ܡܺܐܡܪܳܐ ܕܥܶܣܪܺܝܢ ܘܰܬܡܳܢܝܳܐ

ܥܰܠ ܗܳܝ ܕܰܢܚܶܬ ܠܣܳܠܳܘܩܺܝܰܐ܆ ܒܕܽܘܟܪܳܢܶܗ ܕܬܳܐܘܡܰܐ ܫܠܺܝܚܳܐ.

28: ܐܰܢ̱ܬܽܘܢ ܡܳܢ ܣܳܒܪܺܝܢ ܐܢ̱ܬܽܘܢ ܥܠܰܝ ‌ܐܳܘ ܪ̈ܳܚܡܶܐ ܘܰܐܚ̈ܶܐ܆ ܕܰܡܫܰܟܳܢܽܘ ܡܫܰܟܶܢ ܐ̱ܢܳܐ ܠܟܽܘܢ ܕܢܶܚܬܶܬ ܠܗܳܕܶܐ ܡܕܺܝܢ̱ܬܳܐ. ܐܶܢܳܐ ܕܶܝܢ ܠܰܘ ܗܳܟܰܢܳܐ ܣܺܝܡ ܐ̱ܢܳܐ ܒܬܰܪܥܺܝܬܝ. ܒܕܰܠܩܽܘܒܠܳܐ ܓܶܝܪ܆ ܕܳܐܦ ܛܰܝܒܽܘܬܳܐ ܡܰܘܕܶܐ ܐ̱ܢܳܐ܆ ܟܰܕ ܠܢܶܣܝܳܢܳܐ ܕܪܶܓܬܳܐ ܡܶܕܶܡ ܪܽܘܚܳܢܳܝܬܳܐ ܐܶܬܺܝܬ.

ܐܰܝܟ ܙܢܳܐ ܓܶܝܪ ܕܐ̱ܢܳܫ ܟܰܕ ܫܳܡܰܥ ܠܗܳܢܽܘܢ ܕܗܳܠܶܝܢ ܥܰܬܺܝ̈ܩܳܬܳܐ ܡܶܫܬܰܥܶܝܢ܆ ܡܶܛܽܠ ‌ܐ̱ܢܳܫ ܕܰܒܙܰܒ̈ܢܶܐ ܕܡܶܢ ܩܕܺܝܡ ‌ܐܺܝܬܰܘܗ̱ܝ ܗ̱ܘܳܐ ܓܰܒܪܳܐ ܢܰܨܺܝܚܳܐ ܘܪܺܝܫ ܚܰܝܠܳܐ܆ ܕܰܒܕܽܘܟܬܳܐ ܦܠܳܢܝܰܬ ܐܶܢ ܬܶܓܕܰܫ. ܐܰܩܺܝܡ ܢܺܝܫܳܐ ܕܙܳܟܽܘܬܳܐ ܢܰܨܺܝܚܳܐܺܝܬ܆ ܘܰܠܡܰܩܪ̈ܒܳܢܶܐ ܒܽܐܘܚܕܳܢܳܐ ܘܥܽܘܫܢܳܐ ܟܒܰܫ܆ ܡܶܬܢܓܶܕ ܘܡܶܬܬܰܘܒܰܠ ܒܢܰܦܫܶܗ܆ ܘܰܒܬܰܪܥܺܝܬܶܗ ܠܘܳܬ ܙܰܒܢܳܐ ܗܰܘ ܣܳܠܶܩ܆ ܘܰܒܪܶܥܝܳܢܶܗ ܡܛܰܦܶܤ ܘܨܳܐܰܪ ܠܶܗ ܠܬܽܘܢܳܝܳܐ܆ ܟܰܕ ܠܶܗ ܠܓܰܢ̱ܒܳܪܳܐ ܗܰܘ ܢܰܨܺܝܚܳܐ ܣܳܒܰܪ ܠܶܗ ܕܚܳܙܶܐ܆ ܕܒܶܗ ܒܣܶܕܪܳܐ ܕܰܩܪܳܒܳܐ ܚܰܪܺܝܦܳܐܺܝܬ ܡܰܢ ܘܰܕܚܺܝܠܳܐܺܝܬ ܠܽܘܩܒܰܠܗܽܘܢ ܕܣܰܩܽܘܒܠܳܝ̈ܶܐ ܢܳܫܶܡ܆ ܘܠܳܐ ܣܳܟ ܡܶܬܗܦܶܟ ܠܒܶܣܬܪܶܗ܆ ܡܳܚܶܐ ܕܶܝܢ ܕܠܳܐ ܚܰܘܣܳܢ ܘܒܰܙܒܰܢ ܐ̱ܚܪܺܝܢ ܐ̱ܚܪܺܢܳܐܺܝܬ ܡܙܺܝܥ ܠܳܗ̇ ܠܝܰܡܺܝܢܶܗ ܠܳܐ ܡܶܙܕܰܟܝܳܢܺܝܬܳܐ܆ ܘܪܳܐܶܓ ܡܶܢ ܟܽܠ ܦܪܽܘܤ ܕܳܐܦ ܠܳܗ̇ ܠܕܽܘܟܬܳܐ ܗܳܝ ܕܒܳܗ̇ ܩܳܡ ܢܺܝܫܳܐ ܗܰܘ ܕܙܳܟܽܘܬܳܐ ܢܶܚܙܶܐ܆ ܒܶܗ ܟܰܕ ܒܶܗ ܕܰܙܢܳܐ ܗܳܢܳܐ܆ ܟܰܕ ܟܬܳܒܳܐ ܗܰܘ ܕܰܦܪ̈ܰܟܣܺܝܤ ܩܳܪܶܐ ܗ̱ܘܺܝܬ܆ ܘܫܳܡܰܥ ܗ̱ܘܺܝܬ ܠܰܟܬܺܝ̈ܒܳܬܳܐ ܟܳܗܢܳܝ̈ܳܬܳܐ ܕܡܶܛܽܠ ܦܰܘܠܽܘܤ ܐܰ‌ܠܳܗܳܝܳܐ ܘܒܰܪܢܰܒܰܐ ܐܳܡܪ̈ܳܢ: ܗܳܠܶܝܢ ܡܰܢ ܗܳܟܺܝܠ ܟܰܕ ܐܶܫܬܰܕܰܪܘ ܡܶܢ ܪܽܘܚܳܐ ܩܰܕܺܝܫܳܐ܆ ܢܚܶܬܘ ܠܣܰܠܽܘܩܺܝܰܐ ܘܡܶܢ ܬܰܡܳܢ ܛܳܦܘ ܠܩܽܘܦܪܽܘܤ^[1]܆ ܪܳܐܶܓ ܗܘܺܝܬ ܠܡܶܚܙܶܝܗ̇ ܠܰܡܕܺܝܢ̱ܬܳܐ ܘܠܰܠܡܺܐܢܳܐ ܗܳܢܳܐ܆ ܐܰܟܙܢܳܐ ܕܰܠܫܽܘܪܳܝ ܡܰܦܰܩܬܳܐ ܕܪ̈ܰܟܫܳܐ ܪ̈ܽܘܚܳܢܳܝܶܐ܆ ܕܰܫܠܺܝ̈ܚܶܐ ܐܳܡܰܪ ܐ̱ܢܳܐ ܗܳܢܽܘܢ ܕܰܪܗܶܛܘ ܐܰܝܟ ܛܰܝ̈ܳܣܶܐ^[2] ܒܟܽܠܳܗ̇ ܡܶܬܥܰܡܪܳܢܺܝܬܳܐ܆ ܘܰܚܒܰܩܘ ܠܣܰܘ̈ܦܶܐ ܒܟܳܪܽܘܙܽܘܬܳܐ ܕܶܐܘܰܢܓܶܠܺܝܽܘܢ.

ܗܳܢܽܘܢ ܕܡܶܛܽܠܳܬܗܽܘܢ ܐܳܦ ܢܒܺܝܳܐ ܚܰܒܩܽܘܩ ܟܰܕ ܩܰܕܶܡ ܗ̱ܘܳܐ ܐܳܡܰܪ܆ ܡܰܙܥܶܩ ܗ̱ܘܳܐ ܠܘܳܬ ܐܰ‌ܠܳܗܳܐ ܕܟܽܠ܆ ܘܰܐܪܟܒܶܬ ܠܪ̈ܰܟܫܳܐ ܕܺܝܠܳܟ ܥܰܠ ܝܰܡܳܐ܆ ܕܫܳܓܫܺܝܢ ܡܰܝ̈ܳܐ ܣܰܓܺܝ̈ܶܐܐ^[3]. ܘܗܳܕܶܐ ܡܰܢ ܐܰܡܺܝܪܳܐ܆ ܐܰܝܟ ܣܽܘܟܳܠܳܐ ܦܫܺܝܩܳܐ ܘܕܰܩܕܳܡ ܐܺܝܕܰܝ̈ܳܐ. ܐܰܝܟ ܣܽܘܟܳܠܳܐ ܕܶܝܢ ܪܳܡܳܐ ܘܰܡܥܰܠܝܳܐ ܘܫܰܪܺܝܪܳܐ܆ ܝܰܡܳܐ ܠܥܳܠܡܳܐ ܗܳܢܳܐ ܐܳܡܰܪ ܕܺܐܝܬܰܘܗ̱ܝ܆ ܡܶܛܽܠ ܡܰܚܫܽܘܠܳܐ ܕܥܳܠܡܳܐ^[4] ܗܳܢܳܐ ܗܰܘ ܕܪܳܕܶܐ ܘܰܕܠܳܐ ܩܰܘܡܳܐ. ܥܰܠ ܗܰܘ ܕܟܰܕ ܕܪ̈ܰܟܶܝܢ ܪ̈ܶܓܠܰܝܗܽܘܢ ܕܰܫܠܺܝ̈ܚܶܐ܆ ܫܳܓܫܺܝܢ ܠܡܰܝ̈ܳܐ ܣܰܓܺܝ̈ܶܐܐ܆ ܟܰܕ ܒܰܛܶܠܘ ܠܬܰܪ̈ܥܝܳܬܳܐ ܥܳܠܡܳܢܳܝ̈ܳܬܳܐ ܐܰܫܺܝ̈ܕܳܬܳܐ^[5] ܘܪ̈ܳܚܡܳܬ ܪ̈ܓܺܝܓܳܬܳܐ܆ ܘܰܐܘܒܶܫܘ ܐܶܢܶܝܢ ܒܡܰܠܦܳܢܽܘܬܳܐ ܕܰܡܚܰܡܣܢܳܢܽܘܬܳܐ ܘܰܕܢܰܟܦܽܘܬܳܐ.

