ܡܐܡܪܳܐ ܕܰܬܠܳܬܺܝܢ ܘܬܶܫܥܳܐ

ܕܥܰܠ ܨܰܘܡܳܐ܆ ܕܰܬܪܶܝܢ.

39: ܡܽܘܫܶܐ ܗܰܘ ܡܢܺܝܚܳܢܳܐ ܕܰܐ‌ܠܳܗܳܐ܆ ܟܰܕ ܠܘܳܬ ܩܪܳܒܳܐ ܢܳܦܩܺܝܢ ܗ̱ܘܰܘ ܒ̈ܢܰܝ ܐܺܝܣܪܳܐܶܝܠ܆ ܠܟܳܗܢܳܐ ܦܳܩܶܕ ܗ̱ܘܳܐ܆ ܕܕܰܐܝܟ ܗܳܠܶܝܢ ܢܡܰܠܶܠ ܘܢܺܐܡܰܪ ܠܗܽܘܢ: ܐܰܝܠܶܝܢ ܕܠܰܡ̈ܙܰܝܢܶܐ ܠܒܺܝܒܽܘܬܳܐ ܡܳܠ̈ܝܳܢ ܗ̱ܘܰܝ̈܆ ܘܪܶܥܝܳܢܳܐ ܠܳܐ ܡܶܬܬܙܺܝܥܳܢܳܐ. ܫܡܰܥ ܐܺܝܣܪܳܐܶܝܠ: ܐܰܢ̱ܬܽܘܢ ܐܳܙܺܠ̱ܝܢ ܐܢ̱ܬܽܘܢ ܝܰܘܡܳܢܳܐ ܠܰܩܪܳܒܳܐ. ܥܰܠ ܒܥܶܠ̈ܕܒܳܒܰܝܟܽܘܢ ܠܳܐ ܢܶܬܪܰܦܶܐ ܠܶܒܟܽܘܢ. ܠܳܐ ܬܶܕܚܠܽܘܢ܆ ܐܳܦܠܳܐ ܬܶܬܬܰܒܪܽܘܢ^[1]. ܐܳܦܠܳܐ ܬܶܤܛܽܘܢ ܡܶܢ ܩܕܳܡ ܦܰܪܨܽܘܦܳܐ ܕܺܝܠܗܽܘܢ܆ ܡܶܛܽܠ ܕܡܳܪܝܳܐ ܐܰ‌ܠܳܗܳܐ ܕܺܝܠܟܽܘܢ܆ ܗܰܘ ܕܩܳܕܶܡ ܐܳܙܶܠ ܥܰܡܟܽܘܢ܆ ܢܰܩܪܶܒ ܥܰܡܟܽܘܢ ܐܰܟܚܕܳܐ. ܠܽܘܩܒܰܠ ܒܥܶܠ̈ܕܒܳܒܶܐ ܕܺܝܠܟܽܘܢ ܘܰܢܫܰܘܙܶܒܟܽܘܢ.

ܐܶܢ ܗܳܟܺܝܠ ܗܰܘ ܟܰܕ ܠܘܳܬ ܕܡܳܐ ܘܒܶܣܪܳܐ ܡܙܰܝܶܢ ܗ̱ܘܳܐ ܦܳܠ̈ܚܶܐ܆ ܘܠܽܘܩܒܰܠ ܒܢܰܝ̈ܢܳܫܳܐ ܫܰܘ̈ܝ̣ܰܝ̣ ܒܓܶܢܣܳܐ ܣܳܕܰܪ ܗ̱ܘܳܐ ܠܗܽܘܢ܆ ܕܗܳܘܶܐ ܠܗܽܘܢ ܐܰ‌ܠܳܗܳܐ ܡܣܰܝܥܳܢܳܐ ܥܳܪܶܒ ܗ̱ܘܳܐ ܠܗܽܘܢ܆ ܐܰܝܟܰܢܳܐ ܠܰܘ ܝܰܬܺܝܪܳܐܺܝܬ ܢܶܬܬܟܶܠ ܚܢܰܢ܆ ܕܗܳܠܶܝܢ ܕܝܰܬܺܝܪ ܪ̈ܰܘܪܒܳܢ ܡܶܢ ܗܳܠܶܝܢ ܢܶܫܬܰܘܕܶܐ ܟܺܝܬ ܘܢܺܐܡܰܪ܆ ܟܰܕ ܠܟܽܘܢ ܡܙܰܝ̈ܢܶܐ ܪ̈ܽܘܚܳܢܶܐ ܒܝܰܕ ܨܰܘܡܳܐ ܠܘܳܬ ܣܶܕܪܳܐ ܕܰܩܪܳܒܳܐ ܡܶܬܗܰܘܢܳܢܳܐ ܡܰܦܩܺܝܢ ܚ̱ܢܰܢ܆ ܠܽܘܩܒܰܠ ܒܥܶܠ̈ܕܒܳܒܶܐ ܠܳܐ ܡܶܬܚܰܙܝܳܢ̈ܶܐ. ܠܳܐ ܓܶܝܪ ܐܺܝܬܰܘܗ̱ܝ ܠܰܢ ܗܰܘ ܕܰܪܳܐ ܠܘܳܬ ܕܡܳܐ ܘܒܶܣܪܳܐ. ܐܶܠܳܐ ܠܘܳܬ ܪ̈ܺܝܫܳܢܘܳܬܳܐ. ܠܘܳܬ ܫܽܘܠ̈ܛܳܢܶܐ. ܠܘܳܬ ܐܰܚܺܝ̈ܕܰܝ ܥܳܠܡܳܐ ܕܚܶܫܽܘܟܳܐ ܕܥܳܠܡܳܐ ܗܳܢܳܐ^[2]. ܠܘܳܬ ܪ̈ܽܘܚܶܐ ܗܳܠܶܝܢ ܕܒܺܝܫܽܘܬܳܐ܆ ܒܗܳܠܶܝܢ ܫܡܰܝܳܢ̈ܝܳܬܳܐ.

ܐܳܘ ܠܣܶܕܪܳܐ ܐܰܝܟ ܕܒܰܫܪܳܪܳܐ ܐܰ‌ܠܳܗܳܝܳܐ ܘܰܦܐܶܐ ܒܪܰܒܽܘܬܳܐ. ܠܰܢ ܗܳܢܽܘܢ ܕܥܰܡ ܛܺܝܢܳܐ ܐܰܣܺܝܪܺܝܢ ܚ̱ܢܰܢ܆ ܠܽܘܩܒܰܠ ܪ̈ܽܘܚܶܐ ܐܳܐܰܪ̈ܳܝܳܬܳܐ ܕܚܶܫܽܘܟܳܐ ܘܚܰܝ̈ܠܰܘܳܬܳܐ ܗܳܢܽܘܢ ܕܝܰܬܺܝܪ ܡܶܢ ܟܽܠ ܒܺܝܫܺܝܢ ܡܙܰܝܶܢ ܠܰܢ. ܠܗܳܠܶܝܢ ܕܦܰܘܠܽܘܤ ܪ̈ܺܝܫܳܢܘܳܬܳܐ ܘܫܽܘܠ̈ܛܳܢܶܐ ܩܪܳܐ ܐܶܢܽܘܢ. ܗܳܠܶܝܢ ܕܶܝܢ ܐܺܝܬܰܝܗܽܘܢ܆ ܗܳܢܽܘܢ ܕܥܰܡ ܐܳܟܶܠܩܰܪܨܳܐ ܡܪܰܕܘ܆ ܕܛܳܒ̈ܶܐ ܡܰܢ ܒܫܽܘܪܳܝܳܐ ܘܰܠܛܳܒܬܳܐ ܡܶܢ ܥܳܒܽܘܕܳܐ ܐܶܬܒܪܺܝܘ܆ ܘܰܒܪܺܝܫܳܢܽܘܬܳܐ ܡܶܕܶܡ ܘܛܶܟܣܳܐ ܡܰܠܰܐܟܳܝܳܐ ܐܶܬܛܰܟܰܣܘ ܘܶܐܬܬܣܺܝܡܘ܆ ܨܶܒܝܳܢܳܐܺܝܬ ܕܶܝܢ ܡܶܢ ܬܶܐܽܘܪܝܰܐ ܗܳܝ ܕܰܠܥܶܠ ܘܡܶܢ ܫܽܘܠܳܡܳܐ^[3] ܗܰܘ ܢܽܘܗܪܳܢܳܝܳܐ ܐܰܗܦܶܟܘ ܚܝܳܪܗܽܘܢ܆ ܘܶܐܬܟܪܰܗܘ̱ ܪܳܡܽܘܬܳܐ ܥܰܡ ܗܰܘ ܕܠܽܘܩܒܰܠ ܡܳܪܝܳܐ ܐܰܚܺܝܕ ܟܽܠ ‌ܐܰܪܺܝܡ ܨܰܘܪܶܗ ܐܰܝܟܰܢܳܐ ܕܰܟܬܺܝܒ܆ ܘܰܒܨܶܒܝܳܢ ܢܰܦܫܗܽܘܢ ܥܰܡܶܨܘ ܠܥܰܝܢܳܐ ܗܳܝ ܡܶܬܗܰܘܢܳܢܺܝܬܳܐ ܘܰܗܘ̣ܰܘ ܒܚܶܫܽܘܟܳܐ. ܗܰܘ ܓܶܝܪ ܕܨܶܒܝܳܢܳܐܺܝܬ ܡܰܪܚܶܩ ܠܳܗ̇ ܠܥܰܝܢܶܗ ܡܶܢ ܢܽܘܗܪܳܐ܆ ܝܺܕܺܝܥܳܐ ܗܝ܆ ܕܗܽܘ ܠܘܳܬ ܢܰܦܫܶܗ ܡܩܺܝܡ ܠܶܗ ܠܚܶܫܽܘܟܳܐ.

ܪ̈ܺܝܫܳܢܘܳܬܐ ܕܶܝܢ ܘܫܽܘܠ̈ܛܳܢܶܐ. ܟܰܢܺܝ ܐܶܢܽܘܢ ܫܠܺܝܚܳܐ܆ ܠܰܘ ܡܶܛܽܠ ܕܪܺܝܫܳܢܽܘܬܳܐ ܡܶܕܶܡ ܐܰܘ ܫܽܘܠܛܳܢܳܐ ܐܺܝܬ ܠܗܽܘܢ ܥܠܰܝܢ ܠܫ̈ܺܐܕܶܐ. ܙܶܠ ܠܗܰܠ܆ ܐܰܝܟܰܢܳܐ ܓܶܝܪ ܗܳܢܽܘܢ ܕܳܐܦܠܳܐ ܥܰܠ ܚܙܺܝܪ̈ܶܐ ܕܢܺܐܙܽܠ̱ܘܢ ܐܶܫܟܰܚܘ܆ ܐܶ‌ܠܽܘ ܠܳܐ ܕܟܰܕ ܝܶܫܽܘܥ ܦܳܪܽܘܩܳܐ ܐܰ‌ܠܳܗܳܐ ܫܒܰܩ ܐܶܙܰܠܘ܆^[4] ܐܰܝܟ ܡܳܐ ܟܺܝܬ ܕܳܐܦ ܒܶܐܘܢܓ̈ܶܠܝܰܐ ܟܬܺܝܒ܆ ܐܶܠܳܐ ܡܶܛܽܠ ܕܡܶܢ ܪܺܝܫܳܢܽܘܬܳܐ ܘܫܽܘܠܛܳܢܳܐ ܢܦܰܠܘ܆ ܗܰܘ ܕܰܥܠܰܘܗ̱ܝ ܩܳܡܘ ܗ̱ܘܰܘ ܡܶܢ ܐܰ‌ܠܳܗܳܐ.

