ܡܺܐܡܪܳܐ ܕܰܐܪܒܥܺܝܢ

ܐܰܡܺܝܪ ܠܓܰܘ ܒܒܶܝܬ ܡܰܥܡܽܘܕܺܝܬܳܐ ܩܰܕܺܝܫܳܐ ܒܪܰܡܫܳܐ܆ ܟܰܕ ܨܰܘܡܳܐ ܩܰܕܺܝܫܳܐ ܕܰܐܪܒܥܺܝܢ ܥܳܐܶܠ܆ ܟܰܕ ܥܬܺܝܕܺܝܢ ܗ̱ܘܰܝܢ ܕܡܶܢ ܡܰܥܰܠܬܳܐ ܕܠܶܗ ܠܒܶܝܬ ܡܰܥܡܽܘܕܺܝܬܳܐ ܗܳܝ ܕܰܒܟܽܠ ܚܰܕ ܪܰܡܫܳܐ ܕܚܰܕܒܫܰܒܳܐ ܗܳܘܝܳܐ܆ ܢܦܽܘܫ. ܥܕܰܡܳܐ ܠܦܶܣܟܐ ܩܰܕܺܝܫܳܐ ܘܠܰܩܝܳܡܬܳܐ.

40: ܟܽܠܗܶܝܢ ܐܰܝܠܶܝܢ ܕܰܒ̈ܥܺܕܳܬܳܐ ܕܰܐ‌ܠܳܗܳܐ ܡܶܫܬܰܡ̈ܠܝܳܢ ܘܡܶܬܦܰܠ̈ܚܳܢ܆ ܠܘܳܬ ܚܰܕ ܫܽܘܠܳܡܳܐ ܚܳܝܪ̈ܳܢ. ܠܘܳܬ ܬܽܘܪܳܨܳܐ ܕܺܝܠܰܢ܆ ܘܰܠܘܳܬ ܡܶܬܩܰܪܒܳܢܽܘܬܳܐ ܕܨܶܝܕ ܗܳܠܶܝܢ ܕܰܡܝܰܬܪ̈ܳܢ܆ ܘܰܠܘܳܬ ܫܽܘܘܫܳܛܳܐ ܕܰܠܪܰܘܡܳܐ. ܐܳܦܶܢ ܥܺܐܕܳܐ ܬܺܐܡܰܪ. ܐܳܦܶܢ ܨܰܘܡܳܐ܆ ܐܳܦܶܢ ܡܶܕܶܡ ܐ̱ܚܪܺܢܳܐ ܡܶܢ ܗܳܠܶܝܢ ܕܕܰܐܝܟ ܗܳܟܰܢ. ܡܰܥܗܕܳܢܽܘܬܳܐ ܓܶܝܪ ܐܺܝܬ ܠܗܶܝܢ ܡܶܢ ܟܽܠܦܪܽܘܤ܆ ܕܫܰܦܺܝܪܽܘܬ ܣܳܥܽܘܪܽܘܬܳܐ ܐܰ‌ܠܳܗܳܝܬܳܐ ܕܰܗܘܳܬ ܠܘܳܬܰܢ܆ ܕܗܳܝ ܕܰܬܚܶܝܬ ܚܰܘܒܬܳܐ ܗܘ̣ܰܝܢܰܢ. ܐܰܝܟܰܢܳܐ ܕܟܽܠ ܚܰܕ ܡܶܢܰܢ. ܟܰܕ ܡܶܬܚܰܫܰܒ ܢܺܐܡܰܪ: ܡܳܢܳܐ ܐܶ݀ܦܪܽܘܥ ܠܡܳܪܝܳܐ ܡܶܛܽܠ ܟܽܠܗܶܝܢ ܗܳܠܶܝܢ ܕܦܰܪܥܰܢܝ^[1].

