ܡܺܐܡܪܳܐ ܕܰܬܠܳܬܺܝܢ ܘܰܬܡܳܢܝܳܐ.

ܕܥܰܠ ܢܽܘܗܪ̈ܶܐ܆ ܗܰܘ ܕܰܬܪܶܝܢ.

38: ܟܰܕ ܥܺܐܕܳܐ ܕܢܽܘܗܪ̈ܶܐ ܡܥܰܕܥܕܺܝܢܰܢ܆ ܠܙܰܗܪܳܐ ܗܰܘ ܕܰܨܡܰܚ ܡܶܢ ܗܳܢܳܐ ܒܬܰܪ̈ܥܝܳܬܳܐ ܕܺܝܠܰܢ܆ ܢܶܓܠܶܐ ܒܡܶܠܬܳܐ܆ ܐܰܝܟܰܢܳܐ ܕܰܢܕܰܡܶܐ ܒܗܳܕܶܐ ܒܙܰܠܺܝܩܳܐ ܕܢܽܘܗܪܳܐ. ܐܳܦ ܓܶܝܪ ܐܰܟܙܢܳܐ. ܕܰܕܙܰܠܺܝܩܳܐ ܕܺܝܠܳܝܬܶܗ ܐܺܝܬܶܝܗ̇܆ ܗܳܝ ܕܥܰܠ ܣܰܓܺܝ̈ܶܐܐ ܢܶܡܬܚܺܝܗ̇ ܠܢܰܗܺܝܪܽܘܬܳܐ ܕܺܝܠܶܗ ܒܰܝܬܳܝܬܳܐ܆ ܘܰܠܟܽܠܢܳܫ ܒܳܗ̇ ܒܰܕܡܽܘܬܳܐ ܢܫܰܚܶܢ܆ ܘܰܒܫܰܘܝܽܘܬ ܐܺܝܩܳܪܳܐ ܢܶܢܗܰܪ ܠܰܐܦ̈ܶܐ ܕܗܳܢܽܘܢ ܕܚܳܙܶܝܢ܆ ܗܳܟܰܢܳܐ ܒܰܝܬܳܝܬܳܐ ܐܺܝܬܶܝܗ̇ ܕܡܶܠܬܳܐ܆ ܗܳܝ ܕܰܠܘܳܬ ܣܰܓܺܝ̈ܶܐܐ ܬܰܦܩܺܝܗ̇ ܠܺܝܕܰܥܬܳܐ ܘܰܠܡܰܢܗܪܳܢܽܘܬܳܐ ܕܰܐ‌ܠܳܗܳܐ܆ ܕܰܡܢܰܝܪܳܐ^[1] ܘܡܰܢܗܪܳܐ.

ܡܰܢܽܘ ܓܶܝܪ ܕܚܳܙܶܐ ܠܶܗ ܠܝܶܫܽܘܥ ܕܰܒܡܶܨܥܰܬ ܫܶܦ̈ܥܶܐ ܕܝܽܘܪܕܢܳܢ ܩܳܐܶܡ܆ ܘܫܳܡܰܥ ܠܩܳܠܳܐ ܕܰܐܝܟ ܕܡܶܢ ܦܰܪܨܽܘܦܳܐ ܕܰܐܒܳܐ ܡܶܬܬܰܝܬܶܐ ܕܳܐܡܰܪ: ܕܰܐܢ̱ܬ ܐܺܝܬܰܝܟ ܒܪܳܐ ܕܺܝܠܝ ܗܰܘ ܚܰܒܺܝܒܳܐ^[2]. ܘܚܳܙܶܐ ܠܪܽܘܚܳܐ ܩܰܕܺܝܫܳܐ ܕܒܰܚܙܳܬܳܐ ܦܰܓܪܳܢܳܝܬܳܐ ܢܳܚܶܬ ܐܰܝܟ ܝܰܘܢܳܐ ܘܰܡܩܰܘܶܐ ܥܠܰܘܗ̱ܝ܆ ܠܰܘ ܟܰܕ ܠܬܰܪܥܺܝܬܳܐ ܕܡܶܠܰܘ̈ܗ̱ܝ ܕܰܢܒܺܝܳܐ ܐܳܬܶܐ ܢܺܐܡܰܪ܆ ܕܗܳܕܶܐ ܐܰܪܰܐ ܐܺܝܬܶܝܗ̇ ܗܳܝ ܕܕܰܘܺܝܕ ܐܰ‌ܠܳܗܳܝܳܐ ܡܩܰܕܶܡ ܗ̱ܘܳܐ ܡܰܙܥܶܩ ܠܘܳܬ ܐܰ‌ܠܳܗܳܐ ܘܰܐܒܳܐ ܕܟܽܠ ܟܰܕ ܩܳܥܶܐ܆ ܕܰܒܢܽܘܗܪܳܟ ܢܶܚܙܶܐ ܢܽܘܗܪܳܐ^[3].

ܐܶܢ ܓܶܝܪ ܢܽܘܗܪܳܐ ܕܰܐܒܳܐ ܐܺܝܬܰܘܗ̱ܝ ܒܪܳܐ܆ ܟܰܕ ܨܶܡܚܳܐ ܕܬܶܫܒܽܘܚܬܳܐ ܕܺܝܠܶܗ ܐܺܝܬܰܘܗ̱ܝ^[4]. ܘܝܽܘܩܢܳܐ ܕܰܩܢܽܘܡܶܗ܆ ܒܶܗ ܕܶܝܢ ܒܢܽܘܗܪܳܐ܆ ܢܽܘܗܪܳܐ ܐ̱ܚܪܺܢܳܐ ܚܙܰܝܢܰܢ܆ ܠܪܽܘܚܳܐ ܩܰܕܺܝܫܳܐ܆ ܠܳܐ ܐܺܝܬܶܝܗ̇ ܠܳܐ ܝܺܕܺܝܥܬܳܐ܆ ܕܢܽܘܗܪܳܐ ܬܠܺܝܬܳܝܳܐ ܕܗܺܝ ܟܰܕ ܗܺܝ ܢܰܨܺܝܚܽܘܬܳܐ ܡܰܒܪܶܩ܆ ܠܝܽܘܩ̈ܢܶܐ ܕܰܬܠܳܬܰܝ̈ܗܽܘܢ ܩܢܽܘܡ̈ܶܐ ܡܚܰܘܶܐ ܠܳܐ ܒܠܺܝ̈ܠܶܐ^[5]܆ ܘܠܰܚܕܳܐ ܐܰ‌ܠܳܗܽܘܬܳܐ.

ܡܶܛܽܠܗܳܕܶܐ. ܠܥܺܐܕܳܐ ܗܳܢܳܐ ܢܽܘܗܪ̈ܶܐ ܡܟܰܢܶܝܢ ܚ̱ܢܰܢ܆ ܟܰܕ ܒܶܗ ܝܰܬܺܝܪ ܢܰܗܺܝܪܳܐܺܝܬ ܐܶܫܬܰܘܕܰܥܢܰܢ܆ ܐܰܝܟ ܕܒܰܬܠܳܬܳܐ ܢܽܘܗܪ̈ܶܐ܆ ܒܰܬܠܳܬ ܕܺܝܠܳܝ̈ܳܬܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ܆ ܠܰܚܕܳܐ ܗܺܝܟܰܕܗܺܝܽܘܬܳܐ^[6] ܕܽܐܘܣܺܝܰܐ. ܗܳܝ ܓܶܝܪ ܕܰܐܢ̱ܬ ܐܺܝܬܰܝܟ ܒܪܳܐ ܕܺܝܠܝ. ܫܰܘܬܳܦܽܘܬܳܐ ܕܰܟܝܳܢܳܐ ܘܰܕܝܳܬ̣ܳܐ ܡܰܥܠܳܐ܆ ܗܳܝ ܕܺܐܝܬ ܠܶܗ ܠܰܐܒܳܐ ܠܘܳܬ ܒܪܳܐ. ܠܳܐ ܓܶܝܪ ܐܶܡܰܪ ܕܰܗܘ̣ܰܝܬ܆ ܐܶܠܳܐ ܕܺܐܝܬܰܝܟ ܒܪܳܐ ܕܺܝܠܝ. ܗܳܝ ܕܶܝܢ ܕܺܐܝܬܰܝܟ܆ ܠܗܳܝ ܕܺܐܝܬܰܘܗ̱ܝ. ܘܠܳܗ̇ ܠܽܐܘܣܺܝܰܐ ܡܚܰܘܝܳܐ܆ ܐܰܝܟܰܢܳܐ ܕܳܐܦ ܠܡܽܘܫܶܐ ܡܰܠܶܠ ܟܰܕ ܐܳܡܰܪ: ܐܶܢܳܐ ܐܺܝܬܰܝ ܗܰܘ ܕܺܐܝܬܰܘܗ̱ܝ^[7]. ܗܰܘ ܕܰܥܠܰܘܗ̱ܝ ܐܳܦ ܢܒܺܝܳܐ ܗܰܘ ܕܰܡܙܰܡܪ ܐܳܡܰܪ: ܗܰܘ ܕܺܐܝܬܰܘܗ̱ܝ ܩܕܳܡ ܥܳܠ̈ܡܶܐ^[8].

 ܢܶܒܗܬܽܘܢ ܗܳܟܺܝܠ ܗܳܢܽܘܢ ܒܰܥ̈ܠܰܝ ܫܡܳܐ ܕܫܳܢܝܽܘܬܶܗ ܕܰܐܪܺܝܽܘܤ܆ ܕܰܠܗܰܘ ܕܰܒܗܳܝ ܕܺܐܝܬܰܘܗ̱ܝ ܒܪܳܐ܆ ܠܳܐ ܙܰܒܢܳܐܺܝܬ ܘܠܳܐ ܡܬܰܚܡܳܐܺܝܬ ܐܺܝܬܰܘܗ̱ܝ ܐܰܝܟܰܢܳܐ ܕܳܐܦ ܐܰܒܳܐ܆ ܒܪܺܝܬܳܐ ܘܰܥܒܳܕܳܐ ܐܳܡܪܺܝܢ ܠܶܗ. ܢܶܒܗܬܽܘܢ ܕܶܝܢ܆ ܐܳܦ ܝܳܪ̈ܽܘܬܶܐ ܕܚܰܣܺܝܪܽܘܬ ܪܶܥܝܳܢܶܗ ܕܢܶܣܛܽܘܪܺܝܽܘܤ܆ ܕܚܳܙܶܝܢ ܠܶܗ ܠܝܶܫܽܘܥ ܕܰܐܝܟ ܒܪܳܐ ܚܰܬܺܝܬܳܐ^[9] ܕܰܐ‌ܠܳܗܳܐ^[10] ܫܰܪܺܝܪܳܐ܆ ܠܳܐ ܡܶܬܦܰܠܓܳܢܳܐܺܝܬ ܘܠܳܐ ܡܶܬܦܰܪܫܳܢܳܐܺܝܬ ܫܳܡܰܥ ܗܳܝ ܕܰܐܢ̱ܬ ܐܺܝܬܰܝܟ ܒܪܳܐ ܕܺܝܠܝ܆ ܘܰܡܦܰܠܓܺܝܢ ܠܶܗ ܠܗܰܘ ܚܰܕ ܒܪܳܐ܆ ܠܰܬܪܰܝܳܢܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ.