ܘܰܕܗܳܕܶܐ ܗܳܟܰܢܳܐ ܐܺܝܬ ܠܶܗ܆ ܠܗܽܘܢ ܠܰܟ̈ܬܳܒܶܐ ܟܳܗ̈ܢܳܝܶܐ ܫܡܰܥ. ܕܳܐܡܪܺܝܢ ܗܳܟܰܢܳܐ. ܠܡܰܠܰܐܟ̈ܶܐ ܟܺܝܬ ܗܳܢܽܘܢ ܠܳܐ ܢܛܰܪܘ ܪܺܝܫܳܢܽܘܬܳܐ ܕܺܝܠܗܽܘܢ܆ ܐܶܠܳܐ ܫܒܰܩܘ ܠܒܶܝܬ ܡܰܥܡܪܳܐ ܗܰܘ ܕܺܝܠܗܽܘܢ܆ ܠܕܺܝܢܳܐ ܕܝܰܘܡܳܐ ܪܰܒܳܐ܆ ܒܰܐܣܽܘܪ̈ܶܐ ܕܰܠܥܳܠܰܡ ܬܚܶܝܬ ܚܶܫܽܘܟܳܐ ܢܛܰܪ^[5]. ܡܩܰܘܶܐ^[6] ܠܗܽܘܢ ܓܶܝܪ ܝܰܘܡܳܐ ܗܰܘ ܕܢܺܝܚܳܐ ܕܕܺܝܢܳܐ܆ ܘܫܰܠܗܶܒܺܝܬܳܐ ܕܫܽܘܢܳܩܳܐ ܗܳܝ ܕܠܳܐ ܫܽܘܠܳܡ ܘܰܕܠܳܐ ܕܳܥܟܳܐ܆ ܐܰܝܟ ܗܳܝ ܕܰܐܡܺܝܪܳܐ: ܙܶܠܘ ܠܟܽܘܢ ܡܶܢܝ ܠܺܝ̈ܛܶܐ ܠܢܽܘܪܳܐ ܗܳܝ ܕܰܠܥܳܠܰܡ܆ ܗܳܝ ܕܰܡܛܰܝܒܳܐ ܠܳܐܟܶܠܩܰܪܨܳܐ ܘܰܠܡܰܠܰܐܟܰܘ̈ܗܝ^[7]. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܗܽܘܢ ܠܳܐ ܐܺܝܬ ܠܗܽܘܢ ܪܺܝܫܳܢܽܘܬܳܐ ܕܡܶܕܶܡ܆ ܐܶܠܳܐ ܐܶܢ ܕܰܠܡܳܐ܆ ܟܰܕ ܠܶܗ ܠܳܐܟܶܠܩܰܪܨܳܐ ܐܺܝܬ ܠܗܽܘܢ ܪܺܝܫܳܐ܆ ܐܰܝܟ ܡܰܢ ܕܡܰܝܬܶܐ ܩܰܕܡܳܝ̈ܳܬܳܐ ܒܒܺܝܫܽܘܬܳܐ܆ ܘܗܽܘ ܩܰܕܡܳܐܺܝܬ ܚܰܒܶܠ ܘܺܝܠܶܕ ܡܳܪܽܘܕܽܘܬܳܐ܆ ܘܛܶܟܣܳܐ ܠܳܐ ܡܛܰܟܣܳܐ ܘܚܶܫܽܘܟܳܝܳܐ ܬܚܶܝܬ ܗܰܘ ܡܶܬܛܰܟܣܺܝܢ܆ ܘܒܰܪܘܺܝܚܽܘܬܶܗ ܕܳܐܐܰܪ ܥܳܡܪܺܝܢ^[8] ܐܰܝܟ ܡܰܢ ܕܡܶܢ ܫܽܘܪܳܝܳܐ ܟܝܳܢܳܐ ܩܰܛܺܝܢ ܡܢ̈ܰܘܳܬܳܐ ܡܛܳܐ ܠܗܽܘܢ܆ ܘܕܰܡܚܰܪܰܪ ܡܶܢ ܥܰܒܝܽܘܬܳܐ ܗܳܝ ܕܰܠܬܰܚܬ ܡܢܰܬܥܳܐ.

ܡܶܛܽܠ ܗܳܕܶܐ. ܗܽܘ ܝܶܫܽܘܥ܆ ܟܰܕ ܣܰܓܺܝ̈ܶܐܐ ܐܺܝܬܰܝܗܽܘܢ ܐܳܕܫ̈ܶܐ ܕܰܡܣܳܡ ܒܪܺܝܫܳܐ܆ ܥܰܠ ܨܠܺܝܒܳܐ ܨܶܒܝܳܢܳܐܺܝܬ ܣܳܠܶܩ܆ ܐܰܝܟܰܢܳܐ ܕܰܠܪܺܝܫܳܢܽܘܬܳܐ ܕܺܝܠܗܽܘܢ ܗܳܝ ܕܒܳܐܰܐܪ ܢܶܫܪܶܐ܆ ܡܶܢ ܐܰܝܟܳܐ ܕܟܰܕ ܐܰܝܟ ܗܰܘ ܕܰܠܚܶܣܢܳܗ̇ ܕܰܡܕܺܝܢ̱ܬܳܐ ܟܒܰܫܘ܆ ܠܓܶܢܣܳܐ ܕܰܒܢܰܝ̈ܢܳܫܳܐ ܥܫܰܡܘ ܗ̱ܘܰܘ ܘܫܰܥܒܶܕܘ. ܘܡܶܬܪܰܡܪܰܡ ܐܳܦ ܟܰܕ ܚܳܐܶܫ܆ ܐܰܝܟܰܢܳܐ ܕܠܰܢ ܗܳܢܽܘܢ ܕܡܶܛܽܠܳܬܗܽܘܢ ܘܰܚܠܳܦܰܝܗܽܘܢ ܗܽܘ ܨܠܺܝܒܳܐ ܗܘ̣ܳܐ܆ ܢܪܰܡܪܶܡ ܘܢܶܓܶܕ ܠܘܳܬܶܗ. ܘܰܢܚܰܘܶܐ ܓܰܠܝܳܐܺܝܬ܆ ܕܳܐܦ ܒܶܗ ܒܚܰܫܳܐ ܗܰܘ ܕܡܽܘܟܳܟܳܐ ܨܶܒܝܳܢܳܝܳܐ ܩܰܘܺܝ ܪܳܡܳܐ. ܘܡܶܬܪܰܡܪܰܡ ܠܰܘ ܦܫܺܝܛܳܐܺܝܬ܆ ܐܶܠܳܐ ܟܰܕ ܐܶܬܡܬܰܚ ܪܒܺܝܥܳܐܺܝܬ. ܠܰܐܪܒܥܳܐ ܓܶܝܪ ܓܰܒ̈ܶܐ ܐܰܚܺܝܕ ܗܽܘ ܨܠܺܝܒܳܐ. ܟܰܕ ܒܝܰܕ ܗܳܕܶܐ ܡܚܰܘܶܐ ܢܰܗܺܝܪܳܐܺܝܬ܆ ܕܰܐ‌ܠܳܗܳܐ ܐܺܝܬܰܘܗ̱ܝ܆ ܕܒܝܰܕ ܟܽܠ ܥܳܒܰܪ܆ ܘܰܠܟܽܠ ܚܳܒܶܫ ܗܽܘ ܒܶܗ.

ܗܳܟܰܢܳܐ ܐܳܦ ܦܰܘܠܽܘܤ ܟܰܕ ܡܚܰܘܶܐ ܗ̱ܘܳܐ ܠܐ̱ܪܳܙܳܐ ܕܰܨܠܺܝܒܳܐ܆ ܟܰܕ ܠܶܐܦܶܣܳܝ̈ܶܐ ܟܳܬܶܒ ܗ̱ܘܳܐ ܐܳܡܰܪ ܗ̱ܘܳܐ: ܐܰܝܟܰܢܳܐ ܕܬܶܬܡܨܽܘܢ ܠܡܰܕܪܳܟܽܘ ܥܰܡ ܟܽܠܗܽܘܢ ܩܰܕܺܝ̈ܫܶܐ܆ ܡܳܢܰܘ ܦܬܳܝܳܐ ܘܽܐܘܪܟܳܐ ܘܥܽܘܡܩܳܐ ܘܪܰܘܡܳܐ܆ ܘܬܶܕܥܽܘܢ ܠܚܽܘܒܶܗ ܕܰܡܫܺܝܚܳܐ ܗܰܘ ܕܰܡܥܰܠܰܝ ܘܥܳܒܰܪ ܠܺܝܕܰܥܬܳܐ^[9].

ܠܡܳܢܳܐ ܗܳܟܺܝܠ ܢܺܐܡܰܪ ܐ̱ܢܳܫ܆ ܐܶܢܗܽܘ ܕܠܳܐ ܡܶܕܶܡ ܐܰܚܺܝܕܺܝܢ ܫ̈ܺܐܕܶܐ܆ ܐܰܡܺܝܪܺܝܢ ܐܰܚܺܝ̈ܕܰܝ ܥܳܠܡܳܐ. ܠܰܘ ܐܰܝܟ ܡܰܢ ܕܠܰܫܡܰܝܳܐ ܘܠܰܐܪܥܳܐ ܘܰܠܝܰܡܳܐ ܘܰܠܗܳܢܶܝܢ ܕܰܒܗܳܠܶܝܢ ܡܶܬܚܰܒ̈ܫܳܢ ܐܰܚܺܝܕܺܝܢ܆ ܗܳܕܶܐ ܓܶܝܪ ܐܺܝܬܰܘܗ̱ܝ ܥܳܠܡܳܐ ܗܳܢܳܐ ܕܡܶܬܚܙܶܐ܆ ܐܶܠܳܐ ܐܰܝܟ ܡܰܢ ܕܰܕܣܽܘ̈ܟܳܠܶܐ ܥܳܠ̈ܡܳܢܳܝܶܐ ܕܒܺܝܫܽܘܬܳܐ ܐܰܚܺܝܕܺܝܢ ܪܺܝܫܳܢܽܘܬܳܐ ܘܕܰܐܫܺܝܕܽܘܬܳܐ ܗܳܝ ܕܗܰܢܺܝ̈ܐܘܳܬܳܐ܆ ܗܳܠܶܝܢ ܕܰܒܗܶܝܢ ܐܰܚܺܝܕܺܝܢ ܘܰܡܫܰܥܒܕܺܝܢ ܗܳܢܽܘܢ ܕܰܒܥܳܠܡܳܐ ܚܰܝ̣ܺܝ̣ܢ. ܗܳܢܽܘܢ ܓܶܝܪ ܕܩܰܕܡܳܝ̈ܶܐ ܐܶܬܟܪܰܗܘ̱ ܒܺܝܫܽܘܬܳܐ܆ ܘܰܐܝܟ ܗܰܘ ܕܗܶܢܽܘܢ ܐܰܪܡܝܽܘܗ̱ܝ ܠܙܰܪܥܳܗ̇ ܕܗܳܕܶܐ܆ ܟܺܐܢܳܐܺܝܬ ܕܕܺܝܠܳܗ̇ ܐܺܝܬܰܝܗܽܘܢ ܪ̈ܺܝܫܳܢܶܐ܆ ܘܰܕܠܳܗ̇ ܐܰܚܺܝܕܺܝܢ ܘܕܰܥܠܶܝܗ̇ ܡܰܡܠܟܺܝܢ܆ ܐܳܦ ܡܶܬܰܐܡܪܺܝܢ ܐܳܦ ܡܶܣܬܰܒܪܺܝܢ.

ܕܰܥܝܳܕܳܐ ܕܶܝܢ ܐܺܝܬ ܠܰܟܬܳܒܳܐ. ܥܳܠܡܳܐ ܠܡܶܩܪܳܐ܆ ܠܡܰܚ̈ܫܒܳܬܳܐ ܕܒܺܝܫܽܘܬܳܐ ܗܳܢܶܝܢ ܕܰܒܥܳܠܡܳܐ܆ ܣܰܒ ܠܳܟ ܠܝܽܘܚܰܢܳܢ ܐܶܘܰܢܓܶܠܺܣܛܐ ܡܡܰܠܶܠ ܐܰ‌ܠܳܗܳܝ̈ܳܬܳܐ܆ ܕܗܳܟܰܢܳܐ ܐܳܡܰܪ: ܠܳܐ ܬܶܪܚܡܽܘܢ ܠܥܳܠܡܳܐ܆ ܘܳܐܦܠܳܐ ܠܗܳܠܶܝܢ ܕܰܒܥܳܠܡܳܐ. ܐܶܢ ܐ̱ܢܳܫ ܡܰܚܶܒ ܠܥܳܠܡܳܐ܆ ܠܳܐ ܐܺܝܬܰܘܗ̱ܝ ܒܶܗ ܚܽܘܒܳܐ ܕܰܐܒܳܐ. ܡܶܛܽܠ ܕܟܽܠ ܡܽܘܢ ܕܰܒܥܳܠܡܳܐ ܐܺܝܬܰܘܗ̱ܝ܆ ܪܶܓܬܳܐ ܕܒܶܣܪܳܐ. ܘܪܶܓܬܳܐ ܕܥܰܝ̈ܢܶܐ܆ ܘܰܡܫܰܩܠܽܘܬܳܐ ܕܚܰܝ̈ܶܐ ܕܥܳܠܡܳܐ܆ ܠܳܐ ܐܺܝܬܰܝܗܶܝܢ ܡܶܢ ܐܰܒܳܐ܆ ܐܶܠܳܐ ܡܶܢ ܥܳܠܡܳܐ ܐܺܝܬܰܝܗܶܝܢ. ܘܥܳܠܡܳܐ ܥܳܒܰܪ ܠܶܗ ܘܪܶܓܬܳܐ. ܗܰܘ ܕܶܝܢ ܕܥܳܒܶܕ ܨܶܒܝܳܢܳܐ ܕܰܐ‌ܠܳܗܳܐ܆ ܡܩܰܘܶܐ ܠܥܳܠܰܡ^[10]. ܘܬܽܘܒ. ܝܳܕܥܺܝܢ ܚ̱ܢܰܢ ܕܡܶܢ ܐܰ‌ܠܳܗܳܐ ܐܺܝܬܰܝܢ. ܘܥܳܠܡܳܐ ܟܽܠܶܗ ܒܒܺܝܫܳܐ ܣܺܝܡ^[11].

