ܡܺܐܡܪܳܐ ܕܰܬܠܳܬܺܝܢ ܘܰܬܠܳܬܳܐ.
ܥܰܠ ܣܰܡܝܳܐ ܗܰܘ ܕܡܶܢ ܝܺܠܺܝܕܽܘܬܶܗ܆ ܗܰܘ ܕܫܰܐܶܠܘ ܡܶܛܽܠܳܬܶܗ ܬܰܠ̈ܡܺܝܕܶܐ ܠܡܳܪܰܢ܆ ܪܰܒܺܝ܆ ܡܰܢܽܘ ܚܛܳܐ܆ ܗܳܢܳܐ܆ ܐܰܘ ܐܰܒܳܗ̈ܶܐ ܕܺܝܠܶܗ܆ ܐܰܝܟܰܢܳܐ ܕܣܰܡܝܳܐ ܢܶܬܺܝܠܶܕ[1].
33: ܨܳܒܶܝܢ ܐܢ̱ܬܽܘܢ ܕܰܠܣܰܡܝܳܐ ܗܳܢܳܐ ܕܡܶܢ ܝܺܠܺܝܕܽܘܬܶܗ ܢܶܬܩܰܪܰܒ܆ ܘܰܐܟܙܢܳܐ ܕܡܶܢ ܐܰܪܥܳܐ ܗܳܝ ܕܕܰܗܒܳܐ܆ ܡܢܳܬ̣ ܡܶܕܶܡ ܙܥܽܘܪܬܳܐ ܢܶܓܪܽܘܕ܆ ܘܢܶܢܗܰܪ ܚܢܰܢ ܠܰܢ ܢܽܘܗܪܳܐ ܕܺܝܕܰܥܬܳܐ[2] ܐܰܝܟܰܢܳܐ ܕܰܢܒܺܝܳܐ ܐܳܡܰܪ: ܡܶܢ ܣܰܡܝܽܘܬܳܐ ܗܳܝ ܡܰܘܬܪܳܢܺܝܬܳܐ ܘܰܛܥܺܝܢܬܳܐ ܢܽܘܗܪܳܐ ܕܗܰܘ܆ ܫܰܦܺܝܪ ܝܳܕܰܥ ܐ̱ܢܳܐ. ܕܨܳܒܶܝܢ ܐܢ̱ܬܽܘܢ܆ ܘܰܕܗܳܠܶܝܢ ܕܰܐܝܟ ܗܳܟܰܢ. ܘܠܳܐ ܚܰܕ ܣܰܒܥܳܐ ܝܳܕܥܺܝܢ ܐܢ̱ܬܽܘܢ. ܐܳܦ ܓܶܝܪ ܚܦܺܝܛܺܝܢ ܐܢ̱ܬܽܘܢ. ܘܰܡܣܰܪܗܒܺܝܢ ܐܢ̱ܬܽܘܢ܆ ܕܡܶܚܕܳܐ ܒܰܪܫܳܥܬܶܗ ܢܺܐܡܰܪ ܐܶܢܶܝܢ܆ ܠܗܳܠܶܝܢ ܕܥܰܠ ܥܰܡܠܳܐ ܣܰܓܺܝܳܐܐ ܣܢܺܝ̈ܩܳܢ. ܒܪܰܡ. ܢܶܬܩܰܪܰܒ܆ ܠܰܘ ܟܰܕ ܥܰܠ ܚܰܝܠܳܐ ܕܺܝܠܰܢ܆ ܥܰܠ ܪܶܚܡܬܳܐ ܕܶܝܢ ܕܺܝܠܟܽܘܢ ܐܶܬܬܟܶܠܢܰܢ.
ܡܫܰܐܠܺܝܢ ܗ̱ܘܰܘ ܐܳܡܰܪ ܬܰܠ̈ܡܺܝܕܶܐ ܠܝܶܫܽܘܥ. ܟܰܕ ܐܳܡܪܺܝܢ: ܪܰܒܺܝ܆ ܡܰܢܽܘ ܚܛܳܐ. ܗܳܢܳܐ. ܐܰܘ ܐܰܒܳܗ̈ܶܐ ܕܺܝܠܶܗ܆ ܐܰܝܟܰܢܳܐ ܕܣܰܡܝܳܐ ܢܶܬܺܝܠܶܕ؟ ܛܳܒܳܐܺܝܬ ܘܠܳܚܡܳܐܺܝܬ ܠܗܳܝ ܕܩܰܕܺܝܡܳܐ ܣܺܝܡܳܐ ܗ̱ܘܳܬ ܩܕܳܡܰܝܗܽܘܢ ܩܪܰܐܽܘܗ̱ܝ ܪܰܒܺܝ܆ ܗܳܢܰܘ ܕܶܝܢ ܡܰܠܦܳܢܳܐ. ܥܰܠ ܡܰܠܦܳܢܽܘܬܳܐ ܓܶܝܪ ܕܝܰܬܺܝܪ ܚܰܬܺܝܬܳܐ ܣܢܺܝܩܳܐ ܗ̱ܘܳܬ ܗܺܝ ܡܰܣܪܚܳܢܽܘܬܳܐ. ܡܳܢܳܐ ܕܶܝܢ ܗܰܘ ܝܳܗܽܘܒܳܐ ܕܚܶܟܡܬܳܐ ܡܦܰܢܶܐ ܦܶܬܓܳܡܳܐ܆ ܗܰܘ ܟܳܪܽܘܙܳܐ ܘܪܺܝܫܳܐ ܘܡܶܠܬܳܐ ܗܳܝ ܩܦܺܝܣܬܳܐ ܘܕܰܒܦܳܣܺܝ̈ܩܳܬܳܐ܆ ܐܰܝܟܰܢܳܐ ܕܶܐܫܰܥܝܳܐ ܢܒܺܝܳܐ ܩܰܕܶܡ ܐܰܙܥܶܩ ܟܰܕ ܐܳܡܰܪ: ܕܡܶܠܬܳܐ ܕܰܒܦܳܣܺܝ̈ܩܳܬܳܐ ܢܶܥܒܶܕ ܡܳܪܝܳܐ ܥܰܠ ܐܰܪܥܳܐ[3]. ܡܶܠܬܳܐ ܕܶܝܢ ܩܦܺܝܣܬܳܐ ܘܕܰܒܦܳܣܺܝ̈ܩܳܬܳܐ ܐܺܝܬܶܝܗ̇܆ ܗܳܝ ܕܒܰܙܥܽܘܪܽܘܬ ܡ̈ܶܠܶܐ ܐܺܝܬܶܝܗ̇ ܐܳܚܽܘܕܬܳܐ ܕܣܽܘ̈ܟܳܠܶܐ ܣܰܓܺܝ̈ܶܐܐ. ܗܳܝ ܕܳܐܦ ܒܶܠܡܰܬ̣ ܠܣܰܓܺܝܽܐܘܬ ܡ̈ܶܠܶܐ ܕܚܰܟܺܝ̈ܡܶܐ ܗܳܢܽܘܢ ܕܰܠܒܰܪ܆ ܘܰܠܡܶܫܬܰܩ ܥܒܰܕܬܳܗ̇܆ ܒܗܳܝ ܕܰܠܟܽܠܗܽܘܢ ܩܺܝ̣ܢܳܐܺܝܬ[4] ܦܝܳܣܳܐ ܥܶܒܕܰܬ ܒܚܰܝܠܳܐ ܡܶܕܶܡ ܠܳܐ ܡܶܙܕܰܟܝܳܢܳܐ܆ ܘܠܳܐ ܡܶܫܬܰܚܠܦܳܢܳܐܺܝܬ ܢܶܓܕܰܬ ܐܶܢܽܘܢ ܠܘܳܬܳܗ̇.
