ܡܺܐܡܪܳܐ ܕܰܬܠܳܬܺܝܢ ܘܚܰܡܫܳܐ

ܥܰܠ ܗܳܝ ܕܒܶܗ ܒܝܰܘܡܳܐ ܒܫܰܢ̱ܬܳܐ ܗܳܝ ܕܥܶܒܪܰܬ܆ ܗܰܘ ܕܒܶܗ ܩܳܡ ܥܰܠ ܡܕܺܝܢ̱ܬܳܐ ܐܶܡܰܪ ܗ̱ܘܳܐ ܡܶܠܬܳܐ ܠܥܰܡܳܐ܆ ܘܥܰܠ ܩܰܕܺܝܫܳܐ ܣܳܗܕܳܐ ܪܽܘܡܰܢܽܘܤ.

35: ܣܰܓܺܝ̈ܳܐܬܳܐ ܐܺܝܬܰܝܗܶܝܢ ܗܳܠܶܝܢ ܕܰܡܚܰܦ̈ܛܳܢ ܠܺܝ ܝܰܘܡܳܢܳܐ܆ ܕܰܠܘܳܬ ܡܰܫܡܰܥܬܳܐ ܕܺܝܠܟܽܘܢ ܪܶܚܡܰܬ ܐܰ‌ܠܳܗܳܐ ܐܶ݀ܡܰܠܶܠ. ܘܝܰܬܺܝܪܳܐܺܝܬ. ܡܶܛܽܠ ܕܶܐܫܬܩܰܕܝ ܒܗܳܢܳܐ ܝܰܘܡܳܐ ܕܩܰܪܺܝܒ. ܩܳܡܢܰܢ ܥܠܰܝܟܽܘܢ܆ ܘܡܶܛܽܠ ܕܰܒܗܳܢܳܐ ܒܰܝܬܳܐ ܣܓܺܝܕܳܐ ܕܣܳܗܕܳܐ ܡܫܰܒܰܚ ܒܟܽܠ ܪܽܘܡܢܘܤ܆ ܠܰܡܫܰܡܳܪܽܘ ܩܳܠܐ ܒܥܺܕܬܳܐ ܗܳܕܶܐ ܟܳܗܢܳܝܬܳܐ ܐܶܬܬܟܶܠܢܰܢ܆ ܟܰܕ ܐܺܝܬܰܝܢ ܡܶܢ ܐ̱ܢܳܫܺܝ̈ܢ ܠܳܐ ܡܠܺܝ̈ܠܶܐ ܘܰܕܠܳܐ ܩܳܠܳܐ܆ ܢܣܰܒܢܰܢ ܕܶܝܢ ܗܳܕܶܐ܆ ܡܶܢ ܗܰܘ ܕܝܰܗ̱ܒ ܡܰܘܗ̈ܒܳܬܳܐ ܒܰܒܢܰܝ̈ܢܳܫܳܐ ܒܝܰܕ ܡܶܬܒܰܪܢܫܳܢܽܘܬܳܐ ܐܰ‌ܠܳܗܳܝܬܳܐ^[1]܆ ܘܰܒܗܳܢܽܘܢ ܕܠܳܐ ܡܶܬܬܦܺܝܣܺܝܢ ܗ̱ܘܰܘ ܫܪܳܐ܆ ܠܗܳܢܽܘܢ ܕܰܡܗܰܝܡ̈ܢܶܐ ܡܶܢ ܠܳܐ ܡܗܰܝܡ̈ܢܶܐ ܥܒܰܕ ܐܶܢܽܘܢ܆ ܘܰܒܢܰܝ̈ܳܐ ܚܠܳܦ ܥܰܒ̈ܕܶܐ.

ܐܶܢ ܓܶܝܪ ܡܽܘܫܶܐ ܗܰܘ ܪܰܒܳܐ܆ ܟܰܕ ܢܚܶܬ ܡܶܢ ܛܽܘܪܳܐ ܕܣܺܝܢܰܝ܆ ܘܣܳܝܽܘ̈ܡܘܳܬ ܢܳܡܽܘ̈ܣܶܐ ܗܳܠܶܝܢ ܐܶܤܛܽܘܟܣܳܢܳܝ̈ܳܬܳܐ ܐܰܘܟܺܝܬ ܫܰܪ̈ܘܳܝܳܬܳܐ ܗܳܠܶܝܢ ܕܰܫܡܺܝܥ ܗ̱ܘܳܐ ܠܶܗ ܡܶܢ ܐܰ‌ܠܳܗܳܐ. ܣܳܡ ܠܥܰܡܳܐ܆ ܘܟܰܕ ܣܠܶܩ ܗ̱ܘܳܐ ܬܽܘܒ ܠܬܰܡܳܢ܆ ܠܰܐܗܪܽܘܢ ܟܺܝܬ ܘܰܠܢܳܕܳܒ ܘܠܰܐܒܺܝܗܽܘܕ ܒܢܰܘ̈ܗ̱ܝ ܕܗܰܘ ܐܰܣܶܩ ܐܰܟܚܕܳܐ ܥܰܡܶܗ܆ ܘܰܠܫܰܒܥܺܝܢ ܓܰܒܪ̈ܶܐ ܡܶܢ ܣܰܝܒܽܘܬܳܐ ܕܺܐܝܣܪܳܐܶܝܠ ‌ܐܰܝܟܰܢܳܐ ܕܰܟܬܺܝܒ܆ ܘܰܚܙܰܘ ܠܕܽܘܟܬܳܐ ܐܰܝܟܳܐ ܕܩܳܐܶܡ ܗ̱ܘܳܐ ܐܰ‌ܠܳܗܳܐ ܕܺܐܝܣܪܳܐܶܝܠ܆ ܘܰܠܗܳܠܶܝܢ ܕܰܬܚܶܝܬ ܪ̈ܶܓܠܶܐ ܕܺܝܠܶܗ܆ ܐܰܝܟ ܥܒܳܕܳܐ ܕܰܠܒܶܢ̱ܬܳܐ ܕܣܰܐܦܺܝܠܳܐ܆ ܘܰܐܟܙܢܳܐ ܕܚܶܙܘܳܐ ܕܰܪܩܺܝܥܳܐ ܕܰܫܡܰܝܳܐ ܒܕܰܟܝܽܘܬܳܐ^[2]܆ ܘܶܐܬܚܙܺܝܘ ܒܕܽܘܟܬܳܐ ܗܳܝ ܕܰܐ‌ܠܳܗܳܐ. ܘܶܐܟܰܠܘ ܘܶܐܫܬܺܝܘ܆ ܟܡܳܐ ܝܰܬܺܝܪܳܐܺܝܬ ܙܳܕܶܩ ܗ̱ܘܳܐ܆ ܠܺܝ ܕܰܒܨܺܝܪܳܐ ܡܰܢ ܐܺܝܬܰܝ ܘܰܡܚܺܝܠܳܐ܆ ܠܡܶܠܬܳܐ ܕܶܝܢ ܪܰܒܬܳܐ ܗܳܝ ܕܶܐܘܰܢܓܶܠܺܝܽܘܢ ܡܫܰܡܶܫ ܐ̱ܢܳܐ܆ ܕܰܠܟܽܘܢ ܥܰܡܳܐ ܩܰܕܺܝܫܳܐ ܟܽܘܗܳܢܳܐ ܡܰܠܟܳܝܳܐ܆ ܠܥܰܡܳܐ ܗܰܘ ܡܫܰܪܬܚܳܐ^[3]܆ ܐܰܣܶܩ ܥܰܠ ܗܳܢܳܐ ܛܽܘܪܳܐ ܡܶܬܗܰܘܢܳܢܳܐ܆ ܗܰܘ ܕܒܶܗ ܟܰܕ ܩܰܕܡܳܐܺܝܬ ܠܡ̈ܶܠܶܐ ܕܥܰܠ ‌ܐܰ‌ܠܳܗܳܐ ܩܶܪܒܶܬ^[4]܆ ܠܛܽܘ̈ܦܶܐ ܕܡܶܢ ܬܰܡܳܢ ܐܰܡܛܪܶܬ ܠܟܽܘܢ. ܡܶܛܪܳܐ ܓܶܝܪ ܣܰܓܺܝܳܐܐ ܘܥܰܬܺܝܪܳܐ ܕܰܡܡܰܠܠܽܘܬ ܐܰ‌ܠܳܗܽܘܬܳܐ܆ ܘܠܳܐ ܐܶܢܳܐ ܕܶܐ݀ܬܗܰܝܡܰܢ ܐܰܘ ܐܶܣܰܝܒܰܪ ܡܶܫܟܰܚ ܗܘܺܝܬ܆ ܘܳܐܦ ܠܳܐ ܐܰܢ̱ܬܽܘܢ ܠܡܶܫܰܡܥ ܡܶܫܟܚܺܝܢ ܗ̱ܘܰܝܬܽܘܢ. ܐܺܝܬܰܘܗ̱ܝ ܓܶܝܪ܆ ܐܰܝܟ ܡܰܝ̈ܳܐ ܣܰܓܺܝ̈ܶܐܐ ܐܰܝܟ ܒܰܪ̱ܬ ܩܳܠܶܗ ܕܰܢܒܺܝܳܐ܆ ܕܣܳܦܩܺܝܢ ܠܰܡܟܰܣܳܝܽܘ ܠܝܰܡ̱̈ܡܶܐ^[5].

ܐܶܠܐ. ܦܬܰܚܘ̱ ܠܺܝ ܥܰܝ̈ܢܶܐ ܕܬܰܪܥܺܝܬܟܽܘܢ܆ ܘܬܶܚܙܽܘܢ ܠܰܘ ܕܽܘܟܬܳܐ ܕܰܡܣܰܒܗܳܐ ܠܟܺܐܦܳܐ ܕܣܰܦܺܝܠܳܐ܆ ܐܶܠܳܐ ܠܕܽܘܟܬܳܐ ܗܳܝ ܕܒܳܗ̇ ܠܟܺܐܦܳܐ ܗܰܘ ܪܺܝܫ ܓܽܘܢܝܳܐ ܚܰܘܺܝܬ̣ ܠܟܽܘܢ. ܠܡܶܠܬܳܐ ܗܰܘ ܕܶܐܬܒܰܣܰܪ܆ ܠܗܰܘ ܕܰܗܘܳܐ ܡܶܨܥܳܝܳܐ ܕܰܐ‌ܠܳܗܳܐ ܘܕܰܒܢܰܝ̈ܢܳܫܳܐ^[6]܆ ܗܰܘ ܕܰܐ‌ܠܘܶܬ ܠܗܳܠܶܝܢ ܕܪ̈ܰܚܺܝܩܳܢ ܗ̱ܘܰܝ̈^[7]. ܗܳܕܶܐ ܡܰܢ ܠܥܰܡܳܐ ܗܰܘ ܕܡܶܢ ܥܰܡ̱ܡ̈ܶܐ ܠܘܳܬ ܐܺܝܣܪܳܐܶܝܠ܆ ܗܳܕܶܐ ܕܶܝܢ ܠܰܐܪ̈ܥܳܢܳܝܶܐ ܠܘܳܬ ܫܡܰܝܳܢ̈ܶܐ.

ܘܟܰܕ ܗܳܟܰܢܳܐ ܡܶܬܢܰܗܪܺܝܢ ܐܢ̱ܬܽܘܢ ܒܫܽܘܦܪܳܗ̇ ܕܕܽܘܟܬܳܐ܆ ܒܣܽܘ̈ܟܳܠܶܐ܆ ܠܥܶܠ ܡܶܢ ܫܡܰܝܳܐ ܬܶܬܪܺܝܡܽܘܢ܆ ܘܬܶܒܥܽܘܢ ܐܰܝܟܰܢܳܐ ܕܣܰܝܒܽܘܬܳܐ ܗܳܝ ܕܺܐܝܣܪܳܐܶܝܠ܆ ܕܒܳܗ̇ ܒܕܽܘܟܬܳܐ ܗܳܝ ܬܶܐܟܠܽܘܢ ܘܬܶܫܬܽܘܢ. ܡܳܢܳܐ ܕܶܝܢ ܐܺܝܬܶܝܗ̇ ܡܶܐܟܽܘܠܬܳܐ ܘܫܶܩܝܳܐ ܕܒܰܐܬܪܳܐ ܗܰܘ ܕܕܰܐܝܟ ܗܳܢܳܐ܆ ܐܶܠܳܐ ܐܶܢ ܒܽܘܣܳܡܳܐ ܕܣܽܘ̈ܟܳܠܶܐ ܐܰ‌ܠܳܗܳܝ̈ܶܐ ܘܰܡܥܰܠܰܝ̈ܳܐ܆ ܗܰܘ ܕܒܺܐܝܕܰܘ̈ܗ̱ܝ ܡܶܬܒܰܣ̈ܡܳܢ ܘܰܡܥܰܕܥ̈ܕܳܢ ܪ̈ܽܘܚܶܐ ܗܳܠܶܝܢ ܡܶܬܗܰܘ̈ܢܳܢܝܳܬܳܐ ܘܢܰܦ̈ܫܳܬܳܐ ܡܠܺܝ̈ܠܳܬܳܐ.

