠܒܺܝܟ ܠܢܰܨܺܝܚܽܘܬܳܐ ܕܡܰܠܟܽܘܬܳܐ ܕܰܫܡܰܝܳܐ܆ ܘܰܠܟܽܠܗܶܝܢ ܗܳܠܶܝܢ ܕܗܳܪܟܳܐ܆ ܡܺܝ̈ܬܳܬܳܐ ܚܳܫܒܺܝܢ ܗ̱ܘܰܘ ܠܗܶܝܢ܆ ܟܰܕ ܒܣܶܒܪ̈ܶܐ ܠܘܳܬ ܚܰܝ̈ܶܐ ܗܳܠܶܝܢ ܕܰܕܠܳܐ ܫܽܘܠܳܡ ܐܰܫܩܶܠܘ ܗ̱ܘܰܘ܆ ܘܰܒܢܰܦ̈ܫܳܬܗܽܘܢ ܗܳܐ ܡܶܢ ܟܰܕܽܘ ܫܰܢܺܝܘ ܗ̱ܘܰܘ ܠܗܽܘܢ ܠܬܰܡܳܢ. ܘܟܰܕ ܟܡܳܐ ܕܬܳܒܥܳܐ ܗ̱ܘܳܬ ܒܰܠܚܽܘܕ ܗܳܝ ܕܢܶܬܟܰܬܫܽܘܢ܆ ܚܳܐܝܶܢ ܗ̱ܘܰܘ ܒܦܰܓܪ̈ܰܝܗܽܘܢ܆ ܡܕܰܡܶܝܢ ܗ̱ܘܰܘ ܠܳܗ̇ ܠܰܡܫܰܪܪܽܘܬܗܽܘܢ ܘܰܠܠܳܐ ܡܶܬܟܰܒܫܳܢܽܘܬܗܽܘܢ ܕܡܶܢ ܟܽܠ ܕܽܘܟ܆ ܠܡܰܓܕܠܳܐ ܚܰܣܺܝܢܳܐ ܕܰܒܢܶܐ ܒܟܺܐܦ̈ܶܐ ܠܳܐ ܡܶܙܕܰܥ̈ܙܥܳܢܝܳܬܳܐ ܘܫܰܘ̈ܝܳܬܳܐ܆ ܘܰܠܘܳܬ ܪܰܘܡܳܐ ܡܶܬܥܰܠܶܐ.

ܡܶܛܽܠܗܳܕܶܐ. ܗܰܘ ܕܗܳܝܕܶܝܢ ܕܳܐܶܢ ܗ̱ܘܳܐ. ܨܢܺܝܥܳܐ ܓܶܝܪ ܘܒܺܝܫܳܐ ܐܺܝܬܰܘܗ̱ܝ ܗ̱ܘܳܐ ܠܰܫܟܳܚ̈ܳܬܳܐ܆ ܟܰܕ ܡܶܢ ܟܽܠ ܕܽܘܟ ܡܶܬܟܪܶܟ ܗ̱ܘܳܐ܆ ܣܳܥܶܐ ܗ̱ܘܳܐ ܠܰܡܙܰܥܙܳܥܽܘ ܠܪܶܥܝܳܢܗܽܘܢ ܕܗܳܢܽܘܢ܆ ܗܰܘ ܪܳܡܳܐ ܘܠܳܐ ܡܶܙܕܰܥܙܥܳܢܳܐ. ܘܟܰܕ ܐܰܝܟ ܗܰܘ ܕܰܣܝܳܓܳܐ ܘܦܽܘܪ̈ܣܶܐ ܡܩܺܝܡ ܗ̱ܘܳܐ ܥܠܰܝܗܽܘܢ܆ ܘܒܰܙܒܰܢ ܡܰܢ ܟܰܕ ܒܫܽܘܓܳܫܳܐ ܢܟܺܝܠܳܐ ܘܰܡܨܰܕܝܳܢܳܐ ܡܚܰܪܟܶܫ ܗ̱ܘܳܐ܆ ܒܰܙܒܰܢ ܕܶܝܢ. ܟܰܕ ܒܰܓ̈ܙܳܡܶܐ ܡܕܰܚܶܠ ܗ̱ܘܳܐ܆ ܠܚܰܪܬܳܐ܆ ܟܰܕ ܚܙܳܐ ܠܟܽܠܗܶܝܢ ܠܳܐ ܡܶܕܶܡ܆ ܘܕܰܣܪܺܝܩܳܐܺܝܬ ܐܶܬܺܝܨܶܦܶܝ̈ܢ܆ ܟܰܕ ܐܳܦܠܐ ܚܰܕ ܡܰܥܠܳܢܳܐ ܡܶܫܟܰܚ ܗ̱ܘܳܐ. ܙܳܢܶܩ ܗ̱ܘܳܐ ܠܗܶܝܢ. ܘܟܰܕ ܐܳܕܫܳܐ ܚܰܕܬܳܐ ܕܬܰܫܢܺܝܩܳܐ ܐܶܬܦܰܪܰܤ܆ ܘܶܐܫܟܰܚ ܒܬܰܪܥܺܝܬܶܗ܆ ܟܰܕ ܢܛܰܪ ܟܺܝܬ ܘܰܚܙܳܐ ܡܰܫܒܳܐ ܕܪܽܘܚܳܐ ܕܓܰܪܒܝܳܐ ܕܝܰܬܺܝܪ ܚܰܪܺܝܦ ܗ̱ܘܳܐ܆ ܕܣܳܦܶܩ ܗ̱ܘܳܐ ܕܰܠܪܰܛܺܝܒܽܘܬܳܐ ܡܰܢ ܢܶܩ̣ܛܰܪ܆ ܠܡܶܕܶܡ ܕܶܝܢ ܡܢܰܦܫܳܐ ܢܶܥܒܕܺܝܘܗ̱ܝ ܕܠܳܐ ܢܫܰܡܬܳܐ܆ ܟܰܕ ܫܰܚܺܝܢܽܘܬܳܐ ܗܳܝ ܕܰܠܒܺܝܟܳܐ ܠܳܗ̇ ܠܚܰܝܽܘܬܳܐ ܥܳܪܩܳܐ ܘܰܠܘܳܬ ܥܽܘܡ̈ܩܶܐ ܐܰܟܚܕܳܐ ܪܳܗܛܳܐ܆ ܒܝܰܡܬܳܐ ܗܳܝ ܕܩܰܪܺܝܒܳܐ ܗ̱ܘܳܬ ܠܶܗ ܪܳܡܶܐ ܠܗܽܘܢ ܠܚܰܝ̈ܠܬܳܢܶܐ ܗܳܢܽܘܢ ܟܰܕ ܥܰܪ̈ܛܶܠܳܝ̣ܺܝ̣ܢ.