ܘܠܳܐ ܗܳܢܳܐ ܐܳܡܰܪ ܚܛܳܐ܆ ܘܳܐܦܠܳܐ ܐܰܒܳܗ̈ܶܐ ܕܺܝܠܶܗ[5]. ܒܗܳܠܶܝܢ ܣܽܘܠܒ̈ܤ ܙܥܽܘܪ̈ܝܳܬܳܐ. ܠܬܰܪܬܶܝܢ ܬܰܪ̈ܥܝܳܬܳܐ ܕܝܰܬܺܝܪ ܒܺܝ̈ܫܳܢ ܘܰܕܠܳܐ ܐܰܠܳܗ ܐܰܪܡܺܝ. ܚܕܳܐ ܡܰܢ ܕܚܰܢ̈ܦܶܐ܆ ܐ̱ܚܪܺܬܳܐ ܕܶܝܢ ܕܝܽܗ̱ܘ̈ܕܳܝܳܢ.
ܚܰܢ̈ܦܶܐ ܓܶܝܪ܆ ܕܩܰܕܺܝ̈ܡܳܢ ܒܚܰܝ̈ܶܐ ܕܥܳܠܰܡ ܗܶܢܶܝܢ ܢܰܦ̈ܫܳܬܳܐ܆ ܘܰܕܩܰܕܺܝ̈ܡܳܢ ܐܺܝܬܰܝܗܶܝܢ ܡܶܢ ܩܕܳܡ ܦܰܓܪ̈ܶܐ ܐܳܡܪܺܝܢ: ܘܰܕܟܰܕ ܪ̈ܽܘܚܳܬܳܐ ܡ̈ܠܺܝܠܳܬܳܐ ܐܺܝܬܰܝܗܶܝܢ܆ ܡܶܛܽܠ ܚܛܺܝܬܳܐ ܡܶܕܶܡ ܐܶܬܢܰܚ̈ܰܬܶܝܢ܆ ܘܒܰܙܢܳܐ ܕܰܡܣܳܡ ܒܪܺܝܫܳܐ܆ ܒܥܰܒܝܽܘܬܳܐ ܕܦܰܓܪ̈ܶܐ ܐܶܬܶܐܣܰܪ̈ܶܝܢ. ܡܶܛܽܠ ܗܳܕܶܐ ܓܶܝܪ ܐܳܡܪܺܝܢ: ܐܳܦ ܦܰܓܪ̈ܶܐ ܗܳܟܰܢܳܐ ܐܶܬܩܪܺܝܘ܆ ܡܶܛܽܠ ܗܳܝ ܕܰܐܝܟ ܕܒܰܣܝܳܡܳܐ ܡܶܕܶܡ ܘܰܒܩܰܒܪܳܐ[6] ܚܒܺܝ̈ܫܳܢ ܗܳܠܶܝܢ ܒܒܶܣܪܳܐ. ܣܝܳܡܳܐ ܕܶܝܢ. ܒܢܰܝ̈ܳܐ ܕܦܽܘܐܺܝ̈ܛܶܐ܆ ܠܩܰܒܪܳܐ ܡܫܰܡܗܺܝܢ. ܡܶܢ ܗܳܪܟܳܐ ܠܢܰܦ̈ܫܳܬܳܐ ܕܳܘ̈ܝܳܬܳܐ܆ ܐܳܦ ܠܘܳܬ ܦܰܓܪܳܐ ܕܰܒܥܺܝܪܳܐ ܘܰܕܚܰܝ̈ܘܳܬ ܫܶܢܳܐ ܘܰܕܪ̈ܰܚܫܳܐ ܘܰܕܦܳܪ̈ܚܳܬܳܐ܆ ܗܳܐ ܡܶܢ ܟܰܕܽܘ ܕܶܝܢ ܐܳܦ ܕܺܐܝ̈ܠܳܢܶܐ ܡܰܚܬܺܝܢ ܠܗܶܝܢ. ܘܬܽܘܒ ܡܶܢ ܬܰܡܳܢ ܐܳܡܪܺܝܢ ܠܗܶܝܢ܆ ܕܰܠܘܳܬ ܛܶܟܣܳܐ ܗܰܘ ܡܠܺܝܠܳܐ ܘܩܰܕܡܳܝܳܐ ܡܶܢ ܕܪܺܝܫ ܡܶܬܥܰܠ̈ܝܳܢ.
ܘܰܐܝܟܰܢܳܐ ܡܶܫܟܚܳܐ܆ ܕܗܳܠܶܝܢ ܕܰܠܘܬ ܠܳܐ ܡܠܺܝܠܽܘܬܳܐ ܘܰܠܘܳܬ ܟܝܳܢܳܐ ܗܰܘ ܕܚܰܝܘܰܬ ܫܶܢܳܐ ܥܒܰܪ ܩܰܢ̈ܝܳܢ ܐܰܝܢܳܝܽܘܬܳܐ܆ ܘܰܕܝܰܬܺܝܪ ܒܺܝ̈ܫܳܢ ܗ̱ܘܰܝ̈܆ ܕܰܠܘܳܬ ܫܽܘܠܳܡܳܐ ܕܝܰܬܺܝܪ ܛܳܒ ܢܶܣ̈ܩܳܢ܆ ܡܶܢ ܕܽܘܒܳܪܳܐ ܗܰܘ ܠܳܐ ܡܠܺܝܠܳܐ ܘܠܳܐ ܡܰܪܓܫܳܢܳܐ܆ ܟܰܕ ܠܒܺܝܫܽܘܬܗܶܝܢ ܠܳܐ ܓܰܪ̈ܕܶܝܢ ܡܶܢܗܶܝܢ܆ ܐܶܠܳܐ ܥܰܒܝܽܘܬܳܐ ܐ̱ܚܪܺܬܳܐ ܗܽܘܠܳܢܳܝܬܳܐ ܒܰܕܡܽܘܬ ܩ̈ܠܳܦܳܬܳܐ ܐܶܬܥܰܛ̈ܰܦܶܝܢ.
ܡܶܛܽܠܗܳܕܶܐ. ܟܰܕ ܠܫܳܛܽܘܪܽܘܬܳܐ ܗܳܝ ܕܗܳܟܰܢܳܐ ܓܚܺܝܟܬܳܐ ܡܪܺܝܡ ܗ̱ܘܳܐ ܦܳܪܽܘܩܰܢ ܡܦܰܢܶܐ ܗ̱ܘܳܐ܆ ܗܳܝ ܕܳܐܦܠܳܐ ܗܳܢܳܐ ܚܛܳܐ. ܐܰܝܟܰܢܳܐ ܕܰܢܚܰܘܶܐ܆ ܕܠܰܘ ܟܰܕ ܡܶܛܽܠ ܚܛܺܝܬܳܐ ܕܩܰܕܡܰܬ ܗ̱ܘܳܬ ܝܳܗܒܳܐ ܗ̱ܘܳܬ ܬܰܒ̈ܥܳܬܳܐ ܢܰܦܫܶܗ ܕܗܰܘ܆ ܐܶܣܳܪܳܐ ܕܥܰܡ ܦܰܓܪܳܐ ܣܰܡܝܳܐ ܐܶܬܚܰܝܒܰܬ. ܕܠܳܐ ܓܶܝܪ ܩܰܕܺܝ̈ܡܳܢ ܐܺܝܬܰܝܗܶܝܢ ܢܰܦ̈ܫܳܬܳܐ܆ ܐܶܠܳܐ ܐܰܟܚܕܳܐ ܥܰܡ ܦܰܓܪ̈ܶܐ ܡܶܬܥܰܒ̈ܕܳܢ܆ ܐܰܟܙܢܳܐ ܕܩܒܺܝ̈ܥܳܬ ܚܰܕܬܳܐܺܝܬ܆ ܡܰܘܕܰܥ ܐܳܦ ܙܟܰܪܝܳܐ ܢܒܺܝܳܐ ܟܰܕ ܐܳܡܰܪ ܡܶܛܽܠ ܐܰܠܳܗܳܐ ܕܟܽܠ܆ ܗܰܘ ܕܓܳܒܶܠ ܪܽܘܚܶܗ ܕܒܰܪܢܳܫܳܐ ܒܶܗ[7].
