ܡܺܐܡܪܳܐ ܕܥܶܣܪܺܝܢ ܘܫܰܒܥܳܐ

ܥܰܠ ܩܰܕܺܝܫܳܐ ܘܣܳܗܕܳܐ ܠܶܐܘܰܢܛܺܝܽܘܣ[1]

27: ܠܟܽܠܗܽܘܢ ܡܰܢ ܣܳܗ̈ܕܶܐ ܙܳܕܶܩ ܠܰܢ ܠܰܡܩܰܪܳܒܽܘ ܐܺܝܩܳܪܳܐ ܗܰܘ ܕܰܒܝܰܕ ܡ̈ܶܠܶܐ܆ ܡܶܛܽܠ ܕܫܰܥܒܕܽܘܗ̇ ܠܬܰܪܥܺܝܬܳܐ ܕܒܶܣܪܳܐ ܠܗܰܘܢܳܐ ܪܺܝܫܳܢܳܝܳܐ ܘܰܡܠܺܝܠܳܐ ܕܢܰܦܫܳܐ܆ ܘܚܰܘܺܝܘ ܒܝܰܕ ܡܚܰܡܣܢܳܢܽܘܬܳܐ ܕܰܒܚܰܫܳܐ܆ ܕܠܳܐ ܡܫܰܥܒܕܳܐ ‌ܐܺܝܬܰܘܗ̱ܝ ܘܰܕܠܳܐ ܡܳܪܶܐ ܚܽܘܫܳܒܳܐ ܗܰܘ ܕܒܰܢ܆ ܘܰܕܠܳܐ ܡܶܬܕܒܰܪ ܡܶܢ ܩܛܺܝܪܳܐ ܡܶܕܶܡ. ܝܰܬܺܝܪܳܐܺܝܬ ܕܶܝܢ ܙܳܕܶܩ ܕܰܢܝܰܩܰܪ ܒܗܳܠܶܝܢ܆ ܠܠܐܘܢܛܝܘܤ܆ ܗܰܘ ܕܰܒܝܰܕ ܐܰܬܠܺܝܛܽܘܬܳܐ ܒܰܝܬܳܝܬܳܐ ܗܳܝ ܕܺܝܠܶܗ܆ ܝܰܬܺܝܪ ܢܰܨܺܝ̈ܚܶܐ ܚܰܘܺܝ ܐܶܢܽܘܢ ܠܗܳܢܽܘܢ ܕܩܰܕܶܡܘ ܐܶܬܟܰܬܰܫܘ ܒܰܐܬܠܺܝܛܽܘܬܳܐ܆ ܘܳܐܦ ܥܕܰܡܳܐ ܠܗܳܫܳܐ ܘܰܒܟܽܠܫܳܥ ܐܰܝܟ ܕܰܠܡܺܐܡܰܪ ܡܰܣܗܶܕ ܓܰܠܝܳܐܺܝܬ ܒܝܰܕ ܚܰܝ̈ܠܶܐ ܬܡܺܝ̈ܗܶܐ ܘܳܐܬܘ̈ܳܬܳܐ܆ ܕܰܡܫܺܝܚܳܐ ܡܳܪܶܗ܆ ܐܰ‌ܠܳܗܳܐ ܫܰܪܺܝܪܳܐ ‌ܐܺܝܬܰܘܗ̱ܝ. ܗܳܢܳܐ ܓܶܝܪ. ܗܳܢܳܐ ܐܰܓܽܘܢܺܝܣܛܳܐ ܚܰܝܠܬܳܢܳܐ܆ ܡܰܠܽܘܢ ܕܶܝܢ ܕܰܚܺܝܚܶܗ^[2] ܕܗܳܢܳܐ܆ ܬܰܚ̈ܘܝܳܬܳܐ ܓܰܠ̈ܝܳܬܳܐ ܘܫܰܪܺܝܪ̈ܳܬܳܐ ܕܰܩܝܳܡܬܳܐ ܝܳܗܶܒ ܠܰܢ܆ ܟܰܕ ܬܶܕܡܪ̈ܳܬܳܐ ܣܰܓܺܝ̈ܳܐܬܳܐ ܘܳܐܣܺܝ̈ܘܳܬܐ ܕܟܽܠ ܓܢܶܤ ܡܫܰܟܶܢ ܠܗܳܢܽܘܢ ܕܓܳܫܦܺܝܢ ܠܘܳܬܶܗ܆ ܡܰܠܽܘܢ ܕܶܝܢ ܟܰܕ ܐܳܦ ܠܗܳܢܽܘܢ ܕܰܒܪܽܘܚܩܳܐ ܐܺܝܬܰܝܗܽܘܢ ܘܩܳܪܶܝܢ ܠܬܰܟܫ̈ܦܳܬܶܗ ܕܣܳܗܕܳܐ܆ ܡܫܰܕܰܪ ܒܰܕܡܽܘܬ ܙܰܠܺܝ̈ܩܶܐ ܠܡܰܥܒ̈ܕܳܢܘܳܬܳܐ ܒܰܝ̈ܬܳܝܳܬܳܐ ܕܺܝܠܶܗ܆ ܒܝܰܕ ܛܰܝܒܽܘܬܳܐ ܕܪܽܘܚܳܐ ܗܳܝ ܕܰܐܣܺܝܢܳܐ^[3] ܒܶܗ.

ܕܗܺܝ ܓܶܝܪ ܣܳܗܕܽܘܬܳܐ܆ ܡܫܰܪܪܳܢܽܘܬܳܐ ܘܣܽܘܬܳܬܳܐ^[4] ܐܺܝܬܶܝܗ̇ ܕܣܰܒܪܳܐ ܕܰܩܝܳܡܬܳܐ܆ ܣܳܗܶܕ ܟܬܳܒܳܐ ܕܰܦܪ̈ܰܟܣܺܝܤ܆ ܟܰܕ ܗܳܟܰܢܳܐ ܐܳܡܰܪ. ܘܰܒܚܰܝܠܳܐ ܪܰܒܳܐ ܝܳܗܒܺܝܢ ܗ̱ܘܰܘ ܣܳܗܕܽܘܬܳܐ ܕܰܩܝܳܡܬܳܐ܆ ܫܠܺܝ̈ܚܰܘ̈ܗ̱ܝ ܕܡܳܪܰܢ ܝܶܫܽܘܥ. ܘܛܰܝܒܽܘܬܳܐ ܟܺܝܬ ܣܰܓܺܝܐܬܳܐ ܐܺܝܬ ܗ̱ܘܳܐ܆ ܥܰܠ ܟܽܠܗܽܘܢ^[5]. ܐܶܠܳܐ ܫܠܺܝ̈ܚܶܐ ܡܰܢ ܗܳܝܕܶܝܢ܆ ܟܰܕ ܥܕܰܟܺܝܠ ܚܰܝ݂ܺܝ݂̈ܢ ܗ̱ܘܰܘ ܘܳܐܐܰܪ ܗܳܢܳܐ ܣܳܝܩܺܝܢ ܗ̱ܘܰܘ܆ ܡܰܥܒܕܺܝܢ ܗ̱ܘܰܘ ܬܶܕܡܪ̈ܳܬܳܐ܆ ܘܣܳܗܕܺܝܢ ܗ̱ܘܰܘ ܠܰܩܝܳܡܬܶܗ ܕܥܰܡܰܢܽܘܐܶܝܠ܆ ܗܳܝ ܕܺܐܝܬܶܝܗ̇ ܪܺܝܫܺܝܬܳܐ ܕܰܩܝܳܡܬܳܐ ܗܳܝ ܕܡܶܣܬܰܒܪܳܐ ܠܰܢ. ܒܶܣܪܶܗ ܕܶܝܢ ܕܠܐܘܢܛܝܘܤ ܟܰܕ ܐܶܬܩܒܰܪ ܘܰܗܦܰܟ ܠܰܐܪܥܳܐ ܗܳܝ ܕܡܶܢܳܗ̇ ܐܶܬܢܣܶܒ܆ ܘܳܐܦ ܩܕܳܡ ܕܢܶܬܢܰܚܰܡ. ܘܰܩܕܳܡ ܕܢܰܦܫܶܗ ܬܽܘܒ ܢܩܰܒܶܠ܆ ܟܰܕ ܡܰܥܒܶܕ ܫܒܺܝ̈ܚܳܬܳܐ ܪܰܘܪ̈ܒܳܬܳܐ܆ ܠܒܶܣܪܳܐ ܡܶܟܺܝܠ܆ ܠܳܐ ܫܳܒܶܩ ܠܶܗ ܕܣܰܒܪܳܐ ܢܟܰܬܰܪ. ܣܰܒܪܳܐ ܓܶܝܪ ܕܡܶܬܚܙܶܐ܆ ܠܳܐ ‌ܐܺܝܬܰܘܗ̱ܝ ܣܰܒܪܳܐ. ܗܰܘ ܡܳܐ ܓܶܝܪ ܕܚܳܙܶܐ ܠܶܗ ܐ̱ܢܳܫ܆ ܠܡܳܢܳܐ ܐܳܦ ܡܣܰܒܰܪ^[6] ܡܶܛܽܠܳܬܶܗ܆ ܐܳܡܰܪ ܦܰܘܠܽܘܤ ܫܠܺܝܚܳܐ^[7].

ܗܳܟܰܢܳܐ ܪܰܒܳܐ ܗܳܝ ܕܰܚܠܳܦ ܡܫܺܝܚܳܐ ܐ̱ܢܳܫ ܢܶܚܰܫ. ܘܰܟܡܳܐ ܕܢܶܬܡܠܶܐ ܐ̱ܢܳܫ ܡܶܢ ܫܶܢ̈ܕܶܐ ܕܝܰܬܺܝܪ ܡܫܰܪܬܚܺܝܢ ܘܰܩܫܶܝܢ܆ ܗܳܢܳܐ ܟܽܠܶܗ ܡܳܠܶܐ ܠܶܐܠܦܳܐ ܒܰܝܬܳܝܬܳܐ ܕܺܝܠܶܗ ܡܶܢ ܡܰܘ̈ܒܠܶܐ ܗܳܠܶܝܢ ܕܪܰܘܪ̈ܒܳܢ ܡܶܢ ܬܶܫܒܽܘܚܬܳܐ. ܘܰܐܝܟܰܢܳܐ ܕܥܰܠ ܢܶܨ̈ܒܳܬܳܐ ܐܺܝܬ ܠܡܶܚܙܳܐ܆ ܕܣܰܘ̈ܟܶܐ^[8] ܗܳܠܶܝܢ ܕܡܶܢ ܐܺܝܠܳܢ̈ܶܐ ܥܳܒ̈ܕܰܝ ܦܺܐܪ̈ܶܐ܆ ܗܳܠܶܝܢ ܕܡܶܢ ܡܪ̈ܰܒܝ݂ܰܝ݂ ܢܶܨ̈ܒܳܬܳܐ ܒܰܕܡܽܘܬ ܠܛܳܝ̈ܶܐ ܡܶܬܚܰܪ̈ܙܳܢ ܘܡܶܬܪ̈ܰܡܝܳܢ ܬܚܶܝܬ ܩܠܳܦܬܶܗ ܕܺܐܝܠܳܢܳܐ܆ ܡܰܘܠܕܳܢܺܝܬܳܐ ܕܦܺܐܪ̈ܶܐ ܡܫܰܡ̈ܠܝܳܢ ܠܳܗ̇܆ ܠܡܰܘܥܺܝܬܳܐ ܗܳܝ ܕܡܶܢ ܩܕܺܝܡ ܐܺܝܬܶܝܗ̇ ܗ̱ܘܳܬ ܕܠܳܐ ܦܺܐܪ̈ܶܐ܆ ܒܳܗ̇ ܒܰܕܡܽܘܬܳܐ ܐܳܦ ܫܽܘ̈ܡܳܬܳܐ ܕܰܡܫܺܝܚܳܐ ܗܳܢܶܝܢ ܕܰܒܝܰܕ ܫܶܢ̈ܕܶܐ܆ ܟܰܕ ܒܦܰܓܪ̈ܶܐ ܕܣܳܗ̈ܕܶܐ ܡܶܬܪ̈ܫܡܳܢ܆ ܡ̈ܥܰܬܕܳܢ ܠܗܽܘܢ ܠܓܰܪ̈ܡܶܐ ܗܳܢܽܘܢ ܝܰܒܺܝ̈ܫܶܐ܆ ܘܰܠܕܰܚܺܝܚܳܐ ܗܰܘ ܡܺܝܬܳܐ ܘܠܳܐ ܡܰܘܠܕܳܢܳܐ܆ ܕܢܰܝܬܽܘܢ ܦܺܐܪ̈ܶܐ ܕܬܶܕܡܪ̈ܳܬܳܐ ܘܰܕܚܰܝ̈ܠܶܐ ܘܕܳܐܣܝܽܘܬܳܐ.

