ܡܺܐܡܪܳܐ ܕܥܶܣܪܺܝܢ ܘܬܶܫܥܳܐ

ܕܰܡܚܰܘܶܐ ܗܳܝ ܕܢܰܚܪܶܡ ܠܗܳܢܽܘܢ ܕܰܡܚܰܝܒܺܝܢ܆ ܘܣܰܒܰܪܘ ܠܰܢ ܠܒܰܪ ܡܶܢ ܗܰܘ ܡܳܐ ܕܩܰܒܶܠܢܰܢ܆ ܕܰܡܚܰܪܪܳܐ ܠܰܡܕܺܝܢ̱ܬܳܐ ܘܰܠܥܺܕܬܳܐ ܐܰܘܟܺܝܬ ܠܥܰܡܳܐ ܐܺܝܬܶܝܗ̇܆ ܡܶܢ ܠܰܘܛܬܳܐ ܟܺܝܬ ܘܡܶܢ ܚܶܪܡܳܐ.

29: ܟܰܕ ܠܳܐ ܡܶܕܶܡ ܕܺܐܝܬ ܕܒܺܝܫ ܡܶܢ ܡܰܪܺܝܪܽܘܬܳܐ ܗܶܪܶܛܺܝܩܳܝܬܳܐ. ܟܡܳܐ ܓܶܝܪ ܕܶܝܢ ܢܶܟܠܶܐ ܐ̱ܢܳܫ ܠܚܺܐܦ̈ܶܐ ܕܺܝܠܳܗ̇ ܡܦܰܬܟ̈ܶܐ ܘܣܰܓܺܝ̈ܰܐܝ ܟܪ̈ܽܘܟܝܶܐ܆ ܗܳܢܳܐ ܟܽܠܶܗ ܝܰܬܺܝܪܳܐܺܝܬ ܒܡܶܫܟܚܳܢܽܘܬ ܡ̈ܶܠܶܐ ܓܽܘܡܕܳܢܳܝ̈ܳܬܳܐ ܕܠܶܫܳܢܳܐ. ܡܶܬܚܰܪܝܳܐ ܠܰܡܩܳܡ܆ ܐܰܝܟ ܗܳܢܽܘܢ ܣܰܓܺܝ̈ܰܐܝ ܪ̈ܺܝܫܶܐ ܕܪ̈ܰܚܫܳܐ ܪ̈ܳܡܝ̣ܰܝ̣ ܡܶܪܬܳܐ܆ ܗܳܠܶܝܢ ܟܺܝܬ ܕܶܐܢ ܢܶܬܦܣܶܩ ܚܰܕ ܪܺܝܫܳܐ ܕܺܝܠܗܽܘܢ܆ ܬܽܘܒ ܒܝܰܕ ܐ̱ܚܪܺܢܳܐ܆ ܠܳܗ̇ ܟܰܕ ܠܳܗ̇ ܠܡܶܪܬܳܐ ܘܡܰܘܬܳܐ ܓܳܙܡܺܝܢ. ܡܶܛܽܠܗܳܕܶܐ ܕܰܘܺܝܕ ܗܰܘ ܢܒܺܝܳܐ܆ ܟܰܕ ܠܘܳܬ ܥܰܣܩܽܘܬ ܢܛܽܘܪܬܶܗ ܕܠܶܫܳܢܳܐ ܕܰܐܝܟ ܗܳܢܳܐ ܡܙܰܡܰܪ ܗ̱ܘܳܐ ܡܰܙܥܶܩ ܗ̱ܘܳܐ܆ ܡܳܢܳܐ ܢܶܬܺܝܗܰܒ ܠܳܟ ܘܡܳܢܳܐ ܢܶܬܬܰܘܣܰܦ ܠܳܟ܆ ܠܘܳܬ ܠܶܫܳܢܳܐ ܢܰܟܽܘܠܬܳܢܳܐ^[1]܆ ܘܡܶܛܽܠ ܙܰܕܺܝ̈ܩܶܐ ܗܳܢܽܘܢ ܕܡܶܫܬܘܶܝܢ ܠܰܢܛܽܘܪܬܳܐ ܕܡܶܢܳܗ̇ ܐܳܡܰܪ ܗ̱ܘܳܐ: ܬܛܰܫܶܐ ܐܶܢܽܘܢ ܒܣܶܬܳܪܳܐ ܕܦܰܪܨܽܘܦܳܟ ܡܶܢ ܕܠܽܘܚܝܳܐ ܕܰܒܢܰܝ̈ܢܳܫܳܐ. ܬܟܰܣܶܐ ܐܶܢܽܘܢ ܒܡܰܫܟܢܳܐ ܡܶܢ ܚܶܪܝܳܢܳܐ ܕܠܶܫܳܢ̈ܶܐ^[2].

ܡܳܢܳܐ ܕܶܝܢ ‌ܐܺܝܬܰܘܗ̱ܝ ܡܰܫܟܢܳܐ ܗܰܘ ܕܢܳܛܰܪ ܠܗܳܢܽܘܢ ܕܕܳܚܠܺܝܢ ܠܶܗ ܡܶܢ ܚܶܪܝܳܢܳܐ ܕܠܶܫܳܢ̈ܶܐ ܠܳܐ ܡܶܬܠܰܒܟܳܢ̈ܶܐ܆ ܐܶܠܳܐ ܐܶܢ ܗܳܝ ܕܒܰܐܠܳܗܳܐ ܟܽܠܗܶܝܢ ܢܶܣܥܽܘܪ ܘܰܢܡܰܠܶܠ܆ ܐܰܝܟ ܡܳܐ ܕܳܐܦ ܦܰܘܠܽܘܤ ܠܩܽܘܠܳܣܳܝ̈ܶܐ ܡܰܪܬܶܐ ܗ̱ܘܳܐ ܟܰܕ ܐܳܡܰܪ: ܘܟܽܠ ܗܰܘ ܡܳܐ ܕܶܐܢ ܬܶܥܒܕܽܘܢ ܒܰܫܡܶܗ ܒܡܶܠܬܳܐ ܘܒܰܥܒܳܕܳܐ܆ ܟܽܠܗܶܝܢ ܒܰܫܡܶܗ ܕܡܳܪܰܢ ܝܶܫܽܘܥ ܥܒܶܕܘ܆ ܟܕ ܡܰܘܕܶܝܢ ܐܢ̱ܬܽܘܢ ܒܺܐܝܕܰܘ̈ܗ̱ܝ ܠܰܐܠܳܗܳܐ ܘܰܐܒܳܐ^[3].

ܗܳܐ ܓܶܝܪ ܗܳܢܽܘܢ ܕܰܠܘܳܬ ܬܶܛܪܳܐ ܕܛܰܡܽܐܘܬܶܗ ܕܢܶܣܛܽܘܪܺܝܽܘܤ ܢܚܶܬܘ܆ ܘܰܡܦܰܠܓܺܝܢ ܠܶܗ ܠܗܰܘ ܚܰܕ ܡܳܪܰܢ ܘܰܐ‌ܠܳܗܰܢ ܝܶܫܽܘܥ ܡܫܺܝܚܳܐ܆ ܠܰܬܪܰܝܳܢܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ܆ ܟܰܕ ܪܽܘܫܥܳܐ ܕܺܝܠܗܽܘܢ ܒܝܰܕ ܟܡܳܐ ܬܰܚܘ̈ܝܳܬܳܐ ܣܰܓܺܝ̈ܳܐܬܳܐ ܐܶܬܟܣܶܤ܆ ܡܶܢ ܟܬܳܒ̈ܶܐ ܟܺܝܬ ܥܳܗ̈ܢܳܝܶܐ܆ ܘܡܶܢ ܡܰܠܦܳܢܽܘܬܳܐ ܢܦܺܝܚܬܳܐ ܡܶܢ ܐܰ‌ܠܳܗܳܐ ܕܡܰܝ̈ܬܝ̣ܰܝ̣ ܐ̱ܪ̈ܳܙܶܐ ܕܥܺܕܬܳܐ܆ ܡܰܠܚܫܺܝܢ ܪܰܟܺܝܟܳܐܺܝܬ ܒܓܽܘܢܝܳܐ܆ ܘܒܰܕܡܽܘܬ ܥܰܒ̈ܕܶܐ ܒܕܽܘܟ ܗܳܢܽܘܢ ܡܶܬܢܰܓܕܳܢ̈ܶܐ ܟܰܕ ܬܚܶܝܬ ܫܶܢܳܐ ܡܠܰܬܡܺܝܢ܆ ܡܶܬܟܰܪܟܺܝܢ ܘܳܐܡܪܺܝܢ: ܕܣܰܓܺܝ ܝܰܩܺܝܪܬܳܐ ܐܺܝܬܶܝܗ̇܆ ܗܳܝ ܕܰܒܟܽܠܫܳܥ ܢܰܚܪܶܡ ܠܐܦܝܣܩܘ̈ܦܶܐ ܗܳܢܽܘܢ ܕܰܥܢܰܕܘ ܡܶܢ ܥܳܠܡܳܐ܆ ܗܳܢܽܘܢ ܕܬܰܚܶܡܘ ܕܒܰܬܪܶܝܢ ܟܝܳܢ̈ܶܐ ܡܶܬܺܝܕܰܥ ܗܰܘ ܚܰܕ ܡܫܺܝܚܳܐ. ܝܽܘܩܪܳܐ ܪܰܒܳܐ ܐܺܝܬܶܝܗ̇ ܐܳܦ ܠܗܳܢܽܘܢ ܠܡܰܫܡ̈ܥܳܬܳܐ܆ ܕܝܰܬܺܝܪ ܥܣܶܩ ܠܰܛܥܳܢܶܗ ܝܰܬܺܝܪ ܡܶܢ ܟܽܠ ‌ܐܰܒܳܪܳܐ܆ ܐܳܦ ܗܺܝ ܗܳܝ ܕܠܳܗ̇ ܠܠܶܟܣܺܝܤ ܕܺܝܠܶܗ ܕܚܶܪܡܳܐ ܒܰܠܚܽܘܕܶܝܗ̇ ܢܰܫܡܰܥ. ܘܕܰܚܺܝܠܺܝܢ ܚ̱ܢܰܢ ܐܳܡܪܺܝܢ: ܕܕܰܠܡܳܐ ܒܝܰܕ ܚܶܪ̈ܡܶܐ ܕܕܰܐܝܟ ܗܳܠܶܝܢ܆ ܗܺܝ ܡܕܺܝܢ̱ܬܳܐ ܬܶܪܥܰܠ ܬܶܦܶܠ ܥܠܰܝܢ. ܗܳܠܶܝܢ ܟܺܝܬ ܕܺܐܝܬܰܝܗܶܝܢ܆ ܟܽܘ̈ܚܳܠܶܐ ܡܰܛܥܝܳܢ̈ܶܐ ܘܰܢܟܺܝ̈ܠܶܐ ܕܐ̱ܢܳܫܺܝ̈ܢ ܐܰܟܣ̈ܢܳܝܶܐ ܘܛܳܥܰܝ̈ܳܐ܆ ܗܳܢܽܘܢ ܕܰܚܠܰܕܘ ܥ̣ܰܠܘ ܠܡܶܓܰܫ ܚܺܐܪܽܘܬܰܢ^[4]܆ ܐܰܝܟܰܢܳܐ ܕܳܐܡܰܪ ܦܰܘܠܽܘܤ.

ܡܳܢܳܐ ܗܳܟܺܝܠ ܢܺܐܡܰܪ ܠܘܳܬ ܗܳܠܶܝܢ. ܕܰܠܡܳܐ܆ ܪܝܛܝܢܝ^[5] ܠܰܝܬ ܒܓܶܠܥܳܕ܆ ܐܰܘ ܐܳܣܝܳܐ ܠܰܝܬ ܬܰܡܳܢ. ܠܡܳܢܳܐ ܘܠܳܐ ܣܶܠܩܰܬ ܐܳܣܝܽܘܬܳܐ ܕܒܰܪܬܳܐ ܕܥܰܡܳܐ ܕܺܝܠܝ^[6]. ܫܰܦܺܝܪܳܐ ܓܶܝܪ ܒܙܰܒܢܳܗ̇ ܠܡܶܬܚܰܫܳܚܽܘ ܒܡ̈ܶܠܶܐ ܕܶܐܪܰܡܝܳܐ ܢܒܺܝܳܐ ܘܰܠܡܺܐܡܰܪ: ܕܰܠܡܳܐ܆ ܢܒܽܘܪ ܡܶܢ ܣܰܡ̈ܡܳܢܶܐ ܕܡܶܢ ܟܬܳܒܳܐ ܐܰ‌ܠܳܗܳܝܳܐ܆ ܕܡܶܫܟܚܺܝܢ ܠܡܰܐܣܳܝܽܘ ܠܟܽܘܪܗܳܢܳܐ ܕܗܳܠܶܝܢ܆ ܘܟܰܕ ܛܳܒ܆ ܠܰܘ ܡܶܛܽܠ ܡܶܕܶܡ ܐ̱ܚܪܺܝܢ ܗܳܠܶܝܢ ܐܰܡܺܝܪ̈ܳܢ ܡܶܢ ܪܽܘܚܳܐ ܐܰ‌ܠܳܗܳܝܳܐ܆ ܐܶܠܳܐ ܡܶܛܽܠ ܕܥܰܠ ܟܽܠ ܚܰܕ ܚܰܫܳܐ ܘܟܺܐܒܳܐ ܡܶܢܗܶܝܢ ܢܶܫܟܰܚ ܐܳܣܝܽܘܬܳܐ ܕܠܳܚܡܳܐ܆ ܐܰܝܟܰܢܳܐ ܕܰܒܕܽܘܟ ܐܳܦ ܟܰܕ ܠܪ̈ܽܘܡܳܝܶܐ ܟܳܬܶܒ ܗ̱ܘܳܐ ܫܠܺܝܚܐ ܦܰܘܠܽܘܤ ܐܳܡܰܪ. ܟܽܠܗܶܝܢ ܗܳܠܶܝܢ ܕܩܰܕܶܡ̈ܝ̱ ܐܶܬܟܬܶܒ̈ܝ̱܆ ܠܡܰܠܦܳܢܽܘܬܳܐ ܕܺܝܠܰܢ ܩܰܕܶܡ ܐ̈ܶܬܟܬܶܒ̈ܝ̱܆ ܐܰܝܟܰܢܳܐ ܕܰܒܝܰܕ ܡܣܰܝܒܪܳܢܽܘܬܳܐ ܘܒܽܘܝܳܐܳܐ ܕܡܶܢ ܟܬܳܒ̈ܶܐ ܢܶܗܘܶܐ ܐܺܝܬ ܠܰܢ ܣܰܒܪܳܐ^[7].