ܒܗܳܕܶܐ ܬܰܪܥܺܝܬܳܐ܆ ܟܰܕ ܠܥܽܘܗܕܳܢܳܐ ܐܳܬܶܝܢ ܚ̱ܢܰܢ ܕܠܶܠܝܳܐ ܗܰܘ ܕܒܶܗ ܡܳܪܰܢ ܘܰܐ‌ܠܳܗܰܢ ܝܶܫܽܘܥ ܡܫܺܝܚܳܐ ܡܶܢ ܡܺܝ̈ܬܶܐ ܩܳܡ܆ ܒܟܽܠ ܚܰܕ ܝܰܘܡܳܐ ܕܚܰܕܒܫܰܒܳܐ܆ ܠܒܰܝܬܐ ܗܳܢܳܐ ܣܓܺܝܕܳܐ ܥܳܐܠܺܝܢ ܚ̱ܢܰܢ܆ ܥܰܡ ܡܰܙܡܽܘܪ̈ܶܐ ܘܒܳܥ̈ܘܳܬܳܐ ܘܰܨ̈ܠܰܘܳܬܳܐ. ܐܰܝܟܰܢܳܐ ܕܟܰܕ ܡܶܬܒܰܩܶܝܢܰܢ. ܒܰܡܥܺܝܢܳܐ ܗܳܕܶܐ ܕܡܰܝ̈ܳܐ ܚ̈ܰܝܶܐ܆ ܗܳܝ ܕܒܳܗ̇ ܟܰܕ ܐܶܬܩܒܰܪܢܰܢ ܐܰܟܚܕܳܐ ܒܰܓܡܳܥܳܐ ܬܠܺܝܬܳܝܳܐ ܥܰܡ ܥܰܡܰܢܽܘܐܶܝܠ܆ ܐܰܟܚܕܳܐ ܥܰܡܶܗ ܩܳܡܢܰܢ^[2]. ܟܰܕ ܠܒܰܪܢܳܫܳܐ ܡܰܢ ܥܰܬܺܝܩܳܐ ܫܒܰܩܢܰܢ ܠܬܰܚܬ܆ ܠܩܰܘܡܬܳܐ ܕܶܝܢ ܗܳܝ ܕܠܳܐ ܡܶܬܚܰܒܠܳܢܽܘܬܳܐ ܠܒܶܫܢܰܢ܆ ܗܳܝ ܠܳܐ ܡܶܬܟܰܒܫܳܢܺܝܬܳܐ ܠܣܰܝܒܽܘܬܳܐ. ܘܰܕܠܳܐ ܡܰܥܬܩܳܐ܆ ܘܕܰܠܚܰܝ̈ܶܐ ܕܠܳܐ ܫܽܘܠܳܡ ܡܫܰܕܪܳܐ܆ ܢ݀ܫܰܒܰܚ ܠܗܰܘ ܕܰܠܗܳܕܶܐ ܩܪܳܐ ܠܰܢ.

