ܡܺܐܡܪܳܐ ܕܰܬܠܳܬܺܝܢ ܘܚܰܕ

ܥܰܠ ܚܽܘ̈ܕܳܬܳܐ ܕܰܨܠܺܝܒܳܐ ܩܰܕܺܝܫܳܐ܆ ܘܥܰܠ ܥܽܘܗܕܳܢܳܐ ܕܙܰܘܥܳܐ ܗܰܘ ܕܰܗܘܳܐ.

31: ܐܶܢܗܽܘ ܕܰܕܗܰܝܟܠܳܐ ܗܰܘ ܕܒܽܐܘܪܶܫܠܶܡ܆ ܠܗܰܘ ܕܰܒܢܳܝܗ̱ܝ ܡܰܢ ܚܰܟܺܝܡܳܐ ܫܳܠܽܘܡܽܘܢ܆ ܩܰܕܶܡ ܕܶܝܢ ܛܰܦܣܶܗ ܪܽܘܚܳܐ ܩܰܕܺܝܫܳܐ ܗܰܘ ܕܡܰܠܶܠ ܒܰܢܒܺܝܳܐ ܕܰܘܺܝܕ^[1]܆ ܐܰܝܟܰܢܳܐ ܕܒܰܟܬܳܒܳܐ ܗܰܘ ܕܚܰܣܺܝܪ̈ܳܬܳܐ ܣܺܝܡܳܐ ܬܰܫܥܺܝܬܳܐ^[2]܆ ܥܺܐܕܳܐ ܕܚܽܘ̈ܕܳܬܳܐ ܡܚܰܓܶܝܢ ܗ̱ܘܰܘ ܗܳܢܽܘܢ ܩܰܕ̈ܡܳܝܶܐ܆ ܐܰܝܟܰܢܳܐ ܠܰܘ ܝܰܬܺܝܪ ܙܳܕܩܳܐܺܝܬ ܚܢܰܢ ܠܗܳܢܳܐ ܚܰܓܳܐ ܢܩܺܝܡ܆ ܥܰܠ ܨܠܺܝܒܳܐ ܡܝܰܩܪܳܐ ܕܰܐ‌ܠܳܗܳܐ ܘܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ܆ ܗܰܘ ܕܒܺܐܝܕܰܘ̈ܗ̱ܝ ܟܽܠ ܗܰܝܟܠܳܐ ܡܶܬܩܰܕܰܫ܆ ܘܟܽܠ ܕܶܒܚܬܳܐ ܘܐ̱ܪܳܙܳܐ ܡܶܬܗܰܘܢܳܢܳܐ ܡܶܫܬܰܡܠܶܐ. ܡܰܠܽܘܢ ܕܶܝܢ ܐܰܝܟܰܢܳܐ ܕܳܐܡܰܪ ܡܶܕܶܡ ܐܳܦ ܕܝܰܬܺܝܪ ܐܰ‌ܠܳܗܝ܆ ܗܰܘ ܕܒܺܐܝܕܰܘ̈ܗ̱ܝ ܗܳܘܶܝܢܰܢ ܗܰܝ̈ܟܠܶܐ ܕܰܐ‌ܠܳܗܳܐ^[3]܆ ܟܰܕ ܗܳܕܶܐ ܐܰܝܟ ܦܰܘܠܽܘܤ ܝܳܕܥܺܝܢܰܢ: ܕܒܰܪܢܳܫܳܐ ܕܺܝܠܰܢ ܗܰܘ ܥܰܬܺܝܩܳܐ܆ ܨܠܺܝܒ ܗ̱ܘܳܐ ܐܰܟܚܕܳܐ ܥܰܡ ܡܫܺܝܚܳܐ ܒܝܰܕ ܡܰܥܡܽܘܕܺܝܬܳܐ܆ ܟܰܕ ܐܶܬܒܰܛܰܠ ܡܰܢ ܦܰܓܪܳܐ ܕܰܚܛܺܝܬܳܐ ܒܗܳܝ ܕܠܳܐ ܢܶ݀ܦܠܽܘܚ ܥܰܒܕܽܘܬܳܐ ܠܰܚܛܺܝܬܳܐ^[4]܆ ܟܰܕ ܐܶܬܬܡܺܝܬܘ ܡܰܢ ܗܰܕܳܡ̈ܶܐ ܕܥܰܠ ‌ܐܰܪܥܳܐ^[5]܆ ܚܰܝ̣ܺܝ̣ܢ ܚ̱ܢܰܢ ܕܶܝܢ ܬܽܘܒ ܠܰܘ ܚܢܰܢ܆ ܐܶܠܳܐ ܚܰܝ ܒܰܢ ܡܫܺܝܚܳܐ^[6]܆ ܡܶܛܽܠܗܳܕܶܐ܆ ܐܳܦ ܥܽܘܗܕܳܢܳܐ ܡܶܬܗܰܘܢܳܢܳܐ ‌ܐܺܝܬܰܘܗ̱ܝ ܐܰܝܟ ܕܒܰܫܪܳܪܳܐ ܗܽܘ ܨܠܺܝܒܳܐ. ܡܶܛܽܠܗܳܕܶܐ܆^[7] ܡܳܪܳܢܳܐܺܝܬ ܙܳܕܶܩ ܠܡܶܩܪܝܶܗ ܚܽܘ̈ܕܳܬܳܐ܆ ܠܥܺܐܕܳܐ ܗܰܘ ܕܰܥܠܰܘܗ̱ܝ ܡܶܫܬܰܡܠܶܐ. ܐܶܢ ܐ̱ܢܳܫ ܓܶܝܪ ܒܰܡܫܺܝܚܳܐ܆ ܗܳܢܳܐ ܒܪܺܝܬܰܐ ܗ̱ܘ ܚܕܰܬܳܐ. ܗܳܠܶܝܢ ܥܰܬܺܝ̈ܩܳܬܳܐ ܥܒ̣ܰܪ̈ܝ̱ ܠܗܶܝܢ. ܗܳܐ ܗܘܰܝ̈ ܟܽܠܗܶܝܢ ܚܰܕ̈ܬܶܐ^[8].

ܡܳܕܶܝܢ ܠܳܐ ܗ̱ܘܳܐ ܐܰܝܟ ܡܰܢ ܕܥܽܘܗܕܳܢܳܐ ܡܝܰܩܪܳܐ ܕܰܨܠܺܝܒܳܐ ܡܰܣܶܐܒ ܒܰܢ܆ ܠܗܳܢܳܐ ܡܚܰܕܬܺܝܢܰܢ ܝܰܘܡܳܢܳܐ܆ ܗܰܘ ܟܺܝܬ ܕܺܐܝܬܰܘܗ̱ܝ ܐ̱ܪܳܙܳܐ ܕܰܐܡܺܝܢܳܐܺܝܬ ܡܶܬܥܰܠܰܡ^[9] ܘܰܕܠܳܐ ܡܰܥܬܰܩ܆ ܐܶܠܳܐ ܡܰܦܩܺܝܢ ܚ̱ܢܰܢ ܠܶܗ ܠܗܳܢܳܐ ܘܰܡܚܰܘܶܝܢ ܚ̱ܢܰܢ ܠܶܗ ܠܟܽܘܢ܆ ܐܰܝܟ ܕܰܠܪܺܝܫܳܐ ܕܚܰܝ̈ܶܐ ܚܰܕܬܳܐ܆ ܐܰܝܟܰܢܳܐ ܕܰܠܥܽܘܗܕܳܢܳܐ ܬܺܐܬܽܘܢ ܕܗܰܘ ܕܪܶܚܡܰܬ ܐ̱ܢܳܫܳܐܺܝܬ ܠܗܳܢܳܐ^[10] ܩܪܳܐ ܠܰܢ. ܘܟܰܕ ܡܶܢ ܟܽܠܶܗ ܚܡܺܝܪܳܐ ܥܰܬܺܝܩܳܐ ܕܒܺܝܫܽܘܬܳܐ ܡܰܗܦܟܺܝܢ ܐܢ̱ܬܽܘܢ ܐܰܦܰܝ̈ܟܽܘܢ܆ ܐܶܘܰܢܓܶܠܳܐܺܝܬ ܘܚܰܕܬܳܐܺܝܬ ܬܶܬܕܰܒܪܽܘܢ^[11]. ܘܠܘܳܬ ܩܰܛܰܣܛܰܣܺܝܤ ܗܳܝ ܕܰܥܬܺܝܕܳܐ ܬܶܬܛܰܝܒܽܘܢ܆ ܗܳܝ ܕܰܒܟܽܠ ܙܒܰܢ ܐܺܝܬܶܝܗ̇ ܕܡܶܬܥܰܠܡܳܐ ܘܰܕܠܳܐ ܣܳܐܒܳܐ. ܕܢܰܦ̈ܫܳܬܳܐ ܕܺܝܠܰܢ ܐܰܪܰܐ ܐܺܝܬܰܝܗܽܘܢ ܚܽܘ̈ܕܳܬܳܐ ܝܰܘܡܳܢܳܐ܆ ܘܠܳܐ ܗ̱ܘܳܐ ܕܰܨܠܺܝܒܳܐ. ܡܶܛܽܠܗܳܕܶܐ ܕܶܝܢ ܕܰܨܠܺܝܒܳܐ ܐܳܡܪܺܝܢܰܢ ܠܗܽܘܢ܆ ܟܰܕ ܥܰܠ ܗܰܘ ܡܰܣܩܺܝܢܰܢ ܠܳܗ̇ ܠܥܶܠܬܳܐ ܕܚܽܘ̈ܕܳܬܳܐ ܕܺܝܠܰܢ. ܘܰܐܝܟ ܗܰܘ ܕܳܐܡܪܺܝܢܰܢ ܐܰܟܚܕܳܐ ܘܰܡܥܰܕܥܕܺܝܢܰܢ܆ ܚܽܘ̈ܕܳܬܳܐ ܕܺܝܠܰܢ ܗܳܠܶܝܢ ܕܰܒܝܰܕ ܨܠܺܝܒܳܐ ܐܶܫܬܰܟܰܢܘ ܠܰܢ.

ܨܠܺܝܒܳܐ ܕܶܝܢ ܐܶܡܰܬܝ ܕܳܐܡܰܪ ܐ̱ܢܳܐ: ܠܩܰܝܣܳܐ ܐܳܡܰܪ ܐ̱ܢܳܐ܆ ܗܰܘ ܩܰܕܡܳܝܳܐ ܐܰܟܚܕܳܐ ܘܚܰܕܬܳܐ. ܥܰܬܺܝܩܳܐ ܡܰܢ܆ ܒܩܰܕܺܝܡܽܘܬ ܡܶܠܬܳܐ ܕܰܟܬܳܒܳܐ ܐܰ‌ܠܳܗܳܝܳܐ ܕܡܶܢ ܠܥܶܠ ܗܳܝ ܕܰܥܠܰܘܗ̱ܝ. ܚܰܕܬܳܐ ܕܶܝܢ܆ ܒܡܶܬܓܰܠܝܳܢܽܘܬܳܐ ܗܳܝ ܕܰܒܚܰܪܬܳܐ ܕܙܰܒܢܳܐ ܕܺܝܕܰܥܬܳܐ ܕܰܐ‌ܠܳܗܳܐ܆ ܗܳܝ ܕܰܐܕܢܰܚ ܠܰܢ ܫܶܡܫܳܐ ܕܙܰܕܺܝܩܽܘܬܳܐ܆ ܗܰܘ ܡܶܛܽܠܳܬܰܢ ܐܶܬܒܰܣܰܪ ܠܳܐ ܡܶܫܬܰܚܠܦܳܢܳܐܺܝܬ ܘܶܐܨܛܠܶܒ ܒܰܒܣܰܪ.

ܗܳܢܳܐ ‌ܐܺܝܬܰܘܗ̱ܝ ܗ̱ܘܳܐ ܩܰܝܣܳܐ ܗܰܘ ܕܰܢܨܺܝܒ ܗ̱ܘܳܐ ܒܰܡܨܰܥܬܳܐ ܕܦܰܪܕܰܝܣܳܐ܆ ܕܗܰܘ ܕܰܛܥܳܡܬܶܗ ܠܳܐ ܡܶܫܟܰܚ ܗ̱ܘܳܐ ܐܳܕܳܡ ܠܡܰܝܬܳܝܽܘ ܕܠܳܐ ܚܽܘܣܪܳܢܳܐ܆ ܟܰܕ ܥܕܰܟܺܝܠ ܬܰܪܥܺܝܬܳܐ ܠܳܐ ܡܕܰܪܰܫܬܳܐ ܐܺܝܬ ܗ̱ܘܳܐ ܠܶܗ܆ ܘܠܳܐ ܥܕܰܟܺܝܠ ܡܢܰܦܰܩ ܗ̱ܘܳܐ ܒܦܽܘܠܚܳܢܳܐ ܘܰܒܬܶܐܽܘܪܺܝܰܐ ܕܗܳܠܶܝܢ ܢܶܨ̈ܒܳܬܳܐ ܐ̱ܚܪ̈ܳܢܝܳܬܳܐ܆ ܕܗܳܠܶܝܢ ܕܡܰܦܰܤ ܗ̱ܘܳܐ ܠܶܗ ܠܡܶܐܟܰܠ ܡܶܢܗܶܝܢ. ܟܰܕ ܡܶܢ ܗܳܢܳܐ ܐܺܝܠܳܢܳܐ ܒܙܰܒܢܶܗ ܚܢܰܢ ܛܥܶܡܢܰܢ܆ ܘܩܰܕܶܡܢܰܢ ܐܶܬܪܰܒܺܝܢܰܢ ܒܝܰܕ ܢܳܡܽܘܣܳܐ ܘܰܢܒܺܝ̈ܶܐ܆ ܘܰܒܝܰܕ ܬܶܐܽܘܪܺܝܰܐ ܟܝܳܢܳܝܬܳܐ ܕܒܶܪ̈ܝܳܬܳܐ ܡܶܬܚܰܙܝܳܢ̈ܝܳܬܳܐ܆ ܗܳܠܶܝܢ ܓܶܝܪ ܐܺܝܬܰܝܗܶܝܢ ܢܶܨ̈ܒܳܬܳܐ ܡܶܬܗܰܘܢܳܢ̈ܝܳܬܳܐ ܕܦܰܪܕܰܝܣܳܐ܆ ܕܺܐܝܬ ܠܗܶܝܢ ܦܺܐܪܳܐ ܕܳܐܦ ܠܗܳܢܽܘܢ ܕܺܐܝܬܰܝܗܽܘܢ ܦܫܺܝ̈ܛܶܐ ܒܰܙܢܳܐ܆ ‌ܐܺܝܬܰܘܗ̱ܝ ܡܶܬܰܐܟܠܳܢܳܐ ܘܰܕܠܳܐ ܩܺܝܢܕܽܘܢܽܘܤ܆ ܓܰܠܝܳܐܺܝܬ ܝܺܕܰܥܢܰܢ܆ ܕܺܐܝܠܳܢܳܐ ‌ܐܺܝܬܰܘܗ̱ܝ܆ ܕܗܳܝ ܕܢܶܕܰܥ ܗܳܝ ܕܛܳܒܳܐ ܘܗܳܝ ܕܒܺܝܫܳܐ^[12].

ܟܰܕ ܓܶܝܪ ܨܠܺܝܒܳܐ ܠܡܰܠܦܳܢܽܘܬܳܐ ܕܟܳܪܽܘܙܽܘܬܳܐ ܐܶܘܰܢܓܶܠܳܝܬܳܐ ܐܰܨܡܰܚ ܠܰܢ܆ ܠܘܳܬ ܡܰܢ ܗܳܝ ܕܛܳܒܳܐ ܪܗܶܛܢܰܢ܆ ܗܳܕܶܐ ܕܶܝܢ ܐܺܝܬܶܝܗ̇ ܕܬܰܘܕܺܝܬܳܐ ܕܠܳܐ ܛܽܘܥܝܰܝ ܘܗܰܝܡܳܢܽܘܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܥܪܰܩܢܰܢ ܕܶܝܢ ܘܰܐܗܦܶܟܢܰܢ ܐܰܦܰܝ̈ܢ ܡܶܢ ܗܳܝ ܕܒܺܝܫܳܐ. ܗܳܝ ܟܺܝܬ ܕܺܐܝܬܶܝܗ̇܆ ܥܰܒܕܽܘܬܳܐ ܕܳܐܟܶܠܩܰܪܨܳܐ ܘܛܳ̈ܥܝܽܘܬܳܐ ܕܕܶܚܠܰܬ ܫܻ̈ܐܕܶܐ܆ ܘܣܶܓܕܬܳܐ ܕܒܶܪ̈ܝܳܬܳܐ.