ܠܳܐ ܕܶܝܢ ܐܳܡܰܪ ܗ̱ܘܳܐ ܠܗܰܠ ܗܳܕܶܐ܆ ܥܰܠ ܥ̈ܒܳܕܶܐ ܗܳܢܽܘܢ ܛܳܒ̈ܶܐ ܘܫܰܦܺܝܪ̈ܶܐ ܕܡܶܬܚܙܶܝܢ܆ ܟܰܕ ܐܰ‌ܠܳܗܳܐ ܕܫܰܦܺܝܪ̈ܳܢ ܥܒܰܕ ܐܶܢܶܝܢ ܠܟܽܠܗܶܝܢ ܘܰܕܣܰܓܺܝ ܫܰܦܺܝܪ̈ܳܢ^[12]܆ ܐܰܝܟܰܢܳܐ ܕܰܠܡܽܘܫܶܐ ܫܳܡܥܺܝܢܰܢ ܕܰܟܬܰܒ܆ ܘܰܕܠܳܐ ܣܳܟ ܐܺܝܬܰܝܗܶܝܢ ܒܺܝ̈ܫܳܬܳܐ. ܐܰܝܟ ܗܳܕܶܐ ܬܰܪܥܺܝܬܳܐ܆ ܐܳܦ ܦܳܪܽܘܩܰܢ ܒܶܐܘܰܢܓܶܠܺܝܽܘܢ ܠܘܳܬ ܫܠܺܝ̈ܚܶܐ ܐܳܡܰܪ ܗ̱ܘܳܐ: ܐܶ‌ܠܽܘ ܡܶܢ ܥܳܠܡܳܐ ܐܺܝܬܰܝܟܽܘܢ ܗ̱ܘܰܝܬܽܘܢ܆ ܥܳܠܡܳܐ ܠܕܺܝܠܶܗ ܪܳܚܶܡ ܗ̱ܘܳܐ^[13]. ܘܟܰܕ ܛܳܒ܆ ܡܢܳܬܳܐ ܐܺܝܬܰܝܗܽܘܢ ܗ̱ܘܰܘ ܐܳܦ ܗܶܢܽܘܢ ܡܶܢ ܥܳܠܡܳܐ܆ ܟܰܕ ܒܰܟܝܳܢܳܐ ܒܢܰܝ̈ܢܳܫܳܐ ܐܺܝܬܰܝܗܽܘܢ ܗ̱ܘܰܘ܆ ܐܰܝܟܰܢܳܐ ܕܳܐܦ ܚܢܰܢ. ܐܶܠܳܐ ܠܰܘ ܠܳܐ ܝܺܕܰܥܬܳܐ ܐܺܝܬܶܝܗ̇܆ ܐܳܦ ܠܗܳܢܽܘܢ ܕܰܡܡܰܫܚܳܐܺܝܬ ܡܫܰܘܬܦܺܝܢ ܒܗܰܘܢܳܐ ܘܰܒܚܽܘܫܳܒ̈ܶܐ. ܕܡܶܛܽܠ ܕܰܗܘ̣ܰܘ ܐܰܟܣ̈ܢܳܝܶܐ ܠܡܰܚ̈ܫܒܳܬܳܐ ܗܳܠܶܝܢ ܕܒܺܝܫܽܘܬܳܐ܆ ܗܳܠܶܝܢ ܕܰܡܫܰܥܒܕܺܝܢ ܠܗܶܝܢ ܗܳܢܽܘܢ ܕܗܳܢܶܝܢ ܥܳܠܡܳܢܳܝ̈ܳܬܳܐ ܘܕܰܡܠܶܐ ܙܰܒܢܳܐ ܡܶܬܪܰܥܶܝܢ܆ ܐܳܡܰܪ ܠܗܽܘܢ: ܕܺܐܝܬܰܝܗܽܘܢ ܢܽܘܟܪ̈ܳܝܶܐ ܕܥܳܠܡܳܐ.

ܗܽܘ ܗܳܟܘܳܬ ܟܺܝܬ. ܐܳܦ ܦܰܘܠܽܘܤ܆ ܟܰܕ ܐܰܚܺܝ̈ܕܰܝ ܥܳܠܡܳܐ ܟܰܢܺܝ ܐܶܢܽܘܢ ܠܫ̈ܺܐܕܶܐ܆ ܒܗܳܠܶܝܢ ܕܡܶܢ ܒܳܬܰܪܟܶܢ ܐܰܝܬܺܝ ܩܰܦܣܳܗ̇ ܠܰܪܘܺܝܚܽܘܬܶܗ^[14] ܕܣܽܘܟܳܠܳܐ܆ ܟܰܕ ܐܶܡܰܪ: ܕܚܶܫܽܘܟܳܐ ܗܳܢܳܐ. ܟܰܕ ܗܳܕܶܐ ܐܰܝܟ ܕܰܠܡܺܐܡܰܪ ܐܳܡܰܪ ܗ̱ܘܳܐ܆ ܕܰܐܚܺܝ̈ܕܰܝ ܥܳܠܡܳܐ ܐܶܡܪܶܬ ܟܡܳܐ ܕܺܐܝܬܶܝܗ̇ ܗܳܝ ܕܢܶܐܚܽܘܕ ܡܶܕܶܡ ܠܚܶܫܽܘܟܳܐ ܘܰܠܒܺܝܫܽܘܬܳܐ ܗܳܝ ܕܰܒܥܳܠܡܳܐ ܐܶܬܰܐܫܕܰܬ. ܟܽܠܡܶܕܶܡ ܓܶܝܪ ܕܦܳܪܶܫ ܡܶܢ ܐܰ‌ܠܳܗܳܐ. ܗܰܘ ܢܽܘܗܪܳܐ ܫܰܪܺܝܪܳܐ܆ ܗܳܢܳܐ ܡܳܪܳܢܳܐܺܝܬ ܐܺܝܬܰܘܗ̱ܝ ܚܶܫܽܘܟܳܐ.

 ܡܶܛܠ ܗܳܕܶܐ ܐܳܦ ܠܬܰܣܰܠܽܘܢܺܝ̈ܩܳܝܶܐ ܟܳܬܶܒ ܗ̱ܘܳܐ: ܕܠܳܐ ܐܺܝܬܰܝܢ ܕܠܺܠܝܳܐ ܐܳܦܠܐ ܕܚܶܫܽܘܟܳܐ^[15]. ܐܶܠܳܐ ܬܽܘܒ. ܐܳܦ ܪ̈ܽܘܚܶܐ ܕܒܺܝܫܽܘܬܳܐ ܩܪܳܐ ܐܶܢܽܘܢ܆ ܠܗܽܘܢ ܟܰܕ ܠܗܽܘܢ ܠܫ̈ܺܐܕܶܐ. ܟܰܕ ܡܰܘܕܰܥ܆ ܕܟܰܕ ܒܪ̈ܽܘܚܶܐ ܗܳܢܶܝܢ ܡܶܬܗܰܘ̈ܢܳܢܝܳܬܳܐ ܡܶܬܡܢܶܝܢ ܗ̱ܘܰܘ܆ ܘܕܺܝܠܶܗ ܟܰܕ ܕܺܝܠܶܗ ܕܰܟܝܳܢܳܐ ܫܰܘܝܳܐܺܝܬ ܠܗܢܝܢ ܐܺܝܬܰܝܗܽܘܢ ܗ̱ܘܰܘ܆ ܐܶܬܟܪܰܗܘ̱ ܒܺܝܫܽܘܬܳܐ܆ ܐܰܝܟܰܢܳܐ ܕܰܫܡܳܐ ܢܶܗܘܶܐ ܠܗܽܘܢ ܗܽܘ̣ ܟܽܘܪܗܳܢܗܽܘܢ. ܡܶܛܽܠܗܳܕܶܐ ܓܶܝܪ܆ ܐܳܦ ܟܰܕ ܡܨܰܠܶܝܢ ܚ̱ܢܰܢ ܐܳܡܪܺܝܢܰܢ: ܦܰܨܳܐ ܠܰܢ ܡܶܢ ܒܺܝܫܳܐ^[16]. ܟܰܕ ܠܣܳܛܳܢܳܐ ܡܫܰܡܗܺܝܢܰܢ ܒܺܝܫܳܐ܆ ܐܰܝܟ ܕܠܰܡܕܰܒܪܳܢܳܐ ܘܪܰܒܳܐ ܕܰܦܠܰܓܳܐ ܗܳܝ ܕܒܺܝܫܽܘܬܳܐ.

ܗܳܝ ܕܶܝܢ ܕܒܰܫܡܰܝܳܢ̈ܝܳܬܳܐ܆ ܦܽܘܫܳܩܳܐ ܥܦܺܝܦܳܐ ܐܺܝܬ ܠܶܗ. ܐ̱ܢܳܫܺܝ̈ܢ ܓܶܝܪ ܐܳܡܪܺܝܢ܆ ܕܰܥܝܳܕܰܐ ܗ̄ܘ ܠܰܟܬܳܒܳܐ܆ ܕܰܫܡܰܝܳܐ ܢܶܩܪܶܐ ܠܳܐܰܪ܆ ܗܰܘ ܕܒܶܗ ܒܰܥܝܳܕܳܐ ܐܳܦ ܦܳܪ̈ܚܳܬܳܐ ܕܰܫܡܰܝܳܐ ܫܰܡܰܗ^[17]. ܗܳܝ ܗܳܟܺܝܠ ܕܒܰܫܡܰܝܳܢ̈ܝܳܬܳܐ܆ ܕܰܚܠܳܦ ܗܳܝ ܕܒܳܐܐܰܪ̈ܳܝܳܬܳܐ ܐܰܡܺܝܪܳܐ ܡܫܰܪܪܺܝܢ ܠܡܺܐܡܰܪ. ܕܒܳܐܰܐܪ ܕܶܝܢ ܐܰܝܟ ܕܰܒܣܽܘܓܳܐܐ ܡܕܰܝܪ̈ܳܢ ܪ̈ܽܘܚܶܐ ܗܳܢܶܝܢ ܕܒܺܝܫܽܘܬܳܐ܆ ܩܰܕܶܡܢܰܢ ܐܶܡܰܪܢܰܢ. ܕܡܶܢ ܗܳܪܟܳܐ ܐܳܦ ܦܰܘܠܽܘܤ܆ ܡܶܛܽܠ ‌ܐܳܟܶܠܩܰܪܨܳܐ ܐܳܡܰܪ: ܐܰܝܟ ܪܺܝܫܳܢܳܐ ܕܫܽܘܠܛܳܢܳܐ ܕܳܐܰܐܪ܆ ܕܪܽܘܚܳܐ ܗܰܘ ܕܗܳܫܳܐ ܡܰܥܒܶܕ ܒܰܒ̈ܢܰܝܳܐ ܕܠܳܐ ܡܶܬܛܦܺܝܣܳܢܽܘܬܳܐ^[18].

ܐ̱ܢܳܫܺܝ̈ܢ ܕܶܝܢ ܟܰܕ ܠܳܐ ܝܰܠܺܝܦܳܐܺܝܬ ܐܺܝܬ ܠܗܽܘܢ ܡܶܛܽܠ ܟܬܳܒܳܐ ܐܰ‌ܠܳܗܳܝܳܐ܆ ܘܠܳܐ ܡܶܫܟܚܺܝܢ ܕܒܰܙܢܳܐ ܗܳܢܳܐ ܕܶܐܬܶܐܡܰܪ܆ ܢܶܬܠܽܘܢ ܡܶܠܬܳܐ ܕܗܳܢܳܐ ܦܽܘܫܳܩܳܐ܆ ܠܰܡܙܰܝܳܦܽܘ ܠܗܳܢܳܐ ܦܶܬܓܳܡܳܐ ܣܥܰܘ. ܟܰܕ ܗܳܝ ܕܰܒܗܳܠܶܝܢ ܕܰܬܚܶܝܬ ܫܡܰܝܳܐ ܚܠܳܦ ܗܳܝ ܕܒܰܫܡܰܝܳܢ̈ܝܳܬܳܐ ܐܰܡܪܰܚܘ ܠܡܶܟܬܰܒ܆ ܘܒܰܦܫܺܝܩܽܘܬܶܗ ܕܰܓܒܽܘܠܝܳܐ ܪܰܫܺܝܥܳܐ܆ ܚܰܦܺܝܘ ܠܡܰܐܺܝܢܽܘܬܳܐ ܘܰܠܠܳܐ ܝܰܠܺܝܦܽܘܬܳܐ ܒܰܝܬܳܝܬܳܐ ܕܺܝܠܗܽܘܢ. ܗܳܠܶܝܢ ܓܶܝܪ ܕܰܬܚܶܝܬ ܫܡܰܝܳܐ ܐܳܡܪܺܝܢ: ܠܳܐܰܐܪ ܡܶܢ ܟܽܠ ܦܪܽܘܤ ܐܺܝܬ ܠܰܢ ܕܢܶܣܒܰܪ.

