ܡܺܐܡܪܳܐ ܕܥܶܣܪܺܝܢ ܘܚܰܡܫܳܐ

ܥܰܠ ܦܰܢܛܺܝܩܽܘܤܛܺܐ[1].

25: ܟܽܠܚܰܕ ܡܶܢ ܚܰܓ̈ܶܐ ܕܰܐ‎ܠܳܗܳܐ܆ ܥܽܘܗܕܳܢܳܐ ܕܦܽܘܪܩܳܢܳܐ ܕܺܝܠܰܢ ܐܺܝܬ ܠܶܗ܆ ܘܰܫܪܳܝܳܐ ܕܰܚܕܳܐ ܡܶܢ ܐܰܦܽܘܦܰܣܺܝ̈ܤ ܗܳܠܶܝܢ ܕܥܰܠ ܓܶܢܣܳܐ ܐ̱ܢܳܫܳܝܳܐ. ܕܰܐܝܟ ܐܰܝܟܰܢ܆ ܐܶܬܺܝܠܶܕ ܡܫܺܝܚܳܐ؟ ܘܰܒܝܰܕ ܡܶܐܬܺܝܬܶܗ ܕܒܰܒܣܰܪ ܐܶܬܓܠܺܝ ܠܰܢ. ܕܰܐ‎ܠܳܗܳܐ ‌ܐܺܝܬܰܘܗ̱ܝ ܫܰܪܺܝܪܳܐ. ܘܰܠܥܺܐܕܳܐ ܕܺܝܠܶܗ ܗܰܘ ܕܡܶܬܚܰܙܝܳܢܽܘܬ ܐܰ‎ܠܳܗܳܐ ܐܰܘܟܺܝܬ ܕܕܶܢܚܳܐ ܘܰܕܒܶܝܬ ܝܰܠܕܳܐ ܡܥܰܕܥܕܺܝܢܰܢ. ܟܰܕ ܓܶܝܪ ܐܶܬܺܝܠܶܕ ܠܦܽܘܪܩܳܢܳܐ. ܘܰܠܚܰܕܽܘܬܳܐ ܕܥܳܠܡܳܐ ܟܽܠܶܗ܆ ܫܪܳܐ ܠܗܳܝ ܕܰܒܥܳܩ̈ܳܬܳܐ ܬܺܐܠܕܺܝܢ ܒܢܰܝ̈ܳܐ^[2]܆ ܕܥܰܠ ܚܰܘܳܐ ܐܶܬܓܰܙܪܰܬ. ܬܽܘܒ. ܛܥܶܡ ܡܰܘܬܳܐ ܒܰܒܣܰܪ^[3]܆ ܘܰܐܡܺܝܬ ܒܡܰܘܬܳܐ ܕܺܝܠܶܗ ܠܡܰܘܬܳܐ܆ ܘܟܰܕ ܩܳܡ. ܐܰܩܺܝܡ ܠܰܢ ܥܰܡܶܗ܆ ܘܰܡܫܰܡܠܶܝܢ ܚ̱ܢܰܢ ܥܽܘܗܕܳܢܳܐ ܕܰܩܝܳܡܬܶܗ܆ ܕܒܰܛܺܝܠܬܳܐ ܥܒܰܕܬܳܗ̇ ܠܗܳܝ ܕܥܰܠ ‌ܐܳܕܳܡ ܐܶܬܓܰܙܪܰܬ ܡܶܛܽܠ ܛܥܳܡܬܳܐ ܠܳܐ ܢܳܡܽܘܣܳܝܬܳܐ ܕܺܐܝܠܳܢܳܐ܆ ܗܳܝ ܕܰܒܝܰܘܡܳܐ ܗܰܘ ܕܬܶܐܟܠܽܘܢ ܡܶܢܶܗ ܒܡܰܘܬܳܐ ܬܡܽܘܬܽܘܢ^[4]܆ ܘܗܳܝ ܕܥܰܦܪܳܐ ܐܺܝܬܰܝܟ ܘܰܠܥܰܦܪܳܐ ܬܺܐܙܰܠ^[5].

ܡܶܢ ܒܳܬܰܪ ܩܝܳܡܬܳܐ. ܣܠܶܩ ܠܰܫܡܰܝܳܐ܆ ܘܰܢܚܶܬ ܥܠܰܝܢ ܪܽܘܚܳܐ ܩܰܕܺܝܫܳܐ ܟܰܕ ܐܶܬܡܰܠܺܝܘ ܚܰܡܫܺܝܢ ܝܰܘ̈ܡܳܬܳܐ ܡܶܢ ܝܰܘܡܳܐ ܕܰܩܝܳܡܬܳܐ. ܢܚܶܬ ܕܶܝܢ. ܠܰܘ ܟܰܕ ܕܽܘܟܬܳܐ ܡܶܢ ܕܽܘܟܬܳܐ ܚܰܠܶܦ܆ ܐܰܝܟܰܢܳܐ ܓܶܝܪ ܗܰܘ ܕܰܠܟܽܠ ܡܳܠܶܐ܆ ܐܶܢ ܟܺܝܬ ܪܽܘܚܶܗ ܕܡܳܪܝܳܐ ܐܰܝܟ ܕܰܟܬܺܝܒ ܡܠ̣ܳܬ ܠܡܶܬܥܰܡܪܳܢܺܝܬܳܐ^[6]܆ ܐܶܠܳܐ. ܒܗܳܝ ܕܺܝܕܺܝܥܬܳܐ ܘܰܕܢܺܝܚܬܳܐ ܘܰܓܠܺܝܬܳܐ ܥܒܰܕ ܠܰܢ ܠܡܰܥܒܕܳܢܽܘܬܳܐ ܕܰܐ‎ܠܳܗܽܘܬܳܐ. ܘܡܶܛܽܠܗܳܕܶܐ܆ ܠܥܺܐܕܳܐ ܕܦܰܢܛܺܩܽܘܤܛܺܐ ܡܥܰܕܥܕܺܝܢܰܢ. ܐܶܫܬܰܪܝܰܬ ܓܶܝܪ ܐܳܦ ܒܝܰܕ ܗܳܢܳܐ ܬܽܘܒ ܐܰܦܽܘܦܰܣܺܝܤ ܐ̱ܚܪܺܬܳܐ܆ ܗܳܝ ܕܰܓܙܰܪ ܡܳܪܝܳܐ ܐܰ‎ܠܳܗܳܐ ܥܰܠ ܓܶܢܣܳܐ ܕܺܝܠܰܢ܆ ܐܶܡܰܬܝ ܕܰܥܬܺܝܕ ܗ̱ܘܳܐ ܠܡܰܝܬܳܝܽܘ ܛܳܘܦܳܢܳܐ ܥܰܠ ‌ܐܰܪܥܳܐ܆ ܟܰܕ ܐܳܡܰܪ: ܕܠܳܐ ܬܶܥܡܰܪ ܪܽܘܚܝ ܒܰܒܢܰܝ̈ܢܳܫܳܐ ܗܳܠܶܝܢ ܠܥܳܠܰܡ܆ ܡܶܛܽܠ ܕܒܶܣܪܳܐ ܐܺܝܬܰܝܗܽܘܢ^[7].

ܗܳܢܳܐ ܕܶܝܢ ܥܺܐܕܳܐ ܕܦܰܢܛܺܩܽܘܤܛܺܐ܆ ܛܽܘܦܣܳܢܳܐܺܝܬ ܡܶܫܬܰܡܠܶܐ ܗ̱ܘܳܐ. ܐܳܦ ܠܘܳܬ ܥܶܒܪ̈ܳܝܶܐ܆ ܐܰܟܙܢܳܐ ܕܳܐܦ ܗܰܘ ܕܦܶܣܟܳܐ ܡܶܫܬܰܡܠܶܐ ܗ̱ܘܳܐ ܕܶܝܢ܆ ܗܳܟܰܢܳܐ. ܒܝܰܘ̈ܡܳܬܳܐ ܕܰܚܨܳܕܳܐ܆ ܟܰܕ ܫܩܺܝܠܳܐ ܗ̱ܘܳܬ ܡܶܟܺܝܠ ܫܶܒܠܳܐ ܩܰܘܡܬܳܐ. ܘܰܡܫܰܡܠܰܝ ܗ̱ܘܳܐ ܦܺܐܪܳܗ̇܆ ܡܶܬܢܰܣܒܳܐ ܗ̱ܘܳܬ ܟܰܦܳܐ ܡܶܢ ܚܰܩܠܳܐ܆ ܘܣܳܠܩܳܐ ܗ̱ܘܳܬ ܩܕܳܡ ܡܳܪܝܳܐ. ܣܳܠܩܳܐ ܗ̱ܘܳܬ ܕܶܝܢ ܠܰܘ ܒܶܗ ܒܝܰܘܡܳܐ ܗܰܘ ܕܶܐܬܢܰܣܒܰܬ ܒܶܗ܆ ܐܶܠܳܐ. ܒܝܰܘܡܳܐ ܗܰܘ ܕܒܳܬܪܶܗ. ܘܡܶܢ ܗܰܘ ܡܶܬܡܢܶܝܢ ܗ̱ܘܰܘ ܝܰܘ̈ܡܳܬܳܐ ܚܰܡܫܺܝܢ. ܘܝܰܘܡܳܐ ܗܰܘ ܕܰܡܡܰܠܶܐ ܗ̱ܘܳܐ ܠܶܗ ܠܡܶܢܝܳܢܳܐ ܗܳܢܳܐ܆ ܚܰܓܳܐ ‌ܐܺܝܬܰܘܗ̱ܝ ܗ̱ܘܳܐ. ܘܡܶܬܩܪܶܐ ܗ̱ܘܳܐ. ܦܰܢܛܺܩܽܘܤܛܺܐ.

ܐܷܠܳܐ ܐܶܢ ܫܳܦܪܳܐ ܠܟܽܘܢ܆ ܐܳܦ ܠܗܶܝܢ ܠܰܟܬܺܝ̈ܒܳܬܳܐ ܢܳܡܽܘܣܳܝ̈ܳܬܳܐ ܢܶܫܡܰܥ܆ ܕܗܳܟܰܢܳܐ ܐܺܝܬ ܠܗܶܝܢ. ܘܬܶܡܢܽܘܢ ܠܟܽܘܢ ܡܶܢ ܝܰܘܡܳܐ ܕܠܰܡܚܳܪ ܕܫܰܒ̈ܶܐ. ܡܶܢ ܝܰܘܡܳܐ ܗܰܘ ܕܰܬܩܰܪܒܽܘܢ ܒܶܗ ܟܰܦܳܐ ܕܦܽܘܪܫܳܢܳܐ܆ ܫܒܰܥ ܫܰܒ̈ܶܐ ܡܫܰܡ̈ܠܝܳܬܳܐ ܬܶܡܢܶܐ. ܥܕܰܡܳܐ ܠܝܰܘܡܳܐ ܕܒܳܬܪܳܗ̇ ܕܫܰܒܬܳܐ ܐ̱ܚܪܺܬܳܐ܆ ܚܰܡܫܺܝܢ ܝܰܘ̈ܡܳܬܳܐ ܬܶܡܢܽܘܢ^[8].

ܢܶܥܒܰܪ ܡܶܟܺܝܠ ܡܶܢ ܛܽܘܦܣܳܐ ܠܘܳܬ ܫܪܳܪܳܐ. ܟܰܦܳܐ ܕܫܶܒ̈ܠܶܐ ܡܠܺܝ̈ܠܳܬܳܐ܆ ܗܳܢܰܘ ܕܶܝܢ ܓܶܢܣܳܐ ܕܺܝܠܰܢ܆ ܡܫܺܝܚܳܐ ‌ܐܺܝܬܰܘܗ̱ܝ܆ ܗܰܘ ܡܶܠܬܳܐ ܕܰܐ‎ܠܳܗܳܐ ܕܶܐܬܒܰܣܰܪ ܚܠܳܦܰܝܢ܆ ܗܽܘ ܓܶܝܪ ܗܘ̣ܳܐ ܪܺܝܫܺܝܬܳܐ ܕܺܝܠܰܢ ܕܠܳܐ ܡܶܬܚܰܒܠܳܢܽܘܬܳܐ܆ ܐܰܝܟܰܢܳܐ ܕܳܐܕܳܡ ܗܰܘ ܩܰܕܡܳܝܳܐ ܕܰܚܒܳܠܳܐ܆ ܒܝܰܕ ܥܒܳܪ ܦܽܘܩܕܳܢܳܐ. ܕܟܰܦܳܐ ܕܶܝܢ ܪܺܝܫܺܝܬܳܐ ܐܺܝܬܶܝܗ̇܆ ܣܳܗܶܕ ܟܬܳܒܳܐ ܟܳܗܢܳܝܳܐ ܟܰܕ ܗܳܟܰܢܳܐ ܐܳܡܰܪ: ܘܬܰܝܬܽܘܢ ܟܰܦܳܐ ܪܺܝܫܳܝܬܳܐ ܕܰܚܨܳܕܳܐ ܕܺܝܠܟܽܘܢ^[9]. ܦܰܘܠܽܘܤ ܕܶܝܢ. ܠܰܡܫܺܝܚܳܐ ܫܰܡܰܗ ܪܺܝܫܺܝܬܳܐ ܕܺܝܠܰܢ. ܟܰܕ ܐܳܡܰܪ: ܪܺܝܫܺܝܬܳܐ ܡܫܺܝܚܳܐ. ܒܳܬܰܪܟܶܢ. ܗܳܢܽܘܢ ܕܰܡܫܺܝܚܳܐ ܒܡܶܐܬܺܝܬܶܗ^[10].

