ܡܺܐܡܪܳܐ ܕܰܬܠܳܬܺܝܢ ܘܰܐܪܒܥܳܐ.

ܡܶܢ ܒܳܬܰܪ ܕܶܐܬܚܰܘܝܰܬ ܕܰܡܨܰܥܪܳܐܺܝܬ ܐܶܬܪܟܶܢ ܒܺܝܛܰܐܠܺܝܰܐܢܽܘܤ ܗܰܘ ܫܟܺܝܪ ܫܡܳܐ ܡܳܪܽܘܕܳܐ܆ ܟܰܕ ܥܠܶܝܗ̇ ܕܗܳܕܶܐ ܗܽܘ ܟܢܽܘܫܝܳܐ ܐܶܫܬܰܡܠܺܝ.

34: ܗܳܝ ܕܥܰܠ ܙܳܟ̈ܘܳܬܳܐ ܕܡܰܠ̈ܟܶܐ ܫܰܦܺܝܪ̈ܰܝ ܕܶܚܠܬܳܐ ܢܶܚܕܶܐ܆ ܕܰܢܝܰܩܰܪ ܠܰܐܠܳܗܳܐ ܐܺܝܬܶܝܗ̇܆ ܗܰܘ ܕܺܐܝܬܰܘܗ̱ܝ ܡܳܪܳܐ ܕܙܳܟܽܘܬܳܐ ܘܰܡܕܰܒܪܳܢܳܐ. ܘܝܰܬܺܝܪܳܐܺܝܬ ܐܶܡܰܬܝ ܕܗܽܘ ܫܽܘܡܠܳܝܳܗ̇ ܕܙܳܟܽܘܬܳܐ ܤܛܰܪ ܡܶܢ ܕܡ̈ܶܐ ܩܳܐܶܡ܆ ܟܰܕ ܠܚܰܝܠܳܐ ܠܳܐ ܡܶܙܕܰܟܝܳܢܳܐ^[1] ܒܰܠܚܽܘܕܰܘܗ̱ܝ ܗܰܘ ܕܡܶܢ ܠܥܶܠ ܡܰܘܕܰܥ. ܡܶܛܠܗܳܕܶܐ. ܐܳܦ ܐܶܢܳܐ ܠܰܡܨܰܥܬܳܐ ܥܳܒܪܳܐ܆ ܐܰܝܟܰܢܳܐ ܕܰܐ݀ܥܶܗܕܟܽܘܢ ܒܰܠܚܽܘܕ ܡܶܢ ܟ̈ܬܳܒܶܐ ܟܳܗ̈ܢܳܝܶܐ܆ ܠܬܶܕܡܪ̈ܳܬܳܐ ܬܡܺܝ̈ܗܳܬܳܐ ܕܰܐ‌ܠܳܗܳܐ ܗܳܠܶܝܢ ܕܕܳܡ̈ܝܳܢ ܠܗܳܢܶܝܢ ܕܰܠܘܳܬܰܢ ܐܶܬܕܰܒܰܪ̈ܶܝܢ. ܘܰܐ݀ܥܺܝܪ ܠܟܽܠ ܦܽܘܡܳܐ ܠܘܳܬ ܬܶܫܒܽܘܚܬܳܐ܆ ܘܰܠܘܳܬ ܩܽܘܠܳܣܳܐ ܫܰܠܡܳܐ ܘܰܨܠܽܘܬܳܐ.

