ܡܺܐܡܪܳܐ ܕܰܬܠܳܬܺܝܢ ܘܫܰܒܥܳܐ
ܥܰܠ ܪܰܒܳܐ ܒܰܣܶܝܠܺܝܽܘܤ ܘܥܰܠ ܬܶܐܽܘܠܽܘܓܽܘܤ ܓܪܺܝܓܽܘܪܺܝܽܘܤ. ܐܶܬܶܐܡܰܪ ܕܶܝܢ ܒܒܰܝܬܳܐ ܕܣܳܗܕܳܐ ܩܰܕܺܝܫܳܐ ܐܺܝܓܢܰܐܛܺܝܽܘܤ.
37: ܠܚܰܓܳܐ ܗܳܢܳܐ ܢܰܨܺܝܚܳܐ ܘܰܐܝܟ ܕܒܰܫܪܳܪܳܐ ܪܽܘܚܳܢܳܝܳܐ܆ ܕܠܳܐ ܒܨܶܒܝܳܢܝ ܡܰܢ܆ ܕܳܢܶܬ ܕܶܝܢ ܒܪܰܡ ܕܶܐܥܒܕܺܝܘܗ̱ܝ ܒܫܶܬܩܳܐ܆ ܟܰܕ ܒܡܰܪ̈ܢܝܳܬܳܐ ܕܣܽܘܥܪ̈ܳܢܶܐ ܣܰܓܺܝ̈ܶܐܐ ܨܳܐܰܪ[1] ܐ̱ܢܳܐ܆ ܘܳܐܦܠܳܐ ܕܶܐ݀ܣܽܘܩ ܪܽܘܚܳܐ ܡܶܫܬܒܶܩ ܐ̱ܢܳܐ.
ܗܳܟܰܢܳܐ ܡܶܬܚܰܢܳܢܳܐܺܝܬ[2] ܐܺܝܬܰܝܗܽܘܢ ܠܰܢ ܣܽܘܥܪ̈ܳܢܶܐ ܕܥܺܕܬܳܐ܆ ܘܡܰܪ̈ܢܝܳܬܳܐ ܡܰܠܽܘܢ. ܐܰܘ ܦܺܐܪ̈ܶܐ[3] ܡܰܝ̈ܬܝܳܢ܆ ܘܰܒܣܽܘܓܳܐܐ ܕܚܰܘ̈ܒܳܬܳܐ ܡܰܘܩܪܺܝܢ܆ ܘܟܰܦܳܐ ܣܰܓܺܝܐܬܳܐ ܕܪ̈ܶܒܝܳܬܳܐ ܡܰܐܟܪܺܝܢ ܥܠܰܝܢ ܡܰܘܙ̈ܦܳܢܶܐ. ܡܶܛܽܠ ܓܶܝܪ ܗܳܢܽܘܢ ܕܥܳܫܩܺܝܢ ܠܰܢ ܘܳܐܟܠܺܝܢ ܩܰܪ̈ܨܰܝܢ܆ ܘܰܡܚܰܝܛܺܝܢ ܥܠܰܝܢ ܟܽܠܗܶܝܢ ܗܳܠܶܝܢ ܡܰܟ̈ܝܳܢܘܳܬܳܐ ܕܠܳܐ ܡܶܢܝܳܢ. ܡܳܢܳܐ ܙܳܕܶܩ ܐܳܦ ܕܢܺܐܡܰܪ: ܗܳܢܽܘܢ ܟܺܝܬ ܕܟܰܕ ܕܢܰܪܚܡܽܘܢ[4] ܥܠܰܝܢ ܙܳܕܶܩ ܗ̱ܘܳܐ ܠܗܽܘܢ܆ ܒܗܳܢܽܘܢ ܕܠܳܐ ܡܶܕܶܡ ܡܰܥܘܶܠ ܠܗܽܘܢ ܒܗܽܘܢ ܚܳܣܡܺܝܢ܆ ܘܥܰܠ ܕܣܳܝܩܺܝܢܰܢ ܗܳܢܳܐ ܐܳܐܰܪ ܡܶܬܥܰܣܩܺܝܢ܆ ܘܡܰܪܚܩܺܝܢ ܡܶܢ ܡܶܠܬܳܐ ܕܫܰܦܺܝܪܽܘܬ ܕܶܚܠܬܳܐ܆ ܘܢܳܛܪܺܝܢ ܙܰܒ̈ܢܶܐ܆ ܘܪܳܗܶܝܢ[5] ܣܰܓܺܝ ܝܰܨܺܝܦܳܐܺܝܬ ܠܗܳܠܶܝܢ ܕܺܝܠܰܢ܆ ܠܘܳܬ ܗܳܢܽܘܢ ܕܠܳܐ ܡܶܕܶܡ ܐ̱ܚܪܺܢܳܐ ܐܺܝܬ ܠܰܢ ܙܰܝܢܳܐ܆ ܐܶܠܳܐ ܐܶܢ ܕܥܰܡ ܗܰܘ ܕܰܡܙܰܡܰܪ ܢܺܐܡܰܪ: ܡܳܪܝܳܐ ܐܺܝܬ ܠܺܝ ܡܥܰܕܪܳܢܳܐ. ܠܳܐ ܐܶ݀ܕܚܰܠ܆ ܡܳܢܳܐ ܢܶܥܒܶܕ ܠܺܝ ܒܰܪܢܳܫܳܐ[6]܆ ܐܶܠܳܐ ܐܶܢ ܗܳܕܶܐ ܒܪܰܡ ܕܣܳܟܪܺܝܢ ܠܦܽܘܡܳܐ ܕܺܝܠܰܢ܆ ܟܰܕ ܠܘܳܬ ܗܳܕܣܳܐ[7] ܐ̱ܚܪ̈ܳܢܶܐ ܢܳܬܦܺܝܢ ܠܰܢ.
ܐܶܠܳܐ ܟܰܕ ܗܳܟܰܢܳܐ ܐܺܝܬ ܗ̱ܘܳܐ ܠܺܝ. ܒܝܰܘܡܳܐ ܗܰܘ ܕܶܐܬܡܳܠܝ̱܆ ܟܰܕ ܗܳܐ ܡܶܢ ܟܰܕܽܘ ܩܰܪܺܝܒ ܗ̱ܘܳܐ ܪܰܡܫܳܐ܆ ܗܳܝ ܕܶܐܪܰܡܝܳܐ ܓܶܕܫܰܬ ܠܺܝ܆ ܘܰܗܘܳܬ ܒܠܶܒܝ ܐܰܝܟ ܢܽܘܪܳܐ ܕܝܳܩܕܳܐ܆ ܕܡܶܫܬܰܠܗܒܳܐ ܘܳܐܚܕܳܐ ܒܓܰܪ̈ܡܰܝ[8]܆ ܘܶܐܫܬܪܺܝܬ̣ ܡܶܢ ܟܽܠ ܕܽܘܟ.
ܘܟܰܕ ܚܳܙܶܐ ܗ̱ܘܺܝܬ ܠܶܗ ܠܝܰܘܡܳܐ ܗܳܢܳܐ ܪܚܺܝܡܳܐ ܕܕܽܘܟܪܳܢܶܗ ܕܒܰܣܶܝܠܺܝܽܘܤ ܘܕܰܓܪܺܝܓܳܪܺܝܽܘܤ ܕܥܰܠ ܬܰܪ̈ܥܶܐ ܩܳܐܶܡ܆ ܠܳܐ ܡܶܫܟܰܚ ܗܘܺܝܬ ܡܶܟܺܝܠ ܠܰܡܣܰܝܒܪܽܘܬܶܗ ܠܫܶܬܩܳܐ. ܐܶܠܳܐ ܐܰܝܟ ܐܶܠܺܝܗܘ ܐܶܡܪܶܬ ܒܢܰܦܫܝ܆ ܐܶ݀ܡܰܠܶܠ ܐܰܝܟܰܢܳܐ ܕܶܐ݀ܬܬܢܺܝܚ[9]. ܘܡܶܚܕܳܐ ܒܰܪܫܳܥܬܶܗ. ܐܰܝܟ ܙܢܳܐ ܕܛܶܠܳܢܺܝܬܶܗ ܕܰܫܠܺܝܚܳܐ ܦܶܛܪܽܘܤ܆ ܚܽܘܠܡܳܢܳܐ ܝܳܗܒܳܐ ܗ̱ܘܳܬ ܠܗܳܢܽܘܢ ܕܫܳܟܢܳܐ ܗ̱ܘܳܬ ܥܠܰܝܗܽܘܢ[10]. ܗܳܟܰܢܳܐ ܐܳܦ ܠܺܝ܆ ܟܰܕ ܡܰܚܫܰܒܬܳܐ ܕܓܰܒܪ̈ܶܐ ܗܳܢܽܘܢ ܠܒܺܝ̈ܫܰܝ ܠܰܐܠܳܗܳܐ ܢܶܦܠܰܬ ܒܺܝ ܒܰܕܡܽܘܬ ܙܰܠܺܝܩܳܐ܆ ܐܳܦ ܟܰܕ ܠܳܐ ܡܛܰܝܰܒ ܗ̱ܘܺܝܬ܆ ܢܽܘܗܪܳܐ ܡܠ̣ܳܬܰܢܝ܆ ܘܰܠܡܺܐܡܰܪ ܐܳܠܨܳܐ ܗ̱ܘܳܬ ܠܺܝ܆ ܘܳܐܦܠܳܐ ܒܡܶܕܶܡ ܡܫܰܚܠܰܦ ܗ̱ܘܺܝܬ ܡܶܢ ܚܰܙܩܝܐܝܠ܆ ܕܰܠܪܺܝܫܳܐ[11] ܗܰܘ ܐܰܠܳܗܳܝܳܐ ܕܰܟܬܳܒܳܐ ܐܶܟܰܠ ܘܶܐܡܰܪ: ܘܰܗܘ̣ܳܐ ܒܦܽܘܡܳܐ ܕܺܝܠܝ ܐܰܝܟ ܕܶܒܫܳܐ ܚܰܠܝܳܐ[12].
