ܡܺܐܡܪܳܐ ܕܰܬܠܳܬܳܐ

…. ܐܰܝܟ ܐܰܝܟܳܐ ܕܗܰܘ ܕܰܡܙܰܡܰܪ ܐܳܡܰܪ ܠܘܳܬ ܐܰ‎ܠܳܗܳܐ ܕܥܰܠ ܟܽܠ܆ ܡܰܢܗܰܪ ܐܰܢ̱ܬ ܬܡܺܝܗܳܐܺܝܬ ܡܶܢ ܛܽܘܪ̈ܶܐ ܕܰܠܥܳܠܰܡ. ܠܗܳܠܶܝܢ ܕܶܝܢ ܣܰܩܽܘܒܠܳܝ̈ܶܐ܆ ܐܰܝܟ ܐܰܝܟܳܐ ܕܒܶܐܪܰܡܝܳܐ ܠܘܳܬ ܐܳܟܶܠܩܰܪܨܳܐ ܪܺܝܫ ܩܰܘܡܳܐ ܕܺܝܠܗܽܘܢ ܗܽܘ ܡܳܪܝܳܐ ܡܳܬܰܚ ܟܰܕ ܐܳܡܰܪ: ܗܳܐ ܐܶܢܳܐ ܥܠܰܝܟ ܛܽܘܪܳܐ ܡܚܰܒܠܳܢܳܐ܆ ܗܰܘ ܕܰܡܚܰܒܶܠ ܠܟܽܠܳܗ̇ ܐܰܪܥܳܐ^[1]. ܐܶܠܳܐ ܐܳܦ ܗܳܝ ܕܢܶܚܬܶܬ ܠܰܐܪܥܳܐ. ܗܳܝ ܕܡܽܘ̈ܟܠܶܐ ܕܺܝܠܳܗ̇ ܐܳܚ̈ܽܘܕܶܐ ܕܰܠܥܳܠܰܡ^[2]. ܟܰܕ ܠܝܰܘܢܳܢ. ܘܠܳܐ ܣܳܟ ܠܳܚܡܳܐ ܐܶܬܠܰܚܰܡ. ܘܛܳܒ ܟܺܐܢܳܐܺܝܬ܆ ܠܰܡܫܺܝܚܐ ܗܰܘ ܕܰܠܬܰܪ̈ܥܶܐ ܕܰܢܚܳܫܳܐ ܬܰܒܰܪ܆ ܘܰܠܡܽܘܟ̈ܠܶܐ ܕܦܰܪܙܠܳܐ ܓܰܕܶܡ^[3]. ܬܰܪ̈ܥܶܐ ܓܶܝܪ ܕܰܫܝܽܘܠ ܟܰܕ ܚܙܰܐܽܘܗ̱ܝ ܐܶܣܬܰܪܰܕܘ܆ ܘܶܐܡܰܪ ܠܗܳܢܽܘܢ ܕܒܰܐܣܽܘܪ̈ܶܐ ܦܽܘܩܘ܆ ܘܰܠܗܳܢܽܘܢ ܕܰܒܚܶܫܽܘܟܳܐ ܐܶܬܓܠܰܘ܆ ܐܰܝܟ ܒܰܪ̱ܬ ܩܳܠܳܐ ܕܺܐܝܽܘܒ ܘܕܶܐܫܰܥܝܳܐ ܢܒܺܝܳܐ^[4]. ܘܳܐܦ ܗܳܝ ܕܢܶܣܩܽܘܢ ܡܶܢ ܚܒܳܠܳܐ ܚܰܝ̈ܶܐ ܕܺܝܠܝ܆ ܕܡܶܢ ܝܰܘܢܳܢ ܐܰܡܺܝܪܳܐ. ܬܽܘܒ ܙܳܕܶܩ ܕܬܶܣܒܺܝܗ̇܆ ܠܰܡܫܺܝܚܳܐ ܗܰܘ ܕܰܥܠܰܘܗ̱ܝ ܟܬܺܝܒ. ܕܠܳܐ ܐܶܫܬܰܒܩܰܬ݂ ܢܰܦܫܳܐ ܕܺܝܠܶܗ ܒܰܫܝܽܘܠ܆ ܘܳܐܦܠܳܐ ܒܶܣܪܳܐ ܕܺܝܠܶܗ ܚܙܳܐ ܚܒܳܠܳܐ^[5].