ܚܶܙܰܩܝܳܐ ܓܶܝܪ ܗܰܘ ܪܳܚܶܡ ܐܰ‌ܠܳܗܳܐ ܡܰܠܟܳܐ ܕܽܐܘܪܫܠܶܡ^[2]܆ ܟܕ ܝܽܗ̱ܘ̈ܕܳܝܶܐ ܠܒܰܪ ܡܶܢ ܢܳܡܽܘܣ̈ܶܐ ܐܰܒܳܗ̈ܳܝܶܐ ܐܶܬܕܰܒܰܪܘ܆ ܘܰܠܦܽܘܠܚܳܢ ܬܶܫܡܶܫܬܳܐ ܗܰܘ ܕܡܶܢ ܡܽܘܫܶܐ ܐܶܬܦܩܶܕܘ̱܆ ܘܠܰܡܕܰܟܝܳܢܽܘܬܳܐ ܗܳܝ ܕܫܰܪܟܳܐ ܐܰܫܺܝܛܘ ܘܡܰܣܠܰܝܬܳܐ ܣܳܡܽܘܗ̇^[3]܆ ܘܰܠܘܳܬ ܡܢܺܝܚܳܢܽܘܬܳܐ ܗܳܝ ܕܫ̈ܺܐܕܶܐ ܫܪܰܥܘ ܢܚܶܬܘ܆ ܐܰܝܟܰܢܳܐ ܕܳܐܦ ܒܗܰܝܟܠܳܐ ܗܰܘ ܕܰܐ‌ܠܳܗܳܐ. ܘܰܒܒܰܝܬܳܐ ܗܰܘ ܕܰܨܠܽܘܬܳܐ܆ ܒܗܰܘ ܠܳܐ ܡܶܬܓܰܫܦܳܢܳܐ ܘܕܰܠܗܳܢܽܘܢ ܕܠܳܐ ܕܟܶܝܢ ܠܳܐ ܡܶܬܚܰܙܝܳܢܳܐ܆ ܢܶܙܡܪܽܘܢ ܙܡܺܝܪ̈ܳܬܳܐ ܚܰܢ̈ܦܳܝܳܬܳܐ ܕܫ̈ܺܐܕܶܐ܆ ܘܢܶܥܠܽܘܢ ܠܶܗ. ܘܢܶܩܒܥܽܘܢ ܒܶܗ ܟܽܠ ܡܽܘܢ ܕܗܽܘ ܦܬܰܟܪܳܐ ܥܒܺܝܕ ܒܺܐܝ̈ܕܰܝܳܐ ܘܰܓܒܽܘܠܝܳܐ ܕܕܶܡ̈ܘܳܬܳܐ܆ ܟܰܕ ܥܰܠ ܗܳܢܽܘܢ ܕܗܳܟܰܢܳܐ ܛܳܥܶܝܢ ܗ̱ܘܰܘ ܕܰܡܰܥ ܘܰܒܟܳܐ܆ ܘܰܠܘܳܬ ܫܡܰܝܳܐ ܬܠ̣ܳܐ ܥܰܝܢܰܘ̈ܗ̱ܝ ܒܪܶܚܡܰܬ ܥܰܡܠܳܐ ܘܚܰܨܺܝܦܳܐܝܬ܆ ܥܰܡ ܥܰܝܢܳܐ ܕܬܰܪܥܺܝܬܶܗ ܐܰܟܚܕܳܐ܆ ܘܟܽܠܶܗ ܬܰܗܺܝܪܳܐ ܗܘ̣ܳܐ܆ ܘܶܐܬܚܰܝܰܠ ܡܶܢ ܗܰܘ ܕܰܒܗܳܠܶܝܢ ܕܗܳܟܰܢܳܐ ܡܨܰܠܶܝܢ ܫܳܪܶܐ ܘܰܡܕܰܝܰܪ܆ ܠܗܰܝܟܠܳܐ ܡܰܢ ܕܰܟܺܝ ܡܶܢ ܫܳܢܝܽܘܬܳܐ ܗܳܝ ܫܺܐܕܳܢܳܝܬܳܐ. ܐܰܥܗܶܕ ܕܶܝܢ ܠܰܒ̈ܢܰܝ ܫܰܪܒܬܶܗ ܠܠܽܘܚ̈ܶܐ ܗܳܠܶܝܢ ܟܬܺܝ̈ܒܳܬܳܐ ܡܶܢ ܐܰ‌ܠܳܗܳܐ܆ ܘܰܠܓܶܠ̈ܝܳܢܶܐ ܗܳܢܽܘܢ ܫܡܰܝܳܢ̈ܶܐ܆ ܘܠܰܐܠܳܗܳܐ ܗܰܘ ܕܥܰܠ ܛܽܘܪܳܐ ܕܣܺܝܢܰܝ ܢܚܶܬ ܘܡܰܠܶܠ ܥܰܡܗܽܘܢ. ܘܟܰܕ ܠܟܳܗ̈ܢܶܐ ܒܨܶܒܬܳܐ ܐܰܩܺܝܡ ܕܣܰܓܺܝ ܫܰܦܺܝܪܳܐܺܝܬ ܡܢܰܩܕܺܝܢ 222ܘܚ̇ܕܝܡܝܢ ܡܕܰܟܶܝܢ. ܕܰܢܕܰܒܚܘܢ ܐܰܝܟ ܢܳܡܽܘܣܳܐ ܦܳܩܶܕ ܗ̱ܘܳܐ ܠܗܽܘܢ܆ ܘܕܰܢܚܰܣܽܘܢ ܘܰܢܪܰܥܽܘܢ ܠܰܐܠܳܗܳܐ܆ ܘܕܰܢܥܰܕܥܕܽܘܢ ܥܺܐܕܳܐ ܗܰܘ ܕܦܣܟܐ܆ ܩܰܝ̣ܺܝ̣ܡ ܗ̱ܘ̣ ܓܶܝܪ ܙܰܒܢܳܐ.