ܪܗܰܛ ܠܺܝ ܓܶܝܪ ܠܥܶܠ ܒܥܽܘܗܕܳܢܳܟ܆ ܠܘܳܬ ܬܰܫܥܺܝܬܳܐ ܗܳܝ ܕܥܰܠ ܝܶܫܽܘܥ ܒܰܪܢܽܘܢ܆ ܗܰܘ ܪܰܒ ܚܰܝܠܳܐ ܠܳܐ ܡܶܙܕܰܟܝܳܢܳܐ ܕܣܶܕܪܳܐ ܕܰܩܪܳܒܶܗ ܕܡܳܪܝܳܐ܆ ܘܬܶܚܙܶܐ ܓܰܠܝܳܐܺܝܬ܆ ܕܗܳܝ ܕܠܳܐ ܢܰܚܪܶܡ ܠܗܳܢܽܘܢ ܕܺܐܝܬܰܝܗܽܘܢ ܥܕܺܝ̈ܠܶܐ ܘܰܡܚܰܝ̈ܒܶܐ܆ ܥܳܒܕܳܐ ܠܳܗ̇ ܠܰܡܕܺܝܢ̱ܬܳܐ ܬܚܶܝܬ ܚܽܘܝܳܒܳܐ ܕܚܶܪܡܳܐ܆ ܗܳܝ ܕܶܝܢ ܕܠܰܡܣܳܡ ܒܪܺܝܫܳܐ ܢܰܫܠܶܡ ܐܶܢܽܘܢ ܠܗܳܢܽܘܢ ܕܰܡܚܰܝܒܺܝܢ܆ ܡܶܢ ܟܽܠܳܗ̇ ܠܰܘܛܬܳܐ ܡܚܰܪܪܳܐ ܠܗܽܘܢ ܠܡܶܕܝܰܢܳܝ̈ܶܐ. ܐܳܦ ܓܶܝܪ ܗܽܘ ܗܰܘ ܪܺܝܫ ܚܰܝܠܳܐ ܪܰܒܳܐ ܘܰܡܕܰܒܰܪ ܥܰܡܳܐ ܣܰܟܽܘܠܬܳܢܳܐ܆ ܘܝܳܪܽܘܬܳܐ ܘܰܡܩܰܒܠܳܢܳܐ ܕܫܽܘܠܛܳܢܶܗ ܕܡܽܘܫܶܐ ܗܰܘ ܪܰܒܳܐ. ܟܰܕ ܥܬܺܝܕ ܗ̱ܘܳܐ ܕܢܰܩܪܶܒ ܥܰܡ ܐܺܝܪܺܝܚܽܘ ܗܳܝ ܕܺܐܝܬܶܝܗ̇ ܗ̱ܘܳܬ ܡܕܺܝܢ̱ܬܳܐ ܕܰܐ̱ܚܪ̈ܳܢܝ̣ܰܝ̣ ܫܰܪܒܬܳܐ܆ ܦܩܰܕ ܠܰܡܙܰܝܢ̈ܶܐ ܟܰܕ ܐܳܡܰܪ: ܩܥܰܘ. ܐܰܫܠܡܳܗ̇ ܠܰܢ ܓܶܝܪ ܡܳܪܝܳܐ ܠܰܡܕܺܝܢ̱ܬܳܐ. ܘܬܶܗܘܶܐ ܡܕܺܝܢ̱ܬܳܐ ܗܳܕܶܐ ܚܶܪܡܳܐ܆ ܘܟܽܠܗܶܝܢ ܗܳܠܶܝܢ ܕܺܐܝܬ ܒܳܗ̇܆ ܠܡܳܪܝܳܐ ܕܚܰܝ̈ܠܰܘܳܬܳܐ^[8]. ܠܡܳܪܝܳܐ ܨܒܰܐܽܘܬ. ܘܰܐܢ̱ܬܽܘܢ ܐܶܙܕܰܗܪܘ ܡܶܢ ܚܶܪܡܳܐ܆ ܕܕܰܠܡܳܐ ܟܰܕ ܬܶܬܚܰܫܒܽܘܢ ܬܶܣܒܽܘܢ ܡܶܕܶܡ ܡܶܢ ܚܶܪܡܳܐ܆ ܘܬܶܥܒܕܽܘܢܳܗ̇ ܠܡܰܫܪܺܝܬܳܐ ܕܰܒ̈ܢܰܝ ܐܺܝܣܪܳܐܶܝܠ ܚܶܪܡܳܐ ܘܬܶܬܒܪܽܘܢ.

ܘܗܰܘ ܡܰܢ ܗܳܠܶܝܢ ܦܳܩܶܕ ܗ̱ܘܳܐ. ܫܽܘܪ̈ܶܐ ܕܶܝܢ ܗܶܢܽܘܢ ܡܶܢ ܢܰܦܫܗܽܘܢ ܐܶܨܛܠܺܝܘ ܠܘܳܬ ܐܰܪܥܳܐ܆ ܒܰܩܥܳܬܳܐ ܕܥܰܡܳܐ. ܟܰܕ ܐܰܝܟ ܗܰܘ ܕܦܽܘܪ̈ܣܶܐ ܕܡܳܐܢܰܝ̈ ܩܪܳܒܳܐ ܐܶܬܬܱܪܰܥܘ ܘܰܡܕܺܝܢ̱ܬܳܐ ܐܶܬܟܰܒܫܰܬ܆ ܘܰܬܚܶܝܬ ܐܺܝܕܳܐ ܕܗܳܢܽܘܢ ܕܟܰܒܫܽܘܗ̇ ܗܘ̣ܳܬ. ܘܐ̱ܢܳܫ ܦܳܠܚܳܐ ܡܶܢ ܒܢܰܝ̈ ܐܺܝܣܪܳܐܶܝܠ ܥܳܟܳܪ ܗܰܘ ܒܰܪ ܟܰܪܡܺܝ܆ ܡܶܢ ܫܽܘܦܪܳܐ ܕܒܶܙܬܳܐ ܐܶܙܕܟܺܝ܆ ܘܰܒܓܰܢܳܒܽܘܬܳܐ ܐܰܣܟܶܠ ܘܰܚܛܳܐ. ܘܗܝ ܚܛܺܝܬܳܐ. ܥܰܠ ܟܽܠܶܗ ܥܰܡܳܐ ܐܶܬܟܰܬܒܰܬ. ܘܰܣܠܶܩܘ ܠܡܰܩܪܳܒܽܘ ܠܘܳܬ ܥܳܝ܆ ܡܕܺܝܢ̱ܬܳܐ ܕܶܝܢ ܐܺܝܬܶܝܗ̇ ܗ̱ܘܳܬ ܐܳܦ ܗܳܕܶܐ ܕܰܐ̱ܚܪ̈ܳܢܝ̣ܰܝ̣ ܫܰܪܒܬܳܐ. ܘܚܰܣܺܝܢܳܐܺܝܬ ܐܶܙܕܟܺܝܘ. ܟܰܕ ܥܰܠ ܗܳܠܶܝܢ ܡܶܬܟܡܰܪ ܗ̱ܘܳܐ ܝܶܫܽܘܥ ܒܰܪ ܢܽܘܢ ܡܕܰܡܰܥ ܗ̱ܘܳܐ. ܘܟܰܕ ܠܰܠܒܽܘܫܶܗ ܣܰܕܶܩ܆ ܘܥܰܠ ܪܺܝܫܶܗ ܒܕܰܪ ܥܰܦܪܳܐ ܥܰܡ ܣܳܒ̈ܶܐ ܕܺܐܝܣܪܳܐܶܝܠ܆ ܘܥܰܠ ‌ܐܰܦܰܘ̈ܗ̱ܝ ܢܦܰܠ ܥܰܠ ‌ܐܰܪܥܳܐ ܩܕܳܡ ܡܳܪܝܳܐ܆ ܒܳܥܶܐ ܗ̱ܘܳܐ ܠܡܺܐܠܰܦ ܠܥܶܠܬܳܐ܆ ܕܫܽܘܚܠܳܦܳܐ^[9] ܕܗܳܢܽܘܢ ܕܶܐܣܬܕܰܪܘ ܠܰܩܪܳܒܳܐ ܡܶܢ ܥܰܡܳܐ. ܘܫܳܡܰܥ ܗ̱ܘܳܐ ܠܰܐܠܳܗܳܐ ܕܳܐܡܰܪ ܓܰܠܝܳܐܺܝܬ܆ ܕܚܶܪܡܳܐ ܐܺܝܬ ܒܟܽܘܢ. ܠܳܐ ܬܶܫܟܚܽܘܢ ܠܰܡܩܳܡ ܠܽܘܩܒܰܠ ܒܥܶܠܕܒܳܒܰܝ̈ܟܽܘܢ܆ ܥܕܰܡܳܐ ܕܰܬܪܺܝܡܽܘܢܳܝܗ̱ܝ ܠܚܶܪܡܳܐ ܡܶܢܟܽܘܢ^[10].

ܘܟܰܕ ܠܗܳܠܶܝܢ ܫܡܰܥ ܓܰܒܪܳܐ ܗܰܘ ܪܳܚܶܡ ܐܰ‌ܠܳܗܳܐ. ܒܳܥܶܐ ܗ̱ܘܳܐ ܠܶܗ ܠܗܰܘ ܕܣܰܥܪܳܗ̇ ܠܰܓܢܽܘܒܬܳܐ ܘܰܐܣܟܶܠ. ܘܰܗܘ̣ܳܐ ܠܥܰܡܳܐ ܥܶܠܬܳܐ ܕܠܰܘܛܬܳܐ ܘܰܕܚܶܪܡܳܐ. ܘܟܰܕ ܐܶܫܟܚܶܗ ܠܥܳܟܳܪ ܗܰܘ ܒܰܪ ܟܰܪܡܺܝ܆ ܕܗܽܘ ܠܛܰܡܽܐܘܬܳܐ ܕܰܐܝܟ ܗܳܕܶܐ ܐܰܡܪܰܚ܆ ܠܠܰܘܛܬܳܐ ܗܳܝ ܕܥܰܠ ܥܰܡܳܐ ܘܰܠܚܶܪܡܳܐ܆ ܐܰܥܒܰܪ ܣܳܡܳܗ̇ ܥܠܰܘܗ̱ܝ܆ ܟܰܕ ܗܳܟܰܢܳܐ ܐܳܡܰܪ: ܠܡܳܢܳܐ ܐܰܘܒܶܕܬ^[11] ܠܰܢ. ܢܰܘܒܕܳܟ^[12] ܡܳܪܝܳܐ ܐܰܝܟ ܕܳܐܦ ܝܰܘܡܳܢܳܐ. ܘܰܪܓܶܡܘ ܟܽܠܶܗ ܐܺܝܣܪܳܐܶܝܠ ܒܟܺܐܦ̈ܶܐ. ܘܰܟܫܰܘ ܥܠܰܘܗ̱ܝ ܝܰܓܪܳܐ ܪܰܒܳܐ ܕܟܺܐܦ̈ܶܐ܆ ܘܶܐܬܬܢܺܝܚ ܡܳܪܝܳܐ ܡܶܢ ܪܽܘܓܙܳܐ ܕܚܶܡܬܶܗ^[13].

