ܡܺܐܡܪܳܐ ܕܰܬܠܳܬܺܝܢ ܘܰܬܪܶܝܢ

ܕܥܰܠ ܝܽܘܚܰܢܳܢ ܡܰܥܡܕܳܢܳܐ.

32: ܬܽܘܒ ܐܳܦ ܗܳܫܳܐ. ܝܽܘܚܰܢܳܢ ܗܰܘ ܡܰܥܡܕܳܢܳܐ. ܡܰܟܪܶܙ ܟܰܕ ܐܳܡܰܪ: ܐܶܢܳܐ ܩܳܠܳܐ ܕܗܰܘ ܕܩܳܥܶܐ ܒܡܰܕܒܪܳܐ܆ ܛܰܝܶܒܘ ܐܽܘܪܚܶܗ ܕܡܳܪܝܳܐ܆ ܬܪ̈ܺܝܨܶܐ ܥܒܶܕܘ ܠܰܫ̈ܒܺܝܠܶܐ ܕܺܝܠܶܗ^[1]. ܘܰܚܢܰܢ ܟܰܕ ܩܳܠܐ ܡܰܙܥܶܩ܆ ܕܠܳܐ ܩܳܠܳܐ ܢܩܰܘܶܐ ܘܢܶܫܬܽܘܩ܆ ܘܳܐܦܠܳܐ ܗܳܝ ܕܰܙܡܳܡܳܐ ܕܥܳܢܶܐ ܒܰܪ̱ܬ ܩܳܠܳܐ ܢܶܚܰܫ܆ ܘܰܠܘܳܬ ܪܺܝܫܳܗ̇ ܘܫܽܘܠܳܡܳܗ̇ ܕܰܙܥܳܩܬܳܐ܆ ܢܶܗܦܽܘܟ ܢܰܙܥܶܩ ܠܩܽܘܒܠܳܗ̇. ܘܡܰܢܽܘ ܕܠܳܐ ܢܶܥܕܽܘܠ ܠܰܢ ܥܰܠ ܠܳܐ ܡܠܺܝܠܽܘܬܳܐ ܛܳܠܽܘܡܬܳܐ. ܙܡܳܡܳܐ ܡܰܢ ܓܶܝܪ ܕܩܳܠܳܐ. ܕܗܳܢܽܘܢ ܒܢܰܝ̈ܢܳܫܳܐ ܐ̱ܚܪ̈ܳܢܶܐ. ܟܰܕ ܒܡܰܕܒܪܳܐ ܡܶܬܬܰܙܥܰܩ܆ ܢܩܳܫܳܐ ܕܡܳܚܶܐ ܠܳܐܐܰܪ ܐܺܝܬܰܘܗ̱ܝ܆ ܘܒܶܗ ܠܳܐ ܡܫܰܘܕܥܳܐܺܝܬ ܗܳܦܶܟ ܢܳܦܶܠ ܟܰܕ ܝܳܗܶܒ ܩܳܠܳܐ. ܟܰܕ ܕܶܝܢ ܒܰܪ̱ܬ ܩܳܠܳܐ ܕܝܽܘܚܰܢܳܢ ܩܳܥܝܳܐ܆ ܘܰܠܡܶܐܬܺܝܬܳܐ ܕܒܰܒܣܰܪ ܕܡܶܠܬܳܐ ܡܣܰܒܪܳܐ܆ ܘܰܒܢܰܦܫ̈ܳܬܳܐ ܡܰܙܥܩܳܐ ܠܰܘ ܒܰܠܚܽܘܕ ܒܗܳܠܶܝܢ ܪ̈ܳܚܡܳܬ ܐܰ‌ܠܳܗܳܐ܆ ܐܶܠܳܐ ܐܳܦ ܒܗܳܠܶܝܢ ܕܰܓ̈ܠܺܝܙܳܢ ܡܶܢ ܐܰ‌ܠܳܗܳܐ܆ ܡܳܢܳܐ ܢܶܗܘܶܐ ܕܗܳܦܶܟ ܡܶܬܬܰܙܥܰܩ ܠܩܽܘܒܠܳܗ̇܆ ܐܶܠܳܐ ܐܶܢ ܗܳܝ ܕܰܢܛܰܝܶܒ ܐܽܘܪܚܶܗ ܕܡܳܪܝܳܐ܆ ܬܪ̈ܺܝܨܶܐ ܢܶܥܒܶܕ ܫܒ̈ܺܝܠܶܐ ܕܺܝܠܶܗ.

ܡܶܢ ܟܽܠ ܦܪܽܘܤ ܗܳܟܺܝܠ. ܐܳܦ ܚܢܰܢ ܟܰܕ ܠܒܰܪ̱ܬ ܩܳܠܳܐ ܗܳܕܶܐ ܫܳܡܥܺܝܢ ܚ̱ܢܰܢ܆ ܕܰܩܕܳܡ ܡܶܠܬܳܐ. ܩܳܕܡܳܐ ܪܳܗܛܳܐ܆ ܠܰܘ ܙܡܳܡܳܐ ܡܶܕܶܡ ܠܳܐ ܡܫܰܘܕܥܳܢܳܐ. ܢܶܬܶܠ ܠܩܽܘܒܠܳܗ̇܆ ܐܶܠܳܐ ܡܶܠܬܳܐ ܡܫܰܘܕܥܳܢܺܝܬܳܐ܆ ܘܰܕܠܰܐܠܳܗܳܐ ܪܚܺܝܡܳܐ܆ ܘܰܠܫܳܡܽܘ̈ܥܶܐ ܡܰܘܬܪܳܐ. ܘܢܶܗܘܶܐ ܒܰܕܡܽܘܬ ܩܺܝܬܳܪܳܐ ܡܶܕܶܡ ܗܰܘ ܕܠܰܘ ܫܰܦܺܝܪܳܐܺܝܬ ܡܰܢ ܡܰܬܩܰܢ܆ ܘܡܶܢ̈ܶܐ ܡܚܺܝ̈ܠܳܬܳܐ ܐܺܝܬ ܠܶܗ܆ ܘܡܰܙܥܶܩ ܒܰܪ̱ܬ ܩܳܠܳܐ ܕܠܳܐ ܠܳܚܡܳܐ ܠܡܽܘܣܺܝܩܳܪܽܘܬܳܐ܆ ܟܰܕ ܕܶܝܢ ܡܠܰܚܡܳܐܺܝܬ ܡܶܢ ܒܰܪ̱ܬ ܩܳܠܳܐ ܕܝܽܘܚܰܢܳܢ ܡܶܬܢܩܶܫ܆ ܐܳܦ ܩܺܝܢܬܳܐ ܡܫܰܡܠܰܝܬܳܐ ܙܳܡܰܪ܆ ܘܰܙܡܺܝܪܬܳܐ ܡܶܢ ܙܡܺܝܪ̈ܳܬܳܐ ܗܳܠܶܝܢ ܕܨܶܗܝܽܘܢ ܠܰܘ ܒܰܐܪܥܳܐ ܢܽܘܟܪܳܝܬܳܐ܆ ܐܶܠܳܐ ܒܕܳܪ̈ܳܬܶܗ ܕܡܳܪܝܳܐ܆ ܘܒܰܡܨܰܥܬܳܐ ܕܗܳܕܶܐ ܐܽܘܪܶܫܠܶܡ^[2]. ܫܰܪܺܝܪܳܐܺܝܬ ܓܶܝܪ܆ ܒܰܪ̱ܬ ܩܳܠܳܐ ܕܗܰܘ ܕܡܰܙܥܶܩ ܐܺܝܬܰܘܗ̱ܝ ܗ̱ܘܐ ܝܽܘܚܰܢܳܢ܆ ܕܥܽܘܬܪܳܐ ܣܰܓܺܝܳܐܐ ܕܣܽܘ̈ܟܳܠܶܐ ܪ̈ܽܘܚܳܢܳܝܶܐ ܗܺܝ ܒܳܗ̇ ܡܰܝܬܝܳܐ ܗ̱ܘܳܬ.

ܡܶܢ ܗܳܪܟܳܐ ܙܟܰܪܝܳܐ. ܗܰܘ ܐܰܒܳܐ ܕܗܳܢܳܐ܆ ܕܟܳܗܢܳܐ ܐܺܝܬܰܘܗ̱ܝ ܗ̱ܘܳܐ ܐܰܝܟ ܢܳܡܽܘܣܳܐ܆ ܘܰܠܓܰܘ ܩܕܽܘܫ ܩܽܘ̈ܕܫܶܐ ܥ̣ܰܠ ܗ̱ܘܳܐ܆ ܘܣܳܡ ܗ̱ܘܳܐ ܒܶܣ̈ܡܶܐ^[3]܆ ܘܶܐܣܬܰܒܰܪ ܡܶܢ ܓܰܒܪܺܐܶܝܠ. ܕܢܶܗܘܶܐ ܠܶܗ ܒܪܳܐ ܡܶܢ ܐܰܢ̱ܬܬܶܗ ܥܩܰܪܬܳܐ܆ ܘܶܐܬܦܰܠܰܓ ܘܠܳܐ ܗܰܝܡܶܢ܆ ܫܶܬܩܳܐ ܡܶܛܽܠ ܠܳܐ ܗܰܝܡܳܢܽܘܬܳܐ ܡܶܬܚܰܝܰܒ ܗ̱ܘܳܐ. ܘܟܰܕ ܐܶܬܺܝܠܶܕ܆ ܥܰܡ ܩܳܠܐ܆ ܐܳܦ ܫܽܘܟܳܢܳܐ ܕܰܢܒܺܝܽܘܬܳܐ ܢܣܰܒ. ܘܩܰܕܶܡ ܗ̱ܘܳܐ ܡܰܟܪܶܙ ܟܰܕ ܐܳܡܰܪ: ܐܳܦ ܐܰܢ̱ܬ ܛܰܠܝܳܐ ܢܒܺܝܶܗ ܕܰܡܪܰܝܡܳܐ ܬܶܬܩܪܶܐ. ܬܶܩܕܽܘܡ ܓܶܝܪ ܬܺܐܙܰܠ ܩܕܳܡ ܦܰܪܨܽܘܦܶܗ ܕܡܳܪܝܳܐ܆ ܠܰܡܛܰܝܳܒܽܘ ܐܽܘܪ̈ܚܳܬܳܐ ܕܺܝܠܶܗ^[4].

ܙܟܰܪܝܳܐ ܓܶܝܪ܆ ܛܽܘܦܣܳܐ ܐܰܚܺܝܕ ܗ̱ܘܳܐ ܕܟܳܗܢܽܘܬܳܐ ܟܺܝܬ ܘܰܕܬܶܫܡܶܫܬܳܐ ܗܳܝ ܢܳܡܽܘܣܳܝܬܳܐ܆ ܗܳܝ ܟܺܝܬ ܕܰܒܡܰܛܫ̈ܝܳܬܳܐ ܕܺܝܠܶܗ ܘܰܒܥܽܘܡ̈ܩܳܬܳܐ܆ ܒܰܕܡܽܘܬ ܒܶܣ̈ܡܶܐ ܐܺܝܬ ܗ̱ܘܳܐ ܠܶܗ ܕܡܰܛܫܝܳܐ܆ ܒܰܣܺܝܡܽܘܬ ܪܺܝܚܳܐ ܗܳܝ ܡܶܬܗܰܘܢܳܢܺܝܬܳܐ ܕܦܽܘܠܚܳܢ ܬܶܫܡܶܫܬܳܐ ܗܳܝ ܪܽܘܚܳܢܳܝܬܳܐ܆ ܘܐ̱ܪܳܙܳܐ ܗܰܘ ܕܶܐܘܰܢܓܶܠܺܝܽܘܢ ܠܗܰܘ ܕܟܰܕ ܠܳܐ ܗܰܝܡܶܢܘ ܝܽܗ̱ܘ̈ܕܳܝܶܐ܆ ܩܰܘܺܝ ܢܳܡܽܘܣܳܐ. ܠܗܽܘܢ ܡܰܢ ܕܠܳܐ ܩܳܠܐ ܘܠܳܐ ܣܳܥܽܘܪܳܐ ܘܠܳܐ ܡܰܥܒܕܳܢܳܐ܆ ܘܒܰܕܡܽܘܬ ܥܰܩܪ̈ܳܬܳܐ܆ ܕܠܳܐ ܦܺܐܪ̈ܶܐ ܟܺܝܬ ܘܰܕܠܳܐ ܝܰܠ̈ܕܶܐ. ܒ̈ܛܰܠܶܝܢ ܠܗܶܝܢ ܓܶܝܪ ܕܶܒ̈ܚܳܬܳܐ ܗܳܠܶܝܢ ܕܰܐܝܟ ܢܳܡܽܘܣܳܐ ܡܶܫ̈ܬܰܡܠܝܳܢ ܗ̱ܘܰܝ̈. ܠܰܡܗܰܝܡ̈ܢܶܐ ܕܶܝܢ ܗܳܢܽܘܢ ܕܡܶܢ ܓܙܽܘܪܬܳܐ. ܘܰܠܥܰܡܡ̈ܶܐ. ܠܰܘ ܒܰܠܚܽܘܕ ܠܳܐ ܗܘ̣ܳܐ ܕܠܳܐ ܩܳܠܳܐ܆ ܐܶܠܳܐ ܐܳܦ ܕܥܰܡ ܢܒܺܝܽܘܬܳܐ ܡܡܰܠܶܠ. ܘܰܕܪܽܘܚܳܢܳܐܺܝܬ ܡܶܬܬܰܥܒܰܕ.

ܠܰܟܪ̈ܺܝܣܛܝܳܢܶܐ ܕܶܝܢ. ܥܕܰܡܳܐ ܠܝܰܘܡܳܢܳܐ ܡܶܬܢܰܒܶܐ ܢܳܡܽܘܣܳܐ܆ ܘܡܶܬܗܰܘܢܳܢܳܐܺܝܬ ܡܶܬܦܠܰܚ ܡܶܢܗܽܘܢ܆ ܟܰܕ ܠܥܽܘܡ̈ܩܶܐ ܕܪܽܘܚܳܐ ܥܳܐܠܺܝܢ ܘܰܠܦܺܐܪܳܐ ܕܡܶܢ ܬܰܡܳܢ ܩܳܛܦܺܝܢ܆ ܘܰܒܫܽܘܟܳܢ̈ܶܐ ܪ̈ܽܘܚܳܢܳܝܶܐ ܡܶܨܛܰܒܬܺܝܢ ܘܳܐܡܪܺܝܢ: ܡܶܛܽܠ ܕܶܚܠܬܳܐ ܕܺܝܠܳܟ ܡܳܪܝܳܐ ܒܟܰܪܣܳܐ ܫܩܰܠܢܰܢ^[5]܆ ܘܰܚܒܰܠܢܰܢ ܘܺܝܠܶܕܢܰܢ ܪܽܘܚܳܐ ܕܦܽܘܪܩܳܢܳܐ ܕܺܝܠܳܟ. ܗܳܟܰܢܳܐ ܓܶܝܪ ܥܺܕܬܳܐ ܡܰܢ ܗܝ ܥܩܰܪܬܳܐ ܘܡܶܢ ܥܰܡܡ̈ܶܐ. ܝܶܠܕܰܬ ܫܰܒܥܳܐ܆ ܐܶܬܡܰܚܠܰܬ ܕܶܝܢ ܟܢܽܘܫܬܳܐ ܗܳܝ ܕܣܰܓܺܝܐܬܳܐ ܐܺܝܬܶܝܗ̇ ܗ̱ܘܳܬ ܒܰܒ̈ܢܰܝܳܐ ܡܶܢ ܩܕܺܝܡ܆ ܘܰܗܘ̣ܰܘ ܣܰܓܺܝ̈ܶܐܐ ܒܢܰܝ̈ܳܐ ܕܗܳܝ ܡܓܰܙܰܝܬܳܐ ܝܰܬܺܝܪܳܐܺܝܬ^[6]܆ ܐܰܘ ܕܗܳܝ ܕܺܐܝܬ ܗ̱ܘܳܐ ܠܳܗ̇ ܓܰܒܪܳܐ.