ܟܰܕ ܦܩܰܕ ܕܬܰܡܳܢ ܢܩܰܘܽܘܢ ܒܰܡܣܰܝܒܪܳܢܽܘܬܳܐ ܟܽܠܶܗ ܠܶܠܝܳܐ. ܡܰܠܽܘܢ ܕܶܝܢ. ܐܶܢ ܙܳܕܶܩ ܕܗܳܝ ܕܝܰܬܺܝܪ ܫܰܪܺܝܪܳܐ ܢܺܐܡܰܪ: ܕܟܰܕ ܚܰܝ̣ܺܝ̣ܢ ܢܶܬܩܰܒܪܽܘܢ ܒܡܰܝ̈ܳܐ ܗܳܢܽܘܢ ܟܰܕ ܩܳܛܪܺܝܢ. ܗܳܟܰܢܳܐ ܓܰܠܝܳܐ ܘܰܩܕܳܡ ܥܰܝ̈ܢܶܐ ܐܺܝܬܰܘܗ̱ܝ ܗ̱ܘܳܐ ܗܽܘ ܩܺܝܢܕܽܘܢܽܘܤ. ܐܶܠܳܐ ܗܳܢܽܘܢ ܐܰܝܟ ܒܣܳܡܳܐ ܐܰܥܒܪܽܘܗܝ^[11] ܠܠܺܠܝܳܐ ܗܰܘ ܡܠܶܐ ܟܺܐܒ̈ܶܐ. ܟܰܕ ܚܠܳܦ ܦܽܘܩ̈ܕܳܢܶܐ ܡܛܰܟ̈ܣܳܢܶܐ ܕܪ̈ܺܝܫܰܝ ܚܰܝ̈ܠܶܐ. ܒܡܰܙܡܽܘܪ̈ܶܐ ܘܰܒܬܶܫܒ̈ܚܳܬܳܐ ܠܘܳܬ ܓܰܢ̱ܒܳܪܽܘܬܳܐ ܠܰܚ̈ܕܳܕܶܐ ܡܩܺܝܡܺܝܢ ܗ̱ܘܰܘ܆ ܘܰܠܚܰܕܽܘܬܳܐ ܡܶܢ ܗܳܠܶܝܢ ܥܳܦܶܝܢ ܗ̱ܘܰܘ.

ܫܳܬܶܩ ܐ̱ܢܳܐ ܠܰܡܒܰܣܪܳܢܽܘܬܳܐ ܕܺܝܠܗܽܘܢ ܕܥܰܠ ܒܰܠܰܢܺܐ܆ ܗܳܝ ܟܺܝܬ ܕܡܶܢ ܩܽܘܪܒܳܐ ܒܰܕܡܽܘܬ ܫܶܕܠܳܐ ܩܕܳܡܰܝܗܽܘܢ ܣܺܝܡܳܐ ܗ̱ܘܳܬ܆ ܕܰܠܪ̈ܳܚܡܰܝ ܦܰܓܪ̈ܰܝܗܽܘܢ ܡܶܫܟܚܳܐ ܗ̱ܘܳܬ ܠܡܶܓܢܰܒ ܡܶܢ ܐܰܓܽܘ̈ܢܶܐ. ܫܳܒܶܩ ܐ̱ܢܳܐ ܕܶܝܢ ܐܳܦ ܠܗܰܘ ܕܰܩܕܳܡܶܝܗ̇ ܕܒܰܠܰܐܢܺܝ ܒܰܕܡܽܘܬ ܡܰܬܰܝ ܡܶܢ ܩܕܺܝܡ ܒܶܝܬ ܡܳܟ̈ܣܶܐ ܝܳܬܶܒ ܗ̱ܘܳܐ܆ ܘܡܶܢܫܶܠܝ ܐܶܬܩܪܺܝ ܡܶܢ ܝܶܫܽܘܥ܆ ܘܶܐܬܺܝܗܶܒ ܐܰܓܽܘܢܺܝܣܛܳܐ ܕܰܐܟܚܕܳܐ ܩܳܪܶܐ ܡܶܢ ܢܰܦܫܶܗ ܠܗܽܘܢ ܠܩܰܕܺܝ̈ܫܶܐ܆ ܚܠܳܦ ܗܰܘ ܕܰܐܫܦܶܠ ܘܰܫܒܰܩ ܛܶܟܣܶܗ. ܒܰܚܕܳܐ ܕܶܝܢ ܒܰܠܚܽܘܕ ܐܺܝܬ ܠܺܝ ܠܡܶܬܕܰܡܳܪܽܘ܆ ܝܰܬܺܝܪ ܡܶܢ ܟܽܠܗܶܝܢ ܗܳܠܶܝܢ ܐ̱ܚܪ̈ܳܢܝܳܬܳܐ܆ ܕܰܐܝܟܰܢܳܐ ܗܰܘ ܕܚܰܟܺܝܡܳܐܺܝܬ ܠܦܽܘܪܩܳܢܳܐ ܕܺܝܠܰܢ ܡܕܰܒܪ܆ ܫܒܰܩ ܕܰܒܗܳܢܳܐ ܙܢܳܐ ܕܰܡܣܳܡ ܒܪܺܝܫܳܐ ܢܶܫܬܰܡܠܽܘܢ ܗܳܢܽܘܢ ܐܰܪܒܥܺܝܢ ܣܳܗ̈ܕܶܐ.