ܒܕܰܐܝܟ ܗܳܠܶܝܢ ܟܽܘܬܡ̈ܳܬܳܐ ܗܰܕܰܪ ܠܦܰܓܪܳܐ ܕܺܝܠܶܗ܆ ܠܒܺܝܫ ܠܰܡܫܺܝܚܳܐ ܣܳܗܕܳܐ ܠܐܘܢܛܝܘܤ. ܗܳܠܶܝܢ ܕܳܐܦ ܝܰܬܺܝܪ ܢܰܨܺܝܚܳܐܺܝܬ ܛܳܒ ܡܶܢ ܟܰܘܟ̈ܒܶܐ ܢܶܒܪ̈ܩܳܢ ܥܠܰܘܗ̱ܝ܆ ܒܝܰܘܡܳܐ ܗܰܘ ܕܰܩܝܳܡܬܳܐ. ܡܶܢܗܶܝܢ ܐܳܦ ܡܫܽܘܚ ܠܰܢ ܠܟܽܠܗܽܘܢ ܗܳܠܶܝܢ ܘܰܠܕܰܐܝܟ ܗܳܠܶܝܢ ܦܺܐܪ̈ܶܐ ܕܳܐܣܝܽܘܬܳܐ. ܟܰܕ ܠܫ̈ܺܐܕܶܐ ܛܳܪܶܕ. ܟܰܕ ܠܣܽܘܓܦܳܢ̈ܶܐ ܕܦܰܓܪ̈ܶܐ ܡܶܢ ܕܪܺܝܫ ܡܬܰܪܶܨ. ܟܰܕ ܠܒܺܝ̈ܫܳܬܳܐ ܕܰܥܬܺܝ̈ܕܳܢ ܩܰܕܶܡ ܦܰܣܶܩ܆ ܘܰܒܝܰܕ ܚܶܙܘܳܢ̈ܶܐ ܘܓܶܠܝܳܢ̈ܶܐ ܓܠܰܝ̈ܳܐ܆ ܡܩܰܝܶܡ ܓܰܠ̈ܝܳܬܳܐ ܠܗܳܠܶܝܢ ܕܠܳܐ ܝܺܕܺܝ̈ܥܳܢ ܗ̱ܘܰܝ̈ ܘܰܡܛܰܫ̈ܝܳܢ܆ ܘܩܰܕܶܡ ܐܳܡܰܪ ܗܳܠܶܝܢ ܕܡܶܢ ܟܽܠܦܪܽܘܤ ܥܬܺܝ̈ܕܳܢ ܕܢܶܗܘ̈ܝܳܢ. ܘܒܗܳܕܶܐ܆ ܟܰܕ ܠܰܘ ܕܦܰܓܪ̈ܶܐ ܒܰܠܚܽܘܕ܆ ܐܶܠܳܐ ܐܳܦ ܕܢܰܦ̈ܫܳܬܳܐ ‌ܐܺܝܬܰܘܗ̱ܝ ܐܳܣܝܳܐ ܡܛܰܝܒܳܐ ܘܠܳܐ ܡܶܬܬܰܓܪܳܢܳܐ^[9]܆ ܘܟܰܕ ܐܰ‌ܠܳܗܳܝܽܘܬܳܐ ܡܶܕܶܡ ܡܳܠܶܐ ܠܗܽܘܢ ܠܗܳܢܽܘܢ ܕܰܠܗܰܝܟܠܳܐ ܕܒܶܝܬ ܨܠܽܘܬܳܐ ܕܺܝܠܶܗ ܥܳܐܠܺܝܢ ܠܰܡܨܰܠܳܝܽܘ܆ ܘܓܳܫܶܦ ܒܬܰܪ̈ܥܝܳܬܗܽܘܢ ܘܡܰܚܶܐ ܠܗܶܝܢ ܒܨܶܡܚܳܐ ܕܪܶܚܡܬܳܐ ܫܡܰܝܳܢܺܝܬܳܐ܆ ܘܰܠܣܰܓܺܝ̈ܶܐܐ ܝܳܕܰܥ ܐ̱ܢܳܐ ܡܶܢ ܛܠܳܝ̈ܶܐ ܗܳܢܽܘܢ ܕܰܒܒܝܪܘܛܘܤ ܗܳܝ ܪܳܚܡܰܬ ܓܽܘܚܟܳܐ ܩܳܪܶܝܢ ܗ̱ܘܰܘ ܠܢܳܡܽܘ̈ܣܶܐ ܕܪ̈ܽܘܡܳܝܶܐ܆ ܕܶܐܙܰܠܘ ܠܘܳܬܶܗ ܡܶܛܽܠ ܨܠܽܘܬܳܐ܆ ܘܡܶܢܫܶܠܝ ܫܕܰܘ ܡܶܢ ܗܰܘܢܗܽܘܢ ܠܛܺܝ̈ܛܶܐ ܕܬܰܪ̈ܥܝܳܬܳܐ ܥܳܠܡܳܢܳܝ̈ܳܬܳܐ ܘܡܳܪ̈ܳܢܳܝܳܬܳܐ܆ ܘܰܐܝܟ ܗܰܘ ܕܟܰܦܰܪܘ ܘܕܰܟܝܽܘܗ̱ܝ ܡܶܢ ܗܳܠܶܝܢ܆ ܘܶܐܫܬܰܚܠܰܦܘ ܫܽܘܚܠܳܦܳܐ ܛܳܒܳܐ܆ ܘܰܠܘܳܬ ܕܽܘܒܳܪܳܐ ܦܺܝܠܳܣܽܘܦܳܝܳܐ ܗܦܰܟܘ ܐܶܬܛܰܟܰܣܘ܆ ܘܰܠܘܳܬ ܚܰܝ̈ܶܐ ܕܕܰܝܪܳܝܽܘܬܳܐ ܕܡܶܢܗܽܘܢ ܚܰܕ ܐܺܝܬܰܝ. ܐܳܦ ܐܶܢܳܐ ܩܢܽܘܡܝ܆ ܗܰܘ ܕܒܳܐܬܘ̈ܳܬܶܗ ܕܣܳܗܕܳܐ ܐܶܫܬܰܚܠܦܶܬ܆ ܘܨܺܝܕܳܐ ܕܗܳܠܶܝܢ ܗܘ̣ܺܝܬ̣.

ܡܶܛܽܠܗܳܕܶܐ ܐܰܝܟܰܢܳܐ ܕܗܳܫܳܐ ܐܶܡܪܶܬ܆ ܐܳܦ ܕܦܰܓܪ̈ܶܐ ܐܳܦ ܕܢܰܦ̈ܫܳܬܳܐ ‌ܐܺܝܬܰܘܗ̱ܝ ܐܳܣܝܳܐ܆ ܡܶܛܽܠ ܟܺܝܬ ܕܰܒܟܽܠܗܽܘܢ ܡܰܢ ܫܶܢ̈ܕܶܐ ܦܰܓܪ̈ܳܢܳܝܶܐ ܕܠܳܐ ܣܰܒܥܽܘ ܚܰܡܣܶܢ܆ ܙܥܽܘܪ̈ܶܐ ܕܶܝܢ ܒܪܰܡ ܚܫܰܒ ܠܟܽܠܗܽܘܢ܆ ܟܰܕ ܒܰܚܘܺܝܚܽܘܬܳܐ ܕܢܰܦܫܶܗ܆ ܕܫܶܢ̈ܕܶܐ ܕܣܰܓܺܝܐܺܝܢ ܛܳܒ ܡܶܢ ܗܳܠܶܝܢ ܡܶܬܝܰܐܰܒ ܗ̱ܘܳܐ ܕܢܶܣܰܒ ܢܶܣܝܳܢܳܐ. ܗܰܘ ܕܰܐܝܟܰܢܳܐ ܟܺܝܬ ܕܫܶܡܥܶܬ ܠܐ̱ܢܳܫ ܡܶܢ ܗܳܢܽܘܢ ܕܣܶܐܒܘ ܒܰܛܪܺܝܦܽܘܠܺܝܤ܆ ܕܗܳܠܶܝܢ ܥܰܬܺܝ̈ܩܳܬܳܐ ܡܶܫܬܰܥܶܐ ܗ̱ܘܳܐ ܘܳܐܡܰܪ ܗ̱ܘܳܐ ܡܶܛܽܠܳܬܶܗ܆ ܕܰܠܘܳܬ ܒܺܐܡܰܐ ܕܗܰܘ ܕܕܳܐܶܢ ܗ̱ܘܳܐ܆ ܠܰܘ ܒܰܩܛܺܝܪܳܐ ܐܶܬܬܰܝܬܺܝ܆ ܘܠܳܐ ܐܶܬܢܰܓܰܕ ܛܪܽܘܢܳܐܺܝܬ. ܐܶܠܳܐ ܒܰܙܢܳܐ ܡܶܕܶܡ ܗܽܘ ܡܰܢ ܨܶܒܝܳܢܳܐܺܝܬ ܐܶܬܳܐ.