ܐܳܦ ܓܶܝܪ ܐܰܝܟ ܕܒܰܫܪܳܪܳܐ. ܕܝܰܬܺܝܪ ܚܠܶܐ ܡܶܢ ܕܶܒܫܳܐ ܐܺܝܬܰܘܗ̱ܝ܆ ܐܳܦ ܗܽܘ ܟܽܘܢܳܝܳܐ ܒܰܠܚܽܘܕܰܘܗ̱ܝ. ܗܰܘ ܕܡܰܠ̈ܦܳܢܶܐ ܗܳܢܽܘܢ ܠܒܺܝ̈ܫܰܝ ܠܰܐܠܳܗܳܐ܆ ܡܶܛܽܠ ܟܺܝܬ ܕܡ̈ܶܠܶܐ ܕܝܰܬܺܝܪ ܚܰܠ̈ܝܳܢ ܛܳܒ ܡܶܢ ܕܶܒܫܳܐ ܡܰܠܶܠܘ. ܥܰܠ ܗܳܠܶܝܢ ܕܳܐܦ ܚܰܬܢܳܐ ܗܰܘ ܕܰܒܬܶܫܒܚܰܬ ܬܶܫܒ̈ܚܳܬܳܐ܆ ܗܰܘ ܕܺܐܝܬܰܘܗ̱ܝ ܡܫܺܝܚܳܐ܆ ܡܶܬܬܢܺܝܚ ܗ̱ܘܳܐ ܥܠܰܝܗܽܘܢ ܟܰܕ ܐܳܡܰܪ: ܟܰܟܳܪܺܝܬܳܐ ܡܰܛܦ̈ܳܢ ܣܶܦ̈ܘܳܬܶܟܝ ܟܰܠܬܳܐ. ܕܶܒܫܳܐ ܘܚܰܠܒܳܐ ܬܚܶܝܬ ܠܶܫܳܢܶܟܝ[13]. ܡܰܢܽܘ ܓܶܝܪ ܕܟܰܕ ܒܡܰܠ̈ܦܳܢܘܳܬܳܐ ܚܰܟܺܝ̈ܡܳܬܳܐ ܕܗܳܢܽܘܢ ܦܓܰܥ܆ ܠܳܐ ܐܶܬܢܬܶܦ ܒܢܰܦܫܶܗ ܘܶܐܬܬܰܘܒܰܠ ܒܗܰܘܢܶܗ܆ ܘܟܽܠܶܗ ܗܘ̣ܳܐ ܕܚܰܝ̈ܶܐ ܗܳܢܽܘܢ ܕܰܥܬܺܝܕܺܝܢ܆ ܘܒܰܕܡܽܘܬ ܦܰܘܠܽܘܤ ܐܰܙܥܶܩ܆ ܕܥܳܒܰܪ ܠܶܗ ܐܶܣܟܺܡܶܗ ܕܥܳܠܡܳܐ ܗܳܢܳܐ[14].
ܡܰܢܽܘ ܥܠܰܝܡܳܐ ܕܬܰܙܺܝܙ ܒܦܰܓܪܶܗ ܘܪܳܬܰܚ ܒܗܰܒܳܒܳܐ ܕܛܰܠܝܽܘܬܳܐ܆ ܘܰܠܘܳܬ ܪ̈ܶܚܡܳܬܳܐ ܫܟܺܝܪ̈ܳܬܳܐ ܡܶܢ ܚܽܘܬܚܳܬܳܐ ܕܪܶܓܬܳܐ ܡܶܬܬܰܝܬܶܐ܆ ܕܟܰܕ ܐܰܪܟܶܢ ܡܰܫܡܰܥܬܶܗ ܠܰܒ̈ܢܳܬ ܩ̈ܳܠܶܐ ܢܦܺܝ̈ܚܳܬ ܡܶܢ ܐܰܠܳܗܳܐ ܕܗܳܠܶܝܢ܆ ܠܳܐ ܡܶܚܕܳܐ ܗܘ̣ܳܐ ܢܰܟܦܳܐ ܘܕܰܠܬܰܚܬ ܚܳܐܰܪ܆ ܘܕܰܠܢܽܘܪܳܐ ܕܰܪ̈ܓܺܝܓܳܬܳܐ ܛܰܥܺܝ܆ ܘܰܕܝܰܬܺܝܪ ܩܰܪܺܝܪ ܛܳܒ ܡܶܢ ܬܰܠܓܳܐ܆ ܟܰܕ ܒܕܶܚܠܳܐ ܝܰܒܺܝܫ ܡܶܢ ܫܽܘ̈ܢܳܩܶܐ ܕܰܠܥܳܠܰܡ ܗܳܢܽܘܢ ܕܰܓܙܺܝܡܺܝܢ܆ ܘܕܰܚܺܝܠ ܕܕܰܠܡܳܐ ܒܕܽܘܟ ܕܠܳܐ ܢܛܽܘܪܬܳܐ ܢܰܟ̣ܪܶܟ ܥܰܝܢܶܗ܆ ܘܰܕܚܰܘܪܳܐ ܝܰܥܢܳܐ[15] ܐܰܝܟ ܕܓܰܘܪܳܐ ܢܶܬܬܒܰܥ ܕܺܝܢܳܐ[16].
ܡܰܢܽܘ ܡܶܢ ܗܳܢܽܘܢ ܕܟܺܝܣܳܐ ܪܰܒܳܐ ܩܢܶܝܢ܆ ܘܺܐܝܕܳܐ ܝܰܒܺܝܫܬܳܐ ܘܰܡܫܰܪܰܝܬܳܐ ܐܺܝܬ ܠܗܽܘܢ܆ ܘܰܕܒܰܐܣܳܪܳܐ ܕܪܶܚܡܰܬ ܟܶܣܦܳܐ ܐܰܣܺܝܪܳܐ܆ ܕܟܰܕ ܒܡܰܟ̈ܬܒܳܢܘܳܬܗܽܘܢ ܕܗܳܢܽܘܢ ܡܶܬܥܢܶܐ܆ ܠܰܘ ܠܝܶܫܽܘܥ ܐܰܣܒܰܪ ܕܫܳܡܰܥ ܕܳܐܡܰܪ ܠܶܗ ܦܫܽܘܛ ܐܺܝܕܳܟ܆ ܐܶܠܳܐ ܦܰܫܛܳܗ̇ ܘܰܦܢܳܬ ܘܰܗܘܳܬ ܚܠܺܝܡܬܳܐ[17]܆ ܟܰܕ ܡܒܰܕܪܳܐ ܘܝܳܗܒܳܐ ܠܒܳܝ̈ܫܶܐ ܐܰܝܟ ܗܳܝ ܕܰܟܬܺܝܒܳܐ[18]܆ ܐܰܝܟܰܢܳܐ ܟܺܝܬ ܕܟܽܠܗܽܘܢ ܗܳܢܽܘܢ ܕܚܳܙܶܝܢ ܠܶܗ܆ ܢܫܰܒܚܽܘܢ ܠܡܳܪܝܳܐ ܗܰܘ ܕܥܰܒܕܳܗ̇ ܠܬܶܕܡܽܘܪܬܳܐ.
