ܡܺܐܡܪܳܐ ܕܰܬܠܳܬܺܝܢ

ܥܰܠ ܩܰܕܺܝܫܳܐ ܫܶܡܥܽܘܢ ܗܰܘ ܕܶܐܤܛܽܘܢܶܐ.

30: ܡܳܢܰܐ ܗ̱ܘ ܗܰܘ ܕܰܢܩܰܠܶܤ ܐ̱ܢܳܫ ܡܶܢ ܛܳܒ̈ܳܬܳܐ܆ ܐܶܢܗܽܘ ܕܰܚܢܰܢ ܠܳܐ ܢܩܰܠܶܤ ܠܫܶܡܥܽܘܢ ܗܰܘ ܙܰܕܺܝܩܳܐ܆ ܐܶܠܳܐ ܠܫܰܦܺܝܪܬܳܐ ܗܳܝ ܕܟܽܠܶܗ ܗܳܢܳܐ ܒܫܶܬܩܳܐ ܢܶܥܒܰܪ܆ ܘܗܳܕܶܐ ܟܰܕ ܬܶܐܽܘܕܽܘܪܺܝܛܽܘܤ ܗܰܘ ܪܰܫܺܝܥܳܐ ܣܥܳܐ܆ ܠܰܘ ܕܰܢܩܰܠܶܤ ܡܰܠܽܘܢ܆ ܐܶܠܳܐ ܕܢܶܓܢܽܘܒ ܠܕܽܘܒܳܪܶܗ ܕܗܰܘ. ܐܰܟܙܢܳܐ ܕܳܐܦ ܠܗܰܘܢܳܐ ܚܠܺܝܡܳܐ ܕܰܟܬܳܒ̈ܶܐ ܐܰܡܺܝܪ̈ܰܝ ܒܪܽܘܚܳܐ܆ ܐܰܝܟܰܢܳܐ ܕܬܶܣܬܒܰܪ ܢܰܨܺܝܚܽܘܬܳܐ ܕܣܳܥܽܘܪ̈ܘܳܬܳܐ ܡܝܰܬܪ̈ܳܬܳܐ܆ ܕܕܰܢܕܺܝܕܽܘܬܶܗ ܕܢܶܣܛܽܘܪܺܝܽܘܤ ܐܺܝܬܶܝܗ̇ ܣܢܺܐܓܪܳܐ. ܗܰܘ ܓܰܝܪ ܕܰܐܡܪܰܚ ܕܟܰܕ ܟܳܬܶܒ ܠܽܘܩܒܰܠ ܩܶܦܱ̈ܠܶܐܐ ܕܩܰܕܺܝܫܳܐ ܩܽܘܪܺܝܠܽܘܤ܆ ܠܽܘܩܒܰܠ ܒܰܪ̱ܬ ܩܳܠܳܐ ܟܳܗܢܳܝܬܳܐ ܕܶܐܘܰܢܓܶܠܺܝ̈ܰܐ ܢܡܰܠܶܠ ܣܰܩܽܘܒܠܳܐܺܝܬ ܘܓܰܠܝܳܐܺܝܬ ܢܺܐܡܰܪ܆ ܕܠܳܐ ܗܘ̣ܳܐ ܡܶܠܬܳܐ ܒܶܣܪܳܐ܆ ܗܳܢܳܐ ܒܠܶܫܳܢܶܗ ܗܰܘ ܡܰܪܳܚ ܒܟܽܠ܆ ܐܳܦ ܠܫܽܘܒܚܳܐ^[1] ܕܺܝܠܶܗ ܕܙܰܕܺܝܩܳܐ ܥܫܰܩ.

ܗܰܘ ܟܺܝܬ ܕܗܽܘ ܡܓܰܕܦܳܢܳܐ ܬܶܐܽܘܕܽܘܪܺܝܛܽܘܤ܆ ܡܶܢ ܒܳܬܰܪ ܕܶܐܫܬܪܺܝ ܟܢܽܘܫܝܳܐ ܗܰܘ ܕܰܣܪܺܝܩܽܘܬܳܐ ܕܗܳܢܽܘܢ ܕܰܒܟܰܠܩܺܝܕܽܘܢܺܐ ܐܰܟܚܕܳܐ ܐܶܬܟܰܢܰܫܘ܆ ܘܰܫܪܳܐ ܠܶܐܣܳܪܳܐ ܕܥܺܕ̈ܳܬܳܐ ܩܰܕܺܝ̈ܫܳܬܳܐ ܘܠܰܐܘܝܽܘܬܳܐ ܕܫܰܝܢܳܐ܆ ܟܰܕ ܡܰܚܓܰܪ ܒܰܡܚܺܝܠܽܘܬܳܐ ܕܕܽܘܓ̈ܡܰܛܰܐ ܡܣܰܝ̈ܒܶܐ܆ ܠܘܳܬ ܛܝܳܪܶܗ^[2] ܕܗܰܘ ܩܰܕܺܝܫܳܐ ܐܶܙܰܠ܆ ܟܰܕ ܣܳܒܰܪ ܗ̱ܘܳܐ ܠܰܡܚܰܠܳܨܽܘ ܠܗܰܘ ܚܰܟܺܝܡܳܐ ܕܰܒܡܳܪܰܢ. ܐܳܦ ܟܺܝܬ ܟܰܕ ܣܰܓܺܝ̈ܳܐܬܳܐ ܫܰܪܺܝ ܕܰܢܦܰܟܶܢ܆ ܘܕܰܢܩܰܝܶܡ ܠܪܽܘܫܥܳܐ ܒܰܝܬܳܝܳܐ ܕܺܝܠܶܗ܆ ܟܰܕ ܩܕܳܡܰܘ̈ܗ̱ܝ ܕܶܐܤܛܽܘܢܳܐ ܩܳܐܶܡ ܗ̱ܘܳܐ܆ ܣܰܓܺܝ ܦܨܺܝܚܳܐܺܝܬ ܐܰܟܚܕܳܐ ܘܰܠܒܺܝܒܳܐܺܝܬ ܐܰܟܣܶܗ. ܟܰܕ ܓܶܝܪ ܐܰܝܬܺܝ ܒܳܒܽܘܣܳܐ ܠܰܡܨܰܥܬܳܐ܆ ܘܫܰܐܠܶܗ ܕܰܒܡܳܢܳܐ ܡܗܰܝܡܶܢ܆ ܘܰܫܡܰܥ ܠܒܰܪ̱ܬ ܩܳܠܳܐ ܫܰܒܪܳܝܬܳܐ. ܘܠܳܐ ܓܒܺܝܠܬܳܐ܆ ܕܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ܆ ܟܰܕ ܠܘܳܬ ܗܰܘ ܡܳܬܰܚ ܗ̱ܘܳܐ ܐܳܡܰܪ: ܐܰܝܟ ܗܳܢܳܐ ܛܰܠܝܳܐ܆ ܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ ܗܰܝܡܢܶܬ܆ ܘܰܡܫܰܒܰܚ ܐ̱ܢܳܐ ܠܚܰܕ ܐܰ‌ܠܳܗܳܐ ܣܓܺܝܕܳܐ ܕܒܰܬܠܺܝܬܳܝܽܘܬܳܐ ܩܰܕܺܝܫܬܳܐ. ܘܰܠܫܳܛܽܘܪ̈ܘܳܬܳܐ ܝܰܬܺܝܪ̈ܳܬܳܐ ܠܳܐ ܡܶܬܪܡܶܐ ܐ̱ܢܳܐ܆ ܘܳܐܦܠܳܐ ܬܽܘܒ ܠܗܳܝ ܕܰܒܝܰܕ ܦܽܘܡܝ ܐܰ݀ܝܬܶܐ ܠܣܽܘܢܶܗܕܽܘܤ ܗܳܝ ܕܳܐܡܰܪ ܐܰܢ̱ܬ. ܘܰܠܗܳܕܶܐ ܠܗܽܘܢ ܠܗܳܢܽܘܢ ܕܒܶܗ ܒܰܛܝܳܪܳܐ ܩܰܕܺܝܫܳܐ ܗܰܘ ܦܺܝܠܳܣܽܘܦܺܝܣܳܐ ܥܳܒܕܺܝܢ ܘܣܶܐܒܘ ܒܶܗ܆ ܕܰܥܕܰܟܺܝܠ ‌ܐܳܦ ܗܳܫܳܐ ܡܶܫܬܰܥܶܝܢ ܠܳܗ̇ ܐܺܝܬ ܠܡܶܫܡܰܥ܆ ܕܡܶܢ ܒܳܬܰܪ ܩܳܠܶܗ ܕܗܰܘ ܩܰܒܠܽܘܗ̇ ܠܗܳܝ ܕܫܰܪܺܝܪܳܐ.

ܐܷܠܳܐ ܒܪܰܡ ܘܟܰܕ ܗܳܠܶܝܢ ܫܡܰܥ ܓܰܒܪܳܐ ܗܰܘ ܬܠܺܝܬܳܝ ܕܳܘܝܽܘܬܳܐ܆ ܕܰܫܠܶܡ ܒܰܟܬܳܒܳܐ ܓܰܒܪܳܐ ܗܰܘ ܚܰܣܝܳܐ ܠܨܶܒܝܳܢܶܗ ܡܶܬܚܪܶܐ ܗ̱ܘܳܐ ܕܰܢܫܰܪܰܪ܆ ܗܰܘ ܕܳܐܦܠܳܐ ܠܗܶܝܢ ܠܰܟܬܺܝ̈ܒܳܬܳܐ ܝܳܕܰܥ ܗ̱ܘܳܐ. ܕܕܰܐܝܟ ܗܳܕܶܐ ܗܳܝ ܐܽܘܪܚܳܐ ܕܰܐܢ̱ܬܬܳܐ ܓܰܝܳܪܬܳܐ^[3]܆ ܡܰܙܥܶܩ ܡܰܬܠܳܐ. ܗܳܝ ܕܶܐܡܰܬܝ ܕܬܶܣܥܽܘܪ ܗܳܠܶܝܢ ܕܺܝܠܳܗ̇܆ ܟܰܕ ܬܫܺܝܓ ܐܳܡܪܳܐ܆ ܕܠܳܐ ܡܶܕܶܡ ܣܥܺܝܪ ܠܺܝ ܕܒܺܝܫ. ܠܗܳܢܳܐ ܟܽܠܶܗ ܕܶܝܢ ܢܦܰܩ̈ܶܝܢ ܠܶܗ ܗܳܠܶܝܢ ܕܓܽܘܡܕܳܢܽܘܬܳܐ܆ ܐܰܝܟܰܢܳܐ ܕܳܐܦ ܠܕܽܘܒܳܪܳܐ ܕܺܝܠܶܗ ܘܰܠܦܽܘܠܺܝܛܝܐ ܗܳܝ ܡܝܰܬܰܪܬܳܐ ܢܶܓܒܶܐ ܠܡܰܟܬܳܒܽܘ܆ ܠܰܘ ܡܶܛܽܠ ܡܶܕܶܡ ܐ̱ܚܪܺܝܢ܆ ܐܶܠܳܐ ܡܶܛܽܠ ܕܰܠܗܳܢܽܘܢ ܕܝܰܬܺܝܪ ܦܫܺܝܛܺܝܢ ܢܰܝܬܶܐ ܠܘܳܬ ܫܰܘܝܽܘܬ ܬܰܪܥܺܝܬܳܐ ܕܪܽܘܫܥܳܐ.

ܐܷܠܳܐ ܠܳܐ ܫܰܦܺܝܪܳܐ ܬܶܫܒܽܘܚܬܳܐ ܒܦܽܘܡܳܐ ܕܚܰܛܳܝܳܐ^[4]܆ ܐܰܝܟܰܢܳܐ ܕܐ̱ܢܳܫ ܚܰܟܺܝܡܳܐ ܐܶܡܰܪ: ܡܶܛܽܠ ܕܳܐܦ ܐܽܘܣܶܒܺܝܽܘܤ ܗܰܘ ܩܶܣܰܪܳܝܳܐ܆ ܟܰܕ ܒܟܽܘܪܗܳܢܳܐ ܗܰܘ ܕܰܐܪܺܝܽܘܤ ܡܟܰܬܰܡ ܗ̱ܘܳܐ܆ ܠܢܶܨܚܳܢܰܝ̈ܗܽܘܢ ܕܣܳܗ̈ܕܶܐ ܫܒܺܝ̈ܚܰܝ ܙܳܟܽܘܬܳܐ ܗܳܢܽܘܢ ܕܒܰܦܠܰܣܛܺܝܢܺܝ ܐܰܟܬܶܒ ܒܬܰܫܥܺܝܬܳܐ܆ ܘܠܰܘ ܡܶܛܽܠܗܳܕܶܐ ܐܳܡܪܺܝܢܰܢ: ܕܰܐܬܠܺܝ̈ܛܶܐ ܗܳܢܽܘܢ ܕܰܫܪܳܪܳܐ܆ ܗܳܠܶܝܢ ܕܰܐܪܺܝܽܘܤ ܡܶܬܪܰܥܶܝܢ ܗ̱ܘܰܘ. ܒܪܰܡ ܚܦܺܝܛܽܘܬܳܐ ܡܶܕܶܡ ܣܰܓܺܝܐܬܳܐ ܐܺܝܬ ܠܗܽܘܢ ܠܗܶܪ̈ܶܛܺܝܩܽܘ܆ ܕܰܒܫܰܦܺܝܪ̈ܳܬܳܐ ܢܽܘܟܪ̈ܳܝܳܬܳܐ ܢܨܰܒܬܽܘܢ ܠܪܽܘܫܥܳܐ ܒܰܝܬܳܝܳܐ ܕܺܝܠܗܽܘܢ܆ ܐܰܟܙܢܳܐ ܕܰܠܢܶܫ̈ܶܐ ܗܳܢܶܝܢ ܕܠܳܐ ܢܰܟ̈ܦܳܢ܆ ܕܫܽܘܦܪܳܐ ܗܰܘ ܕܠܳܐ ‌ܐܺܝܬܰܘܗ̱ܝ ܠܗܶܝܢ܆ ܡܶܢ ܓܰܘ̈ܢܶܐ ܢܺܐܨ̈ܦܳܢ ܠܡܶܬܚܰܟܳܡܽܘ. ܗܳܟܰܢܳܐ ܓܶܝܪ ܒܰܙܒܰܢ ܐܳܦ ܠܩܰܕܺܝܫܳܐ ܐܰܢܛܽܘܢܺܝܽܘܤ܆ ܗܰܘ ܪܺܝܫ ܕܚܰܝ̈ܶܐ ܕܕܰܝܪܳܝܽܘܬܳܐ ܘܦܺܝܠܳܣܽܘܦܳܝܳܐ܆ ܕܗܶܢܶܝܢ ܟܰܕ ܗܶܢܶܝܢ ܠܗܽܘܢ ܡܶܬܪܰܥܶܐ ܣܥܰܘ ܠܡܶܥܫܩܶܗ܆ ܗܳܢܽܘܢ ܒܰܥ̈ܠܰܝ ܫܡܳܐ ܕܫܳܢܝܽܘܬܳܐ ܕܰܐܪܺܝܽܘܤ. ܐܶܠܳܐ ܐܶܬܟܣܶܣܘ ܡܶܢ ܗܰܘ܆ ܐܰܝܟܰܢܳܐ ܕܰܐܦ ܬܶܐܽܘܕܽܘܪܺܝܛܽܘܤ ܡܶܢ ܙܰܕܺܝܩܳܐ ܫܶܡܥܽܘܢ܆ ܘܗܳܕܶܐ ܟܰܕ ܥܰܡ ܦܫܺܝܛܽܘܬܳܐ ܚܳܝܶܐ ܗ̱ܘܳܐ܆ ܘܝܰܬܺܝܪ ܩܽܘܪܝܳܐܺܝܬ ܐܺܝܬ ܗ̱ܘܳܐ ܠܶܗ.

ܙܰܒܢܰܐ ܗ̄ܘ ܠܺܝ ܕܶܝܢ ܡܶܟܺܝܠ܆ ܠܰܡܫܰܪܳܝܽܘ ܒܩܽܘܠܳܣܳܐ ܕܣܳܥܽܘܪ̈ܘܳܬܶܗ ܕܗܰܘ܆ ܗܳܠܶܝܢ ܕܟܽܠ ܚܕܳܐ ܡܶܢܗܶܝܢ܆ ܠܘܳܬ ܩܽܘܠܳܣܳܐ ܡܫܰܡܠܝܳܐ܆ ܗܺܝ ܒܰܠܚܽܘܕܶܝܗ̇ ܥܰܠ ܚܰܕ ܦܽܘܡܳܐ ܘܠܶܫܳܢܳܐ ܣܢܺܝܩܳܐ ܗ̱ܘܳܬ܆ ܡܰܠܽܘܢ ܕܶܝܢ ܐܰܝܟܰܢܳܐ ܕܗܳܝ ܕܝܰܬܺܝܪ ܫܰܪܺܝܪܳܐ ܐܳܡܰܪ: ܕܗܺܝ ܐܺܝܬܶܝܗ̇ ܦܽܘܡܳܐ ܕܢܰܦܫܳܗ̇܆ ܟܰܕ ܡܶܢܳܗ̇ ܕܪܰܒܽܘܬ ܩܳܠܳܐ ܕܰܥܒ̈ܳܕܶܐ ܗܺܝ ܠܳܗ̇ ܡܚܰܘܝܳܐ. ܡܰܢܽܘ ܓܶܝܪ ܡܶܢ ܝܰܘܢܳܝ̈ܶܐ ܐܰܘ ܒܰܪܒܪ̈ܳܝܶܐ ܕܠܳܐ ܫܡܺܝܥ ܠܶܗ ܕܽܘܒܳܪܶܗ ܕܗܰܘ܆ ܗܰܘ ܕܗܳܟܰܢܳܐ ܐܰܟܣܢܳܝ ܗ̱ܘܳܐ ܘܺܐܝܬܰܘܗ̱ܝ ܠܥܶܠ ܡܶܢ ܒܰܪܢܳܫܳܐ.

ܗܰܘ ܕܺܐܝܬܰܘܗ̱ܝ ܗ̱ܘܳܐ ܡܶܢ ܩܪܺܝܬܳܐ ܚܕܳܐ܆ ܕܣܺܝܡܳܐ ܡܰܢ ܠܰܐܦܰܝ̈ ܡܰܕܢܚܳܐ܆ ܒܰܬܚܽܘ̈ܡܶܐ ܕܶܝܢ ܕܩܺܝܠܺܝ̈ܩܳܝܶܐ ܠܰܘ ܟܽܠܳܗ̇܆ ܐܶܠܳܐ ܡܶܢ ܦܶܠܓܳܐ ܚܒܺܝܫܳܐ. ܠܗܳܝ ܕܰܡܫܰܡܗܺܝܢ ܠܳܗ̇ ܒܢܰܝ̈ ܐܰܬܪܳܐ ܗܰܘ ܨܺܝܨ. ܘܟܰܕ ܥܶܪ̈ܒܶܐ ܐܶܬܬܣܺܝܡ ܠܡܶܪܥܳܐ ܡܶܢ ܐܰܒܳܗ̈ܶܐ ܕܺܝܠܶܗ܆ ܗܽܘ ܒܢܰܦܫܶܗ ܪܳܥܶܐ ܗ̱ܘܳܐ܆ ܒܡܰܪ̈ܓܶܐ ܡܶܬܗܰܘ̈ܢܳܢܶܐ ܕܪܽܘܚܳܐ. ܘܠܳܐ ܓܶܝܪ ܐܰܝܟ ܝܰܘܣܶܦ ‌ܐܺܝܬܰܘܗ̱ܝ ܗ̱ܘܳܐ܆ ܕܒܰܚܣܳܡܳܐ ܕܰܐܚܰܘ̈ܗ̱ܝ ܡܶܬܬܰܩܪܰܒ ܗ̱ܘܳܐ^[5]܆ ܘܳܐܦܠܳܐ ܐܰܝܟ ܡܽܘܫܶܐ ܕܰܠܒܰܪܬܳܐ ܕܝܰܬܪܽܘܢ ܫܩܰܠ ܠܘܳܬ ܙܽܘܘܳܓܳܐ^[6]܆ ܘܳܐܦܠܳܐ ܐܰܝܟ ܕܰܘܺܝܕ ܕܰܚܠܳܦ ܪܳܥܝܳܐ܆ ܛܥܺܝܢ ܙܰܝܢܳܐ ܕܡܰܠܟܳܐ ܗܳܘܶܐ ܗ̱ܘܳܐ^[7]. ܐܶܠܳܐܡܶܢ ܩܰܘܡܬܳܐ ܫܰܒܪܳܝܬܳܐ. ܒܰܠܚܽܘܕܳܝܽܘܬ ܙܢܳܐ ܚܳܝܶܐ ܗ̱ܘܳܐ܆ ܘܟܰܕ ܒܺܐܝܕܶܗ ܡܰܢ. ܘܰܒܚܽܘܛܪܶܗ ܡܕܰܒܰܪ ܗ̱ܘܳܐ ܠܥܶܪ̈ܒܶܐ܆ ܠܘܳܬ ܫܡܰܝܳܐ ܕܶܝܢ ܚܳܐܰܪ ܗ̱ܘܳܐ ܘܡܶܬܬܰܝܬܶܐ ܗ̱ܘܳܐ ܡܶܢ ܪܶܡܙܳܐ ܕܰܐ‌ܠܳܗܳܐ܆ ܘܟܰܕ ܐܰܡܺܝܢܳܐܺܝܬ ܥܰܡܶܗ ܒܰܨܠܽܘܬܳܐ ܗܳܘܶܐ ܗ̱ܘܳܐ. ܘܟܰܕ ܥܰܠ ܪ̈ܺܝܫܰܝ ܛܽܘܪ̈ܶܐ ܡܶܬܟܪܶܟ ܗ̱ܘܳܐ܆ ܘܟܰܕ ܠܗܰܒܳܒܳܐ ܘܕܽܘܥܬܳܐ ܕܶܐܶܤܛܽܘܪܟܳܐ ܥܳܦܶܐ ܗ̱ܘܳܐ܆ ܘܥܰܠ ܓܽܘܡܪ̈ܶܐ ܕܢܽܘܪܳܐ ܣܳܐܶܡ ܗ̱ܘܳܐ܆ ܘܠܰܡܪܰܝܡܳܐ ܒܒܰܣܺܝܡܽܘܬ ܪܺܝܚܳܐ ܕܡܶܢ ܗܳܪܟܳܐ ܡܝܰܩܰܪ ܗ̱ܘܳܐ܆ ܗܳܟܰܢܳܐ ܡܶܢ ܛܰܠܝܽܘܬܶܗ܆ ܐ̱ܢܳܫ ܦܫܺܝܛܳܐ ‌ܐܺܝܬܰܘܗ̱ܝ ܗ̱ܘܳܐ ܒܰܙܢܳܐ ܘܪܳܚܶܡ ܐܰ‌ܠܳܗܳܐ.