ܟܰܕ ܓܶܝܪ ܚܙܳܝܗ̱ܝ ܗ̱ܘܳܐ ܠܦܽܘܦܠܺܝܽܘܤ ܣܳܗܕܳܐ܆ ܗܰܘ ܕܒܰܫܒܳܒܽܘܬܶܗ ܣܺܝܡ܆ ܕܰܒܗܰܘ ܙܰܒܢܳܐ ܠܘܳܬ ܡܰܘܬܳܐ ܡܶܬܬܰܘܒܰܠ ܗ̱ܘܳܐ܆ ܢܰܩܺܝܦ ܗ̱ܘܳܐ ܠܶܗ. ܡܠܰܘܶܐ ܗ̱ܘܳܐ ܠܶܗ܆ ܕܠܳܐ ܕܶܚܠܬܳܐ ܡܡܰܠܶܠ ܗ̱ܘܳܐ ܠܶܗ. ܚܙܳܬܳܐ ܠܘܳܬ ܡܰܠܦܳܢܽܘܬܳܐ ܢܳܣܶܒ ܗ̱ܘܳܐ. ܘܡܶܢ ܒܳܬܰܪ ܩܰܠܺܝܠ܆ ܐܰܟܚܕܳܐ ܥܰܡܶܗ ܐܰܬܠܺܝܣܳܐ ܥܳܒܶܕ ܗ̱ܘܳܐ. ܐܰܟܚܕܳܐ ܥܰܡܶܗ ܥܳܒܶܕ ܗ̱ܘܳܐ ܐܰܓܽܘܢܳܐ. ܒܰܟ̈ܠܺܝܠܶܐ ܥܳܒܰܪ^[10] ܗ̱ܘܳܐ ܝܰܬܺܝܪܳܐ. ܐܳܙܶܠ ܗ̱ܘܳܐ ܗܽܘ ܒܚܺܐܦܳܐ ܠܘܳܬ ܗܳܝ ܕܢܶܚܰܫ܆ ܐܰܝܟ ܕܳܐܙܺܠ̱ܝܢ ܗܳܢܽܘܢ ܕܺܐܝܬܰܝܗܽܘܢ ܪ̈ܳܚܡܰܝ ܒܶܣܪܗܽܘܢ܆ ܠܘܳܬ ܗܳܝ ܕܠܳܐ ܢܶܚܫܽܘܢ. ܘܰܒܟܽܠܗܶܝܢ ‌ܐܺܝܬܰܘܗ̱ܝ ܗ̱ܘܳܐ ܚܠܺܝܡܳܐ ܘܰܡܫܰܪܪܳܐ ܘܠܳܐ ܡܶܫܬܰܚܠܦܳܢܳܐ܆ ܘܕܰܡܫܰܪܰܪ ܠܡܶܠܬܳܐ ܗܳܝ ܐܰ‌ܠܳܗܳܝܬܳܐ ܐܰܝܟ ܗܰܘ ܕܰܥܠܰܘܗ̱ܝ ܩܰܕܡܰܬ ܐܶܬܰܐܡܪܰܬ. ܗܳܝ ܕܙܰܕܺܝܩܳܐ ܐܰܝܟ ܐܰܪܝܳܐ^[11] ܬܟܺܝܠ. ܛܐܟܳܐ^[12] ܕܶܝܢ ܗܳܫܳܐ ܡܶܢ ܒܳܬܰܪ ܗܰܘ܆ ܕܝܰܬܺܝܪ ܠܳܚܡܳܐ ܐܺܝܬܶܝܗ̇ ܠܡܺܐܡܰܪ: ܥܰܠ ܗܳܢܽܘܢ ܕܛܳܢܶܝܢ^[13] ܘܪܳܗܛܺܝܢ ܚܘܺܝܚܳܐܺܝܬ ܠܘܳܬ ܡܰܪܳܚܽܘܬܳܐ ܡܩܰܠܰܣܬܳܐ܆ ܙܰܕܺܝܩܳܐ ܐܰܝܟ ܠܐܘܢܛܝܘܤ ܬܟܺܝܠ.

ܟܰܕ ܗܳܟܰܢܳܐ ܡܰܢ ܗܳܟܺܝܠ ‌ܐܺܝܬ ܗ̱ܘܳܐ ܠܶܗ ܡܶܛܽܠ ܛܽܘܝܳܒܳܐ܆ ܘܗܳܟܰܢܳܐ ܚܰܡܺܝܡܳܐܺܝܬ ܢܚܶܬ ܠܘܳܬ ܤܛܰܐܕܺܝܽܘܢ ܕܣܳܗܕܽܘܬܳܐ܆ ܘܠܰܘ ܗܽܘ ܐܶܬܢܰܣܺܝ ܒܗܽܘܢ ܒܫܶܢ̈ܕܶܐ܆ ܐܶܠܳܐ ܗܽܘ ܝܰܗ̱ܒ ܠܗܽܘܢ ܠܫܶܢ̈ܕܶܐ ܢܶܣܝܳܢܳܐ ܕܺܝܠܶܗ ܕܗܶܢܽܘܢ ܢܶܬܢܰܣܽܘܢ ܒܶܗ܆ ܒܝܰܕ ܗܳܝ ܕܥܰܠ ܟܽܠܗܽܘܢ ܓܚܶܟ ܘܠܳܐ ܐܶܙܕܟܺܝ ܒܕܶܚܠܬܳܐ܆ ܘܰܒܝܰܕ ܗܳܝ ܕܚܰܘܺܝ ܠܗܳܢܽܘܢ ܕܗܳܝܕܶܝܢ ܛܪܽܘܢܳܐܺܝܬ ܕܳܝܢܺܝܢ ܗ̱ܘܰܘ܆ ܕܥܰܠ ‌ܐܽܘܪ̈ܓܰܢܶܐ ܐ̱ܚܪ̈ܳܢܶܐ ܕܫܶܢ̈ܕܶܐ ܐܺܝܬ ܠܗܽܘܢ ܣܽܘܢܩܳܢܳܐ܆ ܐܰܝܟ ܡܰܢ ܕܗܳܠܶܝܢ ܕܺܐܝܬ ܗ̱ܘܳܐ ܠܗܽܘܢ ܫܺܝ̈ܛܶܐ ܘܰܦܫܺܝ̈ܩܰܝ ܠܡܶܬܒܣܳܝܽܘ ܐܶܬܟܣܶܣܘ ܕܺܐܝܬܰܝܗܽܘܢ܆ ܟܠܺܝܠܳܐ ܕܣܳܗܕܽܘܬܳܐ ܩܛܰܪ܆ ܟܰܕ ܢܰܨܺܝܚܳܐ ܘܪܳܡܳܐ ܒܢܰܨܺܝ̈ܚܶܐ ܕܓܰܢܒܳܪܽܘܬܳܐ ܫܰܢܺܝ ܠܘܳܬ ܡܳܪܳܐ ܕܺܝܠܶܗ.

ܘܡܶܚܕܳܐ ܒܰܪܫܳܥܬܶܗ ܩܛܰܦ ܠܪ̈ܺܝܫܳܝܳܬܳܐ ܕܰܟܠܺܝ̈ܠܶܐ ܕܥܰܠ ‌ܐܰܦܰܝ̈ ܥܰܡ̈ܠܶܐ܆ ܘܒܳܐܣܺܝ̈ܘܳܬܳܐ ܣܰܓܺܝ̈ܳܐܬܳܐ ܘܰܡܫܰܚ̈ܠܦܳܬܳܐ ܐܶܬܚܙܺܝ ܦܳܪܽܘܩܳܐ ܘܰܡܥܰܕܪܳܢܳܐ ܠܗܳܢܽܘܢ ܕܚܰܝ݂ܺܝ݂ܢ. ܗܰܘ ܕܡܶܣܬܒܰܪ ܗ̱ܘܳܐ ܕܺܐܝܬܰܘܗ̱ܝ ܡܺܝܬܳܐ܆ ܘܡܰܨܡܰܚ ܗ̱ܘܳܐ ܒܙܰܠܺܝ̈ܩܶܐ ܕܫܽܘܟܳܢ̈ܶܐ ܪ̈ܽܘܚܳܢܳܝܶܐ܆ ܘܠܳܐ ܐܶܣܬܢܶܩ ܥܰܠ ܡܰܟܬܰܒ ܡܺܐܡܪ̈ܶܐ ܕܡܶܫܬܰܥܶܐ ܘܰܡܬܰܢܶܐ ܣܳܗܕܽܘܬܶܗ ܠܗܳܢܽܘܢ ܕܡܶܢ ܒܳܬܰܪܟܶܢ܆ ܘܕܰܒ̈ܡܶܠܶܐ ܡܨܰܒܶܬ ܠܗܶܝܢ ܘܰܡܪܰܡܪܶܡ ܠܣܳܥܽܘܪ̈ܳܬܳܐ ܕܺܝܠܶܗ ܡܝܰܬܪ̈ܳܬܳܐ܆ ܐܶܠܳܐ ܗܽܘ ܒܝܰܕ ܬܶܕܡܪ̈ܳܬܳܐ ܒܰܝܬܳܝ̈ܳܬܳܐ ܕܺܝܠܶܗ ܡܰܟܬܶܒ ܒܟܽܠ ܝܽܘܡ ܠܕܽܘܒܳܪܶܗ܆ ܡܰܠܽܘܢ ܕܶܝܢ ܝܳܗܶܒ ܥܶܠ̈ܠܳܬܳܐ ܕܡ̈ܶܠܶܐ ܣܰܓܺܝ̈ܳܐܬܳܐ ܠܟܽܠܚܰܕ ܡܶܢ ܗܳܢܽܘܢ ܕܡܶܬܥܰܕܪܺܝܢ܆ ܘܰܠܟܽܠܗܽܘܢ ܡܟܰܬܒܰܝ̈ ܡܺܐܡܪ̈ܶܐ ܡܚܰܘܶܐ ܠܗܽܘܢ܆ ܟܰܕ ܡܶܫܬܰܥܶܝܢ ܠܰܘ ܗܳܠܶܝܢ ܕܡܶܢ ܐ̱ܚܪ̈ܳܢܶܐ ܫܡܰܥܘ܆ ܐܶܠܳܐ ܗܳܢܶܝܢ ܕܗܶܢܽܘܢ ܒܝܰܕ ܢܶܣܝܳܢܳܐ ܐܶܬܒܰܣܰܡܘ ܒܗܶܝܢ.

ܕܰܐܝܟ ܗܳܢܳܐ ܓܶܝܪ ܐܳܣܝܳܐ ܙܳܕܶܩ ܗ̱ܘܳܐ ܐܰܝܟ ܕܒܰܫܪܳܪܳܐ ܕܰܢܩܺܝܡ ܐܰ‌ܠܳܗܳܐ ܘܢܰܪܡܶܐ ܒܰܡܨܰܥܬܳܐ܆ ܠܗܳܢܽܘܢ ܕܥܳܡܪܺܝܢ ܗ̱ܘܰܘ ܒܰܣܦܳܪ ܝܰܡܳܐ ܘܰܒܦܽܘܢܺܝܩܺܐ ܗܳܝ ܕܰܠܘܳܬ ܠܶܒܢܳܢ܆ ܐܰܝܟܰܢܳܐ ܕܰܒܝܰܕ ܐܳܣܺܝ̈ܘܳܬܳܐ ܪܰܘܪ̈ܒܳܬܳܐ ܟܺܝܬ ܘܚܰܝ̈ܠܶܐ܆ ܢܶܦܣܽܘܩ ܠܪܶܗܛܳܐ ܗܰܘ ܕܰܠܘܳܬ ܛܳܥܝܽܘܬܳܐ ܚܰܢܦܳܝܬܳܐ ܘܕܶܚܠܰܬ ܫܺܐܕ̈ܶܐ܆ ܘܟܽܠܗܽܘܢ ܢܶܓܶܕ ܠܘܳܬܶܗ.