ܡܰܢܽܘ ܕܰܠܘܳܬ ܬܶܐܓܽܘܪܬܳܐ ܦܥܺܝܪ ܚܶܟܶܗ ܘܰܠܘܳܬ ܟܽܘܢܳܫܳܐ ܕܡܰܪ̈ܗܳܛܶܐ܆ ܘܥܰܠ̈ܠܳܬܳܐ ܕܝܽܘܬܪܳܢܳܐ ܕܳܐܶܩ ܘܡܶܬܪܢܶܐ܆ ܕܶܐܢ ܚܰܕ ܟܬܳܒܳܐ ܟܡܳܐ ܙܰܒ̈ܢܺܝܢ ܢܶܩܢܶܐ ܡܶܢ ܡܰܠܦܳܢܽܘܬܳܐ ܕܗܳܢܽܘܢ܆ ܠܰܘ ܗܺܝ ܟܰܕ ܗܺܝ ܢܶܚܰܫ ܠܗܰܘ ܕܰܙܒܰܢ ܩܪܺܝܬܳܐ܆ ܘܶܐܫܟܰܚ ܒܳܗ̇ ܣܺܝܡܬܳܐ ܕܰܡܛܰܫܝܳܐ[19]܆ ܐܰܝܟܰܢܳܐ ܕܳܐܡܰܪ ܟܬܳܒܳܐ ܟܳܗܢܳܝܳܐ ܕܶܐܘܰܢܓܶܠ̈ܝܰܐ. ܐܶܢܕܶܝܢ ܒܪܶܚܡܰܬ ܥܰܡܠܳܐ ܢܶܩܒܽܘܥ ܠܗܰܘܢܶܗ ܒܗܳܠܶܝܢ ܕܰܟ̈ܬܺܝܒܳܢ܆ ܢܶܫܟܰܚ ܠܡܰܪܓܳܢܺܝܬܳܐ ܗܳܝ ܝܰܩܺܝܪܰܬ ܕܡܰܝ̈ܳܐ. ܘܟܕ ܒܢܰܨܺܝܚܽܘܬܳܐ[20] ܕܡܶܢܳܗ̇. ܒܥܰܝܢܳܐ ܕܬܰܪܥܺܝܬܶܗ ܢܶܬܬܰܒܪܰܩ܆ ܘܰܠܟܽܠܗܶܝܢ ܗܳܠܶܝܢ ܐ̱ܚܪ̈ܳܢܝܳܬܳܐ ܙܶܒܠܳܐ ܢܶܚܫܽܘܒ. ܐܰܝܟ ܦܰܘܠܽܘܤ܆ ܘܥܰܡ ܝܰܨܺܝܦܽܘܬܳܐ[21] ܢܙܰܒܶܢ܆ ܢܶܩܢܶܐ ܠܗܰܘ ܕܰܠܩܰܢܳܝܽܘܬܳܐ ܫܳܘܶܐ. ܘܢܺܐܡܰܪ ܡܫܰܡܠܝܳܐܺܝܬ ܘܰܫܠܺܝܚܳܐܺܝܬ܆ ܕܝܽܘܬܪ̈ܳܢܶܐ ܗܳܠܺܝܢ ܕܺܐܝܬ ܗ̱ܘܳܐ ܠܺܝ܆ ܠܗܳܠܶܝܢ ܙܺܝܡܺܝܰܐ[22] ܚܶܫܒܶܬ ܐܶܢܽܘܢ ܡܶܛܽܠ ܡܫܺܝܚܳܐ. ܐܶܠܳܐ ܡܰܢ ܓܶܝܪ܆ ܐܳܦ ܚܳܫܶܒ ܐ̱ܢܳܐ ܠܟܽܠܗܶܝܢ ܕܚܽܘܣܪܳܢܳܐ ܐܺܝܬܰܝܗܶܝܢ܆ ܡܶܛܽܠ ܡܥܰܠܝܽܘܬܳܗ̇ ܕܺܝܕܰܥܬܳܐ ܕܰܡܫܺܝܚܳܐ ܝܶܫܽܘܥ ܡܳܪܳܐ ܕܺܝܠܝ[23].
ܚܽܘܣܪܳܢܳܐ ܓܶܝܪ ܐܰܝܟ ܕܒܰܫܪܳܪܳܐ ܐܺܝܬܰܘܗ̱ܝ ܩܶܢܝܳܢܳܐ ܕܗܳܠܶܝܢ ܕܰܡܠܶܐ ܙܰܒܢܳܐ܆ ܕܥܰܡܶܗ ܕܗܳܝ ܕܡܶܬܩܢܶܐ ܐܰܝܟ ܕܰܠܡܺܐܡܰܪ: ܫܳܒܶܩ ܠܶܗ ܠܗܰܘ ܕܰܩܢܳܝܗ̱ܝ . ܩܶܢܝܳܢܳܐ ܓܶܝܪ ܡܳܪܳܢܳܐܺܝܬ܆ ܐܽܘܚܕܳܢܳܐ ܕܗܳܠܶܝܢ ܕܠܳܐ ܡܶܬܬܪ̈ܺܝܡܳܢ ܐܺܝܬܰܘܗ̱ܝ. ܐܰܝܟܰܢܳܐ ܟܺܝܬ ܕܰܠܗܳܠܶܝܢ ܕܗܳܪܟܳܐ܆ ܕܗܳܢܽܘܢ ܕܒܚܶܠܡܳܐ ܥܳܬܪܺܝܢ ܬܺܐܡܰܪ ܐܶܢܶܝܢ ܟܺܐܢܳܐܺܝܬ. ܕܠܳܐ ܓܶܝܪ ܢܳܣܶܒ ܠܗܶܝܢ ܐ̱ܢܳܫ ܠܟܽܠܗܶܝܢ ܟܰܕ ܡܳܐܶܬ܆ ܫܳܡܥܺܝܢܰܢ ܠܕܰܘܺܝܕ ܕܡܰܙܥܶܩ[24].
ܐܶܠܳܐ ܟܰܒܰܪ ܬܺܐܡܰܪ: ܕܡ̈ܶܠܶܐ ܕܗܳܢܽܘܢ ܘܡܰܠ̈ܦܳܢܘܳܬܗܽܘܢ܆ ܠܓܰܒܪ̈ܶܐ ܒܰܠܚܽܘܕ ܡܰܘܬܪ̈ܳܢ. ܠܢܶܫ̈ܶܐ ܕܶܝܢ ܘܠܳܐ ܣܳܟ. ܡܳܕܶܝܢ ܣܰܒ ܠܺܝ ܡܺܐܡܪܳܐ ܕܒܰܣܶܝܠܺܝܽܘܤ ܗܰܘ ܕܠܽܘܩܒܰܠ ܪ̈ܳܚܡܰܝ ܥܽܘܬܪܳܐ܆ ܘܰܩܪܺܝ ܩܕܳܡ ܐܰܢ̱ܬܬܳܐ ܕܺܝܠܳܟ. ܘܬܶܚܙܶܐ ܕܡܶܚܕܳܐ ܒܰܪܫܳܥܬܶܗ. ܫܳܕܝܳܐ ܡܶܢܳܗ̇ ܠܚܶܫ̈ܠܳܬܳܐ ܗܳܠܶܝܢ ܕܕܰܗܒܳܐ ܐܰܝܟ ܕܰܠܟܶܒ̈ܠܶܐ܆ ܘܫܳܝܛܳܐ ܠܪܰܟܺܝܟܽܘܬܗܽܘܢ ܟܺܝܬ ܕܢܰܚ̈ܬܶܐ ܘܠܰܫܒܺܝܚܽܘܬܗܽܘܢ ܐܰܝܟ ܕܠܽܐܘܪܩܰܥܬܳܐ ܕܨܳܐܳܐ܆ ܘܰܕܦܺܝܠܳܣܽܘܦܽܘܤ ܐܰܘ ܟܺܝܬ ܪܳܚܡܰܬ ܚܶܟܡܬܳܐ ܚܠܳܦ ܪܶܚܡܰܬ ܨܶܒܬܳܐ ܗܳܘܝܳܐ܆ ܘܕܰܠܘܳܬ ܡܰܠܟܽܘܬܳܐ ܕܰܫܡܰܝܳܐ ܡܶܣܬܰܪܗܒܳܐ܆ ܘܰܕܣܳܥܪܳܐ ܥܰܡܳܟ ܐܰܟܚܕܳܐ ܙܰܕܺܝܩܽܘܬܳܐ܆ ܘܰܡܪܰܒܝܳܐ ܠܟܽܠ ܣܳܥܽܘܪܽܘܬܳܐ ܛܳܒܬܳܐ.