ܝܺܕܰܥܬܳܐ ܓܶܝܪ ܕܰܨܠܺܝܒܳܐ ܒܰܠܚܽܘܕܶܝܗ̇܆ ܦܶܪܫܰܬ ܠܗܳܝ ܕܛܳܒܳܐ ܡܶܢ ܗܳܝ ܕܒܺܝܫܳܐ܆ ܘܰܕܠܳܐ ܚܠܺܝܛܳܐܺܝܬ ܢܶܗܘܶܐ ܐܺܝܬ ܠܗܶܝܢ ܥܶܒ̣ܕܰܬ. ܗܳܝ ܟܺܝܬ ܕܠܳܐ ܢܳܡܽܘܣܳܐ܆ ܘܳܐܦܠܳܐ ܡܰܠܦܳܢ̈ܘܳܬܳܐ ܢܒ̈ܺܝ̣ܳܝ̣ܳܬܳܐ ܣܳܦ̈ܩܳܢ ܠܡܶܥܒܰܕ. ܡܶܢ ܓܶܝܪ ܬܰܫܥܺܝܬܳܐ ܟܬܺܝܒܬܳܐ ܝܳܕܥܺܝܢܰܢ܆ ܕܗܳܢܽܘܢ ܕܣܳܓܕܺܝܢ ܗ̱ܘܰܘ ܠܰܐܠܳܗܳܐ ܕܟܽܠ܆ ܣܳܓܕܺܝܢ ܗ̱ܘܰܘ ܐܳܦ ܠܒܰܥܠܳܐ܆ ܘܰܒܪܰܘܳܝܽܘܬܳܐ ܕܣܰܓܺܝܽܐܘܬ ܐܰ‌ܠܳܗ̈ܶܐ ܫܢܺܝ̣ܺܝ̈ܢ ܗ̱ܘܰܘ. ܘܰܕܗܳܕܶܐ ܐܺܝܬܶܝܗ̇ ܝܺܕܰܥܬܳܐ܆ ܗܳܝ ܕܰܒܝܰܕ ܐܺܝܠܳܢܳܐ ܕܗܳܝ ܕܛܳܒܳܐ ܘܰܕܗܳܝ ܕܒܺܝܫܳܐ܆ ܗܳܝ ܕܰܠܗܰܘ ܕܺܐܝܬܰܘܗ̱ܝ ܐܰ‌ܠܳܗܳܐ ܢܶܕܰܥ܆ ܘܗܳܝ ܕܰܠܩܽܘܒܠܳܐ ܢܰܣܠܶܐ܆ ܠܗܳܢܽܘܢ ܕܠܳܐ ܐܺܝܬܰܝܗܽܘܢ ܐܰ‌ܠܳܗ̈ܶܐ܆ ܝܺܕܰܥܬܳܐ ܐܺܝܬܶܝܗ̇܆ ܐܳܦ ܡܶܢܗܶܝܢ ܕܡ̈ܶܠܶܐ ܡܰܛܥ̈ܝܳܢܝܳܬܳܐ ܕܚܶܘܝܳܐ܆ ܗܳܝ ܟܺܝܬ ܕܩܰܪܶܒ ܠܚܰܘܳܐ܆ ܟܰܕ ܡܳܠܶܟ ܠܳܗ̇ ܠܡܶܐܟܰܠ ܡܶܐܟܽܘܠܬܳܐ ܗܳܝ ܕܺܐܝܠܳܢܳܐ ܕܟܰܠܝܳܐ ܗ̱ܘܳܬ ܘܰܕܠܳܐ ܐܺܝܬܶܝܗ̇ ܗ̱ܘܳܬ ܕܠܳܚܡܳܐ ܠܙܰܒܢܳܐ. ܡܳܢܳܐ ܓܶܝܪ ܐܳܡܰܪ ܠܘܳܬܳܗ̇. ܠܳܐ ܗ̱ܘܳܐ ܡܡܽܘܬ ܬܡܽܘܬܽܘܢ. ܝܳܕܰܥ ܗ̱ܘܳܐ ܓܶܝܪ ܐܰ‌ܠܳܗܳܐ ܕܰܒܝܰܘܡܳܐ ܗܰܘ ܕܬܶܐܟܠܽܘܢ ܒܶܗ ܡܶܢܶܗ܆ ܢܶܬܦܰܬܚ̈ܳܢ ܥܰܝ̈ܢܶܐ ܕܺܝܠܟܽܘܢ܆ ܘܬܶܗܘܽܘܢ ܐܰܝܟ ܐܰ‌ܠܳܗ̈ܶܐ܆ ܕܝܳܕܥܺܝܢ ܗܳܝ ܕܛܳܒܳܐ ܘܗܳܝ ܕܒܺܝܫܳܐ^[13].

ܚܳܙܶܐ ܐܰܢ̱ܬ܆ ܕܰܒܫܽܘܡܳܗܳܐ ܗܰܘ ܣܰܓܺܝܳܐܢܳܝܳܐ ܕܰܐ‌ܠܳܗ̈ܶܐ܆ ܓܽܘܡܳܨܳܐ ܗܰܘ ܕܡܶܢ ܣܰܓܺܝܽܐܘܬ ܐܰ‌ܠܳܗ̈ܶܐ ܚܰܘܺܝ܆ ܗܰܘ ܕܰܥܬܺܝܕܳܐ ܗ̱ܘܳܬ ܕܬܺܐܠܰܕ ܛܥܳܡܬܳܐ ܗܳܝ ܕܰܥܒܳܪ ܢܳܡܽܘܣܳܐ ܘܰܕܠܳܐ ܒܙܰܒܢܳܗ̇܆ ܗܳܝ ܕܟܰܕ ܩܕܳܡ ܙܰܒܢܳܐ ܛܰܥܡܳܗ̇ ܐܳܕܳܡ܆ ܐܶܙܕܟܺܝ ܒܽܐܘܚܕܳܢܳܐ ܕܒܺܝܫܳܐ܆ ܘܰܠܗܳܕܶܐ ܥܰܠ ܒܢܰܘ̈ܗ̱ܝ ܫܰܕܰܪ܆ ܗܳܢܽܘܢ ܟܺܝܬ ܕܰܠܕܶܚܠܰܬ ܦܬܰܟܪ̈ܶܐ ܐܶܫܬܰܪܓܰܠܘ܆ ܐܳܦܶܢ ܗܽܘ ܐܰܡܶܕ ܡܶܢ ܣܽܘܓܦܳܢܳܐ ܕܡܶܢ ܗܳܕܶܐ܆ ܒܗܳܝ ܕܺܐܝܬ ܗ̱ܘܳܐ ܠܶܗ ܒܶܗ ܕܰܩܒܺܝܥ ܘܰܡܕܰܝܰܪ ܚܰܕܬܳܐ ܘܰܕܠܰܘ ܩܕܳܡ ܙܰܒܢܳܐ ܣܰܓܺܝ܆ ܠܫܶܡܥܳܐ ܕܡܰܟܣܳܢ̈ܘܳܬܳܐ ܐܰ‌ܠܳܗܳܝ̈ܳܬܳܐ܆ ܘܟܰܕ ܒܰܓܙܳܪ ܕܺܝܢܳܐ ܚܰܕܬܳܐ ܕܡܰܘܬܳܐ ܡܶܬܟܰܘܰܢ ܗ̱ܘܳܐ܆ ܗܳܝ ܓܶܝܪ ܕܰܠܬܶܐܽܘܠܽܘܓܺܝܰܐ ܢܶܬܩܰܪܰܒ܆ ܗܳܝ ܕܩܰܢܝܳܐ ܗ̱ܘܳܬ ܠܳܗ̇ ܒܳܗ̇ ܛܥܳܡܬܳܐ ܗܳܝ ܕܺܐܝܠܳܢܳܐ܆ ܠܗܳܢܽܘܢ ܕܠܳܐ ܩܰܕܶܡܘ ܐܶܬܪܕܺܝܘ ܒܝܰܕ ܬܶܐܽܘܪܺܝܰܐ ܗܳܝ ܕܰܒܒܶܪ̈ܝܳܬܳܐ܆ ܠܳܐ ܐܺܝܬܶܝܗ̇ ܗ̱ܘܳܬ ܙܗܺܝܪܬܳܐ^[14].

ܕܰܡܫܰܡܠܰܝ̈ܳܐ ܓܶܝܪ ܐܺܝܬܶܝܗ̇ ܡܶܐܟܽܘܠܬܳܐ ܗܳܝ ܚܠܺܝܡܬܳܐ^[15]܆ ܐܰܝܟܰܢܳܐ ܕܳܐܦ ܦܰܘܠܽܘܤ ܐܳܡܰܪ: ܗܳܢܽܘܢ ܕܡܶܛܽܠ ܩܰܢܳܝܽܘܬܳܐ ܕܬܰܪܥܺܝܬܗܽܘܢ ܪ̈ܶܓܫܶܐ ܡܕܰܪ̈ܫܶܐ ܐܺܝܬ ܠܗܽܘܢ܆ ܠܘܳܬ ܦܽܘܪܫܳܢܳܐ ܕܗܳܝ ܟܺܝܬ ܕܛܳܒܳܐ ܘܰܕܗܳܝ ܕܒܺܝܫܳܐ. ܐܶܠܳܐ ܠܰܢ ܕܺܝܠܰܢ܆ ܥܰܡܰܢܽܘܐܶܝܠ ܗܰܘ ܐܳܣܝܳܐ ܚܰܟܺܝܡܳܐ ܕܢܰܦ̈ܫܳܬܳܐ ܕܺܝܠܰܢ ܘܡܰܠܦܳܢܳܐ ܟܰܕ ܩܰܕܶܡܢܰܢ ܐܶܬܬܰܪܰܐܢܰܢ ܘܶܐܬܪܕܺܝܢܰܢ܆ ܠܰܘ ܒܝܰܕ ܕܽܘܝܳܪܳܐ ܕܰܒܦܰܪܕܰܝܣܳܐ ܘܰܒܝܰܕ ܦܽܘܠܚܳܢܳܐ ܘܡܶܐܟܽܘܠܬܳܐ ܕܢܶܨ̈ܒܳܬܳܐ ܡܶܕܶܡ܆ ܐܶܠܳܐ ܐܰܝܟܰܢܳܐ ܕܶܐܡܪܶܬ܆ ܒܝܰܕ ܢܳܡܽܘܣܳܐ ܘܰܢܒܺܝ̈ܶܐ܆ ܫܰܘܬܶܦ ܠܰܢ ܒܙܰܒܢܳܐ ܕܠܳܚܶܡ ܠܰܛܥܳܡܬܶܗ ܕܺܐܝܠܳܢܳܐ. ܗܰܘ ܟܺܝܬ ܕܟܰܕ ܝܺܕܰܥܢܰܢ ܕܺܐܝܠܳܢܳܐ ‌ܐܺܝܬܰܘܗ̱ܝ܆ ܕܗܳܝ ܕܬܶܗܘܶܐ ܝܺܕܰܥܬܳܐ ܕܗܳܝ ܕܛܳܒܳܐ ܘܰܕܗܳܝ ܕܒܺܝܫܳܐ܆ ܒܗܳܝ ܡܰܢ ܕܛܳܒܳܐ ܡܶܙܕܰܗܪܺܝܢܰܢ ܘܠܳܒܟܺܝܢܰܢ܆ ܠܗܳܝ ܕܶܝܢ ܕܒܺܝܫܳܐ ܪܳܩܺܝܢ ܚ̱ܢܰܢ ܘܡܰܣܠܶܝܢ ܚ̱ܢܰܢ܆ ܘܰܠܪܽܘܚܩܳܐ ܫܳܕܶܝܢ ܚ̱ܢܰܢ ܥܰܕ ܠܰܘ ܕܺܝܕܰܥܬܳܐ ܕܰܐ‌ܠܳܗܳܐ ܒܰܠܚܽܘܕ ܝܳܨܦܺܝܢ ܚ̱ܢܰܢ܆ ܐܶܠܳܐ ܐܳܦ ܕܟܽܠܳܗ̇ ܡܝܰܬܪܽܘܬܳܐ ܫܒܽܘܩ ܕܶܝܢ ܕܗܺܝ ܗܳܝ ܕܢܶ݀ܕܰܥ ܠܰܐܠܳܗܳܐ ܐܰܝܟ ܕܙܳܕܶܩ ܕܢܶܕܰܥ^[16]܆ ܠܟܽܠܗܶܝܢ ܛܳܒ̈ܬܳܐ ܚܳܫܒܳܐ ܗܺܝ ܒܶܗ܆ ܘܰܗܘ̣ܳܐ ܠܰܢ ܗܽܘ ܟܰܕ ܗܽܘ ܩܰܝܣܳܐ܆ ܐܳܦ ܩܰܝܣܳܐ ܕܚܰܝ̈ܶܐ. ܬܪܶܝܢ ܓܶܝܪ ܐܺܝܬܰܝܗܽܘܢ ܗ̱ܘܰܘ ܐܺܝܠܳܢ̈ܶܐ ܡܝܰܬܪ̈ܶܐ ܒܦܰܪܕܰܝܣܳܐ܆ ܝܰܬܺܝܪ ܡܶܢ ܗܳܠܶܝܢ ܢܶܨ̈ܒܳܬܳܐ ܐ̱ܚܪ̈ܳܢܝܳܬܳܐ܆ ܐܰܝܟܰܢܳܐ ܕܬܰܫܥܺܝܬܳܐ ܗܳܝ ܕܡ̈ܶܠܶܐ ܟܳܗ̈ܢܳܝܳܬܳܐ ܡܰܘܕܥܳܐ ܟܰܕ ܐܳܡܪܳܐ܆ ܘܰܐܫܘܰܚ ܐܰ‌ܠܳܗܳܐ ܬܽܘܒ ܡܶܢ ܐܰܪܥܳܐ ܟܽܠ ܩܰܝܣܳܐ ܫܰܦܺܝܪܳܐ ܠܰܚܙܳܬܳܐ ܘܰܕܝܳܐܶܐ ܠܡܶܐܟܽܘܠܬܳܐ. ܘܩܰܝܣܳܐ ܗܰܘ ܕܚܰܝ̈ܶܐ ܒܰܡܨܰܥܬܳܐ ܕܦܰܪܕܰܝܣܳܐ܆ ܘܩܰܝܣܳܐ ܗܰܘ ܕܗܳܝ ܕܢܶܕܰܥ ܝܺܕܰܥܬܳܐ ܕܗܳܝ ܕܛܳܒܳܐ ܘܰܕܗܳܝ ܕܒܺܝܫܳܐ^[17].

ܘܡܶܢ ܗܰܘ ܚܰܕ ܡܰܢ ܐܺܝܠܳܢܳܐ ܡܶܢ ܗܳܠܶܝܢ ܬܪܶܝܢ܆ ܡܶܬܟܠܶܐ ܗ̱ܘܳܐ ܕܫܳܥܬܳܐ ܡܶܛܽܠ ܦܽܘܩܕܳܢܳܐ ܐܳܕܳܡ ܠܡܶܛܥܰܡ. ܗܰܘ ܕܶܝܢ ܐ̱ܚܪܺܢܳܐ܆ ܩܰܝܣܳܐ ܗܰܘ ܕܚܰܝ̈ܶܐ ܐܳܡܰܪ ܐ̱ܢܳܐ: ܐܺܝܩܳܪܳܐ ܥܬܺܝܕ ܗ̱ܘܳܐ ܕܢܶܣܒܺܝܘܗ̱ܝ܆ ܐܶ‌ܠܽܘ ܢܰܛܪܳܗ̇ ܠܣܳܝܽܘܡܽܘܬ ܢܳܡܽܘܣܳܐ܆ ܟܰܕ ܠܳܐ ܐܶܙܕܟܺܝ ܡܶܢ ܛܥܳܡܬܳܐ ܗܳܝ ܕܰܕܠܳܐ ܒܙܰܒܢܳܗ̇. ܗܳܠܶܝܢ ܕܶܝܢ ܬܪܶܝܢ ܩܰܝ̈ܣܶܐ. ܛܽܘܦܣܳܐ ܐܰܚܺܝܕܺܝܢ ܗ̱ܘܰܘ ܕܰܨܠܺܝܒܳܐ ܡܝܰܩܪܳܐ ܟܰܕ ܫܰܟܶܢ ܠܰܢ ܡܰܢ ܒܝܰܕ ܛܥܳܡܬܳܐ ܕܰܒܙܰܒܢܳܗ̇܆ ܝܺܕܰܥܬܳܐ ܕܦܽܘܪܳܫܳܐ ܚܰܬܺܝܬܳܐ ܕܗܳܝ ܕܛܳܒܳܐ ܘܰܕܗܳܝ ܕܒܺܝܫܳܐ܆ ܡܫܰܕܰܪ ܠܰܢ ܕܶܝܢ ܒܝܰܕ ܩܝܳܡܬܳܐ ܠܘܳܬ ܒܽܘܣܳܡܳܐ ܕܚܰܝ̈ܶܐ ܕܰܠܥܳܠܰܡ܆ ܗܳܝ ܟܺܝܬ ܕܳܐܦ ܐܶܫܰܥܝܳܐ ܗܰܘ ܫܺܝܦܽܘܪܳܐ ܪܰܒ ܩܳܠܳܐ ܕܰܢܒܺܝ̈ܶܐ܆ ܡܶܛܽܠ ܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܠܰܡܗܰܝܡܳܢܽܘ ܒܰܡܫܺܝܚܳܐ܆ ܡܩܰܕܶܡ ܗ̱ܘܳܐ ܡܰܙܥܶܩ ܟܰܕ ܐܳܡܰܪ: ܐܰܝܟ ܓܶܝܪ ܝܰܘ̈ܡܳܬܳܐ ܕܺܐܝܠܳܢܳܐ ܗܰܘ ܕܚܰܝ̈ܶܐ܆ ܢܶܗܘܽܘܢ ܝܰܘ̈ܡܳܬܳܐ ܕܥܰܡܳܐ ܕܺܝܠܝ^[18].