ܘܰܐܟܙܢܳܐ ܟܺܝܬ ܕܰܙܟܰܪܝܳܐ. ܐܰܒܳܐ ܐܺܝܬܰܘܗ̱ܝ ܗ̱ܘܳܐ ܕܝܽܘܚܰܢܳܢ܆ ܕܒܰܪ̱ܬ ܩܳܠܳܐ ܗܳܝ ܕܡܰܙܥܩܳܐ ܗ̱ܘܳܬ ܒܡܰܕܒܪܳܐ܆ ܘܰܕܢܶܩܪܶܝܘܗ̱ܝ ܝܽܘܚܰܢܳܢ ܒܝܰܕ ܠܶܫܳܢܳܐ ܠܳܐ ܡܶܫܟܰܚ ܗ̱ܘܳܐ܆ ܟܰܕ ܫܩܰܠ ܕܶܝܢ ܦܶܢܩܺܝܬܳܐ^[7]. ܠܟܽܘܢܳܝܳܐ ܟܳܬܶܒ ܗ̱ܘܳܐ܆ ܗܳܟܰܢܳܐ ܐܳܦ ܢܳܡܽܘܣܳܐ܆ ܥܰܩܪܳܐ ܡܶܕܶܡ ܐܺܝܬܰܘܗ̱ܝ ܗ̱ܘܳܐ ܘܪܺܝܫܳܐ܆ ܕܒܰܪ̱ܬ ܩܳܠܶܗ ܪܰܒܬܳܐ ܕܶܐܘܰܢܓܶܠܺܝܽܘܢ܆ ܗܳܝ ܟܺܝܬ ܕܟܰܕ ܚܰܪܒܬܳܐ ܘܡܰܕܒܪܳܐ ܐܺܝܬܶܝܗ̇ ܗ̱ܘܳܬ ܡܶܬܥܰܡܪܳܢܺܝܬܳܐ܆ ܝܺܕܰܥܬܳܐ ܕܰܐ‌ܠܳܗܳܐ ܡܶܠܬܶܗ܆ ܠܗܳܝ ܕܠܳܐ ܡܶܫܟܰܚ ܗ̱ܘܳܐ ܢܳܡܽܘܣܳܐ ܕܰܐܝܟ ܕܰܒܝܰܕ ܠܶܫܳܢܳܐ ܓܰܠܝܳܐܺܝܬ ܢܡܰܠܠܺܝܗ̇ ܘܢܰܦܩܺܝܗ̇ ܒܩܳܠܳܐ܆ ܐܰܝܟ ܕܰܒܦܶܢܩܺܝܬܳܐ ܕܶܝܢ ܒܝܰܕ ܛܽܘܦ̈ܣܶܐ ܪܳܫܶܡ ܗ̱ܘܳܐ ܠܳܗ̇.

ܐܶܢ ܗܳܟܺܝܠ. ܟܰܕ ܡܶܢܳܗ̇ ܕܟܰܪܣܳܐ ܕܶܐܡܶܗ ܫܘܰܚ ܗܽܘ ܝܽܘܚܰܢܳܢ܆ ܘܡܶܢܗܽܘܢ ܕܥܰܙܪܽܘܪ̈ܶܐ܆ ܡܥܺܝܢܳܐ ܕܐ̱ܪ̈ܳܙܶܐ ܕܕܰܐܝܟ ܗܳܠܶܝܢ ܡܰܫܦܰܥ^[8] ܠܰܢ. ܐܰܝܟܰܢܳܐ ܠܰܘ ܠܟܽܠ ܡܰܫܡܰܥܬܳܐ ܘܬܰܪܥܺܝܬܳܐ ܬܛܺܝܦ ܒܰܕܡܽܘܬ ܪܶܕܝܳܐ ܕܝܰܡܳܐ܆ ܬܰܫܥܺܝܬܳܐ ܗܳܝ ܕܟܽܠܗܽܘܢ ܚܰܝܰܘ̈ܗ̱ܝ ܘܰܕܕܽܘܒܳܪܶܗ ܗܰܘ ܡܰܠܰܐܟܳܝܳܐ. ܡܶܚܕܳܐ ܓܶܝܪ ܬܪܺܝܨܳܐܺܝܬ. ܡܶܢܳܗ̇ ܕܩܰܘܡܬܳܐ ܫܰܒܪܳܝܬܳܐ܆ ܠܘܳܬ ܡܰܕܒܪܳܐ ܬܪܰܨ ܚܺܐܦܶܗ ܐܰܟܙܢܳܐ ܕܰܠܘܳܬ ܒܶܝܬ ܕܰܪܳܐ܆ ܘܕܽܘܒܳܪܳܐ ܐܶܬܥܰܢܘܺܝ ܠܳܐ ܡܥܰܝܕܳܐ ܠܰܒܢܰܝ̈ܢܳܫܳܐ ܘܰܕܠܳܐ ܝܺܕܺܝܥ܆ ܘܰܕܠܰܐܠܳܗܳܐ ܒܰܠܚܽܘܕܰܘܗ̱ܝ ܡܶܬܺܝܕܰܥ ܗ̱ܘܳܐ. ܟܰܕ ܡܚܰܘܶܐ ܗ̱ܘܳܐ. ܐܳܦ ܒܝܰܕ ܗܳܕܶܐ ܓܰܠܝܳܐܺܝܬ܆ ܕܕܶܢܚ̈ܶܐ ܕܝܰܬܺܝܪ ܚܰܕܬܺܝܢ ܘܠܳܐ ܗܽܘ̈ܠܳܢܳܝܶܐ ܡܶܕܶܡ ܥܬܺܝܕ ܗ̱ܘܳܐ ܕܢܶܗܘܶܐ ܠܰܢ ܟܳܪܽܘܙܳܐ܆ ܠܗܳܠܶܝܢ ܕܳܐܦ ܡܟܰܢܶܐ ܗ̱ܘܳܐ ܠܗܽܘܢ ܡܰܠܟܽܘܬܳܐ ܕܰܐ‌ܠܳܗܳܐ ܟܰܕ ܓܰܠܝܳܐܺܝܬ ܐܳܡܰܪ ܗ̱ܘܳܐ: ܬܽܘܒܘ܆ ܩܶܪܒܰܬ ܠܳܗ̇ ܡܰܠܟܽܘܬܳܐ ܕܰܐ‌ܠܳܗܳܐ^[9].

ܟܰܕ ܓܶܝܪ ܚܛܺܝܬܳܐ ܠܳܐ ܡܰܡܠܟܳܐ ܒܰܢ܆ ܐܶܠܳܐ ܙܰܕܺܝܩܽܘܬܳܐ^[10] ܐܰܝܟ ܡܶܠܬܶܗ ܕܚܰܟܺܝܡܳܐ ܦܰܘܠܽܘܤ: ܙܳܕܩܳܐܺܝܬ ܠܚܰܝ̈ܶܐ ܕܕܰܐܝܟ ܗܳܠܶܝܢ܆ ܡܰܠܟܽܘܬܳܐ ܕܰܐ‌ܠܳܗܳܐ ܡܫܰܡܰܗ ܗ̱ܘܳܐ܆ ܗܰܘ ܪܰܗܳܛܳܐ ܕܰܩܕܳܡ ܦܳܪܽܘܩܰܢ. ܗܰܘ ܕܟܰܕ ܡܶܢ ܟܰܕܽܘ. ܐܳܦ ܓܰܒܪܳܐ ܗ̱ܘܳܐ܆ ܘܰܠܘܳܬ ܗܳܝ ܕܰܡܫܰܡܠܝܳܐ ܕܩܰܘܡܬܳܐ ܟܺܝܬ ܗܳܝ ܦܰܓܪܳܢܳܝܬܳܐ ܘܗܳܝ ܡܶܬܗܰܘܢܳܢܺܝܬܳܐ ܡܰܢܰܥ܆ ܒܦܽܘܩܕܳܢܳܐ ܕܰܐ‌ܠܳܗܳܐ ܒܰܕܡܽܘܬ ܟܰܘܟܒܳܐ ܡܶܕܶܡ ܫܰܦܪܳܝܳܐ. ܡܶܢ ܚܽܘܪܒܐ ܕܢܰܚ܆ ܟܰܕ ܡܶܢܶܗ ܕܙܰܒܢܳܐ ܩܰܕܡܳܝܳܐ܆ ܘܠܳܐ ܠܐ̱ܢܳܫ ܡܰܢ ܡܶܢ ܗܳܠܶܝܢ ܕܥܰܠ ‌ܐܰܪܥܳܐ܆ ܠܗܰܘ ܕܶܝܢ ܕܒܰܫܡܰܝܳܐ ܒܰܠܚܽܘܕܰܘܗ̱ܝ܆ ܐܺܝܬ ܗ̱ܘܳܐ ܠܶܗ ܣܳܗܕܳܐ ܘܣܳܐܶܡ ܢܳܡܽܘܣܳܐ ܘܪܳܕܽܘܝܳܐ.

ܘܡܶܟܺܝܠ. ܠܰܘ ܦܫܺܝܛܳܐܝܬ܆ ܐܶܠܳܐ ܥܰܡ ܢܒܺܝܽܘܬܳܐ ܡܶܬܚܙܶܐ܆ ܟܕ ܐܳܡܰܪ: ܐܶܢܳܐ ܩܳܠܳܐ ܗܰܘ ܕܩܳܥܶܐ ܒܡܰܕܒܪܳܐ܆ ܛܰܝܶܒܘ ܐܽܘܪܚܳܐ ܕܡܳܪܝܳܐ^[11]܆ ܐܰܝܟ ܕܰܠܡܺܐܡܰܪ. ܟܰܕ ܐܰܝܟ ܕܰܒܨܶܒܥܳܐ ܡܚܰܘܶܐ. ܘܡܰܙܥܶܩ܆ ܕܡܳܪܝܐ ܗܰܘ ܕܶܐܬܢܰܒܺܝ^[12] ܡܶܢ ܩܕܺܝܡ܆ ܗܳܐ ܩܰܪܺܝܒ. ܘܥܰܠ ܬܰܪ̈ܥܶܐ ܐܺܝܬܰܘܗ̱ܝ. ܕܶܐ݀ܥܒܶܕ ܠܶܗ ܐܽܘܪܚܳܐ ܐܶܬܺܝܬ̣. ܨܳܒܶܐ ܓܶܝܪ ܕܰܒܟܽܘܢ ܩܰܕܡܳܐܺܝܬ ܢܗܰܠܶܟ ܒܝܰܕ ܦܽܘܩ̈ܕܳܢܶܐ. ܘܶܐܡܰܬܝ ܕܢܶܚܙܶܐ ܠܽܐܘܪܚܳܐ. ܕܰܒܟܽܠܢܳܫ ܡܬܰܩܢܳܐ ܘܫܰܦܝܳܐ܆ ܗܳܝܕܶܝܢ ܡܶܟܺܝܠ ܢܺܐܡܰܪ: ܐܶܢܳܐ ܘܰܐܒܳܐ ܢܺܐܬܶܐ. ܘܰܐܘܳܢܳܐ ܠܘܳܬܶܗ ܢܶܥܒܶܕ^[13].

ܘܟܰܕ ܗܳܠܶܝܢ ܐܳܡܰܪ ܗ̱ܘܳܐ: ܡܦܺܝܤ ܗ̱ܘܳܐ܆ ܘܰܠܣܰܓܺܝ̈ܶܐܐ ܠܘܳܬ ܡܰܥܡܽܘܕܺܝܬܳܐ ܕܰܬܝܳܒܽܘܬܳܐ ܢܳܓܶܕ ܗ̱ܘܳܐ܆ ܟܰܕ ܩܳܕܶܡ ܗ̱ܘܳܐ ܡܕܰܟܶܐ܆ ܘܩܳܕܶܡ ܗ̱ܘܳܐ ܡܥܰܬܶܕ ܒܝܰܕ ܡܰܝ̈ܳܐ܆ ܠܘܳܬ ܡܰܘܗܰܒܬܳܐ^[14] ܗܳܝ ܕܪܽܘܚܳܐ܆ ܘܰܠܘܳܬ ܫܽܘܠܛܳܢܳܐ ܐܰܘܟܺܝܬ ܐܺܝܩܳܪܳܐ ܗܰܘ ܪܰܒܳܐ ܕܣܳܝܽܘܡܽܘܬ ܒܢܰܝ̈ܳܐ. ܐܳܦ ܓܶܝܪ ܐܰܝܟ ܕܒܰܫܪܳܪܐ. ܕܰܐܝܟ ܗܳܢܳܐ ܦܐܶܐ ܗ̱ܘܳܐ ܕܢܶܗܘܶܐ ܐܺܝܬܰܘܗ̱ܝ ܗ̱ܘܳܐ܆ ܗܰܘ ܕܰܠܘܳܬ ܐ̱ܪ̈ܳܙܶܐ ܕܕܰܐܝܟ ܗܳܠܶܝܢ ܩܳܪܶܐ ܗ̱ܘܳܐ܆ ܘܩܳܕܶܡ ܗ̱ܘܳܐ ܪܳܗܶܛ ܩܕܳܡ ܡܶܐܬܺܝܬܶܗ ܕܥܰܡܰܢܽܘܐܶܝܠ. ܐܰܝܟ ܐܰܝܢܳܐ ܕܺܐܝܬܰܘܗ̱ܝ ܗ̱ܘܳܐ ܝܽܘܚܰܢܳܢ ܗܰܘ ܡܰܥܡܕܳܢܳܐ.

ܐܰܝܟܰܢܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܕܣܳܦܩܳܐ ܕܰܬܪܺܝܡ ܠܬܰܪܥܺܝܬܗܽܘܢ ܕܗܳܢܽܘܢ ܕܫܳܡܥܺܝܢ ܗ̱ܘܰܘ܆ ܘܡܶܢ ܚܛܺܝܬܳܐ ܬܰܪܚܶܩ ܐܶܢܽܘܢ ܘܳܐܦ ܡܶܢܗܶܝܢ ܕܬܰܪ̈ܥܝܳܬܳܐ ܕܰܐܪܥܳܐ܆ ܘܬܶܩܒܽܘܥ ܐܶܢܽܘܢ ܒܰܫܡܰܝܳܐ܆ ܘܰܬܥܰܬܶܕ ܐܶܢܽܘܢ ܕܰܢܚܽܘܪܽܘܢ ܠܥܶܠ܆ ܘܰܕܢܶܗܘܶܐ ܦܥܺܝܪ ܠܗܽܘܢ ܚܶܟܗܽܘܢ܆ ܘܰܠܡܶܐܬܺܝܬܳܐ ܕܰܐ‌ܠܳܗܳܐ ܢܣܰܟܽܘܢ܆ ܗܳܝ ܕܢܶܚܙܽܘܢ ܓܰܒܪܳܐ ܟܰܕ ܠܳܐ ܩܰܕܶܡ ܐܶܬܚܙܺܝ ܘܶܐܬܺܝܕܰܥ ܘܡܶܢܫܶܠܝ܆ ܕܰܒܡܰܕܒܪܳܐ ܐܶܬܚܙܺܝ܆ ܘܒܰܕܡܽܘܬ ܚܰܝܠܳܐ ܡܶܕܶܡ ܕܡܶܢ ܫܡܰܝܳܐ ܐܰܬܺܝ܆ ܘܳܐܦ ܒܶܗ ܒܶܐܣܟܺܡܳܐ ܕܶܚܠܬܳܐ ܡܨܶܐ ܠܡܶܥܒܰܕ܆ ܘܰܡܩܰܫܰܝ ܡܶܢ ܦܰܓܪܶܗ܆ ܠܣܰܥܪܳܐ ܕܶܝܢ ܕܪܺܝܫܶܗ ܐܰܝܟ ܢܙܺܝܪܳܐ ܐܺܝܬ ܠܶܗ ܟܽܠ ܟܽܠܶܗ ܠܳܐ ܡܶܣܬܰܦܪܳܢܳܐ܆ ܘܰܒܕܰܩܢܳܐ ܣܥܽܘܪ ܘܥܰܒܺܝܛ܆ ܘܰܐܣܺܝܪ ܥܶܪܰܩܬܳܐ ܕܡܶܫܟܳܐ܆ ܘܰܠܘܳܬ ܥܽܘܗܕܳܢܳܐ ܕܶܐ‌ܠܺܝܳܐ ܢܒܺܝܳܐ ܡܰܣܶܩ ܠܗܳܢܽܘܢ ܕܚܳܙܶܝܢ ܠܶܗ. ܐܳܦ ܓܶܝܪ ܐܳܦ ܡܶܛܽܠ ܗܰܘ ܐܳܡܰܪ ܟܬܳܒܳܐ ܟܳܗܢܳܝܳܐ܆ ܓܰܒܪܳܐ ܣܰܥܳܪܳܐ ܘܰܕܥܶܪܰܩܬܳܐ ܕܡܶܫܟܳܐ ܐܰܣܺܝܪ ܥܰܠ ܟܣܳܣܬܶܗ^[15]܆ ܘܠܰܒ̈ܢܳܬ ܩܴ̈ܠܶܐ ܗܳܠܶܝܢ ܕܡܶܢ ܐܶܫܰܥܝܳܐ ܩܰܕܶܡ̈ܶܝܢ ܐܶܬܟܪ̈ܶܙܶܝܢ ܡܰܙܥܶܩ: ܛܰܝܶܒܘ ܐܽܘܪܚܶܗ ܕܡܳܪܝܳܐ܆ ܬܪ̈ܺܝܨܶܐ ܥܒܶܕܘ ܠܰܫ̈ܒܺܝܠܶܐ ܕܺܝܠܶܗ^[16]܆ ܘܬܰܟܣܺܝܬܳܐ ܕܣܰܥܪܳܐ ܐܺܝܬ ܠܶܗ܆ ܘܠܰܘ ܦܫܺܝܛܳܐܺܝܬ܆ ܐܶܠܳܐ ܕܡܶܢ ܣܰܥܪܳܐ ܕܓܰܡ̈ܠܶܐ ܡܰܬܩܢܳܐ^[17]. ܘܳܐܦ ܗܳܕܶܐ ܕܶܝܢ ܠܰܘ ܕܠܳܐ ܡܶܠܬܳܐ. ܐܶܠܳܐ ܐܰܝܟ ܕܰܒܐ̱ܪܳܙܳܐ ܘܰܒܛܽܘܦܣܳܐ.

ܐܳܦ ܓܶܝܪ ܗܽܘ ܓܰܡܠܳܐ܆ ܘܠܳܐ ܥܰܡ ܗܳܠܶܝܢ ܚܰܝ̈ܘܳܬܳܐ ܛܰܡ̈ܳܐܬܳܐ ܡܢܶܐ ܓܡܺܝܪܳܐܺܝܬ܆ ܘܳܐܦܠܳܐ ܥܰܡ ܗܳܠܶܝܢ ܕܰܟ̈ܝܳܬܳܐ. ܛܶܟܣܐ ܕܶܝܢ ܡܶܕܶܡ ܡܶܨܥܳܝܳܐ ܐܺܝܬ ܠܶܗ܆ ܘܠܰܬܪ̈ܰܝܗܽܘܢ ܓܶܢ̈ܣܶܐ ܕܳܡܶܐ ܒܫܽܘܘ̈ܕܳܥܶܐ ܗܳܠܶܝܢ ܕܺܝܠܗܽܘܢ. ܗܳܝ ܡܰܢ ܓܶܝܪ ܕܢܰܣܶܩ ܦܫܳܪܳܐ^[18]. ܗܳܢܰܘ ܕܶܝܢ ܗܳܝ ܕܢܰܣܩܺܝܗ̇ ܠܡܶܐܟܽܘܠܬܳܐ ܗܳܝ ܕܰܚܕܳܐ ܙܒܰܢ ܐܶܬܒܰܠܥܰܬ܆ ܘܬܽܘܒ ܠܘܳܬ ܫܶܢ̈ܶܐ ܢܫܰܕܪܺܝܗ̇ ܘܡܶܢ ܕܪܺܝܫ ܢܶܠܥܣܺܝܗ̇܆ ܕܺܝܠܳܝܬܳܐ ܕܚܰܝ̈ܘܳܬܳܐ ܕܰܟ̈ܝܳܬܳܐ ܐܺܝܬܶܝܗ̇. ܗܳܝ ܟܺܝܬ ܕܳܐܦ ܠܓܰܡܠܳܐ ܫܟܺܝܚܳܐ. ܗܳܝ ܕܶܝܢ ܕܠܳܐ ܬܶܗܘܶܐ ܦܨܺܝܠܳܐ ܦܰܪܣܬܶܗ܆ ܒܗܳܠܶܝܢ ܠܳܐ ܕܰܟ̈ܝܳܬܳܐ ܡܟܰܢܶܐ. ܐܳܦ ܦܰܪܣܬܳܐ ܕܶܝܢ ܕܓܰܡܠܳܐ. ܒܡܰܣܪܚܳܢܽܘܬܳܐ ܕܛܶܦܪ̈ܶܐ܆ ܠܳܐ ܨܰܪܝܳܐ^[19].

ܡܶܛܽܠ ܗܳܕܶܐ ܗܳܟܺܝܠ ܥܶܠܬܳܐ܆ ܠܣܰܥܪܳܐ ܕܗܳܕܶܐ ܚܰܝܽܘܬܳܐ ܡܶܬܟܰܣܶܐ ܗ̱ܘܳܐ ܝܽܘܚܰܢܳܢ. ܟܕ ܡܚܰܘܶܐ ܗ̱ܘܳܐ. ܕܰܩܪܳܝܬܳܐ ܐܶܘܰܢܓܶܠܳܝܬܳܐ܆ ܘܡܰܠܟܽܘܬܳܐ ܕܰܐ‌ܠܳܗܳܐ ܗܳܝ ܕܳܐܡܰܪ ܗ̱ܘܳܐ: ܕܩܶܪܒܰܬ ܠܳܗ̇܆ ܐܳܦ ܠܗܳܢܽܘܢ ܕܡܶܢ ܐܺܝܣܪܳܐܶܝܠ ܥܰܡܳܐ ܗܰܘ ܕܰܟܝܳܐ ܘܰܡܩܰܒܠܳܐ܆ ܘܳܐܦ ܠܗܳܢܽܘܢ ܕܡܶܢ ܥܰܡܡ̈ܶܐ ܠܳܐ ܕܟܰܝ̈ܳܐ܆ ܘܕܳܐܦ ܠܗܳܠܶܝܢ. ܘܳܐܦ ܠܗܳܢܽܘܢ܆ ܒܫܰܘܝܽܘܬ ܐܺܝܩܳܪܳܐ ܡܰܟܪܶܙ ܗ̱ܘܳܐ ܬܝܳܒܽܘܬܳܐ.

ܐܰܟܙܢܳܐ ܕܶܝܢ ܕܶܐ‌ܠܺܝܳܐ ܗܰܘ ܢܒܺܝܳܐ. ܟܕ ܟܰܦܢܳܐ ܐܶܚܰܕ ܠܰܐܪܥܳܐ܆ ܟܰܕ ܝܳܬܶܒ ܗ̱ܘܳܐ ܒܢܰܚܠܳܐ ܕܟܶܪܝܰܬ܆ ܡܶܢ ܥܽܘܪ̈ܒܶܐ ܡܶܬܬܰܪܣܶܐ ܗ̱ܘܳܐ ܐ̱ܪܳܙܳܢܳܐܺܝܬ. ܟܰܕ ܒܨܰܦܪܳܐ ܡܰܢ. ܠܰܚܡܳܐ ܡܩܰܒܶܠ ܗ̱ܘܳܐ܆ ܠܘܳܬ ܦܳܢܝܳܐ ܕܶܝܢ ܡܫܰܘܚܪܳܐ ܒܶܣܪܳܐ. ܟܰܕ ܗܳܕܶܐ ܡܰܘܕܥܳܐ ܗ̱ܘܳܬ ܡܶܠܬܳܐ܆ ܕܶܐܡܰܬܝ ܡܰܢ ܕܢܳܡܽܘܣܳܐ ܗܰܘ ܛܶܠܳܢܳܝܳܐ ܕܰܒܝܰܕ ܡܽܘܫܶܐ ܐܰܚܺܝܕ ܗ̱ܘܳܐ܆ ܘܒܰܗܽܘܪܳܐ ܡܶܕܶܡ ܐܺܝܬܰܘܗ̱ܝ ܗ̱ܘܳܐ ܙܰܠܺܝܩܳܐ ܗܰܘ ܕܺܝܕܰܥܬܳܐ ܕܰܐ‌ܠܳܗܳܐ܆ ܕܶܒܚܬܳܐ ܗܳܝ ܕܰܒܝܕ ܒܶܣܪܳܐ ܡܶܫܬܰܡܠܝܳܐ ܗ̱ܘܬ. ܐܶܡܰܬܝ ܕܶܝܢ ܕܰܡܫܺܝܚܳܐ ܗܰܘ ܫܶܡܫܳܐ ܕܙܰܕܺܝܩܽܘܬܳܐ ܕܢܰܚ. ܐܰܟܙܢܳܐ ܕܟܰܕ ܐܺܝܡܳܡܳܐ ܡܫܰܪܶܐ܆ ܘܟܳܗ̈ܢܶܐ ܗܳܢܽܘܢ ܕܡܶܢ ܥܰܡܡ̈ܶܐ ܛܰܡ̈ܶܐܐ ܒܰܕܡܽܘܬ ܥܽܘܪ̈ܒܶܐ܆ ܟܰܕ ܒܗܰܝܡܳܢܽܘܬܳܐ ܐܶܙܕܰܕܰܩܘ܆ ܠܘܳܬ ܗܳܝ ܕܰܢܟܰܗܢܽܘܢ ܐܶܬܩܪܺܝܘ. ܗܳܝܕܶܝܢ ܕܶܒܚܬܳܐ ܗܳܝ ܛܽܘܦܣܳܢܳܝܬܳܐ ܕܰܒܝܰܕ ܒܶܣܪܳܐ܆ ܠܘܳܬ ܕܶܒܚܬܳܐ ܡܫܰܡܠܰܝܬܳܐ ܘܰܕܠܳܐ ܕܡܳܐ ܗܳܝ ܕܰܒܝܰܕ ܠܰܚܡܳܐ ܥܶܒܪܰܬ ܐܶܫܬܰܚܠܦܰܬ.

ܗܳܟܰܢܳܐ ܐܳܦ ܝܽܘܚܰܢܳܢ ܡܰܥܡܕܳܢܐ܆ ܒܡܶܐܟܽܘܠܬܳܐ ܕܝܰܬܺܝܪ ܐ̱ܪܳܙܳܢܳܝܳܐ ܘܰܕܡܰܠܝܳܐ ܣܽܘ̈ܟܳܠܶܐ ܪ̈ܽܘܚܳܢܳܝܶܐ ܡܶܬܒܰܣܰܡ ܗ̱ܘܳܐ. ܐܳܟܶܠ ܗ̱ܘܳܐ ܕܶܝܢ ܩܰܡ̈ܨܶܐ ܘܕܶܒܫܳܐ ܕܒܰܪܳܐ^[20]. ܟܰܕ ܩܰܡ̈ܨܶܐ ܡܰܢ ܡܚܰܘܶܝܢ܆ ܕܠܰܦܪ̈ܺܝܫܶܐ ܘܰܠܙܰܕܽܘ̈ܩܳܝܶܐ ܕܰܠܘܳܬ ܒܺܝܫܽܘܬܳܐ ܕܪ̈ܰܚܫܳܐ ܪ̈ܳܡܝ̣ܰܝ̣ ܡܶܪܬܳܐ ܐܶܬܢܰܚܰܬܘ܆ ܠܗܳܢܽܘܢ ܟܺܝܬ ܕܳܐܦ ܚ̈ܘܰܘܳܬܳܐ ܘܝܰܠ̈ܕܶܐ ܕܳܐܟ̈ܶܕܢܶܐ ܩܳܪܶܐ ܠܗܽܘܢ^[21]܆ ܠܩܰܡ̈ܨܶܐ ܡܫܰܚܠܶܦ ܠܗܽܘܢ. ܡܶܢ ܦܳܪ̈ܚܳܬܳܐ ܓܶܝܪ ܗܳܢܶܝܢ ܕܰܒܪ̈ܰܚܫܳܐ܆ ܕܰܟܝܳܐ ܐܺܝܬܰܘܗ̱ܝ ܩܰܡܨܳܐ܆ ܘܰܕܠܳܐ ܟ̇ܠܶܐ̣ ܠܡܶܐܟܽܘܠܬܳܐ܆ ܐܰܝܟ ܡܰܢ ܕܰܒܟܰܪ̈ܥܰܘܗ̱ܝ ܡܶܬܬܪܺܝܡ ܠܥܶܠ܆ ܘܰܠܡܶܫܘܰܪ ܡܶܢ ܐܰܪܥܳܐ ܡܶܫܟܰܚ܆ ܗܳܢܰܘ ܕܶܝܢ ܕܢܰܫܩܶܠ ܘܰܢܫܰܢܶܐ ܡܶܢ ܡܰܚ̈ܫܒܳܬܳܐ ܗܳܠܶܝܢ ܕܥܰܠ ‌ܐܰܪܥܳܐ.