ܡܶܛܽܠܗܳܕܶܐ ܓܶܝܪ܆ ܒܦܰܪܕܰܝܣܳܐ ܟܰܕܢܳܗ̇ ܐܰܠܳܗܳܐ ܠܚܰܘܳܐ ܥܰܡ ܐܳܕܳܡ܆ ܟܰܕ ܡܥܰܕܪܳܢܺܝܬܳܐ ܕܰܡܝܰܬܪܽܘܬܳܐ ܘܰܕܦܽܘܠܚܳܢܳܐ ܐܰܠܳܗܳܝܳܐ ܝܳܗܶܒ ܗ̱ܘܳܐ ܠܳܗ̇ ܠܶܗ ܒܩܰܕܺܝܡܽܘܬ ܛܽܘܦܣܳܐ܆ ܘܠܰܘ ܫܰܘܬܳܦܬܳܐ ܕܚܽܘܠܛܳܢܳܐ ܟܺܝܬ ܘܰܕܪܶܓܬܳܐ. ܐܶܡܰܬܝ ܓܶܝܪ ܕܰܠܒܰܪ ܡܶܢ ܦܰܪܕܰܝܣܳܐ ܗܘ̣ܳܐ ܐܳܕܳܡ܆ ܗܳܝܕܶܝܢ ܚܟܰܡ ܠܚܰܘܳܐ ܐܰܢ̱ܬܬܶܗ. ܘܟܰܕ ܒܶܛܢܰܬ ܝܶܠܕܰܬ ܠܩܳܐܝܢ[25]. ܐܶܡܰܬܝ ܓܶܝܪ ܕܡܶܛܽܠ ܠܳܐ ܡܶܫܬܰܡܥܳܢܽܘܬܳܐ. ܢܦܰܠ ܒܰܪܢܳܫܳܐ ܡܶܢ ܠܳܐ ܡܳܝܽܘܬܽܘܬܳܐ ܗܳܝ ܕܰܡܠܺܝܟܳܐ ܗ̱ܘܳܬ ܠܶܗ܆ ܗܳܝܕܶܝܢ ܥܶܠܰܬ ܡܥܰܕܪܳܢܽܘܬܳܐ ܕܥܳܒܽܘܕܽܘܬ ܒܢܰܝ̈ܳܐ܆ ܕܰܡܫܰܘܙܒܳܐ ܠܝܽܘܒܳܠܶܗ ܕܓܶܢܣܳܐ.
ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܟܽܘܢ ܐܺܝܬ ܠܺܝ ܕܶܐ݀ܥܕܽܘܠ܆ ܡܶܛܽܠ ܡܫܰܡܕܽܘܬܳܐ[26] ܘܪܰܦܝܽܘܬܳܐ ܕܢܶܫܰܝ̈ܟܽܘܢ܆ ܕܛܶܟܣܳܐ ܕܪܺܝܫܳܐ ܐܰܚܺܝܕܺܝܢ ܐܢ̱ܬܽܘܢ܆ ܘܳܐܦܠܳܐ ܚܰܕ ܝܽܘܠܦܳܢܳܐ ܡܶܕܶܡ ܚܠܺܝܡܳܐ ܘܪܽܘܚܳܢܳܝܳܐ ܐܳܡܪܺܝܢ ܐܢ̱ܬܽܘܢ ܠܗܶܝܢ. ܠܡܳܢܳܐ ܗܳܕܶܐ ܐܳܡܰܪ ܐ̱ܢܳܐ؟ ܟܰܕ ܚܳܙܶܐ ܐ̱ܢܳܐ ܠܟܽܠ ܡܶܕܶܡ ܕܰܒܕܰܠܩܽܘܒܠܳܐ ܗܳܘܶܐ. ܐܺܝܬ ܐܶܡܰܬܝ ܓܶܝܪ܆ ܕܳܐܦ ܡܩܰܛܪܓܺܝܢ ܐܢ̱ܬܽܘܢ ܠܗܶܝܢ ܡܰܪܺܝܪܳܐܺܝܬ ܘܩܰܫܝܳܐܺܝܬ܆ ܐܶܢܗܽܘ ܕܰܠܘܳܬ ܥܺܕܬܳܐ ܒܰܠܚܽܘܕ ܬܶܚܙܽܘܢ ܐܶܢܶܝܢ ܕܳܐܙ̈ܳܠ̱ܢ ܣܒܺܝܣܳܐܺܝܬ ܘܰܒܪܶܚܡܰܬ ܥܰܡܠܳܐ. ܘܠܶܗ ܠܣܽܘܥܪܳܢܳܐ ܩܳܪܶܝܢ ܐܢ̱ܬܽܘܢ ܠܶܗ ܥܰܣܩܳܐ ܘܠܳܐ ܡܶܣܬܰܝܒܪܳܢܳܐ܆ ܟܰܕ ܐܰܢ̱ܬܽܘܢ ܟܽܠܶܗ ܝܰܘܡܳܐ ܒܰܛܺܝ̈ܠܶܐ ܡܶܬܟܰܪܟܺܝܢ ܐܢ̱ܬܽܘܢ ܒܫܽܘܩܳܐ܆ ܘܰܠܥܶܕܳܢܳܐ ܕܬܽܘܪܣܳܝܳܐ ܥܰܠ ܥܰܪܣܳܐ ܡܶܬܐܰܫܕܺܝܢ ܐܢ̱ܬܽܘܢ܆ ܘܰܠܟܰܪܣܳܐ ܝܰܬܺܝܪ ܡܳܠܶܝܢ ܐܢ̱ܬܽܘܢ܆ ܟܰܕ ܗܳܠܶܝܢ ܨܳܝ̈ܡܳܢ܆ ܘܡܶܬܛܰܝ̈ܒܳܢ ܕܰܠܥܺܕܬܳܐ ܬܽܘܒ ܢܶܪ̈ܗܛܳܢ ܠܘܳܬ ܨ̈ܠܰܘܳܬܳܐ ܪ̈ܰܡܫܳܝܳܬܳܐ܆ ܘܕܰܠܡܶܣܟܺܢܳܐ ܢܫܰܘ̈ܬܦܳܢ ܒܫܳܡܽܘܢܳܐ܆ ܘܰܕܢܶܫ̈ܬܰܘܬܦܳܢ ܒܐ̱ܪ̈ܳܙܶܐ ܐܰܠܳܗܳܝ̈ܶܐ܆ ܘܰܕܢܰܟܪ̈ܟܳܢ ܫܽܘܪܳܐ ܠܒܳܬܰܝ̈ܟܽܘܢ ܒܰܢܛܽܘܪܬܳܐ ܕܚܰܝ̈ܠܰܘܳܬܳܐ ܡܰܠܰܐܟܳܝ̈ܶܐ. ܢܶܫܪܶܐ ܓܶܝܪ ܡܰܠܰܐܟܶܗ ܕܡܳܪܝܳܐ ܚܕܳܪ̈ܰܝ ܗܳܢܽܘܢ ܕܕܳܚܠܺܝܢ ܠܶܗ. ܘܰܢܦܰܨܶܐ ܐܶܢܽܘܢ[27].
