ܡܺܐܡܪܳܐ ܕܥܶܣܪܺܝܢ ܘܶܫܬܳܐ

ܡܰܪܬܝܳܢܽܘܬܳܐ: ܥܰܠ ܚܙܳܬܳܐ ܕܪ̈ܰܟܫܳܐ ܗܳܝ ܕܰܗܘ̣ܳܬ ܩܰܕܡܳܝܬܳܐ ܡܶܢ ܒܳܬܰܪ ܬܰܕܐܳܐ܆ ܠܘܳܬ ܗܳܝ ܕܢܶܥܪܽܘܩ ܡܶܢ ܦܽܘܪܓܳܝܳܐ ܡܰܚܣܪܳܢܳܐ܆ ܘܡܶܢ ܒܺܝ̈ܫܳܬܳܐ ܗܳܠܶܝܢ ܕܢܳܒ̈ܥܳܢ ܡܶܢ ܗܳܪܟܳܐ܆ ܘܥܰܠ ܣܳܗܕܳܐ ܩܰܕܺܝܫܳܐ ܬܶܐܽܘܕܽܘܪܽܘܤ.

26: ܘܰܐܟܙܢܳܐ ܕܰܐܒܳܐ ܛܳܒܳܐ ܕܟܰܕ ܚܳܙܶܐ ܠܰܒܪܶܗ ܕܝܰܡܺܝܢܳܐܺܝܬ ܘܚܰܨܺܝܦܳܐܺܝܬ ܐܺܝܬ ܠܶܗ ܠܘܳܬ ܡܶܕܶܡ ܡܶܢ ܝܽܘܠܦܳܢ̈ܶܐ܆ ܐܰܘ ܠܘܳܬ ܐܽܘܡܳܢܽܘܬܳܐ ܡܶܕܶܡ ܗܳܝ ܐܰܝܕܳܐ ܕܡܶܬܪܕܶܐ܆ ܚܳܕܶܐ ܘܪܳܘܶܙ ܒܠܶܒܶܗ܆ ܘܰܒܫܰܦܺܝܪܽܘܬ ܟܝܳܢܳܐ ܕܰܒܪܶܗ ܡܶܬܚܬܰܪ܆ ܒܶܗ ܟܰܕ ܒܶܗ ܒܰܙܢܳܐ ܐܶܢܳܐ܆ ܟܰܕ ܠܥܺܕܬܳܐ ܗܳܕܶܐ ܚܳܙܶܐ ܐ̱ܢܳܐ. ܘܠܰܟܢܽܘܫܝܳܐ ܗܳܢܳܐ ܟܳܗܢܳܝܳܐ܆ ܕܚܰܪܺܝܦܳܐܺܝܬ ܘܚܰܨܺܝܦܳܐܺܝܬ ܐܺܝܬ ܠܶܗ ܠܘܳܬ ܫܶܡܥܳܐ ܕܡ̈ܶܠܶܐ ܐܰ‌ܠܳܗܳܝ̈ܳܬܳܐ܆ ܘܰܠܘܳܬ ܡܰܪܕܽܘܬܳܐ ܘܝܽܘܠܦܳܢܳܐ ܕܰܡܝܰܬܪ̈ܳܬܳܐ ܗܰܘ ܕܡܶܢ ܗܳܪܟܳܐ ܗܳܘܶܐ܆ ܚܳܕܶܐ ܐ̱ܢܳܐ ܣܰܓܺܝ ܒܢܰܦܫܝ܆ ܘܛܰܝܒܽܘܬܳܐ ܝܳܕܰܥ ܐ̱ܢܳܐ ܠܰܐܠܳܗܳܐ܆ ܗܰܘ ܕܰܒܝܰܕ ܫܶܡܥܳܐ ܕܺܝܠܟܽܘܢ ܣܰܟܽܘܠܬܳܢܳܐ܆ ܡܡܰܠܶܐ ܠܚܰܣܺܝܪܽܘܬܳܐ ܕܠܶܫܳܢܳܐ ܕܺܝܠܝ.

ܐܺܝܬ ܗ̱ܘܳܐ ܡܰܢ ܓܶܝܪ ܒܽܐܘܪܶܫܠܶܡ ܡܶܢ ܩܕܺܝܡ. ܟܰܕ ܟܰܗܺܝܢܳܐ ܗ̱ܘܳܬ ܒܰܡܝܰܬܪ̈ܳܬܳܐ ܪ̈ܽܘܚܳܢܳܝܳܬܳܐ܆ ܐܰܝܟܰܢܳܐ ܕܶܐܫܰܥܝܳܐ ܢܒܺܝܳܐ ܐܳܡܰܪ: ܐܦ ܪܺܝܫ ܢܰܓܳܪ̈ܶܐ ܚܰܟܺܝܡܳܐ܆ ܘܫܳܡܽܘܥܳܐ ܣܰܟܽܘܠܬܳܢܳܐ^[1]. ܕܪܺܝܫ ܢܰܓܳܪ̈ܶܐ ܕܶܝܢ ܚܰܟܺܝܡܳܐ܆ ܡܰܠܦܳܢܳܐ ܕܕܽܘܓ̈ܡܰܛܰܐ ܐܰ‌ܠܳܗܳܝ̈ܶܐ ‌ܐܺܝܬܰܘܗ̱ܝ܆ ܠܚܰܟܺܝܡܳܐ ܦܰܘܠܽܘܤ ܫܡܰܥ ܕܡܰܠܶܦ. ܐܰܝܟ ܓܶܝܪ ܛܰܝܒܽܘܬܳܐ ܕܰܐ‌ܠܳܗܳܐ ܐܳܡܰܪ: ܗܳܝ ܕܶܐܬܝܰܗܒܰܬ ܠܺܝ܆ ܣܳܡܶܬ ܫܶܬܶܐܣܬܳܐ ܐܰܝܟ ܪܺܝܫ ܢܰܓܳܪ̈ܶܐ ܚܰܟܺܝܡܳܐ^[2]. ܕܗܳܕܶܐ ܕܶܝܢ ܐܽܘܪܶܫܠܶܡ ܡܶܬܚܰܙܝܳܢܺܝܬܳܐ. ܐܳܦ ܕܺܝܠܶܗ ܕܟܽܘܢܳܝܳܐ܆ ܠܳܐ ܕܶܝܢ ܟܺܝܬ ܐܳܡܰܪ ܐ̱ܢܳܐ ܕܚܶܟܡܬܳܐ. ܟܰܕ ܒܪܽܘܚܩܳܐ ܕܗܳܕܶܐ ܐܺܝܬܰܝ܆ ܪܺܝܫ ܢܰܓܳܪ̈ܶܐ ܐ̱ܢܳܫ ܡܶܣܬܒܰܪ ܐ̱ܢܳܐ ܕܺܐܝܬܰܝ܆ ܒܰܡܫܰܪܬܚܽܘܬܳܐ ܕܫܶܡܥܳܐ ܕܺܝܠܟܽܘܢ ܚܰܟܺܝܡܳܐ. ܘܗܳܘܝܳܐ ܝܰܬܺܝܪܽܘܬܳܐ ܕܺܝܠܟܽܘܢ܆ ܠܚܰܣܺܝܪܽܘܬܳܐ ܕܺܝܠܝ^[3]. ܬܽܘܒ ܓܶܝܪ ܠܳܚܡܳܐܺܝܬ܆ ܒܡ̈ܶܠܶܐ ܕܦܰܘܠܽܘܤ ܡܶܬܚܰܫܰܚ ܐ̱ܢܳܐ.

ܐܷܠܳܐ ܗܳܝܕܶܝܢ ܝܰܬܺܝܪܳܐܺܝܬ ܐܶ݀ܩܰܠܶܣܟܽܘܢ ܥܰܠ ܣܰܟܽܘܠܬܳܢܽܘܬܳܐ܆ ܐܶܡܰܬܝ ܕܰܒܝܽܘܠܦܳܢ̈ܶܐ ܪ̈ܽܘܚܳܢܳܝܶܐ ܐܶ݀ܫܟܰܚܟܽܘܢ ܕܡܶܬܚܰܫܚܺܝܢ ܐܢ̱ܬܽܘܢ ܒܙܰܒܢܶܗ ܕܣܽܘܥܪܳܢܳܐ ܠܳܚܡܳܐܺܝܬ܆ ܐܰܟܙܢܳܐ ܕܰܒܥܽܘܕܪ̈ܳܢܶܐ ܗܳܢܽܘܢ ܕܩܳܕܡܺܝܢ ܢܳܛܪܺܝܢ ܡܶܢ ܟܽܘܪܗܳܢܳܐ܆ ܠܘܳܬ ܥܪܽܘܩܝܳܐ ܕܡܶܢ ܣܽܘܓܦܳܢܳܐ ܡܶܕܶܡ܆ ܐܰܘ ܠܘܳܬ ܬܽܘܪܳܨܳܐ ܕܰܡܝܰܬܪܽܘܬܳܐ. ܡܶܛܽܠ ܟܺܝܬ ܕܳܐܦ ܦܳܠܚܳܐ. ܡܶܬܩܰܠܣܳܢܳܐ ‌ܐܺܝܬܰܘܗ̱ܝ܆ ܟܰܕ ܒܟܽܘܠܳܝܽܘܬ ܙܰܝܢܳܐ ܫܰܦܺܝܪܳܐܺܝܬ ܘܛܳܒ ܠܳܚܡܳܐܺܝܬ ܡܶܨܛܰܒܰܬ܆ ܘܰܠܢܰܝܙܟ̈ܶܐ^[4] ܡܙܺܝܥ܆ ܘܰܠܓܶܐܪ̈ܶܐ ܝܳܕܰܥ ܠܰܡܫܰܕܳܪܽܘ܆ ܘܣܰܟܪ̈ܶܐ ܠܡܰܗܦܳܟܽܘ. ܕܗܳܕܶܐ ܕܶܝܢ ܡܢܰܣܝܽܘܬܳܐ ܡܶܬܩܰܠܣܳܢܺܝܬܳܐ܆ ܝܽܘܬܪܳܢܳܐ ܐܳܦܠܳܐ ܚܰܕ ܐܺܝܬ܆ ܐܶܢܗܽܘ ܕܰܒܣܶܕܪܳܐ ܕܰܩܪܳܒܳܐ ܟܰܕ ܡܰܩܪ̈ܒܳܢܶܐ ܢܩܽܘܡܽܘܢ ܣܰܩܽܘܒܠܳܐܺܝܬ܆ ܠܳܐ ܡܶܕܶܡ ܩܪܳܒܳܝܳܐ ܐܰܘ ܙܪܺܝܙܳܐ ܢܚܰܘܶܐ܆ ܐܶܠܳܐ ܥܳܪܽܘܩܳܐ ܢܶܬܬܨܺܝܕ ܐܰܝܟ ܗܳܝ ܕܰܒܡܰܙܡܽܘܪܳܐ ܐܰܡܺܝܪܳܐ: ܒܢܰܘ̈ܗ̱ܝ ܕܰܐܦܪܶܝܡ ܕܡܳܬܚܺܝܢ ܗ̱ܘܰܘ ܘܪܳܡܶܝܢ ܒܩܶܫܬܳܐ܆ ܗܦܰܟܘ ܒܝܰܘܡܳܐ ܕܰܩܪܳܒܳܐ^[5].