ܘܶܐܢܗܽܘ ܕܰܒܕܽܘܟ ܟܰܘܫܳܐ ܡܶܕܶܡ ܒܰܙܒܰܢ ܢܶܗܘܶܐ ܗ̱ܘܳܐ ܠܶܗ ܡܶܢ ܪܳܥܝܽܘܬܳܐ܆ ܘܰܠܡܶܪܥܳܐ ܥܶܪ̈ܒܶܐ ܠܰܝܬ ܗ̱ܘܳܐ ܠܶܗ܆ ܡܶܢ ܟܽܠܦܪܽܘܤ ܠܘܳܬ ܥܺܕܬܳܐ ܐܳܙܶܠ ܗ̱ܘܳܐ܆ ܘܰܠܩܶܪܝܳܢܳܐ ܕܰܟܬܳܒ̈ܶܐ ܟܳܗܢܳܝ̈ܶܐ ܣܰܟܽܘܠܬܳܢܳܐܺܝܬ ܠܶܐܕܢܳܐ ܕܺܝܠܶܗ ܪܳܚܡܰܬ ܫܶܡܥܳܐ ܨܳܠܶܐ ܗ̱ܘܳܐ܆ ܘܡܶܬܕܰܡܰܪ ܗ̱ܘܳܐ ܣܰܓܺܝ܆ ܕܰܐܝܟܰܢܳܐ ܗܰܘ ܕܰܠܗܰܠ ܡܶܢ ܟܽܠ ܘܡܳܪܝܳܐ ܕܗܳܠܶܝܢ ܕܺܐܝܬܰܝܗܶܝܢ ܘܥܳܒܽܘܕܳܐ܆ ܗܳܟܰܢܳܐ ܡܶܢ ܪܰܘܡܳܐ ܒܰܝܬܳܝܳܐ ܕܺܝܠܶܗ ܡܶܬܢܰܚܰܬ܆ ܘܡܰܟܺܝܟܳܐܺܝܬ ܘܰܡܪܰܚܡܳܢܳܐܺܝܬ ܠܰܒܢܰܝ̈ܢܳܫܳܐ ܡܡܰܠܶܠ. ܘܰܒܗܳܕܶܐ ܝܰܬܺܝܪܳܐܺܝܬ ܒܚܽܘܒܳܐ ܕܰܠܘܳܬܶܗ ܡܶܬܚܰܬܚܰܬ^[8] ܗ̱ܘܳܐ. ܘܰܒ̈ܡܶܠܶܐ ܢܦܺܝ̈ܚܳܬ ܡܶܢ ܐܰ‌ܠܳܗܳܐ܆ ܐܰܝܟ ܕܰܒܓܺܐܪ̈ܶܐ ܫܡܰܝܳܢ̈ܶܐ ܒܠܶܒܶܗ ܒܳܠܰܥ ܗ̱ܘܳܐ.

ܘܒܰܙܒܰܢ ܟܰܕ ܫܡܰܥ ܠܟܰܬܳܒܳܐ ܟܳܗܢܳܝܳܐ ܕܰܐܘܰܢܓܶܠܺܝ̈ܰܐ ܕܳܐܡܰܪ: ܛܽܘܒܰܝܗܽܘܢ ܠܰܐܝܠܶܝܢ ܕܡܶܬܰܐܒܠܺܝܢ ܗܳܫܳܐ ܕܗܶܢܽܘܢ ܢܶܬܒܰܝܐܽܘܢ^[9]܆ ܠܛܽܘܒܳܐ ܗܳܢܳܐ ܒܪܶܚܡܰܬ ܥܰܡܠܳܐ ܡܥܰܩܶܒ ܗ̱ܘܳܐ. ܘܰܕܡܳܢܳܐ ܟܰܝ ‌ܐܺܝܬܰܘܗ̱ܝ ܐܶܒܠܳܐ ܗܰܘ ܕܰܐܝܟ ܗܳܢܳܐ ܗܽܘ ܒܶܗ ܡܶܢܶܗ ܘܠܶܗ ܡܒܰܚܶܢ ܗ̱ܘܳܐ. ܘܡܶܫܟܰܚ ܗ̱ܘܳܐ ܟܰܕ ܡܶܢ ܣܽܘ̈ܟܳܠܶܐ ܕܪܽܘܚܳܐ ܩܰܕܺܝܫܳܐ ܡܶܬܗܰܕܶܐ ܗ̱ܘܳܐ܆ ܕܶܐܒܠܳܐ ܩܪܳܐ܆ ܠܰܠܒܽܘܟܝܳܐ ܘܠܰܦܓܽܘܕܬܳܐ ܕܡܶܢ ܡܚܰܡܣܢܳܢܽܘܬܳܐ܆ ܕܰܐܫܺܝܕܽܘܬܳܐ ܕܗܰܢܺܝ̈ܐܘܳܬܳܐ ܥܳܠܡܳܢܳܝ̈ܳܬܳܐ܆ ܘܰܠܚܰܝ̈ܶܐ ܕܕܰܝܪܳܝܽܘܬܳܐ. ܐܰܝܟ ܬܰܪܥܺܝܬܳܐ ܗܳܝ ܕܒܳܗ̇ ܩܽܘܗܠܰܬ ܐܶܡܰܪ: ܕܛܳܒ ܠܡܺܐܙܰܠ ܠܒܰܝܬܳܐܕܶܐܒܠܳܐ܆ ܐܰܘ ܠܡܺܐܙܰܠ ܠܒܰܝܬܳܐ ܕܡܰܫܬܝܳܐ^[10]. ܘܗܳܟܰܢܳܐ ܗܰܘ ܒܰܪܢܳܫܳܐ ܕܰܐ‌ܠܳܗܳܐ܆ ܟܰܕ ܠܰܐܣܽܘܪ̈ܶܐ ܕܰܐܪܥܳܐ ܦܳܣܶܩ܆ ܐܰܟܙܢܳܐ ܕܫܶܡܫܽܘܢ ܗܰܘ ܢܙܺܝܪܳܐ ܠܚܰܒ̈ܠܶܐ ܕܰܦܠܶܫܬܳܝ̈ܶܐ^[11]܆ ܠܘܳܬ ܡܰܕܒܪܳܐ ܦܪܰܚ܆ ܘܰܠܕܽܘܒܳܪܳܐ ܗܰܘ ܦܺܝܠܳܣܽܘܦܳܝܳܐ ܚܰܒܶܒ.

ܩܰܕܡܳܐܺܝܬ܆ ܟܰܕ ܠܗܰܝܟܠܳܐ ܕܣܳܗ̈ܕܶܐ ܩܰܕܺܝ̈ܫܶܐ ܒܪܶܗܛܳܐ ܥ̣ܰܠ܆ ܘܟܰܦ ܒܽܘܪܟܳܐ ܘܒܰܐܪܥܳܐ ܩܒܰܥ ܠܦܰܪܨܽܘܦܳܐ ܕܺܝܠܶܗ܆ ܘܫܶܦ̈ܥܶܐ ܣܰܓܺܝ̈ܶܐܐ ܕܕܶܡ̈ܥܶܐ ܡܶܢ ܥܰܝܢܰܘ̈ܗ̱ܝ ܐܶܫܰܕ ܠܰܐܠܳܗܳܐ܆ ܘܶܐܬܟܰܫܰܦ ܕܢܶܬܓܰܠ̈ܝܳܢ ܠܶܗ ܗܳܠܶܝܢ ܕܦܳܩ̈ܚܳܢ܆ ܘܫܶܢܬܳܐ ܡܶܕܶܡ ܗܰܢܺܝܐܬܳܐ ܕܡܶܟ܆ ܘܰܐܝܟ ܗܰܘ ܕܰܠܬܶܡܗܳܐ ܐܰ‌ܠܳܗܳܝܳܐ ܐܶܬܳܐ܆ ܘܰܠܕܰܐܝܟ ܗܳܕܶܐ ܚܙܳܬܳܐ ܐܶܫܬܘܺܝ܆ ܐܰܣܒܰܪ܆ ܕܫܶܬܶܐܣܬܳܐ ܥܰܡܺܝܩܬܳܐ ܚܳܦܰܪ ܗ̱ܘܳܐ. ܘܟܰܕ ܣܳܦܩܳܐܺܝܬ ܚܳܦܰܪ ܗ̱ܘܳܐ܆ ܠܐܺܝ. ܘܶܐܬܢܺܝܚ ܡܶܢ ܥܰܡܠܳܐ. ܘܰܫܡܰܥ ܠܐ̱ܢܳܫ ܕܳܐܡܰܪ: ܙܕܶܩ ܠܡܰܘܣܳܦܽܘ ܥܰܠ ܥܽܘܡܩܳܐ. ܘܬܽܘܒ ܝܳܨܶܦ ܗ̱ܘܳܐ ܚܦܳܪܳܐ. ܘܟܰܕ ܐܰܢܺܝܚ ܐܺܝܕܰܘ̈ܗ̱ܝ ܬܽܘܒ ܡܶܢ ܒܳܬܰܪ ܥܰܡܠܳܐ܆ ܠܘܳܬ ܥܒܳܕܳܐ ܕܝܰܬܺܝܪ ܥܰܡܺܝܩ ܡܶܢܳܗ̇ ܕܒܰܪ̱ܬ ܩܳܠܳܐ ܬܽܘܒ ܡܶܬܦܩܶܕ ܗ̱ܘܳܐ ܕܢܶܬܚܰܦܰܛ. ܘܟܰܕ ܬܠܳܬ ܙܰܒܢܺܝ̈ܢ ܘܰܐܪܒܰܥ. ܠܶܗ ܠܦܽܘܩܕܳܢܳܐ ܐܶܬܬܦܺܝܤ܆ ܠܚܰܪܬܳܐ ܫܳܡܰܥ ܗ̱ܘܳܐ܆ ܕܠܳܐ ܬܽܘܒ ܝܰܬܺܝܪ ܠܘܳܬ ܥܽܘܡܩܳܐ ܢܶܩܪܽܘܒ. ܐܶܠܳܐ ܡܶܟܺܝܠ ܡܫܰܪܪܳܐܺܝܬ ܘܰܕܠܳܐ ܩܺܝܢܕܽܘܢܽܘܤ ܢܶܒܢܶܐ.

ܠܦܽܘܫܳܩܶܗ ܕܶܝܢ ܕܗܳܢܳܐ ܚܶܙܘܳܐ܆ ܗܽܘ ܡܰܦܩܳܢܳܐ ܚܰܘܝܶܗ ܢܰܗܺܝܪܳܐܺܝܬ. ܐܶ‌ܠܽܘ ܠܳܐ ܓܶܝܪ ܕܰܒܥܽܘܡܩܳܐ ܩܰܕܶܡ ܐܰܪܡܺܝ ܗܰܘ ܩܰܕܺܝܫܳܐ ܠܥܰܡ̈ܠܶܐ ܕܦܺܝܠܳܣܽܘܦܺܝܰܐ܆ ܘܰܒܝܰܕ ܟܽܠܳܗ̇ ܢܙܺܝܪܽܘܬܳܐ ܐܶܬܳܐ܆ ܒܰܕܡܽܘܬ ܗܰܘ ܚܰܟܺܝܡܳܐ ܕܒܶܐܘܰܢܓܶܠܺܝܽܘܢ܆ ܕܥܰܠ ܫܽܘܥܳܐ ܠܳܐ ܡܶܙܕܰܥܙܥܳܢܳܐ ܩܒܰܥ ܫܶܬܶܐܣܬܳܐ ܕܒܰܝܬܶܗ ܘܠܰܘ ܥܰܠ ܚܳܠܳܐ^[12]܆ ܠܳܐ ܗ̱ܘܳܐ ܟܰܕ ܥܰܠ ‌ܐܶܤܛܽܘܢܳܐ ܣܳܠܶܩ ܗ̱ܘܳܐ܆ ܠܡܰܝ̈ܳܐ ܬܰܩܺܝ̈ܦܶܐ ܕܰܪ̈ܓܺܝܓܳܬܳܐ ܘܰܠܡܰܫܒܳܐ ܩܛܺܝܪܳܝܳܐ ܕܪ̈ܽܘܚܶܐ ܕܒܺܝܫܽܘܬܳܐ ܠܳܐ ܡܶܙܕܰܥܙܥܳܢܳܐܺܝܬ ܡܣܰܝܒܰܪ ܗ̱ܘܳܐ.

ܗܳܝܕܶܝܢ ܕܶܝܢ ܗܰܘ ܚܰܝܠܬܳܢܳܐ܆ ܟܰܕ ܠܚܶܙܘܳܐ ܗܰܘ ܐܰ‌ܠܳܗܳܝܳܐ ܚܙܳܐ܆ ܒܡܰܠܦܳܢ̈ܶܐ ܗܳܢܽܘܢ ܕܝܳܕܥܺܝܢ ܕܛܰܪܩܳܐܺܝܬ ܢܰܪܕܽܘܢ ܠܰܛܠܳܝ̈ܶܐ ܘܢܶܓܒܠܽܘܢ ܒܰܙܢܳܐ ܘܰܥܝܳܕܳܐ ܗܰܘ ܕܢܰܦܫܳܐ ܡܶܬܚܰܫܰܚ ܗ̱ܘܳܐ܆ ܗܳܢܽܘܢ ܐܳܡܰܪ ܐ̱ܢܳܐ ܕܩܳܝܡܺܝܢ ܒܪܺܝܫܳܐ ܘܪܺܝܫܳܢܽܘܬܳܐ ܐܺܝܬ ܠܗܽܘܢ܆ ܕܕܽܘܒܳܪܳܐ ܕܗܳܢܽܘܢ ܕܰܚܠܺܝܛܳܐܺܝܬ ܦܺܝܠܳܣܽܘܦܺܝܣܳܐ ܥܳܒܕܺܝܢ܆ ܗܰܘ ܟܺܝܬ ܕܰܐܚܺܝܕ ܕܽܘܡܝܳܐ ܕܟܶܢܫܳܐ ܗܰܘ ܕܰܒܫܽܘܪ̈ܳܝܶܐ ܕܟܳܪܽܘܙܽܘܬܳܐ ܐܶܘܰܢܓܶܠܳܝܬܳܐ ܗܰܝܡܶܢ ܒܝܶܫܽܘܥ܆ ܗܰܘ ܕܡܶܛܽܠܳܬܶܗ ܒܰܦܪ̈ܰܟܣܺܝܤ ܕܰܫܠܺܝ̈ܚܶܐ ܗܳܟܰܢܳܐ ܟܬܺܝܒ: ܕܟܶܢܫܳܐ ܕܶܝܢ ܗܰܘ ܕܗܳܢܽܘܢ ܕܗܰܝܡܶܢܘ܆ ‌ܐܺܝܬܰܘܗ̱ܝ ܗ̱ܘܳܐ ܠܶܒܳܐ ܚܰܕ ܘܢܰܦܫܳܐ ܚܕܳܐ܆ ܘܳܐܦܠܳܐ ܚܰܕ ܠܡܶܕܶܡ ܡܶܢ ܗܳܠܶܝܢ ܕܺܐܝܬ ܗ̱ܘܳܐ ܠܶܗ܆ ܐܳܡܰܪ ܗ̱ܘܳܐ ܕܕܺܝܠܶܗ ‌ܐܺܝܬܰܘܗ̱ܝ܆ ܐܶܠܳܐ ܐܺܝܬܰܝܗܶܝܢ ܗ̱ܘܰܝ̈ ܠܗܽܘܢ ܟܽܠܗܶܝܢ ܕܓܰܘܳܐ^[13].

ܘܟܽܠܶܗ ܗܳܢܳܐ܆ ܠܰܘ ܒܰܠܚܽܘܕ ܠܰܒ̈ܢܰܝ ܩܰܘܡܬܶܗ܆ ܐܶܠܳܐ ܐܳܦ ܠܗܳܢܽܘܢ ܕܺܐܝܬܰܝܗܽܘܢ ܒܩܳܢܺܝ̈ܘܳܬܳܐ ܕܦܺܝܠܳܣܽܘܦܺܝܰܐ ܥܳܒܰܪ ܗ̱ܘܳܐ܆ ܐܰܝܟܰܢܳܐ ܕܚܰܡܫܳܐ ܝܰܘ̈ܡܳܬܳܐ ܢܰܠܘܶܬ ܐܰܟܚܕܳܐ ܒܨܰܘܡܳܐ܆ ܘܰܠܟܽܠܗܽܘܢ ܐܰܝܟ ܚܰܕ ܝܰܘܡܳܐ ܢܶܚܫܽܘܒ ܐܶܢܽܘܢ܆ ܟܰܕ ܗܳܢܽܘܢ ܐ̱ܚܪ̈ܳܢܶܐ ܒܟܽܠ ܝܰܘܡܳܐ ܟܰܕ ܫܶܡܫܳܐ ܥܳܪܶܒ ܗ̱ܘܳܐ ܡܶܫܬܰܘܬܦܺܝܢ ܗ̱ܘܰܘ ܒܣܰܝܒܳܪܬܳܐ܆ ܐܰܘ ܗܳܝ ܕܝܰܬܺܝܪ ܐܰܪܺܝܟܳܐ ܟܰܕ ܥܳܐܦܶܝܢ ܗ̱ܘܰܘ ܠܶܗ ܠܨܰܘܡܳܐ܆ ܘܰܠܘܳܬ ܬܠܺܝܬܳܝܳܐ ܠܳܐ ܡܰܡܪܚܺܝܢ ܗ̱ܘܰܘ ܠܡܶܦܰܩ܆ ܘܰܠܥܰܡܠܳܐ ܕܰܓܠܺܝܙܽܘܬ ܡܶܐܟܽܘܠܬܳܐ ܠܰܡܣܰܝܒܳܪܽܘ܆ ܘܠܳܐ ܢܶܦܣܩܽܘܢ ܗ̱ܘܰܘ ܠܢܰܩܺܝܦܽܘܬܳܗ̇ ܕܰܡܚܰܡܣܢܳܢܽܘܬܳܐ.

ܘܟܰܕ ܗܳܠܶܝܢ ܣܳܥܰܪ ܗ̱ܘܳܐ܆ ܡܶܬܟܠܶܐ ܗ̱ܘܳܐ ܡܶܢ ܗܳܢܽܘܢ ܕܩܳܝܡܺܝܢ ܗ̱ܘܰܘ ܒܪܺܝܫܳܐ ܘܺܐܝܬܰܝܗܽܘܢ ܗ̱ܘܰܘ ܣܳܒ̈ܶܐ. ܟܰܕ ܐܳܡܪܺܝܢ ܗ̱ܘܰܘ: ܕܠܳܐ ܡܨܰܒܬܽܘܬܳܐ ܘܠܳܐ ܡܛܰܟܣܽܘܬܳܐ ܘܕܽܘܘܳܕܳܐ ܡܰܥܠܶܐ ܥܰܠ ܡܰܥܡܪܳܐ ܕܰܐܚ̈ܶܐ܆ ܗܳܝ ܕܢܶܬܚܰܦܰܛ ܚܰܕ ܕܰܠܗܰܠ ܡܶܢ ܬܚܽܘ̈ܡܶܐ ܕܰܦܩܺܝܕܺܝܢ ܢܶܬܕܰܒܰܪ܆ ܘܠܰܘ ܗܺܝ ܟܰܕ ܗܺܝ ܢܶܬܪܰܥܶܐ܆ ܘܳܐܦܠܳܐ ܠܶܗ ܟܰܕ ܠܶܗ ܠܩܳܢܽܘܢܳܐ ܢܶܫܠܰܡ^[14]܆ ܐܰܝܟܰܢܳܐ ܕܳܐܡܰܪ ܫܠܺܝܚܳܐ. ܥܰܡ ܗܳܠܶܝܢ ܕܶܝܢ܆ ܐܳܦ ܩܺܝܢܕܽܘܢܽܘܤ ܕܪܳܡܽܘܬܳܐ ܡܶܬܓܙܶܡ ܗ̱ܘܳܐ ܗܰܘ ܙܪܺܝܙܳܐ܆ ܘܰܕܡܰܦܽܘܠܬܳܐ ܕܡܶܢ ܗܳܪܟܳܐ.