ܫܳܡܥܺܝܢܰܢ ܓܶܝܪ ܠܕܰܘܺܝܕ ܘܰܠܗܳܠܶܝܢ ܬܠܳܬܳܐ ܛܠܳܝ̈ܶܐ ܕܰܡܫܰܒܚܺܝܢ ܠܡܳܪܝܳܐ܆ ܘܕܰܠܟܽܠܳܗ̇ ܒܪܺܝܬܳܐ ܩܳܪܶܝܢ ܠܘܳܬܗܽܘܢ ܘܕܰܡܥܰܕܪܳܢܺܝܬܳܐ ܫܳܩܠܺܝܢ ܠܳܗ̇ ܕܺܝܠܳܗ̇ ܕܬܶܫܒܽܘܚܬܳܐ. ܕܰܢܫܰܒܚܽܘܢ ܓܶܝܪ ܘܰܢܒܰܪܟܽܘܢ ܠܗܰܘ ܕܰܥܒܰܕ ܐܶܢܽܘܢ ܦܳܩܕܺܝܢ ܠܗܽܘܢ܆ ܐܳܦ ܠܰܫܡܰܝܳܐ. ܐܳܦ ܠܰܐܪܥܳܐ܆ ܐܳܦ ܠܫܶܡܫܳܐ ܐܳܦ ܠܣܰܗܪܳܐ܆ ܘܰܠܢܽܘܪܳܐ ܘܰܠܡܰܝ̈ܳܐ. ܘܰܠܚܰܝ̈ܘܳܬܳܐ ܘܠܰܒܥܺܝܪܳܐ܆ ܠܰܘ ܐܰܝܟܰܢܳܐ ܕܒܰܪ̱ܬ ܩܳܠܳܐ ܢܶܣܒܽܘܢ ܗܳܠܶܝܢ ܠܳܐ ܡܢܰܦ̈ܫܶܐ ܐܰܘܟܺܝܬ ܕܠܳܐ ܡܶܠܬܳܐ. ܐܰܘ ܠܳܐ ܡܰܪ̈ܓܫܳܢܶܐ܆ ܐܶܠܳܐ ܐܰܝܟܰܢܳܐ ܕܰܚܢܰܢ ܟܰܕ ܥܰܠ ܟܽܠ ܚܕܳܐ ܡܶܢܗܶܝܢ ܐܳܬܶܝܢ ܚ̱ܢܰܢ ܒܬܰܪܥܺܝܬܰܢ܆ ܘܡܰܘܕܶܝܢ ܚ̱ܢܰܢ ܛܰܝܒܽܘܬܳܐ ܠܗܰܘ ܕܝܰܗ̱ܒ ܐܶܢܶܝܢ܆ ܘܰܠܗܳܠܶܝܢ ܣܰܩܽܘܒ̈ܠܳܝܳܬܳܐ ܠܰܚܕܳܐ ܫܰܠܡܽܘܬܳܐ ܠܰܚܶܡ ܐܶܢܶܝܢ ܘܰܠܘܳܬ ܣܽܘܢܩܳܢܳܐ ܕܺܝܠܰܢ܆ ܩܽܘܠܳܣܳܐ ܗܰܘ ܕܡܶܢ ܟܽܠܗܶܝܢ ܢܓܰܒܶܐ.

ܗܳܕܶܐ ܗܳܟܺܝܠ ‌ܐܳܦ ܥܰܠ ‌ܐܰܓܽܘ̈ܢܶܐ ܣܳܗ̈ܕܳܝܶܐ ܓܶܕܫܰܬ. ܠܣܰܓܺܝ̈ܶܐܐ ܓܶܝܪ ܡܶܢܗܽܘܢ ܕܣܳܗ̈ܕܶܐ ܗܳܢܽܘܢ ܙܪ̈ܺܝܙܶܐ܆ ܠܰܡܣܳܡ ܒܪܺܝܫܳܐ ܕܰܒܝܰܕ ܢܽܘܪܳܐ ܐܰܫܠܶܡܘ ܐܶܢܽܘܢ܆ ܛܪ̈ܽܘܢܶܐ ܗܳܢܽܘܢ ܕܰܒܙܰܒ̈ܢܶܐ ܡܫܰܚ̈ܠܦܶܐ ܪܕܰܦܘ ܠܫܰܦܺܝܪܽܘܬ ܕܶܚܠܬܳܐ܆ ܘܠܳܐ ܐܶܙܕܟܺܝܘ ܗܳܢܽܘܢ ܚܰܝ̈ܠܬܳܢܶܐ ܡܶܢ ܫܰܠܗܶܒܺܝܬܳܐ ܘܡܶܢ ܝܰܩܕܳܢܳܐ. ܐܶܠܳܐ ܐܰܘ ܟܰܕ ܕܰܥܟܽܘܗ̇ ܙܟܰܘ܆ ܐܰܘ ^[12]ܟܰܕ ܒܗܳܝ ܕܣܰܝܒܰܪܘ܆ ܒܰܕܡܽܘܬ ܩܰܪܺܝܪܬܳܐ ܚܰܘܝܽܘܗ̇܆ ܘܗܳܟܰܢܳܐ ܒܰܪܶܟܘ ܢܽܘܪܳܐ ܘܚܽܘܡܳܐ^[13] ܠܡܳܪܝܳܐ܆ ܟܰܕ ܐܶܙܕܟܺܝܘ ܒܰܡܣܰܝܒܪܳܢܽܘܬܳܐ ܕܗܳܢܽܘܢ ܕܶܐܬܟܰܬܰܫܘ. ܘܟܰܕ ܠܰܢ ܝܳܗܒܺܝܢ ܥܶܠܬܳܐ ܕܗܳܝ ܕܰܢܒܰܪܶܟ.