ܚܳܙܶܝܢ ܐܢ̱ܬܽܘܢ ܕܗܳܝ ܕܰܠܗܳܢܽܘܢ ܕܰܡܚܰܝܒܺܝܢ ܢܰܪܡܶܐ ܬܚܶܝܬ ܠܰܘܛܬܳܐ ܘܰܬܚܶܝܬ ܚܶܪܡܳܐ܆ ܠܪܽܘܓܙܳܐ ܕܰܐ‌ܠܳܗܳܐ ܡܰܗܦܟܳܐ܆ ܗܰܘ ܕܥܰܠ ܥܰܡܳܐ ܘܥܰܠ ܡܕܺܝܢ̱ܬܳܐ܆ ܗܳܝ ܕܶܝܢ ܕܢܶܬܛܰܫܽܘܢ ܒܥܰܡܳܐ ܟܰܣܝܳܐܺܝܬ ܗܳܢܽܘܢ ܕܰܡܚܰܝܒܺܝܢ ܬܚܶܝܬ ܚܶܪܡܳܐ܆ ܚܒܳܠܳܐ ܟܽܘܠܳܢܳܝܳܐ ܕܟܽܠܶܗ ܥܰܡܳܐ܆ ܡܩܺܝܡܳܐ ܥܰܠ ܟܽܠܶܗ ܓܰܘܳܐ܆ ܡܶܛܽܠܗܳܕܶܐ ܚܢܰܢ܆ ܠܗܳܢܽܘܢ ܕܒܰܬܪܶܝܢ ܟܝܳܢ̈ܶܐ ܬܰܚܶܡܘ ܕܡܶܬܺܝܕܰܥ ܗܰܘ ܚܰܕ ܡܫܺܝܚܳܐ܆ ܒܚܶܪܡܳܐ ܡܦܰܪܣܶܝܢ ܚ̱ܢܰܢ܆ ܟܰܕ ܠܰܡܕܺܝܢ̱ܬܳܐ ܕܺܝܠܰܢ ܡܚܰܪܪܺܝܢܰܢ ܡܶܢ ܠܰܘܛܬܳܐ ܘܡܶܢ ܚܶܪܡܳܐ܆ ܘܥܰܠ ܩܰܪܩܰܦܬܳܐ ܕܺܝܠܗܽܘܢ ܡܰܗܦܟܺܝܢ ܚ̱ܢܰܢ ܠܳܗ̇ ܠܠܰܘܛܬܳܐ. ܐܰܘ ܠܰܘ ܠܗܳܢܳܐ ܕܽܘܓܡܰܐ ܪܰܫܺܝܥܳܐ ܗܰܘ ܡܶܬܪܰܥܶܐ ܗ̱ܘܳܐ܆ ܗܰܘ ܕܰܐܢ̱ܬܘܢ ܝܳܕܥܺܝܢ ܐܢ̱ܬܽܘܢ ܠܶܗ܆ ܘܟܰܣܝܳܐܺܝܬ ܠܟܽܠܢܳܫ ܡܣܰܝܶܡ ܗ̱ܘܳܐ܆ ܘܒܰܢ ܟܰܕ ܠܳܐ ܝܳܕܥܺܝܢ ܗ̱ܘܰܝܢ ‌ܐܺܝܬܰܘܗ̱ܝ ܗ̱ܘܳܐ ܚܶܪܡܳܐ ܘܰܟܣܶܐ ܗ̱ܘܳܐ܆ ܘܰܒܟܽܠܶܗ ܗܰܘ ܙܰܒܢܳܐ܆ ܠܟܽܠܳܗ̇ ܡܕܺܝܢ̱ܬܳܐ ܫܓܽܘ̈ܫܝܶܐ ܘܰܕܠܽܘܚ̈ܝܶܐ ܡܳܠܶܐ ܗ̱ܘܳܐ܆ ܐܰܝܟܰܢܳܐ ܕܳܐܦ ܐܶܤܛܘܳܐ ܘܰܡܢܰܘ̈ܳܬܳܐ ܢܰܨܺܝ̈ܚܳܬܳܐ ܕܰܡܕܺܝܢ̱ܬܳܐ ܥܒܳܕܳܐ ܕܢܽܘܪܳܐ ܢܶܗܘ̈ܝܳܢ܆ ܘܩ̈ܶܛܠܶܐ ܣܰܓܺܝ̈ܶܐܐ ܢܶܬܬܰܡܪܚܽܘܢ܆ ܘܪ̈ܶܓܠܳܬܳܐ ܕܰܕܡ̈ܶܐ ܢܶܫܬܰܦ̈ܥܳܢ.

ܐܷܠܳܐ ܐܶܡܰܬܝ ܕܰܐܝܟ ܥܳܟܰܪ ܐܶܬܟܣܶܤ ܘܶܐܬܬܨܺܝܕ܆ ܟܰܕ ܠܪܽܘܫܥܳܐ ܗܰܘ ܕܚܳܒܶܠ ܗ̱ܘܳܐ ܒܶܗ܆ ܘܰܡܛܰܫܝܳܐܺܝܬ ܘܰܢܟܺܝܠܳܐܺܝܬ ܟܰܡܺܝܢ ܗ̱ܘܳܐ ܒܶܗ ܘܰܡܨܰܕܝܳܢܳܐܺܝܬ܆ ܕܰܥܦܺܝܦܽܘܬܳܐ ܘܕܰܨܢܺܝܥܽܘܬܳܐ ܫܕܰܝܢܰܢ܆ ܘܰܬܚܶܝܬ ܚܙܳܬܳܐ ܕܟܽܠܢܳܫ ܥܰܪܛܶܠܳܝܳܐ ܘܰܡܦܰܪܣܝܳܐ ܚܰܘܺܝܢܳܝܗ̱ܝ ܘܗܳܟܰܢܳܐ ܒܰܙܰܚܢܳܝܗ̱ܝ ܆ ܒܰܓܙܳܪ ܕܺܝܢܳܐ ܕܚܶܪܡܳܐ ܚܰܝܶܒܢܳܝܗ̱ܝ ܐܰܟܚܕܳܐ܆ ܥܰܡܗܽܘܢ ܕܡܰܠܦܳܢ̈ܶܐ ܪ̈ܰܫܺܝܥܶܐ ܕܗܳܢܳܐ. ܐܳܦ ܓܶܝܪ ܟܺܝܬ܆ ܘܳܐܦܠܳܐ ܗܽܘ ܥܳܟܰܪ ܒܰܠܚܽܘܕܰܘܗ̱ܝ ܣܰܒܠܶܗ ܠܰܡܣܳܡ ܒܪܺܝܫܳܐ. ܐܶܠܳܐ ܐܳܦ ܐܰܢ̱ܬܬܶܗ ܘܳܐܦ ܒܢܰܘ̈ܗ̱ܝ ܘܟܽܠܗܽܘܢ ܐܰܝܠܶܝܢ ܕܝܳܕܥܺܝܢ ܗ̱ܘܰܘ ܥܰܡܶܗ܆ ܘܰܒܝܰܕ ܗܳܕܶܐ ܥܰܡܶܗ ܐܰܣܟܶܠܘ ܘܶܐܫܬܰܘܬܰܦܘ ܒܓܰܢܳܒܽܘܬܳܐ ܗܳܝ܆ ܟܰܕ ܠܨܳܡܰܥܬܳܐ^[14] ܐܶܬܬܰܝܬܺܝܘ܆ ܘܥܶܪ̈ܒܰܘ̈ܗ̱ܝ ܘܚܶܡܪ̈ܰܘܗ̱ܝ ܘܰܒܥܺܝܪܶܗ܆ ܠܘܳܬ ܗܳܝ ܕܢܶܥܒܕܽܘܢ ܕܶܚܠܬܳܐ ܘܙܰܘܥܬܳܐ ܒܗܳܢܽܘܢ ܕܚܳܙܶܝܢ܆ ܕܠܳܐ ܒܗܽܘܢ ܟܰܕ ܒܗܽܘܢ ܒܰܚܛܳܗ̈ܶܐ ܢܶܦܠܽܘܢ܆ ܐܶܬܪܓܶܡܘ ܒܟܺܐܦ̈ܶܐ ܡܶܢ ܒܢܰܝ̈ܳܐ ܕܺܐܝܣܪܳܐܶܝܠ. ܡܶܛܽܠܗܳܕܶܐ ܟܰܕ ܚܰܕ ܡܶܢ ܐܶܦܝܣܩܽܘ̈ܦܶܐ ܟܰܕ ܐܳܬܶܐ ܠܗܳܪܟܳܐ܆ ܟܺܐܦܳܐ ܡܠܺܝܠܬܳܐ ܫܳܕܶܐ ܒܝܰܕ ܚܶܪܡܶܐ܆ ܥܰܠ ܟܽܠܶܗ ܒܰܝܬܳܐ ܕܪ̈ܰܫܺܝܥܶܐ. ܘܟܰܕ ܠܰܡܕܺܝܢ̱ܬܳܐ ܕܺܝܠܰܢ ܪܳܚܡܰܬ ܠܰܡܫܺܝܚܳܐ ܡܚܰܪܰܪ ܡܶܢ ܐܰܒܕܳܢܳܐ܆ ܠܟܽܠܚܰܕ ܡܶܢܗܽܘܢ ܕܰܡܚܰܝ̈ܒܶܐ ܐܳܡܰܪ ܒܰܕܡܽܘܬ ܝܶܫܽܘܥ ܗܰܘ ܒܰܪ ܢܽܘܢ܆ ܕܰܠܡܳܐ ܐܰܘܒܶܕܬ^[15] ܠܰܢ. ܢܰܘܒܕܳܟ ܡܳܪܝܳܐ ܐܰܝܟܰܢܳܐ ܕܳܐܦ ܝܰܘܡܳܢܳܐ.

ܕܣܰܓܺܝ ܕܶܝܢ ܫܰܦܺܝܪܳܐ ܘܰܕܝܰܬܺܝܪ ܠܳܚܡܳܐ ܠܫܰܪܒܳܐ ܗܳܢܳܐ ܕܣܺܝܡ ܠܰܢ܆ ܚܳܙܶܐ ܐ̱ܢܳܐ ܠܳܗ̇ ܠܬܰܫܥܺܝܬܳܐ ܗܳܝ ܕܥܳܟܳܪ܆ ܗܳܝ ܕܰܠܪܽܘܫܥܳܐ ܕܺܝܠܗܽܘܢ ܕܗܶܪ̈ܶܣܺܝܤ ܡܝܰܩܢܳܐ. ܡܳܢܳܐ ܓܶܝܪ ܐܶܡܰܪ ܗܰܘ ܙܳܝܥܳܐ ܘܕܳܘܝܳܐ ܟܰܕ ܐܶܬܬܨܺܝܕ ܕܰܓܢܰܒ܆ ܘܰܢܦܰܠ ܬܚܶܝܬ ܚܶܪܡܳܐ. ܚܙܺܝܬ ܒܒܶܙܬܳܐ ܐܳܡܶܠܳܐ ܚܕܳܐ܆ ܫܚܺܝܡܬܳܐ ܡܦܰܬܰܟܬܳܐ ܫܰܦܺܝܪܬܳܐ. ܐܳܡܶܠܳܐ ܕܶܝܢ ܐܺܝܬܶܝܗ̇܆ ܬܰܟܣܺܝܬܳܐ ܦܫܺܝܛܬܳܐ. ܘܡܰܐܬܶܝܢ ܕܺܝܕܪ̈ܰܟܡܶܐ ܐܰܘܟܺܝܬ ܬܪ̈ܰܝܳܢܰܝ ܙܽܘ̈ܙܶܐ ܕܣܺܐܡܳܐ܆ ܘܠܶܫܳܢܳܐ ܚܰܕ ܕܕܰܗܒܳܐ ܕܚܰܡܫܺܝܢ ܕܺܝܕܪ̈ܰܟܡܶܐ܆ ܘܟܰܕ ܐܶܬܪܰܓܪܓܶܬ ܠܗܽܘܢ ܫܶܩܠܶܬ ܐܶܢܽܘܢ. ܘܗܳܐ ܗܳܠܶܝܢ ܡܛܰܫܶܝܢ ܒܰܐܪܥܳܐ ܒܡܰܫܟܢܳܐ܆ ܘܣܺܐܡܳܐ ܡܛܰܫܰܝ ܬܚܽܘܬܰܝܗܽܘܢ^[16].

ܕܰܐܝܟ ܗܳܠܶܝܢ ܗܳܟܺܝܠ ܒܕܽܘܟ ܐܺܝܬܰܝܗܽܘܢ܆ ܐܳܦ ܗܳܢܽܘܢ ܕܰܗܘ̣ܰܘ ܪ̈ܺܝܫܳܢܶܐ ܠܗܶܪ̈ܣܺܝܤ ܗܳܠܶܝܢ ܪ̈ܰܫܺܝܥܳܬܳܐ܆ ܡܚܰܠ̈ܨܰܝ ܒܶܝܬ ܡܰܩܕܫܳܐ. ܘܓܰܢܳܒ̈ܶܐ ܕܰܟܬܳܒܳܐ ܐܰ‌ܠܳܗܳܝܳܐ܆ ܗܰܘ ܕܒܺܐܝܕܰܘ̈ܗ̱ܝ ܫܒܰܐܽܘܗ̱ܝ ܗܳܢܽܘܢ ܕܶܝܢ ܒܰܙܽܘܗ̱ܝ ܠܳܐܟܶܠܩܰܪܨܳܐ܆ ܫܠܺܝ̈ܚܶܐ ܩܰܕܺܝ̈ܫܶܐ ܘܡܰܠܦܳܢ̈ܶܐ ܡܰܝ̈ܬܝ̣ܰܝ̣ ܐ̱ܪ̈ܳܙܶܐ ܕܥܺܕܬܳܐ܆ ܓܳܢܒܺܝܢ ܕܶܝܢ ܠܳܐܡܶܠܳܐ ܗܳܝ ܫܚܺܝܡܬܳܐ ܡܦܰܬܰܟܬܳܐ ܟܺܝܬ ܘܫܰܦܺܝܪܬܳܐ. ܗܳܕܶܐ ܕܶܝܢ ܐܺܝܬܶܝܗ̇܆ ܐܶܤܛܠܳܐ ܫܰܦܺܝܪܬܳܐ ܕܥܺܕܬܳܐ܆ ܗܳܝ ܕܡܶܛܽܠܳܬܳܗ̇ ܐܳܡܰܪ ܢܒܺܝܳܐ ܕܰܘܺܝܕ ܠܘܳܬ ܐܰ‌ܠܗܳܐ ܕܟܽܠ܆ ܩܳܡܰܬ ܡܰܠܟܽܘܬܳܐ ܡܶܢ ܝܰܡܺܝܢܳܟ܆ ܟܕ ܡܥܰܛܦܳܐ ܒܰܠܒܽܘܫܳܐ ܡܰܕܗܒܳܐ ܘܰܡܦܰܬܟܳܐ^[17]. ܠܗܳܝ ܕܰܒܝܰܕ ܡܰܠܦܳܢܽܘܬܗܽܘܢ ܕܰܓܳܠܬܳܐ ܝܰܨܺܝܦܺܝܢ ܗܳܢܽܘܢ ܡܰܪ̈ܳܚܶܐ ܕܢܶܩܦܠܽܘܢ ܘܰܢܫܰܠܚܽܘܢܳܗ̇.