ܕܶܒܫܳܐ ܕܶܝܢ ܡܫܰܘܕܰܥ܆ ܕܰܠܗܳܢܽܘܢ ܕܡܶܢ ܥܰܡ̱ܡ̈ܶܐ. ܕܰܗܘ̣ܰܘ ܕܰܒܪ̈ܳܝܶܐ ܘܠܳܐ ܦܠܺܝ̈ܚܶܐ܆ ܘܳܐܦܠܳܐ ܕܦܽܘܩܕܳܢܳܐ ܢܳܡܽܘܣܳܝܳܐ ܩܰܒܶܠܘ ܙܰܪ̈ܥܶܐ܆ ܘܳܐܦܠܳܐ ܕܡܰܠܦܳܢܽܘܬܳܐ ܢܒܺܝܽܘܬܳܐ܆ ܕܢܶܣܟ̣ܽܘܢ^[22] ܡܥܺܝ̈ܢܶܐ ܕܕܶܒܫܳܐ ܡܥܰܬܶܕ ܠܗܽܘܢ. ܘܰܠܗܳܕܶܐ ܚܰܘܺܝ. ܒܗܽܘܢ ܒܣܽܘܥܪ̈ܳܢܶܐ܆ ܡܰܝ̈ܬܝ̣ܰܝ̣ ܐ̱ܪ̈ܳܙܶܐ ܘܡܰܠ̈ܦܳܢܶܐ ܗܳܢܽܘܢ ܕܥܺܕܬܳܐ܆ ܕܰܩܕܳܡ ܟܽܠܳܗ̇ ܗܳܝ ܕܰܬܚܶܝܬ ܫܡܰܝܳܐ ܠܰܐܓܳܢܳܐ ܪܽܘܚܳܢܳܝܬܳܐ ܗܳܝ ܕܡܰܠܦܳܢܽܘܬܳܐ ܐܰܩܺܝܡܘ̱.

ܐܳܦ ܗܳܝ ܕܶܝܢ. ܕܩܰܕܶܡ ܡܕܰܟܶܐ ܘܡܰܣܚܶܐ ܒܡܰܝ̈ܳܐ ܕܰܬܝܳܒܽܘܬܳܐ. ܠܗܳܢܽܘܢ ܕܡܶܬܩܰܪܒܺܝܢ ܗ̱ܘܰܘ. ܕܣܳܦܩܳܐ ܐܺܝܬܶܝܗ̇ ܗ̱ܘܳܬ ܕܰܬܦܺܝܤ܆ ܕܰܠܘܳܬ ܪܶܚܡܰܬ ܐ̱ܢܳܫܽܘܬܳܐ ܡܶܕܶܡ ܐܰ‌ܠܳܗܳܝܬܳܐ ܘܐ̱ܪܳܙܳܢܳܝܬܳܐ ܘܡܶܬܢܰܚܬܳܢܽܘܬܳܐ܆ ܠܘܳܬ ܡܶܐܬܺܝܬܳܐ ܕܰܡܫܺܝܚܳܐ ܡܶܬܥܰܬܕܺܝܢ܆ ܘܕܰܒܡܶܨܥܳܝܽܘܬܳܐ ܣܰܓܺܝܐܬܳܐ ܘܰܐܝܟ ܕܳܐܦܠܳܐ ܐܺܝܬ ܠܡܺܐܡܰܪ: ܕܰܟܡܳܐ ܝܰܬܺܝܪ ܐܰ‌ܠܳܗܳܝܳܐ܆ ܝܰܬܺܝܪ ܡܶܢ ܡܰܚܬܬܳܐ ܗܳܝ ܕܥܰܠ ܛܽܘܪܳܐ ܕܣܺܝܢܰܝ.

ܬܰܡܳܢ ܓܶܝܪ ܠܰܡܫܳܓܽܘ ܡܳܐܢܰܝ̈ܗܽܘܢ ܡܶܬܦܰܩܕܺܝܢ ܗ̱ܘܰܘ ܒܰܠܚܽܘܕ܆ ܥܕܰܡܳܐ ܠܝܰܘܡܳܐ ܬܠܺܝܬܳܝܳܐ ܢܶܬܕܰܟܽܘܢ. ܗܳܪܟܳܐ ܕܶܝܢ. ܕܢܰܦܫܳܐ ܢܚܰܠܠܽܘܢ ܐܰܟܚܕܳܐ ܥܰܡ ܦܰܓܪܳܐ. ܫܳܡܥܺܝܢ ܗ̱ܘܰܘ ܓܶܝܪ ܥܒܶܕܘ ܦܺܐܪ̈ܶܐ ܕܫܳܘܶܝܢ ܠܰܬܝܳܒܽܘܬܳܐ^[23]. ܘܡܽܘܫܶܐ ܡܰܢ. ܟܰܕ ܒܨܰܘܡܳܐ ܕܰܐܪܒܥܺܝܢ ܝܰܘܡܺܝ̈ܢ. ܩܰܕܶܡ ܐܶܬܶܐܪܶܙ. ܠܢܳܡܽܘܣܳܐ ܗܰܘ ܕܰܒܠܽܘܚ̈ܶܐ ܩܰܒܶܠ. ܝܽܘܚܰܢܳܢ ܕܶܝܢ. ܟܰܕ ܠܟܽܠܗܽܘܢ ܚܰܝܰܘ̈ܗ̱ܝ. ܟܰܕ ܠܳܐ ܛܰܥܶܡ ܗ̱ܘܳܐ ܡܶܢ ܡܶܐܟܽܘܠܬܳܐ ܗܰܝ ܕܰܡܥܰܝܕܳܐ ܠܰܒܢܰܝ̈ܢܳܫܳܐ ܫܰܡܠܺܝ ܐܶܢܽܘܢ܆ ܠܡܶܠܬܳܐ ܕܰܐ‌ܠܳܗܳܐ ܗܰܘ ܕܶܐܬܒܰܣܰܪ ܚܰܘܺܝ܆ ܘܰܠܫܽܘܠܳܡܳܐ ܕܺܝܠܶܗ ܕܐ̱ܪܳܙܳܐ ܩܰܕܶܡ ܐܰܘܕܰܥ܆ ܗܳܢܳܐ ܕܶܝܢ. ܐܺܝܬܰܘܗ̱ܝ ܗ̱ܘܳܐ. ܨܠܺܝܒܳܐ܆ ܘܚܰܫܳܐ ܦܳܪܽܘܩܳܝܳܐ ܗܰܘ ܕܒܺܐܝܕܰܘ̈ܗ̱ܝ. ܟܰܕ ܓܰܠܝܳܐܺܝܬ ܐܶܡܰܪ: ܕܗܳܐ ܐܶܡܪܶܗ ܕܰܐ‌ܠܳܗܳܐ ܗܰܘ ܕܰܡܪܺܝܡ^[24] ܚܛܺܝܬܶܗ ܕܥܳܠܡܳܐ^[25].

ܫܳܬܶܩ ܐ̱ܢܳܐ ܠܬܶܫܡܶܫܬܳܐ ܗܳܝ ܕܰܥܡܳܕܳܐ. ܘܥܳܒܰܪ ܐ̱ܢܳܐ ܠܳܗ̇ ܒܡܶܠܬܳܐ܆ ܗܳܝ ܕܒܺܐܝ̈ܕܶܝܗ̇ ܓܫܰܦ ܒܰܟܝܳܢܳܐ ܗܰܘ ܠܳܐ ܡܶܬܓܰܫܦܳܢܳܐ. ܘܰܕܡܶܛܽܠܳܬܰܢ ܡܶܬܓܰܫܦܳܢܳܐ܆ ܟܰܕ ܝܰܡܺܝܢܳܐ ܕܺܝܠܶܗ ܣܳܡ ܥܰܠ ܪܺܝܫܶܗ ܕܥܰܡܰܢܽܘܐܶܝܠ. ܘܰܐܥܡܕܶܗ ܡܰܢ ܐܰܝܟ ܕܠܰܣܢܺܝܩܳܐ ܠܗܰܘ ܕܰܠܥܶܠ ܡܶܢ ܟܽܠ ܪܺܝܫܳܢܽܘܬܳܐ ܫܽܘܠܛܳܢܳܐ ܟܺܝܬ ܘܚܰܝܠܳܐ. ܠܰܡܥܰܠܝܽܘܬܶܗ ܕܶܝܢ ܘܰܠܠܳܐ ܣܢܺܝܩܽܘܬܶܗ ܐܶܫܬܰܘܕܰܥ ܘܶܐܡܰܪ: ܐܶܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܶ݀ܥܡܰܕ ܘܰܐܢ̱ܬ ܐܳܬܶܐ ܐܰܢ̱ܬ ܠܘܳܬܝ. ܐܶܠܳܐ ܫܳܡܰܥ ܗ̱ܘܳܐ. ܫܒܽܘܩ ܗܳܫܳܐ. ܗܳܟܰܢܳܐ ܓܶܝܪ ܕܦܰܐܝܳܐ ܠܰܢ ܐܺܝܬܶܝܗ̇܆ ܕܰܢܡܰܠܶܐ ܟܽܠܳܗ̇ ܙܰܕܺܝܩܽܘܬܳܐ^[26]. ܘܕܰܠܒܺܝܒܽܘܬܳܐ ܡܰܠܝܳܐ ܘܰܕܫܰܦܺܝܪ ܡܶܬܬܦܺܝܣܳܐ ܐܺܝܬܶܝܗ̇ ܗ̱ܘܳܬ܆ ܝܰܡܺܝܢܳܐ ܗܳܝ ܕܰܕܫܳܥܬܳܐ ܡܰܠܝܰܬ ܪܶܥܠܳܐ܆ ܟܰܕ ܠܪ̈ܶܡܙܶܐ ܐܰ‌ܠܳܗܳܝ̈ܶܐ ܡܰܫܦܳܐ ܘܡܶܫܬܰܥܒܕܳܐ. ܐܰܘ ܠܢܰܦܫܳܐ ܕܡܶܬܬܰܝܬܝܳܐ^[27] ܡܶܢ ܐܰ‌ܠܳܗܳܐ܆ ܘܶܐܬܚܰܙܝܰܬ ܡܰܢ ܕܫܳܘܝܳܐ ܠܓܶܠܝܳܢܳܐ ܕܗܳܠܶܝܢ ܠܳܐ ܡܶܬܡܰܠ̈ܠܳܢܝܳܬܳܐ܆ ܠܳܐ ܕܶܝܢ ܐܶܬܬܪܺܝܡܰܬ ܒܪܰܒܽܘܬܳܗ̇ ܕܡܰܘܗܰܒܬܳܐ.

ܟܰܕ ܓܶܝܪ ܐܶܬܓܰܠܝܰܬ ܠܶܗ ܡܶܢ ܐܰ‌ܠܳܗܳܐ ܐܰܒܳܐ. ܗܳܝ ܕܰܥܬܺܝܕܳܐ ܗ̱ܘܳܬ ܕܬܶܗܘܶܐ܆ ܘܳܐܡܰܪ ܗ̱ܘܳܐ ܓܰܠܝܳܐܺܝܬ: ܘܶܐܢܳܐ ܠܳܐ ܝܳܕܰܥ ܗ̱ܘܺܝܬ ܠܶܗ܆ ܐܶܠܳܐ ܗܰܘ ܕܫܰܕܪܰܢܝ ܠܡܰܥܡܳܕܽܘ ܒܡܰܝ̈ܳܐ܆ ܗܰܘ ܐܶܡܰܪ ܠܺܝ܆ ܕܥܰܠ ܗܰܘ ܕܬܶܚܙܶܐ ܪܽܘܚܳܐ ܕܢܳܚܬܳܐ ܘܰܡܩܰܘܝܳܐ ܥܠܰܘܗ̱ܝ܆ ܗܳܢܳܐ ܐܺܝܬܰܘܗ̱ܝ. ܗܰܘ ܕܡܰܥܡܶܕ ܒܪܽܘܚܳܐ ܩܰܕܺܝܫܳܐ^[28]. ܟܰܕ ܐܶܫܬܰܘܕܥܶܗ ܕܰܠܘܳܬ ܡܰܥܡܽܘܕܺܝܬܳܐ ܐܶܬܳܐ܆ ܟܳܠܶܐ ܗ̱ܘܳܐ ܠܶܗ ܟܰܕ ܐܳܡܰܪ: ܕܶܐܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܶ݀ܥܡܰܕ܆ ܘܰܐܢ̱ܬ܆ ܐܳܬܶܐ ܐܰܢ̱ܬ ܠܘܳܬܝ^[29]܆ ܦܽܘܩܕܳܢܶܗ ܐܳܡܰܪ ܕܰܐܒܳܐ܆ ܠܘܳܬ ܬܶܫܡܶܫܬܳܐ ܕܐ̱ܪܳܙܳܐ ܡܚܰܦܶܛ ܠܺܝ.

ܪܰܒܽܘܬܳܐ ܕܶܝܢ ܕܰܐ‌ܠܳܗܽܘܬܳܐ ܕܰܒܪܳܐ. ܬܳܟܣܳܐ ܠܺܝ܆ ܘܰܠܡܶܪܥܰܠ ܥܳܒܕܳܐ ܠܺܝ. ܘܰܠܡܰܗܦܳܟܽܘ ܐܺܝܕܳܐ܆ ܐܳܦܶܢ ܣܰܓܝ ܝܰܬܺܝܪܳܐܺܝܬ ܒܡܶܠܬܳܐ ܕܰܡܕܰܒܪܳܢܽܘܬܳܐ ܡܶܬܟܰܣܝܳܐ. ܫܦܺܝܥܽܘܬܶܗ ܓܶܝܪ ܕܣܽܘܪܳܩܳܐ. ܝܰܬܺܝܪ ܡܶܙܕܰܟܝܳܐ ܒܙܰܗܪ̈ܺܝܪܶܐ ܕܰܐ‌ܠܳܗܽܘܬܳܐ. ܡܳܢܳܐ ܓܶܝܪ ܐܺܝܬ؟ ܗܰܘ ܕܰܠܙܰܠܺܝ̈ܩܶܐ ܕܫܶܡܫܳܐ ܕܙܰܕܺܝܩܽܘܬܳܐ ܡܨܶܐ ܠܰܡܚܰܦܳܝܽܘ. ܡܶܛܽܠܗܳܕܶܐ ܟܺܐܢܳܐܺܝܬ ܕܳܚܶܠ ‌ܐ̱ܢܳܐ. ܡܶܛܽܠܗܳܕܶܐ ܠܦܽܘܩܕܳܢܳܐ ܫܰܘܝܳܐ ܕܰܒܪܳܐ ܡܟܰܬܰܪ ܐ̱ܢܳܐ܆ ܕܗܺܝ ܟܰܕ ܗܺܝ ܠܡܶܣܥܰܪ ܡܰܦܰܤ ܠܺܝ܆ ܗܳܝ ܟܺܝܬ ܕܳܐܦ ܐܰܒܳܐ.