ܡܶܛܽܠܗܳܕܶܐ ܓܶܝܪ. ܢܰܦ̈ܫܳܬܳܐ ܥܰܡ ܦܰܓܪ̈ܶܐ ܐܶܬܥܰܪ̈ܙܰܠܶܝܢ܆ ܠܳܐ ܗ̱ܘܳܐ ܐܰܝܟܰܢܳܐ ܕܰܕܝܰܬܺܝܪ ܒܺܝ̈ܫܳܢ ܢܶܗ̈ܘܝܳܢ. ܐܶܠܳܐ ܗܳܝ ܕܰܠܩܽܘܒܠܳܐ܆ ܐܰܝܟܰܢܳܐ ܕܰܢܫ̈ܰܘܬܦܳܢ ܘܢܶܬܠ̈ܳܢ ܠܗܽܘܢ ܡܶܢ ܢܰܨܺܝܚܽܘܬܳܐ ܒܰܝܬܳܝܬܳܐ ܕܺܝܠܗܽܘܢ ܗܳܝ ܡܠܺܝܠܬܳܐ. ܕܡܶܢ ܗܳܪܟܳܐ܆ ܠܰܘ ܒܰܠܚܽܘܕ ܠܢܰܦ̈ܫܳܬܳܐ܆ ܐܶܠܳܐ ܐܳܦ ܠܦܰܓܪ̈ܶܐ ܐܰܝܟ ܕܠܰܐܝܠܶܝܢ ܕܰܐܟܚܕܳܐ ܥܰܡܗܶܝܢ ܛܳܒܳܐܺܝܬ ܐܶܬܕܰܒܰܪܘ܆ ܡܠܺܝܟ ܫܽܘܒܚܳܐ ܗܰܘ ܕܰܙܒܰܢ ܩܝܳܡܬܳܐ ܘܡܶܢ ܚܰܝ̈ܶܐ ܛܽܘܒ̈ܬܳܢܶܐ ܘܰܕܠܳܐ ܫܽܘܠܳܡ. ܗܰܘ ܕܡܶܛܽܠܳܬܶܗ. ܐܳܦ ܓܠܺܝܙܽܘܬܳܐ ܗܳܝ ܕܥܰܝ̈ܢܶܐ܆ ܐܰܘ ܣܓܺܝܦܽܘܬܳܐ ܕܗܰܕܳܡ̈ܶܐ ܐ̱ܚܪ̈ܳܢܶܐ܆ ܠܰܘ ܡܥܺܝܩܳܢܺܝܬܳܐ ܐܺܝܬܶܝܗ̇܆ ܟܰܕ ܠܘܳܬ ܚܛܺܝܬܳܐ ܡܰܢ ܝܰܬܺܝܪ ܒܰܛܺܝ̈ܠܶܐ ܥܳܒܕܳܐ܆ ܟܰܕ ܡܚܰܡܣܢܳܢܳܐܺܝܬ ܕܶܝܢ ܘܰܒܩܽܘܒܳܠ ܛܰܝܒܽܘܬܳܐ ܡܶܣܬܰܝܒܪܳܐ܆ ܡܙܰܡܢܳܐ ܒܽܘܣܳܡܳܐ ܕܢܽܘܗܪܳܐ ܗܰܘ ܕܰܥܬܺܝܕ.
ܡܳܢܳܐ ܓܶܝܪ ܐܰܘܬܰܪܬܶܗ ܐܶܡܰܪ ܠܺܝ؟ ܠܰܦܠܳܢ ܐܰܘ ܠܰܦܠܳܢ܆ ܗܳܝ ܕܢܶܗܘܶܐ ܚܠܺܝܡ ܒܥܰܝܢܰܘ̈ܗ̱ܝ܆ ܒܚܰܘܪܳܐ ܕܶܝܢ ܥܢ̣ܳܐ ܘܰܡܥܰܩܒܳܢܳܐ[8] ܢܶܗܘܶܐ ܐܺܝܬ ܠܶܗ ܡܰܥܒܕܳܢܽܘܬܗܽܘܢ ܕܗܳܠܶܝܢ ܠܳܐ ܡܦܰܓܰܕܬܳܐ܆ ܘܫܽܘܦܪ̈ܶܐ ܢܽܘܟܪ̈ܳܝܶܐ ܢܶܗܘܶܐ ܡܨܰܝܶܕ܆ ܘܰܠܘܳܬ ܙܳܢܝܽܘܬܳܐ ܢܶܗܘܶܐ ܡܶܬ̣ܚܰܬ̣ܚܰܬ̣܆ ܘܰܚܠܳܦ ܚܙܳܬܳܐ ܙܥܽܘܪܬܳܐ ܘܡܰܠܝܰܬ ܚܽܘܣܪܳܢܳܐ ܕܚܰܝ̈ܶܐ ܗܳܠܶܝܢ ܕܰܡܠܶܐ ܙܰܒܢܳܐ܆ ܢܚܰܠܶܦ ܢܶܩܢܶܐ ܚܶܫܽܘܟܳܐ ܗܰܘ ܕܰܠܥܳܠܰܡ. ܥܳܠܡܳܐ[9] ܓܶܝܪ ܗܳܢܳܐ ܡܣܰܝܟܳܐ. ܘܰܕܒܰܡܫܽܘܚܬܳܐ ܙܥܽܘܪܬܳܐ ܡܶܬܚܒܶܫ܆ ܟܰܕ ܠܘܳܬ ܚܰܝ̈ܶܐ ܗܳܠܶܝܢ ܕܫܽܘܠܳܡܳܐ ܠܰܝܬ ܠܗܽܘܢ܆ ܡܶܬܦܰܚܰܡ܆ ܛܽܘܦܬܳܐ ܠܘܳܬ ܝܰܡܳܐ ܠܳܐ ܡܶܬܬܟܺܝܠܳܢܳܐ ܐܺܝܬܰܘܗ̱ܝ. ܡܰܢܽܘ ܕܶܝܢ ܡܶܢ ܗܳܢܽܘܢ ܕܗܰܘܢܳܐ ܐܺܝܬ ܠܗܽܘܢ܆ ܕܰܠܗܰܢܺܝܽܐܘܬܳܐ ܙܥܽܘܪܬܳܐ ܢܶܚܫܽܘܒ ܕܺܐܝܬܶܝܗ̇ ܝܰܬܺܝܪ ܡܝܰܩܰܪܬܳܐ܆ ܛܳܒ ܡܶܢ ܗܳܝ ܕܝܰܬܺܝܪ ܪܰܒܳܐ ܘܰܕܠܳܐ ܫܽܘܠܳܡ.
ܠܬܰܪܥܺܝܬܳܐ ܡܰܢ ܗܳܟܺܝܠ ܗܳܝ ܕܚܰܢ̈ܦܶܐ܆ ܗܳܟܰܢܳܐ ܚܰܘܝܳܗ̇ ܡܫܺܝܚܳܐ ܕܰܓܳܠܬܳܐ. ܠܗܳܝ ܕܶܝܢ ܕܝܽܗ̱ܘ̈ܕܳܝܶܐ܆ ܒܝܰܕ ܗܳܠܶܝܢ ܕܒܳܬܰܪܟܶܢ ܐܰܝܬܺܝ܆ ܚܰܘܝܳܗ̇ ܕܺܐܝܬܶܝܗ̇ ܕܠܳܐ ܩܰܘܡܳܐ ܘܰܕܦܰܕܺܝܕܳܐ܆ ܟܰܕ ܓܶܝܪ ܡܰܣܒܪܺܝܢ ܗ̱ܘܰܘ ܗܶܢܽܘܢ܆ ܕܰܕܗܳܠܶܝܢ ܕܠܰܐܒܳܗ̈ܶܐ ܚ̣̈ܛܶܝܢ ܝܳܗܒܺܝܢ[10] ܒܢܰܝ̈ܳܐ ܬܰܒ̈ܥܳܬܳܐ܆ ܘܡܶܣܬܰܟܠܺܝܢ ܒܺܝܫܳܐܺܝܬ ܠܗܳܝ ܕܰܒܝܰܕ ܡܽܘܫܶܐ ܩܰܕܡܰܬ ܐܶܬܰܐܡܪܰܬ: ܕܶܐܢܳܐ ܐܰܠܳܗܳܐ ܛܰܢܳܢܳܐ܆ ܕܦܳܪܰܥ ܚ̈ܛܳܗܶܐ ܕܰܐܒܳܗ̈ܶܐ ܥܰܠ ܒܢܰܝ̈ܳܐ܆ ܥܰܠ ܕܳܪܳܐ ܬܠܺܝܬܳܝܳܐ ܘܰܪܒܺܝܥܳܝܳܐ[11]܆ ܟܰܕ ܗܳܦܶܟ ܘܰܡܒܰܛܶܠ ܠܡܰܣܒܪܳܢܽܘܬܳܐ ܕܺܝܠܗܽܘܢ. ܗܳܝ ܕܗܳܟܰܢܳܐ ܕܰܓܳܠܬܳܐ܆ ܘܶܐܡܰܪ: ܗܳܝ ܕܳܐܦܠܳܐ ܗܳܢܳܐ ܚܛܳܐ܆ ܐܰܝܬܺܝ ܒܳܬܪܳܗ̇ ܡܶܚܕܳܐ܆ ܗܳܝ ܕܳܐܦܠܳܐ ܐܰܒܳܗ̈ܶܐ ܕܺܝܠܶܗ[12]܆ ܐܰܝܟܰܢܳܐ ܕܰܢܚܰܘܶܝܘܗ̱ܝ ܠܗܰܘ ܣܰܡܝܳܐ܆ ܠܰܘ ܕܺܝ̈ܢܶܐ ܕܰܚ̈ܛܳܗܶܐ ܕܰܐܒܳܗܰܘ̈ܗ̱ܝ ܡܶܬܦܪܰܥ.