ܟܽܠܗܶܝܢ ܕܶܝܢ ܒܪܰܡ܆ ܚܰܝܠܬܳܢܳܐܺܝܬ ܡܣܰܝܒܰܪ ܗ̱ܘܳܐ. ‌ܐܺܝܬܰܘܗ̱ܝ ܗ̱ܘܳܐ ܓܶܝܪ ܡܰܟܺܝܟܳܐ ܒܰܙܢܳܐ܆ ܘܰܕܠܳܐ ܣܳܟ ܡܶܬܬܪܺܝܡ ܗ̱ܘܳܐ. ܘܡܶܬܩܦܶܤ ܗ̱ܘܳܐ ܡܰܢ ܒܡܰܥܗ̈ܕܳܢܘܳܬܳܐ ܕܗܳܢܽܘܢ ܕܩܳܝܡܺܝܢ ܗ̱ܘܰܘ ܒܪܺܝܫܳܐ܆ ܘܰܠܥܶܕܠܳܝ̈ܶܐ ܐܰܝܟ ܚܰܛܳܝܳܐ ܡܒܰܝܬܶܐ ܗ̱ܘܳܐ ܠܶܗ܆ ܘܡܶܫܬܰܠܗܰܒ ܗ̱ܘܳܐ ܕܶܝܢ ܒܪܶܚܡܬܳܐ ܐܰ‌ܠܳܗܳܝܬܳܐ. ܘܰܠܘܳܬ ܚܰܠܝܽܘܬܳܐ ܕܥܰܡ̈ܠܶܐ ܕܰܡܝܰܬܪܽܘܬܳܐ܆ ܗܽܘ ܒܨܶܒܝܳܢܶܗ ܫܩܺܝܠ ܗ̱ܘܳܐ ܙܺܐܦܳܐ. ܛܥܶܡ ܗ̱ܘܳܐ ܓܶܝܪ ܕܛܳܒܳܐ ܗ̱ܝ ܗܳܝ ܕܢܶܦܠܽܘܚ ܐܰܝܟܰܢܳܐ ܕܫܳܠܽܘܡܽܘܢ ܡܶܛܽܠ ‌ܐܰܢ̱ܬܬܳܐ ܓܰܒܪܳܢܺܝܬܳܐ ܟܬܰܒ^[15]܆ ܡܰܠܽܘܢ ܕܶܝܢ ܡܶܛܽܠ ܢܰܦܫܳܐ ܕܡܶܬܥܰܠܡܳܐ.

ܗܳܠܶܝܢ ܟܺܝܬ ܕܳܐܦ ܟܰܕ ܝܳܕܥܺܝܢ ܗ̱ܘܰܘ ܠܗܶܝܢ ܣܳܒ̈ܶܐ ܗܳܢܽܘܢ ܦܺܝܠܳܣܽܘ̈ܦܶܐ ܘܪ̈ܳܕܽܘܝܶܐ ܕܰܡܝܰܬܪ̈ܳܬܳܐ܆ ܒܰܚܙܳܬܳܐ ܡܰܢ ܕܡܶܢ ܠܒܰܪ܆ ܐܳܦ ܟܳܐܶܝܢ ܗ̱ܘܰܘ ܒܶܗ܆ ܘܳܐܦ ܠܡܶܟܠܝܶܗ ܡܢܰܣܶܝܢ ܗ̱ܘܰܘ ܡܶܢ ܢܙܺܝܪܽܘܬܳܐ ܣܰܓܺܝܐܬܳܐ. ܒܬܰܪܥܺܝܬܗܽܘܢ ܕܶܝܢ܆ ܚܳܕܶܝܢ ܗ̱ܘܰܘ ܥܰܡܶܗ ܐܰܟܚܕܳܐ ܡܶܛܽܠ ܚܘܺܝܚܽܘܬܳܐ܆ ܘܡܶܛܽܠ ܫܽܘܘܫܳܛܶܗ ܕܰܠܘܳܬ ܗܳܠܶܝܢ ܕܰܡܝܰܬܪ̈ܳܢ. ܐܳܦ ܓܶܝܪ ܐܳܦܠܳܐ ܡܶܬܚܙܰܘܙܝܳܢܳܐܺܝܬ ܐܺܝܬ ܗ̱ܘܳܐ ܠܶܗ. ܐܶܠܳܐ ܡܢܰܣܶܐ ܗ̱ܘܳܐ ܠܡܶܬܛܰܫܳܝܽܘ܆ ܘܠܰܡܛܰܫܳܝܽܘ ܒܟܽܠܶܗ ܚܰܝܠܶܗ ܠܰܙܢܰܝ̈ܳܐ ܕܡܽܘܟܳܟܳܐ ܗܳܠܶܝܢ ܕܡܶܬܛܰܟܰܢ ܗ̱ܘܳܐ.

ܡܶܛܽܠܗܳܕܶܐ ܟܰܕ ܨܒܳܐ ܕܠܰܪ̈ܓܺܝܓܳܬܳܐ ܕܚܰܫ̈ܶܐ ܗܳܢܽܘܢ ܕܰܬܚܶܝܬ ܟܰܪܣܳܐ ܚܰܣܺܝܢܳܐܺܝܬ ܢܶܙܟܶܐ܆ ܐܰܝܟܰܢܳܐ ܕܳܐܦܠܳܐ ܟܽܠ ܟܽܠܶܗ ܣܳܟ ܢܰܠܙܽܘܢܳܝܗ̱ܝ ܡܶܛܽܠ ܪܶܬܚܳܐ ܕܛܰܠܝܽܘܬܳܐ܆ ܟܰܕ ܚܰܒܠܳܐ ܩܰܫܝܳܐ ܗܰܘ ܕܡܶܢ ܕܶܩ̈ܠܶܐ ܐܶܫܟܰܚ܆ ܗܰܘ ܟܺܝܬ ܕܡܶܢ ܩܠܳܦܬܳܐ ܕܺܝܠܶܗ ܕܺܐܝܠܳܢܳܐ ܟܰܕ ܡܶܣܬܰܕܩܳܐ ܘܡܶܬܪܰܫܫܳܐ ܡܶܬܬܰܦܫܰܠ ܩܛܺܝܪܳܐܺܝܬ܆ ܡܶܛܽܠ ܕܩܰܫܝܳܐ ܘܥܰܣܩܳܐܺܝܬ ܡܶܫܬܰܥܒܕܳܐ ܠܰܦܫܳܠܳܐ^[16]܆ ܡܶܬܬܰܦܫܠܳܐ ܕܶܝܢ ܒܪܰܡ܆ ܐܰܝܟܰܢܳܐ ܕܳܐܦ ܟܽܘܒ̈ܶܐ ܒܰܙܢܳܐ ܡܶܕܶܡ ܢܶܣܬܰܒܪܽܘܢ ܕܢܳܕܺܝܢ ܥܰܠ ܦܫܳܠܳܗ̇܆ ܘܰܠܗܳܢܳܐ ܢܣܰܒ܆ ܠܓܰܘ ܡܶܢ ܟܽܘܬܺܝܢܶܗ ܥܰܠ ܚܰܨܶܗ ܟܰܕ ܓܳܠܶܐ ܐܰܣܳܪܶܗ܆ ܕܰܢܛܰܫܶܐ ܠܣܳܥܽܘܪܽܘܬܳܐ ܗܳܝ ܕܗܳܟܰܢܳܐ ܥܡܺܝܠܳܐ ܝܰܨܺܝܦ ܗ̱ܘܳܐ. ܟܰܕ ܠܘܳܬ ܡܳܪܝܳܐ ܒܰܠܚܽܘܕ ܚܳܐܰܪ ܗ̱ܘܳܐ܆ ܘܠܰܬܙܺܝܙܽܘܬܳܐ ܗܳܝ ܕܡܶܢ ܪ̈ܓܺܝܓܳܬܳܐ ܒܣܰܓܺܝܽܐܘܬܶܗ ܕܟܺܐܒܳܐ ܡܶܢ ܫܶܪ̈ܫܶܝܗ̇ ܨܳܒܶܐ ܗ̱ܘܳܐ ܠܡܶܬܠܰܫ.

ܘܟܰܕ ܟܽܠܶܗ ܗܳܢܳܐ ܚܰܡܣܶܢ ܒܶܗ ܒܰܐܣܽܘܪ̈ܶܐ܆ ܥܕܰܡܳܐ ܕܛܽܘ̈ܦܶܐ ܕܰܕܡܳܐ ܟܰܕ ܪ̈ܕܰܝ ܡܶܢܶܗ ܣܰܡܰܩܶܝ̈ܢ ܠܰܐܪܥܳܐ܆ ܗܳܝ ܕܰܥܠܶܝܗ̇ ܡܗܰܠܶܟ ܗ̱ܘܳܐ. ܒܚܰܕ ܡܶܢ ܝܰܘ̈ܡܳܬܳܐ ܟܰܕ ܣܽܘܢܩܳܢܳܐ ܡܶܕܶܡ ܡܡܰܠܶܐ ܗ̱ܘܳܐ. ܘܟܰܕ ܐ̱ܢܳܫ ܡܶܢ ܐܰܚ̈ܶܐ ܗܳܢܽܘܢ ܕܰܐܟܚܕܳܐ ܦܺܝܠܳܣܽܘܦܺܝܣܳܐ ܥܳܒܕܺܝܢ ܗ̱ܘܰܘ ܚܙܳܝܗ̱ܝ ܠܣܽܘܥܪܳܢܳܐ ܬܡܺܝܗܳܐ܆ ܡܫܰܐܶܠ ܗ̱ܘܳܐ ܠܶܗ ܥܰܠ ܥܶܠܬܳܐ. ܗܽܘ ܕܶܝܢ ܟܰܕ ܫܬܶܩ܆ ܐܰܝܟ ܠܳܐ ܝܳܕܰܥ ܠܶܗ ܠܣܽܘܥܪܳܢܳܐ ܚܰܘܺܝ ܐܶܣܟܺܡܳܐ. ܘܰܒܗܳܕܶܐ ܕܢܶܬܛܰܫܶܐ ܡܰܢ ܠܳܐ ܐܶܫܟܰܚ܆ ܝܰܬܺܝܪܳܐܺܝܬ ܕܶܝܢ ܥܰܒܕܶܗ ܠܓܰܒܪܳܐ ܗܰܘ ܕܰܢܥܰܩܶܒ ܝܰܬܺܝܪ ܒܛܺܝܠܳܐܺܝܬ ܘܚܰܬܺܝܬܳܐܺܝܬ܆ ܐܰܝܟܰܢܳܐ ܕܳܐܦ ܠܗܳܕܶܐ ܢܺܐܬܶܐ܆ ܕܺܐܝܕܳܐ ܕܺܝܠܶܗ ܢܰܪܡܶܐ ܒܝܰܕ ܫܒܳܐ ܕܓܰܒܶܗ ܠܓܰܘ ܡܶܢ ܟܽܘܬܺܝܢܽܘܢܺܝܬܳܐ ܕܺܝܠܶܗ܆ ܘܢܶܬܕܰܡܶܐ ܒܰܫܠܺܝܚܳܐ ܬܽܐܘܡܰܐ܆ ܗܰܘ ܕܡܶܢ ܪܶܚܡܰܬ ܐܰ‌ܠܳܗܳܐ ܡܥܰܩܒܳܢܺܝܬܳܐ ܓܰܫ ܠܕܰܦܢܳܐ ܕܚܰܝ̈ܶܐ ܗܳܝ ܟܺܝܬ ܕܟܰܕ ܥܰܒܕܳܗ̇^[17]܆ ܐܶܫܟܚܶܗ ܠܒܶܣܪܳܐ ܗܰܘ ܕܥܰܠ ܟܣܳܣܬܳܗ̇ ܕܰܢܣܺܝܪ ܡܶܢ ܚܰܒܠܳܐ ܗܰܘ܆ ܘܦܰܪܣܝܶܗ ܠܫܽܘܚܢܳܐ ܕܬܰܟܬܽܘܫܳܐ ܙܪܺܝܙܳܐ܆ ܗܰܘ ܕܰܡܙܰܝܢܳܐ ܕܫܰܦܺܝܪܽܘܬ ܕܶܚܠܬܳܐ ܠܽܘܩܒܰܠ ܙܳܢܝܽܘܬܳܐ ܙܪܺܝܙܳܐܺܝܬ ܐܶܬܟܰܬܰܫ.

ܡܶܢ ܗܳܪܟܳܐ ܬܽܘܒ ܗܰܘ ܕܰܒܪܺܝܫܶܗ ܕܥܽܘܡܪܳܐ ܩܳܐܶܡ ܗ̱ܘܳܐ܆ ܒܬܰܪܥܺܝܬܶܗ ܡܰܢ ܡܶܬܕܰܡܰܪ ܗ̱ܘܳܐ ܒܳܗ̇ ܒܣܳܥܽܘܪܽܘܬܳܐ. ܒܠܶܫܳܢܶܗ ܕܶܝܢ܆ ܩܛܺܝܓܪܳܢܽܘܬܳܐ ܡܚܰܘܶܐ ܗ̱ܘܳܐ ܐܶܣܟܺܡܳܐ ܕܥܳܒܶܕ܆ ܘܥܳܕܶܠ ܗ̱ܘܳܐ ܠܶܗ ܠܰܣܥܳܝܳܐ ܗܰܘ ܩܰܫܝܳܐ ܘܡܰܪܳܚܳܐ ܕܠܽܘܩܒܰܠ ܒܶܣܪܳܐ ܒܗܳܝ ܕܡܰܣܒܰܪ^[18]܆ ܟܰܕ ܚܰܡܺܝܡܽܘܬܳܐ ܥܠܰܝܡܳܝܬܳܐ ܘܚܰܪܡܽܘܬܳܐ܆ ܘܪ̈ܶܫܝܳܢܶܐ ܕܰܐܝܟ ܗܳܟܰܢ ܡܰܝܬܶܐ ܗ̱ܘܳܐ ܥܠܰܘܗ̱ܝ܆ ܘܩܳܦܶܤ ܗ̱ܘܳܐ ܠܶܗ ܠܘܳܬ ܡܰܟܺܝܟܽܘܬܳܐ ܕܬܰܪܥܺܝܬܳܐ.

ܘܟܰܕ ܚܳܙܶܐ ܗ̱ܘܳܐ ܠܶܗ ܕܩܳܕܶܡ ܡܩܰܒܶܠ ܠܗܶܝܢ ܠܡܰܥܗܕܳܢ̈ܘܳܬܳܐ ܕܡܰܪܕܽܘܬܳܐ܆ ܘܟܽܠܶܗ ܗܳܢܳܐ ܡܰܚܶܬ ܠܶܗ ܠܗܰܘܢܶܗ ܠܘܳܬ ܗܳܝ ܕܰܡܡܰܫܚܳܐ^[19]܆ ܟܡܳܐ ܕܰܒܝܰܕ ܥܰܡ̈ܠܶܐ ܕܣܳܥܽܘܪܽܘܬܳܐ ܠܘܳܬ ܪܰܘܡܳܐ ܕܰܡܝܰܬܪܽܘܬܳܐ ܠܡܶܣܰܩ ܡܣܰܪܗܶܒ ܗ̱ܘܳܐ܆ ܐܰܝܟ ܡܶܠܬܳܐ ܗܳܝ ܕܳܐܡܰܪ: ܕܰܟܡܳܐ ܕܺܐܝܬܰܝܟ ܪܰܒܳܐ ܟܽܠܶܗ ܗܳܢܳܐ ܡܰܟܶܟ ܐܰܢ̱ܬ ܠܳܟ܆ ܘܰܩܕܳܡ ܡܳܪܝܳܐ ܬܶܫܟܰܚ ܛܰܝܒܽܘܬܳܐ^[20]܆ ܫܳܒܶܩ ܗ̱ܘܳܐ ܠܶܗ ܡܶܟܺܝܠ ܕܰܐܝܟ ܕܨܳܒܶܐ ܗ̱ܘܳܐ܆ ܒܚܰܝ̈ܶܐ ܠܳܐ ܡܫܰܘܬܦ̈ܶܐ ܘܠܳܐ ܚܠܺܝ̈ܛܶܐ ܘܰܕܟܽܠ ܟܽܠܶܗ ܡܰܕܒܪ̈ܳܝܶܐ ܢܶܬܗܰܦܰܟ܆ ܐܰܝܟ ܡܰܢ ܕܡܶܟܺܝܠ ܡܨܶܐ ܗܘ ܕܳܐܦ ܒܗܳܢܳܐ ܙܢܳܐ ܙܗܺܝܪܳܐܺܝܬ ܘܰܡܫܰܪܪܳܐܺܝܬ ܢܺܚܶܐ܆ ܘܕܰܠܘܳܬ ܕܰܪܳܐ ܚܰܪܺܝܦܳܐ ܕܫ̈ܺܐܕܶܐ ܝܰܬܺܝܪ ܥܠܰܝܡܳܐܺܝܬ ܢܶܚܠܽܘܨ.

ܘܟܰܕ ܟܺܝܬ ܗܽܘ ܚܰܝܠܬܳܢܳܐ܆ ܡܶܢ ܕܽܘܒܳܪܳܐ ܕܰܐܟܚܕܳܐ ܗܰܘ ܕܰܐܚ̈ܶܐ ܢܦܰܩ ܘܰܦܠܰܛ܆ ܗܰܘ ܕܢܳܓܶܕ ܗ̱ܘܳܐ ܘܢܳܬܶܦ ܗ̱ܘܳܐ ܠܳܗ̇ ܠܩܰܠܺܝܠܽܘܬ ܦܪܳܚܳܐ ܕܬܰܪܥܺܝܬܶܗ ܠܘܳܬ ܗܽܘܦܳܟܳܐ ܚܠܺܝܛܳܐ. ܒܰܕܡܽܘܬ ܣܽܘܣܝܳܐ ܡܶܕܶܡ ܚܠܺܝܡܳܐ ܕܡܶܢ ܐܰܣܽܘܪ̈ܶܐ ܐܶܬܚܰܪܰܪ܆ ܠܘܳܬ ܕܽܘܥ̈ܬܶܐ ܕܝܰܬܺܝܪ ܥܡܺܝ̈ܠܳܢ ܕܰܢܙܺܝܪܽܘܬܳܐ ܘܕܰܡܚܰܡܣܢܳܢܽܘܬܳܐ ܠܒܺܝܒܳܐܺܝܬ ܐܳܙܶܠ ܗ̱ܘܳܐ. ܘܟܰܕ ܓܽܘܒܳܐ ܡܶܕܶܡ ܐܶܫܟܰܚ ܣܦܺܝܩܳܐ ܡܶܢ ܡܰܝ̈ܳܐ ܕܠܰܘ ܠܥܽܘܡܩܳܐ ܚܦܺܝܪ ܗ̱ܘܳܐ܆ ܐܰܚܶܬ ܗܽܘ ܠܶܗ ܠܓܰܘܶܗ. ܘܟܰܕ ‌ܐܺܝܬܰܘܗ̱ܝ ܗ̱ܘܳܐ ܬܰܡܳܢ ܕܠܳܐ ܡܶܐܟܽܘܠܬܳܐ܆ ܘܡܶܬܗܰܓܶܐ ܗ̱ܘܳܐ ܐܰܝܟ ܗܳܝ ܕܰܟܬܺܝܒܳܐ ܒܢܳܡܽܘܣܳܐ ܕܡܳܪܝܳܐ ܒܺܐܝܡܳܡܳܐ ܘܰܒܠܺܠܝܳܐ^[21]܆ ܡܶܢ ܬܶܫܡܶܫܬܳܐ ܗܳܝ ܕܡܰܙܡܽܘܪܳܐ ܡܶܬܬܰܪܣܶܐ ܗ̱ܘܳܐ܆ ܘܰܠܘܳܬ ܟܝܳܢܳܐ ܠܳܐ ܡܶܬܦܢܶܐ ܗ̱ܘܳܐ.

ܘܟܰܕ ܝܰܘ̈ܡܳܬܳܐ ܚܰܡܫܳܐ ܥܒܰܪܘ܆ ܪ̈ܺܝܫܳܢܶܐ ܕܬܶܓ̈ܡܶܐ ܗܳܢܽܘܢ ܦܺܝܠܳܣܽܘ̈ܦܶܐ ܕܡܶܢ ܐܰܝܟܳܐ ܕܰܢܦܰܩ ܟܰܕ ܐܶܬܰܐܘܺܝܘ܆ ܬܪܶܝܢ ܡܶܢ ܐܰܚ̈ܶܐ ܡܫܰܕܪܺܝܢ ܗ̱ܘܰܘ ܕܰܢܥܰܩܒܽܘܢ ܘܢܶܒܨܽܘܢ ܠܕܽܘܟ̈ܝܳܬܳܐ ܗܳܠܶܝܢ ܐ̱ܚܪ̈ܳܝܳܬܳܐ ܘܡܰܕܒܪ̈ܳܝܳܬܳܐ ܕܛܽܘܪܳܐ ܗܰܘ܆ ܕܕܰܠܡܳܐ ܟܒܰܪ ܢܶܫܟܚܽܘܢܳܝܗ̱ܝ ܒܗܶܝܢ. ܕܰܐܒܥܶܕ ܓܶܝܪ ܒܕܽܘܟ̈ܝܳܬܳܐ ܗܳܠܶܝܢ ܕܝܰܬܺܝܪ ܚܰܪ̈ܒܳܢ ܡܣܰܒܪܺܝܢ ܗ̱ܘܰܘ ܥܠܰܘܗ̱ܝ. ܘܟܰܕ ܒܐ̱ܢܳܫܺܝ̈ܢ ܪ̈ܳܥܰܘܳܬܳܐ ܕܰܚܙܰܐܽܘܗ̱ܝ ܠܶܗ ܠܓܰܒܪܳܐ ܦܓܰܥܘ ܗܳܢܽܘܢ ܕܶܐܫܬܰܕܰܪܘ܆ ܘܰܒܗܽܘܢ ܐܶܬܚܰܫܰܚܘ ܡܕܰܒܪ̈ܳܢܶܐ ܕܽܐܘܪܚܳܐ ܘܰܡܥܰܕܪ̈ܳܢܶܐ ܕܰܒܥܳܬܳܐ܆ ܟܰܕ ܡܶܬܟܰܪܟܺܝܢ ܗ̱ܘܰܘ ܥܰܠ ܫܽܘ̈ܥܶܐ܆ ܠܘܳܬܶܗ ܕܓܽܘܒܳܐ ܟܰܕ ܠܳܐ ܩܰܕܶܡܘ ܚܙܰܐܽܘܗ̱ܝ. ܡܶܢ ܪܶܡܙܳܐ ܐܰ‌ܠܳܗܳܝܳܐ ܡܶܢܫܶܠܝ ܡܶܬܬܰܝܬܶܝܢ ܗ̱ܘܰܘ. ܘܩܳܝܡܺܝܢ ܗ̱ܘܰܘ ܥܠܶܝܗ̇ ܕܕܽܘܟܬܳܐ܆ ܐܰܝܟ ܕܥܰܠ ܡܛܐܠܘܢ ܕܕܰܗܒܳܐ ܕܰܡܛܰܫܰܝ. ܘܟܰܕ ܣܰܓܺܝ̈ܳܐܬܳܐ ܩܥܰܘ ܥܠܰܘܗ̱ܝ ܕܙܰܕܺܝܩܳܐ܆ ܘܩܰܫܝܳܐ ܘܒܰܥܪܺܝܪܳܝܳܐ ܘܗܳܠܶܝܢ ܕܰܐܝܟ ܗܳܟܰܢ ܩܪܰܐܽܘܗܝ܆ ܟܰܕ ܚܰܒܠܳܐ ܫܰܡܰܪܘ ܠܶܗ ܘܰܕܢܶܠܒܟܶܗ ܠܗܳܢܳܐ ܦܩܰܕܘ ܠܶܗ܆ ܘܰܠܡܰܚܣܶܢ ܦܝܳܣܳܐ ܥܰܒܕܽܘܗܝ܆ ܢܓܰܕܘ ܘܰܐܣܩܽܘܗ̱ܝ ܡܶܢ ܬܰܡܳܢ.