ܗܳܫܳܐ ܕܶܝܢ ܥܰܡܳܗ̇ ܕܺܝܠܳܗ̇ ܟܰܕ ܕܺܝܠܳܗ̇ ܕܬܰܪܥܺܝܬܳܐ܆ ܕܢܶܕܚܽܘܩܟܽܘܢ ܩܰܠܺܝܠ ܡܶܢ ܡܰܥܰܠܬܳܐ ܗܳܕܶܐ ܟܳܗܢܳܝܬܳܐ ܨܳܒܶܝܢ ܚ̱ܢܰܢ܆ ܟܰܕ ܠܥܶܠܬܳܐ ܗܳܝ ܕܡܶܛܽܠܳܬܳܗ̇ ܚܙܰܝܢܰܢ ܠܗܳܠܶܝܢ ܠܳܐ ܡܶܬܚܰܙܝܳܢ̈ܝܳܬܳܐ. ܘܰܕܪܰܟܢܰܢ ܥܰܠ ܗܳܠܶܝܢ ܠܳܐ ܡܶܬܕܰܪ̈ܟܳܢܝܳܬܳܐ^[3]܆ ܝܰܬܺܝܪ ܢܰܗܺܝܪܳܐܺܝܬ ܐܰܝܟ ܙܢܳܐ ܕܒܰܩܝܳܡܬܳܐ܆ ܠܡܶܓܠܰܦ ܒܢܰܦ̈ܫܳܬܳܐ ܕܺܝܠܟܽܘܢ ܚܦܺܝܛܺܝܢ ܚ̱ܢܰܢ. ܡܳܢܳܐ ܕܶܝܢ ܐܺܝܬܶܝܗ̇ ܗܺܝ ܥܶܠܬܳܐ. ܕܡܶܗ ܕܰܐ‌ܠܳܗܳܐ ܗܰܘ ܕܶܐܬܒܰܗܰܪ܆ ܗܰܘ ܡܝܰܩܪܳܐ ܫܰܪܺܝܪܳܐܺܝܬ ܘܰܛܒܺܝܒܳܐ܆ ܘܕܰܣܦܰܩ ܕܰܠܥܳܠܡܳܐ ܟܽܠܶܗ ܕܠܰܚ̈ܛܳܗܶܐ ܐܶܬܥܰܒܕܰܕ ܢܶܦܪܽܘܩ. ܠܦܰܘܠܽܘܤ ܓܶܝܪ ܫܳܡܥܺܝܢܰܢ ܕܳܐܡܰܪ: ܕܰܡܫܺܝܚܳܐ ܒܝܰܕ ܕܡܳܐ ܕܺܝܠܶܗ. ܥ̣ܰܠ ܚܕܳܐ ܙܒܰܢ ܠܰܩܕܽܘܫ ܩܽܘ̈ܕܫܶܐ܆ ܟܰܕ ܦܽܘܪܩܳܢܳܐ ܕܰܠܥܳܠܰܡ ܐܶܫܟܰܚ^[4]܆ ܘܕܺܐܝܬ ܠܰܢ ܦܰܪܶܗ̱ܣܺܝܰܐ ܒܡܰܥܰܠܬܳܐ ܕܩܽܘ̈ܕܫܶܐ ܒܰܕܡܳܐ ܕܝܶܫܽܘܥ܆ ܗܳܝ ܕܚܰܕܶܬ ܠܰܢ ܐܽܘܪܚܳܐ ܚܕܰܬܳܐ ܘܚܰܝܬܳܐ.