ܕܡܶܛܽܠܡܳܢܳܐ ܕܶܝܢ ܐܰܡܺܝܪ ܠܺܝ ܗܳܕܶܐ: ܐܳܡܰܪ ܓܰܠܝܳܐܺܝܬ ܘܠܳܐ ܣܳܟ ܐܶܛܰܫܶܐ. ܡܶܢ ܐܶܡܰܬܝ ܕܕܶܪܟܶܬ ܒܰܡܕܺܝܢ̱ܬܳܐ ܗܳܕܶܐ. ܘܰܥܕܰܡܳܐ ܠܝܰܘܡܳܢܳܐ܆ ܥܽܘܬܪܳܐ ܣܰܓܺܝܳܐܐ ܪܽܘܚܳܢܳܝܳܐ ܐܶ݀ܫܟܰܚܬܟܽܘܢ ܕܰܡܟܰܢܫܺܝܢ ܐܢ̱ܬܽܘܢ. ܘܕܰܡܫܰܪܪܺܝܢ ܐܢ̱ܬܽܘܢ ܠܟܽܘܢܳܝܳܐ ܕܺܝܠܟܽܘܢ܆ ܘܰܕܫܰܘܝܳܐܺܝܬ ܐܶܬܩܪܺܝܬܽܘܢ ܩܰܕܡܳܝ̈ܶܐ ܟܪ̈ܺܝܣܛܝܳܢܶܐ^[6]. ܘܕܰܠܣܳܝܽܘܡ̈ܘܳܬ ܢܳܡܽܘܣ̈ܶܐ ܫܠܺܝ̈ܚܳܝܳܬܳܐ܆ ܗܳܠܶܝܢ ܕܰܒܡ̈ܶܠܶܐ ܒܥܺܕܬܳܐ ܡܶܬܩܰܪ̈ܝܳܢ܆ ܒܰܥܒܳܕܳܐ ܘܰܒܗܽܘܢ ܒܣܽܘܥܪ̈ܳܢܶܐ ܡܚܰܘܶܝܢ ܐܢ̱ܬܽܘܢ. ܘܕܰܒܚܽܘܒܳܐ ܡܰܢ. ܕܠܳܐ ܡܣܳܡ ܒܰܐܦ̈ܶܐ ܐܺܝܬܰܝܟܽܘܢ^[7]܆ ܣܳܢܶܝܢ ܐܢ̱ܬܽܘܢ ܕܶܝܢ ܠܒܺܝܫܬܳܐ ܐܰܝܟ ܡܶܠܬܶܗ ܕܦܰܘܠܽܘܤ. ܘܡܶܬܢܰܩܦܺܝܢ ܐܢ̱ܬܽܘܢ ܠܛܳܒܬܳܐ. ܕܰܠܚܽܘܒܳܐ ܕܪܶܚܡܰܬ ܐܰܚܽܘܬܳܐ܆ ܒܰܚܕܳܕ̈ܶܐ ܥܳܡܠܺܝܢ ܐܢ̱ܬܽܘܢ ܠܰܡܚܰܘܳܝܽܘ. ܕܒܰܚܦܺܝܛܽܘܬܳܐ. ܠܳܐ ܡܰܐܺܝ̈ܢܶܐ ܐܺܝܬܰܝܟܽܘܢ. ܕܰܒܪܽܘܚܳܐ ܪܳܬܚܺܝܢ ܐܢ̱ܬܽܘܢ. ܕܰܠܡܳܪܝܳܐ ܦܳܠܚܺܝܢ ܐܢ̱ܬܽܘܢ ܥܰܒܕܽܘܬܳܐ. ܕܰܒܣܰܒܪܳܐ ܚܳܕܶܝܢ ܐܢ̱ܬܽܘܢ. ܕܒܽܐܘܠܨܳܢܳܐ ܡܣܰܝܒܪܺܝܢ ܐܢ̱ܬܽܘܢ^[8]. ܕܰܠܥܺܐܕ̈ܶܐ ܟܽܠܗܽܘܢ ܕܰܡܫܺܝܚܳܐ܆ ܥܰܡ ܗܰܝܡܳܢܽܘܬܳܐ ܘܕܰܟܝܽܘܬܳܐ ܘܺܐܝܩܳܪܳܐ ܫܰܡܠܺܝܬܽܘܢ܆ ܘܥܰܡ ܝܺܠܺܝܕܽܘܬܳܐ ܡܰܢ ܕܒܰܒܣܰܪ ܕܥܰܡܰܢܽܘܐܶܝܠ ܒܰܙܢܳܐ ܡܶܕܶܡ ܐܶܬܺܝܠܶܕܬܽܘܢ܆ ܒܝܰܕ ܗܳܝ ܕܚܰܨܺܝܦܺܝܢ ܐܢ̱ܬܽܘܢ ܒܚܰܕܬܽܘܬܳܐ ܕܚܰܝ̈ܶܐ ܠܰܡܗܰܠܳܟܽܘ. ܥܰܡ ܕܶܢܚܳܐ ܕܶܝܢ ܐܰ‌ܠܳܗܳܝܳܐ ܐܰܟܚܕܳܐ ܐܶܬܬܪܺܝܡܬܽܘܢ܆ ܘܡܶܬܚܙܶܝܢ ܐܢ̱ܬܽܘܢ ܐܰܝܟ ܢܺܗܺܝܪ̈ܶܐ ܒܥܳܠܡܳܐ ܕܰܐܚܺܝܕܺܝܢ ܡܶܠܬܳܐ ܕܚܰܝ̈ܶܐ^[9]܆ ܐܰܝܟܰܢܳܐ ܕܢܶܬܓܠܶܐ ܐܳܦ ܩܕܳܡ ܡܶܐܬܺܝܬܳܐ ܗܳܝ ܕܬܰܪܬܶܝܢ ܘܰܫܒܺܝܚܬܳܐ܆ ܘܰܩܕܳܡ ܝܰܘܡܳܐ ܗܰܘ ܪܰܒܳܐ܆ ܐܰ‌ܠܳܗܳܐ ܕܩܳܐܶܡ ܒܰܟܢܽܘܫܝܳܐ ܕܰܐ‌ܠܳܗ̈ܶܐ܆ ܗܰܘ ܕܳܐܡܰܪ: ܐܶܢܳܐ ܐܶܡܪܶܬ ܕܰܐ‌ܠܳܗ̈ܶܐ ܐܺܝܬܰܝܟܽܘܢ܆ ܘܰܒܢܰܝ̈ܳܐ ܕܰܡܪܰܝܡܳܐ ܟܽܠܟܽܘܢ^[10]. ܕܥܰܡ ܨܠܺܝܒܳܐ ܐܰܟܚܕܳܐ ܐܶܨܛܠܶܒܬܽܘܢ܆ ܘܰܨܠܰܒܬܽܘܢ ܠܬܰܪܥܺܝܬܳܐ ܕܒܶܣܪܳܐ. ܕܒܰܩܒܽܘܪܬܳܐ ܐܰܟܚܕܳܐ ܥܰܡܶܗ ܐܶܬܬܡܺܝܬܽܘܢ^[11]܆ ܘܰܐܡܺܝܬܬܽܘܢ ܠܗܰܕܳܡ̈ܶܐ ܗܳܠܶܝܢ ܕܥܰܠ ‌ܐܰܪܥܳܐ܆ ܠܙܳܢܝܽܘܬܳܐ܆ ܠܛܰܡܽܐܘܬܳܐ܆ ܠܚܰܫܳܐ܆ ܠܪܶܓܬܳܐ ܒܺܝܫܬܳܐ ܘܰܠܥܳܠܽܘܒܽܘܬܳܐ^[12]. ܕܒܰܩܝܳܡܬܳܐ ܐܰܟܚܕܳܐ ܥܰܡܶܗ ܩܳܡܬܽܘܢ܆ ܘܗܳܠܶܝܢ ܕܰܠܥܶܠ ܡܶܬܪܰܥܶܝܢ ܐܢ̱ܬܽܘܢ܆ ܗܳܠܶܝܢ ܕܰܠܥܶܠ ܒܳܥܶܝܢ ܐܢ̱ܬܽܘܢ܆ ܐܰܝܟܳܐ ܕܰܡܫܺܝܚܳܐ ‌ܐܺܝܬܰܘܗ̱ܝ ܕܝܳܬܶܒ ܡܶܢ ܝܰܡܺܝܢܳܐ ܕܰܐܒܳܐ^[13]. ܕܰܒܡܶܐܬܺܝܬܳܐ ܕܪܽܘܚܳܐ ܩܰܕܺܝܫܳܐ ܐܶܬܢܰܝܰܪܬܽܘܢ^[14]܆ ܘܡܶܢ ܛܺܝܢܳܐ ܐܰܗܦܶܟܬܽܘܢ ܐܰܦܰܝ̈ܟܽܘܢ܆ ܘܰܒܫܽܘܟܳܢ̈ܶܐ ܪ̈ܽܘܚܳܢܳܝܶܐ ܦܪܰܚܬܽܘܢ܆ ܘܰܒܪܶܓܬܳܐ ܕܩܰܢܳܝܽܘܬܳܐ ܕܗܳܠܶܝܢ ܒܰܫܡܰܝܳܐ ܩܒܰܥܬܽܘܢ ܠܥܰܝܢܳܐ ܕܬܰܪܥܺܝܬܟܽܘܢ܆ ܘܰܚܠܰܨܬܽܘܢ ܚܘܺܝܚܳܐܺܝܬ ܠܘܳܬ ܤܛܰܐܕܝܽܘܢ ܕܨܰܘܡܳܐ܆ ܡܰܠܽܘܢ ܕܶܝܢ ܕܳܐܦܠܳܐ ܤܛܰܐܕܝܽܘܢ ܚܳܫܒܺܝܢ ܐܢ̱ܬܽܘܢ ܠܶܗ܆ ܐܶܠܳܐ ܡܰܪܓܳܐ ܡܶܕܶܡ ܗܰܢܺܝܳܐܐ. ܕܗܰܒܳܒ̈ܶܐ ܘܕܽܘܝܳܪܳܐ ܛܽܘܒܬܳܢܳܐ ܕܰܒܦܰܪܕܰܝܣܳܐ.

ܟܰܕ ܗܳܟܺܝܠ ܟܽܠܶܗ ܗܳܢܳܐ ܥܽܘܬܪܳܐ ܪܽܘܚܳܢܳܝܳܐ. ܐܰܝܟܰܢܳܐ ܕܶܐܡܪܶܬ ܚܳܙܶܐ ܐ̱ܢܳܐ ܒܟܽܘܢ ܗܳܫܳܐ܆ ܕܰܚܺܝܠ ܗ̱ܘܺܝܬ ܕܕܰܠܡܳܐ ܚܽܘܣܪܳܢܳܐ ܡܶܕܶܡ ܢܶܗܘܶܐ ܠܟܽܘܢ. ܐܳܦ ܓܶܝܪ ܚܳܐܰܪ ܗ̱ܘܺܝܬ܆ ܠܘܳܬ ܚܶܙܘܳܢܳܐ ܗܰܘ ܩܰܕܡܳܝܳܐ ܕܺܥܬܺܝܕ ܗ̱ܘܳܐ ܕܢܶܗܘܶܐ ܕܰܐܓܽܘ̈ܢܶܐ ܕܪ̈ܰܟܫܳܐ܆ ܘܰܫܓܽܘܫܝܳܐ ܘܬܰܟܬܽܘܫܳܐ^[15] ܕܚܽܘܫܳܒ̈ܶܐ ܡܶܬܡܠܶܐ ܗ̱ܘܺܝܬ. ܘܪܳܥܶܠ ܗ̱ܘܺܝܬ܆ ܕܕܰܠܡܳܐ ܠ̱ܐܢܳܫܺܝ̈ܢ ܡܶܢܟܽܘܢ ܟܰܕ ܓܳܢܶܒ ܫܺܐܕܳܐ ܗܰܘ ܒܺܝܫܳܐ܆ ܒܦܽܘܪܓܳܝܳܐ ܕܰܡܠܶܐ ܙܰܒܢܳܐ ܢܰܛܥܶܐ܆ ܘܚܰܙܳܝ̈ܶܐ ܕܙܽܘܝܳܚܳܐ ܤܳܛܳܢܳܝܳܐ ܢܶܥܒܶܕ ܐܶܢܽܘܢ܆ ܠܗܳܢܽܘܢ ܕܶܐܫܬܘܺܝܘ ܠܡܶܚܙܳܐ ܠܐ̱ܪ̈ܳܙܶܐ ܐܰ‌ܠܳܗܳܝ̈ܶܐ ܘܠܳܐ ܡܶܬܚܰܙܝܳܢ̈ܶܐ ܘܠܳܐ ܡܶܬܡܰܠ̈ܠܳܢܶܐ܆ ܗܳܠܶܝܢ ܕܰܢܒܺܝ̈ܶܐ ܣܰܓܺܝ̈ܶܐܐ ܘܙܰܕܺܝ̈ܩܶܐ ܐܶܬܪܰܓܪܰܓܘ ܠܡܶܚܙܳܐ ܘܠܳܐ ܚܙܰܘ^[16]܆ ܐܰܝܟ ܒܰܪܬܩܳܠܶܗ ܠܳܐ ܕܰܓܳܠܬܳܐ ܕܡܳܪܰܢ ܕܒܶܐܘܰܢܓܶܠܺܝ̈ܰܐ܆ ܗܳܠܶܝܢ ܕܰܒܗܽܘܢ ܐܳܦ ܡܰܠܰܐܟ̈ܶܐ ܪܳܚܡܺܝܢ ܕܰܢܕܺܝܩܽܘܢ^[17]. ܟܰܕ ܪܳܓܺܝܢ ܠܡܰܕܪܟܳܢܽܘܬܳܐ ܕܝܰܬܺܝܪ ܡܫܰܡܠܝܳܐ܆ ܐܰܝܟܰܢܳܐ ܕܦܶܛܪܽܘܤ ܗܰܘ ܓܰܒܝܳܐ ܕܰܫܠܺܝ̈ܚܶܐ ܟܬܰܒ܆ ܡܕܰܡܰܥ ܐ̱ܢܳܐ ܕܶܝܢ ܘܡܶܬܬܰܢܰܚ ܐ̱ܢܳܐ܆ ܟܰܕ ܒܬܰܪܥܺܝܬܝ ܡܶܬܚܰܫܰܒ ܐ̱ܢܳܐ܆ ܐܶܢ ܦܽܘܡܳܐ ܗܰܘ ܕܰܐܣܶܩ. ܒܥܺܕܬܳܐ ܬܶܫܒ̈ܚܳܬܳܐ ܐ̱ܪ̈ܳܙܳܢܳܝܳܬܳܐ܆ ܘܰܐܒܳܐ ܕܺܝܠܶܗ ܩܪܳܝܗ̱ܝ ܠܗܰܘ ܕܒܰܫܡܰܝܳܐ܆ ܒܢ̈ܳܬ ܩ̈ܳܠܶܐ ܫܺܐܕܳܢܳܝ̈ܳܬܳܐ ܐܰܪܦܺܝ ܥܰܠ ܚܶܙ̈ܘܳܢܶܐ.