ܕܡܶܢ ܗܳܪܟܳܐ ܗܽܘ ܝܶܫܽܘܥ. ܡܦܰܢܶܐ ܗ̱ܘܳܐ ܦܶܬܓܳܡܳܐ܆ ܗܳܝ ܕܰܫܒܽܘܩ ܗܳܫܳܐ^[30]. ܗܳܢܰܘ ܕܶܝܢ. ܐܰܫܶܦ ܠܚܶܟܡܬܳܐ ܕܰܡܕܰܒܪܳܢܽܘܬܳܐ. ܘܫܰܡܶܫ ܒܰܠܚܽܘܕ܆ ܟܰܕ ܡܶܢ ܠܳܐ ܡܶܬܩܰܪܒܳܢܽܘܬܳܐ ܕܰܐ‌ܠܳܗܽܘܬܳܐ ܕܺܝܠܝ. ܠܳܐ ܡܶܣܬܰܪܰܕ ܐܰܢ̱ܬ܆ ܡܶܛܽܠ ܟܺܝܬ ܕܡܶܬܩܰܪܒܳܢܳܐ ܗܘܰܝܬ ܠܳܟ ܒܝܰܕ ܡܶܬܒܰܣܪܳܢܽܘܬܳܐ.

ܢܶܒܗܬܽܘܢ ܟܰܕ ܗܳܠܶܝܢ ܫܳܡܥܺܝܢ܆ ܗܳܢܽܘܢ ܡܣܰܝ̈ܥܳܢܶܐ ܕܟܽܘܪܗܳܢܶܗ ܕܰܐܪܺܝܽܘܤ ܘܰܕܢܶܣܛܽܘܪܺܝܽܘܤ܆ ܟܰܕ ܗܳܢܽܘܢ ܡܰܢ ܠܫܰܘܝܽܘܬ ܐܺܝܩܳܪܳܐ ܕܰܐ‌ܠܳܗܳܐ ܡܶܠܬܳܐ ܗܳܝ ܕܰܠܘܳܬ ܐܰܒܳܐ ܡܬܰܚܬܶܝܢ ܘܰܡܒܰܨܪܺܝܢ. ܗܳܢܽܘܢ ܕܶܝܢ ܠܒܶܣܪܳܐ ܡܶܢ ܡܶܠܬܳܐ ܡܦܰܠܓܺܝܢ܆ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ. ܐܶ‌ܠܽܘ ܓܶܝܪ ܗܳܕܶܐ ܐܺܝܬܶܝܗ̇ ܗ̱ܘܳܬ܆ ܠܳܐ ܐܳܡܰܪ ܗ̱ܘܳܐ ܡܰܥܡܕܳܢܳܐ: ܕܶܐܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܶ݀ܥܡܰܕ܆ ܘܰܐܢ̱ܬ ܐܳܬܶܐ ܐܰܢ̱ܬ ܠܘܳܬܝ. ܐܶܠܳܐ ܐܳܡܰܪ ܗ̱ܘܳܐ: ܕܳܐܦܶܢ ܕܝܰܬܺܝܪ ܪܰܒ ܡܶܢܝ ܐܺܝܬܰܝܟ ܒܫܽܘܠܛܳܢܳܐ܆ ܐܶܠܳܐ ܒܪܰܡ ܡܰܥܡܶܕ ܐ̱ܢܳܐ 222ܗܘ ܠܳܟ. ܟܰܕ ܠܦܽܘܩܕܳܢܳܐ ܕܰܐ‌ܠܳܗܳܐ ܡܶܫܬܰܥܒܰܕ ܐ̱ܢܳܐ܆ ܐܰܝܟܰܢܳܐ ܕܳܐܦ ܐܰܢ̱ܬ.

ܗܳܫܳܐ ܕܶܝܢ. ܟܰܕ ܗܳܝ ܕܰܠܩܽܘܒܠܳܐ ܐܶܡܰܪ: ܕܶܐܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܶ݀ܥܡܰܕ. ܠܢܰܦܫܶܗ ܡܰܢ. ܗܳܝ ܕܚܰܣܺܝܪܳܐ܆ ܣܗܶܕ ܐܰܝܟ ܕܰܠܒܰܪܢܳܫܳܐ܆ ܗܳܝ ܕܶܝܢ ܕܠܳܐ ܣܢܺܝܩܽܘܬܳܐ܆ ܠܗܰܘ ܣܗܶܕ܆ ܐܰܝܟ ܕܠܰܐܠܳܗܳܐ ܕܒܰܟܝܳܢܳܐ܆ ܘܕܰܡܨܶܐ ܕܰܠܗܳܢܽܘܢ ܕܒܰܣܢܺܝܩܽܘܬܳܐ ܐܺܝܬܰܝܗܽܘܢ܆ ܗܳܠܶܝܢ ܕܰܐܝܟ ܗܳܟܰܢ ܠܰܡܫܰܟܳܢܽܘ.

ܕܰܠܟܽܠܗܶܝܢ ܡܰܢ ܗܳܟܺܝܠ ܡܝܰܬܪ̈ܳܬܳܐ^[31] ܐ̱ܚܪ̈ܳܢܝܳܬܳܐ܆ ܗܳܠܶܝܢ ܟܺܝܬ ܕܰܫܟܺܝ̈ܚܳܢ ܠܶܗ ܠܡܰܥܡܕܳܢܳܐ ܢܺܐܡܰܪ: ܠܰܘ ܕܙܰܒܢܳܐ ܗܳܢܳܐ ܕܩܰܪܺܝܒ ܐܺܝܬܶܝܗ̇. ܐܳܦ ܓܶܝܪ ܟܽܠ ܚܕܳܐ ܡܶܢܗܶܝܢ܆ ܥܰܠ ܡܺܐܡܪܳܐ ܕܺܝܠܳܢܳܝܳܐ ܣܢܺܝܩܳܐ. ܘܥܰܠ ܫܶܡܥܳܐ^[32]. ܕܝܰܬܺܝܪ ܪܰܒ ܒܺܝ̈ܠܺܝܕܰܝ ܢܶܫ̈ܶܐ^[33]. ܡܶܢ ܒܰܪ̱ܬ ܩܳܠܳܐ ܠܳܐ ܕܰܓܳܠܬܳܐ ܐܶܣܬܗܶܕ. ܕܠܰܘ ܒܰܠܚܽܘܕ ܢܒܺܝܳܐ. ܐܶܠܳܐ ܐܳܦ ܝܰܬܺܝܪ ܡܶܢ ܢܒܺܝܳܐ^[34]. ܕܪܳܚܡܳܐ ܕܚܰܬܢܳܐ ܐܶܫܬܰܡܰܗ. ܕܰܫܪܳܓܳܐ ܕܩܳܕܶܡ ܡܰܢܗܰܪ ܘܩܳܕܶܡ ܪܳܗܶܛ ܩܕܳܡ ܫܶܡܫܳܐ ܕܙܰܕܺܝܩܽܘܬܳܐ^[35]. ܕܪܺܝܫܳܐ ܕܰܩܛܺܝܪ̈ܳܢܶܐ ܕܡܰܠܟܽܘܬܳܐ ܕܰܫܡܰܝܳܐ ܐܺܝܬܰܘܗ̱ܝ^[36]. ܕܳܐܦ ܩܕܳܡ ܫܠܺܝ̈ܚܶܐ ܫܠܺܝܚܳܐ ܐܺܝܬܰܘܗ̱ܝ܆ ܒܗܳܝ ܕܩܰܕܶܡ ܐܰܟܪܶܙ ܠܶܐܘܰܢܓܶܠܺܝܽܘܢ܆ ܘܡܰܙܥܶܩ ܬܽܘܒܘ܆ ܩܶܪܒܰܬ ܠܳܗ̇ ܓܶܝܪ ܡܰܠܟܽܘܬܳܐ ܕܰܐ‌ܠܳܗܳܐ^[37].

ܨܳܒܶܐ ܐ̱ܢܳܐ ܕܶܝܢ. ܕܩܰܠܺܝܠ ܡܶܕܶܡ ܐܶ݀ܟܰܬܰܪ ܘܶܐܟܽܘܫ ܠܘܳܬ ܪܺܝܫܶܗ܆ ܗܰܘ ܕܟܰܕ ܐܶܬܦܣܶܩ ܡܶܢܶܗ ܚܠܳܦ ܫܪܳܪܳܐ܆ ܗܽܘ ܩܰܕܡܳܝܳܐ ܚܰܘܺܝ ܠܶܣܛܰܐܕܺܝܽܘܢ ܕܣܳܗ̈ܕܶܐ ܗܰܘ ܕܕܺܝܰܬܺܝܩܺܐ ܚܕܰܬܳܐ܆ ܐܰܝܟܰܢܳܐ ܕܳܦ ܒܶܗ ܒܗܳܕܶܐ܆ ܪܰܗܳܛܳܐ ܕܩܳܕܶܡ ܪܳܗܶܛ ܢܶܗܘܶܐ. ܠܗܶܪܽܘܕܺܝܤ ܓܶܝܪ ܕܰܠܒܰܪ ܡܶܢ ܢܳܡܽܘܣܳܐ ܕܳܡܶܟ ܗ̱ܘܳܐ ܥܰܡ ܐܰܢ̱ܬܰܬ ܐܰܚܽܘܗ̱ܝ܆ ܡܰܠܦܳܢܳܐܺܝܬ ܐܳܡܰܪ ܗ̱ܘܳܐ: ܠܳܐ ܫܰܠܺܝܛ ܠܳܟ ܕܬܶܩܢܶܝܗ̇ ܒܢܶܫ̈ܶܐ^[38]. ܗܰܘ ܕܶܝܢ ܟܰܕ ܠܳܐ ܡܣܰܝܒܰܪ ܗ̱ܘܳܐ ܠܡܰܪܬܝܳܢܽܘܬܳܐ ܗܳܝ ܡܰܟܣܳܢܺܝܬܳܐ. ܘܰܕܗܳܟܰܢܳܐ ܐܺܝܬܶܝܗ̇ ܗ̱ܘܳܬ ܛܳܒܬܳܐ܆ ܘܚܳܫܶܒ ܗ̱ܘܳܐ ܕܰܩܫܺܝܬܳܐ^[39] ܐܺܝܬܶܝܗ̇܆ ܕܠܰܘ ܐܰܝܟ ܢܳܡܽܘܣܳܝܳܐ ܐܰܦܣܶܗ ܠܶܗ ܠܚܽܘܠܛܳܢܳܐ ܗܰܘ ܕܰܠܒܰܪ ܡܶܢ ܢܳܡܽܘܣܳܐ܆ ܠܰܐܣܽܘܪ̈ܶܐ ܘܰܠܒܶܝܬ ܚܒܽܘܫܝܳܐ ܐܰܫܠܡܶܗ܆ ܠܡܳܠܽܘܟܳܐ ܘܡܰܠܦܳܢܳܐ ܕܗܳܠܶܝܢ ܕܦܳܩ̈ܚܳܢ. ܟܰܕ ܣܳܒܰܪ ܗ̱ܘܳܐ. ܕܰܒܝܰܕ ܗܳܕܶܐ ܡܙܺܝܥ ܠܶܗ ܠܰܐܬܠܺܝܛܳܐ ܗܰܘ ܠܳܐ ܡܶܬܬܙܺܝܥܳܢܳܐ^[40]܆ ܘܰܕܕܶܚܠܬܳܐ ܡܰܥܶܠ ܡܰܫܪܶܐ ܒܳܗ̇ ܒܢܰܦܫܳܐ ܗܳܝ ܙܪܺܝܙܬܳܐ ܘܝܰܬܺܝܪ ܚܰܝܠܬܳܢܺܝܬܳܐ܆ ܘܰܕܡܰܠܝܳܐ ܗ̱ܘܳܬ ܡܶܢ ܠܒܺܝܒܽܘܬܳܐ ܡܩܰܠܰܣܬܳܐ ܗܳܝ ܕܚܽܘܫܳܒ̈ܶܐ ܬܪ̈ܺܝܨܶܐ.

ܐܶܠܳܐ ܐܶܬܕܰܓܰܠ ܡܶܢ ܣܰܒܪܶܗ. ܝܰܬܺܝܪܳܐܺܝܬ ܓܶܝܪ܆ ܡܶܢܶܗ ܕܒܶܝܬ ܚܒܽܘܫܝܳܐ ܘܡܶܢܗܽܘܢ ܕܰܐܣܽܘܪ̈ܶܐ܆ ܡܶܬܩܰܪܰܒ ܗ̱ܘܳܐ ܠܶܗ ܝܰܬܺܝܪ ܡܰܟܣܳܢܳܐܺܝܬ. ܗܳܠܶܝܢ ܓܶܝܪ ܕܰܠܗܳܢܽܘܢ ܕܒܰܒܣܰܪ ܚܳܐܝܶܢ. ܩܳܦ̈ܣܳܢ ܘܡܰܕܚ̈ܠܳܢ. ܠܬܰܪ̈ܥܝܳܬܗܽܘܢ ܕܩܰܕܺܝ̈ܫܶܐ܆ ܠܘܳܬ ܗܳܝ ܕܰܡܝܰܬܪܳܐ ܡܪ̈ܺܝܡܳܢ ܘܰܡ̈ܥܰܠܝܳܢ. ܘܟܰܕ ܠܘܳܬ ܐܰ‌ܠܳܗܳܐ ܚܳܝܪܺܝܢ܆ ܫܳܝܛܺܝܢ ܠܗܳܠܶܝܢ ܥܡܺܝ̈ܠܳܬܳܐ ܘܡܰܟܶܐܒܳܢ̈ܝܳܬܳܐ ܕܦܰܓܪܳܐ.