ܡܶܛܽܠ ܡܰܢ ܓܶܝܪ ܐܳܕܳܡ܆ ܟܰܕ ܚܕܳܐ ܙܒܰܢ ܢܦܰܠ ܗ̱ܘܳܐ ܠܶܗ ܬܚܶܝܬ ܚܒܳܠܳܐ ܒܝܰܕ ܥܒܳܪ ܦܽܘܩܕܳܢܳܐ ܘܰܒܡܰܘܬܳܐ ܐܶܬܚܰܝܰܒ܆ ܐܳܡܰܪ ܗ̱ܘܳܐ ܐܰ‌ܠܳܗܳܐ ܕܟܽܠ܆ ܘܗܳܫܳܐ ܕܰܠܡܳܐ ܢܶܦܫܽܘܛ ܐܺܝܕܶܗ ܘܢܶܣܰܒ ܡܶܢ ܐܺܝܠܳܢܳܐ ܕܚܰܝ̈ܶܐ ܘܢܶܐܟܽܘܠ܆ ܘܢܺܚܶܐ ܠܥܳܠܰܡ^[19]܆ ܐܰܝܟܰܢܳܐ ܕܠܳܐ ܢܩܰܘ̈ܝܳܢ ܗܳܠܶܝܢ ܕܰܚܒܳܠܳܐ ܠܳܐ ܡܳܝ̈ܽܘܬܳܬܳܐ ܘܰܕܠܳܐ ܫܽܘܠܳܡ. ܡܶܛܽܠܳܬܰܢ ܕܶܝܢ ܕܺܝܠܰܢ܆ ܕܰܫܠܰܚܢܰܢ ܠܒܰܪܢܳܫܳܐ ܗܰܘ ܥܰܬܺܝܩܳܐ܆ ܗܰܘ ܕܡܶܬܚܰܒܰܠ ܒܰܪ̈ܓܺܝܓܳܬܳܐ ܕܛܽܘܥܝ̣ܰܝ̣^[20]܆ ܘܒܰܣܚܳܬܳܐ ܕܝܰܠܕܳܐ ܕܡܶܢ ܕܪܺܝܫ ܘܰܒܪܽܘܚܳܐ ܐܶܬܚܰܕܰܬܢܰܢ܆ ܘܗܳܟܰܢܳܐ ܡܶܢ ܝܺܕܰܥܬܳܐ ܕܺܐܝܠܳܢܳܐ ܛܥܶܡܢܰܢ܆ ܣܰܓܺܝ ܠܳܚܡܳܐܺܝܬ ܐܳܡܰܪ: ܕܰܐܝܟ ܓܶܝܪ ܝܰܘ̈ܡܳܬܳܐ ܕܺܐܝܠܳܢܳܐ ܗܰܘ ܕܚܰܝ̈ܶܐ܆ ܢܶܗܘܽܘܢ ܝܰܘ̈ܡܳܬܳܐ ܕܥܰܡܳܐ ܕܺܝܠܝ^[21]܆ ܐܰܝܟܰܢܳܐ ܕܰܢܩܰܘ̈ܝܳܢ ܗܳܠܶܝܢ ܕܩܰܘܡܬܳܐ ܪܽܘܚܳܢܳܝܬܳܐ ܘܛܰܠܝܽܘܬܳܐ܆ ܕܰܠܥܳܠܰܡ ܘܰܕܗܽܘ ܗܳܟܘܳܬ ܐܺܝܬ ܠܗܶܝܢ ܘܠܳܐ ܡܶܙܕܰܥܙܥܳܢ̈ܝܳܬܳܐ.

ܡܶܛܽܠܗܳܕܶܐ ܓܶܝܪ ܡܶܢ ܒܳܬܰܪ ܥܒܳܪ ܦܽܘܩܕܳܢܳܐ ܕܳܐܕܳܡ܆ ܛܰܟܶܤ ܘܣܳܡ ܐܰ‌ܠܳܗܳܐ ܟܪܽܘܒܳܐ܆ ܘܪܽܘܡܚܳܐ ܫܰܠܗܶܒܺܝܬܳܢܳܝܬܳܐ ܕܡܶܬܗܰܦܟܳܐ܆ ܠܡܶܛܰܪ ܐܽܘܪܚܳܐ ܕܺܐܝܠܳܢܳܐ ܗܰܘ ܕܚܰܝ̈ܶܐ^[22]. ܟܪܽܘܒܳܐ ܡܰܢ܆ ܐܰܝܟܰܢܳܐ ܕܢܺܐܠܰܦ܆ ܕܩܰܝܣܳܐ ܕܰܨܠܺܝܒܳܐ܆ ܩܰܝܣܳܐ ܕܰܐ‌ܠܳܗܳܐ ܐܺܝܬܰܘܗ̱ܝ. ܩܕܳܡ ܐܰ‌ܠܳܗܳܐ ܓܶܝܪ ܒܰܠܚܽܘܕܰܘܗ̱ܝ ܝܳܕܥܺܝܢ ܟܪ̈ܽܘܒܶܐ ܠܰܡܩܳܡ ܘܠܰܡܕܰܝܳܠܽܘ܆ ܘܰܠܫܽܘܒܚܳܐ ܠܳܐ ܡܶܬܡܰܠܠܳܢܳܐ ܠܰܡܫܰܡܳܫܽܘ. ܠܳܐ ܡܶܬܡܰܠܠܳܢܺܝܬܳܐ ܓܶܝܪ ܐܺܝܬܶܝܗ̇ ܐܳܦ ܡܶܠܬܳܐ ܕܰܨܠܺܝܒܳܐ ܘܰܕܥܳܒܪܳܐ ܠܡܰܕܪܟܳܢܽܘܬܳܐ ܕܺܝܠܰܢ܆ ܘܰܕܫܽܘܒܚܳܐ ܒܰܠܚܽܘܕ ܦܐܶܐ ܠܰܐܠܑܳܗܳܐ ܡܶܣܬܰܓܕܳܐ.

ܪܽܘܡܚܳܐ ܕܶܝܢ ܫܰܠܗܶܒܺܝܬܳܢܳܝܬܳܐ ܕܡܶܬܗܰܦܟܳܐ ܩܳܪܶܐ܆ ܠܩܰܕܺܝܡܽܘܬ ܡ̈ܶܠܶܐ ܗܳܠܶܝܢ ܕܰܒܝܰܕ ܢܒܺܝ̈ܶܐ܆ ܗܳܠܶܝܢ ܟܺܝܬ ܕܪܶܡܙܳܢܳܐܺܝܬ ܡܚܰܘ̈ܝܳܢ ܗ̱ܘܰܝ̈ ܠܰܢ ܐܽܘܪܚܳܐ ܕܰܨܠܺܝܒܳܐ܆ ܘܢܳܛܪ̈ܳܢ ܗ̱ܘܰܝ̈ ܠܶܗ ܠܙܰܒܢܳܐ ܗܳܢܳܐ ܕܩܰܪܺܝܒ. ܡܶܢ ܪܽܘܡܚܳܐ ܓܶܝܪ ܫܰܠܗܶܒܺܝܬܳܢܳܝܬܳܐ ܐܰܝܟ ܕܒܰܫܪܳܪܳܐ܆ ܘܠܳܐ ܡܶܕܶܡ ܡܶܬܚܰܙܝܳܐ ܠܺܝ ܕܰܡܫܰܚܠܦܳܐ. ܡܶܠܬܳܐ ܗܳܝ ܢܒܺܝ̣ܳܝ̣ܬܳܐ܆ ܗܳܝ ܟܺܝܬ ܕܰܡܫܰܠܗܒܳܐ ܡܰܢ ܐܰܝܟ ܢܽܘܪܳܐ܆ ܦܳܣܩܳܐ ܕܶܝܢ ܝܰܬܺܝܪ ܡܶܢ ܣܰܝܦܳܐ ܕܰܠܛܺܝܫ^[23]܆ ܐܰܝܟ ܡܶܠܬܳܐ ܕܶܐܪܰܡܝܳܐ ܢܒܺܝܳܐ ܕܳܐܡܰܪ: ܠܳܐ ܗ̱ܘܳܐ ܗܳܐ ܡ̈ܶܠܶܐ ܕܺܝܠܝ ܐܰܟܙܢܳܐ ܕܢܽܘܪܳܐ ܕܰܡܫܰܠܗܒܳܐ ܐܳܡܰܪ ܡܳܪܝܳܐ܆ ܘܰܐܝܟ ܦܶܠܩܳܐ ܕܦܳܣܶܩ ܫܽܘܥܳܐ^[24]. ܗܳܕܶܐ ܕܶܝܢ ܪܽܘܡܚܳܐ ܫܰܠܗܶܒܺܝܬܳܢܳܝܬܳܐ. ܗܳܢܰܘ ܕܶܝܢ ܠܶܫܳܢܳܐ ܗܰܘ ܢܒܺܝ̣ܳܝ̣ܳܐ܆ ܡܶܬܗܰܦܰܟ ܗ̱ܘܳܐ ܕܠܳܐ ܫܰܠܘܳܐ ܘܡܶܬܬܙܺܝܥ ܗ̱ܘܳܐ܆ ܘܰܠܡܶܐܬܺܝܬܳܐ ܕܒܰܒܣܰܪ ܕܰܡܫܺܝܚܳܐ ܩܳܕܶܡ ܗ̱ܘܳܐ ܡܰܟܪܶܙ. ܐܰܩܺܝܡܳܗ̇ ܕܶܝܢ ܘܫܰܠܝܳܗ̇ ܗܽܘ ܥܰܡܰܢܽܘܐܶܝܠ. ܟܰܕ ܥ̣ܰܠ ܠܦܰܪܕܰܝܣܳܐ܆ ܐܶܡܰܬܝ ܕܳܐܦ ܠܗܰܘ ܓܰܝܳܣܳܐ ܥܰܡܶܗ ܐܰܥܠܶܗ. ܓܠܺܝܬܳܐ ܓܶܝܪ ܐܺܝܬܶܝܗ̇܆ ܕܫܽܘܠܳܡܳܐ ܕܢܳܡܽܘܣܳܐ ܘܕܰܢܒܺܝ̈ܶܐ ܡܫܺܝܚܳܐ ‌ܐܺܝܬܰܘܗ̱ܝ܆ ܕܗܳܢܽܘܢ ܕܰܐ̱ܚܪܳܝܳܐ ܕܺܝܠܗܽܘܢ ‌ܐܺܝܬܰܘܗ̱ܝ ܗ̱ܘܳܐ ܝܽܘܚܰܢܳܢ ܗܰܘ ܡܰܥܡܕܳܢܳܐ܆ ܗܳܝ ܟܺܝܬ ܕܳܐܦ ܗܽܘ ܦܳܪܽܘܩܰܢ ܓܠܺܝܬܳܐ ܥܰܒܕܳܗ̇ ܒܶܐܘܰܢܓܶܠܺܝ̈ܰܐ ܟܰܕ ܐܳܡܰܪ: ܟܽܠܗܽܘܢ ܓܶܝܪ ܢܒܺܝ̈ܶܐ ܘܢܳܡܽܘܣܳܐ܆ ܥܕܰܡܳܐ ܠܝܽܘܚܰܢܳܢ ܐܶܬܢܰܒܺܝܘ^[25].

ܗܳܢܳܐ ܩܰܝܣܳܐ ܕܰܨܠܺܝܒܳܐ ܡܝܰܩܪܳܐ܆ ܕܰܢܢܽܘܚ ܥܒܰܕ ܒܰܙܒܰܢ܆ ܐܳܦ ܠܛܰܘܦܳܢܳܐ ܗܰܘ ܕܰܒܝܰܘ̈ܡܰܝ ܢܽܘܚ. ܝܰܘܢܳܐ ܓܶܝܪ ܟܰܕ ܛܽܘܦܣܳܐ ܕܪܽܘܚܳܐ ܩܰܕܺܝܫܳܐ ܐܰܚܺܝܕܳܐ܆ ܒܥܶܕܳܢ ܪܰܡܫܳܐ ܦܢܳܬ ܠܘܳܬ ܩܺܒܽܘܬܳܐ ܟܰܕ ܛܰܪܦܳܐ ܕܙܰܝܬܳܐ ܛܥܺܝܢܳܐ܆ ܘܟܰܕ ܡܫܰܘܕܥܳܐ ܕܝܶܒܫܰܬ ܐܰܪܥܳܐ^[26]. ܐܳܦ ܓܶܝܪ ܐܰܝܟ ܕܒܰܫܪܳܪܳܐ܆ ܩܰܝܣܳܐ ܕܪ̈ܰܚܡܶܐ ܘܰܕܪܶܚܡܰܬ ܐ̱ܢܳܫܽܘܬܳܐ ܗܘ̣ܳܐ ܠܰܢ ܨܠܺܝܒܳܐ܆ ܗܰܘ ܕܡܶܛܽܠ ܡܪܰܚܡܳܢܽܘܬܶܗ ܕܰܥܠܰܝܢ܆ ܩܰܒܶܠ ܥܠܰܘܗ̱ܝ ܥܰܡܰܢܽܘܐܶܝܠ. ܠܗܰܘ ܕܪܽܘܚܳܐ ܩܰܕܺܝܫܳܐ ܟܰܕ ܒܝܰܕ ܦܽܘܡܳܐ ܕܰܫܠܺܝ̈ܚܶܐ ܡܰܟܪܶܙ܆ ܠܰܪ̈ܓܺܝܓܳܬܳܐ ܪ̈ܰܛܺܝܒܳܬܳܐ ܗܳܠܶܝܢ ܕܰܒܟܽܠܳܗ̇ ܐܰܪܥܳܐ ܐܰܫܺܝ̈ܕܳܢ ܗ̱ܘܰܝ̈ ܐܰܘܒܶܫ܆ ܘܰܐܢܺܝܚ ܘܒܰܛܶܠ ܠܛܰܘܦܳܢܳܐ ܕܰܚܛܺܝܬܳܐ.

ܗܳܢܳܐ ܩܰܝܣܳܐ ܥܒܰܕ ܒܡܶܨܪܶܝܢ ܠܽܘܩܒܰܠ ܦܶܪܥܽܘܢ ܐܳܬܘ̈ܳܬܳܐ ܘܬܶܕܡܪ̈ܳܬܳܐ܆ ܘܰܐܓܗܺܝ ܠܺܐܝܣܪܳܐܶܝܠ ܡܶܢ ܥܰܒܕܽܘܬܳܐ. ܚܽܘܛܪܳܐ ܓܶܝܪ ܡܶܬܦܩܶܕ ܗ̱ܘܳܐ ܡܽܘܫܶܐ ܠܡܶܛܥܰܢ܆ ܘܒܶܗ ܚܰܝܠܳܐ ܕܬܶܕܡܪ̈ܳܬܳܐ ܠܰܡܚܰܘܳܝܽܘ^[27]. ܘܰܐܝܟܰܢܳܐ ܕܢܺܐܠܰܦ ܚܢܰܢ܆ ܕܚܽܘܛܪܳܐ ܠܰܘ ܡܶܛܽܠ ܡܶܕܶܡ ܐ̱ܚܪܺܝܢ ܚܰܝܠܳܐ ܗܳܠܶܝܢ ܡܰܥܒܶܕ ܗ̱ܘܳܐ܆ ܐܶܠܳܐ ܡܶܛܽܠ ܛܽܘܦܣܳܐ ܕܰܨܠܺܝܒܳܐ ܡܝܰܩܪܳܐ. ܗܰܘ ܕܒܶܗ ܡܛܰܫܰܝ ܗ̱ܘܳܐ܆ ܐܳܦ ܤܛܰܪ ܡܶܢܶܗ ܒܳܐܬܳܐ ܗܳܝ ܕܰܒܝܰܕ ܨܠܺܝܒܳܐ܆ ܥܒܰܕ ܬܶܕܡܪ̈ܳܬܳܐ ܐܰ‌ܠܳܗܳܝܳܐ ܡܽܘܫܶܐ.