ܘܶܐܢ ܐܶ݀ܫܡܰܥ. ܟܰܕ ܥܰܡܟܽܘܢ ܥܰܠ ܛܽܘܪܳܐ ܩܳܐܶܡ ܐ̱ܢܳܐ܆ ܒܰܕܡܽܘܬ ܡܽܘܫܶܐ ܠܟܳܪܽܘܙܽܘܬܳܐ ܗܳܝ ܕܝܰܬܺܝܪ ܪܳܡܳܐ ܕܳܐܡܪܳܐ: ܣܰܩ ܠܘܳܬܝ ܠܛܽܘܪܳܐ ܘܰܗܘܺܝ ܬܰܡܳܢ܆ ܘܶܐ݀ܬܶܠ ܠܳܟ ܗܳܠܶܝܢ ܦܶܟ̈ܣܳܝܶܐ ܐܰܘܟܺܝܬ ܠܽܘܚ̈ܶܐ ܕܟܺܐܦܳܐ܆ ܠܢܳܡܽܘܣܳܐ ܘܰܠܦܽܘܩ̈ܕܳܢܶܐ ܗܳܠܶܝܢ ܕܟܶܬܒܶܬ ܠܰܡܣܳܡ ܠܗܽܘܢ ܢܳܡܽܘܣܳܐ^[8]܆ ܠܳܐ ܐܶܫܒܽܘܩܟܽܘܢ ܐܰܝܟܰܢܳܐ ܕܗܰܘ ܠܰܐܗܪܽܘܢ ܘܠܰܒ̈ܢܰܘܗ̱ܝ ܘܰܠܣܰܝܒܽܘܬܳܐ ܕܺܐܝܣܪܳܐܶܝܠ. ܐܶܠܳܐ ܥܰܡܝ ܐܰܟܚܕܳܐ ܬܶܣܩܽܘܢ܆ ܘܬܶܫܬܰܘܬܦܽܘܢ ܐܰܟܚܕܳܐ ܒܓܶܠܝܳܢܳܐ.

ܡܳܢܳܐ ܕܶܝܢ ܐܺܝܬܶܝܗ̇ ܗܳܕܶܐ. ܐܳܦ ܓܶܝܪ ܠܦܶܠܶܐܬܳܐ ܡܶܕܶܡ ܒܕܽܘܟ ܕܳܡܝܳܐ. ܐܰܝܟܰܢܳܐ ܟܰܕ ܥܰܠ ܛܽܘܪܳܐ ܣܠܶܩ ܗ̱ܘܳܐ ܡܽܘܫܶܐ ܥܰܡ ܐܰܗܪܽܘܢ ܘܥܰܡ ܩܰܫܺܝ̈ܫܶܐ ܕܺܐܝܣܪܳܐܶܝܠ܆ ܠܗܳܢܽܘܢ ܕܳܐܦ ܚܰܙܳܝ̈ܶܐ ܕܺܝܠܳܗ̇ ܕܕܽܘܟܬܳܐ ܥܒܰܕ ܐܶܢܽܘܢ܆ ܗܳܝ ܕܰܥܠܶܝܗ̇ ܩܳܡ ܐܰ‌ܠܳܗܳܐ ܗܰܘ ܣܳܐܶܡ ܢܳܡܽܘܣܳܐ܆ ܫܳܡܰܥ ܗ̱ܘܳܐ ܬܽܘܒ: ܣܰܩ ܠܘܳܬܝ ܠܛܽܘܪܳܐ܆ ܘܶܐܬܶܠ ܠܳܟ ܗܳܠܶܝܢ ܦܶܟ̈ܣܳܝܶܐ ܐܰܘܟܺܝܬ ܠܽܘ̈ܚܶܐ ܕܟܺܐܦܳܐ܆ ܘܰܐܝܟܰܢܳܐ ܟܰܕ ܚܕܳܐ ܙܒܰܢ ܢܣܰܒ ܐܶܢܽܘܢ ܠܦܽܘܩ̈ܕܳܢܶܐ ܗܳܠܶܝܢ ܕܢܳܡܽܘܣܳܐ܆ ܘܰܠܗܳܠܶܝܢ ܟܰܕ ܢܚܶܬ܆ ܐܳܦ ܐܰܝܟܰܢܳܐ ܕܶܐܡܪܶܬ܆ ܣܳܡ ܐܶܢܽܘܢ ܠܥܰܡܳܐ܆ ܫܳܡܰܥ ܗ̱ܘܳܐ ܬܽܘܒ. ܐܶ݀ܬܶܠ ܠܳܟ ܗܳܠܶܝܢ ܦܶܟܣܳܝ̈ܶܐ ܐܰܘܟܺܝܬ ܠܽܘܚ̈ܶܐ ܕܟܺܐܦܳܐ܆ ܠܢܳܡܽܘܣܳܐ ܘܰܠܦܽܘܩ̈ܕܳܢܶܐ ܗܳܠܶܝܢ ܕܟܶܬܒܶܬ܆ ܠܰܡܣܳܡ ܠܗܽܘܢ ܢܳܡܽܘܣܳܐ. ܐܶܢܳܐ ܐܶܦܰܫܩܺܝܗ̇ ܠܟܽܘܢ ܠܥܶܠܬܳܐ ܓܰܠܝܳܐܺܝܬ܆ ܘܬܶܕܥܽܘܢ ܐܰܝܟ ܕܰܒܥܰܡܛܳܢܳܐ ܘܰܒܛܶܠܳܠܳܐ ܡܰܕܪܟܳܢܽܘܬܳܐ ܡܢܳܬܳܝܬܳܐ܆ ܠܝܰܡܳܐ ܠܳܐ ܡܶܬܡܰܠܠܳܢܳܐ ܕܐ̱ܪ̈ܳܙܶܐ.

ܥܦܺܝܦܳܐ ܐܺܝܬܰܘܗ̱ܝ ܗ̱ܘܳܐ ܢܳܡܽܘܣܳܐ. ܕܡܶܢ ܠܥܶܠ ܡܰܢ. ܘܛܰܢܦܳܐܺܝܬ ܐܺܝܬ ܗ̱ܘܳܐ ܠܶܗ ܒܶܗ ܦܽܘܪ̈ܓܳܠܶܐ ܕܰܟܬܺܝܒܬܳܐ܆ ܒܥܽܘܡܩܳܐ ܕܶܝܢ܆ ܡܛܰܫܶܐ ܗ̱ܘܳܐ ܒܶܗ ܠܣܽܘ̈ܟܳܠܶܐ ܪ̈ܽܘܚܳܢܳܝܶܐ. ܡܶܛܽܠ ܗܳܕܶܐ ܓܶܝܪ܆ ܕܡܶܢ ܠܓܰܘ ܟܺܝܬ ܘܡܶܢ ܠܒܰܪ ܟܬܺܝ̈ܒܳܢ ܗ̱ܘܰܝ̈ ܦܠܐܩ̈ܣ^[9]. ܗܳܠܶܝܢ ܕܢܳܡܽܘܣܳܐ܆ ܐܳܡܰܪ ܟܬܳܒܳܐ ܗܰܘ ܟܳܗܢܳܝܳܐ. ܡܶܛܽܠܗܳܕܶܐ ܐܳܦ ܦܰܘܠܽܘܤ. ܠܢܳܡܽܘܣܳܐ܆ ܒܰܙܒܰܢ ܡܰܢ܆ ܕܝܰܬܺܝܩܺܐ ܕܰܟܬܺܝܒܬܳܐ ܡܫܰܡܰܗ ܗ̱ܘܳܐ ܠܶܗ܆ ܒܰܙܒܰܢ ܕܶܝܢ ܐܳܡܰܪ ܗ̱ܘܳܐ: ܕܝܳܕܥܺܝܢܰܢ ܕܢܳܡܽܘܣܳܐ ܪܽܘܚܳܢܳܐ ܐܺܝܬܰܘܗ̱ܝ^[10]. ܠܰܟܬܺܝܒܬܳܐ ܡܰܢ ܗܳܟܺܝܠ܆ ܗܳܝ ܕܳܐܦ ܕܢܶܬܗܰܝܡܢܳܗ̇ ܐܺܝܣܪܳܐܶܝܠ ܗܰܘ ܕܕܰܒܣܰܪ ܡܶܫܟܰܚ ܗ̱ܘܳܐ܆ ܟܰܕ ܫܰܒܪܳܐܺܝܬ ܥܕܰܟܺܝܠ ܘܠܳܐ ܡܫܰܡܠܝܳܐܺܝܬ ܣܺܝܡ ܗ̱ܘܳܐ܆ ܟܰܕ ܢܚܶܬ ܡܽܘܫܶܐ ܡܶܢ ܛܽܘܪܳܐ ܡܣܰܗܶܕ ܗ̱ܘܳܐ ܠܳܗ̇ ܠܥܰܡܳܐ.

ܘܡܶܢ ܒܳܬܰܪ ܗܳܕܶܐ. ܟܰܕ ܕܒܰܪ ܥܰܡܶܗ ܠܰܐܗܪܽܘܢ ܘܰܠܣܰܝܒܽܘܬܳܐ ܕܺܐܝܣܪܳܐܶܝܠ܆ ܥܕܰܡܳܐ ܠܩܰܪܩܰܦܬܳܐ ܩܰܕܡܳܝܬܳܐ ܕܛܽܘܪܳܐ ܐܰܣܶܩ ܐܶܢܽܘܢ. ܗܳܢܰܘ ܕܶܝܢ ܥܰܠ ܪܰܘܡܳܐ ܕܡܰܣܰܩܬܳܐ ܡܢܳܬܳܝܬܳܐ ܕܓܶܠ̈ܝܳܢܶܐ ܐܰ‌ܠܳܗܳܝ̈ܶܐ܆ ܗܳܝ ܕܒܺܐܝ̈ܕܶܝܗ̇܆ ܟܬܺܝܒܬܳܐ ܟܺܝܬ ܘܣܽܘܟܳܠܳܐ ܒܰܠܚܽܘܕ ܗܰܘ ܕܒܳܗ̇ ܡܶܬܓܠܶܝܢ ܗ̱ܘܰܘ. ܐܶܡܰܬܝ ܕܶܝܢ ܕܰܥܬܺܝܕ ܗ̱ܘܳܐ܆ ܕܰܟܬܳܒܳܐ ܗܰܘ ܕܡܶܢ ܠܓܰܘ ܕܗܳܠܶܝܢ ܦܠܐܩ̈ܐܤ ܢܶܬܗܰܝܡܰܢ܆ ܠܪܽܘܚܳܐ ܐܳܡܰܪ ܐ̱ܢܳܐ ܘܥܽܘܡܩܳܐ ܕܢܳܡܽܘܣܳܐ܆ ܗܰܘ ܕܒܺܐܝܕܰܘ̈ܗ̱ܝ ܗܳܠܶܝܢ ܕܕܽܘܒܳܪܳܐ ܗܰܘ ܐܶܘܰܢܓܶܠܳܝܳܐ ܡܶܬܚܰܘ̈ܝܳܢ ܗ̱ܘܰܝ̈܆ ܘܟܰܕ ܥܰܠ ܛܽܘܪܳܐ ܐܺܝܬܰܘܗ̱ܝ. ܢܶܫܡܰܥ ܠܰܩܪܳܝܬܳܐ ܕܝܰܬܺܝܪ ܪܳܡܳܐ ܘܰܠܡܰܣܰܩܬܳܐ ܕܳܐܡܪܳܐ: ܣܰܩ ܠܘܳܬܝ ܠܛܽܘܪܳܐ ܘܰܗ̣ܘܺܝ ܬܰܡܳܢ܆ ܘܶܐܬܶܠ ܠܳܟ ܠܗܳܠܶܝܢ ܦܽܘܟ̈ܣܳܝܶܐ ܐܰܘܟܺܝܬ ܠܽܘ̈ܚܶܐ ܕܟܺܐܦܳܐ^[11]܆ ܟܰܕ ܩܳܡ. ܘܝܰܬܺܝܪ ܪܳܡܳܐ ܘܰܡܥܰܠܝܳܐ. ܘܰܐܝܟ ܕܰܠܡܺܐܡܰܪ ܦܳܪܽܘܚܳܐ ܗܘ̣ܳܐ ܒܬܶܐܽܘܪܺܝܰܐ܆ ܠܝܶܫܽܘܥ ܡܰܢ ܗܰܘ ܒܰܪ ܢܽܘܢ ܕܳܒܰܪ ܗ̱ܘܳܐ ܥܰܡܶܗ܆ ܗܰܘ ܕܛܽܘܦܣܳܐ ܐܰܚܺܝܕ ܗ̱ܘܳܐ. ܕܝܶܫܽܘܥ ܗܰܘ ܕܺܝܠܝ ܘܰܐ‌ܠܳܗܳܐ ܦܳܪܽܘܩܳܐ܆ ܐܳܦ ܓܶܝܪ ܠܳܐ ܡܶܫܟܚܳܐ ܗ̱ܘܳܬ܆ ܕܰܤܛܰܪ ܡܶܢ ܝܶܫܽܘܥ. ܥܽܘܡܩܶܗ ܕܢܳܡܽܘܣܳܐ ܘܐ̱ܪ̈ܳܙܶܐ ܗܳܠܶܝܢ ܕܶܐܘܰܢܓܶܠܺܝܽܘܢ ܢܶܬܓܠܽܘܢ. ܠܰܐܗܪܽܘܢ ܕܶܝܢ ܘܰܠܩܰܫܺܝ̈ܫܶܐ ܕܺܐܝܣܪܳܐܶܝܠ܆ ܬܰܡܳܢ ܫܳܒܶܩ ܗ̱ܘܳܐ ܟܰܕ ܐܳܡܰܪ: ܫܬܽܘܩܘ ܬܰܡܳܢ. ܥܕܰܡܳܐ ܕܢܶܗܦܽܘܟ ܠܘܳܬܟܽܘܢ^[12]. ܠܳܐ ܓܶܝܪ ܡܨܶܐ ܗ̱ܘܳܐ ܚܰܝܠܶܗ ܕܺܐܝܣܪܳܐܶܝܠ ܗܰܘ ܕܒܰܒܣܰܪ ܘܰܕܟܳܗܢܽܘܬܳܐ ܠܶܘܳܝܬܳܐ܆ ܗܰܘ ܕܰܙܥܽܘܪ̈ܝܳܬܳܐ ܚܳܙܶܐ ܗ̱ܘܳܐ ܘܰܒܛܶܠܳܢܺܝܬܗܽܘܢ ܒܰܠܚܽܘܕ ܕܦܽܘܩ̈ܕܳܢܶܐ ܡܶܬܒܰܩܶܐ ܗ̱ܘܳܐ܆ ܕܰܠܘܳܬ ܫܽܘܦܪܳܐ ܗܰܘ ܡܛܰܫܝܳܐ ܕܢܳܡܽܘܣܳܐ ܢܶܬܡܰܛܶܐ܆ ܘܕܰܒܣܽܘ̈ܟܳܠܶܐ ܪ̈ܽܘܚܳܢܳܝܶܐ ܘܶܐܘܰܢܓ̈ܠܳܝܶܐ ܢܶܬܢܰܗܰܪ.