ܗܳܕܶܐ ܗܳܟܺܝܠ ܟܰܦܳܐ܆ ܐܰܝܟ ܕܡܶܢ ܚܰܩܠܳܐ ܛܥܺܝܢܰܬ ܚ̈ܶܛܶܐ܆ ܡܶܢ ܓܶܢܣܳܐ ܕܺܝܠܰܢ ܐܶܬܚܰܨܕܰܬ݂܆ ܒܝܰܕ ܨܠܺܝܒܳܐ ܘܡܰܘܬܳܐ ܨܶܒܝܳܢܳܝܳܐ ܘܡܰܚܰܬܬܳܐ ܕܠܰܫܝܽܘܠ. ܒܝܰܘܡܳܐ ܕܶܝܢ ܕܒܳܬܪܶܗ܆ ܣܶܠܩܰܬ݂. ܘܶܐܬܟܰܗܢܰܬ݂ ܒܝܰܕ ܩܝܳܡܬܳܐ. ܗܽܘ ܓܶܝܪ ܦܳܪܽܘܩܰܢ ܒܶܐܘܰܢܓܶܠܺܝ̈ܰܐ ܐܳܡܰܪ܆ ܚܠܳܦܰܝܗܽܘܢ. ܐܶܢܳܐ ܠܺܝ ܡܩܰܕܶܫ ܐ̱ܢܳܐ܆ ܐܰܝܟܰܢܳܐ ܕܳܐܦ ܗܶܢܽܘܢ ܢܶܗܘܽܘܢ ܩܰܕܺܝܫܺܝܢ ܒܰܫܪܳܪܳܐ^[11].

ܟܰܕ ܠܛܽܘܦܣܳܐ ܗܳܟܺܝܠ ܗܰܘ ܥܰܬܺܝܩܳܐ ܢܳܩܦܺܝܢ ܚ̱ܢܰܢ܆ ܚܰܡܫܺܝܢ ܝܰܘ̈ܡܳܬܳܐ ܡܳܢܶܝܢ ܚ̱ܢܰܢ܆ ܠܰܘ ܡܶܢ ܝܰܘܡܳܐ ܗܰܘ ܕܶܐܬܚܰܨܕܰܬ݂ ܒܶܗ ܟܰܦܳܐ܆ ܐܶܠܳܐ ܡܶܢ ܝܰܘܡܳܐ ܗܰܘ ܕܒܳܬܪܶܗ܆ ܗܰܘ ܟܺܝܬ ܕܺܐܝܬܰܘܗ̱ܝ ܝܰܘܡܳܐ ܗܰܘ ܕܰܩܝܳܡܬܳܐ. ܡܰܠܽܘܢ ܕܶܝܢ. ܐܰܝܟܰܢܳܐ ܕܗܳܝ ܕܫܰܪܺܝܪܳܐ ܐܳܡܰܪ: ܗܽܘ ܛܽܘܦܣܳܐ ܗܰܘ ܥܰܬܺܝܩܳܐ ܢܩܶܦ ܠܰܫܪܳܪܳܐ܆ ܕܠܰܘ ܡܶܢ ܝܰܘܡܳܐ ܕܰܚܨܳܕܳܗ̇ ܕܟܰܦܳܐ ܥܒܰܕ ܡܶܢܝܳܢܳܐ ܕܗܳܠܶܝܢ ܚܰܡܫܺܝܢ ܝܰܘ̈ܡܳܬܳܐ܆ ܐܶܠܳܐ ܡܶܢ ܝܰܘܡܳܐ ܗܰܘ ܕܒܳܬܪܶܗ.

ܢܶܒܗܬܽܘܢ ܐܳܦ ܒܺܐܝܕܰܘ̈ܗ̱ܝ ܕܺܝܠܶܗ ܕܛܽܘܦܣܳܐ ܗܰܘ ܕܟܰܦܳܐ܆ ܗܳܢܽܘܢ ܕܰܒܗܰܓܳܓ̈ܘܳܬܳܐ ܕܛܳܥܝܽܘܬܳܐ ܕܶܐܘܛܶܘܟ̥ܶܐ ܦܳܗܶܝܢ܆ ܘܟܳܦܪܺܝܢ ܕܠܰܘ ܡܶܢܳܗ̇ ܟܰܕ ܡܶܢܳܗ̇ ܕܽܐܘܣܺܝܰܐ ܕܺܝܠܰܢ ‌ܐܺܝܬܰܘܗ̱ܝ ܒܶܣܪܶܗ ܕܦܳܪܽܘܩܰܢ. ܐܰܟܙܢܳܐ ܕܟܰܦܳܐ܆ ܫܰܘܝܰܬ ܒܓܶܢܣܳܐ ܐܺܝܬܶܝܗ̇ ܘܫܰܘܝܰܬ ܒܽܐܘܣܺܝܰܐ܆ ܠܗܳܠܶܝܢ ܫܶܒ̈ܠܶܐ ܕܫܰܪܟܳܐ ܕܚܰܩܠܳܐ܆ ܗܳܟܰܢܳܐ ܐܳܦ ܥܰܡܰܢܽܘܐܶܝܠ ܫܘܶܐ ܒܽܐܘܣܺܝܰܐ ‌ܐܺܝܬܰܘܗ̱ܝ ܒܰܒܣܰܪ ܠܰܢ ܒܢܰܝ̈ܢܳܫܳܐ܆ ܕܗܳܢܽܘܢ ܟܺܝܬ ܕܟܰܦܳܐ ܘܪܺܝܫܺܝܬܳܐ ܕܺܝܠܗܽܘܢ ܐܰܫܘܺܝ ܕܢܶܗܘܶܐ. ܐܶܠܳܐ ܚܙܺܝ ܠܺܝ܆ ܐܳܦ ܠܐ̱ܪܳܙܳܐ ܗܰܘ ܕܩܰܕܶܡ ܗ̱ܘܳܐ ܡܶܬܛܰܦܰܤ ܒܕܶܒܚܬܳܐ ܗܳܝ ܕܡܶܫܬܰܡܠܝܳܐ ܗ̱ܘܳܬ ܒܶܗ ܒܝܰܘܡܳܐ ܗܰܘ ܕܦܰܢܛܺܝܩܽܘܤܛܺܝ. ܘܰܬܩܰܪܒܽܘܢ ܐܳܡܰܪ ܕܒܶܚܬܳܐ ܚܕܰܬܳܐ ܠܡܳܪܝܳܐ. ܡܶܢ ܡܰܥܡܪܳܐ ܕܺܝܠܟܽܘܢ ܬܩܰܪܒܽܘܢ ܠܰܚܡ̈ܶܐ ܕܦܽܘܪܫܳܢܳܐ ܬܪܶܝܢ ܠܰܚ̈ܡܶܐ. ܡܶܢ ܬܪܶܝܢ ܥܶܣܪ̈ܽܘܢܶܐ ܢܶܗܘܶܐ ܠܰܚܡܳܐ ܗܰܘ ܚܰܕ. ܚܰܡܺܝ̈ܥܶܐ ܢܶܬܰܐܦܽܘܢ ܡܶܢ ܪܺܝܫ ܥܰܠ̈ܠܳܬܗܽܘܢ ܠܡܳܪܝܳܐ.

ܟܽܠ ܠܰܚܡܳܐ ܡܰܢ ܗܳܟܺܝܠ ܕܡܶܬܩܰܪܰܒ ܠܕܶܒܚܬܳܐ ܛܽܘܦܣܳܐ ‌ܐܺܝܬܰܘܗ̱ܝ ܕܥܰܡܰܢܽܘܐܶܝܠ. ܗܽܘ ܓܶܝܪ ‌ܐܺܝܬܰܘܗ̱ܝ ܠܰܚܡܳܐ ܗܰܘ ܕܡܶܢ ܫܡܰܝܳܐ ܢܚܶܬ^[12]܆ ܘܝܳܗܶܒ ܚܰܝ̈ܶܐ ܠܥܳܠܰܡ. ܡܶܢ ܬܪܶܝܢ ܥܶܣܪ̈ܽܘܢܶܐ ܕܩܰܡܚܳܐ ܠܺܝܫ ܗܽܘ ܚܰܕ ܠܰܚܡܳܐ܆ ܡܶܢ ܐܰ‎ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ܆ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܐܰܝܟ ܡܶܠܬܳܐ ܕܺܝܠܗܶܝܢ. ܕܰܡܫܰܡܠܳܝܽܘܬܳܐ ܓܶܝܪ ܐܺܝܬܶܝܗ̇ ܡܫܰܘܕܥܳܢܺܝܬܳܐ ܗܝ ܥܣܺܝܪܳܝܽܘܬܳܐ܆ ܡܶܛܽܠ ܗܺܝ ܟܺܝܬ ܕܰܡܫܰܡܠܝܳܐ ‌ܐܺܝܬܰܘܗ̱ܝ ܡܶܢܝܳܢܳܐ ܗܰܘ ܕܥܶܣܪܳܐ. ܬܪܶܝܢ ܕܶܝܢ ܠܰܚ̈ܡܶܐ ܒܝܰܘܡܳܐ ܗܰܘ ܕܦܰܢܛܺܝܩܽܘܤܛܺܐ ܡܶܬܩܰܪܒܺܝܢ ܗ̱ܘܰܘ. ܘܠܰܘ ܏ܓ܆ ܠܰܡܚܰܘܝܳܢܽܘܬܳܐ ܕܓܶܠܝܳܢܳܐ ܕܰܬܪܶܝܢ ܩܢܽܘ̈ܡܶܐ܆ ܕܰܒܪܳܐ ܐܳܡܰܪ ܐ̱ܢܳܐ ܘܰܕܪܽܘܚܳܐ ܩܰܕܺܝܫܳܐ. ܐܰܒܳܐ ܓܶܝܪ ܡܶܢ ܟܰܕܽܘ. ܩܰܕܺܝܡ ܗ̱ܘܳܐ ܝܺܕܺܝܥ. ܟܰܕ ܗܳܠܶܝܢ ܕܶܝܢ ܝܺܕܺܝ̈ܥܳܬܳܐ ܗܘ̈ܰܝ ܠܰܢ ܝܺܕܰܥܢܰܢ ܠܰܚܕܳܐ ܐܰ‎ܠܳܗܽܘܬܳܐ ܕܒܰܬܠܺܝܬܳܝܽܘܬܳܐ. ܗܰܘ ܓܶܝܪ ܕܰܡܝܰܩܰܪ ܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܆ ܠܰܐܒܳܐ ܡܶܢ ܟܽܠܦܪܽܘܤ ܡܝܰܩܰܪ܆ ܕܗܰܘ ‌ܕܺܐܝܬܰܘܗ̱ܝ ܕܺܝܠܶܗ ܒܪܳܐ ܘܳܐܦ ܪܽܘܚܳܐ ܩܰܕܺܝܫܳܐ.

ܗܳܝ ܕܶܝܢ ܕܗܶܢܽܘܢ ܠܰܚ̈ܡܶܐ ܚܰܡܺܝ̈ܥܶܐ ܢܶܬܩܰܪܒܽܘܢ܆ ܬܽܘܒ. ܐ̱ܪܳܙܳܐ ܐ̱ܚܪܺܢܳܐ ܡܚܰܘܝܳܐ ܠܰܢ. ܟܰܕ ܦܶܣܟܳܐ ܡܰܢ ܓܶܝܪ. ܘܥܺܐܕܳܐ ܗܰܘ ܕܡܰܥܒܰܪܬܳܐ ܡܥܰܕܥܕܺܝܢ ܗ̱ܘܰܝܢ܆ ܦܐܣܩ ܓܶܝܪ ܡܰܥܒܰܪܬܳܐ ܡܶܬܦܰܫܰܩ܆ ܥܒܰܪܢܰܢ ܓܶܝܪ ܡܶܢ ܥܰܒܕܽܘܬܳܐ ܒܺܝܫܬܳܐ ܕܳܐܟܶܠܩܰܪܨܳܐ ܘܰܕܫ̈ܺܐܕܶܐ ܒܝܰܕ ܕܡܶܗ ܕܺܝܚܺܝܕܳܝܳܐ܆ ܐܰܝܟܰܢܳܐ ܕܺܐܝܣܪܳܐܶܝܠ ܡܶܢ ܩܕܺܝܡ ܡܶܢ ܛܪܽܘܢܽܘܬܶܗ ܕܦܶܪܥܽܘܢ ܘܰܕܡܶܨܪ̈ܳܝܶܐ܆ ܘܡܶܢ ܡܚܽܘܬܳܐ ܕܗܰܘ ܕܡܰܘܒܶܕ ܗ̱ܘܳܐ ܠܒܽܘܟܪ̈ܰܝܗܽܘܢ܆ ܒܝܰܕ ܐܶܡܪܳܐ ܗܰܘ ܕܛܽܘܦܣܳܢܳܐܺܝܬ ܐܶܬܕܒܰܚ܆ ܠܰܚܡ̈ܶܐ ܦܰܛܺܝܪ̈ܶܐ ܡܶܬܦܰܩܕܺܝܢ ܗ̱ܘܰܝܢ ܠܰܡܩܰܪܳܒܽܘ܆ ܟܰܕ ܠܳܐ ܡܶܕܶܡ ܐܺܝܬ ܠܰܢ ܡܶܢ ܚܡܺܝܪܳܐ ܡܶܨܪܳܝܳܐ ܚܰܡܽܘܨܳܐ ܘܰܕܠܳܐ ܐܰ‌ܠܳܗ܆ ܐܰܝܟܰܢܳܐ ܕܳܐܦ ܦܰܘܠܽܘܤ ܐܳܡܰܪ: ܐܳܦ ܓܶܝܪ ܦܶܣܟܳܐ ܕܺܝܠܰܢ ܐܶܬܕܒܰܚ ܡܫܺܝܚܳܐ. ܐܰܝܟܰܢܳܐ ܟܺܝܬ ܕܰܢ݀ܥܰܕܥܶܕ܆ ܠܳܐ ܒܰܚܡܺܝܪܳܐ ܥܰܬܺܝܩܳܐ܆ ܐܳܦܠܳܐ ܒܰܚܡܺܝܪܳܐ ܕܒܺܝܫܽܘܬܳܐ ܘܰܕܡܰܪܺܝܪܽܘܬܳܐ. ܐܶܠܳܐ. ܒܦܰܛܺܝܪ̈ܶܐ ܕܕܰܟܝܽܘܬܳܐ ܘܕܰܫܪܳܪܳܐ^[13]. ܠܗܳܢܽܘܢ ܓܶܝܪ ܕܗܳܫܳܐ ܚܰܕܬܳܐܺܝܬ ܢܰܦܺܝܩܺܝܢ ܡܶܢ ܒܺܝܫܽܘܬܳܐ܆ 222ܡܶܬܥܰܩܪ̈ܳܢܝܳܬܳܐ ܡܶܬܥܰܪ̈ܩܳܢܝܳܬܳܐ ܐܺܝܬܰܝܗܶܝܢ ܥܰܬܺܝ̈ܩܳܬܳܐ^[14].