ܘܠܳܐ ܐ̱ܢܳܫ ܢܥܰܩܒܺܝܗ̇ ܠܡܶܠܬܳܐ. ܕܰܐܝܟܰܢܳܐ ܟܰܕ ܬܠܳܬܳܐ ܐܺܝܡܳܡܺܝ̈ܢ ܘܰܬܠܳܬܳܐ ܠܰܝ̈ܠܰܘܳܢ ܗܘ̣ܳܐ ܝܰܘܢܳܢ ܒܟܰܪܣܳܐ ܕܩܺܝܛܽܘܤ܆ ܠܳܐ ܐܶܬܚܰܒܰܠ. ܟܰܕ ܓܶܝܪ ܠܡܳܪܝܳܐ ܫܳܡܰܥ ܐܰܢ̱ܬ ܕܳܐܡܰܪ: ܐܳܬܳܐ ܕܝܰܘܢܳܢ ܢܒܺܝܳܐ^[6]܆ ܠܳܐ ܬܥܰܩܶܒ ܠܰܙܢܳܗ̇ ܕܬܶܕܡܽܘܪܬܳܐ. ܠܳܐ ܓܶܝܪ ܡܩܰܘܝܳܐ ܐܳܬܳܐ܆ ܐܶܢ ܡܰܝܬܶܐ ܐܰܢ̱ܬ ܠܳܗ̇ ܬܚܶܝܬ݂ ܡ̈ܶܠܶܐ ܕܰܟܝܳܢܳܐ. ܕܺܝܠܳܝܬܳܐ ܗ̱ܝ ܓܶܝܪ ܗܳܕܶܐ܆ ܕܬܶܕܡܪ̈ܳܬܳܐ ܘܰܕܣܽܘܥܪ̈ܳܢܶܐ ܬܡܺܝ̈ܗܶܐ܆ ܕܢܶܗܘܽܘܢ ܥܳܒܪܺܝܢ ܠܛܶܟܣܳܐ ܕܰܟܝܳܢܳܐ. ܘܶܐܢ ܕܶܝܢ ܠܳܐ܆ ܐܶܢ ܠܰܘ ܗܳܕܶܐ ܢܶܬܶܠ܆ ܐܶܕܰܓܶܠ ܢܳܩܦܳܐܺܝܬ܆ ܐܳܦ ܠܬܶܕܡܽܘܪܬܳܐ ܕܩܰܘܡܬܶܗ ܕܥܰܡܰܢܽܘܐܶܝܠ.

ܠܘܳܬ ܗܳܠܶܝܢ܆ ܡܳܢܳܐ ܐܳܡܪܺܝܢ ܠܰܢ܆ ܗܳܢܽܘܢ ܕܰܡܣܰܡܶܝܢ ܒܫܽܘܒܚܽܘܢܳܐ ܕܳܘܝܳܐ ܕܗܰܓܳܓܽܘܬܳܐ ܐܶܢ ܓܶܝܪ ܫܰܪܺܝܪܳܐ ܡܰܢ ‌ܐܺܝܬܰܘܗ̱ܝ ܛܽܘܦܣܳܐ ܗܰܘ ܕܝܰܘܢܳܢ܆ ܘܟܰܕ ܒܰܪܢܳܫܳܐ ‌ܐܺܝܬܰܘܗ̱ܝ ܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܫܰܘܝܳܐܺܝܬ ܠܰܢ܆ ܡܶܢ ܩܺܝܛܽܘܤ ܐܶܬܒܠܰܥ ܘܶܐܬܬܺܝܒ܆ ܟܰܕ ܠܳܐ ܐܶܬܚܰܒܰܠ ܘܳܐܦܠܳܐ ܐܶܬܒܰܨܰܪ܆ ܒܦܰܢܛܰܣܺܝܰܐ ܕܶܝܢ ܐܶܬܒܰܪܢܰܫ ܡܳܪܰܢ ܘܶܐܣܬܒܰܪ ܕܰܣܒܰܠ ܨܠܺܝܒܳܐ ܗܰܘ ܕܰܚܠܳܦܰܝܢ܆ ܘܕܰܥܕܰܡܳܐ ܠܗܽܘܢ ܠܬܰܪ̈ܥܶܐ ܕܰܫܝܽܘܠ ܢܚܶܬ݂܆ ܐܰܝܟܰܢܳܐ ܠܰܘ ܕܓܽܘܚܟܳܐ ܐܺܝܬܶܝܗ̇܆ ܐܶܢܗܽܘ ܕܰܫܪܳܪܳܐ ܢܶܗܘܶܐ ܛܽܘܦܣܳܐ ܕܦܰܢܛܰܣܺܝܰܐ. ܕܰܠܩܽܘܒܠܳܐ ܓܶܝܪ ܐܺܝܬ ܠܡܶܚܙܳܐ. ܕܰܠܛܽܘܦ̈ܣܶܐ ܡܰܢ ܚܰܝܠܳܐ ܕܰܕܡܽܘܬܳܐ ܘܰܕܝܽܘܩܢܳܐ ܒܰܗܽܘܪܳܐ ܐܺܝܬ ܠܗܽܘܢ. ܗܰܘ ܕܶܝܢ ܕܡܶܢܗܽܘܢ ܕܛܽܘܦ̈ܣܶܐ ܡܶܬܚܰܘܶܐ ܣܽܘܥܪܳܢܳܐ ܡܰܠܝܳܐ ܕܡܶܢ ܫܪܳܪܳܐ ‌ܐܺܝܬܰܘܗ̱ܝ.