ܛܽܘܒܬܳܢܳܐ ܗܳܟܺܝܠ ‌ܐܰܝܟ ܕܒܰܫܪܳܪܳܐ ܘܩܰܕܺܝܫܳܐ ܐܳܡܰܪ ܐ̱ܢܳܐ ܠܶܗ ܐܶܢܳܐ ܠܰܠܡܺܐܢܳܐ ܗܳܢܳܐ܆ ܘܛܳܒ ܟܺܐܢܳܐܺܝܬ. ܗܰܘ ܕܰܥܠܰܘܗ̱ܝ ܒܪ̈ܰܟܶܝܢ ܒܽܘܪ̈ܟܰܝܗܽܘܢ ܕܰܫܠܺܝ̈ܚܶܐ܆ ܘܨܰܠܺܝ ܠܶܫܳܢܳܐ ܕܺܝܠܗܽܘܢ. ܗܰܘ ܕܒܶܗ ܟܰܕ ܥܰܠ ‌ܐܶ‌‌ܠܦܳܐ ܣܠܶܩܘ܆ ܘܠܰܐܪ̈ܡܶܢܶܐ ܦܪܰܣܘ܆ ܒܦܽܘܩ̈ܕܳܢܶܐ ܪ̈ܳܚܡܰܝ ܐܰ‌ܠܳܗܳܐ ܫܰܪܺܝܘ܆ ܘܒܽܘܪܟܬܳܐ ܠܳܐ ܡܶܬܬܪܺܝܡܳܢܺܝܬܳܐ ܫܒܰܩܘ ܠܳܗ̇ ܠܕܽܘܟܬܳܐ܆ ܐܶܢ ܟܺܝܬ ܐܰܝܟ ܡܶܠܬܶܗ ܕܦܰܘܠܽܘܤ܆ ܕܠܳܐ ܡܶܬܬܰܘܝܳܢܽܘܬܳܐ ܐܺܝܬܰܝܗܽܘܢ ܫܽܘܟܳܢ̈ܶܐ ܕܰܐ‌ܠܳܗܳܐ^[6].

ܡܶܛܽܠܗܳܕܶܐ ܡܗܰܝܡܢܺܝܢܰܢ܆ ܕܳܐܦ ܡܰܠܟܳܐ ܪܳܚܶܡ ܠܰܡܫܺܝܚܳܐ ܢܶܫܠܰܡ ܘܢܶܦܩܽܘܕ ܠܘܳܬ ܬܽܘܩܳܢܶܗ ܕܗܳܢܳܐ ܘܰܚܓܳܓܶܗ^[7]. ܪܚܺܝܡܳܐ ܠܶܗ ܓܶܝܪ܆ ܕܠܰܘ ܒܰܠܚܽܘܕ ܠܕܽܘܟܝ̈ܳܬܳܐ ܗܳܠܶܝܢ ܚܳܫ̈ܚܳܬܳܐ܆ ܐܶܠܳܐ ܣܰܓܺܝ ܝܰܬܺܝܪܳܐܺܝܬ܆ ܐܳܦ ܠܗܳܠܶܝܢ ܩܰܕܺܝ̈ܫܳܬܳܐ ܢܶܒܢܶܐ ܘܰܢܚܰܕܶܬ܆ ܗܳܢܳܐ ܕܶܝܢ܆ ܐܳܦ ܗܳܝ ܚܫܰܚܬܳܐ ܐܺܝܬ ܠܶܗ ܐܰܟܚܕܳܐ܆ ܐܳܦ ܗܳܝ ܕܩܰܕܺܝܫܽܘܬܳܐ ܘܕܺܐܝܩܳܪܳܐ. ܟܰܕ ܠܰܘ ܒܰܠܚܽܘܕ ܒܨܶܒ̈ܘܳܬܳܐ ܗܳܠܶܝܢ ܡܶܙܕܰܒܢܳܢ̈ܝܳܬܳܐ ܕܥܳܐܠ̈ܳܢ ܠܶܗ܆ ܡܩܰܒܶܠ ܠܰܡܕܺܝܢ̱ܬܳܐ ܗܳܝ ܪܰܒܬܳܐ ܘܢܰܨܺܝܚܬܳܐ ܕܰܐܢܛܺܝܰܟܽܘܤ܆ ܘܠܰܐܪܥܳܐ ܗܳܝ ܕܝܰܒܫܳܐ ܕܰܠܗܰܠ ܡܶܢ ܗܳܕܶܐ܆ ܐܶܠܳܐ ܘܳܐܦ ܟܰܕ ܒܙܰܒܢܳܐ ܗܰܘ ܡܩܰܒܶܠ ܗ̱ܘܳܐ ܘܠܰܫܠܺܝ̈ܚܶܐ ܡܠܰܘܶܐ ܗ̱ܘܳܐ. ܘܬܽܘܒ ܟܰܕ ܦܳܢܶܝܢ ܗ̱ܘܰܘ ܐܳܬܶܝܢ܆ ܗܳܦܶܟ ܦܳܪܰܥ ܗ̱ܘܳܐ ܡܰܘ̈ܒܠܶܐ ܛܳܒ̈ܳܬܳܐ ܕܫܰܦܺܝܪܽܘܬ ܕܶܚܠܬܳܐ.

ܐܳܦ ܓܶܝܪ ܐܺܝܬ ܠܡܶܫܡܰܥ܆ ܕܡܶܫܬܰܥܶܐ ܡܶܛܽܠܳܬܗܽܘܢ ܬܽܘܒ ܟܬܳܒܳܐ ܗܰܘ ܕܰܦܪ̈ܰܟܣܺܝܤ ܗܳܟܰܢܳܐ. ܘܰܢܚܶܬܘ ܠܺܐܝܛܰܠܝܰܐ. ܘܡܶܢ ܬܰܡܳܢ ܛܳܦܘ ܠܰܐܢܛܺܝܽܘܟܺܝܘܤ܆ ܡܶܢ ܐܰܝܟܳܐ ܕܶܐܫܬܠܶܡܘ ܗ̱ܘܰܘ ܡܶܢ ܛܰܝܒܽܘܬܳܐ ܕܰܐ‌ܠܳܗܳܐ ܠܰܥܒܳܕܳܐ ܗܰܘ ܕܡܰܠܺܝܘ^[8]. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܰܡܝܰܩܳܪܽܘ ܙܳܕܶܩ ܠܰܡܕܺܝܢ̱ܬܳܐ ܗܳܕܶܐ܆ ܘܰܠܡܶܫܰܐܠ ܒܰܫܠܳܡܳܗ̇܆ ܡܶܛܽܠ ܕܰܠܝܳܗܽܘܒ̈ܶܐ ܕܬܽܘܪ̈ܣܳܝܶܐ ܪ̈ܽܘܚܳܢܳܝܶܐ ܗܳܝܕܶܝܢ ܝܳܗܒܳܐ ܗ̱ܘܳܬ ܠܰܢ܆ ܗܳܢܽܘܢ ܕܡܶܛܽܠܳܬܗܽܘܢ ܟܰܕ ܪܒܰܝܢܰܢ ܘܰܗܘ̣ܰܝܢܰܢ ܠܟܶܢܫܳܐ ܣܰܓܺܝܳܐܐ܆ ܐܳܦ ܟܽܘܢܳܝܳܐ ܗܰܘ ܕܰܟܪ̈ܺܝܣܛܝܳܢܶܐ ܩܰܕܡܳܝ̈ܶܐ ܐܶܫܬܰܡܰܗܢܰܢ^[9]. ܠܗܳܢܽܘܢ ܕܶܝܢ ܕܰܐܪܡܺܝܘ ܐܶܢܽܘܢ ܠܙܰܪ̈ܥܶܐ܆ ܙܳܕܶܩ ܕܢܶܬܚܰܫܒܽܘܢ ܦܺܐܪ̈ܶܐ ܕܢܶܨ̈ܒܳܬܳܐ ܛܳܒ̈ܳܬܳܐ܆ ܫܒܽܘܩ ܕܳܐܦ ܗܳܫܳܐ ܟܰܕ ܨܳܒܝܳܐ ܕܰܬܬܰܪܣܶܐ ܠܰܢ ܪܽܘܚܳܢܳܐܺܝܬ܆ ܠܘܳܬ ܕܽܘܟܪܳܢܳܐ ܘܥܺܐܕܳܐ ܕܩܰܕܺܝܫܳܐ ܬܽܐܘܡܰܐ ܫܠܺܝܚܳܐ ܐܰܚܬܰܬ ܠܰܢ.

ܥܺܐܕܳܐ ܓܶܝܪ ܐܺܝܬܶܝܗ̇ ܐܰܝܟ ܕܒܰܫܪܳܪܳܐ܆ ܗܳܝ ܕܢܶܬܶܥܗܶܕ ܐܶܢܶܝܢ ܠܗܳܢܶܝܢ ܡ̈ܶܠܶܐ܆ ܗܳܠܶܝܢ ܟܺܝܬ ܕܗܽܘ ܬܽܐܘܡܰܐ ܠܘܳܬ ܫܠܺܝ̈ܚܶܐ ܗܳܢܽܘܢ ܕܫܰܪܟܳܐ. ܟܰܕ ܡܶܬܦܰܠܰܓ ܗ̱ܘܳܐ ܘܠܳܐ ܡܗܰܝܡܶܢ ܐܳܡܰܪ ܗ̱ܘܳܐ: ܟܰܕ ܡܶܬܚܪܶܝܢ ܗ̱ܘܰܘ ܠܩܽܘܒܠܶܗ܆ ܘܰܡܫܰܪܪܺܝܢ ܗܘܰܘ ܚܠܺܝܡܳܐܺܝܬ ܕܰܚܙܰܘ ܠܡܳܪܰܢ ܡܶܢ ܒܳܬܰܪ ܕܩܳܡ ܡܶܢ ܡܺܝ̈ܬܶܐ܆ ܘܶܐܬܳܐ ܠܘܳܬܗܽܘܢ ܘܶܐܬܚܙܺܝ ܠܗܽܘܢ. ܐܶܢ ܠܳܐ ܐܶ݀ܚܙܶܐ ܐܳܡܰܪ ܒܺܐܝܕܰܘ̈ܗ̱ܝ ܠܫܽܘ̈ܡܳܬܳܐ ܕܨܶܨ̈ܶܐ܆ ܘܰܐ݀ܪܡܶܐ ܠܨܶܒܥܳܐ ܕܺܝܠܝ ܒܕܽܘܟܬܳܐ ܗܳܝ ܕܺܝܠܗܽܘܢ ܕܨܶܨ̈ܶܐ܆ ܘܰܐ݀ܪܡܶܐ ܠܺܐܝܕܳܐ ܕܺܝܠܝ ܒܕܰܦܢܶܗ܆ ܠܳܐ ܐܶ݀ܗܰܝܡܶܢ^[10]. ܐܳܘ ܠܠܳܐ ܗܰܝܡܳܢܽܘܬܳܐ^[11] ܚܰܟܺܝܡܬܳܐ܆ ܕܒܰܕܡܽܘܬ ܕܝܩܐܠܐ ܚܶܦܪܰܬ ܠܰܢ ܠܣܺܝܡܬܳܐ܆ ܕܥܽܘܡܩܳܐ ܕܕܽܘܓ̈ܡܰܛܰܐ ܬܪ̈ܺܝܨܳܬܳܐ ܘܰܕܗܰܝܡܳܢܽܘܬܳܐ. ܕܟܰܕ ܓܶܝܪ ܡܶܢ ܪܽܘܚܳܐ ܩܰܕܺܝܫܳܐ ܡܶܬܬܙܺܝܥ ܗ̱ܘܳܐ ܗܽܘ ܫܠܺܝܚܳܐ܆ ܒܰܙܰܥ ܘܰܐܦܶܩ ܠܰܢ ܠܰܒ̈ܢܳܬ ܩ̈ܳܠܶܐ ܗܳܠܶܝܢ ܣܰܓܺܝ̈ܳܐܬܳܐ ܒܽܘܝܳܝܢܳܐ ܘܰܡܥܰܩܒܳܢ̈ܝܳܬܳܐ ܘܡܶܬܩܰܠܣܳܢ̈ܝܳܬܳܐ܆ ܡܶܢ ܬܰܡܳܢ ܐܺܝܬܶܝܗ̇ ܦܫܺܝܩܬܳܐ ܠܡܺܐܠܰܦ.

ܡܽܘܫܶܐ ܡܰܢ ܓܶܝܪ ܟܰܕ ܨܳܗܶܐ ܗ̱ܘܳܐ ܐܺܝܣܪܳܐܶܝܠ ܒܡܰܕܒܪܳܐ܆ ܘܫܳܐܶܠ ܗ̱ܘܳܐ ܡܰܝ̈ܳܐ ܠܡܶܫܬܳܐ^[12]܆ ܡܳܚܶܐ ܗ̱ܘܳܐ ܒܚܽܘܛܪܳܐ ܠܫܽܘܥܳܐ ܗܰܘ ܝܰܒܺܝܫܳܐ܆ ܐܰܝܟܰܢܳܐ ܕܶܐܬܶܐܡܰܪ ܠܶܗ ܡܶܢ ܐܰ‌ܠܳܗܳܐ. ܟܰܕ ܕܶܝܢ ܡܶܬܦܰܫܰܟ ܗ̱ܘܳܐ ܒܪܰܡ ܐܳܡܰܪ ܗ̱ܘܳܐ: ܫܽܘܡܥܽܘܢܳܢ ܠܳܐ ܡܶܬܬܦܺܝ̈ܣܳܢܶܐ. ܕܰܠܡܳܐ܆ ܡܶܢ ܫܽܘܥܳܐ ܗܳܢܳܐ܆ ܢܳܦܶܩ ܠܟܽܘܢ ܡܰܝ̈ܳܐ܆ ܘܡܰܪܡܰܪ ܠܰܐܠܳܗܳܐ ܡܶܛܽܠ ܗܳܕܶܐ܆ ܘܫܳܡܰܥ ܗ̱ܘܳܐ ܡ̈ܶܠܶܐ ܕܰܓܙܳܡܳܐ ܥܰܡ ܐܰܗܪܽܘܢ ܐܰܚܽܘܗ̱ܝ܆ ܘܗܳܟܰܢܳܐ ܐܺܝܬ ܠܗܶܝܢ. ܡܶܛܽܠ ܕܠܳܐ ܗܰܝܡܶܢܬܽܘܢܳܢܝ ܕܰܬܩܰܕܫܽܘܢܳܢܝ ܩܕܳܡ ܒܢܰܝ̈ܳܐ ܕܺܐܝܣܪܳܐܶܝܠ܆ ܡܶܛܽܠܗܳܕܶܐ܆ ܠܳܐ ܬܰܥܠܽܘܢܳܗ̇ ܐܰܢ̱ܬܽܘܢ ܠܰܟܢܽܘܫܬܳܐ ܗܳܕܶܐ܆ ܠܰܐܪܥܳܐ ܗܳܝ ܕܝܶܗܒܶܬ ܠܗܽܘܢ^[13]. ܠܳܐ ܓܶܝܪ ܙܳܕܶܩ ܗ̱ܘܳܐ ܠܡܶܬܦܰܫܳܟܽܘ ܒܳܬܰܪ ܦܽܘܩܕܳܢܳܐ ܐܰ‌ܠܳܗܳܝܳܐ ܐܶܠܳܐ ܠܰܡܗܰܝܡܳܢܽܘ܆ ܕܡܶܢ ܟܽܠܦܪܽܘܤ ܗܳܘܝܳܐ ܗܳܝ ܕܶܐܬܦܰܩܕܰܬ.

ܬܽܐܘܡܰܐ ܕܶܝܢ ܟܰܕ ܒܙܰܒܢܶܗ ܘܡܶܬܩܰܠܣܳܢܳܐܺܝܬ ܡܶܬܦܰܠܰܓ ܗ̱ܘܳܐ ܘܠܳܐ ܡܗܰܝܡܶܢ ܗ̱ܘܳܐ ܡܶܛܽܠ ܡܫܺܝܚܳܐ܆ ܠܘܳܬ ܡܛܰܦܣܳܢܽܘܬܳܐ ܘܫܽܘܪܳܪܳܐ ܕܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܠܰܡܗܰܝܡܳܢܽܘ ܒܶܗ ܠܚܰܝ̈ܶܐ ܕܰܠܥܳܠܰܡ^[14]܆ ܐܰܝܟܰܢܳܐ ܕܳܐܡܰܪ ܦܰܘܠܽܘܤ: ܫܳܡܰܥ ܗ̱ܘܳܐ ܡܶܢܶܗ ܕܗܰܘ ܡܰܠܦܳܢܳܐ ܢܺܝܚܳܐ ܘܢܰܓܺܝܪ ܪܽܘܚܳܐ ܐܰ‌ܠܳܗܳܐ܆ ܐܰܝܬܳܐ ܨܶܒܥܳܟ ܠܗܳܪܟܳܐ܆ ܘܰܚܙܺܝ ܐܺܝ̈ܕܰܝ. ܘܰܐܝܬܳܐ ܐܺܝܕܳܟ ܘܰܐܪܡܳܐ ܒܕܰܦܢܳܐ ܕܺܝܠܝ. ܘܠܳܐ ܬܶܗܘܶܐ ܠܳܐ ܡܗܰܝܡܢܳܐ܆ ܐܶܠܳܐ ܡܗܰܝܡܢܳܐ^[15].