ܡܶܢ ܒܳܬܰܪ ܕܶܝܢ ܕܶܐܙܕܒܶܢܢ ܡܶܢ ܚܛܺܝܬܳܐ. ܒܰܕܡܳܐ ܕܰܡܫܺܝܚܳܐ. ܘܩܰܒܶܠܢܰܢ ܙܰܪܥܳܐ ܕܝܽܘܠ̈ܦܳܢܶܐ ܐܶܘܰܢܓܶܠܳܝ̈ܶܐ܆ ܐܳܦ ܦܺܐܪ̈ܶܐ ܠܡܰܝܬܳܝܽܘ ܡܶܬܦܰܩܕܺܝܢ ܚ̱ܢܰܢ܆ ܠܰܚ̈ܡܶܐ ܡܶܟܺܝܠ ܚܰܡܺܝ̈ܥܶܐ ܒܦܰܢܛܺܝܩܽܘܤܛܺܐ ܠܰܡܩܰܪܳܒܽܘ. ܘܠܳܗ̇ ܠܥܶܠܬܳܐ ܡܰܘܣܶܦ ܠܳܗ̇ ܗܽܘ ܟܬܳܒܳܐ ܟܳܗܢܳܝܳܐ. ܟܰܕ ܐܳܡܰܪ: ܚܰܡܺܝ̈ܥܶܐ ܢܶܬܰܐܦܽܘܢ ܡܶܢ ܪܺܝܫ ܥܰܠ̈ܠܳܬܳܐ ܠܡܳܪܝܳܐ^[15]. ܡܶܢ ܪܺܝܫ ܥܰܠ̈ܠܳܬܳܐ ܐܳܡܰܪ ‌ܐܺܝܬܰܘܗ̱ܝ ܗܰܘ ܚܡܺܝܪܳܐ܆ ܘܡܶܛܽܠܗܳܕܶܐ ܠܳܐ ܡܰܗܦܶܟ ܐ̱ܢܳܐ ܐܰܦܰܝ̈ ܡܶܢܶܗ. ܡܶܢ ܓܶܝܪ ܒܺܝܫܽܘܬܳܐ ܗܳܝ ܥܰܬܺܝܩܬܳܐ ܘܚܰܡܽܘܨܽܘܬܳܐ. ܡܰܓܗܰܝ ܗܽܘ ܠܶܗ ܠܗܳܢܳܐ ܘܰܡܚܰܪܰܪ܆ ܘܥܳܒܶܕ ܠܰܚܡܳܐ ܡܶܕܶܡ ‌ܐܺܝܬܰܘܗ̱ܝ. ܘܰܡܚܰܝܢܳܐ. ܥܰܠ ܗܳܢܳܐ ܚܡܺܝܪܳܐ. ܡܳܪܰܢ ܒܶܐܘܰܢܓܶܠܺܝ̈ܰܐ ܐܳܡܰܪ: ܕܕܳܡܝܳܐ ܐܺܝܬܶܝܗ̇ ܡܰܠܟܽܘܬܳܐ ܕܰܫܡܰܝܳܐ܆ ܠܰܚܡܺܝܪܳܐ ܗܰܘ ܕܟܰܕ ܫܶܩܠܰܬ ܐܰܢ̱ܬܬܳܐ ܛܡܰܪܬ̣ܶܗ ܒܰܬܠܳܬ ܣܳܐܺܝ̈ܢ ܕܩܰܡܚܳܐ܆ ܥܕܰܡܳܐ ܕܰܚܡܰܥ ܟܽܠܶܗ^[16].

ܢ݀ܚܽܘܪ ܕܶܝܢ ܒܶܗ ܒܛܽܘܦܣܳܐ ܗܰܘ ܕܺܝܠܳܗ̇ ܕܦܰܢܛܺܝܩܽܘܤܛܺܐ ܐܶܢ ܫܳܦܪܳܐ ܠܟܽܘܢ܆ ܝܰܬܺܝܪ ܣܰܓܺܝ ܒܪܶܚܡܰܬ ܥܰܡܠܳܐ. ܐܳܡܰܪ ܓܶܝܪ ܐܳܦ ܗܳܠܶܝܢ ܟܬܳܒܳܐ ܗܰܘ ܢܳܡܽܘܣܳܝܳܐ. ܠܰܚܡܳܐ ܘܰܦܪ̈ܺܝܟܳܬܳܐ ܚܰܕ̈ܬܳܬܳܐ ܡܚܰܪ̈ܟܳܬܳܐ܆ ܠܳܐ ܬܶܐܟܠܽܘܢ ܥܕܰܡܳܐ ܠܶܗ ܠܝܰܘܡܳܐ ܗܳܢܳܐ^[17]܆ ܥܕܰܡܳܐ ܕܰܬܩܰܪܒܽܘܢ ܐܰܢ̱ܬܽܘܢ ܩܽܘܪ̈ܒܳܢܳܐ ܕܰܐ‎ܠܳܗܳܐ ܕܺܝܠܟܽܘܢ. ܠܡܰܠܦܳܢܽܘܬܳܐ ܐܳܡܰܪ ܡܫܰܡܠܰܝܬܳܐ܆ ܗܳܝ ܕܡܶܢ ܦܺܐܪ̈ܶܐ ܚܰܕ̈ܬܶܐ ܘܙܰܪ̈ܥܶܐ ܐܶܘܰܢܓܶܠܳܝ̈ܶܐ܆ ܗܳܝ ܕܺܐܝܬܶܝܗ̇ ܠܰܚܡܳܐ ܬܽܘܪܣܳܝܳܐ ܕܗܳܢܽܘܢ ܕܰܡܫܰܡܠܶܝܢ܆ ܠܡܶܐܟܰܠ ܠܳܐ ܫܰܠܺܝܛ܆ ܩܕܳܡ ܝܰܘܡܳܐ ܕܦܰܢܛܺܝܩܽܘܤܛܺܐ܆ ܗܰܘ ܕܒܶܗ ܐܶܬܳܐ ܦܰܪܰܩܠܺܝܛܳܐ ܗܰܘ ܡܰܠܦܳܢܳܐ ܕܰܓܡܺܝܪ̈ܳܬܳܐ.

ܠܗܳܕܶܐ ܐܳܦ ܗܽܘ ܡܫܺܝܚܳܐ ܐܰܡܪܳܗ̇ ܓܰܠܝܳܐܺܝܬ ܒܶܐܘܰܢܓܶܠܺܝ̈ܰܐ ܠܬܰܠ̈ܡܺܝܕܶܐ ܕܺܝܠܶܗ. ܬܽܘܒ ܣܰܓܺܝ̈ܳܐܬܳܐ ܐܺܝܬ ܠܺܝ ܠܡܺܐܡܰܪ ܠܟܽܘܢ. ܐܶܠܳܐ. ܠܳܐ ܡܶܫܟܚܺܝܢ ܐܢ̱ܬܽܘܢ ܠܡܶܛܥܰܢ ܗܳܫܳܐ܆ ܐܶܡܰܬܝ ܕܶܝܢ ܕܢܺܐܬܶܐ ܗܰܘ܆ ܪܽܘܚܳܐ ܗܰܘ ܕܰܫܪܳܪܳܐ܆ ܢܗܰܕܶܝܟܽܘܢ ܠܘܳܬ ܟܽܠܶܗ ܫܪܳܪܳܐ^[18]. ܡܳܢܳܐ ܕܶܝܢ ܐ̱ܚܪܺܢܳܐ ܢܣܰܒܰܪ ܕܺܐܝܬܰܘܗ̱ܝ ܟܽܠܶܗ ܫܪܳܪܳܐ܆ ܐܶܠܳܐ ܐܶܢ ܡܶܬܓܰܠܝܳܢܽܘܬܳܐ ܡܫܰܡܠܰܝܬܳܐ ܕܰܬܠܺܝܬܳܝܽܘܬܳܐ. ܠܡܽܘܫܶܐ ܡܰܢ ܓܶܝܪ ܘܠܰܢܒܺܝ̈ܶܐ ܫܳܡܥܺܝܢ ܚ̱ܢܰܢ ܕܳܐܡܪܺܝܢ ܡܶܛܽܠ ‌ܐܰܒܳܐ܆ ܗܳܠܶܝܢ ܐܳܡܰܪ ܡܳܪܝܳܐ ܐܰ‎ܠܳܗܳܐ ܕܺܐܝܣܪܳܐܶܝܠ. ܠܰܒܪܳܐ ܕܶܝܢ. ܟܰܕ ܡܚܰܘܶܐ ܫܰܘܝܽܘܬ ܐܺܝܩܳܪܶܗ ܘܫܰܘܝܽܘܬ ܚܰܝܠܶܗ ܕܰܠܘܳܬ ܐܰܒܳܐ܆ ܕܡܰܙܥܶܩ ܟܰܕ ܡܰܠܶܦ ܗ̱ܘܳܐ ܒܶܐܘܰܢܓܶܠܺܝܽܘܢ܆ ܐܶܬܶܐܡܰܪ ܠܩܰܕܡܳܝ̈ܶܐ܆ ܠܳܐ ܬܶܩܛܽܘܠ. ܗܰܘ ܕܶܝܢ ܕܢܶܩܛܽܘܠ܆ ܡܚܰܝܒܳܐ ܢܶܗܘܶܐ ܠܕܺܝܢܳܐ. ܐܶܢܳܐ ܕܶܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܟܽܠ ܡܰܢ ܕܪܳܓܶܙ ܥܰܠ ‌ܐܰܚܽܘܗ̱ܝ ܐܺܝܩܺܐ܆ ܡܚܰܝܒܳܐ ܢܶܗܘܶܐ ܠܕܺܝܢܳܐ^[19]. ܗܳܝ ܕܶܝܢ ܕܶܐܢܳܐ ܐܳܡܰܪ ܐ̱ܢܳܐ ܠܟܽܘܢ܆ ܕܗܰܘ ܕܣܳܐܶܡ ܢܳܡܽܘܣܳܐ ܥܰܡ ܫܽܘܠܛܳܢܳܐ ܦܐܶܐ ܠܰܐܠܳܗܳܐ ܐܺܝܬܶܝܗ̇.

ܐܳܦ ܥܰܠ ܪܽܘܚܳܐ ܕܶܝܢ ܩܰܕܺܝܫܳܐ. ܒܳܗ̇ ܒܰܕܡܽܘܬܳܐ. ܐܳܡܪܺܝܢ ܗ̱ܘܰܘ ܡܫܰܡܫܳܢ̈ܶܐ ܕܕܺܝܰܐܬܺܝܩܺܐ ܚܕܰܬܳܐ܆ ܗܳܠܶܝܢ ܐܳܡܰܪ ܪܽܘܚܳܐ ܩܰܕܺܝܫܳܐ. ܐܰܝܟܰܢܳܐ ܕܒܦܪ̈ܟܣܺܝܤ ܕܰܫܠܺܝ̈ܚܶܐ ܟܬܺܝܒ^[20]. ܘܬܽܘܒ ܟܰܕ ܦܰܘܠܽܘܤ ܠܓܰܠܰܛܳܝ̈ܶܐ܆ ܗܳܠܶܝܢ ܟܳܬܶܒ ܗ̱ܘܳܐ ܥܰܠ ܢܰܦܫܶܗ܆ ܐܶܡܰܬܝ ܕܶܝܢ ܕܰܨܒܳܐ ܗܰܘ ܕܦܰܪܫܰܢܝ ܡܶܢ ܟܰܪܣܳܐ ܕܶܐܡܳܐ ܕܺܝܠܝ܆ ܘܰܩܪܳܢܝ ܒܝܰܕ ܛܰܝܒܽܘܬܶܗ ܕܢܶܓܠܶܐ ܠܰܒܪܶܗ ܒܺܝ܆ ܐܰܝܟܰܢܳܐ ܕܶܐ݀ܣܰܒܪܺܝܘܗ̱ܝ ܒܥܰܡ̱ܡ̈ܶܐ^[21]. ܒܦܪ̈ܟܣܺܝܤ ܕܰܫܠܺܝ̈ܚܶܐ. ܗܳܟܰܢܳܐ ܟܬܺܝܒ. ܟܰܕ ܡܫܰܡܫܺܝܢ ܗ̱ܘܰܘ ܠܡܳܪܝܳܐ ܘܨܳܝܡܺܝܢ܆ ܐܶܡܰܪ ܪܽܘܚܳܐ ܩܰܕܺܝܫܳܐ. ܦܪܽܘܫܘ ܠܺܝ ܠܒܰܪܢܰܒܰܐ ܘܰܠܫܳܐܘܳܠ ܠܰܥܒܳܕܳܐ ܗܰܘ ܕܰܩܪܺܝܬ̣ ܐܶܢܽܘܢ^[22]. ܚܳܙܶܐ ܐܰܢ̱ܬ ܕܰܠܗܰܘ ܕܰܦܪܰܫ ܘܰܩܪܳܐ ܐܰܒܳܐ ܠܬܶܫܡܶܫܬܳܐ ܕܶܐܘܰܢܓܶܠܺܝܽܘܢ܆ ܠܶܗ ܟܰܕ ܠܶܗ ܦܪܰܫ ܘܰܩܪܳܐ ܐܳܦ ܪܽܘܚܳܐ ܩܰܕܺܝܫܳܐ܆ ܠܰܘ ܡܫܰܡܫܳܢܳܐܺܝܬ. ܐܶܠܳܐ ܒܶܗ ܒܦܰܪܨܽܘܦܳܐ ܕܺܝܠܶܗ. ܘܰܒܫܰܠܺܝܛܽܘܬ ܒܝܳܬܳܐ ܘܰܐ‌ܠܳܗܳܐܝܬ܆ ܡܶܢ ܗܳܠܶܝܢ ܕܰܡܚܰܘܶܐ܆ ܕܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܘܰܕܫܽܘܒܚܳܐ ܘܰܕܚܰܝܠܳܐ ‌ܐܺܝܬܰܘܗ̱ܝ܆ ܫܰܘܝܳܐܺܝܬ ܠܰܐܒܳܐ ܘܠܰܒܪܳܐ.