ܗܳܝ ܡܰܢ ܓܶܝܪ ܕܗܽܘ ܠܶܗ ܠܥܽܘܡܩܳܐ ܢܫܰܡܰܪ܆ ܦܫܺܝܩܬܳܐ ܐܺܝܬܶܝܗ̇ ܗ̱ܘܳܬ. ܗܳܝ ܕܶܝܢ ܕܡܶܢ ܬܰܡܳܢ ܢܶܣܰܩ܆ ܠܳܐ ܬܽܘܒ ܒܳܗ̇ ܒܰܕܡܽܘܬܳܐ ܐܺܝܬܶܝܗ̇ ܗ̱ܘܳܬ ܕܠܳܐ ܣܽܘܢܩܳܢܳܐ. ܐܶܠܳܐ ܐܰܝܟ ܕܰܒܣܽܘܓܳܐܐ ܥܰܠ ܥܽܘܕܪܳܢܳܐ ܕܰܐ̱ܚܪ̈ܳܢܶܐ ܣܢܺܝܩܳܐ ܗ̱ܘܳܬ. ܟܰܕ ܗܳܟܰܢܳܐ ܡܶܢ ܗܳܟܺܝܠ ܣܠܶܩ܆ ܘܠܳܐ ܗ̱ܘܳܐ ܐܰܝܟ ܕܡܶܢ ܓܽܘܒܳܐ ܕܕܳܘܝܽܘܬܳܐ ܐܰܝܟ ܗܳܝ ܕܰܟܬܺܝܒܳܐ^[22]܆ ܐܶܠܳܐ ܟܰܕ ܐܰܝܟ ܕܡܶܢ ܡܥܺܝܢܳܐ ܕܡܰܝ̈ܳܐ ܚܰܝ̈ܶܐ ܩܛܺܝܪܳܐܺܝܬ ܐܶܬܢܓܶܕ܆ ܡܶܬܬܰܢܰܚ ܗ̱ܘܳܐ ܘܒܳܟܶܐ. ܠܰܘ ܓܶܝܪ ܠܕܽܘܝܳܪܳܐ ܗܰܘ ܚܶܫܽܘܟܳܐ ܕܰܒܥܽܘܡܩܳܐ܆ ܐܶܠܳܐ ܠܥܶܢܝܳܢܳܐ ܕܰܠܘܳܬ ܐܰ‌ܠܳܗܳܐ ܗܰܘ ܕܰܕܠܳܐ ܛܽܘܥܝܰܝ ܘܠܳܐ ܐܰܫܺܝܕܳܐ ܘܰܕܠܳܐ ܦܶܗܝܳܐ ܘܕܰܡܠܶܐ ܗ̱ܘܳܐ ܢܽܘܗܪܳܐ ܡܶܬܚܰܫܰܒ ܗ̱ܘܳܐ. ܘܬܽܘܒ. ܕܢܶܗܘܶܐ ܐܰܟܚܕܳܐ ܥܰܡ ܐܰܚ̈ܶܐ ܡܶܬܶܐܠܶܨ ܗ̱ܘܳܐ.

ܘܟܰܕ ܟܰܫ ܘܕܰܝܰܪ ܥܰܡܗܽܘܢ ܙܰܒܢܳܐ ܕܰܬܠܳܬ ܫܢܰܝ̈ܳܐ ܒܦܰܓܪܳܐ ܒܰܠܚܽܘܕ܆ ܟܰܕ ܓܶܝܪ ܒܠܳܐ ܡܬܰܬܪܣܝܳܢܽܘܬܳܐ ܘܰܒܠܳܐ ܗܽܘܠܳܢܳܝܽܘܬܳܐ ܕܕܽܘܒܳܪܳܐ܆ ܘܰܒܪܶܥܝܳܢܳܐ ܦܳܪܽܘܚܳܐ ܕܢܰܦܫܳܐ܆ ܠܟܽܠܗܽܘܢ ܗܳܢܽܘܢ ܕܥܰܠ ‌ܐܰܪܥܳܐ ܥܒܰܪ܆ ܒܚܰܝ̈ܠܰܘܳܬܳܐ ܫܡܰܝܳܢ̈ܶܐ ܘܠܳܐ ܦܰܓܪ̈ܳܢܶܐ ܡܡܰܪܶܐ ܗ̱ܘܳܐ܆ ܠܘܳܬ ܬܠܢܫܝ ܩܪܺܝܬܳܐ ܕܗܳܟܰܢܳܐ ܡܶܬܩܰܪܝܳܐ ܗ̱ܘܳܬ ܐܳܙܶܠ ܗ̱ܘܳܐ. ܘܟܰܕ ܬܚܶܝܬ ܩܰܪܩܰܦܬܶܗ ܕܛܽܘܪܳܐ ܗܰܘ ܕܰܠܘܳܬܳܗ̇ ܥܳܡܪܺܝܢ ܥܳܡܽܘܪ̈ܶܝܗ̇ ܕܰܩܪܺܝܬܳܐ ܗܳܝ܆ ܒܰܝܬܽܘܢܳܐ ܚܰܕ ܙܥܽܘܪܳܐ ܘܦܺܝܠܳܣܽܘܦܺܝܣܳܐ ܚܙܳܐ܆ ܒܠܰܥ ܒܢܰܦܫܶܗ ܡܶܛܽܠ ܗܳܢܳܐ܆ ܘܪܰܓܶܗ ܘܪܰܚܡܶܗ ܠܡܰܥܡܪܳܐ ܕܒܶܗ܆ ܗܰܘ ܕܺܐܝܬܰܘܗ̱ܝ ܕܪܶܚܡܰܬ ܥܰܡܠܳܐ ܣܰܓܺܝܐܬܳܐ.

ܘܙܰܒܢܳܐ ܕܰܬܠܳܬ ܫܢܰܝ̈ܳܐ ܥܡܰܪ ܐܳܦ ܗܳܪܟܳܐ܆ ܟܰܕ ܒܫܽܘܘ̈ܫܳܛܶܐ ܕܝܰܬܺܝܪ ܪܳܡܺܝܢ ܕܰܓܠܺܝܙܽܘܬܳܐ ܕܡܶܢ ܬܽܘܪܣܳܝܳܐ܆ ܠܘܳܬ ܨܰܘܡܳܐ ܗܰܘ ܕܡܽܘܫܶܐ ܘܕܺܐ‌ܠܺܝܳܐ ܡܶܬܚܪܶܐ ܗ̱ܘܳܐ ܠܡܶܣܰܩ. ܡܶܬܚܰܫܰܒ ܗ̱ܘܳܐ ܓܶܝܪ܆ ܕܗܰܘ ܕܝܰܗ̱ܒ ܠܗܳܢܽܘܢ ܬܽܘܪܳܨܳܐ ܕܗܳܟܰܢܳܐ ܪܰܒ܆ ܩܕܳܡ ܛܰܝܒܽܘܬܳܐ ܗܳܝ ܕܫܰܟܶܢ ܠܰܒܢܰܝ̈ܢܳܫܳܐ ܟܰܕ ܕܢܰܚ ܠܗܽܘܢ ܒܝܰܕ ܡܶܐܬܺܝܬܶܗ ܕܒܰܒܣܰܪ܆ ܐܳܦ ܠܶܗ ܢܶܬܶܠ ܕܗܺܝ ܟܰܕ ܗܺܝ ܢܶܬܡܨܶܐ܆ ܟܰܕ ܗܺܝ ܟܰܕ ܗܺܝ ܚܘܺܝܚܽܘܬܳܐ ܡܰܥܶܠ. ܘܣܰܓܺܝ ܝܰܬܺܝܪܳܐܺܝܬ܆ ܟܡܳܐ ܕܰܒܝܰܕ ܨܰܘܡܶܗ ܕܺܝܠܶܗ ܗܰܘ ܕܨܳܡ ܡܕܰܒܪܳܢܳܐܺܝܬ ܗܰܘ ܕܡܶܛܽܠܳܬܰܢ ܐܶܬܒܰܣܰܪ܆ ܩܰܕܶܡ ܪܰܟܒܶܗ ܠܰܢ ܠܗܳܢܳܐ ܘܰܦܫܺܝܩܳܐ ܥܰܒܕܶܗ܆ ܟܰܕ ܡܶܫܟܰܚ ܗ̱ܘܳܐ ܡܰܢ ܐܳܦ ܕܢܶܥܒܪܺܝܘܗ̱ܝ ܠܡܶܢܝܳܢܳܐ ܗܰܘ ܕܰܐܪܒܥܺܝܢ ܝܰܘ̈ܡܳܬܳܐ܆ ܟܰܕ ܐܰ‌ܠܳܗܳܐ ‌ܐܺܝܬܰܘܗ̱ܝ ܘܡܳܪܶܗ ܕܰܟܝܳܢܳܐ܆ ܕܢܶܥܒܪܺܝܗ̇ ܕܶܝܢ ܠܰܡܫܽܘܚܬܳܐ ܗܳܝ ܕܡܽܘܫܶܐ ܘܕܺܐ‌ܠܺܝܳܐ ܒܗܳܕܶܐ ܠܳܐ ܨܒܳܐ܆ ܡܶܛܽܠ ܕܢܶܬܶܠ ‌ܐܰܬܪܳܐ ܠܗܰܘ ܕܰܡܢܰܣܶܐ ܗ̱ܘܳܐ ܕܢܶܬܩܰܪܰܒ ܠܘܳܬܶܗ ܐܰܝܟ ܕܰܠܘܳܬ ܒܰܪܢܳܫܳܐ ܡܶܬܩܰܪܒܳܢܳܐ܆ ܘܠܳܐ ܢܶܥܪܽܘܩ ܡܶܢ ܐܰܟܣܢܳܝܽܘܬܳܗ̇ ܘܠܳܐ ܡܶܬܩܰܪܒܳܢܽܘܬܳܗ̇ ܕܰܐ‌ܠܳܗܽܘܬܳܐ܆ ܒܗܰܘ ܕܟܰܕ ܢܦܰܠ ܒܶܗ ܐܶܙܕܟܺܝ ܘܶܐܙܕܢܶܩ^[23]܆ ܘܟܰܕ ܡܶܢ ܬܰܡܳܢ ܐܶܬܦܣܶܩܘ^[24] ܓܝܳܕܰܘ̈ܗ̱ܝ܆ ܡܶܢ ܗܳܢܽܘܢ ܕܒܰܡܫܺܝܚܳܐ ܗܰܝܡܶܢܘ ܡܶܙܕܟܶܐ ܒܕܰܪܳܐ.

ܟܰܕ ܗܳܠܶܝܢ ܐܶܬܚܰܫܰܒ ܫܶܡܥܽܘܢ ܗܰܘ ܫܰܦܺܝܪ ܕܶܚܠܬܳܐ ܘܙܰܕܺܝܩܳܐ܆ ܠܘܳܬ ܤܛܰܐܕܺܝܽܘܢ ܕܨܰܘܡܳܐ ܕܰܐܪܒܥܺܝܢ ܝܰܘ̈ܡܳܬܳܐ ܐܳܬܶܐ ܗ̱ܘܳܐ܆ ܟܰܕ ܦܩܰܕ ܕܡܶܢ ܠܒܰܪ ܢܶܬܬܫܺܝܥ ܬܰܪܥܳܐ ܕܒܰܝܬܽܘܢܳܐ ܗܰܘ ܒܛܺܝܢܳܐ܆ ܟܰܕ ܣܳܡ ܠܶܗ ܩܰܕܡܳܐܺܝܬ ܣܽܘܢܩܳܢܳܐ ܕܡܰܝ̈ܳܐ ܘܰܕܠܰܚܡܳܐ܆ ܟܰܕ ܡܚܰܘܶܐ ܗ̱ܘܳܐ ܐܳܦ ܒܗܳܕܶܐ ܡܰܟܺܝܟܽܘܬܳܗ̇ ܕܬܰܪܥܺܝܬܶܗ܆ ܘܰܒܗܽܘܢ ܒܣܽܘܥܪ̈ܳܢܶܐ ܡܰܘܕܶܐ ܗ̱ܘܳܐ܆ ܕܰܐܝܟ ܒܰܪܢܳܫܳܐ ܡܰܢ ܥܬܺܝܕ ܕܢܶܙܕܟܶܐ ܒܰܐܢܰܢ̈ܩܰܤ ܕܰܟܝܳܢܳܐ܆ ܒܟܰܦܢܳܐ ܘܰܒܨܶܗܝܳܐ܆ ܢܶܙܟܶܐ ܕܶܝܢ ܠܗܳܠܶܝܢ ܒܚܰܝܠܳܐ ܕܗܰܝܡܳܢܽܘܬܳܐ ܟܰܕ ܐܰ‌ܠܳܗܳܐ ܨܳܒܶܐ܆ ܐܰܝܟܰܢܳܐ ܕܳܐܦ ܐܰܝܟ ܦܰܘܠܽܘܤ ܢܺܐܡܰܪ: ܟܽܠܗܶܝܢ ܡܨܶܐ ܐ̱ܢܳܐ ܒܰܡܫܺܝܚܳܐ ܕܰܡܚܰܝܶܠ ܠܶܝ^[25].

ܕܗܳܕܶܐ ܕܶܝܢ ܚܘܺܝܚܽܘܬܳܐ ܛܳܒܬܳܐ ‌ܐܺܝܬܰܘܗ̱ܝ ܗ̱ܘܳܐ ܡܕܰܝܠܳܢܳܐ ܘܰܡܫܰܡܫܳܢܳܐ܆ ܒܰܐܣܽܘܤ ܗܰܘ ܕܰܒܗܰܘ ܙܰܒܢܳܐ ܐܰܝܟ ܢܳܡܽܘܣܳܐ ܥܺܕܬܳܢܳܝܳܐ܆ ܐܳܦ ܒܩܽܘܪ̈ܝܰܤ ܗܳܢܶܝܢ ܥܰܠ ܥܻ̈ܕܳܬܳܐ ܡܶܬܟܪܶܟ ܗ̱ܘܳܐ ܘܣܳܥܰܪ܆ ܘܳܐܦ ܕܰܟܢܽܘܫܝܳܐ ܕܓܰܒܪ̈ܶܐ ܡܰܐܬܶܝܢ ܦܺܝܠܳܣܽܘ̈ܦܶܐ ‌ܐܺܝܬܰܘܗ̱ܝ ܗ̱ܘܳܐ ܪܺܝܫ ܕܰܝܪܳܐ܆ ܠܗܳܢܽܘܢ ܕܗܳܟܰܢܳܐ ܝܺܨܺܝܦܳܐ ܗ̱ܘܳܬ ܡܣܰܪܩܽܘܬܳܐ ܘܗܳܝ ܕܢܶܗܘܽܘܢ ܡܰܝ̣ܺܝ̣ܬܺܝܢ ܠܥܳܠܡܳܐ܆ ܐܝܟܰܢܳܐ ܕܳܐܦܠܳܐ ܠܡܶܐܦܳܐ ܠܰܚܡܳܐ ܠܓܰܘ ܡܶܢ ܬܰܪܥܳܐ ܕܕܰܝܪܗܽܘܢ ܢܶܬܪܡܽܘܢ. ܟܰܕ ܠܳܐ ܪܰܚܝܳܐ ܘܠܳܐ ܩܶܢܝܳܢܳܐ^[26] ܐܺܝܬ ܗ̱ܘܳܐ ܠܗܽܘܢ܆ ܐܳܦܠܳܐ ܕܰܠܥܶܠ ܡܶܢ ܐܶܣܟܽܘܦܬܳܐ ܕܬܰܪܥܳܐ ܕܥܽܘܡܪܗܽܘܢ ܢܶܥܒܪܽܘܢ܆ ܐܶܠܳܐ ܕܰܢܣܰܟܽܘܢ ܗ̱ܘܰܘ ܠܬܽܘܪܣܳܝܳܐ܆ ܡܶܢ ܗܳܢܽܘܢ ܕܡܶܢ ܗܰܝܡܳܢܽܘܬܳܐ ܝܳܕܥܺܝܢ ܗ̱ܘܰܘ ܠܰܡܬܰܪܣܳܝܽܘ ܠܰܡܫܺܝܚܳܐ ܟܰܕ ܟܦܶܢ܆ ܘܰܕܢܶܚܙܽܘܢܳܝܗ̱ܝ ܟܰܕ ܒܒܶܝܬ ܐܰܣܺܝܪ̈ܶܐ ܚܒܺܝܫ^[27].

ܗܳܢܳܐ ܗܳܟܺܝܠ ܬܰܡܺܝܡܳܐ ܒܐܣܘܤ܆ ܡܶܢ ܒܳܬܰܪ ܚܽܘܕܪܳܐ ܕܰܐܪܒܥܺܝܢ ܝܰܘ̈ܡܳܬܳܐ܆ ܟܰܕ ܦܬܰܚ ܠܬܰܪܥܳܐ ܕܒܰܝܬܽܘܢܳܐ ܗܰܘ܆ ܫܰܠ̈ܡܶܐ ܡܰܢ ܘܠܳܐ ܒܨܺܝܪ̈ܶܐ ܐܶܫܟܰܚ ܠܠܰܚ̈ܡܶܐ ܗܳܢܽܘܢ ܘܰܕܠܳܐ ܡܶܕܶܡ ܛܳܥܶܐ ܡܶܢܗܽܘܢ܆ ܥܶܣܪܳܐ ܓܶܝܪ ܐܺܝܬܰܝܗܽܘܢ ܗ̱ܘܰܘ ܒܡܶܢܝܳܢܳܐ܆ ܕܡܰܠܝܳܐ ܕܶܝܢ ܠܩܽܘܠܬܳܐ ܗܳܝ ܕܡܰܝ̈ܳܐ. ܠܶܗ ܕܶܝܢ ܠܰܐܓܽܘܢܺܝܣܛܳܐ ܗܰܘ ܚܰܝܠܬܳܢܳܐ܆ ܡܶܢ ܒܳܬܰܪ ܨܰܘܡܳܐ ܗܰܘ ܕܟܽܠܶܗ ܗܳܢܳܐ܆ ܘܬܰܟܬܽܘܫܳܐ ܗܰܘ ܣܰܓܺܝ ܠܒܽܘܟ̈ܝܶܐ ܕܰܠܘܳܬ ܫ̈ܺܐܕܶܐ ܕܗܳܟܰܢܳܐ ‌ܐܺܝܬܰܘܗ̱ܝ ܗ̱ܘܳܐ ܥܡܺܝܠܳܐ ܘܰܡܬܺܝܚܳܐ܆ ܠܽܘܩܒܰܠ ܓܶܝܪ ܡܚܰܡ̈ܣܢܳܢܘܳܬܳܐ ܗܳܢܶܝܢ ܕܝܰܬܺܝܪ ܪܰܘܪ̈ܒܳܢ܆ ܕܰܪܳܐ ܕܝܰܬܺܝܪ ܚܰܪܺܝܦ ܡܩܺܝ̈ܡܳܢ ܪ̈ܽܘܚܶܐ ܗܳܢܶܝܢ ܚܰܣܳܡ̈ܳܬܳܐ܆ ܘܝܰܬܺܝܪ ܒܰܥܪܺܝܪܳܐܺܝܬ ܩܳܝ̈ܡܳܢ ܠܽܘܩܒܰܠܗܶܝܢ܆ ܐܶܫܟܚܶܗ ܕܰܪܡܶܐ. ܕܠܳܐ ܢܫܰܡܬܳܐ ܥܰܠ ‌ܐܰܪܥܳܐ܆ ܘܰܕܪܳܬܰܚ ܒܪܰܡ ܒܪܽܘܚܳܐ܆ ܘܕܰܒܗܰܕܳܡܰܘ̈ܗ̱ܝ ܡܰܢ ܡܫܰܪܰܝ ܗ̱ܘܳܐ܆ ܕܰܥܠܰܝܡܳܝ ܗ̱ܘܳܐ ܕܶܝܢ ܘܰܙܪܺܝܙܳܐ ܒܚܺܝܨܽܘܬܳܐ ܕܬܰܪܥܺܝܬܶܗ. ܘܟܰܕ ܢܣܰܒ ܥܶܩܳܪ̈ܶܐ ܡܶܕܶܡ ܗܳܠܶܝܢ ܝܰܪ̈ܩܳܢܳܝܶܐ ܘܕܺܐܝܬܰܝܗܽܘܢ ܡܶܬܰܐܟ̈ܠܳܢܶܐ ܠܰܒܢܰܝ̈ܢܳܫܳܐ܆ ܕܰܒܩܰܠܺܝܠ ܩܰܠܺܝܠ ܢܦܰܣܶܩ ܘܰܢܕܰܩܶܩ ܒܫܶܢܰܘ̈ܗ̱ܝ܆ ܘܕܰܢܫܰܡܰܪ ܠܟܰܪܣܳܐ ܦܳܩܶܕ ܗ̱ܘܳܐ ܠܶܗ܆ ܟܰܕ ܩܰܕܡܳܐܺܝܬ ܒܫܰܘܬܳܦܽܘܬܳܐ ܕܐ̱ܪ̈ܳܙܶܐ ܐܰ‌ܠܳܗܳܝ̈ܶܐ ܚܰܝܠܶܗ ܠܰܐܬܠܺܝܛܳܐ.