ܟܰܕ ܓܶܝܪ ܥܡܳܠܺܝܩ܆ ܥܰܡܳܐ ܕܶܝܢ ‌ܐܺܝܬܰܘܗ̱ܝ ܗܳܢܳܐ ܥܣܶܩ ܠܦܶܓܥܳܐ ܒܰܩܪܳܒܳܐ ܘܰܕܝܰܬܺܝܪ ܩܫܶܐ܆ ܐܶܣܬܕܰܪ ܠܽܘܩܒܰܠ ‌ܐܺܝܣܪܳܐܶܝܠ܆ ܘܣܳܟܰܪ ܗ̱ܘܳܐ ܘܟܳܠܶܐ ܠܗܽܘܢ ܡܰܥܒܰܪܬܳܐ܆ ܩܳܐܶܡ ܗ̱ܘܳܐ ܡܰܢ ܪܺܝܫ ܚܰܝܠܳܐ ܒܰܩܪܳܒܳܐ ܝܶܫܽܘܥ ܗܰܘ ܒܪܶܗ ܕܢܽܘܢ܆ ܩܳܐܶܡ ܗ̱ܘܳܐ ܕܶܝܢ ܥܰܠ ܛܽܘܪܳܐ ܡܽܘܫܶܐ. ܘܟܰܕ ܐܺܝܕܰܘ̈ܗ̱ܝ ܦܪܰܤ܆ ܘܰܒܝܰܕ ܗܳܕܶܐ ܠܛܽܘܦܣܳܐ ܕܰܨܠܺܝܒܳܐ ܫܰܡܠܺܝ܆ ܡܣܰܝܰܥ ܗ̱ܘܳܐ ܠܥܰܡܳܐ ܒܰܝܬܳܝܳܐ܆ ܘܣܳܚܶܦ ܗ̱ܘܳܐ ܠܗܳܢܽܘܢ ܕܩܳܝܡܺܝܢ ܗ̱ܘܰܘ ܠܽܘܩܒܰܠܗܽܘܢ. ܫܰܦܺܝܪܳܐ ܗ̱ܝ ܕܶܝܢ ܕܳܐܦ ܠܗܶܝܢ ܠܰܒ̈ܢܳܬ ܩ̈ܳܠܶܐ ܕܰܟܬܳܒܳܐ ܐܰ‌ܠܳܗܳܝܳܐ ܢܰܝܬܶܐ ܠܰܡܨܰܥܬܳܐ܆ ܐܰܝܟܰܢܳܐ ܕܝܰܬܺܝܪ ܓܠܺܝܬܳܐ ܢܶܚܙܶܝܗ̇ ܝܰܬܺܝܪܳܐܺܝܬ܆ ܐܳܦ ܟܰܕ ܐܰܝܟ ܕܰܒܛܶܠܳܢܺܝܬܳܐ ܡܶܬܬܨܺܝܪܳܐ܆ ܠܡܰܥܒܕܳܢܽܘܬܳܐ ܕܚܰܝܠܳܐ ܕܰܨܠܺܝܒܳܐ. ܐܺܝܬ ܠܗܶܝܢ ܕܶܝܢ ܗܳܟܰܢܳܐ. ܘܰܗܘ̣ܳܐ ܕܶܐܡܰܬܝ ܕܰܡܪܺܝܡ ܗ̱ܘܳܐ ܡܽܘܫܶܐ ܐܺܝ̈ܕܰܝܳܐ܆ ܙܳܟܶܐ ܗ̱ܘܳܐ ܐܺܝܣܪܳܐܶܝܠ. ܐܶܡܰܬܝ ܕܶܝܢ ܕܡܰܚܶܬ̣ ܗ̱ܘܳܐ ܐܺܝܕܰܘ̈ܗ̱ܝ܆ ܙܳܟܶܐ ܗ̱ܘܳܐ ܥܠܳܡܺܝܩ. ܐܺܝ̈ܕܰܝܳܐ ܕܶܝܢ ܕܡܽܘܫܶܐ ܝܰܩܺܝܪ̈ܳܢ ܗ̱ܘܰܝ̈. ܘܟܰܕ ܢܣܰܒܘ ܟܺܐܦܳܐ. ܣܳܡܘ ܬܚܽܘܬܰܘܗ̱ܝ܆ ܘܝܳܬܶܒ ܗ̱ܘܳܐ ܥܠܶܝܗ̇. ܘܰܐܗܪܽܘܢ ܘܗܽܘܪ ܡܣܰܡܟܺܝܢ ܗ̱ܘܰܘ ܠܗܶܝܢ ܠܺܐܝܕܰܘ̈ܗ̱ܝ. ܡܶܢ ܗܳܪܟܳܐ ܚܰܕ܆ ܘܡܶܢ ܗܳܪܟܳܐ ܚܰܕ. ܘܰܗ̈ܘܰܝ ܐܺܝܕܰܘ̈ܗ̱ܝ ܕܡܽܘܫܶܐ ܣܡܺܝ̈ܟܳܢ ܥܕܰܡܳܐ ܠܡܰܥܪ̈ܳܒܶܐ ܕܫܶܡܫܳܐ. ܘܰܡܚܳܐ ܝܶܫܽܘܥ ܠܰܥܡܳܠܺܝܩ ܘܰܠܟܽܠܶܗ ܥܰܡܳܐ ܕܺܝܠܶܗ ܒܩܶܛܠܳܐ ܕܚܰܪܒܳܐ^[28].

ܚܳܙܶܝܢ ܐܢ̱ܬܽܘܢ ܓܰܠܝܳܐܺܝܬ܆ ܕܪܽܘܫܡܳܐ ܕܰܨܠܺܝܒܳܐ ܕܶܐܬܛܰܦܰܤ ܒܝܰܕ ܐܺܝ̈ܕܰܝܳܐ ܕܡܽܘܫܶܐ܆ ܘܝܶܫܽܘܥ ܕܩܳܐܶܡ ܗ̱ܘܳܐ ܩܕܳܡ ܣܶܕܪܳܐ ܕܰܩܪܳܒܳܐ܆ ܬܒܰܪ ܘܰܐܥܪܶܩ ܠܡܰܩܪ̈ܒܳܢܶܐ܆ ܗܳܟܰܢܳܐ ܗܳܟܺܝܠ ‌ܐܳܦ ܚܢܰܢ ܐܰܝܟܰܢܳܐ ܕܡܽܘܫܶܐ ܥܰܠ ܛܽܘܪܳܐ܆ ܟܰܕ ܥܰܠ ܒܶܝܬ ܥܰܝܢܰܝ̈ܢ ܚܳܬ̣ܡܳܐ ܕܰܨܠܺܝܒܳܐ ܪܳܫܡܺܝܢܰܢ܆ ܘܩܰܕܡܳܐܺܝܬ ܒܪܺܝܫ ܣܶܕܪܳܐ ܠܦܳܪܽܘܩܰܢ ܝܶܫܽܘܥ ܡܫܺܝܚܳܐ ܡܫܰܡܗܺܝܢܰܢ܆ ܠܡܰܩܪ̈ܒܳܢܶܐ ܡܶܬܗܰܘ̈ܢܳܢܶܐ ܬܳܒܪܺܝܢܰܢ ܘܣܳܚܦܺܝܢܰܢ܆ ܠܫ̈ܺܐܕܶܐ ܐܳܡܰܪ ܐ̱ܢܳܐ ܘܠܳܐܟܶܠܩܰܪܨܳܐ ܪܺܝܫܳܐ ܕܗܳܠܶܝܢ ܠܗܳܕܶܐ ܐܳܬܶܐ܆ ܐܳܦ ܚܰܙܩܺܝܐܶܝܠ ܢܒܺܝܳܐ ܐܰܝܟ ܕܰܒܛܽܘܦܣܳܐ ܚܙܳܐ܆ ܕܺܐܝܬܶܝܗ̇ ܗ̱ܘܳܬ ܙܰܝܢܳܐ ܕܚܺܝܠܳܐ ܘܚܳܬܡܳܐ ܕܰܢܛܽܘܪܬܳܐ܆ ܠܗܳܢܽܘܢ ܕܕܳܚܠܺܝܢ ܗ̱ܘܰܘ ܠܡܳܪܝܳܐ.

ܟܰܕ ܓܶܝܪ ܓܙܳܪ ܕܺܝܢܳܐ ܕܰܐܒܕܳܢܳܐ ܐܰܦܶܩ ܥܰܠ ‌ܐܽܘܪܶܫܠܶܡ ܐܰ‌ܠܳܗܳܐ ܕܟܽܠ܆ ܦܳܩܶܕ ܟܰܕ ܐܳܡܰܪ: ܗܳܟܰܢܳܐ. ܥܒܰܪ ܒܰܡܨܰܥܬܳܐ ܕܰܡܕܺܝܢ̱ܬܳܐ ܒܰܡܨܰܥܬܳܐ ܕܽܐܘܪܶܫܠܶܡ܆ ܘܗܰܒ ܐܳܬܳܐ ܥܰܠ ܒܶܝܬ ܥܰܝ̈ܢܶܐ ܕܓܰܒܪ̈ܶܐ ܗܳܢܽܘܢ ܕܡܶܬܬܰܢܚܺܝܢ܆ ܘܰܕܗܳܢܽܘܢ ܕܡܶܬܰܐܒܠܺܝܢ ܘܡܶܬܕܰܢܩܺܝܢ ܥܰܠ ܟܽܠܗܶܝܢ ܠܳܐ ܢܳܡܽܘܣܳܝ̈ܘܳܬܳܐ ܗܳܠܶܝܢ ܕܗܳܘ̈ܝܳܢ ܒܓܰܘܳܗ̇. ܘܰܠܗܳܠܶܝܢ ܐܶܡܰܪ ܟܰܕ ܫܳܡܰܥ ܐ̱ܢܳܐ ܐܶܢܳܐ. ܙܠܶܘ ܠܰܡܕܺܝܢ̱ܬܳܐ ܒܳܬܪܶܗ ܘܰܚܪܽܘܒܘ. ܘܠܳܐ ܬܚܽܘܣܽܘܢ ܒܥܰܝ̈ܢܶܐ ܕܺܝܠܟܽܘܢ܆ ܘܠܳܐ ܬܰܪܚܡܽܘܢ ܥܰܠ ܣܳܒܳܐ ܘܰܥܠܰܝܡܳܐ ܘܰܒܬܽܘܠܬܳܐ܆ ܘܫܰܒܪ̈ܶܐ ܘܢܶܫ̈ܶܐ. ܩܛܽܘܠܘ ܠܰܓܡܽܘܪܝܳܐ. ܠܘܳܬ ܕܶܝܢ ܟܽܠܗܽܘܢ ܗܳܢܽܘܢ ܕܺܐܝܬ ܥܠܰܝܗܽܘܢ ܐܳܬܳܐ܆ ܠܳܐ ܬܶܬܩܰܪܒܽܘܢ^[29].

ܡܶܛܽܠܗܳܕܶܐ ܥܶܠܬܳܐ. ܟܰܕ ܥܽܘܗܕܳܢܳܐ ܡܫܰܡܠܶܝܢ ܚ̱ܢܰܢ ܝܰܘܡܳܢܳܐ܆ ܕܕܶܚܠܳܐ ܗܰܘ ܕܰܗܘܳܐ ܘܰܕܙܰܘܥܳܐ ܕܰܐܪܥܳܐ܆ ܗܰܘ ܟܺܝܬ ܕܰܠܟܽܠܳܗ̇ ܗܳܕܶܐ ܡܕܺܝܢ̱ܬܳܐ ܒܨܺܝܪ ܩܰܠܺܝܠ ‌ܐܰܙܺܝܥ ܘܰܐܪܥܶܠ܆ ܠܥܺܐܕܳܐ ܕܰܨܠܺܝܒܳܐ ܡܝܰܩܪܳܐ ܐܰܙܘܶܓܢܰܢ ܐܰܟܚܕܳܐ ܥܰܡܶܗ܆ ܘܠܳܐܬܳܐ ܗܳܝ ܫܡܰܝܳܢܺܝܬܳܐ ܠܟܽܠܟܽܘܢ ܚܰܘܺܝܢܰܢ. ܐܰܝܟܰܢܳܐ ܕܰܒܝܰܕ ܥܽܘܗܕܳܢܶܗ ܡܰܢ ܕܕܶܚܠܳܐ܆ ܠܘܳܬ ܣܽܘܟܳܠܳܐ ܕܗܳܢܶܝܢ ܕܶܐܬܚ̈ܛܺܝܶܝܢ ܢܥܰܬܶܕ ܠܡܶܐܬܳܐ܆ ܘܰܠܡܶܬܬܱܢܳܚܽܘ ܠܗܳܢܽܘܢ ܕܰܒܟܽܠ ܚܕܳܐ ܩܰܘܡܬܳܐ. ܒܝܰܕ ܕܶܝܢ ܡܚܰܘܝܳܢܽܘܬܳܐ ܕܰܨܠܺܝܒܳܐ܆ ܐܰܝܟ ܗܰܘ ܕܚܳܬܡܳܐ ܟܽܘܠܳܝ̣ܳܝ̣ ܟܶܢܫܳܐ ܥܳܒܕܺܝܢܰܢ ܟܽܠܰܢ܆ ܢܣܺܝܡ ܥܰܠ ܒܶܝܬ ܥܰܝ̈ܢܶܐ ܕܰܡܕܺܝܢ̱ܬܳܐ܆ ܘܗܳܟܰܢܳܐ ܐܳܦ ܡܶܛܽܠܳܬܰܢ. ܐܰ‌ܠܳܗܳܐ ܗܰܘ ܕܰܒܪ̈ܰܚܡܶܐ ܘܰܒܪܶܚܡܰܬ ܐ̱ܢܳܫܽܘܬܳܐ ܪܳܕܶܐ܆ ܢܺܐܡܰܪ ܠܡܰܠܰܐܟ̈ܶܐ ܗܳܢܽܘܢ ܡܫܰܡ̈ܫܳܢܶܐ ܕܪܽܘܓܙܳܐ܆ ܠܘܳܬ ܕܶܝܢ ܟܽܠܗܽܘܢ ܗܳܢܽܘܢ ܕܺܐܝܬ ܥܠܰܝܗܽܘܢ ܐܳܬܳܐ܆ ܠܳܐ ܬܶܬܩܰܪܒܽܘܢ^[30].

ܥܳܗܕܺܝܢ ܐܢ̱ܬܽܘܢ ܗ̱ܘ̣ ܓܶܝܪ ܟܽܠܟܽܘܢ ܗܳܢܽܘܢ ܕܺܐܝܬܰܝܟܽܘܢ ܣܳܒ̈ܶܐ܆ ܐܰܝܟܰܢܳܐ ܐܺܝܬܶܝܗ̇ ܗ̱ܘܳܬ ܗܳܝܕܶܝܢ ܕܣܺܝܡܳܐ ܩܕܳܡ ܥܰܝܢܶܝ̈ܗ̇ ܕܟܽܠܢܳܫ܆ ܚܙܳܬܳܐ ܕܚܺܝܠܬܳܐ ܘܡܶܬܚܰܢܳܢܺܝܬܳܐ܆ ܠܡܶܚܙܳܐ ܠܣܰܝܒܽܘܬܳܐ ܐܰܟܚܕܳܐ ܥܰܡ ܛܰܠܝܽܘܬܳܐ ܘܩܰܘܡܬܳܐ ܫܰܒܪܳܝܬܳܐ ܕܠܳܐ ܒܙܰܒܢܳܗ̇܆ ܕܡܶܢܫܶܠܝ ܘܰܟܢܺܝܫܳܐܺܝܬ ܗܘ̣ܳܬ ܡܺܝܬܬܳܐ܆ ܠܢܶܫ̈ܶܐ ܕܶܐܬܛܡܰܪ̈ܶܝܢ ܟܰܕ ܡܰܝ݂ܺܝ̣̈ܬܳܢ܆ ܟܰܕ ܫܰܒܪ̈ܶܐ ܕܰܬܚܶܝܬ ܬܕܳܐ ܥܕܰܟܺܝܠ ܪܳܦܬܺܝܢ ܗ̱ܘܰܘ ܬܚܶܝܬ ܒܶܙܳܐ ܕܺܝܠܗܶܝܢ ܘܠܰܢܬܳܦܳܐ ܕܚܰܠܒܳܐ ܡܶܬܝܰܐܒܺܝܢ ܗ̱ܘܰܘ ܘܢܳܬܦܺܝܢ܆ ܘܰܠܘܳܬ ܡܰܘܬܳܐ ܗܰܘ ܕܰܬܠܶܐ ܗ̱ܘܳܐ ܠܥܶܠ ܡܶܢ ܪ̈ܺܝܫܰܝܗܽܘܢ ܠܳܐ ܡܰܪܓܫܳܢܳܐܺܝܬ ܐܺܝܬ ܗ̱ܘܳܐ ܠܗܽܘܢ. ܘܰܠ̱ܐܢܳܫܺܝ̈ܢ ܡܰܢ ܟܰܕ ܒܰܝܬܳܐ ܡܶܬܦܫܰܚ ܗ̱ܘܳܐ ܘܠܰܐܪܥܳܐ ܢܳܚܶܬ ܗ̱ܘܳܐ ܕܰܠܒܰܪ ܗܘ̣ܰܘ܆ ܘܰܐܣܒܰܪܘ ܕܥܰܪܺܝܩܺܝܢ ܡܶܢ ܩܺܝܢܕܽܘܢܽܘܤ܆ ܒܰܕܡܽܘܬ ܪ̈ܰܗܳܛܶܐ ܕܶܝܢ ܟܰܕ ܠܳܐ ܚܳܝܪܺܝܢ ܠܰܩܕܳܡܰܝܗܽܘܢ ܬܚܶܝܬ ܡܰܦܽܘܠܬܳܐ ܐ̱ܚܪܺܬܳܐ ܥܰܠ̣ܘ܆ ܘܰܐܕܪܶܟܘ ܕܠܳܐ ܠܨܶܒܝܳܢܗܽܘܢ ܠܡܰܘܬܳܐ ܗܰܘ ܕܰܥܪܰܩܘ ܡܶܢܶܗ.