ܟܰܕ ܗܳܠܶܝܢ ܗܳܟܺܝܠ ܝܳܕܰܥ ܐܰܢ̱ܬ܆ ܐܶܢ ܬܶܫܡܰܥ ܠܦܳܪܽܘܩܰܢ ܕܳܐܡܰܪ ܒܶܐܘܰܢܓܶܠܺܝܽܘܢ ܡܶܛܽܠ ܪܽܘܚܳܐ ܩܰܕܺܝܫܳܐ܆ ܠܳܐ ܓܶܝܪ ܢܡܰܠܶܠ ܡܶܢ ܢܰܦܫܶܗ܆ ܐܶܠܳܐ ܟܽܠܗܶܝܢ ܗܳܠܶܝܢ ܕܶܐܢ ܢܶܫܡܰܥ ܢܡܰܠܶܠ܆ ܘܰܠܗܳܠܶܝܢ ܕܳܐܬܝ̈ܳܢ ܢܰܘܕܰܥܟܽܘܢ܆ ܗܰܘ ܠܺܝ ܢܫܰܒܰܚ܆ ܡܶܛܽܠ ܕܡܶܢܝ ܕܺܝܠܝ ܢܶܣܰܒ ܘܰܢܚܰܘܶܝܟܽܘܢ^[23]܆ ܕܰܥ܆ ܕܒܰܡܕܰܒܪܳܢܽܘܬܳܐ ܗܳܠܶܝܢ ܐܳܡܰܪ ܗ̱ܘܳܐ: ܟܰܕ ܥܰܡ ܡܚܺܝܠܽܘܬܳܐ ܕܗܳܢܽܘܢ ܕܫܳܡܥܺܝܢ ܡܶܬܢܰܚܰܬ̣ ܗ̱ܘܳܐ܆ ܕܠܳܐ ܡܶܫܟܚܺܝܢ ܗ̱ܘܰܘ ܕܫܳܥܬܳܐ ܠܡܶܥܪܳܐ܆ ܠܓܶܠܝܳܢܳܐ ܕܰܐ‎ܠܳܗܽܘܬܶܗ ܕܦܰܪܰܩܠܺܝܛܳܐ܆ ܘܕܰܚܕܳܐ ܐܽܘܣܺܝܰܐ ܗܳܝ ܕܒܰܬܠܳܬܳܐ ܩܢܽܘ̈ܡܶܐ.

ܐܳܦ ܓܶܝܪ ܕܶܚܠܬܳܐ ܐܺܝܬܶܝܗ̇ ܗ̱ܘܳܬ݂܆ ܕܕܰܠܡܳܐ ܟܰܕ ܠܘܳܬ ܪܰܘܡܗܽܘܢ ܕܣܽܘ̈ܟܳܠܶܐ ܠܳܐ ܡܨܶܝܢ ܗ̱ܘܰܘ ܚܰܝܠܳܐ܆ ܕܰܬܠܳܬ ܪ̈ܺܝܫܳܢܘܳܬܳܐ ܐܺܝܬܶܝܗ̇ ܬܠܺܝܬܳܝܽܘܬܳܐ ܢܶܣܒܪܽܘܢ. ܘܠܰܘ ܠܰܚܕܳܝܽܘܬ ܪܺܝܫܳܢܽܘܬܳܐ܆ ܐܶܠܳܐ ܣܰܓܺܝܐܽܘܬ ܪܺܝܫܳܢܽܘܬܳܐ ܢܫܰܒܚܽܘܢ. ܡܶܛܽܠܗܳܕܶܐ܆ ܥܰܡ ܝܺܕܰܥܬܳܐ ܡܶܕܶܡ ܪܺܝܫܳܝܬܳܐ ܡܶܬܚܰܫܰܚ ܗ̱ܘܳܐ ܒܗܶܝܢ ܒܡ̈ܶܠܶܐ. ܘܟܰܕ ܐܳܡܰܪ ܕܣܰܓܺܝ̈ܳܐܬܳܐ ܐܺܝܬ ܠܺܝ ܠܡܺܐܡܰܪ ܠܟܽܘܢ܆ ܐܶܠܳܐ ܠܳܐ ܡܶܫܟܚܺܝܢ ܐܢ̱ܬܽܘܢ ܠܡܶܛܥܰܢ ܗܳܫܳܐ܆ ܐܶܡܰܬܝ ܕܶܝܢ ܕܢܺܐܬܶܐ ܗܰܘ܆ ܪܽܘܚܳܐ ܗܰܘ ܕܰܫܪܳܪܳܐ܆ ܢܗܰܕܶܝܟܽܘܢ ܠܘܳܬ ܟܽܠܶܗ ܫܪܳܪܳܐ^[24]. ܘܚܰܘܺܝ ܕܗܽܘ ܦܰܪܰܩܠܺܝܛܳܐ܆ ܕܺܝܕܰܥܬܳܐ ܗܳܝ ܕܝܰܬܺܝܪ ܡܫܰܡܠܝܳܐ. ܢܶܗܘܶܐ ܡܰܠܦܳܢܳܐ܆ ܡܶܚܕܳܐ ܩܰܦܚܳܗ̇ ܘܒܰܨܪܳܗ̇ ܠܡܶܠܬܶܗ܆ ܡܶܛܽܠ ܡܚܺܝܠܽܘܬܳܐ ܕܗܳܢܽܘܢ ܕܫܳܡܥܺܝܢ ܗ̱ܘܰܘ ܟܰܕ ܐܶܡܰܪ: ܠܳܐ ܓܶܝܪ ܢܡܰܠܶܠ ܡܶܢ ܢܰܦܫܶܗ܆ ܐܶܠܳܐ. ܟܽܠܗܶܝܢ ܗܳܠܶܝܢ ܕܶܐܢ ܢܶܫܡܰܥ ܢܡܰܠܶܠ. ܘܰܕܡܶܢ ܕܺܝܠܝ ܢܶܣܰܒ ܘܰܢܚܰܘܶܝܟܽܘܢ.

ܒܳܬܰܪܟܶܢ ܬܽܘܒ. ܟܰܕ ܚܳܙܶܐ ܗ̱ܘܳܐ ܕܰܒܝܰܕ ܗܳܠܶܝܢ ܡ̈ܶܠܶܐ܆ ܐܶܣܬܒܰܪ ܐܰܝܟ ܗܰܘ ܕܡܰܙܥܰܪ ܗ̱ܘܳܐ ܠܫܽܘܠܛܳܢܶܗ ܐܰ‎ܠܳܗܳܝܳܐ ܕܪܽܘܚܳܐ܆ ܡܩܺܝܡ ܠܳܗ̇ ܬܽܘܒ ܡܶܚܕܳܐ. ܘܰܡܥܰܠܶܐ ܠܳܗ̇ ܠܪܰܘܡܳܐ ܠܬܰܪܥܺܝܬܗܽܘܢ ܕܬܰܠܡܺܝ̈ܕܶܐ܆ ܘܡܰܝܬܶܐ ܒܳܬܰܪ ܗܳܠܶܝܢ. ܟܰܕ ܐܳܡܰܪ: ܟܽܠܗܶܝܢ ܗܳܠܶܝܢ ܕܺܐܝܬ ܠܶܗ ܠܰܐܒܳܐ. ܕܺܝܠܝ ܐܺܝܬܰܝܗܶܝܢ^[25]. ܡܶܛܽܠܗܳܕܶܐ ܐܶܡܪܶܬ܆ ܕܡܶܢ ܕܺܝܠܝ ܢܶܣܰܒ ܘܰܢܚܰܘܶܝܟܽܘܢ. ܠܳܐ ܬܶܣܒܪܽܘܢ ܐܳܡܰܪ܆ ܕܰܐܝܟ ܕܡܶܢ ܝܽܘܠܦܳܢܳܐ ܘܰܐܝܟ ܕܡܶܢ ܓܶܠܝܳܢܳܐ ܕܡܶܢ ܡܶܕܶܡ ܕܝܰܬܺܝܪ ܪܰܒ ܡܶܢܶܗ܆ ܟܽܠܗܶܝܢ ܗܳܠܶܝܢ ܕܶܐܢ ܢܶܫܡܰܥ ܪܽܘܚܳܐ ܩܰܕܺܝܫܳܐ܆ ܗܳܠܶܝܢ ܢܡܰܠܶܠ܆ ܘܰܐܝܟ ܐܰܝܠܶܝܢ ܕܠܳܐ ܐܺܝܬ ܠܶܗ܆ ܟܰܕ ܡܶܢ ܐ̱ܚܪܺܢܳܐ ܢܳܣܶܒ܆ ܢܶܬܶܠ ܠܟܽܘܢ ܝܺܕܰܥܬܳܐ.

ܐܰܟܙܢܳܐ ܓܶܝܪ ܐܳܡܰܪ. ܕܶܐܢܳܐ ܡܶܢ ܐܰܒܳܐ ܝܺܠܺܝܕ ܐ̱ܢܳܐ܆ ܘܟܽܠܗܶܝܢ ܗܳܠܶܝܢ ܕܺܐܝܬ ܠܶܗ ܠܰܐܒܳܐ ܕܺܝܠܝ ܐܺܝܬܰܝܗܶܝܢ܆ ܡܶܛܽܠ ܗܳܝ ܕܗܺܝ ܟܰܕ ܗܺܝ ܕܽܐܘܣܺܝܰܐ܆ ܘܰܡܕܰܒܪܳܢܳܐܺܝܬ ܒܪܰܡ ܐܳܡܰܪ ܐ̱ܢܳܐ ܥܰܠ ܢܰܦܫܝ ܕܢܳܣܶܒ ܐ̱ܢܳܐ ܠܗܶܝܢ ܠܗܳܠܶܝܢ܆ ܗܳܢܶܝܢ ܟܺܝܬ ܕܰܟܝܳܢܳܐܺܝܬ. ܐܺܝܬܰܝܗܶܝܢ ܠܺܝ܆ ܗܳܟܰܢܳܐ ܐܳܦ ܗܽܘ ܟܰܕ ܪܽܘܚܳܐ ܕܰܫܪܳܪܳܐ ‌ܐܺܝܬܰܘܗ̱ܝ܆ ܗܰܘ ܕܡܶܢ ܐܰܒܳܐ ܢܳܦܶܩ܆ ܘܕܺܐܝܬ ܠܶܗ^[26]. ܒܽܐܘܣܺܝܰܐ ܗܳܠܶܝܢ ܕܰܐܒܳܐ܆ ܕܡܶܢ ܕܺܝܠܝ ܢܳܣܶܒ ܡܶܬܶܐܡܰܪ. ܗܳܝ ܕܶܝܢ ܕܺܝܠܝ܆ ܘܠܳܐ ܡܶܕܶܡ ܐ̱ܚܪܺܢܳܐ ܐܺܝܬܶܝܗ̇܆ ܐܶܠܳܐ ܐܶܢ ܐܰܒܳܐ. ܡܶܛܽܠܗܳܕܶܐ. ܐܳܦ ܗܽܘ ܟܰܕ ܠܘܳܬ ܝܽܗ̱ܘ̈ܕܳܝܶܐ ܡܡܰܠܶܠ ܗ̱ܘܳܐ܆ ܡܚܰܠܶܛ ܗ̱ܘܳܐ ܠܡ̈ܶܠܶܐ ܗܳܠܶܝܢ ܡܕܰܒܪ̈ܳܢܝܳܬܳܐ ܘܰܠܗܳܠܶܝܢ ܐܰ‎ܠܳܗܳܝ̈ܳܬܳܐ ܟܰܕ ܐܳܡܰܪ: ܐܰܒܳܐ ܗܰܘ ܕܝܰܗ̱ܒ ܠܺܝ܆ ܝܰܬܺܝܪ ܡܶܢ ܟܽܠ ‌ܐܺܝܬܰܘܗ̱ܝ ܪܰܒܳܐ. ܘܬܽܘܒ. ܐܶܢܳܐ ܘܰܐܒܳܐ. ܚܰܕ ܚܢܰܢ^[27]. ܘܰܒܪܰܡ ܟܰܕ ܠܳܐ ܡܣܰܝܒܪܺܝܢ ܗ̱ܘܰܘ ܠܡܶܫܡܰܥ. ܫܰܘܝܽܘܬ ܐܺܝܩܳܪܶܗ ܘܫܰܘܝܽܘܬ ܐܽܘܣܺܝܰܐ ܕܺܝܠܶܗ ܕܰܠܘܳܬ ܐܰܒܳܐ܆ ܪܳܓܡܺܝܢ ܗ̱ܘܰܘ ܠܶܗ ܟܰܕ ܐܳܡܪܺܝܢ: ܡܶܛܽܠ ܥܒܳܕ̈ܶܐ ܛܳܒ̈ܶܐ. ܠܳܐ ܪܳܓܡܺܝܢܰܢ ܠܳܟ. ܐܶܠܳܐ ܡܶܛܽܠ ܓܽܘܕܳܦܳܐ܆ ܘܡܶܛܽܠ ܕܟܰܕ ܐܰܢ̱ܬ ܒܰܪܢܳܫܳܐ ܐܺܝܬܰܝܟ܆ ܥܳܒܶܕ ܐܰܢ̱ܬ ܢܰܦܫܳܟ ܐܰ‎ܠܳܗܳܐ^[28].

ܪܰܒܳܐ ܓܶܝܪ ܐܰܝܟ ܕܒܰܫܪܳܪܳܐ ‌ܐܺܝܬܰܘܗ̱ܝ ܝܽܘܠܦܳܢܳܐ ܘܬܰܘܕܺܝܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܘܠܳܐ ܐܺܝܬ ܗ̱ܘܳܐ ܐ̱ܢܳܫ ܡܶܢ ܒܢܰܝ̈ܢܳܫܳܐ ܕܣܳܦܶܩ ܗ̱ܘܳܐ ܗܳܕܶܐ ܠܡܰܘܕܳܥܽܘ܆ ܐܶܠܳܐ ܐܶܢ ܡܶܠܬܶܗ ܕܰܐ‎ܠܳܗܳܐ ܘܪܽܘܚܳܐ ܩܰܕܺܝܫܳܐ. ܡܶܛܽܠܗܳܕܶܐ. ܐܳܦ ܟܰܕ ܠܘܳܬ ܡܽܘܫܶܐ ܡܡܰܠܶܠ ܗ̱ܘܳܐ. ܐܳܡܰܪ ܗ̱ܘܳܐ: ܐܶܢܳܐ ܡܳܪܝܳܐ. ܘܶܐܬܚܙܺܝܬ̣ ܠܘܳܬ ܐܰܒܪܳܗܳܡ ܘܰܠܘܳܬ ܐܺܝܣܚܳܩ. ܘܰܠܘܳܬ ܝܰܥܩܽܘܒ܆ ܟܰܕ ܐܰ‎ܠܳܗܳܐ ܕܺܝܠܗܽܘܢ ܐܺܝܬܰܝ܆ ܘܰܫܡܳܐ ܕܺܝܠܝ ܡܳܪܝܳܐ܆ ܠܳܐ ܐܰܘܕܥܶܬ ܠܗܽܘܢ^[29].