ܣܰܓܺܝ̈ܶܐܐ ܡܰܢ ܗܳܟܺܝܠ ܕܟܰܕ ܪܳܗܛܺܝܢ ܗ̱ܘܰܘ ܗܳܝܕܶܝܢ ܠܘܳܬ ܙܶܐܽܘܤ ܗܰܘ ܕܰܒܒܰܥܠܒܰܟ܆ ܕܢܶܣܒܽܘܢ ܗܘܰܘ ܩܶܨܡܳܐ ܕܛܳܥܝܽܘܬܳܐ܆ ܐܰܘ ܟܰܕ ܫܩܰܠܘ ܘܰܗܦܰܟܘ܆ ܘܰܐܪܓܶܫܘ ܐܳܦ ܟܰܕ ܠܳܐ ܨܳܒܶܝܢ ܗ̱ܘܰܘ ܒܬܶܕܡܪ̈ܳܬܶܗ ܕܣܳܗܕܳܐ܆ ܘܓܶܠܝܳܢ̈ܶܐ ܡܶܕܶܡ ܐܰ‌ܠܳܗܳܝ̈ܶܐ ܩܰܒܶܠܘ܆ ܘܰܒܝܰܕ ܗܳܠܶܝܢ ܠܗܳܝ ܕܫܰܪܺܝܪܳܐ ܝܺܕܰܥܘ܆ ܟܰܕ ܐܰܪ̈ܺܝܟܳܬܳܐ ܓܚܶܟܘ ܥܰܠ ܨܰܕܘܶܗ ܕܩܶܨܡܳܐ܆ ܫܒܰܩܘ ܠܕܰܝܘܳܐ ܗܰܘ ܕܰܐܒܳܗܰܝ̈ܗܽܘܢ܆ ܣܰܓܺܝ̈ܶܐܐ ܕܶܝܢ ܕܨܳܒܶܝܢ ܗ̱ܘܰܘ ܕܰܠܘܳܬ ܙܽܘܘܳܓ̈ܶܐ ܢܳܡܽܘܣܳܝ̈ܶܐ ܢܶܬܥܢܽܘܢ܆ ܘܰܠܘܳܬ ܪܳܚܡܰܬ ܪܶܓܬܳܐ ܐܰܦܪܽܘܕܺܝܛܺܐ ܗܳܝ ܕܰܒܠܶܒܢܳܢ܆ ܐܳܙܺܠ̱ܝܢ ܗ̱ܘܰܘ ܕܢܶܫܬܰܡܠܽܘܢ ܫܽܘܡܠܳܝܳܐ ܗܰܘ ܛܰܡܳܐܐ ܘܠܰܘ ܗܰܘ ܐ̱ܪܳܙܳܢܳܝܳܐ܆ ܘܰܫܪܺܝܚܽܘܬܳܐ ܢܶܥܒܕܽܘܢ ܫܽܘܪܳܝܳܐ ܕܙܽܘܘܳܓܳܐ ܢܰܟܦܳܐ܆ ܟܰܕ ܠܩܳܝܽܘܡܽܘܬܳܐ ܬܳܪܐܳܝܬܳܐ ܕܺܝܠܶܗ ܕܣܳܗܕܳܐ ܐܶܫܬܘܺܝܘ܆ ܘܠܰܚܙܳܬܳܐ ܠܺܠܝ̣ܳܝ̣ܬܳܐ ܘܰܕܚܺܝܠܬܳܐ܆ ܘܰܒܠܰܥܘ ܒܚܽܘܛܪܳܐ ܡܰܠܦܳܢܳܝܳܐ ܕܕܰܟܝܽܘܬܳܐ܆ ܟܰܕ ܛܥܰܘ ܠܫܳܢܝܽܘܬܳܐ ܪܶܚܡܬܳܢܳܝܬܳܐ܆ ܠܳܐ ܡܶܬܚܰܒܠܳܢܽܘܬܳܐ ܓܒܰܘ ܠܗܽܘܢ ܚܠܳܦܶܝܗ̇܆ ܘܫܰܢܺܝܘ ܠܘܳܬ ܐ̱ܪܳܙܳܐ ܪܰܒܳܐ ܕܫܰܦܺܝܪܽܘܬ ܕܶܚܠܬܳܐ^[14].

ܘܗܳܫܳܐ ܙܶܐܽܘܤ ܡܰܢ ܗܰܘ ܕܒܰܥܠ̈ܒܰܟܳܝܶܐ܆ ܗܘܳܐ ܚܰܪܫܳܐ ܘܰܕܠܳܐ ܩܳܠܳܐ܆ ܘܰܣܦܺܝܩܳܐ ܡܶܢ ܐܰܟܣܢܳܝ̈ܶܐ܆ ܟܰܕ ܠܒܰܥܠ̈ܒܰܟܳܝܶܐ ܒܰܠܚܽܘܕܰܝܗܽܘܢ ܡܰܛܥܶܐ ܡܶܛܽܠ ܕܗܶܢܽܘܢ ܨܳܒܶܝܢ܆ ܘܐܰܦܪܽܘܕܺܝܛܺܐ ܗܳܝ ܐܰ‌ܠܳܗܬܳܐ ܙܳܢܺܝܬܳܐ ܘܡܽܘܠܺܝܣܬܳܐ܆ ܠܢܰܟܦܽܘܬܳܐ ܗܳܝ ܕܶܐܚܕܰܬ ܘܶܐܫܬܰܠܛܰܬ ܥܰܠ ܟܽܠ ܒܳܟܝܳܐ ܘܳܐܒܠܳܐ܆ ܘܒܰܕܡܽܘܬ ܢܶܫ̈ܶܐ ܙܰܢܳܝ̈ܳܬܳܐ ܗܳܢܶܝܢ ܫܪ̈ܺܝܚܳܬܳܐ ܕܩܳܝ̈ܡܳܢ ܡܶܢ ܦܽܘܪܢܺܝܽܘܢ܆ ܠܒܶܛܠܳܢܳܐ ܘܰܠܠܳܐ ܣܳܥܽܘܪܽܘܬܳܐ ܐܳ‌ܠ̣ܝܳܐ. ܠܠܐܘܢܛܝܘܤ ܕܶܝܢ܆ ܐܰܪܥܳܐ ܟܺܝܬ ܟܽܠܳܗ̇ ܘܝܰܡܳܐ܆ ܡܫܰܕܪܺܝܢ ܠܶܗ ܐܰܬܠܺܝ̈ܛܶܐ ܘܬܰܠܡܺܝ̈ܕܶܐ ܕܫܰܦܺܝܪܽܘܬ ܕܶܚܠܬܳܐ܆ ܐܰܝܟ ܕܰܠܡܰܠܦܳܢܳܐ ܕܰܡܝܰܬܪܽܘܬܳܐ܆ ܘܰܠܗܳܢܽܘܢ ܕܒܳܥܶܝܢ ܕܰܢܨܰܠܽܘܢ ܘܰܚܦܺܝܛܺܝܢ ܕܰܢܩܺܝܡܽܘܢܳܝܗ̱ܝ ܠܗܽܘܢ ܡܚܰܣܝܳܢܳܐ ܠܰܐܠܳܗܳܐ܆ ܐܰܝܟ ܕܠܺܐܝܙܓܰܕܳܐ ܕܣܰܓܺܝ ܝܰܬܺܝܪ ܡܨܶܐ܆ ܘܦܰܪܶܗܣܺܝܰܐ ܣܰܓܺܝܐܬܳܐ ܡܰܝܬܶܐ ܠܘܳܬ ܡܫܺܝܚܳܐ. ܘܟܰܕ ܟܽܠܗܽܘܢ ܡܶܫܬܘܶܝܢ ܠܗܳܢܶܝܢ ܕܫܳܐܠܺܝܢ܆ ܐܳܙܺܠ̱ܝܢ ܠܘܳܬ ܐܰܬܪܗܽܘܢ܆ ܟܰܕ ܚܳܕܶܝܢ ܘܪܳܘܙܺܝܢ.

ܐܶܢܳܐ ܕܶܝܢ ܡܶܬܕܰܡܰܪ ܐ̱ܢܳܐ܆ ܒܰܡܠܰܚܡܽܘܬܶܗ ܕܣܳܗܕܳܐ ܕܰܠܘܳܬ ܟܽܠܢܳܫ܆ ܕܰܐܝܟܰܢܳܐ ܠܗܳܢܽܘܢ ܡܰܢ ܕܺܐܝܬܰܝܗܽܘܢ ܡܫܰܡܠܰܝ̈ܳܐ܆ ܘܡܶܠܬܳܐ ܕܚܶܟܡܬܳܐ ܐܺܝܬ ܠܗܽܘܢ^[15] ܐܰܝܟܰܢܳܐ ܕܳܐܡܰܪ ܫܠܺܝܚܳܐ: ܡܰܫܡܠܝܳܐܺܝܬ ܘܰܡܠܺܝܠܳܐܺܝܬ ܘܚܰܟܺܝܡܳܐܺܝܬ ܡܶܬܚܙܶܐ ܠܗܽܘܢ܆ ܘܦܠܺܝܪܽܘܦܽܘܪܺܝܰܐ ܥܳܒܶܕ ܒܗܽܘܢ ܗܳܝ ܕܙܳܕܩܳܐ. ܠܗܳܢܽܘܢ ܕܶܝܢ ܕܡܶܠܬܳܐ ܕܺܝܕܰܥܬܳܐ ܐܺܝܬ ܠܗܽܘܢ܆ ܝܕܽܘܥܬܳܢܳܐܺܝܬ ܘܰܐܝܟ ܗܰܘ ܕܓܳܠܶܐ ܗܳܠܶܝܢ ܠܳܐ ܡܶܬܡܰܠ̈ܠܳܢܝܳܬܳܐ ܘܰܡܛܰܫ̈ܝܳܬܳܐ܆ ܠܗܳܢܽܘܢ ܕܶܝܢ ܕܡܶܨܥܳܐܺܝܬ ܐܺܝܬ ܠܗܽܘܢ ܡܶܨܥܳܐܺܝܬ܆ ܥܰܡ ܗܳܢܰܘ ܕܶܝܢ ܕܠܳܐ ܡܫܰܡܠܝܳܐܺܝܬ ܣܺܝܡܺܝܢ ܡܶܬܢܰܚܰܬ܆ ܘܰܐܝܟ ܕܥܰܡ ܫܰܒܪ̈ܶܐ ܒܝܰܕ ܬܶܕܡܪ̈ܳܬܳܐ ܡܰܦܨܰܚ^[16].