ܘܰܐܝܟܰܢܳܐ ܕܰܠܗܳܠܶܝܢ ܐ̱ܚܪ̈ܳܢܝܳܬܳܐ ܐܶ݀ܫܒܽܘܩ܆ ܗܳܠܶܝܢ ܕܺܐܝܬ ܒܗܶܝܢ ܫܟܺܝܪܽܘܬܳܐ ܣܰܓܺܝܐܬܳܐ ܘܓܽܘܕܳܦܳܐ܆ ܟܡܳܐ^[18] ܣܳܒܪܺܝܢ ܐܢ̱ܬܽܘܢ ܕܡܰܪܓܙܳܐ ܠܶܗ ܠܰܐܠܳܗܳܐ܆ ܗܺܝ ܗܳܝ ܡܶܠܬܳܐ ܕܡܶܣܬܰܒܪܳܐ ܕܺܐܝܬܶܝܗ̇ ܫܺܝܛܬܳܐ܆ ܗܳܝ ܕܡܶܢ ܣܰܓܺܝ̈ܶܐܐ ܕܠܳܐ ܒܽܘܚܳܢܳܐ ܡܶܬܬܰܙܥܩܳܐ܆ ܗܳܝ ܕܙܳܟܶܐ ܓܰܕܳܗ̇ ܕܰܡܕܺܝܢ̱ܬܳܐ. ܗܳܢܽܘܢ ܓܶܝܪ ܕܰܠܗܳܢܽܘܢ ܕܠܳܐ ܐܺܝܬܰܝܗܽܘܢ ܐܰ‌ܠܳܗ̈ܶܐ ܦܫܺܝܩܳܐܺܝܬ ܓܳܒܠܺܝܢ ܘܒܳܪܶܝܢ ܘܰܠܗܽܘܢ ܣܳܓܕܺܝܢ܆ ܠܗܳܝ ܕܺܐܝܬܶܝܗ̇ ܠܳܐ ܫܘܺܝܬܳܐ ܡܶܢ ܗܳܠܶܝܢ ܕܒܶܝܬ ܒܢܰܝ̈ܢܳܫܳܐ ܗܳܘ̈ܝܳܢ܆ ܘܰܕܠܳܐ ܩܰܘܡܳܐ ܘܰܕܠܳܐ ܕܡܳܝܳܐ܆ ܟܰܕ ܥܰܠ ܫܺܐܕܳܐ ܡܶܕܶܡ ܣܳܡܽܘܗ̇ ܐܰܝܟ ܗܳܝ ܕܣܶܠܩܰܬ ܥܰܠ ܒܳܠܗܽܘܢ܆ ܡܶܛܽܠ ܟܺܝܬ ܕܠܳܐ ܐܶܬܕܰܪܟܰܬ ܠܗܽܘܢ܆ ܓܰܕܳܐ ܫܰܡܗܽܘܗ̇ ܠܗܳܕܶܐ܆ ܡܶܛܽܠ ܗܳܝ ܕܗܳܠܶܝܢ ܕܰܐܝܟ ܗܳܟܰܢ܆ ܗܳܟܰܢܳܐ ܐܰܝܟ ܕܳܐܬܝܳܐ ܡܶܬܬܰܝ̈ܬܝܳܢ. ܘܟܰܕ ܛܳܒܳܐܺܝܬ ܟܺܝܬ ܗܳܕܶܐ ܒܰܠܚܽܘܕ ܥܳܒܕܺܝܢ܆ ܘܟܰܕ ܒܺܐܝܕܰܘ̈ܗ̱ܝ ܕܟܽܘܢܳܝܳܐ ܗܳܢܳܐ܆ ܡܟܰܣܶܝܢ ܠܳܗ̇ ܠܡܰܣܒܪܳܢܽܘܬܳܐ ܗܳܝ ܕܠܳܐ ܐܰ‌ܠܳܗܽܘܬܳܐ܆ ܗܳܝ ܕܒܺܐܝ̈ܕܶܝܗ̇ ܡܒܰܛܠܺܝܢ ܠܳܗ̇ ܠܰܒܛܺܝܠܽܘܬܳܐ ܕܰܐ‌ܠܳܗܳܐ.

ܩܰܕܡܳܐܺܝܬ ܡܰܢ ܓܶܝܪ܆ ܕܥܰܣ̈ܩܰܝ ܠܰܚܙܳܬܳܐ ܐܺܝܬܰܝܗܽܘܢ ܘܰܕܠܰܢ ܠܳܐ ܡܶܬܕܰܪܟܺܝܢ܆ ܕܺܝܢ̈ܶܐ ܕܗܰܘ ܕܰܡܕܰܒܪܳܐ ܠܶܗ ܠܗܳܢܳܐ ܟܽܠ܆ ܐܰܝܟ ܡܶܠܬܳܐ ܗܳܝ ܕܳܐܡܪܳܐ: ܕܺܝ̈ܢܶܐ ܕܺܝܠܳܟ ܬܗܽܘܡܳܐ ܣܰܓܺܝܳܐܐ^[19]. ܘܰܒܕܽܘܟܬܳܐ ܐ̱ܚܪܺܬܳܐ ܬܽܘܒ܆ ܕܠܳܐ ܡܶܬܒܰܨ̈ܝܳܢܶܐ ܐܺܝܬܰܝܗܽܘܢ ܕܺܝ̈ܢܶܐ ܕܺܝܠܶܗ܆ ܘܽܐܘܪ̈ܚܳܬܶܗ ܠܳܐ ܡܶܬܥܰܩܒܳܢ̈ܝܳܬܳܐ. ܡܰܢܽܘ ܓܶܝܪ ܝܺܕܰܥ ܗܰܘܢܳܐ ܕܡܳܪܝܳܐ܆ ܐܰܘ ܡܰܢܽܘ ܒܰܪ ܡܶܠܟܳܐ ܕܺܝܠܶܗ ܗܘܳܐ܆ ܐܰܘ ܡܰܢܽܘ ܕܩܰܕܶܡ ܝܰܗ̱ܒ ܠܶܗ܆ ܘܢܶܗܦܽܘܟ ܢܶܬܦܪܰܥ ܠܶܗ. ܡܶܛܽܠ ܕܡܶܢܶܗ ܘܒܺܐܝܕܰܘ̈ܗ̱ܝ ܘܒܶܗ ܟܽܠܗܶܝܢ. ܠܶܗ ܫܽܘܒܚܳܐ ܠܥܳܠܡܺܝܢ^[20]. ܐܰܡܺܝܢ.

ܒܳܬܰܪܟܶܢ ܕܶܝܢ܆ ܕܳܐܦ ܗܺܝ ܗܳܝ ܕܡܶܣܬܰܒܪܳܐ ܠܳܐ ܫܰܘܝܽܘܬܳܐ ܘܰܦܫܺܝܩܰܬ݂ ܠܫܽܘܚܠܳܦܳܐ܆ ܕܣܽܘܥܪ̈ܳܢܶܐ ܕܥܳܠܡܳܐ ܗܳܢܳܐ܆ ܕܚܶܟܡܬܳܐ ܗܳܝ ܪܺܝܫܳܝܬܳܐ ܕܰܐ‌ܠܳܗܳܐ ܗܰܘ ܕܥܰܠ ܟܽܠ ‌ܐܺܝܬܶܝܗ̇. ܡܰܠܶܦ ܠܰܢ ܓܶܝܪ ܒܝܰܕ ܗܳܠܶܝܢ܆ ܕܢܶܒܣܶܐ ܥܰܠ ܗܳܠܶܝܢ ܕܩܰܪ̈ܺܝܒܳܢ ܐܰܝܟ ܕܥܰܠ ‌ܐܰܝܠܶܝܢ ܕܰܕܠܳܐ ܩܰܘܡܳܐ ܐܺܝܬܰܝܗܶܝܢ܆ ܘܰܕܠܳܐ ܢܶܣܪܰܟ ܒܣܽܘܥܪ̈ܳܢܶܐ ܡܶܬܚܰܒܠܳܢ̈ܶܐ ܘܕܰܡܠܶܐ ܙܰܒܢܳܐ܆ ܕܰܢܚܽܘܪ ܕܶܝܢ ܠܘܳܬ ܗܳܠܶܝܢ ܕܰܥܬܺܝ̈ܕܳܢ܆ ܗܳܢܶܝܢ ܠܳܐ ܡܶܬܚܰܒ̈ܠܳܢܝܳܬܳܐ ܘܠܳܐ ܡܳܝܽܘ̈ܬܳܬܳܐ ܘܰܠܘܳܬ ܕܺܝܢܳܐ ܗܰܘ ܐ̱ܚܪܺܢܳܐ܆ ܗܰܘ ܕܒܶܗ ܣܺܝܡܺܝܢ ܡܰܬܩ̈ܳܠܶܐ ܘܡܰܣ̈ܰܐܬܶܐ ܕܫܰܘܝܽܘܬܳܐ܆ ܘܦܽܘܪ̈ܥܳܢܶܐ ܕܗܳܝ. ܕܰܐܝܟ ܕܫܳܘܝܳܐ ܠܟܽܠܢܳܫ ܕܗܳܠܶܝܢ ܕܗܳܪܟܳܐ ܐܶܬܕܰܒܰܪ̈ܶܝܢ.

 ܠܡܳܢܳܐ ܗܳܟܺܝܠ ‌ܐܳܘ ܗܳܢܳܐ܆ ܠܰܡܕܰܒܪܳܢܽܘܬܳܐ ܚܰܟܺܝܡܬܳܐ ܕܰܐܝܟ ܗܳܕܶܐ ܕܰܐ‌ܠܳܗܳܐ܆ ܟܰܕ ܡܰܣܡܰܝ ܐܰܢ̱ܬ ܓܰܕܳܐ ܩܳܪܶܐ ܐܰܢ̱ܬ ܘܦܰܪܨܽܘܦܳܐ ܥܳܒܶܕ ܐܰܢ̱ܬ ܠܶܗ ܒܢܳܡܽܘܣܳܐ ܕܢܰܦܫܳܟ܆ ܘܰܠܡܰܣܒܪܳܢܽܘܬܳܐ ܕܺܝܠܳܟ ܡܩܺܝܡ ܐܰܢ̱ܬ ܐܰ‌ܠܳܗܳܐ ܥܰܠ ܡܕܺܝܢ̱ܬܳܐ܆ ܘܰܥܠܶܝܗ̇ ܡܰܣܶܩ ܐܰܢ̱ܬ ܠܳܗ̇ ܠܙܳܟܽܘܬܳܐ܆ ܟܰܕ ܐܰ‌ܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ ܡܰܙܥܶܩ ܒܶܐܘܰܢܓܶܠܺܝ̈ܰܐ: ܐܶܬܠܰܒܰܒܘ܆ ܐܶܢܳܐ ܙܟܺܝܬܶܗ ܠܥܳܠܡܳܐ^[21]. ܗܰܘ ܕܳܐܦ ܒܝܰܕ ܐܶܫܰܥܝܳܐ ܢܒܺܝܳܐ܆ ܠܗܳܢܽܘܢ ܕܬܶܫܒܽܘܚܬܳܐ ܣܪܺܝܩܬܳܐ ܕܕܰܐܝܟ ܗܳܕܶܐ ܟܪܺܝܗܶܝܢ ܡܚܰܣܶܕ ܟܰܕ ܐܳܡܰܪ: ܐܢ̱ܬܽܘܢ ܕܶܝܢܗܳܢܽܘܢ ܕܰܫܒܰܩܬܽܘܢܳܢܝ ܘܛܳܥܶܝܢ ܐܢ̱ܬܽܘܢ ܠܛܽܘܪܳܐ ܕܺܝܠܝ ܩܰܕܺܝܫܳܐ܆ ܘܡܰܬܩܢܺܝܢ ܐܢ̱ܬܽܘܢ ܦܳܬܽܘܪܳܐ ܠܓܰܕܳܐ܆ ܘܡܳܠܶܝܢ ܐܢ̱ܬܽܘܢ ܡܙܳܓܳܐ ܠܕܰܝܘܳܐ܆ ܐܶܢܳܐ ܐܰ݀ܫܠܶܡܟܽܘܢ ܠܣܰܝܦܳܐ. ܟܽܠܟܽܘܢ ܒܩܶܛܠܳܐ ܬܶܦܠܽܘܢ^[22].