ܘܟܰܕ ܗܳܠܶܝܢ ܗܳܟܰܢܳܐ ܐܶܫܬܰܡ̈ܠܺܝܶܢ܆ ܠܳܐ ܣܰܝܒܰܪ ܕܰܝܘܳܐ ܗܰܘ ܚܰܣܳܡܳܐ܆ ܗܰܘ ܕܚܳܣܶܡ ܒܰܢ ܥܰܠ ‌ܐܰܦ̈ܰܝ ܒܰܝܬܳܝܽܘܬܳܐ ܕܰܠܘܳܬ ܐܰ‌ܠܳܗܳܐ܆ ܘܨܳܒܶܐ ܕܡܶܢ ܗܳܕܶܐ ܢܶܦܪܽܘܫ ܠܰܢ܆ ܡܶܢ ܗܳܝ ܕܗܽܘ ܨܶܒܝܳܢܳܐܺܝܬ ܐܰܪܚܶܩ ܗܽܘ ܠܶܗ. ܡܶܛܽܠܗܳܕܶܐ. ܘܰܕܢܰܚܶܬ ܠܰܢ ܡܶܢ ܬܰܡܳܢ. ܪܰܒܬܳܐ ܐܺܝܬܶܝܗ̇. ܐܰܝܟ ܕܡܶܬܚܪܶܐ܆ ܘܰܟܡܳܐ ܕܰܚܢܰܢ ܠܡܶܣܰܩ ܠܘܳܬܳܗ̇ ܝܳܨܦܺܝܢ ܚ̱ܢܰܢ.

ܐܰܩܺܝܡ ܓܶܝܪ ܥܠܰܘܗ̱ܝ ܠܡܰܠܟܳܐ ܕܳܐܬܽܘܪ̈ܳܝܶܐ^[4]܆ ܕܣܽܘܓܳܐܐ ܕܠܳܐ ܣܳܟܳܐ ܕܡܰܩܪ̈ܒܳܢܶܐ ܡܙܰܝ̈ܢܶܐ ܕܒܺܝܪ ܗ̱ܘܳܐ ܥܰܡܶܗ܆ ܫܳܒܶܩ ܗ̱ܘܳܐ ܕܶܝܢ ܗܳܕܶܐ ܐܰ‌ܠܳܗܳܐ܆ ܗܰܘ ܣܳܐܶܡ ܐܰܓܽܘ̈ܢܶܐ ܕܫܰܦܺܝܪ̈ܰܝ ܕܶܚܠܬܳܐ܆ ܗܰܘ ܕܪܳܚ̣ܡܳܐ ܠܶܗ ܕܰܒܢܶܣܝܳܢܳܐ ܢܶܒܩܶܝܗ̇ ܠܰܡܝܰܬܪܽܘܬܳܐ ܐܰܝܟ ܕܰܒܟܽܘܪܳܐ܆ ܘܰܠܦܽܘܬ ܪܰܒܽܘܬܳܐ ܕܕܰܪܶܗ ܕܒܺܝܫܳܐ. ܢܶܬܩܽܘܠ ܠܩܽܘܒܠܳܗ̇ ܠܗܳܢܽܘܢ ܕܠܳܐ ܡܶܨܛܰܠܝܳܢܳܐܺܝܬ ܡܶܬܟܰܬܫܺܝܢ܆ ܟܰܝ̈ܠܶܐ ܕܰܡܣܰܝܒܪܳܢܽܘܬܳܐ ܘܰܕܚܰܝܠܳܐ.

ܐܳܦ ܟܺܝܬ ܪܰܒܫܳܩܳܐ^[5] ܗܰܘ ܕܩܰܕܡܳܝ̈ܳܬܳܐ ܡܰܝܬܶܐ ܗ̱ܘܳܐ ܕܪ̈ܺܝܫܰܝ ܛܶܟ̈ܣܶܐ ܘܰܕܪ̈ܰܒܰܝ ܚܰܝ̈ܠܶܐ ܗܳܢܽܘܢ ܕܒܰܪܒܪܳܝܳܐ ܗܰܘ܆ ܟܰܕ ܥܰܡ ܚܰܝܠܳܐ ܣܰܓܺܝܳܐܐ ܠܘܳܬ ܫܽܘܪܳܐ ܕܽܐܘܪܫܠܶܡ ܐܶܬܩܰܪܰܒ܆ ܠܗܳܢܽܘܢ ܕܥܰܠ ܥܳܥܝ̈ܳܬܳܐ ܕܫܽܘܪܳܐ ܩܳܝܡܺܝܢ ܗ̱ܘܰܘ ܡܰܙܥܶܩ ܗ̱ܘܳܐ܆ ܕܠܳܐ ܙܳܕܶܩ ܠܟܽܘܢ ܕܠܽܘܩܒܰܠ ܡܰܠܟܳܐ ܕܺܝܠܟܽܘܢ ܪܰܒܳܐ ܐܺܝ̈ܕܰܝܳܐ ܬܪܺܝܡܽܘܢ ܡܳܪܽܘܕܳܐܺܝܬ. ܐܶܠܳܐ ܕܰܠܘܳܬ ܐܰܬܪܳܐ ܕܦܳܪ̈ܣܳܝܶܐ ܬܫܰܢܽܘܢ܆ ܘܬܶܪܚܩܽܘܢ ܡܶܢ ܐܰܬܪܳܐ ܗܳܢܳܐ ܕܺܝܠܟܽܘܢ^[6]. ܐܰܘ ܡܶܢ ܚܰܣܺܝܪܽܘܬ ܪܶܥܝܳܢܳܐ ܒܰܪܒܪܳܝܬܳܐ. ܥܰܡ ܗܳܢܽܘܢ ܕܠܳܐ ܥܕܰܟܺܝܠ ‌ܐܰܩܪܶܒ܆ ܠܘܳܬ ܗܳܠܶܝܢ ܐܰܝܟ ܕܰܠܘܳܬ ܫܰܒ̈ܝܶܐ ܡܡܰܠܶܠ ܗ̱ܘܳܐ. ܟܰܕ ܒܰܙܒܰܢ ܡܰܢ ܠܣܽܘܓܳܐܐ ܕܚܰܝܠܳܐ܆ ܒܰܙܒܰܢ ܕܶܝܢ ܠܣܽܘܓܳܐܐ ܕܪ̈ܰܟܫܳܐ ܡܚܰܘܶܐ ܗ̱ܘܳܐ܆ ܘܟܰܕ ܨܳܒܶܐ ܗ̱ܘܳܐ ܕܰܒܕܶܚܠܬܳܐ ܢܙܺܝܥ ܐܶܢܽܘܢ.