ܒܪܰܡ ܐ̱ܚܪ̈ܳܢܶܐ܆ ܠܗܳܝ ܕܰܫܡܰܝܳܢ̈ܝܳܬܳܐ ܗܳܟܰܢܳܐ ܐܶܣܬܰܟܠܽܘܗ̇. ܟܰܕ ܐܳܡܪܺܝܢ: ܕܺܐܝܬܰܘܗ̱ܝ ܠܰܢ ܕܰܪܳܐ ܠܘܳܬ ܪ̈ܽܘܚܶܐ ܗܳܠܶܝܢ ܕܒܺܝܫܽܘܬܳܐ ܠܰܘ ܣܪܺܝܩܳܐܺܝܬ. ܘܳܐܦܠܳܐ ܦܫܺܝܛܳܐܺܝܬ ܘܳܐܦܠܳܐ ܒܣܽܘܥܪ̈ܳܢܶܐ ܐܰܝܠܶܝܢ ܕܗܽܘ ܘܰܕܠܳܐ ܫܳܘܶܝܢ ܠܡܶܕܶܡ. ܐܶܠܳܐ ܒܗܳܠܶܝܢ ܫܡܰܝܳܢ̈ܝܳܬܳܐ. ܡܶܛܽܠ ܗܳܢܶܝܢ ܓܶܝܪ ܐܺܝܬܰܘܗ̱ܝ ܟܽܠܶܗ ܬܰܟܬܽܘܫܳܐ. ܟܰܕ ܚܢܰܢ ܡܰܢ ܡܶܬܚܪܶܝܢܰܢ ܠܡܶܣܰܩ ܠܘܳܬ ܝܽܘܬܪܳܢܳܐ^[19]  ܗܰܘ ܫܡܰܝܳܢܳܐ܆ ܒܝܰܕ ܕܽܘܒܳܪܳܐ ܡܝܰܬܪܳܐ ܘܣܳܥܽܘܪ̈ܘܳܬܳܐ ܛܳܒ̈ܳܬܳܐ܆ ܗܳܢܽܘܢ ܕܶܝܢ ܩܳܝܡܺܝܢ ܠܩܽܘܒܠܰܢ ܘܟܳܠܶܝܢ ܠܰܢ܆ ܘܰܒܫܰܥܺܝܥܽܘܬܳܐ ܕܗܰܢܺܝ̈ܐܘܳܬܳܐ ܫܟܺܝܪ̈ܳܬܳܐ ܢܳܓܕܺܝܢ ܠܰܢ ܠܰܐܦ̈ܰܝ ܠܬܰܚܬ܆ ܘܓܳܪܺܝܢ ܠܰܢ ܠܘܳܬ ܓܽܘܡܳܨܳܐ ܘܰܐܒܕܳܢܳܐ. ܟܰܕ ܓܶܝܪ ܟܝܳܢܳܐ ܚܰܣܳܡܳܐ ܐܺܝܬܰܝܗܽܘܢ ܫ̈ܺܐܕܶܐ܆ ܘܚܰܣܳܡܽܘܬܳܐ ܐܶܬܟܪܰܗܘ̱ ܥܰܡ ܗܳܠܶܝܢ ܒܺܝ̈ܫܳܬܳܐ ܐ̱ܚܪ̈ܳܢܝܳܬܳܐ܆ ܩܰܫܝܳܐܺܝܬ ܟܳܐܶܒ ܠܗܽܘܢ ܘܡܶܬܢܰܟܬܺܝܢ܆ ܟܰܕ ܚܳܙܶܝܢ ܠܰܢ ܕܰܠܘܳܬ ܪܰܘܡܳܐ ܗܳܝ ܪܳܕܦܺܝܢܰܢ ܚܢܰܢ ܘܰܡܣܰܪܗܒܺܝܢܰܢ܆ ܗܰܘ ܕܰܢܦܰܠܘ ܗܶܢܽܘܢ ܡܶܢܶܗ ܡܶܛܽܠ ܒܺܝܫܽܘܬܳܐ ܗܳܝ ܕܥܶܠ̣ܰܬ ܥܠܰܝܗܽܘܢ.

ܠܗܳܠܶܝܢ ܕܶܝܢ ܦܽܘܫܳܩ̈ܶܐ ܬܪ̈ܰܝܗܽܘܢ ܕܳܝܢܺܝܢ ܚ̱ܢܰܢ ܚܢܰܢ܆ ܕܢܳܩܦܺܝܢ ܠܢܺܝܫܳܐ ܕܫܰܦܺܝܪܽܘܬ ܕܶܚܠܬܳܐ. ܒܰܙܢܰܝ̈ܳܐ ܓܶܝܪ ܣܰܓܺܝ̈ܶܐܐ ܡܶܣ̈ܬܰܟܠܳܢ ܡ̈ܶܠܶܐ ܗܳܠܶܝܢ ܕܪܽܘܚܳܐ ܡܶܛܽܠ ܥܽܘܬܪܳܐ ܗܰܘ ܕܣܽܘ̈ܟܳܠܶܐ ܐܰ‌ܠܳܗܳܝ̈ܶܐ. ܟܕ ܚܕܳܐ ܒܰܠܚܽܘܕ ܡܰܣܠܶܝܢ ܚ̱ܢܰܢ܆ ܠܰܫܟܳܚܬܳܐ ܗܳܝ ܠܳܐ ܪܕܺܝܬܳܐ ܕܦܰܠܣܳܪܽܘܬܳܐ^[20].

ܠܘܳܬ ܕܰܐܝܟ ܗܳܠܶܝܢ ܗܳܟܺܝܠ ܡܶܬܟܰܬܫܳܢ̈ܶܐ ܕܰܠܩܽܘܒܠܳܐ ܣܳܕܰܪ ܠܰܢ ܡܫܺܝܚܳܐ ܒܝܰܕ ܨܰܘܡܳܐ܆ ܠܘܳܬ ܐܳܟܶܠܩܰܪܨܳܐ ܐܳܡܰܪ ܐ̱ܢܳܐ: ܘܰܠܘܳܬ ܟܢܺܝܫܽܘܬ ܚܰܝܠܳܐ ܒܺܝܫܬܳܐ ܗܳܝ ܕܫ̈ܺܐܕܶܐ. ܟܰܕ ܡܶܛܽܠܗܳܕܶܐ ܐܶܫܬܰܡܰܗ ܐܳܟܶܠܩܰܪܨܳܐ܆ ܡܶܛܽܠ ܕܗܽܘ ܟܰܕ ܩܰܕܡܳܝܳܐ ܕܰܓܶܠ܆ ܪܡܳܝ ܘܳܐܟܶܠ ܩܰܪ̈ܨܶܐ ܕܣܳܝܽܘܡܽܘܬ ܢܳܡܽܘܣܳܐ ܘܰܕܦܽܘܩܕܳܢܳܐ ܗܰܘ ܕܰܐ‌ܠܳܗܳܐ܆ ܟܕ ܡܚܰܦܶܛ ܗ̱ܘܳܐ ܠܚܰܘܳܐ ܠܳܐ ܡܶܫܬܰܡܥܳܢܽܘܬܳܐ ܘܳܐܡܰܪ ܗ̱ܘܳܐ: ܠܰܘ ܡܡܳܬ ܬܡܽܘܬܽܘܢ܆ ܝܳܕܰܥ ܗ̱ܘܳܐ ܓܶܝܪ ܐܰ‌ܠܳܗܳܐ ܕܰܒܝܰܘܡܳܐ ܗܰܘ ܕܬܶܐܟܠܽܘܢ ܒܶܗ ܡܶܢ ܩܰܝܣܳܐ ܗܰܘ܆ ܢܶܬܦܰܬܚ̈ܳܢ ܥܰܝܢ̈ܶܐ ܕܺܝܠܟܽܘܢ ܘܬܶܗܘܽܘܢ ܐܰܝܟ ܐܰ‌ܠܳܗ̈ܶܐ ܕܝܳܕܥܺܝܢ ܛܳܒܬܳܐ ܘܒܺܝܫܬܳܐ^[21].

ܐܳܘ ܡܶܢ ܡܪܰܡܝܳܢܽܘܬܳܐ ܗܳܝ ܕܝܰܬܺܝܪ ܡܶܢ ܟܽܠ ܒܺܝܫܳܐ. ܠܰܚܣܳܡܳܐ ܗܰܘ ܕܗܽܘ ܐܶܬܟܪܰܗ ܐܰܩܶܦ ܠܰܐܠܳܗܳܐ܆ ܟܰܕ ܚܣܳܡܳܐ ܫܰܪܰܪ ܕܺܐܝܬܰܘܗ̱ܝ ܗ̱ܘܳܐ ܟܶܠܝܳܢܳܐ ܗܰܘ ܕܡܶܢ ܡܶܐܟܽܘܠܬܳܐ ܕܩܰܝܣܳܐ ܗܰܘ. ܕܚܰܣܳܡܽܘܬܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܐܰܝܟ ܕܒܰܫܪܳܪܳܐ܆ ܐܰܝܟ ܓܒܽܘܠܝܶܗ ܡܰܛܥܝܳܢܳܐ ܕܳܐܟܶܠܩܰܪܨܳܐ܆ ܗܳܝ ܕܢܶܟܠܶܐ ܐܶܢܽܘܢ ܡܶܢ ܫܰܘܬܳܦܽܘܬܳܐ ܘܬܽܘܪܣܳܝܳܐ܆ ܗܰܘ ܕܡܶܫܟܰܚ ܗ̱ܘܳܐ ܗܳܝܕܶܝܢ ܠܰܡܫܰܟܳܢܽܘ ܗܳܠܶܝܢ ܕܛܳܒ̈ܳܢ.

ܗܰܘ ܕܰܠܘܳܬܶܗ ܬܽܘܒ. ܡܶܛܽܠ ܕܰܡܣܰܓܦܳܢܳܐܺܝܬ ܐܶܟܰܠܢܰܢ ܒܙܰܒܢܳܐ ܗܰܘ ܕܠܳܐ ܙܳܕܶܩ ܗ̱ܘܳܐ܆ ܒܺܐܝܕܰܘ̈ܗ̱ܝ ܕܺܝܠܶܗ ܟܰܕ ܕܺܝܠܶܗ ܕܨܰܘܡܳܐ ܡܙܰܝܶܢ ܠܰܢ ܠܩܽܘܒܠܶܗ܆ ܪܺܝܫ ܚܰܝܠܳܐ ܗܰܘ ܕܺܝܠܰܢ. ܐܶ‌ܠܽܘ ܓܶܝܪ ܨܳܡ ܗ̱ܘܳܐ ܐܳܕܳܡ ܒܙܰܒܢܳܐ ܗܰܘ ܕܠܳܚܶܡ ܗ̱ܘܳܐ ܡܶܢ ܡܶܐܟܽܘܠܬܳܐ ܗܳܝ ܕܺܐܝܠܳܢܳܐ ܗܰܘ܆ ܠܳܐ ܗܳܘܶܐ ܗ̱ܘܳܐ ܠܰܢ ܣܽܘܢܩܳܢܳܐ ܥܰܠ ܨܰܘܡܳܐ ܗܳܢܳܐ. ܐܶܠܳܐ ܐܰܟܙܢܳܐ ܕܳܐܣܝܳܐ ܛܰܪܩܳܐ܆ ܟܕ ܬܽܘܪ̈ܣܳܝܶܐ ܠܳܐ ܙܳܕܩܳܐܺܝܬ ܐܶܬܢܣܶܒܘ ܘܰܥܒܰܕܘ ܟܽܘܪܗܳܢܳܐ ܒܦܰܓܪܳܐ܆ ܒܝܰܕ ܓܠܺܝܙܽܘܬ ܡܶܐܟܽܘܠܬܳܐ ܡܣܰܦܶܩ ܠܳܗ̇ ܠܗܳܝ ܕܰܡܥܺܝܩܳܐ܆ ܘܰܠܥܶܠ̈ܠܳܬܳܐ ܗܳܠܶܝܢ ܥܳܒ̈ܕܳܬ ܟܽܘܪܗܳܢܳܐ ܡܕܰܟܶܐ ܒܩܰܠܺܝܠ ܩܰܠܺܝܠ܆ ܗܳܟܰܢܳܐ ܨܰܘܡܳܐ ܥ̣ܰܠ ܥܠܰܝܢ ܡܰܐܣܝܳܢܳܐܺܝܬ܆ ܟܰܕ ܡܕܰܟܶܐ ܒܝܰܕ ܓܠܺܝܙܽܘܬ ܬܽܘܪܣܳܝܳܐ ܚܰܟܺܝܡܬܳܐ ܘܝܰܕܽܘܥܬܳܢܺܝܬܳܐ܆ ܠܚܰܫ̈ܶܐ ܗܳܢܽܘܢ ܕܰܥܕܰܘ ܥܠܰܝܢ ܡܶܢ ܗܳܝ ܡܶܐܟܽܘܠܬܳܐ ܕܰܕܠܳܐ ܒܙܰܒܢܳܗ̇܆ ܘܡܰܚܠܶܡ ܘܰܡܚܰܝܶܠ ܒܩܰܠܺܝܠ ܩܰܠܺܝܠ܆ ܘܡܰܦܢܶܐ ܡܰܝܬܶܐ ܠܘܳܬ ܫܰܦܺܝܪܽܘܬ ܩܰܢܳܝܽܘܬܳܐ ܘܰܠܘܳܬ ܓܰܢ̱ܒܳܪܽܘܬܳܐ ܗܳܝ ܕܙܳܕܩܳܐ܆ ܘܰܡܙܰܝܶܢ ܠܽܘܩܒܰܠ ܫ̈ܺܐܕܶܐ.