ܠܰܐ̱ܚܪ̈ܳܢܶܐ ܕܶܝܢ ܕܟܰܬܰܪܘ ܬܚܶܝܬ ܬܰܛܠܺܝܠܳܐ ܗܰܘ ܕܒܳܬܰܪ ܩܰܠܺܝܠ ܥܬܺܝܕ ܗ̱ܘܳܐ ܕܢܶܚܽܘܬ܆ ܘܰܠܡܶܥܪܶܩ ܠܳܐ ܐܶܬܡܨܺܝܘ ܡܶܛܽܠ ܣܰܝܒܽܘܬܳܐ ܐܰܘ ܡܶܛܽܠ ܡܚܺܝܠܽܘܬܳܐ ܐ̱ܚܪܺܬܳܐ܆ ܐܰܘ ܐܳܦ ܠܡܰܘܬܳܐ ܐܰܝܟ ܦܣܳܩܳܐ ܕܰܐ‌ܠܳܗܳܐ ܩܰܒܶܠܘ ܘܶܐܡܰܪܘ ܐܰܝܟ ܢܒܺܝܳܐ: ܠܰܐܝܟܳܐ ܐܺ݀ܙܰܠ ܡܶܢ ܪܽܘܚܳܟ܆ ܘܡܶܢ ܦܰܪܨܽܘܦܳܐ ܕܺܝܠܳܟ ܠܰܐܝܟܳܐ ܐܶ݀ܥܪܽܘܩ^[31]܆ ܘܰܬܡܺܝܗܳܐܺܝܬ ܐܶܫܬܰܘܙܰܒܘ܆ ܘܒܰܛܡܳܪܳܐ ܡܰܢ ܐܶܬܬܚܶܕܘ܆ ܣܺܝܡܺܝܢ ܗ̱ܘܰܘ ܕܶܝܢ ܐܰܝܟ ܕܰܬܚܶܝܬ ܡܥܰܪܬܳܐ܆ ܘܰܡܦܺܝܣܺܝܢ ܗ̱ܘܰܘ ܕܢܶܬܓܰܠܽܘܢ ܘܢܶܬܕܠܽܘܢ܆ ܘܒܰܓܥܳܬܗܽܘܢ ܒܰܠܚܽܘܕ ܡܶܬܝܰܕܥܺܝܢ ܗ̱ܘܰܘ ܕܠܳܐ ܡܰܝ݂ܺܝ̣̈ܬܺܝܢ ܗ̱ܘܰܘ.

ܠ̱ܐܢܳܫܺܝ̈ܢ ܕܶܝܢ܆ ܐܳܦ ܕܟܰܕ ܩܳܝܡܺܝܢ ܗ̱ܘܰܘ ܬܪܺܝܨܳܐܺܝܬ ܘܰܕܠܳܐ ܢܶܟܝܳܢܳܐ ܟܰܬܰܪܘ܆ ܟܰܕ ܐܶܣ̈ܶܐ ܠܟܳܐ ܘܰܠܗܰܠ ܢܳܚ̈ܬܳܢ ܗ̱ܘܰܝ̈. ܐܰܝܟܰܢܳܐ ܕܺܝܕܰܥܬܳܐ ܬܶܗܘܶܐ ܐܺܝܬܶܝܗ̇܆ ܕܡܶܠܬܳܐ ܕܰܐ‌ܠܳܗܳܐ ‌ܐܺܝܬܰܘܗ̱ܝ܆ ܗܰܘ ܕܒܶܗ ܐܺܝܬܶܝܗ̇ ܠܗܳܢܽܘܢ ܕܰܗܘܰܘ ܗܳܝ ܕܢܶܗܘܽܘܢ ܐܺܝܬܰܝܗܽܘܢ ܘܗܳܝ ܕܰܢܟܰܬܪܽܘܢ. ܘܰܕܬܰܪܬܶܝܢ ܨܶܦܪ̈ܺܝܢ ܡܶܙܕܰܒ̈ܢܳܢ ܡܰܢ ܒܰܐܣܳܪܺܝܽܘܢ ܚܰܕ܆ ܚܕܳܐ ܕܶܝܢ ܡܶܢܗܶܝܢ ܠܳܐ ܬܶܦܶܠ ܒܶܠܥܳܕ ܡܶܢ ܐܰܒܽܘܟܽܘܢ ܗܰܘ ܕܒܰܫܡܰܝܳܐ܆ ܘܰܕܡܶܢ̈ܶܐ ܕܣܰܥܪܳܐ ܕܪܺܝܫܳܐ ܕܺܝܠܰܢ ܟܽܠܗܶܝܢ ܡܰܢ̈ܝܳܬܳܐ ܐܺܝܬܰܝܗܶܝܢ^[32]. ܗܳܠܶܝܢ ܟܺܝܬ ܕܠܰܬܚܽܘܡܳܐ ܚܰܬܺܝܬܳܐ ܕܰܒܛܺܝܠܽܘܬܳܐ ܡܚܰܘ̈ܝܳܢ܆ ܘܰܠܪܶܚܡܬܳܐ ܪܺܝܫܳܝܬܳܐ ܕܰܐ‌ܠܳܗܳܐ ܘܚܰܝܽܘܣܬܳܢܽܘܬܳܐ ܕܰܥܠܰܝܢ.

ܐܶܬܚܙܺܝ ܐ̱ܢܳܫ ܗܳܝܕܶܝܢ܆ ܕܟܰܬܦܶܗ ܬܒܺܝܪܳܐ ܗ̱ܘܳܬ ܐܰܘ ܫܳܩܶܗ. ܐ̱ܚܪܺܢܳܐ ܕܺܐܝܕܶܗ ܦܣܺܝܩܳܐ ܗ̱ܘܳܬ܆ ܐܰܘ ܕܰܒܟܺܐܦܳܐ ܪܰܒܬܳܐ ܒܰܠܺܝܥ ܗ̱ܘܳܐ ܥܰܠ ܦܳܬܶܗ ܘܰܪܥܺܝܥ ܗ̱ܘܳܐ܆ ܘܰܠܝܽܘܩܢܳܐ ܕܦܰܪܨܽܘܦܶܗ ܐܰܘܒܶܕ ܘܰܚܣܰܪ. ܘܳܐܦܠܳܐ ܕܡܰܢܽܘ ‌ܐܺܝܬܰܘܗ̱ܝ ܗ̱ܘܳܐ ܡܶܬܺܝܕܰܥ ܗ̱ܘܳܐ. ܘܗܰܘ ܡܰܢ ܐ̱ܢܳܫ ܦܶܠܓܽܘ ܡܺܝܬܳܐ ܪܡܶܐ ܗ̱ܘܳܐ܆ ܟܰܕ ܡܶܫܟܰܚ ܗ̱ܘܳܐ ܕܢܶܬܚܠܶܡ܆ ܘܠܰܝܬ ܗ̱ܘܳܐ ܠܶܗ ܠܗܰܘ ܕܰܡܫܰܘܙܶܒ ܠܶܗ܆ ܐܰܝܟ ܗܰܘ ܕܰܐܘܦܝܰܬ ܢܰܦܫܶܗ ‌ܐܺܝܬܰܘܗ̱ܝ ܗ̱ܘܳܐ. ܗܰܘ ܕܶܝܢ ܐ̱ܢܳܫ܆ ܟܰܕ ܒܰܡܢܳܬܳܐ ܣܰܓܺܝܐܬܳܐ ܕܦܰܓܪܶܗ ܠܒܰܪ ܡܶܢ ܡܰܦܽܘܠܬܳܐ ‌ܐܺܝܬܰܘܗ̱ܝ ܗ̱ܘܳܐ܆ ܒܡܶܕܶܡ ܡܶܕܶܡ ܕܶܝܢ ܡܶܢ ܪ̈ܺܝܫܶܐ ܕܗܰܕܳܡܰܘ̈ܗ̱ܝ܆ ܐܰܝܟ ܨܶܦܪܳܐ ܡܶܢ ܦܰܚܳܐ ܐܰܚܺܝܕ ܗ̱ܘܳܐ. ܘܗܳܢܽܘܢ ܡܰܢ ܡܶܢ ܒ̈ܳܬܶܐ܆ ܥܰܡܗܽܘܢ ܕܓܰܒܪ̈ܰܝܗܽܘܢ ܐܶܬܗܓܶܡܘ ܘܰܢܚܶܬܘ܆ ܘܳܐܦܠܳܐ ܕܢܰܪܡܶܐ ܐ̱ܢܳܫ ܩܳܠܳܐ ܡܶܢ ܗܳܢܽܘܢ ܕܥܳܡܪܺܝܢ ܐܶܫܬܒܶܩ.

ܗܳܠܶܝܢ ܕܶܝܢ ܟܰܕ ܐܶܙܕܰܥܙܰܥܘ ܘܶܐܣܰܝ̈ܗܽܘܢ ܡܬܰܠܚ̈ܳܢ ܗ̱ܘܰܝ̈܆ ܘܰܦܥܺܝܪܺܝܢ ܗ̱ܘܰܘ ܬܰܛܠܺܝܠܰܝ̈ܗܽܘܢ܆ ܡܰܘܬܳܐ ܓܳܙܡܺܝܢ ܗ̱ܘܰܘ. ܐܰܝܟܰܢܳܐ ܕܗܳܢܽܘܢ ܕܰܠܓܰܘ ܐܺܝܬܰܝܗܽܘܢ ܗ̱ܘܰܘ܆ ܒܰܐܝܠ̈ܠܳܬܳܐ ܘܒܽܐܘܠ̈ܝܳܬܳܐ ܢܰܨܪܚܽܘܢ ܠܥܶܠ ܡܶܢ ܐܳܐܰܪ܆ ܘܗܳܟܰܢܳܐ ܟܰܕ ܗܶܢܽܘܢ ܡܶܢ ܢܰܦܫܗܽܘܢ ܐܶܬܒܟܺܝܘ܆ ܠܰܘ ܒܕܶܡ̈ܥܶܐ ܡܥܰܦ̈ܝܳܢܝܳܬܳܐ ܡܰܠܽܘܢ܆ ܐܶܠܳܐ ܒܕܶܡ̈ܥܶܐ ܕܰܩܕܳܡ ܩܒܽܘܪܬܳܐ܆ ܠܟܺܐܦ̈ܶܐ ܗܳܠܶܝܢ ܕܬܰܠ̈ܝܳܢ ܗ̱ܘܰܝ̈. ܠܥܶܠ ܡܶܢ ܪ̈ܺܝܫܰܝܗܽܘܢ ܩܰܒܶܠܘ܆ ܘܶܐܬܛܡܰܪܘ ܒܩܪ̈ܡܝܢܐ^[33] ܘܰܒܕܰܦ̈ܶܐ ܘܰܒܩܳܪ̈ܝܳܬܳܐ.

ܚܰܪܒܬܳܐ ܕܶܝܢ ܐܺܝܬܶܝܗ̇ ܗ̱ܘܳܬ ܡܶܟܺܝܠ ܡܶܢ ܥܳܡܽܘܪ̈ܶܐ ܗܳܝ ܡܺܕܝܢ̱ܬܳܐ. ܟܽܠܗܽܘܢ ܓܶܝܪ ܠܘܳܬ ܪ̈ܺܝܫܰܝ ܛܽܘܪ̈ܶܐ ܪܗܶܛܘ܆ ܘܰܠܕܽܘܟ̈ܝܳܬܳܐ ܪ̈ܰܚܺܝܩܳܬܳܐ ܕܰܐܬܪܳܐ. ܘܝܰܬܺܝܪܳܐܺܝܬ ܠܗܳܠܶܝܢ ܕܠܳܐ ܡܶܬܥܰܡܪ̈ܳܢ. ܠܳܐ ܓܶܝܪ ܐܺܝܬ ܗ̱ܘܳܐ ܕܽܘܟܬܳܐ܆ ܐܰܝܟܳܐ ܕܥܰܠ ܦܽܘܪܩܳܢܳܐ ܥܳܪܒܳܐ^[34] ܗ̱ܘܳܬ ܠܳܟ ܐܶܣܬܳܐ ܐܰܘ ܬܰܛܠܺܝܠܳܐ. ܡܶܛܽܠ ܟܺܝܬ ܕܟܽܠܗܶܝܢ ܢܳܝ̈ܕܳܢ ܗ̱ܘܰܝ̈܆ ܘܰܕܚܺܝܠܳܐܺܝܬ ܡܶܙܕܰܥܙ̈ܥܳܢ ܗ̱ܘܰܝ̈. ܐܳܦ ܓܶܝܪ ܥܕܰܟܺܝܠ ܚܳܐܰܪ ܗ̱ܘܳܐ ܒܰܐܪܥܳܐ ܗܰܘ ܕܥܳܒܶܕ ܠܳܗ̇ ܕܬܶܪܥܰܠ^[35]. ܘܚܰܘܪܳܐ ܗܰܘ ܕܰܓܙܳܡܳܐ ܠܳܐ ܫܳܪܶܐ ܗ̱ܘܳܐ. ܐܶܠܳܐ ܥܺܝܪ ܗ̱ܘܳܐ ܡܳܪܝܳܐ ܥܰܠ ܪ̈ܽܘܫܥܶܐ ܕܺܝܠܰܢ܆ ܐܰܝܟܰܢܳܐ ܕܶܐܪܰܡܝܳܐ ܢܒܺܝܳܐ ܐܶܡܰܪ: ܘܠܳܐ ܡܰܗܦܶܟ ܗ̱ܘܳܐ ܦܰܪܨܽܘܦܳܐ ܕܺܝܠܶܗ ܡܶܢ ܚܛܳܗ̈ܶܐ ܕܺܝܠܰܢ^[36]. ܐܶܡܰܬܝ ܕܶܝܢ ܕܰܠܟܳܣܳܐ ܕܪܽܘܓܙܶܗ ܗܰܘ ܠܳܐ ܡܙܺܝܓܳܐ܆ ܒܗܰܘ ܕܪܶܚܡܰܬ ܐ̱ܢܳܫܽܘܬܳܐ ܡܙܰܓ܆ ܟܰܕ ܐܰܪܟܶܢ ܡܶܢ ܗܳܕܶܐ ܠܘܳܬ ܗܳܕܶܐ܆ ܐܰܝܟܰܢܳܐ ܕܠܳܐ ܟܰܕ ܬܶܛܪܳܐ ܕܚܶܡܬܶܗ ܡܶܣܬܰܦܰܩ܆ ܟܽܠܗܽܘܢ ܟܢܺܝܫܳܐܺܝܬ ܢܺܐܒܕܽܘܢ܆ ܗܳܝܕܶܝܢ ܡܫܰܪܳܪܐܺܝܬ ܐܰܩܺܝܡܶܗ ܠܙܰܘܥܳܐ ܕܰܐܪܥܳܐ܆ ܗܰܘ ܕܰܐܪܡܺܝ ܥܠܶܝܗ̇ ܟܺܐܦܳܐ ܕܙܳܘܺܝܬܳܐ܆ ܗܳܢܳܐ ܕܶܝܢ ‌ܐܺܝܬܰܘܗ̱ܝ܆ ܡܶܠܬܳܐ ܕܺܝܠܶܗ ܗܰܘ ܕܰܒܚܰܪܬܳܐ ܕܝܰܘ̈ܡܳܬܳܐ ܐܶܬܒܰܣܰܪ܆ ܘܬܽܘܒ ܗܘ̣ܳܐ ܠܰܢ ܠܪܺܝܫܳܐ ܕܓܽܘܢܝܳܐ܆ ܘܶܐܣܰܪ ܐܰܟܚܕܳܐ ܠܗܳܢܽܘܢ ܕܡܶܢ ܓܙܽܘܪܬܳܐ ܘܰܠܗܳܢܽܘܢ ܕܡܶܢ ܥܰܡ̱ܡ̈ܶܐ܆ ܒܰܚܕܳܐ ܟܳܪܽܘܙܽܘܬܳܐ ܕܶܐܘܰܢܓܶܠܺܝܽܘܢ.