ܗܳܟܰܢܳܐ ܒܰܟܝܳܢܳܐ ܪܟܺܝܢܳܐܺܝܬ ܐܺܝܬ ܠܗܶܝܢ ܠܘܳܬ ܛܳܒ̈ܳܬܳܐ܆ ܘܪ̈ܳܚܡܳܬ ܝܽܘܠܦܳܢܳܐ ܕܫܰܦܺܝܪܽܘܬ ܕܶܚܠܬܳܐ ܐܺܝܬܰܝܗܶܝܢ. ܘܪ̈ܳܚܡܳܬ ܐܰܠܳܗܳܐ܆ ܒܰܠܚܽܘܕ. ܐܶܢ ܐܢ̱ܬܽܘܢ ܠܰܚܘܺܝܚܽܘܬܳܐ ܕܺܝܠܗܶܝܢ ܠܳܐ ܬܶܦܣܩܽܘܢ[28]. ܒܪܰܡ ܐܶܢ ܠܺܝ ܡܶܬܬܦܺܝ̈ܣܳܢ܆ ܡܶܬܬܦܺܝ̈ܣܳܢ ܕܶܝܢ ܝܳܕܰܥ ܐ̱ܢܳܐ. ܐܳܦ ܓܶܝܪ ܡܶܠܬܳܐ ܣܰܓܺܝܐܬܳܐ ܐܺܝܬ ܠܗܶܝܢ ܕܦܽܘܪܩܳܢܳܐ ܕܺܝܠܗܶܝ.܆ ܟܽܠܗܶܝܢ ܡܰܢ. ܗܳܠܶܝܢ ܕܦܳܩܕܺܝܢ ܐܢ̱ܬܽܘܢ ܠܗܶܝܢ ܕܫܳܘ̈ܝܳܢ ܘܰܠܪܺܝܫܳܐ ܦܰܐܝ̈ܳܢ܆ ܥܰܡ ܟܽܠܳܗ̇ ܕܶܚܠܬܳܐ ܢܶܡܠ̈ܝܳܢ. ܟܽܠܗܶܝܢ ܕܶܝܢ. ܗܳܠܶܝܢ ܕܰܠܒܰܪ ܡܶܢ ܗܳܝ ܕܙܳܕܩܳܐ ܢܳܦ̈ܠܳܢ܆ ܘܡܶܢ ܐܰܠܳܗܳܐ ܡܰܪ̈ܚܩܳܢ܆ ܠܗܳܠܶܝܢ ܐܰܝܟ ܐܰܝܠܶܝܢ ܕܫܳܘ̈ܝܳܢ ܕܢܶܬܒܰܣ̈ܝܳܢ ܢܫܽܘ̈ܛܳܢ ܐܶܢܶܝܢ܆ ܟܰܕ ܠܡܶܠܬܳܐ ܗܳܝ ܐܰܠܳܗܳܝܬܳܐ ܐܳܡܪ̈ܳܢ܆ ܕܠܰܐܠܳܗܳܐ ܙܳܕܶܩ ܠܡܶܬܬܦܳܣܽܘ ܝܰܬܺܝܪܳܐܺܝܬ܆ ܐܰܘ ܠܰܒܢܰܝ̈ܢܳܫܳܐ.[29] ܘܟܰܕ ܗܳܟܰܢܳܐ ܒܰܡܝܰܬܪܽܘܬܳܐ ܚܳܙܶܝܢ ܐܢ̱ܬܽܘܢ ܠܗܶܝܢ܆ ܐܶܡܰܬܝ ܕܗܽܘ. ܐܳܦܶܢ ܡܫܰܘܚܪܳܐܺܝܬ ܐܳܦ ܐܰܢ̱ܬܽܘܢ ܬܶܗܘܽܘܢ ܢܰܟ̈ܦܶܐ܆ ܟܰܕ ܓܰܘܳܢܳܐܺܝܬ ܒܦܽܘܪ̈ܥܳܢܶܐ ܕܡܶܢ ܫܡܰܝܳܐ ܡܶܬܒܰܣܡܺܝܢ ܐܢ̱ܬܽܘܢ܆ ܘܝܳܗܒܺܝܢ ܐܢ̱ܬܽܘܢ ܛܽܘܒܳܐ ܐܰܢ̱ܬܽܘܢ ܠܟܽܘܢ܆ ܡܶܛܽܠ ܙܽܘܘܳܓܟܽܘܢ ܛܳܒܳܐ.
ܗܳܠܶܝܢ ܕܶܝܢ܆ ܠܰܘ ܡܶܛܽܠ ܡܶܕܶܡ ܐ̱ܚܪܺܝܢ ܐܶܡܪܶܬ ܐܶܢܶܝܢ܆ ܐܶܠܳܐ ܐܶܢ ܕܶܐ݀ܚܰܘܶܐ ܓܰܠܝܳܐܺܝܬ܆ ܕܒܰܣܶܝܠܺܝܽܘܤ ܘܰܓܪܺܝܓܽܘܪܺܝܽܘܤ ܗܳܠܶܝܢ ܛܽܘܒ̈ܬܳܢܶܐ܆ ܡܰܠ̈ܦܳܢܶܐ ܓܰܘܳܢܳܝ̈ܶܐ ܕܰܟܝܳܢܳܐ ܐܺܝܬܰܝܗܽܘܢ ܗ̱ܘܰܘ܆ ܘܰܠܟܽܠ ܓܶܢܣܳܐ ܘܰܠܟܽܘܠ ܩܰܘܡܬܳܐ ܒܫܰܘܝܽܘܬ ܐܺܝܩܳܪܳܐ ܪܳܕܶܝܢ ܗ̱ܘܰܘ. ܘܟܰܕ ܠܦܽܘܡܳܐ ܕܬܰܪܥܺܝܬܗܽܘܢ ܥܰܡ ܪܶܓܬܳܐ ܣܰܓܺܝܐܬܳܐ ܦܬܰܚܘ܆ ܘܰܠܫܶܦ̈ܥܶܐ ܕܪܽܘܚܳܐ ܝܰܬܺܝܪ ܡܫܰܪܬܚܳܐܺܝܬ ܐܰܝܟ ܕܡܰܨܝܳܐ ܗ̱ܘܳܬ ܠܰܒܢܰܝ̈ܢܳܫܳܐ ܡܬܰܩܘ ܗ̱ܘܰܘ܆ ܬܰܦ̈ܶܐ ܕܢܰܗܪܳܐ ܗܘ̣ܰܘ[30]܆ ܕܠܰܡܕܺܝܢ̱ܬܳܐ ܕܰܐܠܳܗܳܐ ܡܚܰܕܶܝܢ܆ ܝܺܕܺܝܥܳܐ ܕܶܝܢ ܕܰܠܥܺܕܬܳܐ ܕܰܡܫܺܝܚܳܐ.
ܣܰܓܺܝ ܓܶܝܪ ܦܰܐܝܳܐܺܝܬ ܠܪܶܕܝܳܐ ܘܰܠܚܺܐܦܳܐ ܕܢܰܗܪܳܐ ܢܕܰܡܶܝܗ̇ ܐ̱ܢܳܫ ܠܡܶܠܬܗܽܘܢ ܕܗܳܢܽܘܢ܆ ܗܳܝ ܕܰܠܗܽܘܦܳܟ ܚܽܘܫܳܒ̈ܶܐ ܕܰܐܪܺܝܽܘܤ ܘܕܽܐܘܢܽܘܡܺܝܽܘܤ܆ ܕܰܠܥܳܒܽܘܕܳܐ ܕܥܳܠ̈ܡܶܐ ܡܶܠܬܳܐ ܘܰܒܪܳܐ ܕܰܐܠܳܗܳܐ ܒܪܺܝܬܳܐ ܐܳܡܪܺܝܢ ܗ̱ܘܰܘ܆ ܒܰܕܡܽܘܬ ܡܰܓܕܠܳܐ ܗܰܘ ܕܶܐܬܒܢܺܝ ܥܰܠ ܚܳܠܳܐ ܓܶܪܦܰܬ[31]܆ ܘܰܠܩܽܘܦܝܳܐ ܣܰܪܝܳܐ ܕܫܶܥܝܳܢܳܐ ܥܳܠܡܳܢܳܝܳܐ ܡܶܢ ܢܰܦ̈ܫܳܬܳܐ ܡܗܰܝܡ̈ܢܳܬܳܐ ܕܰܟܝܰܬ܆ ܘܰܪܕܳܬ ܘܚܰܘܝܰܬ ܬܶܐܽܘܪܺܝܰܐ ܟܝܳܢܳܝܬܳܐ܆ ܟܰܕ ܐܰܠܦܰܬ ܐܰܝܟ ܕܡܶܫܟܚܳܐ܆ ܕܒܰܐܝܠܶܝܢ ܡ̈ܶܠܶܐ ܚܰܟܺܝ̈ܡܳܬܳܐ ܘܽܐܘܡ̈ܳܢܳܝܳܬܳܐ܆ ܐܰܝܬܺܝ ܥܳܒܽܘܕܳܐ ܠܗܳܕܶܐ ܒܪܺܝܬܳܐ ܕܬܶܗܘܶܐ ܐܺܝܬܶܝܗ̇܆ ܐܰܝܟܳܐ ܟܺܝܬ ܕܰܐܝܟ ܕܶܐܡܰܪ ܐ̱ܢܳܫ ܚܰܟܺܝܡܳܐ܆ ܡܶܢ ܫܽܘܦܪܳܐ ܕܒܶܪ̈ܝܳܬܳܐ ܘܡܶܢ ܚܶܟܡܬܳܐ ܗܳܝ ܕܰܒܗܶܝܢ ܡܶܬܬܰܝܬܝܳܐ[32]܆ ܡܣܰܩܡܳܐܺܝܬ ܥܳܒܽܘܕܳܐ ܕܺܝܠܗܶܝܢ ܢܶܬܚܙܶܐ܆ ܘܡܶܢ ܒܪܺܝܬܶܗ ܕܥܳܠܡܳܐ܆ ܗܳܠܶܝܢ ܠܳܐ ܡܶܬܚܰܙܝܳܢ̈ܝܳܬܳܐ ܕܺܝܠܶܗ ܢܶܣ̈ܬܰܟܠܳܢ[33]܆ ܐܰܝܟܰܢܳܐ ܕܦܰܘܠܽܘܤ ܦܺܝܠܳܣܽܘܦܺܝܣܳܐ ܥܒܰܕ.
