ܡܺܐܡܪܳܐ ܕܰܬܠܳܬܺܝܢ ܘܫܬܐ

ܥܰܠ ܝܺܠܺܝܕܽܘܬܶܗ ܕܒܰܒܣܰܪ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ.

36: ܟܰܕ ܠܘܳܬ ܬܶܕܡܽܘܪܬܳܐ ܪܰܒܬܳܐ ܕܥܺܐܕܳܐ ܗܳܢܳܐ ܕܩܰܪܺܝܒ ܬܰܡܺܝܗ ܐ̱ܢܳܐ܆ ܡܶܬܦܰܠܰܓ ܐ̱ܢܳܐ ܒܬܰܪܥܺܝܬܳܐ. ܐܳܦ ܓܶܝܪ ܘܰܕܟܽܠ ܟܽܠܶܗ ܐܶ݀ܫܬܽܘܩ ܡܶܬܚܰܦܰܛ ܐ̱ܢܳܐ܆ ܘܳܐܦ ܕܺܐܡܰܪ ܣܰܓܺܝ̈ܳܐܬܳܐ. ܡܰܢܽܘ ܓܶܝܪ ܕܟܰܕ ܫܳܡܰܥ ܕܒܶܝܬ ܝܰܠܕܳܐ ܕܗܰܘ ܠܳܐ ܒ̣ܰܪܝܳܐ^[1] ܡܥܰܕܥܕܺܝܢܰܢ܆ ܘܟܰܕ ܡܥܰܩܶܒ ܐ̱ܢܳܐ ܠܳܗ̇ ܠܰܬܡܺܝܗܽܘܬܳܐ ܠܳܐ ܨܳܝܰܪ^[2]܆ ܘܰܒܫܶܬܩܳܐ ܡܝܰܩܰܪ ܠܗܳܝ ܕܠܳܐ ܡܶܬܕܰܪܟܳܐ.

ܡܰܢܽܘ ܕܶܝܢ ܕܟܰܕ ܝܳܠܶܦ ܠܳܗ̇ ܠܥܶܠܬܳܐ܆ ܗܳܝ ܕܡܶܛܽܠܳܬܳܗ̇ ܡܶܠܬܳܐ ܗܰܘ ܕܰܠܗܰܠ ܡܶܢ ܟܽܠ. ܠܗܳܢܳܐ ܟܽܠܶܗ ܡܽܘܟܳܟܳܐ ܐܶܬܢܰܚܰܬ܆ ܘܶܐܬܪܡܺܝ ܕܢܶܫܬܰܘܬܰܦ ܠܺܝܠܺܝܕܽܘܬܳܐ܆ ܒܶܣܪܳܢܳܝܬܳܐ܆ ܡܶܛܽܠܳܬܰܢ ܗܳܢܽܘܢ ܕܰܠܘܳܬ ܒܶܣܪܳܐ ܫܪܰܥܢܰܢ܆ ܘܰܠܫܰܦܺܝܪܽܘܬ ܛܽܘܗܡܳܐ ܕܢܰܦܫܳܐ ܒܚܰܫ̈ܶܐ ܛܡܰܪܢܰܢ܆ ܗܳܝ ܕܒܳܗ̇ ܗܘ̣ܰܝܢܰܢ ܒܨܰܠܡܳܐ ܕܗܰܘ ܕܰܒ̣ܪܳܐ ܠܰܢ. ܠܳܐ ܦܳܪܰܚ ܒܗܰܘܢܶܗ ܘܰܠܘܳܬ ܩܽܘܠܳܣܳܐ ܡܶܬܬܥܺܝܪ܆ ܘܰܒܪܰܒܽܘܬܳܗ̇ ܕܪܶܚܡܰܬ ܐ̱ܢܳܫܽܘܬܳܐ ܡܶܬܬܪܺܝܡ ܘܡܶܬܥܰܠܶܐ܆ ܘܒܰܕܡܽܘܬ ܗܳܢܽܘܢ ܬܠܳܬܳܐ ܛܠܳܝ̈ܶܐ ܕܰܒܫܰܠܗܶܒܺܝܬܳܐ ܗܳܝ ܒܳܒܠܳܝܬܳܐ܆ ܐܳܦ ܠܡܰܠܰܐܟ̈ܶܐ ܐܳܦ ܠܚܰܝ̈ܠܰܘܳܬܳܐ ܗܳܢܽܘܢ ܕܰܠܥܶܠ ܡܶܢ ܥܳܠܡܳܐ܆ ܘܰܠܟܽܠܳܗ̇ ܒܪܺܝܬܳܐ ܡܶܬܗܰܘܢܳܢܺܝܬܳܐ ܟܺܝܬ ܘܡܶܬܪܰܓܫܳܢܺܝܬܳܐ܆ ܡܦܺܝܤ ܕܰܢܣܰܝܥܽܘܢܳܝܗ̱ܝ ܠܘܳܬ ܬܶܫܒܽܘܚܬܳܐ ܟܰܕ ܐܶܡܰܪ: ܒܰܪܶܟܘ ܟܽܠܗܽܘܢ ܥܒܳܕܰܘ̈ܗ̱ܝ ܕܡܳܪܝܳܐ ܠܡܳܪܝܳܐ^[3]܆ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ.

ܫܰܪܺܝܪܳܐܺܝܬ ܓܶܝܪ ܟܽܠܳܗ̇ ܒܪܺܝܬܳܐ ܐܶܬܝܰܩܪܰܬ܆ ܒܝܰܕ ܡܶܬܒܰܪܢܫܳܢܽܘܬܳܐ ܐܰ‌ܠܳܗܳܝܬܳܐ. ܘܰܚܢܰܢ ܡܰܢ ܒܝܰܬܺܝܪܳܐ܆ ܡܶܛܽܠ ܕܶܐܫܬܰܘܬܰܦ ܡܶܠܬܳܐ ܤܛܰܪ ܡܶܢ ܚܛܺܝܬܳܐ ܒܰܓܒܺܝܠܬܳܐ ܕܺܝܠܰܢ^[4]܆ ܘܠܰܘ ܟܰܕ ܫܕܳܐ ܡܶܢܶܗ ܗܳܝ ܕܢܶܗܘܶܐ ܐܺܝܬܰܘܗ̱ܝ ܐܰ‌ܠܳܗܳܐ܆ ܗܘ̣ܳܐ ܒܰܪܢܳܫܳܐ. ܗܳܠܶܝܢ ܕܶܝܢ ܒܶܪ̈ܝܳܬܳܐ ܕܫܰܪܟܳܐ܆ ܡܶܛܽܠ ܕܰܕܢܶܬܒܪܶܐ ܣܳܟ ܐܶܨܛܒܺܝ ܗܽܘ ܒܳܪܽܘܝܳܐ܆ ܘܥܳܒܽܘܕܳܐ ܢܶܬܚܙܶܐ ܕܗܳܘܶܐ ܡܶܬܡܰܢܝܳܢܳܐ ܒܰܥ̈ܒܳܕܶܐ ܕܺܝܠܶܗ. ܥܳܠܡܳܐ ܕܶܝܢ ܗܳܢܳܐ ܡܶܬܚܰܙܝܳܢܳܐ. ܐܳܦ ܒܡܶܠܬܳܐ ܐ̱ܚܪܺܬܳܐ ܝܺܬܰܪ ܒܝܰܕ ܫܰܦܺܝܪܽܘܬ ܣܳܥܽܘܪܽܘܬܳܐ ܕܰܐܝܟ ܗܳܕܶܐ. ܟܰܕ ܓܶܝܪ ܠܘܳܬ ܥܰܒܕܽܘܬܳܐ ܘܬܶܫܡܶܫܬܳܐ ܕܺܝܠܢ ܗܘܳܐ.

ܠܺܝ ܓܶܝܪ ܐܶܬܛܰܟܰܤ ܘܶܐܬܬܣܺܝܡ ܫܶܡܫܳܐ ܘܣܰܗܪܳܐ ܘܟܰܘܟ̈ܒܶܐ ܕܢܽܘܗܪܳܐ ܢܶܕܢܚܽܘܢ܆ ܘܰܫܡܰܝܳܐ ܕܢܰܡܛܰܪ܆ ܘܳܐܰܐܪ ܕܡܶܬܬܰܪܣܝܳܢܽܘܬܳܐ ܢܳܫܶܒ܆ ܘܰܐܪܥܳܐ ܕܬܰܝܬܶܐ ܦܺܐܪ̈ܶܐ܆ ܘܗܳܠܶܝܢ ܕܫܰܪܟܳܐ ܠܗܳܠܶܝܢ ܣܽܘܢ̈ܩܳܢܶܐ ܐ̱ܚܪ̈ܳܢܶܐ ܢܶܡܠ̈ܝܳܢ. ܡܶܟܺܝܠ ܠܳܐ ܫܰܘܝܳܐܺܝܬ ܦܳܠ̈ܚܳܢ ܗ̱ܘܰܝ̈ ܠܰܢ ܥܰܒܕܽܘܬܳܐ܆ ܟܰܕ ܚܢܰܢ ܫܠܰܚܢܰܢ ܠܺܐܝܩܳܪܳܐ ܗܰܘ ܕܡܳܪܽܘܬܳܐ܆ ܒܗܳܝ ܕܰܗܘ̣ܰܝܢܰܢ ܐܰܚܺܝ̈ܕܶܐ ܡܶܢ ܡܳܪܽܘܬܳܐ ܕܰܚܛܺܝܬܳܐ܆ ܟܰܕ ܠܘܳܬ ܣܪܺܝܩܽܘܬܳܐ ܗܳܝ ܐ̱ܚܪܳܝܬܳܐ ܢܚܶܬܢܰܢ. ܡܶܛܽܠܗܳܕܶܐ ܦܰܘܠܽܘܤ ܐܳܡܰܪ ܗ̱ܘܳܐ: ܕܠܰܣܪܺܝܩܽܘܬܳܐ ܐܶܫܬܰܥܒܕܰܬ ܒܪܺܝܬܳܐ ܠܰܘ ܒܨܶܒܝܳܢܳܗ̇^[5]. ܐܰܝܟ ܕܰܠܡܺܐܡܰܪ. ܟܰܕ ܐܳܦ ܡܰܪܓܫܳܢܽܘܬܳܐ ܣܳܐܶܡ ܥܰܠ ܗܳܝ ܠܳܐ ܡܢܰܦܰܫܬܳܐ ܘܠܳܐ ܡܰܪܓܫܳܢܺܝܬܳܐ܆ ܐܰܝܟܰܢܳܐ ܕܰܢܚܰܘܶܐ ܠܣܰܓܺܝܽܐܘܬܳܗ̇ ܕܰܫܟܺܝܪܽܘܬܳܐ ܘܒܺܝܫܽܘܬܳܐ ܕܺܝܠܰܢ܆ ܘܰܕܥܰܒܕܽܘܬܶܗ ܕܥܳܠܡܳܐ ܗܳܝ ܕܰܠܒܰܪ ܡܶܢ ܗܳܝ ܕܫܳܘܝܳܐ^[6].