ܗܳܝ ܓܶܝܪ ܕܰܐܢ̱ܬ܆ ܡܚܰܘܝܳܢܳܐܺܝܬ^[11]. ܠܘܳܬ ܗܰܘ ܡܳܐ ܕܡܶܬܚܙܶܐ ܗ̱ܘܳܐ ܡܶܬܡܰܬܚܳܐ. ܐܳܦ ܓܶܝܪ ܐܶ‌ܠܽܘ ܐܰܝܟ ܚܰܣܺܝܪܽܘܬ ܗܰܘܢܳܐ ܕܗܳܢܽܘܢ܆ ܗܰܘ ܕܡܶܬܚܙܶܐ. ܡܶܢ ܗܰܘ ܕܡܶܣܬܰܟܰܠ܆ ܗܳܢܰܘ ܕܶܝܢ ܟܝܳܢܳܐ ܗܰܘ ܐ̱ܢܳܫܳܝܳܐ. ܡܶܢ ܗܰܘ ܐܰ‌ܠܳܗܳܝܳܐ܆ ܒܰܥܦܺܝܦܽܘܬܳܐ ܦܪܺܝܫ ܗ̱ܘܳܐ܆ ܘܠܰܘ ܚܰܕ ܠܳܐ ܒܠܺܝܠܳܐ ܐܺܝܬܰܘܗ̱ܝ ܗ̱ܘܳܐ ܡܶܢ ܬܰܪܬܶܝܢ܆ ܡܶܢ ܐܰ‌ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ܆ ܗܳܢܰܘ ܕܶܝܢ ܚܰܕ ܩܢܽܘܡܳܐ ܕܰܡܒܰܣܰܪ ܕܰܐ‌ܠܳܗܳܐ ܡܶܠܬܳܐ܆ ܠܳܐ ܐܳܡܰܪ ܗ̱ܘܳܐ ܐܰܢ̱ܬ ܐܺܝܬܰܝܟ. ܐܶܠܳܐ ܗܰܘ ܕܒܳܟ ܐܺܝܬܰܘܗ̱ܝ ܒܪܳܐ ܕܺܝܠܝ. ܐ̱ܢܳܫܽܘܬܳܐ ܓܶܝܪ. ܟܰܕ ܦܪܺܝܫܳܐ ܟܝܳܢܳܐܺܝܬ ܡܶܢ ܐܰ‌ܠܳܗܽܘܬܳܐ܆ ܢܳܩܦܳܐܺܝܬ. ܐܳܦ ܥܰܠ ܣܳܝܽܘܡܽܘܬ ܒܢܰܝ̈ܳܐ ܣܢܺܝܩܳܐ ܗ̱ܘܳܬ܆ ܐܰܝܟܰܢܳܐ ܕܳܐܦ ܚܢܰܢ. ܠܰܢ ܕܶܝܢ܆ ܠܰܘ ܗܳܝ ܕܺܐܝܬܰܝܟ ܒܪܳܐ ܕܺܝܠܝ܆ ܐܶܠܳܐ ܗܳܝ ܕܰܗܘ̣ܰܝܬ܆ ܠܳܚܡܳܐ ܡܳܪܳܢܳܐܺܝܬ ܕܢܶܫܡܰܥ ܡܶܢ ܐܰ‌ܠܳܗܳܐ. ܗܳܝ ܡܰܢ ܓܶܝܪ ܕܺܐܝܬܰܘܗ̱ܝ. ܕܰܟܝܳܢܳܐ ܗ̱ܝ. ܗܳܝ ܕܶܝܢ ܕܢܶܗܘܶܐ. ܕܛܰܝܒܽܘܬܳܐ.

ܐܶܬܒܰܩܳܐ ܠܺܝ ܕܶܝܢ ܐܳܦ ܒܫܰܘܝܽܘܬ ܐܺܝܩܳܪܳܐ ܕܪܽܘܚܳܐ܆ ܘܰܒܗܳܝ ܕܗܺܝ ܟܰܕ ܗܺܝ ܕܰܐ‌ܠܳܗܽܘܬܳܐ܆ ܗܳܝ ܟܺܝܬ ܕܚܰܘܺܝ ܝܽܘܚܰܢܳܢ ܡܰܥܡܕܳܢܳܐ ܟܰܕ ܐܳܡܰܪ: ܐܶܠܳܐ ܗܰܘ ܕܫܰܕܪܰܢܝ ܕܰܐܥܡܶܕ ܒܡܰܝ̈ܳܐ܆ ܗܽܘ ܐܶܡܰܪ ܠܺܝ܆ ܕܥܰܠ ܗܰܘ ܕܚܳܙܶܐ ܐܰܢܬ ܕܢܳܚܶܬ ܪܽܘܚܳܐ ܘܰܡܩܰܘܶܐ ܥܠܰܘܗ̱ܝ܆ ܗܳܢܳܐ ܐܺܝܬܰܘܗ̱ܝ ܗܰܘ ܕܡܰܥܡܶܕ ܒܪܽܘܚܳܐ ܩܰܕܺܝܫܳܐ. ܘܶܐܢܳܐ ܚܙܺܝܬ ܘܣܶܗܕܶܬ܆ ܕܗܳܢܳܐ ܐܺܝܬܰܘܗ̱ܝ ܗܰܘ ܒܪܶܗ ܕܰܐ‌ܠܳܗܳܐ^[12]. ܢܚܶܬ ܡܰܢ ܓܶܝܪ ܥܠܰܘܗ̱ܝ ܪܽܘܚܳܐ ܡܕܰܒܪܳܢܳܐܺܝܬ܆ ܐܰܝܟ ܡܰܢ ܕܒܰܫܪܳܪܳܐ ܗܘ̣ܳܐ ܒܰܪܢܳܫܳܐ. ܩܰܘܺܝ ܕܶܝܢ ܐܰܝܟ ܐܰ‌ܠܳܗܳܐ. ܒܰܐܠܳܗܳܐ܆ ܟܰܕ ܐܳܦܠܳܐ ܡܶܢ ܩܕܺܝܡ ܐܰܪܚܶܩ ܡܶܢܶܗ܆ ܠܳܐ ܡܶܬܦܰܪܫܳܢܳܐܺܝܬ ܓܶܝܪ ܐܺܝܬܰܘܗ̱ܝ ܒܶܗ.

ܒܪܰܡ ܐܰܝܟ ܕܰܠܘܳܬ ܬܰܪܥܺܝܬܳܐ ܕܺܝܠܰܢ܆ ܘܰܠܦܽܘܬ ܡܶܬܢܰܚܬܳܢܽܘܬܶܗ ܕܰܡܕܰܒܪܳܢܽܘܬܳܐ܆ ܗܺܝ ܡܶܠܬܳܐ ܐܶܘܰܢܓܶܠܳܝܬܳܐ ܗܳܟܰܢܳܐ ܣܺܝܡܳܐ. ܠܰܘ ܓܶܝܪ ܟܰܕ ܒܰܚܙܳܬܳܐ ܦܰܓܪܳܢܳܝܬܳܐ ܢܚܶܬ ܐܰܝܟ ܝܰܘܢܳܐ^[13]܆ ܗܳܟܰܢܳܐ ܐܰܡܺܝܢܳܐܺܝܬ ܒܶܗ ܒܗܳܢܳܐ ܙܢܳܐ ܩܰܘܺܝ ܥܠܰܘܗ̱ܝ. ܐܶܠܳܐ ܐܰܟܙܢܳܐ. ܕܰܒܪܳܐ ܒܰܐܒܳܐ. ܘܰܐܒܳܐ ܒܰܒܪܳܐ܆ ܗܳܟܰܢܳܐ ܐܳܦ ܒܰܒܪܳܐ ܪܽܘܚܳܐ܆ ܘܰܒܪܳܐ ܒܪܽܘܚܳܐ. ܝܺܠܰܦ ܕܶܝܢ ܡܡܰܠܠܽܘܬ ܐܰ‌ܠܳܗܽܘܬܳܐ ܕܣܰܓܺܝ ܝܰܬܺܝܪ ܚܰܬܺܝܬ̣ܳܐ܆ ܡܶܢܗܶܝܢ ܕܡܶܠܰܘ̈ܗ̱ܝ ܕܡܰܥܡܕܳܢܳܐ. ܐܳܡܰܪ ܓܶܝܪ܆ ܘܶܐܢܳܐ ܚܙܺܝܬ ܘܣܶܗܕܶܬ܆ ܕܗܳܢܳܐ ܐܺܝܬܰܘܗ̱ܝ ܗܰܘ ܒܪܶܗ ܕܰܐ‌ܠܳܗܳܐ. ܡܶܢ ܗܳܠܶܝܢ ܐܳܡܰܪ ܕܰܚܙܺܝܬ܆ ܕܩܰܘܺܝ ܪܽܘܚܳܐ ܐܰ‌ܠܳܗܳܐܺܝܬ ܒܰܒܪܳܐ܆ ܐܰܕܪܟܶܬ܆ ܕܕܰܚܕܳܐ ܐܺܝܬܰܘܗ̱ܝ ܐܰܒܳܐ ܘܰܒܪܳܐ܆ ܐܽܘܣܺܝܰܐ ܟܺܝܬ ܘܰܐ‌ܠܳܗܽܘܬܳܐ. ܘܣܶܗܕܶܬ ܕܗܳܢܳܐ ܐܺܝܬܰܘܗ̱ܝ ܗܰܘ ܒܪܶܗ ܕܰܐ‌ܠܳܗܳܐ܆ ܗܰܘ ܕܡܰܥܡܶܕ ܒܪܽܘܚܳܐ ܩܰܕܺܝܫܳܐ. ܗܰܘ ܕܠܳܐ ܡܶܫܟܰܚ ܗ̱ܘܳܐ ܕܰܠܗܳܢܳܐ ܢܫܰܟܶܢ܆ ܐܶ‌ܠܽܘܠܳܐ ܕܕܺܝܠܳܢܳܝܳܐ ܕܺܝܠܶܗ܆ ܘܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܐܺܝܬܰܘܗ̱ܝ ܗ̱ܘܳܐ ܠܶܗ ܫܰܘܝܳܐܺܝܬ ܪܽܘܚܳܐ ܩܰܕܺܝܫܳܐ. ܗܰܘ ܓܶܝܪ ܕܡܶܢ ܡܰܘܗܰܒܬܳܐ ܢܳܣܶܒ ܠܶܗ ܐ̱ܢܳܫ܆ ܠܗܳܢܳܐ. ܠܰܐ̱ܚܪ̈ܳܢܶܐ ܐܰܝܟ ܕܡܶܢ ܦܰܪܨܽܘܦܳܐ ܒܰܝܬܳܝܳܐ܆ ܠܰܡܫܰܟܳܢܽܘ ܠܳܐ ܡܶܫܟܰܚ. ܗܽܘ ܕܶܝܢ ܒܬܰܠ̈ܡܺܝܕܶܐ ܢܳܦܰܚ ܗ̱ܘܳܐ ܟܰܕ ܐܳܡܰܪ: ܣܰܒܘ ܪܽܘܚܳܐ ܩܰܕܺܝܫܳܐ^[14]. ܡܶܛܽܠܗܳܕܶܐ ܐܳܦ ܦܰܘܠܽܘܤ. ܟܰܕ ܠܪ̈ܽܘܡܳܝܶܐ ܟܳܬܶܒ ܗ̱ܘܳܐ. ܐܳܡܰܪ: ܐܶܢܕܶܝܢ ܐ̱ܢܳܫ. ܪܽܘܚܳܐ ܕܰܡܫܺܝܚܳܐ ܠܰܝܬ ܒܶܗ܆ ܗܳܢܳܐ ܠܳܐ ܐܺܝܬܰܘܗ̱ܝ ܕܺܝܠܶܗ^[15].