ܡܳܢܳܐ ܕܶܝܢ ‌ܐܺܝܬܰܘܗ̱ܝ ܫܡܳܐ ܗܰܘ ܕܠܳܐ ܐܶܬܓܠܺܝ ܠܗܽܘܢ܆ ܐܶܠܳܐ ܐܶܢ ܗܰܘ ܕܰܬܠܺܝܬܳܝܽܘܬܳܐ ܠܳܐ ܒ̣ܪܺܝܬܳܐ܆ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ. ܛܳܒܳܐܺܝܬ ܕܶܝܢ ܐܶܡܰܪ: ܕܠܳܐ ܐܰܘܕܥܶܬ. ܗܳܢܰܘ ܕܶܝܢ. ܕܓܰܠܝܳܐ ܘܺܝܕܺܝܥܳܐ ܠܳܐ ܥܒܰܕ݀ܬܶܗ. ܐܳܦ ܓܶܝܪ ܐܰܝܟ ܕܰܒܝܰܕ ܪܶܡܙܳܐ ܘܦ̈ܶܠܴܐܬܳܐ ܚܰܘܝܶܗ ܗ̱ܘܳܐ܆ ܘܰܐܝܟ ܕܡܰܨܝܳܐ ܗ̱ܘܳܬ ܢܩܰܕܡܽܘܢ ܢܶܬܰܐܪܙܽܘܢ ܘܢܺܐܠܦܽܘܢ ܗܳܢܽܘܢ ܕܡܶܫܬܘܶܝܢ ܗ̱ܘܰܘ܆ ܠܐ̱ܪܳܙܳܐ ܗܰܘ ܕܰܥܬܺܝܕ ܗ̱ܘܳܐ ܕܢܶܬܓܠܶܐ.

ܡܶܛܽܠܗܳܕܶܐ. ܐܳܦ ܠܝܽܗ̱ܘ̈ܕܳܝܶܐ. ܗܽܘ ܦܳܪܽܘܩܰܢ ܐܳܡܰܪ ܗ̱ܘܳܐ: ܐܰܒܪܳܗܳܡ ܐܰܒܽܘܟܽܘܢ ܕܳܐܶܨ ܗ̱ܘܳܐ ܕܢܶܚܙܶܐ ܠܝܰܘܡܳܐ ܕܺܝܠܝ܆ ܘܰܚܙܳܐ ܘܰܚܕܺܝ^[30]. ܘܰܚܙܺܝ ܠܺܝ ܠܫܽܘܘܫܳܛܳܐ ܘܡܰܣܩܳܢܳܐ ܕܒܺܐܝܕܳܐ ܒܺܐܝܕܳܐ ܕܡܰܠܦܳܢܽܘܬܳܐ. ܡܶܢ ܣܰܓܺܝܽܐܘܬ ܐܰ‌ܠܳܗ̈ܶܐ ܘܕܶܚܠܰܬ̣ ܫ̈ܺܐܕܶܐ ܥܰܬܺܝܩܬܳܐ ܗܳܝ ܕܡܶܨܪ̈ܳܝܶܐ. ܩܳܪܶܐ ܗ̱ܘܳܐ ܠܰܒܢܰܝ̈ܳܐ ܕܺܐܝܣܪܳܐܶܝܠ܆ ܐܰܝܟܰܢܳܐ ܕܰܠܚܰܕ ܘܒܰܠܚܽܘܕܰܘܗ̱ܝ ܐܰ‎ܠܳܗܳܐ ܢܶܫܬܰܘܕܥܽܘܢ. ܘܰܒܠܽܘ̈ܚܶܐ ܕܟܺܐܦܳܐ. ܟܳܬܶܒ ܗ̱ܘܳܐ ܠܗܽܘܢ ܢܳܡܽܘܣܳܐ܆ ܡܶܛܽܠ ܟܺܝܬ ܕܰܐܝܟ ܕܠܰܐܝܠܶܝܢ ܕܰܗܘܰܘ ܠܳܐ ܡܰܪ̈ܓܫܳܢܶܐ܆ ܘܰܐܝܟ ܗܰܘ ܕܟܺܐܦ̈ܶܐ ܐܺܝܬܰܝܗܽܘܢ ܗ̱ܘܰܘ ܡܡܰܠܶܠ ܗ̱ܘܳܐ ܠܗܽܘܢ. ܡܰܠܽܘܢ ܕܶܝܢ܆ ܐܰܝܟܰܢܳܐ ܕܳܐܦ ܒܟܺܐܦ̈ܶܐ ܟܬܺܝ̈ܒܳܬ ܡܶܢ ܐܰ‎ܠܳܗܳܐ܆ ܘܕܰܒܨܶܒܥܳܐ ܕܰܐ‎ܠܳܗܳܐ ܟܬܺܝ̈ܒܳܢ ܗ̱ܘܰܝ̈ ܐܰܝܟܰܢܳܐ ܕܳܐܡܰܪ ܟܬܳܒܳܐ ܐܰ‎ܠܳܗܳܝܳܐ^[31]: ܡܶܢ ܐܰ‌ܠܳܗ̈ܶܐ ܕܟܺܐܦܳܐ ܘܠܳܐ ܡܰܪ̈ܓܫܳܢܶܐ ܢܰܪܚܶܩ ܐܶܢܽܘܢ.

ܟܰܕ ܕܶܝܢ ܠܘܳܬ ܝܺܕܰܥܬܳܐ ܕܰܐ‎ܠܳܗܳܐ. ܩܰܕܶܡܘ ܐܶܬܥܰܬܰܕܘ܆ ܒܝܰܕ ܡܰܪܕܽܘܬܳܐ ܡܰܥܠܳܢܺܝܬܳܐ^[32] ܕܢܳܡܽܘܣܳܐ. ܙܳܕܶܩ ܗ̱ܘܳܐ ܡܶܟܺܝܠ ܕܬܶܬܓܠܶܐ ܐܰ‎ܠܳܗܽܘܬܶܗ ܕܺܝܚܺܝܕܳܝܳܐ ܡܶܠܬܳܐ. ܘܗܽܘ ܐܰ‎ܠܳܗܳܐ ܡܶܠܬܳܐ܆ ܠܳܐ ܡܶܫܬܰܚܠܦܳܢܳܐܺܝܬ. ܒܰܪܢܳܫܳܐ ܡܠܺܝܠܳܐ ܗܳܘܶܐ܆ ܘܥܰܡ ܒܢܰܝ̈ܢܳܫܳܐ ܡܶܬܗܰܦܰܟ^[33]. ܘܰܡܝܰܬܪ̈ܶܐ ܥܳܒܶܕ ܠܗܽܘܢ܆ ܘܡܕܰܟܶܐ ܠܰܡܠܺܝܠܽܘܬܳܐ^[34] ܕܺܝܠܰܢ܆ ܕܰܒܚܰܫ̈ܶܐ^[35] ܕܒܶܣܪܳܐ ܝܰܩܺܝܪܳܐ ܗ̱ܘܳܬ. ܐܰܝܟܰܢܳܐ ܟܺܝܬ ܕܰܐܝܟ ܡܶܠܬܶܗ ܕܦܰܘܠܽܘܤ܆ ܒܗܰܘܢܳܐ ܡܶܟܺܝܠ ܢܶܗܘܶܐ ܦܳܠܚܺܝܢ ܚ̱ܢܰܢ ܠܢܳܡܽܘܣܳܐ ܕܰܐ‎ܠܳܗܳܐ܆ ܘܠܰܘ ܒܒܶܣܪܳܐ ܠܢܳܡܽܘܣܳܐ ܕܰܚܛܺܝܬܳܐ^[36]܆ ܘܳܐܦܠܳܐ ܚܰܕ ܚܽܘܝܳܒܳܐ ܢܶܗܘܶܐ ܐܺܝܬ܆ ܠܗܳܢܽܘܢ ܕܒܰܡܫܺܝܚܳܐ ܝܶܫܽܘܥ^[37]܆ ܠܰܘ ܒܰܒܣܰܪ ܡܗܰܠܟܺܝܢ ܐܶܠܳܐ ܒܪܽܘܚ^[38]. ܟܰܕ ܗܳܟܺܝܠ ܡܶܢ ܟܰܕܽܘ ܕܰܐܝܟ ܗܳܠܶܝܢ ܗܘܰܝܢܰܢ ܒܝܰܕ ܡܶܐܬܺܝܬܶܗ ܕܒܰܒܣܰܪ ܕܡܶܠܬܳܐ܆ ܘܰܠܘܳܬ ܚܰܝ̈ܶܐ ܡܠܺܝ̈ܠܶܐ ܘܡܶܬܗܰܘܢܳܢ̈ܶܐ ܐܶܬܥܰܠܺܝܢܰܢ܆ ܘܰܡܨܶܝܢ ܗ̱ܘܰܝܢ. ܕܰܠܘܳܬ ܗܳܠܶܝܢ ܕܰܠܥܶܠ ܢܚܽܘܪ^[39]܆ ܪܽܘܚܳܢܳܐܺܝܬ ܐܶܬܓܠܺܝ ܠܰܢ ܪܽܘܚܳܐ ܩܰܕܺܝܫܳܐ܆ ܟܰܕ ܠܳܐ ܐܶܣܬܢܶܩ ܥܰܠ ܩܰܕܺܝܡܽܘܬ ܬܰܚܦܺܝܬܳܐ ܕܒܶܣܪܳܐ.

ܘܰܒܠܶܫܳܢ̈ܶܐ ܢܽܘܪ̈ܳܢܳܝܶܐ ܥܰܠ ܫܠܺܝ̈ܚܶܐ ܫܟܶܢ. ܟܰܕ ܒܝܰܕ ܢܽܘܪܳܐ ܡܰܢ. ܡܚܰܘܶܐ ܗ̱ܘܳܐ܆ ܕܗܽܘ ܟܰܕ ܗܽܘ ‌ܐܺܝܬܰܘܗ̱ܝ ܒܽܐܘܣܺܝܰܐ ܘܰܒܫܽܘܒܚܳܐ܆ ܠܗܰܘ ܕܰܒܢܽܘܪܳܐ ܢܚܶܬ ܠܘܳܬ ܛܽܘܪܳܐ ܗܰܘ ܕܣܺܝܢܰܝ܆ ܘܓܰܘܙܠܶܗ ܠܣܰܢܝܳܐ ܗܰܘ ܕܠܳܐ ܝܳܩܶܕ ܗ̱ܘܳܐ܆ ܘܰܐܪܶܙ ܘܰܐ‎ܠܶܦ ܠܡܽܘܫܶܐ. ܒܝܰܕ ܕܶܝܢ ܠܶܫܳܢ̈ܶܐ܆ ܕܒܰܪ ܓܶܢܣܳܐ ‌ܐܺܝܬܰܘܗ̱ܝ ܘܠܰܘ ܢܽܘܟܪܳܝܳܐ ܕܰܐ‎ܠܳܗܽܘܬܶܗ ܕܰܒܪܳܐ ܘܡܶܠܬܳܐ. ܠܶܫܳܢܳܐ ܓܶܝܪ ܘܡܶܠܬܳܐ ܩܰܪܺܝܒܽܘܬܳܐ ܣܰܓܺܝܐܬܳܐ ܐܺܝܬ ܠܗܽܘܢ ܠܘܳܬ ܚ̈ܕܳܕܶܐ܆ ܘܰܠܙܰܘܥܰܘ̈ܗ̱ܝ ܕܗܰܘܢܳܐ ܡܰܘܕܥܺܝܢ. ܟܰܕ ܗܳܟܺܝܠ ܩܰܒܶܠܘ ܫܠܺܝ̈ܚܶܐ ܠܛܰܝܒܽܘܬܳܐ ܕܰܐܝܟ ܗܳܕܶܐ܆ ܟܰܕ ܝܺܬܶܒܘ ܥܠܰܝܗܽܘܢ ܠܶܫܳܢ̈ܶܐ܆ ܫܰܪܺܝܘ ܕܰܒܠܶܫܳܢ̈ܶܐ ܐ̱ܚܪ̈ܳܢܶܐ ܢܡܰܠܠܽܘܢ܆ ܘܕܰܠܘܳܬ ܗܳܢܽܘܢ ܕܡܶܢ ܥܰܡ̱ܡ̈ܶܐ ܡܫܰܚܠ̈ܦܶܐ ܠܽܐܘܪܶܫܠܶܡ ܐܳܬܶܝܢ ܗ̱ܘܰܘ ܢܶܬܥܢܽܘܢ ܒܡܶܠܬܳܐ. ܟܰܕ ܡܰܘܕܰܥ ܗ̱ܘܳܐ ܪܽܘܚܳܐ ܒܝܰܕ ܗܳܕܶܐ܆ ܕܰܠܟܽܠܗܽܘܢ ܥܰܡ̱ܡ̈ܶܐ ܫܰܘܝܳܐܺܝܬ ܥܬܺܝܕܳܐ ܣܒܰܪܬܳܐ ܕܬܶܬܟܪܶܙ.