ܗܳܕܶܐ ܕܶܝܢ܆ ܕܚܽܘܒܳܐ ܗܰܘ ܪܺܝܫܳܝܳܐ ܕܰܐ‌ܠܳܗܳܐ ܘܰܕܝܰܨܺܝܦܽܘܬܳܐ ܕܺܝܠܶܗ ܕܰܥܠܰܝܢ ܐܺܝܬܶܝܗ̇. ܐܰܟܙܢܳܐ ܓܶܝܪ ܕܰܡܚܰܕܝܳܐ ܠܰܐܒܳܗ̈ܶܐ܆ ܗܳܝ ܕܰܒ̈ܢܰܝܳܐ ܒܰܝ̈ܬܳܝܶܐ ܕܺܝܠܗܽܘܢ܆ ܢܶܬܥܰܪܙܠܽܘܢ ܥܰܡ ܐ̱ܢܳܫܺܝ̈ܢ ܚܰܝ̈ܠܬܳܢܶܐ ܡܶܬܟܰܬܫܳܢ̈ܶܐ ܕܰܠܩܽܘܒܠܳܐ܆ ܘܰܒܝܰܕ ܙܳܟܽܘܬܳܐ ܘܙܽܘܝܳܚ̈ܶܐ ܡܩܰܠ̈ܣܳܢܶܐ ܢܶܬܢܰܨܚܽܘܢ܆ ܒܶܗ ܟܰܕ ܒܶܗ ܒܰܙܢܳܐ ܟܰܕ ܒܛܰܘܪܳܐ ܣܰܓܺܝܳܐܐ ܕܒܰܡܨܰܥܬܳܐ ܝܰܬܺܝܪ ܡܶܢ ܟܽܠ ‌ܐܰܒܳܐ܆ ܪܶܚܡܬܳܢܳܐܺܝܬ ܣܺܝܡ ܠܘܳܬܰܢ ܐܰ‌ܠܳܗܳܐ܆ ܐܶܬܚܰܫܰܚ ܥܰܡ ܚܣܳܡܳܐ ܕܳܐܟܶܠܩܰܪܨܳܐ ܘܰܕܫ̈ܺܐܕܶܐ܆ ܕܰܠܘܳܬ ܟܽܠܳܗ̇ ܗܳܕܶܐ ܟܡܳܝܽܘܬܳܐ ܕܒܺܝܫܽܘܬܳܐ ܫܪܰܥܘ܆ ܘܫܳܒܶܩ ܕܢܶܗܘܶܐ ܕܰܪܳܐ܆ ܐܰܝܟܰܢܳܐ ܕܳܐܦ ܠܰܡܫܰܩܠܽܘܬܳܐ ܕܗܳܢܽܘܢ ܗܳܝ ܕܡܶܢ ܪܳܡܽܘܬܳܐ ܢܫܰܢܶܩ܆ ܘܠܰܢ ܝܰܬܺܝܪ ܫܒܺܝ̈ܚܶܐ ܘܢܰܨܺܝ̈ܚܶܐ ܒܝܰܕ ܟ̈ܠܺܝܠܶܐ ܢܚܰܘܶܐ܆ ܘܢܰܟܪܶܙ ܠܰܢ ܒܝܰܕ ܟܳܪܽܘܙܽܘܬܳܐ ܪܳܡܬܳܐ ܐܰܝܟ ܕܠܰܐܝܠܶܝܢ ܕܶܐܬܟܰܬܰܫܘ܆ ܘܰܢܫܰܘܬܶܦ ܐܰܝܟ ܕܠܰܐܝܠܶܝܢ ܕܰܥܡ̣ܰܠܘ ܘܰܠܐܺܝܘ܆ ܒܒܽܘܣܳܡܳܐ ܕܛܳܒ̈ܳܬܳܐ ܕܰܠܥܳܠܰܡ.

ܐܶܠܳܐ ܡܶܢ ܩܕܺܝܡ ܡܰܢ. ܟܰܕ ܠܳܐ ܡܫܰܡܠܝܳܐܺܝܬ. ܘܰܟܪܺܝܗܳܐܺܝܬ ܣܺܝܡܺܝܢ ܗ̱ܘܰܝܢ܆ ܐܳܣܝܳܐܺܝܬ ܗܽܘ ܨܰܘܡܳܐ ܡܶܬܩܰܪܰܒ ܗ̱ܘܳܐ ܠܰܢ. ܡܦܰܩܶܕ ܗ̱ܘܳܐ ܓܶܝܪ ܡܽܘܫܶܐ. ܟܰܕ ܗܳܟܰܢܳܐ ܐܳܡܰܪ ܗ̱ܘܳܐ: ܘܒܰܥܣܰܪܬܳܐ ܕܝܰܪܚܳܐ ܗܳܢܐ ܫܒܺܝܥܳܝܳܐ܆ ܝܰܘܡܳܐ ܕܚܽܘܣܳܝܳܐ ܐܺܝܬܰܘܗ̱ܝ. ܩܰܪܝܳܐ. ܩܰܕܺܝܫܳܐ ܢܶܗܘܶܐ ܠܟܽܘܢ܆ ܘܰܬܡܰܟܟܽܘܢ ܢܰܦ̈ܫܳܬܟܽܘܢ^[22]. ܡܶܛܽܠ ܟܺܝܬ ܕܝܰܘܡܳܐ ܠܰܡ ܕܚܽܘܣܳܝܳܐ ܘܰܕܫܽܘܒܩܳܢܳܐ ܐܺܝܬܰܘܗ̱ܝ܆ ܠܡܽܘܟܳܟܳܐ ܗܰܘ ܕܡܶܢ ܨܰܘܡܳܐ ܩܰܒܶܠܘ. ܐܰܝܟ ܕܶܐܢ ܐܳܦ ܐܳܣܝܳܐ ܠܗܳܢܽܘܢ ܕܰܥܡܝܠܺܝܢ ܡܶܢ ܟܽܘܪܗܳܢܳܐ ܐܳܡܰܪ ܗ̱ܘܳܐ܆ ܕܰܢܣܰܝܒܪܽܘܢ ܟܺܐܒܳܐ ܕܰܨܪܳܝܳܐ ܐܰܘ ܕܰܟܘܳܝܳܐ܆ ܡܶܛܽܠ ܝܽܘܬܪܳܢܳܐ ܕܚܽܘܠܡܳܢܳܐ.

ܗܳܫܳܐ ܕܶܝܢ ܟܰܕ ܠܘܳܬ ܩܰܢܳܝܽܘܬܳܐ ܕܝܰܬܺܝܪ ܡܫܰܡܠܝܳܐ ܐܶܬܰܝܢܰܢ܆ ܐܰܬܠܺܝܛܳܐܺܝܬ ܘܰܐܝܟ ܕܰܠܬܰܟܬܽܘܫܳܐ ܡܶܬܬܣܺܝܡ ܠܰܢ ܘܡܶܬܦܩܶܕ ܨܰܘܡܳܐ܆ ܡܶܢ ܐܰ‌ܠܳܗܳܐ ܪܰܒܳܐ ܘܦܳܪܽܘܩܰܢ ܡܫܺܝܚܳܐ. ܡܳܢܳܐ ܓܶܝܪ ܐܳܡܰܪ: ܐܰܢ̱ܬ ܕܶܝܢ ܟܰܕ ܨܳܐܶܡ ܐܰܢ̱ܬ܆ ܡܫܽܘܚ ܪܺܝܫܳܟ^[23]. ܡܶܬܡܫܳܚܽܘ ܕܶܝܢ ܡܶܬܡܫܰܚ ܡܶܢ ܟܽܠܦܪܽܘܤ܆ ܗܰܘ ܕܰܠܘܳܬ ܕܰܪܳܐ ܫܳܠܰܚ. ܐܶܠܳܐ ܡܶܛܽܠ ܟܺܝܬ. ܕܠܰܘ ܦܰܓܪܳܢܳܐ ܐܺܝܬܰܘܗ̱ܝ ܗܽܘ ܕܰܪܳܐ܆ ܡܶܬܗܰܘܢܳܢܳܐ ܕܶܝܢ ܡܶܢ ܟܽܠ ܦܪܽܘܤ܆ ܠܰܘ ܐ̱ܚܪܺܬܳܐ ܡܢܳܬܳܐ ܡܶܢ ܦܰܓܪܳܐ ܦܩܰܕ ܠܡܶܡܫܰܚ ܐܶܠܳܐ ܐܶܢ ܠܪܺܝܫܳܐ܆ ܗܳܢܰܘ ܕܶܝܢ ܠܪܺܝܫܳܢܳܝܳܐ ܗܰܘ ܕܢܰܦܫܳܐ܆ ܒܡܶܫܚܳܐ ܗܰܘ ܐܰ‌ܠܳܗܳܝܳܐ܆ ܒܡ̈ܶܠܶܐ ܗܳܠܶܝܢ ܕܪܽܘܚܳܐ. ܐܰܝܟ ܗܳܝ ܕܰܐܡܺܝܪܳܐ ܠܩܽܘܗܠܰܬ: ܕܰܕܚܰܟܺܝܡܳܐ ܥܰܝܢܰܘ̈ܗ̱ܝ ܒܪܺܝܫܶܗ^[24]. ܗܰܘ ܕܶܝܢ ܕܗܳܟܰܢܳܐ ܡܫܰܚ܆ ܘܶܐܬܥܰܪܙܰܠ ܥܰܡ ܒܰܥ̈ܠܰܝ ܕܰܪܶܗ ܘܰܙܟܳܐ܆ ܢܳܩܦܳܐܺܝܬ ܐܳܦ ܦܰܪܨܽܘܦܶܗ ܢܫܺܝܓ܆ ܟܰܕ ܒܥܰܝܢܳܐ ܕܟܺܝܬܳܐ ܘܢܰܗܺܝܪܬܳܐ ܕܬܰܪܥܺܝܬܶܗ܆ ܒܬܶܐܽܘܪܺܝܰܐ ܕܗܳܠܶܝܢ ܫܡܰܝܳܢ̈ܝܳܬܳܐ ܗܳܘܶܐ.