ܕܟܰܕ ܠܘܳܬ ܬܶܐܘܳܪܝܰܐ ܓܶܝܪ ܕܝܰܬܺܝܪ ܪܳܡܳܐ܆ ܘܰܠܘܳܬ ܡܰܕܪܟܳܢܽܘܬܳܐ ܕܢܳܡܽܘܣܳܐ ܗܳܝ ܕܡܶܢ ܠܓܰܘ. ܡܶܬܩܪܶܐ ܗ̱ܘܳܐ ܗܽܘ ܡܽܘܫܶܐ܆ ܟܰܕ ܥܰܠ ܛܽܘܪܳܐ ܐܺܝܬܰܘܗ̱ܝ ܗ̱ܘܳܐ܆ ܫܳܡܰܥ ܗ̱ܘܳܐ ܬܽܘܒ. ܕܣܰܩ ܠܘܳܬܝ ܠܛܽܘܪܳܐ܆ ܡܶܢܗܶܝܢ ܕܡ̈ܶܠܶܐ ܗܳܠܶܝܢ ܕܰܐ‌ܠܳܗܳܐ ܐܺܝܬܶܝܗ̇ ܓܠܺܝܬܳܐ. ܠܳܐ ܓܶܝܪ ܐܶܡܰܪ ܒܰܠܚܽܘܕ ܕܣܰܩ ܠܛܽܘܪܳܐ܆ ܐܶܠܳܐ ܐܰܘܣܶܦ. ܐܳܦ ܗܳܝ ܕܰܠܘܳܬܝ. ܗܳܝ ܟܺܝܬ ܕܡܰܘܕܥܳܐ܆ ܐܰܝܟ ܕܰܠܘܳܬܰܢ ܡܰܢ. ܡܰܣܰܩܬܳܐ ܕܝܰܬܺܝܪ ܪܳܡܳܐ. ܐܰܝܟ ܕܰܠܘܳܬ ܐܰ‌ܠܳܗܳܐ ܕܶܝܢ܆ ܡܰܣܰܩܬܳܐ ܕܝܰܬܺܝܪ ܩܰܪܺܝܒܳܐ.

ܘܬܽܘܒ. ܠܳܐ ܐܶܡܰܪ: ܘܶܐܬܶܠ ܠܳܟ ܗܳܠܶܝܢ ܦܠܐܩ̈ܐܤ. ܐܶܠܐ. ܗܳܠܶܝܢ ܦܽܘܟ̈ܣܳܝܶܐ ܐܰܘܟܺܝܬ ܠܽܘ̈ܚܶܐ ܕܟܺܐܦܳܐ. ܗܳܝ ܟܺܝܬ ܕܰܡܚܰܘܝܳܐ܆ ܠܠܳܐ ܡܒܰܛܠܳܢܽܘܬܳܗ̇ ܘܠܳܐ ܡܶܬܚܰܒܠܳܢܽܘܬܳܗ̇ ܕܣܳܝܽܘܡܽܘܬ ܢܳܡܽܘܣܳܐ ܗܳܝ ܐܶܘܢܓܶܠܳܝܬܳܐ. ܕܰܐܝܟ ܗܳܢܳܐ ܓܶܝܪ ܐܺܝܬܰܘܗ̱ܝ ܩܰܝܣܳܐ ܗܰܘ ܕܦܽܘܟܣܝܢܘܢ ܐܰܘܟܺܝܬ ܕܶܐܫܟܳܪܥܳܐ. ܩܰܕܺܝܡܳܐ ܓܶܝܪ ܝܺܕܺܝܥܳܐ܆ ܕܰܟܬܺܝܒܬܳܐ ܡܰܢ ܕܢܳܡܽܘܣܳܐ܆ ܟܰܕ ܗܳܠܶܝܢ ܕܰܡܠܶܐ ܙܰܒܢܳܐ ܣܳܝܡܳܐ ܗ̱ܘܳܬ ܢܳܡܽܘܣܳܐ܆ ܗܘ̣ܳܬ ܠܶܗ ܒܩܰܪܺܝܒܽܘܬܳܐ ܕܰܚܒܳܠܳܐ. ܘܣܶܐܒܰܬ ܠܳܗ̇^[13]. ܪܽܘܚܳܐ ܕܶܝܢ ܡܶܬܥܰܠܰܡ ܐܰܘܟܺܝܬ ܗܘ̣ܳܐ ܠܶܗ ܛܰܠܝܳܐ. ܘܟܰܕ ܒܝܰܕ ܐܶܘܰܢܓܶܠܺܝܽܘܢ ܡܰܨܡܰܚ܆ ܥܕܰܡܳܐ ܠܫܽܘܠܳܡܳܐ ܕܥܳܠܡܳܐ ܗܳܢܳܐ ܡܗܰܒܰܒ.

ܗܳܕܶܐ ܐܳܦ ܟܰܠܬܳܐ ܗܳܝ ܕܰܒܬܶܫܒܚܰܬ ܬܶܫܒ̈ܚܳܬܳܐ ܗܳܢܰܘ ܕܶܝܢ ܥܺܕܬܳܐ ܐܰܘܕܥܰܬ. ܟܰܕ ܓܶܝܪ ܠܰܡܫܺܝܚܳܐ ܚܰܬܢܳܐ ܕܺܝܠܳܗ̇ ܘܣܳܐܶܡ ܢܳܡܽܘܣܳܐ ܪܳܫܡܳܐ ܗ̱ܘܳܬ. ܐܳܡܪܳܐ܆ ܟܰܪܣܳܐ^[14] ܕܺܝܠܶܗ ܦܘܟܣܝܘܢ ܐܰܘ ܟܺܝܬ ܐܶܫܟܰܪܥܳܝܬܳܐ ܓܪܶܡܦܺܝܠܳܝܬܳܐ ܕܥܰܠ ܟܺܐܦܳܐ ܕܣܰܦܺܝܠܳܐ^[15].

ܡܰܢܽܘ ܕܶܝܢ ܠܳܐ ܝܳܕܰܥ܆ ܕܟܰܪܣܳܐ ܠܥܽܘܡܩܳܐ ܪܳܫܡܳܐ ܐܰܘܟܺܝܬ ܡܰܘܕܥܳܐ܆ ܘܰܠܟܰܣܝܽܘܬܳܐ ܘܠܳܐ ܡܶܬܡܰܠܠܳܢܽܘܬܳܐ ܕܣܽܘ̈ܟܳܠܶܐ ܐܶܘܢܓ̈ܠܳܝܶܐ܆ ܗܳܝ ܟܺܝܬ ܕܺܐܝܬܶܝܗ̇ ܦܘܟܣܝܘܢ ܐܰܘܟܺܝܬ ܠܽܘܚܳܐ ܓܪܶܡܦܺܝܠܳܝܬܳܐ܆ ܕܠܳܐ ܡܶܬܚܰܒܠܳܐ ܘܳܐܦܠܳܐ ܒܢܰܓܺܝܪܽܘܬܶܗ ܕܙܰܒܢܳܐ ܡܰܫ̣ܦܳܐ^[16]. ܥܰܠ ܓܶܢܣܳܐ ܓܶܝܪ ܕܦܺܝ̈ܠܶܐ. ܐܳܡܪܳܐ ܡܶܠܬܳܐ܆ ܕܢܰܓܺܝܪ ܚܰܝ̈ܶܐ ܐܺܝܬܰܘܗ̱ܝ.

ܒܪܰܡ ܐܶܡܪܰܬ ܗܺܝ ܟܰܠܬܳܐ܆ ܕܗܺܝ ܟܰܪܣܳܐ ܐܰܘ ܟܺܝܬ ܠܽܘܚܳܐ܆ ܥܰܠ ܟܺܐܦܳܐ ܕܣܰܦܺܝܠܳܐ ܐܺܝܬܶܝܗ̇܆ ܡܶܛܽܠ ܗܳܝ ܕܥܰܠ ܦܠܐܩ̈ܐܤ ܟܺܐܦܳܝ̈ܳܬܳܐ ܗܳܠܶܝܢ ܕܢܳܡܽܘܣܳܐ ܡܶܬܬܰܝܬܝܳܐ ܗ̱ܘܳܬ. ܗܳܢܰܘ ܕܶܝܢ. ܕܝܽܘܠܦܳܢܳܐ ܘܕܽܘܒܳܪܳܐ ܗܳܢܳܐ ܐܶܘܰܢܓܶܠܳܝܳܐ܆ ܒܰܟ̈ܬܺܝܒܳܬܳܐ ܗܳܠܶܝܢ ܢܳܡܽܘܣ̈ܳܝܳܬܳܐ ܡܩܰܕܶܡ ܗ̱ܘܳܐ ܡܶܬܪܫܶܡ. ܘܳܐܦ ܗܽܘ ܕܶܝܢ ܣܰܦܺܝܠܳܐ܆ ܠܗܶܝܢ ܠܰܟ̈ܬܺܝܒܳܬܳܐ ܢܳܡܽܘ̈ܣܳܝܳܬܳܐ ܫܳܠܶܡ܆ ܠܗܳܠܶܝܢ ܕܡܶܢ ܠܥܶܠ ܫܡܰܥܢܰܢ ܐܶܢܶܝܢ ܕܳܐܡܪ̈ܳܢ܆ ܕܕܽܘܟܬܳܐ ܗܳܝ ܕܰܥܠܶܝܗ̇ ܟܺܝܬ ܩܳܡ ܐܰ‌ܠܳܗܳܐ ܟܰܕ ܣܳܐܶܡ ܢܳܡܽܘܣܳܐ܆ ܐܺܝܬܶܝܗ̇ ܗ̱ܘܳܬ ܐܰܝܟ ܣܰܦܺܝܠܳܐ܆ ܘܰܐܝܟ ܚܶܙܘܳܐ ܕܰܫܡܰܝܳܐ. ܠܰܚܙܳܬܳܐ ܓܶܝܪ ܫܡܰܝܳܢܺܝܬܳܐ܆ ܐܺܝܬܰܘܗ̱ܝ ܕܕܳܡܶܐ ܒܓܰܘܢܳܐ ܗܽܘ ܣܰܦܺܝܠܳܐ^[17]. ܗܳܝ ܟܺܝܬ ܕܡܰܘܕܥܳܐ܆ ܠܰܐܠܳܗܳܝܽܘܬܳܐ ܘܰܫܡܰܝܳܢܽܘܬܳܐ ܕܺܝܠܗܽܘܢ ܕܦܽܘܩ̈ܕܳܢܶܐ.