ܡܶܛܽܠ ܗܳܕܶܐ ܗܳܟܺܝܠ. ܡܶܢ ܪܺܝܫܶܗ ܓܰܠܙܶܗ ܩܰܕܡܳܐܺܝܬ܆ ܠܰܘ ܡܶܢ ܦܰܪܶܗ̱ܣܺܝܰܐ. ܘܗܳܝܕܶܝܢ ܒܰܠܚܽܘܕ. ܚܙܳܝܗ̱ܝ ܕܫܰܬܺܝܩ܆ ܠܠܶܫܳܢܶܗ ܗܰܘ ܡܫܰܡܫܳܢܳܐ ܕܢܳܡܽܘܣ̈ܶܐ ܐܰ‌ܠܳܗܳܝ̈ܶܐ. ܐܶܡܰܬܝ ܕܕܰܢܡܰܠܶܠ ܠܳܐ ܡܶܫܟܰܚ ܗ̱ܘܳܐ. ܡܩܰܒܶܠ ܗ̱ܘܳܐ ܠܳܗ̇ ܕܶܝܢ. ܠܕܽܘܟܬܶܗ ܕܝܽܘܚܰܢܳܢ. ܙܢܳܐ ܕܡܰܟܣܳܢܽܘܬܳܐ ܕܝܰܬܺܝܪ ܚܰܝܠܬܳܢ܆ ܦܣܳܩܳܐ ܗܰܘ ܕܡܶܢ ܐܰ‌ܠܳܗܳܐ ܐܶܬܬܰܝܬܺܝ܆ ܘܠܰܡܫܰܩܠܽܘܬܳܐ ܒܰܡܣܳܡ ܒܪܺܝܫܳܐ ܡܚܰܝܶܒ ܗ̱ܘܳܐ. ܟܰܕ ܓܶܝܪ ܒܬܰܫܢܺܝܩܳܐ ܪܳܕܽܘܝܳܐ. ܒܠܰܥ ܦܰܓܪܶܗ܆ ܥܰܡܶܗ ܕܰܡܚܽܘܬܳܐ ܐܶܒܰܕ ܗ̱ܘܳܐ.

ܘܟܰܕ ܛܳܒ ܡܰܪܩܽܘܤ ܒܶܐܘܰܢܓܶܠܺܝܽܘܢ ܐܳܡܰܪ: ܕܕܳܚܶܠ ܗ̱ܘܳܐ ܗܶܪܽܘܕܺܝܤ ܡܶܢ ܝܽܘܚܰܢܳܢ܆ ܟܰܕ ܝܰܕܥܶܗ ܕܓܰܒܪܳܐ ܙܰܕܺܝܩܳܐ ܘܩܰܕܺܝܫܳܐ ܐܺܝܬܰܘܗ̱ܝ܆ ܘܰܕܗܰܢܺܝܳܐܺܝܬ ܫܳܡܰܥ ܗ̱ܘܳܐ ܠܶܗ^[41]. ܐܶܠܳܐ ܕܕܰܐܝܟ ܗܳܟܰܢ ܐܺܝܬܰܘܗ̱ܝ ܣܽܘܥܪܳܢܳܐ ܕܰܛܪ̈ܽܘܢܶܐ. ܡܶܢ ܡܝܰܬܪܽܘܬܳܐ ܡܰܢ ܡܶܬܟܰܚܕܺܝܢ ܘܡܶܬܪܰܟܢܺܝܢ. ܘܗܳܕܶܐ ܡܶܛܽܠ ܣܽܘܓܳܐܐ ܕܥܰܡܳܐ. ܕܗܳܢܽܘܢ ܕܶܝܢ ܕܰܠܗܳܕܶܐ ܡܶܬܥܰܢܘܶܝܢ܆ ܡܩܰܠ̈ܣܳܢܶܐ ܒܰܠܚܽܘܕ ܐܺܝܬܰܝܗܽܘܢ ܘܫܳܡܽܘ̈ܥܶܐ. ܡܕܰܡ̈ܝܳܢܶܐ ܕܶܝܢ ܘܠܳܐ ܣܳܟ. ܡܶܚܕܳܐ ܕܶܝܢ ܕܡܶܬܟܰܣܣܺܝܢ. ܘܡܶܢ ܗܳܠܶܝܢ ܕܗܰܢܺܝ̈ܐܳܢ ܠܗܽܘܢ ܡܶܬܓܰܠܙܺܝܢ. ܡܶܬܢܰܟܬܺܝܢ. ܘܰܠܘܳܬ ܡܨܰܥܬܳܐ ܡܶܬܓܰܪܓܺܝܢ܆ ܘܰܚܣܳܡܳܐ ܡܶܚܕܳܐ ܘܩܶܛܠܳܐ ܚܳܒܠܺܝܢ. ܐܶܢܕܶܝܢ ܐܳܦ ܢܶܫ̈ܶܐ ܥܳܡܪ̈ܳܢ ܥܰܡܗܽܘܢ܆ ܫܰܘ̈ܬܦܳܬܳܐ ܕܺܝܠܶܗ ܟܰܕ ܕܺܝܠܶܗ ܕܨܶܒܝܳܢܳܐ ܛܪܽܘܢܳܝܳܐ܆ ܠܶܗ ܠܰܚܒܳܠܳܐ. ܠܝܰܠܕܳܐ ܡܰܦܩܺܝܢ ܠܶܗ. ܘܡܰܘܬܳܐ ܣܳܥܪܺܝܢ.

ܐܰܟܙܢܳܐ ܕܗܶܪܳܘܕܺܝܰܐ ܟܕ ܡܶܫܬܰܘܬܦܳܐ ܗ̱ܘܳܬ ܠܚܽܘܠܛܳܢܳܐ܆ ܘܡܶܫܬܰܠܗܒܳܐ ܗ̱ܘܳܬ ܒܰܐܟܬܳܐ܆ ܕܚܰܕ ܪܶܩܕܳܐ ܙܰܢܳܝܳܐ܆ ܐܰܓܪܳܐ ܡܰܘܒܕܳܢܳܐ ܫܶܩܠܰܬ܆ ܪܺܝܫܶܗ ܕܝܽܘܚܰܢܳܢ ܡܰܥܡܕܳܢܳܐ. ܠܰܘ ܟܰܕ ܒܶܐܣܦܪܺܝܕܳܐ. ܐܰܘ ܒܩܽܘܦܺܝܢܳܐ ܡܶܬܛܥܶܢ܆ ܐܰܘ ܒܪܽܘܩܰܥܬܳܐ ܡܶܬܟܪܶܟ ܘܡܶܬܬܚܺܝܨ܆ ܐܶܠܳܐ ܟܰܕ ܥܰܠ ܦܺܝܢܟܳܐ ܡܶܬܬܰܝܬܶܐ^[42]. ܒܗܳܝ ܕܳܐܦ ܣܰܓܺܝ ܡܶܬܕܰܡܰܪ ܐ̱ܢܳܐ. ܙܳܕܶܩ ܗ̱ܘܳܐ ܓܶܝܪ ܕܥܰܠ ܦܺܝܢܟܳܐ ܢܶܬܬܰܝܬܶܐ܆ ܪܺܝܫܳܐ ܗܰܘ ܕܰܒܡܶܐܟܽܘܠܬܳܐ ܡܠܺܝܠܬܳܐ ܩܰܒܶܠ ܘܬܰܪܣܺܝ ܠܟܽܠܗܽܘܢ ܡܗܰܝܡ̈ܢܶܐ. ܠܗܰܘ ܕܠܰܘ ܠܒܰܪ ܡܶܢ ܚܰܫܳܐ ܦܰܫܛܶܗ ܝܽܘܚܰܢܳܢ ܩܕܳܡ ܣܰܝܦܳܐ܆ ܐܶܠܳܐ ܐܰܝܟ ܡܰܢ ܕܪܺܝܫ ܕܣܳܗ̈ܕܶܐ ܐܺܝܬܰܘܗ̱ܝ ܘܩܰܕܡܳܝܳܐ܆ ܠܗܰܕܳܡܳܐ ܪܺܝܫܳܢܳܝܳܐ ܕܦܰܓܪܳܐ ܐܰܫܠܶܡ ܘܝܰܗ̱ܒ ܠܣܳܗܕܽܘܬܳܐ. ܠܗܳܢܳܐ ܪܺܝܫܳܐ ܟܳܗܢܳܝܳܐ܆ ܫܰܟܶܢ ܠܰܢ ܡܫܺܝܚܳܐ ܗܰܘ ܝܳܗܽܘܒܳܐ ܕܛܳܒ̈ܳܬܳܐ܆ ܠܗܳܢܽܘܢ ܕܰܒܡܰܕܢܚܳܐ ܥܳܡܪܺܝܢ. ܟܰܕ ܡܶܢ ܩܕܺܝܡ ܡܰܢ. ܒܰܐܪܥܳܐ ܗܳܝ ܕܫܳܡܪܺܝܢ ܡܛܰܫܰܝ ܗ̱ܘܳܐ܆ ܗܳܝ ܕܒܳܗ̇ ܡܰܡܠܶܟ ܗ̱ܘܳܐ ܗܶܪܽܘܕܺܝܤ܆ ܗܳܫܳܐ ܕܶܝܢ ܒܡܰܕܢܚܳܐ܆ ܒܰܕܡܽܘܬ ܟܰܘܟܒܳܐ ܢܰܨܺܝܚܳܐ ܡܰܢܗܰܪ. ܘܗܳܕܶܐ ܠܰܘ ܕܠܳܐ ܡܶܠܬܳܐ ܘܰܕܠܳܐ ܕܺܝܢܳܐ.

ܡܶܛܽܠ ܓܶܝܪ ܕܶܐܬܢܰܒܺܝ ܗ̱ܘܳܐ ܗܽܘ ܐܰ‌ܠܳܗܳܝܳܐ ܡܰܥܡܕܳܢܳܐ܆ ܡܶܛܽܠ ܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܠܰܡܗܰܝܡܳܢܽܘ ܡܶܢ ܥܰܡ̱ܡ̈ܶܐ ܗܳܢܽܘܢ ܠܳܐ ܡܰܪܓܫܺܝܢ ܘܕܰܡܩܰܫܶܝܢ ܗ̱ܘܰܘ ܒܰܕܡܽܘܬ ܟܺܐܦ̈ܶܐ܆ ܟܰܕ ܐܳܡܰܪ ܗ̱ܘܳܐ ܕܡܶܫܟܰܚ ܗ̱ܘ̣ ܐܰ‌ܠܗܐ ܠܰܡܩܳܡܽܘ ܡܶܢ ܗܳܠܶܝܢ ܟܺܐܦ̈ܶܐ ܒܢܰܝ̈ܳܐ ܠܰܐܒܪܳܗܳܡ^[43]܆ ܡܽܘܠܟܳܢܳܐ ܕܶܝܢ ܗܰܘ ܕܰܠܘܳܬ ܐܰܒܪܳܗܳܡ܆ ܩܰܕܶܡ ܗ̱ܘܳܐ ܐܳܡܰܪ ܕܰܒܙܰܪܥܳܟ ܢܶܬܒܰܪܟܽܘܢ. ܟܽܠܗܽܘܢ ܥܰܡܡ̈ܶܐ^[44]. ܙܰܪܥܶܗ ܕܶܝܢ ܡܫܺܝܚܳܐ ܐܺܝܬܰܘܗ̱ܝ ܗ̱ܘܳܐ܆ ܠܘܳܬܰܢ ܗܳܢܽܘܢ ܕܠܰܢܒܺܝܽܘܬܳܐ ܗܳܕܶܐ ܡܰܠܶܝܢܰܢ܆ ܘܰܠܘܳܬ ܗܳܢܽܘܢ ܕܡܶܢ ܥܰܡ̱ܡ̈ܶܐ ܐܶܬܩܪܺܝܘ ܟܪ̈ܺܝܣܛܝܳܢܶܐ܆ ܘܢܳܩܦܳܐܺܝܬ ܘܠܳܚܡܳܐܺܝܬ ܩܳܡܘ ܒܢܰܝ̈ܳܐ ܠܰܐܒܪܳܗܳܡ܆ ܪܗܶܛ ܪܺܝܫܳܐ ܗܰܘ ܕܠܰܒ̈ܢܳܬ ܩ̈ܳܠܶܐ ܗܳܠܶܝܢ ܩܰܕܶܡ ܐܰܟܪܶܙ. ܟܰܕ ܕܶܝܢ ܪܗܶܛ ܠܘܳܬ ܫܦܽܘ̈ܠܰܘܗ̱ܝ ܕܠܶܒܢܳܢ ܛܽܘܪܳܐ ܩܳܡ܆ ܘܠܰܡܕܺܝܢ̱ܬܳܐ ܕܰܚ̈ܡܶܨܳܝܶܐ ܒܰܪܶܟ܆ ܟܰܕ ܡܶܢ ܬܰܡܳܢ ܠܘܳܬܰܢ ܚܳܐܰܪ܆ ܘܳܐܣܺܝ̈ܘܳܬܳܐ ܡܫܰܚ̈ܠܦܳܬܳܐ ܘܣܰܓ̈ܺܝܳܐܬ ܙܢܰܝ̈ܳܐ ܥܰܬܺܝܪܳܐܺܝܬ ܡܰܫܦܰܥ^[45].

ܪܳܚܶܡ ܓܶܝܪ ܥܕܰܟܺܝܠ ܠܕܽܘܝܳܪ̈ܶܐ ܗܳܠܶܝܢ ܕܰܫܒܳܒܺܝܢ ܠܛܽܘܪ̈ܶܐ ܘܰܠܚܽܘܪ̈ܒܶܐ܆ ܘܨܳܒܶܐ ܕܩܳܠܳܐ ܕܗܰܘ ܕܡܰܙܥܶܩ ܒܡܰܕܒܪܳܐ^[46] ܐܳܦ ܗܳܫܳܐ ܕܢܶܗܘܶܐ ܐܺܝܬܰܘܗ̱ܝ ܘܰܕܢܶܫܬܰܡܰܗ܆ ܘܕܰܢܕܰܥܶܟ ܡܫܰܡܠܝܳܐܺܝܬ ܠܕܶܚܠܰܬ ܫ̈ܺܐܕܶܐ ܗܳܝ ܕܰܒܠܶܒܢܳܢ ܐܰܚܺܝܕܳܐ܆ ܗܳܝ ܕܳܐܦ ܕܒܰܥܒܳܕܳܐ ܢܳܦܩܳܐ ܘܡܶܫܬܰܘܫܛܳܐ ܒܟܽܠܝܽܘܡ ܐܰܝܟ ܕܰܠܡܺܐܡܰܪ ܐܺܝܬ ܠܡܶܚܙܳܐ. ܠܟܽܠܗܽܘܢ ܓܶܝܪ ܗܳܢܽܘܢ ܕܰܠܘܳܬ ܕܽܘܟܬܳܐ ܗܳܝ ܥܳܡܪܺܝܢ܆ ܫܰܚܠܶܦ ܐܶܢܽܘܢ ܠܘܬ ܫܰܦܺܝܪܽܘܬ ܕܶܚܠܬܳܐ.