ܠܰܐ̱ܚܪ̈ܳܢܶܐ. ܒܫܶܦ̈ܥܶܐ ܕܝܰܡܳܐ ܐܰܘ ܕܢܰܗܪ̈ܰܘܳܬܳܐ ܛܡܰܪܘ ܐܶܢܽܘܢ܆ ܟܰܕ ܒܟܺܐܦ̈ܶܐ. ܐܰܘ ܒܡܶܕܶܡ ܐ̱ܚܪܺܝܢ ܡܶܢ ܗܳܠܶܝܢ ܕܰܠܬܰܚܬ ܢܳܬܥ̈ܳܢ ܐܶܣܰܪܘ ܐܶܢܽܘܢ܆ ܘܰܐܘ^[14] ܟܰܕ ܚܰܝ̣ܺܝ̣ܢ܆ ܠܘܳܬ ܣܦܳܪ ܝܰܡܳܐ ܘܰܠܘܳܬ ܝܰܒܫܳܐ ܐܶܫܬܕܺܝܘ^[15]܆ ܘܟܰܕ ܪܶܗܛܳܐ ܕܺܝܠܗܽܘܢ ܫܰܡܠܺܝܘ ܒܓܰܘ ܡܰܝ̈ܳܐ܆ ܘܒܰܕܡܽܘܬ ܓܽܘܫ̈ܡܶܐ ܡܶܕܶܡ ܡܶܢ ܗܳܢܽܘܢ ܩܰܠܺܝ̈ܠܶܐ ܛܳܦܘ ܠܥܶܠ ܡܶܢ ܡܰܝ̈ܳܐ܆ ܘܗܳܟܰܢܳܐ ܢܰܗܪ̈ܰܘܳܬܳܐ ܘܝܰܡܳܐ ܬܽܘܒ ܡܒܰܪܟܺܝܢ ܗ̱ܘܰܘ ܠܡܳܪܶܐ ܝܰܡܳܐ.

ܫܰܒܰܚ̈ܶܝܢ ܐܳܦ ܚܰܝ̈ܘܳܬܳܐ ܠܡܳܪܝܳܐ ܒܝܰܕ ܣܳܗ̈ܕܶܐ܆ ܟܰܕ ܐܶܬܬܣܺܝܡܘ ܩܕܳܡܰܝܗܶܝܢ ܠܡܶܐܟܽܘܠܬܳܐ. ܐܶܠܳܐ ܡܶܛܽܠ ܟܺܝܬ ܕܚܰܣܺܝܪܳܐ ܗ̱ܘܳܬ ܕܒܺܐܝ̈ܕܰܝܗܽܘܢ ܕܺܝܠܗܽܘܢ ܕܰܐܬܠܺܝ̈ܛܶܐ܆ ܩܽܘܪܫܳܐ ܘܥܰܪܝܳܐ ܘܬܰܠܓܳܐ ܘܰܓܠܺܝܕܳܐ܆ ܢܒܰܪܟܽܘܢ ܗ̱ܘܰܘ ܠܗܰܘ ܕܰܒ̣ܪܳܐ ܐܶܢܘܢ܆ ܗܳܕܶܐ ܥܰܬܺܝܪܳܐܺܝܬ. ܘܥܰܡ ܡܫܰܪܬܚܽܘܬܳܐ ܣܰܓܺܝܐܬܳܐ܆ ܒܝܰܕ ܗܳܢܽܘܢ ܐܰܪܒܥܺܝܢ ܣܳܗ̈ܕܶܐ ܚܙܰܝܢܳܗ̇. ܗܳܢܽܘܢ ܕܟܰܕ ܠܰܐܬܠܺܝ̈ܣܘܳܬܗܽܘܢ ܡܝܰܩܰܪ ܡܫܺܝܚܳܐ ܗܰܘ ܣܳܝܽܘܡܳܐ ܕܰܐܓܽܘ̈ܢܶܐ܆ ܒܡܶܛܪ̈ܶܐ ܫܦܺܝ̈ܥܶܐ ܝܰܘܡܳܢܳܐ ܨܳܒܰܥ ܠܰܢ܆ ܟܰܕ ܒܟܰܘܪܳܢܳܐ ܒܨܺܝܪ ܩܰܠܺܝܠ ܝܰܒܺܝܫܳܐ ܗ̱ܘܳܬ ܐܰܪܥܳܐ܆ ܘܢܰܓܺܝܒܳܐ ܗ̱ܘܳܬ ܡܰܘܥܺܝܬܳܐ ܕܙܰܪ̈ܥܶܐ. ܢ݀ܝܰܩܰܪ ܗܳܟܺܝܠ ܚܢܰܢ܆ ܐܳܦ ܠܗܳܢܽܘܢ ܕܫܰܦܺܝܪ ܐܶܬܟܰܬܰܫܘ܆ ܐܳܦ ܠܰܐܠܳܗܳܐ ܗܰܘ ܕܣܳܡܶܗ ܠܰܐܓܽܘܢܳܐ܆ ܒܫܽܘܚܠܳܦܳܐ ܕܚܰܝ̈ܶܐ ܘܰܕܕܽܘܒܳܪܳܐ ܕܰܠܘܳܬ ܗܳܝ ܕܰܡܝܰܬܪܳܐ.