ܗܳܝ ܓܶܝܪ ܕܶܐܬܰܐܡܪܰܬ ܡܶܢ ܡܽܘܫܶܐ܆ ܗܳܢܳܐ ܙܢܳܐ ܐܺܝܬ ܠܳܗ̇. ܚܛܳܐ ܐ̱ܢܳܫ܆ ܘܣܰܝܒܪܶܗ ܐܰܠܳܗܳܐ ܠܗܳܢܳܐ ܒܡܰܓܪܰܬ ܪܽܘܚܳܐ܆ ܟܰܕ ܡܣܰܟܶܐ ܠܰܬܝܳܒܽܘܬܳܐ ܘܰܠܫܽܘܚܠܳܦܳܐ ܕܰܠܘܳܬ ܛܳܒܬܳܐ. ܟܰܕ ܕܶܝܢ ܠܳܐ ܐܶܫܬܰܚܠܰܦ ܗܳܢܳܐ܆ ܐܶܙܰܠ ܥܰܡ ܪܽܘܫܥܶܗ܆ ܟܰܕ ܠܒܶܝܬ ܕܺܝ̈ܢܶܐ ܗܳܢܽܘܢ ܕܰܥܬܺܝܕܺܝܢ ܐܶܫܬܰܕܰܪ. ܐܶܡܰܬܝ ܕܗܳܝ ܕܰܐܝܟ ܕܫܳܘܝܳܐ ܡܶܬܦܰܪܥܳܐ ܠܟܽܠ ܚܰܕ܆ ܒܡܰܬܩܴ̈ܠܶܐ ܕܰܐܠܳܗܳܐ ܗܳܢܽܘܢ ܕܝܰܬܺܝܪ ܬܪܺܝܨܺܝܢ. ܒܳܬܰܪܟܶܢ ܒܪܳܐ ܗܰܘ ܕܰܐܒܳܐ ܗܳܢܳܐ܆ ܒܥܶܩ̈ܒܳܬܳܐ ܕܰܚܛܺܝܬܳܐ ܗܳܝ ܐܰܒܳܗܳܝܬܳܐ ܪܕܳܐ܆ ܘܒܳܗ̇ ܒܰܕܡܽܘܬܳܐ ܠܰܐܒܽܘܗ̱ܝ ܢܦ̣ܰܩ ܡܶܢ ܚܰܝ̈ܶܐ ܗܳܠܶܝܢ.
ܗܳܝܕܶܝܢ ܡܶܟܺܝܠ܆ ܐܶܢܗܽܘ ܕܗܰܘ ܕܡܶܢ ܗܳܢܳܐ ܐܶܬܺܝܠܶܕ܆ ܢܕܰܡܶܐ ܐܳܦ ܗܽܘ ܒܰܚܛܺܝܬܳܐ ܠܰܐܒܽܘܗ̱ܝ܆ ܗܰܘ ܢܰܓܺܝܪ ܪܽܘܚܳܐ. ܒܛܺܝܠܽܘܬܳܐ ܡܚܰܘܶܐ܆ ܟܰܕ ܐܳܦ ܒܗܳܢܳܐ ܥܳܠܡܳܐ ܦܳܪܰܥ ܗܳܝ ܕܰܐܝܟ ܕܫܳܘܝܳܐ܆ ܗܰܘ ܡܳܐ ܟܺܝܬ ܕܡܶܬܦܪܰܥ[13] ܗ̱ܘܳܐ ܐܳܦ ܐܰܒܽܘܗ̱ܝ ܕܗܳܢܳܐ܆ ܐܶܠܽܘ ܠܳܐ ܟܺܝܬ ܕܟܰܝ̈ܠܶܐ ܗܳܢܽܘܢ ܕܡܰܓܪܰܬ ܪܽܘܚܶܗ ܕܰܐܠܳܗܳܐ ܡܶܫܬܰܪܬܚܺܝܢ ܗ̱ܘܰܘ܆ ܒܡ̈ܶܠܶܐ ܗܳܠܶܝܢ ܕܝܳܕܰܥ ܠܗܶܝܢ܆ ܗܰܘ ܕܰܒܚܶܟܡܬܳܐ ܠܗܳܠܶܝܢ ܡܕܰܒܰܪ. ܙܰܒ̈ܢܺܝܢ ܓܶܝܪ ܣܰܓܺܝ̈ܳܐܢ ܒܒܰܣܺܝܡܽܘܬܳܐ܆ ܐܳܦ ܟܰܕ ܠܕܳܪܳܐ ܗܰܘ ܬܠܺܝܬܳܝܳܐ ܥܒܰܪ܆ ܥܰܠ ܗܰܘ ܕܰܐܪܒܥܳܐ ܐܰܝܬܝܶܗ ܠܰܦܣܳܩܳܐ ܗܰܘ ܕܦܽܘܪܥܳܢܽܘܬܳܐ. ܡܶܛܠܗܳܕܶܐ ܠܰܘ ܦܫܺܝܛܳܐܺܝܬ ܥܰܠ ܕܳܪܳܐ ܬܠܺܝܬܳܝܳܐ ܘܰܪܒܺܝܥܳܝܳܐ ܐܰܡܺܝܪܳܐ܆ ܐܶܠܳܐ ܡܰܘܣܦܳܐ ܐܰܡܺܝܪܳܐ܆ ܠܗܳܢܽܘܢ ܕܣܳܢܶܝܢ ܠܺܝ. ܐܰܝܟܰܢܳܐ ܕܶܐ݀ܬܚܰܘܶܐ ܓܰܠܝܳܐܺܝܬ܆ ܕܡܶܛܽܠ ܣܶܢܶܐܬܳܐ ܒܰܝܬܳܝܬܳܐ ܕܺܝܠܗܽܘܢ ܗܳܝ ܕܣܳܢܶܝܢ ܗ̱ܘܰܘ ܠܶܗ ܠܰܐܠܳܗܳܐ܆ ܘܠܰܘ ܡܶܛܽܠ ܗܳܝ ܕܰܐܒܳܗܰܝ̈ܗܽܘܢ ܡܶܬܚܰܝܒܺܝܢ܆ ܐܳܦܶܢ ܒܗܳܢܽܘܢ ܛܰܢܘ ܘܕܰܡܺܝܘ.