ܠܳܐ ܐܺܝܬ ܗ̱ܘܳܐ ܐ̱ܚܪܺܢܳܐܺܝܬ ܠܰܡܚܰܘܳܝܽܘ ܠܠܳܐ ܗܳܝܡܳܢܽܘܬܶܗ ܕܬܰܠܡܺܝܕܳܐ܆ ܕܣܰܓܺܝ ܡܰܘܬܪܳܢܳܐܺܝܬ ܘܙܳܕܩܳܐܺܝܬ ܗܘ̣ܳܬ܆ ܐܶܠܳܐ ܐܶܢ ܒܝܰܕ ܗܳܝ ܕܗܳܠܶܝܢ ܢܺܐܡܰܪ ܗ̱ܘܳܐ܆ ܕܠܳܐ ܬܶܗܘܶܐ ܠܳܐ ܡܗܰܝܡܢܳܐ ܐܶܠܳܐ ܡܗܰܝܡܢܳܐ. ܠܳܐ ܗܰܝܡܳܢܽܘܬܳܐ ܕܺܝܠܳܟ ܐܳܡܰܪ: ܕܗܰܝܡܳܢܽܘܬܳܐ ܗܘ̣ܳܬ ܐܶܡܳܐ. ܡܳܕܶܝܢ ܟܰܕ ܠܗܳܝ ܫܳܒܶܩ ܐܰܢ̱ܬ܆ ܠܘܳܬ ܗܳܕܶܐ ܥܒܰܪ ܫܰܢܳܐ. ܥܰܗܺܝܕ ܐ̱ܢܳܐ ܗ̱ܘ̣ ܓܶܝܪ ܠܫܽܘܘܕܳܝ̈ܶܐ ܕܺܝܠܝ܆ ܗܳܢܽܘܢ ܕܒܺܐܝ̈ܕܰܝܗܽܘܢ ܐܶܡܪܶܬ܆ ܩܽܘܫܘ ܘܢܶܬܦܬܰܚ ܠܟܽܘܢ^[16]. ܢܩܰܫܬ ܐܰܢ̱ܬ ܚܦܺܝܛܳܐܺܝܬ. ܐܶܠܳܐ ܦܶܬܚܶܬ ܠܳܟ ܐܶܢܳܐ ܝܰܬܺܝܪ ܫܦܺܝܥܳܐܺܝܬ܆ ܟܰܕ ܒܰܥܒܳܕܳܐ ܡܡܰܠܶܐ ܐ̱ܢܳܐ ܗܰܘ ܡܳܐ ܕܰܒܥܰܝܬ. ܐܰܝܬܳܐ ܓܶܝܪ ܨܶܒܥܳܟ ܠܗܳܪܟܳܐ ܘܰܚܙܺܝ ܠܺܐܝ̈ܕܰܝ܆ ܘܶܐܬܕܰܟܪ ܠܺܐܝܕܳܐ ܕܳܐܕܳܡ܆ ܗܳܝ ܕܠܳܐ ܦܰܓܕܳܗ̇ ܦܽܘܩܕܳܢܳܐ ܕܰܐ‌ܠܳܗܳܐ܆ ܕܠܳܐ ܬܶܣܰܒ ܠܦܺܐܪܳܐ ܕܺܐܝܠܳܢܳܐ ܗܰܘ ܕܰܟܠܶܐ ܗ̱ܘܳܐ܆ ܗܳܝ ܕܡܶܛܽܠܳܬܳܗ̇ ܐܶܢܳܐ ܠܺܐܝ̈ܕܰܝܳܐ ܕܺܝܠܝ ܐܰܫܠܡܶܬ ܠܒܽܘܙܳܥܳܐ ܕܨܶܨ̈ܶܐ.

ܘܰܐܝܬܳܐ ܐܺܝܕܳܟ܆ ܘܰܐܪܡܳܐ ܒܕܰܦܢܳܐ ܕܺܝܠܝ܆ ܘܰܒܬܰܪܥܺܝܬܳܟ ܠܘܳܬ ܚܰܘܳܐ ܪܗܰܛ܆ ܗܳܝ ܕܡܶܢ ܕܰܦܢܶܗ ܕܓܰܒܪܳܐ ܐܶܬܦܰܣܩܰܬ܆ ܘܰܥܒܰܕܬ̣ܶܗ ܠܓܰܒܪܳܐ ܫܰܘܬܳܦܳܐ ܕܡܰܛܥܝܳܢܽܘܬܳܐ ܕܚܶܘܝܳܐ܆ ܗܳܝ ܕܡܶܛܽܠܳܬܳܗ̇ ܒܶܠܥܶܬ݂ ܒܕܰܦܢܳܐ ܕܺܝܠܝ ܒܠܽܘܟܳܝܬܳܐ ܕܶܐܤܛܪܰܛܺܝܽܘܛܳܐ܆ ܘܠܰܘ ܦܫܺܝܛܳܐܺܝܬ܆ ܐܶܠܳܐ ܡܶܢ ܒܳܬܰܪ ܡܰܘܬܳܐ ܨܶܒܝܳܢܳܝܳܐ. ܐܰܝܟܰܢܳܐ ܕܶܐ݀ܚܰܘܶܐ ܓܰܠܝܳܐܺܝܬ܆ ܕܰܠܡܰܘܬܳܐ ܗܰܘ ܕܰܒܕܰܦܢܳܐ ܐ݀ܶܥܒܶܕ ܩܰܕܡܳܐܺܝܬ܆ ܐܳܦ ܩܕܳܡ ܩܝܳܡܬܳܐ ܐܰ݀ܩܣܺܝܬܶܗ܆ ܟܰܕ ܡܶܢܶܗ ܕܕܰܦܢܳܐ ܕܺܝܠܝ ܗܳܝ ܕܡܺܝܬ̣ܰܬ̣ ܐܰܝܟ ܗܰܘ ܕܚܰܝ̈ܶܐ ܗܘ̣ܳܬ܆ ܐܰܒܥܶܬ݂ ܡܥܺܝܢܳܐ ܦܳܪܽܘܩܳܝܬܳܐ ܕܡܰܝ̈ܳܐ ܘܰܕܡܳܐ܆ ܘܥܶܒܕܶܬ ܠܫܽܘܪܳܝܳܐ ܕܡܰܘܬܳܐ܆ ܫܽܘܪܳܝܳܐ ܕܐ̱ܪ̈ܳܙܶܐ ܕܠܳܐ ܡܳܝܽܘܬܽܘܬܳܐ.

ܐܶܢܗܽܘ ܗܳܟܺܝܠ ܕܡܶܛܽܠ ܗܳܠܶܝܢ ܥܶܠ̈ܠܳܬܳܐ܆ ܡܶܠܬܶܗ ܕܰܐ‌ܠܳܗܳܐ ܠܳܐ ܡܶܫܬܰܚܠܦܳܢܳܐܺܝܬ ܐܶܬܒܰܣܰܪ ܘܶܐܬܒܰܪܢܰܫ܆ ܐܰܝܟܰܢܳܐ ܠܰܘ ܒܳܗ̇ ܟܰܕ ܒܳܗ̇ ܒܽܐܘܣܺܝܰܐ ܠܰܢ ܐܶܫܬܰܘܬܰܦ ܤܛܰܪ ܡܶܢ ܚܛܺܝܬܳܐ܆ ܠܗܳܢܽܘܢ ܕܰܕܢܶܚܛܽܘܦ ܐܶܢܽܘܢ ܡܶܢ ܢܶܫܒܰܘ̈ܗ̱ܝ ܕܡܰܘܬܳܐ ܡܣܰܪܗܶܒ ܗ̱ܘܳܐ. ܡܶܛܽܠܗܳܕܶܐ ܓܶܝܪ. ܡܶܢ ܙܰܪܥܶܗ ܕܰܐܒܪܳܗܳܡ ܢܣܰܒ^[17]܆ ܘܰܗܘ̣ܳܐ ܡܶܢ ܥܶܩܳܪܶܗ ܕܺܐܝܫܰܝ ܘܰܕܕܰܘܺܝܕ܆ ܗܳܢܽܘܢ ܕܡܶܢ ܙܰܪܥܗܽܘܢ ܐܺܝܬܶܝܗ̇ ܗ̱ܘܳܬ ܒܬܽܘܠܬܳܐ ܗܳܝ ܩܰܕܺܝܫܬܳܐ܆ ܗܳܝ ܕܡܶܢܳܗ̇ ܐܳܦ ܒܰܒܣܰܪ ܐܶܬܺܝܠܶܕ. ܐܰܝܟܰܢܳܐ ܕܶܝܢ ܠܰܘ ܠܒܰܪ ܡܶܢ ܡܶܬܒܰܪܢܫܳܢܽܘܬܳܐ ܫܰܪܺܝܪܬܳܐ܆ ܣܳܝܡܳܐ ܠܳܗ̇ ܟܽܠܳܗ̇ ܗܰܓܳܓܽܘܬܳܐ ܚܶܠܡܳܢܳܝܬܳܐ܆ ܓܶܫܬܳܐ ܗܳܝ ܠܳܐ ܡܗܰܝܡܰܢܬܳܐ ܘܰܕܣܰܓܺܝ ܡܗܰܝܡܰܢܬܳܐ ܕܬܽܐܘܡܰܐ ܫܠܺܝܚܳܐ. ܗܶܓܓܳܐ ܓܶܝܪ ܐܰܘܟܺܝܬ ܓܽܘܫܡܳܐ ܛܶܠܳܢܳܝܳܐ܆ ܡܶܢ ܟܽܠܦܪܽܘܤ. ܐܳܦܠܳܐ ܡܩܰܒܠܳܢܳܐ ܕܓܶܫܬܳܐ ‌ܐܺܝܬܰܘܗ̱ܝ. ܡܶܛܽܠܗܳܕܶܐ ܗܳܟܺܝܠ ܗܰܘ ܬܰܠܡܺܝܕܳܐ ܡܶܬܦܰܠܰܓ ܘܠܳܐ ܡܗܰܝܡܶܢ܆ ܐܰܝܟܰܢܳܐ ܕܠܺܝ ܢܶܗܘܶܐ ܡܙܰܡܢܳܢܳܐ ܕܗܰܝܡܳܢܽܘܬܳܐ ܫܰܪܺܝܪܬܳܐ܆ ܟܰܕ ܦܳܣܶܩ ܠܠܳܐ ܗܰܝܡܳܢܽܘܬܳܐ ܕܰܣܒܺܝܪܽܘܬܳܐ ܗܳܝ ܕܰܥܬܺܝܕܳܐ ܗ̱ܘܳܬ. ܘܟܰܕ ܐܶܬܦܰܠܰܓ ܡܰܢ ܘܓܰܫ ܗܳܟܰܢܳܐ ܐܰܘܬܰܪ܆ ܘܡܶܢ ܗܳܕܶܐ ܛܳܥܝܽܘܬܳܐ ܐܰܓܗܺܝ ܠܰܢ. ܐܰܘܬܰܪ ܕܶܝܢ ܬܽܘܒ܆ ܘܳܐܦ ܡܶܢ ܛܳܥܝܽܘܬܳܐ ܐ̱ܚܪܺܬܐ ܚܰܪܰܪ ܠܰܢ.