ܐܶܠܳܐ ܗܳܠܶܝܢ ܡܰܢ܆ ܗܳܢܶܝܢ^[16] ܕܰܡܡܰܠܠܽܘܬ ܐܰ‌ܠܳܗܽܘܬܳܐ. ܢܺܐܬܶܐ ܠܰܢ ܗܳܟܺܝܠ ܡܶܟܺܝܠ܆ ܐܳܦ ܠܘܳܬ ܫܰܦܺܝܪܽܘܬ ܨܶܒܝܳܢܳܐ ܗܳܝ ܕܡܶܛܽܠܳܬܰܢ. ܗܶܢܶܝܢ ܓܶܝܪ ܟܰܕ ܗܶܢܶܝܢ ܡ̈ܶܠܶܐ ܡܰܘ̈ܕܥܳܢ܆ ܐܳܦ ܠܪܳܡܽܘܬ ܡܥܰܠܝܽܘܬܳܐ ܕܰܡܡܰܠܠܽܘܬ ܐܰ‌ܠܳܗܽܘܬܳܐ܆ ܘܳܐܦ ܠܪܶܚܡܰܬ ܐ̱ܢܳܫܽܘܬܳܐ ܕܡܶܬܢܰܚܬܳܢܽܘܬܳܐ. ܐܰܢ̱ܬ ܐܺܝܬܰܝܟ ܒܪܳܐ ܕܺܝܠܝ ܗܰܘ ܚܰܒܺܝܒܳܐ. ܠܗܳܕܶܐ ܒܰܪ̱ܬ ܩܳܠܳܐ܆ ܥܰܠ ܪܺܝܫܺܝܬܳܐ ܕܓܶܢܣܳܐ ܕܺܝܠܰܢ܆ ܥܰܠ ܡܶܠܬܳܐ ܗܰܘ ܕܶܐܬܒܰܣܰܪ܆ ܥܰܠ ‌ܐܳܕܳܡ ܗܰܘ ܬܪܰܝܳܢܳܐ܆ ܒܰܕܡܽܘܬ ܙܰܪܥܳܐ ܐܰ‌ܠܳܗܳܝܳܐ ܐܰܪܡܝܶܗ ܐܰܒܳܐ܆ ܗܰܘ ܕܡܶܢܶܗ ܫܘܰܚ ܫܽܘܟܳܢܳܐ ܗܰܘ ܕܣܳܝܽܘܡܽܘܬ ܒܢܰܝ̈ܳܐ܆ ܗܰܘ ܕܰܥܠܰܘܗ̱ܝ ܐܳܦ ܝܽܘܚܰܢܳܢ ܟܰܕ ܟܳܬܶܒ ܗ̱ܘܳܐ ܠ̱ܐܢܳܫܺܝ̈ܢ ܐܳܡܰܪ ܗ̱ܘܳܐ: ܗܰܘ ܕܡܶܢ ܐܰ‌ܠܳܗܳܐ ܝܺܠܺܝܕ ܚܛܺܝܬܳܐ ܠܳܐ ܥܳܒܶܕ܆ ܡܶܛܽܠ ܕܙܰܪܥܳܐ ܕܺܝܠܶܗ ܒܶܗ ܡܩܰܘܶܐ܆ ܘܠܳܐ ܡܶܫܟܰܚ ܠܡܶܚܛܳܐ܆ ܡܶܛܽܠ ܕܡܶܢ ܐܰ‌ܠܗܳܐ ܝܺܠܺܝܕ^[17].

ܠܰܢ ܗܳܟܺܝܠ ܩܪܳܐ ܒܶܗ ܒܢܰܝ̈ܳܐ ܒܝܶܫܽܘܥ܆ ܠܗܳܢܽܘܢ ܒܥܶܠ̈ܕܒܳܒܶܐ܆ ܠܗܳܢܽܘܢ ܡܰܩܪ̈ܒܳܢܶܐ܆ ܠܗܳܢܽܘܢ ܡܳܪ̈ܽܘܕܶܐ܆ ܠܗܳܢܽܘܢ ܕܳܐܦܠܳܐ ܗܳܠܶܝܢ ܕܫܳܘ̈ܝܳܢ ܠܰܥ̈ܒܳܕܶܐ ܣܳܥܪܺܝܢ ܗ̱ܘܰܝܢ܆ ܐܶܠܳܐ ܠܘܳܬ ܛܪܽܘܢܽܘܬܳܐ ܕܳܐܟܶܠ ܩܰܪܨܳܐ ܘܰܕܫ̈ܺܐܕܶܐ ܚܢܰܢ ܡܶܢ ܨܶܒܝܳܢܰܢ ܐܶܙܰܠܢܰܢ^[18]. ܘܠܰܘ ܒܢܰܝ̈ܳܐ ܒܰܠܚܽܘܕ ܟܰܢܺܝ ܠܰܢ܆ ܐܶܠܳܐ ܐܳܦ ܚܰܒܺܝ̈ܒܶܐ܆ ܠܗܳܢܽܘܢ ܕܰܠܣܶܢܶܐܬܳܐ ܫܳܘܶܝܢ ܗ̱ܘܰܝܢ܆ ܘܰܠܡܰܗܦܟܽܘܬ ܐܰܦ̈ܶܐ ܡܫܰܡܠܰܝܬܳܐ. ܠܗܳܢܽܘܢ ܕܙܰܝܶܦܘ ܘܡܰܣܠܝܳܐ ܥܰܒܕܽܘܗ̱ܝ ܠܨܰܠܡܳܐ ܕܗܰܘ ܕܰܒ̣ܪܳܐ ܐܶܢܽܘܢ. ܠܗܳܢܽܘܢ ܡܫܰܟܪ̈ܶܐ ܘܰܣܢܰܝ̈ܳܐ. ܠܗܳܢܽܘܢ ܕܰܨܐܶܝܢ ܗ̱ܘܰܘ ܒܨܳܐܬܳܐ ܗܳܝ ܥܰܣܩܰܬ ܠܰܫܝܳܓܬܳܐ ܕܰܚܛܺܝܬܳܐ܆ ܘܰܠܘܳܬ ܣܰܢܝܽܘܬܳܐ ܗܳܝ ܐ̱ܚܪܳܝܬܳܐ ܢܦܰܠܘ. ܠܗܳܢܽܘܢ ܕܳܐܦܶܢ ܕܢܶܚܙܶܐ ܐܶܢܽܘܢ ܐ̱ܢܳܫ ܢܰܕܺܝܕܳܐ ܗ̱ܘܳܬ ܠܶܗ܆ ܠܗܳܠܶܝܢ ܐܰܚܶܒ. ܘܗܳܝ ܕܰܬܡܺܝܗܳܐ܆ ܕܠܰܘ ܐܰܝܟ ܐܰܝܢܳܐ ܕܰܡܪܰܚܶܡ. ܐܶܠܳܐ ܐܰܝܟ ܐܰܝܢܳܐ ܕܫܰܦܺܝܪ ܡܶܨܛܒܶܐ܆ ܘܰܐܝܟ ܐܰܝܢܳܐ ܕܡܶܛܽܠ ܣܽܘܥܪܳܢܳܐ ܕܺܐܝܬܰܘܗ̱ܝ ܝܰܬܺܝܪ ܛܳܒܳܐ ܘܰܪܚܺܝܡܳܐ ܫܰܦܺܝܪ ܐܶܬܪܰܥܺܝ.

ܘܡܶܛܽܠ ܟܺܝܬ ܕܗܳܕܶܐ ܐܶܣܬܰܒܪܰܬ^[19]܆ ܡܶܚܕܳܐ ܬܪܺܝܨܳܐܺܝܬ ܠܘܳܬ ܗܳܝ ܕܶܐܣܬܰܒܪܰܬ^[20]܆ ܫܰܚܠܶܦ ܐܰܥܒܪܶܗ ܠܗܰܘ ܡܳܐ ܕܡܶܬܪܰܓܪܰܓ ܗ̱ܘܳܐ. ܟܰܕ ܐܰܫܺܝܓܶܗ ܒܡܰܝ̈ܳܐ. ܟܰܕ ܥܰܛܦܶܗ ܒܰܠܒܽܘܫܳܐ ܕܠܳܐ ܡܶܬܚܰܒܠܳܢܽܘܬܳܐ. ܟܰܕ ܨܰܒܬܶܗ ܒܪܽܘܚܳܐ. ܟܰܕ ܡܰܫܚܶܗ ܒܡܽܘܪܽܘܢ܆ ܘܒܰܣܺܝܡܽܘܬ ܪܺܝܚܳܐ ܡܶܬܗܰܘܢܳܢܺܝܬܳܐ ܣܳܡ ܒܶܗ. ܐܰܝܟܰܢܳܐ ܟܺܝܬ ܕܰܐܝܟ ܡܶܠܬܶܗ ܕܦܰܘܠܽܘܤ: ܢܶܗܘܶܐ ܐܺܝܬܰܝܢ ܩܰܕܺܝ̈ܫܶܐ ܘܰܕܠܳܐ ܡܽܘܡ^[21]܆ ܕܠܳܐ ܐܺܝܬ ܒܗܽܘܢ ܟܽܘܬܡܳܐ ܐܰܘ ܩܶܡܛܳܐ܆ ܐܰܘ ܡܶܕܶܡ ܡܶܢ ܗܳܠܶܝܢ ܕܰܐܝܟ ܗܳܟܰܢ. ܡܶܢ ܟܽܠܗܶܝܢ ܐܰܝܠܶܝܢ ܕܰܠܫܽܘܦܪܳܐ ܗܰܘ ܫܰܪܺܝܪܳܐ ܡܚܰܒ̈ܠܳܢ.