5: ܐܶܠܳܐ ܡܶܢ ܫܡܰܝܳܐ ܐܳܡܰܪ ܐܰܢ̱ܬ܆ ܕܰܐܝܬܺܝ ܠܶܗ ܡܶܠܬܳܐ ܕܰܐ‎ܠܳܗܳܐ ܒܶܣܪܳܐ܆ ܐܶܠܳܐ ܐܳܕܳܡ ܗܰܘ ܕܰܐܣܟܶܠ܆ ܘܰܣܢܺܝܩ ܗ̱ܘܳܐ ܥܰܠ ‌ܐܳܣܝܽܘܬܳܐ܆ ܐܰܪܥܳܢܳܝܳܐ ‌ܐܺܝܬܰܘܗ̱ܝ ܗ̱ܘܳܐ. ܘܡܶܢ ܛܺܝܢܳܐ ܓܒܺܝܠ ܗ̱ܘܳܐ܆ ܡܶܢ ܗܰܘ ܕܳܐܦ ܚܢܰܢ ܗܘܰܝܢܰܢ^[7]܆ ܐܰܝܟܰܢܳܐ ܕܳܐܡܰܪ ܟܬܳܒܳܐ ܕܺܐܝܽܘܒ. ܐܰܘ ܗܳܟܺܝܠ ܗܰܒ ܠܺܝ܆ ܕܳܐܕܳܡ ܗܰܘ ܩܰܕܡܳܝܳܐ܆ ܗܰܘ ܕܰܬܚܶܝܬ݂ ܚܛܺܝܬܳܐ ܢܦܰܠ܆ ܫܡܰܝܳܢܳܐ ‌ܐܺܝܬܰܘܗ̱ܝ ܗ̱ܘܳܐ܆ ܐܰܘ ܐܶܢ ܠܰܘ ܗܳܕܶܐ ܬܶܬܶܠ܆ ܕܠܳܐ ܗܰܘܢܳܐ ܗ̱ܝ ܓܶܝܪ܆ ܢܳܩܦܳܐ ܡܳܕܶܝܢ ܠܡܰܘܕܳܝܽܘ܆ ܕܡܶܠܬܳܐ ܕܰܐ‎ܠܳܗܳܐ ܗܰܘ ܫܡܰܝܳܢܳܐ ܘܕܰܩܕܳܡ ܥܳܠ̈ܡܶܐ܆ ܒܶܣܪܳܐ ܫܘܶܐ ܒܓܶܢܣܳܐ ܕܳܐܕܳܡ܆ ܘܰܕܠܰܢ ܫܘܶܐ ܒܽܐܘܣܺܝܰܐ ܚܰܝܶܕ ܠܶܗ ܩܢܽܘܡܳܐܺܝܬ܆ ܗܰܘ ܕܡܶܛܽܠܳܬܶܗ ܐܳܦ ܐܳܕܳܡ ܬܪܰܝܳܢܳܐ ܐܶܫܬܰܡܰܗ܆ ܘܥܰܠ ‌ܐܰܪܥܳܐ ܐܶܬܚܙܺܝ܆ ܘܥܰܡ ܒܢܰܝ̈ܢܳܫܳܐ ܐܶܬܗܰܦܰܟ܆ ܐܰܝܟܰܢܳܐ ܕܠܰܢ ܠܘܳܬ ܫܡܰܝܳܐ ܢܰܣܶܩ܆ ܘܗܽܘ ‌ܐܺܝܬܰܘܗ̱ܝ ܗܰܘ ܕܡܶܛܽܠܳܬܶܗ ܐܳܦ ܐܺܝܽܘܒ ܩܰܕܶܡ ܐܰܙܥܶܩ܆ ܟܰܕ ܡܫܰܘܕܰܥ ܐܰܟܚܕܳܐ ܘܳܐܦ ܠܛܽܘܦܣܳܐ ܕܝܰܘܢܳܢ܆ ܘܳܐܦ ܠܙܳܟܽܘܬܶܗ ܕܺܝܠܶܗ ܕܠܽܘܩܒܰܠ ‌ܐܳܟܶܠ ܩܰܪܨܳܐ܆ ܟܰܕ ܗܳܟܰܢܳܐ ܐܳܡܰܪ^[8]: ܐܶܠܳܐ ܢܠܽܘܛܺܝܘܗ̱ܝ ܗܰܘ ܕܠܳܛ ܠܝܰܘܡܳܐ ܗܰܘ܆ ܗܰܘ ܕܰܥܬܺܝܕ ܕܰܠܩܺܝܛܽܘܤ ܪܰܒܳܐ ܢܶܩܛܽܘܠ^[9].