ܟܕ ܕܶܝܢ ܐܶܬܒܰܣܰܪ ܡܶܠܬܳܐ܆ ܘܦܰܪܣܬܳܐ ܦܰܓܪܳܢܳܝܬܳܐ ܣܡܰܟ ܥܰܠ ‌ܐܰܪܥܳܐ܆ ܘܰܥܠܶܝܗ̇ ܐܶܬܚܙܺܝ ܘܥܰܡ ܒܢܰܝ̈ܢܳܫܳܐ ܐܶܬܗܰܦܰܟ^[7]܆ ܘܰܐܝܟ ܒܪܳܐ ܝܺܚܺܝܕܳܝܳܐ ܘܰܐ‌ܠܳܗܳܐ ܡܶܢ ܟܽܠ ܠܳܐ ܡܶܬܥܪܶܐ܆ ܐܶܠܳܐ ܠܟܽܠܗܶܝܢ ܡܰܝܬܶܐ ܗܽܘ ܒܶܗ܆ ܘܰܠܡܶܬܥܰܡܪܳܢܺܝܬܳܐ ܐܰܝܟ ܒܽܘܟܪܳܐ ܒܰܐܚ̈ܶܐ ܣܰܓܺܝ̈ܶܐܐ ܥܳܐܶܠ ܡܶܢ ܐܰܒܳܐ^[8]. ܒܰܛܠܳܗ̇ ܠܰܒܪܺܝܬܳܐ ܐܰܝܟ ܕܡܶܢ ܨܶܐܕܰܘܗ̱ܝ܆ ܡܶܢ ܕܬܶܦܠܰܚ ܥܰܒܕܽܘܬܳܐ ܠܰܣܪܺܝܩܽܘܬܳܐ. ܡܰܠܽܘܢ ܕܶܝܢ ܐܳܦ ܝܰܬܺܝܪ ܡܶܢ ܗܳܝ ܕܫܳܘܝܳܐ ܥܰܒܕܳܗ̇ ܕܬܶܣܥܽܘܪ܆ ܐܶܢܗܽܘ ܕܡܶܢ ܩܕܺܝܡ ܡܰܢ ܐܶܬܬܣܺܝܡܰܬ ܠܡܶܦܠܰܚ ܥܰܒܕܽܘܬܳܐ ܠܒܰܪܢܳܫܳܐ ܕܰܒܨܰܠܡܳܐ ܕܰܐ‌ܠܳܗܳܐ ܗܘ̣ܳܐ܆ ܗܳܫܳܐ ܕܶܝܢ ܠܰܐܠܳܗܳܐ ܐܰܝܟ ܚܰܕ ܡܶܢ ܣܰܓܺܝ̈ܶܐܐ ܩܰܒܠܰܬ܆ ܕܡܶܛܽܠܳܬܰܢ ܡܶܬܡܰܣܟܰܢ ܗܳܝ ܕܢܶܬܒܰܣܰܪ܆ ܘܠܰܚܛܺܝܬܳܐ 222ܡܚܰܒܶܠ܆ ܘܠܰܐܪܥܐ ܫܡܰܝܳܐ ܥܳܒܶܕ܆ ܘܰܒܬܽܘܠܽܘܬܳܐ ܘܚܰܝ̈ܶܐ ܠܳܐ ܦܰܓܪ̈ܳܢܶܐ ܘܕܽܘܒܳܪܳܐ ܡܰܠܰܐܟܳܝܳܐ ܢܳܨܶܒ܆ ܘܢܳܓܶܕ ܠܣܰܓܺܝ̈ܶܐܐ ܠܘܳܬ ܕܽܘܡܝܳܐ ܕܺܝܠܶܗ܆ ܗܳܝ ܕܳܐܦ ܢܒܺܝܳܐ ܚܰܒܩܽܘܩ ܡܶܛܽܠܳܬܶܗ ܩܰܕܶܡ ܐܰܙܥܶܩ ܟܰܕ ܐܳܡܰܪ: ܢܦܰܩܬ ܠܦܽܘܪܩܳܢܳܐ ܕܥܰܡܳܐ ܕܺܝܠܳܟ܆ ܠܡܶܦܪܰܩ ܠܰܡܫܺܝ̈ܚܶܐ ܕܺܝܠܳܟ^[9]. ܠܗܳܕܶܐ ܐܳܦ ܦܰܘܠܽܘܤ ܐܰ‌ܠܳܗܳܝܳܐ. ܒܶܗ ܒܢܶܣܝܳܢܳܐ ܚܰܘܝܳܗ̇܆ ܟܰܕ ܠܩܽܘܪ̈ܺܝܢܬܳܝܶܐ ܟܳܬܶܒ܆ ܡܕܰܡ̈ܝܳܢܶܐ ܕܺܝܠܝ ܗܘܰܘ܆ ܐܰܝܟܰܢܳܐ ܕܳܐܦ ܐܶܢܳܐ ܕܰܡܫܺܝܚܳܐ^[10].

ܡܰܢܽܘ ܗܳܟܺܝܠ ܠܫܰܦܺܝܪܽܘܬ ܣܳܥܽܘܪܽܘܬܳܐ ܗܳܝ ܕܗܳܟܰܢܳܐ ܪܰܒܳܐ܆ ܠܰܘ ܒܪܶܒܽܘ ܦܽܘ̈ܡܺܝܢ ܢܫܰܒܰܚ. ܡܰܢܽܘ ܕܶܝܢ ܕܠܰܘ ܠܘܳܬ ܕܶܡ̈ܥܶܐ ܡܶܬܶܐܫܶܕ ܕܰܚ̈ܠܺܝܛܳܢ ܒܚܰܕܽܘܬܳܐ ܘܒܰܪܘܳܙܳܐ ܪܽܘܚܳܢܳܝܳܐ܆ ܘܰܒܢܰܦܫܶܗ ܡܶܬܬܘܶܐ ܘܳܐܦ ܟܰܕ ܒܰܕܡܽܘܬ ܟܺܐܦܳܐ ܘܠܳܐ ܡܰܪܓܫܳܢܳܐܺܝܬ ܣܺܝܡ܆ ܟܰܕ ܚܳܙܶܐ ܠܰܢ܆ ܠܗܳܢܽܘܢ ܕܠܳܐ ܫܳܘܶܝܢ ܕܰܢܗܰܠܟܽܘܢ ܥܰܠ ‌ܐܰܪܥܳܐ܆ ܐܰܝܟܰܢܳܐ ܟܺܝܬ ܕܳܐܦ ܬܶܬܬܰܢܰܚ ܡܶܛܽܠ ܗܳܕܶܐ܆ ܕܶܐܫܬܰܢܺܝܢܰܢ ܡܶܢܫܶܠܝ ܠܰܫܡܰܝܳܐ. ܡܰܠܽܘܢ ܕܶܝܢ ܕܒܰܐܪܥܳܐ ܥܳܡܪܺܝܢ ܚ̱ܢܰܢ ܐܰܝܟ ܕܒܰܫܡܰܝܳܐ ܒܝܰܕ ܫܽܘܚܠܳܦܳܐ ܛܳܒܳܐ܆ ܘܰܒܝܰܕ ܗܳܝ ܕܰܠܘܳܬ ܕܽܘܡܝܳܐ ܕܰܡܫܺܝܚܳܐ ܪܳܕܶܝܢ ܚ̱ܢܰܢ. ܟܰܕ ܒܰܡܥܰܠܝܽܘܬܳܗ̇ ܕܗܳܕܶܐ ܪܶܚܡܰܬ ܐ̱ܢܳܫܽܘܬܳܐ܆ ܬܶܓܡܳܐ ܗܰܘ ܕܡܰܠܰܐܟ̈ܶܐ ܬܡܰܗ ܘܰܬܘܰܪ܆ ܡܶܬܕܰܡܪܳܢܳܐܺܝܬ ܐܰܙܥܶܩ܆ ܫܽܘܒܚܳܐ ܒܰܡܪ̈ܰܘܡܶܐ ܠܰܐܠܳܗܳܐ܆ ܘܥܰܠ ‌ܐܰܪܥܳܐ ܫܰܝܢܳܐ܆ ܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ^[11].

 ܗܳܝ ܕܶܝܢ ܕܶܐܬܰܐܡܪܰܬ. ܕܰܐܝܟ ܗܳܕܶܐ ܐܺܝܬܶܝܗ̇. ܗܳܝ ܕܥܰܠ ܕܰܐܝܟ ܗܳܕܶܐ ܟܽܠܳܗ̇ ܡܶܬܢܰܚܬܳܢܽܘܬܳܐ ܐܳܡܰܪ ܫܽܘܒܚܳܐ ܢܰܣܶܩ. ܘܳܐܦܠܳܐ ܕܐ̱ܢܳܫ ܡܶܢ ܗܳܢܽܘܢ ܕܥܰܠ ‌ܐܰܪܥܳܐ ܐܺܝܬܶܝܗ̇. ܠܡܰܚܣܶܢ ܕܶܝܢ ܕܚܰܝ̈ܠܰܘܳܬܳܐ ܗܳܢܽܘܢ ܕܰܒܪܰܘܡܳܐ. ܐܰܝܟ ܟܡܳܐ ܓܶܝܪ ܕܗܰܘ ܪܳܡܳܐ ܕܒܰܟܝܳܢܳܐ ܢܚܶܬ܆ ܟܰܕ ܡܰܟܶܟ ܗܽܘ ܠܶܗ ܨܶܒܝܳܢܳܐܺܝܬ. ܗܳܢܳܐ ܟܽܠܶܗ ܗܳܠܶܝܢ ܕܫܽܘܒܚܳܐ ܝܰܬܺܝܪ ܪ̈ܳܡܳܬܳܐ ܗܘ̣̈ܰܝ. ܕܝܰܬܺܝܪ ܪ̈ܳܡܳܢ ܕܶܝܢ ܗܘ̣̈ܰܝ܆ ܒܗܳܢܽܘܢ ܕܰܡܫܰܒܚܺܝܢ ܘܰܡܩܰܠܣܺܝܢ܆ ܒܝܰܕ ܗܳܝ ܕܗܶܢܽܘܢ ܝܰܬܺܝܪܳܐܺܝܬ ܡܶܫܬܰܘܕܥܺܝܢ ܠܶܗ ܠܰܡܪܰܝܡܳܐ. ܘܶܐܢܕܶܝܢ ܠܐ. ܗܽܘ ܟܺܝܬ܆ ܟܰܕ ܡܫܰܡܠܝܳܐܺܝܬ ܐܺܝܬ ܠܶܗ ܒܟܽܠ ܡܽܘܢ ܕܗܽܘ ܡܶܢ ܗܳܠܶܝܢ ܕܽܐܘܣܝܳܐܺܝܬ ܫܟܺܝ̈ܚܳܢ ܠܶܗ܆ ܘܳܐܦܠܳܐ ܚܕܳܐ ܬܰܪܒܺܝܬܳܐ ܡܩܰܒܶܠ.