ܐܳܦ ܚܢܰܢ ܗܳܟܺܝܠ. ܠܪܺܝܫܶܗ ܡܝܰܩܪܳܐ ܘܩܰܕܺܝܫܳܐ ܕܡܰܥܡܕܳܢܳܐ܆ ܒܚܽܘܠܳܦܳܐ ܕܕܽܘܒܳܪܳܐ ܢܝܰܩܰܪ܆ ܟܰܕ ܥܒ̈ܳܕܶܐ ܕܙܰܕܺܝܩܽܘܬܳܐ ܣܳܥܪܺܝܢܰܢ. ܘܶܐܢ ܐ̱ܢܳܫ ܟܰܕ ܡܶܢ ܪܶܚܡܬܳܐ ܕܰܠܒܰܪ ܡܶܢ ܢܳܡܽܘܣܳܐ ܡܶܫܬܰܠܗܰܒ܆ ܠܘܳܬ ܚܽܘܠܛܳܢܳܐ ܠܳܐ ܢܳܡܽܘܣܳܝܳܐ ܥܬܺܝܕ ܠܡܺܐܙܰܠ܆ ܘܥܰܡ ܐܰܢ̱ܬܬܳܐ ܗܳܝ ܕܠܳܐ ܐܺܝܬܶܝܗ̇ ܕܺܝܠܶܗ ܢܶܫܬܰܘܬܰܦ^[47]. ܠܪܺܝܫܶܗ ܕܝܽܘܚܰܢܳܢ ܢܰܣܒܰܪ ܕܩܳܐܶܡ ܠܥܶܠ ܡܶܢܶܗ ܘܚܳܐܰܪ ܒܶܗ ܙܥܺܝܦܳܐܺܝܬ܆ ܘܓܳܙܶܡ ܘܩܳܥܶܐ܆ ܕܠܳܐ ܫܰܠܺܝܛ ܠܳܟ ܕܬܶܣܒܺܝܗ̇^[48]܆ ܘܡܶܚܕܳܐ ܒܰܪ ܫܳܥܬܶܗ ܢܶܕܚܰܠ. ܘܢܶܙܩܰܦ ܣܰܥܪܶܗ܆ ܘܰܪܓܶܠܬܳܐ ܗܳܝ ܕܪܶܓܬܳܐ ܬܺܐܒܰܫ.

ܘܡܶܢ ܢܶܫ̈ܶܐ. ܟܽܠܟܶܝܢ ܐܰܝܠܶܝܢ ܕܺܐܝܬܰܝܟܶܝܢ ܟܢܺܝ̈ܟܳܬܳܐ ܘܪ̈ܳܚܡܳܬ ܠܰܡܫܺܝܚܳܐ܆ ܠܘܳܬ ܒܽܘܣܳܡܳܐ ܕܦܳܬܽܘܪܳܐ܆ ܡܶܢ ܟܽܠܶܗ ܪܶܩܕܳܐ ܘܪܰܦܝܽܘܬܳܐ ܕܩܺܝ̈ܢܳܬܳܐ ܘܰܫܪܺܝܚܽܘܬܳܐ܆ ܘܡܶܢ ܡ̈ܶܠܶܐ ܥܳܒ̈ܕܳܬ ܓܽܘܚܟܳܐ ܐܰܗܦ̈ܶܟܶܝܢ ܐܰܦܰܝ̈ܟܶܝܢ܆ ܟܰܕ ܠܪܺܝܫܶܗ ܕܚܺܝܠܳܐ ܕܺܐܝܙܓܰܕܳܐ. ܘܪܰܗܳܛܳܐ ܝܽܘܚܰܢܳܢ܆ ܕܣܺܝܡ ܩܕܳܡܰܝܟܶܝܢ ܥܰܠ ܦܺܝܢܟܳܐ܆ ܩܕܳܡ ܥܰܝ̈ܢܶܐ ܕܺܝܠܟܶܝܢ ܪ̈ܳܫܡܳܢ ܐܢ̱ܬܶܝܢ.

ܐܶܢܕܶܝܢ ܐ̱ܢܳܫ. ܐܳܦ ܠܘܳܬ ܗܺܓܡܽܘܢܳܐ ܛܪܽܘܢܳܝܳܐ ܕܰܡܛܰܝܒܳܐܺܝܬ ܣܺܝܡ ܠܘܳܬ ܩܶܛܠܳܐ܆ ܚܠܳܦ ܡܶܠܬܳܐ ܕܫܰܦܺܝܪܽܘܬ ܕܶܚܠܬܳܐ ܡܶܬܟܰܬܰܫ܆ ܠܘܳܬ ܡܶܬܬܪܺܝܡܳܢܽܘܬܳܐ ܕܪܺܝܫܶܗ ܕܝܽܘܚܰܢܳܢ ܢܚܽܘܪ܆ ܗܳܝ 222ܪܙܘܝܬܐ^[49] ܘܡܰܠܦܳܢܺܝܬܳܐ܆ ܘܰܠܘܳܬ ܦܰܪܶܗ̱ܣܺܝܰܐ ܗܳܝ ܢܳܡܽܘܣܳܝܬܳܐ܆ ܘܰܠܟܽܠܗܶܝܢ. ܬܪ̈ܰܝܳܢܝܳܬܳܐ ܕܰܐ‌ܠܳܗܳܐ ܢܶܚܫܽܘܒ ܕܺܐܝܬܰܝܗܶܝܢ܆ ܟܰܕ ܠܶܗ ܡܰܓܥܶܠ ܠܶܗ ܠܢܰܦܫܶܗ܆ ܐܰܝܟ ܕܠܰܢܛܽܘܪܬܳܐ ܠܳܐ ܡܶܬܚܰܠܨܳܢܺܝܬܳܐ.

ܢܰܦ̈ܫܳܬܳܐ ܓܶܝܪ ܕܙܰܕܺܝ̈ܩܶܐ ܒܺܐܝ̈ܕܰܝܳܐ ܕܰܐ‌ܠܳܗܳܐ܆ ܐܰܝܟܰܢܳܐ ܕܐ̱ܢܳܫ ܚܰܟܺܝܡܳܐ ܐܶܡܰܪ: ܟܽܠܰܢ ܕܶܝܢ ܒܪܰܡ^[50]. ܫܠܺܝܚܳܐܺܝܬ ܠܡܺܐܡܰܪ: ܩܰܕܺܝܫܽܘܬܳܐ ܢܫܰܡܠܶܐ. ܒܕܶܚܠܬܳܐ ܕܰܐ‌ܠܳܗܳܐ^[51]܆ ܟܰܕ ܡܶܬܚܰܫܒܺܝܢܰܢ ܠܝܽܘܚܰܢܳܢ܆ ܕܰܠܘܳܬ ܫܶܦܥܶܗ ܕܝܽܘܪܕܢܳܢ ܩܳܐܶܡ܆ ܘܰܒܪܺܝܫܶܗ ܕܥܰܡܰܢܽܘܐܶܝܠ ܓܳܫܶܦ. ܗܰܘ. ܕܟܰܕ ܠܳܐ ܡܶܬܓܰܫܫܳܢܳܐ ܐܺܝܬܰܘܗ̱ܝ. ܐܰܝܟ ܡܶܠܬܳܐ ܠܳܐ ܦܰܓܪܳܢܳܐ܆ ܘܰܡܬܽܘܡܳܝܳܐ ܘܰܫܘܶܐ ܒܽܐܘܣܺܝܰܐ ܠܰܐܒܳܐ܆ ܗܘ̣ܳܐ ܠܳܐ ܡܶܫܬܰܚܠܦܳܢܳܐܺܝܬ ܐܳܦ ܠܰܢ ܠܰܒܢܰܝ̈ܢܳܫܳܐ ܫܘܶܐ ܒܽܐܘܣܺܝܰܐ. ܤܛܰܪ ܡܶܢ ܚܛܺܝܬܳܐ^[52]܆ ܐܰܝܟܰܢܳܐ ܕܰܥܠܰܝܢ ܢܶܓܶܕ ܠܪܽܘܚܳܐ ܩܰܕܺܝܫܳܐ܆ ܗܳܢܽܘܢ ܕܰܣܦܺܝ̈ܩܶܐ ܐܺܝܬܰܝܢ ܗ̱ܘܰܝܢ ܡܶܢܶܗ܆ ܟܰܕ ܒܰܚܙܳܬܳܐ ܓܽܘܫܡܳܢܳܝܬܳܐ ܢܳܚܶܬ ܐܰܝܟ ܝܰܘܢܳܐ^[53].

ܟܰܕ ܓܶܝܪ ܠܳܐ ܣܢܺܝܩܳܐ ܐܺܝܬܰܘܗ̱ܝ ܐܰܝܟ ܐܰ‌ܠܳܗܳܐ. ܘܰܒܪܳܐ ܫܰܪܺܝܪܳܐ ܕܰܐܒܳܐ܆ ܘܠܳܐ ܡܶܬܦܰܪܫܳܢܳܐ ܡܶܢ ܪܽܘܚܳܐ ܗܰܘ ܫܘܶܐ ܒܽܐܘܣܺܝܰܐ. ܐܺܝܬܰܘܗ̱ܝ܆ ܠܰܢ ܥܰܡܕܳܗ̇ ܠܡܰܥܡܽܘܕܺܝܬܳܐ܆ ܘܩܰܕܶܡ ܐܰܪܡܶܙ ܫܶܬܶܐܣܬܳܐ ܕܣܳܝܽܘܡܽܘܬ ܒܢܰܝ̈ܳܐ ܪܽܘܚܳܢܳܝܬܳܐ܆ ܗܳܝ ܕܶܐܫܬܰܟܢܰܬ ܠܰܒܢܰܝ̈ܢܳܫܳܐ ܒܺܐܝ̈ܕܶܝܗ̇ ܕܡܰܥܡܽܘܕܺܝܬܳܐ ܟܰܕ ܗܘ̣ܳܐ ܪܺܝܫܺܝܬܳܐ^[54] ܕܓܶܢܣܳܐ ܕܺܝܠܰܢ^[55]܆ ܘܶܐܫܬܰܡܰܗ ܐܳܕܳܡ ܬܪܰܝܳܢܳܐ^[56].

ܡܶܛܽܠܗܳܕܶܐ. ܒܟܽܠ ܚܰܕ ܡܶܢ ܝܰܘ̈ܡܳܬܳܐ ܕܚܰܕ ܒܫܰܒܳܐ܆ ܠܘܳܬ ܒܶܝܬ ܡܰܥܡܽܘܕܺܝܬܳܐ ܡܰܝܬܶܝܢ ܚ̱ܢܰܢ ܠܟܽܘܢ܆ ܥܰܡ ܬܶܫܡܶܫܬܳܐ ܘܬܶܫܒ̈ܚܳܬܳܐ ܘܰܨ̈ܠܰܘܳܬܳܐ ܘܬܰܟܫ̈ܦܳܬܳܐ܆ ܐܰܝܟܰܢܳܐ ܕܠܰܩܝܳܡ̈ܶܐ ܢܶܬܥܰܗܰܕ ܗܳܠܶܝܢ ܕܣܳܡܢܰܢ ܠܘܳܬ ܐܰ‌ܠܳܗܳܐ܆ ܟܰܕ ܟܦܰܪܢܰܢ ܒܣܳܛܳܢܳܐ ܘܒܰܥ̈ܒܳܕܶܐ ܒܺܝ̈ܫܶܐ܆ ܐܰܝܟܰܢܳܐ ܕܠܳܐ ܠܛܳܥܝܽܘܬܳܐ ܕܫܽܘܒܩܳܢܳܐ ܕܰܚ̈ܛܳܗܰܝܢ ܢܺܐܬܶܐ܆ ܕܡܰܘܗܰܒܬܳܐ ܕܪܽܘܚܳܐ܆ ܕܫܽܘܟܳܢܳܐ ܕܣܳܝܽܘܡܽܘܬ ܒܢܰܝ̈ܳܐ. ܐܰܝܟܰܢܳܐ ܕܰܠܥܽܘܬܪܳܐ ܗܳܢܳܐ. ܒܟܽܠܶܗ ܚܰܝܠܳܐ ܢܶܛܰܪ܆ ܟܕ ܠܳܐ ܦܳܢܶܝܢ ܚ̱ܢܰܢ ܠܘܳܬ ܗܳܠܶܝܢ܆ ܡܶܢ ܐܰܝܟܳܐ ܕܰܢܦܰܩܢܰܢ.

ܥܰܠ ܣܽܘܡܳܟ̈ܶܐ ܓܶܝܪ ܣܰܓܺܝ̈ܶܐܐ ܣܢܺܝܩܺܝܢ ܚ̱ܢܰܢ܆ ܟܰܕ ܒܡܰܐܝܢܽܘܬܳܐ ܠܘܳܬ ܐܰܪܥܳܐ ܪܟܺܝܢܺܝܢ ܚ̱ܢܰܢ܆ ܘܩܺܝܢܕܽܘܢܽܘܣܳܐ ܥܳܒܕܺܝܢܰܢ ܕܢܶܦܶܠ. ܐܶܠܳܐ ܐܳܦ ܗܳܕܶܐ ܐܶܬܥܰܕܰܠܘ ܗܳܢܽܘܢ ܪ̈ܳܚܡܰܝ ܥܶܕܠܳܝ̈ܶܐ܆ ܘܕܰܠܫ̈ܶܢܶܐ^[57] ܕܰܚܣܳܡܳܐ ܠܳܛܫܺܝܢ ܥܠܰܝܢ. ܐܳܡܪܺܝܢ ܓܶܝܪ: ܕܠܳܐ ܙܳܕܶܩ ܕܒܰܝܬܳܐ ܗܰܘ ܣܓܺܝܕܳܐ ܕܒܶܝܬ ܡܰܥܡܽܘܕܺܝܬܳܐ܆ ܐܶܠܳܐ ܐܶܢ ܚܕܳܐ ܙܒܰܢ ܒܫܰܢ̱ܬܳܐ ܢܶܬܦܬܰܚ. ܟܰܕ ܡܶܢ ܐܰܝܟܳܐ. ܠܗܳܕܶܐ ܫܩܰܠܘ܆ ܐܰܘ ܟܰܕ ܐܰܝܢܳܐ ܢܳܡܽܘܣܳܐ ܡܰܦܩܺܝܢ ܡܚܰܘܶܝܢ. ܘܳܐܦܠܳܐ ܚܰܕ ܤܛܰܪ ܡܶܢ ܨܶܒܝܳܢܳܐ ܕܺܝܠܗܽܘܢ ܗܰܘ ܒܺܝܫܳܐ ܘܣܳܢܶܐ ܒ̈ܢܰܝ ܐ̱ܢܳܫܳܐ.

