1: ܡܶܛܽܠ ܗܳܝ ܕܰܩܕܳܡ ܥܺܐܕܳܐ ܕܒܶܝܬ ܝܰܠܕܳܐ܆ ܪܺܝܫܳܐ ܕܶܐܘܰܢܓܶܠܺܝܽܘܢ ܕܠܽܘܩܳܐ ܡܶܢ ܥܝܳܕܳܐ ܡܶܬܩܪܶܐ܆ ܘܡܶܢܗܽܘܢ ܕܦܶܬܓ̈ܳܡܶܐ ܐܶܘܰܢܓܶܠܳܝ̈ܶܐ. ܡܶܛܽܠ ܕܽܘܓܡܰܐ ܕܡܶܬܒܰܪܢܫܳܢܽܘܬܳܐ ܐܰܠܳܗܳܝܬܳܐ܆ ܘܡܰܠܦܳܢܽܘܬܳܐ ܐܺܝܬܺܝܩܺܐ ܐܰܘܟܺܝܬ ܕܡܶܛܽܠ ܕܽܘܒܳܪ̈ܶܐ. ܕܡܰܠܦܳܐ ܕܰܐܝܟܰܢܳܐ ܙܳܕܶܩ ܕܩܰܕܶܡ ܢܶ݀ܬܥܰܬܰܕ ܩܕܳܡ ܥܺܐܕܳܐ.
2: ܐܰܝܟܰܢܳܐ ܕܢܽܘܗܪܳܐ ܕܺܐܝܡܳܡܳܐ ܟܰܕ ܕܳܢܰܚ ܡܩܰܕܶܡ ܡܰܦܨܰܚ ܠܰܐܦܰܝ̈ܗܽܘܢ ܕܗܳܢܽܘܢ ܕܚܳܙܶܝܢ ܘܰܡܥܰܬܶܕ ܠܗܽܘܢ ܠܘܳܬ݂ ܚܙܳܬܳܐ ܕܢܰܨܺܝܚܽܘܬܶܗ ܕܫܶܡܫܳܐ܆ ܐܰܝܟܰܢܳܐ ܕܠܳܐ ܟܰܝ ܡܶܢ ܒܳܬܰܪ ܚܶܫܽܘܟܳܐ. ܡܶܢ ܫܶܠܝ ܢܶܦܓ̈ܥܳܢ ܥܰܝ̈ܢܶܐ ܒܙܰܠܺܝ̈ܩܶܐ܆ ܘܠܳܐ ܢܣܰܝܒܪ̈ܳܢ ܠܙܰܗܪܳܐ ܕܡܶܢܗܽܘܢ ܢܰܥܡ̈ܨܳܢ ܠܬܶܡܪ̈ܶܐ. ܘܰܢܚܰܦ̈ܝܳܢ ܠܒܳܒ̈ܳܬܳܐ܆ ܘܢܶܚܣܪ̈ܳܢ[1] ܒܽܘܣܳܡܳܐ ܕܺܝܠܶܗ ܕܢܽܘܗܪܳܐ܆ ܗܳܟܰܢܳܐ ܐܳܦ ܢܳܡܽܘܣܳܐ ܕܥܺܕܬܳܐ܆ ܟܰܕ ܥܬܺܝܕ ܕܢܰܢܗܰܪ ܥܠܰܝܢ ܕܶܢܚܶܗ ܕܫܶܡܫܳܐ ܕܙܰܕܺܝܩܽܘܬܳܐ ܒܝܰܕ ܝܺܠܺܝܕܽܘܬܳܐ ܕܒܰܒܣܰܪ܆ ܘܗܽܘ ܝܰܘܡܳܐ ܥܰܠ ܬܰܪ̈ܥܶܐ ܐܺܝܬܰܘܗ̱ܝ܆ ܗܰܘ ܕܥܺܐܕܳܐ ܕܒܶܝܬ ܝܰܠܕܳܐ ܡܥܰܕܥܕܺܝܢܰܢ ܠܶܗ ܠܰܡܫܺܝܚܳܐ ܦܳܪܽܘܩܰܢ܆ ܒܫܺܝܦܽܘܪܳܐ ܐܶܘܰܢܓܶܠܳܝܳܐ ܕܗܳܢܶܝܢ ܕܗܳܫܳܐ ܐܶܬܩܪ̈ܺܝܶܢ܆ ܡܩܰܕܶܡ ܡܕܰܟܶܐ ܠܥܰܝ̈ܢܶܐ ܕܬܰܪܥܺܝܬܰܢ܆ ܐܰܝܟܰܢܳܐ ܕܟܰܕ ܢܶܗܘܶܐ ܐܺܝܬ ܠܰܢ ܡܛܰܝܒܳܐܺܝܬ܆ ܢ݀ܩܰܒܶܠ ܠܢܽܘܗܪܳܐ ܕܡܶܐܬܺܝܬܳܐ ܕܒܰܒܣܰܪ ܕܰܡܫܺܝܚܳܐ. ܘܢܶ݀ܬܒܰܩܶܐ ܕܒܰܐܝܠܶܝܢ ܡ̈ܶܠܶܐ ܗܽܘ ܐܰܠܳܗܳܝܳܐ ܠܽܘܩܳܐ ܡܰܝܬܶܐ ܠܰܢ ܠܘܳܬ ܐ̱ܪ̈ܳܙܶܐ ܘܰܡܩܰܕܶܡ ܡܥܰܬܶܕ ܠܰܢ.
3: ܐܶܡܰܪ ܕܶܐܫܬܰܠܡܰܬ݂ ܠܶܗ ܗܺܝ ܟܳܪܽܘܙܽܘܬܳܐ ܕܶܐܘܰܢܓܶܠܺܝܽܘܢ܆ ܡܶܢ ܗܳܢܽܘܢ ܕܗܶܢܽܘܢ ܗܘ̣ܰܘ ܚܰܙܳܝ̈ܶܐ ܘܰܡܫܰܡܫܳܢ̈ܶܐ ܕܺܝܠܶܗ ܕܡܶܠܬܳܐ[2]. ܡܳܢܳܐ ܐܳܡܰܪ ܐܰܢ̱ܬ. ܚܰܙܳܝ̈ܶܐ ܕܺܝܠܶܗ ܕܡܶܠܬܳܐ ܐܰܠܳܗܳܐ ܘܰܡܫܰܡ̈ܫܳܢܶܐ܆ ܠܰܫܠܺܝ̈ܚܶܐ ܩܳܪܶܐ ܐܰܢ̱ܬ܆ ܘܰܐܝܟܰܢܳܐ ܚܙܰܘ ܐܶܡܰܪܘ ܠܺܝ؟ ܠܗܰܘ ܠܳܐ ܦܰܓܪܳܢܳܐ ܘܕܰܬܚܶܝܬ݂ ܚܙܳܬܳܐ ܠܳܐ ܢܳܦܶܠ. ܐܰܝܟܰܢܳܐ܆ ܡܶܛܽܠ ܕܰܤܛܰܪ ܡܶܢ ܚܛܺܝܬܳܐ ܒܶܣܪܳܐ ܗܘ̣ܳܐ ܚܰܝܶܕ ܠܶܗ ܩܢܽܘܡܳܐܺܝܬ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ[3]܆ ܕܢܰܦܫܳܐ ܐܺܝܬ ܠܶܗ ܡܠܺܝܠܬܳܐ ܟܺܝܬ ܘܡܶܬܗܰܘܢܳܢܺܝܬܳܐ܆ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܩܰܕܺܝܫܬܳܐ ܝܳܠܕܰܬ݂ ܐܰܠܳܗܳܐ ܘܰܒܬܽܘܠܰܬ݂ ܒܟܽܠܙܒܰܢ ܡܰܪܝܰܡ ܕܺܐܝܬܰܘܗ̱ܝ ܡܶܢ ܟܽܠܦܪܽܘܤ ܡܶܬܚܰܙܝܳܢܳܐ ܘܡܶܬܓܰܫܫܳܢܳܐ ܘܡܫܚܳܐ[4]. ܗܳܟܰܢܳܐ ܐܳܦ ܦܰܘܠܽܘܤ. ܡܶܛܽܠ ܕܶܐܬܓܠܺܝ ܒܒܶܣܪܳܐ[5] ܡܶܛܽܠܗܳܕܶܐ ܐܳܡܰܪ ܕܶܐܬܚܙܺܝ ܠܡܰܠܰܐܟ̈ܶܐ. ܒܳܗ̇ ܕܶܝܢ ܒܰܕܡܽܘܬܳܐ܆ ܐܳܦ ܝܽܘܚܰܢܳܢ ܗܰܘ ܪܰܥܡܳܐ ܟܰܕ ܟܳܬܶܒ ܡܰܙܥܶܩ ܗ̱ܘܳܐ܆ ܗܰܘ ܕܺܐܝܬܰܘܗ̱ܝ ܗ̱ܘܳܐ ܡܶܢ ܪܺܝܫܺܝܬܳܐ. ܗܰܘ ܕܰܚܙܰܝܢ ܒܥܰܝ̈ܢܶܐ ܕܺܝܠܰܢ. ܗܰܘ ܕܰܚܙܰܝܢ ܘܺܐܝܕܰܝ̈ܳܐ ܕܺܝܠܰܢ ܓܰܫ̈ܶܝܢ܆ ܡܶܛܽܠ ܡܶܠܬܳܐ ܕܚܰܝ̈ܶܐ[6].
4: ܐܶܢ ܗܳܟܺܝܠ ܗܰܘ ܡܶܠܬܳܐ ܕܶܐܬܚܙܺܝ ܘܶܐܬܓܫܶܫ ܡܶܬܟܪܶܙ܆ ܡܶܛܽܠ ܚܕܳܝܽܘܬܳܐ ܗܳܝ ܪܺܝܫܳܝܬܳܐ ܕܰܠܘܳܬ ܦܰܓܪܳܐ܆ ܗܳܝ ܕܺܐܝܬܶܝܗ̇ ܘܰܕܠܳܐ ܒܽܘܠܒܳܠܳܐ ܘܠܳܐ ܡܶܬܦܰܠܓܳܢܺܝܬܳܐ܆ ܘܒܶܗ ܟܰܕ ܒܶܗ ܒܰܙܢܳܐ ܒܪܶܗ ܕܐ̱ܢܳܫܳܐ ܟܬܺܝܒ ܕܰܢܚܶܬ ܡܶܢ ܫܡܰܝܳܐ[7]܆ ܘܗܳܕܶܐ ܟܰܕ ܗܽܘ ܒܶܣܪܳܐ ܡܶܢ ܝܳܠܕܰܬ ܐܰܠܳܗܳܐ ܡܰܪܝܰܡ ܒܬܽܘܠܬܳܐ ܗܳܝ ܫܳܘܝܰܬ ܒܽܐܘܣܺܝܰܐ ܕܺܝܠܰܢ ܐܺܝܬܰܘܗ̱ܝ܆ ܐܰܝܟܰܢܳܐ ܠܰܘ ܕܚܰܕ ܐܺܝܬܰܘܗ̱ܝ ܥܰܡܰܢܽܘܐܶܝܠ ܢܺܐܡܰܪ܆ ܕܡܶܢ ܬܪܶܝܢ ܟܝܳܢ̈ܶܐ ܐܰܠܳܗܽܘܬܳܐ ܟܺܝܬ ܘܐ̱ܢܳܫܽܘܬܳܐ ܠܰܚܕܳܝܽܘܬܳܐ ܠܳܐ ܡܶܬܦܰܠܓܳܢܺܝܬܳܐ ܡܟܰܢܰܫ܆ ܘܠܰܘ ܒܰܬܪܶܝܢ ܟܝܳܢ̈ܶܐ ܡܶܬܺܝܕܰܥ ܘܰܒܡܰܥܒܕܳܢ̈ܘܳܬܳܐ ܕܗܳܠܶܝܢ ܘܕܺܝܠܳܝ̈ܘܳܬܳܐ. ܐܶܢ ܓܶܝܪ ܬܪܶܝܢ ܩܰܘܺܝܘ ܡܶܢ ܒܳܬܰܪ ܚܕܳܝܽܘܬܳܐ ܬܽܘܒ. ܗܽܘ ܚܕܳܝܽܘܬܳܐ ܡܳܕܶܝܢ܆ ܐܶܫܬܰܪܝܰܬ݂ ܠܳܗ̇ ܠܗܳܠܶܝܢ ܕܡܶܢܗܶܝܢ ܐܺܝܬܶܝܗ̇. ܗܰܘ ܡܳܐ ܓܶܝܪ ܕܡܶܢ ܬܪܶܝܢ ܡܶܕܶܡ ܡܟܰܢܰܫ܆ ܘܠܳܐ ܠܗܳܠܶܝܢ
ܕܡܶܢܗܶܝܢ ܐܶܬܟܰܢܰܫ ܒܰܠܒܶܠ܆ ܡܶܛܽܠܗܳܝ ܟܺܝܬ ܕܠܳܐ ܡܶܫܬܰܚܠܦܳܢܳܐܺܝܬ ܐܶܬܚܰܝܰܕ܆ ܘܳܐܦ ܚܰܕ ܩܒܺܝܥܳܐܺܝܬ ܡܩܰܘܶܐ܆ ܟܰܕ ܟܳܦܰܪ ܒܰܬܪܰܝܳܢܽܘܬܳܐ ܡܶܢ ܒܳܬܰܪ ܚܕܳܝܽܘܬܳܐ.
5: ܡܶܛܽܠܳܬܳܗ̇ ܕܗܳܕܶܐ܆ ܗܽܘ ܡܶܠܬܳܐ ܐܶܬܚܙܺܝ ܘܶܐܬܓܫܶܫ[8]. ܘܡܶܛܽܠ ܟܺܝܬ ܕܠܳܐ ܡܶܫܬܰܚܠܦܳܢܳܐܺܝܬ ܗ̣ܘܳܐ ܒܶܣܪܳܐ܆ ܗܳܠܶܝܢ ܕܺܐܝܬܰܝܗܶܝܢ ܕܺܝܠܶܗ ܕܒܶܣܪܳܐ ܡܶܬܚܰܙܝܳܢܳܐ ܘܡܶܬܓܰܫܫܳܢܳܐ܆ ܕܺܝܠܳܢܳܝ̈ܳܬܳܐ ܕܺܝܠܶܗ ܩܰܒܶܠ ܥܠܰܘܗ̱ܝ ܕܢܶܬܟܰܬ̈ܒܳܢ. ܟܰܕ ܠܰܘ ܒܗܳܝ ܕܺܐܝܬܰܘܗ̱ܝ ܗ̱ܘܳܐ܆ ܐܶܠܳܐ ܒܳܗܝ ܕܰܗܘ̣ܳܐ ܐܶܬܚܙܺܝ. ܒܗܳܝ ܕܶܝܢ ܕܰܗܘ̣ܳܐ ܘܶܐܬܚܙܺܝ܆ ܒܗܳܕܶܐ ܐܳܦ ܚܰܫ ܒܰܒܣܰܪ[9]܆ ܟܰܕ ܨܠܺܝܒܳܐ ܗܰܘ ܕܰܚܠܳܦܰܝܢ ܣܰܝܒܰܪ܆ ܘܩܰܘܺܝ ܠܳܐ ܚܳܫܽܘܫܳܐ ܒܗܽܘܢ ܒܚܰܫ̈ܶܐ.