ܕܡܶܛܽܠ ܡܳܢܳܐ ܕܶܝܢ ܐܶܡܰܪܘ܆ ܫܽܘܒܚܳܐ ܒܰܡܪ̈ܰܘܡܶܐ ܠܰܐܠܳܗܳܐ܆ ܐܰܘܣܶܦܘ ܣܳܡܽܘܗ̇ ܠܥܶܠܬܳܐ. ܡܶܛܽܠ ܠܰܡ ܕܥܰܠ ‌ܐܰܪܥܳܐ ܫܰܝܢܳܐ܆ ܘܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ. ܘܳܐܦ ܗܳܠܶܝܢ ܕܶܝܢ܆ ܕܗܳܢܽܘܢ ܕܡܶܬܕܰܡܪܺܝܢ ܘܰܬܡܺܝܗܺܝܢ ܐܺܝܬܰܝܗܶܝܢ܆ ܡܶܛܽܠ ܕܣܳܟ ܐܺܝܬ ܥܰܠ ‌ܐܰܪܥܳܐ ܫܰܝܢܳܐ܆ ܗܳܝ ܕܺܐܝܬܶܝܗ̇ ܗ̱ܘܳܬ ܡܰܩܪܒܳܢܺܝܬܳܐ ܠܽܘܩܒܰܠ ‌ܐܰ‌ܠܳܗܳܐ܆ ܗܳܝ ܕܡܰܠ̣ܝܳܐ ܗ̱ܘܳܬ ܥܠ̈ܰܘܴܬܳܐ ܘܰܣ̈ܘܳܬ̣ܳܐ^[12] ܘܰܕܡ̈ܶܐ܆ ܘܰܠܗܳܢܽܘܢ ܕܠܳܐ ܐܺܝܬܰܝܗܽܘܢ ܐܰ‌ܠܳܗ̈ܶܐ ܓܶܒܠܰܬ ܘܣܶܓܕܰܬ. ܡܶܛܽܠ ܕܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ܆ ܗܳܢܽܘܢ ܕܳܐܦ ܠܗܳܝ ܕܢܶܗܘܽܘܢ ܐܺܝܬܰܝܗܽܘܢ ܒܢܰܝ̈ܢܳܫܳܐ ܐܰܘܒܶܕܘ܆ ܟܰܕ ܠܘܳܬ ܠܳܐ ܡܠܺܝܠܽܘܬܳܐ ܐܶܬܢܰܚܰܬܘ̱܆ ܒܰܪܢܳܫܳܐ ܓܶܝܪ ܕܟܰܕ ܒܺܐܝܩܳܪܳܐ ܐܺܝܬܰܘܗ̱ܝ ܠܳܐ ܐܶܣܬܰܟܰܠ܆ ܐܶܬܦܰܚܰܡ ܠܰܒܥܺܝܪܳܐ ܕܠܳܐ ܗܰܘܢܳܐ ܘܶܐܬܕܰܡܺܝ ܠܳܗ̇^[13]܆ ܫܳܡܥܺܝܢܰܢ ܠܰܡܙܰܡܪܳܢܳܐ ܕܡܰܙܥܶܩ.

ܐܶܠܳܐ ܥܰܠ ܗܳܢܽܘܢ ܕܗܳܟܰܢܳܐ ܒܒܺܝܫܽܘܬܳܐ ܐܺܝܬ ܗ̱ܘܳܐ ܠܗܽܘܢ܆ ܘܰܠܘܳܬ ܫܺܝܛܽܘܬܳܐ ܘܨܰܥܪܳܐ ܗܰܘ ܐ̱ܚܪܳܝܳܐ ܕܰܒ̣ܘ ܐܰܘܟܺܝܬ ܪܫܰܦܘ܆ ܘܰܠܫܰܦܺܝܪܽܘܬ ܦܰܐܝܽܘܬܳܐ ܗܳܝ ܡܠܺܝܠܬܳܐ ܫܕܰܘ ܡܶܢܗܽܘܢ܆ ܘܥܰܠ ܨܰܠܡܳܐ ܗܰܘ ܕܰܐ‌ܠܳܗܳܐ ܕܶܡ̈ܘܳܬܳܐ ܫ̈ܺܐܕܳܢܳܝܳܬܳܐ ܛܫ̣ܰܘ܆ ܘܰܠܝܽܘܩܢܳܐ ܗܰܘ ܡܶܬܗܰܘܢܳܢܳܐ ܒܝܰܕ ܚܰܫ̈ܶܐ ܥܰܒܕܽܘܗ̱ܝ ܡܙܰܝܦܳܐ ܘܡܰܣܠܝܳܐ܆ ܠܳܐ ܗ̱ܘܳܐ ܪܰܚܶܡ ܥܠܰܝܗܽܘܢ ܒܰܠܚܽܘܕ܆ ܐܶܠܳܐ ܐܳܦ ܐܰܚܶܒ ܐܶܢܽܘܢ. ܗܳܕܶܐ ܓܶܝܪ ܐܺܝܬܶܝܗ̇ ܫܰܦܺܝܪܽܘܬ ܨܶܒܝܳܢܳܐ܆ ܗܳܝ ܕܠܰܘ ܡܶܢ ܩܛܺܝܪܳܐ ܐܰܘ ܡܶܢ ܐܰܢܰܢܩܺܐ܆ ܐܶܠܳܐ ܡܶܢܳܗ̇ ܕܡܶܬܬܙܺܝܥܳܢܽܘܬܳܐ ܩܰܕܡܳܝܬܳܐ ܘܡܶܢ ܨܶܒܝܳܢ ܢܰܦܫܶܗ܆ ܥܰܡ ܒܽܘܩܝܳܐ ܕܝܰܬܺܝܪ ܛܳܒ܆ ܠܘܳܬ ܡܶܕܶܡ ܡܶܢ ܗܳܠܶܝܢ ܕܰܪ̈ܚܺܝܡܳܢ ܢܺܐܬܶܐ. ܫܰܦܺܝܪܽܘܬ ܨܶܒܝܳܢܳܐ^[14] ܓܶܝܪ܆ ܡܶܢ ܗܳܝ ܕܫܰܦܺܝܪ ܐܶܣܬܰܒܪܰܬ ܡܶܬܟܰܢܝܳܐ. ܗܳܝ ܟܺܝܬ ܕܰܡܚܰܘܝܳܐ܆ ܐܳܦ ܠܠܴܐ ܡܶܬܬܰܘܝܳܢܽܘܬܳܐ ܕܫܽܘܟܳܢ̈ܶܐ ܕܰܐ‌ܠܳܗܳܐ. ܗܳܝ ܓܶܝܪ ܕܫܰܦܺܝܪ ܐܶܣܬܰܒܪܰܬ܆ ܠܳܐ ܡܬܽܘܡ ܝܳܠܕܳܐ ܡܶܬܬܰܘܝܳܢܽܘܬܳܐ. ܡܶܛܽܠ ܗܳܕܶܐ ܐܳܦ ܦܰܘܠܽܘܤ ܐܳܡܰܪ: ܕܰܕܠܳܐ ܡܶܬܬܰܘܝܳܢܽܘܬܳܐ ܐܺܝܬܰܝܗܽܘܢ ܫܽܘܟܳܢ̈ܶܐ ܕܰܐ‌ܠܳܗܳܐ^[15]. ܘܳܐܦ ܩܪܳܝܬܶܗ܆ ܐܶܠܳܐ ܐܶܢ ܕܰܠܡܳܐ ܚܢܰܢ ܢܚܰܘܶܐ ܢܰܦܫܰܢ ܕܠܳܐ ܫܳܘܶܝܢ ܚ̱ܢܰܢ ܠܛܰܝܒܽܘܬܳܐ. ܟܽܠܳܗ̇ ܗܳܕܶܐ ܪܶܚܡܬܳܐ ܐܺܝܬ ܠܶܗ ܕܨܰܠܡܶܗ. ܗܳܟܰܢܳܐ ܪܶܚܡܬܳܢܳܐܺܝܬ ܠܘܳܬ ܓܒܺܝܠܬܳܐ ܕܺܝܠܶܗ ܣܺܝܡ.

ܡܶܢ ܐܰܝܟܳܐ ܓܶܝܪ. ܐ̱ܚܪܺܝܢ ܐܺܝܬ ܗ̱ܘܳܐ ܕܰܢܚܰܘܶܝܗ̇ ܠܪܶܚܡܬܶܗ ܝܰܬܺܝܪ ܓܠܺܝܬܳܐ ܘܰܕܢܺܝܚܬܳܐ܆ ܐܶܠܳܐ ܐܶܢ ܒܝܰܕ ܗܳܝ ܕܢܶܪܕܽܘܦ ܘܢܶܪܗܰܛ ܒܳܬܰܪ ܗܰܘ ܕܰܐܪܚܶܩ ܠܪܽܘܚܩܳܐ܆ ܗܰܘ ܕܰܒܥܶܠܕܒܳܒܳܐܺܝܬ ܐܺܝܬ ܗ̱ܘܳܐ ܠܶܗ܆ ܗܰܘ ܕܰܒܝܰܕ ܢܳܡܽܘܣܳܐ ܘܢܶܒ̈ܥܶܐ ܐܶܬܒܥܺܝ ܘܠܳܐ ܐܶܫܬܟܰܚ܆ ܡܫܰܡܠܝܳܐܺܝܬ ܘܳܐܦܠܳܐ ܐܶܬܩܰܕܰܡ܆ ܐܰܝܟܰܢܳܐ ܟܺܝܬ ܕܰܒܕܰܠܩܽܘܒܠܳܐ܆ ܗܽܘ ܗܰܘ ܕܒܳܥܶܐ ܗ̱ܘܳܐ܆ ܗܺܝ ܗܳܕܶܐ ܢܶܗܘܶܐ܆ ܗܳܝ ܟܺܝܬ ܕܒܳܥܶܐ ܗ̱ܘܳܐ. ܟܰܕ ܓܶܝܪ ܐܰ‌ܠܳܗܳܐ ܐܺܝܬܰܘܗ̱ܝ܆ ܠܳܐ ܡܶܫܬܰܚܠܦܳܢܳܐܺܝܬ ܘܒܰܫܪܳܪܳܐ ܗܘ̣ܳܐ ܒܰܪܢܳܫܳܐ. ܘܟܰܕ ܒܰܡܨܰܥܬܳܐ ܕܺܝܠܰܢ. ܗܽܘ ܠܶܗ ܐܰܪܡܺܝ ܨܶܒܝܳܢܳܐܺܝܬ܆ ܐܰܝܟ ܡܶܠܬܶܗ ܕܰܢܒܺܝܳܐ ܐܰܙܥܶܩ: ܕܶܐܫܬܰܟܚܶܬ̣ ܠܗܳܢܽܘܢ ܕܠܳܐ ܒܳܥܶܝܢ ܠܺܝ. ܟܰܕ ܗܶܢܽܘܢ ܠܡܶܫܬܟܳܚܽܘ ܠܳܐ ܨܒܰܘ^[16]. ܓܶܠܝܳܐ ܗܘܺܝܬ ܠܗܳܢܽܘܢ ܕܰܥܠܰܝ ܠܳܐ ܫܐܰܠܘ. ܡܶܛܽܠ ܟܺܝܬ ܕܗܶܢܽܘܢ܆ ܒܚܶܫܽܘܟܳܐ ܕܰܚܛܺܝܬܳܐ ܡܶܬܛܰܫܶܝܢ ܗ̱ܘܰܘ. ܘܟܰܕ ܠܘܳܬ ܝܺܕܰܥܬܳܐ ܕܶܝܢ ܕܰܐ‌ܠܳܗܳܐ. ܡܶܢ ܛܳܥܝܽܘܬܳܐ ܡܰܦܢܶܐ ܠܰܢ. ܐܶܡܰܪ ܠܘܳܬ ܐܰܒܳܐ ܒܝܰܕ ܗܰܘ ܕܰܡܙܰܡܰܪ. ܐܶ݀ܚܰܘܶܐ ܫܡܳܟ ܠܰܐܚ̈ܰܝ܆ ܒܡܶܨܥܰܬ ܥܺܕܬܳܐ ܐܶ݀ܫܰܒܚܳܟ^[17].