ܚܳܙܶܝܢ ܐܢ̱ܬܽܘܢ ܕܠܰܘ ܦܫܺܝܛܳܐܝܬ^[18] ܐܳܡܰܪ ܗ̱ܘܺܝܬ̣ ܕܕܳܒܰܪ ܐ̱ܢܳܐ ܠܟܽܘܢ ܥܰܡܝ ܐܰܟܚܕܳܐ܆ ܟܰܕ ܠܘܳܬ ܡܰܣܰܩܬܳܐ ܐܰܘܟܺܝܬ ܡܶܬܥܰܠܝܳܢܽܘܬܳܐ ܕܣܽܘ̈ܟܳܠܶܐ ܗܳܝ ܕܝܰܬܺܝܪ ܪܳܡܳܐ ܐܳܙܶܠ ‌ܐ̱ܢܳܐ܆ ܘܛܳܒ ܟܺܐܢܳܐܺܝܬ. ܝܶܫܽܘܥ ܓܶܝܪ ܐܺܝܬܰܘܗ̱ܝ ܗ̱ܘܳܐ܆ ܗܰܘ ܕܕܺܝܠܶܗ ܐܺܝܬܰܝܟܽܘܢ ܐܰܢ̱ܬܽܘܢ ܥܰܡܳܐ܆ ܗܰܘ ܕܩܰܪܺܝܒ ܗ̱ܘܳܐ ܐܰܟܚܕܳܐ ܥܰܡ ܡܽܘܫܶܐ܆ ܘܰܠܗܳܠܶܝܢ ܕܡܶܢ ܠܓܰܘ ܠܚܶܙܘܳܢ̈ܶܐ ܗܳܠܶܝܢ ܕܰܐܝܟ ܗܰܘ ܕܰܠܓܰܘ ܡܶܢ ܐܰܦ̈ܰܝ ܬܰܪܥܳܐ ܩܰܕܡܳܝܳܐ ܘܬܰܚܦܺܝܬܳܐ ܗܳܝ ܕܢܳܡܽܘܣܳܐ ܐܺܝܬܰܝܗܽܘܢ ܗ̱ܘܰܘ܆ ܓܳܠܶܐ ܗ̱ܘܳܐ ܘܰܡܚܰܘܶܐ ܘܠܰܬܚܶܝܬ^[19] ܚܙܳܬܳܐ ܡܰܝܬܶܐ ܗ̱ܘܳܐ ܠܗܽܘܢ܆ ܗܳܠܶܝܢ ܕܡܶܢܗܽܘܢ ܐܳܦ ܐܶܬܚܰܘܺܝ ܠܶܗ ܠܡܽܘܫܶܐ ܠܡܶܥܒܰܕ ܬܟܺܝܠܳܐܺܝܬ܆ ܠܰܡܛܰܦܣܳܢܽܘܬܳܐ ܗܳܝ ܕܡܰܫܟܢܳܐ ܕܣܳܗܕܽܘܬܳܐ ܗܰܘ ܕܰܥܬܺܝܕ ܗ̱ܘܳܐ ܕܰܢܚܰܘܶܐ܆ ܗܳܝ ܕܝܽܘܩܢܳܐ ܡܰܝܬܝܳܐ ܗ̱ܘܳܬ ܕܥܺܕܬܳܐ ܪܽܘܚܳܢܳܝܬܳܐ ܕܰܡܫܺܝܚܳܐ.

ܡܶܛܽܠܗܳܕܶܐ. ܐܳܦ ܫܳܡܰܥ ܗ̱ܘܳܐ܆ ܘܰܬܩܺܝܡܺܝܘܗ̱ܝ ܠܡܰܫܟܢܳܐ܆ ܐܰܝܟ ܚܶܙܘܳܐ ܗܰܘ ܕܶܐܬܚܰܘܺܝ ܠܳܟ ܒܛܽܘܪܳܐ^[20]. ܐܶܢ ܗܳܟܺܝܠ ܝܶܫܽܘܥ ܡܫܺܝܚܳܐ ܐܺܝܬܰܘܗ̱ܝ ܗ̱ܘܳܐ. ܗܰܘ ܕܗܳܠܶܝܢ ܓܳܠܶܐ ܗ̱ܘܳܐ܆ ܐܰܝܟܰܢܳܐ ܙܳܕܶܩ ܗ̱ܘܳܐ ܕܰܠܬܰܚܬ ܐܶܫܒܽܘܩܟܽܘܢ܆ ܠܟܽܘܢ ܗܳܢܽܘܢ ܒ̈ܢܰܝ ܫܡܳܐ ܕܰܡܫܺܝܚܳܐ ܘܰܕܩܰܕܡܳܝ̈ܶܐ ܐܶܬܩܪܺܝܬܽܘܢ ܟܪ̈ܺܝܣܛܝܳܢܶܐ^[21]܆ ܟܰܕ ܐܳܦ ܠܶܗ ܠܢܶܣܝܳܢܳܐ ܕܺܝܠܟܽܘܢ ܫܶܩܠܶܬ ܣܰܓܺܝ ܣܳܦܩܳܐܺܝܬ.

ܡܽܘܫܶܐ ܡܰܢ ܓܶܝܪ. ܟܰܕ ܐܶܡܰܪ ܠܥܰܡܳܐ܆ ܠܳܐ ܢܶܗܘܽܘܢ ܠܳܟ ܐܰ‌ܠܳܗ̈ܶܐ ܐ̱ܚܪ̈ܳܢܶܐ ܤܛܰܪ ܡܶܢܝ܆ ܠܳܐ ܬܶܥܒܶܕ ܠܳܟ ܦܬܰܟܪܳܐ. ܘܳܐܦܠܳܐ ܕܡܽܘܬܳܐ ܕܟܽܠ ܡܽܘܢ ܕܗܽܘ^[22]܆ ܘܰܣܠܶܩ ܕܰܢܩܰܒܶܠ ܠܽܘܚ̈ܶܐ ܗܳܠܶܝܢ ܕܟܺܐܦܳܐ܆ ܘܰܫܩܰܠ ܠܗܳܠܶܝܢ ܘܰܢܚܶܬ܆ ܐܶܫܟܰܚ ܐܶܢܽܘܢ ܕܰܥܒܺܝܕ ܠܗܽܘܢ ܥܶܓܠܳܐ ܗܰܘ ܢܣܺܝܟܳܐ. ܘܟܰܕ ܐܶܬܚܰܡܰܬ܆ ܫܕܳܐ ܠܗܳܠܶܝܢ ܥܰܠ ‌ܐܰܪܥܳܐ. ܘܬܰܒܰܪ ܐܶܢܶܝܢ.

ܠܟܽܘܢ ܕܶܝܢ ܐܶܢܳܐ. ܟܰܕ ܠܪܽܘܚܩܳܐ ܡܶܢ ܛܳܥܝܽܘܬܳܐ ܗܳܝ ܟܰܠܩܺܝܕܽܘܢܳܝܬܳܐ ܘܰܬܪܰܝܳܢܰܬ ܟܝܳܢ̈ܶܐ ܐܰܩܺܝܡܬܟܽܘܢ܆ ܘܳܐܦ ܡܶܢ ܣܒܺܝܪܽܘܬܳܐ ܗܳܝ ܕܠܳܐ ܐܰ‌ܠܳܗ ܕܽܐܘܛܶܘܟ̥ܶܐ܆ ܘܚܘܺܝܬ ܠܟܽܘܢ ܠܰܚܒܳܪܳܐ ܗܰܘ ܬܪܰܝܳܢܳܝ ܫܩܺܝ̈ܦܶܐ܆ ܘܰܠܡܶܨܥܳܝܽܘܬܳܐ ܕܰܫܪܳܪܳܐ ܕܠܳܐ ܛܽܘܥܝ̣ܰܝ̣ ܗܳܝ ܕܰܒܡܶܨܥܰܬ ܗܳܠܶܝܢ܆ ܕܰܒܝܰܕ ܐܽܘܪܚܳܐ ܡܰܠܟܳܝܬܳܐ ܐܳܙܠܺܝܢ ܐܢ̱ܬܽܘܢ ܚܳܙܶܐ ܐ̱ܢܳܐ ܠܟܽܘܢ܆ ܘܰܕܠܳܐ ܡܰܣܛܶܝܢ ܐܢ̱ܬܽܘܢ ܠܝܰܡܺܝܢܳܐ ܐܰܘ ܠܣܶܡܳܠܳܐ^[23]. ܐܰܝܟܰܢܳܐ ܕܰܟܬܺܝܒ. ܘܕܰܬܪܺܝܨܳܐܺܝܬ ܙܳܕܶܩ ܘܡܶܫܬܰܘܫܛܺܝܢ ܐܢ̱ܬܽܘܢ ܠܰܩܕܳܡܰܝܟܽܘܢ܆ ܘܕܰܒܓܶܐܪ̈ܶܐ ܡܠܺܝ̈ܠܶܐ ܘܰܒܕܽܘܓܡ̈ܰܛܰܐ ܬܪ̈ܺܝܨܶܐ ܪܳܕܦܺܝܢ ܐܢ̱ܬܽܘܢ. ܠܗܽܘܢ ܠܰܒܥܶܠ̈ܕܒܳܒܶܐ ܕܰܨܠܺܝܒܳܐ ܕܰܡܫܺܝܚܳܐ܆ ܘܡܰܙܥܩܺܝܢ ܐܢ̱ܬܽܘܢ ܐܰܝܟ ܡܙܰܡܪܳܢܳܐ܆ ܐܰܪܘܰܚ̣ܬ ܦܣ̈ܳܥܳܬܝ ܬܚܽܘܬܰܝ. ܘܠܳܐ ܐܶܬܡܚܶܠܘ ܩܽܘܪ̈ܨܠܰܝ. ܐܶܪܕܽܘܦ ܒܥܶܠ̈ܕܒܳܒܰܝ. ܘܰܐܕܪܶܟ ܐܶܢܽܘܢ܆ ܘܠܳܐ ܐܶܗܦܽܘܟ ܥܕܰܡܳܐ ܕܰܢܣܽܘܦܽܘܢ^[24].

ܡܶܛܽܠܗܳܕܶܐ. ܠܦܠܐܩ̈ܐܤ ܐܰܘܟܺܝܬ ܠܽܘܚ̈ܶܐ ܕܕܽܘܓܡ̈ܰܛܰܐ܆ ܠܳܐ ܐܶ݀ܫܕܶܐ ܟܰܕ ܐܶ݀ܬܚܰܡܰܬ܆ ܘܳܐܦܠܳܐ ܐܶܬܒܽܘܪ ܐܶܢܶܝܢ ܠܬܰܚܬ ܡܶܢ ܛܽܘܪܳܐ܆ ܘܳܐܦܠܳܐ ܐܶ݀ܬܬܘܶܐ ܡܶܛܽܠ ܡܰܠܦܳܢܽܘܬܳܐ ܗܳܝ ܕܗܳܟܰܢܳܐ ܩܰܛܺܝܢܳܐ. ܐܶܠܳܐ ܐܰ݀ܘܣܶܦ ܐܶ݀ܣܰܩ ܬܽܘܒ܆ ܘܶܐ݀ܫܰܐܠ ܨܶܒܥܳܐ ܕܰܐ‌ܠܳܗܳܐ܆ ܕܒܰܟ̈ܬܺܝܒܳܬܳܐ ܕܝܰܬܺܝܪ ܪ̈ܰܒܳܢ܆ ܘܰܒܪ̈ܽܘܫܡܶܐ ܕܝܰܬܺܝܪ ܡܫܰܡܠܶܝܢ ܢܣܺܝܡ ܠܺܝ ܢܳܡܽܘܣܳܐ܆ ܘܳܐܦ ܢܶܬܶܠ ܡܶܢ ܟܽܠ ܦܪܽܘܤ܆ ܗܰܘ ܕܰܠܘܳܬ ܡܫܽܘܚܬܳܐ ܡܫܰܡܠܰܝܬܳܐ ܨܳܒܶܐ ܕܢܰܝܬܶܐ ܠܰܢ ܘܳܐܡܰܪ: ܗܘ̣ܰܘ ܗܳܟܺܝܠ ܡܫܰܡ̈ܠܰܝܳܐ܆ ܐܰܝܟܰܢܳܐ ܕܰܐܒܽܘܟܽܘܢ ܗܰܘ ܫܡܰܝܳܢܳܐ ܡܫܰܡܠܝܳܐ ܐܺܝܬܰܘܗ̱ܝ^[25]. ܗܰܘ ܓܶܝܪ ܕܰܠܗܳܢܽܘܢ ܕܰܗܘ̣ܰܘ ܥܶܠܬܳܐ ܕܢܶܬܬܰܒܪ̈ܳܢ ܗܳܠܶܝܢ ܦܠܐܩ̈ܐܤ܆ ܒܝܰܕ ܡܽܘܫܶܐ ܝܰܗ̱ܒ ܐ̱ܚܪ̈ܳܢܝܳܬܳܐ ܕܕܰܐܝܟ ܗܳܠܶܝܢ܆ ܐܰܝܟܰܢܳܐ ܠܟܽܘܢ ܗܳܢܽܘܢ ܕܠܳܐ ܬܒܰܪܬܽܘܢ ܐܶܠܳܐ ܫܰܠ̈ܡܳܬܳܐ ܢܛܰܪܬܽܘܢ ܐܶܢܶܝܢ܆ ܠܳܐ ܢܰܘܣܶܦ ܠܟܽܘܢ ܝܺܕܰܥܬܳܐ܆ ܘܰܢܣܺܝܡ ܠܟܽܘܢ ܢܳܡܽܘܣܳܐ܆ ܗܳܠܶܝܢ ܕܝܰܬܺܝܪ ܪܰܘܪ̈ܒܳܢ. ܠܗܳܠܶܝܢ ܟܺܝܬ. ܕܰܒܙܰܒܢܳܐ ܗܳܢܳܐ ܕܩܰܪܺܝܒ܆ ܐܶܢܳܐ ܒܨܶܒܝܳܢܝ ܡܬܰܗܶܐ ܐ̱ܢܳܐ.