ܡܶܛܽܠܗܳܕܶܐ ܓܶܝܪ. ܡܶܢ ܒܳܬܰܪ ܕܶܐܡܰܪ ܕܰܡܫܽܘܚ ܪܺܝܫܳܟ܆ ܐܰܝܬܺܝ ܒܳܬܰܪܟܶܢ܆ ܘܦܰܪܨܽܘܦܳܟ ܐܰܫܺܝܓ. ܦܨܺܝܚܳܐ ܗܳܟܺܝܠ ܘܟܰܕ ܚܳܐܰܪ ܐܰܢ̱ܬ ܠܘܳܬ ܫܡܰܝܳܐ܆ ܣܰܩ ܠܘܳܬ ܨܰܘܡܳܐ ܗܰܘ ܪܳܡܳܐ ܘܰܡܥܰܠܝܳܐ. ܘܠܳܐ ܬܶܬܟܡܰܪ ܠܩܽܘܒܠܶܗ܆ ܐܳܦܠܳܐ ܠܬܰܚܬ ܬܶܬܟܦܶܦ ܘܬܶܬܶܐܒܶܠ 222ܘܬܰܐܠܶܐ ܠܩܰܛܺܝܢܽܘܬܳܐ ܘܠܳܐ ܡܶܬܬܰܪܣܝܳܢܽܘܬܳܐ ܕܟܰܪܣܳܟ. ܗܳܕܶܐ ܓܶܝܪ. ܕܚܰܝ̈ܘܳܬܳܐ ܪ̈ܒܺܝܥܳܝܳܬ ܪ̈ܶܓܠܶܐ܆ ܗܳܠܶܝܢ ܕܰܠܘܳܬ ܟܰܪܣܳܐ ܪ̈ܟܺܝܢܳܢ. ܐܺܝܬܶܝܗ̇ ܕܺܝܠܳܝܬܳܐ܆ ܘܠܰܘ ܕܒܰܪ ܐ̱ܢܳܫܐ ܡܠܺܝܠܳܐ ܘܕܰܒܨܰܠܡܳܐ ܕܰܐ‌ܠܳܗܳܐ ܐܶܬܒܪܺܝ܆ ܘܕܰܒܝܰܕ ܐܶܣܟܺܡܳܐ ܕܰܒܦܰܓܪܳܐ܆ ܒܰܠܚܽܘܕܰܘܗ̱ܝ ܡܶܢ ܗܳܠܶܝܢ ܚܰܝ̈ܘܳܬܳܐ ܐ̱ܚܪ̈ܳܢܝܳܬܳܐ܆ ܐܺܝܬ ܠܶܗ ܚܰܘܪܳܐ ܦܫܺܝܩܳܐ ܠܥܶܠ ܠܘܳܬ ܫܡܰܝܳܐ. ܘܰܫܡܰܥܳܝܗ̱ܝ ܠܦܰܘܠܽܘܤ ܕܣܳܐܶܡ ܢܳܡܽܘܣܳܐ ܘܳܐܡܰܪ: ܐܶܢ ܗܳܟܺܝܠ ܩܳܡܬܽܘܢ ܥܰܡ ܡܫܺܝܚܳܐ܆ ܗܳܠܶܝܢ ܕܰܠܥܶܠ ܒܥ̣ܰܘ܆ ܐܰܝܟܳܐ ܕܰܡܫܺܝܚܳܐ ܐܺܝܬܰܘܗ̱ܝ ܟܰܕ ܡܶܢ ܝܰܡܺܝܢܳܐ ܕܰܐ‌ܠܳܗܳܐ ܝܳܬܶܒ܆ ܗܳܠܶܝܢ ܕܰܠܥܶܠ ‌ܐܶܬܪܰܥܰܘ܆ ܠܰܘ ܗܳܠܶܝܢ ܕܥܰܠ ‌ܐܰܪܥܳܐ^[25].

ܣܰܒ ܒܺܐܝ̈ܕܰܝܟ ܦܶܢܩܺܝܬܳܐ ܕܰܟܬܳܒܳܐ ܐܰ‌ܠܳܗܳܝܳܐ. ܥܒܰܪ ܒܬܰܫ̈ܥܝܳܬܳܐ ܥܰܬܺܝ̈ܩܳܬܳܐ. ܩܪܺܝ ܕܽܘܒܳܪ̈ܰܝܗܽܘܢ ܕܓܰܒܪ̈ܶܐ ܗܳܢܽܘܢ ܕܡܶܬܩܰܠܣܺܝܢ. ܕܰܐܒܪܳܗܳܡ. ܕܺܐܝܣܚܳܩ. ܕܝܰܥܩܽܘܒ. ܕܺܐܝܽܘܒ. ܘܰܠܝܽܘܩܢܳܐ ܕܰܡܝܰܬܪܽܘܬܳܐ ܕܗܳܢܽܘܢ܆ ܒܰܕܡܽܘܬ ܨܰܝܳܪܳܐ ܚܰܟܺܝܡܳܐ ܕܰܡܳܐ. ܝܺܠܰܦ ܕܰܐܝܟܰܢܳܐ ܥܰܡ ܢܶܫ̈ܶܐ ܢܰܟܦܳܐܺܝܬ ܚ̣ܝܰܘ. ܐܰܝܟܰܢܳܐ ܒܪܶܚܡܰܬ ܐܰ‌ܠܳܗܳܐ ܒܢܰܝ̈ܳܐ ܪܰܒܺܝܘ. ܐܰܝܟܰܢܳܐ ܪܶܚܡܰܬ ܐܰܟܣ̈ܢܳܝܶܐ ܐܶܬܥܰܢܘܺܝܘ܆ ܐܰܝܟܰܢܳܐ ܟܺܝܬ ܕܳܐܦ ܠܡܰܠܰܐܟ̈ܶܐ ܒܒܰܝܬܳܐ ܢܩܰܒܠܽܘܢ^[26]܆ ܐܰܝܟܰܢܳܐ ܟܰܕ ܥܰܬܺܝܪܺܝܢ ܗ̱ܘܰܘ ܠܰܘ ܠܢܰܦܫܗܽܘܢ ܥܰܬܺܝܪܺܝܢ ܗ̱ܘܰܘ܆ ܐܶܠܳܐ ܠܩܰܪ̈ܺܝܒܰܝܗܽܘܢ܆ ܟܰܕ ܒܰܡܫܰܘܬܦܽܘܬ ܡܰܘܗܰܒܬܳܐ ܠܗܳܝ ܕܚܰܣܺܝܪܳܐ ܡܢܺܝܚܺܝܢ ܗ̱ܘܰܘ. ܘܳܐܦܠܳܐ ܣܳܟ ܣܰܪܺܝܟܺܝܢ ܗ̱ܘܰܘ ܒܕܰܗܒܳܐ܆ ܘܡܶܢ ܥܳܠܽܘܒܽܘܬܳܐ ܐܰܝܟ ܕܡܶܢ ܛܰܡܽܐܘܬܳܐ ܡܰܗܦܟܺܝܢ ܗ̱ܘܰܘ ܐܰܦܰܝ̈ܗܽܘܢ. ܚܰܕ ܡܰܢ ܓܶܝܪ ܡܶܢܗܽܘܢ ܐܳܡܰܪ ܗ̱ܘܳܐ: ܟܰܕ ܒܩܽܘܪ̈ܒܳܢܶܐ ܡܶܢ ܐ̱ܢܳܫ ܡܶܬܝܰܩܰܪ ܗ̱ܘܳܐ܆ ܐܶ݀ܦܫܽܘܛ ܐܺܝܕܳܐ ܕܺܝܠܝ ܠܘܳܬ ܐܰ‌ܠܳܗܳܐ ܡܪܰܝܡܳܐ܆ ܗܰܘ ܕܰܒ̣ܪܳܐ ܠܰܫܡܰܝܳܐ ܘܠܰܐܪܥܳܐ^[27]܆ ܐܶܢ ܡܶܢ ܫܘܺܝܬܳܐ ܥܕܰܡܳܐ ܠܥܶܪܰܩܬܳܐ ܕܰܣܐܽܘܢܳܐ܆ ܐܶ݀ܣܰܒ ܡܶܢ ܟܽܠܗܶܝܢ ܗܳܠܶܝܢ ܕܺܝܠܳܟ܆ ܕܠܳܐ ܬܺܐܡܰܪ ܕܶܐܢܳܐ ܐܰܥܬܪܶܬ ܠܰܐܒܪܳܗܳܡ.

ܐ̱ܚܪܺܢܳܐ ܕܶܝܢ. ܟܰܕ ܡܶܛܽܠ ܚܛܺܝܬܳܐ ܣܳܒܰܪ ܗ̱ܘܳܐ ܕܡܶܬܪܕܶܐ܆ ܘܟܰܕ ܡܰܘܕܶܐ ܗ̱ܘܳܐ ܘܰܡܩܰܛܪܶܓ ܗܽܘ ܠܶܗ. ܘܠܰܘ ܟܰܕ ܡܶܬܚܬܰܪ ܗ̱ܘܳܐ ܒܢܰܦܫܶܗ. ܐܳܡܰܪ ܗ̱ܘܳܐ: ܐܶܢ ܒܺܐܝ̈ܕܰܝܳܐ ܕܺܝܠܝ ܓܶܫܦܶܬ ܒܫܽܘܚܕܳܐ܆ ܐܶ݀ܙܪܽܘܥ ܐܰܪܰܐ ܘܰܐ̱ܚܪ̈ܳܢܶܐ ܢܶܐܟܠܽܘܢ. ܐܶܢ ܕܶܝܢ ܐܳܦ ܚܕܺܝܬ ܟܰܕ ܥܽܘܬܪܳܐ ܣܰܓܺܝܳܐܐ ܗ̱ܘܳܐ ܠܺܝ܆ ܐܰܘ ܥܰܠ ܩܶܢܝܳܢ̈ܶܐ ܠܳܐ ܡܶܬܡܰܢ̈ܝܳܢܶܐ ܣܳܡܶܬ ܐܺܝܕܳܐ ܕܺܝܠܝ. ܐܰܘ ܠܳܐ ܚܳܙܶܝܢܰܢ ܠܫܶܡܫܳܐ ܕܡܰܢܗܰܪ ܘܰܕܡܰܘܦܶܐ܆ ܠܣܰܗܪܳܐ ܕܶܝܢ ܕܒܳܨܪܳܐ ܘܓܳܡܪܳܐ. ܠܰܘ ܓܶܝܪ ܒܗܽܘܢ ܐܺܝܬܶܝܗ̇^[28].

ܚܙܰܝܬ ܦܺܝܠܳܣܽܘܦܺܝܰܐ ܚܰܬܺܝܬ̣ܬܳܐ܆ ܘܬܰܪܥܺܝܬܳܐ ܕܰܡܒܰܣܝܳܐ ܥܰܠ ܡܚܰܕܝܳܢ̈ܝܳܬܳܐ ܗܳܠܶܝܢ ܕܡܶܬܚܰܙܝ̈ܳܢ܆ ܠܳܐ ܠܰܡ ܐܳܡܰܪ ܢܬܰܦܬ̣ܰܢܝ ܫܰܦܺܝܪܽܘܬ ܓܰܘܢܳܐ ܕܕܰܗܒܳܐ܆ ܘܠܳܐ ܐܶܙܕܟܺܝܬ̣ ܡܶܢ ܢܰܨܺܝܚܽܘܬܶܗ ܕܣܺܐܡܳܐ܆ ܘܠܳܐ ܐܶܬܰܐܫܕܶܬ ܒܗܰܘܢܝ. ܠܘܳܬ ܓܶܝܪ ܫܶܡܫܳܐ ܘܣܰܗܪܳܐ ܚܳܪܶܬ܆ ܐܶܤܛܽܘܟ̈ܣܶܐ ܗܳܢܽܘܢ ܕܗܳܟܰܢܳܐ ܫܰܦܺܝܪܺܝܢ܆ ܘܰܒܣܰܓܺܝܽܐܘܬܳܐ ܛܳܒ ܡܶܢ ܕܰܗܒܳܐ ܘܛܳܒ ܡܶܢ ܣܺܐܡܳܐ ܝܰܬܺܝܪ ܢܰܗܺܝܪܺܝܢ܆ ܘܶܐܫܟܚܶܬ܆ ܠܗܰܘ ܡܰܢ ܕܡܰܘܦܶܐ܆ ܠܗܳܝ ܕܶܝܢ ܕܡܶܢ ܒܳܬܰܪ ܬܰܪܒܺܝܬܳܐ܆ ܕܓܳܡܪܳܐ ܘܕܰܒܩܰܠܺܝܠ ܩܰܠܺܝܠ ܡܫܰܠܡܳܐ ܘܛܳܠܩܳܐ܆ ܘܰܕܠܰܘ ܒܗܽܘܢ ܐܺܝܬܶܝܗ̇. ܘܳܐܦܠܳܐ ܓܶܝܪ ܒܗܽܘܢ ܣܺܝܡܳܐ܆ ܗܳܝ ܕܢܶܢ̣ܗܪܽܘܢ ܘܗܳܝ ܕܠܳܐ܆ ܐܶܠܳܐ ܐ̱ܚܪܺܢܳܐ ܐܺܝܬܰܘܗ̱ܝ ܗܰܘ ܕܡܰܢܗܰܪ ܠܰܢ ܠܠܰܡܦܺܝܕܳܐ ܕܡܶܢ ܗܳܠܶܝܢ܆ ܗܰܘ ܕܳܐܦ ܥܒܰܕ ܐܶܢܽܘܢ܆ ܘܡܶܢ ܗܳܝ ܕܠܳܐ ܐܺܝܬܰܝܗܽܘܢ ܗ̱ܘܰܘ ܐܰܝܬܺܝ ܐܶܢܽܘܢ. ܘܗܳܕܶܐ ܡܰܪܕܽܘܬܳܐ ܗܘ̣ܳܬ ܠܺܝ܆ ܕܠܳܐ ܐܶ݀ܚܽܘܪ ܒܗܰܒܳܒܳܐ ܕܥܽܘܬܪܳܐ܆ ܕܒܰܪܫܳܥܬܶܗ ܚܳܡܶܐ ܘܢܳܬ̣ܰܪ.