ܠܗܳܢܳܐ ܐܳܦ ܝܽܘܚܰܢܳܢ ܗܰܘ ܡܰܥܡܕܳܢܳܐ܆ ܟܰܕ ܚܳܙܶܐ ܗ̱ܘܳܐ ܠܶܗ ܒܥܰܝ̈ܢܶܐ ܪ̈ܽܘܚܳܢܳܝܳܬܳܐ܆ ܕܶܐܬܚܰܠܰܛ ܘܶܐܬܗܰܦܰܟ ܥܰܡܰܢ܆ ܐܳܡܰܪ ܗ̱ܘܳܐ. ܒܰܡܨܰܥܬܳܐ ܕܺܝܠܟܽܘܢ ܩܳܐܶܡ܆ ܗܰܘ ܕܰܐܢ̱ܬܘܢ ܠܳܐ ܝܳܕܥܺܝܢ ܐܢ̱ܬܽܘܢ ܠܶܗ^[18]. ܐܰܟܙܢܳܐ ܓܶܝܪ ܕܐ̱ܢܳܫ ܪܳܚܽܘܡܳܐ ܕܝܰܬܺܝܪ ܚܰܡܺܝܡ܆ ܟܰܕ ܒܚܰܪ ܡܶܢ ܦܽܘܪܣܳܐ ܕܰܐܝܟܰܢܳܐ ܢܶܗܘܶܐ ܒܥܶܢܝܳܢܳܐ ܕܗܰܘ ܕܡܶܬܪܚܶܡ܆ ܒܝܰܕ ܒܡܳܐܢܳܐ ܡܶܕܶܡ ܟܡܳܐ ܙܰܒ̈ܢܺܝܢ ܡܶܬܦܰܪܰܤ ܕܰܢܨܽܘܕܺܝܘܗ̱ܝ ܠܨܰܝܕܳܐ܆ ܒܶܗ ܟܰܕ ܒܶܗ ܒܰܙܢܳܐ ܥܰܡܰܢܽܘܐܶܝܠ܆ ܡܶܬܢܰܩܰܦ ܠܰܢ ܒܝܰܕ ܐ̱ܚܝܳܢܽܘܬܳܐ ܕܒܰܒܣܰܪ܆ ܡܶܛܽܠ ܟܺܝܬ ܕܰܚܢܰܢ ܠܒܰܝܬܳܝܽܘܬܳܐ ܕܰܠܘܳܬܶܗ ܗܳܝ ܕܰܒܝܰܕ ܨܰܠܡܳܐ ܐܰܘܒܶܕܢܰܢ܆ ܐܰܝܟܰܢܳܐ ܕܢܶܬܩܰܪܰܒ ܠܘܳܬܶܗ ܟܰܕ ܒܰܪܢܳܫܐ ܗ̱ܘܳܐ܆ ܠܘܳܬ ܗܰܘ ܕܡܶܢ ܩܕܺܝܡ ܠܳܐ ܐܶܫܟܰܚܢܰܢ ܠܡܶܬܩܰܪܳܒܽܘ ܐܰܝܟ ܕܰܠܘܳܬ ܐܰ‌ܠܳܗܳܐ. ܘܗܳܟܰܢܳܐ ܢܶܫܬܰܘܕܰܥ ܕܫܰܪܺܝܪܳܐܺܝܬ ܐܺܝܬܰܘܗ̱ܝ ܐܰ‌ܠܳܗܳܐ܆ ܐܶܡܰܬܝ ܕܰܗܘ̣ܳܐ ܒܰܪܢܳܫܳܐ ܘܡܰܟܶܟ ܗܽܘ ܠܶܗ܆ ܗܳܝ ܕܳܐܦ ܬܡܺܝܗܳܐ. ܗܳܠܶܝܢ ܗܳܟܺܝܠ܆ ܠܰܘ ܕܫܰܦܺܝܪܽܘܬ ܨܶܒܝܳܢܳܐ ܐܺܝܬܰܝܗܶܝܢ܆ ܗܳܠܶܝܢ܆ ܠܰܘ ܕܚܽܘܒܳܐ ܪܺܝܫܳܝܳܐ ܐܺܝܬܰܝܗܶܝܢ܆ ܗܳܠܶܝܢ ܕܗܳܟܰܢܳܐ ܐܶܬܕܰܒܰܪ̈ܶܝܢ ܡܶܛܽܠܳܬܰܢ.

ܡܶܛܽܠ ܗܳܕܶܐ ܡܫܰܒܚܺܝܢ ܗ̱ܘܰܘ ܡܰܠܰܐܟ̈ܶܐ ܟܰܕ ܐܳܡܪܺܝܢ: ܫܽܘܒܚܳܐ ܒܰܡܪ̈ܰܘܡܶܐ ܠܰܐܠܳܗܳܐ܆ ܘܥܰܠ ‌ܐܰܪܥܳܐ ܫܰܝܢܳܐ܆ ܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ^[19]. ܘܗܳܕܶܐ ܩܰܕܡܳܐܺܝܬ. ܠܪ̈ܳܥܰܘܳܬܳܐ ܡܶܬܓܰܠܝܳܐ܆ ܗܳܝ ܕܰܒܝܰܕ ܡܰܠܰܐܟ̈ܶܐ ܡܶܫܬܰܒܚܳܐ ܗ̱ܘܳܬ܆ ܗܳܢܽܘܢ ܟܺܝܬ ܕܛܽܘܦܣܳܐ ܐܰܚܺܝܕܺܝܢ ܗ̱ܘܰܘ ܕܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܠܡܶܪܥܳܐ ܠܥܻ̈ܕܳܬܳܐ. ܘܛܳܒ ܟܺܐܢܳܐܺܝܬ. ܗܶܢܽܘܢ ܓܶܝܪ ܙܳܕܶܩ ܗ̱ܘܳܐ܆ ܕܢܶܫܡܥܽܘܢ ܒܛܶܟܣܳܐ ܩܰܕܡܳܝܳܐ܆ ܗܳܝ ܕܥܰܠ ‌ܐܰܪܥܳܐ ܫܰܝܢܳܐ܆ ܗܳܢܽܘܢ ܟܺܝܬ ܕܰܥܬܺܝܕܺܝܢ ܗ̱ܘܰܘ ܕܢܰܙܥܩܽܘܢ ܫܰܝܢܳܐ܆ ܠܟܽܠܶܗ ܡܽܘܠܳܝܳܐ ܕܥܺܕܬܳܐ. ܦܰܪܨܽܘܦܳܐ ܕܶܝܢ ܕܪ̈ܳܥܰܘܳܬܳܐ܆ ܘܚܰܕܽܘܬܳܐ ܗܳܝ ܕܰܗܘܳܬ ܠܗܽܘܢ ܒܝܰܕ ܓܶܠܝܳܢܳܐ܆ ܡܫܰܘܕܥܺܝܢ ܓܰܠܝܳܐܺܝܬ܆ ܕܡܶܛܽܘܠ ܥܶܪܒܳܐ ܗܰܘ ܕܰܛܥܶܐ ܗ̱ܘܳܐ ܐܶܬܳܐ ܪܳܥܝܳܐ ܗܰܘ ܛܳܒܳܐ. ܠܪ̈ܳܥܰܘܳܬܳܐ ܓܶܝܪ܆ ܘܠܳܐ ܡܶܕܶܡ ܗܳܟܰܢܳܐ ܝܳܕܰܥ ܕܰܢܚܰܕܶܐ܆ ܐܰܝܟ ܫܟܳܚܬܳܐ ܕܥܶܪܒܳܐ ܗܰܘ ܕܰܐܒܺܝܕ. ܗܰܘ ܟܺܝܬ ܕܠܳܐ ܐܺܝܬܶܝܗ̇ ܗ̱ܘܳܬ ܕܐ̱ܢܳܫ ܐ̱ܚܪܺܢܳܐ ܕܢܶܫܟܚܺܝܘܗ̱ܝ܆ ܐܶܠܳܐ ܐܶܢ ܕܰܡܫܺܝܚܳܐ ܗܰܘ ܪܺܝܫ ܪ̈ܳܥܰܘܳܬܳܐ. ܡܳܢܳܐ ܗܳܟܺܝܠ ‌ܐܶܡܰܪܘ؟ ܗܳܢܽܘܢ ܕܰܠܟܶܢܫܳܐ ܕܦܳܠܚܽܘܬܳܐ ܫܡܰܝܳܢܺܝܬܳܐ ܫܡܰܥܘ ܕܰܡܫܰܒܚܺܝܢ܆ ܫܽܘܒܚܳܐ ܒܰܡܪ̈ܰܘܡܶܐ ܠܰܐܠܳܗܳܐ܆ ܘܥܰܠ ‌ܐܰܪܥܳܐ ܫܰܝܢܳܐ܆ ܒܰܒܢܰܝ̈ܢܳܫܳܐ ܫܰܦܺܝܪܽܘܬ ܨܶܒܝܳܢܳܐ. ܠܘܳܬ ܚ̈ܕܳܕܶܐ ܐܶܡܰܪܘ܆ ܢܶܪܕܶܐ ܗܳܟܺܝܠ ܥܕܰܡܳܐ ܠܒܶܝܬ ܠܚܶܡ܆ ܘܢܶܚܙܶܐ ܠܡܶܠܬܳܐ ܗܳܕܶܐ ܕܰܗܘ̣ܳܬ܆ ܗܳܝ ܕܡܳܪܝܳܐ ܐܰܘܕܰܥ ܠܰܢ.

ܐܳܘ ܠܛܽܘܦܣܳܐ ܕܐ̱ܪܳܙܳܐ ܦܐܶܐ ܠܰܐܠܳܗܳܐ. ܒܶܝܬ ܠܚܶܡ ܓܶܝܪ ܒܰܝܬܳܐ ܕܠܰܚܡܳܐ ܡܶܬܦܰܫܩܳܐ. ܠܰܐܝܟܳܐ ܕܶܝܢ ܥܬܺܝܕܺܝܢ ܗ̱ܘܰܘ ܪ̈ܳܥܰܘܳܬܳܐ ܡܶܢ ܒܳܬܰܪ ܟܳܪܽܘܙܽܘܬܳܐ ܕܫܰܝܢܳܐ ܠܡܶܣܬܰܪܗܳܒܽܘ܆ ܐܶܠܳܐ ܐܶܢ ܠܘܳܬ ܒܰܝܬܳܐ ܪܽܘܚܳܢܳܝܳܐ ܕܠܰܚܡܳܐ ܫܡܰܝܳܢܳܐ܆ ܗܳܢܰܘ ܕܶܝܢ ܠܘܳܬ ܥܺܕܬܳܐ. ܡܫܺܝܚܳܐ ܕܶܝܢ ܐܺܝܬܰܘܗ̱ܝ ܠܰܚܡܳܐ ܚܰܝܳܐ ܗܰܘ ܕܡܶܢ ܫܡܰܝܳܐ ܢܚܶܬ܆ ܘܶܐܬܺܝܗܶܒ ܚܠܳܦ ܚܰܝܰܘ̈ܗ̱ܝ ܕܥܳܠܡܳܐ^[20]܆ ܐܰܝܟܰܢܳܐ ܕܗܽܘ ܒܶܐܘܢܓܶܠܺܝ̈ܰܐ ܐܶܡܰܪ.