ܕܗܳܕܶܐ ܕܶܝܢ ܗܳܟܰܢܳܐ ܐܺܝܬ ܠܳܗ̇܆ ܐܳܦ ܒܬܶܢܝܳܢ ܢܳܡܽܘܣܳܐ ܚܰܘܺܝ ܗܽܘ ܡܽܘܫܶܐ ܟܰܕ ܐܳܡܰܪ: ܕܠܳܐ ܢܡܽܘܬܽܘܢ ܐܰܒܳܗ̈ܶܐ ܚܠܳܦ ܒܢܰܝ̈ܳܐ܆ ܘܰܒ̈ܢܰܝܳܐ ܠܳܐ ܢܡܽܘܬܽܘܢ ܚܠܳܦ ܐܰܒܳܗ̈ܶܐ. ܟܽܠܚܰܕ ܒܰܚܛܺܝܬܳܐ ܕܺܝܠܶܗ ܢܡܽܘܬ[14]. ܡܶܛܽܠܳܬܳܗ̇ ܕܗܳܕܶܐ. ܐܳܦ ܚܰܙܩܺܝܐܶܝܠ ܢܒܺܝܳܐ܆ ܠܘܳܬ ܝܽܗ̱ܘ̈ܕܳܝܶܐ ܕܫܳܢܶܝܢ ܗ̱ܘܰܘ ܘܳܐܡܪܺܝܢ: ܕܰܐܒܳܗ̈ܶܐ ܐܶܟܰܠܘ ܒܶܣܪ̈ܶܐ܆ ܘܫܶܢ̈ܶܐ ܕܰܒ̈ܢܰܝܳܐ ܩܗܰܝ̈ܶܢ. ܐܶܡܰܪ: ܚܰܝ ܐ̱ܢܳܐ ܐܶܢܳܐ ܐܳܡܰܪ ܡܳܪܝܳܐ: ܐܶܢ ܢܶܗܘܶܐ ܬܽܘܒ ܕܡܶܬܶܐܡܰܪ ܡܰܬܠܳܐ ܗܳܢܳܐ ܒܺܐܝܣܪܳܐܶܝܠ. ܡܶܛܽܠ ܕܟܽܠܗܶܝܢ ܢܰܦ̈ܫܳܬܳܐ ܕܺܝܠܝ ܐܺܝܬܰܝܗܶܝܢ. ܐܰܟܙܢܳܐ ܕܢܰܦܫܳܐ ܕܰܐܒܳܐ܆ ܗܳܟܰܢܳܐ ܐܳܦ ܢܰܦܫܳܐ ܕܰܒܪܳܐ. ܟܽܠܗܶܝܢ ܢܰܦ̈ܫܳܬܳܐ ܕܺܝܠܝ ܐܺܝܬܰܝܗܶܝܢ. ܢܰܦܫܳܐ ܗܳܝ ܕܚܳܛܝܳܐ ܗܺܝ ܬܡܽܘܬ[15]. ܒܪܳܐ ܠܳܐ ܢܳܣܶܒ ܥܰܘܠܳܐ ܕܰܐܒܽܘܗ̱ܝ܆ ܘܳܐܦܠܳܐ ܐܰܒܳܐ ܢܳܣܶܒ ܥܰܘܠܳܐ ܕܰܒܪܶܗ. ܙܰܕܺܝܩܽܘܬܶܗ ܕܙܰܕܺܝܩܳܐ ܥܠܰܘܗ̱ܝ ܬܶܗܘܶܐ. ܘܠܳܐ ܢܳܡܽܘܣܳܝܽܘܬܶܗ ܕܠܳܐ ܢܳܡܽܘܣܳܝܳܐ ܥܠܰܘܗ̱ܝ ܬܶܗܘܶܐ.
ܐܶܬܚܰܘܝܰܬ̣ ܗܳܟܺܝܠ. ܡܶܢ ܡܶܠܰܘ̈ܗ̱ܝ ܕܦܳܪܽܘܩܰܢ܆ ܕܗܰܘ ܣܰܡܝܳܐ܆ ܐܳܦܠܳܐ ܡܶܛܽܠ ܚܛܺܝܬܳܐ ܒܰܝܬܳܝܬܳܐ ܕܺܝܠܶܗ ܐܶܬܺܝܠܶܕ ܣܰܡܝܳܐ܆ ܘܳܐܦܠܳܐ ܡܶܛܽܠ ܣܰܟܠܽܘܬܳܐ ܡܶܕܶܡ ܐܰܒܳܗܳܝܬܳܐ. ܐܶܠܳܐ ܡܶܛܽܠ ܕܢܶܬܓܠܽܘܢ ܒܶܗ ܐܳܡܰܪ ܥ̈ܒܳܕܶܐ ܕܰܐܠܳܗܳܐ[16]. ܡܳܢܳܐ ܕܶܝܢ ܐܺܝܬܶܝܗ̇ ܗܳܕܶܐ. ܩܕܡ ܩܰܠܺܝܠ ܦܶܬܓܳܡ̈ܶܐ ܡܶܢ ܠܥܶܠ܆ ܐܳܡܰܪ ܗ̱ܘܳܐ ܡܫܺܝܚܳܐ ܠܘܳܬ ܝܽܗ̱ܘ̈ܕܳܝܶܐ܆ ܩܕܳܡ ܕܢܶܗܘܶܐ ܐܰܒܪܳܗܳܡ ܐܺܝܬܰܝ ܐܶܢܳܐ[17]. ܘܗܳܢܽܘܢ ܟܰܕ ܠܘܳܬ ܗܳܝ ܕܡܶܬܚܰܙܝܳܐ. ܚܳܝܪܺܝܢ ܗ̱ܘܰܘ܆ ܘܡܰܣܒܪܺܝܢ ܗ̱ܘܰܘ. ܕܒܰܪܢܳܫܳܐ ܒܰܠܚܽܘܕ ܐܺܝܬܰܘܗ̱ܝ ܗ̱ܘܳܐ܆ ܘܠܰܘܳܬ ܥܽܘܡܩܶܗ ܕܐ̱ܪܳܙܳܐ. ܠܳܐ ܚܳܝܪܺܝܢ ܗ̱ܘܰܘ܆ ܘܳܐܦ ܠܳܐ ܡܶܣܬܰܟܠܺܝܢ ܗ̱ܘܰܘ ܠܝܳܬܳܐ ܕܺܝܠܶܗ ܐܰܠܳܗܳܝܬܳܐ ܘܕܰܩܕܳܡ ܥܳܠ̈ܡܶܐ܆ ܟܕ ܫܩܰܠܘ ܟܺܐܦ̈ܶܐ܆ ܠܡܶܪܓܡܶܗ ܡܶܬܪܰܥܶܝܢ ܗ̱ܘܰܘ܆ ܠܗܰܘ ܠܳܐ ܡܶܬܕܰܪܟܳܢܳܐ ܘܠܳܐ ܡܶܬܟܰܒܫܳܢܳܐ ܘܕܰܒܨܶܒܝܳܢܶܗ ܡܶܬܕܰܪܟܳܢܳܐ܆ ܐܶܡܰܬܝ ܕܗܳܕܶܐ ܨܒܳܐ.
ܟܰܕ ܨܳܒܶܐ ܕܶܝܢ. ܕܓܰܠܝܳܐܺܝܬ ܢܚܰܘܶܐ܆ ܕܠܰܘ ܒܰܠܚܽܘܕ ܩܕܳܡ ܐܰܒܪܳܗܳܡ ܐܺܝܬܰܘܗ̱ܝ܆ ܐܶܠܳܐ ܐܳܦ ܥܳܒܽܘܕܳܐ ܕܗܳܠܶܝܢ ܕܺܐܝܬܰܝܗܶܝܢ ܐܺܝܬܰܘܗ̱ܝ܆ ܠܘܳܬ ܗܰܘ ܣܰܡܝܳܐ ܕܡܶܢ ܝܺܠܺܝܕܽܘܬܶܗ ܐܶܬܳܐ. ܐܰܝܟܰܢܳܐ ܕܠܰܩܒܳܥܗܶܝܢ ܕܒܳܒ̈ܳܬܳܐ. ܥܳܒܽܘܕܳܐܺܝܬ ܒܓܰܘ ܩܽܘ̈ܩܝܳܬܳܐ ܗܳܠܶܝܢ ܕܥܰܝ̈ܢܶܐ ܢܣܺܝܡ܆ ܗܳܠܶܝܢ ܕܠܳܐ ܐܶܬܺܝܗܶܒ̈ܝ̱ ܗ̱ܘܰܝ̈ ܠܶܗ ܡܶܢ ܟܝܳܢܳܐ܆ ܘܗܳܟܰܢܳܐ ܢܶܬܓܠܽܘܢ ܒܶܗ ܥ̈ܒܳܕܶܐ ܕܰܐܠܳܗܳܐ. ܐܰܝܟܰܢܳܐ ܓܶܝܪ ܠܰܘ ܓܰܠܝܳܐܺܝܬ ܐܰܠܳܗܰܐ ܗ̱ܘ܆ ܗܰܘ ܕܰܐܝܟ ܗܳܠܶܝܢ ܥܳܒܶܕ.
ܒܰܕܓܽܘܢ ܟܰܕ ܗܳܠܶܝܢ ܐܶܡܰܪ: ܐܰܝܬܺܝ ܒܳܬܰܪܗܶܝܢ܆ ܕܠܺܝ ܙܳܕܶܩ. ܠܡܶܥܒܰܕ ܥ̈ܒܳܕܶܐ ܕܗܰܘ ܕܫܰܕܪܰܢܝ[18]. ܗܳܕܶܐ ܡܰܢ܆ ܘܟܰܕ ܥܳܪܶܩ ܡܶܢ ܡܰܣܒܪܳܢܽܘܬܳܐ܆ ܕܗܳܝ ܕܢܶܣܬܒܰܪ ܕܺܐܝܬܰܘܗ̱ܝ ܣܰܩܽܘܒܠܳܝ ܐܰܠܳܗܳܐ. ܗܳܕܶܐ ܕܶܝܢ܆ ܘܟܰܕ ܡܰܘܕܰܥ ܕܥܰܡ ܐܰܒܳܐ ܐܰܟܚܕܳܐ ܥܰܒܕܶܗ ܠܗܳܢܳܐ ܟܽܠ܆ ܘܳܐܦ ܒܺܐܝܕܰܘ̈ܗ̱ܝ ܥܒܰܕ ܠܟܽܠܡܶܕܶܡ. ܘܳܐܦ ܬܶܕܡܽܘܪܬܳܐ ܗܳܝ ܕܰܥܬܺܝܕ ܠܡܶܥܒܰܕ܆ ܐܰܝܟ ܚܰܕ ܡܶܢ ܥ̈ܒܳܕܶܐ ܗܳܠܶܝܢ ܕܫܰܪܟܳܐ ܥܒܳܕܳܐ ܕܰܐܒܳܐ ܐܺܝܬܶܝܗ̇܆ ܟܰܕ ܒܝܰܕ ܐܰܠܳܗܳܐ ܡܶܠܬܳܐ ܗܰܘ ܕܶܐܬܒܰܣܰܪ ܡܶܬܥܰܒܕܳܐ܆ ܘܠܰܘ ܡܰܥܒܕܳܢܽܘܬܳܐ ܡܶܕܶܡ ܕܓܰܒܪܳܐ ܩܰܕܺܝܫܳܐ ܐܺܝܬܶܝܗ̇܆ ܕܰܠܫܽܘܟܳܢܳܐ ܪܽܘܚܳܢܳܝܳܐ ܡܫܰܡܶܫ.
ܘܰܚܙܺܝ ܠܺܝ ܠܶܗ ܠܰܙܢܳܐ ܗܰܘ ܕܥܳܒܽܘܕܽܘܬ ܬܶܕܡܪ̈ܳܬܳܐ܆ ܕܰܐܝܟܰܢܳܐ ܦܐܶܐ ܠܰܐܠܳܗܳܐ ܐܺܝܬܰܘܗ̱ܝ. ܟܰܕ ܓܶܝܪ ܪܰܩ ܥܰܠ ܐܰܪܥܳܐ܆ ܘܰܥܒܰܕ ܛܺܝܢܳܐ ܡܶܢ ܗܰܘ ܪܽܘܩܳܐ܆ ܛܳܫܶܗ ܠܛܺܝܢܳܐ ܥܰܠ ܥܰܝܢܰܘ̈ܗ̱ܝ ܕܗܰܘ ܣܰܡܝܳܐ ܘܶܐܡܰܪ ܠܶܗ: ܙܶܠ ܐܰܫܺܝܓ ܒܡܰܥܡܽܘܕܺܝܬܳܐ ܗܳܝ ܕܫܺܝܠܽܘܚܳܐ[19]܆ ܗܳܝ ܕܡܶܬܦܰܫܩܳܐ ܫܠܺܝܚܳܐ ܐܰܘܟܺܝܬ ܡܶܫܬܰܕܪܳܢܳܐ. ܛܺܝܢܳܐ ܡܰܢ܆ ܠܰܓܒܺܝܠܽܘܬܳܐ ܗܳܝ ܩܰܕܡܳܝܬܳܐ ܡܰܥܗܶܕ ܠܰܢ܆ ܗܳܝ ܕܒܳܗ̇ ܥܒܰܕ ܠܒܰܪܢܳܫܳܐ ܥܰܦܪܳܐ ܡܶܢ ܐܰܪܥܳܐ. ܗܳܝ ܕܰܐܝܟ ܟܬܳܒܳܐ ܗܰܘ ܕܺܐܝܘܒ܆ ܟܰܕ ܫܩܰܠ ܛܺܝܢܳܐ ܓܒܰܠ ܚܰܝܽܘܬܳܐ܆ ܘܡܰܠܳܠܬܳܐ ܣܳܡܳܗ̇ ܥܰܠ ܐܰܪܥܳܐ[20]. ܡܰܥܡܽܘܕܺܝܬܳܐ ܕܶܝܢ ܫܺܝܠܽܘܚܳܐ. ܗܳܝ ܕܺܐܝܬܶܝܗ̇ ܡܶܫܬܰܕܪܳܢܳܐ ܩܳܕܡܳܐ ܡܚܰܘܝܳܐ܆ ܠܰܓܒܺܝܠܽܘܬܳܐ ܕܡܶܢ ܕܪܺܝܫ ܗܳܝ ܡܶܬܗܰܘܢܳܢܳܝܬܳܐ ܘܪܽܘܚܳܢܳܝܬܳܐ܆ ܗܳܝ ܕܰܥܬܺܝܕܳܐ ܗ̱ܘܳܬ ܕܬܶܗܘܶܐ ܒܝܰܕ ܡܰܥܡܽܘܕܺܝܬܳܐ. ܬܰܪ̈ܬܰܝܗܶܝܢ ܕܶܝܢ. ܡܚܰܘ̈ܝܳܢ ܠܶܗ ܠܰܡܫܺܝܚܳܐ ܕܺܐܝܬܰܘܗ̱ܝ܆ ܘܳܐܦ ܒܳܪܽܘܝܳܐ ܐܳܦ ܡܚܰܕܬܳܢܳܐ ܕܡܶܢ ܕܪܺܝܫ. ܐܶܫܬܰܕܰܪ ܓܶܝܪ ܨܶܒܝܳܢܳܐܺܝܬ ܠܘܳܬܰܢ܆ ܘܗܳܕܶܐ ܒܝܰܕ ܡܶܬܒܰܣܪܳܢܽܘܬܳܐ. ܟܰܕ ܠܟܽܠ ܕܽܘܟ ܩܰܪܺܝܒ ܐܰܝܟ ܐܰܠܳܗܳܐ ܘܰܠܟܽܠ ܡܳܠܶܐ܆ ܘܳܐܦܠܳܐ ܒܰܚܕܳܐ ܕܽܘܟܬܳܐ ܡܶܣܬܰܝܰܟ. ܗܳܝ ܕܳܐܦ ܕܰܘܺܝܕ ܗܰܘ ܢܒܺܝܳܐ ܩܰܕܶܡ ܗ̱ܘܳܐ ܐܳܡܰܪ: ܫܰܕܰܪ ܡܶܠܬܳܐ ܕܺܝܠܶܗ ܘܰܐܣܺܝ ܐܶܢܽܘܢ܆ ܘܦܰܨܺܝ ܐܶܢܽܘܢ ܡܶܢ ܚܒܳܠܳܐ ܕܺܝܠܗܽܘܢ[21].