ܟܰܕ ܕܶܝܢ ܟܽܠ ܚܰܕ ܡܶܢܗܽܘܢ ܕܠܳܐ ܩܶܢܛܳܐ ܘܫܰܠܝܳܐܺܝܬ ܥܠܰܘܗ̱ܝ ܕܫܽܘܪܳܐ ܩܳܐܶܡ ܗ̱ܘܳܐ܆ ܘܰܠܨܶܒܪ̈ܰܘܗ̱ܝ ܕܗܰܘ ܠܡܶܚܕܳܐ ܐܶܡܰܪ: ܘܦܽܘܡܶܗ ܣܟܰܪ ܒܫܶܬܩܳܐ܆ ܘܰܠܘܳܬ ܐܰ‌ܠܳܗܳܐ ܚܳܐܰܪ ܗ̱ܘܳܐ܆ ܘܰܠܥܽܘܕܪܳܢܳܐ ܕܡܶܢ ܠܥܶܠ ܡܣܰܟܶܐ ܗ̱ܘܳܐ܆ ܕܰܐܝܟ ܗܳܠܶܝܢ ܓܶܝܪ ܐܺܝܬܰܝܗܽܘܢ ܗ̱ܘܰܘ ܦܽܘܪ̈ܓܳܠܰܘܗ̱ܝ ܘܦܽܘܩ̈ܕܳܢܰܘܗ̱ܝ ܕܪܳܚܡ ܐܰ‌ܠܳܗܳܐ ܡܰܠܟܳܐ ܚܶܙܰܩܝܳܐ܆ ܗܳܠܶܝܢ ܕܰܠܘܳܬ ܥܰܡܳܐ ܘܗܳܠܶܝܢ ܕܰܠܘܳܬ ܪ̈ܰܒܰܝ ܚܰܝ̈ܠܶܐ.

ܗܳܝܕܶܝܢ ܡܶܟܺܝܠ ܗܽܘ ܒܰܪܒܪܳܝܳܐ܆ ܠܠܶܫܳܢܳܐ ܗܰܘ ܡܫܰܩܠܳܐ. ܠܘܳܬ ܓܽܘܕܳܦܳܐ ܕܥܰܠ ‌ܐܰ‌ܠܳܗܳܐ ܫܰܢܺܝ ܐܰܥܒܕܶܗ܆ ܐܰܝܟ ܕܥܰܠ ܡܚܺܝܠܳܐ ܘܰܕܠܳܐ ܣܳܟ ܡܨܶܐ ܠܰܡܦܰܨܳܝܽܘ ܠܗܳܢܽܘܢ ܕܣܰܒܰܪܘ ܥܠܰܘܗ̱ܝ. ܘܟܰܕ ܗܳܠܶܝܢ ܡ̈ܶܠܶܐ ܟܬܰܒ ܒܰܟܬܳܒܳܐ܆ ܫܰܕܰܪ ܠܘܳܬ ܚܶܙܰܩܝܳܐ. ܗܰܘ ܕܶܝܢ ܟܰܕ ܩܪܳܐ. ܐܰܝܟܰܢܳܐ ܕܳܐܡܰܪ ܟܬܳܒܳܐ ܗܰܘ ܟܳܗܢܳܝܳܐ. ܣܠܶܩ ܠܒܰܝܬܶܗ ܕܡܳܪܝܳܐ܆ ܗܰܘ ܕܡܶܢ ܦܽܘܠܚܳܢܳܐ ܘܬܶܫܡܶܫܬܳܐ ܗܳܝ ܕܰܦܬܰܟܪ̈ܶܐ ܐܰܫܺܝܓ ܘܕܰܟܝܶܗ ܗ̱ܘܳܐ܆ ܘܦܰܬܚܶܗ ܗ̱ܘܳܐ ܩܕܳܡ ܡܳܪܝܳܐ. ܘܟܰܕ ܒܟܳܐ ܡܰܪܺܝܪܳܐܺܝܬ܆ ܘܶܐܡܰܪ ܡ̈ܶܠܶܐ ܝܺܕܺܝ̈ܥܳܬܳܐ ܘܨܰܠܺܝ܆ ܠܚܰܪܬܳܐ ܐܰܝܬܺܝ ܒܳܬܰܪܗܶܝܢ܆ ܢܶܕܥ̈ܳܢ ܟܽܠܗܶܝܢ ܡܰܠ̈ܟܘܳܬܳܐ ܕܰܐܪܥܳܐ܆ ܕܰܐܢ̱ܬ ܐܺܝܬܰܝܟ ܡܳܪܝܳܐ ܐܰ‌ܠܳܗܳܐ ܒܰܠܚܽܘܕܰܝܟ. ܘܫܰܡܥܶܗ ܗܰܘ ܕܰܩܕܳܡ ܕܢܶܬܩܪܶܐ ܩܰܪܺܝܒ^[7].