ܕܫܳܥܬܳܐ ܓܶܝܪ܆ ܪܽܘܡܰܐܢܽܘܤ ܣܳܗܕܳܐ ܘܰܐܓܽܘܢܺܝܣܛܳܐ ܚܰܝܠܬܳܢܳܐ ܕܫܰܦܺܝܪܽܘܬ ܕܶܚܠܬܳܐ ܢܳܬܶܦ ܠܺܝ ܠܘܳܬܶܗ܆ ܗܰܘ ܕܺܐܝܬ ܠܺܝ ܠܘܳܬܶܗ ܡܶܕܶܡ ܕܒܰܝܬܳܝܽܘܬܳܐ. ܐܳܦ ܓܶܝܪ ܐܳܦ ܗܽܘ ܟܰܕ ܒܰܥ̈ܝܳܕܶܐ ܘܡܰܪ̈ܕܘܳܬܳܐ ܗܳܠܶܝܢ ܕܰܒܦܠܣܛܝܢܝ ܐܶܬܪܰܒܺܝ܆ ܘܥܰܡ ܙܰܟܰܝ ܘܰܐ‌ܠܦܝܘܤ ܚܰܒܪܳܐ ܕܺܝܠܶܗ ܘܣܳܗ̈ܕܶܐ܆ ܒܕܽܘܪ̈ܳܫܶܐ ܗܳܠܶܝܢ ܩܰܕܡܳܝ̈ܶܐ ܐܶܬܝܰܩܰܢ܆ ܠܗܳܪܟܳܐ ܡܶܫܬܰܕܰܪ ܡܶܢ ܚܶܟܡܬܳܐ ܗܳܝ ܕܥܳܒܪܳܐ ܠܟܽܠ ܗܰܘܢܳܐ܆ ܕܰܢܫܰܡܠܶܐ ܪܶܗܛܶܗ܆ ܘܢܶܣܰܒ ܟܠܺܝܠܐ ܕܰܐܬܠܺܝ̈ܣܘܳܬܶܗ܆ ܘܰܢܓܰܕ ܠܰܐ̱ܚܪ̈ܳܢܶܐ ܠܘܳܬ ܛܢܳܢܳܐ ܕܕܳܡܶܐ܆ ܒܬܰܚܘܺܝܬܳܐ ܛܳܒܬܳܐ ܕܓܰܢ̱ܒܳܪܽܘܬܳܐ. ܟܰܕ ܗܳܟܰܢܳܐ ܗܳܟܺܝܠ ܘܕܰܐܝܟ ܗܳܟܰܢ. ܐܺܝܬ ܗ̱ܘܳܐ ܠܶܗ ܒܰܡܛܰܝܒܽܘܬܳܐ܆ ܠܟܽܠܳܗ̇ ܥܺܕܬܳܐ ܕܰܐܢܛܺܝܽܘ̈ܟܳܝܶܐ ܪܳܕܶܐ ܗ̱ܘܳܐ܆ ܠܘܳܬ ܠܒܺܝܒܽܘܬܳܐ ܘܫܰܦܺܝܪܽܘܬ ܡܰܪܳܚܽܘܬܳܐ ܕܰܚܠܳܦ ܡܶܠܬܳܐ ܕܰܫܪܳܪܳܐ.

ܟܰܕ ܓܶܝܪ ܐܣܩܠܝܦܝܐܕܝܤ ܗܽܘܦܰܪܟܳܐ^[26] ܒܕܶܚܠܰܬ ܫ̈ܺܐܕܶܐ ܪܘܶܐ ܗ̱ܘܳܐ܆ ܘܨܳܒܶܐ ܗ̱ܘܳܐ ܕܰܠܓܰܘ ܥܺܕܬܳܐ ܢܶܥܽܘܠ܆ ܘܰܒܗܰܝܟܠܳܐ ܩܰܕܺܝܫܳܐ ܢܶܫܬܰܛܶܐ܆ ܒܰܕܡܽܘܬ ܐ̱ܢܳܫ ܪܺܝܫ ܛܶܟܣܳܐ ܠܳܐ ܡܶܬܟܰܒܫܳܢܳܐ܆ ܟܰܕ ܒܡ̈ܶܠܶܐ ܕܫܰܦܺܝܪܽܘܬ ܕܶܚܠܬܳܐ ܠܟܽܠܗܽܘܢ ܐܰܚ̈ܶܐ ܠܛܰܫ܆ ܘܰܠܘܳܬ ܠܒܺܝܒܽܘܬܳܐ ܐܰܥܺܝܪ ܐܶܢܽܘܢ܆ ܟܳܠܶܐ ܗ̱ܘܳܐ ܠܶܗ ܠܗܳܢܳܐ ܡܶܢ ܡܰܥܰܠܬܳܐ. ܟܰܕ ܠܘܳܬܗܽܘܢ ܐܳܡܰܪ ܗ̱ܘܳܐ܆ ܕܕܰܢܣܰܝܶܒ ܡܰܢ. ܐܳܦ ܟܰܕ ܥܳܐܶܠ. ܠܳܐ ܡܶܫܟܰܚ܆ ܠܗܳܠܶܝܢ ܡܶܬܗܰܘ̈ܢܳܢܝܳܬܳܐ ܘܠܳܐ ܡܶܬܓܰܫ̈ܦܳܢܝܳܬܳܐ܆ ܘܕܰܟ̈ܝܳܬܳܐ ܘܠܳܐ ܡܶܣܬܰܝ̈ܒܳܢܝܳܬܳܐ. ܒܪܰܡ ܕܶܝܢ ܠܳܐ ܢܶܫܬܘܶܐ^[27] ܕܰܢܫܰܡܠܶܐ ܣܥܳܝܶܗ ܐܰܝܟ ܕܣܳܒܰܪ.

ܗܰܘ ܕܶܝܢ ܟܰܕ ܡܶܢܶܗ ܕܫܶܡܥܳܐ ܒܰܠܚܽܘܕܰܘܗ̱ܝ ܕܚܶܠ܆ ܘܰܠܨܰܥܪܳܐ ܘܫܺܝܛܽܘܬܳܐ ܠܳܐ ܐܶܫܟܰܚ ܠܰܡܣܰܝܒܳܪܽܘ܆ ܩܕܳܡ ܒܺܐܡܰܐ ܡܶܚܕܳܐ ܬܪܺܝܨܳܐܺܝܬ ܐܰܩܺܝܡܶܗ. ܘܟܰܕ ܢܶܣܝܳܢܳܐ ܕܦܰܪܝܣܺܝܰܐ ܕܺܝܠܶܗ ܫܩܰܠ܆ ܐܶܡܰܪ: ܠܡܳܢܳܐ ܠܰܘ ܥܰܡ ܢܺܝܚܽܘܬܳܐ ܕܦܰܐܝܳܐ܆ ܠܦܽܘܢܳܝ ܦܶܬܓܳܡ̈ܶܐ ܥܳܒܶܕ ܐܰܢ̱ܬ ܐܳܘ ܡܣܰܝܒܳܐ܆ ܐܰܝܟܰܢܳܐ ܕܳܐܦ ܗܺܝ ܕܶܚܠܬܳܐ ܕܰܟܪ̈ܺܝܣܛܝܳܢܶܐ ܡܶܫܬܰܘܕܝܳܐ.

ܘܟܰܕ ܠܘܳܬ ܗܳܠܶܝܢ. ܣܰܓܺܝ ܛܳܒܳܐܺܝܬ ܡܦܰܪܶܫ ܗܽܘ ܬܰܠܡܺܝܕܳܐ ܕܰܡܫܺܝܚܳܐ. ܐܶܡܰܪ ܠܶܗ: ܕܙܰܒܢܳܐ ܗܳܢܳܐ ܕܩܰܪܺܝܒ܆ ܕܰܠܒܺܝܒܽܘܬܳܐ ܐܺܝܬܰܘܗ̱ܝ. ܘܠܰܘ ܕܡܰܟܺܝܟܽܘܬܳܐ. ܒܗܳܠܶܝܢ ܡܰܢ ܓܶܝܪ ܐ̱ܚܪ̈ܳܢܝܳܬܳܐ ܟܽܠܗܶܝܢ܆ ܚܰܝ̈ܶܐ ܐܺܝܬܶܝܗ̇ ܠܰܢ ܡܡܰܫܚܽܘܬܳܐ ܐܰܘ ܟܺܝܬ ܡܰܟܺܝܟܽܘܬܳܐ. ܘܰܠܢܺܝܚܽܘܬܳܐ ܣܳܝܩܺܝܢܰܢ܆ ܐܰܘ ܠܗܳܢܳܐ ܐܳܐܰܪ. ܐܰܝܟܰܢܳܐ ܕܶܝܢ ܕܰܐܓܽܘܢܳܐ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ ܩܰܕܺܝܡ ܣܺܝܡ܆ ܠܘܳܬ ܪ̈ܺܝܫܳܢܶܐ ܕܰܐܟܘܳܬܳܟ ܕܳܚ̈ܠܰܝ ܠܫ̈ܺܐܕܶܐ ܘܕܰܡܣܰܡܶܝܢ܆ ܕܣܳܒܪܺܝܢ ܕܒܰܓܒܺܝܢܳܐ ܘܒܰܓ̈ܙܳܡܶܐ܆ ܢܕܽܘܫܽܘܢ ܘܰܢܩܰܦܚܽܘܢ ܠܡܰܟܺܝܟܽܘܬܳܐ ܕܺܝܠܰܢ܆ ܘܰܩܕܳܡܰܝܗܽܘܢ ܢܩܺܝܡܽܘܢܳܗ̇܆ ܗܳܝܕܶܝܢ ܡܶܟܺܝܠ. ܣܰܓܺܝ ܠܒܺܝ̈ܒܶܐ ܐܺܝܬܰܝܢ ܚܢܰܢ܆ ܘܕܰܠܥܶܠ ܠܪܰܘܡܳܐ ܠܨܰܘܪܰܢ ܦܳܫܛܺܝܢܰܢ܆ ܘܕܰܠܘܳܬ ܫܡܰܝܳܐ ܥܰܝ̈ܢܰܝܢ ܡܪܺܝܡܺܝܢܰܢ܆ ܚܢܰܢ ܗܳܢܽܘܢ ܡܰܟܺܝ̈ܟܶܐ ܘܕܰܠܘܳܬ ܐܰܪܥܳܐ ܚܳܝܪܺܝܢ ܚ̱ܢܰܢ܆ ܘܕܰܒܪܶܥܝܳܢܳܐ ܚܬܺܝܪܳܐ ܠܽܘܩܒܰܠ ܪܽܘܫܥܳܐ ܡܶܬܬܪܺܝܡܺܝܢ ܚ̱ܢܰܢ ܐܺܝܬܰܝܢ܆ ܘܕܰܠܡܰܘܬܳܐ ܐܰܝܟ ܕܠܽܐܘܪܚܳܐ ܕܝܰܬܺܝܪ ܡܛܰܝܒܳܐ ܘܕܰܠܘܳܬ ܐܰܘ̈ܳܢܶܐ ܗܳܠܶܝܢ ܕܰܠܥܶܠ ܡܰܝܬܝܳܐ ܚܳܕܝܳܐܺܝܬ ܡܩܰܒܠܺܝܢܰܢ ܥܠܰܝܢ܆ ܘܕܳܐܦ ܥܰܠ ܫܶܢ̈ܕܶܐ ܘܥܰܠ ܡܰܟܶܐܒܳܢ̈ܝܳܬܳܐ ܘܰܥܡܺܝ̈ܠܳܬܳܐ ܗܳܠܶܝܢ ܕܒܶܣܪܳܐ ܓܳܚܟܺܝܢ ܚ̱ܢܰܢ. ܡܫܺܝܚܳܐ ܓܶܝܪ ܗܰܘ ܚܰܝܠܶܗ ܕܰܐ‌ܠܳܗܳܐ ܘܰܐܒܳܐ^[28]܆ ܐܺܝܬܰܘܗ̱ܝ ܕܒܰܢ ܡܶܬܟܰܬܰܫ܆ ܘܰܠܗܳܢܳܐ ܫܽܘܚܠܳܦܳܐ ܡܶܬܩܰܠܣܳܢܳܐ ܘܰܕܗܳܟܰܢܳܐ ܡܶܢܫܶܠܝ܆ ܡܫܰܚܠܶܦ ܠܢܰܦ̈ܫܳܬܳܐ ܕܺܝܠܰܢ. ܗܰܘ ܕܡܶܛܽܠܳܬܶܗ. ܐܳܦ ܕܰܘܺܝܕ ܗܰܘ ܢܒܺܝܳܐ ܐܳܡܰܪ: ܕܗܳܢܳܐ ܫܽܘܚܠܳܦܳܐ ܕܝܰܡܺܝܢܶܗ ܕܰܡܪܰܝܡܳܐ^[29].