ܐܶܠܳܐ ܟܺܝܬ ܡܶܠܬܗܽܘܢ ܗܳܝ ܢܽܘܪܳܢܳܝܬܳܐ ܕܗܳܢܽܘܢ ܐܰܠܳܗܳܝ̈ܶܐ܆ ܝܰܬܺܝܪ ܡܶܢ ܟܽܠܗܽܘܢ ܒܢܰܝ̈ ܐ̱ܢܳܫܳܐ ܐܳܦ ܠܘܳܬ ܥܽܘܡ̈ܩܶܐ ܕܬܶܐܘܠܘܓܝܰܐ ܐܶܬܓܰܘܝܰܬ ܥܶܠܰܬ. ܡܢܘ ܓܶܝܪ ܟܰܕ ܠܥܰܡ̈ܠܶܐ ܗܳܢܽܘܢ ܕܬܶܐܘܠܘܓܝܰܐ ܕܰܓܪܺܝܓܽܘܪܺܝܽܘܤ ܩܳܪܶܐ܆ ܡܰܠܽܘܢ ܕܶܝܢ ܓܶܠ̈ܝܳܢܶܐ ܠܡܺܐܡܰܪ ܝܰܬܺܝܪ ܒܰܝܬܳܐܺܝܬ܆ ܠܰܘ ܠܘܳܬ ܪܰܘܡܳܐ ܣܳܠܶܩ ܡܶܬܥܰܠܶܐ ܘܰܠܘܳܬ ܬܠܺܝܬܳܝܽܘܬܳܐ ܠܥܶܠ ܦܳܪܰܚ܆ ܘܰܠܒܰܪ ܡܶܢ ܦܰܓܪܳܐ ܗܳܘܶܐ܆ ܘܰܠܥܶܠ ܡܶܢ ܟܽܠ ܒܪܺܝܬܳܐ ܡܶܬܪܰܓܫܳܢܺܝܬܳܐ ܘܡܶܬܗܰܘܢܳܢܺܝܬܳܐ ܛܳܐܶܤ ܥܳܒܰܪ.
ܡܰܢܽܘ ܕܶܝܢ ܕܺܐܝܬ ܠܶܗ ܪܳܡܽܘܬ ܓܒܺܝܢܳܐ ܡܶܛܽܠ ܡܰܪܕܽܘܬܳܐ ܕܡ̈ܶܠܶܐ ܗܳܠܶܝܢ ܕܡܶܢ ܠܒܰܪ܆ ܕܟܰܕ ܠܘܳܬ ܚܶܟܡܬܳܐ ܕܗܳܢܽܘܢ ܚܳܪ܆ ܠܰܘ ܒܠܳܐ ܝܰܠܺܝ̈ܦܶܐ ܘܩܽܘܪ̈ܝܳܝܶܐ ܗܽܘ ܠܶܗ ܢܶܟܬܽܘܒ܆ ܘܒܰܕܡܽܘܬ ܡܽܘܫܶܐ ܕܚܰܓ ܘܶܐܬܩܦܶܤ ܠܘܳܬ ܪܰܒܽܘܬܳܐ ܕܬܶܐܽܘܪܺܝܰܐ ܕܰܐܠܳܗܳܐ ܘܰܕܡܰܡܠܠܳܐ ܕܥܰܡܶܗ܆ ܢܺܐܡܰܪ ܒܪܶܚܡܰܬ ܫܪܳܪܳܐ܆ ܕܦܺܐܩܳܐ[34] ܐܺܝܬܰܝ ܘܡܰܬܺܝܢ ܠܶܫܳܢܳܐ[35]. ܠܺܝ ܕܶܝܢ ܡܶܣܬܰܒܪܳܐ܆ ܕܳܐܦ ܗܳܢܶܝܢ ܡ̈ܶܠܶܐ܆ ܛܰܝܒܽܘܬܳܐ ܚܳܝ̈ܒܳܢ܆ ܠܗܳܠܶܝܢ ܓܰܒܪ̈ܶܐ ܡܡܰܠ̈ܠܰܝ ܐܰܠܳܗܳܝ̈ܳܬܳܐ.
ܐܰܟܙܢܳܐ ܓܶܝܪ ܕܶܐܢ ܐ̱ܢܳܫ ܢܰܚܬܳܐ ܡܶܕܶܡ ܡܰܠܟܳܝܳܐ ܢܳܣܶܒ܆ ܘܢܰܥܛܶܦ ܒܶܗ ܠܐ̱ܢܳܫ ܟܽܘܣܬܳܢܳܐ ܘܕܰܡ̈ܦܰܬܠܳܢ ܪ̈ܶܓܠܰܘܗ̱ܝ܆ ܘܕܰܙܠܺܝܡܳܐܺܝܬ ܚܳܐܰܪ ܒܥܰܝܢܰܘ̈ܗ̱ܝ܆ ܕܢܶܬܓܚܶܟ ܝܰܬܺܝܪܳܐܺܝܬ ܥܳܒܶܕ ܠܶܗ ܠܗܰܘ ܕܰܠܒܶܫ܆ ܢܶܗܘܶܐ ܓܶܝܪ ܐܰܝܟܰܢܳܐ ܕܡܰܬܠܳܐ ܐܳܡܰܪ܆ ܐܰܝܟ ܩܕܳܫܳܐ ܕܕܰܗܒܳܐ ܒܰܢܚܺܝܪܳܐ ܕܰܚܙܺܝܪܬܳܐ[36]܆ ܐܶܢܕܶܝܢ ܠܐ̱ܢܳܫ ܥܠܰܝܡܳܐ ܫܰܦܺܝܪ ܩܰܘܡܬܳܐ ܘܕܰܒܫܽܘܦܪܳܐ ܗܕܺܝܪܳܐܺܝܬ ܐܺܝܬ ܠܶܗ܆ ܢܨܰܒܶܬ ܒܰܠܒܽܘܫܳܐ ܗܰܘ ܕܰܐܪ̈ܓܘܳܢܶܐ ܡܰܠ̈ܟܳܝܶܐ܆ ܥܦܺܝܦܳܐ ܗܳܘܶܐ ܩܽܘܠܳܣܶܗ ܕܫܽܘܦܪܳܐ܆ ܟܰܕ ܦܰܐܝܽܘܬܳܐ ܕܡܶܢ ܟܽܠܚܰܕ ܡܶܢܗܽܘܢ ܡܰܢܗܪܳܐ ܠܽܘܩܒܰܠ ܚܒܰܪܬܳܗ̇܆ ܘܚܰܕ ܦܽܘܪܓܳܝܳܐ ܡܥܰܠܶܐ ܐܰܟܚܕܳܐ ܠܚܰܙܳܝ̈ܶܐ.
ܗܳܟܰܢܳܐ ܚܰܟܺܝ̈ܡܰܝܗܽܘܢ ܡܰܢ ܕܝܰܘ̈ܢܳܝܶܐ܆ ܟܰܕ ܠܘܳܬ[37] ܝܺܠܺܝܕܽܘܬ ܐܰܠܳܗ̈ܶܐ ܗܳܝ ܓܚܺܝܟܬܳܐ ܠܳܐ ܕܶܝܢ ܐܳܡܰܪ ܐ̱ܢܳܐ ܡܡܰܠܠܽܘܬ ܐܰܠܳܗܽܘܬܳܐ܆ ܐܶܬܥܢܺܝܘ ܒܗܶܝܢ ܒܡ̈ܶܠܶܐ܆ ܘܰܒܗܰܒܳܒܳܗ̇ ܕܫܰܦܺܝܪܽܘܬ ܠܶܫܳܢܳܐ ܠܶܐܤܛܽܘܟ̈ܣܶܐ ܥܒܰܕܘ ܐܰܠܳܗ̈ܶܐ܆ ܘܰܠܙܶܐܽܘܤ ܓܰܝܳܪܳܐ ܛܳܫܘ[38] ܘܠܺܐܝܦܣܛܽܘܤ ܚܓܺܝܪܳܐ ܘܰܠܕܺܝܽܘܢܽܘܣܽܘܤ ܓܒܰܪ ܢܶܫܳܝ܆ ܝܰܬܺܝܪܳܐܺܝܬ ܚܰܘܺܝܘ ܐܶܢܽܘܢ ܝܰܬܺܝܪ ܓܚܺܝ̈ܟܶܐ܆ ܟܰܕ ܒܫܽܘܦܪܗܶܝܢ ܕܡ̈ܶܠܶܐ ܠܰܫܟܺܝܪܽܘܬܗܽܘܢ ܒܰܙܰܚܘ.