ܗܳܠܶܝܢ ܡܰܢ ܗܳܟܺܝܠ ܣܽܘ̈ܟܳܠܶܐ. ܡܶܢ ܪ̈ܳܥܰܘܳܬܳܐ ܥܳܦܺܝܢ ܚ̱ܢܰܢ. ܣܰܓܺܝ̈ܳܐܬܳܐ ܕܶܝܢ ܡܶܫܟܰܚ ܗ̱ܘܳܐ ܐ̱ܢܳܫ ܡܰܘܬܪ̈ܳܢܝܳܬܳܐ܆ ܘܳܐܦ ܡܶܢ ܗܳܠܶܝܢ ܡܓܽܘ̈ܫܶܐ. ܗܳܠܶܝܢ ܕܰܕܢܶܦܽܘܩ ܒܡܶܠܬܳܐ. ܒܺܐܝܕܳܐ ܒܺܐܝܕܳܐ ܡܶܛܽܠܳܬܗܽܘܢ܆ ܠܰܘ ܕܙܰܒܢܳܐ ܗܳܢܳܐ ܕܩܰܪܺܝܒ ܐܺܝܬܶܝܗ̇. ܕܰܚܺܝܠ ‌ܐ̱ܢܳܐ ܓܶܝܪ܆ ܕܕܰܠܡܳܐ ܒܕܽܘܟ ܟܰܕ ܠܒܰܪ ܡܶܢ ܡܫܽܘܚܬܳܐ ܠܦܳܬܽܘܪܳܐ ܡܠܺܝܠܳܐ ܣܳܡܶܬ ܩܕܳܡܰܝܟܽܘܢ܆ ܗܳܝ ܕܗܰܢܺܝܐܳܐ ܘܰܡܚܰܕܝܳܐ ܐܰ݀ܚܣܰܪ܆ ܟܰܕ ܒܣܰܓܺܝܽܐܘܬܳܐ ܐܰܘܩܰܪܬܳܗ̇ ܠܡܰܫܡܰܥܬܳܐ.

ܒܰܚܕܳܐ ܕܶܝܢ ܒܰܠܚܽܘܕ ܡܶܢ ܗܳܠܶܝܢ ܕܗܳܢܽܘܢ ܐܰܝܟ ܐܰܟܣܢܳܝܬܳܐ^[21] ܐܶܬܕܰܡܪܶܬ. ܕܟܰܕ ܙܰܒܢܳܐ ܣܰܓܺܝܳܐܐ ܠܘܳܬ ܗܳܠܶܝܢ ܕܰܠܥܶܠ. ܦܥܺܝܪ ܚܶܟܗܽܘܢ܆ ܘܰܠܪܶܗܛܳܐ ܕܟܰܘܟ̈ܒܶܐ ܣܰܓܺܝܳܐܺܝܬ ܡܥܰܩܒܺܝܢ܆ ܗܳܕܶܐ ܓܶܝܪ ܕܺܝܠܳܝܬܳܐ ܐܺܝܬܶܝܗ̇ ܕܟܰܠ̈ܕܳܝܶܐ܆ ܗܳܢܽܘܢ ܕܡܶܢܗܽܘܢ ܐܺܝܬܰܝܗܽܘܢ ܡܓܽܘ̈ܫܶܐ܆ ܠܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ ܠܳܐ ܐܰܕܪܶܟܘ. ܐܶܡܰܬܝ ܕܶܝܢ ܕܰܚܙܰܘ ܟܰܘܟܒܳܐ ܐܰܟܣܢܳܝܳܐ܆ ܕܡܶܢ ܠܥܶܠ ܡܰܢ ܕܢܰܚ܆ ܕܰܢܚܽܘܪܽܘܢ ܕܶܝܢ ܠܬܰܚܬ ܡܥܰܬܶܕ ܠܗܽܘܢ ܘܰܡܗܰܕܶܐ܆ ܘܩܳܡ ܠܥܶܠ ܡܶܢ ܐܰܝܟܳܐ ܕܺܐܝܬܰܘܗ̱ܝ ܗ̱ܘܳܐ ܛܰܠܝܳܐ^[22]. ܘܰܐܝܟ ܕܰܠܡܺܐܡܰܪ ܒܝܰܕ ܐܶܣܟܺܡܳܐ ܡܰܙܥܶܩ ܗ̱ܘܳܐ ܐܰܝܟ ܒܰܪ̱ܬ ܩܳܠܶܗ ܕܝܽܘܚܰܢܳܢ܆ ܕܗܰܘ ܕܡܶܢ ܠܥܶܠ ‌ܐܳܬܶܐ. ܠܥܶܠ ܡܶܢ ܟܽܠ ‌ܐܺܝܬܰܘܗ̱ܝ^[23]܆ ܐܰܝܟ ܕܒܰܫܡܰܝܳܐ ܦܓܰܥܘ ܒܶܗ ܒܥܽܘܒܳܐ ܒܬܽܘܠܳܝܳܐ. ܘܟܰܕ ܥܽܘܠܳܐ ܚܙܰܘ܆ ܐܰܝܟ ܕܠܰܐܠܳܗܳܐ ܚܰܝܠܬܳܢܳܐ ܣܓܶܕܘ ܠܶܗ. ܠܳܐ ܓܶܝܪ ܡܩܰܪܒܺܝܢ ܗ̱ܘܰܘ ܠܶܗ ܠܝܒܢܘܢ܆ ܐܶ‌ܠܽܘ ܠܳܐ ܕܗܳܕܶܐ ܗܰܝܡܶܢܘ܆ ܟܰܕ ܐܰܘܣܶܦܘ ܕܶܝܢ ܕܰܗܒܳܐ܆ ܘܰܐܝܟ ܕܰܠܡܰܠܟܳܐ ܡܰܕܰܐܬܳܐ ܐܰܣܶܩܘ ܠܶܗ܆ ܣܗܶܕܘ ܠܶܗ ܕܶܝܢ ܐܽܘܚܕܳܢܳܐ ܗܰܘ ܕܥܰܠ ܟܽܠ. ܟܕ ܕܶܝܢ ܠܡܽܘܪܳܐ ܠܗܳܠܶܝܢ. ܐܰܟܚܕܳܐ ܐܰܙܘܶܓܘ܆ ܘܰܠܒܰܣܺܝܡܽܘܬ ܪܺܝܚܳܐ ܕܰܩܒܽܘܪܬܳܐ ܩܰܕܶܡܘ ܫܰܘܕܰܥܘ܆ ܠܗܳܝ ܟܺܝܬ ܕܦܰܘܠܽܘܤ ܟܰܕ ܒܢܰܦܫܶܗ ܡܰܟܪܶܟ ܗ̱ܘܳܐ ܠܳܗ̇ ܡܰܙܥܶܩ ܗ̱ܘܳܐ܆ ܕܒܰܣܺܝܡܽܘܬ ܪܺܝܚܳܐ ܕܰܡܫܺܝܚܳܐ ܐܺܝܬܰܝܢ^[24].

ܐܶܠܳܐ ܡܶܬܦܰܠܓܳܢܽܘܬܶܗ ܕܥܰܡܰܢܽܘܐܶܝܠ ‌ܐܰܟܪܶܙܘ܆ ܟܰܕ ܝܰܕܥܽܘܗ̱ܝ ܠܶܗ ܟܰܕ ܠܶܗ ܘܰܐ‌ܠܳܗܳܐ ܘܡܰܠܟܳܐ܆ ܘܰܕܚܰܫ ܘܕܶܐܬܩܒܰܪ ܒܰܒܣܰܪ. ܐܳܦ ܓܶܝܪ ܐܶܢܗܽܘ ܕܗܰܘ ܡܳܐ ܕܰܡܟܳܢ ܠܡܶܚܰܫ܆ ܒܡܶܠܬܳܐ ܕܰܡܕܰܒܪܳܢܽܘܬܳܐ ܡܶܬܬܰܝܬܶܐ܆ ܡܒܰܣܰܪ ܗ̱ܘܳܐ ܓܶܝܪ ܗܰܘ ܕܺܐܝܬܰܘܗ̱ܝ ܠܳܐ ܡܩܰܒܠܳܢܳܐ ܕܚܰܫܳܐ܆ ܐܳܦ ܐ̱ܢܳܫܳܐܺܝܬ ܗܽܘ ܟܰܕ ܗܽܘ ܚܳܐܶܫ܆ ܐܳܦ ܡܟܰܬܰܪ ܐܰ‌ܠܳܗܳܐܺܝܬ ܠܳܐ ܚܳܫܽܘܫܳܐ. ܠܳܐ ܬܦܰܠܓܺܝܘܗ̱ܝ ܠܰܬܪܰܝܳܢܽܘܬܳܐ ܕܰܟܝܳܢ̈ܶܐ܆ ܟܰܕ ܚܕܳܐ ܙܒܰܢ ܐܶܬܚܰܝܰܕ ܠܳܐ ܡܶܫܬܰܪܝܳܢܳܐܺܝܬ܆ ܐܰܝܟܰܢܳܐ ܕܰܣܢܺܐܓܪܳܐ ܝܰܬܺܝܪܳܐ ܐܶܬܚܙܶܐ ܕܠܳܐ ܚܳܫܽܘܫܽܘܬܶܗ ܕܰܐ‌ܠܳܗܳܐ ܡܶܠܬܳܐ܆ ܠܗܰܘ ܕܰܫܟܺܝܚܳܐ ܗ̱ܝ ܠܶܗ ܠܳܐ ܚܳܫܽܘܫܽܘܬܳܐ܆ ܐܳܦܶܢ ܡܚܰܝܰܕ ܗ̱ܘܳܐ ܩܢܽܘܡܳܐܺܝܬ ܠܦܰܓܪܳܐ ܚܳܫܽܘܫܳܐ. ܫܳܬܶܩ ܐ̱ܢܳܐ ܠܽܐܘܪܝܳܐ܆ ܗܰܘ ܕܰܥܠܰܘܗ̱ܝ ܡܶܠܬܳܐ ܗܽܘ ܠܶܗ ܥܰܠ ܠܳܐ ܡܠܺܝܠܽܘܬܳܐ ܐܰܓܶܣ^[25]܆ ܟܰܕ ܡܰܘܕܰܥ ܕܰܠܗܳܢܽܘܢ ܕܠܰܒܥܺܝܪܳܐ ܕܠܳܐ ܗܰܘܢܳܐ ܐܶܬܕܰܡܺܝܘ ܥܬܺܝܕ ܕܢܦܪܽܘܩ ܘܰܒܗܽܘܢ ܢܶܬܚܙܶܐ.