ܘܟܰܕ ܠܘܳܬ ܗܳܠܶܝܢ. ܬܽܘܒ ܝܰܬܺܝܪ ܪܬܰܚ ܐܣܩܠܝܦܝܐܕܝܣ ܒܚܶܡܬܳܐ ܕܪܽܘܫܥܳܐ܆ ܕܢܶܣܬܪܶܩ ܗܽܘ ܩܰܕܺܝܫܳܐ ܟܰܕ ܥܰܠ ܩܰܝܣܳܐ ܡܶܬܬܠܶܐ ܦܩܰܕ. ܟܰܕ ܕܶܝܢ ܡܫܰܡ̈ܫܳܢܶܐ ܗܳܢܽܘܢ ܛܥܺܝ̈ܢܰܝ ܢܰܝ̈ܙܟܶܐ ܥܰܗܕܽܘܗ̱ܝ܆ ܕܡܶܢ ܕܡܳܐ ܗܰܘ ܕܒܽܘܠܐܘ̈ܛܐ^[30] ܐܰܘܟܺܝܬ ܡܳܠܽܘܟ̈ܶܐ ܐܺܝܬܰܘܗ̱ܝ ܗܳܢܳܐ܆ ܘܡܶܛܽܠ ܗܳܕܶܐ ܠܳܐ ܙܳܕܶܩ ܕܗܰܘ ܕܡܶܢ ܢܳܡܽܘܣ̈ܶܐ ܕܪ̈ܽܘܡܳܝܶܐ ܐܶܬܝܰܩܰܪ܆ ܒܕܰܐܝܟ ܗܳܠܶܝܢ ܫܶܢ̈ܕܶܐ ܢܶܨܛܰܥܰܪ. ܟܰܕ ܐܰܚܬܶܗ ܡܶܢ ܩܰܝܣܳܐ. ܘܥܰܠ ‌ܐܰܪܥܳܐ ܐܰܩܺܝܡܶܗ܆ ܡܫܰܐܶܠ ܗ̱ܘܳܐ܆ ܐܶܢ ܡܶܢ ܐܰܒܽܘܗ̱ܝ ܠܘܳܬ ܒܽܘܠܳܐ ܣܳܠܶܩ܆ ܗܳܢܰܘ ܕܶܝܢ ܠܘܳܬ ܛܶܟܣܳܐ ܗܰܘ ܕܒܽܘܠܐܘ̈ܛܐ.

ܘܡܶܚܕܳܐ. ܟܰܕ ܦܬܰܚ ܦܽܘܡܶܗ ܗܽܘ ܣܳܗܕܳܐ܆ ܝܰܬܺܝܪ ܡܶܢ ܢܰܗܪ̈ܰܘܴܬܳܐ ܪܕܶܐ ܗ̱ܘܳܐ ܒܡܶܠܬܳܐ. ܟܰܕ ܡܚܰܘܶܐ ܗ̱ܘܳܐ ܒܝܰܕ ܣܰܓܺܝ̈ܳܐܬܳܐ ܕܠܳܐ ܡܶܕܶܡ ܡܶܬܝܰܨܦܳܐ ܠܶܗ܆ ܡܶܛܽܠ ܢܰܨܺܝܚܽܘܬܳܐ ܐܰܝ̇ܕܳܐ ܕܡܶܢ ܒܶܣܪܳܐ ܐܳܬܝܳܐ܆ ܗܳܝ ܕܰܐܝܟ ܗܰܒܳܒ̈ܶܐ ܚܳܡܝܳܐ܆ ܕܰܐ̱ܚܪܺܢܳܐ ܕܶܝܢ ܐܺܝܬܰܘܗ̱ܝ ܐܺܝܩܳܪܳܐ ܗܰܘ ܕܰܦܐܶܐ ܠܰܒ̈ܢܰܝܢܳܫܳܐ ܡܠܺܝ̈ܠܶܐ܆ ܠܗܰܘ ܕܰܡܫܰܟܢܳܐ ܠܗܳܢܽܘܢ ܕܡܶܬܕܰܒܪܺܝܢ ܒܫܰܦܺܝܪܽܘܬ ܕܶܚܠܬܳܐ܆ ܒܰܝܬܳܝܽܘܬܳܐ ܗܳܝ ܕܰܠܘܳܬ ܐܰ‌ܠܳܗܳܐ܆ ܗܳܕܶܐ ܓܶܝܪ ܐܺܝܬܶܝܗ̇ ܫܰܦܺܝܪܽܘܬ ܛܽܘܗܡܳܐ ܕܢܰܦܫܳܐ. ܗܰܘ ܕܡܶܛܽܠܳܬܶܗ. ܐܳܦ ܕܝܰܬܺܝܪ ܡܝܰܩܪܺܝܢ ܛܳܒ ܡܶܢ ܡܰܠ̈ܟܶܐ ܐܺܝܬܰܝܗܽܘܢ.

ܘܰܠܚܰܪܬܳܐ ܟܰܕ ܐܶܙܕܟܺܝ ܗܽܘ ܕܰܝܳܢܳܐ. ܡܶܢ ܦܰܪܶܗ̱ܣܺܝܰܐ ܕܺܝܠܶܗ ܢܳܡܽܘܣܳܝܬܳܐ܆ ܘܡܶܢ ܡܣܰܝܒܪܳܢܽܘܬܶܗ ܕܰܒܫܶܢ̈ܕܶܐ܆ ܡܶܢ ܒܳܬܰܪ ܡܶܬܚܰܘܝܳܢܽܘܬܳܐ ܣܰܓܺܝܐܬܳܐ ܕܫܰܦܺܝܪܽܘܬ ܕܶܚܠܬܳܐ܆ ܕܒܰܙܒܰܢ ܡܰܢ ܒܝܰܕ ܬܶܕܡܪ̈ܳܬܳܐ܆ ܒܰܙܒܰܢ ܕܶܝܢ ܒܝܰܕ ܚܰܝܠܳܐ ܘܡܶܠܬܳܐ܆ ܡܣܳܡ ܒܪܺܝܫܳܐ ܕܰܒܝܰܕ ܢܽܘܪܳܐ ܦܣܰܩ ܥܠܰܘܗ̱ܝ. ܘܗܽܘ ܣܳܗܕܳܐ ܗܰܘ ܕܰܫܪܳܪܳܐ. ܒܡܰܘ̈ܡܳܬܳܐ ܬܰܚܶܡ܆ ܕܠܳܐ ܢܶܚܙܶܝܗ̇ ܣܳܟ ܠܗܳܝ ܢܽܘܪܳܐ܆ ܫܒܽܘܩ ܟܺܝܬ ܕܢܶܣܝܳܢܳܗ̇ ܕܗܳܕܶܐ ܢܶܣܰܒ. ܟܰܕ ܕܶܝܢ ܗܳܝ ܡܰܢ ܐܶܫܬܰܓܪܰܬ ܩܰܫܝܳܐܺܝܬ ܩܕܳܡ ܬܰܪ̈ܥܶܐ ܕܡܕܺܝܢ̱ܬܳܐ܆ ܗܽܘ ܕܶܝܢ ܠܘܳܬܳܗ̇ ܡܶܬܬܰܝܬܶܐ ܗ̱ܘܳܐ܆ ܟܰܕ ܡܨܰܠܶܐ ܗ̱ܘܳܐ ܒܪܶܥܝܳܢܶܗ ܘܰܒܠܶܫܳܢܳܐ ܫܰܠܝܳܐ ܘܰܒܣܶܦ̈ܘܳܬܳܐ ܕܠܳܐ ܡܶܬܬܙܺܝ̈ܥܳܢ܆ ܡܶܛܪܳܐ ܚܒܺܝܛܳܐ ܘܰܕܛܳܒ ܣܰܓܺܝܳܐܐ. ܟܕ ܐܶܫܬܰܦܰܥ܆ ܕܰܥܟܳܗ̇ ܠܓܘܙܰܠܬܳܐ. ܪܽܘܡܰܢܽܘܤ ܕܶܝܢ. ܟܕ ܠܰܐܦ̈ܰܝ ܦܶܠܓܳܗ̇ ܕܽܐܘܪܚܳܐ ܒܕܽܘܟ ܡܰܛܺܝ ܗ̱ܘܳܐ. ܠܒܶܣܬܪܳܐ ܡܶܬܬܰܝܬܶܐ ܗ̱ܘܳܐ܆ ܟܰܕ ܫܰܒܩܳܗ̇ ܠܓܰܘܙܰܠܬܳܐ ܐܰܝܟܰܢܳܐ ܕܩܰܕܶܡ ܐܶܡܰܪ ܠܳܐ ܡܶܬܚܰܙܝܳܢܺܝܬܳܐ^[31]. ܗܳܝ ܟܺܝܬ ܕܟܰܕ ܕܶܥܟܰܬ܆ ܝܰܬܺܝܪܳܐܺܝܬ ܓܰܘܙܰܠܬܳܗ̇ ܠܚܶܡܬܶܗ ܕܕܰܝܳܢܳܐ܆ ܘܰܠܚܰܣܺܝܪܽܘܬ ܗܰܘܢܶܗ ܪܰܒܝܰܬ.

ܐܳܡܰܪ ܗ̱ܘܳܐ ܓܶܝܪ܆ ܕܟܰܕ ܙܰܒܢܳܐ ܣܰܬܘܳܝܳܐ ܐܺܝܬܰܘܗ̱ܝ܆ ܕܺܝܠܶܗ ܐܺܝܬܰܘܗ̱ܝ ܗ̱ܘܳܐ ܡܶܛܪܳܐ ܗܰܘ܆ ܘܠܰܘ ܥܒܳܕܳܐ ܕܰܨܠܽܘܬܶܗ ܕܣܳܗܕܳܐ܆ ܟܰܕ ܠܳܐ ܝܳܕܰܥ^[32] ܗ̱ܘܳܐ܆ ܕܗܰܘ ܕܰܒܝܰܕ ܨܠܽܘܬܶܗ ܕܰܫܡܽܘܐܶܝܠ ܢܒܺܝܳܐ ܪܥܰܡ ܪܰܘܪܒܳܐܺܝܬ܆ ܘܠܰܐܚܪ̈ܳܢܝ̣ܰܝ̣ ܫܰܪܒܬܳܐ ܬܒܰܪ ܘܚܰܝܶܒ܆ ܗܽܘܝܽܘ ܕܰܒܝܰܕ ܨܠܽܘܬܳܐ ܕܕܳܡܝܳܐ. ܐܳܦ ܠܓܰܘܙܰܠܬܳܐ ܗܳܕܶܐ ܐܰܛܺܝܦ܆ ܘܠܰܢܒܺܝܽܘܬܶܗ ܕܣܳܗܕܳܐ ܐܰܩܺܝܡ.

ܡܢܳܐ ܕܶܝܢ ܗܰܘ ܪܰܫܺܝܥܳܐ. ܥܰܠ ܠܶܫܳܢܶܗ ܐܰܦܶܩ ܓܙܳܪ ܕܺܝܢܳܐ܆ ܘܰܕܢܶܬܦܣܶܩ ܗܳܢܳܐ ܦܩܰܕ. ܡܥܺܝܩ ܗ̱ܘܳܐ ܠܶܗ ܓܶܝܪ ܗܳܢܳܐ^[33]܆ ܘܟܰܕ ܡܡܰܠܶܠ ܘܟܰܕ ܡܨܰܠܶܐ ܗ̱ܘܳܐ܆ ܘܟܰܕ ܡܶܬܢܰܒܶܐ ܗ̱ܘܳܐ. ܘܟܰܕ ܐܶܬܦܣܶܩ ܕܶܝܢ܆ ܝܰܬܺܝܪܳܐܺܝܬ ܐܰܥܺܝܩܶܗ. ܡܡܰܠܶܠ ܗ̱ܘܳܐ ܓܶܝܪ ܗܰܘ ܕܡܶܢ ܗܳܢܳܐ ܐܶܬܓܠܶܙ. ܕܗܰܘ ܕܰܒܡܳܢܳܐ ܡܶܢ ܗܳܠܶܝܢ ܕܺܝܠܶܗ ܐܺܝܬ ܠܡܶܬܕܰܡܳܪܽܘ ܣܰܓܺܝܳܐܺܝܬ܆ ܠܰܘ ܦܫܺܝܩܬܳܐ ܗܳܝ ܠܡܺܐܡܰܪ܆ ܒܦܰܪܶܗ̱ܣܺܝܰܐ ܘܩܰܘܡܶܗ ܡܥܰܙܝܳܢܳܐ ܕܠܶܫܳܢܶܗ ܕܣܳܗܕܳܐ܆ ܐܰܘ ܒܡܶܠܬܳܐ ܗܳܝ ܕܠܳܐ ܠܶܫܳܢܳܐ. ܡܶܣܬܰܒܪܳܐ ܠܺܝ ܕܶܝܢ܆ ܕܰܡܛܰܝܒܽܘܬܳܐ ܘܫܰܦܺܝܪܽܘܬ ܡܰܪܳܚܽܘܬܳܐ ܗܳܝ ܕܠܶܫܳܢܶܗ܆ ܐܺܝܬܶܝܗ̇ ܕܝܰܬܺܝܪ ܕܡܺܝܪܳܐ ܝܰܬܺܝܪ ܡܶܢ ܗܳܝ ܐ̱ܚܪܺܬܳܐ. ܗܳܝ ܡܰܢ ܓܶܝܪ ܕܪܽܘܡܰܢܽܘܤ ܐܺܝܬܶܝܗ̇ ܗ̱ܘܳܬ. ܗܳܝ ܕܶܝܢ܆ ܕܰܐ‌ܠܳܗܳܐ ܗܰܘ ܕܥܳܒܶܕ ܠܗܶܝܢ ܠܬܶܕܡܪ̈ܳܬܳܐ.