ܘܠܰܡܚܰܡܣܢܳܢܽܘܬܳܐ ܡܰܢ ܕܰܒܥܰܪܝܳܐ܆ ܒܝܰܒܺܝܫܽܘܬܳܐ ܕܥܳܢܘܳܝܽܘܬܳܐ ܢܶܦܪܽܘܥ. ܘܰܒܡܰܚܡܝܳܢܽܘܬܳܐ ܕܰܪ̈ܓܺܝܓܳܬܳܐ܆ ܟܰܕ ܢܰܟܦܽܘܬܳܐ ܚܠܳܦ ܙܳܢܝܽܘܬܳܐ ܡܶܬܥܰܢܘܶܝܢ ܚ̱ܢܰܢ. ܠܥܰܪܛܶܠܳܝܽܘܬܳܐ ܕܶܝܢ ܕܦܰܓܪ̈ܶܐ ܩܰܕܺܝ̈ܫܶܐ܆ ܒܗܳܝ ܕܰܠܝܰܬܺܝܪ̈ܳܬܳܐ ܕܰܠܒܽܘܫܳܐ ܢܶܥܬܰܪ܆ ܟܰܕ ܚܳܡܠܺܝܢܰܢ ܠܗܶܝܢ ܒܗܳܢܽܘܢ ܕܰܣܢܺܝܩܺܝܢ. ܐܶܢ ܓܶܝܪ ܡܶܢ ܡܫܺܝܚܳܐ. ܠܳܐ ܡܶܬܟܰܚܰܕ ܐܰܢ̱ܬ܆ ܕܩܳܡ ܥܰܪܛܶܠ ܡܶܛܽܠܳܬܳܟ܆ ܡܶܢܗܽܘܢ ܕܣܳܗ̈ܕܶܐ. ܐܶܬܚܰܡܨ܆ ܕܶܐܬܟܰܬܰܫܘ ܥܰܪܛܶܠܳܐܺܝܬ ܡܶܛܽܠ ܡܫܺܝܚܳܐ܆ ܘܶܐܬܪܕܺܝ ܘܺܝܠܶܦ ܣܰܒܪܳܐ ܕܚܰܝ̈ܶܐ ܕܰܥܬܺܝܕܺܝܢ ܥܕܰܡܳܐ ܠܶܐܡܰܬܝ ܒܚܰܝ̈ܶܐ ܗܳܠܶܝܢ ܡܚܰܒ̈ܠܶܐ ܘܰܒܥܳܠܡܳܐ ܗܳܢܳܐ ܕܩܰܪܺܝܒ ܣܰܪܺܝܟ ܐܰܢ̱ܬ܆ ܟܰܕ ܒܳܣܶܡ ܐܰܢ̱ܬ܆ ܟܰܕ ܩܳܢܶܐ ܐܰܢ̱ܬ܆ ܟܰܕ ܡܶܬܥܰܛܰܦ ܐܰܢ̱ܬ ܘܠܳܒܶܫ ܐܰܢ̱ܬ ܗܳܠܶܝܢ ܕܠܳܐ ܕܺܝܠܳܟ. ܟܽܠ ܡܳܐ ܓܶܝܪ ܕܰܠܥܶܠ ܡܶܢ ܣܽܘܢܩܳܢܳܟ ܐܺܝܬܰܘܗ̱ܝ܆ ܠܳܐ ܐܺܝܬܰܘܗ̱ܝ ܕܺܝܠܳܟ. ܫܡܰܥܳܝܗ̱ܝ ܠܦܰܘܠܽܘܤ ܕܳܐܡܰܪ: ܟܰܕ ܐܺܝܬ ܠܰܢ ܬܽܘܪܣܳܝܳܐ ܘܬܰܟܣܺܝܬܳܐ܆ ܗܳܠܶܝܢ ܢܶܣ̈ܦܩܳܢ ܠܰܢ. ܘܶܐܢ ܒܗܳܠܶܝܢ ܚܰܝ̈ܶܐ ܒܰܠܚܽܘܕ ܡܣܰܒܪܺܝܢܰܢ܆ ܕܳܘܰܝ̈ܳܐ ܐܺܝܬܰܝܢ ܝܰܬܺܝܪ ܡܶܢ ܟܽܠܗܽܘܢ ܒܢܰܝ̈ ܐ̱ܢܳܫܳܐ^[16].

ܚܳܙܶܝܢ ܐܢ̱ܬܽܘܢ ܐܰܪܰܐ܆ ܕܗܳܝ ܒܰܠܚܽܘܕ ܕܢܶܚܫܽܘܒ ܐܶܢܶܝܢ ܠܣܳܥܽܘܪ̈ܘܳܬܳܐ ܕܣܳܗ̈ܕܶܐ܆ ܠܳܐ ܓܶܝܪ ܐܳܡܰܪ ܐ̱ܢܳܐ ܕܝܰܨܺܝܦܳܐܺܝܬ ܢ݀ܡܰܠܶܠ ‌ܐܶܢܶܝܢ܆ ܟܡܳܐ ܡܥܺܝ̈ܢܶܐ ܥܰܬܺܝܪ̈ܳܬܳܐ ܕܝܽܘܬܪ̈ܳܢܶܐ ܐܰܒܥܰܬ ܠܰܢ܆ ܡܳܢܳܐ ܗܳܟܺܝܠ. ‌ܐܶ݀ܫܰܠܡܺܝܘܗ̱ܝ ܠܡܺܐܡܪܳܐ܆ ܘܶܐ݀ܣܰܓܶܦ ܒܫܶܬܩܳܐ ܠܬܽܘܢܳܝܳܐ ܚܰܝܠܬܳܢܳܐ ܕܶܐܡܳܐ ܗܳܝ ܪܳܚܡܰܬ ܐܰ‌ܠܳܗܳܐ. ܡܰܠܽܘܢ ܕܶܝܢ ܐܰ݀ܚܣܰܪ ܠܡܰܫ̈ܡܥܳܬܳܐ ܕܺܝܠܟܽܘܢ ܪ̈ܳܚܡܳܬ ܐܰ‌ܠܳܗܳܐ܆ ܩܽܘܠܳܣܳܐ ܕܬܰܫܥܺܝܬܳܐ. ܗܳܝ ܕܗܳܟܰܢܳܐ ܫܰܦܺܝܪܳܐ܆ ܐܶܠܳܐ ܐܳܦܶܢ ܠܳܐ ܐܶ݀ܨܒܶܐ܆ ܢܳܬܦܳܐ ܠܺܝ ܠܘܳܬܳܗ̇ ܐܰܢܬܬܳܐ ܗܳܝ ܙܪܺܝܙܬܳܐ. ܣܳܒܰܪ ܐ̱ܢܳܐ ܠܺܝ ܓܶܝܪ܆ ܕܟܰܕ ܠܰܒܪܳܗ̇ ܥܰܠ ܟܰܬܦ̈ܳܬܳܗ̇ ܛܥܺܝܢܳܐ ܠܶܗ ܚܳܙܶܐ ܐ̱ܢܳܐ ܠܳܗ̇ ܗܳܫܳܐ܆ ܠܗܳܝ ܕܶܟܪܳܢܳܝܬܳܐ ܒܗܰܘܢܳܐ ܘܪܳܚܡܰܬ ܒܪܳܗ̇܆ ܘܰܕܠܰܡܚܺܝܠܽܘܬܶܗ ܕܰܟܝܳܢܳܐ ܕܶܒܪܰܬ ܒܰܩܛܺܝܪܳܐ܆ ܘܒܳܬܰܪ ܥܳܓܰܠܬܳܐ ܗܳܝ ܒܪܶܗܛܳܐ ܐܰܝܟ ܕܡܰܨܝܳܐ ܐܳܙܳܠܐ ܗ̱ܘܳܬ܆ ܘܰܡܥܳܩܳܐ ܗ̱ܘܳܬ ܘܳܐܡܪܳܐ: ܕܕܰܚܺܝܠܳܐ ܐ̱ܢܳܐ ܕܰܠܡܳܐ ܐܰ‌ܠܳܗܳܐ ܗܰܘ ܕܝܳܕܰܥ ܥܽܘܡ̈ܩܶܐ ܕܠܶܒܰܘ̈ܳܬܳܐ܆ ܚܙܳܐ ܒܺܝ ܚܽܘܫܳܒܳܐ ܒܶܣܪܳܢܳܝܳܐ ܐܰܘ ܕܶܡܥܬܳܐ ܢܶܩܒܬܳܢܳܝܬܳܐ ܘܰܪܦܺܝܬܳܐ ܘܠܳܐ ܓܰܒܪܳܢܳܝܬܳܐ܆ ܘܟܰܕ ܠܰܙܥܽܘܪܽܘܬ ܢܰܦܫܳܐ ܕܺܝܠܝ ܡܒܰܝܐܳܐ܆ ܐܰܪܦܝܶܗ ܠܒܶܪܝ ܟܰܕ ܐܺܝܬ ܒܶܗ ܢܶܫܡܬܳܐ. ܟܰܕ ܗܳܠܶܝܢ ܐ̱ܚܪ̈ܳܢܶܐ ܚܙܰܩܘ ܚܙܽܘܩܝܳܐ ܫܰܦܺܝܪܳܐ܆ ܘܦܰܓܪ̈ܶܐ ܕܺܝܠܗܽܘܢ ܡܶܬܬܰܘܒܠܺܝܢ ܠܢܽܘܪܳܐ ܐܰܝܟ ܦܽܘܩܕܳܢܐ ܕܗܰܘ ܕܕܳܢ ܐܶܢܽܘܢ.