ܘܟܰܕ ܗܳܟܰܢܳܐ ܐܶܬܚܠܶܡ ܘܡܶܢ ܕܪܺܝܫ ܐܶܬܚܰܝܠܰܬ ܢܫܰܡܬܶܗ܆ ܬܽܘܒ ܘܬܽܘܒ ܠܨܰܘܡܳܐ ܗܰܘ ܩܛܺܝܪܳܝܳܐ ܘܰܕܒܽܐܘܠܨܳܢܳܐ܆ ܒܗܽܘܓܳܝܳܐ^[28] ܣܒܺܝܣܳܐ ܟܝܳܢܳܝܳܐ ܘܠܳܐ ܩܛܺܝܪܳܝܳܐ ܥܰܒܕܶܗ܆ ܟܰܕ ܗܺܝ ܪܶܓܬܳܐ ܕܡܶܐܟܽܘܠܬܳܐ ܒܰܕܡܽܘܬ ܐ̱ܢܳܫ ܐܳܪܚܳܝܳܐ ܕܡܶܢ ܙܰܒܢܳܐ ܚܰܙܺܝܩ܆ ܡܶܢ ܒܳܬܰܪ ܐܰܪܒܥܺܝܢ ܝܰܘ̈ܡܳܬܳܐ ܦܳܢܝܳܐ ܐܳܬܝܳܐ ܠܰܟܝܳܢܳܐ. ܟܰܕ ܗܳܟܰܢܳܐ ܕܶܝܢ ܡܩܰܘܶܐ ܗ̱ܘܳܐ ܕܠܳܐ ܬܽܘܪܣܳܝܳܐ܆ ܢܳܩܦܳܐܺܝܬ ‌ܐܺܝܬܰܘܗ̱ܝ ܗ̱ܘܳܐ ܐܳܦ ܕܠܳܐ ܫܶܢܬܳܐ܆ ܘܟܰܕ ܐܺܝܬ ܠܶܗ ܗܰܘܢܳܐ ܕܰܡܠܶܐ ܡܶܢ ܥܺܝܪܽܘܬܳܐ ܐܰ‌ܠܳܗܳܝܬܳܐ܆ ܘܡܶܢ ܩܪܳܒܳܐ ܕܰܠܘܳܬ ܫ̈ܺܐܕܶܐ ܕܠܳܐ ܣܳܒܰܥ ܗ̱ܘܳܐ.

ܡܶܢ ܗܳܪܟܳܐ ܐܳܦ ܩܰܘܡܳܐ ܪܳܡܳܐ ܗܰܘ ܕܥܰܠ ‌ܐܶܤܛܽܘܢܳܐ ܦܺܝܠܳܘܣܽܘܦܺܝܬܺܝܢܳܐ ܗܘ̣ܳܐ ܡܶܢܶܗ. ܐܰܝܟܰܢܳܐ ܓܶܝܪ ܕܐ̱ܢܳܫ ܓܰܢ̱ܒܳܪܳܐ ܘܰܙܪܺܝܙܳܐ܆ ܟܰܕ ܐ̱ܢܳܫܺܝ̈ܢ ܡܰܩܪ̈ܒܳܢܶܐ ܚܰܣܺܝ̈ܢܶܐ ܘܥܰܣ̈ܩܰܝ ܠܰܩܪܳܒܳܐ ܢܺܐܬܽܘܢ ܥܠܰܘܗ̱ܝ܆ ܘܢܰܩܪܒܽܘܢ ܥܰܡܶܗ ܘܢܶܐܠܨܽܘܢܳܝܗ̱ܝ ܒܰܩܪܳܒܳܐ܆ ܢܳܦܶܩ ܡܰܢ ܠܽܘܩܒܰܠܗܽܘܢ܆ ܘܟܰܕ ܢܳܦܶܠ ܥܠܰܝܗܽܘܢ ܡܳܚܶܐ ܠܗܽܘܢ ܘܥܳܪ̈ܽܘܩܶܐ ܥܳܒܶܕ ܠܗܽܘܢ܆ ܠܳܐ ܕܶܝܢ ܡܶܬܬܦܺܝܤ ܕܬܶܣܦܰܩ ܠܶܗ ܡܰܦܽܘܠܬܗܽܘܢ ܕܗܳܠܶܝܢ܆ ܐܶܠܳܐ ܪܳܕܶܦ ܠܗܽܘܢ ܐܳܦ ܟܰܕ ܥܳܪܩܺܝܢ܆ ܟܰܕ ܕܠܳܐ ܚܰܘܣܳܢ ܡܳܚܶܐ ܒܣܰܝܦܳܐ ܘܚܳܨܶܕ ܐܰܝܟ ܕܰܠܫܶܒ̈ܠܶܐ ܠܩܰܪ̈ܩܦܳܬܳܐ ܕܰܒܥܶܠ̈ܕܒܳܒܶܐ܆ ܘܰܥܕܰܡܳܐ ܠܟܽܠܶܗ ܗܳܢܳܐ ܠܳܐ ܡܢܺܝܚ ܠܝܰܡܺܝܢܶܗ ܗܳܝ ܕܠܳܐ ܠܳܐܝܳܐ܆ ܥܕܰܡܳܐ ܕܢܶܛܪܽܘܕ ܐܶܢܽܘܢ ܠܗܳܢܽܘܢ ܕܶܐܬܰܘ ܥܠܰܘܗ̱ܝ ܠܘܳܬ ܡܰܫ̈ܟܢܶܐ ܕܺܝܠܗܽܘܢ܆ ܐܰܘ ܢܶܥܒܶܕ ܐܶܢܽܘܢ ܕܢܶܬܓܰܘܣܽܘܢ ܒܰܡܕܺܝܢ̈ܳܬܳܐ ܕܺܝܠܗܽܘܢ܆ ܘܢܶܗܦܽܘܟ ܢܩܺܝܡ ܥܠܰܝܗܽܘܢ ܗܽܘ ܐܽܘܠܨܳܢܳܐ ܕܰܩܪܳܒܳܐ܆ ܒܶܗ ܟܰܕ ܒܶܗ ܒܰܙܢܳܐ ܡܶܣܬܒܰܪ ܠܺܝ ܐܳܦ ܫܶܡܥܽܘܢ ܗܰܘ ܙܰܕܺܝܩܳܐ܆ ܕܟܰܕ ܠܚܺܐܦ̈ܶܐ ܡܫܰܚ̈ܠܦܶܐ ܕܫ̈ܺܐܕܶܐ ܒܥܶܠ̈ܕܒܳܒܶܐ ܘܡܰܩܪ̈ܒܳܢܶܐ ܙܟܳܐ ܘܚܰܝܶܒ ܥܰܠ ‌ܐܰܪܥܳܐ܆ ܘܚܰܘܺܝ ܐܶܢܽܘܢ ܥܳܪ̈ܽܘܩܶܐ ܒܕܰܪ̈ܶܐ ܙܪ̈ܺܝܙܶܐ ܘܓܰܢ̱ܒܳܪ̈ܶܐ ܕܰܡܚܰܡܣܢܳܢܽܘܬܳܐ܆ ܒܰܡܫܰܪܬܚܽܘܬܳܗ̇ ܕܰܚܘܺܝܚܽܘܬܳܐ ܨܒܳܐ ܕܢܶܦܽܘܩ ܠܽܘܩܒܰܠܗܽܘܢ ܐܳܦ ܠܶܗ ܠܳܐܐܰܪ܆ ܘܰܢܚܰܘܶܐ ܐܶܢܽܘܢ ܥܳܪ̈ܽܘܩܶܐ ܐܳܦ ܡܶܢ ܬܰܡܳܢ܆ ܒܝܰܕ ܬܶܫܡܶܫܬܳܐ ܕܡܰܙܡܽܘܪ̈ܶܐ ܕܰܒܪܰܘܡܳܐ ܘܚܰܝ̈ܶܐ ܠܳܐ ܗܽܘܠܳܢܳܝ̈ܶܐ.

ܘܳܐܦܠܳܐ ܓܶܝܪ ܥܰܠ ‌ܐܶܤܛܽܘܢܳܐ ܐܰܗܡܺܝ ܡܶܢ ܨܰܘܡܳܐ ܗܰܘ ܢܰܩܺܝܦܳܐ ܘܡܰܠܘܬܳܐ ܕܰܐܪܒܥܺܝܢ ܝܰܘ̈ܡܳܬܳܐ܆ ܗܰܘ ܕܒܶܗ ܒܰܬܠܳܬܺܝܢ ܫܢܰܝ̈ܳܐ ܟܢܺܝܫܳܐܺܝܬ ܕܠܳܐ ܦܣܳܩ ܐܰܬܡܰܗ ܘܕܰܚܶܠ‌ܐܶܢܽܘܢ ܠܫ̈ܺܐܕܶܐ܆ ܟܰܕ ܠܳܐ ܬܽܘܒ ܡܰܢ ܐܰܟܙܢܳܐ ܕܥܰܠ ܬܰܪܥܳܐ ܠܡܶܬܰܒ ܐܰܘ ܠܡܰܓܳܣܽܘ ܡܨܶܐ ܗ̱ܘܳܐ܆ ܐܶܡܰܬܝ ܕܚܺܝܨܽܘܬܳܐ ܗܳܝ ܟܝܳܢܳܝܬܳܐ ܕܦܰܓܪܳܐ ܡܫܰܪܝܳܐ ܗ̱ܘܳܬ ܡܶܟܺܝܠ ܘܡܰܪܦܝܳܐ܆ ܟܰܕ ܨܰܘܡܳܐ ܘܠܳܐ ܡܶܬܬܰܪܣܝܳܢܽܘܬܳܐ ܗܳܝ ܕܗܳܟܰܢܳܐ ܐܰܪܺܝܟܳܐ ܗ̱ܘܳܬ ܡܶܫܬܰܘܫܛܳܐ ܗ̱ܘܳܬ܆ ܐܶܠܳܐ ܩܳܐܶܡ ܗ̱ܘܳܐ ܐܰܡܺܝܢܳܐܺܝܬ.

ܘܩܰܕܡܳܐܺܝܬ ܡܰܢ܆ ܟܰܕ ܩܰܝܣܳܐ ܐܰܩܺܝܡ ܠܘܳܬܶܗ ܕܶܐܤܛܽܘܢܳܐ܆ ܕܰܐܝܟ ܗܰܘ ܕܥܰܡܶܗ ܡܰܢ ܐܰܟܚܕܳܐ ܝܰܥܺܝ ܗ̱ܘܳܐ ܘܰܐܟܚܕܳܐ ܡ̣ܟܳܢ ܗ̱ܘܳܐ܆ ܡܳܬܰܚ ܗ̱ܘܳܐ ܕܶܝܢ ܘܥܳܒܰܪ ܐܳܦ ܠܥܶܠ ܡܶܢ ܪܺܝܫܶܗ ܕܶܐܤܛܽܘܢܳܐ܆ ܕܡܶܫܟܰܚ ܗ̱ܘܳܐ ܠܡܶܣܡܟܶܗ ܟܰܕ ܒܨܰܘܡܳܐ ܡܶܬܟܰܦܰܦ ܗ̱ܘܳܐ܆ ܐܰܝܟ ܕܡܶܛܽܠ ܗܳܝ ܕܠܳܐ ܢܶܨܛܠܶܐ ܘܢܶܦܶܠ ܘܥܰܠ ‌ܐܰܣܳܪܳܐ ܕܚܰܒ̈ܠܶܐ ܢܶܣܬܢܶܩ. ܠܚܰܪܬܳܐ ܕܶܝܢ܆ ܟܰܕ ܐܳܦܠܳܐ ܥܰܠ ܥܽܘܕܪܳܢܳܐ ܗܳܢܳܐ ܐܶܣܬܢܶܩ܆ ܗܰܘ ܩܛܺܝܪܳܢܳܐ ܛܳܒܳܐ ܕܡܰܠܟܽܘܬܳܐ ܕܰܫܡܰܝܳܐ^[29]܆ ܘܰܕܡܶܛܽܠܗܳܕܶܐ ܒܛܰܝܒܽܘܬܳܐ ܡܫܰܪܬܰܚܬܳܐ ܘܥܰܬܺܝܪܬܳܐ ܕܡܶܢ ܠܥܶܠ ‌ܐܶܬܒܰܣܰܡ܆ ܘܰܕܣܰܓܺܝ ܐܰܚܶܒ ܐܰܝܟ ܗܳܝ ܕܰܟܬܺܝܒܳܐ ܘܝܰܬܺܝܪ ܣܰܓܺܝ ܢܣܰܒ. ܘܰܕܥܰܡ ܦܰܘܠܽܘܤ ܡܰܙܥܶܩ: ܕܚܽܘܒܶܗ ܕܰܡܫܺܝܚܳܐ ܐܰܚܺܝܕ ܠܰܢ ܕܕܳܢܰܢ ܗܳܕܶܐ܆ ܕܶܐܢ ܚܰܕ ܚܠܳܦ ܟܽܠܗܽܘܢ ܒܢܰܝ̈ܢܳܫܳܐ ܡܺܝܬ܆ ܐܰܪܰܐ ܟܽܠܗܽܘܢ ܒܢܰܝ̈ܢܳܫܳܐ ܡܺܝܬܘ܆ ܘܰܚܠܳܦ ܟܽܠܗܽܘܢ ܡܺܝܬ܆ ܐܰܝܟܰܢܳܐ ܕܗܳܢܽܘܢ ܕܚܰܝ̣ܺܝ̣ܢ ܠܳܐ ܬܽܘܒ ܠܢܰܦܫܗܽܘܢ ܢܶܗܘܽܘܢ ܚܰܝ̣ܺܝ̣ܢ܆ ܐܶܠܳܐ ܠܗܰܘ ܕܰܚܠܳܦܰܝܗܽܘܢ ܡܺܝܬ ܘܩܳܡ^[30].

ܘܰܒܗܳܕܶܐ ܬܰܪܥܺܝܬܳܐ܆ ܒܟܽܠܫܳܥ ܡܰܚܶܒ ܗ̱ܘܳܐ܆ ܠܗܳܝ ܕܙܰܒܢܺܝ̈ܢ ܣܰܓܺܝ̈ܳܐܢ ܚܠܳܦ ܡܫܺܝܚܳܐ ܢܡܽܘܬ. ܡܶܛܽܠܗܳܕܶܐ ܟܺܝܬ܆ ܟܰܕ ܗܳܝ ܚܕܳܐ ܡܶܢ ܪ̈ܶܓܠܰܘܗ̱ܝ܆ ܠܳܐ ܣܶܦܩܰܬ ܠܶܗ ܠܘܳܬ ܥܰܡܠܳܐ܆ ܐܶܠܳܐ ܩܰܕܡܳܐܺܝܬ ܡܰܢ ܐܶܬܥܰܒܝܰܬ܆ ܒܳܬܰܪܟܶܢ ܕܶܝܢ ܐܶܫܬܰܚܠܰܦ ܠܫܰܠܽܘܦ̈ܚܶܐ ܗܽܘ ܥܽܘܒܝܳܢܳܐ ܘܶܐܨܛܰܪܝܰܬ̣ ܘܪܶܗܠܳܐ ܕܰܡܠܶܐ ܣܰܪܝܽܘܬ ܪܺܝܚܳܐ ܣܽܘܓܳܐܐ ܕܬܰܘܠ̈ܥܶܐ ܡܰܪܨܢܳܐ ܗ̱ܘܳܬ ܘܡܰܦܩܳܐ ܐܰܡܺܝܢܳܐܺܝܬ܆ ܒܟܺܐܒܳܐ ܗܰܘ ܕܕܰܐܝܟ ܗܳܢܳܐ ܠܳܐ ܡܰܪܓܶܫ ܗ̱ܘܳܐ. ܟܰܕ ܕܶܝܢ ܠܬܰܪܥܺܝܬܶܗ ܩܒܰܥ ܒܡܶܠܰܘ̈ܗ̱ܝ ܕܡܳܪܝܳܐ ܕܶܐܡܰܪ: ܗܰܘ ܕܶܝܢ ܕܰܡܣܰܝܒܰܪ ܥܕܰܡܳܐ ܠܚܰܪܬܳܐ ܗܳܢܳܐ ܢܶܬܦܪܶܩ^[31]܆ ܘܬܽܘܒ ܒܰܡܣܰܝܒܪܳܢܽܘܬܳܐ ܕܺܝܠܟܽܘܢ ܬܶܩܢܽܘܢ ܢܰܦ̈ܫܳܬܟܽܘܢ^[32]܆ ܠܳܐ ܠܽܐܘܡܳܢܽܘܬܳܐ ܕܳܐܣܰܘ̈ܳܬܳܐ ܩܰܒܶܠ܆ ܘܠܳܐ ܒܽܘܝܳܐܳܐ ܕܰܢܦܺܐܫܳܐ ܐ̱ܚܪܺܢܳܐ ܗܰܘ ܕܡܶܢ ܒܢܰܝ̈ܢܳܫܳܐ ܡܶܫܬܟܰܚ ܒܦܽܘܪ̈ܣܶܐ ܕܗܰܘܢܳܐ. ܐܶܠܳܐ ܡܥܰܙܶܐ ܗ̱ܘܳܐ ܒܗܽܘܢ ܒܥܰܡ̈ܠܶܐ܆ ܟܰܕ ܝܰܪ̈ܚܶܐ ܬܶܫܥܳܐ ܟܽܠܗܽܘܢ ܣܰܝܒܰܪ ܐܶܢܽܘܢ ܠܟܺܐܒ̈ܶܐ ܗܳܠܶܝܢ ܚܰܪ̈ܺܝܦܶܐ ܘܰܡܨܰܪ̈ܦܳܢܶܐ܆ ܘܰܠܢܽܘܟ̈ܬܳܬܳܐ ܠܳܐ ܡܶܬܒܰܝ̈ܳܐܢܝܳܬܳܐ ܗܳܢܶܝܢ ܕܬܰܘܠ̈ܥܶܐ.

ܘܠܰܒܢܰܝ̈ܢܳܫܳܐ ܡܰܢ ܠܳܐ ܡܶܬܩܰܪܒܳܢܳܐ ‌ܐܺܝܬܰܘܗ̱ܝ ܗ̱ܘܳܐ܆ ܡܶܛܽܠ ܣܰܪܝܽܘܬ ܪܺܝܚܳܐ ܕܗܰܘ ܫܽܘܚܢܳܐ܆ ܐܺܝܬ ܗ̱ܘܳܐ ܠܶܗ ܕܶܝܢ ܕܳܐܬܝ̈ܳܢ ܠܘܳܬܶܗ ܘܡܶܬܥܰܢ̈ܝܳܢ ܥܰܡܶܗ܆ ܪ̈ܽܘܚܶܐ ܡܶܬܗܰܘ̈ܢܳܢܝܳܬܳܐ ܘܠܳܐ ܗܽܘܠܳܢܳܝ̈ܳܬܳܐ ܕܡܰܠܰܐܟ̈ܶܐ. ܗܳܢܳܐ ‌ܐܺܝܬܰܘܗ̱ܝ ܗ̱ܘܳܐ ܐܰܪܰܐ܆ ܦܪܶܕܬܳܐ ܕܚܰܪܕܠܳܐ܆ ܗܳܝ ܟܺܝܬ ܕܠܳܗ̇ ܕܳܡܝܳܐ ܡܰܠܟܽܘܬܳܐ ܕܰܫܡܰܝܳܐ. ܗܳܝ ܕܰܙܥܽܘܪܬܳܐ ܡܰܢ ܐܺܝܬܶܝܗ̇ ܝܰܬܺܝܪ ܡܶܢ ܟܽܠܗܽܘܢ ܙܰܪ̈ܥܽܘܢܶܐ ܕܰܒܝܰܪܩܳܐ܆ ܟܰܕ ܪܳܒܝܳܐ ܕܶܝܢ܆ ܠܘܳܬ ܐܽܘܪܟܳܐ ܕܺܐܝܠܳܢܳܐ ܡܶܬܡܰܬܚܳܐ ܘܰܠܘܳܬ ܣܰܘ̈ܟܶܐ ܥܰܒܺܝ̈ܛܳܬܳܐ܆ ܐܰܝܟܰܢܳܐ ܕܟܰܕ ܢܶܐܬܝ̈ܳܢ ܦܳܪ̈ܚܳܬܳܐ ܕܰܫܡܰܝܳܐ܆ ܢܶܫܟ̈ܚܳܢ ܠܡܶܫܟܰܢ ܒܗܶܝܢ^[33].