ܟܰܕ ܕܶܝܢ ܢܳܚ ܙܰܘܥܳܐ. ܡܶܬܬܟܶܠ ܗ̱ܘܳܐ ܡܶܟܺܝܠ ܟܽܠ ܚܰܕ ܡܶܢ ܗܳܢܽܘܢ ܕܥܰܪܺܝܩܺܝܢ ܗ̱ܘܰܘ܆ ܕܟܰܕ ܪܶܓܠܶܗ ܙܗܺܝܪܳܐܺܝܬ ܥܰܠ ‌ܐܰܪܥܳܐ ܡܫܰܪܰܪ ܗ̱ܘܳܐ܆ ܠܘܳܬ ܡܕܺܝܢ̱ܬܳܐ ܠܡܺܐܙܰܠ. ܟܽܠܗܽܘܢ ܓܶܝܪ ܟܰܕ ܒܕܶܚܠܬܳܐ ܒܠܰܥܘ܆ ܡܰܠ̈ܝ̣ܰܝ̣ ܪܶܥܠܳܐ ܐܺܝܬܰܝܗܽܘܢ ܗ̱ܘܰܘ. ܘܟܰܕ ܡܗܰܠܟܺܝܢ ܗ̱ܘܰܘ ܢܳܝܕܺܝܢ ܗ̱ܘܰܘ܆ ܒܰܕܡܽܘܬ ܗܳܢܽܘܢ ܕܝܰܡ̱̈ܡܶܐ ܐܰܪ̈ܺܝܟܶܐ ܥܒܰܪܘ ܘܡܶܢ ܐܶ‌ܠܦܳܐ ܢܦܰܩܘ܆ ܘܰܥܕܰܟܺܝܠ ܩܳܛܶܝܢ^[37] ܘܨܳܚܪܺܝܢ. ܟܰܕ ܡܶܬܟܰܪܟܺܝܢ ܗ̱ܘܰܘ ܕܶܝܢ ܥܰܠ ܒ̈ܳܬܶܐ܆ ܐܳ‌ܠ̣ܶܝܢ ܗ̱ܘܰܘ ܠܳܐ ܡܶܬܒܰܝ̈ܳܐܢܝܳܬܳܐ܆ ܟܰܕ ܠܳܐ ܡܣܰܝܒܪܺܝܢ ܗ̱ܘܰܘ ܠܰܚܙܳܬܳܐ. ܘܗܰܘ ܡܰܢ܆ ܠܰܐܒܽܘܗ̱ܝ ܕܶܐܙܰܠ. ܗܰܘ ܕܶܝܢ ܠܰܐܚܽܘܗ̱ܝ. ܐ̱ܚܪܺܢܳܐ ܕܶܝܢ ܠܰܒܪܳܐ. ܘܰܐ̱ܚܪܺܢܳܐ ܥܰܠ ܪܳܚܡܶܗ ܡܶܬܶܐܒܶܠ ܗ̱ܘܳܐ. ܐܳܦ ܓܶܝܪ ܐܳܦܠܳܐ ܚܰܕ ܐܶܣܳܪܳܐ ܕܪܶܚܡܬܳܐ ܐܺܝܬ ܗ̱ܘܳܐ܆ ܗܰܘ ܕܠܳܐ ܫܪܳܝܗ̱ܝ ܒܡܰܘܬܳܐ.

ܐܳܦ ܐܶܡܳܐ ܒܕܽܘܟ ܐ̱ܢܳܫ ܪܳܚܡܰܬ ܒܢܰܝ̈ܳܐ܆ ܟܰܕ ܠܟܽܠܶܗ ܝܰܠܕܳܐ ܕܰܒܢܰܝ̈ܳܐ ܕܺܝܠܳܗ̇ ܐܰܟܚܕܳܐ ܡܶܢܫܶܠܝ ܐܰܘܒܕܰܬ܆ ܘܗܺܝ ܠܒܰܪ ܡܶܢ ܣܶܒܪܳܐ ܐܶܫܬܰܘܙܒܰܬ܆ ܘܰܠܡܰܪܓܫܳܢܽܘܬܳܐ ܕܚܰܫܳܐ ܐܶܬܳܐ܆ ܘܶܐܫܬܰܠܗܒܰܬ ܡܶܢ ܪ̈ܰܚܡܶܝܗ̇܆ ܟܰܕ ܪܰܗܺܝܛܳܐ ܡܶܬܬܰܝܬܝܳܐ ܗ̱ܘܳܬ ܠܘܳܬ ܒܰܝܬܳܐ ܗܰܘ ܕܰܢܦܰܠ. ܟܰܕ ܫܪܳܬ ܣܰܥܪܳܗ̇ ܘܰܡܚܰܪܛܳܐ ܗ̱ܘܳܬ ܦܰܟܶܝ̈ܗ̇܆ ܘܟܰܕ ܪܰܥܽܘܡܳܐܺܝܬ ܡܰܝܠܠܳܐ ܗ̱ܘܳܬ. ܐܳܦ ܟܺܝܬ ܟܰܕ ܥܰܠ ܬܶܠܠܳܐ ܗܰܘ ܕܺܝܠܳܗ̇ ܕܡܰܦܽܘܠܬܳܐ ܐܶܬܓܰܗܢܰܬ܆ ܘܰܠܚܰܘܪܳܐ ܗܰܘ ܐܶܡܗܳܝܳܐ ܚܰܪܺܝܦܳܐܺܝܬ ܒܰܚܪܽܘܪ̈ܶܐ ܕܒܰܝܢܳܬ ܟܺܐܦ̈ܶܐ ܩܶܒܥܰܬ ܗ̱ܘܳܬ܆ ܘܡܶܢ ܚܰܒܺܝ̈ܒܶܝܗ̇ ܘܠܳܐ ܠܚܰܕ ܚܙܳܬ ܐܰܝܟܰܢܳܐ ܟܺܝܬ ܕܣܳܒܪܳܐ ܗ̱ܘܳܬ܆ ܠܘܳܬ ܥܽܘܕܪܳܢܳܐ ܗܰܘ ܕܡܶܢ ܡܰܫܡܰܥܬܳܐ ܡܫܰܢܝܳܐ ܗ̱ܘܳܬ. ܘܟܰܕ ܒܪܶܚܡܰܬ ܥܰܡܠܳܐ ܠܶܐܕܢܳܗ̇ ܣܶܡܟܰܬ^[38]܆ ܠܟܽܠ ܚܰܕ ܡܶܢ ܒܢܶܝ̈ܗ̇ ܡܫܰܡܗܳܐܺܝܬ ܠܡܶܩܪܳܐ ܡܢܰܣܝܳܐ ܗ̱ܘܳܬ܆ ܥܰܡ ܓܥܳܬܳܐ ܚܰܝܠܬܳܢܺܝܬܳܐ܆ ܕܕܰܠܡܳܐ ܒܕܽܘܟ ܩܳܠܳܐ ܚܰܠܝܳܐ ܡܶܢܗܽܘܢ ܬܶܫܡܰܥ ܗ̱ܘܳܬ. ܥܳܒܶܕ ܗ̱ܘܳܐ ܠܳܗ̇ ܓܶܝܪ ܚܰܫܳܐ ܐܳܦ ܠܒܰܪ ܡܶܢ ܗܰܘܢܳܗ̇. ܘܟܰܕ ܠܳܐ ܡܶܫܟܚܳܐ ܗ̱ܘܳܬ ܒܽܘܝܳܐܳܐ܆ ܕܠܳܐ ܢܫܰܡܬܳܐ ܪܰܡܝܳܐ ܗ̱ܘܳܬ܆ ܟܰܕ ܡܨܰܠܝܳܐ ܗ̱ܘܳܬ ܕܰܐܟܚܕܳܐ ܥܰܡ ܒܢܶܝ̈ܗ̇ ܬܺܐܙܰܠ ܡܶܢ ܥܳܠܡܳܐ.

ܐ̱ܢܳܫܺܝ̈ܢ ܕܶܝܢ ܟܰܕ ܦܺܝܠܳܣܽܘܦܳܐܺܝܬ ܝܳܕܥܺܝܢ ܗ̱ܘܰܘ ܠܰܡܣܰܝܒܳܪܽܘ܆ ܠܡܰܪ̈ܕܘܳܬܳܐ ܗܳܠܶܝܢ ܕܡܶܢ ܐܰ‌ܠܳܗܳܐ ܡܶܬܬܰܝ̈ܬܝܳܢ܆ ܠܘܳܬ ܩܒܽܘܪܬܳܐ ܕܦܰܓܪ̈ܶܐ ܡܺܝ̈ܬܶܐ ܡܶܬܰܐܡܢܺܝܢ ܗ̱ܘܰܘ. ܘܰܠܗܳܠܶܝܢ ܕܥܰܠ ܥܳܓ̈ܠܳܬܳܐ ܡܰܦܩܺܝܢ ܗ̱ܘܰܘ. ܘܟܰܕ ܡܰܝܬܶܝܢ ܗ̱ܘܰܘ ܠܗܽܘܢ ܠܘܳܬ ܗܰܝܟܠܳܐ ܗܳܢܳܐ ܩܰܕܺܝܫܳܐ܆ ܡܰܫܠܡܺܝܢ ܗ̱ܘܰܘ ܠܗܽܘܢ ܠܰܩܒܽܘܪܬܳܐ ܕܙܳܕܩܳܐ.

ܠܗܳܢܳܐ ܚܰܫܳܐ ܗܰܘ ܕܗܳܝܕܶܝܢ ܓܕܰܫ܆ ܨܒܳܬ ܡܰܢ ܐܺܝܕܳܐ ܕܨܳܝܪܳܐ ܠܰܡܕܰܡܳܝܽܘ܆ ܗܳܝ ܕܰܠܟܽܠܗܶܝܢ ܦܫܺܝܩܳܐܺܝܬ ܡܰܡܪܚܳܐ ܘܰܡܢܰܣܝܳܐ ܕܰܬܚܰܘܶܐ ܕܰܓܳܠܳܐܺܝܬ܆ ܘܰܠܘܳܬ ܟܽܠܶܗ. ܠܳܐ ܣܶܦܩܰܬ. ܨܳܒܝܳܐ ܕܶܝܢ ܐܳܦ ܗܳܫܳܐ ܡܶܠܬܳܐ܆ ܕܠܰܩܕܳܡ ܚܙܳܬܳܐ ܬܰܝܬܶܝܘܗ̱ܝ. ܘܟܰܕ ܠܳܐ ܡܶܬܡܰܨܝܳܢܳܐܺܝܬ ܐܺܝܬ ܠܳܗ̇ ܕܬܶܫܘܶܐ ܥܰܡ ܣܽܘܥܪ̈ܳܢܶܐ܆ ܡܶܙܕܰܟܝܳܢܽܘܬܳܐ ܡܰܘܕܝܳܐ.

ܡܶܛܽܠܗܳܕܶܐ ܟܰܕ ܠܩܰܝܣܳܐ ܕܰܨܠܺܝܒܳܐ ܒܰܡܨܰܥܬܳܐ ܩܕܳܡܰܝܟܽܘܢ ܣܳܡܢܰܢ܆ ܡܰܥܗܕܺܝܢ ܚ̱ܢܰܢ ܠܰܐܠܳܗܳܐ ܗܰܘ ܕܶܐܬܒܰܣܰܪ܆ ܕܶܒܚܬܳܐ ܗܳܝ ܪܰܒܬܳܐ܆ ܗܳܝ ܕܰܚܠܳܦܰܝܢ ܐܶܬܕܒܰܚ܆ ܘܰܠܥܳܠܡܳܐ ܟܽܠܶܗ ܡܶܢ ܚܛܺܝܬܳܐ ܚܛܰܦ. ܡܰܕܒܚܳܐ ܓܶܝܪ ܕܚܽܘܣܳܝܳܐ ܐܰܝܟ ܕܒܰܫܪܳܪܳܐ ‌ܐܺܝܬܰܘܗ̱ܝ ܨܠܺܝܒܳܐ܆ ܐܰܝܟܰܢܳܐ ܕܳܐܦ ܚܰܙܩܺܝܐܶܝܠ ܢܒܺܝܳܐ ܚܙܳܐ ܟܰܕ ܬܶܐܽܘܪܺܝܰܐ ܡܶܬܶܐܪܶܙ ܗ̱ܘܳܐ: ܕܗܰܝܟܠܳܐ ܗܰܘ ܪܽܘܚܳܢܳܐ ܕܰܥܬܺܝܕ ܗ̱ܘܳܐ ܕܢܶܗܘܶܐ܆ ܐܳܡܰܪ ܐ̱ܢܳܐ ܕܶܝܢ ܕܥܺܕܬܳܐ. ܘܰܚܙܺܝ ܠܺܝ ܡܳܢܳܐ ܐܳܡܰܪ: ܩܕܳܡ ܦܰܪܨܽܘܦܳܐ ܕܒܶܝܬ ܩܽܘܕܫܳܐ ܚܙܳܬܳܐ܆ ܐܰܝܟ ܚܶܙܘܳܐ ܕܡܰܕܒܚܳܐ ܕܩܰܝܣܳܐ. ܘܰܐܡ̈ܶܐ ܬܠܳܬ ܪܰܘܡܳܐ ܕܺܝܠܶܗ܆ ܘܽܐܘܪܟܳܐ ܕܰܐܡ̈ܶܐ ܬܰܪܬܶܝܢ. ܘܰܦܬܳܝܳܐ ܕܰܐܡ̈ܶܐ ܬܰܪܬܶܝܢ^[39]. ܡܳܢܳܐ ܕܶܝܢ ܐ̱ܚܪܺܢܳܐ ܢܶܣܒܰܪ ܐ̱ܢܳܫ ܕܺܐܝܬܰܘܗ̱ܝ ܡܰܕܒܚܳܐ ܕܩܰܝܣܳܐ܆ ܐܶܠܳܐ ܐܶܢ ܨܠܺܝܒܳܐ܆ ܗܰܘ ܕܰܥܠܰܘܗ̱ܝ ܢܶܟܣܬܳܐ ܗܳܝ ܡܶܬܗܰܘܢܳܢܺܝܬܳܐ ܩܰܪܶܒ ܗܽܘ ܠܶܗ ܡܫܺܝܚܳܐ܆ ܡܶܠܬܳܐ ܗܰܘ ܕܰܐ‌ܠܳܗܳܐ܆ ܗܰܘ ܕܡܶܛܽܠܳܬܰܢ ܐܶܬܒܰܣܰܪ܆ ܗܰܘ ܕܒܺܐܝܕܰܘ̈ܗ̱ܝ ܐܶܬܥܰܠܺܝܢܰܢ ܠܘܳܬ ܪܰܘܡܳܐ ܕܺܝܕܰܥܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ. ܗܳܕܶܐ ܓܶܝܪ ܡܫܰܘܕܥܳܐ܆ ܗܳܝ ܕܰܬܠܳܬ ܐܰܡ̈ܶܐ ‌ܐܺܝܬܰܘܗ̱ܝ ܪܰܘܡܳܐ ܕܺܝܠܶܗ. ܗܳܝ ܕܶܝܢ ܕܬܰܪܬܶܝܢ ܡܰܢ ܐܰܡܺܝ̈ܢ ‌ܐܺܝܬܰܘܗ̱ܝ ܐܽܘܪܟܶܗ܆ ܬܰܪܬܶܝܢ ܕܶܝܢ ܦܬܳܝܶܗ܆ ܡܰܘܕܥܳܐ ܓܰܠܝܳܐܺܝܬ܆ ܕܗܰܘ ܕܶܐܬܡܬܰܚ ܥܰܠ ܨܠܺܝܒܳܐ ܘܚܰܫ ܒܰܒܣܰܪ܆ ܕܰܐܪ̈ܒܥܳܬܰܝܗܽܘܢ ܣܰܘ̈ܦܶܐ ܕܡܶܬܥܰܡܪܳܢܺܝܬܳܐ܆ ‌ܐܺܝܬܰܘܗ̱ܝ ܡܳܪܳܐ ܘܒܳܪܽܘܝܳܐ ܘܥܳܒܽܘܕܳܐ܆ ܘܰܕܡܳܬܰܚ ܘܥܳܒܰܪ ܥܕܰܡܳܐ ܠܟܽܠ܆ ܘܗܽܘ ܒܶܗ ܐܳܚܶܕ ܘܚܳܒܶܫ ܠܗܳܢܳܐ ܟܽܠ܆ ܗܳܝ ܕܳܐܦ ܦܰܘܠܽܘܤ ܠܶܐܦܶܣܳܝ̈ܶܐ ܟܳܬܶܒ ܗ̱ܘܳܐ܆ ܘܰܠܐ̱ܪܳܙܳܐ ܕܰܨܠܺܝܒܳܐ ܢܰܗܺܝܪܳܐܺܝܬ ܡܚܰܘܶܐ ܗ̱ܘܳܐ ܐܳܡܰܪ ܗ̱ܘܳܐ܆ ܐܰܝܟܰܢܳܐ ܕܬܶܬܡܨܽܘܢ ܠܡܰܕܪܳܟܽܘ ܥܰܡ ܟܽܠܗܽܘܢ ܩܰܕ̈ܺܝܫܶܐ܆ ܡܳܢܰܘ ܦܬܳܝܳܐ ܘܽܐܘܪܟܳܐ ܘܥܽܘܡܩܳܐ ܘܪܰܘܡܳܐ܆ ܘܰܠܡܶܕܰܥ ܠܚܽܘܒܳܐ ܕܰܡܫܺܝܚܳܐ ܗܰܘ ܕܥܳܒܰܪ ܠܟܽܠ ܝܺܕܰܥܬܳܐ܆ ܐܰܝܟܰܢܳܐ ܕܬܶܬܡܠܽܘܢ ܡܽܘܠܳܝܳܐ ܕܰܐ‌ܠܳܗܳܐ^[40].