ܠܰܒܬܽܘܠܬܳܐ ܕܶܝܢ܆ ܡܺܐܡܪܳܐ ܕܺܝܠܳܢܳܝܳܐ ܐܶ݀ܩܰܪܶܒ܆ ܟܰܕ ܠܡܺܐܡܪ̈ܶܐ ܣܰܓܺܝ̈ܶܐܐ ܣܳܦܩܳܐ ܕܬܶܬܶܠ ܥܶܠܬܳܐ. ܫܒܽܘܩ ܟܺܝܬ ܕܳܐܦ ܗܳܠܶܝܢ ܕܗܳܫܳܐ ܐܶܬܶܐܡܰܪ̈ܶܝܢ܆ ܥܠܶܝܗ̇ ܣܳܠ̈ܩܳܢ^[26] ܐܰܝܟ ܕܥܰܠ ܥܶܩܳܪܳܐ ܛܳܒܳܐ. ܛܳܒܳܐܺܝܬ ܓܶܝܪ ܘܠܳܚܡܳܐܺܝܬ ܫܳܡܥܳܐ ܗ̱ܘܳܬ ܡܶܢ ܐܶ‌ܠܺܝܫܒܰܥ܆ ܡܒܰܪܰܟܬܳܐ ܐܰܢ̱ܬܝ ܒܢܶܫ̈ܶܐ܆ ܘܰܡܒܰܪܰܟ ܗ̱ܘ̣ ܦܺܐܪܳܐ ܕܟܰܪܣܶܟܝ^[27]. ܡܳܕܶܝܢ ܗܰܘ ܕܰܠܦܺܐܪܳܐ ܒܰܪܶܟ. ܠܟܰܪܣܳܐ ܗܳܝ ܕܰܠܦܺܐܪܳܐ ܐܰܝܬܝܰܬ ܒܰܪܶܟ. ܐܶܠܳܐ ܓܶܝܪ܆ ܠܳܐ ܝܳܕܰܥ ܐ̱ܢܳܐ ܐܰܝܟܰܢܳܐ ܠܰܡܨܰܥܬܳܐ ܐܶܬ̣ܳܬ̣܆ ܐܳܦ ܡܰܟܣܳܢܽܘܬܳܐ ܕܰܣܒܺܝܪܽܘܬܳܐ ܛܰܢܦܬܳܐ ܕܶܐܘܛܶܘܟ̥ܶܐ. ܟܽܠ ܓܶܝܪ ܦܺܐܪܳܐ܆ ܡܶܢ ܐܽܘܣܺܝܰܐ ܕܺܐܝܠܳܢܳܐ ܗܰܘ ܕܡܰܦܪܶܐ ܠܳܐ ܝܳܥܶܐ. ܘܕܺܝܠܶܗ ܟܰܕ ܕܺܝܠܶܗ ܕܰܟܝܳܢܳܐ ܐܺܝܬܰܘܗ̱ܝ ܫܰܘܝܳܐܺܝܬ ܠܗܰܘ܆ ܘܠܰܘ ܕܰܐ̱ܚܪܺܢܳܐ ܡܶܕܶܡ ܐܰܝܢܳܐ ܕܗܽܘ. ܐܰܝܟܰܢܳܐ ܗܳܟܺܝܠ܆ ܠܰܘ ܡܶܢ ܡܰܪܝܰܡ ܐܳܡܰܪ ܐܰܢ̱ܬ ܕܺܐܝܬܰܘܗ̱ܝ ܦܰܓܪܶܗ ܕܥܰܡܰܢܽܘܐܶܝܠ܆ ܐܳܘ ܕܠܳܐ ܗܰܘܢܳܐ. ܐܶܠܳܐ ܟܰܕ ܠܟܰܪܣܳܐ ܗܳܝ ܕܰܠܦܺܐܪܳܐ ܗܰܘ ܒܪܺܝܟܳܐ ܘܫܰܪܺܝܪܳܐ ܐܰܘܥܝܰܬ ܕܚܰܩ̣ܬ܆ ܠܰܣܒܺܝܪܽܘܬܳܐ ܕܗܶܓܓܳܐ ܡܶܕܶܡ ܕܠܳܐ ܩܢܽܘܡܳܐ ܓܳܒܶܠ ‌ܐܰܢ̱ܬ ܐܶܡܳܐ܆ ܟܰܕ ܗܶܓܓܳܐ ܘܚܶܠܡܳܐ ܥܳܒܶܕ ܐܰܢ̱ܬ ܠܶܗ ܠܦܽܘܪܩܳܢܰܢ.

ܐܶܢ ܓܶܝܪ ܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܫܰܘܝܳܐܺܝܬ ܠܳܐܕܳܡ܆ ܐܺܝܬܶܝܗ̇ ܗ̱ܘܳܬ ܐܰܢ̱ܬܬܳܐ ܗܳܝ ܕܡܶܢ ܐܶ‌ܠܥܶܗ ܐܶܬܢܰܣܒܰܬ ܘܶܐܬܒ̣ܰܪܝܰܬ܆ ܘܰܕܒܰܥܒܽܘܪܝܳܐ ܕܦܽܘܩܕܳܢܳܐ ܥܰܡܶܗ ܐܰܣܟܠܰܬ܆ ܗܰܘ ܕܡܶܢܶܗ ܢܳܚܬܳܐ ܗܺܝ ܚܛܺܝܬܳܐ܆ ܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܡܳܕܶܝܢ ܡܶܢ ܟܽܠ ܦܪܽܘܤ. ܐܺܝܬܶܝܗ̇ ܗ̱ܘܳܬ܆ ܐܳܦ ܗܺܝ ܒܬܽܘܠܬܳܐ܆ ܗܳܝ ܕܡܶܢܳܗ̇ ܕܢܰܚ ܡܫܺܝܚܳܐ ܗܰܘ ܐܳܕܳܡ ܬܪܰܝܳܢܳܐ܆ ܗܰܘ ܕܰܡܪܺܝܡ ܠܰܚܛܺܝܬܶܗ ܕܥܳܠܡܳܐ^[28]. ܐܰܝܟܰܢܳܐ ܟܺܝܬ ܕܗܳܢܽܘܢ ܕܒܳܐܕܳܡ ܡܺܝܬܘ܆ ܢܺܚܽܘܢ ܒܰܡܫܺܝܚܳܐ^[29]܆ ܐܰܝܟܰܢܳܐ ܕܳܐܡܰܪ ܫܠܺܝܚܳܐ. ܐܶܢ ܓܶܝܪ ܘܠܳܐ ܡܶܕܶܡ ܐܰܥܠܰܬ ܐܰܟܚܕܳܐ ܗܺܝ ܒܬܽܘܠܬܳܐ ܡܶܢ ܐܽܘܣܺܝܰܐ ܗܳܝ ܕܺܝܠܳܗ̇ ܠܝܰܠܕܶܗ ܕܥܰܡܰܢܽܘܐܶܝܠ. ܡܳܕܶܝܢ܆ ܘܳܐܦܠܳܐ ܝܳܠܕܰܬ ܐܰ‌ܠܳܗܳܐ ܡܳܪܳܢܳܐܺܝܬ ܐܺܝܬܶܝܗ̇. ܐܰܝܟܰܢܳܐ ܓܶܝܪ ܡܶܫܟܚܳܐ ܗ̱ܘܳܬ ܕܠܳܗ̇ ܠܰܐܠܳܗܽܘܬܳܐ ܥܰܪܛܶܠܳܝܬܳܐ ܡܶܢ ܒܶܣܪܳܐ ܬܺܐܠܰܕ܆ ܐܶܢ ܕܶܝܢ ܡܶܠܬܶܗ ܕܰܐ‌ܠܳܗܳܐ܆ ܦܰܓܪܳܐ ܗܰܘ ܕܡܶܢܳܗ̇ ܚܰܝܶܕ ܠܶܗ ܩܢܽܘܡܳܐܺܝܬ܆ ܕܰܡܢܰܦܰܫ ܒܢܰܦܫܳܐ ܡܠܺܝܠܬܳܐ ܟܺܝܬ ܘܡܶܬܗܰܘܢܳܢܺܝܬܳܐ܆ ܐܰܝܟܰܢܳܐ ܟܺܝܬ ܕܗܽܘ ܐܳܦ ܢܶܬܒܛܶܢ. ܗܳܕܶܐ ܓܶܝܪ ܡܚܰܘܝܳܐ ܗܳܝ ܕܶܐܬܒܰܣܰܪ܆ ܘܗܳܟܰܢܳܐ ܢܶܬܺܝܠܶܕ ܦܰܐܝܽܘܬ ܐܰ‌ܠܳܗܳܐܝܬ܆ ܟܰܕ ܐܰܣܽܘܪ̈ܶܐ ܕܰܒܬܽܘܠܽܘܬܳܐ ܠܳܐ ܐܶܣܬܕܶܩܘ. ܫܰܪܺܝܪܳܐܺܝܬ ܡܰܪܝܰܡ ܟܰܕ ܠܰܐܠܳܗܳܐ ܕܶܐܬܒܰܣܰܪ ܘܶܐܬܒܰܪܢܰܫ ܝܶܠܕܰܬ܆ ܝܳܠܕܰܬ ܐܰ‌ܠܳܗܳܐ ܐܺܝܬܶܝܗ̇. ܗܳܕܳܐ ܗ̱ܝ ܓܶܝܪ ܬܡܺܝܗܽܘܬܳܗ̇ ܕܬܶܕܡܽܘܪܬܳܐ. ܥܰܠ ܕܝܰܠܕܳܐ ܫܰܪܺܝܪܳܐ ܠܰܒܬܽܘܠܬܳܐ ܠܳܐ ܫܪܳܐ.

ܐܶܢ ܓܶܝܪ ܛܶܠܳܢܺܝܬܳܐ ܡܶܕܶܡ ܘܦܰܢܛܰܣܺܝܰܐ ܝܶܠܕܰܬ܆ ܠܳܐ ܪܰܒܳܐ. ܐܶܢ ܗܳܝ ܕܒܰܣܒܺܝܪܽܘܬܳܐ ܝܶܠܕܰܬ܆ ܒܬܽܘܠܬܳܐ ܩܰܘܝܰܬ. ܐܶܠܐ^[30] ܚܢܰܢ ܟܰܕ ܠܫܽܘ̈ܥܝܳܬܳܐ^[31] ܚܶܠ̈ܡܳܢܳܝܳܬܳܐ ܕܶܐܘܛܶܘܟ̥ܶܐ ܘܕܰܐܦܽܘܠܺܝܢܰܪܺܝܽܘܤ܆ ܗܳܠܶܝܢ ܕܰܠܟܽܠܶܗ ܐ̱ܪܳܙܳܐ ܫܳܪ̈ܝܳܢ܆ ܘܠܰܦܣܳܩܳܐ ܝܽܗ̱ܘܕܳܝܳܐ ܕܢܶܣܛܽܘܪܺܝܽܘܤ܆ ܚܕܰܘ ܐܳܡܪܺܝܢܰܢ: ܕܚܰܕ ܐܺܝܬܰܘܗ̱ܝ ܢܫܰܒܚܺܝܘܗ̱ܝ ܡܶܢ ܬܰܪܬܶܝܢ ܡܫܰܡ̈ܠܝܳܬܳܐ ܐܰ‌ܠܳܗܽܘܬܳܐ ܟܺܝܬ ܘܐ̱ܢܳܫܽܘܬܳܐ܆ ܘܰܕܡܶܢ ܒܳܬܰܪ ܚܕܳܝܽܘܬܳܐ ܠܰܬܪܶܝܢ ܟܝܳܢ̈ܶܐ ܠܳܐ ܡܶܬܦܰܠܰܓ܆ ܠܗܰܘ ܕܡܶܛܽܠܳܬܰܢ ܩܰܒܶܠ ܥܠܰܘܗ̱ܝ ܕܢܶܬܒܰܣܰܪ ܒܶܣܪܳܐ ܕܺܝܠܰܢ ܤܛܰܪ ܡܶܢ ܚܛܺܝܬܳܐ^[32]. ܘܠܰܒܬܽܘܠܬܳܐ ܝܳܠܕܰܬ ܐܰ‌ܠܳܗܳܐ ܢ݀ܝܰܩܰܪ. ܘܰܕܬܶܬܟܰܫܰܦ ܚܠܳܦܰܝܢ ܢܦܺܝܣܝܗ̇.