ܡܶܛܽܠ ܗܳܟܺܝܠ ܕܰܠܬܶܫܒܽܘܚܬܶܗ ܕܰܕܡܳܐ ܗܰܘ ܕܰܡܫܺܝܚܳܐ܆ ܗܰܘ ܕܶܐܬܶܐܫܶܕ ܚܠܳܦܰܝܢ ܥܰܬܺܝܪܳܐܺܝܬ܆ ܐܰܝܟ ܕܰܠܡܰܛܳܦܽܘ ܘܠܰܡܫܳܓܽܘ ܟܽܠ ܟܽܘܬܡܳܐ ܘܛܽܘܠܫܳܐ܆ ܠܗܳܠܶܝܢ ܐܰܪܒܥܺܝܢ ܝܰܘ̈ܡܳܬܳܐ ܨܳܝܡܺܝܢ ܚ̱ܢܰܢ܆ ܐܰܝܟ ܐܰܝܠܶܝܢ ܕܰܒܛܺܝܡܳܐ ܘܕܰܐܝܟ ܗܳܕܶܐ ܪܰܒܬܳܐ ܐܶܙܕܒܶܢܢ. ܘܠܳܐ ܬܽܘܒ ܠܢܰܦܫܰܢ ܚܳܐܶܝܢ ܚ̱ܢܰܢ܆ ܐܶܠܳܐ ܠܗܰܘ ܕܰܚܠܳܦܰܝܢ ܡܺܝܬ ܘܩܳܡ^[5]܆ ܩܰܠܺܝܠ ܡܪܚ̣ܝܢ222 ܚ̱ܢܰܢ ܘܡܰܪܚܩܺܝܢ ܚ̱ܢܰܢ ܡܶܢ ܡܰܥܰܠܬܳܐ ܗܳܕܶܐ. ܐܰܝܟܰܢܳܐ ܕܰܒܝܰܘܡܳܐ ܗܰܘ ܕܒܶܗ ܐܶܬܶܐܫܶܕ ܕܡܳܐ ܗܰܘ܆ ܗܰܘ ܕܒܶܗ ܦܶܣܟܳܐ ܚܠܳܦܰܝܢ ܐܶܬܕܒܰܚ ܡܫܺܝܚܳܐ܆ ܥܰܡܶܗ ܐܰܟܚܕܳܐ ܢܶ݀ܥܽܘܠ܆ ܟܰܕ ܐܰܟܚܕܳܐ ܥܰܡܶܗ ܣܳܠܩܺܝܢ ܚ̱ܢܰܢ܆ ܐܰܘ ܗܰܘ ܕܠܶܗ ܠܰܫܡܰܝܳܐ ܣܳܠܶܩ. ܡܰܙܥܶܩ ܓܶܝܪ ܦܰܘܠܽܘܤ. ܗܰܘ ܫܺܝܦܽܘܪܳܐ ܕܥܺܕܬܳܐ ܐ̱ܪܳܙܳܢܳܝܳܐ ܘܪܳܡ ܩܳܠܐ܆ ܗܰܘ ܕܓܳܠܶܐ ܐܰܝܟ ܕܡܰܨܝܳܐ ܠܥܽܘܡ̈ܩܶܐ ܕܪܽܘܚܳܐ܆ ܕܠܰܘ ܠܒܶܝܬ ܩܽܘܕܫܳܐ ܥܒܺܝܕ ܒܺܐܝ̈ܕܰܝܳܐ ܥ̣ܰܠ ܡܫܺܝܚܳܐ܆ ܗܰܘ ܕܺܐܝܬܰܘܗ̱ܝ ܛܽܘܦܣܳܐ ܕܗܰܘ ܫܰܪܺܝܪܳܐ܆ ܐܶܠܳܐ ܠܶܗ ܠܰܫܡܰܝܳܐ܆ ܕܢܶܬܚܙܶܐ ܠܦܰܪܨܽܘܦܳܐ ܕܰܐ‌ܠܳܗܳܐ ܚܠܳܦܰܝܢ^[6].

ܡܰܢܽܘ ܕܠܳܐ ܢܶܬܡܰܗ ܒܪܰܒܽܘܬܳܗ̇ ܕܪܶܚܡܰܬ ܐ̱ܢܳܫܽܘܬܳܐ܆ ܘܰܕܣܽܘܪܳܩܳܐ ܕܺܝܠܶܗ ܕܡܶܛܽܠܳܬܰܢ ܗܰܘ ܕܥܳܒܰܪ ܠܟܽܠ܆ ܒܪܰܒܽܘܬܳܐ ܕܚܶܟܡܬܳܐ ܕܰܐܒܳܐ ܗܳܝ ܕܳܐܡܪܳܐ ܕܰܩܕܳܡ ܟܽܠܗܽܘܢ ܬܶܠ̈ܠܶܐ ܝܳܠܶܕ ܠܺܝ܆ ܘܰܒܟܽܠ ܝܽܘܡ ܚܳܕܝܳܐ ܗ̱ܘܳܬ ܒܦܰܪܨܽܘܦܳܐ ܕܺܝܠܶܗ ܒܟܽܠ ܙܒܰܢ. ܗܳܫܳܐ ܡܶܬܚܰܙܝܳܐ ܠܦܰܪܨܽܘܦܳܐ ܕܰܐ‌ܠܳܗܳܐ܆ ܐܰܝܟ ܐܰܟܣܢܳܝܬܳܐ ܘܢܽܘܟܪܳܝܬܳܐ ܘܕܰܠܒܰܪ^[7] ܡܶܢ ܗܳܢܳܐ ܐܺܝܬܶܝܗ̇. ܒܪܰܡ ܩܰܪܺܝܒ ܗ̱ܘ̣ ܡܰܦܰܩ ܒܪܽܘܚܳܐ. ܡܶܬܚܰܙܝܳܐ ܓܶܝܪ ܠܰܘ ܚܠܳܦ ܢܰܦܫܳܗ̇܆ ܐܶܠܳܐ ܚܠܳܦܰܝܢ. ܠܰܢ ܓܶܝܪ ܐܰܟܚܕܳܐ ܐܰܣܩܰܬ ܥܰܡܳܗ̇܆ ܠܗܳܢܽܘܢ ܐܰܟܣ̈ܢܳܝܶܐ ܕܰܫܡܰܝܳܐ܆ ܡܰܠܽܘܢ ܕܶܝܢ ܘܰܕܠܳܐ ܫܳܘܶܝܢ ܠܰܐܪܥܳܐ. ܠܗܳܢܽܘܢ ܕܰܐܒܺܝܕܺܝܢ ܗ̱ܘܰܘ. ܠܗܳܢܽܘܢ ܕܰܗܘ̣ܰܘ ܥܰܪ̈ܛܶܠܳܝܶܐ ܡܶܢ ܛܰܝܒܽܘܬܳܐ. ܠܗܳܢܽܘܢ ܕܡܶܬܛܰܫܶܝܢ ܗ̱ܘܰܘ ܡܶܢ ܐܰ‌ܠܳܗܳܐ. ܠܗܳܢܽܘܢ ܕܒܳܐܕܳܡ ܫܡܰܥܘ ܕܰܐܝܟܳܐ ܐܺܝܬܰܝܟ.