ܚܳܙܶܝܢ ܐܢ̱ܬܽܘܢ܆ ܕܰܕܛܳܥܝܽܘܬܳܐ ܗ̱ܝ ܣܰܓܺܝܳܐܐ ܐܰ‌ܠܳܗ̈ܶܐ ܘܕܳܚܠܰܬ ܠܫ̈ܺܐܕܶܐ ܐܺܝܬܶܝܗ̇ ܙܰܪܥܳܐ܆ ܗܳܝ ܕܰܢܫܰܒܰܚ^[23] ܠܓܰܕܳܐ. ܐܶܢ ܓܶܝܪ ܐܰ‌ܠܳܗܐ ܗܰܘ ܠܳܐ ܕܰܓܳܠܳܐ ܦܣܰܩ ܒܰܟܬܳܒܳܐ ܟܳܗܢܳܝܳܐ ܕܶܐܘܰܢܓܶܠܺܝ̈ܰܐ ܟܰܕ ܐܳܡܰܪ: ܠܳܐ ܗ̱ܘܳܐ ܬܰܪܶܬܝܢ ܨܶܦܪ̈ܺܝܢ ܡܶܙܕܰܒ̈ܢܳܢ ܒܰܐܣܳܪܺܝܽܘܢ܆ ܘܰܚܕܳܐ ܡܶܢܗܶܝܢ ܠܳܐ ܢܳܦܠܳܐ ܥܰܠ ‌ܐܰܪܥܳܐ ܒܶܠܥܳܕ ܐܰܒܽܘܟܽܘܢ^[24]. ܐܰܝܟܰܢܳܐ ܐܰܝܟ ܫܳܛܽܘܪ̈ܘܳܬܳܐ ܕܗܳܢܽܘܢ ܚܰܟܺܝ̈ܡܶܐ ܠܳܐ ܚܰܟܺܝ̈ܡܶܐ ܢܺܐܡܰܪ܆ ܕܓܰܕܳܐ ‌ܐܺܝܬܰܘܗ̱ܝ ܡܳܪܳܐ ܕܗܳܠܶܝܢ ܕܺܐܝܬܰܝܗܶܝܢ.

ܐܶܢ ܗܳܟܺܝܠ ܗܺܝ ܗܳܝ ܚܕܳܐ ܒܰܪ̱ܬ ܩܳܠܳܐ܆ ܘܳܐܦ ܟܰܕ ܡܶܣܬܰܒܪܳܐ ܠܣܰܓܺܝ̈ܶܐܐ ܕܰܕܠܳܐ ܚܽܘܝܳܒܳܐ ܐܺܝܬܶܝܗ̇܆ ܕܰܬܚܶܝܬ ܚܽܘܝܳܒܳܐ ܕܕܰܐܝܟ ܗܳܠܶܝܢ ܟܽܠܗܽܘܢ ܪ̈ܶܫܝܳܢܶܐ ܟܰܕ ܡܶܬܒܰܚܢܳܐ ܐܶܬܚܰܙܝܰܬ ܕܺܐܝܬܶܝܗ̇܆ ܐܰܝܟܳܐ ܢܣܺܝܡ ܠܗܳܠܶܝܢ ܒܢ̈ܳܬ ܩ̈ܳܠܶܐ ܐ̱ܚܪ̈ܳܢܝܳܬܳܐ܆ ܐܰܝܠܶܝܢ ܕܡܰܙܥܩܺܝܢ ܗܳܢܽܘܢ ܕܚܳܙܶܝܢ ܐܰܓܽܘܢܳܐ ܗܰܘ ܕܪ̈ܰܟܫܳܐ܆ ܟܰܕ ܩܳܥܶܝܢ ܚܰܝܠܬܳܢܳܐܺܝܬ܆ ܘܰܠܥܶܠ ܡܶܢ ܐܳܐܰܪ ܡܰܙܡܺܝܢ ܠܩܳܠܰܝ̈ܗܽܘܢ ܟܰܕ ܡܰܨܪܚܺܝܢ܆ ܘܰܠܘܳܬ ܫܡܰܝܳܐ ܙܳܢܩܺܝܢ ܥܰܦܪܳܐ܆ ܐܰܘ ܒܕܽܘܟ ܐܳܦ ܒܟܺܐܦ̈ܶܐ ܡܫܰܕܶܝܢ܆ ܘܪܽܘܥܬܳܐ ܫܳܢܝ̣ܳܝ̣ܬܳܐ ܡܶܢ ܦܽܘܡܰܝ̈ܗܽܘܢ ܡܰܦܩܺܝܢ܆ ܘܥܰܡܗܽܘܢ ܕܪ̈ܰܟܫܳܐ ܡܰܣܒܪܺܝܢ ܕܪܳܗܛܺܝܢ܆ ܘܰܕܥܰܡܶܗ ܕܗܶܢܝܽܘܟܳܐ ܡܦܰܪܢܣܺܝܢ ܠܗܶܝܢ ܠܥܰܪ̈ܩܶܐ܆ ܘܳܐܦ ܕܥܰܡܶܗ ܐܰܟܚܕܳܐ ܡܳܚܶܝܢ ܒܢܶܓ̈ܕܶܐ܆ ܘܡܰܝܠܠܺܝܢ ܥܠܰܘܗ̱ܝ ܕܪܶܗܛܳܐ܆ ܘܟܰܕ ܡܶܬܬܰܒܪܺܝܢ ܪ̈ܰܟܫܳܐ ܕܗܰܘ ܕܰܠܩܽܘܒܠܳܐ ܚܳܕܶܝܢ܆ ܘܳܐܦܠܳܐ ܫܳܡܥܺܝܢ ܠܰܟܬܳܒ̈ܶܐ ܟܳܗܢܳܝ̈ܶܐ ܕܳܐܡܪܺܝܢ: ܕܙܰܕܺܝܩܳܐ ܚܳܐܶܤ ܥܰܠ ܢܰܦ̈ܫܳܬܳܐ ܕܰܒܥܺܝܪ̈ܳܐ ܕܺܝܠܶܗ^[25]܆ ܐܶܠܳܐ ܐܳܦ ܗܳܝ ܕܰܠܩܽܘܒܠܳܐ܆ ܕܡܶܬܚܪܶܝܢ ܟܰܕ ܐܳܡܪܺܝܢ: ܕܳܐܦܠܳܐ ܚܕܳܐ ܚܛܺܝܬܳܐ ܐܺܝܬܶܝܗ̇܆ ܗܳܝ ܕܰܒܕܰܐܝܟ ܗܳܠܶܝܢ ܚܶܙܘܳܢ̈ܶܐ ܢܶܬܦܰܪܓܶܐ.

ܐܶܢܳܐ ܕܶܝܢ ܩܰܕܡܳܐܺܝܬ ܡܰܢ܆ ܫܳܒܶܩ ܐ̱ܢܳܐ ܠܡܺܐܡܰܪ: ܕܟܽܠ ܚܶܙܘܳܢܳܐ ܐܰܝܢܳܐ ܕܗܽܘ܆ ܠܡܶܕܶܡ ܡܶܢ ܕܰܝ̈ܘܶܐ ܡܶܫܬܰܡܠܶܐ. ܥܰܬܺܝܪܺܝܢ ܓܶܝܪ ܚܰܢ̈ܦܶܐ ܥܽܘܬܪܳܐ ܗܰܘ ܡܰܚܣܪܳܢܳܐ܆ ܣܽܘܓܳܐܐ ܐܳܡܰܪ ܐ̱ܢܳܐ ܕܰܐ‌ܠܳܗ̈ܶܐ ܕܰܓܳܠܰܝ̈ ܫܡܳܐ. ܘܗܰܘ ܡܰܢ ‌ܐܺܝܬܰܘܗ̱ܝ ܠܘܳܬܗܽܘܢ܆ ܕܰܝܘܳܐ ܪܳܚܶܡ ܪ̈ܰܟܫܳܐ. ܗܰܘ ܕܶܝܢ܆ ܪܳܚܶܡ ܓܽܘܚܟܳܐ. ܗܰܘ ܕܶܝܢ ܪܳܚܶܡ ܩܪܳܒܳܐ. ܗܰܘ ܕܶܝܢ ܨܰܝܳܕܳܝܳܐ. ܘܰܠܗܳܠܶܝܢ ܒܨܽܘܝ̈ܳܚܶܐ^[26] ܘܚܰܓ̈ܶܐ ܕܰܪܚܺܝܡܺܝܢ ܠܗܽܘܢ ܡܢܺܝܚܺܝܢ܆ ܟܰܕ ܡܫܰܡܠܶܝܢ ܠܗܳܠܶܝܢ ܪܰܫܺܝܥܳܐܺܝܬ܆ ܘܡܶܫܬܰܡܠܶܝܢ ܒܗܽܘܢ ܠܳܐ ܐܰ‌ܠܳܗܳܐܝܬ.