ܒܳܬܰܪܟܶܢ. ܠܶܠܝܳܐ ܒܰܡܨܰܥܬܳܐ܆ ܘܰܢܦܰܩ ܡܰܠܰܐܟܶܗ ܕܡܳܪܝܳܐ. ܘܩܰܛܶܠ ܡܶܢ ܡܰܫܪܺܝܬܳܐ ܕܳܐܬܽܘܪ̈ܳܝܶܐ. ܡܳܐܐ ܘܰܬܡܳܢܺܝܢ ܘܚܰܡܫܳܐ ܐܰ‌ܠ̈ܦܺܝܢ. ܘܩܰܕܶܡܘ ܒܨܰܦܪܳܐ. ܘܶܐܫܟܰܚܘ ܠܟܽܠܗܽܘܢ ܦܰܓܪ̈ܶܐ ܡܺܝ̈ܬܶܐ^[8].

ܕܰܐܝܟ ܗܳܢܳܐ ܩܶܛܠܳܐ ܐܶܫܟܚܰܬ ܠܡܶܥܒܰܕ܆ ܚܕܳܐ ܨܠܽܘܬܳܐ ܕܡܶܢ ܬܰܪܥܺܝܬܳܐ ܪܳܚܡܰܬ ܐܰ‌ܠܳܗܳܐ ܫܶܘܚܰܬ ܗ̱ܘܳܬ܆ ܘܰܒܕܶܡ̈ܥܶܐ ܡܶܨܛܰܒܥܳܐ ܗ̱ܘܳܬ. ܐܶܠܳܐ ܗܳܝ ܕܠܺܝ ܒܨܺܝܪ ܩܰܠܺܝܠ ܥܒ̣ܰܪܬܰܢܝ ܗ̱ܘܳܬ. ܡܶܢ ܓܽܘ̈ܕܳܦܰܘܗ̱ܝ ܕܪܰܒܫܳܩܳܐ܆ ܟܰܕ ܓܶܝܪ ܣܺܝܡ ܗ̱ܘܳܐ ܗܽܘ ܪܰܫܺܝܥܳܐܺܝܬ ܡܶܛܽܠ ‌ܐܰ‌ܠܳܗܳܐ ܕܟܽܠ܆ ܗܰܘ ܕܺܐܝܬܰܘܗ̱ܝ ܗܽܘ ܟܰܕ ܗܽܘ ܐܳܦ ܕܺܝܠܳܢܳܐܺܝܬ ܐܰ‌ܠܳܗܳܐ ܕܺܐܝܣܪܳܐܶܝܠ܆ ܡܶܛܽܠ ܝܰܬܺܝܪܽܘܬܳܐ ܕܺܝܕܰܥܬܳܐ ܕܰܐ‌ܠܳܗܳܐ܆ ܣܳܥܶܐ ܕܠܰܛܢܳܢܶܗ ܐܰ‌ܠܳܗܳܝܳܐ ܕܚܶܙܰܩܝܳܐ ܡܰܠܟܳܐ ܠܡܶܥܫܰܩ. ܟܰܕ ܐܳܡܰܪ: ܐܶܢܕܶܝܢ ܐܳܡܪܺܝܢ ܐܢ̱ܬܽܘܢ ܠܘܳܬܝ܆ ܕܥܰܠ ܡܳܪܝܳܐ ܐܰ‌ܠܳܗܳܐ ܕܺܝܠܰܢ ܬܟܺܝܠܺܝܢܰܢ܆ ܐܳܦ ܟܺܝܬ ܗܳܢܳܐ ܐܺܝܬܰܘܗ̱ܝ܆ ܗܰܘ ܕܰܥܩܰܪ ܚܶܙܰܩܝܳܐ ܥ̈ܠܰܘܳܬܶܗ ܘܡܰܕܒ̈ܚܰܘܗ̱    ܝ܆ ܘܶܐܡܰܪ ܠܺܝܗܽܘܕܳܐ ܘܠܽܐܘܪܶܫܠܶܡ܆ ܕܰܩܕܳܡ ܡܰܕܒܚܳܐ ܗܳܢܳܐ ܣܓܽܘܕܘ^[9]. ܘܟܰܕ ܛܳܒ ܟܺܝܬ܆ ܕܰܐ‌ܠܳܗ̈ܶܐ ܗܳܢܽܘܢ ܕܰܓܳܠ̈ܰܝ ܫܡܳܐ ܐܰܥܒܰܪ ܗ̱ܘܳܐ ܚܶܙܰܩܝܳܐ ܥ̈ܠܰܘܳܬܳܐ܆ ܛܽܘܪ̈ܶܐ ܐܳܡܰܪ ܐ̱ܢܳܐ ܘܪ̈ܳܡܳܬܳܐ܆ ܗܳܠܶܝܢ ܕܰܥܠܰܝܗܽܘܢ ܡܕܰܒܚܺܝܢ ܗ̱ܘܰܘ ܗܳܢܽܘܢ ܫܳܛܰܝ̈ܳܐ܆ ܘܠܺܐܝܩܳܪܶܗ ܕܡܰܕܒܚܳܐ ܘܰܠܣܶܓܕܬܳܐ ܘܦܽܘܠܚܳܢܳܐ ܕܡܶܢ ܗܳܪܟܳܐ܆ ܐܰܥܒܰܪ ܗ̱ܘܳܐ ܠܘܳܬ ܫܪܳܪܳܐ ܕܰܐ‌ܠܳܗܳܐ ܒܰܠܚܽܘܕܰܘܗ̱ܝ܆ ܘܰܠܘܳܬ ܫܡܳܐ ܗܰܘ ܠܳܐ ܡܫܰܘܬܦܳܐ.