ܡܳܢܳܐ ܓܶܝܪ ܐܺܝܬܰܘܗ̱ܝ ܕܪܰܒ^[34]܆ ܐܶܢܗܽܘ ܕܗܰܘ ܕܡܶܢ ܩܕܺܝܡ ܠܚܰܕ ܠܶܫܳܢܳܐ ܕܰܒܢܰܝ̈ܢܳܫܳܐ ܠܣܰܓܺܝ̈ܶܐܐ ܦܳܠܶܓ܆ ܐܰܝܟܰܢܳܐ ܕܥܳܒܽܘܕܽܘܬ ܡܰܓܕܠܳܐ ܢܳܨܝܰܬ̣ ܥܰܡ ܐܰ‌ܠܳܗܳܐ ܗܳܝ ܕܰܒܟܠܐܢܝ ܬܶܙܕܰܥܙܰܥ܆ ܘܡܶܢ ܒܳܬܰܪܟܶܢ ܥܰܠ ܫܠܺܝ̈ܚܶܐ ܒܠܶܫܳܢ̈ܶܐ ܢܽܘܪ̈ܳܢܶܐ ܕܢܰܚ܆ ܘܗܳܝ ܕܰܒܗܶܦܟܳܐ܆ ܠܠܶܫܳܢ̈ܶܐ ܣܰܓܺܝ̈ܶܐܐ ܠܰܚܕܳܐ ܒܰܪ̱ܬ ܩܳܠܳܐ ܕܗܳܢܽܘܢ ܟܰܢܶܫ܆ ܐܳܦ ܒܪܽܘܡܰܢܽܘܤ܆ ܤܛܰܪ ܡܶܢ ܐܽܘܪܓܰܢܽܘܢ ܕܡܰܡܠܠܳܐ ܡܰܠܶܠ. ܒܡ̈ܶܠܶܐ ܓܶܝܪ ܢܽܘܪ̈ܳܢܳܝܳܬܳܐ ܡܶܬܚܰܫܚܺܝܢ ܗܳܠܶܝܢ ܕܰܒܪܽܘܚܳܐ ܡܡܰܠܠܺܝܢ܆ ܐܳܦ ܐܶܡܰܬܝ ܕܠܶܫܳܢܳܐ ܗܰܘ ܕܒܶܣܪܳܐ ܐܺܝܬ ܠܗܽܘܢ. ܘܰܠܘܳܬ ܫܽܘܪܳܪܳܐ ܗܰܘ ܕܗܳܕܶܐ. ܗܳܟܰܢܳܐ ܐܺܝܬ ܠܳܗ̇܆ ܡܶܢ ܒܳܬܰܪ ܡܶܬܬܪܺܝܡܳܢܽܘܬܶܗ ܕܗܳܢܳܐ ܡܡܰܠܶܠ ܗ̱ܘܳܐ ܗܽܘ ܣܳܗܕܳܐ.

ܡܶܛܽܠ ܗܳܕܶܐ ܠܟܽܠܗܶܝܢ ܗܳܠܶܝܢ ܕܰܐܝܟ ܗܳܟܰܢ ܙܳܕܶܩ ܠܰܢ ܠܰܡܗܰܝܡܳܢܽܘ. ܘܟܰܕ ܫܳܡܥܺܝܢ ܚ̱ܢܰܢ. ܕܰܒܪܽܘܚܳܐ ܩܰܕܺܝܫܳܐ ܘܰܒܢܽܘܪܳܐ ܥܳܡܕܺܝܢ ܚ̱ܢܰܢ^[35]܆ ܠܰܘ ܒܡܰܝ̈ܳܐ ܒܰܠܚܽܘܕ ܙܳܕܶܩ ܠܰܢ ܕܰܢܚܽܘܪ. ܐܶܠܳܐ ܕܰܒܥܰܝ̈ܢܶܐ ܕܗܰܝܡܳܢܽܘܬܳܐ ܢܶܚܙܶܝܗ̇ ܠܢܽܘܪܳܐ܆ ܘܢܶܬܚܰܫܒܺܝܗ̇ ܒܬܰܪܥܺܝܬܳܐ. ܗܺܝ ܕܶܝܢ ܟܰܕ ܗܺܝ ܐܳܡܰܪ ܐ̱ܢܳܐ܆ ܐܳܦ ܡܶܛܽܠ ܕܶܒܚܬܳܐ ܗܳܝ ܕܰܕܠܳܐ ܕܡܳܐ. ܕܠܰܘ ܒܗܳܠܶܝܢ ܕܡܶܬܚ̈ܰܙܝܳܢ ܢܩܰܘܶܐ܆ ܐܶܠܳܐ ܠܘܳܬ ܗܳܠܶܝܢ ܕܡܶܣ̈ܬܰܟܠܳܢ ܡܗܰܝܡܢܳܐܺܝܬ ܢܰܣܩܺܝܘܗ̱ܝ ܠܗܰܘܢܰܢ܆ ܘܰܒܦܠܺܝܪܽܘܦܽܘܪܺܝܰܐ ܢܶܬܬܦܺܝܤ܆ ܕܳܐܦ ܠܗܶܝܢ ܠܗܳܠܶܝܢ ܕܡܶܬܗܰܘ̈ܢܳܢ^[36] ܚܳܙܶܝܢܰܢ ܓܰܠܝܳܐܺܝܬ ܘܡܶܬܪܰܓܫܳܢܳܐܺܝܬ. ܗܳܠܶܝܢ ܕܶܝܢ ܓܰܠ̈ܝܳܬܳܐ ܐܺܝܬܰܝܗܶܝܢ. ܠܗܳܢܽܘܢ ܕܺܐܝܬܰܝܗܽܘܢ ܝܰܠܺܝ̈ܦܶܐ ܕܐ̱ܪ̈ܳܙܶܐ܆ ܐܳܦ ܚܢܰܢ ܡܚܰܦܝܳܐܺܝܬ ܡܡܰܠܠܺܝܢܰܢ ܠܗܶܝܢ܆ ܡܶܛܽܠ ܡܰܫܡܰܥܬܳܐ ܠܳܐ ܝܰܠܺܝܦܬܳܐ ܕܐ̱ܪ̈ܳܙܶܐ.

ܐܶܠܐ. ܐܳܦ ܒܗܳܝ ܐܺܝܬ ܠܡܶܬܡܰܗ ܒܢܰܦܫܶܗ ܕܪܽܘܡܢܘܤ ܗܳܝ ܕܫܰܪܺܝܪܳܐܺܝܬ ܪܰܒܬܳܐ܆ ܕܰܐܝܟܰܢܳܐ ܒܛܺܝܠ ܗ̱ܘܳܐ ܠܶܗ ܥܰܠ ܝܽܘܬܪܳܢܳܐ ܕܰܐܚ̈ܶܐ. ܠܳܐ ܓܶܝܪ ܚܫܰܒ ܕܣܳܦܩܳܐ ܠܘܳܬ ܫܽܘܪܳܪܳܐ ܕܗܰܝܡܳܢܽܘܬܳܐ ܕܗܳܢܽܘܢ܆ ܡܶܠܬܳܐ ܗܳܝ ܬܡܺܝܗܬܳܐ ܕܡܶܢ ܒܳܬܰܪ ܦܣܳܩܳܐ ܕܠܶܫܳܢܶܗ܆ ܐܶܠܳܐ ܚܠܳܦ ܕܝܽܘܬܳܐ܆ ܟܰܕ ܒܰܕܡܳܐ ܗܰܘ ܕܪܳܕܶܐ ܗ̱ܘܳܐ ܡܶܢ ܗܳܢܳܐ ܐܶܬܚܰܫܰܚ܆ ܡܰܪ̈ܬܝܳܢܘܳܬܳܐ ܡܰܘܬܪ̈ܳܬ ܢܰܦܫܳܐ܆ ܘܕܽܘܓܡ̈ܰܛܰܐ ܦܳܪ̈ܽܘܩܳܝܶܐ ܕܗܰܝܡܳܢܽܘܬܳܐ ܟܳܬܶܒ ܗ̱ܘܳܐ. ܟܰܕ ܡܰܘܕܰܥ ܗ̱ܘܳܐ܆ ܕܟܽܠ ܕܡܳܐ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ ܡܶܬܶܐܫܶܕ܆ ܟܰܕ ܢܳܩܶܦ ܠܰܕܡܳܐ ܗܰܘ ܩܰܕܡܳܝܳܐ ܕܶܐܡܪܳܐ ܕܡܶܛܽܠܳܬܰܢ ܘܰܐ‌ܠܳܗܳܐ܆ ܕܡܳܐ ܕܕܺܝܰܬܺܝܩܺܐ ܐܺܝܬܰܘܗ̱ܝ܆ ܕܡܰܥܗܶܕ ܠܫܽܘܒܩܳܢܳܐ ܕܰܚ̈ܛܳܗܶܐ ܗܰܘ ܕܡܶܢ ܨܠܺܝܒܳܐ ܢܳܚܶܬ^[37]. ܗܰܘ ܕܰܚܠܳܦܰܘܗ̱ܝ. ܙܳܕܶܩ ܕܟܽܠܗܶܝܢ ܢܶ݀ܚܰܫ܆ ܐܳܦܶܢ ܠܳܐ ܡܶܕܶܡ ܡܶܢ ܚܰܫ̈ܶܐ ܗܳܠܶܝܢ ܕܺܝܠܰܢ ܐܺܝܬ܆ ܕܠܽܘܩܒܰܠ ܗܰܘ ܫܳܘܶܐ^[38].

ܟܰܕ ܕܶܝܢ ܟܳܬܶܒ ܗ̱ܘܳܐ ܗܳܠܶܝܢ ܕܰܐܝܟ ܗܳܟܰܢ ܘܳܐܡܰܪ ܗ̱ܘܳܐ. ܗܽܘ ܡܫܰܒܰܚ ܒܟܽܠ ܣܳܗܕܳܐ ܪܽܘܡܰܢܽܘܤ܆ ܕܰܡܫܰܒܰܚ ܠܰܐܒܳܐ ܥܰܡ ܒܪܳܐ ܐܳܡܰܪ ܗ̱ܘܳܐ: ܟܰܕ ܡܰܘܕܰܥ ܠܫܰܘܝܽܘܬ ܐܽܘܣܺܝܰܐ ܘܰܠܫܰܘܝܽܘܬ ܐܺܝܩܳܪܳܐ ܕܰܬܪ̈ܰܝܗܽܘܢ܆ ܘܫܳܪܶܐ ܠܡܰܣܒܪܳܢܽܘܬܳܐ ܗܳܝ ܡܓܰܕܦܳܢܺܝܬܳܐ ܕܰܐܪܺܝܽܘܤ܆ ܕܰܒܗܳܝ ܕܰܒܝܰܕ ܒܪܳܐ ܒܰܠܚܽܘܕ ܡܫܰܒܚܳܢܳܐ ܠܰܐܒܳܐ܆ ܠܘܳܬ ܫܺܝܛܽܘܬܳܐ ܗܳܝ ܕܒܶܪ̈ܝܳܬܳܐ܆ ܓܳܪܕܳܐ ܘܡܰܚܬܳܐ ܠܳܗ̇ ܠܝܳܬܳܐ ܗܳܝ ܕܰܩܕܳܡ ܥܳܠ̈ܡܶܐ ܕܺܝܚܺܝܕܳܝܳܐ.