ܡܶܛܽܠܗܳܕܶܐ ܐ̱ܢܳܫ ܡܶܢ ܩܽܘܪ̈ܝ̣ܳܝ̣ܶܐ ܗܳܢܽܘܢ ܕܥܳܡܪܺܝܢ ܗ̱ܘܰܘ ܒܰܚܕܳܪ̈ܰܘܗ̱ܝ܆ ܟܰܕ ܡܶܢ ܥܝܳܕܳܐ ܚܰܢܦܳܝܳܐ ܗܰܘ ܩܰܕܡܳܝܳܐ܆ ܬܰܪܢܳܓܠܳܐ ܐܶܫܬܰܘܕܺܝ ܠܰܡܩܰܪܳܒܽܘ ܠܶܗ ܠܣܳܗܕܳܐ܆ ܘܰܠܘܳܬ ܒܰܝܬܳܐ ܕܺܝܠܶܗ ܕܒܶܝܬ ܨܠܽܘܬܳܐ ܐܳܙܶܠ ܗ̱ܘܳܐ܆ ܟܰܕ ܒܽܐܘܪܚܳܐ ܦܓܰܥ ܒܶܗ ܦܳܠܚܳܐ ܐ̱ܢܳܫ܆ ܐܰܪܺܝܡܶܗ ܠܬܰܪܢܳܓܠܳܐ ܗܰܘ ܡܶܢܶܗ. ܘܟܰܕ ܡܕܰܡܰܥ ܘܡܶܬܬܰܢܰܚ܆ ܠܘܳܬ ܗܰܝܟܠܳܐ ܗܰܘ ܩܰܕܺܝܫܳܐ ܐܳܙܶܠ ܗ̱ܘܳܐ܆ ܕܰܢܩܰܛܪܓܶܗ ܠܰܚܛܽܘܦܝܳܐ^[17]. ܒܳܬܰܪܟܶܢ ܟܰܕ ܠܓܰܘ ܗܘ̣ܳܐ܆ ܐܴܠܶܐ ܗ̱ܘܳܐ. ܡܬܰܢܶܐ ܗ̱ܘܳܐ ܠܶܗ ܠܰܩܛܺܝܪܳܐ. ܘܰܩܕܳܡ ܕܰܢܫܰܡܠܶܐ ܡܶܠܰܘ̈ܗ̱ܝ܆ ܗܽܘ ܣܳܗܕܳܐ ܠܟܰܪܣܶܗ ܝܰܥܢܬܳܐ ܕܦܳܠܚܳܐ ܗܰܘ ܪܳܕܶܐ^[18] ܗ̱ܘܳܐ.

ܟܰܕ ܓܶܝܪ ܢܰܟܣܶܗ ܠܗܰܘ ܬܰܪܢܳܓܠܳܐ܆ ܘܰܐܪܡܝܶܗ ܒܩܶܕܪܳܐ܆ ܘܰܠܢܽܘܪܳܐ ܢܰܒܪܶܫ ܘܰܫܓܰܪ ܬܰܩܺܝܦܳܐܺܝܬ܆ ܘܰܕܒܰܫܺܝܠܳܐ ܡܰܣܒܰܪ ܗ̱ܘܳܐ܆ ܡܶܐܟܽܘܠܬܳܐ ܗܳܝ ܪܚܺܝܡܬܳܐ ܘܺܝܨܺܝܦܬܳܐ܆ ܘܣܳܡ ܦܳܬܽܘܪܳܐ܆ ܒܒܶܣܪܳܐ ܕܬܰܪܢܳܓܠܳܐ ܗܰܘ ܕܶܐܬܩܰܫܺܝ ܘܰܗܘ̣ܳܐ ܐܰܝܟ ܟܺܐܦܳܐ ܦܓܰܥ. ܘܳܐܦܠܳܐ ܓܶܝܪ ܠܺܐܝ̈ܕܰܝܳܐ ‌ܐܺܝܬܰܘܗ̱ܝ ܗ̱ܘܳܐ ܡܶܬܩܰܪܒܳܢܳܐ܆ ܐܰܘ ܕܰܡܨܶܐ ܕܢܶܬܦܰܠܰܓ܆ ܫܒܽܘܩ ܕܡܶܢ ܫܶܢ̈ܶܐ ܢܶܬܦܣܶܩ. ܐܰܝܟܰܢܳܐ ܓܶܝܪ ܗܰܘ ܕܰܐܝܟ ܫܽܘ̈ܥܶܐ ܐܶܬܩܰܫܺܝ.

ܡܶܚܕܳܐ ܕܶܝܢ ܒܪܰܡ ܚܳܛܽܘܦܶܗ ܕܬܰܪܢܳܓܠܳܐ܆ ܟܳܪܽܘܙܳܗ̇ ܕܬܶܕܡܽܘܪܬܳܐ ܗܳܝ ܗܳܘܶܐ ܗ̱ܘܳܐ܆ ܘܰܠܘܳܬܶܗ ܡܫܰܢ̈ܝܳܢ ܗ̱ܘܰܝ̈ ܕܶܡܥܰܘ̈ܗ̱ܝ ܕܗܰܘ ܩܽܘܪܝ̣ܳܝ̣ܳܐ. ܟܰܕ ܓܶܝܪ ܢܦܰܠ ܥܰܠ ‌ܐܰܦܰܘ̈ܗ̱ܝ ܥܰܠ ‌ܐܰܪܥܶܗ ܕܗܰܝܟܠܳܐ܆ ܡܰܪܺܝܪܳܐܺܝܬ ܡܶܬܬܰܢܰܚ ܗ̱ܘܳܐ. ܡܦܰܪܣܶܐ ܗ̱ܘܳܐ ܠܰܚܛܺܝܬܳܐ. ܡܦܺܝܤ ܗ̱ܘܳܐ ܕܢܶܫܬܘܶܐ ܠܫܽܘܒܩܳܢܳܐ. ܘܟܰܕ ܚܳܙܶܐ ܗ̱ܘܳܐ ܠܗܳܠܶܝܢ܆ ܗܰܘ ܕܶܐܬܥܰܘܰܠ ܟܰܕ ܩܳܐܶܡ܆ ܚܳܕܶܐ ܗ̱ܘܳܐ܆ ܕܰܠܥܰܘܠܳܐ ܘܰܥܠܽܘܒܝܳܐ ܗܰܘ ܕܰܣܒܰܠ܆ ܩܰܒܠܶܗ ܣܳܗܕܳܐ ܚܠܳܦ ܕܶܒܚܬܳܐ ܘܰܚܠܳܦ ܟܽܠ ܢܶܕܪܳܐ.

ܐ̱ܚܪܺܢܳܐ ܕܶܝܢ ܐ̱ܢܳܫ܆ ܕܺܐܝܬܰܘܗ̱ܝ ܗ̱ܘܳܐ ܡܶܢܳܗ̇ ܟܰܕ ܡܶܢܳܗ̇ ܕܩܽܘܪܝ̣ܳܝ̣ܽܘܬܳܐ܆ ܟܰܕ ܢܕܰܪ ܠܠܐܘܢܛܝܘܤ ܐܰ‌ܠܳܗܳܝܳܐ ܐܶܫܬܰܘܕܝܶܗ ܠܝܰܠܕܳܐ ܩܰܕܡܳܝܳܐ ܕܬܽܘܪܬܶܗ. ܘܟܰܕ ܡܛܳܐ ܙܰܒܢܳܐ ܕܚܶܒ̈ܠܶܐ܆ ܘܰܢܦܰܩ ܒܰܛܢܳܐ ܠܒܰܪ܆ ܒܽܘܩܝܳܐ ܡܶܕܶܡ ܠܶܗ ܠܩܽܘܪܝ̣ܳܝ̣ܳܐ ܡܶܬܩܰܪܰܒ ܗ̱ܘܳܐ. ܟܰܕ ܓܶܝܪ ܚܙܳܝܗ̱ܝ ܠܰܐܪܘܳܢܳܐ ܗܰܘ ܕܶܐܬܺܝܠܶܕ܆ ܕܺܐܝܬ ܠܶܗ ܫܰܦܺܝܪܽܘܬ ܟܝܳܢܳܐ܆ ܘܚܶܘܳܪܳܐ ܡܰܢ ܒܓܰܘܢܳܐ܆ ܦܨܺܝܚܳܐ ܕܶܝܢ ܒܰܚܙܳܬܳܐ܆ ܕܥܰܠ ܥܶܣܒܳܐ ܟܺܝܬ ܝܽܘܪܩܳܐ ܕܚܰܩ̈ܠܳܬܳܐ܆ ܡܫܰܘܰܪ ܘܰܡܕܰܝܶܨ ܘܥܰܡ ܐܶܡܶܗ ܪܳܗܶܛ܆ ܘܰܕܫܰܒܗܪܳܢ ܘܫܰܦܺܝܪ ܒܰܦܬܳܝܳܐ ܕܒܶܝܬ ܥܰܝܢܰܘ̈ܗ̱ܝ܆ ܘܒܰܙܠܺܝܡܽܘܬܳܐ ܕܨܰܘܪܶܗ܆ ܓܳܙܶܡ ܥܰܠ ܡܰܣܪܚܳܢܽܘܬܳܐ ܕܩܰܪ̈ܢܶܐ܆ ܘܰܠܘܳܬ ܢܺܝܪܳܐ ܗܰܘ ܕܰܥܬܺܝܕ ܗ̱ܘܳܐ ܕܢܶܬܬܣܺܝܡ ܥܠܰܘܗ̱ܝ܆ ܡܰܘܕܰܥ ܗ̱ܘܳܐ ܠܰܙܪܺܝܙܽܘܬܳܐ ܘܫܰܦܺܝܪܽܘܬ ܡܠܰܚܡܽܘܬܳܐ ܕܰܟܝܳܢܶܗ܆ ܐܶܙܕܟܺܝ ܡܶܢ ܚܙܳܬܳܐ. ܘܟܰܕ ܒܠܰܥ ܒܪܶܓܬܳܐ ܕܺܝܠܳܗ̇ ܕܚܰܝܽܘܬܳܐ܆ ܠܢܶܕܪܶܗ ܡܰܢ ܛܥܳܐ܆ ܕܢܶܟܕܢܶܗ ܕܶܝܢ ܠܬܰܘܪܳܐ ܬܚܶܝܬ ܩܺܝܩܢܳܐ ܡܶܬܚܰܫܰܒ ܗ̱ܘܳܐ.