ܐܶܡܰܬܝ ܕܶܝܢ ܕܡܶܢ ܫܽܘܚܢܳܐ ܗܰܘ ܐܰܓܗܺܝ ܟܰܕ ܐܶܬܕܰܪܰܫ ܒܫܶܢ̈ܕܶܐ ܕܡܶܢܶܗ܆ ܗܳܝܕܶܝܢ ܟܺܝܬ ܗܳܝܕܶܝܢ܆ ܐܳܦ ܝܰܬܺܝܪܳܐܺܝܬ ܐܰܘ ܡܶܢ ܩܕܺܝܡ܆ ܟܽܠܶܗ ܡܰܢ ܣܦܳܪ ܝܰܡܳܐ܆ ܟܽܠܶܗ ܕܶܝܢ ܝܰܒܫܳܐ܆ ܠܘܳܬܶܗ ܡܫܰܕܪܺܝܢ ܗ̱ܘܰܘ ܠܗܽܘܢ ܠܗܳܢܽܘܢ ܕܰܟܪܺܝܗܺܝܢ ܗ̱ܘܰܘ܆ ܘܒܳܐܕܫ̈ܶܐ ܡܫܰܚ̈ܠܦܶܐ ܕܟܽܘܪ̈ܗܳܢܶܐ ܡܶܙܕܰܪܒܺܝܢ ܗ̱ܘܰܘ. ܐܰܝܟܰܢܳܐ ܕܳܐܦ ܗܳܢܽܘܢ ܕܰܒܬܰܪ̈ܬܰܝܗܶܝܢ ܪ̈ܶܓܠܰܝܗܽܘܢ ܚܓܺܝܪܺܝܢ ܗ̱ܘܰܘ܆ ܕܽܘܪ̈ܟܳܬܳܐ ܚܠܺܝ̈ܡܳܬܳܐ ܢܶܣܒܽܘܢ. ܘܗܳܢܽܘܢ ܕܒܶܐܕܢܰܝ̈ܗܽܘܢ ܡܡܰܚܶܝܢ ܗ̱ܘܰܘ܆ ܘܳܐܦ ܟܺܝܬ ܘܳܐܦ ܒܒܳܒ̈ܳܬܗܽܘܢ ܬܽܘܒ܆ ܘܳܐܦ ܕܰܐܣܺܝܪ ܗ̱ܘܳܐ ܠܶܫܳܢܗܽܘܢ܆ ܡܰܥܒ̈ܕܳܢܶܐ ܡܶܟܺܝܠ ܘܠܳܐ ܡܶܬܥܰܟܪ̈ܳܢܶܐ ܢܶܗܘܽܘܢ ܐܺܝܬ ܠܗܽܘܢ ܠܪ̈ܶܓܫܶܐ܆ ܟܰܕ ܩܳܪܒܺܝܢ ܗ̱ܘܰܘ ܠܶܗ ܒܰܠܚܽܘܕ܆ ܠܫ̈ܺܐܕܶܐ ܕܶܝܢ ܗܳܟܰܢܳܐ ܕܠܺܝܠܳܐܺܝܬ ܪܳܕܶܦ ܗ̱ܘܳܐ ܠܗܽܘܢ ܡܶܢ ܗܳܢܽܘܢ ܕܡܶܬܬܰܟܒܺܝܢ ܗ̱ܘܰܘ ܡܶܢܗܽܘܢ܆ ܐܰܝܟܰܢܳܐ ܕܳܐܦܠܳܐ ܐ̱ܢܳܫ ܗܳܟܰܢܳܐ ܦܫܺܝܩܳܐܺܝܬ ܠܕܶܒܳܒ̈ܶܐ ܢܶܬܡܨܶܐ ܠܡܶܛܪܰܕ.

ܐܷܠܳܐ ܬܽܘܒ ܐܳܦ ܠܡܰܪ̈ܕܘܳܬܳܐ ܟܺܝܬ ܘܰܠܡܰܚ̈ܘܳܬܳܐ ܕܟܺܐܢܳܐܺܝܬ ܡܶܬܬܰܝ̈ܬܝܳܢ ܗ̱ܘܰܝ̈ ܡܶܢ ܐܰ‌ܠܳܗܳܐ܆ ܒܬܰܟܫܶܦܬܳܐ ܒܰܠܚܽܘܕ ܫܳܪܶܐ ܗ̱ܘܳܐ. ܘܰܠܟܰܘܪ̈ܳܢܶܐ ܡܰܢ ܕܳܐܐܰܪ ܕܰܬܠܶܝܢ ܗ̱ܘܰܘ ܠܥܶܠ ܡܶܢ ܪܺܝܫܳܐ ܕܰܒܢܰܝ̈ܢܳܫܳܐ܆ ܥܰܡܳܗ̇ ܕܰܨܠܽܘܬܶܗ ܕܗܳܢܳܐ ܡܶܚܕܳܐ܆ ܡܶܛܪ̈ܶܐ ܚܒܺܝ̈ܛܶܐ ܡܩܰܒܶܠ ܗ̱ܘܳܐ ܘܫܳܪܶܐ ܗ̱ܘܳܐ ܠܗܽܘܢ. ܘܠܰܓܠܺܝܙܽܘܬ ܦܺܐܪ̈ܶܐ ܗܳܝ ܕܳܚܒܳܠܳܐ ܗ̱ܘܳܬ܆ ܠܰܡܫܰܪܬܚܽܘܬ ܦܺܐܪ̈ܶܐ ܡܫܰܚܠܶܦ ܗ̱ܘܳܐ܆ ܟܰܪ ܒܪܶܕܝܳܐ ܫܦܺܝܥܳܐ ܘܥܰܬܺܝܪܳܐ ܘܠܰܘ ܒܛܽܘ̈ܦܶܐ܆ ܡܙܰܘ̈ܝܳܢ ܗ̱ܘܰܝ̈ ܠܳܗ̇ ܥܢܳܢ̈ܶܐ ܠܰܐܪܥܳܐ. ܠܡܰܘܬܳܢ̈ܶܐ ܕܶܝܢ ܕܡܶܢ ܚܽܘܒܳܠܳܐ܆ ܩܰܛܰܣܛܰܣܺܝܤ ܬܰܩܢܬܳܐ ܘܰܚܠܺܝܡܬܳܐ ܡܫܰܚܠܦܳܐ ܗ̱ܘܳܬ. ܘܰܠܡܶܬܬܰܝ̈ܬܝܳܢܘܳܬܳܐ ܟܽܘܠܳܢܳܝ̈ܳܬܳܐ ܘܰܠܡܰܚ̈ܘܳܬܳܐ ܕܥܰܠ ܟܽܠܶܗ ܥܰܡܳܐ܆ ܕܰܐܝܟ ܐܰܝܟܰܢ܆ ܠܚܽܘܒܳܠܳܐ ܕܡܳܫܽܘܛܳܐ܆ ܠܚܰܝܠܳܐ ܐܳܟܽܘܠܳܐ ܕܩܰܡܨܳܐ܆ ܬܰܟܫܶܦܬܳܐ ܕܰܒܕܶܡ̈ܥܶܐ ܪ̈ܳܚܡܳܬ ܥܰܡܠܳܐ ܡܶܨܛܰܒܥܳܐ ܗ̱ܘܳܬ܆ ܟܳܠܝܳܐ ܗ̱ܘܳܬ ܘܰܡܒܰܛܠܳܐ.

ܠܗܳܠܶܝܢ ܟܺܝܬ ܕܳܐܦ ܩܰܕܶܡ ܗ̱ܘܳܐ ܐܳܡܰܪ ܐܶܡܰܬܝ ܕܰܥܬܺܝ̈ܕܳܢ ܗ̱ܘܰܝ̈ ܕܢܶܗܘ̈ܝܳܢ ܗܽܘ ܙܰܕܺܝܩܳܐ܆ ܟܰܕ ܒܫܽܘܟܳܢܳܐ ܕܰܢܒܺܝܽܘܬܳܐ ܥܰܬܺܝܪ ܗ̱ܘܳܐ܆ ܘܟܰܕ ܠܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܕܢܶܬܪܕܽܘܢ ܡܰܥܗܶܕ ܗ̱ܘܳܐ܆ ܕܰܒܝܰܕ ܬܝܳܒܽܘܬܳܐ ܢܶܦܪܩܽܘܢ ܡܶܢܗܽܘܢ ܠܪܽܘܓܙܳܐ ܗܰܘ ܕܡܶܬܓܙܶܡ ܗ̱ܘܳܐ ܠܗܽܘܢ. ܘܟܰܕ ܐܰܬܪܳܐ ܕܶܝܢ ܚܰܕ ܗܳܝܕܶܝܢ ܡܶܢ ܗܳܠܶܝܢ ܕܺܝܠܰܢ ܥܽܘܩܒܪ̈ܶܐ ܪܰܘܪ̈ܒܶܐ ܓܣܳܐ ܒܣܰܓܝܽܐܘܬܳܐ ܡܶܢ ܗܳܠܶܝܢ ܕܚܰܩܠܳܐ܆ ܐܰܝܟܰܢܳܐ ܕܳܐܦ ܠܥܶܪ̈ܒܶܐ ܕܪܳܥܶܝܢ ܢܶܐܟܠܽܘܢ ܗ̱ܘܰܘ܆ ܐܰܝܟܰܢܳܐ ܕܫܳܡܥܺܝܢܰܢ ܡܶܢ ܟܬܳܒܳܐ ܐܰ‌ܠܳܗܳܝܳܐ ܕܡܶܫܬܰܥܶܐ ܥܰܠ ‌ܐܰܪܥܳܐ ܗܳܝ ܕܰܐܫܕܘܕܝ̈ܐ^[34]܆ ܕܛܰܪܛܥܰܬ ܘܰܐܦܩܰܬ ܒܰܙܒܰܢ ܠܕܰܐܝܟ ܗܳܢܳܐ ܓܶܢܣܳܐ ܕܪ̈ܰܚܫܳܐ܆ ܐܰܩܺܝܡܳܗ̇ ܗ̱ܘܳܐ ܗܽܘ ܙܰܕܺܝܩܳܐ ܠܡܰܣܰܩܬܗܽܘܢ ܕܗܳܠܶܝܢ ܘܠܺܝܠܺܝܕܽܘܬܗܽܘܢ. ܟܰܕ ܬܠܳܬܳܐ ܨܠܺܝ̈ܒܶܐ ܦܩܰܕ ܗ̱ܘܳܐ ܠܗܽܘܢ ܠܩܽܘܪ̈ܝ̣ܳܝ̣ܶܐ ܗܳܢܽܘܢ ܕܥܳܡܪܺܝܢ ܗ̱ܘܰܘ ܬܰܡܳܢ ܕܢܶܩܒܥܽܘܢ ܗ̱ܘܰܘ ܒܰܚܕܳܪ ܗܰܘ ܐܰܬܪܳܐ܆ ܘܕܰܢܩܺܝܡܽܘܢ ܩܰܘܡܳܐ ܕܓܽܘܕ̈ܶܐ ܕܫܰܗܪܳܐ ܒܬܶܫܡܶܫܬܳܐ ܕܙܽܘܡܳܪܳܐ ܘܒܰܨܠܽܘܬܳܐ.

ܒܝܰܕ ܓܶܝܪ ܥܰܡ̈ܠܶܐ ܕܕܳܡܶܝܢ ܠܗܳܢܽܘܢ ܕܰܡܚܰܡܣܢܳܢܽܘܬܳܐ ܒܰܝܬܳܝܬܳܐ ܗܳܝ ܕܺܝܠܶܗ܆ ܠܟܽܠܢܳܫ ܡܚܰܦܶܛ ܗ̱ܘܳܐ ܕܰܢܢܺܝܚܶܗ ܠܰܐܠܳܗܳܐ. ܟܰܕ ܒܡܰܠܦܳܢ̈ܘܳܬܳܐ ܣܒܺܝ̈ܣܳܬܳܐ ܡܶܬܚܰܫܰܚ ܗ̱ܘܳܐ ܒܟܽܠ ܝܰܘܡܳܐ܆ ܡܶܢ ܫܳܥܬܳܐ ܗܳܝ ܕܰܬܫܰܥ ܥܕܰܡܳܐ ܠܰܨ̈ܠܰܘܳܬܳܐ ܪ̈ܰܡܫܳܝܳܬܳܐ܆ ܘܟܰܕ ܠܢܽܘܪܳܐ ܗܳܝ ܕܠܳܐ ܕܳܥܟܳܐ ܡܰܥܗܶܕ ܗ̱ܘܳܐ ܒܟܽܠܙܒܰܢ܆ ܘܰܠܬܰܫܢܺܝܩܳܐ ܗܰܘ ܕܰܠܥܳܠܰܡ܆ ܘܟܰܕ ܕܫܳܘܶܐ ܠܡܶܬܗܰܝܡܳܢܽܘ ܟܰܐܢܳܐܺܝܬ ܡܶܬܚܙܶܐ ܗ̱ܘܳܐ ܒܗܳܠܶܝܢ ܕܡܰܠܶܦ ܗ̱ܘܳܐ܆ ܡܶܛܽܠ ܩܰܘܡܳܐ ܗܰܘ ܬܡܺܝܗܳܐ ܘܡܰܥܡܪܳܐ ܕܥܰܠ ܟܺܐܦܳܐ܆ ܗܰܘ ܕܗܳܟܰܢܳܐ ‌ܐܺܝܬܰܘܗ̱ܝ ܝܰܬܺܝܪ ܪܳܡܳܐ ܘܝܰܬܺܝܪ ܐܰ‌ܠܺܝܨܳܐ܆ ܘܚܰܝ̈ܶܐ ܕܠܳܐ ܬܽܘܪܣܳܝܳܐ ܘܕܽܘܒܳܪܳܐ ܠܳܐ ܗܽܘܠܳܢܳܝܳܐ܆ ܐܝܟ ܢܒܺܝܽܘܬܳܐ ܕܶܐܫܰܥܝܳܐ ܗܳܝ ܕܳܐܡܪܳܐ: ܡܰܢܽܘ ܢܰܘܕܰܥܟܽܘܢ ܕܢܽܘܪܳܐ ܝܳܩܕܳܐ؟ ܡܰܢܽܘ ܢܰܘܕܰܥܟܽܘܢ ܠܰܐܬܪܳܐ ܗܰܘ ܕܰܠܥܳܠܰܡ؟ ܗܰܘ ܕܰܡܗܰܠܶܟ ܒܙܰܕܺܝܩܽܘܬܳܐ. ܗܰܘ ܕܰܡܡܰܠܶܠ‌ ܐܽܘܪܚܳܐ ܬܪܺܝܨܬܳܐ. ܗܰܘ ܕܣܳܢܶܐ ܠܳܐ ܢܳܡܽܘܣܳܝܽܘܬܳܐ ܘܥܰܘܳܠܽܘܬܳܐ܆ ܘܠܺܐܝܕܰܘ̈ܗ̱ܝ ܡܰܗܦܶܟ ܡܶܢ ܫܽܘܚܕ̈ܶܐ܆ ܟܰܕ ܡܰܘܩܰܪ ܐܰܕܢܰܘ̈ܗ̱ܝ ܕܠܳܐ ܫܡܰܥ ܕܺܝܢܳܐ ܥܰܘܠܳܐ ܕܰܕܡܳܐ܆ ܟܰܕ ܡܥܰܡܶܨ ܥܰܝܢܰܘ̈ܗ̱ܝ ܕܠܳܐ ܢܶܚܙܶܐ ܥܰܘܳܠܽܘܬܳܐ. ܗܳܢܳܐ ܢܶܥܡܰܪ ܒܰܡܥܰܪܬܳܐ ܪܳܡܬܳܐ ܕܫܽܘܥܳܐ ܚܰܣܺܝܢܳܐ. ܠܰܚܡܳܐ ܢܶܬܺܝܗܶܒ ܠܶܗ܆ ܘܡܰܝ̈ܳܐ ܕܺܝܠܶܗ ܡܗܰܝܡܺܢܝܢ^[35].

ܡܕܰܒܪܳܢܽܘܬܳܐ ܓܶܝܪ ܡܶܕܶܡ ܐܰ‌ܠܳܗܳܝܬܳܐ܆ ܘܠܰܘ ܡܶܬܚܰܘܝܳܢܽܘܬܳܐ ܐ̱ܚܪܳܢܝܳܐܺܝܬ܆ ‌ܐܺܝܬܰܘܗ̱ܝ ܗ̱ܘܳܐ ܩܰܘܡܳܐ ܗܰܘ ܐܳܐܱܪܳܝܳܐ ܕܥܰܠ ‌ܐܶܤܛܽܘܢܳܐ܆ ܘܚܰܝ̈ܶܐ ܗܳܢܽܘܢ ܠܳܐ ܡܶܬܕܰܪ̈ܟܳܢܶܐ^[36] ܠܰܐܝܠܶܝܢ ܕܰܒܒܶܣܪܳܐ ܐܰܣܺܝܪܺܝܢ܆ ܕܰܠܣܰܓܺܝ̈ܶܐܐ ܡܶܢ ܒܰܪܒܪ̈ܳܝܶܐ ܕܳܚ̈ܠܰܝ ܠܫ̈ܺܐܕܶܐ ܘܒܰܥܪܺܝܪ̈ܳܝܶܐ܆ ܡܗܰܕܶܝܢ ܗ̱ܘܰܘ ܠܘܳܬ ܫܪܳܪܳܐ. ܗܳܢܽܘܢ ܟܺܝܬ ܕܰܠܩܰܕܺܝ̈ܫܶܐ ܗܳܢܽܘܢ ܕܰܒܛܽܘܪ̈ܶܐ ܟܣܶܝܢ܆ ܘܒܰܚܪܽܘܪ̈ܶܐ ܕܰܐܪܥܳܐ ܡܛܰܫܶܝܢ܆ ܠܳܐ ܡܬܽܘܡ ܦܫܺܝܩܳܐܺܝܬ ܐܳܬܶܝܢ ܗ̱ܘܰܘ ܒܳܥܶܝܢ ܗ̱ܘܰܘ ܠܗܽܘܢ. ܠܘܳܬ ܕܶܝܢ ܚܙܳܬܳܐ ܗܳܝ ܕܗܳܟܰܢܳܐ ܐܺܝܬܶܝܗ̇ ܐܰܟܣܢܳܝܬܳܐ ܘܰܡܥܰܠܰܝܬܳܐ ܘܳܐܐܱܪܳܝܬܳܐ܆ ܘܰܡܚܰܡܣܢܳܢܽܘܬܳܐ ܕܫܶܡܥܽܘܢ ܙܰܕܺܝܩܳܐ܆ ܘܳܐܦ ܗܶܢܽܘܢ ܡܶܢ ܢܶܦܫܗܽܘܢ ܐܳܬܶܝܢ ܗ̱ܘܰܘ܆ ܟܰܕ ܡܶܛܽܠܳܬܳܗ̇ ܕܗܳܕܶܐ ܡܶܢ ܥܝ̈ܳܕܶܐ ܒܰܝܬܳܝ̈ܶܐ ܕܺܝܠܗܽܘܢ ܘܳܐܦ ܡܶܢ ܕܽܘܟܝ̈ܳܬܗܽܘܢ ܡܰܫܩܠܺܝܢ ܗ̱ܘܰܘ ܘܡܶܬܬܙܺܝܥܺܝܢ.

ܘܰܐܟܙܢܳܐ ܕܥܰܠ ܝܺܠܺܝܕܽܘܬܶܗ ܕܒܰܒܣܰܪ ܕܦܳܪܽܘܩܰܢ܆ ܠܰܡܓܽܘܫ̈ܶܐ ܕܰܠܘܳܬ ܐܶܤܛܪܽܘܢܽܘܡܺܝܰܐ ܦܥܺܝܪ ܗ̱ܘܳܐ ܚܶܟܗܽܘܢ ܠܺܝܕܰܥܬܳܐ ܕܰܐ‌ܠܳܗܳܐ ܢܓܰܕ ܐܶܢܽܘܢ ܟܰܘܟܒܳܐ ܗܰܘ ܠܳܐ ܡܥܰܝܕܳܐ ܟܰܕ ܐܶܬܚܙܺܝ܆ ܗܳܟܰܢܳܐ ܐܳܦ ܠܦܳܪ̈ܣܳܝܶܐ ܕܰܠܘܳܬ ܕܶܚܠܬܳܐ ܕܫܶܡܫܳܐ ܘܰܕܣܰܗܪܳܐ ܬܳܘܪܺܝܢ ܗ̱ܘܰܘ܆ ܘܰܠܛܰܝ̣ܳܝ̣̈ܶܐ ܗܳܢܽܘܢ ܕܠܺܐܝܩܳܪܳܗ̇ ܕܐܰܦܪܽܘܕܺܝܛܺܐ^[37]܆ ܠܕܶܢܚܳܐ ܕܟܰܘܟܒܳܐ ܗܰܘ ܪܰܡܫܳܝܳܐ ܣܳܓܕܺܝܢ ܗ̱ܘܰܘ܆ ܗܰܘ ܕܝܰܬܺܝܪ ܢܰܨܺܝܚ ܛܳܒ ܡܶܢ ܗܳܠܶܝܢ ܟܰܘ̈ܟܒܶܐ ܐ̱ܚܪ̈ܳܢܳܝܶܐ܆ ܡܶܢ ܛܳܥܝܽܘܬܳܐ ܐܰܒܳܗܳܝܬܳܐ ܕܺܝܠܗܽܘܢ ܡܰܪܚܶܩ ܗ̱ܘܳܐ ܠܗܽܘܢ ܫܶܡܥܽܘܢ ܗܰܘ ܙܰܕܺܝܩܳܐ. ܟܰܕ ܒܡܶܨܥܰܬ ܐܳܐܰܪ ܡܶܬܚܙܶܐ ܗ̱ܘܳܐ܆ ܘܰܠܪܽܘܚܩܳܐ ܡܫܰܡܰܪ ܗ̱ܘܳܐ ܙܰܠܺܝ̈ܩܶܐ ܕܬܶܕܡܪ̈ܳܬܶܗ ܘܰܕܚܰܝܰܘ̈ܗ̱ܝ ܡܰܠܰܐܟܳܝ̈ܶܐ ܘܠܳܐ ܦܰܓܪ̈ܳܢܶܐ܆ ܗܳܢܽܘܢ ܕܺܐܝܬܰܝܗܽܘܢ ܡܰܢܗܰܪ ܗ̱ܘܳܐ ܠܗܳܢܽܘܢ ܕܰܒܚܶܫܽܘܟܳܐ ܕܠܳܐ ܝܺܕܰܥܬܳܐ ܝܳܬܒܺܝܢ ܗ̱ܘܰܘ^[38].