ܠܘܳܬ ܗܳܕܶܐ ܚܳܝܪܳܐ ܗ̱ܘܳܬ܆ ܗܳܝ ܕܡܶܠܬܳܐ ܝܺܚܺܝܕܳܝܳܐ ܕܰܐ‌ܠܳܗܳܐ܆ ܢܶܨܒܶܐ ܠܡܶܗܘܳܐ ܫܰܘܬܳܦܳܐ ܒܰܗܘܳܝܳܐ^[22] ܕܺܝܠܰܢ܆ ܘܰܒܪܶܗ ܕܐ̱ܢܳܫܳܐ ܢܶܫܬܰܡܰܗ܆ ܡܶܛܽܠ ܗܳܝ ܕܰܚܢܰܢ ܢܶܬܩܪܶܐ ܒܢܰܝ̈ܳܐ ܕܰܐ‌ܠܳܗܳܐ܆ ܘܰܢܡܰܠܶܐ ܠܡܽܘܠܟܳܢܳܐ ܗܰܘ ܕܰܠܘܳܬ ܐܰܒܳܗ̈ܳܬܳܐ܆ ܘܰܒܙܰܪܥܶܗ ܕܰܐܒܪܳܗܳܡ ܗܰܘ ܟܺܝܬ ܕܺܐܝܬܰܘܗ̱ܝ ܗܽܘ܆ ܢܒܰܪܶܟ ܠܟܽܠܗܽܘܢ ܥܰܡܡ̈ܶܐ^[23]܆ ܘܰܕܢܶܒܢܶܐ ܠܰܢ ܒܝܰܕ ܡܰܚܰܬܬܳܐ ܕܺܝܠܶܗ܆ ܠܡܰܣܰܩܬܳܐ ܗܳܝ ܠܳܐ ܕܪܺܝܫܬܳܐ ܘܠܳܐ ܡܶܬܓܰܫܦܳܢܺܝܬܳܐ ܘܰܕܠܰܫܡܰܝܳܐ ܡܰܝܬܝܳܐ܆ ܗܳܝ ܟܺܝܬ ܕܳܐܦ ܥܰܡܽܘܤ ܢܒܺܝܳܐ܆ ܐܰ‌ܠܳܗܳܐܺܝܬ ܘܝܰܬܺܝܪ ܢܰܗܺܝܪܳܐܺܝܬ ܩܰܕܶܡ ܐܰܟܪܶܙ ܟܰܕ ܐܳܡܰܪ: ܗܰܘ ܕܒܳܢܶܐ ܒܰܫܡܰܝܳܐ ܡܰܣܰܩܬܶܗ܆ ܘܰܠܫܽܘܘܕܳܝܶܗ ܥܰܠ ‌ܐܰܪܥܳܐ ܡܫܰܬܶܐܣ^[24].

ܠܳܗ̇ ܕܶܝܢ ܟܰܕ ܠܳܗ̇ ܠܗܳܕܶܐ܆ ܐܳܦ ܡܰܬܰܝ ܟܺܝܬ ܐܳܦ ܠܽܘܩܳܐ ܚܰܘܝܽܘܗ̇ ܓܰܠܝܳܐܺܝܬ܆ ܟܰܕ ܡܶܢ ܪܽܘܚܳܐ ܩܰܕܺܝܫܳܐ ܡܶܬܬܙܺܝܥܺܝܢ. ܡܰܬܰܝ ܡܰܢ ܓܶܝܪ ܟܰܕ ܠܺܝܠܺܝܕܽܘܬܳܐ ܕܒܰܒܣܰܪ ܕܦܳܪܽܘܩܰܢ ܨܳܒܶܐ ܗ̱ܘܳܐ ܠܡܶܫܬܰܥܳܝܽܘ܆ ܘܡܶܢ ܐܰܒܪܳܗܳܡ ܫܰܪܺܝ ܒܰܡܡܰܠܠܽܘܬ ܫܰܪ̈ܒܳܬܳܐ ܘܡܶܢ ܕܰܘܺܝܕ܆ ܥܕܰܡܳܐ ܠܝܶܫܽܘܥ ܢܚܶܬ^[25]. ܠܽܘܩܳܐ ܕܶܝܢ ܟܰܕ ܐܶܡܰܪ: ܕܰܠܘܳܬ ܝܽܘܪܕܢܳܢ ܐܶܬܳܐ ܟܰܕ ܬܠܳܬܺܝܢ ܫܢܰܝ̈ܳܐ ܡܰܠܺܝ ܕܩܰܘܡܬܳܐ ܦܰܓܪܳܢܳܝܬܳܐ܆ ܗܰܘ ܕܠܳܐ ܩܰܘܡܬܳܐ ܘܰܕܠܳܐ ܙܰܒܢܳܐ ܐܰܝܟ ܐܰ‌ܠܳܗܳܐ܆ ܘܡܰܥܡܽܘܕܺܝܬܳܐ ܗܳܝ ܕܰܚܠܳܦܰܝܢ ܥܡܰܕ܆ ܗܳܝܕܶܝܢ ܣܳܐܶܡ ܠܶܗ ܒܰܡܡܰܠܠܽܘܬ ܫܰܪ̈ܒܳܬܳܐ܆ ܟܰܕ ܗܳܟܰܢܳܐ ܐܳܡܰܪ: ܘܗܽܘ ܝܶܫܽܘܥ ܐܺܝܬܰܘܗ̱ܝ ܗ̱ܘܳܐ܆ ܐܰܝܟ ܗܰܘ ܕܒܰܬܠܳܬܺܝܢ ܫܢܺܝ̈ܢ ܡܫܰܪܶܐ ܗ̱ܘܳܐ. ܟܰܕ ܐܺܝܬܰܘܗ̱ܝ ܗ̱ܘܳܐ ܐܰܝܟ ܕܡܶܣܬܒܰܪ ܗ̱ܘܳܐ܆ ܒܪܳܐ ܕܝܰܘܣܶܦ ܗܰܘ ܒܰܪ ܥܶܠܺܝ܆ ܗܰܘ ܒܰܪ ܡܰܐܛܬ^[26]. ܘܗܳܟܰܢܳܐ ܟܰܕ ܡܶܢ ܗܳܢܽܘܢ ܕܰܠܬܰܚܬ. ܠܘܳܬ ܗܳܢܽܘܢ ܐܰܒܳܗ̈ܳܬܳܐ ܩܰܕܡܳܝ̈ܶܐ ܒܛܶܟܣܳܐ ܐܳܙܶܠ ܗ̱ܘܳܐ܆ ܟܰܕ ܫܰܠܶܡ ܐܶܡܰܪ: ܗܰܘ ܒܰܪ ܫܺܝܬ܆ ܒܰܪ ܐܳܕܳܡ܆ ܒܰܪ ܐܰ‌ܠܳܗܳܐ^[27].

ܟܰܕ ܝܺܕܺܝܥܳܐ ܟܺܝܬ. ܕܗܳܕܶܐ ܡܚܰܘ̈ܝܳܢ ܬܰܪ̈ܬܰܝܗܶܝܢ ܗܳܠܶܝܢ ܡܡܰܠܠܘܳܬ ܫܰܪ̈ܒܳܬܳܐ܆ ܕܟܰܕ ܠܰܗܘܳܝܳܐ ܕܺܝܠܰܢ ܒܶܣܪܳܢܳܝܳܐ܆ ܗܰܘ ܕܡܶܢ ܗܳܠܶܝܢ ܕܰܠܥܶܠ ‌ܐܰܚܶܬ ܠܰܢ ܠܘܳܬ ܗܳܠܶܝܢ ܕܰܠܬܰܚܬ܆ ܡܶܛܽܠ ܪܶܚܡܰܬ ܐ̱ܢܳܫܽܘܬܳܐ ܒܰܝܬܺܝ ܠܶܗ ܡܶܠܬܳܐ ܕܰܐ‌ܠܳܗܳܐ܆ ܠܺܝܠܺܝܕܽܘܬܳܐ ܪܽܘܚܳܢܳܝܬܳܐ ܗܳܝ ܕܰܒܝܰܕ ܡܰܥܡܽܘܕܺܝܬܳܐ ܚܰܠܶܦ ܝܰܗ̱ܒ ܠܰܢ ܚܠܳܦܰܘܗܝ܆ ܗܳܝ ܕܡܶܢ ܗܳܠܶܝܢ ܕܰܠܬܰܚܬ ܠܘܳܬ ܗܳܠܶܝܢ ܕܰܠܥܶܠ ܡܫܰܢܝܳܐ ܡܰܥܒܪܳܐ܆ ܘܠܰܒ̈ܢܰܝܳܐ ܕܳܐܕܳܡ ܥܳܒܕܳܐ ܒܢܰܝ̈ܳܐ ܕܰܐ‌ܠܳܗܳܐ.

ܗܳܠܶܝܢ ܐܺܝܬܰܝܗܶܝܢ ܦܬܳܚܗܽܘܢ ܕܰܫܡܰܝ̈ܳܐ ܗܳܢܽܘܢ ܕܰܦܬܰܚ ܡܫܺܝܚܳܐ܆ ܕܶܐܬܬܚܶܕܘ ܗ̱ܘܰܘ ܡܶܢ ܐܳܕܳܡ܆ ܡܶܢ ܐܰܝܟܳܐ ܕܡܶܢ ܗܳܠܶܝܢ ܕܰܠܥܶܠ ܘܠܳܐ ܡܶܕܶܡ ܢܳܚܶܬ ܗ̱ܘܳܐ ܠܘܳܬܰܢ܆ ܐܶܠܳܐ ܣܳܓܰܬ̣ ܣܝܳܓܳܐ ܚܛܺܝܬܳܐ܆ ܘܦܶܪܫܰܬ ܠܰܢ ܡܶܢ ܒܰܝܬܳܝܽܘܬܳܐ ܕܰܠܘܳܬ ܐܰ‌ܠܳܗܳܐ܆ ܐܰܝܟܰܢܳܐ ܕܳܐܦ ܗܽܘ ܒܝܰܕ ܢܒܺܝܳܐ ܐܳܡܰܪ: ܠܳܐ ܗ̱ܘܳܐ ܚܛܳܗܰܝ̈ܟܽܘܢ ܦܳܪܫܺܝܢ ܒܶܝܬ ܠܺܝ ܘܰܠܟܽܘܢ^[28]. ܗܳܫܳܐ ܕܶܝܢ ܐܰܝܟ ܗܰܘ ܕܬܰܪܥܳܐ ܪܰܒܳܐ ܐܶܬܦܬܰܚ܆ ܘܳܐܦ ܗܶܢܽܘܢ ܫܡܰܝܳܐ ܡܶܢܫܶܠܝ ܐܶܬܓܠܺܝܘ ܘܶܐܬܦܫܶܛܘ܆ ܟܢܺܝܫܳܐܺܝܬ ܪܓܶܠܬܳܐ ܕܟܽܠܗܶܝܢ ܛܳܒ̈ܳܬܳܐ ܢܶܚܬܰܬ ܠܘܳܬܰܢ ܒܰܪ̱ܬ ܩܳܠܶܗ ܕܰܐܒܳܐ. ܩܪܳܝܬܶܗ ܕܰܒܪܳܐ. ܡܰܚܰܬܬ̣ܶܗ ܕܪܽܘܚܳܐ. ܗܳܠܶܝܢ ܓܶܝܪ ܢܳܓܶܕ ܗ̱ܘܳܐ ܥܰܠ ܢܰܦܫܶܗ ܝܶܫܽܘܥ܆ ܟܰܕ ܡܫܰܕܰܪ ܗ̱ܘܳܐ ܠܗܶܝܢ ܗܰܘ ܡܰܠܝܳܐ܆ ܠܰܢ ܗܳܢܽܘܢ ܣܢܺܝ̈ܩܶܐ. ܐܰܝܟܰܢܳܐ ܓܶܝܪ ܠܰܘ ܡܰܠܝܳܐ ܐܺܝܬܰܘܗ̱ܝ܆ ܕܗܰܘ ܕܰܚܙܰܝܢ ܫܽܘܒܚܶܗ܆ ܫܽܘܒܚܳܐ ܐܰܝܟ ܕܺܝܚܺܝܕܳܝܳܐ ܕܡܶܢ ܐܰܒܳܐ܆ ܕܰܡܠܶܐ ܛܰܝܒܽܘܬܳܐ ܘܰܫܪܳܪܳܐ^[29].