6: ܘܠܳܐ ܡܬܽܘܡ[10] ܐܰܝܟ ܛܽܘܡܣܳܐ ܪܰܫܺܝܥܳܐ ܕܠܶܐܘܳܢ܆ ܗܰܘ ܕܣܽܘܢܶܗܕܽܘܤ ܗܳܝ ܕܰܒܟܰܠܩܺܝܕܽܘܢܺܐ ܫܰܪܪܰܬ݂܆ ܠܟܽܠܚܰܕ ܡܶܢ ܟܝܳܢ̈ܶܐ ܕܺܝܠܳܢ̈ܘܳܬܳܐ ܕܺܝܠܶܗ ܢܦܰܠܶܓ܆ ܘܰܕܟܽܠ ܚܰܕ ܡܰܥܒܶܕ ܗܳܠܶܝܢ ܕܺܝܠܶܗ ܢܺܐܡܰܪ܆ ܐܰܟܙܢܳܐ ܓܶܝܪ ܕܗܽܘ ܡܶܠܬܳܐ ܠܳܐ ܡܶܬܓܰܫܫܳܢܳܐ ܘܠܳܐ ܡܶܬܚܰܙܝܳܢܳܐ ܐܶܬܚܙܺܝ ܘܶܐܬܓܫܶܫ܆ ܗܳܟܰܢܳܐ ܐܳܦ ܥܰܠ ܝܰܡܳܐ ܗܰܠܶܟ܆ ܕܕܐܣܐ222 ܗܳܟܺܝܠ ܟܝܳܢܳܐ ܢܺܐܡܰܪ ܕܺܐܝܬܶܝܗ̇ ܕܺܝܠܳܢܳܝܬܳܐ ܗܺܝ ܡܰܥܒܕܳܢܽܘܬܳܐ ܕܗܳܝ ܕܰܢܗܰܠܶܟ ܥܰܠ ܡܰܝ̈ܳܐ܆ ܢܦܰܢܽܘܢ ܠܰܢ ܦܶܬܓܳܡܳܐ܆ ܗܳܢܽܘܢ ܕܡܶܢ ܒܳܬܰܪ ܚܕܳܝܽܘܬܳܐ ܬܪܶܝܢ ܟܝܳܢ̈ܶܐ ܡܥܰܠܶܝܢ ܠܰܢ. ܕܗܰܘ ܐܰܠܳܗܳܝܳܐ܆ ܘܰܐܝܟܰܢܳܐ ܕܺܝܠܳܢܳܝܬܳܐ ܕܰܐܠܳܗܽܘܬܳܐ ܬܶܗܘܶܐ܆ ܗܳܝ ܕܰܒܪ̈ܶܓܠܶܐ ܦܰܓܪ̈ܳܢܳܝܳܬܳܐ ܬܗܰܠܶܟ ܘܶܐܠܳܐ ܕܗܰܘ ܐ̱ܢܳܫܳܝܳܐ܆ ܘܰܐܝܟܰܢܳܐ ܠܰܘ ܢܽܘܟܪܳܝܬܳܐ ܐܺܝܬܶܝܗ̇ ܕܒܰܪܢܳܫܳܐ܆ ܗܳܝ ܕܥܰܠ ܐܽܘܣܺܝܰܐ ܪܰܛܺܝܒܬܳܐ ܢܗܰܠܶܟ. ܡܳܕܶܝܢ ܫܳܥܬܳܐ[11] ܗ̱ܝ ܠܳܟ܆ ܕܰܟܝܳܢܳܐ ܬܠܺܝܬܳܝܳܐ ܬܶܒܥܶܐ ܠܳܟ܆ ܗܰܘ ܕܰܥܠܰܘܗ̱ܝ ܬܶܟܬܽܘܒ ܠܕܰܐܰܝܟ ܗܳܕܶܐ ܡܰܥܒܕܳܢܽܘܬܳܐ. ܡܶܢ ܗܳܠܶܝܢ ܓܶܝܪ ܬܪܶܝܢ ܟܝܳܢ̈ܶܐ܀
ܫܠܶܡ ܡܺܐܡܪܳܐ ܕܰܐܪܒܥܐ.