ܡܶܢ ܗܳܪܟܳܐ ܐܳܦ ܡܰܠܟܳܐ ܗܰܘ ܕܦܳܪ̈ܣܳܝܶܐ ܐܶܬܕܰܡܰܪ ܒܶܗ܆ ܐܰܝܟܰܢܳܐ ܕܰܠܗܰܝܡܳܢܽܘܬܳܐ ܢܰܝܬܶܝܘܗ̱ܝ܆ ܘܳܐܦ ܠܫܰܘܬܳܦܽܘܬܳܐ ܒܰܝܬܳܝܬܳܐ ܕܺܝܠܶܗ܆ ܗܳܝ ܟܺܝܬ ܕܫܶܐܠܰܬ ܕܡܶܫܚܳܐ ܕܰܡܒܰܪܰܟ ܢܶܬܬܰܝܬܶܐ ܠܶܗ ܡܶܢ ܠܘܳܬܶܗ ܕܩܰܕܺܝܫܳܐ܆ ܐܰܝܟ ܐܳܣܝܽܘܬܳܐ ܡܶܕܶܡ ܡܥܰܕܪܳܢܺܝܬܳܐ ܕܡܶܢ ܒܺܝ̈ܫܳܬܳܐ. ܐܳܦ ܠܰܡܓܽܘ̈ܫܶܐ ܕܶܝܢ ܗܳܢܽܘܢ ܕܰܠܢܽܘܪܳܐ ܡܫܰܡܫܺܝܢ܆ ܢܶܣܝܳܢܳܐ ܝܰܗ̱ܒ ܕܛܰܝܒܽܘܬܳܐ ܒܰܝܬܳܝܬܳܐ ܕܺܝܠܶܗ ܘܰܕܚܰܝܠܳܐ܆ ܐܰܝܟܰܢܳܐ ܟܺܝܬ ܕܪܰܒܳܐ ܢܰܟܪܙܽܘܢܳܝܗ̱ܝ . ܘܕܰܠܥܶܠ ܡܶܢ ܒܰܪ ܐ̱ܢܳܫܳܐ ‌ܐܺܝܬܰܘܗ̱ܝ ܢܰܘܕܽܘܢ.

ܐܳܦ ܓܶܝܪ ܐ̱ܢܳܫ ܡܶܢܗܽܘܢ ܕܡܰܪܙܒܳܢܳܐ ܡܶܫܬܰܡܰܗ ܗ̱ܘܳܐ܆ ܐܶܙܕܟܺܝ ܡܶܢ ܫܽܘܦܪܳܐ ܕܰܛܠܺܝܬܳܐ ܚܕܳܐ ܦܳܪܣܳܝܬܳܐ܆ ܕܺܐܝܬܶܝܗ̇ ܗ̱ܘܳܬ ܟܪܺܝܣܛܝܳܢܺܝܬܳܐ ܒܫܰܦܺܝܪܽܘܬ ܕܶܚܠܬܳܐ. ܘܟܰܕ ܒܬܽܘܠܬܳܐ ܐܺܝܬܶܝܗ̇ ܗ̱ܘܳܬ܆ ܠܘܳܬ ܙܽܘܘܳܓܳܐ ܡܦܺܝܤ ܗ̱ܘܳܐ ܕܢܶܣܒܺܝܗ̇. ܘܠܰܐܒܳܗܶܝ̈ܗ̇ ܬܳܒܰܥ ܗ̱ܘܳܐ܆ ܕܢܶܫܕܟܽܘܢܳܗ̇ ܠܶܗ ܠܰܛܠܺܝܬܳܐ ܒܰܡܟܺܝܪܽܘܬܳܐ. ܗܳܝ ܕܶܝܢ ܟܰܕ ܚܳܬ̣ܡܳܐ ܕܰܨܠܺܝܒܳܐ ܥܰܠ ܒܶܝܬ ܥܰܝܢܶܝ̈ܗ̇ ܪܶܫܡܰܬ̣܆ ܡܶܫܬܰܐܠܳܐ ܗ̱ܘܳܬ ܡܶܢ ܣܽܘܥܪܳܢܳܐ܆ ܘܛܰܡܐܽܘܬܳܐ ܡܫܰܡܗܳܐ ܗ̱ܘܳܬ ܠܫܰܘܬܳܦܽܘܬܳܐ ܗܳܝ ܕܰܠܘܳܬ ܕܳܚܶܠ ܠܫ̈ܺܐܕܶܐ.

ܗܰܘ ܕܶܝܢ ܟܰܕ ܒܚܰܫܳܐ ܕܰܠܒܰܪ ܡܶܢ ܡܶܠܬܳܐ ܡܶܫܬܰܠܗܰܒ ܗ̱ܘܳܐ܆ ܘܥܰܡ ܟܶܢܫܳܐ ܡܙܰܝܢܳܐ ܐܶܬܳܐ ܥܠܶܝܗ̇. ܚܰܛܦܳܗ̇ ܠܰܛܠܺܝܬܳܐ. ܘܰܩܛܺܝܪܳܐܺܝܬ ܐܰܘܒܠܳܗ̇. ܘܟܰܕ ܚܳܙܶܐ ܗ̱ܘܳܐ ܠܳܗ̇ ܕܡܶܕܶܡ ܡܶܕܶܡ ܨܳܒܝܳܐ ܗ̱ܘܳܬ ܕܬܶܬܦܰܣܰܩ܆ ܐܰܘ ܕܬܶܫܬܰܘܬܰܦ ܠܶܗ ܒܡܰܫܟ̣ܒܳܐ ܕܰܠܒܰܪ ܡܶܢ ܢܳܡܽܘܣܳܐ. ܟܰܕ ܡܰܚ̈ܘܳܬܳܐ ܠܳܐ ܡܶܬܰܐܣܝܳܢ̈ܝܳܬܳܐ ܣܳܡ ܥܠܶܝܗ̇܆ ܘܰܠܒܶܝܬ ܐܰܣܺܝܪ̈ܶܐ ܐܰܫܠܡܳܗ̇܆ ܘܢܶܣܝܳܢܳܐ ܕܡܳܐܢ̈ܶܐ ܡܫܰܢ̈ܩܳܢܶܐ ܩܰܪܶܒ ܠܳܗ̇܆ ܠܚܰܪܬܳܐ ܠܥܰܒܕܰܘ̈ܗ̱ܝ ܦܳܩܶܕ ܗ̱ܘܳܐ܆ ܕܟܰܕ ܟܺܐܦܳܐ ܕܣܰܓܺܝ ܪܰܒܳܐ ܬܳܠܶܝܢ ܒܨܰܘܪܳܗ̇܆ ܢܶܫܕܽܘܢܳܗ̇ ܥܰܠ ܫܶܦ̈ܥܶܐ ܗܳܢܽܘܢ ܕܰܒܗܽܘܢ ܕܶܩܠܰܬ ܐܰܟܚܕܳܐ ܡܶܬܬܰܝܬܶܐ ܥܰܡ ܦܪܳܬ܆ ܘܡܶܠܶܐܳܐ ܣܰܓܺܝܳܐܐ ܡܫܰܡܠܶܐ.

ܟܰܕ ܚܙܳܬ ܕܶܝܢ ܥܠܰܝܡܬܳܐ ܗܳܝ ܕܰܡܫܺܝܚܳܐ܆ ܠܩܺܝܢܕܽܘܢܽܘܤ ܗܰܘ ܕܗܳܟܰܢܳܐ ܓܠܶܐ ܗ̱ܘܳܐ܆ ܟܰܕ ܥܰܝܢܶܝ̈ܗ̇ ܠܘܳܬ ܫܡܰܝܳܐ ܐܰܪܺܝܡܰܬ܆ ܘܰܒܬܰܪܥܺܝܬܳܗ̇ ܚܶܬܡܰܬ ܠܦܰܪܨܽܘܦܳܗ̇܆ ܡܶܛܽܠ ܟܺܝܬ ܕܒܺܐܝܕܳܗ̇ ܠܳܐ ܡܰܨܝܳܐ ܗ̱ܘܳܬ܆ ܠܒܺܝܟܳܐ ܗ̱ܘܳܬ ܓܶܝܪ܆ ܘܣܶܦ̈ܘܳܬܳܗ̇ ܐܰܙܺܝܥܰܬ܆ ܟܽܠܶܗ ܗܳܢܳܐ ܒܰܠܚܽܘܕ ܐܶܡܰܪܬ. ܐܰ‌ܠܳܗܶܗ ܕܫܶܡܥܽܘܢ ܙܰܕܺܝܩܳܐ܆ ܩܽܘܡ ܠܺܝ܆ ܘܰܐܘܫܶܛ ܠܺܝ ܐܺܝܕܳܐ ܒܗܳܕܶܐ ܫܳܥܬܳܐ ܕܽܐܘܠܨܳܢܳܐ ܗܳܢܳܐ܆ ܡܶܛܽܠ ܟܺܝܬ ܕܡܶܛܽܠ ܗܰܝܡܳܢܽܘܬܳܐ ܕܒܳܟ ܐܳܒܕܳܐ ܐ̱ܢܳܐ. ܘܗܳܢܽܘܢ ܡܰܢ ܟܰܕ ܗܳܠܶܝܢ ܐܶܡܪܰܬ܆ ܥܰܠ ܡܰܝ̈ܳܐ ܫܕܰܐܽܘܗ̇.

ܫܶܡܥܽܘܢ ܕܶܝܢ ܩܰܒܠܳܗ̇܆ ܐܰܝܟܰܢܳܐ ܕܩܺܝܛܽܘܤ ܠܝܰܘܢܳܢ. ܘܟܰܕ ܒܺܐܝܕܳܗ̇ ܠܰܒܟܳܗ̇. ܥܰܠ ܝܰܒܫܳܐ ܐܰܪܡܳܗ̇܆ ܟܰܕ ܠܶܐܣܳܪܳܐ ܗܰܘ ܕܟܺܐܦܳܐ ܦܣܰܩ ܡܶܢܳܗ̇. ܐܶܢ ܟܺܝܬ ܟܰܕ ܦܳܪܽܘܚܳܐ ܒܝܰܕ ܐܳܐܰܪ ܐܶܬܬܰܝܬܺܝ ܗܽܘ ܩܰܕܺܝܫܳܐ܆ ܠܗܳܕܶܐ ܬܶܕܡܽܘܪܬܳܐ ܣܥܰܪ. ܐܰܟܙܢܳܐ ܕܥܰܠ ܚܰܒܩܽܘܩ ܢܒܺܝܳܐ ܟܬܺܝܒ ܕܩܳܡ ܥܰܠ ܓܽܘܒܳܐ ܕܕܳܢܺܝܐܶܝܠ^[39]܆ ܘܶܐܢ ܟܺܝܬ ܚܰܕ ܡܶܢ ܚܰܝ̈ܠܰܘܳܬܳܐ ܡܰܠܰܐܟܳܝ̈ܶܐ܆ ܟܰܕ ܒܰܚܙܳܬܶܗ ܕܫܶܡܥܽܘܢ ܐܶܣܬܰܟܰܡ܆ ܡܶܢ ܩܺܝܢܕܽܘܢܽܘܤ ܗܰܘ ܚܰܛܦܳܗ̇ ܠܰܛܠܺܝܬܳܐ. ܝܳܕܰܥ ܠܗܳܕܶܐ ܐܰ‌ܠܳܗܳܐ ܗܰܘ ܕܬܶܕܡܪ̈ܳܬܳܐ܆ ܡܰܠܽܘܢ ܕܶܝܢ ܕܗܰܘ. ܘܡܳܢܳܐ ܙܳܕܶܩ ܣܰܓܺܝ̈ܳܐܬܳܐ ܠܡܺܐܡܰܪ܆ ܠܳܐ ܡܶܣܬܰܟܝܳܢܳܐܺܝܬ ܩܳܡܰܬ ܥܰܠ ‌ܐܰܒܳܗܶܝ̈ܗ̇ ܗܺܝ ܥܠܰܝܡܬܳܐ܆ ܗܳܢܽܘܢ ܕܶܝܢ ܟܰܕ ܒܰܬܡܺܝܗܽܘܬܳܗ̇ ܕܰܚܙܳܬܳܐ ܬܘܰܪܘ^[40]܆ ܘܰܒܪܶܚܡܬܳܐ ܕܰܟܝܳܢܳܐ ܫܘܰܪܘ܆ ܘܒܰܩܕܳܠܳܗ̇ ܕܰܛܠܺܝܬܳܐ ܐܰܪܡܺܝܘ ܐܺܝܕܰܝ̈ܗܽܘܢ܆ ܡܢܰܫܩܺܝܢ ܗ̱ܘܰܘ ܠܳܗ̇. ܡܕܰܡܥܺܝܢ ܗ̱ܘܰܘ. ܟܰܕ ܫܳܡܥܺܝܢ ܕܰܡܬܰܢܝܳܐ ܙܢܳܐ ܕܦܽܘܪܩܳܢܳܗ̇. ܡܫܰܒܚܺܝܢ ܗ̱ܘܰܘ ܠܰܡܫܺܝܚܳܐ ܗܰܘ ܕܦܰܪܩܳܗ̇. ܗܰܘ ܕܳܐܦ ܠܪܳܚܘܡܳܐ ܗܰܘ ܕܠܳܐ ܐܰ‌ܠܳܗ ܘܩܳܛܽܘܠܳܗ̇ ܕܰܛܠܺܝܬܳܐ܆ ܬܒܰܥ ܕܰܝܳܢܳܐ ܕܩܰܫܝܽܘܬܶܗ.

ܟܰܕ ܓܶܝܪ ܫܳܪܽܘܬܳܐ ܥܳܒܶܕ ܗ̱ܘܳܐ܆ ܘܡܰܓܶܤ ܗ̱ܘܳܐ ܥܰܠ ܬܰܫܘܺܝܬܶܗ܆ ܟܰܕ ܓܰܒܪܳܐ ܚܰܕ ܕܚܺܝܠܳܐ ܩܳܡ ܥܠܰܘܗ̱ܝ ܕܰܐܚܺܝܕ ܗ̱ܘܳܐ ܣܰܝܦܳܐ ܒܝܰܡܺܝܢܶܗ܆ ܘܰܡܚܳܝܗ̱ܝ ܥܰܠ ܪܺܝܫܶܗ ܒܰܦܣܳܩܳܐ ܬܪܺܝܨܳܐ܆ ܝܰܒܺܝܫܳܐ ܥܰܒ̣ܕܶܗ ܥܕܰܡܳܐ ܠܛܶܦܪ̈ܰܘܗ̱ܝ ܒܓܰܒܳܐ ܗܰܘ ܕܝܰܡܺܝܢܳܐ ܕܦܰܓܪܶܗ. ܘܡܰܘܕܶܐ ܗ̱ܘܳܐ ܒܳܗ̇ ܒܡܰܪܳܚܽܘܬܳܐ܆ ܘܰܠܬܳܒܽܘܥܳܐ ܕܡܰܪܳܚܽܘܬܳܐ ܐܳܡܰܪ ܗ̱ܘܳܐ ܕܺܐܝܬܰܘܗ̱ܝ ܐܰ‌ܠܳܗܳܐ ܕܢܳܨܪ̈ܳܝܶܐ. ܘܣܺܝܡ ܗ̱ܘܳܐ ܩܕܳܡ ܦܳܪ̈ܣܳܝܶܐ ܚܙܳܬܳܐ ܕܚܺܝܠܬܳܐ ܐܰܟܚܕܳܐ܆ ܘܡܰܪܕܽܘܬܳܐ ܕܗܳܝ ܕܠܳܐ ܢܰܪܡܶܐ ܐ̱ܢܳܫ ܐܺܝܕܳܐ ܛܪܽܘܢܳܝܬܳܐ ܥܰܠ ܟܪ̈ܺܝܣܛܝܳܢܶܐ.

ܗܳܠܶܝܢ ܐܰܒܳܗܶܝ̈ܗ̇ ܕܰܒܬܽܘܠܬܳܐ ܗܳܝ ܟܰܕ ܐܶܬܰܘ ܠܰܣܝܳܓ̣ܬܶܗ ܕܩܰܕܺܝܫܳܐ ܐܶܫܬܰܥܺܝܘ. ܟܰܕ ܗܳܠܶܝܢ ܗܳܫܳܐ ܫܳܡ̈ܥܳܢ ܐܢ̱ܬܶܝܢ܆ ܟܽܠܟܶܝܢ ܗܳܢܶܝܢ ܕܺܐܝܬܰܝܟܶܝܢ ܟܢܺܝ̈ܟܳܬܳܐ ܡܶܢ ܢܶܫ̈ܶܐ ܠܢܰܟܦܽܘܬܳܐ ܐܰܚܶܒܶܝ̈ܢ. ܘܶܐܡܗ̈ܳܬܳܐ ܡܰܢ܆ ܗܳܟܰܢܳܐ ܠܰܒ̈ܢܳܬܗܶܝܢ ܢܪ̈ܰܒܝܳܢ. ܒܢ̈ܳܬܳܐ ܕܶܝܢ܆ ܗܳܟܰܢܳܐ ܠܝܽܘܠܦܳܢܳܐ ܕܰܐܒܳܗܰܝ̈ܗܶܝܢ ܡܗܰܝܡ̈ܢܶܐ ܘܠܰܒܬܽܘܠܽܘܬܳܐ ܢܶܛܪ̈ܳܢ.

ܐܷܠܳܐ ܢܺܐܡܰܪ ܐ̱ܢܳܫ ܟܒܰܪ܆ ܕܰܠܦܳܪ̈ܣܳܝܶܐ ܡܰܢ܆ ܗܳܟܰܢܳܐ ‌ܐܺܝܬܰܘܗ̱ܝ ܗ̱ܘܳܐ ܫܶܡܥܽܘܢ ܟܚܺܝܕܳܐ܆ ܘܰܕܡܰܬܘܰܪ ܗ̱ܘܳܐ ܠܗܽܘܢ ܒܢܶܣܝܳܢܳܐ ܘܰܒܫܶܡܥܳܐ. ܠܛܰܝ̣ܳܝ̣̈ܶܐ ܕܶܝܢ ܠܳܐ ܬܽܘܒ܆ ܘܠܳܐ ܣܳܟ ܗܳܟܰܢܳܐ. ܐܶܠܳܐ ܣܰܓܺܝ ܝܰܬܺܝܪܳܐܺܝܬ܆ ܠܗܳܢܽܘܢ ‌ܐܺܝܬܰܘܗ̱ܝ ܗ̱ܘܳܐ ܝܰܬܺܝܪ ܕܰܚܺܝܠܳܝܳܐ ܘܝܰܬܺܝܪ ܡܝܰܩܪܳܐ. ܟܰܕ ܓܶܝܪ ܡܰܠܟܬܳܐ ܗܳܝ ܕܺܝܠܗܽܘܢ ܡܰܪܒܥܳܐ ܠܳܐ ܡܰܦܪܝܳܢܳܐ ܐܺܝܬ ܗ̱ܘܳܐ ܠܳܗ̇܆ ܘܺܐܝܙܓܰܕܽܘܬܳܐ ܕܓܰܒܪ̈ܶܐ ܫܳܘ̈ܝ̣ܰܝ̣ ܠܡܶܠܬܳܐ ܫܰܕܪܰܬ ܠܘܳܬܶܗ ܕܩܰܕܺܝܫܳܐ܆ ܕܬܶܗܘܶܐ ܐܶܡܳܐ ܕܰܒܪܳܐ ܫܶܐܠܰܬ. ܘܟܰܕ ܗܘ̣ܳܬ܆ ܠܦܺܐܪܳܐ ܕܚܶܒܠܳܐ ܠܘܳܬܶܗ ܕܰܣܝܳܓ̣ܬܳܐ ܐܰܝܬܝܰܬ̣ܶܗ܆ ܗܳܝ ܕܢܶܫ̈ܶܐ ܠܳܐ ܡܶܬܬܕܺܝܫܳܢܺܝܬܳܐ ܐܺܝܬܶܝܗ̇ ܗ̱ܘܳܬ. ܘܟܰܕ ܡܶܛܽܠܗܳܕܶܐ ܠܒܰܪ ܡܶܢܶܗ ܕܰܛܝܳܪܳܐ ܩܳܝܡܳܐ ܗ̱ܘܳܬ. ܘܰܠܩܳܠܳܗ̇ ܠܪܰܘܡܳܐ ܐܰܪܺܝܡܰܬ ܠܘܳܬܶܗ ܕܣܳܒܳܐ ܟܰܕ ܥܰܠ ‌ܐܶܤܛܽܘܢܳܐ ܩܳܐܶܡ ܗ̱ܘܳܐ ܡܰܙܥܩܳܐ ܗ̱ܘܳܬ܆ ܡܶܛܪܳܐ ܕܰܨܠܰܘ̈ܳܬܳܟ ܚܰܦ̈ܝܳܬܳܐ ܐܳܘ ܐܰܒܳܐ܆ ܘܠܳܐ ܗ̱ܘܳܐ ܟܰܪܣܳܐ ܕܺܝܠܝ܆ ܐܰܘܥܝܰܬ̣ ܠܺܝ ܠܗܳܕܶܐ ܫܶܒܠܳܐ. ܩܰܒܶܠ ܪܺܝܫܺܝܬܳܐ ܕܚܰܩܠܳܐ ܠܳܐ ܡܰܘܠܕܳܢܺܝܬܳܐ. ܘܟܰܕ ܪܬܰܡ ܓܽܘܚܟܳܐ ܗܰܘ ܕܡܶܬܦܰܨܚܳܢܽܘܬܳܐ ܗܽܘ ܣܳܒܳܐ ܥܰܠ ܗܰܝܡܳܢܽܘܬܳܗ̇ ܕܗܳܝ ܕܡܰܙܥܩܳܐ ܗ̱ܘܳܬ܆ ܘܫܰܡܰܪ ܕܶܡܥܬܳܐ ܕܰܚܠܺܝܛܳܐ ܗ̱ܘܳܬ ܥܰܡ ܗܰܘ ܓܽܘܚܟܳܐ ܕܰܦܨܺܝܚܽܘܬܳܐ܆ ܒܰܪܟܶܗ ܠܛܰܠܝܳܐ. ܘܰܠܗܳܝ ܕܺܝܠܶܕܬ̣ܶܗ܆ ܟܰܕ ܚܳܕܝܳܐ ܫܰܕܪܳܗ̇ ܡܶܢ ܠܘܳܬܶܗ.