ܠܡܳܢܳܐ ܓܶܝܪ ܟܰܝ܆ ܟܰܕ ܒܗܳܠܶܝܢ ܡܰܢ ܒ̈ܳܬܶܐ ܐ̱ܚܪ̈ܳܢܶܐ ܘܗܰܝܟ̈ܠܶܐ ܕܒܶܝܬ ܨܠܽܘܬܳܐ܆ ܒܟܽܠܚܰܕ ܝܰܘܡܳܐ ܚܳܙܶܝܢ ܐܢ̱ܬܽܘܢ ܠܒ̈ܳܬܶܐ ܗܳܠܶܝܢ ܕܒܶܝܬ ܡܰܥܡܽܘܕܺܝܬܳܐ ܕܰܦܬܺܝܚܺܝܢ ܠܳܐ ܥܳܕܠܺܝܢ ܐܢ̱ܬܽܘܢ܆ ܠܘܳܬ ܕܶܝܢ ܚܕܳܐ ܥܺܕܬܳܐ ܒܰܠܚܽܘܕ ܚܳܝܪܺܝܢ ܐܢ̱ܬܽܘܢ܆ ܘܰܠܘܳܬ ܒܶܝܬ ܡܰܥܡܽܘܕܺܝܬܳܐ ܗܰܘ ܕܒܳܗ̇܆ ܘܟܰܕ ܛܳܒ ܗܺܝ ܟܰܕ ܗܺܝ ܣܶܓܕܬܳܐ ܘܕܶܚܠܬܳܐ ܒܟܽܠܗܽܘܢ ܐܺܝܬ. ܐܰܘ ܗܳܟܺܝܠ. ܐܳܦ ܗܳܠܶܝܢ ܕܫܰܪܟܳܐ. ܢܶܬܬܰܚܕܽܘܢ ܙܳܕܶܩ܆ ܐܰܘ ܐܳܦ ܟܰܕ ܡܶܬܦܬܰܚ ܗܳܢܳܐ ܒܚܰܕܒܫܰܒܳܐ ܥܰܡ ܙܡܺܝܪ̈ܳܬܳܐ ܘܬܶܫܒ̈ܚܳܬܳܐ ܪ̈ܽܘܚܢܳܝܳܬܳܐ܆ ܠܳܐ ܢܳܦܶܠ ܬܚܶܝܬ ܩܛܺܝܓܪܳܢܽܘܬܳܐ܆ ܐܶܠܳܐ ܡܰܠܽܘܢ^[58] ܢܳܓܶܕ ܐܳܦ ܠܩܽܘܠܳܣܳܐ ܗܰܘ ܕܡܶܢ ܫܰܦܺܝܪ̈ܰܝ ܕܶܚܠܬܳܐ.

ܠܺܝ ܕܶܝܢ܆ ܐܳܦ ܡܶܢ ܩܰܕܺܝܡܽܘܬ ܡܶܠܬܳܐ ܢܒܺܝ̣ܳܝ̣ܬܳܐ ܐܺܝܬ ܠܺܝ ܢܳܡܽܘܣܳܐ ܣܢܺܐܓܪܳܐ܆ ܡܶܛܽܠ ܣܽܘܥܪܳܢܳܐ ܗܳܢܳܐ ܡܩܰܠܣܳܐ ܘܪܳܚܶܡ ܐܰ‌ܠܳܗܳܐ. ܚܰܙܩܝܐܝܠ ܓܶܝܪ. ܗܰܘ ܚܰܙܳܝܳܐ ܕܚܶܙ̈ܘܶܐ ܗܳܠܶܝܢ ܐܰ‌ܠܳܗܳܝ̈ܶܐ܆ ܟܕ ܠܥܺܕܬܳܐ ܗܳܝ ܕܰܥܬܺܝܕܳܐ ܗ̱ܘܳܬ܆ ܚܳܙܶܐ ܗ̱ܘܳܐ ܒܥܰܝ̈ܢܶܐ ܢܒܺܝ̣ܳܝ̣̈ܳܬܳܐ ܕܩܳܕܡܳܐ ܗ̱ܘܳܬ ܡܶܬܛܰܦܣܳܐ܆ ܟܬܰܒ ܗܳܟܰܢܳܐ. ܗܳܠܶܝܢ ܐܳܡܰܪ ܐܰܕܽܘܢܰܝ ܡܳܪܝܳܐ. ܬܰܪܥܳܐ ܗܰܘ ܕܰܒܕܳܪܬܳܐ ܗܳܝ ܓܰܘܳܝܬܳܐ. ܗܰܘ ܕܚܳܐܰܪ ܠܘܳܬ ܡܰܕܢܚܳܐ܆ ܢܶܗܘܶܐ ܐܰܚܺܝܕ ܫܬܳܐ ܝܰܘ̈ܡܳܬܳܐ ܗܳܠܶܝܢ ܕܰܥ̈ܒܳܕܶܐ. ܒܝܰܘܡܳܐ ܕܶܝܢ ܗܰܘ ܕܫܰܒ̈ܶܐ ܢܶܬܦܬܰܚ. ܘܰܒܝܰܘܡܳܐ ܗܰܘ ܕܪܺܝܫ ܝܰܪܚܳܐ. ܢܶܬܦܬܰܚ^[59]. ܡܳܢܳܐ ܕܶܝܢ ܐܺܝܬܶܝܗ̇ ܕܳܪܬܳܐ ܗܳܝ ܓܰܘܳܝܬܳܐ܆ ܗܳܝ ܕܺܐܝܬ ܠܳܗ̇ ܬܰܪܥܳܐ ܕܚܳܐܰܪ. ܠܘܳܬ ܡܰܕܢܚܳܐ܆ ܐܶܠܳܐ ܐܶܢ ܒܶܝܬ ܡܰܥܡܽܘܕܺܝܬܳܐ܆ ܕܺܐܝܬ ܠܳܗ̇^[60] ܡܥܺܝܢܳܐ ܡܰܥܒܕܰܬ ܚܰܝ̈ܶܐ܆ ܕܺܐܝܬܶܝܗ̇ ܬܰܪܥܳܐ ܘܡܰܥܠܳܢܳܐ ܗܰܘ ܕܰܠܘܳܬ ܦܰܪܕܰܝܣܳܐ ܡܰܝܬܶܐ܆ ܗܰܘ ܕܶܐܬܢܨܶܒ ܒܡܰܕܢܚܳܐ. ܕܗܽܘ ܗܳܢܳܐ ܬܰܪܥܳܐ܆ ܫܰܒܬܳܢܳܐܺܝܬ ܡܰܢ. ܒܝܰܕ ܢܳܡܽܘܣܳܐ ܘܰܢܒܺܝ̈ܶܐ ܡܶܬܦܬܰܚ ܗ̱ܘܳܐ܆ ܘܝܰܬܺܝܪ ܒܰܗܽܘܪܳܐܺܝܬ ܡܶܬܚܰܘܶܐ ܗ̱ܘܳܐ. ܐܰܝܟ ܒܪܺܝܫ ܝܰܪܚܳܐ ܕܶܝܢ܆ ܒܚܰܕܒܫܰܒܳܐ ܗܰܘ ܕܪܺܝܫܳܐ ܐܺܝܬܰܘܗ̱ܝ ܕܰܩܝܳܡܬܳܐ ܘܰܕܚܰܝ̈ܶܐ ܚ̈ܰܕܬ̣ܶܐ܆ ܒܝܰܕ ܦܽܘܠܚܳܢܳܐ ܐܶܘܰܢܓܶܠܳܝܳܐ ܐܶܬܦܬܰܚ܆ ܝܰܬܺܝܪ ܢܰܨܺܝܚܳܐܺܝܬ ܟܺܝܬ ܘܝܰܬܺܝܪ ܢܰܗܺܝܪܳܐܺܝܬ.

ܚܰܕܒܫܰܒܳܐ ܕܶܝܢ ܐܺܝܬܰܘܗ̱ܝ ܫܰܪܺܝܪܳܐܺܝܬ܆ ܟܽܠܶܗ ܕܽܘܒܳܪܳܐ ܘܚܰܝ̈ܶܐ ܕܗܳܢܽܘܢ ܕܡܶܢ ܒܳܬܰܪ ܡܶܐܬܺܝܬܳܐ ܕܰܡܫܺܝܚܳܐ ܒܚܰܕܬܽܘܬܳܐ ܕܚܰܝ̈ܶܐ ܡܗܰܠܟܺܝܢ^[61]܆ ܐܰܝܟ ܡܶܠܬܶܗ ܕܰܫܠܺܝܚܳܐ ܐܰ‌ܠܳܗܳܝܳܐ. ܕܕܰܐܝܟ ܗܳܠܶܝܢ ܡ̈ܶܠܶܐ ܪ̈ܽܘܚܳܢܳܝܳܬܳܐ܆ ܝܰܗ̱ܒ ܠܰܢ ܥܶܠ̈ܠܳܬܐ ܕܽܘܟܪܳܢܶܗ ܕܺܐܝܙܓܰܕܳܐ ܝܽܘܚܰܢܳܢ ܪܰܗܳܛܳܐ ܕܰܩܕܳܡ ܡܫܺܝܚܳܐ. ܕܗܳܠܶܝܢ ܢܶܬܗܰܓܶܐ܆ ܕܰܒܗܳܠܶܝܢ ܢܶܗܘܶܐ ܒܟܽܠܙܒܰܢ. ܢܨܰܠܶܐ܆ ܒܰܡܫܺܝܚܳܐ ܝܶܫܽܘܥ ܡܳܪܰܢ. ܕܥܰܡܶܗ ܠܰܐܒܳܐ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܕܺܝܠܶܗ ܩܰܕܺܝܫܳܐ ܘܰܫܘܶܐ ܒܽܐܘܣܺܝܰܐ. ܗܳܫܳܐ. ܘܰܒܟܽܠܙܒܰܢ ܘܰܠܥܰܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܰܬܠܳܬܺܝܢ ܘܰܬܪܶܝܢ.

ܠܘܩܐ. 3: 4  ܐܦ ܐܫܥܝܐ. 40: 4  ܐܦ ܝܘܚܢܢ. 1: 23 [1]

ܡܙܡܘܪ̈ܐ. 137: 4  ܐܦ. 115: 19 [2]

ܠܘܩܐ. 1: 9 [3]

ܠܘܩܐ. 1: 76 [4]

ܒܛܢܢ[5]

[6]ܐ. ܫܡܘܐܝܠ. 2: 5  ܐܦ ܓܠܛܝ̈ܐ. 4: 27  ܐܦ ܐܫܥܝܐ. 54: 1

ܠܘܩܐ. 1: 63 [7]

ܢܳܣܶܟ[8]

ܡܬܝ. 3: 2 [9]

ܪ̈ܗܘܡܝܐ. 6: 12 [10]

[11]ܠܘܩܐ. 3: 4  ܐܦ ܐܫܥܝܐ. 40: 4  ܐܦ ܝܘܚܢܢ. 1: 23

ܕܶܐܬܶܐܡܰܪ ܒܰܢܒܺܝܽܘܬܐ[12]

ܝܘܚܢܢ. 14: 23 [13]

 ܫܽܘܟܳܢܳܐ[14]

ܣܶܦܪܐ ܕܬܪܝܢ ܕܡܠ̈ܟܐ. 1: 8 [15]

ܐܫܥܝܐ. 40: 3 [16]

ܡܪܩܘܣ. 1: 6  ܐܦ ܡܬܝ. 3: 4 [17]

ܓܽܘܪܳܪܳܐ[18]

ܦܠܺܝܥܳܐ[19]

ܡܪܩܘܣ. 1: 6  ܐܦ ܡܬܝ. 3: 4 [20]

ܡܬܝ. 3: 7 ܐܦ ܠܘܩܐ. 3: 7 [21]

ܕܢܰܫܦܥܘܢ ܕܢܪܙܘܢ[22]

ܡܬܝ. 3: 8 [23]

ܕܢܛܥܢ[24]

ܝܘܚܢܢ. 1: 29 [25]

ܡܬܝ. 3: 14 ـ 15 [26]

 ܕܡܶܬܕܰܒܪܳܐ[27]

ܝܘܚܢܢ. 1: 33 [28]

ܡܬܝ. 3: 14 [29]

ܡܬܝ. 3: 15 [30]

ܝܽܘܠ̈ܦܳܢܶܐ[31]

 ܨܳܝܽܘܬܽܘܬܳܐ[32]

ܡܬܝ. 11: 11  ܐܦ ܠܘܩܐ. 7: 28 [33]

ܡܬܝ. 11: 9   ܐܦ ܠܘܩܐ. 7: 26 [34]

ܝܘܚܢܢ. 1: 8 [35]

ܡܬܝ. 11: 12 [36]

ܡܬܝ. 3: 2 [37]

[38]ܡܬܝ. 14: 4  ܐܦ ܡܪܩܘܣ. 6: 18 ܐܦ ܠܘܩܐ. 3: 19

ܕܒܺܝܫܬܳܐ[39]

 ܡܶܣܬܰܪܕܳܢܳܐ[40]

ܡܪܩܘܣ. 6: 20 [41]

ܡܪܩܘܣ. 6: 25  ܐܦ ܡܬܝ. 14: 8 [42]

ܡܬܝ. 3:9  ܐܦ ܠܘܩܐ. 3: 8 [43]

ܣܶܦܪܐ ܕܒܪܝܬܐ. 22: 18 ܐܦ 26: 4 [44]

ܡܰܪܕܶܐ[45]

[46]ܡܬܝ. 3: 3  ܐܦ ܡܪܩܘܣ. 1: 1 ܐܦ ܠܘܩܐ. 3: 1  ܐܦ ܐܫܥܝܐ. 40: 3

 ܢܶܬܥܰܪܙܰܠ[47]

ܡܬܝ. 14: 4  ܐܦ ܡܪܩܘܣ. 6: 18 [48]

ܡܶܢ ܡܰܪܕܽܘܬܳܐ[49]

ܣܶܦܪܐ ܕܚܟܡܬܐ. 7: 16 [50]

ܐ. ܛܝܡܬܐܘܣ. 6: 11 ܐܦ ܒ. ܛܝܡܬܐܘܣ. 2: 22 [51]

[52]ܥܒܪ̈ܝܐ. 4: 15

[53]ܡܬܝ. 3: 16  ܐܦ ܡܪܩܘܣ. 1: 10  ܐܦ ܠܘܩܐ. 3: 22

ܕܬܰܪܬܶܝܢ[54]

[55]ܩܘܠܣ̈ܝܐ. 1: 18  ܐܦ ܐܦܣ̈ܝܐ. 1: 22

ܐ. ܩܘܪ̈ܝܢܬܝܐ. 15: 45 [56]

 ܕܫܶܢ̈ܶܐ ܠܳܛܫܺܝܢ[57]

 ܝܰܬܺܝܪܳܐܝܬ[58]

ܚܙܩܝܐܝܠ. 46: 1 [59]

ܒܳܗ̇[60]

ܪ̈ܗܘܡܝܐ. 6: 4 [61]