ܡܶܠܬܳܐ ܓܶܝܪ ܗܳܝ ܕܰܫܪܳܪܳܐ܆ ܘܳܐܦ ܥܰܡ ܒܪܳܐ ܡܰܣܩܳܐ ܫܽܘܒܚܳܐ ܠܰܐܒܳܐ܆ ܘܳܐܦ ܒܝܰܕ ܒܪܳܐ. ܥܰܡ ܒܪܳܐ ܡܰܢ܆ ܡܶܛܽܠ ܟܺܝܬ ܕܰܐ‌ܠܳܗܳܐ ܡܬܽܘܡܳܝܳܐ ܕܡܶܢ ܐܰ‌ܠܳܗܳܐ܆ ܘܢܽܘܗܪܳܐ ܠܳܐ ܙܰܒܢܳܝܳܐ ܘܠܳܐ ܡܶܬܬܰܚܡܳܐ ܕܡܶܢ ܢܽܘܗܪܳܐ܆ ܐܺܝܬܰܘܗ̱ܝ ܒܪܳܐ. ܒܝܰܕ ܒܪܳܐ ܕܶܝܢ ܬܽܘܒ܆ ܡܶܛܽܠ ܟܺܝܬ ܕܟܰܕ ܣܰܪܶܩ ܗܽܘ ܠܶܗ ܒܚܰܪܬܳܐ ܕܝܰܘ̈ܡܳܬܳܐ܆ ܫܠܺܝܚܳܐ ܘܪܺܝܫ ܟܳܗ̈ܢܶܐ ܕܬܰܘܕܺܝܬܳܐ ܕܺܝܠܰܢ ܐܶܫܬܰܡܰܗ^[39]܆ ܟܰܕ ܠܗܰܝܡܳܢܽܘܬܳܐ ܕܺܝܠܰܢ ܘܰܠܬܰܘܕܺܝܬܳܐ ܗܳܝ ܕܒܳܗ̇܆ ܡܟܰܗܶܢ ܠܳܗ̇^[40]. ܠܶܗ ܟܺܝܬ ܐܳܦ ܠܰܐܒܳܐ܆ ܘܰܒܗܳܕܶܐ ܡܶܨܥܳܝܳܐ ܕܺܝܠܰܢ ܘܕܰܐ‌ܠܳܗܳܐ ܐܶܬܚܙܺܝ.

ܐܶܠܳܐ ܝܳܪ̈ܽܘܬܶܐ ܘܰܡܚܰܪ̈ܟܫܳܢܶܐ^[41] ܕܦܰܩܪܽܘܬܶܗ ܕܰܐܪܺܝܽܘܤ܆ ܠܡܶܨܛܰܒܝܳܢܽܘܬܶܗ. ܘܰܠܡܶܬܢܰܚܬܳܢܽܘܬܶܗ ܕܡܶܛܽܠܳܬܰܢ܆ ܠܒܽܘܨܳܪܳܐ ܕܽܐܘܣܺܝܰܐ ܕܺܝܠܶܗ ܡܰܦܩܺܝܢ ܠܳܗ̇܆ ܘܕܰܐ‌ܠܳܗܽܘܬܶܗ ܗܳܝ ܫܰܘܝܰܬ ܒܺܐܝܩܳܪܳܐ ܕܰܠܘܳܬ ܐܰܒܳܐ. ܠܗܳܢܽܘܢ ܕܟܰܕ ܡܶܢ ܫܒܳܒܰܘ̈ܗ̱ܝ ܐܺܝܬܰܝܗܽܘܢ. ܗܽܘ ܣܳܗܕܳܐ. ܒܰܟ̈ܫܳܛܶܐ ܕܬܶܐܘܳܠܘܓܝܰܐ ܪܳܡܶܐ ܠܗܽܘܢ. ܗܰܘ ܕܳܐܦ ܠܠܶܫܳܢܳܐ ܕܺܝܠܰܢ. ܕܒܰܛܺܝܠܳܐ ܘܠܳܐ ܡܶܬܬܙܺܝܢܳܢܳܐ ܐܺܝܬܰܘܗ̱ܝ ܗ̱ܘܳܐ܆ ܗܳܪܟܳܐ ܩܰܕܡܳܐܺܝܬ ܐܰܙܺܝܥܶܗ܆ ܘܒܰܕܡܐ ܕܠܶܫܳܢܳܐ ܒܰܝܬܳܝܳܐ ܕܺܝܠܶܗ ܨܰܒܥܶܗ^[42]. ܘܟܽܠܶܗ ܗܳܢܳܐ܆ ܕܳܐܦ ܟܺܝܬ ܠܘܳܬ ܡܽܘܫܶܐ ܒܪܺܝܫܶܗ ܕܡܺܐܡܪܳܐ ܕܶܐ݀ܦܰܚܶܡ ܐܶܢܳܐ ܠܺܝ ܐܶܬܬܰܟܠܶܬ܆ ܟܰܕ ܥܰܡ ܪܰܒܽܘܬܶܗ ܕܶܐܘܰܢܓܶܠܺܝܽܘܢ ܐܰܟܚܕܳܐ ܐܶܬܬܪܺܝܡܶܬ܆ ܘܰܛܥܺܝܬ ܠܰܡܚܺܝܠܽܘܬܳܐ ܘܠܰܙܥܽܘܪܽܘܬܳܐ ܕܺܝܠܝ.

ܘܳܐܦ ܐܰܢ̱ܬܽܘܢ ܗܳܟܺܝܠ. ܟܰܕ ܡܶܢ ܦܣܳܩܳܐ ܘܰܕܡܳܐ ܕܠܶܫܳܢܶܗ ܕܣܳܗܕܳܐ ܡܶܬܟܰܚܕܺܝܢ ܐܢ̱ܬܽܘܢ܆ ܠܰܡܨܰܚܝܳܢܽܘܬܳܐ ܫܳܥܳܝܬܳܐ. ܠܪܽܘܚܩܳܐ ܡܶܢܟܽܘܢ ܛܪܽܘܕܘ܆ ܘܠܳܐ ܠܠܶܫܳܢ̈ܶܐ ܕܺܝܠܟܽܘܢ܆ ܘܰܠܣܶܦ̈ܘܳܬܳܐ ܗܳܠܶܝܢ ܕܡܶܣ̈ܬܰܡܩܳܢ ܒܰܕܡܳܐ ܕܰܐ‌ܠܳܗܳܐ ܗܰܘ ܕܶܐܬܒܰܣܰܪ܆ ܒܦܽܘܠܦܳܠܳܐ ܕܡܰܡܠܠܳܐ ܒܺܝܫܳܐ ܘܰܕܨܰܥܪ̈ܶܐ ܬܛܰܘܫܽܘܢ. ܒܕܰܠܩܽܘܒܠܳܐ ܕܶܝܢ܆ ܒܰܪܶܟܘ ܐܳܦ ܠܗܳܢܽܘܢ ܕܰܡܨܰܚܶܝܢ ܠܟܽܘܢ^[43]܆ ܡܛܽܠ ܕܰܠܗܳܕܶܐ ܐܶܬܩܪܺܝܬܽܘܢ܆ ܐܰܝܟܰܢܳܐ ܕܒܽܘܪܟܬܳܐ ܬܺܐܪܬܽܘܢ. ܘܒܰܕܚܽܘܩܝܳܐ ܕܫ̈ܺܐܕܶܐ ܗܳܢܽܘܢ ܫܟܺܝܪ̈ܶܐ܆ ܠܚܰܫ̈ܶܐ ܡܝܰܩܪ̈ܶܐ ܗܳܢܽܘܢ ܕܣܳܗ̈ܕܶܐ ܝܰܩܰܪܘ. ܗܳܕܶܐ ܓܶܝܪ ܐܺܝܬܰܘܗ̱ܝ ܕܽܘܟܪܳܢܳܐ ܫܰܪܺܝܪܳܐ ܘܚܰܓܳܐ ܕܩܰܕܺܝ̈ܫܶܐ܆ ܗܳܝ ܕܡܶܢܶܗ ܡܶܕܶܡ ܡܰܘܬܪܳܢܳܐ ܢܶ݀ܥܦܶܐ ܘܢܶ݀ܩܛܽܘܦ ܠܢܰܦ̈ܫܳܬܳܐ ܕܺܝܠܰܢ܆ ܠܬܶܫܒܽܘܚܬܳܐ ܕܰܡܫܺܝܚܳܐ ܐܰ‌ܠܗܳܐ ܗܰܘ ܕܰܒܝܰܕ ܟܽܠܗܶܝܢ ܡܥܰܕܪܳܢܳܐ. ܗܰܘ ܕܠܶܗ ܦܰܐܝܳܐ ܟܽܠ ܬܶܫܒܽܘܚܬܳܐ. ܘܺܐܝܩܳܪܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ܆ ܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܰܬܠܳܬܺܝܢ ܘܚܰܡܫܳܐ܀

ܐܦܣ̈ܝܐ. 4: 8 [1]

ܣܶܦܪܐ ܕܡܦܩܢܐ. 24: 9 ـ 10[2]

ܣܶܦܪܐ ܕܡܦܩܢܐ. 19: 6 [3]

ܓܶܫܦܶܬ[4]

ܐܫܥܝܐ. 11: 9 [5]

ܐ. ܛܝܡܬܐܘܣ. 2: 1 [6]

ܐܦܣ̈ܝܐ. 2: 13 [7]

ܣܶܦܪܐ ܕܡܦܩܢܐ. 24: 12 [8]

ܡܦܩܢܐ. 32: 15 [9]

ܪ̈ܗܘܡܳܝܐ. 7: 14[10]

ܡܦܩܢܐ. 24: 12 [11]

ܡܦܩܢܐ. 24: 14 [12]

ܥܒܪ̈ܝܐ. 8: 13 [13]

[14]ܙܳܕܶܩ ܠܡܶܕܰܥ ܕܒܠܕܥ ܕܰܒܠܶܫܳܢܳܐ ܝܰܘܢܳܝܳܐ܆ ܦܽܘܟ̈ܣܝܐ ܩܳܪܶܝܢ ܠܗܳܠܶܝܢ ܠܠܽܘܚ̈ܶܐ. ܦܘܟ̈ܣܝܐ ܕܶܝܢ ܐܺܝܬܰܘܗ̱ܝ ܟܰܕ ܡܶܬܦܰܫܰܩ ܠܣܽܘܪܝ̣ܝ̣ܐ܆ ܐܶܫܟܪ̈ܥܝܬܐ. ܘܶܐܫܟܪ̈ܝܥܳܬܐ ܩܳܪܶܝܢ ܗ̱ܘܰܘ ܠܗܶܝܢ ܠܠܽܘܚ̈ܶܐ܆ ܐܰܝܟ ܡܰܢ ܕܡܶܢ ܩܰܝܣܳܐ ܒܰܠܚܽܘܕ ܕܶܐܫܟܰܪܥܳܐ ܥܳܒܕܺܝܢ ܗ̱ܘܰܘ ܠܗܶܝܢ܆ ܘܡܶܢ ܩܰܝܣܳܐ ܐ̱ܚܪܺܢܳܐ ܠܐ. ܡܶܛܽܠ ܗܳܢܳܐ ܐܺܝܬ ܒܝܰܘܢܳܝܳܐ ܕܳܐܡܰܪ ܟܰܠܬܳܐ ܡܶܛܽܠ ܚܰܬܢܳܐ: ܟܰܪܣܳܐ ܕܺܝܠܶܗ: ܐܶܫܟܰܪܥܝܬܐ ܓܪܶܡܦܺܝܠܳܝܬܳܐ ܕܥܠ ܟܺܐܦܳܐ ܕܣܶܐܦܝܠܐ ܐܺܝܬܶܝܗ̇. ܗܳܢܰܘ ܕܶܝܢ ܠܽܘܚܳܐ ܕܰܓܪܡܦܝܠܐ.

ܬܶܫܒ̈ܚܳܬ ܬܶܫܒ̈ܚܳܬܳܐ. 5: 15 [15]

ܬܳܚܒܳܐ[16]

ܝܰܘ̈ܢܳܝܶܐ ܠܣܰܐܦܝܠܐ ܣܰܐܦ̊ܝܪܘ ܩܳܪܶܝܢ ܠܳܗ̇[17]

ܣܪܺܝܩܳܐܝܬ[18]

ܘܠܰܩܕܳܡ[19]

ܣܶܦܪܐ ܕܡܦܩܢܐ. 26: 30 [20]

ܦܪܟܣܝܣ. 11: 26 [21]

ܣܦܪܐ ܕܡܦܩܢܐ. 20: 3 ـ 4 [22]

ܬܶܢܝܳܢ ܢܳܡܽܘܣܳܐ. 5: 32 [23]

ܡܙܡܘܪ̈ܐ. 18. 37 ـ 38 [24]

ܡܬܝ. 5: 48 [25]

ܡܒܛܠ[26]

ܢܶܫܬܒܶܩ[27]

ܐ. ܩܘܪ̈ܝܢܬܝܐ. 1. 24 [28]

ܡܙܡܘܪ̈ܐ. 78: 11 [29]

[30]ܒܠܫܢܐ ܝܘܢܝܐ ܟܳܬܒ ܗܳܟܰܢ. ܗܰܕܳܡ̈ܶܐ ܕܦ̊ܰܪܠܰܡܰܢܛܳܐ.Parlament

ܟܕ ܠܐ ܚܙܳܗ̇[31]

ܛܥܝܐ ܠܶܗ[32]

ܠܠܶܫܳܢܳܐ ܐܳܡܰܪ[33]

ܕܰܬܡܺܝܗ[34]

ܡܬܝ. 3: 11  ܐܦ ܠܘܩܐ. 3: 16 [35]

ܕܡܶܣ̈ܬܰܟܠܳܢ[36]

ܡܶܬܝܰܒܰܠ[37]

ܦܳܚܶܡ[38]

ܥܶܒܪ̈ܝܐ. 2: 1 [39]

ܠܢܰܦܫܶܗ[40]

ܡܠܰܟ̈ܚܰܝ ܦܳܬܽܘܪ̈ܶܐ[41]

ܤܰܛܡܶܗ[42]

ܠܘܩܐ. 6: 28 [43]