ܡܶܛܽܠܗܳܕܶܐ ܟܰܕ ܣܰܓܺܝ̈ܶܐܐ ܐܺܝܬܰܝܗܽܘܢ ܐܳܕ̈ܫܶܐ ܕܰܡܣܳܡ ܒܪܺܝܫܳܐ܆ ܠܡܰܘܬܳܐ ܗܰܘ ܕܰܒܝܰܕ ܨܠܺܝܒܳܐ ܩܰܒܶܠ ܥܠܰܘܗ̱ܝ ܥܰܡܰܢܽܘܐܶܝܠ. ܐܰܝܟܰܢܳܐ ܕܰܢܚܰܘܶܐ ܗܽܘ ܠܶܗ ܕܰܐ‌ܠܳܗܳܐ ‌ܐܺܝܬܰܘܗ̱ܝ ܗܰܘ ܕܰܠܟܽܠ ܡܳܠܶܐ܆ ܡܳܕܶܝܢ ܐܶܣܟܺܡܳܐ ܕܰܨܠܺܝܒܳܐ܆ ܐܳܦ ܕܗܶܪ̈ܣܺܝܤ ܗܳܠܶܝܢ ܡܰܣ̈ܠܝܳܬܳܐ ܘܰܕܠܳܐ ܐܰ‌ܠܳܗ ‌ܐܺܝܬܰܘܗ̱ܝ ܡܰܟܣܳܢܽܘܬܳܐ. ܐܶܢ ܓܶܝܪ ܗܰܘ ܕܰܥܠܰܘܗ̱ܝ ܐܶܬܡܬܰܚ܆ ܐܰ‌ܠܳܗܳܐ ܕܟܽܠ ‌ܐܺܝܬܰܘܗ̱ܝ܆ ܗܰܘ ܒܪܳܐ ܕܰܐܒܳܐ ܘܡܶܠܬܳܐ܆ ܟܰܕ ‌ܐܺܝܬܰܘܗ̱ܝ ܗܽܘ ܟܰܕ ܗܽܘ ܡܰܣܬܰܝܟܳܢܳܐ ܒܰܒܣܰܪ ܘܠܳܐ ܡܶܣܬܰܝܟܳܢܳܐ ܒܰܐܠܳܗܽܘܬܳܐ܆ ܘܒܶܗ ܟܰܕ ܒܶܗ ܒܰܙܢܳܐ܆ ܗܽܘ ܟܰܕ ܗܽܘ ܚܳܫܽܘܫܳܐ ܟܺܝܬ ܘܠܳܐ ܚܳܫܽܘܫܳܐ܆ ܐܰܝܟܳܐ ܐܺܝܬ ܠܗܽܘܢ ܐܰܬܪܳܐ ܠܗܳܢܽܘܢ ܕܰܪܘܶܝܢ ܕܠܳܐ ܚܰܡܪܳܐ ܐܰܝܟܰܢܳܐ ܕܰܢܒܺܝܽܘܬܳܐ ܐܳܡܪܳܐ^[41]: ܠܗܳܢܽܘܢ ܡܦܰܠܓܳܢ̈ܶܐ ܒܺܝ̈ܫܶܐ ܕܰܚܕܳܝܽܘܬܳܐ ܘܩܳܝ̈ܡܰܝ ܒܰܐܦ̈ܶܐ ܕܛܳܥܝܽܘܬܳܐ ܗܳܝ ܕܰܬܪܶܝܢ ܟܝܳܢ̈ܶܐ܆ ܠܰܡܫܰܐܳܠܽܘ ܘܰܠܡܺܐܡܰܪ ܐܰܝܟ ܕܥܰܠ ܬܪܶܝܢ܆ ܐܶܬܒܰܩܳܐ ܐܰܝܢܳܐ ܟܝܳܢܳܐ ܒܩܰܝܣܳܐ ܕܰܨܠܺܝܒܳܐ ܬܠܶܐ.

ܐܰܝܟܳܐ ܕܶܝܢ ܡܶܟܺܝܠ‌ ܐܰܦܽܘܠܺܝܢܰܪܺܝܽܘܤ ܗܰܘ ܡܡܰܠܶܠ ܣܪ̈ܺܝܩܳܬܳܐ ܢܶܬܛܰܫܶܐ܆ ܕܦܳܣܶܩ ܠܶܗ ܠܗܰܘܢܳܐ ܡܶܢ ܡܶܬܒܰܪܢܫܳܢܽܘܬܳܐ ܐܰ‌ܠܳܗܳܝܬܳܐ. ܐܶܢ ܓܶܝܪ ܐܰܝܟܰܢܳܐ ܕܒܶܗ ܒܶܐܣܟܺܡܳܐ ܢܚܰܘܶܐ ܡܫܺܝܚܳܐ܆ ܠܡܰܠܝܽܘܬܳܐ ܕܺܝܠܶܗ ܘܠܰܡܫܰܡܠܝܽܘܬܶܗ ܒܰܐܠܳܗܽܘܬܳܐ܆ ܠܡܰܘܬܳܐ ܕܰܨܠܺܝܒܳܐ ܗܰܘ ܕܡܶܣܬܒܰܪ ܕܺܐܝܬܰܘܗ̱ܝ ܝܰܬܺܝܪ ܫܛܳܐ ܩܰܒܶܠ܆ ܐܰܝܟܰܢܳܐ ܥܬܺܝܕ ܗ̱ܘܳܐ ܕܠܳܐ ܢܶܗܘܶܐ ܐܺܝܬ ܠܶܗ ܗܳܝ ܕܰܡܫܰܡܠܝܳܐ ܒܐ̱ܢܳܫܽܘܬܳܐ܆ ܘܰܠܗܰܘܢܳܐ ܕܺܝܠܰܢ ܢܶܫܒܩܺܝܘܗ̱ܝ ܠܳܐ ܡܶܬܰܐܣܝܳܢܳܐ܆ ܒܗܳܝ ܕܠܳܐ ܫܩܰܠ ܢܰܦܫܳܐ ܡܶܬܗܰܘܢܳܢܺܝܬܳܐ܆ ܘܰܕܠܳܐ ܗܰܘܢܳܐ ܢܶܥܒܕܺܝܘܗ̱ܝ^[42] ܠܦܽܘܪܩܳܢܳܐ ܕܺܝܠܰܢ. ܘܕܰܒܗܳܠܶܝܢ ܡܫܰܪܪ̈ܳܬܳܐ ܘܡܰܘܬܪ̈ܳܢܝܳܬܳܐ ܘܰܕܥܳܗ̈ܢܳܢ ܚܰܣܺܝܪ.

ܐܷܠܳܐ ܐܳܦܠܳܐ ܠܚܰܣܺܝܪܽܘܬ ܗܰܘܢܳܐ ܕܶܐܘܛܶܘܟ̥ܶܐ ܡܶܬܪܰܡܝܳܐ ܡܶܠܬܳܐ ܕܰܨܠܺܝܒܳܐ. ܟܰܕ ܠܟܽܠܳܗ̇ ܦܰܢܛܰܣܺܝܰܐ܆ ܒܝܰܕ ܨܶܨ̈ܶܐ ܙܳܢܩܳܐ. ܐܰܝܕܳܐ ܓܶܝܪ ܫܪܰܓܪܳܓܺܝܬܳܐ ܕܠܳܐ ܒܶܣܪܳܐ ܡܰܨܝܳܐ ܕܬܶܣܬܰܟܰܟ ܒܨܶܨ̈ܶܐ܆ ܘܒܳܠܥܳܐ ܒܕܰܦܢܳܗ̇ ܒܪܽܘܡܚܳܐ܆ ܘܰܡܥܺܝܢܳܐ ܕܰܕܡܳܐ ܘܰܕܡܰܝ̈ܳܐ ܐܰܟܚܕܳܐ ܡܰܫܦܥܳܐ܆ ܘܒܳܗ̇ ܟܰܕ ܒܳܗ̇ ܡܚܰܘܝܳܐ ܐܰܟܚܕܳܐ ܐܰ‌ܠܳܗܳܝܬܳܐ ܘܐ̱ܢܳܫܳܝܬܳܐ ܘܰܠܠܳܐ ܡܶܬܦܰܠܓܳܢܽܘܬܳܐ ܕܰܒܟܽܠ ܡܽܘܢ ܕܗܽܘ܆ ܡܰܠܽܘܢ ܕܶܝܢ ܟܽܠܳܗ̇ ܐܰ‌ܠܳܗܳܝܬܳܐ ܒܗܳܕܶܐ܆ ܡܶܛܽܠ ܟܺܝܬ ܕܪܶܕܝܳܐ ܗܳܢܳܐ ܦܳܪܽܘܩܳܝܳܐ܆ ܡܶܢ ܒܳܬܰܪ ܕܰܫܒܰܩ ܡܳܪܰܢ ܪܽܘܚܶܗ ܗܘ̣ܳܐ.

ܒܳܠܶܡ ܕܶܝܢ ܦܽܘܡܳܐ ܗܽܘ ܨܠܺܝܒܳܐ܆ ܐܳܦ ܕܚܰܢ̈ܦܶܐ ܕܳܚ̈ܠܰܝ ܠܫܻ̈ܐܕܶܐ. ܘܰܡܚܰܘܶܐ܆ ܕܟܽܠܗܽܘܢ ܐܰ‌ܠܳܗ̈ܶܐ ܕܥܰܡ̱ܡ̈ܶܐ ܫ̈ܺܐܕܶܐ ܐܶܢܽܘܢ ܐܰܝܟܰܢܳܐ ܕܰܟܬܺܝܒ^[43]. ܪ̈ܳܥܠܳܢ ܓܶܝܪ ܛܳܒ ܣܰܓܺܝ ܡܶܢ ܚܬܳܡܳܐ ܪ̈ܽܘܚܶܐ ܒܺܝ̈ܫܳܬܳܐ ܗܳܠܶܝܢ ܘܕܳܚ̈ܠܳܢ܆ ܠܰܘ ܐܰܝܟ ܕܡܶܢ ܢܰܦܫܳܐ ܕܐ̱ܢܳܫ ܕܰܢܟܺܝܤ ܩܛܺܝܪܳܐܺܝܬ܆ ܐܰܝܟ ܒܶܕ̈ܝܶܐ ܚܰܢܦܳܝ̈ܶܐ ܙܶܠ ܠܗܰܠ܆ ܐܶܠܳܐ ܐܰܝܟ ܕܡܶܢ ܚܳܬܡܳܐ ܕܰܒܪܳܐ ܕܰܐ‌ܠܳܗܳܐ ܘܡܶܠܬܳܐ ܗܳܢܰܘ ܕܡܶܢ ܐܰܒܳܐ. ܡܶܛܽܠ ܕܣܰܓܺܝ̈ܶܐܐ ܐܳܦ ܩܕܳܡ ܥܰܡܰܢܽܘܐܶܝܠ ‌ܐܶܨܛܠܶܒܘ܆ ܐܶܠܳܐ ܠܳܐ ܗܘ̣ܰܘ ܕܚܺܝ̈ܠܶܐ ܠܫܻ̈ܐܕܶܐ܆ ܘܳܐܦܠܳܐ ܬܽܘܒ ܗܽܘ ܨܠܺܝܒܳܐ܆ ܠܡܶܥܪܰܩ ܥܳܒܶܕ ܗ̱ܘܳܐ ܠܪ̈ܽܘܚܶܐ ܒܺܝ̈ܫܳܬܳܐ. ܘܣܳܗܕܳܐ ܐܺܝܬܶܝܗ̇܆ ܗܺܝ ܒܰܪ̱ܬ ܩܳܠܳܐ ܗܳܝ ܕܫܻ̈ܐܕܶܐ܆ ܗܳܝ ܡܚܺܝܠܬܳܐ ܘܰܕܝܰܬܺܝܪ ܫܰܪܺܝܪܳܐ܆ ܕܡܳܐ ܠܰܢ ܘܠܳܟ ܝܶܫܽܘܥ ܒܪܶܗ ܕܰܐ‌ܠܳܗܳܐ܆ ܐܶܬܰܝܬ ܕܗܳܪܟܳܐ ܩܕܳܡ ܙܰܒܢܳܐ ܬܫܰܢܶܩ ܠܰܢ^[44].

ܐܷܠܳܐ ܢܺܐܡܰܪ ܐ̱ܢܳܫ܆ ܕܰܠܫ̈ܺܐܕܶܐ ܡܰܢ܆ ܙܟܳܐ ܘܰܣܚܰܦ ܗܽܘ ܨܠܺܝܒܳܐ. ܠܚܰܟܺܝ̈ܡܶܐ ܕܶܝܢ ܗܳܢܽܘܢ ܕܰܠܘܳܬ ܝܰܘ̈ܢܳܝܶܐ. ܠܳܐ ܚܣܰܢ. ܐܶܠܳܐ ܘܳܐܦܠܳܐ ܐܺܝܬ ܠܡܺܐܡܰܪ܆ ܕܒܰܟܡܳܐ ܡܫܰܪܬܚܽܘܬܳܐ ܠܗܳܠܶܝܢ ܙܟܳܐ. ܘܰܠܗܳܕܶܐ ܡܚܰܘܶܐ ܗܽܘ ܢܶܣܝܳܢܗܽܘܢ ܕܣܽܘܥܪ̈ܳܢܶܐ. ܠܡܺܐܡܪ̈ܶܐ ܓܶܝܪ ܣܰܓܺܝ̈ܶܐܐ ܕܺܝܠܗܽܘܢ ܘܰܐܪ̈ܺܝܟܶܐ܆ ܗܳܐ ܟܽܠܗܽܘܢ ܒܢܰܝ̈ܢܳܫܳܐ܆ ܐܰܝܟ ܕܰܠܠܳܐ ܡܦܺܝܣܳܢ̈ܶܐ ܐܰܣܠܺܝܘ ܐܶܢܽܘܢ܆ ܘܳܐܦܠܳܐ ܐ̱ܢܳܫ ܨܳܠܶܐ ܠܗܽܘܢ ܗܰܘܢܶܗ. ܠܨܰܝܳܕ̈ܶܐ ܕܶܝܢ ܘܠܳܐ ܣܦܺܝܪ̈ܶܐ܆ ܟܰܕ ܥܰܡ ܨܠܺܝܒܳܐ ܡܶܬܪܰܓܡܺܝܢ ܗ̱ܘܰܘ ܘܰܡܡܰܠܠܺܝܢ. ܟܶܢ̈ܫܶܐ ܘܰܡܕܺܝܢ̱ܬܳܐ ܐܰܪܟܶܢܘ ܨܰܘܪܳܐ ܘܶܐܫܬܰܥܒܰܕܘ.