ܒܳܬܰܪܟܶܢ ܕܶܝܢ ܢܶܬܶܠ܆ ܘܕܳܐܦ ܠܳܐ ܚܕܳܐ ܣܶܓܕܬܳܐ^[27] ܕܫ̈ܺܐܕܶܐ ܡܶܬܬܰܝܬܝܳܐ ܒܚܶܙܘܳܢܳܐ ܗܰܘ ܕܰܐܓܽܘ̈ܢܶܐ ܕܪ̈ܰܟܫܳܐ܆ ܕܰܦܨܺܝܚܽܘܬܳܐ ܕܶܝܢ ܒܰܠܚܽܘܕ ܘܦܽܘܪܓܳܝܳܐ ܕܢܰܦܫܳܐ ܐܺܝܬܶܝܗ̇ ܗܳܝ ܕܡܶܣܬܰܥܪܳܐ. ܐܰܪܰܐ ܣܳܒܰܪ ܐܰܢ̱ܬ ܕܰܡܚܰܕܝܳܐ ܠܶܗ ܗܳܕܶܐ ܠܰܐܠܳܗܳܐ ܕܟܽܠ܆ ܗܰܘ ܕܰܐܝܟܰܢܳܐ ܕܠܰܚܡܳܪܳܐ ܦܩܰܕ ܠܡܶܛܥܰܢ ܛܰܥܢܳܐ܆ ܠܬܰܘܪܳܐ ܕܶܝܢ ܠܡܶܓܰܕ ܠܢܺܝܪܳܐ܆ ܘܕܰܒܩܺܝܩܢܳܐ ܠܡܶܨܪܳܐ ܚܛܽܘܛܳܐ܆ ܘܰܠܗܳܢܶܝܢ ܒܥܺܝܪ̈ܳܐ ܐ̱ܚܪ̈ܳܢܝܳܬܳܐ ܠܰܡܫܰܡܳܫܽܘ ܒܣܽܘܢ̈ܩܳܢܶܐ ܕܥܳܠܡܳܐ܆ ܗܳܟܰܢܳܐ ܐܳܦ ܠܩܰܠܺܝܠܽܘܬܳܐ ܕܣܽܘܣܝܳܐ ܝܰܗ̱ܒ ܠܰܡܫܰܡܳܫܽܘ܆ ܠܘܳܬ ܗܳܝ ܕܩܰܠܺܝܠܳܐܺܝܬ ܐܽܘܪ̈ܚܳܬܳܐ ܗܳܠܶܝܢ ܪ̈ܰܚܺܝܩܳܬܳܐ^[28]܆ ܘܰܠܗܳܢܽܘܢ ܕܰܠܒܰܪ ܡܶܢ ܬܚܽܘܡ̈ܶܐ ܢܰܘܕܰܥ ܫܽܘܘ̈ܕܳܥܶܐ ܡܰܘܬܪ̈ܳܢܶܐ܆ ܘܣܽܘܓܦܳܢܳܐ ܟܒܰܪ ܢܶܟܠܶܐ܆ ܘܠܽܘܩܒܰܠ ܒܥܶܠܕܒܳܒ̈ܶܐ ܕܳܐܬܶܝܢ ܥܠܰܝܢ ܢܶܦܽܘܩ ܘܢܶܣܬܕܰܪ ܠܰܩܪܳܒܳܐ܆ ܐܰܝܟܰܢܳܐ ܕܰܒܕܽܘܟ ܐܳܡܰܪ ܐܳܦ ܟܬܳܒܳܐ ܟܳܗܢܳܝܳܐ܆ ܣܽܘܣܝܳܐ ܡܶܬܛܰܝܰܒ ܠܰܩܪܳܒܳܐ܆ ܡܶܢ ܠܘܳܬ ܡܳܪܝܳܐ ܕܶܝܢ ‌ܐܺܝܬܰܘܗ̱ܝ ܥܽܘܕܪܳܢܳܐ^[29]܆ ܘܠܳܐ ܗ̱ܘܳܐ ܐܰܝܟܰܢܳܐ ܕܢܶܡܬܚܺܝܗ̇ ܠܚܰܝܽܘܬܳܐ ܒܪ̈ܶܗܛܶܐ ܝܰܬܺܝܪ̈ܶܐ ܘܰܕܙܰܒܢܺܝ̈ܢ ܣܰܓܺܝ̈ܳܐܢ ܥܰܠ ܢܰܦܫܗܽܘܢ ܡܶܢܕܪܺܝܫ ܡܶܬܟܰܪܟܺܝܢ܆ ܘܰܕܢܶܥܒܕܺܝܗ̇ ܕܬܶܦܩܰܥ܆ ܐܰܘ ܪ̈ܶܓܠܶܝܗ̇ ܢܬܰܒܰܪ ܒܓܺܝ̈ܓܠܶܐ ܠܳܐ ܚܰܝܽܘܣܬܳܢܳܐܺܝܬ܆ ܘܰܐܢ̱ܬ ܡܰܢ ܟܰܕ ܠܒܰܪ ܒܰܝܬܳܐ ܕܺܝܠܳܟ ܝܳܗܶܒ ܐܰܢ̱ܬ ܠܰܡܫܰܡܳܫܽܘ ܠܐܢܳܫ܆ ܡܶܬܥܰܣܰܩ^[30] ܐܰܢ̱ܬ ܘܰܕܒܺܝ̈ܫܳܬܳܐ ܚܰܫܬ ܡܰܣܒܰܪ ܐܰܢ̱ܬ܆ ܐܶܢܗܽܘ ܕܰܒܪܰܚܝܳܐ ܐܰܘ ܒܡܶܛܰܠܽܘܢ ܢܰܪܡܽܘܗ̱ܝ܆ ܐܰܘ ܒܦܽܘܠܚܳܢܳܐ ܡܶܕܶܡ ܐ̱ܚܪܺܢܳܐ ܥܡܺܝܠܳܐ܆ ܥܰܠ ‌ܐܰ‌ܠܳܗܳܐ ܕܶܝܢ ܡܰܣܒܰܪ ܐܰܢ̱ܬ܆ ܕܠܳܐ ܡܶܬܥܰܣܰܩ ܘܡܶܬܚܰܡܰܬ܆ ܕܰܠܒܰܪ ܡܶܢ ܥܶܠ̈ܠܳܬܳܐ ܚܰܫ̈ܚܳܬܳܐ ܘܰܠܒܰܪ ܡܶܢ ܦܽܘܩܕܳܢܰܘ̈ܗ̱ܝ܆ ܚܳܙܶܐ ܠܳܟ ܕܡܶܬܚܰܫܰܚ ܐܰܢ̱ܬ ܒܗܶܝܢ ܒܚܰܝ̈ܘܳܬܳܐ ܠܳܐ ܡܪܰܚܡܳܢܳܐܺܝܬ. ܪ̈ܰܚܡܶܐ ܓܶܝܪ ܕܒܰܪܢܳܫܳܐ ܥܰܠ ‌ܐܳܡܰܪ ܐ̱ܢܳܫ ܚܰܟܺܝܡܳܐ܆ ܥܰܠ ܩܰܪܺܝܒܳܐ܆ ܕܺܝܠܶܗ. ܪ̈ܰܚܡܶܐ ܕܶܝܢ ܕܡܳܪܝܳܐ ܥܰܠ ܟܽܠܒܣܰܪ^[31].

ܫܳܬܶܩ ܐ̱ܢܳܐ ܓܶܝܪ ܕܺܐ݀ܡܰܪ: ܕܢܰܦ̈ܩܳܬܳܐ ܗܳܠܶܝܢ ܕܚܶܙܘܳܢܳܐ ܗܳܢܳܐ ܕܠܳܐ ܝܽܘܬܪܳܢ܆ ܟܰܪ̈ܣܳܬܳܐ ܕܡܶܣ̈ܟܺܢܶܐ ܣܰܓܺܝ̈ܶܐܐ ܡܶܫܟ̈ܚܳܢ ܗ̱ܘܰܝ̈ ܠܡܶܡܠܳܐ. ܠܗܰܘ ܕܶܝܢ ܕܝܳܕܰܥ ܕܢܶܥܒܶܕ ܛܳܒܬܳܐ ܘܠܳܐ ܥܳܒܶܕ ܠܳܗ̇܆ ܚܛܳܗܳܐ ܐܺܝܬ ܠܶܗ^[32]܆ ܐܰܝܟܰܢܳܐ ܕܝܰܥܩܽܘܒ ܟܰܕ ܟܳܬܶܒ ܬܰܚܶܡ. ܘܠܳܐ ܐ̱ܢܳܫ ܢܦܰܢܶܐ ܣܰܩܽܘܒܠܳܐܺܝܬ ܠܽܘܩܒܰܠܝ ܟܰܕ ܐܳܡܰܪ: ܕܗܳܐ ܐܳܦ ܦܰܘܠܽܘܤ ܫܠܺܝܚܳܐ ܐܳܡܰܪ: ܕܕܰܠܡܳܐ ܥܰܠ ܬܰܘܪ̈ܶܐ ܒܛܺܝܠ ܠܶܗ ܠܰܐܠܳܗܳܐ^[33]. ܒܛܺܝܠ ܠܶܗ ܓܶܝܪ ܐܳܦ ܥܰܠ ܗܳܠܶܝܢ܆ ܘܳܐܦ ܕܰܟܝܳܢܳܐ ܠܳܐ ܡܠܺܝܠܳܐ ܝܳܨܶܦ. ܗܰܘ ܓܶܝܪ ‌ܐܺܝܬܰܘܗ̱ܝ ܗܰܘ ܕܦܳܬܰܚ ܐܺܝܕܳܐ ܕܺܝܠܶܗ܆ ܘܡܳܠܶܐ ܠܟܽܠ ܚܰܝܽܘܬܳܐ ܡܶܢ ܫܰܦܺܝܪܽܘܬ ܨܶܒܝܳܢܶܗ^[34].

ܐܷܠܳܐ ܗܳܕܶܐ܆ ܠܘܳܬ ܗܳܝ ܕܩܰܕܺܝܡܳܐ ܗ̱ܘܳܬ ܐܰܡܺܝܪܳܐ ܐܰܡܪܳܗ̇ ܗܽܘ ܫܠܺܝܚܳܐ. ܟܰܕ ܓܶܝܪ ܠܩܽܘܪ̈ܺܝܢܬܳܝܶܐ ܡܡܰܠܶܠ ܗ̱ܘܳܐ܆ ܡܶܛܽܠ ܗܳܝ ܕܙܳܕܶܩ ܕܗܳܢܽܘܢ ܕܰܡܣܰܒܪܺܝܢ ܣܒܰܪܬܳܐ܆ ܡܶܢܳܗ̇ ܡܶܢ ܣܒܰܪܬܳܐ ܠܡܶܚܳܐ^[35]. ܐܰܝܬܺܝ ܟܬܳܒܳܐ ܢܳܡܽܘܣܳܝܳܐ ܠܩܽܘܝܳܡܳܗ̇ ܕܗܳܕܶܐ ܕܳܐܡܰܪ: ܠܳܐ ܬܶܒܠܽܘܡ ܬܰܘܪܳܐ ܕܡܰܕܪܶܟ^[36]. ܘܗܳܟܰܢܳܐ ܐܺܝܬܰܝ ܗܽܘ ܒܳܬܰܪܟܶܢ܆ ܕܰܠܡܳܐ ܥܰܠ ܬܰܘܪ̈ܶܐ ܒܛܺܝܠ ܠܶܗ ܠܰܐܠܳܗܳܐ؟ ܐܰܘ ܡܶܛܽܠܳܬܰܢ ܡܶܢ ܟܽܠܦܪܽܘܤ ܐܳܡܰܪ. ܡܶܛܽܠܳܬܰܢ ܓܶܝܪ ܐܶܬܟܰܬܒܰܬ܆ ܡܶܛܽܠ ܕܥܰܠ ܣܰܒܪܳܐ ܘܠܳܐ ܠܶܗ ܠܗܰܘ ܕܟܳܪܶܒ ܕܢܶܟܪܽܘܒ. ܘܗܰܘ ܕܡܰܕܪܶܟ ܥܰܠ ܣܰܒܪܳܐ ܕܗܳܝ ܕܢܶܫܬܰܘܬܰܦ ܡܶܢ ܗܰܘ ܡܳܐ ܕܡܰܕܪܶܟ^[37].

ܗܳܝ ܕܶܝܢ ܕܳܐܡܰܪ܆ ܕܰܐܝܟ ܗܳܕܶܐ ܐܺܝܬܶܝܗ̇. ܐܶܡܰܪ ܠܰܡ ܐܰ‌ܠܳܗܳܐ ܐܳܡܰܪ: ܠܳܐ ܬܶܒܠܽܘܡ ܬܰܘܪܳܐ ܕܡܰܕܪܶܟ. ܠܰܘ ܟܰܕ ܥܰܠ ܬܰܘܪ̈ܶܐ ܒܝܰܕ ܗܳܕܶܐ ܥܳܒܶܕ ܒܛܺܝܠܽܘܬܳܐ ܡܶܕܶܡ܆ ܗܳܢܽܘܢ ܟܺܝܬ ܕܰܡܨܶܝܢ ܐܶܢܽܘܢ ܕܳܐܦܶܢ ܠܰܘ ܒܶܐܕܪܳܐ܆ ܟܰܕ ܡܫܰܠܡܺܝܢ ܕܶܝܢ ܒܪܰܡ ܠܰܥܒܳܕܗܽܘܢ܆ ܕܢܶܡ̣ܠܽܘܢ ܟܰܪܣܳܐ ܒܰܝܬܳܝܬܳܐ ܕܺܝܠܗܽܘܢ܆ ܐܶܠܳܐ ܟܰܕ ܠܘܳܬ ܗܳܝ ܕܰܡܝܰܬܪܳܐ ܡܥܱܠܶܐ ܠܰܢ܆ ܘܰܠܘܳܬ ܬܰܪܥܺܝܬܳܐ ܗܳܝ ܕܡܶܛܽܠ ܒܢܰܝ̈ܢܳܫܳܐ܆ ܘܰܡܚܰܘܶܐ ܠܰܢ ܕܰܕܦܰܐܝܳܐ ܘܟܺܐܢܳܐ ܐܺܝܬܶܝܗ̇܆ ܕܗܰܘ ܕܦܳܠܰܚ ܦܽܘܠܚܳܢܳܐ ܡܶܕܶܡ܆ ܡܶܢܶܗ ܕܦܽܘܠܚܳܢܳܐ ܢܶܬܬܰܪܣܶܐ܆ ܐܰܝܟ ܦܽܘܩܕܳܢܳܐ ܗܰܘ ܕܳܐܡܰܪ܆ ܫܳܘܶܐ ܗܽܘ ܦܳܥܠܳܐ ܠܬܽܘܪܣܳܝܶܗ^[38].