ܕܰܠܡܳܢܳܐ ܗܳܟܺܝܠ ܡܳܕܶܝܢ ܡܶܬܚܰܫܰܚ ܗ̱ܘܳܐ ܒܩܶܢ̈ܝܳܢܶܐ ܫܡܰܥ. ܐܶܢ ܠܠܰܚܡܳܐ ܕܺܝܠܝ ܐܳܡܰܪ ܐܶܟܠܶܬ ܒܰܠܚܽܘܕܰܝ܆ ܘܠܳܐ ܫܰܘܬܦܶܬ ܠܝܰܬܡܳܐ܆ ܘܡܶܢ ܛܰܠܝܽܘܬܳܐ ܕܺܝܠܝ ܡܬܰܪܣܶܐ ܗ̱ܘܺܝܬ ܐܰܝܟ ܐܰܒܳܐ܆ ܘܡܶܢ ܟܰܪܣܳܗ̇ ܕܶܐܡܝ ܕܰܒܪܶܬ. ܐܶܢܕܶܝܢ ܘܰܐܗܡܺܝܬ̣ ܡܶܢ ܥܰܪܛܶܠܳܝܳܐ ܕܳܐܒܶܕ ܗ̱ܘܳܐ ܘܠܳܐ ܟܰܣܺܝܬ̊ܶܗ. ܡܚ̈ܺܝܠܶܐ ܕܶܝܢ܆ ܐܶܢ ܠܳܐ ܡܒܰܪܟܺܝܢ ܗ̱ܘܰܘ ܠܺܝ. ܡܶܢ ܓܶܙܳܐ ܕܶܝܢ ܕܥܶܪ̈ܒܶܐ ܕܺܝܠܝ܆ ܐܶܫܬܰܚܰܢܘ ܚ̈ܰܨܶܐ ܕܺܝܠܗܽܘܢ. ܐܶܢ ܕܶܝܢ. ܐܳܦ ܐܰܪܺܝܡܶܬ ܥܰܠ ܝܰܬܡܳܐ ܐܺܝܕܳܐ ܕܺܝܠܝ܆ ܟܰܕ ܬܟܺܝܠ ‌ܐ̱ܢܳܐ ܕܰܡܥܰܕܪܳܢܽܘܬܳܐ ܣܰܓܺܝܐܬܳܐ ܫܟܺܝܚܳܐ ܠܺܝ܆ ܬܶܬܦܫܰܚ ܐܰܪܰܐ ܟܰܬܦܳܐ ܕܺܝܠܝ ܡܶܢ ܩܠܺܝܕܶܗ܆ ܕܪܳܥܳܐ ܕܶܝܢ ܕܺܝܠܝ܆ ܡܶܢ ܐܰܩܽܘܢܶܗ (ܩܰܢܝܶܗ) ܢܶܬܬܒܰܪ^[29]. ܘܬܽܘܒ ܐܳܡܰܪ: ܠܒܰܪ ܕܶܝܢ ܠܳܐ ܒܳܐܶܬ̣ ܗ̱ܘܳܐ ܐܰܟܣܢܳܝܳܐ. ܘܬܰܪܥܳܐ ܕܺܝܠܝ ܠܟܽܠ ܕܳܐܬܶܐ ܗ̱ܘܳܐ ܦܬܺܝܚ ܗ̱ܘܳܐ^[30]. ܘܳܐܦ ܐ̱ܚܪ̈ܳܢܶܐ ܕܶܝܢ ܬܽܘܪ̈ܳܨܶܐ ܣܰܓܺܝ̈ܶܐܐ ܚܳܫܶܒ܆ ܕܺܐܝܬܰܝܗܽܘܢ ܡܛܰܠ̈ܩܳܢܶܐ ܕܥܽܘܬܪܳܐ ܘܕܰܪܚܺܝܡܺܝܢ ܠܰܐܠܳܗܳܐ.

ܕܗܳܠܶܝܢ ܐܶܢܗܽܘ ܕܢܶܗܘܶܐ ܛܰܢܳܢ̈ܶܐ܆ ܫܰܪܺܝܪܳܐܺܝܬ ܥܰܡ ܦܰܓܪܳܐ ܐܳܦ ܒܬܰܪܥܺܝܬܳܐ ܢܨܽܘܡ. ܡܳܢܳܐ ܓܶܝܪ ܡܰܘܬܰܪ ܐܰܢ̱ܬ ܠܺܝ ܟܰܕ ܟܦܶܢ ܐܰܢ̱ܬ܆ ܐܶܢܗܽܘ ܕܗܰܘ ܡܳܐ ܕܝܳܬܰܪ ܡܶܢ ܡܶܐܟܽܘܠܬܳܐ܆ ܠܳܐ ܬܫܰܕܪܺܝܘܗ̱ܝ ܠܟܰܪܣܶܗ ܕܗܰܘ ܕܟܳܦܶܢ. ܡܳܢܰܐ ܗ̄ܘ ܝܽܘܬܪܳܢܶܗ ܕܨܰܘܡܳܐ ܦܰܓܪܳܢܳܝܳܐ܆ ܐܶܢܗܽܘ ܕܠܳܐ ܬܬܰܪܣܶܝܗ̇ ܠܢܰܦܫܳܐ ܒܝܽܘܠ̈ܦܳܢܶܐ ܕܡ̈ܶܠܶܐ ܐܰ‌ܠܳܗܳܝ̈ܳܬܳܐ܆ ܘܰܒܡܰܪ̈ܕܘܳܬܳܐ ܕܡܰܪܬܝܳܢܽܘܬܳܐ܆ ܘܰܒܬܽܘ̈ܢܳܝܶܐ ܕܬܰܫ̈ܥܝܳܬܳܐ܆ ܗܳܠܶܝܢ ܕܺܐܝܬ ܠܡܶܫܟܳܚܽܘ ܡܶܢܗܽܘܢ܆ ܐܳܦ ܠܢܶܫ̈ܶܐ ܣܰܡܡ̈ܢܶܐ ܘܳܐܣܺܝ̈ܘܳܬܳܐ ܕܠܳܚ̈ܡܳܢ܆ ܘܬܰܚ̈ܘܝܳܬܳܐ ܕܰܡܝܰܬܪܽܘܬܳܐ. ܐܳܦ ܓܶܝܪ ܗܽܘ ܤܛܰܐܕܺܝܽܘܢ ܕܗܳܢܳܐ܆ ܐܳܦ ܠܓܰܒܪ̈ܶܐ ܐܳܦ ܠܢܶܫ̈ܶܐ ܒܳܗ̇ ܒܰܕܡܽܘܬܳܐ ܦܬܺܝܚ. ܘܰܐܝܟܰܢܳܐ ܕܠܳܐ ܠܪܽܘܚܩܳܐ. ܡܶܢ ܗܳܝ ܕܩܰܕܺܝܡܳܐ ܣܺܝܡܳܐ. ܢܰܘܒܠܺܝܗ̇ ܠܡܶܠܬܳܐ܆ ܢܶܚܙܶܐ ܕܰܐܝܟ ܐܰܝ̇ܕܳܐ ܩܳܝܶܡܬܳܐ ܕܪܶܚܡܰܬ ܚܶܟܡܬܳܐ܆ ܕܢܶܫ̈ܶܐ ܗܳܠܶܝܢ ܕܨܳܡ̈ܶܝܢ ܫܒܰܩ ܠܰܢ ܡܽܘܫܶܐ܆ ܒܰܟܬܳܒܳܐ ܗܰܘ ܕܡܰܦܩܳܢܳܐ^[31].

ܟܕ ܓܶܝܪ ܠܬܽܘܩܳܢܶܗ ܕܡܰܫܟܢܳܐ ܒܺܐܝܕܳܐ ܒܺܐܝܕܳܐ ܡܶܫܬܰܥܶܐ ܗ̱ܘܳܐ܆ ܐܶܡܰܪ ܡܶܛܽܠ ܒܰܨܠܺܝܐܶܝܠ ܗܰܘ ܪܺܝܫ ܐܽܘܡܳܢ̈ܶܐ܆ ܗܰܘ ܕܰܡܠܳܝܗ̱ܝ ܐܰ‌ܠܳܗܳܐ ܪܽܘܚܳܐ ܕܚܶܟܡܬܳܐ ܟܺܝܬ ܘܰܕܣܽܘܟܳܠܳܐ܆ ܕܗܳܢܳܐ ܥܒܰܕ ܡܫܳܓܬܳܐ ܕܰܢܚܳܫܳܐ܆ ܘܰܠܒܰܐܣܺܝܤ ܕܺܝܠܳܗ̇ ܕܰܢܚܳܫܳܐ܆ ܡܶܢ ܡܰܚ̈ܙܝܳܬܳܐ ܕܗܳܢܶܝܢ ܕܨܳܝ̈ܡܳܢ ܗ̱ܘܰܝ̈܆ ܗܳܠܶܝܢ ܟܺܝܬ ܕܨܳܡ̈ܶܝܢ ܠܘܳܬ ܬܰܪ̈ܥܶܐ ܕܡܰܫܟܢܳܐ ܕܣܳܗܕܽܘܬܳܐ. ܚܙܺܝ ܠܘܳܬ ܐܰܝܢܳܐ ܪܰܘܡܳܐ ܕܰܡܝܰܬܪܽܘܬܳܐ ܐܰܣܶܩ ܐܶܢܶܝܢ ܕܽܘܟܳܝܳܐ ܕܨܰܘܡܳܐ. ܠܰܘ ܓܶܝܪ ܒܰܠܚܽܘܕ ܠܳܐ ܡܶܬܬܰܪ̈ܣܝܳܢܝܳܬܳܐ ܩܰܘܺܝ̈ܶܢ܆ ܐܶܠܳܐ ܐܳܦ ܠܘܳܬ ܬܰܪ̈ܥܶܐ ܕܡܰܫܟܢܳܐ ܒܪܶܚܡܰܬ ܐܰ‌ܠܳܗܳܐ ܝܺܬ̣ܶܒ̈ܶܝܢ܆ ܟܰܕ ܒܰܙܢܳܐ ܡܶܕܶܡ ܠܬܰܪܥܺܝܬܗܶܝܢ ܟܰܗ̈ܶܢܶܝܢ܆ ܘܨܳܡ̈ܶܝܢ ܡܶܢ ܟܽܠܳܗ̇ ܡܰܪܢܺܝܬܳܐ ܥܳܠܡܳܢܳܝܬܳܐ.

ܘܟܰܕ ܚ̣̈ܙܰܝ ܗܶܢܶܝܢ ܠܗܶܝܢ ܕܫܰܦܺܝܪ̈ܳܬܳܐ ܗܘܰܝ̈ ܠܰܐܠܳܗܳܐ ܐܰܝܟܰܢܳܐ ܕܰܟܬܺܝܒ: ܘܰܕܡܰܢܗܪ̈ܳܢ ܒܫܽܘܦܪܳܐ ܗܰܘ ܕܢܰܦܫܳܐ ܠܡܰܚ̈ܙܝܳܬܳܐ ܕܰܐܦ̈ܶܐ ܦܰܓܪ̈ܳܢܳܝܳܬܳܐ ܫ̣̈ܕܰܝܶܢ ܡܶܢܗܶܝܢ܆ ܟܰܕ ܒܗܽܘܢ ܒܣܽܘܥܪ̈ܳܢܶܐ ܡܰܪ̈ܥܩܳܢ ܗ̱ܘܰܝ̈܆ ܕܗܳܠܶܝܢ ܕܫܰܦܺܝܪܽܘܬ ܦܰܐܝܽܘܬܳܐ ܗܳܝ ܕܡܶܢ ܠܓܰܘ ܐܺܝܬ ܠܗܶܝܢ܆ ܡܒܰܣ̈ܝܳܢ ܥܰܠ ܫܽܘܦܪܳܐ ܗܰܘ ܕܚܳܡܶܐ ܘܡܶܢ ܠܒܰܪ܆ ܗܰܘ ܟܺܝܬ ܕܰܒܓܰܘ̈ܢܶܐ ܐܺܝܬ ܠܶܗ ܗܳܝ ܕܡܰܛܥܝܳܐ ܘܓܳܢܶܒ ܠܥܰܝ̈ܢܶܐ܆ ܒܰܕܡܽܘܬ ܝܽܘܩ̈ܢܶܐ ܐܰܘ ܕܽܘܡ̈ܝܶܐ ܗܳܠܶܝܢ ܕܡܶܢ ܨܝܳܢ̈ܶܐ ܡܶܬܛܺܝܫܺܝܢ ܥܰܠ ܕܰܦ̈ܶܐ.