ܕܰܐܝܟ ܗܳܢܳܐ ܐܶܬܚܙܺܝ ܠܰܢ ܐܳܦ ܒܺܝܛܰܐܠܺܢܰܐܢܽܘܤ ܗܰܘ ܫܟܺܝܪ ܫܡܳܐ. ܟܰܕ ܓܶܝܪ ܒܰܕܡܽܘܬ ܝܽܘܪܰܒܥܰܡ ܗܰܘ ܥܰܒܕܳܐ ܕܰܫܠܶܝܡܽܘܢ܆ ܗܰܘ ܕܡܳܪܽܘܕܽܘܬܳܐ ܠܽܘܩܒܰܠ ܡܳܪܶܗ ܐܶܬܟܪܶܟ ܘܠܰܛܪܽܘܢܽܘܬܳܐ ܪܰܓ^[10]܆ ܘܰܦܝܳܣܳܐ ܥܒܰܕ ܠܗܳܢܽܘܢ ܕܰܬܚܶܝܬ ܐܺܝܕܶܗ܆ ܕܰܠܥܶܓ̈ܠܶܐ ܕܕܰܗܒܳܐ ܗܳܠܶܝܢ ܕܰܒܫܳܡܪܺܝܢ ܢܶܣܓܕܽܘܢ܆ ܒܰܡܨܺܝܕܬܳܐ ܝܽܗ̱ܘܕܳܝܬܳܐ ܘܰܒܦܰܚܳܐ ܗܰܘ ܕܰܬܪܶܝܢ ܟܝܳܢ̈ܶܐ ܐܶܬܬܨܺܝܕ܆ ܘܰܒܦܽܘܠܳܓܳܐ ܪܰܫܺܝܥܳܐ ܕܗܰܘ ܚܰܕ ܘܒܰܠܚܽܘܕܰܘܗ̱ܝ ܡܫܺܝܚܳܐ܆ ܠܗܰܘ ܕܡܶܢ ܫܶܪ̈ܫܶܐ ܐܰܪܺܝܡܶܗ. ܫܰܦܺܝܪ ܕܶܚܠܬܳܐ ܡܰܠܟܳܐ܆ ܟܰܕ ܚܰܕ ܟܝܳܢܳܐ ܕܰܡܒܰܣܰܪ ܕܰܐ‌ܠܳܗܳܐ ܡܶܠܬܳܐ ܡܰܘܕܶܐ. ܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ܆ ܕܰܡܢܰܦܫܰܢ ܒܢܰܦܫܳܐ ܡܠܺܝܠܬܳܐ ܟܺܝܬ ܘܡܶܬܗܰܘܢܳܢܺܝܬܳܐ ܤܛܰܪ ܡܶܢ ܟܽܠܳܗ̇ ܚܛܺܝܬܳܐ܆ ܐܰܝܟܰܢܳܐ ܕܗܰܝܡܳܢܽܘܬܳܐ ܫܠܺܝܚܳܝܬܳܐ ܡܰܟܪܙܳܐ ܘܡܰܫܠܡܳܐ܆ ܗܰܘ ܐܳܬܽܘܬܳܐ ܡܶܕܶܡ ܘܰܚܙܳܬܳܐ ܫܺܝܛܬܳܐ܆ ܟܰܕ ܠܰܫܪܳܪܳܐ ܐܰܝܟ ܗܰܘ ܪܰܒܫܳܩܳܐ ܥܳܫܶܩ܆ ܡܰܪܫܽܘܬܳܐ^[11] ܥܰܒܕܳܗ̇ ܠܫܰܦܺܝܪܽܘܬ ܕܶܚܠܬܳܐ܆ ܟܰܕ ܡܶܣܬܰܩܰܡ^[12] ܕܢܶܗܘܶܐ ܣܢܺܐܓܪܳܐ ܕܕܶܚܠܬܳܐ ܕܰܟܪ̈ܺܝܣܛܝܳܢܶܐ܆ ܗܰܘ ܓܰܢܳܒܳܐ ܕܡܰܪ̈ܗܳܛܶܐ ܗܳܠܶܝܢ ܕܠܳܐ ܙܳܕܩܺܝܢ ܠܶܗ܆ ܘܰܕܒܳܒܽܘܢܳܐ ܕܫܳܡܽܘܢܳܐ ܠܣܰܓܺܝ̈ܶܐܐ ܕܟܰܦܢܺܝܢ ܘܡܶܙܕܰܒ̈ܢܳܢܶܐ ܕܒܰܩܨܳܝܳܐ ܕܠܰܚܡܳܐ ܢܓܰܕ ܠܘܳܬܶܗ. ܗܳܢܽܘܢ ܟܺܝܬ ܕܡܶܚܕܳܐ ܩܰܠܺܝܠܳܐܺܝܬ ܫܰܒܩܽܘܗ̱ܝ ܡܶܢ ܒܳܬܰܪ ܕܰܣܒܰܥܘ܆ ܘܶܐܫܬܰܘܕܰܥܘ ܠܡܳܪܽܘܬܳܐ ܗܳܝ ܫܰܪܺܝܪܬܳܐ. ܘܓܶܕܫܰܬ ܠܶܗ. ܗܳܝ ܕܡܶܢ ܐܶܪܰܡܝܳܐ ܢܒܺܝܳܐ ܫܰܦܺܝܪ ܩܰܕܡܰܬ ܐܶܬܰܐܡܪܰܬ: ܩܥܳܐ ܚܶܓܠܳܐ܆ ܟܰܢܶܫ ܗܳܠܶܝܢ ܕܠܳܐ ܝܺܠܶܕ܆ ܟܰܕ ܥܳܒܶܕ ܥܽܘܬܪܳܐ ܕܺܝܠܶܗ ܠܰܘ ܥܰܡ ܕܺܝܢܳܐ. ܒܦܶܠܓܽܘܬ ܚܰܝܰܘ̈ܗ̱ܝ ܢܶܫܒܩܽܘܢܳܝܗ̱ܝ ܆ ܘܠܰܐܚܪ̈ܳܝܳܬܶܗ ܢܶܗܘܶܐ ܣܰܟܠܳܐ^[13].