ܠܗܳܢܽܘܢ ܕܰܒܝܰܕ ܗܰܘ ܐܶܡܰܪܘ ܒܰܪ̱ܬ ܩܳܠܳܐ ܗܳܝ ܕܒܶܗܬܬܳܐ ܡܰܠ̣ܝܳܐ ܗ̱ܘܳܬ܆ ܗܳܝ ܕܕܶܚܠܶܬ ܕܥܰܪܛܶܠܳܝܳܐ ܐܺܝܬܰܝ܆ ܘܶܐܬܛܰܫܺܝܬ̣^[8].

ܐܰܝܟ ܐܰܝܠܶܝܢ ܗܳܟܺܝܠ ܕܰܠܕܰܐܝܟ ܗܳܕܶܐ ܪܶܚܡܰܬ ܐ̱ܢܳܫܽܘܬܳܐ ܐܶܫܬܘܺܝܢܰܢ܆ ܘܠܰܩܕܽܘܫ ܩܽܘ̈ܕܫܶܐ ܐܰܝܟ ܕܠܰܫܡܰܝܳܐ. ܥܬܺܝܕܺܝܢܰܢ ܠܡܶܥܰܠ ‌ܐܰܟܚܕܳܐ ܥܰܡ ܡܫܺܝܚܳܐ܆ ܘܰܕܢܶ݀ܗܘܶܐ ܡܶܬܚܰܙܝܳܢ̈ܶܐ ܠܦܰܪܨܽܘܦܳܐ ܕܰܐ‌ܠܳܗܳܐ܆ ܢܶ݀ܬܛܰܝܰܒ ܒܟܽܠܶܗ ܚܰܝܠܰܢ ܒܝܰܕ ܥ̈ܒܳܕܶܐ ܛܳܒ̈ܶܐ܆ ܘܰܢ݀ܩܰܕܶܡ ܢ݀ܕܰܟܶܐ ܢܰܦܫܰܢ ܩܕܳܡ ܗܰܘ ܝܰܘܡܳܐ ܗܰܘ ܕܒܶܗ ܕܶܒܚܬܳܐ܆ ܗܰܘ ܕܒܶܗ ܕܡܳܐ܆ ܗܰܘ ܕܒܶܗ ܡܰܝ̈ܳܐ ܗܳܢܽܘܢ ܕܡܶܢ ܕܰܦܢܳܐ܆ ܗܰܘ ܕܒܶܗ ܓܒܺܝܬܳܐ ܕܗܳܢܽܘܢ ܕܚܰܒܺܝܒܺܝܢ. ܗܰܘ ܕܒܶܗ ܩܝܳܡܬܳܐ܆ ܩܽܘܕܫܐ܆ ܣܰܒܪܳܐ ܕܺܝܠܺܝܕܽܘܬܳܐ ܕܡܶܢ ܕܪܺܝܫ܆ ܗܰܘ ܕܒܶܗ ܟܠܳܐ ܢܰܚܠܳܐ^[9] ܕܛܳܒܬܳܐ܆ ܠܗܰܘ ܕܠܰܘ ܒܰܠܚܽܘܕ ܐܶܫܬܺܝܢܰܢ܆ ܐܶܠܳܐ ܐܳܦ ܪܘܺܝܢܰܢ܆ ܡܶܛܽܠ ܫܦܺܝܥܽܘܬܶܗ ܗܳܝ ܕܰܕܠܳܐ ܚܣܳܡ ܕܺܝܠܶܗ ܕܪܶܕܝܳܐ. ܢܶܪܘܽܘܢ ܓܶܝܪ ܐܳܡܰܪ ܡܶܢ ܕܰܗܺܝܢܽܘܬܶܗ ܕܒܰܝܬܳܟ܆ ܘܢܰܚܠܳܐ ܕܒܽܘܣܳܡܐ ܕܺܝܠܳܟ. ܬܰܫܩܶܐ ܐܶܢܽܘܢ^[10].