ܠܡܳܢܳܐ ܕܶܝܢ ܠܳܐ ܥܬܺܝܕܳܐ ܗ̱ܘܳܬ ܕܕܰܐܝܟ ܗܳܠܶܝܢ ܬܙܰܡܶܢ ܠܓܶܢܣܳܐ ܗܺܝ ܪܺܝܫܳܝܬܳܐ܆ ܗܰܘ ܕܡܶܨܥܳܝܳܐ ܕܰܐ‌ܠܳܗܳܐ ܘܕܰܒܢܰܝ̈ܢܳܫܳܐ ܡܶܛܽܠ ܪܶܚܡܰܬ ܐ̱ܢܳܫܽܘܬܶܗ ܗܳܘܶܐ ܗ̱ܘܳܐ܆ ܘܡܶܛܽܠܗܳܕܶܐ ܒܡܶܨܥܰܬ ܫܶܦ̈ܥܶܐ ܕܢܰܗܪܳܐ ܩܳܐܶܡ ܗ̱ܘܳܐ܆ ܐܰܝܟܰܢܳܐ ܕܰܠܗܳܢܽܘܢ ܕܰܠܘܳܬ ܕܽܘܒܳܪܳܐ ܐܰܪܥܳܢܳܝܳܐ ܡܶܬܢܰܬܥܺܝܢ ܗ̱ܘܰܘ܆ ܘܰܠܘܳܬ ܥܽܘܡ̈ܩܶܐ ܕܰܚܛܺܝܬܳܐ ܡܶܬܬܰܝܬܶܝܢ ܗ̱ܘܰܘ܆ ܢܥܰܠܶܐ ܒܝܰܕ ܡܰܝ̈ܳܐ܆ ܘܰܢܫܰܕܰܪ ܐܶܢܽܘܢ ܠܥܶܠ ܠܘܳܬ ܪܰܘܡܳܐ ܒܝܰܕ ܪܽܘܚܳܐ܆ ܟܰܕ ܩܢܰܘ ܩܰܠܺܝܠܽܘܬܳܐ ܘܡܶܬܥܰܠܝܳܢܽܘܬܳܐ ܕܰܠܥܶܠ܆ ܡܶܢ ܡܢܰܝܪܳܢܽܘܬܳܐ ܕܗܳܪܟܳܐ ܐܰܘܟܺܝܬ ܡܶܢ ܒܽܘܚܪܳܢܳܐ ܕܰܒܝܰܕ ܢܽܘܪܳܐ^[30].

ܡܶܛܽܠ ܡܳܢܳܐ ܕܶܝܢ ܒܰܪ ܬܠܳܬܺܝܢ ܫܢܺܝ̈ܢ ܠܘܳܬ ܡܰܥܡܽܘܕܺܝܬܳܐ ܐܳܬܶܐ. ܐܰܝܟܰܢܳܐ ܕܰܢܚܰܘܶܐ܆ ܕܓܰܒܪ̈ܶܐ ܕܺܐܝܬܰܝܗܽܘܢ ܡܫܰܡ̈ܠܰܝܳܐ ܒܩܰܘܡܬܳܐ ܗܳܝ ܡܶܬܗܰܘܢܳܢܺܝܬܳܐ܆ ܝܳܠܕܳܐ ܝܺܠܺܝܕܽܘܬܳܐ ܕܡܶܢ ܕܪܺܝܫ ܗܳܝ ܪܽܘܚܳܢܳܝܬܳܐ. ܗܳܟܰܢܳܐ ܓܶܝܪ ܐܳܦ ܒܰܪܢܳܫܳܐ ܗܰܘ ܩܰܕܡܳܝܳܐ ܡܫܰܡܠܝܳܐ ܐܶܬܓܒܶܠ. ܘܡܶܚܕܳܐ ܟܰܕ ܒܦܰܪܕܰܝܣܳܐ ܐܶܬܬܣܺܝܡ. ܐܰܝܟ ܡܫܰܡܠܝܳܐ܆ ܦܽܘܩܕܳܢܳܐ ܘܢܳܡܽܘܣܳܐ. ܡܩܰܒܶܠ ܗ̱ܘܳܐ܆ ܘܡܶܬܦܣܶܤ ܗ̱ܘܳܐ ܠܶܗ ܦܽܘܠܚܳܢܳܐ ܘܰܢܛܽܘܪܬܳܐ ܕܦܰܪܕܰܝܣܳܐ. ܫܰܒܪܽܘܬܳܐ ܓܶܝܪ. ܘܬܰܪܒܺܝܬܳܐ ܗܳܝ ܕܰܒܩܰܘ̈ܡܳܬܳܐ܆ ܡܶܢ ܒܳܬܰܪ ܡܰܦܰܩܬܳܐ ܕܡܶܢ ܦܰܪܕܰܝܣܳܐ ܢܶܩܦܰܬ܆ ܠܚܽܘܠܛܳܢܳܐ ܗܰܘ ܕܪܶܕܝܳܐ܆ ܘܰܠܚܰܝ̈ܶܐ ܗܳܢܽܘܢ ܕܒܰܗܘܳܝܳܐ ܘܒܰܚܒܳܠܳܐ. ܐܰܝܟ ܐܰܝܠܶܝܢ ܗܳܟܺܝܠ. ܕܺܐܝܬܰܝܗܶܝܢ ܗ̱ܘܰܝ̈. ܗܳܠܶܝܢ ܕܰܓܒܺܝܠܽܘܬܳܐ ܗܳܝ ܩܰܕܡܳܝܬܳܐ܆ ܕܰܐܝܟ ܗܳܠܶܝܢ ܐܳܦ ܗܳܢܶܝܢ ܕܰܓܒܺܝܠܽܘܬܳܐ ܕܡܶܢ ܕܪܺܝܫ ܗܳܝ ܚܕܰܬܳܐ. ܡܰܠܽܘܢ ܕܶܝܢ ܕܝܰܬܺܝܪ ܛܳܒ̈ܳܢ ܘܰܕܝܰܬܺܝܪ ܪ̈ܳܡܳܢ.

ܐܰܟܚܕܳܐ ܕܶܝܢ. ܐܳܦ ܒܝܰܕ ܡܫܰܡܠܝܽܘܬܳܐ ܬܠܺܝܬܳܝܬܳܐ ܕܒܰܬܠܳܬ ܥܣܺܝܪ̈ܝܘܳܬܳܐ ܕܰܬܠܳܬܺܝܢ ܫܢܺܝ̈ܢ ܡܚܰܘܶܐ ܗ̱ܘܳܐ܆ ܕܥܰܠ ܝܽܘܪܕܢܳܢ ܡܶܬܓܠܶܐ ܐ̱ܪܳܙܳܐ ܡܫܰܡܠܝܳܐ ܕܰܬܠܺܝܬܳܝܽܘܬܳܐ܆ ܕܰܚܕܳܐ ܐܰ‌ܠܳܗܽܘܬܳܐ ܕܒܰܬܠܳܬܳܐ ܩܢܽܘ̈ܡܶܐ ܡܫܰܡ̈ܠܰܝܳܐ ܡܶܬܝܰܕܥܳܐ܆ ܗܳܝ ܕܒܳܗ̇ ܐܳܦ ܥܬܺܝܕ ܗ̱ܘܳܐ ܕܢܶܫܬܰܡܠܶܐ ܥܡܳܕܳܐ ܗܰܘ ܕܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ.