ܒܰܣܶܝܠܺܝܽܘܤ ܕܶܝܢ ܘܰܓܪܺܝܓܽܘܪܺܝܽܘܤ܆ ܟܰܕ ܠܘܳܬ ܗܰܘܢܳܐ ܘܰܐܒܳܐ ܗܰܘ ܕܰܠܗܰܠ ܡܶܢ ܟܽܠ܆ ܘܰܠܘܳܬ ܡܶܠܬܳܐ ܗܰܘ ܫܳܘܶܐ ܒܰܡܬܽܘܡܳܝܽܘܬܳܐ܆ ܘܰܠܘܳܬ ܪܽܘܚܳܐ ܗܰܘ ܕܰܫܘܶܐ ܠܗܽܘܢ ܒܽܐܘܣܺܝܰܐ ܐܰܗܦܶܟܘ ܐܶܢܶܝܢ ܠܡ̈ܶܠܶܐ܆ ܡܡܰܠܠܽܘܬ ܐܰܠܳܗܽܘܬܳܐ ܐܰܝܟ ܕܒܰܫܪܳܪܳܐ ܥܰܒܕܽܘܗ̇ ܠܰܡܡܰܠܠܽܘܬ ܐܰܠܳܗܽܘܬܳܐ܆ ܕܰܠܗܰܘܢܳܐ ܐܽܘܣܝ̣ܳܝ̣ܳܐ܆ ܘܰܠܡܶܠܬܳܐ ܚܰܝܳܐ܆ ܘܰܠܪܽܘܚܳܐ ܩܢܽܘܡܳܝܳܐ ܡܰܟܪܙܳܐ܆ ܘܗܳܟܰܢܳܐ ܢܣܰܒ̈ܶܝܢ ܡ̈ܶܠܶܐ ܠܺܐܝܩܳܪܳܐ ܒܰܝܬܳܝܳܐ ܗܰܘ ܕܺܝܠܗܶܝܢ܆ ܟܰܕ ܠܡܶܠܬܳܐ ܫܰܡܶܫ̈ܶܝܢ܆ ܘܠܰܡܥܺܝܢܳܐ ܕܟܽܠܳܗ̇ ܚܶܟܡܬܳܐ ܘܺܝܕܰܥܬܳܐ܆ ܟܕ ܠܢܺܝܪܳܐ ܕܠܳܐ ܡܠܺܝܠܽܘܬܳܐ ܚܰܢܦܳܝܬܳܐ ܐܰܟܙܢܳܐ ܕܰܛܪܽܘܢܽܘܬܳܐ ܫ̈ܕܰܝ ܡܶܢܗܶܝܢ.
ܐܶܠܳܐ ܐܳܦ ܠܘܳܬ ܪ̈ܺܝܫܰܝܗܶܝܢ ܕܗܶܪ̈ܶܣܺܝܤ܆ ܣܰܓܺܝ ܫܽܘܚܠܳܦܳܐ ܐܺܝܬ ܠܩܰܕܺܝ̈ܫܶܐ ܗܳܠܶܝܢ. ܐܳܦ ܓܶܝܪ ܐܰܦܽܘܠܺܝܢܰܪܺܝܽܘܤ. ܐܳܦ ܕܺܝܽܘܕܽܘܪܽܘܤ ܗܳܢܽܘܢ ܒܺܝ̈ܫܶܐ ܘܡܰܣ̈ܠܰܝܳܐ܆ ܕܝܽܘܠ̈ܦܳܢܶܐ ܣܰܓܺܝ̈ܶܐܐ ܐܺܝܬܰܝܗܽܘܢ ܗ̱ܘܰܘ ܡܠܰܝ̈ܳܐ܆ ܘܥܰܡ̈ܠܶܐ ܘܡܰܟ̈ܬܒܳܢܘܳܬܳܐ ܫܒܰܩܘ ܒܳܬܰܪܗܽܘܢ. ܐܶܠܳܐ ܒܰܕܡܽܘܬ ܗܳܠܶܝܢ ܕܒܰܣܶܝܠܺܝܽܘܤ ܘܕܰܓܪܺܝܓܽܘܪܺܝܽܘܤ܆ ܠܡܶܠܚܳܐ ܫܠܺܝܚܳܝܬܳܐ ܠܰܝܬ ܗ̱ܘܳܐ ܠܗܽܘܢ ܒܗܽܘܢ܆ ܗܳܝ ܕܰܥܠܶܝܗ̇ ܐܳܡܰܪ ܦܰܘܠܽܘܤ: ܕܡܶܠܬܳܐ ܕܺܝܠܟܽܘܢ ܒܟܽܠ ܙܒܰܢ ܒܛܰܝܒܽܘܬܳܐ ܒܡܶܠܚܳܐ ܢܶܗܘܶܐ ܡܡܰܕܟܳܐ[39]. ܡܶܛܽܠ ܗܳܕܶܐ܆ ܐܳܦ ܠܘܳܬ ܗܰܘܢܳܐ ܡܰܣܠܝܳܐ ܐܶܫܬܰܪܓܰܠܘ܆ ܘܗܶܪ̈ܶܣܺܝܤ ܝܺܠܶܕܘ. ܘܡܶܠܬܳܐ ܕܺܝܠܗܽܘܢ ܕܠܳܐ ܛܰܝܒܽܘ ܐܺܝܬܶܝܗ̇܆ ܘܣܰܒܺܝܥܬܳܐ ܠܗܳܢܽܘܢ ܕܩܳܪܶܝܢ. ܐܰܝܟܰܢܳܐ ܟܺܝܬ ܕܟܰܕ ܡܦܰܚܡܺܝܢ ܚ̱ܢܰܢ ܠܗܽܘܢ ܠܘܳܬ ܚ̈ܕܳܕܶܐ܆ ܢܺܐܡܰܪ ܐܶܢܽܘܢ ܐܰܝܟ ܒܰܪܬܩܳܠܳܐ ܕܶܐܪܰܡܝܳܐ ܢܒܺܝܳܐ܆ ܡܳܢܰܐ ܗ̄ܘ ܬܶܒܢܳܐ ܠܘܳܬ ܚ̈ܶܛܶܐ[40].
ܡܰܟܬܒܳܢ̈ܘܳܬܗܽܘܢ ܕܶܝܢ ܕܗܳܠܶܝܢ ܩܰܦܕܽܘܩܳܝ̈ܶܐ܆ ܒܰܕܡܽܘܬ ܡ̈ܠܶܐ ܚܰܝ̈ܳܬܳܐ ܡܶܬܗܰܦ̈ܟܳܢ ܒ̈ܥܺܕܳܬܳܐ ܘܡܶܬܢܰܨ̈ܚܳܢ܆ ܘܕܽܘܓ̈ܡܰܛܰܐ ܕܺܝܠܗܽܘܢ܆ ܐܰܝܟ ܢܳܡܽܘܣ̈ܶܐ ܩܳܪܶܝܢ ܚ̱ܢܰܢ ܠܗܽܘܢ ܠܽܘܩܒܰܠ ܟܽܠ ܗܶܪ̈ܣܺܝܤ. ܐܶܠܳܐ ܟܰܕ ܗܳܟܰܢܳܐ. ܒܳܬܰܪ ܪܺܝܫܳܢܽܘܬܳܗ̇ ܕܡܰܠܦܳܢܽܘܬܳܐ ܚܠܺܝܡܬܳܐ ܘܰܕܚܶܟܡܬܳܐ ܐܰܠܳܗܳܝܬܳܐ ܪܕܰܦܘ܆ ܐܳܦ ܠܘܳܬ ܐܰܓܽܘ̈ܢܶܐ ܪܰܘܪ̈ܒܶܐ ܕܣܳܗܕܽܘܬܳܐ ܢܦܰܩܘ. ܒܰܣܶܝܠܺܝܽܘܤ ܡܰܢ܆ ܟܰܕ ܠܫܳܢܝܽܘܬܶܗ ܕܘܐܠܺܝܤ ܡܰܠܟܳܐ ܙܟܳܐ܆ ܐܳܦ ܒܡܶܠܬܳܐ ܕܫܰܦܺܝܪܽܘܬ ܕܶܚܠܬܳܐ܆ ܘܳܐܦ ܒܬܰܪܥܺܝܬܳܐ ܥܠܰܝܡܳܝܬܳܐ ܘܓܰܢ̱ܒܳܪܬܳܐ܆ ܐܰܝܟܰܢܳܐ ܕܳܐܦ ܐܰܟܣܽܘܪܝܳܐ ܢܶܬܚܰܝܰܒ܆ ܘܰܠܗܳܕܶܐ ܢܕܰܥܶܟ ܒܝܰܕ ܐܳܬܳܐ ܫܒܺܝܚܬܳܐ. ܗܽܘ ܓܶܝܪ ܩܰܢܝܳܐ܆ ܗܰܘ ܕܒܶܗ ܟܳܬܶܒ ܗ̱ܘܳܐ ܡܰܠܟܳܐ ܪܡܳܝ ܐܺܝܕܶܗ ܕܦܽܘܩܕܳܢܳܐ ܗܳܝ ܕܰܐܟܣܽܘܪܝܳܐ܆ ܟܰܕ ܬܠܳܬ ܙܰܒ̈ܢܺܝܢ ܐܶܬܬܒܰܪ ܒܺܐܝܕܶܗ ܕܗܰܘ ܕܟܳܬܶܒ ܗ̱ܘܳܐ܆ ܠܰܓܙܳܪܕܺܝܢܳܐ ܗܰܘ ܥܰܘܳܠܳܐ ܟܠܳܐ ܘܒܰܛܶܠ.