ܟܰܕ ܗܳܟܺܝܠ. ܠܘܳܬ ܝܰܘܡܐ ܗܰܘ ܣܓܺܝܕܳܐ ܡܶܬܛܰܝܒܺܝܢܰܢ ܥܰܡ ܟܽܠܳܗ̇ ܢܰܟܦܽܘܬܳܐ ܢܶܬܕܰܒܰܪ. ܗܰܘ ܕܰܠܘܳܬܶܗ ܡܛܰܝܒܳܐ ܠܰܢ. ܐܳܦ ܩܰܕܺܝܡܽܘܬ ܡܶܠܬܳܐ ܢܒܺܝ̣ܳܝ̣ܬܳܐ܆ ܟܰܕ ܗܳܟܰܢܳܐ ܐܳܡܪܳܐ܆ ܐܶܬܢܰܟܰܦܘ^[11] ܡܶܢ ܩܕܳܡ ܦܰܪܨܽܘܦܶܗ ܕܡܳܪܝܳܐ܆ ܡܶܛܽܠ ܕܩܰܪܺܝܒ ܗ̱ܘ̣ ܝܰܘܡܶܗ ܕܡܳܪܝܳܐ܆ ܡܶܛܽܠ ܕܛܰܝܶܒ ܡܳܪܝܳܐ ܕܶܒܚܬܳܐ ܕܺܝܠܶܗ^[12]. ܩܰܕܶܫ ܠܰܓ̈ܒܰܝܳܐ ܕܺܝܠܶܗ. ܠܶܗ ܬܶܫܒܽܘܚܬܳܐ ܠܥܳܠܰܡ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܰܐܪܒܥܺܝܢ.

ܡܙܡܘܪ̈ܐ. 115: 12 [1]

ܩܘܠܣ̈ܝܐ. 2: 12  ܐܦ ܐܦܣ̈ܝܐ. 4: 22 [2]

ܡܬܬܕܝܫ̈ܢܝܬܐ[3]

ܥܒܪ̈ܝܐ. 9: 12 [4]

ܐ. ܩܘܪ̈ܝܢܬܝܐ. 7: 23  ܐܦ ܒ. ܩܘܪ̈ܝܢܬܝܐ. 5: 15 [5]

ܥܒܪ̈ܝܐ. 9: 24 [6]

ܘܕܰܠܪܽܘܚܩܐ[7]

ܣܶܦܪܐ ܕܒܪܝܬܐ. 3: 9 ـ 10 [8]

ܕܥ̇ܠܬܐ[9]

ܡܙܡܘܪ̈ܐ. 36: 8 [10]

ܐܶܬܟܰܚܰܕܘ[11]

ܢܒܺܝܽܘܬܶܗ ܕܰܨܦܰܢܝܳܐ. 1: 7 [12]