ܐܶܠܳܐ ܒܪܰܡ. ܡܰܠܟܳܐ ܗܰܘ ܕܰܐܝܟ ܕܒܰܫܪܳܪܳܐ ܪܳܚܶܡ ܠܰܡܫܺܝܚܳܐ ܘܝܰܬܺܝܪ ܚܰܟܺܝܡܳܐ. ܠܳܐ ܗ̱ܘܳܐ ܐܰܝܟ ܨܶܒܝܳܢܶܗ ܣܰܟܠܳܐ ܥܒܰܕ ܠܶܗ. ܐܶܠܳܐ ܟܰܕ ܐܶܫܟܚܶܗ ܓܰܒܪܽܘܢܳܐ^[14] ܡܶܕܶܡ ܙܥܽܘܪܽܘܢܳܐ܆ ܠܶܗ ܐܳܡܰܪ ܐ̱ܢܳܐ ܠܗܳܢܳܐ ܕܡܶܬܩܪܶܐ ܒܺܝܛܰܐܠܺܝܰܐܢܽܘܤ܆ ܘܕܺܐܝܬ ܠܶܗ ܟܽܘܢܳܝܳܐ ܕܝܰܬܺܝܪ ܐܰܪܺܝܟ ܛܳܒ ܡܶܢ ܙܥܽܘܪܽܘܬܳܐ ܕܦܰܓܪܶܗ܆ ܘܕܰܡܠܶܐ ܒܺܝܫܽܘܬܳܐ ܒܰܕܡܽܘܬ ܩܰܐܪ̈ܩܽܘܦܰܐܤ܆ ܕܠܳܐ ܫܳܘܝܳܐ ܠܬܰܪܥܺܝܬܶܗ ܗܳܝ ܡܰܠܟܳܝܬܳܐ ܘܪܰܒܰܬ ܦܰܐܝܽܘܬܳܐ. ܚܰܫܒܳܗ̇܆ ܠܗܳܝ ܕܰܢܪܺܝܡ ܩܰܪܩܰܦܬܶܗ ܕܗܳܢܳܐ. ܐܶܠܳܐ ܠܘܳܬ ܐܰܬܪ̈ܰܘܴܬܳܐ ܒܰܪ̈ܳܝܶܐ ܕܬܰܪ̈ܰܐܩܶܐ ܫܰܕܪܶܗ܆ ܕܬܰܡܳܢ. ܐܰܘ ܢܶܬܬܘܶܐ ܥܰܠ ܒܺܝܫܽܘܬܶܗ ܐܰܘ ܢܶܬܩܛܶܠ.