ܓܪܺܝܓܽܘܪܺܝܽܘܤ ܕܶܝܢ܆ ܟܰܕ ܥܰܠ ܪ̈ܰܡܟܳܐ ܕܚܰܝ̈ܘܳܬ ܫܶܢܳܐ ܕܰܐܪ̈ܝܰܐܢܘ ܘܰܕܡܶܬܟܰܬܫܺܝܢ ܥܰܡ ܪܽܘܚܳܐ܆ ܒܰܡܕܺܝܢ̱ܬܳܐ ܗܳܝ ܡܰܠܟܳܝܬܳܐ ܗܽܘ ܡܶܢ ܢܰܦܫܶܗ ܩܳܡ܆ ܘܒܰܕܡܽܘܬ ܕܶܟܪܳܐ ܡܶܕܶܡ ܝܺܕܺܝܥܳܐ ܕܥܳܢ̈ܳܐ ܒܰܡܨܰܥܬܗܽܘܢ ܥ̣ܰܠ܆ ܘܶܐܬܬܟܶܠ ܥܰܠ ܗܰܘ ܕܶܐܡܰܪ: ܕܗܳܐ ܐܶܢܳܐ ܡܫܰܕܰܪ ܐ̱ܢܳܐ ܠܟܽܘܢ ܐܰܝܟ ܥܶܪ̈ܒܶܐ ܒܡܶܨܥܰܬ ܕܺܐܒ̈ܶܐ[41]. ܘܙܰܒ̈ܢܺܝܢ ܣܰܓܺܝ̈ܳܐܢ ܐܶܬܪܓܶܡ ܒܟܺܐܦ̈ܶܐ܆ ܘܶܐܬܩܰܪܰܒ ܠܡܰܘܬܳܐ܆ ܠܟܽܠܗܽܘܢ ܟܢܺܝܫܳܐܺܝܬ ܣܚܰܦ ܘܚܰܒܶܠ.
ܗܳܟܰܢܳܐ ܒܨܶܒܝܳܢܗܽܘܢ ܐܶܬܚܙܺܝܘ ܣܳܗ̈ܕܶܐ. ܠܳܐ ܓܶܝܪ ܣܰܪܺܝܟܺܝܢ ܗ̱ܘܰܘ ܒܟܽܘܪ̈ܣܰܘܳܬܳܐ܆ ܘܳܐܦܠܳܐ ܒܒܽܘܣܳܡܳܐ ܕܥܳܠܡܳܐ ܗܳܢܳܐ ܐܰܣܺܝܪܺܝܢ ܗ̱ܘܰܘ. ܟܰܕ ܕܶܝܢ ܒܰܠܒܺܝܫ ܠܰܐܠܳܗܳܐ ܐܺܝܓܢܰܐܛܺܝܽܘܤ ܛܳܢܺܝܢ ܗ̱ܘܰܘ. ܐܳܡܪܺܝܢ ܗ̱ܘܰܘ: ܫܰܦܺܝܪܳܐ ܗ̱ܝ ܠܡܶܥܪܰܒ[42] ܡܶܢ ܥܳܠܡܳܐ܆ ܘܰܠܡܶܕܢܰܚ ܒܰܡܫܺܝܚܳܐ.
ܡܶܛܽܠܗܳܕܶܐ. ܐܳܦ ܠܒܰܝܬܳܐ ܗܳܢܳܐ ܕܺܝܠܶܗ ܕܒܶܝܬ ܨܠܽܘܬܳܐ܆ ܠܘܳܬ ܕܽܘܟܪܳܢܳܐ ܕܺܝܠܗܽܘܢ ܕܩܰܕܺܝ̈ܫܶܐ ܡܟܰܢܫܺܝܢ ܚ̱ܢܰܢ ܠܟܽܘܢ܆ ܘܰܠܩܽܘ̈ܠܳܣܶܐ ܕܗܳܢܽܘܢ ܢܳܦܩܺܝܢ ܚ̱ܢܰܢ ܒܡܶܠܬܳܐ܆ ܟܰܕ ܠܡܰܠܦܳܢܳܐ ܡܝܰܩܪܺܝܢܰܢ ܒܝܰܕ ܬܰܠܡܺܝܕܰܘ̈ܗ̱ܝ܆ ܗܳܢܽܘܢ ܕܕܰܡܺܝܘ ܫܰܦܺܝܪ ܒܪܳܥܝܽܘܬܶܗ ܡܰܠܝܰܬ ܐܰܓܽܘ̈ܢܶܐ ܕܗܰܘ.
ܐܶܠܳܐ ܓܶܝܪ ܟܰܕ ܗܳܢܳܐ ܠܺܠܝܳܐ ܕܰܥܒܰܪ ܫܰܒܩܰܢܝ܆ ܗܰܘ ܕܒܶܗ ܗܳܠܶܝܢ ܟܳܬܶܒ ܗ̱ܘܺܝܬ܆ ܒܰܐܢܰܢܩܺܐ ܫܰܠܺܝܬܳܗ̇ ܠܡܶܠܬܳܐ[43]܆ ܟܰܕ ܣܰܓܺܝ̈ܳܐܬܳܐ ܛܳܒ ܪܓܺܝܓܳܐ ܗ̱ܘܳܬ ܠܡܺܐܡܰܪ܆ ܘܗܺܝ ܟܰܕ ܗܺܝ ܚܳܐܶܫ ܐ̱ܢܳܐ ܠܢܶܫ̈ܶܐ ܗܳܢܶܝܢ ܕܟܰܕ ܠܳܐ ܡܡܰܠ̈ܝܳܢ ܠܙܰܒܢܳܐ ܕܒܰܛܢܳܐ ܗܰܘ ܕܰܐܝܟ ܢܳܡܽܘܣܳܐ܆ ܠܳܐ ܡܫܰܡ̈ܠܰܝܳܐ ܘܝܰܚ̈ܛܶܐ ܝܳܠ̈ܕܳܢ ܠܗܽܘܢ ܠܥܽܘ̈ܠܶܐ܆ ܐܶܠܳܐ ܬܠܺܝܬܳܝܽܘܬܳܐ ܗܳܝ ܡܫܰܡܠܝܰܬ ܒܟܽܠ ܘܩܰܕܺܝܫܬܳܐ܆ ܠܺܐܝܩܳܪܳܐ ܕܩܰܕܺܝ̈ܫܶܐ ܗܳܢܽܘܢ ܕܰܡܫܰܡܠܝܳܐܺܝܬ ܡܰܠܠܽܘܗ̇ ܐܰܠܳܗܳܐܝܬ܆ ܐܳܦ ܠܝܰܠܕܳܐ ܕܺܝܠܰܢ ܠܳܐ ܡܫܰܡܠܝܳܐ ܬܩܰܒܶܠ ܐܰܝܟ ܡܫܰܡܠܝܳܐ܆ ܘܠܳܐ ܚܰܣܺܝܪܳܐ ܬܶܬܶܠ ܐܰܓܪܳܐ ܗܰܘ ܕܥܰܠ ܐܰܦ̈ܰܝ ܡܛܰܝܒܽܘܬ ܨܶܒܝܳܢܳܐ. ܕܠܳܗ̇ ܫܽܘܒܚܳܐ ܠܥܳܠܰܡ ܐܰܡܺܝܢ܀
ܫܠܶܡ ܡܺܐܡܪܳܐ ܕܰܬܠܳܬܺܝܢ ܘܫܰܒܥܳܐ܀
ܒܰܦܪܰܢܫܳܝܳܐ. ܐܳܡܰܪ ܕܰܫܓܺܝܡ ܐ̱ܢܳܐ؟[1]
ܕܳܘܝܳܐܝܬ. ܠܦܘܬ ܠܶܫܳܢܳܐ ܦܪܢܫܝܐ. ܐܳܬܝܳܐ ܡܶܠܬܳܐ ܡܶܢ ܡܪܰܚܡܳܢܽܘܬܳܐ.[2]