ܟܰܕ ܐܰܘܕܝܶܗ ܠܗܰܘ ܕܶܐܬܓܫܶܫ ܡܳܪܝܳܐ ܘܰܐ‌ܠܳܗܳܐ܆ ܘܰܐܙܥܶܩ ܡܶܬܕܰܡܪܳܢܳܐܝܬ܆ ܡܳܪܝܳܐ^[18] ܕܺܝܠܝ ܘܰܐ‌ܠܳܗܳܐ ܕܺܝܠܝ^[19]. ܠܰܘ ܟܰܕ ܐ̱ܚܪܺܢܳܐ ܡܰܘܕܶܐ ܗ̱ܘܳܐ ܡܳܪܝܳܐ ܕܡܶܬܚܙܶܐ. ܘܠܰܐ̱ܚܪܺܢܳܐ ܐܰ‌ܠܳܗܳܐ ܕܰܡܛܰܫܰܝ܆ ܐܰܝܟ ܫܳܛܽܘܪ̈ܘܳܬܳܐ ܕܗܳܢܽܘܢ ܕܦܳܣܩܺܝܢ ܠܶܗ ܠܦܳܪܽܘܩܰܢ ܘܰܐ‌ܠܳܗܳܐ ܝܶܫܽܘܥ ܡܫܺܝܚܳܐ܆ ܠܰܬܪܰܝܳܢܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ܆ ܐܶܠܳܐ ܟܰܕ ܚܰܕ ܘܗܽܘ ܟܰܕ ܗܽܘ ܝܳܕܰܥ ܗ̱ܘܳܐ ܠܶܗ ܡܶܢ ܬܪܶܝܢ ܟܝܳܢ̈ܶܐ܆ ܡܶܢ ܐܰ‌ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ܆ ܗܳܢܶܝܢ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܐܰܝܟ ܡܶܠܬܳܐ ܕܺܝܠܗܶܝܢ܆ ܠܳܐ ܡܶܬܓܰܫܫܳܢܳܐ ܡܰܢ ܒܗܳܝ ܕܺܐܝܬܰܘܗ̱ܝ ܐܰ‌ܠܳܗܳܐ܆ ܡܶܬܓܰܫܫܳܢܳܐ ܕܶܝܢ ܒܗܳܝ ܕܰܗܘܳܐ ܒܰܪܢܳܫܳܐ ܡܶܛܽܠܳܬܰܢ ܠܳܐ ܡܶܫܬܰܚܠܦܳܢܳܐܺܝܬ ܘܰܕܠܳܐ ܒܽܘܠܒܳܠܳܐ܆ ܘܟܰܕ ܥܰܡ ܝܽܘܚܰܢܳܢ ܗܰܘ ܬܶܐܽܘܠܽܘܓܽܘܤ ܡܰܙܥܶܩ܆ ܗܰܘ ܕܺܐܝܬܰܘܗ̱ܝ ܗ̱ܘܳܐ ܡܶܢ ܪܺܝܫܺܝܬܳܐ܆ ܗܰܘ ܕܰܚܙܰܝܢ ܒܥܰܝ̈ܢܰܝܢ܆ ܗܰܘ ܕܰܚܙܰܝܢ ܘܒܺܐܝ̈ܕܰܝܢ ܓܰܫܢܳܝܗ̱ܝ ܆ ܡܶܛܽܠ ܡܶܠܬܳܐ ܕܚܰܝ̈ܶܐ^[20].

ܘܠܳܐ ܐ̱ܢܳܫ ܢܶܣܒܰܪ ܕܰܒܝܰܕ ܗܳܠܶܝܢ ܬܰܪܬܶܝܢ ܐܳܬܘ̈ܳܬܳܐ ܕܣܺܝ̈ܡܳܢ ܩܕܳܡ ܗܳܠܶܝܢ ܬܪܶܝܢ ܫܡܳܗ̈ܶܐ ܕܡܳܪܝܳܐ ܕܺܝܠܝ ܘܰܐ‌ܠܳܗܳܐ ܕܺܝܠܝ܆ ܬܰܪܥܺܝܬܳܐ ܕܰܬܪܶܝܢ ܟܝܳܢ̈ܶܐ ܘܰܩܢܽܘܡ̈ܶܐ ܘܦܰܪ̈ܨܽܘܦܶܐ ܥܳܐܠܳܐ. ܝܰܬܺܝܪܳܐܺܝܬ ܓܶܝܪ ܐܺܝܬ ܠܡܶܫܟܳܚܽܘ ܐܳܕܫܳܐ ܕܰܐܝܟ ܗܳܢܳܐ ܕܡܶܠܬܳܐ ܒܕܽܘܟ̈ܝܳܬܳܐ ܣܰܓܺܝ̈ܳܐܬܳܐ ܕܰܟܬܳܒ̈ܶܐ ܟܳܗܢܳܝ̈ܶܐ܆ ܕܒܰܠܚܽܘܕܳܝܽܘܬ ܦܰܪܨܽܘܦܳܐ ܡܶܬܰܐܡܰܪ܆ ܥܰܠ ܚܰܕ ܘܒܰܠܚܽܘܕܰܘܗ̱ܝ ܐܰ‌ܠܳܗܳܐ. ܐܰܝܟ ܐܰܝܟܳܐ ܕܳܐܡܰܪ ܕܰܘܺܝܕ ܒܡܰܙܡܽܘܪ̈ܶܐ ܕܰܠܘܳܬ ܐܰ‌ܠܳܗܳܐ ܕܟܽܠ܆ ܨܽܘܬ ܠܩܳܠܳܐ ܕܬܰܟܫܶܦܬܳܐ ܕܺܝܠܝ ܡܰܠܟܳܐ ܕܺܝܠܝ ܘܰܐ‌ܠܳܗܳܐ ܕܺܝܠܝ^[21]܆ ܘܶܐܪܰܡܪܡܳܟ ܐܰ‌ܠܳܗܳܐ ܡܰܠܟܳܐ ܕܺܝܠܝ^[22]. ܘܰܒܕܽܘܟܬܳܐ ܐ̱ܚܪܺܬܳܐ ܬܽܘܒ܆ ܡܶܛܽܠ ܕܰܐܢ̱ܬ ܐܺܝܬܰܝܟ ܐܰ‌ܠܳܗܳܐ ܦܳܪܽܘܩܳܐ ܕܺܝܠܝ^[23]. ܘܰܠܘܳܬ ܕܳܢܺܝܐܶܝܠ܆ ܐܰ‌ܠܳܗܳܐ ܗܰܘ ܕܰܠܥܳܠܰܡ܆ ܗܰܘ ܝܳܕܽܘܥܳܐ ܕܟܰܣ̈ܝܳܬܳܐ^[24]܆ ܘܬܽܘܒ܆ ܡܳܪܝܳܐ ܐܰ‌ܠܳܗܳܐ ܗܰܘ ܪܰܒܳܐ ܘܰܬܡܺܝܗܳܐ^[25]. ܘܰܐܪܺܝܟܬܳܐ ܗ̱ܝ ܕܗܳܠܶܝܢ ܕܰܐܝܟ ܗܳܟܰܢ ܢܶܡܢܶܐ ܘܢܺܐܡܰܪ. ܐܰܝܟܰܢܳܐ ܟܺܝܬ ܕܬܽܐܘܡܰܐ ܡܶܕܶܡ܆ ܠܰܘ ܟܰܕ ܨܳܒܶܐ ܕܠܰܬܪܶܝܢ ܢܶܦܣܽܘܩ ܠܗܰܘ ܚܰܕ ܘܒܰܠܚܽܘܕܰܘܗ̱ܝ܆ ܐܰܡܪܳܗ̇ ܠܗܳܕܶܐ܆ ܐܶܠܳܐ ܟܰܕ ܒܰܥܝܳܕܳܐ ܟܬܳܒܳܝܳܐ ܡܶܬܚܰܫܰܚ ܐܰܝܟ ܐܰܝܢܳܐ ܕܡܶܢܶܗ ܟܰܕ ܡܶܢܶܗ ܕܪܽܘܚܳܐ ܡܶܬܢܦܰܚ ܗ̱ܘܳܐ܆ ܠܗܰܘ ܕܶܐܬܓܫܶܫ ܘܶܐܬܺܝܕܰܥ܆ ܡܳܪܝܳܐ ܘܰܐ‌ܠܳܗܳܐ ܫܰܒܰܚ ܘܰܐܘܕܺܝ.