ܟܰܕ ܡܶܬܒܰܩܶܐ ܐ̱ܢܳܐ ܕܶܝܢ ܒܗܳܠܶܝܢ܆ ܘܣܰܓܺܝ ܝܰܬܺܝܪ ܒܪܶܚܡܰܬ ܥܰܡܠܳܐ ܡܥܰܩܶܒ ܐ̱ܢܳܐ܆ ܝܰܡܳܐ ܕܠܳܐ ܣܽܘܦ ܕܪܶܚܡܰܬ ܐ̱ܢܳܫܽܘܬܳܐ܆ ܡܶܢ ܬܶܕܡܽܘܪܬܳܐ ܗܳܝ ܕܠܶܫܳܢ̈ܶܐ ܡܶܬܚܰܘܶܐ ܠܺܝ. ܫܳܪܶܐ ܓܶܝܪ ܠܚܽܘܝܳܒܳܐ ܥܰܬܺܝܩܳܐ܆ ܗܰܘ ܕܰܢܦܰܩ ܡܶܢ ܐܰ‎ܠܳܗܳܐ ܥܰܠ ܓܶܢܣܳܐ ܕܺܝܠܰܢ. ܕܡܳܢܳܐ ܕܶܝܢ ‌ܐܺܝܬܰܘܗ̱ܝ ܗܽܘ ܚܽܘܝܳܒܳܐ. ܠܰܟܬܳܒ̈ܶܐ ܐܰ‎ܠܳܗܳܝ̈ܶܐ ܢܶܫܡܰܥ ܕܳܐܡܪܺܝܢ: ܟܬܰܒ ܓܶܝܪ ܡܽܘܫܶܐ ܐܰ‎ܠܳܗܳܝܳܐ ܒܰܟܬܳܒܳܐ ܗܰܘ ܕܰܒܪܺܝܬܳܐ܆ ܒܗܳܢܳܐ ܙܢܳܐ. ܘܺܐܝܬܶܝܗ̇ ܗ̱ܘܳܬ ܟܽܠܳܗ̇ ܐܰܪܥܳܐ܆ ܣܶܦܬܳܐ ܚܕܳܐ܆ ܘܩܳܠܳܐ ܚܰܕ ܠܟܽܠܗܽܘܢ. ܘܰܗܘܳܐ ܕܟܰܕ ܐܶܬܬܙܺܝܥܘ ܒܢܰܝ̈ ܐ̱ܢܳܫܳܐ ܡܶܢ ܡܰܕܢܚܳܐ܆ ܐܶܫܟܰܚܘ ܦܩܰܥܬܳܐ ܒܰܐܪܥܳܐ ܕܣܶܢܥܳܪ܆ ܘܰܥܡܰܪܘ ܬܰܡܳܢ. ܘܶܐܡܰܪ ܓܰܒܪܳܐ ܠܩܰܪܺܝܒܶܗ: ܬܰܘ ܢܰ݀ܪܡܶܐ ܠܶܒ̈ܢܶܐ ܘܢܶ݀ܫܓܽܘܪ ܐܶܢܶܝܢ ܒܢܽܘܪܳܐ. ܘܰܗܘܳܬ ܠܗܽܘܢ ܠܒܶܬܳܐ ܠܟܺܐܦܳܐ܆ ܘܟܽܘܦܪܳܐ ‌ܐܺܝܬܰܘܗ̱ܝ ܗ̱ܘܳܐ ܠܗܽܘܢ ܛܺܝܢܳܐ. ܘܶܐܡܰܪܘ: ܬܰܘ ܢܶ݀ܒܢܶܐ ܠܰܢ ܡܕܺܝܢ̱ܬܳܐ ܘܡܰܓܕܠܳܐ܆ ܗܰܘ ܕܢܶܗܘܶܐ ܪܺܝܫܶܗ ܥܕܰܡܳܐ ܠܰܫܡܰܝܳܐ܆ ܘܢܶ݀ܥܒܶܕ ܠܰܢ ܫܡܳܐ ܩܕܳܡ ܕܢܶܬܒܰܕܰܪ ܥܰܠ ܦܰܪܨܽܘܦܳܐ ܕܟܽܠܳܗ̇ ܐܰܪܥܳܐ^[40].

ܘܰܢܚܶܬ ܡܳܪܝܳܐ ܕܢܶܚܙܶܐ ܠܰܡܕܺܝܢ̱ܬܳܐ ܘܰܠܡܰܓܕܠܳܐ ܗܰܘ ܕܰܒ̣ܢܰܘ ܒܢܰܝ̈ܢܳܫܳܐ. ܘܶܐܡܰܪ ܡܳܪܝܳܐ: ܗܳܐ ܓܶܢܣܳܐ ܚܰܕ. ܘܠܶܫܳܢܳܐ ܚܰܕ ܕܟܽܠܗܽܘܢ܆ ܘܗܳܕܶܐ ܫܰܪܺܝܘ ܠܡܶܥܒܰܕ܆ ܘܗܳܫܳܐ ܠܳܐ ܢܶܬܒܰܨܪ̈ܳܢ ܡܶܢܗܽܘܢ ܟܽܠܗܶܝܢ ܐܰܝܠܶܝܢ ܕܢܶܬܚܰܫܒܽܘܢ ܠܡܶܥܒܰܕ. ܬܰܘ ܢܶ݀ܚܽܘܬ ܢ݀ܒܰܠܒܶܠ ܬܰܡܳܢ ܠܶܫܳܢܳܐ ܕܺܝܠܗܽܘܢ܆ ܐܰܝܟܰܢܳܐ ܕܠܳܐ ܢܶܫܡܥܽܘܢ ܟܽܠܚܰܕ ܠܩܳܠܳܐ ܕܩܰܪܺܝܒܶܗ. ܘܒܰܕܰܪ ܐܶܢܽܘܢ ܡܳܪܝܳܐ ܐܰ‎ܠܳܗܳܐ ܡܶܢ ܬܰܡܳܢ ܥܰܠ ܦܰܪܨܽܘܦܳܐ ܕܟܽܠܳܗ̇ ܐܰܪܥܳܐ܆ ܘܢܳܚܘ ܡܶܢ ܕܶܠܡܶܒܢܳܐ ܡܕܺܝܢ̱ܬܳܐ ܘܡܰܓܕܠܳܐ. ܡܶܛܽܠܗܳܕܶܐ ܐܶܬܩܪܺܝ ܫܡܳܗ̇ ܒܳܒܶܠ܆ ܡܶܛܽܠ ܕܬܰܡܳܢ ܒܰܠܒܶܠ ܡܳܪܝܳܐ ܐܰ‎ܠܳܗܳܐ ܠܠܶܫܳܢ̈ܶܐ ܕܟܽܠܳܗ̇ ܐܰܪܥܳܐ.

ܠܗܳܢܳܐ ܡܣܳܡ ܒܪܺܝܫܳܐ. ܘܰܠܦܽܘܠܳܓܳܐ ܕܩ̈ܳܠܶܐ܆ ܫܪܳܝܗ̱ܝ ܪܽܘܚܳܐ ܩܰܕܺܝܫܳܐ܆ ܟܰܕ ܕܢܰܚ ܘܶܐܬܓܠܺܝ ܒܝܰܕ ܠܶܫܳܢ̈ܶܐ ܢܽܘܪ̈ܳܢܳܝܶܐ. ܫܪܳܝܗ̱ܝ ܕܶܝܢ܆ ܣܰܓܺܝ ܦܰܐܝܽܘܬ ܐܰ‎ܠܳܗܳܐܺܝܬ܆ ܘܝܰܬܺܝܪ ܣܰܓܺܝ ܬܡܺܝܗܳܐܺܝܬ ܘܰܫܒܺܝܚܳܐܺܝܬ. ܠܰܘ ܓܶܝܪ ܟܰܕ ܒܰܚܕܳܐ ܒܰܪ̱ܬ ܩܳܠܳܐ ܡܡܰܠܠܺܝܢ ܗ̱ܘܰܘ ܫܠܺܝ̈ܚܶܐ܆ ܫܳܡܥܺܝܢ ܗ̱ܘܰܘ ܠܗܽܘܢ ܘܡܶܣܬܰܟܠܺܝܢ ܗܳܢܽܘܢ ܕܡܶܢ ܥܰܡ̱ܡ̈ܶܐ ܡܫܰܚ̈ܠܦܶܐ܆ ܐܶܠܳܐ ܗܳܝ ܕܰܠܩܽܘܒܠܳܐ. ܗܳܢܽܘܢ ܕܰܡܡܰܠܠܺܝܢ ܗ̱ܘܰܘ܆ ܐܰܝܟ ܕܒܰܚܕܳܐ ܒܰܪ̱ܬ ܩܳܠܳܐ܆ ܘܰܒܠܶܫܳܢ̈ܶܐ ܣܰܓܺܝ̈ܶܐܐ ܡܶܬܚܰܫܚܺܝܢ ܗ̱ܘܰܘ. ܘܗܳܢܽܘܢ ܕܫܳܡܥܺܝܢ ܗ̱ܘܰܘ܆ ܡܶܬܪܰܟܢܺܝܢ ܗ̱ܘܰܘ ܒܰܦܝܳܣܳܐ ܕܠܳܐ ܚܶܪܝܳܢܳܐ܆ ܠܟܳܪܽܘܙܽܘܬܳܐ ܕܶܐܘܰܢܓܶܠܺܝܽܘܢ. ܐܳܦ ܓܶܝܪ ܐܶ‎ܠܽܘ ܚܰܕ ܥܰܒ̣ܕܶܗ ܬܽܘܒ. ܠܩܳܠܳܐ ܕܟܽܠܗܽܘܢ ܒܢܰܝ̈ܢܳܫܳܐ܆ ܕܰܩܛܺܝܪܳܐ ܡܰܠܽܘܢ ܡܶܣܬܰܒܪܳܐ ܗ̱ܘܳܬ. ܗܺܝ ܫܰܠܡܽܘܬܳܐ ܕܥܰܠ ܟܳܪܽܘܙܽܘܬܳܐ܆ ܘܠܰܘ ܕܰܦܝܳܣܳܐ.

ܟܰܕ ܕܶܝܢ ܡܶܢ ܠܶܫܳܢ̈ܶܐ ܣܰܓܺܝ̈ܶܐܐ ܘܰܡܫܰܚ̈ܠܦܶܐ܆ ܚܕܳܐ ܗܰܝܡܳܢܽܘܬܳܐ ܡܶܬܬܰܘܕܥܳܐ܆ ܐܳܦ ܨܶܒܝܳܢܳܝܽܘܬܳܐ ܕܗܳܢܽܘܢ ܕܗܰܝܡܶܢܘ ܡܶܬܚܰܘܝܳܐ܆ ܘܳܐܦ ܒܽܘܠܒܳܠܳܐ ܕܠܶܫܳܢ̈ܶܐ ܗܰܘ ܕܡܶܢ ܩܕܺܝܡ ܐܶܬܰܐܣܺܝ ܒܫܰܠܡܽܘܬܳܐ ܕܬܰܘܕܺܝܬܳܐ. ܘܬܰܟܬܽܘܫܳܐ ܡܰܢ ܗܰܘ ܕܥܰܡ ܐܰ‎ܠܳܗܳܐ. ܕܰܒܢܰܝ̈ܢܳܫܳܐ ܗܳܢܽܘܢ ܩܰܕܡܳܝ̈ܶܐ܆ ܠܠܶܫܳܢܳܐ ܕܟܽܠܳܗ̇ ܐܰܪܥܳܐ ܕܚܰܕ ܐܺܝܬܰܘܗ̱ܝ ܗ̱ܘܳܐ ܣܕܰܩ. ܝܺܕܰܥܬܳܐ ܕܶܝܢ ܕܰܐ‎ܠܳܗܳܐ܆ ܠܠܶܫܳܢ̈ܶܐ ܡܫܰܚ̈ܠܦܶܐ ܠܰܚܕܳܐ ܗܰܝܡܳܢܽܘܬܳܐ ܠܰܚܡܰܬ܆ ܘܒܰܕܡܽܘܬ ܡܶܢ̈ܶܐ ܕܩܺܝܬܳܪܳܐ ܕܩ̈ܳܠܶܐ ܣܰܩܽܘܒ̈ܠܳܝܶܐ ܡܰܫܡ̈ܥܳܢ܆ ܚܕܳܐ ܩܺܝܢܬܳܐ ܫܘܺܝܬܳܐ ܠܰܡܫܰܡܠܳܝܽܘ ܥܰܬܕܶܬ܆ ܘܶܐܬܡܰܠܺܝܬ ܒܝܰܕ ܗܳܠܶܝܢ ܢܒܺܝܽܘܬܳܐ ܗܳܝ ܕܰܙܟܰܪܝܳܐ ܕܡܰܙܥܩܳܐ: ܕܢܶܗܘܶܐ ܡܳܪܝܳܐ ܠܡܰܠܟܳܐ ܥܰܠ ܟܽܠܳܗ̇ ܐܰܪܥܳܐ܆ ܒܝܰܘܡܳܐ ܗܰܘ ܢܶܗܘܶܐ ܡܳܪܝܳܐ ܚܰܕ ܘܰܫܡܶܗ ܚܰܕ܆ ܕܟܳܪܶܟ ܠܟܽܠܳܗ̇ ܐܰܪܥܳܐ^[41].