ܣܰܓܺܝ ܕܶܝܢ ܙܳܕܩܳܐܺܝܬ ܠܶܐܤܛܠܳܐ ܕܥܺܕܬܳܐ܆ ܫܚܺܝܡܬܳܐ ܡܦܰܬܰܟܬܳܐ ܫܰܦܺܝܪܬܳܐ ܫܰܡܗܳܗ̇. ܫܚܺܝܡܬܳܐ ܓܶܝܪ ܐܺܝܬܶܝܗ̇ ܘܰܦܫܺܝܛܬܳܐ܆ ܡܶܛܽܠ ܦܫܺܝܛܽܘܬܶܗ ܘܠܳܐ ܙܺܝܦܳܢܽܘܬܶܗ ܕܰܫܪܳܪܳܐ. ܡܦܰܬܰܟܬܳܐ ܕܶܝܢ܆ ܡܶܛܽܠ ܪ̈ܺܝܫܶܐ ܡܫܰܚ̈ܠܦܶܐ ܕܰܡܝܰܬܪ̈ܳܬܳܐ. ܗܳܠܶܝܢ ܕܡܶܢܗܽܘܢ ܐܺܝܬܶܝܗ̇ ܫܰܦܺܝܪܬܳܐ ܘܰܦܐܺܝܬܳܐ܆ ܕܠܰܝܬ ܒܳܗ̇ ܟܽܘܬܡܳܐ ܐܰܘ ܛܽܘܠܫܳܐ ܐܰܘ ܡܶܕܶܡ ܡܶܢ ܗܳܠܶܝܢ ܕܰܐܝܟ ܗܳܟܰܢ^[18]܆ ܐܰܝܟܰܢܳܐ ܕܳܐܡܰܪ ܦܰܘܠܽܘܤ.

ܓܳܢܒܺܝܢ ܕܶܝܢ ܗܳܢܽܘܢ ܡܣܰܝ̈ܒܶܐ܆ ܘܰܠܘܳܬ ܗܳܝ ܕܫܳܦܪܳܐ ܠܗܽܘܢ ܩܰܦܺܝܠܽܘܣܳܐ ܥܳܒܕܺܝܢ ܐܰܘܟܺܝܬ ܡܙܰܝܦܺܝܢ ܠܗܽܘܢ܆ ܐܳܦ ܠܡܰܐܬܶܝܢ ܕܺܝܕܪ̈ܰܟܡܶܐ ܐܰܘܟܺܝܬ ܬܪ̈ܰܝܳܢܰܝ ܙܽܘ̈ܙܶܐ ܕܣܺܐܡܳܐ܆ ܗܳܠܶܝܢ ܟܺܝܬ ܕܺܐܝܬܰܝܗܽܘܢ܆ ܡܰܠܦܳܢܽܘܬܳܐ ܗܳܝ ܡܫܰܡܠܰܝܬܳܐ ܕܬܰܪ̈ܬܰܝܗܶܝܢ ܕܺܝܰܐܬܺܝ̈ܩܰܤ܆ ܕܥܰܬܺܝܩܬܳܐ ܟܺܝܬ ܘܕܰܚܕܰܬܳܐ܆ ܕܠܰܥܣܰܪ ܥܣܺܝܪ̈ܳܝܘܳܬܳܐ ܒܟܽܠ ܚܕܳܐ ܡܶܢܗܶܝܢ ܡܶܫܬܰܘܫܛܳܐ ܘܪܳܒܝܳܐ܆ ܗܳܢܳܐ ܓܶܝܪ ‌ܐܺܝܬܰܘܗ̱ܝ ܬܚܽܘܡܳܐ ܕܡܰܫܠܡܳܢܽܘܬܳܐ ܪܺܝܫܳܝܬܳܐ. ܕܰܐܝܬܺܝ ܦܺܐܪ̈ܶܐ ܓܶܝܪ ܫܳܡܥܺܝܢܰܢ ܒܶܐܘܰܢܓܶܠܺܝ̈ܰܐ ܙܰܪܥܳܐ ܗܰܘ ܫܡܰܝܳܢܳܐ ܘܡܶܠܬܳܐ ܚܰܕ ܒܰܡܳܐܐ܆ ܒܳܬܰܪ ܬܠܳܬܺܝܢ ܘܶܫܬܺܝܢ^[19]. ܕܗܺܝ ܟܰܕ ܗܺܝ ܕܶܝܢ ‌ܐܺܝܬܰܘܗ̱ܝ ܐܳܡܪܺܝܢܰܢ ܠܣܺܐܡܳܐ܆ ܐܳܦ ܠܠܶܫܳܢܳܐ ܗܰܘ ܕܕܰܗܒܳܐ܆ ܗܰܘ ܟܺܝܬ ܕܺܐܝܬܰܘܗ̱ܝ܆ ܗܰܘ ܕܰܫܠܺܝ̈ܚܶܐ ܘܕܰܢܒܺܝ̈ܶܐ܆ ܗܰܘ ܕܒܺܐܝܕܰܘ̈ܗ̱ܝ ܐܰܝܟ ܡܢܰܝܪܳܐ^[20] ܘܕܰܒܪܽܘܚܳܐ ܩܰܕܺܝܫܳܐ ܤܛܺܝܡ܆ ܢܦ̈ܰܩܶܝܢ ܡ̈ܶܠܶܐ ܐܰܡܺܝܪ̈ܳܬ ܒܪܽܘܚܳܐ.

ܟܬܺܝܒ ܓܶܝܪ܆ ܕܣܺܐܡܳܐ ܒܚܺܝܪܳܐ ܠܶܫܳܢܶܗ ܕܙܰܕܺܝܩܳܐ^[21]. ܘܒܽܘܩܝܳܐ ܠܣܺܐܡܳܐ ܘܰܠܕܰܗܒܳܐ܆ ܒܽܘܚܪܳܢܳܐ ܕܢܽܘܪܳܐ. ܘܬܽܘܒ ܡ̈ܶܠܶܐ ܕܡܳܪܝܳܐ ܡ̈ܶܠܶܐ ܕܰܟܝ̈ܳܬܳܐ܆ ܣܺܐܡܳܐ ܒܚܺܝܪܳܐ ܕܰܒܩܶܐ ܒܰܐܪܥܳܐ ܕܰܡܕܰܟܰܝ ܚܰܕ ܒܫܰܒܥܳܐ^[22].

ܠܗܳܢܳܐ ܗܳܟܺܝܠ ܠܶܫܳܢܳܐ ܕܕܰܗܒܳܐ ܘܰܒܚܺܝܪܳܐ܆ ܘܰܠܣܺܐܡܳܐ ܗܳܢܳܐ ܒܰܩܝܳܐ܆ ܟܰܕ ܡܚܰܠܨܺܝܢ ܓܳܢܒܺܝܢ ܠܶܗ ܗܶܪ̈ܶܛܺܝܩܽܘ ܒܰܕܡܽܘܬ ܥܳܟܳܪ܆ ܘܛܳܡܪܺܝܢ ܠܶܗ ܒܰܐܪܥܳܐ ܒܰܕܡܽܘܬ ܥܰܒܕܳܐ ܗܰܘ ܒܺܝܫܳܐ ܘܰܚܒܰܢܳܢܳܐ ܕܒܶܐܘܰܢܓܶܠܺܝܽܘܢ ܕܛܰܫܺܝ ܠܗܳܝ ܟܰܟܪܳܐ^[23]܆ ܘܠܰܘ ܒܰܠܚܽܘܕ ܒܰܐܪܥܳܐ ܐܶܠܳܐ ܐܳܦ ܒܡܰܫܟܢܳܐ܆ ܗܳܢܰܘ ܕܶܝܢ ܒܡܰܣܰܒ ܒܰܐܦ̈ܶܐ ܘܰܒܨܰܕܘܳܐ܆ ܘܒܶܐܣܟܺܡܳܐ ܕܡܶܢ ܠܒܰܪ ܘܕܰܩܕܳܡ ܐܰܦ̈ܶܐ ܕܫܰܦܺܝܪܽܘܬ ܕܶܚܠܬܳܐ ܐܰܝܟܰܢܳܐ ܕܳܐܡܰܪ ܫܠܺܝܚܳܐ܆ ܕܰܕܡܽܘܬܳܐ ܕܫܰܦܺܝܪܽܘܬ ܕܶܚܠܬܳܐ ܐܺܝܬ ܠܗܽܘܢ^[24]܆ ܒܚܰܝܠܳܐ ܕܶܝܢ ܕܺܝܠܳܗ̇ ܟܳܦܪܺܝܢ܆ ܘܰܒܠܶܫܳܢܳܐ ܕܰܐܒܳܪܳܐ ܘܕܰܓܳܠܳܐ܆ ܡܫܰܚܠܦܺܝܢ ܘܰܡܙܰܝܦܺܝܢ ܠܕܽܘܓ̈ܡܰܛܰܐ ܐܰ‌ܠܳܗܳܝ̈ܶܐ܆ ܠܟܽܠܶܗ ܥܰܡܳܐ ܗܳܘܶܝܢ ܡܰܙܡܢܳܢ̈ܶܐ ܕܪܽܘܓܙܶܗ ܕܰܐ‌ܠܳܗܳܐ. ܡܶܛܽܠܗܳܕܶܐ ܐܰܝܟ ܕܰܒܟܺܐܦ̈ܶܐ ܒܚܶܪܡܳܐ ܪܳܡܶܝܢ ܚ̱ܢܰܢ ܠܗܽܘܢ܆ ܐܳܦܶܢ ܝܰܬܺܝܪ ܣܰܓܺܝ̈ܶܐܐ ܢܶܗܘܽܘܢ ܐܺܝܬܰܝܗܽܘܢ ܒܡܶܢܝܳܢܳܐ. ܘܟܽܠܶܗ ܗܳܢܳܐ܆ ܟܡܳܐ ܕܰܢܩܺܝܡ ܥܠܰܝܗܽܘܢ ܝܰܓܪܳܐ ܪܰܒܳܐ ܕܟܺܐܦ̈ܶܐ܆ ܐܰܝܟܰܢܳܐ ܕܠܳܐ ܬܽܘܒ ܢܶܫܟܚܽܘܢ ܕܢܶܬܠܽܘܢ ܪܺܝܫܗܽܘܢ ܒܰܕܡܽܘܬ ܚ̈ܘܰܘܳܬܳܐ܆ ܘܢܶܪܚܫܽܘܢ ܢܶܦܩܽܘܢ ܠܒܰܪ ܡܶܢ ܢܶܩ̈ܥܰܝܗܽܘܢ.

ܦܰܘܠܽܘܤ ܓܶܝܪ ܗܰܘ ܐܰ‌ܠܳܗܳܝܳܐ܆ ܘܳܐܦܠܳܐ ܥܰܠ ܡܰܠܰܐܟ̈ܶܐ ܚܰܣܰܪ. ܟܰܕ ܐܳܡܰܪ ܗ̱ܘܳܐ: ܐܶܠܳܐ ܐܳܦܶܢ ܚܢܰܢ ܐܰܘ ܡܰܠܰܐܟܳܐ ܢܣܰܒܰܪܟܽܘܢ ܠܒܰܪ ܡܶܢ ܗܰܘ ܡܳܐ ܕܣܰܒܰܪܢܳܟܽܘܢ. ܚܶܪܡܳܐ ܢܶܗܘܶܐ. ܘܬܽܘܒ ܡܶܢ ܕܪܺܝܫ ܡܶܢ ܩܽܘܪܒܳܐ ܗܺܝ ܟܰܕ ܗܺܝ ܠܘܳܬ ܙܽܘܗܳܪܳܐ ܕܺܝܠܰܢ ܐܰܝܬܺܝ ܒܳܬܰܪܟܶܢ ܟܰܕ ܐܶܡܰܪ: ܐܰܝܟ ܕܩܰܕܶܡܢܰܢ ܐܶܡܰܪܢܰܢ܆ ܐܳܦ ܗܳܫܳܐ ܬܽܘܒ ܐܳܡܰܪ ܐ̱ܢܳܐ. ܐܶܢ ܐ̱ܢܳܫ ܢܣܰܒܰܪܟܽܘܢ܆ ܠܒܰܪ ܡܶܢ ܗܰܘ ܡܳܐ ܕܩܰܒܶܠܬܽܘܢ܆ ܚܶܪܡܳܐ ܢܶܗܘܶܐ^[25].