ܟܡܳܐ ܠ̱ܐܢܳܫܺܝ̈ܢ ܡܶܢ ܦܺܝܠܳܣܽܘ̈ܦܶܐ ܠܽܘܩܒܰܠ ‌ܐܶܘܰܢܓܶܠܺܝ̈ܰܐ ܐܰ‌ܠܳܗܳܝ̈ܶܐ ܫܢ̣ܰܘ ܘܰܐܟܬܶܒܘ. ܩܐܠܣܘܤ ܗܰܘ ܐܦܝܩܘܪܝܐ. ܦܘܪܦܘܪܝܘܤ ܗܰܘ ܫܟܺܝܪ ܫܡܳܐ. ܝܘܠܝܐܢܽܘܤ܆ ܠܗܰܘ ܕܥܳܒܕܳܐ ܗ̱ܘܳܬ ܠܶܗ ܡܫܰܩܠܳܐ ܗܺܝ ܛܪܽܘܢܽܘܬܳܐ܆ ܥܰܡ ܚܶܟܡܬܳܐ ܗܳܝ ܕܰܓܳܠܰܬ ܫܡܳܐ. ܐܶܠܳܐ ܐܶܬܚܙܺܝܘ ܕܰܣܪܺܝܩܳܐܺܝܬ ܝܺܚܶܛܘ^[45].  ܩܰܕܡܳܐܺܝܬ ܡܰܢ܆ ܕܡܰܟܬܒܳܢ̈ܶܐ ܗܳܢܽܘܢ ܕܰܗܘܰܘ ܒܰܙܒܰܢ ܙܒܰܢ. ܘܡܰܠܦܳܢ̈ܶܐ ܕܥܺܕܬܳܐ܆ ܐܰܝܟ ܕܠܰܙܩܽܘܪ̈ܶܐ ܕܰܓܘܳܓܰܝ ܫܪܰܘ ܠܥܽܘܪ̈ܙܳܠܶܐ ܕܗܳܢܽܘܢ. ܕܬܰܪܬܶܝܢ ܕܶܝܢ܆ ܕܳܐܦ ܗܶܢܽܘܢ܆ ܬܒܰܥܬܳܐ ܕܦܰܩܪܽܘܬܗܽܘܢ ܝܰܗܒܘ܆ ܟܰܕ ܫܪܰܘ ܠܚܰܝ̈ܶܐ ܕܺܝܠܗܽܘܢ ܕܳܘܝܳܐܺܝܬ ܘܫܺܝܛܳܐܺܝܬ. ܐܰܝܟ ܕܰܥܕܰܡܳܐ ܠܗܳܫܳܐ ܢܶܣܬܢܽܘܢ ܝܰܬܺܝܪܳܐܺܝܬ ܡܶܛܽܠ ܚܣܺܝܪܽܘܬ ܪܶܥܝܳܢܗܽܘܢ܆ ܐܰܘ ܢܶܬܚܰܢܢܽܘܢ ܡܶܛܽܠ ܥܳܩܰܬܗܽܘܢ. ܗܰܘ ܓܶܝܪ ܕܠܽܘܩܒܰܠ ܡܫܺܝܚܳܐ ܡܰܩܪܶܒ. ܠܽܘܩܒܰܠ ܢܰܦܫܶܗ ܡܰܠܽܘܢ ܡܰܩܪܶܒ܆ ܐܰܘ ܠܽܘܩܒܰܠ ܡܫܺܝܚܳܐ. ܟܰܕ ܗܳܟܺܝܠ ܕܰܐܝܟ ܗܳܢܳܐ ‌ܐܺܝܬܰܘܗ̱ܝ ܠܰܢ ܨܠܺܝܒܳܐ܆ ܙܰܝܢܳܐ ܠܳܐ ܡܶܬܚܰܣܢܳܢܳܐ ܘܰܢܛܽܘܪܬܳܐ ܠܳܐ ܡܶܬܚܰܠܨܳܢܺܝܬܳܐ.

ܐܰܝܟܰܢܳܐ ܐ̱ܢܳܫܺܝ̈ܢ ܡܰܢ ܠܘܳܬ ܕܰܐܦܢܶܐ ܪܗܶܛܘ ܐܰܝܟ ܕܫܶܡܥܶܬ܆ ܘܠܺܠܝܳܐ ܗܰܘ ܐܰܥܒܪܽܘܗ̱ܝ ܕܠܳܐ ܫܶܢܬܳܐ܆ ܐ̱ܢܳܫܺܝ̈ܢ ܕܶܝܢ ܗܳܢܽܘܢ ܕܝܰܬܺܝܪܳܐܺܝܬ ܠܳܐ ܡܗܰܝ̈ܡܢܶܐ ܘܰܕܠܳܐ ܗܰܘܢܳܐ ܠܘܳܬ ܣܠܘܩܝܐ ܐܶܙܰܠܘ܆ ܐܰܝܟܰܢܳܐ ܟܺܝܬ ܕܟܰܕ ܙܰܘܥܳܐ ܗܘܳܐ܆ ܟܰܕ ܠܶܐܠܦ̈ܶܐ ܣܳܠܩܺܝܢ܆ ܠܕܰܦ̈ܶܐ ܢܗܰܝܡܢܽܘܢ ܦܽܘܪܩܳܢܳܐ ܕܺܝܠܗܽܘܢ. ܡܰܢܽܘ ܠܳܐ ܢܶܓܚܰܟ܆ ܡܰܠܽܘܢ ܕܶܝܢ ܢܰܐܠܶܐ ܘܢܶܬܶܐܒܶܠ܆ ܥܰܠ ܚܰܣܺܝܪܽܘܬ ܪܶܥܝܳܢܳܐ ܗܳܕܶܐ. ܐܶ‌ܠܽܘ ܓܶܝܪ ܠܚܽܘܕܳܝܰܬ ܐܳܕܫܳܐ ܐܺܝܬܶܝܗ̇ ܗ̱ܘܳܬ ܗܺܝ ܡܰܪܕܽܘܬܶܗ ܕܡܳܪܝܳܐ܆ ܘܰܒܙܰܘܥܳܐ ܒܰܠܚܽܘܕ ܡܢܰܓܶܕ ܗ̱ܘܳܐ ܠܗܳܢܽܘܢ ܕܚܳܛܶܝܢ܆ ܟܒܰܪ ܐܺܝܬ ܗ̱ܘܳܐ ܠܳܗ̇ ܡܶܠܬܳܐ܆ ܠܠܳܐ ܡܶܬܒܰܝܢܳܢܽܘܬܳܐ ܕܡܰܚܫܰܒܬܗܽܘܢ. ܫܒܽܘܩ ܕܶܝܢ ܕܳܐܦܠܳܐ ܗܳܟܰܢܳܐ܆ ܡܰܨܝܳܐ ܗ̱ܘܳܬ ܠܡܶܥܪܰܩ ܡܶܢ ܐܺܝܕܳܐ ܕܗܰܘ ܕܟܽܠ ܡܨܶܐ.

ܐܶܢ ܕܶܝܢ ܡܫܰܚܠ̈ܦܳܬܳܐ ܝܳܕܥܺܝܢ ܚ̱ܢܰܢ ܠܗܶܝܢ ܠܡܶܬܬܰܝܬܝܳܢ̈ܘܳܬܳܐ^[46] ܕܡܰܪ̈ܕܘܳܬܳܐ ܗܳܠܶܝܢ ܕܰܐܝܟ ܗܳܟܰܢ܆ ܣܰܓܺܝ̈ܶܐܐ ܓܶܝܪ ܒܒܰܪ̈ܩܶܐ ܝܺܩܶܕܘ܆ ܣܰܓܺܝ̈ܶܐܐ ܕܶܝܢ ܒܦܶܚ̈ܬܶܐ ܕܰܐܪܥܳܐ ܐܶܬܒܠܰܥܘ܆ ܐ̱ܚܪ̈ܳܢܶܐ ܕܶܝܢ ܒܡܰܝ̈ܳܐ ܐܶܬܓܪܶܦܘ ܐܰܘ ܕܡܶܢ ܝܰܡܳܐ ܐܰܘ ܕܶܡܢ ܥܢܳܢ̈ܶܐ܆ ܡܳܢܳܐ ܡܶܬܚܰܟܡܺܝܢ ܠܶܗ ܠܗܰܘ ܚܰܟܺܝܡܳܐ܆ ܠܗܰܘ ܕܡܰܘܕܰܥ ܒܝܰܕ ܢܒܺܝܳܐ ܠܠܳܐ ܡܶܬܥܰܪܩܳܢܽܘܬܳܐ ܕܕܺܝܢܰܘ̈ܗ̱ܝ܆ ܘܳܐܡܰܪ ܠܘܳܬ ܗܳܢܽܘܢ ܕܗܳܟܰܢܳܐ ܡܬܰܠܠܺܝܢ^[47]܆ ܗܰܘ ܕܥܳܪܶܩ ܡܶܢ ܩܕܳܡ ܕܶܚܠܬܳܐ܆ ܢܳܦܶܠ ܒܓܽܘܡܳܨܳܐ܆ ܘܗܰܘ ܕܣܳܠܶܩ ܡܶܢ ܓܽܘܡܳܨܳܐ ܢܶܬܬܚܶܕ ܒܦܰܚܳܐ^[48].

ܢܺܐܡܰܪ ܕܶܝܢ ܐ̱ܢܳܫ ܡܶܢ ܗܳܢܽܘܢ ܕܒܰܕܐܰܝܟ ܗܳܠܶܝܢ ܚܰܟܺܝܡܺܝܢ܆ ܐܰܝܟܳܐ ܝܰܬܺܝܪܳܐ ܙܳܕܶܩ ܕܢܶܩܢܰܛ ܐ̱ܢܳܫ ܡܶܢ ܕܶܚܠܬܳܐ ܕܡܶܢ ܙܰܘܥܳܐ. ܒܰܡܕܺܝܢ̱ܬܳܐ ܗܳܝ ܕܩܰܒܠܰܬ ܡܣܳܡ ܒܪܺܝܫܳܐ ܕܡܶܛܽܠ ܚܛܺܝܬܳܗ̇܆ ܐܰܘ ܠܘܳܬ ܕܶܐܦܰܢܶܐ܆ ܗܳܝ ܟܺܝܬ ܕܠܳܐ ܥܕܰܟܺܝܠ ‌ܐܶܬܢܰܓܕܰܬ܆ ܐܳܦܠܳܐ ܟܺܝܬ ܬܶܬܢܰܓܰܕ܆ ܥܰܡܰܢ ܕܶܝܢ ܒܝܰܕ ܬܝܳܒܽܘܬܳܐ ܠܰܚܛܳܗ̈ܶܐ ܬܶܠܚܶܐ^[49]. ܐܰܝܟܳܐ ܕܶܝܢ ܐܺܝܬܶܝܗ̇ ܝܰܬܺܝܪ ܙܗܺܝܪܬܳܐ ܠܰܡܕܰܝܳܪܽܘ. ܐܰܝܟܳܐ ܕܒܶܣܡܳܐ ܘܰܐܫܺܝܕܽܘܬܳܐ^[50]܆ ܐܰܘ ܐܰܝܟܳܐ ܕܒܳܥ̈ܘܳܬܳܐ ܘܬܶܫܡ̈ܫܳܬܳܐ܆ ܘܰܨܠܰܘ̈ܳܬܳܐ ܘܕܶܡ̈ܥܶܐ ܘܬܶܢܚ̈ܳܬܳܐ܆ ܘܢܰܦ̈ܫܳܬܳܐ ܕܰܠܕܶܚܠܬܳܐ ܗܳܝ ܕܡܶܢ ܩܕܺܝܡ ܡܚ̈ܰܕܬܳܢ ܒܥܽܘܗܕܳܢܳܐ܆ ܘܰܠܘܳܬ ܫܡܰܝܳܐ ܡܪ̈ܺܝܡܳܢ ܥܰܝܢܰܝܗܶܝܢ܆ ܘܰܠܪ̈ܰܚܡܶܐ ܕܡܶܢ ܠܥܶܠ ܡܣܰܟ̈ܝܳܢ.

ܠܳܐ ܗܳܟܺܝܠ ‌ܐܢ̱ܬܽܘܢ ܠܟܽܘܢ ܬܰܛܥܽܘܢ܆ ܘܠܰܐܠܳܗܳܐ ܬܰܪܓܙܽܘܢ. ܕܡܳܪܝܰܐ ܗ̱ܘ ܓܶܝܪ ܐܰܪܥܳܐ ܘܡܽܘܠܳܝܳܐ ܕܺܝܠܳܗ̇܆ ܗܰܘ ܕܒܶܗ ܚܰܝ݂ܺܝ݂̈ܢ ܚ̱ܢܰܢ ܘܡܶܬܬܙܺܝܥܺܝܢܰܢ ܘܺܐܝܬܰܝܢ^[51]܆ ܗܰܘ ܕܳܐܦ ܠܗܳܢܽܘܢ ܕܗܳܟܰܢܳܐ ܛܳܥܝܳܐܺܝܬ ܡܶܬܪܰܥܶܝܢ ܡܚܰܣܝܳܢܳܐ ܢܶܗܘܶܐ܆ ܘܰܢܦܰܨܶܐ ܠܟܽܠ ܓܶܢܣܳܐ ܘܰܠܟܽܠ ܩܰܘܡܬܳܐ܆ ܡܶܢ ܟܽܠ ܡܚܽܘܬܳܐ ܛܥܺܝܢܰܬ ܡܰܘܬܳܐ܆ ܗܰܘ ܕܒܰܠܚܽܘܕܰܘܗ̱ܝ ܛܳܒܳܐ ܘܪܳܚܶܡ ܐ̱ܢܳܫܳܐ. ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܬܠܬܝܢ ܘܚܰܕ. ܕܚܽܘܕܳܬܳܐ ܕܰܨܠܺܝܒܳܐ. ܫܰܠܶܡ ܩܰܕܝܫܐ ܡܳܪܝ ܣܶܐܘܺܝܪܶܐ ܕܥܰܠ ܨܠܺܝܒܳܐ ܡܝܰܩܪܳܐ.

ܡܙܡܘܪ̈ܐ. 68: 30 [1]

ܣܶܦܪܐ ܕ ܒ. ܒܪܝܡܝܢ. 7: 1 ـ 10 [2]

ܐ. ܩܘܪ̈ܝܢܬܝܐ. 3: 16 ـ 17  ܐܦ 6: 19 [3]

ܪ̈ܗܘܡܝܐ. 6: 6 [4]

ܩܘܠܣ̈ܝܐ. 3: 5 [5]

ܓܠܛܝ̈ܐ. 2: 20 [6]

ܡܶܛܽܠܗܳܢܳܐ[7]

ܒ. ܩܘܪ̈ܝܢܬܝܐ. 5: 17 [8]

ܡܶܬܚܰܕܰܬ[9]

ܠܥܺܐܕܳܐ ܐܳܡܰܪ[10]

ܐ. ܩܘܪ̈ܝܢܬܝܐ. 5: 8 [11]

ܣܶܦܪܐ ܕܒܪܝܬܐ. 2: 9 [12]

ܣܶܦܪܳܐ ܕܒܪܝܬܐ. 3: 4 ـ 5 [13]

 ܗ̱ܘܳܬ ܙܰܗܝܽܘܬܳܐ[14]

ܥܒܪ̈ܝܐ. 5: 14 [15]

ܐ. ܩܘܪ̈ܝܢܬܝܐ. 8: 2 ـ 3 [16]

ܣܶܦܪܐ ܕܒܪܝܬܐ. 2: 9 [17]

ܐܫܥܝܐ. 65: 22 [18]

ܣܶܦܪܐ ܕܒܪܝܬܐ. 3: 22 [19]

ܐܦܣ̈ܝܐ. 4: 22  ܐܦ ܛܝܛܘܣ. 3: 5 [20]

ܐܫܥܝܐ. 65: 22 [21]

ܣܶܦܪܐ ܕܒܪܝܬܐ. 3: 24 [22]

ܐܦܣ̈ܝܐ. 6: 17  ܐܦ ܥܒܪ̈ܝܐ. 4: 12 [23]

ܐܶܪܡܝܐ. 23: 29  ܐܦ 20: 9 [24]

ܡܬܝ. 11: 13 [25]

ܣܶܦܪܐ ܕܒܪܝܬܐ. 8: 11 [26]

ܣܶܦܪܐ ܕܡܦܩܢܐ. 7: 9 ـ 12 ܐܦ 17: 5 [27]

ܣܶܦܪܐ ܕܡܦܩܢܐ. 17: 10 ـ 13 [28]

ܚܙܩܝܐܝܠ. 9: 4 ـ 6 [29]

ܚܙܩܝܐܝܠ. 9: 4 ـ 6 [30]

ܡܙܡܘܪ̈ܐ. 138: 7 [31]

ܡܬܝ. 10: 29 ـ 30 ܐܦ ܠܘܩܐ. 12: 7 [32]

ܒܩܪ̈ܡܝܕܐ[33]

ܡܶܢ ܥܪܽܘܒܬܳܐ[34]

ܡܙܡܘܪ̈ܐ. 104: 32 [35]

ܐܪܡܝܐ. 18: 23 [36]

ܚܳܕܪܺܝܢ ܠܟ̣ܳܐ ܘܰܠܟ̣ܳܐ. ܘܣܳܡܩܺܝܢ ܐܰܦܰܝ̈ܗܽܘܢ.[37]

ܣܶܕܪܶܬ[38]

ܚܙܩܝܐܝܠ. 41: 21 ـ 22 [39]

ܐܦܣ̈ܝܐ. 3: 18 ـ 19 [40]

ܐܫܥܝܐ. 24: 9 [41]

 ܢܶܥܒܕܶܗ[42]

ܡܙܡܘܪ̈ܐ. 96: 5 [43]

[44]ܡܬܝ. 8: 29  ܐܦ ܠܽܘܩܳܐ. 4: 34 ܐܦ ܡܪܩܘܣ. 1: 24

ܡܶܢ ܚܰܝܛܳܐ ܕܰܠܒܽܘ̈ܫܶܐ.[45]

ܠܡ̈ܬܬܙܝܢܘܬܐ[46]

[47] ܝܳܕܥܺܝܢ. ܫܳܢܶܝܢܢ ܠܦܘܬ ܦܪܢܫܝܐ ܐܳܡܰܪ Aptal

ܐܪܡܝܐ. 48: 44 [48]

ܬܫܕܐ[49]

ܦܘܪܦܳܥܳܐ[50]

ܡܙܡܘܪ̈ܐ. 24: 1 [51]