ܡܶܛܽܠܗܳܕܶܐ ܐܳܡܰܪ ܗܘܺܝܬ. ܟܰܕ ܡܫܰܪܶܐ ܗ̱ܘܺܝܬ ܒܶܗ ܒܡܺܐܡܪܳܐ܆ ܕܟܽܠ ܥܺܐܕܳܐ ܐܰܝܟ ܕܰܠܡܺܐܡܰܪ: ܫܪܳܝܳܐ ܕܰܚܕܳܐ ܡܶܢ ܐܰܦܽܘܦܰܐܣܺܝ̈ܤ ܗܳܠܶܝܢ ܕܥܰܠ ܓܶܢܣܳܐ ܕܺܝܠܰܢ ‌ܐܺܝܬܰܘܗ̱ܝ. ܠܗܳܠܶܝܢ ܘܰܠܕܐܰܝܟ ܗܳܠܶܝܢ ܫܰܟܢܰܬ ܠܰܢ ܡܶܐܬܺܝܬܳܐ ܓܠܺܝܬܳܐ ܕܦܰܪܰܩܠܺܝܛܳܐ. ܘܟܰܕ ܠܡܶܐܬܺܝܬܳܐ ܕܒܰܒܣܰܪ ܕܰܐ‎ܠܳܗܳܐ ܡܶܠܬܳܐ ܥܬܰܪܢܰܢ܆ ܐܶܫܬܘܺܝܢܰܢ. ܐܳܦ ܠܡܶܐܬܺܝܬܳܐ ܡܶܬܗܰܘܢܳܢܺܝܬܳܐ ܡܶܕܶܡ ܕܪܽܘܚܳܐ܆ ܘܕܰܐܝܟ ܗܰܘ ܕܺܐܝܬܶܝܗ̇ ܐܰܝܟ ܕܰܠܡܺܐܡܰܪ ܪܽܘܚܳܢܳܝܬܳܐ ܘܰܕܠܳܐ ܓܫܽܘܡ܆ ܗܰܘ ܕܳܐܦ ܠܫܽܘܟܳܢ̈ܶܐ ܒܰܝܬܳܝ̈ܶܐ ܕܺܝܠܶܗ ܐܰܡܛܰܪ ܥܠܰܝܢ ܒܰܕܡܽܘܬ ܪ̈ܣܺܝܣܶܐ܆ ܗܳܠܶܝܢ ܕܟܰܕ ܡܳܢܶܐ ܗ̱ܘܳܐ ܠܗܽܘܢ ܦܰܘܠܽܘܤ ܐܳܡܰܪ ܗ̱ܘܳܐ: ܠܗܰܘ ܡܰܢ ܒܝܰܕ ܪܽܘܚܳܐ ܡܶܬܝܰܗܒܳܐ ܡܶܠܬܳܐ ܕܚܶܟܡܬܳܐ. ܠܰܐ̱ܚܪܺܢܳܐ ܕܶܝܢ ܡܶܠܬܳܐ ܕܺܝܕܰܥܬܳܐ ܒܳܗ̇ ܟܰܕ ܒܳܗ̇ ܒܪܽܘܚܳܐ. ܠܰܐ̱ܚܪܺܢܳܐ ܕܶܝܢ ܗܰܝܡܳܢܽܘܬܳܐ ܒܳܗ̇ ܟܰܕ ܒܳܗ̇ ܒܪܽܘܚܳܐ. ܠܰܐ̱ܚܪܺܢܳܐ ܕܶܝܢ ܫܽܘ̈ܟܳܢܶܐ ܕܳܐܣܺܝ̈ܘܳܬܳܐ ܒܚܰܕ ܪܽܘܚܳܐ. ܠܰܐܚܪܳܢܳܐ ܕܶܝܢ ܡܰܥܒܕܳܢܽܘܬܳܐ ܕܚܰܝ̈ܠܶܐ. ܠܰܐ̱ܚܪܺܢܳܐ ܕܶܝܢ ܢܒܺܝܽܘܬܳܐ܆ ܠܰܐܚܪܳܢܳܐ ܕܶܝܢ ܦܽܘܪܳܫܳܐ ܕܪ̈ܽܘܚܶܐ. ܠܰܐܚܪܳܢܳܐ ܕܶܝܢ ܓܶܢ̈ܣܶܐ ܕܠܶܫܳܢ̈ܶܐ. ܠܰܐܚܪܳܢܳܐ ܕܶܝܢ ܦܽܘܫܳܩܳܐ ܕܠܶܫܳܢ̈ܶܐ. ܟܽܠܗܶܝܢ ܕܶܝܢ ܗܳܠܶܝܢ ܡܰܥܒܶܕ ܗܽܘ ܚܰܕ ܘܗܽܘ ܟܰܕ ܗܽܘ ܪܽܘܚܳܐ. ܟܰܕ ܡܦܰܠܶܓ ܕܺܝܠܳܢܳܐܺܝܬ ܠܟܽܠܚܰܕ ܐܰܝܟܰܢܳܐ ܕܨܳܒܶܐ^[42].

ܚܳܙܶܐ ܐܰܢ̱ܬ ܠܥܽܘܬܪܳܐ ܕܰܫܦܺܝܥܽܘܬ ܡܰܘܗܰܒܬܳܐ. ܕܠܰܐܠܳܗܳܐ ܦܐܶܐ܆ ܘܰܠܫܽܘܠܛܳܢܶܗ ܕܪܽܘܚܳܐ ܗܰܘ ܕܰܡܦܰܠܶܓ ܒܫܰܠܺܝܛܽܘܬ ܒܝܳܬܶܗ܆ ܠܟܽܠܚܰܕ ܐܰܝܟܰܢܳܐ ܕܨܳܒܶܐ ܡܰܘܗ̈ܒܳܬܳܐ ܐܰ‎ܠܳܗܳܝ̈ܳܬܳܐ܆ ܐܰܝܟܰܢܳܐ ܗܳܟܺܝܠ ܡܶܬܚܪܶܐ ܐܰܢ̱ܬ܆ ܕܪܽܘܚܳܐ ܠܰܘ ܐܰ‎ܠܳܗܰܐ ܗ̱ܘ܆ ܘܰܒܒܶܪ̈ܝܳܬܳܐ ܡܬܰܚܬܶܐ ܐܰܢ̱ܬ ܠܶܗ ܠܗܰܘ ܠܳܐ ܒܰܪܝܳܐ ܘܥܳܒܽܘܕܳܐ ܕܚܰܝ̈ܠܰܘܳܬܳܐ ܡܫܰܡ̈ܫܳܢܶܐ ܘܰܫܡܰܝܳܢ̈ܶܐ܆ ܘܳܐܦ ܕܺܝܠܰܢ ܒܢܰܝ̈ܢܳܫܳܐ ܠܰܘ ܒܰܠܚܽܘܕ ܥܳܒܽܘܕܳܐ܆ ܐܶܠܳܐ ܐܳܦ ܝܳܗܽܘܒܳܐ ܕܟܽܠܳܗ̇ ܚܶܟܡܬܳܐ ܘܣܽܘܟܳܠܳܐ. ܕܰܘܺܝܕ ܡܰܢ ܓܶܝܪ ܐܳܡܰܪ: ܒܡܶܠܬܳܐ ܕܡܳܪܝܳܐ ܐܶܫܬܰܪܰܪܘ ܫܡܰܝ̈ܳܐ. ܘܰܒܪܽܘܚܳܐ ܕܦܽܘܡܶܗ. ܟܽܠܶܗ ܚܰܝܠܗܽܘܢ^[43].

ܐ̱ܢܳܫ ܕܶܝܢ ܟܰܕ ܦܺܝܠܳܣܽܘܦܺܝܣܳܐ ܥܳܒܶܕ ܒܰܟܬܳܒܳܐ ܗܰܘ ܕܺܐܝܽܘܒ ܐܶܡܰܪ: ܪܽܘܚܳܐ ܐܰ‎ܠܳܗܳܝܳܐ ܗܰܘ ܕܥܰܒܕܰܢܝ ܢܫܰܡܬܳܐ ܕܶܝܢ ܕܰܐܚܺܝܕ ܟܽܠ ܗܳܝ ܕܡܰܠܦܳܐ ܠܺܝ^[44]. ܗܽܘ ܡܰܢ ܗܳܟܺܝܠ ‌ܐܰ‎ܠܳܗܳܐ ܡܶܠܬܳܐ܆ ܠܰܢ ܕܥܰܠ ‌ܐܰܪܥܳܐ ܣܺܝܡܺܝܢ ܗ̱ܘܰܝܢ ܕܢܰܚ܆ ܟܰܕ ܡܰܟܶܟ ܗܽܘ ܠܶܗ ܘܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ܆ ܘܫܰܠܝܳܐܺܝܬ ܘܢܺܝܚܳܐܺܝܬ ܠܰܡܕܰܒܪܳܢܽܘܬܳܐ ܡܰܠܺܝ܆ ܐܰܝܟ ܢܒܺܝܽܘܬܳܐ ܕܶܐܫܰܥܝܳܐ ܗܳܝ ܕܳܐܡܪܳܐ: ܠܳܐ ܢܶܬܚܪܶܐ ܘܠܳܐ ܢܶܩܥܶܐ܆ ܘܳܐܦܠܳܐ ܢܶܫܡܰܥ ܐ̱ܢܳܫ ܩܳܠܶܗ ܒܫܽܘܩܳܐ܆ ܩܰܢܝܳܐ ܪܥܺܝܥܳܐ ܠܳܐ ܢܶܬܒܽܘܪ܆ ܘܰܫܪܳܓܳܐ ܕܰܡܛܰܦܛܶܦ ܠܳܐ ܢܰܕܥܶܟ.^[45] ܘܟܰܕ ܗܳܟܰܢܳܐ ܥܰܡ ܒܢܰܝ̈ܢܳܫܳܐ ܐ̱ܢܳܫܳܐܺܝܬ ܐܶܬܗܰܦܰܟ܆ ܘܣܰܝܒܰܪ ܒܰܒܣܰܪ ܨܶܒܝܳܢܳܐܺܝܬ ܠܰܨܠܺܝܒܳܐ ܕܰܚܠܳܦܰܝܢ܆ ܘܰܛܥܶܡ ܒܰܠܚܽܘܕ ܠܡܺܝܬܽܘܬܳܐ ܡܰܥܒܕܰܬ ܚܰܝ̈ܶܐ܆ ܐܰܩܺܝܡ ܠܰܢ ܐܰܟܚܕܳܐ ܥܰܡܶܗ ܕܡܰܝ̣ܺܝ̣ܬ̣ܺܝܢ ܗ̱ܘܰܝܢ^[46]܆ ܟܰܕ ܗܽܘ ܗܘ̣ܳܐ ܪܺܝܫܺܝܬܳܐ ܕܰܩܝܳܡܬܳܐ^[47].

ܘܠܺܐܝܩܳܪܳܐ ܕܫܰܦܺܝܪܽܘܬ ܣܳܥܽܘܪܽܘܬܳܐ ܗܳܕܶܐ. ܘܰܕܥܽܘܕܪܳܢܳܐ ܕܰܐܝܟ ܗܳܢܳܐ܆ ܒܗܳܠܶܝܢ ܚܰܡܫܺܝܢ ܝܰܘ̈ܡܳܬܳܐ܆ ܠܳܐ ܒܳܪܟܺܝܢܰܢ ܠܘܳܬ ܐܰܪܥܳܐ ܒܰܨܠܰܘ̈ܳܬܳܐ ܟܽܠ ܟܽܠܶܗ. ܐܶܠܳܐ܆ ܟܰܕ ܩܳܝܡܺܝܢܰܢ ܬܪ̈ܺܝܨܶܐ ܐܺܝܕܰܝ̈ܢ ܦܳܫܛܺܝܢܰܢ܆ ܟܰܕ ܠܗܰܘ ܕܶܐܨܛܠܶܒ ܘܶܐܬܩܒܰܪ ܘܩܳܡ ܡܫܰܒܚܺܝܢܰܢ܆ ܘܠܽܘܩܒܰܠ ܒܥܶܠܕܒܳܒ̈ܶܐ ܕܺܝܠܰܢ ܐܳܟܶܠܩܰܪܨܳܐ ܘܫ̈ܺܐܕܶܐ ܥܰܡ ܕܰܘܺܝܕ ܡܙܰܡܪܺܝܢ ܚ̱ܢܰܢ܆ ܗܶܢܽܘܢ ܐܶܬܥܰܪܩܰܠܘ ܘܰܢܦܰܠܘ܆ ܚܢܰܢ ܕܶܝܢ ܩܳܡܢܰܢ ܘܶܐܬܬܱܪܰܨܢܰܢ^[48].

ܟܰܕ ܕܶܝܢ ܪܽܘܚܳܐ ܩܰܕܺܝܫܳܐ ܦܰܐܝܽܘܬ ܐܰ‎ܠܳܗܳܐܺܝܬ. ܕܢܰܚ ܘܶܐܬܚܙܺܝ ܠܰܢ܆ ܘܰܒܠܶܫܳܢ̈ܶܐ ܢܽܘܪ̈ܳܢܳܝܶܐ ܐܰ‎ܠܳܗܽܘܬܳܐ ܐܰܒܪܶܩ ܠܰܢ܆ ܘܶܐܫܰܕ ܠܥܽܘܬܪܳܐ ܣܰܓܺܝܳܐܐ ܕܫܽܘܟܳܢ̈ܶܐ ܪ̈ܽܘܚܳܢܳܝܶܐ. ܐܶ݀ܫܽܘܕ ܓܶܝܪ ܐܳܡܰܪ ܡܶܢ ܪܽܘܚܳܐ ܕܺܝܠܝ ܥܰܠ ܟܽܠ ܒܣܰܪ^[49]. ܐܰܝܟ ܗܰܘ ܕܠܰܚܙܳܬܶܗ ܠܳܐ ܡܣܰܝܒܪܺܝܢ ܚ̱ܢܰܢ܆ ܘܰܒܪܰܒܽܘܬܳܐ ܕܰܫܦܺܝܥܽܘܬ ܫܽܘ̈ܟܳܢܶܐ ܕܺܝܠܶܗ ܬܳܡܗܺܝܢ ܚ̱ܢܰܢ܆ ܠܘܳܬ ܐܰܪܥܳܐ ܡܶܬܓܰܗܢܺܝܢܰܢ܆ ܘܥܰܠ ܒܽܘܪ̈ܟܰܝܢ ܒܳܪܟܺܝܢܰܢ܆ ܟܰܕ ܡܫܰܒܚܺܝܢܰܢ ܠܝܳܗܽܘܒܳܐ ܕܡܰܘܗ̈ܒܳܬܳܐ ܗܳܠܶܝܢ ܕܗܳܟܰܢܳܐ ܪܰܘܪ̈ܒܳܢ.

ܘܬܽܘܒ. ܟܰܕ ܒܝܰܕ ܨܰܘܡܳܐ ܡܶܬܕܰܟܶܝܢ ܚ̱ܢܰܢ܆ ܘܟܰܕ ܠܚܰܝ̈ܶܐ ܪ̈ܽܘܚܳܢܳܝܶܐ ܡܬܰܪܨܺܝܢܰܢ. ܥܝܳܕܰܐ ܗ̱ܘ ܓܶܝܪ ܥܰܠ ܚܶܙܘܳܢ̈ܶܐ ܐܰ‎ܠܳܗܳܝ̈ܶܐ ܠܗܳܢܽܘܢ ܕܡܶܫܬܘܶܝܢ܆ ܕܥܰܠ ‌ܐܰܪܥܳܐ ܢܶܒܪܟܽܘܢ܆ ܘܰܒܝܰܕ ܐܶܣܟܺܡܳܐ ܗܳܢܳܐ ܢܰܘܕܽܘܢ ܠܰܡܥܰܠܝܽܘܬܳܗ̇ ܘܪܰܒܽܘܬܳܗ̇ ܕܰܚܙܳܬܳܐ. ܗܳܕܶܐ ܚܰܫܘ ܬܰܠܡܺܝ̈ܕܶܐ܆ ܟܰܕ ܐܶܫܬܰܚܠܦܰܬ ܕܡܽܘܬܶܗ ܕܝܶܫܽܘܥ ܥܠ ܛܽܘܪܳܐ܆ ܘܩܰܠܺܝܠ ܡܶܕܶܡ ܒܰܕܡܽܘܬ ܒܠܶܨܽܘܨܺܝܬܳܐ ܡܶܢ ܐܰ‎ܠܳܗܽܘܬܶܗ ܚܰܘܺܝ. ܢܦܰܠܘ ܓܶܝܪ ܐܳܡܰܪ ܥܰܠ ܦܰܪܨܽܘܦܳܐ ܕܺܝܠܗܽܘܢ. ܘܰܕܚܶܠܘ ܣܰܓܺܝ^[50].