ܘܡܶܚܕܳܐ ܡܶܢܫܶܠܝ܆ ܥܰܠ ܥܰܝܢܶܗ ܕܰܐܪܘܳܢܳܐ ܗܰܘ ܫܰܦܺܝܪܳܐ ܘܰܪܚܺܝܡܳܐ܆ ܥܰܪܦܶܠܳܐ ܡܶܕܶܡ ܚܶܘܳܪܬܳܐ ܒܰܕܡܽܘܬ ܩܠܳܦܬܳܐ ܩܶܪܡܰܬ܆ ܘܰܠܥܽܘܗܕܳܢܳܐ ܕܦܳܠܚܳܐ ܗܰܘ ܡܶܢ ܕܪܺܝܫ ܩܳܪܝܳܐ ܗ̱ܘܳܬ. ܘܟܰܕ ܒܡܰܪܓܫܳܢܽܘܬܳܗ̇ ܕܰܚܛܺܝܬܳܐ ܗܘ̣ܳܐ܆ ܠܘܳܬ ܗܰܝܟܠܶܗ ܕܣܳܗܕܳܐ ܢܳܓܶܕ ܗ̱ܘܳܐ ܠܶܗ ܠܬܰܘܪܳܐ. ܘܡܶܚܕܳܐ ܕܰܕܪܰܟ ܩܕܳܡ ܬܰܪ̈ܥܶܐ܆ ܘܰܐܣܪܶܗ ܒܚܰܕ ܡܶܢ ܐܶܤܛܽܘ̈ܢܶܐ ܒܰܪ ܫܳܥܬܶܗ ܐܶܬܕܰܟܝܰܬ̣ ܥܰܝܢܶܗ. ܥܰܒܝܽܘܬܳܐ ܓܶܝܪ ܕܥܰܪܦܶܠܳܐ܆ ܗܳܝ ܕܣܺܝܡܳܐ ܗ̱ܘܳܬ ܥܰܠ ܒܳܒܬܶܗ܆ ܫܰܪܝܰܬ ܕܬܶܫܚܶܐ܆ ܘܰܬܨܽܘܠ ܬܶܦܽܘܩ ܒܕܶܡܥܬܳܐ. ܘܟܰܕ ܐܶܫܬܰܡܰܪ ܗܽܘ ܐܰܪܘܳܢܳܐ ܡܶܢ ܐܰܣܽܘܪ̈ܶܐ܆ ܥܰܡ ܒܰܩܪ̈ܳܐ ܗܳܠܶܝܢ ܕܫܰܪܟܳܐ ܕܺܝܠܶܗ ܕܣܳܗܕܳܐ ܐܰܟܚܕܳܐ ܐܳܙܶܠ ܗ̱ܘܳܐ.

ܐܳܦ ܓܶܝܪ ܐܺܝܬ ܠܶܗ ܐܳܦ ܒܰܩܪ̈ܶܐ ܡܫܰܚ̈ܠܦܳܬܳܐ ܕܩܶܢܝܳܢ̈ܶܐ܆ ܘܥܽܘܬܪܳܐ ܣܰܓܺܝܳܐܐ ܪܳܕܶܐ ܘܳܐܬܶܐ ܥܰܠ ܬܶܕܡܪ̈ܳܬܳܐ ܘܳܐܣܺܝ̈ܘܳܬܳܐ ܗܳܠܶܝܢ ܕܡܶܣܬܰܥܪ̈ܳܢ܆ ܟܰܕ ܟܽܠܗܽܘܢ ܗܳܢܽܘܢ ܕܫܰܦܺܝܪ ܚܳܫܺܝܢ܆ ܒܡܰܘܗ̈ܒܳܬܳܐ ܣܰܓܺܝ̈ܳܐܬܳܐ ܘܚܶܪ̈ܡܶܐ ܦܳܪܥܺܝܢ ܠܶܗ܆ ܠܳܐܣܝܳܐ ܘܥܳܒܽܘܕܳܐ ܕܬܶܕܡܪ̈ܳܬܳܐ. ܡܶܢ ܗܳܪܟܳܐ ܐܺܝܬ ܠܡܶܚܙܳܐ܆ ܚܕܳܪ̈ܰܝ ܒܰܝܬܳܐ ܗܰܘ ܕܒܶܝܬ ܨܠܽܘܬܳܐ܆ ܩܽܘܒܳܠܳܐ ܕܰܐܟܣ̈ܢܳܝܶܐ. ܝܰܨܺܝܦܽܘܬܳܐ ܕܰܐܪ̈ܝܰܢܶܐ܆ ܘܰܕܗܳܢܽܘܢ ܕܰܐ̱ܚܪܳܢܝܳܐܺܝܬ ܐܰܝܟܰܢ ܕܗܽܘ ܟܪܺܝܗܺܝܢ܆ ܘܟܽܠܗܶܝܢ ܗܳܢܶܝܢ ܕܰܠܗܳܠܶܝܢ ܠܳܚ̈ܡܳܢ ܘܢܳܩ̈ܦܳܢ.

ܫܰܦܺܝܪܳܐ ܕܶܝܢ ܕܳܐܦܠܳܐ ܠܗܳܝ ܐ̱ܚܪܺܬܳܐ ܢܶܥܒܰܪ ܒܫܶܬܩܳܐ. ܐ̱ܢܳܫ ܓܶܝܪ ܡܶܣܟܺܢܳܐ܆ ܘܰܕܡܶܢ ܐ̱ܢܳܫ ܡܰܘܙܦܳܢܳܐ ܡܰܪܺܝܪܳܐ ܡܶܬܶܐܠܶܨ ܗ̱ܘܳܐ ܘܡܶܬܬܰܟܰܒ܆ ܥܰܠ ܟܡܳܝܽܘܬܳܐ ܕܶܫܬܳܐ ܕܺܝܢܳܪ̈ܶܐ ܕܕܰܗܒܳܐ܆ ܟܰܕ ܡܨܰܠܶܐ܆ ܫܳܐܶܠ ܗ̱ܘܳܐ ܡܶܢ ܣܳܗܕܳܐ܆ ܕܢܰܪܡܶܐ ܚܠܳܦܰܘܗ̱ܝ ܠܚܰܘܒܬܳܐ ܗܳܝ. ܘܚܰܒܺܝܒܳܐܺܝܬ܆ ܝܰܗ̱ܒ ܠܶܗ ܓܶܠܝܳܢܳܐ ܒܠܺܠܝܳܐ ܟܰܕ ܩܳܡ ܥܠܰܘܗ̱ܝ܆ ܕܢܺܐܙܰܠ ܠܘܳܬ ܬܰܪܥܳܐ ܕܰܡܕܺܝܢ̱ܬܳܐ. ܘܡܶܚܕܳܐ ܕܢܶܚܙܶܐ ܐ̱ܢܳܫ̈ܳܐ ܡܶܢ ܐܰܬܪܳܐ܆ ܕܡܰܝܬܶܝܢ ܩܽܘܠܳܐ ܕܚܰܡܪܳܐ ܡܶܢ ܩܪܺܝܬܳܐ܆ ܢܪܺܝܡ ܟܺܐܦܳܐ ܚܕܳܐ ܙܥܽܘܪܬܳܐ ܡܶܢ ܐܰܪܥܳܐ܆ ܘܢܶܬܒܽܘܪ ܠܗܳܝ ܐ̱ܚܪܳܝܬܳܐ ܕܩܽܘ̈ܠܶܐ. ܗܽܘ ܕܶܝܢ ܟܰܕ ܐܶܬܬܥܺܝܪ܆ ܡܶܬܦܰܫܰܟ ܗ̱ܘܳܐ ܘܕܰܚܺܝܠ܆ ܕܕܰܠܡܳܐ ܥܰܡܳܗ̇ ܕܚܰܘܒܬܳܐ܆ ܥܬܺܝܕ ܕܳܐܦ ܥܰܠ ܚܽܘܣܪܳܢܳܐ ܕܚܰܡܪܳܐ ܗܰܘ ܕܰܥܬܺܝܕ ܗ̱ܘܳܐ ܕܢܶܓܕܰܫ܆ ܢܶܬܩܰܛܪܰܓ ܘܰܠܒܶܝܬ ܐܰܣܺܝܪ̈ܶܐ ܢܶܬܬܰܝܬܶܐ. ܒܪܰܡ ܥܳܒܶܕ ܗ̱ܘܳܐ ܗܳܝ ܕܶܐܬܦܰܩܕܰܬ. ܘܟܰܕ ܡܳܐܢܳܐ ܗܰܘ ܕܚܰܡܪܳܐ ܐܶܬܬܒܰܪ܆ ܗܽܘ ܚܰܡܪܳܐ ܥܰܠ ‌ܐܰܪܥܳܐ ܡܶܬܶܐܫܶܕ ܗ̱ܘܳܐ. ܘܰܡܚܰܘܶܐ ܗ̱ܘܳܐ ܠܡܶܕܶܡ ܡܶܢ ܪܰܚܫܳܐ ܪ̈ܳܡܝ݂ܰܝ݂ ܡܶܪܬܳܐ܆ ܕܰܒܩܽܘܠܬܳܐ ܗܳܝ ܡܶܢ ܩܕܺܝܡ ܡܶܬܛܰܫܶܐ ܗ̱ܘܳܐ. ܘܗܰܘ ܕܚܽܘܣܪܳܢܳܐ ܗܳܢܳܐ ܣܒܰܠ܆ ܕܗܳܟܰܢܳܐ ‌ܐܺܝܬܰܘܗ̱ܝ ܗ̱ܘܳܐ ܡܠܶܐ ܝܽܘܬܪܳܢܳܐ ܘܦܪܽܘܩܝܳܐ܆ ܐܰܝܟ ܦܽܘܩܕܳܢܶܗ ܕܣܳܗܕܳܐ܆ ܣܳܐܶܡ ܗ̱ܘܳܐ ܒܺܐܝܕܳܐ ܗܳܝ ܕܰܐܪܺܝܡܰܬ ܠܟܺܐܦܳܐ ܘܰܬܒܰܪܬܳܗ̇ ܠܩܽܘܠܬܳܐ܆ ܕܺܝܢܳܪ̈ܶܐ ܗܳܠܶܝܢ ܫܬܳܐ.