ܢܶܫܒܽܘܩ ܕܶܝܢ ܐܶܢ ܨܳܒܶܐ ܐܰܢ̱ܬ܆ ܐܳܦ ܕܕܰܟܺܝܬܳܐ ܐܺܝܬܶܝܗ̇ ܡܶܢ ܟܽܠܳܗ̇ ܚܛܺܝܬܳܐ܆ ܡܡܰܪܝܳܢܽܘܬܳܐ ܗܳܝ ܕܪ̈ܰܟܫܳܐ. ܡܶܛܽܠܡܳܢܳܐ ܠܳܐ ܡܶܬܒܰܣܰܡ ܐܰܢ̱ܬ ܒܳܗ̇ ܒܰܚܙܳܬܳܐ ܒܫܶܠܝܳܐ܆ ܘܟܰܕ ܥܰܡ ܟܢܺܝܟܽܘܬܳܐ ܝܳܬܶܒ ܐܰܢ̱ܬ܆ ܐܶܠܳܐ ܥܶܠܬܳܐ ܕܚܶܪܝܳܢܳܐ ܘܕܰܫܓܽܘܫܝܳܐ ܥܳܒܶܕ ܐܰܢ̱ܬ ܠܳܗ̇ ܠܗܳܕܶܐ. ܘܟܰܕ ܐܰܝܟ ܕܥܰܠ ܙܳܟܽܘܬܳܐ ܕܰܡܝܰܬܪܽܘܬܳܐ ܒܪܶܗܛܳܐ ܗܰܘ ܩܰܠܺܝܠܳܐ ܕܪ̈ܰܟܫܳܐ ܡܶܬܢܦܰܚ ܐܰܢ̱ܬ܆ ܡܡܰܪܡܰܪ ܐܰܢ̱ܬ ܘܠܳܛܶܫ ܐܰܢ̱ܬ ܒܰܒ̈ܢܳܬ ܩ̈ܳܠܶܐ ܡܓܰܪ̈ܝܳܢܝܳܬܳܐ܆ ܠܗܰܘ ܕܰܦܠܺܝܓ ܥܠܰܝܟ ܒܪܶܚܡܰܬ ܗܳܝ ܕܰܠܩܽܘܒܠܳܐ܆ ܐܰܝܟܰܢܳܐ ܕܟܰܕ ܠܳܐ ܢܶܫܟܰܚ ܠܰܡܣܰܝܒܳܪܽܘ ܠܚܶܣ̈ܕܶܐ܆ ܠܘܳܬ ܪ̈ܓܽܘܡܝܶܐ ܘܰܫܕ̈ܳܝܶܐ ܕܟܺܐܦ̈ܶܐ ܢܶܬܗܦܶܟ܆ ܘܩ̈ܶܛܠܶܐ ܣܰܓܺܝ̈ܶܐܐ ܡܶܢ ܗܳܪܟܳܐ ܢܶܬܬܰܡܪܚܽܘܢ. ܐܰܝܟܰܢܳܐ ܠܰܘ ܫܶܥ̈ܝܶܐ ܕܰܛܠܳܝ̈ܶܐ ܫܰܒܪ̈ܳܝܶܐ܆ ܘܰܠܘܰܝ ܗܳܕܶܐ ܒܰܠܚܽܘܕ܆ ܢܶܩܪܶܐ ܐܶܢܶܝܢ ܐ̱ܢܳܫ ܠܗܳܠܶܝܢ ܟܺܐܢܳܐܺܝܬ.

ܕܥܰܠ ܡܽܘܢ ܓܶܝܪ ܐܶ݀ܓܚܰܟ ܝܰܬܺܝܪܳܐܺܝܬ ܡܶܛܽܠ ܚܰܣܺܝܪܽܘܬ ܗܰܘܢܳܐ܆ ܠܰܝܬ ܠܺܝ ܠܡܺܐܡܰܪ. ܥܰܠ ܗܰܘ ܕܰܡܓܰܪܶܐ ܘܰܡܡܰܪܡܰܪ܆ ܐܰܘ ܥܰܠ ܗܰܘ ܕܥܰܠ ܗܳܠܶܝܢ ܕܳܐܦܠܳܐ ܒܡܶܕܶܡ ܦܰܐܝ̈ܳܢ ܣܪܺܝܩܳܐܺܝܬ ܡܶܬܡܰܪܡܰܪ ܘܡܶܬܥܰܝܰܛ. ܙܳܕܶܩ ܗ̱ܘܳܐ ܠܗܽܘܢ ܓܶܝܪ ܐܰܝܟ ܕܶܐܢܳܐ ܕܳܐܶܢ ܐ̱ܢܳܐ܆ ܕܓܰܘܳܢܳܐܺܝܬ ܢܩܰܠܣܽܘܢ ܠܗܳܢܽܘܢ ܕܙܳܟܶܝܢ܆ ܠܪ̈ܰܟܫܳܐ ܟܺܝܬ ܘܰܠܗܶܢܝܽܘܟ̈ܶܐ܆ ܘܓܰܘܳܢܳܐܺܝܬ ܠܗܳܢܽܘܢ ܕܡܶܙܕܟܶܝܢ ܢܰܣܠܽܘܢ܆ ܘܠܳܐ ܢܶܬܦܰܠܓܽܘܢ ܒܰܦܠܺܝܓܽܘܬ ܬܰܪܥܺܝܬܳܐ ܘܒܰܒܥܶܠܕܒܳܒܽܘܬܳܐ܆ ܘܰܠܗܳܕܶܐ ܢܶܥܒܕܽܘܢܳܗ̇ ܥܶܠܬܳܐ ܕܰܫܓܽܘܫܝܳܐ ܘܰܕܒܺܝ̈ܫܳܬܳܐ ܕܓܰܘܳܐ ܕܟܽܠܶܗ ܥܰܡܳܐ.

ܐܷܠܳܐ ܠܡܳܢܳܐ ܨܳܒܶܐ ܐ̱ܢܳܐ ܐܰܝܟ ܗܰܘ ܕܰܠܢܰܦܫܝ ܡܰܛܥܶܐ ܐ̱ܢܳܐ܆ ܕܛܶܟܣܳܐ ܐܶ݀ܣܺܝܡ ܠܠܳܐ ܡܛܰܟܣܽܘܬܳܐ܆ ܘܰܬܚܶܝܬ ܡܶܠܬܳܐ ܐܶ݀ܫܰܥܒܶܕ ܠܠܳܐ ܡܠܺܝܠܽܘܬܳܐ. ܗܳܕܶܐ ܓܶܝܪ ܡܚܰܘܝܳܐ ܝܰܬܺܝܪܳܐܺܝܬ܆ ܗܳܝ ܕܰܩ̈ܥܳܬܶܐ ܘܰܕܠܽܘܚ̈ܝܶܐ ܘܡܰܨ̈ܘܳܬܳܐ ܘܰܫܓܽܘܫ̈ܝܶܐ ܩܳܝܡܺܝܢ ܬܰܡܳܢ܆ ܕܫܺܐܕܳܢܳܝ̈ܳܬܳܐ ܐܺܝܬܰܝܗܶܝܢ ܗܳܠܶܝܢ ܕܰܐܝܟ ܗܳܟܰܢ ܕܚܶܙ̈ܘܳܢܶܐ. ܡܶܢ ܓܶܝܪ ܦܺܐܪ̈ܰܘܗ̱ܝ ܡܶܬܺܝܕܰܥ ܐܺܝܠܳܢܳܐ^[39]܆ ܐܰܝܟ ܒܰܪ̱ܬ ܩܳܠܶܗ ܠܳܐ ܕܰܓܳܠܬܳܐ ܕܡܳܪܰܢ. ܢܚܰܘܽܘܢ ܕܶܝܢ ܗܳܝ ܕܰܠܩܽܘܒܠܳܐ܆ ܗܳܢܽܘܢ ܚܰܙܳܝ̈ܶܐ ܕܗܳܠܶܝܢ܆ ܘܥܰܡ ܫܶܠܝܳܐ ܕܰܦܐܶܐ܆ ܢܶܣܒܥܽܘܢ ܡܶܢ ܦܽܘܪܓܳܝܳܐ. ܡܨܰܠܶܐ ܐ̱ܢܳܐ ܓܶܝܪ ܐܶܢܳܐ܆ ܕܕܰܓܳܠܳܐ ܐܶ݀ܬܚܰܘܶܐ ܒܗܳܕܶܐ ܡܢܳܬܳܐ܆ ܡܶܛܽܠ ܦܽܘܪܩܳܢܳܐ ܕܺܝܠܗܽܘܢ. ܐܳܦܶܢ ܓܶܝܪ ܠܘܳܬ ܚܶܙܘܳܢܳܐ ܐܰܘ ܬܪܶܝܢ ܢܶܬܡܨܽܘܢ ܠܡܰܣܛܳܝܽܘ^[40] ܡܶܢ ܣܽܘܓܦܳܢܳܐ ܕܳܐܟܶܠܩܰܪܨܳܐ. ܐܳܡܰܪ ܐ̱ܢܳܐ ܕܶܝܢ ܟܡܳܐ ܟܺܝܬ ܕܠܳܐ ܢܺܐܬܽܘܢ ܠܘܳܬ ܡܰܨܽܘܬܳܐ ܘܰܫܓܽܘܫܝܳܐ܆ ܐܶܠܳܐ ܠܳܐ ܬܽܘܒ ܐܳܦ ܒܙܰܒܢܳܐ ܗܰܘ ܕܫܰܪܟܳܐ܆ ܐܺܝܬ ܠܺܝ ܗܳܝ ܕܰܙܗܺܝܪܳܐ.

ܗܳܠܶܝܢ ܡܰܢ ܗܳܟܺܝܠ܆ ܡܶܛܽܠ ܗܳܢܽܘܢ ܢܶܬܰܐܡܪ̈ܳܢ. ܠܟܽܘܢ ܕܶܝܢ ܗܳܢܽܘܢ ܕܰܒܥܺܕܬܳܐ ܡܶܬܰܐܡܢܺܝܢ ܐܢ̱ܬܽܘܢ܆ ܡܰܪܬܶܐ ܐ̱ܢܳܐ ܘܡܳܠܶܟ ܐ̱ܢܳܐ܆ ܕܰܐܦܠܳܐ ܒܰܚܕܳܐ ܚܙܳܬܳܐ ܕܰܐܝܟ ܗܳܕܶܐ܆ ܠܥܰܝܢ̈ܶܐ ܕܺܝܠܟܽܘܢ ܬܛܰܡܽܐܘܢ܆ ܐܳܦܠܳܐ ܠܠܶܫܳܢܳܐ ܕܺܝܠܟܽܘܢ ܬܛܰܘܫܽܘܢ ܒܰܒ̈ܢܳܬ ܩ̈ܳܠܶܐ ܡܰܦ̈ܠܳܝܳܬܳܐ ܘܛܰܡ̈ܳܐܬܳܐ܆ ܠܗܰܘ ܟܰܕ ܡܙܰܡܪܺܝܢ ܐܢ̱ܬܽܘܢ܆ ܠܗܰܘ ܕܟܰܕ ܨܰܠܘ̈ܳܬܳܐ ܐ̱ܪ̈ܳܙܳܢܳܝܳܬܳܐ ܡܰܣܩܺܝܢ ܐܢ̱ܬܽܘܢ܆ ܩܰܕܶܫܬܽܘܢ. ܬܶܬܦܺܝܣܽܘܢ ܕܶܝܢ܆ ܠܰܫܠܺܝܚܳܐ ܩܰܕܺܝܫܳܐ ܕܣܳܐܶܡ ܢܳܡܽܘܣܳܐ ܘܳܐܰܡܪ: ܘܠܳܐ ܬܥܺܝܩܽܘܢ ܠܪܽܘܚܳܐ ܩܰܕܺܝܫܳܐ ܕܰܐ‌ܠܳܗܳܐ܆ ܗܰܘ ܕܒܶܗ ܐܶܬܚܬܶܡܬܽܘܢ ܠܝܰܘܡܳܐ ܕܦܽܘܪܩܳܢܳܐ. ܘܡܰܠܶܦ ܕܰܐܝܟܰܢܳܐ ܡܶܫܟܚܳܐ ܕܠܳܐ ܢܥܺܝܩ ܠܪܽܘܚܳܐ ܩܰܕܺܝܫܳܐ. ܘܡܰܝܬܶܐ ܒܳܬܰܪܟܶܢ ܗܳܠܶܝܢ. ܟܽܠܳܗ̇ ܡܰܪܺܝܪܽܘܬܳܐ ܘܚܶܡܬܳܐ ܘܪܽܘܓܙܳܐ ܘܰܩܥܳܬܳܐ ܘܓܽܘܕܳܦܳܐ ܢܶܬܬܪ̈ܺܝܡܳܢ ܡܶܢܟܽܘܢ܆ ܥܰܡ ܟܽܠܳܗ̇ ܒܺܝܫܽܘܬܳܐ^[41]. ܕܢܶܗܘܶܐ ܕܶܝܢ ܕܟܶܐ܆ ܡܶܢ ܗܳܠܶܝܢ ܟܽܠܗܶܝܢ܆ ܗܰܘ ܕܚܶܙܘܳܢܳܐ ܕܪ̈ܰܟܫܳܐ ܚܳܙܶܐ܆ ܕܠܳܐ ܦܽܘܪܣܳܐ ܐܺܝܬܶܝܗ̇.