ܥܰܠ ܠܶܫܳܢ̈ܶܐ ܡܰܢ ܗܳܟܺܝܠ ܢܽܘܪ̈ܳܢܳܝܶܐ܆ ܒܬܰܪܥܺܝܬܗܽܘܢ ܡܰܢ ܬܘܰܗܘ ܘܰܬܗܰܪܘ. ܕܥܰܠ ‌ܐܰܪܥܳܐ ܕܝܢ ܢܶܒܪܟܽܘܢ. ܠܳܐ ܣܳܟ ܐܶܫܬܒܶܩܘ܆ ܐܰܝܟܰܢܳܐ ܕܢܶܬܚܙܽܘܢ ܠܶܫܳܢ̈ܶܐ ܗܳܢܽܘܢ ܕܝܳܬܒܺܝܢ ܗ̱ܘܰܘ ܥܰܠ ܟܽܠܚܰܕ ܚܰܕ ܡܶܢܗܽܘܢ.

ܚܢܰܢ ܕܶܝܢ܆ ܚܠܳܦ ܗܳܢܽܘܢ. ܗܳܕܶܐ ܥܳܒܕܺܝܢܰܢ܆ ܟܰܕ ܒܳܪܟܺܝܢܰܢ ܥܰܠ ܒܽܘܪ̈ܟܰܝܢ܆ ܘܪܳܬܺܝܢ ܚ̱ܢܰܢ ܡܶܢ ܪܰܒܽܘܬܳܗ̇ ܕܡܶܐܬܺܝܬܳܐ ܐܰ‎ܠܳܗܳܝܬܳܐ ܕܪܽܘܚܳܐ܆ ܘܣܳܓܕܺܝܢ ܚ̱ܢܰܢ ܠܶܗ ܐܰܝܟ ܕܰܠܡܳܪܳܐ ܘܰܐ‌ܠܳܗܳܐ ܘܰܡܫܰܒܚܺܝܢ ܚ̱ܢܰܢ. ܐܰܟܚܕܳܐ ܕܶܝܢ ܘܟܰܕ ܡܚܰܘܶܝܢ ܚ̱ܢܰܢ܆ ܕܰܒܝܰܕ ܪܽܘܚܳܐ ܐܶܬܝܰܠܰܦܢܰܢ ܣܶܓܕܬܳܐ ܡܫܰܡܠܰܝܬܳܐ܆ ܕܡܶܢ ܐܰܒܳܐ ܡܰܢ ܡܫ̣ܰܪܝܳܐ܆ ܒܪܽܘܚܳܐ ܕܶܝܢ ܡܶܬܬܰܚܡܳܐ܆ ܘܒܶܗ ܡܫܰܠܡܳܐ ܘܡܶܣܬܰܝܟܳܐ. ܟܽܠ ܓܶܝܪ ܡܶܕܶܡ. ܕܰܠܒܰܪ ܡܶܢ ܗܳܠܶܝܢ ܏ܓ ܩܢܽܘ̈ܡܶܐ܆ ܠܳܐ ‌ܐܺܝܬܰܘܗ̱ܝ ܡܶܣܬܰܓܕܳܢܳܐ܆ ܐܶܠܳܐ ܒܗܳܢܽܘܢ ܕܣܳܓܕܺܝܢ ܡܛܰܟܰܤ. ܕܰܐ‎ܠܳܗܽܘܬܳܐ ܓܶܝܪ ܗܳܝ ܠܳܐ ܒܪܺܝܬܳܐ ܘܰܕܠܳܐ ܙܰܒܢܳܐ ܐܺܝܬܶܝܗ̇ ܕܺܝܠܳܢܳܝܬܳܐ܆ ܣܶܓܕܬܳܐ ܗܳܝ ܪܽܘܚܳܢܳܝܬܳܐ ܘܫܰܪܺܝܪܬܳܐ. ܡܶܛܽܠ ܕܪܽܘܚܰܐ ܗ̱ܘ ܐܰ‎ܠܳܗܳܐ܆ ܘܰܠܗܳܢܽܘܢ ܕܣܳܓܕܺܝܢ ܠܶܗ܆ ܒܪܽܘܚܳܐ ܘܒܰܫܪܳܪܳܐ ܘܠܳܐ ܠܗܽܘܢ ܠܡܶܣܓܰܕ^[51].

ܡܶܛܽܠܗܳܕܶܐ ܓܶܝܪ. ܐܳܦ ܦܰܪܰܩܠܺܝܛܳܐ ܐܰܘܟܺܝܬ ܡܦܺܝܣܳܢܳܐ ܐܶܫܬܰܡܰܗ ܗܽܘ ܪܽܘܚܳܐ ܩܰܕܺܝܫܳܐ^[52]܆ ܥܰܠ ܕܰܒܠܶܒܰܘ̈ܳܬܰܢ ܥܳܡܰܪ ܘܰܠܘܳܬ ܗܳܠܶܝܢ ܕܰܡܝܰܬܪ̈ܳܢ ܡܦܺܝܤ ܠܰܢ ܘܰܡܚܰܦܶܛ܆ ܘܠܰܘ ܒܰܠܚܽܘܕ ܠܡܶܣܓܰܕ ܐܶܠܳܐ ܐܳܦ ܠܰܡܨܰܠܳܝܽܘ ܪܽܘܚܳܢܳܐܺܝܬ ܡܰܠܶܦ ܠܰܢ. ܡܶܢ ܐܰܝܟܳܐ ܕܳܐܦ ܦܰܘܠܽܘܤ. ܟܰܕ ܠܪ̈ܽܘܡܳܝܶܐ ܟܳܬܶܒ. ܐܳܡܰܪ ܗ̱ܘܳܐ: ܗܳܝ ܓܶܝܪ ܕܡܳܢܳܐ ܢܨܰܠܶܐ ܐܰܝܟ ܡܳܐ ܕܙܳܕܶܩ ܠܳܐ ܝܳܕܥܺܝܢܰܢ. ܐܶܠܳܐ ܗܽܘ ܪܽܘܚܳܐ ܡܶܬܟܰܫܰܦ ܚܠܳܦܰܝܢ ܒܬܶܢ̈ܚܳܬܳܐ ܕܠܳܐ ܡܶܬܡܰܠ̈ܠܳܢ^[53].

ܗܳܝ ܟܺܝܬ. ܕܰܕܥܳܒܕܺܝܢ ܚ̱ܢܰܢ ܒܟܽܠܙܒܰܢ ܠܳܐ ܢܶܫܠܶܐ. ܐܶܠܳܐ ܚܰܝ̈ܶܐ ܕܟܰܝ̈ܳܐ ܢܚܰܘܶܐ܆ ܘܟܰܕ ܡܶܢ ܠܶܫܳܢ̈ܶܐ ܗܳܢܽܘܢ ܢܽܘܪ̈ܳܢܳܝܶܐ ܡܶܬܟܰܚܕܺܝܢ ܚ̱ܢܰܢ܆ ܢܰܗܦܶܟ ܐܰܦܰܝ̈ܢ ܡܶܢ ܨܽܘܚ̈ܝܳܬܳܐ ܛܰܢ̈ܦܳܬܳܐ. ܘܡܶܢ ܓܽܘܕܳܦܳܐ ܘܡܶܢ ܡܰܡܠܠܳܐ ܕܫܳܛܝܽܘܬܳܐ ܘܰܕܫܶܥܝܳܐ. ܘܰܒܡ̈ܶܠܶܐ ܐܰ‎ܠܳܗܳܝ̈ܳܬܳܐ. ܠܠܶܫܳܢܳܐ ܕܺܝܠܰܢ ܢܢܰܝܰܪ^[54] ܘܢܶܨܒܰܥ. ܟܰܕ ܠܳܐ ܥܳܒܕܺܝܢܰܢ ܠܶܗ ܛܺܝܢܳܝܳܐ܆ ܒܗܳܝ ܕܰܐܪ̈ܥܳܢܳܝܳܬܳܐ ܡܡܰܠܶܠ܆ ܕܒܗܳܠܶܝܢ ܕܶܝܢ ܫܡܰܝܳܢ̈ܝܳܬܳܐ ܡܶܬܗܰܓܶܐ ܟܽܠܝܽܘܡ܆ ܘܰܠܚܰܕ ܐܰ‎ܠܳܗܳܐ ܗܰܘ ܕܒܰܬܠܺܝܬܳܝܽܘܬܳܐ ܩܰܕܺܝܫܬܳܐ ܡܫܰܒܰܚ. ܗܰܘ ܕܠܶܗ ܬܶܫܒܽܘܚܬܳܐ ܘܽܐܘܚܕܳܢܳܐ ܠܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܥܶܣܪܺܝܢ ܘܚܰܡܫܳܐ.

[1]ܬܽܘܪܓܳܡܳܐ ܕܥܶܣܪܺܝܢ ܏ܘܗ ܕܐܦܝܬܪܘܢܝܘ ܕܥܰܠ ܥܺܐܕܳܐ ܦܰܢܛܺܝܩܽܘܤܛܺܝ

ܕܩܰܕܺܝܫܳܐ ܡܳܪܝ ܣܶܐܝܪܘܣ ܪܺܝܫ ܐܶܦܶܝܣܩܽܘܦܳܐ ܕܰܐܢܛܺܝܽܘܟܺܝܰܐ ܘܦܰܐܛܶܪܝܰܪܟܳܐ

ܕܣܽܘܪܝܐ.

  ܣܶܦܪܳܐ ܕܒܪܝܬܐ. 3: 16 [2]

  ܥܒܪ̈ܝܐ. 2: 9 ܐܦ ܒ. ܛܝܡܬܐܘܣ. 1: 10 [3]

  ܣܶܦܪܳܐ ܕܰܒܪܝܬܐ. 2: 17 [4]

  ܣܶܦܪܳܐ ܕܒܪܝܬܐ. 3: 19[5]

ܣܶܦܪܐ ܕܚܶܟܡܬܐ. 1: 7 [6]

ܣܶܦܪܐ ܕܒܪܝܬܐ. 6: 3 [7]

ܣܶܦܪܐ ܕܟܳܗ̈ܢܐ. 23: 15 ـ 16 [8]

ܣܶܦܪܐ ܕܟܳܗ̈ܢܐ. 23: 10 [9]

ܐ. ܩܘܪ̈ܝܢܬܝܐ. 15: 23 [10]

ܝܘܚܢܢ. 17: 19 [11]

ܝܘܚܢܢ. 6: 51 [12]

ܐ. ܩܘܪ̈ܝܢܬܝܐ. 5: 7 ـ 8 [13]

ܒ. ܩܘܪ̈ܝܢܬܝܐ. 5: 17 [14]

ܣܶܦܪܐ ܕܟܳܗ̈ܢܐ. 23: 17 [15]

ܡܬܝ. 13: 33 [16]

ܣܶܦܪܐ ܕܟܗ̈ܢܐ. 23: 14 [17]

ܝܘܚܢܢ. 16: 12 ـ 13 [18]

ܡܬܝ. 5: 21 ـ 22  ܐܦ ܒܣܶܦܪܳܐ ܕܡܰܦܩܳܢܳܐ. 20: 13 [19]

ܦܪ̈ܟܣܝܣ. 21: 11 [20]

ܓܠ̈ܛܝܐ. 1: 15 ـ 16 [21]

ܦܪ̈ܟܣܝܣ. 13: 2 [22]

ܝܘܚܢܢ. 16: 13 ـ 14 [23]

ܝܘܚܢܢ. 16: 12 ـ 13 [24]

ܝܘܚܢܢ. 16: 15 [25]

ܝܘܚܢܢ. 15: 26 [26]

ܝܘܚܢܢ. 10: 29 ـ 30 [27]

ܝܘܚܢܢ. 10: 33 [28]

ܣܶܦܪܳܐ ܕܡܰܦܩܢܐ. 6: 3 [29]

ܝܘܚܢܢ. 8: 56 [30]

ܣܶܦܪܐ ܕܡܦܩܢܐ. 31: 18 [31]

ܐܰܝܟ ܕܡܶܢ ܡܰܥܰܠܬܳܐ[32]

ܣܶܦܪܐ ܕܒܰܪܽܘܟ. 3: 38 [33]

 ܠܗܰܘܢܳܐ[34]

 ܕܰܒܢܰܝ̈ܢܳܫܳܐ[35]

ܪ̈ܗܘܡܳܝܶܐ. 7: 25 [36]

ܪ̈ܗܘܡܝܐ. 8: 1 [37]

ܒ. ܩܘܪ̈ܝܢܬܝܐ. 10: 3 [38]

ܩܘܠ̈ܣܝܐ. 3: 1 [39]

ܣܶܦܪܳܐ ܕܒܪܝܬܐ. 11: 1 ـ 9 [40]

ܙܟܰܪܝܐ. 14: 9 ـ 10 [41]

ܐ. ܩܘܪ̈ܝܢܬܝܐ. 12: 8 ـ 11 [42]

ܡܙܡܘܪ̈ܐ. 33: 6 [43]

ܐܝܘܒ. 33: 4 [44]

ܐܫܥܝܐ. 42: 2 ـ 3  ܐܦ ܡܬܝ. 12: 19 ـ 20 [45]

ܐܦܣ̈ܝܐ. 2: 6 [46]

ܐ. ܩܘܪ̈ܝܢܬܝܐ. 15: 20 ـ 23 [47]

ܡܙܡܘܪ̈ܐ. 20: 9 [48]

ܝܘܐܝܠ. 2: 28  ܐܦ ܦܪܟܣܝܣ. 2: 17 [49]

ܡܬܝ. 17: 6 [50]

ܝܘܚܢܢ. 4: 24 [51]

ܝܘܚܢܢ. 15: 26 [52]

ܪ̈ܗܘܡܝܐ. 8: 26 [53]

ܡܶܢ ܢܽܘܪܳܐ[54]