ܟܰܕ ܗܳܠܶܝܢ ܕܶܝܢ ܐܳܡܰܪ ܐ̱ܢܳܐ ܒܰܡܨܰܥܬܳܐ܆ ܬܰܡܺܝܗ ܐ̱ܢܳܐ܆ ܕܰܡܥܰܩܶܒ ܐ̱ܢܳܐ ܠܪܰܒܽܘܬܳܗ̇ ܕܡܶܬܢܰܚܬܳܢܽܘܬܳܐ ܗܳܝ ܕܰܕܠܳܐ ܣܳܟܳܐ. ܗܰܘ ܓܶܝܪ ܕܰܒܝܰܘ̈ܡܰܝ ܝܶܫܽܘܥ ܗܰܘ ܒܰܪ ܢܽܘܢ ܛܽܘܦܣܳܢܳܐܺܝܬ ܒܩܺܒܽܘܬܳܐ ܡܶܬܛܥܶܢ ܗ̱ܘܳܐ܆ ܘܰܒܝܰܕ ܩܶܣܛܳܐ ܕܕܰܗܒܳܐ ܗܳܝ ܕܺܐܝܬ ܗ̱ܘܳܐ ܒܳܗ̇ ܡܰܢܢܳܐ܆ ܘܰܒܝܰܕ ܚܽܘܛܪܶܗ ܕܰܐܗܪܽܘܢ ܗܰܘ ܕܡܶܢ ܒܳܬܰܪ ܕܺܝܒܶܫ ܐܰܦܪܰܥ^[31]܆ ܩܳܕܶܡ ܗ̱ܘܳܐ ܡܶܬܪܫܶܡ ܘܰܦܣܰܩ ܘܰܟ̣ܠܳܐ ܠܝܽܘܪܕܢܳܢ ܢܰܗܪܳܐ܆ ܘܰܐܥܒܰܪ ܐܰܝܟ ܕܥܰܠ ‌ܐܰܪܥܳܐ ܝܰܒܺܝܫܬܳܐ. ܠܬܰܪܬܰܥܶܣܪ̈ܶܐ ܫܰܪ̈ܒܳܬܳܐ ܕܺܐܝܣܪܳܐܶܝܠ܆ ܐܰܝܟܰܢܳܐ ܟܺܝܬ ܕܒܰܙܢܳܐ ܡܶܕܡ ܐܳܦ ܢܶܕܚܠܽܘܢ ܗܶܢܽܘܢ ܡܰܝ̈ܳܐ ܘܢܶܪܥܠܽܘܢ^[32]܆ ܘܡܶܛܽܠܗܳܕܶܐ ܢܶܩܛܪܽܘܢ ܘܰܢܩܽܘܡܽܘܢ ܟܰܕ ܡܶܢ ܠܥܶܠ ܢܳܚܬܺܝܢ ܗ̱ܘܰܘ ܘܰܒܩܶܒܝܳܐ ܚܰܕ ܕܣܰܓܺܝ ܕܚܺܝܩ ܠܪܽܘܚܩܳܐ܆ ܐܰܝܟܰܢܳܐ ܕܳܐܡܰܪ ܟܬܳܒܳܐ ܗܰܘ ܟܳܗܢܳܝܳܐ܆ ܗܳܫܳܐ. ܟܰܕ ܐܶܬܒܰܣܰܪ ܘܒܰܫܪܳܪܳܐ. ܘܠܰܘ ܒܛܽܘܦܣܳܐ ܘܰܒܪ̈ܶܡܙܶܐ^[33] ܐܶܬܚܙܺܝ܆ ܒܶܗ ܒܫܶܦܥܳܐ ܕܡܰܝ̈ܳܐ ܠܪܺܝܫܶܗ ܡܛܰܒܰܥ. ܘܰܠܬܰܚܬ ܗܳܘܶܐ܆ ܐܰܝܟܰܢܳܐ ܕܢܰܣܶܩ ܥܰܡܶܗ ܐܰܟܚܕܳܐ܆ ܠܰܢ ܠܗܳܢܽܘܢ ܕܰܒܥܽܘܡܩܳܐ ܕܰܚܛܺܝܬܳܐ ܐܶܬܛܰܒܰܥܢܰܢ.

ܗܳܕܶܐ ܐܺܝܬܶܝܗ̇ ܗ̱ܘܳܬ܆ ܗܳܝ ܕܳܐܦ ܝܽܘܚܰܢܳܢ ܟܰܕ ܪܳܥܶܠ ‌ܐܰܪܚܶܩ ܠܺܐܝܕܶܗ ܡܶܢ ܪܺܝܫܶܗ ܕܥܰܡܰܢܽܘܐܶܝܠ܆ ܗܰܘ^[34] ܟܺܝܬ ܕܳܐܦ ܗܳܫܳܐ ܡܶܬܗܰܘܢܳܢܳܐܺܝܬ ܐܰܗܦܶܟ ܠܡܰܝ̈ܳܐ ܠܒܶܣܬܰܪܗܽܘܢ܆ ܟܰܕ ܟ̣ܠܳܐ ܠܪܶܕܝܳܐ ܘܰܠܚܺܐܦܳܐ ܕܗܰܢܺܝ̈ܐܘܳܬܳܐ ܗܳܠܶܝܢ ܪ̈ܰܛܺܝܒܳܬܳܐ܆ ܘܰܠܓܰܠ̈ܠܶܐ ܕܰܚܛܺܝܬܳܐ ܗܳܢܽܘܢ ܕܡܶܬܥܰܪܡܺܝܢ ܗ̱ܘܰܘ ܘܙܳܩܦܺܝܢ܆ ܫܪܳܐ ܐܶܢܽܘܢ ܠܪܽܘܥܬܳܐ܆ ܒܝܕ ܕܽܘܒܳܪܳܐ ܐܶܘܰܢܓܶܠܳܝܳܐ.

ܟܰܕ ܕܶܝܢ ܩܳܥܶܐ ܗ̱ܘܳܐ܆ ܗܳܝ ܕܶܐܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܶ݀ܥܡܰܕ܆ ܘܰܐܢ̱ܬ ܐܳܬܶܐ ܐܰܢ̱ܬ ܠܘܳܬܝ܆ ܘܡܶܬܚܰܫܰܒ ܗ̱ܘܳܐ ܠܠܐ ܡܶܬܩܰܪܒܳܢܽܘܬܳܐ ܕܰܐ‌ܠܳܗܽܘܬܶܗ ܕܝܶܫܽܘܥ܆ ܡܕܰܒܪܳܢܳܐ ܗܰܘ ܚܰܟܺܝܡܳܐ ܕܦܽܘܪܩܳܢܳܐ ܕܺܝܠܰܢ. ܐܰܗܦܶܟ ܠܩܽܘܒܠܶܗ܆ ܫܒܽܘܩ ܗܳܫܳܐ^[35]. ܠܳܐ ܬܶܩܕܽܘܡ ܬܶܪܗܰܛ ܐܳܡܰܪ ܩܕܳܡ ܬܚܽܘܡܶܝ̈ܗ̇ ܕܰܡܕܰܒܪܳܢܽܘܬܳܐ܆ ܐܳܘ ܐܺܝܙܓܰܕܳܐ ܕܩܳܕܶܡ ܪܳܗܶܛ. ܐܳܦ ܓܶܝܪ ܥܕܰܟܺܝܠ܆ ܠܡܽܘܫ̈ܚܳܬܳܐ ܕܣܽܘܪܳܩܳܐ ܨܶܒܝܳܢܳܝܳܐ. ܣܳܥܰܪ ܐ̱ܢܳܐ ܐܳܡܰܪ: ܘܡܶܬܡܰܢܝܳܢܳܐ ܒܗܳܢܽܘܢ ܕܡܶܢܳܟ ܥܳܡܕܺܝܢ ܗܳܘܶܐ ܐ̱ܢܳܐ܆ ܟܰܕ ܫܽܘܪܳܝܳܐ ܥܬܺܝܕ ܐ̱ܢܳܐ ܠܡܶܬܰܠ ܠܰܥܡܳܕܳܐ ܐ̱ܚܪܺܢܳܐ܆ ܗܰܘ ܕܺܐܝܬܰܘܗ̱ܝ ܝܰܬܺܝܪ ܡܫܰܡܠܝܳܐ܆ ܘܥܰܠ ܗܰܘ ܕܰܐܢ̱ܬ ܐܳܡܰܪ ܐܰܢ̱ܬ ܕܰܣܢܺܝܩ ܐܰܢ̱ܬ܆ ܟܰܕ ܫܰܪܺܝܪ̈ܳܬܳܐ ܐܳܡܰܪ ܐܰܢ̱ܬ.

ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܰܢ ܘܠܰܘ ܠܶܗ ܥܰܡ̣ܕܳܗ̇ ܠܡܰܥܡܽܘܕܺܝܬܳܐ܆ ܗܰܘ ܕܟܽܠܗܶܝܢ ܡܶܛܽܠܳܬܰܢ ܩܰܒܶܠ ܥܠܰܘܗ̱ܝ ܠܡܶܣܒܰܠ. ܡܶܛܽܠ ܕܳܐܦ ܠܰܢ. ܐܶܬܢܰܣܺܝ. ܟܰܕ ܗܽܘ ܥܰܠ ܢܶܣ̈ܝܳܢܶܐ ܠܳܐ ܣܢܺܝܩ ܗ̱ܘܳܐ܆ ܗܰܘ ܕܰܚܛܺܝܬܳܐ ܠܳܐ ܥܒܰܕ܆ ܘܳܐܦܠܳܐ ܢܶܟܠܳܐ ܐܶܫܬܟܰܚ ܒܦܽܘܡܶܗ^[36].

ܒܪܰܡ ܕܶܝܢ. ܟܰܕ ܠܰܡܚܺܝܠܽܘܬܳܐ ܕܰܟܝܳܢܳܐ ܕܺܝܠܰܢ. ܘܰܕܓܶܢܣܳܐ ܐ̱ܢܳܫܳܝܳܐ ܡܬܰܪܶܨ܆ ܡܩܰܒܶܠ ܠܶܗ ܠܳܐܟܶܠܩܰܪܨܳܐ. ܘܦܳܬܰܚ ܠܰܢ ܠܰܣܛܰܐܕܺܝܽܘܢ ܕܬܰܟܬܽܘܫܳܐ ܕܰܠܘܳܬܶܗ. ܐܰܝܟܰܢܳܐ ܕܟܰܕ ܩܳܪܶܒ ܠܘܳܬܶܗ ܘܡܶܙܕܢܶܩ܆ ܘܡܶܢ ܚܰܝܠܬܳܢܽܘܬܳܐ ܗܳܝ ܕܶܐܬܚܰܝܰܠ ܠܩܽܘܒܠܰܢ ܡܶܫܬܪܶܐ܆ ܘܡܰܫܪܝܳܐ ܡܶܢ ܟܰܕܽܘ ܗܳܘܶܐ܆ ܕܠܺܝܠ ܠܡܶܬܟܰܒܫܳܢܽܘܬܳܐ ܡܶܟܺܝܠ ܢܶܥܒܕܺܝܘܗ̱ܝ܆ ܠܗܳܢܽܘܢ ܕܡܶܬܟܰܬܫܺܝܢ ܠܘܳܬܶܗ. ܐܰܝܟܰܢܳܐ ܟܺܝܬ ܕܡܳܕܶܝܢ. ܗܳܝ ܕܗܽܘ ܨܶܒܝܳܢܳܐܺܝܬ ܢܶܬܢܰܣܶܐ܆ ܠܰܢ ܕܶܝܢ ܡܚܺܝ̈ܠܶܐ ܗܘ̣ܳܬ ܥܽܘܕܪܳܢܳܐ. ܘܗܳܕܶܐ ܐܺܝܬܶܝܗ̇ ܗܳܝ ܕܦܰܘܠܽܘܤ ܟܰܕ ܠܥܶܒܪ̈ܳܝܶܐ ܟܳܬܶܒ ܐܳܡܰܪ ܗ̱ܘܳܐ: ܒܗܳܝ ܓܶܝܪ ܕܚܰܫ ܗܽܘ ܟܰܕ ܐܶܬܢܰܣܺܝ܆ ܡܶܫܟܰܚ ܠܰܡܥܰܕܳܪܽܘ ܠܗܳܢܽܘܢ ܕܡܶܬܢܰܣܶܝܢ^[37]. ܐܳܦ ܓܶܝܪ ܒܗܳܝ ܕܶܐܬܢܰܣܺܝ܆ ܠܡܶܬܡܰܨܝܳܢܽܘܬܳܐ ܚܰܘܺܝ.