ܡܳܢܳܐ ܗܳܟܺܝܠ ‌ܐܶܡܰܪ ܠܺܝ. ܕܰܠܡܳܐ ܟܰܕ ܡܡܰܠܶܠ ܣܪ̈ܺܝܩܳܬܳܐ ܘܝܰܬܺܝܪܳܐ ܐܶܣܬܒܰܪ ܠܳܟ܆ ܟܰܕ ܬܰܪܬܶܝܢ ܙܰܒܢܺܝ̈ܢ ܐܰܡܪܶܗ ܠܚܶܪܡܳܐ܆ ܘܢܰܩܺܝܦܳܐܺܝܬ ܘܰܥܠܶܝܗ̇ ܟܰܕ ܥܠܶܝܗ̇܆ ܐܰܘ ܝܰܬܺܝܪܳܐܺܝܬ ܙܗܺܝܪܳܐ܆ ܘܰܕܥܰܠ ܦܽܘܪܩܳܢܳܐ ܕܺܝܠܰܢ ܥܳܒܶܕ ܝܰܨܺܝܦܽܘܬܳܐ܆ ܘܰܕܝܰܬܺܝܪ ܡܚܰܣ̈ܢܶܐ ܥܳܒܶܕ ܠܰܢ ܒܰܢܛܽܘܪܬܳܐ ܕܡܶܢ ܗܳܪܟܳܐ. ܗܰܘ ܟܺܝܬ ܕܳܐܦ ܦܳܣܽܘܩܳܐܺܝܬ ܬܽܘܒ ܐܳܡܰܪ: ܕܶܐܢ ܐ̱ܢܳܫ ܠܳܐ ܪܳܚܶܡ ܠܡܳܪܰܢ܆ ܢܶܗܘܶܐ ܚܪܶܡ^[26]. ܡܳܢܳܐ ܕܶܝܢ. ܗܰܘ ܕܥܰܠ ܡܰܠܰܐܟ̈ܶܐ ܟܰܕ ܡܣܰܒܪܺܝܢ ܠܰܢ ܠܒܰܪ ܡܶܢ ܗܰܘ ܡܳܐ ܕܩܰܒܶܠܰܝܢ ܠܳܐ ܚܳܤ܆ ܥܰܠ ܣܽܘܓܳܐܐ ܕܰܒܢܰܝ̈ܢܳܫܳܐ ܟܰܝ ܚܳܐܶܤ ܗ̱ܘܳܐ܆ ܕܰܡܫܰܚܠܦܺܝܢ ܗ̱ܘܰܘ ܘܰܡܙܰܝܦܺܝܢ ܠܗܰܝܡܳܢܽܘܬܳܐ܆ ܘܰܠܟܳܪܽܘܙܽܘܬܳܐ ܕܶܐܘܰܢܓܶܠܺܝܽܘܢ܆ ܐܰܘ ܠܳܐ ܝܳܕܰܥ ܐܰܢ̱ܬ ܕܺܐܝܣܪܳܐܶܝܠ܆ ܗܳܘܶܐ ܗ̱ܘܳܐ ܡܰܢ ܫܶܬܡܳܐܐ ܐܰ‌ܠܦܰܝ̈ܳܐ ܕܪ̈ܶܓܠܳܝܶܐ^[27]܆ ܟܰܕ ܡܶܢ ܡܶܨܪܶܝܢ ܠܘܳܬ ܐܰܪܥܳܐ ܕܡܽܘܠܟܳܢܳܐ ܥܳܒܶܕ ܗ̱ܘܳܐ ܡܰܪܕܺܝܬܳܐ܆ ܘܥܰܡܳܐ ܩܰܕܺܝܫܳܐ ܡܶܫܬܰܡܰܗ ܗ̱ܘܳܐ܆ ܥܰܡܳܐ ܡܫܰܪܬܚܳܐ܆ ܟܽܘܗܳܢܳܐ ܡܰܠܟܳܝܳܐ܆ ܘܟܰܕ ܥܒܰܪܘ ܥܰܠ ܦܽܘܩ̈ܕܳܢܶܐ ܕܰܐ‌ܠܳܗܳܐ܆ ܟܽܠܗܽܘܢ ܢܦܰܠܘ ܒܡܰܕܒܪܳܐ ܟܰܕ ܐܶܫܬܰܛܰܚܘ ܐܰܝܟ ܕܰܟܬܺܝܒ܆ ܟܰܕ ܫܪ̈ܰܕܽܘܕܶܐ ܕܺܝܠܗܽܘܢ ܒܰܩܘ ܬܰܡܳܢ܆ ܒܰܠܚܽܘܕܰܘܗ̱ܝ ܕܶܝܢ ܝܶܫܽܘܥ ܗܰܘ ܒܰܪ ܢܽܘܢ ܘܟܳܠܳܒ ܗܰܘ ܒܪܶܗ ܕܝܽܘܦܢܳܐ܆ ܠܘܳܬ ܐܰܪܥܳܐ ܗܳܝ ܕܰܐܒܳܗ̈ܳܬܳܐ ܐܳܬܶܝܢ ܗ̱ܘܰܘ܆ ܘܰܠܡܽܘܠܟܳܢܳܐ ܡܶܫܬܘܶܝܢ ܗܘܰܘ^[28].

ܐܰܝܟܰܢܳܐ ܕܶܝܢ ܠܳܐ ܫܳܡܰܥ ܐܰܢ̱ܬ ܠܶܗ ܠܡܽܘܫܶܐ. ܡܰܠܽܘܢ ܕܶܝܢ ܠܰܡܫܺܝܚܳܐ ܗܰܘ ܕܒܶܗ ܡܡܰܠܶܠ ܗ̱ܘܳܐ܆ ܕܣܳܐܶܡ ܢܳܡܽܘܣܳܐ ܘܳܐܡܰܪ: ܕܠܳܐ ܬܶܗܘܶܐ ܥܰܡ ܣܰܓܺܝ̈ܶܐܐ ܠܒܺܝܫܬܳܐ^[29]܆ ܠܳܐ ܬܶܬܬܰܘܣܰܦ ܥܶܡ ܟܶܢܫܳܐ ܠܡܶܣܛܳܐ ܥܰܡ ܣܰܓܺܝ̈ܶܐܐ܆ ܐܰܝܟ ܕܰܠܡܶܨܠܳܐ ܕܺܝܢܳܐ. ܟܰܕ ܠܗܳܕܶܐ ܬܰܪܥܺܝܬܳܐ ܢܳܩܶܦ ܗ̱ܘܳܐ ܐܳܦ ܓܪܺܝܓܳܪܺܝܽܘܤ ܗܰܘ ܡܡܰܠܶܠ ܐܰ‌ܠܳܗܳܝ̈ܳܬܳܐ܆ ܟܰܕ ܐܶܦܝܣܩܽܘ̈ܦܶܐ ܣܰܓܺܝ̈ܶܐܐ ܐܶܬܟܰܢܰܫܘ ܒܗܰܘ ܙܰܒܢܳܐ܆ ܟܰܕ ܗܶܪܶܣܺܝܤ ܕܰܐܪܺܝܽܘܤ ܦܩܺܝܪܳܐ ܗܘܳܬ܆ ܘܠܽܘܩܒܰܠ ܗܝܡܳܢܽܘܬܳܐ ܗܰܘ ܕܰ܏ܫܝܚ 318 ܐܶܬܠܰܬܰܟܘ ܨܢܺܝܥܳܐܺܝܬ܆ ܘܬܰܚܶܡܘ ܚܳܪܥܳܐܺܝܬ ܕܕܳܡܶܐ ‌ܐܺܝܬܰܘܗ̱ܝ ܒܪܳܐ ܠܰܐܒܳܐ܆ ܟܰܕ ܙܳܕܶܩ ܗ̱ܘܳܐ ܠܗܽܘܢ ܠܡܺܐܡܰܪ ܕܰܫܘܶܐ ܒܽܐܘܣܺܝܰܐ ‌ܐܺܝܬܰܘܗ̱ܝ܆ ܐܰܝܟܰܢܳܐ ܕܰܒܝܰܕ ܡܶܨܥܳܝܽܘܬܳܗ̇ ܕܠܶܟܣܺܝܤ܆ ܠܪܽܘܫܥܳܐ ܢܶܦܬܚܽܘܢ ܬܰܪܥܳܐ܆ ܠܰܟܢܽܘܫܝܳܐ ܗܰܘ ܕܗܳܢܶܘܢ ܕܗܳܟܰܢܳܐ ܬܰܚܶܡܘ܆ ܟܢܺܝܫܽܘܬ ܡܰܘܬܒܳܐ ܕܩܰܝܳܦܳܐ ܫܰܡܗܶܗ. ܫܰܦܺܝܪܳܐ ܕܶܝܢ܆ ܕܳܐܦ ܠܗܶܝܢ ܠܡ̈ܶܠܶܐ ܕܺܝܠܶܗ ܕܩܰܕܺܝܫܳܐ ܢܶܬܥܰܗܰܕ܆ ܕܗܳܢܳܐ ܙܢܳܐ ܐܺܝܬ ܠܗܶܝܢ.

ܐܶܢ ܟܺܝܬ ܡܰܓܕܠܳܐ ܗܰܘ ܕܒܟܐܠܐܢܝ^[30]܆ ܗܰܘ ܕܰܠܠܶܫܳܢ̈ܶܐ ܦܰܠܶܓ^[31]܆ ܐܰܝܟ ܕܶܐܫܬܽܘܦ ܟܺܝܬ ܐܳܦ ܠܗܳܢܽܘܢ܆ ܥܰܠ ܒܺܝܫܬܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܫܰܠܡܽܘܬܗܽܘܢ܆ ܘܶܐܢ ܟܺܝܬ ܟܢܽܘܫܝܳܐ ܕܩܰܝܳܦܳܐ܆ ܒܗܰܘ ܕܰܡܫܺܝܚܳܐ ܡܶܬܚܰܝܰܒ^[32]܆ ܘܶܐܢ ܡܶܕܶܡ ܐ̱ܚܪܺܢܳܐ ܕܰܐܝܟ ܗܳܢܳܐ܆ ܙܳܕܶܩ ܕܰܢܫܰܡܗܺܝܗ̇ ܠܗܳܝ ܣܽܘܢܶܗܕܽܘܤ܆ ܗܳܝ ܕܰܠܟܽܠܗܶܝܢ ܗܰܦܟܰܬ ܘܒܰܠܒܠܰܬ܆ ܟܰܕ ܠܕܽܘܓܡܰܐ ܡܶܢ ܗܰܘ ܫܰܦܺܝܪ ܕܶܚܠܬܳܐ ܘܥܰܬܺܝܩܳܐ ܘܰܣܢܺܐܓܪܳܐ ܕܬܰܠܺܝܬܳܝܽܘܬܳܐ ܫܪܳܬ܆ ܒܗܳܝ ܕܰܐܪܡܝܰܬ ܣܝܳܓܳܐ ܘܰܒܡܺܝ̈ܟܰܢܶܐ^[33] ܙܰܥܙܥܰܬ ܠܗܳܝ ܕܰܫܘܶܐ ܒܽܐܘܣܺܝܰܐ܆ ܠܪܽܘܫܥܳܐ ܕܶܝܢ ܦܶܬܚܰܬ ܬܰܪܥܳܐ܆ ܒܝܰܕ ܡܶܨܥܳܝܽܘܬܳܐ ܕܗܳܠܶܝܢ ܕܰܟܬܺܝ̈ܒܳܢ.

ܘܡܶܛܽܠܳܬܗܽܘܢ ܟܰܕ ܡܶܛܽܠܳܬܗܽܘܢ ܬܽܘܒ ܐܳܡܰܪ: ܗܳܢܽܘܢ ܕܪ̈ܳܡܰܝ ܐܺܝ̈ܕܰܝܳܐ ܕܪ̈ܽܘܫܥܶܐ ܡܶܬܬܰܒܥܺܝܢ ܗ̱ܘܰܘ܆ ܐܰܝܟ ܙܢܳܐ ܕܡܶܕܶܡ ܐ̱ܚܪܺܢܳܐ ܡܶܢ ܗܳܠܶܝܢ ܕܳܐ‌ܠ̈ܨܳܢ. ܘܰܕܝܽܘܬܳܐ. ܡܛܰܝܒܳܐ ܗ̱ܘܳܬ. ܘܥܳܫܽܘܢܝܳܐ ܒܩܽܘܪܒܳܐ. ܐܰܘܟܺܝܬ ܕܳܐܦ ܣܰܓܺܝ̈ܶܐܐ ܡܶܢ ܗܳܢܽܘܢ ܕܺܝܠܰܢ ܠܳܐ ܡܙܰܟ̈ܝܳܢܶܐ ܚܰܫܘ. ܟܰܕ ܒܬܰܪܥܺܝܬܳܐ ܡܰܢ ܠܳܐ ܢܦܰܠܘ܆ ܒܰܟܬܳܒܳܐ ܕܶܝܢ ܐܶܙܕܰܝܰܦܘ܆ ܘܠܰܚܕܳܐ ܐܶܬܰܘ ܥܰܡ ܗܳܢܽܘܢ ܕܒܺܝܫܺܝܢ ܗ̱ܘܰܘ ܒܬܰܪ̈ܬܰܝܗܶܝܢ܆ ܘܰܒܬܶܢܳܢܳܐ ܟܺܝܬ܆ ܐܳܦܶܢ ܠܰܘ ܒܢܽܘܪܳܐ ܐܶܫܬܰܘܬܰܦܘ. ܥܰܠ ܗܳܝ ܕܙܰܒ̈ܢܺܝܢ ܣܰܓܺܝ̈ܳܐܢ ܕܰܡܥܶܬ܆ ܟܰܕ ܚܳܙܶܐ ܗ̱ܘܺܝܬ ܠܒܽܘܠܒܳܠܳܐ ܕܗܳܝܕܶܝܢ ܕܪܽܘܫܥܳܐ܆ ܘܠܰܪܕܽܘܦܝܳܐ ܗܰܘ ܕܗܳܫܳܐ ܩܳܡ ܥܰܠ ܡܶܠܬܳܐ ܬܪܺܝܨܬܳܐ ܡܶܢ ܩܰܝܽܘ̈ܡܶܐ ܕܡܶܠܬܳܐ.