ܗܳܠܶܝܢ ܕܡܶܢܗܶܝܢ ܢܦܰܨܶܐ ܠܟܽܠܰܢ܆ ܗܰܘ ܕܦܰܨܺܝ ܠܰܢ ܡܶܢ ܚ̈ܒܳܠܶܐ ܕܺܝܠܰܢ^[42]. ܐܰܝܟܰܢܳܐ ܕܗܰܘ ܕܰܡܙܰܡܰܪ ܐܳܡܰܪ܆ ܘܰܙܒܰܢ ܠܰܢ ܡܶܢ ܚܛܺܝܬܳܐ ܟܰܕ ܐܶܬܥܰܒܕܰܕܢܰܢ ܡܶܢ ܐܳܟܶܠܩܰܪܨܳܐ ܘܰܗܘܰܝܢܰܢ ܬܚܶܝܬ ܦܰܚܳܐ ܕܡܰܘܬܳܐ܆ ܒܝܰܕ ܕܡܳܐ ܕܺܝܠܶܗ ܗܰܘ ܕܰܠܥܳܠܡܳܐ ܕܰܟܺܝ܆ ܗܰܘ ܕܳܐܦ ܝܰܘܡܳܢܳܐ ܩܪܳܐ ܘܟܰܢܶܫ ܠܰܢ ܐܰܟܚܕܳܐ܆ ܕܰܢ݀ܚܰܓܶܐ ܠܕܽܘܟܪܳܢܳܐ ܕܩܰܕܺܝܫܳܐ ܣܳܗܕܳܐ ܬܶܐܽܘܕܽܘܪܽܘܤ܆ ܟܰܕ ܨܳܒܶܐ ܕܰܢܛܺܝܦ ܘܰܢܫܺܝܓ ܠܣܽܘܓܦܳܢܳܐ ܗܰܘ ܕܶܐܬܡܳܠܝ̱܆ ܒܝܰܕ ܝܽܘܬܪܳܢܳܐ ܗܳܢܳܐ ܕܝܰܘܡܳܢܳܐ ܩܰܪܺܝܒ. ܥܝܳܕܰܐ ܗ̱ܘ ܓܶܝܪ ܠܶܗ܆ ܕܒܰܡܫܰܪܬܚܽܘܬܳܗ̇ ܕܳܐܣܝܽܘܬܳܐ ܢܛܰܫܶܐ ܐܶܢܽܘܢ ܠܟܽܘܪ̈ܗܳܢܶܐ܆ ܘܰܕܠܽܘܩܒܰܠ ܚܛܳܗ̈ܶܐ ܕܺܝܠܰܢ ܢܶܬܩܽܘܠ ܫܽܘܒܩܳܢ̈ܶܐ܆ ܐܰܝܟܰܢܳܐ ܕܠܳܐ ܢܶܛܥܶܐ ܕܳܐܒܕܺܝܢܰܢ ܚ̱ܢܰܢ ܒܝܰܕ ܗܳܠܶܝܢ ܕܰܡܡܰܪܡܪܺܝܢ ܚ̱ܢܰܢ ܠܶܗ.

ܠܰܐܝܕܳܐ ܓܶܝܪ ܬܰܪܥܺܝܬܳܐ ܠܳܐ ܡܰܦ̣ܢܶܐ ܣܳܗܕܳܐ ܬܶܐܽܘܕܽܘܪܽܘܤ܆ ܐܰܘ ܡܶܢ ܐܰܝܕܳܐ ܚܙܳܬܳܐ ܤܳܛܳܢܳܝܬܳܐ ܠܳܐ ܡܰܪܚܶܩ܆ ܘܰܠܘܳܬܶܗ ܢܳܓܶܕ ܠܳܗ̇ ܠܥܰܝܢܳܐ. ܚܶܙܘܳܢܳܐ ܓܶܝܪ ‌ܐܺܝܬܰܘܗ̱ܝ ܐܰܝܟ ܕܒܰܫܪܳܪܳܐ ܪܽܘܚܳܢܳܝܳܐ ܘܰܫܡܰܝܳܢܳܐ. ܕܳܐܦ ܠܩܳܝܽܘܡܽܘܬ ܓܽܘ̈ܕܶܐ ܕܡܰܠܰܐܟ̈ܶܐ ܐܰܦܨܰܚ ܘܦܰܪܓܺܝ ܐܳܦ ܥܕܰܟܺܝܠ ܡܦܰܪܓܶܐ܆ ܘܳܐܦ ܠܶܗ ܠܣܳܐܶܡ ܐܰܓܽܘܢܳܐ ܡܫܺܝܚܳܐ. ܓܰܒܪܳܐ ܦܳܠܚܳܐ. ܕܩܳܐܶܡ ܗ̱ܘܳܐ ܒܡܶܨܥܰܬ ܗܳܢܽܘܢ ܕܕܳܝܢܺܝܢ ܗ̱ܘܰܘ܆ ܘܒܰܝܢܳܬ ܗܳܢܽܘܢ ܕܰܡܢܰܓܕܺܝܢ ܗ̱ܘܰܘ܆ ܘܒܰܝܢܳܬ ܗܳܢܽܘܢ ܕܚܳܙܶܝܢ ܗ̱ܘܰܘ܆ ܟܰܕ ܠܳܐ ܙܳܐܰܥ ܗ̱ܘܳܐ ܐܰܘ ܪܳܥܶܠ. ܠܒܺܝܒܳܐ. ܕܠܳܐ ܡܶܬܬܘܰܗ. ܛܰܠܝܳܐ ܒܩܰܘܡܬܳܐ܆ ܕܰܥܕܰܟܺܝܠ ܫܽܘ̈ܡܳܬܳܐ ܢܳܦ̈ܩܳܢ ܗ̱ܘܰܝ̈ ܠܶܗ܆ ܘܗܳܐ ܡܶܢ ܟܰܕܽܘ ܐܺܝܬ ܗ̱ܘܳܐ ܠܶܗ ܕܰܩܢܳܐ ܕܰܡܫܰܪܶܐ ܡܰܘܟܶܡ ܘܡܰܣܥܰܪ܆ ܘܰܕܠܳܐ ܡܚܰܒܶܠ ܠܶܗ ܒܰܡܕܰܟܝܳܐ ܦܰܪܨܽܘܦܶܗ܆ ܡܶܛܽܠ ܦܺܝܠܳܣܽܘܦܽܘܬܳܐ ܕܕܽܘܒܳܪܳܐ. ܚܠܺܝܡܳܐ ܡܰܢ ܘܫܰܦܺܝܪ ܩܰܘܡܬܳܐ܆ ܘܕܰܠܗܳܢܽܘܢ ܕܺܐܝܬܰܝܗܽܘܢ ܗ̱ܘܰܘ ܡܕܰܒܪ̈ܳܢܶܐ ܕܛܶܟ̈ܣܶܐ ܦܳܠ̈ܚܳܝܶܐ܆ ܡܙܰܝܢܳܐ ܕܛܳܒ ܝܺܕܺܝܥ ܗ̱ܘܳܐ ܘܰܡܫܰܡܰܗ܆ ܕܰܡܥܱܨܰܝ ܗ̱ܘܳܐ ܕܶܝܢ ܠܦܰܓܪܶܗ ܒܥܰܡ̈ܠܶܐ ܕܰܡܚܰܡܣܢܳܢܽܘܬܳܐ܆ ܘܡܰܨܡܰܚ ܗ̱ܘܳܐ ܒܡܰܘܪܩܽܘܬܳܐ ܕܰܐܦ̈ܶܐ. ܘܰܕܢܶܬܟܰܬܰܫ ܡܰܢܘ ܢܶܩ̣ܪܽܘܒ ܠܘܳܬ ܒܰܪܒܪ̈ܳܝܶܐ ܐܶܬܟܬܶܒ ܗ̱ܘܳܐ܆ ܐܺܝܬ ܗ̱ܘܳܐ ܠܶܗ ܕܶܝܢ ܕܰܪܳܐ܆ ܠܰܘ ܠܘܳܬ ܕܡܳܐ ܘܒܶܣܪܳܐ܆ ܐܶܠܳܐ ܠܘܳܬ ܪ̈ܺܝܫܳܢܘܳܬܳܐ ܘܫܽܘܠ̈ܛܳܢܶܐ܆ ܘܰܠܘܳܬ ܐܰܚܺܝ̈ܕܰܝ ܥܳܠܡܳܐ ܕܚܶܫܽܘܟܳܐ ܕܥܳܠܡܳܐ ܗܳܢܳܐ܆ ܠܘܳܬ ܪ̈ܽܘܚܶܐ ܕܒܺܝܫܽܘܬܳܐ^[43].

ܘܰܐܟܙܢܳܐ ܕܰܐܕܪܺܝܢܰܛܳܐ ܩܳܐܶܡ ܗ̱ܘܳܐ ܒܶܣܛܰܐܕܝܽܘܢ ܕܣܳܗܕܽܘܬܳܐ܆ ܟܰܕ ܒܢܶܓ̈ܕܶܐ ܘܰܒܫܶܢ̈ܕܶܐ ܕܟܽܠ ܙܢܺܝ̈ܢ ܡܶܬܢܰܬܰܫ ܗ̱ܘܳܐ܆ ܘܠܳܐ ܡܰܫܶܦ ܗ̱ܘܳܐ ܐܰܘ ܡܶܬܪܰܦܶܐ. ܕܗܰܘ ܕܠܰܠܒܺܝܒܽܘܬܶܗ ܘܠܰܡܛܰܝܒܽܘܬܶܗ ܘܥܽܘܬܳܕܶܗ ܕܰܠܘܳܬ ܩܺܝܢ̈ܕܽܘܢܽܘ ܕܰܚܠܳܦ ܡܫܺܝܚܳܐ܆ ܐܳܦ ܗܳܝ ܫܰܠܗܶܒܺܝܬܳܐ ܗܳܝ ܕܢܽܘܪܳܐ ܐܰܫܦܰܬ. ܘܟܰܕ ܒܰܕܡܽܘܬ ܒܰܝܬܽܘܢܳܐ ܡܶܕܶܡ ܓܠܺܝܠܳܐ ܘܚܽܘܕܪܳܢܳܝܳܐ ܘܰܕܕܳܡܶܐ ܠܰܡܥܰܪܬܳܐ ܡܶܕܶܡ ܐܪܐ ܠܝܬܘܗܝ ܐܫܬܡܠܝ݀ܬ؟222 ܐܶܫܬܰܡܠܝܰܬ܆ ܘܰܠܦܰܓܪܶܗ ܚܶܒ̣ܫܰܬ ܘܡܶܢ ܠܒܰܪ ܟܶܪܟܰܬ܆ ܘܠܳܐ ܡܶܬܛܰܠܩܳܢܳܐ ܠܗܳܢܳܐ ܢܶܛܪܰܬ܆ ܠܢܰܦܫܶܗ ܠܘܳܬ ܪ̈ܽܘܚܳܬܳܐ ܫܡܰܝܳܢ̈ܝܳܬܳܐ ܫܰܕܰܪܬܳܗ̇.