6: ܟܰܕ ܗܳܟܺܝܠ ܒܝܽܘܬܪܳܢܳܐ ܕܰܐܝܟ ܗܳܢܳܐ ܕܕܽܘܓ̈ܡܰܛܰܐ ܐܰ‎ܠܳܗܳܝ̈ܶܐ. ܐܶܬܒܰܣܰܡܢܰܢ܆ ܡܶܢ ܡ̈ܶܠܶܐ ܕܡܳܪܰܢ ܘܡܶܢ ܬܰܫܥܺܝܬܳܐ ܕܥܰܠ ܝܰܘܢܳܢ܆ ܢܰܛܶܢ ܐܳܦ ܒܰܡܝܰܬܪܽܘܬܶܗ܆ ܘܥܺܝܪ̈ܶܐ ܢܶܗܘܶܐ. ܘܳܐܦ ܒܰܨܠܰܘ̈ܳܬܳܐ. ܕܠܳܐ ܦܣܳܩ ܢܚܰܡܣܶܢ. ܐܶ‎ܠܽܘ ܠܳܐ ܓܶܝܪ ܕܰܐܡܺܝܢܳܐܺܝܬ ܗܰܘ ܡܨܰܠܶܐ ܗ̱ܘܳܐ܆ ܘܰܠܗܳܕܶܐ 222ܗܽܘܓܳܢܳܐ^[10] ܥܳܒܶܕ ܗ̱ܘܳܐ܆ ܠܰܘ ܟܰܕ ܚܒܺܝܫ ܒܟܰܪܣܳܐ ܕܩܺܝܛܽܘܤ ܠܰܐܠܳܗܳܐ ܡܶܬܟܰܫܰܦ ܗ̱ܘܳܐ^[11]. ܢܶܩܢܶܐ ܗܳܟܺܝܠ ‌ܐܳܦ ܚܢܰܢ ܠܗܳܢܳܐ ܗܽܘܓܳܢܳܐ ܡܶܬܩܰܠܣܳܢܳܐ܆ ܐܰܝܟܰܢܳܐ ܕܶܐܡܰܬܝ ܕܡܶܢ ܢܶܣܝܽܘܢܳܐ. ܐܰܝܟ ܕܡܶܢ ܩܺܝܛܽܘܤ ܢܶܬܒܠܰܥ܆ ܢܶܬܬܺܝܒ ܒܝܰܕ ܨܠܽܘܬܳܐ܆ ܒܛܰܝܒܽܘܬܳܐ ܘܰܒܪ̈ܰܚܡܶܐ ܘܰܒܪܶܚܡܰܬ݂ ܐ̱ܢܳܫܽܘܬܳܐ ܕܰܐ‎ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܠܶܗ ܬܶܫܒܽܘܚܬܳܐ. ܥܰܡ ܐܰܒܳܐ. ܘܪܽܘܚܳܐ ܩܰܕܺܝܫܳܐ܆ ܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܶܡ ܡܺܐܡܪܳܐ ܕܰܬܠܳܬܳܐ‌܀

ܐܶܪܰܡܝܳܐ. 51: 25 [1]

ܝܰܘܢܳܢ. 2: 7 [2]

ܡܙܡܘܪ̈ܐ. 107: 16[3]

ܐܶܫܰܥܝܳܐ. 49: 9  ܐܝܘܒ. 38: 17 [4]

ܦܪܟܣܝܣ. 2: 31  ܘܨܚܳܚܳܐ. 15: 35 ـ 37 [5]

ܡܬܝ. 12: 39 [6]

 ܡܫܰܡܠܝܳܐ[7]

ܐܝܘܒ. 3: 7 [8]

 ܢܶܐܚܽܘܕ[9]

ܬܐܘܡܐ ܐܘܕܘ. ܓܰܡܠܐ ܥܰܫܺܝܢܳܐ[10]

ܝܘܢܢ. 2: 2 [11]