ܗܳܠܶܝܢ ܕܶܝܢ܆ ܠܰܘ ܡܶܛܽܠ ܡܶܕܶܡ ܐ̱ܚܪܺܝܢ ܐܶܡܪܶܬ ܐܶܢܶܝܢ܆ ܐܶܠܳܐ ܡܶܛܽܠ ܕܶܐ݀ܚܰܘܶܐ ܐܰܝܟܰܢܳܐ ܕܩܰܕܡܶܬ ܐܶܡܪܶܬ܆ ܕܰܒܝܰܕ ܬܶܕܡܪ̈ܳܬܳܐ ܕܥܰܠ ܗܳܠܶܝܢ ܣܽܘܥܪ̈ܳܢܶܐ ܙܥܽܘܪ̈ܶܐ܆ ܐܰܝܬܺܝ ܘܩܰܪܶܒ ܐܶܢܽܘܢ ܠܘܳܬܶܗ ܠܚܰܢ̈ܦܶܐ ܗܳܢܽܘܢ ܕܥܳܡܪܺܝܢ ܗ̱ܘܰܘ ܚܕܳܪ̈ܰܘܗ̱ܝ܆ ܘܰܐܪܚܶܩ ܐܶܢܽܘܢ ܡܶܢ ܛܳܥܝܽܘܬܳܐ ܕܫ̈ܺܐܕܶܐ. ܦܥܺܝܪܺܝܢ ܗ̱ܘܰܘ ܓܶܝܪ ܠܘܳܬ ܗܳܠܶܝܢ ܙܥܽܘܪ̈ܝܳܬܳܐ ܘܡܶܬܚܰܙܝܳܢ̈ܝܳܬܳܐ܆ ܒܰܕܡܽܘܬ ܛܠܳܝ̈ܶܐ ܫܰܒܪ̈ܶܐ܆ ܟܰܕ ܐܳܦܠܳܐ ܚܕܳܐ ܡܶܠܬܳܐ ܥܳܒܕܺܝܢ ܗ̱ܘܰܘ܆ ܕܗܳܠܶܝܢ ܕܺܥܬܺܝ̈ܕܳܢ ܘܠܳܐ ܡܶܬܚܰܙ̈ܝܳܢ^[19]. ܡܶܛܽܠ ܗܳܕܶܐ܆ ܐܳܦ ܐ̱ܢܳܫ ܡܶܢ ܦܺܝܠܳܣܽܘ̈ܦܶܐ ܕܰܠܘܳܬܗܽܘܢ ܐܶܡܰܪ܆ ܕܝܰܘܢܳܝ̈ܶܐ ܒܟܽܠܙܒܰܢ ܛܠܳܝ̈ܶܐ ܐܺܝܬܰܝܗܽܘܢ. ܣܳܒܳܐ ܕܶܝܢ ܝܰܘܢܳܝܳܐ܆ ܘܠܳܐ ܚܰܕ܆ ܡܶܛܽܠܗܳܕܶܐ܆ ܓܳܚܟܺܝܢ ܥܠܰܝܢ܆ ܗܳܢܽܘܢ ܕܫܳܛܝܽܘܬܳܐ ܚܳܫܒܺܝܢ ܠܶܗ ܠܰܨܠܺܝܒܳܐ ܕܰܡܫܺܝܚܳܐ^[20]. ܥܰܠ ܕܓܰܪ̈ܡܶܐ ܡܺܝ̈ܬܶܐ ܕܣܳܗ̈ܕܶܐ ܐܰܝܟܰܢܳܐ ܕܗܶܢܽܘܢ ܐܳܡܪܺܝܢ ܡܰܟܪܟܺܝܢ ܚ̱ܢܰܢ. ܚܢܰܢ ܕܶܝܢ܆ ܟܰܕ ܓܳܚܟܺܝܢ ܚ̱ܢܰܢ ܥܰܠ ܚܰܣܺܝܪܽܘܬ ܗܰܘܢܳܐ ܕܺܝܠܗܽܘܢ܆ ܐܳܦ ܡܶܫܬܰܒܗܳܪܽܘ ܡܶܫܬܒܰܗܪܺܝܢ ܚ̱ܢܰܢ܆ ܒܗܳܠܶܝܢ ܕܗܶܢܽܘܢ ܕܠܳܐ ܡܶܠܬܳܐ ܘܫܳܢܝܳܐܺܝܬ ܓܳܚܟܺܝܢ ܥܠܰܝܗܽܘܢ. ܐܳܦ ܓܶܝܪ ܠܡܰܥܒܕܳܢܽܘܬܳܐ ܕܺܝܠܗܽܘܢ ܗܳܝ ܚܰܝܬܳܐ܆ ܘܰܠܚܰܝ̈ܠܶܐ ܗܳܠܶܝܢ ܕܒܺܐܝܕܰܝ̈ܗܽܘܢ ܡܶܫܬܰܡܠܶܝܢ ܡܙܰܝܚܺܝܢ ܚ̱ܢܰܢ ܘܓܳܠܶܝܢ ܚ̱ܢܰܢ܆ ܘܰܐܝܟ ܕܥܰܠ ܡܰܫܟ̈ܢܶܐ ܫܰܪܺܝܪ̈ܶܐ ܟܺܝܬ ܘܰܙܗܺܝܪ̈ܶܐ ܕܰܩܝܳܡܬܳܐ ܗܳܝ ܕܡܶܣܬܰܒܪܳܐ ܠܰܢ ܚܳܝܨܺܝܢ ܚ̱ܢܰܢ ܐܺܝܕܳܐ܆ ܟܰܕ ܡܶܢܗܽܘܢ ܕܣܽܘܥܪ̈ܳܢܶܐ ܠܠܳܐ ܗܰܝܡܳܢܽܘܬܳܐ ܕܗܳܢܽܘܢ ܡܰܟܣܶܝܢ ܚ̱ܢܰܢ.

ܥܰܡ ܗܳܕܶܐ ܛܰܝܒܽܘܬܳܐ ܐܶܬܳܐ ܠܰܢ ܠܘܳܬ ܕܰܦܢܰܐ[21] ܒܰܪ ܒܰܝܬܳܐ ܡܗܰܝܡܢܳܐ ܕܰܡܫܺܝܚܳܐ ܘܦܳܠܚܳܐ ܚܰܝܠܬܳܢܳܐ ܠܐܘܢܛܝܘܤ. ܠܰܘ ܐܰܝܟܰܢܳܐ ܕܠܐܦܘܠܘܢ ܗܰܘ ܕܒܳܗ̇ ܡܶܢ ܩܕܺܝܡ ܡܶܬܝܰܩܰܪ ܗ̱ܘܳܐ܆ ܢܰܟܶܤ ܘܰܢܚܰܘܶܝܘܗ̱ܝ ܩܳܨܽܘܡܳܐ ܕܰܓܳܠܳܐ. ܐܶܬܒܣܶܤ ܠܶܗ ܓܶܝܪ܆ ܒܝܰܕ ܐ̱ܚܪܺܢܳܐ ܒܰܪ ܦܳܠܚܽܘܬܶܗ܆ ܒܝܰܕ ܩܰܕܺܝܫܳܐ ܐܳܡܰܪ ܐ̱ܢܳܐ ܣܳܗܕܳܐ ܒܰܐܒܽܘܠܶܐ܆ ܟܰܕ ܒܒܰܪܩܳܐ ܐܶܬܪܡܺܝ ܘܺܝܩܶܕ ܥܰܡܶܗ ܕܗܰܝܟܠܶܗ ܘܰܦܬܰܟܪܶܗ܆ ܐܶܠܳܐ܆ ܐܰܝܟܰܢܳܐ ܕܰܠܟܽܘܢ ܢܥܰܕܰܪ܆ ܟܰܕ ܕܢܰܦ̈ܫܳܬܳܐ ܝܰܬܺܝܪܳܐܺܝܬ ‌ܐܺܝܬܰܘܗ̱ܝ ܐܳܣܝܳܐ. ܝܳܕܰܥ ܓܶܝܪ܆ ܕܰܒ̈ܢܰܝ ܡܕܺܝܢ̱ܬܳܐ ܕܺܝܠܰܢ܆ ܣܒܺܝܣܳܐܺܝܬ ܪܳܗܛܺܝܢ ܠܡܶܦܰܩ ܠܘܳܬ ܕܶܦܢܳܐ܆ ܐܰܝܟ ܕܰܠܕܽܘܟܬܳܐ ܕܗܰܢܺܝܽܐܘܬܳܐ ܘܰܕܦܽܘܪܓܳܝܳܐ. ܘܟܰܕ ܨܳܒܶܐ ܕܰܠܚܽܘܣܪܳܢܳܐ ܗܰܘ ܕܡܶܢ ܗܳܪܟܳܐ ܗܳܘܶܐ ܠܢܰܦ̈ܫܳܬܳܐ܆ ܢܶܩܕܽܘܡ ܢܶܟܠܶܐ܆ ܠܶܗ ܠܡܰܥܠܳܢܳܐ ܐܰܝܟ ܕܰܠܬܰܪܥܳܗ̇ ܕܕܽܘܟܬܳܐ ܩܰܕܶܡ ܠܒܰܟ܆ ܟܰܕ ܩܒܰܥ ܒܶܗ ܠܗܰܝܟܠܳܐ ܗܳܢܳܐ ܩܰܕܺܝܫܳܐ.

ܟܽܠ ܓܶܝܪ ܕܥܳܒܰܪ܆ ܢܶܥܽܘܠ ܘܰܢܨܰܠܶܐ܆ ܘܰܠܥܽܘܗܕܳܢܳܐ ܢܺܐܬܶܐ ܕܚܰܫܰܘ̈ܗ̱ܝ ܕܣܳܗܕܳܐ܆ ܘܰܒܡܶܫܚܳܐ ܩܰܕܺܝܫܳܐ ܕܓܽܘܪܢܶܗ ܡܝܰܩܪܳܐ ܢܶܡܫܽܘܚ ܗܽܘ ܠܶܗ܆ ܘܟܰܕ ܗܳܟܰܢܳܐ ܠܰܪ̈ܓܺܝܓܳܬܳܐ ܕܒܶܣܪܳܐ ܢܰܩܗܶܐ܆ ܒܚܽܘܫܳܒܳܐ ܢܰܟܦܳܐ ܘܰܟܢܺܝܟܳܐ ܢܺܐܙܰܠ ܠܘܳܬ ܦܽܘܪܓܳܝܳܐ. ܘܠܳܐ ܠܘܳܬ ܙܳܢܝܽܘܬܳܐ܆ ܘܳܐܦܠܳܐ ܠܘܳܬ ܙܡܺܝܪ̈ܳܬܳܐ ܫܟܺܝܪ̈ܳܬܳܐ܆ ܘܓܽܘܚ̈ܟܶܐ ܠܳܐ ܟܢܺܝ̈ܟܶܐ ܢܶܦܽܘܩ. ܟܰܕ ܕܶܝܢ ܡܶܢ ܡܶܐܟ̈ܠܳܬܳܐ ܘܡܶܢ ܫܶܩܝܳܐ܆ ܡܡܰܫܚܳܐܺܝܬ ܘܣܳܦܩܳܐܺܝܬ ܘܥܰܡ ܒܽܘܪܟܬܳܐ ܡܶܬܡܠܶܐ܆ ܘܪܽܘܚܳܢܳܐܺܝܬ ܡܰܠܽܘܢ ܡܶܬܒܰܣܰܡ ܠܒܰܝܬܶܗ ܢܶܦܢܶܐ܆ ܟܰܕ ‌ܐܺܝܬܰܘܗ̱ܝ ܕܠܳܐ ܣܽܘܓܦܳܢܳܐ ܒܦܰܓܪܶܗ ܟܺܝܬ ܘܰܒܢܰܦܫܶܗ.