ܒܰܫܪܳܪܳܐ ܓܶܝܪ ܪ̈ܳܥܰܘܳܬܳܐ ܫܛܰܘ ܐܰܝܟ ܕܰܟܬܺܝܒ^[34]. ܐܰܒܗܶܬܘ ܠܰܡܢܳܬܳܐ ܪܓܺܝܓܬܳܐ^[35]܆ ܠܥܺܕܬܳܐ ܐܳܡܰܪ ܐ̱ܢܳܐ܆ ܗܳܝ ܕܰܒܕܽܘ̈ܥܬܶܐ ܣܰܓܺܝ̈ܳܐܬܳܐ ܘܢܶܟ̈ܣܳܬܳܐ ܡܟܰܢܫܳܐ ܗ̱ܘܳܬ܆ ܗܳܢܶܝܢ ܟܺܝܬ ܕܰܩܕܳܡ ܡܫܺܝܚܳܐ ܘܒܳܬܰܪ ܡܫܺܝܚܳܐ܆ ܘܳܐܦ ܒܗܽܘܢ ܒܚܰܫ̈ܶܐ ܪܰܘܪ̈ܒܶܐ ܕܰܐ‌ܠܳܗܳܐ ܕܡܶܛܽܠܳܬܰܢ. ܤܛܰܪ ܓܶܝܪ ܡܶܢ ܙܥܽܘܪ̈ܶܐ ܣܰܓܺܝ܆ ܘܡܶܢ ܗܳܠܶܝܢ: ܟܽܠܗܽܘܢ ܗܳܢܽܘܢ ܕܡܶܛܽܠ ܙܥܽܘܪܽܘܬܗܽܘܢ ܐܶܬܒܣܺܝܘ ܐܰܘ^[36] ܡܶܛܽܠ ܡܝܰܬܪܽܘܬܗܽܘܢ ܩܳܡܘ^[37] ܣܰܩܽܘܒܠܳܐܺܝܬ܆ ܗܢܽܘܢ ܕܙܳܕܶܩ ܗ̱ܘܳܐ ܕܙܰܪܥܳܐ ܘܥܶܩܳܪܳܐ ܢܶܫܬܰܒܩܺܘܢ ܠܺܐܝܣܪܳܐܶܝܠ܆ ܐܰܝܟܰܢܳܐ ܕܬܽܘܒ ܡܶܢ ܕܪܺܝܫ ܢܶܚܠܰܦ ܘܢܶܗܦܽܘܟ ܢܺܚܶܐ ܒܫܶܩ̈ܝܶܐ ܕܪܽܘܚܳܐ܆ ܟܽܠܗܽܘܢ ܕܙܰܒܢܳܐ ܗܘ̣ܰܘ. ܟܰܕ ܟܽܠܶܗ ܗܳܢܳܐ ܡܶܢ ܚ̈ܕܳܕܶܐ ܡܫܰܚܠܦܺܝܢ ܗ̱ܘܰܘ܆ ܟܡܳܐ ܕܗܶܢܽܘܢ ܡܰܢ ܡܶܢ ܩܕܺܝܡ܆ ܗܳܢܽܘܢ ܕܶܝܢ ܠܚܰܪܬܳܐ ܗܳܕܶܐ ܚܰܫܘ. ܘܗܳܢܽܘܢ ܡܰܢ ܗܘ̣ܰܘ ܩܳܝܽܘܡ̈ܶܐ ܘܡܶܬܟܰܬܫܳܢ̈ܶܐ ܩܰܕܡܳܝ̈ܶܐ ܕܰܚܠܳܦ ܪܽܘܫܥܳܐ܆ ܗܳܢܽܘܢ ܕܶܝܢ ܐܶܬܛܰܟܰܣܘ ܒܗܳܠܶܝܢ ܬܪ̈ܰܝܳܢܝܳܬܳܐ܆ ܐܰܘ ܟܺܝܬ ܒܕܶܚܠܬܳܐ ܐܶܙܕܰܥܙܰܥܘ܆ ܐܰܘ ܟܰܕ ܠܣܽܘܢܩܳܢܳܐ ܐܶܫܬܰܥܒܰܕܘ܆ ܐܰܘ ܟܰܕ ܒܫܽܘܓܳܫܳܐ ܐܶܫܬܰܕܰܠܘ܆ ܐܰܘ ܟܰܕ ܒܠܳܐ ܝܺܕܰܥܬܳܐ ܐܶܬܓܢܶܒܘ ܗܳܝ ܕܝܰܬܺܝܪ ܡܡܰܫܚܳܐ܆^[38] ܐܶܢ ܠܐ̱ܢܳܫ ܐܳܦ ܗܳܕܶܐ ܣܳܦܩܳܐ ܠܡܰܦܰܩܒܪܽܘܚܳܐ܆ ܡܶܢ ܗܳܢܽܘܢ ܕܰܒܪܺܝܫ ܥܰܡܳܐ ܐܶܬܗܰܝܡܰܢܘ ܠܰܡܩܳܡ.

ܐܰܝܟܰܢܳܐ ܓܶܝܪ ܕܠܰܘ ܗܶܢܽܘܢ ܟܰܕ ܗܶܢܽܘܢ ܚܺܐܦ̈ܶܐ ܐܺܝܬܰܝܗܽܘܢ܆ ܕܰܐܪ̈ܝܰܘܳܬܳܐ ܟܺܝܬ ܘܰܕܗܳܢܶܝܢ ܚܰܝ̈ܘܳܬܳܐ ܐ̱ܚܪ̈ܳܢܝܳܬܳܐ܆ ܘܳܐܦܠܳܐ ܕܓܰܒܪ̈ܶܐ ܐܰܘ ܕܢܶܫ̈ܶܐ܆ ܐܰܘ ܕܣܳܒ̈ܶܐ ܐܰܘ ܕܰܛܠܳܝ̈ܶܐ܆ ܐܶܠܳܐ ܕܺܐܝܬ ܐܳܦ ܕܩܰܘ̈ܡܳܬܳܐ ܐܳܦ ܕܓܶܢ̈ܣܶܐ ܫܽܘܚܠܳܦܳܐ ܕܠܳܐ ܙܥܽܘܪ܆ ܗܳܟܰܢܳܐ ܐܳܦܠܳܐ ܕܪ̈ܺܝܫܳܢܶܐ ܐܰܘ ܕܗܳܢܽܘܢ ܕܰܬܚܶܝܬ ܪܺܝܫܳܐ. ܠܗܳܢܽܘܢ ܡܰܢ ܓܶܝܪ ܕܡܶܢ ܥܰܡܳܐ܆ ܟܒܰܪ ܐܳܦ ܫܳܒܩܺܝܢܰܢ ܠܗܽܘܢ ܟܰܕ ܗܳܕܶܐ ܚܳܫܺܝܢ܆ ܠܗܳܢܽܘܢ ܕܰܡܫܰܘܙܒܳܐ ܠܗܽܘܢ ܙܰܒܢܺܝ̈ܢ ܣܰܓܺܝ̈ܳܐܢ܆ ܠܳܐ ܡܥܰܩܒܳܢܽܘܬܳܐ ܕܣܽܘܥܪ̈ܳܢܶܐ. ܠܡܰܠܦܳܢܳܐ ܕܶܝܢ܆ ܐܰܝܟܰܢܳܐ ܗܳܕܶܐ ܢܶܬܶܠ܆ ܗܰܘ ܕܳܐܦ ܠܠܳܐ ܝܺܕܺܝ̈ܥܳܬܳܐ ܕܗܳܢܽܘܢ ܐ̱ܚܪ̈ܳܢܶܐ ܡܬܰܪܶܨ܆ ܐܶܢܗܽܘ ܟܺܝܬ ܕܠܳܐ ܢܶܗܘܶܐ ‌ܐܺܝܬܰܘܗ̱ܝ ܕܰܓܳܠ ܫܡܳܐ.

ܐܰܝܟܰܢܳܐ ܓܶܝܪ ܠܳܐ ܫܟܺܝܪܳܐ܆ ܕܰܠܢܳܡܽܘܣܳܐ ܡܰܢ ܕܪ̈ܽܘܡܳܝܶܐ ܠܳܐ ܢܶܗܘܶܐ ܫܰܠܺܝܛ ܠܶܗ ܠܐ̱ܢܳܫ ܕܠܳܐ ܢܶܕܰܥ܆ ܘܳܐܦܠܳܐ ܐܶܢ ܣܰܓܺܝ ܢܶܗܘܶܐ ‌ܐܺܝܬܰܘܗ̱ܝ ܡܶܢ ܩܽܘܪܝܳܝܽܘܬܳܐ ܘܝܰܬܺܝܪ ܠܳܐ ܝܰܠܺܝܦܳܐ܆ ܘܳܐܦܠܳܐ ܐܺܝܬ ܢܳܡܽܘܣܳܐ ܕܰܡܥܰܕܰܪ ܠܗܶܝܢ ܠܗܳܢܶܝܢ ܕܡܶܣܬܰܥܪ̈ܳܢ ܡܶܛܽܠ ܠܳܐ ܝܺܕܰܥܬܳܐ܆ ܠܡܰܠܦܳܢ̈ܶܐ ܕܶܝܢ ܡܰܝ̈ܬܝ̣ܰܝ̣ ܐ̱ܪ̈ܳܙܶܐ ܕܦܽܘܪܩܳܢܳܐ܆ ܕܠܳܐ ܢܶܗܘܽܘܢ ܝܳܕܥܺܝܢ ܠܗܽܘܢ ܠܫܽܘܪ̈ܳܝܶܐ ܕܦܽܘܪܩܳܢܳܐ܆ ܐܳܦ ܒܗܳܠܶܝܢ ܐ̱ܚܪ̈ܳܢܝܳܬܳܐ ܢܶܫܬܰܟܚܽܘܢ ܕܺܐܝܬܰܝܗܽܘܢ ܡܶܢ ܗܳܢܽܘܢ ܕܝܰܬܺܝܪ ܦܫܺܝܛܺܝܢ܆ ܘܰܕܠܳܐ ܥܰܡܺܝܩܺܝܢ ܒܬܰܪܥܺܝܬܳܐ. ܒܪܰܡ ܢܶܗܘܶܐ ܫܽܘܒܩܳܢܳܐ ܠܗܳܢܽܘܢ ܕܡܶܛܽܠ ܠܳܐ ܝܺܕܰܥܬܳܐ ܢܩܶܦܘ. ܡܳܢܳܐ ܕܶܝܢ ܬܺܐܡܰܪ ܡܶܛܽܠ ܗܳܢܽܘܢ ܐ̱ܚܪ̈ܳܢܶܐ܆ ܟܽܠܗܽܘܢ ܗܳܢܽܘܢ ܕܟܰܕ ܥܳܒܕܺܝܢ ܗ̱ܘܰܘ ܡܶܠܬܳܐ ܕܺܝܕܰܥܬܳܐ܆ ܡܛܠ ܥܶܠ̈ܠܳܬܳܐ ܗܳܢܶܝܢ ܕܶܐܡܪܶܬ ܐܶܙܕܟܺܝܘ ܡܶܢ ܗܳܢܽܘܢ ܕܰܐܚܺܝܕܺܝܢ ܗ̱ܘܰܘ܆ ܘܟܰܕ ܣܰܓܺܝ ܐܶܫܬܥܺܝܘ ܒܡܰܫܟܢܳܐ ܕܫܰܦܺܝܪܽܘܬ ܕܶܚܠܬܳܐ܆ ܐܶܬܚܙܺܝ ܡܶܕܶܡ ܡܶܢ ܗܳܠܶܝܢ ܕܡܰܟ̈ܣܳܢ ܘܰܢܦܰܠܘ.

ܢܶܬܒܰܩܶܐ ܚܰܬܺܝܬ̣ܳܐܺܝܬ܆ ܐܰܝܟܰܢܳܐ ܟܰܕ ܝܳܕܰܥ ܗ̱ܘܳܐ ܡܰܠܦܳܢܳܐ ܗܳܢܳܐ ܡܡܰܠܶܠ ܐܰ‌ܠܳܗܳܝ̈ܳܬܳܐ܆ ܕܡܶܢ ܗܳܢܽܘܢ ܕܬܰܚܶܡܘ ܘܰܐܪܡܺܝܘ ܐܺܝܕܳܐ܆ ܗܳܢܽܘܢ ܡܰܢ ܩܰܝܽܘܡ̈ܶܐ ܕܪܽܘܫܥܳܐ ܐܺܝܬܰܝܗܽܘܢ ܗ̱ܘܰܘ ܘܡܶܬܟܰܬܫܳܢ̈ܶܐ ܩܰܕܳܡܝ̈ܶܐ܆ ܗܳܢܽܘܢ ܕܶܝܢ ܕܰܒܕܶܚܠܬܳܐ ܐܶܙܕܰܥܙܰܥܘ܆ ܐܰܘ ܒܣܽܘܢܩܳܢܳܐ ܐܶܫܬܰܥܒܰܕܘ܆ ܘܰܒܫܽܘܓܳܫܳܐ ܐܶܫܬܰܕܰܠܘ܆ ܘܰܒܠܳܐ ܝܺܕܰܥܬܳܐ ܐܶܬܓܢܶܒܘ܆ ܠܟܽܠܗܽܘܢ ܐܰܟܚܕܳܐ ܟܢܺܝܫܽܘܬ ܡܰܘܬܒܳܐ ܕܩܰܝܳܦܳܐ ܫܰܡܰܗܘ܆ ܒܗܰܘ ܕܰܡܫܺܝܚܳܐ ܡܶܬܚܰܝܰܒ܆ ܘܡܰܓܕܠܳܐ ܕܟܐܠܐܢܝ܆ ܗܰܘ ܕܒܳܢܶܝܢ ܗ̱ܘܰܘ ܡܶܢ ܩܕܺܝܡ ܗܳܢܽܘܢ ܡܶܬܟܰܬܫܰܝ̈ ܥܰܡ ܐܰ‌ܠܳܗܳܐ܆ ܟܰܕ ܡܶܬܚܪܶܝܢ ܗ̱ܘܰܘ ܠܶܡܣܰܩ ܠܘܳܬ ܫܡܰܝܳܐ܆ ܗܳܝ ܕܡܶܛܽܠܳܬܳܗ̇ ܐܳܦ ܒܽܘܠܒܳܠܳܐ ܘܦܽܘܠܳܓܳܐ ܕܠܶܫܳܢ̈ܶܐ ܐܶܬܚܰܝܰܒܘ.