ܘܠܰܘ ܒܰܠܚܽܘܕ ܗܳܪܟܳܐ ܐܰܘܬܰܪ ܠܰܢ ܗܽܘ ܫܠܺܝܚܳܐ܆ ܟܰܕ ܒܡܶܠܬܳܐ ܕܰܡܕܰܒܪܳܢܽܘܬܳܐ ܘܰܕܡܶܬܒܰܪܢܫܳܢܽܘܬܳܐ ܐܶܬܦܰܠܰܓ ܘܠܳܐ ܗܰܝܡܶܢ܆ ܐܶܠܳܐ ܐܳܦ ܒܕܽܘܟܬܳܐ ܐ̱ܚܪܺܬܳܐ܆ ܟܰܕ ܒܪܶܚܡܰܬ ܐܰ‌ܠܳܗܳܐ ܐܶܬܦܰܫܰܟ܆ ܐܰܘܬܰܪ ܠܰܢ ܒܬܶܐܽܘܠܽܘܓܺܝܰܐ. ܟܰܕ ܓܶܝܪ ܦܳܪܽܘܩܰܢ ܝܰܬܺܝܪ ܡܥܰܠܝܳܐܺܝܬ ܡܡܰܠܶܠ ܗ̱ܘܳܐ ܠܘܳܬ ܬܰܠܡܺܝ̈ܕܶܐ܆ ܡܥܰܩܶܒ ܗ̱ܘܳܐ ܗܽܘ ܘܰܡܫܰܐܶܠ ܟܰܕ ܐܳܡܰܪ: ܡܳܪܝ. ܠܳܐ ܝܳܕܥܺܝܢܰܢ ܠܰܐܝܟܳܐ ܐܳܙܶܠ ‌ܐܰܢ̱ܬ. ܘܰܐܝܟܰܢܳܐ ܡܶܫܟܚܺܝܢܰܢ ܐܽܘܪܚܳܐ ܠܡܶܕܰܥ. ܘܳܐܡܰܪ ܠܶܗ ܝܶܫܽܘܥ. ܘܶܐܢܳܐ ܐܺܝܬܰܝ ܐܽܘܪܚܳܐ ܘܰܫܪܳܪܳܐ܆ ܘܚܰܝ̈ܶܐ. ܠܳܐ ܐ̱ܢܳܫ ܐܳܬܶܐ ܠܘܳܬ ܐܰܒܳܐ܆ ܐܶܠܳܐ ܐܶܢ ܒܺܐܝ̈ܕܰܝ. ܐܶ‌ܠܽܘ ܝܳܕܥܺܝܢ ܗ̱ܘܰܝܬܽܘܢ ܠܺܝ܆ ܐܳܦ ܠܰܐܒܳܐ ܕܺܝܠܝ ܝܳܕܥܺܝܢ ܗ̱ܘܰܝܬܽܘܢ. ܘܡܶܢ ܗܳܫܳܐ ܝܳܕܺܥܝܢ ܐܢ̱ܬܽܘܢ ܠܶܗ ܘܰܚܙܰܝܬܽܘܢܳܝܗ̱ܝ ^[26].

ܡܶܢ ܗܳܠܶܝܢ ܕܶܝܢ ܡ̈ܶܠܶܐ܆ ܠܳܐ ܡܶܕܶܡ ܐ̱ܚܪܺܢܳܐ ܡܚܰܘܶܐ܆ ܐܶܠܳܐ ܐܶܢ ܫܰܘܝܽܘܬ ܐܽܘܣܺܝܰܐ ܕܺܝܠܶܗ ܗܳܝ ܕܰܠܘܳܬ ܐܰܒܳܐ. ܐܶ‌ܠܽܘ ܓܶܝܪ ܠܰܘ ܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ‌ܐܺܝܬܰܘܗ̱ܝ ܗ̱ܘܳܐ ܒܪܳܐ ܠܰܐܒܳܐ܆ ܠܳܐ ܗ̱ܘܳܐ ܒܗܳܝ ܕܗܽܘ ܒܪܳܐ ܡܶܣܬܰܟܰܠ ܗ̱ܘܳܐ ܘܡܶܬܺܝܕܰܥ܆ ܗܽܘ ܐܰܒܳܐ ܐܰܝܟ ܕܰܒܨܰܠܡܳܐ ܚܰܝܳܐ ܘܕܰܫܘܶܐ ܠܶܗ ܘܰܕܠܳܐ ܡܫܰܚܠܰܦ ܒܟܽܠ ܗܰܘ ܡܳܐ ܕܗܽܘ܆ ܡܶܣܬܰܟܰܠ ܗ̱ܘܳܐ ܘܡܶܬܺܝܕܰܥ. ܒܪܺܝܬܳܐ ܓܶܝܪ ܠܳܐ ܗܳܘܝܳܐ ܡܫܰܘܕܥܳܢܺܝܬܳܐ ܕܰܟܝܳܢܳܐ ܠܳܐ ܒ̣ܰܪܝܳܐ. ܐܰܝܟܰܢܳܐ ܗܳܟܺܝܠ ܕܦܽܘܫܳܟܶܗ ܘܫܽܘܐܳܠܶܗ ܕܬܽܐܘܡܰܐ܆ ܕܗܳܕܶܐ ܬܶܐܽܘܠܽܘܓܺܝܰܐ ܗܘ̣ܳܐ ܠܰܢ ܡܰܠܦܳܢܳܐ܆ ܗܳܟܰܢܳܐ ܐܳܦܠܳܐ ܗܰܝܡܳܢܽܘܬܶܗ ܘܓܶܫܬܶܗ܆ ܕܡܶܬܒܰܪܢܫܳܢܽܘܬܳܐ ܫܰܪܺܝܪܬܳܐ ܘܰܕܠܳܐ ܗܰܓܳܓܽܘܬܳܐ܆ ܗܘ̣ܳܬ ܠܰܢ ܡܰܠܦܳܢܺܝܬܳܐ.

ܠܗܳܝ ܕܳܐܦ ܚܢܰܢ܆ ܟܰܕ ܡܝܰܩܪܺܝܢ ܚ̱ܢܰܢ ܢܓܽܘܫܺܝܘܗ̱ܝ ܒܳܗ̇ ܒܰܕܡܽܘܬܳܐ ܐܶܢ ܫܳܦܪܳܐ ܐܳܦ ܗܳܫܳܐ ܠܰܡܫܺܝܚܳܐ. ܘܠܰܘ ܒܰܠܚܽܘܕ ܠܺܐܝܕܰܘ̈ܗ̱ܝ ܕܶܐܬܒܰܙܰܥ̈ܝ̱ ܘܰܠܕܰܦܢܶܗ ܕܶܐܬܬܰܪܥܰܬ܆ ܐܶܠܳܐ ܐܳܦ ܠܚܰܨܶܗ ܢܶܣܥܽܘܪ ܗܰܘ ܕܰܠܡܰܚ̈ܘܳܬܳܐ ܝܰܗܒܶܗ܆ ܘܳܐܦ ܠܦܰܟܰܘ̈ܗ̱ܝ ܗܳܠܶܝܢ ܕܰܐܪܟܶܢ ܐܶܢܽܘܢ ܠܫܽܘܩܳܦ̈ܶܐ^[27]. ܘܰܢܫܰܐܠܺܝܘܗ̱ܝ ܐܰܝܟ ܢܒܺܝܽܘܬܶܗ ܕܰܙܟܰܪܝܳܐ. ܡܳܢܳܐ ܐܶܢܶܝܢ ܗܳܠܶܝܢ ܡܰܚ̈ܘܳܬܳܐ܆ ܕܒܰܝܢܳܬ ܟܰܬܦ̈ܳܬܳܐ ܕܺܝܠܳܟ. ܘܢܺܐܡܰܪ: ܗܳܠܶܝܢ ܕܒܶܠܥܶܬ̣ ܒܒܰܝܬܐ ܚܰܒܺܝܒܳܐ ܕܺܝܠܝ^[28]. ܒܰܝܬܳܐ ܕܶܝܢ ܚܰܒܺܝܒܳܐ܆ ܠܺܐܝܣܪܳܐܶܝܠ ܘܠܽܐܘܪܶܫܠܶܡ ܩܳܪܶܐ܆ ܗܳܝ ܕܒܳܗ̇ ܚܰܫ ܚܰܫܳܐ ܦܳܪܽܘܩܳܝܳܐ. ܡܰܠܽܘܢ ܕܶܝܢ ܠܟܽܠܶܗ ܓܶܢܣܳܐ ܕܰܒܢܰܝ̈ܢܳܫܳܐ܆ ܘܰܠܡܶܬܥܰܡܪܳܢܺܝܬܳܐ ܟܽܠܳܗ̇܆ ܗܳܝ ܕܰܚܠܳܦܶܝܗ̇ ܚܰܫ̣ܶܗ ܠܚܰܫܳܐ ܗܰܘ ܦܳܪܽܘܩܳܝܳܐ.