ܗܳܠܶܝܢ ܕܶܝܢ ܕܺܐܝܩܳܪܳܐ ܒܗܳܕܶܐ ܢܶܚܫܽܘܒ ܕܺܐܝܬܰܝܗܶܝܢ܆ ܒܗܳܝ ܕܠܰܒܬܽܘܠܽܘܬܳܐ ܕܺܝܠܳܗ̇ ܡܰܠܦܳܢܽܘܬܳܐ ܩܳܢܶܝܢ ܚ̱ܢܰܢ ܠܳܗ̇ ܕܚܰܝ̈ܶܐ^[33] ܕܰܟܢܺܝܟܽܘܬܳܐ. ܝܰܬܺܝܪܳܐܺܝܬ ܕܶܝܢ ܐܳܡܰܪ ܐ̱ܢܳܐ ܗܳܠܶܝܢ܆ ܠܢܶܫ̈ܶܐ ܟܽܠܗܶܝܢ ܗܳܠܶܝܢ ܕܺܐܝܬܰܝܗܶܝܢ ܪ̈ܳܚܡܳܬ ܐܰ‌ܠܳܗܳܐ. ܚܳܕܶܐ ܐ̱ܢܳܐ ܓܶܝܪ ܟܰܕ ܚܳܙܶܐ ܐ̱ܢܳܐ ܠܟܶܝܢ܆ ܕܰܚܘܺܝܚܳܐܺܝܬ ܪ̈ܳܗܛܳܢ ܐܢ̱ܬܶܝܢ ܠܘܳܬ ܕܽܘܟܪܳܢܳܗ̇ ܕܝܳܠܕܰܬ ܐܰ‌ܠܳܗܳܐ܆ ܘܢܰܚ̈ܬܶܐ ܢܰܨܺܝ̈ܚܶܐ ܠܳܒ̈ܫܳܢ ܐܢ̱ܬܶܝܢ܆ ܘܰܒܨܶܒܬܳܐ ܗܰܘ ܕܫܰܪܟܳܐ܆ ܡܶܬܗܰܕܪ̈ܳܢ ܐܢ̱ܬܶܝܢ ܡܶܛܽܠ ܫܽܘܒܗܳܪܳܐ ܘܰܟܢܺܝܟܽܘܬܳܐ ܕܓܶܢܣܟܶܝܢ.

ܡܚܰܦܶܛ ܐ̱ܢܳܐ ܠܟܶܝܢ ܕܶܝܢ ܕܰܬܨܰܒ̈ܬܳܢ܆ ܠܒܰܪܢܳܫܳܐ ܗܰܘ ܕܡܶܢ ܠܓܰܘ. ܠܰܒܬܽܘܠܬܳܐ ܡܰܢ ܒܰܢܛܽܘܪܽܘܬܳܐ ܕܕܰܟܝܽܘܬܳܐ. ܠܗܳܝ ܕܶܝܢ ܕܰܬܚܶܝܬ ܢܺܝܪܳܐ܆ ܒܰܦܓܽܘܕܬܳܐ ܕܪܶܚܡܰܬ ܓܰܒܪܳܗ̇܆ ܘܰܒܪܽܘܒܳܝܳܐ ܪܳܚܶܡ ܐܰ‌ܠܳܗܳܐ ܘܰܕܝܰܬܺܝܪ ܟܢܺܝܟ ܕܰܒ̈ܢܰܝܳܐ. ܒܝܰܕ ܗܳܝ ܕܬܰܪܬܶܐ ܘܬܰܠܶܦ ܐܶܢܽܘܢ܆ ܕܰܠܘܳܬ ܥܻ̈ܕܳܬܳܐ ܘܰܠܘܳܬ ܒ̈ܳܬܶܐ ܕܒܶܝܬ ܨܠܽܘܬܳܐ ܢܺܐܙܽܠ̱ܘܢ܆ ܘܠܰܘ ܠܘܳܬ ܚ̈ܶܙܘܳܢܶܐ. ܕܢܶܗܘܽܘܢ ܫܳܡܥܺܝܢ ܠܰܟ̈ܬܳܒܶܐ ܐܰ‌ܠܳܗܳܝ̈ܶܐ. ܕܢܶܗܘܽܘܢ ܡܶܫܬܰܘܬܦܺܝܢ ܒܐ̱ܪ̈ܳܙܶܐ ܩܰܕܺܝ̈ܫܶܐ.

ܗܳܠܶܝܢ ܓܶܝܪ. ܟܰܕ ܡܶܢ ܩܰܘܡܬܳܐ ܫܰܒܪܳܝܬܳܐ. ܫܳܘ̈ܚܳܢ ܒܗܽܘܢ܆ ܠܘܳܬ ܩܰܢܳܝܽܘܬܳܐ ܛܰܪܩܬܳܐ ܡܰܝ̈ܬܝܳܢ܆ ܘܝܳܗ̈ܒܳܢ ܫܽܘܪܳܝܳܐ ܘܥܶܠܬܳܐ ܕܟܽܠܳܗ̇ ܫܰܦܺܝܪܽܘܬ ܚܰܝ̈ܶܐ܆ ܘܰܡܙܰܡ̈ܢܳܢ ܠܗܽܘܢ ܡܥܰܕܪܳܢܽܘܬܳܐ ܕܡܶܢ ܐܰ‌ܠܳܗܳܐ܆ ܕܰܡܦܰܨܝܳܐ ܠܗܽܘܢ ܡܶܢ ܓܶܐܪ̈ܰܘܗ̱ܝ ܡܰܪܺܝܪ̈ܶܐ ܘܩܳܛ̈ܠܰܝ ܐ̱ܢܳܫܳܐ ܕܳܐܟܶܠܩܰܪܨܳܐ.

ܠܟܽܠܟܽܘܢ ܕܶܝܢ ܒܳܗ̇ ܒܰܕܡܽܘܬܳܐ ܘܰܠܟܽܠܟܶܝܢ܆ ܡܪܰܚܡܳܢܽܘܬܳܐ ܗܳܝ ܕܥܰܠ ܗܳܢܽܘܢ ܕܰܣܢܺܝܩܺܝܢ ܡܦܰܩܶܕ ܐ̱ܢܳܐ. ܓܰܘܳܢܳܝܰܐ ܗ̄ܘ ܓܶܝܪ ܗܳܢܳܐ ܝܽܘܠܦܳܢܳܐ ܘܦܽܘܩܕܳܢܳܐ. ܡܳܢܳܐ ܓܶܝܪ ܐ̱ܚܪܺܢܳܐ ܢܶܬܶܠ ܠܗܰܘ ܕܟܽܠܶܗ ܗܳܢܳܐ ܪܰܚܶܡ ܥܠܰܝܢ܆ ܐܶܠܳܐ ܐܶܢ ܡܪܰܚܡܳܢܽܘܬܳܐ ܕܕܳܡܝܳܐ ܗܳܝ ܕܥܰܠ ܫܰܘ̈ܝ̣ܰܝ̣ ܒܓܶܢܣܳܐ܆ ܠܗܳܝ ܕܗܽܘ ܥܰܠ ܦܰܪܨܽܘܦܳܐ ܒܰܝܬܳܝܳܐ ܕܺܝܠܶܗ ܡܰܣܶܩ ܠܳܗ̇ ܟܰܕ ܐܳܡܰܪ: ܕܠܺܝ ܥܒܰܕܬܽܘܢ^[34]. ܒܪܰܡ ܗܳܠܶܝܢ ܕܥܰܡ ܓܰܒܪ̈ܶܐ ܐܺܝܬܰܝܟܶܝܢ.

ܐܰܝܟܰܢܳܐ ܕܶܐܡܰܬܝ ܕܡܳܐܢܳܐ ܐܰܘ ܚܶܫܠܬܳܐ ܡܶܕܶܡ ܕܕܰܗܒܳܐ ܐܰܟܣܢܳܝܬܳܐ ܘܰܬܡܺܝܗܬܳܐ ܚ̈ܳܙܝܳܢ ܐܢ̱ܬܶܝܢ܆ ܕܢܶܙܒܢܽܘܢܳܗ̇ ܠܗܳܕܶܐ ܡܥ̈ܰܬܕܳܢ ܐܰܢ̱ܬܶܝܢ ܠܗܽܘܢ ܥܰܡ ܝܰܨܺܝܦܽܘܬܳܐ ܣܰܓܺܝܐܬܳܐ܆ ܟܰܕ ܠܥܺܐܕܳܐ ܠܰܡܨܰܥܬܳܐ ܡܰܝ̈ܬܝܳܢ ܐܰܢ̱ܬܶܝܢ܆ ܒܶܗ ܟܰܕ ܒܶܗ ܒܰܙܢܳܐ ܟܽܠ ܚܕܳܐ ܡܶܢܟܶܝܢ ܠܘܳܬ ܓܰܒܪܳܐ ܕܺܝܠܳܗ̇ ܬܺܐܡܰܪ: ܗܰܒ ܠܺܝ ܕܰܗܒܳܐ ܐܰܘ ܣܺܐܡܳܐ ܠܰܢܝܳܚܬܳܐ ܕܡܶܣ̈ܟܺܢܶܐ܆ ܐܰܝܟܰܢܳܐ ܕܰܠܢܰܦܫܳܐ ܕܺܝܠܝ ܐܶ݀ܨܰܒܶܬ. ܒܳܗܬܳܐ ܐ̱ܢܳܐ ܓܶܝܪ ܕܠܳܐ ܡܨܰܒܰܬ̣ܬܳܐ ܐܶܬܚܙܶܐ ܠܳܗ̇ ܠܝܳܠܕܰܬ ܐܰ‌ܠܳܗܳܐ܆ ܟܰܕ ܠܰܝܬ ܠܺܝ ܡܶܕܶܡ ܡܶܢ ܨܶܒܬܳܐ ܗܰܘ ܕܰܠܗܳܝ ܡܚܰܕܶܐ. ܘܶܐܢܗܽܘ ܕܗܳܟܰܢܳܐ ܬܺܐܙܺܠ̱ܝܢ ܠܘܳܬ ܒܰܝܬܳܐ ܩܰܕܺܝܫܳܐ ܕܺܝܠܳܗ̇܆ ܟܰܕ ܡܥܰܛܦܳܐ ܐܰܢ̱ܬܝ ܢܰܨܺܝܚܽܘܬܳܐ ܪܽܘܚܳܢܳܝܬܳܐ܆ ܒܽܘܪܟܬܳܐ ܪܰܒܬܳܐ ܬܰܘܒܠܺܝܢ ܠܓܰܒܪܶܟܝ ܘܠܰܒ̈ܢܰܝܟܝ. ܟܕ ܠܒܰܝܬܶܟܝ ܦܳܢܝܳܐ ܐܰܢ̱ܬܝ. ܐܳܦ ܓܶܝܪ ܗܽܘ ܨܶܒܬܳܐ ܕܦܰܓܪܳܐ܆ ܠܶܟܝ ܒܰܠܚܽܘܕܰܝܟܝ ܡܚܰܘܶܐ ܦܐܺܝܬܳܐ. ܗܰܘ ܕܶܝܢ ܕܢܰܦܫܳܐ܆ ܐܳܦ ܠܓܰܒܪܶܟܝ. ܐܳܦ ܠܰܒ̈ܢܰܝܟܝ܆ ܫܰܘ̈ܬܳܦܶܐ ܡܚܰܘܶܐ ܠܗܽܘܢ ܕܫܽܘܦܪܳܐ ܗܰܘ ܡܶܬܗܰܘܢܳܢܳܐ܆ ܕܡܰܝܬܶܐ ܝܽܘܬܪܳܢܳܐ ܗܰܘ ܓܰܘܳܢܳܝܳܐ.