ܐܰܝܟܰܢܳܐ ܐܶ݀ܣܰܝܒܰܪ ܠܗܳܢܳܐ ܟܽܠܶܗ ܢܽܘܘܳܓܳܐ ܘܚܽܘܣܪܳܢܳܐ܆ ܐܶܢܗܽܘ ܕܠܶܐܡ̈ܗܳܬܗܽܘܢ ܡܰܢ ܕܗܳܢܽܘܢ ܕܥܰܡ ܒܶܪܝ ܐܰܟܚܕܳܐ ܐܰܬܠܺܝܣܳܐ ܥܒܰܕܘ܆ ܠܝܰܠܕܳܐ ܕܚܶܒ̈ܠܶܐ ܒܰܝ̈ܬܳܝܶܐ ܕܺܝܠܗܶܝܢ ܗܳܐ ܡܶܢ ܟܰܕܽܘ ܒܰܫܡܰܝܳܐ ܐܺܝܬ ܠܗܶܝܢ܆ ܦܺܐܪܳܐ ܕܶܝܢ ܕܟܰܪܣܳܐ ܕܺܝܠܝ ܥܰܠ ‌ܐܰܪܥܳܐ ܥܕܰܟܺܝܠ ‌ܐܺܝܬܰܘܗ̱ܝ. ܠܳܐ ܬܰܣܠܶܐ ܠܕܶܒܚܬܳܐ ܕܺܝܠܝ ܐܳܘ ܡܳܪܝ܆ ܐܰܝܟ ܕܰܠܗܳܝ ܕܩܳܐܝܢ^[17]. ܠܰܘ ܓܶܝܪ ܬܪܺܝܨܳܐܺܝܬ ܡܰܢ ܩܰܪܒܶܬ܆ ܬܪܺܝܨܳܐܺܝܬ ܕܶܝܢ ܠܳܐ ܦܶܪܫܶܬ ܐܶܢܳܐ ܐܰܝܟ ܗܰܘ. ܡܩܰܪܒܳܐ ܐ̱ܢܳܐ ܠܳܟ ܓܶܝܪ ܠܝܰܠܕܳܐ ܕܺܝܠܝ܆ ܡܫܰܡܠܝܳܐ ܟܺܝܬ ܘܠܳܐ ܡܦܰܠܓܳܐ. ܘܠܳܐ ܡܶܕܶܡ ܢܳܛܪܳܐ ܐ̱ܢܳܐ ܠܘܳܬܝ. ܚܕܳܐ ܓܶܝܪ ܢܛܽܘܪܬܳܐ ܡܬܰܚܡܳܐ ܐ̱ܢܳܐ. ܘܰܙܗܺܝܪܽܘܬܳܐ܆ ܗܳܝ ܕܠܳܟ ܐܰ݀ܓܥܶܠ ܗܳܠܶܝܢ ܕܺܝܠܳܟ. ܗܳܐ ܐܺܝܬ ܠܳܟ ܠܰܒܪܳܐ ܕܺܝܠܝ ܥܰܠ ܥܳܓܰܠܬܳܐ܆ ܐܰܝܟܰܢܳܐ ܕܠܺܐܝܣܚܳܩ ܟܰܕ ܐܶܬܬܣܺܝܡ ܥܰܠ ܩܰܝ̈ܣܶܐ^[18]. ܟܰܕ ܓܶܝܪ ܪܶܗܛܶܬ ܐܰܕܪܟܶܬ܆ ܡܶܛܽܠ ܟܺܝܬ ܕܪܳܗܛܳܐ ܗ̱ܘܺܝܬ. ܠܰܘ ܠܳܐ ܝܺܕܺܝܥܳܐܺܝܬ܆ ܟܰܕ ܒܪܶܗܛܳܐ ܕܦܰܘܠܽܘܤ ܛܶܢܶܬ^[19]. ܡܶܟܺܝܠ ܦܪܽܘܥ ܠܺܝ ܕܶܟܪܳܐ^[20] ܒܝܰܘܡܳܐ ܕܰܩܝܳܡܬܳܐ܆ ܗܰܘ ܕܠܰܒܪܳܐ ܕܺܝܠܳܟ ܘܶܐܡܪܳܐ^[21]܆ ܒܢܶܨܒܬܳܐ ܕܣܐܒܩ^[22] ܢܶܟܣܬܳܐ ܕܕܽܘܟܳܝܳܐ ܫܰܟܢܰܬ ܠܰܢ. ܢܶܨܒܬܳܐ ܕܶܝܢ ܕܣܐܒܩ܆ ܨܠܺܝܒܳܐ ܩܰܕܺܝܫܳܐ ܐܺܝܬܰܘܗ̱ܝ܆ ܟܰܕ ܩܰܝܣܳܐ ܐܺܝܬܰܘܗ̱ܝ ܕܡܰܪܦܝܳܢܽܘܬܳܐ ܘܰܕܫܽܘܒܩܳܢܳܐ.