ܘܳܐܦ ܒܰܐ̱ܚܪܺܬܳܐ ܕܶܝܢ ܢܰܘܬܰܪܟܽܘܢ ܣܰܓܺܝ܆ ܟܰܕ ܥܠܰܘܗ̱ܝ ܕܰܓܒܺܝܢܳܐ ܕܽܐܘܪܚܳܐ ܕܕܰܦܢܳܐ ܣܺܝܡ ܗܰܝܟܠܳܐ ܕܺܝܠܶܗ ܕܣܳܗܕܳܐ. ܡܶܣ̈ܟܺܢܶܐ ܓܶܝܪ ܣܰܓܺܝ̈ܶܐܐ ܢܶܬܒܽܘܢ ܘܢܶܬܰܐܡܢܽܘܢ܆ ܘܢܶܣܟܪܽܘܢܳܗ̇ ܠܟܽܘܢ ܠܽܐܘܪܚܳܐ܆ ܘܠܳܐ ܢܰܪܦܽܘܢ ܥܕܰܡܳܐ ܕܳܐܦ ܗܶܢܽܘܢ ܡܢܳܬܳܐ ܡܶܕܶܡ. ܡܶܢ ܕܶܐܦܰܢܶܐ ܐܰܘܟܺܝܬ ܢܦܰܩܬܳܐ ܗܳܝ ܕܰܥܬܺܝܕܳܐ ܕܬܶܗܘܶܐ ܠܟܽܘܢ ܢܶܫܬܰܘܬܦܽܘܢ. ܒܰܟܡܳܐ ܕܶܝܢ ܢܙܰܒܢܺܝܗ̇ ܐ̱ܢܳܫ܆ ܠܗܳܝ ܕܩܰܕܡܳܐܺܝܬ ܢܬܰܪܣܶܐ ܠܰܡܫܺܝܚܳܐ ܒܝܰܕ ܗܳܢܽܘܢ ܕܟܰܦܢܺܝܢ܆ ܘܠܰܘ ܟܽܠܗܶܝܢ ܢܫܰܕܰܪ ܐܶܢܶܝܢ ܠܟܰܪܣܳܐ ܗܳܝ ܕܰܒܟܽܠܙܒܰܢ ܣܢܺܝܩܳܐ܆ ܘܟܰܕ ܡܰܠܝܳܐ܆ ܘܬܽܘܒ ܟܰܕ ܐܺܝܬܶܝܗ̇ ܠܳܐ ܡܠܺܝܬܳܐ.

ܫܳܒܶܩ ܐ̱ܢܳܐ ܓܶܝܪ ܠܡܺܐܡܰܪ: ܕܟܰܕ ܗܳܠܶܝܢ ܣܳܥܪܺܝܢ ܐܢ̱ܬܽܘܢ܆ ܝܰܬܺܝܪ ܥܰܬܺܝܪܬܳܐ ܘܰܫܦܺܝܥܬܳܐ ܣܰܓܺܝ ܬܶܫܬܰܟܰܢ ܠܟܽܘܢ ܛܰܝܒܽܘܬܶܗ ܕܣܳܗܕܳܐ܆ ܒܳܐܬܘ̈ܳܬܳܐ ܟܺܝܬ ܘܰܒܬܶܕܡܪ̈ܳܬܳܐ ܘܰܒ̈ܚܰܝܠܶܐ. ܗܰܘ ܕܳܐܦ ܒܝܰܘܡܳܐ ܗܰܘ ܕܶܐܬܡܳܠܝ܆ ܫܰܪܺܝ ܠܰܢ ܒܬܶܕܡܪ̈ܳܬܳܐ ܒܰܝܬܳܝ̈ܳܬܳܐ ܕܺܝܠܶܗ. ܟܰܕ ܓܶܝܪ ܣܰܓܺܝ̈ܶܐܐ ܒܽܐܘܪܚܳܐ ܫܳܕܶܝܢ ܗ̱ܘܰܘ ܥܰܠ ܥܳܓܶܠܬܳܐ ܗܳܝ ܕܰܛܥܺܝܢܳܐ ܗ̱ܘܳܬ ܡܢܳܬܳܐ ܡܝܰܩܰܪܬܳܐ ܡܶܢ ܓܰܪ̈ܡܰܘ̈ܗ̱ܝ ܗܳܝ ܕܗܳܪܟܳܐ ܐܶܬܬܣܺܝܡܰܬ܆ ܢܰܚ̈ܬܶܐ ܕܟܽܠ ܓܢܶܤ ܘܠܰܚ̈ܡܶܐ ܘܥܶܙ̈ܩܳܬܳܐ ܘܥܶܩ̈ܶܐ܆ ܘܡܰܘܫܛܺܝܢ ܗ̱ܘܰܘ ܛܠܳܝ̈ܶܐ ܫܰܒܪ̈ܶܐ܆ ܘܰܡܦܺܝܣܺܝܢ ܗ̱ܘܰܘ ܕܢܶܫܬܰܘܬܦܽܘܢ ܘܢܶܣܒܽܘܢ ܡܶܢ ܒܽܘܪܟܬܳܐ ܘܩܰܕܺܝܫܽܘܬܳܐ ܕܺܝܠܶܗ ܕܩܰܕܺܝܫܳܐ܆ ܘܰܕܢܶܓܫܦܽܘܢ ܒܶܗ܆ ܚܰܕ ܡܶܢܗܽܘܢ ܕܰܛܠܳܝ̈ܶܐ ܟܰܕ ܥܰܠ ‌ܐܰܪܥܳܐ ܢܦܰܠ܆ ܬܚܶܝܬ ܓܺܝ̈ܓܠܶܐ ܗܳܠܶܝܢ ܕܗܳܝ ܥܳܓܶܠܬܳܐ ܗܘ̣ܳܐ. ܘܰܠܟܽܠ ܐ̱ܢܳܫ ܐܶܣܬܒܰܪ ܗ̱ܘܳܐ ܕܶܐܒܰܕ ܠܶܗ܆ ܘܶܐܬܒܰܕܰܪܘ ܓܰܪ̈ܡܶܐ ܕܺܝܠܶܗ ܠܘܳܬ ܫܝܽܘܠ^[22]܆ ܐܰܝܟܰܢܳܐ ܕܗܰܘ ܕܰܡܙܰܡܰܪ ܐܳܡܰܪ. ܐܶܠܳܐ ܒܬܰܟ̈ܫܦܳܬܶܗ ܕܣܳܗܕܳܐ܆ ܟܰܕ ܥܰܠ ܬܰܪ̈ܬܰܝܗܶܝܢ ܥܰܛ̈ܡܳܬܶܗ ܕܛܰܠܝܳܐ ܐܶܬܥܰܪ̈ܓܰܠܶܝܢ ܓܺܝ̈ܓܠܶܐ܆ ܗܳܠܶܝܢ ܕܳܐܦ ܠܩܰܫܝܽܘܬܳܐ ܘܰܚܠܺܝܡܽܘܬܳܐ ܕܟܺܐܦ̈ܶܐ܆ ܠܳܐ ܡܶܣܬܰܝܒܪ̈ܳܢܝܳܬܳܐ ܐܺܝܬܰܝܗܶܝܢ܆ ܠܒܶܣܪܳܐ ܗܰܘ ܫܰܒܪܳܝܳܐ ܘܰܕܣܰܓܺܝ ܪܰܟܺܝܟ ܗ̱ܘܳܐ܆ ܘܳܐܦܠܳܐ ܥܕܰܡܳܐ ܠܣܽܘܪܛܬ̣ܳܐ^[23]ܓܫ̣̈ܰܦܶܝܢ. ܛܰܝܒܽܘܬܳܐ ܗܳܟܺܝܠ ܢܰܘܕܶܐ ܥܰܠ ܟܽܠܗܽܘܢ ܠܰܡܫܺܝܚܳܐ ܐܰ‌ܠܳܗܳܐ ܕܥܰܠ ܟܽܠ܆ ܗܰܘ ܕܰܠܕܰܐܝܟ ܗܳܢܳܐ ܪܺܝܫܳܢܳܐ ܘܰܐܚܺܝܕ ܡܕܺܝܢ̱ܬܳܐ ܫܰܟܶܢ ܠܰܢ܆ ܐܰܟܙܢܳܐ ܕܳܐܦ ܢܳܛܽܘܪܳܐ ܘܳܐܣܝܳܐ܆ ܘܰܡܣܰܝܥܳܢܳܐ ܕܬܰܟܫ̈ܦܳܬܳܐ ܕܺܝܠܰܢ. ܕܠܶܗ ܫܽܘܒܚܳܐ ܠܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܥܶܣܪܺܝܢ ܘܫܰܒܥܳܐ.

ܣܳܗܕܳܐ܆ ܕܩܰܕܺܝܫܳܐ ܡܳܪܝ ܣܶܐܘܶܝܪܘܣ ܦܰܛܶܪܝܰܪܟܳܐ ܕܰܐܢܛܺܝܽܘܟܺܝܰܐ.[1]

ܗܳܠܝܢ ܟܠܗܝܢ ܥܠ ܕܰܚܺܝܚܶܗ ܕܣܳܗܕܳܐ ܐܰܡܺܝܪ̈ܳܢ.[2]

ܕܣܺܝܡܳܐ[3]

 ܘܩܝܡܐ[4]

ܦܪ̈ܟܣܝܣ. 4: 33 [5]

ܡܣܰܟܶܐ ܠܶܗ[6]

ܪ̈ܗܘܡܝܐ. 8: 24 [7]

ܪ̈ܺܝܫܰܝ ܥܰܢܩܳܐ[8]

ܕܠܐ ܐܰܓܪܳܐ[9]

[10]ܡܶܬܥܰܠܶܐ ܗܳܢܳܐ ܕܡܶܬܥܰܠܶܐ ܗ̱ܘܳܐ ܒܰܡܝܰܬܪ̈ܳܬܳܐ ܒܝܰܕ ܚܰܫ̈ܶܐ ܕܣܳܒܶܠ ܗ̱ܘܳܐ. ܘܰܦܨܺܝܚܳܐܝܬ ܚܳܕܶܐ ܗ̱ܘܳܐ ܒܗܽܘܢ ܐܰܝܟ ܗܳܝ ܕܰܐܡܺܝܪܳܐ ܠܦܘܠܘܣ ܘܰܠܘܳܬ ܐܰ‌ܠܳܗܳܐ ܡܶܬܬܰܘܒܰܠ ܗ̱ܘܳܐ ܐܰܝܟ ܩܽܘܪܒܳܢܳܐ ܠܐ ܡܶܬܚܰܙܝܐ ܘܣܳܟܳܐ.

[11] ܠܶܚܡܰܬ ܠܶܗ ܠܡܰܠܦܳܢܳܐ ܗܺܝ ܬܰܚܘܺܝܬܳܐ܆ ܠܰܘ ܒܰܠܚܽܘܕ ܡܶܛܽܠ ܠܒܺܝܒܽܘܬܶܗ ܘܰܚܘܺܝܚܽܘܬܶܗ ܕܣܳܗܕܳܐ: ܐܶܠܐ ܐܳܦ ܡܶܛܽܠ ܫܡܶܗ. ܠܐܘܢܛܝܘܣ ܓܶܝܪ ܐܳܪܚܳܐܡܶܬܦܰܫܰܩ

ܛܟܐ[12]

ܕܛܳܥܶܝܢ[13]

ܐܦܣ̈ܝܐ. 5: 32  ܐܦ ܐ. ܛܝܡܬܐܘܣ. 3: 16 [14]

ܐ. ܩܘܪ̈ܝܢܬܝܐ. 12: 8 [15]

ܡܶܫܬܰܥܶܐ[16]

ܠܚܳܛܽܘܦܳܐ[17]

ܡܶܢ ܡܰܪܕܽܘܬܳܐ[18]

ܒ. ܩܘܪ̈ܝܢܬܝܐ. 4: 18 [19]

ܐ. ܩܘܪ̈ܝܢܬܝܐ. 1: 23 [20]

ܕܰܐܦܢܺܝ[21]

ܡܙܡܘܪ̈ܐ. 22: 15 [22]

 ܨܽܘܠܦܬܳܐ[23]