ܐܰܝܟܰܢܳܐ ܕܶܝܢ ܢܓܽܘܫܺܝܘܗ̱ܝ ܘܰܢܝܰܩܪܺܝܘܗ̱ܝ ܠܗܰܘ ܕܨܶܒܝܳܢܳܐܺܝܬ ܒܒܰܝܬܳܐ ܚܰܒܺܝܒܳܐ ܘܰܚܠܳܦ ܒܰܝܬܶܗ ܒܠܰܥ. ܐܰܝܟܰܢܳܐ܆ ܐܶܢܗܽܘ ܕܟܰܕ ܫܕܶܐ ܒܫܽܘܩܳܐ ܘܰܡܠܶܐ ܫܽܘܚ̈ܢܶܐ ܠܳܐ ܢܶܥܒܪܺܝܘܗ̱ܝ܆ ܐܶܠܳܐ ܢܫܰܘܬܦܺܝܘܗ̱ܝ ܒܪ̈ܰܚܡܶܐ ܘܰܒܪܶܚܡܰܬ ܐ̱ܢܳܫܽܘܬܳܐ܆ ܘܟܰܕ ܪܡܶܐ ܢܶܬܶܠ ܠܶܗ ܐܺܝܕܳܐ ܘܰܢܩܺܝܡܺܝܘܗ̱ܝ܆ ܘܟܰܕ ܫܠܺܝܚ ܢܟܰܣܶܝܘܗ̱ܝ^[29]. ܙܳܕܶܩ ܗ̱ܘܳܐ ܡܰܢ ܓܶܝܪ ܐܶ‌ܠܽܘ ܟܺܝܬ ܡܰܨܝܳܐ ܗ̱ܘܳܬ܆ ܕܳܐܦ ܠܟܺܐܒܳܐ ܕܫܽܘܚܢܰܘ̈ܗ̱ܝ ܢܦܰܠܶܓ ܐܰܟܚܕܳܐ ܥܰܡܶܗ܆ ܘܢܶܫܬܰܘܬܰܦ ܒܡ̈ܢܬܐ222 ܐܰܝܟ ܕܥܰܡ ܐܰܝܢܳܐ ܕܩܰܕܶܡ ܚܰܫ܆ ܘܠܰܕܡܳܐ ܗܰܘ ܕܰܚܠܳܦܰܝܢ ܐܶܫܰܕ܆ ܡܶܛܽܠ ܕܶܝܢ ܕܗܳܕܶܐ ܠܳܐ ܡܫܶܟܚܳܐ܆ ܠܳܐ ܢܰܘܣܶܦ ܠܶܗ ܕܽܘܘܳܢܳܐ ܗܰܘ ܕܡܶܢ ܟܰܦܢܳܐ ܘܡܶܢ ܥܰܪܛܶܠܳܝܽܘܬܳܐ܆ ܘܢܶܡܬܚܺܝܘܗ̱ܝ ܠܶܗ ܠܟܺܐܒܳܐ ܗܰܘ ܕܫܽܘܚܢܰܘ̈ܗ̱ܝ܆ ܘܢܺܐܡܰܪ ܐܳܦ ܡܶܛܽܠܳܬܰܢ܆ ܐܰܝܟܰܢܳܐ ܕܰܒܝܰܕ ܢܒܺܝܳܐ ܗܰܘ ܕܰܡܙܰܡܰܪ ܩܰܕܶܡ ܐܰܟܪܶܙ܆ ܘܥܰܠ ܟܺܐܒܳܐ ܕܫܽܘܚ̈ܢܶܐ ܕܺܝܠܝ ܐܰܘܣܶܦܘ^[30].

ܡܶܛܽܠ ܗܳܠܶܝܢ ܓܶܝܪ ܬܠܳܬ܆ ܚܰܝܳܒܺܝܢܰܢ ܕܢܰܥܶܠ ܪ̈ܰܚܡܶܐ ܠܗܳܢܽܘܢ ܕܗܳܟܰܢܳܐ ܣܺܝܡܺܝܢ. ܒܩܰܕܡܳܐ ܡܰܢ: ܡܶܛܽܠ ܕܰܕܢܰܟܶܐܒ ܠܰܢ ܐܰܟܚܕܳܐ ܥܰܡ ܒ̈ܢܰܝ ܓܶܢܣܰܢ ܙܳܕܶܩ܆ ܘܰܕܢܶܬܪܟܶܢ ܡܶܛܽܠ ܓܰܘܳܢܳܝܽܘܬܶܗ ܕܰܟܝܳܢܳܐ. ܕܬܰܪܬܶܝܢ ܕܶܝܢ܆ ܡܶܛܽܠ ܠܳܐ ܝܺܠܺܝܕܽܘܬܳܗ̇ ܝܺܕܺܝܥܽܘܬܳܗ̇ ܠܳܐ ܡܶܬܚܰܙܝܳܢܽܘܬܳܗ̇ ܕܗܳܝ ܕܰܥܬܺܝܕܳܐ. ܠܳܐ ܓܶܝܪ ܝܳܕܥܺܝܢܰܢ ܐܶܢ ܡܶܢ ܒܳܬܰܪ ܩܰܠܺܝܠ ܒܗܶܝܢ ܟܰܕ ܒܗܶܝܢ ܢܶܦܶܠ܆ ܘܥܰܠ ‌ܐ̱ܚܪܺܢܳܐ ܕܰܡܥܰܕܪܺܝܢ ܠܰܢ ܢܶܣܬܢܩ. ܕܰܬܠܳܬ ܕܶܝܢ܆ ܡܶܛܽܠ ‌ܐܺܝܩܳܪܳܐ ܗܰܘ ܦܐܶܐ ܒܪܰܒܽܘܬܳܐ ܘܪܳܡܳܐ܆ ܗܰܘ ܕܶܐܬܺܝܗܶܒ ܠܰܢ ܡܶܢ ܗܰܘ ܕܶܐܡܰܪ: ܕܰܐܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܰܟܡܳܐ ܕܰܥܒܰܕܬܽܘܢ ܠܚܰܕ ܡܶܢ ܗܳܠܶܝܢ ܐܰܚܰܝ̈ ܙܥܽܘܪ̈ܶܐ܆ ܠܺܝ ܗܽܘ ܥܒܰܕܬܽܘܢ^[31].

ܐܰܝܟܰܢܳܐ ܓܶܝܪ ܠܳܐ ܫܟܺܝܪܐ܆ ܐܶܢܗܽܘ ܕܗܰܘ ܡܰܢ ܟܰܕ ܕܠܳܐ ܚܛܳܗ ‌ܐܺܝܬܰܘܗ̱ܝ ܒܥܰܝܢܳܐ ܐܶܬܡܚܺܝ ܡܶܛܽܠܳܬܰܢ ܘܶܐܬܟܪܰܗ ܡܶܛܽܠ ܠܳܐ ܢܳܡܽܘܣܳܝ̈ܘܳܬܰܢ^[32]܆ ܘܶܐܬܬܰܝܬܺܝ ܠܚܰܪܬܳܐ ܠܡܰܘܬܳܐ ܐܰܝܟ ܒܰܪ̱ܬ ܩܳܠܳܐ ܕܶܐܫܰܥܝܳܐ܆ ܚܢܰܢ ܕܶܝܢ ܐܳܦܠܳܐ ܒܫܽܘܚ̈ܢܶܐ ܕܰܒ̈ܢܰܝ

ܓܶܢܣܰܢ ܢܢܺܝܚܺܝܘܗ̱ܝ܆ ܗܳܢܽܘܢ ܕܰܪܒ̣ܰܘ ܫܽܘܚ̈ܢܶܐ ܒܬܰܪܥܺܝܬܰܢ ܢܳܒܥܺܝܢ ܚ̱ܢܰܢ܆ ܘܠܳܐ ܡܰܪܓܫܺܝܢ ܚ̱ܢܰܢ ܒܡܰܣܝܽܘܬܳܐ ܡܶܬܗܰܘܢܳܢܺܝܬܳܐ ܘܰܒܪܶܗܠܳܐ. ܠܳܐ ܓܶܝܪ ܬܺܐܡܰܪ ܠܺܝ܆ ܕܡܶܬܟܰܚܰܕ ܐܰܢ̱ܬ ܗ̱ܘ̣ ܡܶܢ ܕܰܦܢܳܐ ܗܳܝ ܐܰ‌ܠܳܗܳܝܬܳܐ܆ ܘܡܶܢ ܐܺܝܕܰܝ̈ܳܐ ܗܳܠܶܝܢ ܕܰܚܠܳܦܰܝܟ ܐܶܬܒܰܙܰܥ̈ܝ̱܆ ܐܶܢ ܡܶܢ ܫܽܘܚ̈ܢܶܐ ܕܰܐܚܽܘܟ ܡܰܗܡܶܐ ܐܰܢ̱ܬ. ܛܥܰܝܬ ܠܳܟ ܓܶܝܪ ܒܝܰܕ ܗܳܠܶܝܢ ܫܳܐܶܛ ܐܰܢ̱ܬ ܠܫܽܘܚ̈ܢܶܐ ܗܳܢܽܘܢ. ܗܺܝ ܟܰܕ ܗܺܝ ܥܳܒܶܕ ܐܰܢ̱ܬ܆ ܐܰܟܙܢܳܐ ܕܶܐܢ ܐ̱ܢܳܫ ܠܗܰܕܳܡ̈ܶܐ ܕܚܰܕ ܦܰܓܪܳܐ܆ ܠܡܶܢܗܽܘܢ ܡܰܢ ܢܶܪܚܰܡ܆ ܠܡܶܢܗܽܘܢ ܕܶܝܢ ܢܶܣܢܶܐ ܘܢܰܗܦܶܟ ܐܰܦ̈ܶܐ ܡܶܢܗܽܘܢ ܘܬܶܢܰܕ ܠܶܗ ܡܶܢܗܽܘܢ. ܫܳܬܶܩ ܐ̱ܢܳܐ ܓܶܝܪ ܠܒܰܪ̱ܬ ܩܠܶܗ ܗܳܝ ܫܰܪܺܝܪܬܳܐ ܕܝܽܘܚܰܢܳܢ܆ ܗܳܝ ܕܒܺܐܝ̈ܕܶܝܗ̇ ܠܳܐ ܕܰܓܳܠܳܐܺܝܬ ܦܤܰܩ܆ ܕܗܰܘ ܕܠܳܐ ܡܰܚܶܒ ܠܰܐܚܽܘܗ̱ܝ܆ ܠܗܰܘ ܕܚܳܙܶܐ܆ ܠܰܐܠܳܗܳܐ ܗܰܘ ܕܠܳܐ ܚܙܳܝܗ̱ܝ ܡܶܢ ܡܬܽܘܡ ܠܳܐ ܡܶܫܟܶܚ ܠܡܰܚܳܒܽܘ^[33].