ܘܰܠܚܰܫܳܐ ܗܰܘ ܕܟܰܦܢܳܐ܆ ܐܰܝܟ ܡܳܐ ܕܳܐܦ ܠܗܳܠܶܝܢ ܐ̱ܚܪ̈ܳܢܶܐ܆ ܟܽܠܗܽܘܢ ܗܳܢܽܘܢ ܕܳܐܦܠܳܐ ܚܕܳܐ ܩܛܺܓܪܳܢܽܘܬܳܐ ܕܰܚܛܺܝܬܳܐ ܐܺܝܬ ܠܗܽܘܢ܆ ܨܶܒܝܳܢܳܐܺܝܬ ܩܰܒܶܠ ܥܠܰܘܗ̱ܝ܆ ܟܰܕ ܡܰܫܶܦ ܗ̱ܘܳܐ ܐܺܝܬ ܐܶܡܰܬܝ ܠܰܬܚܽܘ̈ܡܶܐ ܗܳܠܶܝܢ ܕܰܟܝܳܢܳܐ ܕܰܒܝܰܕ ܗܳܠܶܝܢ ܕܺܝܠܗܽܘܢ ܢܺܐܬܽܘܢ܆ ܘܠܰܘ ܡܶܢ ܐܰܢܰܢܩܺܐ ܡܶܕܶܡ ܠܘܳܬ ܗܳܠܶܝܢ ܡܶܬܬܰܝܬܶܐ ܗ̱ܘܳܐ. ܕܰܠܘܳܬ ܓܶܝܪ ܡܛܰܦܣܳܢܽܘܬܳܐ ܘܡܰܠܦܳܢܽܘܬܐ ܕܺܝܠܰܢ܆ ܗܳܠܶܝܢ ܕܰܐܝܟ ܗܳܟܰܢ ܡܶܣܬܰܥܪ̈ܳܢ ܗ̱ܘܰܝ̈܆ ܝܺܕܺܝܥܳܐ ܡܶܢ ܠܗܰܠ. ܟܬܺܝܒ ܓܶܝܪ܆ ܕܶܐܬܕܒܰܪ ܠܡܰܕܒܪܳܐ ܡܶܢ ܪܽܘܚܳܐ^[38].

ܐܰܪܰܐ ܗܳܟܺܝܠ܆ ܠܳܐ ܨܶܒܝܳܢܳܐܺܝܬ ܡܶܬܢܓܶܕ ܗ̱ܘܳܐ. ܘܡܶܬܬܰܘܒܰܠ ܗ̱ܘܳܐ܆ ܟܰܕ ܛܳܒ ܟܺܝܬ܆ ܐܳܦܠܳܐ ܚܢܰܢ ܚܳܫܺܝܢ ܚ̱ܢܰܢ ܗܳܕܶܐ܆ ܐܶܠܳܐ ܐܳܙܺܠ̱ܝܢ ܚ̱ܢܰܢ ܠܘܳܬ ܗܳܠܶܝܢ ܕܙܳܕܶܩ ܕܢܶܣܬܰܥܪ̈ܳܢ܆ ܒܨܶܒܝܳܢܳܐ ܫܰܠܺܝܛ ܒܝܳܬܶܗ. ܐܶܠܳܐ ܗܳܝ ܟܺܝܬ ܕܶܐܡܪܶܬ܆ ܠܘܳܬ ܝܽܘܠܦܳܢܳܐ ܕܺܝܠܰܢ ܫܰܪܘܳܝܳܐ ܕܰܒܝܰܕ ܐܳܬܘ̈ܳܬܳܐ ܩܰܕܡܳܝ̈ܳܬܳܐ. ܘܰܠܘܳܬ ܡܰܥܰܠܬܳܐ ܪܳܕܽܘܝܬܳܐ܆ ܗܳܠܶܝܢ ܗܳܟܰܢܳܐ ܡܶܬܕܰܒܪ̈ܳܢ ܗ̱ܘܰܝ̈܆ ܐܰܝܟܰܢܳܐ ܕܰܚܢܰܢ ܟܰܕ ܠܡܰܥܡܽܘܕܺܝܬܳܐ ܐܰ‌ܠܳܗܳܝܬܳܐ ܡܶܫܬܘܶܝܢ ܚ̱ܢܰܢ܆ ܠܳܐ ܬܽܘܒ ܚܢܰܢ ܠܰܢ ܢܕܰܒܰܪ܆ ܐܶܠܳܐ ܢܶܬܶܠ ܚܢܰܢ ܠܰܢ ܠܢܳܡܽܘ̈ܣܶܐ ܕܪܽܘܚܳܐ ܘܡܶܢ ܗܳܢܽܘܢ ܢܶܬܬܰܝܬܶܐ܆ ܟܰܕ ܚܰܝ̣ܺܝ̣ܢ ܚ̱ܢܰܢ ܚܰܝ̈ܶܐ ܡܶܕܶܡ ܪ̈ܽܘܚܳܢܶܐ܆ ܘܡܶܬܥܰܠܡܺܝܢܰܢ ܠܽܘܩܒܰܠ ܕܰܪ̈ܶܐ ܕܳܐܟܶܠܩܰܪܨܳܐ܆ ܗܳܢܽܘܢ ܕܡܶܢܗܽܘܢ ܐܺܝܬܰܝܗܽܘܢ ܟ̈ܠܺܝܠܶܐ ܘܡܰܠܟܽܘܬܳܐ ܕܰܫܡܰܝܳܐ܆ ܘܚܰܓܳܐ ܗܰܘ ܕܥܰܡ ܡܰܠܰܐܟ̈ܶܐ܆ ܘܚܰܝ̈ܶܐ ܗܳܢܽܘܢ ܫܰܘ̈ܝ̣ܰܝ̣ ܠܕܽܘܝܳܪܳܐ ܕܺܝܠܗܽܘܢ.

ܠܗܳܕܶܐ ܫܳܪܽܘܬܳܐ ܘܦܳܬܽܘܪܳܐ ܡܠܺܝܠܳܐ ܣܳܡ ܩܕܳܡܰܝܢ ܝܰܘܡܳܢܳܐ܆ ܗܰܘ ܡܬܰܪܣܝܳܢܳܐ ܕܢܰܦ̈ܫܳܬܳܐ ܕܺܝܠܰܢ܆ ܐܰ‌ܠܳܗܳܐ ܗܰܘ ܕܰܕܢܰܚ ܠܥܳܠܡܳܐ܆ ܗܰܘ ܕܥܳܡܰܪ ܒܢܽܘܗܪܳܐ ܠܳܐ ܡܶܬܩܰܪܒܳܢܳܐ^[39]܆ ܘܰܨܡܰܚ ܥܰܠ ܚܰܝ̈ܶܐ ܕܰܒܢܰܝ̈ܢܳܫܳܐ܆ ܟܰܕ ܠܘܳܬ ܡܰܥܪ̈ܒܶܐ ܐܺܝܬܰܝܗܽܘܢ ܗ̱ܘܰܘ. ܒܰܐܝܠܶܝܢ ܗܳܟܺܝܠ ܦܽܘܪ̈ܥܳܢܶܐ ܢܶܦܪܥܺܝܘܗ̱ܝ ܠܝܳܗܽܘܒܳܐ ܕܛܳܒ̈ܳܬܳܐ ܕܕܰܐܝܟ ܗܳܠܶܝܢ. ܢܶܩܕܽܘܡ ܢܶܪܗܰܛ ܬܽܘܒ ܗܽܘ ܡܰܥܡܕܳܢܳܐ. ܘܢܺܐܡܰܪ: ܗܰܘ ܕܺܐܝܬ ܠܶܗ ܬܰܪܬܶܝܢ ܟܽܘܬܺܝ̈ܢܝܳܬܳܐ܆ ܢܶܬܶܠ ܠܗܰܘ ܕܠܰܝܬ ܠܶܗ. ܘܗܰܘ ܕܺܐܝܬ ܠܶܗ ܡܶܐܟ̈ܠܳܬܳܐ܆ ܒܳܗ̇ ܒܰܕܡܽܘܬܳܐ ܢܶܥܒܶܕ^[40].

ܠܡܳܢܳܐ ܗܳܟܺܝܠ ܚܢܰܢ ܒܥܺܐܕܳܐ ܗܳܢܳܐ܆ ܟܰܕ ܚܳܙܶܝܢ ܚ̱ܢܰܢ ܕܰܒܒܽܘ̈ܫܳܠܶܐ ܣܰܓ̈ܺܝܰܐܝ ܙܢܰܝ̈ܳܐ ܢܳܒܰܥ ܦܳܬܽܘܪܰܢ܆ ܠܳܐ ܢܫܰܘܬܶܦ ܠܗܳܢܽܘܢ ܕܰܣܢܺܝܩܺܝܢ ܡܶܢ ܗܳܠܶܝܢ ܝܰܬܺܝܪ̈ܳܬܳܐ܆ ܐܶܠܳܐ ܠܟܽܠܗܶܝܢ ܠܟܰܪܣܳܐ ܗܳܝ ܕܠܳܐ ܣܳܒܥܳܐ ܢܫܰܕܰܪ ܐܶܢܶܝܢ܆ ܘܟܰܕ ܒܢܰܚ̈ܬܶܐ ܡܥܰܠܰܝ̈ܳܐ ܘܝܰܩܺܝܪ̈ܰܝ ܕܡܰܝ̈ܳܐ ܡܶܬܚܰܬܪܺܝܢܰܢ܆ ܕܰܠܘܳܬ ܫܽܘܦܪܳܐ ܝܰܬܺܝܪܳܐܺܝܬ ܥܒܺܝܕܺܝܢ ܘܠܰܘ ܠܘܳܬ ܣܽܘܢܩܳܢܳܐ܆ ܠܰܐܚܳܐ ܕܡܶܢ ܩܽܘܪܫܳܐ ܝܰܒܺܝܫ ܠܳܐ ܡܟܰܣܶܝܢ ܚ̱ܢܰܢ܆ ܘܰܐܝܟܰܢܳܐ ܠܳܐ ܡܕܰܓܠܺܝܢ ܚ̱ܢܰܢ ܟܰܕ ܐܳܡܪܺܝܢܰܢ: ܕܕܶܢܚܳܐ ܕܢܽܘܗܪܳܐ ܐܰ‌ܠܳܗܳܝܳܐ ܡܥܰܕܥܕܺܝܢܰܢ܆ ܟܰܕ ܐܳܦܠܳܐ ܚܕܳܐ ܣܳܥܽܘܪܽܘܬܳܐ ܕܢܽܘܗܪܳܐ ܣܳܥܪܺܝܢ ܚ̱ܢܰܢ܆ ܐܶܠܳܐ ܐܳܦ ܗܳܠܶܝܢ ܕܩܰܪ̈ܺܝܒܰܝܢ. ܡܪܺܝܡܺܝܢ ܚ̱ܢܰܢ ܡܶܢܗܽܘܢ ܘܓܳܠܙܺܝܢܰܢ܆ ܘܰܠܗܳܢܽܘܢ ܕܠܳܐ ܡܶܕܶܡ ܚܰܝܳܒܺܝܢ ܠܒܶܝܬ ܐܰܣܺܝܪ̈ܶܐ ܡܰܘܒܠܺܝܢܰܢ ܠܗܽܘܢ܆ ܘܰܒܨܰܥܪ̈ܶܐ ܘܒܶܙ̈ܚܶܐ ܘܚܶܣ̈ܕܶܐ ܪܳܡܶܝܢ ܚ̱ܢܰܢ ܠܗܽܘܢ܆ ܠܗܳܢܽܘܢ ܕܡܶܢܶܗ ܟܰܕ ܡܶܢܶܗ ܕܛܺܝܢܳܐ ܐܶܬܓܒܶܠܘ܆ ܘܠܶܗ ܟܰܕ ܠܶܗ ܠܪܽܘܚܳܐ ܕܰܓܒܺܝܠܽܘܬܳܐ ܕܡܶܢ ܕܪܺܝܫ ܥܬܰܪܘ.