ܘܟܰܕ ܡܶܢ ܬܰܡܳܢ ܚܳܐܰܪ ܒܰܢ܆ ܚܳܕܝܳܐܺܝܬ ܠܒܳܥ̈ܘܳܬܳܐ ܕܰܚܠܳܦܰܝܢ ܡܰܣܶܩ ܠܘܳܬ ܐܰ‌ܠܳܗܳܐ ܕܟܽܠ܆ ܟܰܕ ‌ܐܺܝܬܰܘܗ̱ܝ ܡܥܰܕܪܳܢܳܐ ܘܺܐܝܙܓܰܕܳܐ ܕܠܳܐ ܐܰܓܪܳܐ ܕܬܰܟ̈ܫܦܳܬܳܐ ܕܺܝܠܰܢ܆ ܘܫܰܘܬܳܦܳܐ ܕܡܰܪ̈ܢܝܳܬܳܐ ܕܚܰܝ̈ܶܐ ܕܺܝܠܰܢ. ܘܟܰܕ ܕܚܺܝܠܳܐܺܝܬ ܡܰܢ ܚܳܐܰܪ ܠܽܘܩܒܰܠ ܫ̈ܺܐܕܶܐ ܘܣܰܓܺܝ ܠܳܐ ܡܶܣܬܰܝܒܪܳܢܳܐܺܝܬ. ܐܳܚܶܕ ܕܶܝܢ ܠܪ̈ܶܓܠܶܐ ܕܥܰܒ̈ܕܶܐ ܕܥܳܪܩܺܝܢ ܘܰܕܓܰܢܳܒ̈ܶܐ܆ ܘܟܰܕ ܡܚܰܘܶܐ ܒܢܽܘܗܪܳܐ ܠܥܰܡ̈ܠܶܐ ܠܺܠܝ̣ܳܝ̣̈ܶܐ ܘܰܡܛܰܫ̈ܰܝܳܐ ܕܗܳܢܽܘܢ ܕܰܡܚܰܠܨܺܝܢ ܡܳܐܢ̈ܶܐ ܘܦܳܠܫܺܝܢ ܒ̈ܳܬܶܐ܆ ܘܰܡܦܰܪܣܶܐ ܣܰܟ̈ܠܘܳܬܳܐ܆ ܘܰܠܟܽܠܗܽܘܢ ܟܰܕ ܦܟܺܝܪܺܝܢ ܡܰܝܬܶܐ ܠܘܳܬܶܗ ܟܰܕ ܗܳܢܳܐ ܐܺܝܩܳܪܳܐ ܟܒܰܪ ܡܶܢ ܡܫܺܝܚܳܐ ܢܣܰܒ܆ ܡܶܛܽܠ ܕܰܚܘܺܝܚܳܐܺܝܬ ܠܰܐܣܽܘܪ̈ܶܐ ܕܰܚܠܳܦܰܘܗ̱ܝ ܩܰܒܶܠ܆ ܟܰܕ ܠܘܳܬ ܓܰܘܙܰܠܬܳܐ ܡܶܬܩܰܪܰܒ ܗ̱ܘܳܐ. ܠܗܳܠܶܝܢ ܕܳܐܦ ܝܰܬܺܝܪ̈ܶܐ ܚܰܘܺܝ ܐܶܢܽܘܢ܆ ܟܰܕ ܗܽܘ ܠܶܗ ܐܶܣܰܪ ܒܰܐܣܽܘܪ̈ܶܐ ܨܶܒܝܳܢܳܝ̈ܶܐ ܕܰܡܣܰܝܒܪܳܢܽܘܬܳܐ. ܗܳܝ ܓܶܝܪ ܕܰܚܠܳܦ ܡܫܺܝܚܳܐ ܢܕܽܘܢ ܐ̱ܢܳܫ ܕܢܶܚܰܫ܆ ܐܰܣܽܘܪܳܐ ܠܳܐ ܡܶܫܬܰܪܝܳܢܳܐ ܘܠܳܐ ܡܶܬܦܰܣܩܳܢܳܐ ܐܺܝܬܶܝܗ̇܆ ܡܶܛܽܠ ܟܺܝܬ ܕܨܶܒܝܳܢܳܝܬܳܐ ܗ̱ܝ. ܠܳܐ ܡܶܕܶܡ ܓܶܝܪ ܐܺܝܬ ܝܰܬܺܝܪ ܩܛܺܝܪܳܢܳܝ ܘܰܩܫܶܐ ܡܶܢ ܚܽܘܫܳܒܳܐ ܓܰܒܪܳܢܳܝܳܐ.

ܕܰܠܡܳܐ ܡܶܕܶܡ ܕܰܐܝܟ ܗܳܟܰܢ ܡܶܫܟܚܳܐ ܗ̱ܘܳܬ ܕܬܰܦܨܰܚ ܘܰܬܦܰܪܓܶܐ ܠܰܢ܆ ܚܙܳܬܳܐ ܗܳܝ ܕܶܐܬܡܳܠܝ̱܆ ܐܰܪܰܐ ܠܳܐ ܐܶܬܬܰܪܣܺܝܬܽܘܢ ܘܶܐܬܒܰܣܰܡܬܽܘܢ ܒܢܰܦ̈ܫܳܬܟܽܘܢ܆ ܘܰܡܝܰܬܪ̈ܶܐ ܗܘܰܝܬܽܘܢ ܡܶܢܶܗ ܕܫܶܡܥܳܐ ܒܰܠܚܽܘܕ܆ ܐܰܝܟܳܐ ܗ̱ܝ ܓܶܝܪ ܕܳܡܝܽܘܬܳܐ ܠܦܽܘܢܳܩܳܐ ܕܒܶܣܪܳܐ ܘܠܰܚܙܳܬܳܐ ܡܰܛܥܝܳܢܺܝܬܳܐ ܕܥܰܝ̈ܢܶܐ܆ ܘܰܠܗܰܢܺܝܽܐܘܬܳܐ ܕܢܰܦܫܳܐ ܘܰܠܬܶܐܽܘܪܺܝܰܐ ܪܽܘܚܳܢܳܝܬܳܐ. ܣܰܓܺܝܳܐܐ ܗܳܝ ܕܒܰܡܨܰܥܬܳܐ. ܘܗܳܢܳܐ ܟܽܠܶܗ܆ ܟܡܳܐ ܕܰܕܢܰܟܦܽܘܬܳܐ܆ ܘܰܕܦܶܗܝܳܐ ܕܚܽܘ̈ܫܳܒܶܐ.

ܐܳܦ ܓܶܝܪ ܐܰܢ̱ܬ܆ ܣܺܝܡ ܠܽܘܩܒܰܠ ܓܽܘܚ̈ܟܶܐ ܠܳܐ ܡܶܬܠܰܒ̈ܟܳܢܶܐ܆ ܠܕܶܡܥܬܳܐ ܕܰܬܘܳܬ ܢܰܦܫܳܐ. ܠܽܘܩܒܰܠ ‌ܐܰܫܺܝܕܽܘܬܳܐ ܕܶܝܢ ܚܺܝܨܽܘܬܳܐ. ܘܠܽܘܩܒܰܠ ܝܰܥܢܽܘܬܳܐ ܕܶܝܢ ܣܳܦܩܽܘܬܳܐ ܕܡܶܐܟ̈ܠܳܬܳܐ܆ ܕܰܡܠܶܐ ܣܽܘܢܩܳܢܳܐ ܘܠܳܐ ܝܰܬܺܝܪܽܘܬܳܐ. ܠܽܘܩܒܰܠ ܙܡܺܝܪ̈ܳܬܳܐ ܛܰܠܝܽܘ̈ܣܳܝܳܬܳܐ ܕܰܒܫܽܘ̈ܩܶܐ܆ ܗܳܢܶܝܢ ܟܺܝܬ ܕܟܰܕ ܒܥܺܝܪܽܘܬܳܐ ܡܶܬܚܰܫܰܒ ܠܗܶܝܢ ܐ̱ܢܳܫ܆ ܡܶܬܚܰܡܰܨ ܒܗܶܝܢ ܡܶܢ ܟܽܠܦܪܽܘܤ܆ ܠܡܰܙܡܽܘܪ̈ܶܐ ܕܰܒܥܺܕܬܳܐ ܘܠܽܘܩܒܰܠ ܟܽܠܗܶܝܢ܆ ܠܠܳܐ ܡܶܬܩܰܛܪܓܳܢܽܘܬܳܐ ܕܡܶܢ ܬܺܐܪܬܳܐ. ܠܣܰܒܪܳܐ ܗܰܘ ܕܠܳܐ ܡܰܒܗܶܬ ܘܩܰܪܺܝܒ ܠܗܰܝܡܳܢܽܘܬܳܐ^[44]܆ ܘܰܡܫܰܪܪܳܐܺܝܬ ܡܶܣܬܰܟܶܐ ܘܰܥܬܺܝܕ܆ ܗܳܝ ܕܰܬܢܺܝܚ ܠܰܐܠܳܗܳܐ ܘܠܳܐ ܬܰܪܓܙܺܝܘܗ̱ܝ. ܕܗܳܝ܆ ܕܡܳܢܳܐ ܕܝܰܬܺܝܪ ܛܽܘܒܬܳܢ ܡܶܢܳܗ̇ ܢܕܽܘܢ ܐ̱ܢܳܫ܆ ܟܰܕ ܫܰܦܺܝܪ ܡܶܬܪܰܥܶܐ. ܠܗܰܘ ܕܳܐܦ ܩܽܘܒܳܠ ܛܰܝܒܽܘܬܳܐ ܕܥܰܠ ܟܽܠܗܶܝܢ ܢܰ݀ܣܶܩ܆ ܡܶܛܽܠ ܕܠܶܗ ܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܳܐ. ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܥܶܣܪܺܝܢ ܘܶܫܬܳܐ.

ܐܶܫܰܥܝܐ. 3: 3 [1]

ܐ. ܩܘܪ̈ܝܢܬܝܐ. 3: 10 [2]

ܒ. ܩܘܪ̈ܝܢܬܝܐ. 8: 14 [3]

 ܠܩܽܘܢܛܪ̈ܐ[4]

ܡܙܡܘܪ̈ܐ. 78: 9 [5]

ܦܪܟܣܝܣ. 11: 26 [6]

ܝܥܩܘܒ. 2: 1 [7]

ܪ̈ܗܘܡܝܐ. 12: 9 ـ 12[8]

ܐܦܣ̈ܝܐ. 2: 15 ـ 16 [9]

ܡܙܡܘܪ̈ܐ. 82: 6 [10]

ܪ̈ܗܘܡܝܐ. 6: 4  ܐܦ ܓܠܛܝ̈ܐ. 5: 24 [11]

ܩܘܠܣ̈ܝܐ. 3: 5 [12]

ܩܘܠܣ̈ܝܐ. 3: 1 ـ 2 [13]

ܐܶܫܬܓܰܪܬܽܘܢ[14]

ܕܽܘܘܳܕܳܐ[15]

ܡܬܝ. 13: 17 [16]

ܐ. ܦܛܪܘܣ. 1: 12 [17]

ܐܰܝܟܰܢܳܐ[18]

ܡܙܡܘܪ̈ܐ. 36: 7 [19]

ܪ̈ܗܘܡܝܐ. 11: 33 ـ 36  ܐܦ ܐܫܥܝܐ. 40: 13[20]

ܝܘܚܢܢ. 16: 33 [21]

ܐܫܥܝܐ. 65: 11 [22]

 ܕܢܣ̣ܒܪ ܕܐܝܬ ܓܕܐ[23]

ܡܬܝ. 10: 29 [24]

ܡ̈ܰܬܠܐ. 12: 10 [25]

 ܩ̈ܳܠܶܐ ܚܰܣܺܝ̈ܢܶܐ[26]

 ܕܶܚܠܬܳܐ[27]

 ܢܰܓܺܝܪ̈ܳܬܳܐ[28]

ܡ̈ܰܬܠܐ. 21: 31 [29]

ܡܶܬܩܰܫܶܐ ܠܳܟ[30]

ܝܫܘܥ ܒܪ ܐܰܣܝܪܳܐ. 18: 11 ـ 12 [31]

ܝܥܩܘܒ. 4: 17 [32]

ܐ. ܩܘܪ̈ܝܢܬܝܐ. 9: 9 [33]

ܡܙܡܘܪ̈ܐ. 144: 16 [34]

ܐ. ܩܘܪ̈ܝܢܬܝܐ. 9: 14 [35]

ܬܶܢܝܳܢ ܢܳܡܽܘܣܳܐ. 25: 4 [36]

ܐ. ܩܘܪ̈ܝܢܬܝܐ. 9: 9 ـ 10 [37]

ܡܬܝ. 10: 10 [38]

ܡܬܝ. 12: 33 [39]

ܠܡܰܡܳܕܽܘ[40]

ܐܦܣ̈ܝܐ. 4: 30 [41]

ܡܙܡܘܪ̈ܐ. 91: 3 [42]

ܐܦܣ̈ܝܐ. 6: 12 [43]

ܪ̈ܗܘܡܝܐ. 5: 5 [44]