ܐܰܝܟܰܢܳܐ ܠܰܘ ܕܫܳܘܶܐ ܠܚܶܪܡܳܐ ‌ܐܺܝܬܰܘܗ̱ܝ ܟܢܽܘܫܝܳܐ ܕܩܰܝܳܦܳܐ܆ ܘܗܳܢܽܘܢ ܕܠܽܘܩܒܰܠ ‌ܐܰ‌ܠܳܗܳܐ ܡܰܩܪܒܳܢܳܐܺܝܬ ܥܒܰܕܘ ܡܰܓܕܠܳܐ. ܐܳܦ ܓܶܝܪ ܙܳܕܶܩ ܗ̱ܘܳܐ ܠܰܡ ܐܳܡܪܺܝܢ. ܕܰܠܗܳܢܽܘܢ ܕܫܳܘܶܝܢ ܠܫܽܘܒܩܳܢܳܐ ܠܡܶܦܪܰܫ܆ ܘܠܰܘ ܠܟܽܠܗܽܘܢ ܒܳܗ̇ ܒܰܕܡܽܘܬܳܐ ܒܰܚܕܳܐ ܩܛܺܝܓܪܳܢܽܘܬܳܐ ܡܚܰܝܰܒܬܳܐ ܢܶܚܒܽܘܫ. ܐܶܠܳܐ ܐܶܢܳܐ ܠܗܳܢܽܘܢ ܕܣܰܒܪܽܘܢܝ ܠܒܰܪ ܡܶܢ ܗܰܘ ܡܳܐ ܕܩܰܒܠܶܬ܆ ܡܰܚܪܶܡ ܐ̱ܢܳܐ ܘܡܰܗܦܶܟ ܐ̱ܢܳܐ ܐܰܦ̈ܶܐ ܡܶܢܗܽܘܢ. ܠܗܳܢܽܘܢ ܕܶܝܢ ܕܙܳܕܶܩ ܕܢܶܫܬܒܶܩ ܝܳܕܰܥ ܠܗܽܘܢ܆ ܗܰܘ ܕܠܶܗ ܐܺܝܬ ܬܚܽܘܡ̈ܶܐ ܕܫܽܘܒܩܳܢܳܐ܆ ܘܡܰܬܩ̈ܳܠܶܐ ܘܡܰܣ̈ܰܐܬܶܐ ܕܪ̈ܰܚܡܶܐ.

ܐܳܦ ܓܶܝܪ ܐܳܦ ܡܶܢ ܗܳܝ ܕܰܠܩܽܘܒܠܳܐ܆ ܠܣܽܘܢܗܕܽܘܤ ܗܳܝ ܕܰܬܠܳܬܡܳܐܐ ܘܰܬܡܳܢܬܰܥܣܰܪ܆(325) ܒܳܗ̇ ܒܰܕܡܽܘܬܳܐ ܐܳܦ ܠܗܳܝ ܕܡܳܐܐ ܘܚܰܡܫܺܝܢ܆(381) ܡܝܰܩܪ̈ܳܬܳܐ ܘܩܰܕܺܝ̈ܫܳܬܳܐ ܡܫܰܡܗܺܝܢ ܚ̱ܢܰܢ. ܘܗܳܕܶܐ܆ ܟܰܕ ܒܗܳܝ ܡܰܢ ܐܺܝܬ ܗ̱ܘܳܐ ܐܽܘܣܶܒܺܝܽܘܤ ܗܰܘ ܩܶܣܰܪܳܝܳܐ ܕܰܚܠܳܦ ܗܶܪܶܣܺܝܤ ܐܰܪܺܝܳܢܳܝܬܳܐ ܡܶܬܟܰܬܰܫ ܗ̱ܘܳܐ܆ ܒܗܳܝ ܕܶܝܢ ܕܺܝܽܘܕܽܘܪܽܘܤ ܗܰܘ ܛܐܪܣܝܐ܆ ܗܰܘ ܡܰܠܦܳܢܳܐ ܕܪܽܘܫܥܶܗ ܕܢܶܣܛܽܘܪܺܝܽܘܤ. ܘܗܳܢܽܘܢ ܡܰܢ ܡܚܰܝ̈ܒܶܐ ܕܚܶܪܡܳܐ ܐܺܝܬܰܝܗܽܘܢ. ܡܶܢܝܳܢܳܐ ܕܶܝܢ ܗܰܘ ܕܺܝܠܗܶܝܢ ܕܣܽܘܢܶܗ̈ܕܽܘ ܩܰܕܺܝ̈ܫܳܬܳܐ܆ ܠܳܐ ܚܰܣܺܝܪܳܐ ܟܰܬܰܪ܆ ܡܶܛܽܠ ܟܺܝܬ ܕܡܶܢ ܗܳܝ ܕܣܰܓܺܝܳܐܐ ܘܰܕܝܰܬܺܝܪ ܚܰܣܺܝܢܳܐ܆ ܗܳܠܶܝܢ ܕܰܐܝܟ ܗܳܟܰܢ ܡܶܬܬܕܺܝ̈ܢܳܢ ܟܺܝܬ ܘܡܶܬܰܐܡܪ̈ܳܢ.

ܕܗܳܝ ܓܶܝܪ ܕܢܶܚܽܘܤ ܥܰܠ ‌ܐ̱ܢܳܫܺܝ̈ܢ ܠܒܰܪ ܡܶܢ ܦܽܘܩܕܳܢܳܐ܆ ܠܗܳܢܽܘܢ ܕܚܳܝܣܺܝܢ ܡܚܰܝ̈ܒܶܐ ܥܳܒܕܳܐ ܠܗܽܘܢ ܬܚܶܝܬ ܡܣܳܡ ܒܪܺܝܫܳܐ ܟܺܝܬ ܘܰܬܚܶܝܬ ܪܽܘܓܙܳܐ܆ ܠܰܟܬܳܒ̈ܶܐ ܟܳܗܢܳܝ̈ܶܐ ܢܶܫܡܰܥ܆ ܒܗܳܝ ܕܰܬܠܳܬ ܕܡܰܠܟ̈ܘܳܬܳܐ ܗܳܟܰܢܳܐ ܐܳܡܪܺܝܢ. ܘܓܰܒܪܳܐ ܚܰܕ ܡܶܢ ܒܢܰܝ̈ ܢܒܺܝ̈ܶܐ܆ ܐܶܡܰܪ ܠܘܳܬ ܩܰܪܺܝܒܶܗ. ܒܡܶܠܬܶܗ ܕܡܳܪܝܳܐ ܡܚܺܝܢܝ. ܘܠܳܐ ܨܒܳܐ ܗܰܘ ܒܰܪܢܳܫܳܐ ܕܢܶܡܚܶܝܘܗ̱ܝ. ܘܶܐܡܰܪ ܠܘܳܬܶܗ: ܚܠܳܦ ܗܳܝ ܕܠܳܐ ܫܡ̣ܰܥܬ ܒܩܳܠܶܗ ܕܡܳܪܝܳܐ܆ ܗܳܐ ܐܰܢ̱ܬ ܐܳܙܶܠ ‌ܐܰܢ̱ܬ ܡܶܢ ܠܘܳܬܝ. ܘܢܶܡܚܶܝܟ ܐܰܪܝܳܐ. ܘܶܐܙܰܠ ܡܶܢ ܠܘܳܬܶܗ. ܘܶܐܫܟܚܶܗ ܐܰܪܝܳܐ ܘܰܡܚܳܝܗ̱ܝ . ܘܩܰܛܠܶܗ. ܘܡܶܫܟܰܚ ܓܰܒܪܳܐ ܐ̱ܚܪܺܢܳܐ. ܘܳܐܡܰܪ ܠܶܗ. ܡܚܺܝܢܝ. ܘܰܡܚܳܝܗ̱ܝ ܓܰܒܪܳܐ ܗܰܘ ܟܰܕ ܡܚܳܝܗ̱ܝ . ܘܨܰܠܦܶܗ^[39]. ܘܗܳܟܰܢܳܐ ܗܰܘ ܡܰܢ ܕܚܳܤ ܥܰܠ ܗܰܘ ܢܒܺܝܳܐ. ܠܒܰܪ ܡܶܢ ܗܳܝ ܕܫܶܦܪܰܬ ܠܰܐܠܳܗܳܐ܆ ܩܰܒܶܠ ܡܣܳܡ ܒܪܺܝܫܳܐ. ܗܰܘ ܕܶܝܢ ܕܰܡܚܳܐ ܠܳܐ ܚܰܝܽܘܣܬܳܢܳܐܺܝܬ ܟܰܕ ܐܰ‌ܠܳܗܳܐܦܳܩܶܕ ܗ̱ܘܳܐ. ܐܶܙܕܰܕܰܩ. ܘܶܐܬܦܰܨܺܝ.

ܗܳܕܶܐ ܕܶܝܢ܆ ܗܳܝ ܟܺܝܬ ܕܗܳܫܳܐ ܐܶܡܪܶܬ ܥܳܒܶܕ ܗ̱ܘܳܐ ܢܒܺܝܳܐ܆ ܠܘܳܬ ܡܰܟܣܳܢܽܘܬܳܐ ܕܚܰܝܽܘܣܬܳܢܽܘܬܳܐ ܐ̱ܚܪܺܬܳܐ ܕܰܠܒܰܪ ܡܶܢ ܢܳܡܽܘܣܳܐ. ܟܰܕ ܓܶܝܪ ܐܳܚܳܒ ܡܰܠܟܳܐ ܕܺܐܝܣܪܳܐܶܝܠ ‌ܐܶܚܰܕ ܠܰܒܪܶܗ ܕܗܳܕܳܕ ܡܰܠܟܳܐ ܕܰܐܕܽܘܡܳܝ̈ܶܐ ܒܰܩܪܳܒܳܐ ܘܰܒܬܰܟܬܽܘܫܳܐ ܘܠܳܐ ܩܰܛܠܶܗ. ܐܶܠܳܐ ܫܰܒܩܶܗ ܟܰܕ ‌ܐܺܝܬܰܘܗ̱ܝ ܗ̱ܘܳܐ ܒܥܶܠܕܒܳܒܳܐ ܕܰܐ‌ܠܳܗܳܐ܆ ܟܰܕ ܐܶܙܰܠ ܗܳܢܳܐ ܢܒܺܝܳܐ ܗܰܘ ܕܰܒܠܺܝܥ ܗ̱ܘܳܐ ܥܰܠ ‌ܐܰܦܰܘ̈ܗ̱ܝ ܘܰܨܠܺܝܦ܆ ܘܚܰܘܺܝ ܢܰܦܫܶܗ. ܐܶܡܰܪ ܠܰܐܚܳܒ܆ ܟܰܕ ܪܳܕܶܐ ܘܡܰܠܶܦ ܠܶܗ ܒܶܐܣܟܺܡܳܐ ܗܰܘ ܕܡܶܬܚܙܶܐ ܗ̱ܘܳܐ ܐܰܟܚܕܳܐ ܘܰܒܩܳܠܳܐ. ܗܳܠܶܝܢ ܐܳܡܰܪ ܡܳܪܝܳܐ. ܡܶܛܽܠ ܕܫܰܕܰܪܬ ܐܰܢ̱ܬ ܠܓܰܒܪܳܐ ܡܰܘܒܕܳܢܳܐ ܡܶܢ ܐܺܝܕܳܐ ܕܺܝܠܳܟ܆ ܗܳܐ ܢܰܦܫܳܟ ܚܠܳܦ ܢܰܦܫܶܗ܆ ܘܥܰܡܳܟ ܚܠܳܦ ܥܰܡܶܗ^[40].