ܐܰܟܙܢܳܐ ܓܶܝܪ ܕܶܐܢ ܐ̱ܢܳܫ. ܟܰܕ ܫܶܡܫܳܐ ܕܰܟܝܳܐܺܝܬ ܡܰܢܗܰܪ ܠܟܽܠܳܗ̇ ܐܰܪܥܳܐ܆ ܢܶܐܚܽܘܕ ܠܒܰܝܬܳܐ ܐܰܝܟܰܢܳܐ ܕܳܐܦܠܳܐ ܡܶܢ ܕܽܘܟ ܢܰܪܦܶܐ ܡܰܥܠܳܢܳܐ ܠܙܰܗܪܳܐ܆ ܕܠܳܐ ܢܽܘܗܪܳܐ ܘܰܕܡܰܠ̈ܝܳܢ ܚܶܫܟܳܐ ܢܶܥܒܶܕ ܐܶܢܶܝܢܠܗܳܠܶܝܢ ܕܰܠܓܰܘ܆ ܗܳܟܰܢܳܐ ܐܳܦ ܗܰܘ ܕܰܒܣܳܥܽܘܪ̈ܘܳܬܳܐ ܒܺܝ̈ܫܳܬܳܐ ܡܰܚܕܰܪ^[41] ܗܽܘ ܠܶܗ܆ ܘܟܽܠ ܡܰܥܠܳܢܳܐ ܣܳܟܰܪ ܠܢܽܘܗܪܳܐ ܐܰ‌ܠܳܗܳܝܳܐ܆ ܥܕܰܟܺܝܠ ܢܰܦܫܳܐ ܕܳܘܺܝܬܳܐ ܘܰܡܥܳܩܬܳܐ܆ ܕܰܒܚܶܫܽܘܟܳܐ ܘܰܒܛܶܠܳܠܳܐ ܕܡܰܘܬܳܐ ܝܰܬܒܳܐ ܐܺܝܬ ܠܳܗ̇^[42]܆ ܕܳܐܦܠܳܐ ܚܕܳܐ ܡܰܪܓܫܳܢܽܘܬܳܐ ܩܰܒܠܰܬ ܕܙܰܗܪܺܝܪ̈ܰܘܗ̱ܝ ܕܫܶܡܫܳܐ ܕܙܰܕܺܝܩܽܘܬܳܐ. ܐܰܝܟܰܢܳܐ ܗܳܟܺܝܠ ܕܠܳܐ ܗܳܕܶܐ ܢܶܚܰܫ܆ ܢܶܬܬܦܺܝܤ ܠܦܰܘܠܽܘܤ ܕܡܰܪܬܶܐ ܘܳܐܡܰܪ: ܐܺܝܬܰܝܟܽܘܢ ܗ̱ܘܰܝܬܽܘܢ ܓܶܝܪ ܚܶܫܽܘܟܳܐ ܒܰܙܒܰܢ܆ ܗܳܫܳܐ ܕܶܝܢ ܢܽܘܗܪܳܐ ܒܡܳܪܝܳܐ. ܐܰܝܟ ܒܢܰܝ̈ܳܐ ܕܢܽܘܗܪܳܐ ܗܰܠܶܟܘ. ܦܺܐܪܳܐ ܓܶܝܪ ܕܢܽܘܗܪܳܐ܆ ܒܟܽܠܳܗ̇ ܛܳܒܽܘܬܳܐ ܘܙܰܕܺܝܩܽܘܬܳܐ ܘܰܫܪܳܪܳܐ ܐܺܝܬܰܘܗ̱ܝ. ܟܰܕ ܒܳܩܶܝܢ ܐܢ̱ܬܽܘܢ܆ ܕܡܳܢܳܐ ܐܺܝܬܶܝܗ̇ ܗܳܝ ܕܫܳܦܪܳܐ ܠܡܳܪܝܳܐ܆ ܘܠܳܐ ܬܶܫܬܰܘܬܦܽܘܢ ܠܰܥ̈ܒܳܕܶܐ ܕܚܶܫܽܘܟܳܐ ܗܳܢܽܘܢ ܕܠܳܐ ܦܺܐܪ̈ܶܐ. ܐܶܠܳܐ ܝܰܬܺܝܪܳܐܺܝܬ ܐܳܦ ܐܰܟܶܣܘ ܐܶܢܽܘܢ^[43].

ܟܰܕ ܗܳܠܶܝܢ ܓܶܝܪ ܥܳܒܕܺܝܢ ܚ̱ܢܰܢ܆ ܢܶܫܬܰܘܬܰܦ ܐܳܦ ܒܢܰܨܺܝܚܽܘܬܳܐ ܗܳܝ ܕܗܳܪܟܳܐ܆ ܘܳܐܦ ܒܗܳܝ ܕܰܒܕܶܢܚܳܐ ܐܰ‌ܠܳܗܳܝܳܐ ܗܰܘ ܕܰܥܬܺܝܕ. ܠܗܳܝ ܕܬܶܗܘܶܐ. ܕܟܽܠܰܢ ܢܶܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ. ܘܰܠܪܽܘܚܳܐ ܩܰܕܺܝܫܳܐ܆ ܦܰܐܝܳܐ ܟܽܠ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܬܠܬܝܢ ܘܰܬܡܳܢܳܝܳܐ.

ܡܶܢ ܢܽܘܪܳܐ[1]

ܠܘܩܐ. 3: 22 [2]

ܡܙܡܘܪ̈ܐ. 36: 9 [3]

ܥܒܪ̈ܝܐ. 1: 3 [4]

ܠܐ ܒܠܺܝܠܳܐܝܬ[5]

[6]ܠܐ ܐ̱ܢܳܫ ܢܶܥܕܽܘܠ ܠܒܰܪ̱ܬ ܩܳܠܳܐ ܗܳܕܶܐ ܚܕܬܐ ܐܰܝܟ ܕܰܒܠܶܫܳܢܳܐ ܣܽܘܪܝܝܐ܆ ܡܶܛܽܠ ܕܠܰܘ ܚܕܬܐ ܗܝ. ܗܳܟܺܝܠ ܓܶܝܪ ܢܰܗܺܝܪܳܐܝܬ ܐܺܝܬܶܝܗ̇ ܒܝܰܘܢܳܝܳܐ܆ ܘܠܐ ܡܶܬܚܰܘܶܐ ܚܰܝܠܶܗ ܡܫܰܡܠܝܐܝܬ܆ ܐܶܢ ܗܳܟܺܝܠ ܠܐ ܡܶܬܬܣܺܝܡܳܐ. ܘܝܰܬܺܝܪܳܐܝܬ܆ ܐܶܡܰܬܝ ܕܺܐܝܬ ܩܕܳܡܶܝܗ̇ ܒܰܪ̱ܬ ܩܳܠܐ ܗܳܝ ܕܰܚܕܳܐ. ܠܐ ܓܶܝܪ ܫܰܦܺܝܪ ܗ̱ܘܳܐ ܣܝܳܡܳܗ̇ ܐܶ‌ܠܽܘ ܐܶܡܰܪܢܰܢ܆ ܚܕܳܐ ܗܳܝ ܕܗܺܝ ܟܰܕ ܗܺܝ ܕܽܐܘܣܺܝܰܐ. ܐܶܠܐ ܚܕܳܐ ܗܺܝܟܰܕܗܺܝܽܘܬܐ ܕܽܐܘܣܺܝܰܐ.

ܣܦܪܐ ܕܡܦܩܢܐ. 3: 14 [7]

ܡܙܡܘܪ̈ܐ. 55: 20 [8]

ܚܰܒܺܝܒܳܐ. ܚܰܬܺܝܬܳܐ[9]

ܘܰܐ‌ܠܳܗܳܐ[10]

ܡܶܬܡܰܬܚܳܐ[11]

ܝܘܚܢܢ. 1: 33 ـ 34 [12]

ܠܘܩܐ. 3: 22 [13]

ܝܘܚܢܢ. 20: 22 [14]

ܪ̈ܗܘܡܝܐ. 8: 9 [15]

ܗܳܠܶܝܢ[16]

ܐ. ܝܘܚܢܢ. 3: 9 [17]

ܠܘܩܐ. 15: 19 [18]

ܫܶܦܪܰܬ ܫܪܳܬ[19]

ܫܪܳܬ[20]

ܐܦܣ̈ܝܐ. 1: 4 [21]

ܒܺܝܠܺܝܕܽܘܬܐ[22]

ܣܶܦܪܐ ܕܒܪܝܬܐ. 22: 18 [23]

ܥܡܘܣ. 9: 6 [24]

ܡܬܝ. 1: 1 ـ 16 [25]

ܠܘܩܐ. 3: 23 ـ 24 [26]

ܠܘܩܐ. 3: 38 [27]

ܐܫܥܝܐ. 59: 2 [28]

ܝܘܚܢܢ. 1: 14 [29]

ܡܙܡܘܪ̈ܐ. 66: 10 ـ 12 [30]

ܥܒܪ̈ܝܐ. 9: 4 [31]

ܡܙܡܘܪ̈ܐ. 77: 16  ܐܦ 114: 3 ـ 5 [32]

ܘܰܒܦ̈ܶܠܳܐܬܐ[33]

ܠܪܺܝܫܳܐ ܐܳܡܰܪ[34]

ܡܬܝ. 3: 14 ـ 15 [35]

ܐ. ܦܛܪܘܣ. 2: 22  ܐܦ ܐܫܥܝܐ. 53: 9

ܥܒܪ̈ܝܐ. 2: 18 [37]

ܠܘܩܐ. 4: 1 [38]

ܐ. ܛܝܡܬܐܘܣ. 6: 16 [39]

ܠܘܩܐ. 3: 11 [40]

ܡܰܟܪܶܟ[41]

ܠܘܩܐ. 1: 79 [42]

ܐܦܣ̈ܝܐ. 5: 8 ـ 11 [43]