ܡܳܢܳܐ ܕܶܝܢ ܐܳܦ ܗܽܘ ܗܰܘ ܦܽܘܡܳܐ ܕܰܫܪܳܪܳܐ ܠܰܘ ܗܳܟܰܢܳܐ ܡܰܙܥܶܩ ܒܶܐܘܰܢܓܶܠܺܝ̈ܰܐ ܕܶܐܢ ܡܰܚܒܺܝܢ ܐܢ̱ܬܽܘܢ ܠܺܝ ܦܽܘܩ̈ܕܳܢܰܝ ܛܰܪܘ^[34]. ܠܳܐ ܗܳܟܺܝܠ ܢܰܛܥܶܐ ܢܰܦܫܰܢ ܐܶܠܳܐ ܗܳܟܰܢܳܐ ܢܶܓܽܘܫ ܠܗܰܕܳܡ̈ܶܐ ܕܰܐܚܰܝ̈ܢ ܡܡܰܚܰܝ̈ܳܐ܆ ܐܰܝܟ ܕܰܠܕܰܦܢܳܐ ܗܳܝ ܩܰܕܺܝܫܬܳܐ ܘܰܕܟܺܝܬܳܐ܆ ܗܳܝ ܕܰܠܫܶܩ̈ܝܶܐ ܗܳܠܶܝܢ ܕܠܳܐ ܡܳܝܽܘܬܽܘܬܳܐ ܐܰܫܦܥܰܬ ܠܰܢ. ܘܠܶܗ ܠܰܡܫܺܝܚܳܐ ܓܰܠܝܳܐܺܝܬ ܢܶܚܙܶܐ܆ ܘܟܰܕ ܢܶܣܓܽܘܕ ܠܶܗ ܘܦܰܐܝܽܘܬ ܐܰ‌ܠܳܗܳܐܺܝܬ ܢܫܰܒܚܺܝܘܗ̱ܝ܆ ܢܺܐܡܰܪ ܟܽܠ ܚܰܕ ܡܶܢܰܢ ܐܰܟܚܕܳܐ ܥܰܡ ܬܽܐܘܡܰܐ ܫܠܺܝܚܳܐ܆ ܡܳܪܝܳܐ ܕܺܝܠܝ ܘܰܐ‌ܠܳܗܳܐ ܕܺܝܠܝ^[35]. ܕܠܶܗ ܫܽܘܒܚܳܐ ܠܥܳܠܡܺܝܢ. ܐܰܡܺܝܢ‌܀  

ܫܠܶܡ ܡܺܐܡܪܳܐ ܕܥܶܣܪܺܝܢ ܘܰܬܡܳܢܝܳܐ.

ܦܪ̈ܟܣܝܣ. 13: 4[1]

 ܦܳܪ̈ܽܘܚܶܐ[2]

ܚܒܩܘܩ. 3: 15 [3]

[4]ܕܽܘܒܳܪܳܐkosmos

ܪ̈ܰܦܝܳܬܳܐ[5]

ܪ̈ܗܘܡܝܐ. 11: 29 [6]

ܘܕܽܘܟܳܝܶܗ[7]

ܦܪ̈ܟܣܝܣ. 14: 25 ـ 26 [8]

ܦܪ̈ܟܣܝܣ. 11: 26 [9]

ܝܘܚܢܢ. 20: 25 [10]

ܠܰܦܠܺܝܓܽܘܬܳܐ[11]

ܣܶܦܪܐ ܕܡܦܩܢܐ. 17: 1 ـ 2 [12]

ܣܶܦܪܐ ܕܡܶܢܝܳܢܳܐ. 20: 10 ـ 12 [13]

ܐ. ܛܝܡܬܐܘܣ. 1: 16 [14]

ܝܘܚܢܢ. 20: 27 [15]

ܡܬܝ. 7: 7  ܐܦ ܠܘܩܐ. 11: 9 [16]

ܥܒܪ̈ܝܐ. 2: 16 [17]

[18]ܒܠܶܫܳܢܳܐ ܝܰܘܢܳܝܳܐ ܡ̈ܢܰܘܳܬܳܐ ܡܶܕܶܡ ܕܡܰܡܠܠܳܐ ܐܺܝܬ ܕܡܶܬܩܰܪ̈ܝܳܢ ܐܪ̈ܬܪܐ ܘܡܶܬܬܣܺܝ̈ܡܳܢ ܩܕܳܡ ܫܡܳܗ̈ܶܐ ܟܰܕ ܡܶܬܛܰܟܣܺܝܢ ܘܡܶܣܬܰܕܪܺܝܢ ܒܰܡܠܺܝܠܽܘܬܳܐ܆ ܘܶܐܡܰܬܝ ܕܥܰܠ ܚܰܕ ܦܰܪܨܽܘܦܳܐ ܡܶܬܬܣܺܝܡܺܝܢ ܫܡܳܗ̈ܶܐ ܣܰܓܺܝ̈ܶܐܐ܆ ܠܳܐ ܡܶܬܒܥܶܐ ܐܪܬܪܘܢ ܕܢܶܬܬܣܺܝܡ ܩܕܳܡܰܝܗܽܘܢ܆ ܐܷܠܳܐ ܐܶܢ ܚܰܕ ܒܰܠܚܽܘܕ܆ ܕܠܳܐ ܢܶܬܶܠ ܫܽܘܘܕܳܥܳܐ ܕܦܰܪ̈ܨܽܘܦܶܐ ܣܰܓܺܝ̈ܶܐܐ. ܡܶܛܽܠ ܕܶܝܢ ܕܟܰܕ ܐܶܡܰܪ ܬܽܐܘܡܰܐ ܫܠܺܝܚܳܐ: ܡܳܪܝܳܐ ܕܺܝܠܝ ܘܰܐ‌ܠܳܗܳܐ ܕܺܝܠܝ: ܣܳܡ ܬܪܶܝܢ ܐܪ̈ܬܪܐ ܩܕܳܡ ܬܪ̈ܰܝܗܽܘܢ ܫܡܳܗ̈ܶܐ: ܗܰܘ ܕܡܳܪܝܳܐ ܘܗܰܘ ܕܰܐ‌ܠܳܗܳܐ: ܐܰܝܟ ܥܝܳܕܳܐ ܦܫܺܝܛܳܐ ܘܠܳܐ ܡܥܰܩܒܳܢܳܐ ܘܠܳܐ ܚܶܪܝܳܝܳܐ ܕܰܟܬܳܒܳܐ ܐܰ‌ܠܳܗܳܝܳܐ: ܘܰܫܩܰܠܘ ܢܶܣܛܽܘܪ̈ܝܳܢܶܐ ܥܰܢ̈ܳܬܶܐ ܐܳܦ ܡܶܢ ܗܳܪܟܳܐ ܥܶܠܬܳܐ ܕܢܺܐܡܪܽܘܢ ܬܪܶܝܢ: ܡܳܪܝܳܐ ܡܶܢܶܗ ܘܠܶܗ ܘܰܐ‌ܠܳܗܳܐ ܬܽܘܒ ܡܶܢܶܗ ܘܠܶܗ܆ ܡܶܛܽܠܗܳܕܶܐ ܐܳܡܰܪ ܡܰܠܦܳܢܳܐ܆ ܗܳܝ ܕܠܳܐ ܐ̱ܢܳܫ ܢܣ̣ܒܪ ܒܝܰܕ ܗܳܠܶܝܢ ܬܰܪܬܶܝܢ ܐܳܬܘ̈ܳܬܳܐ܆ ܘܰܐܝܬܺܝ ܬܰܚ̈ܘܝܳܬܳܐ ܕܕܳܡ̈ܝܳܢ ܡܶܢ ܟܬܳܒܳܐ ܐܰ‌ܠܳܗܳܝܳܐ܆ ܕܡܶܢ ܟܽܠܦܪܘܣ ܐܰܡܺܝܪ̈ܳܢ ܥܰܠ ܚܰܕ ܦܰܪܨܽܘܦܳܐ.

ܝܘܚܢܢ. 20: 28 [19]

ܝܘܚܢܢ. 1: 1 [20]

ܡܙܡܘܪ̈ܐ. 5: 3 [21]

ܡܙܡܘܪ̈ܐ. 144: 1 [22]

ܡܙܡܘܪ̈ܐ. 25: 5 [23]

ܕܢܝܐܝܠ. 13: 42 [24]

ܕܳܢܝܐܝܠ. 9: 4 [25]

ܝܘܚܢܢ. 14: 5 ـ 7 [26]

ܐܫܥܝܐ. 1: 6 [27]

ܙܟܰܪܝܐ. 13: 6 [28]

ܠܘܩܐ. 10: 30 ـ 31 [29]

ܡܙܡܘܪ̈ܐ. 69: 27 [30]

ܡܬܝ. 25: 40 [31]

  ܐܫܥܝܐ. 53: 5 [32]

ܐ. ܝܘܚܢܢ. 4: 20 [33]

ܝܘܚܢܢ. 14: 15 [34]

ܝܘܚܢܢ. 20: 27 [35]