ܟܰܕ ܗܳܠܶܝܢ ܗܳܟܺܝܠ ܝܳܕܥܺܝܢ ܐܢ̱ܬܽܘܢ܆ ܐܰܢ̱ܬܽܘܢ ܒܝܰܕ ܟܽܠܗܶܝܢ ܐܶܬܢܰܩܰܦܘ ܠܢܳܡܽܘ̈ܣܶܐ ܕܰܐ‌ܠܳܗܳܐ. ܘܟܰܕ ܡܪܰܚܡܺܝܢ ܐܢ̱ܬܽܘܢ. ܘܟܰܕ ܠܓܽܘܕܳܦܳܐ ܐܰܘ ܠܒܺܝܫܽܘܬܳܐ ܡܫܰܢܩܺܝܢ ܐܢ̱ܬܽܘܢ܆ ܠܫܳܛܽܘܪ̈ܘܳܬܳܐ ܕܗܳܠܶܝܢ ܬܰܪܬܶܝܢ ܐܰܘ ܬܠܳܬ ܢܶܫܽܘܢܳܝ̈ܳܬܳܐ ܪܽܘܩܘ ܘܰܐܫܺܝܛܘ܆ ܗܳܠܶܝܢ ܕܰܛܡܺܝܪ̈ܳܢ ܒܰܚܛܳܗ̈ܶܐ ܘܡܶܬܢܰܓ̈ܕܳܢ ܠܰܪ̈ܓܺܝܓܳܬܳܐ ܡܫܰܚ̈ܠܦܳܬܳܐ ܘܰܕܠܳܐ ܩܶܢܛܳܐ ܠܘܳܬ ܓܰܒܪ̈ܶܐ ܡܡܰܠ̈ܠܳܢ܆ ܘܰܡܬܰܪ̈ܣܝܳܢ^[41] ܠܥܰܝ̈ܢܶܐ ܕܕܶܟܪ̈ܶܐ܆ ܡܶܛܽܠ ܕܢܶܬܶܠ ܕܡܶܢ ܗܳܝ ܫܪܺܝܚܽܘܬܳܐ ܐ̱ܚܪܺܬܳܐ ܘܪܶܓܬܳܐ ܕܰܟ̈ܝܳܢ ܐܶܢܶܝܢ܆ ܗܳܠܶܝܢ ܟܺܝܬ ܕܟܰܕ ܒܩܰܠܺܝܠܽܘܬ ܡܽܘܚܳܐ ܢܶܫܳܝܬܳܐ ܫܳܛܪ̈ܳܢ܆ ܐܳܡܪ̈ܳܢ: ܕܠܳܐ ܙܳܕܶܩ ܕܥܰܠ ܡܺܝ̈ܬܶܐ ܢܰܝܬܶܐ ܦܳܣܩܳܐ. ܡܳܕܶܝܢ ܐܳܦ ܐܪܺܝܽܘܤ ܐܳܦ ܐܘܢܘܡܝܽܘܤ ܘܰܐܦܽܘܠܺܝܢܰܪܺܝܽܘܤ܆ ܐܳܦ ܡܰܐܢܺܝ ܗܰܘ ܡܣܰܝܒܳܐ܆ ܘܗܳܢܽܘܢ ܕܰܠܗܳܠܶܝܢ ܢܩܶܦܘ܆ ܟܰܕ ܣܰܓܺܝ̈ܶܐܐ ܐܺܝܬܰܝܗܽܘܢ ܒܡܶܢܝܳܢܳܐ. ܕܢܶܬܚܰܢܢܽܘܢ ܙܳܕܶܩ. ܡܺܝ̈ܬܶܐ ܓܶܝܪ ܐܺܝܬܰܝܗܽܘܢ ܐܳܦ ܗܶܢܽܘܢ. ܐܰܘ ܗܳܟܺܝܠ ‌ ܐܰܪܦܐ܆ ܐܳܦ ܠܗܳܠܶܝܢ܆ ܐܳܘ ܥܳܒܶܕ ܢܳܡܽܘܣܳܐ ܘܪܳܚܶܡ ܐ̱ܢܳܫܳܐ܆ ܐܰܘ ܒܶܗܬܬܳܐ ܪܰܒܬܳܐ ܬܚܽܘܒ܆ ܟܰܕ ܠܡܺܝ̈ܬܶܐ ܥܳܒܶܕ ܐܰܢ̱ܬ ܕܺܝ̈ܢܶܐ܆ ܘܒܰܡܣܳܡ ܒܰܐܦ̈ܶܐ ܟܪܺܝܗ ܐܰܢ̱ܬ܆ ܘܰܒܫܽܘܟܳܢ̈ܶܐ ܡܰܦܶܩ ܐܰܢ̱ܬ ܠܗܽܘܢ ܠܕܺܝ̈ܢܶܐ.

ܟܰܕ ܠܗܳܠܶܝܢ ܗܳܟܺܝܠ ܘܰܠܕܰܐܝܟ ܗܳܠܶܝܢ ܚܕܰܘ ܐܳܡܪܺܝܢ ܐܢ̱ܬܽܘܢ܆ ܘܡܶܬܬܦܺܝܣܺܝܢ ܐܢ̱ܬܽܘܢ ܠܗܳܢܶܝܢ ܕܠܰܐܠܳܗܳܐ ܫܳܦܪ̈ܳܢ܆ ܡܶܢ ܟܽܠܳܗ̇ ܠܰܘܛܬܳܐ ܘܚܶܪܡܳܐ ܬܶܗܘܽܘܢ ܡܚܰܪܪ̈ܶܐ^[42]. ܘܰܐܝܟܰܢܳܐ ܕܰܟܬܺܝܒ: ܢܫܰܕܰܪ ܡܳܪܝܳܐ ܥܠܰܝܟ ܒܽܘܪܟܬܳܐ ܒܬܰܘ̈ܘܳܢܶܐ ܕܺܝܠܳܟ܆ ܘܰܒܟܽܠܗܶܝܢ ܗܳܠܶܝܢ ܕܰܐܝܟܳܐ ܕܶܐܢ ܬܰܪܡܶܐ ܐܺܝܕܳܐ ܕܺܝܠܳܟ ܥܰܠ ‌ܐܰܪܥܳܐ܆ ܗܳܝ ܕܡܳܪܝܳܐ ܐܰ‌ܠܳܗܳܐ ܕܺܝܠܳܟ ܝܳܗܶܒ ܠܳܟ. ܢܩܺܝܡܳܟ ܠܶܗ ܡܳܪܝܳܐ ܥܰܡܳܐ ܩܰܕܺܝܫܳܐ܆ ܐܰܟܙܢܳܐ ܕܺܝܡ̣ܳܐ ܠܰܐܒܳܗ̈ܰܝܟ܆ ܐܶܢ ܬܶܫܡܰܥ ܠܩܳܠܳܐ ܕܡܳܪܝܳܐ ܐܰ‌ܠܳܗܳܐ ܕܺܝܠܳܟ܆ ܘܰܬܗܰܠܶܟ ܒܽܐܘܪ̈ܚܳܬܶܗ. ܘܢܶܚܙܽܘܢܳܟ ܟܽܠܗܽܘܢ ܥܰܡ̱ܡ̈ܶܐ ܕܰܐܪܥܳܐ܆ ܕܰܫܡܳܐ ܕܡܳܪܝܳܐ ܩܪܶܐ ܥܠܰܝܟ܆ ܘܢܶܕܚܠܽܘܢ ܡܶܢܳܟ^[43]. ܘܢܺܐܡܪܽܘܢ܆ ܒܪ̈ܺܝܟܶܐ ܐܰܢ̱ܬܽܘܢ ܠܡܳܪܝܳܐ ܗܰܘ ܕܰܥܒܰܕ ܫܡܰܝܳܐ ܘܰܐܪܥܳܐ. ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ. ܕܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܥܶܣܪܺܝܢ ܘܬܶܫܥܳܐ.

ܡܙܡܘܪ̈ܐ. 119: 3 [1]

ܡܙܡܘܪ̈ܐ. 31: 21 [2]

ܩܘܠܣ̈ܝܐ. 3: 17 [3]

ܓܠܛܝ̈ܐ. 2: 4 [4]

 ܕܽܘܥܬܳܐ ܕܒܶܛܡܬܳܐ. ܒܣܶܦܪܳܐ ܕܶܐܪܰܡܝܐ܆ ܐܳܡܰܪ ܫܥܽܘܬܳܐ.[5]

ܐܶܪܰܡܝܐ. 8: 22 [6]

ܪ̈ܗܘܡܝܐ. 15: 4 [7]

ܣܶܦܪܳܐ ܕܝܫܘܥ ܒܪܢܘܢ. 6: 16ـ 18 [8]

 ܕܡܰܦܽܘܠܬܳܐ[9]

ܣܶܦܪܳܐ ܕܝܫܘܥ ܒܪܢܘܢ. 7: 13 [10]

 ܚܰܒܶܠܬ[11]

ܢܥ̣ܛܝܟ[12]

ܣܶܦܪܳܐ ܕܝܫܘܥ ܒܪܢܘܢ. 7: 25 ـ 26 [13]

ܛܰܢܦܽܘܬܐ[14]

[15][ܣܰܓܺܝ ܫܰܦܺܝܪ ܐܺܝܬ ܠܳܗ̇ ܠܗܳܝ ܕܰܒܡܰܫܠܡܳܢܽܘܬܳܐ ܗܳܝ ܕܰܠܘܳܬ ܣܽܘܪ̈ܝܳܝܶܐ ܣܺܝܡܳܐ܆ ܗܳܝ ܕܰܕܠܰܚܬ ܠܰܢ ܕܠܰܚܬ ܢܶܕܠܚܳܟ ܡܪܝܐܝܬܝܪ ܡܶܢ ܗܺܝ ܕܰܠܘܳܬ ܝܰܘܢܳܝ̈ܶܐ ܒܡܰܫܠܡܳܢܽܘܬܳܐ ܗܳܝ ܕܫܰܒܥܺܝܢ܆ ܕܰܐܘܒܕܬ ܠܰܢ ܢܰܘܒܕܳܟ ܡܳܪܝܳܐ. ܙܳܕܶܩ ܓܶܝܪ ܠܡܶܕܰܥ܆ ܕܡܶܢܶܗ ܕܰܫܡܳܐ ܗܰܘ ܕܥܳܟܳܪ ܫܰܩܠܳܗ̇ ܝܶܫܽܘܥ ܒܰܪ ܢܽܘܢ ܠܳܗ̇ ܠܠܰܘܛܬܳܐ ܗܳܝ ܕܠܳܛܶܗ. ܫܡܳܐ ܓܶܝܪ ܕܥܳܟܳܪ ܒܠܶܫܳܢܳܐ ܥܶܒܪܳܝܳܐ܆ ܕܶܠܚܳܐ ܐܰܘܟܺܝܬ ܬܶܛܪܳܐ ܡܶܬܶܐܡܰܪ. ܡܶܛܽܠ ܗܳܟܺܝܠ ܕܰܕܠܳܚܳܐ ܐܰܘܟܺܝܬ ܬܶܛܪܳܐ ܠܳܗ̇ ܡܶܬܩܪܶܐ ܗܘܳܐ ܗܰܘ ܕܡܶܬܬܠܺܝܛ ܗܘܳܐ: ܘܰܒܪܶܗ ܕܟܰܪܡܳܐ ܐܺܝܬܰܘܗܝ ܗܘܳܐ: ܐܳܦ ܓܶܝܪ ܫܡܳܐ ܕܰܐܒܽܘܗܝ ܗܳܕܶܐ ܡܫܰܘܕܰܥ ܗܘܳܐ܆ ܘܟܽܠ ܗܳܝ ܐܳܦ ܩܪܳܝܗܝ ܠܰܒܪܶܗ ܬܶܛܪܳܐ ܐܰܘܟܺܝܬ ܕܶܠܚܳܐ܆ ܟܰܕ ܠܶܗ ܠܗܳܢܳܐ ܕܶܠܚܳܐ ܥܳܟܳܪ ܠܳܐܶܛ ܗܘܳܐ ܝܶܫܽܘܥ ܒܰܪ ܢܽܘܢ.ܐܳܡܰܪ ܕܕܰܠܰܚܬ ܠܰܢ ܐܳܘ ܕܶܠܚܳܐ܆ ܢܶܕܠܚܳܟ ܡܳܪܝܳܐ ܝܰܘܡܳܢܳܐ.

ܣܶܦܪܐ ܕܝܫܘܥ ܒܪܢܘܢ. 7: 21 [16]

ܡܙܡܘܪ̈ܐ. 45: 10 [17]

ܐܦܣ̈ܝܐ. 5: 27 [18]

ܡܬܝ. 13: 8   ܐܦ ܡܪܩܘܣ. 4: 8 [19]

ܕܰܥܒܺܝܕ ܟܽܠܶܗ ܢܽܘܪܳܐ[20]

ܡ̈ܬܠܐ. 10: 20 [21]

ܡܙܡܘܪ̈ܐ. 12: 7 [22]

ܡܬܝ. 25: 25 [23]

ܒ. ܛܝܡܬܐܘܣ. 3: 5 [24]

ܓܠܛܝ̈ܐ. 1: 8 ـ 9 [25]

ܐ. ܩܘܪ̈ܝܢܬܝܐ. 16: 22 [26]

ܣܶܦܪܳܐ ܕܡܰܦܩܢܐ. 14: 6 [27]

ܣܶܦܪܳܐ ܕܡܶܢܝܳܢܳܐ. 14: 30 ـ 32 [28]

ܣܶܦܪܳܐ ܕܡܰܦܩܳܢܳܐ. 23: 2 [29]

[30]ܒܣܶܦܪܳܐ ܕܰܒܪܺܝܬܳܐ. 10: 10 ܟܳܬܶܒ ܗܳܟܰܢ. ܟ̣ܶܠܝܳܐ. ܕܺܐܝܬܶܝܗ̇ ܒܰܐܪܥܳܐ ܕܣܶܢܥܳܪ܆ ܚܕܳܐ ܡܶܢ ܡܕܺܝܢ̈ܳܬܳܐ ܕܢܡܪܘܕ ܓܰܢ̱ܒܳܪܳܐ ܢܰܚܫܺܝܪܬܳܢܳܐ.

ܣܶܦܪܳܐ ܕܰܒܪܝܬܐ. 11: 4 [31]

ܝܘܚܢܢ. 11: 47 [32]

ܘܰܒܛܽܘܟ̈ܢܶܐ[33]

ܐܶܪܰܡܝܐ. 10: 21 [34]

ܐܶܪܰܡܝܳܐ. 12: 10 [35]

ܘܠܘ[36]

 ܙܟܰܘ[37]

ܙܥܽܘܪܝܳܐ[38]

ܣܶܦܪܐ ܩܰܕܡܳܝܐ ܕܡܰܠ̈ܟܶܐ. 20: 35 ـ 37 [39]

ܣܶܦܪܳܐ ܩܰܕܡܝܐ ܕܡܰܠ̈ܟܶܐ. 20: 42 [40]

 ܡܒܰܣ̈ܡܳܢ ܥܳܒ̈ܕܳܢ ܫܳܪ̈ܘܳܬܐ[41]

ܙܟܰܪܝܳܐ. 14: 11 ܐܦ ܐܶܪܰܡܝܳܐ. 31: 40 [42]

ܬܶܢܝܳܢ ܢܳܡܽܘܣܐ. 28: 8 ـ 10 [43]