ܟܰܕ ܐܰܫܺܝܓ ܕܶܝܢ ܗܰܘ ܣܰܡܝܳܐ܆ ܦܢܳܐ ܟܰܕ ܢܽܘܗܪܳܐ ܥܦܺܝܦܳܐ ܛܥܺܝܢ. ܗܰܘ ܡܰܢ ܕܥܰܝ̈ܢܶܐ ܦܰܓܪ̈ܳܢܳܝܶܐ܆ ܡܶܢ ܐܺܝܕܳܐ ܥܳܒܽܘܕܬܳܐ. ܗܰܘ ܕܶܝܢ. ܕܥܰܝܢܳܐ ܕܬܰܪܥܺܝܬܳܐ܆ ܡܶܢ ܓܒܺܝܠܽܘܬܳܐ ܕܡܶܢ ܕܪܺܝܫ܆ ܗܰܘ ܕܰܡܫܰܟܢܳܐ ܡܰܥܡܽܘܕܺܝܬܳܐ. ܡܶܛܽܠ ܗܳܕܶܐ܆ ܟܰܕ ܒܢܽܘܗܪܳܐ ܕܺܝܕܰܥܬܳܐ ܕܰܐܠܳܗܳܐ ܐܶܬܬܰܨܡܰܚ ܒܒܰܪܢܳܫܳܐ ܕܰܠܓܰܘ܆ ܠܘܳܬ ܝܽܗ̱ܘ̈ܕܳܝܶܐ ܡܰܟܣܳܢܳܐܺܝܬ ܡܰܙܥܶܩ ܗ̱ܘܳܐ܆ ܡܶܢ ܥܳܠܰܡ. ܠܳܐ ܐܶܫܬܰܡܥܰܬ܆ ܕܰܦܬܰܚ ܐ̱ܢܳܫ ܥܰܝܢܳܐ ܕܗܰܘ ܕܶܐܬܺܝܠܶܕ ܣܰܡܝܳܐ. ܐܶܠܽܘ ܠܳܐ ܕܺܐܝܬܰܘܗ̱ܝ ܗ̱ܘܳܐ ܗܳܢܳܐ ܡܶܢ ܐܰܠܳܗܳܐ܆ ܠܳܐ ܡܶܫܟܰܚ ܗ̱ܘܳܐ ܠܡܶܥܒܰܕ ܘܠܳܐ ܡܶܕܶܡ. ܘܟܰܕ ܡܫܰܐܶܠ ܗ̱ܘܳܐ ܝܶܫܽܘܥ܆ ܕܰܐܢ̱ܬ ܡܗܰܝܡܶܢ ܐܰܢ̱ܬ ܒܰܒܪܶܗ ܕܰܐܠܳܗܳܐ؟ ܦܰܢܺܝ ܗܽܘ ܘܶܐܡܰܪ: ܡܰܢܽܘ ܐܺܝܬܰܘܗ̱ܝ ܡܳܪܝ؟ ܐܰܝܟܰܢܳܐ ܕܶܐܗܰܝܡܶܢ ܒܶܗ. ܘܟܰܕ ܐܶܡܰܪ ܡܫܺܝܚܳܐ: ܕܳܐܦ ܚܙܰܝܬܳܝܗ̱ܝ܆ ܘܗܰܘ ܕܰܡܡܰܠܶܠ ܥܰܡܳܟ ܗܰܘ ܐܺܝܬܰܘܗ̱ܝ. ܩܥܳܐ ܟܰܕ ܐܳܡܰܪ: ܡܗܰܝܡܶܢ ܐ̱ܢܳܐ ܡܳܪܝ ܘܰܣܓܶܕ ܠܶܗ[22]. ܐܰܝܟ ܕܰܠܡܺܐܡܰܪ. ܟܰܕ ܗܶܢܶܝܢ ܟܰܕ ܗܶܢܶܝܢ ܠܦܶܛܪܽܘܤ ܫܠܺܝܚܳܐ ܡܰܙܥܶܩ: ܐܰܢ̱ܬ ܗ̱ܘ̣ ܡܫܺܝܚܳܐ ܗܰܘ ܒܪܶܗ ܕܰܐܠܳܗܳܐ ܚܰܝܳܐ[23].
ܗܳܢܳܐ ܣܰܡܝܳܐ ܡܰܟܶܤ܆ ܐܳܦ ܠܗܳܢܽܘܢ ܕܒܶܐܣܟܺܡܳܐ ܕܰܟܪܺܝܣܛܝܳܢܽܘܬܳܐ. ܗܳܠܶܝܢ ܕܝܽܗ̱ܘ̈ܕܳܝܶܐ ܡܶܬܪܰܥܶܝܢ܆ ܘܦܳܣܩܺܝܢ ܠܶܗ ܠܥܰܡܰܢܽܘܐܶܝܠ܆ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ. ܕܰܐܝܢܳܐ ܓܶܝܪ ܟܝܳܢܳܐ ܢܺܐܡܪܽܘܢ ܕܺܐܝܬܶܝܗ̇ ܡܰܥܒܕܳܢܽܘܬܳܐ ܐܰܘ ܕܺܝܠܳܝܬܳܐ܆ ܗܳܝ ܕܰܒܝܰܕ ܛܺܝܢܳܐ ܒܳܒ̈ܳܬܳܐ ܢܶܥܒܶܕ. ܐܶܢ ܡܰܢ ܓܶܝܪ ܕܗܰܘ ܐܰܠܳܗܳܝܳܐ܆ ܘܰܐܝܟܰܢܳܐ ܕܺܝܠܳܝܬܳܐ ܐܺܝܬܶܝܗ̇ ܗܳܝ ܕܢܶܪܽܘܩ܆ ܕܰܐܠܳܗܳܐ ܗܰܘ ܕܠܳܐ ܓܫܽܘܡ ܘܰܕܠܳܐ ܐܶܣܟܺܡܳܐ ܘܠܳܐ ܡܶܬܓܰܫܫܳܢܳܐ. ܐܶܢܕܶܝܢ ܕܗܰܘ ܐ̱ܢܳܫܳܝܳܐ܆ ܢܶܫܡܥܽܘܢ ܠܰܘ ܠܰܢ܆ ܐܶܠܳܐ ܠܗܰܘ ܣܰܡܝܳܐ ܕܳܐܡܰܪ: ܕܡܶܢ ܥܳܠܰܡ ܠܳܐ ܐܶܫܬܰܡܥܰܬ܆ ܕܰܦܬܰܚ ܐ̱ܢܳܫ ܡܶܢ ܒܢܰܝ̈ܢܳܫܳܐ܆ ܠܥܰܝ̈ܢܶܐ ܕܗܰܘ ܕܣܰܡܝܳܐ ܐܶܬܺܝܠܶܕ[24]. ܐܶܢ ܕܶܝܢ ܐܰܠܳܗܳܐ ܡܶܠܬܳܐ. ܡܶܛܽܠܳܬܰܢ ܗܘ̣ܳܐ ܠܳܐ ܡܶܫܬܰܚܠܦܳܢܳܐܺܝܬ ܦܰܓܪܳܢܳܐ܆ ܟܰܕ ܚܰܕ ܐܺܝܬܰܘܗ̱ܝ ܡܶܢ ܬܪܶܝܢ ܟܝܳܢ̈ܶܐ܆ ܐܰܠܳܗܽܘܬܳܐ ܟܺܝܬ ܘܐ̱ܢܳܫܽܘܬܳܐ܆ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܐܝܟ ܡܶܠܬܳܐ ܕܺܝܠܗܶܝܢ. ܟܰܕ ܐܺܝܬܰܘܗ̱ܝ ܗܽܘ ܟܰܕ ܗܽܘ ܫܘܶܐ ܒܽܐܘܣܺܝܰܐ ܠܰܐܒܳܐ. ܒܗܳܝ ܕܺܐܝܬܰܘܗ̱ܝ ܐܰܠܳܗܳܐ܆ ܘܗܽܘ ܟܰܕ ܗܽܘ ܫܘܶܐ ܒܽܐܘܣܺܝܰܐ ܠܰܢ ܠܰܒܢܰܝ̈ܢܳܫܳܐ ܒܗܳܝ ܕܰܤܛܰܪ ܡܶܢ ܚܛܺܝܬܳܐ ܗܘ̣ܳܐ ܐܰܟܘܳܬܰܢ[25]. ܐܳܦ ܐ̱ܢܳܫܳܐܺܝܬ ܢܶܪܽܘܩ܆ ܐܳܦ ܐܰܠܳܗܳܐܺܝܬ ܗܽܘ ܟܰܕ ܗܽܘ ܒܝܰܕ ܪܽܘܩܳܐ ܢܶܥܒܶܕ ܥܰܝ̈ܢܶܐ܆ ܟܰܕ ܐܳܦܠܐ ܒܡܶܕܶܡ ܡܶܬܦܰܠܰܓ.