ܗܳܠܶܝܢ ܐܺܝܬܰܝܗܶܝܢ ܗ̱ܘܰܝ̈ ܕܶܐܡܳܐ ܗܳܝ ܚܰܝܠܬܳܢܺܝܬܳܐ܆ ܡ̈ܶܠܶܐ܆ ܣܽܘܥܪ̈ܳܢܶܐ܆ ܚܽܘܫܳܒ̈ܶܐ. ܒܗܳܠܶܝܢ. ܢܶܕܡ̈ܝܳܢ ܐܶܡ̈ܗܳܬܳܐ܆ ܘܠܳܐ ܡܶܕܶܡ ܕܢܽܘܟܪܳܝ ܠܫܰܦܺܝܪܽܘܬ ܕܶܚܠܬܳܐ ܢܶܚ̈ܫܳܢ܆ ܐܶܡܰܬܝ ܕܢܶܚ̈ܙܝܳܢ ܠܰܒ̈ܢܰܝܗܶܝܢ܆ ܕܗܶܢܽܘܢ ܠܗܽܘܢ ܝܳܗܒܺܝܢ ܠܥܰܡܠܳܐ ܪܚܺܝܡ ܠܰܐܠܳܗܳܐ. ܘܶܐܢܗܽܘ ܕܐ̱ܢܳܫ ܡܶܢܟܶܝܢ܆ ܕܨܳܐܶܡ ܬܶܚܙܶܝܗ̇ ܠܰܒܪܳܗ̇܆ ܬܽܘܒ ܬܶܡܬܚܺܝܗ̇ ܠܰܚܘܺܝܚܽܘܬܳܐ܆ ܒܝܰܕ ܡܰܪܬܝܳܢܽܘܬܳܐ ܚܰܟܺܝܡܬܳܐ ܘܶܐܡܗܳܝܬܳܐ. ܘܠܳܐ ܟܰܕ ܚܳܙܝܳܐ ܠܰܐܦܰܘ̈ܗ̱ܝ ܕܡܰܘܪ̈ܩܳܢ܆ ܠܘܳܬ ܡܫܰܘܬܦܽܘܬ ܚܰܫܳܐ ܠܳܐ ܦܐܺܝܬܳܐ ܬܶܦܶܠ܆ ܘܟܰܕ ܡܶܬܪܰܦܝܳܐ ܗܺܝ ܘܰܡܫܰܦܠܳܐ܆ ܬܪܰܦܶܐ ܠܬܰܪܥܺܝܬܳܐ ܗܳܝ ܕܡܶܬܥܰܠܡܳܐ ܙܪܺܝܙܳܐܺܝܬ. ܘܶܐܢ ܕܰܠܘܳܬ ܥܺܕܬܳܐ ܐܳܙܶܠ ܬܰܫܟܚܺܝܘܗ̱ܝ܆ ܘܕܰܒܬܶܫܡܶܫܬܳܐ ܠܺܠܝ̣ܳܝ̣ܬܳܐ ܡܶܬܶܐܡܶܢ. ܘܒܰܨܠܽܘܬܳܐ܆ ܐܶ݀ܚܕܶܐ ܥܰܡܶܗ ܐܰܟܚܕܳܐ ܡܶܛܽܠ ܡܝܰܬܪܽܘܬܳܐ܆ ܘܰܬܪܰܒܶܝܘܗ̱ܝ ܥܰܡܶܗ ܐܰܟܚܕܳܐ ܠܥܽܘܬܪܳܐ.

ܟܽܠܟܶܝܢ ܕܶܝܢ ܒܳܗ̇ ܒܰܕܡܽܘܬܳܐ܆ ܟܠܰܝ̣̈ܶܝ̣ܢ ܠܽܐܘܪܚܳܐ ܡܣܰܓܦܳܢܺܝܬܳܐ ܘܡܰܘܒܕܳܢܺܝܬܳܐ ܕܰܒܢܰܝ̈ܟܶܝܢ ܗܳܝ ܕܰܠܘܳܬ ܚܶܙܘܳܢ̈ܶܐ܆ ܕܪ̈ܰܟܫܳܐ ܐܳܡܰܪ ܐ̱ܢܳܐ ܘܕܰܙܡܳܪ̈ܶܐ ܫܟܺܝܪ̈ܶܐ܆ ܘܰܕܓܰܒܪ̈ܶܐ ܗܳܢܽܘܢ ܡܰܓܚ̈ܟܳܢܶܐ. ܟܰܕ ܡܰܪ̈ܬܝܳܢ ܐܢ̱ܬܶܝܢ. ܟܰܕ ܡܫܰܓ̈ܫܳܢ ܐܢ̱ܬܶܝܢ. ܟܰܕ ܠܡ̈ܶܢܶܐ ܗܳܠܶܝܢ ܡܰܢ ܝܳܗ̈ܒܳܢ ܐܰܢ̱ܬܶܝܢ܆ ܗܳܠܶܝܢ ܕܶܝܢ ܡܶܫ̈ܬܰܘܕܝܳܢ ܐܢ̱ܬܶܝܢ܆ ܘܒܰܙ̈ܢܰܝܳܐ ܐ̱ܚܪ̈ܳܢܶܐ ܕܕܰܐܝܟ ܗܳܠܶܝܢ ܡܫܰܓ̈ܫܳܢ ܐܢ̱ܬܶܝܢ ܠܗܽܘܢ ܘܡܰܛܥ̈ܝܳܢ ܐܢܬܶܝܢ܆ ܘܢܳܬܦ̈ܳܢ ܐܢ̱ܬܶܝܢ ܠܗܽܘܢ ܡܶܢ ܚܒܳܠܳܐ. ܐܰܝܟ ܓܶܝܪ ܕܰܒܩܺܪܽܘܬܳܐ ܡܶܬܛܰܦܣܺܝܢ ܒܪܰܟܺܝܟܽܘܬܳܐ ܕܩܰܘܡܬܳܐ ܫܰܒܪܳܝܬܳܐ܆ ܝܽܘܠ̈ܦܳܢܶܐ ܕܰܡܝܰܬܪܽܘܬܳܐ ܐܰܘ ܕܒܺܝܫܽܘܬܳܐ. ܡܶܛܽܠܗܳܕܶܐ܆ ܥܰܠ ܢܛܽܘܪܬܳܐ ܣܰܓܺܝܐܬܳܐ ܘܡܰܠܝܰܬ ܥܰܡܠܳܐ ܣܢܺܝܩܺܝܢ.