ܚܳܙܶܝܢ ܐܢ̱ܬܽܘܢ ܕܕܰܐܝܟ ܐܰܝܠܶܝܢ ܐܰܝܬܝܰܬ ܠܰܢ ܝܳܠܕܰܬ ܐܰ‌ܠܳܗܳܐ ܠܡܺܐܡܰܪ܆ ܘܗܳܕܶܐ ܟܰܕ ܩܰܕܶܡܢܰܢ ܓܒܰܝܢܰܢ ܕܰܠܡܶܠܬܳܐ ܕܰܥܠܶܝܗ̇. ܒܪܶܗܛܳܐ ܢܶܥܒܰܪ܆ ܐܶܠܳܐ ܠܳܐ ܫܳܒܩܳܐ ܠܡܶܫܬܰܩ܆ ܐܳܦܠܳܐ ܠܗܳܢܽܘܢ ܕܠܳܐ ܡܠܺܝܠܳܐܺܝܬ ܘܠܳܐ ܚܰܟܺܝܡܳܐܺܝܬ ܐܺܝܬ ܠܗܽܘܢ܆ ܡܶܛܽܠ ܟܺܝܬ ܕܕܰܐ‌ܠܳܗܳܐ ܡܶܠܬܳܐ ܘܰܕܚܶܟܡܬܳܐ ܗܘ̣ܳܬ ܐܶܡܳܐ.

ܩܰܠܺܝܠ ܕܶܝܢ ܬܽܘܒ ܨܳܒܶܐ ܐ̱ܢܳܐ܆ ܐܳܦ ܡܶܢ ܗܳܢܽܘܢ ܪ̈ܳܥܰܘܳܬܳܐ ܠܡܺܐܬܰܪ. ܐܳܦ ܓܶܝܪ ܐܶܡܰܪ ܡܶܛܽܠܳܬܗܽܘܢ ܟܬܳܒܳܐ ܐܰ‌ܠܳܗܳܝܳܐ ܗܰܘ ܕܶܐܘܢܓ̈ܠܺܝܰܐ܆ ܕܺܐܝܬܰܝܗܽܘܢ ܗ̱ܘܰܘ. ܕܢܳܛܪܺܝܢ ܗ̱ܘܰܘ ܡܰܛܪ̈ܳܬܳܐ ܕܠܺܠܝܳܐ ܥܰܠ ܡܰܪܥܺܝܬܗܽܘܢ܆ ܘܗܳܐ ܡܰܠܰܐܟܳܐ ܕܡܳܪܝܳܐ ܩܳܡ ܥܠܰܝܗܽܘܢ܆ ܘܬܶܫܒܽܘܚܬܳܐ ܕܡܳܪܝܳܐ ܐܰܢܗܪܰܬ ܥܠܰܝܗܽܘܢ^[35]. ܡܰܘܕܥܳܐ ܕܶܝܢ ܡܶܠܬܳܐ܆ ܕܳܐܦ ܗܳܢܽܘܢ ܕܩܳܝܡܺܝܢ ܒܪܺܝܫ ܡܰܪ̈ܥܝܳܬܳܐ ܡܠܺܝ̈ܠܳܬܳܐ܆ ܐܶܢܗܽܘ ܕܠܰܘ ܣܰܓܺܝ ܥܺܝܪܳܐܺܝܬ ܢܶܗܘܽܘܢ ܐܺܝܬܰܝܗܽܘܢ܆ ܘܢܶܛܪܽܘܢ ܡܰܛܪ̈ܳܬܳܐ ܕܠܺܠܝܳܐ܆ ܟܰܕ ܡܶܢ ܚܶܫܽܘܟܳܐ ܡܰܢ ܕܦܰܢܛܰܣܺܝܰܐ ܥܳܠܡܳܢܳܝܬܳܐ ܡܰܪܚܩܺܝܢ ܠܗܽܘܢ ܠܗܳܢܽܘܢ ܕܡܶܢܗܽܘܢ ܡܶܬܪܥܶܝܢ. ܡܗܰܕܶܝܢ ܠܗܽܘܢ ܕܶܝܢ܆ ܠܘܳܬ ܙܰܗܪܳܐ ܕܰܩܝܳܡܬܳܐ ܘܰܕܚܰܝ̈ܶܐ ܗܳܠܶܝܢ ܕܰܥܬܺܝܕܺܝܢ܆ ܠܳܐ ܬܶܢܗܰܪ ܥܠܰܝܗܽܘܢ ܬܶܫܒܽܘܚܬܳܐ ܕܡܳܪܝܳܐ.

ܐܶܢ ܓܶܝܪ ܝܰܥܩܘܒ ܟܰܕ ܥܶܪ̈ܒܶܐ ܕܠܳܒܳܢ ܪܳܥܶܐ ܗ̱ܘܳܐ ܐܳܡܰܪ ܗ̱ܘܳܐ: ܕܗܳܘܶܐ ܗ̱ܘܺܝܬ̣ ܕܝܳܩܶܕ ܐ̱ܢܳܐ ܒܚܽܘܡܳܐ ܕܺܐܝܡܳܡܳܐ ܘܰܒܥܰܪܝܳܐ ܕܠܺܠܝܳܐ܆ ܘܡܰܪܚܩܳܐ ܗ̱ܘܳܬ ܫܶܢܬܳܐ ܡܶܢ ܥܰܝ̈ܢܰܝ^[36]܆ ܡܳܢܳܐ ܢܶܥܒܶܕ ܚܢܰܢ܆ ܗܳܢܽܘܢ ܕܰܠܨܰܠܡܳܐ ܕܰܐ‌ܠܳܗܳܐ ܠܡܶܪܥܳܐ ܐܶܬܬܣܺܝܡܢܰܢ܆ ܘܰܕܠܳܐ ܡܰܪܢܺܝܬܳܐ ܕܳܡܟܺܝܢܰܢ܆ ܟܰܕ ܐܳܦ ܚܢܰܢ ܗܳܐ ܩܺܝܢܕܽܘܢܺܝܣܳܐ ܥܳܒܕܺܝܢܰܢ ܕܢܶܗܘܶܐ ܡܢܰܬܫ̈ܰܝ ܠܚܰܝ̈ܘܳܬܳܐ.

ܡܶܫܟܚܳܢܰܐ ܗ̄ܘ ܓܶܝܪ ܐܰ‌ܠܳܗܳܐ ܗܰܘ ܕܡܶܢ ܪܰܘܡܳܐ ܢܚܶܬ܆ ܘܠܳܐ ܐܰܪܚܶܩ ܡܶܢ ܗܳܝ ܕܰܠܟܽܠ ܢܶܡܠܶܐ ܒܡ̈ܶܠܶܐ ܗܳܠܶܝܢ ܕܗܽܘ ܝܳܕܰܥ ܠܗܶܝܢ܆ ܠܰܢ ܓܶܝܪ ܡܗܰܝܡܢܳܐ ܡܰܢ ܬܶܕܡܽܘܪܬܳܐ܆ ܠܳܐ ܕܶܝܢ ܐܶܬܕܰܪܟܰܬ܆ ܕܰܠܟܽܠܰܢ ܢܕܰܒܰܪ ܠܘܳܬ ܗܳܝ ܕܠܶܗ ܫܳܦܪܳܐ܆ ܠܬܶܫܒܽܘܚܬܳܐ ܕܺܝܠܶܗ ܟܺܝܬ ܘܕܰܐܒܽܘܗ̱ܝ ܘܰܕܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܰܬܠܳܬܺܝܢ ܘܫܬܐ.

ܠܐ ܝܺܠܺܝܕܳܐ[1]

ܡܶܢ ܨܰܘܪ̈ܢܐ[2]

ܡܙܡܘܪ̈ܐ. 133: 1 [3]

ܥܒܪ̈ܝܐ. 4: 15 [4]

ܪ̈ܗܘܡܝܐ. 8: 20 [5]

ܘܠܝܬܐ[6]

ܒ. ܒܪܽܘܟ̣. 3: 38 [7]

ܪ̈ܗܘܡܝܐ. 8: 29 [8]

ܚܒܩܘܩ. 3: 12 [9]

ܐ. ܩܘܪ̈ܝܢܬܝܐ. 11: 1 [10]

ܠܘܩܐ. 2: 14 [11]

ܘܨܢܬܐ[12]

ܡܙܡܘܪ̈ܐ. 49: 13  ܐܦ 49: 21 [13]

[14]ܐܘܝܘܩܝܐ ܐܰܘܟܺܝܬ ܫܰܦܺܝܪܽܘܬ ܨܶܒܝܳܢܳܐ ܒܠܶܫܳܢܳܐ ܝܰܘܢܳܝܳܐ ܡܶܢ ܗܳܝ ܕܫܰܦܺܝܪ ܘܡܶܢ ܗܳܝ ܕܶܐܣܬܰܒܪܰܬ܆ ܡܪܰܟܰܒ ܫܡܳܗ̇. ܗܳܢܰܘ ܕܶܝܢ ܫܰܦܺܝܪܽܘܬ ܣܒܺܝܪܽܘܬܳܐ

ܪ̈ܗܘܡܝܐ. 11: 29 [15]

ܐܶܫܥܝܐ. 65: 1  ܐܦ ܪ̈ܗܘܡܝܐ. 10: 20 [16]

ܡܙܡܘܪ̈ܐ. 22: 23  ܐܦ ܥܒܪ̈ܝܐ. 2: 12 [17]

ܝܘܚܢܢ. 1: 26 [18]

ܠܘܩܐ. 2: 13 ـ 15 [19]

ܝܘܚܢܢ. 6: 51 [20]

ܬܡܺܝܗܬܳܐ[21]

ܡܬܝ. 2: 9 [22]

ܝܘܚܢܢ. 3: 31 [23]

ܒ. ܩܘܪ̈ܝܢܬܝܐ. 2: 15 [24]

ܐܰܓܢܺܝ[25]

ܡܶܬܥܰܠ̈ܝܳܢ[26]

ܠܘܩܐ. 1: 42 [27]

ܝܘܚܢܢ. 1: 29 [28]

ܐ. ܩܘܪ̈ܝܢܬܝܐ. 15: 21 [29]

ܐܶܢ[30]

 ܠܡ̈ܰܬܠܶܐ[31]

ܥܒܪ̈ܝܐ. 4: 15 [32]

ܕܕܽܘܒܳܪܳܐ[33]

ܡܬܝ. 25: 40 [34]

ܠܘܩܐ. 2: 8 ـ 9 [35]

ܣܶܦܪܐ ܕܒܪܝܬܐ. 31: 40 [36]