ܗܳܠܶܝܢ ܡܰܢ ܗܳܟܺܝܠ ܚܢܰܢ܆ ܡܶܢ ܗܰܝܡܳܢܽܘܬܶܗ ܢܰܗܺܝܪܬܳܐ ܕܗܰܘ ܣܰܡܝܳܐ ܠܡܺܐܡܰܪ ܐܶܬܢܰܗܰܪܢܰܢ܆ ܘܡܶܢ ܗܰܘ ܕܰܠܗܰܘ ܐܰܣܺܝ ܘܰܐܢܗܰܪ. ܐܰܢ̱ܬܽܘܢ ܕܶܝܢ܆ ܐܰܝܢܳܐ ܐܰܓܪܳܐ ܚܠܳܦ ܝܽܘܬܪܳܢܳܐ ܬܶܦܪܥܽܘܢܳܝܗ̱ܝ . ܟܽܠ ܚܰܕ ܡܶܢܟܽܘܢ ܟܰܕ ܠܒܰܝܬܶܗ ܐܳܙܶܠ܆ ܢܰܪܡܶܐ ܬܠܳܬܳܐ ܫܳܡܽܘ̈ܢܶܐ ܕܰܢܚܳܫܳܐ ܒܺܐܝܕܶܗ ܗܳܝ ܕܰܦܫܺܝܛܳܐ ܕܟܽܠ ܚܰܕ ܡܶܢ ܗܳܠܶܝܢ ܣܡܰܝ̈ܳܐ ܕܚܳܕܪܺܝܢ. ܘܶܐܢ ܐ̱ܢܳܫ ܠܳܐ ܛܥܺܝܢ ܟܶܣܦܳܐ ܗܳܫܳܐ܆ ܠܝܰܘܡܳܐ ܕܒܳܬܪܶܗ. ܢܡܰܠܶܐ ܠܡܰܪܬܝܳܢܽܘܬܳܐ ܗܳܕܶܐ ܫܰܦܺܝܪܰܬ ܕܶܚܠܬܳܐ. ܠܗܰܘ ܡܰܢ ܓܶܝܪ ܕܝܳܗܶܒ܆ ܗܳܕܶܐ ܙܥܽܘܪܬܳܐ ܗܝ. ܠܗܰܘ ܕܶܝܢ ܕܰܡܩܰܒܶܠ ܣܰܓܺܝܐܬܳܐ ܐܺܝܬܶܝܗ̇܆ ܟܰܕ ܡܶܢ ܟܽܠ ܕܽܘܟ ܐܰܟܚܕܳܐ ܡܶܬܟܰܢܫܳܐ. ܬܶܬܝܰܩܰܪ ܓܶܝܪ ܒܰܬܠܳܬܳܐ ܫܳܡܽܘ̈ܢܶܐ܆ ܗܰܝܡܳܢܽܘܬܶܗ ܕܗܰܘ ܣܰܡܝܳܐ܆ ܗܳܝ ܕܥܳܒܪܳܐ ܠܟܽܠ ܐܺܝܩܳܪܳܐ. ܢܶܬܡܰܣܟܰܢ ܓܶܝܪ ܐܳܦ ܒܗܳܕܶܐ ܡܫܺܝܚܳܐ ܨܶܒܝܳܢܳܐܝܬ[26]܆ ܗܰܘ ܕܰܠܟܽܠܗܶܝܢ ܗܳܠܶܝܢ ܕܺܝܠܰܢ ܒܰܝܬܺܝ ܠܶܗ ܟܰܕ ܠܳܐ ܚܫܰܒ ܐܶܢܶܝܢ ܨܰܥܪܳܐ܆ ܐܰܝܟܰܢܳܐ ܕܰܚܢܰܢ ܕܰܐܝܟ ܕܡܶܬܕܰܪܟܳܐ ܠܰܒܢܰܝ̈ܢܳܫܳܐ ܗܳܠܶܝܢ ܕܗܰܘ ܢܶܥܬܰܪ܆ ܘܢܶܫܬܘܶܐ ܠܡܰܠܟܽܘܬܳܐ ܗܳܝ ܕܰܫܡܰܝܳܐ. ܕܠܶܗ ܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܰܬܠܳܬܺܝܢ ܘܰܬܠܳܬܳܐ܀
ܬܐܘܡܐ ܐܘܕܘ.430. ܩܳܝܢܘܢ. ܟܶܢܫܳܐ. ܫܘܬܦܘܬܐ. ܓܰܘܳܐ ܕܰܡܗܝܡ̈ܢܐ؟[4]
[6]ܨܶܝܕ ܝܰܘ̈ܢܳܝܶܐ ܫܡܳܐ ܗܰܘ ܕܩܳܪܶܝܢ ܦܽܘܐܝ̈ܛܶܐ ܠܩܰܒܪܳܐ܆ ܣܝܳܡܳܐ ܡܶܬܶܐܡܰܪ. ܘܡܶܛܽܠ ܕܰܡܣܰܒܰܗ ܗܳܢܳܐ ܩܰܠܺܝܠ ܒܒܰܪ̱ܬ ܩܳܠܳܐ ܕܡܰܦܩܶܗ܆ ܠܰܫܡܳܐ ܕܦܰܓܪܳܐ ܗܰܘ ܕܡܶܬܶܐܡܰܪ ܣܘܡܐ܆ ܐܶܡܰܪܘ ܝܰܘ̈ܢܳܝܶܐ ܕܠܐ ܗܰܘܢܳܐ܆ ܕܡܶܛܽܠܗܳܕܶܐ. ܡܶܬܩܪܶܝܢ ܒܶܣܪ̈ܶܐ ܗܳܠܶܝܢ ܕܰܡܚܰܝܕܺܝܢ ܠܢܰܦ̈ܫܳܬܳܐ: ܣܘܡ̈ܐܛܐ ܐܰܘ ܟܺܝܬ ܦܰܓܪ̈ܶܐ܆ ܥܰܠ ܕܰܥܒܺܝܕܺܝܢ ܠܗܶܝܢ ܠܰܡ ܒܰܕܡܽܘܬ ܣܺܝ̈ܡܐܛܐ ܐܰܘ ܟܺܝܬ ܩܰܒܪ̈ܶܐ. ܘܳܐܦ ܥܰܠ ܫܡܳܐ ܕܺܝܠܗܶܝܢ ܕܢܰܦ̈ܫܳܬܳܐ ܬܽܘܒ܆ ܗܽܘ ܟܰܕ ܗܽܘ ܒܶܕܝܳܐ ܒ̣ܕܰܘ. ܥܰܠ ܕܡܰܣܒܰܗ ܫܡܳܐ ܕܢܰܦܫܳܐ ܠܕܩܘܪܐ܆ ܢܰܦܫܳܐ ܓܶܝܪ ܦܣܘܟܝ ܡܶܬܩܰܪܝܳܐ: ܩܘܪܐ ܕܶܝܢ ܦܣܘܟܘܣ: ܒܳܕܶܝܢ܆ ܡܶܛܽܠ ܕܒܰܪ̈ܝܳܢ ܕܽܘܒܳܪܳܐ ܗܰܘ ܕܺܐܝܬܰܝܗܶܝܢ ܗ̱ܘܰܝ̈ ܒܶܗ ܠܰܡ܆ ܐܶܬܩܪ̈ܺܝܶܢ ܦܣܘ̈ܟܐ ܐܰܘ ܟܺܝܬ ܢܰܦ̈ܫܳܬܳܐ.