ܡܙܰܡܰܪ ܓܶܝܪ ܗܰܘ ܪܳܚܶܡ ܐܰ‌ܠܗܳܐ ܫܰܪܺܝܪܳܐܺܝܬ ܒܟܽܠ ܝܽܘܡ ܥܰܡ ܢܒܺܝܳܐ ܕܰܘܺܝܕ: ܐܶܢ ܦܳܪܥܰܬ ܠܗܳܢܽܘܢ ܕܦܳܪܥܺܝܢ ܠܺܝ ܒܺܝ̈ܫܳܬܳܐ܆ ܐܰܦܶܠ^[15] ‌ܐܰܪܰܐ ܡܶܢ ܒܥܶܠ̈ܕܒܳܒܰܝܢ ܣܪܺܝܩܐ^[16]. ܡܳܕܶܝܢ ܐܳܦ ܚܢܰܢ. ܚܠܳܦ ܡܰܠܟܽܘܬܶܗ ܪܳܚܡܰܬ ܐ̱ܢܳܫܳܐ. ܢܨܰܠܶܐ ܟܰܕ ܐܳܡܪܺܝܢܰܢ: ܦܪܽܘܩ ܡܳܪܝܳܐ ܠܡܰܠܟܳܐ܆ ܘܰܥܢܺܝ ܠܰܢ ܒܝܰܘܡܳܐ ܗܰܘ ܕܢܶ݀ܩܪܶܝܟ^[17]. ܠܰܘ ܓܶܝܪ ܟܰܕ ܨܳܒܶܝܢ ܚ̱ܢܰܢ ܕܰܢ݀ܩܰܠܶܤ܆ ܠܗܰܘ ܕܒܰܡܫܰܝܢܽܘܬܶܗ ܙܳܟܶܐ ܠܩܽܘ̈ܠܳܣܶܐ. ܗܳܠܶܝܢ ܐܶܡܰܪܢܰܢ܆ ܐܶܠܐ. ܐܰܝܟܰܢܳܐ ܕܠܰܡܫܺܝܚܳܐ ܢ݀ܫܰܒܰܚ. ܗܰܘ ܕܠܶܗ ܦܐܶܐ ܟܽܠ ܫܽܘܒܚܳܐ ܘܬܶܫܒܽܘܚܬܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀ ܫܠܶܡ ܡܺܐܡܪܳܐ ܕܰܬܠܳܬܺܝܢ ܘܰܐܪܒܥܳܐ܀

ܠܐ ܡܬܬܩܪܒܢܐ[1]

ܒ. ܕܡܠܟ̈ܐ. 18: 1 ـ [2]

ܥܰܒܕܽܘܗ̇ ܚܰܫܒܽܘܗ̇[3]

  ܒ. ܕܡܠܟ̈ܐ. 18: 17 [4]

[5]Rab- sage, ou grand officier

ܒ. ܕܡܠܟ̈ܐ. 18: 32 [6]

ܒ. ܕܡܠܟ̈ܐ. 19: 14 [7]

ܒ. ܡܠܟ̈ܐ. 19: 35 [8]

ܒ. ܡܠܟ̈ܐ. 18: 22 [9]

ܐ. ܡܠܟ̈ܐ. 11: 26 [10]

ܥܶܕܠܳܝܳܐ[11]

 ܡܶܣܬܰܟܰܡ[12]

ܐܪܡܝܐ. 17: 11 [13]

ܒܪܢܫܘܝܐ[14]

ܒܡܙܡܘܪ̈ܐ ܟܬܝܒ ܗܳܟܰܢ. ܘܶܐܢ ܐܰ‌ܠܨܶܬ̣ ܠܰܒ̈ܥܶܠܕܒܳܒܰܝ ܣܪܺܝܩܐܝܬ.[15]

ܡܙܡܘܪ̈ܐ. 7: 5 [16]

ܡܙܡܘܪ̈ܐ. 20: 10 [17]