ܐܶܬܒܰܩܳܐ ܕܶܝܢ ܐܳܦ ܒܶܗ ܒܦܽܘܩܕܳܢܳܐ ܕܪܽܘܚܳܐ܆ ܗܰܘ ܕܰܐܝܟ ܕܒܰܫܪܳܪܳܐ ܚܰܟܺܝܡܳܐ. ܡܫܳܓܬܳܐ ܡܶܢ ܗܳܠܶܝܢ ܡܰܚ̈ܙܝܬܳܐ ܦܩܰܕ ܕܬܶܗܘܶܐ܆ ܐܰܝܟܰܢܳܐ ܕܰܢܚܰܘܶܐ ܓܰܠܝܳܐܺܝܬ܆ ܕܰܠܗܳܢܶܝܢ ܕܰܡܝܰܬܪܽܘܬܳܐ ܕܗܳܟܰܢܳܐ ܐܺܝܬܶܝܗ̇ ܪܰܒܬܳܐ ܚܰܘܺܝ̈ܶܢ^[32]܆ ܘܕܰܐܝܟ ܗܳܢܳܐ ܩܽܘܪܒܳܢܳܐ ܩܰܪ̈ܶܒܶܝܢ^[33]. ܣܚܳܬܳܐ ܘܫܽܘܒܩܳܢܳܐ ܕܰܚ̈ܛܳܗܶܐ ܦܪܰܥ ܝܰܗ̱ܒ.

ܗܳܟܰܢܳܐ ܫܰܦܺܝܪ ܨܰܘܡܳܐ܆ ܐܰܝܟ ܗܰܘ ܕܶܐ‌ܠܽܘ ܐܺܝܬܰܘܗ̱ܝ ܗ̱ܘܳܐ ܡܰܚܙܺܝܬܳܐ ܡܶܬܗܰܘܢܳܢܺܝܬܳܐ܆ ܘܰܠܟܽܘܬܡ̈ܳܬܳܐ ܕܢܰܦܫܳܐ ܩܕܳܡ ܚܙܳܬܳܐ ܡܰܝܬܶܐ ܗ̱ܘܳܐ ܣܳܐܶܡ܆ ܘܪܳܕܶܐ ܘܡܰܠܶܦ ܗ̱ܘܳܐ ܠܰܢ ܕܢܶܥܒܶܕ ܝܰܨܺܝܦܽܘܬܳܐ ܕܕܽܘܟܳܝܳܐ ܕܗܳܠܶܝܢ. ܐܶܢ ܗܳܟܺܝܠ. ܗܳܢܶܝܢ ܕܰܠܢܳܡܽܘܣܳܐ ܛܶܠܳܢܳܝܳܐ ܗܰܘ ܕܰܒܝܰܕ ܡܽܘܫܶܐ ܩܰܒ̈ܶܠܶܝܢ. ܘܗܳܫܳܐ ܚܰܕܬܳܐܺܝܬ ܡܰܓ̣ܗܶܐ ܗ̱ܘܳܐ ܠܗܶܝܢ ܡܶܢ ܥ̈ܝܳܕܶܐ ܗܳܢܽܘܢ ܐܺܓܘܦ̈ܛܳܝܶܐ ܘܒܰܪܒܪ̈ܳܝܶܐ܆ ܡܶܛܽܠ ܡܝܰܩܪܽܘܬܶܗ ܕܡܰܫܟܢܳܐ܆ ܗܳܟܰܢܳܐ ܡܥܰܠܝܳܐܺܝܬ ܘܦܺܝܠܳܣܽܘܦܳܐܺܝܬ ܨܳܡ̈ܶܝܢ܆ ܐܰܢ̱ܬܶܝܢ ܗܳܢܶܝܢ ܕܰܠܥܺܕܬܳܐ ܡܡ̈ܰܠܝܳܢ ܐܢ̱ܬܶܝܢ܆ ܘܪܺܝܫܳܐ ܐܺܝܬ ܠܟܶܝܢ ܡܫܺܝܚܳܐ܆ ܘܡܶܢ ܐܶܘܰܢܓܶܠܺܝܽܘܢ ܡܶܬܬܣܺܝܡ ܠܟܶܝܢ ܢܳܡܽܘܣܳܐ. ܘܡܶܬܝܰܠ̈ܦܳܢ ܐܢ̱ܬܶܝܢ ܢܳܡܽܘܣ̈ܶܐ ܗܳܢܽܘܢ ܫܡܰܝܳܢ̈ܶܐ܆ ܘܗܳܠܶܝܢ ܕܕܰܐ‌ܠܳܗܳܐ ܒܰܠܚܽܘܕ ܗܰܘ ܕܥܰܠ ‌ܐܰܪܥܳܐ ܢܚܶܬ ܐܺܝܬܶܝܗ̇ ܗ̱ܘܳܬ ܕܢܺܐܡܰܪ ܐܶܢܽܘܢ܆ ܠܳܐ ܥܳܒܪ̈ܳܢ ܐܢ̱ܬܶܝܢ ܠܗܶܝܢ ܠܗܳܠܶܝܢ ܒܰܡܫܽܘܚܬܳܐ ܕܠܳܐ ܣܳܟܳܐ܆ ܘܰܒܬܰܪܥܺܝܬܳܐ ܕܰܠܥܶܠ ܡܶܢ ܥܳܠܡܳܐ ܨܳܝ̈ܡܳܢ ܐܢ̱ܬܶܝܢ܆ ܘܰܠܟܽܠ ܨܶܒܬܳܐ ܦܰܓܪܳܢܳܝܳܐ ܫܳܝ̈ܛܳܢ ܐܢ̱ܬܶܝܢ܆ ܘܰܠܨܶܒܬܳܐ ܕܰܡܝܰܬܪ̈ܳܬܳܐ ܥܰܠ ܢܰܦܫܳܐ ܣܳܝ̈ܡܳܢ ܐܢܬܶܝܢ.

ܐܳܦ ܓܶܝܪ ܐܳܦ ܠܟܶܝܢ ܐܺܝܬ ܠܟܶܝܢ ܡܫܳܓܬܳܐ ܕܝܰܬܺܝܪ ܫܰܪܺܝܪܳܐ܆ ܐܺܝ̈ܕܰܝܳܐ ܗܳܠܶܝܢ ܕܡܶܣ̈ܟܺܢܶܐ. ܬܰܡܳܢ ܐܰܪ̈ܡܶܝܢܳܝܗ̱ܝ ܠܰܢܚܳܫܳܐ܆ ܘܰܐܫܺܝ̈ܓܶܝܢ ܠܢܰܦ̈ܫܳܬܳܐ ܕܺܝܠܟܶܝܢ. ܘܰܠܘܳܬ ܒ̈ܳܬܶܐ ܕܰܨܠܽܘܬܳܐ ܐܶܬܐܰܡ̈ܶܢܶܝܢ܆ ܘܶܐܬܥܢܰܝ̈ܶܢ ܒܡܰܙܡܽܘܪ̈ܶܐ ܘܰܒܬܶܫ̈ܒܚܳܬܳܐ ܘܒܰܙܡܺܝܪ̈ܳܬܳܐ ܪ̈ܽܘܚܳܢܳܝܳܬܳܐ^[34]. ܗܳܟܰܢܳܐ ܓܶܝܪ ܐܶܢ ܬܨܽܘܡ̈ܳܢ܆ ܐܳܦ ܠܰܒ̈ܢܰܝܳܐ ܕܺܝܠܟܶܝܢ܆ ܡܕܰܡܝܳܢܽܘܬܳܐ ܕܺܝܠܟܶܝܢ ܬܶܫܒ̈ܩܳܢ ܠܗܽܘܢ ܢܳܡܽܘܣܳܐ ܟܬܺܝܒܳܐ.

ܢܶܬܕܰܟܪܽܘܢ ܓܶܝܪ. ܘܢܺܐܡܪܽܘܢ ܡܶܢ ܟܽܠ ܦܪܽܘܤ܆ ܕܰܐܒܳܗ̈ܶܐ ܕܺܝܠܰܢ ܒܗܳܢܳܐ ܙܢܳܐ ܨܳܝܡܺܝܢ ܗ̱ܘܰܘ. ܢܡܰܠܶܐ ܗܳܟܺܝܠ ܠܢܳܡܽܘܤܳܐ ܐܰܒܳܗܳܝܳܐ. ܘܟܰܕ ܗܳܠܶܝܢ ܗܳܟܰܢܳܐ ܗܳܘ̈ܝܳܢ܆ ܠܟܶܝܢ ܡܰܢ. ܢܶܩܦܽܘܢ ܘܢܺܐܙܽܠ̱ܘܢ ܥܰܡܟܶܝܢ܆ ܦܽܘܪ̈ܥܳܢܶܐ ܕܬܰܪܒܺܝܬܳܐ ܗܳܝ ܛܳܒܬܳܐ. ܠܗܳܢܽܘܢ ܕܶܝܢ. ܚܰܝܽܘܣܬܳܢܳܐ ܘܰܡܪܰܚܡܳܢܳܐ ܢܶܗܘܶܐ ܐܰ‌ܠܳܗܳܐ. ܒܟܽܠܗܽܘܢ ܚܰܝ̈ܶܐ ܕܺܝܠܗܽܘܢ܆ ܟܰܕ ܦܳܪܰܥ ܠܗܽܘܢ ܚܠܳܦ ܝܽܘܠܦܳܢܗܽܘܢ ܛܳܒܳܐ ܘܡܰܫܘܶܐ ܠܗܽܘܢ܆ ܠܗܳܝ ܕܝܰܬܺܝܪ ܪܰܒܳܐ ܡܶܢ ܟܽܠܗܶܝܢ ܛܳܒ̈ܳܬܳܐ ܠܡܰܠܟܽܘܬܳܐ ܗܳܝ ܕܰܫܡܰܝܳܐ.

ܠܗܳܝ ܕܬܶܗܘܶܐ. ܕܟܽܠܰܢ ܢܶܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ. ܥܰܡ ܪܽܘܚܳܐ ܩܰܕܺܝܫܳܐ܆ ܠܥܳܠܰܡ ܥܳܠܡܺܝܢ ܐܰܡܺܝܢ‌‌܀

ܫܠܶܡ ܡܺܐܡܪܳܐ ܕܰܬܠܳܬܺܝܢ ܘܬܶܫܥܳܐ.

ܬܶܢܝܳܢ ܢܡܘܣܐ. 20: 3 [1]

ܐܦܣ̈ܝܐ. 6: 12 [2]

ܝܽܘܬܪܳܢܳܐ[3]

ܡܪܩܘܣ. 5: 11 ـ 13 [4]

ܐܓܪܬܐ ܕܝܗܘܕܐ. 1: 6 [5]

ܡܣܰܟܶܐ[6]

ܡܬܝ. 25: 41 [7]

ܡܕܰܝܪܺܝܢ[8]

ܐܦܣ̈ܝܐ. 3: 18 ـ 19 [9]

ܐ. ܝܘܚܢܢ. 2: 15 ـ 17 [10]

ܐ. ܝܘܚܢܢ. 5: 19 [11]

ܣܶܦܪܳܐ ܕܒܪܝܬܐ. 1: 31 [12]

ܝܘܚܢܢ. 15: 19 [13]

ܠܦܰܬܝܽܘܬܶܗ ܕܫܰܪܒܳܐ[14]

ܐ. ܬܣܠܘܢܝܩܝ̈ܐ. 5: 5 [15]

ܡܬܝ. 6: 13 [16]

ܡܬܝ. 6: 26 [17]

ܐܦܣ̈ܝܐ. 2: 2 [18]

ܫܽܘܠܳܡܳܐ[19]

[20]ܬܐܘܡܐ ܐܘܕܘ. ܦܐܬܐ 299 ܥܨܳܪܳܐ. ܚܺܝܨܽܘܬܳܐ ܕܒܰܦܠܳܣܽܘܪܳܐ. ܢܶܥܽܘܠ ܦܰܓܪܳܐ ܠܰܫܝܳܓܬܳܐ ܕܚܰܫ̈ܶܐ ܒܝܰܕ ܦܰܠܣܳܪܽܘܬܶܗ ܕܨܰܘܡܳܐ ܘܰܒܝܕ ܩܰܨܳܪܽܘܬܶܗ.

ܣܶܦܪܐ ܕܒܪܝܬܐ. 3: 4 ـ 5 [21]

ܟܗ̈ܢܐ. 23: 27 [22]

ܡܬܝ. 6: 17 [23]

ܩܘܗܠܬ. 2: 14 [24]

ܩܘܠܣ̈ܝܐ. 3: 1 ـ 2[25]

ܣܶܦܪܐ ܕܒܪܝܬܐ. 18: 1 ـ [26]

ܣܶܦܪܐ ܕܒܪܝܬܐ. 14: 22 [27]

ܐܝܘܒ. 31: 7 ـ 8 [28]

ܐܝܘܒ. 31: 17 ـ 22 [29]

ܐܝܘܒ. 31: 32 [30]

ܡܦܩܢܐ. 38: 8 [31]

ܚܰܘܺܝܘ؟[32]

ܩܰܪܶܒܘ؟[33]

ܩܘܠܣ̈ܝܐ. 3: 16 [34]