ܐܳܦ ܢܰܥܡܳܢ ܕܶܝܢ ܕܚܰܕ ܡܶܢܗܽܘܢ ܕܺܝܠܗܽܘܢ ܕܗܳܠܶܝܢ ܒܰܪܒܪ̈ܳܝܶܐ ‌ܐܺܝܬܰܘܗ̱ܝ ܗ̱ܘܳܐ ܘܪܺܝܫܳܐ ܕܺܝܠܗܽܘܢ܆ ܕܰܠܦܳܪ̈ܣܳܝܶܐ ‌ܐܺܝܬܰܘܗ̱ܝ ܗ̱ܘܳܐ ܡܫܰܥܒܕܳܐ܆ ܟܰܕ ܚܙܳܐ ܐܶܢܽܘܢ ܠܰܒ̈ܢܰܝ ܫܰܪܒܬܶܗ܆ ܕܰܠܘܳܬ ܣܝܳܓ̣ܬܶܗ ܕܩܰܕܺܝܫܳܐ ܣܕܺܝܪܳܐܺܝܬ ܒܰܕܡܽܘܬ ܫܽܘܫܡܳܢ̈ܶܐ ܪܳܚܫܺܝܢ ܗ̱ܘܰܘ. ܘܳܐܙܺܠ̱ܝܢ܆ ܢܳܡܽܘܣܳܐ ܣܳܡ܆ ܕܡܘܬܳܐ222 ܡܬܰܚܶܡ ܗ̱ܘܳܐ ܚܽܘܣܪܳܢܳܐ܆ ܐܶܢ ܐ̱ܢܳܫ ܠܘܳܬ ܫܶܡܥܽܘܢ ܢܺܐܙܰܠ. ܕܰܚܺܝܠ ܗ̱ܘܳܐ ܓܶܝܪ܆ ܕܕܰܠܡܳܐ ܒܥܶܠܬܳܐ ܕܕܶܚܠܬܳܐ ܕܰܟܪ̈ܺܝܣܛܝܳܢܶܐ܆ ܠܘܳܬ ܪܺܝܫܳܢܽܘܬܳܐ ܕܪ̈ܽܘܡܳܝܶܐ ܢܫܰܢܽܘܢ. ܐܶܠܳܐ ܒܫܳܥܬܳܐ ܫܠܺܝܬܳܐ ܕܠܰܝ̈ܠܰܘܳܬܳܐ ܘܰܒܥܶܕܳܢܳܐ ܥܰܡܺܝܩܳܐ ܘܚܶܫܽܘܟܳܐ܆ ܟܰܕ ܚܰܝܠܳܐ ܩܳܡ ܥܠܰܘܗ̱ܝ܆ ܡܢܰܬܶܫ ܠܶܗ ܠܗܳܢܳܐ ܒܡܰܚ̈ܘܳܬܳܐ ܕܥܰܠ ܚܰܨܶܗ܆ ܘܰܓܙܳܡܳܐ ܕܡܰܘܬܳܐ ܡܰܘܣܶܦ ܠܶܗ܆ ܐܶܢܗܽܘ ܕܠܳܐ ܢܶܫܪܶܝܘܗ̱ܝ ܠܢܳܡܽܘܣܳܐ ܗܰܘ ܕܟܳܠܶܐ ܗ̱ܘܳܐ ܠܥܰܒܕܰܘ̈ܗ̱ܝ ܕܰܐ‌ܠܳܗܳܐ ܕܰܠܘܳܬ ܫܶܡܥܽܘܢ ܢܺܐܙܽܠ̱ܘܢ.

ܘܰܒܨܰܦܪܳܐ ܥܰܡܺܝܩܳܐ ܩܰܕܶܡ ܢܽܘܗܪܳܐ ܡܦܺܝܤ ܗ̱ܘܳܐ ܠܗܳܢܽܘܢ ܕܰܬܚܶܝܬ ܐܺܝܕܶܗ܆ ܕܟܰܕ ܨܳܒܶܝܢ ܢܺܐܙܽܠ̱ܘܢ ܠܰܣܝܳܓ̣ܬܶܗ ܕܩܰܕܺܝܫܳܐ܆ ܟܰܕ ܡܰܘܕܶܐ ܗ̱ܘܳܐ ܕܰܒܢܳܡܽܘܣܳܐ ܡܝܰܬܪܳܐ܆ ܐܶܫܬܪܺܝ ܢܳܡܽܘܣܳܐ ܒܰܝܬܳܝܳܐ ܗܰܘ ܕܺܝܠܶܗ. ܘܕܰܒܡܰܫܪܺܝܬܳܐ ܕܺܝܠܶܗ܆ ܐܳܦ ܥܻ̈ܕܳܬܳܐ ܠܡܶܒܢܳܐ ܦܩܰܕ܆ ܘܕܶܐܦܶܝܣܩܽܘܦܐ ܘܩܰܫܺܝ̈ܫܶܐ ܘܬܶܫܡܶܫܬܳܐ ܪܽܘܚܳܢܳܝܬܳܐ ܗܳܝ ܕܫܰܪܟܳܐ܆ ܢܶܗܘܽܘܢ ܐܺܝܬ ܠܗܽܘܢ ܕܠܳܐ ܕܶܚܠܬܳܐ.

ܐܠܳܐ ܐܳܦܠܳܐ ܠܓܶܢܣܳܐ ܕܰܐܪ̈ܡܢܳܝܶܐ ܐܰܘ ܕܐܝܒܝܪ̈ܝܐ ܛܥܳܐ ܪܶܗܛܳܐ ܗܰܘ ܕܰܠܘܳܬ ܐܶܤܛܽܘܢܳܐ. ܐܶܠܳܐ ܢܳܓܶܕ ܗ̱ܘܳܐ ܐܳܦ ܠܗܽܘܢ ܗܰܘ ܕܛܳܒܳܐ܆ ܐܳܦ ܙܰܠܺܝ̈ܩܶܐ ܗܳܢܽܘܢ ܕܬܶܕܡܪ̈ܳܬܶܗ. ܐܶܬܺܝܕܰܥ ܕܶܝܢ܆ ܐܳܦ ܟܰܕ ܠܗܳܢܽܘܢ ܕܰܒܥܽܘܡܩܳܐ ܕܝܰܡܳܐ ܡܶܬܬܰܪܦܶܝܢ ܒܡܰܚ̈ܫܽܘܠܳܐ ܐܶܬܚܙܺܝ. ܘܶܐ‌ܠ̈ܦܳܝܶܐ ܟܰܕ ܠܰܐܪ̈ܡܶܢܶܐ ܕܺܝܠܗܽܘܢ ܘܰܠܣܰܘ̈ܟܳܢܶܐ ܛܳܥܶܝܢ^[41] ܗ̱ܘܰܘ܆ ܠܘܳܬ ܛܽܘܪܳܐ ܐܶܬܰܘ ܒܪ̈ܶܓܠܶܐ ܥܰܪ̈ܛܶܠܳܝܳܬܳܐ܆ ܘܕܰܠܡܶܣܚܳܐ ܡܰܠܽܘܢ ܐܰܘ ܠܰܡܗܠܳܟܽܘ ܝܰܠܺܝ̈ܦܳܢ ܗ̱ܘܰܝ̈܆ ܐܰܝܟܰܢܳܐ ܕܢܶܚܙܽܘܢ ܠܗܰܘ ܕܡܶܢ ܩܺܝܢܕܽܘܢܽܘܤ ܦܰܨܺܝ ܐܶܢܽܘܢ. ܘܟܰܕ ܠܘܳܬܶܗ ܕܶܐܤܛܽܘܢܳܐ ܥܰܝ̈ܢܰܝܗܽܘܢ ܡܪܺܝܡܺܝܢ ܗ̱ܘܰܘ܆ ܘܰܒܚܰܘܪܳܐ ܡܥܰܩܒܳܢܳܐ ܡܶܬܒܰܩܶܝܢ ܗ̱ܘܰܘ܆ ܡܶܫܬܰܘܕܥܺܝܢ ܗ̱ܘܰܘ܆ ܕܗܳܢܳܐ ‌ܐܺܝܬܰܘܗ̱ܝ ܗ̱ܘܳܐ ܗܰܘ ܕܰܒܗܽܘܢ ܒܟܺܝܡܽܘ̈ܢܶܐ ܐܶܬܚܙܺܝ ܠܗܽܘܢ. ܘܟܰܕ ܡܶܬܒܰܪܟܺܝܢ ܗ̱ܘܰܘ܆ ܠܘܳܬ ܠܡܺܐܢܳܐ ܬܽܘܒ ܘܰܠܘܳܬ ܐܶ‌ܠܦܳܐ ܦܳܢܶܝܢ ܗ̱ܘܰܘ܆ ܟܰܕ ܙܘܳܕ̈ܶܐ ܛܳܒ̈ܶܐ ܘܰܙܗܺܝܪ̈ܶܐ ܠܰܨܠܰܘ̈ܳܬܶܗ ܫܩܺܝܠܺܝܢ ܗ̱ܘܰܘ.

ܐܷܠܳܐ ܠܡܳܢܳܐ܆ 222ܬܚܪܬ^[42] ܐܶܢܳܐ܆ ܕܒܰܫܪܳܩܬܳܐ ܙܥܽܘܪܬܳܐ ܐܰ݀ܟܺܝܠ ܠܝܰܡܳܐ ܠܳܐ ܡܶܬܬܟܺܝܠܳܢܳܐ܆ ܘܕܰܒܡܶܠܬܳܐ ܐܶ݀ܚܫܽܘܒ ܠܣܳܥܽܘܪ̈ܘܳܬܶܗ ܕܗܰܘ. ܐܳܦ ܓܶܝܪ ܠܰܘ ܟܰܕ ܠܶܗ ܠܙܰܕܺܝܩܳܐ ܚܦܺܝܛ ܐ̱ܢܳܐ ܕܰܒܩܽܘܠܳܣ̈ܶܐ ܐܶ݀ܟܰܢܶܟ ܠܰܡܨܰܥܬܳܐ ܥܶܒܪܶܬ܆ ܐܶܠܳܐ ܟܰܕ ܐܶܢܳܐ ܠܺܝ ܨܳܒܶܐ ܐ̱ܢܳܐ ܕܰܐܘܬܰܪ܆ ܐܳܦ ܠܟܽܘܢ ܐܶ݀ܒܰܣܶܡ^[43]܆ ܒܗܳܝ ܕܶܐ݀ܬܥܰܗܰܕ ܬܠܳܬ ܐܰܘ ܐܰܪܒܰܥ ܡܶܢ ܬܶܕܡܪ̈ܳܬܳܐ ܘܰܡܝܰܬܪ̈ܳܬܳܐ ܕܺܝܠܶܗ܆ ܒܰܕܡܽܘܬܳܐ ܕܗܳܢܽܘܢ ܕܰܠܩܰܠܺܝܠ ܩܽܘ̈ܒܠܶܐ ܕܘܰܪܕܳܐ ܡܰܝܬܶܝܢ ܡܶܢ ܡܰܪܓܳܐ ܕܰܒܗܰܒܳܒ̈ܶܐ ܣܰܓܺܝ̈ܶܐܐ ܘܰܡܫܰܚܠ̈ܦܶܐ ܕܟܽܠ ܓܢܶܤ ܥܰܒܺܝܛ.

ܗܰܘ ܓܶܝܪ ܕܰܐܟܙܢܳܐ ܕܟܰܕ ܥܰܡ ܪܰܘܡܶܗ ܕܶܐܤܛܽܘܢܳܐ ܒܕܽܘ̈ܥܳܬܳܐ ܕܥܰܡ̈ܠܶܐ ܡܶܬܬܪܺܝܡ ܗ̱ܘܳܐ܆ ܘܠܳܐ ܠܚܰܕ ܐ̱ܢܳܫ ܫܒܰܩ ܕܽܘܡܝܳܐ܆ ܐܳܦܶܢ ܣܰܓܺܝ̈ܶܐܐ ܝܳܨܦܺܝܢ ܠܰܡܕܰܡܳܝܽܘ ܒܩܰܘܡܶܗ ܐܰܟܙܢܳܐ ܕܰܒܛܶܠܳܢܝ̈ܳܬܳܐ܆ ܘܗܳܟܰܢܳܐ ܥܰܡ ܩܺܝܢܕܽܘܢܽܘܤ ܒܶܗ ܟܰܕ ܒܶܗ ܒܰܙܢܳܐ܆ ܐܳܦ ܠܶܗ ܠܚܰܝܠܳܐ ܕܺܝܠܗܶܝܢ ܕܡ̈ܶܠܶܐ ܥܳܒܰܪ ܗ̱ܘܳܐ ܘܙܳܟܶܐ. ܐܳܦܠܳܐ ܗܽܘ ܡܰܝܬܶܐ ܗ̱ܘܳܐ ܠܰܡܥܰܠܝܽܘܬܶܗ ܕܕܽܘܒܳܪܳܐ ܕܠܳܐ ܚܽܘܣܪܳܢܳܐ܆ ܐܶ‌ܠܽܘ ܠܳܐ ܕܥܽܘܬܪܳܐ ܕܕܳܡܶܐ ܐܺܝܬ ܗ̱ܘܳܐ ܠܶܗ ܕܡܰܟܺܝܟܽܘܬܳܐ ܘܰܕܬܰܪܥܺܝܬܳܐ ܡܡܰܫܰܚܬܳܐ܆ ܟܰܕ ܠܰܡܫܺܝܚܳܐ ܡܫܰܒܰܚ ܗ̱ܘܳܐ ܗܰܘ ܕܡܶܛܽܠܳܬܰܢ ܗܽܘ ܠܶܗ ܡܰܟܶܟ܆ ܗܰܘ ܕܳܐܦ ܥܠܰܘܗ̱ܝ ܕܶܐܤܛܽܘܢܳܐ ܫܟܶܢ ܠܶܗ܆ ܗܳܝ ܕܥܰܡ ܗܳܠܶܝܢ ܐܰܓܽܘ̈ܢܶܐ ܢܺܐܙܰܠ܆ ܘܠܳܐ ܢܶܬܪܰܦܶܐ ܠܘܳܬ ܫܽܘܠܳܡܗܽܘܢ ܕܥܰܡ̈ܠܶܐ܆ ܘܗܳܠܶܝܢ ܟܰܕ ܡܰܛܺܝ ܗ̱ܘܳܐ ܠܣܰܝܒܽܘܬܳܐ ܥܰܡܺܝܩܬܳܐ.

ܕܗܳܢܳܐ ܟܰܕ ܠܒܶܣܪܶܗ ܗܰܘ ܠܳܐ ܡܶܬܬܰܪܣܝܳܢܳܐ܆ ܘܰܒܨܺܝܪ ܩܰܠܺܝܠ ܡܶܛܽܠܗܳܕܶܐ ܠܳܐ ܦܰܓܪܳܢܳܐ܆ ܢܣܰܒܘ ܒ̈ܢܰܝ ܡܕܺܝܢ̱ܬܳܐ ܕܺܝܠܰܢ܆ ܒܗܳܢܳܐ ܒܰܝܬܳܐ ܣܳܡܽܘܗ̱ܝ. ܗܰܘ ܟܺܝܬ ܕܟܰܕ ܡܶܬܬܰܝܬܶܐ ܘܠܰܐܦܰܝ̈ ܕܽܘܟܬܳܐ ܕܰܩܕܳܡ ܬܰܪ̈ܥܶܐ ܕܰܡܕܺܝܢ̱ܬܳܐ ܗܘ̣ܳܐ܆ ܠܐ̱ܢܳܫ ܕܰܝܘܳܢܳܐ ܕܰܒܒܶܝܬ ܩܒܽܘܪܳܐ ܛܳܥܶܐ ܗ̱ܘܳܐ ܡܶܢ ܚܰܫܶܗ ܐܰܓܗܺܝ ܗ̱ܘܳܐ ܘܚܳܕܰܪ܆ ܘܗܳܕܶܐ ܪܺܝܫܺܝܬܳܐ ܕܳܐܣܺܝ̈ܘܳܬܳܐ ܚܰܘܺܝ ܠܰܡܗܰܝܡ̈ܢܶܐ ܕܗܳܪܟܳܐ ܒܰܡܫܺܝܚܳܐ ܝܶܫܽܘܥ ܡܳܪܰܢ. ܠܗܰܘ ܕܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܰܬܠܳܬܺܝܢ.

ܠܬܰܘܕܺܝܬܳܐ[1]

 ܣܝܳܓܬܶܗ[2]

ܡ̈ܬܠܶܐ. 30: 20 [3]

ܣܶܦܪܐ ܕܝܫܘܥ ܒܪ ܐܣܝܪܐ. 15: 9 [4]

ܣܶܦܪܐ ܕܒܪܝܬܐ. 37: 8 [5]

ܡܦܩܢܐ. 2: 21 [6]

ܐ. ܫܡܘܐܝܠ. 18: 4 [7]

ܡܶܬܢܰܒܪܰܫ[8]

ܡܬܝ. 5: 4 [9]

ܟܬܒܐ ܕܩܽܘܗܠܰܬ. 7: 3 [10]

ܣܦܰܪ ܕܰܝܳܢ̈ܶܐ. 14: 14 [11]

ܡܬܝ. 7: 24 ـ 25 [12]

ܦܪ̈ܟܣܝܣ. 4: 32 [13]

ܦܝܠܝܦܣ̈ܝܐ. 3: 16 [14]

ܡ̈ܰܬܠܐ. 31: 18 [15]

[16]ܗܠܝܢ ܫܡܠܝܢ ܒܕܝܪܐ ܕܒܶܝܬ ܡܪܝ ܐܘܣܒܘܢܐ܆ ܗܳܝ ܕܥܰܠ ܓܶܢ̱ܒ ܬܠܥܕܐ ܩܪܝܬܐ.

ܝܘܚܢܢ. 20: 27 [17]

[18]ܒܗܳܝ ܕܡܣ̣ܒܪܢܘܬܐ ܐܺܝܬ ܠܶܗ ܥܰܠ ܢܰܦܫܶܗ: ܥܳܕܶܠ ܗ̱ܘܳܐ ܠܶܗ ܟܰܕ ܡܩܰܦܰܚ ܗ̱ܘܳܐ ܠܶܗ

 ܕܰܙܥܽܘܪܝܳܐ[19]

[20]ܝܥܩܘܒ. 4: 6  ܐܦ ܐ. ܦܛܪܘܣ. 5: 5

ܡܙܡܘܪ̈ܐ. 1: 2 [21]

ܡܙܡܘܪ̈ܐ. 55: 23  ܬܘܒ ܡܙܡܘܪ̈ܐ 40: 2 [22]

ܡܬܝ. 4: 1 ـ [23]

ܐܶܬܓܰܝܰܕܘ[24]

ܦܝܠܝܦܣ̈ܝܐ. 4: 13 [25]

ܒܥܺܝܪ̈ܳܐ[26]

ܡܬܝ. 25: 35 ـ 36 [27]

ܒܕܽܘܪܳܫܳܐ[28]

ܡܬܝ. 11: 12 [29]

ܒ. ܩܘܪ̈ܝܢܬܝܐ܀ 5: 14 ـ 15 [30]

ܡܬܝ. 10: 22  ܬܘܒ ܡܬܝ. 24: 13 [31]

ܠܘܩܐ. 21: 19 [32]

[33]ܡܬܝ. 13: 31 ـ 32 ܐܦ ܡܪܩܘܣ. 4: 30 ـ 32  ܐܦ ܠܘܩܐ. 13: 18 ـ 19

ܐ. ܫܡܘܐܝܠ. 5: 6 [34]

ܐܫܥܝܐ. 33: 14 ـ 16 [35]

ܠܐ ܡܶܬܗܰܠ̈ܟܳܢܶܐ[36]

[37]ܠܥܘܙܝ ܣܳܓܕܺܝܢ ܗ̱ܘܰܘ ܛܰܝ̣ܳܝ̣̈ܶܐ ܡܶܢ ܩܕܺܝܡ܆ ܗܳܢܰܘ ܕܶܝܢ ܚܕܳܐ ܟܰܘܟܒܬܳܐ܆ ܗܳܝ ܕܠܳܗ̇ ܩܪܳܐ ܡܰܠܦܳܢܳܐ ܐܰܦܪܽܘܕܺܝܛܺܐ.

ܠܘܩܐ. 1: 79 [38]

ܕܢܝܐܝܠ. 14: 34 ـ 39 [39]

ܝܺܒܶܫܘ[40]

ܫܳܒܩܺܝܢ[41]

ܐܶܬܚܪܺܝܬ̣܆ ܡ̣ܢ ܚܶܪܝܳܢܳܐ؟[42]

ܐܶ݀ܚܰܕܶܐ[43]