ܢ݀ܨܰܠܶܐ ܕܶܝܢ ܐܳܦ ܚܢܰܢ܆ ܕܠܰܐܓܽܘ̈ܢܶܐ ܘܠܰܐܬܠܺܝܣ̈ܘܳܬܳܐ ܕܣܳܗ̈ܕܶܐ ܗܳܠܶܝܢ ܫܰܦܺܝܪ̈ܰܝ ܙܳܟܽܘܬܳܐ ܘܣܰܓܺܝ̈ܰܐܝ ܐܺܝܩܳܪܳܐ܆ ܩܕܳܡ ܥܰܝ̈ܢܰܝܢ ܢܶܗܘܶܐ ܐܺܝܬ ܠܰܢ܆ ܒܟܽܠܗܽܘܢ ܚܰܝ̣ܰܝ̣̈ܢ. ܐܰܝܟܰܢܳܐ ܕܒܙܰܒ̈ܢܶܐ ܕܕܳܡܶܝܢ܆ ܠܳܐ ܢܶܗܘܶܐ ܡܫܰܠܡ̈ܳܢܶܐ ܕܰܫܪܳܪܳܐ܆ ܐܳܦ ܠܳܐ ܟܰܕ ܠܰܪ̈ܓܺܝܓܳܬܳܐ ܡܶܬܓܰܪܦܺܝܢܰܢ܆ ܢܶ݀ܫܬܰܪܓܰܠ ܠܘܳܬ ܗܰܘܢܳܐ ܡܰܣܠܝܳܐ. ܐܶܠܳܐ ܟܰܕ ܒܕܶܚܠܬܳܐ ܘܒܰܪܬܺܝܬܳܐ. ܚܳܐܶܝܢ ܚ̱ܢܰܢ ܘܡܶܬܕܰܒܪܺܝܢ ܚ̱ܢܰܢ܆  ܕܫܳܘܶܝܢ ܚ̱ܢܰܢ ܢܶ݀ܗܘܶܐ ܠܡܰܠܟܽܘܬܳܐ ܕܰܫܡܰܝܳܐ. ܠܗܳܝ ܕܬܶܗܘܶܐ. ܕܟܽܠܰܢ ܢ݀ܩܰܒܶܠ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ. ܘܺܐܝܩܳܪܳܐ ܘܽܐܘܚܕܳܢܳܐ܆ ܥܰܡ ܪܽܘܚܳܐ ܕܺܝܠܶܗ ܩܰܕܺܝܫܳܐ ܘܰܫܘܶܐ ܒܽܐܘܣܺܝܰܐ. ܗܳܫܳܐ ܘܰܒܟܠ ܙܒܰܢ. ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܰܐܪܒܥܺܝܢ ܘܚܰܕ.

ܥܡܘܣ. 3: 6 ـ 8 [1]

ܢܩܰܝܶܙ[2]

ܡܦܣܪ[3]

ܣܶܦܪܐ ܕܒܪܝܬܐ. 2: 10 [4]

ܥܰܬܺܝܪܳܐܝܬ[5]

ܡܙܡܘܪ̈ܐ. 81: 10 [6]

ܐܫܥܝܐ. 12: 3 [7]

ܐܫܥܝܐ. 12: 4 ـ 5  ܐܦ ܡܙܡܘܪ̈ܐ.105: 1 [8]

ܝܘܚܢܢ. 17: 21 [9]

[10]ܬܐܘܡܐ ܐܘܕܘ. ܦܐܬܐ 264. ܙܽܘܢܳܐ: ܙܽܘܢܺܝ. ܝܘܢܝܬܐ ܗܝ. ܣܘܪܝܝܬܐ. ܥܪܰܩܬܳܐ. ܐܰܣܳܪ ܚܰܨܳܐ. ܩܰܡܪܳܐ. ܘܫܪܟܐ.

ܫܡܠܝܘܗܝ[11]

ܐܰܝܟ ܙܢܳܐ ܕܣܳܗܕܳܐ ܪܽܘܡܰܢܘܣ[12]

ܘܝܰܩܕܳܢܳܐ[13]

[14]ܐܰܟܙܢܳܐ ܕܰܛܠܺܝܬܳܐ ܗܳܝ ܕܰܫܕܰܘ ܦܪ̈ܣܝܐ ܒܕܶܩܠܰܬ ܒܙܰܒܢܳܐ ܕܡܳܪܝ ܫܶܡܥܽܘܢ.

 ܐܶܬܺܝܗܶܒܘ[15]

ܐ. ܛܝܡܬܐܘܣ. 6: 8  ܐܦ ܐ. ܩܘܪ̈ܝܢܬܝܐ. 15: 19 [16]

ܣܶܦܪܐ ܕܒܪܝܬܐ. 4: 5 [17]

ܣܶܦܪܐ ܕܒܪܝܬܐ. 22: 9 [18]

ܦܝܠܝܦܣ̈ܝܐ. 3: 12 [19]

ܗܰܒ ܥܶܪܒܳܐ[20]

ܣܶܦܪܐ ܕܒܪܝܬܐ. 22: 13 [21]

ܕܫܽܘܒܩܳܢܳܐ[22]